ߊߟߊ߫ ߕߐ߮ ߟߊ߫ ߡߊ߬ߤߌ߬ߣߊ߬ߟߊ߫ ߟߋ߬ ߤߌߣߟߊ߫ ߟߋ߬ ﴿1﴾

ߕߊ߲߬ߘߏ ߊߟߊ߫ ߦߋ߫ ߸ ߖߊ߯ߓߊ ( ߘߏ߲߬ߞߏ ) ߟߎ߫ ߡߊ߰ߙߌ ߟߋ߬ ﴿2﴾

ߡߊ߬ߤߌ߬ߣߊ߬ߟߊ߫ ߟߋ߬ ߤߌߣߟߊ߫ ߟߋ߬ ﴿3﴾

ߛߙߊ߬ߟߌ ߟߏ߲ ߡߊ߲߬ߛߊ ߟߋ߬ ﴿4﴾

ߊ߲ ߧߴߌߟߋ ߟߋ߫ ߓߊ߬ߕߏ߬ ߟߊ߫ ߸ ߊ߲ ߧߴߌߟߋ ߟߋ߬ ߡߊߕߙߊ߫ ߟߊ߫ ﴿5﴾

ߖߊ߰ߣߌ߲߬ ߊ߲ ߞߊ߲ߘߊ߫ ߛߌߟߊ߫ ߕߋߟߋ߲ߣߍ߲߫ ߓߐߚߐ ߞߊ߲߬ ﴿6﴾

ߌ ߣߍߡߊߣߍ߲߫ ߡߍ߲ ߠߎ߫ ߡߊ߬ ߏ߬ ߟߎ߬ ߟߊ߫ ߛߌߟߊ ߟߋ߬ ߞߏ߫ ߦߋ߫ ߸ ߡߐߣߍ߫ ߞߍߣߍ߲߫ ߡߍ߲ ߠߎ߫ ߡߊ߬ ߏ߬ ߟߎ߬ ߟߊ߫ ߛߌߟߊ ߞߏ߫ ߕߍ߫ ߸ ߝߟߌ߬ߓߊ߰ߒߕߋ ߟߎ߬ ߝߣߊ߫ ߕߊ ߞߏ߫ ߕߍ߫ ﴿7﴾

ߊ. ߟ. ߡ. ( ߊߟߌߝ. ߟߊ߯ߡ. ߡߌ߯ߡ) ﴿1﴾

ߟߍߙߊ ߡߍ߲ ߣߌ߲߬ ߛߌߞߊ߫ ߛߌ߫ ߕߴߊ߬ ߘߐ߫ ߸ ߝߊ߲ߕߊ߲ߞߟߊ ߟߎ߬ ߞߊ߲ߘߊ߫ ߝߋ߲ ߠߋ߬ ﴿2﴾

ߏ߬ ߟߎ߫ ߟߋ߫ ߘߍ߲߬ߞߣߍ߬ߦߊ߬ߣߍ߲߬ ߞߏ߫ ߘߏ߰ߣߍ߲ ߡߊ߬ ߸ ߊ߬ߟߎ߬ ߦߋ߫ ߛߊߟߌ ߟߐ߬ ߟߊ߫ ߸ ߊ߬ ߣߴߊ߲ ߞߵߊ߬ߟߎ߫ ߤߊ߬ߙߌ߬ߖߍ߰ ߝߋ߲ ߡߍ߲ ߠߊ߫ ߸ ߊ߬ߟߎ߬ ߦߋ߫ ߖߘߍ߬ߡߊ߬ߓߐ ߞߍ߫ ߟߴߏ߬ ߘߐ߫ ﴿3﴾

ߟߍߙߊ ߡߍ߲ ߠߊߖߌ߰ߣߴߌ ߡߊ߬ ߏ߱ ߸ ߡߍ߲ ߠߊߖߌ߰ߣߴߌ ߢߍ߫ ߏ߱ ߸ ߊ߬ߟߎ߬ ߟߊߣߴߏ߬ ߓߍ߯ ߟߊ߫ ߸ ߊ߬ ߣߴߊ߬ߟߎ߬ ߟߊߣߍ߲߫ ߟߊߞߌߙߊߞߏ ߝߣߊ߫ ߟߊ߫ ﴿4﴾

ߏ߬ ߟߎ߬ ߦߋ߫ ߞߊ߲ߘߦߊ߫ ߟߋ߫ ߞߊ߲߬ ߞߊ߬ ߝߘߴߊ߬ߟߎ߫ ߡߊ߰ߙߌ ߟߊ߫ ߸ ߒ߬ߓߊ߬ ߏ߬ ߟߎ߫ ߟߋ߬ ߛߎߘߊ߲ߓߊ߮ ߟߎ߬ ߘߌ߫ ﴿5﴾

ߒ߬ߞߊ߬ ߡߍ߲ ߠߎ߫ ߓߊ߲߬ߣߍ߲߬ ߛߊ߫ ߸ ߌ ߞߊ߬ ߖߊ߬ߛߙߋ߬ߡߊ߬ߟߊ߫ ߞߍ߫ ߏ߬ ߟߎ߬ ߦߋ߫ ߓߊ߬ ߸ ߥߊߟߴߌ ߡߊ߫ ߖߊ߬ߛߙߋ߬ߡߊ߬ߟߊ߫ ߞߍ߫ ߊ߬ߟߎ߬ ߦߋ߫ ߓߊ߬ ߸ ߏ߬ ߓߍ߯ ߞߊ߫ ߞߊ߲߫ ߏ߬ ߟߎ߫ ߡߊ߬ ، ߓߊ ߊ߬ߟߎ߫ ߘߍ߲߬ߞߣߍ߬ߦߊ߬ߕߐ߫ ߕߍ߫ ﴿6﴾

ߊߟߊ߫ ߣߵߏ߬ ߟߎ߫ ߛߣߐ߬ߡߍ ߣߴߊ߬ߟߎ߬ ߕߟߏߘߋ߲ ߠߎ߬ ߟߊߓߊ߬ߘߌ߬ ߟߊ߫ ߟߋ߬ ߸ ߞߊ߬ ߓߊ߲߫ ߞߊ߬ ߞߎ߲߬ߠߊ߬ߓߘߌ߬ߟߊ ߟߴߊ߬ߟߎ߬ ߢߊ ߟߊ߫ ߜߎߕߙߎ߬ ، ߤߊ߲߫ ߸ ߖߊ߲߰ߞߕߊ߬ߓߊ߫ ߦߴߏ߬ ߟߎ߬ ߦߋ߫ ߞߟߋ߫߹ ﴿7﴾

ߡߐ߱ ߘߏ߫ ߟߎ߫ ߓߍ߫ ߸ ߏ߬ ߟߎ߫ ߟߴߊ߬ ߝߐ߫ ߟߊ߫ ߕߋ߲߬ ߞߏ߫ ߒ߬ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߠߋ߬ ߊߟߊ߫ ߣߌ߫ ߟߏ߲ߠߊߓߊ߲ ߡߊ߬ ߸ ߞߵߊ߬ ߕߍ߬ߘߍ߫ ߊ߬ߟߎ߫ ߘߍ߲߬ߞߣߍ߬ߦߊ߬ߣߍ߲߫ ߕߍ߫ ﴿8﴾

ߏ߬ ߟߎ߬ ߦߴߏ߬ ߝߐ߫ ߟߴߊߟߊ߫ ߣߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߜߍߙߍ߲ߞߍ߫ ߞߊ߲ ߠߋ߫ ߡߊ߬ ߸ ߊ߬ߟߎ߫ ߘߏ߲߬ ߕߍ߫ ߜߍߙߍ߲ߞߍߟߌ ߏ߬ ߞߍ߫ ߟߊ߫ ߝߏߦߌ߬ ߟߴߊ߬ߟߎ߫ ߖߘߍ߬ ߞߐ߫ ߸ ߞߏ߬ߣߵߊ߬ߟߎ߬ ߡߴߏ߬ ߟߐ߲߫ ﴿9﴾

ߖߌ߰ߙߌ߬ߖߐ߯ߙߐ ߟߴߏ߬ ߟߎ߫ ߛߣߐ߬ߡߍ ߘߐ߫ ߸ ߊߟߊ߫ ߣߵߏ߬ ߟߎ߬ ߟߊ߫ ߖߌ߰ߙߌ߬ߖߐ߯ߙߐ ߏ߬ ߟߋ ߡߊߞߊ߬ߝߏ߬ ߟߊ߫ ߓߘߍߞߍ߭ ، ߞߏ߬ߣߌ߲߬ ߖߊ߲߰ߞߕߊ߬ ߘߌߡߌ߲ߣߍ߲߫ ߠߴߏ߬ ߟߎ߬ ߦߋ߫ ߞߊ߬ߡߊߛߐ߬ߘߐ߲߫ ߊ߬ߟߎ߬ ߟߊ߫ ߥߎߦߊߝߐ ߝߍ߬ ﴿10﴾

ߊ߬ ߓߊ߯ ߝߐ߫ ߏ߬ ߟߎ߬ ߦߋ߫ ߸ ߞߏ߫ ߊߟߎ߫ ߞߊߣߊ߬ ߕߌߢߍߟߌ ߞߍ߫ ߘߎ߱ ߞߣߐ߫ (ߘߋ߬) ߸ ߊ߬ߟߎ߬ ߘߴߊ߬ ߝߐ߫ ߞߏ߫ ߒ߬ߠߎ߬ ߦߋ߫ ߞߏ߫ ߘߐߓߍ߲ߠߊ ߟߎ߫ ߟߋ߬ ߘߌ߫ ﴿11﴾

ߞߵߊ߬ ߕߘߍ߬ ߛߎߋ߯ ߕߌߢߍߟߌߟߊ ߟߎ߫ ߟߋ߬ ߸ ߞߏ߬ߣߵߊ߬ߟߎ߬ ߕߴߏ ߞߊ߬ߟߊߡߊ߬ ﴿12﴾

ߣߴߊ߬ ߘߏ߲߬ ߝߐ߫ ߘߴߊ߬ߟߎ߬ ߦߋ߫ ߸ ߞߏ߫ ߊߟߎ߫ ߘߍ߲߬ߞߣߍ߬ߦߊ߫ ߦߏ߫ ߡߐ߱ ( ߕߐ߭ ) ߟߎ߫ ߘߍ߲߬ߞߣߍ߬ߦߊ߬ߣߍ߲߫ ߢߊ ߡߍ߲ ، ߊ߬ߟߎ߬ ߘߴߊ߬ ߝߐ߫ ߞߏ߫ ߌ߬ߦߏ߯ ߒ߬ߠߎ߬ ߦߋ߫ ߘߍ߲߬ߞߣߍ߬ߦߊ߫ ߖߎߥߊ ߟߎ߫ ߘߍ߲߬ߞߣߍ߬ߦߊ߬ߢߊ ߡߊ߬؟ ߞߵߊ߬ ߕߘߍ߬ ߖߐ߫ ߊ߬ߟߎ ߟߋ߬ ߖߎߥߊ ߘߌ߫ ߸ ߞߏ߬ߣߵߊ߬ߟߎ߬ ߡߴߏ߬ ߟߐ߲߫ ﴿13﴾

ߣߴߊ߬ߟߎ߫ ߓߍ߲߬ ߘߊ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߘߌ߫ ߸ ߊ߬ߟߎ߬ ߘߴߊ߬ ߝߐ߫ ߞߏ߫ ߊ߲ ߓߘߊ߫ ߘߍ߲߬ߞߣߍ߬ߦߊ߫ ، ߓߊ߬ߙߌ߬ ߊ߬ߟߎ߬ ߓߊ߯ ߛߊ߬ߦߌ߲߫ ߊ߬ߟߎ߬ ߟߊ߫ ߜߍ߬ߘߍ ߟߎ߫ ߡߊ߬ ߸ ߊ߬ߟߎ߬ ߘߴߊ߬ ߝߐ߫ ߏ߬ ߟߎ߬ ߦߋ߫ ߞߏ߫ ߒ߬ߠߎ߬ ߦߴߊߟߎ ߟߋ߫ ߝߍ߬ ߞߟߋ߫ ߸ ߊ߲ ߧߋ߫ ߘߐ ߢߌ߲߬ ߠߎ߬ ߘߐߓߊ߬ߙߊ߲߬ߕߌ ߟߋ߬ ߟߊ߫ ﴿14﴾

ߊߟߊ߫ ߘߏ߲߬ ߝߣߊ߫ ߦߴߊ߬ߟߎ߬ ߘߐߓߊ߬ߙߊ߲߬ߕߌ߬ ߟߴߏ߬ ߟߋ ߘߐ߫ ߸ ߞߵߊ߬ߟߎ߫ ߝߊ߲߬ߞߊߘߏ߲߬ ߊ߬ߟߎ߬ ߟߊ߫ ߘߊ߲߬ߠߊ߬ߕߊߡߌ߲ ߘߐ߫ ߡߎߣߎ߲߬ ߖߐ߫ ߸ ߞߣߵߊ߬ߟߎ߬ ߕߏ߫ ߞߣߐ߬ߘߐ߬ߝߟߌ ߘߐ߫ ߔߍߘߍ߲ߞߍ߲ߛߍ߲߫ ﴿15﴾

ߏ߬ ߟߎ߫ ߟߋ߬ ߣߊ߬ ߝߌ߬ߟߌ ߛߊ߲߬ ߠߊ߫ ߞߏ߫ ߞߊ߲ߘߦߊ ߟߴߏ߬ ߘߌ߫ ، ߞߏ߫ ߝߌ߬ߟߊ ߏ߬ ߖߊ߬ߥߏ ߡߊ߫ ߘߌߦߴߊ߬ߟߎ߬ ߟߊ߫ ߸ ߊ߬ߟߎ߫ ߘߏ߲߬ ߡߊ߫ ߞߊ߲ߘߊ߫ ﴿16﴾

ߊ߬ߟߎ߬ ߟߊߒߡߊ ߟߋ߬ ߦߏ߫ ߡߐ߱ ߡߍ߲ ߢߌߣߌ߲ߣߍ߲߫ ߦߋߟߋ߲ ߡߊ߬ ߞߊ߬ ߕߊ ߟߊߡߍߣߍ߲߫ ߸ ߏ߬ ߣߵߊ߬ ߟߊߡߌߣߌ߲ ߞߣߍߦߊ߫ ߟߊ ߥߙߊߕߊߕߊ߫ ߸ ߊߟߊ߫ ߞߵߊ߬ߟߎ߬ ߟߊ߫ ߦߋߟߋ߲ ߏ߬ ߟߊߛߊ߬ ߡߐ߫ ߞߵߊ߬ߟߎ߬ ߕߏ߫ ߘߌ߬ߓߌ ߘߐ߫ ߞߌߘߌ߲ߜߊ߲߫ ߸ ߊ߬ߟߎ߬ ߢߊ߲߫ ߕߍ߫ ߝߏߦߌ߬ ߟߊ߫ ﴿17﴾

ߕߟߏߜߋߘߋ߲ ߠߎ߫ ߟߋ߬ ߸ ߓߏߓߏ ߟߎ߫ ߟߋ߬ ߸ ߝߎߦߋ߲ ߠߎ߫ ߟߋ߬ ، ߏ߬ ߘߐ߫ ߸ ߊ߬ߟߎ߬ ߕߍߣߵߊ߬ߟߎ߬ ߞߐߛߊ߬ߦߌ߬ ߟߊ߫ ߟߋ߬ ߘߍ߯ ﴿18﴾

ߥߟߴߊ߬ߟߎ߬ ߟߊߒߡߊ ߟߋ߬ ߦߏ߫ ߛߊ߲ߖߌ߫ ( ߞߘߐ߫ ߡߐ߮ ߟߎ߬) ߸ ߏ ߕߎ߬ߡߊ ߘߌ߬ߓߌ ߘߏ߲߬ߣߍ߲߬ ߘߍ߲߫ ߸ ߞߵߊ߬ ߕߘߍ߬ ߛߊ߲ ߔߍߙߍ߲߫ ߠߊ߫ ߸ ߊ߰ ߡߍ߯ߡߍ߯ ߟߊ߫ ، ߊ߬ߟߎ߬ ߦߴߊ߬ߟߎ߬ ߓߟߏߞߏ߬ߋ߬ߣߍ߲ ߠߎ߬ ߛߐߙߐ߲߫ ߠߴߊ߬ߟߎ߬ ߕߟߏߥߏ ߟߎ߬ ߟߊ߫ ߛߊ߲ߜߊߟߌߡߊ ߟߎ߬ ߞߊ߲ ߢߍ߫ ߛߊ߬ߦߊ ߢߍߛߌߟߊ߲ߒߢߍ ߡߊ߬ ، ߞߵߊ߬ ߕߘߍ߬ ߓߊ߲߬ߓߊ߮ ߟߎ߬ ߟߊߝߏ߬ߣߍ߲߫ ߠߋ߬ ߊߟߊ߫ ߓߟߏ߫ ߔߘߋߞߎ߬ ﴿19﴾

ߛߊ߲ߢߊ߯ߢߊ߮ ߓߍ߫ ߢߌߣߌ߲߫ ߞߵߊ߬ߟߎ߬ ߢߊߘߋ߲ ߠߎ߫ ߕߵߊ߬ ߘߐ߫ ߟߊߎ߫ ، ߏ߬ ߓߊ߯ ߡߍ߯ߡߍ߯ ߊ߬ߟߎ߬ ߢߊߞߘߐ߫ ߞߏߕߊ߲߫ ߊ߬ߟߎ߬ ߘߴߊ߬ߟߎ߬ ߕߊ߯ߡߊ߫ ߏ߬ ( ߦߋߟߋ߲ ) ߠߊ߫ ߸ ߘߌ߬ߓߌ ߘߏ߲߬ߘߴߊ߬ߟߎ߫ ߡߊ߬ ߕߋ߲߬ ߸ ߊ߬ߟߎ߬ ߘߴߊ߬ߟߎ߫ ߟߐ߬ ߖߌ߲ߖߊ߲߫ ، ߊ߬ ߘߏ߲߬ ߕߘߍ߬ ߓߊ߯ ߘߌߦߴߊߟߊ߫ ߢߍ߫ ߸ ߊ߬ ߕߎ߲߬ ߘߴߊ߬ߟߎ߬ ߕߟߏߘߋ߲ ߠߎ߬ ߣߴߊ߬ߟߎ߬ ߢߊߘߋ߲ ߠߎ߬ ߟߊߕߊ߯ ߞߐߍ߫ ߸ ߓߊ ߊߟߊ߫ ߛߋ߫ ߟߊ߫ ߞߏ ߓߍ߯ ߟߊ߫ ﴿20﴾

ߤߍ߲߬ ߊߟߎ߬ ߡߐ߱ ߟߎ߬ ߸ ߊߟߎ߫ ߦߴߊߟߎ߫ ߡߊ߰ߙߌ ߓߊ߬ߕߏ߬ ߸ ߏ߬ ߡߍ߲ ߞߵߊߟߎ߫ ߣߴߊߟߎ߫ ߢߍߓߊ߮ ߟߎ߬ ߘߊ߲߫ ߛߴߊߟߎ߫ ߘߌ߫ ߝߊ߲ߕߊ߲߬ߞߊ߫ ﴿21﴾

ߊ߬ߟߋ ߟߋ߫ ߞߊ߬ ߘߎ߱ ߞߍ߫ ߊߟߎ߫ ߦߋ߫ ߣߊ߲߬ߞߊ߲ ߘߌ߫ ، ߞߊ߬ ߛߊ߲ ߞߍ߫ ( ߊߟߎ߫ ߞߎ߲߬ߘߐ߫ ) ߓߟߌ ߘߌ߫ ، ߞߊ߬ ߖߌ ߟߊߖߌ߰ ߞߊ߬ ߓߐ߫ ߡߐ߲ߕߐ߲ ߘߐ߫ ߸ ߞߊ߬ ߦߙߌߘߋ߲ ߠߎ߬ ߟߊߝߍߘߍ߲߫ ߏ߬ ߟߊ߫ ߊߟߎ߫ ߓߊߟߏ ߘߌ߫ ، ߒ߬ߓߵߊߟߎ߫ ߞߊߣߵߊߟߎ߫ ߕߊߥߎ߫ ߡߎ߬ߕߎ߲߬ ߞߊ߬ ߢߐ߲߰ߘߐ߬ ߜߘߍ߫ ߟߎ߫ ߞߍ߫ ߊߟߊ߫ ߟߊ߫ ߘߋ߬ ߞߵߊ߬ ߕߘߍ߬ ߛߎߋ߯ ߊߟߎ߫ ߞߵߊ߬ ߟߐ߲߫ ﴿22﴾

ߣߴߊߟߎ߫ ߞߍ߫ ߘߊ߫ ߛߌߞߊ߫ ߘߐ߫ ߒ߬ ߠߊ߫ ߟߍߙߊ߫ ߟߊߖߌ߰ߣߍ߲ ߘߐ߫ ߒ߬ ߠߊ߫ ߖߐ߲߭ ߡߊ߬ ߸ ߒ߬ߓߵߊߟߎ߫ ߣߵߊ߬ ߕߊ ߢߐ߲߰ ߛߎ߯ߙߊ߫ ߞߋߟߋ߲߫ ߘߌ߫ ߓߊ߫ ߸ ߊߟߎ߫ ߝߣߴߊߟߎ߫ ߛߙߋ ߟߎ߬ ߞߟߌ߫ ߏ ߡߊ߬ ߡߍ߲ ߠߎ߬ ߕߍ߫ ߊߟߊ߫ ߘߌ߫ ߣߴߊߟߎ߫ ߞߍ߫ ߘߊ߫ ߕߎ߬ߢߊ߬ ߕߌ߯ ߘߌ߫ ﴿23﴾

ߣߴߊߟߎ߫ ߡߊ߫ ߛߴߏ߬ ߞߍ߫ ߟߊ߫ ߊߟߎ߫ ߘߏ߲߬ ߜߎ ߕߍߣߊ߬ ߛߋ߫ ߟߴߏ߬ ߞߍ߫ ߟߊ߫، ߏ߬ ߘߐ߫ ߊߟߎ߫ ߦߋ߫ ߕߊ ߡߊߕߊ߲߬ߞߊ߫ ߸ ߡߍ߲ ߢߐ߲߬ߛߐ߲ ߦߋ߫ ߡߐ߱ ߟߎ߬ ߣߌ߫ ߝߘߊ ߟߎ߬ ߘߌ߫ ، ߏ߬ ߟߋ ߘߐߓߍ߲߬ߣߍ߲߫ ߓߊ߲߬ߓߊ߮ ߟߎ߬ ߢߍ߫ ﴿24﴾

ߌ ߘߟߊߝߎ߬ ߘߍ߲߬ߞߣߍ߬ߦߊ߬ߓߊ߯ ߢߌ߬ߡߊ߬ ߞߍ߬ߟߊ ߟߎ߬ ߦߋ߫ ߸ ߞߏ߫ ߊ߬ߟߎ߬ ߢߍߛߌ߰ߣߍ߲߫ ߣߊߞߐ ߟߎ߬ ߟߊ߫ ߸ ߖߌߢߊ ߟߎ߯ ߥߦߏ߬ ߟߊ߫ ߡߍ߲ ߠߎ߬ ߞߘߐߟߊ ߟߎ߬ ߘߐ߫ ߞߎߟߊ߲ߞߎߟߊ߲߫ ، ߏ߬ ߟߎ߬ ߓߊ߯ ߛߐ߫ ߦߙߌߘߋ߲ ߛߎ߮ ߘߏ߫ ߟߊ߫ ߦߋ߲߬ ߞߏߕߊ߲߫ ߸ ߊ߬ߟߎ߬ ߘߴߊ߬ ߝߐ߫ ߞߏ߫ ߝߋ߲߫ ߠߋ߬ ߣߌ߲߬ ߸ ߡߍ߲ ߢߐ߲߰ ߕߘߍ߬ ߓߘߊ߫ ߘߌ߫ ߒ߬ ߡߊ߬ ߞߘߐ߬ߡߊ߲߫ ߸ ߓߊߏ߬ ߊ߬ߟߎ߬ ߛߐߣߍ߲߫ ߏ߬ ߟߊߡߎߣߎ߲ߧߊ ߟߋ߬ ߟߊ߫ ، ߊ߬ߟߎ߬ ߢߍߛߌ߰ߣߍ߲߬ ߝߘߎߡߊ߫ ߛߊߣߌ߲ߡߊ߲ ߠߎ߬ ߝߣߊ߫ ߟߊ߫ ߦߋ߲߬ ߸ ߒ߬ߓߊ߬ ߏ߬ ߟߎ߬ ߘߎߡߊߕߐ߫ ( ߡߍ߲ߘߌߦߊ ) ߏ߬ ߟߋ ߘߐ߫ ﴿25﴾

ߝߋߎ߫ ߊߟߊ߫ ߕߍ߫ ߕߎ߲߬ߞߎ߬ߙߎ߲߬ ߠߊ߫ ߛߊ߲߬ߘߊ ߟߊ ߘߐ߫ ߝߋ߲ ߛߎ߯-ߎ-ߛߎ߯ ߡߊ߬ ߸ ߞߵߊ߬ ߕߊ߬ ߛߏ߬ߛߏ߬ߣߍ߲ ߢߐ߲߰ ߡߊ߬ ߸ ߞߵߊ߬ ߛߌ߰ ߝߋ߲߫ ߠߊ߫ ߡߍ߲ ߦߴߏ߬ ߛߊ߲ߘߐ߫ ، ߡߍ߲ ߠߎ߫ ߞߏ߬ߣߌ߲ ߘߍ߲߬ߞߣߍ߬ߦߊ߬ߣߍ߲߫ ߸ ߏ߬ ߟߎ߫ ߞߵߊ߬ ߟߐ߲߫ ߞߏ߫ ߊ߬ߟߎ߫ ߡߊ߰ߙߌ ߟߊ߫ ߛߊ߲߬ߘߊ ߦߋ߫ ߕߎ߬ߢߊ߫ ߟߋ߬ ߘߌ߫ ، ߒ߬ߓߊ߬ ߡߍ߲ ߠߎ߫ ߓߊ߲߬ߣߍ߲߬ ߛߊ߫ ߸ ߏ߬ ߟߎ߫ ߟߴߊ߬ ߝߐ߫ ߟߊ߫ ߞߏ߫ ߊߟߊ߫ ߣߊ߬ ߛߊ߲߬ߘߊ ߣߌ߲߬ ߟߊ߫ ߟߊ߫ ߡߋ߬ߘߋ ߘߐ߫ ߓߏ߲߰؟ ߊߟߊ߫ ߘߏ߲߬ ߦߋ߫ ߡߐ߰ ߛߌߦߊߡߊ߲߫ ߠߊߝߟߌ߬ ߟߊ߫ ߏ߬ ߟߋ ߟߊ߫ ߸ ߞߊ߬ ߡߐ߰ ߛߌߦߊߡߊ߲߫ ߞߊ߲ߘߴߊ߬ ߟߊ߫ ، ߞߏ߬ߣߵߊ߬ ߕߍ߫ ߡߐ߰ ߛߌ߫ ߟߊߝߟߌ߬ ߟߴߊ߬ ߟߊ߫ ߝߏ߫ ߔߊߟߊ߲ߞߊߓߊ߯ߕߐ ߟߎ߬ ﴿26﴾

ߏ߬ ߟߎ߫ ߟߋ߬ ߊߟߊ߫ ߟߊ߫ ߟߊ߬ߤߘߌ ߕߌߢߍ߫ ߟߊ߫ ߸ ߊ߬ ߘߐߖߊ߬ߣߍ߲ ߞߐ߫ ߜߘߋߜߘߋ߫ ، ߊ߬ ߣߌ߫ ߝߣߊ߫ ߸ ߊߟߊ߫ ߞߵߊ߬ߟߎ߫ ߟߐ߬ ߝߋ߲ ߡߍ߲ ߕߎ߲߰ ߠߊ߫ ߸ ߊ߬ߟߎ߬ ߘߴߊ߬ ߞߍ߫ ߏ߬ ߕߍ߱ ߘߌ߫ ߸ ߊ߬ ߣߌ߫ ߞߵߊ߬ ߞߍ߫ ߕߌߢߍߟߌ ߘߌ߫ ߖߡߊ߬ߣߊ ߞߣߐ߫ ، ߒ߬ߓߊ߬ ߏ߬ ߟߎ߫ ߟߋ߬ ߓߣߐ߬ߓߊ߮ ߟߎ߬ ߘߌ߫ ﴿27﴾

ߐ߲߬ߤߐ߲߫ ߸ ߊߟߎ߫ ߦߋ߫ ߓߊ߲߬ߓߊ߰ߦߊ ߟߐ߬ ߟߴߊߟߊ߫ ߡߊ߬ ߘߌ߬ ߛߊ߫؟ ߊߟߎ߫ ߕߘߍ߬ ߣߌߒߕߊ߲ ߠߎ߫ ߟߋ߬ ߘߌ߫ ߊߟߊ߫ ߟߋ߫ ߞߵߊߟߎ߫ ߟߊߣߌߡߦߊ߫ ߸ ߏ߬ ߞߐ߫ ߊ߬ ߘߴߊߟߎ߫ ߛߊ߬ ߸ ߊ߬ ߘߌ߫ ߓߊ߲߫ ߞߵߊߟߎ߫ ߟߊߣߌߡߦߊ߫ ߕߎ߲߯ߣߌ߲߫ ، ߏ߬ ߞߐ߫ ߕߘߋ߫ ߊߟߎ߫ ߣߊ߬ߕߐ߫ ߟߊߛߊ߬ߦߌ߬ ߟߴߊ߬ߟߋ ߟߋ߫ ߡߊ߬ ﴿28﴾

ߊ߬ߟߋ ߟߋ߫ ߞߊ߬ ߘߎ߱ ߝߋ߲ ߓߍ߯ ߘߊ߲߫ ߊߟߎ߫ ߟߊ߫ ߞߏ߫ ߟߊ߫ ߸ ߞߊ߬ ߓߊ߲߫ ߞߊ߬ ߛߊ߲ ߡߊߜߍ߲߫ ߸ ߞߵߏ߬ ߟߊߞߢߊ߫ ߛߊ߲߫ ߥߐߙߐ߲ߥߌ߬ߟߊ߬ ߘߌ߫ ، ߒ߬ߓߵߊߟߊ߫ ߏ߬ ߟߋ ߞߊ߬ ߞߏ ߓߍ߯ ߟߐ߲߫ ߕߊߦߌ߫ ﴿29﴾

ߕߎ߬ߡߊ ߡߍ߲ ߌ ߡߊ߰ߙߌ ߞߵߊ߬ ߝߐ߫ ߡߟߍ߬ߞߊ ߟߎ߬ ߦߋ߫ ߸ ߞߏ߫ ߒ ߓߴߊ߬ ߝߍ߬ ߞߊ߬ ߞߐߦߌߘߊߓߊ߯ ߞߍ߫ ߘߎ߱ ߞߊ߲߬ ، ߏ߬ ߟߎ߫ ߞߵߊ߬ ߖߋ߬ߓߌ߬ ߞߏ߫ ߌ߬ߦߏ߯ ߌ ߘߌ߫ ߝߋ߲߫ ߠߊߛߌ߰ ߊ߬ ߞߊ߲߬ ߡߎ߬ߕߎ߲߬ ߡߍ߲ ߘߴߊ߬ ߞߍ߫ ߕߌߢߍߟߌ ߘߴߊ߬ ߞߊ߲߬ ߸ ߊ߬ ߣߌ߫ ߞߊ߬ ߢߐ߲߮ ߖߋ߬ߟߌ ߟߊߓߐ߲߬؟ ߊ߲ߠߎ߫ ߘߏ߲߬ ߦߋ߫ ߛߊߣߌ߲ߧߊ ߟߊ߫ ߟߵߌ ߕߊ߲߬ߘߏ ߞߊ߲߬ ߞߍ߬ߣߍ߲ ߸ ߞߵߌ ߟߊ߫ ߓߛߍ߬ߦߊ ߝߐ߫ ، ߊߟߊ߫ ߞߊ߲߫ ߏ߬ ߟߋ ߘߐ߫ ߸ ߞߏ߫ ߒߠߋ ߞߊ߬ ߡߍ߲ ߟߐ߲߫ ߊߟߎ ߡߴߏ߬ ߟߐ߲߫ ﴿30﴾

ߊߟߊ߫ ߣߊ߬ ߘߴߊߘߡߊ߫ ߟߊߟߐ߲ߠߌ߲߫ ߝߋ߲ ߓߍ߯ ߕߐ߮ ߟߊ߫ ߸ ߞߊ߬ ߓߊ߲߫ ߞߵߏ߬ ߟߎ߫ ߟߐ߬ ߡߟߍ߬ߞߊ ߟߎ߬ ߦߋ߫ ߸ ߞߏ߫ ߊߟߎ߫ ߝߋ߲ ߢߌ߲߬ ߠߎ߬ ߕߐ߮ ߝߐ߫ ߒ ߧߋ߫ ߓߊ߫ ߣߴߊ߬ ߕߘߍ߬ ߘߊ߫ ߖߏ߫ ߦߴߊߟߎ߫ ߝߍ߬ ﴿31﴾

ߊ߬ߟߎ߬ ߞߊ߲߫ ߞߏ߫ ߋ߯ ߡߊ߰ߙߌ߬ ߛߊߣߌ߲߹ ߒ߬ߠߎ߬ ߡߊ߫ ߝߋ߲-ߋ-ߝߋ߲߫ ߟߐ߲߫ ߝߏ߫ ߌ ߓߊ߯ ߒ߬ ߞߊ߬ߙߊ߲߬ ߡߍ߲ ߠߊ߫ ، ߌߟߋ ߟߋ߬ ߟߐ߲ߠߌ߲ߠߊ ߘߌ߫ ߸ ߌߟߋ ߟߋ߫ ߥߘߋ߬ߥߘߋ߬ߟߌ߬ߟߊ ߘߌ߫ ﴿32﴾

ߊߟߊ߫ ߞߊ߲߫ ߞߏ߫ ߒ߬ߓߵߊߘߡߊ߫ ߸ ߊ߬ߟߎ߫ ߞߊ߬ߙߊ߲߬ ߊ߬ߟߋ߬ ߝߋ߲߫ ߕߐ߮ ߟߎ߬ ߟߊ߫ ، ߏ߬ ߓߊ߲ ߊ߬ߟߎ߫ ߞߊ߬ߙߊ߲߬ ߠߴߊ߬ߟߋ߬ ߝߋ߲߫ ߕߐ߮ ߟߎ߬ ߟߊ߫ ߸ ߊߟߊ߫ ߞߊ߲߫ ߞߏ߫ ߒ ߡߴߊ߬ ߝߐ߫ ߊߟߎ߫ ߦߋ߫ ߒ ߞߏ߫ ߒߠߋ ߟߋ߫ ߞߊ߬ ߛߊ߲ ߠߎ߬ ߣߌ߫ ߘߎ߱ ߞߏ߫ ߘߏ߲߰ߣߍ߲ ߠߎ߬ ߟߐ߲߫ ߸ ߊ߬ ߣߌ߫ ߒ ߞߵߊߟߎ߫ ߞߎ߲߬ߞߎ߲ ߣߴߊߟߎ߫ ߢߍ߬ߢߍ߲ ߓߍ߯ ߟߐ߲߫؟ ﴿33﴾

ߒ߬ߠߎ߫ ߣߊ߬ ߘߴߊ߬ ߝߐ߫ ߡߟߍ߬ߞߊ ߟߎ߬ ߦߋ߫ ߸ ߒ ߞߏ߫ ߒ߬ߓߵߊߟߎ߫ ߕߌ߲ߓߌߘߌ߲ ߞߍ߫ ߊߘߡߊ߫ ߦߋ߫ ، ߏ߬ ߓߍ߯ ߞߊ߬ ߕߌ߲ߓߌߘߌ߲ ߏ߬ ߞߍ߫ ߝߏ߫ ߓߙߌ߬ߛߌ߫ ߸ ߏ߬ ߟߋ ߞߵߊ߬ ߓߊ߲߬ ߝߊߦߌ߲߫ ߞߵߊ߬ ߖߘߍ߬ߘߐߓߏ߲߬ߧߊ߫ ߞߊ߬ ߞߍ߫ ߓߊ߲߬ߓߊ߮ ߟߎ߬ ߘߏ߫ ߘߌ߫ ﴿34﴾

ߒ߬ߠߎ߫ ߞߵߊ߬ ߝߐ߫ ߛߊ߫ ߒ ߞߏ߫ ߊߘߡߊ߫ ߸ ߌ ߡߊߞߍ߫ ߣߊߞߐ ߘߐ߫ ߌ ߣߴߌ ߝߘߎߡߊ ߸ ߊ߬ ߞߣߐߟߊ ߝߊ߲߬-ߊ-ߝߊ߲߬ ߓߊ߯ ߊߟߎ߫ ߘߌߦߊ߫ ߸ ߊߟߎ߫ ߦߋ߫ ߓߊߟߏ߫ ߢߌߡߊ ߘߊߥߎ߲߫ ߦߋ߲߬ ߝߛߊߦߌ߫ ، ߞߏ߬ߣߵߊߟߎ߫ ߞߊߣߵߊߟߎ߫ ߡߊߘߏ߲߬ ߦߙߌ߫ ߞߋߟߋ߲ ߢߌ߲߬ ߠߊ߫ ߘߋ߬ ߸ ߓߊ ߏ߬ ߘߐ߫ ߊߟߎ߫ ߘߌ߫ ߞߍ߫ ߕߐ߬ߢߍ߰ߒߕߋ ߟߎ߬ ߘߏ߫ ߘߌ߫ ﴿35﴾

ߓߊ߬ߙߌ߬ ߜߍ߬ߘߍ ߞߵߊ߬ߟߎ߬ ߟߊߕߣߍ߬ߣߍ߫ ߦߋ߲߬ ߸ ߞߵߊ߬ߟߎ߬ ߟߊߓߐ߫ ߡߍ߲ߘߌߦߊ ߘߐ߫ ߸ ߊ߬ߟߎ߫ ߕߘߍ߬ ߡߍ߲ ߘߐ߫ ، ߒ߬ߠߎ߬ ߞߊ߲߫ ߒ ߞߏ߫ ߒ߬ߓߵߊߟߎ߯ ߖߌ߰ ߸ ߊߟߎ߬ ߖߎ߯ߢߐ߲߯ߡߊ ߟߎ߬ ، ߡߊ߬ߞߍ߬ ߦߌߟߊ߫ ߣߌ߫ ߘߊ߰ߡߎ߲߬ ߦߴߊߟߎ߫ ߦߋ߫ ߘߎ߱ ߞߊ߲߬ ߝߎߚߎ߫ ߝߏ߫ ߕߎ߬ߡߊ ߘߏ߫ ﴿36﴾

ߊߘߡߊ߫ ߣߊ߬ ߘߊ߫ ( ߞߟߍ߬ ߓߊ߲߬ ) ߞߊ߲߫ ߛߐ߬ߘߐ߲߫ ߊ߬ ߡߊ߰ߙߌ ߟߊ߫ ߸ ߏ߬ ߦߝߊ߬ ߘߴߊ߬ ߡߊ߬ ، ߓߊ ߏ߬ ߟߋ ߖߘߍ߬ߟߊ߬ߛߊߦߌ ߡߌ߬ߘߊ߬ߓߊ߰ ߤߌߣߊߒߕߋ ߘߌ߫ ﴿37﴾

ߒ߬ߠߎ߫ ߞߵߊ߬ ߝߐ߫ ߛߊ߫ ߸ ߒ ߞߏ߫ ߊߟߎ߫ ߓߍ߯ ߖߌ߰ ߞߊ߬ ߓߐ߫ ߣߊߞߐ ߘߐ߫ ߝߋߎ߫ ߸ ߣߌ߫ ߞߊ߲ߘߦߊ߫ ߣߊ߬ ߘߊ߫ ߝߘߊ߫ ߒߠߋ ߟߊ߫ ߞߊ߬ ߥߴߊߟߎ߫ ߕߍ߬ߘߍ߫ ߦߋ߲߬ ߸ ߣߌ߫ ߡߍ߲ ߞߊ߬ ߒ ߠߊ߫ ߞߊ߲ߘߦߊ ߏ߬ ߟߊߓߊ߬ߕߏ߬ ߸ ߛߌߟߊ߲߫ ߕߴߏ߬ ߟߎ߬ ߟߊ߫ ߸ ߊ߬ߟߎ߫ ߘߏ߲߬ ߕߍߣߊ߫ ߛߎ߬ߣߎ߲߬ ߠߊ߫ ﴿38﴾

ߣߌ߫ ߡߍ߲ ߠߎ߫ ߟߋ߫ ߓߊ߲߬ ߘߴߏ߬ ߡߊ߬ ߛߊ߫ ߸ ߊ߬ ߣߌ߫ ߞߵߊ߬ ߞߍ߫ ߒ߬ ߠߊ߫ ߟߝߊߙߌ ߟߎ߬ ߘߊߘߐߖߊ߭ ߘߌ߫ ߝߘߌߝߘߌ߫ ߸ ߒ߬ߓߊ߬ ߏ߬ ߟߎ߫ ߟߋ߬ ߞߍߕߐ߫ ߕߊ ߘߏ߲߬ߞߏ ߟߎ߬ ߘߌ߫ ߸ ߊ߬ߟߎ߫ ߘߏ߲߬ ߘߎߡߊߕߐ߫ ߦߋ߲߬ ߠߋ߬ ﴿39﴾

ߤߍ߲߬ ߊߟߎ߬ ߌߛߌߙߊߌߟߞߊ ߟߎ߬ ߸ ߊߟߎ߫ ߦߴߊߟߎ߫ ߖߊ߲߬ߓߌ߬ߟߊ߬ ߒ ߠߊ߫ ߣߍߡߊ ߘߐ߫ ߒ ߞߊ߬ ߣߍߡߊ ߡߍ߲ ߞߍ߫ ߊߟߎ߫ ߦߋ߫ ، ߊ߬ ߣߌ߫ ߝߣߊ߫ ߸ ߊߟߎ߫ ߒ ߠߊ߫ ߟߊ߬ߤߘߌ ߝߊ߫ ߒ ߝߣߴߊߟߎ߫ ߕߊ ߝߊ߫ ، ߤߊ߲߫ ߸ ߊߟߎ߫ ߛߌߟߊ߲߫ ߒߠߋ ߢߍ߫ ߟߋ߬ ﴿40﴾

ߊߟߎ߫ ߘߍ߲߬ߞߣߍ߬ߦߊ߬ ߟߍߙߊ߫ ߡߊ߬ ߸ ߒ ߣߊ߬ ߡߍ߲ ߠߊߖߌ߰ ߟߊ߫ ߞߵߊ߬ ߞߍ߫ ߊߟߎ߫ ߕߊ ߕߎ߬ߢߊ߬ߕߌ߰ߦߊ߬ߟߊ߲ ߘߌ߫ ߸ ߊߟߎ߫ ߞߊߣߊ߬ ߞߍ߫ ߏ߬ ߡߊߛߐ߬ߛߐ߬ߓߊ߰ ߝߟߐ ߘߌ߫ ߘߋ߬ ߸ ߊߟߎ߫ ߘߏ߲߬ ߞߊߣߊ߬ ߒ߬ ߠߊ߫ ߟߝߊߙߌ ߟߎ߫ ߝߋ߬ߙߋ߫ ߛߐ߲߬ߞߐ߬ߣߍ߲߬ ߕߜߋ ߟߊ߫ ، ߤߊ߲ߤߊ߲߫ ߸ ߊߟߎ߫ ߦߴߊߟߎ߫ ߝߊ߲ߕߊ߲߬ߞߊ߬ ߒߠߋ ߡߊ߬ ߟߋ߬ ﴿41﴾

ߊߟߎ߫ ߞߊߣߊ߬ ߕߎ߬ߢߊ ߡߊߡߟߋߞߋ߫ ߥߎߦߊ ߟߊ߫ ߸ ߊߟߎ߫ ߘߏ߲߬ ߞߊߣߵߊߟߎ߫ ߕߊߥߎ߫ ߞߊ߬ ߕߎ߬ߢߊ ߘߏ߲߰ ߞߵߊ߬ ߕߘߍ߬ ߊߟߎ߫ ߞߵߊ߬ ߟߐ߲߫ ﴿42﴾

ߊߟߎ߫ ߛߊߟߌ ߟߐ߬ ߞߊ߬ ߖߞߊ ߘߌ߫ ߸ ߞߵߊߟߎ߫ ߞߐߡߊߓߌߘߌ߲߫ ߛߊߟߌ ߞߐߡߊߓߌߘߌ߲ߠߊ ߟߎ߫ ߝߍ߬ ﴿43﴾

ߌ߬ߦߏ߯ ߊߟߎ߫ ߘߌ߫ ߡߐ߱ ( ߕߐ߭ ) ߟߎ߫ ߟߐ߬ ߢߌ߬ߡߊ߬ߦߊ ߟߊ߫ ߞߊ߬ ߢߌ߬ߣߵߊߟߎ߫ ߖߘߍ߬ ߞߐ߫ ߸ ߊߟߎ߫ ߘߏ߲߬ ߦߋ߫ ߟߍߙߊ ߞߊ߬ߙߊ߲߬ ߠߊ߫ ، ߦߊ߯ߟߊ߫ ߊߟߎ߫ ߕߴߏ߬ ߝߊ߰ߡߎ߲߬ ߠߊ߫ ߟߋ߫ ߓߊ߬؟ ﴿44﴾

ߊߟߎ߫ ߘߍ߬ߡߍ߲߬ߠߌ߲߬ߢߌߣߌ߲ ߞߍ߫ ߡߎ߬ߢߎ߲ ߞߊ߲߬ ߊ߬ ߣߌ߫ ߛߊߟߌ ߞߊ߲߬ ، ߓߊ ߛߊߟߌ ߜߍ߬ߟߍ߲߬ߡߊ߲߬ ߓߍ߯ ߟߋ߫ ߡߊ߬ ߸ ߝߏ߫ ߢߍ߬ߣߍ߲߬ߕߐ ߟߎ߬ ﴿45﴾

ߏ߬ ߟߎ߫ ߟߴߊ߬ ߓߛߌ߬ߞߌ߬ ߟߊ߫ ߸ ߞߏ߫ ߊ߬ߟߎ߬ ߞߍߕߐ߫ ߊ߬ߟߎ߫ ߡߊ߰ߙߌ ߓߍ߲߬ߢߐ߲߰ߦߊ߬ ߟߊ߫ ߟߋ߬ ߸ ߊ߬ ߣߌ߫ ߞߏ߫ ߊ߬ߟߎ߫ ߛߊ߬ߦߌ߲߬ߕߐ߫ ߟߴߊ߬ ߡߊ߬ ߕߘߋ߫ ﴿46﴾

ߤߍ߲߬ ߊߟߎ߬ ߌߛߌߙߊߌߟߞߊ ߟߎ߬ ߸ ߊߟߎ߫ ߦߴߊߟߎ߫ ߦߟߌߕߏ߫ ߒ ߠߊ߫ ߣߍߡߊ ߘߐ߫ ߸ ߒ ߞߊ߬ ߣߍߡߊ ߡߍ߲ ߞߍ߫ ߊߟߎ߫ ߦߋ߫ ، ߊ߬ ߣߌ߫ ߒ ߞߵߊߟߎ߫ ߟߊߝߌ߬ߛߊ߬ߦߊ ߡߍ߲ ߞߍ߫ ߡߌ߬ߙߌ߲߬ߘߌ ( ߕߐ߭ ) ߟߎ߬ ߘߌ߫ ﴿47﴾

ߊߟߎ߫ ߦߴߊߟߎ߫ ߝߊ߲ߕߊ߲߬ߞߊ߬ ߟߏ߲ ߡߊ߬ ߸ ߣߌߡߊ ߘߏ߫ ߕߍ߫ ߘߏ߫ ߥߛߊ߬ ߟߊ߫ ߝߏߦߌ߬ ߘߐ߫ ߟߏ߲ ߡߍ߲ ، ߛߏ߬ߟߏ߲߬ ߕߍ߫ ߡߌ߬ߘߊ߬ ߘߏ߫ ߦߋ߫ ߸ ߞߎ߲߬ߞߊ߬ ߕߍ߫ ߡߌ߬ߘߊ߬ ߘߏ߫ ߟߊ߫ ߸ ߊ߬ߟߎ߫ ߘߏ߲߬ ߕߍߣߊ߫ ߘߍ߬ߡߍ߲߬ ߠߊ߫ ﴿48﴾

ߕߎ߬ߡߊ ߡߍ߲ ߊ߲ ߞߵߊߟߎ߫ ߓߏ߬ߛߌ߬ ߝߋߙߊߥߎ߲߫ ߘߏ߲߬ߞߏ ߟߎ߬ ߟߊ߫ ߸ ߏ߬ ߟߎ߬ ߡߍ߲ ߠߎ߫ ߕߘߍ߬ ߊߟߎ߫ ߜߊ߰ߢߊ߬ߜߊ߯ߢߊ߫ ߟߊ߫ ߖߊ߲߰ߞߕߊ߬ ߖߎ߮ ߟߎ߬ ߟߊ߫ ߸ ߞߵߊߟߎ߫ ߘߋ߲ߞߍ ߟߎ߬ ߞߊ߲ߠߊߕߍ߰ ߛߐ߲߬ ߸ ߊ߬ ߣߌ߫ ߞߵߊߟߎ߫ ߘߋ߲ߡߛߏ ߟߎ߬ ߘߐߙߐ߲߫ ߢߣߊߡߊ ߕߏ߫ ، ߤߊ߲߫ ߸ ߏ߬ ߞߍ߫ ߘߴߊߟߎ߫ ߞߊ߲߬ ߞߘߐߓߐߟߌߓߊ߫ ߟߋ߬ ߘߌ߫ ߊߟߎ߫ ߡߊ߰ߙߌ ߓߟߏ߫ ߘߋ߬ ﴿49﴾

ߕߎ߬ߡߊ ߡߍ߲ ߊ߲ ߞߊ߬ ߞߐ߰ߖߌ ߝߙߊ߫ ߊߟߎ߫ ߢߍ߫ ߸ ߊ߲ ߞߵߊߟߎ߫ ߟߊߞߛߌ߫ ߏ߬ ߘߐ߫ ߞߊ߬ ߝߋߙߊߥߎ߲߫ ߘߏ߲߬ߞߏ ߟߎ߬ ߟߊߕߏ߫ ߖߌ ߘߐ߫ ߊߟߎ߫ ߢߣߊ߫ ߸ ߞߵߊ߬ ߕߘߍ߬ ߊߟߎ߫ ߦߴߊ߬ߟߎ߬ ߡߊߝߟߍ ߟߊ߬ ﴿50﴾

ߕߎ߬ߡߊ ߡߍ߲ ߊ߲ ߣߌ߫ ߡߎߛߊ߫ ߛߘߊ߫ ߘߊ߫ ߛߎ߫ ߓߌߣߊ߯ߣߌ߲߫ ߢߐ߲߯ߦߋ ߡߊ߬ ߸ ߊߟߎ߫ ߞߵߊߟߎ߫ ߓߟߏߞߍ߫ ߕߎߙߊߣߍ߲ ߠߊ߫ ߏ߬ ߞߐ߫ ߸ ߞߊ߬ ߞߍ߫ ߖߘߍ߬ߕߐ߬ߢߍ߰ߟߊ ߟߎ߬ ߘߌ߫ ﴿51﴾

ߊ߲ ߣߊ߬ ߘߊ߫ ߦߝߵߊߟߎ߫ ߡߊ߬ ߏ߬ ߓߍ߯ ߞߐ߫ ߸ ߖߐ߲߬ߛߴߊߟߎ߫ ߘߴߊ߲ ߞߏߢߌߡߊߟߐ߲߫ ﴿52﴾

ߕߎ߬ߡߊ ߡߍ߲ ߊ߲ ߞߊ߬ ߡߎߛߊ߫ ߛߐ߫ ߟߍߙߊ ߣߌ߫ ߝߊߙߊ߲ߝߊߛߌߟߊ߲ ߠߊ߫ ߸ ߒ߬ ߞߵߏ߬ ߞߍ߫ ߟߋ߬ ߖߐ߲߬ߛߴߊߟߎ߫ ߘߌ߫ ߞߊ߲ߘߊ߫ ﴿53﴾

ߕߎ߬ߡߊ ߡߍ߲ ߡߎߛߊ߫ ߞߵߊ߬ ߝߐ߫ ߊ߬ ߡߌ߬ߙߌ߲߬ߘߌ ߦߋ߫ ߸ ߞߏ߫ ߤߍ߲߬ ߊߟߎ߬ ߒ ߓߊߘߋ߲ ߠߎ߬ ߸ ߊߟߎ߫ ߓߘߊ߫ ߓߋ߬ߓߊ߫ ߞߍ߫ ߊߟߎ߫ ߖߍ߬ߘߍ߫ ߞߊ߲߬ ߊߟߎ߫ ߓߟߏߞߍ ߘߐ߫ ߕߎߙߊߣߍ߲ ߠߊ߫ ، ߒ߬ߓߵߊߟߎ߫ ߦߴߊߟߎ߫ ߖߘߍ߬ ߟߊߛߊ߬ߦߌ߲߬ ߊߟߎ߫ ߘߊ߲ߓߊ߮ ߡߊ߬ ߸ ߞߵߊߟߎ߫ ߢߐ߲߮ ߝߊ߰ ߸ ߏ߬ ߟߋ ߘߌߡߴߊߟߎ߫ ߟߴߊߟߎ߫ ߘߊ߲ߓߊ߮ ߓߘߊ ، ߊ߬ ߞߊ߬ ߖߘߍ߬ߟߊ߬ߛߊߦߌ ߡߌ߬ߘߵߊߟߎ߫ ߦߋ߫ ߏ߬ ߘߐ߫ ߸ ߓߊߏ߬ ߖߘߍ߬ߟߊ߬ߛߊߦߌ ߡߌ߬ߘߊ߬ߓߊ߰ ߤߌߣߊߒߕߋ ߟߋ߬ ﴿54﴾

ߕߎ߬ߡߊ ߡߍ߲ ߊߟߎ߫ ߞߵߊ߬ ߝߐ߫ ߸ ߞߏ߫ ߤߍ߲߬ ߌߟߋ߬ ߡߎߛߊ߫ ߸ ߊ߲ ߕߍ߫ ߘߍ߲߬ߞߣߍ߬ߦߴߌ ߡߊ߬ ߝߋߎ߫ ߝߏ߫ ߒ߬ ߓߊ߯ ߊߟߊ߫ ߦߋ߫ ߜߍ ߘߐ߫ ߔߊߞߌߛߊ߫ ، ߜߊ߬ߙߊ߲߬ߞߕߊ ߞߵߊߟߎ߫ ߡߌ߬ߘߊ߫ ߏ߬ ߘߐ߫ ߸ ߞߵߊ߬ ߕߘߍ߬ ߊߟߎ߫ ߢߊ߯ ߊ߬ ߟߊ߫ ߜߍ ߘߐ߫ ﴿55﴾

ߊ߲ ߞߵߊߟߎ߫ ߛߊ߬ߣߍ߲ ߞߐ ߏ߬ ߟߊߞߎߣߎ߲߫ ߸ ߛߴߊߟߎ߫ ߘߌ߫ ߒ߬ ߞߏߢߌߡߊߟߐ߲߫ ﴿56﴾

ߊ߲ ߞߵߊߟߎ߫ ߘߎߟߋ߲ߧߊ߫ ߓߘߌߞߊ ߟߊ߫ ߸ ߊ߬ ߣߴߊ߲ ߞߊ߬ ߓߊ߯ߘߊߟߌ ߣߌ߫ ߥߋ߲߬ߕߙߋ߬ߟߋ߲߬ ( ߛߓߏ ) ߟߊߖߌ߰ ߊߟߎ߫ ߡߊ߬ ߸ ߒ ߞߏ߫ ߊߟߎ߫ ߒ߬ ߠߊ߫ ߤߊ߬ߙߌ߬ߖߍ߰ ߢߌ߬ߡߊ߬ ߘߌߣߍ߲ ߏ߬ ߟߎ߬ ߘߊߥߎ߲߫ ߝߛߊߦߌ߫ ، ߞߏ߬ߣߌ߲߬ ߊ߬ߟߎ߬ ߡߴߏ߬ ߕߌߢߍ߫ ߒ߬ߠߎ߫ ߡߊ߬ ߘߋ߬ ߸ ߊ߬ߟߎ߫ ߞߵߏ߬ ߕߌߢߍ߫ ߊ߬ߟߎ߫ ߖߍ߬ߘߍ߫ ߟߋ߫ ߡߊ߬ ﴿57﴾

ߕߎ߬ߡߊ ߡߍ߲ ߒ߬ ߞߵߊ߬ ߝߐ߫ ߒ ߞߏ߫ ߊߟߎ߫ ߘߏ߲߬ ߛߏ ߢߌ߲߬ ߠߊ߫ ߸ ߊ߬ ߝߊ߲߬-ߊ-ߝߊ߲߬ ߓߊ߯ ߊߟߎ߫ ߘߌߦߊ߫ ߊߟߎ߫ ߦߋ߫ ߓߊߟߏ߫ ߢߌߡߊ ߘߊߥߎ߲߫ ߦߋ߲߬ ߝߛߊߦߌ߫ ߸ ߊ߬ ߣߴߊߟߎ߫ ߦߋ߫ ߘߏ߲߬ ߖߌ߲߬ߘߊ ߟߊ߫ ߕߌ߲ߓߌߘߌ߲ ߠߋ߬ ߘߌ߫ ، ߊ߬ ߣߴߊߟߎ߫ ߦߴߊ߬ ߝߐ߫ ߞߏ߫ ( ߊ߲ ߧߋ߫ ߡߍ߲ ߝߍ߬ ) ߏ߬ ߟߋ ߟߊ߬ߓߋ߬ߟߌ ߘߌ߫ ، ߊ߲ ߘߴߊߟߎ߫ ߕߊ߲߬ߓߏ߲ ߠߎ߫ ߦߝߵߊߟߎ߫ ߦߋ߫ ߏ߬ ߘߐ߫ ߸ ߊ߲ ߘߌߣߊ߬ ߢߊ߬ߓߊ߮ ߟߎ߫ ( ߛߊ߬ߙߊ ) ߡߊߞߊ߬ߝߏ߬ ﴿58﴾

ߒ߬ߞߵߊ߬ߟߎ߫ ߟߐ߬ߣߍ߲߫ ߞߏ߫ ߊ߬ߟߎ߫ ( ߘߏ߲߬ߕߐ ) ߦߋ߫ ߞߎߡߊ ߡߍ߲ ߝߐ߫ ߸ ߕߐ߬ߢߍ߰ߒߕߋ ߟߎ߫ ߞߵߏ ߝߊ߬ߟߋ߲߬ ߘߏ߫ ߜߘߍ߫ ߟߊ߫ ߡߍ߲ ߡߊ߫ ߝߐ߫ ߊ߬ߟߎ߬ ߦߋ߫ ، ߏ߬ ߞߍ ߸ ߊ߲ ߞߊ߬ ߖߊ߲߰ߞߕߊ ߟߊߖߌ߰ ߕߐ߬ߢߍ߰ߒߕߋ ߟߎ߫ ߞߊ߲߬ ߞߊ߬ ߓߐ߫ ߛߊ߲ ߡߊ߬ ߸ ߞߊ߬ߡߊߛߐ߬ߘߐ߲߫ ߊ߬ߟߎ߬ ߟߊ߫ ߔߊߟߊ߲ߞߊ ߝߍ߬ ﴿59﴾

ߕߎ߬ߡߊ ߡߍ߲ ߡߎߛߊ߫ ߞߊ߬ ߖߌ߫ ߢߌߣߌ߲ ߞߍ߫ ߊ߬ ߡߌ߬ߙߌ߲߬ߘߌ ߦߋ߫ ߸ ߊ߲ ߞߵߊ߬ ߝߐ߫ ߊ߬ ߦߋ߫ ߒ ߞߏ߫ ߝߘߊ ߥߊ߬ߟߏ߲߬ ߌ ߟߊ߫ ߘߐ߬ߞߐ ߟߊ߫ ߓߊ߫ ߸ ߏ߬ ߞߍ ߞߐ߬ߢߊ߬ ߕߊ߲߫ ߣߌ߫ ߝߌ߬ߟߊ߫ ߓߎ߬ߦߌ߬ ߘߊ߫ ߝߘߊ ߘߐ߫ ߞߎߟߊ߲ߞߎߟߊ߲߫ ، ߓߊߓߏ߲ ߓߍ߯ ߞߵߊ߬ ߕߊ߫ ߖߌ߫ ߕߊ߫ ߦߌߟߊ߫ ߛߐ߬ߘߐ߲߬ ߌߞߘߐ߫ ، ߞߏ߫ ߊߟߎ߯ ߊߟߊ߫ ߟߊ߫ ߤߊ߬ߙߌ߬ߖߍ߮ ߘߊߥߎ߲߫ ߞߵߊ߬ ߡߌ߲߬ ߝߛߊߦߌ߫ ߸ ߒ߬ߞߵߊߟߎ߫ ߞߊߣߊ߬ ߖߊߛߟߌ ߞߍ߫ ߘߎ߱ ߞߊ߲߬ ߘߋ߬ ߞߊ߬ ߞߍ߫ ߕߌߢߍߟߌߟߊ ߟߎ߬ ߘߌ߫ ﴿60﴾

ߕߎ߬ߡߊ ߡߍ߲ ߊߟߎ߫ ߞߵߊ߬ ߝߐ߫ ߞߏ߫ ߤߍ߲߬ ߌߟߋ߬ ߡߎߛߊ߫ ߸ ߊ߲ ߕߍߣߊ߫ ߒ߬ ߡߎ߬ߢߎ߲߬ ߠߊ߫ ߛߎ߬ߡߊ߲߬ ߞߋߟߋ߲߫ ߞߊ߲߬ ߕߋ߲߬ ߘߋ߬ ، ߏ߬ ߘߐ߫ ߌ ߡߊ߰ߙߌ ߕߙߊ߫ ߒ߬ ߧߋ߫ ߸ ߊ߬ ߦߋ߫ ߘߎ߱ ߝߍߘߍ߲ߝߋ߲ ߘߏ߫ ߟߎ߫ ߟߊߓߐ߫ ߒ߬ ߧߋ߫ ، ߣߊߟߌ߬ߡߎ߲߫ ߊ߬ ߢߎ߰ߟߊ߬ߞߊ ߟߎ߬ ߘߌ߫ ߸ ߊ߬ ߣߴߊ߬ ߛߙߊ߫ ߘߋ߲ ߠߎ߬ ߣߴߊ߬ ߖߓߊ߬ߟߋ߲ ߠߎ߬ ߘߌ߫ ߸ ߊ߬ ߣߴߊ߬ ߛߐ߬ߛߐ ߟߎ߬ ߣߴߊ߬ ߖߊ߬ߓߊ ߟߎ߬ ߘߌ߫ ، ߡߎߛߊ߫ ߞߊ߲߫ ߞߏ߫ ߌ߬ߦߏ߯ ߊߟߎ߫ ߘߌ߫ ߛߎ߬ߡߊ߲߬ ߞߙߌߞߙߊ ߟߎ߫ ߓߌ߬ߟߊ߫ ߓߍ߬ߘߍ ߟߎ߫ ߣߐ߭ ߘߐ߫؟ ߒ߬ߓߵߊߟߎ߫ ߖߌ߰ ߛߏ߫ ߥߍ߫ ، ߊߟߎ߫ ߢߌߣߌ߲ߝߋ߲ ߦߴߊߟߎ߫ ߢߍ߫ ߦߋ߲߬ ، ߓߊ߬ߙߌ߬ ߘߐ߯ߦߡߊ ߣߌ߫ ߘߐ߱ ߟߊ߫ ߘߴߊ߬ߟߎ߫ ߞߊ߲߬ ߦߋ߲߬ ، ߏ߬ ߞߍ ߊ߬ߟߎ߫ ߛߊ߬ߦߌ߲߬ ߘߴߊߟߊ߫ ߟߊ߫ ߛߊ߬ߙߌ ߘߌ߫ ، ߏ߬ ߘߏ߲߬ ߞߎ߲߭ ߠߋ߬ ߓߊߏ߬ ߊ߬ߟߎ߬ ߗߋ ߟߋ߫ ߕߘߍ߬ ߓߊ߲߭ ߘߌ߫ ߊߟߊ߫ ߟߊ߫ ߟߝߊߙߌ ߟߎ߬ ߘߐ߫ ߸ ߊ߬ ߣߴߊ߬ߟߎ߬ ߦߋ߫ ߟߊ߬ߝߐ߬ߓߊ߮ ߟߎ߫ ߝߊ߰ ߟߊ߫ ߕߋ߲߬ ߝߎ߯ ߸ ߏ߬ ߘߏ߲߬ ߕߊ߬ߣߴߊ߬ߟߎ߬ ߟߊ߫ ߞߎ߬ߕߊ ߟߋ߫ ߡߊ߬߸ ߊ߬ ߣߴߊ߬ߟߎ߫ ߕߘߍ߬ ߖߊ߲߬ߘߊ ߡߍ߲ ߞߍ߫ ߟߊ߫ ﴿61﴾

ߘߍ߲߬ߞߣߍ߬ߦߊ߬ߓߊ߮ ߟߎ߫ ߏ߱ ߸ ߦߊ߬ߤߎ߯ߘߎ ߟߎ߫ ߏ߱ ߸ ߌߛߊߟߞߊ ߟߎ߫ ߏ߱ ߸ ߛߊߓߍ߲ߠߞߊ ߟߎ߫ ߏ߱ ߸ ߏ߬ ߝߋ߲-ߋ-ߝߋ߲߫ ߓߊ߯ ߘߍ߲߬ߞߣߍ߬ߦߊ߬ ߊߟߊ߫ ߣߌ߫ ߟߏ߲ߠߊߓߊ߲ ߡߊ߬ ߸ ߞߊ߬ ߢߌ߬ߡߊ߬ ߞߍ߫ ߸ ߏ߬ ߟߎ߬ ߘߴߊ߬ߟߎ߫ ߛߊ߬ߙߊ ߛߐ߬ߘߐ߲߫ ߊ߬ߟߎ߫ ߡߊ߰ߙߌ ߓߘߊ ߖߐ߫ ߸ ߛߌߟߊ߲߫ ߕߍ߫ ߞߍ߫ ߊ߬ߟߎ߬ ߟߊ߫ ߸ ߊ߬ߟߎ߫ ߘߏ߲߬ ߕߍߣߊ߫ ߛߎ߬ߣߎ߲߬ ߠߊ߫ ﴿62﴾

ߕߎ߬ߡߊ ߡߍ߲ ߊ߲ ߞߵߊߟߎ߫ ߟߊ߫ ߟߊ߬ߤߘߌ ߡߌ߬ߘߊ߬ ߸ ߊ߬ ߣߌ߫ ߒ߬ ߞߊ߬ ߞߎ߬ߙߎ ߘߎ߲߫ ߊߟߎ߫ ߞߎ߲߬ߘߐ߫ ߸ ߒ ߞߏ߫ ߒ ߞߊ߬ ߝߋ߲ ߡߍ߲ ߘߴߊߟߎ߫ ߡߊ߬ ߸ ߊߟߎ߫ ߦߴߏ߬ ߡߌ߬ߘߊ߬ ߛߍ߲ߓߍ ߟߊ߫ ߸ ߊ߬ ߣߌ߫ ߞߵߊߟߎ߫ ߖߊ߲߬ߕߏ߫ ߊ߬ ߞߣߐ߫ ߞߎߡߊ ( ߓߍ߯ ) ߘߐ߫ ߛߴߊߟߎ߫ ߘߴߊߟߎ߫ ߝߊ߲ߕߊ߲߬ߞߊ߫ ﴿63﴾

ߏ߬ ߞߐ ߘߐ߫ ߊߟߎ߫ ߞߵߊߟߎ߫ ߞߐߘߏ߲߬ ߔߏ߲߫ ، ߒ߬ߓߊ߬ ߣߌ߫ ߊߟߊ߫ ߟߊ߫ ߣߍߡߊ ߣߴߊ߬ ߟߊ߫ ߤߌߣߊ ߕߎ߲߬ ߕߍ߫ ߊߟߎ߫ ߞߊ߲߬ ߸ ߊߟߎ߫ ߕߎ߲߬ ߘߌ߫ ߞߍ߫ ߓߣߐ߬ߓߊ߮ ߟߎ߬ ߘߏ߫ ߘߌ߫ ﴿64﴾

ߊߟߎ߫ ߖߍ߬ߘߍ ߞߵߊ߬ ߟߐ߲߫ ߛߎߋ߫ ߞߏ߫ ߡߍ߲ ߠߎ߫ ߞߊ߬ ߖߊ߲߬ߘߊ ߞߍ߫ ߊߟߎ߫ ߘߐ߫ ߞߍ߲ߘߍߟߏ߲ (ߛߓߌߕߌ߫ ߟߊߕߏߓߊߟߌߦߊ ) ߘߐ߫ ߸ ߞߏ߫ ߊ߲ ߞߵߊ߬ ߝߐ߫ ߏ߬ ߟߎ߫ ߡߊ߬ ߟߋ߬ ߸ ߞߏ߫ ߊߟߎ߫ ߞߍ߫ ߛߎ߬ߟߊ ߟߎ߬ ߘߌ߫ ߥߟߋߥߟߋ߫ ﴿65﴾

ߒ߬ ߞߵߏ߬ ߞߍ߫ ߕߊ߰ߛߌ߬ ߞߏ߫ ߟߋ߬ ߘߌ߫ ߊ߬ ߢߣߊߓߊ߮ ߟߎ߬ ߣߴߊ߬ ߞߐߓߊ߮ ߟߎ߬ ߦߋ߫ ، ߊ߬ ߣߌ߫ ߞߵߊ߬ ߞߍ߫ ߝߊ߲ߕߊ߲ߞߟߊ ߟߎ߫ ߞߊ߬ߥߊ߲߬ߘߌ߬ߞߏ ߘߌ߫ ﴿66﴾

ߕߎ߬ߡߊ ߡߍ߲ ߡߎߛߊ߫ ߞߵߊ߬ ߝߐ߫ ߊ߬ ߡߌ߬ߙߌ߲߬ߘߌ ߦߋ߫ ߞߏ߫ ߊߟߊ߫ ߦߴߊߟߎ߫ ߖߡߊ߬ߙߌ߬ ߟߊ߫ ߸ ߞߏ߫ ߊߟߎ߫ ߦߋ߫ ߣߛߌ߬ߡߛߏ ߘߏ߫ ߞߊ߲ߠߊߕߍ߰ ߸ ߊ߬ߟߎ߬ ߞߊ߲߫ ߞߏ߫ ߌ ߦߋ߫ ߒ߬ ߘߐߓߊ߬ߙߊ߲߬ߕߌ߬ ߟߊ߫ ߟߋ߫ ߓߊ߬؟ ߡߎߛߊ߫ ߞߊ߲߫ ߞߏ߫ ߊߟߊ߫ ߒ ߕߊ߲߬ߞߊ߬ ߒ ߞߍ ߡߊ߬ ߡߐ߰ ߞߎ߲ߒߕߊ߲ ߠߎ߬ ߘߏ߫ ߘߌ߫ ﴿67﴾

ߊ߬ߟߎ߬ ߞߊ߲߫ ߞߏ߫ ߒ߬ ߓߊ߬ ߌ ߡߊ߰ߙߌ ߕߙߊ߫ ߒ߬ ߧߋ߫ ߸ ߊ߬ ߦߴߊ߬ ߛߌ߬ ߞߛߊߓߌ ߝߐ߫ ߒ߬ ߧߋ߫ ، ߡߎߛߊ߫ ߞߊ߲߫ ߞߏ߫ ߡߊ߰ߙߌ ߞߊ߲߫ ߞߏ߫ ߞߙߏߜߊ߫ ߕߍ߫ ߸ ߖߊ߰ ߝߣߊ߫ ߕߍ߫ ߸ ߊ߬ ߦߋ߫ ߕߟߊߒߕߍ ߟߋ߬ ߘߌ߫ ߸ ߊߟߎ߫ ߘߏ߲߬ ߦߋ߫ ߊߟߎ߫ ߖߡߊ߬ߙߌ߬ߒ߬ߞߊ߲߬ߠߊ ߞߍ߫ ߟߋ߫ ߘߋ߬ ﴿68﴾

ߊ߬ߟߎ߬ ߞߊ߲߫ ߞߏ߫ ߌ ߡߊ߰ߙߌ ߕߙߊ߫ ߒ߬ ߧߋ߫ ߕߎ߲߯ ߸ ߞߏ߫ ߊ߬ ߦߴߊ߬ ߞߐ߬ߟߐ ߝߐ߫ ߒ߬ ߧߋ߫ ، ߡߎߛߊ߫ ߞߊ߲߫ ߞߏ߫ ߡߊ߰ߙߌ ߞߊ߲߫ ߞߏ߫ ߣߛߌ߬ߡߛߏ߬ ߛߊߦߌߡߊ ߟߋ߬ ߡߍ߲ ߞߐ߬ߟߐ ߞߐ߯ߣߍ߲߫ ߸ ( ߝߏ߫ ) ߊ߬ ߦߋ߫ ߝߟߍߟߌߟߊ ߟߎ߬ ߟߊߛߍߥߊ߫ ߟߊ߫ ﴿69﴾

ߊ߬ߟߎ߬ ߞߊ߲߫ ߞߏ߫ ߌ ߡߊ߰ߙߌ ߕߙߊ߫ ߒ߬ ߧߋ߫ ߕߎ߲߯ ߸ ߞߏ߫ ߡߋ߬ߘߋ ߊ߬ ߓߊ߯ߙߘߊ ߘߌ߫ ߸ ߓߊ ߣߌ߬ߛߌ ߟߎ߬ ߓߘߊ߫ ߡߎߣߎ߲ߧߊ߫ ߒ߬ߠߎ߬ ߢߣߊ߫ ߘߋ߬ ، ߞߏ߬ߣߌ߲߬ ߣߴߊߟߊ߫ ߛߐ߲߬ ߘߊ߫ ߸ ߊ߬ ߘߌߣߊ߬ ߘߐߞߣߍ߫ ߒ߬ ߡߊ߬ ߖߐ߫ ﴿70﴾

ߡߎߛߊ߫ ߞߊ߲߫ ߞߏ߫ ߡߊ߰ߙߌ ߞߊ߲߫ ߸ ߞߏ߫ ߊ߬ߟߋ߬ ( ߣߌ߬ߛߌ ) ߟߊߞߟߏߣߍ߲߫ ߕߍ߫ ߘߎ߰ ߛߣߍ߫ ߟߊ߫ ߣߛߌ߬ߘߓߊ߫ ߟߊ߫ ߸ ߊ߬ ߘߏ߲߬ ߕߍ߫ ߝߙߊ߬ ߛߐ߬ ߖߌ߫ ߟߊߦߟߍ߬ ߟߊ߫ ߸ ߝߍ߬ ߕߴߊ߬ ߟߊ߫ ߸ ߢߍ߲߰ ߛߎ߰ ߜߘߍ߫ ߕߍ߫ ߊ߬ ߘߐ߫ ، ߊ߬ߟߎ߬ ߞߊ߲߫ ߞߏ߫ ߐ߲߬ߤߐ߲ ߌ ߓߘߊ߫ ߣߊ߬ ߕߎ߬ߢߊ ߘߌ߫ ߛߍߣߍ߲߬ ߛߊ߫ ، ߏ߬ ߞߍ ߊ߬ߟߎ߫ ߞߵߊ߬ ߞߊ߲ߠߊߕߍ߰ ، ߊ߬ߟߎ߫ ߝߊ߲߭ ߕߌ߲߬ ߕߴߊ߬ ߝߍ߬ ߞߵߊ߬ ߞߍ߫ ﴿71﴾

ߏ ߞߵߊ߬ ߕߘߍ߬ ߊߟߎ߫ ߓߘߊ߫ ߣߌߡߊ ߝߊ߰ ߸ ߞߊ߬ ߢߐ߲߮ ߘߐߕߏ߰ߝߏ߬ߕߊ߯ߝߊ߫ ߏ߬ ߞߏߢߊ ߘߐ߫ ߞߏߛߓߍ߫ ߸ ߞߏ߬ߣߌ߲߬ ߊߟߊ߫ ߟߋ߬ ߊߟߎ߫ ߟߊ߫ ߞߏ߫ ߘߏ߲߰ߣߍ߲ ߠߎ߬ ߟߊߓߐߓߊ߮ ߘߌ߫ ﴿72﴾

ߊ߲ ߞߵߊ߬ ߝߐ߫ ߞߏ߫ ߊߟߎ߫ ߦߴߊ߬ߟߋ߬ ߛߎ߭ ߜߊ߬ߛߌ߫ ߣߌ߬ߛߌ ߝߊ߲߭ ߘߏ߫ ߟߊ߫ ، ߊߟߊ߫ ߦߋ߫ ߛߎ߭ ߟߎ߬ ߟߊߞߎߣߎ߲߫ ߠߊ߫ ߕߋ߲߬ ߠߋ߬ ߸ ߊ߬ ߣߌ߫ ߞߵߊ߬ ߟߊ߫ ߡߊ߲߬ߕߊߣߌ߲ ߠߎ߫ ߦߌ߬ߘߵߊߟߎ߫ ߟߊ߫ ߛߴߊߟߎ߫ ߘߌ߫ ߤߊ߲ߞߟߌ߫ ߛߐ߬ߘߐ߲߬ ﴿73﴾

ߊߟߎ߫ ߖߎ߬ߛߎ ߣߊ߬ ߘߊ߫ ߖߊ߬ ߏ߬ ߓߍ߯ ߞߐ߫ ߸ ߞߊ߬ ߞߍ߫ ߦߏ߫ ߝߘߊ ، ߥߟߴߊ߬ ߖߊ߬ߣߍ߲߫ ߏ߬ ߘߌ߫ ، ߓߊߏ߬ ߝߘߊ ߘߏ߫ ߓߍ߫ ߸ ߞߐ߭ ߟߎ߬ ߦߋ߫ ߓߎ߬ߦߌ߬ ߟߴߏ߬ ߘߐ߫ ߸ ߊ߬ ߘߏ߫ ߜߘߍ߫ ߓߍ߫ ߏ߬ ߦߋ߫ ߛߍ߲ߞߍ߫ ߟߊ߫ ߞߊ߬ ߖߌ ߝߎ߲ߘߌ߫ ߊ߬ ߘߐ߫ ߸ ߊ߬ ߘߏ߫ ߝߣߊ߫ ߦߴߊ߬ ߘߐ߫ ߸ ߏ߬ ߦߋ߫ ߖߌ߰ ߟߊ߫ ߊߟߊ߫ ߢߍߛߌߟߊ߲ߢߍ ߡߊ߬ ، ߓߊ߬ߙߌ߬ ߊߟߊ߫ ߖߊ߲߬ߓߐߣߍ߲߫ ߕߍ߫ ߊߟߎ߫ ߗߋߥߊߟߌ ߟߎ߬ ߘߐ߫ ߘߋ߬ ﴿74﴾

ߕߡߊ߬ߦߌ ߟߋ߬ ߊߟߎ ( ߛߌ߬ߟߊ߬ߡߊ ߟߎ߬ ) ߘߐ߫ ߓߊ߬ ߞߏ߫ ߢߌ߲߬ ߠߎ߬ ߘߌ߫ ߘߍ߲߬ߞߣߍ߬ߦߴߊߟߎ߫ ߝߍ߬؟ ߞߊ߯ߙߌ߫ ߸ ߝߋ߲ ߡߍ߲ ߠߎ߫ ߝߊ߲߬ ߞߋߟߋ߲ ߕߘߍ߬ ߊߟߊ߫ ߟߊ߫ ߞߎߡߊ ߡߍ߲߫ ߠߊ߫ ߕߌ߯ߕߌ߯ ߸ ߞߊ߬ ߓߊ߲߫ ߞߵߊ߬ߟߎ߬ ߕߊߥߎ߫ ߞߵߏ ߦߟߍ߬ߡߊ߲߬ ߔߊߦߌ߫ ߸ ߞߵߊ߬ ߕߘߍ߬ ߊ߬ߟߎ߫ ߞߵߊ߬ ߝߊ߰ߡߎ߲߬ ߛߎߋ߯ ﴿75﴾

ߊ߬ߟߎ߬ ߓߊ߯ ߓߍ߲߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߘߌ߫ ߸ ߊ߬ߟߎ߬ ߘߴߊ߬ ߝߐ߫ ߞߏ߫ ߊ߲ ߝߣߊ߫ ߓߘߊ߫ ߘߍ߲߬ߞߣߍ߬ߦߊ߫ ، ߓߊ߬ߙߌ߬ ߣߴߊ߬ߟߎ߫ ߜߊ߲߬ߛߊ߲ ߓߟߏߡߊߞߊ߬ ߘߊ߫ ߸ ߊ߬ߟߎ߬ ߘߴߊ߬ ߝߐ߫ ߢߐ߲߮ ߦߋ߫ ߸ ߞߏ߫ ߌ߬ߦߏ߯ ߊߟߊ߫ ߣߊ߬ ߟߊ߬ߥߛߊ ߡߍ߲ ߞߍ߫ ߟߴߊߟߎ߫ ߦߋ߫ ߸ ߊߟߎ߫ ߘߴߊ߬ ߞߍ߫ ߏ߬ ߓߊ߬ߘߏ ߘߌ߫ ߛߌ߬ߟߊ߬ߡߊ ߟߎ߬ ߦߋ߫ ߸ ߏ߬ ߟߎ߬ ߦߴߏ߬ ߞߍ߫ ߊ߬ߟߎ߬ ߘߊߘߐߡߌߘߊߞߎ߲ߧߊ߫ ߘߴߊߟߎ߫ ߡߊ߬ ߊߟߎ߫ ߡߊ߰ߙߌ ߓߘߊ ߸ ߦߊ߯ߟߊ߫ ߊߟߎ߫ ߕߴߏ߬ ߤߊ߲ߞߟߌߡߦߊ߫ ߟߊ߫ ߟߋ߫ ߓߊ߬؟ ﴿76﴾

ߊ߬ ߝߐ߫ ߏ߬ ߟߎ߬ ߡߴߊ߬ ߟߐ߲߫ ߓߊ߬ ߞߏ߫ ߊߟߊ߫ ߞߵߊ߬ߟߎ߫ ߜߎ߲߬ߘߎ ߣߴߊ߬ߟߎ߬ ߟߊߒߞߣߍߡߊ ߓߍ߯ ߟߐ߲߫؟ ﴿77﴾

ߞߎ߲߬ߝߌ߲ ߘߏ߫ ߟߎ߫ ߝߊ߲߭ ߦߴߊ߬ߟߎ߬ ߘߐ߫ ߸ ߏ߬ ߟߎ߬ ߡߊ߫ ߟߍߙߊ ߟߐ߲߫ ߡߎ߰ߡߍ߫ ߸ ߝߏ߫ ߞߎ߲߬ߘߐ߬ߕߍ߯ (ߖߘߍ߬ ߛߊ߬ߥߏ߬ ߝߐ) ، ߊ߬ߟߎ߫ ߘߏ߲߬ ߕߍ߫ ߝߏߦߌ߫ ߞߊ߲߬ ߖߌ߰ߟߌ ߞߐ߫ ﴿78﴾

ߜߊ߬ߟߏ߬ ߦߴߊ߬ ߘߏ߫ ߟߎ߫ ߢߍ߫ ߸ ߡߍ߲ ߠߎ߬ ߦߋ߫ ߟߍߙߊ ߛߓߍ߫ ߟߴߊ߬ߟߎ߬ ߓߟߏ ߟߊ߫ ߸ ߞߵߊ߬ ߝߐ߫ ߏ ߡߊ߬ ߞߏ߫ ߣߌ߲߬ ߓߐߣߍ߲߫ ߊߟߊ߫ ߓߘߊ ߟߋ߬ ߸ ߛߴߊ߬ߟߎ߬ ߘߴߏ߬ ߝߋ߬ߙߋ߫ ߛߐ߲߬ߞߐ߬ߣߍ߲߬ ߕߜߋ ߟߊ߫ ، ߒ߬ߓߊ߬ ߜߊ߬ߟߏ߫ ߟߴߏ߬ ߟߎ߬ ߢߍ߫ ߊ߬ߟߎ߬ ߓߟߏ߫ ߟߊ߫ ߛߓߍߟߌ߫ ߣߐ ߏ߬ ߝߍ߬ ߸ ߜߊ߬ߟߏ߬ ߦߴߊ߬ߟߎ߬ ߢߍ߫ ߏ߬ ߣߊ߬ߝߊ߫ ߛߐ߬ߘߐ߬ߣߍ߲ ߝߣߊ߫ ߝߍ߬ ﴿79﴾

ߊ߬ߟߎ ߟߋ߬ ߞߊ߲߫ ߞߏ߫ ߕߊ ߕߍߣߊ߬ ߡߊ߰ ߟߊ߫ ߒ߬ߠߎ߬ ߟߊ߫ ߝߏ߫ ߕߟߋ߬ ߦߙߌߞߊ߫ ، ߊ߬ߟߎ߫ ߖߋ߬ߓߌ߬ ߞߏ߫ ߊߟߎ߫ ߣߵߏ ߟߊ߬ߤߘߌ ߟߋ߫ ߕߊ߬ ߟߴߊߟߊ߫ ߓߘߊ ߓߊ߬ ߸ ߓߊ ߊߟߊ߫ ߕߴߊ߬ ߟߊ߫ ߟߊ߬ߤߘߌ ߛߐ߬ߛߐ߬ ߟߊ߫ ، ߥߟߴߊߟߎ߫ ߝߋ߲߫ ߠߋ߬ ߝߐ߫ ߟߴߊߟߊ߫ ߡߊ߬ ߊߟߎ߫ ߡߊ߫ ߡߍ߲ ߟߐ߲߫؟ ﴿80﴾

ߋ߰ߋ߰ߋ߯ ߸ ߡߍ߲-ߍ-ߡߍ߲߫ ߞߊ߬ ߖߎ߯ߡߊ߲߫ ߞߍ߫ ߞߵߊ߬ ߖߘߍ߬ ߟߊߡߌߣߌ߲߫ ߏ߬ ߞߎ߲߬ߞߏ ߟߊ߫ ߸ ߏ߬ ߟߎ߫ ߟߋ߬ ߕߊ ߘߏ߲߬ߞߏ ߟߎ߬ ߘߌ߫ ، ߏ߬ ߟߎ߫ ߘߏ߲߬ ߘߎߡߊߕߐ߫ ߏ߬ ߟߋ ߘߐ߫ ﴿81﴾

ߒ߬ߓߊ߬ ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߞߊ߬ ߢߌ߬ߡߊ ߟߎ߬ ߞߍ߫ ߸ ߏ߬ ߟߎ߫ ߟߋ߬ ߣߊߞߐ ߘߏ߲߬ߞߏ ߟߎ߬ ߘߌ߫ ߸ ߏ߬ ߟߎ߫ ߘߏ߲߬ ߘߎߡߊߕߐ߫ ߏ߬ ߟߋ ߘߐ߫ ﴿82﴾

ߕߎ߬ߡߊ ߡߍ߲ ߊ߲ ߞߊ߬ ߌߛߌߙߊߌߟߞߊ ߟߎ߬ ߟߊ߫ ߟߊ߬ߤߘߌ ߡߌ߬ߘߊ߬ ߞߊ߲ ߞߍ߫ ߸ ߒ ߞߏ߫ ߊߟߎ߫ ߞߊߣߊ߬ ߝߏߦߌ߫ ߓߊ߬ߕߏ߬ ߝߏ߫ ߊߟߊ߫ ߸ ߞߏ߫ ߊߟߎ߫ ߢߊ߬ ߡߏߦߌߓߊ߯ ߝߌ߬ߟߊ ߟߊ߫ ߸ ߊ߬ ߣߌ߫ ߓߊߘߋ߲ߡߊ߫ ߛߎߘߎ߲ ߠߎ߬ ߣߌ߫ ߝߊߙߌߕߊ ߟߎ߬ ߣߌ߫ ߘߐ߰ߕߐ ߟߎ߬ ߟߊ߫ ߸ ߊ߬ ߣߴߊߟߎ߫ ߢߌ߬ߡߊ߫ ߟߋ߬ ߝߐ߫ ߡߐ߱ ߟߎ߫ ߝߍ߬ ߸ ߊ߬ ߣߴߊߟߎ߫ ߛߊߟߌ ߟߐ߬ ߞߊ߬ ߖߞߊ ߘߌ߫ ، ߞߏ߬ߣߌ߲߬ ߊߟߎ߫ ߞߵߊߟߎ߫ ߞߎ߲߬ߓߐ߫ ߏ ߞߊ߲߬ ߝߏ߫ ߊߟߎ߫ ߡߐ߰ ߕߜߋ߫ ߸ ߊߟߎ߫ ߞߐߘߏ߲߬ߣߍ߲ ߠߴߏ߬ ߘߌ߫ ߕߋ߲߬ ߔߏ߲߫ ﴿83﴾

ߕߎ߬ߡߊ ߡߍ߲ ߊ߲ ߞߵߊߟߎ߫ ߟߊ߫ ߟߊ߬ߤߘߌ ߡߌ߬ߘߊ߬ ߸ ߒ ߞߏ߫ ߊߟߎ߫ ߞߊߣߵߊߟߎ߫ ߢߐ߲߮ ߖߋ߬ߟߌ ߟߊߓߐ߲߬ ، ߊߟߎ߫ ߘߏ߲߬ ߞߊߣߊ߬ ߢߐ߲߮ ߠߊߓߐ߫ ߢߐ߲߮ ߠߊ߫ ߟߎ ߟߎ߬ ߞߣߐ߫ ، ߊߟߎ߫ ߞߵߏ߬ ߘߐߖߊ߬ ߜߘߋߜߘߋ߫ ߞߵߊ߬ ߕߘߍ߬ ߊߟߎ߫ ߖߍ߬ߘߍ ߦߋ߫ ߛߙߋߦߊ ߟߊ߬ ﴿84﴾

ߞߏ߬ߣߌ߲߬ ߊߟߎ ߟߋ߬ ߢߐ߲߯ ߝߊ߮ ߟߊ߬ ߣߌ߲߬ ߸ ߊ߬ ߣߌ߫ ߞߵߊߟߎ߫ ߘߏ߫ ߟߊߓߐ߫ ߊ߬ߟߎ߬ ߟߊ߫ ߟߎ ߟߎ߬ ߞߣߐ߫ ، ߊߟߎ߫ ߦߴߊߟߎ߫ ߢߐ߲߮ ߘߍ߬ߡߍ߲߬ ߠߴߏ߬ ߟߎ߫ ߡߊ߬ ߖߟߎ߬ߡߎ߲ ߣߌ߫ ߕߐ߬ߢߍ߮ ߟߊ߫ ، ߣߴߏ߬ ߟߎ߫ ߖߐ߲߬ߠߊ߬ߡߊ ߣߊ߬ ߘߴߊߟߎ߫ ߡߊ߬ ߊߟߎ߫ ߘߴߊ߬ߟߎ߫ ߞߎ߲߬ߡߊߞߊ߬ ߖߐ߫ ߸ ߞߵߊ߬ ߕߘߍ߬ ߏ߬ ߟߎ߬ ߟߊߓߐ ߟߋ߫ ߞߎ߬ߡߊ߲߬ߘߌ߬ߣߍ߲߫ ߊߟߎ߫ ߡߊ߬ ، ߌ߬ߦߏ߯ ߊߟߎ߫ ߘߌ߫ ߘߍ߲߬ߞߣߍ߬ߦߊ߬ ߟߍߙߊ ߝߊ߲߭ ߘߏ߫ ߡߊ߬ ߞߊ߬ ߡߙߎߕߌ߫ ߘߏ߫ ߡߊ߬؟ ߝߋ߲-ߋ-ߝߋ߲߫ ߞߵߏ߬ ߞߍ߫ ߊߟߎ߫ ߘߐ߫ ߸ ߝߏߦߌ߬ ߕߴߏ ߛߊ߬ߙߊ ߘߌ߫ ߝߏ߫ ߘߐ߯ߦߡߊ ߘߎߢߊ߫ ߢߣߊߡߦߊ ߘߐ߫ ، ߟߐ߬ߓߊ ߟߏ߲ ߝߣߊ߫ ߘߐ߫ ߊ߬ߟߎ߬ ߘߌ߫ ߟߊߛߊ߬ߦߌ߲߫ ߖߊ߲߰ߞߕߊ ߓߍ߯ ߘߐ߫ ߜߍ߬ߟߍ߲߬ߡߊ߲ ߡߊ߬ ، ߊߟߊ߫ ߘߏ߲߬ ߖߊ߲߬ߓߐ߬ߣߍ߲߫ ߕߍ߫ ߊߟߎ߫ ߗߋߥߊߟߌ ߟߎ߬ ߘߐ߫ ﴿85﴾

ߏ߬ ߟߎ߫ ߟߋ߫ ߣߊ߬ ߘߎߢߊ߫ ߢߣߊߡߦߊ ߝߊ߬ߟߋ߲߬ ߠߊ߫ ߟߊߞߌߙߊ߫ ߕߊ ߟߊ߫ ، ߒ߬ߓߊ߬ ߖߊ߲߰ߞߕߊ ߕߍߣߊ߬ ߘߐߝߍߦߊ߫ ߟߴߏ߬ ߟߎ߫ ߟߋ߫ ߞߊ߲߬ ߸ ߊ߬ߟߎ߫ ߘߏ߲߬ ߕߍߣߊ߫ ߘߍ߬ߡߍ߲߬ ߠߊ߫ ﴿86﴾

ߖߊ߯ߕߋ߫ ߸ ߊ߲ ߞߊ߬ ߡߎߛߊ߫ ߛߐ߫ ߟߍߙߊ ߟߊ߫ ، ߊ߬ߟߋ߫ ߕߊ߬ߡߌ߲߬ߣߍ߲ ߞߐ߫ ߊ߲ ߞߊ߬ ߞߋߟߊ ߟߎ߫ ߕߎ߲߰ ߊ߬ ߟߊ߫ ، ߊ߲ ߞߊ߬ ߡߊߙߌߦߡߊ߫ ߘߋ߲ߞߍ߫ ߌߛߊ߫ ߛߐ߫ ߔߊߞߌ ߟߎ߬ ߟߊ߫ ߸ ߊ߬ ߣߴߊ߲ ߞߵߊ߬ ߝߊ߲߬ߞߊߘߏ߲߬ ߛߊߣߌ߲ߧߊ ߛߟߐߡߌ߲ ߠߊ߫ ، ߌ߬ߦߏ߯ ߞߋߟߊ ߘߏ߫ ߓߊ߯ ߣߵߊߟߎ߫ ߡߊ߬ ߝߋ߲߫ ߘߌ߫ ߞߏߕߊ߲߫ ߊߟߎ߫ ߣߌ ߕߍ߫ ߡߍ߲ ߞߊ߬ߣߌ߲߬ ߠߊ߫ ߸ ߊߟߎ߫ ߘߴߏ߬ ߟߊߓߍ߲߬ ߖߘߍ߬ߘߐ߬ߓߏ߲ߧߊ ߟߊ߫؟ ߊߟߎ߫ ߦߴߏ߬ ߘߏ߫ ߟߎ߫ ߛߐ߬ߛߐ߬ ߟߊ߫ ߞߊ߬ ߘߏ߫ ߟߎ߫ ߝߊ߰ ﴿87﴾

ߊ߬ߟߎ߫ ߝߊ߲߭ ߞߊ߲߫ ߠߋ߬ ߸ ߞߏ߫ ߒ߬ߠߎ߫ ߛߣߐ߬ߡߍ ߟߎ߫ ߥߖߊ߬ߡߊ ߟߋ߬ ߸ ߞߵߊ߬ ߕߘߍ߬ ߊߟߊ߫ ߟߋ߫ ߣߵߊ߬ߟߎ߬ ߘߊ߲ߞߊ߫ ߟߴߊ߬ߟߎ߬ ߟߊ߫ ߓߊ߲߬ߓߊ߰ߦߊ ߞߏߛߐ߲߬ ، ߤߊ߲߫ ߸ ߊ߬ߟߎ߫ ߘߍ߲߬ߞߣߍ߬ߦߊ߬ ߞߏ ߕߜߋ߫ ߟߋ߫ ߘߋ߬߹ ﴿88﴾

ߟߍߙߊ ߣߊ߬ߣߍ߲ ߊ߬ߟߎ߫ ߡߊ߬ ߞߊ߬ ߓߐ߫ ߊߟߊ߫ ߓߘߊ ߸ ߊ߬ ߘߏ߲߬ ߦߴߊ߬ߟߎ߬ ߓߟߏߕߊ ߟߊߛߙߋߦߊ߫ ߟߊ߫ ߸ ߊ߬ߟߎ߫ ߘߏ߲߬ ߜߎ ߕߘߍ߬ ߟߊ߬ߥߛߊ ߢߌߣߌ߲߫ ߠߊ߫ ߓߊ߲߬ߓߊ߮ ߟߎ߫ ߡߊ߬ ߞߘߐ߬ߡߊ߲߫ ، ߊ߬ߟߎ߬ ߟߐ߲߫ ߞߏ ߏ߬ ߣߊ߬ߣߴߊ߬ߟߎ߫ ߡߊ߬ ߸ ߊ߬ߟߎ߫ ߞߵߊ߬ߟߎ߫ ߓߊ߲߬ ߏ߬ ߘߐ߫ ߝߊߦߌ߲߫ ، ߒ߬ߓߵߊߟߊ߫ ߟߊ߫ ߘߊ߲ߞߊ ߟߋ߫ ߓߊ߲߬ߓߊ߮ ߟߎ߫ ߡߊ߬ ﴿89﴾

ߊ߬ߟߎ߫ ߘߏ߲߬ ߞߵߊ߬ߟߎ߬ ߣߌ ߝߊ߬ߟߋ߲߬ ߝߋ߲߫ ߖߎ߯ ߟߊ߫ ߞߟߋ߫ ، ߏ߬ ߟߴߊ߬ߟߎ߫ ߓߊ߲߭ ߘߌ߫ ߊߟߊ߫ ߟߊ߫ ߝߋ߲߫ ߠߊߖߌ߰ߣߍ߲ ߘߐ߫ ߢߊ߲ߜߏߦߊ ߡߊ߬ ߸ ߞߏ߫ ߊߟߊ߫ ߓߘߴߊ߬ ߟߊ߫ ߢߊ߬ߒߡߊ߭ ߘߏ߫ ߟߊߖߌ߰ ߊ߬ ߟߊ߫ ߖߐ߲߬ ߜߘߍ߫ ߡߊ߬ ߡߍ߲ ߓߊ߯ ߊ߬ ߘߌߦߊ߫ ، ߏ߬ ߞߍ ߸ ߊ߬ߟߎ߫ ߞߵߊ߬ߟߎ߬ ߢߎ߲߫ ߛߊ߬ߙߌ ߟߊ߫ ߛߊ߬ߙߌ ߞߊ߲߬ ، ߒ߬ߓߊ߬ ߟߊ߬ߝߍߦߊ ߖߊ߲߰ߞߕߊ ߟߋ߬ ( ߛߌ߰ߣߍ߲߫ ) ߓߊ߲߬ߓߊ߮ ߟߎ߬ ߦߋ߫ ﴿90﴾

ߣߴߊ߬ ߝߐ߫ ߘߴߊ߬ߟߎ߬ ߦߋ߫ ߸ ߞߏ߫ ߊߟߎ߫ ߘߍ߲߬ߞߣߍ߬ߦߵߊߟߊ߫ ߟߊ߫ ߝߋ߲߫ ߠߊߖߌ߰ߣߍ߲ ߡߊ߬ ߸ ߊ߬ߟߎ߬ ߘߴߊ߬ ߝߐ߫ ߞߏ߫ ߒ߬ ߕߊ ߡߍ߲ ߠߊߖߌ߰ߣߍ߲߫ ߒ߬ ߡߊ߬ ߒ߬ ߘߍ߲߬ߞߣߍ߬ߦߊ߬ߣߍ߲߫ ߏ߬ ߟߋ ߡߊ߬ ، ߊ߬ߟߎ߬ ߘߴߊ߬ߟߎ߫ ߓߊ߲߬ ߏ߬ ߞߐߕߊ ߘߐ߫ ߛߊ߫ ߸ ߏ ߘߏ߲߬ ߜߎ ߦߋ߫ ߕߎ߬ߢߊ߫ ߟߋ߬ ߘߌ߫ ߸ ߊ߬ ߦߴߊ߬ߟߎ߬ ߓߟߏߕߊ ߟߊߛߙߋߦߊ߫ ߟߊ߫ ، ߊ߬ߟߎ߫ ߖߋ߬ߓߌ߬ ߸ ߞߏ߫ ߡߎ߲߬ ߠߊ߫ ߘߏ߲߬ ߊߟߎ߫ ߞߵߊߟߊ߫ ߟߊ߫ ߟߊ߬ߝߐ߬ߓߊ߮ ߟߎ߫ ߝߊ߰ ߞߘߐ߬ߡߊ߲߫ ߸ ߣߴߊߟߎ߫ ߘߍ߲߬ߞߣߍ߬ߦߊ߬ߣߍ߲߫؟ ﴿91﴾

ߖߊ߯ߕߋ߫ ߸ ߡߎߛߊ߫ ߣߊ߬ ߘߴߊߟߎ߫ ߡߊ߬ ߔߊߞߌ ߟߎ߬ ߘߌ߫ ߸ ߊߟߎ߫ ߞߊ߬ ߓߊ߲߫ ߞߵߊߟߎ߫ ߓߟߏߞߍ߫ ߕߎߙߊߣߍ߲ ߠߊ߫ ߏ߬ ߞߐ߫ ߸ ߞߵߊ߬ ߕߘߍ߬ ߊߟߎ߫ ߦߋ߫ ߛߏߡߊ ߟߎ߬ ߘߌ߫ ﴿92﴾

ߕߎ߬ߡߊ ߡߍ߲ ߊ߲ ߞߵߊߟߎ߫ ߟߊ߫ ߟߊ߬ߤߘߌ ߡߌ߬ߘߊ߫ ߞߊ߬ ߞߎ߬ߙߎ ߘߎ߲߫ ߊߟߎ߫ ߞߎ߲߬ߘߐ߫ ߸ ߒ ߞߏ߫ ߒ ߣߊ߬ ߝߋ߲ ߡߍ߲ ߘߌ߫ ߟߴߊߟߎ߫ ߡߊ߬ ߊߟߎ߯ ߏ ߡߌ߬ߘߵߊߟߎ߫ ߛߍ߲ߓߍ ߟߊ߫ ߞߵߊߟߎ߫ ߕߟߏߡߊߟߐ߬ ߊ߬ ߟߊ߫ ߝߣߊ߫ ، ߊ߬ߟߎ߬ ߞߊ߲߫ ߞߏ߫ ߊ߲ ߓߘߴߊ߬ ߡߍ߲߫ ߞߏ߬ߣߵߊ߲ ߓߘߴߊ߬ ߡߊߛߐ߬ߛߐ߬ ، ߊ߬ߟߎ߬ ߟߊߡߌ߲߬ ߘߴߊ߬ߟߎ߫ ߛߣߐ߬ߡߍ ߟߎ߬ ߘߐ߫ ߕߎߙߊߣߍ߲ߞߏ ߟߋ߬ ߟߴߊ߬ߟߎ߬ ߟߊߓߊ߲߬ߓߊ߰ߦߊ ߞߏߛߐ߲߬ ، ߊ߬ ߝߐ߫ ( ߊ߬ߟߎ߬ ߦߋ߫ ) ߸ ߞߏ߫ ߊߟߎ߫ ߟߊ߫ ߘߍ߲߬ߞߣߍ߬ߦߊ ߘߏ߲߬ ߞߵߊߟߎ߫ ߟߐ߬ ߞߏ߫ ߖߎ߯ ߟߊ߫ ߥߍ߫ ߸ ߣߴߊ߬ ߕߘߍ߬ ߘߴߊߟߎ߫ ߦߋ߫ ߘߍ߲߬ߞߣߍ߬ߦߊ߬ߓߊ߯ ߟߎ߫ ߘߌ߫ ﴿93﴾

ߊ߬ ߝߐ߫ ߞߏ߫ ߣߴߊ߬ ߕߘߍ߬ ߘߊ߫ ߊߟߊ߫ ߓߘߊ ߛߏ߫ ߟߊߓߊ߲ ߦߴߊߟߎ ߟߋ߬ ߘߐߙߐ߲߫ ߘߎ߲߬ߘߎ߬ߡߊ ߘߌ߫ ߞߊ߬ ߡߐ߱ ߕߐ߭ ߟߎ߬ ߕߏ߫ ߸ ߊߟߎ߯ ߛߊ߬ߦߊ ߣߕߊ߬ ߥߍ߫ ߸ ߣߴߊߟߎ߫ ߞߍ߫ ߘߊ߫ ߕߎ߬ߢߊ߬ ߕߌ߯ ߘߌ߫ ﴿94﴾

ߊ߬ߟߎ߫ ߘߏ߲߬ ߕߍߣߵߏ ߣߕߊ߬ ߟߊ߫ ߝߋߎ߫ ، ߞߊ߬ߡߊߛߐ߬ߘߐ߲߫ ߊ߬ߟߎ߬ ߓߟߏ߫ ߟߊ߫ ߗߋߥߊߟߌ ߝߍ߬ ، ߓߊ ߊߟߊ߫ ߞߊ߬ ߕߐ߬ߢߍ߰ߒߕߋ ߟߎ߬ ߟߐ߲߫ ߠߋ߫ ߘߋ߬ ﴿95﴾

ߌ ߓߊ߯ ߊ߬ ߡߊߝߟߍ߫ ߸ ߌ ߘߴߊ߬ ߕߘߍ߬ ߢߣߊߡߦߊ ߞߊ߬ߣߌ߲ ߦߴߊ߬ߟߎ ߟߋ߬ ߘߐ߫ ߞߊ߬ ߕߊ߬ߡߌ߲߬ ߡߐ߱ ߓߍ߯ ߟߊ߫ ߸ ߤߊߟߌ߫ ߞߊ߬ ߕߊ߬ߡߌ߲߬ ߛߏߡߊ ߟߎ߬ ߟߊ߫ ، ߊ߬ߟߎ߫ ߞߋ߬ߟߋ߲߬ߞߋ߬ߟߋ߲߬ߠߊ ߦߴߊ߬ ߣߕߊ߬ ߟߊ߫ ߟߋ߬ ߸ ߞߏ߫ ߊ߬ ߦߋ߫ ߛߊ߲߬ ߥߊ߯ ߞߋߟߋ߲߫ ߛߌ߬ ߛߐ߬ߘߐ߲߬ ، ߏ߬ ߘߏ߲߬ ߕߍ߫ ߊ߬ ߡߊߓߐ߫ ߖߊ߲߰ߞߕߊ ߟߊ߫ ߤߟߴߊ߬ ߞߵߏ ߛߐ߬ߘߐ߲߬ ߸ ߓߊ ߊߟߊ߫ ߢߊ߯ ߊ߬ߟߎ߬ ߗߋߥߊߟߌ ߟߊ߫ ߟߋ߬ ߛߚߋ߫ ﴿96﴾

ߊ߬ ߝߐ߫ ߞߏ߫ ߡߍ߲ ߓߊ߯ ߞߍ߫ ߖߌ߬ߓߙߌߟߎ߫ ߖߎ߮ ߘߌ߫ ߸ ߏ߬ ߟߋ ߞߏ߬ߣߌ߲ ߖߌ߰ ߘߊ߫ ߞߎ߬ߙߊ߬ߣߊ ߘߌ߫ ߌ ߛߣߐ߬ߡߍ ߡߊ߬ ߊߟߊ߫ ߟߊ߫ ߘߌ߬ߢߍ ߟߊ߫ ߸ ߞߵߏ߬ ߞߍ߫ ߊ߬ ߢߍ߫ ߟߍߙߊ ߟߊߛߙߋߦߊߟߊ߲ ߘߌ߫ ߸ ߊ߬ ߣߌ߫ ߞߵߊ߬ ߞߍ߫ ߞߊ߲ߘߦߊ ߣߌ߫ ߘߟߊߝߎߟߊ߲ ߘߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߋ߫ ﴿97﴾

ߡߍ߲ ߓߊ߯ ߞߍ߫ ߊߟߊ߫ ߣߴߊ߬ ߟߊ߫ ߞߋ߲ߛߐ߲ ߠߎ߬ ߣߴߊ߬ ߟߊ߫ ߞߋߟߊ ߟߎ߬ ߣߌ߫ ߖߌ߬ߓߙߌߟߎ߫ ߣߌ߫ ߡߌ߬ߞߊ߯ߌߟߎ߫ ߖߎ߮ ߘߌ߫ ߸ ߒ߬ߓߵߊߟߊ߫ ߝߣߊ߫ ߟߋ߬ ߓߊ߲߬ߓߊ߮ ߟߎ߬ ߖߎ߮ ߘߌ߫ ﴿98﴾

ߊ߲ ߣߊ߬ ߟߝߊߙߌ߫ ߘߐߞߣߍߣߍ߲ ߠߎ߫ ߟߋ߬ ߟߊߖߌ߰ ߟߴߌ ߡߊ߬ ߣߌ߲߬ ߸ ߡߐ߰ ߛߌ߫ ߕߍ߫ ߊ߬ ߓߊ߲߬ ߏ߬ ߟߎ߬ ߘߐ߫ ߝߏ߫ ߔߊߟߊ߲ߞߊߓߊ߯ߕߐ ߟߎ߬ ﴿99﴾

(ߊ߬ ߝߐ߫ ) ߌ߬ߦߏ߯ ߊ߬ߟߎ߬ ߓߊ߯ ߟߊ߬ߤߘߌ ߘߏ߫ ߕߊ߬ ߞߏߕߊ߲߫ ߸ ߖߊ߬ߡߊ ߝߊ߲߬ ߞߋߟߋ߲ ߘߴߏ߬ ߟߊߝߌ߬ߟߴߊ߬ߟߎ߬ ߘߐ߫ ߔߌߚߌ߫ ، ߓߊ ߊ߬ߟߎ߫ ߝߊ߲߬ߓߊ ߟߋ߬ ߕߍ߫ ߘߍ߲߬ߞߣߍ߬ߦߊ߫ ߟߊ߫ ﴿100﴾

ߊߟߊ߫ ߟߊ߫ ߞߋߟߊ ߣߊ߬ߣߍ߲ ߊ߬ߟߎ߫ ߡߊ߬ ߸ ߊ߬ ߘߏ߲߬ ߦߴߊ߬ߟߎ߬ ߓߟߏߕߊ ߟߊߛߙߋߦߊ߫ ߟߊ߫ ߸ ߟߍߙߊߟߞߊ ߝߊ߲߬ ߞߋߟߋ߲ ߞߵߊ߬ ߞߍ߫ ߊߟߊ߫ ߟߊ߫ ߟߍߙߊ ߏ߬ ߟߊߝߌ߬ߟߌ ߘߌ߫ ߊ߬ߟߎ߬ ߞߕߐ߫ ߸ ߞߵߊ߬ ߞߍ߫ ߦߏ߫ ߊ߬ߟߎ߬ ߕߍ߫ ߊ߬ ߞߊ߬ߟߊߡߊ߬ ﴿101﴾

ߊ߬ߟߎ߫ ߕߎ߲߰ ߘߊ߫ ߞߙߌߛߌ ߟߎ߫ ߟߋ߬ ߟߊ߫ ߸ ߜߍ߬ߘߍ ߟߎ߫ ߕߘߍ߬ ߡߍ߲ ߠߎ߫ ߞߊ߬ߙߊ߲߬ ߠߊ߫ ߛߎ߬ߟߋ߬ߡߊ߯ߣߊ߫ ߟߊ߫ ߡߊ߲߬ߛߊ߬ߦߊ ߕߎ߬ߡߊ ߟߊ߫ ، ߛߎ߬ߟߋ߬ߡߊ߯ߣߊ߫ ߘߏ߲߬ ߡߊ߫ ߕߘߍ߬ ߓߊ߲߬ߓߊ߰ߦߊ ߘߐ߫ ߝߋߎ߫ ، ߜߍ߬ߘߍ ߟߎ߫ ߟߋ߬ ߓߊ߲߬ߓߊ߰ߦߊ߬ ߘߊ߫ ، ߏ߬ ߟߎ߫ ߟߋ߬ ߕߘߍ߬ ߡߐ߱ ߟߎ߬ ߟߊߟߐ߲ߠߌ߲߫ ߠߊ߫ ߛߎߓߊ߯ߦߊ ߟߊ߫ ، ߊ߬ ߣߌ߫ ߝߋ߲ ߡߍ߲ ߠߊߖߌ߰ ߘߊ߫ ߡߟߍ߬ߞߊ߬ ߤߊߙߎߕߊ߫ ߣߌ߫ ߡߊߙߎߕߊ߫ ߝߌ߬ߟߊ ߡߊ߬ ߓߊߓߌߟߊ߫ ، ߏ߬ ߟߎ߫ ߘߏ߲߬ ߡߊ߫ ߡߐ߰ ߛߌ߫ ߟߊߟߐ߲ߠߌ߲߫ ߏ߬ ߟߊ߫ ߣߴߊ߬ߟߎ߬ ߡߴߊ߬ ߝߐ߫ ߏ߬ ߦߋ߫ ߸ ߞߏ߫ ߒ߬ߠߎ߬ ߦߋ߫ ߞߘߐߓߐߟߌ ߟߋ߬ ߟߊ߫ ߸ ߏ߬ ߘߐ߫ ߌ ߞߊߣߊ߬ ߞߍ߫ ߓߊ߲߬ߓߊ߮ ߘߌ߫ ߘߋ߬ ، ߊ߬ߟߎ߫ ߕߘߍ߬ ߝߋ߲߫ ߠߋ߫ ߞߊ߬ߙߊ߲߬ ߠߴߏ߬ ߟߎ߫ ߝߌ߬ߟߊ ߝߍ߬ ߸ ߊ߬ߟߎ߬ ߦߋ߫ ߗߍ߭ ߣߴߊ߬ ߝߘߎߡߊ ߝߘߊ߫ ߟߊ߫ ߡߍ߲ ߠߊ߫ ، ߞߏ߬ߣߵߊ߬ߟߎ߬ ߕߴߛߋ߫ ߞߏ߫ ߕߌߢߍ߫ ߟߊ߫ ߡߐ߰ ߛߌ߫ ߡߊ߬ ߏ߬ ߟߊ߫ ߸ ߝߏ߫ ߊߟߊ߫ ߓߊ߯ ߘߌ߬ߢߍ߬ ߡߍ߲ ߡߊ߬ ، ߊ߬ߟߎ߫ ߕߘߍ߬ ߟߐ߲ߠߌ߲߫ ߠߋ߬ ߢߌߣߌ߲߫ ߠߴߏ߬ ߘߌ߫ ߸ ߡߍ߲ ߘߴߊ߬ߟߎ߬ ߕߙߐ߫ ߊ߬ ߘߏ߲߬ ߕߴߊ߬ߟߎ߬ ߡߎߣߊ߲ߝߊ߲߫ ߸ ߊ߬ߟߎ߬ ߜߎ ߞߵߊ߬ ߟߐ߲߫ ߛߎߋ߯ ߞߏ߫ ߡߍ߲ ߓߊ߯ ߏ߬ ߛߊ߲߬ ߸ ߣߌ߬ ߛߌ߫ ߕߍ߫ ߞߍ߫ ߏ߬ ߢߍ߫ ߟߊߞߌߙߊ߫ ، ߊ߬ߟߎ߫ ߘߏ߲߬ ߞߵߊ߬ߟߎ߬ ߣߌ ߟߎ߫ ߝߙߋ߬ ߝߋ߲߫ ߖߎ߯ ߟߊ߫ ߏ߬ ߘߌ߫ ߞߟߋ߫ ߣߴߊ߬ߟߎ߫ ߕߎ߲߬ ߓߴߏ߬ ߢߊߦߋ߫ ߟߊ߫ ﴿102﴾

ߣߴߊ߬ߟߎ߫ ߕߌ߲߬ ߘߍ߲߬ߞߣߍ߬ߦߊ߬ ߘߊ߫ ߞߵߊ߬ߟߎ߬ ߝߊ߲ߕߊ߲߬ߞߊ߫ ߸ ߏ߬ ߛߊ߬ߙߊ ߡߍ߲ ߊߟߊ߫ ߓߘߊ ߏ߬ ߟߋ ߝߌ߬ߛߊ߬ ߣߴߊ߬ߟߎ߫ ߕߌ߲߬ ߓߴߏ߬ ߢߊߦߋ߫ ߟߊ߫ ﴿103﴾

ߤߍ߲߬ ߊߟߎ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߞߊߣߵߊ߬ ߝߐ߫ ߘߋ߬ ߞߏ߫ ߊ߲ ߠߊߣߍ߰ߣߍ߯ ߸ ߊߟߎ߫ ߊ߬ ߝߐ߫ ߟߋ߬ ߞߏ߫ “ ߌ ߢߊ ߓߍ߲߬ ߊ߲ ߡߊ߬” ، ߏ߬ ߞߐ߫ ߊߟߴߊߟߎ߫ ߕߟߏߡߊߟߐ߬ ، ( ߓߊ߲߬ߓߊ߰ ) ߕߟߏߡߊߜߍߟߍ߲ ߠߎ߫ ߟߋ߬ ߢߍߛߌ߰ߣߍ߲߫ ߖߊ߲߰ߞߕߊ߬ ߘߌߡߌ߲ߣߍ߲ ߠߊ߫ ﴿104﴾

ߟߍߙߊߟߞߊ߫ ߓߊ߲߬ߣߍ߲ ߠߎ߬ ߣߌ߫ ߛߏߡߊ ߟߎ߬ ߛߌ߫ ߕߴߊ߬ ߝߍ߬ ߊߟߎ߫ ߡߊ߰ߙߌ ߟߊ߫ ߤߙߊ߫ ߛߌ߫ ߦߋ߫ ߟߊߖߌ߰ ߊߟߎ߫ ߡߊ߬ ، ߊߟߊ߫ ߘߏ߲߬ ߡߐ߰ ߟߋ߬ ߞߙߍߞߙߍ߫ ߟߴߊ߬ ߟߊ߫ ߤߌߣߊ ߟߊ߫ ߡߍ߲ ߓߊ߯ ߊ߬ ߘߌߦߊ߫ ، ߊߟߊ߫ ߟߋ߬ ߘߏ߲߬ ߦߋ߫ ߢߊ߬ߒߡߊ߭ ߓߟߋ߬ߓߟߋ ߕߌ߱ ߘߌ߫ ﴿105﴾

ߊ߲ ߓߊ߯ ߟߝߊߙߌ ߡߍ߲ ߠߊߥߟߌ߬ ߸ ߥߟߊ߫ ߒ߬ ߓߴߌ ߟߊߢߌ߬ߣߊ߬ ߡߍ߲ ߞߐ߫ ߸ ߒ߬ ߘߌ߫ ߣߊ߬ ߘߏ߫ ߜߘߍ߫ ߘߌ߫ ߸ ߡߍ߲ ߝߌ߬ߛߊ߫ ߏ߬ ߘߌ߫ ߥߟߴߊ߬ ߣߌ߫ ߡߍ߲ ߞߊ߲ߧߊߡߊ߲߫ ، ߌ ߡߴߊ߬ ߟߐ߲߫ ߞߏ߫ ߊߟߊ߫ ߛߋߣߍ߲߫ ߞߏ ߓߍ߯ ߟߊ߫؟ ﴿106﴾

ߌ ߡߴߊ߬ ߟߐ߲߫ ߓߊ߬ ߞߏ߫ ߊߟߊ߫ ߟߋ߬ ߕߊ߫ ߦߋ߫ ߛߊ߲ ߠߎ߬ ߣߌ߫ ߘߎ߱ ߡߊ߲߬ߛߊ߬ߦߊ ߘߌ߫؟ ߊ߬ ߣߌ߫ ߞߏ߫ ߊߟߊ߫ ߓߐ߲߯ߕߍ߫ ߸ ߢߌ߲߰ ߕߍ߫ ߊߟߎ߫ ߟߊ߫ ߘߍ߬ߡߍ߲߬ߓߊ߯ ߕߍ߫؟ ﴿107﴾

ߦߊ߯ߟߊ߫ ߊߟߎ߫ ߦߴߊ߬ ߝߍ߬ ߟߋ߫ ߓߊ߬ ߞߵߊߟߎ߫ ߟߊ߫ ߞߋߟߊ ߢߌ߬ߣߌ߲߬ߞߊ߬ ߝߎߚߎ߫ ߸ ߦߏ߫ ߡߎߛߊ߫ ߢߌ߬ߣߌ߲߬ߞߊ߬ ߘߊ߫ ߢߊ ߡߍ߲ ߞߘߐ߬ߡߊ߲߫؟ ، ߡߐ߰-ߐ-ߡߐ߰ ߘߏ߲߬ ߞߊ߬ ߓߊ߲߬ߓߊ߰ߦߊ ߓߌ߬ߟߊ߫ ߘߍ߲߬ߞߣߍ߬ߦߊ ߣߐ߭ ߘߐ߫ ߸ ߏ߬ ߓߘߊ߫ ߝߟߌ߬ ߛߌߟߊ ߕߍߡߟߊ ߡߊ߬ ߝߊ߯ߙߌ߫ ﴿108﴾

ߟߍߙߊߟߞߊ ߛߌߦߊߡߊ߲߫ ߦߴߊ߬ ߝߍ߬ ߟߋ߬ ߞߵߊߟߎ߫ ߟߊߛߊ߬ߦߌ߲߬ ߓߊ߲߬ߓߊ߰ߦߊ ߘߐ߫ ߊߟߎ߫ ߘߍ߲߬ߞߣߍ߬ߦߊ߬ߣߍ߲ ߞߐ߫ ߸ ߞߵߏ߬ ߟߊߥߌ߬ߟߌ߫ ߊ߬ߟߎ߬ ߣߌ ߘߐ߫ ߓߍ߲߬ߛߍ߲߬ߞߐ߬ߣߌ߲߬ߧߊ ߘߐߙߐ߲߫ ߡߊ߬ ، ߞߵߊ߬ ߕߘߍ߬ ߜߎ ߕߎ߬ߢߊ ߓߘߊ߫ ߓߊ߲߫ ߟߊ߲ߞߣߍߡߊ߫ ߟߴߊ߬ߟߎ߬ ߦߋ߫ ، ߒ߬ߓߵߊߟߎ߫ ߜߊ߲ߒߞߎ߲ߠߊ ߣߌ߫ ߞߏ߫ ߘߐߞߏߦߊߕߏ ߞߍ߫ ߡߎߣߎ߲߬ ߖߐ߫ ߸ ߝߏ߫ ߊߟߊ߫ ߦߋ߫ ߣߵߊ߬ ߟߊ߫ ߞߏ ߘߌ߫ ߸ ߓߊߏ߬ ߊߟߊ߫ ߟߋ߬ ߛߋ߫ ߟߊ߫ ߞߏ ߓߍ߯ ߟߊ߫ ﴿109﴾

ߊߟߎ߯ ߛߊߟߌ ߟߐ߬ ߊߟߎ߯ ߖߞߊ ߘߌ߫ ߸ ߊߟߎ߫ ߞߊ߬ ߝߋ߲-ߋ-ߝߋ߲߫ ߠߊߕߊ߬ߡߌ߲߬ ߊߟߎ߫ ߖߘߍ߬ ߢߍ߫ ߢߌ߬ߡߊ߬ ߘߐ߫ ߸ ߊߟߎ߫ ߘߴߏ߬ ߕߘߍ߬ ߊߟߊ߫ ߓߘߊ ߖߐ߫ ، ߊߟߊ߫ ߘߏ߲߬ ߢߊ߯ ߊߟߎ߫ ߗߋߥߊߟߌ ߟߎ߬ ߟߊ߫ ﴿110﴾

ߊ߬ߟߎ߬ ߞߊ߲߫ ߠߋ߬ ߞߏ߫ ߡߐ߰ ߛߌ߫ ߕߍ߫ ߘߏ߲߬ ߊ߬ߙߌ߬ߖߣߍ߫ ߸ ߝߏ߫ ߣߌ߫ ߡߍ߲ ߞߍ߫ ߘߊ߫ ߦߊ߬ߤߎ߯ߘߎ ߘߌ߫ ߥߟߊ߫ ߣߊ߬ߛߊ߯ߙߊ ߘߌ߫ ، ߊ߬ߟߎ߬ ߘߌߦߊߣߊ߲ߕߊ ߟߎ߫ ߟߴߏ߬ ߘߌ߫ ، ߊ߬ߟߎ߫ ߖߋ߬ߓߌ߬ ߞߏ߫ ߊߟߎ߯ ߣߵߊߟߎ߫ ߘߊ߬ߟߎ ߟߎ߬ ߘߌ߫ ߓߊ߫ ߣߴߊߟߎ߫ ߞߍ߫ ߘߊ߫ ߕߎ߬ߢߊ߬ ߕߌ߯ ߟߎ߫ ߘߌ߫ ﴿111﴾

ߤߊ߯ߟߌ߫ ߸ ( ߡߐ߰ ߜߘߍ߫ ߘߌ߫ ߘߏ߲߬ ߊ߬ߙߌ߬ߖߣߍ߫ ߘߐ߫ ߞߍ߬ ) ، ߝߋ߲-ߋ-ߝߋ߲߫ ߞߵߊ߬ ߢߊߘߐߟߊ ߞߟߏ߫ ߊߟߊ߫ ߦߋ߫ ߞߊ߬ ߞߍ߫ ߢߊ߬ߓߊ߮ ߘߌ߫ ߸ ߏ ߛߊ߬ߙߊ ߦߴߊ߬ ߢߍ߫ ߊ߬ ߡߊ߰ߙߌ ߓߘߊ ߖߐ߫ ، ߛߌߟߊ߲߫ ߕߍ߫ ߏ߬ ߟߎ߬ ߟߊ߫߸ ߊ߬ߟߎ߫ ߘߏ߲߬ ߕߍߣߊ߫ ߛߎ߬ߣߎ߲߬ ߠߊ߫ ﴿112﴾

ߦߊ߬ߤߎ߯ߘߎ ߟߎ߬ ߞߊ߲߫ ߠߋ߬ ߸ ߞߏ߫ ߣߊ߬ߛߊ߯ߙߊ ߟߎ߬ ߓߟߏ߫ ߕߍ߫ ߝߏߦߌ߫ ߡߊ߬ ، ߣߊ߯ߛߊ߯ߙߊ ߟߎ߬ ߝߣߊ߫ ߞߊ߲߫ ߠߋ߬ ߸ ߞߏ߫ ߦߊ߬ߤߎ߯ߘߎ ߟߎ߬ ߓߟߏ߫ ߕߍ߫ ߝߏߦߌ߫ ߡߊ߬ ، ߊ߬ߟߎ߫ ߘߏ߲߬ ߓߍ߯ ߦߋ߫ ߟߍߙߊ ߞߊ߬ߙߊ߲߬ ߠߊ߫ ، ߒ߬ߓߊ߬ ߞߎ߲߬ߝߌ߲߬ ߝߋ߲߫ ߟߐ߲ߓߊߟߌ ߟߎ߬ ߝߣߊ߫ ߣߵߏ߬ ߟߎ߬ ߟߊ߫ ߞߎߡߊ ߢߐ߲߱ ߝߐ߫ ߟߊ߫ ߕߋ߲߬ ߠߋ߬ ߖߐ߫ ، ߞߏ߬ߣߌ߲߬ ߊߟߊ߫ ߘߌߣߵߊ߬ߟߎ߬ ߟߊ߫ ߢߐ߲߯ ߛߐߛߐ߫ ߞߏ ߟߎ߬ ߞߕߌ ߕߍ߰ ߊ߬ߟߎ߬ ߕߍ߫ ߟߐ߬ߓߊ ߟߏ߲ ߠߋ߬ ߕߘߋ߫ ﴿113﴾

ߖߍߣߍ߲ ߠߊ߫ ߕߐ߬ߢߍ߮ ߕߊ߬ߡߌ߲߬ߣߍ߲߬ ߊߟߊ߫ ߟߊ߫ ߡߌ߬ߛߙߌ ߟߎ߫ ߞߎ߬ߡߊ߲߬ߘߌ߬ߓߊ߮ ߕߊ ߞߊ߲߬ ߞߏ߫ ߊߟߊ߫ ߕߐ߮ ߕߍ߫ ߝߐ߫ ߦߋ߲߬ ߸ ߊ߬ ߣߌ߫ ߞߊ߬ ߓߊ߯ߙߊ ߞߍ߫ ߡߌ߬ߛߙߌ ߟߎ߫ ߕߋ߭ ߘߐ߫؟ ، ߒ߬ߓߊ߬ ߏ߬ ߟߎ߫ ߟߋ߬ ߡߊ߲߫ ߞߊ߲߫ ߞߊ߬ ߘߏ߲߬ ߡߌ߬ߛߙߌ ߟߎ߬ ߟߊ߫ ߝߋߎ߫ ߝߏ߫ ߊ߬ߟߎ߬ ߛߌߟߊ߲ߡߍߣߍ߲ߕߐ ، ߘߐ߯ߦߡߊ ߟߴߏ߬ ߟߎ߬ ߢߍ߫ ߘߎߢߊ߫ ߘߐ߫ ߸ ߊ߬ ߣߌ߫ ߖߊ߲߰ߞߕߊ߬ ߓߟߋߓߟߋ ߟߴߊ߬ߟߎ߬ ߢߍ߫ ߟߊߞߌߙߊ߫ ﴿114﴾

ߊߟߊ߫ ߕߊ ߟߋ߬ ߕߟߋ߬ߓߐ ߣߌ߫ ߕߟߋ߬ߓߋ ߘߌ߫ ، ߊߟߎ߫ ߞߵߊߟߎ߫ ߢߊߛߌ߲߫ ߝߊ߲߬-ߊ-ߝߊ߲߬ ߠߊ߫ ߊߟߊ߫ ߞߏߟߘߊ ߦߋ߫ ߦߋ߲߬ ߖߐ߫ ، ߖߊ߯ߕߋ߫ ߸ ߊߟߊ߫ ߦߙߌߥߊߣߍ߲߫ ߊ߬ ߟߐ߲ߠߌ߲ߣߍ߲߫ ﴿115﴾

ߊ߬ߟߎ߬ ߞߊ߲߫ ߠߋ߬ ߞߏ߫ ߊߟߊ߫ ߓߘߴߊ߬ ߓߟߏߞߍ߫ ߘߋ߲߫ ߠߊ߫ ߸ ߊ߬ ߘߏ߲߬ ߛߊߣߌ߲ߡߊ߲߫ ߏ ߡߊ߬ ߞߟߋ߫ ، ߊ߬ ߞߏ߬ߣߌ߲ ߕߊ ߟߋ߬ ߛߊ߲ ߠߎ߬ ߣߌ߫ ߘߎ߱ ߟߎ߬ ߘߌ߫ ߸ ߏ߬ ߓߍ߯ ߘߏ߲߬ ߞߟߏߣߍ߲߫ ߊ߬ ߢߍ߫ ߟߋ߬ ߞߎߡߍߞߎߡߍ߫ ﴿116﴾

ߛߊ߲ ߠߎ߬ ߣߌ߫ ߘߎ߱ ߜߙߋ߬ߡߊߕߍ߰ߓߊ߮ ߟߋ߬ ߸ ߊ߬ ߓߊ߯ ߞߍ߫ ߞߏ ߡߍ߲ ߠߊߕߍ߰ ߟߊ߫ ߸ ߊ߬ ߦߴߊ߬ ߝߐ߫ ߟߴߏ ߡߊ߬ ߟߋ߬ ߞߏ߫ ߞߍ߫ ߸ ߏ߬ ߘߌ߫ ߞߍ߫ ߘߏߦߌ߲߫ ﴿117﴾

ߝߋ߲߫ ߟߐ߲ߓߊߟߌ ߟߎ߬ ߞߊ߲߫ ߠߋ߬ ߸ ߞߏ߫ ߥߟߊߞߏ߫ ߊߟߊ߫ ߖߍ߬ߘߍ ߕߘߍ߬ ߊ߲ ߞߎߡߊߢߐ߲߯ߦߊ߫ ߥߟߊ߫ ߡߊ߲߬ߕߊߣߌ߲߫ ߕߍ߬ߘߍ߫ ߣߵߊ߲ ߡߊ߬ ، ߒ߬ߓߵߊ߬ߟߎ߬ ߢߍߓߊ߮ ߟߎ߬ ߝߣߊ߫ ߞߵߏ ߢߐ߲߰ ߠߋ߬ ߝߐ߫ ߞߘߐ߬ߡߊ߲߫ ، ߊ߬ߟߎ߫ ߛߣߐ߬ߡߍ ߟߎ߫ ߟߋ߬ ߓߘߊ߫ ߡߎߣߎ߲ߧߊ߫ ، ߊ߲ ߞߏ߬ߣߌ߲߬ ߓߘߊ߫ ߟߝߊߙߌ ߟߎ߬ ߝߊߙߊ߲ߝߊߛߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߢߍ߫ ﴿118﴾

ߊ߲ ߣߵߌ ߗߋ߫ ߟߊ߫ ߘߟߊߝߎߟߌߟߊ ߣߌ߫ ߖߊ߬ߛߙߋ߬ߡߊ߬ߟߌ߬ߟߊ ߘߌ߫ ߕߎ߬ߢߊ ߖߊ߯ߕߋ ߟߋ߬ ߟߊ߫ ߸ ߞߏ߬ߣߌ߲߬ ߝߋߎ߫ ߌ ߕߍߣߊ߬ ߢߌ߬ߣߌ߲߬ߞߊ߬ ߟߊ߫ ߥߋ߲ߓߋ ߘߏ߲߬ߞߏ ߟߎ߫ ( ߞߎ߲߬ߞߏ ) ߡߊ߬ ﴿119﴾

ߦߊ߬ߤߎ߯ߘߎ ߟߎ߬ ߣߌ߫ ߣߊ߬ߛߊ߯ߙߊ ߟߎ߬ ߛߌ߫ ߕߍߣߊ߫ ߘߌ߬ߢߍ߬ ߟߴߌ ߡߊ߬ ߝߏ߫ ߣߴߌ ߞߵߊ߬ߟߎ߬ ߟߊ߫ ߣߊߡߎ߲ ߠߊߓߊ߬ߕߏ߬ ، ߊ߬ ߝߐ߫ ߞߏ߫ ߊߟߊ߫ ߟߊ߫ ߞߊ߲ߘߦߊ ߟߋ߬ ߞߊ߲ߘߦߊ ߖߊ߯ߕߋ ߘߌ߫ ، ߒ߬ߓߊ߬ ߣߴߌ ߞߵߊ߬ߟߎ߬ ߣߌ ߛߊ߬ߥߏ ߟߊߓߊ߬ߕߏ߫ ߡߎ߬ߕߎ߲߬ ߟߐ߲ߠߌ߲ ߣߊ߬ߣߍ߲ ߞߐ ߌ ߡߊ߬ ߸ ߢߌ߲߬ ߕߴߌ ߟߊ߫ ߊߟߊ߫ ߡߊ߬ ߏ߬ ߘߐ߫ ߸ ߘߍ߲߬ߡߍ߲߬ߓߊ߰ ߕߴߌ ߟߊ߫ ﴿120﴾

ߊ߲ ߣߊ߬ ߟߍߙߊ ߘߌ߫ ߟߊ߫ ( ߤߓߊߛߌ߫ ߣߊ߲߬ߛߊ߯ߙߊ߫ ) ߡߍ߲ ߠߎ߫ ߡߊ߬ ߞߘߐ߬ߡߊ߲߫ ( ߣߊߟߌ߬ߡߎ߲߫ ߋߗߏߔߌߞߊ ߟߎ߬ ߘߌ߫ ) ߣߴߊ߬ߟߎ߬ ߦߴߊ߬ ߞߊ߬ߙߊ߲߬ ߠߴߊ߬ ߞߊ߬ߙߊ߲߬ ߢߊ߬ ߓߘߍ ߡߊ߬ ߸ ߏ߬ ߟߎ߫ ߟߋ߬ ߘߍ߲߬ߞߣߍ߬ߦߊ߬ߣߍ߲߫ ߊ߬ ߡߊ߬ ، ߒ߬ߞߊ߬ ߡߍ߲ ߠߎ߬ ߓߊ߯ ߊ߬ߟߎ߫ ߓߊ߲߬ ߊ߬ ߡߊ߬ ߛߊ߫ ߸ ߒ߬ߓߊ߬ ߏ߬ ߟߎ߫ ߟߋ߫ ߓߣߐ߬ߓߊ߮ ߟߎ߬ ߘߌ߫ ﴿121﴾

ߤߍ߲߬ ߊߟߎ߬ ߌߛߌߙߊߌߟߞߊ ߟߎ߬ ߸ ߊߟߎ߫ ߦߴߊߟߎ߫ ߖߊ߲߬ߓߌ߬ߟߊ߬ ߒ ߠߊ߫ ߣߍߡߊ ߘߐ߫ ߒ ߞߊ߬ ߣߍߡߊ ߡߍ߲ ߞߍ߫ ߊߟߎ߫ ߦߋ߫ ߸ ߊ߬ ߣߌ߫ ߒ ߞߵߊߟߎ߫ ߟߊߝߌ߬ߛߊ߬ߦߊ ߡߍ߲ ߞߍ߫ ߡߌ߬ߙߌ߲߬ߘߌ ߟߎ߬ ߘߌ߫ ﴿122﴾

ߊߟߎ߫ ߦߴߊߟߎ߫ ߝߊ߲ߕߊ߲߬ߞߊ߬ ߟߏ߲߫ ߡߊ߬ ߣߌߡߊ ߘߏ߫ ߕߍ߫ ߘߏ߫ ߥߛߊ߬ ߟߊ߫ ߝߏߦߌ߬ ߘߐ߫ ߟߏ߲ ߡߍ߲ ߸ ߞߎ߲߬ߞߊ߬ ߕߍ߫ ߡߌ߬ߘߊ߬ ߟߊ߫ ߘߏ߫ ߟߊ߫ ߸ ߛߏ߬ߟߏ߲߬ ߕߍ߫ ߘߏ߫ ߡߎߣߊ߲ߝߊ߲߫ ߸ ߊ߬ߟߎ߫ ߘߏ߲߬ ߕߍߣߊ߫ ߘߍ߬ߡߍ߲߬ ߠߊ߫ ﴿123﴾

ߕߎ߬ߡߊ ߡߍ߲ ߌߓߎ߬ߙߊ߬ߤߌߡߊ߫ ߡߊ߰ߙߌ ߞߵߊ߬ ߞߘߐߓߐ߫ ߞߎߡߊ ߘߏ߫ ߟߎ߫ ߟߊ߫ ߸ ߊ߬ ߞߵߏ߬ ߟߎ߬ ߘߝߊ߫ ߡߍ߲ߞߍ߭ ߸ ߊߟߊ߫ ߞߊ߲߫ ߊ߬ ߡߊ߬ ߞߏ߫ ߒ߬ߓߊ߬ ߒ ߓߘߴߌ ߞߍ߫ ߡߐ߱ ߟߎ߬ ߢߍߓߊ߮ ߘߌ߫ ، ߊ߬ ߞߊ߲߫ ߞߏ߫ ߊ߬ ߣߌ߫ ߒ ߓߐ߲ߛߐ߲ ߘߏ߫ ߟߎ߫ ߝߣߊ߫ ߓߊ߬؟ ، ߊߟߊ߫ ߞߊ߲߫ ߞߏ߫ ߒ ߠߊ߫ ߟߊ߬ߤߘߌ ߕߍߣߊ߬ ߕߐ߬ߢߍ߰ߒߕߋ ߟߎ߬ ߟߊߛߐ߬ߘߐ߲߬ ߠߊ߫ ߘߋ߬ ﴿124﴾

ߕߎ߬ߡߊ ߡߍ߲ ߊ߲ ߞߊ߬ ߓߏ߲ ߞߍ߫ ߡߐ߱ ߟߎ߬ ߢߍ߫ ߕߊ߯ߣߌߛߊߦߌ߫ ߦߙߐ߫ ߣߌ߫ ߞߎ߲߬ߠߊ߬ߝߎ߬ߟߋ߲߬ ߦߌߟߊ߫ ߘߌ߫ ߸ ߒ ߞߏ߫ ߊߟߎ߫ ߦߋ߫ ߛߊߟߌ߫ ߦߙߐ ߟߊߘߊ߲߫ ߌߓߎ߬ߙߊ߬ߤߌߡߊ߫ ߕߟߐ߬ ߦߙߐ ߘߊߝߍ߬ ، ߊ߲ ߞߊ߬ ߟߊ߬ߤߘߌ ߘߴߌߓߎ߬ߙߊ߬ߤߌߡߊ߫ ߣߴߌߛߌ߬ߡߊ߬ߌߟߊ߫ ߡߊ߬ ߸ ߒ ߞߏ߫ ߊߟߎ߫ ߝߌ߬ߟߊ ߦߋ߫ ߒ ߠߊ߫ ߓߏ߲ ߛߊߣߌ߲ߧߴߊ߬ ߖߊ߰ߟߋ߬ߓߊ߮ ߟߎ߬ ߣߴߊ߬ ߟߊߡߍ߲߬ߛߍ߲߬ߧߊ߬ߓߊ߮ ߟߎ߬ ߦߋ߫ ߸ ߊ߬ ߣߌ߫ ߞߐߡߊߓߌߘߌ߲ߓߊ߯ ߕߌ߲ߓߌߘߌ߲ߓߊ߮ ߟߎ߬ ߦߋ߫ ﴿125﴾

ߕߎ߬ߡߊ ߡߍ߲ ߌߓߎ߬ߙߊ߬ߤߌߡߊ߫ ߞߵߊ߬ ߝߐ߫ ߞߏ߫ ߒ ߡߊ߰ߙߌ ߸ ߦߊ߲߬ ߞߍ߫ ߛߏ߫ ߞߎ߲߬ߠߊ߬ߝߎߟߋ߲ߣߍ߲߫ ߘߌ߫ ߸ ߌ ߦߴߊ߬ ߛߌ߰ߓߊ߮ ߟߎ߫ ߤߊ߬ߙߌ߬ߖߍ߰ ߦߙߌߘߋ߲ ߠߎ߬ ߟߊ߫ ߸ ߞߏ߬ߣߵߊ߬ߟߎ߬ ߡߍ߲ ߓߊ߯ ߘߍ߲߬ߞߣߍ߬ߦߊ߫ ߊߟߊ߫ ߣߌ߫ ߟߏ߲ߠߊߓߊ߲ ߡߊ߬ ߘߋ߬ ، ߊߟߊ߫ ߞߊ߲߫ ߞߏ߫ ߤߊߟߌ߬ ߡߍ߲ ߓߊ߯ ߞߍ߫ ߓߊ߲߬ߓߊ߮ ߘߌ߫ ߞߍ߬ ، ߒ ߘߌ߫ ߘߊ߰ߡߎ߲߬ߣߍ߲߬ ߕߜߋ߫ ߘߴߏ߬ ߡߊ߬ ߡߎߣߎ߲߬ ߖߐ߫ ߸ ߞߊ߬ ߓߊ߲߫ ߞߵߊ߬ ߟߊߕߊ߲߬ߞߌ߲߬ ߕߊ ߖߊ߲߰ߞߕߊ ߡߊ߬ ، ߟߊ߬ߓߊ߲߬ ߦߌ߬ߟߊ߬ ߖߎ߯ ߟߴߏ߬ ߘߌ߫ ߞߟߋ߫ ﴿126﴾

ߌߓߎ߬ߙߊ߬ߤߌߡߊ߫ ߣߴߌߛߌ߬ߡߊ߬ߌߟߊ߫ ߞߍߕߐ ߓߏ߲ ߜߘߌ ߟߎ߬ ߞߘߐߕߊ߬ ߟߊ߫ ߸ ( ߊ߬ߟߎ߬ ߞߊ߲߫ ߞߏ߫ ) ߊ߲ ߡߊ߰ߙߌ ߸ ߟߊ߬ߡߌ߬ߘߊ߬ ߞߍ߫ ߒ߬ ߧߋ߫ ߖߊ߰ߣߌ߲߬ ߸ ߌߟߋ ߡߍ߲ ߦߋ߫ ߡߍ߲ߠߌ߲ߠߊ߫ ߟߐ߲ߠߌ߲ߠߊ ߘߌ߫ ﴿127﴾

ߊ߲ ߡߊ߰ߙߌ ߸ ߌ ߦߴߊ߲ ߞߍ߫ ߖߘߍ߬ߞߟߏ߬ߓߊ߯ ߝߌ߬ߟߊ߬ ߘߴߌ ߦߋ߫ ߸ ߌ ߦߋ߫ ߘߏ߫ ߟߎ߫ ߓߐ߫ ߒ߬ ߓߐ߲ߛߐ߲ ߠߎ߬ ߘߐ߫ ߞߵߏ߬ ߟߎ߬ ߞߍ߫ ߡߊ߲߬ߕߏ߲߬ ߞߟߏߣߍ߲߫ ߘߴߌ ߦߋ߫ ߸ ߌ ߦߴߊ߬ߟߋ߬ ߓߏ߲ ߓߊ߬ߕߏ ߞߍߢߊ ߦߌ߬ߘߵߊ߲ ߠߊ߫ ، ߌ ߦߋ߫ ߖߘߍ߬ߟߊ߬ߛߊߦߌ߲ ߡߌ߬ߘߵߊ߲ ߦߋ߫ ߸ ߌߟߋ ߡߍ߲ ߦߋ߫ ߖߘߍ߬ߟߊ߬ߛߊߦߌ ߡߌ߬ߘߊ߬ߓߊ߰ ߤߌߣߊߒߕߋ ߘߌ߫ ﴿128﴾

ߒ ߡߊ߰ߙߌ ߸ ߌ ߦߴߊ߬ߟߎ߬ ߘߏ߫ ߗߋ߫ ߊ߬ߟߎ߫ ߡߊ߬ ߞߋߟߊ ߘߌ߫ ߸ ߏ߬ ߦߴߌ ߟߊ߫ ߟߝߊߙߌ ߟߎ߫ ߞߊ߬ߙߊ߲߫ ߊ߬ߟߎ߬ ߦߋ߫ ߸ ߏ߬ ߦߴߊ߬ߟߎ߬ ߟߊߟߐ߲ߠߌ߲߫ ߟߍߙߊ ߣߌ߫ ߥߘߋ߬ߥߘߋ߬ߟߌ ߟߊ߫ ߞߵߊ߬ߟߎ߬ ߛߊߣߌ߲ߧߊ߫ ߛߏߘߊ߫ ، ߖߊ߯ߕߋ߬ ߸ ߌߟߋ ߟߋ߫ ߣߌ߬ߣߌ߬ߟߊ߫ ߥߘߋ߬ߥߘߋ߬ߟߌ߬ߟߊ ߘߌ߫ ﴿129﴾

ߡߐ߰ ߛߌ߫ ߕߍ߫ ߊ߬ ߖߍ߲߬ߞߍ߬ ߌߓߎ߬ߙߊ߬ߤߌߡߊ߫ ߟߊ߫ ߣߊߡߎ߲ ߡߊ߬ ߝߏ߫ ߡߍ߲ ߓߊ߯ ߊ߬ ߖߘߍ߬ ߞߍ߫ ߖߎߥߊ ߘߌ߫ ߸ ߊ߲ ߞߵߊ߬ ߛߎߥߊ߲ߘߌ߫ ߟߋ߬ ߞߌߢߍ߲ ߢߌ߲߬ ߘߐ߫ ߸ ߊ߬ ߘߏ߲߬ ߦߋ߫ ߛߎ߬ߟߊ߫ ߡߐ߰ ߢߌߡߊ ߟߎ߬ ߘߏ߫ ߟߋ߬ ߘߌ߫ ﴿130﴾

ߕߎ߬ߡߊ ߡߍ߲ ߊ߬ ߡߊ߰ߙߌ ߞߵߊ߬ ߝߐ߫ ߊ߬ ߦߋ߫ ߸ ߞߏ߫ ߌ ߖߘߍ߬ ߞߟߏ߫ ߊ߬ ߞߊ߲߫ ߞߏ߫ ߒ ߓߘߊ߫ ߒ ߖߘߍ߬ ߞߟߏ߫ ( ߛߌ߬ߟߊ߬ߡߊ ߘߌ߫ ) ߖߊ߯ߓߊ ߟߎ߫ ߡߊ߰ߙߌ ߦߋ߫ ﴿131﴾

ߒ߬ߓߊ߬ ߌߓߎ߬ߙߊ߬ߤߌߡߊ߫ ߞߵߏ߬ ߟߋ ߛߙߊ߬ߒ߬ߞߊ߲߬ߠߊ ߞߍ߫ ߊ߬ ߘߋ߲ ߠߎ߬ ߟߊ߫ ߸ ߊ߬ ߣߌ߫ ߦߊ߬ߞߎߓߊ߫ ߝߣߊ߫ ߞߵߏ߬ ߟߋ ߛߙߊ߬ߒ߬ߞߊ߲߬ߠߊ ߞߍ߫ ߞߏ߫ ߒ ߘߋ߲ ߠߎ߬ ߸ ߊߟߊ߫ ߓߘߊ߫ ߘߌ߯ߣߊ ߢߌ߲߬ ߠߋ߬ ߛߎߥߊ߲ߘߌ߫ ߊߟߎ߫ ߦߋ߫ ߸ ߒ߬ߓߵߊߟߎ߫ ߞߊߣߊ߬ ߛߊ߬ ߘߋ߬ ߝߏ߫ ߊߟߎ߫ ߓߊ߯ ߞߍ߫ ߖߘߍ߬ߞߟߏ߬ߦߊ߬ߓߊ߮ ߟߎ߬ ߘߌ߫ ﴿132﴾

ߦߊ߯ߟߴߊߟߎ ߟߋ߫ ߕߘߍ߬ ߛߙߋ ߟߎ߬ ߘߌ߫ ߓߊ߬ ߛߊ߬ߦߊ ߣߊ߬ ߕߎߡߊ ߟߊ߫ ߦߊ߬ߞߎߓߊ߫ ߡߊ߬؟ ߕߎ߬ߡߊ ߡߍ߲ ߊ߬ ߞߵߊ߬ ߟߊߛߴߊ߬ ߘߋ߲ ߠߎ߫ ߡߊ߬ ߸ ߞߏ߫ ߊߟߎ߫ ߞߍߕߐ߫ ߡߋ߬ߘߋ ߓߊ߬ߕߏ߬ ߟߊ߫ ߒ ߞߐ߫؟ ߏ߬ ߟߎ߬ ߞߊ߲߫ ߞߏ߫ ߊ߲ ߧߴߌ ߡߊ߰ߙߌ ߟߋ߫ ߓߊ߬ߕߏ߬ ߟߊ߫ ߊ߬ ߣߴߌ ߝߊ߬ ߟߎ߫ ߡߊ߰ߙߌ ߸ ߣߊߟߌ߬ߡߎ߲߬ ߌߓߎ߬ߙߊ߬ߤߌߡߊ߫ ߣߴߌߛߌ߬ߡߊ߬ߌߟߊ߫ ߣߴߌߛߌ߬ߤߊ߯ߞߊ߫ ߟߎ߫ ߘߌ߫ ، ߏ߬ ߘߏ߲߬ ߓߍ߯ ߦߋ߫ ߡߊ߰ߙߌ߬ ߞߋߟߋ߲߫ ߠߋ߬ ߘߌ߫ ߸ ߊ߲ߠߎ߬ ߞߟߏߣߴߏ߬ ߟߋ ߡߊ߬ ﴿133﴾

ߏ߬ ߟߎ߬ ߦߋ߫ ߡߊ߲߬ߕߏ߲߫ ߕߊ߬ߡߌ߲߬ߣߍ߲ ߠߋ߬ ߘߌ߫ ߸ ߏ߬ ߟߎ߬ ߗߋߥߊߟߌ ߦߴߊ߬ߟߎ߬ ߦߋ߫ ߸ ߊߟߎ߫ ߝߣߊ߫ ߗߋߥߊߟߌ ߦߴߊߟߎ߫ ߦߋ߫ ، ߊߟߎ߫ ߘߏ߲߬ ߕߍߣߊ߬ ߢߌ߬ߣߌ߲߬ߞߊ߬ ߟߊ߫ ߏ߬ ߟߎ߬ ߗߋߥߊߟߌ ߝߋ߲߫ ߡߊ߬ ﴿134﴾

ߊ߬ߟߎ߬ ߞߊ߲߫ ߠߋ߬ ߸ ߞߏ߫ ߊߟߎ߫ ߦߋ߫ ߞߍ߫ ߦߊ߬ߤߎ߯ߘߎ ߟߎ߬ ߘߌ߫ ߥߟߊ߫ ߣߊ߬ߛߊ߯ߙߊ ߟߎ߬ ߘߌ߫ ߸ ߞߴߏ߬ ߟߋ ߘߴߊ߬ ߞߍ߫ ߊߟߎ߫ ߘߌ߫ ߞߊ߲ߘߊ߫ ، ߊ߬ߟߎ߫ ߖߋ߬ߓߌ߬ ߞߏ߫ ߍ߲߬ߍ߲ߍ߲߬ ߸ ߒ߬ ߧߋ߫ ߌߓߎ߬ߙߊ߬ߤߌߡߊ߫ ߟߊ߫ ߣߊߡߎ߲߫ ߕߋߟߋ߲ߣߍ߲ ߠߋ߫ ߞߊ߲߬ ߓߐߚߐ߫ ߸ ߓߊ ߏ߬ ߡߊ߫ ߞߍ߫ ߛߏߡߊ ߟߎ߬ ߝߋ߲߫ ߘߌ߫ ﴿135﴾

ߊߟߴߊ߬ ߝߐ߫ ߟߋ߬ ߸ ߞߏ߫ ߊ߲ ߓߘߊ߫ ߘߍ߲߬ߞߣߍ߬ߦߊ߬ ߊߟߊ߫ ߡߊ߬ ߸ ߊ߬ ߣߌ߫ ( ߟߍߙߊ ) ߡߍ߲ ߠߊߖߌ߰ߣߴߊ߲ ߡߊ߬ ، ߊ߬ ߣߌ߫ ߡߍ߲ ߠߊߖߌ߰ ߘߊ߫ ߌߓߎ߬ߙߊ߬ߤߌߡߊ߫ ߣߴߌߛߌ߬ߡߊ߬ߌߟߊ߫ ߣߴߌߛߌ߬ߤߊ߯ߞߊ߫ ߣߌ߫ ߦߊ߬ߞߎߓߊ߫ ߣߴߊ߬ ߟߊ߫ ߓߊߓߏ߲ ߠߎ߫ ߡߊ߬ ، ߊ߬ ߣߌ߫ ߡߍ߲ ߘߌ߫ ߘߊ߫ ߡߎߛߊ߫ ߡߊ߬ ߸ ߊ߬ ߣߌ߫ ߌߛߊ߫ ߡߊ߬ ، ߊ߬ ߣߌ߫ ߡߍ߲ ߘߌ߫ ߘߊ߫ ߟߊ߬ߝߐ߬ߓߊ߮ ߟߎ߫ ߡߵߊ߬ߟߎ߫ ߡߊ߰ߙߌ ߓߟߏ߫ ، ߊ߲ߠߎ߬ ߕߍ߫ ߘߊ߲߬ߝߘߊ߬ߓߐ߫ ߘߏ߲߬ ߠߊ߫ ߡߐ߰ ߛߌ߫ ߕߍ߫ ߏ߬ ߟߎ߬ ߘߐ߫ ، ߒ߬ߠߎ߫ ߞߟߏߣߍ߲߫ ߊߟߊ߫ ߟߋ߬ ߦߋ߫ ﴿136﴾

ߣߴߊ߬ߟߎ߫ ߘߍ߲߬ߞߣߍ߬ߦߊ߬ ߘߴߊߟߎ߫ ߘߍ߲߬ߞߣߍ߬ߦߊ߬ ߢߊ ߏ߬ ߡߊ߬ ߸ ߊ߬ߟߎ߬ ߓߘߊ߫ ߞߊ߲ߘߊ߫ ߏ߬ ߘߐ߫ ، ߒ߬ߞߊ߬ ߣߴߊ߬ߟߎ߫ ߞߵߊ߬ߟߎ߬ ߞߐߘߏ߲߬ ߸ ߊ߬ߟߎ߬ ߦߋ߫ ߝߐߢߐ߲߯ߞߐ ߟߋ߫ ߞߊ߲߬ ߏ߬ ߘߌ߫ ߛߊ߫ ، ߊߟߊ߫ ߘߏ߲߬ ߓߍߣߵߌ ߥߊ߬ߛߴߊ߬ߟߎ߫ ߡߊ߬ ߟߋ߬ ߘߍ߯ ߸ ߓߊߏ߬ ߊߟߊ߫ ߦߋ߫ ߡߍ߲ߠߌ߲ߠߊ߫ ߟߐ߲ߠߌ߲ߠߊ ߟߋ߬ ߘߌ߫ ﴿137﴾

(ߊ߲ߠߎ߬ ߦߋ߫ ) ߊߟߊ߫ ߟߊ߫ ߞߙߊ߬ߦߊ ߟߋ߫ ߝߍ߬ ، ߖߍߣߍ߲ ߘߏ߲߬ ߢߌ߬ߡߊ߬ ߊߟߊ߫ ߘߌ߫ ߞߙߊ߬ߦߊ ߘߐ߫؟ ߒ߬ߓߊ߬ ߒ߬ߠߎ߬ ߦߴߏ߬ ߟߋ ߓߊ߬ߕߏ߬ ߟߊ߫ ﴿138﴾

ߊ߬ ߝߐ߫ ߞߏ߫ ߌ߬ߦߏ߯ ߊߟߎ߫ ߘߌ߫ ߕߏ߫ ߒ߬ ߘߊߘߐߖߊ߬ ߟߴߊߟߊ߫ ߞߏ ߘߐ߫ ، ߏ߬ ߟߋ ߘߏ߲߬ ߒ߬ߠߎ߫ ߡߊ߰ߙߌ ߣߴߊߟߎ߫ ߡߊ߰ߙߌ ߘߌ߫ ، ߒ߬ߠߎ߬ ߕߊ ߟߋ߬ ߒ߬ ߠߊ߫ ߓߊ߯ߙߊ ߟߎ߬ ߘߌ߫ ߊߟߎ߫ ߝߣߊ߫ ߕߊ ߟߋ߬ ߊߟߎ߫ ߟߊ߫ ߓߊ߯ߙߊ ߟߎ߬ ߘߌ߫ ، ߒ߬ߠߎ߬ ߦߋ߫ ߓߎ߰ߓߎ߰ߟߌ ߞߍ߫ ߟߴߊ߬ߟߋ ߟߋ߬ ߦߋ߫ ﴿139﴾

ߊ߬ߟߎ߬ ߞߊ߲߫ ߠߋ߫ ߓߊ߬ ߞߏ߫ ߌߓߎ߬ߙߊ߬ߤߌ߯ߡߊ߫ ߣߴߌߛߌ߬ߡߊ߬ߌߟߊ߫ ߣߴߌߛߌ߬ߤߊ߯ߞߊ߫ ߣߌ߫ ߦߊ߬ߞߎߓߊ߫ ߣߴߊ߬ ߟߊ߫ ߓߊߓߏ߲ ߠߎ߫ ߕߘߍ߬ ߦߊ߬ߤߎ߯ߘߎ ߟߋ߬ ߘߌ߫ ߥߟߊ߫ ߣߊ߬ߛߊ߯ߙߊ ߟߎ߬؟ ߊ߬ߟߎ߫ ߖߋ߬ߓߌ߬ ߸ ߞߏ߫ ߊ߬ߟߎ ߟߋ߫ ߞߵߏ߬ ߟߐ߲߫ ߓߊ߰ ߥߟߊ߫ ߊߟߊ߫؟ ߒ߬ߓߊ߬ ߡߍ߲ ߣߵߊߟߊ߫ ߟߊ߫ ߛߙߋߦߊ ߕߏ߫ ߟߴߊ߬ ߓߟߏ߫ ߞߵߏ ߘߏ߲߰ ߸ ߖߍߣߍ߲ ߠߊ߫ ߕߐ߬ߢߍ߮ ߘߌ߫ ߕߊ߬ߡߌ߲߫ ߏ߬ ߕߊ ߟߊ߫؟ ߓߊ߬ߙߌ߬ ߝߋߎ߫ ߊߟߊ߫ ߖߊ߲߬ߓߐߣߍ߲߫ ߕߍ߫ ߊߟߎ߫ ߗߋߥߊߟߌ ߟߎ߬ ߘߐ߫ ﴿140﴾

ߏ߬ ߟߎ߬ ߦߋ߫ ߡߊ߲߬ߕߏ߲߫ ߕߊ߬ߡߌ߲߬ߣߍ߲ ߠߋ߬ ߘߌ߫ ߸ ߏ߬ ߟߎ߬ ߗߋߥߊߟߌ ߦߴߊ߬ߟߎ߬ ߦߋ߫ ߊߟߎ߫ ߝߣߊ߫ ߗߋߥߊߟߌ ߦߴߊߟߎ߫ ߦߋ߫ ، ߊߟߎ߫ ߘߏ߲߬ ߕߍߣߊ߬ ߢߌ߬ߣߌ߲߬ߞߊ߬ ߟߊ߫ ߏ߬ ߟߎ߬ ߗߋߥߊߟߌ ߝߋ߲߫ ߡߊ߬ ﴿141﴾

ߡߐ߰ ߞߎ߲߬ߡߊߦߟߍ߬ߡߊ߲߬ߣߍ߲ ߠߎ߬ ߘߌߣߵߊ߬ ߝߐ߫ ߸ ߞߏ߫ ߡߋ߬ߘߋ ߞߵߊ߬ߟߎ߬ ߞߐߘߏ߲߬ ߊ߬ߟߎ߬ ߟߊ߫ ߞߐߘߐ߲ ߠߊ߫ ߊ߬ߟߎ߫ ߕߘߍ߬ ߡߍ߲ ߞߊ߲߬؟ ߊ߬ߟߎ߫ ߖߋ߬ߓߌ߬ ߞߏ߫ ߊߟߊ߫ ߕߊ ߟߋ߫ ߕߟߋ߬ߓߐ ߣߌ߫ ߕߟߋ߬ߓߋ ߘߌ߫ ߸ ߡߍ߲ ߓߊ߯ ߊ߬ ߘߌߦߊ߫ ߊ߰ ߏ߬ ߟߋ ߞߊ߲ߘߊ߫ ߟߊ߫ ߛߌߟߊ߫ ߕߋߟߋ߲ߣߍ߲ ߞߊ߲߬ ﴿142﴾

ߒ߬ߠߎ߫ ߣߵߊߟߎ߫ ߞߍ߫ ߟߊ߫ ߡߊ߲߬ߕߏ߲߬ ߛߎߥߊ߲ߘߌߣߍ߲ ߘߌ߫ ߟߋ߬ ߸ ߛߴߊߟߎ߫ ߘߌ߫ ߞߍ߫ ߡߐ߱ ߕߐ߭ ߟߎ߬ ߛߙߋ ߘߌ߫ ߸ ߞߊ߬ ߞߋߟߊ ߞߍ߫ ߊߟߎ߫ ߝߣߊ߫ ߛߙߋ ߘߌ߫ ، ߌ ߕߘߍ߬ ߞߐߘߐ߲ ߡߍ߲ ߞߊ߲߬ ߸ ߊ߲ ߡߴߏ߬ ߞߏ ߟߊߥߟߌ߬ ߝߏߦߌ߫ ߡߊ߬ ߝߏ߫ ߞߵߊ߬ ߟߊߥߟߌ߬ ߛߴߊ߲ ߘߌ߫ ߞߋߟߊ ߟߊߓߊ߬ߕߏ߬ߓߊ߮ ߟߐ߲߫ ߡߐ߱ ߘߐ߫ ߸ ߡߍ߲ ߦߋ߫ ߛߊ߬ߦߌ߬ ߟߴߊ߬ ߕߏ߲ߕߏߟߌ߫ ߝߌ߬ߟߊ ߡߊ߬ ، ߤߟߴߊ߬ ߜߟߍ߬ߦߊ߬ߣߍ߲߫ ߞߍ߫ ߘߊ߫ ߸ ߊ߬ ߞߏ߬ߣߌ߲ ߕߍ߫ ߜߟߍ߬ߦߵߊߟߊ߫ ߟߊ߫ ߡߐ߰ ߞߊ߲ߘߊߣߍ߲ ߠߎ߫ ߡߊ߬ ، ߊߟߊ߫ ߘߏ߲߬ ߕߍߣߵߊߟߎ߫ ߟߊ߫ ߘߍ߲߬ߞߣߍ߬ߦߊ ߕߌߢߍ߫ ߟߊ߫ ، ߖߊ߯ߕߋ߬ ߸ ߡߐ߱ ߟߎ߫ ߞߌ߬ߣߌ߲߬ߞߌߣߌ߲ ߣߴߊ߬ߟߎ߫ ߡߊ߬ߤߌߣߊ ߠߋ߬ ߊߟߊ߫ ߟߊ߫ ﴿143﴾

ߊ߲ ߞߵߌ ߦߋ߫ ߢߣߊߞߊߟߊ߲ߠߌ߲ ߠߊ߫ ߛߊ߲ ߡߊ߬ ߖߐ߫ ، ߊ߲ ߓߍߣߵߌ ߛߐ߫ ߞߐߘߐ߲߫ ߠߊ߫ ߸ ߌ ߘߌ߫ ߘߌ߬ߢߍ߫ ߏ ߡߊ߬ ، ߒ߬ߓߊ߬ ߌ ߢߊߕߋߟߋ߲߫ ߡߌ߬ߛߙߌ߬ ߟߊߕߏߣߍ߲ ߝߊ߲߭ ߠߊ߫ ، ߊߟߎ߫ ߓߊ߯ ߞߍ߫ ߝߊ߲߬-ߊ-ߝߊ߲߬ ߊߟߴߊߟߎ߫ ߢߊߛߌ߲߫ ߦߋ߲߬ ߝߊ߲߭ ߠߊ߫ ، ߟߍߙߊߟߞߊ ߟߎ߫ ߞߵߊ߬ ߟߐ߲߫ ߛߎߋ߯ ߞߏ߫ ߕߎ߬ߢߊ߫ ߟߋ߬ ߛߋߚߋ߫ ߞߊ߬ ߝߘߴߊߟߎ߫ ߡߊ߰ߙߌ ߟߊ߫ ، ߓߊ߬ߙߌ߬ ߊߟߊ߫ ߖߊ߲߬ߓߐߣߍ߲߫ ߕߍ߫ ߊ߬ߟߎ߬ ߗߋߥߊߟߌ ߘߐ߫ ߘߋ߬ ﴿144﴾

ߤߊߟߵߌ ߣߊ߬ ߘߊ߫ ߡߊ߲߬ߕߊߣߌ߲ ߛߎ߮ ߓߍ߯ ߘߌ߫ ߟߍߙߊߟߞߊ ߟߎ߫ ߡߊ߬ ߸ ߊ߬ߟߎ߬ ߕߴߌ ߟߊ߫ ߞߐߘߐ߲ ߠߊߓߊ߬ߕߏ߬ ، ߌߟߋ ߘߏ߲߬ ߕߍ߫ ߊ߬ߟߎ߬ ߟߊ߫ ߞߐߘߐ߲ ߠߊߓߊ߬ߕߏ߬ߓߊ߯ ߘߌ߫ ، ߟߍߙߊߟߞߊ ߘߏ߫ ߝߣߊ߫ ߕߍ߫ ߘߏ߫ ߟߊ߫ ߞߐߘߐ߲ ߠߊߓߊ߬ߕߏ߬ ߟߊ߫ ، ߒ߬ߓߊ߬ ߣߴߌ ߞߵߊ߬ߟߎ߬ ߣߌ ߛߊ߬ߥߏ ߟߊߓߊ߬ߕߏ߫ ߡߎ߬ߕߎ߲߬ ߟߐ߲ߠߌ߲ ߣߊ߬ߣߍ߲ ߞߐ ߌ ߡߊ߬ ߸ ߏ ߕߎ߬ߡߊ ߌ ߓߘߊ߫ ߞߍ߫ ( ߖߘߍ߬ ) ߕߐ߬ߢߍ߰ߟߊ ߟߎ߬ ߘߏ߫ ߘߌ߫ ﴿145﴾

ߊ߲ ߣߊ߬ ߡߍ߲ ߠߎ߬ ߛߐ߫ ߟߊ߫ ߟߍߙߊ ߟߊ߫ ߸ ߏ߬ ߟߎ߫ ߞߵߊ߬ ߟߐ߲߫ ߠߋ߬ ߦߏ߫ ߊ߬ߟߎ߫ ߞߵߊ߬ߟߎ߬ ߘߋ߲ ߠߎ߬ ߟߐ߲߫ ߢߊ ߡߍ߲ ، ߞߏ߬ߣߌ߲߬ ߊ߬ߟߎ߫ ߝߊ߲߬ ߞߋߟߋ߲ ߠߴߊ߬ߟߎ߬ ߕߊߥߎ߫ ߟߊ߫ ߞߊ߬ ߕߎ߬ߢߊ ߘߏ߲߰ ߞߵߊ߬ ߕߘߍ߬ ߊ߬ߟߎ߫ ߞߵߊ߬ ߟߐ߲߫ ﴿146﴾

ߕߎ߬ߢߊ ߘߏ߲߬ ߝߘߊߣߍ߲߫ ߌ ߡߊ߰ߙߌ ߟߋ߬ ߟߊ߫ ، ߏ߬ ߘߐ߫ ߌߟߋ ߞߊߣߊ߬ ߞߍ߫ ߛߌߞߊߓߊ߮ ߟߎ߬ ߝߋ߲߫ ߘߌ߫ ߘߋ߬ ﴿147﴾

(ߡߌ߬ߙߌ߲߬ߘߌ ) ߓߍ߯ ߣߴߊ߬ ߕߊ߫ ߞߎ߲߬ߕߋߟߋ߲߫ ߠߋ߬ ߸ ߊ߰ ߊ߬ ߢߊߛߌ߲߫ ߠߊ߫ ߡߍ߲ ߠߊ߫ ، ߒ߬ߓߵߊߟߎ߫ ߛߊ߲ߞߊߢߐ߲߯ߦߊ ߞߍ߫ ߤߙߊ ߟߎ߫ ߟߋ߬ ߞߍ ߘߐ߫ ، ߊߟߎ߫ ߓߊ߯ ߞߍ߫ ߝߊ߲߬-ߊ-ߝߊ߲߬ ߊߟߊ߫ ߘߌ߫ ߣߵߊߟߎ߫ ߓߍ߯ ߟߊߘߍ߬ߣߍ߲ ߘߌ߫ (ߖߊ߬ߕߋ߬ߓߐ߬ ߞߊ߲ߡߊ߬) ߖߐ߫ ߸ ߓߊ ߊߟߊ߫ ߟߋ߬ ߛߋ߫ ߟߊ߫ ߞߏ ߓߍ߯ ߟߊ߫ ﴿148﴾

ߌ ߓߊ߯ ߓߐ߫ ߝߊ߲߬-ߊ-ߝߊ߲߬ ߌ ߦߴߌ ߢߊ ߓߍ߲߬ ߡߌ߬ߛߙߌ߬ ߟߊߕߏߣߍ߲ ߝߊ߲߭ ߡߊ߬ ، ߏ߬ ߟߋ ߌ ߡߊ߰ߙߌ ߟߊ߫ ߕߎ߬ߢߊ ߘߌ߫ ߸ ߊߟߊ߫ ߘߏ߲߬ ߖߊ߲߬ߓߐ߬ߣߍ߲߫ ߕߍ߫ ߊߟߎ߫ ߗߋߥߊߟߌ ߟߎ߬ ߘߐ߫ ﴿149﴾

ߌ ߓߊ߯ ߓߐ߫ ߝߊ߲߬-ߊ-ߝߊ߲߬ ߸ ߌ ߦߴߌ ߢߊ ߓߍ߲߬ ߡߌ߬ߛߙߌ߬ ߟߊߕߏߣߍ߲ ߝߊ߲߭ ߡߊ߬ ، ߊߟߎ߫ ߓߊ߯ ߞߍ߫ ߝߊ߲߬-ߊ-ߝߊ߲߬ ߊߟߴߊߟߎ߫ ߢߊ ߓߍ߲߬ ߦߋ߲߬ ߝߊ߲߭ ߡߊ߬ ، ߤߊߞߍߕߏ߫ ߘߊߘߐߡߌߘߊߞߎ߲ߧߊ߫ ߞߊߣߊ߬ ߞߍ߫ ߡߐ߱ ߟߎ߬ ߟߴߊߟߎ߫ ߡߊ߬ ߸ ߝߏ߫ ߣߌ߫ ߡߍ߲ ߠߎ߫ ߞߵߊߟߎ߫ ߕߐ߬ߢߍ߯ ߊ߬ߟߎ߬ ߘߐ߫ ، ߊߟߎ߫ ߘߏ߲߬ ߞߊߣߊ߬ ߛߌߟߊ߲߫ ߏ߬ ߟߎ߬ ߢߍ߫ ߘߋ߬ ߸ ߊߟߎ߯ ߛߌߟߊ߲߫ ߒߠߋ ߟߋ߬ ߢߍ߫ ߸ ߛߊ߫ ߒ ߘߌ߫ ߒ ߠߊ߫ ߣߍߡߊ ߘߝߴߊߟߎ߫ ߦߋ߫ ߸ ߊ߬ ߣߌ߫ ߖߐ߲߰ߛߴߊߟߎ߫ ߘߌ߫ ߞߊ߲ߘߊ߫ ﴿150﴾

ߦߏ߫ ߊ߲ ߞߵߊߟߎ߫ ߖߍ߬ߘߍ ߘߏ߫ ߗߋ߫ ߊߟߎ߫ ߡߊ߬ ߞߋߟߊ ߘߌ߫ ߢߊ ߡߍ߲ ߸ ߏ߬ ߦߋ߫ ߒ߬ ߠߊ߫ ߟߝߊߙߌ ߟߎ߫ ߞߊ߬ߙߊ߲߬ ߊߟߎ߫ ߦߋ߫ ߸ ߞߵߊߟߎ߫ ߛߊߣߌ߲ߧߊ߫ ߸ ߊ߬ ߣߌ߫ ߞߵߊߟߎ߫ ߟߊߟߐ߲ߠߌ߲߫ ߟߍߙߊ ߣߌ߫ ߥߘߋ߬ߥߘߋ߬ߟߌ ߟߊ߫ ߸ ߊ߬ ߣߌ߫ ߞߵߊߟߎ߫ ߟߊߟߐ߲ߠߌ߲߫ ߞߏ߫ ߟߊ߫ ߊߟߎ߫ ߕߘߍ߬ ߡߊ߫ ߡߍ߲ ߟߐ߲߫ ﴿151﴾

ߒ߬ߓߵߊߟߎ߫ ߦߴߊߟߎ߫ ߦߟߌߕߏ߫ ߒߠߋ ߘߐ߫ ߟߋ߬ ߸ ߒ ߝߊߣߊ߯ ߒ ߦߟߌߕߏ߫ ߊߟߎ߫ ߘߐ߫ ، ߊ߬ ߣߴߊߟߎ߯ ߒߠߋ ߞߏߢߌߡߊߟߐ߲߫ ߠߋ߬ ߸ ߊߟߎ߫ ߞߊߣߊ߬ ߒ ߓߊ߬ߙߌ߬ߒ߬ߕߊ߲߬ߧߊ߫ ߘߋ߬ ﴿152﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߘߍ߲߬ߡߍ߲߬ߠߌ߲߬ ߢߌߣߌ߲ ߞߍ߫ ߡߎ߬ߢߎ߲ ߣߌ߫ ߛߊߟߌ ߟߋ߫ ߞߊ߲߬ ، ߓߊ ߊߟߊ߫ ߦߋ߫ ߡߎ߬ߢߎ߲߬ߓߊ߮ ߟߎ߫ ߟߋ߫ ߝߍ߬ ﴿153﴾

ߡߍ߲ ߠߎ߬ ߓߊ߯ ߝߊ߰ ߊߟߊ߫ ߞߏ ߘߐ߫ ߸ ߊߟߎ߫ ߞߴߊ߬ ߝߐ߫ ߘߋ߬ ߞߴߏ߬ ߟߎ߬ ߦߋ߫ ߛߎ߭ ߟߎ߫ ߟߋ߬ ߘߌ߫ ، ߞߊ߯ߙߌ߫ ߸ ߏ߬ ߟߎ߬ ߢߣߊߡߊ ߟߋ߬ ، ߓߊ߬ߙߌ߬ ߊߟߎ ߟߋ߬ ߕߴߊ߬ߟߎ߫ ߞߊ߬ߟߊߡߊ߬ ﴿154﴾

ߖߊ߯ߕߋ߫ ߸ ߊ߲ ߘߌߣߵߊߟߎ߫ ߞߘߐߓߐ߫ ߝߋ߲ ߘߏ߫ ߟߊ߫ ߣߊߟߌ߬ߡߎ߲߬ ߛߌߟߊ߲ ߣߌ߫ ߞߐ߲ߞߐ ߘߌ߫ ، ߊ߬ ߣߌ߫ ߞߊ߬ ߝߎ߰ߛߌ ߘߏ߲߬ ߣߊ߲߬ߝߟߏ ߟߎ߬ ߣߌ߫ ߣߌ ߟߎ߬ ߣߌ߫ ߦߙߌߘߋ߲ ߠߎ߬ ߘߐ߫ ، ߓߊ߬ߙߌ߬ ߸ ߌ ߘߟߊߝߎ߬ ߡߎ߬ߢߎ߲߬ߓߊ߮ ߟߎ߬ ߦߋ߫ ﴿155﴾

ߕߣߊ߬ߡߊ ߏ߬ ߘߏ߫ ߓߊ߯ ߡߍ߲ ߠߎ߫ ߛߐ߬ߘߐ߲߬ ߞߏߕߊ߲߫ ߸ ߊ߬ߟߎ߬ ߘߴߊ߬ ߝߐ߫ ߞߏ߫: ߒ߬ߠߎ߬ ߦߋ߫ ߊߟߊ߫ ߟߋ߬ ߦߋ߫ ߸ ߊ߲ ߘߏ߲߬ ߛߊ߬ߦߌ߬ߕߐ߫ ߏ߬ ߟߋ ߡߊ߬ ﴿156﴾

ߒ߬ߓߊ߬ ߘߎߓߊ ߟߎ߬ ߣߌ߫ ߤߌߣߊ ߏ߬ ߟߎ߫ ߟߋ߬ ߦߋ߫ ߞߊ߬ ߝߘߴߊ߬ߟߎ߫ ߡߊ߰ߙߌ ߟߊ߫ ، ߏ߬ ߟߎ߫ ߟߋ߬ ߘߏ߲߬ ߞߊ߲ߘߊߓߊ߯ߕߐ ߟߎ߬ ߘߌ߫ ﴿157﴾

ߝߘߊ߫ ( ߕߌ߲ߘߌ ) ߣߌ߫ ߞߓߊ߫ ( ߕߌ߲ߘߌ ) ߓߍ߯ ߦߋ߫ ߊߟߊ߫ ߘߎ߲߬ߘߎ߬ߡߊ߬ ߦߌߟߊ ߟߎ߬ ߘߏ߫ ߟߋ߬ ߘߌ߫ ، ߏ߬ ߘߐ߫ ߸ ߡߍ߲ ߓߊ߯ ߡߊ߬ߓߊߕߏ ( ߤߖߌ ) ߞߍ߫ ߓߏ߲ ߠߊ߫ ߸ ߥߟߊ߫ ߞߊ߬ ߡߍ߲߬ߛߍ߲߬ߧߊ ( ߎߡߎߙߊ ) ߞߍ߫ ߊ߬ ߟߊ߫ ߸ ߞߎ߲߬ߞߏ߬ ߕߴߏ߬ ߡߊ߬ ߏ߬ ߝߌ߬ߟߊ ߖߊ߰ߟߋ ߘߐ߫ ، ߡߍ߲ ߓߊ߯ ߓߐߒߖߘߍߘߐ ߞߍ߫ ߸ ߊߟߊ߫ ߦߋ߫ ߞߏߢߌߡߊߟߐ߲ߠߊ߫ ߘߌ߫ ߊ߰ ߟߐ߲ߠߌ߲ߠߊ߫ ߘߌ߫ ﴿158﴾

ߊ߲ ߣߊ߬ ߔߊߞߌ ߟߎ߬ ߣߌ߫ ߞߊ߲ߘߦߊ ߡߍ߲ ߠߎ߬ ߟߊߖߌ߰ ߟߊ߫ ߸ ߊ߲ ߓߊ߲ ߞߐ ߏ߬ ߟߎ߬ ߘߐߞߣߍ߫ ߟߊ߫ ߡߐ߱ ߟߎ߬ ߦߋ߫ ߟߍߙߊ ߞߣߐ߫ ، ߡߍ߲ ߓߴߏ߬ ߟߎ߫ ߘߏ߲߰ ߡߎ߬ߕߎ߲߬ ߊߟߊ߫ ߘߴߏ߬ ߟߎ߬ ߘߊ߲ߞߊ߫ ߸ ߘߊ߲ߞߊߟߌߟߊ ߟߎ߬ ߝߣߊ߫ ߘߴߊ߬ߟߎ߬ ߘߊ߲ߞߊ߫ ﴿159﴾

ߝߏ߫ ߡߍ߲ ߠߎ߬ ߓߊ߯ ߊ߬ߟߎ߫ ߖߘߍ߬ߟߊߛߊ߬ߦߌ߲߫ ߞߊ߬ ߟߢߊ߬ߟߌ ߞߍ߫ ߸ ߊ߬ ߣߌ߫ ߞߊ߬ ߟߍߙߊ ߞߊ߲ ߟߊ߲ߞߣߍߡߊ߫ ، ߒ߬ߓߊ߬ ߒ߬ ߝߣߊ߫ ߦߋ߫ ߖߘߍ߬ߟߊ߬ߛߊߦߌ߲ ߡߌ߬ߘߊ߬ ߟߴߏ߬ ߟߎ߫ ߟߋ߬ ߦߋ߫ ، ߓߊߏ߬ ߒߠߋ ߦߋ߫ ߖߘߍ߬ߟߊ߬ߛߊߦߌ߲ ߡߌ߬ߘߊ߬ߟߊ߫ ߘߌ߫ ߒ ߧߋ߫ ߤߌߣߟߊ߫ ߘߌ߫ ﴿160﴾

ߡߍ߲ ߠߎ߫ ߞߏ߬ߣߌ߲߬ ߓߊ߯ ߞߍ߫ ߓߊ߲߬ߓߊ߮ ߘߌ߫ ߛߊ߫ ߸ ߞߊ߬ ߛߊ߬ ߓߊ߲߬ߓߊ߰ߦߊ ߘߐ߫ ߸ ߊߟߊ߫ ߣߌ߫ ߡߟߍ߬ߞߊ ߟߎ߬ ߣߌ߫ ߡߐ߱ ߓߍ߯ ߟߊ߫ ߘߊ߲ߞߊ ߘߌ߫ ߞߍ߫ ߏ߬ ߟߎ߫ ߡߊ߬ ߞߐߘߍ߫ ﴿161﴾

ߏ߬ ߟߎ߬ ߘߎߡߊߕߐ߫ ߏ߬ ߟߋ ߘߐ߫ ، ߖߊ߲߰ߞߕߊ ߕߍ߫ ߡߊߛߍ߬ߟߍ߲߬ߓߍ߫ ߏ߬ ߟߎ߫ ߞߊ߲߬ ߸ ߊ߬ߟߎ߫ ߘߏ߲߬ ߕߍ߫ ߡߊߞߐ߬ߣߐ߲߬ ߥߊ߯ߕߌ߫ ߜߘߍ߫ ߟߊ߫ ﴿162﴾

ߊߟߎ߫ ߡߊ߰ߙߌ ߦߋ߫ ߡߊ߰ߙߌ߬ ߞߋߟߋ߲߫ ߔߋ߫ ߟߋ߬ ߘߌ߫ ߸ ߡߊ߰ߙߌ߬ ߜߘߍ߫ ߕߴߏ߬ ߟߋ ߞߐ߫ ߸ ߡߊ߬ߤߌ߬ߣߊ߬ߟߊ߫ ߟߋ߬ ߤߌߣߟߊ߫ ߟߋ߬ ﴿163﴾

ߛߊ߲ ߠߎ߬ ߣߌ߫ ߘߎ߱ ߘߊ߲ ߊߟߊ߫ ߓߟߏ߫ ߸ ߊ߬ ߣߌ߫ ߛߎ ߣߌ߫ ߕߟߋ߬ߘߐ߬ߟߊ ߟߎ߬ ߟߊ߫ ߝߐߢߐ߲߯ߞߐ ، ߊ߬ ߣߌ߫ ߞߎߟߎ߲ ߡߍ߲ ߠߎ߬ ߞߎߟߎ߲ߞߎߟߎ߲߫ ߠߊ߫ ߓߊ ߞߊ߲߬ ߡߐ߱ ߟߎ߬ ߡߎߣߊ߲ߝߊ߲߫ ߝߋ߲ ߠߎ߬ ߘߌ߫ ، ߊ߬ ߣߌ߫ ߊߟߊ߫ ߦߋ߫ ߖߌ ߡߍ߲ ߠߊߖߌ߰ ߟߊ߫ ߞߊ߬ ߓߐ߫ ߡߐ߲ߕߐ߲ ߘߐ߫ ߞߊ߬ ߘߎ߱ ߟߊߢߣߊߡߦߊ߫ ߏ߬ ߟߴߊ߬ ߛߊ߬ߣߍ߲ ߞߐ߫ ߸ ߊ߬ ߣߌ߫ ߞߊ߬ ߛߍ߲߬ߛߍ߲߬ߓߊ߮ ߛߎ߮ ߓߍ߯ ߟߊߓߎ߯ ߊ߬ ߞߊ߲߬ ، ߊ߬ ߣߌ߫ ߝߢߐ ߣߌ߫ ߛߊ߲ߝߌ߲ ߠߊ߫ ߕߊ߯ߣߌߛߊߦߌ ߞߟߏ߫ ߢߊ ߛߊ߲߫ ߣߌ߫ ߘߎ߰ ߕߍ߫ ߸ ߏ߬ ߟߎ߬ ߦߋ߫ ߕߊ߰ߛߌ߬ ߞߏ߫ ߜߊ߲߬ߛߊ߲߫ ߠߋ߬ ߘߌ߫ ߤߊ߲ߞߟߌߡߊ ߟߎ߬ ߦߋ߫ ﴿164﴾

ߘߏ߫ ߦߋ߫ ߡߐ߱ ߟߎ߬ ߘߐ߫ ߸ ߏ߬ ߟߋ ߊߟߊ߫ ߕߏ߫ ߟߊ߫ ߦߋ߲߬ ߞߵߊ߬ ߓߟߏߞߍ߫ ߢߐ߲߰ߘߐ߬ ߜߘߍ ߟߎ߬ ߟߊ߫ ߸ ߞߵߏ߬ ߟߎ߫ ߞߊ߬ߣߌ߲߬ ߦߏ߫ ߊߟߊ߫ ߞߊ߬ߣߌ߲߬ ߢߊ ، ߘߍ߲߬ߞߣߍ߬ߦߊ߬ߓߊ߮ ߟߎ߫ ߘߏ߲߬ ߠߴߊߟߊ߫ ߞߊߣߌ߲ ߓߏ߲߬ߓߊ߫ ߏ߬ ߘߌ߫ ، ߤߊ߲߫ ߸ ߖߊ߲߰ߞߕߊ ߦߋ߫ ߦߋ߫ ߟߊ߫ ߕߎ߬ߡߊ ߡߍ߲ ߕߐ߬ߢߍ߰ߒߕߋ ߟߎ߬ ߓߟߏ߫ ߸ ߊ߬ߟߎ߬ ߘߴߊ߬ ߦߋ߫ ߏ߬ ߘߐ߫ ߞߏ߫ ߝߊ߲߬ߞߊ ߓߍ߯ ߟߊߘߍ߬ߣߍ߲ ߦߋ߫ ߊߟߊ߫ ߟߋ߬ ߟߊ߫ ߸ ߊ߬ ߣߌ߫ ߞߏ߫ ߊߟߊ߫ ߟߋ߫ ߖߊ߲߰ߞߕߊ߬ ߜߍߟߍ߲ ߕߌ߱ ߘߌ߫ ﴿165﴾

ߏ ߕߎ߬ߡߊ ߟߋ߬ ߟߓߊ߬ߕߏ߬ߕߊ ߟߎ߬ ߘߴߊ߬ߟߎ߫ ߣߍ߰ߓߐ߫ ߟߓߊ߬ߕߏ߬ߟߊ ߟߎ߬ ߟߊ߫ ߞߏ ߘߐ߫ ߞߵߊ߬ ߕߘߍ߬ ߊ߬ߟߎ߬ ߢߊ ߓߘߊ߫ ߟߊ߫ ߖߊ߲߰ߞߕߊ ߞߊ߲߬ ߸ ߞߵߊ߬ߟߎ߬ ߕߍ ߖߎ߬ߟߎ ߓߍ߯ ߘߐߓߎ߲ߘߊ߲߫ ﴿166﴾

ߟߓߊ߬ߕߏ߬ߟߌ߬ߟߊ ߟߎ߬ ߘߴߊ߬ ߝߐ߫ ߞߏ߫ ߣߌ߫ ߞߐߛߊߦߌ߲ ߛߋ߫ ߓߍ߫ ߒ߬ ߧߋ߫ ߸ ߒ߬ ߝߣߊ߫ ߕߎ߲߬ ߥߴߊ߲ ߣߍ߰ߓߐ߫ ߢߌ߲߬ ߠߎ߬ ߟߊ߫ ߞߏ ߘߐ߫ ߸ ߦߏ߫ ߊ߬ߟߎ߫ ߣߵߊ߬ߟߎ߫ ߣߍ߰ߓߐ߫ ߟߊ߫ ߒ߬ ߠߊ߫ ߞߏ߫ ߘߐ߫ ߣߌ߲߬ ߢߊ ߡߍ߲ ، ߒ߬ߓߵߊߟߊ߫ ߦߴߊ߬ߟߎ߬ ߗߋߥߊߟߌ ߟߎ߫ ߦߌ߬ߘߊ߬ ߟߴߊ߬ߟߎ߬ ߟߊ߫ ߣߡߌߛߊ ߟߎ߬ ߘߌ߫ ߕߋ߲߬ ߠߋ߬ ، ߞߏ߬ߣߌ߲߬ ߝߋߎ߫ ߊ߬ߟߎ߬ ߕߍߣߊ߬ ߓߐ߫ ߟߊ߫ ߕߊ ߘߐ߫ ﴿167﴾

ߤߍ߲߬ ߊߟߎ߬ ߡߐ߱ ߟߎ߬ ߸ ߊߟߎ߫ ߦߋ߫ ߘߎ߰ߞߟߏ ߞߊ߲߬ ߝߋ߲߫ ߘߤߊ߬ߣߍ߲߬ ߢߌߡߊ ߓߍ߯ ߘߏ߫ ߘߊߥߎ߲߫ ߝߛߊߦߌ߫ ߸ ߓߊ߬ߙߌ߬ ߊߟߎ߫ ߞߣߊ߫ ߜߍ߬ߘߍ ߜߋ߬ߙߋ ߟߎ߬ ߟߊߓߊ߬ߕߏ߫ ߘߋ߬ ، ߓߊ ߏ߬ ߦߴߊߟߎ߫ ߖߎ߯ ߘߐߜߍ ߖߍ߬ߘߍ ߟߋ߬ ߘߌ߫ ﴿168﴾

ߏ߬ ߦߴߊߟߎ߫ ߟߐ߬ ߟߊ߫ ߖߎ߯ߡߊ߲ ߣߌ߫ ߞߏߙߏ߲ߧߊ ߟߋ߬ ߟߊ߫ ߸ ߊ߬ ߣߌ߫ ߞߵߊߟߎ߫ ߟߐ߬ ߝߋ߲߫ ߝߐ߫ ߟߴߊߟߊ߫ ߡߊ߬ ߊߟߎ߫ ߡߊ߫ ߡߍ߲ ߟߐ߲߫ ﴿169﴾

ߣߴߊ߬ ߝߐ߫ ߘߴߊ߬ߟߎ߬ ߦߋ߫ ߞߏ߫ ߊߟߎ߫ ߦߋ߫ ߊߟߊ߫ ߟߊ߫ ߟߍߙߊ߫ ߟߊߖߌ߰ߣߍ߲ ߠߊߓߊ߬ߕߏ߬ ߸ ߊ߬ߟߎ߬ ߘߴߊ߬ ߝߐ߫ ߞߏ߫: ߍ߲߬ߍ߲ߍ߲߬ ߸ ߊ߲ ߣߵߊ߲ ߝߊ߬ ߟߎ߫ ߕߘߍ߬ ߟߊ߫ ߡߍ߲ ߞߊ߲߬ ߊ߲ ߧߴߏ߬ ߟߋ ߟߊߓߊ߬ߕߏ߬ ߟߊ߫ ، ߋ߫ ߸ ߤߟߴߊߟߎ߫ ߝߊ߭ ߟߎ߫ ߕߎ߲߬ ߕߍ߫ ߝߏߦߌ߬ ߢߊߦߋ߫ ߟߊ߫ ߸ ߤߟߴߊ߬ߟߎ߫ ߕߎ߲߬ ߕߍ߫ ߞߊ߲ߘߦߊ߫ ߞߊ߲߬؟ ﴿170﴾

ߓߊ߲߬ߓߊ߮ ߟߎ߬ ߟߊߒߡߊ ߟߋ߬ ߸ ߦߏ߫ ( ߡߐ߱ ) ߡߍ߲ ߦߋ߫ ߊ߬ ߞߊ߲ߠߊߓߐ߫ ߟߊ߫ ߝߋ߲߫ ߡߊ߬ ߸ ߕߟߏ߫ ߕߍ߫ ߡߍ߲ ߞߎ߲߬ ، ߝߏ߫ ߊ߬ߟߋ߬ ߦߋ߫ ߞߟߌߟߌ ߣߌ߫ ߜߋߟߋ߲ߜߋߟߋ߲ߠߌ߲ ߠߋ߬ ߘߐߙߐ߲߫ ߠߊ߫ ، ߕߟߏߜߋߘߋ߲ ߠߎ߫ ߟߋ߬ ، ߝߎߦߋ߲ ߠߎ߫ ߟߋ߬ ، ߊ߬ߟߎ߬ ߕߍ߫ ߝߏߦߌ߫ ߝߊ߰ߡߎ߲߬ ߠߊ߫ ﴿171﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߝߋ߲߫ ߢߌߡߊ ߟߎ߬ ߘߏ߫ ߘߊߥߎ߲߫ ߊ߲ ߞߵߊߟߎ߫ ߤߊ߬ߙߌ߬ߖߍ߰ ߡߍ߲ ߠߎ߬ ߟߊ߫ ߸ ߊ߬ ߣߴߊߟߎ߫ ߞߏߢߌߡߊߟߐ߲ ߞߍ߫ ߊߟߊ߫ ߦߋ߫ ߣߴߊߟߎ߫ ߞߍ߫ ߘߴߊ߬ ߓߊ߬ߕߏ߬ ߞߏ ߘߐ߫ ﴿172﴾

ߝߋ߲ ߡߍ߲ ߠߎ߬ ߟߊߕߐ߲ߣߍ߲߫ ߊߟߎ߫ ߡߊ߬ ߸ ߏ߬ ߟߎ߫ ߟߋ߬ ߛߊ߲ߞߌߘߊ߲ ߘߌ߫ ߸ ߊ߬ ߣߌ߫ ߖߋ߬ߟߌ ߣߌ߫ ߟߍ߬ ߛߓߏ ߘߌ߫ ߸ ߊ߬ ߣߌ߫ ߞߎߟߋ߫ ߞߍߣߍ߲߫ ߝߋ߲ ߡߍ߲ ߠߴߊߟߊ߫ ߕߊ߬ߣߊ ߘߏ߫ ߦߋ߫ ، ߒ߬ߞߊ߬ ߣߌ߫ ߡߍ߲ ߘߋ߬ߥߎ߬ ߘߊ߫ ߞߵߊ߬ ߕߘߍ߬ ߡߙߎߕߌߓߊ߯ ߕߍ߫ ߖߊ߲߬ߘߊ߬ߓߊ߯ ߕߍ߫ ߸ ߖߟߎ߬ߡߎ߲߬ ߕߴߏ߬ ߡߊ߬ ( ߝߋ߲߫ ߠߊߕߐ߲ߣߍ߲ ߘߏ߫ ߘߊߥߎ߲ ߘߐ߫ ) ߸ ߓߊ ߊߟߊ߫ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿173﴾

ߡߍ߲ ߠߎ߬ ߦߋ߫ ߊߟߊ߫ ߟߊ߫ ߟߍߙߊ߫ ߟߊߖߌ߰ߣߍ߲ ߞߊ߲ ߘߏ߲߰ ߠߊ߫ ߸ ߊ߬ ߣߴߊ߬ߟߎ߬ ߦߴߏ߬ ߝߙߋ߬ ߟߊ߫ ߛߐ߲߬ߞߐ߬ߣߍ߲߬ ߕߜߋ ߟߊ߫ ߸ ߏ߬ ߟߎ߬ ߕߍ߫ ߝߏߦߌ߬ ߟߊߘߏ߲߬ ߠߴߊ߬ߟߎ߬ ߞߣߐ߫ ߏ߬ ߘߌ߫ ߝߏ߫ ߕߊ ߸ ߊߟߊ߫ ߕߍߣߊ߬ ߞߎߡߊ߫ ߟߴߏ߬ ߟߎ߫ ߝߍ߬ ߟߐ߬ߓߊ ߟߏ߲ ߸ ߊ߬ ߕߴߊ߬ߟߎ߬ ߛߊߣߌ߲ߧߊ߫ ، ߊ߬ߟߎ߫ ߘߏ߲߬ ߢߍߛߌ߰ߣߍ߲߫ ߖߊ߲߰ߞߕߊ߬ ߘߌߡߌ߲ߣߍ߲ ߠߋ߬ ߟߊ߫ ﴿174﴾

ߏ߬ ߟߎ߫ ߟߋ߫ ߣߊ߬ ߝߌ߬ߟߌ ߛߊ߲߬ ߠߊ߫ ߞߏ߫ ߞߊ߲ߘߦߊ ߟߴߏ߬ ߘߌ߫ ، ߞߊ߬ ߖߊ߲߰ߞߕߊ ߛߊ߲߬ ߞߏ߫ ߦߝߊ߬ߟߌ ߟߴߏ߬ ߘߌ߫ ، ߡߋ߬ߘߋ ߣߵߏ߬ ߟߎ߬ ߦߟߌߟߊߕߍ߰ ߟߊ߫ ߕߊ ߡߊ߬ ߕߋ߲߬؟ ﴿175﴾

ߏ߬ ߘߏ߲߬ ߞߎ߲߭ ߠߋ߬ ߸ ߓߊߏ߬ ߊߟߊ߫ ߞߊ߬ ߟߍߙߊ ߟߊߖߌ߰ ߕߎ߬ߢߊ ߟߋ߬ ߟߊ߫ ، ߒ߬ߞߊ߬ ߡߍ߲ ߠߎ߫ ߞߊ߬ ߢߐ߲߮ ߛߐ߬ߛߐ߬ ߟߍߙߊ ( ߞߏߢߊ ) ߘߐ߫ ߸ ߏ߬ ߟߎ߬ ߦߋ߫ ߝߘߊߟߌ߫ ߟߋ߬ ߘߐ߫ ߡߍ߲ ߊ߬ߟߎ߬ ߦߌߟߡߊߖߊ߲߬ߧߊ߬ ߟߊ߫ ߢߐ߲߮ ߠߊ߫ ﴿176﴾

ߢߌ߬ߡߊ߬ߦߊ ߕߍ߫ ߊߟߎ߫ ߢߊ ߓߍ߲߭ ߘߌ߫ ߕߟߋ߬ߓߐ ߣߌ߫ ߕߟߋ߬ߓߋ ߝߊ߲߭ ߠߎ߬ ( ߘߐߙߐ߲߫ ) ߡߊ߬ ، ߓߊ߬ߙߌ߬ ߢߌ߬ߡߊ߬ߦߊ ߦߋ߫ ߡߐ߰ ߟߋ߬ ߕߊ߫ ߘߌ߫ ߡߍ߲ ߓߊ߯ ߘߍ߲߬ߞߣߍ߬ߦߴߊߟߊ߫ ߡߊ߬ ߸ ߟߏ߲ߠߊߓߊ߲ ߡߊ߬ ߸ ߡߟߍ߬ߞߊ ߟߎ߫ ߡߊ߬ ߸ ߟߍߙߊ ߡߊ߬ ߸ ߟߊ߬ߝߐ߬ߓߊ߮ ߟߎ߫ ߡߊ߬ ، ߊ߬ ߣߌ߫ ߞߊ߬ ߣߊ߲߬ߝߟߏ ߘߴߊ߬ ߟߊߘߌߦߊߢߍ ߞߊ߲߬ ߡߊ߬ߛߎ߬ߘߎ߲߬ߧߊ߬ߓߊ߮ ߟߎ߫ ߡߊ߬ ߸ ߝߊߙߌߕߊ ߟߎ߫ ߡߊ߬ ߸ ߘߐ߰ߕߐ ߟߎ߫ ߡߊ߬ ߸ ߛߌߟߊߘߋ߲ ߡߊ߬ ߸ ߕߙߊߟߌߟߊ ߟߎ߫ ߡߊ߬ ߸ ߞߊ߲ ߠߎ߬ ߤߙߐߦߊ ߘߐ߫ ، ߊ߬ ߣߌ߫ ߡߍ߲ ߓߊ߯ ߛߊߟߌ ߟߐ߬ ߞߊ߬ ߖߞߊ ߘߌ߫ ߸ ߊ߬ ߣߌ߫ ߡߍ߲ ߠߎ߬ ߦߴߊ߬ߟߎ߬ ߟߊ߫ ߟߊ߬ߤߘߌ߫ ߕߊ߬ߣߍ߲ ߠߎ߬ ߝߊ߫ ߟߊ߫ ، ߊ߬ ߣߌ߫ ߡߍ߲ ߠߎ߬ ߦߴߊ߬ߟߎ߫ ߡߎ߬ߢߎ߲߬ ߠߊ߫ ߕߣߊ߬ߡߊ ߟߎ߬ ߣߌ߫ ߕߙߐߦߊ ߟߎ߬ ߣߌ߫ ߞߟߍ߬ ߕߎߡߊ ߟߎ߬ ߘߐ߫ ، ߒ߬ߓߊ߬ ߏ߬ ߟߎ߫ ߟߋ߬ ߕߎ߬ߢߊ ߞߊ߲߬ ߸ ߏ߬ ߟߎ߫ ߟߋ߫ ߘߏ߲߬ ߝߊ߲ߕߊ߲ߞߟߊ ߟߎ߬ ߘߌ߫ ﴿177﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߕߊߢߐ߲߯ߓߐ ߓߘߊ߫ ߛߓߍ߫ ߊߟߎ߫ ߡߊ߬ ߝߊ߰ߓߊ߰ߕߐ ߟߎ߬ ߘߐ߫ ، ߤߙߐ ߦߋ߫ ߤߙߐ ߢߐ߲߮ ߘߌ߫ ߝߊ߰ߟߌ ߘߐ߫ ߸ ߖߐ߲߭ ߦߋ߫ ߖߐ߲߭ ߢߐ߲߮ ߘߌ߫ ߸ ߡߏ߬ߛߏ ߦߋ߫ ߡߏ߬ߛߏ ߢߐ߲߮ ߘߌ߫ ، ߝߋ߲ ߘߏ߫ ߓߊ߯ ߘߐߞߏߦߊߕߏ߫ ߡߍ߲ ߦߋ߫ ߊ߬ ߓߊߘߋ߲ ߓߟߏ߫ ߸ ߏ߬ ߣߐ߬ߝߍ߬ߜߍ߲ ߦߋ߫ ߘߐߣߐ߰ߦߊ߫ ( ߦߝߊ߬ߟߊ ߓߟߏ߫ ) ߸ ߊ߬ ߣߌ߫ ߢߍ߬ߢߌ߲߬ߘߐ߬ߓߍ߲ ߦߋ߫ ߘߌ߫ ߦߝߊ߬ߓߊ߮ ߡߊ߬ ߝߊ߰ߟߌ߬ߟߊ ߓߟߏ߫ ߞߊ߬ߡߙߊ߬ߒ߬ߞߋ߬ߦߊ ߟߊ߫ ، ߏ߬ ߦߋ߫ ߞߏߘߐߣߐ߲߯ߦߊ߫ ߣߌ߫ ߤߌߣߊ߫ ߟߋ߬ ߘߌ߫ ߊߟߎ߫ ߡߊ߰ߙߌ ߓߟߏ߫ ، ߡߍ߲ ߠߋ߬ ߓߊ߯ ߖߊ߲߬ߘߊ߬ ߞߍ߫ ߏ߬ ߞߐ߫ ߡߎ߬ߕߎ߲߬ ߸ ߖߊ߲߬ߞߕߊ߬ ߘߌߡߌ߲ߣߍ߲ ߘߌ߫ ߟߴߏ߬ ߞߊ߲߬ ﴿178﴾

ߣߌ߫ ߟߊߞߊ߲ߘߊ߫ ߟߋ߬ ߊߟߎ߫ ߦߋ߫ ߕߊߢߐ߲߯ߓߐ ߘߐ߫ ߸ ߏ߬ ߝߕߐ߫ ߊߟߎ ߤߊߞߟߌߡߊ ߟߎ߬ ߦߋ߫ ߟߋ߬ ߸ ߛߴߊߟߎ߫ ߘߌ߫ ߕߊ߲߬ߞߊ߬ ( ߢߐ߲߯ ߝߊ߯ ߛߌߦߊߡߊ߲ ߡߊ߬) ﴿179﴾

ߛߙߊ߬ߒ߬ߞߊ߲߬ߠߊ ߓߘߊ߫ ߛߓߍ߫ ߊߟߎ߫ ߡߊ߬ ߸ ߣߌ߫ ߛߊ߬ߦߊ ߛߋ߫ ߘߴߊߟߎ߫ ߘߏ߫ ߡߊ߬ ߸ ߣߌ߫ ߣߊ߲߬ߝߟߏ߬ ߘߌ߫ ߕߏ߫ ߡߍ߲ ߞߐ߫ ߸ ߏ߬ ߦߴߊ߬ ߛߙߊ߬ ߢߌ߬ߡߊ߬ ߞߍ ߘߐ߫ ߡߏߦߌߓߊ߯ ߝߌ߬ߟߊ ߣߌ߫ ߓߊߘߋ߲ߡߊ߫ ߛߎߘߎ߲ ߠߎ߬ ߦߋ߫ ߞߍߢߊ߫ ߡߊߟߐ߲ߣߍ߲߫ ߡߊ߬ ߸ ߏ߬ ߓߘߊ߫ ߞߍ߫ ߛߋ߲ߛߋߘߋ߲ ߘߌ߫ ߝߊ߲ߕߊ߲ߞߟߊ ߟߎ߫ ߡߊ߬ ﴿180﴾

ߒ߬ߓߊ߬ ߣߌ߫ ߡߍ߲ ߞߊ߬ ߛߙߊ߬ߒ߬ߞߊ߲߬ߠߊ ߡߊߝߊ߬ߟߋ߲߬ ߊ߬ ߡߍ߲ߣߍ߲ ߞߐ߫ ߊ߬ ߓߟߏ߫ ߛߎߋ߯ ߸ ߏ߬ ߖߟߎ߬ߡߎ߲ ߦߴߊ߬ ߡߊߝߊ߬ߟߋ߲߬ߓߊ߮ ߟߎ߫ ߟߋ߬ ߞߎ߲߬ ߸ ߊߟߊ߫ ߘߏ߲߬ ߦߋ߫ ߡߍ߲ߠߌ߲ߠߊ߫ ߘߌ߫ ߸ ߊ߰ ߟߐ߲ߠߌ߲ߠߊ߫ ߘߌ߫ ﴿181﴾

ߣߌ߫ ߡߍ߲ ߛߌߟߊ߲߫ ߘߊ߫ ߛߙߊ߬ߒ߬ߞߊ߲߬ߠߊ߬ߓߊ߮ ߖߍ߲߬ߞߍ߬ ߢߊ ߢߍ߫ ߥߟߴߊ߬ ߖߟߎ߬ߡߎ߲ ߢߍ߫ ߞߵߊ߬ߟߎ߬ ߕߍ ߘߐߓߍ߲߬ ߸ ߖߟߎ߬ߡߎ߲߬ ߕߴߏ߬ ߡߊ߬ ، ߓߊ ߊߟߊ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿182﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ، ߛߎ߲߫ ߘߏ߲ ߓߘߊ߫ ߛߓߍ߫ ߊߟߎ߫ ߡߊ߬ ߸ ߦߏ߫ ߊ߬ ߛߓߍ߫ ߘߴߊߟߎ߫ ߢߍߓߊ߮ ߟߎ߫ ߡߊ߬ ߢߊ ߡߍ߲ ߸ ߖߐ߲߬ߛߴߊߟߎ߫ ߘߴߊߟߎ߫ ߝߊ߲ߕߊ߲߬ߞߊ߫ ﴿183﴾

ߊ߬ ߟߏ߲ ߠߎ߬ ߦߙߌߞߊߣߍ߲߫ ߠߋ߬ ، ߊ߬ ߓߊ߯ ߊߟߎ߫ ߡߍ߲ ߕߘߍ߬ ߖߊ߲߬ߞߊ߬ߙߏ߬ ߘߐ߫ ߥߟߊ߫ ߕߊ߯ߡߊ߫ ߘߐ߫ ߸ ߏ߬ ߦߋ߫ ߟߏ߲߫ ߖߎ߬ߟߎߕߊ߬ߣߍ߲ ߠߎ߫ ߖߊ߬ߕߋ߫ ߞߵߊ߬ ߛߙߊ߬ ߟߏ߲߫ ߜߘߍ߫ ߟߎ߫ ߘߐ߫ ، ߟߊ߬ߣߐ ߡߍ߲ ߠߎ߬ ߦߋ߫ ߸ ߏ߬ ߟߎ߬ ߘߴߊ߬ ߞߎ߲߬ߞߊ߬ ߸ ߞߵߏ߬ ߞߍ߫ ߘߐ߰ߕߐ ߘߏ߫ ߓߊߟߏ ߘߌ߫ ، ߣߌ߫ ߡߍ߲ ߘߏ߲߬ ߞߊ߬ ߤߙߊ߫ ߜߘߍ߫ ߓߐ߫ ߊ߬ ߖߘߍ߬ ߘߐ߫ ߸ ߏ߬ ߘߌ߫ ߞߴߏ߬ ߦߋ߫ ߤߙߊ߫ ߘߌ߫ ، ߣߴߊߟߎ߫ ߘߏ߲߬ ߞߊ߬ ߛߎ߲ ߘߏ߲߬ ߕߟߋߡߊ߬ ߸ ߏ߬ ߟߋ ߘߌߡߊ߲߫ ߊߟߎ߫ ߟߊ߫ ߣߴߊ߬ ߕߘߍ߬ ߘߴߊߟߎ߫ ߘߴߊ߬ ߢߊߦߋ߫ ﴿184﴾

ߛߎ߲ߞߊߙߏ ߡߍ߲ ߣߌ߲߬ ߸ ߞߎ߬ߙߊ߬ߣߊ ߟߊߖߌ߰ ߘߴߊ߬ߟߋ ߟߋ߬ ߟߊ߫ ߸ ߞߵߊ߬ ߞߍ߫ ߞߊ߲ߘߊ ߘߌ߫ ߡߐ߱ ߟߎ߬ ߦߋ߫ ، ߊ߬ ߣߌ߫ ߞߵߊ߬ ߞߍ߫ ߞߊ߲ߘߦߊ ߘߊ߬ߟߎ ߟߎ߬ ߣߌ߫ ߝߊߙߊ߲ߝߊߛߌߟߊ߲ ߘߌ߫ ، ߊߟߎ߫ ߡߍ߲ ߓߊ߯ ߞߍ߫ ߛߏ߫ ߛߌ߯ߓߊ߯ ߘߴߊ߬ߟߋ߬ ߞߊߙߏ ߟߊ߫ ߸ ߏ߬ ߦߴߊ߬ ߛߎ߲߫ ( ߠߋ߬ ߕߘߋ߫) ߸ ߣߌ߫ ߡߍ߲ ߖߊ߲߬ߞߊ߬ߙߏ߬ߕߐ߫ ߞߍ߫ ߘߊ߫ ߥߟߴߊ߬ ߦߋ߫ ߕߊ߯ߡߊ߫ ߘߐ߫ ߸ ߏ߬ ߦߋ߫ ߖߎ߬ߟߎ߫ ߕߊ߬ߣߍ߲ ߠߎ߬ ߦߙߌߞߊ߫ ߸ ߞߵߊ߬ ߛߙߊ߬ ߟߏ߲߫ ߜߘߍ߫ ߟߎ߫ ߘߐ߫ ، ߊߟߊ߫ ߦߋ߫ ߣߐ߰ߦߊ߫ ߟߋ߬ ߢߌߣߌ߲߫ ߠߴߊߟߎ߫ ߦߋ߫ ߸ ߊ߬ ߕߍ߫ ߜߟߍ߬ߦߊ߬ ߢߌߣߌ߲߫ ߠߴߊߟߎ߫ ߦߋ߫ ، ߊߟߎ߫ ߞߏ߬ߣߌ߲ ߦߋ߫ ߦߙߌߞߊ ߘߝߊ߫ ߘߋ߬ ، ߊ߬ ߣߴߊߟߎ߫ ߦߋ߫ ߊߟߊ߫ ߟߊ߫ ߓߏ߲߬ߧߊ ߝߐ ߟߊߥߊ߲߬ߞߊ߲߫ ߞߊ߬ߡߊߛߐ߬ߘߐ߲߬ ߊ߬ ߞߵߊߟߎ߫ ߞߊ߲ߘߊ ߡߍ߲ ߞߍ߫ ، ߏ߬ ߟߋ ߘߏ߲߬ ߘߴߊ߬ ߞߍ߫ ߊߟߎ߫ ߘߌ߫ ߞߏߢߌߡߊߟߐ߲ ߞߍ߫ ( ߊ߬ ߦߋ߫) ﴿185﴾

ߣߌ߫ ߒ߬ ߠߊ߫ ߖߐ߲߭ ߠߎ߫ ߞߊ߬ ߒ ߡߊߢߌ߬ߣߌ߲߬ߞߊ߬ ߌ ߟߊ߫ ߸ ߒ߬ߓߊ߬ ߒߠߋ ߡߊߛߎ߬ߘߎ߲߬ߡߊ߲߫ ߠߋ߬ ߜߐߞߎ߫ ، ߒ ߘߏ߲߬ ߦߋ߫ ߞߟߌߟߌߟߊ ߟߊ߫ ߞߟߌߟߌ ߖߋ߬ߓߌ߬ ߟߊ߫ ߸ ߣߴߊ߬ ߞߊ߬ ߒ ߞߟߌ߫ ، ߞߏ߬ߣߵߊ߬ߟߎ߬ ߝߣߊ߫ ߦߋ߫ ߒ ߖߋ߬ߓߌ߫ ߘߋ߬ ، ߊ߬ ߣߴߊ߬ߟߎ߬ ߦߋ߫ ߘߍ߲߬ߞߣߍ߬ߦߊ߬ ߒ ߡߊ߬ ߸ ߏ߬ ߟߋ ߘߴߊ߬ ߞߍ߫ ߊ߬ߟߎ߬ ߘߌ߫ ߞߊ߲ߘߊ߫ ﴿186﴾

ߊߟߎ߫ ߡߏ߬ߛߏ ߟߎ߫ ߞߊ߬ߝߏ߬ߢߐ߲߰ߦߊ ߘߤߊ߬ߣߍ߲߫ ߊߟߎ߫ ߦߋ߫ ߛߎ߲ߞߊߙߏ ߛߎ ߟߎ߬ ߘߐ߫ ، ߓߊ ߏ߬ ߟߎ߬ ߦߴߊߟߎ߫ ߛߘߌ߬ߝߊ߯ߣߌ߲߫ ߠߋ߬ ߘߌ߫ ߸ ߊߟߎ߫ ߝߣߊ߫ ߦߴߊ߬ߟߎ߫ ߛߘߌ߬ߝߊ߯ߣߌ߲߫ ߠߋ߬ ߘߌ߫ ، ߊߟߊ߫ ߞߵߊ߬ ߟߐ߲߫ ߞߏ߫ ߊߟߎ߫ ߕߘߍ߬ ߊߟߎ߫ ߖߍ߬ߘߍ߫ ߖߊ߲߬ߝߊ߬ ߟߴߏ߬ ߟߎ߬ ߟߊ߫ ߞߏߢߊ ߘߐ߫ ، ߏ߬ ߟߋ ߞߵߊ߬ ߞߍ߫ ߊ߬ ߞߊ߬ ߖߘߍ߬ߟߊ߬ߛߊߦߌ߲ ߡߌ߬ߘߵߊߟߎ߫ ߦߋ߫ ߞߊ߬ ߜߊ߲ߒߞߎ߲ߠߊ ߞߍ߫ ߊߟߎ߫ ߦߋ߫ ، ߏ߬ ߘߐ߫ ߛߌߛߍ߲߬ ߸ ߊߟߎ߫ ߦߴߊ߬ߟߎ߬ ߟߊߢߐ߲߯ߦߊ߫ ߞߊ߬ ߝߋ߲߫ ߢߌߣߌ߲߫ ( ߊ߬ߟߎ߬ ߟߊ߫ ) ߊߟߊ߫ ߞߊ߬ ߡߍ߲ ߛߓߍ߫ ߊߟߎ߫ ߡߊ߬ ، ߊ߬ ߣߴߊߟߎ߫ ߦߋ߫ ߘߊߥߎ߲ߠߌ߲ ߣߌ߫ ߡߌ߲߬ߠߌ߲ ߞߍ߫ ߝߎߚߎ߫ ߝߏ߫ ߞߊߙߌ߫ ߜߍ ߣߌ߫ ߞߊߙߌ߫ ߝߌ߲ ߘߊ߲߬ߕߍ߰ߓߐ ߦߋ߫ ߟߊ߲ߞߣߍߡߊ߫ ߊߟߎ߫ ߦߋ߫ ߖߍߡߎߙߍ߲ ߞߣߍߦߊ ߓߟߏ߫ ، ߏ߬ ߞߐ߫ ߊߟߎ߫ ߛߎ߲ ߞߎ߲߬ߘߏ߲߬ ߞߵߊ߬ ߛߌ߰ ߛߎ ߟߊ߫ ، ߞߏ߬ߣߵߊߟߎ߫ ߞߊߣߵߊ߬ߟߎ߬ ߟߊߢߐ߲߯ߦߊ߫ ߘߋ߬ ߞߵߊ߬ ߕߘߍ߬ ߊߟߎ߫ ߦߋ߫ ߓߊ߬ߕߏ ߘߊ߯ߡߊߞߍ ߘߐ߫ ߡߌ߬ߛߙߌ ߟߎ߬ ߟߊ߫ ، ߊߟߊ߫ ߟߊ߫ ߞߎ߬ߙߎ߲߬ߘߎ ߟߎ߫ ߟߋ߬ ( ߢߊߝߐ߫ ߞߊ߲߫ ) ߣߌ߲߬ ߸ ߊߟߎ߫ ߞߊߣߵߊߟߎ߫ ߡߊߘߏ߲߬ ߏ߬ ߟߎ߬ ߟߊ߫ ߘߋ߬ ، ߒ߬ߓߵߊߟߊ߫ ߦߴߊ߬ ߟߊ߫ ߟߝߊߙߌ ߟߎ߬ ߘߐߞߣߍ߫ ߟߊ߫ ߡߐ߱ ߟߎ߬ ߦߋ߫ ߕߊ߲߬ ߠߋ߬ ߛߴߊ߬ߟߎ߬ ߘߴߊ߬ߟߎ߬ ߝߊ߲ߕߊ߲߬ߞߊ߫ ﴿187﴾

ߊߟߎ߫ ߞߊߣߊ߬ ߢߐ߲߮ ߠߊ߫ ߣߊ߲߬ߝߟߏ ߟߎ߬ ߘߊߥߎ߲߫ ߊߟߎ߫ ߣߌ߫ ߢߐ߲߮ ߕߍ߫ ߣߊ߲߬ߞߊ߬ߡߎ߲߬ߣߊ߲ߞߊߡߎ߲ ߠߊ߫ ߘߋ߬ ߸ ߊ߬ ߣߌ߫ ߞߊ߬ ߥߊߟߌ߫ ߣߊ߲ߝߟߏ ߟߎ߬ ߟߊߛߋ߫ ߞߕߌ߫ ߕߍ߯ߟߊ ߟߎ߫ ߡߊ߬ ߸ ߛߴߊߟߎ߫ ߘߌ߫ ߘߏ߫ ߘߊߥߎ߲߫ ߡߐ߱ ߟߎ߬ ߟߊ߫ ߣߊ߲߬ߝߟߏ ߘߐ߫ ߤߊߞߍ ߟߊ߫ ߞߵߊ߬ ߕߘߍ߬ ߊߟߎ߫ ߞߵߊ߬ ߟߐ߲߫ ߞߋ߲߫ ﴿188﴾

ߊ߬ߟߎ߫ ߣߊ߬ߕߐ߫ ߌ ߢߌ߬ߣߌ߲߬ߞߊ߬ ߟߊ߫ ߞߊߙߏ߫ ߢߋߙߌ߲ ߠߎ߫ ߡߊ߬ ، ߊ߬ߟߎ߫ ߖߋ߬ߓߌ߬ ߞߴߏ߬ ߟߎ߬ ߦߋ߫ ߥߊ߯ߕߌߦߊ߫ ߝߋ߲ ߠߎ߫ ߟߋ߬ ߘߌ߫ ߡߐ߱ ߟߎ߬ ߦߋ߫ ߸ ߊ߬ ߣߌ߫ ߡߊ߬ߓߊߕߏ ߦߋ߫ ( ߤߖߌ ߦߋ߫ ߞߊ߬ߣߌ߲߫ ) ، ߞߏ߬ߣߌ߲߬ ߢߌ߬ߡߊ߬ߦߊ ߕߍ߫ ߊߟߎ߫ ߥߊ ߘߌ߫ ߓߏ߲ ߠߎ߬ ߟߴߊ߬ߟߎ߬ ߞߕߐߟߊ ߟߎ߫ ߝߍ߬ ߸ ߞߏ߬ߣߌ߲߬ ߢߌ߬ߡߊ߬ߦߊ ߦߋ߫ ߡߐ߰ ߟߋ߬ ߕߊ ߘߌ߫ ߡߍ߲ ߓߊ߯ ߊ߬ ߝߊ߲ߕߊ߲߬ߞߊ߫ ، ߏ߬ ߘߐ߫ ߸ ߊߟߎ߫ ߥߊ߫ ߓߏ߲ ߠߎ߬ ߟߴߊ߬ߟߎ߬ ߘߊ ߟߎ߫ ߟߋ߫ ߝߍ߬ ، ߊ߬ ߣߌ߫ ߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߸ ߏ߬ ߟߋ ߘߴߊ߬ ߞߍ߫ ߊߟߎ߫ ߘߌ߫ ߛߎߘߊ߲߫ ﴿189﴾

ߊߟߎ߫ ߦߋ߫ ߡߐ߰ ߟߎ߫ ߟߋ߫ ߞߟߍ߬ ߊߟߊ߫ ߛߌߟߊ ߞߊ߲߬ ߸ ߡߍ߲ ߠߎ߬ ߦߴߊߟߎ߫ ߞߟߍ߬ ߟߊ߫ ، ߞߏ߬ߣߵߊߟߎ߫ ߞߊߣߊ߬ ߖߊ߲߬ߘߊ ߞߍ߫ ( ߞߊ߬ ߛߋ߫ ߡߐ߰ ߜߘߍ߫ ߡߊ߬ ߘߋ߬ ) ߸ ߓߊߏ߬ ߊߟߊ߫ ߕߍ߫ ߖߊ߲߬ߘߊ߬ߓߊ߮ ߟߎ߫ ߝߍ߬ ﴿190﴾

ߊߟߎ߫ ߓߴߊ߬ߟߎ߫ ߕߘߍ߬ ߝߊ߲߬-ߊ-ߝߊ߲߬ ߊߟߎ߫ ߦߴߊ߬ߟߎ߫ ߝߌ߬ߙߌ߲߬ߕߊߥߏ߫ ߦߋ߲߬ ، ߊ߬ߟߎ߫ ߞߵߊߟߎ߫ ߟߊߓߐ߫ ߦߙߐ ߡߍ߲ ߠߎ߬ ߘߐ߫ ߸ ߊߟߎ߫ ߦߴߊ߬ߟߎ߬ ߟߊߓߐ߫ ߦߋ߲߬ ߓߍ߯ ߘߐ߫ ، ߥߊ߬ߥߎߟߋ ߟߋ߬ ߦߊ߯ ߜߍ߬ߟߍ߲߫ ߝߊ߰ߟߌ ߘߌ߫ ، ߊߟߎ߫ ߞߏ߬ߣߌ߲߬ ߞߊߣߵߊ߬ߟߎ߫ ߞߍ߬ߟߍ߫ ߡߌ߬ߛߙߌ߬ ߟߊߕߏߣߍ߲ ߘߟߊ߫ ߘߋ߬ ߸ ߝߏ߫ ߊ߬ߟߎ߬ ߓߊ߯ ߊߟߎ߫ ߞߍ߬ߟߍ߫ ߦߋ߲߬ ، ߣߴߊ߬ߟߎ߫ ߞߏ߬ߣߌ߲ ߞߵߊߟߎ߫ ߞߟߍ߬ ߸ ߊߟߎ߫ ߝߣߴߊ߬ߟߎ߫ ߞߟߍ߬ ، ߓߊ߲߬ߓߊ߮ ߟߎ߬ ߕߊ ߛߙߊ߬ ߢߊ ߟߴߏ߬ ߘߌ߫ ( ߓߊ߲߬ߓߊ߮ ߟߎ߬ ߦߋ߫ ߛߙߊ߬ ߟߊ߫ ߕߋ߲߬ ߠߋ߬) ﴿191﴾

ߣߴߊ߬ߟߎ߫ ߘߊ߲߬ ߘߊ߫ ( ߞߊ߬ ߞߍ߬ߟߍ ߓߟߏߞߊ߬ ߞߊ߬ߣߌ߲߬ ) ߸ ߊߟߊ߫ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿192﴾

ߞߏ߬ߣߌ߲߬ ߊߟߴߊ߬ߟߎ߫ ߞߍ߬ߟߍ߫ ߟߋ߬ ߝߎߚߎ߫ ߸ ߝߏ߫ ߥߊ߬ߥߎ߬ߟߋ߬ ߛߌ߫ ߞߊߣߊ߬ ߞߍ߫ ߡߎ߬ߕߎ߲߬ ، ߊ߬ ߣߌ߫ ߝߏ߫ ߘߌ߯ߣߊ ߦߋ߫ ߞߍ߫ ߊߟߊ߫ ߕߊ ߘߌ߫ ، ߣߴߊ߬ߟߎ߫ ߞߏ߬ߣߌ߲ ߘߊ߲߬ ߘߊ߫ ߸ ߖߎ߯ߦߊ߫ ߞߣߊ߫ ߟߐ߬ ߡߐ߰ ߛߌ߫ ߡߊ߬ ߡߎ߬ߕߎ߲߬ ߝߏ߫ ߕߐ߬ߢߍ߰ߒߕߋ ߟߎ߬ ﴿193﴾

ߛߊ߲߬ߓߏ߬ߟߏ߲߬ ߠߊߕߏߕߊ ߟߋ߬ ߛߊ߲߬ߓߏ߬ߟߏ߲߬ ߠߊߕߏߕߊ ߢߐ߲߮ ߘߌ߫ ، ߏ߬ ߘߐ߫ ߸ ߕߣߊ߬ ߟߊߕߏߕߊ ߓߍ߯ ߦߋ߫ ߕߊߢߐ߲߯ߓߐ߫ ߞߏ߫ ߟߋ߬ ߘߌ߫ ، ߏ߬ ߟߋ ߞߏߛߐ߲߬ ߸ ߡߍ߲ ߓߊ߯ ߖߊ߲߬ߘߵߊߟߎ߫ ߡߊ߬ ߸ ߊߟߎ߫ ߝߣߊ߫ ߖߊ߲߬ߘߊ߫ ߏ ߡߊ߬ ߸ ߦߏ߫ ߊ߬ ߖߊ߲߬ߘߊ߬ߣߍ߲߫ ߊߟߎ߫ ߡߊ߬ ߢߊ ߡߍ߲ ، ߊ߬ ߣߴߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߸ ߊߟߎ߫ ߦߴߊ߬ ߟߐ߲߫ ߝߣߊ߫ ߞߏ߫ ߊߟߊ߫ ߦߋ߫ ߝߊ߲ߕߊ߲ߞߟߊ ߟߎ߫ ߟߋ߫ ߝߍ߬ ﴿194﴾

ߊߟߎ߯ ߖߘߍ߬ߡߊ߬ߓߐ ߞߍ߫ ߊߟߊ߫ ߛߌߟߊ ߘߐ߫ ، ߊߟߎ߫ ߘߏ߲߬ ߞߊߣߵߊߟߎ߫ ߓߟߏ ߟߎ߬ ߟߊߘߌ߫ ߖߘߍ߬ ߟߊ߬ߕߏ߬ߒߘߐ ߡߊ߬ ߘߋ߬ ، ߊߟߎ߫ ߦߋ߫ ߢߊ߬ ߟߋ߬ ߓߊߏ߬ ߢߊ߬ߓߊ߮ ߟߎ߫ ߟߋ߬ ߘߌߡߊ߲߫ ߊߟߊ߫ ߢߍ߫ ﴿195﴾

ߊߟߎ߫ ߦߋ߫ ߡߊ߬ߓߊߕߏ ߣߌ߫ ߡߍ߲߬ߛߍ߲߬ߦߊ ߓߍ߯ ߘߝߴߊߟߊ߫ ߦߋ߫ ߟߋ߬ ߖߐ߫ ، ߣߌ߫ ߛߌߟߊ ߕߍ߰ ߘߴߊߟߎ߫ ߢߍ߫ ߸ ߒ߬ߓߊ߬ ߡߍ߲ ߓߊ߯ ߣߐ߰ߦߊ߫ ߖߋ߬ߟߌ߬ ߓߐ߲߬ߕߊ ߘߐ߫ ߏ߬ ߘߐ߫ ߘߋ߬ ، ߊߟߎ߫ ߞߊߣߵߊߟߎ߫ ߞߎ߲߭ ߠߎ߬ ߟߌ߫ ߘߋ߬ ߝߏ߫ ߖߋ߬ߟߌ߬ ߓߐ߲߬ߕߊ ߓߊ߯ ߛߴߊ߬ ߛߕߊ ߦߌߟߊ ، ߒ߬ߓߊ߬ ߣߌ߫ ߡߍ߲ ߖߊ߲߬ߞߊ߬ߙߏ߬ߕߐ ߞߍ߫ ߘߊ߫ ߥߟߊ߫ ߘߌߡߌ߲߫ ߦߴߊ߬ ߞߎ߲߭ ߘߐ߫ ߸ ߏ߬ ߦߋ߫ ߞߎ߲߬ߟߌ ߏ߬ ߞߎ߲߬ߡߊ߬ߞߊ ߓߐ߫ ، ߏ߰ ߞߍ߫ ߛߎ߲߫ ߘߌ߫ ߥߟߊ߫ ߛߘߊߞߊ߫ ߘߌ߫ ߸ ߤߊߡߊ߲ߕߍ߫ ߖߋ߬ߟߌ߬ ߟߊ߬ߓߐ߲߫ ߘߌ߫ ، ߣߴߊߟߎ߫ ߞߍ߫ ߘߊ߫ ߞߎ߲߬ߠߊ߬ߝߎ߬ߟߋ߲߬ ߥߊ߯ߕߌ ߘߐ߫ ߸ ߡߍ߲ ߓߊ߯ ߘߊ߰ߡߎ߲߬ߦߊ ߞߍ߫ ߡߍ߲߬ߛߍ߲߬ߦߊ ߟߊ߫ ߏ߬ ߘߐ߫ ߞߊ߬ ߕߊ߯ ߡߊ߬ߓߊߕߏ ߡߊ߬ ߸ ߒ߬ߓߊ߬ ߡߍ߲ ߓߊ߯ ߣߐ߰ߦߊ߫ ߖߋ߬ߟߌ߬ ߓߐ߲߬ߕߊ ߘߐ߫ ߏ߬ ߘߐ߫ ߘߋ߬ ، ߣߌ߫ ߡߍ߲ ߡߴߏ ߛߐ߬ߘߐ߲߬ ߏ߬ ߦߋ߫ ߕߋ߬ߟߋ߫ ߛߓߊ߬ ߛߎ߲߫ ߡߊ߬ߓߊߕߏ ߘߐ߫ ߸ ߞߊ߬ ߥߐߙߐ߲ߥߌ߬ߟߊ߬ ߛߎ߲߫ ߣߴߊ߬ ߞߐߛߊ߬ߦߌ߲߬ ߘߊ߫ ߕߎ߬ߡߊ ߡߍ߲ ، ߏ߬ ߟߎ߬ ( ߟߊߘߍ߬ߣߍ߲ ) ߦߋ߫ ߕߟߋ߬ ߕߊ߲߫ ߘߝߊߣߍ߲ ߠߋ߬ ߘߌ߫ ، ߓߊ߬ߙߌ߬ ߏ߬ ߦߋ߫ ߡߐ߰ ߟߋ߬ ߡߊ߬ ߸ ߡߍ߲ ߞߐߙߍ ߕߍ߫ ߡߌ߬ߛߙߌ߬ ߟߊߕߏߣߍ߲ ߓߐ߰ߝߍ ߘߐ߫ ، ߊߟߎ߫ ߘߏ߲߬ ߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߘߋ߬ ߸ ߊ߬ ߣߴߊߟߎ߫ ߦߴߊ߬ ߟߐ߲߫ ߞߏ߫ ߊߟߊ߫ ߟߋ߬ ߓߌ߲߬ߓߊ߬ߥߏ߬ ߜߍߟߍ߲ ߕߌ߱ ߘߌ߫ ﴿196﴾

ߡߊ߬ߓߊߕߏ ߦߋ߫ ߛߊ߲߬ߓߏߟߏ߲߫ ߡߊߟߐ߲ߣߍ߲ ߠߎ߫ ߟߋ߬ ߘߌ߫ ߸ ߡߍ߲ ߓߊ߯ ߣߊߡߎ߲ߘߐߦߊ ߕߊ߬ ߏ߬ ߟߎ߬ ߝߋ߲-ߋ-ߝߋ߲߫ ߠߊ߫ ߸ ߏ߬ ߞߊߣߊ߬ ߗߍ߬ߣߌ߬ߡߛߏ߬ߦߊ߫ ߞߍ߫ ߊ߬ ߞߊ߫ ߔߊߟߊ߲ߞߊ߫ ߞߍ߫ ߸ ߊ߬ ߞߊ߫ ߥߐ߬ߦߐ ߛߎ߯-ߎ-ߛߎ߯ ߞߍ߫ ߡߊ߬ߓߊߕߏ ߘߐ߫ ، ߊߟߎ߫ ߘߏ߲߬ ߓߊ߯ ߤߙߊ ߡߍ߲ ߞߍ߫ ߸ ߊߟߊ߫ ߘߴߏ߬ ߟߐ߲߫ ، ߊߟߎ߫ ߝߊ߲ߘߊ߫ ߕߊ߬ ߸ ߝߊ߲ߘߊ ߘߐ߫ ߢߌ߬ߡߊ ߟߋ߬ ߝߊ߲ߕߊ߲ߞߊ ߘߌ߫ ، ߤߊ߲߫ ߸ ߊߟߎ߫ ߤߊߞߟߌߡߊ ߟߎ߬ ߦߴߊߟߎ߫ ߝߊ߲ߕߊ߲߬ߞߊ߬ ߒߠߋ ߡߊ߬ ߟߋ߫ ߘߋ߬ ﴿197﴾

ߕߍ߰ߡߊ߬ߛߌ߯ ߕߍ߫ ߊߟߎ߫ ߡߊ߬ ߤߊ߬ߙߌ߬ߖߍ߰ ߢߌߣߌ߲ ߘߐ߫ ߊߟߎ߫ ߡߊ߰ߙߌ ߟߊ߫ ، ߣߴߊߟߎ߫ ߓߐ߫ ߘߊ߫ ߊߙߊߝߊ߫ ߟߊ߫ ߸ ߊߟߎ߯ ߊߟߊ߫ ߞߏߝߐ߫ ߕߍ߲ߘߊ߫ ߟߊߕߏߣߍ߲ ߠߊ߫ ، ߊߟߎ߫ ߜߎ ߦߴߊߟߊ߫ ߞߏߝߐ߫ ߟߋ߬ ߦߏ߫ ߊ߬ ߞߵߊߟߎ߫ ߞߊ߲ߘߊ߫ ߢߊ ߡߍ߲ ، ߤߊߟߌ߬ ߣߴߊߟߎ߫ ߕߎ߲߬ ߞߍ߫ ߘߊ߫ ߝߟߌ߬ߓߊ߰ߒߕߋ ߟߎ߬ ߘߏ߫ ߘߌ߫ ߞߘߐ߬ߡߊ߲߫ ﴿198﴾

ߏ߬ ߞߐ߫ ߸ ߖߊ߬ߡߊ ߓߊ߯ ߞߍ߫ ߓߐ߫ ߟߊ߫ ߦߌߟߊ ߡߍ߲ ߸ ߊߟߎ߫ ( ߡߞߊߞߊ ߟߎ߬ ) ߝߣߊ߫ ߦߋ߫ ߓߐ߫ ߦߋ߲߬ ، ߊ߬ ߣߴߊߟߎ߯ ߦߝߊ߬ ߢߌߣߌ߲ ߞߍ߫ ߊߟߎ߫ ߡߊ߰ߙߌ ߟߊ߫ ߸ ߓߊ ߊߟߊ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿199﴾

ߣߴߊߟߎ߫ ߓߊ߲߫ ߘߊ߫ ߊߟߎ߫ ߟߊ߫ ߣߊߡߎ߲߫ ߠߊߕߋߟߋ߲ ߠߎ߬ ߟߊ߫ ߸ ߊߟߎ߫ ߦߴߊߟߊ߫ ߞߏߝߐ߫ ߝߎߚߎ߫ ߦߏ߫ ߊߟߎ߫ ߦߴߊߟߎ߫ ߝߊ߬ ߟߎ߬ ߞߏߝߐ߫ ߟߊ߫ ߢߊ ߡߍ߲ ߸ ߥߟߴߊߟߊ߫ ߞߏߝߐ ߦߋ߫ ߜߟߍ߬ߦߊ߫ ߏ߬ ߘߌ߫ ، ߡߐ߱ ߘߏ߫ ߟߎ߫ ߓߍ߫ ߸ ߏ߬ ߟߎ߬ ߦߴߊ߬ ߝߐ߫ ߟߴߏ߬ ߘߐ߫ ߟߋ߬ ߸ ߞߏ߫: ߊ߲ ߡߊ߰ߙߌ ߸ ߊ߲ ߛߐ߫ ߘߎߢߊ߫ ߢߌ߲߬ ߠߋ߬ ߘߐ߫ ، ߒ߬ߓߊ߬ ߣߌ߬ ߕߴߏ߬ ߟߎ߬ ߦߋ߫ ߟߊߞߌߙߊ߫ ﴿200﴾

ߡߐ߰ ߜߘߍ߫ ߓߍ߫ ߸ ߏ߬ ߦߴߊ߬ ߝߐ߫ ߟߊ߫ ߟߋ߬ ߞߏ߫: ߊ߲ ߡߊ߰ߙߌ ߸ ߊ߲ ߛߐ߫ ߘߎߢߊ߫ ߤߙߊ ߣߌ߫ ߟߊߞߌߙߊ߫ ߤߙߊ ߟߋ߬ ߓߍ߯ ߟߊ߫ ߸ ߊ߬ ߣߴߌ ߦߴߊ߲ ߕߊ߲߬ߞߊ߬ ߕߊ ߖߊ߲߰ߞߕߊ ߡߊ߬ ﴿201﴾

ߒ߬ߓߊ߬ ߣߌ߭ ߦߴߏ߬ ߟߎ߫ ߟߋ߬ ߢߍ߫ ߊ߬ߟߎ߬ ߓߊ߯ߙߊ߫ ߣߐ ߘߐ߫ ، ߓߊ ߖߊ߬ߕߋ߬ߓߐ߬ ߞߊߟߌ߲ ߕߌ߱ ߟߋ߬ ߊߟߊ߫ ߘߌ߫ ﴿202﴾

ߊߟߎ߯ ߊߟߊ߫ ߞߏߝߐ߫ ( ߡߌߣߊ߫ ߛߌ߱ ) ߕߟߋ߬ ߦߙߌߞߊ߫ ߞߘߐ߫ ، ߣߌ߫ ߡߍ߲ ߞߌߢߍ߫ ߘߊ߫ ߕߋ߬ߟߋ߫ ߝߌ߬ߟߊ߬ ߞߘߐ߫ ߸ ߖߟߎ߬ߡߎ߲߬ ߕߴߏ ߡߊ߬ ، ߣߌ߫ ߡߍ߲ ߘߏ߲߬ ߘߏ߲߰ߘߌ߬ ߘߊ߫ ߸ ߖߟߎ߬ߡߎ߲߬ ߕߴߏ߬ ߡߊ߬ ، ߒ߬ߞߊ߬ ߏ߬ ߓߍ߯ ߦߋ߫ ߡߐ߰ ߟߋ߬ ߞߏ߫ ߘߌ߫ ߸ ߡߍ߲ ߓߊ߯ ߊ߬ ߝߊ߲ߕߊ߲߬ߞߊ߬ ، ߏ߬ ߘߐ߫ ߸ ߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߘߋ߬ ، ߊ߬ ߣߌ߫ ߊߟߎ߫ ߦߴߊ߬ ߟߐ߲߫ ߞߏ߫ ߊߟߎ߫ ߟߊߘߍ߬ߕߐ߫ ߊ߬ߟߋ ߟߋ߫ ߡߊ߬ ﴿203﴾

ߡߐ߱ ߘߏ߫ ߓߍ߫ ߸ ߏ߬ ߟߊ߫ ߞߎߡߊ ߘߴߌ ߤߣߍ߫ ߘߎߢߊߘߐߕߍ߮ ( ߞߏ ߓߍ߯ ) ߘߐ߫ ߸ ߊ߬ ߘߌ߫ ߊߟߊ߫ ߞߍ߫ ߊ߬ ߛߙߋ ߘߌ߫ ߊ߬ ߛߣߐ߬ߡߍ߬ ߘߐ߬ ߞߏ ߞߊ߲߬ ߸ ߞߵߊ߬ ߕߘߍ߬ ߊ߬ ߟߊ߫ ߞߟߍ߬ߢߐ߲߰ߦߊ ߜߍ߬ߟߍ߲߬ߡߊ߲߬ߓߊ ߦߋ߫ ( ߛߌ߬ߟߊ߬ߡߊ ߟߎ߫ ߞߊ߲߬) ﴿204﴾

ߣߴߊ߬ ߞߵߊ߬ ߞߐߘߏ߲߬ ߸ ߊ߬ ߘߴߊ߬ ߗߋ ߞߍ߫ ߕߌߢߍߟߌ ߘߌ߫ ߘߎ߱ ߞߣߐ߫ ، ߞߵߊ߬ ߞߍ߫ ߛߣߍ߬ ߛߎߡߊ߲ ߠߎ߬ ߣߌ߫ ߓߌߦߊ߲ ߠߎ߬ ߕߌߢߍ ߘߌ߫ ، ߊߟߊ߫ ߘߏ߲߬ ߕߍ߫ ߕߌߢߍߟߌ ߝߍ߬ ﴿205﴾

ߣߴߊ߬ ߝߐ߫ ߘߴߊ߬ ߦߋ߫ ߞߏ߫ ߌ ߝߊ߲ߕߊ߲߬ߞߵߊߟߊ߫ ߡߊ߬ ߸ ߊ߬ ߘߴߊ߬ ߝߎ߬ߙߎ߲߬ߞߎ߫ ߖߘߍ߬ ߟߊ߬ߜߍ ߞߊ߬ߡߙߊ߬ߒ߬ߞߋ߬ߦߊ ߘߌ߫ ߞߵߊ߬ ߕߘߍ߬ ߊ߬ ߛߐ߲߭ ߠߋ߬ ، ߞߏ߬ߣߵߊ߬ ߥߊ߬ߛߊ ߟߋ߬ ߔߊߦߌߔߊߦߌ ߘߌ߫ ، ߟߊ߫ ߦߌߟߊ߫ ߖߎ߮ ߟߴߏ߬ ߘߌ߫ ߞߟߋ߫ ﴿206﴾

ߡߐ߱ ߘߏ߫ ߝߣߊ߫ ߓߍ߫ ߸ ߏ߬ ߟߴߊ߬ ߖߍ߬ߘߍ߫ ߝߙߋ߬ ߟߴߊߟߊ߫ ߟߊ߫ ߘߌ߬ߢߍ ߢߌߣߌ߲߫ ߞߊ߲ ߡߊ߬ ، ߊߟߊ߫ ߘߏ߲߬ ߞߌ߬ߣߌ߲߬ߞߌ߬ߣߌ߲߬ ߠߴߊ߬ ߟߊ߫ ߖߐ߲߭ ߠߎ߬ ߟߊ߫ ߞߟߋ߫ ﴿207﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߓߍ߯ ߦߋ߫ ߘߏ߲߬ ( ߛߌ߬ߟߡߊ߬ߦߊ ) ߖߘߍ߬ߞߟߏ߬ߦߊ ߘߐ߫ ߟߋ߬ ߞߐߘߍ߫ ߸ ߊߟߎ߫ ߞߊߣߊ߬ ߕߎ߲߰ ߜߍ߬ߘߍ ߜߋ߬ߙߋ ߟߎ߬ ߟߊ߫ ߘߋ߬ ߸ ߓߊ ߏ߬ ߦߴߊߟߎ߫ ߖߎ߯ ߘߐߜߍ ߖߍ߬ߘߍ ߟߋ߬ ߘߌ߫ ﴿208﴾

ߣߴߊߟߎ߫ ߘߏ߲߬ ߕߣߍ߬ߣߍ߬ ߘߊ߫ ߡߎ߬ߕߎ߲߬ ߔߊߞߌ ߟߎ߫ ߣߊ߭ ߞߐ߫ ߊߟߎ߫ ߡߊ߬ ߸ ߊߟߎ߫ ߦߴߊ߬ ߟߐ߲߫ ߏ߬ ߘߐ߫ ߞߏ߫ ߊߟߊ߫ ߦߋ߫ ߣߌ߬ߣߌ߬ߟߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߊ߫ ߘߌ߫ ﴿209﴾

ߢߌ߲߬ ߠߎ߬ ߕߍ߫ ߝߏߦߌ߬ ߘߐߞߐ߬ߣߐ߲߬ ߠߊ߫ ߸ ߝߏ߫ ߊߟߊ߫ ߣߌ߫ ߡߟߍ߬ߞߊ ߟߎ߬ ߦߋ߫ ߣߵߊ߬ߟߎ߫ ߡߊ߬ ߛߊ߲ߝߌ߲ ߘߎߟߋ߲ ߠߎ߬ ߞߘߐ߫ ߸ ߞߊ߬ ߞߏ ߞߕߌ ߕߍ߰ ߘߏߦߌ߲߫ ، ߞߏ ߟߎ߫ ߘߏ߲߬ ߠߊߛߊ߬ߦߌ߬ߕߐ߫ ߊߟߊ߫ ߟߋ߬ ߡߊ߬ ﴿210﴾

ߌߛߌߙߊߌߟߞߊ ߟߎ߫ ߢߌ߬ߣߌ߲߬ߞߊ߬ ߓߊ߫ ߸ ߞߏ߫ ߊ߲ ߞߵߊ߬ߟߎ߬ ߛߐ߫ ߡߊ߲߬ߕߊ߬ߣߌ߲߬ ߘߐ߬ߜߍ߫ ߖߋ߬ߟߌ߫ ߟߋ߬ ߟߊ߫؟ ߒ߬ߓߊ߬ ߡߍ߲ ߓߊ߯ ߊߟߊ߫ ߟߊ߫ ߣߍߡߊ ߡߊߝߊ߬ߟߋ߲߬ ߊ߬ ߣߊ߬ߣߍ߲ ߞߐ ߊ߬ ߡߊ߬ ߸ ߤߊ߲߫ ߊߟߊ߫ ߦߋ߫ ߓߌ߲߬ߓߊ߬ߏ߬ ߜߍߟߍ߲ ߕߌ߱ ߟߋ߬ ߘߌ߫ ߘߋ߬߹ ﴿211﴾

ߘߎߢߊ߫ ߢߣߊߡߦߊ ߟߋ߬ ߟߊߗߋ߲߰ߧߊ߬ߣߍ߲߫ ߓߊ߲߬ߓߊ߮ ߟߎ߬ ߢߊߞߘߐ߫ ، ߊ߬ߟߎ߬ ߦߋ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߡߊߦߟߍ߫ ߟߊ߫ ( ߏ߬ ߟߋ ߘߐ߫ ) ، ߡߍ߲ ߠߎ߫ ߞߏ߬ߣߌ߲ ߊ߬ߟߎ߬ ߝߊ߲ߕߊ߲߬ߞߊ߬ ߟߊ߫ ߸ ߏ߬ ߟߎ߫ ߟߴߊ߬ߟߎ ߛߊ߲ߘߐ߫ ߟߐ߬ߓߊ ߟߏ߲ ، ߡߍ߲ ߘߏ߲߬ ߓߊ߯ ߊߟߊ߫ ߘߌߦߊ߫ ߸ ߊ߰ ߏ߬ ߟߋ ߤߊ߬ߙߌ߬ߖߍ߰ ߟߊ߫ ߤߊߟߌ߬ ߣߌ߫ ߖߊ߬ߕߋ߬ߟߌ߫ ߕߍ߫ ﴿212﴾

ߡߐ߱ ߓߍ߯ ߕߘߍ߬ ߡߊ߲߬ߕߏ߲߬ ߞߋߟߋ߲߫ ߠߋ߬ ߘߌ߫ ߸ ߊߟߊ߫ ߟߋ߫ ߞߊ߬ ߟߊ߬ߝߐ߬ߓߊ߮ ߟߎ߬ ߗߋ߫ ߘߟߊߝߎߟߊ ߟߎ߬ ߣߌ߫ ߖߊ߬ߛߙߋ߬ߡߊ߬ߟߌ߬ߟߊ ߟߎ߬ ߘߌ߫ ߸ ߊ߬ ߞߊ߬ ߟߍߙߊ ߟߊߖߌ߰ ߏ߬ ߟߎ߫ ߝߍ߬ ߕߎ߬ߢߊ ߘߌ߫ ߸ ߞߴߏ߬ ߦߋ߫ ߞߕߌ߫ ߡߐ߱ ߟߎ߬ ߕߍ߫ ߊ߬ߟߎ߬ ߟߊ߫ ߝߐߢߐ߲߯ߞߐ߫ ߞߏ ߟߎ߬ ߘߐ߫ ، ߡߐ߰ ߛߌ߫ ߘߏ߲߬ ߡߊ߫ ߛߐ߬ߛߐ߬ߟߌ ߞߍ߫ ߟߍߙߊ߫ ߞߏ ߘߐ߫ ߸ ߝߏ߫ ߊ߬ ߘߌߣߍ߲߫ ߡߍ߲ ߠߎ߫ ߡߊ߬ ، ߏ ߕߎ߬ߡߊ ߜߎ ߔߊߞߌ ߓߘߊ߫ ߓߊ߲߫ ߣߊ߬ ߟߴߊ߬ߟߎ߫ ߡߊ߬ ، ߒ߬ߞߊ߬ ߞߵߊ߬ ߟߊߥߟߌ߬ ߢߊ߲ߜߏߦߊ ߡߊ߬ ߢߐ߲߮ ߕߍ߫ ߕߋ߲߬ ߝߎ߯ ، ߊߟߊ߫ ߘߏ߲߬ ߞߊ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߞߊ߲ߘߴߊ߬ߟߎ߬ ߟߊ߫ ߢߐ߲߯ ߛߐߛߐ߫ ߞߏ ߡߊ߬ ߸ ߣߊߟߌ߬ߡߎ߲߫ ߕߎ߬ߢߊ ߘߌ߫ ߸ ߊ߬ߟߋ ߖߍ߬ߘߍ ߟߊ߫ ߘߌ߬ߢߍ ߟߊ߫ ، ߡߍ߲ ߘߏ߲߬ ߓߊ߯ ߊߟߊ߫ ߘߌߦߊ߫ ߖߐ߫ ߸ ߊ߰ ߏ߬ ߟߋ ߞߊ߲ߘߊ߫ ߟߊ߫ ߛߌߟߊ߫ ߕߋߟߋ߲ߣߍ߲߫ ߓߐߚߐ ߞߊ߲߬ ﴿213﴾

ߊ߰ ߊߟߎ߫ ߢߣߊ߫ ߟߋ߫ ߓߊ߬ ߞߏ߫ ߊߟߎ߫ ߘߌ߫ ߘߏ߲߬ ߡߍ߲ߘߌߦߊ ߣߊߞߐ ߘߐ߫ ߞߵߊ߬ ߕߘߍ߬ ߊߟߎ߫ ߢߍߓߊ߯ ߕߊ߬ߡߌ߲߬ߣߍ߲ ߠߎ߬ ߕߊ ߢߐ߲߰ ߡߊ߫ ߣߵߊߟߎ߫ ߡߊ߬؟ ߓߊߏ߬ ߕߣߊ߬ߡߊ ߟߎ߬ ߣߌ߫ ߕߙߐߦߊ ߟߎ߫ ߟߋ߫ ߡߊ߰ ߘߴߏ߬ ߟߎ߬ ߟߊ߫ ߞߏߛߓߍ߫ ، ߞߵߊ߬ߟߎ߬ ߦߙߍߦߙߍ߫ ߝߎߚߎ߫ ߝߏ߫ ߞߋߟߊ ߣߴߊ߬ ߝߍ߬ ߡߐ߯ ߘߍ߲߬ߞߣߍ߬ߦߊ߬ߣߍ߲ ߠߎ߬ ߦߴߊ߬ ߝߐ߫ ߸ ߞߏ߫ ߊߟߊ߫ ߟߊ߫ ߘߍ߬ߡߍ߲߬ߠߌ߲ ߣߊ߬ߕߐ߫ ߕߎ߬ߡߊ ߖߐ߲߫ ߛߊ߫؟ ، ߖߊ߰ ߊߟߊ߫ ߟߊ߫ ߘߍ߬ߡߍ߲߬ߠߌ߲ ߞߎ߲߬ߘߐߛߎ߬ߘߎ߲߬ߡߊ߲߬ߓߊ ߟߋ߬ ﴿214﴾

ߊ߬ߟߎ߫ ߣߊ߬ߕߐ߫ ߌ ߢߌ߬ߣߌ߲߬ߞߊ߬ ߟߊ߫ ߞߏ߫ ߊ߬ߟߎ߬ ߦߋ߫ ߡߎ߲߬ ߞߍ߫ ߟߊ߫ ߖߘߍ߬ߡߊ߬ߓߐ߬ ߝߋ߲ ߘߌ߫؟ ߊ߬ߟߎ߫ ߖߋ߬ߓߌ߬ ߞߏ߫: ߊߟߎ߫ ߓߊ߯ ߝߋ߲-ߋ-ߝߋ߲߫ ߞߍ߫ ߖߘߍ߬ߡߊ߬ߓߐ ߘߌ߫ ߤߙߊ߫ ߘߐ߫ ߸ ߏ߬ ߦߋ߫ ߘߌ߫ ߡߏߦߌߓߊ߯ ߝߌ߬ߟߊ ߡߊ߬ ߸ ߡߊ߬ߛߎ߬ߘߎ߲߬ߧߊ߬ߓߊ߮ ߟߎ߫ ߡߊ߬ ߸ ߝߊߙߌߕߊ ߟߎ߫ ߡߊ߬ ߸ ߘߐ߰ߕߐ ߟߎ߫ ߡߊ߬ ߸ ߊ߬ ߣߌ߫ ߛߌߟߊߘߋ߲ ߡߊ߬ ، ߊߟߎ߫ ߜߎ ߦߋ߫ ߤߙߊ ߛߎ߯-ߎ-ߛߎ߯ ߞߍ߫ ߟߊ߫ ( ߡߐ߱ ߟߎ߬ ߦߋ߫ ) ߊߟߊ߫ ߞߵߏ߬ ߟߐ߲߫ ߖߐ߫ ﴿215﴾

ߞߍ߬ߟߍ ߓߘߊ߫ ߛߓߍ߫ ߊߟߎ߫ ߡߊ߬ ߸ ߊ߬ ߘߏ߲߬ ߜߏߡߊ߲߫ ߊߟߎ߫ ߦߋ߫ ، ߊ߬ ߘߏ߲߬ ߕߋ߲߬ ߠߋ߬ ߸ ߞߏ ߘߏ߫ ߜߏߡߊ߲߫ ߊߟߎ߫ ߦߋ߫ ߸ ߊ߬ ߛߌߦߊߡߊ߲ ߘߐ߫ ߏ߬ ߞߊ߫ ߘߌ߫ ߊߟߎ߫ ߟߊ߫ ، ߞߏ ߘߏ߫ ߝߣߊ߫ ߘߌߡߊ߲߫ ߊߟߎ߫ ߦߋ߫ ߸ ߊ߬ ߛߌߦߊߡߊ߲ ߘߐ߫ ߏ߬ ߡߊ߲߫ ߘߴߊߟߎ߫ ߟߊ߫ ، ߊߟߊ߫ ߞߵߏ߬ ߟߐ߲߫ ( ߊߟߎ߫ ߟߊ߫ ߞߏ ߘߐ߫ ߖߐ߫ ) ߊߟߎ ߟߋ߬ ߕߴߏ߬ ߟߐ߫ ߠߊ߫ ﴿216﴾

ߊ߬ߟߎ߫ ߣߊ߬ߕߐ߬ ߌ ߢߌ߬ߣߌ߲߬ߞߊ߬ ߟߊ߫ ߛߊ߲߬ߓߏ߬ߟߏ߲߬ ߠߊߕߏߣߍ߲ ߡߊ߬ ߸ ߞߍ߬ߟߍ ߞߍ߫ ߞߏ ߘߐ߫ ߏ߬ ߟߊ߫ ، ߊ߬ߟߎ߫ ߖߋ߬ߓߌ߬ ߞߏ߫ ߞߍ߬ߟߍ ߞߍ ߏ߬ ߟߊ߫ ߸ ߏ߬ ߦߋ߫ ( ߞߎ߲߬ߞߏ߬) ߓߟߋߓߟߋ߫ ߘߌ߫ ، ߓߊ߬ߙߌ߬ ߞߎ߬ߡߊ߲߬ߘߌ߬ߟߌ ߊߟߊ߫ ߟߊ߫ ߛߌߟߊ ߡߊ߬ ߸ ߊ߬ ߣߌ߫ ߓߊ߲߭ ߊ߬ ߘߐ߫ ߸ ߊ߬ ߣߌ߫ ( ߞߎ߬ߡߊ߲߬ߘߌ߬ߟߌ ) ߡߌ߬ߛߙߌ߬ ߟߊߕߏߣߍ߲ ߡߊ߬ ߸ ߊ߬ ߣߴߊ߬ ߘߏ߲߬ߞߏ ߟߎ߬ ߟߊߓߐ ߊ߬ ߞߣߐ߫ ߸ ߏ߬ ߟߎ߫ ߟߋ߫ ( ߞߎ߲߬ߞߏ ) ߓߏ߲߬ߓߊ߬ߓߊ ߦߋ߫ ߊߟߊ߫ ߓߘߊ ، ߒ߬ߓߊ߬ ߥߊ߬ߥߎߟߋ ߛߊ߫ ߸ ߏ߬ ߟߋ ( ߞߎ߲߬ߞߏ ) ߓߏ߲߬ߓߊ߫ ߝߊ߰ߟߌ ߘߌ߫ ، ߓߊ߲߬ߓߊ߮ ߟߎ߫ ߘߏ߲߬ ߕߍߣߊ߬ ߝߘߊ߫ ߟߴߊߟߎ߫ ߞߟߍ߬ ߟߊ߫ ߝߋߎ߫ ߸ ߝߏ߫ ߊ߬ߟߎ߬ ߦߴߊߟߎ߫ ߟߊߛߊ߬ߦߌ߫ ߟߋ߬ ߞߵߊߟߎ߫ ߓߐ߫ ߊߟߎ߫ ߟߊ߫ ߘߌ߯ߣߊ ߞߊ߲߬ ߸ ߣߴߊ߬ߟߎ߫ ߞߵߏ߬ ߟߊߣߐ߬ ، ߣߴߊߟߎ߫ ߡߍ߲ ߘߏ߲߬ ߡߙߎߕߌ߫ ߘߴߊ߬ ߟߊ߫ ߘߌ߯ߣߊ ߡߊ߬ ߞߊ߬ ߛߊ߬ ߓߊ߲߬ߓߊ߰ߦߊ ߘߐ߫ ߸ ߏ߬ ߟߎ߫ ߟߋ߬ ߗߋߥߊߟߌ ߟߎ߬ ߕߌߢߍߕߐ߫ ߘߎߢߊ߫ ߣߌ߫ ߟߊߞߌߙߊ߫ ߸ ߏ߬ ߟߎ߫ ߟߋ߫ ߘߏ߲߬ ߕߊ ߘߏ߲߬ߞߏ ߟߎ߬ ߘߌ߫ ߸ ߏ߬ ߟߎ߬ ߘߎߡߊߕߐ߫ ߦߋ߲߬ ߠߋ߬ ﴿217﴾

ߒ߬ߓߊ߬ ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߸ ߊ߬ ߣߌ߫ ߡߍ߲ ߠߎ߬ ߝߎ߲ߘߌߣߍ߲߫ ، ߊ߬ߟߎ߫ ߘߏ߲߬ ߞߊ߬ ߖߘߍ߬ߘߌ ߞߍ߫ ߊߟߊ߫ ߛߌߟߊ ߞߊ߲߬ ߸ ߏ߬ ߟߎ߫ ߟߋ߬ ߦߟߌߛߌ߰ߣߍ߲߫ ߊߟߊ߫ ߟߊ߫ ߤߌߣߊ ߟߊ߫ ، ߊߟߊ߫ ߘߏ߲߬ ߦߋ߫ ߦߝߊ߬ߟߊ߫ ߤߌߣߊߒߕߋ ߟߋ߬ ߘߌ߫ ﴿218﴾

ߊ߬ߟߎ߫ ߣߊ߬ߕߐ߫ ߌ ߢߌ߬ߣߌ߲߬ߞߊ߬ ߟߊ߫ ߘߐ߬ߟߐ ߣߌ߫ ߛߏ߬ߝߘߊ߬ߓߋ ߡߊ߬ ، ߊ߬ߟߎ߫ ߖߋ߬ߓߌ߬ ߞߏ߫ ߖߟߎ߬ߡߎ߲߬ߓߊ߫ ߟߴߏ߬ ߟߎ߫ ߝߌ߬ߟߊ ߘߐ߫ ߸ ߊ߬ ߣߌ߫ ߡߐ߱ ߟߎ߬ ߡߎߣߊ߲ߝߊ߲߫ ߞߏ ߟߎ߬ ، ߞߏ߬ߣߵߊ߬ߟߎ߫ ߖߟߎ߬ߡߎ߲ ߓߏ߲߬ߓߴߊ߬ߟߎ߬ ߡߎߣߊ߲ߝߊ߲ ߘߌ߫. ߊ߬ߟߎ߫ ߣߊ߬ߕߐ߬ ߌ ߢߌ߬ߣߌ߲߬ߞߊ߬ ߟߊ߫ ߕߎ߲߯ ߸ ߞߏ߫ ߊ߬ߟߎ߬ ߦߋ߫ ߡߎ߲߬ ߞߍ߫ ߖߘߍ߬ߡߊ߬ߓߐ߬ ߝߋ߲ ߘߌ߫؟ ߊ߬ߟߎ߫ ߖߋ߬ߓߌ߬ ߸ ߞߏ߫ ߡߊ߬ߞߏ߬ߟߊ߬ߘߏ߲ ߕߐ߭ ߞߍ߬ ، ߒ߬ߓߵߊߟߊ߫ ߦߋ߫ ߟߝߊߙߌ ߟߎ߬ ߝߊߙߊ߲ߝߊߛߌ߫ ߟߴߊߟߎ߫ ߦߋ߫ ߕߊ߲߬ ߠߋ߬ ߸ ߛߴߊߟߎ߫ ߘߴߊߟߎ߫ ߡߙߌ ߟߊߕߊ߯ ﴿219﴾

ߞߌߢߍ߲߫ ߣߌ߫ ߛߎ߬ߟߊ߫ ߞߏ ߟߎ߫ ߝߍ߬: ߊ߬ߟߎ߫ ߣߊ߬ߕߐ߬ ߌ ߢߌ߬ߣߌ߲߬ߞߊ߬ ߟߊ߫ ߝߣߊ߫ ߝߊߙߌߕߊ ߟߎ߫ ߡߊ߬ ، ߊ߬ߟߎ߫ ߖߋ߬ߓߌ߬ ߞߏ߫ ߞߊ߬ ߟߢߊ߬ߟߌ߬ ߞߍ߫ ߏ߬ ߟߎ߬ ߦߋ߫ ߸ ߏ߬ ߟߋ ߝߌ߬ߛߊ߬ ، ߣߴߊߟߎ߫ ߘߏ߲߬ ߞߵߊߟߎ߫ ߞߏߟߏ߲ߛߏ߲߫ ߊ߬ߟߎ߬ ߘߐ߫ ߸ ߊߟߎ߫ ߓߊߘߋ߲ ߠߎ߫ ߟߴߊ߬ߟߎ߬ ߘߌ߫ ߏ߬ ߘߐ߫ ، ߊߟߊ߫ ߘߏ߲߬ ߞߊ߬ ( ߥߊߟߌ߫ ߣߊ߲ߝߟߏ ) ߖߊߛߌߓߊ߮ ߣߴߊ߬ ߟߊߢߊ߬ߓߊ߮ ߘߊ߲߬ߕߍ߰ߓߐ ߟߐ߲߫ ، ߊ߬ ߘߏ߲߬ ߕߌ߲߬ ߓߊ߯ ߊߟߊ߫ ߘߌߦߊ߫ ߊ߬ ߕߘߍ߬ ߘߌ߫ ߘߋ߬ߥߎ߬ ߟߴߊߟߎ߫ ߞߊ߲߬ ( ߢߌ߲߬ ߘߐ߫ ) ، ߖߊ߯ߕߋ߫ ߸ ߊߟߊ߫ ߦߋ߫ ߣߌ߬ߣߌ߬ߟߊ߫ ߘߌ߫ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿220﴾

ߊߟߎ߫ ߞߊߣߊ߬ ߛߏߡߊ ߡߛߏ߬ߡߊ߲ ߠߎ߬ ߝߘߎ߫ ߘߋ߬ ، ߝߏ߫ ߊ߬ߟߎ߬ ߦߋ߫ ߘߍ߲߬ߞߣߍ߬ߦߊ߫ ߟߋ߬ ߕߘߋ߫ ، ߓߊ ߖߐ߲߬ߡߛߏ߫ ߘߍ߲߬ߞߣߍ߬ߦߊ߬ߣߍ߲ ߠߋ߫ ߝߌ߬ߛߊ߬ ߛߏߡߊߡߛߏ ߘߌ߫ ߸ ߤߟߴߊ߬ ߞߵߊߟߎ߫ ߤߣߍ߫ ߢߊ-ߊ-ߢߊ߫ ، ߊߟߎ߫ ߘߏ߲߬ ߞߊߣߵߊߟߎ߫ ( ߟߊ߫ ߝߋ߲ߡߛߏ ߟߎ߫ ) ߘߏ߲߬ ߝߘߎ߫ ߟߊ߫ ߛߏߡߊ ߗߍ߬ߡߊ߲ ߠߎ߫ ߡߊ߬ ߝߋߎ߫ ، ߝߏ߫ ߊ߬ߟߎ߬ ߦߋ߫ ߘߍ߲߬ߞߣߍ߬ߦߊ߫ ߟߋ߬ ߖߐ߫ ، ߓߊ ߖߐ߲߬ߞߍ߫ ߘߍ߲߬ߞߣߍ߬ߦߊ߬ߣߍ߲ ߠߋ߫ ߝߌ߬ߛߊ߬ ߛߏߡߊߞߍ ߘߌ߫ ߸ ߤߟߴߊ߬ ߞߵߊߟߎ߫ ߤߣߍ߫ ߢߊ-ߊ-ߢߊ߫ ، ߓߊ ߏ߬ ߟߎ߬ ߦߋ߫ ߞߟߌߟߌ ߞߍ߫ ߟߊ߫ ߕߊ ߟߋ߫ ߡߊ߬ ߸ ߊߟߊ߫ ߘߏ߲߬ ߞߟߌߟߌ ߞߍ߫ ߟߊ߫ ߡߍ߲ߘߌߦߊ ߣߊߞߐ ߣߌ߫ ߦߝߊ߬ߝߌ ߟߋ߫ ߡߵߊ߬ ߟߊ߫ ߘߌ߬ߢߍ ߟߊ߫ ، ߊ߬ ߣߴߊ߬ ߦߴߊ߬ ߟߊ߫ ߟߝߊߙߌ ߟߎ߬ ߘߐߞߣߍ߫ ߟߊ߫ ߡߐ߱ ߟߎ߬ ߦߋ߫ ߟߋ߬ ߸ ߛߴߊ߬ߟߎ߬ ߘߴߊ߬ߟߎ߫ ߕߊ߰ߛߌ߫ ﴿221﴾

ߊ߬ߟߎ߫ ߣߊ߬ߕߐ߫ ߌ ߢߌ߬ߣߌ߲߬ߞߊ߬ ߟߊ߫ ߦߟߌߛߌ ߡߊ߬ ، ߊ߬ߟߎ߫ ߖߋ߬ߓߌ߬ ߞߴߏ߬ ߦߋ߫ ߢߍߢߌ߲߫ ߘߐ߫ ߝߋ߲߫ ߠߋ߬ ߘߌ߫ ، ߏ߬ ߘߐ߫ ߸ ߊߟߎ߫ ߦߴߊߟߎ߫ ߡߊߓߐ߫ ߡߏ߬ߛߏ ߟߎ߬ ߟߊ߫ ߞߵߊ߬ߟߎ߬ ߕߏ߫ ߦߟߌߛߌ ߘߐ߫ ، ߊߟߎ߫ ߞߊߣߵߊߟߎ߫ ߡߊߘߏ߲߬ ߊ߬ߟߎ߬ ߟߊ߫ ߝߋߎ߫ ߝߏ߫ ߊ߬ߟߎ߬ ߓߊ߯ ߛߊߣߌ߲ߧߊ߫ ، ߣߴߊ߬ߟߎ߬ ߛߊߣߌ߲ߧߊ߫ ߘߊ߫ ߛߊ߫ ߸ ߊߟߎ߫ ߣߵߊ߬ߟߎ߫ ߡߵߊߟߊ߫ ߟߊ߫ ߖߊ߬ߡߊߙߌ ߘߌ߲߬ߞߌߙߊ ߘߐ߫ ، ߖߊ߯ߕߋ߫ ߸ ߖߘߍ߬ߟߛߊ߬ߦߌ߬ߟߊ ߟߎ߬ ߣߌ߫ ߓߍ߬ߛߍ ߟߎ߫ ߟߋ߬ ߘߌߡߊ߲߫ ߊߟߊ߫ ߦߋ߫ ﴿222﴾

ߊߟߎ߫ ߡߏ߬ߛߏ ߟߎ߬ ߦߋ߫ ߝߏ߬ߘߏ߫ ߟߋ߬ ߘߌ߫ ߊߟߎ߫ ߦߋ߫ ، ߊߟߎ߫ ߣߵߊߟߎ߫ ߟߊ߫ ߝߏ߬ߘߏ ߡߊ߬ ߢߊ߫ ߟߋ߫ ߡߊ߬ ߸ ߡߍ߲ ߓߊ߯ ߊߟߎ߫ ߘߌߦߊ߫ ، ߊ߬ ߣߴߊߟߎ߫ ߢߍߛߌ߯ ߟߊߘߊ߲߫ ߊߟߎ߫ ߖߘߍ߬ ߦߋ߫ ߸ ߊ߬ ߣߴߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ، ߊߟߎ߫ ߦߴߊ߬ ߟߐ߲߫ ߝߣߊ߫ ߞߏ߫ ߊߟߎ߫ ߞߍߕߐ߫ ߊ߬ ߓߍ߲߬ߢߐ߲߰ߦߊ߬ ߟߊ߫ ߟߋ߬ ߛߋߚߋ߫ ، ߌ ߘߟߊߝߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߢߍ߫ ﴿223﴾

ߊߟߎ߫ ߞߊߣߵߊߟߊ߫ ߞߍ߫ ߓߊ߬ߟߊ߲߬ ߘߌ߫ ߊߟߎ߫ ߟߊ߫ ߞߊ߬ߟߌ߬ߟߌ ߟߎ߬ ߢߍ߫ ، ߞߊ߬ ߘߏ߲߬ ߊߟߎ߫ ߣߌ߫ ߢߌ߬ߡߊ߬ߦߊ ߣߌ߫ ߝߊ߲ߕߊ߲ߞߊ ߣߌ߫ ߡߐ߱ ߟߎ߬ ߕߍߘߐߓߍ߲ ߕߍ߫ ، ߓߊߏ߬ ߊߟߊ߫ ߦߋ߫ ߡߍ߲ߠߌ߲ߠߊ߫ ߘߌ߫ ߊ߰ ߟߐ߲ߠߌ߲ߠߊ߫ ߘߌ߫ ﴿224﴾

ߊߟߊ߫ ߕߍ߫ ߊߟߎ߫ ߡߌ߬ߘߊ߬ ߟߴߊߟߎ߫ ߟߊ߫ ߕߏߟߏ߲߫ ߞߊߟߌߟߌ ߟߎ߬ ߟߊ߫ ، ߞߏ߬ߣߌ߲߬ ߊ߬ ߦߴߊߟߎ߫ ߡߌ߬ߘߊ߬ ߟߴߊߟߎ߫ ߛߣߐ߬ߡߍ ߓߊ߯ߙߊ߫ ߣߐ ߟߎ߫ ߟߋ߬ ߟߊ߫ ߸ ߊߟߊ߫ ߘߏ߲߬ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߡߎ߬ߢߎ߲߬ߓߊ߯ ߘߌ߫ ﴿225﴾

ߡߍ߲ ߠߎ߬ ߦߴߊ߬ߟߎ߬ ߘߊߘߐߟߊ߫ ߟߴߊ߬ߟߎ߬ ߡߏ߬ߛߏ ߟߎ߫ ߡߊ߬ ߸ ߏ߬ ߟߎ߬ ߦߋ߫ ߡߊߞߐ߬ߣߐ߲߬ ߞߊߙߏ߫ ߣߊ߯ߣߌ߲߫ ߠߊ߫ ، ߣߴߊ߬ߟߎ߫ ߞߵߊ߬ߟߎ߬ ߘߊߘߐߓߐ߫ ߸ ߊߟߊ߫ ߦߋ߫ ߦߝߊ߬ߟߊ߫ ߘߌ߫ ߊ߰ ߤߌߣߟߊ߫ ߘߌ߫ ﴿226﴾

ߣߴߊ߬ߟߎ߫ ߘߏ߲߬ ߝߊ߲ߞߊ߲߫ ߘߊ߫ ߓߌ߬ߟߊ߬ߟߌ ߞߊ߲߬ ߸ ߊߟߊ߫ ߡߍ߲ߠߌ߲ߠߊ߫ ߘߌ߫ ߊ߰ ߟߐ߲ߠߌ߲ߠߊ߫ ߘߌ߫ ﴿227﴾

ߡߏ߬ߛߏ߫ ߓߌ߬ߟߊ߬ߣߍ߲ ߠߎ߬ ߦߋ߫ ߛߊߣߌ߲ߧߊ߫ ߛߓߊ߬ ߡߊ߬ߞߐ߬ߣߐ߲߬ߠߌ߲߫ ߞߍ߫ ߊ߬ߟߎ߫ ߖߍ߬ߘߍ߫ ߡߊ߬ ( ߝߙߌ߬ߦߊ ߘߐ߫) ، ߊ߬ ߘߏ߲߬ ߕߍ߫ ߘߊ߬ߤߴߊ߬ߟߎ߬ ߦߋ߫ ߝߋߎ߫ ߞߊ߬ ߝߋ߲߫ ߘߏ߲߰ ߊߟߊ߫ ߞߊ߬ ߡߍ߲ ߘߊ߲߫ ߊ߬ߟߎ߬ ߘߋ߲ߛߏ ߟߎ߬ ߘߐ߫ ، ߣߴߊ߬ ߕߘߍ߬ ߘߊ߫ ߞߊ߬ߣߌ߲߬ ߊ߬ߟߎ߫ ߘߍ߲߬ߞߣߍ߬ߦߊ߬ߣߍ߲߫ ߊߟߊ߫ ߣߌ߫ ߟߏ߲ߠߊߓߊ߲ ߡߊ߬ ، ߊ߬ߟߎ߫ ߗߍ߬ ߟߎ߫ ߟߋ߬ ߖߊߙߋߣߍ߲߫ ߊ߬ߟߎ߬ ߟߊߛߊ߬ߦߌ ߟߊ߫ ( ߝߘߎ ߞߣߐ߫ ) ߏ߬ ߞߎ߲߬ߕߊ߮ ߞߘߐ߫ ، ߣߴߊ߬ ߕߘߍ߬ ߘߊ߫ ߞߊ߬ߣߌ߲߬ ߊ߬ߟߎ߬ ߦߋ߫ ߕߍߘߐߓߍ߲ ߝߍ߬. ߤߊߞߍ ߡߍ߲ ߦߋ߫ ߡߏ߬ߛߏ ߟߎ߬ ߦߋ߫ ߗߍ߭ ߟߎ߫ ߞߊ߲ߠߊ߫ ߖߐ߫ ߸ ߏ߬ ߢߐ߲߰ ߠߵߊ߬ߟߎ߬ ߝߣߊ߫ ߞߊ߲ߠߊ߫ ߗߍ߭ ߟߎ߬ ߦߋ߫ ߞߎ߬ߙߎ߲߬ߘߎ ߞߣߐ߫ ، ߡߐ߬ߟߐ߲ ߞߏ߬ߣߌ߲߬ ߦߋ߫ ߗߍ߭ ߟߎ߫ ߟߋ߬ ߟߊ߫ ߡߏ߬ߛߏ ߟߎ߬ ߛߊ߲ߘߐ߫ ، ߊߟߊ߫ ߦߋ߫ ߣߌ߬ߣߌ߬ߟߊ߫ ߘߌ߫ ߊ߰ ߥߘߋ߬ߥߘߋ߬ߟߊ߫ ߘߌ߫ ﴿228﴾

ߓߌ߬ߟߊ߬ߟߌ ߦߋ߫ ߛߋ߲߬ߧߊ߫ ߝߌ߬ߟߊ߫ ߟߋ߬ ߘߌ߫ ، ߏ߬ ߞߐ߫ ߸ ߞߋߟߋ߲߫ ߞߊ߬ ‹ ߡߏ߬ߛߏ › ߘߐߡߌ߬ߣߊ߬ ߞߎ߬ߙߎ߲߬ߘߎ ߞߣߐ߫ ߥߟߊ߫ ߞߵߊ߬ ߟߊߓߌ߬ߟߊ߬ ߞߏߢߊ߬ ߘߏߦߌ߲߫ ، ߊ߬ ߞߏ߬ߣߌ߲ ߕߍ߫ ߘߤߊ߬ ߊߟߎ߫ ߦߋ߫ ߸ ߞߊ߬ ߝߏߦߌ߫ ߡߌ߬ߘߊ߬ ߝߋ߲߫ ߘߐ߫ ߊߟߎ߫ ߞߊ߬ ߡߍ߲ ߠߎ߬ ߘߴߊ߬ߟߎ߫ ߡߊ߬ ( ߝߘߎߝߋ߲ ߘߌ߫) ، ߝߏ߫ ߣߴߊ߬ߟߎ߫ ߝߌ߬ߟߊ ߓߍ߯ ߛߌߟߊ߲߫ ߘߊ߫ ߞߏ߫ ߊ߬ߟߎ߫ ߝߌ߬ߟߊ ߕߍߣߵߊ߬ߟߎ߫ ߟߐ߬ ߟߴߊߟߊ߫ ߟߊ߫ ߞߎ߬ߙߎ߲߬ߘߎ ߟߎ߬ ߟߊ߫ ، ߣߴߊ߬ߟߎ߬ ߛߌߟߊ߲߫ ߘߊ߫ ߞߏ߫ ߊ߬ߟߎ߫ ߝߌ߬ߟߊ ߕߍߣߵߊ߬ߟߎ߫ ߟߐ߬ ߟߴߊߟߊ߫ ߟߊ߫ ߞߎ߬ߙߎ߲߬ߘߎ ߟߎ߬ ߟߊ߫ ߸ ߡߏ߬ߛߏ ߓߊ߯ ߊ߬ ߖߍ߬ߘߍ߫ ߞߎ߲߬ߡߊߞߊ߬ ߝߋ߲ ߡߍ߲ ߠߊ߫ ߏ߬ ߘߐ߫ ߸ ߏ߬ ߕߍ߫ ߞߍ߫ ߊ߬ߟߎ߫ ߝߌ߬ߟߊ ߛߌ߫ ߞߊ߲߬ ߞߎ߲߬ߞߏ߫ ߘߌ߫ ، ߒ߬ߓߵߊߟߊ߫ ߟߊ߫ ߞߎ߬ߙߎ߲߬ߘߎ ߟߎ߫ ߟߋ߬ ߣߌ߲߬ ߸ ߊߟߎ߫ ߞߊߣߵߊߟߎ߫ ߛߊ߬ߥߏ߲߫ ߏ ߞߎ߲߬ߠߊ߫ ߘߋ߬ ߸ ߓߊ ߡߍ߲ ߓߊ߯ ߊ߬ ߛߊ߬ߥߏ߲߬ ߊߟߊ߫ ߟߊ߫ ߞߎ߬ߙߎ߲߬ߘߎ ߟߎ߫ ߞߎ߲߬ߠߊ߫ ߸ ߏ߬ ߟߎ߫ ߟߋ߬ ߕߐ߬ߢߍ߰ߒߕߋ ߟߎ߬ ߘߌ߫ ﴿229﴾

ߒ߬ߓߊ߬ ߣߴߊ߬ ߞߵߊ߬ ߓߌ߬ߟߊ߬ ( ߛߓߊߣߊ߲ ߞߍ߫ ) ߡߎ߬ߕߎ߲߬ ߸ ߊ߬ ߕߍ߫ ߘߊ߬ߤߴߊ߬ ߦߋ߫ ߏ߬ ߞߐ߫ ߝߋߎ߫ ߝߏ߫ ߣߴߊ߬ ߝߘߎ߫ ߘߊ߫ ߗߍ߬ ߜߘߍ߫ ߡߊ߬ ، ߒ߬ߓߊ߬ ߣߴߏ߬ ߟߋ ߝߣߊ߫ ߞߵߊ߬ ߓߌ߬ߟߊ߬ ߸ ߖߟߎ߬ߡߎ߲߬ ߕߍ߫ ߊ߬ߟߎ߫ ߡߊ߬ ߏ߬ ߘߐ߫ ، ߊ߬ߟߎ߬ ߦߋ߫ ߛߊ߬ߦߌ߲߬ ߢߐ߲߮ ߡߊ߬ ߝߛߊߦߌ߫ ، ߣߴߊ߬ߟߎ߫ ߞߵߊ߬ ߓߛߌ߬ߞߌ߫ ߞߊ߬ߣߌ߲߬ ߞߏ߫ ߊ߬ߟߎ߬ ߘߌ߫ ߘߊ߲߬ ߊߟߊ߫ ߟߊ߫ ߞߎ߬ߙߎ߲߬ߘߎ ߟߎ߬ ߟߊ߫ ، ߊߟߊ߫ ߘߏ߲߬ ߦߴߊ߬ ߟߊ߫ ߞߎ߬ߙߎ߲߬ߘߎ ߟߎ߬ ߝߊߙߊ߲ߝߊߛߌ߫ ߟߊ߫ ߡߌ߬ߙߌ߲߬ߘߌ߬ ߞߏߟߐ߲ߠߊ ߟߎ߫ ߟߋ߬ ߦߋ߫ ﴿230﴾

ߣߴߊߟߎ߫ ߞߊ߬ ߞߍ߫ ߡߏ߬ߛߏ ( ߡߍ߲ ) ߠߎ߫ ߓߌ߬ߟߊ߬ ߟߊ߫ ߸ ߣߴߏ߬ ߛߋ߫ ߘߴߊ߬ߟߎ߬ ߟߊ߫ ( ߝߙߌ߬ߦߊ) ߛߕߊ ߟߊ߫ ߸ ߞߋߟߋ߲߫ ߊߟߎ߫ ߦߴߊ߬ߟߎ߬ ߘߐߡߌ߬ߣߊ߬ ߢߊ߫ ߡߊߟߐ߲ߣߍ߲߫ ߡߊ߬ ߥߟߊ߫ ߊߟߎ߫ ߦߴߊ߬ߟߎ߬ ߟߊߓߌ߬ߟߊ߬ ߢߊ߫ ߡߊߟߐ߲ߣߍ߲߫ ߡߊ߬ ، ߊߟߎ߫ ߞߏ߬ߣߌ߲߬ ߞߊߣߵߊ߬ߟߎ߬ ߘߐߡߌ߬ߣߊ߬ ߕߙߐߦߊ ߘߐ߫ ߘߋ߬ ߞߵߊ߬ ߟߊߥߟߌ߬ ߛߴߊߟߎ߫ ߘߌ߫ ߖߊ߲߬ߘߊ ߞߍ߫ ، ߡߍ߲ ߓߊ߯ ߏ߬ ߞߍ߫ ߸ ߏ߬ ߓߘߊ߫ ߓߊ߰ ߊ߬ ߖߍ߬ߘߍ߫ ߡߊ߬ ، ߊߟߎ߫ ߘߏ߲߬ ߞߊߣߵߊߟߊ߫ ߟߊ߫ ߟߝߊߙߌ ߟߎ߫ ߡߌ߬ߘߊ߬ ߦߟߍߒߡߊ߫ ߝߋ߲߫ ߘߌ߫ ߘߋ߬ ، ߊߟߎ߫ ߦߴߊߟߎ߫ ߦߟߌ߫ ߕߏ߫ ߊߟߊ߫ ߟߊ߫ ߣߍߡߊ ߘߐ߫ ߊߟߎ߫ ߞߊ߲߬ ߸ ߊ߬ ߣߴߊ߬ ߣߐ߬ ߟߍߙߊ ߣߌ߫ ߥߘߋ߬ߥߘߋ߬ߟߌ ߡߍ߲ ߠߎ߬ ߟߊߖߌ߰ ߟߴߊߟߎ߫ ߡߊ߬ ، ߊ߬ ߦߴߊߟߎ߫ ߞߊ߬ߥߊ߲߬ߘߌ߬ ߟߴߏ߬ ߟߋ ߟߊ߫ ، ߒ߬ߓߵߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ، ߊ߬ ߣߴߊߟߎ߫ ߦߴߊ߬ ߟߐ߲߫ ߞߏ߫ ߊߟߊ߫ ߞߊ߬ ߞߏ ߓߍ߯ ߟߐ߲߫ ߕߊߦߌ߫ ﴿231﴾

ߣߴߊߟߎ߫ ߞߊ߬ ߡߏ߬ߛߏ ߟߎ߫ ߓߌ߬ߟߊ߬ ߸ ߏ߬ ߟߎ߬ ߛߋ߫ ߘߴߊ߬ߟߎ߬ ߟߊ߫ ( ߝߙߌ߬ߦߊ ) ߛߕߊ ߡߊ߬ ߸ ߊߟߎ߫ ( ߝߋ߲ߡߛߏ߫ ߕߌ߮ ߟߎ߬ ) ߞߊߣߵߊ߬ߟߎ߫ ߞߎ߬ߡߊ߲߬ߘߌ߫ ߘߋ߬ ߞߏ߫ ߊ߬ߟߎ߬ ߞߊߣߊ߬ ߝߘߎ߫ ߊ߬ߟߎ߫ ߗߍ߬ ( ߞߘߐ ) ߟߎ߫ ߡߊ߬ ߸ ߣߴߊ߬ߟߎ߫ ߘߌ߬ߢߍ߬ ߘߊ߫ ߢߐ߲߮ ߕߍ߫ ߞߎ߬ߙߎ߲߬ߘߎ ߞߣߐ߫ ߞߊ߬ߣߌ߲߫ ، ߣߌ߲߬ ߦߋ߫ ߡߐ߰ ߟߋ߬ ߞߊ߬ߥߊ߲߬ߘߌ߬ ߞߊ߲߫ ߘߌ߫ ߸ ߡߍ߲ ߘߍ߲߬ߞߣߍ߬ߦߊ߬ߣߍ߲߬ ߊߟߎ߫ ߘߐ߫ ߊߟߊ߫ ߣߌ߫ ߟߏ߲߫ ߠߊߓߊ߲ ߡߊ߬ ، ߏ߬ ߟߋ ߘߏ߲߬ ߜߍߣߍ߲߫ ߊߟߎ߫ ߟߊ߫ ߞߏ ߘߐ߫ ߸ ߊ߬ ߛߊߣߌ߲ߡߊ߲߫ ، ߊߟߊ߫ ߞߵߏ߬ ߟߐ߲߫ ߖߐ߫ ߊߟߎ ߟߋ߬ ߡߴߏ߬ ߟߐ߲߫ ﴿232﴾

ߘߋ߲ߓߊ߫ ( ߓߌ߬ߟߊ߬ߣߍ߲) ߠߎ߬ ߦߴߊ߬ߟߎ߬ ߘߋ߲ ߠߎ߬ ߟߊߡߌ߲߬ ߛߊ߲߬ ߝߌ߬ߟߊ߬ ߘߝߊߣߍ߲߫ ߞߘߐ߫ ߸ ߣߴߊ߬ ߕߘߍ߬ ߘߊ߫ ߞߊ߬ߣߌ߲߬ ߡߍ߲ ߦߴߊ߬ ߝߍ߬ ߞߊ߬ ߟߊ߬ߡߌ߲߬ߠߌ߲ ߘߝߊ߫ ، ߘߋ߲߫ ߠߊߡߌ߲߫ ߡߛߏ ߟߎ߬ ߓߊߟߏ ߣߴߊ߬ߟߎ߬ ߝߊߘߌߦߊߓߐ ߦߋ߫ ߘߋ߲ߝߊ ߟߋ߬ ߞߎ߲߬ ߢߊ߫ ߡߊߟߐ߲ߣߍ߲߫ ߡߊ߬ ، ߡߐ߰ ߛߌ߫ ߞߊߣߊ߬ ߕߌ߲ߕߌ߲߫ ߝߏߦߌ߬ ߟߊ߫ ߸ ߝߏ߫ ߊ߬ ߛߋߞߏ ߓߍ߬ߙߍ ، ߘߋ߲߫ ߣߊ ߞߊߣߊ߬ ߕߙߐ߫ ߊ߬ ߘߋ߲ ߝߍ߬ ߸ ߘߋ߲ߝߊ ߝߣߊ߫ ߞߊߣߊ߬ ߕߙߐ߫ ߊ߬ ߘߋ߲ ߝߍ߬ ߸ ߏ߬ ߢߐ߲߰ ߠߋ߬ ߗߍߕߊߓߊ߮ ߝߣߊ߫ ߡߊ߬ ، ߣߴߊ߬ߟߎ߫ ߝߌ߬ߟߊ ߘߏ߲߬ ߦߋ߫ ߘߊߓߐߟߌ ߝߍ߬ ߓߍ߲߬ ߓߟߏ ߡߊ߬ ߢߐ߲߯ߦߋ ߘߐ߫ ߸ ߞߎ߲߬ߞߏ߬ ߕߍ߫ ߊ߬ߟߎ߫ ߡߵߏ߬ ߘߐ߫ ، ߣߴߊߟߎ߫ ߗߍ߭ ߟߎ߫ ߘߏ߲߬ ߦߴߊ߬ ߝߍ߬ ߞߊ߬ ߟߊ߬ߡߌ߲߬ߓߊ߯ ߢߌߣߌ߲߫ ߊߟߎ߫ ߘߋ߲ ߠߎ߬ ߢߍ߫ ߸ ߞߎ߲߬ߞߏ߫ ߕߍ߫ ߊߟߎ߫ ߡߵߏ߬ ߝߣߊ߫ ߘߐ߫ ߸ ߣߴߊ߬ ߕߘߍ߬ ߘߊ߫ ߞߊ߬ߣߌ߲߬ ߊߟߎ߫ ߦߋ߫ ߝߋ߲ ߡߍ߲ ߘߌ߫ ߞߏ ߘߐ߫ ߊߟߎ߫ ߓߘߴߏ߬ ߟߊߕߊ߬ߡߌ߲߫ ߊ߬ߟߎ߫ ߡߊ߬ ߢߊ߫ ߡߊߟߐ߲ߣߍ߲߫ ߡߊ߬ ، ߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߸ ߊߟߎ߫ ߦߴߊ߬ ߟߐ߲߫ ߝߣߊ߫ ߞߏ߫ ߊߟߊ߫ ߢߊ߯ ߊߟߎ߫ ߗߋߥߊߟߌ ߓߍ߯ ߟߊ߫ ﴿233﴾

(ߗߍ߭ ) ߡߍ߲ ߠߎ߬ ߦߋ߫ ߛߊ߬ ߟߴߊߟߎ߫ ߘߐ߫ ߞߵߊ߬ߟߎ߫ ߡߏ߬ߛߏ ߟߎ߬ ߕߏ߫ ߸ ߏ߬ ߟߎ߬ ߦߋ߫ ߞߊߙߏ߫ ߣߊ߯ߣߌ߲߫ ߣߌ߫ ( ߕߟߋ߬ ) ߕߊ߲߫ ߡߊ߬ߞߐ߬ߣߐ߲߬ߠߌ߲߫ ߞߍ߫ ߊ߬ߟߎ߫ ߖߘߍ߬ ߦߋ߫ ( ߝߙߌ߬ߦߊ ߘߐ߫) ، ߣߴߊ߬ߟߎ߬ ߛߋ߫ ߘߴߊ߬ߟߎ߬ ߟߊ߫ ( ߝߙߌ߬ߦߊ ) ߛߕߊ ߡߊ߬ ߸ ߖߟߎ߬ߡߎ߲߬ ߕߍ߫ ߊߟߎ߫ ߡߊ߬ ߡߏ߬ߛߏ ߟߎ߬ ߟߊ߫ ߞߏ߫ ߘߐ߫ ߏ߬ ߘߐ߫ ߸ ߊ߬ߟߎ߬ ߓߊ߯ ߡߍ߲ ߞߍ߫ ߊ߬ߟߎ߫ ߖߘߍ߬ ߘߐ߫ ߞߎ߬ߙߎ߲߬ߘߎ ߞߣߐ߫ ، ߊߟߊ߫ ߘߏ߲߬ ߊߟߎ߫ ߗߋߥߊߟߌ ߓߍ߯ ߞߊ߬ߟߊߡߊ߬ ߖߐ߫ ﴿234﴾

ߖߟߎ߬ߡߎ߲߬ ߕߍ߫ ߊߟߎ߫ ߡߊ߬ ߝߣߊ߫ ߡߏ߬ߛߏ ߟߎ߬ ߝߘߎ߫ ߞߏ ߓߌ߬ߟߊ ߘߐ߫ ߜߍ ߞߊ߲߬ ߸ ߥߟߴߊ߬ ߘߏ߲߱ ߘߐ߫ ߊߟߎ߫ ߣߌ ߟߎ߬ ߘߐ߫ ، ߓߊ ߊߟߊ߫ ߞߵߊ߬ ߟߐ߲߫ ߞߏ߫ ߊߟߎ߫ ߣߊ߬ߕߐ߫ ߟߴߊ߬ߟߎ߬ ߞߏߝߐ߫ ߟߊ߫ ، ߒ߬ߞߵߊߟߎ߫ ߞߊߣߵߊ߬ߟߎ߬ ߦߟߌߡߊߘߌߦߊ߫ ߟߋ߬ ߘߏ߲߰ ߘߐ߫ ، ߝߏ߫ ߊߟߎ߫ ߦߋ߫ ߞߎߡߊ߫ ߡߊߟߐ߲ߣߍ߲߫ ߠߋ߬ ߝߐ߫ ، ߓߊ߬ߙߌ߬ ߊߟߎ߫ ߞߊߣߊ߬ ߝߊ߲ߞߊ߲߫ ߝߘߎߛߘߌ ߞߊ߲߬ ߘߋ߬ ߸ ߝߏ߫ ߟߍߙߊ ߟߊ߫ ߛߕߊ ߓߊ߯ ߛߋ߫ ، ߊߟߎ߫ ߘߏ߲߬ ߦߴߊ߬ ߟߐ߲߫ ߞߏ߫ ߊߟߊ߫ ߞߵߊߟߎ߫ ߣߌ߫ ߘߐ߫ ߞߏ ߓߍ߯ ߟߐ߲߫ ، ߏ߬ ߘߐ߫ ߸ ߊߟߎ߯ ߊ߬ ߡߊߕߊ߲߬ߞߊ߫ ߟߋ߬ ، ߊߟߎ߫ ߦߴߊ߬ ߟߐ߲߫ ߝߣߊ߫ ߸ ߞߏ߫ ߊߟߊ߫ ߦߝߊ߬ߓߊ߯ ߘߌ߫ ߸ ߊ߰ ߡߎ߬ߢߎ߲߬ߓߊ߯ ߘߌ߫ ﴿235﴾

ߞߎ߲߬ߞߏ߬ ߕߍ߫ ߊߟߎ߫ ߡߊ߬ ߸ ߣߴߊߟߎ߫ ߞߊ߬ ߡߏ߬ߛߏ ߟߎ߫ ߓߌ߬ߟߊ߫ ߞߵߊ߬ ߕߘߍ߬ ߊߟߎ߫ ߡߊ߫ ߡߊ߰ ߊ߬ߟߎ߬ ߟߊ߫ ߸ ߥߟߴߊߟߎ߫ ߡߊ߫ ߝߘߎߝߋ߲߫ ߠߊߕߍ߰ ߊ߬ߟߎ߬ ߦߋ߫ ߡߎߣߎ߲߬ ، ߊߟߎ߫ ߞߏ߬ߣߌ߲߬ ߦߴߊ߬ߟߎ߫ ߘߊ߰ߡߎ߲߫ ( ߊ߬ߟߎ߬ ߕߏߢߊ ߟߊ ߟߴߊ߬ߟߎ߫ ߞߊ߲߬ ) ، ߝߋ߲ߕߌ߮ ߦߴߊ߬ ߕߊ߫ ߓߍ߬ߙߍ ߓߐ߫ ߸ ߕߍ߯ߜߍ ߦߴߊ߬ ߕߊ߫ ߓߍ߬ߙߍ ߓߐ߫ ، ߏ߬ ߘߊ߰ߡߎ߲ ߦߋ߫ ߓߍ߲߬ ߞߎ߬ߙߎ߲߬ߘߎ ߟߋ߫ ߡߊ߬ ، ߏ߬ ߦߋ߫ ߛߋ߲ߛߋߘߋ߲ ߠߋ߬ ߘߌ߫ ߢߊ߬ߓߊ߮ ߟߎ߫ ߡߊ߬ ﴿236﴾

ߣߴߊߟߎ߫ ߞߊ߬ ߡߏ߬ߛߏ ( ߡߍ߲ ߠߎ߫ ) ߓߌ߬ߟߊ߬ ߞߊ߬ ߞߐ߲߰ ߊߟߎ߫ ߡߊ߱ ߢߍ߫ ߊ߬ߟߎ߬ ߟߊ߫ ߸ ߞߵߊ߬ ߕߘߍ߬ ߊߟߎ߫ ߓߘߊ߫ ߓߊ߲߫ ߝߘߎߝߋ߲ ߠߊߕߊ߬ߡߌ߲߬ߣߴߊ߬ߟߎ߫ ߡߊ߬ ߸ ߊߟߎ߫ ߦߋ߫ ߝߘߎߝߋ߲ ߕߟߊ ߕߏ߫ ߊ߬ߟߎ߬ ߓߟߏ߫ ، ߝߏ߫ ߣߌ߫ ߡߏ߬ߛߏ ߟߎ߫ ߞߵߊ߬ ߘߐߞߏߦߊߕߏ߫ ߸ ߥߟߊ߫ ߝߘߎߛߘߌ ߞߏߢߊ ߦߋ߫ ߡߍ߲ ߓߟߏ߫ ( ߝߘߎ߫ ߗߍ ߥߟߊ߫ ߡߏ߬ߛߏ ߟߊ߫ ߞߏߕߌ߮) ߏ߬ ߦߴߊ߬ ߘߐߞߏߦߊߕߏ߫ ، ߣߴߊߟߎ߫ ߖߍ߬ߘߍ ߘߏ߲߬ ߞߊ߬ ߘߐ߬ߞߏ߬ߦߊ߬ߕߏ߬ߟߌ ߞߍ߫ ߸ ߏ߬ ߟߋ ߛߎ߬ߘߎ߲߬ߡߊ߲߬ ߝߊ߲ߕߊ߲ߞߊ ߟߊ߫ ، ߓߊ ߊߟߎ߫ ߞߊߣߊ߬ ߢߌ߬ߣߊ߬ ߞߊ߬ߡߙߊ߬ߒ߬ߞߋ߬ߦߊ ߞߐ߫ ߊߟߎ߫ ߣߌ߫ ߢߐ߲߮ ߕߍ߫ ، ߖߊ߯ߕߋ߬ ߸ ߊߟߊ߫ ߢߊ߯ ߊߟߎ߫ ߗߋߥߊߟߌ ߓߍ߯ ߟߊ߫ ﴿237﴾

ߊߟߎ߫ ߦߋ߫ ߛߊߟߌ ߟߎ߬ ߟߊߕߊ߲߬ߞߊ߬ ( ߢߐ߲߮ ߕߍ߫ ߘߋ߬ ) ߸ ߊ߬ ߣߌ߫ ߛߊߟߌ ߕߍߡߕߊ ߸ ߊ߬ ߣߌ߫ ߊߟߎ߫ ߦߴߊߟߎ߫ ߟߐ߬ ߊߟߊ߫ ߦߋ߫ ߖߘߍ߬ߞߟߏ ߘߌ߫ ( ߟߋ߬ ߖߙߌ߫) ﴿238﴾

ߣߴߊߟߎ߫ ߞߍ߫ ߘߊ߫ ߖߐ߬ߘߐ ߘߐ߫ ߊߟߎ߫ ߛߊߟߌ߫ ߊߟߎ߫ ߛߋ߲߬ߘߐ߫ ߸ ߥߟߊ߫ ߓߏ߬ߙߌ߬ߝߋ߲ ߞߊ߲߬ ، ߣߴߊߟߎ߫ ߞߎ߲߬ߠߊ߬ߝߎߟߋ߲߫ ߘߊ߫ ߸ ߊߟߎ߫ ߦߴߊߟߊ߫ ߞߏߝߐ߫ ( ߊ߬ ߢߊ߫ ߞߘߐ ߡߊ߬ ) ߦߏ߫ ߊ߬ ߞߵߊߟߎ߫ ߞߊ߬ߙߊ߲߬ ߢߊ ߡߍ߲ ߞߏ߫ ߟߊ߫ ߸ ߊߟߎ߫ ߕߘߍ߬ ߡߊ߫ ߡߍ߲ ߟߐ߲߫ ﴿239﴾

(ߗߍ߭ ) ߡߍ߲ ( ߠߎ߬ ) ߓߊ߯ ߞߍ߫ ߛߊ߬ ߟߴߊߟߎ߫ ߘߐ߫ ߞߊ߬ ߝߘߎߡߊ ߟߎ߬ ߕߏ߫ ߸ ߏ߬ ߟߎ߬ ߦߴߊ߬ߟߎ߫ ߛߊ߬ߙߊ߫ ߘߊ߰ߡߎ߲ ߘߌ ߘߐ߫ ߊ߬ߟߎ߫ ߡߏ߬ߛߏ ߟߎ߫ ߡߊ߬ ( ߓߊߟߏ ߘߌ߫ ) ߝߏ߫ ߞߊ߬ ߛߊ߲߬ ߞߎ߲ߢߐ߲߮ ߛߋ߫ ߸ ߣߌ߫ ߟߊ߬ߓߐ߬ߟߌ߫ ߕߍ߫ ، ߣߴߊ߬ߟߎ߫ ߞߏ߬ߣߌ߲ ߓߐ߫ ߘߴߊ߬ߟߎ߫ ߖߘߍ߬ ߦߋ߫ ߞߎ߲߬ߞߏ߬ ߕߍ߫ ߊߟߎ߫ ߡߊ߬ ߏ߬ ߘߐ߫ ߸ ߣߴߊ߬ߟߎ߫ ߣߐ߬ ߞߍ߫ ߘߴߏ߬ ߞߍ߫ ߟߴߊ߬ߟߎ߫ ߖߘߍ߬ ߘߐ߫ ߢߊ߫ ߡߊߟߐ߲ߣߍ߲߫ ߡߊ߬ ( ߞߎ߬ߙߎ߲߬ߘߎ ߞߣߐ߫) ، ߊߟߊ߫ ߘߏ߲߬ ߦߋ߫ ߣߌ߬ߣߌ߬ߟߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿240﴾

ߘߊ߰ߡߎ߲߬ ߦߋ߫ ߟߊ߫ ߓߌ߬ߟߊ߬ߓߊ߰ߕߐ ߟߎ߫ ߞߊ߲߬ ( ߊ߬ߟߎ߬ ߕߏߢߊ ߟߎ߬ ߘߌ߫ ) ߢߊ߫ ߡߊߟߐ߲ߣߍ߲߫ ߡߊ߬ ( ߞߎ߬ߙߎ߲߬ߘߎ ߞߐ߬ߣߐߡߊ߬ ) ߸ ߏ߰ ߛߋ߲ߛߋߘߋ߲ ߠߋ߬ ߘߌ߫ ߝߊ߲ߕߊ߲ߞߟߊ ߟߎ߫ ߡߊ߬ ﴿241﴾

ߒ߬ߓߵߊߟߊ߫ ߦߴߊ߬ ߟߊ߫ ߟߝߊߙߌ ߟߎ߬ ߘߐߞߣߍ߫ ߟߴߊߟߎ߫ ߦߋ߫ ߕߊ߲߬ ߠߋ߬ ߖߐ߬ߛߴߊߟߎ߫ ߘߴߊ߬ ߤߊߞߟߌߡߦߊ߫ ﴿242﴾

ߌ ߡߴߊ߬ ߦߋ߫ ߓߊ߬ ߡߍ߲ ߠߎ߬ ߥߊ߯ ߦߙߌߞߊ ߝߎ߲ߘߌ߫ ߘߊ߫ ߞߊ߬ ߓߐ߫ ߊ߬ߟߎ߬ ߟߊ߫ ߟߎ ߟߎ߬ ߞߣߐ߫ ߛߊ߬ߦߊ ߢߍߛߌߟߊ߲ߧߍ ߡߊ߬؟ ߏ߬ ߞߍ ߊߟߊ߫ ߞߊ߲߫ ߏ߬ ߟߎ߫ ߡߊ߬ ߞߏ߫ ߊߟߎ߫ ߛߊ߬ ߞߐߘߍ߫ ، ߊ߲ ߓߊ߲߫ ߘߊ߫ ߞߵߊ߬ߟߎ߬ ߟߊߢߣߊߡߦߊ߫ ، ߖߊ߯ߕߋ߬ ߸ ߊߟߊ߫ ߦߋ߫ ߢߊ߬ߒߡߊ߭ ߕߌ߱ ߟߋ߬ ߘߌ߫ ߡߐ߱ ߟߎ߬ ߟߊ߫ ߸ ߓߊ߬ߙߌ߬ ߡߐ߱ ߝߊ߲߬ߓߊ ߟߋ߬ ߕߍ߫ ߊ߬ ߞߏߢߌߡߊߟߐ߲߫ ߠߊ߫ ﴿243﴾

ߊߟߎ߫ ߞߍ߬ߟߍ ߞߍ߫ ߊߟߊ߫ ߛߌߟߊ ߞߊ߲߬ ߸ ߊ߬ ߣߴߊߟߎ ߦߴߊ߬ ߟߐ߲߫ ߞߏ߫ ߊߟߊ߫ ߦߋ߫ ߡߍ߲ߠߌ߲ߠߊ߫ ߘߌ߫ ߸ ߊ߰ ߟߐ߲ߠߌ߲ߠߊ߫ ߘߌ߫ ﴿244﴾

ߖߍߣߍ߲ ߘߴߊߟߊ߫ ߘߐ߲ߘߐ߫ ߘߐ߲ߘߐߟߌ߫ ߢߌߡߊ߫ ߟߊ߫؟ ߊ߬ ߦߴߏ߬ ߓߊߟߌ߫ ߏ߬ ߦߋ߫ ߓߊߟߌ߫ ߞߏ߫ ߛߌߦߊߡߊ߲߫ ߠߊ߫؟ ߊߟߊ߫ ߟߋ߬ ߘߏ߲߬ ߦߋ߫ ߘߐ߬ߡߌ߬ߣߊ߬ߟߌ ߣߌ߫ ߘߐ߬ߝߎ߬ߝߋ߲߬ߠߌ߲ ߞߍ߫ ߟߊ߫ ، ߊߟߎ߫ ߘߏ߲߬ ߣߊ߬ߕߐ߬ ߟߊߛߊ߬ߦߌ߬ ߟߴߊ߬ߟߋ ߟߋ߫ ߡߊ߬ ﴿245﴾

ߌ ߡߴߊ߬ ߦߋ߫ ߓߊ߬ ߸ ߡߎߛߊ߫ ߕߊ߬ߡߌ߲ ߞߐ߫ ߸ ߌߛߌ߬ߙߊ߬ߌߟߊ߫ ߡߐ߰ߘߐ߬ߜߍ ߡߍ߲ ߠߎ߫ ߞߵߊ߬ ߝߐ߫ ߊ߬ߟߎ߬ ߟߊ߫ ߟߊ߬ߝߐ߬ߓߊ߮ ߘߏ߫ ߦߋ߫ ߸ ߞߏ߫ ߡߊ߲߬ߛߊ߬ ߟߊߥߟߌ߬ ߊ߲ ߧߋ߫ ߸ ߊ߲ ߣߴߏ߬ ߦߋ߫ ߞߍ߬ߟߍ ߞߍ߫ ߊߟߊ߫ ߛߌߟߊ ߞߊ߲߬ ، ߏ߬ ߞߊ߲߫ ߞߏ߫ ߦߊ߯ߟߊ߫ ߣߌ߫ ߞߍ߬ߟߍ ߛߓߍ ߘߴߊߟߎ߫ ߡߊ߬ ߊߟߎ߫ ߕߍ߫ ߊߟߎ߫ ߓߊ߲߬ ߞߍ߬ߟߍ ߡߊ߬؟ ߊ߬ߟߎ߬ ߞߊ߲߫ ߞߏ߫ ߡߋ߬ߘߋ ߦߴߊ߲ ߠߊ߫ ߊ߲ ߕߍ߫ ߞߍ߬ߟߍ ߞߍ߫ ߊߟߊ߫ ߛߌߟߊ ߞߊ߲߬؟ ߒ߬ ߘߏ߲߬ ߓߘߊ߫ ߟߊߓߐ߫ ߒ߬ ߠߊ߫ ߟߎ ߟߎ߬ ߞߣߐ߫ ߊ߬ ߣߌ߫ ߒ߬ ߘߋ߲ ߠߎ߬ ߕߍߡߊ߬ ، ߞߍ߬ߟߍ ߖߊ߬ߡߊߙߌ ߘߌ ߏ߬ ߟߎ߫ ߡߊ߬ ߸ ߊ߬ߟߎ߫ ߝߊ߲߬ߓߊ ߞߵߊ߬ߟߎ߬ ߞߐߟߊ߫ ߥߘߊߎ߫ ߝߏ߫ ߊ߬ߟߎ߬ ߘߐ߫ ߕߜߋߣߍ߲߫ ، ߤߊ߲߫ ߸ ߊߟߊ߫ ߞߊ߬ ߕߐ߬ߢߍ߰ߒߕߋ ߟߎ߬ ߟߐ߲߫ ߠߋ߬ ߘߋ߬ ﴿246﴾

ߊ߬ߟߎ߬ ߟߊ߫ ߟߊ߬ߝߐ߬ߓߊ߮ ߣߊ߬ ߘߴߊ߬ ߝߐ߫ ߊ߬ߟߎ߬ ߦߋ߫ ߸ ߞߏ߫ ߊߟߊ߫ ߓߘߊ߫ ߕߊߟߎߕߊ߫ ߟߊߛߌ߰ ߊߟߎ߫ ߞߎ߲߬ߠߊ߫ ߡߊ߲߬ߛߊ ߘߌ߫ ، ߊ߬ߟߎ߬ ߞߊ߲߫ ߞߴߏ߬ ߛߋߕߐ߫ ߟߊߛߌ߰ ߟߊ߫ ߡߊ߲߬ߛߊ߬ߦߊ ߟߊ߫ ߒ߬ߠߎ߫ ߞߎ߲߬ߠߊ߫ ߘߌ߬؟ ߒ߬ߠߎ߫ ߟߋ߫ ߓߍ߲߬ߣߍ߲߫ ߡߊ߲߬ߛߊ߬ߦߊ ߟߊ߫ ߏ߬ ߘߌ߫ ، ߓߊ ߣߊ߲߬ߝߟߏ߬ ߦߙߌߥߊߣߍ߲߫ ߡߊ߫ ߞߍ߫ ߊ߬ ߤߊ߬ߙߌ߬ߖߍ߮ ߘߌ߫ ، ( ߟߊ߬ߝߐ߬ߓߊ߮ ) ߞߊ߲߫ ߞߏ߫ ߊߟߊ߫ ߘߏ߲߬ ߠߵߏ߬ ߟߋ ߛߎߥߊ߲ߘߌ߫ ߟߴߊߟߎ߫ ߡߊ߬ ߘߋ߬ ، ߊ߬ ߣߴߊ߬ ߞߵߏ߬ ߟߋ ߖߘߌ߫ ߟߐ߲ߠߌ߲ ߣߌ߫ ߝߊ߬ߘߌ߬ ߞߟߏ ߓߍ߯ ߦߙߌߥߊߣߍ߲ߓߊ ߟߊ߫ ، ߊߟߊ߫ ߘߏ߲߬ ߦߴߊ߬ ߟߊ߫ ߡߊ߲߬ߛߊ߬ߦߊ ߘߌ߫ ߟߊ߫ ߡߐ߰ ߟߋ߬ ߡߊ߬ ߸ ߡߍ߲ ߓߊ߯ ߊ߬ ߘߌߦߊ߫ ، ߓߊߏ߬ ߊߟߊ߫ ߦߙߌߥߊߣߍ߲߫ ߊ߬ ߟߐ߲ߠߌ߲ߣߍ߲߫ ﴿247﴾

ߊ߬ߟߎ߬ ߟߊ߫ ߟߊ߬ߝߐ߬ߓߊ߮ ߞߊ߲߫ ߊ߬ߟߎ߬ ߦߋ߫ ߸ ߞߏ߫ ߊ߬ ߟߊ߫ ߡߊ߲߬ߛߊ߬ߦߊ ߕߐ߰ߡߊ߬ߛߙߋ ߦߋ߫ ߡߍ߲ ߘߌ߫ ߸ ( ߊߟߎ߫ ߟߊ߫ ߗߍ߫ ) ߞߊ߲ߞߌߙߊ ߦߋ߫ ߣߵߊߟߎ߫ ߡߊ߬ ߸ ߊߟߎ߫ ߡߊ߰ߙߌ ߟߊ߫ ߡߊ߬ߝߊ ߦߴߏ߬ ߡߍ߲ ߞߣߐ߫ ߸ ߊ߬ ߣߌ߫ ߡߎߛߊ߫ ߘߏ߲߬ߞߏ ߣߌ߫ ߤߊߙߎߣߊ߫ ߘߏ߲߬ߞߏ ߟߎ߬ ߓߟߏߝߋ߲߫ ߕߏߣߍ߲ ߘߏ߫ ߟߎ߫ ߕߐ߭ ، ߡߟߍ߬ߞߊ ߟߎ߫ ߣߊ߬ߕߐ߫ ߏ߬ ߟߋ ߡߊߟߐ߬ ߟߊ߫ ، ߏ߬ ߦߋ߫ ߕߊ߰ߛߌ߬ ߞߏ߬ߓߊ߫ ߟߋ߬ ߘߌ߫ ߊߟߎ߫ ߦߋ߫ ߘߋ߬ ߸ ߣߴߊ߬ ߕߘߍ߬ ߘߊ߫ ߊߟߎ߫ ߦߋ߫ ߘߍ߲߬ߞߣߍ߬ߦߊ߬ߓߊ߯ ߟߎ߫ ߘߌ߫ ﴿248﴾

ߕߎ߬ߡߊ ߡߍ߲ ߕߊߟߎߕߊ߫ ߓߐ߫ ߘߊ߫ ߞߟߍ߬ߓߏߟߏ߲ ߠߎ߬ ߘߌ߫ ߸ ߊ߬ ߞߊ߲߫ ߞߏ߫ ߊߟߊ߫ ߦߴߊߟߎ߫ ߞߘߐߓߐ߫ ߟߊ߫ ߞߐ߭ ߘߏ߫ ߟߊ߫ ߸ ߡߍ߲ ߓߊ߯ ߊ߬ ߡߌ߲߬ ߏ߬ ߘߐ߫ ߏ߬ ߕߍ߫ ߒ ߝߋ߲߫ ߘߌ߫ ، ߣߌ߫ ߡߍ߲ ߡߴߏ߬ ߣߍߣߍ߫ ߝߋߎ߫ ߸ ߏ߬ ߟߋ ߦߋ߫ ߒ ߘߐ߫ ߘߌ߫ ، ߝߏ߫ ߣߌ߫ ߡߍ߲ ߞߊ߬ ߛߏ߬ߙߟߌ߬ ߞߏ߬ ߞߋߟߋ߲߫ ߞߍ߫ ߊ߬ ߕߍ߮ ߟߊ߫ ߕߋ߲߬ ، ߞߏ߬ߣߵߊ߬ߟߎ߬ ߓߍ߯ ߞߵߊ߬ߟߎ߫ ߡߌ߲߬ ߏ߬ ߘߐ߫ ߸ ߝߏ߫ ߘߡߊߘߡߊߣߍ߲߫ ، ߊ߬ ߕߊ߬ߡߌ߲߬ߣߍ߲ ( ߞߐ߭ ) ߏ߬ ߟߊ߫ ߸ ߊ߬ ߣߴߊ߬ ߝߍ߬ߡߐ߯ ߘߍ߲߬ߞߣߍ߬ߦߊ߬ߣߍ߲ ߠߎ߬ ، ( ߡߌ߲߬ߠߌ߲߬ߠߊ ) ߟߎ߬ ߞߊ߲߫ ߞߏ߫ ߟߊ߬ߣߐ߬ ߛߌ߫ ߕߍ߫ ߊ߲ ߦߋ߫ ߓߌ߬ ߖߊߟߎߕߊ߫ ߣߴߊ߬ ߟߊ߫ ߞߟߍ߬ߓߏߟߏ߲ ߠߎ߫ ߡߊ߬ ، ߒ߬ߞߊ߬ ( ߡߌ߬ߠߌ߲߬ߓߊߟߌ) ߡߍ߲ ߠߎ߬ ߦߴߊ߬ ߓߛߌ߬ߞߌ߬ ߟߊ߫ ߞߏ߫ ߊ߬ߟߎ߫ ߣߊ߬ߕߐ߫ ߟߋ߬ ߊߟߊ߫ ߓߍ߲߬ߢߐ߲߰ߦߊ߬ ߟߊ߫ ߸ ߏ߬ ߟߎ߬ ߞߊ߲߫ ߞߏ߫ ߖߡߊ߬ߣߍ߲߬ ߕߜߋ߬ ߛߘߍߡߊ߲߫ ߓߍ߫ ߸ ߏ߬ ߟߎ߬ ߓߘߊ߫ ߛߋ߫ ߖߡߊ߬ ߞߙߎ߬ ߛߌߦߊߡߊ߲߫ ߠߴߊߟߊ߫ ߟߊ߫ ߘߌ߬ߢߍ ߟߊ߫ ، ߓߊ ߊߟߊ߫ ߦߋ߫ ߡߎ߬ߢߎ߲߬ߓߊ߮ ߟߎ߫ ߟߋ߫ ߝߍ߬ ﴿249﴾

ߊ߬ߟߎ߬ ߛߋ ߞߟߍ߬ߓߙߊ ߘߐ߫ ߖߊߟߎ߯ߕߊ߫ ߣߴߊ߬ ߟߊ߫ ߞߟߍ߬ߓߏߟߏ߲ ߠߎ߬ ߢߊߞߘߐ߫ ߸ ߊ߬ߟߎ߬ ߞߊ߲߫ ߞߏ߫ ߊ߲ ߡߊ߰ߙߌ ߸ ߡߎ߬ߢߎ߲ ߠߊߓߐ߲߬ ߊ߲ ߞߊ߲߬ ، ߌ ߦߴߊ߲ ߛߋ߲߭ ߠߎ߬ ߓߊ߲ߓߊ߲߫ ߸ ߊ߬ ߣߴߌ ߦߴߊ߲ ߘߍ߬ߡߍ߲߫ ߡߌ߬ߙߌ߲߬ߘߌ߫ ߓߊ߲߬ߣߍ߲ ߠߎ߫ ߡߊ߬ ﴿250﴾

ߏ߬ ߞߍ ߸ ߊ߬ߟߎ߫ ߞߊ߬ ( ߖߎ߮ ) ߏ߬ ߟߎ߬ ߞߊߘߌ߫ ߊߟߊ߫ ߟߊ߫ ߘߌ߬ߢߍ ߟߊ߫ ߕߊߎ߫ ، ߘߊߎߘߊ߫ ߞߊ߬ ߖߊߟߎ߯ߕߊ߫ ߝߊ߰ ، ߊߟߊ߫ ߞߵߏ߬ ߛߐ߫ ߡߊ߲߬ߛߊ߬ߦߊ ߣߌ߫ ߥߘߋ߬ߥߘߋ߬ߟߌ ߟߊ߫ ( ߣߊߟߌ߬ߡߎ߲߫ ߟߊ߬ߝߐ߬ߓߊ߰ߦߊ ߘߌ߫ ) ، ߊ߬ ߣߌ߫ ߞߵߊ߬ ߟߊߟߐ߲ߠߌ߲߫ ߞߏ߫ ߟߊ߫ ߡߍ߲ ߞߵߊ߬ ߘߌߦߊ߫ ، ߣߌ߫ ߊߟߊ߫ ߕߍ߫ ߡߐ߱ ߘߏ߫ ߟߎ߫ ߟߊߢߐ߬ߣߌ߲߬ ߠߊ߫ ߘߏ߫ ߟߎ߫ ߟߊ߫ ߸ ߛߊ߫ ߘߎ߱ ߓߘߊ߫ ߕߌߢߍ߫ ، ߓߊ߬ߙߌ߬ ߊߟߊ߫ ߦߋ߫ ߢߊ߬ߒߡߊ߭ ߕߌ߱ ߟߋ߬ ߘߌ߫ ߖߊ߯ߓߊ ( ߘߏ߲߬ߞߏ ) ߟߎ߬ ߦߋ߫ ﴿251﴾

ߢߌ߲߬ ߠߎ߬ ߦߋ߫ ߊߟߊ߫ ߟߊ߫ ߟߝߊߙߌ ߟߎ߫ ߟߋ߬ ߘߌ߫ ߸ ߊ߲ ߧߴߏ߬ ߟߎ߫ ߟߋ߬ ߘߐߞߊ߬ߙߊ߲߬ ߠߴߌ ߦߋ߫ ߕߎ߬ߢߊ ߟߊ߫ ، ߓߊ ߖߊ߯ߕߋ߬ ߸ ߌ ߦߋ߫ ߞߋߟߊ ߟߎ߬ ߘߏ߫ ߟߋ߬ ߘߌ߫ ﴿252﴾

ߞߋߟߊ ߏ߬ ߟߎ߫ ߘߏ߲߬ ߸ ߊ߲ ߞߵߏ߬ ߟߎ߬ ߘߏ߫ ߟߎ߫ ߟߊߝߌ߬ߛߦߊ߬ ߘߏ߫ ߟߎ߫ ߘߌ߫ ߟߋ߬ ، ߓߊߏ߬ ߘߏ߫ ߟߎ߫ ߦߴߊ߬ߟߎ߬ ߘߐ߫ ߸ ߊߟߊ߫ ߞߵߏ߬ ߟߎ߬ ߞߎߡߊߢߐ߲߯ߦߊ߫ ߸ ߞߊ߬ ߘߏ߫ ߟߎ߫ ߡߐ߬ߟߐ߲ ߠߎ߬ ߡߊߦߟߍ߬ ( ߓߍ߯ ߛߊ߲ߘߐ߫ ) ، ߊ߲ ߞߊ߬ ߡߊߙߌߦߡߊ߫ ߘߋ߲ߞߍ߫ ߛߐ߫ ߔߊߞߌ ߟߎ߬ ߟߊ߫ ، ߊ߬ ߣߴߊ߲ ߞߵߊ߬ ߛߍ߲ߓߍߘߏ߲߬ ߛߊߣߌ߲ߧߊ ߛߟߐߡߌ߲ ߠߊ߫ ، ߊ߬ ߕߎ߲߬ ߓߊ߯ ߘߌߦߴߊߟߊ߫ ߦߋ߫ ߸ ߏ߬ ߟߎ߬ ߞߐߓߊ߮ ߟߎ߫ ߕߎ߲߬ ߕߍ߫ ߢߐ߲߮ ߞߟߍ߬ ߔߊߞߌ ߣߊ߭ ߞߐ߫ ߊ߬ߟߎ߫ ߡߊ߬ ، ߞߏ߬ߣߵߊ߬ߟߎ߫ ߞߊ߬ ߢߐ߲߮ ߛߐ߬ߛߐ߫ ߟߋ߬. ߊ߬ߟߎ߬ ߘߏ߫ ߟߎ߫ ߘߍ߲߬ߞߣߍ߬ߦߊ߬ ߘߊ߫ ߸ ߘߏ߫ ߟߎ߫ ߝߣߊ߫ ߓߊ߲߬ߓߊ߰ߦߊ߬ ߘߊ߫ ، ߊ߬ ߕߎ߲߬ ߓߊ߯ ߊߟߊ߫ ߘߌߦߊ߫ ߸ ߊ߬ߟߎ߫ ߕߎ߲߬ ߕߍ߫ ߢߐ߲߮ ߞߟߍ߬ ߝߋߎ߫ ، ߒ߬ߞߊ߬߸ ߊߟߊ߫ ߞߏ߫ ߟߋ߬ ߞߍ߫ ߟߊ߫ ߸ ߊ߬ ߓߊ߯ ߡߍ߲ ߠߊߢߌߣߌ߲߫ ﴿253﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߯ ߖߘߍ߬ߡߊ߬ߓߐ ߞߍ߫ ߣߊ߲߬ߝߟߏ ߘߐ߫ ߸ ߊ߲ ߞߵߊߟߎ߫ ߤߊ߬ߙߌ߬ߖߍ߰ ߡߍ߲ ߠߊ߫ ߸ ߛߊߣߌ߬ ߟߏ߲߫ ߣߊ߬ ߕߍ߫ ߝߙߋ߬ߢߐ߲߰ߦߊ߬ ߕߍ߫ ߡߍ߲ ߘߐ߫ ߸ ߕߋߙߌߢߐ߲߯ߦߊ߫ ߕߍ߫ ߸ ߛߟߏ߬ߣߊ߬ߟߌ߫ ߕߍ߫ ، ߓߊ߲߬ߓߊ߮ ߟߎ߬ ߛߊ߫ ߸ ߏ߬ ߟߎ߫ ߟߋ߬ ߕߐ߬ߢߍ߰ߒߕߋ ߟߎ߬ ߘߌ߫ ﴿254﴾

ߊߟߊ߫ ߸ ߡߊ߰ߙߌ߬ ߜߘߍ߫ ߕߍ߫ ߊ߬ߟߋ ߞߐ߫ ، ߣߌߡߊ ߟߋ߬ ، ߟߐ߬ߣߍ߲ߒߖߘߍ߬ߟߊ ߟߋ߬ ، ߖߌ߲߬ߞߐ߲߬ ߕߍ߫ ߊ߬ ߡߌ߬ߘߊ߬ ߟߊ߫ ߸ ߞߎߡߊ߫ ߕߍ߫ ߛߌ߬ߣߐ߯ ߡߊ߬ ، ߝߋ߲ ߓߍ߯ ߟߴߊ߬ ߕߊ ߘߌ߫ ߸ ߡߍ߲ ߦߋ߫ ߛߊ߲ ߠߎ߬ ߞߣߐ߫ ، ߊ߬ ߣߌ߫ ߡߍ߲ ߦߋ߫ ߘߎ߱ ߞߣߐ߫ ، ߖߐ߲߫ ߓߴߛߋ߫ ߞߊ߬ ߛߟߏ߬ߣߊ߬ߟߌ ߞߍ߫ ߊ߬ ߓߘߊ ߣߴߊ߬ ߡߊ߫ ߘߌ߬ߢߍ߬؟ ߊ߬ ߞߊ߬ ߡߐ߱ ߟߎ߬ ߢߍ߫ ߞߏ ߣߴߊ߬ߟߎ߬ ߞߐ߫ ߞߏ ߓߍ߯ ߟߐ߲߫ ، ߊ߬ߟߎ ߘߏ߲߬ ߕߍ߫ ߝߏߦߌ߫ ߞߊ߬ߟߊߡߊ߬ ߊ߬ߟߋ ߟߊ߫ ߟߐ߲ߠߌ߲ ߘߐ߫ ߝߏ߫ ߡߍ߲ ߓߊ߯ ߊ߬ ߘߌߦߊ߫ ، ߊ߬ ߟߊ߫ ߥߊ߰ߣߍ߲ ߦߙߌߥߊߣߍ߲߫ ߛߊ߲ ߠߎ߬ ߣߌ߫ ߘߎ߱ ߓߍ߯ ߡߊ߬ ، ߏ߬ ߝߌ߬ߟߊ ߟߊߕߊ߲߬ߞߊ ߘߏ߲߬ ߕߍ߫ ߊ߬ ߘߋ߬ߥߎ߬ ߟߊ߫ ߝߏߦߌ߬ ߟߊ߫ ، ߊ߬ߟߋ ߟߋ߬ ߔߏ߲ߞߌ߲߫ ߓߟߋ߬ߓߟߋ ߘߌ߫ ﴿255﴾

ߞߘߊߡߊߟߌ߫ ߕߍ߫ ߘߌ߯ߣߊ ߘߐ߫ ، ߓߊ ߞߊ߲ߘߦߊ ߣߌ߫ ߝߌ߬ߟߌ ߘߊ߲߬ߕߍ߰ߓߐ ߓߘߊ߫ ߟߊߒߞߣߍߡߊ߫ ، ߡߍ߲ ߓߊ߯ ߊ߬ ߓߊ߲߬ ߞߏ߲ߞߏߓߊ ߘߐ߫ ߸ ߞߊ߬ ߘߍ߲߬ߞߣߍ߬ߦߵߊߟߊ߫ ߡߊ߬ ߸ ߏ߬ ߓߘߴߊ߬ ߓߟߏߞߍ߫ ߟߊߒߠߦߊ߫ ߜߊ߬ߟߌ߬ ߟߊ߫ ߸ ߡߍ߲ ߕߍ߫ ߕߍ߰ ߟߊ߫ ، ߊߟߊ߫ ߘߏ߲߬ ߦߋ߫ ߡߍ߲ߠߌ߲ߠߊ߫ ߘߌ߫ ߸ ߊ߰ ߟߐ߲ߠߌ߲ߠߊ߫ ߘߌ߫ ﴿256﴾

ߊߟߊ߫ ߟߋ߬ ߘߍ߲߬ߞߣߍ߬ߦߊ߬ߓߊ߮ ߟߎ߫ ߢߌ߲߭ ߘߌ߫ ، ߊ߬ߟߋ ߟߴߏ߬ ߟߎ߬ ߟߊߓߐ߫ ߟߊ߫ ߘߌ߬ߓߌ ߟߎ߬ ߘߐ߫ ߸ ߞߊߕߙߍ߬ ߦߋߟߋ߲ ߡߊ߬ ، ߓߊ߲߬ߓߊ߮ ߟߎ߫ ߟߋ߬ ߢߌ߲߭ ߠߎ߬ ߦߋ߫ ߞߏ߲ߞߏߓߊ ߟߎ߬ ߘߌ߫ ، ߏ߬ ߟߎ߫ ߟߴߏ߬ ߟߎ߬ ߟߊߓߐ߫ ߟߊ߫ ߦߋߟߋ߲ ߘߐ߫ ߸ ߞߊߕߙߍ߬ ߘߌ߬ߓߌ ߡߊ߬ ، ߒ߬ߓߊ߬ ߏ߬ ߟߎ߫ ߟߋ߬ ߕߊ ߘߏ߲߬ߞߏ ߟߎ߬ ߘߌ߫ ، ߏ߬ ߟߎ߫ ߘߏ߲߬ ߘߎߡߊߕߐ߫ ߦߋ߲߬ ߠߋ߬ ﴿257﴾

ߌ ߡߴߊ߬ ߦߋ߫ ߓߊ߬ ߡߍ߲ ߞߊ߬ ߌߓߎ߬ߙߊ߬ߤߌߡߊ߫ ߘߊߘߐߖߵߊ߬ ߡߊ߰ߙߌ߬ ߞߏ ߘߐ߫ ߸ ߞߏ߫ ߊߟߊ߫ ߓߘߴߊ߬ߟߋ߬ ߛߐ߫ ߡߊ߲߬ߛߊ߬ߦߊ ߟߊ߫؟ ߌߓߎ߬ߙߊ߬ߤߌߡߊ߫ ߣߵߊ߬ ߝߐ߫ ߟߊ ߞߏ߫ ߒߠߋ ߡߊ߰ߙߌ ߟߋ߬ ߡߐ߰ ߟߊߣߌߡߦߊ߫ ߟߊ߫ ߞߊ߬ ߡߐ߰ ߛߊ߬ ، ߊ߬ ߞߊ߲߫ ߞߏ߫ ߒߠߋ ߝߣߊ߫ ߦߋ߫ ߡߐ߰ ߟߊߣߌߡߦߊ߫ ߟߊ߫ ߞߊ߬ ߡߐ߰ ߛߊ߬ ، ߌߓߎ߬ߙߊ߬ߤߌߡߊ߫ ߞߊ߲߫ ߞߏ߫ ߊߟߊ߫ ߟߋ߬ ߣߊ߬ ߟߊ߫ ߕߋ߬ߟߋ ߘߌ߫ ߛߐ߲߬ ߞߊ߬ ߓߐ߫ ߕߟߋ߬ߓߐ ߘߐ߫ ، ߒ߬ߓߊ߬ ߌ ߝߣߊ߫ ߣߵߊ߬ ߘߌ߫ ߞߊ߬ ߓߐ߫ ߕߟߋ߬ߓߋ ߘߐ߫ ߓߊ߫ ، ߏ߬ ߞߍ ߓߊ߲߬ߓߊ߮ ߞߣߐ߬ߘߐߝߟߌ߬ ߘߊ߫ ߗߏ߫ ، ߓߊ ߊߟߊ߫ ߕߍ߫ ߡߌ߬ߙߌ߲߬ߘߌ߫ ߕߐ߬ߢߍ߰ߒߕߋ ߟߎ߬ ߞߊ߲ߘߊ߫ ߟߊ߫ ﴿258﴾

ߥߟߊ߫ ( ߊ߰ ߟߋ߬ ) ߦߏ߫ ߡߍ߲ ߕߊ߬ߡߌ߲߬ߕߐ ߛߏ ߘߏ߫ ߟߊ߫ ߸ ߞߵߊ߬ ߕߘߍ߬ ߊ߬ ߜߘߊ ߟߎ߬ ߟߊߣߍ߲߫ ߊ߬ ߛߊ߲ߛߊߙߊ ߟߎ߫ ߞߊ߲߬ ߟߋߎ߫ ، ߊ߬ ߞߊ߲߫ ߞߏ߫ ߊߟߊ߫ ߞߍߕߐ߫ ߦߊ߲߬ ߠߊߞߎߣߎ߲߫ ߠߴߊ߬ ߛߊ߬ߣߍ߲ ߞߐ߫ ߘߌ߬ ߛߊ߫؟ ߏ߬ ߞߍ ߸ ߊߟߊ߫ ߞߵߊ߬ߟߋ߫ ߛߊ߬ ߞߊ߬ ߛߊ߲߬ ߗߡߍ߬ ߞߍ߫ ߸ ߞߊ߬ ߓߊ߲߫ ߞߵߊ߬ ߟߊߞߎߣߎ߲߫ ߞߵߊ߬ ߢߌ߬ߣߌ߲߬ߞߊ߬ ߸ ߞߏ߫ ߌ ߓߘߊ߫ ߥߎ߬ߛߎ߫ ߖߋ߬ߟߌ߫ ߟߋ߬ ߞߍ߫ ߦߊ߲߬؟ ߊ߬ ߞߊ߲߫ ߞߏ߫ ߒ ߓߘߊ߫ ߥߎ߬ߛߎ ߡߍ߲ ߞߍ߫ ߸ ߕߟߋ߬ ߞߋߟߋ߲߫ ߥߟߊ߫ ߕߋ߬ߟߋ߫ ߝߊ߲߬ ߞߋߟߋ߲߫ ، ߊߟߊ߫ ߞߊ߲߫ ߞߏ߫ ߍ߲߬ߍ߲ߍ߲߬ ، ߌ ߓߘߊ߫ ߛߊ߲߬ ߗߍ߬ߡߍ߫ ߥߎ߬ߛߎ߫ ߟߋ߬ ߞߍ߫ ߦߊ߲߬ ، ߌ ߢߊ ߟߐ߬ ߌ ߟߊ߫ ߛߎ߬ߡߊ߲ ߣߴߌ ߡߌ߲߬ߖߌ ߘߐ߫ ߓߊ߫ ߸ ߏ߬ ߛߌ߫ ߡߊ߫ ߕߌߢߍ߫ ، ߌ ߢߊ ߟߐ߬ ߌ ߟߊ߫ ߝߊ߬ߟߌ ߝߣߊ߫ ߘߐ߫ ، ߊ߲ ߧߴߌ ߞߍ߫ ߟߊ߫ ߡߊ߲߬ߕߊߣߌ߲߫ ߠߋ߬ ߘߌ߫ ߡߐ߱ ߟߎ߬ ߦߋ߫ ، ߌ ߢߊ ߟߐ߬ ( ߌ ߟߊ߫ ߝߊ߬ߟߌ ) ߞߟߏ ߟߎ߬ ߘߐ߫ ߓߊ߫ ، ߊ߲ ߧߴߏ߬ ߟߎ߬ ߟߊߘߍ߬ ߟߊ߫ ߢߊ ߡߍ߲ ߸ ߞߊ߬ ߓߊ߲߫ ߞߊ߬ ߛߏ߬ߓߏ ߟߴߊ߬ ߡߊ߬ ، ߕߎ߬ߡߊ ߡߍ߲ ߞߏ ߢߊߘߐߜߍ ߟߊ߲ߞߣߍߡߊ߫ ߘߴߊ߬ ߦߋ߫ ߸ ߊ߬ ߞߊ߲߫ ߞߏ߫ ߒ ߓߘߴߊ߬ ߟߐ߲߫ ߛߊ߫ ߒ ߞߏ߫ ߖߊ߰ ߊߟߊ߫ ߟߋ߬ ߛߋ߫ ߟߊ߫ ߞߏ ߓߍ߯ ߟߊ߫ ﴿259﴾

ߕߎ߬ߡߊ ߡߍ߲ ߌߓߎ߬ߙߊ߬ߤߌߡߊ߫ ߞߵߊ߬ ߝߐ߫ ߞߏ߫ ߒ ߡߊ߰ߙߌ ߸ ߌ ߦߋ߫ ߛߎ߭ ߟߊߞߎߣߎ߲߫ ߠߊ߫ ߢߊ ߡߍ߲ ߏ߬ ߦߌ߬ߘߊ߬ ߒ ߠߊ߫ ߞߟߋ߫߹ ߊߟߊ߫ ߞߊ߲߫ ߞߏ߫ ߌ ߡߊ߫ ߘߍ߲߬ߞߣߍ߬ߦߊ߫ ߏ߬ ߘߐ߫ ߓߊ߬؟ ߊ߬ ߞߊ߲߫ ߞߏ߫ ߤߊ߯ߟߌ߯ (ߒ ߘߍ߲߬ߞߣߍ߬ߦߊ߬ߣߍ߲߫ ߖߐ߫) ߸ ߓߊ߬ߙߌ߬ ( ߒ ߧߴߊ߬ ߝߍ߬ ) ߒ ߛߣߐ߬ߡߍ ߟߋ߬ ߦߋ߫ ߡߝߊ߫ ، ߊߟߊ߫ ߞߊ߲߫ ߞߏ߫ ߒ߬ߓߊ߬ ߞߣߐ߬ ߣߊ߯ߣߌ߲߫ ߡߌ߬ߘߊ߬ ߌ ߦߴߏ߬ ߟߎ߬ ߟߊߘߋ߬ߙߌ߬ ߌ ߖߘߍ߬ ߟߊ߫ ، ߌ ߦߋ߫ ߓߊ߲߫ ߞߵߏ߬ ߟߎ߬ ( ߘߐߛߎ߬ߛߎ߬ߣߍ߲ ) ߞߎߘߎ߲߫ ߞߋߟߋ߲߫ ߓߌ߬ߟߊ߫ ߞߎ߬ߙߎ ߞߋ߬ߟߋ߲߬ߞߋ߬ߟߋ߲߬ߣߊ ߓߍ߯ ߞߊ߲߬ ، ߌ ߦߋ߫ ߓߊ߲߫ ߛߊ߫ ߞߵߊ߬ߟߎ߬ ߞߟߌ߫ ، ߊ߬ߟߎ߬ ߞߊߟߌߦߊߡߍߣߍ߲ߕߐ ߘߌ߫ ߣߵߌ ߡߊ߬ ߔߙߊߔߙߊ߫ ، ߌ ߦߴߊ߬ ߟߐ߲߫ ߛߊ߫ ߞߏ߫ ߊߟߊ߫ ߟߋ߬ ߣߌ߬ߣߌ߬ߟߊ߫ ߥߘߋ߬ߥߘߋ߬ߟߊ ߘߌ߫ ﴿260﴾

ߡߍ߲ ߠߎ߬ ߦߴߊ߬ߟߎ߬ ߟߊ߫ ߣߊ߲߬ߝߟߏ ߞߍ߫ ߟߊ߫ ߖߘߍ߬ߡߊ߬ߓߐ ߘߌ߫ ߊߟߊ߫ ߛߌߟߊ ߘߐ߫ ߸ ߏ߬ ߟߊߒߡߊ ߟߋ߬ ߦߏ߫ ߛߎ߬ߡߊ߲߬ ߞߡߊ߬ ߞߋߟߋ߲ ߓߊ߯ ߝߍߘߍ߲߫ ߕߌ߲ߛߐ߲߫ ߥߐߙߐ߲ߥߌ߬ߟߊ߬ ߘߌ߫ ، ߞߡߊ߫ ߗߡߍ߬ ߦߋ߫ ߕߌ߲ߛߐ߲ ߓߍ߯ ߟߊ߫ ، ߒ߬ߓߵߊߟߊ߫ ߦߋ߫ ߓߊߟߌߟߌ ߞߍ߫ ߟߊ߫ ߡߐ߰ ߟߋ߬ ߦߋ߫ ߡߍ߲ ߓߊ߯ ߊ߬ ߘߌߦߊ߫ ، ߊߟߊ߫ ߘߏ߲߬ ߦߙߌߥߊߣߍ߲߫ ߸ ߊ߬ ߟߐ߲ߠߌ߲ߣߍ߲߫ ﴿261﴾

ߡߍ߲ ߠߎ߬ ߦߴߊ߬ߟߎ߬ ߟߊ߫ ߣߊ߲߬ߝߟߏ ߟߎ߬ ߞߍ߫ ߟߊ߫ ߖߘߍ߬ߡߊ߬ߓߐ ߘߌ߫ ߊߟߊ߫ ߛߌߟߊ ߘߐ߫ ߸ ߊ߬ߟߎ߫ ߘߏ߲߬ ߕߍ߫ ߊ߬ߟߎ߬ ߟߊ߫ ߖߘߍ߬ߡߊ߬ߓߐ߬ ߝߋ߲ ߏ߬ ߡߊߛߊ߯ߘߊ߫ ߟߊ߫ ߞߎ߲߬ߘߐ߬ߓߌ߬ߟߊ߬ߟߌ߬ ߣߌ߫ ߕߙߐߦߊ߫ ߛߌ߫ ߟߊ߫ ، ߏ߬ ߟߎ߫ ߛߊ߬ߙߊ ߟߋ߫ ߛߌ߰ߣߍ߲߫ ߊ߬ߟߎ߬ ߢߍ߫ ߊ߬ߟߎ߫ ߡߊ߰ߙߌ ߕߍ߰ߟߊ ߘߐ߫ ، ߛߌߟߊ߲߫ ߕߍ߫ ߏ߬ ߟߎ߬ ߟߊ߫ ߸ ߊ߬ߟߎ߫ ߘߏ߲߬ ߕߍߣߊ߫ ߛߎ߬ߣߎ߲߬ ߠߊ߫ ﴿262﴾

ߞߊ߬ ߞߊ߲߫ ߓߘߍ߫ ߝߐ߫ ߊ߬ ߣߌ߫ ߞߊ߬ ߞߏߘߐߞߏߦߊߕߏ߫ ߞߍ߫ ߸ ߏ߬ ߟߎ߫ ߝߌ߬ߛߊ߬ ߛߘߊߞߊ߫ ߓߐ ߘߌ߫ ߸ ߞߵߊ߬ ߡߊߛߊ߯ߘߊ߫ ߕߙߐߦߊ ߟߊ߫ ، ߊߟߊ߫ ߘߏ߲߬ ߞߊ߯ߙߌߓߊ߯ ߘߌ߫ ߸ ߊ߰ ߡߎ߬ߢߎ߲߬ߓߊ߯ ߘߌ߫ ﴿263﴾

ߤߍ߲߬ ߊߟߎ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ، ߊߟߎ߫ ߞߊߣߵߊߟߎ߫ ߟߊ߫ ߛߘߊߞߊ ߟߎ߬ ߡߊߕߌߢߍ߫ ߞߎ߲߬ߘߐ߬ߓߌ߬ߟߊ߬ߟߌ ߣߌ߫ ߕߙߐߦߊ߫ ߟߊ߫ ߘߋ߬ ، ߦߏ߫ ߡߍ߲ ߦߴߊ߬ ߟߊ߫ ߣߊ߲߬ߝߟߏ ߞߍ߫ ߟߊ߫ ߖߘߍ߬ߡߊ߬ߓߐ ߘߌ߫ ߖߘߍ߬ߦߌߘߊ ߡߊ߬ ، ߊ߬ ߘߏ߲߬ ߕߍ߫ ߘߍ߲߬ߞߣߍ߬ߦߵߊߟߊ߫ ߣߌ߫ ߟߏ߲߫ ߠߊߓߊ߲ ߡߊ߬ ߸ ߏ߬ ߟߊߒߡߊ ߟߋ߬ ߦߏ߫ ߝߎ߯ߘߌ ߓߊ߯ ߞߍ߫ ߝߘߊ ߞߊ߲߬ ، ߛߊ߲ߖߌߓߊ ߓߐߙߐ߲ߘߐ߫ ߘߴߏ߬ ߞߊ߲߬ ߜߏߓߌ߫ ، ߞߵߊ߬ ߡߊߞߏߟߏ߲ ߕߏ߫ ߜߟߋߞߎ߬ ، ߊ߬ ( ߕߌ߱ ) ߟߎ߬ ߕߴߛߋ߫ ߟߊ߫ ߝߏߦߌ߬ ߟߊߣߐ߬ ߟߴߊ߬ߟߎ߬ ߟߊ߫ ߓߊ߯ߙߊ ߘߐ߫ ، ߊߟߊ߫ ߘߏ߲߬ ߕߍ߫ ߡߌ߬ߙߌ߲߬ߘߌ߫ ߓߊ߲߬ߣߍ߲ ߞߊ߲ߘߊ߫ ߟߊ߫ ﴿264﴾

ߡߍ߲ ߠߎ߬ ߦߴߊ߬ߟߎ߬ ߟߊ߫ ߣߊ߲߬ߝߟߏ ߟߎ߫ ߡߎ߬ߛߞߊ߬ ߟߴߊߟߊ߫ ߟߊ߫ ߘߌ߬ߢߍ ߟߎ߬ ߢߌߣߌ߲߫ ߞߊ߲ ߡߊ߬ ߸ ߊ߬ ߣߌ߫ ߞߐߡߊߓߌ߲ߓߌ߲ߠߌ߲ ߡߊ߬ ߞߵߏ߬ ߓߐ߫ ߊ߬ߟߎ߫ ߖߘߍ߬ ߘߐ߫ ، ߏ߰ ߟߋ߬ ߦߏ߫ ߣߊߞߐ ߓߊ߯ ߞߍ߫ ߞߌ߬ߢߍ߬ߘߎ߮ ߕߌ߲ߘߌ ߟߊ߫ ߸ ߛߊ߲ߖߌߓߊ ߦߋ߫ ߓߐߙߐ߲ߘߐ߫ ߏ߬ ߞߊ߲߬ ߸ ߏ߬ ߦߴߊ߬ ߥߟߏߒߘߐ ߟߎ߬ ߞߍ߫ ߓߊߟߌ߫ ߝߌ߬ߟߊ߫ ߝߌ߬ߟߊ߬ ߘߌ߫ ، ߤߊߟߌ߬ ߛߊ߲ߖߌߓߊ߫ ߡߊ߫ ߓߐߙߐ߲ߘߐ߫ ߊ߬ ߞߊ߲߬ ߸ ߛߊ߲ߖߌ߫ ߡߌߛߍ߲ ߦߴߊ߬ ߡߊߝߎ߲ߝߎ߲߫ ߕߋ߲߬ ߕߎ߲߫ ، ߊߟߊ߫ ߘߏ߲߬ ߢߊ߯ ߊߟߎ߫ ߗߋߥߊߟߌ ߟߎ߬ ߟߊ߫ ߖߐ߫ ﴿265﴾

ߦߊ߯ߟߴߊߟߎ߫ ߘߏ߫ ߘߴߊ߬ ߣߊ߬ߕߊ߫ ߓߊ߬ ߞߏ߫ ߣߊߞߐ߫ ߦߋ߫ ߞߍ߫ ߊ߬ߟߋ߬ ߓߟߏ߫ ߸ ߏ߬ ߝߊߣߍ߲ ߦߋ߫ ߞߍ߫ ߕߡߊߙߏߛߎ߲ ߠߎ߬ ߣߌ߫ ߖߊ߬ߓߌ߬ߙߋ߲߬ ߛߎ߲ ߠߎ߬ ߟߊ߫ ، ߖߌߢߊ ߟߎ߬ ߦߋ߫ ߥߦߏ߬ ߟߴߊ߬ ߞߘߐ߫ ߸ ߦߙߌ߫ ߘߋ߲ߕߊ ߛߎ߮ ߓߍ߯ ߘߏ߫ ߦߴߊ߬ ߓߟߏ߫ ߦߋ߲߬ ، ߞߐ߬ߘߐ ߦߋ߫ ߣߵߊ߬ߟߋ ߛߐ߬ߘߐ߲߬ ߞߵߊ߬ ߕߘߍ߬ ߓߐ߲ߛߐ߲߫ ߞߎ߲߬ߡߊߞߘߎ߬ߓߊߟߌ ߟߎ߫ ߟߵߊ߬ ߓߟߏ߫ ، ߘߊ߬ߡߊ߲߬ߛߊ߫ ߕߐ߲ߞߐߟߐ߲߫ ߕߡߊ ߕߊ߯ ߘߴߏ ߛߐ߬ߘߐ߲߬ ߞߵߊ߬ ߡߍ߬ߡߍ߬ ߟߋߎ߫ ، ߒ߬ߓߵߊߟߊ߫ ߦߴߊ߬ ߟߊ߫ ߟߝߊߙߌ ߟߎ߬ ߘߐߞߣߍ߫ ߟߴߊߟߎ߫ ߦߋ߫ ߕߊ߲߬ ߠߋ߬ ߛߴߊߟߎ߫ ߘߴߊ߬ߟߎ߫ ߕߊ߰ߛߌ߫ ﴿266﴾

ߤߍ߲߬ ߊߟߎ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߦߋ߫ ߖߘߍ߬ߡߊ߬ߓߐ ߞߍ߫ ߊߟߎ߫ ߛߐ߬ߘߐ߲߬ ߝߋ߲߬ ߓߘߍߓߘߍ ߟߎ߫ ߟߋ߬ ߘߐ߫ ߸ ߊ߬ ߣߴߊ߲ ߞߊ߬ ߝߋ߲ ߡߍ߲ ߠߎ߬ ߟߊߓߐ߫ ߊߟߎ߫ ߦߋ߫ ߘߎ߱ ߘߐ߫ ، ߊߟߎ߫ ߞߊߣߊ߬ ߝߋ߲߫ ߖߎ߮ ߞߙߍߞߙߍ߫ ߘߋ߬ ߞߏ߫ ߊߟߎ߫ ߦߋ߫ ߖߘߍ߬ߡߊ߬ߓߐ ߞߍ߫ ߟߴߏ߬ ߘߐ߫ ، ߓߊ ߤߊߟߵߊߟߎ߫ ߖߍ߬ߘߍ ߕߍ߫ ߛߐ߲߬ ߏ߬ ߡߌ߬ߘߊ߬ ߟߊ߫ ߝߏ߫ ߣߴߊߟߎ߫ ߞߵߊߟߎ߫ ߢߊ ߟߊߛߌ߬ ߏ߬ ߘߐ߫ ߸ ߊߟߎ߫ ߘߏ߲߬ ߦߴߊ߬ ߟߐ߲߫ ߞߏ߫ ߊߟߊ߫ ߦߋ߫ ߞߊ߯ߙߌߓߊ߯ ߕߊ߲߬ߘߏ߬ߕߊ߫ ߟߋ߬ ߘߌ߫ ﴿267﴾

ߜߍ߬ߘߍ ߦߴߊߟߎ߫ ߦߟߌߡߊߜߏߦߊ߫ ߟߊ߫ ߓߟߏߞߏߟߏ߲ߧߊ ߟߋ߬ ߟߊ߫ ߸ ߊ߬ ߣߌ߫ ߞߵߊߟߎ߫ ߟߐ߬ ߞߏߙߏ߲ߧߊ ߟߊ߫ ߸ ߊߟߊ߫ ߘߏ߲߬ ߦߴߊߟߎ߫ ߦߟߌߡߊߘߌߦߊ߫ ߟߴߊ߬ ߟߊ߫ ߦߝߊ߬ߟߌ ߣߴߊ߬ ߟߊ߫ ߢߊ߬ߒߡߊ߭ ߟߋ߬ ߟߊ߫ ، ߊߟߊ߫ ߘߏ߲߬ ߦߙߌߥߊߣߍ߲߫ ߸ ߊ߬ ߟߐ߲ߠߌ߲ߣߍ߲߫ ﴿268﴾

ߊ߬ ߦߋ߫ ߥߘߋ߬ߥߘߋ߬ߟߌ ߘߌ߫ ߟߊ߫ ߡߐ߰ ߟߋ߬ ߡߊ߬ ߡߍ߲ ߓߊ߯ ߊ߬ ߘߌߦߊ߫ ، ߥߘߋ߬ߥߘߋ߬ߟߌ ߘߏ߲߬ ߓߊ߯ ߘߌ߫ ߡߍ߲ ߡߊ߬ ߸ ߤߙߊ߫ ߛߌߦߊߡߊ߲߫ ߠߋ߬ ߘߌߣߴߏ߬ ߡߊ߬ ، ߡߐ߰ ߛߌ߫ ߟߋ߬ ߕߍ߫ ߊ߬ ߕߊ߰ߛߌ߬ ߟߊ߫ ߸ ߝߏ߫ ߤߊߞߟߌ߫ ߞߌߛߍ߫ ߕߌ߮ ߟߎ߬ ﴿269﴾

ߊߟߎ߫ ߓߊ߯ ߖߘߍ߬ߡߊ߬ߓߐ ߡߍ߲-ߍ-ߡߍ߲߫ ߞߍ߫ ، ߥߟߴߊߟߎ߫ ߓߊ߯ ߘߊߞߊ߲ ߡߍ߲ ߕߊ߬ ، ߊߟߊ߫ ߞߵߏ߬ ߓߍ߯ ߟߐ߲߫ ، ߘߍ߬ߡߍ߲߬ߓߊ߯ ߟߋ߬ ߕߍ߫ ߕߐ߬ߢߍ߰ߒߕߋ ߟߎ߬ ߟߊ߫ ﴿270﴾

ߊߟߎ߫ ߓߊ߯ ߛߘߊߞߊ ߟߎ߬ ߟߊ߲ߞߣߍߡߊ߫ ߸ ߏ߬ ߞߊ߫ ߢߌ߲߬ ، ߞߏ߬ߣߵߊߟߎ߫ ߓߊ߯ ߊ߬ߟߎ߫ ߘߏ߲߰ ߞߵߊ߬ߟߎ߫ ߣߌ߬ ߓߟߏߞߏߟߏ߲ ߠߎ߬ ߟߊ߫ ߸ ߏ߬ ߟߋ ߘߌߡߊ߲ߓߊ ߦߴߊߟߎ߫ ߟߊ߫ ، ߓߊ ߊߟߊ߫ ߦߴߊߟߎ߫ ߖߎ߯ߡߊ߲߫ ߞߍ߫ ߣߐ ߘߏ߫ ߟߎ߫ ߕߍ߬ ߟߴߏ߬ ߟߋ ߘߐ߫ ، ߊߟߊ߫ ߘߏ߲߬ ߦߴߊߟߎ߫ ߗߋߥߊߟߌ ߟߎ߫ ߞߟߊ߬ߡߊ߬ߓߊ߯ ߟߋ߬ ߘߌ߫ ﴿271﴾

(ߡߐ߱ ) ߟߎ߬ ߞߊ߲ߘߊ ߕߴߌߟߋ ߡߊ߬ ، ߓߊ߬ߙߌ߬ ߊߟߊ߫ ߟߋ߬ ߡߐ߰ ߞߊ߲ߘߊ߫ ߟߊ߫ ߡߍ߲ ߓߊ߯ ߊ߬ ߘߌߦߊ߫ ، ߊߟߎ߫ ߘߏ߲߬ ߓߊ߯ ߖߘߍ߬ߡߊ߬ߓߐ ߝߋ߲-ߋ-ߝߋ߲߫ ߞߍ߫ ߢߌ߬ߡߊ߬ ߘߐ߫ ߸ ߊߟߴߏ߬ ߓߍ߯ ߞߍ߫ ߟߴߊߟߎ߫ ߖߍ߬ߘߍ߫ ߟߋ߬ ߦߋ߫ ، ߊߟߎ߫ ߘߏ߲߬ ߕߍ߫ ߖߘߍ߬ߡߊ߬ߓߐ ߞߍ߫ ߟߊ߫ ( ߞߎ߲߬ ߛߌ߫ ߟߊ߫ ) ߝߏ߫ ߊߟߊ߫ ߞߏߟߘߊ߫ ߢߌߣߌ߲ ، ߊߟߎ߫ ߜߎ ߓߊ߯ ߖߘߍ߬ߡߊ߬ߓߐ ߝߋ߲-ߋ-ߝߋ߲߫ ߞߍ߫ ߢߌ߬ߡߊ߬ ߘߐ߫ ߸ ߏ߬ ߛߊ߬ߙߊ ߘߌ߫ ߘߝߴߊߟߎ߫ ߦߋ߫ ߖߐ߫ ߸ ߊߟߎ߫ ߕߍ߫ ߕߐ߬ߢߍ߰ ߝߏߦߌ߬ ߟߊ߫ ﴿272﴾

(ߊߟߎ߯ ߢߌ߬ߡߊ ߏ߬ ߟߎ߬ ߞߍ߫ ) ߓߟߏߞߏߟߏ߲ ߠߎ߫ ߟߋ߬ ߦߋ߫ ߸ ߛߌߟߊ ߕߍ߰ߣߍ߲߫ ߡߍ߲ ߠߎ߬ ߢߍ߫ ߊߟߊ߫ ߞߏ ߘߐ߫ ، ߊ߬ߟߎ߬ ߕߍ߫ ߕߊ߯ߡߊ߫ ߟߊߣߐ߬ ߟߊ߫ ߖߡߊ߬ߣߊ ߢߊߝߍ߬ ، ߞߏߟߐ߲ߓߊߟߌ ߦߴߏ߬ ߟߎ߫ ߟߋ߬ ߓߛߌ߬ߞߌ߬ ߟߊ߫ ߓߊ߬ߣߊ ߟߎ߬ ߘߌ߫ ߸ ߊ߬ߟߎ߬ ߟߊ߫ ߞߎ߲ߒߖߘߍ߬ߡߊ ߞߏߛߐ߲߬ ، ߌ ߦߴߊ߬ߟߎ߬ ߟߐ߲߫ ߠߴߊ߬ߟߎ߫ ߕߐ߰ߡߊ߬ߛߙߋ ߟߋ߫ ߡߊ߬ ߸ ߊ߬ߟߎ߫ ߞߏ߬ߣߌ߲߬ ߕߍ߫ ߡߐ߱ ߟߎ߬ ߕߙߊ߫ ߟߊ߫ ߝߛߊ߬ߒ߬ߡߊ߬ߟߌ߫ ߟߊ߫ ߝߍ߲ߝߍߘߍ߲߫ ، ߊߟߎ߫ ߓߊ߯ ߖߘߍ߬ߡߊ߬ߓߐ ߝߋ߲-ߋ-ߝߋ߲߫ ߞߍ߫ ( ߏ߬ ߟߎ߬ ߦߋ߫ ) ߢߌ߬ߡߊ߬ ߘߐ߫ ߸ ߊߟߊ߫ ߞߵߏ߬ ߟߐ߲߫ ߖߐ߫ ﴿273﴾

ߡߍ߲ ߠߎ߬ ߦߴߊ߬ߟߎ߬ ߟߊ߫ ߣߊ߲߬ߝߟߏ ߞߍ߫ ߟߊ߫ ߖߘߍ߬ߡߊ߬ߓߐ ߘߌ߫ ߛߎ ߘߐ߫ ߕߋ߬ߟߋ ߘߐ߫ ߸ ߜߎ߲߬ߘߎ ߘߐ߫ ߊ߬ ߣߌ߫ ߟߊ߲ߞߣߍߡߊ ߘߐ߫ ߸ ߏ߬ ߟߎ߫ ߛߊ߬ߙߊ ߟߴߊ߬ߟߎ߬ ߦߋ߫ ߊ߬ߟߎ߫ ߡߊ߰ߙߌ ߓߘߊ ، ߛߌߟߊ߲߫ ߕߍ߫ ߏ߬ ߟߎ߬ ߟߊ߫ ߸ ߊ߬ߟߎ߫ ߘߏ߲߬ ߕߍߣߊ߫ ߛߎ߬ߣߎ߲߬ ߠߊ߫ ﴿274﴾

ߒ߬ߓߊ߬ ߡߍ߲ ߠߎ߬ ߦߋ߫ ߜߙߐ߬ߞߐ ߘߊߥߎ߲߫ ߠߊ߫ ߛߊ߫ ߸ ߏ߬ ߟߎ߬ ߕߍߣߊ߫ ߥߟߌ߬ ߟߊ߫ ( ߞߊ߬ ߓߐ߫ ߞߊߓߙߎ ߘߐ߫ ߢߊ߫ ߛߌ߫ ߡߊ߬ ) ߝߏ߫ ߡߐ߰ ߥߟߌ߬ ߢߊ ߸ ߜߍ߬ߘߍ ߣߊ߬ ߡߍ߲ ߠߊߞߙߌ߬ߞߙߌ߬ߡߊ߬ ߟߊ߫ ߝߊ߭ ߡߊ߰ߢߐ߲߰ߦߊ ߟߊ߫ ، ߏ ߘߏ߲߬ ߞߎ߲߭ ߠߋ߬ ߓߊ ߏ߬ ߟߎ߬ ߞߊ߲߫ ߠߋ߬ ߞߏ߫ ߝߋ߬ߙߋ ߟߊߒߡߊ ߟߋ߫ ߜߙߐ߬ߞߐ ߘߌ߫ ߸ ߊߟߊ߫ ߘߏ߲߬ ߞߊ߬ ߝߋ߬ߙߋ ߟߋ߬ ߟߊߘߊ߬ߤߊ߫ ߸ ߞߊ߬ ߜߙߐ߬ߞߐ ߟߊߕߐ߲߫ ، ߣߌ߫ ߡߍ߲ ߞߏ߬ߣߌ߲ ߡߊ߰ߙߌ ߟߊ߫ ߞߊ߬ߥߊ߲߬ߘߌ߬ ߞߊ߲ ( ߣߌ߲߬ ) ߣߊ߬ ߘߴߊ߬ ߡߊ߬ ߸ ߊ߬ ߞߊ߬ ߝߘߊ߫ ߜߙߐ߬ߞߐ ߟߊ߫ ߸ ߕߊ߬ߡߌ߲߬ߣߍ߲߬ ߞߘߐ ߦߴߏ߬ ߕߊ߫ ߘߌ߫ ߝߛߊߦߌ߫ ، ߊ߬ ߣߴߏ߬ ߟߊ߫ ߞߏ ߘߌ߫ ߕߏ߫ ߊߟߊ߫ ߡߊ߬ ، ߒ߬ߓߊ߬ ߣߌ߫ ߡߍ߲ ߠߋ߫ ߛߊ߬ߦߌ߲߬ ߘߴߊ߬ ߡߊ߬ ߏ߬ ߞߐ߫ ߸ ߏ߬ ߟߎ߫ ߟߋ߬ ( ߞߍߕߐ߫ ) ߕߊ ߘߏ߲߬ߞߏ ߟߎ߬ ߘߏ߫ ߘߌ߫ ߸ ߏ߬ ߟߎ߬ ߘߎߡߊߕߐ߫ ߦߋ߲߬ ߠߋ߬ ﴿275﴾

ߊߟߊ߫ ߦߋ߫ ߜߙߐ߬ߞߐ ߝߎ߰ߛߌ߬ ߟߊ߫ ߟߋ߬ ߸ ߞߊ߬ ߛߘߊߞߊ ߟߎ߬ ߟߊߓߎ߯ ، ߞߏ߬ߣߌ߲߬ ߊߟߊ߫ ߕߍ߫ ߝߌߕߙߌߥߊߟߋ߫ ߖߟߎ߬ߡߎ߲߬ߕߐ߬ ߛߌ߫ ߝߍ߬ ﴿276﴾

ߒ߬ߓߊ߬ ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߞߊ߬ ߢߌ߬ߡߊ ߟߎ߬ ߞߍ߫ ߸ ߞߊ߬ ߛߊߟߌ ߟߐ߬ ߞߊ߬ ߖߞߊ ߘߌ߫ ߸ ߏ߬ ߟߎ߫ ߛߊ߬ߙߊ ߟߴߊ߬ߟߎ߬ ߢߍ߫ ߊ߬ߟߎ߫ ߡߊ߰ߙߌ ߓߘߊ ߸ ߛߌߟߊ߲߫ ߕߍ߫ ߏ߬ ߟߎ߬ ߟߊ߫ ߸ ߊ߬ߟߎ߫ ߘߏ߲߬ ߕߍߣߊ߫ ߛߎ߬ߣߎ߲߬ ߠߊ߫ ﴿277﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߸ ߞߊ߬ ߜߙߐ߬ߞߐ߬ ( ߖߟߎ ) ߕߐ߬ ߕߏߣߍ߲ ߓߍ߯ ߕߏ߫ ߦߋ߲߬ ߝߋߎ߫ ߸ ߣߴߊߟߎ߫ ߞߍ߫ ߘߊ߫ ߘߍ߲߬ߞߣߍ߬ߦߊ߬ߓߊ߯ ߘߌ߫ ߞߊ߬ߣߌ߲߫ ﴿278﴾

ߣߴߊߟߎ߫ ߘߏ߲߬ ߡߴߏ߬ ߞߍ߫ ߸ ߊߟߎ߫ ߦߴߊߟߎ߫ ߘߐߓߍ߲߬ ߊߟߊ߫ ߣߌ߫ ߞߋߟߊ ߟߊ߫ ߞߍ߬ߟߍ ߢߍ߫ ، ߣߴߊߟߎ߫ ߣߐ߬ ߞߍ߫ ߘߊ߫ ߖߘߍ߬ߟߊ߬ߛߊߦߌ ߡߌ߬ߘߊ߬ ߟߊ߫ ߸ ߊߟߎ߫ ߟߊ߫ ߣߊ߲߬ߝߟߏ߬ ߞߎ߲ ߠߎ߬ ߘߐߙߐ߲߫ ߠߋ߬ ߦߋ߫ ߕߏ߫ ߊߟߎ߫ ߓߟߏ߫ ߛߍߣߍ߲߬ ߸ ߊߟߎ߫ ߕߍ߫ ߕߐ߬ߢߍ߰ ߞߍ߫ ߏ߬ ߘߐ߫ ߸ ߊߟߎ߫ ߘߏ߲߬ ߕߍ߫ ߕߐ߬ߢߍ߰ ﴿279﴾

ߣߴߊߟߎ߫ ( ߖߟߎ߬ߡߍ߬ߣߍ߲߬ߕߐ ߦߋ߫ ) ߜߟߍ߬ߦߊ ߘߐ߫ ߸ ߊߟߎ߯ ߊ߬ ߡߊߞߐ߬ߣߐ߲߫ ߣߐ߰ߦߊ ߥߊ߯ߕߌ ߟߊ߫ ، ߊߟߎ߫ ߝߊ߲߭ ߦߴߊ߬ ߕߏ߫ ߊ߬ ߓߟߏ߫ ߛߘߊߞߊ ߘߌ߫ ، ߏ߬ ߟߋ ߘߌߡߊ߲߫ ߊߟߎ߫ ߟߊ߫ ߸ ߣߴߊߟߎ߫ ߓߴߊ߬ ߢߊߦߋ߫ ߟߊ߫ ﴿280﴾

ߊߟߎ߫ ߦߴߊߟߎ߫ ߝߊ߲ߕߊ߲߬ߞߊ߬ ߟߏ߲߫ ߡߊ߬ ߸ ߊߟߎ߫ ߟߊߛߊ߬ߦߌ߲߬ߕߐ߬ ߊߟߊ߫ ߡߊ߬ ߟߏ߲ ߡߍ߲ ، ߏ߬ ߟߋ ߞߐ߫ ߸ ߣߌߡߊ ߓߍ߯ ߗߋߥߊߟߌ ( ߛߊ߬ߙߊ ) ߘߌ߫ ߘߝߴߊ߬ ߦߋ߫ ߸ ߊ߬ߟߎ߫ ߘߏ߲߬ ߕߍߣߊ߬ ߕߐ߬ߢߍ߰ ߟߊ߫ ﴿281﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߣߴߊߟߎ߫ ߞߊ߬ ߞߍ߫ ߖߎ߬ߟߎ ߟߊߘߊ߲߫ ߠߊ߫ ߞߵߊ߬ ߛߌ߰ ߛߕߊ߫ ߟߐ߯ߟߊߣߍ߲߫ ߠߊ߫ ߸ ߊߟߎ߫ ߦߴߊ߬ ߛߓߍ߫ ߟߋ߬ ߖߐ߫ ، ߛߓߍߟߌߟߊ ߦߴߊ߬ ߛߓߍ߫ ߊߟߎ߫ ߕߍ߫ ߕߋߟߋ߲ ߠߊ߫ ، ߛߓߍߟߌߟߊ ߞߊߣߵߊ߬ ߓߊ߲߬ ߘߋ߬ ߞߏ߫ ߊ߬ ߕߴߊ߬ ߛߓߍ߫ ߦߏ߫ ߊߟߊ߫ ߞߵߊ߬ ߟߊߟߐ߲ߠߌ߲߫ ߢߊ ߡߍ߲ ، ߊ߬ߟߋ߬ ߦߋ߫ ߛߓߍߟߌ ߞߍ߫ ߸ ߖߟߎ߬ߡߍ߬ߣߍ߲߬ߕߐ ߦߋ߫ ߝߐߛߓߍ ߞߍ߫ ( ߊ߬ ߞߎ߲߬ ) ߏ߬ ߘߏ߲߬ ߦߴߊ߬ ߝߊ߲ߕߊ߲߬ߞߴߊ߬ ߡߊ߰ߙߌ ߊߟߊ߫ ߡߊ߬ ، ߊ߬ ߞߊߣߊ߬ ߝߏߦߌ߬ ߘߐߘߛߏ߫ ߊ߬ ߘߐ߫ ، ߣߌ߫ ߖߟߎ߬ߡߍ߬ߣߍ߲߬ߕߐ ߞߍ߫ ߘߊ߫ ߞߎ߲߬ߝߌ߲߫ ߘߌ߫ ߥߟߊ߫ ߡߐ߰ ߖߐ߲ߝߐ߲ߣߍ߲߫ ߘߌ߫ ߸ ߥߟߴߊ߬ ߖߍ߬ߘߍ ߕߴߛߋ߫ ߝߐߛߓߍ߫ ߞߍ߫ ߟߊ߫ ߸ ߊ߬ ߥߛߊ߬ߓߊ߮ ߦߋ߫ ߝߐߛߓߍ ߞߍ߫ ߕߋߟߋ߲߫ ߠߊ߫. ߊߟߎ߫ ߦߋ߫ ߛߙߋ߫ ߢߌߣߌ߲ ߞߍ߫ ( ߞߏ ߟߎ߬ ߘߐ߫ ) ߸ ߏ߬ ߦߋ߫ ߞߍ߫ ߛߙߋ߫ ߝߌ߬ߟߊ߫ ߟߋ߬ ߘߌ߫ ߊߟߎ߫ ߘߐ߫ ߗߍ߭ ߟߎ߬ ߘߐ߫ ߸ ߣߴߊ߬ߟߎ߬ ߡߊ߫ ߞߍ߫ ߗߍ߬ ߝߌ߬ߟߊ߬ ߘߌ߫ ߸ ߊ߬ߟߎ߬ ߦߋ߫ ߞߍ߫ ߗߍ߬ ߞߋߟߋ߲߫ ߣߌ߫ ߡߏ߬ߛߏ߫ ߝߌ߬ߟߊ߬ ߘߌ߫ ، ߏ߬ ߟߎ߬ ߦߋ߫ ߓߐ߫ ߡߐ߰ ߟߎ߫ ߟߋ߬ ߘߐ߫ ߸ ߊߟߎ߫ ߓߍ߯ ߘߌ߬ߢߍ߬ߣߍ߲߫ ߡߍ߲ ߠߎ߫ ߡߊ߬ ߛߙߋ ߟߎ߬ ߘߐ߫ ، ߞߎߟߊߞߏߕߍ߫ ߣߌ߫ ߡߛߏ߬ ߞߋߟߋ߲߫ ߝߟߌ߬ ߘߊ߫ ߸ ߕߐ߬ ߞߋߟߋ߲ ߘߴߏ ߖߊ߲߬ߓߌ߬ߟߊ߬. ߛߙߋ ߟߎ߬ ߞߊߣߵߊ߬ߟߎ߫ ߓߊ߲߬ ( ߥߊ߫ ߟߊ߫) ߘߋ߬ ߣߴߊ߬ߟߎ߬ ߞߟߌ߫ ߘߊ߫ ، ߖߎ߬ߟߎ ߛߓߍ ߞߊߣߊ߬ ߟߐ߯ߓߐ߫ ߊߟߎ߫ ߟߊ߫ ߝߋߎ߫ ، ߊ߬ ߘߐ߯ߦߊ߫ ߘߊ߫ ߥߟߴߊ߬ ߓߏ߲߬ߧߊ߬ ߘߊ߫ ߸ ߞߵߊ߬ ߛߌ߰ ߊ߬ ߛߕߊ ߟߊ߫ ، ߏ߬ ߟߋ ߓߍ߲߬ߣߍ߲߬ ߊߟߊ߫ ߡߊ߬ ߸ ߏ߬ ߟߋ ߘߏ߲߬ ߕߋߟߋ߲ߣߍ߲߫ ߛߙߋߦߊ߫ ߞߏ ߘߐ߫ ߸ ߏ߬ ߟߋ ߘߴߊ߬ ߞߍ߫ ߝߣߊ߫ ߸ ߊߟߎ߫ ߕߍ߫ ߛߌߞߊ߫ ، ߝߏ߫ ߣߴߊ߬ ߞߍ߫ ߘߊ߫ ߘߎ߰ ߞߣߐ߬ ߖߊߥߏ߫ ߘߌ߫ ߸ ߊߟߎ߫ ߦߋ߫ ߡߍ߲ ߠߊߝߌߙߌ߲ߝߌߙߌ߲߫ ߠߊ߫ ߢߐ߲߮ ߕߍ߫ ߞߍ߬ߣߍ߲ ، ߖߟߎ߬ߡߎ߲߬ ߕߍ߫ ߊߟߎ߫ ߡߊ߬ ߞߏ߫ ߊߟߎ߫ ߡߴߏ߬ ߛߓߍ߫ ، ߊߟߎ߫ ߛߙߋߦߊ ߟߊߘߊ߲߫ ߣߴߊߟߎ߫ ߞߊ߬ ߞߍ߫ ߝߙߋ߬ߢߐ߲߰ߦߊ ߞߍ߫ ߟߊ߫ ، ߡߐ߰ ߕߍ߫ ߕߏ߫ ߛߓߍߟߌߟߊ ߣߌ߫ ߛߙߋ ߛߌ߫ ߕߙߐ߫ ߟߊ߫ ߛߐ߲߬ ( ߞߏ߫ ߡߌߛߍ߲ ߓߍ߯ ߘߐ߫ ) ، ߣߴߊߟߎ߫ ߞߵߏ߬ ߞߍ߫ ߸ ߏ߬ ߦߋ߫ ߔߊߟߊ߲ߞߊ ߟߋ߬ ߘߌ߫ ߊߟߎ߫ ߓߟߏ߫ ، ߊߟߎ߫ ߘߏ߲߬ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߟߋ߬ ، ߊߟߊ߫ ߦߴߊߟߎ߫ ߟߊߟߐ߲ߠߌ߲߫ ߠߊ߫ ߟߋ߬ ߣߌ߲߬ ߓߍ߯ ߘߌ߫ ، ߊߟߊ߫ ߘߏ߲߬ ߞߊ߬ ߞߏ ߓߍ߯ ߟߐ߲߫ ߠߋ߬ ߕߊߦߌ߫ ﴿282﴾

ߣߴߊߟߎ߫ ߞߍ߫ ߘߊ߫ ߕߊ߯ߡߊ ߘߐ߫ ߸ ߊߟߎ߫ ߡߊ߫ ߛߓߍߟߌߟߊ߫ ߛߐ߬ߘߐ߲߬ ߸ ߒ߬ߓߊ߬ ߕߏ߬ߟߌ߬ߡߊ߬ߛߌ߯ ߡߌ߬ߘߊ߬ߕߊ ߦߋ߫ ߞߴߦߋ߲߬ ، ߣߴߊߟߎ߫ ߘߏ߫ ߟߊ߫ ߘߊ߫ ߘߏ߫ ߟߊ߫ ( ߞߊ߬ߙߌ߬ߝߊ ߘߐ߫ ) ߸ ߟߊ߫ ߞߍߣߍ߲߫ ߡߍ߲ ߠߊ߫ ߞߊ߬ ߞߊ߬ߙߌ߬ߝߊ ߞߍ߫ ߊ߬ ߟߊ߫ ߸ ߏ߬ ߦߴߊ߬ ߟߊ߫ ߞߊ߬ߙߌ߬ߝߊ ߏ߬ ߟߊߛߊ߬ߦߌ߫ ߊ߬ ߕߌ߱ ߡߊ߬ ߘߋ߬ ، ߊ߬ ߘߏ߲߬ ߦߴߊ߬ ߝߊ߲ߕߊ߲߬ߞߴߊ߬ ߡߊ߰ߙߌ߬ ߊߟߊ߫ ߡߊ߬ ، ߊߟߎ߫ ߞߊߣߊ߬ ߛߙߋߦߊ ߘߏ߲߰ ߘߋ߬ ߸ ߡߍ߲ ߓߊ߯ ߊ߬ ߘߏ߲߰ ߏ ߛߣߐ߬ߡߍ ߓߘߊ߫ ߞߍ߫ ߖߟߎ߬ߡߎ߲߬ߕߐ ߘߌ߫ ߸ ߊߟߊ߫ ߘߏ߲߬ ߞߵߊߟߎ߫ ߗߋߥߊߟߌ ( ߓߍ߯ ) ߟߐ߲߫ ߕߊߦߌ߫ ﴿283﴾

ߊߟߊ߫ ߕߊ ߟߋ߬ ߝߋ߲ ߘߌ߫ ߡߍ߲ ߦߋ߫ ߛߊ߲ ߠߎ߬ ߘߐ߫ ߸ ߊ߬ ߣߌ߫ ߡߍ߲ ߦߋ߫ ߘߎ߱ ߘߐ߫ ، ߊߟߎ߫ ߞߵߊߟߎ߫ ߣߌ߫ ߘߐ߫ ߞߏ ߘߏ߲߰ ߓߊ߬ ߸ ߥߟߴߊߟߎ߫ ߞߵߊ߬ ߟߊ߲ߞߣߍߡߊ߫ ߓߊ߬ ߸ ߊߟߊ߫ ߘߴߊߟߎ߫ ߟߐ߬ ߊ߬ ( ߓߍ߯ ) ߖߊ߬ߕߋ߬ߓߐ ߟߊ߬ ، ߊ߬ ߘߌߣߊ߬ ߦߊ߬ߝߊ߫ ߡߐ߰ ߡߊ߬ ߸ ߡߍ߲ ߓߊ߯ ߊ߬ ߘߌߦߊ߫ ، ߊ߬ ߘߌ߫ ߡߐ߰ ߖߊ߲߰ߞߕߊ߫ ߸ ߡߍ߲ ߓߊ߯ ߊ߬ ߘߌߦߊ߫ ، ߊߟߊ߫ ߟߋ߫ ߘߏ߲߬ ߛߋ߫ ߟߊ߫ ߞߏ ߓߍ߯ ߟߊ߫ ﴿284﴾

ߞߋߟߊ ߓߘߊ߫ ߟߊ߫ ߟߍߙߊ ߟߊ߫ ߸ ߡߍ߲ ߠߊߖߌ߰ߣߴߊ߬ ߡߊ߬ ߊ߬ ߡߊ߰ߙߌ ߓߟߏ߫ ߸ ߊ߬ߟߋ ߣߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ، ߊ߬ߟߎ߫ ߞߋ߬ߟߋ߲߬ߞߋ߬ߟߋ߲߬ߣߊ ߓߍ߯ ߘߍ߲߬ߞߣߍ߬ߦߊ߬ߣߍ߲߫ ߊߟߊ߫ ߡߊ߬ ߸ ߊ߬ ߟߊ߫ ߡߟߍ߬ߞߊ ߟߎ߫ ߡߊ߬ ߸ ߊ߬ ߟߊ߫ ߟߍߙߊ ߟߎ߫ ߡߊ߬ ߸ ߊ߬ ߣߴߊ߬ ߟߊ߫ ߞߋߟߊ ߟߎ߫ ߡߊ߬ ، ( ߊ߬ ߣߴߊ߬ߟߎ߬ ߞߊ߲߫ ߞߏ߫ ) ߊ߲ ߕߍ߫ ߘߊ߲߬ߕߍ߰ߓߐ߫ ߞߍ߫ ߡߐ߰ ߛߌ߫ ߕߍ߫ ߊ߬ ߟߊ߫ ߞߋߟߊ ߟߎ߬ ߘߐ߫ ، ߊ߬ߟߎ߬ ߞߊ߲߫ ߞߏ߫ ߊ߲ ߓߘߊ߫ ߡߍ߲ߠߌ߲ ߞߍ߫ ߸ ߞߊ߬ ߞߊ߲߫ ߡߌߘߊ ߞߍ߫ ، ߊ߲ ߧߴߌ ߟߊ߫ ߦߊ߬ߝߊ ߟߋ߫ ߝߍ߬ ߊ߲ ߡߊ߰ߙߌ ߸ ߊ߲ ߣߊ߬ߕߐ߬ ߟߊߓߊ߲߫ ߠߊ߫ ߌߟߋ ߟߋ߫ ߡߊ߬ ﴿285﴾

ߊߟߊ߫ ߕߍ߫ ߣߌߡߊ ߞߘߊߡߊ߫ ߟߊ߫ ߝߏߦߌ߬ ߟߊ߫ ߝߏ߫ ߊ߬ ߓߍ߬ߙߍ ، ߊ߬ ߞߵߊ߬ ߟߊ߫ ߢߌ߬ߡߊ߬ ߞߍ߫ ߊ߬ ߖߍ߬ߘߍ߫ ߟߋ߬ ߦߋ߫ ߸ ߊ߬ ߞߵߊ߬ ߟߊ߫ ߖߎ߯ߡߊ߲߫ ߞߍ߫ ߊ߬ ߖߍ߬ߘߍ߫ ߟߋ߬ ߟߊ߫ ، ߞߏ߫ ߊ߲ ߡߊ߰ߙߌ ߸ ߌ ߞߊߣߵߊ߲ ߡߌ߬ߘߊ߬ ( ߞߎ߲߬ߞߏ߫ ߟߊ߫) ߣߴߊ߲ ߢߌ߬ߣߊ߬ ߘߊ߫ ߥߟߴߊ߲ ߝߎ߬ߕߎ߲߬ߕߌ߬ ߘߊ߫ ، ߞߏ߫ ߊ߲ ߡߊ߰ߙߌ ߸ ߌ ߞߊߣߊ߬ ߘߏ߬ߣߌ߲߬ ߟߊ߫ ߒ߬ߞߎ߲߬ ߸ ߦߏ߫ ߌ ߞߊ߬ߡߍ߲ ߟߊ߫ ߒ߬ ߢߍߓߊ߮ ߟߎ߫ ߞߎ߲߬ ، ߞߏ߫ ߊ߲ ߡߊ߰ߙߌ ߸ ߌ ߘߏ߲߬ ߞߊߣߵߊ߲ ߢߎ߲߫ ߞߏ߫ ߟߊ߫ ߸ ߊ߲ ߕߴߛߋ߫ ߡߍ߲ ߞߘߐ߫ ، ߌ ߦߋ߫ ߜߊ߲ߒߞߎ߲ߠߊ ߞߍ߫ ߊ߲ ߦߋ߫ ߸ ߞߊ߬ ߦߊ߬ߝߴߊ߲ ߡߊ߬ ߸ ߊ߬ ߣߌ߫ ߞߊ߬ ߤߌߣߊ߫ ߒ߬ ߠߊ߫ ، ߌߟߋ ߟߵߊ߲ ߕߌ߱ ߘߌ߫ ، ߖߊ߰ߣߌ߲߬ ߌ ߦߴߊ߲ ߘߍ߬ߡߍ߲߫ ߡߌ߲߬ߙߌ߲߬ߘߌ߫ ߓߊ߲߬ߣߍ߲ ߠߎ߫ ߡߊ߬ ﴿286﴾

ߊ. ߟ. ߡ. ( ߊߟߌߝ. ߟߊ߯ߡ. ߡߌ߯ߡ) ﴿1﴾

ߊߟߊ߫ ߸ ߡߊ߰ߙߌ߬ ߜߘߍ߫ ߕߍ߫ ߊ߬ߟߋ߬ ߞߐ߫ ، ߣߌߡߊ ߟߋ߬ ، ߟߐ߬ߣߍ߲ߖߘߍ߬ߟߊ ߟߋ߬ ﴿2﴾

ߊ߬ ߞߊ߬ ߟߍߙߊ ( ߘߐ߲߬ߘߐ߰ߣߍ߲߬ ) ߠߊߖߌ߰ ߌ ߡߊ߬ ߕߎ߬ߢߊ ߟߋ߬ ߟߊ߫ ، ߞߵߏ߬ ߞߍ߫ ߊ߬ ߢߍߕߊ ߟߎ߬ ߟߊߛߙߋߦߊߟߊ߲ ߘߌ߫ ߸ ߊ߬ ߣߴߊ߬ ߞߊ߬ ߕߊ߬ߥߎ߬ߙߊߕߌ ߣߌ߫ ߟߌ߲߬ߖߌ߯ߟߌ ߟߎ߬ ߟߊߖߌ߰ ﴿3﴾

ߊ߬ߟߋ߬ ߢߍ߫ ߸ ߞߵߏ߬ ߟߎ߬ ߞߍ߫ ߞߊ߲ߘߦߊ ߘߌ߫ ߡߐ߱ ߟߎ߬ ߢߍ߫ ، ߊ߬ ߣߴߊ߬ ߞߊ߬ ߝߊߙߊ߲ߝߊߛߌߟߊ߲ ߠߊߖߌ߰ ( ߏ߬ ߟߎ߬ ߞߐ߫ ߛߊ߫ ) ، ߒ߬ߓߊ߬ ߡߍ߲ ߠߎ߫ ߓߊ߲߬ߣߍ߲߫ ߒ߬ ߠߊ߫ ߟߝߊߙߌ ߟߎ߬ ߘߐ߫ ߸ ߏ߬ ߟߎ߬ ߢߍߛߌ߰ߣߍ߲߫ ߖߊ߲߰ߞߕߊ߬ ߜߍߟߍ߲ ߠߋ߬ ߟߊ߫ ، ߊߟߊ߫ ߘߏ߲߬ ߦߋ߫ ߣߌ߬ߣߌ߬ߟߊ߫ ߘߌ߫ ߊ߰ ߕߊߢߐ߲߯ߓߐ ߕߌ߰ ߘߌ߫ ﴿4﴾

ߖߊ߯ߕߋ߬ ، ߊߟߊ߫ ߸ ߝߏߦߌ߬ ߕߍ߫ ߘߏ߲߰ ߠߴߊ߬ߟߋ ߟߋ߫ ߡߊ߬ ߘߎ߰ߡߊ߬ߟߊ ߣߌ߫ ߛߊ߲ߡߟߊ ߛߌ߫ ߘߐ߫ ﴿5﴾

ߊ߬ߟߋ ߟߵߊߟߎ߫ ߖߙߎߡߎ߲ߦߊ߫ ߟߊ߫ ߘߋ߲ߛߏ ߟߎ߬ ߘߐ߫ ߢߊ߫ ߡߊ߬ ߸ ߡߍ߲ ߞߵߊ߬ ߘߌߦߊ߫ ، ߡߊ߰ߙߌ߬ ߛߌ߫ ߕߍ߫ ߊ߬ ߞߐ߫ ، ߣߌ߬ߣߌ߬ߟߊ߫ ߟߋ߬ ߥߘߋ߬ߥߘߋ߬ߟߌ߬ߟߊ߫ ߟߋ߬ ﴿6﴾

ߊ߬ߟߋ ߟߋ߫ ߞߊ߬ ߟߍߙߊ ߟߊߖߌ߰ ߌ ߡߊ߬ ، ߟߝߊߙߌ ߘߏ߫ ߟߎ߫ ߦߴߏ߬ ߘߐ߫ ߸ ߏ߬ ߟߎ߫ ߥߘߋ߬ߥߘߋ߬ߦߊ߬ߣߍ߲߫ ، ߏ߬ ߟߎ߫ ߟߋ߬ ߟߍߙߊ ߓߊߖߎ ߖߍ߬ߘߍ ߘߌ߫ ، ߘߏ߫ ߜߘߍ߫ ߓߍ߫ ߸ ߏ߬ ߟߎ߬ ߘߐߝߌ߲߬ߣߍ߲߫ ، ߒ߬ߓߊ߬ ߣߊߡߙߊ߫ ߞߏ ߦߋ߫ ߡߍ߲ ߠߎ߫ ߛߣߐ߬ߡߍ ߘߐ߫ ߸ ߏ߬ ߟߎ߫ ߟߋ߬ ߘߐ߬ߝߌ߲߬ߓߊ߰ߕߐ ߟߎ߬ ߘߐߛߏ߯ߙߋ߫ ߟߊ߫ ، ߞߵߊ߬ ߟߊߥߌ߬ߟߌ߫ ߥߊ߬ߥߎߟߋ ߢߌߣߌ߲ ߡߊ߬ ߸ ߊ߬ ߣߌ߫ ߞߵߊ߬ ߟߊߥߌ߬ߟߴߊ߬ ߞߘߐߡߊߖߊ߲ ߢߌߣߌ߲ ߡߊ߬ ، ߡߐ߰ ߛߌ߫ ߘߏ߲߬ ߕߍ߫ ߊ߬ ߞߘߐߡߊߖߊ߲ ߟߐ߲߫ ߝߏ߫ ߊߟߊ߫ ، ߡߍ߲ ߠߎ߬ ߞߏ߲ߓߏߦߊߣߍ߲߫ ߟߐ߲ߠߌ߲ ߘߐ߫ ߸ ߏ߬ ߟߎ߫ ߟߴߊ߬ ߝߐ߫ ߟߊ߫ ߞߏ߫ ߒ߬ߠߎ߬ ߟߊߣߴߊ߬ ߟߊ߫ ߛߎߋ߯ ߸ ߓߊ ߊ߬ ߓߍ߯ ߓߐߣߍ߲߫ ߒ߬ ߡߊ߰ߙߌ ߓߘߊ ߟߋ߬ ، ߡߐ߰ ߛߌ߫ ߟߋ߬ ߕߍ߫ ߊ߬ ߕߊ߰ߛߌ߬ ߟߊ߫ ߝߏ߫ ߤߊߞߟߌ߫ ߞߌߛߍ߫ ߕߌ߮ ߟߎ߬ ﴿7﴾

(ߏ߬ ߟߎ߬ ߞߊ߲߫ ߠߋ߬ ߞߏ߫) ߊ߲ߡߊ߰ߙߌ ߸ ߌ ߞߊߣߵߊ߲ ߛߣߐ߬ߡߍ ߟߊߖߍ߲߬ߞߍ߫ ߡߎ߬ߕߎ߲߬ ߸ ߊ߲ ߞߊ߲ߘߊߣߍ߲ ߞߐ߫ ߌ ߓߟߏ߫ ߸ ߌ ߘߏ߲߬ ߦߋ߫ ߒ߬ ߛߐ߫ ߌ ߟߊ߫ ߣߍߡߊ ߘߏ߫ ߟߊ߫ ، ߓߊ ߌߟߋ ߟߋ߫ ߣߌ߬ߣߌ߬ߟߊ߬ߓߊ ߘߌ߫ ﴿8﴾

ߞߏ߫ ߊ߲ ߡߊ߰ߙߌ ߸ ߌߟߋ ߟߋ߬ ߡߐ߱ ߟߎ߬ ߟߊߘߍ߬ߓߊ߮ ߘߌ߫ ߟߏ߲߫ ߡߊ߬ ߸ ߛߌߞߊ߫ ߕߍ߫ ( ߟߏ߲ ) ߡߍ߲ ߘߐ߫ ، ߖߊ߯ߕߋ߬ ߸ ߊߟߊ߫ ߕߍ߫ ߦߟߌߡߊߘߌߦߊ߫ ߞߊ߲ ߝߘߏ߬ ߟߊ߫ ﴿9﴾

ߓߊ߲߬ߓߊ߮ ߟߎ߬ ߟߊ߫ ߣߊ߲߬ߝߟߏ ߣߴߊ߬ߟߎ߬ ߘߋ߲ ߠߎ߬ ߕߍߣߵߊ߬ߟߎ߬ ߕߟߊ߫ ߟߴߊߟߊ߫ ߟߊ߫ ߝߏߦߌ߬ ߟߊ߫ ߸ ߒ߬ߓߊ߬ ߏ߬ ߟߎ߫ ߟߋ߬ ߕߊ ߢߐ߲߬ߛߐ߲ ߠߎ߬ ߘߌ߫ ﴿10﴾

ߦߏ߫ ߝߋߙߊߥߎ߲߫ ߘߏ߲߬ߞߏ ߟߎ߫ ߟߊ߲߬ߘߊ ߖߐ߫ ߊ߬ ߣߌ߫ ߡߍ߲ ߠߎ߫ ߞߐ߲߰ߣߍ߲߫ ߏ߬ ߟߎ߬ ߢߍ߫ ، ߏ߬ ߟߎ߫ ߟߋ߫ ߞߊ߬ ߒ߬ ߠߊ߫ ߟߝߊߙߌ ߟߎ߬ ߘߊߘߐߖߊ߬ ߝߘߌߝߘߌ߫ ، ߊߟߊ߫ ߝߣߊ߫ ߞߵߊ߬ߟߎ߫ ߡߌ߬ߘߴߊ߬ߟߎ߫ ߖߟߎ߬ߡߎ߲ ߠߎ߬ ߟߊ߫ ߏ߬ ߟߋ ߘߐ߫ ߥߊߡߌ߲߫ ، ߓߊߏ߬ ߊߟߊ߫ ߦߋ߫ ߓߌ߲߬ߓߊ߬ߥߏ߬ ߜߍ߬ߟߍ߲߬ ߕߌ߮ ߟߋ߬ ߘߌ߫ ﴿11﴾

ߊ߬ ߟߊߛߋ߫ ߓߊ߲߬ߓߊ߮ ߟߎ߫ ߡߊ߬ ߸ ߞߏ߫ ߛߋ߫ ߓߍߣߊ߬ ߞߍ߫ ߊߟߎ߫ ߟߊ߫ ، ߊߟߎ߫ ߘߏ߲߬ ߘߌ߫ ߟߊߘߍ߬ ߔߊߦߌߔߊߦߌ ߘߐ߫ ߞߐߘߍ߫ ، ߟߊߦߙߐ߫ ߖߎ߮ ߟߴߏ߬ ߘߌ߫ ߞߟߋ߫ ﴿12﴾

ߕߐ߰ߡߊ߬ߛߙߋ߬ ߞߏ߫ ߟߋ߬ ߞߍ߫ ߘߴߊߟߎ߫ ߦߋ߫ ߖߊ߬ߡߊ߫ ߝߌ߬ߟߊ ߟߊ߫ ߢߐ߲߯ߓߍ߲ ߘߐ߫ ، ߖߊ߬ߡߊ ߞߋߟߋ߲ ߦߋ߫ ߞߍ߬ߟߍ ߞߍߟߴߊߟߊ߫ ߛߌߟߊ ߞߊ߲߬ ߸ ߕߐ߬ ߞߋߟߋ߲ ߦߋ߫ ߓߊ߲߬ߓߊ߮ ߟߎ߬ ߘߌ߫ ، ߏ߬ ߟߎ߬ ߦߋ߫ ߘߐ ߏ߬ ߟߎ߬ ߦߋ߫ ߟߴߊ߬ߟߎ߫ ߢߐ߲߰ ߝߌ߬ߟߊ߫ ߟߋ߬ ߘߌ߫ ߢߊ ߟߊ߫ ߦߋߟߌ ߘߐ߫ ، ߊߟߊ߫ ߘߏ߲߬ ߦߋ߫ ߡߐ߰ ߟߋ߬ ߞߐߡߊߓߌ߲ߓߌ߲߫ ߠߴߊ߬ ߟߊ߫ ߘߍ߬ߡߍ߲߬ߠߌ߲ ߠߊ߫ ߸ ߡߍ߲ ߓߊ߯ ߊ߬ ߘߌߦߊ߫ ، ߖߊ߯ߕߋ߬ ߸ ߕߊ߰ߛߌ߬ߟߌ߬ߓߊ߫ ߟߴߏ߬ ߘߐ߫ ߤߊ߲ߞߟߌ߫ ߟߊ߫ ߦߋߟߌ ߕߌ߱ ߟߎ߬ ߢߍ߫ ﴿13﴾

ߣߋ߬ߦߌ߬ߣߊ߲߬ߝߋ߲ ߠߎ߫ ߞߊ߬ߣߌ߲ ߠߋ߬ ߡߊߢߍ߯ߙߍߣߍ߲߫ ߡߐ߱ ߟߎ߬ ߢߊߞߘߐ߫ ߡߏ߬ߛߏ ߟߎ߬ ߣߌ߫ ߘߋ߲ߞߍ ߠߎ߬ ߣߌ߫ ߞߐ߲߬ߜߍ߲߫ ߠߊߘߍ߬ߕߊ ߟߎ߬ ߘߌ߫: ߣߊߟߌ߬ߡߎ߲߫ ߛߊߣߌ߲ ߣߌ߫ ߥߊߘߌ ߣߌ߫ ߛߏ߬ ߕߐ߰ߡߊ߬ߛߙߋ߬ߡߊ ߟߎ߬ ߣߌ߫ ߞߟߏߝߋ߲ ߠߎ߬ ߣߌ߫ ߛߍ߬ߣߍ ߟߎ߬ ߘߌ߫ ، ߏ߬ ߘߏ߲߬ ( ߓߍ߯ ) ߦߋ߫ ߘߎߢߊ߫ ߢߣߊߡߦߊ ߘߊ߰ߡߎ߲ ߘߐߙߐ߲߫ ߠߋ߬ ߘߌ߫ ، ߒ߬ߞߊ߬ ߊߟߊ߫ ߛߊ߫ ߸ ߛߊ߬ߦߌ߲߬ ߦߌ߬ߟߊ߬ ߢߌߡߊ ߏ߬ ߟߋ ߓߟߏ߫ ߊ߬ ߕߍ߰ߟߊ ߘߐ߫ ﴿14﴾

ߊ߬ ߝߐ߫ ߞߏ߫ ߦߊ߯ߟߊ߫ ߒ ߧߴߊߟߎ߫ ߞߌ߬ߓߊ߬ߙߏ߬ ߤߙߊ߫ ߟߊ߫ ߓߊ߬ ߡߍ߲ ߝߌ߬ߛߊ߬ ( ߡߊߘߊ߲ߣߍ߲ ) ߣߌ߲߬ ߓߍ߯ ߘߌ߫؟ ߓߊ߬ߙߌ߬ ߏ߬ ߦߋ߫ ߝߊ߲ߕߊ߲ߞߟߊ ߟߎ߫ ߟߋ߬ ߢߍ߫ ߊ߬ߟߎ߫ ߡߊ߰ߙߌ ߓߘߊ ߘߋ߬ ، ߏ߬ ߦߋ߫ ߣߊߞߐ߫ ߟߎ߫ ߟߋ߬ ߘߌ߫ ߸ ߖߌߢߊ ߟߎ߬ ߦߋ߫ ߥߦߏ߬ ߟߊ߫ ߡߍ߲ ߠߎ߬ ߞߘߐߟߊ ߟߎ߬ ߘߐ߫ ߞߎߟߊ߲ߞߎߟߊ߲߫ ، ߏ߬ ߟߎ߫ ߘߏ߲߬ ߘߎߡߊߕߐ߫ ߏ߬ ߟߋ ߘߐ߫ ߊ߬ ߣߌ߫ ߝߘߎߡߊ߫ ߛߊߣߌ߲ߡߊ߲ ߠߎ߬ ، ߞߵߏ߬ ߓߍ߯ ߟߴߊߟߊ߫ ߟߊ߫ ߘߌ߬ߢߍ ߞߊ߲߬ ، ߊߟߊ߫ ߘߏ߲߬ ߢߊ߯ ߖߐ߲߭ ߠߎ߬ ߟߊ߫ ߖߐ߫ ﴿15﴾

ߏ߬ ߟߎ߫ ߟߴߊ߬ ߝߐ߫ ߟߊ߫ ߞߏ߫ ߊ߲ ߡߊ߰ߙߌ ߸ ߊ߲ ߓߘߊ߫ ߘߍ߲߬ߞߣߍ߬ߦߊ߫ ، ߏ߬ ߘߐ߫ ߸ ߊ߲ ߖߟߎ߬ߡߎ߲ ߠߎ߫ ߦߊ߬ߝߊ߫ ߒ߬ ߧߋ߫ ߸ ߊ߬ ߣߴߌ ߦߴߊ߲ ߕߊ߲߬ߞߊ߬ ߕߊ ߟߊ߫ ߖߊ߲߰ߞߕߊ ߡߊ߬ ﴿16﴾

ߡߎ߬ߢߎ߲߬ߓߊ߮ ߟߎ߬ ߣߌ߫ ߕߎ߬ߢߊ߬ ߕߌ߮ ߟߎ߬ ߣߌ߫ ߖߘߍ߬ߞߟߏ߬ߟߊ ߟߎ߬ ߣߌ߫ ߘߟߊߝߊ߯ߟߊ ߟߎ߫ ߞߊ߬ߣߌ߲߫ ߸ ߊ߬ ߣߌ߫ ߡߊ߬ߞߕߏ߬ߟߌ߬ ߢߌ߬ߣߌ߲߬ߠߊ ߟߎ߬ ߛߎ߫ ߟߊߓߊ߲ ߠߎ߬ ߟߊ߫ ﴿17﴾

ߊߟߊ߫ ߛߙߋߦߊߣߍ߲߫ ߸ ߞߏ߫ ߡߊ߰ߙߌ߬ ߜߘߍ߫ ߕߍ߫ ߊ߬ߟߋ߬ ߞߐ߫ ، ߊ߬ ߣߌ߫ ߡߟߍ߬ߞߊ ߟߎ߬ ߣߌ߫ ߟߐ߲ߞߏߕߌ߮ ߟߎ߬ ( ߛߙߋߦߊߣߍ߲߫ ) ، ߟߐ߬ ߞߍߣߍ߲߫ ߕߋߟߋ߲ߓߊ߯ߦߊ ߟߊ߫ ߸ ߞߏ߫ ߡߊ߰ߙߌ߬ ߜߘߍ߫ ߕߍ߫ ߊ߬ߟߋ߬ ߞߐ߫ ، ߣߌ߬ߣߌ߬ߟߊ߫ ߟߋ߬ ߸ ߥߘߋ߬ߥߘߋ߬ߟߌ߬ߟߊ߫ ߟߋ߬ ﴿18﴾

ߘߌ߯ߣߊ ߡߍ߲ ߊߟߊ߫ ߓߟߏ߫ ߸ ߏ߬ ߟߋ ߛߌ߬ߟߡߊ߬ߦߊ ߘߌ߫ ، ߟߍߙߊߟߞߊ ߟߎ߬ ߡߊ߫ ߢߐ߲߮ ߛߐ߬ߛߐ߬ ߝߋߎ߫ ߸ ߝߏ߫ ߟߐ߲ߠߌ߲ ߣߊ߬ߣߍ߲ ߞߐ ߊ߬ߟߎ߫ ߡߊ߬ ، ߞߵߏ߬ ߟߊߥߟߌ߬ ߢߊ߲ߜߏߦߊ ߘߐߙߐ߲߫ ߡߊ߬ ߢߐ߲߮ ߕߍ߫ ߸ ߡߍ߲ ߞߏ߬ߣߌ߲߬ ߓߊ߯ ߊ߬ ߓߊ߲߬ ߊߟߊ߫ ߟߊ߫ ߟߍߙߊ ߟߎ߬ ߘߐ߫ ߸ ߊߟߊ߫ ߘߏ߲߬ ߦߋ߫ ߖߊ߬ߕߋ߬ߓߐ߬ ߞߊߟߌ߲ ߕߌ߱ ߟߋ߬ ߘߌ߫ ߘߋ߬ ﴿19﴾

ߒ߬ߓߊ߬ ߣߴߊ߬ߟߎ߫ ߞߵߌ ߘߊߘߐߖߊ߬ ߸ ߌ ߦߴߊ߬ ߝߐ߫ ߞߏ߫ ߒߠߋ ߓߘߊ߫ ߒ ߢߊߘߐߟߊ ߞߟߏ߫ ߊߟߊ߫ ߦߋ߫ ߒ ߣߌ߫ ߒ ߝߍ߬ ߡߐ߮ ߟߎ߬ ، ߌ ߦߋ߫ ߓߊ߲߫ ߞߊ߬ ߟߍߙߊߟߞߊ ߟߎ߬ ߣߌ߫ ߞߎ߲߬ߝߌ߲ ߠߎ߫ ߢߌ߬ߣߌ߲߬ߞߊ߬ ߞߏ߫ ߊߟߎ߫ ߓߘߴߊߟߎ߫ ߖߘߍ߬ߞߟߏ߫ ߓߊ߬؟ ، ߣߴߊ߬ߟߎ߫ ߣߐ߬ ߞߍ߫ ߘߴߊ߬ߟߎ߫ ߖߘߍ߬ߞߟߏ߫ ߟߊ߫ ߸ ߊ߬ߟߎ߬ ߓߘߊ߫ ߞߊ߲ߘߊ߫ ߏ߬ ߘߐ߫ ، ߣߴߊ߬ߟߎ߫ ߞߵߊ߬ߟߎ߬ ߞߐߘߏ߲߬ ߠߋ߬ ߛߊ߫ ߸ ߡߍ߲ ߌߟߋ ߡߊ߬ ߸ ߏ߬ ߟߋ ߟߊ߬ߛߋ߬ߟߌ ߘߌ߫ ، ߊߟߊ߫ ߘߏ߲߬ ߢߊ߯ ߖߐ߲߭ ߠߎ߬ ߟߊ߫ ߟߋ߬ ߖߐ߫ ﴿20﴾

ߡߍ߲ ߠߎ߫ ߓߊ߲߬ߣߍ߲߬ ߊߟߊ߫ ߟߊ߫ ߟߝߊߙߌ ߟߎ߬ ߘߐ߫ ، ߊ߬ ߣߌ߫ ߞߵߊ߬ ߞߍ߫ ߟߊ߬ߝߐ߬ߓߊ߮ ߟߎ߫ ߝߊ߱ ߘߌ߫ ߕߎ߬ߢߊ߫ ߕߊ߬ߣߊ ߟߊ߫ ، ߊ߬ ߣߌ߫ ߞߵߊ߬ ߞߍ߫ ߡߐ߰ ߟߎ߫ ߝߊ߱ ߘߌ߫ ߸ ߡߍ߲ ߠߎ߯ ߖߡߊ߬ߙߌ߬ߟߌ ߞߍ߫ ߟߊ߫ ߕߋߟߋ߲ߓߊ߯ߦߊ ߟߊ߫ ، ߒ߬ߓߊ߬ ߌ ߘߟߊߥߊ߬ߦߌ߲߬ ߏ߬ ߟߎ߬ ߦߋ߫ ߖߊ߲߰ߞߕߊ߬ ߘߌߡߌ߲ߣߍ߲ ߠߊ߫ ﴿21﴾

ߏ߬ ߟߎ߬ ߟߊ߫ ߓߊ߯ߙߊ ߟߎ߬ ߕߌߢߍߣߍ߲߫ ߠߋ߬ ߘߎߢߊ߫ ߣߌ߫ ߟߊߞߌߙߊ߫ ߓߍ߯ ߘߐ߫ ، ߘߍ߬ߡߍ߲߬ߓߊ߯ ߘߏ߲߬ ߕߍ߫ ߊ߬ߟߎ߬ ߟߊ߫ ﴿22﴾

ߌ ߡߴߊ߬ ߦߋ߫ ( ߖߌ߰ ) ߟߍߙߊ ߘߏ߫ ߘߌߣߍ߲߫ ߡߍ߲ ߠߎ߫ ߡߊ߬ ߸ ߏ߬ ߟߎ߫ ߟߋ߬ ߞߟߌ߫ ߟߴߊߟߊ߫ ߟߊ߫ ߟߍߙߊ ߡߊ߬ ߸ ߞߏ߫ ߊ߬ߟߎ߬ ߦߋ߫ ߣߊ߬ ߏ߬ ߦߋ߫ ߞߕߌ߫ ߊ߬ߟߎ߬ ߕߍ߫ ، ߊ߬ߟߎ߫ ߝߊ߲߬ ߞߋߟߋ߲ ߘߌ߫ ߓߊ߲߫ ߞߵߊ߬ߟߎ߬ ߞߐߟߊ߫ ߞߵߊ߬ߟߎ߬ ߞߐߘߏ߲߬ ߔߏ߲߫ ﴿23﴾

ߏ ߞߎ߲߭ ߠߋ߬ ߸ ߓߊ ߊ߬ߟߎ߬ ߞߊ߲߫ ߠߋ߬ ߞߏ߫ ߕߊ ߕߍ߫ ߡߊ߰ ߟߊ߫ ߒ߬ߠߎ߬ ߟߊ߫ ߝߏ߫ ߕߟߋ߬ ( ߘߡߊߘߡߊ߫ ) ߦߙߌߞߕߊ߫ ، ߊ߬ߟߎ߬ ߟߊ߫ ߞߎ߲߬ߘߐ߬ߕߍ߰ ߞߏ ߟߎ߫ ߘߏ߲߬ ߞߵߊ߬ߟߎ߬ ߜߍߙߍ߲ߞߍ߫ ߊ߬ߟߎ߬ ߟߊ߫ ߘߌ߯ߣߊ ߘߐ߫ ߥߍ߫ ﴿24﴾

ߐ߲߬ߤߐ߲߫ ߸ ߊ߬ ߓߍߣߊ߬ ߞߍ߫ ߘߌ߬ ߸ ߣߴߊ߲ ߣߊ߬ ߘߴߊߟߎ߫ ߟߊߘߍ߬ ߟߏ߲߫ ߡߊ߬ ߸ ߛߌߞߊ߫ ߕߍ߫ ߡߍ߲ ߘߐ߫ ߸ ߞߊ߬ ߣߌߡߊ ߓߍ߯ ߗߋߥߊߟߌ ( ߛߊ߬ߙߊ ) ߘߝߴߊ߬ ߦߋ߫ ߖߐ߫ ߸ ߊ߬ߟߎ߫ ߘߏ߲߬ ߕߍߣߊ߬ ߕߐ߬ߢߍ߰ ߟߊ߫؟ ﴿25﴾

ߊ߬ ߝߐ߫ ߞߏ߫ ߒ ߡߊ߰ߙߌ ߊߟߊ߫ ߸ ߌߟߋ߬ ߡߊ߲߬ߛߊ߬ߦߊ ߡߙߊ߬ߓߊ߮ ߸ ߌ ߦߋ߫ ߡߊ߲߬ߛߊ߬ߦߊ ߘߌ߫ ߟߊ߫ ߡߐ߰ ߟߋ߬ ߡߊ߬ ߸ ߡߍ߲ ߓߴߌ ߘߌߦߊ߫ ، ߌ ߘߌ߫ ߡߊ߲߬ߛߊ߬ߦߊ ߓߏ߬ߛߌ߫ ߡߐ߰ ߟߊ߫ ߸ ߡߍ߲ ߓߴߌ ߘߌߦߊ߫ ، ߌ ߘߌ߫ ߡߐ߰ ߜߟߌߦߊ߫ ߸ ߡߍ߲ ߓߴߌ ߘߌߦߊ߫ ، ߌ ߘߌ߫ ߡߐ߰ ߘߐ߯ߦߊ߫ ߸ ߡߍ߲ ߓߴߌ ߘߌߦߊ߫ ، ߤߙߊ ߌߟߋ ߟߋ߬ ߓߟߏ߫ ߸ ߌߟߋ ߟߋ߬ ߘߏ߲߬ ߛߋ߫ ߟߊ߫ ߞߏ ߓߍ߯ ߟߊ߫ ﴿26﴾

ߌߟߋ ߟߋ߬ ߛߎ ߟߊߘߏ߲߬ ߠߊ߫ ߕߟߋ߬ߘߐ߬ߟߊ ߘߐ߫ ، ߌ ߦߋ߫ ߕߟߋ߬ߘߐ߬ߟߊ ߟߊߘߏ߲߬ ߠߊ߫ ߛߎ ߘߐ߫ ، ߌߟߋ ߟߋ߬ ߣߌߡߊ ߓߐ߫ ߟߊ߫ ߛߎ߭ ߘߐ߫ ߸ ߌ ߦߋ߫ ߛߎ߭ ߓߐ߫ ߟߊ߫ ߣߌߡߊ ߘߐ߫ ، ߡߍ߲ ߘߏ߲߬ ߓߴߌ ߘߌߦߊ߫ ߌ ߘߴߏ߬ ߤߊ߬ߙߌ߬ߖߍ߰ ߓߎߦߌ߯ ߤߊߟߌ߬ ߣߌ߫ ߖߊ߬ߕߋ߬ߟߌ߫ ߕߍ߫ ﴿27﴾

ߘߍ߲߬ߞߣߍ߬ߦߊ߬ߓߊ߮ ߟߎ߬ ߞߊߣߵߊ߬ߟߎ߫ ߘߍ߲߬ߞߣߍ߬ߦߊ߬ߢߐ߲߮ ߠߎ߬ ߕߏ߫ ߘߋ߬ ߞߊ߬ ߓߊ߲߬ߓߊ߮ ߟߎ߬ ߞߍ߫ ߊ߬ߟߎ߫ ߢߌ߲߭ ߠߎ߬ ߘߌ߫ ، ߡߍ߲ ߓߊ߯ ߏ߬ ߞߍ߫ ߸ ߏ߬ ߓߟߏ߫ ߕߍ߫ ߝߏߦߌ߫ ߡߊ߬ ߊߟߊ߫ ߞߏ ߘߐ߫ ߡߎ߬ߕߎ߲߬ ، ߝߏ߫ ߣߴߊߟߎ߫ ߞߍ߫ ߘߴߊߟߎ߫ ߝߊ߲ߕߊ߲߬ߞߊ߬ ߟߴߊ߬ߟߎ߫ ߡߊ߬ ߛߌߟߊ߲ߒߢߍ߫ ߓߟߏ ߡߊ߬ ߘߋ߬ ، ߊߟߊ߫ ߘߏ߲߬ ߦߴߊߟߎ߫ ߟߐ߬ ߟߴߊ߬ ߖߍ߬ߘߍ ߟߋ߬ ߡߊߕߊ߲߬ߞߊ߬ ߟߊ߫ ߣߌ߲߬ ، ߓߊߏ߬ ( ߓߍ߯ ) ߟߊߓߊ߲ߕߐ߫ ߊߟߊ߫ ߟߋ߫ ߡߊ߬ ﴿28﴾

ߊ߬ ߝߐ߫ ߞߏ߫ ߊߟߎ߫ ߞߵߊߟߎ߫ ߛߌߛߌ߫ ߘߐ߫ ߞߏ ߘߏ߲߰ ߓߊ߬ ߸ ߥߟߴߊߟߎ߫ ߞߵߊ߬ ߟߊ߲ߞߣߍߡߊ߫ ߓߊ߬ ߊߟߊ߫ ߞߵߊ߬ ߟߐ߲߫ ، ߊ߬ ߞߊ߬ ߝߋ߲߫ ߟߐ߲߫ ߸ ߡߍ߲ ߓߍ߯ ߦߋ߫ ߛߊ߲ ߠߎ߬ ߞߣߐ߫ ߊ߬ ߣߌ߫ ߡߍ߲ ߓߍ߯ ߦߋ߫ ߘߎ߱ ߞߣߐ߫ ، ߊߟߊ߫ ߟߋ߬ ߘߏ߲߬ ߛߋ߫ ߟߊ߫ ߞߏ ߓߍ߯ ߟߊ߫ ﴿29﴾

ߣߌߡߊ ߞߋ߬ߟߋ߲߬ߞߋ߬ߟߋ߲߬ߣߊ ߞߍߕߐ߫ ߊ߬ ߟߊ߫ ߢߌ߬ߡߊ߬ ߞߍߣߍ߲ ߦߋ߫ ߟߊ߫ ߜߍ ߘߐ߫ ߟߏ߲ ߡߍ߲ ߔߊߞߌߛߊ߫ ، ߊ߬ ߣߴߊ߬ ߟߊ߫ ߖߎ߯ߡߊ߲߫ ߞߍߣߍ߲ ، ߊ߬ ߘߴߊ߬ ߣߕߊ߬ ߞߏ߫ ߥߟߊߞߏ߫ ߝߏ߬ߣߊ߲߬ ߖߊ߲߫ ߕߘߍ߬ ߞߍ߫ ߊ߬ ߣߴߊ߬ ߗߋߥߊߟߌ ߕߍ߫ ، ߊߟߊ߫ ߘߏ߲߬ ߦߴߊߟߎ߫ ߟߐ߬ ߟߴߊ߬ ߖߍ߬ߘߍ ߟߋ߬ ߡߊߕߊ߲߬ߞߊ߬ ߟߊ߫ ߣߌ߲߬ ، ߓߊߏ߬ ߖߐ߲߭ ߠߎ߫ ߞߌ߬ߣߌ߲߬ߞߌߣߌ߲ ߠߋ߬ ߊߟߊ߫ ߟߊ߫ ﴿30﴾

ߊ߬ ߝߐ߫ ߞߏ߫ ߣߌ߫ ߊߟߊ߫ ߘߌߡߊ߲߫ ߞߍ߫ ߘߴߊߟߎ߫ ߦߋ߫ ߸ ߊߟߎ߫ ߒߠߋ ߟߊߓߊ߬ߕߏ߬ ، ߊߟߎ߫ ߝߣߊ߫ ߘߌ߫ ߘߌߦߴߊߟߊ߫ ߦߋ߫ ߏ߬ ߘߐ߫ ߸ ߊ߬ ߣߴߊ߬ ߘߴߊߟߎ߫ ߖߟߎ߬ߡߎ߲ ߠߎ߫ ߦߝߊ߬ ߊߟߎ߫ ߦߋ߫ ، ߓߊ ߊߟߊ߫ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿31﴾

ߊ߬ ߝߐ߫ ߞߏ߫ ߊߟߎ߯ ߊߟߊ߫ ߣߌ߫ ߞߋߟߊ ߞߊ߲ ߡߌ߬ߘߊ߬ ، ߣߴߊ߬ߟߎ߫ ߘߏ߲߬ ߞߵߊ߬ߟߎ߬ ߞߐߘߏ߲߬ ߸ ߒ߬ߓߊ߬ ߓߊ߲߬ߓߊ߮ ߟߎ߬ ߡߊ߲߫ ߘߌ߫ ߊߟߊ߫ ߦߋ߫ ߘߋ߬ ﴿32﴾

ߖߊ߯ߕߋ߬ ߸ ߊߟߊ߫ ߞߊ߬ ߊߘߡߊ߫ ߣߌ߫ ߣߎ߯ߤߎ߲߫ ߣߴߌߓߎ߬ߙߊ߬ߤߌߡߊ߫ ߞߐߙߍ ߣߴߌߡߎ߬ߙߊ߲߬ ߞߐߙߍ ߛߎߥߊ߲ߘߌ߫ ߟߋ߬ ( ߖߊ߯ߓߊ ) ߘߏ߲߬ߞߏ ߟߎ߫ ߡߊ߬ ﴿33﴾

ߓߐ߲ߛߐ߲ ߏ߬ ߟߎ߬ ߘߏ߫ ߓߐߣߍ߲߫ ߘߏ߫ ߟߋ߬ ߘߐ߫ ، ߊߟߊ߫ ߘߏ߲߬ ߡߍ߲ߠߌ߲ߠߊ߫ ߘߌ߫ ߸ ߊ߰ ߟߐ߲ߠߌ߲ߠߊ߫ ߘߌ߫ ﴿34﴾

ߕߎ߬ߡߊ ߡߍ߲ ߌߡߎ߬ߙߊ߲߫ ߣߊ߬ߡߌ߬ߢߐ߲߮ ߞߵߊ߬ ߝߐ߫ ߞߏ߫ ߒ ߡߊ߰ߙߌ ߸ ߒ ߓߘߊ߫ ߘߊߞߊ߲߫ ߕߊ߬ ߌ ߦߋ߫ ߒ ߢߋ߬ߟߋ ߢߌ߲߬ ߠߊ߫ ߸ ߞߵߊ߬ ߞߴߌ ߘߎ߲߬ߘߎ߬ߡߊ ߘߌ߫ ߝߛߊߦߌ߫ ، ߖߊ߰ߣߌ߲߬ ߌ ߦߴߊ߬ ߡߌ߬ߘߊ߬ ߒ ߠߊ߫ ، ߖߊ߯ߕߋ߬ ߸ ߌߟߋ ߟߋ߬ ߡߍ߲ߠߌ߲ߠߊ߫ ߟߐ߲ߠߌ߲ߠߊ ߘߌ߫ ﴿35﴾

ߊ߬ ߣߵߊ߬ ߡߏߦߌ߫ ߟߊ ߸ ߊ߬ ߞߊ߲߫ ߞߏ߫ ߒ ߡߊ߰ߙߌ ߒ ߓߘߴߊ߬ ߡߏߦߌ߫ ߡߛߏ߬ߡߊ߲ ߘߌ߫ ، « ߞߵߊ߬ ߕߘߍ߬ ߖߐ߫ ߊߟߊ߫ ߞߵߊ߬ ߟߐ߲߫ ߊ߬ ߞߊ߬ ߡߍ߲ ߡߏߦߌ߫ » ، ߊ߬ ߞߏ߫ ߗߍ߬ߡߊ߲ ߘߏ߲߬ ߕߍ߫ ߦߏ߫ ߡߛߟߏ߬ߡߊ߲ ، ߒߠߋ ߓߘߴߊ߬ ߕߐ߯ߟߊ߫ ߒ ߞߏ߫ ߡߊߙߌߦߡߊ߫ ، ߒ ߘߏ߲߬ ߓߘߴߊ߬ ߣߴߊ߬ ߓߐ߲ߛߐ߲ ߠߎ߫ ߞߊ߬ߙߌ߬ߝߊ߬ ߌ ߟߊ߫ ߸ ߞߊ߬ ߓߐ߫ ߜߍ߬ߘߍ߫ ߞߙߎ߬ߟߊ߬ߓߏ߲߬ߕߊ ߡߊ߬ ﴿36﴾

ߊ߬ ߡߊ߰ߙߌ ߘߏ߲߬ ߞߵߊ߬ ߘߋ߲ ߡߌ߬ߘߊ߬ ߘߐ߬ߡߌ߬ߘߊ߬ߟߌ߬ ߢߌߡߊ߫ ߟߊ߫ ، ߊ߬ ߣߌ߫ ߞߵߊ߬ ߟߊߡߐ߬ ߡߐ߬ ߘߌ߬ߦߊ߬ ߓߟߏ ߡߊ߬ ߖߏߙߏ߲ߕߊ߲߫ ، ߖߊߞߊ߬ߙߌ߬ߦߊ߫ ߞߵߊ߬ ߟߊߞߟߏߞߟߏ߫ ، ߖߊߞߊ߬ߙߌ߬ߦߊ߫ ߕߎ߲߬ ߓߊ߯ ߘߏ߲߬ ߊ߬ ߞߊ߲߬ ߞߐߘߐ߲ߞߎ߲ ߘߐ߫ ߞߏߕߊ߲߫ ߸ ߊ߬ ߘߌ߫ ߘߊߥߎ߲ߠߌ߲ߝߋ߲ ߘߏ߫ ߛߐ߬ߘߐ߲߬ ߊ߬ ߓߘߊ ߦߋ߲߬ ، ߊ߬ ߞߵߊ߬ ߝߐ߫ ( ߊ߬ ߡߊ߬ ߏ߬ ߟߋ ߘߐ߫ ) ߞߏ߫ ߡߊߙߌߦߡߊ߫ ߸ ߌߟߋ ߛߎ߬ߡߊ߲ ߢߌ߲߬ ߠߎ߫ ߛߐ߬ߘߐ߲߬ ߠߊ߫ ߘߌ߬ ߓߏ߲߰؟ ߊ߬ ߞߵߊ߬ ߖߋ߬ߓߌ߬ ߞߏ߫ ߣߌ߲߬ ߦߋ߫ ߓߐ߫ ߟߴߊߟߊ߫ ߓߘߊ ߟߋ߬ ، ߖߊ߯ߕߋ߬ ߸ ߊߟߊ߫ ߦߋ߫ ߡߐ߰ ߟߋ߬ ߤߊ߬ߙߌ߬ߖߍ߰ ߟߊ߫ ߸ ߡߍ߲ ߓߊ߯ ߊ߬ ߘߌߦߊ߫ ߸ ߣߌ߫ ߖߊ߬ߕߋ߬ߟߌ߫ ߕߍ߫ ﴿37﴾

ߖߊߞߊ߬ߙߌ߬ߦߊ߬ ߝߣߊ߫ ߞߵߊ߬ ߡߊ߰ߙߌ ߞߟߌ߫ ߦߌߟߊ ߏ߬ ߟߋ ߘߐ߫ ߸ ߞߏ߫ ߒ ߡߊ߰ߙߌ ߸ ߒ ߛߐ߫ ߓߐ߲ߛߐ߲߫ ߢߌߡߊ߫ ߟߊ߫ ߞߊ߬ ߝߘߊ߫ ߌ ߝߊ߲ߝߊ߲߫ ߠߊ߫ ، ߖߊ߯ߕߋ߬ ߸ ߌߟߋ ߟߋ߬ ߕߌ߲ߞߌ ߡߍ߲ߓߊ߮ ߘߌ߫ ﴿38﴾

ߏ߬ ߞߍ ߸ ߞߋ߲ߛߐ߲ ߠߎ߫ ߞߵߊ߬ ߞߟߌ߫ ߞߵߊ߬ ߕߘߍ߬ ߊ߬ ߟߐ߬ߣߍ߲߫ ߛߊߟߌ ߟߊ߬ ߞߐߘߐ߲ߞߎ߲ ߘߐ߫ ، ߞߏ߫ ߊߟߊ߫ ߦߴߊ߬ ߘߟߊߝߎ߬ ߟߴߌ ߦߋ߫ ߦߊߤߊ߬ߦߊ߫ ߟߊ߫ ، ߏ߬ ߘߌ߫ ߞߍ߫ ߞߎߡߊ ߘߏ߫ ߟߊߛߙߋߦߊߓߊ߯ ߘߌ߫ ߸ ߡߍ߲ ߝߘߊߕߐ߫ ߊߟߊ߫ ߟߊ߫ ، ߊ߬ ߣߌ߫ ߞߎ߲߬ߕߌ߯ ߘߌ߫ ߊ߬ ߣߌ߫ ߤߌߟߍ ߟߊߜߎ߬ߝߎ߲߬ߓߊ߯ ߘߌ߫ ߸ ߊ߬ ߣߌ߫ ߟߊ߬ߝߐ߬ߓߊ߯ ߘߌ߫ ߡߐ߰ ߢߌߡߊ ߟߎ߬ ߕߍߡߊ߬ ﴿39﴾

ߊ߬ ߞߊ߲߫ ߞߏ߫ ߒ ߡߊ߰ߙߌ ߸ ߘߋ߲ߞߍ߫ ߞߍߕߐ߫ ߒߠߋ ߓߟߏ߫ ߘߌ߬ ߸ ߞߊ߬ ߞߓߐߞߓߐߦߊ ߛߋߣߍ߲ ߕߏ߫ ߒ ߡߊ߬ ߸ ߒ ߡߏ߬ߛߏ ߝߣߊ߫ ߦߋ߫ ߦߟߌߕߍ߯ߕߐ ߘߌ߫؟ ߊ߬ ߞߵߊ߬ ߖߋ߬ߓߌ߬ ߞߏ߫ ߊ߬ ߘߏ߲߬ ߕߋ߲߬ ߠߋ߬ ߘߋ߬ ، ߓߊ ߊߟߊ߫ ߞߏ߫ ߟߋ߬ ߞߍ߫ ߟߊ߫ ߡߍ߲ ߓߊ߯ ߊ߬ ߘߌߦߊ߫ ﴿40﴾

ߊ߬ ߞߊ߲߫ ߞߏ߫ ߒ ߡߊ߰ߙߌ ߸ ߒ߬ߓߵߊ߬ ߕߐ߰ߡߊ߬ߛߙߋ ߦߌ߬ߘߊ߬ ߒ ߠߊ߫ ߥߍ߫ ، ߊ߬ ߞߊ߲߫ ߞߏ߫ ߌ ߟߊ߫ ߕߐ߰ߡߊ߬ߛߙߋ ߡߍ߲ ߘߌ߫ ߸ ߌ ߕߴߛߋ߫ ߞߎߡߊ߫ ߟߊ߫ ߡߐ߱ ߟߎ߫ ߝߍ߬ ߕߋ߬ߟߋ߫ ߛߓߊ߬ ߞߘߐ߫ ߝߏ߫ ߞߐߡߌ߲ߠߌ߲ ، ߌ ߞߏ߬ߣߌ߲ ߦߴߌ ߡߊ߰ߙߌ ߞߏߝߐ߫ ߛߌߦߊߡߊ߲ ߞߍ߫ ߸ ߊ߬ ߣߴߌ ߦߋ߫ ߛߊߣߌ߲ߧߊ߫ ߝߐ ߞߍ߫ ߛߐ߲߬ ߥߎ߬ߙߊ ߣߌ߫ ߛߐ߰ߡߊ߬ ﴿41﴾

ߕߎ߬ߡߊ ߡߍ߲ ߞߋ߲ߛߐ߲ ߠߎ߫ ߞߵߊ߬ ߝߐ߫ ߞߏ߫ ߡߊߙߌߦߡߊ߫ ߸ ߊߟߊ߫ ߓߘߴߌ ߛߎߥߊ߲ߘߌ߫ ߞߵߌ ߛߊߣߌ߲ߧߊ߫ ߸ ߞߵߌ ߛߎߥߊ߲ߘߌ߫ ߖߊ߯ߓߊ ߡߏ߬ߛߏ ߟߎ߫ ߡߊ߬ ﴿42﴾

ߞߏ߫ ߡߊߙߌߦߡߊ߫ ߸ ߌ ߖߘߍ߬ߞߟߏ߫ ߌ ߡߊ߰ߙߌ ߦߋ߫ ߸ ߌ ߦߋ߫ ߕߌ߲ߓߌߘߌ߲ ߞߍ߫ ߊ߬ ߣߴߌ ߦߋ߫ ߞߐߡߊߓߌߘߌ߲ ߞߍ߫ ( ߛߊߟߌ ) ߞߐߡߊߓߌߘߌ߲ߠߊ ߟߎ߫ ߝߍ߬ ﴿43﴾

ߣߌ߲߬ ߦߋ߫ ߞߏ߫ ߘߏ߲߰ߣߍ߲ ߖߊ߲߬ߖߏ߲ ߠߎ߬ ߘߏ߫ ߟߋ߬ ߘߌ߫ ߸ ߊ߲ ߧߴߏ߬ ߟߋ ߦߟߌߘߏ߲ ߟߐ߬ ߟߴߌ ߡߊ߬ ߣߌ߲߬ ، ߣߴߏ߬ ߕߍ߫ ߸ ߌߟߋ ߕߎ߲߬ ߕߍ߫ ߊ߬ߟߎ߫ ߝߍ߬ ߦߋ߲߬ ߸ ߊ߬ߟߎ߬ ߟߊ߫ ߞߟߊ߬ߓߐ ߕߎ߬ߡߊ ߟߊ߫ ߡߊߙߌߦߡߊ߫ ߟߊߡߐ߬ߓߊ߰ ߞߏ ߘߐ߫ ، ߌ ߘߏ߲߬ ߕߎ߲߬ ߕߍ߫ ߊ߬ߟߎ߫ ߝߍ߬ ߊ߬ߟߎ߬ ߟߊ߫ ߢߐ߲߯ߡߊߞߟߍ ߕߎ߬ߡߊ ߟߊ߫ ﴿44﴾

ߕߎ߬ߡߊ ߡߍ߲ ߞߋ߲ߛߐ߲ ߠߎ߫ ߞߵߊ߬ ߝߐ߫ ߞߏ߫ ߤߍ߲߬ ߌߟߋ߬ ߡߊߙߌߦߡߊ߫ ߸ ߊߟߊ߫ ߦߴߊ߬ ߘߟߊߝߎ߬ ߟߴߌ ߦߋ߫ ߞߎߡߊ߫ ߞߋߟߋ߲߫ ߠߊ߫ ߞߵߏ߬ ߝߘߴߊ߬ ߖߍ߬ߘߍ ߟߊ߫ ߸ ( ߏ߬ ߘߌߣߊ߬ ߞߍ߫ ߘߋ߲ߞߍ߫ ߘߌ߫ ) ߊ߬ ߕߐ߯ ߞߏ߫ ߡߊߙߌߦߡߊ߫ ߘߋ߲ߞߍ߫ ߟߊ߬ߞߛߌ߬ߟߌ߬ߟߊ߫ ߡߊߡߎ߲߬ߣߍ߲ ( ߊ߬ߟߌ߬ߡߊ߬ߛߌ߯ߤߎ߬ ߌߛߊ߫ ) ، ߊ߬ ߘߌ߫ ߞߍ߫ ߡߐ߬ߟߐ߲߬ߡߊ߫ ߘߌ߫ ߘߎߢߊ߫ ߣߌ߫ ߟߊߞߌߙߊ߫ ، ߊ߬ ߣߌ߫ ߡߊ߬ߛߎ߬ߘߎ߲߬ߧߊ߬ߓߊ߰ߕߐ ߟߎ߬ ߘߏ߫ ߘߌ߫ ﴿45﴾

ߊ߬ ߘߌ߫ ߡߐ߱ ߟߎ߬ ߞߎߡߊߢߐ߲߯ߦߊ߫ ( ߞߵߊ߬ ߕߏ߫ ) ߖߍ߰ߖߍ߮ ߘߐ߫ ߊ߬ ߣߌ߫ ߜߌߛߌ߲ߧߊ ߘߐ߫ ، ߊ߬ ߣߴߊ߬ ߘߌ߫ ߞߍ߫ ߡߐ߰ ߢߌߡߊ ߟߎ߬ ߘߏ߫ ߘߌ߫ ﴿46﴾

ߊ߬ ߞߊ߲߫ ߞߏ߫ ߒ ߡߊ߰ߙߌ ߸ ߘߋ߲߫ ߞߍߕߐ߫ ߒߠߋ ߓߟߏ߫ ߘߌ߬ ߞߵߊ߬ ߕߘߍ߬ ߗߍ߬ ߡߊ߫ ߡߊ߰ ߒ ߠߊ߫؟ ߊ߬ ߞߵߊ߬ ߖߋ߬ߓߌ߬ ߞߏ߫ ߊ߬ ߘߏ߲߬ ߕߋ߲߬ ߠߋ߬ ߘߋ߬ ߸ ߓߊ ߊߟߊ߫ ߝߋ߲߫ ߠߋ߬ ߘߊ߲߫ ߠߊ߫ ߡߍ߲ ߓߊ߯ ߊ߬ ߘߌߦߊ߫ ، ߊ߬ ߓߊ߯ ߞߏ ߡߍ߲ ߠߊߕߍ߰ ߊ߰ ߊ߬ ߝߐ߫ ߟߴߏ߬ ߡߊ߬ ߟߋ߬ ߞߏ߫ ߞߍ߫ ، ߏ߬ ߘߏ߲߬ ߘߌ߫ ߞߍ߫ ﴿47﴾

ߊ߬ ߘߴߊ߬ ( ߟߋ߬ ߘߋ߲ ) ߟߊߟߐ߲ߠߌ߲߫ ߟߍߙߊ ߣߌ߫ ߥߘߋ߬ߥߘߋ߬ߟߌ ߟߊ߫ ߸ ߊ߬ ߣߌ߫ ߕߊ߬ߥߎ߬ߙߊߕߌ ߣߌ߫ ߟߌ߲߬ߖߌ߯ߟߌ ߟߊ߫ ﴿48﴾

ߊ߬ ߣߴߊ߬ ߘߴߊ߬ ߞߍ߫ ߗߋߘߋ߲ ߘߌ߫ ߌߛߌߙߊߌߟߞߊ ߟߎ߫ ߡߊ߬ ߸ ߞߏ߫ ߒߠߋ ߣߊ߬ߣߍ߲߫ ߊߟߎ߫ ߡߊ߬ ߡߊ߲߬ߕߊߣߌ߲ ߠߋ߬ ߘߌ߫ ߞߊ߬ ߝߘߴߊߟߎ߫ ߡߊ߰ߙߌ ߟߊ߫ ߸ ߓߊ ߒ ߘߌ߫ ߓߐ߱ ߟߊߘߊ߲߫ ߊߟߎ߫ ߦߋ߫ ߸ ߞߵߊ߬ ߞߍ߫ ߖߐ߫ ߦߏ߫ ߞߐ߬ߣߐ ߦߋ߫ ߢߊ ߡߍ߲ ، ߒ ߘߌ߫ ( ߣߌ ) ߝߍ߫ ߏ߬ ߘߐ߫ ߸ ߊ߬ ߘߌ߫ ߞߍ߫ ߞߐ߬ߣߐ ߘߌ߫ ߊߟߊ߫ ߟߊ߫ ߘߌ߬ߢߍ ߟߊ߫ ، ߒ ߘߌ߫ ߝߎߦߋ߲߫ ߡߏߦߌߣߍ߲ ߣߌ߫ ߓߊ߬ߞߌ߬ߕߐ ߟߎ߬ ߟߊߞߍ߲ߘߍߦߊ߫ ߊ߬ ߣߌ߫ ߒ ߘߌ߫ ߛߎ߭ ߟߎ߬ ߟߊߞߎߣߎ߲߫ ߊߟߊ߫ ߟߊ߫ ߘߌ߬ߢߍ ߟߊ߫ ߸ ߒ ߘߴߊߟߎ߫ ߞߌ߬ߓߊ߬ߙߏ߬ ߝߋ߲ ߠߎ߬ ߟߊ߫ ߸ ߊߟߎ߫ ߣߊ߬ ߡߍ߲ ߠߎ߬ ߘߊߥߎ߲߫ ߠߊ߫ ߸ ߊ߬ ߣߌ߫ ߡߍ߲ ߠߎ߬ ߦߴߊߟߎ߫ ߓߟߏߡߊߛߌ߮ ߘߌ߫ ߊߟߎ߫ ߟߊ߫ ߓߏ߲ ߠߎ߬ ߞߣߐ߫ ، ߏ߬ ߟߎ߬ ߦߋ߫ ߕߊ߰ߛߌ߬ ߞߏ߬ߓߊ߫ ߟߋ߬ ߘߴߊߟߎ߫ ߦߋ߫ ߘߋ߬ ߸ ߣߴߊ߬ ߕߘߍ߬ ߘߴߊߟߎ߫ ߦߋ߫ ߘߍ߲߬ߞߣߍ߬ߦߊ߬ߓߊ߯ ߟߎ߫ ߘߌ߫ ﴿49﴾

ߒ ߘߏ߲߬ ߦߋ߫ ߒ ߢߍ߫ ߟߍߙߊ ߟߊߛߙߋߦߊ߫ ߟߊ߫ ߸ ߣߊߟߌ߬ߡߎ߲߫ ߕߊ߬ߥߎ߬ߙߊߕߌ ߘߌ߫ ، ߊ߬ ߣߌ߫ ߒ ߘߌ߫ ߝߋ߲ ߘߏ߫ ߟߎ߫ ߟߊߘߤߊ߬ ߊߟߎ߫ ߦߋ߫ ߸ ߡߍ߲ ߠߎ߬ ߟߊߕߐ߲ߣߍ߲߫ ߕߘߍ߬ ߊߟߎ߫ ߡߊ߬ ، ߒ ߜߎ ߣߊ߬ߣߴߊߟߎ߫ ߡߊ߬ ߡߊ߲߬ߕߊߣߌ߲߫ ߠߋ߬ ߘߌ߫ ߸ ߞߊ߬ ߝߘߴߊߟߎ߫ ߡߊ߰ߙߌ ߟߊ߫ ، ߏ߬ ߘߐ߫ ߸ ߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߸ ߞߊ߬ ߒߠߋ ߞߊ߲ߡߌ߬ߘߊ߬ ﴿50﴾

ߖߊ߯ߕߋ߬ ߸ ߊߟߊ߫ ߟߋ߬ ߒߠߋ ߡߊ߰ߙߌ ߘߌ߫ ߸ ߊ߬ ߣߴߊߟߎ߫ ߝߣߊ߫ ߡߊ߰ߙߌ ߘߌ߫ ، ߒ߬ߓߵߊߟߎ߯ ߏ߬ ߟߋ ߓߊ߬ߕߏ߫ ߘߋ߬ ، ߓߊ ߏ߬ ߟߋ ߛߌߟߊ߫ ߕߋߟߋ߲ߣߍ߲ ߘߌ߫ ﴿51﴾

ߌߛߊ߫ ߛߏ߬ߓߌ ߊ߬ߟߎ߫ ߡߊ߬ ߓߊ߲߬ߓߊ߰ߦߊ ߘߐ߫ ߸ ߊ߬ ߞߊ߲߫ ߞߏ߫ ߖߍߣߍ߲ ߠߎ߬ ߘߌ߫ ߞߍ߫ ߒߠߋ ߘߍ߬ߡߍ߲߬ߓߊ߮ ߟߎ߬ ߘߌ߫ ߊߟߊ߫ ߞߏ ߘߐ߫؟ ، ߞߋߟߊߞߋߟߊ ߟߎ߬ ߞߊ߲߫ ߸ ߞߏ߫ ߒ߬ߠߎ߬ ߦߋ߫ ߊߟߊ߫ ߘߍ߬ߡߍ߲߬ߓߊ߮ ߟߎ߫ ߟߋ߬ ߘߌ߫ ، ߒ߬ ߘߍ߲߬ߞߣߍ߬ߦߊ߬ߣߍ߲߫ ߊߟߊ߫ ߡߊ߬ ߸ ߌ ߦߋ߫ ߛߙߋߦߊ߫ ߞߏ߫ ߒ߬ߠߎ߬ ߦߋ߫ ߖߘߍ߬ߞߟߏ߬ߓߊ߮ ߟߎ߫ ߟߋ߬ ߘߌ߫ ﴿52﴾

ߞߏ߫ ߊ߲ ߡߊ߰ߙߌ ߸ ߊ߲ ߓߘߊ߫ ߘߍ߲߬ߞߣߍ߬ߦߊ߬ ߌ ߟߊ߫ ߟߍߙߊ߫ ߟߊߖߌ߰ߣߍ߲ ߡߊ߬ ߸ ߞߊ߬ ߞߋߟߊ ߟߊߓߊ߬ߕߏ߬ ، ߏ߬ ߘߐ߫ ߌ ߦߴߊ߲ ߛߓߍ߫ ߛߙߋ ߟߎ߫ ߝߍ߬ ߝߊ߯ߛߌ߫ ﴿53﴾

ߊ߬ߟߎ߫ ߞߊ߬ ߓߍ߲߬ߓߍ߲߬ߓߍ߲ ߕߐ߲߬ߕߍ߫ ߸ ߊߟߊ߫ ߝߣߊ߫ ߞߊ߬ ߘߏ߫ ߕߐ߲߬ߕߍ߫ ، ߊߟߊ߫ ߟߋ߬ ߘߏ߲߬ ߕߐ߲߬ߕߍ߬ߟߌ߬ߟߊ ߓߍ߯ ߘߐ߫ ߢߌ߬ߡߊ ߘߌ߫ ﴿54﴾

ߕߎ߬ߡߊ ߡߍ߲ ߊߟߊ߫ ߞߵߊ߬ ߝߐ߫ ߞߏ߫ ߌߛߊ߫ ߸ ߒ ߧߴߌ ߛߏߡߊߦߟߍߡߊ߲߫ ߠߊ߫ ߟߋ߬ ߣߌ߲߬ ߸ ߞߵߌ ߟߊߦߟߍ߬ ߒ ߖߍ߬ߘߍ ߝߍ߬ ߸ ߊ߬ ߣߌ߫ ߞߵߌ ߛߊߣߌ߲ߧߊ߫ ߓߊ߲߬ߓߊ߮ ߟߎ߫ ߡߊ߬ ، ߊ߬ ߣߌ߫ ߞߵߌ ߟߊߓߊ߬ߕߏ߬ߓߊ߮ ߟߎ߬ ߞߍ߫ ߓߊ߲߬ߓߊ߮ ߟߎ߬ ߛߊ߲ߘߐ߫ ߸ ߝߏ߫ ߞߵߊ߬ ߛߌ߰ ߟߐ߬ߓߊ ߟߏ߲ ߠߊ߫ ، ߏ߬ ߞߐ߫ ߕߘߋ߫ ߸ ߊߟߎ߫ ߣߊ߬ߕߐ߫ ߛߊ߬ߦߌ߬ ߟߊ߫ ߒߠߋ ߟߋ߬ ߡߊ߬ ، ߒ ߘߌ߫ ߞߕߌ߫ ߊߟߎ߫ ߕߍ߫ ߸ ߊߟߎ߫ ߟߊ߫ ߝߐߢߐ߲߯ߞߐ߫ ߞߏ ( ߓߍ߯ ) ߘߐ߫ ﴿55﴾

ߒ߬ߓߊ߬ ߡߍ߲ ߠߎ߬ ߓߊ߯ ߕߘߍ߬ ߓߊ߲߬ߓߊ߮ ߟߎ߬ ߘߌ߫ ߸ ߒ߬ ߘߴߏ߬ ߟߎ߫ ߖߊ߲߰ߞߕߊ߫ ߖߊ߲߰ߞߕߊ߬ ߜߍߟߍ߲ ߠߊ߫ ߞߌߢߍ߲߫ ߣߌ߫ ߛߎ߬ߟߊ߫ ( ߘߎߢߊ߫ ߣߌ߫ ߟߊߞߌߙߊ߫ ߞߊ߬ߣߌ߲߫ ) ، ߘߍ߬ߡߍ߲߬ߓߊ߰ ߛߌ߫ ߘߏ߲߬ ߕߍ߫ ߊ߬ߟߎ߬ ߟߊ߫ ﴿56﴾

ߡߍ߲ ߠߎ߫ ߘߏ߲߬ ߓߊ߯ ߞߍ߫ ߘߍ߲߬ߞߣߍ߬ߦߊ߬ߓߊ߯ ߢߌ߬ߡߊ߬ ߞߍ߬ߟߊ ߟߎ߬ ߘߌ߫ ߸ ߊ߬ ߘߴߏ߬ ߟߎ߫ ߛߊ߬ߙߊ ߟߎ߬ ߘߝߴߊ߬ߟߎ߬ ߦߋ߫ ، ߊߟߊ߫ ߘߏ߲߬ ߕߍ߫ ߕߐ߬ߢߍ߰ߒߕߋ ߟߎ߫ ߝߍ߬ ߝߋߎ߫ ﴿57﴾

ߊ߲ ߧߴߢߌ߲߬ ߘߐߞߊ߬ߙߊ߲߬ ߠߴߌ ߦߋ߫ ߞߊ߬ ߓߐ߫ ߟߝߊߙߌ ߟߎ߫ ߟߋ߬ ߘߐ߫ ߸ ߊ߬ ߣߌ߫ ߖߊ߲߬ߓߌ߬ߟߊ߬ ߞߊ߲߫ ߥߘߋ߬ߥߘߋ߬ߣߍ߲ ߘߐ߫ ﴿58﴾

ߌߛߊ߫ ߟߊߒߡߊ ߟߋ߬ ߊߟߊ߫ ߓߘߊ ߸ ߦߏ߫ ߊߘߡߊ߫ ߕߊ ، ߓߊ ߊ߬ ߞߵߏ߬ ߘߊ߲߫ ߓߎ߰ߘߌ ߟߋ߬ ߘߐ߫ ߸ ߞߊ߬ ߓߊ߲߫ ߞߵߊ߬ ߝߐ߫ ߊ߬ ߡߊ߬ ߞߏ߫ ߞߍ߫ ߸ ߏ߬ ߞߍ ߊ߬ ߞߍ߫ ߘߊ߫ ﴿59﴾

ߕߎ߬ߢߊ ( ߣߌ߲߬ ) ߝߘߊߣߴߌ ߡߊ߰ߙߌ ߟߋ߬ ߟߊ߫ ߸ ߒ߬ߓߊ߬ ߌߟߋ ߞߊߣߊ߬ ߞߍ߫ ߛߌߞߊߓߊ߮ ߟߎ߬ ߝߋ߲߫ ߘߌ߫ ߘߋ߬ ﴿60﴾

ߡߍ߲ ߓߴߌ ߘߊߘߐߖߵߊ߬ ߘߐ߫ ߡߎ߬ߕߎ߲߬ ߟߐ߲ߠߌ߲ ߣߊ߬ߣߍ߲ ߞߐ߫ ߌ ߡߊ߬ ߸ ߌ ߦߴߊ߬ ߝߐ߫ ߞߏ߫ ߊߟߎ߫ ߣߵߊ߲ ߧߋ߫ ߒ߬ ߘߋ߲ߞߍ ߟߎ߬ ߣߴߊߟߎ߫ ߘߋ߲ߞߍ ߟߎ߬ ߞߟߌ߫ ، ߊ߬ ߣߴߊ߲ ߡߏ߬ߛߏ ߟߎ߬ ߣߴߊߟߎ߫ ߡߏ߬ߛߏ ߟߎ߬ ، ߊ߬ ߣߴߊ߲ ߖߍ߬ߘߍ ߟߎ߬ ߣߴߊߟߎ߫ ߖߍ߬ߘߍ ߟߎ߬ ، ߏ߬ ߞߐ߫ ߸ ߊ߲ ߧߋ߫ ߒ߬ ߡߊߛߍ߲߫ ߞߵߊߟߊ߫ ߟߊ߫ ߘߊ߲ߞߊ ߞߍ߫ ߥߎߦߊ߫ ߝߐߟߊ ߟߎ߫ ߡߊ߬ ﴿61﴾

ߖߊ߯ߕߋ߬ ߸ ߕߎ߬ߢߊ ߘߐ߬ߝߐ ߟߋ߬ ߣߌ߲߬ ، ߡߊ߰ߙߌ߬ ߛߌ߫ ߕߍ߫ ߝߏ߫ ߊߟߊ߫ ߸ ߊߟߊ߫ ߟߋ߬ ߘߏ߲߬ ߣߌ߬ߣߌ߬ߟߊ߫ ߥߘߋ߬ߥߘߋ߬ߟߌ߬ߟߊ ߘߌ߫ ﴿62﴾

ߤߊߟߵߊ߬ߟߎ߫ ߞߵߊ߬ߟߎ߬ ߞߐߘߏ߲߬ ߸ ߊߟߊ߫ ߞߏ߬ߣߌ߲߬ ߞߊ߬ ߕߌߢߍߟߌߟߊ ߟߎ߬ ߟߐ߲߫ ߠߋ߫ ߘߋ߬ ﴿63﴾

ߊ߬ ߝߐ߫ ߞߏ߫ ߤߍ߲߬ ߊߟߎ߬ ߟߍߙߊߟߞߊ ߟߎ߬ ߸ ߊߟߎ߫ ߣߊ߬ ߞߎߡߊ߫ ߞߋߟߋ߲߫ ߡߊ߬ ߸ ߡߍ߲ ߞߊ߫ ߞߊ߲߫ ߊ߲ߠߎ߬ ߣߴߊߟߎ ߕߍ߫ ، ߒ ߞߏ߫ ߊ߲ ߝߋ߲߫ ߞߊߣߊ߬ ߝߏߦߌ߫ ߓߊ߬ߕߏ߬ ߣߌ߫ ߊߟߊ߫ ߕߍ߫ ߸ ߊ߲ ߘߏ߲߬ ߞߊߣߊ߬ ߝߏߦߌ߫ ߝߊ߬ߙߴߊ߬ ߞߊ߲߬ ، ߊ߲ ߘߏ߫ ߘߏ߲߬ ߞߊ߫ ߘߏ߫ ߞߍ߫ ߡߊ߰ߙߌ ߟߎ߬ ߘߌ߫ ߞߵߊߟߊ߫ ߕߏ߫ ، ߣߴߊ߬ߟߎ߫ ߘߏ߲߬ ߞߵߊ߬ߟߎ߬ ߞߐߘߏ߲߬ ߸ ߊߟߎ ߦߴߊ߬ ߝߐ߫ ߞߏ߫ ߒ߬ߓߵߊߟߎ߫ ߦߋ߫ ߛߙߋߦߊ߫ ߞߏ߫ ߒ߬ߠߎ߬ ߦߋ߫ ߖߘߍ߬ߞߟߏ߬ߦߊ߬ߓߊ߮ ߟߎ߫ ߟߋ߬ ߘߌ߫ ﴿64﴾

ߤߍ߲߬ ߊߟߎ߬ ߟߍߙߊߟߞߊ ߟߎ߬ ، ߡߎ߲߬ ߠߴߊߟߎ߫ ߛߐ߬ߛߐ߬ߟߌ ߞߍ߫ ߟߊ߫ ߌߓߎ߬ߙߊ߬ߤߌߡߊ߫ ߟߊ߫ ߞߏ ߘߐ߫ ߓߏ߲߰؟ ߕߊ߬ߥߎ߬ߙߊߕߌ ߣߌ߫ ߟߌ߲߬ߖߌ߯ߟߌ ߘߏ߲߬ ߜߎ ߡߊ߫ ߟߊߖߌ߰ ߝߴߏ ߕߊ߬ߡߌ߲ ߞߐ߫ ، ߦߊ߯ߟߴߊߟߎ߫ ߕߴߏ߬ ߢߊߦߋ߫ ߟߊ߫ ߟߋ߫ ߓߊ߬؟ ﴿65﴾

ߤߍ߲߬ ߊߟߎ߬ ߸ ߊߟߎ ߟߋ߫ ߛߐ߬ߛߐ߬ߟߌ ߞߍ߫ ߟߴߊߟߎ߫ ߟߐ߲߫ ߞߏ ߘߐ߫ ، ߓߊ߬ߙߌ߬ ߡߎ߲߬ ߠߴߊߟߎ߫ ߦߋ߫ ߛߐ߬ߛߐ߬ߟߌ ߞߍ߫ ߟߴߊߟߎ߫ ߟߐ߲ߓߊߟߌߦߊ߫ ߞߏ ߘߐ߫؟ ߞߵߊ߬ ߕߘߍ߬ ߊߟߊ߫ ߟߋ߫ ߞߵߊ߬ ߢߊߟߐ߲߫ ߸ ߊߟߎ ߘߏ߲߬ ߕߍ߫ ߊ߬ ߞߊ߬ߟߊߡߊ߬ ﴿66﴾

ߌߓߎ߬ߙߊ߬ߤߌߡߊ߫ ߡߊ߫ ߞߍ߫ ߦߊ߬ߤߎ߯ߘߎ߫ ߘߌ߫ ߸ ߊ߬ ߡߊ߫ ߞߍ߫ ߣߊ߬ߛߊ߯ߙߊ߫ ߘߌ߫ ، ߞߏ߬ߣߵߊ߬ ߞߍ߫ ߘߊ߫ ߡߐ߰ ߝߊ߲ߞߊ߲ߣߍ߲߫ ߡߐ߰ ߞߟߏߣߍ߲߫ ߠߋ߬ ߘߌ߫ ߸ ( ߒ߬ߞߊ߬ ߝߋߎ߫ ) ߊ߬ ߡߊ߫ ߞߍ߫ ߛߏߡߊ ߟߎ߬ ߝߋ߲߫ ߘߌ߫ ﴿67﴾

ߡߐ߱ ߓߍ߯ ߘߐ߫ ߓߍ߲߬ߣߍ߲ ߌߓߎ߬ߙߊ߬ߤߌߡߊ߫ ( ߟߊ߬ߡߐ߰ߦߊ ) ߟߊ߫ ߸ ߏ߬ ߟߴߊ߬ ߟߊߓߊ߬ߕߏ߬ߓߊ߮ ߟߎ߬ ߘߌ߫ ، ߊ߬ ߣߌ߫ ߟߊ߬ߝߐ߬ߓߊ߮ ߡߍ߲ ߦߋ߫ ߣߌ߲߬ ، ߏ߬ ߣߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ، ߊߟߊ߫ ߟߋ߫ ߘߏ߲߬ ߦߋ߫ ߘߍ߲߬ߞߣߍ߬ߦߊ߬ߓߊ߮ ߟߎ߫ ߢߌ߲߭ ߘߌ߫ ﴿68﴾

ߟߍߙߊߟߞߊ ߝߊ߲߬ ߞߋߟߋ߲ ߦߴߊ߬ ߝߍ߬ ߟߋ߬ ߸ ߞߏ߫ ߊ߬ߟߎ߬ ߦߴߊߟߎ߫ ߟߊߝߟߌ߬ ، ߊ߬ߟߎ߫ ߘߏ߲߬ ߕߍ߫ ( ߡߐ߰ ߛߌ߫ ) ߟߊߝߟߌ߬ ߟߊ߫ ߝߏ߫ ߊ߬ߟߎ߫ ߖߍ߬ߘߍ ، ߓߊ߬ߙߌ߬ ߊ߬ߟߎ߬ ߕߴߏ ߞߊ߬ߟߊߡߊ߬ ﴿69﴾

ߤߍ߲߬ ߊߟߎ߬ ߟߍߙߊߟߞߊ ߟߎ߬ ߸ ߡߎ߲߬ߠߴߊߟߎ߫ ߦߴߊߟߎ߫ ߓߊ߲߬ ߠߴߊߟߊ߫ ߟߊ߫ ߟߝߊߙߌ ߟߎ߬ ߘߐ߫ ߓߏ߲߰ ߸ ߞߵߊ߬ ߕߘߍ߬ ߊߟߎ ߟߴߊ߬ ߟߊߛߙߋߦߊߓߊ߮ ߟߎ߬ ߘߌ߫؟ ﴿70﴾

ߤߍ߲߬ ߊߟߎ߬ ߟߍߙߊߟߞߊ ߟߎ߬ ߸ ߡߎ߲߬ ߠߴߊߟߎ߯ ߕߎ߬ߢߊ ߢߊ߯ߡߌ߲߫ ߠߊ߫ ߥߎߦߊ ߟߊ߫ ߸ ߊ߬ ߣߌ߫ ߞߊ߬ ߕߎ߬ߢߊ ߘߏ߲߰ ߞߵߊ߬ ߕߘߍ߬ ߊߟߎ߫ ߞߵߊ߬ ߟߐ߲߫ ߞߋ߲߫ ﴿71﴾

ߟߍߙߊߟߞߊ ߝߊ߲߬ ߞߋߟߋ߲ ߠߋ߬ ߞߊ߲߫ ( ߢߐ߲߮ ߦߋ߫ ) ߸ ߞߏ߫ ߊߟߎ߫ ߦߋ߫ ߘߍ߲߬ߞߣߍ߬ߦߊ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߟߊ߫ ߟߍߙߊ߫ ߖߌ߰ߣߍ߲ ߡߊ߬ ߕߋ߬ߟߋ ߞߎ߲߬ߝߟߐ ߘߐ߫ ߸ ߞߵߊߟߎ߫ ߓߊ߲߬ ߊ߬ ߘߐ߫ ( ߕߋ߬ߟߋ ) ߟߊߓߊ߲ ߠߊ߫ ߸ ߛߴߊ߬ߟߎ߬ ߘߌ߫ ߛߊ߬ߦߌ߲߬ ߞߊ߬ ߓߐ߫ ߊ߬ ߞߊ߲߬ ﴿72﴾

ߊ߬ ߣߌ߫ ߞߏ߫ ߊߟߎ߫ ߞߊߣߊ߬ ߘߍ߲߬ߞߣߍ߬ߦߊ߫ ߡߐ߰ ߛߌ߫ ߡߊ߬ ߸ ߝߏ߫ ߡߍ߲ ߓߊ߯ ߕߎ߲߰ ߊߟߎ߫ ߟߊ߫ ߘߌ߯ߣߊ ߟߊ߫ ، ߊ߬ߟߎ߫ ߖߋ߬ߓߌ߬ ߞߏ߫ ߞߊ߲ߘߦߊ ߦߋ߫ ߊߟߊ߫ ߟߊ߫ ߞߊ߲ߘߊ ߟߋ߬ ߘߌ߫ ، ߡߐ߰ ߜߘߍ߫ ߘߌ߫ ( ߛߋ߫ ߞߊ߬ ) ߛߐ߫ ߝߋ߲߫ ߢߐ߲߰ ߠߊ߫ ߸ ߊߟߎ ߛߐߣߍ߲߫ ߡߍ߲ ߠߊ߫ ، ߥߟߴߊ߬ߟߎ߬ ߦߴߊߟߎ߫ ߞߟߍ߬ ߞߊ߬ ߘߊߘߐߡߌߘߊ߫ ߞߎ߲ߧߊ߫ ߛߐ߬ߘߐ߲߬ ߊߟߎ߫ ߡߊ߬ ߊߟߎ߫ ߡߊ߰ߙߌ ߓߘߊ ، ߊ߬ߟߎ߫ ߖߋ߬ߓߌ߬ ߞߏ߫ ߢߊ߬ߒߡߊ߭ ߦߋ߫ ߊߟߊ߫ ߟߋ߬ ߓߟߏ߫ ، ߊ߬ ߦߴߊ߬ ߘߌ߫ ߟߊ߫ ߡߐ߰ ߟߋ߬ ߡߊ߬ ߸ ߡߍ߲ ߓߊ߯ ߊ߬ ߘߌߦߊ߫ ، ߊߟߊ߫ ߘߏ߲߬ ߦߙߌߥߊߣߍ߲߫ ߸ ߊ߬ ߟߐ߲ߠߌ߲ߣߍ߲߫ ﴿73﴾

ߊ߬ ߦߋ߫ ߡߐ߰ ߟߋ߬ ߞߙߍߞߙߍ߫ ߟߴߊ߬ ߟߊ߫ ߤߌߣߊ ߟߊ߫ ߸ ߡߍ߲ ߓߊ߯ ߊ߬ ߘߌߦߊ߫ ، ߊߟߊ߫ ߟߋ߫ ߘߏ߲߬ ߦߋ߫ ߢߊ߬ߒߡߊ߭ ߓߏ߲߬ߓߊ߬ߓߊ ߕߌ߱ ߘߌ߫ ﴿74﴾

ߟߍߙߊߟߞߊ ߟߎ߬ ߘߏ߫ ߓߍ߫ ߸ ߣߴߌ ߞߊ߬ ߞߐ߲߬ߜߍ߲ ߞߊ߬ߙߌ߬ߝߊ߫ ߏ߬ ߟߊ߫ ߸ ߊ߬ ߘߴߊ߬ ߟߊߛߊ߬ߦߴߌ ߡߊ߬ ، ߒ߬ߞߵߊ߬ߟߎ߬ ߘߏ߫ ߜߘߍ߫ ߓߍ߫ ߸ ߤߊߟߵߌ ߞߊ߬ ߘߊ߬ߓߌ߬ߦߏ߲߬ ߞߋߟߋ߲߫ ߔߋ߫ ߞߊ߬ߙߌ߬ߝߊ߫ ߏ߬ ߟߊ߫ ߸ ߊ߬ ߕߴߏ߬ ߘߴߌ ߡߊ߬ ߝߋߎ߫ ߸ ߝߏ߫ ߣߴߌ ߞߵߌ ߟߐ߬ ߊ߬ ߘߟߊ߫ ߝߍ߲ߝߍߘߍ߲߫ ، ߏ߬ ߘߏ߲߬ ߞߎ߲߭ ߠߋ߬ ߓߊߏ߬ ߊ߬ߟߎ߬ ߞߊ߲߫ ߠߋ߬ ߞߏ߫ ߛߌߟߊ߫ ߛߌ߫ ߕߍ߫ ߒ߬ߠߎ߫ ߡߊ߬ ߞߎ߲߬ߝߌ߲ ߠߎ߬ ( ߡߘߊߥߎ߲ ) ߘߐ߫ ، ߊ߬ߟߎ߬ ߦߴߊ߬ߟߎ߬ ߕߊߥߎ߫ ߟߊ߫ ߟߋ߬ ߞߊ߬ ߥߎߦߊ ߟߴߊߟߊ߫ ߟߊ߫ ߸ ߞߵߊ߬ ߕߘߍ߬ ߊ߬ߟߎ߫ ߞߵߊ߬ ߟߐ߲߫ ߞߋ߲߫ ﴿75﴾

ߓߊ߬ߙߌ߬ ߞߊ߯ߙߌ߫ ߸ ߡߍ߲ ߞߏ߬ߣߌ߲߬ ߓߊ߯ ߊ߬ ߟߊ߫ ߟߊ߬ߤߘߌ ߝߊ߫ ߸ ߊ߬ ߣߌ߫ ߞߵߊ߬ ߝߊ߲ߕߊ߲߬ߞߊ߫ ߸ ߒ߬ߓߵߊߟߊ߫ ߦߋ߫ ߝߊ߲ߕߊ߲ߞߟߊ ߟߎ߫ ߟߋ߬ ߘߌߦߊߢߐ߲߮ ߘߌ߫ ﴿76﴾

ߒ߬ߓߊ߬ ߡߍ߲ ߠߎ߬ ߦߴߊߟߊ߫ ߟߊ߫ ߟߊ߬ߤߘߌ ߣߴߊ߬ߟߎ߫ ߖߍ߬ߘߍ ߟߊ߫ ߞߊ߬ߟߌ߬ߟߌ ߟߎ߫ ߝߙߋ߬ ߟߊ߫ ߛߐ߲߬ߞߐ߬ߣߍ߲߬ ߕߜߋ ߟߊ߫ ߸ ߣߌ߬ ߕߴߏ߬ ߟߎ߫ ߟߋ߬ ߦߋ߫ ߟߊߞߌߙߊ߫ ، ߊߟߊ߫ ߝߊ߲߭ ߕߍ߫ ߛߍ߯ ߝߟߌ߬ ߟߴߏ߬ ߟߎ߬ ߘߐ߫ ߸ ߊ߬ ߕߍ߫ ߊ߬ߟߎ߬ ߡߊߝߟߍ߫ ߟߊ߫ ߟߐ߬ߓߊ ߟߏ߲ ߸ ߊ߬ ߘߏ߲߬ ߕߍ߫ ߊ߬ߟߎ߬ ߟߊߜߍ߫ ߟߊ߫ ، ߖߊ߲߰ߞߕߊ߬ ߘߌߡߌ߲ߣߍ߲ ߠߴߏ߬ ߟߎ߬ ߢߍ߫ ﴿77﴾

ߖߊ߯ߕߋ߬ ߸ ߖߡߊ߬ ߞߎߘߎ߲߫ ߦߴߊ߬ߟߎ߬ ߘߐ߫ ߸ ߏ߬ ߟߎ߫ ߟߴߊ߬ߟߎ߫ ߣߍ߲߭ ߠߎ߬ ߘߐߞߙߎ߬ ߟߊ߫ ߟߍߙߊ ߘߌ߫ ߸ ߛߴߊߟߎ߫ ߘߴߏ߬ ߖߌ߰ ߟߍߙߊ ߘߏ߫ ߘߌ߫ ߸ ߞߵߊ߬ ߕߘߍ߬ ߏ߬ ߕߍ߫ ߟߍߙߊ ߝߋ߲߫ ߘߌ߫ ، ߊ߬ߟߎ߬ ߘߴߊ߬ ߝߐ߫ ߞߴߏ߬ ߓߐߣߍ߲߫ ߊߟߊ߫ ߓߘߊ ߟߋ߬ ߸ ߞߵߊ߬ ߕߘߍ߬ ߏ߬ ߡߊ߫ ߓߐ߫ ߊߟߊ߫ ߓߘߊ߫ ߛߌ߫ ߘߐ߫ ، ߊ߬ߟߎ߬ ߦߴߊ߬ߟߎ߬ ߕߊߥߎ߫ ߟߊ߫ ߟߋ߬ ߞߊ߬ ߥߎߦߊ ߟߴߊߟߊ߫ ߟߊ߫ ߞߵߊ߬ ߕߘߍ߬ ߊ߬ߟߎ߫ ߞߵߊ߬ ߟߐ߲߫ ߞߋ߲߫ ﴿78﴾

ߊ߬ ߕߍ߫ ߞߎ߲߫ ߡߐ߰ ߛߌ߫ ߘߐ߫ ߸ ߊߟߊ߫ ߦߴߊ߬ ߛߐ߫ ߟߍߙߊ ߣߌ߫ ߞߕߌߦߊ ߣߌ߫ ߟߊ߬ߝߐ߬ߓߊ߰ߦߊ ߟߊ߫ ߸ ߏ߬ ߦߋ߫ ߓߊ߲߫ ߞߵߊ߬ ߝߐ߫ ߡߐ߱ ߟߎ߬ ߦߋ߫ ߸ ߞߏ߫ ߊߟߎ߯ ߞߍ߫ ߒߠߋ ߟߊ߫ ߖߐ߲߭ ߠߎ߬ ߘߌ߫ ߞߵߊߟߊ߫ ߕߏ߫. ߓߊ߬ߙߌ߬ ( ߊ߬ ߦߴߊ߬ ߝߐ߫ ߟߊ߫ ߟߋ߬ ) ߞߏ߫ ߊߟߎ߯ ߞߍ߫ ( ߊߟߊ߫ ߞߏ ) ߞߊ߬ߙߊ߲߬ߡߐ߰ߓߊ ߟߎ߫ ߟߋ߬ ߘߌ߫ ߸ ߞߊ߬ߡߊߛߐ߬ߘߐ߲߬ ߡߍ߲ ߝߍ߬ ߊߟߎ ߟߋ߬ ( ߡߐ߱ ߟߎ߬ ) ߟߊߟߐ߲ߠߌ߲߫ ߠߊ߫ ߟߍߙߊ ߟߊ߫ ߸ ߊ߬ ߣߌ߫ ߞߊ߬ߡߊߛߐ߬ߘߐ߲߬ ߊߟߎ ߟߋ߫ ߞߊ߬ߙߊ߲ ߞߍ߫ ߟߊ߫ ﴿79﴾

ߊ߬ ߘߏ߲߬ ߕߍ߫ ߊߟߎ߫ ߟߐ߬ ߝߋߎ߫ ߞߏ߫ ߊߟߎ߯ ߡߟߍ߬ߞߊ ߟߎ߬ ߣߌ߫ ߟߊ߬ߝߐ߬ߓߊ߮ ߟߎ߬ ߞߍ߫ ߡߊ߰ߙߌ ߟߎ߬ ߘߌ߫ ، ߋ߫ ߸ ߊ߬ ߝߐ߫ ߊ߬ ߘߴߊߟߎ߫ ߟߐ߬ ߓߊ߲߬ߓߊ߰ߦߊ ߟߊ߫ ߸ ߊߟߎ߫ ߞߍߣߍ߲ ߞߐ߫ ߖߘߍ߬ߞߟߏ߬ߓߊ߮ ߟߎ߬ ߘߌ߫؟ ﴿80﴾

ߕߎ߬ߡߊ ߡߍ߲ ߊߟߊ߫ ߞߊ߬ ߟߊ߬ߝߐ߬ߓߊ߮ ߟߎ߬ ߟߊ߫ ߟߊ߬ߤߘߌ ߡߌ߬ߘߊ߬ ߸ ߞߏ߫ ߣߌ߫ ߒ ߣߊ߬ ߘߴߊߟߎ߫ ߛߐ߫ ߟߍߙߊ ߘߏ߫ ߟߊ߫ ߸ ߊ߬ ߣߌ߫ ߥߘߋ߬ߥߘߋ߬ߟߌ ߘߏ߫ ߟߊ߫ ، ߏ߬ ߞߐ߫ ߞߋߟߊ߫ ߜߘߍ߫ ߣߊ߬ ߘߴߊߟߎ߫ ߡߊ߬ ߸ ߏ߬ ߦߴߊߟߎ߫ ߓߟߏ߫ ߕߊ ߟߊߛߙߋߦߊ߫ ߟߊ߫ ߸ ߦߊ߯ߟߴߊߟߎ߫ ߘߌ߫ ߘߍ߲߬ߞߣߍ߬ߦߊ߫ ߏ ߡߊ߬ ߞߵߊ߬ ߘߍ߬ߡߍ߲߫؟ ߊ߬ ߞߏ߫ ߦߊ߯ߟߊ߫ ߊߟߎ߫ ߘߴߏ߬ ߟߊߟߐ߬ ߞߊ߬ ߒ߬ ߠߊ߫ ߟߊ߬ߤߘߌ ߕߊ߬ ( ߞߊ߲ ) ߏ߬ ߟߊ߫؟ ، ߊ߬ߟߎ߬ ߞߊ߲߫ ߞߏ߫ ߊ߲ ߓߘߴߏ߬ ߟߊߟߐ߬ ߝߋߎ߫ ، ‹ ߊߟߊ߫ › ߞߊ߲߫ ߞߏ߫ ߒ߬ߓߵߊߟߎ߫ ߞߍ߫ ߛߙߋ ߟߎ߬ ߘߌ߫ ߸ ߒߠߋ ߝߣߴߊߟߎ߫ ߝߍ߬ ߛߙߋ ߟߎ߬ ߘߏ߫ ߟߋ߬ ߘߌ߫ ﴿81﴾

ߒ߬ߓߊ߬ ߡߍ߲ ߓߊ߯ ߊ߬ ߞߐߘߏ߲߬ ߡߎ߬ߕߎ߲߫ ߸ ߏ߬ ߟߎ߫ ߟߋ߬ ߔߊߟߊ߲ߞߊߓߊ߯ߕߐ ߟߎ߬ ߘߌ߫ ﴿82﴾

ߌ߬ߦߏ߯ ߊ߬ߟߎ߬ ߘߌ߫ ߊߟߊ߫ ߟߊ߫ ߘߌ߯ߣߊ ߛߌ߬ߣߊ߬ ߜߘߍ߫ ߢߌߣߌ߲߫؟ ߞߵߊ߬ ߕߘߍ߬ ߘߏ߲߬ ߛߊ߲ ߠߎ߬ ߣߌ߫ ߘߎ߱ ߣߌߡߊ ߓߍ߯ ߓߘߴߊ߬ ߖߘߍ߬ߞߟߏ߫ ߊ߬ ߦߋ߫ ߘߌߦߊ߬ߘߌߦߊ ߟߊ߫ ߸ ߊ߬ ߣߌ߫ ߜߏߦߊ߬ߜߏߦߊ ߟߊ߫ ، ߏ߬ ߟߎ߫ ߘߏ߲߬ ߣߊ߬ߕߐ߫ ߟߊߛߊ߬ߦߌ߬ ߟߴߊ߬ߟߋ ߟߋ߫ ߡߊ߬ ﴿83﴾

ߊ߬ ߟߊߛߋ߫ ߞߏ߫ ߒ߬ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߠߋ߬ ߊߟߊ߫ ߡߊ߬ ߸ ߊ߬ ߣߌ߫ ( ߟߍߙߊ ) ߡߍ߲ ߠߊߖߌ߰ߣߍ߲߫ ߒ߬ ߡߊ߬ ߸ ߊ߬ ߣߌ߫ ߡߍ߲ ߠߊߖߌ߰ ߘߊ߫ ߌߓߎ߬ߙߊ߬ߤߌߡߊ߫ ߣߴߌߛߌ߬ߡߊ߬ߌߟߊ߫ ߣߴߌߛߌ߬ߤߊ߯ߞߊ߫ ߣߌ߫ ߦߊ߬ߞߎߓߊ߫ ߣߌ߫ ߓߊߓߏ߲ ߠߎ߫ ߡߊ߬ ، ߊ߬ ߣߌ߫ ߡߍ߲ ߘߌ߫ ߘߊ߫ ߡߎߛߊ߫ ߣߴߌߛߊ߫ ߣߌ߫ ߟߊ߬ߝߐ߬ߓߊ߮ ( ߕߐ߭ ) ߟߎ߫ ߡߵߊ߬ߟߎ߫ ߡߊ߰ߙߌ ߓߟߏ߫ ، ߊ߲ߠߎ߬ ߕߍ߫ ߘߊ߲߬ߝߘߊ߬ߓߐ߫ ߘߏ߲߬ ߡߐ߰ ߛߌ߫ ߕߍ߫ ߏ߬ ߟߎ߬ ߘߐ߫ ، ߒ߬ߠߎ߫ ( ߞߏ߬ߣߌ߲߬ ) ߞߟߏߣߍ߲߫ ߊߟߊ߫ ߟߋ߬ ߢߍ߫ ﴿84﴾

ߡߍ߲-ߍ-ߡߍ߲߫ ߞߊ߬ ߛߌ߬ߟߡߊ߬ߦߊ ߛߌ߬ߣߊ߬ ߜߘߍ߫ ߢߌߣߌ߲߫ ߞߵߏ߬ ߞߍ߫ ߊ߬ ߘߌ߯ߣߊ ߘߌ߫ ߸ ߏ߬ ߕߍ߫ ߡߌ߬ߘߊ߫ ߏ߬ ߟߊ߫ ߝߋߎ߫ ، ߏ߬ ߘߏ߲߬ ߞߍߕߐ߫ ߟߊߞߌߙߊ߫ ߓߣߐ߬ߓߊ߮ ߟߎ߬ ߘߏ߫ ߟߋ߬ ߘߌ߫ ﴿85﴾

ߊߟߊ߫ ߦߋ߫ ߡߌ߬ߙߌ߲߬ߘߌ߬ ߞߊ߲ߘߊ߫ ߟߊ߫ ߘߌ߬ ߸ ߡߍ߲ ߠߎ߬ ߡߙߎߕߌ߫ ߘߴߊ߬ߟߎ߬ ߟߊ߫ ߘߍ߲߬ߞߣߍ߬ߦߊ ߞߐ߫ ߸ ߞߊ߬ ߛߙߋߦߊ߫ ߞߏ߫ ߞߋߟߊ ߦߋ߫ ߕߎ߬ߢߊ߫ ߟߋ߬ ߘߌ߫ ߸ ߊ߬ ߣߌ߫ ߔߊߞߌ ߟߎ߫ ߣߊ߭ ߞߐ߫ ߊ߬ߟߎ߫ ߡߊ߬؟ ߊߟߊ߫ ߘߏ߲߬ ߕߍ߫ ߡߌ߬ߙߌ߲߬ߘߌ߫ ߕߐ߬ߢߍ߰ߒߕߋ ߟߎ߬ ߞߊ߲ߘߊ߫ ߟߊ߫ ߝߋߎ߫ ﴿86﴾

ߏ߬ ߟߎ߫ ߛߊ߬ߙߊ ߟߋ߬ ߞߍߕߐ߫ ߊߟߊ߫ ߣߌ߫ ߞߋ߲ߛߐ߲ ߠߎ߬ ߣߌ߫ ߡߐ߱ ߓߍ߯ ߟߊ߫ ߘߊ߲ߞߊ ߘߴߊ߬ߟߎ߫ ߞߊ߲߬ ߞߐߘߍ߫ ﴿87﴾

ߏ߬ ߟߎ߬ ߘߎߡߊߕߐ߫ ߏ߬ ߟߋ ߘߐ߫ ߸ ߖߊ߲߰ߞߕߊ ߕߍ߫ ߡߊߛߍ߬ߟߍ߲߬ߓߍ߫ ߊ߬ߟߎ߫ ߞߊ߲߬ ߸ ߊ߬ߟߎ߫ ߝߊ߲߭ ߕߍ߫ ߡߊߝߟߍ߫ ߟߋ߬ ﴿88﴾

ߝߏ߫ ߣߌ߫ ߡߍ߲ ߠߎ߫ ߞߵߊ߬ߟߎ߫ ߖߘߍ߬ ߟߊߛߊ߬ߦߌ߬ ߞߐ ߟߊ߫ ߸ ߞߊ߬ ߢߊ߬ߟߌ ߞߍ߫ ، ߏ߬ ߓߊ߯ ߞߍ߫ ߊߟߊ߫ ߝߣߊ߫ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿89﴾

ߡߍ߲ ߠߎ߬ ߡߎߙߎ߲ߕߌ߫ ߘߴߊ߬ߟߎ߬ ߟߊ߫ ߘߍ߲߬ߞߣߍ߬ߦߊ ߞߐ߫ ߸ ߞߊ߬ ߓߊ߲߫ ߞߣߊ߬ ߖߘߌ߫ ߓߊ߲߬ߓߊ߰ߦߊ ߘߐ߫ ߸ ߏ߬ ߟߎ߬ ߟߊ߫ ߖߘߍ߬ߟߊ߬ߛߊߦߌ ߕߍ߫ ߡߌ߬ߘߊ߬ ߝߋߎ߫ ، ߓߊ ߏ߬ ߟߎ߫ ߟߋ߫ ߝߟߌ߬ߓߊ߰ߒߕߋ ߟߎ߬ ߘߌ߫ ﴿90﴾

ߡߍ߲ ߠߎ߬ ߓߊ߯ ߞߍ߫ ߓߊ߲߬ߓߊ߮ ߟߎ߬ ߘߌ߫ ߸ ߞߣߊ߬ ߛߊ߬ ߓߊ߲߬ߓߊ߰ߦߊ ߘߐ߫ ߸ ߘߎ߱ ߝߊ߫ ߛߊߣߌ߲ ߕߍ߫ ߡߌ߬ߘߊ߫ ߏ߬ ߝߋ߲߫ ߠߊ߫ ߸ ߤߟߴߊ߬ ߞߵߊ߬ ߞߎ߲߬ߡߊߞߊ߬ ߏ߬ ߟߊ߫ ، ߏ߬ ߟߎ߫ ߟߋ߬ ߢߍߛߌ߰ߣߍ߲߫ ߖߊ߲߰ߞߕߊ߬ ߘߌߡߌ߲ߣߍ߲ ߠߊ߫ ߸ ߘߍ߬ߡߍ߲߬ߓߊ߯ ߟߎ߫ ߘߏ߲߬ ߕߍ߫ ߊ߬ߟߎ߬ ߟߊ߫ ﴿91﴾

ߊߟߎ߫ ߕߍ߫ ߢߌ߬ߡߊ߬ߦߊ ߛߐ߬ߘߐ߲߬ ߝߋߎ߫ ߝߏ߫ ߣߴߊߟߎ߫ ߞߊ߬ ߖߘߍ߬ߡߊ߬ߓߐ ߞߍ߫ ߊߟߎ߫ ߘߌߦߊߣߍ߲߫ ߝߋ߲ ߘߐ߫ ، ߊߟߎ߫ ߘߏ߲߬ ߓߊ߯ ߖߘߍ߬ߡߊ߬ߓߐ ߞߍ߫ ߝߋ߲-ߋ-ߝߋ߲߫ ߘߐ߫ ߊߟߊ߫ ߞߵߏ߬ ߟߐ߲߫ ߖߐ߫ ﴿92﴾

ߛߎ߬ߡߊ߲ ߓߍ߯ ߘߤߊ߬ߣߍ߲߫ ߠߋ߫ ߕߘߍ߬ ߌߛߌ߬ߙߊ߬ߌߟߊ߫ ߓߐ߲ߛߐ߲ ߠߎ߬ ߦߋ߫ ߸ ߝߏ߫ ߌߛߌ߬ߙߊ߬ߌߟߊ߫ ߞߊ߬ ߡߍ߲ ߞߎ߬ߡߊ߲߬ߘߌ߫ ߊ߬ ߖߍ߬ߘߍ߫ ߡߊ߬ ߸ ߞߊ߬ ߞߐ߲߰ ߕߊ߬ߥߎ߬ߙߊߕߌ ߖߌ߱ ߢߍ߫ ، ߊ߬ ߝߐ߫ ߞߏ߫ ߊߟߎ߫ ߣߊ߬ ߕߊ߬ߥߎ߬ߙߊߕߌ ߘߌ߫ ߞߵߊ߬ ߞߊ߬ߙߊ߲߬ ߓߊ߫ ߣߌ߫ ߕߎ߬ߢߊ߬ ߞߍ߫ ߘߴߊߟߎ߫ ߝߍ߬ ﴿93﴾

ߒ߬ߓߊ߬ ߡߍ߲ ߓߊ߯ ߥߎߦߊ ߟߴߊߟߊ߫ ߟߊ߫ ߡߎ߬ߕߎ߲߫ ߸ ߏ߬ ߟߎ߫ ߟߋ߬ ߕߐ߬ߢߍ߰ߒߕߋ ߟߎ߬ ߘߌ߫ ﴿94﴾

ߊ߬ ߝߐ߫ ߞߏ߫ ߊߟߊ߫ ߞߊ߬ ߕߎ߬ߢߊ߬ ߝߐ߫ ، ߏ߬ ߘߐ߫ ߸ ߊߟߎ߫ ߦߋ߫ ߌߓߎ߬ߙߊ߬ߤߌߡߊ߫ ߟߊ߫ ߣߊߡߎ߲߫ ߕߋߟߋ߲ߣߍ߲߫ ߓߐߚߐ ߟߋ߬ ߟߊߓߊ߬ߕߏ߬ ، ߓߊ ߏ߬ ߡߊ߫ ߞߍ߫ ߛߏߡߊ ߟߎ߬ ߝߋ߲߫ ߘߌ߫ ﴿95﴾

ߓߏ߲߫ ߝߟߐ ߡߍ߲ ߟߐ߬ ߘߊ߫ ߡߐ߱ ߟߎ߬ ߦߋ߫ ، ߖߊ߯ߕߋ߬ ߸ ߏ߬ ߟߋ ߓߞߊ߫ ߕߊ ߘߌ߫ ߸ ( ߡߞߊ߫ ߕߊ ߞߊ߬ߣߌ߲߫ ) ، ߏ߬ ߟߋ ߞߍ߫ ߘߊ߫ ߓߙߊߞߊ߫ ߦߙߐ ߣߌ߫ ߞߊ߲ߘߦߊ ߘߌ߫ ߖߊ߯ߓߊ ߟߎ߬ ߦߋ߫ ﴿96﴾

ߕߐ߰ߡߊ߬ߛߙߋ߬ ߟߊ߲ߞߣߍߡߊߣߍ߲ ߠߎ߬ ߦߴߊ߬ ߞߣߐ߫ ߸ ߏ߬ ߟߎ߬ ߘߏ߫ ߟߋ߬ ߌߓߎ߬ߙߊ߬ߤߌߡߊ߫ ߕߟߐ߬ ߦߌߟߊ ߘߌ߫ ، ߡߍ߲ ߓߊ߯ ߘߏ߲߬ ߊ߬ ߞߣߐ߫ ߏ߬ ߘߌ߫ ߞߍ߫ ߡߐ߰ ߞߎ߲߬ߠߊ߬ߝߎߟߋ߲ߣߍ߲ ߘߌ߫ ، ߊ߬ߟߋ߬ ߓߏ߲ ߡߊߓߊ߬ߕߏ ߦߋ߫ ߡߐ߱ ߓߍ߯ ߟߋ߬ ߡߊ߬ ߛߋ߲ߛߋߘߋ߲ ߘߌ߫ ߊߟߊ߫ ߦߋ߫ ߸ ߡߍ߲ ߓߊ߯ ߊ߬ ߛߌߟߊ ߟߊߣߐ߬ ߞߊ߬ߣߌ߲߫. ߣߌ߫ ߡߍ߲ ߘߏ߲߬ ߞߵߊ߬ ߓߊ߲߬ ߸ ߊߟߊ߫ ߞߊ߯ߙߌߣߍ߲߫ ߠߋ߬ ߖߊ߯ߓߊ ߟߎ߫ ߡߊ߬ ﴿97﴾

ߊ߬ ߟߊߛߋ߫ ߞߏ߫ ߤߍ߲߬ ߊߟߎ߬ ߟߍߙߊߟߞߊ ߟߎ߬ ߸ ߡߎ߲߬ ߠߴߊߟߎ߫ ߦߴߊߟߎ߫ ߓߊ߲߬ ߠߴߊߟߊ߫ ߟߊ߫ ߟߝߊߙߌ ߟߎ߬ ߘߐ߫ ߓߏ߲߰؟ ߊߟߊ߫ ߘߏ߲߬ ߜߎ ߛߙߋߦߊߣߍ߲߫ ߊߟߎ߫ ߗߋߥߊߟߌ ߟߎ߫ ߡߊ߬ ﴿98﴾

ߊ߬ ߟߊߛߋ߫ ߞߏ߫ ߤߍ߲߬ ߊߟߎ߬ ߟߍߙߊߟߞߊ ߟߎ߬ ߸ ߡߎ߲߬ߠߴߊߟߎ߫ ߦߋ߫ ߘߍ߲߬ߞߣߍ߬ߦߊ߬ߓߊ߮ ( ߟߎ߫ ) ߞߎ߬ߡߊ߲߬ߘߌ߬ ߟߴߊߟߊ߫ ߟߊ߫ ߛߌߟߊ ߡߊ߬ ߸ ߞߵߊ߬ ߢߌߣߌ߲߫ ߞߏ߫ ߊߟߎ߫ ߏ߬ ߞߍ߫ ߟߊ߫ ߞߐ߲߬ߕߌ߲ ߘߌ߫ ߸ ߞߵߊ߬ ߕߘߍ߬ ߜߎ ߊߟߎ ߟߵߊ߬ ߛߙߋ ߟߎ߬ ߘߌ߫؟ ، ߞߏ߬ߣߌ߲߬ ߊߟߊ߫ ߖߊ߲߬ߓߐߣߍ߲߫ ߕߍ߫ ߊߟߎ߫ ߗߋߥߊߟߌ ߟߎ߬ ߘߐ߫ ߘߋ߬ ﴿99﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߣߴߊߟߎ߫ ߕߎ߲߰ ߘߊ߫ ߖߊ߬ߡߊ ߘߏ߫ ߟߎ߫ ߟߊ߫ ߟߍߙߊߟߞߊ ߟߎ߬ ߘߐ߫ ߸ ߊ߬ߟߎ߬ ߘߴߊߟߎ߫ ߟߊߛߊ߬ߦߌ߫ ߓߊ߲߬ߓߊ߰ߦߊ ߘߐ߫ ߊߟߎ߫ ߟߊ߫ ߘߍ߲߬ߞߣߍ߬ߦߊ ߞߐ߫ ﴿100﴾

ߊߟߎ߫ ߘߏ߲߬ ߛߊ߬ߦߌ߲߬ߕߐ߫ ߓߊ߲߬ߓߊ߰ߦߊ ߘߐ߫ ߘߌ߬ ߓߏ߲߰ ߞߵߊߟߊ߫ ߟߊ߫ ߟߝߊߙߌ ߟߎ߬ ߕߏ߫ ߞߊ߬ߙߊ߲߬ ߠߴߊߟߎ߫ ߦߋ߫؟ ߸ ߊߟߊ߫ ߟߊ߫ ߞߋߟߊ ߝߣߊ߫ ߦߴߊߟߎ߫ ߕߍߡߊ߬؟ ، ߡߍ߲ ߞߏ߬ߣߌ߲߬ ߓߊ߯ ߊ߬ ߓߟߏߞߍ߫ ߊߟߊ߫ ߟߊ߫ ߸ ߏ߬ ߓߘߊ߫ ߞߊ߲ߘߊ߫ ߛߌߟߊ߫ ߕߋߟߋ߲ߣߍ߲ ߞߊ߲߬ ﴿101﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߵߊ߬ ߝߊ߲ߕߊ߲ߞߊ߫ ߢߊ ߖߍ߬ߘߍ ߡߊ߬ ، ߊߟߎ߫ ߞߊߣߊ߬ ߛߊ߬ ߝߋߎ߫ ߝߏ߫ ߊߟߎ߫ ߛߌ߬ߟߡߊ߬ߟߊ߬ߡߊ ﴿102﴾

ߊߟߎ߫ ߓߍ߯ ߊߟߎ߫ ߓߟߏߞߍ߫ ߊߟߊ߫ ߟߊ߫ ߖߎ߬ߟߎ ߟߊ߫ ߸ ߊߟߎ߫ ߞߊߣߊ߬ ߝߘߊ߫ ߘߋ߬ ، ߊ߬ ߣߴߊߟߎ߫ ߦߴߊߟߎ߫ ߖߊ߲߬ߓߌ߬ߟߊ߬ ߊߟߊ߫ ߟߊ߫ ߣߍߡߊ ߘߐ߫ ߊߟߎ߫ ߞߊ߲߬ ، ߕߎ߬ߡߊ ߡߍ߲ ߊߟߎ߫ ߕߘߍ߬ ߖߎ߯ߢߐ߲߯ߡߊ ߟߎ߬ ߘߌ߫ ߸ ߊ߬ ߞߊ߬ ߘߋ߬ߙߌ ߘߏ߲߬ ߊߟߎ߫ ߛߣߐ߬ߡߍ ߟߎ߬ ߕߍ߫ ، ߏ߬ ߞߍ ߊߟߎ߫ ߞߍ߫ ߘߊ߫ ߓߊߘߋ߲ߡߊ ߟߎ߬ ߘߴߊ߬ ߟߊ߫ ߣߍߡߊ ߟߊ߫ ، ߊ߬ ߣߴߊߟߎ߫ ߕߘߍ߬ ߕߊ߫ ߘߋ߲ߞߊ ߞߊ߲ߞߎ߲ ߠߋ߫ ߞߊ߲߬ ߸ ߊ߬ߟߋ߫ ߟߋ߫ ߞߵߊߟߎ߫ ߟߊߞߛߌ߫ ߞߊ߬ ߓߐ߫ ߏ߬ ߞߊ߲߬ ، ߒ߬ߓߵߊߟߊ߫ ߦߴߊ߬ ߟߊ߫ ߟߝߊߙߌ ߟߎ߬ ߘߐߞߣߍ߫ ߟߴߊߟߎ߫ ߦߋ߫ ߕߋ߲߬ ߠߋ߬ ߸ ߖߐ߲߬ߛߴߊߟߎ߫ ߘߌ߫ ߞߊ߲ߘߊ߫ ﴿103﴾

ߏ߬ ߓߍ߯ ߞߎ߲߭ ߠߋ߬ ߸ ߛߊ߫ ߡߌ߬ߙߌ߲߬ߘߌ߬ ߘߌ߫ ߞߍ߫ ߊߟߎ߫ ߘߐ߫ ߸ ߡߍ߲ ߠߎ߬ ߘߌ߫ ߞߟߌߟߌ ߞߍ߫ ߤߙߊ ߡߊ߬ ߸ ߞߊ߬ ߖߡߊ߬ߙߌ߬ߟߌ ߞߍ߫ ߢߌ߬ߡߊ ߟߊ߫ ߸ ߊ߬ ߣߌ߫ ߞߊ߬ ߝߊߕߊ߲ߕߟߌ ߞߍ߫ ߖߎ߯ߡߊ߲ ߡߊ߬ ، ߒ߬ߓߊ߬ ߏ߬ ߟߎ߫ ߟߋ߬ ߛߎߘߊ߲ߓߊ߮ ߟߎ߬ ߘߌ߫ ﴿104﴾

ߊߟߎ߫ ߞߊߣߊ߬ ߞߍ߫ ߘߋ߬ ߦߏ߫ ߡߍ߲ ߠߎ߫ ߥߊ߲߬ߖߊ߲߬ ߘߊ߫ ߞߵߊ߬ߟߎ߬ ߢߐ߲߮ ߛߐ߬ߛߐ߬ ߔߊߞߌ ߟߎ߫ ߣߊ߭ ߞߐ߫ ߊ߬ߟߎ߫ ߡߊ߬ ، ߓߊ ߏ߬ ߟߎ߫ ߟߋ߬ ߢߍߛߌ߰ߣߍ߲߫ ߖߊ߲߰ߞߕߊ߬ ߓߟߋߓߟߋ ߟߊ߫ ﴿105﴾

ߏ߬ ߞߍߕߐ߫ ߢߘߊ ߘߏ߫ ߟߎ߫ ߜߍߦߊ߫ ߟߏ߲ ߠߋ߬ ߸ ߊ߬ ߣߌ߫ ߢߘߊ ߘߏ߫ ߟߎ߫ ߝߌ߲߬ ߟߏ߲ ، ߒ߬ߓߊ߬ ߡߍ߲ ߠߎ߬ ߢߘߊ ߟߎ߫ ߝߌ߲߬ߕߐ߫ ߸ ߞߏ߫ ߊߟߎ ߟߋ߬ ߡߎߙߎ߲ߕߌ߫ ߘߴߊߟߎ߫ ߟߊ߫ ߘߍ߲߬ߞߣߍ߬ߦߊ ߞߐ߫ ߓߊ߬؟ ، ߒ߬ߓߵߊߟߎ߫ ߖߊ߲߰ߞߕߊ ߡߊߜߙߏ߬ ߞߊ߬ߡߊߛߐ߬ߘߐ߲߬ ߊߟߎ߫ ߟߊ߫ ߓߊ߲߬ߓߊ߰ߦߊ ߝߍ߬ ﴿106﴾

ߒ߬ߓߊ߬ ߡߍ߲ ߠߎ߬ ߢߘߊ ߟߎ߬ ߜߍߦߊߕߐ߫ ߸ ߏ߬ ߟߎ߬ ߦߋ߫ ߊߟߊ߫ ߟߊ߫ ߤߌߣߊ ߟߋ߬ ߘߐ߫ ߸ ߊ߬ߟߎ߫ ߘߏ߲߬ ߘߎߡߊߕߐ߫ ߏ߬ ߟߋ ߘߐ߫ ﴿107﴾

ߊߟߊ߫ ߟߊ߫ ߟߝߊߙߌ ߟߎ߫ ߟߋ߬ ߣߌ߲߬ ߸ ߊ߲ ߧߴߏ߬ ߟߎ߫ ߟߋ߬ ߘߐߞߊ߬ߙߊ߲߬ ߠߴߌ ߦߋ߫ ߕߎ߬ߢߊ ߟߊ߫ ߣߌ߲߬ ، ߊߟߊ߫ ߘߏ߲߬ ߕߍ߫ ߕߐ߬ߢߍ߰ ߢߌߣߌ߲߫ ߠߊ߫ ߖߊ߯ߓߊ ߘߏ߲߬ߞߏ ߟߎ߬ ߦߋ߫ ﴿108﴾

ߊߟߊ߫ ߕߊ ߟߋ߬ ߝߋ߲ ߠߎ߬ ߓߍ߯ ߘߌ߫ ߸ ߡߍ߲ ߠߎ߬ ߦߋ߫ ߛߊ߲ ߠߎ߬ ߞߣߐ߫ ߸ ߊ߬ ߣߌ߫ ߡߍ߲ ߠߎ߬ ߦߋ߫ ߘߎ߱ ߞߣߐ߫ ، ߞߏ ߟߎ߫ ߘߏ߲߬ ߟߊߛߊ߬ߦߌ߬ߕߐ߫ ߊߟߊ߫ ߟߋ߫ ߡߊ߬ ﴿109﴾

ߊߟߎ ߟߋ߬ ߞߍߣߍ߲߫ ߡߊ߲߬ߕߏ߲߬ ߢߌߡߊ ߘߌ߫ ߸ ߡߍ߲ ߠߊߓߐ߫ ߘߊ߫ ߡߐ߱ ߟߎ߬ ߦߋ߫ ، ( ߓߊ ) ߊߟߎ ߟߋ߫ ߖߡߊ߬ߙߌ߬ߟߌ ߞߍ߫ ߟߊ߫ ߢߌ߬ߡߊ ߟߊ߫ ߸ ߞߊ߬ ߝߊߕߊ߲ߕߟߌ ߞߍ߫ ߖߎ߯ߡߊ߲ ߡߊ߬ ، ߊ߬ ߣߌ߫ ߞߊ߬ ߘߍ߲߬ߞߣߍ߬ߦߵߊߟߊ߫ ߡߊ߬ ، ߣߌ߫ ߟߍߙߊߟߞߊ ߟߎ߫ ߕߌ߲߬ ߞߊ߬ ߘߍ߲߬ߞߣߍ߬ߦߊ߫ ߸ ߏ ߕߘߍ߬ ߘߌ߫ ߞߍ߫ ߤߙߊ߫ ߘߴߊ߬ߟߎ߬ ߦߋ߫ ، ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߴߊ߬ߟߎ߬ ߘߐ߫ ߛߊ߫ ߸ ߞߏ߬ߣߵߊ߬ߟߎ߫ ߝߊ߲߬ߓߊ ߟߋ߬ ߔߊߟߊ߲ߞߊߓߊ߮ ߟߎ߬ ߘߌ߫ ﴿110﴾

ߊ߬ߟߎ߬ ߕߍߣߵߊߟߎ߫ ߕߙߐ߫ ߟߊ߫ ߝߏߦߌ߬ ߟߊ߫ ߝߏ߫ ߡߊ߲߬ߕߙߐ߬ߣߍ߲ ߠߎ߬ ، ߓߊ߬ߙߌ߬ ߣߴߊ߬ߟߎ߫ ߞߵߊߟߎ߫ ߞߟߍ߬ ߸ ߊ߬ߟߎ߬ ߘߴߊ߬ߟߎ߬ ߞߐߟߐ߬ ߊߟߎ߫ ߟߊ߫ ( ߓߏ߬ߙߌ ߘߌ߫ ) ߸ ߊ߬ߟߎ߫ ߘߏ߲߬ ߕߍ߫ ߘߍ߬ߡߍ߲߬ ߏ߬ ߞߐ߫ ߡߎ߬ߕߎ߲߬ ߝߋߎ߫ ﴿111﴾

ߊ߬ߟߎ߫ ߘߏ߲߬ ߓߊ߯ ߛߐ߬ߘߐ߲߫ ߝߊ߲߬-ߊ-ߝߊ߲߬ ߸ ߘߐ߯ߦߊ ߘߌ߫ ߟߴߊ߬ߟߎ߫ ߞߊ߲߬ ߦߋ߲߬ ߝߎߚߎ߫ ߸ ߝߏ߫ ߊ߬ߟߎ߬ ߦߴߊ߬ߟߎ߬ ߓߟߏߞߍ߫ ߊߟߊ߫ ߟߊ߫ ߟߊ߬ߤߘߌ ߣߌ߫ ߡߐ߱ ߟߎ߬ ߟߊ߫ ߟߊ߬ߤߘߌ ߟߋ߬ ߟߊ߫ ، ߓߊߏ߬ ߊ߬ߟߎ߫ ߞߵߊ߬ߟߎ߬ ߢߎ߲߫ ߊߟߊ߫ ߟߊ߫ ߡߐߣߍ ߟߋ߬ ߟߊ߫ ، ߏ߬ ߟߋ ߞߊ߬ ߘߐ߯ߦߡߊ ߟߴߊ߬ߟߎ߫ ߞߊ߲߬ ، ߏ ߘߏ߲߬ ߓߍ߯ ߞߎ߲߭ ߠߋ߬ ߊ߬ߟߎ߬ ߟߊ߫ ߓߊ߲߭ ߘߌ߫ ߊߟߊ߫ ߟߊ߫ ߟߝߊߙߌ ߟߎ߬ ߘߐ߫ ، ߊ߬ ߣߴߊ߬ߟߎ߫ ߕߘߍ߬ ߟߊ߬ߝߐ߬ߓߊ߮ ߟߎ߫ ߝߊ߱ ߡߍ߲ ߞߍ߫ ߟߊ߫ ߕߎ߬ߢߊ߫ ߕߣߊ߬ ߟߊ߫ ، ߏ߬ ߓߍ߯ ߡߊߛߐ߬ߘߐ߲߬ߣߴߊ߬ߟߎ߬ ߟߊ߫ ߕߟߏߡߊߜߟߍߦߊ ߟߋ߫ ߝߍ߬ ߸ ߊ߬ ߣߴߊ߬ߟߎ߫ ߕߘߍ߬ ߖߊ߲߬ߘߊ ߡߍ߲ ߞߍ߫ ߟߊ߫ ﴿112﴾

ߊ߬ߟߋ߬ ߟߍߙߊߟߞߊ ߟߎ߫ ߞߏ߬ߣߌ߲߬ ߓߍ߯ ߡߊ߲߫ ߞߊ߲߫ ، ߓߊ ߡߌ߬ߙߌ߲߬ߘߌ߬ ߕߋߟߋ߲ߣߍ߲ ߘߏ߫ ߟߎ߫ ߦߴߊ߬ߟߎ߬ ߘߐ߫ ߸ ߏ߬ ߟߎ߬ ߦߋ߫ ߊߟߊ߫ ߟߊ߫ ߟߝߊߙߌ ߟߎ߫ ߞߊ߬ߙߊ߲߬ ߠߊ߫ ߛߎ ߞߎ߲߬ߕߊ߮ ߟߎ߬ ߘߐ߫ ߸ ߞߵߊ߬ߟߎ߬ ߕߏ߫ ߕߌ߲ߓߌߘߌ߲ ߘߐ߫ ﴿113﴾

ߏ߬ ߟߎ߬ ߦߋ߫ ߘߍ߲߬ߞߣߍ߬ߦߊ߬ ߟߴߊߟߊ߫ ߣߌ߫ ߟߏ߲߫ ߠߊߓߊ߲ ߡߊ߬ ، ߊ߬ߟߎ߬ ߦߋ߫ ߖߡߊ߬ߙߌ߬ߟߌ ߞߍ߫ ߟߊ߫ ߢߌ߬ߡߊ ߟߊ߫ ߞߊ߬ ߝߊߕߊ߲ߕߟߌ ߞߍ߫ ߖߎ߯ߡߊ߲ ߡߊ߬ ، ߊ߬ ߣߴߊ߬ߟߎ߬ ߦߋ߫ ߞߐ߲߰ ߠߊ߫ ߤߙߊ ߟߎ߬ ( ߞߍ ) ߡߊ߬ ، ߒ߬ߓߊ߬ ߏ߬ ߟߎ߫ ߟߋ߬ ߡߐ߰ ߢߌߡߊ ߟߎ߬ ߘߌ߫ ﴿114﴾

ߊ߬ߟߎ߫ ߘߏ߲߬ ߞߊ߬ ߤߙߊ ߝߋ߲-ߋ-ߝߋ߲߫ ߞߍ߫ ߸ ߊ߬ߟߎ߬ ߕߍ߫ ߝߌߕߙߌߥߊߟߋߦߊ߫ ߏ߬ ߘߐ߫ ߝߋߎ߫ ߸ ߓߊ ߊߟߊ߫ ߞߊ߬ ߝߊ߲ߕߊ߲ߞߟߊ ߟߎ߬ ߟߐ߲߫ ߠߋ߬ ߘߋ߬ ﴿115﴾

ߡߍ߲ ߠߎ߬ ߓߊ߯ ߞߍ߫ ߓߊ߲߬ߓߊ߮ ߟߎ߬ ߘߌ߫ ߸ ߏ߬ ߟߎ߬ ߟߊ߫ ߣߊ߲߬ߝߟߏ ߟߎ߬ ߣߴߊ߬ߟߎ߬ ߘߋ߲ ߠߎ߬ ߕߍߣߵߊ߬ߟߎ߫ ߕߊ߲߬ߞߊ߬ ߟߴߊߟߊ߫ ߡߊ߬ ߝߏߦߌ߬ ߟߊ߫ ، ߒ߬ߓߊ߬ ߏ߬ ߟߎ߫ ߟߋ߬ ߕߊ ߘߏ߲߬ߞߏ ߟߎ߬ ߘߌ߫ ߸ ߊ߬ߟߎ߫ ߘߏ߲߬ ߘߎߡߊߕߐ߫ ߦߋ߲߬ ߠߋ߬ ﴿116﴾

ߏ߬ ߟߎ߬ ߦߋ߫ ߖߘߍ߬ߡߊ߬ߓߐ ߡߍ߲ ߠߎ߬ ߞߍ߫ ߟߊ߫ ߘߎߢߊ߫ ߢߣߊߡߦߊ ߘߐ߫ ߸ ߏ߬ ߟߎ߬ ߟߊߒߡߊ ߟߋ߬ ߦߏ߫ ߝߢߐ ߕߡߊ ߓߊ߯ ߡߌ߬ߙߌ߲߬ߘߌ߫ ߖߘߍ߬ ߕߐ߬ߢߍ߰ߟߊ ߟߎ߬ ߟߊ߫ ߝߏ߬ߘߏ ߛߐ߬ߘߐ߲߬ ߞߵߊ߬ ߛߌߟߊߛߊ߬ ߟߋߎ߫ ، ߊߟߊ߫ ߘߏ߲߬ ߡߊ߫ ߓߊ߰ ߏ߬ ߟߎ߫ ߡߊ߬ ߏ߬ ߘߐ߫ ߘߋ߬ ߸ ߏ߬ ߟߎ߫ ߟߋ߬ ߓߊ߰ ߘߴߊ߬ߟߎ߫ ߖߍ߬ߘߍ߫ ߡߊ߬ ﴿117﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ، ߊ߬ߟߎ߫ ߞߊߣߊ߬ ߞߣߐߘߐߝߐߢߐ߲߯ ߜߘߍ߫ ߟߊߘߊ߲߫ ߘߋ߬ ߣߴߊߟߎ߫ ߜߊ߲߬ߛߊ߲ ߕߍ߫ ، ߊ߬ߟߎ߬ ߟߊ߫ ߕߌߢߍߟߌ ߕߍ߫ ߝߏ߬ ߊߟߎ߫ ߟߊ߫ ߏ߬ ߘߐ߫ ، ߓߊ ߊߟߎ߫ ߕߙߐ߫ ߞߏ ߟߋ߬ ߘߌߡߊ߲߫ ߊ߬ߟߎ߬ ߦߋ߫ ، ߞߐߣߌ߲ߧߊ ߓߘߊ߫ ߓߊ߲߫ ߟߊ߲ߞߣߍߡߊ߫ ߟߴߊ߬ߟߎ߬ ߘߊ ߟߊ߫ ، ߊ߬ߟߎ߬ ߛߌߛߌ ߟߎ߫ ߘߏ߲߬ ߡߍ߲ ߘߏ߲߰ ߠߊ߫ ߏ߬ ߟߋ ߞߊ߫ ߓߏ߲߬ ، ߊ߲ ߓߘߊ߫ ߓߊ߲߫ ߕߐ߰ߡߊ߬ߛߙߋ ߟߎ߫ ߦߌ߬ߘߊ߬ ߟߴߊߟߎ߫ ߟߊ߫ ߣߴߊ߬ ߕߘߍ߬ ߘߴߊߟߎ߫ ߦߋ߫ ߤߊ߲ߞߟߌߡߊ߫ ߟߎ߫ ߘߌ߫ ﴿118﴾

ߤߍ߲߬ ߊߟߎ߬ ߸ ߊߟߎ ߟߴߊ߬ߟߎ߫ ߞߊ߲߬ߣߌ߲߬ ߠߊ߫ ߸ ߞߏ߬ߣߵߊ߬ߟߎ ߕߍ߫ ߊߟߎ ߞߊ߬ߣߌ߲߬ ߠߊ߫ ߘߋ߬ ، ߊ߬ ߣߴߊߟߎ ߟߋ߫ ߘߍ߲߬ߞߣߍ߬ߦߊ߬ߣߍ߲߫ ߟߍߙߊ ߓߍ߯ ߡߊ߬ ، ߣߴߊ߬ߟߎ߫ ߓߍ߲߬ ߘߴߊߟߎ߫ ߘߌ߫ ߸ ߊ߬ߟߎ߬ ߘߴߊ߬ ߝߐ߫ ߞߏ߫ ߊ߲ ߝߣߊ߫ ߘߍ߲߬ߞߣߍ߬ߦߊ߬ߣߍ߲߫ ߠߋ߬ ، ߓߊ߬ߙߌ߬ ߣߴߊ߬ߟߎ߫ ( ߜߊ߲߬ߛߊ߲ ) ߓߟߏߡߊߞߊ߬ ߘߊ߫ ߸ ߊ߬ߟߎ߬ ߘߴߊ߬ߟߎ߬ ߓߟߏߞߏ߬ߦߌ߬ߣߍ߲ ߠߎ߬ ߗߌ߲߫ ߊߟߎ߫ ߞߊ߲ߡߊ߬ ߡߐߣߍ ߡߊ߬ ، ߊ߬ ߝߐ߫ ߞߏ߫ ߊߟߎ߯ ߛߊ߬ ߡߐߣߍ ߡߊ߬ ߞߍ߬ ، ߊߟߊ߫ ߞߏ߬ߣߌ߲ ߞߊ߬ ߛߌߛߌ ߟߎ߬ ߞߣߐ߫ ߞߏ ߓߍ߯ ߟߐ߲߫ ﴿119﴾

ߣߌ߫ ߤߙߊ߫ ߞߵߊߟߎ߫ ߛߐ߬ߘߐ߲߬ ߏ߬ ߘߴߊ߬ߟߎ߬ ߟߊߛߎ߬ߣߎ߲߬ ߸ ߣߌ߫ ߖߎ߯ߡߊ߲߫ ߠߋ߫ ߞߵߊߟߎ߫ ߛߐ߬ߘߐ߲߬ ߛߊ߫ ߸ ߊ߬ߟߎ߬ ߘߌ߫ ߛߍߥߊ߫ ߏ߬ ߟߊ߫ ، ߣߴߊߟߎ߫ ߞߏ߬ߣߌ߲ ߞߵߊߟߎ߫ ߡߎ߬ߢߎ߲߬ ߞߵߊߟߎ߫ ߝߊ߲ߕߊ߲߬ߞߊ߫ ߸ ߊ߬ߟߎ߫ ߘߊ߬ߓߊߙߌ ߕߍ߫ ߊߟߎ߫ ߕߙߐ߫ ߝߏߦߌ߬ ߟߊ߫ ، ߓߊ ߊ߬ߟߎ߬ ߗߋߥߊߟߌ ߟߎ߬ ߟߊߝߏ߬ߣߍ߲߫ ߠߋ߬ ߊߟߊ߫ ߓߟߏ߫ ߔߘߋߞߎ߬ ﴿120﴾

ߕߎ߬ߡߊ ߡߍ߲ ߌ ߛߏ߬ߙߌ߬ ߘߊ߫ ߓߐ߫ ߟߴߌ ߘߏ߲߬ߞߏ ߟߎ߫ ߝߍ߬ ߸ ߞߊ߬ ߥߊ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߡߊߞߍ߫ ߘߊ߮ ߟߎ߬ ߟߊ߫ ߞߍ߬ߟߍ ߞߊ߲ߡߊ߬ ، ߊߟߊ߫ ߘߏ߲߬ ߡߍ߲ߠߌ߲ߠߊ߫ ߘߌ߫ ߸ ߊ߰ ߟߐ߲ߠߌ߲ߠߊ߫ ߘߌ߫ ﴿121﴾

ߕߎ߬ߡߊ ߡߍ߲ ߞߟߍ߬ߓߏߟߏ߲߫ ߝߌ߬ߟߊ߫ ߕߎ߲߬ ߓߍ߫ ߢߌߣߌ߲߫ ߊߟߎ߫ ߘߐ߫ ߞߊ߬ ߖߌߕߐߦߊ߫ ߸ ߞߏ߬ߣߌ߲߬ ߊߟߊ߫ ߞߍ߫ ߘߴߊ߬ߟߎ߫ ߢߌ߲߭ ߘߌ߫ ، ߘߍ߲߬ߞߣߍ߬ߦߊ߬ߓߊ߮ ߟߎ߫ ߘߏ߲߬ ߊ߬ߟߎ߫ ߛߍ߲߬ߓߍ߬ ߟߴߊߟߊ߫ ߟߋ߬ ߟߊ߫ ﴿122﴾

ߊߟߊ߫ ߞߵߊߟߎ߫ ߘߍ߬ߡߍ߲߬ ߓߊߘߙߌ߫ ߸ ߏ߬ ߕߎ߬ߡߊ ߊߟߎ߫ ߜߍ߲ߛߍ߲ߞߍߙߍ߲ ߦߋ߫ ߸ ߒ߬ߓߵߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߸ ߛߴߊߟߎ߫ ߘߌ߫ ߞߏߢߌߡߊߟߐ߲ ߞߍ߫ ﴿123﴾

ߕߎ߬ߡߊ ߡߍ߲ ߌ ߞߵߊ߬ ߝߐ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߋ߫ ߸ ߞߏ߫ ߊ߬ ߕߍ߫ ߊߟߎ߫ ߥߊ߬ߛߊ߫ ߓߵߊߟߎ߫ ߡߊ߰ߙߌ ߦߴߊߟߎ߫ ߡߊߜߍ߲߫ ߡߟߍ߬ߞߊ߫ ( ߞߋ߲ߛߐ߲߫ ) ߟߊߖߌ߰ߕߊ ߥߊ߯ ߛߓߊ߬ ߟߊ߫؟ ﴿124﴾

ߤߊ߯ߟߌ߫ ߞߍ߬ ߸ ߣߴߊߟߎ߫ ߝߊ߲߭ ߞߵߊߟߎ߫ ߡߎ߬ߢߎ߲߫ ߞߵߊߟߎ߫ ߝߊ߲ߕߊ߲߬ߞߊ߫ ߸ ߖߎ߮ ߟߎ߬ ߘߌߣߊ߬ ߥߎ߬ߦߊ߬ ߊߟߎ߫ ߞߊ߲߬ ߥߊ߯ߕߌ ߢߌ߲߬ ߘߐ߫ ߛߍ߲ ߸ ( ߏ߬ ߓߊ߯ ߞߍ߫ ) ߊߟߎ߫ ߡߊ߰ߙߌ ߘߴߊߟߎ߫ ߡߊߜߍ߲߫ ߞߋ߲ߛߐ߲߫ ߕߐ߰ߡߊ߬ߛߙߋ߬ߟߌ߬ߟߊ ߥߊ߯ ߟߏ߯ߟߎ߫ ߟߊ߫ ﴿125﴾

ߊߟߊ߫ ߡߴߏ߬ ߞߍ߫ ߞߎ߲߬ ߜߘߍ߫ ߟߊ߫ ߝߏ߫ ߊߟߎ߫ ߟߊߛߍߥߊ ، ߊ߬ ߣߌ߫ ߛߴߊߟߎ߫ ߛߣߐ߬ߡߍ ߘߌ߫ ߡߝߴߊ߬ ߟߊ߫ ، ߘߍ߬ߡߍ߲߬ߠߌ߲߬ ߛߌ߫ ߘߏ߲߬ ߕߍ߫ ߝߏ߫ ߡߍ߲ ߓߊ߯ ߝߘߴߊߟߊ߫ ߟߊ߫ ߸ ߏ߬ ߟߋ ߣߌ߬ߣߌ߬ߟߊ ߥߘߋ߬ߥߘߋ߬ߟߌ߬ߟߊ ߘߌ߫ ﴿126﴾

ߊ߬ ߦߴߊ߬ ߝߍ߬ ߟߋ߬ ߛߴߊ߬ ߘߌ߫ ߓߊ߲߬ߓߊ߮ ߟߎ߬ ߟߊ߫ ߖߊ߬ߡߊ ߝߊ߲߬ ߞߋߟߋ߲ ߓߟߏߕߍ߰ ߥߟߊ߫ ߞߵߊ߬ߟߎ߫ ߡߎ߰ߡߍ ߟߊߝߘߌ߫ ߞߎߜߋ߫ ، ߏ߬ ߓߊ߯ ߞߍ߫ ߊ߬ߟߎ߬ ߘߌ߫ ߛߊ߬ߦߌ߲߬ ߖߌ߰ߘߐ߬ߞߏߟߏ߲ߧߊ ߘߌ߫ ߝߏߦߊ߲߫ ﴿127﴾

ߝߏߦߌ߬ ߕߴߌߟߋ ߡߊ߬ ߞߏߢߊ ( ߢߌ߲߬) ߘߐ߫ ، ߞߋߟߋ߲߫ ‹ ߊߟߊ߫› ߦߋ߫ ߖߘߍ߬ߟߊ߬ߛߊߦߌ ߡߌ߬ߘߴߊ߬ߟߎ߬ ߦߋ߫ ߥߟߴߊ߬ ߦߴߊ߬ߟߎ߫ ߖߊ߲߰ߞߕߊ߫ ، ߓߊ ߕߐ߬ߢߍ߰ߒߕߋ ߟߎ߫ ߟߋ߬ ﴿128﴾

ߊߟߊ߫ ߕߊ ߟߋ߬ ߛߊ߲ ߠߎ߬ ߣߌ߫ ߘߎ߱ ߞߣߐ߫ ߝߋ߲ ߘߌ߫ ، ߊ߬ ߘߌ߫ ߦߊ߬ߝߊ߫ ߡߐ߰ ߡߊ߬ ߡߍ߲ ߓߊ߯ ߊ߬ ߘߌߦߊ߫ ، ߊ߬ ߘߌ߫ ߡߐ߰ ߖߊ߲߰ߞߕߊ߫ ߡߍ߲ ߓߊ߯ ߊ߬ ߘߌߦߊ߫ ، ߊߟߊ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿129﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߞߊߣߊ߬ ߜߙߐ߬ߞߐ ߓߊߟߌ߫ ߞߏ߫ ߛߌߦߊߡߊ߲ ߘߊߥߎ߲߫ ߘߋ߬ ، ߊߟߎ߫ ߘߏ߲߬ ߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߸ ߖߐ߲߰ߛߴߊߟߎ߫ ߘߌ߫ ߛߎߘߊ߲߫ ﴿130﴾

ߊߟߎ߫ ߦߴߊߟߎ߫ ߝߊ߲ߕߊ߲߬ߞߊ߬ ߕߊ ߡߊ߬ ߸ ߡߍ߲ ߘߐߓߍ߲߬ߣߍ߲߫ ߓߊ߲߬ߓߊ߮ ߟߎ߬ ߢߍ߫ ﴿131﴾

ߊߟߎ߯ ߊߟߊ߫ ߣߌ߫ ߞߋߟߊ ߞߊ߲ ߡߌ߬ߘߊ߬ ߸ ߏ߬ ߟߋ ߘߴߊ߬ ߞߍ߫ ߊߟߎ߫ ߘߌ߫ ߟߊߤߌߣߊ߫ ﴿132﴾

ߊߟߎ߯ ߞߐ߲߰ ߦߝߊ߬ ( ߢߌߣߌ߲ ) ߡߵߊߟߎ߫ ߡߊ߰ߙߌ ߝߍ߬ ߸ ߊ߬ ߣߌ߫ ߡߍ߲ߘߌߦߊ ߣߊߞߐ ( ߢߌߣߌ߲ ߡߊ߬ ) ߸ ߏ߬ ߡߍ߲ ߥߊ߲߬ߥߊ߲ ߦߋ߫ ߦߏ߫ ߛߊ߲ ߠߎ߬ ߣߌ߫ ߘߎ߱ ߕߊ ، ߏ߬ ߟߋ ߘߐߓߍ߲߬ߣߍ߲߫ ߝߊ߲ߕߊ߲ߞߟߊ ߟߎ߬ ߢߍ߫ ﴿133﴾

ߏ߬ ߟߎ߫ ߟߋ߫ ߖߘߍ߬ߡߊ߬ߓߐ ߞߍ߫ ߟߊ߫ ߡߍ߲ߘߌߦߊ ߘߐ߫ ߊ߬ ߣߌ߫ ߡߊ߲߬ߕߙߐ ߘߐ߫ ، ߏ߬ ߟߎ߫ ߟߋ߬ ߡߐߣߍ ߟߊߞߎ߬ߣߎ߲߬ ߠߊ߫ ߸ ߊ߬ ߣߌ߫ ߞߊ߬ ߜߊ߲ߒߞߎ߲ߠߊ ߞߍ߫ ߡߐ߱ ߟߎ߬ ߦߋ߫ ، ߢߊ߬ߓߊ߮ ߟߎ߫ ߟߋ߫ ߘߏ߲߬ ߘߌߡߊ߲߫ ߊߟߊ߫ ߦߋ߫ ﴿134﴾

ߊ߬ ߣߴߏ߬ ߟߎ߫ ߟߋ߬ ߓߊ߯ ߞߏߙߏ߲ߧߊ ߘߏ߫ ߞߍ߫ ߥߟߊ߫ ߖߘߍ߬ ߕߐ߬ߢߍ߰ ߞߏ ߘߏ߫ ߸ ߊ߬ߟߎ߬ ߘߴߊ߬ߟߎ߫ ߖߊ߲߬ߓߌ߬ߟߊ߬ ߊߟߊ߫ ߘߐ߫ ߸ ߞߊ߬ ߦߝߊ߬ ߢߌߣߌ߲ ߞߍ߫ ߊ߬ߟߎ߫ ߖߟߎ߬ߡߎ߲ ( ߏ߬ ) ߟߎ߬ ߟߊ߫ ، ߖߍߣߍ߲ ߘߏ߲߬ ߘߌ߫ ߖߟߎ߬ߡߎ߲ ߠߎ߫ ߦߝߊ߬ ߣߌ߫ ߊߟߊ߫ ߕߍ߫؟ ߊ߬ߟߎ߫ ߘߏ߲߬ ߕߍ߫ ߊ߬ߟߎ߬ ߕߋ߲ߜߋߘߋ߲ߧߴߊ߬ߟߎ߬ ߞߍ߫ ߛߐ߲ ߏ߬ ߞߊ߲߬ ߓߊ ߊ߬ߟߎ߫ ߞߵߊ߬ ߟߐ߲߫ ﴿135﴾

ߏ߬ ߟߎ߫ ߟߋ߫ ߛߊ߬ߙߊ ߞߍߕߐ߫ ߦߝߊ߬ߟߌ ߘߌ߫ ߊ߬ߟߎ߫ ߡߊ߰ߙߌ ߓߟߏ߫ ߸ ߊ߬ ߣߌ߫ ߣߊߞߐ߫ ߟߎ߫ ߘߌ߫ ߸ ߖߌߢߊ ߟߎ߫ ߥߦߏ߬ ߟߊ߫ ߡߍ߲ ߠߎ߬ ߞߘߐߟߊ ߟߎ߬ ߘߐ߫ ، ߏ߬ ߟߎ߬ ߘߎߡߊߕߐ߫ ߦߋ߲߬ ߠߋ߬ ، ߓߊ߯ߙߟߊ ߟߎ߫ ߛߙߊ߬ ߢߌߡߊ ߟߴߏ߬ ߘߌ߫ ߞߟߋ߫ ﴿136﴾

ߖߊ߲߬ߖߏ߲߬ ߛߘߍߡߊ߲߫ ߓߘߊ߫ ߕߊ߬ߡߌ߲߬ ߊߟߎ߫ ߢߍ߫ ߞߘߐ߬ߡߊ߲߫ ، ߊߟߴߊߟߎ߫ ߦߊ߯ߟߊ߫ ߘߎ߱ ( ߝߊ߲߭ ߠߎ߬ ) ߘߐ߫ ߸ ߞߵߊ߬ ߝߟߍ߫ ߡߊ߬ߛߐ߬ߛߐ߬ߟߌ߬ߟߊ ߟߎ߬ ߟߊߓߊ߲ ߞߍ߫ ߘߊ߫ ߢߊ ߡߍ߲ ﴿137﴾

(ߞߎ߬ߙߊ߬ߣߊ) ߣߌ߲߬ ߦߋ߫ ߟߊ߬ߛߋ߬ߒ߬ߞߊ߲߬ߠߊ ߟߋ߬ ߘߌ߫ ߡߐ߱ ߟߎ߫ ߡߊ߬ ، ߊ߬ ߣߌ߫ ߞߊ߲ߘߦߊ߫ ߣߌ߫ ߞߊ߬ߥߊ߲߬ߘߌ߫ ߟߋ߬ ߝߊ߲ߕߊ߲ߞߟߊ ߟߎ߬ ߦߋ߫ ﴿138﴾

ߊߟߎ߫ ߞߣߊ߫ ߟߊ߲߰ߝߏ߫ ، ߊߟߎ߫ ߞߣߊ߫ ߛߎ߬ߣߎ߲߬ ، ߊߟߎ ߟߋ߫ ߣߊ߬ߕߐ߬ ߛߋ ߛߐ߬ߘߐ߲߬ ߠߊ߫ ߸ ߣߴߊ߬ ߕߘߍ߬ ߘߊ߫ ߞߊ߬ߣߌ߲߬ ߊߟߎ߫ ߦߋ߫ ߘߍ߲߬ߞߣߍ߬ߦߊ߬ߓߊ߯ ( ߟߎ߫ ) ߘߌ߫ ﴿139﴾

ߣߌ߫ ߖߐߞߟߌ߫ ߞߵߊߟߎ߫ ߛߐ߬ߘߐ߲߬ ߸ ߏ߬ ߢߐ߲߰ ߖߐߞߟߌ߫ ߓߘߊ߫ ߖߎ߮ ߟߎ߫ ߛߐ߬ߘߐ߲߫ ߞߘߐ߬ߡߊ߲߫ ، ߊ߲ ߘߏ߲߬ ߦߋ߫ ߟߏ߲ ߠߎ߬ ߘߐߝߊ߬ߟߋ߲߬ ߠߊ߫ ߡߐ߱ ߟߎ߬ ߕߍ߫ ߟߋ߬ ߸ ߛߴߊߟߊ߫ ߘߴߊ߬ ߟߐ߲߫ ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲߫ ، ߊ߬ ߣߴߊ߬ ߦߋ߫ ߛߙߋ ߟߎ߫ ߕߵߊߟߎ߫ ߘߐ߫ ، ߞߏ߬ߣߌ߲߬ ߝߋߎ߫ ߊߟߊ߫ ߕߍ߫ ߕߐ߬ߢߍ߰ߒߕߋ ߟߎ߫ ߝߍ߬ ߟߋ߬ ߘߍ߯ ﴿140﴾

ߊ߬ ߣߌ߫ ߛߴߊߟߊ߫ ߘߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߫ ߓߎ߰ߓߎ߯ ߸ ߞߊ߬ ߓߊ߲߬ߓߊ߮ ߟߎ߫ ߝߎ߰ߛߌ߫ ﴿141﴾

ߊ߬ ߦߴߊߟߎ߫ ߢߣߊ߫ ߟߋ߫ ߓߊ߬ ߞߏ߫ ߊߟߎ߫ ߦߋ߫ ߘߏ߲߬ ߡߍ߲ߘߌߦߊ ߣߊߞߐ ߘߐ߫ ߕߋ߲߬ ߸ ߞߵߊ߬ ߕߘߍ߬ ߊߟߊ߫ ߡߴߊߟߎ߫ ߞߘߐߓߐ߫ ߡߎߣߎ߲߬ ߞߵߊ߬ ߟߐ߲߫ ߡߍ߲ ߠߎ߬ ߘߌ߫ ߖߘߍ߬ߘߌ ߞߍ߫ ߊߟߎ߫ ߘߐ߫ ߸ ߊ߬ ߣߌ߫ ߞߊ߬ ߡߎ߬ߢߎ߲߬ߓߊ߮ ߟߎ߬ ߟߐ߲߫ ﴿142﴾

ߊߟߎ߫ ߘߏ߲߬ ߜߎ ߕߘߍ߬ ߛߊ߬ߦߊ ߣߕߊ߬ ߟߊ߫ ߞߘߐ߬ߡߊ߲߫ ߞߵߊ߬ ߕߘߍ߬ ߊߟߎ߫ ߡߴߊ߬ ߓߍ߲߬ߢߐ߲߰ߦߊ߫ ߡߎߣߎ߲߬ ، ߒ߬ߓߵߊߟߎ߫ ߓߘߴߏ߬ ߟߋ ߦߋ߫ ߣߌ߲߬ ߸ ߞߵߊ߬ ߕߘߍ߬ ߊߟߎ߫ ߢߊ ߓߍ߲߬ߣߴߊ߬ ߡߵߊ߬ ߘߐߜߍ ߟߊ߬ ﴿143﴾

ߡߊ߬ߡߊߘߌ߫ ߕߍ߫ ߝߋ߲߫ ߜߘߍ߫ ߘߌ߫ ߞߋߟߊߡߐ߮ ߞߐ߫. ߞߋߟߊߡߐ߯ ߛߘߍߡߊ߲߫ ߘߏ߲߬ ߓߘߊ߫ ߕߊ߬ߡߌ߲߫ ߊ߬ ߢߍ߫ ߞߘߐ߬ߡߊ߲߫. ߊ߬ ߝߐ߫ ߣߴߊ߬ ߛߊ߬ ߘߊ߫ ߸ ߥߟߴߊ߬ ߝߊ߰ ߘߊ߫ ߸ ߊߟߎ߫ ߘߌ߫ ߛߊ߬ߦߌ߬ ߊߟߎ߫ ߕߏ߲ߕߏߟߌ߲ ߠߎ߫ ߡߊ߬ ߓߊ߬؟ ، ߡߍ߲ ߘߏ߲߬ ߓߊ߫ ߛߊ߬ߦߌ߲߬ ߊ߬ ߕߏ߲ߕߏߟߌ߲߫ ߝߌ߬ߟߊ ߡߊ߬ ߸ ߏ߬ ߕߍ߫ ߊߟߊ߫ ߕߙߐ߫ ߝߏߦߌ߬ ߟߊ߫ ، ߓߊ ߊߟߊ߫ ߣߊ߬ߕߐ߫ ߟߋ߬ ߞߏߢߌߡߊߟߐ߲ߠߊ ߟߎ߫ ߛߙߊ߬ ߟߊ߫ ﴿144﴾

ߊ߬ ߛߋ߫ ߕߍ߫ ߣߌߡߊ߫ ߛߌ߫ ߢߍ߫ ߞߊ߬ ߛߊ߬ ߸ ߝߏ߫ ߊߟߊ߫ ߓߊ߯ ߘߌ߬ߢߍ߬ ߛߓߍߟߌ߫ ߟߐ߯ߟߊߣߍ߲ ߠߊ߫ ، ߡߍ߲ ߘߏ߲߬ ߓߊ߯ ߞߍ߫ ߘߎߢߊ߫ ߛߊ߬ߙߊ ߝߍ߬ ߸ ߊ߲ ߘߴߏ߬ ߘߴߏ ߡߊ߬ ߖߐ߫ ، ߡߍ߲ ߝߣߊ߫ ߓߊ߯ ߞߍ߫ ߟߊߞߌߙߊ߫ ߛߊ߬ߙߊ ߝߍ߬ ߸ ߒ߬ ߘߴߏ߬ ߘߴߏ ߡߊ߬ ߸ ߞߏ߬ߣߌ߲߬ ߛߋߚߋ߫ ߸ ߒ߬ ߣߊ߬ߕߐ߫ ߟߋ߬ ߞߏߢߌߡߊߟߐ߲ߠߊ ߟߎ߫ ߛߙߊ߬ ߟߊ߫ ﴿145﴾

ߟߊ߬ߝߐ߬ߓߊ߯ ߖߋ߬ߟߌߖߋ߬ߟߌ߫ ߟߋ߬ ߸ ߞߏ߲߬ߓߏ߬ ߛߌߦߊߡߊ߲߫ ߞߊ߬ ( ߖߘߍ߬ߘߌ ) ߞߍ߬ߟߍ ߞߍ߫ ߡߍ߲ ߝߍ߬ ، ߞߏ ߡߍ߲ ߠߎ߫ ߞߵߏ߬ ߟߎ߫ ߛߐ߬ߘߐ߲߬ ߊߟߊ߫ ߛߌߟߊ ( ߕߊ߯ߡߊ) ߘߐ߫ ߸ ߏ߬ ߡߴߏ߬ ߟߎ߫ ߖߛߎ߬ߘߐߝߊ߰ ߸ ߊ߬ ߡߴߊ߬ߟߎ߫ ߝߊ߬ߘߌ߬ߘߐߝߊ߰ ، ߊ߬ߟߎ߫ ߘߏ߲߬ ߡߊ߫ ߘߎ߰ߡߊ ߓߛߏ߫ ߸ ߡߎ߬ߢߎ߲߬ߓߊ߮ ߟߎ߫ ߟߋ߫ ߘߏ߲߬ ߘߌߡߊ߲߫ ߊߟߊ߫ ߦߋ߫ ﴿146﴾

ߏ߬ ߟߎ߬ ߟߊ߫ ߞߎߡߊ ߡߊ߫ ߞߍ߫ ߘߏ߫ ߜߘߍ߫ ߘߌ߫ ߸ ߝߏ߫ ߊ߬ߟߎ߫ ߞߵߊ߬ ߝߐ ߡߍ߲ ߞߍ߫ ߞߏ߫ ߊ߲ ߡߊ߰ߙߌ ߸ ߦߊ߬ߝߊ ߞߍ߫ ߒ߬ ߧߋ߫ ߒ߬ ߖߟߎ߬ߡߎ߲ ߠߎ߬ ߣߴߊ߲ ߞߏ߫ ߘߐߕߌߢߍ߫ ߣߐ ߟߎ߬ ߘߐ߫ ߸ ߊ߬ ߣߴߌ ߦߴߊ߲ ߛߋ߲߭ ( ߠߎ߬ ) ߓߊ߲ߓߊ߲߫ ߞߵߊ߲ ߘߍ߬ߡߍ߲߫ ߡߌ߬ߙߌ߲߬ߘߌ߫ ߓߊ߲߬ߣߍ߲ ߠߎ߫ ߡߊ߬ ﴿147﴾

ߏ߬ ߞߍ ߊߟߊ߫ ߞߵߏ߬ ߟߎ߬ ߛߐ߫ ߘߎߢߊ߫ ߛߊ߬ߙߊ ߟߊ߫ ߸ ߊ߬ ߣߌ߫ ߟߊߞߌߙߊ߫ ߓߙߊ߬ߖߌ߬ ߢߌߡߊ ߟߊ߫ ، ߓߊ ߢߊ߬ߓߊ߮ ߟߋ߬ ߘߌߡߊ߲߫ ߊߟߊ߫ ߦߋ߫ ﴿148﴾

ߤߍ߲߬ ߊߟߎ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߣߴߊߟߎ߫ ߞߊ߬ ߓߊ߲߬ߓߊ߮ ߟߎ߬ ߞߊ߲ ߡߌ߬ߘߊ߬ ߸ ߊ߬ߟߎ߬ ߘߴߊߟߎ߫ ߟߊߛߊ߬ߦߌ߲߬ ߊߟߎ߫ ߕߏ߲ߕߏߟߌ߲ ߠߎ߫ ߡߊ߬ ، ߏ߬ ߓߊ߯ ߞߍ߫ ߊߟߎ߫ ߘߌ߫ ߟߊߓߊ߲߫ ߓߣߐ߬ߓߊ߮ ߟߎ߬ ߘߌ߫ ﴿149﴾

ߞߏ߬ߣߌ߲߬ ߍ߲߬ߍ߲ߍ߲߬ ߸ ߊߟߊ߫ ߟߵߊߟߎ߫ ߟߊ߫ ߞߏߕߌ߮ ߘߌ߫ ، ߏ߬ ߟߋ ߘߏ߲߬ ߦߋ߫ ߘߍ߬ߡߍ߲߬ߠߌ߲߬ߠߊ ߟߎ߬ ߘߐ߫ ߢߌ߬ߡߊ ߘߌ߫ ﴿150﴾

ߛߋߚߋ߫ ߊ߲ ߓߍߣߊ߬ ߛߌߟߊ߲ ߠߊߝߌ߬ߟߌ߫ ߓߊ߲߬ߓߊ߮ ߟߎ߫ ߛߣߐ߬ߡߍ ߟߎ߬ ߘߐ߫ ߸ ߞߊ߬ߡߊߛߐ߬ߘߐ߲߬ ߊ߬ߟߎ߫ ߞߊ߬ ߝߋ߲߫ ߠߋ߬ ߝߙߊ߬ ߊߟߊ߫ ߞߊ߲߬ ߸ ߊ߬ ߡߊ߫ ߡߍ߲ ߘߊ߬ߟߎ߬ ߛߌ߫ ߟߊߖߌ߰ ، ߏ߬ ߟߎ߬ ߡߊߞߍ߫ ߦߌߟߊ ߟߋ߬ ( ߞߍߕߐ߫ ) ߕߊ ߘߌ߫ ، ߕߐ߬ߢߍ߰ߒߕߋ ߟߎ߫ ߛߌ߰ ߦߌߟߊ ߏ߬ ߘߏ߲߬ ߖߎ߯ߡߊ߲߫ ߞߟߋ߫ ﴿151﴾

ߖߊ߯ߕߋ߬ ߸ ߊߟߊ߫ ߞߵߊ߬ ߟߊ߫ ߦߟߌߡߊߘߌߦߊ ߓߐ߫ ߜߍ߫ ߟߴߊߟߎ߫ ߦߋ߫ ، ߏ߬ ߞߍ ߸ ߊߟߎ߫ ߕߏ߫ ߘߊ߫ ( ߖߎ߮ ) ߟߎ߬ ߛߐ߲ߛߐ߲߫ ߠߴߊ߬ ߟߊ߫ ߘߌ߬ߢߍ ߟߊ߫ ߝߎߚߎ߫ ߸ ߝߏ߫ ߊߟߎ߫ ߥߊ߫ ߘߊ߫ ߖߌߕߐߦߊ߫ ߞߊ߬ ߝߐ߫ ߢߐ߲߮ ߞߐ߫ ߥߊߟߌߢߊ ߘߐ߫ ، ߊ߬ ߣߌ߫ ߞߊ߬ ߖߊ߬ߡߊߙߌ ߛߐ߬ߛߐ߫ ، ߞߵߊ߬ ߕߘߍ߬ ߜߎ ( ߊߟߊ߫ ) ߓߘߊ߫ ߓߊ߲߫ ߊߟߎ߫ ߛߊ߬ߥߏ ߦߌ߬ߘߊ߬ ߟߴߊߟߎ߫ ߟߊ߫ ، ߞߏ߬ߣߌ߲߬ ߘߎߢߊ߫ ߢߌߣߌ߲ߠߊ ߣߌ߫ ߟߊߞߌߙߊ߫ ߢߌߣߌ߲ߠߊ ߟߋ߬ ߓߍ߯ ߘߏ߫ ( ߓߊ߬ߛߊ߲߬ߣߍ߲߫ ) ߕߘߍ߬ ߊߟߎ߫ ߘߐ߫ ، ߏ߬ ߟߋ ߞߵߊ߬ ߞߍ߫ ߊ߬ ߞߵߊߟߎ߫ ߟߊߛߊ߬ߦߌ߲߬ ( ߖߎ߮ ) ߟߎ߬ ߞߐ߫ ، ߞߵߏ߬ ߟߊߥߟߌ߬ ߊߟߎ߫ ߞߘߐߓߐ ߡߊ߬ ، ߞߏ߬ߣߵߊ߬ ߓߘߊ߫ ߦߝߵߊߟߎ߫ ߡߊ߬ ( ߏ߬ ߓߍ߯ ߘߐ߫ ) ، ߊߟߊ߫ ߘߏ߲߬ ߦߋ߫ ߝߎߣߎ߲ߛߙߋߦߊ ߕߌ߱ ߟߋ߬ ߘߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߫ ߡߊ߬ ﴿152﴾

ߕߎ߬ߡߊ ߡߍ߲ ߊߟߎ߫ ߕߏ߫ ߘߴߊߟߎ߫ ߞߎ߲߬ ߠߊߦߟߍ߬ ߟߊ߫ ، ߊߟߎ߫ ߕߍ߫ ߊߟߎ߫ ߞߐߝߍߣߍ߲߫ ߠߊ߫ ߡߐ߰ ߛߌ߫ ߡߊ߬ ، ߞߵߊ߬ ߕߘߍ߬ ߞߋߟߊ ߦߴߊߟߎ߫ ߞߟߌ ߞߊ߲߬ ߊߟߎ߫ ߞߕߐ߫ ، ߏ߬ ߟߋ ߞߵߊ߬ ߞߍ߫ ߊ߬ ߞߵߊߟߎ߫ ߛߙߊ߬ ߞߣߐߜߊ ߟߊ߫ ߞߣߐߜߊ߫ ߜߘߍ߫ ߞߊ߲߬ ، ߣߌ߲߬ ߞߏߛߐ߲߬ ߊߟߎ߫ ߞߣߊ߫ ߛߎ߬ߣߎ߲߬ ߤߙߊ߫ ߡߊ߬ ߡߍ߲ ߞߵߊߟߎ߫ ߘߊ߲߬ ، ߊ߬ ߣߌ߫ ߡߊ߲߬ߕߙߐ߫ ߡߊ߬ ߡߍ߲ ߞߵߊߟߎ߫ ߛߐ߬ߘߐ߲߬ ، ߊߟߊ߫ ߘߏ߲߬ ߞߟߊ߬ߡߊ߬ ߞߏ ߟߋ߬ ߊߟߎ߫ ߗߋߥߊߟߌ ߟߎ߬ ߘߌ߫ ﴿153﴾

ߞߣߐߜߊ ߏ߬ ߟߋ ߞߐ߫ ߊ߬ ߞߊ߬ ߞߎ߲߬ߠߊ߬ߝߎߟߋ߲ ߠߊߖߌ߰ ߊߟߎ߫ ߡߊ߬ ، ߝߏ߫ ߖߌ߲߬ߞߐ߲ ߞߊ߬ ߖߊ߬ߡߊ ߝߊ߲߬ ߞߋߟߋ߲ ߞߎ߲߬ߠߊ߬ߓߌߘߌ߲߫ ߊߟߎ߫ ߘߐ߫ ، ߞߵߊ߬ ߕߘߍ߬ ߖߊ߬ߡߊ ߕߐ߬ ߝߊ߲߬ ߞߋߟߋ߲ ߣߌ ߞߎ߬ߘߎ ߓߘߊ߫ ߛߌ߰ ߊ߬ߟߎ߬ ߞߊ߲ߠߊ߫ ߝߎߚߎ߫ ߝߏ߫ ߊ߬ߟߎ߫ ߞߊ߬ ߖߌ߰ߟߌ߫ ߟߐ߬ ߊߟߊ߫ ߡߊ߬ ߸ ߡߍ߲ ߣߌ߫ ߕߎ߬ߢߊ߬ ߡߊ߲߫ ߞߊ߲߫ ߸ ߘߓߌ߬ߘߐ߬ߦߊ ߖߌ߰ߟߌ ߞߊ߬ߣߌ߲߫ ، ߊ߬ߟߎ߬ ߦߴߊ߬ ߝߐ߫ ߟߊ߫ ߞߏ߫ ߦߊ߯ߟߊ߫ ߒ߬ ߕߊ߫ ߦߋ߫ ߣߌ߲߬ ߞߏߢߊ ߘߐ߫ ߓߊ߬؟ ߊ߬ߟߎ߫ ߖߋ߬ߓߌ߬ ߞߏ߫ ߣߌ߲߬ ߞߏ ߓߍ߯ ߊߟߊ߫ ߟߋ߬ ߓߟߏ߫ ، ߊ߬ߟߎ߫ ߘߏ߲߬ ߦߋ߫ ߡߍ߲ ߘߏ߲߰ ߠߴߊ߬ߟߎ߬ ߣߌ ߟߎ߬ ߘߐ߫ ߸ ߊ߬ߟߎ߬ ߕߴߏ߬ ߟߊ߲ߞߣߍߡߊ߫ ߟߴߌߟߋ ߦߋ߫ ، ߊ߬ߟߎ߬ ߞߊ߲߫ ߠߋ߬ ߞߏ߫ ߣߴߊ߲ ߕߊ߫ ߕߘߍ߬ ߊ߬ߟߋ߬ ߞߏ ߢߌ߲߬ ߘߐ߫ ߸ ߊ߲ ߕߎ߲߬ ߕߍ߫ ߣߊ߬ ߝߊ߰ ߦߊ߲߬ ( ߕߋ߲߬ ߝߎ߯ ) ، ߊ߬ߟߎ߫ ߖߋ߬ߓߌ߬ ߞߏ߫ ߤߊߟߵߊߟߎ߫ ߞߍ߫ ߘߴߊߟߎ߫ ߟߊ߫ ߓߏ߲ ߠߎ߬ ߞߣߐ߫ ߸ ߝߊ߰ߟߌ ߛߓߍߣߍ߲߫ ߡߍ߲ ߠߎ߫ ߡߊ߬ ߸ ߏ߬ ߟߎ߫ ߕߌ߲߬ ߘߌ߫ ߓߐ߫ ߟߋ߬ ߕߘߋ߫ ߞߊ߬ ߥߊ߫ ߝߊ߰ ߊ߬ߟߎ߫ ߓߋ߬ ߦߌߟߊ ߟߎ߬ ߘߐ߫ ، ߏ߬ ߓߍ߯ ߞߎ߲߭ ߠߋ߬ ߸ ߛߴߊߟߊ߫ ߘߴߊߟߎ߫ ߛߌߛߌ߫ ߘߐ߫ ߞߏ ߟߎ߫ ߓߌ߬ߟߊ߬ ߜߍ ߘߐ߫ ߸ ߊ߬ ߣߌ߫ ߞߵߊߟߎ߫ ߛߣߐ߬ߡߍ ߟߎ߬ ߞߣߐߟߊ ߓߎ߰ߓߎ߯ ، ߊߟߊ߫ ߟߋ߫ ߘߏ߲߬ ߛߌߛߌ߫ ߘߐ߫ ߞߏ ߟߎ߬ ߟߐ߲ߓߊ߮ ߘߌ߫ ﴿154﴾

ߡߍ߲ ߠߎ߫ ߞߵߊ߬ߟߎ߬ ߞߐߟߴߊߟߎ߫ ߘߐ߫ ߖߊ߬ߡߊ߫ ߝߌ߬ߟߊ ߢߐ߲߯ߓߍ߲߫ ߟߏ߲ ߸ ߜߍ߬ߘߍ ߟߋ߫ ߣߵߏ߬ ߟߎ߬ ߟߊߕߣߍ߬ߣߍ߬ ߟߴߊ߬ߟߎ߬ ߗߋߥߊߟߌ ߘߏ߫ ߟߎ߫ ߞߏߛߐ߲߬ ، ߒ߬ߞߵߊߟߊ߫ ߓߘߊ߫ ߜߊ߲ߒߞߎ߲ߠߊ ߞߍ߫ ߊߟߎ߫ ߢߍ߫ ( ߏ߬ ߘߐ߫ ) ، ߖߊ߯ߕߋ߬ ߸ ߊߟߊ߫ ߦߋ߫ ߦߝߊ߬ߓߊ߯ ߘߌ߫ ߊ߰ ߡߎ߬ߢߎ߲߬ߓߊ߯ ߘߌ߫ ﴿155﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߞߊߣߵߊߟߎ߫ ( ߖߘߍ߬ ) ߞߍ߫ ߘߋ߬ ߦߏ߫ ߓߊ߲߬ߓߊ߮ ߡߍ߲ ߠߎ߫ ߞߵߊ߬ ߝߐ߫ ߊ߬ߟߎ߬ ߓߊߘߋ߲߫ ߖߡߊ߬ߣߊ߬ ߘߐ߬ ߕߊ߰ߡߊ߬ߟߊ ߟߎ߬ ߣߌ߫ ߞߟߍ߬ ߘߐ߬ ߕߊ߰ߟߊ ߟߎ߫ ߡߊ߬ ߸ ߞߏ߫ ߣߴߏ߬ ߟߎ߫ ߕߎ߲߬ ߞߍ߫ ߘߴߊ߲ ߝߍ߬ ߛߏ߫ ߸ ߊ߬ߟߎ߫ ߕߎ߲߬ ߕߍ߫ ߛߊ߬ ߸ ߊ߬ߟߎ߫ ߕߎ߲߬ ߕߍ߫ ߝߊ߰ ، ߏ߬ ߘߏ߲߬ ߞߎ߲߭ ߠߋ߬ ߸ ߛߴߊߟߊ߫ ߘߴߏ߬ ߞߍ߫ ߣߡߌߛߊ߫ ߘߌ߫ ߊ߬ߟߎ߫ ߛߣߐ߬ߡߍ ߟߎ߬ ߘߐ߫ ، ߊߟߊ߫ ߟߋ߬ ߘߏ߲߬ ( ߡߐ߰ ) ߟߊߢߣߊߡߦߊ߫ ߟߊ߫ ߸ ߊ߬ߟߋ ߟߋ߬ ( ߡߐ߰ ) ߛߊ߬ ߟߊ߫ ، ߊߟߊ߫ ߘߏ߲߬ ߢߊ߯ ߊߟߎ߫ ߗߋߥߊߟߌ ߟߎ߬ ߟߊ߫ ﴿156﴾

ߊߟߎ߫ ߝߊ߰ ߘߴߊߟߊ߫ ߟߊ߫ ߛߌߟߊ ( ߕߊ߯ߡߊ ) ߘߐ߫ ߓߊ߬ ߸ ߥߟߴߊߟߎ߫ ߛߊ߬ ߘߊ߫ ߓߊ߬ ߸ ߏ߬ ߦߝߊ߬ߟߌ ߣߴߊ߬ ߤߌߣߊ ߡߍ߲ ߝߘߊߕߐ߫ ߊߟߊ߫ ߟߊ߫ ߸ ߏ߬ ߟߋ ߝߌ߬ߛߵߊߟߎ߫ ߟߊ߫ ‹ ߣߊ߲߬ߝߟߏ߫› ߟߊߘߍ߬ߕߊ ߓߍ߯ ߘߌ߫ ﴿157﴾

ߊߟߎ߫ ߘߏ߲߬ ߛߊ߬ ߘߊ߫ ߓߊ߬ ߸ ߥߟߴߊߟߎ߫ ߝߊ߰ ߘߊ߫ ߓߊ߬ ߸ ߊߟߎ߫ ߘߌ߫ ߟߊߘߍ߬ ߊߟߊ߫ ߣߊ߰ߟߊ߫ ߟߋ߬ ߕߘߋ߫ ﴿158﴾

ߊߟߊ߫ ߟߊ߫ ߤߌߣߊ ߟߋ߫ ߞߵߊ߬ ߞߍ߫ ߸ ߌ ߞߵߌ ߣߐ߰ߦߴߊ߬ߟߎ߬ ߦߋ߫ ، ߣߴߌ ߕߎ߲߬ ߞߍ߫ ߘߊ߫ ߡߐ߰ ߥߢߊߞߌ߫ ߣߌ߫ ߖߛߎ߬ߡߊ߲߬ߜߏ߫ ߘߌ߫ ߸ ߊ߬ߟߎ߫ ߕߎ߲߬ ߘߴߌ ߡߊߥߙߍߥߙߍ߫ ߛߎߋ߯ ، ߒ߬ߓߊ߬ ߜߊ߲ߒߞߎߣߴߊ߬ߟߎ߫ ߡߊ߬ ߌ ߦߋ߫ ߦߝߊ߬ ߢߌߣߌ߲ ߞߍ߫ ߊ߬ߟߎ߬ ߦߋ߫ ، ߊ߬ ߣߴߌ ߦߴߊ߬ߟߎ߬ ߞߏߟߊߒߞߘߐߢߐ߲߯ߦߊ߫ ߞߏߢߊ ( ߟߎ߬ ) ߘߐ߫ ( ߞߍ߬ߣߍ߲ ) ، ߓߊ߬ߙߌ߬ ߣߴߌ ߝߊ߲ߞߊ߲߫ ߘߊ߫ ( ߞߏ ߡߍ߲ ߞߊ߲߬) ߸ ߌ ߦߴߌ ߥߞߊ߬ߟߌ߬ ߊߟߊ߫ ߟߊ߫ ( ߏ߬ ߞߏ ߘߐ߫ ߟߋ߬ ߛߍߣߍ߲߬) ، ߖߊ߯ߕߋ߬ ߸ ߥߞߊ߬ߟߌ߬ߓߊ߮ ߟߎ߫ ߟߋ߬ ߘߌߡߊ߲߫ ߊߟߊ߫ ߦߋ߫ ﴿159﴾

ߣߴߊߟߊ߫ ߞߵߊߟߎ߫ ߘߍ߬ߡߍ߲߬ ߸ ߛߋ߫ ߕߍ߫ ߞߍ߫ ߊߟߎ߫ ߟߊ߫ ، ߞߏ߬ߣߌ߲߬ ߣߴߊ߬ ߞߵߊߟߎ߫ ߟߊߓߌ߬ߟߊ߬ ߸ ߖߍߣߍ߲ ߘߴߊߟߎ߫ ߘߍ߬ߡߍ߲߫ ߏ߬ ߞߐ߫ ߡߎ߬ߕߎ߲߬؟ ߒ߬ߓߊ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߴߊ߬ߟߎ߫ ߛߍ߲߬ߓߍ߬ ߊߟߊ߫ ߟߋ߬ ߟߊ߫ ﴿160﴾

ߊ߬ ߕߍ߫ ߓߍ߲߬ ߟߊ߬ߝߐ߬ߓߊ߰ ߛߌ߫ ߡߊ߬ ߞߊ߬ ߞߊ߲ߛߏ߲ ߞߍ߫ ، ߡߐ߰-ߐ-ߡߐ߰ ߘߏ߲߬ ߞߊ߬ ߞߊ߲ߛߏ߲ ߞߍ߫ ߸ ߏ߬ ߘߌ߫ ߣߵߊ߬ ߟߊ߫ ߝߋ߲߫ ߞߊ߲ߛߏ߲ߣߍ߲ ߘߌ߫ ߟߐ߬ߓߊ ߟߏ߲ ، ߏ߬ ߟߋ ߞߐ߫ ߸ ߣߌߡߊ ߓߍ߯ ߗߋߥߊߟߌ ߘߌ߫ ߘߝߴߊ߬ ߦߋ߫ ߞߐ߲ ߸ ߊ߬ߟߎ߫ ߘߏ߲߬ ߕߍ߫ ߕߐ߬ߢߍ߰ ߟߊ߫ ( ߝߏߦߌ߬ ߟߊ߫) ﴿161﴾

ߦߊ߯ߟߊ߫ ߡߍ߲ ߦߴߊߟߊ߫ ߟߊ߫ ߘߌ߬ߢߍ ߛߌߟߊ ߟߊߓߊ߬ߕߏ߬ ߟߊ߫ ߸ ߏ߬ ߘߌ߫ ߞߍ߫ ߓߊ߬ ߦߏ߫ ߡߍ߲ ߞߵߊ߬ ߢߎ߲߫ ߊߟߊ߫ ߟߊ߫ ߛߊ߬ߙߌ ߟߊ߫؟ ߒ߬ߓߊ߬ ߏ߬ ߟߋ ߘߊ߯ ߦߌߟߊ ߞߍߕߐ߫ ߔߊߦߌߔߊߦߌ ߘߌ߫ ߸ ߟߊ߬ߓߊ߲߬ ߦߌ߬ߟߊ߬ ߖߎ߯ ߘߏ߲߬ ߏ߬ ߘߌ߫ ߞߟߋ߫ ﴿162﴾

ߊ߬ߟߎ߬ ߦߋ߫ ߟߐ߬ߦߌߟߊ߫ ߟߐ߬ߦߌߟߊ ߟߎ߫ ߟߋ߬ ߘߐ߫ ߊߟߊ߫ ߓߘߊ ، ߊߟߊ߫ ߘߏ߲߬ ߢߊ߯ ߊ߬ߟߎ߬ ߗߋߥߊߟߌ ߟߎ߬ ߟߊ߫ ߖߐ߫ ﴿163﴾

ߖߊ߯ߕߋ߬ ߸ ߊߟߊ߫ ߝߎߣߎ߲ߛߙߋߦߊߣߍ߲ߓߊ ߟߋ߬ ߞߍߣߍ߲߫ ߘߍ߲߬ߞߣߍ߬ߦߊ߬ߓߊ߮ ߟߎ߫ ߡߊ߬ ߸ ߕߎ߬ߡߊ ߡߍ߲ ߊ߬ ߞߊ߬ ߞߋߟߊ ߓߐ߫ ߊ߬ߟߎ߫ ߖߍ߬ߘߍ ߘߐ߫ ߸ ߏ߬ ߦߴߊ߬ ߟߊ߫ ߟߝߊߙߌ ߟߎ߫ ߞߊ߬ߙߊ߲߬ ߠߴߊ߬ߟߎ߬ ߦߋ߫ ߞߵߊ߬ߟߎ߬ ߛߊߣߌ߲ߧߊ߫ ، ߊ߬ ߣߌ߫ ߞߵߊ߬ߟߎ߬ ߟߊߟߐ߲ߠߌ߲߫ ߟߍߙߊ ߣߌ߫ ߥߘߋ߬ߥߘߋ߬ߟߌ ߟߊ߫ ߸ ߤߊߟߵߊ߬ߟߎ߫ ߕߌ߲߬ ߞߍ߫ ߘߊ߫ ߝߟߌ߬ ߔߘߋߞߟߋ ߘߐ߫ ߞߘߐ߬ߡߊ߲߫ ﴿164﴾

ߋߜߋ߫ ߸ ߡߊ߲߬ߕߙߐ߬ ߞߋߟߋ߲߫ ߔߋ߫ ߣߵߊߟߎ߫ ߛߐ߬ߘߐ߲߬ ߠߊ ߕߋ߲߬ ߸ ߊߟߎ ߘߏ߲߬ ߓߘߴߏ߬ ߢߐ߲߰ ߝߌ߬ߟߊ߬ ߟߊ߫ ߖߎ߮ ߟߎ߫ ߞߊ߲߬ ߞߘߐ߬ߡߊ߲߫ ߸ ߊߟߎ ߦߴߊ߬ ߝߴߏ߬ ߘߐ߫ ߞߏ߫ ߣߌ߲߬ ߓߐߣߍ߲߫ ߡߌ߲߫؟ ߊ߬ߟߎ߫ ߖߋ߬ߓߌ߬ ߞߏ߫ ߊ߬ ߓߐߣߍ߲߫ ߊߟߎ߫ ߖߍ߬ߘߍ ߓߘߊ ߟߋ߬ ، ߖߊ߯ߕߋ߬ ߸ ߊߟߊ߫ ߟߋ߬ ߛߋ߫ ߟߊ߫ ߞߏ ߓߍ߯ ߟߊ߫ ﴿165﴾

ߞߏ ߡߍ߲ ߞߵߊߟߎ߫ ߛߐ߬ߘߐ߲߫ ߖߊ߬ߡߊ߫ ߝߌ߬ߟߊ ߢߐ߲߯ߓߍ߲߫ ߟߏ߲ ߸ ߏ߬ ߞߍߣߍ߲߫ ߊߟߊ߫ ߟߊ߫ ߘߌ߬ߢߍ ߟߋ߬ ߟߊ߫ ߸ ߖߐ߲߰ߛߴߊ߬ ߘߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߟߐ߲߫ ﴿166﴾

ߊ߬ ߣߌ߫ ߛߴߊ߬ ߘߴߊ߬ ߟߐ߲߫ ߡߍ߲ ߠߎ߫ ߞߊ߬ ߝߌ߬ߟߊ߲߬ߞߊ߬ߝߏ߬ߦߊ ߞߍ߫ ، ߊ߬ ߝߐ߫ ߘߴߏ߬ ߟߎ߫ ߟߋ߬ ߦߋ߫ ߞߏ߫ ߊߟߎ߯ ߣߊ߬ ߞߍ߬ߟߍ ߞߍ߫ ߊߟߊ߫ ߟߊ߫ ߛߌߟߊ ߘߐ߫ ، ߥߟߴߊߟߎ߫ ߖߎ߮ ߟߎ߬ ߟߊߢߐ߬ߣߌ߲߬ ، ߊ߬ߟߎ߬ ߞߊ߲߫ ߞߏ߫ ߣߴߊ߲ ߕߎ߲߬ ߞߊ߬ ߞߍ߬ߟߍ ߢߊߟߐ߲߫ ߸ ߊ߲ ߕߎ߲߬ ߘߌ߫ ߥߴߊߟߎ߫ ߝߍ߬ ، ߞߵߊ߬ ߕߘߍ߬ ߏ߬ ߟߏ߲ ߸ ߊ߬ߟߎ߫ ߛߎ߬ߘߎ߲߬ߡߊ߲߫ ߓߊ߲߬ߓߊ߰ߦߊ ߟߋ߬ ߟߊ߫ ߘߍ߲߬ߞߣߍ߬ߦߊ ߘߌ߫ ، ߊ߬ߟߎ߬ ߦߋ߫ ߝߋ߲߫ ߠߋ߬ ߝߐ߫ ߟߴߊ߬ߟߎ߬ ߘߊ ߟߎ߬ ߟߊ߫ ߸ ߡߍ߲ ߕߍ߫ ߊ߬ߟߎ߫ ߛߣߐ߬ߡߍ ߟߎ߬ ߘߐ߫ ، ߊߟߊ߫ ߘߏ߲߬ ߞߵߊ߬ ߟߐ߲߫ ߖߐ߫ ߊ߬ߟߎ߬ ߦߋ߫ ߡߍ߲ ߘߏ߲߰ ߠߊ߫ ﴿167﴾

ߊ߬ߟߎ ߟߋ߫ ߞߵߊ߬ ߝߐ߫ ߊ߬ߟߎ߬ ߓߊߘߋ߲ ߠߎ߫ ߡߊ߬ ߞߵߊ߬ ߕߘߍ߬ ߊ߬ߟߎ߬ ߓߘߴߊ߬ߟߎ߫ ߛߏ߬ߘߌ߬ ߸ ߞߏ߫ ߣߴߏ߬ ߟߎ߫ ߕߎ߲߬ ߞߊ߬ ߒ߬ߠߎ߬ ߞߊ߲ ߡߌ߬ߘߊ߬ ߸ ߊ߬ߟߎ߫ ߕߎ߲߬ ߕߍ߫ ߝߊ߰ ، ߊ߬ߟߎ߫ ߖߋ߬ߓߌ߬ ߞߏ߫ ߊߟߎ߯ ߛߊ߬ߦߊ ߟߊߕߎ߲߬ߕߎ߲߫ ߞߵߊ߬ ߓߐ߫ ߊߟߎ߫ ߖߍ߬ߘߍ߫ ߞߊ߲߬ ߥߍ߫ ߸ ߣߴߊ߬ ߕߘߍ߬ ߘߴߊߟߎ߫ ߦߋ߫ ߕߎ߬ߢߊ߬ ߕߌ߯ ߟߎ߫ ߘߌ߫ ﴿168﴾

ߌߟߋ ߞߊߣߵߊ߬ ߖߌ߰ ߘߋ߬ ߞߏ߫ ߡߍ߲ ߠߎ߫ ߝߊ߰ߣߍ߲߬ ߊߟߊ߫ ߛߌߟߊ ߘߐ߫ ߸ ߞߴߏ߬ ߟߎ߬ ߦߋ߫ ߛߎ߭ ߟߎ߫ ߟߋ߬ ߘߌ߫ ، ߞߊ߯ߙߌ߫ ߸ ߏ߬ ߟߎ߬ ߢߣߊߡߊ ߟߴߊ߬ߟߎ߫ ߡߊ߰ߙߌ ߓߘߊ ߤߊ߬ߙߌ߬ߖߍ߮ ߘߐ߫ ﴿169﴾

ߊ߬ߟߎ߬ ߛߍߥߊߣߍ߲߫ ߊߟߊ߫ ߟߊ߫ ߝߎߣߎ߲ߛߙߋߦߊ ߟߊ߫ ߸ ߊ߬ ߞߊ߬ ߡߍ߲ ߘߴߊ߬ߟߎ߫ ߡߊ߬ ، ߊ߬ ߣߴߊ߬ߟߎ߬ ߢߊ߯ߟߋ߲ߣߍ߲߫ ߊ߬ߟߎ߬ ߞߐ߫ ߡߐ߮ ߟߎ߬ ߟߊ߫ ߸ ߡߍ߲ ߠߎ߬ ߡߴߊ߬ߟߎ߫ ߛߐ߬ߘߐ߲߫ ߦߋ߲߬ ߡߎߣߎ߲߬ ߸ ߞߏ߫ ߛߌߟߊ߲߫ ߕߴߏ߬ ߟߎ߬ ߟߊ߫ ߸ ߊ߬ߟߎ߫ ߘߏ߲߬ ߕߍߣߊ߫ ߛߎ߬ߣߎ߲߬ ߠߊ߫ ﴿170﴾

ߊ߬ߟߎ߬ ߢߊ߯ߟߋ߲ߣߍ߲߫ ߊߟߊ߫ ߟߊ߫ ߣߍߡߊ ߣߴߊ߬ ߟߊ߫ ߢߊ߬ߒߡߊ߭ ߟߊ߫ ، ߊ߬ ߣߌ߫ ߞߏ߫ ߊߟߊ߫ ߕߍ߫ ߘߍ߲߬ߞߣߍ߬ߦߊ߬ߓߊ߮ ߟߎ߫ ߓߙߊ߬ߖߌ ߕߌߢߍ߫ ߟߊ߫ ﴿171﴾

ߏ߬ ߟߎ߫ ߟߋ߫ ߣߵߊߟߊ߫ ߣߌ߫ ߞߋߟߊ ( ߟߊ߫ ߞߟߌߟߌ ) ߖߋ߬ߓߌ߬ ߟߊ߫ ߸ ߖߐߞߟߌ ߓߊ߲ ߞߐ ߊ߬ߟߎ߫ ߛߐ߬ߘߐ߲߬ ߠߊ߫ ، ߏ߬ ߟߎ߬ ߘߐ߫ ߢߊ߬ߓߊ߯ ߝߊ߲ߕߊ߲ߞߟߊ ߟߎ߬ ߢߍߛߌ߰ߣߍ߲߫ ߛߙߊ߬ ߓߟߋߓߟߋ ߟߋ߬ ߟߊ߫ ﴿172﴾

ߡߐ߱ ߟߎ߫ ߞߵߊ߬ ߝߐ߫ ߏ߬ ߟߎ߫ ߟߋ߬ ߦߋ߫ ߸ ߞߏ߫ ߡߐ߱ ߟߎ߬ ߓߘߊ߫ ߟߊ߬ߘߍ ߞߍ߫ ߊߟߎ߫ ߞߊ߲ߡߊ߬ ߘߋ߬ ، ߏ߬ ߘߐ߫ ߸ ߊߟߎ߫ ߛߌߟߊ߲߫ ߊ߬ߟߎ߬ ߢߍ߫ ، ߏ ߞߵߏ߬ ߟߎ߬ ߟߊ߫ ߘߍ߲߬ߞߣߍ߬ߦߊ ߡߊߞߊ߬ߝߏ߬ ߓߘߍߞߍ߭ ، ߊ߬ߟߎ߫ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫ ߊߟߊ߫ ߟߋ߬ ߒ߬ߠߎ߫ ߥߊ߬ߛߊ ߘߌ߫ ߸ ߊ߬ ߣߴߊ߬ߟߋ ߟߋ߫ ߛߍ߲߬ߓߍ߬ߟߊ߲߬ ߢߌߡߊ ߘߌ߫ ﴿173﴾

ߏ߬ ߞߍ ߸ ߏ߬ ߟߎ߫ ߛߊ߬ߦߌ߲߬ ߘߴߊߟߊ߫ ߟߊ߫ ߣߍߡߊ ߣߴߊ߬ ߟߊ߫ ߢߊ߬ߒߡߊ߭ ߘߌ߫ ، ߖߎ߯ߡߊ߲߫ ߡߊ߫ ߡߊ߰ ߏ߬ ߟߎ߬ ߟߊ߫ ، ( ߓߊ ) ߊ߬ߟߎ߫ ߞߵߊߟߊ߫ ߟߊ߫ ߘߌ߬ߢߍ ߟߋ߬ ߟߊߓߊ߬ߕߏ߬ ، ߊߟߊ߫ ߟߋ߫ ߘߏ߲߬ ߦߋ߫ ߢߊ߬ߒߡߊ߭ ߓߏ߲߬ߓߊ߬ߓߊ ߕߌ߱ ߘߌ߫ ﴿174﴾

ߜߍ߬ߘߍ ߟߋ߬ ߞߏߝߐߣߍ߲߫ ߊߟߎ߫ ߦߋ߫ ߣߌ߲߬ ߸ ߏ߬ ߟߋ ߊߟߎ߫ ߟߊߛߌߟߊ߲߫ ߠߴߊ߬ ߢߌ߲߭ ߠߎ߬ ߢߍ߫ ، ߒ߬ߓߵߊߟߎ߫ ߞߊߣߊ߬ ߛߌߟߊ߲߫ ߏ߬ ߟߎ߬ ߢߍ߫ ߘߋ߬ ، ߊߟߎ߫ ߛߌߟߊ߲߫ ߒߠߋ ( ߊߟߊ߫ ) ߟߋ߬ ߢߍ߫ ، ߣߴߊߟߎ߫ ߞߍ߫ ߘߊ߫ ߘߍ߲߬ߞߣߍ߬ߦߊ߬ߓߊ߯ ߘߌ߫ ﴿175﴾

ߡߍ߲ ߠߎ߬ ߦߋ߫ ߜߘߌ߫ ߟߊ߫ ߓߊ߲߬ߓߊ߰ߦߊ ߞߊ߲߬ ߸ ߏ߬ ߟߎ߬ ߞߊߣߵߌ ߟߊߛߎ߬ߣߎ߲߫ ߘߋ߬ ߸ ߓߊ ߏ߬ ߟߎ߬ ߕߍ߫ ߊߟߊ߫ ߕߙߐ߫ ߟߊ߫ ߝߏߦߌ߬ ߟߊ߫ ، ߊߟߊ߫ ߦߴߊ߬ ߝߍ߬ ߟߋ߬ ߊ߬ ߞߣߊ߫ ߣߌ߬ ߞߍ߫ ߏ߬ ߟߎ߬ ߢߍ߫ ߟߊߞߌߙߊ߫ ߸ ߏ߬ ߟߎ߫ ߘߏ߲߬ ߢߍߛߌ߰ߣߍ߲߫ ߖߊ߲߰ߞߕߊ߬ ߓߟߋߓߟߋ߫ ߟߋ߬ ߟߊ߫ ﴿176﴾

ߖߊ߯ߕߋ߬ ߸ ߡߍ߲ ߠߎ߫ ߣߊ߬ ߓߊ߲߬ߓߊ߰ߦߊ ߝߊ߬ߟߋ߲߬ ߠߊ߫ ߘߍ߲߬ߞߣߍ߬ߦߊ ߟߊ߫ ، ߏ߬ ߟߎ߬ ߕߍ߫ ߊߟߊ߫ ߕߙߐ߫ ߟߊ߫ ߝߏߦߌ߬ ߟߊ߫ ، ߏ߬ ߟߎ߬ ߢߍߛߌ߰ߣߍ߲߫ ߖߊ߲߰ߞߕߊ߬ ߘߌߡߌ߲ߣߍ߲ ߠߋ߬ ߟߊ߫ ﴿177﴾

ߓߊ߲߬ߓߊ߮ ߟߎ߬ ߞߊߣߵߊ߬ ߓߛߌ߬ߞߌ߫ ߘߋ߬ ߞߏ߫ ߊ߲ ߧߴߊ߬ߟߎ߫ ( ߛߌ߭ ) ߘߏ߲߰ߘߌ ߡߍ߲ ߞߍ߫ ߟߊ߫ ߞߴߏ߬ ߦߋ߫ ߤߙߊ߫ ߟߋ߬ ߘߌ߫ ߊ߬ߟߎ߬ ߦߋ߫ ، ߊ߲ ߘߏ߲߬ ߦߴߊ߬ߟߎ߫ (ߛߌ߭) ߘߏ߲߰ߘߌ߬ ߟߊ߫ ߟߋ߬ ߸ ߛߴߊ߬ߟߎ߬ ߘߌ߫ ߕߊ߬ߡߌ߲߬ ߖߘߌ߫ ߟߊ߫ ߖߟߎ߬ߡߎ߲ ߘߐ߫ ، ߊ߬ߟߎ߫ ߘߏ߲߬ ߢߍߛߌ߰ߣߍ߲߬ ߘߐ߯ߦߊ ߖߊ߲߰ߞߕߊ ߟߋ߬ ߟߊ߫ ﴿178﴾

ߊߟߊ߫ ߕߍ߫ ߛߐ߲߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߕߏ߫ ߟߴߊߟߎ ( ߓߊ߲߬ߓߊ߮ ) ߟߎ߬ ߗߏ߮ ߟߊ߫ ، ߝߏ߫ ߊ߬ ߦߋ߫ ߘߊ߲߬ߕߍ߰ߓߐ ߞߍ߫ ߞߛߐߕߐ ߣߌ߫ ߛߊߣߌ߲ߡߊ߲ ߕߍ߫ ߟߋ߬ ߕߘߋ߫ ، ߞߏ߬ߣߌ߲߬ ߊߟߊ߫ ߕߍ߫ ߊߟߎ߫ ߟߊߖߌ߲ߞߌ߲߫ ߠߊ߫ ߟߋ߬ ߞߏ߫ ߘߏ߲߰ߣߍ߲ ߡߊ߬ ߸ ߊߟߊ߫ ߞߏ߬ߣߌ߲߬ ߘߌ߫ ߘߏ߫ ߛߎߥߊ߲ߘߌ߫ ߊ߬ ߟߊ߫ ߞߋߟߊ ߟߎ߬ ߘߐ߫ ߸ ߡߍ߲ ߓߊ߯ ߊ߬ ߘߌߦߊ߫ ، ߒ߬ߓߵߊߟߎ߫ ߘߍ߲߬ߞߣߍ߬ߦߵߊߟߊ߫ ߣߴߊ߬ ߟߊ߫ ߞߋߟߊ ߟߎ߫ ߡߊ߬ ߘߋ߬ ، ߣߴߊߟߎ߫ ߘߏ߲߬ ߘߍ߲߬ߞߣߍ߬ߦߊ߬ ߘߊ߫ ߞߵߊߟߎ߫ ߝߊ߲ߕߊ߲߬ߞߊ߫ ߸ ߓߙߊ߬ߖߌ߬ߓߊ ߘߌ߫ ߞߍ߫ ߊߟߎ߫ ߦߋ߫ ߏ߬ ߘߐ߫ ﴿179﴾

ߡߐ߱ ߟߎ߬ ߞߊߣߵߊ߬ ߓߛߌ߬ߞߌ߫ ߘߋ߬ ߸ ߡߍ߲ ߠߎ߬ ߦߋ߫ ߖߎ߯ߡߊ߲ߒߕߋߦߊ ߞߍ߫ ߟߊ߫ ߝߋ߲ ߞߊ߲߬ ߸ ߊߟߊ߫ ߞߊ߬ ߡߍ߲ ߘߴߊ߬ߟߎ߫ ߡߵߊ߬ ߟߊ߫ ߢߊ߬ߒߡߊ߭ ߘߐ߫ ، ߞߴߏ߬ ߦߋ߫ ߤߙߊ߫ ߟߋ߬ ߘߴߊ߬ߟߎ߬ ߦߋ߫ ، ߞߊ߯ߙߌ߫ ߸ ߏ߬ ߦߋ߫ ߖߎ߯ߡߊ߲߫ ߠߋ߬ ߘߴߊ߬ߟߎ߫ ߞߊ߲߬ ، ߛߋߚߋ߫ ߊ߬ߟߎ߬ ߟߊ߫ ߖߎ߯ߡߊ߲ߒߕߋߦߊ߫ ߝߋ߲ ߓߍߣߊ߬ ߞߍ߫ ߞߐ߲߭ ߘߌ߫ ߊ߬ߟߎ߬ ߞߊ߲ߠߊ߫ ߟߐ߬ߓߊ ߟߏ߲ ߞߙߌߟߊ߲߫ ، ߊߟߊ߫ ߘߏ߲߬ ߕߊ ߟߋ߬ ߛߊ߲ ߠߎ߬ ߣߌ߫ ߘߎ߱ ߗߍ ߘߌ߫ ، ߊ߬ ߣߌ߫ ߊߟߊ߫ ߦߴߊ߬ߟߎ߬ ߗߋߥߊߟߌ ߟߎ߫ ߞߟߊ߬ߡߊ߬ߓߊ߮ ߟߋ߬ ߘߌ߫ ﴿180﴾

ߊߟߊ߫ ߕߟߏ߫ ߡߐ߱ ߟߎ߬ ߟߊ߫ ߞߎߡߊ ߟߊ߫ ߸ ߡߍ߲ ߠߎ߬ ߞߊ߲߫ ߞߏ߫ ߊߟߊ߫ ߟߋ߬ ߓߟߏߞߏߟߏ߲ ߘߌ߫ ߸ ߊ߲ߠߎ߬ ߦߋ߫ ߓߊ߬ߣߊ ߟߎ߬ ߘߌ߫. ߛߋߚߋ߫ ߸ ߊ߲ ߘߌߣߵߏ߬ ߟߎ߬ ߞߊ߲ ߏ߬ ߛߓߍ߫ ߸ ߊ߬ ߣߴߊ߬ߟߎ߫ ߞߊ߬ ߟߊ߬ߝߐ߬ߓߊ߮ ߟߎ߫ ߝߊ߱ ߡߍ߲ ߠߎ߬ ߞߍ߫ ߸ ߞߵߊ߬ ߕߘߍ߬ ߊ߬ߟߎ߬ ߡߊ߫ ߤߊߞߍ߫ ߘߐ߫ ߞߏ߫ ߞߍ߫ ، ߊ߲ ߘߌߣߵߊ߬ ߝߐ߫ ( ߏ߬ ߟߎ߫ ߡߊ߬ ) ߸ ߒ ߞߏ߫ ߊߟߎ߫ ߦߋ߫ ߖߋ߬ߣߌ߲߬ߠߌ߲ ߖߊ߲߰ߞߕߊ ߡߊߜߏ߬ߙߏ߫ ( ߟߋ߬ ߕߘߋ߫) ﴿181﴾

ߒ ߞߏ߫ ( ߖߊ߲߰ߞߕߊ ) ߣߌ߲߬ ߡߊߛߐ߬ߘߐ߲߬ߣߍ߲߫ ߞߏ߫ ߟߋ߫ ߝߍ߬ ߸ ߊߟߎ߫ ߓߟߏ ߟߎ߫ ߞߊ߬ ߡߍ߲ ߢߍߓߌ߬ߟߊ߬ ، ߒ߬ߞߊ߬ ߝߋߎ߫ ߊߟߊ߫ ߕߍ߫ ߓߊ߰ ߟߴߊ߬ ߟߊ߫ ߖߐ߲߬ ߛߌ߫ ߡߊ߬ ﴿182﴾

ߏ߬ ߟߎ߫ ߟߋ߬ ߞߊ߲߫ ߞߏ߫ ߊߟߊ߫ ߞߊ߬ ߟߊ߬ߤߘߌ ߘߌ߫ ߒ߬ߠߎ߫ ߡߊ߬ ߟߋ߬ ߸ ߞߏ߫ ߊ߲ ߞߣߊ߫ ߘߍ߲߬ߞߣߍ߬ߦߊ߫ ߞߋߟߊ߫ ߛߌ߫ ߡߊ߬ ߸ ߝߏ߫ ߡߍ߲ ߓߊ߯ ߣߊ߬ ߖߊ߲߬ߛߊ߬ߟߌ߬ ߝߋ߲ ߘߌ߫ ߒ߬ ߡߊ߬ ߸ ߕߊ ߦߴߏ ߡߍ߬ߡߍ߬ ، ߊ߬ߟߎ߫ ߖߋ߬ߓߌ߬ ߞߏ߫ ߞߋߟߊ ߘߏ߫ ߟߎ߫ ߘߏ߲߬ ߣߊ߬ ߘߴߊߟߎ߫ ߡߊ߬ ߔߊߞߌ ߟߎ߬ ߘߌ߫ ߒߠߋ ߢߍ߫ ߞߘߐ߬ߡߊ߲߫ ߸ ߊ߬ ߣߴߊߟߎ ߕߊ߫ ߝߐߕߊ ( ߓߍ߯ ) ߘߌ߫ ، ߡߎ߲߬ ߠߊ߫ ߘߏ߲߬ ߊߟߎ߫ ߞߵߏ߬ ߟߎ߫ ߝߊ߰ ߸ ߣߴߊߟߎ߫ ߦߋ߫ ߕߎ߬ߢߊ߬ ߕߌ߯ ߟߎ߫ ߘߌ߫؟ ﴿183﴾

ߣߴߊ߬ߟߎ߫ ߞߵߌ ߛߐ߬ߛߐ߬ ߸ ߞߋߟߊ߫ ߟߎ߫ ߓߘߊ߫ ߛߐ߬ߛߐ߬ ߌ ߢߍ߫ ߞߘߐ߬ߡߊ߲߫ ߸ ߏ߬ ߟߎ߫ ߣߊ߬ ߘߊ߫ ߔߊߞߌ ߟߎ߬ ߘߌ߫ ߸ ߊ߬ ߣߌ߫ ߟߍߙߊ߫ ߞߘߐ ߟߎ߬ ߣߌ߫ ߟߍߙߊ߫ ߦߋߟߋ߲ߡߊ ߘߌ߫ ﴿184﴾

ߣߌߡߊ ߓߍ߯ ߘߌ߫ ߛߊ߬ߦߊ ߣߍߣߍ߫ ߟߋ߬ ߕߘߋ߫ ߸ ߓߊ߬ߙߌ߬ ߊߟߎ߫ ߛߊ߬ߙߊ ߟߎ߬ ߘߝߊߕߐ߫ ߊߟߎ߫ ߢߍ߫ ߟߐ߬ߓߊ ߟߏ߲ ߠߋ߬ ، ߣߌ߫ ߡߍ߲ ߡߊߓߐ߫ ߘߊ߫ ߕߊ ߟߊ߫ ߏ߬ ߘߐ߫ ߞߵߊ߬ ߟߊߘߏ߲߬ ( ߡߍ߲ߘߌߦߊ ) ߣߊߞߐ ߘߐ߫ ߸ ߏ߬ ߓߘߊ߫ ߞߍ߫ ߊ߬ ߘߌߦߊ߫ ߞߟߋ߫ ، ߘߎߢߊ߫ ߢߣߊߡߦߊ ߟߋ߬ ߕߍ߫ ߝߏߦߌ߬ ߘߌ߫ ߝߏ߫ ߡߊߙߊ߲ߛߊ ߘߊ߰ߡߎ߲ ﴿185﴾

ߊߟߎ߫ ߓߍߣߊ߬ ߞߘߐߓߐ߫ ߊߟߎ߫ ߟߊ߫ ߣߊ߲߬ߝߟߏ ߟߎ߬ ߣߴߊߟߎ߫ ߣߌ ߟߎ߬ ߘߐ߫ ߸ ߊ߬ ߣߴߊߟߎ߫ ߓߍߣߊ߬ ߣߊ߬ߣߌ߲߬ߠߌ߲ ߛߘߍߡߊ߲߫ ߡߍ߲߫ ߸ ߞߊ߬ ߝߘߴߊߟߎ߫ ߢߍ߫ ߟߍߙߊߟߞߊ ߟߎ߬ ߣߌ߫ ߛߏߡߊ ߟߎ߬ ߟߊ߫ ، ߒ߬ߞߊ߬ ߣߴߊߟߎ߫ ߞߏ߬ߣߌ߲ ߞߵߊߟߎ߫ ߡߎ߬ߢߎ߲߫ ߞߵߊߟߎ߫ ߝߊ߲ߕߊ߲߬ߞߊ߫ ߸ ߒ߬ߓߊ߬ ߏ߬ ߟߋ ߞߏߢߊ ߟߎ߬ ߘߐ߫ ߝߊ߲ߞߊ߲ߕߊ ( ߘߏ߫ ) ߘߌ߫ ﴿186﴾

ߕߎ߬ߡߊ ߡߍ߲ ߊߟߊ߫ ߞߊ߬ ߟߍߙߊߟߞߊ ߟߎ߬ ߟߊ߫ ߟߊ߬ߤߘߌ ߡߌ߬ߘߊ߬ ߞߊ߲ ߞߍ߫ ߸ ߞߏ߫ ߊߟߎ߫ ߦߋ߫ ߟߍߙߊ ߞߊ߲ ߟߊ߲ߞߣߍߡߊ߫ ߡߐ߱ ߟߎ߬ ߦߋ߫ ߸ ߞߏ߫ ߊߟߎ߫ ߞߊߣߵߊ߬ ߘߏ߲߰ ߘߋ߬ ، ߓߊ߬ߙߌ߬ ߏ߬ ߟߎ߫ ߞߵߏ߬ ߟߊߝߌ߬ߟߌ߫ ߊ߬ߟߎ߬ ߞߕߐ߫ ߔߊߎ߲߫ ، ߞߵߊ߬ ߝߊ߬ߟߋ߲߬ ߛߐ߲߬ߞߐ߬ߣߍ߲߬ ߕߜߋ ߟߊ߫ ، ߊ߬ߟߎ߫ ߘߏ߲߬ ߦߋ߫ ߝߊ߬ߟߋ߲߬ߠߌ߲߬ ߖߎ߯ ߟߊ߫ ߞߟߋ߫ ﴿187﴾

ߌ ߞߴߊ߬ ߓߛߌ߬ߞߌ߫ ߘߋ߬ ߞߏ߫ ߡߍ߲ ߠߎ߬ ߓߊ߯ߙߊ߫ ߞߍ߫ ߣߐ ߖߍ߰ߙߍ ߦߋ߫ ߞߍ߫ ߟߴߊ߬ߟߎ߬ ߟߊ߫ ߸ ߊ߬ ߣߴߊ߬ߟߎ߬ ߦߴߊ߬ ߝߍ߬ ߞߵߊ߬ߟߎ߫ ߕߊ߲߬ߘߏ߬ ߞߏ߫ ߟߊ߫ ߊ߬ߟߎ߬ ߡߊ߫ ߡߍ߲ ߞߍ߫ ، ߌ ߞߴߏ߬ ߟߎ߫ ߓߛߌ߬ߞߌ߫ ߘߋ߬ ߞߴߏ߬ ߟߎ߬ ߞߛߌߕߐ߫ ߓߍ߫ ߖߊ߲߰ߞߕߊ ߡߊ߬ ، ߏ߬ ߟߎ߬ ߢߍߛߌ߰ߣߍ߲߫ ߖߊ߲߰ߞߕߊ߬ ߘߌߡߌ߲ߣߍ߲ ߠߋ߬ ߟߊ߫ ﴿188﴾

ߊߟߊ߫ ߕߊ ߟߋ߬ ߛߊ߲ ߠߎ߬ ߣߌ߫ ߘߎ߱ ߡߊ߲߬ߛߊ߬ߦߊ ߘߌ߫ ، ߊߟߊ߫ ߟߋ߫ ߘߏ߲߬ ߛߋ߫ ߟߊ߫ ߞߏ ߓߍ߯ ߟߊ߫ ﴿189﴾

ߖߊ߯ߕߋ߬ ߸ ( ߞߏ ߡߍ߲ ߠߎ߬ ߦߋ߫ ) ߛߊ߲ ߠߎ߬ ߣߌ߫ ߘߎ߱ ߘߊ߲ ߘߐ߫ ߸ ߊ߬ ߣߌ߫ ߛߎ ߣߌ߫ ߕߟߋ߬ߘߐ߬ߟߊ ߟߊ߫ ߝߐߢߐ߲߯ߞߐ ߘߐ߫ ߸ ߏ߬ ߓߍ߯ ߦߋ߫ ߕߊ߰ߛߌ߬ ߞߏ߫ ߟߋ߬ ߘߌ߫ ߤߊ߲ߞߟߌ߫ ߞߌߛߍ߫ ߕߌ߮ ߟߎ߬ ߦߋ߫ ﴿190﴾

ߏ߬ ߟߎ߫ ߟߋ߬ ߊߟߊ߫ ߞߏߝߐ߫ ߟߊ߫ ߟߐ߭ ߣߌ߫ ߛߌ߱ ߣߌ߫ ߟߊߟߌ ( ߓߍ߯ ) ߘߐ߫ ߸ ߊ߬ߟߎ߬ ߦߴߊ߬ߟߎ߬ ߛߌߡߊ߫ ߟߊ߫ ߛߊ߲ ߠߎ߬ ߣߌ߫ ߘߎ߱ ߘߊ߲߫ ߢߊ ߡߊ߬ ߸ ( ߞߵߊ߬ ߝߐ߫ ) ߞߏ߫ ߊ߲ ߡߊ߰ߙߌ ߸ ߌ ߡߴߢߌ߲߬ ߘߊ߲߫ ߜߊ߲ߛߊ߲߫ ߘߋ߬ ، ߛߊߣߌ߲ߧߊ ߦߴߌ ߦߋ߫ ߞߟߋ߫ ، ߖߊ߰ߣߌ߲߬ ߌ ߦߴߊ߲ ߕߊ߲߬ߞߊ߬ ߕߊ ߖߊ߲߰ߞߕߊ ߡߊ߬ ﴿191﴾

ߊ߲ ߡߊ߰ߙߌ ߸ ߌ ߓߊ߯ ߡߍ߲ ߠߊߘߏ߲߬ ߕߊ ߘߐ߫ ߸ ߌ ߓߘߊ߫ ߘߐ߯ߦߊ ߟߴߏ߬ ߞߊ߲߬ ߞߟߋ߫ ߸ ߘߍ߬ߡߍ߲߬ߓߊ߯ ߟߎ߫ ߟߋ߬ ߕߍ߫ ߕߐ߬ߢߍ߰ߒߕߋ ߟߎ߬ ߟߊ߫ ﴿192﴾

ߊ߲ ߡߊ߰ߙߌ ߸ ߊ߲ ߓߘߊ߫ ߞߟߌߟߌߟߊ ߘߏ߫ ߞߊ߲ ߡߍ߲߫ ߞߟߌߟߌ ߟߊ߫ ߘߍ߲߬ߞߣߍ߬ߦߊ ߡߊ߬ ߸ ߞߏ߫ ߊߟߎ߫ ߘߍ߲߬ߞߣߍ߬ߦߵߊߟߎ߫ ߡߊ߰ߙߌ ߡߊ߬ ، ߊ߲ ߘߏ߲߬ ߘߍ߲߬ߞߣߍ߬ߦߊ߬ ߘߊ߫ ، ߏ߬ ߘߐ߫ ߊ߲ ߡߊ߰ߙߌ ߸ ߖߊ߰ߣߌ߲߬ ߊ߲ ߖߟߎ߬ߡߎ߲ ߠߎ߫ ߦߊ߬ߝߊ߫ ߒ߬ ߧߋ߫ ߸ ߌ ߦߴߊ߲ ߖߎ߯ߡߊ߲߫ ߞߍ߫ ߣߐ ߟߎ߬ ߘߐߞߏߦߊߕߏ߫ ߒ߬ ߧߋ߫ ، ߊ߬ ߣߴߌ ߦߴߊ߲ ߠߊ߫ ߛߊ߬ߦߊ ߞߍ߫ ߡߐ߰ ߢߌߡߊ ߟߎ߬ ߕߊ ߞߍߢߊ ߡߊ߬ ﴿193﴾

ߊ߲ ߡߊ߰ߙߌ ߸ ߌ ߞߵߌ ߟߊ߫ ߞߋߟߊ ߟߎ߫ ߟߐ߬ ߊ߲ ߦߟߌߡߊߘߌߦߊ߫ ߟߊ߫ ߡߍ߲ ߠߊ߫ ߸ ߌ ߦߴߏ߬ ߘߴߊ߲ ߡߊ߬ ߖߊ߰ߣߌ߲߬ ، ߌ ߘߏ߲߬ ߞߊߣߊ߬ ߘߐ߯ߦߊ߫ ߟߊߛߴߊ߲ ߡߊ߬ ߟߐ߬ߓߊ ߟߏ߲ ߸ ߓߊ ߌ ߕߍ߫ ߦߟߌߡߊߘߌߦߊ߫ ߞߊ߲ ߝߘߏ߬ ߟߊ߫ ﴿194﴾

ߏ߬ ߟߎ߫ ߡߊ߰ߙߌ ߞߵߊ߬ߟߎ߬ ߟߊ߫ ߕߌ߲ߞߌ ߡߌ߬ߘߊ߬ ߞߊ߲ ߞߍ߫ ߸ ߞߏ߫ ߒߠߋ ߕߍ߫ ߓߊ߯ߙߟߊ߫ ߛߌ߫ ߟߊ߫ ߓߊ߯ߙߊ ߕߌߢߍ߫ ߟߴߊߟߎ߫ ߘߐ߫ ، ߊ߬ ߓߍ߫ ߗߍ߬ߡߊ߲߫ ߘߌ߫ ߥߟߊ߫ ߡߛߏ߬ߡߊ߲߫ ߘߌ߫ ، ߓߊ ߊߟߎ߫ ߘߏ߫ ߓߐߣߍ߲߫ ߘߏ߫ ߟߋ߬ ߘߐ߫. ߒ߬ߓߊ߬ ߡߍ߲ ߠߎ߬ ߝߎ߲ߘߌ߫ ߘߊ߫ ، ߊ߬ ߣߴߊ߬ߟߎ߬ ߟߊߓߐ߫ ߘߴߊ߬ߟߎ߬ ߟߊ߫ ߟߎ ߟߎ߬ ߞߣߐ߫ ، ߊ߬ ߣߴߊ߬ߟߎ߬ ߕߙߐ߫ ߘߊ߫ ߒ ߠߊ߫ ߛߌߟߊ ( ߕߊ߯ߡߊ) ߘߐ߫ ، ߊ߬ ߣߴߊ߬ߟߎ߫ ߞߊ߬ ߞߍ߬ߟߍ ߞߍ߫ ߸ ߊ߬ ߣߴߊ߬ߟߎ߫ ߝߊ߰ ߘߊ߫، ߖߊ߯ߕߋ߬ ߸ ߒ ߘߌߣߵߏ߬ ߟߎ߬ ߖߎ߯ߡߊ߲߫ ߞߍ߫ ߣߐ ߟߎ߬ ߘߐߞߏߦߊߕߏ߫ ߊ߬ߟߎ߬ ߦߋ߫ ، ߊ߬ ߣߌ߫ ߖߊ߯ߕߋ߬߸ ߒ ߘߴߊ߬ߟߎ߬ ߟߊߘߏ߲߬ ( ߡߍ߲ߘߌߦߊ ) ߣߊߞߐ ߟߎ߬ ߘߐ߫ ߸ ߖߌߢߊ ߟߎ߬ ߦߋ߫ ߥߦߏ߬ ߟߊ߫ ߡߍ߲ ߠߎ߬ ߞߘߐߟߊ ߟߎ߬ ߘߐ߫ ߞߎߟߊ߲ߞߎߟߊ߲߫ ، ߞߵߏ߬ ߞߍ߫ ( ߊ߬ߟߎ߬ ) ߞߐ߲ߘߐ߲ ߘߌ߫ ߞߊ߬ ߝߘߴߊߟߊ߫ ߟߊ߫ ، ߞߐ߲ߘߐ߲߫ ߢߌߡߊ ߘߏ߲߬ ߊߟߊ߫ ߟߋ߬ ߓߟߏ߫ ﴿195﴾

ߓߊ߲߬ߓߊ߮ ߟߎ߬ ߟߊ߫ ߦߟߍ߬ߡߊ߲߬ߦߟߍߡߊ߲ ߖߊ߬ߡߣߊ ߟߎ߬ ߢߊߝߍ߬ ߏ߬ ߞߊߣߵߌ ߜߍߙߍ߲ߞߍ߫ ߘߋ߬ ﴿196﴾

ߏ߬ ߦߋ߫ ߘߊ߰ߡߎ߲߬ߣߍ߲߬ ߕߜߋ߫ ߟߋ߬ ߘߌ߫ ، ߏ߬ ߟߋ ߞߐ߫ ߸ ߊ߬ߟߎ߬ ߡߊߞߍ߫ ߦߙߐ ߘߌ߫ ߞߍ߫ ߔߊߦߌߔߊߦߌ ߘߌ߫ ، ߟߊ߫ ߦߌߟߊ߫ ߖߎ߮ ߟߴߏ߬ ߘߌ߫ ߞߟߋ߫ ﴿197﴾

ߡߍ߲ ߠߎ߫ ߞߏ߬ߣߌ߲ ߞߵߊ߬ߟߎ߬ ߝߊ߲ߕߊ߲߬ߞߴߊ߬ߟߎ߫ ߡߊ߰ߙߌ ߡߊ߬ ߸ ߏ߬ ߟߎ߬ ߢߍߛߌ߰ߣߍ߲߫ (ߡߍ߲ߘߌߦߊ) ߣߊߞߐ ߟߎ߫ ߟߋ߬ ߟߊ߫ ߸ ߖߌߢߊ ߟߎ߬ ߦߋ߫ ߥߦߏ߬ ߟߊ߫ ߡߍ߲ ߠߎ߬ ߞߘߐߟߊ ߟߎ߬ ߘߐ߫ ߞߎߟߊ߲ߞߎߟߊ߲߫ ، ߏ߬ ߟߎ߫ ߘߏ߲߬ ߘߎߡߊߕߐ߫ ߏ߬ ߟߋ ߘߐ߫ ߸ ߞߵߏ ߡߊ߬ߞߍ߬ ߦߌߟߊ ߝߘߴߊߟߊ߫ ߟߊ߫ ، ߝߋ߲ ߡߍ߲ ߘߏ߲߬ ߊߟߊ߫ ߓߘߊ ߸ ߏ߬ ߟߋ ߤߙߊ ߘߌ߫ ߡߐ߰ ߢߌߡߊ ߟߎ߬ ߦߋ߫ ﴿198﴾

ߟߍߙߊߟߞߊ ߘߏ߫ ߟߎ߫ ߓߍ߫ ߸ ߏ߬ ߟߎ߫ ߘߍ߲߬ߞߣߍ߬ߦߊ߬ߣߍ߲߫ ߊߟߊ߫ ߡߊ߬ ، ߊ߬ ߣߌ߫ ( ߟߍߙߊ ) ߡߍ߲ ߠߊߖߌ߰ߣߍ߲߫ ߊߟߎ߫ ߡߊ߬ ߸ ߊ߬ ߣߌ߫ ߡߍ߲ ߠߊߖߌ߰ ߘߴߊ߬ߟߎ߫ ߖߍ߬ߘߍ ߡߊ߬ ، ߊߟߊ߫ ߢߍߡߌߙߌ߲ ߦߴߊ߬ߟߎ߬ ߟߊ߫ ߸ ߏ߬ ߟߎ߬ ߕߍ߫ ߊߟߊ߫ ߟߊ߫ ߟߝߊߙߌ ߟߎ߫ ߝߙߋ߬ ߟߊ߫ ߛߐ߲߬ߞߐ߬ߣߍ߲߬ ߕߜߋ ߟߊ߫ ߸ ߒ߬ߓߊ߬ ߏ߬ ߟߎ߫ ߟߋ߬ ߢߍߛߌ߰ߣߍ߲߫ ߊ߬ߟߎ߫ ߛߊ߬ߙߊ ߟߴߊ߬ߟߎ߫ ߡߊ߰ߙߌ ߕߍ߰ߟߊ ߘߐ߫ ، ߖߊ߯ߕߋ߬ ߸ ߊߟߊ߫ ߟߋ߬ ߖߊ߬ߕߋ߬ߓߐ߬ ߞߊߟߌ߲ ߕߌ߱ ߘߌ߫ ﴿199﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߦߴߊߟߎ߫ ߡߎ߬ߢߎ߲߬ ߸ ߊߟߎ߯ ߛߊ߲ߞߊߢߐ߲߯ߦߊ ߞߍ߫ ߡߎ߬ߢߎ߲ ߘߐ߫ ، ߊߟߎ߯ ߓߐߕߏ߲߫ ߕߊ߲ߞߊ ߞߍ߫ ، ߊ߬ ߣߴߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߸ ߖߐ߲߰ߛߴߊߟߎ߫ ߘߌ߫ ߛߎߘߊ߲߫ ﴿200﴾

ߤߍ߲߬ ߊߟߎ߬ ߡߐ߱ ߟߎ߬ ߸ ߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߎ߫ ߡߊ߰ߙߌ ߡߊ߬ ߸ ߏ߬ ߡߍ߲ ߞߵߊߟߎ߫ ߘߊ߲߫ ߣߌߡߊ߫ ߞߋߟߋ߲߫ ߘߐ߫ ߸ ߞߵߏ߬ ߝߘߎߡߊ ߘߊ߲߫ ߊ߬ ߖߍ߬ߘߍ ߘߐ߫ ، ߊ߬ ߞߵߏ ߝߌ߬ߟߊ ߡߊߕߋ߭ ߞߍ߫ ߗߍ߬ ߛߌߦߊߡߊ߲߫ ߣߌ߫ ߡߛߏ߬ ߛߌߦߊߡߊ߲߫ ߘߌ߫ ، ߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߸ ߊߟߎ߫ ߦߴߊߟߎ߫ ߢߐ߲߮ ߕߙߊ߫ ߟߴߏ߬ ߡߍ߲ ߣߌ߫ ߓߊߘߋ߲ߧߊ ߟߊ߫ ߸ ߊߟߊ߫ ߘߏ߲߬ ߦߴߊߟߎ߫ ߜߋ߬ߟߎ߲߬ߓߊ߯ ߟߋ߬ ߘߌ߫ ﴿1﴾

ߊߟߎ߫ ߦߋ߫ ߝߊߙߌߕߊ ߟߎ߫ ߝߊ߬ ߟߊ߫ ( ߗߍ߫ ) ߣߊ߲ߝߟߏ ߟߎ߬ ߘߴߊ߬ߟߎ߫ ߡߊ߬ ߘߋ߬ ، ߝߋߎ߫ ߊߟߎ߫ ߞߊߣߊ߬ ( ߊߟߎ߫ ߕߊ߫ ) ߖߎ߯ߡߊ߲ ߝߊ߬ߟߋ߲߫ ( ߏ߬ ߟߎ߬ ߕߊ߫ ) ߓߍ߬ߘߍ ߟߊ߫ ، ߊߟߎ߫ ߘߏ߲߬ ߞߊߣߵߏ߬ ߟߎ߬ ߟߊ߫ ߣߊ߲߬ߝߟߏ ߟߎ߬ ߘߊߥߎ߲߫ ߊߟߎ߫ ߕߊ߫ ߣߊ߲߬ߝߟߏ ߟߎ߫ ߝߍ߬ ߝߋߎ߫ ، ߓߊ ߏ߬ ߦߋ߫ ߖߟߎ߬ߡߎ߲߬ߓߊ߫ ߟߋ߬ ߘߌ߫ ﴿2﴾

ߣߴߊߟߎ߫ ߛߌߟߊ߲߫ ߘߊ߫ ߞߏ߫ ߊߟߎ߫ ߕߍ߫ ߛߴߊߟߎ߫ ߕߋߟߋ߲߫ ߠߊ߫ ߝߊߙߌߕߊ ߟߎ߬ ߢߍ߫ ( ߝߘߎ ߘߐ߫ ) ߊߟߎ߫ ߦߴߊߟߎ߫ ߢߣߊ ߝߘߎ߫ ߡߛߏ߬ ( ߜߘߍ ߕߐ߭) ߟߎ߬ ߘߐ߫ ، ߊ߬ ߓߍ߫ ߝߌ߬ߟߊ߬ ߘߌ߫ ߸ ߊ߬ ߓߍ߫ ߛߓߊ߬ ߘߌ߫ ߸ ߊ߬ ߓߍ߫ ߣߊߣߌ߲߫ ߘߌ߫ ، ߣߴߊߟߎ߫ ߘߏ߲߬ ߛߌߟߊ߲߫ ߘߊ߫ ߸ ߞߏ߫ ߊߟߎ߫ ߕߍ߫ ߛߴߊߟߎ߫ ߕߋߟߋ߲߫ ߠߊ߫ ( ߛߌߦߊߡߊ߲ ߕߍ߫ )߸ ߊߟߎ߫ ߘߊ߲߬ ߞߋߟߋ߲߫ ߡߊ߬ ، ߥߟߴߊߟߎ߫ ߦߴߊߟߎ߫ ߓߟߏߡߐ߮ ߘߏ߫ ߕߊ߬ ( ߕߙߊ߬ ߡߛߏ ߘߌ߫ ) ߸ ߓߊ ߏ߬ ߟߋ ߘߴߊ߬ ߞߍ߫ ߊߟߎ߫ ߕߍ߫ ߘߐ߰ ߞߐߙߍ߫ ߛߌߦߊߡߊ߲ ߓߟߏ߫ ﴿3﴾

ߊߟߎ߫ ߦߋ߫ ߡߏ߬ߛߏ ߟߎ߬ ߝߘߎߝߋ߲ ߠߎ߬ ߘߴߊ߬ߟߎ߫ ߡߊ߬ ߟߋ߬ ߝߛߊߦߌ߫ ، ߣߴߊ߬ߟߎ߫ ߖߍ߬ߘߍ ߣߌߘߐߘߌߦߊ߫ ߘߊ߫ ߡߍ߲ ߞߊ߲߬ ߊߟߎ߫ ߦߋ߫ ߸ ߊߟߎ߫ ߏ߬ ߟߋ ߘߊߥߎ߲߫ ߛߐ߲߬ ߛߎߡߊ ߘߐ߫ ߕߐߍ߯ ﴿4﴾

ߊߟߎ߫ ߞߊߣߵߊߟߎ߫ ߟߊ߫ ߣߊ߲߬ߝߟߏ ߟߎ߬ ߟߊߕߊ߬ߡߌ߲߬ ߖߎߥߊ ߟߎ߫ ߡߊ߬ ߘߋ߬ ، ߊߟߊ߫ ߣߵߏ߬ ߡߍ߲ ߞߍ߫ ߟߴߊߟߎ߫ ߟߐ߬ߛߋ߲ ߘߌ߫ ، ߊߟߎ߫ ߞߏ߬ߣߌ߲߬ ߦߴߊ߬ߟߎ߬ ߓߊߟߏ߫ ߊ߬ ߘߐ߫ ߊ߬ ߣߌ߫ ߞߵߊ߬ߟߎ߬ ߝߊߘߌߦߊߓߐ߫ ( ߊ߬ ߘߐ߫ )߸ ߊ߬ ߣߴߊߟߎ߯ ߕߏ߫ ߞߎߡߊ߫ ߡߊߟߐ߲ߍ߲߫ ߝߐ߫ ߟߴߊ߬ߟߎ߬ ߦߋ߫ ߞߍ߬ߣߍ߲ ﴿5﴾

ߊߟߎ߯ ߕߏ߫ ߝߊߙߌߕߊ ߟߎ߫ ߞߙߐ߬ߛߌ߬ ߟߊ߫ ߛߐ߲߬ ߸ ߝߏ߫ ߊ߬ߟߎ߬ ߦߋ߫ ߛߋ߫ ߝߘߎ ߡߊ߬ ، ߣߴߊߟߎ߫ ߞߊ߬ ߤߊ߲ߞߟߌߡߦߊ߫ ( ߕߐ߰ߡߊ߬ߛߙߋ߫ ) ߦߴߊ߬ߟߎ߬ ߘߐ߫ ߸ ߊߟߴߊ߬ߟߎ߬ ߟߊ߫ ߣߊ߲߬ߝߟߏ ߟߎ߬ ߟߊߕߊ߬ߡߌ߲߫ ߊ߬ߟߎ߫ ߡߊ߬ ، ߓߊ߬ߙߌ߬ ߊߟߎ߫ ߞߊߣߵߊ߬ ߘߊߥߎ߲߫ ߖߊߛߟߌ ߘߐ߫ ߸ ߊ߬ ߣߌ߫ ߞߊߟߌߦߊ ߘߐ߫ ߛߊ߬ߣߴߊ߬ߟߎ߫ ߓߏ߲߬ߧߊ߬ ߕߍ߫ ، ߡߍ߲ ߓߊ߯ ߞߍ߫ ߓߊ߬ߣߊ ߘߌ߫ ߏ߬ ߦߴߊ߬ ߖߘߍ߬ ߟߊߛߐ߲߫ ߊ߬ ߡߊ߬ ، ߣߌ߫ ߡߍ߲ ߦߋ߫ ߓߟߏߞߏߟߏ߲ ߘߌ߫ ، ߏ߬ ߦߴߊ߬ ߘߏ߫ ߘߊߥߎ߲߫ ߢߊ߫ ߡߊߟߐ߲ߣߍ߲߫ ߘߐ߫ ، ߊߟߎ߫ ߘߏ߲߬ ߓߊ߯ ߞߍ߫ ߊ߬ߟߎ߬ ߟߊ߫ ߣߊ߲߬ߝߟߏ ߟߎ߬ ߟߊߛߊ߬ߦߌ߬ ߟߴߊ߬ߟߎ߫ ߡߊ߬ ߸ ߊߟߎ߫ ߛߙߋ ߞߍ߫ ߊ߬ߟߎ߬ ߟߊ߫ ، ߊߟߊ߫ ߞߏ߬ߣߌ߲ ߥߛߊ߬ ߘߊ߫ ߖߊ߬ߕߋ߬ߓߐ߬ߟߊ߫ ߘߌ߫ ﴿6﴾

ߣߌ߬ ߦߋ߫ ߗߍ߭ ߟߎ߬ ߦߋ߫ ( ߊ߬ߟߎ߬ ) ߡߏߦߌߓߊ߯ ߝߌ߬ߟߊ ߣߴߊ߬ߟߎ߬ ߡߊߛߎ߬ߘߎ߲߬ߧߊ߬ߓߊ߮ ߟߎ߬ ߗߍ ߘߐ߫ ߸ ߣߌ߬ ߦߋ߫ ߡߏ߬ߛߏ ߟߎ߬ ߝߣߊ߫ ߦߋ߫ ( ߊ߬ߟߎ߬ ) ߡߏߦߌߓߊ߯ ߝߌ߬ߟߊ ߣߴߊ߬ߟߎ߬ ߡߊߛߎ߬ߘߎ߲߬ߧߊ߬ߓߊ߮ ߟߎ߬ ߗߍ ߘߐ߫ ، ߏ߬ ߞߍ߫ ߘߊ߫ ߕߜߋ߫ ߘߌ߫ ߥߟߊ߫ ߛߌߦߊߡߊ߲߫ ߘߌ߫ ߸ ߣߌ߬ ߘߌߦߊߜߏߦߊߣߍ߲ ߜߊ߲߬ߛߊ߲ ߞߊ߬ߣߌ߲߫ ﴿7﴾

ߣߌ߫ ߡߊ߬ߛߎ߬ߘߎ߲߬ߧߊ߬ߓߊ߮ ߟߎ߬ ߣߌ߫ ߝߊߙߌߕߊ ߟߎ߬ ߣߌ߫ ߘߐ߰ߕߐ ߟߎ߬ ߕߊ߯ ߘߊ߫ ( ߗߍ߫ ) ߕߟߊ߫ ߦߌߟߊ ߸ ߊߟߎ߫ ߦߴߊ߬ߟߎ߬ ߛߐ߫ ߊ߬ ߘߐ߫ ߊ߬ ߣߴߊߟߎ߯ ߞߎߡߊ߫ ߢߌߡߊ߫ ߝߐ߫ ߊ߬ߟߎ߬ ߦߋ߫ ﴿8﴾

ߝߊߙߌߕߊ ߟߎ߬ ߕߏߕߐ߫ ߡߍ߲ ߠߎ߬ ߓߟߏ߫ ߸ ߏ߬ ߟߎ߬ ߦߋ߫ ߛߌߟߊ߲߫ ߞߵߊ߬ ߡߌ߬ߘߴߊ߬ߟߎ߫ ߖߍ߬ߘߍ߫ ߡߊ߬ ߓߊ߫: ߣߴߊ߬ߟߎ߫ ߞߊ߬ ߞߍ߫ ߛߊ߬ ߟߊ߫ ߞߊ߬ ߓߐ߲ߛߐ߲߫ ߓߘߎߓߘߍ ߟߎ߬ ߕߏ߫ ߊ߬ߟߎ߬ ߞߐ߫ ߸ ߏ߬ ߟߎ߫ ߖߐ߬ߘߐ ߡߍ߲ ߞߍߕߐ߫ ߊ߬ߟߎ߬ ߟߊ߫ ߸ ߊ߬ߟߎ߬ ߦߴߊ߬ߟߎ߬ ߡߙߌ߫ ߏ ߡߊ߬ ߞߵߊ߬ߟߎ߬ ߝߊ߲ߕߊ߲߬ߞߵߊߟߊ߫ ߡߊ߬ ߸ ߊ߬ ߣߴߊ߬ߟߎ߬ ߦߋ߫ ߞߎߡߊ߫ ߛߥߊ߬ߓߊ ߟߊ߫ ﴿9﴾

ߡߍ߲ ߠߎ߫ ߞߏ߬ߣߌ߲ ߦߋ߫ ߝߊߙߌߕߊ ߟߎ߬ ߟߊ߫ ߣߊ߲߬ߝߟߏ ߟߎ߬ ߘߊߥߎ߲߫ ߠߊ߫ ߕߐ߬ߢߍ߮ ߟߊ߫ ߸ ߏ߬ ߟߎ߬ ߦߋ߫ ߕߊ ߟߋ߬ ߟߊߘߏ߲߬ ߠߴߊ߬ߟߎ߬ ߞߣߐ߫ ߏ߬ ߘߌ߫ ، ߛߋߚߋ߫ ߏ߬ ߟߎ߫ ߘߏ߲߬ߕߐ߫ ߖߌߖߌ ߟߋ߬ ߘߐ߫ ﴿10﴾

ߊߟߊ߫ ߦߴߊߟߎ߫ ߡߊߛߙߊ߬ ߟߴߊߟߎ߫ ߘߋ߲ ߠߎ߫ ߣߌ߬ ߞߏ ߟߋ߬ ߘߐ߫ ߣߌ߲߬: ߗߍ߬ߡߊ߲߬ ߞߋߟߋ߲ ߕߊ ߦߋ߫ ߞߍ߫ ߡߛߏ߬ߡߊ߲߫ ߝߌ߬ߟߊ߫ ߣߌ߭ ߢߐ߲߰ ߘߌ߫ ، ߣߴߊ߬ߟߎ߫ ߘߏ߲߬ ߞߍ߫ ߘߊ߫ ߡߛߏ߬ߡߊ߲߫ ߜߊ߲߬ߛߊ߲߬ ߘߌ߫ ߡߐ߰ ߝߌ߬ߟߊ߬ ߛߊ߲ߘߐ߫ ߸ ߗߍ ߛߓߊߢߐ߲߯ ߝߌ߬ߟߊ ߦߋ߫ ߘߌ߫ ߏ߬ ߟߎ߫ ߡߊ߬ ، ߣߌ߫ ߡߛߏ߬ ߞߋߟߋ߲߫ ߠߋ߬ ߸ ߏ߬ ߕߊ ߦߋ߫ ߞߍ߫ ߕߟߊߒߕߍ ߘߌ߫ ، ߕߐ߭ ߘߏ߫ ߦߴߊ߬ ߡߏߦߌߓߊ߯ ߝߌ߬ߟߊ ߕߊ ߘߌ߫: ߏ ߞߋ߬ߟߋ߲߬ߞߋ߬ߟߋ߲߬ߠߊ ߣߌ߭ ߦߋ߫ ߞߍ߫ ߥߐ߯ߙߐߢߐ߲߯ ߞߋߟߋ߲߫ ߘߌ߫ ߸ ߣߴߊ߬ ߕߘߍ߬ ߘߊ߫ ߘߋ߲߫ ߦߴߊ߬ ߓߟߏ߫ ، ߒ߬ߞߊ߬ ߣߌ߫ ߘߋ߲߫ ߕߍ߫ ߊ߬ ߓߟߏ߫ ߸ ߊ߬ ߡߏߦߌߓߊ߯ ߝߌ߬ߟߊ ߘߴߊ߬ ߗߍ ߕߊ߬ ، ߊ߬ ߣߊ߫ ߕߊ ߦߴߏ߬ ߘߐ߫ ߛߓߊߢߐ߲߯ ߞߋߟߋ߲߫ ߘߌ߫ ، ߓߊ߬ߙߌ߬ ߣߌ߫ ߓߊߘߋ߲ߡߊ ߟߎ߬ ߦߴߊ߬ ߟߊ߫ ߸ ߊ߬ ߣߊ߫ ߕߊ ߘߌ߫ ߞߍ߫ ߥߐ߯ߙߐߢߐ߲߯ ߞߋߟߋ߲߫ ߘߌ߫ ، ߏ߬ ߓߍ߯ ߞߍߕߐ߫ ߛߙߊ߬ߒ߬ߞߊ߲߬ߠߊ ߓߐ ߟߋ߬ ߞߐ߫ ߸ ߊ߬ ߦߴߏ߬ ߡߍ߲ ߓߐ ߡߊߜߟߍ߬ߦߊ߬ ߟߊ߫ ، ߥߟߊ߫ ߖߟߎ߬ ( ߛߙߊ ) ߞߐ߫ ، ߊߟߎ߫ ߝߊ߭ ߟߎ߬ ߣߴߊߟߎ߫ ߘߋ߲ ߠߎ߬ ߘߐ߫ ߸ ߊߟߎ߫ ߡߴߊ߬ ߟߐ߲߫ ߡߍ߲ ߠߎ߫ ߛߎ߬ߘߎ߲߬ߡߊ߲߬ ߊߟߎ߫ ߟߊ߫ ߣߊ߬ߝߊ ߘߐ߫ ، ( ߗߍ߫ ߕߟߊ߫ ߢߊ ߣߌ߲߬ ) ߘߌߦߊߜߏߦߊ ߝߘߊߣߍ߲߫ ߊߟߊ߫ ߟߋ߬ ߟߊ߫ ߸ ߊߟߊ߫ ߘߏ߲߬ ߦߋ߫ ߟߐ߲ߠߌ߲ߠߊ߫ ߘߌ߫ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿11﴾

ߊߟߎ߫ ( ߗߍ߭ ߟߎ߬ ) ߕߊ ߟߋ߬ ߕߟߊߒߕߍ ߘߌ߫ ߊߟߎ߫ ߡߏ߬ߛߏ ߟߎ߬ ߗߍ ߘߐ߫ ߸ ߣߴߊ߬ ߕߘߍ߬ ߘߊ߫ ߞߊ߬ߣߌ߲߬ ߘߋ߲߫ ߕߍ߫ ߊ߬ߟߎ߬ ߓߟߏ߫ ، ߓߊ߬ߙߌ߬ ߣߌ߫ ߘߋ߲߫ ߦߴߊ߬ߟߎ߬ ߓߟߏ߫ ߸ ߣߊ߯ߣߌ߲ߢߐ߲߮ ߘߌ߫ ߞߍ߫ ߊߟߎ߫ ߕߊ ߘߌ߫ ߊ߬ߟߎ߬ ߟߊ߫ ߣߊ߲߬ߝߟߏ߬ ߕߏߣߍ߲ ߘߐ߫ ، ߏ߬ ߓߍ߯ ߞߍߕߐ߫ ߛߙߊ߬ߒ߬ߞߊ߲߬ߠߊ ߓߐ ߟߋ߬ ߞߐ߫ ߊ߬ ߦߴߏ߬ ߡߍ߲ ߓߐ ߡߊߜߟߍ߬ߦߊ߬ ߟߊ߫ ߥߟߊ߫ ߖߟߎ߬ ( ߛߙߊ ) ߞߐ߫ ، ߡߏ߬ߛߏ ߟߎ߬ ߕߊ ߟߋ߬ ߣߊߣߌ߲ߢߐ߲߮ ߘߌ߫ ߊߟߎ ( ߝߘߎߗߍ ߟߎ߬ ) ߗߍ ߘߐ߫ ߸ ߣߴߊ߬ ߕߘߍ߬ ߘߊ߫ ߞߊ߬ߣߌ߲߬ ߘߋ߲߫ ߕߍ߫ ߊߟߎ߫ ߓߟߏ߫ ، ߒ߬ߞߊ߬ ߣߌ߫ ߘߋ߲ ߦߴߊߟߎ߫ ߓߟߏ߫ ߸ ߊ߬ߟߎ߬ ߕߊ ߘߌ߫ ߞߍ߫ ߛߋߦߌ߲ߢߐ߲߮ ߘߌ߫ ߊߟߎ߫ ߟߊ߫ ߣߊ߲߬ߝߟߏ߬ ߕߏߣߍ߲ ߘߐ߫ ، ߏ߬ ߓߍ߯ ߞߍߕߐ߫ ߛߙߊ߬ߒ߬ߞߊ߲߬ߠߊ ߓߐ ߟߋ߬ ߞߐ߫ ߸ ߊߟߎ߫ ߦߴߏ߬ ߡߍ߲ ߓߐ ߡߊߜߟߍ߬ߦߊ߬ ߟߊ߫ ߥߟߊ߫ ߖߟߎ߬ ( ߛߙߊ ) ߞߐ߫ ، ߣߌ߫ ߗߍ߭ ߡߍ߲ ߥߟߊ߫ ߡߏ߬ߛߏ ߡߍ߲ ߗߍ ߞߍ߫ ߘߊ߫ ߕߊ߬ ߟߊ߫ ߘߋ߲ߒߕߊ߲ߧߊ ߣߌ߫ ߡߏߦߌߓߊ߯ߒߕߊ߲ߧߊ ߘߐ߫ ، ߞߵߊ߬ ߕߘߍ߬ ߓߊߘߋ߲ߡߊ߫ ߗߍ߬ߡߊ߲ ߦߴߊ߬ ߟߊ߫ ߥߟߴߊ߬ ߡߛߏ߬ߡߊ߲߫ ߸ ߏ߬ ߟߎ߫ ߞߋ߬ߟߋ߲߬ߞߋ߬ߟߋ߲߬ߠߊ ߣߌ߭ ߦߋ߫ ߞߍ߫ ߥߐ߯ߙߐߢߐ߲߮ ߘߌ߫ ، ߣߴߊ߬ߟߎ߫ ߘߏ߲߬ ߛߌߦߊߦߊ߫ ߘߴߏ߬ ߘߌ߫ ߸ ߊ߬ߟߎ߬ ߦߋ߫ ߘߍ߬ ߛߓߊߢߐ߲߮ ߠߊ߫ ، ߏ߬ ߓߍ߯ ߞߍߕߐ߫ ߛߙߊ߬ߒ߬ߞߊ߲߬ߠߊ ߓߐ ߟߋ߬ ߞߐ߫ ߸ ߊ߬ ߦߴߏ߬ ߡߍ߲ ߓߐ ߡߊߜߟߍ߬ߦߊ߬ ߟߊ߫ ߥߟߊ߫ ߖߟߎ߬ ( ߛߙߊ ) ߞߐ߫. ߣߌ߫ ߢߐ߲߯ ߕߙߐ߫ ߕߍ߫ ، ߣߌ߲߬ ߛߙߊ߬ߒ߬ߞߊ߬ߠߊ ߝߘߊߣߍ߲߫ ߊߟߊ߫ ߟߋ߬ ߟߊ߫ ߸ ߊߟߊ߫ ߘߏ߲߬ ߟߐ߲ߠߌ߲ߠߊ߫ ߘߌ߫ ߸ ߊ߰ ߡߎ߬ߢߎ߲߬ߓߊ߯ ߘߌ߫ ﴿12﴾

ߢߌ߲߬ ߠߎ߬ ߦߋ߫ ߊߟߊ߫ ߟߊ߫ ߞߎ߬ߙߎ߲߬ߘߎ ߟߎ߫ ߟߋ߬ ߘߌ߫ ، ߡߍ߲ ߘߏ߲߬ ߓߊ߯ ߊߟߊ߫ ߣߴߊ߬ ߟߊ߫ ߞߋߟߊ ߞߊ߲ ߡߌ߬ߘߊ߬ ߸ ߊ߬ ߘߴߏ߬ ߟߊߘߏ߲߬ ( ߡߍ߲ߘߌߦߊ ) ߣߊߞߐ ߟߎ߬ ߘߐ߫ ߸ ߖߌߢߊ ߟߎ߯ ߥߦߏ߬ ߟߊ߫ ߡߍ߲ ߠߎ߬ ߞߘߐߟߊ ߟߎ߬ ߘߐ߫ ߞߎߟߊ߲ߞߎߟߊ߲߫ ، ߏ߬ ߟߎ߬ ߘߎߡߊߕߐ߫ ߏ߬ ߟߋ ߘߐ߫ ، ߏ߬ ߟߋ ߘߏ߲߬ ߦߋ߫ ߣߌ߬ ߓߟߋߓߟߋ ߘߌ߫ ﴿13﴾

ߒ߬ߓߊ߬ ߡߍ߲ ߓߊ߯ ߊߟߊ߫ ߣߴߊ߬ ߟߊ߫ ߞߋߟߊ ߛߐ߬ߛߐ߬ ߸ ߞߵߊ߬ ߛߊ߬ߥߏ߲߫ ߊ߬ ߟߊ߫ ߞߎ߬ߙߎ߲߬ߘߎ ߟߎ߫ ߞߎ߲߬ߠߊ߫ ߸ ߊ߬ ߘߴߏ߬ ߟߊߘߏ߲߬ ߕߊ ߘߐ߫ ߞߵߊ߬ ߘߎߡߊ߫ ߦߋ߲߬ ، ߏ߬ ߢߍߛߌ߮ ߟߋ߬ ߘߐ߯ߦߊ ߖߊ߲߰ߞߕߊ ߘߌ߫ ﴿14﴾

ߡߍ߲ ߠߎ߬ ߦߋ߫ ߣߊ߬ ߟߊ߫ ߞߏߙߏ߲ߧߊ ߟߴߊߟߎ߫ ߡߏ߬ߛߏ ߟߎ߬ ߘߐ߫ ߸ ߊߟߎ߯ ߛߙߋ߫ ߣߊ߯ߣߌ߲߫ ߢߌߣߌ߲߫ ߏ߬ ߟߎ߫ ߡߵߊߟߎ߫ ߖߍ߬ߘߍ ߘߐ߫ ، ߣߴߏ߬ ߟߎ߫ ߞߊ߬ ߛߙߋߦߊ ߟߊߟߐ߬ ߸ ߊߟߎ߫ ߡߏ߬ߛߏ ߏ߬ ߟߎ߬ ߟߊߞߘߎ߬ ߓߏ߲ ߠߎ߬ ߞߣߐ߫ ߝߎߚߎ߫ ߝߏ߫ ߛߊ߬ߦߊ ߦߋ߫ ߛߴߊ߬ߟߎ߫ ߡߊ߬ ߸ ߥߟߴߊߟߊ߫ ߦߋ߫ ߛߌߟߊ߫ ߟߊߞߵߊ߬ߟߎ߬ ߦߋ߫ ﴿15﴾

ߡߍ߲ ߝߌ߬ߟߊ ߦߋ߫ ߖߊߕߐߦߊ ߞߍ߫ ߟߴߊߟߎ߫ ߘߐ߫ ߸ ߊߟߎ߫ ߦߴߏ߬ ߟߎ߬ ߕߙߐ߫ ߞߏߛߓߍ߫ ، ߣߴߊ߬ߟߎ߫ ߞߵߊ߬ߟߎ߫ ߖߘߍ߬ߟߊߛߊ߬ߦߌ߫ ߞߊ߬ ߟߢߊ߬ߟߌ ߞߍ߫ ߸ ߊߟߎ߫ ߦߴߊߟߎ߫ ߞߐߟߐ߬ ߊ߬ߟߎ߬ ߟߊ߫ ، ߖߊ߯ߕߋ߬ ߸ ߊߟߊ߫ ߦߋ߫ ߖߘߍ߬ߟߊ߬ߛߊߦߌ ߡߌ߬ߘߊ߬ߓߊ߯ ߘߌ߫ ߊ߰ ߤߌߣߟߊ߫ ߘߌ߫ ﴿16﴾

ߞߏ߬ߣߌ߲߬ ߖߘߍ߬ߟߊ߬ߛߊߦߌ ߡߌ߬ߘߊ ߊߟߊ߫ ߓߟߏ߫ ߸ ߏ߬ ߦߋ߫ ߞߍ߫ ߟߊ߫ ߡߐ߰ ߟߎ߫ ߟߋ߬ ߦߋ߫ ߸ ߡߍ߲ ߠߎ߬ ߦߋ߫ ߖߎ߯ߡߊ߲ ߞߍ߫ ߟߊ߫ ߞߏߟߐ߲ߓߊߟߌߦߊ ߡߊ߬ ߸ ߞߊ߬ ߓߊ߲߫ ߞߵߊ߬ߟߎ߫ ߖߘߍ߬ߟߊߛߊ߬ߦߌ߲߬ ߖߏߣߊ߫ ، ߒ߬ߓߵߊߟߊ߫ ߦߋ߫ ߖߘߍ߬ߟߊ߬ߛߊߦߌ ߡߌ߬ߘߊ߬ ߟߴߏ߬ ߟߎ߫ ߟߋ߬ ߦߋ߫ ، ߖߊ߯ߕߋ߬ ߸ ߊߟߊ߫ ߦߋ߫ ߟߐ߲ߠߌ߲ߠߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿17﴾

(ߞߏ߬ߣߌ߲߬ ߝߋߎ߫ ) ߖߘߍ߬ߟߊ߬ߛߊߦߌ ߕߍ߫ ߡߌ߬ߘߊ߬ ߟߊ߫ ߡߐ߰ ߟߎ߬ ߦߋ߫ ߸ ߡߍ߲ ߠߎ߬ ߦߋ߫ ߖߎ߯ߡߊ߲ ߠߎ߬ ߞߍ߫ ߟߊ߫ ߝߎߚߎ߫ ߝߏ߫ ߛߊ߬ߦߊ ߦߋ߫ ߛߴߊ߬ ߘߏ߫ ߡߊ߬ ، ߏ߬ ߦߴߊ߬ ߝߐ߫ ߛߊ߫ ߞߏ߫ ߒ ߓߘߊ߫ ߒ ߖߘߍ߬ߟߊߛߊ߬ߦߌ߲߬ ߛߍߣߍ߲߬ ، ߊ߬ ߕߍ߫ ߡߌ߬ߘߊ߫ ߡߐ߰ ߟߎ߬ ߝߣߊ߫ ߦߋ߫ ߸ ߡߍ߲ ߠߎ߬ ߦߋ߫ ߛߊ߬ ߟߊ߫ ߞߵߊ߬ߟߎ߬ ߕߏ߫ ߓߊ߲߬ߓߊ߰ߦߊ ߘߐ߫ ، ߡߐ߰ ( ߛߌ߰ ߝߌ߬ߟߊ ) ߏ߬ ߟߎ߫ ߸ ߊ߲ ߣߊ߬ ߖߊ߲߰ߞߕߊ߬ ߘߌߡߌ߲ߣߍ߲ ߠߋ߬ ߘߐߓߍ߲߬ ߠߴߏ߬ ߟߎ߬ ߢߍ߫ ﴿18﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊ߬ ߕߍ߫ ߘߤߵߊߟߎ߫ ߦߋ߫ ߝߋߎ߫ ߞߊ߬ ߡߏ߬ߛߏ ߟߎ߬ ߗߍߕߊ߬ ߘߌߦߊߜߏߦߊ ߟߊ߫ ߸ ߊߟߎ߫ ߘߏ߲߬ ߞߊߣߵߊ߬ߟߎ߫ ߞߎ߬ߡߊ߲߬ߘߌ߬ ( ߞߏ߫ ߊ߬ߟߎ߬ ߞߊߣߊ߬ ߝߘߎ߫ ߗߍ߬ ߜߘߍ߫ ߟߎ߫ ߡߊ߬) ߤߊߞߍߕߏ߫ ߊߟߎ߫ ߘߴߊ߬ߟߎ߬ ߝߘߎߝߋ߲ ߘߏ߫ ߓߐ߫ ߊ߬ߟߎ߬ ߓߟߏ߫ ، ( ߊߟߎ߫ ߞߴߏ߬ ߞߍ߫ ߘߋ߬ ) ߸ ߝߏ߫ ߣߴߊ߬ߟߎ߫ ߞߵߊ߬ߟߎ߫ ߟߐ߬ ߞߏߙߏ߲ߧߊ ߜߍߘߐߕߊ ߟߊ߫ ، ߊߟߎ߫ ߘߏ߲߬ ߡߏ߬ߛߏ ߟߎ߫ ߛߌ߰ߢߐ߲߰ߦߊ߫ ߞߎ߬ߙߎ߲߬ߘߎ ߟߋ߬ ߞߣߐ߫ ߸ ߊ߬ߟߎ߬ ߘߌ߫ ߜߏߦߴߊߟߎ߫ ߦߋ߫ ( ߕߎ߬ߡߊ ߘߏ߫ ) ߸ ߞߏ߬ߣߵߊ߬ ߢߐ߲߰ߘߐ߫ ߞߏ ߘߏ߫ ߦߋ߫ ߜߏߦߊ߫ ߟߴߊߟߎ߫ ߦߋ߫ ߸ ߞߵߊ߬ ߕߘߍ߬ ߊߟߊ߫ ߦߋ߫ ߤߙߊ߫ ߛߌߦߊߡߊ߲ ߞߍ߫ ߟߴߏ߬ ߟߋ ߘߐ߫ ﴿19﴾

ߣߴߊߟߎ߫ ߓߍ߫ ߊ߬ ߝߍ߬ ߞߊ߬ ߡߏ߬ߛߏ ߘߏ߫ ߡߊߝߊ߬ߟߋ߲߬ ߘߏ߫ ߟߊ߫ ߸ ߞߵ ߊ߬ ߕߘߍ߬ ߊߟߎ߫ ߓߘߊ߫ ߓߊ߲߫ ߘߐ ߛߐ߫ ߟߊ߫ ߞߐ߲߬ߜߍ߲ ߠߊ߫ ، ߊߟߎ߫ ߞߊߣߵߏ߬ ߝߋ߲߫ ߡߌ߬ߘߴߏ߬ ߟߊ߫ ߡߎ߬ߕߎ߲߫ ߘߋ߬ ߸ ߊ߬ ߝߐ߫ ߊߟߎ߫ ߘߴߏ ߡߌ߬ߘߊ߫ ߞߊ߬ߙߏ߲ ߠߊ߫߸ ߊ߬ ߣߌ߫ ߖߟߎ߬ߡߎ߲ ߜߍߘߐߕߊ ߟߊ߫ ﴿20﴾

ߊߟߎ߫ ߦߴߏ ߡߌ߬ߘߊ߬ ߟߊ߫ ߘߌ߬ ߡߎ߬ߕߎ߲߬ ߞߵߊ߬ ߕߘߍ߬ ߊߟߎ߫ ߘߏ߫ ߓߘߊ߫ ߓߊ߲߫ ߊ߬ ߖߘߍ߬ ߟߊߕߊ߬ߡߌ߲߬ ߠߊ߫ ߘߏ߫ ߡߊ߬ ، ߊ߬ ߣߌ߫ ߞߵߊ߬ ߕߘߍ߬ ߡߏ߬ߛߏ ߟߎ߬ ߓߘߊ߫ ߓߊ߲߫ ߟߊ߬ߤߘߌ߬ ߜߍߟߍ߲ ߟߊߡߌ߬ߘߊ߬ ߟߴߊߟߎ߫ ߦߋ߫ ﴿21﴾

ߊߟߎ߫ ߞߣߊ߫ ߡߏ߬ߛߏ ߟߎ߬ ߝߋ߲߫ ߝߘߎ߫ ߸ ߊߟߎ߫ ߝߊ߬ ߟߎ߫ ߞߊ߬ ߡߍ߲ ߠߎ߬ ߝߘߎ߫ ، ߝߏ߫ ߡߍ߲ ߞߍߣߍ߲߫ ߞߘߐ ߦߋ߫ ، ( ߝߊ߬ ߡߛߏ߬ ߕߊ ) ߦߋ߫ ߞߏߙߏ߲ߧߊ ߟߋ߬ ߘߌ߫ ߸ ߊ߬ ߣߌ߫ ߞߎ߲߬ߞߏ߫ ߟߋ߬ ߸ ߊ߬ ߣߌ߫ ߛߌߟߊ߫ ߖߎ߯ߓߊ߫ ߟߋ߬ ﴿22﴾

ߊߟߎ߫ ߣߊ ߟߎ߬ ( ߝߘߎ ) ߓߘߊ߫ ߟߊߕߐ߲߫ ߊߟߎ߫ ߡߊ߬ ، ߊ߬ ߣߴߊߟߎ߫ ߘߋ߲ߡߛߏ ߟߎ߬ ߣߴߊߟߎ߫ ߡߊ߬ߡߛߏ ߟߎ߬ ߣߴߊߟߎ߫ ߕߍߣߍ߲ ߠߎ߬ ߣߴߊߟߎ߫ ߓߊߙߌ߲ߡߛߏ ߟߎ߬ ، ߊ߬ ߣߴߊߟߎ߫ ߓߊߘߋ߲߫ ߗߍ߬ߡߊ߲ ߘߋ߲ߡߛߏ ߟߎ߬ ߣߴߊߟߎ߫ ߓߊߘߋ߲߫ ߡߛߏ߬ߡߊ߲ ߘߋ߲ߡߛߏ ߟߎ߬ ߣߴߊߟߎ߫ ߛߌ߲ߡߌ߲߫ ߣߊ ߟߎ߬ ߣߴߊߟߎ߫ ߛߌ߲ߡߌ߲ߢߐ߲߮ ߠߎ߬ ، ߊ߬ ߣߴߊߟߎ߫ ߡߏ߬ߛߏ ߟߎ߬ ߣߊ ߟߎ߬ ߣߴߊߟߎ߫ ߟߊ߫ ߟߊ߬ߡߐ߰ߘߋ߲ ߡߍ߲ ߠߎ߬ ߦߴߊߟߎ߫ ߟߊ߫ ߟߘߊ߬ߙߏ߬ߟߌ ߞߣߐ߫ ߸ ߣߴߊ߬ߟߎ߫ ߛߐ߬ߘߐ߲߬ߣߍ߲߫ ߊߟߎ߫ ߟߊ߫ ߛߎ ߡߏ߬ߛߏ ߟߎ߬ ߟߊ߫ ، ߓߊ߬ߙߌ߬ ߣߌ߫ ߛߎ߫ ߡߊ߫ ߘߏ߲߬ ߊߟߎ߫ ߣߌ߫ ߡߍ߲ ߠߎ߬ ߕߍ߫ ߸ ߞߎ߲߬ߞߏ߬ ߕߍ߫ ߊߟߎ߫ ߡߊ߬ ( ߏ߬ ߟߎ߬ ߘߋ߲ߡߛߏ ߟߎ߬ ߝߘߎ ߘߐ߫ ߣߴߊ߬ ߞߵߊ߬ ߕߘߍ߬ ߊߟߎ߫ ߓߘߊ߫ ߝߘߊ߫) ، ߊ߬ ߣߌ߫ ߝߣߊ߫ ߸ ߊߟߎ߫ ߖߘߍ߬ߥߟߏ߬ ߘߋ߲ߞߍ ߡߍ߲ ߠߎ߬ ߓߐߣߍ߲߫ ߊߟߎ߫ ߛߏ߬ߙߏ ߟߎ߬ ߘߐ߫ ߸ ߏ߬ ߟߎ߫ ߡߏ߬ߛߏ ߟߎ߬ ߝߘߎ ߟߊߕߐ߲ߣߍ߲߫ ߊߟߎ߫ ߡߊ߬ ، ߊߟߎ߫ ߘߏ߲߬ ߞߊߣߊ߬ ߓߊߘߋ߲ߡߊ߫ ߝߌ߬ߟߊ߬ ߟߊߘߍ߬ ߞߋߟߋ߲ߘߌ߫ ߸ ߝߏ߫ ߡߍ߲ ߞߍߣߍ߲߫ ߞߘߐ ߦߋ߫ ، ߖߊ߯ߕߋ߬ ߸ ߊߟߊ߫ ߦߋ߫ ߦߝߊ߬ߟߊ߫ ߘߌ߫ ߊ߬ ߦߋ߫ ߤߌߣߟߊ߫ ߘߌ߫ ﴿23﴾

ߡߛߏ߬ ߝߘߎߕߊ ߟߎ߬ ߝߣߊ߫ ߘߐ߫ ߸ ߓߐ߬ߟߐ߲߬ߞߊ ߟߎ߬ ߟߊߕߐ߲ߣߍ߲߫ ߊߟߎ߫ ߡߊ߬ ( ߡߏ߬ߛߏ߫ ߗߍ߬ ߕߌ߮ ߟߎ߫ ߞߊ߬ߣߌ߲߫ ) ߸ ߝߏ߫ ߊߟߎ߫ ߓߊ߯ ߡߍ߲ ߠߎ߫ ߛߐ߬ߘߐ߲߬ ߓߟߏߡߐ߯ߦߊ ߘߐ߫ ، ߊߟߊ߫ ߟߊ߫ ߛߓߍߒߞߊ߲ߠߊ ߣߊ߬ ߢߌ߲߬ ߠߎ߫ ߟߋ߬ ߟߊߕߐ߲߫ ߠߴߊߟߎ߫ ߡߊ߬ ، ߢߌ߲߬ ߠߎ߬ ߓߐ߲߯ߕߍ߫ ߕߐ߭ ߓߍ߯ ߘߤߊ߬ߣߍ߲߫ ߊߟߎ߫ ߦߋ߫ ، ߊߟߎ߫ ߞߏ߬ߣߌ߲߬ ߦߴߊ߬ߟߎ߬ ߢߌߣߌ߲߫ ߊߟߎ߫ ߟߊ߫ ߣߊ߲߬ߝߟߏ ߟߎ߫ ߟߋ߬ ߟߊ߫ ߝߘߎ ߟߊ߬ߛߐ߲ ߛߌߟߊ ߝߍ߬ ߸ ߢߊ߬ߡߐ߰ߦߊ ߛߌߟߊ ߕߍ߫ ߘߋ߬ ، ߊߟߎ߫ ߘߏ߲߬ ߓߊ߯ ߊߟߎ߫ ߘߊ߰ߡߎ߲߫ ( ߡߛߏ߬ ߝߘߎߕߊ ) ߏ߬ ߡߍ߲ ߠߎ߬ ߟߊ߫ ߸ ߊߟߎ߯ ߏ߬ ߟߎ߬ ߝߘߎߝߋ߲ ߠߎ߬ ߘߌ߫ ߊ߬ߟߎ߫ ߡߊ߬ ߘߊ߰ߡߎ߲߬ ߛߙߊ ߘߌ߫ ߘߌߦߊߜߏߦߊ ߟߊ߫ ، ߣߴߊߟߎ߫ ߘߏ߲߬ ߓߍ߲߬ ߘߴߊߟߎ߫ ߣߌ߫ ߢߐ߲߮ ߕߍ߫ ߝߋ߲߫ ߜߘߍ ߡߍ߲ ߠߎ߫ ߡߊ߬ ߝߘߎߝߋ߲߫ ߘߌߦߊߜߏߦߕߊ ߞߐ߫ ߸ ߞߎ߲߬ߞߏ߬ ߕߍ߫ ߊߟߎ߫ ߡߵߏ߬ ߝߣߊ߫ ߘߐ߫ ، ߖߊ߯ߕߋ߬ ߸ ߊߟߊ߫ ߦߋ߫ ߟߐ߲ߠߌ߲ߠߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿24﴾

ߣߴߊߟߎ߫ ߡߍ߲ ߕߍ߫ ߣߊ߲߬ߝߟߏ߬ ߟߊߣߐ߬ ߞߊ߬߬ ߤߙߐ߫ ߡߛߏ߫ ߘߍ߲߬ߞߣߍ߬ߦߊ߬ߣߍ߲ ߠߎ߬ ߝߘߎ߫ ߸ ߏ߬ ߦߴߊߟߎ߫ ߓߟߏߡߐ߮ ߟߎ߬ ߘߏ߫ ߕߊ߬ ߸ ߊߟߎ߫ ߟߊ߫ ߝߎߣߎ߲ߞߋ߫ ߡߛߏ߫ ߘߍ߲߬ߞߣߍ߬ߦߊ߬ߣߍ߲ ߠߎ߬ ߘߐ߫ ، ߊߟߊ߫ ߟߋ߫ ߞߵߊߟߎ߫ ߟߊ߫ ߘߍ߲߬ߞߣߍ߬ߦߊ ( ߓߍ߬ߙߍ ) ߟߐ߲߫ ، ߊߟߎ߫ ߘߏ߲߬ ߓߐߣߍ߲߫ ߢߐ߲߮ ߠߋ߬ ߘߐ߫ ، ߞߏ߬ߣߌ߲߬ ߊߟߎ߫ ߦߴߊ߬ߟߎ߬ ߝߘߎ߫ ߊ߬ߟߎ߬ ߓߘߊߡߐ߮ ߟߎ߫ ߟߊ߫ ߘߌ߬ߢߍ ߟߋ߬ ߟߊ߫ ߘߋ߬ ߸ ߊߟߎ߫ ߘߏ߲߬ ߦߴߊ߬ߟߎ߬ ߝߘߎߝߋ߲ ߠߎ߬ ߘߴߊ߬ߟߎ߫ ߡߊ߬ ߞߎ߬ߙߎ߲߬ߘߎ ߞߣߐ߫ ߟߋ߬ ߞߵߊ߬ߟߎ߬ ߞߍ߫ ߓߐ߬ߟߐ߲߬ߞߊ ߟߎ߬ ߘߌ߫ ߸ ߊ߬ߟߎ߬ ߞߊߣߊ߬ ߞߍ߫ ߢߊ߬ߡߐ߰ߡߛߏ߫ ߟߎ߫ ߘߌ߫ ߘߋ߬ ߸ ߊ߬ߟߎ߫ ߘߏ߲߬ ߞߊߣߊ߬ ߞߍ߫ ߢߊ߬ߡߐ߰ߞߍ߫ ߡߌ߬ߘߊ߬ߓߊ߯ ߟߎ߫ ߘߌ߫ ، ߣߴߊ߬ߟߎ߫ ߘߏ߲߬ ߞߍ߫ ߘߊ߫ ߓߐ߬ߟߐ߲߬ߞߊ ߟߎ߬ ߘߌ߫ ߸ ߣߴߊ߬ߟߎ߫ ߞߊ߬ ߖߊߕߐߦߊ ߞߍ߫ ߏ߬ ߘߐ߫ ߸ ߤߙߐ߫ ߡߛߏ ߟߎ߬ ߕߊ߫ ߖߊ߲߰ߞߕߊ ߕߟߊߒߕߍ ߦߋ߫ ߟߴߊ߬ߟߎ߫ ߞߊ߲߬ ، ( ߕߙߊ߬ ߡߛߏ߬ ߕߊ ) ߏ߬ ߝߊ߲߭ ( ߠߊߘߤߊ߬ߣߍ߲߫ ߡߐ߰ ߟߋ߬ ߦߋ߫ ) ߡߍ߲ ߓߊ߯ ߛߌߟߊ߲߫ ( ߗߍ߬ߜߊ߬ߣߊ߲߬ߧߊ ) ߘߋ߬ߥߎ ߟߊ߫ ، ߣߴߊߟߎ߫ ߞߏ߬ߣߌ߲ ߞߵߊߟߎ߫ ߡߎ߬ߢߎ߲߬ ߸ ߏ߬ ߟߋ ߘߌߡߊ߲߫ ߊߟߎ߫ ߟߊ߫ ، ߊߟߊ߫ ߘߏ߲߬ ߦߋ߫ ߦߝߊ߬ߓߊ߯ ߘߌ߫ ߸ ߊ߰ ߤߌߣߟߊ߫ ߘߌ߫ ﴿25﴾

ߊߟߊ߫ ߦߴߊ߬ ߝߍ߬ ߟߋ߬ ߞߊ߬ ߝߊߙߊ߲ߝߊߛߌ ߞߍ߫ ߊߟߎ߫ ߦߋ߫ ، ߞߵߊߟߎ߫ ߞߊ߲ߘߴߊߟߎ߫ ߢߍߓߊ߯ ( ߓߘߍ ߟߎ߬ ) ߟߊ߫ ߛߌߟߊ ߟߎ߫ ߞߊ߲߬ ߸ ߊ߬ ߣߌ߫ ߞߊ߬ ߖߘߍ߬ߟߊ߬ߛߊߦߌ ߡߌ߬ߘߵߊߟߎ߫ ߦߋ߫ ߸ ߊߟߊ߫ ߘߏ߲߬ ߦߋ߫ ߟߐ߲ߠߌ߲ߠߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߊ߫ ߘߌ߫ ﴿26﴾

ߊߟߊ߫ ߦߴߊ߬ ߝߍ߬ ߟߋ߬ ߸ ߞߊ߬ ߖߘߍ߬ߟߊ߬ߛߊߦߌ ߡߌ߬ߘߵߊߟߎ߫ ߦߋ߫ ، ߣߋ߬ߦߌ ߟߎ߬ ߟߊ߬ߓߊ߬ߕߏ߬ߟߊ ߟߎ߫ ߘߏ߲߬ ߦߴߊ߬ ߝߍ߬ ߟߋ߬ ߸ ߊߟߎ߫ ߦߋ߫ ߖߍ߲߬ߞߍ߫ ߖߍ߲߬ߞߍ߬ߟߌ߬ ߓߟߋߓߟߋ ߟߊ߫ ߝߊ߯ߙߌ߫ ﴿27﴾

ߊߟߊ߫ ߦߴߊ߬ ߝߍ߬ ߞߵߊߟߎ߫ ߘߏ߬ߣߌ߲ ߠߋ߬ ߟߊߝߍ߯ߦߊ߫ ، ߓߊߏ߬ ߡߐ߱ ߘߊ߲ߣߍ߲߫ ߖߐ߲ߝߐ߲ ߠߋ߬ ߟߊ߫ ﴿28﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߞߊߣߊ߬ ߊߟߎ߫ ߢߐ߲߮ ߠߊ߫ ߣߊ߲߬ߝߟߏ ߟߎ߬ ߘߊߥߎ߲߫ ߢߐ߲߮ ߕߍ߫ ߣߊ߲߬ߞߊ߬ߡߎ߲߬ߣߊ߲ߞߊߡߎ߲ ߠߊ߫ ߘߋ߬ ߸ ߝߏ߫ ߊ߬ ߦߋ߫ ߞߍ߫ ߖߊ߬ߥߏ߫ ߟߋ߬ ߘߐ߫ ߊߟߎ߫ ߖߍ߬ߘߍ ߕߊ߫ ߘߌ߬ߢߍ߬ ߓߟߏ ߡߊ߬ ، ߊߟߎ߫ ߘߏ߲߬ ߞߊߣߵߊߟߎ߫ ߢߐ߲߮ ߝߊ߰ ߘߋ߬ ، ߖߊ߯ߕߋ߬ ߸ ߊߟߎ߫ ߡߊ߬ߤߌߣߊ ߖߍ߬ߘߍ ߟߋ߬ ߊߟߊ߫ ߟߊ߫ ﴿29﴾

ߡߍ߲ ߓߊ߯ ߖߘߍ߬ߝߊ߮ ߏ߬ ߞߍ߫ ߖߎ߯ߦߊ ߡߊ߬ ߊ߬ ߣߌ߫ ߕߐ߬ߢߍ߮ ߡߊ߬ ߸ ߛߋߚߋ߫ ߊ߲ ߓߍߣߵߏ߬ ߟߊߘߏ߲߬ ߕߊ ߘߐ߫ ، ߏ߬ ߘߏ߲߬ ߣߐ߲߰ߡߊ߲߬ߓߊ ߟߋ߬ ߊߟߊ߫ ߡߊ߬ ﴿30﴾

ߣߴߊߟߎ߫ ߞߵߊߟߎ߫ ߡߊߓߐ߫ ߊߟߎ߫ ߝߊߕߊ߲ߕߌ߫ ߞߏߓߊ ߟߎ߬ ߟߊ߫ ߸ ߊ߲ ߘߴߊ߬ ߡߌ߬ߛߍ߲߬ߡߊ߲ ߠߎ߬ ߟߊߓߋ߬ ߊߟߎ߫ ߦߋ߫ ، ߊ߬ ߣߌ߫ ߞߵߊߟߎ߫ ߟߊߘߏ߲߬ ߘߏ߲߬ ߦߙߐ߬ ߢߌߡߊ߫ ߘߐ߫ ﴿31﴾

ߊߟߎ߫ ߞߊߣߊ߬ ߕߏ߫ ߝߋ߲߫ ߣߕߊ߬ ߟߊ߫ ߸ ߊߟߊ߫ ߞߵߊߟߎ߫ ߟߊߝߌ߬ߛߦߊ߬ ߢߐ߲߮ ߘߌ߫ ߡߍ߲ ߠߊ߫ ، ߣߌ߬ ߦߋ߫ ߗߍ߭ ߟߎ߬ ߦߋ߫ ߊ߬ߟߎ߬ ߓߊ߯ߙߊ߫ ߣߐ ߘߐ߫ ߸ ߣߌ߬ ߦߋ߫ ߡߏ߬ߛߏ ߟߎ߬ ߝߣߊ߫ ߦߋ߫ ߊ߬ߟߎ߬ ߓߊ߯ߙߊ߫ ߣߐ ߘߐ߫ ، ߊߟߎ߫ ߦߴߊߟߊ߫ ߕߙߴߊ߬ ߟߊ߫ ߢߊ߬ߒߡߊ߭ ߟߋ߬ ߟߊ߫ ، ߖߊ߯ߕߋ߬ ߸ ߊߟߊ߫ ߞߊ߬ ߞߏ ߓߍ߯ ߟߐ߲߫ ߠߋ߬ ߕߊߦߌ߫ ﴿32﴾

ߊ߲ ߓߘߊ߫ ߓߍ߯ ߕߊ߫ ߗߍߕߊߓߊ߯ ߞߏߝߐ߫ ߡߏߦߌߓߊ߯ ߝߌ߬ߟߊ ߗߍ ߘߐ߫ ߸ ߓߊߘߋ߲ߡߊ ߟߎ߬ ߗߍ ߘߐ߫ ߸ ߊ߬ ߣߴߊߟߎ߫ ߟߊ߬ߤߘߌ߬ߢߐ߲߮ ߠߎ߬ ߗߍ ߘߐ߫ ، ߒ߬ߓߵߊߟߎ߫ ߦߴߏ߬ ߟߎ߬ ߓߍ߯ ߣߌ߭ ߘߴߊ߬ߟߎ߫ ߡߊ߬ ߟߋ ߘߋ߬ ، ߖߊ߯ߕߋ߬ ߸ ߊߟߊ߫ ߦߋ߫ ߞߏ ߓߍ߯ ߛߙߋ ߟߋ߬ ߘߌ߫ ﴿33﴾

ߗߍ߭ ߟߎ߫ ߟߋ߫ ߡߏ߬ߛߏ ߟߎ߬ ߟߊߕߋߟߋ߲ߓߊ߮ ߟߎ߬ ߘߌ߫ ، ߞߊ߬ߡߊߛߐ߬ߘߐ߲߬ ߊߟߊ߫ ߞߵߊ߬ߟߎ߬ ߘߏ߫ ߟߊߝߌ߬ߛߊ߬ߦߊ ߡߍ߲ ߞߍ߫ ߘߏ߫ ߘߌ߫ ߸ ߊ߬ ߣߌ߫ ߞߊ߬ߡߊߛߐ߬ߘߐ߲߬ ߊ߬ߟߎ߬ ߦߋ߫ ߡߏ߬ߛߏ ߟߎ߫ ߡߎ߬ߛߊ߬ߞߊ ߡߍ߲ ߠߎ߬ ߞߍ߫ ߟߴߊ߬ߟߎ߬ ߟߊ߫ ߣߊ߲߬ߝߟߏ ߘߐ߫ ، ߒ߬ߓߊ߬ ߡߛߏ߬ ߢߌߡߊ ߟߎ߫ ߟߴߊ߬ߟߎ߫ ߖߘߍ߬ ߞߟߏ߫ ߟߊ߫ ߸ ߞߵߊߟߊ߫ ߟߊ߫ ߝߋ߲߫ ߞߊ߬ߙߌ߬ߝߊ߬ߣߍ߲ ߠߊߕߊ߲߬ߞߊ߫ ߘߏ߲߰ ߘߐ߫. ߒ߬ߞߵߊߟߎ߫ ߓߊ߯ ߛߌߟߊ߲߫ ( ߡߏ߬ߛߏ ) ߡߍ߲ ߠߎ߬ ߟߊ߫ ߣߎ߲ߞߘߐߕߊ ߢߍ߫ ߸ ߊߟߎ߯ ߏ߬ ߟߎ߬ ߟߊߟߌ߫ ߸ ߞߵߊߟߎ߫ ߝߎ߬ߙߎ߲߬ߞߎ߫ ߊ߬ߟߎ߬ ߟߊ߫ ߟߊߝߋ߲ ߠߎ߬ ߘߐ߫ ߸ ߊ߬ ߣߌ߫ ߞߵߊ߬ߟߎ߫ ߜߊ߬ߛߌ߬. ߣߴߊ߬ߟߎ߫ ߞߵߊߟߎ߫ ߞߊ߲ ߡߌ߬ߘߊ߬ ߸ ߊߟߎ߫ ߞߊߣߊ߬ ߡߐߣߍߦߊ߫ ߟߊߓߐ߫ ߛߌߟߊ߫ ߟߐ߬ ߊ߬ߟߎ߫ ߡߊ߬ ߡߎ߬ߕߎ߲߬. ߖߊ߯ߕߋ߬ ߊߟߊ߫ ߦߋ߫ ߔߏ߲ߞߌ߲߫ ߘߌ߫ ߸ ߊ߰ ߘߊ߲߬ߞߙߐ߬ߓߊ߫ ߘߌ߫ ﴿34﴾

ߣߴߊߟߎ߫ ߛߌߟߊ߲߫ ߘߊ߫ ߝߘߎߡߊ߫ ߝߌ߬ߟߊ ߕߍߜߟߍߦߊ ߟߊ߫ ߸ ߊߟߎ߫ ߦߋ߫ ߕߍߝߐߓߊ߯ ߞߋߟߋ߲߫ ߠߊߥߟߌ߬ ߗߍ߭ ߓߘߊߡߐ߮ ߘߐ߫ ߸ ߞߊ߬ ߕߍߝߐߓߊ߯ ߟߊߥߟߌ߬ ߡߏ߬ߛߏ ߝߣߊ߫ ߓߘߊߡߐ߮ ߘߐ߫ ، ߣߌ߫ ߝߘߎߡߊ߫ ߝߌ߬ߟߊ ߞߍ߫ ߘߊ߫ ߕߍߘߐߓߍ߲ ߝߍ߬ ߸ ߊߟߊ߫ ߘߌ߫ ߓߍ߲߭ ߠߊߘߏ߲߬ ߊ߬ߟߎ߬ ߕߍ߫ ߟߴߏ߬ ߘߐ߫ ߘߍ߯ ، ߖߊ߯ߕߋ߬ ߸ ߊߟߊ߫ ߟߐ߲ߠߌ߲ߠߊ߫ ߘߌ߫ ߸ ߊ߬ ߦߋ߫ ߞߟߊ߬ߡߊ߬ߓߊ߯ ߘߌ߫ ﴿35﴾

ߊߟߎ߯ ߊߟߊ߫ ߓߊ߬ߕߏ߬ ، ߊߟߎ߫ ߞߊߣߊ߬ ߝߋ߲߫ ߝߊ߬ߙߴߊ߬ ߞߊ߲߬ ߘߋ߬ ، ߊߟߎ߫ ߢߊ߬ ߡߏߦߌߓߊ߯ ߝߌ߬ߟߊ ߟߊ߫ ߸ ߡߊ߬ߛߎ߬ߘߎ߲߬ߧߊ߬ߓߊ߮ ߟߎ߬ ߟߊ߫ ߸ ߝߊߙߌߕߊ ߟߎ߬ ߟߊ߫ ߸ ߘߐ߰ߕߐ ߟߎ߬ ߟߊ߫ ߸ ߛߌ߰ߢߐ߲߰ߡߊ߬ ߛߎߘߎ߲ ߠߎ߬ ߟߊ߫ ߸ ߛߌ߰ߢߐ߲߰ߡߊ߬ ߖߊ߲ ߠߎ߬ ߟߊ߫ ߸ ߘߍ߬ߢߐ߲߮ ߠߊ߫ ߡߍ߲ ߦߴߊߟߎ߫ ߝߎ߬ߘߎ ߝߍ߬ ߜߐߞߎ߫ ߸ ߛߌߟߊߘߋ߲ ߠߊ߫߸ ߊ߬ ߣߴߊߟߎ߫ ߓߟߏߡߐ߮ ߟߎ߬ ߟߊ߫ ، ߖߊ߯ߕߋ߬ ߸ ߊߟߊ߫ ߕߍ߫ ߢߊ߲߬ߞߊ߲߬ߓߊ߯ ߥߊߛߏߟߊ ߝߍ߬ ﴿36﴾

ߡߍ߲ ߠߎ߬ ߦߋ߫ ߖߎ߯ߡߊ߲ߒߕߋߦߊ ߞߍ߫ ߟߊ߫ ߸ ߞߊ߬ ߓߊ߲߫ ߞߊ߬ ߡߐ߱ ߟߎ߫ ߟߐ߬ ߖߎ߯ߡߊ߲ߒߕߋߦߊ ߟߊ߫ ، ߊ߬ ߣߌ߫ ߊߟߊ߫ ߣߵߊ߬ ߟߊ߫ ߢߊ߬ߒߡߊ߭ ߡߍ߲ ߞߍ߫ ߟߴߊ߬ߟߎ߬ ߦߋ߫ ߸ ߊ߬ߟߎ߬ ߦߴߏ ߘߏ߲߰ ߠߊ߫ ߗߙߎ߫ ، ߊ߲ ߘߏ߲߬ ߣߊ߬ ߘߐ߯ߦߊ ߖߊ߲߰ߞߕߊ ߟߋ߬ ߘߐߓߍ߲߬ ߠߊ߫ ߓߊ߲߬ߓߊ߮ ߟߎ߬ ߦߋ߫ ﴿37﴾

ߊ߬ ߣߌ߫ ߝߣߊ߫ ߸ ߡߍ߲ ߠߎ߬ ߦߴߊ߬ߟߎ߬ ߟߊ߫ ߣߊ߲߬ߝߟߏ ߟߎ߫ ߡߎ߬ߛߞߊ߬ ߟߊ߫ ߡߐ߱ ߟߎ߬ ߢߊߞߘߐߟߊ ߡߊ߬ ߸ ߊ߬ߟߎ߫ ߘߏ߲߬ ߕߍ߫ ߘߍ߲߬ߞߣߍ߬ߦߊ߬ ߟߴߊߟߊ߫ ߣߌ߫ ߟߏ߲ߠߊߓߊ߲ ߡߊ߬ ، ߜߍ߬ߘߍ ߘߏ߲߬ ߓߊ߯ ߞߍ߫ ߡߍ߲ ߞߙߎߝߊߢߐ߲߮ ߘߌ߫ ߸ ߏ߬ ߦߋ߫ ߞߙߎߝߊߢߐ߲߯ ߖߎ߮ ߟߋ߬ ߘߌ߫ ߞߟߋ߫ ﴿38﴾

ߞߎ߲߬ߞߏ ߢߌ߬ߡߊ߲߫ ߊ߬ߟߎ߫ ߡߊ߬ ߸ ߣߴߊ߬ߟߎ߫ ߘߍ߲߬ߞߣߍ߬ߦߊ߬ ߘߴߊߟߊ߫ ߣߌ߫ ߟߏ߲߫ ߠߊߓߊ߲ ߡߊ߬ ߸ ߊ߬ ߣߌ߫ ߞߊ߬ ߖߘߍ߬ߡߊ߬ߓߐ ߞߍ߫ ߝߋ߲߫ ߘߐ߫ ߊߟߊ߫ ߞߵߊ߬ߟߎ߫ ߤߊ߬ߙߌ߬ߖߍ߰ ߡߍ߲ ߠߊ߫؟ ߊߟߊ߫ ߘߏ߲߬ ߦߴߊ߬ߟߎ߬ ߟߐ߲ߓߊ߮ ߟߋ߬ ߘߌ߫ ߘߋ߬ ﴿39﴾

ߝߋߎ߫ ߸ ߊߟߊ߫ ߕߍ߫ ߕߐ߬ߢߍ߮ ߞߍ߫ ߟߊ߫ ߝߕߌ߫ ߖߌߘߊ߲ߣߍ߲߫ ߢߐ߲߰ ߠߊ߫ ، ߣߴߏ߬ ߘߏ߲߬ ߞߍ߫ ߘߊ߫ ߢߌ߬ߡߊ ߘߌ߫ ߊ߬ ߦߴߏ߬ ߓߊߟߌ߫ ߟߊ߫ ߟߋ߬ ، ߊ߬ ߣߌ߫ ߞߊ߬ ߓߙߊ߬ߖߌ߬ߓߊ ߘߌ߫ ߸ ߞߵߏ߬ ߝߘߴߊ߬ ߖߍ߬ߘߍ ߟߊ߫ ﴿40﴾

ߐ߬ߤߐ߲߫ ߸ ߣߴߊ߲ ߣߊ߬ ߘߊ߫ ߡߊ߲߬ߕߏ߲ ߓߍ߯ ߕߊ߫ ߛߙߋ߫ ߘߌ߫ ߕߎ߬ߡߊ ߡߍ߲ ߸ ߞߣߊ߬ ߌߟߋ ߞߍ߫ ߢߌ߲߬ ߠߎ߬ ߛߙߋ ߘߌ߫ ( ߏ߬ ߓߍ߫ ߞߍ߫ ߘߌ߬ ߛߊ߫؟) ﴿41﴾

ߒ߬ߓߊ߬ ߏ߬ ߟߏ߲ ߠߋ߬ ߸ ߓߊ߲߬ߓߊ߮ ߟߎ߬ ߣߌ߫ ߞߋߟߊ ߛߐ߬ߛߐ߬ߓߊ߮ ߟߎ߬ ߘߴߊ߬ ߣߕߊ߬ ߸ ߞߏ߫ ߥߟߊߞߏ߫ ߘߎ߱ ߘߊ ߕߘߍ߬ ߦߋ߫ ߟߊߛߌ߬ ߊ߬ߟߎ߫ ߡߊ߬ ߡߟߍߞߘߍ߫ ، ߊ߬ߟߎ߫ ߘߏ߲߬ ߕߴߛߋ߫ ߞߎߡߊ߫ ߛߌ߫ ߘߏ߲߰ ߠߴߊߟߊ߫ ߡߊ߬ ﴿42﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߞߊߣߵߊߟߎ߫ ߡߊߘߏ߲߬ ߛߊߟߌ ߟߊ߫ ߘߋ߬ ߞߵߊߟߎ߫ ߡߌߟߏߣߍ߲ ߕߏ߫ ߸ ߝߏ߫ ߊߟߎ߫ ߓߊ߯ ߊ߬ ߟߐ߲߫ ߊߟߎ߫ ߦߋ߫ ߡߍ߲ ߝߐ߫ ߟߊ߫ ، ߊߟߎ߫ ߘߏ߲߬ ߞߴߊߟߎ߫ ߕߏ߫ ߞߛߐߓߊ ߘߐ߫ ߞߊ߬ ߛߊߟߌ߫ ߸ ߝߏ߫ ߊߟߎ߫ ߓߊ߯ ߊߟߎ߫ ߞߏ߬ ߸ ߝߏ߫ ߛߌߟߊ ߕߊ߯ߡߊߘߋ߲ ߠߎ߬ ، ߣߴߊߟߎ߫ ߖߊ߲߬ߞߊ߬ߙߏ߬ߕߐ ߞߍ߫ ߘߊ߫ ߸ ߥߟߴߊߟߎ߫ ߞߍ߫ ߘߊ߫ ߕߊ߯ߡߊ ߘߐ߫ ߸ ߤߊߡߊ߲ߕߍ߫ ߊߟߎ߫ ߘߏ߫ ߓߐ߫ ߘߊ߫ ߞߐߡߊߕߊ߯ ߦߌߟߊ ߸ ߥߟߴߊߟߎ߫ ߡߊ߰ ߘߊ߫ ߡߏ߬ߛߏ ߟߎ߬ ߟߊ߫ ߸ ߊߟߎ߫ ߘߏ߲߬ ߡߊ߫ ߖߌ߫ ߛߐ߬ߘߐ߲߬ ߸ ߒ߬ߓߵߊߟߎ߫ ߛߊߟߌߓߎ߯ߘߌߕߊ߬ ߘߎ߱ ߝߊ߬ߘߌ߬ ߛߊߣߌ߲ߡߊ߲ ߠߊ߫ ߸ ߞߵߊߟߎ߫ ߢߊߘߐߟߊ ߟߎ߬ ߣߴߊߟߎ߫ ߕߍ߮ ߟߎ߬ ߡߊߛߏ߬ߛߊ߬ ، ߖߊ߯ߕߋ߬ ߸ ߊߟߊ߫ ߦߋ߫ ߜߊ߲ߒߞߎ߲ߠߟߊ߫ ߘߌ߫ ߸ ߊ߰ ߦߝߊ߬ߟߊ߫ ߘߌ߫ ﴿43﴾

ߌ ߡߴߊ߬ ߦߋ߫ ߓߊ߬ ߡߍ߲ ߠߎ߬ ߛߐߣߍ߲߫ ߖߌ߰ ߟߍߙߊ ߘߏ߫ ߟߊ߫ ߸ ߏ߬ ߟߎ߫ ߟߋ߫ ߝߌ߬ߟߌ ߛߊ߲߬ ߠߊ߫ ߸ ߊ߬ߟߎ߬ ߦߴߊ߬ ߝߍ߬ ߝߣߊ߫ ߊߟߎ ߦߋ߫ ߝߟߌ߬ ߛߌߟߊ ߡߊ߬ ﴿44﴾

ߊߟߊ߫ ߞߵߊߟߎ߫ ߖߎ߮ ߟߎ߬ ߟߐ߲߫ ߖߐ߫ ، ߊߟߊ߫ ߘߏ߲߬ ߥߛߊ߬ ߘߊ߫ ( ߡߐ߰ ) ߢߌ߲߬ ߘߌ߫ ߸ ߊ߬ ߥߛߊ߬ ߘߊ߫ ߘߍ߲߬ߡߍ߲߬ߓߊ߯ ߘߌ߫ ﴿45﴾

ߞߊ߬ ߕߊ߬ߡߌ߲߬ ߡߐ߱ ߟߎ߫ ߞߊ߲߬ ߡߍ߲ ߠߎ߬ ߞߍ߫ ߘߊ߫ ߦߊ߬ߤߎ߯ߘߎ ߘߌ߫ ߸ ߏ߬ ߟߎ߫ ߟߋ߬ ߞߎߡߊ ߦߟߍ߬ߡߊ߲߬ ߠߊ߫ ߞߊ߬ ߓߐ߫ ߊ߬ ߢߊ ߡߊ߬ ، ߊ߬ߟߎ߬ ߘߴߊ߬ ߝߐ߫ ߞߏ߫ ߊ߲ ߓߘߊ߫ ߡߍ߲ߠߌ߲ ߞߍ߫ ߸ ߞߏ߬ߣߵߊ߲ ߓߘߊ߫ ߡߊ߬ߛߐ߬ߛߐ߬ߟߌ ߞߍ߫ ، ߊ߬ ߣߴߊ߬ߟߎ߬ ߘߴߊ߬ ߝߐ߫ ߞߏ߫ ߌ ߕߟߏߡߊߟߐ߬ ߞߵߊ߬ ߕߘߍ߬ ߝߏߦߌ߬ ߕߍ߫ ( ߝߐ߫ ߟߊ߫ ) ߡߍ߲ ߘߌ߫ ߟߊߡߍ߲߫ ، ߊ߬ ߣߌ߫ ߞߏ߫ ߊ߲ ߠߊߣߍ߰ߣߍ߯ ߞߵߏ߬ ߝߐ߫ ߣߍ߲߬ ߘߐ߬ ߞߙߎ ߘߐ߫ ߘߌ߯ߣߊ ߘߐߝߎ߬ߙߎ߲߬ ߞߊ߲ ߡߊ߬ ، ߣߴߊ߬ߟߎ߫ ߘߏ߲߬ ߕߎ߲߬ ߞߵߊ߬ ߝߐ߫ ߞߏ߫ ߊ߲ ߓߘߊ߫ ߡߍ߲ߠߌ߲ ߞߍ߫ ߞߊ߬ ߞߊ߲߫ ߡߌߘߊ ߞߍ߫ ߸ ߊ߬ ߣߌ߫ ߞߏ߫ ߌ ߕߟߏߡߊߟߐ߬ ߌ ߦߴߊ߲ ߡߊߝߟߍ߫ ߸ ߏ߬ ߕߎ߲߬ ߘߌ߫ ߞߍ߫ ߊ߬ߟߎ߫ ߡߊ߬ ߤߙߊ߫ ߘߌ߫ ߸ ߊ߬ ߘߌ߫ ߞߍ߫ ߞߏ߫ ߕߋߟߋ߲ߣߍ߲߫ ߘߌ߫ ، ߓߊ߬ߙߌ߬ ߊߟߊ߫ ߟߋ߫ ߣߵߊ߬ߟߎ߬ ߘߊ߲ߞߊ߫ ߟߴߊ߬ߟߎ߬ ߟߊ߫ ߓߊ߲߬ߓߊ߰ߦߊ ߞߏߛߐ߲߬ ، ߊ߬ߟߎ߬ ߕߍ߫ ߘߍ߲߬ߞߣߍ߬ߦߊ߫ ߟߴߏ߬ ߟߋ ߘߐ߫ ߝߏ߫ ߊ߬ߟߎ߫ ߞߋ߬ߟߋ߲߬ߞߋߟߋ߲߫ ﴿46﴾

ߤߍ߲߬ ߊߟߎ߬ ߟߍߙߊߟߞߊ ߟߎ߬ ߸ ߊߟߎ߫ ߘߍ߲߬ߞߣߍ߬ߦߵߊ߲ ߠߊ߫ ߟߍߙߊ߫ ߟߊߖߌ߰ߣߍ߲ ߡߊ߬ ߸ ߞߵߊ߬ ߞߍ߫ ߊߟߎ߫ ߓߟߏߕߊ ߟߊߛߙߋߦߊߟߊ߲ ߘߌ߫ ، ( ߊߟߎ߫ ߏ߬ ߘߍ߲߬ߞߣߍ߬ߦߊ ߞߍ߫ ) ߛߊߣߌ߬ ߒ ߞߍ߫ ߕߍ߫ ߢߊ ߟߎ߬ ߓߎߙߎ߲ߞߐ߫ ߟߊ߫ ߸ ߊ߬ ߣߌ߫ ߞߵߊ߬ߟߎ߬ ߟߊߛߊ߬ߦߌ߬ ߊ߬ߟߎ߬ ߞߕߐߡߊ߬ ߸ ߥߟߴߊ߲ ߣߊ߬ߡߊߣߵߊ߬ߟߎ߬ ߘߊ߲ߞߊ߫ ߸ ߦߏ߫ ߊ߲ ߞߊ߬ ߞߍ߲ߘߍߟߏ߲ߠߞߊ (ߛߓߌߕߌߟߞߊ ) ߟߎ߬ ߘߊ߲ߞߊ߫ ߢߊ ߡߍ߲ ، ߊߟߊ߫ ߟߊ߫ ߞߏ߫ ( ߝߐߣߍ߲ ) ߘߏ߲߬ ߦߋ߫ ߞߍ߫ ߟߊ߫ ߟߋ߬ ߛߋߚߋ߫ ﴿47﴾

ߊߟߊ߫ ߕߍ߫ ߞߏ ߡߍ߲ ߦߝߊ߬ ߝߋߎ߫ ߸ ߏ߬ ߟߋ ߘߏ߫ ߝߊ߬ߙߊ ߘߴߊ߬ ߡߊ߬ ߸ ߊ߬ ߞߏ߬ߣߌ߲ ߘߌ߫ ߞߏ߫ ߜߘߍ߫ ߦߝߊ߬ ߡߍ߲ ߕߴߏ߬ ߘߌ߫ ، ߊ߬ ߦߴߏ߬ ߞߍ߫ ߟߊ߫ ߡߐ߰ ߟߋ߬ ߦߋ߫ ߸ ߡߍ߲ ߓߊ߯ ߊ߬ ߘߌߦߊ߫ ߸ ߡߍ߲ ߞߏ߬ߣߌ߲߬ ߓߊ߯ ߘߏ߫ ߝߙߊ߬ ߊߟߊ߫ ߞߊ߲߬ ߸ ߏ߬ ߓߘߊ߫ ߞߎ߲߬ߞߏ߬ߓߊ߫ ߘߐߕߍ߰ ߏ߬ ߘߌ߫ ߞߟߋ߫ ﴿48﴾

ߌ ߡߴߊ߬ ߦߋ߫ ߓߊ߬ ߡߍ߲ ߠߎ߬ ߦߴߊ߬ߟߎ߫ ߖߘߍ߬ ߟߊߜߍ߫ ߟߊ߫؟ ߊߟߊ߫ ߟߋ߬ ߘߏ߲߬ ߡߐ߰ ߟߊߜߍ߫ ߟߊ߫ ߡߍ߲ ߓߊ߯ ߊ߬ ߘߌߦߊ߫ ، ߊ߬ ߘߏ߲߬ ߕߍ߫ ߡߐ߱ ߟߎ߫ ߕߐ߬ߢߍ߰ ߟߊ߫ ߤߊߟߌ߬ ߕߡߊߙߏ߫ ߝߏߟߏ߲ߣߍ߲߫ ߢߐ߲߰ ߠߊ߫ ﴿49﴾

ߊ߬ ߝߟߍ߫ ߓߊ߫ ߸ ߊ߬ߟߎ߬ ߦߋ߫ ߥߎߦߊ ߟߊ ߞߊ߲߬ ߊߟߊ߫ ߟߊ߫ ߢߊ ߡߍ߲ ، ߏ߬ ߘߏ߲߬ ߥߛߊ߬ ߘߊ߫ ߞߎ߲߬ߞߏ߬ ߘߐ߬ߜߍ߫ ߘߌ߫ ߞߟߋ߫ ﴿50﴾

ߌ ߡߴߊ߬ ߦߋ߫ ߓߊ߬ ߡߍ߲ ߠߎ߬ ߛߐߣߍ߲߫ ( ߖߌ߰ ) ߟߍߙߊ ߘߏ߫ ߟߊ߫؟ ߏ߬ ߟߎ߫ ߟߋ߬ ߘߍ߲߬ߞߣߍ߬ߦߊ߬ ߟߊ߫ ߛߎߓߊ߯ߦߊ߫ ߞߏ ߟߎ߬ ߣߌ߫ ߞߏ߲ߞߏߓߊ ߟߎ߫ ߡߊ߬ ، ߊ߬ߟߎ߬ ߦߴߊ߬ ߝߐ߫ ߟߊ߫ ߓߊ߲߬ߓߊ߮ ߟߎ߫ ߡߊ߬ ߸ ߞߴߏ߬ ߟߎ߫ ߟߋ߬ ߞߊ߲ߘߊ߫ ߛߌߟߊ ߞߊ߲߬ ߞߊ߬ ߕߊ߬ߡߌ߲߬ ( ߛߌ߬ߟߊ߬ߡߊ߫ ) ߘߍ߲߬ߞߣߍ߬ߦߊ߬ߣߍ߲ ߠߎ߫ ߞߊ߲߬ ﴿51﴾

ߒ߬ߓߵߊߟߊ߫ ߣߵߏ߬ ߟߎ߫ ߟߋ߬ ߘߊ߲ߞߊ߫ ߟߊ߫ ، ߊߟߊ߫ ߘߏ߲߬ ߓߊ߯ ߡߍ߲ ߘߊ߲ߞߊ߫ ߸ ߌ ߕߍ߫ ߘߍ߬ߡߍ߲߬ߓߊ߯ ߛߐ߬ߘߐ߲߫ ߏ߬ ߟߊ߫ ߡߎ߬ߕߎ߲߬ ﴿52﴾

ߡߊ߲߬ߛߊ߬ߦߊ ߘߏ߫ ߟߴߊ߬ߟߎ߬ ߓߟߏ߫ ߓߊ߬ ߸ ߏ߬ ߕߎ߬ߡߊ ߝߍ߬ ߊ߬ߟߎ߬ ߕߍ߫ ߡߐ߱ ߟߎ߬ ߛߐ߫ ߕߡߊߙߏ߫ ߘߟߊߛߙߊߓߊ߫ ߢߐ߲߰ߣߍ߲߫ ߘߐ߫ ﴿53﴾

ߦߊ߯ߟߴߊ߬ߟߎ߬ ߦߋ߫ ߡߐ߱ ߟߎ߫ ߓߍ߬ߛߍ߲߬ߞߐ߬ߣߌ߲߬ߧߊ߬ ߟߊ߫ ߟߋ߬ ߊߟߊ߫ ߟߊ߫ ߢߊ߬ߒ߬ߡߊ߬ ߘߌߣߍ߲ ߝߍ߬ ߊ߬ߟߎ߫ ߡߊ߬ ߓߊ߬؟ ߊ߲ ߘߏ߲߬ ߞߊ߬ ߌߓߎ߬ߙߊ߬ߤߌߡߊ߫ ߘߏ߲߬ߞߏ ߟߎ߬ ߛߐ߫ ߟߍߙߊ ߣߌ߫ ߥߘߋ߬ߥߘߋ߬ߟߌ ߟߊ߫ ߸ ߊ߲ ߞߵߊ߬ߟߎ߬ ߛߐ߫ ߝߣߊ߫ ߡߊ߲߬ߛߊ߬ߦߊ߫ ߓߟߋ߬ߓߟߋ ߟߊ߫ ﴿54﴾

ߏ߬ ߘߏ߫ ߟߎ߫ ߘߍ߲߬ߞߣߍ߬ߦߊ߬ ߘߊ߫ ( ߞߎ߬ߙߊ߬ߣߊ ) ߡߊ߬ ߸ ߊ߬ ߘߏ߫ ߟߎ߫ ߞߐߘߏ߲߬ ߘߴߊ߬ ߟߊ߫ ، ߒ߬ߞߊ߬ ߔߊߦߌߔߊߦߌ ߥߛߊ߬ ߘߊ߫ ( ߕߊ߫ ߡߍߣߍ߲߫ ) ߖߌߖߌ߫ ߘߌ߫ ߞߟߋ߫ ﴿55﴾

ߡߍ߲ ߠߎ߫ ߓߊ߲߬ߣߍ߲߫ ߒ߬ ߠߊ߫ ߟߝߊߙߌ ߟߎ߬ ߘߐ߫ ߸ ߛߋߚߋ߫ ߊ߲ ߘߌߣߵߏ߬ ߟߎ߬ ߟߊߘߏ߲߬ ߕߊ ߘߐ߫ ߸ ߊ߬ߟߎ߫ ߜߏ߬ߟߏ ߟߎ߬ ߓߊ߯ ߡߐ߬ ߞߏߕߊ߲߫ ߸ ߊ߲ ߘߌ߫ ߜߟߏ߬ ߜߘߍ߫ ߟߴߊ߬ߟߎ߫ ߞߊ߲߬ ߘߐ ߏ߬ ߟߎ߫ ߝߊ߬ߟߋ߲ ߘߌ߫ ߸ ߛߴߊ߬ߟߎ߬ ߘߌ߫ ߖߊ߲߰ߞߕߊ ߡߊߜߙߏ߬ ( ߓߘߍߞߍ߭ ) ، ߖߊ߯ߕߋ߬ ߸ ߊߟߊ߫ ߦߋ߫ ߣߌ߬ߣߌ߬ߟߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿56﴾

ߒ߬ߓߊ߬ ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߞߊ߬ ߢߌ߬ߡߊ ߟߎ߬ ߞߍ߫ ߸ ߊ߲ ߘߌߣߵߏ߬ ߟߎ߬ ߟߊߘߏ߲߬ ( ߡߍ߲ߘߌߦߊ ) ߣߊߞߐ ߟߎ߬ ߘߐ߫ ߸ ߖߌߢߊ ߟߎ߯ ߥߦߏ߬ ߟߊ߫ ߡߍ߲ ߠߎ߬ ߞߘߐߟߊ ߟߎ߬ ߘߐ߫ ߞߎߟߊ߲ߞߎߟߊ߲߫ ، ߏ߬ ߟߎ߬ ߘߎߡߊߕߐ߫ ߏ߬ ߟߋ ߘߐ߫ ߞߘߊߎ߫ ، ߝߘߎߡߊ߫ ߛߊߣߌ߲ߡߊ߲ ߠߎ߬ ߦߴߊ߬ߟߎ߬ ߢߍ߫ ߦߋ߲߬ ߸ ߊ߬ ߣߴߊ߲ ߘߴߊ߬ߟߎ߬ ߟߊߘߏ߲߬ ߘߎߟߋ߲ߓߊ߫ ߝߌ߰ߝߊ߮ ߟߎ߬ ߞߘߐ߫ ﴿57﴾

ߊߟߊ߫ ߦߴߊߟߎ߫ ߖߡߊ߬ߙߌ߬ ߟߊ߫ ߸ ߞߏ߫ ߊߟߎ߫ ߞߊ߬ߙߌ߬ߝߊ ߟߎ߬ ߟߊߛߊ߬ߦߌ߫ ߊ߬ߟߎ߫ ߕߌ߱ ߟߎ߫ ߡߊ߬ ߸ ߊ߬ ߣߴߊߟߎ߫ ߓߊ߯ ߞߍ߫ ߞߕߌ߫ ߟߊ߫ ߡߐ߱ ߟߎ߬ ߕߍ߫ ߸ ߊߟߎ߯ ߞߕߌ߫ ߕߋߟߋ߲ ߠߊ߫ ، ߖߊ߯ߕߋ߬ ߸ ߊߟߊ߫ ߦߴߊߟߎ߫ ߟߊߟߌ߫ ߟߊ߫ ߓߍ߬ߘߍ߫ ߜߊ߲߬ߛߊ߲߫ ߠߋ߬ ߟߊ߫ ، ߖߊ߯ߕߋ߬ ߸ ߊߟߊ߫ ߦߋ߫ ߡߍ߲ߠߌ߲ߠߊ߫ ߘߌ߫ ߸ ߊ߰ ߦߋߟߌߟߊ߫ ߘߌ߫ ﴿58﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߯ ߊߟߊ߫ ߞߊ߲ ߡߌ߬ߘߊ߬ ߸ ߊ߬ ߣߴߊߟߎ߯ ߞߋߟߊ ߞߊ߲ ߡߌ߬ߘߊ߬ ߸ ߊ߬ ߣߌ߫ ߞߵߊߟߎ߫ ߘߐ߫ ߞߏߕߌ߮ ߟߎ߬ ߞߊ߲ ߡߌ߬ߘߊ߬ ، ߣߴߊߟߎ߫ ߝߐ߫ ߘߊ߫ ߢߐ߲߮ ߞߐ߫ ߞߏ ߡߍ߲ ߘߐ߫ ߸ ߊߟߎ߯ ߏ߬ ( ߞߕߌ ) ߟߊߛߊ߬ߦߌ߬ ߊߟߊ߫ ߣߌ߫ ߞߋߟߊ ߡߊ߬ ، ߣߴߊ߬ ߕߘߍ߬ ߘߴߊߟߎ߫ ߘߍ߲߬ߞߣߍ߬ߦߊ߬ߣߍ߲߫ ߊߟߊ߫ ߣߌ߫ ߟߏ߲߫ ߠߊߓߊ߲ ߡߊ߬ ، ߏ߬ ߟߋ ߝߌ߬ߛߊ߬ ߸ ߞߐߝߟߌ߫ ߢߌߡߊ ߘߏ߲߬ ߏ߬ ߟߋ ߟߊ߫ ﴿59﴾

ߌ ߡߴߊ߬ ߦߋ߫ ߓߊ߬ ߡߍ߲ ߠߎ߬ ߦߴߊ߬ ߜߊߟߏ߲߫ ߠߴߊ߬ߟߎ߬ ߟߊ߫ ߸ ߞߏ߫ ߊ߬ߟߎ߫ ߘߍ߲߬ߞߣߍ߬ߦߊ߬ߣߍ߲߫ ߟߍߙߊ ߡߊ߬ ߡߍ߲ ߠߊߖߌ߰ߣߴߌ ߡߊ߬ ߸ ߊ߬ ߣߌ߫ ߡߍ߲ ߠߊߖߌ߰ ߘߴߌ ߢߍ߫ ، ߏ߬ ߟߎ߫ ߟߴߊ߬ ߝߍ߬ ߣߌ߲߬ ߞߊ߬ ߥߊ߫ ߞߕߌ ߟߊ߫ ߞߏ߲ߞߏߓߊ ߓߘߊ ߸ ߊ߬ߟߎ߫ ߘߏ߲߬ ߜߎ ߟߐ߬ߣߴߊ߬ߟߎ߫ ߓߊ߲߬ ߠߴߏ߬ ߘߐ߫ ߟߋ߬ ، ߞߏ߬ߣߌ߲߬ ߜߍ߬ߘߍ ߟߴߊ߬ ߝߍ߬ ߞߵߊ߬ߟߎ߬ ߟߊߝߌ߬ߟߌ߫ ߝߟߌ߬ ߔߘߋߞߟߋ ߟߊ߫ ﴿60﴾

ߣߴߊ߬ ߝߐ߫ ߘߴߊ߬ߟߎ߬ ߦߋ߫ ߞߏ߫ ߊߟߎ߯ ߣߊ߬ ( ߞߕߌ߫ ) ߊߟߊ߫ ߟߊ߫ ߟߍߙߊ߫ ߟߊߖߌ߰ߣߍ߲ ߡߊ߬ ߸ ( ߊ߬ ߣߌ߫ ) ߞߋߟߊ ߓߘߊ ߸ ߌ ߘߌ߫ ߝߌ߬ߟߊ߲߬ߞߊߝߏ ߟߎ߬ ߞߐߘߏ߲߬ߣߍ߲ ߦߴߏ߬ ߟߊ߫ ߔߏ߲߫ ﴿61﴾

ߊ߬ ߘߏ߲߬ ߝߊ߲߭ ߸ ߣߌ߫ ߡߊ߲߬ߕߙߐ߫ ߞߵߊ߬ߟߎ߫ ߛߐ߬ߘߐ߲߬ ߞߊ߬ߡߊߛߐ߬ߘߐ߲߬ ߝߋ߲߫ ߝߍ߬ ߊ߬ߟߎ߬ ߓߟߏ ߟߎ߫ ߣߊ߬ ߡߍ߲ ߢߍߓߌ߬ߟߊ߬ ߟߊ߫ ߸ ߏ߬ ߟߋ ߞߐ߫ ߊ߬ߟߎ߬ ߘߌ߫ ߥߴߌ ߕߘߍ߬ ߞߵߊ߬ߟߎ߫ ߞߊ߬ߟߌ߬ ߊߟߊ߫ ߟߊ߫ ߡߍߣߍ߲ߎ߲߫ ، ߞߏ߫ ߊ߲ ߕߍ߫ ߝߏߦߌ߫ ߝߍ߬ ߝߏ߫ ߢߊ߬ߟߌ ߣߌ߫ ߓߍ߲߬ ߢߌߣߌ߲ ﴿62﴾

ߒ߬ߓߵߊߟߊ߫ ߞߊ߬ ߡߍ߲ ߠߎ߫ ߛߣߐ߬ߡߍ ߘߐ߫ ߞߏ ߟߐ߲߫ ߖߐ߫ ߸ ߏ߬ ߟߋ ߏ߬ ߟߎ߬ ߘߌ߫ ، ߒ߬ߞߊ߬ ߌߟߋ ߌ ߞߐߘߏ߲߬ ߊ߬ߟߎ߬ ߟߊ߫ ߸ ߌ ߦߴߊ߬ߟߎ߬ ߟߊߟߌ߫ ߊ߬ ߣߴߌ ߦߋ߫ ߞߎߡߴߊ߬ߟߎ߬ ߦߋ߫ ߊ߬ߟߎ߫ ߖߍ߬ߘߍ ߟߊ߫ ߞߏ ߘߐ߫ ߞߎߡߊ߫ ߘߊ߲߬ߠߊ߬ߛߋߣߍ߲ ߠߊ߫ ﴿63﴾

ߒ߬ߠߎ߬ ߡߊ߫ ߞߋߟߊ߫ ߛߌ߫ ߗߋ߫ ߞߎ߲߬ ߜߘߍ߫ ߟߊ߫ ߸ ߝߏ߫ ߞߵߊ߬ ߞߊ߲ ߠߋ߫ ߡߌ߬ߘߊ߬ ߕߘߋ߫ ߊߟߊ߫ ߟߊ߫ ߘߌ߬ߢߍ ߟߊ߫ ، ߣߴߊ߬ߟߎ߫ ߕߎ߲߬ ߣߊ߬ ߘߴߌ ߕߍ߬ߘߍ߫ ߊ߬ߟߎ߬ ߟߊ߫ ߖߘߍ߬ ߕߐߢߍ߮ ߞߐ߫ ߸ ߞߊ߬ ߦߝߊ߬ ߢߌߣߌ߲ ߞߍ߫ ߊߟߊ߫ ߟߊ߫ ߸ ߞߋߟߊ ߝߣߊ߫ ߦߋ߫ ߦߝߊ߬ ߢߌߣߌ߲ ߞߍ߫ ߊ߬ߟߎ߬ ߦߋ߫ ߸ ߊ߬ߟߎ߫ ߕߎ߲߬ ߘߌ߫ ߊߟߊ߫ ߛߐ߬ߘߐ߲߫ ߖߘߍ߬ߟߊ߬ߛߊߦߌ ߡߌ߬ߘߊ߬ߓߊ߰ ߤߌߣߊߒߕߋ߫ ߘߌ߫ ﴿64﴾

ߍ߲߬ߍ߲ߍ߲߬ ߝߋߎ߫ ߸ ߊ߰ ߒ ߣߴߌ ߡߊ߰ߙߌ ߕߍ߫ ߸ ߊ߬ߟߎ߬ ߕߍ߫ ߞߍ߫ ߘߍ߲߬ߞߣߍ߬ߦߊ߬ߓߊ߮ ߖߍ߬ߘߍ ߘߌ߫ ߝߋߎ߫ ߸ ߝߏ߫ ߣߴߊ߬ߟߎ߫ ߞߵߊ߬ߟߎ߬ ߕߍ߫ ߝߐߢߐ߲߯ߞߐ ߓߍ߯ ߞߕߌ ߟߴߌ ߞߘߐ߫ ߟߋ߬ ߖߐ߫ ، ߌ ߘߏ߲߬ ߓߊ߯ ߞߕߌ ߡߍ߲ ߕߍ߰ ߸ ߣߌ߫ ߛߕߌ߫ ߞߏ߫ ߛߌ߫ ߞߊߣߊ߬ ߞߍ߫ ߊ߬ߟߎ߬ ߟߊ߫ ߏ߬ ߘߐ߫ ، ߊ߬ߟߎ߬ ߦߴߊ߬ߟߎ߫ ߖߘߍ߬ߞߟߴߏ߬ ߘߐ߫ ߟߋ߬ ߕߋ߲߬ ߘߏߦߌ߲߫ ﴿65﴾

ߣߌ߫ ߒ߬ߠߎ߫ ߕߎ߲߬ ߞߵߊ߬ ߛߓߍ߫ ߊ߬ߟߎ߫ ߡߊ߬ ߸ ߒ ߞߏ߫ ߊߟߴߊߟߎ߫ ߖߍ߬ߘߍ߫ ߝߊ߰ ߸ ߥߟߴߊߟߎ߫ ߓߐ߫ ߊߟߎ߫ ߟߊ߫ ߟߎ ߟߎ߫ ߡߊ߬ ߸ ߊ߬ߟߎ߫ ߕߎ߲߬ ߕߴߏ߬ ߞߍ߫ ߝߋߎ߫ ߝߏ߫ ߊ߬ߟߎ߬ ߘߐ߫ ߞߋ߬ߟߋ߲߬ߞߋߟߋ߲߫. ߓߊ߬ߙߌ߬ ߣߴߊ߬ߟߎ߫ ߕߎ߲߬ ߓߍ߫ ߊ߬ߟߎ߬ ߟߊߟߌߒߞߊ߲ߠߊ ߞߍ߫ ߟߊ߫ ߸ ߏ߬ ߕߘߍ߬ ߘߌ߫ ߞߍ߫ ߊ߬ߟߎ߬ ߦߋ߫ ߤߙߊ߫ ߘߌ߫ ߸ ߊ߬ ߘߏ߲߬ ߘߌ߫ ߞߍ߫ ߊ߬ߟߎ߬ ߓߊ߲ߓߊ߲ ߘߐߜߟߍ߬ߦߊ߬ ߞߏ߫ ߘߌ߫ ﴿66﴾

ߏ߬ ߕߎ߬ߡߊ ߝߍ߬ ߸ ߒ ߕߎ߲߬ ߘߴߊ߬ߟߎ߬ ߛߐ߫ ߛߙߊ߬ߓߊ ߟߊ߫ ߞߊ߬ ߝߘߊ߫ ߒ߬ ߖߍ߬ߘߍ ߟߊ߫ ﴿67﴾

ߊ߬ ߣߌ߫ ߒ߬ ߕߎ߲߬ ߘߴߊ߬ߟߎ߬ ߞߊ߲ߘߊ߫ ߛߌߟߊ߫ ߕߋߟߋ߲ߣߍ߲߫ ߓߐߚߐ ߞߊ߲߬ ﴿68﴾

ߡߍ߲ ߓߊ߯ ߊߟߊ߫ ߣߌ߫ ߞߋߟߊ ߞߊ߲ ߡߌ߬ߘߊ߬ ߸ ߏ߬ ߟߎ߬ ߞߍߕߐ߫ ߡߐ߰ ߟߎ߫ ߟߋ߫ ߝߍ߬ ߸ ߊߟߊ߫ ߣߍߡߊߣߍ߲߫ ߡߍ߲ ߠߎ߫ ߡߊ߬ ، ߣߊߟߌ߬ߡߎ߲߫ ߟߊ߬ߝߐ߬ߓߊ߮ ߟߎ߬ ߣߌ߫ ߕߎ߬ߢߊ߬ߕߌ߮ ߟߎ߬ ߣߌ߫ ߛߋ߰ߘߎ߬ߝߙߋ ߟߎ߬ ߣߌ߫ ߡߐ߰ ߢߌߡߊ ߟߎ߫ ߛߋ߲߬ߘߏ߲߬ߢߐ߲߰ߦߊ ߘߌ߫ ، ߏ߬ ߟߎ߫ ߘߏ߲߬ ߦߋ߫ ߛߋ߲߬ߘߏ߲߬ߢߐ߲߰ ߢߌߡߊ߫ ߟߎ߫ ߘߌ߫ ߞߟߋ߫ ﴿69﴾

ߏ߬ ߢߊ߬ߒߡߊ߭ ߝߘߊߣߍ߲߫ ߊߟߊ߫ ߟߋ߬ ߟߊ߫ ߸ ߊߟߊ߫ ߘߏ߲߬ ߥߛߊ߬ ߘߊ߫ ߟߐ߲ߠߌ߲ߠߊ߫ ߘߌ߫ ﴿70﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߦߴߊߟߎ߫ ߟߊ߫ ߖߊ߲߬ߕߏ߬ߒ߬ߖߘߍ߬ߘߐ߬ ( ߞߏ ߟߎ߫ ) ߡߌ߬ߘߊ߬ ߸ ߊߟߎ߫ ߓߏߟߏ߲ߝߘߊ ߟߎ߬ ߦߋ߫ ߓߐ߫ ߞߊ߬ ߕߊ߯ ߞߍ߬ߟߍ ߘߐ߫ ߸ ߥߟߴߊߟߎ߫ ߟߊߘߍ߬ߣߍ߲ ߦߋ߫ ߕߊ߯ ﴿71﴾

ߡߐ߱ ߘߏ߫ ߓߍ߫ ߊߟߎ߫ ߘߐ߫ ߸ ߏ߬ ߦߋ߫ ( ߕߊ߯ߟߌ ) ߕߡߊߣߊ߫ ߟߊ߫ ߟߋ߬ ߸ ߖߐ߲߰ߛߊ߫ ߣߌ߫ ߡߊ߲߬ߕߙߐ߫ ߞߵߊߟߎ߫ ߛߐ߬ߘߐ߲߬ ߸ ߊ߬ ߘߴߊ߬ ߝߐ߫ ߞߏ߫ ߊߟߊ߫ ߢߊ߬ ߘߊ߫ ߒ ߡߊ߬ ߞߟߋ߫ ، ߓߊ ߒ ߕߎ߲߬ ߕߍ߫ ߛߙߋ߫ ߘߴߊ߬ߟߎ߫ ߝߍ߬ ߦߋ߲߬ ﴿72﴾

ߣߌ߫ ߊߟߊ߫ ߟߊ߫ ߢߊ߬ߒߡߊ߭ ߘߏ߲߬ ߞߵߊߟߎ߫ ߛߐ߬ߘߐ߲߬ ߸ ߊ߬ ߘߴߊ߬ ߝߐ߫ ߞߏ߫ ߞߵߊ߬ ߞߍ߫ ߕߋ߲߬ ߦߏ߫ ߘߌߦߊߢߍ߫ ߕߎ߲߬ ߕߍ߫ ߊߟߎ߫ ߣߴߊ߬ߟߋ߬ ߕߍ߫؟ ߞߏ߫ ߥߊߦߌߞߊ߬ ߥߟߊߞߏ߫ ߒ ߕߘߍ߬ ߞߍ߫ ߊ߬ߟߎ߫ ߝߍ߬ ، ߛߊ߫ ߒ ߕߎ߲߬ ߘߌ߫ ߣߌ߬ߓߊ߫ ߛߐ߬ߘߐ߲߬ ﴿73﴾

ߒ߬ߓߵߊ߬ ߝߣߊ߫ ߦߋ߫ ߡߐ߰ ߟߎ߫ ߞߟߍ߬ ߊߟߊ߫ ߟߊ߫ ߛߌߟߊ ߞߊ߲߬ ߸ ߡߍ߲ ߠߎ߬ ߦߋ߫ ߘߎߢߊ߫ ߢߣߊߡߦߊ ߝߊ߬ߟߋ߲߬ ߠߊ߫ ߟߊߞߌߙߊ߫ ߕߊ ߟߊ߫ ، ߡߍ߲ ߘߏ߲߬ ߓߊ߯ ߞߍ߬ߟߍ ߞߍ߫ ߊߟߊ߫ ߟߊ߫ ߛߌߟߊ ߞߊ߲߬ ، ߏ߬ ߝߊ߰ ߘߊ߫ ߓߊ߬ ߸ ߥߟߴߊ߬ ߞߊ߬ ߛߋ߫ ߛߐ߬ߘߐ߲߫ ߓߊ߬ ߸ ߛߋߚߋ߫ ߊ߲ ߘߌߣߵߏ߬ ߛߐ߫ ߓߙߊ߬ߖߌ߬ ߓߟߋߓߟߋ ߟߊ߫ ﴿74﴾

ߡߋ߬ߘߋ ߊߟߎ߫ ߟߊ߫ ߓߏ߲߰ ߊߟߎ߫ ߕߍ߫ ߞߍ߬ߟߍ ߞߍ߫ ߟߴߊߟߊ߫ ߛߌߟߊ ߞߊ߲߬ ߸ ߊ߬ ߣߌ߫ ߟߊ߲߰ߝߏ߬ߓߊ߰ߕߐ ߗߍ߬ߡߊ߲ ߠߎ߬ ߣߴߊ߬ ߡߛߏ߬ߡߊ߲ ߠߎ߬ ߣߴߊ߬ ߘߋ߲ߡߌߛߍ߲ ߠߎ߬ ߡߞߊߘߊ߲ ߘߐ߫؟ ߏ߬ ߟߎ߬ ߡߍ߲ ߠߎ߬ ߦߴߊ߬ ߝߐ߫ ߟߊ߫ ߛߐ߲߬ ߞߏ߫ ߊ߲ ߡߊ߰ߙߌ ߸ ߖߊ߰ߣߌ߲߬ ߊ߲ ߠߊߓߐ߫ ߛߏ ߢߌ߲߬ ߠߊ߫ ߸ ߓߊ ߊ߬ ߡߐ߱ ߟߎ߬ ߓߘߊ߫ ߞߍ߫ ߕߐ߬ߢߍ߰ߟߊ ߟߎ߬ ߘߌ߫ ، ߌ ߘߏ߲߬ ߦߋ߫ ߢߌ߲߬ ߞߍ߫ ߊ߲ ߠߊ߫ ߞߊ߬ ߝߘߊ߫ ߌ ߖߍ߬ߘߍ ߟߊ߫ ߸ ߊ߬ ߣߴߌ ߦߋ߫ ߘߍ߬ߡߍ߲߬ߓߊ߯ ߞߍ߫ ߊ߲ ߠߊ߫ ߞߊ߬ ߝߘߊ߫ ߌ ߖߍ߬ߘߍ ߟߊ߫ ﴿75﴾

ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߸ ߏ߬ ߟߎ߬ ߦߋ߫ ߞߍ߬ߟߍ ߞߍ߫ ߟߴߊߟߊ߫ ߛߌߟߊ ߟߋ߫ ߞߊ߲߬ ، ߡߍ߲ ߠߎ߫ ߘߏ߲߬ ߓߊ߲߬ߣߍ߲߫ ߸ ߏ߬ ߟߎ߬ ߦߋ߫ ߞߍ߬ߟߍ ߞߍ߫ ߟߊ߫ ߞߏ߲ߞߏߓߊ ߟߊ߫ ߛߌߟߊ ߟߋ߫ ߞߊ߲߬. ߒ߬ߓߵߊߟߎ߫ ߦߋ߫ ߜߍ߬ߘߍ ߢߌ߲߭ ߠߎ߫ ߞߟߍ߬ ، ߖߊ߯ߕߋ߬ ߸ ߜߍ߬ߘߍ ߘߊ߬ߓߊߙߌ ߗߙߐߞߐߣߍ߲߫ ߠߋ߬ ﴿76﴾

ߌ ߡߴߊ߬ ߦߋ߫ ߓߊ߬ ߸ ߊ߬ ߝߐߣߍ߲߫ ߡߍ߲ ߠߎ߫ ߡߊ߬ ߞߏ߫ ߊߟߴߊߟߎ߫ ߓߟߏ ߟߎ߬ ߘߐߡߌ߬ߘߊ߫ ( ߞߊ߬ ߓߐ߫ ߞߍ߬ߟߍ ߡߊ߬ ) ߸ ߊ߬ ߣߴߊߟߎ߫ ߛߊߟߌ ߟߐ߬ ߞߊ߬ ߖߞߊ ߘߌ߫ ، ߞߏ߬ߣߌ߲߬ ߞߍ߬ߟߍ ߛߓߍ߫ ߘߊ߫ ߏ߬ ߟߎ߫ ߡߊ߬ ߡߍ߲ߞߍ߭ ߸ ߊ߬ߟߎ߫ ߝߊ߲߬ ߞߋߟߋ߲ ߞߵߊ߬ ߞߍ߫ ߛߌߟߊ߲ ߘߌ߫ ߡߐ߱ ߟߎ߬ ߢߍ߫ ߦߏ߫ ߊߟߊ߫ ߢߍߛߌߟߊ߲ߢߍ ߞߍ߫ ߟߊ߫ ߢߊ ߡߍ߲ ߸ ߥߟߴߊ߬ ߛߌߟߊ߲ߢߍ ߦߋ߫ ߜߟߍ߬ߦߊ߫ ߏ߬ ߘߌ߫ ، ߊ߬ߟߎ߬ ߞߊ߲߫ ߏ߬ ߘߐ߫ ߞߏ߫ ߊ߲ ߡߊ߰ߙߌ ߸ ߡߎ߲߬ߠߊ߫ ߌ ߞߊ߬ ߞߍ߬ߟߍ ߛߓߍ߫ ߊ߲ ߡߊ߬؟ ߥߟߊߞߏ߫ ߌ ߕߘߍ߬ ߊ߲ ߘߏ߲߰ߘߌ߫ ߡߎߣߎ߲߬ ߞߵߊ߬ ߕߏ߫ ߛߕߊߣߍ߲߫ ߞߎ߲߬ߘߐ߬ߛߎߘߎ߲߫ ߠߊ߫ ، ߊ߬ߟߎ߫ ߖߋ߬ߓߌ߬ ߞߏ߫ ߘߎߢߊ߫ ߘߊ߰ߡߎ߲ ߕߜߋ߫ ߟߋ߬ ، ߟߊߞߌߙߊ߫ ߕߊ ߘߏ߲߬ ߦߋ߫ ߤߙߊ߫ ߜߊ߲߬ߛߊ߲߫ ߠߋ߬ ߘߌ߫ ߝߊ߲ߕߊ߲ߞߟߊ ( ߟߎ߬ ) ߦߋ߫ ، ߊ߬ߟߎ߫ ߘߏ߲߬ ߕߍ߫ ߕߐ߬ߢߍ߰ ߟߊ߫ ߕߡߊߙߏ߫ ߝߏߟߏ߲ߣߍ߲߫ ߢߐ߲߰ ߠߊ߫ ﴿77﴾

ߊߟߎ߫ ߓߊ߯ ߞߍ߫ ߝߊ߲߬-ߊ-ߝߊ߲߬ ߸ ߛߊ߬ߦߊ ߘߴߊߟߎ߫ ߛߐ߬ߘߐ߲߫ ߦߋ߲߬ ، ߤߊߟߵߊߟߎ߫ ߞߍ߫ ߘߊ߫ ߛߊ߲ߓߏ߲߫ ߖߊ߲߫ ߠߊߦߟߍ߬ߣߍ߲ ߠߎ߫ ߟߋ߬ ߞߣߐ߫ ، ߣߌ߫ ߤߙߊ߫ ߞߵߊ߬ߟߎ߫ ߛߐ߬ߘߐ߲߬ ߊ߬ߟߎ߬ ߘߴߊ߬ ߝߐ߫ ߞߏ߫ ߣߌ߲߬ ߓߐߣߍ߲߫ ߊߟߊ߫ ߓߘߊ ߟߋ߬ ، ߣߌ߫ ߖߎ߯ߡߊ߲߫ ߘߏ߲߬ ߞߵߊ߬ߟߎ߫ ߛߐ߬ߘߐ߲߬ ߸ ߊ߬ߟߎ߬ ߘߴߊ߬ ߝߐ߫ ߞߴߏ߬ ߓߐߣߴߌߟߋ ߓߘߊ ߟߋ߬ ، ߊ߬ߟߎ߫ ߖߋ߬ߓߌ߬ ߞߏ߫ ߊ߬ ߓߍ߯ ߓߐߣߍ߲߫ ߊߟߊ߫ ߓߘߊ ߟߋ߬ ، ߒ߬ߓߊ߬ ߡߋ߬ߘߋ ߡߐ߱ ߢߌ߲߬ ߠߎ߬ ߟߊ߫ ߓߏ߲߰ ߣߴߊ߬ߟߎ߬ ߞߍ߫ ߡߊ߲߫ ߘߌ߫ ߞߊ߬ ߞߎߡߊ߫ ߢߊߦߋ߫؟ ﴿78﴾

ߡߍ߲ ߓߴߌ ߛߐ߬ߘߐ߲߬ ߢߌ߬ߡߊ߬ ߘߐ߫ ߸ ߏ߬ ߝߘߊߣߍ߲߫ ߊߟߊ߫ ߟߋ߬ ߟߊ߫ ، ߡߍ߲ ߘߏ߲߬ ߓߴߌ ߛߐ߬ߘߐ߲߬ ߖߎ߯ߡߊ߲߫ ߘߐ߫ ߸ ߏ߬ ߝߘߊߣߴߌ ߖߍ߬ߘߍ ߟߋ߬ ߟߊ߫ ، ߊ߲ ߣߵߌ ߗߋ߫ ߟߊ߫ ߡߐ߱ ߟߎ߫ ߡߊ߬ ߞߋߟߊ ߟߋ߬ ߘߌ߫ ، ߊߟߊ߫ ߘߏ߲߬ ߥߛߊ߬ ߘߊ߫ ߛߙߋ߫ ߘߌ߫ ﴿79﴾

ߡߍ߲ ߓߊ߯ ߞߋߟߊ ߞߊ߲ ߡߌ߬ߘߊ߬ ߸ ߏ߬ ߣߵߊߟߊ߫ ߟߋ߬ ߞߊ߲ ߡߌ߬ߘߊ߬ ߟߊ߫. ߣߌ߫ ߡߍ߲ ߠߋ߫ ߞߵߊ߬ ߞߐߘߏ߲߬ ߛߊ߫ ߸ ߊ߲ߠߎ߫ ߞߏ߬ߣߌ߲߬ ߡߴߌ ߗߋ߫ ߊ߬ߟߎ߫ ߞߣߐ߬ߜߍ߲߬ߓߊ߯ ߘߌ߫ ﴿80﴾

ߊ߬ߟߎ߬ ߦߴߊ߬ ߝߐ߫ ߟߊ߫ ߛߐ߲߬ ߞߏ߫ ( ߊ߲ ߓߘߊ߫ ) ߞߊ߲߫ ߡߌߘߊ ( ߞߍ߫ ، ) ߓߊ߬ߙߌ߬ ߣߴߊ߬ߟߎ߬ ߓߐ߫ ߘߴߌ ߓߘߊ ߸ ߊ߬ߟߎ߫ ߝߊ߲߬ ߞߋߟߋ߲ ߘߌ߫ ߛߌ߬ ߞߏ߫ ߜߘߍ߫ ߞߊ߲߬ ߸ ߌ ߡߊ߫ ߡߍ߲ ߝߐ߫ ، ߊ߬ߟߎ߫ ߘߏ߲߬ ߛߌ߬ ߟߊ߫ ߡߍ߲ ߞߊ߲߬ ߸ ߊߟߊ߫ ߦߴߏ߬ ߛߓߍ߫ ߟߊ߫ ߖߐ߫ ، ߒ߬ߓߊ߬ ߌߟߋ ߌ ߞߐߘߏ߲߬ ߊ߬ߟߎ߬ ߟߊ߫ ߸ ߌ ߦߴߌ ߛߍ߲߬ߓߍ߬ ߊߟߊ߫ ߟߊ߫ ، ߓߊ ߊߟߊ߫ ߥߛߊ߬ ߘߊ߫ ߛߍ߲߬ߓߍ߬ߟߊ߲߫ ߘߌ߫ ﴿81﴾

ߦߊ߯ߟߴߊ߬ߟߎ߬ ߕߴߊ߬ߟߎ߫ ߕߊ߰ߛߌ߬ ߟߊ߫ ߞߎ߬ߙߊ߬ߣߊ ߞߎ߲߬ߠߊ߫ ߓߊ߬ ߸ ߣߴߊ߬ ߕߎ߲߬ ߝߘߊ߫ ߘߴߊߟߊ߫ ߛߌ߬ߣߊ ߘߏ߫ ߟߋ߬ ߟߊ߫ ߸ ߊ߬ߟߎ߫ ߕߘߍ߬ ߘߌ߫ ߝߐߢߐ߲߯ߞߐ߫ ߛߌߦߊߡߊ߲߫ ߛߐ߬ߘߐ߲߫ ߊ߬ ߞߣߐ߫ ߟߋ߬ ߘߍ߯ ﴿82﴾

ߖߊ߲߬ߖߏ߲ ߘߏ߫ ߓߊ߯ ߕߍ߰ ߊ߬ߟߎ߫ ߞߊ߲߬ ߞߏߕߊ߲߫ ߞߎ߲߬ߠߊ߬ߝߎߟߋ߲߫ ߘߐ߫ ߥߟߊ߫ ߛߌߟߊ߲߫ ߘߐ߫ ߸ ߊ߬ߟߎ߬ ߘߴߏ߬ ߟߊߖߍ߲ߛߍ߲߫ ، ߣߴߊ߬ߟߎ߫ ߘߏ߲߬ ߕߎ߲߬ ߞߵߏ߬ ߟߊߛߋ߫ ߞߋߟߊ ߡߊ߬ ߸ ߊ߬ ߣߴߊ߬ߟߎ߬ ߘߐ߫ ߞߏߕߌ߮ ߟߎ߫ ߡߊ߬ ߸ ߊ߬ߟߎ߬ ߘߐ߫ ߡߐ߰ ߞߣߐߘߐߢߌ߬ߣߌ߲߬ߞߊ߬ߕߊ ߏ߬ ߟߎ߫ ߕߎ߲߬ ߘߌ߫ ߡߌ߬ߘߊ߬ ߢߊ߬ ߟߐ߲߫ ߏ߬ ߟߊ߫ ، ߓߊ߬ߙߌ߬ ߣߌ߫ ߊߟߊ߫ ߟߊ߫ ߢߊ߬ߒߡߊ߭ ߣߴߊ߬ ߟߊ߫ ߤߌߣߊ ߕߍ߫ ߊߟߎ߫ ߞߊ߲߬ ߸ ߊߟߎ߫ ( ߝߊ߲߬ߓߊ ) ߕߎ߲߬ ߘߌ߫ ߜߍ߬ߘߍ ߟߊߓߊ߬ߕߏ߫ ߟߋ߬ ߘߍ߯ ߝߏ߫ ߞߋ߬ߟߋ߲߬ߞߋߟߋ߲߫ ﴿83﴾

ߒ߬ߓߊ߬ ߌߟߋ ߞߍ߬ߟߍ ߞߍ߫ ߊߟߊ߫ ߛߌߟߊ ߞߊ߲߬ ، ߓߊ ߌ ߕߍ߫ ߡߐ߰ ߛߌ߫ ߞߘߊߡߊ߫ ߟߊ߫ ߝߏ߫ ߌ ߖߘߍ߬ߞߎ߲ ، ߊ߬ ߣߴߌ ߦߋ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߝߣߊ߫ ߘߐߛߎ߫ ߸ ߖߐ߲߰ߛߴߊߟߊ߫ ߘߌ߫ ߘߊ߲߬ߛߌ߰ ߓߊ߲߬ߓߊ߮ ߟߎ߬ ߟߊ߫ ߝߊ߲߬ߞߊ ߟߊ߫ ، ߊߟߊ߫ ߟߋ߬ ߘߏ߲߬ ߠߊ߫ ߞߍ߬ߟߍ ߜߍ߬ߟߍ߲߬ߡߊ߲߫ ߸ ߊ߬ ߟߊ߫ ߓߌ߲߬ߓߊߏ ߝߣߊ߫ ߜߍ߬ߟߍ߲߬ߡߊ߲߫ ﴿84﴾

ߡߍ߲ ߓߊ߯ ߛߟߏ߬ߣߊ߬ߟߌ ߞߍ߫ ߛߟߏ߬ߣߊ߬ߟߌ߬ ߢߌߡߊ߫ ߟߊ߫ ߸ ߏ߬ ߘߴߏ߬ ߣߌ߭ ߛߐ߬ߘߐ߲߬ ، ߡߍ߲ ߘߏ߲߬ ߓߊ߯ ߛߟߏ߬ߣߊ߬ߟߌ ߞߍ߫ ߛߟߏ߬ߣߊ߬ߟߌ߬ ߖߎ߯ ߟߊ߫ ߸ ߏ߬ ߘߴߏ߬ ߓߟߏߡߦߊ ߛߐ߬ߘߐ߲߬ ، ߖߊ߯ߕߋ߬ ߸ ߊߟߊ߫ ߟߋ߬ ߞߏ ߓߍ߯ ߟߊߕߍ߰ߓߊ߮ ߘߌ߫ ﴿85﴾

ߣߴߊߟߎ߫ ߝߏ߬ ߘߊ߫ ߝߏ߬ߟߌ ߡߍ߲ ߠߊ߫ ߸ ߊߟߎ߫ ߝߣߊ߫ ߝߏ߬ߟߌ߬ ߞߍ߫ ߡߍ߲ ߢߌ߬ߡߊ߫ ߏ߬ ߘߌ߫ ، ߥߟߴߊߟߎ߫ ߘߊ߲߬ ߊ߬ ߟߊߡߌ߬ߘߊ ߡߊ߬ ߕߋ߲߬ ، ߓߊߏ߬ ߊߟߊ߫ ߦߋ߫ ߞߏ ߓߍ߯ ߟߋ߫ ߖߊ߬ߕߋ߬ߓߐ߬ߟߊ ߘߌ߫ ﴿86﴾

ߊߟߊ߫ ߸ ߡߊ߰ߙߌ߬ ߜߘߍ߫ ߕߍ߫ ߊ߬ߟߋ߬ ߞߐ߫ ، ߊ߬ ߘߌߣߵߊߟߎ߫ ߟߊߘߍ߬ ߟߐ߬ߓߊ ߟߏ߲ ߠߋ߬ ߕߘߋ߫ ߛߌߞߊ߫ ߛߌ߫ ߕߍ߫ ߏ߬ ߘߐ߫ ، ߖߍߣߍ߲ ߘߏ߲߬ ߘߌ߫ ߞߎߡߊ ߕߎ߬ߢߊ ߝߐ߫ ߞߊ߬ ߕߊ߬ߡߌ߲߬ ߊߟߊ߫ ߟߊ߫؟ ﴿87﴾

ߡߋ߬ߘߋ ߊߟߎ߫ ߕߟߊ߫ ߟߊ߫ ߝߌ߬ߟߊ߲߬ߞߊߝߏ ߟߎ߬ ߟߊ߫ ߞߏ ߘߐ߫ ߖߊ߬ߡߊ߫ ߝߌ߬ߟߊ߬ ߘߌ߫؟ ߊߟߊ߫ ߟߋ߬ ߘߏ߲߬ ߣߵߊ߬ߟߎ߬ ߟߊߕߊ߲߬ߞߌ߲߬ ߠߴߊ߬ߟߎ߬ ߗߋߥߊߟߌ ߟߎ߬ ߞߏߛߐ߲߬ ، ߦߊ߯ߟߴߊߟߎ߫ ߦߴߊ߬ ߝߍ߬ ߟߋ߫ ߓߊ߬ ߊߟߊ߫ ߣߊ߬ ߡߍ߲ ߠߊߝߟߌ߬ ߟߊ߫ ߞߏ߫ ߊߟߎ߫ ߦߴߏ߬ ߞߊ߲ߘߊ߫؟ ߊߟߊ߫ ߘߏ߲߬ ߓߊ߯ ߡߍ߲ ߠߊߝߟߌ߬ ߸ ߌ ߕߍ߫ ߛߌߟߊ߫ ߛߐ߬ߘߐ߲߫ ߏ߬ ߦߋ߫ ߡߎ߬ߕߎ߲߬ ﴿88﴾

ߊ߬ߟߎ߬ ߦߴߊ߬ ߞߊ߬ߣߌ߲߬ ߠߊ߫ ߟߋ߬ ߸ ߞߏ߫ ߊߟߎ߫ ߝߣߊ߫ ߦߋ߫ ߞߍ߫ ߓߊ߲߬ߓߊ߮ ߘߌ߫ ߸ ߦߏ߫ ߊ߬ߟߎ߬ ߞߍߣߍ߲߫ ߓߊ߲߬ߓߊ߮ ߘߌ߫ ߢߊ ߡߍ߲ ߸ ߞߵߊߟߎ߫ ߓߍ߯ ߞߢߊ߫؟ ߒ߬ߓߵߊߟߎ߫ ߞߣߊ߫ ߢߌ߲߬ ߛߌ߫ ߡߌ߬ߘߊ߫ ߏ߬ ߟߎ߬ ߘߐ߫ ߸ ߝߏ߫ ߣߴߊ߬ߟߎ߬ ߝߎ߲ߘߌ߫ ߘߴߊߟߊ߫ ߛߌߟߊ ߘߐ߫ ߟߋ߬ ߖߐ߫ ، ߣߴߊ߬ߟߎ߫ ߘߏ߲߬ ߞߵߊ߬ߟߎ߬ ߞߐߘߏ߲߬ ߸ ߊߟߎ߫ ߦߴߊ߬ߟߎ߫ ߡߌ߬ߘߊ߫ ߞߵߊ߬ߟߎ߫ ߝߊ߰ ߸ ߊߟߎ߫ ߓߊ߯ ߊ߬ߟߎ߫ ߛߐ߬ߘߐ߲߫ ߝߊ߲߬-ߊ-ߝߊ߲߬ ، ߊߟߎ߫ ߘߏ߲߬ ߞߣߊ߫ ߢߌ߲߬ ߛߌ߫ ߣߌ߫ ߘߍ߬ߡߍ߲߬ߢߐ߲߰ ߛߌ߫ ߡߌ߬ߘߴߊ߬ߟߎ߬ ߘߐ߫ ﴿89﴾

ߝߏ߫ ߣߌ߫ ߡߍ߲ ߠߎ߬ ߥߊ߫ ߘߊ߫ ߛߋ߫ ߡߌ߬ߙߌ߲߬ߘߌ߬ ߜߘߍ߫ ߡߊ߬ ߸ ߟߊ߬ߤߘߌ ߦߴߊߟߎ߫ ߣߌ߫ ߡߍ߲ ߠߎ߬ ߕߍ߫ ، ߥߟߴߊ߬ߟߎ߬ ߦߋ߫ ߣߵߊߟߎ߫ ߕߘߍ߬ ߸ ߞߏ߫ ߊ߬ߟߎ߫ ߛߣߐ߬ߡߍ ߟߎ߫ ߜߍ߲߬ߘߍ߬ߣߍ߲߫ ߊߟߎ߫ ߞߍ߬ߟߍ ߘߐ߫ ߸ ߥߟߴߊ߬ߟߎ߬ ߓߘߊߡߐ߮ ߟߎ߫ ߞߍ߬ߟߍ ߘߐ߫ ، ߊ߬ ߕߎ߲߬ ߓߊ߯ ߊߟߊ߫ ߘߌߦߊ߫ ߊ߬ ߕߘߍ߬ ߘߌ߫ ߛߋߓߊ߯ߦߊ ߞߍ߫ ߏ߬ ߟߎ߬ ߟߴߊߟߎ߫ ߡߊ߬ ߸ ߏ߬ ߓߊ߯ ߞߍ߫ ߊ߬ߟߎ߬ ߘߴߊߟߎ߫ ߞߟߍ߬ ، ߒ߬ߓߊ߬ ߣߴߏ߬ ߟߎ߫ ߞߵߊ߬ߟߎ߬ ߡߊߓߐ߫ ߊߟߎ߫ ߟߊ߫ ߊ߬ߟߎ߬ ߡߴߊߟߎ߫ ߞߟߍ߬ ߸ ߊ߬ ߣߴߊ߬ߟߎ߫ ߞߊ߬ ߖߐ ߟߐ߬ ߊߟߎ߫ ߡߊ߬ ، ߏ߬ ߘߐ߫ ߸ ߊߟߊ߫ ߕߍ߫ ߛߌߟߊ߫ ߛߌ߫ ߞߍ߫ ߊߟߎ߫ ߞߘߐ߫ ߏ߬ ߟߎ߫ ߡߊ߬ ﴿90﴾

ߊߟߎ߫ ߞߏ߬ߣߌ߲߬ ߘߌߣߊ߬ ߘߏ߫ ߜߘߍ߫ ߟߎ߫ ߛߐ߬ߘߐ߲߬ ߸ ߏ߬ ߟߎ߬ ߦߴߊ߬ ߝߍ߬ ߞߵߊߟߎ߫ ߟߊ߫ ߟߊߒߠߦߊ ߛߐ߬ߘߐ߲߫ ߸ ߞߵߊ߬ߟߎ߬ ߓߘߊߡߐ߮ ߟߎ߬ ߝߣߊ߫ ߟߊ߫ ߟߊߒߠߦߊ ߛߐ߬ߘߐ߲߬ ، ߏ߬ ߟߎ߬ ߓߊ߯ ߟߊߕߎ߲߬ߕߎ߲߬ ߡߙߎߕߌ ߡߊ߬ ߞߏߕߊ߲߫ ߸ ߊ߬ߟߎ߬ ߘߴߊ߬ߟߎ߫ ߥߎ߬ߙߎ߲߬ߓߴߊ߬ ߘߐ߫ ߓߊߓߊߎ߫ ، ߒ߬ߓߊ߬ ߣߴߏ߬ ߟߎ߬ ߡߴߊ߬ߟߎ߬ ߡߊߓߐ߫ ߊߟߎ߫ ߟߊ߫ ߞߊ߬ ߖߐ ߟߊߝߟߌ߬ ߊߟߎ߫ ߡߊ߬ ، ߊ߬ ߣߌ߫ ߞߵߊ߬ߟߎ߬ ߓߟߏ ߟߎ߬ ߘߐߡߌ߬ߣߵߊߟߎ߫ ߞߍ߬ߟߍ ߟߊ߫ ߸ ߊߟߴߊ߬ߟߎ߫ ߡߌ߬ߘߊ߫ ߞߵߊ߬ߟߎ߫ ߝߊ߰ ߸ ߊߟߎ߫ ߓߴߊ߬ߟߎ߫ ߛߐ߬ߘߐ߲߫ ߝߊ߲߬-ߊ-ߝߊ߲߬ ، ߒ߬ߓߊ߬ ߏ߬ ߟߎ߬ ߛߊ߫ ߸ ߊ߲ ߣߊ߬ ߛߋߓߊ߯ߦߊ߫ ߘߐߜߍ߫ ߞߍ߫ ߟߴߊߟߎ߫ ߦߋ߫ ߏ߬ ߟߎ߫ ߟߋ߫ ߡߊ߬ ﴿91﴾

ߊ߬ ߕߍ߫ ߓߍ߲߬ ߘߍ߲߬ߞߣߍ߬ߦߊ߬ߓߊ߰ ߛߌ߫ ߡߊ߬ ߸ ߊ߬ ߦߋ߫ ߘߍ߲߬ߞߣߍ߬ߦߊ߬ߓߊ߰ ߜߘߍ߫ ߝߊ߰ ߝߏ߫ ߝߎ߬ߕߎ߲߬ߕߌ߬ ߓߟߏ ߡߊ߬ ، ߡߍ߲ ߘߏ߲߬ ߓߊ߯ ߘߍ߲߬ߞߣߍ߬ߦߊ߬ߓߊ߮ ߝߊ߰ ߝߎ߬ߕߎ߲߬ߕߌ߬ ߓߟߏ ߡߊ߬ ߸ ߏ߬ ߦߋ߫ ߛߌ߬ߟߡߊ߬ ߖߐ߲߬ ߤߙߐߦߊ߫ ، ߊ߬ ߣߴߊ߬ ߦߋ߫ ߢߍ߬ߢߌ߲ ߛߙߊ߬ ߛߎ߭ ߓߘߊߡߐ߮ ߟߎ߬ ߦߋ߫ ، ߝߏ߫ ߣߴߊ߬ߟߎ߫ ߞߊ߬ ߘߐ߬ߞߏ߬ߦߊ߬ߕߏ߬ߟߌ ߞߍ߫ ߘߋ߬ ، ߣߴߊߟߎ߫ ߖߎ߮ ߘߏ߫ ߟߎ߫ ߟߊ߫ ߡߐ߱ ߟߋ߬ ، ߞߏ߬ߣߌ߲߬ ߘߍ߲߬ߞߣߍ߬ߦߊ߬ߓߊ߮ ߟߋ߬ ߸ ߞߊ߬ ߛߌ߬ߟߡߊ߬ ߖߐ߲߬ ߞߊ߲ߤߙߐߦߊ߫ ߏ߬ ߘߐ߫ ߕߋ߲߬ ، ߣߴߊ߬ ߘߏ߲߬ ߞߍ߫ ߘߊ߫ ߡߌ߬ߙߌ߲߬ߘߌ ߘߏ߫ ߟߊ߫ ߡߐ߰ ߘߌ߫ ߸ ߟߊ߬ߤߘߌ ߦߴߊߟߎ߫ ߣߌ߫ ߡߍ߲ ߠߎ߬ ߕߍ߫ ߸ ߞߊ߬ ߢߍ߬ߢߌ߲߬ ߘߐ߬ߓߍ߲ ߘߌ߫ ߏ߬ ߟߎ߬ ߓߘߊߡߐ߮ ߟߎ߫ ߡߊ߬ ، ߞߊ߬ ߓߊ߲߫ ߞߊ߬ ߛߌ߬ߟߡߊ߬ ߖߐ߲߫ ߞߊ߲ߤߙߐߦߊ߫ ، ߣߌ߫ ߡߍ߲ ߕߴߏ ߛߐ߬ߘߐ߲߬ ߸ ߏ߬ ߦߋ߫ ߞߊߙߏ߫ ߝߌ߬ߟߊ߬ ߛߎ߲߫ ߞߵߏ߬ ߟߎ߫ ߕߎ߲߰ ߢߐ߲߮ ߠߊ߫ ߝߍߚߍ߫ ، ߏ߬ ߦߋ߫ ߖߘߍ߬ߟߛߊ߬ߦߌ߬ ߢߊ߫ ߟߋ߬ ߘߌ߫ ߡߍ߲ ߝߘߊߣߍ߲߫ ߊߟߊ߫ ߟߊ߫ ، ߊߟߊ߫ ߘߏ߲߬ ߦߋ߫ ߟߐ߲ߠߌ߲ߠߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿92﴾

ߡߍ߲ ߓߊ߯ ߘߍ߲߬ߞߣߍ߬ߦߊ߬ߓߊ߮ ߝߊ߰ ߕߊߥߎ߫ ߓߟߏ ߡߊ߬ ߸ ߏ߬ ߛߊ߬ߙߊ ߟߋ߬ ߔߊߦߌߔߊߦߌ ߘߌ߫ ߸ ߞߵߊ߬ ߘߎߡߊ߫ ߦߋ߲߬ ߞߊ߬ߣߌ߲߫ ، ߊߟߊ߫ ߓߘߊ߫ ߛߊ߬ߙߌ߫ ߏ߬ ߡߊ߬ ߸ ߊ߬ ߣߌ߫ ߞߵߊ߬ ߘߊ߲ߞߊ߫ ߸ ߊ߬ ߣߌ߫ ߞߊ߬ ߖߊ߲߰ߞߕߊ߬ ߓߟߋߓߟߋ ߘߐߓߍ߲߬ ߊ߬ ߢߍ߫ ﴿93﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߓߊ߯ ߞߍ߫ ߞߍ߬ߟߍ ߞߟߊߡߊߕߊ߯ߡߊ ߟߊ߫ ߸ ߊߟߊ߫ ߛߌߟߊ ߞߊ߲߬ ߸ ߊߟߎ߫ ߦߴߊߟߎ߫ ߢߡߊߟߐ߬ ߘߋ߬ ، ߡߍ߲ ߓߊ߯ ߝߏ߬ߟߌ ߟߐ߬ ߊߟߎ߫ ߡߊ߬ ߸ ߊߟߎ߫ ߞߊߣߵߊ߬ ߝߐ߫ ߏ߬ ߡߊ߬ ߘߋ߬ ߞߴߌߟߋ ߕߍ߫ ߘߍ߲߬ߞߣߍ߬ߦߊ߬ߓߊ߯ ߘߌ߫ ، ߊߟߎ߫ ߦߋ߫ ߘߎߢߊ߫ ߢߣߊߡߦߊ ߣߊ߲߬ߝߟߏ߬ߡߎ߮ ߟߋ߬ ߢߌߣߌ߲߫ ߠߴߏ߬ ߘߐ߫ ߛߊ߫ ߸ ߕߣߐ߬ ߛߌߦߊߡߊ߲߫ ߘߏ߲߬ ߊߟߊ߫ ߓߘߊ ߟߋ߬ ߞߟߋ߫ ، ߊߟߎ߫ ߘߏ߲߬ ߝߣߊ߫ ߕߘߍ߬ ߕߋ߲߬ ߠߋ߬ ߞߘߐ߬ߡߊ߲߫ ، ߊߟߊ߫ ߟߋ߫ ߢߊ߬ߣߍ߲߫ ߊߟߎ߫ ߡߊ߬ ، ߏ߬ ߘߐ߫ ߸ ߊߟߎ߫ ߦߴߊߟߎ߫ ߢߡߊߟߐ߬ ߟߋ߫ ߘߋ߬ ، ߓߊߏ߬ ߊߟߊ߫ ߦߴߊߟߎ߫ ߞߋߥߊߟߌ ( ߟߎ߫ ) ߞߟߊ߬ߡߊ߬ߓߊ߮ ߖߍ߬ߘߍ ߟߋ߬ ߘߌ߫ ﴿94﴾

ߘߋ߬ߥߎ߬ ߕߍ߫ ߘߍ߲߬ߞߣߍ߬ߦߊ߬ߓߊ߯ ߛߌ߰ߣߍ߲ ߡߍ߲ ߠߎ߬ ߟߊ߫ ߸ ߏ߬ ߟߎ߬ ߣߌ߫ ߘߏ ߟߎ߬ ߕߍ߫ ߞߢߊ߫ ߸ ߡߍ߲ ߠߎ߬ ߦߋ߫ ߞߍ߬ߟߍ ߞߍ߫ ߟߴߊߟߊ߫ ߛߌߟߊ ߞߊ߲߬ ߊ߬ߟߎ߬ ߟߊ߫ ߣߊ߲߬ߝߟߏ ߟߎ߬ ߣߴߊ߬ߟߎ߫ ߖߘߍ߬ߞߎ߲ ߠߎ߬ ߟߊ߫ ، ߡߍ߲ ߠߎ߫ ߘߏ߲߬ ߦߋ߫ ߞߍ߬ߟߍ ߞߍ߫ ߟߴߊ߬ߟߎ߬ ߟߊ߫ ߣߊ߲߬ߝߟߏ ߟߎ߬ ߣߴߊ߬ߟߎ߫ ߖߘߍ߬ߞߎ߲ ߠߎ߬ ߟߊ߫ ߸ ߊߟߊ߫ ߞߵߏ߬ ߟߎ߬ ߟߊߝߌ߬ߛߊ߬ߦߊ߫ ߟߋ߬ ߛߌ߰ߓߊ߮ ߟߎ߬ ߘߌ߫ ߡߐ߬ߟߐ߲ ߘߐ߫ ، ߊߟߊ߫ ߞߏ߬ߣߌ߲ ߞߵߊ߬ߟߎ߬ ߓߍ߯ ߦߟߌߡߊߘߌߦߊ߫ ߤߙߊ߫ ߟߋ߬ ߟߊ߫ ، ߓߊ߬ߙߌ߬ ߊߟߊ߫ ߞߊ߬ ߖߘߍ߬ߘߌ߬ߟߊ ߟߎ߫ ߟߋ߬ ߟߊߝߌ߬ߛߊ߬ߦߊ߫ ߛߌ߰ߓߊ߮ ߟߎ߬ ߘߌ߫ ߛߊ߬ߙߊ ߓߏ߲߬ߧߊ ߘߐ߫ ﴿95﴾

(ߛߊ߬ߙߊ ߏ߬ ߞߍߕߐ߫ ) ߞߛߊߞߊ ߟߎ߫ ߟߋ߬ ߘߌ߫ ߞߊ߬ ߝߘߴߊߟߊ߫ ߟߊ߫ ، ߊ߬ ߣߌ߫ ߦߝߊ߬ߟߌ ߣߌ߫ ߤߌߣߊ ߘߌ߫ ، ߊߟߊ߫ ߘߏ߲߬ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿96﴾

ߡߟߍ߬ߞߊ ߟߎ߬ ߓߊ߯ ߞߍ߫ ( ߛߌ߬ߟߊ߬ߡߊ߫ ) ߖߘߍ߬ߕߐ߬ߢߍ߰ߟߊ ߟߎ߬ ߛߏߡߊߦߟߍߡߊ߲߫ ߠߊ߫ ( ߓߊ߲߬ߓߊ߮ ߟߎ߫ ߝߍ߬ ) ߸ ߊ߬ߟߎ߬ ߘߴߊ߬ߟߎ߫ ߢߌ߬ߣߌ߲߬ߞߊ߬ ߞߏ߫ ߡߎ߲߬ ߠߴߊߟߎ߫ ߕߘߍ߬ ( ߓߊ߲߬ߓߊ߮ ߟߎ߫ ߝߍ߬ ߦߊ߲߬)؟ ߊ߬ߟߎ߬ ߘߴߊ߬ߟߎ߫ ߖߋ߬ߓߌ߬ ߞߏ߫ ߒ߬ߠߎ߬ ߖߐ߲ߝߐ߲ߣߍ߲߫ ߠߋ߫ ߕߍ߬ߘߍ߫ ߖߡߊ߬ߣߊ ߞߣߐ߫ ، ߡߟߍ߬ߞߊ ߟߎ߬ ߘߴߊ߬ ߝߐ߫ ߞߏ߫ ߊߟߊ߫ ߟߊ߫ ߘߎ߰ߞߟߏ ߕߎ߲߬ ߦߙߌߥߊߣߍ߲߫ ߕߍ߫ ߓߊ߬ ߊߟߎ߫ ߦߋ߫ ߝߎ߲ߘߌ߫ ( ߞߊ߬ ߕߊ߯ ) ߊ߬ ߢߊߝߍ߬؟ ߒ߬ߓߊ߬ ߏ߬ ߟߎ߫ ߟߋ߬ ߡߊߞߍ߫ ߦߌߟߊ ߦߋ߫ ߔߊߦߌߔߊߦߌ ߘߌ߫ ، ߏ ߘߏ߲߬ ߦߋ߫ ߟߊ߬ߓߊ߲߬ ߦߌ߬ߟߊ߬ ߖߎ߯ ߘߌ߫ ߞߟߋ߫ ﴿97﴾

ߝߏ߫ ߖߐ߲ߝߐ߲ߓߊ߯ߕߐ ߡߍ߲ ߠߎ߬ ߦߋ߫ ߗߍ߭ ߟߎ߬ ߣߌ߫ ߡߏ߬ߛߏ ߟߎ߬ ߣߌ߫ ߘߋ߲ߕߊ߯ߣߍ߲ ߠߎ߬ ߘߐ߫ ߸ ߣߴߊ߬ߟߎ߬ ߕߍ߫ ߝߙߍ߬ ߟߊߣߐ߬ ߟߊ߫ ߸ ߊ߬ߟߎ߫ ߘߏ߲߬ ߡߊ߫ ߕߊ߯ ߛߌߟߊ߫ ߟߐ߲߫ ﴿98﴾

ߏ߬ ߟߎ߫ ߞߏ߬ߣߌ߲ ߸ ߊ߬ ߢߐ߲߰ߘߐ߫ ߊߟߊ߫ ߘߌ߫ ߜߊ߲ߒߞߎ߲ߠߊ߫ ߏ߬ ߟߎ߫ ߡߊ߬ ߸ ߓߊߏ߬ ߊߟߊ߫ ߦߋ߫ ߜߊ߲ߒߞߎ߲ߠߟߊ߫ ߘߌ߫ ߸ ߊ߰ ߦߝߊ߬ߟߊ߫ ߘߌ߫ ﴿99﴾

ߡߍ߲ ߓߊ߯ ߝߎ߲ߘߌ߫ ߊߟߊ߫ ߛߌߟߊ ߞߊ߲߬ ߸ ߏ߬ ߘߌ߫ ߞߎ߲߬ߞߊ߬ߙߌ߬ߝߊ߬ ߦߙߐ߬ ߛߌߦߊߡߊ߲߫ ߣߌ߫ ߦߙߌߥߓߊ߫ ߛߐ߬ߘߐ߲߫ ߖߡߊ߬ߣߊ ߢߊߝߍ߬ ، ߡߍ߲ ߝߎ߲ߘߌߓߊ߯ߕߐ ߓߊ߯ ߓߐ߫ ߊ߬ ߟߊ߫ ߓߏ߲ ߠߊ߫ ߞߊ߬ ߕߊ߯ ߊߟߊ߫ ߣߴߊ߬ ߟߊ߫ ߗߋߘߋ߲ ߞߐ߫ ، ߣߌ߫ ߛߊ߬ߦߊ߫ ߞߵߏ ߛߐ߬ߘߐ߲߫ ( ߦߋ߲߬ ) ߸ ߏ ߛߊ߬ߙߊ ߓߘߊ߫ ߞߍ߫ ( ߕߍ߰ߒߞߊ߲) ߘߌ߫ ߊߟߊ߫ ߡߊ߬. ߊߟߊ߫ ߘߏ߲߬ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿100﴾

ߣߴߊߟߎ߫ ߞߍ߫ ߘߊ߫ ߡߊ߬ߕߊ߰ߡߊ߬ߟߌ ߟߊ߫ ߖߡߊ߬ߣߊ ߞߣߐ߫ ߸ ߞߎ߲߬ߞߏ߬ ߕߍ߫ ߊߟߎ߫ ߡߊ߬ ߛߊߟߌ ߘߐߘߛߏ ߘߐ߫ ߸ ߣߴߊߟߎ߫ ߛߌߟߊ߲߫ ߘߊ߫ ߞߊ߬ߣߌ߲߬ ߞߏ߫ ߓߊ߲߬ߓߊ߮ ߟߎ߬ ߞߊߣߊ߬ ߥߊ߬ߥߎߟߋ ߟߴߊߟߎ߫ ߞߊ߲߬ ، ߓߊߏ߬ ߓߊ߲߬ߓߊ߮ ߟߎ߬ ߦߴߊߟߎ߫ ߖߎ߯ ߘߐߜߍ ߖߍ߬ߘߍ ߟߋ߬ ߘߌ߫ ﴿101﴾

ߣߴߌߟߋ ߞߍ߫ ߘߴߊ߬ߟߎ߫ ߝߍ߬ ߸ ߞߵߊ߬ ߕߘߍ߬ ߌ ߦߴߊ߬ߟߎ߬ ߟߛߊߟߌ ߞߊ߲߬ ߸ ߊ߬ߟߎ߫ ߝߊ߲߬ ߞߋߟߋ߲ ߦߴߊ߬ߟߎ߫ ߟߐ߬ ߌ ߞߕߐ߫ ، ߘߏ ߟߎ߬ ߦߴߊ߬ߟߎ߬ ߟߊ߫ ߞߟߍ߬ߟߊ߲ ߠߎ߫ ߕߊ߬ ، ߛߊߟߌߟߊ ߟߎ߬ ߓߊ߯ ߓߊ߲߫ ߕߌ߲ߓߌߘߌ߲ ߠߊ߫ ߸ ߏ߬ ߟߎ߬ ߦߋ߫ ߦߟߍ߬ߡߊ߲߫ ߊߟߎ߫ ߞߐߞߘߐ߫ ، ߖߊ߬ߡߊ ߕߐ߬ ߝߊ߲߬ ߞߋߟߋ߲ ߡߍ߲ ߡߊ߫ ߕߘߍ߬ ߛߊߟߌ ߘߐ߫ ߸ ߏ߬ ߟߎ߬ ߦߋ߫ ߣߊ߬ ߛߊߟߴߌ ߝߍ߬ ߸ ߘߏ ߟߎ߬ ߝߣߊ߫ ߦߋ߫ ߖߊ߲߬ߕߏ߬ߟߌ ߣߴߊ߬ߟߎ߬ ߟߊ߫ ߞߟߍ߬ߟߊ߲ ߠߎ߫ ߕߊ߬. ߓߊ߲߬ߓߊ߮ ߟߎ߬ ߦߴߊ߬ ߝߍ߬ ߟߋ߬ ߊߟߎ߫ ߦߴߊߟߎ߫ ߖߊ߲߬ߓߐ߫ ߊߟߎ߫ ߟߊ߫ ߞߟߍ߬ߟߊ߲ ߠߎ߬ ߣߴߊߟߎ߫ ߓߟߏߝߋ߲ ߠߎ߬ ߘߐ߫ ، ߏ߬ ߓߊ߯ ߞߍ߫ ߸ ߊ߬ߟߎ߬ ߦߋ߫ ߝߏ߫ ߞߋߟߋ߲ߘߌ߫ ߞߌߎ߫ ߞߊ߬ ߟߴߊߟߎ߫ ߞߊ߲߬. ߣߌ߫ ߕߙߐߦߊ߫ ߟߊ߫ ߘߴߊߟߎ߫ ߞߊ߲߬ ߛߊ߲ߖߌ ߓߟߏ߫ ߸ ߥߟߴߊߟߎ߫ ߖߊ߲߬ߞߊ߬ߙߏ߬ߕߐ ߞߍ߫ ߘߊ߫ ߸ ߞߎ߲߬ߞߏ߬ ߕߍ߫ ߊߟߎ߫ ߡߵߊߟߎ߫ ߟߊ߫ ߞߟߍ߬ߟߊ߲ ߠߎ߬ ߟߊ ߘߐ߫ ߏ߬ ߘߐ߫ ، ߊߟߎ߫ ߞߏ߬ߣߌ߲߬ ߦߴߊߟߎ߫ ߓߟߏߞߍ߫ ߊߟߎ߫ ߟߊ߫ ߖߊ߲߬ߕߏ߬ߟߌ ߟߊ߫ ߘߋ߬ ، ߖߊ߯ߕߋ߬ ߸ ߊߟߊ߫ ߣߊ߬ ߟߊ߬ߝߍߦߊ ߖߊ߲߰ߞߕߊ ߟߋ߬ ߘߐߓߍ߲߬ ߠߊ߫ ߓߊ߲߬ߓߊ߮ ߟߎ߬ ߦߋ߫ ﴿102﴾

ߣߴߊߟߎ߫ ߓߊ߲߫ ߘߊ߫ ߛߊߟߌ ߟߊ߫ ߸ ߊߟߎ߫ ߦߋ߫ ߊߟߊ߫ ߞߏߝߐ߫ ߟߐ߭ ߘߐ߫ ߸ ߛߌ߱ ߘߐ߫ ߸ ߊ߬ ߣߌ߫ ߟߊߟߌ ߘߐ߫ ߊߟߎ߫ ߝߎ߬ߘߎ ߟߎ߫ ߞߊ߲߬ ، ߣߴߊߟߎ߫ ߡߝߊ߫ ߘߊ߫ ߛߊ߫ ߸ ߊߟߎ߫ ߛߊߟߌ ߟߐ߬ ( ߊ߬ ߢߊ߫ ߓߘߍ ߡߊ߬) ߸ ߓߊߏ߬ ߛߊߟߌ ߦߋ߫ ߘߍ߲߬ߞߣߍ߬ߦߊ߬ߓߊ߮ ߟߎ߫ ߡߊ߬ ߛߋ߲ߛߋߘߋ߲߫ ߥߊ߯ߕߌ߫ ߟߊߕߍ߰ߣߍ߲߫ ߠߋ߬ ߘߌ߫ ﴿103﴾

ߊߟߎ߫ ߞߣߊ߫ ߝߊ߬ߘߌ߬ߘߐߝߊ߰ ߖߎ߮ ߟߎ߬ ߢߌߣߌ߲ ߘߐ߫ ߘߋ߬ ، ߓߊߏ߬ ߣߌ߫ ߘߌߡߌ߲ ߞߍ߫ ߘߴߊߟߎ߫ ߛߐ߬ߘߐ߲߬ ߠߊ߫ ߸ ߘߌߡߌ߲ ߦߋ߫ ߖߎ߮ ߟߎ߬ ߝߣߊ߫ ߛߐ߬ߘߐ߲߬ ߠߊ߫ ߦߏ߫ ߊ߬ ߦߴߊߟߎ߫ ߛߐ߬ߘߐ߲߬ ߠߊ߫ ߢߊ ߡߍ߲ ، ߊߟߎ߫ ߘߏ߲߬ ߦߟߌ߫ ߝߋ߲߫ ߠߋ߬ ߟߊ߫ ߊߟߊ߫ ߓߟߏ߫ ߸ ߘߐ ߏ߬ ߟߎ߬ ߦߟߌ߫ ߕߍ߫ ߡߍ߲ ߠߊ߫ ، ߖߊ߯ߕߋ߬ ߸ ߊߟߊ߫ ߦߋ߫ ߟߐ߲ߠߌ߲ߠߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿104﴾

ߒ߬ߠߎ߫ ߣߊ߬ ߟߍߙߊ ߟߊߖߌ߰ ߟߴߌ ߡߊ߬ ߕߎ߬ߢߊ ߘߌ߫ ߟߋ߬ ߸ ߛߴߌ ߘߌ߫ ߞߕߌ߫ ߡߐ߱ ߟߎ߬ ߕߍ߫ ߝߋ߲߫ ߡߊ߬ ߸ ߊߟߊ߫ ߞߊ߬ ߡߍ߲ ߦߘߵߌ ߟߊ߫ ، ߏ߬ ߘߐ߫ ߸ ߌ ߞߊߣߊ߬ ߞߍ߫ ߥߦߐ߬ ߞߍ߬ߓߊ߯ ߘߌ߫ ߖߊ߲߬ߝߊ߬ߒߕߋ ߟߎ߬ ߦߋ߫ ߘߋ߬ ﴿105﴾

ߌ ߦߋ߫ ߦߝߊ߬ ߢߌߣߌ߲ ߞߍ߫ ߊߟߊ߫ ߟߊ߫ ߸ ߓߊߏ߬ ߊߟߊ߫ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿106﴾

ߌ ߞߊߣߊ߬ ߘߊߘߛߐߛߐ ߞߍ߫ ߡߐ߱ ߟߎ߬ ߟߊ߫ ߞߏ߫ ߟߊ߫ ߸ ߡߍ߲ ߠߎ߬ ߦߴߊ߬ߟߎ߫ ߖߍ߬ߘߍ߫ ߖߊ߲߬ߝߊ߬ ߟߊ߫ ، ߓߊߏ߬ ߊߟߊ߫ ߕߍ߫ ߡߐ߰ ߝߍ߬ ߸ ߡߍ߲ ߦߋ߫ ߖߊ߲߬ߝߊ߬ߒ߬ߕߋ߬ߓߊ߫ ߖߟߎ߬ߡߎ߲߬ߕߐ ߘߌ߫ ﴿107﴾

ߊ߬ߟߎ߬ ߘߴߊ߬ߟߎ߫ ߘߏ߲߰ ߦߙߐ߬ ߢߌߣߌ߲߫ ߡߐ߱ ߟߎ߫ ߟߋ߫ ߡߊ߬ ، ߒ߬ߞߵߊ߬ߟߎ߬ ߕߍ߫ ߊ߬ߟߎ߫ ߘߏ߲߰ ߦߙߐ߬ ߢߌߣߌ߲߫ ߊߟߊ߫ ߡߊ߬ ߘߋ߬ ، ߓߊ ߏ߬ ߦߴߊ߬ߟߎ߬ ߘߊߝߍ߬ ߟߋ߬ ߸ ߏ ߕߎ߬ߡߴߊ߬ߟߎ߬ ߦߋ߫ ߛߌ߬ ߟߊ߫ ߞߎߡߊ߫ ߟߎ߫ ߞߊ߲߬ ߸ ߊߟߊ߫ ߕߍ߫ ߘߌ߬ߢߍ߬ ߡߍ߲ ߠߎ߫ ߡߊ߬ ، ߊߟߊ߫ ߘߏ߲߬ ߣߵߊ߬ߟߎ߬ ߗߋߥߊߟߌ ߟߎ߬ ߟߊߝߏ߬ ߟߊ߫ ߟߋ߬ ߔߘߋߞߎ߬ ﴿108﴾

ߤߍ߲߬ ߊߟߎ߬ ߸ ߊߟߎ ߟߋ߫ ߞߊ߬ ߘߊߘߛߐߛߐ ߞߍ߫ ߊ߬ߟߎ߬ ߟߊ߫ ߞߏ߫ ߟߊ߫ ߘߎߢߊ߫ ߢߣߊߡߦߊ ߘߐ߫ ، ߒ߬ߓߊ߬ ߖߍߣߍ߲ ߘߌ߫ ߘߊߘߛߐߛߐ ߞߍ߫ ߊߟߊ߫ ߝߍ߬ ߊ߬ߟߎ߬ ߟߊ߫ ߞߏ߫ ߟߊ߫ ߟߐ߬ߓߊ ߟߏ߲؟ ߥߟߊ߫ ߖߍߣߍ߲ ߘߌ߫ ߞߍ߫ ߊ߬ߟߎ߬ ߦߋ߫ ߛߍ߲߬ߓߍ߬ߟߊ߲߫ ߘߌ߫؟ ﴿109﴾

ߡߍ߲ ߓߊ߯ ߖߎ߯ߡߊ߲߫ ߞߍ߫ ߥߟߊ߫ ߞߵߊ߬ ߖߍ߬ߘߍ߫ ߕߐ߬ߢߍ߰ ߞߏ߫ ߞߍ߫ ߸ ߞߊ߬ ߓߊ߲߫ ߞߊ߬ ߦߝߊ߬ ߢߌߣߌ߲ ߞߍ߫ ߊߟߊ߫ ߟߊ߫ ߸ ߏ߬ ߘߌ߫ ߊߟߊ߫ ߕߘߍ߬ ߦߝߊ߬ߟߊ߫ ߤߌߣߟߊ߫ ߘߌ߫ ﴿110﴾

ߡߍ߲ ߘߏ߲߬ ߓߊ߯ ߖߟߎ߬ߡߎ߲߬ ߞߍ߫ ߸ ߏ߬ ߦߴߏ߬ ߞߍ߫ ߟߴߊ߬ ߖߍ߬ߘߍ߫ ߟߋ߬ ߟߊ߫ ، ߖߊ߯ߕߋ߬ ߸ ߊߟߊ߫ ߦߋ߫ ߟߐ߲ߠߌ߲ߠߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿111﴾

ߡߍ߲ ߓߊ߯ ߝߎ߬ߕߎ߲߬ߕߌ߫ ߞߍ߫ ߥߟߊ߫ ߖߟߎ߬ߡߎ߲߫ ߸ ߞߊ߬ ߓߊ߲߫ ߞߵߏ߬ ߥߎߦߊ ߟߊ߫ ߡߐ߰ ߟߊߜߍߣߍ߲ ߘߏ߫ ߟߊ߫ ߸ ߏ߬ ߓߘߴߊ߬ ߢߎ߲߫ ߞߊ߬ߙߏ߲ ߠߊ߫ ߊ߬ ߣߌ߫ ߖߟߎ߬ߡߎ߲߬ ߘߐ߬ߜߍ߬ ߟߊ߫ ﴿112﴾

ߣߌ߫ ߊߟߊ߫ ߟߊ߫ ߢߊ߬ߒߡߊ߭ ߣߴߊ߬ ߟߊ߫ ߤߌߣߊ ߕߴߌ ߞߊ߲߬ ߸ ߊ߬ߟߎ߫ ߝߊ߲߬ ߞߋߟߋ߲ ߕߎ߲߬ ߓߍ߫ ߢߌߣߌ߲߫ ߞߵߌ ߟߊߝߟߌ߬ ، ߊ߬ߟߎ߫ ߘߏ߲߬ ߕߍ߫ ߡߐ߰ ߛߌ߫ ߟߊߝߟߌ߬ ߟߴߊ߬ߟߎ߫ ߖߍ߬ߘߍ ߞߐ߫ ، ߊ߬ߟߎ߫ ߘߏ߲߬ ߕߍ߫ ߛߴߌ ߕߙߐ߫ ߟߊ߫ ߝߏߦߌ߬ ߟߊ߫. ߊߟߊ߫ ߟߋ߫ ߞߊ߬ ߟߍߙߊ ߣߌ߫ ߥߘߋ߬ߥߘߋ߬ߟߌ ߟߊߖߌ߰ ߌ ߡߊ߬ ߸ ߞߵߌ ߟߊߟߐ߲ߠߌ߲߫ ߞߏ߫ ߟߊ߫ ߌ ߕߎ߲߬ ߡߊ߫ ߡߍ߲ ߟߐ߲߫ ، ߊߟߊ߫ ߟߊ߫ ߢߊ߬ߒߡߊ߭ ߓߏ߲߬ߓߊ߫ ߟߵߌ ߞߊ߲߬ ߘߋ߬ ﴿113﴾

ߤߙߊ߫ ߕߍ߫ ߊ߬ߟߎ߬ ߟߊ߫ ߢߐ߲߯ߦߋ ߛߌߦߊߡߊ߲߫ ߘߐ߫ ߸ ߝߏ߫ ߡߍ߲ ߓߊ߯ ߖߊ߬ߡߊߙߌ߫ ߞߍ߫ ߝߊ߲߬ߞߊ߬ߘߡߊ߬ ߓߐ߫ ߟߊ߫ ߥߟߊ߫ ߢߌ߬ߡߊ߬ ߞߍ߫ ߟߊ߫ ߸ ߤߊߡߊ߲ߕߍ߫ ߡߐ߱ ߟߎ߬ ߕߍߘߐߓߍ߲߫ ߠߊ߫ ، ߡߍ߲ ߓߴߏ߬ ߞߍ߫ ߊߟߊ߫ ߟߊ߫ ߘߌ߬ߢߍ ( ߟߎ߬ ) ߢߌߣߌ߲ ߡߊ߬ ߸ ߛߋߚߋ߫ ߊ߲ ߘߌߣߵߏ߬ ߛߐ߫ ߛߙߊ߬ ߓߟߋߓߟߋ ߟߊ߫ ﴿114﴾

ߡߍ߲ ߓߊ߯ ߕߍߜߟߍߦߊ ߟߐ߬ ߞߋߟߊ ߡߊ߬ ߞߊ߲ߘߦߊ ߟߊ߲ߞߣߍߡߊߣߍ߲ ߞߐ߫ ߊ߬ ߦߋ߫ ߸ ߊ߬ ߣߌ߫ ߞߊ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߟߊ߫ ߛߌߟߊ ߕߣߊ߬ ߟߊߓߊ߬ߕߏ߬ ߸ ߊ߲ ߘߴߏ߬ ߓߛߌ߬ ߝߋ߲߫ ߠߊ߫ ߸ ߊ߬ ߞߵߊ߬ ߖߍ߬ߘߍ߫ ߓߛߌ߬ ߡߍ߲ ߠߊ߫ ( ߞߵߊ߬ ߕߏ߫ ߊ߬ ߟߊ߫ ߛߌߟߊ ߞߊ߲߬ ߞߊ߬ߣߌ߲߫ ) ߸ ߊ߲ ߘߌ߫ ( ߓߊ߲߫ ߞߊ߬ ) ߊ߬ ߟߊߘߏ߲߬ ߔߊߦߌߔߊߦߌ ߘߐ߫ ، ߏ ߘߏ߲߬ ߦߋ߫ ߟߊ߬ߓߊ߲߬ ߦߌ߬ߟߊ߬ ߖߎ߯ ߘߌ߫ ߞߟߋ߫ ﴿115﴾

ߊߟߊ߫ ߕߍ߫ ߞߏ ߡߍ߲ ߦߝߊ߬ ߝߋߎ߫ ߸ ߏ߬ ߟߋ ߘߏ߫ ߝߊ߬ߙߊ ߘߴߊ߬ ߞߊ߲߬ ߸ ߊ߬ ߞߏ߬ߣߌ߲߬ ߘߌ߫ ߞߏ߫ ߜߘߍ߫ ߦߊ߬ߝߊ߫ ߸ ߡߍ߲ ߕߴߏ߬ ߘߌ߫ ، ߊ߰ ߏ߬ ߞߍ߫ ߟߊ߫ ߡߐ߰ ߟߋ߬ ߦߋ߫ ߸ ߡߍ߲ ߓߊ߯ ߊ߬ ߘߌߦߊ߫ ، ߡߍ߲ ߞߏ߬ߣߌ߲߬ ߓߊ߯ ߘߏ߫ ߝߙߊ߬ ߊߟߊ߫ ߞߊ߲߬ ߸ ߏ߬ ߓߘߊ߫ ߝߌ߬ߟߌ߫ ߞߊ߬ ߘߏ߲߬ ߝߟߌ߬ߥߊ ߟߊ߫ ߔߘߋߞߟߋ߫ ﴿116﴾

ߊ߬ߟߎ߬ ߕߍ߫ ߝߏߦߌ߫ ߓߊ߬ߕߏ߬ ߟߊ߫ ߞߵߊߟߊ߫ ߕߏ߫ ߸ ߝߏ߫ ߖߏ߬ ߡߛߏ ߟߎ߬ ، ߊ߬ߟߎ߫ ߘߏ߲߬ ߕߍ߫ ߝߏߦߌ߫ ߓߊ߬ߕߏ߬ ߟߴߏ߬ ߘߌ߫ ߸ ߝߏ߫ ߜߍ߬ߘߍ߫ ߞߊ߲ߘߐߜߍߟߍ߲ ﴿117﴾

ߊߟߊ߫ ߞߵߏ߬ ߘߊ߲ߞߊ߫ ߟߋ߬ ، ߏ߬ ߞߊ߲߫ ߏ߬ ߟߋ ߘߐ߫ ߸ ߞߏ߫ ߛߋߚߋ߫ ߒ ߘߌߣߊ߬ ߒ ߕߊ߫ ߣߌ߬ ߘߊ߲߬ߠߊߕߍ߰ߣߍ߲ ߕߊ߬ ߌ ߟߊ߫ ߖߐ߲߭ ߠߎ߬ ߘߐ߫ ߟߋ߬ ߘߍ߯ ﴿118﴾

ߒ ߘߴߏ߬ ߟߎ߬ ߟߊߝߟߌ߬ ، ߒ ߘߴߊ߬ߟߎ߬ ߟߊߣߕߊ߬ ߸ ߊ߬ ߣߌ߫ ߒ ߘߴߊ߬ߟߎ߫ ߖߊ߬ߡߊߙߌ߫ ߊ߬ߟߎ߬ ߦߋ߫ ߓߌߦߊ߲ ߠߎ߬ ߕߟߏ ߟߎ߫ ߕߍ߰ ߸ ߒ ߘߴߊ߬ߟߎ߫ ߖߡߊ߬ߙߌ߬ ߝߣߊ߫ ߸ ߊ߬ߟߎ߬ ߦߴߊߟߊ߫ ߟߊ߫ ߘߊ߲ߠߌ߲ ߡߊߦߟߍ߬ߡߊ߲߫ ، ߡߍ߲ ߘߏ߲߬ ߓߊ߯ ߜߍ߬ߘߍ ߞߍ߫ ߊ߬ ߢߌ߲߭ ߘߌ߫ ߞߵߊߟߊ߫ ߕߏ߫ ߸ ߏ߬ ߓߘߊ߫ ߓߐ߬ߣߐ߫ ߸ ߓߣߐ߬ ߘߐ߬ߜߍ ߟߋ߬ ߟߴߏ߬ ߘߌ߫ ߘߋ߬ ﴿119﴾

ߜߍ߬ߘߍ ߟߴߊ߬ߟߎ߬ ߦߟߌߡߊߘߌߦߊ߫ ߟߊ߫ ߞߵߊ߬ߟߎ߬ ߟߊߣߕߊ߬ ، ߊ߬ ߘߏ߲߬ ߕߍ߫ ߊ߬ߟߎ߬ ߦߟߌߡߊߘߌߦߊ߫ ߟߊ߫ ߝߏߦߌ߬ ߟߊ߫ ߝߏ߫ ߡߊߙߊ߲ߛߊ ﴿120﴾

ߏ߬ ߟߎ߫ ߟߋ߬ ߡߊߞߍ߫ ߦߌߟߊ ߞߍߕߐ߫ ߔߊߦߌߔߊߦߌ ߘߌ߫ ߸ ߊ߬ߟߎ߫ ߘߏ߲߬ ߕߍߣߊ߬ ߞߘߐߞߊ߫ ߦߌߟߊ߫ ߛߐ߬ߘߐ߲߬ ߠߴߏ߬ ߟߊ߫ ﴿121﴾

ߡߍ߲ ߠߎ߫ ߘߏ߲߬ ߘߍ߲߬ߞߣߍ߬ߦߊ߬ߣߍ߲߫ ߞߊ߬ ߢߌ߬ߡߊ ߟߎ߬ ߞߍ߫ ߸ ߛߋߚߋ߫ ߊ߲ ߘߌߣߵߏ߬ ߟߎ߬ ߟߊߘߏ߲߬ ߣߊߞߐ ߟߎ߬ ߘߐ߫ ߸ ߖߌߢߊ ߟߎ߯ ߞߎ߬ߟߊ߲߬ߞߎ߬ߟߊ߲߬ ߠߊ߫ ߡߍ߲ ߠߎ߬ ߞߘߐߟߊ ߟߎ߬ ߘߐ߫ ، ߏ߬ ߟߎ߬ ߘߎߡߊߕߐ߫ ߦߋ߲߬ ߠߋ߬ ߞߘߊߎ߫ ، ߊߟߊ߫ ߟߊ߫ ߦߟߌߡߊߘߌߦߊ߫ ߕߎ߬ߢߊ߬ߡߊ ߟߴߏ߬ ߘߌ߫ ، ߖߍߣߍ߲ ߘߏ߲߬ ߘߌ߫ ߞߎߡߊ ߕߎ߬ߢߊ ߝߐ߫ ߞߊ߬ ߕߊ߬ߡߌ߲߬ ߊߟߊ߫ ߟߊ߫؟ ﴿122﴾

ߞߏ ߕߍ߫ ߊߟߎ߫ ߛߊ߬ߥߏ ߘߌ߫ ߸ ߊ߬ ߕߍ߫ ߟߍߙߊߟߞߊ ߟߎ߫ ߛߊ߬ߥߏ ߘߌ߫ ، ߡߍ߲ ߞߏ߬ߣߌ߲߬ ߓߊ߯ ߖߎ߯ߡߊ߲߫ ߞߍ߫ ߸ ߏ߬ ߛߙߊ߬ߕߐ߫ ߏ߬ ߟߋ ߟߊ߫ ، ߢߌ߲߬ ߜߘߍ߫ ߣߌ߫ ߘߍ߬ߡߍ߲߬ߓߊ߰ ߜߘߍ߫ ߘߏ߲߬ ߕߍ߫ ߛߐ߬ߘߐ߲߫ ߏ߬ ߟߊ߫ ߸ ߡߍ߲ ߕߍ߫ ߊߟߊ߫ ߘߌ߫ ﴿123﴾

ߡߍ߲ ߓߊ߯ ߢߌ߬ߡߊ ߘߏ߫ ߞߍ߫ ߗߍ߬ ߘߐ߫ ߥߟߊ߫ ߡߛߏ߬ ߘߐ߫ ߸ ߊ߬ ߘߏ߲߬ ߦߋ߫ ߘߍ߲߬ߞߣߍ߬ߦߊ߬ߓߊ߯ ߘߌ߫ ߸ ߏ߬ ߟߎ߫ ߟߋ߫ ߘߏ߲߬ߕߐ߫ ߡߍ߲ߘߌߦߊ ߣߊߞߐ ߘߐ߫ ، ߊ߬ߟߎ߫ ߘߏ߲߬ ߕߍ߫ ߕߐ߬ߢߍ߰ ߕߡߊߙߏ ߘߟߊߛߙߊߓߊ ߢߐ߲߰ߣߍ߲߬ ߠߊ߫ ﴿124﴾

ߖߍߣߍ߲ ߠߊ߫ ߘߌ߯ߣߊ ߘߌ߫ ߢߊ߬ ߞߊ߬ ߕߊ߬ߡߌ߲߬ ߊ߬ ߢߊߘߐߟߊ ߞߟߏߓߊ߮ ߞߊ߲߬ ߊߟߊ߫ ߦߋ߫؟ ߊ߬ ߘߏ߲߬ ߦߋ߫ ߢߊ߬ߓߊ߯ ߘߌ߫ ߸ ߊ߬ ߣߴߊ߬ ߞߊ߬ ߌߓߎ߬ߙߊ߬ߤߌߡߊ߫ ߟߊ߫ ߣߊߡߎ߲ ߠߊߓߊ߬ߕߏ߬ ߖߐ߲ߖߐ߲߫؟ ߊߟߊ߫ ߞߊ߬ ߌߓߎߓߙߊ߬ߤߌߡߊ߫ ߟߋ߫ ߡߌ߬ߘߴߊ߬ ߕߋߙߌ ߘߌ߫ ﴿125﴾

ߊߟߊ߫ ߕߊ ߟߋ߬ ߛߊ߲ ߠߎ߬ ߞߣߐ߫ ߝߋ߲ ߣߌ߫ ߘߎ߱ ߞߣߐ߫ ߝߋ߲ ( ߓߍ߯ ) ߘߌ߫ ، ߊߟߊ߫ ߘߏ߲߬ ߞߍߣߍ߲߫ ߠߋ߬ ߞߊ߬ ߝߋ߲ ߓߍ߯ ߟߊߝߏ߬ ߔߘߋߞߎ߬ ﴿126﴾

ߊ߬ߟߎ߬ ߦߋ߫ ߖߋ߬ߓߌ߬ߟߌ ߢߌߣߌ߲߫ ߠߴߌ ߝߍ߬ ߡߏ߬ߛߏ ߟߎ߬ ߟߊ߫ ߞߏ ߡߊ߬ ، ߊ߬ ߝߐ߫ ߞߏ߫ ߊߟߊ߫ ߦߴߊߟߎ߫ ߖߋ߬ߓߌ߬ ߟߴߏ߬ ߟߎ߬ ߟߊ߫ ߞߏ ߟߋ߬ ߘߐ߫ ߣߌ߲߬ ، ߊ߬ ߣߴߏ߬ ߢߊ ߡߍ߲ ߘߐߞߊ߬ߙߊ߲߬ߕߐ߫ ߊߟߎ߫ ߦߋ߫ ߟߍߙߊ ߞߣߐ߫ ߛߍ߲ ߸ ߏ߬ ߦߋ߫ ߡߛߏ߬ ߝߊߙߌߕߊ ߟߎ߫ ߟߋ߬ ߟߊ߫ ߞߏߢߊ ߘߌ߫ ߸ ߊߟߎ߫ ߕߴߏ߬ ߟߎ߬ ߡߍ߲ ߠߎ߬ ߝߘߎߝߋ߲߫ ߘߊ߲߬ߠߊߕߍ߰ߣߍ߲ ߘߌ߫ ߟߴߊ߬ߟߎ߫ ߡߊ߬ ، ߊߟߎ߫ ߘߏ߲߬ ߦߴߊ߬ ߝߍ߬ ߞߵߊ߬ߟߎ߫ ߛߌ߰ ߊߟߎ߫ ߞߎ߲߬ ، ߊ߬ ߣߌ߫ ߘߋ߲߫ ߟߊ߲߰ߝߏ߬ߣߍ߲߫ ( ߞߎ߲߬ߡߊ߬ߞߘߎ߬ߓߊߟߌ ߟߎ߬ ) ߟߊ߫ ߞߏߢߊ ، ߞߏ߫ ߊߟߎ߫ ߦߴߊߟߎ߫ ߟߐ߬ ߝߊߙߌߕߊ ߟߎ߬ ߦߋ߫ ߕߋߟߋ߲ ߠߋ߬ ߟߊ߫ ، ߊߟߎ߫ ߘߏ߲߬ ߞߊ߬ ߝߋ߲-ߋ-ߝߋ߲߫ ߞߍ߫ ߤߙߊ߫ ߘߐ߫ ߸ ߊߟߊ߫ ߞߵߏ߬ ߟߐ߲߫ ߖߐ߫ ﴿127﴾

ߣߌ߫ ߡߏ߬ߛߏ ߡߍ߲ ߛߌߟߊ߲߫ ߘߴߊ߬ ߗߍ߬ ߢߍ߫ ߢߊߘߐߗߌ߲߫ ߞߏ ߘߐ߫ ߸ ߥߟߊ߫ ߞߐߘߏ߲߫ ߞߏ ߘߐ߫ ߊ߬ ߟߊ߫ ߸ ߞߎ߲߬ߞߏ߬ ߕߴߏ߬ ߟߎ߫ ߡߊ߬ ߕߍߘߐߓߍ߲ ߘߐ߫ ߊ߬ ߓߊ߯ ߞߍ߫ ߕߍߘߐߓߍ߲߫ ߢߊ ߛߎ-ߎ-ߛߎ߯ ߘߌ߫ ، ߕߍߘߐߓߍ߲ ߠߋ߬ ߘߏ߲߬ ߞߊ߫ ߝߌ߬ߛߊ߬ ( ߝߘߊߟߌ ߘߌ߫ ) ߸ ߓߊ߬ߙߌ߬ ߝߋ߲ߞߏߒߕߋߦߊ ߟߋ߫ ߥߙߊ߬ߣߍ߲߬ ߣߌ ߓߍ߯ ߘߐ߫. ߣߴߊߟߎ߫ ߞߏ߬ߣߌ߲ ߞߊ߬ ߟߢߊ߬ߟߌ ߞߍ߫ ߞߵߊߟߎ߫ ߝߊ߲ߕߊ߲߬ߞߊ߬ ߸ ( ߏ߬ ߟߋ ߓߍ߲߬ߣߍ߲߫ ) ، ߓߊ ߊߟߴߊߟߎ߫ ߗߋߥߊߟߌ ߟߎ߫ ߞߟߊ߬ߡߊ߬ߓߊ߯ ߟߋ߬ ߘߌ߫ ﴿128﴾

ߊߟߎ߫ ߕߍߣߊ߬ ߛߋ߫ ߕߋߟߋ߲ ߟߊߣߐ߬ ߟߊ߫ ߡߏ߬ߛߏ ߟߎ߬ ߕߍ߫ ߤߊߟߵߏ߬ ߓߊ߯ ߘߌߦߊ߫ ߊߟߎ߫ ߢߍ߫ ߢߊ-ߊ-ߢߊ߫ ، ߞߏ߬ߣߌ߲߬ ߊߟߎ߫ ߞߊߣߵߊߟߎ߫ ߖߍ߲߬ߞߍ߫ ߖߍ߲߬ߞߍ߬ߟߌ ߡߎ߰ߡߍ ߟߊ߫ ߸ ߞߊ߬ ߘߐ ߟߊߞߏߟߏ߲ ߕߏ߫ ߦߏ߫ ߝߋ߲߫ ߜߊ߲ߛߊ߲߫ ߘߎ߲ߣߍ߲ ߠߋ߬. ߣߴߊߟߎ߫ ߞߏ߬ߣߌ߲ ߞߊ߬ ߟߢߊ߬ߟߌ ߞߍ߫ ߞߵߊߟߎ߫ ߝߊ߲ߕߊ߲߬ߞߊ߫ (ߏ߬ ߟߋ ߓߍ߲߬ߣߍ߲߬) ، ߓߊ ߊߟߊ߫ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ߘߌ߫ ﴿129﴾

ߣߌ߫ ‹ ߝߘߎߡߊ߫ › ߝߌ߬ߟߊ ߝߘߊ߫ ߘߊ߫ ߸ ߊߟߊ߫ ߘߴߊ߬ ߓߍ߯ ߟߊߞߊ߯ߙߌ߫ ߊ߬ ߟߊ߫ ߦߙߌߥߊ ߟߊ߫ ، ߖߊ߯ߕߋ߬ ߸ ߊߟߊ߫ ߦߙߌߥߊߣߍ߲߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿130﴾

ߊߟߊ߫ ߕߊ ߟߋ߬ ߛߊ߲ ߠߎ߬ ߞߣߐ߫ ߝߋ߲ ߣߌ߫ ߘߎ߱ ߞߣߐ߫ ߝߋ߲ ߓߍ߯ ߘߌ߫ ، ߊ߲ ߘߏ߲߬ ߣߊ߬ ߛߙߊ߬ߒ߬ߞߊ߲߬ߠߊ ߟߋ߬ ߞߍ߫ ߟߊ߫ ( ߡߐ߱ ߢߌ߲߬ ߠߎ߬ ߟߊ߫) ߸ ߡߍ߲ ߠߎ߬ ߛߐߣߍ߲߫ ߟߍߙߊ ߟߴߊߟߎ߫ ߢߍ߫ ߸ ߊ߬ ߣߴߊߟߎ߫ ߖߍ߬ߘߍ ߝߣߊ߫ ߟߊ߫ ߸ ߞߏ߫ ߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߘߋ߬ ، ߣߴߊߟߎ߫ ߞߵߊߟߎ߫ ߓߊ߲߬ ( ߏ ߡߊ߬ ) ߸ ߒ߬ߓߵߊߟߊ߫ ߕߊ ߟߋ߬ ߝߋ߲ ߓߍ߯ ߘߌ߫ ߡߍ߲ ߦߋ߫ ߛߊ߲ ߠߎ߬ ߞߣߐ߫ ߸ ߊ߬ ߣߌ߫ ߡߍ߲ ߦߋ߫ ߘߎ߱ ߞߣߐ߫ ، ߊߟߊ߫ ߘߏ߲߬ ߦߋ߫ ߞߊ߯ߙߌߓߊ߯ ߘߌ߫ ߸ ߊ߬ ߦߋ߫ ߕߊ߲߬ߘߏ߬ߕߊ߫ ߘߌ߫ ﴿131﴾

ߊߟߊ߫ ߕߊ ߟߋ߬ ߛߊ߲ ߠߎ߬ ߞߣߐ߫ ߝߋ߲ ߣߌ߫ ߘߎ߱ ߞߣߐ߫ ߝߋ߲ ߘߌ߫ ، ߊߟߊ߫ ߘߏ߲߬ ߥߛߊ߬ ߘߊ߫ ߛߍ߲߬ߓߍ߬ߟߊ߲߫ ߘߌ߫ ﴿132﴾

ߣߴߊ߬ ߞߊ߬ ߊߟߊ߫ ߘߌߦߊ߫ ߸ ߊ߬ ߘߴߊߟߎ߫ ߟߊߕߊ߯ ߞߐߍ߫ ، ߊߟߎ ߡߐ߱ ߟߎ߫ ߞߊ߬ߣߌ߲߫ ، ߞߊ߬ ߓߊ߲߫ ߞߊ߬ ߣߊ߬ ߘߏ߫ ߜߘߍ߫ ߟߎ߫ ߘߌ߫ ، ߓߊߏ߬ ߊߟߊ߫ ߛߋߣߴߏ߬ ߟߊ߫ ߝߊ߯ߛߌ߫ ﴿133﴾

ߡߍ߲ ߓߊ߯ ߞߍ߫ ߘߎߢߊ߫ ߛߊ߬ߙߊ ߝߍ߬ ߸ ߘߎߢߊ߫ ߛߊ߬ߙߊ ߣߌ߫ ߟߊߞߌߙߊ߫ ߕߊ ߓߍ߯ ߦߋ߫ ߊߟߊ߫ ߓߟߏ߫ ߖߐ߫ ߸ ߊߟߊ߫ ߘߏ߲߬ ߡߍ߲ߠߌ߲ߠߊ߫ ߘߌ߫ ߸ ߊ߰ ߦߋߟߌߟߊ߫ ߘߌ߫ ﴿134﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߦߴߊߟߎ߫ ߟߐ߬ ߕߋߟߋ߲ߓߊ߯ߦߊ ߛߙߋߦߊ ߟߴߊߟߊ߫ ߦߋ߫ ، ߤߊߟߌ߫ ߊ߬ ߓߋ߬ ߘߴߊߟߎ߫ ߖߘߍ߬ߞߎ߲ ߠߋ߫ ߞߊ߲߬ ߸ ߥߟߴߊߟߎ߫ ߡߏߦߌߓߊ߯ ߝߌ߬ߟߊ ߣߴߊߟߎ߫ ߡߊߛߎ߬ߘߎ߲߬ߧߊ߬ߓߊ߮ ߟߎ߫ ߞߊ߲߬ ، ߊ߬ ߞߍ߫ ߘߊ߫ ߓߣߊ߬ ߘߌ߫ ߓߊ߬ ߸ ߥߟߴߊ߬ ߞߍ߫ ߘߊ߫ ߓߟߏߞߏߟߏ߲߫ ߘߌ߫ ، ߓߊ ߊߟߊ߫ ߟߋ߫ ߓߍ߲߬ߣߍ߲߫ ߏ߬ ߟߎ߬ ( ߟߊߝߊ߬ߛߊ ) ߟߊ߫ ، ߊߟߎ߫ ߞߊߣߵߊߟߎ߫ ߣߌ ߟߊߓߊ߬ߕߏ߫ ߘߋ߬ ߞߵߊߟߎ߫ ߓߊ߲߬ ߊߟߎ߫ ߕߋߟߋ߲߫ ߠߊ߫ ، ߣߴߊߟߎ߫ ߘߏ߲߬ ߞߵߊߟߎ߫ ߘߐߘߎ߬ ߥߟߊ߫ ߞߵߊߟߎ߫ ߞߐߘߏ߲߬ ߸ ߊߟߊ߫ ߞߏ߬ߣߌ߲߬ ߦߴߊߟߎ߫ ߗߋߥߊߟߌ ( ߟߎ߫ ) ߞߟߊ߬ߡߊ߬ߓߊ߯ ߟߋ߬ ߘߌ߫ ﴿135﴾

ߤߍ߲߬ ߊߟߎ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߯ ߘߍ߲߬ߞߣߍ߬ߦߵߊߟߊ߫ ߣߴߊ߬ ߟߊ߫ ߞߋߟߊ ߣߌ߫ ߟߍߙߊ ߡߊ߬ ߸ ߊ߬ ߞߊ߬ ߡߍ߲ ( ߘߐ߲߬ߘߐ߰ߣߍ߲߬ ) ߠߊ߬ߖߌ߯ ߊ߬ ߟߊ߫ ߞߋߟߊ ߡߊ߬ ߸ ߊ߬ ߣߌ߫ ߟߍߙߊ߫ ߡߊ߬ ߸ ߊ߬ ߞߊ߬ ߡߍ߲ ( ߞߟߎߞߕߎ ) ߟߊߖߌ߰ ߞߘߐ߬ߡߊ߲߫ ، ߡߍ߲ ߘߏ߲߬ ߓߊ߯ ߓߊ߲߬ߓߊ߰ߦߊ ߟߐ߬ ߊߟߊ߫ ߣߴߊ߬ ߟߊ߫ ߞߋ߲ߛߐ߲ ߠߎ߬ ߣߴߊ߬ ߟߊ߫ ߟߍߙߊ ߟߎ߬ ߣߴߊ߬ ߟߊ߫ ߞߋߟߊ ߟߎ߬ ߣߌ߫ ߟߏ߲ߠߊߓߊ߲ ߡߊ߬ ߸ ߏ߬ ߓߘߊ߫ ߝߌ߬ߟߌ߫ ߸ ߝߟߌ߬ ߔߘߋߞߟߋ ߟߊ߫ ﴿136﴾

ߡߍ߲ ߠߎ߫ ߘߍ߲߬ߞߣߍ߬ߦߊ߬ ߘߊ߫ ߞߊ߬ ߓߊ߲߫ ߞߊ߬ ߓߊ߲߬ߓߊ߰ߦߊ߫ ، ߞߊ߬ ߓߊ߲߫ ߞߊ߬ ߘߍ߲߬ߞߣߍ߬ߦߊ߫ ߸ ߞߊ߬ ߓߊ߲߫ ߞߊ߬ ߓߊ߲߬ߓߊ߰ߦߊ߫ ، ߞߊ߬ ߓߊ߲߫ ߞߊ߬ ߖߘߌ߫ ߓߊ߲߬ߓߊ߰ߦߊ ߘߐ߫ ߸ ߊߟߊ߫ ߕߍߣߊ߬ ߦߝߊ߬ ߟߴߏ߬ ߟߎ߫ ߡߊ߬߸ ߊ߬ ߘߏ߲߬ ߕߍ߫ ߊ߬ߟߎ߬ ߞߊ߲ߘߊ߫ ߛߌߟߊ߫ ߛߌ߫ ߞߊ߲߬ ﴿137﴾

ߌ ߘߟߊߥߊ߬ߦߌ߲߫ ߝߌ߲߬ߟߊ߲߬ߞߊߝߏ ߟߎ߬ ߦߋ߫ ߸ ߞߏ߫ ߊ߬ߟߎ߬ ߢߍߛߌ߰ߣߍ߲߫ ߖߊ߲߰ߞߕߊ߬ ߘߌߡߌ߲ߣߍ߲ ߠߋ߬ ߟߊ߫ ﴿138﴾

ߏ߬ ߟߎ߫ ߟߋ߫ ߓߊ߲߬ߓߊ߮ ߟߎ߬ ߞߍ߫ ߟߴߊ߬ߟߎ߫ ߢߌ߲߭ ߠߎ߬ ߘߌ߫ ߸ ߞߊ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߕߏ߫ ߦߋ߲߬ ، ߦߊ߯ߟߴߊ߬ߟߎ߬ ߦߋ߫ ߜߟߌߦߊ ߟߋ߬ ߢߌߣߌ߲߫ ߠߴߏ߬ ߟߎ߫ ߝߍ߬ ߓߊ߬؟ ߜߟߌߦߊ ߘߏ߲߬ ߓߍ߯ ߦߋ߫ ߊߟߊ߫ ߟߋ߬ ߓߟߏ߫ ﴿139﴾

ߊ߬ ߜߎ ߓߘߊ߫ ߟߊߖߌ߰ ߊߟߎ߫ ߡߊ߬ ߟߍߙߊ ߞߣߐ߫ ߸ ߞߏ߫ ߣߴߊߟߎ߫ ߞߵߊߟߊ߫ ߟߊ߫ ߟߝߊߙߌ ߟߎ߬ ߘߐߝߏ߲߰ߓߌ߬ ߞߊ߲ ߣߴߊ߬ߟߎ߬ ߡߊߦߟߍ߫ ߞߊ߲ ߡߍ߲߫ ߸ ߞߏ߫ ߊߟߎ߫ ߞߊߣߵߊߟߎ߫ ߛߌ߰ ߏ߬ ߕߌ߱ ߟߎ߫ ߝߍ߬ ߸ ߝߏ߫ ߊ߬ߟߎ߬ ߓߊ߯ ߊ߬ߟߎ߬ ߛߏ߲߯ߓߊ߫ ߓߊ߬ߘߏ߬ ߜߘߍ߫ ߘߐ߫ ߡߍ߲ ߕߴߏ߬ ߘߌ߫ ، ߏ߬ ߓߊ߯ ߞߍ߫ ߸ ߊߟߎ߫ ߘߌ߫ ߞߍ߫ ߊ߬ߟߎ߫ ߢߐ߲߰ ߘߌ߫ ߏ߬ ߘߐ߫ ߟߋ߬ ߘߍ߯ ، ߊߟߊ߫ ߘߏ߲߬ ߞߍߕߐ߫ ߝߌ߬ߟߊ߲߬ߞߊߝߏ ߟߎ߬ ߣߌ߫ ߓߊ߲߬ߓߊ߮ ߟߎ߬ ߟߊߘߍ߬ ߟߊ߫ ߔߊߦߌߔߊߦߌ ߘߐ߫ ߟߋ߬ ߔߋߘߋ߲ߎ߲߫ ﴿140﴾

ߊ߬ߟߎ߬ ߦߴߊߟߎ߫ ߘߐߞߐ߬ߣߐ߲ ߠߋ߫ ߞߊ߲߬ ( ߖߎ߯ߡߊ߲ ߠߊ߫ ) ߸ ߣߌ߫ ߟߊ߬ߥߛߊ߫ ߞߍ߫ ߘߴߊߟߎ߫ ߦߋ߫ ߊߟߊ߫ ߓߟߏ߫ ߸ ߊ߬ߟߎ߬ ߘߴߊ߬ ߝߐ߫ ߞߏ߫ ߊߟߎ߫ ߦߴߊ߬ ߞߍ߫ ߟߊ߫ ߟߋ߫ ߓߊ߬ ߦߏ߫ ߊ߲ ߕߎ߲߬ ߕߍ߫ ߊߟߎ߫ ߝߍ߬ ، ߣߌ߫ ߣߌ߬ ߘߏ߲߬ ߞߍ߫ ߘߊ߫ ߓߊ߲߬ߓߊ߮ ߟߎ߬ ߦߋ߫ ( ߛߋ߲߬ߧߊ ߡߍ߲ ߘߐ߫ ) ߸ ߊ߬ߟߎ߬ ߘߴߊ߬ ߝߐ߫ ߏ߬ ߟߎ߬ ߦߋ߫ ߞߏ߫ ߊ߬ ߝߐ߫ ߒ߬ߠߎ߫ ߟߋ߬ ߡߊ߫ ߜߟߌߦߴߊߟߎ߫ ߞߊ߲߬ ߞߵߊߟߎ߫ ߡߊߞߊ߲ߞߊ߲߫ ߘߍ߲߬ߞߣߍ߬ߦߊ߬ߓߊ߮ ߟߎ߫ ߡߊ߬؟ ߒ߬ߓߵߊߟߊ߫ ߓߍߣߊ߬ ߞߕߌ߫ ߊߟߎ߫ ߕߍ߫ ߟߐ߬ߓߊ ߟߏ߲ ߠߋ߬ ߕߘߋ߫ ߸ ߊߟߊ߫ ߘߏ߲߬ ߕߍߣߊ߬ ߛߌߟߊ߫ ߛߌ߫ ߞߍ߫ ߟߊ߫ ߓߊ߲߬ߓߊ߮ ߟߎ߬ ߞߘߐ߫ ߘߍ߲߬ߞߣߍ߬ߦߊ߬ߓߊ߮ ߟߎ߫ ߡߊ߬ ﴿141﴾

ߝߌ߬ߟߊ߲߬ߞߊߝߏ ߟߎ߫ ߟߋ߬ ߊߟߊ߫ ߖߊ߲߬ߝߊ߬ ߟߊ߫ ߸ ߞߵߊ߬ ߕߘߍ߬ ߏ߬ ߟߴߊ߬ߟߎ ߖߊ߲߬ߝߊ߬ߓߊ߮ ߘߌ߫ ، ߊ߬ߟߎ߬ ߓߊ߯ ߞߍ߫ ߊ߬ߟߎ߫ ߟߐ߬ ߟߊ߫ ߛߊߟߌ ߟߊ߬ ߸ ߊ߬ߟߎ߬ ߘߴߊ߬ߟߎ߫ ߟߐ߬ ߦߙߌߦߙߊ߫ ، ߊ߬ߟߎ߬ ߦߴߊ߬ ߞߍ߫ ߟߴߊ߬ߟߎ߫ ߖߍ߬ߘߍߦߌ߬ߘߊ ߘߌ߫ ߡߐ߱ ߟߎ߬ ߟߊ߫ ، ߊ߬ߟߎ߫ ߘߏ߲߬ ߕߍ߫ ߊߟߊ߫ ߞߏߝߐ߫ ߟߊ߫ ߝߏ߫ ߞߋ߬ߟߋ߲߬ߞߋߟߋ߲߫ ﴿142﴾

ߊ߬ߟߎ߬ ߦߋ߫ ߕߊ߯ ߣߌ߫ ߛߊߦߌ ߟߋ߬ ߟߊ߫ ߖߊ߬ߡߊ߫ ߝߌ߬ߟߊ ߕߍ߫ ، ߊ߬ߟߎ߬ ߕߍ߫ ߘߐ ߢߌ߲߬ ߠߎ߫ ߝߍ߬ ߊ߬ߟߎ߬ ߕߍ߫ ߘߐ ߢߌ߲߬ ߠߎ߬ ߝߣߊ߫ ߝߍ߬ ، ߊߟߊ߫ ߘߏ߲߬ ߓߊ߯ ߡߍ߲ ߠߊߝߟߌ߬ ߸ ߌ ߕߍ߫ ߛߌߟߊ߫ ߛߌ߫ ߛߐ߬ߘߐ߲߫ ߏ߬ ߦߋ߫ ߡߎ߬ߕߎ߲߬ ﴿143﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߞߣߊ߫ ߓߊ߲߬ߓߊ߮ ߟߎ߬ ߞߍ߫ ߊߟߎ߫ ߢߌ߲߭ ߠߎ߬ ߘߌ߫ ߘߋ߬ ߞߊ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߕߏ߫ ، ߊߟߎ߫ ߦߴߊ߬ ߝߍ߬ ߏ߬ ߘߐ߫ ߟߋ߫ ߓߊ߬ ߞߊ߬ ߘߊ߬ߟߎ߬ ߘߐ߬ߜߍ߫ ߞߍ߫ ߊߟߊ߫ ߟߴߊߟߎ߫ ߖߘߍ߬ ߞߊ߲ߡߊ߬؟ ﴿144﴾

ߝߌ߬ߟߊ߲߬ߞߊߝߏ ߟߎ߬ ߦߋ߫ ( ߡߍ߲ߜߏߦߊ߫ ) ߕߊ ߖߌ߰ߖߌ߮ ߓߍ߯ ߞߘߐߟߊ ߟߋ߬ ߘߐ߫ ߔߙߐߔߙߐ߫ ߸ ߌ ߘߏ߲߬ ߕߍ߫ ߘߍ߬ߡߍ߲߬ߓߊ߰ ߛߌ߫ ߛߐ߬ߘߐ߲߫ ߊ߬ߟߎ߬ ߦߋ߫ ﴿145﴾

ߝߏ߫ ߣߌ߫ ߡߍ߲ ߠߎ߫ ߞߵߊ߬ߟߎ߫ ߖߘߍ߬ߟߊߛߊ߬ߦߌ߲߫ ߸ ߞߊ߬ ߟߢߊ߬ߟߌ ߞߍ߫ ߸ ߞߵߊ߬ߟߎ߬ ߓߟߏߞߍ߫ ߊߟߊ߫ ߟߊ߫߸ ߊ߬ ߣߌ߫ ߞߵߊ߬ߟߎ߬ ߘߌ߯ߣߊ ߓߎ߰ߓߎ߰ ߊߟߊ߫ ߦߋ߫ ، ߒ߬ߓߊ߬ ߏ߬ ߟߎ߫ ߟߋ߫ ߘߍ߲߬ߞߣߍ߬ߦߊ߬ߓߊ߮ ߟߎ߫ ߝߍ߬ ، ߛߋߚߋ߫ ߊߟߊ߫ ߘߏ߲߬ ߓߍߣߊ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߛߐ߫ ߛߙߊ߬ ߓߟߋߓߟߋ߫ ߟߊ߫ ﴿146﴾

ߊߟߊ߫ ߡߊ߬ߞߏ ߢߌ߬ߡߊ߲߫ ߠߋ߬ ߊߟߎ߫ ߖߊ߲߰ߞߕߊ ߟߊ߫ ߸ ߣߴߊߟߎ߫ ߞߊ߬ ߞߏߢߌߡߊߟߐ߲ ߞߍ߫ ߞߊ߬ ߘߍ߲߬ߞߣߍ߬ߦߊ߫؟ ߊߟߊ߫ ߘߏ߲߬ ߦߋ߫ ߞߏߢߌߡߊߟߐ߲ߠߊ߫ ߘߌ߫ ߸ ߊ߰ ߟߐ߲ߠߌ߲ߠߊ߫ ߘߌ߫ ﴿147﴾

ߊߟߊ߫ ߕߍ߫ ߘߟߊߞߏߖߎ߯ߦߊ ߜߍߘߐߕߊ ߝߍ߬ ߝߋߎ߫ ، ߝߏ߫ ߣߌ߫ ߡߍ߲ ߕߐ߬ߢߍ߰ߣߍ߲ ߞߍ߫ ߘߊ߫ ( ߊ߬ ߕߊ ߖߟߎ߬ ߛߙߊ ߟߊ߫) ، ߊߟߊ߫ ߘߏ߲߬ ߦߋ߫ ߡߍ߲ߠߌ߲ߠߊ߫ ߘߌ߫ ߸ ߊ߰ ߟߐ߲ߠߌ߲ߠߊ߫ ߘߌ߫ ﴿148﴾

ߊߟߎ߫ ߞߊ߬ ߞߏ߫ ߢߌߡߊ ߟߊߒߞߣߍߡߊ߫ ߓߊ߬ ߸ ߥߟߴߊߟߎ߫ ߞߵߊ߬ ߘߏ߲߰ ߓߊ߬ ߸ ߤߊߡߊ߲ߕߍ߫ ߊߟߎ߫ ߞߊ߬ ߖߎ߯ߡߊ߲ ߘߐߞߏߦߊߕߏ߫ ߸ ߊߟߊ߫ ߝߣߊ߫ ߦߋ߫ ߘߐ߬ߞߏ߬ߦߊ߬ߕߏ߬ߟߌ߬ߟߊ߫ ߘߌ߫ ߸ ߊ߰ ߛߋߓߊ߯ ߘߌ߫ ﴿149﴾

ߡߍ߲ ߠߎ߬ ߦߋ߫ ߓߊ߲߬ߓߊ߰ߦߊ ߟߐ߬ ߟߴߊߟߊ߫ ߣߴߊ߬ ߟߊ߫ ߞߋߟߊ ߟߎ߫ ߡߊ߬ ߸ ߊ߬ ߣߴߊ߬ߟߎ߬ ߦߴߊ߬ ߝߍ߬ ߞߊ߬ ߘߊ߬ߣߊ߲߬ߥߊ߯ߙߌ ߞߍ߫ ߊߟߊ߫ ߣߴߊ߬ ߟߊ߫ ߞߋߟߊ ߟߎ߬ ߕߍ߫ ߸ ߞߵߊ߬ ߝߐ߫ ߛߐ߲߬ ߞߏ߫ ߊ߲ ߘߍ߲߬ߞߣߍ߬ߦߊ߬ߣߍ߲߫ ߘߏ߫ ߡߊ߬ ߸ ߊ߲ ߘߍ߲߬ߞߣߍ߬ߦߊ߬ߣߍ߲߫ ߕߍ߫ ߘߏ߫ ߡߊ߬ ߸ ߞߵߊ߬ ߟߊߥߟߌ߬ ߛߴߊ߬ߟߎ߬ ߘߌ߫ ߛߌߟߊ߫ ߟߊߘߊ߲߫ ߏ߬ ߟߎ߬ ߕߍ߫ ﴿150﴾

ߏ߬ ߟߎ߫ ߟߋ߬ ߓߊ߲߬ߓߊ߮ ߟߎ߬ ߘߌ߫ ߕߎ߬ߢߊ ߖߊ߯ߕߋ ߟߊ߫ ، ߊ߲ ߘߏ߲߬ ߣߊ߬ ߟߊ߬ߝߍߦߊ ߖߊ߲߰ߞߕߊ ߟߋ߬ ߘߐߓߍ߲߬ ߠߊ߫ ߓߊ߲߬ߓߊ߮ ߟߎ߬ ߢߍ߫ ﴿151﴾

ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߊߟߊ߫ ߣߴߊ߬ ߟߊ߫ ߞߋߟߊ ߟߎ߫ ߡߊ߬ ߸ ߊ߬ߟߎ߫ ߘߏ߲߬ ߡߊ߫ ߘߊ߬ߣߊ߲߬ߥߊ߯ߙߌ߫ ߞߍ߫ ߊ߬ߟߎ߬ ߛߌ߫ ߕߍ߫ ، ߏ߬ ߟߎ߫ ߞߏ߬ߣߌ߲ ، ߛߋߚߋ߫ ߊߟߊ߫ ߘߌߣߵߏ߬ ߟߎ߫ ߛߊ߬ߙߊ ߘߴߊ߬ߟߎ߫ ߡߊ߬ ، ߊߟߊ߫ ߘߏ߲߬ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿152﴾

ߟߍߙߊߟߞߊ ߟߎ߬ ߦߴߌ ߕߙߊ߫ ߟߊ߫ ߸ ߞߴߌ ߦߋ߫ ߟߍߙߊ߫ ߟߊߖߌ߰ ߊ߬ߟߎ߫ ߡߊ߬ ߞߊ߬ ߓߐ߫ ߛߊ߲ ߡߊ߬ ، ߊ߬ߟߎ߫ ߞߊ߬ ߡߎߛߊ߫ ߕߙߊ߫ ߞߏ߫ ߟߎ߫ ߟߊ߫ ߸ ߡߍ߲ ߠߎ߫ ߜߍ߬ߟߍ߲߬ߡߊ߲߫ ߢߌ߲߬ ߘߌ߫ ، ߓߊ ߊ߬ߟߎ߫ ߞߵߊ߬ ߝߴߏ ߡߊ߬ ߸ ߞߏ߫ ߊߟߊ߫ ߦߌ߬ߘߊ߫ ߒ߬ ߠߊ߫ ߜߍ ߘߐ߫ ، ߜߊ߬ߙߊ߲߬ߞߕߊ ߘߏ߲߬ ߞߵߊ߬ߟߎ߫ ߡߌ߬ߘߊ߫ ߏ߬ ߘߐ߫ ߸ ߊ߬ߟߎ߬ ߟߊ߫ ߕߐ߬ߢߍ߮ ߞߏߛߐ߲߬ ، ߊ߬ߟߎ߫ ߣߊ߬ ߘߴߊ߬ߟߎ߬ ߓߟߏߞߍ߫ ߕߎߙߊߣߍ߲ ߠߊ߫ ߏ߬ ߞߐ߫ ߸ ߔߊߞߌ ߟߎ߫ ߣߊ߭ ߞߐ߫ ߊ߬ߟߎ߫ ߡߊ߬ ، ߓߊ߬ߙߌ߬ ߊ߲ ߞߵߏ߬ ߘߐߞߏߦߊߕߏ߫ ߸ ߊ߬ ߣߴߊ߲ ߞߊ߬ ߡߎߛߊ߫ ߛߐ߫ ߘߊ߬ߟߎ߬ ߘߐ߬ߜߍ ߟߊ߫ ﴿153﴾

ߊ߲ ߞߊ߬ ߞߎ߬ߙߎ ߘߎ߲߫ ߊ߬ߟߎ߫ ߞߎ߲߬ߘߐ߫ ߊ߬ߟߎ߬ ߟߊ߫ ߟߊ߬ߤߘߌ ߘߌ߫ ، ߊ߲ ߞߵߊ߬ ߝߐ߫ ߊ߬ߟߎ߬ ߦߋ߫ ߒ ߞߏ߫ ߊߟߎ߫ ߘߏ߲߬ ߖߌ߲߬ߘߊ ߟߊ߫ ߕߌ߲ߓߌߘߌ߲ ߘߌ߫ ، ߊ߬ ߣߴߊ߲ ߞߵߊ߬ ߝߐ߫ ߊ߬ߟߎ߬ ߦߋ߫ ߒ ߞߏ߫ ߊߟߎ߫ ߞߣߊ߫ ߖߊ߲߬ߘߊ߬ ߞߍ߲ߘߍߟߏ߲ ( ߛߓߌߕߌ ߟߊߕߏߓߊߟߌߦߊ ) ߘߐ߫ ߘߋ߬ ߸ ߊ߬ ߣߴߊ߲ ߞߊ߬ ߟߊ߬ߤߘߌ߬ ߜߍߟߍ߲߫ ߡߌ߬ߘߴߊ߬ߟߎ߬ ߟߊ߫ ﴿154﴾

(ߏ߬ ߓߍ߯ ߞߎ߲߭ ߠߋ߬ ߞߍ߫ ߘߊ߫ ) ߊ߬ߟߎ߬ ߟߊ߫ ߟߊ߬ߤߘߌ߬ ߕߌߢߍ ߣߴߊ߬ߟߎ߬ ߟߊ߫ ߓߊ߲߭ ߘߌ߫ ߊߟߊ߫ ߟߊ߫ ߟߝߊߙߌ ߟߎ߬ ߘߐ߫ ، ߊ߬ ߣߴߊ߬ߟߎ߬ ߟߊ߫ ߟߊ߬ߝߐ߬ߓߊ߰ ߝߊ߮ ߞߵߊ߬ ߕߘߍ߬ ߏ߬ ߟߎ߬ ߡߊ߫ ߤߊߞߍ߫ ߘߐ߫ ߞߏ߫ ߞߍ߫ ، ߊ߬ ߣߴߊ߬ߟߎ߬ ߦߴߊ߬ ߝߐ ߡߍ߲ ߞߍ߫ ߟߊ߫ ߞߏ߫ ߒ߬ߠߎ߫ ߛߣߐ߬ߡߍ ߟߎ߫ ߥߖߊ߬ߡߊ ߟߋ߬ ، ߞߵߊ߬ ߕߘߍ߬ ߊߟߊ߫ ߟߋ߫ ߣߵߊ߬ߺ(ߺߟߎ߫ ߛߣߐ߬ߡߍ) ߟߎ߬ ߟߊߣߘߐ߫ ߟߴߊ߬ߟߎ߬ ߟߊ߫ ߓߊ߲߬ߓߊ߰ߦߊ ߞߏߛߐ߲߬ ، ߊ߬ߟߎ߬ ߕߍ߫ ߘߍ߲߬ߞߣߍ߬ߦߊ߬ ߟߊ߫ ( ߏ߬ ߟߋ ߘߐ߫ ) ߝߏ߫ ߞߋ߬ߟߋ߲߬ߞߋߟߋ߲߫ ﴿155﴾

ߊ߬ ߣߴߊ߬ߟߎ߬ ߟߊ߫ ߓߊ߲߬ߓߊ߰ߦߊ ߞߏߛߐ߲߬ ، ߊ߬ ߣߴߊ߬ߟߎ߬ ߞߎߡߊ ߡߍ߲ ߞߍ߫ ߘߊ߫ ߡߊߙߌߦߡߊ߫ ߡߊ߬ ߸ ߞߊ߬ߙߏ߲߬ ߓߟߋߓߟߋ ߟߊ߫ ߕߋ߲߬ ߝߎ߯ ﴿156﴾

ߊ߬ ߣߴߊ߬ߟߎ߬ ߦߴߊ߬ ߝߐ ߡߍ߲ ߞߍ߫ ߟߊ߫ ߞߏ߫ ߒ߬ߠߎ߫ ߟߋ߬ ߞߊ߬ ߡߊߙߌߦߡߊ߫ ߘߋ߲ߞߍ߫ ߌߛߊ߫ (ߟߊ߬ߞߛߌ߬ߟߌ߬ߟߊ߫) ߡߊߡߎ߲߬ߣߍ߲ ߝߊ߰ ߸ ߏ߬ ߡߍ߲ ߊߟߊ߫ ߟߊ߫ ߗߋߘߋ߲ ߘߌ߫ ، ߞߵߊ߬ ߕߘߍ߬ ߜߎ ߸ ߊ߬ߟߎ߬ ߡߴߊ߬ ߝߊ߰ ߊ߬ߟߎ߬ ߡߴߊ߬ ߓߊߙߊ߲ߕߏ߫ ߸ ߓߊ߬ߙߌ߬ ߊ߬ ߡߎߣߎ߲ߧߊ߫ ߘߴߊ߬ߟߎ߬ ߢߊߞߘߐ߫ ߟߋ߬ ، ߡߍ߲ ߠߎ߫ ߞߊ߬ ߢߐ߲߮ ߛߐ߬ߛߐ߫ ߊ߬ ߞߏߢߊ ߘߐ߫ ߸ ߊ߬ ߞߏ ߛߌߞߊ ߖߍ߬ߘߍ ߟߴߏ߬ ߟߎ߬ ߟߊ߫ ، ߊ߬ߟߎ߬ ߡߴߊ߬ ߢߊ߫ ߖߐ߲ߖߐ߲ ߟߐ߲߫ ߝߋߎ߫ ߝߏ߫ ߊ߬ߟߎ߬ ߦߋ߫ ߖߌ߰ߟߌ ߡߍ߲ ߠߊߓߊ߬ߕߏ ߞߊ߲߬ ، ߊ߬ߟߎ߫ ߞߏ߬ߣߌ߲߬ ߡߴߊ߬ ߝߊ߰ ߘߍ߲߬ߞߣߍ߬ߦߊ߬ ߓߟߏ ߡߊ߬ ߝߋߎ߫ ﴿157﴾

ߓߊ߬ߙߌ߬ ߊߟߊ߫ ߟߋ߫ ߣߵߊ߬ ߟߊߦߟߍ߬ ߟߴߊ߬ ߖߍ߬ߘߍ ߝߍ߬ ، ߊߟߊ߫ ߘߏ߲߬ ߦߋ߫ ߣߌ߬ߣߌ߬ߟߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿158﴾

ߟߍߙߊߟߞߊ߫ ߛߌ߫ ߕߍ߫ ߣߌ߫ ߡߍ߲ ߕߍ߫ ߘߍ߲߬ߞߣߍ߬ߦߊ߬ ߌߛߊ߫ ߡߵߊ߬ ߟߊ߫ ߛߊ߬ߦߊ ߢߍ߫ ، ߟߐ߬ߓߊ ߟߏ߲ ߘߏ߲߬ ߘߐ߫ ߸ ߊ߬ ߘߌ߫ ߛߙߋߦߊ ߟߊߟߐ߬ ߊ߬ߟߎ߫ ߞߊ߲߬ ﴿159﴾

ߦߊ߬ߤߎ߯ߘߎ ߟߎ߬ ߟߊ߫ ߕߐ߬ߢߍ߮ ߟߋ߬ ߞߏߛߐ߲߬ ߸ ߊ߲ ߞߊ߬ ߝߋ߲߫ ߢߌߡߊ ߘߏ߫ ߟߎ߫ ߟߊߕߐ߲߫ ߊ߬ߟߎ߫ ߡߊ߬ ߸ ߡߍ߲ ߠߎ߫ ߘߤߊ߬ߣߍ߲߫ ߕߍ߬ߘߍ߫ ߊ߬ߟߎ߬ ߦߋ߫ ، ߊ߬ ߣߴߊ߬ߟߎ߬ ߟߊ߫ (ߡߐ߰) ߛߌ߬ߦߊ߬ߡߊ߲߬ ߞߎߡߊ߲ߘߌ ߞߏߛߐ߲߬ ߊߟߊ߫ ߟߊ߫ ߛߌߟߊ ߡߊ߬ ﴿160﴾

ߊ߬ ߣߴߊ߬ߟߎ߬ ߟߊ߫ ߜߙߐ߬ߞߐ߬ ߡߌߘߊ ߞߏߛߐ߲߬ ، ߊ߬ߟߎ߫ ߘߏ߲߬ ߜߎ ߝߊߕߊ߲ߕߌߣߍ߲߫ ߏ ߡߊ߬ ߟߋ߬ ، ߊ߬ ߣߴߊ߬ߟߎ߬ ߟߊ߫ ߡߐ߰ ߝߋ߲߬ ߘߊߥߎ߲ ߣߊ߲߬ߞߊ߬ߡߎ߲߬ߣߊ߲ߞߊߡߎ߲ ߠߊ߫ ، ߊ߲ ߘߏ߲߬ ߣߊ߬ ߖߊ߲߰ߞߕߊ߬ ߘߌߡߌ߲ߣߍ߲ ߠߋ߬ ߘߐߓߍ߲߬ ߠ ߴߊ߬ߟߎ߬ ߘߐ߫ ߓߊ߲߬ߓߊ߮ ߟߎ߬ ߢߍ߫ ﴿161﴾

ߞߏ߬ߣߌ߲߬ ߟߐ߲ߠߌ߲ߠߊ߫ ߞߏ߲ߓߏ ߟߎ߬ ߣߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߴߊ߬ߟߎ߬ ߘߐ߫ ߸ ߏ߬ ߟߎ߬ ߟߊߣߍ߲߫ ߟߍߙߊ ߟߊ߫ ߡߍ߲ ߠߊߖߌ߰ߣߴߌ ߡߊ߬ ߸ ߊ߬ ߣߌ߫ ߡߍ߲ ߠߊߖߌ߰ ߘߴߌ ߢߍ߫ ، ߊ߬ ߣߌ߫ ߏ߬ ߟߎ߬ ߦߋ߫ ߛߊߟߌ ߟߐ߬ ߟߊ߫ ߸ ߊ߬ߟߎ߬ ߦߋ߫ ߖߞߊ ߘߌ߫ ߟߊ߫ ، ߊ߬ ߣߴߊ߬ߟߎ߬ ߟߊߣߍ߲߫ ߊߟߊ߫ ߣߌ߫ ߟߏ߲߫ ߠߊߓߊ߲ ߠߊ߫ ، ߏ߬ ߟߎ߫ ߞߏ߬ߣߌ߲߬ ، ߛߋߚߋ߫ ߊ߲ ߓߍߣߵߏ߬ ߟߎ߬ ߛߐ߫ ߛߙߊ߬ ߓߟߋߓߟߋ ߟߊ߫ ﴿162﴾

ߊ߲ ߣߐ߬ ߦߟߌߘߏ߲ ߟߐ߬ ߟߴߌ ߡߊ߬ ߟߋ߬ ߸ ߦߏ߫ ߊ߲ ߞߊ߬ ߦߟߌߘߏ߲ ߟߐ߬ ߣߎߤߊ߲߫ ߡߊ߬ ߢߊ ߡߍ߲ ߸ ߊ߬ ߣߌ߫ ߟߊ߬ߝߐ߬ߓߊ߮ ( ߕߐ߭ ) ߟߎ߫ ߡߊ߬ ( ߣߎߤߎ߲߫ ) ߞߐ߫ ߸ ߊ߬ ߣߴߊ߲ ߞߊ߬ ߦߟߌߘߏ߲ ߟߐ߬ ߌߓߎ߬ߙߊ߬ߤߌߡߊ߫ ߡߊ߬ ߸ ߌߛߌ߬ߡߊ߬ߌߟߊ߫ ߡߊ߬ ߸ ߌߛߌ߬ߤߊ߯ߞߊ߫ ߡߊ߬ ߸ ߦߊ߬ߞߎߓߊ߫ ߡߊ߬ ߸ ߓߊߓߏ߲ ߠߎ߫ ߡߊ߬ ߸ ߌߛߊ߫ ߡߊ߬ ߸ ߦߎ߯ߓߊ߫ ߡߊ߬ ߸ ߦߣߎߛߊ߫ ߡߊ߬ ߸ ߤߊߙߎߣߊ߫ ߡߊ߬ ߸ ߛߎ߬ߟߋ߬ߡߊ߯ߣߊ߫ ߡߊ߬ ، ߊ߬ ߣߴߊ߲ ߞߊ߬ ߘߊߎߘߊ߫ ߛߐ߫ ߞߏ߬ߣߌ߲߬ߛߋ߲ ߠߎ߬ ߟߍߙߊ ߟߊ߫ ﴿163﴾

ߊ߬ ߣߌ߫ ߞߋߟߊߡߐ߮ ߘߏ߫ ߟߎ߫ ߸ ߊ߲ ߞߵߏ߬ ߟߎ߫ ߝߊ߬ߛߊ ߘߊ߲߬ߕߍ߰ ߌ ߦߋ߫ ߞߘߐ߬ߡߊ߲߫ ߸ ߊ߬ ߣߌ߫ ߞߋߟߊߡߐ߯ ߜߘߍ߫ ߟߎ߫ ߊ߲ ߡߴߏ߬ ߟߎ߫ ߘߊ߲߬ߕߍ߰ߟߌ߬ ߛߌ߫ ߞߴߌ ߦߋ߫ ߸ ߊߟߊ߫ ߞߏ߬ߣߌ߲ ߞߎߡߊ߫ ߘߊ߫ ߡߎߛߊ߫ ߝߍ߬ ߟߋ߬ ߞߎߡߊߢߐ߲߯ߦߊ ߔߊߞߌߛߊ ߟߊ߫ ﴿164﴾

ߞߋߟߊ ߏ߬ ߟߎ߬ ߗߋߣߍ߲߫ ߘߟߊߝߎߟߌߟߊ ߟߎ߬ ߣߌ߫ ߖߊ߬ߛߙߋ߬ߡߟߊ߬ߟߊ ߟߎ߬ ߘߌ߫ ߟߋ߬ ߸ ߛߊ߫ ߘߊߘߐߡߌߘߊߞߎ߲ߧߊ߫ ߞߊߣߊ߬ ߞߍ߫ ߡߐ߱ ߟߎ߬ ߟߴߊߟߊ߫ ߡߊ߬ ߞߋߟߊ ߟߎ߫ ( ߣߊ߭ ) ߞߐ߫ ، ߖߊ߯ߕߋ߬ ߸ ߊߟߊ߫ ߦߋ߫ ߣߌ߬ߣߌ߬ߟߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿165﴾

ߊߟߊ߫ ߞߏ߬ߣߌ߲߬ ߛߙߋߦߊߣߍ߲߫ ߸ ߞߏ߫ ߊ߬ ߣߊ߬ ( ߟߍߙߊ ) ߡߍ߲ ߠߊߖߌ߰ ߟߴߌ ߡߊ߬ ߸ ߊ߬ ߞߵߏ߬ ߟߊߖߌ߰ ߊ߬ ߟߊ߫ ߟߐ߲ߠߌ߲ ߠߋ߬ ߟߊ߫ ، ߡߟߍ߬ߞߊ ߟߎ߬ ߝߣߊ߫ ߏ߬ ߛߙߋߦߊ ߟߊ߫ ، ߊߟߊ߫ ߘߏ߲߬ ߥߛߊ߬ ߘߊ߫ ߛߙߋ߫ ߘߌ߫ ﴿166﴾

ߡߍ߲ ߠߎ߫ ߣߵߊ߬ߟߎ߫ ߓߊ߲߬ ߠߊ߫ ߸ ߊ߬ ߣߴߊ߬ߟߎ߫ ߞߊ߬ ߞߎ߬ߡߊ߲߬ߘߌ߬ߟߌ ߞߍ߫ ߊߟߊ߫ ߛߌߟߊ ߡߊ߬ ߸ ߏ߬ ߟߎ߫ ߝߟߌ߬ߣߍ߲߫ ߝߟߌ߬ ߔߘߋߞߟߋ ߟߋ߬ ߟߊ߫ ﴿167﴾

ߡߍ߲ ߠߎ߬ ߜߎ ߣߵߊ߬ߟߎ߫ ߓߊ߲߬ ߠߊ߫ ߸ ߊ߬ ߣߌ߫ ߞߊ߬ ߕߐ߬ߢߍ߮ ߞߍ߫ ߸ ߊߟߊ߫ ߕߍߣߊ߬ ߦߝߊ߬ ߟߴߏ߬ ߟߎ߫ ߡߊ߬ ߸ ߊ߬ ߘߏ߲߬ ߕߍ߫ ߊ߬ߟߎ߬ ߞߊ߲ߘߊ߫ ߟߊ߫ ߛߌߟߊ߫ ߛߌ߫ ߞߊ߲߬ ﴿168﴾

ߝߏ߫ ߔߊߦߌߔߊߦߌ ߛߌߟߊ ߸ ߞߵߊ߬ߟߎ߬ ߘߎߡߊ߫ ߦߋ߲߬ ߞߘߊߎ߫ ، ߏ߬ ߘߏ߲߬ ߣߐ߲߰ߡߊ߲߬ߓߊ ߟߋ߬ ߊߟߊ߫ ߡߊ߬ ﴿169﴾

ߤߍ߲߬ ߊߟߎ߬ ߡߐ߱ ߟߎ߬ ߸ ߞߋߟߊ ߓߘߊ߫ ߣߵߊߟߎ߫ ߡߊ߬ ߕߎ߬ߢߊ ߘߌ߫ ߸ ߞߊ߬ ߝߘߴߊߟߎ߫ ߡߊ߰ߙߌ ߟߊ߫ ، ߒ߬ߓߵߊߟߎ߯ ߘߍ߲߬ߞߣߍ߬ߦߊ߫ ߘߋ߬ ، ߏ߬ ߟߋ ߘߌߡߊ߲߫ ߊߟߎ߫ ߟߊ߫ ، ߣߴߊߟߎ߫ ߘߏ߲߬ ߞߵߊߟߎ߫ ߓߊ߲߬ ߸ ߒ߬ߓߊ߬ ߛߊ߲ ߠߎ߬ ߞߣߐ߫ ߝߋ߲ ( ߠߎ߬ ) ߣߌ߫ ߘߎ߱ ( ߞߣߐ߫ ߝߋ߲ ) ߓߍ߯ ߊߟߊ߫ ߕߊ ߟߋ߬ ߘߌ߫ ، ߊߟߊ߫ ߘߏ߲߬ ߟߐ߲ߠߌ߲ߠߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿170﴾

ߤߍ߲߬ ߊߟߎ߬ ߟߍߙߊߟߞߊ ߟߎ߬ ߸ ߊߟߎ߫ ߞߊߣߵߊߟߎ߫ ߘߊ߲߬ߠߊߕߊ߬ߡߌ߲߬ ߊߟߎ߫ ߘߌ߯ߣߊ ߘߐ߫ ߘߋ߬ ، ߊߟߎ߫ ߘߏ߲߬ ߞߊߣߊ߬ ߝߏߦߌ߬ ߝߐ߫ ߊߟߊ߫ ߡߊ߬ ߝߏ߫ ߕߎ߬ߢߊ ، ߡߊߙߌߦߡߊ߫ ߘߋ߲ߞߍ߫ ߌߛߊ߫ ߡߊߡߎ߲߬ߣߍ߲ ߦߋ߫ ߊߟߊ߫ ߟߊ߫ ߞߋߟߊ ߟߋ߬ ߘߌ߫ ߸ ߊ߬ ߣߴߊ߬ ߟߊ߫ ߛߙߊ߬ߣߎ߲ ߠߋ߬ ߸ ߊ߬ ߞߊ߬ ߡߍ߲ ߠߊߝߟߌ߬ ߡߊߙߌߦߡߊ߫ ߞߊ߲߬ ، ߊ߬ ߣߴߊ߬ ߟߊ߫ ߛߟߐߡߌ߲ ߠߋ߬ ، ߊߟߎ߫ ߘߏ߲߬ ߘߍ߲߬ߞߣߍ߬ߦߊ߬ ߊߟߊ߫ ߣߴߊ߬ ߟߊ߫ ߞߋߟߊ ߟߎ߫ ߡߊ߬ ߟߋ߬ ، ߊߟߎ߫ ߞߣߊ߫ (ߡߊ߰ߙߌ߬) ߛߓߊ߬ ߞߏ ߝߐ߫ ߘߋ߬ ، ߊߟߎ߯ ߕߏ߫ ߟߋ߬ ، ߏ߬ ߟߋ ߘߌߡߊ߲߫ ߊߟߎ߫ ߟߊ߫ ، ߖߊ߯ߕߋ߬ ߸ ߊߟߊ߫ ߦߋ߫ ߡߊ߰ߙߌ߬ ߞߋߟߋ߲߫ ߔߋ߫ ߟߋ߬ ߘߌ߫ ߸ ߊ߬ ߛߊߣߌ߲ߡߊ߲߫ ߘߋ߲ ߞߍ ߡߵߊ߬ ߓߟߏ߫ ، ߊ߬ ߘߏ߲߬ ߕߊ ߟߋ߬ ߛߊ߲ ߠߎ߬ ߞߣߐ߫ ߝߋ߲ ߣߌ߫ ߘߎ߱ ߞߣߐ߫ ߝߋ߲ ߘߌ߫ ، ߒ߬ߓߵߊߟߊ߫ ߥߛߊ߬ ߘߊ߫ ߛߍ߲߬ߓߍ߬ߟߊ߲߫ ߘߌ߫ ﴿171﴾

(ߌߛߊ߫ ) ߡߊߡߎ߲߬ߣߍ߲ ߕߍ߫ ߊ߬ ߣߎ߲ߞߘߐߕߊ߬ ߞߏ߫ ߊ߬ ߕߍ߫ ߞߍ߫ ߊߟߊ߫ ߟߊ߫ ߖߐ߲߭ ߘߌ߫ ، ߡߊ߬ߛߎ߬ߘߎ߲߬ߧߊ߬ ߞߋ߲ߛߐ߲ (ߡߟߍ߬ߞߊ) ߟߎ߬ ߝߣߊ߫ ߕߍ߫ ߊ߬ߟߎ߬ ߣߎ߲ߞߘߐߕߊ߬ ، ߡߍ߲ ߘߏ߲߬ ߓߊ߯ ߊ߬ ߣߎ߲ߞߘߐߕߊ߬ ߊߟߊ߫ ߓߊ߬ߕߏ ߡߊ߬ ߞߵߊ߬ ߖߘߍ߬ߘߐߓߏ߲߬ߧߊ߫ ߸ ߛߋߚߋ߫ ߊ߬ ߘߴߏ߬ ߓߍ߯ ߟߊߘߍ߬ ߊ߬ ߖߍ߬ߘߍ߫ ߝߍ߬ ߦߋ߲߬ ߓߋߘߋ߲ߎ߲߫ ﴿172﴾

ߡߍ߲ ߠߎ߫ ߞߏ߬ߣߌ߲ ߓߊ߯ ߘߍ߲߬ߞߣߍ߬ߦߊ߫ ߞߊ߬ ߢߌ߬ߡߊ ߟߎ߬ ߞߍ߫ ߸ ߊ߬ ߘߴߏ߬ ߟߎ߫ ߛߊ߬ߙߊ ߟߎ߬ ߘߝߴߊ߬ߟߎ߬ ߦߋ߫ ߞߵߊ߬ߟߎ߬ ߖߘߌߖߘߌ߫ ߊ߬ ߟߊ߫ ߢߊ߬ߒߡߊ߭ ߘߐ߫ ، ߒ߬ߞߊ߬ ߡߍ߲ ߠߎ߬ ߓߊ߯ ߊ߬ߟߎ߬ ߣߎ߲ߞߘߐߕߊ߬ ߞߵߊ߬ߟߎ߫ ߖߘߍ߬ߘߐߓߏ߲߬ߧߊ߫ ߸ ߊ߬ ߘߴߏ߬ ߟߎ߫ ߖߊ߲߰ߞߕߊ߫ ߖߊ߲߰ߞߕߊ߬ ߘߌߡߌ߲ߣߍ߲ ߠߊ߫ ، ߏ߬ ߟߎ߫ ߘߏ߲߬ ߕߍߣߊ߬ ߢߌ߲߬ ߜߘߍ߫ ߣߌ߫ ߘߍ߬ߡߍ߲߬ߓߊ߰ ߛߌ߫ ߛߐ߬ߘߐ߲߬ ߠߴߊ߬ߟߎ߫ ߖߘߍ߬ ߟߊ߫ ߞߵߊߟߊ߫ ߕߏ߫ ﴿173﴾

ߤߍ߲߬ ߊߟߎ߬ ߡߐ߱ ߟߎ߬ ߸ ߘߊ߬ߟߎ ߓߘߊ߫ ߣߵߊߟߎ߫ ߡߊ߬ ߞߊ߬ ߝߘߴߊߟߎ߫ ߡߊ߰ߙߌ ߟߊ߫ ߸ ߊ߬ ߣߴߊ߲ ߓߘߊ߫ ߦߋߟߋ߲߫ ߘߐߜߍ߫ ߟߊߖߌ߰ ߊߟߎ߫ ߡߊ߬ ﴿174﴾

ߡߍ߲ ߠߎ߫ ߞߏ߬ߣߌ߲ ߓߊ߯ ߘߍ߲߬ߞߣߍ߬ߦߵߊߟߊ߫ ߡߊ߬ ߞߵߊ߬ߟߎ߬ ߓߟߏߞߍ߫ ߊ߬ ߟߊ߫ ߸ ߛߋߚߋ߫ ߊ߬ ߘߴߏ߬ ߟߎ߬ ߟߊߘߏ߲߬ ߊ߬ ߟߊ߫ ߤߌߣߊ ߣߴߊ߬ ߟߊ߫ ߢߊ߬ߒߡߊ߭ ߞߣߐ߫ ، ߊ߬ ߣߴߊ߬ ߘߴߊ߬ߟߎ߬ ߞߊ߲ߘߴߊ߬ߟߋ߫ ߖߍ߬ߘߍ ߡߊ߬ ߛߌߟߊ߫ ߕߋߟߋ߲ߣߍ߲߫ ߓߐߚߐ ߞߊ߲߬ ﴿175﴾

ߊ߬ߟߎ߬ ߦߴߌ ߢߌ߬ߣߌ߲߬ߞߊ߬ ߟߊ߫ ، ߌ ߦߴߊ߬ ߝߐ߫ ߊ߬ߟߎ߬ ߦߋ߫ ߸ ߞߏ߫ ߊߟߊ߫ ߦߴߊߟߎ߫ ߖߋ߬ߓߌ߬ ߟߊ߫ ߡߐ߰ ߗߍ߫ ߕߟߊ߫ ߢߊ ߘߐ߫ ߸ ߘߋ߲߫ ߕߍ߫ ߡߍ߲ ߓߟߏ߫ ߡߏߦߌߓߊ߯ ߕߍ߫ ߊ߬ ߟߊ߫ ، ߣߌ߫ ߗߍ߭ ߛߊ߬ ߘߊ߫ ߸ ߞߵߊ߬ ߕߘߍ߬ ߘߋ߲߫ ߕߍ߫ ߊ߬ ߓߟߏ߫ ، ߓߊ߬ߙߌ߬ ߡߊ߬ߡߛߏ߬ߣߍ߲߬ ߦߴߊ߬ ߟߊ߫ ، ߏ߬ ߕߊ ߟߋ߬ ߊ߬ ߗߍ ߕߟߊߒߕߍ ߘߌ߫ ، ߣߌ߫ ߡߊ߬ߡߛߏ߬ߣߍ߲ ߝߣߊ߫ ߛߊ߬ ߘߊ߫ ߞߵߊ߬ ߕߘߍ߬ ߘߋ߲߫ ߕߍ߫ ߊ߬ ߓߟߏ߫ ߸ ߡߊ߬ߞߍ ߏ߬ ߟߴߊ߬ ߗߍ ߕߊ߬ ߟߊ߫. ߒ߬ߓߊ߬ ߣߌ߫ ߗߍ߬ ߘߋ߲ߒߕߊ߲ ߡߊ߬ߡߛߏ߬ߣߍ߲ ߞߍ߫ ߘߊ߫ ߝߌ߬ߟߊ߬ ߘߌ߫ ߸ ߏ߬ ߟߎ߬ ߘߌ߫ ߘߍ߬ ߗߍ ߛߓߊߢߐ߲߯ ߝߌ߬ߟߊ ߟߊ߫. ߣߴߊ߬ߟߎ߫ ߘߏ߲߬ ߞߍ߫ ߘߊ߫ ߓߊߘߋ߲ߡߊ߫ ߛߌߦߊߡߊ߲߫ ߘߌ߫ ߸ ߗߍ߭ ߟߎ߬ ߦߴߊ߬ ߘߐ߫ ߡߏ߬ߛߏ ߟߎ߬ ߦߴߊ߬ ߘߐ߫ ߸ ߡߛߏ߬ߡߊ߲߫ ߝߌ߬ߟߊ߫ ߣߌ߭ ߢߐ߲߰ ߦߋ߫ ߞߍ߫ ߗߍ߬ߡߊ߲߬ ߞߋߟߋ߲߫ ߕߊ ߘߌ߫ ، ߊߟߊ߫ ߦߋ߫ ߝߊߙߊ߲ߝߊߛߟߌ ߞߍ߫ ߟߴߊߟߎ߫ ߦߋ߫ ߟߋ߬ ߸ ߛߴߊߟߎ߫ ߞߣߊ߫ ߝߟߌ߬ ߸ ߊߟߊ߫ ߘߏ߲߬ ߦߋ߫ ߞߏ ߓߍ߯ ߟߐ߲ߓߊ߮ ߟߋ߬ ߘߌ߫ ﴿176﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߦߋ߫ ߛߘߊߒߡߊߞߊ߲ߠߊ ߟߎ߬ ߝߊ߫ ، ߓߌߦߊ߲߫ ߞߟߏߝߋ߲ ߠߎ߬ ߓߘߊ߫ ߟߊߘߤߵߊߟߎ߫ ߦߋ߫ ، ߝߏ߫ ߡߍ߲ ( ߢߌ߬ߣߊ߬ߓߐ߬ ߞߏ ) ߞߊ߬ߙߊ߲߬ߕߐ߫ ߊߟߎ߫ ߦߋ߫ ߛߍ߲ ، ߝߟߍ ߕߍ߫ ߘߤߵߊߟߎ߫ ߦߋ߫ ߞߵߊߟߎ߫ ߕߏ߫ ߣߊߡߎ߲ߘߐߦߊ ߘߐ߫ ، ߖߊ߯ߕߋ߬ ߸ ߊߟߊ߫ ߦߋ߫ ߞߕߌ ߟߊ߫ ߟߴߊ߬ ߛߊ߬ߥߏ ߟߋ߬ ߟߊ߫ ﴿1﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߞߣߊ߫ ߕߣߊ߬ ߟߊ߬ߕߍ ߞߍ߫ ߊߟߊ߫ ߟߊ߫ ߘߎ߲߬ߘߎ߬ߡߊ߬ ߞߏ ߟߎ߬ ߟߊ߫ ، ߊ߬ ߣߌ߫ ߛߊ߲߬ߓߏ߬ߟߏ߲߬ ߠߊߕߏߣߍ߲ ߠߊ߫ ߸ ߊ߬ ߣߌ߫ ߖߋ߬ߟߌ߬ ߟߊ߬ߓߐ߲߬ߕߊ ߟߊ߫ ، ߊ߬ ߣߌ߫ ߞߊ߲ߠߊߘߎ߲߫ ߝߋ߲ ߠߎ߬ ߟߊ߫ ، ߊ߬ ߣߌ߫ ߓߏ߲߫ ߠߊߕߏߣߍ߲ ߡߊߜߍ߲ߓߊ߮ ߟߎ߬ ߟߊ߫ ߸ ߏ߬ ߟߎ߬ ߡߍ߲ ߠߎ߬ ߦߋ߫ ߢߊ߬ߒߡߊ߭ ߣߌ߫ ߘߌ߬ߢߍ ߢߌߣߌ߲ ߞߊ߲߬ ߊ߬ߟߎ߫ ߡߊ߰ߙߌ ߟߊ߫. ߣߴߊߟߎ߫ ߓߐ߫ ߘߊ߫ ߣߊߡߎ߲ߘߐߦߊ ߘߐ߫ ߕߎ߬ߡߊ ߡߍ߲ ߸ ߊߟߎ߫ ߦߋ߫ ߝߟߍ ߞߍ߫ ، ߓߊ߬ߙߌ߬ ߡߌ߬ߙߌ߲߬ߘߌ ߡߍ߲ ߠߎ߫ ߞߵߊߟߎ߫ ߞߎ߬ߡߊ߲߬ߘߌ߫ ߡߌ߬ߛߙߌ߬ ߟߊߕߏߣߍ߲ ߡߊ߬ ߸ ߏ߬ ߟߎ߬ ߞߐߣߌ߲ߧߊ ߞߊߣߵߊߟߎ߫ ߟߐ߬ ߞߎ߲߬ߞߏ߫ ߘߐߕߍ߰ ߟߊ߫ ߘߋ߬ ߞߵߊߟߎ߫ ߟߊߖߊ߲߬ߘߊ߫ ، ߊߟߎ߫ ߦߋ߫ ߢߐ߲߮ ߘߍ߬ߡߍ߲߫ ߢߊ߬ߟߌ ߣߌ߫ ߝߊ߲ߕߊ߲ߞߊ ߟߋ߫ ߡߊ߬ ߸ ߊߟߎ߫ ߞߊߣߊ߬ ߢߐ߲߮ ߘߍ߬ߡߍ߲߫ ߖߟߎ߬ߡߎ߲ ߣߌ߫ ߖߎ߯ߦߊ ߡߊ߬ ߘߋ߬ ، ߊߟߎ߫ ߘߏ߲߬ ߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ، ߖߊ߯ߕߋ߬ ߸ ߓߌ߲߬ߓߊ߬ߏ߬ ߜߍߟߍ߲ ߕߌ߱ ߟߋ߬ ߊߟߊ߫ ߘߌ߫ ﴿2﴾

ߝߋ߲ ߡߍ߲ ߠߎ߬ ( ߘߊߥߎ߲ ) ߟߊߕߐ߲ߣߍ߲߫ ߊߟߎ߫ ߡߊ߬ ߸ ߏ߬ ߟߎ߫ ߟߋ߬ ߛߊ߲ߞߌߘߊ߲ ߣߌ߫ ߖߋ߬ߟߌ ߣߌ߫ ߟߍ߬ ߛߓߏ ߘߌ߫ ߸ ߊ߬ ߣߌ߫ ߞߎߟߋ߫ ߞߍߣߍ߲߫ ߝߋ߲ ߡߍ߲ ߠߴߊߟߊ߫ ߕߊ߬ߣߊ ߘߏ߫ ߦߋ߫ ( ߣߊߟߌ߬ߡߎ߲߫ ߖߏ߬ ߛߐ߬ ߝߋ߲ ߘߌ߫ ) ߸ ߊ߬ ߣߌ߫ ߡߍ߲ ߞߊ߲ ߜߍ߲߬ߘߍ߬ߣߍ߲߫ ، ߊ߬ ߣߌ߫ ߡߍ߲ ߘߊ߬ߘߌ߬ߣߍ߲߫ ( ߜߟߋ߬ߞߋ ߟߊ߫) ߸ ߊ߬ ߣߌ߫ ߡߍ߲ ߞߘߎߞߘߎߣߍ߲߫ ߞߊ߬ ߓߋ߬ ، ߊ߬ ߣߌ߫ ߡߍ߲ ߜߎߣߍ߲߫ ، ߊ߬ ߣߌ߫ ߥߘߊ߫ ߘߊߕߐ ، ߝߏ߫ ߣߴߊߟߎ߫ ( ߞߊ߬ ߣߌ ߕߘߍ߬ ߡߍ߲ ߘߐ߫) ߞߵߊ߬ ߞߊ߲ߠߊߕߍ߰ ، ߊ߬ ߣߌ߫ ߡߍ߲ ߞߊ߲ߠߊߕߍ߰ߣߍ߲߫ ߘߎ߰ߘߊ ߟߎ߬ ߟߊ߫ ، ߊ߬ ߣߴߊߟߎ߫ ߞߊߣߊ߬ ߓߟߏߟߊߝߍߣߍ߲ ߞߍ߫ ߓߌ߬ߢߍ ߟߎ߬ ߟߊ߫ ߘߋ߬ ߸ ߏ߬ ߓߍ߯ ߦߋ߫ ߔߊߟߊ߲ߞߊ ߟߋ߬ ߘߌ߫ ، ߒ߬ߓߊ߬ ߓߌ߬ ߛߊ߫ ߸ ߓߊ߲߬ߓߊ߮ ߟߎ߬ ߓߘߊ߫ ߖߌ߰ߕߍ߰ ߊߟߎ߫ ߟߊ߫ ߘߌ߯ߣߊ ( ߘߐߛߊ߬ ߞߏ ߓߍ߯ ) ߟߊ߫ ، ߊߟߎ߫ ߞߊߣߊ߬ ߛߌߟߊ߲߫ ߏ߬ ߟߎ߬ ߢߍ߫ ߡߎ߬ߕߎ߲߫ ߘߋ߬ ߸ ߊߟߎ߫ ߛߌߟߊ߲߫ ߒߠߋ ߟߋ߬ ߢߍ߫. ߓߌ߬ ߡߍ߲ ߓߌ߬ ߘߌ߫ ߸ ߒ ߓߘߴߊߟߎ߫ ߟߊ߫ ߘߌ߯ߣߊ ߘߝߴߊߟߎ߫ ߦߋ߫ ߞߐ߲ ، ߊ߬ ߣߌ߫ ߒ ߓߘߊ߫ ߒ ߠߊ߫ ߣߍߡߊ ߞߎ߲߬ߘߏ߲߬ ߊߟߎ߫ ߦߋ߫ ، ߊ߬ ߣߌ߫ ߒ ߓߘߊ߫ ߘߌ߬ߢߍ߬ ߊߟߎ߫ ߢߍ߫ ߞߊ߬ ߛߌ߬ߟߡߊ߬ߦߊ ߞߍ߫ ߊߟߎ߫ ߘߌ߯ߣߊ ߘߌ߫ ، ߣߌ߫ ߡߍ߲ ߘߋ߬ߥߎ߬ ߘߊ߫ ߞߐ߲ߞߐ ߘߐ߫ ( ߞߊ߬ ߝߋ߲߫ ߠߊߕߐ߲ߣߍ߲ ߢߌ߲߬ ߠߎ߬ ߘߏ߫ ߘߊߥߎ߲߫ ) ߸ ߞߵߊ߬ ߕߘߍ߬ ߊ߬ ߕߍ߫ ߝߊ߲ߞߊ߲ߓߊ߯ ߘߌ߫ ߖߟߎ߬ߡߎ߲߫ ߞߊ߲߬ ، ߏ߬ ߘߐ߫ ߸ ߊߟߊ߫ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿3﴾

ߊ߬ߟߎ߬ ߦߴߌ ߢߌ߬ߣߌ߲߬ߞߊ߬ ߟߊ߫ ߸ ߞߏ߫ ߡߎ߲߬ ߘߏ߲߬ ߘߤߊ߬ߣߍ߲߫ ߊ߬ߟߎ߬ ߦߋ߫ ߛߊ߫؟ ߊ߬ߟߎ߫ ߖߋ߬ߓߌ߬ ߞߏ߫ ߛߎ߬ߡߊ߲߬ ߢߌߡߊ ( ߓߍ߯ ) ߘߤߊ߬ߣߍ߲߫ ߊߟߎ߫ ߦߋ߫ ، ߊ߬ ߣߴߊߟߎ߫ ߓߊ߯ ߥߘߊ ߡߍ߲ ߠߎ߬ ߞߟߏ߫ ߞߵߊ߬ߟߎ߫ ߞߊ߬ߙߊ߲߬ ߝߟߍ ߟߊ߫ ߸ ߊߟߊ߫ ߞߵߊߟߎ߫ ߟߊߟߐ߲ߠߌ߲߫ ߏ߬ ߡߍ߲ ߠߊ߫. ߏ߬ ߟߎ߬ ߓߊ߯ ( ߛߏ߬ߓߏ ) ߡߍ߲ ߠߎ߫ ߡߌ߬ߘߵߊߟߎ߫ ߦߋ߫ ߸ ߊߟߎ߯ ߏ߬ ߟߎ߬ ߘߏ߫ ߘߊߥߎ߲߫ ߝߛߊߦߌ߫ ، ߊߟߎ߫ ߞߏ߬ߣߌ߲߬ ߊߟߊ߫ ߕߐ߮ ߝߐ߫ ߊ߬ ߡߊ߬ ، ߊ߬ ߣߌ߫ ߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ، ߓߊ ߊߟߊ߫ ߦߋ߫ ߖߊ߬ߕߋ߬ߓߐ߬ߟߊ߬ ߞߊߟߌ߲ ߠߋ߬ ߘߌ߫ ﴿4﴾

ߓߌ߬ ߡߍ߲ ߓߌ߬ ߘߌ߫ ( ߘߊߥߎ߲ߠߌ߲ߝߋ߲ ) ߢߌ߬ߡߊ ߟߎ߬ ߓߘߊ߫ ߟߊߘߤߵߊߟߎ߫ ߦߋ߫ ߸ ߟߍߙߊߟߞߊ ߟߎ߬ ߟߊ߫ ߛߎ߬ߡߊ߲ ( ߠߎ߫ ) ߘߤߊ߬ߣߍ߲߬ ߊߟߎ߫ ߦߋ߫ ߸ ߊߟߎ߫ ߟߊ߫ ߛߎ߬ߡߊ߲ ߘߌ ߘߤߊ߬ߣߍ߲߫ ߏ߬ ߟߎ߫ ߡߊ߬ ، ߛߌ߬ߟߡߊ߬ ߤߙߐ߫ ߡߛߏ ߟߎ߬ ߣߌ߫ ߟߍߙߊߟߞߊ ߟߎ߬ ߘߐ߫ ߤߙߐ߫ ߡߛߏ ߟߎ߫ ߘߤߊ߬ߣߍ߲߫ ߊߟߎ߫ ߦߋ߫ ߸ ߣߴߊߟߎ߫ ߞߵߊ߬ߟߎ߬ ߛߐ߫ ߊ߬ߟߎ߬ ߝߘߎߝߋ߲ ߠߎ߬ ߟߊ߫ ߞߊ߬ߣߌ߲߫ ، ߊߟߎ߫ ߦߋ߫ ߞߍ߫ ߝߘߎ߫ ߞߍߟߊ ߟߎ߫ ߟߋ߬ ߘߌ߫ ߸ ߊߟߎ߫ ߞߊߣߊ߬ ߞߍ߫ ߢߊ߬ߡߐ߰ߞߍ߬ߟߊ߫ ߟߎ߫ ߘߌ߫ ߸ ߊߟߎ߫ ߞߊߣߊ߬ ߞߍ߫ ߖߋ߬ߕߌ߰ߡߛߏ߫ ߡߌ߬ߘߊ߬ߓߊ߯ ߟߎ߫ ߘߌ߫. ߡߍ߲ ߘߏ߲߬ ߓߊ߯ ߊ߬ ߓߊ߲߬ ߘߍ߲߬ߞߣߍ߬ߦߊ ߡߊ߬ ߸ ߏ߬ ߟߊ߫ ߓߊ߯ߙߊ ߘߌ߫ ߕߌߢߍ߫ ߞߊ߬ ߞߍ߫ ߟߊߞߌߙߊ߫ ߓߣߐ߬ߓߊ߮ ߟߎ߬ ߘߏ߫ ߘߌ߫ ﴿5﴾

ߤߍ߲߬ ߊߟߎ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߓߊ߯ ߞߍ߫ ߊߟߎ߫ ߟߐ߬ ߟߊ߫ ߛߊߟߌ ߟߊ߫ ߸ ߊߟߎ߫ ߦߴߊߟߎ߫ ߢߊߘߐߟߊ ߟߎ߬ ߣߴߊߟߎ߫ ߕߍ߮ ߟߎ߫ ߞߏ߬ ߞߵߊ߬ ߛߌ߰ ߣߐ߲߬ߞߐ߲߬ߞߘߎ ߟߎ߬ ߟߊ߫ ، ߞߵߊߟߎ߫ ߞߎ߲߭ ߠߎ߬ ߘߐߛߏ߬ߛߊ߫ ߸ ߊ߬ ߣߴߊߟߎ߫ ߛߋ߲߭ ߠߎ߬ ߸ ߞߵߊ߬ ߛߌ߰ ߕߊ߲ߓߊߞߘߎ ߟߎ߬ ߟߊ߫ ، ߓߊ߬ߙߌ߬ ߣߴߊߟߎ߫ ߞߛߐߓߊߕߐ ߞߍ߫ ߘߊ߫ ߸ ߊߟߎ߫ ߦߴߊߟߎ߫ ߞߏ߬ ߒߕߟߋߡߊ߬ ، ߣߴߊߟߎ߫ ߘߏ߲߬ ߖߊ߲߬ߞߊ߬ߙߏ߬ߕߐ ߞߍ߫ ߘߊ߫ ߥߟߴߊߟߎ߫ ߕߊ߯ߡߊߟߡߊ ߟߋ߬ ، ߤߊߡߊ߲ߕߍ߫ ߊߟߎ߫ ߘߏ߫ ߓߐ߫ ߘߊ߫ ߞߐߡߊߕߊ߯ ߦߌߟߊ ، ߥߟߴߊߟߎ߫ ߡߊ߰ ߘߊ߫ ߡߏ߬ߛߏ ߟߎ߬ ߟߊ߫ ߸ ߊߟߎ߫ ߘߏ߲߬ ߡߊ߫ ߖߌ߫ ߛߐ߬ߘߐ߲߬ ߸ ߊߟߎ߫ ߦߋ߫ ߛߊߟߌߓߎ߯ߘߌߕߊ߬ ߘߎ߱ ߝߊ߬ߘߌ߬ ߛߊߣߌ߲ߡߊ߲ ߞߊ߲߬ ߸ ߞߵߊߟߎ߫ ߢߊߘߐߟߊ ߟߎ߬ ߣߴߊߟߎ߫ ߓߟߏ ߟߎ߬ ߡߊߛߏ߬ߛߊ߫ ߏ߬ ߟߊ߫ ߸ ߊߟߊ߫ ߕߍ߫ ߊ߬ ߝߍ߬ ߟߋ߬ ߸ ߞߊ߬ ߛߕߌ߬ ߟߴߊߟߎ߫ ߞߊ߲߬ ، ߓߊ߬ߙߌ߬ ߊ߬ ߦߴߊߟߎ߫ ߛߊߣߌ߲ߧߊ߫ ߞߏ ߟߋ߬ ߘߐ߫ ߸ ߊ߬ ߣߌ߫ ߞߵߊ߬ ߟߊ߫ ߣߍߡߊ ߘߝߴߊߟߎ߫ ߦߋ߫ ߖߐ߲߰ߛߴߊߟߎ߫ ߘߴߊ߬ ߞߏߢߌߡߊߟߐ߲߫ ﴿6﴾

ߊߟߎ߫ ߦߴߊߟߎ߫ ߦߟߌߕߏ߫ ߊߟߊ߫ ߟߊ߫ ߣߍߡߊ ߘߐ߫ ߊߟߎ߫ ߞߊ߲߬ ߸ ߊ߬ ߣߴߊ߬ ߟߊ߫ ߟߊ߬ߤߘߌ ߘߐ߫ ߊ߬ ߞߊ߬ ߡߍ߲ ߡߊߜߟߍ߬ߦߴߊߟߎ߫ ߦߋ߫ ߸ ߏ߬ ߕߎ߬ߡߊ ߊߟߎ߫ ߓߘߴߊ߬ ߝߐ߫ ߞߏ߫ ߊ߲ ߓߘߴߊ߬ ߡߍ߲߫ ߸ ߊ߲ ߓߘߴߊ߬ ߡߌ߬ߘߊ߬ ، ߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ، ߓߊ ߊߟߊ߫ ߞߊ߬ ߛߌߛߌ߫ ߘߐ߫ ߞߏ ߓߍ߯ ߟߐ߲߫ ﴿7﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߦߴߊߟߎ߫ ߟߐ߬ ߊߟߊ߫ ߦߋ߫ ߸ ߞߊ߬ ߞߍ߫ ߛߙߋ ߟߎ߬ ߘߌ߫ ߕߋߟߋ߲ߓߊ߯ߦߊ ߟߊ߫ ، ߞߏ߬ߣߌ߲߬ ߊ߬ߟߋ߬ ߡߌ߬ߙߌ߲߬ߘߌ ߞߐߣߌ߲ߧߊ ߞߊߣߵߊߟߎ߫ ߟߐ߬ ߞߎ߲߬ߞߏ߫ ߘߐߕߍ߰ ߟߊ߫ ߘߋ߬ ߞߵߊߟߎ߫ ߓߊ߲߬ ߊߟߎ߫ ߕߋߟߋ߲߫ ߠߊ߫ ، ߊߟߎ߫ ߦߴߊߟߎ߫ ߕߋߟߋ߲߫ ߠߋ߬ ߸ ߏ߬ ߟߋ ߛߎ߬ߘߎ߲߬ߡߊ߲߫ ߝߊ߲ߕߊ߲ߞߊ ߟߊ߫ ، ߊߟߎ߫ ߘߏ߲߬ ߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߟߋ߬ ، ߓߊ ߊߟߊ߫ ߞߟߊ߬ߡߊ߬ ߞߏ߫ ߟߋ߬ ߊߟߎ߫ ߗߋߥߊߟߌ ߟߎ߬ ߘߌ߫ ﴿8﴾

ߊߟߊ߫ ߓߘߊ߫ ߘߍ߲߬ߞߣߍ߬ߦߊ߬ߓߊ߯ ߢߌ߬ߡߊ߬ ߞߍ߬ߟߊ ߟߎ߬ ߦߟߌߡߊߘߌߦߊ߫ ߸ ߞߏ߫ ߊ߬ߟߎ߬ ߢߍߛߌ߰ߣߍ߲߫ ߦߝߊ߬ߟߌ ߣߌ߫ ߓߙߊ߬ߖߌ߬ ߓߟߋߓߟߋ ߟߋ߬ ߟߊ߫ ﴿9﴾

ߡߍ߲ ߠߎ߫ ߘߏ߲߬ ߣߵߊ߬ߟߎ߫ ߓߊ߲߬ ߠߊ߫ ، ߊ߬ ߣߌ߫ ߞߊ߬ ߒ߬ ߠߊ߫ ߟߝߊߙߌ ߟߎ߬ ߡߊߛߐ߬ߛߐ߫ ߸ ߏ߬ ߟߎ߫ ߟߋ߬ ߥߋ߲߯ߓߋ ߘߏ߲߬ߞߏ ߟߎ߬ ߘߌ߫ ﴿10﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߦߴߊߟߎ߫ ߦߟߌߕߏ߫ ߊߟߊ߫ ߟߊ߫ ߣߍߡߊ ߘߐ߫ ߊߟߎ߫ ߞߊ߲߬ ߸ ߕߎ߬ߡߊ ߡߍ߲ ߡߌ߬ߙߌ߲߬ߘߌ ߘߏ߫ ߞߵߊ߬ߟߎ߬ ߣߌ ߟߴߊ߬ߟߎ߬ ߓߟߏ ߞߘߐߕߊ߭ ߞߊ߲߬ ߊߟߎ߫ ߞߊ߲ߡߊ߬ ، ߊߟߊ߫ ߞߵߏ߬ ߟߎ߬ ߓߟߏ ߘߐߡߌ߬ߣߵߊߟߎ߫ ߡߊ߬ ، ߒ߬ߓߵߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ، ߘߍ߲߬ߞߣߍ߬ߦߊ߬ߓߊ߮ ߟߎ߫ ߘߏ߲߬ ߊ߬ߟߎ߫ ߛߍ߲߬ߓߍ߬ ߊߟߊ߫ ߟߋ߬ ߟߊ߫ ﴿11﴾

ߖߊ߯ߕߋ߬ ߸ ߊߟߊ߫ ߞߊ߬ ߌߛߌߙߊߌߟߞߊ ߟߎ߬ ߟߊ߫ ߟߊ߬ߤߘߌ ߡߌ߬ߘߊ߬ ، ߊ߲ ߞߊ߬ ߛߊߞߍߟߌߟߊ߫ ߕߊ߲߫ ߣߌ߫ ߝߌ߬ߟߊ߬ ߛߎߥߊ߲ߘߌ߫ ߊ߬ߟߎ߬ ߘߐ߫ ߸ ߊߟߊ߫ ߞߊ߲߫ ߊ߬ߟߎ߬ ߦߋ߫ ߞߏ߫ ߒߠߋ ߦߴߊߟߎ߫ ߝߍ߬ ߟߋ߬ ߘߋ߬ ، ߣߴߊߟߎ߫ ߞߏ߬ߣߌ߲ ߞߊ߬ ߛߊߟߌ ߟߐ߬ ߞߊ߬ ߖߞߊ ߘߌ߫ ߞߊ߬ ߘߍ߲߬ߞߣߍ߬ߦߊ߬ ߒ ߠߊ߫ ߞߋߟߊ ߟߎ߫ ߡߊ߬ ߸ ߞߵߊ߬ߟߎ߫ ߘߍ߬ߡߍ߲߬ ߊ߬ ߣߌ߫ ߞߵߊߟߊ߫ ߘߐ߲ߘߐ߫ ߸ ߘߐ߲ߘߐߟߌ߫ ߢߌߡߊ߫ ߟߊ߫ ߸ ߒ ߘߴߊߟߎ߫ ߖߎ߯ߡߊ߲߫ ߞߍ߫ ߣߐ ߟߎ߬ ߘߐߞߏߦߊߕߏ߫ ߊߟߎ߫ ߦߋ߫ ߏ߬ ߘߐ߫ ߸ ߊ߬ ߣߌ߫ ߒ ߘߴߊߟߎ߫ ߟߊߘߏ߲߬ ߣߊߞߐ ߟߎ߬ ߘߐ߫ ߸ ߖߌߢߊ ߟߎ߯ ߞߎ߬ߟߊ߲߬ߞߎ߬ߟߊ߲߬ ߠߊ߫ ߡߍ߲ ߠߎ߬ ߞߘߐߟߊ ߟߎ߬ ߘߐ߫ ، ߊߟߎ߫ ߡߍ߲ ߓߊ߯ ߊ߬ ߓߊ߲߬ ߏ߬ ߞߐ߫ ߡߎ߬ߕߎ߲߬ ߸ ߏ߬ ߓߘߊ߫ ߝߟߌ߬ ߛߌߟߊ߫ ߕߋߟߋ߲ߣߍ߲ ߡߊ߬ ﴿12﴾

ߊ߬ߟߎ߫ ߞߵߊ߬ߟߎ߬ ߟߊ߫ ߟߊ߬ߤߘߌ ߕߌߢߍ ߡߍ߲ ߞߍ߫ ߸ ߊ߲ ߞߵߊ߬ߟߎ߬ ߘߊ߲ߞߊ߫ ߏ߬ ߟߋ ߘߐ߫ ߸ ߞߵߊ߬ߟߎ߫ ߛߣߐ߬ߡߍ ߟߎ߫ ߖߊ߬ ߸ ߊ߬ߟߎ߬ ߦߋ߫ ߕߏ߫ ߟߊ߫ ߞߎߡߊ ߦߟߍ߬ߡߊ߲߬ ߠߊ߫ ߞߵߊ߬ ߓߐ߫ ߊ߬ ߟߊ߫ ߢߊ ߡߊ߬ ، ߊ߬ ߣߴߊ߬ߟߎ߫ ߢߌ߬ߣߊ߬ ߘߴߊ߬ߟߎ߫ ߞߊ߬ߥߊ߲߬ߘߌ߬ ߞߊ߲ ߝߊ߲߬ߓߊ ߞߐ߫ ߸ ߌ ߘߏ߲߬ ߕߍߣߊ߬ ߓߊ߲߫ ߠߊ߫ ߖߊ߲߬ߝߊ ߢߊߦߋ߫ ߟߴߊ߬ߟߎ߬ ߟߊ߫ ߞߎ߲߬ ߠߊ߫ ߛߐ߲߬ ߸ ߝߏ߫ ߊ߬ߟߎ߬ ߘߐ߫ ߞߋ߬ߟߋ߲߬ߞߋߟߋ߲߫ ߘߋ߬ ، ߒ߬ߞߊ߬ ߌߟߋ ߜߊ߲ߒߞߎ߲ߠߊ ߣߌ߫ ߘߐ߬ߞߏ߬ߦߊ߬ߕߏ߬ߟߌ ߞߍ߫ ߊ߬ߟߎ߬ ߦߋ߫ ߸ ߓߊ ߢߊ߬ߓߊ߮ ߟߎ߫ ߟߋ߬ ߘߌߡߊ߲߫ ߊߟߊ߫ ߦߋ߫ ﴿13﴾

ߡߍ߲ ߠߎ߬ ߞߊ߲߫ ߊ߬ߟߎ߫ ߖߍ߬ߘߍ߫ ߡߊ߬ ߞߏ߫ ߒ߬ߠߎ߬ ߦߋ߫ ߌߛߊߟߞߊ ߟߎ߫ ߟߋ߬ ߘߌ߫ ߸ ߊ߲ ߞߵߏ߬ ߟߎ߬ ߟߊ߫ ߟߊ߬ߤߘߌ ߡߌ߬ߘߊ߬ ، ߏ߬ ߟߎ߬ ߝߣߊ߫ ߢߌ߬ߣߊ߬ ߘߴߊ߬ߟߎ߫ ߞߊ߬ߥߊ߲߬ߘߌ߬ ߞߊ߲ ߝߊ߲߬ߓߊ ߞߐ߫ ، ߏ߬ ߞߍ ߊ߲ ߞߵߊ߬ߟߎ߬ ߘߐߛߎ߫ ߢߐ߲߮ ߡߊ߬ ߖߎ߯ߦߊ ߣߌ߫ ߞߐߣߌ߲ߧߊ ߟߊ߫ ߸ ߝߏ߫ ߞߵߊ߬ ߛߌ߰ ߟߐ߬ߓߊ ߟߏ߲ ߠߊ߫ ، ߞߏ߬ߣߌ߲߬ ߛߋߚߋ߫ ߸ ߊߟߊ߫ ߓߍߣߵߊ߬ߟߎ߬ ߟߊ߫ ߓߊ߯ߙߊ ߟߎ߬ ߖߐ߲ ߠߊߓߐ߫ ߊ߬ߟߎ߫ ߡߊ߬ ߟߋ߬ ߖߐ߫ ﴿14﴾

ߤߍ߲߬ ߊߟߎ߬ ߟߍߙߊߟߞߊ ߟߎ߬ ߸ ߊ߲ ߠߊ߫ ߞߋߟߊ ߓߘߊ߫ ߣߵߊߟߎ߫ ߡߊ߬ ، ߊ߬ ߘߏ߲߬ ߦߋ߫ ( ߞߏ߫ ) ߛߌߦߊߡߊ߲߫ ߘߐߞߣߍ߫ ߟߴߊߟߎ߫ ߦߋ߫ ߸ ߊߟߎ߫ ߕߘߍ߬ ߡߍ߲ ߠߎ߫ ߘߏ߲߰ ߠߊ߫ ߟߍߙߊ ߞߣߐ߫ ، ߊ߬ ߝߊ߲߭ ߦߴߊ߬ ߜߊ߲߫ ߠߊ߫ ߛߘߍߡߊ߲߫ ߞߎ߲߬ߠߊ߬. ߦߋߟߋ߲ ߣߌ߫ ߟߍߙߊ߫ ߘߐߜߍ ߟߋ߫ ߘߏ߲߬ ߣߊ߬ߣߍ߲߫ ߊߟߎ߫ ߡߊ߬ ߣߌ߲߬ ߸ ߞߊ߬ ߝߘߴߊߟߊ߫ ߟߊ߫ ﴿15﴾

ߊߟߊ߫ ߦߋ߫ ( ߟߍߙߊ ) ߏ߬ ߟߋ ߞߍ߫ ߟߊ߫ ߸ ߞߵߊ߬ ߟߊ߫ ߘߌ߬ߢߍ ߟߊߓߊ߬ߕߏ߬ߓߊ߮ ߟߎ߬ ߞߊ߲ߘߊ߫ ߞߛߌ ߛߌߟߊ ߟߎ߫ ߡߊ߬ ߸ ߊ߬ ߣߌ߫ ߞߵߊ߬ߟߎ߬ ߟߊߓߐ߫ ߘߌ߬ߓߌ ߟߎ߬ ߘߐ߫ ߞߊߕߙߍ߬ ߦߋߟߋ߲ ߡߊ߬ ߸ ߊ߬ ߖߍ߬ߘߍ ߟߊ߫ ߘߌ߬ߢߍ ߟߊ߫ ، ߊ߬ ߣߌ߫ ߞߵߊ߬ߟߎ߬ ߞߊ߲ߘߊ߫ ߛߌߟߊ߫ ߕߋߟߋ߲ߣߍ߲߫ ߓߐߚߐ ߞߊ߲߬ ﴿16﴾

ߡߍ߲ ߠߎ߬ ߞߊ߲߫ ߞߏ߫ ߊߟߊ߫ ߟߋ߬ ߡߊߙߌߦߡߊ߫ ߘߋ߲ߞߍ߫ ߡߊߡߎ߲߬ߣߍ߲ ߘߌ߫ ߸ ߏ߬ ߟߎ߬ ߓߘߊ߫ ߞߍ߫ ߓߊ߲߬ߓߊ߮ ( ߘߝߊߣߍ߲ ) ߠߎ߬ ߘߌ߫ ، ߒ߬ߓߵߊ߬ߟߎ߫ ߢߌ߬ߣߌ߲߬ߞߊ߬ ߓߊ߫ ߞߏ߫ ߖߍߣߍ߲ ߘߌ߫ ߛߋ߫ ߊߟߊ߫ ߟߊ߫ ߞߏ߫ ߘߏ߲߰ߣߍ߲ ߘߐߛߊ߬ ߟߊ߫ ߸ ߣߴߊ߬ ߦߴߊ߬ ߝߍ߬ ߞߊ߬ ߡߊߙߌߦߡߊ߫ ߘߋ߲ߞߍ߫ ߡߊߡߎ߲߬ߣߍ߲ ߣߴߊ߬ ߣߊ߫ ߛߌߟߊߛߊ߬ ߸ ߊ߬ ߣߌ߫ ߘߎ߰ߞߟߏ ߞߊ߲߬ ߡߐ߮ ߓߍ߯؟ ߊߟߊ߫ ߘߏ߲߬ ߕߊ ߟߋ߬ ߛߊ߲ ߠߎ߬ ߣߌ߫ ߘߎ߱ ߡߊ߲߬ߛߊ߬ߦߊ ߘߌ߫ ߸ ߊ߬ ߣߌ߫ ( ߝߋ߲ ) ߡߍ߲ ߦߴߏ ߝߌ߬ߟߊ ߕߍ߫ ، ߊ߬ ߦߋ߫ ߝߋ߲߫ ߠߋ߬ ߘߊ߲߫ ߠߊ߫ ߡߍ߲ ߓߊ߯ ߊ߬ ߘߌߦߊ߫ ߸ ߓߊ ߊߟߊ߫ ߟߋ߬ ߛߋ߫ ߟߊ߫ ߞߏ ߓߍ߯ ߟߊ߫ ﴿17﴾

ߦߊ߬ߤߎ߯ߘߎ ߟߎ߬ ߣߌ߫ ߣߊ߬ߛߊ߯ߙߊ ߟߎ߬ ߞߊ߲߫ ߠߋ߬ ߸ ߞߏ߫ ߊ߬ߟߎ ߟߋ߬ ߊߟߊ߫ ߘߋ߲ ߠߎ߬ ߣߴߊ߬ ߞߊ߬ߣߌ߲߬ߢߐ߲߮ ߠߎ߬ ߘߌ߫ ، ߊ߬ߟߎ߫ ߢߌ߬ߣߌ߲߬ߞߊ߬ ߞߏ߫ ߡߎ߲߬ ߠߊ߫ ߘߏ߲߬ ߊ߬ ߦߴߊߟߎ߫ ߖߊ߲߰ߞߕߊ߬ ߟߴߊߟߎ߫ ߖߟߎ߬ߡߎ߲ ߠߎ߬ ߞߏߛߐ߲߬؟ ߒ߬ߓߊ߬ ߍ߲߬ߍ߲ߍ߲߫ ߸ ߊߟߎ߫ ߦߴߊ߬ ߟߊ߫ ߘߊ߲ߝߋ߲߫ ߛߊ߬ߕߊ ߘߏ߫ ߟߋ߬ ߘߌ߫ ، ߊ߬ ߘߏ߲߬ ߦߝߊ߬ ߟߊ߫ ߡߐ߰ ߟߋ߬ ߡߊ߬ ߸ ߡߍ߲ ߓߊ߯ ߊ߬ ߘߌߦߊ߫ ، ߊ߬ ߘߌ߫ ߡߐ߰ ߖߊ߲߰ߞߕߊ߫ ߸ ߡߍ߲ ߓߊ߯ ߊ߬ ߘߌߦߊ߫ ، ߊߟߊ߫ ߞߏ߬ߣߌ߲߬ ߕߊ ߟߋ߬ ߛߊ߲ ߠߎ߬ ߣߌ߫ ߘߎ߱ ߡߊ߲߬ߛߊ߬ߦߊ ߘߌ߫ ߸ ߊ߬ ߣߌ߫ ( ߝߋ߲ ) ߡߍ߲ ߦߴߏ߬ ߝߌ߬ߟߊ ߕߍ߫ ، ߓߍ߯ ߘߏ߲߬ ߟߊߓߊ߲ߕߐ߫ ߊ߬ߟߋ ߟߋ߫ ߡߊ߬ ﴿18﴾

ߤߍ߲߬ ߊߟߎ߬ ߟߍߙߊߟߞߊ ߟߎ߬ ߸ ߊ߲ ߠߊ߫ ߞߋߟߊ ߓߘߊ߫ ߣߵߊߟߎ߫ ߡߊ߬ ، ߊ߬ ߘߏ߲߬ ߦߋ߫ ߝߊߙߊ߲ߝߊߛߌ ߞߍ߫ ߟߴߊߟߎ߫ ߦߋ߫ ߞߋߟߊ ߟߎ߬ ߟߊ߫ ߣߊ߭ ߕߍߖߊ߲ߧߊ ߞߐ߫ ߟߋ߬ ߸ ߤߊߞߍߕߏ߫ ߊߟߎ߫ ߞߊߣߵߊ߬ ߝߐ߫ ߸ ߞߏ߫ ߘߟߊߝߎߟߊ߫ ߛߌ߫ ߣߌ߫ ߖߊ߬ߛߙߋ߬ߡߟߊ߬ߟߊ߬ ߛߌ߫ ߡߊ߫ ߣߵߊ߲ ߡߊ߬ ، ߒ߬ߓߊ߬ ߘߟߊߝߎߟߊ ߣߌ߫ ߖߊ߬ߛߙߋ߬ߡߟߊ߬ߟߊ ߓߘߊ߫ ߣߵߊߟߎ߫ ߡߊ߬ ߛߊ߫ ߸ ߓߊ ߞߏ ߓߍ߯ ߛߋ ߊߟߊ߫ ߟߋ߬ ߦߋ߫ ﴿19﴾

ߕߎ߬ߡߊ ߡߍ߲ ߡߎߛߊ߫ ߞߵߊ߬ ߝߐ߫ ߊ߬ ߡߌ߬ߙߌ߲߬ߘߌ ߦߋ߫ ، ߞߏ߫ ߒ ߓߊߘߋ߲ ߠߎ߬ ߸ ߊߟߎ߫ ߦߴߊߟߎ߫ ߦߟߌߕߏ߫ ߊߟߊ߫ ߟߊ߫ ߣߍߡߊ ߘߐ߫ ߊߟߎ߫ ߞߊ߲߬ ߸ ߕߎ߬ߡߊ ߡߍ߲ ߊ߬ ߞߊ߬ ߟߊ߬ߝߐ߬ߓߊ߮ ߟߎ߬ ߞߍ߫ ߊߟߎ߫ ߘߐ߫ ، ߊ߬ ߞߵߊߟߎ߫ ߞߍ߫ ߡߊ߲߬ߛߊ ߟߎ߬ ߘߌ߫ ، ߊ߬ ߣߴߊ߬ ߞߵߊߟߎ߫ ߛߐ߫ ߝߋ߲߫ ߠߊ߫ ߸ ߊ߬ ߡߊ߫ ߡߍ߲ ( ߢߐ߲߰ ) ߘߌ߫ ߡߐ߰ ߛߌ߫ ߡߊ߬ ߡߌ߬ߙߌ߲߬ߘߌ ( ߕߐ߭ ) ߟߎ߬ ߘߐ߫ ﴿20﴾

ߊ߬ ߞߏ߫ ߒ ߓߊߘߋ߲ ߠߎ߬ ߸ ߊߟߎ߫ ߦߋ߫ ߘߏ߲߬ ߘߎ߰ ߛߊߣߌ߲ߡߊ߲ ߞߣߐ߫ ߸ ߊߟߊ߫ ߣߵߏ߬ ߡߍ߲ ߛߓߍ߫ ߟߴߊߟߎ߫ ߡߊ߬ ، ߊߟߎ߫ ߞߣߊ߫ ߛߊ߬ߦߌ߲߬ ߊߟߎ߫ ߞߕߐߡߊ߫ ߘߋ߬ ߸ ߓߊ ߊߟߎ߫ ߘߌ߫ ߟߊߓߊ߲߫ ߓߣߐ߬ߓߊ߮ ߟߎ߬ ߘߌ߫ ߏ߬ ߘߐ߫ ﴿21﴾

ߊ߬ߟߎ߬ ߞߊ߲߫ ߞߏ߫ ߡߎߛߊ߫ ߸ ߡߌ߬ߙߌ߲߬ߘߌ߬ ߛߊ߯ߣߊ ߟߎ߫ ߟߋ߫ ߦߋ߲߬ ، ߊ߲ߠߎ߫ ߘߏ߲߬ ߕߍߣߊ߬ ߘߏ߲߬ ߠߊ߫ ߦߋ߲߬ ߝߋߎ߫ ߸ ߝߴߏ߬ ߟߎ߬ ߓߊ߯ ߓߐ߫ ߦߋ߲߬ ، ߣߴߏ߬ ߟߎ߫ ߞߏ߬ߣߌ߲߬ ߓߐ߫ ߘߊ߫ ߦߋ߲߬ ߛߊ߫ ߸ ߊ߲ߠߎ߬ ߘߌߣߊ߬ ߕߏ߫ ߘߏ߲߬ ߠߊ߫ ﴿22﴾

ߊߟߊ߫ ߣߍߡߊߣߍ߲߫ ߡߍ߲ ߠߎ߫ ߡߊ߬ ߸ ߏ ߗߍ߬ ߝߌ߬ߟߴߊ߬ ߢߍߛߌߟߊ߲ߢߍߓߊ߮ ߟߎ߬ ߘߐ߫ ߸ ߏ߬ ߟߎ߬ ߞߊ߲߫ ߊ߬ߟߎ߫ ߡߊ߬ ߸ ߞߏ߫ ߊߟߎ߫ ߘߏ߲߬ ߊ߬ߟߎ߫ ߞߊ߲߬ ( ߖߌ߲߬ ) ߘߊ ߟߊ߫ ߝߛߊߦߌ߫ ، ߣߴߊߟߎ߫ ߞߏ߬ߣߌ߲ ߘߏ߲߬ ߘߊ߫ ߕߎ߲߫ ߸ ߊߟߎ߫ ߘߌ߫ ߛߋ ߛߐ߬ߘߐ߲߬ ߸ ߊߟߎ߫ ߘߏ߲߬ ߦߴߊߟߎ߫ ߛߍ߲߬ߓߍ߬ ߊߟߊ߫ ߟߋ߬ ߟߊ߫ ߸ ߣߴߊߟߎ߫ ߞߍ߫ ߘߊ߫ ߘߍ߲߬ߞߣߍ߬ߦߊ߬ߓߊ߯ ߟߎ߫ ߘߌ߫ ﴿23﴾

ߊ߬ߟߎ߬ ߞߊ߲߫ ߞߏ߫ ߡߎߛߊ߫ ߸ ߊ߲ߠߎ߬ ߕߍߣߊ߬ ߘߏ߲߬ ߠߊ߫ ߦߋ߲߬ ߝߋߎ߫ ߸ ߝߊ߬ߣߌ߫ ߏ߬ ߟߎ߬ ߘߊ߯ߣߍ߲߫ ߦߋ߲߬ ، ߌߟߋ ߦߋ߫ ߕߊ߯ ߸ ߌ ߣߴߌ ߡߊ߰ߙߌ ߦߋ߫ ߞߍ߬ߟߍ ߞߍ߫ ، ߊ߲ߠߎ߫ ߞߏ߬ߣߌ߲ ߛߌ߰ߣߍ߲߫ ߦߊ߲߬ ߠߋ߬ ﴿24﴾

‹ߡߎߛߊ߫› ߞߊ߲߫ ߞߏ߫ ߒ ߡߊ߰ߙߌ ߸ ߒߠߋ ߛߋ߫ ߕߍ߫ ߡߐ߰ ߛߌ߫ ߘߐ߫ ߝߏ߫ ߒ ߖߍ߬ߘߍ ߣߌ߫ ߒ ߞߘߐ߬ߞߍ߫ ، ߏ߬ ߘߐ߫ ߸ ߖߊ߰ߣߌ߲߬ ߌ ߦߋ߫ ߘߊ߲߬ߝߘߊ߬ߓߐ ߞߍ߫ ߒ߬ߠߎ߬ ߣߌ߫ ߡߌ߬ߙߌ߲߬ߘߌ߬ ߔߊߟߊ߲ߞߊߣߍ߲ ߠߎ߬ ߕߍ߫ ﴿25﴾

‹ ߊߟߊ߫› ߞߊ߲߫ ߞߏ߫ ߒ߬ߓߵߊ߬ߟߋ߬ ‹ ߘߎ߱› ߓߘߊ߫ ߞߎ߬ߡߊ߲߬ߘߌ߫ ߊ߬ߟߎ߫ ߡߊ߬ ߛߊ߲߬ ߓߌߣߊ߯ߣߌ߲߫ ( ߞߘߐ߫ ) ߸ ߊ߬ߟߎ߬ ߞߣߐߘߐߝߟߌ߬ߣߍ߲ ߦߋ߫ ߞߏ߲ߞߏ ߞߣߐ߫ ، ߌ ߘߏ߲߬ ߞߊߣߊ߫ ߛߎ߬ߣߎ߲߫ ߡߌ߬ߙߌ߲߬ߘߌ߬ ߔߊߟߊ߲ߞߊߣߍ߲ ߠߎ߫ ( ߡߊ߬ߤߌߣߊ ) ߡߊ߬ ߘߋ߬ ﴿26﴾

ߌ ߦߋ߫ ߊߘߡߊ߫ ߘߋ߲ߞߍ߫ ߝߌ߬ߟߊ ߖߊ߲߬ߖߏ߲ ߘߐߞߊ߬ߙߊ߲߫ ߊ߬ߟߎ߬ ߦߋ߫ ߕߎ߬ߢߊ ߟߊ߫ ، ߕߎ߬ߡߊ ߡߍ߲ ߊ߬ߟߎ߫ ߞߊ߬ ߖߊ߲߬ߛߊ߬ߟߌ߬ ߝߋ߲ ߘߏ߫ ߟߊߛߋ߫ ߸ ߞߋߟߋ߲ ߕߊ ߟߊߡߌ߬ߘߊ߬ ߘߊ߫ ߸ ߊ߬ ߕߐ߬ ߞߋߟߋ߲ ߕߊ ߡߊ߫ ߟߊߡߌ߬ߘߊ߬ ߡߍ߲ߞߍ߭ ߸ ߏ߬ ߞߊ߲߫ ߘߐ ߡߊ߬ ߸ ߞߏ߫ ߒ߬ߓߊ߬ ߒ ߧߴߌ ߝߊ߰ ߟߊ߫ ߟߋ߬ ߛߋߚߋ߫ ، ߏ߬ ߞߵߊ߬ ߖߋ߬ߓߌ߬ ߸ ߞߏ߫ ߊߟߊ߫ ߘߏ߲߬ ߦߋ߫ ߖߏߕߌ߮ ߟߋ߬ ߕߊ ߟߊߡߌ߬ߘߊ߬ ߟߊ߫ ߘߋ߬ ﴿27﴾

ߞߏ߫ ߣߴߌߟߋ ߞߵߌ ߓߟߏ ߘߐߛߊ߬ߡߊ߲߬ ߒߠߋ ߞߊ߲ߡߊ߬ ߞߴߌ ߦߋ߫ ߒ ߝߊ߰ ߟߊ߫ ߸ ߒߠߋ ߕߍ߫ ߒ ߓߟߏ ߘߐߛߊ߬ߡߊ߲߬ ߌߟߋ ߞߊ߲ߡߊ߬ ߝߋߎ߫ ߒ ߞߏ߫ ߒ ߧߴߌ ߝߊ߰ ߟߊ߫ ، ߓߊ ߒߠߋ ߛߌߟߊ߲߫ ߠߊ߫ ߊߟߊ߫ ߟߋ߬ ߢߍ߫ ߸ ߏ߬ ߡߍ߲ ߖߊ߯ߓߊ ߟߎ߫ ߡߊ߰ߙߌ ߘߌ߫ ﴿28﴾

ߒߠߋ ߦߴߊ߬ ߝߍ߬ ߟߋ߬ ߌ ߦߴߌ ߢߎ߲߫ ߒߠߋ ߖߟߎ߬ߡߎ߲ ߣߴߌ ߖߟߎ߬ߡߎ߲ ߠߊ߫ ، ߏ߬ ߓߊ߯ ߞߍ߫ ߌ ߘߌ߫ ߞߍ߫ ߕߊ ߘߏ߲߬ߞߏ ߟߎ߬ ߘߏ߫ ߘߌ߫ ، ߏ߬ ߟߋ ߘߏ߲߬ ߦߋ߫ ߕߐ߬ߢߍ߰ߒߕߋ ߟߎ߫ ߛߊ߬ߙߊ ߘߌ߫ ﴿29﴾

ߊ߬ ߣߌ ߞߵߊ߬ ߟߐ߬ ߊ߬ ߓߊߘߋ߲ ߝߊ߰ ߟߊ߫ ߸ ߊ߬ ߘߏ߲߬ ߞߵߊ߬ ߝߊ߰ ، ߏ߬ ߞߍ ߸ ߊ߬ ߟߊߓߊ߲߫ ߘߊ߫ ߓߣߐ߬ߓߊ߮ ߟߎ߬ ߘߏ߫ ߘߌ߫ ﴿30﴾

ߘߊ߬ߡߊ߲߬ߛߊ߫ ߊߟߊ߫ ߞߊ߬ ߞߊ߰ߟߊ߭ ߘߏ߫ ߟߊߥߟߌ߬ ، ߏ߬ ߦߋ߫ ߘߎ߱ ߘߐߛߋ߲߬ ߊ߬ ߢߣߊ߫ ߸ ߛߴߊ߬ ߘߴߊ߬ ߓߊߘߋ߲ ߛߎ߭ ߓߙߌ߬ ߢߊ ߦߌ߬ߘߴߊ߬ ߟߊ߫ ، ߊ߬ ߞߊ߲߫ ߏ߬ ߘߐ߫ ߞߏ߫ ߊ߯ߟߊ߲߫ ߸ ߌ߬ߦߏ߯ ߒߠߋ ߘߛߍ߫ ߘߊ߫ ߞߍ߫ ߟߊ߫ ߞߊ߰ߟߊ߭ ߣߌ߲߬ ߢߐ߲߰ ߘߌ߫ ߞߊ߬ ߒ ߓߊߘߋ߲ ߛߎ߭ ߓߙߌ߬؟ ߊ߬ ߞߍ߫ ߘߴߏ߬ ߘߐ߫ ߸ ߣߡߌߛߊߓߊ߮ ߟߎ߬ ߘߏ߫ ߘߌ߫ ﴿31﴾

ߒ߬ߓߊ߬ ߏ߬ ߟߋ ߞߏߛߐ߲߬ ߊ߲ ߞߵߊ߬ ߛߓߍ߫ ߌߛߌߙߊߌߟߞߊ ߟߎ߫ ߡߊ߬ ߸ ߒ ߞߏ߫ ߡߍ߲ ߓߊ߯ ߣߌ߫ ߞߋߟߋ߲߫ ߝߊ߰ ߊ߬ ߡߊ߫ ߞߍ߫ ߣߌ߫ ߢߐ߲߯ ߘߌ߫ ߸ ߥߟߊ߫ ߖߊ߬ߡߣߊ߬ ߕߌ߬ߢߍ߬ ߞߏ߫ ߘߌ߫ ߸ ߊ߰ ߟߋ߬ ߦߴߏ߬ ߓߘߊ߫ ߡߐ߱ ߓߍ߯ ߝߊ߰ ߞߐߘߍ߫ ، ߡߍ߲ ߝߣߊ߫ ߓߊ߯ ߣߌ߫ ߞߋߟߋ߲߫ ߠߊߢߣߊߡߦߊ߫ ߸ ߊ߰ ߟߋ߬ ߦߴߏ߬ ߓߘߊ߫ ߡߐ߱ ߓߍ߯ ߟߊߢߣߊߡߦߊ߫ ، ߒ߬ ߠߊ߫ ߞߋߟߊ ߟߎ߫ ߘߏ߲߬ ߣߊ߬ ߘߴߊ߬ߟߎ߫ ߡߊ߬ ߔߊߞߌ߫ ߜߊ߲߰ߛߊ߲߫ ߠߋ߬ ߘߌ߫ ، ߓߊ߬ߙߌ߬ ߏ߬ ߓߍ߯ ߞߐ߫ ߸ ߊ߬ߟߎ߫ ߝߊ߲߬ߓߊ ߦߋ߫ ߖߊߛߟߌ ߟߊ߬ ߘߎ߰ߞߟߏ ߞߊ߲߬ ߡߎߣߎ߲߬ ߖߐ߫ ﴿32﴾

ߡߍ߲ ߠߎ߬ ߦߋ߫ ߞߍ߬ߟߍ ߓߋ߬ ߟߴߊߟߊ߫ ߣߴߊ߬ ߟߊ߫ ߞߋߟߊ ߞߊ߲߬ ، ߊ߬ ߣߌ߫ ߞߵߊ߬ ߞߍ߫ ߕߌߢߍߟߌ ߘߌ߫ ߖߡߊ߬ߣߊ ߞߣߐ߫ ߸ ߏ߬ ߟߎ߫ ߛߊ߬ߙߊ ߟߋ߬ ߸ ߞߵߊ߬ߟߎ߫ ߝߊ߰ ߥߟߊ߫ ߞߵߊ߬ߟߎ߬ ߓߊߙߊ߲ߕߏ߫ ߸ ߤߊߡߊ߲ߕߍ߫ ߞߵߊ߬ߟߎ߬ ߓߟߏ ߟߎ߬ ߣߴߊ߬ߟߎ߫ ߛߋ߲߭ ߠߎ߫ ߕߍ߰ ߞߵߊ߬ߟߎ߫ ߝߐ߬ߛߐ߲߬ ߢߐ߲߮ ߘߐ߫ ، ߥߟߊ߫ ߞߵߊ߬ߟߎ߬ ߜߍ߲߫ ߖߡߊ߬ߣߊ ߞߣߐ߫ ، ߏ߬ ߟߋ ߊ߬ߟߎ߫ ߞߊ߲߬ ߘߎߢߊ߫ ߘߐ߯ߦߡߊ ߘߌ߫ ߡߎߣߎ߲߬ ، ߊ߬ߟߎ߫ ߘߏ߲߬ ߢߍߛߌ߰ߣߍ߲߬ ߟߊߞߌߙߊ߫ ߖߊ߲߰ߞߕߊ߬ ߓߟߋߓߟߋ ߟߋ߬ ߟߊ߫ ﴿33﴾

ߝߏ߫ ߣߌ߫ ߡߍ߲ ߠߎ߫ ߞߵߊ߬ߟߎ߫ ߖߘߍ߬ߟߊߛߊ߬ߦߌ߲߬ ߞߵߊ߬ ߕߘߍ߬ ߊߟߎ߫ ߡߴߊ߬ߟߎ߬ ߡߊߣߐ߬ ߡߎߣߎ߲߬. ߊߟߎ߫ ߘߏ߲߬ ߦߴߊ߬ ߟߐ߲߫ ߞߏ߫ ߊߟߊ߫ ߦߋ߫ ߦߝߊ߬ߟߊ߫ ߘߌ߫ ߸ ߊ߬ ߦߋ߫ ߤߌߣߟߊ߫ ߘߌ߫ ﴿34﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߸ ߞߊ߬ ߛߊ߲߬ߞߊ߬ߟߊ߲߬ߧߊ ߢߌߣߌ߲߫ ߊߟߊ߫ ߝߍ߬ ( ߓߊ߬ߕߏ ߟߎ߬ ߟߊ߫ ߸ ߡߍ߲ ߠߎ߬ ߘߴߊߟߎ߫ ߡߊߛߎ߬ߘߎ߲߬ߧߴߊ߬ ߟߊ߫) ߸ ߊ߬ ߣߴߊߟߎ߫ ߦߋ߫ ߖߘߍ߬ߘߌ ߞߍ߫ ߊ߬ ߟߊ߫ ߛߌߟߊ ߞߊ߲߬ ߸ ߖߐ߲߰ߛߴߊߟߎ߫ ߘߌ߫ ߛߎߘߊ߲߫ ﴿35﴾

ߡߐ߱ ߡߍ߲ ߠߎ߫ ߓߊ߲߬ߣߍ߲߫ ߸ ߤߊߟߌ߫ ߏ߬ ߟߎ߬ ߕߊ ߞߍ߫ ߘߊ߫ ߘߎ߰ߞߟߏ ߞߣߐ߫ ߣߊ߲ߝߟߏ ߘߌ߫ ߸ ߞߵߏ ߢߐ߲߰ ߜߘߍ߫ ߟߴߏ߬ ߞߊ߲߬ ߸ ߞߏ߫ ߊ߬ߟߎ߬ ߦߴߊ߬ߟߎ߫ ߖߍ߬ߘߍ߫ ߞߎ߲߬ߞߊ߬ ߏ߬ ߟߊ߫ ߟߐ߬ߓߊ ߟߏ߲ ߖߊ߲߰ߞߕߊ ߘߐ߫ ߸ ߏ߬ ߕߍ߫ ߡߌ߬ߘߴߊ߬ߟߎ߬ ߟߊ߫ ߝߋߎ߫ ، ߓߊ ߊ߬ߟߎ߬ ߢߍߛߌ߰ߣߍ߲߫ ߖߊ߲߰ߞߕߊ߬ ߘߌߡߌ߲ߣߍ߲ ߠߋ߬ ߟߊ߫ ﴿36﴾

ߊ߬ߟߎ߬ ߘߴߊ߬ ߢߌߣߌ߲߫ ߛߐ߲߬ ߞߏ߫ ߊ߬ߟߎ߬ ߦߋ߫ ߓߐ߫ ߟߊ߫ ߕߊ ߘߐ߫ ߸ ߞߏ߬ߣߵߊ߬ߟߎ߬ ߕߍ߫ ߓߐ߫ ߊ߬ ߘߐ߫ ߝߋߎ߫ ، ߓߊ ߊ߬ߟߎ߬ ߢߍߛߌ߰ߣߍ߲߫ ߖߊ߲߰ߞߕߊ߬ ߘߎߡߊߣߍ߲ ߠߋ߬ ߟߊ߫ ﴿37﴾

ߊߟߎ߫ ߦߋ߫ ߛߏ߲߭ ߗߍ߬ߡߊ߲ ߣߴߊ߬ ߡߛߏ߬ߡߊ߲ ߓߍ߯ ߓߟߏ ߕߍ߰ ߊ߬ ߟߊ߫ ߜߋߘߎ߫ ߸ ߊ߬ߟߎ߬ ߟߊ߫ ߓߊ߯ߙߊ ߛߊ߬ߙߊ ߘߌ߫ ، ߞߵߏ ߓߌ߲߬ߓߊߏ ߝߘߴߊߟߊ߫ ߟߊ߫ ، ߊߟߊ߫ ߘߏ߲߬ ߦߋ߫ ߣߌ߬ߣߌ߬ߟߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿38﴾

ߡߍ߲ ߞߏ߬ߣߌ߲߬ ߓߊ߯ ߊ߬ ߖߘߍ߬ߟߊߛߊ߬ߦߌ߬ ߊ߬ ߟߊ߫ ߕߐ߬ߢߍ߮ ߞߐ߫ ߞߊ߬ ߟߢߊ߬ߟߌ ߞߍ߫ ߸ ߊߟߊ߫ ߦߋ߫ ߖߘߍ߬ߟߊ߬ߛߊߦߌ ߡߌ߬ߘߊ߬ ߟߴߏ߬ ߟߋ ߦߋ߫ ، ߓߊ ߊߟߊ߫ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿39﴾

ߌ ߡߴߊ߬ ߟߐ߲߫ ߓߊ߬ ߞߏ߫ ߊߟߊ߫ ߕߊ ߟߋ߬ ߛߊ߲ ߠߎ߬ ߣߌ߫ ߘߎ߱ ߡߊ߲߬ߛߊ߬ߦߊ ߘߌ߫؟ ߊ߬ ߘߏ߲߬ ߘߌ߫ ߡߐ߰ ߖߊ߲߰ߞߕߊ߫ ߡߍ߲ ( ߕߊ ) ߓߊ߯ ߊ߬ ߘߌߦߊ߫ ، ߊ߬ ߘߌ߫ ߦߊ߬ߝߊ߫ ߡߐ߰ ߡߊ߬ ߡߍ߲ ( ߕߊ ) ߓߊ߯ ߊ߬ ߘߌߦߊ߫ ، ߓߊ ߞߏ ߓߍ߯ ߛߋ ߊߟߊ߫ ߟߋ߬ ߦߋ߫ ﴿40﴾

ߤߍ߲߬ ߌߟߋ߬ ߞߋߟߊ ߸ ߡߐ߱ ߟߎ߬ ( ߞߏ߫ ߞߍߢߊ ) ߞߊߣߵߌ ߟߊߛߎ߬ߣߎ߲߫ ߘߋ߬ ، ߡߍ߲ ߠߎ߬ ߦߋ߫ ߜߘߌ߫ ߟߊ߫ ߓߊ߲߬ߓߊ߰ߦߊ ߞߊ߲߬ ، ߏ߬ ߟߎ߫ ߟߴߊ߬ ߝߐ߫ ߟߴߊ߬ߟߎ߬ ߘߊ߫ ߓߘߊ ߟߎ߬ ߟߊ߫ ߞߏ߫ ߊ߲ ߓߘߊ߫ ߘߍ߲߬ߞߣߍ߬ߦߊ߫ ، ߞߵߊ߬ ߕߘߍ߬ ߊ߬ߟߎ߫ ߛߣߐ߬ߡߍ ( ߟߎ߫ ) ߘߍ߲߬ߞߣߍ߬ߦߊ߬ߣߍ߲߫ ߕߍ߫ ، ߊ߬ߟߎ߫ ߢߐ߲߱ ߠߎ߬ ߦߋ߫ ߦߊ߬ߤߎ߯ߘߎ ߟߎ߬ ߘߐ߫ ߸ ߡߍ߲ ߠߎ߬ ߦߴߊ߬ߟߎ߬ ߕߟߏߡߊߟߐ߬ ߟߊ߫ ߥߎߦߊ ߟߊ߫ ߸ ߞߊ߬ ߓߊ߲߫ ߞߵߊ߬ߟߎ߬ ߕߟߏߡߊߟߐ߬ ߡߌ߬ߙߌ߲߬ߘߌ߬ ߜߘߍ߫ ߟߊ߫ ߸ ߡߍ߲ ߠߎ߬ ߡߊ߫ ߣߊ߬ ߌ ߓߘߊ ߡߎߣߎ߲߬. ߏ߬ ߟߎ߫ ߟߋ߬ ߞߎߡߊ ߦߟߍ߬ߡߊ߲߬ ߠߴߊ߬ ߟߊߣߍ߲ ߞߐ߫ ߊ߬ ߢߊ ߡߊ߬ ، ߊ߬ߟߎ ߟߴߊ߬ ߝߐ߫ ߟߊ߫ ( ߕߐ߭ ߟߎ߫ ߡߊ߬ ) ߸ ߞߏ߫ ߣߌ߫ ‹ߛߌ߬ߟߊ߬ߡߊ ߟߎ߫ › ߞߊ߬ ߣߌ߲߬ ߘߴߊߟߎ߫ ߡߊ߬ -( ߞߕߌ ߛߊ߬ߙߌ߬ߦߊ ߣߌ߲߬ ߞߊ߬ߣߌ߲߫)- ߊߟߎ߫ ߦߴߏ ߡߌ߬ߘߊ߬ ، ߣߴߊ߬ߟߎ߬ ߡߴߏ߬ ߘߴߊߟߎ߫ ߡߊ߬ ، ߊߟߎ߫ ߦߴߊߟߎ߫ ߖߊ߲߬ߕߏ߬ ߊߟߎ߫ ߖߘߍ߬ ߘߐ߫ ، ߣߴߊߟߊ߫ ߘߏ߲߬ ߢߌߣߌ߲߫ ߘߊ߫ ߡߍ߲ ( ߞߘߐߓߐ ) ߡߊ߬ ߸ ߌ ߕߍ߫ ߛߴߊߟߊ߫ ߟߊ߫ ߝߏߦߌ߬ ߘߐߛߊ߬ ߟߴߏ ߡߊ߬ ، ߒ߬ߓߊ߬ ߡߐ߰ ߛߎ߮ ߏ߬ ߟߎ߬ ߸ ߊߟߊ߫ ߕߴߊ߬ ߝߍ߬ ߝߋߎ߫ ߞߵߏ߬ ߟߎ߫ ߛߣߐ߬ߡߍ ߟߎ߬ ߛߊߣߌ߲ߧߊ߫ ، ߘߐ߯ߦߡߊ ߟߴߏ߬ ߟߎ߬ ߢߍ߫ ߘߎߢߊ߫ ߢߌ߲߬ ߘߐ߫ ߸ ߊ߬ߟߎ߬ ߢߍߛߌ߰ߣߍ߲߫ ߖߊ߲߰ߞߕߊ߬ ߓߟߋߓߟߋ ߟߋ߬ ߟߊ߫ ߟߊߞߌߙߊ߫ ( ߝߣߊ߫ ߘߐ߫) ﴿41﴾

ߏ߬ ߟߎ߫ ߟߴߊ߬ߟߎ߬ ߕߟߏߡߊߟߐ߬ ߟߊ߫ ߥߎߦߊ ߟߊ߫ ߸ ߊ߬ߟߎ߬ ߦߋ߫ ߣߊ߲߬ߝߟߏ߬ ߡߊߢߍߢߌ߲ߣߍ߲ ߠߎ߬ ߘߊߥߎ߲߫ ߠߊ߫ ، ߣߴߏ߬ ߟߎ߫ ߣߊ߬ ߘߴߌ ߓߘߊ ߸ ߌ ߦߋ߫ ߞߕߌ߫ ߊ߬ߟߎ߬ ߕߍ߫ ߥߟߊ߫ ߌ ߦߴߌ ߞߐߘߏ߲߬ ߊ߬ߟߎ߬ ߟߊ߫ ، ߣߴߌ ߘߏ߲߬ ߞߵߌ ߞߐߘߏ߲߬ ߊ߬ߟߎ߬ ߟߊ߫ ߸ ߊ߬ߟߎ߬ ߕߴߌ ߕߙߐ߫ ߝߏߦߌ߬ ߟߊ߫ ، ߣߴߌ ߞߊ߬ ߞߍ߫ ߞߕߌ߫ ߟߊ߫ ߸ ߌ ߦߋ߫ ߞߕߌ߫ ߊ߬ߟߎ߬ ߕߍ߫ ߕߋߟߋ߲ ߠߊ߫ ، ߓߊ ߕߋߟߋ߲ߓߊ߯ߒߕߋ ߟߎ߫ ߟߋ߬ ߘߌߡߊ߲߫ ߊߟߊ߫ ߦߋ߫ ﴿42﴾

ߊ߬ߟߎ߫ ߝߊ߲߭ ߦߴߌߟߋ ߟߐ߬ ߟߊ߫ ߞߕߌ ߟߊ߫ ߘߌ߬ ߓߏ߲߰ ߞߊ߬ ߕߊ߬ߥߎ߬ߙߊߕߌ ߕߏ߫ ߊ߬ߟߎ߬ ߓߟߏ߫ ߸ ߊߟߊ߫ ߟߊ߫ ߞߕߌ ߟߎ߯ ߏ߬ ߡߍ߲ ߘߐ߫؟ ߊ߬ߟߎ߫ ߘߏ߲߬ ߦߴߊ߬ߟߎ߬ ߞߐߘߏ߲߬ ߠߊ߫ ߟߴߏ߬ ߓߍ߯ ߞߐ߫ ߸ ߓߊ ߘߍ߲߬ߞߣߍ߬ߦߊ߬ߓߊ߯ ߟߎ߫ ߕߍ߫ ﴿43﴾

ߊ߲ߠߎ߫ ߟߋ߫ ߞߊ߬ ߕߊ߬ߥߎ߬ߙߊߕߌ ߟߊߖߌ߰ ߸ ߞߊ߲ߘߦߊ ߣߌ߫ ߦߋߟߋ߲ ߦߴߏ߬ ߞߣߐ߫ ، ߦߊ߬ߤߎ߯ߘߎ ߟߎ߬ ߟߊ߫ ߞߕߌ ߦߋ߫ ߕߍ߰ ߟߴߏ߬ ߟߋ ߡߊ߬ ߸ ߟߊ߬ߝߐ߬ߓߊ߮ ߟߎ߬ ߓߟߏ߫ ߸ ߡߍ߲ ߠߎ߫ ߞߵߊ߬ߟߎ߫ ߖߘߍ߬ߞߟߏ߫ ، ߓߊ߬ߕߏ߬ߟߊ߬ߓߊ ߟߎ߬ ߣߌ߫ ߞߏ߲ߓߏ ߟߎ߬ ߝߣߊ߫ ( ߦߋ߫ ߞߕߌ ߕߍ߰ ߟߊ߫ ) ߊߟߊ߫ ߟߊ߫ ߟߍߙߊ ߟߋ߬ ߡߊ߬ ߸ ߡߍ߲ ߞߊ߬ߙߌ߬ߝߊ߬ ߘߴߊ߬ߟߎ߬ ߟߊ߫ ߸ ߞߵߊ߬ߟߎ߫ ߖߍ߬ߘߍ ߞߴߏ߬ ߛߙߋ ߟߎ߬ ߘߌ߫. ߒ߬ߓߵߊߟߎ߫ ߞߊߣߊ߬ ߛߌߟߊ߲߫ ߡߐ߱ ߟߎ߬ ߢߍ߫ ߘߋ߬ ߸ ߊߟߎ߫ ߛߌߟߊ߲߫ ߒߠߋ ( ߊߟߊ߫ ) ߟߋ߬ ߢߍ߫ ، ߊߟߎ߫ ߘߏ߲߬ ߞߊߣߊ߬ ߒ ߠߊ߫ ߟߝߊߙߌ ߟߎ߫ ߝߋ߬ߙߋ߫ ߛߐ߲߬ߞߐ߬ߣߍ߲߬ ߕߜߋ ߟߊ߫ ، ߣߌ߫ ߡߍ߲ ߞߏ߬ߣߌ߲ ߡߊ߫ ߞߕߌ߫ ߊߟߊ߫ ߟߊ߫ ߛߊ߬ߙߌ߬ߦߊ߬ ߟߊߖߌ߰ߣߍ߲ ߡߊ߬ ߸ ߏ߬ ߟߎ߫ ߟߋ߬ ߓߊ߲߬ߓߊ߮ ߟߎ߬ ߘߌ߫ ﴿44﴾

ߊ߲ ߞߵߊ߬ ߛߓߍ߫ ߊ߬ߟߎ߫ ߡߊ߬ ߟߍߙߊ ߞߣߐ߫ ߟߋ߬ ߸ ߒ ߞߏ߫ ߣߌ ߟߋ߬ ߣߌ ߢߐ߲߮ ߘߌ߫ ، ߢߊ ߦߋ߫ ߢߊ ߢߐ߲߮ ߘߌ߫ ، ߣߎ߲ ߦߋ߫ ߣߎ߲ ߢߐ߲߮ ߘߌ߫ ، ߕߟߏ ߦߋ߫ ߕߟߏ ߢߐ߲߮ ߘߌ߫ ، ߢߌ߲ ߦߋ߫ ߢߌ߲ ߢߐ߲߮ ߘߌ߫ ، ߊ߬ ߣߌ߫ ߖߐߞߟߌ߫ ߘߊ ߓߍ߯ ߢߐ߲߮ ߦߋ߫ ߓߐ߫ ، ߣߌ߫ ߡߍ߲ ߞߏ߬ߣߌ߲ ߞߵߊ߬ ߕߊ ߘߐߞߏߦߊߕߏ߫ ߸ ߏ߬ ߘߌ߫ ߞߍ߫ ߖߟߎ߬ߡߎ߲߬ ߟߊ߬ߓߋ߬ߟߊ߲߫ ߘߴߏ߬ ߦߋ߫ ، ߣߌ߫ ߡߍ߲ ߘߏ߲߬ ߡߊ߫ ߞߕߌ߫ ߊߟߊ߫ ߟߊ߫ ߛߊ߬ߙߌ߬ߦߊ߬ ߟߊߖߌ߰ߣߍ߲ ߡߊ߬ ߸ ߏ߬ ߟߎ߫ ߟߋ߫ ߕߐ߬ߢߍ߰ߒߕߋ ߟߎ߬ ߘߌ߫ ﴿45﴾

ߊ߲ ߞߵߏ߬ ߟߎ߫ ߝߏ߲߬ߝߏ߲ ߠߊߓߊ߬ߕߏ߬ ߡߊߙߌߦߡߊ߫ ߘߋ߲ߞߍ߫ ߌߛߊ߫ ߟߋ߬ ߟߊ߫ ߸ ߞߵߏ߬ ߞߍ߫ ߊ߬ ߢߍ߫ ߟߍߙߊ߫ ߕߊ߬ߥߎ߬ߙߊߕߌ ߟߊߛߙߋߦߊߓߊ߮ ߘߌ߫ ، ߊ߲ ߞߵߏ߬ ߛߐ߫ ߟߌ߲߬ߖߌ߯ߟߌ ߟߊ߫ ߸ ߞߊ߲ߘߦߊ ߣߌ߫ ߦߋߟߋ߲ ߦߴߏ߬ ߘߐ߫ ߸ ߊ߬ ߣߴߊ߬ ߦߴߊ߬ ߢߍ߫ ߟߍߙߊ߫ ߕߊ߬ߥߎ߬ߙߊߕߌ ߟߊߛߙߋߦߊ߫ ߟߊ߫ ، ߊ߬ ߣߴߊ߬ ߦߋ߫ ߞߊ߲ߘߦߊ ߣߌ߫ ߞߊ߬ߥߊ߲߬ߘߌ߬ߟߌ ߘߌ߫ ߝߊ߲ߕߊ߲ߞߟߊ ߟߎ߬ ߦߋ߫ ﴿46﴾

(ߊ߲ ߞߵߊ߬ ߝߐ߫ ) ߞߏ߫ ߟߌ߲߬ߖߌ߯ߟߌ ߘߏ߲߬ߞߏ ߟߎ߬ ߦߋ߫ ߞߕߌ߫ ߊߟߊ߫ ߟߊ߫ ߛߊ߬ߙߌ߬ߦߊ߬ ߟߊߖߌ߰ߣߍ߲ ߠߋ߫ ߡߊ߬ ( ߟߌ߲߬ߖߌ߯ߟߌ) ߞߣߐ߫ ، ߒ ߞߏ߫ ߣߌ߫ ߡߍ߲ ߡߊ߫ ߞߕߌ߫ ߊߟߊ߫ ߟߊ߫ ߛߊ߬ߙߌ߬ߦߊ߫ ߟߊߖߌ߰ߣߍ߲ ߡߊ߬ ߸ ߏ߬ ߟߎ߫ ߟߋ߬ ߔߊߟߊ߲ߞߊߓߊ߮ ߟߎ߬ ߘߌ߫ ﴿47﴾

ߊ߲ ߞߊ߬ ߟߍߙߊ ߟߊߖߌ߰ ߌߟߋ ߡߊ߬ ߕߎ߬ߢߊ ߟߋ߬ ߟߊ߫ ߸ ߞߵߊ߬ ߞߍ߫ ߊ߬ ߢߍ߫ ߟߍߙߊ ߟߊߛߙߋߦߊߟߊ߲ ߘߌ߫ ߸ ߊ߬ ߣߴߊ߬ ߞߐߡߊߓߌ߲ߓߌ߲ߟߊ߲ ߘߌ߫ ، ߏ߬ ߘߐ߫ ߸ ߌ ߦߋ߫ ߞߕߌ߫ ߊ߬ߟߎ߬ ߕߍ߫ ߊߟߊ߫ ߟߊ߫ ߛߊ߬ߙߌ߬ߦߊ߬ ߟߊߖߌ߰ߣߍ߲ ߠߋ߫ ߡߊ߬ ߸ ߞߏ߬ߣߌ߲߬ ߌ ߞߊߣߵߊ߬ߟߎ߬ ( ߣߌ ) ߛߊ߬ߥߏ ߟߊߓߊ߬ߕߏ߫ ߞߊ߬ ߓߐ߫ ߕߎ߬ߢߊ ߞߊ߲߬ ߸ ߡߍ߲ ߣߊ߬ߣߴߌ ߡߊ߬ ، ߊ߲ ߞߵߊߟߎ߫ ( ߡߊ߲߬ߕߏ߲ ) ߞߋ߬ߟߋ߲߬ߞߋ߬ߟߋ߲߬ߣߊ ߓߍ߯ ߟߋ߬ ߛߐ߫ ( ߊ߬ ߕߊ߫) ߛߊ߬ߙߌ߬ߦߊ߫ ߣߴ(ߊ߬ ߕߊ߫) ߢߍߥߟߊ߫ ߟߊ߫ ، ߊ߬ ߘߏ߲߬ ߕߎ߲߬ ߓߊ߯ ߊߟߊ߫ ߘߌߦߊ߫ ߸ ߊ߬ ߕߘߍ߬ ߘߴߊߟߎ߫ ߓߍ߯ ߞߍ߫ ߡߊ߲߬ߕߏ߲߬ ߞߋߟߋ߲߫ ߘߌ߫ ، ߓߊ߬ߙߌ߬ ߊ߬ ߞߵߊ߬ ߟߊߥߟߌ߬ ߊߟߎ߫ ( ߞߋ߬ߟߋ߲߬ߞߋ߬ߟߋ߲߬ߣߊ ) ߘߐߜߍ ߟߋ߫ ߡߊ߬ ߛߊ߬ߙߌ߬ߦߊ ߡߌ߬ߘߊ߬ ߢߊ ߘߐ߫ ߸ ߊ߬ ߞߊ߬ ߡߍ߲ ߘߴߊߟߎ߫ ߡߊ߬ ، ߒ߬ߓߵߊߟߎ߫ ߦߋ߫ ߞߐ߲߰ ߤߙߊ ߟߎ߬ ( ߞߍ ) ߟߋ߫ ߡߊ߬ ، ߓߊ ߊߟߎ߫ ߓߍ߯ ߟߊߘߍ߬ߣߍ߲ ߛߊ߬ߦߌ߬ߕߐ߫ ߊߟߊ߫ ߟߋ߫ ߡߊ߬ ، ߊ߬ ߘߏ߲߬ ߘߴߊߟߎ߫ ߟߊ߫ ߢߐ߲߯ ߛߐߛߐ߫ ߞߏ ߓߍ߯ ߢߊ߫ ߘߐߜߍ ߝߐ߫ ߊߟߎ߫ ߦߋ߫ ﴿48﴾

ߌ ߘߏ߲߬ ߦߋ߫ ߞߕߌ߫ ߊ߬ߟߎ߬ ߕߍ߫ ߊߟߊ߫ ߟߊ߫ ߝߋ߲߫ ߠߊߖߌ߰ߣߍ߲ ߠߋ߫ ߡߊ߬ ، ߌ ߞߊߣߵߊ߬ߟߎ߬ ( ߣߌ ) ߛߊ߬ߥߏ ߟߊߓߊ߬ߕߏ߫ ߘߋ߬ ، ߌ ߝߊ߲߭ ߦߴߌ ߕߊ߲߬ߞߴߊ߬ߟߎ߫ ߡߊ߬ ߸ ߊ߬ߟߎ߬ ߞߊߣߵߌ ߟߊߝߘߏ߬ ߊߟߊ߫ ߟߊ߫ ߛߊ߬ߙߌ߬ߦߊ߬ ߟߊߖߌ߰ߣߍ߲ ߘߏ߫ ߡߊ߬ ߌ ߡߊ߬ ، ߣߴߊ߬ߟߎ߫ ߘߏ߲߬ ߞߵߊ߬ߟߎ߬ ߞߐߘߏ߲߬ ߸ ߌ ߦߴߊ߬ ߟߐ߲߫ ߞߏ߫ ߊߟߊ߫ ߦߴߊ߬ ߝߍ߬ ߟߋ߬ ߞߵߊ߬ߟߎ߬ ߡߊߛߐ߬ߘߐ߲߫ ߊ߬ߟߎ߫ ߖߟߎ߬ߡߎ߲ ߠߎ߬ ߘߏ߫ ߝߍ߬ ، ߓߊߏ߬ ߡߐ߱ ߝߊ߲߬ߓߊ ߦߋ߫ ߔߊߟߊ߲ߞߊߓߊ߯ߕߐ ߟߎ߫ ߟߋ߬ ߘߌ߫ ﴿49﴾

ߌ߬ߦߏ߯ ߊ߬ߟߎ߬ ߘߌ߫ ߘߓߌ߬ߘߐ߬ߦߊ ߕߎ߬ߡߊ ߞߕߌ߫ ߟߊ߫ ߢߊ ߢߌߣߌ߲߫؟ ߖߍߣߍ߲ ߘߏ߲߬ ߠߊ߫ ߞߕߌ ߘߌ߫ ߢߵߊߟߊ߫ ߕߊ ߘߌ߫ ߡߌ߬ߙߌ߲߬ߘߌ߫ ߘߍ߲߬ߞߣߍ߬ߦߊ߬ߣߍ߲ ߠߎ߫ ߡߊ߬؟ ﴿50﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߞߊߣߊ߬ ߦߊ߬ߤߎ߯ߘߎ ߟߎ߬ ߣߌ߫ ߣߊ߬ߛߊ߯ߙߊ ߟߎ߫ ߡߌ߬ߘߵߊߟߎ߫ ߢߌ߲߭ ߠߎ߬ ߘߌ߫ ߘߋ߬ ، ߓߊ ߏ߬ ߟߎ߫ ߜߊ߲߬ߛߊ߲ ߠߋ߬ ߢߐ߲߮ ߢߌ߲߭ ߠߎ߬ ߘߌ߫ ، ߣߴߊߟߎ߫ ߡߍ߲ ߞߵߊ߬ ߓߌ߬ߛߌ߫ ߏ߬ ߟߎ߬ ߟߊ߫ ߘߐߙߐ߲߫ ߸ ߏ߬ ߓߘߊ߫ ߞߍ߫ ߊ߬ߟߎ߬ ߘߏ߫ ߘߌ߫ ، ߊߟߊ߫ ߘߏ߲߬ ߕߍ߫ ߡߌ߬ߙߌ߲߬ߘߌ߫ ߕߐ߬ߢߍ߰ߒߕߋ ߟߎ߬ ߞߊ߲ߘߊ߫ ߟߊ߫ ﴿51﴾

ߖߌ߰ߙߌ߬ߖߐ߯ߙߐ ߦߋ߫ ߡߍ߲ ߠߎ߫ ߛߣߐ߬ߡߍ ߘߐ߫ ߸ ߌ ߦߴߏ߬ ߟߎ߫ ߟߋ߬ ߦߋ߫ ߟߊ߫ ߜߘߏ߫ ߟߊ߫ ߞߊ߬ ߘߏ߲߬ ߊ߬ߟߎ߬ ߘߐ߫ ، ߊ߬ߟߎ߬ ߦߴߊ߬ ߝߐ߫ ߟߴߏ߬ ߘߐ߫ ߛߊ߫ ߸ ߞߏ߫ ߊ߲ ߧߋ߫ ߛߌߟߊ߲߫ ߠߊ߫ ߟߋ߬ ߸ ߒ ߞߏ߫ ߜߊ߬ߟߏ߫ ߞߏ߰ߙߌ߬ߣߍ߲ ߞߊߣߊ߫ ߒ߬ ߛߐ߬ߘߐ߲߬ ، ߓߊ߬ߙߌ߬ ߊ߬ ߢߐ߲߰ߘߐ߫ ߊߟߊ߫ ߓߍߣߊ߬ ߟߊ߬ߥߛߊ߫ ߘߌ߫ ߥߟߴߊ߬ ߟߊ߫ ߞߏ߫ ߜߘߍ߫ ߘߌ߫ ، ߏ߬ ߓߊ߯ ߞߍ߫ ߸ ߊ߬ߟߎ߬ ߣߌ߫ ߘߐ߫ ߞߏ߫ ߜߎ߲߬ߘߎ߬ߣߍ߲ ߣߡߌߛߊ ߘߌ߫ ߞߍ߫ ߊ߬ߟߎ߬ ߟߊ߫ ﴿52﴾

ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߴߊ߬ ߝߐ߫ ߟߴߊ߬ߟߎ߫ ߡߊ߬ ߏ߬ ߟߋ ߘߐ߫ ߸ ߞߏ߫ ߢߌ߲߬ ߠߎ߫ ߟߋ߬ ߣߵߊ߬ߟߎ߬ ߟߊ߫ ߛߓߍ߬ߣߊ߲߬ ߞߊߟߌߟߌ ߞߍ߫ ߟߴߊߟߊ߫ ߟߊ߫ ߓߊ߬ ߞߏ߫ ߊ߬ߟߎ߬ ߦߴߊߟߎ ߟߋ߫ ߝߍ߬؟ ߏ߬ ߟߎ߫ ߟߋ߬ ߘߏ߲߬ ߗߋߥߊߟߌ ߟߎ߬ ߓߘߊ߫ ߕߌߢߍ߫ ߣߌ߲߬ ߔߛߐߞߐ߫ ߞߵߊ߬ߟߎ߬ ߞߍ߫ ߓߣߐ߬ߓߊ߮ ߟߎ߬ ߘߌ߫ ﴿53﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߡߍ߲ ߓߊ߯ ߡߎߙߎ߲ߕߌ߫ ߊ߬ ߘߌ߯ߣߊ ߡߵߊߟߎ߫ ߘߐ߫ ، ߛߋߚߋ߫ ߸ ߊߟߊ߫ ߘߌ߫ ߣߊ߬ ߡߌ߬ߙߌ߲߬ߘߌ߬ ߜߘߍ߫ ߘߌ߫ ߡߍ߲ ߠߎ߬ ߘߌߡߊ߲߫ ߊ߬ ߦߋ߫ ߸ ߊ߬ߟߋ߬ ߝߣߊ߫ ߘߌߡߊ߲߫ ߏ߬ ߟߎ߬ ߦߋ߫ ، ߏ߬ ߟߎ߫ ߡߊ߲߰ߡߊ߲߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߓߟߏ߫ ߸ ߊ߬ߟߎ߫ ߞߊ߬ߘߊߜߍ߬ߟߍ߲߬ߡߊ߲߫ ߓߊ߲߬ߓߊ߮ ߟߎ߬ ߟߊ߫ ، ߊ߬ߟߎ߬ ߦߋ߫ ߖߘߍ߬ߘߌ ߞߍ߫ ߟߴߊߟߊ߫ ߛߌߟߊ ߞߊ߲߬ ߸ ߊ߬ߟߎ߫ ߘߏ߲߬ ߕߍ߫ ߛߌߟߊ߲߫ ߠߊ߫ ߖߙߊ߬ߞߌ߬ߓߊ߯ ߟߊ߫ ߖߙߊ߬ߞߌ߬ߟߌ߫ ߢߍ߫ ، ߏ߬ ߦߋ߫ ߊߟߊ߫ ߟߊ߫ ߢߊ߬ߒߡߊ߭ ߟߋ߬ ߘߌ߫ ، ߊ߰ ߏ߬ ߘߌ߫ ߟߊ߫ ߡߐ߰ ߟߋ߬ ߡߊ߬ ߡߍ߲ ߓߊ߯ ߊ߬ ߘߌߦߊ߫ ، ߊߟߊ߫ ߘߏ߲߬ ߦߙߌߥߊߣߍ߲߫ ߸ ߊ߬ ߟߐ߲ߠߌ߲ߣߍ߲߫ ﴿54﴾

ߊߟߎ߫ ߟߊ߫ ߞߏߕߌ߮ ߦߋ߫ ߊߟߊ߫ ߣߴߊ߬ ߟߊ߫ ߞߋߟߊ ߟߋ߬ ߘߌ߫ ߸ ߊ߬ ߣߌ߫ ߘߍ߲߬ߞߣߍ߬ߦߊ߬ߓߊ߮ ߡߍ߲ ߠߎ߬ ߦߋ߫ ߛߊߟߌ ߟߐ߬ ߟߊ߫ ߸ ߞߊ߬ ߖߞߊ ߘߌ߫ ߸ ߊ߬ߟߎ߫ ߘߏ߲߬ ߦߋ߫ ( ߛߊߟߌ ) ߞߐߡߊߓߌߘߌ߲ ߞߍ߫ ߟߊ߫ ﴿55﴾

ߡߍ߲ ߞߏ߬ߣߌ߲ ߓߊ߯ ߊ߬ ߓߛߌ߬ ߊߟߊ߫ ߣߴߊ߬ ߟߊ߫ ߞߋߟߊ ߣߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߟߊ߫ ، ߒ߬ߓߵߊߟߊ߫ ߟߊ߫ ߞߙߎߞߊߘߋ߲ ߠߎ߫ ߟߋ߬ ߛߋߓߊ߮ ߟߎ߬ ߘߌ߫ ﴿56﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߡߍ߲ ߠߎ߬ ߦߴߊߟߎ߫ ߟߊ߫ ߘߌ߯ߣߊ ߞߍ߫ ߟߊ߫ ߡߊ߬ߦߟߍ߬ ߝߋ߲ ߣߌ߫ ߡߣߊ߬ߡߣߊ߬ ߞߏ ߘߌ߫ ߸ ߊߟߎ߫ ߢߍ߫ ߟߍߙߊߟߞߊ ߟߎ߬ ߣߌ߫ ߓߊ߲߬ߓߊ߮ ߟߎ߬ ߘߐ߫ ߸ ߊߟߎ߫ ߞߊߣߵߏ߬ ߟߎ߫ ߡߌ߬ߘߵߊߟߎ߫ ߢߌ߲߭ ߠߎ߬ ߘߌ߫ ߘߋ߬ ، ߊߟߎ߫ ߘߏ߲߬ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߟߋ߬ ߸ ߣߴߊߟߎ߫ ߞߍ߫ ߘߊ߫ ߘߍ߲߬ߞߣߍ߬ߦߊ߬ߓߊ߯ ߟߎ߫ ߘߌ߫ ﴿57﴾

ߊߟߎ߫ ߓߊ߯ ߛߊߟߌߡߊߞߟߌ ߞߍ߫ ߞߏߕߊ߲߫ ߸ ߊ߬ߟߎ߬ ߘߴߏ߬ ߡߌ߬ߘߊ߬ ߦߟߍߡߊߞߏ ߣߌ߫ ߡߣߊ߬ߡߣߊ߬ ߞߏ ߘߌ߫ ، ߏ߬ ߘߏ߲߬ ߞߎ߲߭ ߠߋ߬ ߸ ߓߊߏ߬ ߡߌ߬ߙߌ߲߬ߘߌ߫ ߟߴߊ߬ߟߎ߬ ߘߌ߫ ߸ ߤߊߞߟߌ߫ ߕߍ߫ ߡߍ߲ ߠߎ߬ ߟߊ߫ ﴿58﴾

ߊ߬ ߝߐ߫ ߞߏ߫ ߤߍ߲߬ ߊߟߎ߬ ߟߍߙߊߟߞߊ ߟߎ߬ ߸ ߊߟߎ߫ ߦߴߊߟߎ߫ ߕߍ߰ߡߊߛߌ߰ ߟߊ߫ ߒ߬ ߡߊ߬ ߡߋ߬ߘߋ ߜߘߍ߫ ߘߐ߫ ߣߴߊ߲ ߘߍ߲߬ߞߣߍ߬ߦߊ ߕߍ߫ ߊߟߊ߫ ߣߌ߫ ߟߍߙߊ ߡߊ߬ ߸ ߡߍ߲ ߠߊߖߌ߰ߣߴߊ߲ ߡߊ߬ ߸ ߊ߬ ߣߌ߫ ߡߍ߲ ߠߊߖߌ߰ߣߍ߲߫ ߞߘߐ߬ߡߊ߲߫ ߸ ߊ߬ ߣߴߊߟߎ߫ ߝߊ߲߬ߓߊ ߦߋ߫ ߔߊߟߊ߲ߞߊߓߊ߯ߕߐ ߘߌ߫ ߡߍ߲ߞߍ߭؟ ﴿59﴾

ߊ߬ ߝߐ߫ ߞߏ߫ ߦߊ߯ߟߊ߫ ߒ ߧߴߊߟߎ߫ ߞߌ߬ߓߊ߬ߙߏ߫ ߡߐ߰ ߟߊ߫ ߓߊ߬ ߸ ߡߍ߲ ߛߊ߬ߙߊ ߞߊ߫ ߖߎ߯ ߊߟߊ߫ ߓߘߊ ߣߌ߲߬ ߓߍ߯ ߘߌ߫؟ ߏ߬ ߦߋ߫ ߡߐ߰ ߟߋ߬ ߘߌ߫ ߸ ߊߟߊ߫ ߞߊ߬ ߡߍ߲ ߘߊ߲ߞߊ߫ ، ߞߊ߬ ߡߐߣߍ߫ ߊ߬ ߡߊ߬ ، ߊ߬ ߣߌ߫ ߞߵߊ߬ߟߎ߬ ߘߏ߫ ߟߎ߫ ߞߍ߫ ߛߎ߬ߟߊ ߟߎ߬ ߣߌ߫ ߟߍ߭ ߟߎ߬ ߘߌ߫ ، ߊ߬ ߣߴߊ߬ ߞߊ߬ ߞߏ߲ߞߏߓߊ ߓߊ߬ߕߏ߬ ، ߒ߬ߓߊ߬ ߏ߬ ߟߎ߫ ߟߋ߬ ߦߙߐ ߖߎ߯ߡߊ߲ߓߊ ߦߋ߫ ߸ ߊ߬ ߣߴߊ߬ߟߎ߫ ߝߟߌ߬ߣߍ߲߬ߓߊ ߦߋ߫ ߛߌߟߊ߫ ߕߋߟߋ߲ߣߍ߲ ߡߊ߬ ﴿60﴾

ߏ߬ ߟߎ߬ ߓߊ߯ ߣߵߊߟߎ߫ ߝߍ߬ ߞߏߕߊ߲߫ ߸ ߊ߬ߟߎ߬ ߘߴߊ߬ ߝߐ߫ ߞߏ߫ ߒ߬ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߠߋ߬ ، ߞߵߊ߬ ߕߘߍ߬ ߊ߬ߟߎ߫ ߘߏ߲߬ߣߍ߲߫ ߓߊ߲߬ߓߊ߰ߦߊ ߘߌ߫ ߟߋ߬ ߸ ߞߊ߬ ߓߊ߲߫ ߞߊ߬ ߓߐ߫ ߊ߬ ߘߌ߫ ߕߎ߲߯ߣߌ߲߫ ، ߞߏ߬ߣߌ߲߬ ߊߟߊ߫ ߟߋ߫ ߞߵߊ߬ߟߎ߬ ߟߊ߫ ߞߏ߫ ߘߏ߲߰ߕߊ ߓߍ߯ ߟߐ߲߫ ߕߊߦߌ߫ ﴿61﴾

ߌ ߦߴߊ߬ߟߎ ߟߋ߫ ߝߊ߲߬ߓߊ ߦߋ߫ ߟߊ߫ ߜߘߌ߫ ߟߊ߫ ߖߟߎ߬ߡߎ߲ ߣߌ߫ ߖߎ߯ߦߊ ߞߊ߲߬ ߸ ߊ߬ ߣߌ߫ ߞߵߊ߬ ߞߍ߫ ߣߊ߲߬ߝߟߏ߬ ߡߊ߬ߢߍߢߌ߲ߣߍ߲ ߠߎ߬ ߘߊߥߎ߲ ߘߌ߫ ، ߤߊ߲߫ ߸ ߏ߬ ߟߎ߬ ߟߊ߫ ߓߊ߯ߙߊ߫ ߞߍߣߍ߲ ߠߎ߫ ߘߏ߲߬ ߖߎ߯ߦߊ߫ ߘߊ߫ ߥߍ߫ ﴿62﴾

ߥߟߊߞߏ߫ ߓߊ߬ߕߏ߬ߟߊ߬ߓߊ ߟߎ߬ ߣߌ߫ ߞߏ߲ߓߏ ߟߎ߫ ߕߍ߬ߘߍ߫ ߊ߬ߟߎ߬ ߝߊߕߊ߲ߕߌ߫ ߊ߬ߟߎ߬ ߟߊ߫ ߖߟߎ߬ߡߎ߲߬ ߞߎ߬ߡߊ߬ ߝߐ ߡߊ߬ ߸ ߊ߬ ߣߴߊ߬ߟߎ߬ ߟߊ߫ ߣߊ߲߬ߝߟߏ߬ ߡߊ߬ߢߍ߬ߢߌ߲߬ߣߍ߲߬ ߘߊߥߎ߲ ߡߊ߬ ، ߤߊ߲߫ ߸ ߏ߬ ߟߎ߬ ߗߋߥߊߟߌ ߟߎ߫ ߘߏ߲߬ ߖߎ߯ߦߊ߫ ߘߊ߫ ߥߍ߫ ﴿63﴾

ߦߊ߬ߤߎ߯ߘߎ ߟߎ߬ ߞߊ߲߫ ߠߋ߬ ߸ ߞߏ߫ ߊߟߊ߫ ߓߟߏ ߞߏߟߏ߲ߜߊ߲ߦߊߣߍ߲߫ ( ߞߊ߬ ߓߐ߫ ߛߐߟߌ ߡߊ߬ ) ߸ ߊ߬ߟߎ ߟߋ߫ ߘߏ߲߬ ߓߟߏ ߟߎ߬ ߞߏߟߏ߲ߜߊ߲ߦߊߣߍ߲߫ ، ߊ߬ ߣߴߊ߬ߟߎ߬ ߘߊ߲ߞߊߣߍ߲߫ ߊ߬ߟߎ߬ ߟߊ߫ ߞߎߡߊ߫ ߝߐߣߍ߲ ߏ߬ ߟߋ ߘߐ߫. ߣߴߏ߬ ߕߍ߫ ‹ ߊߟߊ߫› ߓߟߏ߫ ߝߌ߬ߟߊ ߘߐߝߎߟߋ߲ߣߍ߲߫ ߠߋ߬ ߝߋ߲ߜߋ߲߫ ، ߊ߬ ߦߋ߫ ߛߟߐ ߓߐ߫ ߟߊ߫ ߢߊ߫ ߟߋ߫ ߡߊ߬ ߸ ߡߍ߲ ߓߊ߯ ߊ߬ ߘߌߦߊ߫ ، ߓߊ߬ߙߌ߬ ߌ ߡߊ߰ߙߌ ߣߊ߬ ߟߍߙߊ ߡߍ߲ ߠߊߖߌ߰ ߟߴߌ ߡߊ߬ ߣߌ߲߬ ߸ ߏ߬ ߘߴߊ߬ߟߎ߬ ߛߘߍߡߊ߲߫ ߖߘߌ߫ ߘߊ߲߬ߠߊ߬ߕߊߡߌ߲ ߣߌ߫ ߓߊ߲߬ߓߊ߰ߦߊ ߘߐ߫ ߞߟߋ߫ ، ߊ߲ ߘߏ߲߬ ߞߊ߬ ߖߎ߯ߦߊ ߣߌ߫ ߞߐߣߌ߲ߧߊ ߟߋ߬ ߟߊߝߌ߬ߟߴߊ߬ߟߎ߬ ߕߍ߫ ߝߎߚߎ߫ ߸ ߝߏ߫ ߞߵߊ߬ ߛߌ߰ ߟߐ߬ߓߊ ߟߏ߲ ߠߊ߫. ߊ߬ߟߎ߬ ߓߊ߯ ߞߍ߬ߟߍ ߕߊ ߟߊߡߍߣߍ߲߫ ߞߏߕߊ߲߫ ߸ ߊߟߊ߫ ߘߴߏ߬ ߟߊߛߊ߬ ߡߐ߫ ، ߊ߬ߟߎ߬ ߗߋ ߟߋ߬ ߕߌߢߍߟߌ ߘߌ߫ ߖߡߊ߬ߣߊ ߞߣߐ߫ ، ߊߟߊ߫ ߘߏ߲߬ ߕߍ߫ ߕߌߢߍߟߌߟߊ ߟߎ߫ ߝߍ߬ ﴿64﴾

ߣߌ߫ ߟߍߙߊߟߞߊ ߟߎ߫ ߕߎ߲߬ ߘߍ߲߬ߞߣߍ߬ߦߊ߬ ߘߊ߫ ߞߵߊ߬ߟߎ߬ ߝߊ߲ߕߊ߲߬ߞߊ߫ ߸ ߊ߲ ߕߎ߲߬ ߘߴߊ߬ߟߎ߬ ߖߎ߯ߡߊ߲߫ ߞߍ߫ ߣߐ ߟߎ߫ ߥߊ߬ߣߊߙߌ߫ ߊ߬ߟߎ߬ ߦߋ߫ ߸ ߞߵߊ߬ߟߎ߬ ߟߊߘߏ߲߬ ߣߍߡߊ ߣߊߞߐ ߟߎ߬ ߘߐ߫ ﴿65﴾

ߣߴߊ߬ߟߎ߫ ߕߌ߲߬ ߞߊ߬ ߕߊ߬ߥߎ߬ߙߊߕߌ ߣߌ߫ ߟߌ߲߬ߖߌ߯ߟߌ ߟߊߣߐ߬ ߸ ߊ߬ ߣߌ߫ ( ߟߍߙߊ ) ߡߍ߲ ߠߊߖߌ߰ߣߴߊ߬ߟߎ߫ ߡߊ߬ ߞߊ߬ ߝߘߴߊ߬ߟߎ߫ ߡߊ߰ߙߌ ߟߊ߫ ߸ ߊ߬ߟߎ߫ ߕߎ߲߬ ߘߌ߫ ߘߊߥߎ߲ߠߌ߲ ߞߍ߫ ߊ߬ߟߎ߫ ߞߎ߲߬ߘߐ߫ ߊ߬ ߣߴߊ߬ߟߎ߫ ߛߋ߲߬ߞߘߐ߫ ، ߡߊ߲߬ߕߏ߲ ߘߏ߫ ߦߴߊ߬ߟߎ߬ ߘߐ߫ ߸ ߏ߬ ߟߎ߬ ߦߋ߫ ߕߍߡߞߊߒߞߋ߫ ߘߌ߫ ، ߞߏ߬ߣߌ߲߬ ߛߌߦߊߡߊ߲߫ ߦߴߊ߬ߟߎ߬ ߘߐ߫ ߸ ߏ߬ ߟߎ߬ ߟߊ߫ ߓߊ߯ߙߊ ߞߊ߫ ߖߎ߯ ߟߋ߫ ߘߋ߬ ﴿66﴾

ߤߍ߲߬ ߌߟߋ߬ ߞߋߟߊ ߸ ߞߊ߲߫ ߠߊߛߋ߫ ߸ ߡߍ߲ ߖߌ߰ߣߴߌ ߡߊ߬ ߞߊ߬ ߝߘߊ߫ ߌ ߡߊ߰ߙߌ ߟߊ߫ ، ߣߴߌ ߘߏ߲߬ ߡߴߏ߬ ߞߍ߫ ߌ ߡߴߊ߬ ߟߊ߫ ߛߊ߲߬ߓߊ ߟߊߛߋ߫ ߏ߬ ߘߐ߫ ߘߋ߬ ، ߊߟߊ߫ ߟߋ߬ ߘߏ߲߬ ߦߴߌ ߕߊ߲߬ߞߊ߬ ߟߊ߫ ߡߐ߱ ߟߎ߫ ߡߊ߬ ، ߞߏ߬ߣߌ߲߬ ߝߋߎ߫ ߸ ߊߟߊ߫ ߕߍ߫ ߡߌ߬ߙߌ߲߬ߘߌ߫ ߓߊ߲߬ߣߍ߲ ߠߎ߬ ߞߊ߲ߘߊ߫ ߟߊ߫ ﴿67﴾

ߊ߬ ߝߐ߫ ߞߏ߫ ߤߍ߲߬ ߊߟߎ߬ ߟߍߙߊߟߞߊ ߟߎ߬ ߸ ߊߟߎ߫ ( ߓߟߏ߫ ) ߕߍ߫ ߝߏߦߌ߫ ߡߊ߬ ߝߏ߫ ߣߴߊߟߎ߫ ߞߊ߬ ߕߊ߬ߥߎ߬ߙߊߕߌ ߣߌ߫ ߟߌ߲߬ߖߌ߯ߟߌ ߟߊߟߐ߬ ، ߊ߬ ߣߌ߫ ߟߍߙߊ ߡߍ߲ ߠߊߖߌ߰ߣߍ߲߫ ߊߟߎ߫ ߡߊ߬ ߞߊ߬ ߝߘߴߊߟߎ߫ ߡߊ߰ߙߌ ߟߊ߫ ، ߤߊ߲߫ ߸ ߌ ߡߊ߰ߙߌ ߣߊ߬ ߟߍߙߊ ߡߍ߲ ߠߊߖߌ߰ ߟߴߌ ߡߊ߬ ߣߌ߲߬ ߸ ߏ߬ ߘߴߊ߬ߟߎ߬ ߛߌߦߊߡߊ߲߫ ߖߘߌ߫ ߘߊ߲߬ߠߊ߬ߕߊߡߌ߲ ߣߌ߫ ߓߊ߲߬ߓߊ߰ߦߊ ߘߐ߫ ߞߟߋ߫ ، ߒ߬ߞߊ߬ ߌ ߞߊߣߊ߫ ߛߎ߬ߣߎ߲߫ ߡߌ߬ߙߌ߲߬ߘߌ߫ ߓߊ߲߬ߣߍ߲ ߠߎ߫ (ߡߊ߬ߤߌߣߊ) ߟߊ߫ ߘߋ߬ ﴿68﴾

ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߏ߱ ߸ ߡߍ߲ ߠߎ߬ ߞߍߣߍ߲߫ ߦߊ߬ߤߎ߯ߘߎ ߘߌ߫ ߏ߱ ߸ ߛߊߓߍ߲ߠߞߊ ߟߎ߫ ߏ߱ ߸ ߌߛߊߟߞߊ ߟߎ߫ ߏ߱ ߸ ߏ߬ ߝߋ߲-ߋ-ߝߋ߲߫ ߘߍ߲߬ߞߣߍ߬ߦߊ߬ ߘߴߊߟߊ߫ ߣߌ߫ ߟߏ߲߫ ߠߊߓߊ߲ ߡߊ߬ ߞߊ߬ ߢߌ߬ߡߊ ߝߣߊ߫ ߞߍ߫ ߸ ߛߌߟߊ߲߫ ߕߴߏ߬ ߟߎ߬ ߟߊ߫ ߸ ߊ߬ߟߎ߫ ߘߏ߲߬ ߕߍߣߊ߫ ߛߎ߬ߣߎ߲߬ ߠߊ߫ ﴿69﴾

ߒ߬ߠߎ߫ ߞߊ߬ ߌߛߌߙߊߌߟߞߊ ߟߎ߬ ߟߊ߫ ߟߊ߬ߤߘߌ ߡߌ߬ߘߊ߬ ߸ ߞߊ߬ ߞߋߟߊ ߟߎ߬ ߗߋ߫ ߊ߬ߟߎ߫ ߡߊ߬ ߸ ߓߊ߬ߙߌ߬ ߞߋߟߊ ߘߏ߫ ߓߊ߯ ߣߵߊ߬ߟߎ߫ ߡߊ߬ ߞߏ ߘߏ߫ ߘߌ߫ ߞߏߕߊ߲߫ ߸ ߊ߬ߟߎ߬ ߣߌ ߟߎ߬ ߕߍ߫ ߡߍ߲ ߞߊ߬ߣߌ߲߬ ߠߊ߫ ߸ ߊ߬ߟߎ߬ ߘߴߏ߬ ߘߏ߫ ߟߎ߫ ߛߐ߬ߛߐ߫ ߞߊ߬ ߘߏ߫ ߟߎ߫ ߝߊ߰ ﴿70﴾

ߊ߬ߟߎ߫ ߞߵߊ߬ ߖߌ߰ ߞߏ߫ ߞߐߝߟߌ߫ ߕߍߣߊ߬ ߞߍ߫ ߟߴߏ߬ ߛߌ߫ ߟߊ߫ ߸ ߊ߬ߟߎ߫ ߞߵߊ߬ߟߎ߫ ߖߘߍ߬ ߝߎߦߋ߲ߦߊ߫ ߏ߬ ߟߋ ߘߐ߫ ߞߵߊ߬ߟߎ߫ ߖߘߍ߬ ߕߟߏߜߋߘߋ߲ߦߊ߫ ، ߊߟߊ߫ ߞߊ߬ ߖߘߍ߬ߟߊ߬ߛߊߦߌ ߡߌ߬ߘߴߊ߬ߟߎ߬ ߦߋ߫ ߏ߬ ߘߐ߫ ، ߏ߬ ߟߋ ߞߐ߫ ߸ ߊ߬ߟߎ߬ ߛߘߍߡߊ߲߫ ߞߵߊ߬ߟߎ߫ ߖߘߍ߬ ߝߎߦߋ߲ߦߊ߫ ߕߎ߲߯ ߞߵߊ߬ߟߎ߫ ߖߘߍ߬ ߕߟߏߜߋߘߋ߲ߦߊ߫ ، ߓߊ߬ߙߌ߬ ߊߟߊ߫ ߢߊ߯ ߊ߬ߟߎ߬ ߗߋߥߊߟߌ ߟߎ߬ ߟߊ߫ ߖߐ߫ ﴿71﴾

ߡߐ߱ ߟߎ߬ ߓߘߊ߫ ߞߍ߫ ߓߊ߲߬ߓߊ߮ ߟߎ߬ ߘߌ߫ ߸ ߡߍ߲ ߠߎ߬ ߞߊ߲߫ ߞߏ߫ ߊߟߊ߫ ߟߋ߬ ߡߊߙߌߦߡߊ߫ ߘߋ߲ߞߍ߫ ߡߊߡߎ߲߬ߣߍ߲ ߘߌ߫ ، ߡߊ߬ߡߎ߲߬ߣߍ߲ ߏ ߘߏ߲߬ ߞߵߊ߬ ߝߐ߫ ߟߋ߬ ߸ ߞߏ߫ ߤߍ߲߬ ߊߟߎ߬ ߌߛߌߙߊߌߟߞߊ ߟߎ߬ ߸ ߊߟߎ߯ ߊߟߊ߫ ߟߋ߫ ߓߊ߬ߕߏ߬ ، ߏ߬ ߟߋ ߒߠߋ ߡߊ߰ߙߌ ߣߴߊߟߎ߫ ߡߊ߰ߙߌ ߘߌ߫ ، ߊ߬ ߘߏ߲߬ ߝߋ߲-ߋ-ߝߋ߲߫ ߞߊ߬ ߘߏ߫ ߝߙߵߊߟߊ߫ ߞߊ߲߬ ߸ ߊߟߊ߫ ߓߘߊ߫ ( ߡߍ߲ߘߌߦߊ ) ߣߊߞߐ ߞߎ߬ߡߊ߲߬ߘߌ߫ ߏ ߡߊ߬ ߸ ߞߵߊ߬ ߡߊߞߍ߫ ߦߙߐ ߞߍ߫ ߕߊ ߘߌ߫ ، ߘߍ߬ߡߍ߲߬ߓߊ߯ ߟߎ߫ ߘߏ߲߬ ߕߍ߫ ߕߐ߬ߢߍ߰ߒߕߋ ߟߎ߬ ߟߊ߫ ﴿72﴾

ߖߊ߯ߕߋ߬ ߸ ߡߐ߱ ߟߎ߬ ߓߘߊ߫ ߓߊ߲߬ߓߊ߰ߦߊ߫ ߸ ߡߍ߲ ߠߎ߬ ߞߊ߲߫ ߞߏ߫ ߊߟߊ߫ ߟߋ߬ ( ߡߊ߰ߙߌ߫ ) ߛߊ߬ߓߊ ߛߓߊߣߊ߲ ߘߌ߫ ، ߡߊ߰ߙߌ߬ ߛߌ߫ ߘߏ߲߬ ߕߍ߫ ߝߏ߫ ߡߊ߰ߙߌ߬ ߞߋߟߋ߲߫ ߔߋ߫ ، ߣߴߊ߬ߟߎ߫ ߘߏ߲߬ ߡߊ߫ ߝߘߊ߫ ߞߎߡߊ߫ ߛߎ߮ ߏ߬ ߝߐ߫ ߟߊ߫ ߸ ߖߊ߲߰ߞߕߊ߬ ߘߌߡߌ߲ߣߍ߲ ߘߌ߫ ߟߴߊ߬ߟߎ߬ ߘߐ߫ ߓߊ߲߬ߓߊ߮ ߟߎ߫ ߞߊ߲߬ ߠߋ߬ ߘߍ߯ ﴿73﴾

ߌ߬ߦߏ߯ ߊ߬ߟߎ߬ ߕߍ߫ ߊ߬ߟߎ߫ ߖߘߍ߬ ߟߊߛߊ߬ߦߌ߬ ߊߟߊ߫ ߡߊ߬ ߞߊ߬ ߦߝߊ߬ ߢߌߣߌ߲ ߞߍ߫ ߊ߬ ߟߊ߫؟ ߊߟߊ߫ ߟߋ߫ ߘߏ߲߬ ߜߎ ߦߋ߫ ߦߝߊ߬ߟߊ߫ ߤߌߣߟߊ ߘߌ߫ ﴿74﴾

ߡߊߙߌߦߡߊ߫ ߘߋ߲ߞߍ߫ ߡߊߡߎ߲߬ߣߍ߲ ߕߍ߫ ߘߏ߫ ߜߘߍ߫ ߘߌ߫ ߞߋߟߊߡߐ߮ ߞߐ߫ ، ߞߋߟߊ߫ ߛߌߦߊߡߊ߲߫ ߘߏ߲߬ ߓߘߊ߫ ߕߊ߬ߡߌ߲߫ ߊ߬ ߢߍ߫ ߞߘߐ߬ߡߊ߲߫ ، ߊ߬ ߣߊ߫ ߞߍ߫ ߘߊ߫ ߡߛߏ߬ ߟߊߜߍߣߍ߲߫ ߠߋ߬ ߘߌ߫ ، ߊ߬ߟߎ߫ ߝߌ߬ߟߊ ߕߘߍ߬ ߛߎ߬ߡߊ߲ ߠߋ߬ ߘߊߥߎ߲߫ ߠߊ߫ ( ߦߏ߫ ߡߐ߱ ߕߐ߭ ߟߎ߬ ) ، ߊ߬ ߝߟߍ߫ ߓߊ߫ ߊ߲ ߧߋ߫ ߟߝߊߙߌ ߟߎ߬ ߘߐߞߣߍ߫ ߟߴߊ߬ߟߎ߬ ߦߋ߫ ߢߊ ߡߍ߲ ، ߌ ߦߴߊ߬ ߝߟߍ߫ ߕߎ߲߯ ߊ߬ߟߎ߫ ߞߎ߲߭ ߦߋ߫ ߓߐ߫ ߟߴߏ߬ ߞߊ߲߬ ߢߊ ߡߍ߲ ﴿75﴾

ߊ߬ ߝߐ߫ ߞߏ߫ ߌ߬ߦߏ߯ ߊߟߎ߫ ߘߴߊߟߊ߫ ߕߏ߫ ߦߋ߲߬ ߞߊ߬ ߝߋ߲߫ ߜߘߍ߫ ߓߊ߬ߕߏ߬ ߡߍ߲ ߕߍ߫ ߝߏߦߌ߬ ߟߊߛߋ߫ ߟߴߊߟߎ߫ ߡߊ߬ ߡߊ߲߬ߕߙߐ߫ ߣߌ߫ ߣߝߊ߫ ߘߐ߫؟ ߊߟߊ߫ ߟߋ߫ ߘߏ߲߬ ߡߍ߲ߠߌ߲ߠߊ ߣߌ߫ ߟߐ߲ߠߌ߲ߠߊ ߘߌ߫ ﴿76﴾

ߊ߬ ߝߐ߫ ߞߏ߫ ߤߍ߲߬ ߊߟߎ߬ ߟߍߙߊߟߞߊ ߟߎ߬ ߸ ߊߟߎ߫ ߞߊߣߊ߬ ߘߊ߲߬ߠߊ߬ߕߊߡߌ߲ ߞߍ߫ ߊߟߎ߫ ߟߊ߫ ߘߌ߯ߣߊ ߘߐ߫ ߘߋ߬ ߞߊ߬ ߕߎ߬ߢߊ ߟߊߜߊ߲߫ ، ߊߟߎ߫ ߘߏ߲߬ ߞߊߣߊ߬ ߡߌ߬ߙߌ߲߬ߘߌ߫ ߛߊ߬ߥߏ߬ ߟߊߓߊ߬ߕߏ߬ ߸ ߡߍ߲ ߠߎ߫ ߝߟߌ߬ ߘߊ߫ ߞߘߐ߬ߡߊ߲߬ ، ߊ߬ߟߎ߫ ߞߊ߬ ( ߡߐ߰ ) ߛߌߦߊߡߊ߲߫ ߠߊߝߟߌ߬ ، ߊ߬ ߣߴߊ߬ߟߎ߫ ߖߍ߬ߘߍ ߝߟߌ߬ ߘߊ߫ ߛߌߟߊ߫ ߕߋߟߋ߲ߣߍ߲ ߡߊ߬ ﴿77﴾

ߌߛߌߙߊߌߟߞߊ߫ ߓߊ߲߬ߣߍ߲ ߠߎ߬ ߘߊ߲ߞߊ߫ ߘߊ߫ ߟߋ߬ ߘߊߎߘߊ߫ ߣߌ߫ ߡߊߙߌߦߡߊ߫ ߘߋ߲ߞߍ߫ ߌߛߊ߫ ߟߎ߫ ߛߋߟߎ ߡߊ߬ ، ߏ߬ ߘߏ߲߬ ߡߊߛߐ߬ߘߐ߲߬ ߘߴߊ߬ߟߎ߬ ߟߊ߫ ߞߎ߬ߕߊ ߟߋ߫ ߝߍ߬ ߸ ߊ߬ ߣߴߊ߬ߟߎ߫ ߕߍ߬ߘߍ߫ ߖߊ߲߬ߘߊ ߡߍ߲ ߞߍ߫ ߟߊ߫ ﴿78﴾

ߏ߬ ߟߎ߫ ߕߌ߲߬ ߕߴߊ߬ߟߎ߬ ߢߐ߲߮ ߝߊߕߊ߲ߕߌ߫ ߟߴߊ߬ߟߎ߬ ߟߊ߫ ߞߐ߲߫ ߞߏ߫ ߞߍߕߊ߫ ߛߌ߫ ߡߊ߬ ، ߤߊ߲߫ ߸ ߊ߬ߟߎ߫ ߞߊ߬ ߞߏ ߡߍ߲ ߠߎ߬ ߞߍ߫ ߸ ߏ߬ ߟߎ߬ ߖߎ߯ߡߊ߲߫ ߠߋ߫ ߕߍ߬ߘߍ߫ ߘߋ߬ ﴿79﴾

ߌ ߦߴߊ߬ߟߎ ߟߋ߬ ߛߌߦߊߡߊ߲ ߦߋ߫ ߟߴߊ߬ߟߎ߫ ߓߛߌ߬ ߟߊ߫ ߓߊ߲߬ߓߊ߮ ߟߎ߬ ߟߊ߫ ߞߍ߬ߣߍ߲ ، ߤߊ߲߫ ߸ ߏ߬ ߟߎ߬ ߣߌ ߞߵߊ߬ߟߎ߫ ߟߐ߬ ߊ߬ߟߎ߫ ߖߘߍ߬ ߢߍߛߌ߰ ߟߊ߫ ߖߎ߯ߡߊ߲ ߠߋ߬ ߟߊ߫ ߸ ߝߏ߫ ߞߵߊߟߊ߫ ߡߐߣߍ߫ ߊ߬ߟߎ߫ ߡߊ߬ ߞߊߘߌߞߊߘߌ߫ ، ߏ߬ ߟߎ߫ ߟߋ߫ ߘߏ߲߬ ߘߎߡߊߕߐ߫ ߖߊ߲߰ߞߕߊ ߘߐ߫ ﴿80﴾

ߣߴߊ߬ߟߎ߫ ߕߎ߲߬ ߘߍ߲߬ߞߣߍ߬ߦߊ߬ߣߍ߲߫ ߊߟߊ߫ ߡߊ߬ ߸ ߊ߬ ߣߌ߫ ߟߊ߬ߝߐ߬ߓߊ߮ ߡߊ߬ ߸ ߊ߬ ߣߌ߫ ( ߟߍߙߊ ) ߡߍ߲ ߠߊߖߌ߰ߣߴߏ߬ ߡߊ߬ ߸ ߊ߬ߟߎ߫ ߕߎ߲߬ ߕߍ߫ ߓߊ߲߬ߓߊ߮ ߟߎ߫ ߡߌ߬ߘߴߊ߬ߟߎ߫ ߢߌ߲߭ ߠߎ߬ ߘߌ߫ ߝߋߎ߫ ، ߓߊ߬ߙߌ߬ ߊ߬ߟߎ߬ ߛߌߦߊߡߊ߲߫ ߠߋ߬ ߔߊߟߊ߲ߞߊߓߊ߮ ߟߎ߬ ߘߌ߫ ﴿81﴾

(ߌ ߓߊ߯ ߊ߬ ߝߛߍ߬ߝߛߍ߫) ߸ ߌ ߘߴߊ߬ ߕߘߍ߬ ߡߐ߱ ߡߍ߲ ߠߎ߬ ߟߊ߫ ߖߎ߯ߦߊ ߜߍ߬ߟߍ߲߬ߡߊ߲߬ߓߊ ߦߋ߫ ߘߍ߲߬ߞߣߍ߬ߦߊ߬ߓߊ߮ ߟߎ߫ ߞߊ߲߬ ߸ ߏ߬ ߟߎ߫ ߟߋ߫ ߦߊ߬ߤߎ߯ߘߎ ߟߎ߬ ߘߌ߫ ߸ ߊ߬ ߣߌ߫ ߛߏߡߊ ߟߎ߬. ߌ ߘߴߊ߬ ߕߘߍ߬ ߝߣߊ߫ ߸ ߡߍ߲ ߠߎ߬ ߞߊ߲߫ ߊ߬ߟߎ߫ ߖߍ߬ߘߍ߫ ߡߊ߬ ߸ ߞߏ߫ ߒ߬ߠߎ߫ ߟߋ߬ ߌߛߊߟߞߊ ߟߎ߬ ߘߌ߫ ߸ ߏ߬ ߟߎ߫ ߟߋ߫ ߛߎ߬ߘߎ߲߬ߡߊ߲߬ߓߊ ߦߋ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߟߊ߫ ߟߊ߬ߘߌߦߊߢߍ ߘߐ߫. ߏ߬ ߘߏ߲߬ ߞߎ߲߭ ߠߋ߬ ߸ ߓߊߏ߬ ߞߏ߲ߓߏ ߟߎ߬ ߣߌ߫ ߓߊ߬ߕߏ ߘߊ߯ߡߊߞߍߟߊ ߟߎ߫ ߟߴߏ߬ ߟߎ߬ ߘߐ߫ ߸ ߊ߬ ߣߴߊ߬ߟߎ߬ ߕߍ߫ ߊ߬ߟߎ߫ ߖߘߍ߬ߘߐߓߏ߲߬ߧߊ߬ ߟߊ߫ ﴿82﴾

ߣߴߊ߬ߟߎ߫ ߞߊ߬ ‹ ߟߍߙߊ› ߞߊ߬ߙߊ߲߬ ߞߊ߲ ߡߍ߲߫ ߸ ߡߍ߲ ߠߊߖߌ߰ߣߍ߲߫ ߞߋߟߊ ߡߊ߬ ߸ ߌ ߘߴߊ߬ߟߎ߬ ߢߊߖߌ ߦߋ߫ ߛߣߍߣߍ߫ ߟߊ߫ ߸ ߊ߬ߟߎ߫ ߣߵߊ߬ ߕߎ߬ߢߊ ߟߐ߲ ߡߍ߲ ߞߍ߫ ߟߊ߫ ، ߊ߬ߟߎ߬ ߦߴߊ߬ ߝߐ߫ ߟߊ߫ ߞߏ߫ ߊ߲ ߡߊ߰ߙߌ ߸ ߊ߲ ߓߘߊ߫ ߘߍ߲߬ߞߣߍ߬ߦߊ߫ ، ߏ߬ ߘߐ߫ ߸ ߌ ߦߴߊ߲ ߛߓߍ߫ ߛߙߋ ߟߎ߫ ߞߊ߲߬ ﴿83﴾

ߡߎ߲߬ ߦߴߊ߲ ߠߊ߫ ߊ߲ ߕߍ߫ ߘߍ߲߬ߞߣߍ߬ߦߊ߬ ߊߟߊ߫ ߡߊ߬ ߸ ߊ߬ ߣߌ߫ ߝߋ߲߫ ߡߊ߬ ߡߍ߲ ߣߊ߬ߣߍ߲߫ ߒ߬ ߡߊ߬ ߣߊߟߌߡߎ߲߫ ߕߎ߬ߢߊ ߘߌ߫؟ ߊ߲ ߘߏ߲߬ ߦߋ߫ ߕߡߊ߬ߦߌ߬ ߟߊ߫ ߒ ߞߏ߫ ߊ߲ ߡߊ߰ߙߌ ߦߋ߫ ߒ߬ ߠߊߘߏ߲߬ ߡߌ߬ߙߌ߲߬ߘߌ߬ ߢߌߡߊ ߟߎ߬ ߟߊ߫ ߜߊ߬ߙߊ ߘߐ߫ ﴿84﴾

ߏ߬ ߟߎ߬ ߟߊ߫ ߞߎߡߊ߫ ߝߐߣߍ߲ ߏ߬ ߟߋ ߞߏߛߐ߲߬ ߸ ߊߟߊ߫ ߞߵߊ߬ߟߎ߫ ߛߙߊ߬ ߣߊߞߐ߫ ߟߎ߬ ߟߊ߫ ߸ ߖߌߢߊ ߟߎ߬ ߦߋ߫ ߥߦߏ߬ ߟߊ߫ ߡߍ߲ ߠߎ߬ ߞߘߐߟߊ ߟߎ߬ ߘߐ߫ ، ߏ߬ ߟߎ߬ ߘߎߡߊߕߐ߫ ߦߋ߲߬ ߠߋ߬ ، ߏ߬ ߟߋ ߘߏ߲߬ ߦߋ߫ ߢߊ߬ߓߊ߮ ߟߎ߫ ߛߊ߬ߙߊ ߘߌ߫ ﴿85﴾

ߒ߬ߓߊ߬ ߡߍ߲ ߠߎ߫ ߞߵߊ߬ߟߎ߫ ߓߊ߲߬ ߸ ߊ߬ ߣߴߊ߬ߟߎ߫ ߞߊ߬ ߒ߬ ߠߊ߫ ߟߝߊߙߌ ߟߎ߬ ߡߊߛߐ߬ߛߐ߬ ߸ ߏ߬ ߟߎ߫ ߟߋ߬ ߥߋ߲߯ߓߋ ߘߏ߲߬ߞߏ ߟߎ߬ ߘߌ߫ ﴿86﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߞߊߣߊ߬ ߝߋ߲߫ ߢߌߡߊ ߟߎ߬ ߟߊߕߏ߫ ߸ ߊߟߊ߫ ߞߊ߬ ߡߍ߲ ߠߎ߬ ߟߊߘߤߵߊߟߎ߫ ߦߋ߫ ، ߊߟߎ߫ ߘߏ߲߬ ߞߊߣߊ߬ ߖߊ߲߬ߘߊ߫ ، ߓߊߏ߬ ߊߟߊ߫ ߕߍ߫ ߖߊ߲߬ߘߊ߬ߓߊ߮ ߟߎ߫ ߝߍ߬ ﴿87﴾

ߊߟߎ߫ ߦߋ߫ ߝߋ߲߫ ߠߋ߬ (ߘߏ߫) ߘߊߥߎ߲߫ ߸ ߊߟߊ߫ ߞߵߊߟߎ߫ ߤߊ߬ߙߌ߬ߖߍ߰ ߝߋ߲߫ ߠߊߘߤߊ߬ߣߍ߲߬ ߛߊߣߌ߲ߡߊ߲ ߡߍ߲ ߠߎ߬ ߟߊ߫ ، ߊ߬ ߣߴߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߸ ߊߟߎ߫ ߘߍ߲߬ߞߣߍ߬ߦߊ߬ߣߍ߲߫ ߏ߬ ߡߍ߲ ߡߊ߬ ﴿88﴾

ߊߟߊ߫ ߕߍ߫ ߊߟߎ߫ ߡߌ߬ߘߊ߬ ߟߴߊߟߎ߫ ߟߊ߫ ߕߏߟߏ߲߫ ߞߊߟߌߟߌ ߟߎ߬ ߟߊ߫ ߸ ߞߏ߬ߣߌ߲߬ ߊ߬ ߦߴߊߟߎ߫ ߡߌ߬ߘߊ߬ ߟߴߊߟߎ߫ ߟߊ߫ ߞߊ߬ߟߌ߬ߟߌ߫ ߥߊ߬ߣߌ߲߬ߞߋ߫ ߛߘߌ߬ߣߍ߲ ߠߎ߫ ߟߋ߬ ߟߊ߫ ߸ ߏ ߓߌ߲߬ߓߊߏ ߦߋ߫ ߘߐ߰ߕߐ߬ ߕߊ߲߫ ߠߋ߬ ߟߝߊ ߘߌ߫ ߸ ߊߟߎ߫ ߟߊ߫ ߘߋ߲ߓߦߊ߫ ߟߓߊߟߏ߫ ߛߎߡߊ߲ ߕߍߡߞߊߒߞߋ ߘߐ߫ ، ߥߟߊ߫ ߞߵߊ߬ߟߎ߬ ߝߊߘߌߦߊߓߐ߫ ، ߤߊߡߊ߲ߕߍ߫ ߞߊ߬ ߖߐ߲߬ ߞߊ߲ߤߙߐߦߊ߫ ، ߣߌ߫ ߡߍ߲ ߕߴߏ ߛߐ߬ߘߐ߲߬ ߸ ߏ߬ ߦߋ߫ ߕߋ߬ߟߋ߫ ߛߓߊ߬ ߛߎ߲߫ ، ߏ߬ ߟߋ ߦߴߊߟߎ߫ ߟߊ߫ ߞߊ߬ߟߌ߬ߟߌ ߟߎ߬ ( ߕߌߢߍ ) ߓߌ߲߬ߓߊߏ ߘߌ߫ ، ߣߴߊߟߎ߫ ߞߊ߬ ߞߊ߬ߟߌ߬ߟߌ ߞߍ߫ ߞߊ߬ߣߌ߲߫ ( ߞߊ߬ ߓߊ߲߫ ߞߵߊ߬ ߕߌߢߍ߫) ، ߊߟߎ߫ ߘߏ߲߬ ߦߴߊߟߎ߫ ߟߊ߫ ߞߊ߬ߟߌ߬ߟߌ ߟߎ߬ ߟߊߕߊ߲߬ߞߊ߫ ߘߋ߬ ، ߒ߬ߓߵߊߟߊ߫ ߦߴߊ߬ ߟߊ߫ ߟߝߊߙߌ ߟߎ߬ ߘߐߞߣߍ߫ ߟߴߊߟߎ߫ ߦߋ߫ ߕߊ߲߬ ߠߋ߬ ߸ ߖߐ߲߰ߛߴߊߟߎ߫ ߘߴߊ߬ ߞߏߢߌߡߊߟߐ߲߫ ﴿89﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߘߐ߬ߟߐ ߏ߱ ߸ ߛߏ߬ߝߘߊ߬ߓߋ ߏ߱ ߸ ߖߏ߬ ߖߌ߬ߦߊ߬ߘߐ߬ ߟߊߟߐ߬ߣߍ߲ ߠߎ߫ ߏ߱ ߸ ߊ߬ ߣߌ߫ ߓߟߏߟߊߝߍߣߍ߲߫ ߝߋ߲ ߠߎ߫ ߏ߱ ߸ ߏ߬ ߓߍ߯ ߦߋ߫ ߞߛߐ߫ ߟߋ߬ ߘߌ߫ ߸ ߜߍ߬ߘߍ ߟߊ߫ ߓߊ߯ߙߊ ߛߎ߯ߦߊ ߟߎ߬ ߘߐ߫ ߸ ߒ߬ߓߵߊߟߎ߫ ߦߴߊߟߎ߫ ߡߊߓߐ߫ ߏ߬ ߟߊ߫ ߝߋߎ߫ ، ߖߐ߲߰ߛߴߊߟߎ߫ ߘߌ߫ ߛߎߘߊ߲߫ ﴿90﴾

ߜߍ߬ߘߍ ߦߴߊ߬ ߝߍ߬ ߟߋ߬ ߸ ߞߊ߬ ߖߎ߯ߦߊ ߣߌ߫ ߞߐߣߌ߲ߧߊ ߟߊߘߏ߲߬ ߊߟߎ߫ ߕߍ߫ ߘߐ߬ߟߐ ߣߌ߫ ߛߏ߬ߝߘߊ߬ߓߋ ߘߐ߫ ، ߊ߬ ߣߌ߫ ߞߵߊߟߎ߫ ߞߎ߬ߡߊ߲߬ߘߌ߫ ߊߟߊ߫ ߞߏߝߐ ߣߌ߫ ߛߊߟߌ ߡߊ߬ ، ߦߊ߯ߟߴߊߟߎ߫ ߓߘߊ߫ ߝߘߊ߫ ߏ߬ ߘߐ߫ ߓߊ߬؟ ﴿91﴾

ߊߟߎ߯ ߊߟߊ߫ ߞߊ߲ ߡߌ߬ߘߊ߬ ߸ ߊߟߎ߯ ߞߋߟߊ ߞߊ߲ ߡߌ߬ߘߊ߬ ߸ ߊ߬ ߣߌ߫ ߞߵߊߟߎ߫ ߖߊ߲߬ߕߏ߬ ߊߟߎ߫ ߖߘߍ߬ ߘߐ߫ ، ߣߴߊߟߎ߫ ߘߏ߲߬ ߞߵߊߟߎ߫ ߞߐߘߏ߲߬ ߸ ߊߟߎ߫ ߦߴߊ߬ ߟߐ߲߫ ߞߏ߫ ߡߍ߲ ߘߐߙߐ߲߫ ߦߋ߫ ߒ߬ ߠߊ߫ ߞߋߟߊ ߡߊ߬ ߸ ߏ߬ ߟߋ ߟߊ߬ߛߋ߬ߟߌ߬ ߘߐߞߣߍߣߍ߲ ߘߌ߫ ﴿92﴾

ߡߍ߲ ߠߎ߫ ߞߏ߬ߣߌ߲ ߘߍ߲߬ߞߣߍ߬ߦߊ߬ߣߍ߲߫ ߞߊ߬ ߢߌ߬ߡߊ ߟߎ߬ ߞߍ߫ ߸ ߞߎ߲߬ߞߏ߬ ߛߌ߫ ߕߴߏ߬ ߟߎ߫ ߡߵߊ߬ߟߎ߬ ߟߊ߫ ( ߤߙߊ߬ߡߎ߲߬ ) ߘߊߥߎ߲ߣߍ߲߫ ߞߘߐ ߟߎ߬ ߘߐ߫ ߸ ߣߴߊ߬ߟߎ߫ ߞߵߊ߬ߟߎ߬ ߝߊ߲ߕߊ߲߬ߞߊ߫ ߞߊ߬ߣߌ߲߫ ߞߊ߬ ߘߍ߲߬ߞߣߍ߬ߦߊ߫ ߞߊ߬ ߢߌ߬ߡߊ ߟߎ߬ ߞߍ߫ ، ߏ߬ ߞߐ߫ ߕߎ߲߯ ߞߵߊ߬ߟߎ߬ ߝߊ߲ߕߊ߲߬ߞߊ߫ ߞߊ߬ ߘߍ߲߬ߞߣߍ߬ߦߊ߫ ، ߏ߬ ߞߐ߫ ߕߎ߲߯ ߞߵߊ߬ߟߎ߬ ߝߊ߲ߕߊ߲߬ߞߊ߫ ߞߊ߬ ߢߌ߬ߡߊ߬ߦߊ߫ ، ߓߊ ߢߊ߬ߓߊ߮ ߟߎ߫ ߟߋ߬ ߘߌߡߊ߲߫ ߊߟߊ߫ ߦߋ߫ ﴿93﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߊ߫ ߓߍߣߵߊߟߎ߫ ߞߘߐߓߐ߫ ߝߟߍ߫ ߛߓߏ ߘߏ߫ ߟߊ߫ ߸ ߊߟߎ߫ ߓߟߏ ߟߎ߬ ߣߴߊߟߎ߫ ߟߊ߫ ߕߊ߲߬ߓߊ ߟߎ߬ ߘߴߏ ߛߐ߬ߘߐ߲߬ ، ߛߴߊߟߊ߫ ߘߴߊ߬ ߟߐ߲߫ ߡߍ߲ ߦߋ߫ ߛߌߟߊ߲߫߫ ߠߴߊ߬ ߢߍ߫ ߘߏ߲߰ ߘߐ߫ ، ߒ߬ߓߊ߬ ߡߍ߲ ߓߊ߯ ߖߊ߲߬ߘߊ߫ ߏ߬ ߞߐ߫ ߡߎ߬ߕߎ߲߬ ߸ ߖߊ߲߰ߞߕߊ߬ ߘߌߡߌ߲ߣߍ߲ ߠߴߏ߬ ߢߍߛߌ߮ ߘߌ߫ ﴿94﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߞߊߣߊ߬ ߝߟߍ߫ ߛߓߏ߫ ߝߊ߰ ߘߋ߬ ߞߵߊߟߎ߫ ߕߏ߫ ߣߊߡߎ߲ߘߐߦߊ ߘߐ߫ ، ߊߟߎ߫ ߡߍ߲ ߓߴߏ߬ ߝߊ߰ ߕߊߥߎ߫ ߓߟߏ ߡߊ߬ ߸ ߏ߬ ߦߴߊ߬ ߟߊ߫ ߛߏ߬ߓߏ߫ ߝߊ߰ߣߍ߲ ߏ ߢߐ߲߰ ߠߋ߬ ߛߙߊ߬ ߟߊ߫ ߓߌߦߊ߲ ߘߐ߫ ، ߊߟߎ߫ ߘߐ߫ ߕߋߟߋ߲ߓߊ߯ߒߕߋ߫ ߝߌ߬ߟߊ߬ ߦߴߏ߬ ߞߕߌ ߟߊ߫ ، ߞߵߏ߬ ߞߍ߫ ߖߋ߬ߟߌ߬ߓߐ߲߬ߕߊ߫ ߘߌ߫ ߞߵߏ߬ ߟߊߛߋ߫ ߛߐ߬ߕߐ ߟߊ߫ ، ߥߟߴߊ߬ ߢߍߢߌ߲ߘߐߓߍ߲ ߦߋ߫ ߞߍ߫ ߘߐ߰ߕߐ ߟߎ߬ ߓߊߟߏ ߘߌ߫ ، ߤߊߡߊ߲ߕߍ߫ ߊ߬ ߞߎ߲߬ߝߊߟߋ߲ ߦߋ߫ ߞߍ߫ ߛߎ߲ ߠߎ߬ ߘߌ߫ ߸ ߛߴߊ߬ ߘߴߊ߬ ߟߊ߫ ߞߏߢߊ ߞߐߝߟߌ߫ ߖߎ߮ ߡߊߜߙߏ߬ ، ߊߟߊ߫ ߓߘߊ߫ ߕߊ߬ߡߌ߲߬ߣߍ߲߬ ߞߘߐ ߟߎ߬ ߘߐߞߏߦߊߕߏ߫ ، ߡߍ߲ ߠߋ߬ ߓߊ߯ ߛߊ߬ߦߌ߲߬ ߊ߬ ߡߊ߬ ߡߎ߬ߕߎ߲߬ ߛߊ߫ ߸ ߊߟߊ߫ ߘߴߊ߬ ߕߊߢߐ߲߯ߓߐ߫ ߏ߬ ߘߐ߫ ߸ ߓߊߏ߬ ߊߟߊ߫ ߦߋ߫ ߣߌ߬ߣߌ߬ߟߊ߫ ߘߌ߫ ߸ ߊ߬ ߦߋ߫ ߕߊߢߐ߲߯ߓߐ߫ ߕߌ߰ ߘߌ߫ ﴿95﴾

ߓߊ ߞߣߐ߫ ߝߟߍ ߘߤߊ߬ߣߍ߲߫ ߊߟߎ߫ ߦߋ߫ ߸ ߊ߬ ߣߴߊ߬ ߝߟߍߛߓߏ߫ ߘߊߥߎ߲ߕߊ ߸ ߞߵߏ߬ ߘߊ߬ߡߎ߲ ߞߍ߫ ߊߟߎ߫ ߣߌ߫ ߕߊ߯ߡߊߘߋ߲ ߠߎ߬ ߦߋ߫ ، ߜߙߋߡߊ߫ ߝߟߍ ߟߋ߬ ߟߊߕߐ߲ߣߍ߲߫ ߊߟߎ߫ ߡߊ߬ ߸ ߝߊ߬ߣߌ߲߫ ߊߟߎ߫ ߦߋ߫ ߣߊߡߎ߲ߘߐߦߊ ߘߐ߫ ، ߊߟߎ߫ ߘߏ߲߬ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߸ ߊߟߎ߫ ߟߊߘߍ߬ߕߐ߫ ߏ߬ ߡߍ߲ ߣߊ߰ߟߊ߫ ﴿96﴾

ߊߟߊ߫ ߟߋ߫ ߞߊ߬ ߛߐ߬ߕߐ ߓߏ߲߫ ߠߊߕߏߣߍ߲ ߟߐ߬ ߡߐ߱ ߟߎ߬ ߦߋ߫ ߸ ߊ߬ ߣߌ߫ ߛߊ߲߬ߓߏ߬ߟߏ߲߬ ߠߊߕߏߣߍ߲ ߣߌ߫ ߖߋ߬ߟߌ߬ߓߐ߲߬ߕߊ ߣߌ߫ ߞߊ߲ߠߊߘߎ߲߫ ߝߋ߲ ߠߎ߬ ، ߏ߬ ߘߏ߲߬ ߞߎ߲߭ ߠߋ߬ ߛߴߊߟߎ߫ ߘߴߊ߬ ߟߐ߲߫ ߞߏ߫ ߊߟߊ߫ ߞߊ߬ ߛߊ߲ ߠߎ߬ ߞߣߐ߫ ߝߋ߲ ߣߌ߫ ߘߎ߱ ߞߣߐ߫ ߝߋ߲ ߠߎ߬ ߟߐ߲߫ ߸ ߊ߬ ߣߌ߫ ߊߟߊ߫ ߞߊ߬ ߞߏ ߓߍ߯ ߟߐ߲߫ ߕߊߦߌ߫ ﴿97﴾

ߊߟߎ߫ ߦߴߊ߬ ߟߐ߲߫ ߝߣߊ߫ ߸ ߞߏ߫ ߊߟߊ߫ ߦߋ߫ ߓߌ߲߬ߓߊ߬ߏ߬ ߜߍߟߍ߲ ߕߌ߰ ߘߌ߫ ߸ ߊ߬ ߣߌ߫ ߝߣߊ߫ ߸ ߊߟߊ߫ ߟߋ߫ ߦߝߊ߬ߟߊ߫ ߤߌߣߟߊ ߘߌ߫ ﴿98﴾

ߝߏߦߌ߬ ߕߍ߫ ߞߋߟߊ ߡߊ߬ ߟߊ߬ߛߋ߬ߟߌ ߞߐ߫ ߸ ߊߟߊ߫ ߘߏ߲߬ ߞߵߊ߬ ߟߐ߲߫ ߸ ߊߟߎ߯ ߡߍ߲ ߟߊ߲ߞߣߍߡߊ߫ ߟߊ߫ ߸ ߊ߬ ߣߴߊߟߎ߯ ߡߍ߲ ߘߏ߲߰ ߠߊ߫ ﴿99﴾

ߊ߬ ߟߊߛߋ߫ ߸ ߞߏ߫ ߖߎ߯ߡߊ߲ ߣߌ߫ ߢߌ߬ߡߊ ߕߍ߫ ߞߢߊ߫ ߝߋߎ߫ ߸ ߤߊߟߌ߬ ߖߎ߯ߡߊ߲ ߟߊߛߌߦߊߦߊ ߞߴߌ ߤߣߍ߫ ، ߒ߬ߓߵߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߵߊߟߎ߬ ߤߊ߲ߞߟߌ߫ ߞߌߛߍ߫ ߕߌ߮ ߟߎ߬ ߸ ߛߴߊߟߎ߫ ߘߌ߫ ߛߎߘߊ߲߫ ﴿100﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߞߊߣߊ߬ ߕߏ߫ ߞߏ ߟߎ߬ ߢߊ ߡߊߢߌ߬ߣߌ߲߬ߞߊ߬ ߟߊ߫ ߘߋ߬ ، ߓߊߏ߬ ߣߌ߫ ߞߏ ߏ߬ ߟߎ߬ ߢߊ߫ ߘߐߜߍ ߝߐ߫ ߘߴߊߟߎ߫ ߦߋ߫ ߸ ߏ߬ ߘߴߊߟߎ߫ ߟߊߛߎ߬ߣߎ߲߬ ، ߣߴߊߟߎ߫ ߘߏ߲߬ ߞߊ߬ ߞߏ ߡߍ߲ ߢߊ ߡߊߢߌ߬ߣߌ߲߬ߞߊ߫ ߞߎ߬ߙߊ߬ߣߊ ߟߊߖߌ߰ ߕߎߡߊ ߸ ߏ߬ ߢߊ߫ ߘߐߜߍ ߘߌ߫ ߝߐ߫ ߊߟߎ߫ ߦߋ߫ ، ߊߟߊ߫ ߓߘߊ߫ ߢߌ߬ߣߌ߲߬ߞߊ߬ߟߌ߬ ( ߝߟߐ ߟߎ߫ ) ߦߊ߬ߝߊ߫ ، ߊߟߊ߫ ߘߏ߲߬ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߡߎ߬ߢߎ߲߬ߓߊ߯ ߘߌ߫ ﴿101﴾

ߡߌ߬ߙߌ߲߬ߘߌ ߘߏ߫ ߟߎ߫ ߞߵߊ߬ ߢߌ߬ߣߌ߲߬ߞߊ߬ߟߌ ߞߍ߫ ߊߟߎ߫ ߢߍ߫ ߞߘߐ߬ߡߊ߲߫ ߸ ߞߊ߬ ߓߊ߲߫ ߞߵߊ߬ߟߎ߫ ߓߊ߲߬ ߏ߬ ߞߏ ߡߊ߬ ﴿102﴾

ߊߟߊ߫ ߟߊ߫ ߞߏ߫ ߟߊߘߊ߲ߣߍ߲߫ ߕߍ߫ ߢߐ߯ߡߍ߫ ߕߟߏ߫ ߝߙߊ߫ ߓߌߘߌ߲ߓߊߟߌ ߘߌ߫ ߸ ߊ߬ ߕߍ߫ ߢߐ߯ߡߍ߫ ߤߙߐߦߊߣߍ߲߫ ߘߏ߬ߣߌ߲߬ ߕߊ߬ߓߊߟߌ߫ ߘߌ߫ ߸ ߊ߬ ߕߍ߫ ߖߊ߰ ߥߟߏߣߍ߲߫ ߖߊ߰ ߟߊ߫ ߘߌ߫ ߸ ߊ߬ ߕߍ߫ ߢߐ߯ߡߍ߫ ߕߎߙߊ߫ ߞߟߏߞߕߏ߫ ߟߊߢߐߢߐ߲ߣߍ߲߫ ߝߣߊ߫ ߘߌ߫. ߛߏߡߊ ߟߎ߫ ߟߋ߬ ߣߵߏ߬ ߥߎߦߊ ߟߎ߬ ߟߊ߫ ߟߴߊߟߊ߫ ߟߊ߫ ߕߋ߲߬ ߝߎ߯ ، ߊ߬ߟߎ߫ ߝߊ߲߬ߓߊ ߘߏ߲߬ ߕߍ߫ ߤߊ߲ߞߟߌߡߊ߫ ߘߌ߫ ﴿103﴾

ߣߴߊ߬ ߝߐ߫ ߘߴߊ߬ߟߎ߬ ߦߋ߫ ߞߏ߫ ߊߟߎ߯ ߣߵߊߟߊ߫ ߟߊ߫ ߟߍߙߊ߫ ߟߊߖߌ߰ߣߍ߲ ߡߊ߬ ߸ ߊ߬ ߣߌ߫ ߞߋߟߊ ߡߊ߬ ߸ ߊ߬ߟߎ߬ ߘߴߊ߬ ߝߐ߫ ߞߏ߫ ߒ߬ ߣߊ߬ ߒ߬ ߓߋ߲ߓߊ ߟߎ߫ ߕߘߍ߬ ߟߊ߫ ߡߍ߲ ߞߊ߲߬ ߸ ߏ߬ ߘߴߊ߲ ߥߊ߬ߛߊ߫ ߕߋ߲߬ ، ߋ߫ ߸ ߤߟߴߊ߬ߟߎ߬ ߓߋ߲ߓߊ ߟߎ߫ ߕߎ߲߬ ߡߊ߫ ߝߋ߲߫ ߟߐ߲߫؟ ߤߟߴߊ߬ߟߎ߫ ߕߎ߲߬ ߕߍ߫ ߞߊ߲ߘߦߊ߫ ߞߊ߲߬؟ ﴿104﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߦߴߊߟߎ߫ ߞߊߘߊ߲߫ ߊߟߎ߫ ߖߍ߬ߘߍ߫ ߞߊ߲߬ ߘߋ߬ ߸ ߝߟߌ߬ߓߊ߮ ߕߍ߫ ߊߟߎ߫ ߕߙߐ߫ ߝߋߎ߫ ߸ ߣߴߊߟߎ߫ ߞߊ߬ ߞߊ߲ߘߊ߫ ߛߌߟߊ ߕߊ߬ ، ߊߟߎ߫ ߓߍ߯ ߘߏ߲߬ ߛߊ߬ߦߌ߬ߕߐ߫ ߊߟߊ߫ ߟߋ߫ ߡߊ߬ ߸ ߊ߬ ߘߴߊߟߎ߫ ߓߊ߯ߙߊ߫ ߣߐ ߓߍ߯ ߖߐ߲ ߠߊߓߐ߫ ߊߟߎ߫ ߡߊ߬ ﴿105﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߕߍߟߊ߫ ߛߙߋߦߊ ߘߐ߫ ߸ ߣߴߊߟߎ߫ ߡߍ߲ ߞߊ߬ ߞߍ߫ ߛߊ߬ ߟߊ߫ ߸ ߏ߬ ߟߊ߫ ߛߙߊ߬ߒ߬ߞߊ߲߬ߠߊ ߕߎ߬ߡߊ ߸ ߊ߬ ߦߋ߫ ߡߐ߰ ߕߋߟߋ߲ߣߍ߲߫ ߝߌ߬ߟߊ߬ ߞߍ߫ ߛߙߋ ߟߎ߬ ߘߌ߫ ߊߟߎ߫ ߖߍ߬ߘߍ ߓߘߊߡߐ߮ ߟߎ߬ ߘߐ߫ ، ߥߟߴߊ߬ߟߎ߬ ߦߋ߫ ߞߍ߫ ߛߙߋ߫ ߝߌߟߊ߫ ߜߘߍ߫ ߘߌ߫ ߕߎ߲ߞߊߙߊ߲ߒߞߋ ߟߎ߬ ߘߐ߫ ߸ ( ߛߙߋ߫ ߢߌߣߌ߲ ߣߌ߲߬ ߞߍߕߐ߫ ߟߋ߬) ߸ ߣߴߊߟߎ߫ ߥߊ߫ ߘߊ߫ ߕߊ߯ߡߊ ߘߐ߫ ߖߡߊ߬ߣߊ ߢߊߝߍ߬ ߸ ߛߊ߬ߦߊ ߓߌ߬ߟߊ߬ߒߘߐ ߞߵߊߟߎ߫ ߛߐ߬ߘߐ߲߫ ߦߋ߲߬ ، ߊߟߎ߫ ߦߋ߫ ߛߙߋ߫ ߝߌߟߊ߫ ߝߟߐ ߟߊߟߐ߬ ߛߊߟߌ ߞߐ߫ ، ߊ߬ߟߎ߬ ߦߴߊ߬ߟߎ߫ ߞߊ߬ߟߌ߬ ߊߟߊ߫ ߟߊ߫ ߸ ߣߴߊߟߎ߫ ߛߌߞߊ߫ ߘߊ߫ ߞߊ߬ߣߌ߲߬ ، ( ߊ߬ߟߎ߬ ߦߴߊ߬ ߝߐ߫ ߞߊ߬ߟߌ߬ߟߌ ߘߐ߫ ) ߞߏ߫ ߝߋߎ߫ ߸ ߒ߬ߠߎ߬ ߕߍ߫ ߊ߲ ߠߊ߫ ߞߊ߬ߟߌ߬ߟߌ ߝߋ߬ߙߋ߫ ߛߐ߲߬ߞߐ߬ ߛߌ߫ ߟߊ߫ ، ߤߟߴߊ߬ ߞߍ߫ ߘߊ߫ ߒ߬ ߓߊߘߋ߲ߡߊ߫ ߛߎߘߎ߲ ߠߋ߬ ߟߊ߫ ߞߎ߲߬ ߠߊ߫ ، ߊ߲ ߘߏ߲߬ ߕߍ߫ ߊߟߊ߫ ߟߊ߫ ߛߙߋߦߊ ߘߏ߲߰ ߝߋߎ߫ ߸ ߣߴߊ߲ ߞߵߏ߬ ߞߍ߫ ߊ߲ ߘߌ߫ ߞߍ߫ ߖߟߎ߬ߡߎ߲߬ߕߐ ߟߎ߬ ߘߏ߫ ߘߌ߫ ﴿106﴾

ߣߴߊ߬ ߟߐ߲߫ ߘߊ߫ ߞߴߏ߬ ߟߎ߬ ߓߘߴߊ߬ߟߎ߫ ߞߎ߲߬ߟߐ߬ ߖߟߎ߬ߡߎ߲ ߞߘߐ߫ ߸ ߛߙߋ߫ ߝߌߟߊ߫ ߜߘߍ ߦߴߊ߬ߟߎ߫ ߟߐ߬ ߏ߬ ߟߎ߫ ߟߐ߬ ߦߌߟߊ ، ߏ߬ ߟߎ߬ ߦߋ߫ ߓߐ߫ ߡߐ߰ ߟߎ߫ ߟߋ߬ ߘߐ߫ ߸ ߞߊ߬ߟߌ߬ߟߌ߬ߟߊ߫ ߝߌ߬ߟߊ߬ ߝߟߐ ߞߵߊ߬ߟߎ߫ ߞߎ߲߬ߟߐ߬ ߡߍ߲ ߠߎ߬ ߤߊߞߍ ߞߘߐ߫ ، ߏ߬ ߟߎ߬ ߝߣߊ߫ ߦߴߊ߬ߟߎ߫ ߞߊ߬ߟߌ߬ ߊߟߊ߫ ߟߊ߫ ߸ ߞߏ߫ ߒ߬ߠߎ߬ ߟߊ߫ ߛߙߋߦߊ ߟߋ߫ ߓߍ߲߬ߣߍ߲߫ ߘߏ ߟߎ߬ ߕߊ ߘߌ߫ ، ߒ߬ߠߎ߫ ߘߏ߲߬ ߕߍ߫ ߖߊ߲߬ߘߊ߬ ߝߋߎ߫ ، ߓߊ ߏ߬ ߕߎ߬ߡߊ ߸ ߊ߲ ߘߌ߫ ߞߍ߫ ߕߐ߬ߢߍ߰ߒߕߋ ߟߎ߬ ߘߏ߫ ߘߌ߫ ﴿107﴾

ߊ߬ ߞߍߢߊ ߘߐ߫ ߛߎ߬ߘߎ߲߬ߡߊ߲ ߠߋ߫ ߣߌ߲߬ ߸ ߡߍ߲ ߘߴߊ߬ ߞߍ߫ ߊ߬ߟߎ߬ ߘߌ߫ ߣߊ߬ ߛߙߋߦߊ ߘߌ߫ ߊ߬ ߢߊ ߡߊ߬ ، ߓߊ ߊ߬ߟߎ߬ ߘߌ߫ ߛߌߟߊ߲߫ ߞߏ߫ ߞߊ߬ߟߌ߬ߟߌ ߟߎ߬ ߟߊߛߊ߬ߦߌ߲߬ߕߐ߫ ߟߋ߬ ߊ߬ߟߎ߬ ߟߊ߫ ߞߊ߬ߟߌ߬ߟߌ ߟߎ߬ ߞߐ߫ ߕߎ߲߯ߠߌ߲߫ ، ߒ߬ߓߵߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߸ ߊ߬ ߣߌ߫ ߊߟߎ߫ ߦߴߊߟߎ߫ ߕߟߏߡߊߟߐ߬ ( ߖߊ߬ߡߊߙߌ ߟߊ߫ ) ، ߓߊ ߝߋߎ߫ ߊߟߊ߫ ߕߍ߫ ߡߌ߬ߙߌ߲߬ߘߌ߫ ߔߊߟߊ߲ߞߊߣߍ߲ ߞߊ߲ߘߊ߫ ߟߊ߫ ﴿108﴾

ߊߟߊ߫ ߞߍߕߐ߫ ߞߋߟߊ ߟߎ߬ ߟߊߘߍ߬ ߟߊ߫ ߟߏ߲ ߡߍ߲ ߸ ߊ߬ ߘߴߊ߬ߟߎ߫ ߢߌ߬ߣߌ߲߬ߞߊ߬ ߞߏ߫ ߊߟߎ߫ ߖߋ߬ߓߌ߬ ߘߊ߫ ߞߊ߲ ߢߌ߬ߡߊ߲߫ ߠߋ߬ ߟߊ߫؟ ߊ߬ߟߎ߬ ߘߴߊ߬ ߝߐ߫ ߞߴߏ߬ ߢߊ߫ ߛߌ߫ ߕߍ߫ ߒ߬ߠߎ߬ ߞߣߐ߫ ߡߎ߬ߕߎ߲߬ ، ߌߟߋ ߖߍ߬ߘߍ ߟߋ߫ ߘߏ߲߬ ߦߋ߫ ߞߏ߫ ߘߏ߲߰ߣߍ߲ ߠߎ߬ ߟߐ߲ߓߊ߮ ߘߌ߫ ﴿109﴾

ߏ ߕߎ߬ߡߊ ߟߋ߬ ߸ ߊߟߊ߫ ߘߴߊ߬ ߝߐ߫ ߞߏ߫ ߤߍ߲߬ ߌߟߋ߬ ߡߊߙߌߦߡߊ߫ ߘߋ߲ߞߍ߫ ߌߛߊ߫ ߸ ߌ ߦߟߌߓߌ߬ߟߊ߬ ߒ ߠߊ߫ ߣߍߡߊ ߘߐ߫ ߌ ߞߊ߲߬ ߸ ߊ߬ ߣߴߌ ߡߏߦߌ߫ ߣߊ ߞߊ߲߬ ߸ ߕߎ߬ߡߊ ߡߍ߲ ߒ ߞߵߌ ߝߊ߲߬ߞߊߘߏ߲߬ ߛߊߣߌ߲ߧߊ ߛߟߐߡߌ߲ ߠߊ߫ ، ߌ ߞߊ߬ ߡߐ߱ ߟߎ߬ ߞߎߡߊߢߐ߲߯ߦߊ߫ ߞߵߌ ߕߏ߫ ߘߋ߲ߢߋߙߌ߲ߦߊ ߘߐ߫ ߸ ߊ߬ ߣߌ߫ ߜߌߛߌ߲ߧߊ ߘߐ߫ ، ߏ߬ ߕߎ߬ߡߊ ߟߋ߬ ߒ ߞߵߌ ߟߊߟߐ߲ߠߌ߲߫ ߟߍߙߊ ߣߌ߫ ߥߘߋ߬ߥߘߋ߬ߟߌ ߟߊ߫ ߸ ߊ߬ ߣߌ߫ ߕߊ߬ߥߎ߬ߙߊߕߌ ߣߌ߫ ߟߌ߲߬ߖߌ߯ߟߌ ߟߊ߫ ، ߊ߬ ߣߴߌ ߕߘߍ߬ ߓߐ߱ ߟߊߘߊ߲߫ ߠߊ߫ ߞߵߊ߬ ߞߍ߫ ߦߏ߫ ߞߐ߬ߣߐ ߞߍߢߊ ߒ ߠߊ߫ ߘߌ߬ߢߍ ߟߊ߫ ، ߌ ߘߌ߫ ߝߍߟߌ ߞߍ߫ ߏ߬ ߘߐ߫ ߸ ߏ߬ ߘߌ߫ ߞߍ߫ ߞߐ߬ߣߐ ߘߌ߫ ߒ ߠߊ߫ ߘߌ߬ߢߍ ߟߊ߫ ، ߊ߬ ߣߴߌ ߕߘߍ߬ ߝߎߦߋ߲߫ ߡߏߦߌߣߍ߲ ߣߌ߫ ߓߊ߬ߞߌ߬ߕߐ ߟߎ߬ ߟߊߞߍ߲ߘߍߦߊ߫ ߟߊ߫ ߒ ߠߊ߫ ߘߌ߬ߢߍ ߟߊ߫ ، ߊ߬ ߣߴߌ ߕߍ߬ߘߍ߫ ߛߎ߭ ߟߎ߬ ߟߊߥߟߌ߬ ߟߊ߫ ߒ ߠߊ߫ ߘߌ߬ߢߍ ߟߊ߫ ، ߊ߬ ߣߌ߫ ߕߎ߬ߡߊ ߡߍ߲ ߒ ߞߊ߬ ߌߛߌߙߊߌߟߞߊ ߟߎ߬ ߘߐߡߌ߬ߘߴߌ ߡߊ߬ ߸ ߓߊ ߌ ߣߊ߭ ߡߍ߲ ߞߍ߫ ߘߴߊ߬ߟߎ߫ ߡߊ߬ ߔߊߞߌ ߟߎ߬ ߘߌ߫ ߸ ߊ߬ߟߎ߬ ߘߐ߫ ߓߊ߲߬ߓߊ߮ ߟߎ߫ ߞߵߊ߬ ߝߐ߫ ߞߴߏ߬ ߕߍ߫ ߝߏߦߌ߬ ߘߌ߫ ߛߎߦߊ ߜߍߘߐߕߊ ߞߐ߫ ﴿110﴾

ߊ߬ ߣߌ߫ ߕߎ߬ߡߊ ߡߍ߲ ߒ ߞߊ߬ ߦߟߌߘߏ߲ ߟߐ߬ ߞߋߟߊߞߋߟߊ ߟߎ߫ ߡߊ߬ ߸ ߒ ߞߏ߫ ߊߟߎ߯ ߘߍ߲߬ߞߣߍ߬ߦߊ߫ ߒ ߣߌ߫ ߒ ߠߊ߫ ߞߋߟߊ ߡߊ߬ ، ߏ߬ ߟߎ߬ ߞߊ߲߫ ߞߏ߫ ߊ߲ ߓߘߊ߫ ߘߍ߲߬ߞߣߍ߬ߦߊ߫ ، ߌ ߦߋ߫ ߛߙߋߦߊ߫ ߝߊ߯ߛߌ߫ ߞߏ߫ ߒ߬ߠߎ߬ ߦߋ߫ ߖߘߍ߬ߞߟߏ߬ߓߊ߮ ߟߎ߫ ߟߋ߬ ߘߌ߫ ﴿111﴾

ߕߎ߬ߡߊ ߏ߬ ߟߋ ߟߊ߫ ߸ ߞߋߟߊߞߋߟߊ ߟߎ߫ ߞߵߊ߬ ߝߐ߫ ߸ ߞߏ߫ ߤߍ߲߬ ߌߟߋ߬ ߡߊߙߌߦߡߊ߫ ߘߋ߲ߞߍ߫ ߌߛߊ߫ ߸ ߦߊ߯ߟߊ߫ ߌ ߡߊ߰ߙߌ ߘߌ߫ ߛߋ߫ ߓߊ߬ ߞߊ߬ ߛߎ߬ߡߊ߲߬ߝߍ߬ ߞߋߟߋ߲߫ ߠߊߖߌ߰ ߊ߲ ߡߊ߬ ߞߊ߬ ߓߐ߫ ߛߊ߲ߝߍ߬؟ ߊ߬ ߞߊ߲߫ ߞߏ߫ ߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߘߋ߬ ߸ ߣߴߊ߬ ߕߘߍ߬ ߘߴߊߟߎ߫ ߦߋ߫ ߘߍ߲߬ߞߣߍ߬ߦߊ߬ߓߊ߯ ߟߎ߫ ߘߌ߫ ﴿112﴾

ߊ߬ߟߎ߬ ߞߊ߲߫ ߞߏ߫ ߊ߲ ߧߴߊ߬ ߝߍ߬ ߟߋ߬ ߞߵߏ߬ ߘߏ߫ ߘߊߥߎ߲߫ ߸ ߊ߲ ߧߴߊ߲ ߛߣߐ߬ߡߍ ߟߎ߬ ߡߝߊ߫ ، ߊ߬ ߣߴߊ߲ ߧߴߊ߬ ߟߐ߲߫ ߞߏ߫ ߌ ߞߊ߬ ߕߎ߬ߢߊ߫ ߟߋ߬ ߝߐ߫ ߒ߬ ߧߋ߫ ، ߊ߬ ߣߴߊ߲ ߖߍ߬ߘߍ ߦߋ߫ ߞߍ߫ ߊ߬ ߛߙߋ ߟߎ߬ ߘߏ߫ ߘߌ߫ ﴿113﴾

ߡߊߙߌߦߡߊ߫ ߘߋ߲ߞߍ߫ ߌߛߊ߫ ߞߊ߲߫ ߏ߬ ߘߐ߫ ߞߏ߫ ߊ߲ ߡߊ߰ߙߌ߬ ߊߟߊ߫ ߸ ߛߎ߬ߡߊ߲߬ߝߍ߬ ߞߋߟߋ߲߫ ߠߊߖߌ߰ ߒ߬ ߡߊ߬ ߞߊ߬ ߓߐ߫ ߛߊ߲ ߘߐ߫ ، ߏ߬ ߦߋ߫ ߞߍ߫ ߒ߬ ߧߋ߫ ߛߊߟߌ߫ ߞߣߍ߫ ( ߝߌ߬ߘߊ ߣߌ߫ ߥߘߎ߬ߓߊ) ߘߌ߫ ߊ߲ ߞߎ߲߬ߝߟߐ߬ߡߊ߬ ߡߐ߮ ߟߎ߬ ߣߴߊ߲ ߞߐߟߊ߫ ߡߐ߮ ߓߍ߯ ߦߋ߫ ߸ ߊ߬ ߣߴߏ߬ ߦߋ߫ ߞߍ߫ ߡߊ߲߬ߕߊߣߌ߲߫ ߘߌ߫ ߞߊ߬ ߝߘߊ߫ ߌ ߟߊ߫ ، ߌ ߦߋ߫ ߒ߬ ߤߊ߬ߙߌ߬ߖߍ߯ ߏ߬ ߟߊ߫ ߖߊ߰ߣߌ߲߫ ، ߓߊ ߌߟߋ ߟߋ߫ ߤߊ߬ߙߌ߬ߖߍ߰ߟߊ ߓߍ߯ ߘߐ߫ ߢߌ߬ߡߊ ߘߌ߫ ﴿114﴾

ߊߟߊ߫ ߞߊ߲߫ ߞߏ߫ ߒ ߘߴߏ߬ ߟߊߖߌ߰ ߊߟߎ߫ ߡߊ߬ ߓߏ߬ ، ߣߴߊߟߎ߫ ߡߍ߲ ߠߋ߫ ߞߵߊ߬ ߓߊ߲߬ ߏ߬ ߞߐ߫ ߛߊ߫ ߸ ߒ ߘߴߏ ߖߊ߲߰ߞߕߊ߫ ߖߊ߲߰ߞߕߊ߬ ߟߊ߫ ߸ ߖߊ߲߰ߞߕߊ ߡߍ߲ ߢߐ߲߰ ߡߊ߫ ߟߊ߫ ߡߐ߰ ߛߌ߫ ߞߊ߲߬ ߖߊ߯ߓߊ ߞߣߐ߫ ߡߐ߮ ߟߎ߬ ߘߐ߫ ﴿115﴾

ߕߎ߬ߡߊ ߘߏ߫ ߟߊ߫ ߸ ߊߟߊ߫ ߘߌߣߵߊ߬ ߝߐ߫ ߞߏ߫ ߤߍ߲߬ ߌߟߋ߬ ߡߊߙߌߦߡߊ߫ ߘߋ߲ߞߍ߫ ߌߛߊ߫ ߸ ߌߟߋ ߟߋ߫ ߞߵߊ߬ ߝߐ߫ ߡߐ߱ ߟߎ߬ ߦߋ߫ ߓߊ߬ ߸ ߞߏ߫ ߊߟߎ߫ ߦߋ߫ ߒߠߋ ߣߌ߫ ߒ ߣߊ߫ ߞߍ߫ ߡߊ߰ߙߌ߫ ߝߌ߬ߟߊ߬ ߘߌ߫ ߞߵߊߟߊ߫ ߕߏ߫؟ ߊ߬ ߘߴߊ߬ ߝߐ߫ ߞߏ߫ ߞߊ߯ߙߌ߫ ߡߊ߰ߙߌ߬ ߛߊߣߌ߲ ، ߊ߬ ߕߍ߫ ߞߎ߲߫ ߒߠߋ ߘߐ߫ ߞߊ߬ ߝߋ߲߫ ߝߐ߫ ߸ ߒ ߖߊߙߋߣߍ߲߫ ߕߍ߫ ߡߍ߲ ߠߊ߫ ، ߣߌ߫ ߒ ߣߐ߬ ߞߍ߫ ߘߴߏ߬ ߝߐ߫ ߟߊ߫ ߸ ߛߴߌ ߓߘߴߏ߬ ߟߐ߲߫ ، ߓߊߏ߬ ߌ ߞߊ߬ ߒ ߣߌ߫ ߘߐ߫ ߞߏ ߟߐ߲߫ ߸ ߒߠߋ ߘߏ߲߬ ߡߴߌߟߋ ߣߌ߫ ߘߐ߫ ߞߏ ߟߐ߲߫ ، ߌߟߋ ߟߋ߬ ߞߏ߫ ߘߏ߲߰ߣߍ߲ ߠߎ߬ ߟߐ߲ߓߊ߮ ߘߌ߫ ﴿116﴾

ߒ ߡߊ߫ ߝߏߦߌ߬ ߝߐ߫ ߊ߬ߟߎ߬ ߦߋ߫ ߸ ߝߏ߫ ߌ ߞߊ߬ ߒ ߖߡߊ߬ߙߌ߬ ߡߍ߲ ߠߊ߫ ، ߒ ߞߏ߫ ߊߟߎ߯ ߊߟߊ߫ ߟߋ߫ ߓߊ߬ߕߏ߬ ߸ ߏ߬ ߟߋ ߒߠߋ ߡߊ߰ߙߌ ߣߴߊߟߎ߫ ߡߊ߰ߙߌ ߘߌ߫ ، ߒߠߋ ߕߘߍ߬ ߊ߬ߟߎ߬ ߛߙߋ ߘߌ߫ ߸ ߞߵߊ߬ ߕߘߍ߬ ߒ ߧߴߊ߬ߟߎ߫ ߝߍ߬ ߦߋ߲߬ ، ߒ߬ߓߊ߬ ߌ ߣߊ߬ ߒ ߛߏߡߊߦߟߍߡߊ߲߫ ߠߊ ߸ ߌߟߋ ߖߍ߬ߘߍ ߞߍ߫ ߘߴߊ߬ߟߎ߫ ߜߋ߬ߟߎ߲߬ߓߊ߮ ߘߌ߫ ، ߓߊ ߌߟߋ ߟߋ߬ ߞߏ ߓߍ߯ ߛߙߋ ߘߌ߫ ﴿117﴾

ߣߴߌ ߞߵߊ߬ߟߎ߫ ߖߊ߲߰ߞߕߊ߬ ߸ ߌ ߟߊ߫ ߖߐ߲߭ ߠߎ߫ ߟߋ߬ ߞߏ߬ߣߌ߲߬ ߦߋ߫ ، ߣߴߌ ߘߏ߲߬ ߦߝߊ߬ ߘߴߊ߬ߟߎ߫ ߡߊ߬ ߸ ߌߟߋ ߟߋ߫ ߞߏ߬ߣߌ߲߬ ߦߋ߫ ߣߌ߬ߣߌ߬ߟߊ߫ ߥߘߋ߬ߥߘߋ߬ߟߌ߬ߟߊ ߘߌ߫ ﴿118﴾

ߊߟߊ߫ ߘߴߊ߬ ߝߐ߫ ߞߏ߫ ߓߌ߬ ߟߋ߬ ߸ ߕߎ߬ߢߊ߬ ߝߐ߬ߟߊ ߟߎ߬ ߟߊ߫ ߕߎ߬ߢߊ ߘߴߊ߬ߟߎ߬ ߣߝߊ߫ ، ߓߊ ߊ߬ߟߎ߬ ߢߍߛߌ߰ߣߍ߲߫ ߡߍ߲ߘߌߦߊ ߣߊߞߐ ߟߎ߫ ߟߋ߬ ߟߊ߫ ߸ ߖߌߢߊ ߟߎ߬ ߦߋ߫ ߥߦߏ߬ ߟߊ߫ ߡߍ߲ ߠߎ߬ ߞߘߐߟߊ ߟߎ߬ ߘߐ߫ ، ߏ߬ ߟߎ߬ ߘߎߡߊߕߐ߫ ߦߋ߲߬ ߠߋ߬ ߞߘߊߎ߫ ، ߊߟߊ߫ ߘߌ߬ߢߍ߬ߣߍ߲߫ ߏ߬ ߟߎ߫ ߡߊ߬ ߸ ߊ߬ߟߎ߬ ߝߣߊ߫ ߘߌ߬ߢߍ߬ߣߍ߲߬ ߊߟߊ߫ ߡߊ߬ ߸ ߒ߬ߓߊ߬ ߏ߬ ߟߋ ߣߌ߭ ߓߟߋ߬ߓߟߋ ߘߌ߫ ߛߊ߫ ﴿119﴾

ߊߟߊ߫ ߕߊ ߟߋ߬ ߛߊ߲ ߠߎ߬ ߣߌ߫ ߘߎ߱ ߡߊ߲߬ߛߊ߬ߦߊ ߘߌ߫ ߸ ߊ߬ ߣߴߏ߬ ߟߎ߬ ߞߣߐ߫ ߝߋ߲ ߠߎ߬ ߸ ߓߊߏ߬ ߊ߬ߟߋ ߟߋ߬ ߛߋ߫ ߟߊ߫ ߞߏ ߓߍ߯ ߟߊ߫ ﴿120﴾

ߕߊ߲߬ߘߏ ߊߟߊ߫ ߦߋ߫ ߸ ߡߍ߲ ߞߊ߬ ߛߊ߲ ߠߎ߬ ߣߌ߫ ߘߎ߱ ߘߊ߲߫ ߸ ߞߊ߬ ߘߌ߬ߓߌ ߟߎ߬ ߣߌ߫ ߦߋߟߋ߲ ߞߍ߫ ، ߞߣߵߏ߬ ߓߍ߯ ߞߐ߫ ߸ ߓߊ߲߬ߓߊ߮ ߟߎ߬ ߦߋ߫ ߝߋ߲߫ ߜߘߍ߫ ߞߢߊ߫ ߟߴߊ߬ߟߎ߫ ߡߊ߰ߙߌ ߡߊ߬ ﴿1﴾

ߏ߬ ߟߋ ߘߏ߲߬ ߜߎ ߞߵߊ߬ߟߎ߬ ߘߊ߲߫ ߓߐ߱ ߘߐ߫ ߸ ߞߊ߬ ߛߕߊ ߘߏ߫ ߟߊߕߍ߰ ߸ ߞߊ߬ ߛߕߊ߫ ߜߘߍ߫ ߟߐ߯ߟߴߊ߬ ߖߍ߬ߘߍ ߓߘߊ ، ߞߣߵߏ߬ ߓߍ߯ ߞߐ߫ ߸ ߊߟߎ߫ ߦߋ߫ ߛߌߞߊ߫ ߟߊ߫ ߡߎߣߎ߲߬ ﴿2﴾

ߊߟߊ߫ ߏ߬ ߟߋ ߡߊ߰ߙߌ ߘߌ߫ ߛߊ߲ ߠߎ߬ ߣߌ߫ ߘߎ߱ ߞߣߐ߫ ، ߊ߬ ߞߵߊߟߎ߫ ߜߎ߲߬ߘߎ ߣߴߊߟߎ߫ ߟߊ߲ߞߣߍߡߊ ߟߐ߲߫ ߸ ߊ߬ ߣߴߊ߬ ߞߵߊߟߎ߫ ߗߋߥߊߟߌ ߟߎ߬ ߟߐ߲߫ ﴿3﴾

ߞߏ߬ߣߌ߲߬ ߘߊ߬ߟߎ߬ ߛߌ߫ ߕߍ߫ ߣߊ߬ ( ߓߊ߲߬ߓߊ߮ ) ߟߎ߫ ߡߊ߬ ߸ ߊ߬ߟߎ߫ ߡߊ߰ߙߌ ߟߊ߫ ߘߊ߬ߟߎ ߟߎ߬ ߘߐ߫ ߸ ߣߴߊ߬ߟߎ߬ ߡߴߊ߬ߟߎ߬ ߞߐߘߏ߲߬ ߏ߬ ߟߊ߫ ﴿4﴾

ߊ߫ ߸ ߕߎ߬ߢߊ ߣߊ߬ߣߍ߲ ߊ߬ߟߎ߫ ߡߊ߬ ߸ ߊ߬ߟߎ߫ ߞߵߏ߬ ߡߊߛߐ߬ߛߐ߬ ، ߞߏ߬ߣߌ߲߬ ߛߋߚߋ߫ ߸ ߊ߬ߟߎ߫ ߕߎ߲߬ ߦߋ߫ ߡߍ߲ ߡߊߦߟߍ߫ ߟߊ߫ ߸ ߏ߬ ߖߊ߲߬ߖߏ߲ ߠߎ߬ ( ߞߐߝߟߌ ) ߘߌߣߵߊ߬ߟߎ߫ ߡߊ߬ ߟߋ߬ ߕߘߋ߫ ﴿5﴾

ߊ߬ߟߎ߬ ߡߴߊ߬ ߦߋ߫ ߓߊ߬ ߞߏ߫ ߊ߲ ߓߘߊ߫ ߓߐ߲ߛߐ߲ߘߊ߫ ߖߋ߬ߟߌߖߋ߬ߟߌ߬ ߛߌߟߊߛߵߊ߬ߟߎ߬ ߢߍ߫ ߞߘߐ߬ߡߊ߲߫؟ ߊ߲ ߘߏ߲߬ ߞߊ߬ ߡߊ߬ߝߊ ߡߍ߲ ߞߍ߫ ߏ߬ ߟߎ߬ ߦߋ߫ ߘߎ߱ ߞߊ߲߬ ߸ ߒ߬ ߡߴߏ߬ ߡߊ߬ߝߊ ߢߐ߲߰ ߞߍ߫ ߊߟߎ ߦߋ߫ ߥߍ߫ ، ߓߊ ߊ߲ ߞߊ߬ ߛߊ߲ߖߌ ߗߋ߫ ߏ߬ ߟߎ߫ ߡߊ߬ ߓߙߐߕߐߕߐ߫ ߸ ߊ߲ ߞߊ߬ ߞߐ߭ ߟߎ߬ ߝߣߊ߫ ߟߊߥߏ߬ߦߏ߫ ߊ߬ߟߎ߬ ߞߘߐߟߊ ߟߎ߬ ߘߐ߫ ߞߎߟߊ߲ߞߎߟߊ߲߫ ، ߓߊ߬ߙߌ߬ ߊ߲ ߞߵߏ߬ ߟߎ߬ ߛߌߟߊߛߵߊ߬ߟߎ߫ ߖߟߎ߬ߡߎ߲ ߠߎ߬ ߞߏߛߐ߲߬ ߠߋ߬ ߟߋߎ߫ ߸ ߞߊ߬ ߝߊ߯ߘߐߞߍ߫ ߜߘߍ߫ ߟߎ߫ ߘߊ߲߫ ߏ߬ ߟߎ߬ ߞߐ߫ ﴿6﴾

ߤߊߟߌ߫ ߒ߬ ߞߊ߬ ߟߍߙߊ ߟߋ߬ ߟߊߖߌ߰ ߌ ߡߊ߬ ߞߊߦߘߌ ߞߊ߲߬ ߸ ߊ߬ߟߎ߬ ߦߴߊ߬ߟߎ߬ ߓߟߏ ߟߎ߫ ߡߊ߰ ߏ߬ ߟߊ߫ ߸ ߓߊ߲߬ߓߊ߮ ߟߎ߬ ߘߴߊ߬ ߝߐ߫ ߞߏ߫ ߣߌ߲߬ ߕߍ߫ ߝߏߦߌ߬ ߘߌ߫ ߛߎߓߊ߯ߦߊ ߜߍߘߐߕߊ ߞߐ߫ ﴿7﴾

ߊ߬ߟߎ߬ ߞߊ߲߫ ߠߋ߬ ߞߏ߫ ߥߟߊߞߏ߫ ߡߟߍ߬ߞߊ ߕߘߍ߬ ߟߊߖߌ߰ ߊ߬ ߡߊ߬ ، ߞߏ߬ߣߌ߲߬ ߣߴߊ߲ ߕߌ߲߬ ߞߊ߬ ߡߟߍ߬ߞߊ ߟߊߖߌ߰ ߸ ߊ߬ߟߋ߬ ߞߏߢߊ ߞߕߌ ߕߎ߲߬ ߘߌ߫ ߕߍ߰ ߤߟߴߊ߬ߟߎ߬ ߕߍ߫ ߘߐߞߐ߬ߣߐ߲߬ ( ߟߊߞߌߙߊ߫ ߟߊ߫) ﴿8﴾

ߣߴߊ߲ ߘߏ߲߬ ߕߎ߲߬ ߞߵߊ߬ ߞߍ߫ ߡߟߍ߬ߞߊ ߘߌ߫ ߸ ߒ߬ ߕߍ߬ߘߍ߫ ߊ߬ ߞߍ߫ ߟߊ߫ ߗߍ߬ ߛߊߥߎߙߊ ߟߋ߬ ߘߐ߫ ، ߊ߲ ߘߏ߲߬ ߕߘߍ߬ ߘߌ߫ ߝߋ߲߫ ߘߐߝߌ߲߬ ߊ߬ߟߎ߫ ߡߊ߬ ߸ ߊ߬ߟߎ߬ ߡߍ߲ ߘߐߝߌ߲߬ ߠߴߊ߬ߟߎ߫ ߖߍ߬ߘߍ߫ ߡߊ߬ ﴿9﴾

ߖߊ߯ߕߋ߬ ߸ ߞߋߟߊ߫ ߛߘߍߡߊ߲߫ ߓߘߊ߫ ߘߐߓߊ߬ߙߊ߲߬ߕߌ߬ ߌߟߋ ߢߍ߫ ߞߘߐ߬ߡߊ߲߫ ، ߓߊ߬ߙߌ߬ ߡߍ߲ ߠߎ߫ ߞߊ߬ ߘߐ߬ߓߊ߬ߙߊ߲߬ߕߌ߬ߟߌ ߞߍ߫ ߊ߬ߟߎ߬ ߘߐ߫ ߸ ߏ߬ ߟߎ߬ ߟߊ߫ ߘߐ߬ߓߊ߬ߙߊ߲߬ߕߌ߬ߟߌ ߓߌ߲߬ߓߊߏ ߓߋ߬ ߘߴߊ߬ߟߎ߫ ߞߊ߲߬ ߠߋ߬ ߓߙߌ߫ ﴿10﴾

ߊ߬ ߝߐ߫ ߞߏ߫ ߒ߬ߓߵߊߟߎ߫ ߦߴߊߟߎ߫ ߦߊ߯ߟߊ߫ ߘߎ߱ ߢߊߝߍ߬ ߸ ߊߟߎ߫ ߓߊ߲߫ ߞߵߊ߬ ߝߟߍ߫ ߡߊ߬ߛߐ߬ߛߐ߬ߟߌ߬ߟߊ ߟߎ߬ ߟߊߓߊ߲ ߞߍ߫ ߘߊ߫ ߢߊ ߡߍ߲ ﴿11﴾

ߊ߬ ߝߐ߫ ߞߏ߫ ߖߍߣߍ߲ ߕߊ߫ ߦߋ߫ ߛߊ߲ ߠߎ߬ ߣߌ߫ ߘߎ߱ ߞߣߐ߫ ߝߋ߲ ߠߎ߬ ߘߌ߫؟ ߊ߬ ߖߋ߬ߓߌ߬ ߞߏ߫ ߊߟߊ߫ ߟߋ߬ ߕߊ߫ ߦߋ߫ ߞߍ߰ ، ߏ߬ ߡߍ߲ ߞߊ߬ ߤߌߣߊ ߛߓߍ߫ ߊ߬ ߖߍ߬ߘߍ߫ ߡߊ߬ ، ߏ߬ ߟߋ ߞߍߕߐ߫ ߊߟߎ߫ ߟߊߘߍ߬ ߟߊ߫ ߟߐ߬ߓߊ ߟߏ߲ ߸ ߛߌߞߊ߫ ߛߌ߫ ߕߍ߫ ߏ߬ ߘߐ߫ ، ߒ߬ߓߊ߬ ߡߍ߲ ߠߎ߫ ߓߣߐ߬ߣߍ߲߫ ߊ߬ߟߎ߫ ߖߘߍ߬ ߘߐ߫ ߸ ߏ߬ ߟߎ߫ ߟߋ߬ ߕߍ߫ ߘߍ߲߬ߞߣߍ߬ߦߊ߬ ߟߊ߫ ﴿12﴾

ߊߟߊ߫ ߕߊ ߟߋ߬ ߝߋ߲ ( ߓߍ߯ ) ߘߌ߫ ߸ ߡߍ߲ ߡߊߞߍߣߍ߲߫ ߛߎ ߣߌ߫ ߕߟߋ߬ߘߐ߬ߟߊ ߘߐ߫ ، ߊ߬ߟߋ ߟߋ߫ ߘߏ߲߬ ߦߋ߫ ߡߍ߲ߠߌ߲ߠߊ߫ ߟߐ߲ߠߌ߲ߠߊ ߘߌ߫ ﴿13﴾

ߊ߬ ߝߐ߫ ߞߏ߫ ߌ߬ߦߏ߯ ߒߠߋ ߦߋ߫ ߝߋ߲߫ ߜߘߍ߫ ߞߍ߫ ߒ ߠߊ߫ ߞߏߕߌ߮ ߘߌ߫ ߣߌ߫ ߊߟߊ߫ ߕߍ߫ ߸ ߏ߬ ߡߍ߲ ߦߋ߫ ߛߊ߲ ߠߎ߬ ߣߌ߫ ߘߎ߱ ߛߌ߲ߘߌߓߊ߮ ߘߌ߫؟ ߏ߬ ߟߋ ߘߏ߲߬ ߦߋ߫ ߓߍ߯ ߓߊߟߏ߫ ߟߊ߫ ߸ ߡߐ߰ ߛߌ߫ ߕߍ߫ ߊ߬ߟߋ߬ ߓߊߟߏ߫ ߟߊ߫ ، ߊ߬ ߝߐ߫ ߞߏ߫ ߒߠߋ ߖߡߊ߬ߙߌ߬ߣߍ߲߫ ߠߋ߬ ߞߏ߫ ߒ ߧߋ߫ ߞߍ߫ ߖߘߍ߬ߞߟߏ߬ߓߊ߮ ߝߟߐ ߘߌ߫ ߸ ߌ ߘߏ߲߬ ߞߊߣߊ߬ ߞߍ߫ ߛߏߡߊ ߟߎ߬ ߝߋ߲߫ ߘߌ߫ ߘߋ߬ ﴿14﴾

ߊ߬ ߝߐ߫ ߞߏ߫ ߣߌ߫ ߒ ߞߊ߬ ߒ ߡߊ߰ߙߌ ߛߐ߬ߛߐ߬ ߸ ߒ ߧߋ߫ ߛߌߟߊ߲߫ ߠߴߏ߬ ߘߐ߫ ߟߏ߲ߓߊ ߘߏ߫ ߖߊ߲߰ߞߕߊ ߟߋ߬ ߟߊ߫ ﴿15﴾

(ߖߊ߲߰ߞߕߊ ) ߏ߬ ߓߊ߯ ߝߘߏ߬ ߡߍ߲ ߡߊ߬ ߏ߬ ߟߏ߲ ߸ ߊ߬ ߓߘߊ߫ ߤߌߣߊ߫ ߏ߬ ߟߊ߫ ، ߏ߬ ߟߋ ߘߏ߲߬ ߦߋ߫ ߣߌ߬ ߘߐ߬ߜߍ ߖߍ߬ߘߍ ߘߌ߫ ﴿16﴾

ߣߌ߫ ߊߟߊ߫ ߞߊ߬ ߡߊ߲߬ߕߙߐ ߡߍ߲ ߡߊ߰ ߌ ߟߊ߫ ߸ ߟߊ߬ߥߟߌ߬ߓߊ߯ ߕߍ߫ ߏ߬ ߟߊ߫ ߸ ߝߏ߫ ߊ߬ߟߋ߫ ߖߍ߬ߘߍ ، ߣߴߊ߬ ߘߏ߲߬ ߞߊ߬ ߤߙߊ߫ ߡߊ߰ ߌ ߟߊ߫ ߸ ߊ߬ߟߋ ߟߋ߫ ߞߏ߬ߣߌ߲߬ ߛߋ߫ ߟߊ߫ ߞߏ ߓߍ߯ ߟߊ߫ ﴿17﴾

ߊ߬ߟߋ ߟߋ߬ ߞߘߊߡߊߟߌߟߊ ߘߌ߫ ߊ߬ ߟߊ߫ ߖߐ߲߭ ߠߎ߫ ߞߎ߲߬ߠߊ߫ ߸ ߊ߬ ߣߴߊ߬ߟߋ ߟߋ߫ ߥߘߋ߬ߥߘߋ߬ߟߌ߬ߟߊ߫ ߞߟߊ߬ߡߊ߬ߓߊ߮ ߘߌ߫ ﴿18﴾

ߊ߬ ߝߐ߫ ߞߏ߫ ߝߋ߲ ߢߌ߬ߡߊ߲߫ ߓߏ߲߬ߓߊ߬ߓߊ ߦߋ߫ ߛߙߋߦߊ ߘߐ߫؟ ߊ߬ ߖߋ߬ߓߌ߬ ߞߏ߫ ߊߟߊ߫ ߞߍ߰ ، ߏ߬ ߟߋ ߘߏ߲߬ ߛߙߋ ߘߌ߫ ߒߠߋ ߣߴߊߟߎ ߕߍ߫ ، ߒ߬ߓߊ߬ ߞߎ߬ߙߊ߬ߣߊ ߣߌ߲߬ ߗߋߣߍ߲߫ ߒߠߋ ߡߊ߬ ߟߋ߬ ߸ ߞߏ߫ ߒ ߧߋ߫ ߖߊ߬ߛߙߋ߬ߡߊ߬ߟߊ ߞߍ߫ ߊ߬ ߟߴߊߟߎ߫ ߦߋ߫ ߸ ߊ߬ ߣߴߊ߬ ߞߌ߬ߓߊ߬ߙߏ ߓߊ߯ ߛߋ߫ ߡߍ߲-ߍ-ߡߍ߲߫ ߡߊ߬ ، ߌ߬ߦߏ߯ ߊߟߎ߫ ߘߌ߫ ߛߙߋߦߊ߫ ߞߏ߫ ߡߊ߰ߙߌ߬ ߜߘߍ߫ ߟߎ߫ ߦߋ߫ ߊߟߊ߫ ߝߍ߬؟ ߊ߬ ߝߐ߫ ߞߏ߫ ߒ߬ߓߊ߬ ߒߠߋ ߕߴߏ߬ ߟߊߛߙߋߦߊ߫ ߝߋߎ߫ ، ߊ߬ ߝߐ߫ ߞߏ߫ ߊߟߊ߫ ߟߋ߫ ߡߊ߰ߙߌ߬ ߞߋߟߋ߲ ߘߌ߫ ߸ ߒߠߋ ߘߏ߲߬ ߢߌ߬ߣߊ߬ߓߐߣߍ߲߫ ߠߋ߬ ߊߟߎ߫ ߟߊ߫ ߛߏߡߦߊ߫ ߞߏ ߟߎ߬ ߓߍ߯ ߘߐ߫ ﴿19﴾

ߊ߲ ߣߊ߬ ߟߍߙߊ ߘߌ߫ ߟߊ߫ ߡߍ߲ ߠߎ߫ ߡߊ߬ ( ߞߘߐ߬ߡߊ߲߫ ) ߸ ߏ߬ ߟߎ߫ ߞߊ߬ ߞߋߟߊ ߟߐ߲߫ ߠߋ߬ ߦߏ߫ ߊ߬ߟߎ߫ ߞߵߊ߬ߟߎ߬ ߘߋ߲ ߠߎ߬ ߟߐ߲߫ ߢߊ ߡߍ߲ ، ߒ߬ߓߊ߬ ߡߍ߲ ߠߎ߫ ߓߣߐ߬ߣߍ߲߫ ߊ߬ߟߎ߫ ߖߘߍ߬ ߘߐ߫ ߸ ߏ߬ ߟߎ߫ ߟߋ߬ ߕߍ߫ ߘߍ߲߬ߞߣߍ߬ߦߊ߬ ߟߊ߫ ﴿20﴾

ߖߍߣߍ߲ ߠߊ߫ ߕߐ߬ߢߍ߮ ߕߊ߬ߡߌ߲߬ߣߍ߲߫ ߡߐ߱ ߟߊ߫ ߸ ߡߍ߲ ߞߊ߬ ߥߎߦߊ ߞߎ߲߬ߘߐߕߍ߰ ߞߵߊ߬ ߟߴߊߟߊ߫ ߟߊ߫ ߸ ߥߟߊ߫ ߡߍ߲ ߞߵߊߟߊ߫ ߟߊ߫ ߟߝߊߙߌ ߟߎ߬ ߡߊߛߐ߬ߛߐ߬؟ ߞߏ߬ߣߌ߲߬ ߝߋߎ߫ ߸ ߕߐ߬ߢߍ߰ߒߕߋ ߟߎ߬ ߕߍߣߊ߬ ߛߎߘߊ߲߫ ߠߊ߫ ﴿21﴾

ߊ߲ ߞߍߕߐ߫ ߊ߬ߟߎ߬ ߓߍ߯ ߟߊߘߍ߬ ߟߊ߫ ߟߏ߲ ߡߍ߲ ߸ ߒ߬ ߘߌ߫ ߓߊ߲߫ ߞߵߊ߬ ߝߐ߫ ߛߏߡߊ ߟߎ߬ ߦߋ߫ ߸ ߒ ߞߏ߫ ߊߟߎ߫ ߜߙߊ߬ߢߐ߲߮ ߠߎ߬ ߦߋ߫ ߡߌ߲߫ ߸ ߊߟߎ߫ ߕߘߍ߬ ߡߍ߲ ߠߎ߬ ߜߊߟߏ߲߫ ߠߴߊߟߎ߫ ߟߊ߫؟ ﴿22﴾

ߒ߬ߓߵߊ߬ߟߎ߬ ߘߊߘߐߡߌߘߊߞߎ߲ߧߊ ߕߍ߫ ߞߍ߫ ߝߏߦߌ߬ ߘߌ߫ ߸ ߝߏ߫ ߞߵߊ߬ ߝߐ߫ ߞߏ߫ ߊ߰ ߒ ߣߌ߫ ߒ߬ ߡߊ߰ߙߌ߬ ߊߟߊ߫ ߕߍ߫ ߸ ߒ߬ ߡߊ߫ ߞߍ߫ ߛߏߡߊ߫ ߟߎ߫ ߘߌ߫ ߡߎ߰ߡߍ߫ ﴿23﴾

ߒ߬ߓߵߊ߬ ߝߟߍ߫ ߓߊ߫ ߸ ߊ߬ߟߎ߬ ߦߋ߫ ߥߎߦߊ ߟߊ߫ ߟߴߊ߬ߟߎ߫ ߖߘߍ߬ ߟߊ߫ ߢߊ ߡߍ߲ ߸ ߞߵߊ߬ ߕߍ߬ߘߍ߫ ߊ߬ߟߎ߬ ߟߊ߫ ߖߏ߬ ߞߎ߲߬ߘߐߕߍ߰ߣߍ߲ ߓߍ߯ ߓߘߊ߫ ߕߎߣߎ߲߫ ߊ߬ߟߎ߫ ߡߊ߬ ߖߋߎ߲߫ ﴿24﴾

ߊ߬ߟߎ߬ ߘߏ߫ ߦߴߊ߬ ߕߟߏߡߊߟߐ߬ ߟߴߌ ߟߊ߫ ߛߐ߲߬ ߖߐ߫ ، ߞߵߊ߬ ߕߘߍ߬ ߘߏ߲߬ ߊ߲ ߣߐ߬ ߕߎ߲߯ߟߊ߲߫ ߠߋ߬ ߟߊ߫ ߟߴߊ߬ߟߎ߫ ߛߣߐ߬ߡߍ ߟߎ߬ ߢߍߡߊ߬ ߸ ߊ߬ߟߎ߬ ߞߊߣߊ߬ ߝߊ߰ߡߎ߲߬ߠߌ߲߫ ߞߍ߫ ߊ߬ ߟߊ߫ ، ߞߊ߬ ߜߋߘߋ߲ߟߊ߲ ߟߴߊ߬ߟߎ߬ ߕߟߏ ߟߎ߬ ߝߣߊ߫ ߟߊ߫ ߸ ߊ߬ߟߎ߬ ߓߊ߯ ߘߊ߬ߟߎ ߝߋ߲-ߋ-ߝߋ߲߫ ߦߋ߫ ߏ߬ ߘߐ߫ ߸ ߊ߬ߟߎ߬ ߕߍ߫ ߟߊ߫ ߏ߬ ߟߊ߫ ، ߝߏ߫ ߓߊ߲߬ߓߊ߮ ߟߎ߬ ߘߌ߫ ߥߴߌߟߋ ߖߍ߬ߘߍ ߝߍ߬ ߸ ߞߵߌ ߘߊߘߐߖߊ߬ ߝߘߌߝߘߌ߫ ߸ ߞߵߊ߬ ߝߐ߫ ߛߐ߲߬ ߞߏ߫ ( ߞߎ߬ߙߊ߬ߣߊ) ߣߌ߲߬ ߕߍ߫ ߝߏߦߌ߬ ߘߌ߫ ߝߏ߫ ߝߟߐ߫ ߡߐ߮ ߟߎ߬ ߟߊ߫ ߛߌߙߌ߲߫ ( ߞߘߐ ) ߟߎ߬ ﴿25﴾

ߊ߬ߟߎ߬ ߦߋ߫ ( ߡߐ߱ ) ߟߎ߬ ߝߊߕߊ߲ߕߌ߫ ߟߴߊ߬ ߡߊ߬ ߸ ߊ߬ߟߎ߫ ߖߍ߬ߘߍ ߦߴߊ߬ߟߎ߬ ߡߊߓߐ߫ ߟߴߊ߬ ߟߊ߫ ، ߊ߬ߟߎ߫ ߘߏ߲߬ ߕߍ߫ ߡߐ߰ ߛߌ߫ ߟߊߕߏ߫ ߟߴߊ߬ ߘߐ߫ ߊ߬ߟߎ߫ ߖߍ߬ߘߍ ߞߐ߫ ، ߊ߬ߟߎ߬ ߕߴߏ߬ ߟߋ ߞߊ߬ߟߊߡߊ߬ ﴿26﴾

ߤߊ߲߫ ߸ ߣߴߌ ߞߵߊ߬ߟߎ߬ ߦߋ߫ ߊ߬ߟߎ߬ ߟߊߟߐ߬ ߕߎߡߊ ߕߊ ߡߊ߬ ߸ ߌ ߘߴߊ߬ߟߎ߬ ߞߊ߲ ߡߍ߲߫ ߞߏ߫ ߊ߯ߟߊ߲߫ ߸ ߊ߲ ߣߊ߬ߕߊ ߦߋ߫ ߡߍ߲ ߘߌ߫ ߕߋ߲߬ ߸ ߞߵߊ߲ ߠߊߛߊ߬ߦߌ߲߬ ( ߘߎߢߊ߫ ߘߐ߫ ) ߸ ߊ߲ ߕߍ߫ ߥߊ߫ ߒ߬ ߡߊ߰ߙߌ ߟߊ߫ ߟߝߊߙߌ ߟߎ߬ ߡߊߛߐ߬ߛߐ߫ ߡߎ߬ߕߎ߲߬ ߸ ߊ߲ ߘߏ߲߬ ߘߌ߫ ߞߍ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߘߏ߫ ߘߌ߫ ﴿27﴾

ߓߊ߬ߙߌ߬ ߏ߬ ߕߍ߫ ߞߍ߫ ߡߎ߬ߕߎ߲߬ ، ߓߊ ߏ߬ ߦߴߊ߬ ߕߘߍ߬ ߟߊ߫ ߟߋ߬ ߸ ߊ߬ߟߎ߫ ߕߎ߲߬ ߦߋ߫ ߡߍ߲ ߘߏ߲߰ ߠߊ߫ ߞߘߐ߬ߡߊ߲߫ ߸ ߏ߬ ߓߘߊ߫ ߓߌ߬ߟߊ߬ ߜߍ ߘߐ߫ ߊ߬ߟߎ߬ ߢߊߞߘߐ߫ ، ߞߏ߬ߣߌ߲߬ ߌ߬ߦߏ߯ ߞߟߋ߫ ߸ ߤߟߴߊ߬ߟߎ߬ ߟߊߛߊ߬ߦߌ߬ ߘߊ߫ ߸ ߊ߬ߟߎ߬ ߘߌ߫ ߛߊ߬ߦߌ߲߬ ( ߊ߬ߟߎ߫ ߛߐ߲߬ ߞߘߐ ߡߊ߬ ) ߊ߬ߟߎ߬ ߝߊߕߊ߲ߕߌߣߍ߲߫ ߕߘߍ߬ ߡߍ߲ ߡߊ߬ ، ߓߊߏ߬ ߥߎߦߊ߫ ߝߐߟߊ ߟߎ߫ ߟߋ߬ ﴿28﴾

ߊ߬ߟߎ߬ ߞߊ߲߫ ߠߋ߬ ߞߏ߫ ߓߍߓߊ߯ߦߊ߫ ߜߘߍ߫ ߛߌ߫ ߕߍ߫ ߸ ߝߏ߫ ߊ߲ ߠߊ߫ ߘߎߢߊ߫ ߢߣߊߡߦߊ ، ߓߊ߬ߙߌ߬ ߝߋߎ߫ ߸ ߊ߲ ( ߛߎ߭ ) ߕߍߣߊ߬ ߟߊߥߟߌ߬ ߟߊ߫ ﴿29﴾

ߤߊ߲߫ ߸ ߣߴߌ ߞߵߊ߬ߟߎ߬ ߟߊߟߐ߬ߣߍ߲ ߦߴߊ߬ߟߎ߫ ߡߊ߰ߙߌ ߣߊ߰ߟߊ߫ ߸ ߏ߬ ߦߴߊ߬ߟߎ߫ ߢߌ߬ߣߌ߲߬ߞߊ ߞߊ߲߬ ߸ ߞߏ߫ ߦߊ߯ߟߊ߫ ߣߌ߲߬ ( ߝߣߊ߫ ) ߕߍ߫ ߕߎ߬ߢߊ߬ ߘߌ߫ ߓߊ߬؟ ߊ߬ߟߎ߬ ߘߴߊ߬ ߖߋ߬ߓߌ߬ ߞߏ߫ ߤߊ߯ߟߌ߫ ߸ ߊ߬ ߦߴߊ߲ ߣߌ߫ ߒ߬ ߡߊ߰ߙߌ ߕߍ߫ ، ߏ߬ ߓߊ߯ ߞߍ߫ ߊߟߊ߫ ߘߴߊ߬ ߝߐ߫ ߞߏ߫ ߒ߬ߓߵߊߟߎ߯ ߖߊ߲߰ߞߕߊ ߡߊߜߙߏ߬ ߸ ߞߊ߬ߡߊߛߐ߬ߘߐ߲߬ ߊߟߎ߫ ߟߊ߫ ߓߊ߲߬ߓߊ߰ߦߊ ߝߍ߬ ﴿30﴾

ߡߐ߱ ߟߎ߬ ߓߘߊ߫ ߓߣߐ߬ ߸ ߡߍ߲ ߠߎ߬ ߕߏ߫ ߘߴߊߟߊ߫ ߓߍ߲߬ߢߐ߲߰ߦߊ ߡߊߛߐ߬ߛߐ߬ ߟߊ߫ ߝߎߚߎ߫ ߸ ߝߏ߫ ߟߐ߬ߓߊ ߕߎ߬ߡߊ ߣߊ߬ ߘߊ߫ ߓߙߵߊ߬ߟߎ߬ ߘߐ߫ ، ߊ߬ߟߎ߬ ߘߴߊ߬ ߝߐ߫ ߛߊ߫ ߞߏ߫ ߊ߯ߟߊ߲߫ ߸ ߊ߲ ߞߊ߬ ߡߊ߬ߓߌ߬ߟߊ߬ߟߌ ߡߍ߲ ߞߍ߫ ߟߐ߬ߓߊ ߞߏߢߊ ߘߐ߫ ߸ ߏ߬ ߘߏ߲߬ ߣߡߌߛߊ ߦߋ߫ ߒ߬ߠߎ߬ ߟߊ߫ ߕߋ߲߬ ߥߍ߫ ، ߏ߬ ߕߎ߬ߡߴߊ߬ߟߎ߫ ߘߏ߬ߣߌ߲ ߠߎ߬ ߟߊߣߍ߲߫ ߊ߬ߟߎ߬ ߞߐ ߟߎ߫ ߞߊ߲߬ ߜߌ߫ ، ߤߊ߲߫ ߸ ߊ߬ߟߎ߬ ߦߋ߫ ߘߏ߬ߣߌ߲߬ ߖߎ߯ ߕߊ߬ ߟߴߏ߬ ߘߌ߫ ߞߟߋ߫ ﴿31﴾

ߘߎߢߊ߫ ߢߣߊߡߦߊ ߕߍ߫ ߝߏߦߌ߬ ߘߌ߫ ߕߏߟߏ߲ ߣߌ߫ ߣߊ߰ߣߊ߮ ߞߐ߫ ، ߒ߬ߓߊ߬ ߟߊߞߌߙߊ߫ ߛߏ ߛߊ߫ ߸ ߏ߬ ߟߋ ߤߙߊ ߘߌ߫ ߝߊ߲ߕߊ߲ߞߟߊ ߟߎ߬ ߦߋ߫ ، ߦߊ߯ߟߴߊߟߎ߫ ߕߴߏ߬ ߢߊߦߋ߫ ߟߊ߫ ߓߊ߬؟ ﴿32﴾

ߊ߲ߠߎ߫ ߞߵߊ߬ ߟߐ߲߫ ߖߐ߫ ߸ ߒ ߞߏ߫ ߊ߬ߟߎ߬ ߟߊ߫ ߞߎߡߊ ߟߎ߬ ߦߋ߫ ߜߊ߬ ߟߴߌ ߟߊ߫ ، ߊ߬ߟߎ߬ ߕߴߌߟߋ ߛߐ߬ߛߐ߬ ߟߊ߫ ߓߏ߬ ߸ ߞߏ߬ߣߵߊ߬ߟߋ߬ ߕߐ߬ߢߍ߰ߒߕߋ ߟߎ߬ ߦߋ߫ ߊߟߊ߫ ߟߊ߫ ߟߝߊߙߌ ߟߎ߫ ߟߋ߬ ߡߊߛߐ߬ߛߐ߬ ߟߊ߫ ﴿33﴾

ߞߋߟߊ߫ ߛߘߍߡߊ߲߫ ߓߘߊ߫ ߡߊߛߐ߬ߛߐ߬ ߌߟߋ ߢߍ߫ ߞߘߐ߬ߡߊ߲߫ ، ߏ߬ ߟߎ߫ ߞߵߊ߬ߟߎ߫ ߡߎ߬ߢߎ߲߫ ߊ߬ߟߎ߫ ߛߐ߬ߛߐ߬ ߞߏ ߓߍ߯ ߞߊ߲߬ ، ߊ߬ߟߎ߬ ߕߙߐ߫ ߘߊ߫ ߝߎߚߎ߫ ߸ ߝߏ߫ ߊ߲ ߠߊ߫ ߘߍ߬ߡߍ߲߬ߠߌ߲ ߣߊ߬ ߘߴߊ߬ߟߎ߫ ߡߊ߬ ، ߝߊ߬ߟߋ߲߬ߓߊ߯ ߘߏ߲߬ ߕߍ߫ ߊߟߊ߫ ߟߊ߫ ߞߎߡߊ ߟߎ߬ ߟߊ߫ ، ߞߏ߬ߣߌ߲߬ ߘߏ߫ ߘߏ߲߬ ߓߘߊ߫ ߣߵߌ ߡߊ߬ ߞߋߟߊߡߐ߮ ߟߎ߫ ߖߊ߲߬ߖߏ߲ ߘߐ߫ ߞߟߋ߫ ﴿34﴾

ߣߴߊ߬ߟߎ߬ ߟߊ߫ ߞߐߘߏ߲ ߜߟߍ߬ߦߊ߬ߣߍ߲߬ ߞߍ߫ ߘߴߌ ߡߊ߬ ، ߣߴߌ ߓߴߛߋ߫ ߸ ߌ ߦߋ߫ ߝߙߏߞߏ߫ ߢߌߣߌ߲߫ ߘߎ߱ ߘߐ߫ ߥߟߊ߫ ߞߊ߬ ߛߊ߲߬ߞߊ߬ߛߊ߲ߞߊ߫ ߢߌߣߌ߲߫ ߛߊ߲ߘߐ߫ ߸ ߏ߬ ߓߊ߯ ߞߍ߫ ߌ (ߞߐߛߊߦߌ߲) ߦߋ߫ ߣߊ߬ ߡߊ߲߬ߕߊߣߌ߲ ߘߏ߫ ߘߴߊ߬ߟߎ߫ ߡߊ߬ ، ߊ߬ ߘߏ߲߬ ߓߊ߯ ߊߟߊ߫ ߘߌߦߊ߫ ߸ ߊ߬ ߕߎ߲߬ ߘߴߊ߬ߟߎ߬ ߓߍ߯ ߟߊߘߍ߬ ߞߊ߲ߘߦߊ ߞߊ߲߬ ߞߐߘߍ߫ ، ߒ߬ߓߊ߬ ߌ ߞߊߣߵߌ ߖߘߍ߬ ߞߍ߫ ( ߡߐ߰ ) ߞߎ߲ߒߕߊ߲ ߠߎ߬ ߝߋ߲߫ ߘߌ߫ ߘߋ߬ ﴿35﴾

ߡߍ߲ ߠߎ߬ ߦߋ߫ ߖߋ߬ߓߌ߬ߟߌ ߞߍ߫ ߟߊ߫ ߸ ߏ߬ ߟߎ߫ ߟߋ߬ ߡߍ߲ߠߌ߲ߠߊ ߟߎ߬ ߘߌ߫ ، ߛߎ߭ ߟߎ߬ ߛߊ߫ ߸ ߊߟߊ߫ ߓߍߣߵߏ߬ ߟߎ߬ ߟߊߥߌ߬ߟߌ߫ ߟߋ߬ ߛߋߚߋ߫ ، ߏ߬ ߞߐ߫ ߕߘߋ߫ ߸ ߊ߬ߟߎ߬ ߟߊߛߊ߬ߦߌ߲߬ߕߐ߫ ߊ߬ߟߋ ߟߋ߫ ߡߊ߬ ﴿36﴾

ߊ߬ߟߎ߬ ߞߊ߲߫ ߠߋ߬ ߞߏ߫ ߥߟߊߞߏ߫ ߡߊ߲߬ߕߊߣߌ߲߫ ߕߘߍ߬ ߟߊߖߌ߰ ߊ߬ ߡߵߊ߬ ߡߊ߰ߙߌ ߓߟߏ߫ ، ߊ߬ߟߎ߫ ߖߋ߬ߓߌ߬ ߞߏ߫ ߊߟߊ߫ ߓߴߛߋ߫ ߖߐ߫ ߞߊ߬ ߡߊ߲߬ߕߊߣߌ߲ ߠߊߖߌ߰ ، ߓߊ߬ߙߌ߬ ߊ߬ߟߎ߫ ߝߊ߲߬ߓߊ ߟߋ߬ ߡߊ߫ ߝߏߦߌ߬ ߟߐ߲߫ ﴿37﴾

ߡߊ߬ߛߍ߲߬ߛߍ߲߬ߓߊ߰ ߛߌ߫ ߕߍ߫ ߘߎ߱ ߞߊ߲߬ ߸ ߞߣߐ߬ ߛߌ߫ ߕߍ߫ ߊ߬ ߜߊ߲߫ ߠߴߊ߬ ߞߊ߬ߡߊ߲߫ ߝߌ߬ߟߊ ߟߊ߫ ߸ ߣߌ߫ ߡߍ߲ ߠߎ߬ ߕߍ߫ ߊ߬ߟߎ߬ ߕߊ߫ ߡߊ߲߬ߕߏ߲߫ ߠߎ߫ ߘߌ߫ ߦߏ߫ ߊߟߎ߫ ߦߋ߫ ߢߊ ߡߍ߲ ، ߊ߲ߠߎ߫ ߞߏ߬ߣߌ߲ ߡߊ߫ ߝߏߦߌ߬ ( ߛߓߍ߫ ߞߏ ) ߡߊߓߌ߬ߟߊ߬ ߟߍߙߊ ߞߣߐ߫ ، ߏ߬ ߞߐ߫ ߸ ߝߋ߲ ߏ߬ ߓߍ߯ ߘߌߣߊ߬ ߟߊߘߍ߬ ߊ߬ߟߎ߫ ߡߊ߰ߙߌ ߣߊ߰ߟߊ߫ ߖߐ߫ ﴿38﴾

ߡߐ߱ ߡߍ߲ ߠߎ߫ ߞߊ߬ ߒ߬ ߠߊ߫ ߘߊ߬ߟߎ ߟߎ߬ ߡߊߛߐ߬ߛߐ߬ ߸ ߏ߬ ߟߎ߫ ߟߋ߬ ߛߌ߲ߛߌ߲ߓߊ ߟߎ߬ ߣߌ߫ ߓߏߓߏ ߟߎ߬ ߘߌ߫ ߘߓߌ߬ ߞߎߘߎ߲ ߠߎ߬ ߘߐ߫ ߞߌߘߌ߲ߜߊ߲߫. ߡߍ߲ ߓߊ߯ ߊߟߊ߫ ߘߌߦߊ߫ ߸ ߊ߬ ߘߴߏ߬ ߟߊߝߟߌ߬ ، ߡߍ߲ ߓߊ߯ ߊ߬ ߘߌߦߊ߫ ߸ ߊ߬ ߘߴߏ߬ ߓߌ߬ߟߊ߬ ߛߌߟߊ߫ ߕߋߟߋ߲ߣߍ߲߫ ߓߐߚߐ ߞߊ߲߬ ﴿39﴾

ߊ߬ ߝߐ߫ ߞߏ߫ ߊߟߎ߫ ߢߊ߯ ߊ߬ ߟߊ߫ ߓߊ߬ ߸ ߣߌ߫ ߊߟߊ߫ ߟߊ߫ ߖߊ߲߰ߞߕߊ ߣߊ߬ ߘߴߊߟߎ߫ ߡߊ߬ ߸ ߥߟߊ߫ ߟߐ߬ߓߊ ߣߊ߬ ߘߴߊߟߎ߫ ߡߊ߬ ߸ ߊߟߎ߫ ߦߋ߫ ߝߋ߲߫ ߜߘߍ߫ ߟߋ߬ ߞߟߌ߫ ߟߊ߫ ( ߏ߬ ߘߐ߫ ) ߓߊ߬ ߡߍ߲ ߕߍ߫ ߊߟߊ߫ ߘߌ߫ ߸ ߣߴߊߟߎ߫ ߦߋ߫ ߕߎ߬ߢߊ߬ ߕߌ߯ ߟߎ߫ ߘߌ߫؟ ﴿40﴾

ߍ߲߬ߍ߲ߍ߲߬ ߝߋߎ߫ ߸ ߊߟߎ߫ ߦߴߊ߬ߟߋ ߟߋ߬ ߞߟߌ߫ ߟߊ߫ ߞߍ߰ ، ߏ߬ ߓߊ߯ ߞߍ߫ ߊߟߎ߫ ߣߵߊ߬ ߞߟߌ߫ ߟߊ߫ ߞߏ ߡߍ߲ ߡߊ߬ ߸ ߊ߬ ߘߴߏ߬ ߓߐ߫ ߊߟߎ߫ ߞߊ߲߬ ߸ ߣߴߏ ߞߵߊ߬ ߘߌߦߊ߫ ، ߏ߬ ߕߎ߬ߡߊ ߊߟߎ߫ ߓߘߊ߫ ߢߌ߬ߣߊ߬ ߖߏ߭ ߓߍ߯ ߞߐ߫ ߸ ߊߟߎ߫ ߣߊ߬ ߡߍ߲ ߠߎ߫ ߝߙߊ߬ ߟߴߊ߬ ߞߊ߲߬ ﴿41﴾

ߊ߲ ߞߊ߬ ߞߋߟߊ ߟߐ߬ ߡߊ߲߬ߕߏ߲ ߘߏ߫ ߟߎ߫ ߡߊ߬ ߌߟߋ ߢߍ߫ ߞߘߐ߬ߡߊ߲߫ ߸ ߊ߲ ߞߵߏ߬ ߟߎ߫ ߡߌ߬ߘߊ߫ ߕߣߊ߬ߡߊ ߟߎ߬ ߣߌ߫ ߕߙߐߦߊ ߟߎ߬ ߟߊ߫ ߸ ߛߴߊ߬ߟߎ߬ ߘߴߊ߬ߟߎ߬ ߡߊߞߊ߬ߛߌ߬ ﴿42﴾

ߥߟߊߞߏ߫ ߊ߲ ߠߊ߫ ߕߣߊ߬ߡߊ ߣߊ߬ߣߍ߲ ߊ߬ߟߎ߫ ߡߊ߬ ߸ ߊ߬ߟߎ߫ ߕߘߍ߬ ߦߴߊ߬ߟߎ߬ ߡߊߞߊ߬ߛߌ߬ ، ߓߊ߬ߙߌ߬ ߊ߬ߟߎ߫ ߖߎ߬ߛߎ ߖߊ߬ ߘߊ߫ ߟߋ߬ ، ߜߍ߬ߘߍ ߝߣߊ߫ ߞߵߊ߬ߟߎ߫ ߗߋߥߊߟߌ ߟߎ߬ ߟߊߗߋ߲߬ߧߴߊ߬ߟߎ߬ ߢߊߞߘߐ߫ ﴿43﴾

ߕߎ߬ߡߊ ߡߍ߲ ߊ߬ߟߎ߫ ߢߌ߬ߣߊ߬ ߘߴߊ߬ߟߎ߫ ߞߊ߬ߥߊ߲߬ߘߌ߬ ߞߊ߲ ߞߐ߫ ߸ ߊ߲ ߞߊ߬ ߝߋ߲ ߓߍ߯ ߘߊ ߟߎ߬ ߟߊߞߵߊ߬ߟߎ߬ ߦߋ߫ ߔߏ߲ߕߏ߲ߔߊ߲ߕߊ߲߫ ߸ ߝߏ߫ ߊ߬ߟߎ߬ ߛߍߥߊ߫ ߘߴߊ߬ߟߎ߬ ߛߐ߫ ߝߋ߲ ߠߊ߫ ، ߊ߲ ߣߊ߬ ߘߴߊ߬ߟߎ߫ ߓߙߊ߬ߒ߬ߘߐ߬ ߡߌߘߊ߫ ߗߐߞߎ߬ߡߐ߬ ، ߘߊ߬ߡߊ߲߬ߛߊ߫ ߊ߬ߟߎ߫ ߖߌ߰ߕߍ߰ ߘߊ߫ ߥߘߊߎ߫ ﴿44﴾

ߡߌ߬ߙߌ߲߬ߘߌ ߞߏߕߍ߰ߣߍ߲ ߓߍ߯ ߟߴߏ߬ ߘߌ߫ ߸ ߡߍ߲ ߠߎ߫ ߞߊ߬ ߕߐ߬ߢߍ߮ ߞߍ߫ ، ߒ߬ߓߊ߬ ߕߊ߲߬ߘߏ ߊߟߊ߫ ߦߋ߫ ߸ ߖߊ߯ߓߊ ߟߎ߫ ߡߊ߰ߙߌ ߟߋ߬ ﴿45﴾

ߊ߬ ߝߐ߫ ߞߏ߫ ߊߟߎ߫ ߞߵߊ߬ ߦߋ߫ ߓߊ߬ ߸ ߣߌ߫ ߊߟߊ߫ ߞߵߊߟߎ߫ ߕߟߏߘߋ߲ ߠߎ߬ ߣߴߊߟߎ߫ ߢߊߘߋ߲ ߠߎ߫ ߡߌ߬ߘߊ߬ ߸ ߞߵߊߟߎ߫ ߛߣߐ߬ߡߍ ߟߎ߬ ߟߊߣߘߐ߫ ، ߣߌ߫ ߊߟߊ߫ ߕߍ߫ ߸ ߡߊ߰ߙߌ߬ ߜߘߍ ߖߐ߲߫ ߓߍߣߵߏ߬ ߟߎ߬ ߘߴߊߟߎ߫ ߡߊ߬؟ ߊ߬ ߝߟߍ߫ ߓߊ߫ ߊ߲ ߦߋ߫ ߟߝߊߙߌ ߟߎ߬ ߘߐߛߊ߬ߦߌߛߊ߬ߦߌ߬ ߟߊ߫ ߢߊ ߡߍ߲ ߸ ߞߏ߬ߣߵߊ߬ߟߎ߬ ߦߴߊ߬ߟߎ߬ ߞߐߘߏ߲߬ ߠߴߏ߬ ߓߍ߯ ߞߐ߫ ߡߎߣߎ߲߬ ﴿46﴾

ߊ߬ ߝߐ߫ ߞߏ߫ ߊߟߎ߫ ߢߊ߯ ߊ߬ ߟߊ߫ ߓߊ߬ ߸ ߣߌ߫ ߊߟߊ߫ ߟߊ߫ ߖߊ߲߰ߞߕߊ ߣߊ߬ ߘߊ߫ ߓߙߊ߬ ߊߟߎ߫ ߢߌ߬ߣߡߊ߬ߞߏ߬ߟߏ߲߬ߕߐ ߘߐ߫ ߸ ߥߟߊ߫ ߜߍ ߘߐ߫ ߸ ߖߍߣߍ߲ ߘߌ߫ ߛߌߟߊߛߊ߬ ߣߌ߫ ߡߌ߬ߙߌ߲߬ߘߌ߫ ߕߐ߬ߢߍ߰ߒߕߋ ߟߎ߬ ߕߍ߫؟ ﴿47﴾

ߊ߲ ߕߍ߫ ߞߋߟߊ ߟߎ߬ ߗߋ߫ ߟߊ߫ ߝߋ߲߫ ߜߘߍ߫ ߟߎ߫ ߘߌ߫ ߸ ߝߏ߫ ߘߟߊߝߎߟߌߟߊ ߟߎ߬ ߣߌ߫ ߖߊ߰ߛߙߋ߬ߡߊ߬ߟߌ߬ߟߊ ߟߎ߬. ߒ߬ߓߊ߬ ߡߍ߲ ߓߊ߯ ߘߍ߲߬ߞߣߍ߬ߦߊ߫ ( ߏ߬ ߟߎ߫ ߡߊ߬) ߞߊ߬ ߟߢߊ߬ߟߌ ߞߍ߫ ߸ ߛߌߟߊ߲߫ ߕߍ߫ ߏ߬ ߟߎ߬ ߟߊ߫߸ ߊ߬ߟߎ߫ ߘߏ߲߬ ߕߍߣߊ߫ ߛߎ߬ߣߎ߲߬ ߠߊ߫ ﴿48﴾

ߞߏ߬ߣߌ߲߬ ߡߍ߲ ߠߎ߬ ߓߊ߯ ߒ߬ ߠߊ߫ ߟߝߊߙߌ ߟߎ߬ ߡߊߛߐ߬ߛߐ߬ ߸ ߖߊ߲߰ߞߕߊ ߘߌ߫ ߡߊ߰ ߏ߬ ߟߎ߬ ߟߊ߫ ߞߊ߬ߡߊߛߐ߬ߘߐ߲߫ ߊ߬ߟߎ߬ ߟߊ߫ ߔߊߟߊ߲ߞߊ ߝߍ߬ ﴿49﴾

ߊ߬ ߝߐ߫ ߞߏ߫ ߒ ߕߴߊ߬ ߝߐ߫ ߊߟߎ߫ ߦߋ߫ ߒ ߞߏ߫ ߊߟߊ߫ ߟߊ߫ ( ߣߍߡߊ ) ߡߣߐ߬ߓߏ߲ ߠߎ߬ ߦߋ߫ ߒ ߓߟߏ߫ ، ߒ ߘߏ߲߬ ߡߊ߫ ߞߏ߫ ߘߏ߲߰ߣߍ߲߬ ߟߐ߲߫ ، ߒ ߕߴߊ߬ ߝߐ߫ ߊߟߎ߫ ߦߋ߫ ߝߣߊ߫ ߒ ߞߏ߫ ߒ ߧߋ߫ ߞߋ߲ߛߐ߲߫ (ߡߟߍ߬ߞߊ߬) ߘߌ߫ ، ߒ ߕߍ߫ ߝߏߦߌ߬ ߟߊߓߊ߬ߕߏ ߞߊ߲߬ ߝߏ߫ ߦߟߌߘߏ߲߫ ߞߊ߲ ߡߍ߲ ߦߋ߫ ߗߋ߫ ߟߊ߫ ߒ ߡߊ߬ ، ߊ߬ ߝߐ߫ ߞߏ߫ ߦߊ߯ߟߊ߫ ߝߎߦߋ߲ ߣߌ߫ ߢߡߊ ߘߌ߫ ߞߢߊ߫ ߓߊ߬؟ ߦߊ߯ߟߴߊߟߎ߫ ߕߍ߫ ߊߟߎ߫ ߕߊ߰ߛߌ߬ ߟߊ߫ ߟߋ߫ ߓߊ߬؟ ﴿50﴾

ߌ ߦߋ߫ ߖߊ߬ߛߙߋ߬ߡߊ߬ߟߊ ߞߍ߫ ߊ߬ ߟߊ߫ ߡߐ߰ ߟߎ߫ ߟߋ߬ ߦߋ߫ ߸ ߡߍ߲ ߠߎ߬ ߦߋ߫ ߛߌߟߊ߲߫ ߠߴߊ߬ߟߎ߬ ߟߊߘߍ߬ ߞߏ ߘߐ߫ ߊ߬ߟߎ߫ ߡߊ߰ߙߌ ߣߊ߰ߟߊ߫ ߸ ߏ ߕߎ߬ߡߊ ߢߌ߲߬ ߣߌ߫ ߛߟߏ߬ߣߊ߬ߟߌ߬ߟߊ߫ ߕߍ߫ ߊ߬ߟߎ߬ ߟߊ߫ ߣߌ߫ ߊߟߊ߫ ߕߍ߫ ، ߖߐ߲߰ߛߴߊ߬ߟߎ߬ ߘߴߊ߬ߟߎ߬ ߝߊ߲ߕߊ߲߬ߞߊ߫ ﴿51﴾

ߌ ߞߊߣߊ߬ ߡߐ߱ ߟߎ߬ ߜߍ߲߫ ߌ ߞߐ߫ ߸ ߡߍ߲ ߠߎ߬ ߦߴߊ߬ߟߎ߫ ߡߊ߰ߙߌ ߞߟߌ߫ ߟߊ߫ ߛߐ߰ߡߊ߬ߘߊ ߣߌ߫ ߥߎ߬ߙߊ߬ߘߊ ߟߊ߫ ߸ ߊߟߊ߫ ߞߏߟߘߊ ߢߌߣߌ߲ ߡߊ߬ ، ߏ߬ ߟߎ߬ ߟߊ߫ ߖߊ߬ߕߋ߬ߓߐ߫ ߕߴߌߟߋ ߡߊ߬ ߝߏߦߌ߬ ߘߐ߫ ߸ ߌ ߝߣߊ߫ ߟߊ߫ ߖߊ߬ߕߋ߬ߓߐ߫ ߕߴߏ߬ ߟߎ߫ ߡߊ߬ ߝߏߦߌ߬ ߘߐ߫ ، ߌ ߦߴߏ߬ ߟߎ߬ ߜߍ߲߫ ߠߊ߫ ߟߋ߬ ߞߵߌ ߞߍ߫ ߕߐ߬ߢߍ߰ߒߕߋ ߟߎ߬ ߘߏ߫ ߘߌ߫ ߞߍ߬؟ ﴿52﴾

ߒ߬ߓߵߊ߲ ߣߵߊ߬ߟߎ߬ ߘߏ߫ ߟߎ߫ ߞߘߐߓߐ߫ ߟߊ߫ ߘߏ߫ ߟߊ߫ ߕߋ߲߬ ߠߋ߬ ߸ ߛߴߊ߬ߟߎ߬ ߘߴߊ߬ ߝߐ߫ ߞߏ߫ ߊߟߊ߫ ߝߎߣߎ߲ߛߙߋߦߊߣߍ߲߫ ߢߌ߲߬ ߠߎ߫ ߟߋ߫ ߡߊ߬ ߊ߲ ߕߐ߭ ߟߎ߬ ߕߍߡߊ߬ ߓߊ߬؟ ߊ߬ ߝߐ߫ ߊߟߊ߫ ߡߊ߫ ߞߏߢߌߡߊߟߐ߲ߠߊ ߟߎ߬ ߟߐ߲߫ ߓߍ߯ ߘߌ߫ ߘߍ߫؟ ﴿53﴾

ߣߌ߫ ߡߐ߱ ߟߎ߫ ߣߊ߬ ߘߴߌ ߕߘߍ߬ ߸ ߡߍ߲ ߠߎ߬ ߟߊߣߍ߲߫ ߒ߬ ߠߊ߫ ߟߝߊߙߌ ߟߎ߬ ߟߊ߫ ߸ ߌ ߦߴߊ߬ ߝߐ߫ ߞߏ߫ ߖߐ ߦߴߊߟߎ߫ ߡߊ߬ ، ߊߟߎ߫ ߡߊ߰ߙߌ ߞߊ߬ ߤߌߣߊ ߛߓߍ߫ ߊ߬ ߖߍ߬ߘߍ߫ ߡߊ߬ ߟߋ߬ ߸ ߞߏ߫ ߊߟߎ߫ ߡߍ߲ ߓߊ߯ ߖߎ߯ߡߊ߲߫ ߞߋߟߋ߲߫ ߞߍ߫ ߟߐ߲ߠߌ߲ߓߊߟߌߦߊߡߊ߬ ، ߞߊ߬ ߓߊ߲߫ ߞߵߊ߬ ߖߘߍ߬ߟߊߛߊ߬ߦߌ߬ ߏ߬ ߞߐ߫ ، ߞߊ߬ ߟߢߊ߬ߟߌ ߞߍ߫ ߸ ߒ߬ߓߵߊߟߊ߫ ߝߣߊ߫ ߦߋ߫ ߦߝߊ߬ߟߊ߫ ߤߌߣߟߊ߫ ߘߌ߫ ﴿54﴾

ߒ߬ߓߵߊ߲ ߧߋ߫ ߟߝߊߙߌ ߟߎ߬ ߝߊߙߊ߲ߝߊߛߌ߫ ߟߊ߫ ߕߊ߲߬ ߠߋ߬ ߸ ߞߊ߬ ߛߐ߲߬ߡߊ ߟߎ߬ ߟߊ߫ ߛߌߟߊ ߓߌ߬ߟߊ߬ ߜߍ ߘߐ߫ ﴿55﴾

ߊ߬ ߝߐ߫ ߞߏ߫ ߒߠߋ ߝߊߕߊ߲ߕߌߣߍ߲߫ ߠߋ߬ ߸ ߞߏ߫ ߒ ߞߊߣߊ߬ ߖߏ߭ ߟߎ߫ ߓߊ߬ߕߏ߬ ߸ ߊߟߎ߫ ߦߋ߫ ߡߍ߲ ߠߎ߬ ߞߟߌ߫ ߟߊ߫ ߞߵߊߟߊ߫ ߕߏ߫. ߊ߬ ߝߐ߫ ߞߏ߫ ߒߠߋ ߕߍ߫ ߊߟߎ߫ ߛߊ߬ߥߏ ߟߎ߬ ߟߊߓߊ߬ߕߏ߬ ߝߋߎ߫ ، ߏ߬ ߓߊ߯ ߞߍ߫ ߒ ߓߘߊ߫ ߝߌ߬ߟߌ߫ ߏ߬ ߘߐ߫ ߸ ߒ ߡߊ߫ ߞߍ߫ ߞߊ߲ߘߊߓߊ߮ ߟߎ߬ ߝߋ߲߫ ߘߌ߫ ߡߎ߬ߕߎ߲߬ ﴿56﴾

ߊ߬ ߝߐ߫ ߞߏ߫ ߒߠߋ ߦߋ߫ ߔߊߞߌ ߟߋ߫ ߞߊ߲߬ ߞߊ߬ ߝߘߊ߫ ߒ ߡߊ߰ߙߌ ߟߊ߫ ، ߊߟߎ ߘߏ߲߬ ߓߘߴߏ߬ ߡߊߛߐ߬ߛߐ߬ ، ߒ߬ߞߵߊߟߎ߫ ߞߙߐߕߐߣߍ߲߫ ߝߋ߲ ߡߍ߲ ߠߊ߫ ߸ ߏ߬ ߕߍ߫ ߒߠߋ ߓߟߏ߫ ߘߋ߬ ، ߞߕߌ ߕߍ߫ ߝߏߦߌ߬ ߓߟߏ߫ ߝߏ߫ ߊߟߊ߫ ، ߊ߬ ߘߏ߲߬ ߦߋ߫ ߕߎ߬ߢߊ ߟߋ߬ ߘߊ߲߬ߕߍ߰ ߟߊ߫ ߸ ߊ߬ߟߋ ߟߋ߫ ߘߏ߲߬ ߦߋ߫ ߞߕߌ߫ ߕߍ߯ߟߊ ߟߎ߬ ߘߐ߫ ߢߌ߬ߡߊ ߘߌ߫ ﴿57﴾

ߊ߬ ߝߐ߫ ߞߏ߫ ߊߟߎ߫ ߞߌߢߍߣߍ߲߫ ߞߏ ߡߍ߲ ߠߊ߫ ߣߴߏ߬ ߕߘߍ߬ ߒߠߋ ߓߟߏ߫ ߸ ߛߊ߫ ߞߏߢߊ ߞߕߌ ߓߘߊ߫ ߕߍ߰ ߒߠߋ ߣߴߊߟߎ ߕߍ߫ ߞߊ߬ ߓߊ߲߫ ، ߊߟߊ߫ ߘߏ߲߬ ߞߊ߬ ߕߐ߬ߢߍ߰ߒߕߋ ߟߎ߬ ߟߐ߲߫ ߠߋ߫ ߘߋ߬ ﴿58﴾

ߞߏ߫ ߘߏ߲߰ߣߍ߲ ߞߏ߲ߢߌ߲ ߠߎ߬ ߦߴߊ߬ߟߋ ߟߋ߬ ߓߟߏ߫ ، ߝߏߦߌ߬ ߕߴߏ߬ ߟߐ߲߫ ߝߏ߫ ߊ߬ߟߋ ، ߊ߬ ߞߵߊ߬ ߟߐ߲߫ ߝߋ߲ ߡߍ߲ ߦߋ߫ ߜߙߋ ߡߊ߬ ߊ߬ ߣߌ߫ ߓߊ ߘߐ߫ ، ߝߌߘߊ߫ ߞߋߟߋ߲߫ ߕߍ߫ ߓߎ߬ߘߎ߲߬ ߝߏ߫ ߊ߬ ߦߴߏ߬ ߟߐ߲߫ ، ߞߡߊ߫ ߞߋߟߋ߲߫ ߕߍ߫ ߘߎ߱ ߘߌ߬ߓߌ ߟߎ߬ ߘߐ߫ ߸ ߝߋ߲߫ ߘߏ߲ߓߏ߫ ߕߍ߫ ߸ ߝߋ߲߫ ߖߊߙߊ߲߫ ߕߍ߫ ߸ ߝߴߏ߬ ( ߛߓߍߣߍ߲ ) ߦߋ߫ ߞߍ߫ ߟߍߙߊ߫ ߘߐߜߍ ߞߣߐ߫ ﴿59﴾

ߊ߬ߟߋ ߟߵߊߟߎ߫ ߟߊߞߢߐ߬ߡߊ߬ ߟߊ߫ ߛߎ ( ߛߎ߬ߣߐ߮ ) ߘߐ߫ ، ߊ߬ ߘߏ߲߬ ߞߵߊ߬ ߟߐ߲߫ ߊߟߎ߫ ߦߋ߫ ߡߍ߲ ߞߍ߫ ߟߊ߫ ߕߋ߬ߟߋ ߘߐ߫ ، ߊ߬ ߦߴߊߟߎ߫ ߟߊߞߎߣߎ߲߫ ߠߊ߫ ( ߛߎ߬ߣߐ߮ ) ߘߐ߫ ߟߋ߬ ߸ ߛߊ߫ ( ߊߟߎ߫ ) ߛߕߊ߫ ߟߐ߯ߟߊߣߍ߲ ߘߌ߫ ߘߝߊ߫ ، ߊߟߎ߫ ߣߊ߬ߕߐ߫ ߛߊ߬ߦߌ߬ ߟߴߊ߬ ߡߊ߬ ߏ߬ ߟߋ ߞߐ߫ ߸ ߊ߬ ߘߴߊߟߎ߫ ߗߋߥߊߟߌ ߓߍ߯ ߖߐ߲ ߠߊߓߐ߫ ߊߟߎ߫ ߡߊ߬ ﴿60﴾

ߊ߬ߟߋ ߟߋ߬ ߞߘߊߡߊߟߌߟߊ ߘߴߊ߬ ߟߊ߫ ߖߐ߲߭ ߠߎ߫ ߞߎ߲߬ߠߊ߫ ، ߊ߬ ߦߋ߫ ߕߏ߫ ߟߊ߫ ߞߣߐ߬ߜߍ߲߬ߠߊ ߟߎ߬ ߗߋ߫ ߟߴߊߟߎ߫ ߡߊ߬ ߟߋ߬ ߝߎߚߎ߫ ߸ ߝߏ߫ ߊߟߎ߫ ߘߏ߫ ߛߕߊ ߦߋ߫ ߛߋ߫ ، ߊ߲ ߠߊ߫ ( ߞߋ߲ߛߐ߲߫) ߞߋߟߊ ߟߎ߬ ߘߴߏ߬ ߛߏߡߊߦߟߍߡߊ߲߫ ، ߏ߬ ߟߎ߫ ߘߏ߲߬ ߕߍ߫ ߞߏߡߊߓߌߟߊ߫ ߞߍ߫ ߟߊ߫ ﴿61﴾

ߏ߬ ߟߋ ߞߐ߫ ߸ ߊ߬ߟߎ߬ ߘߌ߫ ߟߊߛߊ߬ߦߌ߲߫ ߊ߬ߟߎ߫ ߡߊ߰ߙߌ߬ ߓߘߍ ߊߟߊ߫ ߡߊ߬ ߸ ߓߊ ߞߕߌ ߦߴߏ߬ ߟߋ ߓߟߏ߫ ߸ ߊ߬ߟߋ ߟߋ߫ ߘߏ߲߬ ߦߋ߫ ߖߊ߬ߕߋ߬ߓߐ߬ߟߊ ߓߍ߯ ߘߐ߫ ߞߊߟߌߡߊ߲ ߘߌ߫ ﴿62﴾

ߊ߬ ߝߐ߫ ߞߏ߫ ߖߍߣߍ߲ ߊߟߎ߫ ߟߊߞߛߌ߫ ߟߊ߫ ߜߙߋ ߣߌ߫ ߓߊ ߘߌ߬ߓߌ ߟߎ߬ ߘߐ߫؟ ߣߴߊߟߎ߫ ߦߴߊ߬ ߞߟߌ߫ ߟߊ߫ ߡߞߊ߬ߛߌ߬ߟߌ ߘߐ߫ ߊ߬ ߣߌ߫ ߘߏ߲߱ ߘߐ߫ ߸ ߞߏ߫ ߣߴߊ߬ ߞߵߊ߲ ߠߊߞߛߌ߫ ߢߌ߲߬ ߘߐ߫ ߸ ߛߋߚߋ߫ ߊ߲ ߘߌ߫ ߞߍ߫ ߞߏߢߌߡߊߟߐ߲ߠߊ ߟߎ߬ ߘߏ߫ ߘߌ߫ ߟߋ߬ ߘߍ߯ ﴿63﴾

ߊ߬ ߝߐ߫ ߞߏ߫ ߊߟߊ߫ ߟߵߊߟߎ߫ ߟߊߞߛߌ߫ ߟߊ߫ ߣߌ߲߬ ߘߐ߫ ߸ ߊ߬ ߣߌ߫ ߢߊߣߌ߲߫ ߞߏ ߓߍ߯ ߘߐ߫ ، ߊߟߎ߫ ߘߌ߫ ߓߊ߲߫ ߕߎ߲߯ ߞߊ߬ ߡߊ߰ߙߌ߬ ߜߘߍ߫ ߝߊ߬ߙߊ߫ ߏ ߡߊ߬ ﴿64﴾

ߊ߬ ߝߐ߫ ߞߏ߫ ߊ߬ߟߋ ߟߋ߬ ߓߴߛߋ߫ ߞߊ߬ ߖߊ߲߰ߞߕߊ ߘߏ߫ ߟߊߥߟߌ߬ ߊߟߎ߫ ߞߊ߲ߡߊ߬ ߞߊ߬ ߓߐ߫ ߊߟߎ߫ ߞߎ߲߬ߘߐ߫ ߥߟߊ߫ ߞߊ߬ ߓߐ߫ ߊߟߎ߫ ߛߋ߲߬ߞߘߐ߫ ، ߤߊߡߊ߲ߕߍ߫ ߊ߬ ߦߴߊߟߎ߫ ߞߍ߫ ߢߐ߲߮ ߘߐ߫ ߞߙߎߞߊ߫ ߛߌߦߊߡߊ߲ ߠߎ߬ ߘߌ߫ ߸ ߞߵߊߟߎ߫ ߘߏ߫ ߟߊߣߍߣߍ߫ ߘߏ߫ ߜߘߍ߫ ߡߊ߲߬ߕߙߐ ߟߊ߫ ، ߊ߬ ߝߟߍ߫ ߓߊ߫ ߸ ߊ߲ ߧߋ߫ ߟߝߊߙߌ ߟߎ߬ ߘߐߛߊ߬ߦߌߛߊ߬ߦߌ߬ ߟߊ߫ ߢߊ ߡߍ߲ ߸ ߛߴߊߟߎ߬ ߘߴߊ߬ ߝߊ߰ߡߎ߲߬ ﴿65﴾

ߌ ߡߌ߬ߙߌ߲߬ߘߌ ߓߘߊ߫ ߞߎ߬ߙߊ߬ߣߊ ߡߊߛߐ߬ߛߐ߫ ߞߵߊ߬ ߕߘߍ߬ ߜߎ ߕߎ߬ߢߊ߫ ߟߋ߬ ، ߊ߬ ߝߐ߫ ߞߏ߫ ߒ߬ߓߊ߬ ߒߠߋ ߕߍ߫ ߊߟߎ߫ ߜߋ߬ߟߎ߲߬ߓߊ߯ ߘߌ߫ ߘߋ߬ ﴿66﴾

ߖߊ߲߬ߖߏ߲߬ ( ߟߊߛߋߕߊ ) ߘߏ߲߬ ߓߍ߯ ߣߴߊ߬ ߞߐߝߟߌ߫ ߟߋ߬ ، ߞߏ߬ߣߌ߲߬ ߛߋߚߋ߫ ߊߟߎ߫ ߓߍߣߵߊ߬ ߟߐ߲߫ ﴿67﴾

ߡߍ߲ ߠߎ߬ ߦߴߊ߬ߟߎ߬ ߛߏ߲߯ߓߊ߫ ߟߴߊ߲ ߠߊ߫ ߟߝߊߙߌ ߟߎ߬ ( ߘߕߐߛߌ ) ߘߐ߫ ߸ ߣߴߌ ߞߵߏ߬ ߟߎ߬ ߦߋ߫ ( ߦߌߟߊ ߡߍ߲ ) ߌ ߦߴߌ ߞߐߘߏ߲߬ ߊ߬ߟߎ߬ ߟߊ߫ ߔߏ߲߫ ، ߝߏ߫ ߊ߬ߟߎ߬ ߓߊ߯ ߊ߬ߟߎ߬ ߛߏ߲߯ߓߊ ߘߊߡߌ߬ߣߊ߫ ߓߊ߬ߘߏ߬ ߜߘߍ߫ ߘߐ߫ ، ߒ߬ߓߊ߬ ߣߌ߫ ߜߍ߬ߘߍ ߞߵߌ ߟߊߢߌ߬ߣߊ߬ ߸ ߌ ߞߊߣߊ߬ ߕߏ߫ ߛߌ߱ ߘߐ߫ ߌ ߖߊ߲߬ߓߌߟߊ ߞߐ߫ ߡߌ߬ߙߌ߲߬ߘߌ߫ ߕߐ߬ߢߍ߰ߒߕߋ ߟߎ߫ ߝߍ߬ ߘߋ߬ ﴿68﴾

ߏ߬ ߟߎ߫ ߖߊ߬ߕߋ߬ߓߐ ߕߍ߫ ߝߊ߲ߕߊ߲ߞߟߊ ߟߎ߫ ߡߊ߬ ߝߏߦߌ߬ ߘߐ߫ ، ߓߊ߬ߙߌ߬ ߣߌ߲߬ ߦߋ߫ ߖߊ߲߬ߓߌߟߊ߫ ߟߋ߬ ߘߌ߫ ߸ ߛߴߊ߬ߟߎ߬ ߘߴߊߟߎ߬ ߝߊ߲ߕߊ߲߬ߞߊ߫ ﴿69﴾

ߌ ߦߋ߫ ߝߘߊ߫ ߡߐ߱ ߟߎ߬ ߟߊ߫ ߸ ߡߍ߲ ߠߎ߫ ߣߵߊ߬ߟߎ߬ ߟߊ߫ ߘߌ߯ߣߊ ߡߌ߬ߘߊ߬ ߟߊ߫ ߕߏߟߏ߲ ߣߌ߫ ߡߣߊ߬ߡߣߊ ߘߌ߫ ߸ ߣߌ߫ ߘߎߢߊ߫ ߢߣߊߡߦߊ ߣߵߊ߬ߟߎ߬ ߜߍߙߍ߲ߞߍ߫ ߟߊ߫ ، ߒ߬ߓߊ߬ ߞߊ߬ߥߊ߲߬ߘߌ߬ߟߌ ߞߍ߫ ߞߎ߬ߙߊ߬ߣߊ ߟߊ߫ ߸ ߣߌߡߊ ߞߊߣߊ߬ ߕߏ߫ ߊ߬ ߓߊ߯ߙߊ߫ ߣߐ ߞߎ߲߬ߞߘߐ߫ ߞߵߊ߬ ߕߘߍ߬ ߢߌ߲߬ ߕߍ߫ ߊ߬ ߓߟߏ߫ ߊߟߊ߫ ߡߊ߬ ߸ ߛߏ߬ߟߏ߲߬ߣߊ߬ߟߌ߬ߟߊ߫ ߕߍ߫ ، ߤߟߴߊ߬ ߘߏ߲߬ ߞߵߊ߬ ߖߍ߬ߘߍ߫ ߞߎ߲߬ߞߊ߬ ߞߎ߲߬ߞߊ ߓߍ߯ ߟߊ߫ ߸ ߏ߬ ߕߍ߫ ߡߌ߬ߘߴߊ߬ ߟߊ߫ ، ߒ߬ߓߊ߬ ߏ߬ ߟߎ߫ ߟߋ߬ ߕߏߕߐ߫ ߊ߬ߟߎ߬ ߓߊ߯ߙߊ߫ ߣߐ ߞߎ߲߬ߞߘߐ߫ ، ߡߌ߲߬ߕߊ߫ ߟߴߏ߬ ߟߎ߬ ߢߍ߫ ߸ ߞߊ߬ ߓߐ߫ ߝߎߦߊߝߎߦߊ ߘߐ߫ ، ߊ߬ ߣߌ߫ ߖߊ߲߰ߞߕߊ߬ ߘߌߡߌ߲ߣߍ߲ ߠߴߊ߬ߟߎ߬ ߢߍ߫ ߸ ߞߊ߬ߡߊߛߐ߬ߘߐ߲߫ ߊ߬ߟߎ߫ ߕߍ߬ߘߍ߫ ߓߊ߲߬ߓߊ߰ߦߊ ߡߍ߲ ߞߍ߫ ߟߊ߫ ﴿70﴾

ߊ߬ ߝߐ߫ ߞߏ߫ ߌ߬ߦߏ߯ ߒ߬ߠߎ߬ ߦߋ߫ ߊߟߊ߫ ߕߏ߫ ߦߋ߲߬ ߞߊ߬ ߝߋ߲߫ ߞߟߌ߫ ߸ ߡߍ߲ ߕߍ߫ ߊ߬ ߢߊ߬ ߟߊ߫ ߒ߬ ߡߊ߬ ߸ ߊ߬ ߘߏ߲߬ ߕߍ߫ ߊ߬ ߕߌߢߍ߫ ߟߊ߫ ߒ߬ ߡߊ߬؟ ߌ߬ߦߏ߯ ߞߵߊ߲ ߠߊߛߊ߬ߦߌ߲߬ ߒ߬ ߕߏ߲ߕߏߟߌ߲ ߠߎ߫ ߡߊ߬ ( ߓߊ߲߬ߓߊ߰ߦߊ ߘߐ߫ ) ߊ߲ ߞߊ߲ߘߊߣߍ߲ ߞߐ߫ ߊߟߊ߫ ߓߟߏ߫؟ ߞߵߊ߲ ߞߍ߫ ߏ߬ ߘߐ߫ ߦߏ߫ ߜߍ߬ߘߍ ߟߎ߫ ߣߊ߬ ߡߍ߲ ߠߊߝߋ߬ߟߋ߲߬ߝߋ߬ߟߋ߲߬ ߠߊ߫ ߞߏ߲ߞߏ ߞߣߐ߫ ߸ ߞߵߊ߬ ߞߣߐߘߐߝߟߌ߬ߣߍ߲ ߕߏ߫ ، ߘߍ߬ߢߐ߲߰ ߠߎ߫ ߦߴߊ߬ ߟߊ߫ ߸ ߏ߬ ߟߎ߬ ߦߴߊ߬ ߞߟߌ ߞߊ߲߬ ߛߌߟߊ ߡߊ߬ ߸ ߞߏ߫ ߣߵߊ߲ ߝߍ߬ ߦߊ߲߬ ، ߒ߬ߓߵߊ߬ ߟߊߛߋ߫ ߞߏ߫ ߊߟߊ߫ ߟߊ߫ ߞߊ߲ߘߊ ߟߋ߬ ߞߊ߲ߘߦߊ ߖߍ߬ߘߍߖߍ߬ߘߍ ߘߌ߫ ، ߊ߲ ߘߏ߲߬ ߖߡߊ߬ߙߌ߬ߣߍ߲߫ ߠߋ߬ ߸ ߞߏ߫ ߊ߲ ߧߋ߫ ߒ߬ ߖߘߍ߬ߞߟߏ߫ ߖߊ߯ߓߊ ߟߎ߫ ߡߊ߰ߙߌ ߦߋ߫ ﴿71﴾

ߊ߬ ߣߌ߫ ߞߏ߫ ߊߟߎ߫ ߦߋ߫ ߛߊߟߌ ߟߐ߬ ߞߵߊߟߎ߫ ߝߊ߲ߕߊ߲߬ߞߊ߬ ‹ߊߟߊ߫› ߡߊ߬ ߸ ߊߟߎ߫ ߜߍ߲߬ߜߍ߲߬ߕߐ߫ ߏ߬ ߡߍ߲ ߣߊ߰ߟߊ߫ ﴿72﴾

ߊ߬ߟߋ ߟߋ߫ ߞߊ߬ ߛߊ߲ ߠߎ߬ ߣߌ߫ ߘߎ߱ ߘߊ߲߫ ߕߎ߬ߢߊ ߟߊ߫ ، ߊ߬ ߓߊ߯ ߊ߬ ߝߐ߫ ( ߡߍ߲ ߡߊ߬ ) ߟߏ߲ ߡߍ߲ ߞߏ߫ ߞߍ߫ ߸ ߏ߬ ߘߌ߫ ߞߍ߫ ، ߊ߬ ߟߊ߫ ߞߎߡߊ ߟߋ߬ ߕߎ߬ߢߊ ߘߌ߫ ߸ ߊ߬ ߕߊ ߟߋ߬ ߓߘߎ߫ ߝߍ ߟߏ߲ ߡߊ߲߬ߛߊ߬ߦߊ ߘߌ߫ ، ߞߏ߫ ߘߏ߲߰ߣߍ߲ ߣߴߊ߬ ߟߊ߲ߞߣߍߡߊߣߍ߲ ߟߐ߲ߓߊ߮ ߟߋ߬ ، ߊ߬ߟߋ ߟߋ߫ ߥߘߋ߬ߥߘߋ߬ߟߌ߬ߟߊ߫ ߞߟߊ߬ߡߊ߬ߓߊ߮ ߘߌ߫ ﴿73﴾

ߕߎ߬ߡߊ ߡߍ߲ ߌߓߎ߬ߙߊ߬ߤߌߡߊ߫ ߞߵߊ߬ ߝߐ߫ ߊ߬ ߝߊ߬ ߊ߯ߖ߭ߙߊ߫ ߦߋ߫ ߸ ߞߏ߫ ߌ߬ߦߏ߯ ߌ ߘߌ߫ ߖߏ߭ ߟߎ߫ ߡߌ߬ߘߊ߫ ߡߊ߰ߙߌ ߟߎ߬ ߘߌ߫؟ ߖߊ߯ߕߋ߬ ߸ ߒߠߋ ߢߊ߯ ߌ ߣߴߌ ߡߌ߬ߙߌ߲߬ߘߌ ߟߊ߫ ߝߟߌ߬ ߔߘߋߞߟߋ ߟߋ߬ ߘߐ߫ ﴿74﴾

ߒ߬ߓߵߊ߲ ߞߊ߬ ߛߊ߲ ߠߎ߬ ߣߌ߫ ߘߎ߱ ߡߙߊ߬ߡߊ߲߬ߛߊ߬ߦߊ ߦߌ߬ߘߊ߬ ߌߓߎ߬ߙߊ߬ߤߌߡߊ߫ ߟߊ߫ ߕߋ߲߬ ߠߋ߬ ߸ ߛߴߊ߬ ߘߌ߫ ߞߍ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߘߏ߫ ߘߌ߫ ﴿75﴾

ߕߎ߬ߡߊ ߡߍ߲ ߛߎ ߞߏ߬ ߘߴߊ߬ ߢߣߊ߫ ߸ ߊ߬ ߞߊ߬ ߟߏ߬ߟߏ ߘߏ߫ ߦߋ߫ ߸ ߊ߬ ߞߊ߲߫ ߞߏ߫ ߒ ߡߊ߰ߙߌ ߟߋ߫ ߣߌ߲߬ ، ߏ ߓߋ߬ߣߍ߲ ߸ ߊ߬ ߞߊ߲߫ ߞߏ߫ ߒ ߕߍ߫ ( ߡߊ߰ߙߌ߫ ) ߓߋ߬ߕߊ ߟߎ߫ ߝߍ߬ ߘߋ߬ ﴿76﴾

ߊ߬ ߣߊ߬ ߞߊߙߏ ߖߌ߲ߞߌ߲ߕߐ ߦߋ߫ ߟߊ ߸ ߊ߬ ߞߊ߲߫ ߞߏ߫ ߒ ߡߊ߰ߙߌ ߟߋ߫ ߣߌ߲߬ ، ߏ߬ ߝߣߊ߫ ߓߋ߬ߣߍ߲ ߸ ߊ߬ ߞߊ߲߫ ߞߏ߫ ߤߊ߲߫ ߣߌ߫ ߒ ߡߊ߰ߙߌ ߡߊ߫ ߒ ߞߊ߲ߘߊ߫ ߸ ߒ ߘߌ߫ ߞߍ߫ ߡߌ߬ߙߌ߲߬ߘߌ߫ ߝߟߌ߬ߣߍ߲ ߠߎ߬ ߘߏ߫ ߘߌ߫ ﴿77﴾

ߊ߬ ߣߊ߬ ߕߋ߬ߟߋ ߖߌ߲ߞߌ߲ߕߐ ߦߋ߫ ߟߊ ߸ ߊ߬ ߞߊ߲߫ ߞߏ߫ ߒ ߡߊ߰ߙߌ ߟߋ߫ ߣߌ߲߬ ، ߣߌ߲߬ ߓߏ߲߬ߓߊ߬ߓߊ ߟߋ߬ ، ߏ߬ ߝߣߊ߫ ߓߋ߬ߣߍ߲ ߸ ߊ߬ ߞߊ߲߫ ߞߏ߫ ߒ ߓߊߘߋ߲ ߠߎ߬ ߸ ߒߠߋ ߓߘߊ߫ ߒ ߣߍ߰ߓߐ߫ ߊߟߎ߫ ߟߊ߫ ߛߏߡߦߊ ߘߐ߫ ߝߋߎ߫ ﴿78﴾

ߒߠߋ ߦߋ߫ ߒ ߢߍߛߌ߲߫ ߠߊ߫ ߡߊ߰ߙߌ ߟߋ߬ ߟߊ߫ ߛߍߣߍ߲߬ ߖߐ߲ ߸ ߡߍ߲ ߞߊ߬ ߛߊ߲ ߠߎ߬ ߣߌ߫ ߘߎ߱ ߘߊ߲߫ ، ߝߋߎ߫ ߸ ߒߠߋ ߕߍ߫ ߞߍ߫ ߛߏߡߊ ߟߎ߬ ߝߋ߲߫ ߘߌ߫ ﴿79﴾

ߊ߬ ߡߌ߬ߙߌ߲߬ߘߌ ߞߵߊ߬ ߘߊߘߐߖߊ߬ ߏ߬ ߟߋ ߘߐ߫ ߞߏߛߓߍ߫ ، ߊ߬ ߞߊ߲߫ ߞߏ߫ ߌ߬ߦߏ߯ ߊߟߎ߫ ߦߋ߫ ߒ ߘߊߘߐߖߊ߬ ߟߴߊߟߊ߫ ߞߏ ߟߋ߬ ߘߐ߫ ، ߏ ߘߏ߲߬ ߓߘߊ߫ ߓߊ߲߫ ߒߠߋ ߞߊ߲ߘߊ߫ ߟߊ߫؟ ߒ߬ߓߊ߬ ߝߋߎ߫ ߸ ߒ ߕߍߣߊ߬ ߛߌߟߊ߲߫ ߠߴߊߟߎ߫ ߟߊ߫ ߖߏ߬ ߜߙߊ߬ߕߊ ߟߎ߬ ߢߍ߫ ߸ ߝߏ߫ ߒ ߡߊ߰ߙߌ ߓߊ߯ ߞߏ ߡߍ߲ ߟߊߢߌߣߌ߲߫ ، ߒ ߡߊ߰ߙߌ ߘߏ߲߬ ߦߙߌߥߊߣߍ߲߫ ߝߋ߲ ߓߍ߯ ߟߋ߫ ߡߊ߬ ߟߐ߲ߠߌ߲ ߘߐ߫ ، ߦߊ߯ߟߊ߫ ߊߟߎ߫ ߕߍ߫ ߊߟߎ߫ ߕߊ߰ߛߌ߬ ߟߊ߫ ߟߋ߫ ߓߊ߬؟ ﴿80﴾

ߒߠߋ ߛߌߟߊ߲ߕߐ߫ ߊߟߎ߫ ߟߊ߫ ߖߏ߬ ߜߙߊ߬ߕߊ ߟߎ߬ ߢߍ߫ ߘߌ߬ ߸ ߊߟߎ ߘߏ߲߬ ߕߍ߫ ߛߌߟߊ߲߫ ߠߊ߫ ߞߏ߫ ߊߟߎ߫ ߓߘߊ߫ ߝߋ߲߫ ߝߙߵߊߟߊ߫ ߡߊ߬ ߸ ߊ߬ ߡߊ߫ ߡߍ߲ ߘߊ߬ߟߎ߬ ߛߌ߫ ߟߊߖߌ߰ ߊߟߎ߫ ߡߊ߬؟ ߖߊ߬ߡߊ߫ ߝߌ߬ߟߊ ߣߌ߲߬ ߸ ߢߌ߬ߡߊ߲߫ ߠߋ߬ ߖߊߙߋߣߍ߲߫ ߞߎ߲߬ߠߊ߬ߝߎߟߋ߲ ߠߊ߫ ( ߊߟߎ߯ ߏ߬ ߖߋ߬ߓߌ߫ ߞߍ߬ ) ߣߴߊߟߎ߫ ߣߐ߬ ߞߍ߫ ߘߴߊ߬ ߟߐ߲߫ ߠߊ߫ ﴿81﴾

ߒ߬ߓߊ߬ ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߸ ߊ߬ߟߎ߫ ߘߏ߲߬ ߡߴߊ߬ߟߎ߬ ߟߊ߫ ߘߍ߲߬ߞߣߍ߬ߦߊ ߢߣߊߓߊ߬ߛߊ߲߬ ߛߏߡߦߊ߫ ߛߌ߫ ߟߊ߫ ߸ ߏ߬ ߟߎ߫ ߟߋ߬ ߕߊ ߦߋ߫ ߞߎ߲߬ߠߊ߬ߝߎߟߋ߲ ߘߌ߫ ߸ ߓߊ ߏ߬ ߟߎ߫ ߟߋ߬ ߞߊ߲ߘߊߓߊ߮ ߟߎ߬ ߘߌ߫ ﴿82﴾

ߊ߲ ߠߊ߫ ߘߊ߬ߟߎ ߟߋ߫ ߣߌ߲߬ ߸ ߊ߲ ߞߊ߬ ߌߓߎ߬ߙߊ߬ߤߌߡߊ߫ ߛߐ߫ ߏ߬ ߟߋ ߟߊ߫ ߊ߬ ߟߊ߫ ߡߌ߬ߙߌ߲߬ߘߌ ߡߊ߬ ، ߓߊ ߊ߲ ߧߋ߫ ߡߐ߰ ߟߋ߬ ߡߐ߬ߟߐ߲ ߠߎ߬ ߡߊߦߟߍ߬ ߟߊ߫ ߸ ߡߍ߲ ߓߊ߯ ߊ߲ ߘߌߦߊ߫ ، ߖߊ߯ߕߋ߬ ߸ ߌ ߡߊ߰ߙߌ ߦߋ߫ ߥߘߋ߬ߥߘߋ߬ߟߌ߬ߟߊ߫ ߘߌ߫ ߸ ߊ߰ ߟߐ߲ߠߌ߲ߠߊ߫ ߘߌ߫ ﴿83﴾

ߊ߲ ߞߵߊ߬ ߛߐ߫ ߌߛߌ߬ߤߊ߯ߞߊ߫ ߣߌ߫ ߦߊ߰ߞߎߓߊ߫ ߟߊ߫ ( ߓߐ߲ߛߐ߲ߧߊ ߘߐ߫ ) ߸ ߊ߲ ߘߏ߲߬ ߞߵߏ߬ ߓߍ߯ ߞߊ߲ߘߊ߫ ߟߋ߬ ، ߊ߲ ߞߊ߬ ߣߎߤߎ߲߫ ߞߊ߲ߘߴߊ߬ߟߋ߬ ߢߍ߫ ߞߘߐ߬ߡߊ߲߫ ، ߊ߬ ߓߐ߲ߛߐ߲ ߘߏ߫ ߟߋ߬ ߘߊߎߘߊ߫ ߣߌ߫ ߛߎ߬ߟߋ߬ߡߊ߯ߣߊ߫ ߣߌ߫ ߦߎ߯ߓߊ߬ ߣߌ߫ ߦߛߎߝߎ߫ ߣߌ߫ ߡߎߛߊ߫ ߣߌ߫ ߤߊߙߎߣߊ߫ ߘߌ߫ ، ߒ߬ߓߊ߬ ߊ߲ ߧߋ߫ ߢߊ߬ߓߊ߮ ߟߎ߫ ߛߙߊ߬ ߟߊ߫ ߕߋ߲߬ ߠߋ߬ ﴿84﴾

ߊ߬ ߣߌ߫ ߖ߭ߊߞߊ߬ߙߌ߬ߦߊ߫ ߣߌ߫ ߦߊߤߊ߬ߦߊ߫ ߣߴߌߛߊ߫ ߣߌ߫ ߌߟߌ߬ߦߊ߯ߛߊ߫ ߘߌ߫ ، ߏ߬ ߓߍ߯ ߦߋ߫ ߡߐ߰ ߢߌߡߊ ߟߎ߬ ߘߏ߫ ߟߋ߬ ߘߌ߫ ﴿85﴾

ߊ߬ ߣߌ߫ ߌߛߌ߬ߡߊ߬ߌߟߊ߫ ߣߌ߫ ߌߟߌ߬ߦߛߊߎ߫ ߣߌ߫ ߦߣߎߛߊ߫ ߣߌ߫ ߟߎ߯ߕߌ߫ ߘߌ߫ ، ߊ߲ ߞߵߏ ߞߋ߬ߟߋ߲߬ߞߋ߬ߟߋ߲߬ߣߊ ߟߊߝߌ߬ߛߊ߬ߦߊ߫ ߖߊ߯ߓߊ ߕߐ߭ ߟߎ߬ ߘߌ߫ ߟߋ߬ ﴿86﴾

ߊ߲ ߞߵߏ ߢߐ߲߰ ߞߍ߫ ߊ߬ߟߎ߫ ߝߊ߭ ߟߎ߬ ߘߏ߫ ߟߎ߫ ߘߐ߫ ߸ ߊ߬ ߣߴߊ߬ߟߎ߬ ߓߐ߲ߛߐ߲ ߠߎ߬ ߣߴߊ߬ߟߎ߬ ߓߊߘߋ߲ ߠߎ߬ ، ߊ߲ ߞߵߏ߬ ߟߎ߬ ߛߎߥߊ߲ߘߌ߫ ߟߋ߬ ߸ ߞߵߊ߬ߟߎ߬ ߞߊ߲ߘߊ߫ ߛߌߟߊ߫ ߕߋߟߋ߲ߣߍ߲ ߞߊ߲߬ ﴿87﴾

ߏ߬ ߟߎ߬ ߕߊ ߏ߬ ߦߋ߫ ߊߟߊ߫ ߟߊ߫ ߞߊ߲ߘߦߊ ߟߋ߬ ߘߌ߫ ߸ ߊ߬ ߦߋ߫ ߡߐ߰ ߟߋ߬ ߞߊ߲ߘߊ߫ ߟߴߏ߬ ߡߊ߬ ߸ ߡߍ߲ ߓߊ߯ ߊ߬ ߘߌߦߊ߫ ߊ߬ ߟߊ߫ ߖߐ߲߭ ߠߎ߬ ߘߐ߫ ߸ ߤߊߟߴߏ߬ ߟߎ߫ ߕߌ߲߬ ߞߊ߬ ߡߊ߰ߙߌ߬ ߜߙߊ ߞߍ߫ ߸ ߊ߬ߟߎ߬ ߟߊ߫ ߓߊ߯ߙߊ ߓߍ߯ ߕߎ߲߬ ߘߌ߫ ߕߌߢߍ߫ ߊ߬ߟߎ߫ ߡߊ߬ ߔߛߐߞߐ߬ ﴿88﴾

ߊ߲ ߞߵߏ߬ ߟߎ߫ ߟߋ߬ ߛߐ߫ ߟߍߙߊ ߣߌ߫ ߥߘߋ߬ߥߘߋ߬ߟߌ ߣߌ߫ ߟߊ߬ߝߐ߬ߓߊ߰ߦߊ ߟߊ߫ ، ߒ߬ߓߊ߬ ߣߌ߫ ߓߌ߬ ߡߐ߮ ߢߌ߲߬ ߠߎ߫ ߞߵߊ߬ߟߎ߫ ߓߊ߲߬ ߊ߬ ߘߐ߫ ߸ ߊ߲ ߓߘߴߊ߬ ߛߌ߰ ߡߌ߬ߙߌ߲߬ߘߌ߬ ߜߘߍ߫ ߟߎ߫ ߢߍ߫ ߸ ߏ߬ ߟߎ߬ ߕߍߣߵߊ߬ߟߎ߫ ߓߊ߲߬ ߠߴߊ߬ ߘߐ߫ ߡߎ߬ߕߎ߲߬ ﴿89﴾

ߊߟߊ߫ ߣߵߏ߬ ߟߎ߫ ߟߋ߬ ߞߊ߲ߘߊ߫ ߟߊ߫ ، ߌ ߝߣߊ߫ ߌ ߖߞߊ߫ ߏ߬ ߟߎ߬ ߟߊ߫ ߞߊ߲ߘߊ ߡߊ߬ ، ߊ߬ ߟߊߛߋ߫ ߞߏ߫ ߒߠߋ ߕߍ߫ ߊߟߎ߫ ߕߙߊ߫ ߟߴߊ߬ ߛߙߊ߬ ߟߊ߫ ، ߓߊߏ߬ ߘߏ߫ ߜߘߍ߫ ߕߍ߫ ߝߏ߫ ߖߊ߯ߓߊ ߟߎ߫ ߞߊ߬ߥߊ߲߬ߘߌ ߟߋ߬ ﴿90﴾

ߊ߬ߟߎ߬ ߡߴߊߟߊ߫ ߓߏ߲߬ߧߊ߫ ߸ ߊ߬ ߓߏ߲߬ߧߊ߬ ߢߊ ߖߍ߬ߘߍ ߟߊ߫ ، ߓߊ ߊ߬ߟߎ߬ ߞߊ߲߫ ߠߋ߬ ߞߏ߫ ߊߟߊ߫ ߡߊ߫ ߝߏߦߌ߬ ߟߊߖߌ߰ ߡߐ߰ ߛߌ߫ ߡߊ߬ ، ߊ߬ߟߎ߫ ߢߌ߬ߣߌ߲߬ߞߊ߬ ߞߏ߫ ߖߍߣߍ߲ ߞߊ߬ ߟߍߙߊ ߟߊߖߌ߰ ߸ ߡߎߛߊ߫ ߣߊ߬ ߘߊ߫ ߡߍ߲ ߘߌ߫ ߦߋߟߋ߲ ߣߌ߫ ߞߊ߲ߘߦߊ ߘߌ߫ ߡߐ߱ ߟߎ߬ ߦߋ߫ ߸ ߊߟߎ߫ ߦߴߏ߬ ߞߍ߫ ߟߊ߫ ߞߊߦߘߌ ߟߎ߫ ߞߊ߲߬ ߸ ߊߟߎ߫ ߦߴߏ߬ ( ߘߏ߫ ߟߎ߫ ) ߟߊ߲ߞߣߍߡߊ߫ ߟߊ߫ ߸ ߊߟߎ߫ ߦߋ߫ ߛߌߦߊߡߊ߲߫ ߘߏ߲߰ ߠߊ߫ ، ߊ߬ ߣߌ߫ ߞߵߊߟߎ߫ ߟߊߟߐ߲ߠߌ߲߫ ߝߋ߲߫ ߠߊ߫ ߸ ߊߟߎ߫ ߣߴߊߟߎ߫ ߝߊ߬ ߟߎ߫ ߕߎ߲߬ ߡߊ߫ ߡߍ߲ ߟߐ߲߫؟ ߌ ߖߍ߬ߘߍ ߦߴߊ߬ߟߎ߫ ߖߋ߬ߓߌ߬ ߸ ߞߏ߫ ߊߟߊ߫ ߞߍ߰ ߸ ߌ ߦߋ߫ ߓߊ߲߫ ߦߵߊ߬ߟߎ߬ ߕߏ߫ ߦߋ߲߬ ߊ߬ߟߎ߬ ߦߴߊ߬ߟߎ߬ ߕߏߟߏ߲߫ ߊ߬ߟߎ߬ ߟߊ߫ ߛߏ߯ߓߊߟߌ ߘߐ߫ ﴿91﴾

ߟߍߙߊ ߡߍ߲ ߣߌ߲߬ ߸ ߊ߲ ߞߵߏ߬ ߟߊߖߌ߰ ߓߙߊߞߊ߫ ߝߋ߲ ߠߋ߬ ߘߌ߫ ߸ ߞߵߊ߬ ߞߍ߫ ߊ߬ ߢߍ߫ ߟߍߙߊ ߟߊߛߙߋߦߊߟߊ߲ ߘߌ߫ ، ߖߐ߲߰ߛߊ߫ ߌ ߦߋ߫ ߖߊ߬ߛߙߋ߬ߡߊ߬ߟߊ ߞߍ߫ ߛߏ߫ ߡߌߛߍ߲ ߠߎ߬ ߞߎߓߋߘߊ ߦߋ߫ ߸ ߊ߬ ߣߌ߫ ߡߍ߲ ߠߎ߬ ߦߴߊ߬ ߟߊߡߌߣߌ߲ ߘߐ߫ ، ߡߐ߱ ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߟߊߞߌߙߊ߫ ( ߞߏ ) ߡߊ߬ ߸ ߏ߬ ߟߎ߫ ߟߋ߬ ߟߊߣߴߊ߬ ߟߊ߫ ، ߏ߬ ߟߎ߫ ߟߋ߫ ߘߏ߲߬ ߊ߬ߟߎ߬ ߟߊ߫ ߛߊߟߌ ߟߎ߬ ߟߊߕߊ߲߬ߞߊ߬ ߟߊ߫ ﴿92﴾

ߖߍߣߍ߲ ߠߊ߫ ߕߐ߬ߢߍ߮ ߕߊ߬ߡߌ߲߬ߣߍ߲߫ ߥߎߦߊ ߟߊߓߊ߮ ߕߊ ߞߊ߲߬ ߊߟߊ߫ ߟߊ߫ ߸ ߥߟߊ߫ ߡߍ߲ ߞߊ߲߫ ߞߏ߫ ߦߟߌߘߏ߲ ߦߋ߫ ߟߐ߬ ߟߊ߫ ߒ ߡߊ߬ ، ߞߵߊ߬ ߕߘߍ߬ ߦߟߌߘߏ߲߫ ߛߌ߫ ߡߊ߫ ߟߐ߬ ߊ߬ ߡߊ߬ ، ߊ߬ ߣߌ߫ ߡߍ߲ ߞߊ߲߫ ߞߏ߫ ߒ ߓߍߣߵߊߟߊ߫ ߟߊ߫ ߟߍߙߊ߫ ߟߊߖߌ߰ߣߍ߲ ߢߐ߲߱ ߘߏ߫ ߟߊߖߌ߰ ، ߤߊ߲߫ ߸ ߣߴߌ ߕߎ߲߬ ߓߍ߫ ߕߐ߬ߢߍ߰ߒߕߋ ߟߎ߬ ߦߋ߫ ߟߊ߫ ߛߊ߬ߦߊ ߓߌ߬ߘߏ߲߬ߓߌߘߏ߲ ߠߎ߬ ߘߐ߫ ߸ ߞߵߊ߬ ߕߘߍ߬ ߞߋ߲ߛߐ߲ ߠߎ߬ ߕߍ߮ ߘߐߝߎߟߋ߲ߣߍ߲߫ ߊ߬ߟߎ߬ ߦߋ߫ ߸ ߞߏ߫ ߊߟߴߊߟߎ߫ ߣߌ ߟߎ߬ ߓߐ߫ ߞߍ߬ ، ߓߌ߬ ߞߏ߬ߣߌ߲ ߸ ߊߟߎ߫ ߛߙߊ߬ߕߐ߫ ߟߊ߬ߝߍߦߊ ߖߊ߲߰ߞߕߊ ߟߋ߬ ߟߊ߫ ߞߊ߬ߡߊߛߐ߬ߘߐ߲߬ ߊߟߎ߫ ߕߍ߬ߘߍ߫ ߕߎ߬ߢߊ߫ ߕߊ߬ߣߊ ߡߍ߲ ߝߐ߫ ߟߴߊߟߊ߫ ߡߊ߬ ߸ ߊ߬ ߣߴߊߟߎ߫ ߕߘߍ߬ ߊߟߎ߫ ߖߘߍ߬ߘߐߓߏ߲߬ߧߊ ߡߍ߲ ߞߍ߫ ߟߴߊ߬ ߟߊ߫ ߟߝߊߙߌ ߟߎ߫ ߡߊ߬ ﴿93﴾

ߊߟߎ߫ ߞߋ߬ߟߋ߲߬ߞߋ߬ߟߋ߲߬ߣߊ ߡߍߣߍ߲ߜߍ ߓߘߊ߫ ߣߊ߬ ߒ ߕߘߍ߬ ߏ߬ ߟߋ ߘߐ߫ ߣߌ߲߬ ߛߏߘߊ߫ ߸ ߦߏ߫ ߊ߲ ߞߵߊߟߎ߫ ߘߊ߲߫ ߢߊ ߡߍ߲ ߛߋ߲߬ߧߊ߬ ߝߟߐ ߘߐ߫ ، ߊ߲ ߞߵߊߟߎ߫ ߛߐ߫ ߝߋ߲ ߡߍ߲ ߠߎ߬ ߟߊ߫ ߸ ߊߟߎ߫ ߞߵߏ߬ ߓߍ߯ ߕߏ߫ ߊߟߎ߫ ߞߐ߫ ، ߊ߲ ߘߏ߲߬ ߡߴߊߟߎ߫ ߛߟߏ߬ߣߊ߬ߓߊ߮ ߟߎ߬ ߦߋ߫ ߊߟߎ߫ ߝߍ߬ ߸ ߊߟߎ߫ ߕߘߍ߬ ߊ߬ ߘߊߘߝߐ ߞߍ߫ ߟߊ߫ ߞߏ߫ ߡߍ߲ ߠߎ߬ ߦߴߊߟߎ߫ ߜߙߊ߬ߢߐ߲߮ ߠߎ߬ ߘߌ߫ ، ߊߟߎ߫ ߣߴߏ߬ ߟߎ߬ ߕߍ ߓߘߊ߫ ߓߟߏߕߍ߰ ߜߋߘߎ߫ ، ߝߋ߲ ߠߎ߬ ߓߘߊ߫ ߕߎߣߎ߲߫ ߊߟߎ߫ ߡߊ߬ ߸ ߊߟߎ߫ ߕߘߍ߬ ߡߍ߲ ߠߎ߬ ߜߊߟߏ߲ߕߐߦߊ߫ ߞߊ߲ ߝߐ߫ ߟߊ߫ ﴿94﴾

ߖߊ߯ߕߋ߬ ߸ ߊߟߊ߫ ߟߋ߬ ߝߋ߲߫ ߞߡߊ ߣߌ߫ ߝߋ߲߫ ߞߟߏ ߟߎ߬ ߛߍ߲ߞߍߓߊ߮ ߘߌ߫ ߸ ߊߟߋ ߟߋ߬ ߣߌߡߊ ߓߐ߫ ߟߊ߫ ߛߎ߭ ߘߐ߫ ، ߊ߬ߟߋ ߟߋ߬ ߛߎ߭ ߝߣߊ߫ ߓߐߓߊ߮ ߘߌ߫ ߣߌߡߊ ߘߐ߫ ، ߊߟߊ߫ ߟߴߏ߬ ( ߞߍߓߊ߮ ) ߘߌ߫ ، ߊߟߎ߫ ߞߎ߲߭ ߦߋ߫ ߓߐ߫ ߟߴߏ߬ ߞߊ߲߬ ߘߌ߬ ߓߏ߲߰؟ ﴿95﴾

ߊ߬ߟߋ߫ ߟߋ߬ ߘߎ߬ߛߊ߬ߜߍ ߝߙߊߓߊ߮ ߘߌ߫ ، ߊ߬ ߞߊ߬ ߛߎ ߞߍ߫ ߡߝߊ߬ ( ߕߎߡߊ ) ߘߌ߫ ߸ ߞߊ߬ ߕߋ߬ߟߋ ߣߌ߫ ߞߊߙߏ ߞߍ߫ ߖߊ߬ߕߋ߬ߡߌ߬ߘߊ߬ߟߊ߲߫ ߘߌ߫ ، ߒ߬ߓߊ߬ ߏ߬ ߦߋ߫ ( ߡߊ߰ߙߌ߫ ) ߣߌ߬ߣߌ߬ߟߊ߫ ߟߐ߲ߠߌ߲ߠߊ ߟߊ߫ ߛߋߓߊ߯ߦߊ ߟߋ߬ ߘߌ߫ ﴿96﴾

ߏ߬ ߟߋ ߞߊ߬ ߟߏ߬ߟߏ ߟߎ߬ ߞߍ߫ ߊߟߎ߫ ߦߋ߫ ߸ ߛߴߊߟߎ߫ ߘߌ߫ ߞߊ߲ߘߊ߫ ߏ߬ ߟߎ߬ ߟߊ߫ ߜߙߋߡߟߊ ߣߌ߫ ߓߊߞߊ߲ߠߊ ߘߌ߬ߓߌ ߟߎ߬ ߘߐ߫ ، ߊ߲ ߘߏ߲߬ ߣߊ߬ ߟߝߊߙߌ ߟߎ߬ ߝߊߙߊ߲ߝߊߛߌ߫ ߟߊ߫ ߡߌ߬ߙߌ߲߬ߘߌ߫ ߞߏߟߐ߲ߠߊ ߟߎ߫ ߟߋ߬ ߦߋ߫ ﴿97﴾

ߊ߬ߟߋ ߟߋ߫ ߞߵߊߟߎ߫ ߟߊߝߟߐ߫ ߣߌߡߊ߫ ߞߋߟߋ߲߫ ߘߐ߫ ، ߞߊ߬ ߡߊ߬ߞߍ߬ ߦߙߐ ߞߍ߫ ( ߡߏ߬ߛߏ ߟߎ߬ ߘߐ߫ ) ߸ ߞߊ߬ ߞߊ߬ߙߌ߬ߝߊ߬ ߦߙߐ ߞߍ߫ ( ߘߋ߲ߛߏ ߟߎ߬ ߘߐ߫ ) ، ߊ߲ ߘߏ߲߬ ߣߊ߬ ߟߝߊߙߌ ߟߎ߬ ߝߊߙߊ߲ߝߊߛߌ߫ ߟߊ߫ ߡߌ߬ߙߌ߲߬ߘߌ߫ ߟߋ߬ ߦߋ߫ ߸ ߡߍ߲ ߠߎ߫ ߞߊ߬ ߞߏ߫ ߣߴߊ߬ ߞߘߐ߫ ߟߐ߲߫ ﴿98﴾

ߊ߬ߟߋ ߟߋ߫ ߞߊ߬ ߖߌ ߟߊߖߌ߰ ߞߊ߬ ߓߐ߫ ߡߐ߲ߕߐ߲ ߘߐ߫ ، ߊ߲ ߞߊ߬ ߝߍߘߍ߲ߝߋ߲ ߛߎ߮ ߓߍ߯ ߟߊߝߍߘߍ߲߫ ߏ߬ ߟߊ߫ ، ߏ߬ ߞߍ ߸ ߊ߲ ߞߊ߬ ߦߙߌߘߋ߲߫ ߝߙߌߛߌߡߊ ߟߎ߬ ߓߐ߫ ߏ߬ ߘߐ߫ ، ߊ߲ ߧߋ߫ ߞߡߊ߫ ߕߌ߲ߛߐ߲߫ ߕߐ߲߬ߛߐ߲߬ߞߘߐ߬ߣߍ߲ ߠߎ߬ ߓߐ߫ ߟߴߏ߬ ߘߐ߫ ، ߊ߬ ߣߌ߫ ߞߊ߬ ߕߡߊߙߏ߫ ߕߐ߲ߛߐ߲߫ ߘߎ߲߬ߘߟߊ߬ߕߊ ߟߎ߬ ߓߐ߫ ߕߡߊߙߏߛߎ߲ ߠߊ߫ ߊ߬ ߝߎ߲ߘߌ ߘߐ߫ ، ߊ߬ ߣߌ߫ ߞߊ߬ ߣߊߞߐ ߟߎ߬ ߟߊߝߍߘߍ߲߫ ߖߊ߬ߓߌ߬ߙߋ߲ ߠߎ߬ ߣߌ߫ ߛߏߞߏ߬ߘߏ ߟߎ߬ ߣߌ߫ ߦߙߌߢߐ ߟߎ߬ ߘߌ߫ ، ߏ߬ ߘߏ߫ ߟߎ߫ ߡߎߣߎ߲ߣߍ߲߫ ߸ ߘߏ߫ ߟߎ߫ ߡߎߣߎ߲ߣߍ߲߫ ߕߍ߫ ، ߊߟߎ߫ ߦߋ߫ ߦߙߌ ߏ߬ ߟߎ߬ ߘߋ߲ ߡߊߝߟߍ߫ ߸ ߊ߬ ߓߊ߯ ߞߍ߫ ߊ߬ ߘߋ߲߫ ߠߊ߫ ߸ ߊߟߎ߫ ߦߴߊ߬ ߡߕߐ߬ߟߊ ߝߣߊ߫ ߡߊߝߟߍ߫ ، ߤߊ߲߫ ߸ ߏ߬ ߟߎ߬ ߦߋ߫ ߕߊ߰ߛߌ߬ ߞߏ߫ ߟߎ߫ ߟߋ߬ ߘߌ߫ ߡߌ߬ߙߌ߲߬ߘߌ߫ ߘߍ߲߬ߞߣߍ߬ߦߊ߬ߣߍ߲ ߠߎ߬ ߦߋ߫ ߘߋ߬ ﴿99﴾

ߊ߬ߟߎ߬ ߓߘߊ߫ ߜߙߊ߬ߢߐ߲߮ ߘߏ߫ ߞߍ߫ ߊߟߊ߫ ߟߊ߫ ߥߐ߬ߞߎߟߐ ߟߎ߬ ߘߌ߫ ، ߊ߬ߟߋ ߟߋ߫ ߘߏ߲߬ ߜߎ ߞߵߏ߬ ߟߎ߬ ߘߊ߲߫ ، ߊ߬ߟߎ߬ ߓߘߊ߫ ߞߎ߲߬ߘߐ߬ߕߍ߮ ߞߍ߫ ߞߊ߬ ߘߋ߲ߞߍ ߟߎ߬ ߣߌ߫ ߘߋ߲ߡߛߏ ߟߎ߫ ߘߍ߬ߡߍ߲߬ߘߌ߬ ߊߟߊ߫ ߟߊ߫ ߸ ߞߵߊ߬ ߕߘߍ߬ ߊ߬ ߟߐ߲ߠߌ߲߫ ߛߌ߫ ߕߴߊ߬ߟߎ߬ ߟߊ߫ ، ߊ߬ ߘߏ߲߬ ߛߊߣߌ߲ߡߊ߲߫ ߞߊ߬ ߞߘߐߕߵߊ߬ߟߎ߬ ߟߊ߫ ߡߊ߲߬ߞߕߎ߬ߒ߬ߞߊ߲߬ߠߊ ߟߎ߫ ߡߊ߬ ߥߍ߫ ﴿100﴾

ߛߊ߲ ߠߎ߬ ߣߌ߫ ߘߎ߱ ߜߙߋ߬ߡߊߕߍ߰ߓߊ߮ ߟߋ߬ ، ߘߋ߲߫ ߞߍߕߐ߫ ߏ߬ ߓߟߏ߫ ߘߌ߬ ߞߵߊ߬ ߕߘߍ߬ ߡߛߏ߬ ߕߍ߫ ߊ߬ ߓߟߏ߫؟ ߊ߬ߟߋ ߟߋ߫ ߞߊ߬ ߝߋ߲ ߓߍ߯ ߘߊ߲߫ ߸ ߊ߬ ߘߏ߲߬ ߞߊ߬ ߞߏ ߓߍ߯ ߟߐ߲߫ ߠߋ߬ ߕߊߦߌ߫ ﴿101﴾

ߊߟߊ߫ ߏ߬ ߟߋ ߊߟߎ߫ ߡߊ߰ߙߌ ߘߌ߫ ߸ ߡߊ߰ߙߌ߬ ߛߌ߫ ߕߍ߫ ߏ߬ ߞߐ߫ ، ߏ߬ ߟߋ ߘߏ߲߬ ߝߋ߲ ߓߍ߯ ߘߊ߲ߓߊ߮ ߘߌ߫ ، ߒ߬ߓߵߊߟߎ߫ ߏ߬ ߟߋ ߘߐߙߐ߲߫ ߓߊ߬ߕߏ߫ ߘߋ߬ ، ߓߊ ߏ߬ ߟߋ ߖߊ߲߬ ߦߋ߫ ߞߏ ߓߍ߯ ߘߐ߫ ﴿102﴾

ߢߊ ߟߎ߬ ߕߍ߫ ߘߋߦߌ߫ ߟߴߊ߬ ߡߊ߬ ߸ ߊ߬ߟߋ ߟߋ߬ ߘߋߦߌ߫ ߟߊ߫ ߢߊ ߟߎ߫ ߡߊ߬ ، ߓߊ ߊ߬ߟߋ ߟߋ߬ ߡߐߡߐߒߕߋ߫ ߞߟߊ߬ߡߊ߬ߓߊ߮ ߘߌ߫ ﴿103﴾

ߢߟߊߞߊ߫ ߞߏ ߟߎ߬ ߓߘߊ߫ ߣߵߊߟߎ߫ ߡߊ߬ ߞߊ߬ ߝߘߴߊߟߎ߫ ߡߊ߰ߙߌ ߟߊ߫ ، ߣߌ߫ ߡߍ߲ ߞߵߊ߬ ߢߊ ߟߊߞߊ߬ ߸ ߏ߬ ߦߴߊ߬ ߖߘߍ߬ ߦߋ߫ ، ߣߌ߫ ߡߍ߲ ߘߏ߲߬ ߞߵߊ߬ ߖߘߍ߬ ߝߎߦߋ߲ߦߊ߫ ߸ ߏ߬ ߦߴߏ߬ ߞߍ߫ ߟߴߊ߬ ߖߍ߬ߘߍ߫ ߟߋ߬ ߟߊ߫ ، ߒߠߋ ߞߏ߬ߣߌ߲ ߕߍ߫ ߊߟߎ߫ ߕߊ߲߬ߞߊ߬ߓߊ߯ ߘߌ߫ ߘߋ߬ ﴿104﴾

ߒ߬ߓߵߊ߲ ߧߋ߫ ߟߝߊߙߌ ߟߎ߬ ߘߐߛߊ߬ߦߌߛߊ߬ߦߌ߬ ߟߊ߫ ߕߊ߲߬ ߠߋ߬ ߸ ߛߴߊ߬ߟߎ߬ ߘߴߊ߬ ߝߐ߫ ߞߴߌ ߞߵߊ߬ ߡߊߞߊ߬ߙߊ߲߫ ߠߋ߬ ، ߊ߬ ߣߌ߫ ߛߊ߫ ߒ߬ ߘߴߊ߬ ߘߐߞߣߍ߫ ߡߌ߬ߙߌ߲߬ߘߌ߬ ߞߏߟߐ߲ߠߊ ߟߎ߬ ߦߋ߫ ﴿105﴾

ߌ ߦߋ߫ ߝߋ߲߫ ߠߋ߬ ߟߊߓߊ߬ߕߏ߬ ߸ ߌ ߦߟߌߘߏ߲߬ߣߍ߲߬ ߡߍ߲ ߠߊ߫ ߌ ߡߊ߰ߙߌ ߓߟߏ߫ ߸ ߡߊ߰ߙߌ߬ ߛߌ߫ ߕߴߏ߬ ߟߋ ߞߐ߫ ، ߊ߬ ߣߴߌ ߦߴߌ ߞߐߘߏ߲߬ ߛߏߡߊ ߟߎ߬ ߟߊ߫ ﴿106﴾

ߊ߬ ߕߎ߲߬ ߓߊ߯ ߊߟߊ߫ ߘߌߦߊ߫ ߸ ߊ߬ߟߎ߫ ߕߎ߲߬ ߕߍ߫ ߛߏߡߦߊ߫ ߞߍ߫ ، ߊ߲ ߞߏ߬ߣߌ߲ ߡߴߌߟߋ ߞߍ߫ ߊ߬ߟߎ߫ ߕߊ߲߬ߞߊ߬ߓߊ߯ ߘߌ߫ ߸ ߌߟߋ ߘߏ߲߬ ߕߍ߫ ߊ߬ߟߎ߫ ߜߋ߬ߟߎ߲߬ߓߊ߯ ߘߌ߫ ﴿107﴾

ߊߟߎ߫ ߞߊߣߊ߬ ߖߏ߭ ߟߎ߫ ߣߊ߬ߣߌ߲߬ ߸ ߊ߬ߟߎ߬ ߦߋ߫ ߡߍ߲ ߠߎ߫ ߞߟߌ߫ ߟߊ߫ ߞߵߊߟߊ߫ ߕߏ߫ ، ߓߊ ߏ߬ ߓߊ߯ ߞߍ߫ ߸ ߊ߬ߟߎ߬ ߘߌ߫ ߊߟߊ߫ ߣߊ߬ߣߌ߲߬ ߖߎ߯ߦߊ ߡߊ߬ ߸ ߞߵߊ߬ ߕߘߍ߬ ߊ߬ߟߎ߬ ߡߴߊ߬ ߟߐ߲߫ ، ߊ߲ ߘߏ߲߬ ߞߊ߬ ߡߊ߲߬ߕߏ߲ ߓߍ߯ ߟߊ߫ ߓߊ߯ߙߊ߫ ߟߊߗߋ߲߰ߧߴߊ߬ߟߎ߬ ߢߊߞߘߐ߫ ߕߊ߲߬ ߠߋ߬ ، ߏ߬ ߟߋ ߞߐ߫ ߸ ߊ߬ߟߎ߬ ߘߌߣߊ߬ ߛߊ߬ߦߌ߲߬ ߊ߬ߟߎ߫ ߡߊ߰ߙߌ ߡߊ߬ ، ߏ߬ ߘߴߊ߬ߟߎ߬ ߗߋߥߊߟߌ ( ߓߍ߯ ) ߖߐ߲ ߠߊߓߐ߫ ߊ߬ߟߎ߫ ߡߊ߬ ﴿108﴾

ߊ߬ߟߎ߬ ߓߘߴߊ߬ߟߎ߫ ߞߊ߬ߟߌ߬ ߊߟߊ߫ ߟߊ߫ ߸ ߊ߬ߟߎ߬ ߟߊ߫ ߛߓߍ߬ߣߊ߲߬ ߞߊߟߌߟߌ ߟߎ߬ ߟߊ߫ ߸ ߞߏ߫ ߣߌ߫ ߡߊ߲߬ߕߊߣߌ߲߫ ߣߊ߬ ߘߴߊ߬ߟߎ߫ ߡߊ߬ ߸ ߞߏ߫ ߊ߬ߟߎ߬ ߘߌ߫ ߘߍ߲߬ߞߣߍ߬ߦߊ߫ ߏ߬ ߡߊ߬ ، ߊ߬ߟߎ߫ ߖߋ߬ߓߌ߬ ߞߏ߫ ߡߊ߲߬ߕߊߣߌ߲ ߠߎ߬ ߊߟߊ߫ ߟߋ߬ ߓߟߏ߫ ، ߞߏ߬ߣߌ߲߬ ߖߍߣߍ߲ ߘߴߊߟߎ߫ ߟߊߟߐ߲ߠߌ߲߫ ߞߏ߫ ߤߊߟߌ߫ ߡߊ߲߬ߕߊߣߌ߲ ߣߊ߬ ߘߊ߫ ߸ ߞߏ߫ ߊ߬ߟߎ߫ ߕߍ߫ ߘߍ߲߬ߞߣߍ߬ߦߊ߫؟ ﴿109﴾

ߓߊߏ߬ ߊ߲ ߞߍߕߐ߫ ߊ߬ߟߎ߫ ߛߣߐ߬ߡߍ ߟߎ߬ ߣߴߊ߬ߟߎ߬ ߢߊ ߟߎ߬ ߡߊߦߟߍ߬ߡߊ߲߬ ߠߊ߫ ߟߋ߬ ߸ ߦߏ߫ ߊ߬ߟߎ߬ ߡߊ߫ ߘߍ߲߬ߞߣߍ߬ߦߴߊ߬ ߡߊ߬ ߢߊ ߡߍ߲ ߛߋ߲߬ߧߊ߬ ߝߟߐ ߘߐ߫ ، ߊ߬ ߣߴߊ߲ ߘߴߊ߬ߟߎ߬ ߞߣߐߘߐߝߟߌ߬ߣߍ߲ ߕߏ߫ ߊ߬ߟߎ߬ ߟߊ߫ ߘߊ߲߬ߠߊ߬ߕߊߡߌ߲ ߘߐ߫ ߗߏ߫ ﴿110﴾

ߤߊߟߌ߬ ߊ߲ ߓߊ߯ ߡߟߍ߬ߞߊ ߟߎ߬ ߟߊߖߌ߰ ߊ߬ߟߎ߫ ߡߊ߬ ߸ ߤߊߟߌ߬ ߛߎ߭ ߟߎ߬ ߓߊ߯ ߊ߬ߟߎ߬ ߞߎߡߊߢߐ߲߯ߦߊ߫ ߸ ߤߊߟߌ߬ ߊ߲ ߓߊ߯ ߝߋ߲ ߓߍ߯ ߟߊߘߍ߬ ߓߏ߬ߟߏ߲߬ߘߊ ߟߎ߬ ߘߌ߫ ߸ ߏ߬ ߕߎ߲߬ ߕߴߊ߬ ߞߍ߫ ߊ߬ߟߎ߬ ߦߋ߫ ߘߍ߲߬ߞߣߍ߬ߦߊ߫ ߸ ߝߏ߫ ߣߴߊ߬ ߘߌߦߊ߫ ߘߴߊߟߊ߫ ߦߋ߫ ، ߓߊ߬ߙߌ߬ ߊ߬ߟߎ߫ ߝߊ߲߬ߓߊ ߟߋ߫ ߞߎ߲߬ߡߊߦߟߍ߬ߡߊ߲߬ߣߍ߲߫ ߛߊ߫ ﴿111﴾

ߒ߬ߓߊ߬ ߊ߲ ߣߊ߬ ߖߎ߮ ߞߍ߫ ߟߊ߫ ߟߊ߬ߝߐ߬ߓߊ߮ ߓߍ߯ ߟߊ߫ ߜߍ߬ߘߍ߫ ߡߐ߰ߟߊ߬ߡߊ ߟߎ߬ ߣߴߊ߬ ߥߐ߬ߞߎ߬ߟߐ߬ߟߊ߬ߡߊ ߟߎ߬ ߘߐ߫ ߕߊ߲߬ ߠߋ߬ ߸ ߏ߬ ߟߎ߬ ߘߏ߫ ߟߋ߬ ߦߟߌߘߏ߲ ߟߐ߬ ߟߊ߫ ߘߏ߫ ߡߊ߬ ߸ ߞߎߡߊ߫ ߡߊߢߍ߯ߙߍߣߍ߲ ߠߎ߬ ߟߊ߫ ߢߐ߲߯ ߜߍߙߍ߲ߞߍ ߟߊ߫ ߞߍ߬ߣߍ߲. ߊ߬ ߘߏ߲߬ ߕߎ߲߬ ߓߊ߯ ߌ ߡߊ߰ߙߌ ߘߌߦߊ߫ ߸ ߊ߬ߟߎ߫ ߕߎ߲߬ ߕߴߏ߬ ߞߍ߫ ، ߒ߬ߓߵߊ߬ߟߎ߬ ߣߴߊ߬ߟߎ߬ ߟߊ߫ ߞߎ߲߬ߘߐ߬ߕߍ߰ ߞߏ ߟߎ߬ ߕߏ߫ ߦߋ߲߬ ߘߏߦߌ߲߫ ﴿112﴾

ߊ߬ ߕߏ߫ ߗߐ߫ ߟߊߞߌߙߊ߫ ߞߏ ߘߍ߲߬ߞߣߍ߬ߦߊ߬ߓߊߟߌ ߟߎ߫ ߛߣߐ߬ߡߍ ߟߎ߬ ߦߴߊ߬ߟߎ߬ ߕߟߏߡߊߟߐ߬ ߏ߬ ߟߊ߫ ، ߊ߬ ߕߏ߫ ߖߐ߫ ߊ߬ߟߎ߬ ߦߋ߫ ߛߐ߲߬ ߏ ߡߊ߬ ، ߊ߬ ߕߏ߫ ߖߐ߫ ߊ߬ߟߎ߬ ߦߴߊ߬ߟߎ߬ ߕߊ߫ ߞߍߕߊ ߓߍ߯ ߞߍ߫ ﴿113﴾

ߌ߬ߦߏ߯ ߒߠߋ ߦߋ߫ ߊߟߊ߫ ߕߣߊ߬ ߢߌߣߌ߲߫ ߕߍߟߐ ߘߌ߫؟ ߏ߬ ߟߋ ߘߏ߲߬ ߞߊ߬ ߟߍߙߊ߫ ߝߊߙߊ߲ߝߊߛߌߣߍ߲ ߠߊߖߌ߰ ߊߟߎ߫ ߡߊ߬؟ ߊ߲ ߞߏ߬ߣߌ߲ ߞߊ߬ ߡߍ߲ ߠߎ߬ ( ߝߟߐ߫ ) ߛߐ߫ ߟߍߙߊ ߟߊ߫ ߸ ߏ߬ ߟߎ߫ ߞߵߊ߬ ߟߐ߲߫ ߞߏ߫ ߊ߬ ߟߊߖߌ߰ߣߍ߲߫ ߞߊ߬ ߝߘߊ߫ ߌ ߡߊ߰ߙߌ ߟߋ߬ ߟߊ߫ ߕߎ߬ߢߊ ߟߊ߫ ، ߒ߬ߓߊ߬ ߌ ߞߊߣߊ߬ ߞߍ߫ ߛߌߞߊߓߊ߮ ߟߎ߬ ߝߋ߲߫ ߘߌ߫ ߘߋ߬ ﴿114﴾

ߌ ߡߊ߰ߙߌ ߟߊ߫ ߞߎߡߊ ߓߘߊ߫ ߘߝߊ߫ ߕߎ߬ߢߊ ߣߌ߫ ߕߋߟߋ߲ ߠߊ߫ ، ߝߊ߬ߟߋ߲߬ߓߊ߯ ߘߏ߲߬ ߕߍ߫ ߊ߬ ߟߊ߫ ߞߎߡߊ ߟߎ߬ ߟߊ߫ ، ߊ߬ߟߋ ߟߋ߫ ߘߏ߲߬ ߦߋ߫ ߡߍ߲ߠߌ߲ߠߊ߫ ߟߐ߲ߠߌ߲ߠߊ ߘߌ߫ ﴿115﴾

ߣߴߌ ߞߊ߬ ߘߎ߱ ߡߐ߱ ߝߊ߲߬ߓߊ ߞߊ߲ ߡߌ߬ߘߊ߬ ߸ ߊ߬ߟߎ߬ ߘߴߌ ߟߊߝߟߌ߬ ߊߟߊ߫ ߟߊ߫ ߛߌߟߊ ߡߊ߬ ، ߓߊ ߊ߬ߟߎ߬ ߕߍ߫ ߝߏߦߌ߬ ߟߊߓߊ߬ߕߏ߬ ߟߊ߫ ߖߌ߰ߟߌ ߞߐ߫ ، ߊ߬ߟߎ߫ ߘߏ߲߬ ߕߍ߫ ߝߏߦߌ߫ ߞߊ߲߬ ߞߎ߲߬ߘߐ߬ߕߍ߮ ߞߐ߫ ﴿116﴾

ߌ ߡߊ߰ߙߌ ߟߋ߫ ߞߵߊ߬ ߟߐ߲߫ ߡߍ߲ ߦߋ߫ ߝߟߌ߬ ߟߴߊ߬ ߟߊ߫ ߛߌߟߊ ߡߊ߬ ߸ ߊ߬ ߞߊ߬ ߞߊ߲ߘߊߓߊ߯ߕߐ ߟߎ߬ ߝߣߊ߫ ߟߐ߲߫ ﴿117﴾

ߊߟߎ߫ ߝߋ߲߫ ߠߋ߬ ߘߏ߫ ߘߊߥߎ߲߫ ߸ ߊߟߊ߫ ߕߐ߮ ߓߊ߯ ߝߐ߫ ߡߍ߲ ߡߊ߬ ، ߣߴߊ߬ ߕߘߍ߬ ߘߴߊߟߎ߫ ߘߍ߲߬ߞߣߍ߬ߦߊ߬ߣߍ߲߫ ߊߟߊ߫ ߟߊ߫ ߟߝߊߙߌ ߟߎ߫ ߡߊ߬ ﴿118﴾

ߡߎ߲߬ߠߴߊߟߊ߫ ߕߐ߮ ߓߊ߯ ߝߐ߫ ߝߋ߲ ߡߍ߲ ߠߎ߫ ߡߊ߬ ߊߟߎ߫ ߕߴߏ߬ ߘߏ߫ ߘߊߥߎ߲߫ ߠߊ߫؟ ߊ߬ ߘߏ߲߬ ߜߎ ߓߘߊ߫ ߝߋ߲ ߠߎ߬ ߝߊߙߊ߲ߝߊߛߌ߫ ߊߟߎ߫ ߦߋ߫ ߸ ߡߍ߲ ߠߎ߬ ߟߊߕߐ߲ߣߍ߲߫ ߊߟߎ߫ ߡߊ߬ ، ߝߏ߫ ߣߌ߫ ߘߋ߬ߥߎ߫ ߞߵߊߟߎ߫ ߟߊߛߋ߫ ߏ߬ ߡߍ߲ ߡߊ߬ ، ( ߡߐ߰ ) ߛߌߦߊߡߊ߲߫ ߠߋ߬ ߘߏ߲߬ ߦߋ߫ ߡߐ߱ ߟߎ߬ ߟߊߝߟߌ߬ ߟߴߊ߬ߟߎ߬ ߣߌ ߛߊ߬ߥߏ ߟߎ߬ ߟߊ߫ ߕߋ߲߬ ߝߎ߯ ߸ ߞߵߊ߬ ߕߘߍ߬ ߟߐ߲ߠߌ߲߫ ߛߌ߫ ߕߍ߫ ߊ߬ߟߎ߬ ߟߊ߫ ، ߖߊ߯ߕߋ߬ ߸ ߌ ߡߊ߰ߙߌ ߟߋ߫ ߞߊ߬ ߖߊ߲߬ߘߊ߬ߓߊ߮ ߟߎ߬ ߟߐ߲߫ ﴿119﴾

ߊߟߎ߫ ߝߘߊ߫ ߖߟߎ߬ߡߎ߲ ߟߊ߲ߞߣߍߡߊߣߍ߲ ߣߴߊ߬ ߘߏ߲߰ߣߍ߲ ߓߍ߯ ߟߊ߫ ، ߡߍ߲ ߠߎ߫ ߞߏ߬ߣߌ߲ ߦߋ߫ ߖߟߎ߬ߡߎ߲ ߞߍ߫ ߟߊ߫ ߸ ߛߋߚߋ߫ ߏ߬ ߟߎ߬ ߓߍߣߊ߫ ߛߊ߬ߙߴߊ߬ߟߎ߬ ߗߋߥߊߟߌ ߟߎ߬ ߟߊ߫ ߟߋ߬ ߕߘߋ߫ ﴿120﴾

ߊߟߊ߫ ߕߐ߮ ߡߊ߫ ߝߐ߫ ߝߋ߲ ߡߍ߲ ߡߊ߬ ߸ ߊߟߎ߫ ߞߊߣߵߏ߬ ߝߋ߲߫ ߘߊߥߎ߲߫ ߘߋ߬ ، ߓߊ ߏ߬ ߦߋ߫ ߔߊߟߊ߲ߞߊ ߟߋ߬ ߘߌ߫ ، ߜߍ߬ߘߍ ߟߎ߫ ߟߋ߫ ߘߏ߲߬ ߦߴߊ߬ߟߎ߫ ߢߌ߲߭ ߠߎ߬ ߦߟߌߘߏ߲߬ ߠߊ߫ ߸ ߛߴߊ߬ߟߎ߬ ߘߴߊߟߎ߫ ߘߊߘߐߖߊ߬ ߕߋ߲߬ ߝߎ߯ ، ߣߴߊߟߎ߫ ߘߏ߲߬ ߞߵߏ߬ ߟߎ߬ ߞߊ߲ ߡߌ߬ߘߊ߬ ߸ ߊߟߎ߫ ߞߍߣߍ߲ ߓߍ߯ ߟߋ߬ ߛߏߡߊ ߟߎ߬ ߘߌ߫ ߏ߬ ߘߌ߫ ﴿121﴾

ߦߊ߯ߟߊ߫ ߡߐ߱ ߡߍ߲ ߕߘߍ߬ ߛߎ߭ ߘߌ߫ ، ߊ߲ ߣߊ߬ ߘߴߊ߬ ߟߊߢߣߊߡߦߊ߫ ߸ ߞߊ߬ ߦߋߟߋ߲ ߘߴߊ߬ ߡߊ߬ ߸ ߊ߬ ߦߴߊ߬ ߕߊ߯ߡߊ߫ ߟߊ߫ ߏ߬ ߟߊ߫ ߡߐ߱ ߟߎ߬ ߕߍߡߊ߬ ߸ ߏ߬ ߘߌ߫ ߞߍ߫ ߞߏߟߊߒߞߏߡߊ ߘߐ߫ ߓߊ߬ ߦߏ߫ ߡߍ߲ ߦߋ߫ ߘߓߌ߬ ߟߎ߫ ߘߐ߫ ߸ ߊ߬ ߕߍߣߊ߬ ߓߐ߫ ߟߊ߫ ߡߍ߲ ߠߎ߬ ߘߐ߫؟ ߒ߬ߓߊ߬ ߓߊ߲߬ߓߊ߮ ߟߎ߬ ߗߋߥߊߟߌ ߟߎ߬ ߡߊߢߍ߯ߙߍߣߍ߲߫ ߊ߬ߟߎ߬ ߢߊߞߘߐ߫ ߕߋ߲߬ ߠߋ߬ ﴿122﴾

ߏ߬ ߟߋ ߞߵߊ߬ ߞߍ߫ ߊ߲ ߞߊ߬ ߛߏ ߓߍ߯ ߡߐ߰ߓߊ ߟߎ߬ ߞߍ߫ ߊ߬ ߛߐ߲߬ߡߊ ߟߎ߬ ߘߌ߫ ߸ ߛߴߊ߬ߟߎ߬ ߘߌ߫ ߣߊߡߙߊ ߟߎ߬ ߞߍ߫ ߘߎ߱ ߞߣߐ߫ ، ߞߵߊ߬ ߕߘߍ߬ ߊ߬ߟߎ߬ ߕߍ߫ ߣߊߡߙߊ ߞߍ߫ ߟߊ߫ ߡߐ߰ ߛߌ߫ ߟߴߊ߬ߟߎ߫ ߖߍ߬ߘߍ ߞߐ߫ ، ߞߏ߬ߣߌ߲߬ ߊ߬ߟߎ߬ ߕߴߏ ߞߊ߬ߟߊߡߊ߬ ﴿123﴾

ߣߌ߫ ߟߝߊߙߌ ߘߏ߫ ߣߊ߬ ߘߴߊ߬ߟߎ߫ ߡߊ߬ ߞߏߕߊ߲߫ ߸ ߊ߬ߟߎ߬ ߘߴߊ߬ ߝߐ߫ ߞߏ߫ ߊ߲ ߕߍߣߊ߫ ߘߍ߲߬ߞߣߍ߬ߦߊ߬ ߟߊ߫ ߸ ߝߏ߫ ߣߴߊ߲ ߛߐ߫ ߘߴߊߟߊ߫ ߟߊ߫ ߞߋߟߊ ߟߎ߬ ߟߊ߫ ߡߊ߲߬ߕߊߣߌ߲ ߢߐ߲߰ ߠߊ߫. ߊߟߊ߫ ߟߋ߫ ߘߏ߲߬ ߞߵߊ߬ ߟߐ߲߫ ߊ߬ ߦߴߊ߬ ߟߊ߫ ߞߋߟߦߊ ߞߍ߫ ߟߊ߫ ߦߙߐ ߡߍ߲ ، ߓߊ߬ߙߌ߬ ߛߋߚߋ߫ ߸ ߘߐ߯ߦߊ ߓߍߣߊ߬ ߛߐ߲߬ߡߊ ߟߎ߫ ߛߐ߬ߘߐ߲߬ ߊߟߊ߫ ߓߘߊ ߸ ߊ߬ ߣߌ߫ ߖߊ߲߰ߞߕߊ߬ ߜߍߟߍ߲ ߸ ߞߊ߬ߡߊߛߐ߬ߘߐ߲߫ ߊ߬ߟߎ߬ ߟߊ߫ ߡߊߙߊ߲ߛߊ ߝߍ߬ ﴿124﴾

ߣߌ߫ ߊߟߊ߫ ߓߴߊ߬ ߝߍ߬ ߞߊ߬ ߡߍ߲ ߞߊ߲ߘߊ߫ ߸ ߊ߬ ߘߴߏ߬ ߛߌߛߌ ߦߙߌߥߊ߫ ߛߌ߬ߟߡߊ߬ߦߊ ߦߋ߫ ، ߣߴߊ߬ ߘߏ߲߬ ߦߴߊ߬ ߝߍ߬ ߞߊ߬ ߡߍ߲ ߠߊߝߟߌ߬ ߸ ߊ߬ ߘߴߏ߬ ߛߌߛߌ ߞߍ߫ ߜߍ߬ߙߍ߲߬ߘߍ ߜߍ߬ߙߍ߲߬ߘߍ߬ߣߍ߲ ߘߌ߫ ߝߌ߯ߝߊ߯ ߸ ߦߏ߫ ߊ߬ ߦߋ߫ ߦߍ߬ߟߍ ߟߋ߫ ߞߊ߲߬ ߛߊ߲ ߡߊ߬ ، ߒ߬ߓߵߊߟߊ߫ ߦߋ߫ ߞߛߐ ߞߍ߫ ߟߊ߫ ߘߍ߲߬ߞߣߍ߬ߦߊ߬ߓߊߟߌ ߟߎ߫ ߡߊ߬ ߕߋ߲߬ ߠߋ߬ ﴿125﴾

ߣߌ߲߬ ߦߴߌ ߡߊ߰ߙߌ ߟߊ߫ ߛߌߟߊ߫ ߕߋߟߋ߲ߣߍ߲߫ ߓߐߚߐ ߟߋ߬ ߘߌ߫ ߸ ߊ߲ ߘߏ߲߬ ߓߘߊ߫ ߓߊ߲߫ ߟߝߊߙߌ ߟߎ߬ ߝߊߙߊ߲ߝߊߛߌ߫ ߟߊ߫ ߡߌ߬ߙߌ߲߬ߘߌ߫ ߕߊ߰ߛߌ߬ߟߊ ߟߎ߬ ߦߋ߫ ﴿126﴾

ߞߛߌ ߛߏ ߟߋ߫ ߛߌ߰ߣߴߏ߬ ߟߎ߬ ߢߍ߫ ߊ߬ߟߎ߫ ߡߊ߰ߙߌ ߓߘߊ ، ߏ߬ ߟߋ ߘߏ߲߬ ߦߴߊ߬ߟߎ߫ ߢߌ߲߭ ߘߌ߫ ߞߊ߬ߡߊߛߐ߬ߘߐ߲߫ ߊ߬ߟߎ߬ ߟߊ߫ ߓߊ߯ߙߊ ߝߍ߬ ﴿127﴾

ߊߟߊ߫ ߞߍߕߐ߫ ߊ߬ߟߎ߬ ߓߍ߯ ߟߊߘߍ߬ ߟߊ߫ ߟߏ߲ ߡߍ߲ ( ߞߵߊ߬ ߝߐ߫ ) ߞߏ߫ ߤߍ߲߬ ߊߟߎ߬ ߥߐ߬ߞߎ߬ߟߐ߬ ߖߡߊ ߟߎ߬ ߸ ߖߊ߯ߕߋ߬ ߸ ߊߟߎ ߟߋ߫ ߞߊ߬ ߝߌ߬ߟߌ ߟߊߛߌߦߊߦߊ߫ ߡߐ߱ ߟߎ߬ ߘߐ߫ ، ߊ߬ߟߎ߫ ߢߌ߲߭ ߡߍ߲ ߠߎ߬ ߦߋ߫ ߡߐ߱ ߟߎ߬ ߘߐ߫ ߸ ߏ߬ ߟߎ߬ ߘߴߊ߬ ߝߐ߫ ߞߏ߫ ߊ߲ ߡߊ߰ߙߌ ߸ ߊ߲ ߘߏ߫ ߟߋ߬ ߕߏ߫ ߘߴߊ߬ ߘߊ߰ߡߎ߲߬ ߠߊ߫ ߘߏ߫ ߟߊ߫ ߸ ߝߏ߫ ߊ߲ ߛߋ߫ ߘߊ߫ ߒ߬ ߛߕߊ ߡߊ߬ ߸ ߌ ߞߊ߬ ߡߍ߲ ߟߐ߯ߟߊ߫ ߒ߬ ߧߋ߫ ، ߊߟߊ߫ ߘߴߊ߬ ߝߐ߫ ߞߏ߫ ߒ߬ߓߊ߬ ߕߊ ߟߋ߬ ߞߍߕߐ߫ ߊߟߎ߫ ߘߊ߯ ߦߌߟߊ ߘߌ߫ ، ߊߟߎ߫ ߘߎߡߊߕߐ߫ ߦߋ߲߬ ߠߋ߬ ߝߎߚߎ߫ ߝߏ߫ ߡߍ߲ ߓߊ߯ ߊߟߊ߫ ߘߌߦߊ߫ ، ߖߊ߯ߕߋ߬ ߸ ߌ ߡߊ߰ߙߌ ߦߋ߫ ߥߘߋ߬ߥߘߋ߬ߟߌ߬ߟߊ߫ ߘߌ߫ ߸ ߊ߰ ߟߐ߲ߠߌ߲ߠߊ߫ ߘߌ߫ ﴿128﴾

ߒ߬ߓߊ߬ ߊ߲ ߧߋ߫ ߕߐ߬ߢߍ߰ߒߕߋ ߟߎ߬ ߘߏ߫ ߓߛߌ߬ ߟߊ߫ ߘߏ߫ ߟߊ߫ ߕߋ߲߬ ߠߋ߬ ߸ ߊ߬ߟߎ߬ ߟߊ߫ ߓߊ߯ߙߊ߫ ߞߍߣߍ߲ ߠߎ߫ ߞߛߊ߬ߓߌ ߡߊ߬ ﴿129﴾

(ߊ߬ ߘߌ߫ ߝߐ߫ ߞߏ߫ ) ߤߍ߲߬ ߊߟߎ߬ ߥߐ߬ߞߎߟߐ ߟߎ߬ ߣߌ߫ ߡߐ߱ ߖߊ߬ߡߊ ߟߎ߬ ߸ ߦߊ߯ߟߊ߫ ߞߋߟߊ ߟߎ߬ ߡߊ߫ ߣߵߊߟߎ߫ ߡߊ߬ ߞߊ߬ ߓߐ߫ ߊߟߎ߫ ߖߍ߬ߘߍ ߘߐ߫ ߓߊ߬ ߸ ߡߍ߲ ߠߎ߫ ߞߊ߬ ߒ ߠߊ߫ ߟߝߊߙߌ ߟߎ߫ ߘߊ߲߬ߕߍ߰ߟߌ ߞߍ߫ ߊߟߎ߫ ߦߋ߫ ߸ ߊ߬ ߣߌ߫ ߞߊ߬ ߖߊ߬ߛߙߋ߬ߡߊ߬ߟߊ ߞߍ߫ ߊߟߎ߫ ߦߋ߫ ߊߟߎ߫ ߟߊ߫ ߓߌ߬ ߟߏ߲ ߣߌ߲߬ ߓߍ߲߬ߢߐ߲߰ߦߊ ߟߊ߫؟ ߊ߬ߟߎ߬ ߘߴߊ߬ ߝߐ߫ ߞߏ߫ ߊ߲ ߓߘߊ߫ ߏ߬ ߛߙߋߦߊ ߟߊߟߐ߬ ߒ߬ ߖߍ߬ߘߍ߫ ߞߊ߲߬ ߝߊ߯ߛߌ߫ ، ߞߏ߬ߣߌ߲߬ ߘߎߢߊ߫ ߢߣߊߡߦߊ ߟߋ߫ ߞߵߊ߬ߟߎ߬ ߜߍߙߍ߲ߞߍ߫ ، ߊ߬ߟߎ߫ ߘߏ߲߬ ߘߌ߫ ߛߙߋߦߊ ߟߊߟߐ߬ ߊ߬ߟߎ߫ ߖߍ߬ߘߍ߫ ߞߊ߲߬ ߸ ߞߏ߫ ߊ߬ߟߎ ߟߋ߬ ߞߍ߫ ߘߊ߫ ߓߊ߲߬ߓߊ߮ ߟߎ߬ ߘߌ߫ ﴿130﴾

ߊ߬ ߘߏ߲߬ ߸ ߏ߬ ߞߎ߲߭ ߠߋ߬ ߸ ߓߊ ߌ ߡߊ߰ߙߌ ߕߍ߫ ߞߊ߬ߝߏ߬ ߛߌ߫ ߛߌߟߊߛߊ߬ ߟߊ߫ ߕߐ߬ߢߍ߮ ߟߊ߫ ߞߵߊ߬ ߘߏ߲߬ߞߏ ߟߎ߬ ߘߊߘߐߞߊߘߌߣߍ߲ ߕߏ߫ ﴿131﴾

ߡߐ߬ߟߐ߲߬ ߠߎ߫ ߟߋ߬ ߓߍ߯ ߟߊ߫ ߞߵߊ߬ ߓߍ߲߬ ߓߍ߯ ߗߋߥߊߟߌ ߞߛߊ߬ߓߌ ߡߊ߬ ߸ ߌ ߡߊ߰ߙߌ ߘߏ߲߬ ߖߊ߲߬ߓߐߣߍ߲߫ ߕߍ߫ ߊ߬ߟߎ߬ ߞߍߕߊ ߟߎ߬ ߘߐ߫ ﴿132﴾

ߌ ߡߊ߰ߙߌ߬ ߞߊߙߌߣߍ߲ ߠߋ߬ ߤߌߣߊ ߕߌ߱ ߘߌ߫ ، ߣߴߊ߬ ߞߵߏ߬ ߘߌߦߊ߫ ߸ ߊ߬ ߘߴߊߟߎ߫ ߟߊߕߊ߯ ߖߋߥߎ߲߫ ، ߞߊ߬ ߣߘߐ߬ߓߌߟߊ߫ ߟߊߣߵߊߟߎ߫ ߞߐ߫ ߸ ߡߍ߲ ߓߊ߯ ߊ߬ ߘߌߦߊ߫ ߸ ߦߏ߫ ߊ߬ ߞߵߊߟߎ߫ ߘߊ߲߫ ߡߌ߬ߙߌ߲߬ߘߌ߬ ߜߘߍ߫ ߟߎ߫ ߓߐ߲ߛߐ߲ ߘߐ߫ ߢߊ ߡߍ߲ ﴿133﴾

ߊߟߎ߫ ߦߟߌߡߊߘߌߦߊߣߍ߲߫ ߞߏ ߡߍ߲ ߠߊ߫ ߏ ߣߊ߬ߕߐ߫ ߟߋ߫ ߘߋ߬ ، ߊߟߎ߫ ߘߏ߲߬ ߕߍ߫ ߊߟߊ߫ ߓߟߏߡߊߓߊ߬ߟߌ߬ߓߊ߯ ߟߎ߫ ߘߌ߫ ﴿134﴾

ߊ߬ ߝߐ߫ ߞߏ߫ ߤߍ߲߬ ߊߟߎ߬ ߒ ߓߊߘߋ߲ ߠߎ߬ ߸ ߊߟߎ߫ ߓߊ߯ߙߊ ߞߍ߫ ߊߟߎ߫ ߞߎ߲߬ߕߋߟߋ߲ ߝߍ߬ ߝߛߊߦߌ߫ ߸ ߒߠߋ ߝߣߊ߫ ߦߋ߫ ߒ ߕߊ߫ ߓߊ߯ߙߊ ߟߊ߬ ، ߞߏ߬ߣߌ߲߬ ߛߋߚߋ߫ ߊߟߎ߫ ߘߌߣߵߊ߬ ߟߐ߲߫ ߛߏ ߟߊ߬ߓߊ߲߬ ߞߏ߬ߢߌߡߊ ߣߊ߬ߕߐ߬ ߞߍ߫ ߟߊ߫ ߡߍ߲ ߢߍ߫ ، ߓߊ߬ߙߌ߬ ߕߐ߬ߢߍ߰ߒߕߋ ߟߎ߬ ߕߍߣߊ߬ ߛߎߘߊ߲߫ ߠߊ߫ ﴿135﴾

ߊߟߊ߫ ߖߍ߬ߘߍ ߞߊ߬ ߛߣߍ߬ ߛߎߡߊ߲ ߠߎ߬ ߣߌ߫ ߞߟߏߝߋ߲ ߡߍ߲ ߠߎ߬ ߟߊߓߎ߯ ߸ ߊ߬ߟߎ߬ ߓߘߴߊߟߊ߫ ߣߌ߭ ߟߊߘߊ߲߫ ߏ߬ ߟߎ߬ ߘߐ߫ ߸ ߞߵߊ߬ ߝߐ߫ ߏ߬ ߘߏ߫ ߡߊ߬ ߊ߬ߟߎ߬ ߟߊ߫ ߘߊߘߝߐ ߘߐ߫ ߸ ߞߏ߫ ߣߌ߲߬ ߦߋ߫ ߊߟߊ߫ ߕߊ ߟߋ߬ ߘߌ߫ ، ߘߐ ߣߌ߲߬ ߦߴߊ߲ ߜߙߊ߬ߢߐ߲߮ ߠߎ߬ ߕߊ ߟߋ߬ ߘߌ߫ ، ߡߍ߲ ߓߊ߯ ߞߍ߫ ߊ߬ߟߎ߫ ߜߙߊ߬ߢߐ߲߮ ߠߎ߬ ߕߊ ߘߌ߫ ߸ ߏ߬ ߕߴߛߋ߫ ߊߟߊ߫ ߡߊ߬ ߝߋߎ߫ ، ߒ߬ߞߊ߬ ߡߍ߲ ߓߊ߯ ߞߍ߫ ߊߟߊ߫ ߕߊ ߘߌ߫ ߸ ߏ߬ ߘߌ߫ ߛߴߊ߬ߟߎ߫ ߜߙߊ߬ߢߐ߲߮ ߠߎ߫ ߡߊ߬ ، ߊ߬ߟߎ߬ ߞߕߌ߫ ߟߊ߫ ߢߊ ߏ߬ ߘߏ߲߬ ߖߎ߯ߡߊ߲߫ ߥߍ߫ ﴿136﴾

ߒ߬ߓߵߊ߬ߟߎ߫ ߜߙߊ߬ߢߐ߲߮ ߠߎ߫ ߣߊ߬ ߛߏߡߊ߫ ߛߌߦߊߡߊ߲߫ ߘߋ߲ ߠߎ߫ ߝߊ߱ ߟߊߗߋ߲߰ߧߊ߬ ߟߴߊ߬ߟߎ߬ ߢߊߞߘߐ߫ ߕߊ߲߬ ߠߋ߬ ߸ ߛߴߊ߬ߟߎ߬ ߘߴߊ߬ߟߎ߬ ߛߌߟߊߛߊ߬ ߝߎ߯ ، ߊ߬ ߣߌ߫ ߞߵߊ߬ߟߎ߬ ߘߌ߯ߣߊ ߢߊߞߍ߫ ߊ߬ߟߎ߫ ߡߊ߬ ߓߘߍߞߍ߭ ، ߊ߬ ߘߏ߲߬ ߕߘߍ߬ ߓߊ߯ ߘߌߦߴߊߟߊ߫ ߦߋ߫ ߸ ߊ߬ߟߎ߫ ߕߎ߲߬ ߕߴߏ߬ ߛߌ߫ ߞߍ߫ ، ߒ߬ߓߊ߬ ߌߟߋ ߦߴߊ߬ߟߎ߬ ߕߏ߫ ߦߋ߲߬ ߝߋߎ߫ ߸ ߊ߬ߟߎ߬ ߣߴߊ߬ߟߎ߬ ߟߊ߫ ߞߎ߲߬ߘߐ߬ߕߍ߰ ߞߏ ߓߍ߯ ﴿137﴾

ߊ߬ߟߎ߬ ߦߴߊ߬ ߝߐ߫ ߟߊ߫ ߞߏ߫ ߣߌ߲߬ ߦߋ߫ ߞߟߏߝߋ߲ ߠߎ߬ ߣߌ߫ ߛߣߍ߬ ߛߎߡߊ߲ ߠߋ߬ ߘߌ߫ ߸ ߡߍ߲ ߠߎ߬ ߦߋ߫ ߟߊߕߏߕߊ ߟߎ߬ ߘߌ߫ ، ߡߐ߰ ߜߘߍ߫ ߕߴߏ߬ ߘߊߥߎ߲߫ ߝߏ߫ ߡߍ߲ ߓߊ߯ ߒ߬ ߘߌߦߊ߫ ، ߞߵߏ߬ ߝߐ߫ ߊ߬ߟߎ߬ ߟߊ߫ ߘߊߘߝߐ ߘߐ߫ ، ߊ߬ ߣߌ߫ ߞߏ߫ ߞߟߏߝߋ߲߫ ߜߘߍ߫ ߟߎ߫ ߓߍ߫ ߸ ߏ߬ ߟߎ߬ ߞߐ߫ ߞߊ߲߫ ߦߟߍ ߟߊߕߐ߲ߣߍ߲߫ ߸ ߞߟߏߝߋ߲߫ ߜߘߍ߫ ߟߎ߫ ߓߍ߫ ߸ ߊ߬ߟߎ߬ ߕߍ߫ ߊߟߊ߫ ߕߐ߮ ߝߐ߫ ߟߴߏ߬ ߟߎ߫ ߡߊ߬ ، ߏ߬ ߓߍ߯ ߦߋ߫ ߞߎ߲߬ߘߐ߬ߕߍ߯ ߟߊߣߍ߲ ߠߋ߬ ߘߌ߫ ߊߟߊ߫ ߟߊ߫ ߕߋ߲߬ ߝߎ߯ ، ߊ߬ ߘߏ߲߬ ߘߌߣߵߊ߬ߟߎ߫ ߛߊ߬ߙߴߊ߬ߟߎ߬ ߟߊ߫ ߞߎ߲߬ߘߐ߬ߕߍ߮ ߟߊ߫ ߖߐ߫ ﴿138﴾

ߊ߬ߟߎ߬ ߦߴߊ߬ ߝߐ߫ ߟߊ߫ ߕߎ߲߯ ߸ ߞߏ߫ ߝߋ߲ ߡߍ߲ ߠߎ߬ ߦߋ߫ ߞߟߏߝߋ߲ ߢߌ߲߬ ߠߎ߬ ߞߣߐ߫ ߸ ߏ߬ ߟߎ߬ ߦߋ߫ ߘߎ߲߬ߘߎ߬ߡߊ ߘߌ߫ ߊ߲ ߘߐ߫ ߗߍ߬ߡߊ߲ ߠߎ߫ ߟߋ߬ ߦߋ߫ ߸ ߊ߬ ߟߊߕߐ߲ߣߍ߲߫ ߊ߲ ߝߘߎߡߊ ߟߎ߫ ߡߊ߬ ، ߣߴߊ߬ ߘߏ߲߬ ߞߍ߫ ߘߊ߫ ߛߊ߲ߞߌߘߊ߲߫ ߘߌ߫ ߸ ߊ߬ߟߎ߬ ߓߍ߯ ߘߌ߫ ߘߍ߬ ߏ߬ ߟߊ߫ ، ߞߏ߬ߣߌ߲߬ ߛߋߚߋ߫ ߊߟߊ߫ ߘߌߣߵߊ߬ߟߎ߫ ߛߊ߬ߙߴߊ߬ߟߎ߬ ߟߊ߫ ߡߊ߲߬ߞߕߎ߬ߒ߬ߞߊ߲߬ߠߊ ߟߊ߫ ، ߓߊ ߏ߬ ߦߋ߫ ߥߘߋ߬ߥߘߋ߬ߟߌ߬ߟߊ߫ ߘߌ߫ ߸ ߊ߬ ߦߋ߫ ߟߐ߲ߠߌ߲ߠߊ߫ ߘߌ߫ ﴿139﴾

ߡߐ߱ ߟߎ߫ ߓߣߐ߬ߣߍ߲߫ ߠߋ߬ ߡߍ߲ ߠߎ߫ ߞߵߊ߬ߟߎ߬ ߘߋ߲ ߠߎ߫ ߝߊ߰ ߖߎߥߦߊ ߡߊ߬ ߣߌ߫ ߟߐ߲ߠߌ߲ ߛߎ߯-ߎ-ߛߎ߯ ߕߍ߫ ߸ ߊ߬ ߣߴߊ߬ߟߎ߫ ߞߵߊߟߊ߫ ߟߊ߫ ߤߊ߬ߙߌ߬ߖߍ߰ ߘߌߣߍ߲ ߞߎ߬ߡߊ߲߬ߘߌ߫ ߊ߬ߟߎ߫ ߖߍ߬ߘߍ߫ ߡߊ߬ ، ߏ߬ ߓߍ߯ ߦߋ߫ ߞߎ߲߬ߘߐ߬ߕߍ߮ ߟߊߣߍ߲ ߠߋ߬ ߘߌ߫ ߊߟߊ߫ ߟߊ߫ ߕߋ߲߬ ߝߎ߯ ، ߏ߬ ߟߎ߬ ߦߋ߫ ߝߌ߬ߟߌ ߟߋ߬ ߘߐ߫ ߸ ߊ߬ߟߎ߬ ߡߊ߫ ߞߍ߫ ߞߊ߲ߘߊߓߊ߯ ߘߌ߫ ( ߝߋߎ߫) ﴿140﴾

ߊߟߊ߫ ߟߋ߫ ߞߊ߬ ߣߊߞߐ ߟߎ߬ ߟߊߝߍߘߍ߲߫ ߸ ߏ߬ ߘߏ߫ ߟߎ߫ ߣߐ߲ߓߐߟߡߊ ߦߋ߫ ߟߊߥߦߏ߬ ߟߊ߫ ( ߞߵߊ߬ ߟߊߦߟߍ߬ ߟߐ߲ ߠߊ߫ ) ߸ ߘߏ߫ ߟߎ߫ ߕߍ߫ ߟߊߥߦߏ߬ ߟߊ߫ ( ߞߵߊ߬ ߟߊߦߟߍ߬ ߟߐ߲ ߠߊ߫ ) ، ߊ߬ ߣߌ߫ ߕߡߊߙߏߛߎ߲ ߠߎ߬ ߣߌ߫ ߢߐ߬ ߛߣߍ߬ߕߊ ߟߎ߬ ، ߏ߬ ߟߎ߬ ߥߟߏߒߘߐ ߟߎ߬ ߓߐߣߍ߲߫ ߢߐ߲߮ ߡߊ߬ ، ߊ߬ ߣߌ߫ ߛߏߞߏ߬ߘߏ ߣߌ߫ ߦߙߌߢߐ ߟߎ߬ ، ߏ߬ ߘߏ߫ ߟߎ߫ ߡߎߣߎ߲ߣߍ߲߫ ߘߏ߫ ߟߎ߫ ߡߎߣߎ߲ߣߍ߲߫ ߕߍ߫ ، ߊߟߎ߫ ߦߋ߫ ߦߙߌ ߏ߬ ߟߎ߬ ߘߋ߲ ߘߏ߫ ߘߊߥߎ߲߫ ߸ ߣߴߊ߬ߟߎ߫ ߞߵߊ߬ߟߎ߬ ߘߋ߲߫ ، ߊߟߎ߫ ߦߴߊ߬ߟߎ߬ ߖߞߊ ߘߌ߫ ߊ߬ߟߎ߫ ߞߊ߬ ߟߏ߲ ، ߓߊ߬ߙߌ߬ ߊߟߎ߫ ߞߊߣߊ߬ ߖߊߛߟߌ ߞߍ߫ ߘߋ߬ ߸ ߓߊ ߊߟߊ߫ ߕߍ߫ ߖߊߛߟߌߟߊ ߟߎ߫ ߝߍ߬ ﴿141﴾

ߞߟߏߝߋ߲ ߘߏ߫ ߟߎ߫ ߦߋ߫ ߘߏ߬ߣߌ߲߬ ߕߊ߬ߟߊ߲ ߠߎ߬ ߘߌ߫ ߸ ߘߏ߫ ߟߎ߫ ߦߋ߫ ߞߊ߲ߠߊߕߍ߯ߕߊ ߟߎ߬ ߘߌ߫ ، ߊߟߎ߫ ߦߋ߫ ߊߟߊ߫ ߟߊ߫ ߤߊ߬ߙߌ߬ߖߍ߰ ߘߌߣߍ߲ ߏ߬ ߟߎ߬ ߘߏ߫ ߘߊߥߎ߲߫ ߝߛߊߦߌ߫ ، ߓߊ߬ߙߌ߬ ߊߟߎ߫ ߞߊߣߊ߬ ߕߎ߲߰ ߜߍ߬ߘߍ ߜߋ߬ߙߋ ߟߎ߬ ߟߊ߫ ߘߋ߬ ߸ ߓߊ ߏ߬ ߦߴߊߟߎ߫ ߖߎ߯ ߘߐߜߍ ߟߋ߬ ߘߌ߫ ﴿142﴾

ߞߟߏߝߋ߲ ߠߎ߫ ߝߌ߬ߟߓߊ߬ ߛߋߦߌ߲߫ ߠߋ߬: ߝߌ߬ߟߊ߬ ߦߋ߫ ߛߊ߱ ߘߐ߫ ، ߝߌ߬ߟߊ߬ ߦߋ߫ ߓߊ߭ ߘߐ߫ ، ߊ߬ߟߎ߫ ߢߌ߬ߣߌ߲߬ߞߊ߬ ߞߏ߫ ߦߊ߯ߟߊ߫ ߗߍ߬ߡߊ߲߫ ߝߌ߬ߟߊ߫ ߟߋ߬ ߟߊߕߐ߲ߣߍ߲߫ ߓߊ߬ ߥߟߊ߫ ߡߛߏ߬ߡߊ߲߫ ߝߌ߬ߟߊ ߸ ߤߊߡߊ߲ߕߍ߫ ߡߛߏ߬ߡߊ߲߫ ߝߌ߬ߟߊ ߘߋ߲ߛߏ ߟߎ߬ ߟߊߡߐ߲ߣߍ߲߫ ߢߋ߬ߟߋ ߡߍ߲ ߡߊ߬؟ ، ߊߟߎ߫ ߦߋ߫ ߒ ߞߌ߬ߓߊ߬ߙߴߏ߬ ߢߊ߫ ߘߐߜߍ ߟߊ߫ ߓߊ߫ ߣߴߊߟߎ߫ ߞߍ߫ ߘߊ߫ ߕߎ߬ߢߊ߬ ߕߌ߯ ߟߎ߫ ߘߌ߫؟ ﴿143﴾

ߝߌ߬ߟߊ߬ ߦߋ߫ ߢߐ߯ߡߍ ߘߐ߫ ، ߝߌ߬ߟߊ߬ ߦߋ߫ ߣߌ߬ߛߌ ߘߐ߫ ، ߊ߬ߟߎ߫ ߢߌ߬ߣߌ߲߬ߞߊ߬ ߞߏ߫ ߦߊ߯ߟߊ߫ ߗߍ߬ߡߊ߲߫ ߝߌ߬ߟߊ ߟߋ߬ ߟߊߕߐ߲ߣߍ߲߫ ߓߊ߬ ߥߟߊ߫ ߡߛߏ߬ߡߊ߲߫ ߝߌ߬ߟߊ ߸ ߤߊߡߊ߲ߕߍ߫ ߡߛߏ߬ߡߊ߲߫ ߝߌ߬ߟߊ ߘߋ߲ߛߏ ߟߎ߬ ߟߊߡߐ߲ߣߍ߲߫ ߢߋ߬ߟߋ ߡߍ߲ ߡߊ߬؟ ، ߥߟߊ߫ ߦߊ߯ߟߊ߫ ߊߟߎ ߟߋ߫ ߕߘߍ߬ ߛߙߋ ߟߎ߬ ߘߌ߫ ߸ ߊߟߊ߫ ߞߍ߫ ߕߎߡߊ ߟߊ߫ ߞߊ߬ ߣߌ߲߬ ߛߙߊ߬ߒ߬ߞߊ߲߬ߠߊ ߞߍ߫ ߊߟߎ߫ ߟߊ߫؟ ߒ߬ߓߊ߬ ߖߍߣߍ߲ ߠߊ߫ ߕߐ߬ߢߍ߮ ߘߌ߫ ߕߊ߬ߡߌ߲߬ ߥߎߦߊ ߞߎ߲߬ߘߐߕߍ߰ߓߊ߮ ߟߊ߫ ߞߵߊ߬ ߟߊ߫ ߊߟߊ߫ ߟߊ߫ ߸ ߖߐ߲߰ߛߴߊ߬ ߦߋ߫ ߡߐ߱ ߟߎ߬ ߟߊߝߟߌ߬ ߟߐ߲ߠߌ߲ߓߊߟߌߦߊ ߟߊ߫ ، ߓߊ߬ߙߌ߬ ߝߋߎ߫ ߊߟߊ߫ ߕߍ߫ ߡߌ߬ߙߌ߲߬ߘߌ߫ ߕߐ߬ߢߍ߰ߒߕߋ ߟߎ߬ ߞߊ߲ߘߊ߫ ߟߊ߫ ﴿144﴾

ߊ߬ ߟߊߛߋ߫ ߞߏ߫ ߒ ߦߟߌߘߏ߲߬ߣߍ߲߫ ߟߍߙߊ ߡߍ߲ ߠߊ߫ ߸ ߒ ߡߊ߫ ߝߏߦߌ߬ ߟߊߕߐ߲ߣߍ߲ ߛߐ߬ߘߐ߲߫ ߏ߬ ߞߣߐ߫ ߘߊߥߎ߲ߠߌ߲ߠߊ ߡߊ߬ ߸ ߊ߬ ߘߌ߫ ߡߍ߲ ߘߊߥߎ߲߫ ، ߝߏ߫ ߣߴߊ߬ ߞߍ߫ ߘߊ߫ ߛߊ߲ߞߌߘߊ߲ ߘߌ߫ ߸ ߥߟߊ߫ ߖߋ߬ߟߌ߬ ߟߊߓߐ߲߬ߣߍ߲ ߘߌ߫ ، ߥߟߊ߫ ߟߍ߬ ߛߓߏ ߘߌ߫ ، ߓߊ ߏ߬ ߦߋ߫ ߞߛߐ ߟߋ߬ ߘߌ߫ ، ߤߊߡߊ߲ߕߍ߫ ߔߊߟߊ߲ߞߊ ߞߎߟߋ߫ ߞߍߣߍ߲߫ ߡߍ߲ ߠߊ߫ ߊߟߊ߫ ߕߊ߬ߣߊ ߘߏ߫ ߦߋ߫ ، ߣߌ߫ ߡߍ߲ ߞߏ߬ߣߌ߲ ߘߋ߬ߥߎ߬ ߘߊ߫ ߞߵߊ߬ ߕߘߍ߬ ߡߙߎߕߌߓߊ߯ ߕߍ߫ ߸ ߖߊ߲߬ߘߊ߬ߓߊ߯ ߕߍ߫ ߸ ߒ߬ߓߊ߬ ߌ ߡߊ߰ߙߌ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿145﴾

ߊ߲ ߞߊ߬ ߛߏ߬ߙߌ߲߬ߝߘߊ߬ߡߊ߬ ߝߋ߲ ߓߍ߯ ( ߛߏ߬ߓߏ ) ߞߎ߬ߡߊ߲߬ߘߌ߫ ߟߋ߫ ߦߊ߬ߤߎ߯ߘߎ ߟߎ߫ ߡߊ߬ ، ߊ߲ ߞߊ߬ ߣߌ߬ߛߌ ߟߎ߬ ߣߌ߫ ߕߊ߬ߡߛߌ ߟߎ߬ ߝߣߊ߫ ߗߍ߲ ߠߎ߫ ߞߎ߬ߡߊ߲߬ߘߌ߫ ߊ߬ߟߎ߫ ߡߊ߬ ، ߝߏ߫ ߊ߬ߟߎ߬ ߞߐ ߟߎ߫ ( ߓߎ߭ ) ߣߊ߬ ߡߍ߲ ߕߊ߬ ߟߊ߫ ( ߞߐߓߎ ߟߎ߬ ߟߊ߫) ߸ ߥߟߊ߫ ( ߡߍ߲ ߦߋ߫) ߡߊ߲߬ߛߓߊ߬ߣߏ߮ ߟߎ߬ ߟߊ߫ ، ߤߊߡߊ߲ߕߍ߫ ߡߍ߲ ߓߊ߬ߛߊ߲߬ߣߍ߲߫ ߖߜߊ ߟߊ߫ ، ߊ߲ ߘߏ߲߬ ߞߵߊ߬ߟߎ߫ ߛߙߊ߬ ߏ߬ ߟߴߊ߬ߟߎ߬ ߟߊ߫ ߕߐ߬ߢߍ߮ ߟߋ߬ ߞߏߛߐ߲߬ ، ߊ߲ ߘߏ߲߬ ߦߋ߫ ߕߎ߬ߢߊ߬ ߝߐ߬ߟߊ ߟߎ߫ ߟߋ߬ ߘߌ߫ ﴿146﴾

ߒ߬ߓߊ߬ ߣߴߊ߬ߟߎ߫ ߞߵߌ ߛߐ߬ߛߐ߬ ߸ ߌ ߦߴߊ߬ ߝߐ߫ ߞߏ߫ ߊߟߎ߫ ߡߊ߰ߙߌ ߟߋ߬ ߤߌߣߊ߫ ߦߙߌߥߊߣߍ߲ ߕߌ߱ ߘߌ߫ ، ߓߊ߬ߙߌ߬ ߝߏߦߌ߬ ߕߍ߫ ߛߴߊ߬ ߟߊ߫ ߓߌ߲߬ߓߊߏ ߟߊߛߊ߬ߦߌ߬ ߟߊ߫ ߞߊ߬ ߓߐ߫ ߡߌ߬ߙߌ߲߬ߘߌ߫ ߛߐ߲߬ߡߊ ߟߎ߫ ߞߊ߲߬ ﴿147﴾

ߛߋߚߋ߫ ߸ ߛߏߡߊ ߟߎ߬ ߘߌߣߵߊ߬ ߝߐ߫ ߞߏ߫ ߣߌ߫ ߊߟߊ߫ ߕߎ߲߬ ߦߴߊ߬ ߝߍ߬ ߸ ߊ߲ߠߎ߬ ߣߴߊ߲ ߝߊ߭ ߟߎ߬ ߛߌ߫ ߕߎ߲߬ ߕߍ߫ ߛߏߡߦߊ߫ ߞߍ߫ ، ߊ߲ ߘߏ߲߬ ߕߎ߲߬ ߕߍ߫ ߝߏߦߌ߬ ߞߍ߫ ߕߣߊ߬ ߘߌ߫ ، ߒ߬ߓߵߊ߬ߟߎ߬ ߢߍߓߊ߮ ߟߎ߬ ߝߣߊ߫ ߞߊ߬ ߡߊ߬ߛߐ߬ߛߐ߬ߟߌ ߞߍ߫ ߕߋ߲߬ ߠߋ߬ ߸ ߝߏ߫ ߊ߬ߟߎ߫ ߞߵߊ߲ ߠߊ߫ ߓߌ߲߬ߓߊߏ ߡߊߜߙߏ߬ ، ߊ߬ ߝߐ߫ ߞߏ߫ ߦߊ߯ߟߊ߫ ߟߐ߲ߠߌ߲ ߘߏ߫ ߟߵߊߟߎ߫ ߓߟߏ߫ ߓߊ߬ ߊߟߎ߫ ߏ߬ ߟߊߓߐ߫ ߒ߬ ߧߋ߫ ߜߍ ߘߐ߫؟ ߒ߬ߓߵߊߟߎ߫ ߕߍ߫ ߝߏߦߌ߬ ߟߊߓߊ߬ߕߏ ߞߊ߲߬ ߖߌ߰ߟߌ ߞߐ߫ ، ߊߟߎ߫ ߘߏ߲߬ ߕߍ߫ ߝߏߦߌ߫ ߞߊ߲߬ ߞߎ߲߬ߘߐ߬ߕߍ߮ ߞߐ߫ ﴿148﴾

ߊ߬ ߝߐ߫ ߞߏ߫ ߒ߬ ߓߊ߬ ߘߊ߬ߟߎ߫ ߘߊ߲߬ߠߊ߬ߛߋߣߍ߲ ߦߋ߫ ߊߟߊ߫ ߟߋ߬ ߓߟߏ߫ ، ߊ߬ ߓߊ߯ ߊ߬ ߘߌߦߊ߫ ߸ ߊ߬ ߕߎ߲߬ ߘߴߊߟߎ߫ ߓߍ߯ ߞߊ߲ߘߊ߫ ߞߐߘߍ߫ ﴿149﴾

ߊ߬ ߝߐ߫ ߞߏ߫ ߊߟߎ߫ ߣߵߊߟߎ߫ ߛߙߋ ߟߎ߬ ߘߌ߫ ߓߊ߫ ߸ ߡߍ߲ ߠߎ߬ ߘߌ߫ ߛߙߋߦߊ߫ ߞߏ߫ ߊߟߊ߫ ߟߋ߫ ߣߊ߬ ߕߊ߬ߣߊ ߢߌ߲߬ ߠߎ߬ ߟߊߘߊ߲߫ ߠߊ߫ ، ߣߴߊ߬ߟߎ߫ ߞߵߏ߬ ߛߙߋߦߊ ߟߊߟߐ߬ ߸ ߌߟߋ ߞߴߏ߬ ߛߙߋߦߊ ߟߊߟߐ߬ ߊ߬ߟߎ߫ ߝߍ߬ ߘߋ߬ ، ߌ ߘߏ߲߬ ߞߊߣߊ߬ ߒ߬ ߠߊ߫ ߟߝߊߙߌ ߟߎ߬ ߡߊߛߐ߬ߛߐ߬ߓߊ߮ ߟߎ߬ ߣߌ ߛߊ߬ߥߏ ߟߎ߬ ߟߊߓߊ߬ߕߏ߬ ، ߊ߬ ߣߌ߫ ߝߣߊ߫ ߸ ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߕߍ߫ ߟߊߞߌߙߊ߫ ߞߏ ߡߊ߬ ، ߏ߬ ߟߎ߫ ߟߋ߫ ߘߏ߲߬ ߦߋ߫ ߝߋ߲߫ ߜߘߍ߫ ߞߢߊ߫ ߟߴߊ߬ߟߎ߫ ߡߊ߰ߙߌ ߡߊ߬ ﴿150﴾

ߊ߬ ߝߐ߫ ߞߏ߫ ߊߟߎ߯ ߣߊ߬ ߸ ߒ ߧߴߊߟߎ߫ ߡߊ߰ߙߌ ߟߊ߫ ߝߋ߲߫ ߠߊߕߐ߲ߣߍ߲ ߠߎ߬ ߘߐߞߊ߬ߙߊ߲߬ ߊߟߎ߫ ߦߋ߫: [ ߊ] ߞߏ߫ ߊߟߎ߫ ߞߊߣߊ߬ ߝߏߦߌ߫ ߝߊ߬ߙߴߊ߬ߟߋ߫ ߞߊ߲߬. [ ߋ] ߊ߬ ߦߴߊߟߎ߫ ߡߊߛߙߊ߬ ߟߊ߫ ߡߏߦߌߓߊ߯ ߝߌ߬ߟߊ ߦߋ߫ ߢߊ߬ߟߌ ߟߋ߬ ߟߊ߫. [ ߌ] ߞߏ߫ ߊߟߎ߫ ߞߊߣߵߊߟߎ߫ ߘߋ߲ ߠߎ߫ ߝߊ߰ ߘߐ߱ ߢߍߛߌߟߊ߲ߢߍ ߡߊ߬ ، ߓߊߏ߬ ߒ߬ߠߎ߫ ߟߋ߬ ߊߟߎ߫ ߣߴߏ߬ ߟߎ߫ ߖߐ߰ߣߍ ߕߊ߬ߓߊ߮ ߘߌ߫. [ ߍ] ߞߏ߫ ߊߟߎ߫ ߞߊߣߵߊߟߎ߫ ߡߊߘߏ߲߬ ߖߊߡߙߎߦߊ ߜߍߘߐߕߊ ߣߴߊ߬ ߘߏ߲߰ߘߐ߬ߕߊ ߛߌ߫ ߟߊ߫. [ ߎ] ߞߏ߫ ߊߟߎ߫ ߞߊߣߊ߬ ߣߌ ߝߊ߰ ߊߟߊ߫ ߣߊ߬ ߡߍ߲ ( ߝߊ߭ ) ߟߊߕߐ߲߫ ߠߊ߫ ߸ ߝߏ߫ ߊ߬ ߦߋ߫ ߤߊߞߍ߫ ߘߐ߫ ߞߏ߫ ߟߋ߬ ߞߍ߫ ، ߊߟߊ߫ ߣߵߊߟߎ߫ ߡߊߛߙߊ߬ ߟߴߏ߬ ߟߎ߫ ߟߋ߬ ߟߊ߫ ߖߐ߲߰ߛߴߊߟߎ߫ ߘߌ߫ ߞߍ߫ ߤߊ߲ߞߟߌߡߊ ߟߎ߬ ߘߌ߫ ﴿151﴾

[ߏ] ߞߏ߫ ߊߟߎ߫ ߞߊߣߵߊߟߎ߫ ߡߊߘߏ߲߬ ߝߊߙߌߕߊ ߟߎ߫ ߝߊ߬ ( ߗߍ߫ ) ߣߊ߲ߝߟߏ ߟߊ߫ ߸ ߝߏ߫ ߊ߰ ߞߍ߫ ߢߊߢߌߡߊ߫ ߟߋ߫ ߡߊ߬ ߸ ߝߏ߫ ߊ߬ ߦߋ߫ ߛߴߊ߬ ߞߐ߮ ߡߊ߬. [ߐ ] ߞߏ߫ ߊߟߎ߫ ߛߎߡߊ߲ߟߊ߲ ߣߌ߫ ߖߊ߭ ߝߊ߫ ߕߋߟߋ߲ ߠߊ߫ ߸ ߊ߬ ߕߍ߫ ߣߌߡߊ ߞߘߊߡߊ߫ ߟߊ߫ ߝߏߦߌ߬ ߟߊ߫ ߝߏ߫ ߊ߬ ߝߊ߲߬ߞߊ ߓߍ߬ߙߍ. [ ߒ ] ߞߏ߫ ߊߟߎ߫ ߓߊ߯ ߞߍ߫ ߞߎߡߊ߫ ߟߊ߫ ߸ ߊߟߎ߫ ߦߴߊߟߎ߫ ߕߋߟߋ߲߫ ، ߤߊߟߵߊ߬ ߞߍ߫ ߘߊ߫ ߓߊߘߋ߲ߡߊ߫ ߛߎߘߎ߲ ߠߊ߫ ߞߎ߲߬ߠߊ߫. [ ߓ ] ߊ߬ ߣߌ߫ ߞߏ߫ ߊߟߎ߫ ߦߴߊߟߊ߫ ߟߊ߫ ߟߊ߬ߤߘߌ ߝߊ߫ ، ߊߟߊ߫ ߣߵߊߟߎ߫ ߡߊߛߙߊ߬ ߟߴߏ߬ ߟߋ ߟߊ߫ ߸ ߛߴߊߟߎ߫ ߘߴߊߟߎ߫ ߕߊ߰ߛߌ߫ ﴿152﴾

ߖߊ߯ߕߋ߬ ߸ ߣߌ߲߬ ߦߋ߫ ߒ߬ ߠߊ߫ ߛߌߟߊ߫ ߕߋߟߋ߲ߣߍ߲߫ ߓߐߚߐ ߟߋ߬ ߘߌ߫ ߸ ߊߟߎ߫ ߏ߬ ߟߋ ߟߊߓߊ߬ߕߏ߬ ، ߊߟߎ߫ ߞߊߣߊ߬ ߛߌߟߊ߫ ߛߌߦߊߡߊ߲߫ ߠߊߓߊ߬ߕߏ߫ ߘߋ߬ ߊ߬ߟߎ߬ ߞߊߣߵߊߟߎ߫ ߟߊߝߘߊ߫ ߟߊ߫ ߟߊ߫ ߛߌߟߊ ߟߊ߫ ߸ ߊ߬ ߦߴߊߟߎ߫ ߡߊߛߙߊ߬ ߟߴߏ߬ ߟߋ ߟߊ߫ ߸ ߛߴߊߟߎ߫ ߘߴߊߟߎ߫ ߝߊ߲ߕߊ߲߬ߞߊ߫ ﴿153﴾

ߣߌ߲߬ ߓߍ߯ ߞߐ߫ ߸ ߊ߬ ߞߊ߬ ߡߎߛߊ߫ ߛߐ߫ ߟߍߙߊ ߟߊ߫ ، ߞߵߏ߬ ߞߍ߫ ߘߝߊߟߌ߫ ߘߌ߫ ߡߐ߱ ߦߋ߫ ߸ ߡߍ߲ ߞߊ߬ ߢߊ߬ߟߌ ߞߍ߫ ، ߞߵߊ߬ ߞߍ߫ ߝߊߙߊ߲ߝߊߛߌߟߊ߲ ߘߌ߫ ، ߊ߬ ߣߌ߫ ߞߵߊ߬ ߞߍ߫ ߞߊ߲ߘߦߊ ߣߌ߫ ߤߌߣߊ ߘߌ߫ ߸ ߛߴߊ߬ߟߎ߬ ߘߌ߫ ߘߍ߲߬ߞߣߍ߬ߦߴߊ߬ߟߎ߫ ߡߊ߰ߙߌ ߓߍ߲߬ߢߐ߲߰ߦߊ ߡߊ߬ ﴿154﴾

ߟߍߙߊ ߘߐ ߡߍ߲ ߣߌ߲߬ ߸ ߊ߲ ߣߵߏ߬ ߟߋ ߟߊߖߌ߰ ߟߊ߫ ߝߋ߲߫ ߓߙߊߞߡߊ ߘߌ߫ ߸ ߒ߬ߓߵߊߟߎ߯ ߏ߬ ߟߊߓߊ߬ߕߏ߬ ߸ ߞߵߊߟߎ߫ ߝߊ߲ߕߊ߲߬ߞߊ߫ ߸ ߛߴߊߟߎ߫ ߘߌ߫ ߟߊߤߌߣߊ߫ ﴿155﴾

(ߏ߬ ߟߊߖߌ߰ ߞߎ߲ ߠߋ߬ ) ߊߟߎ߫ ߞߊߣߵߊ߬ ߝߐ߫ ߞߏ߫ ߟߍߙߊ ߟߊߖߌ߰ߣߍ߲߫ ߡߌ߬ߙߌ߲߬ߘߌ߫ ߝߌ߬ߟߊ߫ ߟߋ߫ ߡߊ߬ ߒ߬ߠߎ߬ ߢߍ߫ ߸ ߒ߬ߠߎ߫ ߘߏ߲߬ ߖߊ߲߬ ߕߎ߲߬ ߕߴߏ߬ ߟߎ߬ ߟߊ߫ ߞߊ߬ߙߊ߲ ߘߐ߫ ﴿156﴾

ߥߟߴߊߟߎ߫ ߞߊߣߵߊ߬ ߝߐ߫ ߸ ߞߏ߫ ߣߌ߫ ߟߍߙߊ ߕߎ߲߬ ߠߊߖߌ߰ ߘߊ߫ ߒ߬ߠߎ߫ ߡߊ߬ ߸ ߊ߲ ߕߘߍ߬ ߘߌ߫ ߞߊ߲ߘߊ߫ ߏ߬ ߟߎ߬ ߘߌ߫ ، ߒ߬ߓߊ߬ ߔߊߞߌ ߓߘߊ߫ ߣߵߊߟߎ߫ ߡߊ߬ ߞߊ߬ ߝߘߴߊߟߎ߫ ߡߊ߰ߙߌ ߟߊ߫ ߸ ߊ߬ ߣߌ߫ ߞߊ߲ߘߦߊ ߣߌ߫ ߤߌߣߊ ، ߖߍߣߍ߲ ߘߏ߲߬ ߠߊ߫ ߕߐ߬ߢߍ߮ ߘߌ߫ ߕߊ߬ߡߌ߲߬ ߡߐ߱ ߕߊ ߟߊ߫ ߸ ߡߍ߲ ߞߵߊߟߊ߫ ߟߊ߫ ߟߝߊߙߌ ߟߎ߬ ߡߊߛߐ߬ߛߐ߫ ߞߵߊ߬ ߞߐߘߏ߲߬ ߊ߬ߟߎ߬ ߟߊ߫؟ ߞߏ߬ߣߌ߲߬ ߛߋߚߋ߫ ߡߍ߲ ߠߎ߬ ߦߴߊߟߎ߬ ߞߐߘߏ߲߬ ߠߊ߫ ߒ߬ ߠߊ߫ ߟߝߊߙߌ ߟߎ߬ ߟߊ߫ ߸ ߒ߬ ߘߌߣߵߏ߬ ߟߎ߫ ߛߊ߬ߙߊ߫ ߖߊ߲߰ߞߕߊ߬ ߖߎ߮ ߟߊ߫ ߸ ߞߊ߬ߡߊߛߐ߬ߘߐ߲߫ ߊ߬ߟߎ߬ ߟߊ߫ ߞߐߘߏ߲ ߝߍ߬ ﴿157﴾

ߊ߬ߟߎ߬ ߦߋ߫ ߡߋ߬ߘߋ ߛߌߟߊߞߎ߲߫ ߘߐߜߍ߫ ߟߊ߫؟ ߊ߫ ߸ ߝߏ߫ ߡߟߍ߬ߞߊ ߟߎ߬ ߦߋ߫ ߣߵߊ߬ߟߎ߬ ߞߊ߲ߡߊ߬ ߞߍ߬ ، ߥߟߊ߫ ߌ ߡߊ߰ߙߌ ߖߍ߬ߘߍ ߦߋ߫ ߣߊ߬ ߸ ߤߊߡߊ߲ߕߍ߫ ߌ ߡߊ߰ߙߌ ߟߊ߫ ߕߐ߰ߡߊ߬ߛߙߋ ߟߎ߬ ߘߏ߫ ߦߋ߫ ߣߊ߬ ، ߒ߬ߓߊ߬ ߌ ߡߊ߰ߙߌ ߟߊ߫ ߕߐ߰ߡߊ߬ߛߙߋ ߟߎ߫ ߘߏ߲߬ ߓߊ߯ ߣߊ߬ ߟߏ߲ ߡߍ߲ ߸ ߣߌߡߊ߫ ߛߌ߫ ߟߊ߫ ߘߍ߲߬ߞߣߍ߬ߦߊ ߕߍ߫ ߊ߬ ߡߎߣߊ߲ߝߊ߲߫ ߏ߬ ߟߏ߲ ߸ ߡߍ߲ ߘߍ߲߬ߞߣߍ߬ߦߊ߬ߣߍ߲߫ ߕߍ߫ ߞߘߐ߬ߡߊ߲߫ ߸ ߥߟߊ߫ ߡߍ߲ ߡߊ߫ ߢߌ߬ߡߊ߬ ߞߍ߫ ߊ߬ ߟߊ߫ ߘߍ߲߬ߞߣߍ߬ߦߊ ߘߐ߫ ، ߊ߬ ߝߐ߫ ߞߏ߫ ߊߟߎ߫ ߡߊ߬ߞߐ߬ߣߐ߲߬ߠߌ߲ ߞߍ߫ ߸ ߒ߬ߠߎ߬ ߝߣߊ߫ ߦߋ߫ ߡߊ߬ߞߐ߬ߣߐ߲߬ߠߌ߲ ߠߋ߬ ߟߊ߫ ﴿158﴾

ߡߍ߲ ߠߎ߫ ߞߵߊ߬ߟߎ߬ ߟߊ߫ ߘߌ߯ߣߊ ߝߘߊߝߘߊ߫ ߞߊ߬ ߞߍ߫ ߞߙߎߞߊ ߟߎ߬ ߘߌ߫ ߸ ߌ ߟߊ߫ ߝߏߦߌ߬ ߕߴߏ߬ ߟߎ߬ ߟߊ߫ ߞߏ ߘߐ߫ ، ߏ߬ ߟߎ߬ ߟߊ߫ ߞߏ ߦߋ߫ ߊߟߊ߫ ߟߋ߬ ߡߊ߬ ، ߊ߬ ߘߏ߲߬ ߘߌߣߵߏ߬ ߟߎ߬ ߗߋߥߊߟߌ ߓߍ߯ ߖߐ߲ ߠߊߓߐ߫ ߊ߬ߟߎ߫ ߡߊ߬ ߟߋ߬ ߕߘߋ߫ ﴿159﴾

ߣߌ߫ ߡߍ߲ ߣߊ߬ ߘߊ߫ ߢߌ߬ߡߊ߬ ߞߋߟߋ߲߫ ߘߌ߫ ( ߊߟߊ߫ ߓߘߊ߫ ) ߸ ߏ߬ ߢߐ߲߰ ߕߊ߲߫ ߘߌ߫ ߘߴߏ߬ ߡߊ߬ ، ߡߍ߲ ߘߏ߲߬ ߓߊ߯ ߣߊ߬ ߖߎ߯ߡߊ߲߫ ߞߋߟߋ߲߫ ߘߌ߫ ߸ ߏ߬ ߕߍ߫ ߛߙߊ߬ ߟߊ߫ ߘߏ߫ ߜߘߍ߫ ߟߊ߫ ߏ߬ ߢߐ߲߰ ߞߋߟߋ߲ ߞߐ߫ ߸ ߊ߬ߟߎ߫ ߘߏ߲߬ ߕߍߣߊ߫ ߕߐ߬ߢߍ߰ ߟߊ߫ ﴿160﴾

ߊ߬ ߝߐ߫ ߞߏ߫ ߒߠߋ ߡߊ߰ߙߌ ߣߊ߬ ߒ ߞߊ߲ߘߊ߫ ߟߊ߫ ߛߌߟߊ߫ ߕߋߟߋ߲ߣߍ߲ ߠߋ߫ ߡߊ߬ ، ߞߵߏ߬ ߞߍ߫ ߘߌ߯ߣߊ߫ ߟߐ߬ߣߍ߲ ߘߌ߫ ߗߊ߫ ߸ ߌߓߎ߬ߙߊ߬ߤߌߡߊ߫ ߟߊ߫ ߣߊߡߎ߲߫ ߖߐ߲ߖߐ߲ ߞߊ߬ߣߌ߲߫ ߸ ߏ߬ ߡߍ߲ ߡߊ߫ ߞߍ߫ ߛߏߡߊ ߟߎ߬ ߝߋ߲߫ ߘߌ߫ ߝߋߎ߫ ﴿161﴾

ߊ߬ ߝߐ߫ ߞߏ߫ ߒ ߠߊ߫ ߛߊߟߌ ߣߌ߫ ߒ ߠߊ߫ ߞߊ߲ߠߊߕߍ߯ߟߌ ߣߌ߫ ߒ ߠߊ߫ ߢߣߊߡߦߊ ߣߌ߫ ߒ ߠߊ߫ ߛߊ߬ߦߊ ߓߍ߯ ߊߟߊ߫ ߟߋ߬ ߦߋ߫ ، ߏ߬ ߟߋ ߘߏ߲߬ ߦߋ߫ ߖߊ߯ߓߊ ߟߎ߫ ߡߊ߰ߙߌ ߘߌ߫ ﴿162﴾

ߜߙߊ߬ߢߐ߲߰ ߛߌ߫ ߕߴߏ߬ ߟߋ ߟߊ߫ ، ߒߠߋ ߖߡߊ߬ߙߌ߬ߣߍ߲߫ ߏ߬ ߟߋ ߟߊ߫ ߸ ߒߠߋ ߟߋ߫ ߘߏ߲߬ ߦߋ߫ ߖߘߍ߬ߞߟߏ߬ߦߊ߬ߓߊ߮ ߟߎ߬ ߝߟߐ ߘߌ߫ ﴿163﴾

ߊ߬ ߝߐ߫ ߞߏ߫ ߌ߬ߦߏ߯ ߒߠߋ ߦߋ߫ ߊߟߊ߫ ߕߣߊ߬ ߜߘߍ߫ ߞߍ߫ ߡߊ߰ߙߌ ߘߌ߫؟ ߏ߬ ߟߋ ߘߏ߲߬ ߦߋ߫ ߝߋ߲ ߓߍ߯ ߡߊ߰ߙߌ ߘߌ߫ ، ߣߌߡߊ ߞߋ߬ߟߋ߲߬ߞߋ߬ߟߋ߲߬ߣߊ ߕߍ߫ ߞߏ߫ ߞߍ߫ ߟߊ߫ ( ߡߐ߰ ߜߘߍ߫ ߟߊ߫ ) ߝߏ߫ ߊ߬ ߖߍ߬ߘߍ ، ߘߏ߬ߣߌ߲߬ ߕߌ߮ ߘߏ߫ ߘߏ߲߬ ߕߍߣߊ߬ ߘߏ߫ ߕߊ߫ ߘߏ߬ߣߌ߲߫ ߕߊ߬ ߟߊ߫ ، ߏ߬ ߞߐ߫ ߝߣߊ߫ ߸ ߊߟߎ߫ ߛߊ߬ߦߌ߬ߕߐ߫ ߊߟߎ߫ ߡߊ߰ߙߌ ߟߋ߫ ߡߊ߬ ، ߊ߬ ߘߏ߲߬ ߘߌߣߵߊߟߎ߫ ߟߊ߫ ߢߐ߲߯ ߛߐߛߐ߫ ߞߏ ߓߍ߯ ߢߊߘߐߜߍ ߝߐ߫ ߊߟߎ߫ ߦߋ߫ ﴿164﴾

ߊ߬ߟߋ ߟߋ߫ ߞߵߊߟߎ߫ ߞߍ߫ ߘߎ߱ ߞߊ߲߬ ߣߘߐ߬ߛߌ߰ߟߊ ߟߎ߬ ߘߌ߫ ، ߊ߬ ߘߏ߲߬ ߞߵߊߟߎ߫ ߘߏ߫ ߟߊߦߟߍ߬ ߘߏ߫ ߛߊ߲ߘߐ߫ ߡߐ߬ߟߐ߲ ߠߎ߬ ߘߐ߫ ߟߋ߬ ߸ ߛߴߊ߬ ߘߴߊߟߎ߫ ߞߘߐߓߐ߫ ߤߊ߬ߙߌ߬ߖߍ߮ ߡߌ߬ߘߊ߬ ߢߊ ߘߐ߫ ߸ ߊ߬ ߞߊ߬ ߡߍ߲ ߘߴߊߟߎ߫ ߡߊ߬ ، ߖߊ߯ߕߋ߬ ߸ ߌ ߡߊ߰ߙߌ ߟߋ߫ ߓߌ߲߬ߓߊ߬ߏ߬ ߞߊߟߌ߲ ߕߌ߱ ߘߌ߫ ، ߊ߬ ߣߌ߫ ߖߊ߯ߕߋ߬ ߸ ߊ߬ߟߋ ߟߋ߫ ߦߝߊ߬ߟߊ߫ ߤߌߣߟߊ ߘߌ߫ ﴿165﴾

ߊ. ߟ. ߡ. ߛ߫. ( ߊߟߌߝ. ߟߊ߯ߡ. ߡߌ߯ߡ. ߛ߫ߊ߯ߘ) ﴿1﴾

ߟߍߙߊ ߘߏ߫ ߟߋ߬ ߟߊߖߌ߰ߣߴߌ ߡߊ߬ ߣߌ߲߬ ߸ ߜߍ߲߬ߘߍ߫ ߘߏ߲߬ ߞߊߣߊ߬ ߞߴߌ ߛߌߛߌ ߘߐ߫ ߊ߬ ߞߏߢߊ ߘߐ߫ ߘߋ߬ ، ߛߴߌ ߘߌ߫ ߖߊ߬ߛߙߋ߬ߡߊ߬ߟߊ ߞߍ߫ ߊ߬ ߟߊ߫ ߸ ߊ߬ ߣߌ߫ ߞߵߊ߬ ߞߍ߫ ߦߟߌߓߌߟߊ ߘߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߋ߫ ﴿2﴾

ߊߟߎ߯ ߟߍߙߊ ߟߋ߬ ߟߊߓߊ߬ߕߏ߬ ߡߍ߲ ߖߌ߰ߣߴߊߟߎ߫ ߡߊ߬ ߞߊ߬ ߝߘߴߊߟߎ߫ ߡߊ߰ߙߌ ߟߊ߫ ، ߊߟߎ߫ ߞߊߣߊ߬ ߡߊ߰ߙߌ߬ ߜߘߍ߫ ߟߊߓߊ߬ߕߏ߫ ߘߋ߬ ߞߵߏ߬ ߕߏ߫ ، ߞߏ߬ߣߌ߲߬ ߊߟߎ߫ ߕߊ߰ߛߌ߬ ߞߏ ߕߜߋ߫ ߟߋ߬ ﴿3﴾

ߊ߲ ߓߘߊ߫ ߛߏ߫ ߖߋ߬ߟߌߖߋ߬ߟߌ߫ ߟߋ߬ ߛߌߟߊߛߊ߬ ߞߘߐ߬ߡߊ߲߫߹؟ ߊ߲ ߠߊ߫ ߓߌ߲߬ߓߊߏ ߣߊ߬ ߘߴߏ߬ ߟߎ߫ ߡߊ߬ ߞߵߊ߬ߟߎ߬ ߟߊߣߍ߲ ߕߏ߫ ߛߎ ߘߐ߫ ߥߟߊ߫ ߞߵߊ߬ߟߎ߬ ߕߏ߫ ߕߟߋ߬ ߘߐ߬ ߛߎߣߐ߮ ߘߐ߫ ﴿4﴾

ߏ߬ ߟߎ߬ ߘߊ߫ ߘߐ߫ ߞߊ߲ ߡߊ߫ ߞߍ߫ ߝߏߦߌ߬ ߘߌ߫ ߒ߬ ߠߊ߫ ߓߌ߲߬ߓߊߏ ߣߊ߬ ߕߎߡߊ ߟߴߊ߬ߟߎ߫ ߡߊ߬ ߸ ߝߏ߫ ߞߵߊ߬ ߝߐ߫ ߕߋ߲߬ ߞߏ߫ ߊ߯ߟߊ߲߫ ߸ ߒ߬ߠߎ߫ ߟߋ߬ ߞߍ߫ ߘߊ߫ (ߖߘߍ߬) ߕߐ߬ߢߍ߰ߟߊ ߟߎ߬ ߘߌ߫ ߘߍ߯ ﴿5﴾

ߖߊ߯ߕߋ߬ ߸ ߞߋߟߊ ߟߐ߬ߣߍ߲߫ ߡߍ߲ ߠߎ߫ ߡߊ߬ ߸ ߊ߲ ߘߌߣߵߏ߬ ߟߎ߬ ߘߐߢߌ߬ߣߌ߲߬ߞߊ߫ ߸ ߊ߲ ߘߌߣߊ߬ ߞߋߟߊ ߟߎ߫ ߖߍ߬ߘߍ ߝߣߊ߫ ߘߐߢߌ߲߬ߣߌ߲߬ߞߊ߫ ﴿6﴾

ߊ߲ ߘߏ߲߬ ߘߌߣߊ߬ ߓߍ߯ ߕߊ߫ ߞߍߕߊ߫ ߖߐ߲߫ ߠߊߓߐ߫ ߊ߬ ߡߊ߬ ߟߐ߲ߠߌ߲ ߠߊ߫ ߛߍߛߍߛߍ߫ ، ߓߊߏ߬ ߒ߬ ߕߘߍ߬ ߕߍ߫ ߊ߬ߟߎ߬ ߞߊ߲ߞߕߐߡߊ߬ ﴿7﴾

ߏ߬ ߟߏ߲ ߡߊ߲߬ߕߊ߰ ߞߏ ߦߋ߫ ߕߎ߬ߢߊ߫ ߟߋ߬ ߘߌ߫ ߸ ߡߍ߲ ߠߊ߫ ߡߊ߲߬ߕߊ߰ ߟߊ߬ ߝߋ߲ ߠߎ߬ ߓߊ߯ ߜߟߌߦߊ߫ ߸ ߏ߬ ߟߎ߫ ߟߋ߬ ߛߎߘߊ߲ߓߊ߮ ߟߎ߬ ߘߌ߫ ﴿8﴾

ߣߌ߫ ߡߍ߲ ߘߏ߲߬ ߠߊ߫ ߡߊ߲߬ߕߊ߰ ߟߊ߬ ߝߋ߲ ߠߎ߬ ߝߍߦߊ߫ ߘߊ߫ ߸ ߏ߬ ߟߎ߫ ߟߋ߫ ߓߣߐ߬ߣߍ߲߫ ߊ߬ߟߎ߫ ߖߘߍ߬ ߘߐ߫ ߸ ߓߊߏ߬ ߊ߬ߟߎ ߟߋ߫ ߕߘߍ߬ ߕߐ߬ߢߍ߮ ߟߐ߬ ߟߴߊ߲ ߠߊ߫ ߟߝߊߙߌ ߟߎ߫ ߡߊ߬ ﴿9﴾

ߊ߲ߠߎ߫ ߟߋ߫ ߞߵߊߟߎ߫ ߡߊߞߍ߫ ߘߎ߱ ߞߊ߲߬ ߸ ߞߵߊߟߎ߫ ߓߊߟߏ ߟߎ߬ ߞߍ߫ ߊߟߎ߫ ߦߋ߫ ߘߎ߱ ߞߊ߲߬ ߸ ߓߊ߬ߙߌ߬ ߊߟߎ߫ ߞߏߢߌߡߊߟߐ߲߫ ߞߏ ߕߜߋ߫ ߟߋ߫ ߘߋ߬ ﴿10﴾

ߒ߬ߠߎ߫ ߟߋ߫ ߞߵߊߟߎ߫ ߘߊ߲߫ ߸ ߞߵߊߟߎ߫ ߖߙߎߡߎ߲ߦߊ߫ ߸ ߏ߬ ߟߋ ߞߐ߫ ߊ߲ ߞߵߊ߬ ߝߐ߫ ߞߋ߲ߛߐ߲ ߠߎ߬ ߦߋ߫ ߸ ߒ ߞߏ߫ ߊߟߎ߫ ߕߌ߲ߓߌߘߌ߲ ߞߍ߫ ߊߘߡߊ߫ ߦߋ߫ ߸ ߏ߬ ߓߍ߯ ߞߊ߬ ߕߌ߲ߓߌߘߌ߲ ߞߍ߫ ߝߏ߫ ߓߙߌ߬ߛߌ߫ ߸ ߏ߬ ߟߋ ߡߊ߫ ߞߍ߫ ߕߌ߲ߓߌߘߌ߲ߠߊ ߟߎ߬ ߝߋ߲߫ ߘߌ߫ ﴿11﴾

ߊߟߊ߫ ߞߊ߲߫ ߞߏ߫ ߡߎ߲߬ ߞߵߌ ߞߎ߬ߡߊ߲߬ߘߌ߫ ߕߌ߲ߓߌߘߌ߲ ߡߊ߬ ߒ ߣߵߌ ߖߡߊ߬ߙߌ߬ ߟߊ؟ ߊ߬ ߞߊ߲߫ ߞߏ߫ ߒߠߋ ߝߌ߬ߛߊ߫ ߏ߬ ߘߌ߫ ߟߋ߬ ، ߓߊ ߌ ߞߊ߬ ߒߠߋ ߘߊ߲߫ ߕߊ ߟߋ߬ ߘߐ߫ ߸ ߌ ߘߏ߲߬ ߞߵߏ߬ ߘߊ߲߫ ߓߐ߱ ߟߋ߬ ߘߐ߫ ﴿12﴾

ߊߟߊ߫ ߞߊ߲߫ ߞߏ߫ ߒ߬ߓߊ߬ ߖߌ߰ ߞߊ߬ ߓߐ߫ ߦߊ߲߬ ، ߓߊ ߊ߬ ߕߍ߫ ߓߍ߲߬ ߌ ߡߊ߬ ߸ ߌ ߦߴߌ ߖߘߍ߬ߘߐߓߏ߲߬ߧߊ߫ ߦߊ߲߬ ، ߓߐ߫ ߝߋߎ߫ ، ߓߊ ߌ ߦߋ߫ ߘߐ߯ߦߊߓߊ߯ߕߐ ߟߎ߬ ߘߏ߫ ߟߋ߬ ߘߌ߫ ߛߍߣߍ߲߬ ﴿13﴾

ߊ߬ ߞߊ߲߫ ߞߏ߫ ߒ߬ߓߊ߬ ߒ ߠߊ߫ ߛߊ߬ߦߊ ߘߏ߲߰ߘߌ߬ ߝߎߚߎ߫ ߝߏ߫ ߞߵߊ߬ ߛߌ߰ ߥߟߌ ߟߏ߲ ߠߊ߫ ﴿14﴾

ߊߟߊ߫ ߞߊ߲߫ ߞߏ߫ ߒ ߓߘߴߌ ߡߊߞߐ߬ߣߐ߲߫ ߏ߬ ߥߊ߯ߕߌ ߟߊ߫ ߡߊ߬ߞߐ߬ߣߐ߲߬ߓߊ߰ߕߐ ߟߎ߫ ߝߍ߬ ﴿15﴾

ߊ߬ ߞߊ߲߫ ߞߏ߫ ߒ߬ߓߊ߬ ߓߊߏ߬ ߌ ߓߘߊ߫ ߒߠߋ ߟߊߝߟߌ߬ ߸ ߒ ߝߣߊ߫ ߘߌ߫ ߒ ߛߌ߰ ߊ߬ߟߎ߬ ߢߍ߫ ߌ ߟߊ߫ ߛߌߟߊ߫ ߕߋߟߋ߲ߣߍ߲ ߠߊ߫ ﴿16﴾

ߏ߬ ߞߐ߫ ߒ ߘߌ߫ ߣߵߊ߬ߟߎ߫ ߡߵߊ߬ߟߎ߬ ߢߍߕߐ߫ ߸ ߊ߬ ߣߴߊ߬ߟߎ߬ ߞߕߐ߫ ߸ ߊ߬ ߣߴߊ߬ߟߎ߬ ߞߌߣߌ߲ ߠߎ߬ ߣߴߊ߬ߟߎ߬ ߣߎߡߊ߲ ߠߎ߫ ߝߍ߬ ، ߏ߬ ߓߊ߯ߞߍ߫ ߌ ߕߍ߫ ߊ߬ ߝߊ߲߬ߓߊ ߛߐ߬ߘߐ߲߬ ߞߏߢߌߡߊߟߐ߲ߠߊ߫ ߟߎ߫ ߘߌ߫ ﴿17﴾

ߊߟߊ߫ ߞߊ߲߫ ߞߏ߫ ߌ ߞߏߕߊ߬ ߦߊ߲߬ ߘߐߙߐ߲߫ ߸ ߌ ߣߌ߫ ߡߊ߲߬ߜߏߦߊ ߣߌ߫ ߜߍ߲ߠߌ߲ ߠߋ߬ ߛߍߣߍ߲߬ ، ߡߍ߲ ߘߏ߲߬ ߓߴߌ ߟߊߓߊ߬ߕߏ߬ ߊߘߡߊ߫ ߓߐ߲ߛߐ߲ ߠߎ߬ ߘߐ߫ ߸ ߒ ߘߌ߫ ߔߊߦߌߔߊߦߌ ߟߝߴߊߟߎ߫ ߓߍ߯ ߟߊߘߍ߬ߣߍ߲ ߠߊ߫ ߕߍ߲߫ ﴿18﴾

‹ ߊߟߊ߫ ߞߊ߲߫ › ߞߏ߫ ߊߘߡߊ߫ ߸ ߌ ߣߴߌ ߝߘߎߡߊ ߦߴߊߟߎ߫ ߡߊߞߍ߫ ( ߡߍ߲ߘߌߦߊ ) ߣߊߞߐ ߘߐ߫ ، ߊߟߎ߫ ߘߊߥߎ߲ߠߌ߲ ߞߍ߫ ߊ߬ ߝߊ߲߭ ߓߍ߯ ߘߐ߫ ߸ ߡߍ߲ ߓߊ߯ ߊߟߎ߫ ߘߌߦߊ߫ ، ߒ߬ߞߵߊߟߎ߫ ߞߊߣߵߊߟߎ߫ ߡߊߘߏ߲߬ ߦߙߌ߫ ߞߋߟߋ߲ ߢߌ߲߬ ߠߊ߫ ߘߋ߬ ߸ ߏ߬ ߓߊ߯ ߞߍ߫ ߊߟߎ߫ ߘߌ߫ ߞߍ߫ ߕߐ߬ߢߍ߰ߒߕߋ ߟߎ߬ ߘߏ߫ ߘߌ߫ ﴿19﴾

ߓߊ߬ߙߌ߬ ߜߍ߬ߘߍ ߞߵߊ߬ ߘߊ ߟߴߊ߬ߟߎ߬ ߞߘߐ߫ ߸ ߛߴߊ߬ ߘߴߊ߬ߟߎ߫ ߖߊ߲߬ߓߘߍ ߦߌ߬ߘߴߊ߬ߟߎ߬ ߟߊ߫ ߸ ߏ߬ ߡߍ߲ ߘߏ߲߰ߣߍ߲߫ ߕߍ߬ߘߍ߫ ߊ߬ߟߎ߫ ߡߊ߬ ، ߊ߬ ߞߊ߲߫ ߊ߬ߟߎ߫ ߡߊ߬ ߏ߬ ߘߐ߫ ߸ ߞߏ߫ ߊߟߎ߫ ߡߊ߰ߙߌ ߡߴߊߟߎ߫ ߝߊߕߊ߲ߕߌ߫ ߦߙߌ ߣߌ߲߬ ߡߊ߬ ߞߎ߲߬ ߜߘߍ߫ ߟߊ߫ ߸ ߝߏ߫ ߊߟߎ߫ ߞߊߣߊ߬ ߞߍ߫ ߡߟߍ߬ߞߊ߫ ߝߌ߬ߟߊ߬ ߘߌ߫ ߸ ߥߟߴߊߟߎ߫ ߞߊߣߊ߬ ߞߍ߫ ߘߎߡߊߓߊ߮ ߟߎ߬ ߘߏ߫ ߘߌ߫ ﴿20﴾

ߊ߬ ߞߵߊ߬ ߞߊ߬ߟߌ߫ ߊ߬ߟߎ߬ ߦߋ߫ ߡߍߣߍ߲ߎ߲߫ ߸ ߞߏ߫ ߛߋߚߋ߫ ߒߠߋ ߦߴߊߟߎ߫ ߟߊߟߌߓߊ߮ ߘߏ߫ ߟߋ߬ ߘߌ߫ ﴿21﴾

ߒ߬ߓߊ߬ ߊ߬ ߞߵߊ߬ߟߎ߬ ߟߊߗߌߙߏ߲߫ ߡߊߙߊ߲ߛߊ ߟߊ߫ ߕߋ߲߬ ߠߋ߬ ߸ ߊ߬ߟߎ߫ ߣߊ߬ ߦߙߌ ߣߍߣߍ߫ ߟߊ ߸ ߊ߬ߟߎ߫ ߖߊ߲߬ߓߘߍ ߟߊ߲ߞߣߍߡߊ߫ ߘߴߊ߬ߟߎ߬ ߦߋ߫ ، ߏ߬ ߞߍ ߊ߬ߟߎ߫ ߞߊ߬ ߣߊߞߐ ߝߌߘߊ ߘߏ߫ ߟߎ߫ ߡߙߐߡߙߐ ߘߊߡߌ߬ߣߴߊ߬ߟߎ߫ ߡߊ߬ ، ߊ߬ߟߎ߫ ߡߊ߰ߙߌ ߞߵߊ߬ߟߎ߬ ߞߟߌ߫ ߏ߬ ߟߋ ߘߐ߫ ߸ ߞߏ߫ ߒߠߋ ߡߴߊߟߎ߫ ߝߊߕߊ߲ߕߌ߫ ߦߙߌ ߣߌ߲߬ ߡߊ߬ ߓߊ߬؟ ߊ߬ ߣߌ߫ ߒ ߞߵߊ߬ ߝߐ߫ ߊߟߎ߫ ߦߋ߫ ߒ ߞߏ߫ ߜߍ߬ߘߍ ߦߴߊߟߎ߫ ߖߎ߯ ߘߐߜߍ ߟߋ߬ ߘߌ߫؟ ﴿22﴾

ߊ߬ߟߎ߬ ߞߊ߲߫ ߏ߬ ߘߐ߫ ߞߏ߫ ߊ߲ ߡߊ߰ߙߌ ߸ ߊ߲ ߓߘߊ߫ ߓߋ߬ ߒ߬ ߖߍ߬ߘߍ߫ ߞߊ߲߬ ߓߊ߯ߞߍ߫ ، ߏ߬ ߘߐ߫ ߣߴߌ ߡߊ߫ ߦߊ߬ߝߊ߫ ߒ߬ ߡߊ߬ ߞߊ߬ ߤߌߣߊ߫ ߒ߬ ߠߊ߫ ߸ ߊ߲ ߘߌ߫ ߞߍ߫ ߓߣߐ߬ߓߊ߮ ߟߎ߬ ߘߏ߫ ߘߌ߫ ﴿23﴾

ߊߟߊ߫ ߞߊ߲߫ ߞߏ߫ ߊߟߎ߫ ߖߌ߰ ߸ ߊߟߎ߬ ߖߎ߯ߢߐ߲߯ߡߊ ߟߎ߬ ، ߡߊ߬ߞߍ߬ ߦߙߐ ߣߌ߫ ߘߊ߰ߡߎ߲߬ ߦߴߊߟߎ߫ ߦߋ߫ ߘߎ߱ ߞߊ߲߬ ߛߊ߬ߣߌ߫ ߥߊ߯ߕߌ߫ ߕߍ߫ ﴿24﴾

ߊ߬ ߞߏ߫ ߊߟߎ߫ ߓߍߣߊ߬ ߢߣߊߡߦߊ߫ ߘߎ߱ ߞߊ߲߬ ߸ ߊߟߎ߫ ߘߌ߫ ߛߊ߬ ߦߋ߲߬ ، ߊߟߎ߫ ߘߌߣߊ߬ ߟߊߓߐ߫ ߘߎ߱ ߘߐ߫ ߕߎ߲߯ߣߌ߲߫ ﴿25﴾

ߤߍ߲߬ ߊߟߎ߬ ߊߘߡߊ߫ ߘߋ߲ ߠߎ߬ ߸ ߊ߲ ߓߘߊ߫ ߝߊߘߌߦߊߓߐ߫ ( ߟߊߘߊ߲߫ ߢߊ ) ߟߊߖߌ߰ ߊߟߎ߫ ߡߊ߬ ، ߏ߬ ߦߴߊߟߎ߫ ߖߊ߲߬ߓߘߍ ߟߎ߫ ߥߣߊ߬ߙߌ߬ ߟߊ߫ ، ߊ߬ ߣߌ߫ ߡߊ߬ߢߍ߯ߙߍ ߟߎ߬ ، ߒ߬ߓߊ߬ ߝߊ߲ߕߊ߲ߞߊ ߝߊߘߌߦߊߓߐ ߛߊ߫ ߸ ߏ߬ ߟߋ ߝߌ߬ߛߊ߬ ، ߏ߬ ߟߋ ߘߏ߲߬ ߦߋ߫ ߊߟߊ߫ ߟߊ߫ ߘߊ߬ߟߎ ߟߎ߬ ߘߏ߫ ߘߌ߫ ، ߡߍ߲ ߘߴߊ߬ ߞߍ߫ ߊߟߎ߫ ߘߴߊߟߎ߫ ߕߊ߰ߛߌ߫ ﴿26﴾

ߤߍ߲߬ ߊߟߎ߬ ߊߘߡߊ߫ ߘߋ߲ ߠߎ߬ ߸ ߜߍ߬ߘߍ ߞߊߣߊ߬ ߥߊ߬ߥߎߟߋ ߟߴߊߟߎ߫ ߞߊ߲߬ ߘߋ߬ ߸ ߦߏ߫ ߊ߬ ߞߵߊߟߎ߫ ߡߏߦߌߓߊ߯ ߝߌ߬ߟߊ ߟߊߓߐ߫ ߣߊߞߐ ߘߐ߫ ߢߊ ߡߍ߲ ߸ ߞߵߊ߬ߟߎ߬ ߝߊߘߌߦߊߓߐ ߟߎ߬ ߥߊߙߊ߲ߞߴߊ߬ߟߎ߫ ߡߊ߬ ߸ ߛߴߊ߬ ߘߴߊ߬ߟߎ߫ ߖߊ߲߬ߓߘߍ ߟߎ߫ ߦߌ߬ߘߴߊ߬ߟߎ߬ ߟߊ߫ ، ߊ߬ߟߋ ߘߏ߲߬ ߣߴߊ߬ ߓߐ߲ߛߐ߲ ߠߎ߬ ߦߴߊߟߎ ߦߋ߫ ߟߊ߫ ߸ ߞߵߊ߬ ߕߘߍ߬ ߊߟߎ߫ ߕߴߊ߬ߟߎ߬ ߦߋ߫ ߟߊ߫ ، ߊ߲ ߘߏ߲߬ ߣߊ߬ ߜߍ߬ߘߍ ߟߎ߬ ߞߍ߫ ߟߊ߫ ߘߍ߲߬ߞߣߍ߬ߦߊ߬ߓߊߟߌ ߟߎ߫ ߟߋ߬ ߢߌ߲߭ ߠߎ߬ ߘߌ߫ ﴿27﴾

ߊ߬ߟߎ߬ ߓߊ߯ ߖߎ߯ߡߊ߲ ߘߏ߫ ߞߍ߫ ߸ ߊ߬ߟߎ߬ ߘߴߊ߬ ߝߐ߫ ߞߏ߫ ߊ߲ ߞߊ߬ ߒ߬ ߝߊ߭ ߟߎ߫ ߕߘߍ߬ ߏ߬ ߟߋ ߟߊ߫ ، ߊ߬ ߣߌ߫ ߊߟߊ߫ ߟߋ߫ ߣߊ߬ ߒ߬ ߖߡߊ߬ߙߌ߬ ߟߴߊ߬ ߟߊ߫ ، ߊ߬ߟߎ߫ ߖߋ߬ߓߌ߬ ߞߏ߫ ߊߟߊ߫ ߕߍ߫ ߡߐ߰ ߖߡߊ߬ߙߌ߬ ߟߊ߫ ߖߎ߯ߡߊ߲߫ ߠߊ߫ ، ߌ߬ߦߏ߯ ߊߟߎ߫ ߘߌ߫ ߝߋ߲߫ ߝߐ߫ ߊߟߊ߫ ߡߵߊߟߎ߫ ߡߊ߫ ߡߍ߲ ߟߐ߲߫؟ ﴿28﴾

ߊ߬ ߟߊߛߋ߫ ߞߏ߫ ߒ ߡߊ߰ߙߌ ߞߊ߬ ߖߡߊ߬ߙߌ߬ߟߌ ߞߍ߫ ߕߋߟߋ߲ ߠߋ߬ ߟߊ߫ ߸ ߊ߬ ߣߌ߫ ߞߏ߫ ߊߟߎ߫ ߦߴߊߟߎ߫ ߢߊ ߟߎ߫ ߟߐ߬ ߊ߬ߟߋ ߟߋ߬ ߘߐ߫ ߡߌ߬ߛߙߌ ߕߎ߬ߡߊ ߓߍ߯ ߟߊ߫ ، ߞߵߊ߬ ߞߟߌ߫ ߞߊ߬ ߘߌ߯ߣߊ ߓߎ߰ߓߎ߯ ߊ߬ ߦߋ߫ ، ߊ߬ ߞߵߊߟߎ߫ ߟߊߝߟߐ߫ ߢߊ ߡߍ߲ ߸ ߊߟߎ߫ ߛߊ߬ߦߌ߬ߕߐ߫ ߕߋ߲߬ ߠߋ߬ ﴿29﴾

ߊ߬ ߞߊ߬ ߖߊ߬ߡߊ ߘߏ߫ ߞߊ߲ߘߊ߫ ߸ ߖߡߊ߬ ߜߘߍ߫ ߓߍ߫ ߝߌ߬ߟߌ ߜߋ߲ߜߋ߲ߦߊ߫ ߘߴߏ߬ ߟߎ߫ ߡߊ߬ ߸ ߏ߬ ߟߎ߫ ߞߊ߬ ߜߍ߬ߘߍ ߟߎ߫ ߟߋ߫ ߡߌ߬ߘߴߊ߬ߟߎ߫ ߢߌ߲߭ ߠߎ߬ ߘߌ߫ ߞߵߊߟߊ߫ ߕߏ߫ ߸ ߞߵߊ߬ ߖߌ߰ ߏ߬ ߘߐ߫ ߞߏ߫ ߊ߬ߟߎ߬ ߞߊ߲ߘߊߣߍ߲߫ ߠߋ߬ ﴿30﴾

ߤߍ߲߬ ߊߟߎ߬ ߊߘߡߊ߫ ߘߋ߲ ߠߎ߬ ߸ ߊߟߴߊߟߎ߫ ߟߊ߫ ߡߊ߬ߛߘߌ ߟߎ߫ ߕߊ߬ ߡߌ߬ߛߙߌ ߕߎ߬ߡߊ ߓߍ߯ ߟߊ߫ ߸ ߊ߬ ߣߴߊߟߎ߫ ߦߋ߫ ߘߊߥߎ߲ߠߌ߲ ߞߍ߫ ߞߵߊߟߎ߫ ߡߌ߲߬ ، ߊߟߎ߫ ߞߊߣߊ߬ ߖߊ߯ߛߟߌ ߞߍ߫ ߘߋ߬ ، ߓߊ ߊߟߊ߫ ߕߍ߫ ߖߊߛߟߌߟߊ ߟߎ߫ ߝߍ߬ ﴿31﴾

ߊ߬ ߝߐ߫ ߞߏ߫ ߖߍߣߍ߲ ߞߵߊߟߊ߫ ߟߊ߫ ߡߊ߬ߛߘߌ ߟߎ߬ ߟߊߕߐ߲߫ ߸ ߊ߬ ߞߊ߬ ߡߍ߲ ߠߊߓߐ߫ ߊ߬ ߟߊ߫ ߖߐ߲߭ ߠߎ߬ ߦߋ߫؟ ߊ߬ ߣߌ߫ ߘߊߥߎ߲ߕߊ߫ ߢߌߡߊ ߟߎ߬؟ ߊ߬ ߝߐ߫ ߞߴߏ߬ ߟߎ߫ ߘߤߊ߬ߣߍ߲߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߋ߫ ߘߎߢߊ߫ ߢߣߊߡߦߊ ߘߐ߫ ، ߊ߬ ߦߴߊߟߎ߫ ߘߎ߲߬ߘߎ߬ߡߊ ߘߌ߫ ߟߐ߬ߓߊ ߟߏ߲ ߝߣߊ߫ ߘߐ߫ ، ߒ߬ߓߊ߬ ߊ߲ ߧߋ߫ ߟߝߊߙߌ ߟߎ߬ ߝߊߙߊ߲ߝߊߛߌ߫ ߟߊ߫ ߡߌ߬ߙߌ߲߬ߘߌ߬ ߞߏߟߐ߲ߠߊ ߟߎ߬ ߦߋ߫ ߕߋ߲߬ ߠߋ߬ ﴿32﴾

ߊ߬ ߝߐ߫ ߞߏ߫ ߒ ߡߊ߰ߙߌ ߣߊ߬ ߞߏ ߡߍ߲ ߠߎ߬ ߟߊߕߐ߲߫ ߠߊ߫ ߸ ߏ߬ ߟߎ߫ ߟߋ߬ ߞߏߙߏ߲ߧߊ ߟߎ߬ ߘߌ߫ ߸ ߊ߬ߟߎ߬ ߟߊ߲ߞߣߍߡߊߣߍ߲ ߠߎ߬ ߣߴߊ߬ߟߎ߫ ߘߏ߲߰ߣߍ߲ ߠߎ߫ ߞߊ߬ߣߌ߲߫ ߸ ߊ߬ ߣߌ߫ ߖߟߎ߬ߡߎ߲ ߣߌ߫ ߓߊ߰ߒߡߊ ߕߎ߬ߢߊ ߕߣߊ߬ ߟߊ߫ ، ߊ߬ ߣߌ߫ ߞߏ߫ ߊߟߎ߫ ߞߊߣߊ߬ ߝߋ߲߫ ߝߙߊ߬ ߊߟߊ߫ ߡߊ߬ ߸ ߊ߬ ߡߊ߫ ߘߊ߬ߟߎ߬ ߛߌ߫ ߟߊߖߌ߰ ߡߍ߲ ߠߊ߫ ، ߊ߬ ߣߌ߫ ߞߏ߫ ߊߟߎ߫ ߞߊߣߊ߬ ߝߋ߲߫ ߝߐ߫ ߊߟߊ߫ ߡߊ߬ ߸ ߊߟߎ߫ ߡߊ߫ ߡߍ߲ ߟߐ߲߫ ﴿33﴾

ߡߊ߲߬ߕߏ߲ ߓߍ߯ ߣߴߊ߬ ߕߊ߫ ߛߕߊ߫ ߟߋ߬ ، ߡߍ߲ ߠߎ߬ ߛߕߊ ߓߊ߯ ߣߊ߬ ߸ ߏ߬ ߕߍ߫ ߘߏ߲߰ߘߌ߫ ߕߎ߬ߡߊ߬ߙߋ߲߬ ߞߋߟߋ߲߫ ߠߊ߫ ߸ ߊ߬ߟߎ߫ ߘߏ߲߬ ߕߍ߫ ߞߐ߲߰ ߊ߬ ߢߍ߫ ﴿34﴾

ߤߍ߲߬ ߊߟߎ߬ ߊߘߡߊ߫ ߘߋ߲ ߠߎ߬ ߸ ߞߎߟߊߞߏߕߍ߫ ߣߌ߫ ߞߋߟߊ ߟߎ߫ ߣߊ߬ ߘߊ߫ ( ߗߋ߫ ) ߊߟߎ߫ ߡߊ߬ ߞߊ߬ ߓߐ߫ ߊߟߎ߫ ߖߍ߬ߘߍ ߘߐ߫ ߸ ߞߊ߬ ߒ߬ ߠߊ߫ ߟߝߊߙߌ ߟߎ߫ ߘߊ߲߬ߕߍ߰ ߊߟߎ߫ ߦߋ߫ ، ߡߍ߲ ߓߊ߯ ߊ߬ ߝߊ߲ߕߊ߲߬ߞߊ߫ ߏ߬ ߘߐ߫ ߞߊ߬ ߟߢߊ߬ߟߌ ߞߍ߫ ߸ ߛߌߟߊ߲߫ ߕߍ߫ ߞߍ߫ ߏ߬ ߟߎ߬ ߟߊ߫ ߸ ߊ߬ߟߎ߫ ߘߏ߲߬ ߕߍߣߊ߫ ߛߎ߬ߣߎ߲߬ ߠߊ߫ ﴿35﴾

ߡߍ߲ ߠߎ߫ ߟߋ߬ ߓߊ߯ ߒ߬ ߠߊ߫ ߟߝߊߙߌ ߟߎ߬ ߡߊߛߐ߬ߛߐ߬ ߛߊ߫ ߞߵߊ߬ߟߎ߫ ߖߘߍ߬ߘߐߓߏ߲߬ߧߴߊ߬ߟߎ߫ ߡߊ߬ ߸ ߏ߬ ߟߎ߫ ߟߋ߬ ߞߍߕߐ߫ ߕߊ ߘߏ߲߬ߞߏ ߟߎ߬ ߘߌ߫ ߸ ߊ߬ߟߎ߫ ߘߏ߲߬ ߘߎߡߊߕߐ߫ ߦߋ߲߬ ߠߋ߬ ﴿36﴾

ߖߍߣߍ߲ ߠߊ߫ ߕߐ߬ߢߍ߮ ߕߊ߬ߡߌ߲߬ߣߍ߲߫ ߡߐ߱ ߕߊ ߟߊ߫ ߸ ߡߍ߲ ߞߊ߬ ߥߎߦߊ ߞߎ߲߬ߘߐߕߍ߰ ߞߵߊ߬ ߟߴߊߟߊ߫ ߟߊ߫ ߸ ߥߟߴߊ߬ ߞߵߊߟߊ߫ ߟߊ߫ ߟߍߙߊ ߟߎ߬ ߡߊߛߐ߬ߛߐ߬؟ ߒ߬ߓߊ߬ ߏ߬ ߟߎ߫ ߣߌ߭ ߡߍ߲ ߦߋ߫ ߟߍߙߊ ߞߣߐ߫ ߸ ߊ߬ߟߎ߬ ߘߌ߫ ߕߴߏ ߛߐ߬ߘߐ߲߬ ߠߊ߫ ߝߎߚߎ߫ ߝߏ߫ ߸ ߒ ߠߊ߫ ߗߋߘߋ߲ ߠߎ߬ ߘߌߣߵߊ߬ߟߎ߫ ߕߍ߬ߘߍ߫ ߊ߬ߟߎ߬ ߛߏߡߊߦߟߍߡߊ߲߫ ߞߊ߲ߡߊ߬ ، ߏ߬ ߟߎ߬ ߘߴߊ߬ߟߎ߫ ߢߌ߬ߣߌ߲߬ߞߊ߬ ߞߏ߫ ߡߊ߰ߙߌ ߟߎ߬ ߦߋ߫ ߡߌ߲߫ ߊߟߎ߫ ߕߘߍ߬ ߡߍ߲ ߠߎ߬ ߞߟߌ߫ ߟߊ߫ ߞߵߊߟߊ߫ ߕߏ߫؟ ߊ߬ߟߎ߬ ߘߴߊ߬ ߝߐ߫ ߞߴߏ߬ ߟߎ߬ ߓߘߊ߫ ߕߎߣߎ߲߫ ߒ߬ ߡߊ߬ ، ߘߊ߬ߡߊ߲߬ߛߊ߫ ߊ߬ߟߎ߬ ߘߌ߫ ߛߙߋߦߊ ߟߊߟߐ߬ ߊ߬ߟߎ߫ ߖߍ߬ߘߍ߫ ߞߊ߲߬ ߸ ߞߏ߫ ߊ߬ߟߎ ߟߋ߬ ߞߍ߫ ߘߊ߫ ߓߊ߲߬ߓߊ߮ ߟߎ߬ ߘߌ߫ ﴿37﴾

ߊߟߊ߫ ߘߴߊ߬ ߝߐ߫ ߞߏ߫ ߒ߬ߓߵߊߟߎ߫ ߘߏ߲߬ ߕߊ ߘߐ߫ ߡߊ߲߬ߕߏ߲ ߠߎ߫ ߝߍ߬ ߸ ߡߍ߲ ߠߎ߫ ߕߊ߬ߡߌ߲߬ ߘߴߊߟߎ߫ ߢߍ߫ ߥߐ߬ߞߎߟߐ ߣߌ߫ ߡߐ߱ ߘߐ߫ ، ߡߊ߲߬ߕߏ߲ ߘߏ߫ ߓߊ߯ ߘߏ߲߬ ߞߏߕߊ߲߫ ߸ ߏ߬ ߘߴߊ߬ ߢߍߓߊ߮ ߘߊ߲ߞߊ߫ ، ߝߏ߫ ߊ߬ߟߎ߬ ߓߍ߯ ߘߌ߫ ߢߐ߲߮ ߠߊߞߎ߲߫ ߦߋ߲߬ ߞߐߘߍ߫ ، ߏ߬ ߓߊ߯ ߞߍ߫ ߸ ߊ߬ߟߎ߬ ߞߐ߫ ߟߊ߫ ߡߐ߮ ߟߎ߬ ߘߴߊ߬ ߝߐ߫ ߊ߬ߟߎ߬ ߢߍߓߊ߮ ߟߎ߫ ߡߊ߬ ߸ ߞߏ߫ ߊ߲ ߡߊ߰ߙߌ ߸ ߢߌ߲߬ ߠߎ߫ ߟߋ߫ ߣߐ߬ ߒ߬ ߠߊߝߟߌ߬ ߟߊ߫ ، ߒ߬ߓߊ߬ ߌ ߦߴߏ߬ ߟߎ߬ ߛߐ߫ ߖߊ߲߰ߞߕߊ ߓߊߟߌߣߍ߲ ߠߊ߫ ߕߊ ߘߐ߫ ، ߊߟߊ߫ ߘߴߊ߬ ߝߐ߫ ߞߏ߫ ߊߟߎ߫ ߓߍ߯ ߕߊ ߓߊߟߌߕߐ߫ ߟߋ߬ ߸ ߓߊ߬ߙߌ߬ ߊߟߎ߫ ߡߴߏ߬ ߟߋ ߟߐ߲߫ ﴿38﴾

ߊ߬ߟߎ߬ ߘߐ߫ ߢߍߓߊ߮ ߟߎ߬ ߝߣߊ߫ ߘߴߊ߬ ߝߐ߫ ߞߐ߫ ߟߊ߫ ߡߐ߮ ߟߎ߫ ߡߊ߬ ߸ ߞߏ߫ ߝߌ߬ߛߡߊ߬ߒ߬ߕߋ߬ߦߊ߬ ߛߌ߫ ߕߍ߫ ߊߟߎ߫ ߓߟߏ߫ ߒ߬ߠߎ߫ ߡߊ߬ ، ( ߊ߬ ߘߌ߫ ߝߐ߫ ߞߏ߫ ) ߊߟߎ߫ ߓߍ߯ ߦߋ߫ ߖߊ߲߰ߞߕߊ ߡߊߜߙߏ߬ ߸ ߊߟߎ߫ ߗߋߥߊߟߌ߫ ߞߍߣߍ߲ ߠߎ߬ ߞߏߛߐ߲߬ ﴿39﴾

ߡߍ߲ ߠߎ߫ ߞߏ߬ߣߌ߲ ߞߊ߬ ߒ߬ ߠߊ߫ ߟߝߊߙߌ ߟߎ߬ ߡߊߛߐ߬ߛߐ߫ ߸ ߊ߬ ߣߌ߫ ߞߵߊ߬ߟߎ߫ ߖߘߍ߬ߘߐߓߏ߲߬ߧߴߊ߬ߟߎ߫ ߡߊ߬ ߸ ߛߊ߲ ߓߏ߲߬ߘߊ ߟߎ߬ ߕߍ߫ ߟߊߞߊ߬ ߏ߬ ߟߎ߬ ߦߋ߫ ߝߋߎ߫ ، ߊ߬ߟߎ߫ ߘߏ߲߬ ߕߍ߫ ߘߏ߲߬ ( ߡߍ߲ߘߌߦߊ ) ߣߊߞߐ ߘߐ߫ ߸ ߝߏ߫ ߣߌ߫ ߢߐ߯ߡߍ ߘߏ߲߬ ߘߊ߫ ߛߊ߬ߦߌ߬ߟߊ߲ ߕߏ߲ ߠߊ߫ ، ߒ߬ߓߊ߬ ߊ߲ ߦߋ߫ ߛߐ߲߬ߡߊ ߟߎ߫ ߛߙߊ߬ ߟߊ߫ ߕߋ߲߬ ߠߋ߬ ﴿40﴾

ߕߊ ߟߊߝߋ߲ ߠߴߏ߬ ߟߎ߬ ߢߍ߫ ߔߊߦߌߔߊߦߌ ߘߐ߫ ߸ ߊ߬ ߣߴߊ߬ ߜߎ߬ߕߙߎ ߦߴߊ߬ߟߎ߫ ߞߎ߲߬ߞߘߐ߫ ، ߒ߬ߓߊ߬ ߊ߲ ߧߋ߫ ߕߐ߬ߢߍ߰ߒߕߋ ߟߎ߫ ߛߙߊ߬ ߟߊ߫ ߕߋ߲߬ ߠߋ߬ ﴿41﴾

ߒ߬ߞߊ߬ ߡߍ߲ ߠߎ߫ ߞߏ߬ߣߌ߲ ߘߍ߲߬ߞߣߍ߬ߦߊ߬ߣߍ߲߫ ߞߊ߬ ߢߌ߬ߡߊ ߟߎ߬ ߞߍ߫ ߸ ߒ߬ߠߎ߫ ߘߏ߲߬ ߕߍ߫ ߣߌߡߊ ߞߘߊߡߊ߫ ߟߊ߫ ߝߏߦߌ߬ ߟߴߊ߬ ߝߊ߲߬ߞߊ ߓߍ߬ߙߍ ߞߐ߫ ، ߒ߬ߓߊ߬ ߏ߬ ߟߎ߫ ߟߋ߬ ( ߡߍ߲ߘߌߦߊ ) ߣߊߞߐ ߘߏ߲߬ߞߏ ߟߎ߬ ߘߌ߫ ߸ ߊ߬ߟߎ߫ ߘߏ߲߬ ߘߎߡߊߕߐ߫ ߦߋ߲߬ ߠߋ߬ ﴿42﴾

ߊ߲ ߘߌߣߊ߬ ߞߐߣߌ߲ߧߊ ߓߍ߯ ߓߏ߬ߛߌ߫ ߊ߬ߟߎ߬ ߛߌߛߌ ߟߎ߬ ߘߐ߫ ߞߐߘߍ߫ ، ߞߐ߬ߢߊ ߟߎ߬ ߦߋ߫ ߥߦߏ߬ ߟߴߊ߬ߟߎ߬ ߞߘߐߟߊ ߟߎ߬ ߘߐ߫ ߞߎߟߊ߲ߞߎߟߊ߲߫ ، ߊ߬ߟߎ߬ ߘߴߊ߬ ߝߐ߫ ߞߏ߫: ߕߊ߲߬ߘߏ ߊߟߊ߫ ߦߋ߫ ߸ ߏ߬ ߡߍ߲ ߞߵߊ߲ ߞߊ߲ߘߊ߫ ߣߌ߲߬ ߡߊ߬ ، ߊ߲ߠߎ߫ ߕߎ߲߬ ߕߍ߫ ߞߊ߲ߘߊ߫ ߒ߬ ߖߍ߬ߘߍ߫ ߡߊ߬ ߝߋߎ߫ ߸ ߣߌ߫ ߊߟߊ߫ ߕߘߍ߬ ߡߴߊ߲ ߞߊ߲ߘߊ߫ ، ߊ߲ ߡߊ߰ߙߌ ߟߊ߫ ߞߋߟߊ ߟߎ߫ ߣߊ߬ ߘߊ߫ ߕߎ߬ߢߊ߫ ߟߋ߬ ߘߌ߫ ߝߊ߯ߛߌ߫. ߘߊ߬ߡߊ߲߬ߛߊ߫ ߸ ߊ߬ߟߎ߬ ߘߌ߫ ߞߟߌ߫ ߞߏ߫ ( ߡߍ߲ߘߌߦߊ ) ߣߊߞߐ ߟߋ߬ ߣߌ߲߬ ߸ ߏ߬ ߘߌߣߴߊߟߎ߫ ߡߊ߬ ߗߍ ߘߌ߫ ߊߟߎ߫ ߟߊ߫ ߓߊ߯ߙߊ߫ ߞߍߣߍ߲ ߠߎ߫ ߟߋ߬ ߗߏ߮ ߝߍ߬ ﴿43﴾

ߣߊߞߐ ߘߏ߲߬ߞߏ ߟߎ߬ ߘߌ߫ ߕߊ ߘߏ߲߬ߞߏ ߟߎ߬ ߞߟߌ߫ ߸ ߞߏ߫ ߊ߲ߠߎ߬ ߓߘߊ߫ ߝߋ߲ ߛߐ߬ߘߐ߲߬ ߊ߲ ߡߊ߰ߙߌ ߞߊ߬ ߒ߬ ߦߟߌߡߊߘߌߦߊ߫ ߡߍ߲ ߠߊ߫ ߕߎ߬ߢߊ ߟߊ߫ ، ߦߊ߯ߟߊ߫ ߊߟߎ߫ ߝߣߊ߫ ߓߘߊ߫ ߝߋ߲ ߛߐ߬ߘߐ߲߫ ߓߊ߬ ߊߟߎ߫ ߡߊ߰ߙߌ ߞߵߊߟߎ߫ ߦߟߌߡߊߘߌߦߊ߫ ߡߍ߲ ߠߊ߫ ߕߎ߬ߢߊ ߟߊ߫؟ ߊ߬ߟߎ߬ ߘߴߊ߬ ߝߐ߫ ߞߏ߫ ߤߊ߯ߟߌ߫. ߘߊ߬ߡߊ߲߬ߛߊ߫ ߸ ߞߟߋߞߟߋߡߊߦߟߍߟߊ ߘߌ߫ ߞߟߋߞߟߋߡߊߦߟߍ ߞߍ߫ ߊ߬ߟߎ߬ ߕߍ߫ ߸ ߞߏ߫ ߤߋ߮ ߸ ߊߟߊ߫ ߟߊ߫ ߘߊ߲ߞߊ ߟߋ߫ ߕߐ߬ߢߍ߰ߒߕߋ ߟߎ߫ ߡߊ߬ ߏ߱ ﴿44﴾

ߓߊ ߏ߬ ߟߎ߫ ߟߋ߫ ߞߊ߬ ߞߎ߬ߡߊ߲߬ߘߌ߬ߟߌ ߞߍ߫ ߊߟߊ߫ ߟߊ߫ ߛߌߟߊ ߡߊ߬ ߸ ߊ߬ ߣߌ߫ ߞߵߊ߬ ߢߌߣߌ߲߫ ߞߏ߫ ߊ߬ߟߎ߬ ߦߴߏ߬ ߞߍ߫ ߟߊ߫ ߞߐ߲߬ߕߌ߲ ߘߌ߫ ߸ ߊ߬ ߣߴߊ߬ߟߎ߫ ߓߊ߲߬ߣߍ߲߬ ߟߊߞߌߙߊ߫ ߞߏ ߡߊ߬ ߝߊߦߌ߲߫ ﴿45﴾

ߥߊ߬ߣߊߙߌ ߟߴߊ߬ߟߎ߫ ߝߌ߬ߟߊ ߕߍ߫ ( ߣߊߞߐ ߣߌ߫ ߔߊߦߌߔߊߦߌ ߞߊ߬ߣߌ߲߫ ) ߸ ߗߍ߭ ߘߏ߫ ߟߎ߫ ߦߋ߫ ߕߓߊߞߘߐߣߍ߲߫ ߸ ߏ߬ ߟߎ߫ ߞߊ߬ ( ߡߐ߱ ) ߓߍ߯ ߟߐ߲߫ ߊ߬ߟߎ߫ ߕߐ߰ߡߊ߬ߛߙߋ ߟߎ߫ ߡߊ߬ ، ߏ߬ ߟߎ߬ ߘߌ߫ ߣߊߞߐ ߘߏ߲߬ߞߏ ߟߎ߬ ߞߟߌ߫ ߸ ߞߏ߫ ߖߐ ߦߴߊߟߎ߫ ߡߊ߬ ، ߏ߬ ߟߎ߬ ߡߊ߫ ߘߏ߲߬ ( ߣߊߞߐ ) ߘߐ߫ ߸ ߞߏ߬ߣߵߊ߬ ߕߡߊ߬ߦߌ ߦߴߊ߬ߟߎ߬ ߘߐ߫ ﴿46﴾

ߣߴߊ߬ߟߎ߫ ߞߵߊ߬ߟߎ߬ ߢߊ ߟߎ߬ ߕߟߌߡߌ߲߫ ߕߊ ߘߏ߲߬ߞߏ ߟߎ߫ ߝߊ߲߭ ߝߍ߬ ߸ ߊ߬ߟߎ߬ ߘߴߊ߬ ߝߐ߫ ߞߏ߫ ߊ߲ ߡߊ߰ߙߌ ߸ ߖߊ߰ߣߌ߲߬ ߌ ߞߊߣߵߊ߲ ߞߍ߫ ߡߌ߬ߙߌ߲߬ߘߌ߫ ߕߐ߬ߢߍ߰ߒߕߋ ߟߎ߫ ߝߍ߬ ﴿47﴾

ߕߓߊߞߘߐߣߍ߲߫ ߘߏ߲߬ߞߏ ߟߎ߬ ߘߌ߫ ߗߍ߭ ߘߏ߫ ߟߎ߫ ߞߟߌ߫ ߸ ߊ߬ߟߎ߫ ߞߊ߬ ߡߍ߲ ߠߎ߬ ߟߐ߲߫ ߊ߬ߟߎ߫ ߕߐ߰ߡߊ߬ߛߙߋ ߟߎ߫ ߡߊ߬ ߸ ߞߵߊ߬ ߝߐ߫ ߏ߬ ߟߎ߫ ߡߊ߬ ߞߏ߫ ߊߟߎ߫ ߟߊ߫ ߟߊ߬ߘߍ߬ߟߌ ߞߊ߬ ߡߎ߲߬ ߢߵߊߟߎ߫ ߡߊ߬ ߸ ߊ߬ ߣߴߊߟߎ߫ ߕߘߍ߬ ߖߘߍ߬ߘߐ߬ߓߊ߬ߦߊ ߡߍ߲ ߞߍ߫ ߟߊ߫؟ ﴿48﴾

ߦߊ߯ߟߊ߫ ( ߛߌ߬ߟߊ߬ߡߊ߫ ߟߊ߲߰ߝߏ߬ߣߍ߲ ) ߢߌ߲߬ ߠߎ߬ ߡߍ߲ ߠߎ߬ ߦߋ߫ ߣߌ߲߬ ߸ ߊߟߎ߫ ߞߵߊߟߎ߫ ߞߊ߬ߟߌ߬ ߞߏ߫ ߊߟߊ߫ ߕߍߣߊ߬ ߢߌ߲߬ ߠߎ߫ ߟߋ߬ ߛߐ߫ ߟߊ߫ ߤߌߣߊ߫ ߟߊ߫ ߓߊ߬؟ ( ߊ߬ ߘߏ߲߬ ߓߘߊ߫ ߝߐ߫ ߏ߬ ߟߎ߫ ߟߋ߫ ߡߊ߬ ߣߌ߲߬ ߞߏ߫ ) ߊߟߎ߫ ߘߏ߲߬ ߣߊߞߐ ߘߐ߫ ߞߟߋ߫ ، ߛߌߟߊ߲߫ ߕߍ߫ ߊߟߎ߫ ߟߊ߫ ߸ ߊߟߎ߫ ߘߏ߲߬ ߕߍߣߊ߫ ߛߎ߬ߣߎ߲߬ ߠߊ߫ ﴿49﴾

ߕߊ ߘߏ߲߬ߞߏ ߟߎ߬ ߘߌ߫ ߣߊߞߐ ߘߏ߲߬ߞߏ ߟߎ߬ ߞߟߌ߫ ، ߞߏ߫ ߊߟߎ߫ ߖߌ ߘߏ߫ ߟߛߊߙߌ߫ ߒ߬ ߞߊ߲߬ ߞߟߋ߫ ߸ ߥߟߴߊߟߊ߫ ߣߊ߬ ߓߊߟߏ ߡߍ߲ ߠߎ߬ ߘߌ߫ ߟߴߊߟߎ߫ ߡߊ߬ ، ߏ߬ ߟߎ߬ ߘߴߊ߬ߟߎ߫ ߖߋ߬ߓߌ߬ ߞߏ߫ ߊߟߊ߫ ߞߵߏ ߝߌ߬ߟߊ ߞߎ߬ߡߊ߲߬ߘߌ߫ ߟߋ߫ ߓߊ߲߬ߓߊ߮ ߟߎ߫ ߡߊ߬ ﴿50﴾

ߓߊ ߏ߬ ߟߎ߫ ߟߋ߫ ߞߵߊ߬ߟߎ߬ ߟߊ߫ ߘߌ߯ߣߊ ߡߌ߬ߘߊ߬ ߕߏߟߏ߲ ߣߌ߫ ߡߣߊ߬ߡߣߊ ߘߌ߫ ، ߊ߬ ߣߌ߫ ߘߎߢߊ߫ ߢߣߊߡߦߊ ߞߵߊ߬ߟߎ߬ ߜߍߙߍ߲ߞߍ߫ ߝߎ߯. ߒ߬ߓߊ߬ ߓߌ߬ ߛߊ߫ ߸ ߒ߬ ߧߋ߫ ߒ߬ ߖߘߍ߬ ߟߊߢߌ߬ߣߊ߬ ߟߴߊ߬ߟߎ߬ ߞߐ߫ ߟߋ߬ ߸ ߦߏ߫ ߊ߬ߟߎ߫ ߢߌ߬ߣߊ ߡߍ߲ ߞߍ߫ ߘߴߊ߬ߟߎ߬ ߟߊ߫ ߓߌ߬ ߟߏ߲ ߣߌ߲߬ ߓߍ߲߬ߢߐ߲߰ߦߊ ߞߐ߫ ߸ ߊ߬ ߣߴߊ߬ߟߎ߫ ߕߍ߬ߘߍ߫ ߒ߬ ߠߊ߫ ߟߝߊߙߌ ߟߎ߬ ߡߊߛߐ߬ߛߐ ߡߍ߲ ߞߍ߫ ߟߊ߫ ﴿51﴾

ߒ߬ ߘߏ߲߬ ߜߎ ߣߊ߬ ߘߴߊ߬ߟߎ߫ ߡߊ߬ ߟߍߙߊ߫ ߟߋ߬ ߘߌ߫ ߸ ߊ߲ ߞߵߏ߬ ߝߊߙߊ߲ߝߊߛߌ߫ ߟߐ߲ߠߌ߲߫ ߠߋ߬ ߟߊ߫ ߸ ߞߵߊ߬ ߞߍ߫ ߞߊ߲ߘߦߊ ߣߌ߫ ߤߌߣߊ ߘߌ߫ ߡߌ߬ߙߌ߲߬ߘߌ߫ ߘߍ߲߬ߞߣߍ߬ߦߊ߬ߣߍ߲ ߠߎ߬ ߦߋ߫ ﴿52﴾

ߊ߬ߟߎ߬ ߦߋ߫ ߡߋ߬ߘߋ ߘߐߞߐ߬ߣߐ߲߬ ߠߊ߫ ߣߌ߫ ( ߟߍߙߊ ߟߊ߫ ߞߏ߫ ߟߐ߯ߟߊߣߍ߲ ) ߞߘߐߡߊߖߊ߲ ߕߍ߫؟ ، ߊ߬ ( ߟߊ߫ ߞߏ߫ ߟߐ߯ߟߊߣߍ߲ ) ߞߘߐߡߊߖߊ߲ ߘߏ߲߬ ߣߊ߬ߕߐ߬ ߟߏ߲ ߡߍ߲ ߸ ߡߍ߲ ߠߎ߫ ߢߌ߬ߣߊ߬ ߘߴߊ߬ ߞߐ߫ ߞߘߐ߬ߡߊ߲߫ ߸ ߏ߬ ߟߎ߬ ߘߴߊ߬ ߝߐ߫ ߞߏ߫ ߊ߲ ߡߊ߰ߙߌ ߟߊ߫ ߞߋߟߊ ߟߎ߫ ߘߏ߲߬ ߜߎ ߣߊ߬ ߘߊ߫ ߕߎ߬ߢߊ ߘߌ߫ ، ߦߊ߯ߟߊ߫ ߛߟߏ߬ߣߊ߬ߟߌ߬ߟߊ߫ ߟߎ߫ ߦߴߊ߲ ߠߊ߫ ߓߊ߬ ߸ ߏ߬ ߟߎ߬ ߦߋ߫ ߛߟߏ߬ߣߊ߬ߟߌ ߞߍ߫ ߒ߬ ߧߋ߫؟ ، ߥߟߊ߫ ߒ߬ ߘߌ߫ ߟߊߛߊ߬ߦߌ߬ ( ߘߎߢߊ߫ ߘߐ߫ ) ߓߊ߬ ߒ߬ ߧߋ߫ ߥߊ߫ ߓߊ߯ߙߊ߫ ߞߍ߫ ߡߍ߲ ߕߍ߫ ߒ߬ ߠߊ߫ ߓߊ߯ߙߊ߫ ߞߘߐ ߘߌ߫؟ ، ߏ߬ ߝߐߓߊ߮ ߟߎ߫ ߟߋ߫ ߓߣߐ߬ߣߴߊ߬ߟߎ߫ ߖߘߍ߬ ߘߐ߫ ߸ ߊ߬ ߣߴߊ߬ߟߎ߬ ߟߊ߫ ߝߋ߲߫ ߞߎ߲߬ߘߐߕߍ߰ߣߍ߲ ߠߎ߬ ߓߍ߯ ߓߘߊ߫ ߕߎߣߎ߲߫ ߊ߬ߟߎ߫ ߡߊ߬ ﴿53﴾

ߊߟߎ߫ ߡߊ߰ߙߌ ߟߋ߬ ߊߟߊ߫ ߘߌ߫ ߸ ߡߍ߲ ߞߊ߬ ߛߊ߲ ߠߎ߬ ߣߌ߫ ߘߎ߱ ߘߊ߲߫ ߕߟߋ߬ ߥߐ߯ߙߐ߫ ߞߘߐ߫ ߸ ߞߊ߬ ߓߊ߲߫ ߞߵߊ߬ ߟߊߞߢߊ߫ ߛߍ߬ߡߍ ߞߊ߲߬ ، ߊ߬ߟߋ ߟߋ߬ ߛߎ ߞߍ߫ ߟߊ߫ ߞߊ߬ ߕߟߋ߬ߘߐ߬ߟߊ ߞߎ߲߬ߠߊ߬ߓߌߘߌ߲߫ ، ߏ߬ ߦߴߏ߬ ߢߌߣߌ߲߫ ߠߊ߫ ߞߊߟߌߦߊ߫ ߘߐ߫ ߛߐ߲߬ ، ߊ߬ ߞߊ߬ ߕߋ߬ߟߋ ߣߌ߫ ߞߊߙߏ ߣߌ߫ ߟߏ߬ߟߏ ߟߎ߬ ߞߟߏ߫ ߊ߬ ߟߊ߫ ߖߊ߬ߡߊߙߌ ߟߊ߫ ، ߞߏ߬ߞߏ߫ ߊ߬ߟߋ ߟߋ߬ ߕߊ߫ ߦߋ߫ ߘߊߟߌ ߣߌ߫ ߖߊ߬ߡߊߙߌ ߘߌ߫ ߞߍ߬؟ ، ߊߟߊ߫ ߓߙߊߞߊߣߍ߲߫ ߞߟߋ߫ ߸ ߊ߬ߟߋ ߟߋ߫ ߘߏ߲߬ ߖߊ߯ߓߊ ߟߎ߫ ߡߊ߰ߙߌ ߘߌ߫ ﴿54﴾

ߊߟߎ߫ ߦߴߊߟߎ߫ ߡߊ߰ߙߌ ߞߟߌ߫ ߖߘߍ߬ߞߟߏ ߟߊ߫ ߸ ߊ߬ ߣߌ߫ ߘߏ߲߱ ߘߐ߫ ، ߓߊߏ߬ ߖߊ߲߬ߘߊ߬ߓߊ߮ ߟߎ߬ ߡߊ߲ߘߴߊ߬ ߦߋ߫ ﴿55﴾

ߊߟߎ߫ ߞߊߣߊ߬ ߕߌߢߍߟߌ ߞߍ߫ ߘߎ߱ ߞߊ߲߬ ߸ ߊ߬ ߟߊߢߊ߬ߣߍ߲ ߞߐ߫ ، ߊߟߎ߯ ߊߟߊ߫ ߞߟߌ߫ ߛߌߟߊ߲ ߣߌ߫ ߕߡߊ߬ߦߌ ߘߌ߫ ، ߓߊ ߊߟߊ߫ ߟߊ߫ ߤߌߣߊ ߛߎ߬ߘߎ߲߬ߡߊ߲߫ ߠߋ߬ ߢߊ߬ߓߊ߮ ߟߎ߬ ߟߊ߫ ﴿56﴾

ߊ߬ߟߋ ߟߋ߬ ߝߢߐ ߟߎ߬ ߗߋ߫ ߟߊ߫ ߘߟߊߝߎߟߌ ߘߌ߫ ߊ߬ ߟߊ߫ ߤߌߣߊ ( ߛߊ߲ߖߌ ) ߢߍ߫ ، ߝߢߐ ߏ߬ ߟߴߊ߬ ߢߎ߲߫ ߠߊ߫ ߛߊ߲ߝߌ߲߫ ߜߟߌߡߊ߲ߓߊ ߟߊ߫ ߢߐ߯ߞߐߞߐ߫ ، ߊ߲ ߘߴߏ ߛߊ߬ߡߊ߲߬ ߞߵߊ߬ ߟߊߕߊ߯ ߘߎ߰ ߖߊߙߊ߲ ߡߊ߬ ߞߵߊ߬ ߟߊߖߌ߰ ߖߌ ߘߌ߫ ߦߋ߲߬ ، ߊ߲ ߘߌ߫ ߦߙߌߘߋ߲ ߛߎ߮ ߓߍ߯ ߟߊߓߐ߫ ߏ߬ ߟߊ߫ ، ߒ߬ߓߵߊ߲ ߧߋ߫ ߛߎ߭ ߟߎ߬ ߝߣߊ߫ ߟߊߓߐ߫ ߟߊ߫ ߕߋ߲߬ ߠߋ߬ ߸ ߛߴߊߟߎ߫ ߘߴߊߟߎ߫ ߕߊ߰ߛߌ߫ ﴿57﴾

ߘߎ߰ ߘߌߡߊ߲ ߝߍߘߍ߲ߝߋ߲ ߦߋ߫ ߓߐ߫ ߟߴߊ߬ ߡߊ߰ߙߌ ߟߊ߫ ߘߌ߬ߢߍ ߟߋ߬ ߟߊ߫ ߕߐߟߍ߯ ، ߘߎ߱ ߡߍ߲ ߜߏߡߊ߲߫ ߛߊ߫ ߸ ߏ߬ ( ߝߍߘߍ߲ߝߋ߲ ߠߎ߬ ) ߕߍ߫ ߓߐ߫ ߟߊ߫ ߝߏ߫ ߜߍ߲߬ߘߍ߬ ( ߓߟߏ ߡߊ߬ ) ߸ ߒ߬ߓߊ߬ ߊ߲ ߧߋ߫ ߟߝߊߙߌ ߟߎ߬ ߘߐߛߊ߬ߦߌߛߊ߬ߦߌ߬ ߟߊ߫ ߡߌ߬ߙߌ߲߬ߘߌ߬ ߞߏߢߌߡߊߟߐ߲ߠߊ ߟߎ߬ ߦߋ߫ ߕߋ߲߬ ߠߋ߬ ﴿58﴾

ߖߊ߯ߕߋ߬ ߸ ߒ߬ߠߎ߫ ߟߋ߫ ߞߊ߬ ߣߎߤߎ߲߫ ߗߋ߫ ߊ߬ ߡߌ߬ߙߌ߲߬ߘߌ ߡߊ߬ ، ߊ߬ ߞߵߊ߬ ߟߊߛߋ߫ ߞߏ߫ ߒ ߓߊߘߋ߲ ߠߎ߬ ߸ ߊߟߎ߯ ߊߟߊ߫ ߓߊ߬ߕߏ߬ ، ߡߊ߰ߙߌ߬ ߜߘߍ߫ ߕߍ߫ ߊߟߎ߫ ߟߊ߫ ߏ߬ ߡߍ߲ ߞߐ߫ ، ߒߠߋ ߛߌߟߊ߲ߣߍ߲߫ ߊߟߎ߫ ߘߌ߫ ߟߏ߲ߓߊ ߘߏ߫ ߖߊ߲߰ߞߕߊ ߟߋ߬ ߟߊ߫ ﴿59﴾

ߊ߬ ߡߌ߬ߙߌ߲߬ߘߌ ߢߓߊ ߟߎ߬ ߞߊ߲߫ ߞߏ߫ ߒ߬ߠߎ߬ ߢߊ߯ ߌ ߟߊ߫ ߝߟߌ߬ ߔߘߋߞߟߋ ߟߋ߬ ߘߐ߫ ﴿60﴾

ߊ߬ ߞߊ߲߫ ߞߏ߫ ߒ ߓߊߘߋ߲ ߠߎ߬ ߸ ߒߠߋ ߕߍ߫ ߝߟߌ߬ ߛߌ߫ ߘߐ߫ ߸ ߓߊ߬ߙߌ߬ ߞߋߟߊ ߟߋ߬ ߒߠߋ ߘߌ߫ ߞߊ߬ ߝߘߊ߫ ߖߊ߯ߓߊ ߟߎ߫ ߡߊ߰ߙߌ ߟߊ߫ ﴿61﴾

ߒ ߧߋ߫ ߒ ߡߊ߰ߙߌ ߟߊ߫ ߗߋ ߟߎ߫ ߟߋ߬ ߟߊߛߋ ߞߊ߲߬ ߊߟߎ߫ ߡߊ߬ ߸ ߊ߬ ߣߌ߫ ߞߊ߬ ߒ ߞߣߐߘߐߘߌߦߊ߫ ߟߊ߬ߟߌ߬ߟߌ ߘߐ߫ ߊߟߎ߫ ߦߋ߫ ، ߒߠߋ ߘߏ߲߬ ߞߊ߬ ߡߍ߲ ߟߐ߲߫ ߊߟߊ߫ ߝߍ߬ ߸ ߊߟߎ߫ ߡߴߏ߬ ߟߐ߲߫ ﴿62﴾

ߊߟߎ߫ ߞߓߊߞߏߦߊߣߍ߲߫ ߠߋ߫ ߓߊ߬ ߸ ߞߏ߫ ߊߟߎ߫ ߡߊ߰ߙߌ ߓߘߴߊߟߎ߫ ߞߊ߬ߥߊ߲߬ߘߌ߬ ߞߊ߲ ߟߊߣߵߊߟߎ߫ ߡߊ߬ ߗߍ߬ ߞߋߟߋ߲߫ ߕߊ߫ ߓߟߏ߫ ߟߴߊߟߎ߫ ߘߐ߫ ߸ ߛߴߏ߬ ߘߌ߫ ߖߊ߬ߛߙߋ߬ߡߊ߬ߟߊ ߞߍ߫ ߊߟߎ߫ ߦߋ߫ ، ߊ߬ ߣߌ߫ ߛߴߊߟߎ߫ ߘߴߊߟߎ߫ ߝߊ߲ߕߊ߲߬ߞߊ߫ ߸ ߏ߬ ߟߋ ߘߴߊ߬ ߞߍ߫ ߤߌߣߊ߫ ߘߌ߫ ߞߍ߫ ߊߟߎ߫ ߟߊ߫ ﴿63﴾

ߞߏ߬ߣߵߊ߬ߟߎ߫ ߞߵߏ ߛߐ߬ߛߐ߬ ، ߏ߬ ߞߍ ߊ߲ ߞߵߏ߬ ߣߴߊ߬ ߝߍ߬ ߡߐ߮ ߟߎ߬ ߟߊߞߛߌ߫ ߞߎߟߎ߲ ߞߣߐ߫ ߸ ߞߊ߬ ߒ߬ ߠߊ߫ ߟߝߊߙߌ ߟߎ߬ ߡߊߛߐ߬ߛߐ߬ߓߊ߮ ߟߎ߬ ߟߊߕߏ߫ ߖߌ ߘߐ߫ ߕߋߜߊ߫ ، ߓߊ ߏ߬ ߟߎ߬ ߞߍ߫ ߘߊ߫ ߡߌ߬ߙߌ߲߬ߘߌ߬ ߝߎߦߋ߲ ߠߋ߬ ߘߌ߫ ﴿64﴾

ߊ߲ ߞߊ߬ ߊ߯ߘߌ ߟߎ߬ ߓߊߘߋ߲߫ ߤߎ߯ߘߎ߫ ߗߋ߫ ߊ߬ߟߎ߫ ߡߊ߬ ، ߏ߬ ߞߊ߲߫ ߞߏ߫ ߒ ߓߊߘߋ߲ ߠߎ߬ ߸ ߊߟߎ߫߯ ߊߟߊ߫ ߓߊ߬ߕߏ߬ ߸ ߡߊ߰ߙߌ߬ ߜߘߍ߫ ߕߍ߫ ߊߟߎ߫ ߟߊ߫ ߏ߬ ߡߍ߲ ߞߐ߫ ، ߦߊ߯ߟߊ߫ ߊߟߎ߫ ߕߍ߫ ߊߟߎ߫ ߝߊ߲ߕߊ߲߬ߞߊ߬ ߟߊ߫ ( ߟߋ߫ ) ߓߊ߬؟ ﴿65﴾

ߏ߬ ߟߊ߫ ߡߌ߬ߙߌ߲߬ߘߌ ߢߓߊ߫ ߓߊ߲߬ߣߍ߲ ߠߎ߬ ߞߊ߲߫ ߊ߬ ߡߊ߬ ߸ ߞߏ߫ ߒ߬ߠߎ߬ ߢߊ߯ ߌ ߟߊ߫ ߣߊߟߏ߲ ߖߊ߯ߕߋ ߟߋ߬ ߘߐ߫ ߸ ߊ߲ ߜߎ ߌ ߖߌ߰ ߟߊ߫ ߥߎߦߊ߫ ߝߐߟߊ ߟߎ߬ ߘߏ߫ ߟߋ߬ ߘߌ߫ ﴿66﴾

ߊ߬ ߞߊ߲߫ ߞߏ߫ ߒߠߋ ߕߍ߫ ߣߊߟߏ߲ߡߊ߫ ߘߌ߫ ߘߋ߬ ߒ ߓߊߘߋ߲ ߠߎ߬ ، ߓߊ߬ߙߌ߬ ߒߠߋ ߦߋ߫ ߞߋߟߊ ߟߋ߬ ߘߌ߫ ߸ ߞߊ߬ ߝߘߊ߫ ߖߊ߯ߓߊ ߟߎ߫ ߡߊ߰ߙߌ ߟߊ߫ ﴿67﴾

ߒ ߧߋ߫ ߒ ߡߊ߰ߙߌ ߟߊ߫ ߗߋ ߟߎ߫ ߟߋ߬ ߟߊߛߋ ߞߊ߲߬ ߊߟߎ߫ ߡߊ߬ ، ߒߠߋ ߘߏ߲߬ ߊߟߎ߫ ߟߊߟߌߓߊ߯ ߟߊߒߠߊߒߕߋ ߟߋ߬ ߘߌ߫ ﴿68﴾

ߊߟߎ߫ ߞߓߊߞߏߦߊߣߍ߲߫ ߠߋ߫ ߓߊ߬ ߞߏ߫ ߊߟߎ߫ ߡߊ߰ߙߌ ߓߘߴߊߟߎ߫ ߞߊ߬ߥߊ߲߬ߘߌ߬ ߞߊ߲ ߟߊߣߵߊߟߎ߫ ߡߊ߬ ߗߍ߬ ߞߋߟߋ߲߫ ߕߊ߫ ߓߟߏ߫ ߟߊ߫ ߊߟߎ߫ ߘߐ߫ ߸ ߞߴߏ߬ ߦߋ߫ ߖߊ߬ߛߙߋ߬ߡߊ߬ߟߊ ߞߍ߫ ߊߟߎ߫ ߦߋ߫؟ ، ߒ߬ߓߵߊߟߎ߫ ߦߴߊߟߎ߫ ߛߌߡߊ߫ ߓߊ߫ ߸ ߕߎ߬ߡߊ ߡߍ߲ ߊߟߊ߫ ߞߵߊߟߎ߫ ߞߍ߫ ߣߘߐ߬ߛߌ߮ ߟߎ߬ ߘߌ߫ ߣߎߤߎ߲߫ ߡߌ߬ߙߌ߲߬ߘߌ ߞߐ߫ ߸ ߊ߬ ߣߴߊ߬ ߞߵߊߟߎ߫ ߖߘߌ߫ ߘߊߟߌ ߘߐ߫ ߞߵߊߟߎ߫ ߞߍ߫ ߜߛߏߜߛߏ ߟߎ߬ ߘߌ߫ ، ߒ߬ߓߵߊߟߎ߫ ߦߴߊߟߎ߫ ߦߟߌߓߌ߬ߟߵߊߟߊ߫ ߟߊ߫ ߣߍߡߊ ߟߎ߬ ߘߐ߫ ߸ ߛߴߊߟߎ߫ ߘߌ߫ ߛߎߘߊ߲߫ ﴿69﴾

ߊ߬ߟߎ߫ ߞߵߏ ߖߋ߬ߓߌ߬ ߞߴߌ ߣߊ߬ߣߍ߲߫ ߒ߬ ߕߘߍ߬ ߟߊ߫ ߟߋ߫ ߓߊ߬ ߞߏ߫ ߊ߲ ߧߋ߫ ߊߟߊ߫ ߞߋߟߋ߲߫ ߓߊ߬ߕߏ߬ ߸ ߊ߲ ߝߊ߬ ߟߎ߫ ߕߘߍ߬ ߡߍ߲ ߓߊ߬ߕߏ߬ ߟߊ߫ ߞߵߏ߬ ߕߏ߫ ߦߋ߲߬؟ ، ߒ߬ߓߊ߬ ߌ ߦߴߌ ߞߐ߲߬ߞߐ߲߬ ߠߴߊ߲ ߡߊ߬ ߞߏ ߡߍ߲ ߘߐ߫ ߸ ߣߵߏ߬ ߘߌ߫ ߒ߬ ߞߊ߲ߡߊ߬ ߝߛߊߦߌ߫ ، ߣߴߊ߬ ߕߘߍ߬ ߘߊ߫ ߌ ߦߋ߫ ߕߎ߬ߢߊ߬ ߕߌ߮ ߟߎ߬ ߘߏ߫ ߘߌ߫ ﴿70﴾

ߊ߬ ߞߊ߲߫ ߞߏ߫ ߞߛߐ ߣߌ߫ ߛߊ߬ߙߌ ߓߘߊ߫ ߓߊ߲߫ ߓߋ߬ ߟߴߊߟߎ߫ ߞߊ߲߬ ߸ ߞߊ߬ ߝߘߴߊߟߎ߫ ߡߊ߰ߙߌ ߟߊ߫ ، ߌ߬ߦߏ߯ ߊߟߎ߫ ߘߌ߫ ߕߏ߫ ߒߠߋ ߘߊߘߐߖߊ߬ ߟߴߊߟߎ߫ ߣߴߊߟߎ߫ ߝߊ߬ ߟߎ߬ ߟߊ߫ ߝߋ߲߫ ߕߐ߯ߟߊߣߍ߲ ߠߎ߫ ߝߍ߬ ߸ ߊߟߊ߫ ߡߊ߫ ߘߊ߬ߟߎ߬ ߟߊߖߌ߰ ߡߍ߲ ߠߊ߫؟ ، ߒ߬ߓߵߊߟߎ߫ ߡߊ߬ߞߐ߬ߣߐ߲߬ߠߌ߲ ߞߍ߫ ߸ ߒߠߋ ߝߣߴߊߟߎ߫ ߝߍ߬ ߡߊ߬ߞߐ߬ߣߐ߲߬ߠߌ߲߬ߠߊ ߟߎ߬ ߘߏ߫ ߟߋ߬ ߘߌ߫ ﴿71﴾

ߊ߲ ߞߵߏ߬ ߣߴߊ߬ ߝߍ߬ ߡߐ߮ ߟߎ߬ ߟߊߞߛߌ߫ ߒ߬ ߠߊ߫ ߤߌߣߊ ߘߏ߫ ߟߊ߫ ߸ ߞߵߊ߲ ߠߊ߫ ߟߝߊߙߌ ߟߎ߬ ߡߊߛߐ߬ߛߐ߬ߓߊ߮ ߟߎ߬ ߞߐ ߕߍ߰ ߊ߬ ߟߊ߫ ، ߓߊ ߊ߬ߟߎ߫ ߕߎ߲߬ ߕߍ߫ ߘߍ߲߬ߞߣߍ߬ߦߊ߬ߓߊ߯ ߟߎ߫ ߘߌ߫ ﴿72﴾

ߊ߲ ߞߊ߬ ߛߊ߬ߡߎߘߊ ߟߎ߬ ߓߊߘߋ߲߫ ߛߊߟߌߤߎ߫ ߗߋ߫ ߊ߬ߟߎ߫ ߡߊ߬ ، ߏ߬ ߞߊ߲߫ ߞߏ߫ ߒ ߓߊߘߋ߲ ߠߎ߬ ߸ ߊߟߎ߯ ߊߟߊ߫ ߓߊ߬ߕߏ߬ ߸ ߡߊ߰ߙߌ߬ ߜߘߍ߫ ߕߍ߫ ߊߟߎ߫ ߟߊ߫ ߏ߬ ߡߍ߲ ߞߐ߫ ، ߔߊߞߌ ߓߘߊ߫ ߣߵߊߟߎ߫ ߡߊ߬ ߸ ߞߊ߬ ߝߘߴߊߟߎ߫ ߡߊ߰ߙߌ ߟߊ߫ ، ߊߟߊ߫ ߟߊ߫ ߢߐ߯ߡߍ߫ ߡߛߏ ߟߋ߫ ߣߌ߲߬ ߞߵߏ߬ ߞߍ߫ ߊߟߎ߫ ߦߋ߫ ߡߊ߲߬ߕߊߣߌ߲ ߘߌ߫ ߸ ߊߟߎ߫ ߘߏ߲߬ ߦߴߊ߬ ߕߏ߫ ߊ߬ ߦߴߊ߬ ߘߡߊߘߊߥߎ߲߫ ߊߟߊ߫ ߟߊ߫ ߘߎ߱ ߞߊ߲߬ ߸ ߊߟߎ߫ ߞߊߣߊ߬ ߡߊ߰ ߊ߬ ߟߊ߫ ߖߎ߯ߡߊ߲߫ ߘߌ߫ ߘߋ߬ ، ߖߊ߲߰ߞߕߊ߬ ߘߌߡߌ߲ߣߍ߲ ߘߴߊߟߎ߫ ߛߐ߬ߘߐ߲߫ ߏ߬ ߘߐ߫ ﴿73﴾

ߊߟߎ߫ ߦߴߊߟߎ߫ ߛߌߡߊ߫ ߓߊ߫ ߸ ߕߎ߬ߡߊ ߡߍ߲ ߊߟߊ߫ ߞߵߊߟߎ߫ ߞߍ߫ ߣߘߐ߬ߛߌ߮ ߟߎ߬ ߘߌ߫ ߊ߯ߘߌ ߟߎ߬ ߞߐ߫ ، ߞߵߊߟߎ߫ ߡߊߞߍ߫ ߘߎ߱ ߞߊ߲߬ ، ߊߟߎ߫ ߦߋ߫ ߘߎ߱ ߕߛߊߞߙߊ ߟߎ߫ ߟߐ߬ ߟߊ߫ ߛߊ߲ߞߊߛߏ ߟߎ߬ ߘߌ߫ ، ߊߟߎ߫ ߦߋ߫ ߞߎ߬ߙߎ ߟߎ߬ ߟߛߍ߫ ߟߊ߫ ߓߏ߲ ߠߎ߬ ߘߌ߫ ، ߒ߬ߓߵߊߟߎ߫ ߦߴߊߟߎ߫ ߦߟߌߓߌ߬ߟߵߊߟߊ߫ ߟߊ߫ ߣߍߡߊ ߘߐ߫ ߘߋ߬ ߸ ߊߟߎ߫ ߘߏ߲߬ ߞߊߣߊ߬ ߖߊߛߟߌ ߞߍ߫ ߘߎ߱ ߞߊ߲߬ ߞߊ߬ ߞߍ߫ ߕߌߢߍߟߌߟߊ ߟߎ߬ ߘߌ߫ ﴿74﴾

ߏ߬ ߟߊ߫ ߡߌ߬ߙߌ߲߬ߘߌ ߢߓߊ ߘߐ߫ ߖߘߍ߬ߘߐ߬ߓߊ ߟߎ߬ ߞߊ߲߫ ߖߐ߬ߒ߬ߡߊ߬ߓߊ߰ߕߐ߫ ߘߍ߲߬ߞߣߍ߬ߦߊ߬ߣߍ߲ ߠߎ߫ ߡߊ߬ ߸ ߞߏ߫ ߊ߬ ߝߐ߫ ߊߟߎ߫ ߞߵߊ߬ ߟߐ߲߫ ߛߎߋ߯ ߞߏ߫ ߛߊߟߌߤߎ߫ ߞߋߟߦߊߣߍ߲߫ ߠߴߊ߬ ߡߊ߰ߙߌ ߓߟߏ߫؟ ، ߏ߬ ߟߎ߫ ߞߵߊ߬ߟߎ߫ ߖߋ߬ߓߌ߬ ߸ ߞߏ߫ ߒ߬ߠߎ߫ ߞߏ߬ߣߌ߲ ߘߍ߲߬ߞߣߍ߬ߦߊ߬ߣߍ߲߫ ߠߴߊ߬ ߟߊ߫ ߞߋߟߦߊ߫ ߞߊ߲ ߡߊ߬ ߛߋߚߋ߫ ﴿75﴾

ߖߘߍ߬ߘߐ߬ߓߊ ߟߎ߬ ߞߊ߲߫ ߞߏ߫ ߒ߬ߓߵߊߟߎ߫ ߟߊߣߍ߲߫ ߡߍ߲ ߠߊ߫ ߣߌ߲߬ ߸ ߊ߲ߠߎ߫ ߓߊ߲߬ߣߍ߲߫ ߠߴߏ߬ ߘߐ߫ ߝߊߦߌ߲߫ ﴿76﴾

ߏ߬ ߟߋ ߡߊ߬ ߸ ߊ߬ߟߎ߫ ߞߊ߬ ߢߐ߯ߡߍ߫ ߡߛߏ ߜߐ߲߬ߝߛߊ ߟߎ߫ ߕߍ߰ ߞߵߊ߬ ߝߊ߰ ߸ ߞߵߊ߬ߟߎ߬ ߜߛߋߞߎ߬ߘߎ߫ ߊ߬ߟߎ߫ ߡߊ߰ߙߌ ߟߊ߫ ߖߊ߬ߡߊߙߌ ߡߊ߬ ، ߊ߬ߟߎ߬ ߞߊ߲߫ ߞߏ߫ ߤߍ߲߬ ߌߟߋ߬ ߛߊߟߌߤߎ߫ ߸ ߌ ߦߴߌ ߞߐ߲߬ߞߐ߲߬ ߠߊ߫ ߒ߬ ߡߊ߬ ߞߏ߫ ߡߍ߲ ߘߐ߫ ߸ ߣߵߏ߬ ߘߴߊ߲ ߞߊ߲ߡߊ߬ ߝߛߊߦߌ߫ ߣߴߊ߬ ߕߘߍ߬ ߘߊ߫ ߌ ߦߋ߫ ߞߋߟߊ ߟߎ߬ ߘߏ߫ ߘߌ߫ ﴿77﴾

ߦߙߍߦߙߍ ( ߖߊ߲߬ߞߊߙߏ ) ߞߵߊ߬ߟߎ߫ ߡߌ߬ߘߊ߫ ߏ߬ ߟߋ ߘߐ߫ ، ߏ߬ ߞߍ ߸ ߊ߬ߟߎ߫ ߛߏ߬ߘߌ߬ߣߍ߲ ߞߊ߬ ߘߎ߬ߛߊ ߟߊߜߍ߫ ߊ߬ߟߎ߬ ߟߊ߫ ߛߏ ߟߎ߬ ߞߣߐ߫ ﴿78﴾

ߏ߬ ߞߐߘߏ߲߬ߕߐ ߊ߬ߟߎ߬ ߟߊ߫ ߸ ߊ߬ ߞߊ߲߫ ߞߏ߫ ߒ ߓߊߘߋ߲ ߠߎ߬ ߸ ߒߠߋ ߞߏ߬ߣߌ߲ ߞߊ߬ ߒ ߡߊ߰ߙߌ ߟߊ߫ ߛߊ߲߬ߓߊ ߟߎ߬ ߟߊߛߋ߫ ߊߟߎ߫ ߡߊ߬ ߸ ߞߊ߬ ߒ ߞߣߐߘߐߘߌߦߊ߫ ߟߊ߬ߟߌ߬ߟߌ ߘߐ߫ ߊߟߎ߫ ߦߋ߫ ߸ ߖߊ߰ ߊߟߎ߫ ߘߏ߲߬ ߕߍ߫ ߟߊ߬ߟߌ߬ߟߌ߬ߟߊ ߟߎ߫ ߝߍ߬ ﴿79﴾

ߊ߲ ߞߊ߬ ߟߎߕߌ߫ ߝߣߊ߫ ߗߋ߫ ߸ ߕߎ߬ߡߊ ߡߍ߲ ߊ߬ ߞߵߊ߬ ߝߐ߫ ߊ߬ ߡߌ߬ߙߌ߲߬ߘߌ ߦߋ߫ ، ߞߏ߫ ߌ߬ߦߏ߯ ߊߟߎ߫ ߘߌ߫ ߕߏ߫ ߣߊ߬ ߟߊ߫ ߞߍߞߏߖߎ߯ߦߊ ߟߊ߫ ߸ ߡߐ߰ ߛߌ߫ ߡߊ߫ ߞߐ߲߰ ߊߟߎ߫ ߢߍ߫ ߡߍ߲ ߢߐ߲߰ ߡߊ߬ ߖߊ߯ߓߊ ߞߣߐ߫ ߡߐ߮ ߟߎ߬ ߘߐ߫ ( ߞߘߐ߬ߡߊ߲߫) ﴿80﴾

ߓߊ ߊߟߎ ߟߋ߫ ߣߊ߬ ߟߊ߫ ߗߍ߭ ߟߎ߫ ߡߊ߬ ߤߌߟߍ ߘߌ߫ ߞߊ߬ ߡߏ߬ߛߏ ߟߎ߬ ߕߏ߫ ߦߋ߲߬ ، ߤߊ߲߫ ߸ ߊߟߎ߫ ߦߋ߫ ߡߌ߬ߙߌ߲߬ߘߌ߬ ߖߊߛߟߌߟߊ ߟߎ߫ ߖߍ߬ߘߍ ߟߋ߬ ߘߌ߫ ﴿81﴾

ߏ߬ ߟߊ߫ ߡߌ߬ߙߌ߲߬ߘߌ ߟߊ߫ ߖߋ߬ߓߌ߬ߟߌ ߡߊ߫ ߞߍ߫ ߝߏߦߌ߬ ߘߌ߫ ߸ ߝߏ߫ ߞߵߊ߬ ߝߐ߫ ߞߏ߫ ߊߟߎ߫ ߦߴߊ߬ߟߎ߬ ߟߊߓߐ߫ ߊߟߎ߫ ߟߊ߫ ߛߏ ߞߣߐ߫ ، ߓߊ ߡߐ߰ ߟߎ߫ ߟߋ߬ ߸ ߡߍ߲ ߠߎ߬ ߦߋ߫ ߢߍߦߌ߲߫ ߠߊ߫ ( ߊߟߎ߫ ߘߐ߫) ﴿82﴾

ߊ߲ ߞߵߏ߬ ߣߴߊ߬ ߞߐߙߍ ߟߊߞߛߌ߫ ، ߝߏ߫ ߊ߬ ߡߏ߬ߛߏ ، ߏ߬ ߟߋ ߞߍ߫ ߘߊ߫ ߞߐ߫ ߘߐ߫ ߕߏߓߊ߮ ߟߎ߬ ߘߏ߫ ߘߌ߫ ﴿83﴾

ߊ߲ ߞߊ߬ ߛߊ߲ߖߌ ߘߏ߫ ߟߊߓߐߙߐ߲ߘߐ߫ ߊ߬ߟߎ߫ ߞߊ߲߬ ، ߒ߬ߓߵߊ߬ ߝߟߍ߫ ߓߊ߫ ߛߐ߲߬ߡߊ ߟߎ߬ ߟߊߓߊ߲ ߞߍ߫ ߘߊ߫ ߢߊ ߡߍ߲ ﴿84﴾

ߊ߲ ߞߊ߬ ߡߊߘߌߦߣߊߞߊ ߟߎ߬ ߓߊߘߋ߲߫ ߛߎ߬ߊߦߌߓߎ߫ ߗߋ߫ ߊ߬ߟߎ߫ ߡߊ߬ ، ߏ߬ ߞߊ߲߫ ߞߏ߫ ߒ ߓߊߘߋ߲ ߠߎ߬ ߸ ߊߟߎ߯ ߊߟߊ߫ ߓߊ߬ߕߏ߫ ߘߋ߬ ، ߡߊ߰ߙߌ߬ ߜߘߍ߫ ߕߍ߫ ߊߟߎ߫ ߟߊ߫ ߏ߬ ߡߍ߲ ߞߐ߫ ، ߔߊߞߌ ߓߘߊ߫ ߣߵߊߟߎ߫ ߡߊ߬ ߞߊ߬ ߝߘߊ߫ ߊߟߎ߫ ߡߊ߰ߙߌ ߟߊ߫ ߸ ߞߏ߫ ߊߟߎ߫ ߛߎߡߊ߲ߟߊ߲ ߣߌ߫ ߖߊ߭ ߝߊ߫ ߸ ߊߟߎ߫ ߞߊߣߊ߬ ߡߐ߱ ߟߎ߬ ߟߊ߫ ߝߋ߲ ߠߎ߬ ߟߊߘߛߏ߫ ߊ߬ߟߎ߫ ߡߊ߬ ߸ ߊߟߎ߫ ߘߏ߲߬ ߞߊߣߊ߬ ߕߌߢߍߟߌ ߞߍ߫ ߘߎ߱ ߞߊ߲߬ ߊ߬ ߟߊߢߊ߬ߣߍ߲ ߞߐ߫ ، ߏ߬ ߟߋ ߞߏ߬ߣߌ߲ ߤߙߊ ߘߌ߫ ߊߟߎ߫ ߞߊ߲߬ ߣߴߊ߬ ߕߘߍ߬ ߘߴߊߟߎ߫ ߦߋ߫ ߘߍ߲߬ߞߣߍ߬ߦߊ߬ߓߊ߯ ߟߎ߫ ߘߌ߫ ﴿85﴾

ߊߟߎ߫ ߞߊߣߵߊߟߎ߫ ߛߌ߰ ߛߌߟߊ ߓߍ߯ ߟߊ߫ ߞߵߊ߬ ߞߍ߫ ߞߐ߲߬ߞߐ߲߬ߒ߬ߡߊ߬ߟߌ ߣߌ߫ ߡߐ߰ ߞߎߡߊ߲ߘߌ ߘߌ߫ ߊߟߊ߫ ߟߊ߫ ߛߌߟߊ ߡߊ߬ ߸ ߡߍ߲ ߦߋ߫ ߘߍ߲߬ߞߣߍ߬ߦߊ߬ ߞߏ ߘߐ߫ ߊ߬ ߡߊ߬ ، ߊ߬ ߣߌ߫ ߞߵߊ߬ ߢߌߣߌ߲߫ ߞߏ߫ ߊߟߎ߫ ߦߴߏ߬ ߞߍ߫ ߟߊ߫ ߞߐ߲߬ߕߌ߲ ߘߌ߫ ، ߊߟߎ߫ ߦߴߊߟߎ߫ ߕߊ߰ߛߌ߬ ߓߊ߫ ߸ ߊߟߎ߫ ߜߍ߲ߛߍ߲ߞߍߙߍ߲ ߠߋ߫ ߕߘߍ߬ ، ߊߟߊ߫ ߟߋ߫ ߞߵߊߟߎ߫ ߟߊߛߌߦߊߦߊ߫ ، ߒ߬ߓߵߊߟߎ߫ ߦߴߊ߬ ߝߟߍ߫ ߓߊ߫ ߕߌߢߍߟߌߟߊ ߟߎ߬ ߟߊߓߊ߲ ߞߍ߫ ߘߊ߫ ߢߊ ߡߍ߲ ﴿86﴾

ߣߴߊ߬ ߕߘߍ߬ ߘߊ߫ ߸ ߞߏ߫ ߊߟߎ߫ ߝߊ߲߬ ߞߋߟߋ߲ ߓߘߊ߫ ߘߍ߲߬ߞߣߍ߬ߦߊ߬ ߒߠߋ ߟߊ߫ ߞߋߟߦߊ߫ ߞߊ߲ ߡߊ߬ ߸ ߞߊ߬ ߝߊ߲߬ ߞߋߟߋ߲ ߘߍ߲߬ߞߣߍ߬ߦߊ߬ߓߊߟߌ ߕߏ߫ ߸ ߒ߬ߓߵߊߟߎ߫ ߦߴߊߟߎ߫ ߡߎ߬ߢߎ߲߬ ߖߐ߫ ߝߏ߫ ߊߟߊ߫ ߦߋ߫ ߞߕߌ߫ ߒ߬ ߕߍ߫ ، ߓߊ ߏ߬ ߟߋ ߞߕߌߟߊߟߊ ߟߎ߬ ߘߐ߫ ߢߌ߬ߡߊ ߘߌ߫ ﴿87﴾

ߏ߬ ߟߊ߫ ߡߌ߬ߙߌ߲߬ߘߌ ߢߓߊ ߘߐ߫ ߖߘߍ߬ߘߐ߬ߓߊ ߟߎ߬ ߞߊ߲߫ ߸ ߞߏ߫ ߒ߬ ߘߴߌߟߋ ߛߎ߬ߊߦߌߓߎ߫ ߣߴߌ ߝߍ߬ ߡߐ߯ ߘߍ߲߬ߞߣߍ߬ߦߊ߬ߣߍ߲ ߓߍ߯ ߟߊߓߐ߫ ߒ߬ ߠߊ߫ ߛߏ ߟߊ߫ ߸ ߥߟߴߊߟߎ߫ ߦߋ߫ ߛߊ߬ߦߌ߫ ߒ߬ ߠߊ߫ ߣߊߡߎ߲ ߘߐ߫ ، ߊ߬ ߞߵߊ߬ߟߎ߫ ߖߋ߬ߓߌ߬ ߞߏ߫ ߋ߫ ߸ ߤߊߟߌ߬ ߊ߬ ߜߏߡߊ߲߫ ߞߍ߫ ߘߴߊ߲ ߦߋ߫؟ ﴿88﴾

ߣߴߊ߲ ߛߊ߬ߦߌ߲߬ ߘߴߊߟߎ߫ ߟߊ߫ ߣߊߡߎ߲ ߘߐ߫ ߊߟߊ߫ ߓߊ߲ ߞߐ ߊ߲ ߓߏ߬ߛߌ߬ ߟߴߊ߬ ߘߐ߫ ߸ ߊ߲ ߓߘߊ߫ ߥߎߦߊ ߞߎ߲߬ߘߐߕߍ߰ ߞߵߊ߬ ߟߴߊߟߊ߫ ߟߊ߫ ߏ߬ ߘߐ߫ ߘߋ߬. ߊ߬ ߝߊ߲߭ ߕߍ߫ ߞߎ߲߫ ߒ߬ߠߎ߬ ߘߐ߫ ߞߊ߬ ߛߊ߬ߦߌ߲߬ ߊ߬ ߘߐ߫ ߝߏ߫ ߣߴߊ߲ ߡߊ߰ߙߌ߬ ߊߟߊ߫ ߞߵߏ߬ ߟߊߢߌߣߌ߲߫ ، ߊ߲ ߡߊ߰ߙߌ ߘߏ߲߬ ߦߙߌߥߊߣߍ߲߫ ߝߋ߲ ߓߍ߯ ߟߋ߫ ߡߊ߬ ߟߐ߲ߠߌ߲ ߘߐ߫ ، ߊ߲ ߘߏ߲߬ ߛߍ߲߬ߓߍ߬ߣߍ߲߫ ߊߟߊ߫ ( ߏ߬ ) ߟߋ ߟߊ߫ ، ߊ߲ ߡߊ߰ߙߌ ߸ ߞߕߌ߫ ߊ߲ ߣߌ߫ ߒ߬ ߡߌ߬ߙߌ߲߬ߘߌ ߕߍ߫ ߕߎ߬ߢߊ ߟߊ߫ ߸ ߓߊ ߌߟߋ ߟߋ߬ ߞߕߌ߫ ߕߍ߯ߟߊ ߟߎ߬ ߘߐ߫ ߢߌ߬ߡߊ ߘߌ߫ ﴿89﴾

ߊ߬ ߟߊ߫ ߡߌ߬ߙߌ߲߬ߘߌ ߢߓߊ߫ ߓߊ߲߬ߣߍ߲ ߠߎ߬ ߞߊ߲߫ ߢߐ߲߮ ߢߍ߫ ߸ ߞߏ߫ ߣߴߊߟߎ߫ ߞߊ߬ ߛߎ߬ߊߦߌߓߎ߫ ߟߊߓߊ߬ߕߏ߬ ߸ ߏ ߕߎ߬ߡߊ ߊߟߎ߫ ߓߣߐ߬ߣߍ߲ ߓߍ߯ ߟߴߏ߬ ߘߌ߫ ﴿90﴾

ߘߊ߬ߡߊ߲߬ߛߊ߫ ߦߙߍߦߙߍ ( ߖߊ߲߬ߞߊߙߏ ) ߞߵߊ߬ߟߎ߫ ߡߌ߬ߘߊ߬ ، ߏ߬ ߞߍ ߊ߬ߟߎ߫ ߛߏ߬ߘߌ߬ߣߍ߲ ߞߊ߬ ߘߎ߬ߛߊ ߟߊߜߍ߫ ߊ߬ߟߎ߬ ߞߎ߲ߡߋߙߋ߲ ߠߎ߫ ߞߊ߲߬ ߊ߬ߟߎ߬ ߟߊ߫ ߟߎ ߟߎ߬ ߞߣߐ߫ ﴿91﴾

ߡߍ߲ ߠߎ߫ ߞߊ߬ ߛߎ߬ߊߦߌߓߎ߫ ߛߐ߬ߛߐ߬ ߸ ߊ߬ ߞߍ߫ ߘߊ߫ ߦߴߏ߬ ߟߎ߬ ߡߊ߫ ߛߌ߰ ߞߍ߫ ߦߋ߲߬ ، ߡߍ߲ ߠߎ߫ ߞߊ߬ ߛߎ߬ߊߦߌߓߎ߫ ߛߐ߬ߛߐ߬ ߸ ߏ߬ ߟߎ߬ ߞߍ߫ ߘߊ߫ ߓߣߐ߬ߓߊ߮ ߟߎ߬ ߘߌ߫ ﴿92﴾

ߏ߬ ߞߐߘߏ߲߬ߕߐ ߊ߬ߟߎ߬ ߟߊ߫ ߸ ߊ߬ ߞߊ߲߫ ߞߏ߫ ߒ ߓߊߘߋ߲ ߠߎ߬ ߸ ߒߠߋ ߞߏ߬ߣߌ߲ ߞߊ߬ ߡߊ߰ߙߌ ߟߊ߫ ߛߊ߲߬ߓߊ ߟߎ߬ ߟߊߛߋ߫ ߊߟߎ߫ ߡߊ߬ ߸ ߞߊ߬ ߒ ߞߣߐߘߐߘߌߦߊ߫ ߟߊ߬ߟߌ߬ߟߌ ߘߐ߫ ߊߟߎ߫ ߦߋ߫ ، ߓߊ߬ߙߌ߬ ߒ ߛߎ߬ߣߎ߲߬ߕߐ߫ ߡߌ߬ߙߌ߲߬ߘߌ߫ ߓߊ߲߬ߣߍ߲ ߠߎ߫ ( ߡߊ߬ߤߌߣߊ ) ߡߊ߬ ߘߌ߬؟ ﴿93﴾

ߊ߲ ߡߊ߫ ߟߊ߬ߝߐ߬ߓߊ߯ ߗߋ߫ ߛߏ߫ ߛߌ߫ ߡߊ߬ ߸ ߝߏ߫ ߊ߲ ߧߴߏ߬ ߘߏ߲߬ߞߏ ߟߎ߫ ߡߌ߬ߘߊ߫ ߕߣߊ߬ߡߊ ߟߎ߬ ߣߌ߫ ߡߊ߲߬ߕߙߐ ߟߎ߬ ߟߊ߫ ߸ ߛߴߊ߬ߟߎ߬ ߘߴߊ߬ߟߎ߫ ߖߘߍ߬ ߡߊߞߊ߬ߛߌ߬ ﴿94﴾

ߏ߬ ߟߋ ߞߐ߫ ߸ ߊ߲ ߞߊ߬ ߖߎ߯ߡߊ߲ ߦߙߐ ߡߊߝߊ߬ߟߋ߲߫ ߢߌ߬ߡߊ ߟߊ߫ ߝߏ߫ ߞߵߊ߬ߟߎ߬ ߛߌߦߊߦߊ߫ ، ߊ߬ߟߎ߬ ߞߊ߲߫ ߏ߬ ߘߐ߫ ߞߏ߫ ߡߊ߲߬ߕߙߐ ߣߌ߫ ߡߍ߲ߘߌߦߊ ߟߎ߫ ߡߊ߰ ߘߴߊ߲ ߝߊ߬ ߟߎ߬ ߟߊ߫ ߞߟߋ߫ ، ߘߊ߬ߡߊ߲߬ߛߊ߫ ߊ߲ ߣߊ߬ ߘߴߊ߬ߟߎ߫ ߓߙߊ߬ߒ߬ߘߐ߬ ߡߌߘߊ ߞߍ߫ ߗߐߞߎ߬ߡߐ߬ ߞߵߊ߬ ߕߘߍ߬ ߊ߬ߟߎ߬ ߦߟߌ߫ ߕߍ߫ ߊ߬ ߟߊ߫ ﴿95﴾

ߣߌ߫ ߘߎ߱ ߏ߬ ߟߎ߫ ߘߏ߲߬ߞߏ ߟߎ߫ ߕߎ߲߬ ߘߍ߲߬ߞߣߍ߬ߦߊ߬ ߘߊ߫ ߞߵߊ߬ߟߎ߬ ߝߊ߲ߕߊ߲߬ߞߊ߫ ߸ ߊ߲ ߕߎ߲߬ ߘߌ߫ ߓߙߊߞߊ ߟߎ߬ ߘߊ ߟߊߞߵߊ߬ߟߎ߬ ߦߋ߫ ߞߊ߬ ߓߐ߫ ߛߊ߲ ߘߐ߫ ߊ߬ ߣߌ߫ ߘߎ߱ ߘߐ߫ ، ߓߊ߬ߙߌ߬ ߊ߬ߟߎ߫ ߞߊ߬ ߡߊ߬ߛߐ߬ߛߐ߬ߟߌ ߞߍ߫ ߸ ߏ߬ ߟߋ ߞߵߊ߬ ߞߍ߫ ߊ߲ ߞߵߊ߬ߟߎ߫ ߡߌ߬ߘߴߊ߬ߟߎ߬ ߗߋߥߊߟߌ ߟߊ߫ ﴿96﴾

ߊ߬ ߝߐ߫ ߘߎ߱ ߟߎ߫ ߘߏ߲߬ߞߏ ߟߎ߬ ߘߌ߫ ߦߟߌߟߊߕߍ߰ ߓߊ߬ ߸ ߞߏ߫ ߊ߲ ߠߊ߫ ߓߌ߲߬ߓߊߏ ߕߍߣߵߊ߬ߟߎ߫ ߡߊ߬ ߛߎ ߘߐ߫ ߞߵߊ߬ ߕߘߍ߬ ߊ߬ߟߎ߬ ߦߋ߫ ߛߎ߬ߣߐ߮ ߘߐ߫؟ ﴿97﴾

ߥߟߊ߫ ߘߎ߱ ߟߎ߫ ߘߏ߲߬ߞߏ ߟߎ߬ ߘߌ߫ ߦߟߌߟߊߕߍ߰ ߸ ߞߏ߫ ߊ߲ ߠߊ߫ ߓߌ߲߬ߓߊߏ ߕߍߣߵߊ߬ߟߎ߫ ߡߊ߬ ߛߎ߲߰ߕߟߋ ߟߊ߫ ߞߵߊ߬ ߕߘߍ߬ ߊ߬ߟߎ߬ ߦߋ߫ ߢߣߊߕߍ߮ ߟߊ߫؟ ﴿98﴾

ߌ߬ߦߏ߯ ߊ߬ߟߎ߬ ߘߌ߫ ߦߟߌߟߊߕߍ߰ ߊߟߊ߫ ߟߊ߫ ߡߊߙߊ߲ߛߊ ߡߊ߬؟ ، ߡߐ߰ ߛߌ߫ ߘߏ߲߬ ߕߍ߫ ߦߟߌߟߊߕߍ߰ ߊߟߊ߫ ߟߊ߫ ߡߊߙߊ߲ߛߊ ߡߊ߬ ߝߏ߫ ߡߌ߬ߙߌ߲߬ߘߌ߫ ߓߣߐ߬ߣߍ߲ ߠߎ߬ ﴿99﴾

ߊ߬ ߡߊ߫ ߘߐߞߣߍ߫ ߡߐ߱ ߟߎ߬ ߦߋ߫ ߓߊ߬ ߸ ߡߍ߲ ߠߎ߬ ߦߋ߫ ߘߎ߱ ߕߊ߬ ߟߊ߫ ߗߍ ߘߐ߫ ߊ߬ ߕߌ߱ ߟߎ߬ ߞߐ߫ ߸ ߞߏ߫ ߣߴߊ߬ ߕߎ߲߬ ߞߊ߬ ߒ߬ ߘߌߦߊ߫ ߸ ߊ߲ ߕߘߍ߬ ߘߴߊ߬ߟߎ߬ ߡߊߛߐ߬ߘߐ߲߫ ߊ߬ߟߎ߫ ߖߟߎ߬ߡߎ߲ ߠߎ߫ ߝߍ߬ ، ߊ߬ ߣߌ߫ ߞߏ߫ ߒ߬ ߕߘߍ߬ ߘߴߊ߬ߟߎ߫ ߛߣߐ߬ߡߍ ߟߎ߬ ߟߊߣߘߐ߫ ߔߋ߲߫؟ ߏ߬ ߓߊ߯ ߞߍ߫ ߊ߬ߟߎ߬ ߕߍ߫ ߡߍ߲ߠߌ߲߫ ߞߍ߫؟ ﴿100﴾

ߊ߲ ߧߋ߫ ߘߎ߱ ߡߍ߲ ߠߎ߫ ߖߊ߲߬ߖߏ߲ ߘߏ߫ ߟߎ߫ ߘߊ߲߬ߕߍ߱ ߞߊ߲߬ ߌ ߦߋ߫ ߣߌ߲߬ ߸ ߏ߬ ߟߎ߬ ߟߊ߫ ߞߋߟߊ ߟߎ߫ ߣߊ߬ ߘߴߊ߬ߟߎ߫ ߡߊ߬ ߔߊߞߌ ߟߎ߬ ߘߌ߫ ߟߋ߬ ߛߋߚߋ߫ ، ߓߊ߬ߙߌ߬ ߊ߬ߟߎ߫ ߣߐ߬ ߕߘߍ߬ ߡߍ߲ ߡߊߛߐ߬ߛߐ߬ ߟߊ߫ ߞߘߐ߬ߡߊ߲߫ ߸ ߊ߬ߟߎ߬ ߡߊ߫ ߛߐ߲߬ ߘߍ߲߬ߞߣߍ߬ߦߊ߬ ߟߴߏ߬ ߡߊ߬ ߡߎ߬ߕߎ߲߬ ، ߒ߬ߓߵߊߟߊ߫ ߦߋ߫ ߓߊ߲߬ߓߊ߮ ߟߎ߫ ߛߣߐ߬ߡߍ ߟߎ߬ ߟߊߣߘߐ߫ ߟߊ߫ ߕߋ߲߬ ߠߋ߬ ﴿101﴾

ߊ߲ ߡߴߊ߬ߟߎ߫ ߝߊ߲߬ߓߊ ߛߌ߫ ߕߘߍ߬ ߟߊ߬ߤߘߌ߬ ߕߌ߯ ߘߌ߫ ، ߊ߲ ߞߵߊ߬ߟߎ߫ ߝߊ߲߬ߓߊ ߕߘߍ߬ ߔߊߟߊ߲ߞߊߓߊ߮ ߟߎ߬ ߘߐߙߐ߲߫ ߠߋ߬ ߘߌ߫ ﴿102﴾

ߏ߬ ߟߋ ߞߐ߫߸ ߊ߲ ߞߊ߬ ߡߎߛߊ߫ ߗߋ߫ ߏ߬ ߟߎ߫ ߕߊ߬ߡߌ߲߬ߣߍ߲ ߞߐ߫ ߒ߬ ߠߊ߫ ߡߊ߲߬ߕߊߣߌ߲ ߠߎ߬ ߘߌ߫ ߝߋߙߊߥߎ߲߫ ߣߴߊ߬ ߟߊ߫ ߖߊ߬ߡߊ ߢߓߊ ߟߎ߫ ߡߊ߬ ، ߏ߬ ߟߎ߫ ߞߵߊ߬ߟߎ߫ ߓߊ߲߬ ( ߡߊ߲߬ߕߊߣߌ߲ ) ߏ߬ ߟߎ߬ ߘߐ߫ ߝߊߦߌ߲߫ ، ߊ߬ ߝߟߍ߫ ߓߊ߫ ߸ ߕߌߢߍߟߌߟߊ ߟߎ߬ ߟߊߓߊ߲ ߞߍ߫ ߘߊ߫ ߢߊ ߡߍ߲ ﴿103﴾

ߡߎߛߊ߫ ߞߊ߲߫ ߞߏ߫ ߤߍ߲߬ ߌߟߋ߬ ߝߋߙߊߥߎ߲߫ ߸ ߒߠߋ ߦߋ߫ ߞߋߟߊ ߟߋ߬ ߘߌ߫ ߞߊ߬ ߝߘߊ߫ ߖߊ߯ߓߊ ߟߎ߫ ߡߊ߰ߙߌ ߟߊ߫ ﴿104﴾

ߊ߬ ߖߊ߯ߙߋߣߍ߲߫ ߠߋ߬ ߸ ߒߠߋ ߞߊߣߊ߬ ߝߏߦߌ߬ ߝߐ߫ ߊߟߊ߫ ߡߊ߬ ߝߏ߫ ߕߎ߬ߢߊ ، ߒ ߘߏ߲߬ ߣߊ߬ߣߴߊߟߎ߫ ߡߊ߬ ߔߊߞߌ ߟߋ߬ ߘߌ߫ ߣߌ߲߬ ߸ ߞߊ߬ ߝߘߴߊߟߎ߫ ߡߊ߰ߙߌ ߟߊ߫ ߸ ߞߏ߫ ߌ ߦߋ߫ ߌߛߌߙߊߌߟߞߊ ߟߎ߫ ߓߌ߬ߟߊ߬ ߒ ߝߍ߬ ﴿105﴾

ߊ߬ ߞߊ߲߫ ߞߏ߫ ߣߴߌ ߣߊ߬ߣߍ߲߬ ߞߍ߫ ߘߊ߫ ߘߊ߬ߟߎ߬ ߘߌ߫ ߸ ߣߵߏ߬ ߘߌ߫ ߥߍ߫ ߣߴߌ ߞߍ߫ ߘߊ߫ ߕߎ߬ߢߊ߬ ߕߌ߮ ߟߎ߬ ߘߏ߫ ߘߌ߫ ﴿106﴾

ߏ߬ ߞߍ ߊ߬ ߞߵߊ߬ ߟߊ߫ ߘߐ߬ߞߐ ߟߊߝߟߌ߬ ߸ ߏ߬ ߞߍ߫ ߘߊ߫ ߣߌ߲߬ߞߌ߬ߣߊ߲߬ߞߊ߲ߘߌ߫ ߜߍ ߘߐ߫ ߔߊߞߌߛߊ߫ ﴿107﴾

ߊ߬ ߞߵߊ߬ ߕߍ߮ ߝߣߊ߫ ߟߊߓߐ߫ ߡߍ߲ߞߍ߭ ߸ ߏ߬ ߞߍ߫ ߘߊ߫ ߜߍߡߊ߲߫ ߔߋߔߋ ߘߌ߫ ߝߟߍߟߌߟߊ ߟߎ߬ ߢߊߞߘߐ߫ ﴿108﴾

ߝߋߙߊߥߎ߲߫ ߠߊ߫ ߡߌ߬ߙߌ߲߬ߘߌ ߢߓߊ ߟߎ߬ ߞߊ߲߫ ߞߏ߫ ߣߌ߲߬ ߦߋ߫ ߛߎߓߊ߯ ߞߎߛߊ߲ߓߊ߫ ߘߌ߫ ߞߟߋ߫ ﴿109﴾

ߊ߬ ߦߴߊ߬ ߝߍ߬ ߟߋ߬ ߞߵߊߟߎ߫ ߟߊߓߐ߫ ߊߟߎ߫ ߟߊ߫ ߖߡߊ߬ߣߊ ߞߣߐ߫ ، ߊߟߎ߫ ߦߋ߫ ߖߊ߬ߡߊߙߌ ߢߌ߬ߡߊ߲߬ ߘߌ߫ ߟߊ߫ ߏ߬ ߘߐ߫؟ ﴿110﴾

ߊ߬ߟߎ߬ ߞߊ߲߫ ߞߏ߫ ߞߵߊ߬ ߣߴߊ߬ ߞߘߐ߬ߞߍ߫ ߘߏ߲߰ߘߌ߬ ߝߟߐ߫ ߸ ߞߊ߬ ߡߐ߰ ߟߊ߬ߘߍ߬ߟߊ ߟߎ߬ ߟߊߕߊ߯ ߘߎ߱ ߟߎ߬ ߟߊ߫ ﴿111﴾

ߊ߬ߟߎ߬ ߘߌ߫ ߣߊ߬ ߛߎߓߊ߯ ߞߎߛߊ߲ ߜߊ߲߬ߛߊ߲ ߘߴߌ ߡߊ߬ ﴿112﴾

ߛߎߓߊ߮ ߟߎ߫ ߣߊ߬ ߘߊ߫ ߝߋߙߊߥߎ߲߫ ߕߘߍ߬ ، ߊ߬ߟߎ߬ ߞߊ߲߫ ߊ߬ ߡߊ߬ ߞߏ߫ ߞߏ߬ߞߏ߫ ߛߊ߬ߙߊ߫ ߟߋ߬ ߒ߬ ߧߋ߫ ߞߍ߬ ߸ ߣߴߊ߲ ߞߍ߫ ߘߊ߫ ߛߋߓߊ߮ ߟߎ߬ ߘߌ߫؟ ﴿113﴾

ߊ߬ ߞߊ߲߫ ߞߏ߫ ߤߊ߯ߟߌ߫ ، ߊߟߎ ߟߋ߫ ߝߊ߲߭ ߞߍߕߐ߫ ߡߊ߬ߛߎ߬ߘߎ߲߬ߧߊ߬ߓߊ߮ ߟߎ߬ ߘߏ߫ ߘߌ߫ ﴿114﴾

ߊ߬ߟߎ߬ ߞߊ߲߫ ߞߏ߫ ߤߍ߲߬ ߌߟߋ߬ ߡߎߛߊ߫ ߸ ߌߟߋ ( ߝߟߐ߫ ) ߘߴߌ ߕߊ ߝߌ߬ߟߌ߫ ߓߊ߬ ߸ ߥߟߊ߫ ߒ߬ߠߎ߬ ( ߝߟߐ߫ ) ߟߋ߫ ߒ߬ ߕߊ ߝߟߌ߬ ߟߊ߫؟ ﴿115﴾

ߡߎߛߊ߫ ߞߊ߲߫ ߞߏ߫ ߊߟߎ߫ ( ߝߟߐ߫ ) ߟߊ߬ߝߟߌ߬ߟߌ ߞߍ߫ ߝߛߊߦߌ߫ ، ߊ߬ߟߎ߫ ߣߊ߬ ߟߊ߬ߝߟߌ߬ߟߌ ߞߍ߫ ߟߊ ߸ ߊ߬ߟߎ߫ ߞߊ߬ ߡߐ߱ ߟߎ߬ ߢߊ ߟߎ߬ ߡߊߛߎߓߊ߯ߦߊ߫ ߸ ߞߵߊ߬ߟߎ߬ ߘߐߛߌߟߊ߲߫ ߸ ߓߊ ߊ߬ߟߎ߫ ߣߊ߬ ߘߊ߫ ߛߎߓߊ߯ߦߊ߫ ߓߟߋߓߟߋ ߟߋ߬ ߘߌ߫ ﴿116﴾

ߏ߬ ߞߍ ߊ߲ ߞߊ߬ ߡߎߛߊ߫ ߦߟߌߘߏ߲߬ ( ߞߊ߲ ߞߍ߫ ) ߸ ߒ ߞߏ߫ ߌ ߟߊ߫ ߘߐ߬ߞߐ ߟߊߝߟߌ߬ ߛߊ߫ ، ߘߊ߬ߡߊ߲߬ߛߊ߫߸ ߏ ߞߵߊ߬ߟߎ߬ ߟߊ߫ ߝߋ߲߫ ߞߎ߲߬ߘߐߕߍ߰ߣߍ߲ ߠߎ߬ ߟߊߞߎ߬ߣߎ߲ߞߎ߬ߣߎ߲߬ ߞߌߚߌ߫ ߞߌߚߌ߫ ﴿117﴾

ߏ߬ ߞߍ ߸ ߕߎ߬ߢߊ ߓߊ߲ߓߊ߲߫ ߘߊ߫ ߸ ߛߎߓߊ߮ ߟߎ߬ ߟߊ߫ ߓߊ߯ߙߊ ߓߍ߯ ߕߌߢߍ߫ ߘߊ߫ ﴿118﴾

ߏ߬ ߞߍ ߸ ߛߋ߫ ߞߍ߫ ߘߴߊ߬ߟߎ߬ ߟߊ߫ ߏ߬ ߦߌߟߊ ߡߎ߰ߡߍ ߘߐ߫ ߸ ߞߵߊ߬ߟߎ߫ ߛߊ߬ߦߌ߲߬ ߘߐ߯ߦߡߊ ߘߝߊߣߍ߲ ߘߌ߫ ﴿119﴾

ߛߊߣߌߛߊߕߍ߫ ߛߎߓߊ߮ ߟߎ߫ ߞߵߊ߬ߟߎ߫ ߓߋ߬ ߕߌ߲ߓߌߘߌ߲ ߘߌ߫ ߓߙߌ߫ ﴿120﴾

ߊ߬ߟߎ߬ ߞߊ߲߫ ߞߏ߫ ߊ߲ ߓߘߊ߫ ߘߍ߲߬ߞߣߍ߬ߦߊ߫ ߖߊ߯ߓߊ ߟߎ߫ ߡߊ߰ߙߌ ߡߊ߬ ﴿121﴾

ߡߎߛߊ߫ ߣߌ߫ ߤߊߙߎߣߊ߫ ߡߊ߰ߙߌ ߞߊ߬ߣߌ߲߫ ﴿122﴾

ߝߋߙߊߥߎ߲߫ ߞߊ߲߫ ߞߏ߫ ߌ߬ߦߏ߯ ߊߟߎ߫ ߓߘߊ߫ ߘߍ߲߬ߞߣߍ߬ߦߴߊ߬ ߡߊ߬ ߞߵߊ߬ ߕߘߍ߬ ߒߠߋ ߡߊ߫ ߘߌ߬ߢߍ߬ ߊߟߎ߫ ߦߋ߫؟ ، ߖߊ߰ ߊߟߎ߫ ߣߊ߬ ߣߊߡߙߊ ߢߌ߲߬ ߠߋ߬ ߘߐߛߘߊ߫ ߟߊ߫ ߘߎ߱ ߞߣߐ߫ ߸ ߛߴߊߟߎ߫ ߘߌ߫ ߘߎ߱ ߘߏ߲߬ߞߏ ߟߎ߬ ߟߊߓߐ߫ ߊ߬ ߞߣߐ߫ ، ߞߏ߬ߣߌ߲߬ ߊߟߎ߫ ߘߌߣߵߊ߬ ߟߐ߲߫ ߛߍ߲ ﴿123﴾

ߓߊ ߒ ߞߍߕߐ߫ ߟߋ߬ ߊߟߎ߫ ߓߟߏ ߟߎ߬ ߣߴߊߟߎ߫ ߛߋ߲߭ ߠߎ߫ ߕߍ߰ ߟߊ߫ ߸ ߞߵߊ߬ߟߎ߬ ߝߐ߬ߛߐ߲߬ ߢߐ߲߮ ߘߐ߫ ، ߏ߬ ߞߐ߫ ߒ ߘߴߊߟߎ߫ ߓߍ߯ ߓߊߙߊ߲ߕߏ߫ ߞߐߘߍ߫ ﴿124﴾

ߊ߬ߟߎ߬ ߞߊ߲߫ ߞߏ߫ ߊ߲ ߛߊ߬ߦߌ߬ߕߐ߫ ߊ߲ ߡߊ߰ߙߌ ߟߋ߫ ߡߊ߬ ߏ߬ ߘߌ߫ ﴿125﴾

ߌ ߘߏ߲߬ ߕߴߌ ߕߍ߰ߡߊߛߌ߰ ߟߴߊ߲ ߡߊ߬ ߞߏ߫ ߜߘߍ߫ ߘߐ߫ ߸ ߝߏ߫ ߊ߲ ߘߍ߲߬ߞߣߍ߬ߦߊ ߡߍ߲ ߞߍߣߍ߲߫ ߒ߬ ߡߊ߰ߙߌ ߟߊ߫ ߡߊ߲߬ߕߊߣߌ߲ ߠߎ߫ ߡߊ߬ ߸ ߏ߬ ߟߎ߫ ߣߊ߭ ߡߍ߲ ߞߍߣߴߊ߲ ߡߊ߬ ߸ ߊ߲ ߡߊ߰ߙߌ ߸ ߖߊ߰ߣߌ߲߬ ߡߎ߬ߢߎ߲ ߠߊߓߐ߲߬ ߊ߲ ߞߊ߲߬ ߸ ߊ߬ ߣߴߌ ߦߴߊ߲ ߝߊߕߏ߫ ߞߵߊ߲ ߛߌ߬ߟߡߊ߬ߟߊ߬ߡߊ ߕߘߍ߬ ﴿126﴾

ߝߋߙߊߥߎ߲߫ ߠߊ߫ ߡߌ߬ߙߌ߲߬ߘߌ ߢߓߊ ߟߎ߬ ߞߊ߲߫ ߊ߬ ߡߊ߬ ߸ ߞߏ߫ ߌ߬ߦߏ߯ ߌ ߘߌ߫ ߡߎߛߊ߫ ߣߴߊ߬ ߡߌ߬ߙߌ߲߬ߘߌ ߕߏ߫ ߊ߬ߟߎ߬ ߦߋ߫ ߕߌߢߍߟߌ ߞߍ߫ ߖߡߊ߬ߣߊ ߞߣߐ߫ ߸ ߊ߬ ߣߴߊ߬ ߦߋ߫ ߌߟߋ ߣߴߌ ߡߊ߰ߙߌ ߟߎ߬ ߕߏ߫ ߦߋ߲߬ ߕߋ߲߬ ߜߟߊߞߏ߫؟ ߊ߬ ߞߊ߲߫ ߞߏ߫ ߒ߬ ߣߊ߬ߕߐ߫ ߟߴߊ߬ߟߎ߬ ߘߋ߲ߞߍ ߟߎ߫ ߝߊ߰ ߟߊ߫ ߸ ߞߵߊ߬ߟߎ߫ ߡߏ߬ߛߏ ߟߎ߬ ߘߐߙߐ߲߫ ߢߣߊߡߊ ߕߏ߫ ߸ ߓߊ ߊ߲ߠߎ߫ ߟߋ߬ ߛߋ߫ ߟߴߊ߬ߟߎ ߟߊ߫ ﴿127﴾

ߡߎߛߊ߫ ߞߊ߲߫ ߊ߬ ߡߌ߬ߙߌ߲߬ߘߌ ߡߊ߬ ߸ ߞߏ߫ ߊߟߎ߫ ߘߍ߬ߡߍ߲߬ߠߌ߲߬ ߢߌߣߌ߲ ߞߍ߫ ߊߟߊ߫ ߟߊ߫ ߞߵߊߟߎ߫ ߡߎ߬ߢߎ߲߬ ߖߙߌ߫ ، ߓߊߏ߬ ߘߎ߱ ߦߋ߫ ߊߟߊ߫ ߕߊ ߟߋ߬ ߘߌ߫ ߸ ߊ߬ ߦߴߊ߬ ߞߍ߫ ߟߊ߫ ߗߍ ߘߌ߫ ߡߐ߰ ߟߋ߬ ߦߋ߫ ߸ ߡߍ߲ ߓߊ߯ ߊ߬ ߘߌߦߴߊ߬ ߟߊ߫ ߖߐ߲߭ ߠߎ߬ ߘߐ߫ ، ߞߏ߬ߣߌ߲߬ ߞߏ߫ ߟߊߓߊ߲ ߦߋ߫ ߝߊ߲ߕߊ߲ߞߟߊ ߟߎ߫ ߟߋ߬ ߕߊ߫ ߘߌ߫ ﴿128﴾

ߊ߬ߟߎ߬ ߞߊ߲߫ ( ߡߎߛߊ߫ ߦߋ߫ ) ߞߏ߫ ߊ߬ߟߎ߬ ߓߘߴߊ߲ ߕߙߐ߫ ߌ ߣߊ߭ ߢߍ߫ ߞߘߐ߬ߡߊ߲߫ ߸ ߊ߬ ߣߴߌ ߣߊ߬ߣߍ߲ ߞߐ ߢߌ߲߬ ߘߐ߫ ، ߡߎߛߊ߫ ߞߊ߲߫ ߞߏ߫ ߊ߬ ߢߐ߲߰ߘߐ߫ ߊߟߎ߫ ߡߊ߰ߙߌ ߘߴߊߟߎ߫ ߖߎ߮ ߟߎ߬ ߛߌߟߊߛߊ߬ ߸ ߞߵߊߟߎ߫ ߞߍ߫ ߣߘߐ߬ߓߌߟߊ ߟߎ߬ ߘߌ߫ ߖߡߊ߬ߣߊ ߞߣߐ߫ ، ߊ߬ ߘߴߊ߬ ߝߟߍ߫ ߛߊ߫ ߸ ߊߟߎ߫ ߝߣߊ߫ ߓߊ߯ߙߊߕߐ߫ ߢߊ ߡߍ߲ ﴿129﴾

ߊ߲ ߣߊ߬ ߘߊ߫ ߝߋߙߊߥߎ߲߫ ߘߏ߲߬ߞߏ ߟߎ߫ ߡߌ߬ߘߊ߬ ߞߐ߯ߟߐ ߣߌ߫ ߦߙߌߘߋ߲ ߠߎ߫ ߝߎ߰ߛߌ ߟߊ߫ ߸ ߛߴߊ߬ߟߎ߬ ߘߴߊ߬ߟߎ߫ ߕߊ߰ߛߌ߫ ﴿130﴾

ߒ߬ߞߊ߬ ߤߙߊ ߕߎ߲߬ ߓߊ߯ ߣߵߊ߬ߟߎ߫ ߡߊ߬ ߞߏߕߊ߲߫ ߸ ߊ߬ߟߎ߬ ߘߴߊ߬ ߝߐ߫ ߞߏ߫ ߢߌ߲߬ ߠߋ߬ ߘߋ߬ߙߌ߬ߣߍ߲߬ ߞߍ߫ ߟߊ߫ ߒ߬ ߧߋ߫ ، ߣߌ߫ ߖߎ߯ߡߊ߲߫ ߞߵߊ߬ߟߎ߫ ߛߐ߬ߘߐ߲߬ ߛߊ߫ ߸ ߊ߬ߟߎ߬ ߘߴߏ߬ ߟߊ߫ ߡߎߛߊ߫ ߣߴߊ߬ ߝߍ߬ ߡߐ߮ ߟߎ߫ ߕߋ߬ߕߋ ߞߎ߲߬. ߞߵߊ߬ ߕߘߍ߬ ߘߏ߲߬ ߊ߬ߟߎ߬ ߟߊ߫ ߕߋ߬ߕߋ ߏ߬ ߦߴߊߟߊ߫ ߓߘߊ ߟߋ߬ ، ߓߊ߬ߙߌ߬ ߊ߬ߟߎ߫ ߝߊ߲߬ߓߊ ߟߋ߬ ߕߴߏ߬ ߟߐ߲߫ ߠߊ߫ ﴿131﴾

ߊ߬ߟߎ߬ ߞߊ߲߫ ( ߡߎߛߊ߫ ߡߊ߬ ) ߸ ߞߏ߫ ߌ ߓߊ߯ ߣߊ߬ ߘߊ߬ߟߎ ߝߋ߲-ߋ-ߝߋ߲߫ ߘߌ߫ ߞߏ߫ ߌ ߦߴߊ߲ ߘߓߊ߬ߙߌ߬ ߟߴߏ߬ ߟߊ߫ ߸ ߊ߲ ߕߍ߫ ߘߍ߲߬ߞߣߍ߬ߦߊ߬ ߌ ߡߊ߬ ߏ߬ ߛߌ߫ ߘߐ߫ ﴿132﴾

ߏ߬ ߞߍ ߸ ߊ߲ ߞߊ߬ ߝߐ߬ߝߐ ߗߋ߫ ߊ߬ߟߎ߫ ߡߊ߬ ، ߊ߬ ߣߌ߫ ߕߐ߲߭ ߠߎ߬ ߣߌ߫ ߞߊ߬ߙߊ߲߬ߜߊ ߟߎ߬ ߣߌ߫ ߕߏ߬ߘߌ ߟߎ߬ ߣߌ߫ ߖߋ߬ߟߌ ߟߎ߬ ، ߞߊ߬ ߡߊ߲߬ߕߊߣߌ߲ ߏ߬ ߓߍ߯ ߞߋ߬ߟߋ߲߬ߞߋ߬ߟߋ߲߬ߓߐ߫ ، ߓߊ߬ߙߌ߬ ߊ߬ߟߎ߫ ߞߵߊ߬ߟߎ߫ ߖߘߍ߬ߘߐߓߏ߲߬ߧߊ߫ ߞߊ߬ ߞߍ߫ ߡߌ߬ߙߌ߲߬ߘߌ߫ ߞߎ߲߬ߞߏ߬ߕߐ ߘߌ߫ ﴿133﴾

ߖߊ߲߰ߞߕߊ ߏ߬ ߘߏ߫ ߓߊ߯ ߓߋ߬ ߊ߬ߟߎ߫ ߞߊ߲߬ ߞߏߕߊ߲߫ ߸ ߊ߬ߟߎ߬ ߘߴߊ߬ ߝߐ߫ ߞߏ߫ ߡߎߛߊ߫ ، ߌ ߡߊ߰ߙߌ ߞߟߌ߫ ߒ߬ ߧߋ߫ ߊ߬ ߣߴߌ ߕߍ ߟߊ߬ߤߘߌ ߟߊ߫ ߞߟߋ߫ ، ߣߴߌ ߞߏ߬ߣߌ߲ ߞߊ߬ ߖߊ߲߰ߞߕߊ ߣߌ߲߬ ߓߐ߫ ߒ߬ ߞߊ߲߬ ߸ ߊ߲ ߘߌ߫ ߘߍ߲߬ߞߣߍ߬ߦߊ߬ ߌ ߡߊ߬ ߏ߬ ߘߐ߫ ߟߋ߬ ߘߍ߯ ، ߊ߲ ߘߏ߲߬ ߘߌ߫ ߌߛߌߙߊߌߟߞߊ ߟߎ߫ ߓߌ߬ߟߴߌ ߝߍ߬ ﴿134﴾

ߊ߲ ߓߊ߯ ߖߊ߲߰ߞߕߊ ߏ߬ ߡߍ߲ ߓߐ߫ ߊ߬ߟߎ߫ ߞߊ߲߬ ߛߊߣߌ߬ ߥߊ߯ߕߌ ߘߏ߫ ߛߋ߫ ߕߍ߫ ߊ߬ߟߎ߫ ߡߊ߬ ߸ ߘߊ߬ߡߊ߲߬ߛߊ߫ ߊ߬ߟߎ߬ ߘߴߊ߬ߟߎ߬ ߟߊ߫ ߛߙߊߕߌ ߏ߬ ߕߊ߲ߓߏ߲ ߕߏ߫ ﴿135﴾

ߊ߲ ߞߊ߬ ߒ߬ ߕߊߢߐ߲߯ߓߐ߫ ߊ߬ߟߎ߬ ߘߐ߫ ߟߋ߬ ߞߵߊ߬ߟߎ߬ ߟߊߕߏ߫ ߖߌ ߘߐ߫ ߓߊߞߎߣߊ߲ ߞߣߐ߫ ߕߋߜߊ߫ ، ߓߊ ߊ߬ߟߎ߫ ߞߊ߬ ߒ߬ ߠߊ߫ ߘߊ߬ߟߎ ߟߎ߬ ߡߊߛߐ߬ߛߐ߫ ߟߋ߬ ߸ ߊ߬ ߣߴߊ߬ߟߎ߫ ߞߵߊ߬ߟߎ߫ ߖߊ߲߬ߓߐ߫ ߊ߬ ߘߐ߫ ߟߋ߬ ﴿136﴾

ߖߐ߬ ߞߍߣߍ߲߫ ߕߘߍ߬ ߡߌ߬ߙߌ߬ߙߌ߲߬ߘߌ ߡߍ߲ ߡߊ߬ ߸ ߊ߲ ߞߊ߬ ߒ߬ ߠߊ߫ ߖߡߊ߬ߣߊ߬ ߓߙߊߞߊߣߍ߲ ߕߟߋ߬ߓߐ ߟߎ߬ ߣߴߊ߬ ߕߟߋ߬ߓߋ ߟߎ߬ ߞߍ߫ ߗߍ ߘߌ߫ ߏ߬ ߟߎ߬ ߦߋ߫ ، ߒ߬ߓߊ߬ ߌ ߡߊ߰ߙߌ ߟߊ߫ ( ߦߟߌߡߊߘߌߦߊ߫ ) ߞߊ߲߫ ߢߌߡߊ ߘߝߊ߫ ߘߊ߫ ߌߛߌߙߊߌߟߞߊ ߟߎ߫ ߡߊ߬ ߕߋ߲߬ ߠߋ߬ ߞߊ߬ߡߊߛߐ߬ߘߐ߲߫ ߊ߬ߟߎ߬ ߟߊ߫ ߡߎ߬ߢߎ߲ ߝߍ߬ ، ߊ߲ ߞߊ߬ ߝߋ߲ ߓߍ߯ ߖߊߡߎߙߊ߲߫ ߝߋߙߊߥߎ߲߫ ߣߴߊ߬ ߡߌ߬ߙߌ߲߬ߘߌ ߕߘߍ߬ ߡߍ߲ ߠߎ߫ ߘߍ߲߰ߦߊ߬ ߟߊ߫ ߸ ߊ߬ ߣߴߊ߬ߟߎ߫ ߕߘߍ߬ ( ߟߐ߬ߟߌ߬ ߓߏ߲߬ ߖߊ߲ ) ߡߍ߲ ߠߎ߬ ߟߊߦߟߍ߬ ߟߊ߫ ߔߏ߲ߞߌ߲߫ ﴿137﴾

ߊ߲ ߣߊ߬ ߌߛߌߙߊߌߟߞߊ ߟߎ߬ ߟߊߕߊ߬ߡߌ߲߬ ߠߊ ߖߌ߫ ߡߍߣߍ߲ ߠߊ߫ ߸ ߏ߬ ߟߎ߬ ߥߊ߫ ߘߊ߫ ߛߋ߫ ߡߌ߬ߙߌ߲߬ߘߌ߬ ߜߘߍ߫ ߡߊ߬ ߸ ߖߏ߭ ߟߎ߬ ߦߴߏ߬ ߟߎ߬ ߓߟߏ߫ ߸ ߊ߬ߟߎ߬ ߦߋ߫ ߡߍ߲ ߠߎ߬ ߟߊߡߍ߲߬ߛߍ߲߬ߧߊ߬ ߟߊ߫ ߓߊ߬ߕߏ ߟߊ߫ ߕߎߙߍߕߎߙߍ߫ ، ߊ߬ߟߎ߬ ߞߊ߲߫ ߞߏ߫ ߡߎߛߊ߫ ߸ ߡߊ߰ߙߌ ߘߏ߫ ߟߊߘߊ߲߫ ߒ߬ ߧߋ߫ ߞߟߋ߫ ߦߏ߫ ߡߊ߰ߙߌ߬ ߛߎ߮ ߡߍ߲ ߠߎ߬ ߦߋ߫ ߢߌ߲߬ ߠߎ߬ ߓߟߏ߫ ߣߌ߲߬ ، ( ߡߎߛߊ߫ ) ߞߊ߲߫ ߞߏ߫ ߖߊ߯ߕߋ߬ ߸ ߊߟߎ߫ ߦߋ߫ ߡߌ߬ߙߌ߲߬ߘߌ߫ ߞߎ߲߬ߒ߬ߕߊ߲ ߖߍ߬ߘߍ ߟߋ߬ ߘߌ߫ ﴿138﴾

ߢߌ߲߬ ߠߎ߬ ߦߋ߫ ߞߏ ߡߍ߲ ߞߊ߲߬ ߏ߬ ߛߌߟߊߛߊ߬ߕߐ߫ ߟߋ߬ ، ߊ߬ ߣߴߊ߬ߟߎ߬ ߟߊ߫ ߓߊ߯ߙߊ ߟߎ߬ ߞߍߕߐ߫ ߟߋ߬ ߝߎ߮ ߘߌ߫ ﴿139﴾

ߊ߬ ߞߏ߫ ߌ߬ߦߏ߯ ߒ ߧߋ߫ ߊߟߊ߫ ߕߣߊ߬ ߢߌߣߌ߲߫ ߊߟߎ߫ ߦߋ߫ ߞߵߏ߬ ߞߍ߫ ߡߊ߰ߙߌ ߘߌ߫ ߸ ߊߟߊ߫ ߡߍ߲ ߞߵߊߟߎ߫ ߟߊߝߌ߬ߛߊ߬ߦߊ߫ ߡߌ߬ߙߌ߲߬ߘߌ ߓߍ߯ ߘߌ߫ ﴿140﴾

ߕߎ߬ߡߊ ߡߍ߲ ߊ߲ ߞߵߊߟߎ߫ ߟߊߞߛߌ߫ ߝߋߙߊߥߎ߲߫ ߘߏ߲߬ߞߏ ߟߎ߫ ߡߊ߬ ߸ ߏ߬ ߟߎ߬ ߡߍ߲ ߠߎ߫ ߕߘߍ߬ ߊߟߎ߫ ߜߊ߰ߢߊ߬ߜߊ߯ߢߊ߫ ߟߊ߫ ߖߊ߲߰ߞߕߊ߬ ߖߎ߮ ߟߎ߬ ߟߊ߫ ، ߞߵߊߟߎ߫ ߘߋ߲ߞߍ ߟߎ߫ ߝߊ߰ ߊ߬ ߣߌ߫ ߞߵߊߟߎ߫ ߘߋ߲ߡߛߏ ߟߎ߬ ߘߐߙߐ߲߫ ߢߣߊߡߊ ߕߏ߫ ، ߤߊ߲߫ ߸ ߏ߬ ߞߍ߫ ߘߴߊߟߎ߫ ߞߊ߲߬ ߞߘߐߓߐߟߌߓߊ߫ ߟߋ߬ ߘߌ߫ ߊߟߎ߫ ߡߊ߰ߙߌ ߓߟߏ߫ ߘߋ߬ ﴿141﴾

ߊ߲ ߣߌ߫ ߡߎߛߊ߫ ߛߘߊ߫ ߘߊ߫ ߛߎ߫ ߓߌߛߓߊ߬ ( ߢߐ߲߯ߦߋ ) ߡߊ߬ ، ߊ߲ ߣߊ߬ ߘߊ߫ ߕߊ߲߫ ߜߘߍ߫ ߞߍ߫ ߞߵߊ߬ ߘߝߊ߫ ، ߏ߬ ߞߍ ߸ ߊ߬ ߡߊ߰ߙߌ ߟߊ߫ ߛߘߊߒߡߊߞߊ߲ߠߊ ߘߝߊ߫ ߘߊ߫ ߛߎ߫ ߓߌߣߊ߯ߣߌ߲ ߠߊ߫ ، ߡߎߛߊ߫ ߞߊ߲߫ ߊ߬ ߞߘߐ߬ߞߍ߫ ߤߊߙߎߣߊ߫ ߡߊ߬ ߞߏ߫ ߒ ߣߐ߬ߘߐߓߌ߬ߟߊ߬ ߒ ߡߌ߬ߙߌ߲߬ߘߌ ߞߎ߲߬ߠߊ߫ ߸ ߌ ߦߋ߫ ߟߢߊ߬ߟߌ ߟߋ߬ ߞߍ߫ ߸ ߌ ߞߊߣߊ߬ ߕߌߢߍߟߌߟߊ ߟߎ߬ ߟߊ߫ ߛߌߟߊ ߟߊߓߊ߬ߕߏ߫ ߘߋ߬ ﴿142﴾

ߡߎߛߊ߫ ߣߊ߬ߣߍ߲ ߒ߬ ߠߊ߫ ߥߊ߯ߕߌ߫ ߘߐߛߘߊߣߍ߲ ߡߊ߬ ߸ ߊ߬ ߡߊ߰ߙߌ ߞߵߊ߬ ߞߎߡߊ߲ߢߐ߲߯ߦߊ߫ ، ߊ߬ ߞߊ߲߫ ߞߏ߫ ߒ ߡߊ߰ߙߌ ߸ ߌ ߦߌ߬ߘߊ߬ ߒ ߠߊ߫ ߞߟߋ߫ ߒ ߧߴߌ ߦߋ߫ ، ߊߟߊ߫ ߞߊ߲߫ ߞߏ߫ ߌ ߕߍߣߊ߬ ( ߛߋ߫ ߟߊ߫ ) ߒߠߋ ߦߋ߫ ߟߊ߫ ، ߓߊ߬ߙߌ߬ ߞߎ߬ߙߎ ߝߟߍ߫ ߓߊ߫ ، ߣߴߏ߬ ߓߊ߲ߓߊ߲ߣߍ߲ ߕߏ߫ ߘߴߊ߬ ߣߐ߭ ߘߐ߫ ߸ ߌ ߘߌ߫ ߒ ߦߋ߫ ߏ߬ ߘߐ߫ ، ߊ߬ ߡߊ߰ߙߌ ߣߵߊ߬ ߖߘߍ߬ ߟߊ߲ߞߣߍߡߊ߫ ߟߊ ߞߎ߬ߙߎ ߦߋ߫ ߸ ߊ߬ ߞߵߏ߬ ߞߍ߫ ߓߘߎߓߘߍ߫ ، ߏ߬ ߞߍ߫ ߸ ߡߎߛߊ߫ ߓߋ߬ ߘߊ߫ ߜߊ߬ߙߊ߲߬ߞߕߊ߬ ߢߊ ߡߊ߬ ߞߊ߬ ߞߌ߬ߘߏ߲߬ ߊ߬ ߟߊ߫ ߟߋߎ߫ ، ߊ߬ ߣߊ߬ߣߍ߲ ߞߍ߫ ߟߴߊ߬ ߖߍ߬ߘߍ߫ ߞߊ߬ߟߊߡߊ߬ ߸ ߊ߬ ߞߊ߲߫ ߞߴߌߟߋ ߡߊ߰ߙߌ߬ ߛߊߣߌ߲ ߸ ߒ ߓߘߊ߫ ߒ ߖߘߍ߬ ߟߊߛߊ߬ߦߵߌ ߡߊ߬ ߸ ߊ߬ ߣߌ߫ ߒ ߓߘߊ߫ ߞߍ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߝߟߐ ߘߌ߫ ﴿143﴾

ߊߟߊ߫ ߞߊ߲߫ ߞߏ߫ ߡߎߛߊ߫ ߸ ߒ ߓߘߴߌ ߛߎߥߊ߲ߘߌ߫ ߡߐ߱ ( ߕߐ߭ ) ߟߎ߫ ߡߊ߬ ߒ ߠߊ߫ ߞߋߟߦߊ ߣߌ߫ ߒ ߞߎߡߊߢߐ߲߯ߦߊ ߟߊ߫ ، ߒ ߣߊ߬ ߝߋ߲ ߡߍ߲ ߘߌ߫ ߟߴߌ ߡߊ߬ ߣߌ߲߬ ߸ ߏ߬ ߡߌ߬ߘߊ߬ ߜߘߋߜߘߋ߫ ، ߊ߬ ߣߴߌ ߦߋ߫ ߞߍ߫ ߞߏߢߌߡߊߟߐ߲ߠߊ ߟߎ߬ ߘߏ߫ ߘߌ߫ ﴿144﴾

ߊ߲ ߞߊ߬ ߞߊ߬ߥߊ߲߬ߘߌ ߛߓߍ߫ ߊ߬ ߦߋ߫ ߞߏ ߓߍ߯ ߘߏ߫ ߞߊ߲߬ ߥߊ߬ߟߊ ߟߎ߬ ߘߐ߫ ߸ ߊ߬ ߣߌ߫ ߞߏ ߓߍ߯ ߝߊߙߊ߲ߝߊߛߌ ߞߊ߲߬ ، ߒ ߞߴߏ߬ ߟߎ߫ ߡߌ߬ߘߊ߬ ߛߍ߲ߓߍ߫ ߟߊ߫ ߸ ߊ߬ ߣߴߌ ߦߴߌ ߡߌ߬ߙߌ߲߬ߘߌ ߟߐ߬ ߊ߬ ( ߖߡߊ߬ߙߌ ) ߢߌ߬ߡߊ ߟߎ߫ ߡߌ߬ߘߊ߬ ߟߊ߫ ، ߓߊ ߒ ߣߊ߬ߕߐ߫ ߟߋ߬ ߔߊߟߊ߲ߞߊߓߊ߯ߕߐ ߟߎ߬ ߟߊ߫ ߛߏ ߦߌ߬ߘߊ߬ ߟߴߊߟߎ߫ ߟߊ߫ ﴿145﴾

ߓߊ߬ߙߌ߬ ߒ ߘߌߣߊ߬ ߡߐ߱ ߟߎ߫ ߞߎ߲߬ߓߐ߫ ߒ߬ ߠߊ߫ ߘߊ߬ߟߎ ߟߎ߫ ߞߊ߲߬ ߸ ߡߍ߲ ߠߎ߬ ߦߴߊ߬ߟߎ߫ ߖߘߍ߬ߘߐߓߏ߲߬ߧߊ߬ ߟߊ߫ ߘߎ߱ ߞߊ߲߬ ߕߎ߬ߢߊ߫ ߕߊ߬ߣߊ ߟߊ߫ ߸ ߊ߬ߟߎ߫ ߘߏ߲߬ ߓߊ߯ ߘߊ߬ߟߎ ߛߎ߯-ߎ-ߛߎ߯ ߦߋ߫ ߸ ߊ߬ߟߎ߬ ߕߍ߫ ߟߊ߫ ߏ߬ ߟߊ߫ ، ߤߟߴߊ߬ߟߎ߫ ߞߊ߬ ߞߊ߲ߘߦߊ ߛߌߟߊ ߦߋ߫ ߊ߬ߟߎ߬ ߕߴߏ ߡߌ߬ߘߊ߬ ߛߌߟߊ߫ ߘߌ߫ ، ߒ߬ߓߊ߬ ߣߴߊ߬ߟߎ߫ ߞߊ߬ ߝߌ߬ߟߌ ߛߌߟߊ ߦߋ߫ ߛߊ߫ ߸ ߊ߬ߟߎ߬ ߘߴߏ߬ ߛߌߟߊ ߡߌ߬ߘߊ߬ ، ߏ߬ ߘߏ߲߬ ߞߎ߲߭ ߠߋ߬ ߸ ߓߊߏ߬ ߊ߬ߟߎ߫ ߞߊ߬ ߒ ߠߊ߫ ߘߊ߬ߟߎ ߟߎ߬ ߡߊߛߐ߬ߛߐ߫ ߟߋ߬ ߸ ߊ߬ ߣߴߊ߬ߟߎ߫ ߞߵߊ߬ߟߎ߫ ߖߊ߲߬ߓߐ߫ ߊ߬ߟߎ߬ ߘߐ߫ ߟߋ߬ ߔߏ߲߫ ﴿146﴾

ߡߍ߲ ߠߎ߫ ߘߏ߲߬ ߞߊ߬ ߒ߬ ߠߊ߫ ߘߊ߬ߟߎ ߟߎ߬ ߣߌ߫ ߟߊߞߌߙߊ߫ ߓߍ߲߬ߢߐ߲߰ߦߊ ߡߊߛߐ߬ߛߐ߬ ߸ ߏ߬ ߟߎ߬ ߗߋߥߊߟߌ ߟߎ߬ ߕߌߢߍߕߐ߫ ߟߋ߬ ߔߛߐߞߐ߫ ، ߊ߬ߟߎ߫ ߘߏ߲߬ ߕߍ߫ ߛߙߊ߬ ߟߊ߫ ߝߏߦߌ߬ ߟߊ߫ ߝߏ߫ ߊ߬ߟߎ߫ ߕߘߍ߬ ߡߍ߲ ߠߎ߬ ߞߍ߫ ߟߊ߫ ﴿147﴾

ߡߎߛߊ߫ ߥߊߣߍ߲ ߞߐ ߸ ߊ߬ ߡߌ߬ߙߌ߲߬ߘߌ ߞߵߊ߬ߟߎ߬ ߟߊ߫ ߡߊ߬ߖߐ߰ߙߊ߲߬ ( ߛߊߣߌ߲ ߠߎ߬ ) ߟߊߘߊ߲߫ ߕߎߙߊߣߍ߲߫ ߝߊߘߌ ߘߌ߫ ߡߍ߲ ߦߋ߫ ߞߏ߲߬ߓߏ߬ ߟߊ߫ ، ( ߞߵߏ߬ ߞߍ߫ ߡߊ߰ߙߌ ߘߌ߫ ) ߸ ߞߏ߬ߣߌ߲߬ ߦߊ߯ߟߴߊ߬ߟߎ߬ ߡߴߊ߬ ߦߋ߫ ߓߊ߬ ߕߎߙߊߣߍ߲ ߕߍ߫ ߊ߬ߟߎ߬ ߞߎߡߊߢߐ߲߯ߦߊ߫ ߟߊ߫ ߸ ߊ߬ ߘߏ߲߬ ߕߍ߫ ߊ߬ߟߎ߬ ߞߊ߲ߘߊ߫ ߟߊ߫ ߛߌߟߊ߫ ߛߌ߫ ߡߊ߬؟ ߊ߬ߟߎ߫ ߞߵߏ߬ ߟߋ ߡߌ߬ߘߊ߫ ߡߊ߰ߙߌ ߘߌ߫ ߞߵߊ߬ߟߎ߬ ߞߍ߫ ߛߏߡߊ ߟߎ߬ ߘߌ߫ ﴿148﴾

ߕߎ߬ߡߊ ߡߍ߲ ߊ߬ߺ(ߺߟߎ߬ ߤߊ߲ߞߟߌ ߟߊ߫ ߛߐߟߌ ) ߓߋ߬ ߘߴߊ߬ߟߎ߬ ߕߍ߮ ߟߎ߬ ߘߐ߫ ߸ ߊ߬ ߣߴߊ߬ߟߎ߫ ߞߵߊ߬ ߦߋ߫ ߊ߬ߟߎ߬ ߓߘߊ߫ ߝߟߌ߬ ߸ ( ߊ߬ߟߎ߫ ߣߊ߬ߣߍ߲ ߣߡߌߛߊ ߦߋ߫ ߟߊ߫ ) ߸ ߊ߬ߟߎ߬ ߞߊ߲߫ ߞߏ߫ ߤߊ߲߫ ߸ ߣߌ߫ ߒ߬ ߡߊ߰ߙߌ ߡߊ߫ ߤߌߣߊ߫ ߒ߬ ߠߊ߫ ( ߢߌ߲߬ ߘߐ߫ ) ߞߊ߬ ߦߊ߬ߝߊ߫ ߒ߬ ߡߊ߬ ߸ ߊ߲ ߘߌ߫ ߞߍ߫ ߓߣߐ߬ߓߊ߮ ߟߎ߬ ߘߏ߫ ߘߌ߫ ߟߋ߬ ߘߍ߯ ﴿149﴾

ߡߎߛߊ߫ ߞߐߛߊ߬ߦߌ߲߬ߣߍ߲ ߊ߬ ߡߌ߬ߙߌ߲߬ߘߌ ߡߊ߬ ߞߵߊ߬ ߕߘߍ߬ ߊ߬ ߡߐߣߍߣߍ߲ߓߊ ߛߎ߬ߣߎ߲߬ߣߍ߲߬ߓߊ ߦߋ߫ ߸ ߊ߬ ߞߊ߲߫ ߞߏ߫ ߊߟߎ߫ ߘߏ߲߬ ߞߊ߬ ߒ ߞߐߟߊߝߐ߫ ߒ ߞߐ߫ ߞߏߖߎ߯ߦߊ߫ ߥߍ߫߹ ߌ߬ߦߏ߯ ߊߟߎ߫ ߘߌ߫ ߞߌߢߍ߫ ߊߟߎ߫ ߡߊ߰ߙߌ ߟߊ߫ ߖߊ߬ߡߊߙߌ ߟߊ߫؟ ߘߊ߬ߡߊ߲߬ߛߊ߫ ߸ ߊ߬ ߞߊ߬ ߥߊ߬ߟߊ ߟߎ߬ ߟߊߝߟߌ߬ ߔߌߚߌ߫ ߞߵߊ߬ ߞߘߐ߬ߞߍ߫ ߕߵߊ߬ ߞߎ߲߬ ( ߛߌ ) ߡߊ߬ ߗߊߎ߫ ߸ ߞߵߏ ߛߊ߬ߡߊ߲߫ ߞߵߊ߬ ߡߊߘߏ߲߬ ߊ߬ ߟߊ߫ ، ߏ߬ ߞߊ߲߫ ߊ߬ ߡߊ߬ ߞߏ߫ ߒ ߓߊ߫ ߘߋ߲ ߸ ߡߌ߬ߙߌ߲߬ߘߌ ߖߐ߬ ߘߊ߫ ߒ ߡߊ߬ ߟߋ߬ ߸ ߊ߬ߟߎ߫ ߝߊ߲߭ ߕߎ߲߬ ߓߍߢߌߣߌ߲߫ ߞߊ߬ ߒ ߝߊ߰ ߟߋ߬ ، ߏ߬ ߘߐ߫ ߸ ߌ ߞߊߣߊ߬ ߖߎ߮ ߟߎ߬ ߟߊߦߟߍ߫ ߒ ߡߊ߬ ߸ ߌ ߘߏ߲߬ ߞߊߣߊ߬ ߒ ߞߍ߫ ߡߌ߬ߙߌ߲߬ߘߌ߫ ߕߐ߬ߢߍ߰ߒߕߋ ߟߎ߬ ߝߋ߲߫ ߘߌ߫ ﴿150﴾

ߡߎߛߊ߫ ߞߊ߲߫ ߞߏ߫ ߒ ߡߊ߰ߙߌ ߸ ߦߝߊ߬ ߒ ߣߌ߫ ߒ ߞߘߐ߬ߞߍ߫ ߡߊ߬ ߸ ߊ߬ ߣߴߌ ߦߋ߫ ߒ߬ ߠߊߘߏ߲߬ ߌ ߟߊ߫ ߤߌߣߊ ߞߣߐ߫ ߸ ߌߟߋ ߡߍ߲ ߦߋ߫ ߤߌߣߟߊ ߓߍ߯ ߘߐ߫ ߤߌߣߟߊ ߘߌ߫ ﴿151﴾

ߡߍ߲ ߠߎ߫ ߘߏ߲߬ ߞߵߊ߬ߟߎ߬ ߓߟߏߞߍ߫ ߕߎߙߊߣߍ߲ ߠߊ߫ ߸ ߛߊ߬ߙߌ ߣߌ߫ ߘߐ߯ߦߡߊ ߓߍߣߵߏ߬ ߟߎ߫ ߛߐ߬ߘߐ߲߬ ߞߊ߬ ߝߘߴߊ߬ߟߎ߫ ߡߊ߰ߙߌ ߟߊ߫ ߘߎߢߊ߫ ߢߣߊߡߦߊ ߘߐ߫ ، ߒ߬ߓߵߊ߲ ߧߋ߫ ߞߎ߲߬ߘߐ߬ߕߍ߰ߟߊ ߟߎ߫ ߛߙߊ߬ ߟߊ߫ ߕߋ߲߬ ߠߋ߬ ﴿152﴾

ߡߍ߲ ߠߎ߫ ߞߏ߬ߣߌ߲ ߞߊ߬ ߖߎ߯ߡߊ߲ ߠߎ߬ ߞߍ߫ ߸ ߞߊ߬ ߓߊ߲߫ ߏ߬ ߞߐ߫ ߞߵߊ߬ߟߎ߫ ߖߘߍ߬ߟߊߛߊ߬ߦߌ߫ ߊ߬ ߣߌ߫ ߞߊ߬ ߘߍ߲߬ߞߣߍ߬ߦߊ߫ ߸ ߒ߬ߓߊ߬ ߏ߬ ߓߍ߯ ߞߐ߫ ߸ ߌ ߡߊ߰ߙߌ ߦߋ߫ ߦߝߊ߬ߟߊ߫ ߤߌߣߟߊ߫ ߟߋ߬ ߘߌ߫ ( ߏ߬ ߟߎ߬ ߟߊ߫) ﴿153﴾

ߡߎߛߊ߫ ߟߊ߫ ߡߐߣߍ ߡߊߛߍ߬ߟߍ߲߬ߓߍ߬ߣߍ߲ ߸ ߊ߬ ߞߊ߬ ߥߊ߬ߟߊ ߟߎ߫ ߕߊ߬ ߞߵߊ߬ ߕߘߍ߬ ߞߊ߲ߘߦߊ ߣߌ߫ ߤߌߣߊ ߟߴߏ߬ ߛߓߍߟߌ ߘߐ߫ ߡߐ߰ ߟߎ߬ ߦߋ߫ ߸ ߡߍ߲ ߠߎ߬ ߦߋ߫ ߡߛߌ߬ߡߛߌ߬ ߟߴߊ߬ߟߎ߫ ߡߊ߰ߙߌ ߢߍ߫ ﴿154﴾

ߡߎߛߊ߫ ߞߊ߬ ߗߍ߬ ߓߌߥߐߙߐ߲ߥߌ߬ߟߊ߬ ߛߎߥߊ߲ߘߌ߫ ߊ߬ ߡߌ߬ߙߌ߲߬ߘߌ ߘߐ߫ ߸ ߊ߲ ߠߊ߫ ߛߘߊߒߡߊߕߎߡߣߊ ߞߊ߲ߡߊ߬ ، ߦߙߍߦߙߍ ߣߵߏ߬ ߟߎ߫ ߡߌ߬ߘߊ߬ ߟߊ߫ ߸ ߊ߬ ߞߊ߲߫ ߞߏ߫ ߒ ߡߊ߰ߙߌ ߊ߬ ߕߎ߲߬ ߓߊ߯ ߌ ߘߌߦߊ߫ ߸ ߌ ߕߘߍ߬ ߘߌ߫ ߢߌ߲߬ ߠߎ߬ ߣߌ߫ ߒߠߋ ߖߍ߬ߘߍ ߛߌߟߊߛߊ߬ ߞߊ߬ߦߌ߯ ߞߘߐ߬ߡߊ߲߫ ، ߌ߬ߦߏ߯ ߌ ߘߴߊ߲ ߛߌߟߊߛߊ߬ ߊ߲ ߘߐ߫ ߣߊߟߏ߲ߡߊ ߟߎ߬ ߟߊ߫ ߓߊ߯ߙߊ ߟߊ߫؟ ߣߌ߲߬ ߘߏ߲߬ ߕߍ߫ ߝߏߦߌ߬ ߘߌ߫ ߝߏ߫ ߌ ߟߊ߫ ߞߘߐߓߐߟߌ ، ߌ ߦߋ߫ ߡߐ߰ ߟߋ߬ ߟߊߝߟߌ߬ ߟߴߏ߬ ߟߊ߫ ߸ ߡߍ߲ ߓߴߌ ߘߌߦߊ߫ ، ߌ ߘߌ߫ ߡߐ߰ ߝߣߊ߫ ߞߊ߲ߘߴߊ߬ ߟߊ߫ ߸ ߡߍ߲ ߓߴߌ ߘߌߦߊ߫ ، ߌߟߋ ߟߵߊ߲ ߠߊ߫ ߞߏߕߌ߮ ߘߌ߫ ، ߏ߬ ߘߐ߫ ߸ ߌ ߦߋ߫ ߦߊ߬ߝߴߊ߲ ߡߊ߬ ߞߊ߬ ߤߌߣߴߊ߲ ߠߊ߫ ، ߓߊ ߌߟߋ ߟߋ߫ ߦߝߊ߬ߟߊ ߓߍ߯ ߘߐ߫ ߢߌ߬ߡߊ ߘߌ߫ ﴿155﴾

ߊ߬ ߣߴߌ ߦߋ߫ ߢߌ߬ߡߊ߫ ߟߋ߬ ߛߓߍ߫ ߒ߬ ߧߋ߫ ߘߎߢߊ߫ ߢߌ߲߬ ߘߐ߫ ߸ ߊ߬ ߣߌ߫ ߟߊߞߌߙߊ߫ ߝߣߊ߫ ߘߐ߫ ، ߊ߲ ߓߘߊ߫ ߒ߬ ߖߘߍ߬ߟߊߛߊ߬ߦߌ߬ ߌ ߡߊ߬ ، ߊߟߊ߫ ߞߊ߲߫ ߞߏ߫ ߖߊ߲߰ߞߕߊ ߡߍ߲ ߦߋ߫ ߒ ߓߟߏ߫ ߸ ߒ ߧߴߏ߬ ߟߊ߫ ߟߊ߫ ߡߐ߰ ߟߋ߫ ߞߊ߲߬ ߸ ߡߍ߲ ߓߊ߯ ߒ ߘߌߦߊ߫ ، ߒ ߠߊ߫ ߤߌߣߊ ߘߏ߲߬ ߦߙߌߥߊߣߍ߲߫ ߝߋ߲ ߓߍ߯ ߟߋ߫ ߡߊ߬ ، ߓߊ߬ߙߌ߬ ߒ ߧߴߏ߬ ߛߓߍ߫ ߟߊ߫ ߡߐ߰ ߟߎ߫ ߟߋ߬ ߦߋ߫ ߸ ߡߍ߲ ߠߎ߬ ߦߴߊ߬ߟߎ߬ ߝߊ߲ߕߊ߲߬ߞߊ߬ ߟߊ߫ ، ߊ߬ ߣߴߊ߬ߟߎ߬ ߦߋ߫ ߖߞߊ ߘߌ߫ ߟߊ߫ ، ߊ߬ ߣߌ߫ ߡߍ߲ ߠߎ߬ ߦߋ߫ ߘߍ߲߬ߞߣߍ߬ߦߊ߬ ߟߊ߫ ߒ߬ ߠߊ߫ ߟߝߊߙߌ ߟߎ߫ ߡߊ߬ ﴿156﴾

ߏ߬ ߟߎ߫ ߟߋ߬ ߞߋߟߊ߫ ߟߊ߬ߝߐ߬ߓߊ߯ ߞߎ߲߬ߝߌ߲ ߠߊߓߊ߬ߕߏ߬ ߟߊ߫ ߸ ߊ߬ߟߎ߫ ߣߊ߬ ߡߍ߲ ߡߊ߲߬ߞߕߎ ߛߓߍߣߍ߲ ߛߐ߬ߘߐ߲߬ ߠߴߊ߬ߟߎ߫ ߝߍ߬ ߕߊ߬ߥߎ߬ߙߊߕߌ ߣߌ߫ ߟߌ߲߬ߖߌ߯ߟߌ ߘߐ߫ ߸ ߞߏ߫ ߊ߬ ߘߴߊ߬ߟߎ߫ ߖߊ߬ߡߊߙߌ߫ ߢߌ߬ߡߊ ߟߊ߫ ߞߵߊ߬ߟߎ߬ ߝߊߕߊ߲ߕߌ߫ ߞߐ߲ߞߏ ߟߎ߫ ߡߊ߬ ، ߞߊ߬ ߝߋ߲߫ ߓߘߍ ߟߎ߬ ߟߊߘߊ߬ߤߴߊ߬ߟߎ߬ ߦߋ߫ ߸ ߞߊ߬ ߝߋ߲߫ ߡߊߢߍߢߌ߲ߣߍ߲ ߠߎ߬ ߟߊߕߐ߲߫ ߊ߬ߟߎ߫ ߡߊ߬ ، ߞߵߊ߬ߟߎ߫ ߘߏ߬ߣߌ߲߬ ߖߎ߮ ߟߎ߬ ߓߐ߫ ߊ߬ߟߎ߫ ߞߎ߲߬ ߸ ߊ߬ ߣߌ߫ ߞߏߟߏ߲ߜߊ߲ ߡߍ߲ ߠߎ߫ ߕߘߍ߬ ߊ߬ߟߎ߬ ߟߊ߫ ، ߒ߬ߓߊ߬ ߡߍ߲ ߠߎ߬ ߓߊ߯ ߘߍ߲߬ߞߣߍ߬ߦߊ߫ ߏ ߡߊ߬ ߞߵߊ߬ ߓߏ߲߬ߧߊ߫ ߊ߬ ߣߌ߫ ߞߵߊ߬ ߘߍ߬ߡߍ߲߬ ߸ ߞߊ߬ ߦߋߟߋ߲߫ ߠߊߓߊ߬ߕߏ߬ ߡߍ߲ ߠߊߖߌ߰ߣߴߊ߬ ߡߊ߬ ߸ ߏ߬ ߟߎ߫ ߟߋ߬ ߛߎߘߊ߲ߓߊ߮ ߟߎ߬ ߘߌ߫ ﴿157﴾

ߊ߬ ߝߐ߫ ߞߏ߫ ߤߍ߲߬ ߊߟߎ߬ ߡߐ߱ ߟߎ߬ ߸ ߒߠߋ ߦߋ߫ ߊߟߊ߫ ߟߊ߫ ߞߋߟߊ ߟߋ߬ ߘߌ߫ ߊߟߎ߫ ߓߍ߯ ߟߊߘߍ߬ߣߍ߲ ߡߊ߬ ߞߐߘߍ߫ ، ߊߟߊ߫ ߏ߬ ߟߋ ߕߊ߫ ߦߋ߫ ߛߊ߲ ߠߎ߬ ߣߌ߫ ߘߎ߱ ߡߊ߲߬ߛߊ߬ߦߊ ߘߌ߫ ، ߡߊ߰ߙߌ߬ ߜߘߍ߫ ߘߏ߲߬ ߕߴߏ߬ ߞߐ߫ ، ߊ߬ߟߋ ߟߋ߫ ߟߊ߬ߢߣߊ߬ߡߦߊ߬ߟߌ ߣߌ߫ ߛߊ߬ߦߊ ߞߍ߫ ߟߊ߫ ، ߒ߬ߓߵߊߟߎ߫ ߘߍ߲߬ߞߣߍ߬ߦߵߊߟߊ߫ ߡߊ߬ ߸ ߊ߬ ߣߴߊ߬ ߟߊ߫ ߞߋߟߊ߫ ߟߊ߬ߝߐ߬ߓߊ߯ ߞߎ߲߬ߝߌ߲ ߡߊ߬ ߸ ߏ߬ ߡߍ߲ ߘߍ߲߬ߞߣߍ߬ߦߊ߬ߣߍ߲߫ ߊߟߊ߫ ߣߴߊ߬ ߟߊ߫ ߞߎߡߊ ߟߎ߫ ߡߊ߬ ، ߊߟߎ߫ ߏ߬ ߟߊߓߊ߬ߕߏ߫ ߘߋ߬ ߛߴߊߟߎ߫ ߘߌ߫ ߞߊ߲ߘߊ߫ ﴿158﴾

ߡߊ߲߬ߕߏ߲ ߘߏ߫ ߦߋ߫ ߡߎߛߊ߫ ߡߌ߬ߙߌ߲߬ߘߌ ߘߐ߫ ߸ ߏ߬ ߟߎ߬ ߦߋ߫ ߞߊ߲ߘߊߟߌ ߞߍ߫ ߟߊ߫ ߕߎ߬ߢߊ ( ߟߋ߫ ) ߡߊ߬ ߸ ߊ߬ ߣߴߊ߬ߟߎ߬ ߦߴߊ߬ߟߎ߬ ߕߋߟߋ߲߫ ߠߴߊ߬ ߟߊ߫ ﴿159﴾

ߊ߲ ߞߊ߬ ‹ ߌߛߌߙߊߌߟߞߊ › ߟߎ߬ ߘߐߞߎߘߎ߲ߞߎߘߎ߲߫ ߓߊߓߏ߲߫ ߕߊ߲߫ ߣߌ߫ ߝߌ߬ߟߊ߫ ߡߊ߲߬ߕߏ߲ ߠߎ߬ ߘߌ߫ ، ߊ߲ ߞߊ߬ ߡߎߛߊ߫ ߦߟߌߘߏ߲߬ ߸ ߏ ߕߎ߬ߡߊ ߊ߬ ߡߌ߬ߙߌ߲߬ߘߌ ߓߘߊ߫ ߟߊ߬ߡߌ߲߬ߠߌ߲߬ߢߌߣߌ߲ ߞߍ߫ ߊ߬ ߟߊ߫ ߸ ߒ ߞߏ߫ ߝߘߊ ߜߊ߬ߛߌ߬ ߌ ߟߊ߫ ߘߐ߬ߞߐ ߟߊ߫ ߓߊ߫ ، ߏ߬ ߞߍ ߞߐ߬ߢߊ߬ ߕߊ߲߫ ߣߌ߫ ߝߌ߬ߟߊ߬ ߝߎ߲ߘߌ߫ ߘߴߏ߬ ߘߐ߫ ߞߎߟߊ߲ߞߎߟߊ߲߫ ߸ ߓߊߓߏ߲ ߓߍ߯ ߞߵߊ߬ ߕߊ߫ ߡߌ߲߬ ߦߙߐ ߟߐ߲߫ ߕߋ߲߬ ߘߏߦߌ߲߫ ، ߊ߲ ߣߊ߬ ߘߴߊߟߎ߬ ߘߎߟߋ߲ߧߊ߫ ߓߘߌߞߊ ߟߊ߫ ، ߊ߬ ߣߴߊ߲ ߞߊ߬ ߓߊ߯ߘߊߟߌ ߣߌ߫ ߥߋ߲߬ߕߙߋ߬ߟߋ߲߬ ( ߛߓߏ ) ߟߊߖߌ߰ ߊߟߎ߫ ߡߊ߬ ، ߒ ߞߏ߫ ߊߟߎ߫ ߦߋ߫ ߘߊߥߎ߲ߠߌ߲ ߞߍ߫ ߒ߬ ߠߊ߫ ߤߊ߬ߙߌ߬ߖߍ߰ ߢߌߡߊ ߘߐ߫ ߸ ߒ߬ ߞߵߊߟߎ߫ ߤߊ߬ߙߌ߬ߖߍ߰ ߡߍ߲ ߠߊ߫ ، ( ߊ߬ߟߎ߫ ߞߵߏ߬ ߕߌߢߍ ߡߍ߲ ߞߍ߫ ߊ߬ߟߎ߫ ߖߍ߬ߘߍ ߡߊ߬ ) ߸ ߊ߬ߟߎ߬ ߡߊ߫ ߓߊ߰ ߒ߬ߠߎ߫ ߡߊ߬ ߏ߬ ߘߐ߫ ߘߋ߬ ߸ ߞߏ߬ߣߵߊ߬ߟߎ߫ ߓߊ߰ ߘߴߊ߬ߟߎ߫ ߖߍ߬ߘߍ߫ ߟߋ߫ ߡߊ߬ ﴿160﴾

ߕߎ߬ߡߊ ߡߍ߲ ߊ߬ ߝߐ߫ ߘߴߊ߬ߟߎ߬ ߦߋ߫ ߸ ߞߏ߫ ߊߟߴߊߟߎ߫ ߡߊߞߍ߫ ߛߏ ߢߌ߲߬ ߠߊ߫ ߸ ߊ߬ ߣߴߊߟߎ߫ ߘߊߥߎ߲ߠߌ߲ ߞߍ߫ ߊ߬ ߝߊ߲߬ ߠߋ߬ ߘߐ߫ ߡߍ߲ ߓߊ߯ ߊߟߎ߫ ߘߌߦߊ߫ ، ߊ߬ ߣߴߊߟߎ߫ ߦߴߊ߬ ߝߐ߫ ߞߏ߫: ߒ߬ ߧߋ߫ ߖߟߎ߬ߡߎ߲߬ ߠߊ߬ߓߋ ߟߋ߫ ߝߍ߬ ، ߊ߬ ߣߴߊߟߎ߫ ߘߏ߲߬ ( ߖߌ߲߬ ) ߘߊ ߟߊ߫ ߕߌ߲ߓߌߘߌ߲ ߘߌ߫ ، ߏ߬ ߓߊ߯ ߞߍ߫ ߸ ߒ߬ ߘߴߊߟߎ߫ ߝߎ߬ߕߎ߲߬ߕߌ ߟߎ߫ ߦߝߊ߬ ߊߟߎ߫ ߦߋ߫ ، ߒ ߘߏ߲߬ ߘߌߣߊ߬ ߢߊ߬ߓߊ߮ ߟߎ߬ ߖߘߌ߫ ﴿161﴾

ߒ߬ߞߵߊ߬ߟߎ߫ ߟߐ߬ߣߍ߲߬ ߞߏ߫ ߊ߬ߟߎ߬ ߦߋ߫ ߞߎߡߊ ߡߍ߲ ߝߐ߫ ߸ ߊ߬ߟߎ߬ ߘߐ߫ ߕߐ߬ߢߍ߰ߒߕߋ ߟߎ߫ ߞߵߏ ߝߊ߬ߟߋ߲߬ ߘߏ߫ ߜߘߍ߫ ߟߊ߫ ߡߍ߲ ߡߊ߫ ߝߐ߫ ߊ߬ߟߎ߬ ߦߋ߫ ، ߏ߬ ߞߍ ߸ ߊ߲ ߞߊ߬ ߖߊ߲߰ߞߕߊ ߗߋ߫ ߊ߬ߟߎ߫ ߡߊ߬ ߞߊ߬ ߓߐ߫ ߛߊ߲ ߡߊ߬ ߸ ߞߊ߬ߡߊߛߐ߬ߘߐ߲߫ ߊ߬ߟߎ߬ ߟߊ߫ ߕߐ߬ߢߍ߮ ߝߍ߬ ﴿162﴾

ߌ ߦߴߊ߬ߟߎ߫ ߢߌ߬ߣߌ߲߬ߞߊ߬ ߛߏ ߡߊ߬ ߸ ߡߍ߲ ߕߘߍ߬ ߓߊ߫ ߘߊ ߟߊ߫ ، ߕߎ߬ߡߊ ߡߍ߲ ߏ߬ ߟߎ߫ ߞߊ߬ ߖߊ߲߰ߘߊ ߞߍ߫ ߞߍ߲ߘߍߟߏ߲ ( ߛߓߌߕߌ ) ߞߏߢߊ ߘߐ߫ ، ߏ ߕߎ߬ߡߊ ߊ߬ߟߎ߬ ߟߊ߫ ߖߍ߮ ߟߎ߬ ߦߋ߫ ߣߊ߬ ߟߴߊ߬ߟߎ߫ ߡߵߊ߬ߟߎ߬ ߟߊ߫ ߞߍ߲ߘߍߟߏ߲ ߘߐ߫ ߜߘߏߜߊߘߌ߫ ، ߣߴߊ߬ߟߎ߬ ߕߍ߫ ߞߍ߲ߘߍߟߏ߲߫ ߡߊ߫ ߢߐ߲ߢߐ߲ߠߌ߲߫ ߘߐ߫ ߛߊ߫ ߸ ߖߍ߮ ߟߎ߬ ߕߍ߫ ߣߵߊ߬ߟߎ߫ ߡߊ߬ ، ߒ߬ߓߵߊ߲ ߣߵߊ߬ߟߎ߬ ߞߘߐߓߐ߫ ߟߊ߫ ߕߋ߲߬ ߠߋ߬ ߸ ߞߊ߬ߡߊߛߐ߬ߘߐ߲߫ ߊ߬ߟߎ߬ ߟߊ߫ ߔߊߟߊ߲ߞߊ ߝߍ߬ ﴿163﴾

ߏ ߕߎ߬ߡߊ ߟߋ߬ ߡߊ߲߬ߕߏ߲ ߘߏ߫ ߞߵߊ߬ ߝߐ߫ ߊ߬ߟߎ߬ ߘߐ߫ ߸ ߞߏ߫ ߡߎ߲߬ߠߴߊߟߎ߫ ߦߋ߫ ߡߌ߬ߙߌ߲߬ߘߌ߫ ߞߊ߬ߥߊ߲߬ߘߌ߬ ߟߊ߫ ߸ ߊߟߊ߫ ߦߋ߫ ߡߍ߲ ߠߎ߬ ߛߌߟߊߛߊ߬ ߞߏ ߘߐ߫ ߥߟߴߊ߬ ߦߴߊ߬ߟߎ߫ ߖߊ߲߰ߞߕߊ߬ ߞߏ ߘߐ߫ ߖߊ߲߰ߞߕߊ߬ ߜߍߟߍ߲ ߠߊ߫؟ ߏ߬ ߟߎ߬ ߞߊ߲߫ ߞߏ߫ ߞߵߊ߬ ߞߍ߫ ߟߐ߬ߦߙߌ߫ ߘߴߊߟߎ߫ ߡߊ߰ߙߌ ߣߊ߰ߟߊ߫ ߞߍ߬ ، ߊ߬ ߣߌ߫ ߝߣߊ߫ ߸ ߛߴߊ߬ߟߎ߬ ߘߴߊ߬ߟߎ߬ ߝߊ߲ߕߊ߲߬ߞߊ߫ ﴿164﴾

ߒ߬ߓߊ߬ ߏ߬ ߟߎ߫ ߢߌ߬ߣߊ ߡߍ߲ ߞߍ߫ ߘߴߊ߬ߟߎ߫ ߞߊ߬ߥߊ߲߬ߘߌ߬ ߞߊ߲ ߘߐ߫ ߸ ߊ߲ ߞߊ߬ ߡߐ߱ ߟߎ߬ ߟߊߞߛߌ߫ ߡߍ߲ ߠߎ߫ ߞߊ߬ ߝߊߕߊ߲ߕߟߌ ߞߍ߫ ߖߎ߯ߡߊ߲ ߡߊ߬ ، ߊ߬ ߣߴߊ߲ ߞߊ߬ ߕߐ߬ߢߍ߰ߒߕߋ ߟߎ߫ ߡߌ߬ߘߊ߫ ߖߊ߲߰ߞߕߊ߬ ߖߎ߯ ߟߊ߫ ߸ ߞߊ߬ߡߊߛߐ߬ߘߐ߲߫ ߊ߬ߟߎ߬ ߟߊ߫ ߔߊߟߊ߲ߞߊ ߝߍ߬ ﴿165﴾

ߊ߬ߟߎ߫ ߞߵߊ߬ߟߎ߬ ߜߛߋߞߎ߬ߘߎ ߡߍ߲ ߞߍ߫ ߊ߬ߟߎ߬ ߝߊߕߊ߲ߕߌ߫ ߞߏ ߡߊ߬ ߸ ߊ߲ ߞߵߊ߬ ߝߐ߫ ߊ߬ߟߎ߫ ߡߊ߬ ߒ ߞߏ߫ ߊߟߎ߯ ߞߍ߫ ߛߎ߬ߟߊ ߟߎ߬ ߘߌ߫ ( ߦߌߟߡߊߖߊ߲߯ߧߊ ߘߐ߫ ) ߥߟߋߥߟߋ߫ ﴿166﴾

ߕߎ߬ߡߊ ߡߍ߲ ߌ ߡߊ߰ߙߌ ߞߵߊ߬ ߟߊߛߋ߫ ߞߏ߫ ߊ߬ ߘߌ߫ ߕߏ߫ ߡߐ߰ ߟߊߥߟߌ߬ ߟߴߊ߬ߟߎ߬ ߞߊ߲ߡߊ߬ ߸ ߡߍ߲ ߘߌ߫ ߕߏ߫ ߊ߬ߟߎ߫ ߜߊ߰ߢߊ߬ߜߊ߯ߢߊ߫ ߟߊ߫ ߖߊ߲߰ߞߕߊ߬ ߖߎ߮ ߟߊ߫ ߸ ߝߏ߫ ߞߵߊ߬ ߛߌ߰ ߟߐ߬ߓߊ ߟߏ߲ ߠߊ߫ ، ߖߊ߯ߕߋ߬ ߸ ߌ ߡߊ߰ߙߌ ߟߋ߫ ߓߌ߲߬ߓߊ߬ߏ߬ ߞߊߟߌ߲ ߕߌ߱ ߘߌ߫ ߸ ߊ߬ ߣߴߊ߬ߟߋ ߟߋ߫ ߦߝߊ߬ߟߊ߫ ߤߌߣߟߊ ߖߊ߯ߕߋ ߘߌ߫ ﴿167﴾

ߊ߲ ߞߵߊ߬ߟߎ߬ ߘߐߞߎߘߎ߲ߞߎߘߎ߲߫ ߘߎ߱ ߞߊ߲߬ ߡߊ߲߬ߕߏ߲ ߠߎ߬ ߘߌ߫ ، ߢߊ߬ߓߊ߮ ߟߎ߬ ߦߴߊ߬ߟߎ߬ ߘߐ߫ ߸ ߘߏ߫ ߟߎ߫ ߝߣߴߊ߬ߟߎ߬ ߘߐ߫ ߡߍ߲ ߠߎ߬ ߕߴߏ߬ ߟߎ߬ ߘߌ߫ ، ߊ߲ ߘߏ߲߬ ߞߵߊ߬ߟߎ߬ ߞߘߐߓߐ߫ ߢߌ߬ߡߊ ߟߎ߬ ߣߌ߫ ߖߎ߯ߡߊ߲ ߠߎ߬ ߟߊ߫ ߟߋ߬ ߸ ߛߴߊ߬ߟߎ߫ ߘߌ߫ ߞߐߛߊ߬ߦߌ߲߬ ﴿168﴾

ߣߘߐ߬ߓߌ߬ߟߊ߬ ߖߎ߯ ߟߎ߫ ߟߋ߬ ߝߐ߫ ߘߴߊ߬ߟߎ߬ ߞߐ߫ ߞߊ߬ ߟߍߙߊ ߕߊ߬ ߗߍ ߘߐ߫ ߸ ߏ߬ ߟߎ߬ ߦߋ߫ ߘߎߢߊ߫ ߣߌ߲߬ ߣߊ߲߬ߝߟߏ߬ߡߎ߮ ߡߌ߬ߘߊ߬ ߞߊ߲ ߞߍ߫ ߟߊ߫ ߸ ߞߏ߫ ߣߌ߲߬ ߞߋߟߋ߲ ߘߌߣߊ߬ ߦߊ߬ߝߊ߫ ߒ߬ ߧߋ߫ ، ߣߴߏ ߢߐ߲߰ ߣߊ߲߬ߝߟߏ߬ߡߎ߯ ߣߊ߬ ߘߴߊ߬ߟߎ߫ ߡߊ߬ ߕߎ߲߯ ߸ ߊ߬ߟߎ߬ ߘߴߏ߬ ߝߣߊ߫ ߡߌ߬ߘߊ߬ ، ߦߊ߯ߟߊ߫ ߟߍߙߊ ߟߊ߬ߤߘߌ ߡߊ߫ ߡߌ߬ߘߴߊ߬ߟߎ߫ ߡߊ߬ ߓߊ߬ ߸ ߞߏ߫ ߊ߬ߟߎ߬ ߞߊߣߊ߬ ߝߏߦߌ߬ ߝߐ߫ ߊߟߊ߫ ߡߊ߬ ߣߌ߫ ߕߎ߬ߢߊ ߕߍ߫ ، ߊ߬ߟߎ߫ ߘߏ߲߬ ߞߵߏ߬ ߞߣߐ߫ ߞߎߡߊ ߓߍ߯ ߞߊ߬ߙߊ߲߫ ߠߋ߬ ، ߟߊߞߌߙߊ߫ ߛߏ ߟߋ߫ ߘߏ߲߬ ߘߌߡߊ߲߫ ߝߊ߲ߕߊ߲ߞߟߊ ߟߎ߬ ߟߊ߫ ، ߦߊ߯ߟߊ߫ ߊߟߎ߫ ߕߴߏ߬ ߤߊ߲ߞߟߌߡߦߊ߫ ߟߊ߫ ߟߋ߫ ߓߊ߬؟ ﴿169﴾

ߒ߬ߓߊ߬ ߡߍ߲ ߠߎ߬ ߦߴߊ߬ߟߎ߬ ߓߟߏߞߍ߫ ߟߊ߫ ߟߍߙߊ ߟߊ߫ ߸ ߊ߬ ߣߌ߫ ߞߊ߬ ߛߊߟߌ ߟߐ߬ ، ߒ߬ߠߎ߬ ߕߍ߫ ߟߢߊ߬ߟߌ߬ߟߊ ߟߎ߫ ߛߊ߬ߙߊ ߕߌߢߍ߫ ߟߊ߫ ߘߋ߬ ﴿170﴾

ߕߎ߬ߡߊ ߡߍ߲ ߊ߲ ߞߊ߬ ߞߎ߬ߙߎ ߘߎ߲߫ ߊ߬ߟߎ߫ ߞߎ߲߬ߘߐ߫ ߦߏ߫ ߓߘߌߞߊ ߟߋ߬ ، ߊ߬ߟߎ߫ ߞߵߊ߬ ߖߌ߰ ߞߴߏ ߓߋ߬ߕߐ߫ ߟߋ߫ ߊ߬ߟߎ߫ ߞߊ߲߬ ، ߒ ߞߏ߫ ߒ ߞߊ߬ ߟߍߙߊ ߡߍ߲ ߘߴߊߟߎ߫ ߡߊ߬ ߸ ߊߟߎ߯ ߏ ߡߌ߬ߘߊ߫ ߝߊ߲߬ߞߊ ߟߊ߫ ، ߊ߬ ߣߴߊߟߎ߫ ߦߴߊߟߎ߫ ߖߊ߲߬ߕߏ߫ ߊ߬ ߞߣߐ߫ ߞߏ ߟߎ߬ ߘߐ߫ ߸ ߛߴߊߟߎ߫ ߘߌ߫ ߕߊ߲߬ߞߊ߫ ﴿171﴾

ߕߎ߬ߡߊ ߡߍ߲ ߌ ߡߊ߰ߙߌ ߞߵߊߘߡߊ߫ ߘߋ߲ ߠߎ߬ ߓߐ߲ߛߐ߲ ߠߎ߫ ߕߵߊ߬ߟߎ߫ ߞߏ߬ߘߏ ߟߎ߬ ߘߐ߫ ߸ ߞߵߊ߬ߟߎ߬ ߟߊߛߙߋߦߴߊ߬ߟߎ߫ ߖߍ߬ߘߍ߫ ߡߊ߬ ߸ ߞߏ߫ ߦߊ߯ߟߊ߫ ߒߠߋ ߕߍ߫ ߊߟߎ߫ ߡߊ߰ߙߌ ߘߌ߫ ߓߊ߬؟ ߊ߬ߟߎ߬ ߞߊ߲߫ ߞߏ߫ ߤߊ߯ߟߌ߫ ߞߍ߬߹ ߊ߲ ߣߵߏ߬ ߛߙߋߦߊ ߟߊߟߐ߬ ߟߊ߫ ߟߋ߬ ߸ ߊߟߎ߫ ߞߊߣߊ߬ ߥߴߊ߬ ߝߐ߫ ߟߐ߬ߓߊ ߟߏ߲ ߸ ߞߏ߫ ߒ߬ߠߎ߫ ߢߌ߬ߣߊ߬ߣߍ߲߫ ߠߴߏ߬ ߞߐ߫ ﴿172﴾

ߥߟߴߊߟߎ߫ ߞߊߣߊ߬ ߥߴߊ߬ ߝߐ߫ ߸ ߞߏ߫ ߊ߲ ߝߊ߭ ߟߎ߫ ߟߋ߫ ߞߊ߬ ߛߏߡߦߊ ߞߍ߫ ߞߘߐ߬ߡߊ߲߫ ، ߒ߬ߠߎ߫ ߘߏ߲߬ ߞߍ߫ ߘߊ߫ ߓߐ߲ߛߐ߲ ߘߌ߫ ߏ߬ ߟߎ߫ ߟߋ߬ ߞߐ߫ ، ߊ߬ ߝߐ߫ ߌ ߘߌ߫ ߒ߬ߠߎ߬ ߛߌߟߊߛߊ߬ ߞߊ߬ߟߏ߬ߞߊ߬ߟߏ߬ߟߊ ߟߎ߬ ߟߊ߫ ߓߊ߯ߙߊ ߟߊ߫؟ ﴿173﴾

ߒ߬ߓߵߊ߲ ߧߋ߫ ߟߝߊߙߌ ߟߎ߬ ߝߊߙߊ߲ߝߊߛߌ߫ ߟߊ߫ ߕߊ߲߬ ߠߋ߬ ߸ ߛߴߊ߬ߟߎ߬ ߘߴߊ߬ߟߎ߬ ߞߐߛߊ߬ߦߌ߲߬ ﴿174﴾

ߌ ߦߋ߫ ߡߐ߱ ߖߊ߲߬ߖߏ߲ ߘߐߞߊ߬ߙߊ߲߫ ߊ߬ߟߎ߬ ߦߋ߫ ߸ ߊ߲ ߞߊ߬ ߡߍ߲ ߛߐ߫ ߒ߬ ߠߊ߫ ߘߊ߬ߟߎ ߟߎ߬ ߟߊ߫ ߸ ߞߏ߬ߣߵߊ߬ ߞߵߊ߬ ߖߍ߬ߘߍ߫ ߓߏ߬ߛߌ߫ ߏ߬ ߘߐ߫ ߝߏ߯ߛߌ߫ ، ߏ߬ ߞߍ ߜߍ߬ߘߍ ߞߵߊ߬ ߣߐ߬ߡߌ߬ߣߊ߬ ߗߎߗߎߗߎ߫ ߸ ߝߏ߫ ߞߵߊ߬ ߞߍ߫ ߝߟߌ߬ߓߊ߮ ߟߎ߬ ߘߏ߫ ߘߌ߫ ﴿175﴾

ߊ߬ ߕߎ߲߬ ߓߊ߯ ߒ߬ ߘߌߦߊ߫ ߸ ߒ߬ ߕߘߍ߬ ߘߴߊ߬ ߞߘߐߕߊ߬ ߘߊ߬ߟߎ ߏ߬ ߟߎ߬ ߞߏߛߐ߲߬ ، ߓߊ߬ߙߌ߬ ߊ߬ ߝߊ߲ߞߊ߲߫ ߘߊ߫ ߘߎߢߊ߫ ߟߋ߫ ߞߊ߲߬ ߞߵߊ߬ ߣߌ ߛߊ߬ߥߏ ߟߊߓߊ߬ߕߏ߬ ߸ ߊ߬ ߟߊߒߡߊ ߞߍ߫ ߘߴߏ߬ ߘߐ߫ ߦߏ߫ ߥߎ߬ߟߎ ߟߊߒߡߊ: ߌ ߓߴߌ ߝߍ߫ ߊ߬ ߞߊ߲ߡߊ߬ ߸ ߊ߬ ߘߴߊ߬ ߣߍ߲߭ ߠߊߓߐ߫ ، ߣߴߌ ߘߏ߲߬ ߞߵߊ߬ ߕߏ߫ ߦߋ߲߬ ߸ ߊ߬ ߘߴߊ߬ ߣߍ߲߭ ߠߊߓߐ߫ ، ߒ߬ߓߊ߬ ߡߌ߬ߙߌ߲߬ߘߌ ߟߊߒߡߊ ߟߴߏ߬ ߘߌ߫ ߸ ߡߍ߲ ߠߎ߫ ߞߊ߬ ߒ߬ ߠߊ߫ ߘߊ߬ߟߎ ߟߎ߬ ߡߊߛߐ߬ߛߐ߬ ، ߏ߬ ߘߐ߫ ߸ ߘߐ߬ߝߐ ߣߌ߲߬ ߢߊߝߐ߫ ߊ߬ߟߎ߬ ߦߋ߫ ߛߴߊ߬ߟߎ߬ ߘߴߊ߬ߟߎ߬ ߡߙߌ߫ ﴿176﴾

ߟߊߒߡߊ߫ ߖߎ߯ ߘߏ߲߬ ߦߋ߫ ߒ߬ ߠߊ߫ ߟߝߊߙߌ ߟߎ߬ ߡߊߛߐ߬ߛߐ߬ߓߊ߮ ߟߎ߬ ߟߊ߫ ߏ߬ ߘߌ߫ ߞߟߋ߫ ، ߓߊߏ߬ ߊ߬ߟߎ߬ ߦߴߊ߬ߟߎ߫ ߖߍ߬ߘߍ߫ ߟߋ߫ ߕߐ߬ߢߍ߰ ߟߊ߫ ﴿177﴾

ߊߟߊ߫ ߓߊ߯ ߡߍ߲ ߞߊ߲ߘߊ߫ ߸ ߏ߬ ߟߋ ߞߊ߲ߘߊߓߊ߮ ߘߌ߫ ، ߣߴߊ߬ ߘߏ߲߬ ߞߊ߬ ߡߍ߲ ߠߊߝߟߌ߬ ߸ ߏ߬ ߟߎ߫ ߟߋ߬ ߞߍߕߐ߫ ߓߣߐ߬ߓߊ߮ ߟߎ߬ ߘߌ߫ ﴿178﴾

ߊ߲ ߣߊ߬ ߛߘߍߡߊ߲߫ ߠߋ߬ ߘߊ߲߫ ߠߊ߫ ߔߊߦߌߔߊߦߌ ߦߋ߫ ߸ ߥߐ߬ߞߎߟߐ ߟߎ߬ ߣߌ߫ ߡߐ߱ ߟߎ߬ ߘߐ߫ ، ߛߣߐ߬ߡߍ߬ ߟߎ߫ ߟߴߊ߬ߟߎ߬ ߟߊ߫ ߸ ߊ߬ߟߎ߬ ߕߍ߫ ߝߊ߰ߡߎ߲߬ߠߌ߲߬ ߞߍ߫ ߟߊ߫ ߡߍ߲ ߠߎ߬ ߟߊ߫ ، ߢߊ߫ ߟߎ߫ ߦߴߊ߬ߟߎ߫ ߞߎ߲߬ ߸ ߊ߬ߟߎ߬ ߕߍ߫ ߦߋߟߌ߫ ߞߍ߫ ߟߊ߫ ߡߍ߲ ߠߎ߬ ߟߊ߫ ، ߕߟߏ߫ ߟߎ߫ ߦߴߊ߬ߟߎ߫ ߞߎ߲߬ ߊ߬ߟߎ߬ ߕߍ߫ ߡߍ߲ߠߌ߲߫ ߞߍ߫ ߟߊ߫ ߡߍ߲ ߠߎ߬ ߟߊ߫. ߊ߬ߟߎ߯ ߟߋ߬ ߦߏ߫ ߓߌߦߊ߲ ߠߎ߬ ، ߊ߬ߟߎ߫ ߝߊ߲߭ ߝߟߌ߬ߣߍ߲߫ ߏ߬ ߟߎ߬ ߘߌ߫ ߔߊߣߊ߲ߎ߲߫ ، ߒ߬ߓߊ߬ ߏ߬ ߟߎ߫ ߟߋ߫ ߖߊ߲߬ߓߐ߬ߓߊ߮ ߟߎ߫ ߖߍ߬ߘߍߖߍ߬ߘߍ ߘߌ߫ ﴿179﴾

ߕߐ߯ ߢߌߡߊ ߜߊ߲߬ߛߊ߲߫ ߠߋ߬ ߊߟߊ߫ ߟߊ߫ ، ߊߟߎ߫ ߦߴߊ߬ ߞߟߌ߫ ߏ߬ ߟߎ߫ ߟߋ߬ ߟߊ߫ ، ߊߟߎ߫ ߦߋ߫ ߡߐ߱ ߟߎ߬ ߕߏ߫ ߦߋ߲߬ ߡߍ߲ ߠߎ߬ ߦߋ߫ ߡߊ߬ߝߘߏ߬ߟߌ ߞߍ߫ ߟߴߊ߬ ߕߐ߯ ߞߏ ߘߐ߫ ، ߛߋߚߋ߫ ߏ߬ ߟߎ߬ ߓߍߣߊ߫ ߛߊ߬ߙߴߊ߬ߟߎ߬ ߗߋߥߊߟߌ ߟߎ߬ ߟߊ߫ ﴿180﴾

ߡߊ߲߬ߕߏ߲ ߘߏ߫ ߓߍ߫ ߒ߬ ߠߊ߫ ߡߐ߰ ߘߊ߲ߣߍ߲ ߠߎ߬ ߘߐ߫ ߸ ߏ߬ ߟߎ߬ ߦߋ߫ ߞߊ߲ߘߊ߫ ߟߊ߫ ߕߎ߬ߢߊ ߡߊ߬ ߸ ߊ߬ ߣߴߊ߬ߟߎ߬ ߦߴߊ߬ߟߎ߬ ߕߋߟߋ߲߫ ߠߴߊ߬ ߟߊ߫ ﴿181﴾

ߡߍ߲ ߠߎ߫ ߞߏ߬ߣߌ߲ ߞߊ߬ ߒ߬ ߠߊ߫ ߟߝߊߙߌ ߟߎ߬ ߡߊߛߐ߬ߛߐ߫ ߸ ߒ߬ ߘߌߣߵߏ߬ ߟߎ߬ ߟߊߞߘߎ߬ ߦߙߐ ߘߏ߫ ߘߐ߫ ߛߌ߲߯ߜߙߐ߬ ߸ ߊ߬ߟߎ߬ ߦߟߌ߫ ߕߍ߫ ߡߍ߲ ߠߊ߫ ﴿182﴾

ߒ ߧߴߊ߬ߟߎ߫ ߘߏ߲߰ߘߌ߬ ߟߊ߫ ߟߋ߬ ߡߎߣߎ߲߬ ߖߐ߫ ، ߞߏ߬ߣߌ߲߬ ߒ ߘߊ߬ߓߊߙߌ ߞߐ߯ߣߍ߲߫ ߠߋ߫ ߘߋ߬ ﴿183﴾

ߦߊ߯ߟߴߊ߬ߟߎ߬ ߕߴߊ߬ߟߎ߬ ߡߙߌ߫ ߟߊ߫ ߓߊ߬؟ ߞߵߊ߬ ߟߐ߲߫ ߞߏ߫ ߝߊ߬ ߛߌ߫ ߕߍ߫ ߊߟߎ߫ ߞߊ߬ߝߏ߬ߢߐ߲߮ ߘߐ߫ ߸ ߏ߬ ߕߍ߫ ߘߏ߫ ߜߘߍ߫ ߘߌ߫ ߖߊ߬ߛߙߋ߬ߡߊ߬ߟߌ߬ߟߊ߬ ߘߐ߬ߜߍ ߞߐ߫ ﴿184﴾

ߦߊ߯ߟߴߊ߬ߟߎ߬ ߕߍ߫ ߛߊ߲ ߠߎ߬ ߣߌ߫ ߘߎ߱ ߡߙߊ߬ ߡߊ߲߬ߛߊ߬ߦߊ ߦߋ߫ ߟߊ߫ ߓߊ߬؟ ߊ߬ ߣߌ߫ ߊߟߊ߫ ߣߊ߬ ߝߋ߲ ߡߍ߲ ߓߍ߯ ߘߊ߲߫ ߠߊ߫؟ ߊ߬ ߣߌ߫ ߞߏ߫ ߊ߬ ߢߐ߲߰ߘߐ߫ ߊ߬ߟߎ߬ ߛߕߊ ߛߎ߬ߘߎ߲߬ߧߊ߬ߣߍ߲߫ ߣߊ߬ߞߍ߫؟ ߒ߬ߓߵߊ߬ߟߎ߬ ߟߊߕߐ߫ ߞߎߡߊ߫ ߜߘߍ ߢߌ߬ߡߊ߲߫ ߠߋ߬ ߟߊ߫ ߣߌ߲߬ ߞߐ߫ ߡߎ߬ߕߎ߲߬؟ ﴿185﴾

ߊߟߊ߫ ߓߊ߯ ߡߍ߲ ߠߊߝߟߌ߬ ߸ ߞߊ߲ߘߊߓߊ߯ ߕߴߏ߬ ߟߊ߫ ، ߊ߬ ߘߏ߲߬ ߘߴߊ߬ߟߎ߬ ߞߣߐߘߐߝߟߌ߬ߣߍ߲ ߕߏ߫ ߊ߬ߟߎ߬ ߟߊ߫ ߘߊ߲߬ߠߊ߬ߕߊߡߌ߲ ߘߐ߫ ߔߍߘߍ߲ߞߍ߲ߛߍ߲߫ ﴿186﴾

ߊ߬ߟߎ߬ ߦߴߌ ߢߌ߬ߣߌ߲߬ߞߊ߬ ߟߊ߫ ( ߟߐ߬ߓߊ ) ߥߊ߯ߕߌ ߡߊ߬ ߸ ߞߴߏ ߣߊ߬ߕߐ߫ ߞߎߟߎ߲ ߓߍߟߍ߲߫ ߠߊ߫ ߕߎ߬ߡߊ ߢߌ߬ߡߊ߲߫ ߠߋ߬ ߟߊ߫؟ ߊ߬ߟߎ߫ ߖߋ߬ߓߌ߬ ߞߴߏ߬ ߟߐ߲ߠߌ߲ ߦߋ߫ ߒ ߡߊ߰ߙߌ ߟߋ߬ ߦߋ߫ ߸ ߡߐ߰ ߛߌ߫ ߕߍ߫ ߊ߬ ߥߊ߯ߕߌ ߢߊߘߐߜߍ ߦߌ߬ߘߊ߬ ߝߏ߫ ߊ߬ ߖߍ߬ߘߍ ، ߊ߬ ߞߏߢߊ ߖߌߘߊ߲ ߓߘߊ߫ ߥߙߊ߬ ߛߊ߲ ߠߎ߬ ߣߌ߫ ߘߎ߱ ߞߊ߲߬ ߸ ߊ߬ ߘߏ߲߬ ߕߍ߫ ߣߊ߬ ߟߴߊߟߎ߫ ߡߊ߬ ߝߏ߫ ߓߙߊ߬ߒ߬ߘߐ߬ ߓߟߏ ߡߊ߬ ، ߊ߬ߟߎ߫ ߝߊ߲߭ ߦߴߌߟߋ ߢߌ߬ߣߌ߲߬ߞߊ߬ ߟߴߊ߬ ߡߊ߬ ߕߋ߲߬ ߦߏ߫ ߌߟߋ ߦߴߊ߬ ߞߊ߬ߟߊߡߊ߬ ߟߋ߬ ، ߊ߬ߟߎ߫ ߖߋ߬ߓߌ߬ ߞߏ߫ ߊ߬ ߥߊ߯ߕߌ ߟߐ߲ߠߌ߲ ߦߋ߫ ߊߟߊ߫ ߟߋ߬ ߦߋ߫ ، ߓߊ߬ߙߌ߬ ߡߐ߱ ߝߊ߲߬ߓߊ ߟߋ߬ ߡߴߏ߬ ߟߐ߲߫ ﴿187﴾

ߊ߬ ߝߐ߫ ߞߏ߫ ߒߠߋ ߕߍ߫ ߝߏߦߌ߫ ߡߙߊ߬ ߟߊ߫ ߒ ߖߘߍ߬ ߦߋ߫ ߣߝߊ߬ ߣߌ߫ ߡߊ߲߬ߕߙߐ߫ ߘߐ߫ ߸ ߝߏ߫ ߡߍ߲ ߓߊ߯ ߊߟߊ߫ ߘߌߦߊ߫ ، ߣߌ߫ ߒ ߕߎ߲߬ ߞߊ߬ ߞߏ߫ ߘߏ߲߰ߣߍ߲ ߟߐ߲߫ ߸ ߒ ߕߘߍ߬ ߘߌ߫ ߤߙߊ ߟߊߛߌߦߊߦߊ߫ ߒ ߖߘߍ߬ ߦߋ߫ ߸ ߖߎ߯ߡߊ߲߫ ߛߌ߫ ߘߏ߲߬ ߕߎ߲߬ ߕߍ߫ ߡߊ߰ ߒ ߠߊ߫ ߏ߬ ߘߐ߫ ، ߒ߬ߞߊ߬ ߒߠߋ ߕߍ߫ ߘߏ߫ ߜߘߍ߫ ߘߌ߫ ߝߏ߫ ߖߊ߬ߛߙߋ߬ߡߊ߬ߟߌ߬ߟߊ ߣߌ߫ ߘߟߊߝߎߟߌߟߊ ߡߌ߬ߙߌ߲߬ߘߌ߫ ߘߍ߲߬ߞߣߍ߬ߦߊ߬ߣߍ߲ ߠߎ߬ ߦߋ߫ ﴿188﴾

ߊߟߊ߫ ߟߋ߫ ߞߵߊߟߎ߫ ߘߊ߲߫ ߣߌߡߊ߫ ߞߋߟߋ߲߫ ߘߐ߫ ߸ ߞߵߊ߬ ߝߘߎߡߊ ߞߍ߫ ߊ߬ ߖߍ߬ߘߍ ߘߐ߫ ߛߴߊ߬ ߘߴߊ߬ ߛߌ߰ ߏ߬ ߡߊ߬ ، ߊ߬ ߣߵߏ߬ ߞߎ߲߬ߠߊ߬ߓߌߘߌ߲߫ ߠߊ ߸ ߏ ߞߊ߬ ߞߣߐߣߍ߲߫ ߝߍߡߊ߲߫ ߕߊ߬ ߢߍߣߍ߲ߎ߲߫ ߸ ߊ߬ ߕߏ߫ ߘߊ߫ ߕߊ߬ߡߌ߲ߕߊ߬ߡߌ߲ ߞߍ߫ ߟߴߏ߬ ߘߌ߫ ߞߍ߬ߣߍ߲ ، ߊ߬ ( ߓߊ߲߬ߘߊ߬ߣߍ߲ ) ߣߊ߬ߣߍ߲ ߜߟߌߦߊ߫ ߟߊ߫ ߸ ߊ߬ߟߎ߫ ߝߌ߬ߟߊ ߓߍ߯ ߞߵߊ߬ߟߎ߫ ߡߊ߰ߙߌ ߊߟߊ߫ ߞߟߌ߫ ߸ ߞߏ߫ ߣߴߌ ߞߵߊ߲ ߛߐ߫ ( ߘߋ߲߫ ) ߢߣߊߡߊ߫ ߟߊ߫ ߸ ߊ߲ ߘߌ߫ ߞߴߌ ߞߏߢߌߡߊߟߐ߲ߠߊ ߟߎ߬ ߘߏ߫ ߘߌ߫ ߟߋ߬ ߘߍ߯ ﴿189﴾

ߊ߲ ߠߵߏ߬ ߝߌ߬ߟߊ ߛߐ߫ ߟߊ ( ߘߋ߲߫ ) ߢߌߡߊ ߟߊ߫ ߸ ߏ߬ ߟߎ߫ ߞߊ߬ ߜߙߊ߬ߢߐ߲߮ ߠߎ߬ ߞߍ߫ ߊߟߊ߫ ߟߴߊ߬ߟߎ߬ ߛߐ߫ ߝߋ߲ ߏ߬ ߘߐ߫ ، ߊߟߊ߫ ߘߏ߲߬ ߞߘߐߕߊ߬ߣߍ߲߫ ߊ߬ߟߎ߬ ߟߊ߫ ߜߙߊ߬ߢߐ߲߰ߦߊ߬ ߝߋ߲ ߏ߬ ߟߎ߫ ߡߊ߬ ߞߟߋ߫ ﴿190﴾

ߌ߬ߦߏ߯ ߊ߬ߟߎ߬ ߘߌ߫ ߝߋ߲߫ ߜߙߊ߬ ( ߊߟߊ߫ ߡߊ߬ ) ߸ ߡߍ߲ ߕߍ߫ ߝߏߦߌ߬ ߘߊ߲߫ ߠߊ߫ ߝߏ߫ ߊ߬ߟߎ߫ ߖߍ߬ߘߍ ߟߋ߬ ߘߊ߲ߣߍ߲߫؟ ﴿191﴾

ߊ߬ߟߎ߬ ߕߍ߫ ߘߍ߬ߡߍ߲߬ߠߌ߲߬ ߟߊߣߐ߬ ߟߴߊ߬ߟߎ߬ ߦߋ߫ ߸ ߊ߬ߟߎ߫ ߘߏ߲߬ ߕߍ߫ ߊ߬ߟߎ߫ ߖߘߍ߬ ߡߊߘߍ߬ߡߍ߲߬ ߠߊ߫؟ ﴿192﴾

ߌ ߓߊ߯ ߊ߬ߟߎ߬ ߞߟߌ߫ ߞߊ߲ߘߦߊ ߡߊ߬ ߸ ߊ߬ߟߎ߬ ߕߍ߫ ߊߟߎ߫ ߟߊߓߊ߬ߕߏ߬ ، ߊߟߎ߫ ߞߵߊ߬ߟߎ߬ ߞߟߌ߫ ߓߊ߬ ߸ ߥߟߴߊߟߎ߫ ߡߊߞߎ߲߬ߣߍ߲ ߕߏ߫ ߘߊ߫ ߓߊ߬ ߸ ߏ߬ ߓߍ߯ ߞߊ߫ ߞߊ߲߫ ߊߟߎ߫ ߡߊ߬ ﴿193﴾

ߊߟߎ߫ ߦߋ߫ ߡߍ߲ ߠߎ߬ ߞߟߌ߫ ߟߊ߫ ߞߵߊߟߊ߫ ߕߏ߫ ߸ ߏ߬ ߟߎ߬ ߦߋ߫ ߖߐ߲߭ ߠߎ߫ ߟߋ߬ ߘߌ߫ ߦߏ߫ ߊߟߎ߫ ߦߋ߫ ߢߊ ߡߍ߲ ، ߒ߬ߓߵߊߟߎ߫ ߦߴߊ߬ߟߎ߬ ߞߟߌ߫ ߓߊ߫ ߊ߬ߟߎ߬ ߦߴߊߟߎ߫ ߖߋ߬ߓߌ߬ ߸ ߣߴߊߟߎ߫ ߞߍ߫ ߘߊ߫ ߕߎ߬ߢߊ߬ ߕߌ߯ ߟߎ߫ ߘߌ߫ ﴿194﴾

ߦߊ߯ߟߊ߫ ߛߋ߲߬ ߠߎ߫ ߟߴߊ߬ߟߎ߬ ߟߊ߫ ߓߊ߬ ߸ ߊ߬ߟߎ߬ ߦߋ߫ ߕߊ߯ߡߊ߫ ߟߊ߫ ߡߍ߲ ߠߎ߬ ߟߊ߫؟ ، ߥߟߊ߫ ߓߟߏ߫ ߟߎ߫ ߟߴߊ߬ߟߎ߬ ߟߊ߫ ߓߊ߬ ߸ ߊ߬ߟߎ߬ ߦߋ߫ ߡߌ߬ߘߊ߬ߟߌ ߞߍ߫ ߟߊ߫ ߡߍ߲ ߠߎ߬ ߟߊ߫؟ ، ߤߊߡߊ߲ߕߍ߫ ߢߊ߫ ߟߎ߫ ߟߴߊ߬ߟߎ߬ ߟߊ߫ ߓߊ߬ ߸ ߊ߬ߟߎ߬ ߦߋ߫ ߦߋߟߌ ߞߍ߫ ߟߊ߫ ߡߍ߲ ߠߎ߬ ߟߊ߫؟ ، ߥߟߊ߫ ߕߟߏ߫ ߟߎ߫ ߟߴߊ߬ߟߎ߬ ߟߊ߫ ߸ ߊ߬ߟߎ߬ ߦߋ߫ ߡߍ߲ߠߌ߲ ߞߍ߫ ߟߊ߫ ߡߍ߲ ߠߎ߬ ߟߊ߫؟ ، ߒ߬ߓߵߊ߬ ߝߐ߫ ߞߏ߫ ߊߟߴߊߟߎ߫ ߜߙߊ߬ߢߐ߲߮ ߠߎ߬ ߞߟߌ߫ ߞߊ߬ ߒ ߘߓߊ߬ߙߌ߬ ߝߛߊߦߌ߫ ߸ ߊߟߎ߫ ߝߊ߲߭ ߞߊ߫ ߒ ߘߏ߲߰ߘߌ߫ ﴿195﴾

ߒߠߋ ߟߊ߫ ߞߏߕߌ߮ ߊߟߊ߫ ߟߋ߬ ߘߌ߫ ߸ ߡߍ߲ ߞߊ߬ ߟߍߙߊ ߟߊߖߌ߰ ߸ ߏ߬ ߟߋ ߘߏ߲߬ ߦߋ߫ ߡߐ߰ ߢߌߡߊ ߟߎ߬ ߟߊ߫ ߞߏߕߌ߯ߦߊ ߟߊ߫ ﴿196﴾

ߊߟߎ߫ ߦߋ߫ ߡߍ߲ ߠߎ߬ ߞߟߌ߫ ߟߊ߫ ߞߵߊߟߊ߫ ߕߏ߫ ߸ ߏ߬ ߟߎ߬ ߕߍ߫ ߛߴߊߟߎ߫ ߘߍ߬ߡߍ߲߬ ߠߊ߫ ߸ ߊ߬ߟߎ߬ ߕߍ߫ ߛߴߊ߬ߟߎ߫ ߖߍ߬ߘߍ߫ ߘߍ߬ߡߍ߲߬ ߠߊ߫ ﴿197﴾

ߌ ߓߊ߯ ߊ߬ߟߎ߬ ߞߟߌ߫ ߞߊ߲ߘߦߊ ߡߊ߬ ߸ ߊ߬ߟߎ߬ ߕߍ߫ ߡߍ߲ߠߌ߲߫ ߞߍ߫ ، ߌ ߦߴߊ߬ߟߎ߬ ߢߊ ߥߛߎߣߍ߲ ߠߋ߬ ߦߋ߫ ߟߴߌ ߘߐ߫ ߸ ߞߵߊ߬ ߕߘߍ߬ ߊ߬ߟߎ߬ ߕߍ߫ ߦߋߟߌ߫ ߞߍ߫ ߟߊ߫ ﴿198﴾

ߌ ߓߟߏߞߍ߫ ߜߊ߲ߒߞߎ߲ߠߊ ߟߊ߫ ߸ ߌ ߦߋ߫ ߖߡߊ߬ߙߌ߬ߟߌ ߞߍ߫ ߟߊ߲߬ߘߊ߬ ߡߊߟߐ߲ߣߍ߲ ߠߊ߫ ߸ ߊ߬ ߣߴߌ ߦߴߌ ߞߐߘߏ߲߬ ߞߏߟߐ߲ߓߊߟߌ ߟߎ߬ ߟߊ߫ ﴿199﴾

ߣߌ߫ ߜߍ߬ߘߍ ߟߊ߫ ߘߐ߬ߛߎ߬ߟߌ߬ߟߊ ߞߵߌ ߘߐߛߎ߫ ߸ ߌ ߦߋ߫ ߕߊ߲߬ߞߊ߬ ߟߊ߬ߢߌߣߌ߲ ߞߍ߫ ߊߟߊ߫ ߟߊ߫ ߸ ߓߊ ߏ߬ ߦߋ߫ ߡߍ߲ߠߌ߲ߠߊ߫ ߘߌ߫ ߸ ߊ߬ ߦߋ߫ ߟߐ߲ߠߌ߲ߠߊ߫ ߘߌ߫ ﴿200﴾

ߡߍ߲ ߠߎ߬ ߦߴߊ߬ߟߎ߬ ߝߊ߲ߕߊ߲߬ߞߊ߬ ߟߊ߫ ߸ ߣߌ߫ ( ߡߐߣߍ ߘߐ߫ ) ߘߌߡߌ߲߫ ߞߏߣߍ߲߫ ߡߊ߰ ߘߴߊ߬ߟߎ߬ ߟߊ߫ ߞߊ߬ ߝߘߊ߫ ߜߍ߬ߘߍ ߟߊ߫ ߸ ߊ߬ߟߎ߬ ߘߴߊ߬ߟߎ߫ ߖߊ߲߬ߓߌ߬ߟߊ߬ ، ߘߊ߬ߡߊ߲߬ߛߊ߫ ߊ߬ߟߎ߬ ߤߊ߲ߞߟߌ ߘߴߊ߬ߟߎ߫ ߖߘߍ߬ ߛߐ߫ ﴿201﴾

ߊ߬ߟߎ߬ ߓߊߘߋ߲ ߠߎ߫ ߟߴߊ߬ߟߎ߬ ߖߘߌ߫ ߟߊ߫ ߝߌ߬ߟߌ ߘߐ߫ ߸ ߊ߬ߟߎ߫ ߘߏ߲߬ ߕߍ߫ ߘߛߍ߫ ߟߴߊ߬ߟߎ߬ ߟߊ߫ ﴿202﴾

ߣߴߌ ߡߊ߫ ߣߵߊ߬ߟߎ߫ ߡߊ߬ ߡߊ߲߬ߕߊߣߌ߲ ߘߌ߫ ߸ ߊ߬ߟߎ߬ ߘߴߊ߬ ߝߐ߫ ߞߏ߫ ߥߟߊߞߏ߫ ߌ ߕߘߍ߬ ߊ߬ ߛߎߥߊ߲ߘߌ߫ ߌ ߖߘߍ߬ ߦߋ߫ ، ߊ߬ߟߎ߫ ߖߋ߬ߓߌ߬ ߞߏ߫ ߦߟߌߘߏ߲ ߡߍ߲ ߞߍ߫ ߟߊ߫ ߒߠߋ ߟߊ߫ ߞߊ߬ ߝߘߊ߫ ߒ ߡߊ߰ߙߌ ߟߊ߫ ߸ ߒ ߧߴߏ߬ ߟߋ ߘߐߙߐ߲߫ ߠߊߓߊ߬ߕߏ߬ ߟߊ߫ ߸ ߏ߬ ߘߏ߲߬ ߦߋ߫ ߢߟߊߞߊ߫ ߞߏ߫ ߟߎ߫ ߟߋ߬ ߘߌ߫ ߞߊ߬ ߝߘߴߊߟߊ߫ ߟߊ߫ ، ߊ߬ ߣߌ߫ ߞߊ߲ߘߦߊ ߣߌ߫ ߤߌߣߊ ߟߋ߬ ߡߌ߬ߙߌ߲߬ߘߌ߫ ߘߍ߲߬ߞߣߍ߬ߦߊ߬ߣߍ߲ ߠߎ߬ ߦߋ߫ ﴿203﴾

ߣߌ߫ ߞߎ߬ߙߊ߬ߣߊ ߞߊ߬ߙߊ߲ ߞߍ߫ ߘߴߌߘߐ߫ ߸ ߊߟߎ߫ ߦߴߊߟߎ߫ ߕߟߏߡߊߟߐ߬ ߊ߬ ߟߊ߫ ߞߵߊߟߎ߫ ߡߊߞߎ߲߬ ߖߙߌ߫ ߸ ߖߐ߲߬ߛߊ߫ ߤߌߣߊ߫ ߘߌ߫ ߞߍ߫ ߊߟߎ߫ ߟߊ߫ ﴿204﴾

ߌ ߦߋ߫ ߕߏ߫ ߌ ߡߊ߰ߙߌ ߞߏߝߐ߫ ߟߊ߫ ߌ ߣߌߘߐ߫ ߖߘߍ߬ߡߊ߬ߞߌߣߌ߲ߞߌߣߌ߲ ߣߌ߫ ߛߌߟߊ߲ ߘߴߌ ߘߊߞߘߐ߫ ߛߐ߰ߡߊ߬ߘߊ ߣߌ߫ ߥߎ߬ߙߊ߬ߘߊ ߟߊ߫ ، ߞߏ߬ߣߌ߲߬ ߌ ߞߊߣߊ߬ ߞߍ߫ ߖߊ߲߬ߓߐ߬ߟߊ ߟߎ߬ ߝߋ߲߫ ߘߌ߫ ߘߋ߬ ﴿205﴾

(ߞߋ߲ߛߐ߲ ) ߡߍ߲ ߠߎ߬ ߦߴߌ ߡߊ߰ߙߌ ߓߘߊ ߸ ߏ߬ ߟߎ߬ ߕߍ߫ ߊ߬ߟߎ߫ ߖߘߍ߬ߘߐߓߏ߲߬ߧߊ߬ ߟߴߊ߬ ߓߊ߬ߕߏ ߡߊ߬ ߸ ߊ߬ߟߎ߫ ߘߏ߲߬ ߦߴߊ߬ ߛߊߣߌ߲ߧߊ ߝߐ߫ ߟߊ߫ ߸ ߊ߬ ߣߴߊ߬ߟߎ߬ ߦߋ߫ ߕߌ߲ߓߌߘߌ߲ ߞߍ߫ ߟߴߊ߬ ߦߋ߫ ﴿206﴾

ߊ߬ߟߎ߬ ߦߴߌ ߢߌ߬ߣߌ߲߬ߞߊ߬ ߟߊ߫ ߞߐ߲ߛߐ߲ ߠߎ߫ ߡߊ߬ ، ߊ߬ߟߎ߫ ߖߋ߬ߓߌ߬ ߞߏ߫ ߞߐ߲ߛߐ߲ ߠߎ߬ ߦߋ߫ ߊߟߊ߫ ߣߌ߫ ߞߋߟߊ ߟߋ߬ ߕߊ ߘߌ߫ ، ߒ߬ߓߵߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߞߵߊߟߎ߫ ߕߍ ߘߐߓߍ߲߬ ߸ ߊ߬ ߣߌ߫ ߞߵߊߟߊ߫ ߣߴߊ߬ ߟߊ߫ ߞߋߟߊ ߞߊ߲ߡߌ߬ߘߊ߬ ، ߣߴߊߟߎ߫ ߞߍ߫ ߘߊ߫ ߘߍ߲߬ߞߣߍ߬ߦߊ߬ߓߊ߯ ߟߎ߫ ߘߌ߫ ﴿1﴾

ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߋ߫ ߡߐ߰ ߟߎ߫ ߟߋ߬ ߘߌ߫ ߸ ߊߟߊ߫ ߓߊ߯ ߞߏߝߐ߫ ߡߍ߲ ߠߎ߫ ߛߣߐ߬ߡߍ ߦߋ߫ ߛߌߟߊ߲߫ ߠߊ߫ ، ߣߴߊ߬ ߟߊ߫ ߟߝߊߙߌ ߟߎ߫ ߘߏ߲߬ ߞߊ߬ߙߊ߲߬ ߘߴߊ߬ߟߎ߬ ߦߋ߫ ߸ ߏ߬ ߘߴߊ߬ߟߎ߬ ߟߊ߫ ߘߍ߲߬ߞߣߍ߬ߦߊ ߡߊߞߊ߬ߝߏ߬ ، ߊ߬ ߣߴߊ߬ߟߎ߬ ߦߴߊ߬ߟߎ߫ ߛߍ߲߬ߓߍ߬ ߟߴߊ߬ߟߎ߫ ߡߊ߰ߙߌ ߟߋ߬ ߘߐߙߐ߲߫ ߠߊ߫ ﴿2﴾

ߏ߬ ߟߎ߫ ߟߋ߬ ߛߊߟߌ ߟߐ߬ ߟߊ߫ ، ߊ߬ ߣߴߊ߲ ߞߵߊ߬ߟߎ߫ ߤߊ߬ߙߌ߬ߖߍ߰ ߝߋ߲ ߡߍ߲ ߠߊ߫ ߸ ߊ߬ߟߎ߬ ߦߋ߫ ߖߘߍ߬ߡߊ߬ߓߐ ߞߍ߫ ߟߴߏ߬ ߘߐ߫ ﴿3﴾

ߒ߬ߓߊ߬ ߏ߬ ߟߎ߫ ߟߋ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߘߌ߫ ߕߎ߬ߢߊ ߖߊ߯ߕߋ ߟߊ߫ ، ߡߐ߬ߟߐ߲߬ ߠߎ߫ ߟߴߏ߬ ߟߎ߬ ߢߍ߫ ߊ߬ߟߎ߫ ߡߊ߰ߙߌ ߓߘߊ ، ߊ߬ ߣߌ߫ ߦߝߊ߬ߟߌ ߣߌ߫ ߤߊ߬ߙߌ߬ߖߍ߯ ߞߊ߬ߡߙߊ߬ߒߞߋ ﴿4﴾

ߊ߰ ߟߋ߬ ߖߐ߫ ߦߏ߫ ߌ ߡߊ߰ߙߌ ߞߵߌ ߟߊߓߐ߫ ߌ ߟߊ߫ ߓߏ߲ ߠߊ߫ ߕߎ߬ߢߊ ߟߊ߫ ߢߊ ߡߍ߲ ߸ ߞߵߊ߬ ߕߘߍ߬ ߘߍ߲߬ߞߣߍ߬ߦߊ߬ߓߊ߮ ߝߊ߲߬ ߞߋߟߋ߲߫ ߓߍ߫ ߸ ‹ ߓߐߟߌ › ߜߏߡߊ߲ߓߊ ߟߴߏ߬ ߟߎ߬ ߦߋ߫ ﴿5﴾

ߏ߬ ߟߎ߫ ߟߋ߬ ߌ ߘߊߘߐߖߊ߬ ߟߊ߫ ߕߎ߬ߢߊ ߞߊ߲߬ ߝߘߌߝߘߌ߫ ߊ߬ ߟߊ߲ߞߣߍߡߊߣߍ߲ ߞߐ߫ ߸ ߞߵߊ߬ ߞߍ߫ ߦߏ߫ ߊ߬ߟߎ߫ ߞߏ߬ߙߏ߲߬ߞߏ߬ߙߏ߲߬ߕߐ߫ ߞߊ߬ ߥߊ߫ ߛߊ߬ߦߊ ߟߋ߫ ߡߊ߬ ߸ ߞߵߊ߬ ߕߘߍ߬ ߊ߬ߟߎ߬ ߢߊ߯ ߊ߬ ߟߊ߫ ߜߍ ߘߐ߫ ﴿6﴾

ߕߎ߬ߡߊ ߏ߬ ߟߋ ߟߊ߫ ߸ ߊߟߊ߫ ߞߵߊߟߎ߫ ߦߟߌߡߊߘߌߦߊ߫ ߖߊ߬ߡߊ߫ ߝߌ߬ߟߊ ߞߋߟߋ߲߫ ߠߊ߫ ߸ ߞߵߏ߬ ߘߴߊߟߎ߫ ߡߊ߬ ، ߊߟߎ߫ ߘߏ߲߬ ߕߍ߬ߘߍ߫ ߊ߬ ߞߊ߬ߣߌ߲߬ ߠߊ߫ ߞߏ߫ ߡߙߊ߬ߒ߬ߡߊ߬ߝߋ߲߬ ߕߌ߮ ߕߊ߬ߣߊ ߟߎ߫ ߟߋ߬ ߦߋ߫ ߞߍ߫ ߊߟߎ߫ ߕߊ ߘߌ߫ ، ߞߵߊ߬ ߛߐ߬ߘߐ߲߬ ߊߟߊ߫ ߦߴߊ߬ ߝߍ߬ ߟߋ߬ ߞߊ߬ ߕߎ߬ߢߊ ߓߊ߲ߓߊ߲߫ ߊ߬ ߟߊ߫ ߞߎߡߊ ߟߎ߬ ߟߊ߫ ߸ ߊ߬ ߣߌ߫ ߞߊ߬ ߓߊ߲߬ߓߊ߮ ߟߎ߬ ߞߐ ߕߍ߰ ߊ߬ ߟߊ߫ ߜߊߘߌ߫ ﴿7﴾

ߛߴߊ߬ ߘߌ߫ ߕߎ߬ߢߊ ߕߏ߫ ߊ߬ ߢߊ ߡߊ߬ ߸ ߞߊ߬ ߥߎߦߊ ߟߊߥߎ߬ߦߊ߬ ߤߊߟߴߏ߬ ߜߏߦߊ߫ ߘߊ߫ ߛߐ߲߬ߡߊ ߟߎ߬ ߦߋ߫ ﴿8﴾

ߕߎ߬ߡߊ ߏ߬ ߟߋ ߟߊ߫ ߸ ߊߟߎ߫ ߞߊ߬ ߘߍ߬ߡߍ߲߬ߠߌ߲߬ ߢߌߣߌ߲ ߞߍ߫ ߊߟߎ߫ ߡߊ߰ߙߌ ߟߊ߫ ، ߊ߬ ߘߏ߲߬ ߞߵߊߟߎ߫ ߟߊߡߌ߬ߘߊ߬ ߸ ߞߏ߫ ߒ ߘߴߊߟߎ߫ ߡߊߜߍ߲߫ ߞߋ߲ߛߐ߲߫ ( ߡߟߍ߬ߞߊ ) ߥߊ߯ ߞߋߟߋ߲߫ ߕߎ߲߰ߣߍ߲߫ ߢߐ߲߰ߠߊ ߟߊ߫ ﴿9﴾

ߊߟߊ߫ ߡߴߏ߬ ߞߍ߫ ߝߏߦߌ߬ ߟߊ߫ ߝߏ߫ ߘߟߊߝߎߟߌ ߸ ߊ߬ ߣߌ߫ ߛߴߊߟߎ߫ ߛߣߐ߬ߡߍ ߟߎ߬ ߘߌ߫ ߡߝߊ߫ ߏ߬ ߟߊ߫ ، ߘߍ߬ߡߍ߲߬ߠߌ߲ ߘߏ߲߬ ߕߍ߫ ߓߐ߫ ߟߊ߫ ߦߙߐ߫ ߛߌ߫ ߝߏ߫ ߊߟߊ߫ ߓߘߊ ، ߓߊߏ߬ ߊߟߊ߫ ߦߋ߫ ߣߌ߬ߣߌ߬ߟߊ߫ ߘߌ߫ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿10﴾

ߕߎ߬ߡߊ ߡߍ߲ ߊߟߊ߫ ߞߵߊߟߎ߫ ߞߎ߲߬ߠߊ߬ߓߌߘߌ߲߫ ߖߌ߲߬ߞߐ߲ ߠߊ߫ ߣߊߟߌ߬ߡߎ߲߫ ߞߎ߲߬ߠߊ߬ߝߎߟߋ߲ ߘߌ߫ ߸ ߞߵߏ߬ ߝߘߴߊ߬ ߖߍ߬ߘߍ ߟߊ߫ ، ߊ߬ ߣߴߊ߬ ߞߊ߬ ߖߌ ߟߊߖߌ߰ ߊߟߎ߫ ߡߊ߬ ߞߊ߬ ߓߐ߫ ߡߐ߲ߕߐ߲ ߘߐ߫ ، ߛߴߊ߬ ߘߴߊߟߎ߫ ߛߊߣߌ߲ߧߊ߫ ߏ߬ ߟߊ߫ ߸ ߊ߬ ߣߌ߫ ߞߊ߬ ߜߍ߬ߘߍ ߟߊ߫ ߞߛߐ ߡߊߓߐ߫ ߊߟߎ߫ ߟߊ߫ ߸ ߊ߬ ߣߌ߫ ߛߴߊ߬ ߘߴߊߟߎ߫ ߖߎ߬ߛߎ ߟߎ߬ ߟߊߜߟߍ߬ߦߊ߫ ߸ ߊ߬ ߣߌ߫ ߞߊ߬ ߛߋ߲߭ ߠߎ߬ ߓߊ߲ߓߊ߲߫ ߊ߬ ߟߊ߫ ﴿11﴾

ߕߎ߬ߡߊ ߡߍ߲ ߌ ߡߊ߰ߙߌ ߞߊ߬ ߦߟߌߘߏ߲ ߞߍ߫ ߞߋ߲ߛߐ߲ (ߡߟߍ߬ߞߊ) ߟߎ߬ ߟߊ߫ ߸ ߞߏ߫ ߒ ߧߴߊߟߎ߫ ߝߍ߬ ، ߊߟߎ߫ ߦߋ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߞߐߡߊߓߌ߲ߓߌ߲߫ ، ߒߠߋ ߖߍ߬ߘߍ ߓߍߣߊ߬ ߛߌߟߊ߲ ߠߊߝߌ߬ߟߌ߫ ߓߊ߲߬ߓߊ߮ ߟߎ߫ ߛߣߐ߬ߡߍ ߟߎ߬ ߘߐ߫ ، ߒ߬ߓߵߊߟߎ߫ ߥߊ߫ ߖߎ߮ ߟߎ߫ ߜߊ߬ߛߌ߫ ߊ߬ߟߎ߬ ߞߊ߲ ߠߎ߫ ߞߊ߲߬ ߸ ߊ߬ ߣߌ߫ ߊߟߎ߫ ߦߴߊ߬ߟߎ߬ ߓߟߏߞߏ߬ߋ߬ߣߍ߲ ߞߋ߬ߟߋ߲߬ߞߋ߬ߟߋ߲߬ߣߊ ߓߍ߯ ߜߊ߬ߛߌ߬ ﴿12﴾

ߏ߬ ߘߏ߲߬ ߞߎ߲߭ ߠߋ߬ ߸ ߓߊߏ߬ ߊ߬ߟߎ߫ ߞߊ߬ ߕߍߜߟߍߦߊ ߟߋ߫ ߟߐ߬ ߊߟߊ߫ ߣߴߊ߬ ߟߊ߫ ߞߋߟߊ ߡߊ߬ ، ߡߍ߲ ߘߏ߲߬ ߓߊ߯ ߕߍߜߟߍߦߊ ߟߐ߬ ߊߟߊ߫ ߣߴߊ߬ ߟߊ߫ ߞߋߟߊ ߡߊ߬ ߸ ߒ߬ߓߵߊߟߊ߫ ߦߋ߫ ߓߌ߲߬ߓߊ߬ߏ߬ ߜߍߟߍ߲ ߕߌ߱ ߟߋ߬ ߘߌ߫ ﴿13﴾

ߒ߬ߓߊ߬ ߏ߬ ߡߍ߲ ߏ߬ ߘߌ߫ ߸ ߞߏ߫ ߊߟߎ߫ ߦߴߏ߬ ߡߊߜߙߏ߬ ߡߎߣߎ߲߬ ߸ ߓߊ ߕߊ ߖߊ߲߰ߞߕߊ ߟߋ߫ ߛߌ߰ߣߍ߲߫ ߓߊ߲߬ߓߊ߮ ߟߎ߬ ߢߍ߫ ﴿14﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߣߴߊߟߎ߫ ߓߍ߲߬ ߘߊ߫ ߓߊ߲߬ߓߊ߮ ߟߎ߫ ߖߊ߬ߡߊ ߘߌ߫ ߊ߬ߟߎ߬ ߦߋ߫ ߞߟߍ߬ߡߊ߬ߕߊ߯ߡߊ ߟߊ߫ ߸ ߊߟߎ߫ ߞߊߣߵߊߟߎ߫ ߞߐߟߐ߬ ߊ߬ߟߎ߬ ߟߊ߫ ߘߋ߬ ﴿15﴾

ߡߍ߲ ߓߊ߯ ߊ߬ ߞߐߟߐ߬ ߏ߬ ߟߎ߬ ߟߊ߫ ߏ߬ ߟߏ߲ ߸ ߝߏ߫ ߣߴߊ߬ ߞߍ߫ ߘߴߊ߬ ߖߍ߬ߘߍ߫ ߦߟߍ߬ߡߊ߲߬ ߠߊ߫ ߞߍ߬ߟߍ ߞߊ߲ߡߊ߬ ߸ ߥߟߴߊ߬ ߦߋ߫ ߞߍ߫ ߊ߬ ߝߙߊ߬ ߟߊ߫ ߖߊ߬ߡߊ ߘߏ߫ ߟߊ߫ ، ߣߴߏ߬ ߕߍ߫ ߊ߬ ߓߘߴߊ߬ ߢߎ߲߫ ߊߟߊ߫ ߟߊ߫ ߛߊ߬ߙߌ ߟߊ߫ ، ߏ߬ ߘߐ߫ ߸ ߊ߬ ߡߊߞߍ߫ ߦߌߟߊ ߟߋ߬ ߞߍߕߐ߫ ߔߊߦߌߔߊߦߌ ߘߌ߫ ، ߟߊ߬ߓߊ߲߬ ߦߙߐ߬ ߖߎ߮ ߟߴߏ߬ ߘߌ߫ ߞߟߋ߫ ﴿16﴾

ߊߟߎ߫ ߡߊ߫ ߖߎ߮ ߟߎ߫ ߝߊ߰ ߘߋ߬ ، ߓߊ߬ߙߌ߬ ߊߟߊ߫ ߟߋ߫ ߞߵߊ߬ߟߎ߫ ߝߊ߰ ، ߌ ߞߊ߬ ߝߏ߬ߦߌ߬ߟߌ ߡߍ߲ ߞߍ߫ ߸ ߌ ߡߴߊ߬ߟߎ߬ ߓߏ߲߫ ߘߋ߬ ߸ ߓߊ߬ߙߌ߬ ߊߟߊ߫ ߟߋ߫ ߞߊ߬ ߓߏ߲ߠߌ߲ ߞߍ߫ ، ߏ߬ ߞߎ߲߭ ߠߋ߬ ߛߴߊߟߊ߫ ߘߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߞߘߐߓߐ߫ ߸ ߞߘߐߓߐߟߌ߫ ߢߌߡߊ ߟߊ߫ ، ߖߊ߯ߕߋ߬ ߸ ߊߟߊ߫ ߦߋ߫ ߡߍ߲ߠߌ߲ߠߊ߫ ߘߌ߫ ߸ ߊ߰ ߟߐ߲ߠߌ߲ߠߊ߫ ߘߌ߫ ﴿17﴾

ߏ ߘߏ߲߬ ߞߎ߲߭ ߠߋ߬ ߸ ߞߏ߫ ߊߟߊ߫ ߟߋ߫ ߓߊ߲߬ߓߊ߮ ߟߎ߫ ߘߊ߬ߓߊߙߌ ߟߊ߲߰ߝߏ߬ߓߊ߮ ߘߌ߫ ﴿18﴾

ߣߴߊߟߎ߫ ߦߋ߫ ߟߊ߬ߥߛߊ ߟߋ߬ ߢߌߣߌ߲߫ ߠߊ߫ ߸ ߟߊ߬ߥߛߊ ߟߋ߫ ߣߊ߬ߣߴߊߟߎ߫ ߡߊ߬ ߣߌ߲߬ ، ߣߴߊߟߎ߫ ߘߏ߲߬ ߘߊ߲߬ ߘߊ߫ ߸ ߏ߬ ߟߋ ߘߌߡߊ߲߫ ߊߟߎ߫ ߟߊ߫ ، ߓߊ߬ߙߌ߬ ߣߴߊߟߎ߫ ߞߵߊߟߎ߫ ߣߐ߬ߡߊߛߊ߬ߦߌ߬ ߸ ߒ߬ ߝߣߊ߫ ߘߌ߫ ߣߐ߬ߡߊߛߊ߬ߦߌ߬ ، ߊߟߎ߫ ߟߊ߫ ߖߡߊ߬ߦߊ ߘߏ߲߬ ߕߍ߫ ߝߏߦߌ߫ ߢߵߊߟߎ߫ ߡߊ߬ ߏ߬ ߘߐ߫ ߸ ߤߊߟߌ߫ ߊ߬ ߛߌߦߊߦߊ߫ ߘߊ߫ ߢߊ-ߊ-ߢߊ߫ ، ߓߊ ߊߟߊ߫ ߦߋ߫ ߘߍ߲߬ߞߣߍ߬ߦߊ߬ߓߊ߮ ߟߎ߫ ߟߋ߫ ߝߍ߬ ﴿19﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߯ ߊߟߊ߫ ߣߴߊ߬ ߟߊ߫ ߞߋߟߊ ߞߊ߲ ߡߌ߬ߘߊ߬ ، ߊߟߎ߫ ߞߊߣߵߊߟߎ߫ ߞߐߟߐ߬ ߊ߬ ߟߊ߫ ߘߋ߬ ߞߵߊ߬ ߕߘߍ߬ ߊߟߎ߫ ߕߟߏ߫ ߊ߬ ߞߎߡߊ߫ ߞߊ߲ ߠߊ߫ ﴿20﴾

ߊߟߎ߫ ߘߏ߲߬ ߞߊߣߵߊߟߎ߫ ߖߘߍ߬ ߞߍ߫ ߦߏ߫ ߡߍ߲ ߠߎ߫ ߞߵߊ߬ ߝߐ߫ ߸ ߞߏ߫ ߊ߲ ߓߘߊ߫ ߡߍ߲ߠߌ߲ ߞߍ߫ ߸ ߞߵߊ߬ ߕߍ߬ߘߍ߫ ߊ߬ߟߎ߬ ߕߍ߫ ߡߍ߲ߠߌ߲߫ ߛߌ߫ ߞߍ߫ ߟߊ߫ ﴿21﴾

ߡߊ߬ߛߍ߲߬ߛߍ߲߬ߓߊ߮ ߘߐ߫ ߖߎ߯ߡߊ߲ ߊߟߊ߫ ߓߟߏ߫ ߸ ߏ߬ ߟߋ ߛߌ߲ߛߌ߲ߓߊ߫ ߓߏߓߏ ߟߎ߬ ߘߌ߫ ߸ ߡߍ߲ ߠߎ߬ ߕߍ߫ ߝߏߦߌ߬ ߤߊ߲ߞߟߌߡߦߊ߫ ߟߊ߫ ﴿22﴾

ߣߌ߫ ߊߟߊ߫ ߕߎ߲߬ ߞߊ߬ ߤߙߊ߫ ߟߐ߲߫ ߊ߬ߟߎ߬ ߟߊ߫ ߞߏ ߘߐ߫ ߸ ߊ߬ ߕߘߍ߬ ߘߴߊ߬ߟߎ߬ ߕߏ߫ ߊ߬ߟߎ߬ ߦߋ߫ ߡߍ߲ߠߌ߲ ߞߍ߫ ، ߞߏ߬ߣߌ߲߬ ߤߊߟߵߊ߬ ߕߎ߲߬ ߞߵߊ߬ ߕߏ߫ ߊ߬ߟߎ߬ ߦߋ߫ ߡߍ߲ߠߌ߲ ߞߍ߫ ߸ ߊ߬ߟߎ߫ ߕߘߍ߬ ߘߴߊ߬ߟߎ߫ ߡߎ߬ߙߎ߲߬ߘߎ߫ ߞߵߊ߬ߟߎ߬ ߞߐߘߏ߲߬ ߔߏ߲߫ ﴿23﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߯ ߊߟߊ߫ ߣߌ߫ ߞߋߟߊ ( ߟߊ߫ ߞߟߌߟߌ ) ߟߊߡߌ߬ߘߊ߬ ߣߴߊ߬ߟߎ߫ ߞߵߊߟߎ߫ ߞߟߌ߫ ߊߟߎ߫ ߟߊߢߣߊߡߦߊ߫ ߞߏ ߡߊ߬ ، ߊߟߎ߫ ߘߏ߲߬ ߦߴߊ߬ ߟߐ߲߫ ߞߏ߫ ߊߟߊ߫ ߟߋ߫ ߘߏ߲߬ ߠߊ߫ ߡߐ߱ ߣߴߊ߬ ߛߣߐ߬ߡߍ ߕߍ߫ ، ߊ߬ ߣߌ߫ ߞߏ߫ ߊߟߎ߫ ߣߊ߬ߕߐ߬ ߟߊߘߍ߬ ߟߴߊ߬ߟߋ ߟߋ߫ ߣߊ߰ߟߊ߫ ﴿24﴾

ߊߟߎ߫ ߦߴߊߟߎ߫ ߝߊ߲ߕߊ߲߬ߞߊ߫ ߥߊ߬ߥߎߟߋ ߡߊ߬ ߘߋ߬ ، ߓߊ ߏ߬ ߕߴߊ߬ ߕߍ߰ߓߊ߮ ߟߎ߬ ߘߐߙߐ߲߫ ߛߐ߬ߘߐ߲߬ ߠߴߊߟߎ߫ ߘߐ߫ ، ߊߟߎ߫ ߘߏ߲߬ ߦߴߊ߬ ߟߐ߲߫ ߞߏ߫ ߊߟߊ߫ ߟߋ߫ ߖߊ߲߰ߞߕߊ߬ ߜߍߟߍ߲ ߕߌ߱ ߘߌ߫ ﴿25﴾

ߊߟߎ߫ ߦߴߊߟߎ߫ ߛߌߡߊ߫ ߓߊ߫ ߸ ߊߟߎ߫ ߕߜߋ ߟߋ߫ ߕߘߍ߬ ߸ ߓߍ߯ ߦߋ߫ ߖߐ߬ ߟߴߊߟߎ߫ ߡߊ߬ ߖߡߊ߬ߣߊ ߞߣߐ߫ ، ߊߟߎ߫ ߦߋ߫ ߛߌߟߊ߲߫ ߠߊ߫ ߞߏ߫ ߡߐ߱ ߟߎ߬ ߞߊߣߵߊߟߎ߫ ߖߊ߬ߛߏ߲ߖߊ߬ߛߏ߲߬ ، ߒ߬ߞߵߊߟߊ߫ ߝߙߊ߬ ߘߴߊߟߎ߫ ߞߊ߲߬ ߞߵߊߟߎ߫ ߝߊ߲߬ߞߊߘߏ߲߬ ߊ߬ ߟߊ߫ ߘߍ߬ߡߍ߲߬ߠߌ߲ ߠߊ߫ ، ߊ߬ ߣߌ߫ ߞߵߊߟߎ߫ ߤߊ߬ߙߌ߬ߖߍ߰ ߝߋ߲ ߓߘߍߓߘߍ ߟߎ߬ ߟߊ߫ ߸ ߖߐ߲߬ߛߴߊߟߎ߫ ߘߴߊ߬ ߞߏߢߌߡߊߟߐ߲߫ ﴿26﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߞߊߣߵߊߟߊ߫ ߣߌ߫ ߞߋߟߊ ߖߊ߲߬ߝߊ߫ ߸ ߞߵߊߟߎ߫ ߟߊ߫ ߟߊߒߠߦߊ ߟߎ߫ ߖߊ߲߬ߝߊ߫ ߞߵߊ߬ ߕߘߍ߬ ߊߟߎ߫ ߞߵߊ߬ ߟߐ߲߫ ߛߎߋ߯ ﴿27﴾

ߊߟߎ߫ ߦߴߊ߬ ߟߐ߲߫ ߞߏ߫ ߊߟߎ߫ ߟߊ߫ ߣߊ߲߬ߝߟߏ ߣߴߊߟߎ߫ ߘߋ߲ ߠߎ߬ ߦߴߊߟߎ߫ ߞߘߐߓߐ߫ ߝߋ߲ ߠߋ߬ ߘߌ߫ ߸ ߊ߬ ߣߌ߫ ߞߏ߫ ߓߙߊ߬ߖߌ߬ ߓߟߋߓߟߋ ߊߟߊ߫ ߟߋ߬ ߓߟߏ߫ ߊ߬ ߕߍ߰ߟߊ ߘߐ߫ ﴿28﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߣߴߊߟߎ߫ ߞߵߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߸ ߊ߬ ߘߌ߫ ߝߊߙߊ߲ߝߊߛߌ ߞߍ߫ ߊߟߎ߫ ߦߋ߫ ߸ ߊ߬ ߣߴߊ߬ ߘߴߊߟߎ߫ ߖߎ߯ߡߊ߲߫ ߞߍ߫ ߣߐ ߟߎ߬ ߘߐߞߏߦߊߕߏ߫ ߊߟߎ߫ ߦߋ߫ ߸ ߞߊ߬ ߦߝߵߊߟߎ߫ ߡߊ߬ ، ߓߊߏ߬ ߊߟߊ߫ ߟߋ߫ ߢߊ߬ߒߡߊ߭ ߓߟߋ߬ߓߟߋ ߕߌ߱ ߘߌ߫ ﴿29﴾

ߕߎ߬ߡߊ ߡߍ߲ ߓߊ߲߬ߓߊ߮ ߟߎ߬ ߦߋ߫ ߓߍ߲߬ߓߍ߲߬ߓߍ߲ ߘߏ߲߬ ߠߴߌ ߡߊ߬ ߸ ߞߏ߫ ߊ߬ߟߎ߬ ߦߴߌ ߟߊߞߘߎ߬ ߟߊ߫ ߦߙߐ߫ ߞߋߟߋ߲߫ ، ߥߟߴߊ߬ߟߎ߬ ߦߴߌ ߝߊ߰ ߟߊ߫ ߸ ߤߊߡߊ߲ߕߍ߫ ߊ߬ߟߎ߬ ߦߴߌ ߟߊߓߐ߫ ߟߊ߫ ، ߊ߬ߟߎ߬ ߦߋ߫ ߓߍ߲߬ߓߍ߲߬ߓߍ߲ ߕߐ߲߬ߕߍ ߞߊ߲߬ ߸ ߊߟߊ߫ ߝߣߊ߫ ߦߋ߫ ߓߍ߲߬ߓߍ߲߬ߓߍ߲ ߕߐ߲߬ߕߍ ߞߊ߲߬ ، ߊߟߊ߫ ߟߋ߫ ߘߏ߲߬ ߓߍ߲߬ߓߍ߲߬ߓߍ߲ ߕߐ߲߬ߕߍ߬ߓߊ߮ ߓߍ߯ ߘߐ߫ ߞߎ߬ߛߊ߲ ߘߌ߫ ﴿30﴾

ߣߴߊ߲ ߠߊ߫ ߟߝߊߙߌ ߟߎ߬ ߘߐߞߊ߬ߙߊ߲߬ ߘߴߊ߬ߟߎ߬ ߦߋ߫ ߸ ߊ߬ߟߎ߬ ߘߴߊ߬ ߝߐ߫ ߞߏ߫ ߊ߲ ߓߘߊ߫ ߣߌ߲߬ ߡߍ߲߫ ߞߘߐ߬ߡߊ߲߫ ، ߤߊߟߵߊ߬ ߞߊ߬ ߒ߬ ߘߌߦߊ߫ ߸ ߒ߬ ߝߣߊ߫ ߘߴߢߌ߲߬ ߢߐ߲߰ ߝߐ߫ ، ߓߊ ߣߌ߲߬ ߕߍ߫ ߝߏߦߌ߬ ߘߌ߫ ߝߏ߫ ߝߟߐ߫ ߡߐ߱ ߟߎ߬ ߟߊ߫ ߛߌߙߌ߲ ߠߎ߬ ﴿31﴾

ߕߎ߬ߡߊ ߡߍ߲ ߊ߬ߟߎ߫ ߞߵߊ߬ ߝߐ߫ ߞߏ߫ ߊ߲ ߡߊ߰ߙߌ߬ ߊߟߊ߫ ߸ ߣߴߊ߬ ߕߘߍ߬ ߘߊ߫ ( ߞߎ߬ߙߊ߬ߣߊ ) ߣߌ߲߬ ߦߋ߫ ߕߎ߬ߢߊ߫ ߟߋ߬ ߘߌ߫ ߞߊ߬ ߝߘߊ߫ ߌߟߋ ߟߊ߫ ߖߐ߫ ߸ ߌ ߦߋ߫ ߝߘߊ ߟߎ߬ ߟߊߓߐߙߐ߲ߘߐ߫ ߒ߬ ߞߊ߲߬ ߞߊ߬ ߓߐ߫ ߛߊ߲ ߡߊ߬ ߸ ߥߟߊ߫ ߌ ߦߋ߫ ߣߊ߬ ߖߊ߲߰ߞߕߊ߬ ߘߌߡߌ߲ߣߍ߲ ߘߴߊ߲ ߞߊ߲ߡߊ߬ ﴿32﴾

ߞߏ߬ߣߌ߲߬ ߊߟߊ߫ ߕߍ߫ ߊ߬ߟߎ߫ ߖߊ߲߰ߞߕߊ߫ ߞߵߌߟߋ ߕߏ߫ ߊ߬ߟߎ߬ ߕߍߡߊ߬ ، ߊߟߊ߫ ߜߎ ߕߍ߫ ߊ߬ߟߎ߫ ߖߊ߲߰ߞߕߊ߫ ߞߵߊ߬ߟߎ߬ ߕߏ߫ ߦߝߊ߬ ߢߌߣߌ߲ ߠߊ߬ ﴿33﴾

ߡߎ߲߬ ߦߴߊ߬ߟߎ߬ ߟߊ߫ ߞߏ߫ ߊߟߊ߫ ߕߍ߫ ߊ߬ߟߎ߫ ߖߊ߲߰ߞߕߊ߫ ߞߵߊ߬ߟߎ߬ ߕߏ߫ ߞߎ߬ߡߊ߲߬ߘߌ߬ߟߌ ߟߊ߫ ߡߌ߬ߛߙߌ߬ ߟߊߕߏߣߍ߲ ߡߊ߬؟ ߊ߬ߟߎ߫ ߘߏ߲߬ ߕߍ߫ ߊߟߊ߫ ߢߌ߲߰ ߠߎ߫ ߘߌ߫ ، ߊ߬ ߢߌ߲߭ ߠߎ߬ ߕߍ߫ ߘߏ߫ ߜߘߍ߫ ߟߎ߫ ߘߌ߫ ߝߊ߲ߕߊ߲ߞߟߊ ߟߎ߬ ߞߐ߫ ، ߓߊ߬ߙߌ߬ ߊ߬ߟߎ߫ ߝߊ߲߬ߓߊ ߟߋ߬ ߡߊ߫ ߝߋ߲߫ ߟߐ߲߫ ߛߊ߫ ﴿34﴾

ߊ߬ߟߎ߬ ߟߊ߫ ߛߊߟߌ ߕߍ߫ ߘߏ߫ ߜߘߍ߫ ߘߌ߫ ߓߏ߲ ߘߌ߲߬ߞߌߙߊ ߸ ߝߏ߫ ߝߎ߬ߟߋ߬ ߝߍ ߣߌ߫ ߕߍ߯ ߝߐ߫ ، (ߒ߬ߓߵߊ߬ ߣߊ߬ߕߐ߬ ߝߐ߫ ߟߴߏ߬ ߟߎ߫ ߟߋ߫ ߡߊ߬ ߸ ߞߏ߫ ) ߊߟߎ߫ ߦߋ߫ ߖߊ߲߰ߞߕߊ ߡߊߜߏ߬ߙߏ߫ ߞߊ߬ߡߊߛߐ߬ߘߐ߲߬ ߊߟߎ߫ ߟߊ߫ ߓߊ߲߬ߓߊ߰ߦߊ ߝߍ߬ ﴿35﴾

ߓߊ߲߬ߓߊ߮ ߟߎ߫ ߟߋ߫ ߊ߬ߟߎ߬ ߟߊ߫ ߣߊ߲߬ߝߟߏ ߟߎ߫ ߡߎ߬ߛߞߊ߬ ߟߊ߫ ߸ ߛߴߊ߬ߟߎ߬ ߘߌ߫ ߞߎ߬ߡߊ߲߬ߘߌ߬ߟߌ ߞߍ߫ ߊߟߊ߫ ߛߌߟߊ ߡߊ߬ ، ߞߏ߬ߣߵߊ߬ߟߎ߫ ߣߊ߬ߕߐ߫ ߊ߬ ߡߎ߬ߛߞߊ߬ ߟߊ߫ ߟߋ߬ ߝߎ߯ ، ߊ߬ ߘߌ߫ ߓߊ߲߫ ߞߊ߬ ߞߍ߫ ߊ߬ߟߎ߫ ߡߊ߬ ߓߐ߬ߣߐ ߘߌ߫ ، ߓߊ ߛߋ߫ ߞߍߕߐ߫ ߟߴߊ߬ߟߎ߬ ߟߊ߫ ، ߡߍ߲ ߠߎ߫ ߘߏ߲߬ ߓߊ߲߬ߣߍ߲߫ ߸ ߏ߬ ߟߎ߬ ߟߊߘߍ߬ߕߐ߫ ߟߋ߬ ߔߊߦߌߔߊߦߌ ߘߐ߫ ߔߋߘߋ߲ߎ߲߫ ﴿36﴾

ߏ ߞߎ߲߭ ߠߋ߬ ߸ ߛߴߊߟߊ߫ ߘߌ߫ ߖߎ߯ߡߊ߲ ߣߌ߫ ߢߌ߬ߡߊ ߘߊ߲߬ߕߍ߰ߓߐ߫ ، ߊ߬ ߘߌ߫ ߖߎ߯ߡߊ߲ ߘߏ߫ ߞߍ߫ ߘߏ߫ ߞߊ߲߬ ߸ ߞߵߊ߬ߟߎ߬ ߓߍ߯ ߕߏ߲߬ ߢߐ߲߮ ߞߊ߲߬ ߓߞߏߦߌ߫ ، ߞߵߊ߬ߟߎ߬ ߝߘߌ߫ ߔߊߦߌߔߊߦߌ ߘߐ߫ ߔߌ߫ ، ߒ߬ߓߊ߬ ߏ߬ ߟߎ߫ ߟߋ߫ ߓߣߐ߬ߓߊ߮ ߟߎ߬ ߘߌ߫ ﴿37﴾

ߊ߬ ߟߊߛߋ߫ ߓߊ߲߬ߓߊ߮ ߟߎ߫ ߡߊ߬ ߸ ߞߏ߫ ߣߴߊ߬ߟߎ߫ ߘߊ߲߬ ߘߊ߫ ߸ ( ߊ߬ߟߎ߫ ߛߐ߲߬ ߖߎ߯ ) ߕߊ߬ߡߌ߲߬ߣߍ߲ ߠߎ߬ ߘߌ߫ ߦߊ߬ߝߴߊ߬ߟߎ߬ ߦߋ߫ ، ߣߴߊ߬ߟߎ߫ ߘߏ߲߬ ߞߵߊ߬ߟߎ߫ ߣߐ߬ߡߊߛߊ߬ߦߌ߬ ߸ ߝߟߐ߫ ߡߐ߱ ߟߎ߬ ߟߊ߫ ߟߊ߲߬ߘߊ߫ ߕߊ߬ߡߌ߲߬ߣߍ߲ ߦߋ߫ ߦߋ߲߬ ߘߋ߬߹ ﴿38﴾

ߊߟߎ߫ ߦߴߊ߬ߟߎ߫ ߞߍ߬ߟߍ߫ ߟߋ߬ ߝߎߚߎ߫ ߝߏ߫ ߥߊ߬ߥߎߟߋ߫ ߞߊߣߊ߬ ߛߋ߫ ߞߍ߫ ߟߊ߫ ߡߎ߬ߕߎ߲߬ ، ߊ߬ ߣߌ߫ ߘߌ߯ߣߊ ߓߍ߯ ߦߋ߫ ߞߍ߫ ߊߟߊ߫ ߕߊ ߟߋ߬ ߘߌ߫ ، ߣߴߊ߬ߟߎ߫ ߘߊ߲߬ ߘߊ߫ ߸ ߊߟߊ߫ ߞߏ߬ߣߌ߲߬ ߢߊ߯ ߊ߬ߟߎ߬ ߗߋߥߊߟߌ ( ߓߍ߯ ) ߟߊ߫ ﴿39﴾

ߣߴߊ߬ߟߎ߫ ߘߏ߲߬ ߞߵߊ߬ߟߎ߬ ߞߐߘߏ߲߬ ߸ ߒ߬ߓߵߊߟߎ߫ ߦߴߊ߬ ߟߐ߲߫ ߞߏ߫ ߊߟߊ߫ ߟߵߊߟߎ߫ ߟߊߝߛߊ߬ߓߊ߮ ߘߌ߫ ، ߏ߬ ߟߋ ߘߏ߲߬ ߟߊ߬ߝߛߊ߬ߓߊ߰ ߢߌߡߊ ߣߌ߫ ߘߍ߬ߡߍ߲߬ߠߌ߲߬ߓߊ߰ ߢߌߡߊ ߘߌ߫ ﴿40﴾

ߊߟߎ߫ ߦߴߊ߬ ߟߐ߲߫ ߞߏ߫ ߊߟߎ߫ ߓߊ߯ ߞߐ߲ߛߐ߲ ߡߍ߲ ߛߐ߬ߘߐ߲߬ ߸ ߏ߬ ߟߏ߯ߟߎߢߐ߲߯ ߞߋߟߋ߲ ߦߋ߫ ߘߌ߫ ߊߟߊ߫ ߡߊ߬ ߸ ߞߋߟߊ ߡߊ߬ ߸ ߡߊ߬ߛߎ߬ߘߎ߲߬ߧߊ߬ߓߊ߮ ߟߎ߫ ߡߊ߬ ߸ ߝߊߙߌߕߊ ߟߎ߫ ߡߊ߬ ߸ ߘߐ߰ߕߐ ߟߎ߫ ߡߊ߬ ߸ ߊ߬ ߣߌ߫ ߛߌߟߊߘߋ߲ ߡߊ߬ ، ߣߴߊ߬ ߕߘߍ߬ ߘߴߊߟߎ߫ ߘߍ߲߬ߞߣߍ߬ߦߊ߬ߣߍ߲߫ ߊߟߊ߫ ߡߊ߬ ߸ ߊ߬ ߣߌ߫ ߝߋ߲߫ ߡߊ߬ ߒ߬ ߞߊ߬ ߡߍ߲ ߠߊߖߌ߰ ߒ߬ ߠߊ߫ ߖߐ߲߭ ߡߊ߬ ߝߊߙߊ߲ߝߊߛߌ ߟߏ߲ ߸ ߖߊ߬ߡߊ߫ ߝߌ߬ߟߊ ߢߐ߲߯ߓߍ߲߫ ߟߏ߲ ߞߊ߬ߣߌ߲߫ ، ߞߏ ߓߍ߯ ߘߏ߲߬ ߛߋ ߊߟߊ߫ ߟߋ߬ ߦߋ߫ ﴿41﴾

ߏ߬ ߞߵߊ߬ ߕߘߍ߬ ߊߟߎ߫ ߦߋ߫ ߞߐ߭ ߦߙߐ߫ ߡߊߛߎߘߎ߲ ߘߐ߫ ߸ ߖߎ߮ ߟߎ߬ ߦߋ߫ ߞߐ߭ ߦߙߐ߫ ߡߊߖߊ߲ ߘߐ߫ ، ߦߟߍ߬ߒ߬ߞߊ߲߬ߓߊ߯ ( ߞߙߊ߬ߖߊ߬ߥߏ߬ ߕߌ߮ ) ߟߎ߫ ߘߏ߲߬ ߕߘߍ߬ ߊߟߎ߫ ߘߎ߰ߟߊ߫ ߟߋ߬ ، ߏ߬ ߘߐ߫ ߸ ߊߟߎ߫ ߕߎ߲߬ ߓߊ߯ ߊߟߎ߫ ߞߐ߲߬ߞߐ߲߫ ߝߊ߲߬-ߊ-ߝߊ߲߬ ߡߊ߬ ߸ ߊߟߎ߫ ߕߎ߲߬ ߘߌ߫ ߝߐ߫ ߊ߬ߟߎ߬ ߞߐ߫ ߦߋ߲߬ ، ߏ ߞߎ߲߭ ߠߋ߬ ߸ ߛߴߊߟߊ߫ ߘߌ߫ ߞߏ߫ ߟߊߕߍ߰ ߡߍ߲ ߦߋ߫ ߞߍߕߊ ߘߌ߫ ، ߖߐ߲߬ߛߊ߫ ߕߏߒߘߐߕߊ ߘߌ߫ ߕߏ߫ ߊ߬ ߘߐ߫ ߘߊ߬ߟߎ߬ ߖߐ߲ߖߐ߲߫ ߠߊ߫ ، ߓߊߟߏߕߊ ߦߋ߫ ߓߊߟߏ߫ ߘߊ߬ߟߎ߬ ߖߐ߲ߖߐ߲߫ ߠߊ߫. ߖߊ߯ߕߋ߬ ߸ ߊߟߊ߫ ߦߋ߫ ߡߍ߲ߠߌ߲ߠߊ߫ ߘߌ߫ ߸ ߊ߰ ߟߐ߲ߠߌ߲ߠߊ߫ ߘߌ߫ ﴿42﴾

ߕߎ߬ߡߊ ߡߍ߲ ߊߟߊ߫ ߞߵߊ߬ߟߎ߫ ߦߌ߬ߘߵߌ ߟߊ߫ ߛߌ߬ߓߏ ߘߐ߫ ߖߡߊ߬ߣߍ߲߬ ߕߜߋ ߘߌ߫ ، ߏ ߞߎ߲߭ ߠߋ߬ ߓߊߏ߬ ߣߴߊ߬ ߕߎ߲߬ ߞߵߊ߬ߟߎ߫ ߦߌ߬ߘߵߌ ߟߊ߫ ߖߡߊ߬ ߛߘߍߡߊ߲߫ ߘߌ߫ ߸ ߊߟߎ߫ ߕߎ߲߬ ߘߌ߫ ߖߌߕߐߦߊ߫ ، ߊ߬ ߣߴߊߟߎ߫ ߕߘߍ߬ ߘߌ߫ ߢߐ߲߮ ߛߐ߬ߛߐ߬ ߥߊߟߌߢߊ ߘߐ߫ ، ߓߊ߬ߙߌ߬ ߊߟߊ߫ ߞߵߊߟߎ߫ ߞߛߌ߫ ߏ ߡߊ߬ ، ߓߊߏ߬ ߊ߬ ߦߋ߫ ߛߌߛߌ ߟߎ߬ ߞߣߐ߫ ߞߏ ߟߎ߬ ߟߐ߲ߓߊ߮ ߟߋ߬ ߘߌ߫ ﴿43﴾

ߕߎ߬ߡߊ ߡߍ߲ ߊ߬ ߞߵߊ߬ߟߎ߫ ߦߌ߬ߘߵߊߟߎ߫ ߟߊ߫ ߊߟߎ߫ ߢߐ߲߯ߓߍ߲߫ ߕߎߡߊ ߸ ߊ߬ ߞߵߊ߬ߟߎ߬ ߕߜߋߦߴߊߟߎ߫ ߢߊߞߘߐ߫ ߞߵߊߟߎ߫ ߝߣߊ߫ ߕߜߋߦߴߊ߬ߟߎ߬ ߢߊߞߘߐ߫ ، ߏ ߞߎ߲߭ ߠߋ߬ ߸ ߛߴߊߟߊ߫ ߘߌ߫ ߞߏ߫ ߟߊߕߍ߰ ߡߍ߲ ߦߋ߫ ߞߍߕߊ ߘߌ߫ ، ߞߏ ߓߍ߯ ߘߏ߲߬ ߠߊߛߊ߬ߦߌ߲߬ߕߐ߫ ߊߟߊ߫ ߟߋ߫ ߡߊ߬ ﴿44﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߣߴߊߟߎ߫ ߓߍ߲߬ ߘߊ߫ ߖߎ߮ ߖߡߊ߬ ߞߎߘߎ߲ ߘߌ߫ ߸ ߊߟߎ߫ ߦߴߊߟߎ߫ ߓߊ߲ߓߊ߲߫ ، ߊ߬ ߣߴߊߟߎ߯ ߊߟߊ߫ ߞߏߝߐ߫ ߞߏ߫ ߛߌߦߊߡߊ߲ ߞߍ߫ ߸ ߖߐ߲߰ߛߴߊߟߎ߫ ߘߌ߫ ߛߎߘߊ߲߫ ﴿45﴾

ߊߟߎ߯ ߊߟߊ߫ ߣߴߊ߬ ߟߊ߫ ߞߋߟߊ ߞߊ߲ ߡߌ߬ߘߊ߬ ، ߊߟߎ߫ ߘߏ߲߬ ߞߊߣߊ߬ ߢߐ߲߮ ߛߐ߬ߛߐ߫ ߘߋ߬ ، ߓߊ ߏ߬ ߟߴߊ߬ ߞߍ߫ ߟߊ߫ ߊߟߎ߫ ߘߌ߫ ߖߌߕߐߦߊ߫ ߞߵߊߟߎ߫ ߡߌ߬ߙߌ߲ ߥߊ߫ ߔߏ߲߫ ، ߏ߬ ߘߐ߫ ߊߟߎ߫ ߦߴߊߟߎ߫ ߡߎ߬ߢߎ߲߫ ߠߋ߬ ، ߓߊ ߊߟߊ߫ ߦߋ߫ ߡߎ߬ߢߎ߲߬ߓߊ߮ ߟߎ߫ ߟߋ߫ ߝߍ߬ ﴿46﴾

ߊߟߎ߫ ߞߊߣߵߊߟߎ߫ ߖߘߍ߬ ߞߍ߫ ߘߋ߬ ߦߏ߫ ߡߍ߲ ߠߎ߬ ߓߐ߫ ߘߴߊ߬ߟߎ߬ ߟߊ߫ ߟߎ ߟߎ߬ ߞߣߐ߫ ߖߍ߰ߙߍ ߣߌ߫ ߖߘߍ߬ߦߌߘߊ ߘߌ߫ ߡߐ߱ ߟߎ߬ ߟߊ߫ ، ߊ߬ ߣߴߊ߬ߟߎ߬ ߦߋ߫ ߞߎ߬ߡߊ߲߬ߘߌ߬ߟߌ ߞߍ߫ ߟߴߊߟߊ߫ ߛߌߟߊ ߡߊ߬ ، ߊߟߊ߫ ߘߏ߲߬ ߣߵߊ߬ߟߎ߬ ߗߋߥߊߟߌ ߟߎ߬ ߟߊߝߏ߬ ߟߊ߫ ߟߋ߬ ߔߘߋߞߎ߬ ﴿47﴾

ߕߎ߬ߡߊ ߡߍ߲ ߜߍ߬ߘߍ ߞߵߊ߬ߟߎ߬ ߗߋߥߊߟߌ ߟߎ߬ ߡߊߢߍ߯ߙߍ߫ ߊ߬ߟߎ߬ ߢߊߞߘߐ߫ ߸ ߞߵߊ߬ ߝߐ߫ ߊ߬ߟߎ߬ ߦߋ߫ ߞߏ߫ ߡߐ߰ ߛߌ߫ ߕߍ߫ ߛߴߊߟߎ߫ ߟߊ߫ ߓߌ߬ ، ߓߊߏ߬ ߒߠߋ ߦߴߊߟߎ߫ ߛߌ߰ߢߐ߲߯ ( ߟߊ߬ߕߊ߲߬ߞߊ߬ߟߌ߬ߓߊ߮ ) ߟߋ߬ ߘߌ߫ ، ߒ߬ߞߊ߬ ߖߊ߬ߡߊ߫ ߝߌ߬ߟߊ ߢߊ ߟߊ ߢߐ߲߮ ߞߊ߲߬ ߸ ߊ߬ ߞߵߊ߬ ߞߕߐߙߐ߲ߘߓߐ߫ ߞߊ߬ ߛߊ߬ߦߌ߫ ߊ߬ ߕߏ߲ߕߏߟߌ߲߫ ߝߌ߬ߟߊ ߡߊ߬ ߸ ߞߵߊ߬ ߝߐ߫ ߞߏ߫ ߒߠߋ ߓߘߊ߫ ߒ ߣߍ߰ߓߐ߫ ߊߟߎ߫ ߟߊ߫ ߞߏ ߘߐ߫ ߝߋߎ߫ ، ߓߊ ߒߠߋ ߢߊ߯ ߝߋ߲߫ ߠߋ߬ ߟߊ߫ ߸ ߊߟߎ߫ ߢߊ߲߫ ߕߍ߫ ߡߍ߲ ߠߊ߫ ، ߒߠߋ ߛߌߟߊ߲߫ ߠߴߊߟߊ߫ ߟߋ߬ ߢߍ߫ ، ߓߊ ߊߟߊ߫ ߟߋ߬ ߓߌ߲߬ߓߊ߬ߥߏ߬ ߜߍߟߍ߲ ߕߌ߱ ߘߌ߫ ﴿48﴾

ߕߎ߬ߡߊ ߡߍ߲ ߝߌ߬ߟߊ߲߬ߞߊߝߏ ߟߎ߬ ߣߌ߫ ߛߣߐ߬ߡߍ߫ ߖߊ߲߬ߞߊ߬ߙߏ߬ߕߐ ߟߎ߫ ߞߵߊ߬ ߝߐ߫ ߸ ߞߏ߫ ( ߛߌ߬ߟߊ߬ߡߊ ) ߢߌ߲߬ ߠߎ߬ ߘߌ߯ߣߊ ߘߏ߲߬ ߓߘߴߊ߬ߟߎ߬ ߜߍߙߍ߲ߞߍ߫ ߥߍ߫ ، ߡߍ߲ ߘߏ߲߬ ߓߊ߯ ߊ߬ ߛߍ߲߬ߓߍ߬ ߊߟߊ߫ ߟߊ߫ ߸ ߊߟߊ߫ ߞߏ߬ߣߌ߲߬ ߦߋ߫ ߣߌ߬ߣߌ߬ߟߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿49﴾

ߤߊ߲߫ ߸ ߣߴߌ ߕߎ߲߬ ߓߍ߫ ߦߋߟߌ ߞߍ߫ ߟߊ߫ ߸ ߕߎ߬ߡߊ ߡߍ߲ ߞߋ߲ߛߐ߲ (ߡߟߍ߬ߞߊ) ߟߎ߬ ߦߋ߫ ߓߊ߲߬ߓߊ߮ ߟߎ߬ ߛߏߡߊߦߟߍߡߊ߲߫ ߠߊ߫ ߸ ( ߌ ߘߴߊ߬ߟߎ߬ ߦߋ߫ ) ߊ߬ߟߎ߫ ߥߊ߬ߟߏ߲߬ ߠߴߊ߬ߟߎ߬ ߢߊߘߐߟߊ ߟߎ߬ ߣߴߊ߬ߟߎ߬ ߞߕߐߟߊ ߟߎ߬ ߘߐ߫ ߸ ߞߏ߫ ߊߟߎ߫ ߖߊ߬ߣߌ߲߬ߠߌ߲ ߖߊ߲߰ߞߕߊ ߡߊߜߙߏ߬ ﴿50﴾

ߞߴߏ߬ ߡߊߛߐ߬ߘߐ߲߬ߕߐ߫ ߊߟߎ߫ ߓߟߏ ߟߎ߬ ߓߊ߯ߙߊ߫ ߣߐ ߟߋ߫ ߝߍ߬ ، ߞߏ߫ ߊߟߊ߫ ߘߏ߲߬ ߕߍ߫ ߖߐ߲߭ ߠߎ߫ ߕߐ߬ߢߍ߰ߓߊ߯ ߘߌ߫ ﴿51﴾

ߢߌ߲߬ ߠߎ߬ ߖߏ߮ ߦߋ߫ ߟߋ߬ ߸ ߦߏ߫ ߝߋߙߊߥߎ߲߫ ߘߏ߲߬ߞߏ ߟߎ߬ ߣߴߊ߬ߟߎ߬ ߢߍߓߊ߮ ߟߎ߬ ߕߊ ، ߏ߬ ߟߎ߫ ߟߋ߫ ߞߵߊ߬ߟߎ߫ ߓߊ߲߬ ߊߟߊ߫ ߟߊ߫ ߘߊ߬ߟߎ ߟߎ߬ ߘߐ߫ ߝߊߦߌ߲߫ ، ߏ߬ ߞߍ ߸ ߊߟߊ߫ ߝߣߊ߫ ߞߵߊ߬ߟߎ߫ ߡߌ߬ߘߴߊ߬ߟߎ߫ ߖߟߎ߬ߡߎ߲ ߠߎ߬ ߟߊ߫ ، ߖߊ߯ߕߋ߬ ߸ ߊߟߊ߫ ߦߋ߫ ߝߊ߲߬ߞߊ߬ߡߊ߫ ߘߌ߫ ߸ ߊ߬ ߦߋ߫ ߓߌ߲߬ߓߊ߬ߏ߬ ߜߍߟߍ߲ ߕߌ߰ ߘߌ߫ ﴿52﴾

ߏ߬ ߘߏ߲߬ ߞߎ߲߭ ߠߋ߬ ߸ ߓߊߏ߬ ߊߟߊ߫ ߕߍ߫ ߊ߬ ߟߊ߫ ߣߍߡߊ߫ ߘߌߣߍ߲ ߡߊߦߟߍ߬ߡߊ߲߬ ߠߊ߫ ߞߊ߬ ߓߐ߫ ߡߌ߬ߙߌ߲߬ߘߌ߬ ߛߌ߫ ߞߊ߲߬ ߸ ߝߏ߫ ߣߴߊ߬ߟߎ߫ ߖߍ߬ߘߍ ߞߵߊ߬ߟߎ߫ ߟߌ߬ߤߟߊ ߡߊߦߟߍ߬ߡߊ߲߫ ، ߊߟߊ߫ ߘߏ߲߬ ߦߋ߫ ߡߍ߲ߠߌ߲ߠߊ߫ ߘߌ߫ ߸ ߊ߬ ߦߋ߫ ߟߐ߲ߠߌ߲ߠߊ߫ ߘߌ߫ ﴿53﴾

ߊ߬ߟߎ߬ ߖߏ߮ ߟߋ߬ ߸ ߦߏ߫ ߝߋߙߊߥߎ߲߫ ߘߏ߲߬ߞߏ ߟߎ߬ ߣߴߊ߬ߟߎ߬ ߢߍߓߊ߮ ߟߎ߬ ߕߊ ، ߏ߬ ߟߎ߫ ߟߋ߫ ߞߵߊ߬ߟߎ߫ ߡߊ߰ߙߌ ߟߊ߫ ߘߊ߬ߟߎ ߟߎ߬ ߡߊߛߐ߬ߛߐ߬ ، ߏ߬ ߞߍ ߸ ߊ߲ ߞߵߊ߬ߟߎ߬ ߛߌߟߊߛߵߊ߬ߟߎ߫ ߖߟߎ߬ߡߎ߲ ߠߎ߬ ߞߏߛߐ߲߬ ، ߊ߲ ߞߊ߬ ߝߋߙߊߥߎ߲߫ ߘߏ߲߬ߞߏ ߟߎ߬ ߟߊߕߏ߫ ߖߌ ߟߋ߬ ߘߐ߫ ، ߓߊ ߊ߬ߟߎ߫ ߞߋ߬ߟߋ߲߬ߞߋ߬ߟߋ߲߬ߣߊ ߞߍ߫ ߘߊ߫ ߕߐ߬ߢߍ߰ߒߕߋ ߟߎ߫ ߟߋ߬ ߘߌ߫ ﴿54﴾

ߡߊ߬ߛߍ߲߬ߛߍ߲߬ߓߊ߮ ߓߍ߯ ߘߐ߫ ߖߎ߯ߡߊ߲ ߊߟߊ߫ ߢߣߊ߫ ߸ ߏ߬ ߟߋ ߓߊ߲߬ߓߊ߮ ߟߎ߬ ߘߌ߫ ، ߓߊ ߏ߬ ߟߎ߫ ߟߋ߬ ߕߍ߫ ߘߍ߲߬ߞߣߍ߬ߦߊ߫ ߟߊ߫ ﴿55﴾

ߌ ߓߊ߯ ߟߊ߬ߤߘߌ ߕߊ߬ ߏ߬ ߟߎ߫ ߟߋ߫ ߡߊ߬ ߞߏߕߊ߲߫ ߸ ߊ߬ߟߎ߬ ߘߌ߫ ߕߏ߫ ߊ߬ߟߎ߬ ߟߊ߫ ߟߊ߬ߤߘߌ ߕߌߢߍ߫ ߟߊ߫ ߛߋ߲߬ߢߊ ߓߍ߯ ߘߐ߫ ، ߤߟߴߊ߬ߟߎ߬ ߕߍ߫ ߕߎ߲߬ߞߎ߬ߙߎ߲߬ ߠߊ߫ ﴿56﴾

ߒ߬ߓߊ߬ ߣߴߌ ߞߵߏ߬ ߟߎ߫ ߛߐ߬ߘߐ߲߫ ߞߍ߬ߟߍ ߘߐ߫ ߸ ߌ ߦߴߊ߬ߟߎ߬ ߞߍ߫ ߊ߬ߟߎ߬ ߞߐߡߐ߮ ߟߎ߬ ߜߍ߲߫ ߝߋ߲ ߘߌ߫ ߸ ߛߴߊ߬ߟߎ߬ ߘߴߊ߬ߟߎ߫ ߕߊ߰ߛߌ߫ ﴿57﴾

ߣߴߌ ߛߌߟߊ߲߫ ߘߊ߫ ߡߌ߬ߙߌ߲߬ߘߌ ߡߍ߲ ߢߍ߫ ߖߊ߲߬ߝߊ߬ ߞߏ ߘߐ߫ ߸ ߌ ߦߴߏ߬ ߟߎ߬ ߟߊ߫ ߟߊ߬ߤߘߌ ߟߊߝߌ߬ߟߌ߫ ߊ߬ߟߎ߫ ߡߊ߬ ߸ ߊߟߎ߫ ߓߍ߯ ߦߋ߫ ߞߢߊ߫ ، ߓߊߏ߬ ߊߟߊ߫ ߕߍ߫ ߖߊ߲߬ߝߊ߬ߒߕߋ ߟߎ߬ ߟߊ߫ ߞߊ߬ߣߌ߲߬ߢߐ߲߰ߦߊ߫ ߝߍ߬ ﴿58﴾

ߓߊ߲߬ߓߊ߮ ߟߎ߬ ߞߊߣߵߊ߬ ߓߛߌ߬ߞߌ߫ ߘߋ߬ ߞߏ߫ ߊ߬ߟߎ߬ ߞߍߕߐ߫ ߟߋ߫ ߘߊ߲߬ ߞߍ߫ ߟߊ߫ ، ߝߋߎ߫ ߸ ߊ߬ߟߎ߬ ߕߍߣߊ߬ ߓߟߏߡߓߊߟߌ߫ ߞߍ߫ ߟߊ߫ ﴿59﴾

ߊߟߎ߫ ߘߌ߫ ߝߋ߲-ߋ-ߝߋ߲߫ ߟߊߣߐ߬ ߝߊ߲߬ߞߡߊ߬ߦߊ߬ ߝߋ߲߫ ߣߌ߫ ߛߏ߬ ߛߘߌ߬ߣߍ߲ ߠߎ߬ ߘߐ߫ ߸ ߊߟߎ߫ ߦߴߏ߬ ߓߍ߯ ߘߐߓߍ߲߬ ߊ߬ߟߎ߬ ߞߊ߲ߡߊ߬ ، ߊߟߎ߫ ߦߋ߫ ߊߟߊ߫ ߖߎ߮ ߣߴߊߟߎ߫ ߖߍ߬ߘߍ ߖߎ߮ ( ߟߎ߬ ) ߘߐߛߌߟߊ߲߫ ߠߴߏ߬ ߟߋ ߟߊ߫ ، ߊ߬ ߣߌ߫ ߘߏ߫ ߜߘߍ߫ ߟߎ߫ ߸ ߡߍ߲ ߠߎ߬ ߕߴߏ߬ ߟߎ߬ ߘߌ߫ ، ߊߟߎ߫ ߡߴߏ߬ ߟߎ߬ ߟߐ߲߫ ߡߎߣߎ߲߬ ߸ ߊߟߊ߫ ߟߋ߫ ߞߵߏ߬ ߟߎ߬ ߟߐ߲߫ ، ߊߟߎ߫ ߘߏ߲߬ ߞߊ߬ ߝߋ߲-ߋ-ߝߋ߲߫ ߡߎ߬ߛߞߵߊߟߊ߫ ߛߌߟߊ ߘߐ߫ ߸ ߏ ߛߊ߬ߙߊ ߘߌ߫ ߘߝߴߊߟߎ߫ ߦߋ߫ ߞߐ߲ ، ߊߟߎ߫ ߕߍ߫ ߕߐ߬ߢߍ߰ ߝߏߦߌ߬ ߟߊ߫ ﴿60﴾

ߣߴߊ߬ߟߎ߬ ߝߊ߲ߞߊ߲߫ ߘߊ߫ ߖߐ ߞߊ߲߬ ߸ ߌ ߝߣߊ߫ ߝߊ߲ߞߊ߲߫ ߏ ߞߊ߲߬ ߸ ߞߵߌ ߛߍ߲߬ߓߍ߬ ߊߟߊ߫ ߟߊ߫ ، ߓߊ ߏ߬ ߟߋ ߡߍ߲ߠߌ߲ߠߊ߫ ߟߐ߲ߠߌ߲ߠߊ ߘߌ߫ ﴿61﴾

ߣߴߊ߬ߟߎ߫ ߘߏ߲߬ ߓߴߊ߬ ߝߍ߬ ߞߵߌ ߖߊ߲߬ߝߊ߫ ߸ ߊߟߊ߫ ߘߴߌ ߥߛߊ߬ ، ߓߊ ߏ߬ ߟߋ ߞߵߌ ߝߊ߲߬ߞߊߘߏ߲߬ ߊ߬ ߟߊ߫ ߘߍ߬ߡߍ߲߬ߠߌ߲ ߠߊ߫ ߸ ߊ߬ ߣߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߟߊ߫ ﴿62﴾

ߊ߬ ߣߴߊ߬ ߞߵߊߟߎ߫ ߛߣߐ߬ߡߍ ߟߎ߬ ߟߊߘߍ߬ ( ߓߍ߲߭ ߞߐ߬ߣߐߡߊ߬ ) ، ߤߊߟߵߌ ߘߏ߲߬ ߞߊ߬ ߘߎ߰ߞߟߏ ߞߣߐ߫ ߝߋ߲ ߓߍ߯ ߡߎ߬ߛߊ߬ߞߊ߫ ߸ ߌ ߕߌ߲߬ ߕߴߛߋ߫ ߊ߬ߟߎ߫ ߛߣߐ߬ߡߍ ߟߎ߬ ߟߊߘߍ߬ ߟߊ߫ ، ߓߊ߬ߙߌ߬ ߊߟߊ߫ ߟߋ߫ ߞߵߊ߬ߟߎ߫ ( ߛߣߐ߬ߡߍ ߟߎ߬ ) ߟߊߘߍ߬ ߸ ߊߟߊ߫ ߘߏ߲߬ ߦߋ߫ ߣߌ߬ߣߌ߬ߟߊ߫ ߘߌ߫ ߸ ߊ߬ ߦߋ߫ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿63﴾

ߤߍ߲߬ ߌߟߋ߬ ߟߊ߬ߝߐ߬ߓߊ߮ ߸ ߌ ߥߊ߬ߛߊ ߟߋ߬ ߊߟߊ߫ ߘߌ߫ ߊ߬ ߣߌ߫ ߘߍ߲߬ߞߣߍ߬ߦߊ߬ߓߊ߮ ߡߍ߲ ߠߎ߬ ߓߊ߯ ߌ ߟߊߓߊ߬ߕߏ߬ ﴿64﴾

ߤߍ߲߬ ߌߟߋ߬ ߟߊ߬ߝߐ߬ߓߊ߮ ߸ ߘߍ߲߬ߞߣߍ߬ߦߊ߬ߓߊ߮ ߟߎ߬ ߘߐߛߎ߫ ߞߍ߬ߟߍ ߡߊ߬ ، ߣߌ߫ ߡߎ߬ߢߎ߲߬ߓߊ߮ ߡߎ߬ߥߊ߲߬ ߦߴߊߟߎ߫ ߘߐ߫ ߸ ߏ߬ ߟߎ߬ ߦߋ߫ ߛߋ߫ ( ߓߊ߲߬ߓߊ߮ ) ߗߍ߬ߡߍ߫ ߝߌ߬ߟߊ߬ ߟߊ߫ ، ߣߌ߫ ߗߍ߬ߡߍ߫ ߘߏ߲߬ ߞߍ߫ ߘߴߊߟߎ߫ ߘߐ߫ ߸ ߏ߬ ߟߎ߬ ߦߋ߫ ߛߋ߫ ߥߊ߯ ߞߋߟߋ߲߫ ߠߊ߫ ߓߊ߲߬ߓߊ߮ ߟߎ߬ ߘߐ߫ ، ߓߊ ߏ߬ ߟߎ߬ ߦߋ߫ ߡߌ߬ߙߌ߲߬ߘߌ߫ ߟߋ߬ ߘߌ߫ ߸ ߡߍ߲ ߠߎ߬ ߕߍ߫ ߝߊ߰ߡߎ߲߬ߠߌ߲߫ ߞߍ߫ ߟߊ߫ ﴿65﴾

ߒ߬ߓߊ߬ ߛߌߛߍ߲߬ ߸ ߊߟߊ߫ ߓߘߴߊߟߎ߫ ߘߏ߬ߣߌ߲ ߘߐߝߍߦߊ߫ ، ߓߊ ߊ߬ ߓߘߴߊ߬ ߟߐ߲߫ ߞߏ߫ ߟߊ߲߰ߝߏ ( ߥߙߊ߬ߣߍ߲߫ ) ߊߟߎ߫ ߘߐ߫ ، ߏ߬ ߘߐ߫ ߸ ߣߌ߫ ߡߎ߬ߢߎ߲߬ߓߊ߮ ߗߡߍ߬ ߞߍ߫ ߘߴߊߟߎ߫ ߘߐ߫ ߸ ߏ߬ ߟߎ߬ ߦߋ߫ ߛߋ߫ ߗߍ߬ߡߍ߫ ߝߌ߬ߟߊ߬ ߟߊ߫ ، ߣߌ߫ ߥߊ߯ ߞߋߟߋ߲߫ ߞߍ߫ ߘߴߊߟߎ߫ ߘߐ߫ ߸ ߏ߬ ߟߎ߬ ߦߋ߫ ߛߋ߫ ߥߊ߯ ߝߌ߬ߟߊ߬ ߟߴߊߟߊ߫ ߟߊ߫ ߘߌ߬ߢߍ ߟߊ߫ ، ߊߟߊ߫ ߘߏ߲߬ ߦߋ߫ ߡߎ߬ߢߎ߲߬ߓߊ߮ ߟߎ߫ ߟߋ߬ ߝߍ߬ ﴿66﴾

ߊ߬ ߕߍ߫ ߓߍ߲߬ ߟߊ߬ߝߐ߬ߓߊ߰ ߛߌ߫ ߡߊ߬ ߸ ߡߌ߬ߘߊ߬ߟߌ߬ߘߋ߲ ߠߎ߬ ߦߋ߫ ߞߍ߫ ߊ߬ ߓߟߏ߫ ߸ ߝߏ߫ ߊ߬ ߓߊ߯ ߖߎ߮ ߟߎ߬ ߓߍߘߍ߲ߛߍ߫ ߟߋ߫ ߞߟߍ߬ ߓߙߊ ߘߐ߫ ߡߎߣߎ߲߬ ߖߐ߫ ، ߊߟߎ߫ ߦߋ߫ ߘߎߢߊ߫ ߣߊ߲߬ߝߟߏ߬ߡߎ߮ ߟߋ߬ ߢߌߣߌ߲߫ ߠߊ߫ ߸ ߊߟߊ߫ ߘߏ߲߬ ߦߋ߫ ߟߊߞߌߙߊ߫ ߟߋ߫ ߝߍ߬ ، ߊߟߊ߫ ߘߏ߲߬ ߣߌ߬ߣߌ߬ߟߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿67﴾

ߣߌ߫ ߛߓߍߟߌ ߞߐ߲߰ߣߍ߲ ߕߍ߫ ߞߊ߬ ߝߘߴߊߟߊ߫ ߟߊ߫ ߸ ߖߊ߲߰ߞߕߊ߬ߓߊ߫ ߕߎ߲߬ ߘߌ߫ ߡߊ߰ ߊߟߎ߫ ߟߊ߫ ߸ ߊߟߎ߫ ߟߊ߫ ߝߋ߲߫ ߡߌ߬ߘߊ߬ߣߍ߲ ߠߎ߬ ߘߐ߫ ( ߣߊߟߌ߬ߡߎ߲߫ ߞߎ߲߬ߡߊ߬ߞߊ ߘߌ߫) ﴿68﴾

ߒ߬ߓߵߊߟߎ߫ ߣߊ߬ ߝߋ߲ ߡߍ߲ ߠߎ߬ ߞߐ߲ߛߐ߲ߧߊ߫ ߟߊ߫ ߸ ߊߟߎ߯ ߏ߬ ߘߏ߫ ߘߊߥߎ߲߫ ߛߍߣߍ߲߬ ߝߛߊߦߌ߫ ߘߤߊ߬ ߓߟߏ ߡߊ߬ ߸ ߛߊߣߌ߲ߧߊ߫ ߓߟߏ ߡߊ߬ ، ߞߏ߬ߣߌ߲߬ ߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߘߋ߬ ، ߖߊ߯ߕߋ߬ ߸ ߊߟߊ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿69﴾

ߤߍ߲߬ ߌߟߋ߬ ߟߊ߬ߝߐ߬ߓߊ߮ ߸ ߊ߬ ߟߊߛߋ߫ ߊߟߎ߫ ߓߟߏ߫ ߞߣߐ߫ ߡߌ߬ߘߊ߬ߟߌ߬ߘߋ߲ ߠߎ߫ ߡߊ߬ ߸ ߞߏ߫ ߣߌ߫ ߊߟߊ߫ ߞߵߊ߬ ߟߐ߲߫ ߞߏ߫ ߢߌ߬ߡߊ߫ ߟߋ߬ ߊߟߎ߫ ߛߣߐ߬ߡߍ ߟߎ߬ ߘߐ߫ ߸ ߊ߬ ߘߴߊߟߎ߫ ߛߐ߫ ߝߋ߲߫ ߠߊ߫ ߡߍ߲ ߝߌ߬ߛߵߊߟߎ߫ ߓߟߏߝߋ߲߫ ߡߌ߬ߘߊ߬ߣߍ߲ ߘߌ߫ ، ߊ߬ ߣߴߊ߬ ߘߴߊߟߎ߫ ߡߊ߬ߞߏ߬ߕߏ߫ ، ߓߊ ߊߟߊ߫ ߦߋ߫ ߡߊ߬ߞߕߏ߬ߟߊ߫ ߤߌߣߟߊ ߟߋ߬ ߘߌ߫ ﴿70﴾

ߣߴߊ߬ߟߎ߫ ߘߏ߲߬ ߞߍ߫ ߘߴߌ ߖߊ߲߬ߝߊ߬ ߞߏ ߘߐ߫ ߸ ߊ߬ߟߎ߬ ߓߘߴߊߟߊ߫ ߖߊ߲߬ߝߊ߫ ߞߘߐ߬ߡߊ߲߫ ߸ ߞߏ߬ߣߵߊ߬ ߞߵߏ߬ ߛߴߊ߬ߟߎ߬ ߘߐ߫ ߟߋ߬ ߞߍ߯ߙߍߞߍ߯ߙߍ߫ ، ߓߊ ߊߟߊ߫ ߦߋ߫ ߟߐ߲ߠߌ߲ߠߊ߫ ߥߘߋ߬ߥߘߋ߬ߟߌ߬ߟߊ ߟߋ߬ ߘߌ߫ ﴿71﴾

ߒ߬ߓߊ߬ ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߞߊ߬ ߝߎ߲ߘߌ߫ ، ߊ߬ ߣߌ߫ ߞߊ߬ ߖߘߍ߬ߘߌ ߞߍ߫ ߊ߬ߟߎ߬ ߟߊ߫ ߣߊ߲߬ߝߟߏ ߟߎ߬ ߣߴߊ߬ߟߎ߫ ߖߘߍ߬ߞߎ߲ ߠߎ߬ ߟߴߊߟߊ߫ ߛߌߟߊ ߘߐ߫ ߸ ߊ߬ ߣߌ߫ ߡߍ߲ ߠߎ߫ ߞߵߏ߬ ߟߎ߬ ߟߊߘߊ߬ߙߏ߫ ߞߵߊ߬ߟߎ߫ ߘߍ߬ߡߍ߲߬ ߸ ߏ߬ ߟߎ߫ ߟߋ߬ ߢߐ߲߮ ߢߌ߲߭ ߠߎ߬ ߘߌ߫ ، ߡߍ߲ ߠߎ߫ ߘߏ߲߬ ߘߍ߲߬ߞߣߍ߬ߦߊ߬ߣߍ߲߫ ߕߋ߲߬ ߸ ߞߏ߬ߣߵߊ߬ߟߎ߬ ߡߊ߫ ߝߎ߲ߘߌ߫ ߸ ߏ߬ ߟߎ߬ ߟߊ߫ ߢߌ߲߬ߢߐ߲߰ߦߊ߫ ߕߍ߫ ߊߟߎ߫ ߡߊ߬ ߝߏߦߌ߬ ߘߐ߫ ߸ ߝߏ߫ ߣߴߊ߬ߟߎ߬ ߝߎ߲ߘߌ߫ ߘߊ߫ ߟߋ߬ ߕߘߋ߫ ، ߣߴߊ߬ߟߎ߫ ߞߏ߬ߣߌ߲ ߞߊ߬ ߘߍ߬ߡߍ߲߬ߠߌ߲ ߢߌߣߌ߲߫ ߊߟߎ߫ ߟߊ߫ ߘߌ߯ߣߊ߫ ( ߞߟߍ ) ߘߐ߫ ߸ ߊ߬ߟߎ߫ ߘߍ߬ߡߍ߲ ߦߴߊߟߎ߫ ߡߊ߬ ߛߋ߲ߛߋߘߋ߲ ߘߌ߫ ߓߊ߲߬ߓߊ߮ ߓߍ߯ ߟߋ߫ ߡߊ߬ ، ߝߏ߫ ߖߐߡߌ߲ߢߐ߲߯ߦߊ ߟߊ߬ߤߘߌ ߦߴߊߟߎ߫ ߣߌ߫ ߡߌ߬ߙߌ߲߬ߘߌ ߡߍ߲ ߠߎ߬ ߕߍ߫ ، ߊߟߊ߫ ߘߏ߲߬ ߢߊ߯ ߊߟߎ߫ ߗߋߥߊߟߌ ߟߎ߬ ߟߊ߫ ߖߐ߫ ﴿72﴾

ߡߍ߲ ߠߎ߫ ߘߏ߲߬ ߓߊ߲߬ߣߍ߲߫ ߸ ߏ߬ ߟߎ߫ ߜߊ߲߬ߛߊ߲ ߠߋ߬ ߢߐ߲߮ ߢߌ߲߭ ߠߎ߬ ߘߌ߫ ، ߣߴߊߟߎ߫ ߡߴߊ߬ ߞߍ߫ ߕߋ߲߬ ߥߊ߬ߥߎߟߋ ߘߌ߫ ߞߍ߫ ߖߡߊ߬ߣߊ ߞߣߐ߫ ߊ߬ ߣߌ߫ ߕߌߢߍߟߌߓߊ ﴿73﴾

ߒ߬ߓߊ߬ ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߞߊ߬ ߝߎ߲ߘߌ߫ ، ߊ߬ ߣߌ߫ ߞߊ߬ ߖߘߍ߬ߘߌ ߞߍ߫ ߊߟߊ߫ ߛߌߟߊ ߞߊ߲߬ ، ߊ߬ ߣߌ߫ ߡߍ߲ ߠߎ߫ ߞߵߏ߬ ߟߎ߬ ߟߊߘߊ߬ߙߏ߫ ߞߵߊ߬ߟߎ߫ ߘߍ߬ߡߍ߲߬ ߸ ߏ߬ ߟߎ߫ ߟߋ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߘߌ߫ ߕߎ߬ߢߊ߬ ߢߊ ߡߊ߬ ، ߏ߬ ߟߎ߬ ߢߍߛߌ߰ߣߍ߲߫ ߡߊ߬ߞߕߏ߬ߟߌ ߟߋ߬ ߟߊ߫ ߸ ߊ߬ ߣߌ߫ ߤߊ߬ߙߌ߬ߖߍ߯ ߞߊ߬ߡߙߊ߬ߒߞߋ ߟߊ߫ ﴿74﴾

ߡߍ߲ ߠߎ߬ ߝߣߊ߫ ߘߍ߲߬ߞߣߍ߬ߦߊ߬ߣߍ߲߬ ߞߐ ߟߊ߫ ߸ ߊ߬ߟߎ߫ ߘߏ߲߬ ߝߎ߲ߘߌ߫ ߘߊ߫ ߞߊ߬ ߖߘߍ߬ߘߌ ߞߍ߫ ߊߟߎ߫ ߝߍ߬ ߸ ߏ߬ ߟߎ߬ ߦߴߊߟߎ߫ ߘߏ߫ ߟߋ߬ ߘߌ߫ ، ߒ߬ߓߊ߬ ߓߊߘߋ߲ߡߊ ߟߎ߫ ߜߊ߲߬ߛߊ߲ ߛߊ߫ ߸ ߏ߬ ߟߎ߫ ߟߋ߬ ߖߊߙߋߣߍ߲߫ ߢߐ߲߮ ߠߴߊߟߊ߫ ߟߊ߫ ߟߍߙߊ ߞߣߐ߫ ، ߖߊ߯ߕߋ߬ ߸ ߊߟߊ߫ ߞߊ߬ ߞߏ ߓߍ߯ ߟߐ߲߫ ߠߋ߬ ߕߊߦߌ߫ ﴿75﴾

ߢߌ߬ߣߊ߬ߓߐ߬ ߓߘߊ߫ ߝߘߊ߫ ߊߟߊ߫ ߣߴߊ߬ ߟߊ߫ ߞߋߟߊ ߟߊ߫ ߸ ߞߊ߬ ߕߊ߯ ߊߟߎ߫ ߖߐߡߌ߲ߢߐ߲߯ ߛߏߡߊ ߟߎ߫ ߡߊ߬ ﴿1﴾

(ߞߏ߫ ߤߍ߲߬ ߊߟߎ߬ ߛߏߡߊ ߟߎ߬ ߸ ) ߞߏ߫ ߊߟߴߊߟߎ߫ ߥߊ߫ ߦߙߐ߫ ߢߌߣߌ߲߫ ߘߎ߰ߞߟߏ ߢߊߝߍ߬ ߞߊߙߏ߫ ߣߊ߯ߣߌ߲߫ ( ߖߊ߬ߣߍ߲߬ ) ߞߘߐ߫ ، ߞߏ߬ߣߌ߲߬ ߊߟߎ߫ ߦߴߊ߬ ߟߐ߲߫ ߞߏ߫ ߊߟߎ߫ ߕߍ߫ ߊߟߊ߫ ߓߟߏߡߊߓߊ߬ߟߌ߬ ߝߋߎ߫ ، ߓߊߏ߬ ߊߟߊ߫ ߟߋ߫ ߓߊ߲߬ߓߊ߮ ߟߎ߬ ߘߐ߯ߦߊߓߊ߮ ߘߌ߫ ﴿2﴾

ߞߟߋߞߟߋߡߊߦߟߍ ߓߘߊ߫ ߝߘߴߊߟߊ߫ ߣߴߊ߬ ߟߊ߫ ߞߋߟߊ ߟߊ߫ ߸ ߞߵߊ߬ ߟߊߛߋ߫ ߡߐ߱ ߟߎ߫ ߡߊ߬ ߤߖߌ ߥߘߎ߬ߓߊ ߟߏ߲ ߸ ߞߏ߫ ߊߟߊ߫ ߣߴߊ߬ ߟߊ߫ ߞߋߟߊ ߓߘߴߊ߬ߟߎ߫ ߣߍ߰ߓߐ߫ ߛߏߡߊ ߟߎ߬ ߟߊ߫ ߞߏ ߘߐ߫ ߝߋߎ߫ ، ߣߴߊߟߎ ( ߛߏߡߊ ߟߎ߫ ) ߞߏ߬ߣߌ߲ ߞߵߊߟߎ߫ ߖߘߍ߬ߟߊߛߊ߬ߦߌ߲߬ ߏ߬ ߟߋ ߘߌߡߊ߲߫ ߊߟߎ߫ ߟߊ߫ ، ߣߴߊߟߎ߫ ߘߏ߲߬ ߞߵߊߟߎ߫ ߞߐߘߏ߲߬ ߸ ߒ߬ߓߵߊߟߎ߫ ߦߴߊ߬ ߟߐ߲߫ ߞߏ߫ ߊߟߎ߫ ߕߴߛߋ߫ ߊߟߊ߫ ߓߟߏߡߊߓߊ߬ߟߌ߬ ߟߊ߫ ، ߒ߬ߓߊ߬ ߌߟߋ ߌ ߘߟߊߥߊ߬ߦߌ߲߫ ߓߊ߲߬ߓߊ߮ ߟߎ߬ ߦߋ߫ ߖߊ߲߰ߞߕߊ߬ ߘߌߡߌ߲ߣߍ߲ ߠߊ߫ ﴿3﴾

ߝߏ߫ ߊߟߎ߫ ߣߌ߫ ߛߏߡߊ ߡߍ߲ ߠߎ߫ ߞߊ߬ ߖߐߡߌ߲ ߞߍ߫ ߸ ߊ߬ߟߎ߫ ߘߏ߲߬ ߡߴߊߟߎ߫ ߤߊߞߍ ߣߊ߰ߛߌ߬ ߝߏߦߌ߬ ߟߊ߫ ، ߊ߬ߟߎ߫ ߘߏ߲߬ ߡߊ߫ ߡߐ߰ ߛߌ߫ ߘߍ߬ߡߍ߲߬ ߊߟߎ߫ ߡߊ߬ ، ߒ߬ߓߵߊߟߎ߯ ߏ߬ ߟߎ߬ ߟߊ߫ ߟߊ߬ߤߘߌ ߘߝߴߊ߬ߟߎ߬ ߦߋ߫ ߞߵߊ߬ ߛߋ߫ ߊ߬ߟߎ߬ ߟߊ߫ ߥߎ߬ߛߎ ߡߊ߬ ، ߖߊ߯ߕߋ߬ ߸ ߝߊ߲ߕߊ߲ߞߟߊ ߟߎ߫ ߟߋ߬ ߘߌߡߊ߲߫ ߊߟߊ߫ ߦߋ߫ ﴿4﴾

ߒ߬ߓߊ߬ ߣߌ߫ ߞߊߙߏ߫ ߟߊߕߏߕߊ ߟߎ߫ ߕߊ߬ߡߌ߲߬ ߘߊ߫ ߸ ߊߟߎ߫ ߦߋ߫ ߛߏߡߊ ߟߎ߫ ߝߊ߰ ߝߊ߲߭ ߓߍ߯ ߘߐ߫ ߸ ߊߟߎ߫ ߓߊ߯ ߊ߬ߟߎ߫ ߛߐ߬ߘߐ߲߬ ߦߌߟߊ ߡߍ߲ ، ߊߟߎ߫ ߦߴߊ߬ߟߎ߫ ߡߌ߬ߘߊ߬ ߸ ߊߟߎ߫ ߦߴߊ߬ߟߎ߬ ߘߟߊߛߌ߰ ߸ ߊ߬ ߣߴߊߟߎ߫ ߦߴߊߟߎ߫ ߛߌ߰ ߊ߬ߟߎ߫ ߜߟߊ߬ ߟߊ߫ ߘߞߐ߬ߣߐ߲߬ߠߌ߲߬ ߦߌߟߊ ߓߍ߯ ߘߐ߫ ، ߣߴߊ߬ߟߎ߫ ߞߵߊ߬ߟߎ߫ ߖߘߍ߬ߟߊߛߊ߬ߦߌ߬ ߸ ߞߊ߬ ߛߊߟߌ ߟߐ߬ ߸ ߞߊ߬ ߖߞߊ ߘߌ߫ ߸ ߊߟߎ߫ ߦߴߊ߬ߟߎ߬ ߟߊ߫ ߛߌߟߊ ߟߊߞߊ߬ ، ߖߊ߯ߕߋ߬ ߸ ߊߟߊ߫ ߦߋ߫ ߡߊ߬ߞߕߏ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿5﴾

ߣߌ߫ ߘߏ߫ ߞߵߊ߬ ߞߎ߲߬ߞߊ߬ߙߌ߬ߝߊ߬ ߌ ߟߊ߫ ߛߏߡߊ ߟߎ߬ ߘߐ߫ ߸ ߌ ߦߴߏ߬ ߞߎ߲߭ ߠߊߞߛߌ߫ ߸ ߝߏ߫ ߊ߬ ߦߋ߫ ߊߟߊ߫ ߟߊ߫ ߞߎߡߊ ߡߍ߲߫ ، ߌ ߦߋ߫ ߓߊ߲߫ ߞߵߊ߬ ߟߊߛߋ߫ ߊ߬ ߞߎ߲߬ߠߊ߬ߝߎ߬ߟߋ߲߬ ߦߌߟߊ ߘߐ߫ ، ߏ ߞߎ߲߭ ߠߋ߬ ߸ ߓߊߏ߬ ߡߌ߬ߙߌ߲߬ߘߌ߫ ߟߎ߫ ߟߋ߬ ߸ ߡߍ߲ ߠߎ߬ ߕߍ߫ ߝߏߦߌ߫ ߞߊ߬ߟߊߡߊ߬ ﴿6﴾

ߐ߲߬ߤߐ߲߫ ߸ ߖߐߡߌ߲ߢߐ߲߯ߦߊ ߟߊߟߐ߬ߕߐ߫ ߛߏߡߊ ߟߎ߬ ߦߋ߫ ߊߟߊ߫ ߣߴߊ߬ ߟߊ߫ ߞߋߟߊ ߓߟߏ߫ ߘߌ߬؟ ߝߏ߫ ߊߟߎ߫ ߣߌ߫ ߡߍ߲ ߠߎ߫ ߞߊ߬ ߖߐߡߌ߲ ߠߊߘߊ߲߫ ߡߌ߬ߛߙߌ߬ ߟߊߕߏߣߍ߲ ߘߟߊ߫ ، ߓߊߏ߬ ߝߊ߬ߣߴߊ߬ߟߎ߬ ߕߋߟߋ߲ߣߍ߲߫ ߊߟߎ߫ ߦߋ߫ ߸ ߊߟߎ߫ ߝߣߴߊߟߎ߫ ߕߋߟߋ߲߫ ߊ߬ߟߎ߬ ߦߋ߫ ، ߖߊ߯ߕߋ߬ ߸ ߝߊ߲ߕߊ߲ߞߟߊ ߟߎ߫ ߟߋ߬ ߘߌߡߊ߲߫ ߊߟߊ߫ ߦߋ߫ ﴿7﴾

ߊ߫ ߸ ߊ߬ ߓߊ߯ ߕߘߍ߬ ߛߍ߲ ߊ߬ߟߎ ߟߋ߬ ߛߋ߫ ߟߴߊߟߎ ߟߊ߫ ߸ ߊ߬ߟߎ߬ ߕߴߊߟߎ߫ ߟߊߕߏ߫ ߓߊߘߋ߲ߧߊ߫ ߞߏߛߐ߲߬ ߞߎߡߊ߫ ߕߍ߫ ߖߐߡߌ߲߫ ߞߊ߲ ߟߊ߬ߤߘߌ ߡߊ߬ ، ߊ߬ߟߎ߬ ߦߴߊߟߎ߫ ߟߊߘߌ߬ߢߍ߬ ߟߴߊ߬ߟߎ߬ ߘߊ߫ ߘߐ߫ ߞߎߡߊ߫ ߘߌߡߊ߲ ߠߋ߬ ߟߊ߫ ߸ ߞߵߊ߬ ߕߘߍ߬ ߊ߬ߟߎ߫ ߛߣߐ߬ߡߍ ߟߎ߫ ߓߊ߲߬ߣߍ߲߫ ߠߋ߬ ߝߊߦߌ߲߫ ، ߓߊ ߊ߬ߟߎ߫ ߝߊ߲߬ߓߊ ߦߋ߫ ߔߊߟߊ߲ߞߊߓߊ߯ߕߐ ߟߎ߫ ߟߋ߬ ߘߌ߫ ﴿8﴾

ߊ߬ߟߎ ߟߋ߬ ߊߟߊ߫ ߟߊ߫ ߟߝߊߙߌ ߟߎ߫ ߝߊ߬ߟߋ߲߬ ߠߊ߫ ߛߐ߲߬ߞߐ߬ߣߍ߲߬ ߕߜߋ ߟߊ߫ ߸ ߞߊ߬ ߞߎ߬ߡߊ߲߬ߘߌ߬ߟߌ ߞߍ߫ ߊߟߊ߫ ߟߊ߫ ߛߌߟߊ ߡߊ߬ ، ߤߊ߲߫ ߸ ߊ߬ߟߎ߬ ߟߊ߫ ߓߊ߯ߙߊ߫ ߞߍߣߍ߲ ߠߎ߬ ߖߎ߯ߡߊ߲߫ ߠߋ߫ ߘߋ߬߹ ﴿9﴾

ߊ߬ߟߎ߬ ߕߍ߫ ߘߍ߲߬ߞߣߍ߬ߦߊ߬ߓߊ߯ ߟߊߕߏ߫ ߓߊߘߋ߲ߧߊ߫ ߞߏߛߐ߲߬ ߞߎߡߊ߫ ߕߍ߫ ߖߐߡߌ߲߫ ߞߊ߲߫ ߟߊ߬ߤߘߌ ߡߊ߬ ، ߓߊߏ߬ ߖߊ߲߬ߘߊ߬ߓߊ߮ ߟߎ߫ ߟߋ߬ ﴿10﴾

ߣߴߊ߬ߟߎ߫ ߞߏ߬ߣߌ߲ ߞߵߊ߬ߟߎ߫ ߖߘߍ߬ߟߊߛߊ߬ߦߌ߬ ߞߊ߬ ߛߊߟߌ ߟߐ߬ ߸ ߞߊ߬ ߖߞߊ ߘߌ߫ ߸ ߊߟߎ߫ ߓߊߘߋ߲ ߠߴߊ߬ߟߎ߬ ߘߌ߫ ߘߌ߯ߣߊ ߘߐ߫ ߏ߬ ߘߐ߫ ، ߊ߲ ߘߏ߲߬ ߦߋ߫ ߟߝߊߙߌ ߟߎ߬ ߝߊߙߊ߲ߝߊ߯ߛߌ߫ ߟߊ߫ ߡߌ߬ߙߌ߲߬ߘߌ߬ ߞߏߟߐ߲ߠߊ ߟߎ߫ ߟߋ߬ ߦߋ߫ ﴿11﴾

ߣߴߊ߬ߟߎ߫ ߘߏ߲߬ ߞߵߊ߬ߟߎ߫ ߞߊ߬ߟߌ߬ߒ߬ߞߊ߲߬ߠߊ ߟߎ߬ ߕߌߢߍ߫ ߊ߬ߟߎ߬ ߟߊ߫ ߟߊ߬ߤߘߌ߬ ߕߊ ߞߐ߫ ߸ ߞߵߊߟߎ߫ ߟߊ߫ ߘߌ߯ߣߊ ߘߐߝߏ߲߰ߓߌ߫ ، ߏ߬ ߘߐ߫ ߸ ߊߟߎ߫ ߦߋ߫ ߓߊ߲߬ߓߊ߰ߦߊ ߢߍߓߊ߮ ߟߎ߫ ߞߟߍ߬ ، ߓߊߏ߬ ߞߊ߬ߟߌ߬ߒ߬ߞߊ߲߬ߠߊ߬ ߛߌ߫ ߕߍ߫ ߊ߬ߟߎ߬ ߟߊ߫ ، ߖߐ߲߬ߛߊ߫ ߞߍ߬ߟߍ ߘߴߊ߬ߟߎ߬ ߟߊߘߊ߲߬ ﴿12﴾

ߦߊ߯ߟߴߊߟߎ߫ ߕߍ߫ ߡߌ߬ߙߌ߲߬ߘߌ߫ ߞߍ߬ߟߍ߫ ߓߊ߬ ߸ ߡߍ߲ ߠߎ߫ ߞߵߊ߬ߟߎ߫ ߞߊ߬ߟߌ߬ߒ߬ߞߊ߲߬ߠߊ ߟߎ߬ ߕߌߢߍ߫ ߸ ߊ߬ ߣߴߊ߬ߟߎ߫ ߞߵߊ߬ߟߎ߬ ߣߌ ߟߊ߫ ߞߋߟߊ ߜߍ߲߫ ߞߏ ߞߊ߲߬؟ ، ߊ߬ߟߎ ߟߋ߫ ߘߏ߲߬ ߞߵߊߟߎ߫ ߟߊߢߌߣߌ߲߫ ߛߋ߲߬ߧߊ߬ ߝߟߐ ߘߐ߫ ، ߌ߬ߦߏ߯ ߊߟߎ߫ ߘߌ߫ ߛߌߟߊ߲߫ ߏ߬ ߟߎ߬ ߢߍ߫؟ ߊߟߊ߫ ߟߋ߫ ߘߏ߲߬ ߜߎ ߖߊߙߋߣߍ߲߫ ߊߟߎ߫ ߟߊ߫ ߛߌߟߊߒߢߍ ߟߊ߫ ߸ ߣߴߊ߬ ߕߘߍ߬ ߘߊ߫ ߊߟߎ߫ ߦߋ߫ ߘߍ߲߬ߞߣߍ߬ߦߊ߬ߓߊ߯ ߘߌ߫ ﴿13﴾

ߊߟߎ߫ ߦߴߊ߬ߟߎ߫ ߞߍ߬ߟߍ߫ ߟߋ߬ ߞߟߋ߫ ، ߊߟߊ߫ ߘߴߊ߬ߟߎ߫ ߖߊ߲߰ߞߕߴߊߟߎ߫ ߕߊ߫ ߓߟߏ߫ ߟߊ߫ ، ߊ߬ ߘߴߊ߬ߟߎ߬ ߘߐ߯ߦߊ߫ ߸ ߞߵߊߟߎ߫ ߘߍ߬ߡߍ߲߫ ߊ߬ߟߎ߫ ߡߊ߬ ߸ ߊ߬ ߣߴߊ߬ ߘߌ߫ ߡߌ߬ߙߌ߲߬ߘߌ߫ ߘߍ߲߬ߞߣߍ߬ߦߊ߬ߣߍ߲ ߠߎ߫ ߛߣߐ߬ߡߍ ߟߊߞߍ߲ߘߍߦߊ߫ ߜߋߙߋ߲ߜߋߙߋ߲߫ ﴿14﴾

ߊ߬ ߘߏ߲߬ ߘߴߊ߬ߟߎ߫ ߛߣߐ߬ߡߍ߬ ߘߐ߬ ߡߐߣߍ ߓߍ߯ ߓߐ߫ ߊ߬ߟߎ߬ ߘߐ߫ ، ߊ߬ ߣߌ߫ ߊߟߊ߫ ߘߌ߫ ߖߘߍ߬ߟߊ߬ߛߊߦߌ ߡߌ߬ߘߊ߫ ߡߐ߰ ߦߋ߫ ߸ ߡߍ߲ ߓߊ߯ ߊ߬ ߘߌߦߊ߫ ، ߓߊ ߊߟߊ߫ ߦߋ߫ ߟߐ߲ߠߌ߲ߠߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿15﴾

ߊ߰ ߊߟߎ߫ ߢߣߊ߫ ߟߋ߬ ߓߊ߬ ߞߏ߫ ߞߵߊߟߎ߫ ߕߏ߫ ߕߋ߲߬ ߸ ߞߵߊ߬ ߕߘߍ߬ ߊߟߊ߫ ߡߴߊ߬ ߟߐ߲߫ ߡߎߣߎ߲߬ ߡߍ߲ ߠߎ߬ ߘߌ߫ ߖߘߍ߬ߘߌ ߞߍ߫ ߊߟߎ߫ ߘߐ߫ ߸ ߊ߬ߟߎ߫ ߘߏ߲߬ ߡߴߊ߬ߟߎ߬ ߓߟߏߞߍ߫ ߞߣߐߘߝߐߢߐ߲߯ ߜߘߍ߫ ߟߴߊߟߊ߫ ߣߴߊ߬ ߟߊ߫ ߞߋߟߊ ߣߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߞߐ߫ ، ߊߟߊ߫ ߘߏ߲߬ ߞߟߊ߬ߡߊ߬ ߞߏ ߟߋ߬ ߊߟߎ߫ ߗߋߥߊߟߌ ߟߎ߬ ߘߌ߫ ﴿16﴾

ߊ߬ ߕߍ߫ ߘߤߊ߬ ߛߏߡߊ ߟߎ߬ ߦߋ߫ ߝߋߎ߫ ߸ ߊ߬ߟߎ߬ ߦߴߊ߬ߟߎ߬ ߡߊߘߏ߲߬ ߊߟߊ߫ ߟߊ߫ ߡߌ߬ߛߙߌ ߟߎ߬ ߟߊ߫ ߸ ߞߵߊ߬ ߕߘߍ߬ ߊ߬ߟߎ߬ ߛߙߋߦߊߣߴߊ߬ߟߎ߫ ߖߍ߬ߘߍ߫ ߡߊ߬ ߓߊ߲߬ߓߊ߰ߦߊ ߘߐ߫ ، ߏ߬ ߟߎ߫ ߟߋ߬ ߗߋߥߊߟߌ ߟߎ߬ ߕߌߢߍߣߍ߲߫ ، ߊ߬ ߣߌ߫ ߏ߬ ߟߎ߬ ߘߎߡߊߕߐ߫ ߕߊ ߟߋ߬ ߘߐ߫ ﴿17﴾

ߊߟߊ߫ ߟߊ߫ ߡߌ߬ߛߙߌ ߟߎ߬ ߦߋ߫ ߟߊߡߍ߲߬ߛߍ߲߬ߧߊ߫ ߡߐ߰ ߟߋ߬ ߓߟߏ߫ ߸ ߡߍ߲ ߘߍ߲߬ߞߣߍ߬ߦߊ߬ߣߍ߲߫ ߊߟߊ߫ ߣߌ߫ ߟߏ߲ߠߊߓߊ߲ ߡߊ߬ ߸ ߞߊ߬ ߛߊߟߌ ߟߐ߬ ߸ ߞߊ߬ ߖߞߊ ߘߌ߫ ߸ ߊ߬ ߘߏ߲߬ ߕߍ߫ ߛߌߟߊ߲߫ ߠߊ߫ ߝߏߦߌ߬ ߢߍ߫ ߊߟߊ߫ ߞߐ߫ ، ߒ߬ߓߵߊ߬ ߢߐ߲߰ߘߐ߫ ߸ ߏ߬ ߟߎ߫ ߟߋ߬ ߞߍߕߐ߫ ߞߊ߲ߘߊߓߊ߯ߕߐ ߟߎ߬ ߘߏ߫ ߘߌ߫ ﴿18﴾

ߌ߬ߦߏ߯ ߊߟߎ߫ ߘߌ߫ ߤߖߌߘߋ߲ ( ߠߎ߬ ) ߟߊߡߌ߲߬ ߜߊ߲ߛߊ߲ ߣߌ߫ ߡߌ߬ߛߙߌ߬ ߟߊߕߏߣߍ߲ ߞߣߐ߫ ߓߊ߯ߙߊ ߡߐ߱ ߟߎ߬ ߞߍ߫ ߸ ߦߏ߫ ߡߍ߲ ߘߍ߲߬ߞߣߍ߬ߦߊ߬ߣߍ߲߫ ߊߟߊ߫ ߣߌ߫ ߟߏ߲ߠߊߓߊ߲ ߡߊ߬ ߸ ߊ߬ ߣߴߊ߬ ߞߊ߬ ߖߘߍ߬ߘߌ ߞߍ߫ ߊߟߊ߫ ߛߌߟߊ ߞߊ߲߬؟ ߏ߬ ߟߎ߬ ߕߴߛߋ߫ ߞߢߊ߫ ߟߴߊߟߊ߫ ߓߘߊ ߞߟߋ߫ ، ߊߟߊ߫ ߘߏ߲߬ ߕߍ߫ ߡߌ߬ߙߌ߲߬ߘߌ߫ ߕߐ߬ߢߍ߰ߒߕߋ ߟߎ߬ ߞߊ߲ߘߊ߫ ߟߊ߫ ﴿19﴾

ߡߍ߲ ߠߎ߫ ߞߏ߬ߣߌ߲ ߘߍ߲߬ߞߣߍ߬ߦߊ߬ߣߍ߲߫ ߞߊ߬ ߝߎ߲ߘߌ߫ ߸ ߊ߬ ߣߌ߫ ߞߊ߬ ߖߘߍ߬ߘߌ ߞߍ߫ ߊߟߊ߫ ߛߌߟߊ ߞߊ߲߬ ߊ߬ߟߎ߬ ߟߊ߫ ߣߊ߲߬ߝߟߏ ߟߎ߬ ߣߴߊ߬ߟߎ߫ ߖߘߍ߬ߞߎ߲ ߠߎ߬ ߟߊ߫ ߸ ߏ߬ ߟߎ߫ ߟߋ߬ ߡߐ߬ߟߐ߲ ߓߏ߲߬ߓߵߊߟߊ߫ ߓߘߊ ߸ ߏ߬ ߟߎ߫ ߟߋ߫ ߘߏ߲߬ ߦߋ߫ ߣߌ߬ ߛߐ߬ߘߐ߲߬ߠߊ ߟߎ߬ ߘߌ߫ ﴿20﴾

ߏ߬ ߟߎ߫ ߡߊ߰ߙߌ ߦߴߊ߬ ߘߟߊߝߎ߬ ߟߴߊ߬ߟߎ߬ ߦߋ߫ ߊ߬ ߟߊ߫ ߤߌߣߊ ߟߊ߫ ߸ ߊ߬ ߣߌ߫ ߘߌ߬ߢߍ ߣߌ߫ ߣߊߞߐ ߟߎ߬ ߟߊ߫ ߸ ߊ߬ߟߎ߬ ߢߍߛߌ߰ߣߍ߲߫ ߡߍ߲ ߠߎ߬ ߞߣߐ߫ ߣߍߡߊ߫ ߘߎߡߊߣߍ߲ ߠߊ߫ ﴿21﴾

ߏ߬ ߟߎ߬ ߘߎߡߊߕߐ߫ ߏ߬ ߟߋ ߘߐ߫ ߞߘߊߎ߫ ، ߖߊ߯ߕߋ߬ ߸ ߛߊ߬ߙߊ ߓߏ߲߬ߓߊ ߦߴߊߟߊ߫ ߟߋ߬ ߓߟߏ߫ ߊ߬ ߕߍ߰ߟߊ ߘߐ߫ ﴿22﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߞߊߣߵߊߟߎ߫ ߝߊ߭ ߟߎ߬ ߣߴߊߟߎ߫ ߓߊߘߋ߲ ߠߎ߬ ߞߍ߫ ߊߟߎ߫ ߢߌ߲߭ ߠߎ߬ ߘߌ߫ ߸ ߣߴߏ߬ ߟߎ߫ ߞߊ߬ ߓߊ߲߬ߓߊ߰ߦߊ ߞߊ߬ߣߌ߲߫ ߞߊ߬ ߕߊ߬ߡߌ߲߫ ߘߍ߲߬ߞߣߍ߬ߦߊ ߟߊ߫ ، ߡߍ߲ ߘߏ߲߬ ߓߊ߯ ߢߌ߲߬ߧߊ ߟߐ߬ ߏ߬ ߟߎ߫ ߡߵߊߟߎ߫ ߘߐ߫ ߸ ߏ߬ ߟߎ߫ ߟߋ߫ ߕߐ߬ߢߍ߰ߒߕߋ ߟߎ߬ ߘߌ߫ ﴿23﴾

ߊ߬ ߟߊߛߋ߫ ߞߏ߫ ߣߴߊ߬ ߕߘߍ߬ ߘߊ߫ ߸ ߊߟߎ߫ ߝߊ߭ ߟߎ߬ ߣߴߊߟߎ߫ ߘߋ߲ߞߍ ߟߎ߬ ߣߴߊߟߎ߫ ߓߊߘߋ߲ ߠߎ߬ ߣߴߊߟߎ߫ ߝߘߎߡߊ ߟߎ߬ ߣߴߊߟߎ߫ ߓߊߓߏ߲ ߣߴߊߟߎ߫ ߟߊ߫ ߣߊ߲߬ߝߟߏ߬ ߓߊ߯ߙߊߣߍ߲ ߠߎ߬ ߣߴߊߟߎ߫ ߟߊ߫ ߖߊ߬ߥߏ߬ߘߊ ߟߎ߫ ߜߟߊ߬ ߞߏ ߖߐ߬ߘߐ ߟߋ߬ ߊߟߎ߫ ߟߊ߫ ، ߊ߬ ߣߌ߫ ߣߴߊߟߎ߫ ߛߊ߬ߥߏ߬ߣߊ߲߬ ߡߊ߬ߞߍ߬ ߦߙߐ ߟߎ߬ ߘߌߡߊ߲߫ ߞߍ߫ ߘߴߊߟߎ߫ ߦߋ߫ ߞߊ߬ ߕߊ߬ߡߌ߲߬ ߊߟߊ߫ ߣߴߊ߬ ߟߊ߫ ߞߋߟߊ ߞߊ߲߬ ߸ ߊ߬ ߣߌ߫ ߞߊ߬ ߕߊ߬ߡߌ߲߬ ߖߘߍ߬ߘߌ ߞߊ߲߬ ߊߟߊ߫ ߟߊ߫ ߛߌߟߊ ߘߐ߫ ߸ ߒ߬ߓߵߊߟߎ߫ ߦߋ߫ ߡߊ߬ߞߐ߬ߣߐ߲߬ߠߌ߲ ߞߍ߫ ߸ ߝߏ߫ ߊߟߊ߫ ߦߋ߫ ߣߵߊ߬ ߟߊ߫ ߥߊߟߌߢߊ ߘߌ߫ ، ߊߟߊ߫ ߘߏ߲߬ ߕߍ߫ ߡߌ߬ߙߌ߲߬ߘߌ߫ ߔߊߟߊ߲ߞߊߣߍ߲ ߠߎ߬ ߞߊ߲ߘߊ߫ ߟߊ߫ ߝߋߎ߫ ﴿24﴾

ߖߊ߯ߕߋ߬ ߸ ߊߟߊ߫ ߓߘߴߊߟߎ߫ ߘߍ߬ߡߍ߲߬ ߞߟߊߘߊ߫ ߛߌߦߊߡߊ߲߫ ߘߐ߫ ߸ ߊ߬ ߣߌ߫ ߤߎ߬ߣߊ߬ߦߣߌ߬ ( ߞߟߍ ) ߟߏ߲ ߝߣߊ߫ ߘߐ߫ ، ߏ߬ ߕߎ߬ߡߊ ߊߟߎ߫ ߟߊ߫ ߛߌߦߊߦߊ ߓߘߴߊߟߎ߫ ߤߣߍ߫ ، ߞߏ߬ߣߌ߲߬ ߏ߬ ߡߊ߫ ߝߏߦߌ߫ ߢߵߊߟߎ߫ ߡߊ߬ ، ߘߎ߰ߞߟߏ ߣߴߊ߬ ߟߊ߫ ߦߙߌߥߊ ߝߊ߲߭ ߜߍ߲߬ߘߍ߬ ߘߴߊߟߎ߫ ߡߊ߬ ߸ ߝߏ߫ ߊߟߎ߫ ߞߵߊߟߎ߫ ߞߐߟߊ߫ ߓߏ߬ߙߌ ߘߌ߫ ﴿25﴾

ߏ߬ ߟߋ ߞߐ߫ ߸ ߊߟߊ߫ ߞߵߊ߬ ߟߊ߫ ߡߊ߬ߝߊ ߟߊߖߌ߰ ߊ߬ ߟߊ߫ ߞߋߟߊ ߡߊ߬ ߸ ߊ߬ ߣߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߫ ߡߊ߬ ، ߊ߬ ߣߴߊ߬ ߞߊ߬ ߞߟߍ߬ߓߏߟߏ߲߫ ߠߎ߫ ߟߊߖߌ߰ ߸ ߊߟߎ߫ ߡߊ߫ ߡߍ߲ ߠߎ߬ ߦߋ߫ ، ߊ߬ ߘߏ߲߬ ߞߊ߬ ߓߊ߲߬ߓߊ߮ ߟߎ߫ ߖߊ߲߰ߞߕߊ߫ ، ߓߊ߬ߓߊ߮ ߟߎ߫ ߘߏ߲߬ ߛߙߊ߬ ߢߊ ߟߴߏ߬ ߛߎ߮ ߘߌ߫ ﴿26﴾

ߊߟߊ߫ ߘߌߣߊ߬ ߖߘߍ߬ߟߊ߬ߛߊߦߌ ߡߌ߬ߘߊ߫ ߡߐ߰ ߦߋ߫ ߏ߬ ߞߐ߫ ߸ ߡߍ߲ ߓߊ߯ ߊ߬ ߘߌߦߊ߫ ، ߊߟߊ߫ ߘߏ߲߬ ߦߋ߫ ߡߊ߬ߞߕߏ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿27﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߛߏߡߊ ߟߎ߬ ߦߋ߫ ߞߛߐ߫ ߟߋ߬ ߘߌ߫ ، ߏ߬ ߘߐ߫ ߸ ߊ߬ߟߎ߬ ߞߊߣߵߊ߬ߟߎ߬ ߡߊߘߏ߲߬ ߡߌ߬ߛߙߌ߫ ߟߊߕߏߣߍ߲ ߠߴߊ߬ߟߎ߬ ߟߊ߫ ߛߊ߲߭ ߣߌ߲߬ ߞߐ߫ ߘߋ߬. ߣߴߊߟߎ߫ ߞߍ߫ ߘߊ߫ ߛߌߟߊ߲߫ ߠߊ߫ ߘߐ߱ ߢߍ߫ ߸ ߛߋߚߋ߫ ߊߟߊ߫ ߘߌߣߵߊߟߎ߫ ߟߊߓߣߊ߬ߦߴߊ߬ ߟߊ߫ ߢߊ߬ߒߡߊ߭ ߟߊ߫ ߸ ߣߴߏ ߞߵߊ߬ ߘߌߦߊ߫. ߖߊ߯ߕߋ߬ ߸ ߊߟߊ߫ ߦߋ߫ ߟߐ߲ߠߌ߲ߠߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿28﴾

ߡߐ߱ ߡߍ߲ ߠߎ߬ ߕߍ߫ ߘߍ߲߬ߞߣߍ߬ߦߊ߬ ߟߴߊߟߊ߫ ߣߌ߫ ߟߏ߲߫ ߠߊߓߊ߲ ߡߊ߬ ߸ ߊ߬ ߣߴߊ߬ߟߎ߬ ߕߍ߫ ߕߊ߬ߣߊ ߟߊߕߏ߫ ߟߊ߫ ߸ ߊߟߊ߫ ߣߴߊ߬ ߟߊ߫ ߞߋߟߊ ߞߊ߬ ߡߍ߲ ߞߍ߫ ߕߊ߬ߣߊ ߘߌ߫ ، ߊ߬ߟߎ߫ ߘߏ߲߬ ߕߍ߫ ߊ߬ߟߎ߬ ߓߟߏߞߍ߫ ߟߊ߫ ߕߎ߬ߢߊ߬ ߘߌ߯ߣߊ ߟߊ߫ ߸ ߣߊߟߌ߬ߡߎ߲߫ ߟߍߙߊߟߞߊ ߟߎ߬ ߘߌ߫ ، ߊߟߎ߯ ߏ߬ ߟߎ߫ ߞߍ߬ߟߍ߫ ߟߋ߬ ߝߎߚߎ߫ ߸ ߝߏ߫ ߊ߬ߟߎ߬ ߦߋ߫ ߣߌߛߐ߲ߞߐ ߘߌ߫ ߝߊ߲߬ߞߊ ߟߊ߫ ߸ ߞߵߊ߬ ߕߘߍ߬ ߊ߬ߟߎ߬ ߦߋ߫ ߘߐ߯ߦߊ ߡߎ߬ߙߎ߲߬ߕߌ߬ߣߍ߲߬ ߜߟߏ ߞߊ߲߬ ﴿29﴾

ߦߊ߬ߤߎ߯ߘߎ ߟߎ߬ ߞߊ߲߫ ߸ ߞߏ߫ ߎ߬ߖ߭ߊߌߙߎ߫ ߟߋ߬ ߊߟߊ߫ ߘߋ߲ߞߍ ߘߌ߫ ، ߣߊ߬ߛߊ߯ߙߊ ߟߎ߬ ߞߊ߲߫ ߸ ߞߏ߫ ( ߟߊ߬ߞߛߌ߬ߟߌ߬ߟߊ߫ ) ߡߊߡߎ߲߬ߣߍ߲ ߠߋ߬ ߊߟߊ߫ ߘߋ߲ߞߍ ߘߌ߫ ، ߏ߬ ߓߍ߯ ߦߴߊ߬ߟߎ߬ ߟߊ߫ ߘߊ߫ ߘߐ߫ ߞߎߡߊ߫ ߜߊ߲ߛߊ߲ ߠߋ߬ ߘߌ߫ ، ߊ߬ߟߎ߫ ߘߏ߲߬ ߦߋ߫ ߝߟߐ߫ ߓߊ߲߬ߓߊ߮ ߟߎ߬ ߘߊߘߐߞߊ߲ ߠߋ߬ ߟߊߘߍ߲߰ ߠߴߏ߬ ߘߌ߫ ، ߊߟߊ߫ ߞߵߊ߬ߟߎ߬ ߟߊߕߏ߫ ߊ߬ ߘߐ߫ ߟߋ߬ ߸ ߦߏ߫ ߊ߬ߟߎ߫ ߞߎ߲߭ ߓߐߣߴߊ߬ ߞߊ߲߬ ߢߊ ߡߍ߲ ﴿30﴾

ߊ߬ߟߎ߫ ߞߵߊ߬ߟߎ߬ ߟߊ߫ ߞߏ߲ߓߏ ߟߎ߬ ߣߴߊ߬ߟߎ߬ ߟߊ߫ ߓߊ߬ߕߏ߬ ߘߊ߰ߡߊ߬ߞߍ߬ߟߊ ߟߎ߫ ߟߋ߬ ߞߍ߫ ߡߊ߰ߙߌ ߟߎ߬ ߘߌ߫ ߞߵߊߟߊ߫ ߕߏ߫ ߸ ߊ߬ ߣߌ߫ ߡߊߙߌߦߡߊ߫ ߘߋ߲ߞߍ߫ ߡߊߡߎ߲߬ߣߍ߲ ߝߣߊ߫ ، ߊ߬ߟߎ߫ ߘߏ߲߬ ߡߊ߫ ߟߐ߬ ߝߏߦߌ߬ ߟߊ߫ ߸ ߝߏ߫ ߊ߬ߟߎ߬ ߦߋ߫ ߡߊ߰ߙߌ߬ ߞߋߟߋ߲߫ ߠߋ߫ ߓߊ߬ߕߏ߬ ߸ ߡߊ߰ߙߌ߬ ߜߘߍ߫ ߕߍ߫ ߡߍ߲ ߞߐ߫ ، ߏ߬ ߘߏ߲߬ ߛߊߣߌ߲ߡߊ߲߫ ߊ߬ߟߎ߬ ߟߊ߫ ߜߙߊ߬ߟߌ߬ ߝߋ߲ ߠߎ߫ ߡߊ߬ ﴿31﴾

ߊ߬ߟߎ߬ ߦߴߊ߬ ߝߍ߬ ߟߋ߬ ߸ ߞߵߊߟߊ߫ ߟߊ߫ ߦߋߟߋ߲ ߠߊߛߵߊ߬ߟߎ߬ ߘߊ ߟߎ߬ ߟߊ߫ ، ߊߟߊ߫ ߘߏ߲߬ ߓߊ߲߬ߣߍ߲߫ ߠߋ߬ ߞߏ߫ ߝߏ߫ ߊ߬ ߓߊ߯ ߊ߬ ߟߊ߫ ߦߋߟߋ߲ ߘߝߊ߫ ߟߋ߬ ߖߐ߫ ߸ ߤߟߴߊ߬ ߜߏߦߊ߫ ߘߊ߫ ߓߊ߲߬ߓߊ߮ ߟߎ߬ ߦߋ߫ ﴿32﴾

ߊ߬ߟߋ ߟߋ߫ ߞߵߊ߬ ߟߊ߫ ߞߋߟߊ ߗߋ߫ ߞߊ߲ߘߦߊ ߣߌ߫ ߕߎ߬ߢߊ߬ ߘߌ߯ߣߊ ߘߌ߫ ߸ ߛߴߊ߬ ߘߴߏ߬ ߟߊߦߟߍ߬ ߘߌ߯ߣߊ ߓߍ߯ ߞߊ߲߬ ߸ ߤߟߴߊ߬ ߜߏߦߊ߫ ߘߊ߫ ߛߏߡߊ ߟߎ߬ ߦߋ߫ ﴿33﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߟߍߙߊߟߞߊ߫ ߞߏ߲ߓߏ ߟߎ߬ ߣߴߊ߬ߟߎ߬ ߘߐ߫ ߓߊ߬ߕߏ߬ ߘߊ߰ߡߊ߬ߞߍ߬ߟߊ ߛߘߍߡߊ߲߫ ߠߋ߬ ߡߐ߱ ߟߎ߬ ߟߊ߫ ߣߊ߲߬ߝߟߏ ߟߎ߬ ߘߊߥߎ߲߫ ߠߊ߫ ߣߊ߲߬ߞߊ߬ߡߎ߲߬ߣߊ߲ߞߊߡߎ߲ ߠߊ߫ ، ߊ߬ ߣߌ߫ ߞߊ߬ ߞߎ߬ߡߊ߲߬ߘߌ߬ߟߌ ߞߍ߫ ߊߟߊ߫ ߟߊ߫ ߛߌߟߊ ߡߊ߬ ، ߒ߬ߓߊ߬ ߡߍ߲ ߠߎ߬ ߝߣߊ߫ ߦߋ߫ ߛߊߣߌ߲ ߣߌ߫ ߥߊߘߌ ߞߏ߲ߣߍ߰ ߟߊ߫ ߞߵߊ߬ߟߎ߫ ߓߊ߲߬ ߊ߬ߟߎ߫ ߡߎ߬ߛߞߊ߬ ߟߴߊߟߊ߫ ߛߌߟߊ ߞߊ߲߬ ߸ ߌ ߦߴߌ ߘߟߊߥߊ߬ߦߌ߲߫ ߏ߬ ߟߎ߬ ߦߋ߫ ߖߊ߲߰ߞߕߊ߬ ߘߌߡߌ߲ߣߍ߲ ߠߊ߫ ﴿34﴾

ߟߏ߲ ߘߏ߫ ߸ ߏ߬ ߟߎ߫ ߟߋ߬ ߞߟߊߦߊߕߐ߫ ߔߊߦߌߔߊߦߌ ߕߊ ߘߐ߫ ߞߵߏ߬ ߞߍ߫ ߞߵߊ߬ߟߎ߬ ߕߋ߲ߘߊ ߟߎ߬ ߣߴߊ߬ߟߎ߬ ߥߏ߲ߓߊ߲ ߠߎ߬ ߣߴߊ߬ߟߎ߬ ߞߐ ߟߎ߬ ߡߊߖߋ߬ߣߌ߲߬ ، ߞߏ߫ ߝߋ߲߫ ߠߋ߬ ߣߌ߲߬ ߊߟߎ߫ ߞߊ߬ ߡߍ߲ ߞߏ߲ߣߍ߰ ߊߟߎ߫ ߖߘߍ߬ ߦߋ߫ ، ߒ߬ߓߵߊߟߎ߫ ߦߴߊߟߎ߫ ߟߊ߫ ߞߏ߲ߣߍ߯ߟߌ ߏ ߓߌ߲߬ߓߊߏ ߡߊߜߙߏ߬ ߛߊ߫ ﴿35﴾

ߛߊ߲߬ߓߏߟߏ߲ ߠߎ߬ ߦߙߌߞߊ ߊߟߊ߫ ߓߘߊ ߸ ߏ߬ ߟߋ ߛߊ߲߬ߓߏ߬ߟߏ߲߬ ߕߊ߲߫ ߣߌ߫ ߝߌ߬ߟߊ߬ ߘߌ߫ ߊߟߊ߫ ߟߊ߫ ߟߍߙߊ ߘߐ߫ ߞߊ߬ߦߌ߯ ߛߊ߲ ߠߎ߬ ߣߌ߫ ߘߎ߱ ߘߊ߲߫ ߟߏ߲ ߊ߬ ߓߟߏ߫ ، ߣߊ߯ߣߌ߲߫ ߦߴߊ߬ߟߎ߬ ߘߐ߫ ߸ ߏ߬ ߟߎ߬ ߦߋ߫ ߟߊߕߏߕߊ ߟߎ߬ ߘߌ߫ ، ߒ߬ߓߊ߬ ߏ߬ ߟߋ ߘߌ߯ߣߊ߫ ߕߋߟߋ߲ߣߍ߲ ߘߌ߫ ، ߊߟߎ߫ ߞߊߣߵߊߟߎ߫ ߖߍ߬ߘߍ߫ ߕߐ߬ߢߍ߯ ߏ߬ ߟߎ߬ ߟߊ߫ ߘߋ߬ ، ߊߟߎ߫ ߦߋ߫ ߛߏߡߊ ߟߎ߫ ߞߍ߬ߟߍ߫ ߊ߬ ߓߍ߯ ߟߊ߫ ߸ ߦߏ߫ ߊ߬ߟߎ߬ ߦߴߊߟߎ߫ ߞߟߍ߬ ߟߊ߫ ߢߊ ߡߍ߲ ߊ߬ ߓߍ߯ ߟߊ߫ ، ߊߟߎ߫ ߘߏ߲߬ ߦߴߊ߬ ߟߐ߲߫ ߸ ߞߏ߫ ߊߟߊ߫ ߦߋ߫ ߝߊ߲ߕߊ߲ߞߟߊ ߟߎ߫ ߟߋ߬ ߝߍ߬ ﴿36﴾

ߛߊ߲߬ߓߏߟߏ߲߫ ߕߍߘߏ߲ߕߊ ߦߋ߫ ߓߊ߲߬ߓߊ߰ߦߊ ߡߊߞߊ߬ߝߏ ߟߋ߬ ߘߌ߫ ߸ ߓߊ߲߬ߓߊ߮ ߟߎ߬ ߦߋ߫ ߟߊߝߟߌ߬ ߟߊ߫ ߡߍ߲ ߠߊ߫ ، ߊ߬ߟߎ߬ ߘߌ߫ ߟߊߕߏߕߊ ߟߊߕߏߓߊߟߌ ߕߏ߫ ߛߊ߲߭ ߘߏ߫ ߟߊ߫ ߸ ߞߵߊ߬ ߟߊߕߏ߫ ߛߊ߲߬ ߜߘߍ߫ ߟߊ߫ ، ߏ ߞߎ߲߭ ߠߋ߬ ߛߴߊ߬ߟߎ߬ ߘߌ߫ ߕߏ߫ ߓߍ߲߬ ߠߴߊߟߊ߫ ߟߊ߫ ߝߋ߲߫ ߠߊߕߏߕߊ ߦߙߌߞߊ ( ߘߐߙߐ߲߫ ) ߡߊ߬ ߸ ߞߵߊߟߊ߫ ߟߊ߫ ߞߏ߫ ߟߊߕߐ߲ߣߍ߲ ߠߊߘߊ߬ߤߊ߫ ، ߞߵߊ߬ ߕߘߍ߬ ߊ߬ߟߎ߬ ߟߊ߫ ߓߊ߯ߙߊ߫ ߖߎ߮ ߟߎ߫ ߟߋ߬ ߡߊߢߍ߯ߙߍߣߍ߲߫ ߊ߬ߟߎ߬ ߢߊߞߘߐ߫ ، ߊߟߊ߫ ߘߏ߲߬ ߕߍ߫ ߡߌ߬ߙߌ߲߬ߘߌ߫ ߓߊ߲߬ߣߍ߲ ߠߎ߬ ߞߊ߲ߘߊ߫ ߟߊ߫ ﴿37﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߡߋ߬ߘߋ ߊߟߎ߫ ߟߊ߫ ߓߏ߲߰ ߸ ߊ߬ ߓߊ߯ ߝߐ߫ ߊߟߎ߫ ߦߋ߫ ߞߏ߫ ߊߟߎ߯ ߜߘߌ߫ ( ߞߊ߬ ߥߊ߫ ߞߍ߬ߟߍ ߘߐ߫ ) ߊߟߊ߫ ߛߌߟߊ ߞߊ߲߬ ߸ ߊߟߎ߫ ߘߴߊߟߎ߫ ߣߊߙߊ߲ߞߊߣߍ߲ ߕߏ߫ ߘߎ߱ ߡߊ߬؟ ߦߊ߯ߟߴߊߟߎ߫ ߘߌ߬ߢߍ߬ߣߍ߲߬ ߘߎߢߊ߫ ߢߣߊߡߦߊ ߟߋ߫ ߡߊ߬ ߟߊߞߌߙߊ߫ ߕߊ ߘߌ߫ ߓߊ߬؟ ߞߵߊ߬ ߕߘߍ߬ ߘߏ߲߬ ߘߎߢߊ߫ ߢߣߊߡߦߊ ߘߊ߰ߡߎ߲ ߕߍ߫ ߝߏߦߌ߬ ߘߌ߫ ߟߊߞߌߙߊ߫ ߝߏ߫ ߕߜߋߣߍ߲߫ ﴿38﴾

ߣߴߊߟߎ߫ ߡߊ߫ ߜߘߌ߫ ( ߞߊ߬ ߥߊ߫ ߞߍ߬ߟߍ ߘߐ߫ ) ߸ ‹ ߊߟߊ߫ › ߘߴߊߟߎ߫ ߖߊ߲߰ߞߕߊ߫ ߖߊ߲߰ߞߕߊ߬ ߘߌߡߌ߲ߣߍ߲ ߠߊ߫ ߸ ߊ߬ ߣߴߊ߬ ߘߴߊߟߎ߫ ߡߊߝߊ߬ߟߋ߲߫ ߡߌ߬ߙߌ߲߬ߘߌ߬ ߜߘߍ߫ ߟߊ߫ ߡߍ߲ ߕߍ߫ ߊߟߎ ߘߌ߫ ، ߊߟߎ߫ ߘߏ߲߬ ߕߴߊ߬ ߕߙߐ߫ ߝߏߦߌ߬ ߟߊ߫ ߸ ߓߊ ߞߏ ߓߍ߯ ߛߋ ߊߟߊ߫ ߟߋ߬ ߦߋ߫ ﴿39﴾

ߣߴߊߟߎ߫ ߡߊ߫ ‹ ߞߋߟߊ › ߘߍ߬ߡߍ߲߬ ߸ ߊߟߊ߫ ߓߘߴߊ߬ ߘߍ߬ߡߍ߲߫ ߞߘߐ߬ߡߊ߲߫ ߸ ߏ ߕߎ߬ߡߊ ߓߊ߲߬ߓߊ߮ ߟߎ߬ ߓߘߴߊ߬ ߜߍ߲߫ ، ߊ߬ߟߎ߫ ߝߌ߬ߟߊ߬ ߔߋ ߟߋ߫ ߕߘߍ߬ ߸ ߏ ߕߎ߬ߡߊ ߊ߬ߟߎ߫ ߝߌ߬ߟߊ ߦߋ߫ ߝߊߟߊ߲ ߠߊ߫ ، ߏ ߕߎ߬ߡߊ ߟߋ߬ ߸ ߊ߬ ߞߵߊ߬ ߝߐ߫ ߊ߬ ߘߍ߬ߢߐ߲߮ ߡߊ߬ ߸ ߞߏ߫ ߌ ߞߣߊ߫ ߛߎ߬ߣߎ߲߬ ߝߋߎ߫ ، ߓߊߏ߬ ߊߟߊ߫ ߦߴߊ߲ ߝߍ߬ ، ߏ߬ ߞߍ ߊߟߊ߫ ߞߵߊ߬ ߟߊ߫ ߡߊ߬ߝߊ ߟߊߖߌ߰ ߊ߬ ߡߊ߬ ߸ ߊ߬ ߣߴߊ߬ ߞߵߊ߬ ߝߊ߲߬ߞߊߘߏ߲߬ ߞߟߍ߬ߓߏߟߏ߲߫ ߠߎ߫ ߟߊ߫ ߸ ߊߟߎ߫ ߡߊ߫ ߡߍ߲ ߠߎ߬ ߦߋ߫ ، ߊ߬ ߣߴߊ߬ ߞߊ߬ ߓߊ߲߬ߓߊ߮ ߟߎ߬ ߟߊ߫ ߞߎߡߊ ߞߍ߫ ߡߊ߬ߖߌ߰ߕߊ ߘߌ߫ ߔߙߐߔߙߐ߫ ߸ ߞߵߊߟߊ߫ ߟߊ߫ ߞߎߡߊ ߞߍ߫ ߟߊ߬ߦߟߍ߬ߕߊ ߘߌ߫ ߔߏ߲ߞߌ߲߫ ، ߊߟߊ߫ ߘߏ߲߬ ߦߋ߫ ߣߌ߬ߣߌ߬ߟߊ߫ ߘߌ߫ ߸ ߊ߬ ߦߋ߫ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿40﴾

ߊߟߎ߫ ߝߍߡߊ߲߫ ߓߍ߫ ߸ ߊߟߎ߫ ߜߌߟߌ߲ߡߊ߲߫ ߓߍ߫ ߸ ߊߟߎ߫ ߜߘߌ߫ ߞߊ߬ ߥߊ߫ ߖߘߍ߬ߘߌ ߞߍ߫ ߊߟߎ߫ ߟߊ߫ ߣߊ߲߬ߝߟߏ ߟߎ߬ ߣߴߊߟߎ߫ ߖߘߍ߬ߞߎ߲ ߠߎ߬ ߟߴߊߟߊ߫ ߛߌߟߊ ߞߊ߲߬ ، ߓߊ ߏ߬ ߟߋ ߘߌߡߊ߲߫ ߊߟߎ߫ ߟߊ߫ ߣߴߊߟߎ߫ ߓߴߊ߬ ߟߐ߲߫ ߠߊ߫ ﴿41﴾

ߣߴߊ߬ ߕߎ߲߬ ߞߍ߫ ߘߊ߫ ߣߊ߲߬ߝߟߏ߬ߡߎ߯ ߞߎ߲߬ߘߐ߬ߛߎߘߎ߲߫ ߘߌ߫ ߸ ߊ߬ ߣߌ߫ ߕߊ߯ߡߊ߫ ߡߊߓߍ߲߬ߣߍ߲߫ ߘߌ߫ ߸ ߊ߬ߟߎ߫ ߕߎ߲߬ ߘߌ߫ ߥߴߌ ߝߍ߬ ߟߋ߬ ߘߍ߯ ߸ ߓߊ߬ߙߌ߬ ߝߏ߬ߣߊ߲ ߠߋ߬ ߖߊ߲߰ߧߊ߬ߣߴߊ߬ߟߎ߫ ߡߊ߬ ، ߊ߬ߟߎ߬ ߘߌߣߵߊ߬ߟߎ߫ ߞߊ߬ߟߌ߬ ߊߟߊ߫ ߟߊ߫ ߸ ߞߏ߫ ߣߌ߫ ߟߊ߬ߣߐ߫ ߕߘߍ߬ ߊ߲ ߧߋ߫ ߸ ߊ߲ ߕߎ߲߬ ߘߌ߫ ߓߐ߫ ߟߋ߬ ߘߍ߯ ( ߞߊ߬ ߥߊ߫ ) ߊߟߎ߫ ߝߍ߬ ، ߊ߬ߟߎ߬ ߦߴߊ߬ߟߎ߫ ߖߘߍ߬ ߟߊߕߏ߫ ߟߴߊ߬ ߘߐ߫ ߟߋ߬ ߝߎ߯ ، ߊߟߊ߫ ߘߏ߲߬ ߞߵߊ߬ ߟߐ߲߫ ߞߏ߫ ߥߎߦߊ߫ ߝߐߟߊ ߟߎ߫ ߟߋ߬ ﴿42﴾

ߊߟߊ߫ ߓߘߊ߫ ߜߊ߲ߒߞߎ߲ߠߴߌ ߡߊ߬ ߸ ( ߣߴߏ߬ ߕߍ߫ ) ߡߎ߲߬ߠߊ߫ ߌ ߘߌ߬ߢߍ߬ ߘߴߊ߬ߟߎ߫ ߡߊ߬؟ ߝߏ߫ ߌ ߕߍ߬ߘߍ߫ ߕߎ߬ߢߊ߬ ߝߐ߬ߟߊ ߟߎ߬ ߝߊߙߊ߲ߝߊߛߌ ߟߐ߲߫ ߸ ߊ߬ ߣߴߌ ߕߘߍ߬ ߥߎߦߊ߫ ߝߐߟߊ ߟߎ߬ ߝߣߊ߫ ߟߐ߲߫ ﴿43﴾

ߡߐ߱ ߟߎ߬ ߕߴߌ ߘߌ߬ߢߍ߬ߟߊ߬ߢߌߣߌ߲߫ ( ߠߊ߫ ) ߝߋߎ߫ ߸ ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߊߟߊ߫ ߣߌ߫ ߟߏ߲ߠߊߓߊ߲ ߡߊ߬ ߸ ߞߏ߫ ߊ߬ߟߎ߬ ߦߋ߫ ߛߊ߬ߦߌ߲߫ ߞߍ߬ߟߍ ߘߐ߫ ߊ߬ߟߎ߬ ߟߊ߫ ߣߊ߲߬ߝߟߏ ߟߎ߬ ߘߌ߫ ߸ ߊ߬ ߣߴߊ߬ߟߎ߫ ߖߘߍ߬ߞߎ߲ ߠߎ߬ ߘߌ߫ ، ߓߊߏ߬ ߊߟߊ߫ ߞߊ߬ ߝߊ߲ߕߊ߲ߞߟߊ ߟߎ߬ ߟߐ߲߫ ߠߋ߬ ﴿44﴾

ߡߐ߰ ߟߎ߫ ߟߵߌ ߘߌ߬ߢߍ߬ߟߊ߬ߢߌߣߌ߲߫ ߠߊ߫ ߸ ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲߬ ߕߍ߫ ߊߟߊ߫ ߣߌ߫ ߟߏ߲ߠߊߓߊ߲ ߡߊ߬ ، ߓߊ ߏ߬ ߟߎ߫ ߛߣߐ߬ߣߍ ߟߎ߬ ߛߌߞߊߣߍ߲߫ ߠߋ߬ ߸ ߊ߬ߟߎ߬ ߦߋ߫ ߝߌ߬ߞߌ߲߬ߝߊ߲ߞߊ߲߫ ߠߴߊ߬ߟߎ߬ ߟߊ߫ ߛߌߞߊ ߏ߬ ߟߋ ߕߍߡߊ߬ ﴿45﴾

ߣߴߊ߬ߟߎ߫ ߕߎ߲߬ ߦߋ߫ ߓߐߟߌ ߝߍ߬ ߸ ߊ߬ߟߎ߫ ߕߎ߲߬ ߘߴߊ߬ ߝߊ߲ߘߊ߫ ߘߐߓߍ߲ ߞߍ߫ ، ߓߊ߬ߙߌ߬ ߊ߬ߟߎ߬ ߟߊ߫ ߥߊߟߌ ߟߋ߬ ߜߏߦߊ߫ ߘߴߊߟߊ߫ ߦߋ߫ ، ߊ߬ ߞߵߊ߬ߟߎ߬ ߘߐߡߌ߬ߘߊ߫ ߏ߬ ߟߋ ߘߐ߫ ، ߏ߬ ߞߍ ߸ ߊ߬ ߝߐ߫ ߘߴߊ߬ߟߎ߫ ߡߊ߬ ߸ ߞߏ߫ ߊߟߎ߫ ߦߴߊߟߎ߫ ߛߏ߬ߘߌ߫ ߛߌ߰ߓߊ߮ ߟߎ߫ ߝߍ߬ ﴿46﴾

ߣߴߊ߬ߟߎ߫ ߕߌ߲߬ ߓߐ߫ ߘߊ߫ ߞߊ߬ ߥߴߊߟߎ߫ ߝߍ߬ ߸ ߊ߬ߟߎ߫ ߕߎ߲߬ ߕߍ߫ ߊ߬ߟߎ߫ ߖߘߌ߫ ߝߏߦߌ߬ ߟߊ߫ ߕߌߢߍߟߌ ߞߐ߫ ، ߊ߬ ߣߴߊ߬ߟߎ߫ ߕߎ߲߬ ߘߌ߫ ߞߊߟߌߦߊ߫ ߡߍ߲߬ߘߍ߬ߦߊ ߟߊߘߏ߲߬ ߠߴߊߟߎ߫ ߕߍ߫ ߟߋ߬ ߘߍ߯ ، ߓߊ ߊ߬ߟߎ߬ ߦߋ߫ ߥߊ߬ߥߎߟߋ ߟߋ߬ ߢߌߣߌ߲߫ ߠߴߊߟߎ߫ ߦߋ߫ ، ߘߏ߫ ߟߎ߫ ߘߏ߲߬ ߦߴߊߟߎ߫ ߘߐ߫ ߸ ߡߍ߲ ߠߎ߬ ߕߟߏߡߊߟߐ߬ߣߴߊ߬ߟߎ߬ ߟߊ߫ ، ߊߟߊ߫ ߘߏ߲߬ ߞߊ߬ ߕߐ߬ߢߍ߰ߒߕߋ ߟߎ߬ ߟߐ߲߫ ߠߋ߫ ߘߋ߬ ﴿47﴾

ߊ߬ߟߎ߬ ߓߘߊ߫ ߥߊ߬ߥߎߟߋ ߟߊߢߌߣߌ߲߫ ߞߘߐ߬ߡߊ߲߫ ߸ ߣߊߟߌ߬ߡߎ߲߫ ߡߐ߱ ߟߎ߬ ߟߊߡߙߎߕߌ ߘߌ߫ ߸ ߊ߬ ߣߌ߫ ߞߵߌ ߟߊ߫ ߞߏ ߟߎ߬ ߡߊߦߟߍ߬ߡߊ߲߬ߦߟߍߡߊ߲߫ ߝߎߚߎ߫ ߸ ߝߏ߫ ߕߎ߬ߢߊ ߣߊ߬ ߘߊ߫ ߞߵߊߟߊ߫ ߟߊ߫ ߞߏ ߟߊ߲ߞߣߍߡߊ߫ ߸ ߞߵߊ߬ ߕߘߍ߬ ߊ߬ ߜߏߡߊ߲ߓߊ ߦߴߊ߬ߟߎ߬ ߦߋ߫ ﴿48﴾

ߊ߬ ߘߏ߫ ߟߎ߫ ߟߴߊ߬ ߝߐ߫ ߟߊ߫ ߸ ߞߏ߫ ߘߌ߬ߢߍ߬ ߒߠߋ ߦߋ߫ ߸ ߌ ߞߣߊ߫ ߥߊ߬ߥߎ߬ߟߋ߬ ߟߊ߫ ߒ ߞߊ߲߬ ، ߞߏ߬ߞߏ߫ ߊ߬ߟߎ߬ ߓߘߊ߫ ߓߊ߲߫ ߓߋ߬ ߟߊ߫ ߥߊ߬ߥߎߟߋ ߘߐ߫ ߞߍ߬؟ ، ߔߊߦߌߔߊߦߌ ߘߏ߲߬ ߞߍߣߍ߲߫ ߠߋ߫ ߞߊ߬ ߓߊ߲߬ߓߊ߮ ߟߎ߬ ߟߊߝߏ߬ ߔߘߋߞߎ߬ ﴿49﴾

ߣߌ߫ ߤߙߊ߫ ߞߵߌ ߛߐ߬ߘߐ߲߬ ߸ ߏ߬ ߘߴߊ߬ߟߎ߬ ߟߊߛߎ߬ߣߎ߲߬ ، ߣߌ߫ ߓߌ߬ߟߊ߬ߒ߬ߘߐ߬ ߖߎ߯ ߟߋ߫ ߞߵߌ ߛߐ߬ߘߐ߲߬ ߛߊ߫ ߸ ߊ߬ߟߎ߬ ߘߴߊ߬ ߝߐ߫ ߞߏ߫ ߒ߬ߠߎ߫ ߞߊ߬ ߒ߬ ߕߊ߫ ߞߏ ߡߌ߬ߘߊ߬ ߢߊ ߛߐ߬ߘߐ߲߫ ߞߘߐ߬ߡߊ߲߫ ، ߘߊ߬ߡߊ߲߬ߛߊ߫ ߊ߬ߟߎ߬ ߘߴߊ߬ߟߎ߬ ߞߐߘߏ߲߬ ߛߍߥߊ ߘߌ߫ ﴿50﴾

ߊ߬ߟߎ߫ ߖߋ߬ߓߌ߬ ߸ ߞߏ߫ ߝߏߦߌ߬ ߕߍ߫ ߒ߬ߠߎ߫ ߛߐ߬ߘߐ߲߬ ߝߏ߫ ߊߟߊ߫ ߓߊ߯ ߡߍ߲ ߛߓߍ߫ ߒ߬ ߡߊ߬ ، ߏ߬ ߟߋ ߒ߬ߠߎ߫ ߡߊ߰ߙߌ ߘߌ߫ ߸ ߘߍ߲߬ߞߣߍ߬ߦߊ߬ߓߊ߮ ߟߎ߫ ߘߏ߲߬ ߊ߬ߟߎ߫ ߛߍ߲߬ߓߍ߬ ߟߴߊߟߊ߫ ߏ߬ ߟߋ ߟߊ߫ ﴿51﴾

ߊ߬ ߝߐ߫ ߞߏ߫ ߊߟߎ߫ ߡߋ߬ߘߋ ߘߐߞߐ߬ߣߐ߲߬ ߠߊ߫ ߒ߬ߠߎ߬ ߢߍ߫ ߣߌ߫ ߞߏ߫ ߢߌߡߊ߫ ߝߌ߬ߟߊ ߘߏ߫ ߞߋߟߋ߲߫ ߕߍ߫؟ ߊ߲ߠߎ߫ ߘߏ߲߬ ߡߍ߲ ߘߐߞߐ߬ߣߐ߲߬ ߠߴߊߟߎ߫ ߢߍ߫ ߸ ߒ ߞߏ߫ ߊߟߊ߫ ߦߋ߫ ߖߊ߲߰ߞߕߊ ߟߴߊߟߎ߫ ߞߊ߲߬ ߞߊ߬ ߝߘߴߊ߬ ߖߍ߬ߘߍ ߟߊ߫ ߸ ߥߟߊ߫ ߒ߬ߠߎ߬ ߕߊ߫ ߓߟߏ߫ ߟߊ߫ ، ߒ߬ߓߵߊߟߎ߫ ߘߞߐ߬ߣߐ߲߬ߠߌ߲ ߞߍ߫ ߸ ߒ߬ߠߎ߬ ߝߣߊ߫ ߦߋ߫ ߘߞߐ߬ߣߐ߲߬ߠߌ߲߬ߠߊ ߟߎ߬ ߟߋ߬ ߘߌ߫ ﴿52﴾

ߊ߬ ߝߐ߫ ߞߏ߫ ߊߟߎ߯ ߖߘߍ߬ߡߊ߬ߓߐ ߞߍ߫ ߓߐߒߖߘߍߘߐ ߟߊ߫ ߥߟߊ߫ ߘߌߦߊߜߏߦߊ ߟߊ߫ ߸ ߊ߬ ߛߌ߫ ߕߍߣߊ߬ ߡߌ߬ߘߊ߬ ߟߴߊߟߎ߫ ߦߋ߫ ، ߓߊ ߊߟߎ߫ ߞߍ߫ ߘߊ߫ ߡߌ߬ߙߌ߲߬ߘߌ߬ ߔߊߟߊ߲ߞߊߣߍ߲ ߠߋ߬ ߘߌ߫ ﴿53﴾

ߝߏߦߌ߬ ߡߴߊ߬ߟߎ߫ ߞߎ߬ߡߊ߲߬ߘߌ߫ ߊ߬ߟߎ߬ ߟߊ߫ ߖߘߍ߬ߡߊ߬ߓߐ ߟߎ߫ ߡߌ߬ߘߊ ߡߵߊ߬ߟߎ߬ ߟߊ߫ ߸ ߝߏ߫ ߊ߬ߟߎ߫ ߞߵߊ߬ߟߎ߫ ߓߊ߲߭ ߡߍ߲ ߞߍ߫ ߊߟߊ߫ ߣߴߊ߬ ߟߊ߫ ߞߋߟߊ ߘߐ߫ ، ߊ߬ ߣߴߊ߬ߟߎ߬ ߕߍ߫ ߣߊ߬ ߟߊ߫ ߛߊߟߌ ߡߊ߬ ߝߏ߫ ߊ߬ߟߎ߫ ߛߟߊ߬ߦߊ߬ߣߍ߲ ، ߊ߬ ߣߴߊ߬ߟߎ߬ ߕߍ߫ ߖߘߍ߬ߡߊ߬ߓߐ ߞߍ߫ ߟߊ߫ ߝߏ߫ ߊ߬ߟߎ߬ ߜߏߦߊߡߍߣߍ߲ߕߐ ﴿54﴾

ߊ߬ߟߎ߬ ߟߊ߫ ߣߊ߲߬ߝߟߏ ߟߎ߬ ߣߴߊ߬ߟߎ߬ ߘߋ߲ ߠߎ߬ ߞߊߣߵߌ ߡߊߞߓߊ߫ ߘߋ߬ ، ߓߊߏ߬ ߊߟߊ߫ ߦߴߊ߬ ߝߍ߬ ߟߋ߬ ߞߵߊ߬ߟߎ߫ ߖߊ߲߰ߞߕߊ߫ ߏ߬ ߟߎ߫ ߝߍ߬ ߘߎߢߊ߫ ߢߣߊߡߦߊ ߘߐ߫ ، ߊ߬ ߣߴߊ߬ߟߎ߬ ߣߌ ߟߎ߬ ߦߋ߫ ߓߐ߫ ߞߵߊ߬ ߕߘߍ߬ ߊ߬ߟߎ߬ ߦߋ߫ ߓߊ߲߬ߓߊ߮ ߟߎ߬ ߘߌ߫ ﴿55﴾

ߊ߬ߟߎ߬ ߦߴߊ߬ߟߎ߫ ߞߊ߬ߟߌ߬ ߟߴߊߟߊ߫ ߟߊ߫ ߸ ߞߏ߫ ߊ߬ߟߎ߬ ߦߴߊߟߎ߫ ߘߏ߫ ߟߋ߬ ߘߌ߫ ߛߋߚߋ߫ ، ߞߵߊ߬ ߕߘߍ߬ ߊ߬ߟߎ߬ ߕߍ߫ ߊߟߎ߫ ߝߋ߲߫ ߘߌ߫ ، ߓߊ߬ߙߌ߬ ߡߌ߬ߙߌ߲߬ߘߌ߬ ߟߎ߫ ߟߋ߬ ߡߍ߲ ߠߎ߬ ߦߋ߫ ߛߌߟߊ߲߫ ߠߊ߫ ﴿56﴾

ߣߴߊ߬ߟߎ߬ ߓߍ߫ ߞߎ߲߬ߘߏ߲߰ ߦߌߟߊ߫ ߛߐ߬ߘߐ߲߬ ߠߊ߫ ߸ ߥߟߊ߫ ߝߊߟߊ߲߫ ߠߎ߫ ، ߤߊߡߊ߲ߕߍ߫ ߘߎ߰ߞߘߐ߬ߓߏ߲߫ ߸ ߊ߬ߟߎ߬ ߘߴߊ߬ߟߎ߬ ߞߊߘߌ߫ ߏ߬ ߞߣߐ߫ ߞߊߟߌߦߊ ߛߎ߮ ߓߍ߯ ߘߌ߫ ﴿57﴾

ߊ߬ߟߎ߬ ߘߏ߫ ߟߵߌߟߋ ߕߐ߯ߟߊߖߎ߯ߦߊ߫ ߟߊ߫ ߛߘߊߞߊ߫ ߞߏ ߟߎ߬ ߘߐ߫ ، ߣߴߊ߬ߟߎ߬ ߛߐ߫ ߘߴߏ߬ ߘߐ߫ ߸ ߊ߬ߟߎ߬ ߘߌ߫ ߘߌ߬ߢߍ߬ ، ߣߴߊ߬ߟߎ߬ ߡߊ߫ ߛߐ߫ ߏ߬ ߘߐ߫ ߸ ߌ ߘߴߊ߬ߟߎ߬ ߦߋ߫ ߡߐߣߍ ߟߊ߬ ߞߊߘߌߞߊߘߌ߫ ﴿58﴾

ߥߟߊߞߏ߫ ߊ߬ߟߎ߫ ߕߍ߬ߘߍ߫ ߘߌ߬ߢߍ߬ ߊߟߊ߫ ߣߴߊ߬ ߟߊ߫ ߞߋߟߊ ߟߊ߫ ߛߐߟߌ ߡߊ߬ ، ߊ߬ ߣߴߊ߬ߟߎ߫ ߕߍ߬ߘߍ߫ ߊ߬ ߝߐ߫ ߞߏ߫ ߊߟߊ߫ ߘߌ߫ ߒ߬ ߥߛߊ߬ ، ߓߊ ߊߟߊ߫ ߘߌߣߵߊ߲ ߛߐ߫ ߊ߬ ߟߊ߫ ߢߊ߬ߒߡߊ߭ ߘߐ߫ ߟߋ߬ ߘߍ߯ ، ߊ߬ ߣߴߊ߬ ߟߊ߫ ߞߋߟߊ ߝߣߊ߫ ، ߊ߲ ߞߏ߬ߣߌ߲ ߦߋ߫ ߒ߬ ߖߘߍ߬ߡߊ߲߬ߘߌߦߊ߫ ߟߴߊߟߊ߫ ߟߋ߬ ߟߊ߫ ﴿59﴾

ߖߞߊ ߟߎ߬ ߦߋ߫ ߡߍ߲ ߠߎ߬ ߕߊ ߘߌ߫ ߸ ߏ߬ ߟߎ߫ ߟߋ߬ ߓߟߏߞߏߟߏ߲ ߠߎ߬ ߣߌ߫ ߘߐ߰ߕߐ ߟߎ߬ ߣߌ߫ ߖߞߊ ߓߊ߯ߙߟߊ ߟߎ߬ ߣߌ߫ ߛߣߐ߬ߡߍ߫ ߘߋ߬ߙߌ߬ߕߐ߬ߟߊ ߟߎ߬ ߘߌ߫ ߘߌ߯ߣߊ ߟߊ߫ ߸ ߊ߬ ߣߌ߫ ߖߐ߲߭ ߠߎ߬ ߞߊ߲ߤߙߐߦߊ ߣߌ߫ ߖߟߎ߬ߡߍ߬ߣߍ߲߬ߕߐ ߟߎ߬ ، ߊ߬ ߣߌ߫ ߊߟߊ߫ ߟߊ߫ ߛߌߟߊ ( ߡߞߊߘߊ߲ ) ߘߐ߫ ، ߊ߬ ߣߌ߫ ߛߌߟߊߘߋ߲ ، ߏ߬ ߘߌߦߊߜߏߦߊ ߝߘߊߣߍ߲߫ ߊߟߊ߫ ߟߋ߬ ߟߊ߫ ߸ ߊߟߊ߫ ߘߏ߲߬ ߦߋ߫ ߟߐ߲ߠߌ߲ߠߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿60﴾

ߊ߬ߟߎ߬ ߘߏ߫ ߟߎ߫ ߦߋ߫ ߟߊ߬ߝߐ߬ߓߊ߮ ߕߙߐ߫ ߟߊ߫ ߸ ߞߵߊ߬ ߝߐ߫ ߞߴߏ߬ ߦߋ߫ ߕߟߏߓߊ߫ ߟߋ߬ ߘߌ߫ ، ߊ߬ ߝߐ߫ ߞߴߏ߬ ߟߊ߫ ߕߟߏߓߦߊ ߦߋ߫ ߤߙߊ߫ ߟߋ߬ ߘߴߊߟߎ߫ ߦߋ߫ ، ߓߊ ߊ߬ ߟߊߣߍ߲߫ ߊߟߊ߫ ߟߊ߫ ߸ ߊ߬ ߟߊߣߍ߲߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߟߊ߫ ߸ ߊ߬ ߣߴߊ߬ ߦߋ߫ ߤߌߣߊ߫ ߟߋ߬ ߘߌ߫ ߊߟߎ߫ ߘߐ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߋ߫ ، ߒ߬ߓߊ߬ ߡߍ߲ ߠߎ߬ ߦߋ߫ ߊߟߊ߫ ߟߊ߫ ߞߋߟߊ ߕߙߐ߫ ߟߊ߫ ߸ ߏ߬ ߟߎ߬ ߢߍߛߌ߰ߣߍ߲߫ ߖߊ߲߰ߞߕߊ߬ ߘߌߡߌ߲ߣߍ߲ ߠߋ߬ ߟߊ߫ ﴿61﴾

ߊ߬ߟߎ߬ ߦߴߊ߬ߟߎ߫ ߞߊ߬ߟߌ߬ ߟߴߊߟߊ߫ ߟߴߊߟߎ߫ ߢߍ߫ ߟߋ߬ ߸ ߛߴߊ߬ߟߎ߬ ߘߴߊߟߎ߫ ߟߊߘߌ߬ߢߍ߬ ، ߞߵߊ߬ ߕߘߍ߬ ߊߟߊ߫ ߣߌ߫ ߞߋߟߊ ߟߋ߬ ߖߊߙߋߣߍ߲߫ ߊ߬ߟߎ߬ ߟߊ߫ ߟߊ߬ߘߌ߬ߢߍ߬ߟߌ ߟߊ߫ ߣߴߊ߬ߟߎ߬ ߦߋ߫ ߘߍ߲߬ߞߣߍ߬ߦߊ߬ߓߊ߯ ߟߎ߫ ߘߌ߫ ﴿62﴾

ߊ߬ ߝߐ߫ ߊ߬ߟߎ߬ ߡߴߊ߬ ߟߐ߲߫ ߓߊ߬ ߸ ߞߏ߫ ߡߍ߲ ߓߊ߯ ߊߟߊ߫ ߣߴߊ߬ ߟߊ߫ ߞߋߟߊ ߟߊߡߐߣߍߓߐ߫ ߸ ߞߴߏ߬ ߢߍߛߌ߰ߣߍ߲߬ ߔߊߦߌߔߊߦߌ ߕߊ ߟߋ߬ ߟߊ߫ ߸ ߞߵߊ߬ ߘߎߡߊ߫ ߏ߬ ߘߐ߫؟ ߏ߬ ߟߋ ߘߏ߲߬ ߦߋ߫ ߘߐ߯ߦߡߊ߫ ߓߟߋ߬ߓߟߋ ߘߌ߫ ﴿63﴾

ߝߌ߬ߟߊ߲߬ߞߊߝߏ ߟߎ߬ ߦߋ߫ ߛߌߟߊ߲߫ ߠߊ߫ ߟߋ߬ ߸ ߞߏ߫ ߛߎ߯ߙߊ ߘߏ߫ ߞߊߣߊ߬ ߟߊߖߌ߰ ߊ߬ߟߎ߫ ߞߊ߲߬ ߸ ߡߍ߲ ߘߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߫ ߞߌ߬ߓߊ߬ߙߏ߫ ߊ߬ߟߎ߫ ߛߣߐ߬ߡߍ߬ ߘߐ߬ ߞߏ ߟߊ߫ ، ߊ߬ ߝߐ߫ ߊ߬ߟߎ߬ ߦߋ߫ ߸ ߞߏ߫ ߊߟߎ߫ ߥߊ߫ ߦߟߍߓߐߒߘߐ ߡߊ߬ ߟߋ߬ ߞߟߋ߫ ، ߒ߬ߞߵߊߟߊ߫ ߘߌߣߵߊߟߎ߫ ߛߌߟߊ߲߫ ߞߏ ߟߊߓߐ߫ ߜߍ ߘߐ߫ ߖߐ߫ ﴿64﴾

ߌ ߓߊ߯ ߊ߬ߟߎ߫ ߢߌ߬ߣߌ߲߬ߞߊ߫ ߸ ( ߞߏ߫ ߊߟߎ߫ ߕߘߍ߬ ߡߋ߬ߘߋ ߦߟߍ߫ ߟߊ߫؟) ߊ߬ߟߎ߬ ߘߴߊ߬ ߝߐ߫ ߞߏ߫ ߊ߲ ߕߘߍ߬ ߡߊ߬ߢߊ߰ߟߌ ߣߌ߫ ߕߏߟߏ߲ ߠߋ߬ ߟߊ߫ ، ߊ߬ߟߎ߫ ߖߋ߬ߓߌ߬ ߞߏ߫ ߖߊ߰ ߊߟߎ߫ ߕߘߍ߬ ߊߟߊ߫ ߣߴߊ߬ ߟߊ߫ ߟߝߊߙߌ ߟߎ߬ ߣߴߊ߬ ߟߊ߫ ߞߋߟߊ ߟߋ߬ ߡߊߦߟߍ ߞߊ߲߬߹ ﴿65﴾

ߊߟߎ߫ ߞߊߣߵߊߟߎ߫ ߘߊߘߐߡߌߘߊߞߎ߲ߧߊ߫ ߛߌ߫ ߝߐ߫ ، ߓߊ ߊߟߎ߫ ߓߘߊ߫ ߓߊ߲߫ ߊߟߎ߫ ߖߘߍ߬ ߞߍ߫ ߟߊ߫ ߓߊ߲߬ߓߊ߮ ߟߎ߬ ߘߌ߫ ߊߟߎ߫ ߟߊ߫ ߘߍ߲߬ߞߣߍ߬ߦߊ ߞߐ߫ ، ߣߴߊ߲ ߞߏ߬ߣߌ߲ ߞߊ߬ ߜߊ߲ߒߞߎ߲ߠߊ ߞߍ߫ ߊߟߎ߫ ߝߊ߲߬ ߞߋߟߋ߲ ߦߋ߫ ߸ ߊ߲ ߘߌ߫ ߝߊ߲߬ ߞߋߟߋ߲ ߖߊ߲߰ߞߕߊ߫ ، ߓߊ ߏ߬ ߟߎ߫ ߟߋ߫ ߛߐ߲߬ߡߊ ߟߎ߬ ߘߌ߫ ﴿66﴾

ߝߌ߬ߟߊ߲߬ߞߊߝߏ ߗߍ߬ߡߊ߲ ߠߎ߬ ߣߌ߫ ߝߌ߬ߟߊ߲߬ߞߊߝߏ ߡߛߏ߬ߡߊ߲ ߠߎ߬ ߘߏ߫ ߓߐߣߍ߲߫ ߘߏ߫ ߟߋ߬ ߘߐ߫ ، ߊ߬ߟߎ ߟߋ߫ ߖߡߊ߬ߙߌ߬ߟߌ ߞߍ߫ ߟߊ߫ ߖߎ߯ߡߊ߲ ߠߊ߫ ߸ ߞߊ߬ ߝߊߕߊ߲ߕߟߌ ߞߍ߫ ߢߌ߬ߡߊ ߡߊ߬ ، ߊ߬ ߣߴߊ߬ߟߎ߬ ߦߴߊ߬ߟߎ߬ ߕߍ߮ ߟߎ߬ ߘߐߡߌ߬ߘߊ߬ ߟߊ߫ ( ߛߐߟߌ ߡߊ߬ ) ، ߊ߬ߟߎ߫ ߢߌ߬ߣߊ߬ ߘߊ߫ ߊߟߊ߫ ߞߐ߫ ߟߋ߬ ߸ ߏ߬ ߝߣߊ߫ ߢߌ߬ߣߊ߬ ߘߴߊ߬ߟߎ߬ ߞߐ߫ ، ߓߊ ߝߌ߬ߟߊ߲߬ߞߊߝߏ ߟߎ߫ ߟߋ߬ ߔߊߟߊ߲ߞߊߓߊ߮ ߟߎ߬ ߘߌ߫ ﴿67﴾

ߊߟߊ߫ ߣߵߊ߬ ߞߐ߲߬ߞߐ߲߬ ߠߊ߫ ߝߌ߬ߟߊ߲߬ߞߊߝߏ ߗߍ߬ߡߊ߲ ߣߴߊ߬ ߡߛߏ߬ߡߊ߲ ߠߎ߬ ߣߌ߫ ߓߊ߲߬ߓߊ߮ ߟߎ߬ ߞߊ߲ߡߊ߬ ߔߊߦߌߔߊߦߌ ߕߊ ߟߋ߬ ߟߊ߫ ߸ ߊ߬ߟߎ߬ ߘߎߡߊߕߐ߫ ߦߋ߲߬ ߠߋ߬ ، ߏ߬ ߘߏ߲߬ ߘߴߊ߬ߟߎ߫ ߥߛߊ߬ ߓߐ߫ ( ߛߙߊ߬ ߞߏ ߘߐ߫ ) ، ߓߊ ߊߟߊ߫ ߞߵߊ߬ߟߎ߬ ߘߊ߲ߞߊ߫ ߟߋ߬ ߸ ߊ߬ ߣߌ߫ ߞߵߊ߬ߟߎ߬ ߢߍߛߌ߰ ߖߊ߲߰ߞߕߊ߬ ߘߎߡߊߣߍ߲ ߠߊ߫ ﴿68﴾

ߊ߬ߟߎ߯ ߟߋ߬ ߦߏ߫ ߊߟߎ߫ ߢߍߓߊ߮ ߡߍ߲ ߠߎ߫ ߕߊ߬ߡߌ߲߬ߣߍ߲߫ ߸ ߏ߬ ߟߎ߫ ߘߏ߲߬ ߜߟߍ߬ߡߊ߲߫ ߕߘߍ߬ ߊߟߎ߫ ߘߌ߫ ߝߊ߲߬ߞߊ ߘߐ߫ ، ߊ߬ ߣߴߊ߬ߟߎ߬ ߛߌߦߊߡߊ߲߫ ߕߘߍ߬ ߣߊ߲߬ߝߟߏ ߟߎ߬ ߣߌ߫ ߘߋ߲ ߠߎ߬ ߟߊ߫ ، ߏ߬ ߟߎ߫ ߞߵߊ߬ߟߎ߫ ߘߊ߰ߡߎ߲߫ ߊ߬ߟߎ߫ ߣߌ߭ ߟߎ߬ ߟߊ߫ ، ߊߟߎ߫ ߝߣߊ߫ ߓߘߴߊߟߎ߫ ߘߊ߰ߡߎ߲߬ ߊߟߎ߫ ߣߌ߭ ߟߎ߬ ߟߊ߫ ߸ ߦߏ߫ ߊߟߎ߫ ߢߍߓߊ߮ ߟߎ߫ ߞߵߊ߬ߟߎ߫ ߘߊ߰ߡߎ߲߫ ߊ߬ߟߎ߫ ߣߌ߭ ߟߎ߬ ߟߊ߫ ߢߊ ߡߍ߲ ، ߊ߬ ߣߴߊߟߎ߫ ߓߘߊ߫ ߞߎ߬ߙߎ߲߬ߓߊ߬ߟߌ ߞߍ߫ ߸ ߦߏ߫ ߡߍ߲ ߠߎ߫ ߞߊ߬ ߞߎ߬ߙߎ߲߬ߓߊ߬ߟߌ ߞߍ߫ ߞߘߐ߬ߡߊ߲߫ ، ߒ߬ߓߊ߬ ߏ߬ ߟߎ߫ ߟߋ߬ ߟߊ߫ ߓߊ߯ߙߊ ߟߎ߬ ߕߌߢߍߣߍ߲߫ ߘߎߢߊ߫ ߣߌ߫ ߟߊߞߌߙߊ߫ ، ߊ߬ ߣߴߏ߬ ߟߎ߫ ߟߋ߫ ߓߣߐ߬ߓߊ߮ ߟߎ߬ ߘߌ߫ ﴿69﴾

ߦߊ߯ߟߴߊ߬ߟߎ߬ ߢߍߓߊ߮ ߟߎ߫ ߖߊ߲߬ߖߏ߲ ߡߊ߫ ߣߵߊ߬ߟߎ߫ ߡߊ߬ ߓߊ߬؟ ߣߊߟߌ߬ߡߎ߲߬ ߣߎ߯ߤߎ߲߫ ߡߌ߬ߙߌ߲߬ߘߌ ߣߌ߫ ߊ߯ߘߌ ߟߎ߬ ߣߌ߫ ߛߊ߬ߡߎ߯ߘߊ ߟߎ߬ ߣߌ߫ ߌߓߎ߬ߙߊ߬ߤߌߡߊ߫ ߡߌ߬ߙߌ߲߬ߘߌ ߣߌ߫ ߡߊߘߌ߬ߦߣߊ߫ ߘߏ߲߬ߞߏ ߟߎ߬ ߣߌ߫ ߘߎ߰ ߦߟߍߡߊ߲ ߘߏ߲߬ߞߏ ߟߎ߬ ߘߌ߫؟ ߏ߬ ߟߎ߬ ߟߊ߫ ߞߋߟߊ ߟߎ߫ ߣߊ߬ ߘߴߊ߬ߟߎ߫ ߡߊ߬ ߔߊߞߌ ߟߎ߬ ߘߌ߫ ، ߒ߬ߞߵߊߟߊ߫ ߡߊ߫ ߓߊ߰ ߏ߬ ߟߎ߫ ߡߊ߬ ߘߋ߬ ߸ ߊ߬ߟߎ ߟߋ߫ ߓߊ߰ ߘߴߊ߬ߟߎ߫ ߖߍ߬ߘߍ߫ ߡߊ߬ ﴿70﴾

ߘߍ߲߬ߞߣߍ߬ߦߊ߬ߓߊ߮ ߗߍ߬ߡߊ߲ ߠߎ߬ ߣߴߊ߬ ߡߛߏ߬ߡߊ߲ ߠߎ߫ ߟߋ߬ ߢߐ߲߮ ߢߌ߲߭ ߠߎ߬ ߘߌ߫ ߸ ߏ߬ ߟߎ߫ ߟߋ߫ ߖߡߊ߬ߙߌ߬ߟߌ ߞߍ߫ ߟߊ߫ ߢߌ߬ߡߊ ߟߊ߫ ߸ ߞߊ߬ ߝߊߕߊ߲ߕߟߌ ߞߍ߫ ߖߎ߯ߡߊ߲ ߡߊ߬ ، ߊ߬ߟߎ߬ ߦߋ߫ ߛߊߟߌ ߟߐ߬ ߟߊ߫ ߞߊ߬ ߖߞߊ ߘߌ߫ ߸ ߊ߬ ߣߴߊ߬ߟߎ߬ ߦߋ߫ ߊߟߊ߫ ߣߴߊ߬ ߟߊ߫ ߞߋߟߊ ߞߊ߲ ߡߌ߬ߘߊ߬ ߟߊ߫ ، ߒ߬ߓߵߊߟߊ߫ ߣߊ߬ߕߐ߫ ߤߌߣߊ߫ ߟߴߏ߬ ߟߎ߫ ߟߋ߬ ߟߊ߫ ، ߖߊ߯ߕߋ߬ ߸ ߊߟߊ߫ ߦߋ߫ ߣߌ߬ߣߌ߬ߟߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿71﴾

ߊߟߊ߫ ߣߊ߬ ߘߍ߲߬ߞߣߍ߬ߦߊ߬ߓߊ߮ ߗߍ߬ߡߊ߲ ߠߎ߬ ߣߴߊ߬ ߡߛߏ߬ߡߊ߲ ߠߎ߬ ߦߟߌߡߊߘߌߦߊ߫ ߟߊ߫ ߣߊߞߐ߫ ߟߎ߫ ߟߋ߬ ߟߊ߫ ߸ ߞߐ߬ߢߊ ߟߎ߬ ߦߋ߫ ߞߎ߬ߟߊ߲߬ߞߎ߬ߟߊ߲߬ ߠߴߏ߬ ߟߎ߬ ߞߘߐߟߊ ߟߎ߬ ߘߐ߫ ߸ ߏ߬ ߟߎ߬ ߘߎߡߊߕߐ߫ ߦߋ߲߬ ߠߋ߬ ، ߊ߬ ߣߌ߫ ߡߊ߬ߞߍ߬ ߦߌ߬ߟߊ߬ ߢߌߡߊ ߟߎ߬ ߘߐ߫ ߸ ߝߙߍ ߣߊߞߐ ߟߎ߬ ߞߣߐ߫ ߸ ߏ߬ ߟߎ߫ ߝߊ߲߭ ߟߊߣߍ߲߫ ߘߌ߬ߢߍ ߡߍ߲ ߞߊ߲߬ ߞߊ߬ ߝߘߴߊߟߊ߫ ߟߊ߫ ߸ ߏ߬ ߟߋ ߓߏ߲߬ߓߊ߬ߓߊ ߦߋ߫ ߸ ߏ߬ ߟߋ ߘߏ߲߬ ߦߋ߫ ߣߌ߬ ߓߟߋߓߟߋ ߘߌ߫ ﴿72﴾

ߤߍ߲߬ ߌߟߋ߬ ߟߊ߬ߝߐ߬ߓߊ߮ ߸ ߓߊ߲߬ߓߊ߮ ߟߎ߬ ߣߌ߫ ߝߌ߬ߟߊ߲߬ߞߊߝߏ ߟߎ߫ ߞߟߍ߬ ߸ ߌ ߦߋ߫ ߞߘߊ߬ߜߟߍ߬ߦߊ ߞߍ߫ ߊ߬ߟߎ߬ ߟߊ߫ ߸ ߊ߬ߟߎ߬ ߡߊߞߍ߫ ߦߌߟߊ ߟߋ߬ ( ߞߍߕߐ߫ ) ߔߊߦߌߔߊߦߌ ߘߌ߫ ، ߏ߬ ߘߏ߲߬ ߦߋ߫ ߟߊ߬ߓߊ߲߬ ߦߌ߬ߟߊ߬ ߖߎ߯ ߘߌ߫ ߞߟߋ߫ ﴿73﴾

ߊ߬ߟߎ ߟߴߊ߬ߟߎ߫ ߞߊ߬ߟߌ߬ ߟߴߊߟߊ߫ ߟߊ߫ ߸ ߊ߬ߟߎ߬ ߝߐ߫ ߞߊ߲ ߞߊ߲߬ ، ߊ߬ߟߎ߫ ߘߏ߲߬ ߞߊ߬ ߓߊ߲߬ߓߊ߰ߦߊ ߞߎߡߊ ߝߐ߫ ߟߋ߬ ߛߎߋ߯ ߸ ߊ߬ ߣߴߊ߬ߟߎ߫ ߛߊ߬ߦߌ߲߬ ߘߊ߫ ߓߊ߲߬ߓߊ߰ߦߊ ߘߐ߫ ߟߋ߬ ߸ ߊ߬ߟߎ߫ ߛߌ߬ߟߡߊ߬ߦߊ߬ߣߍ߲ ߞߐ߫ ، ߊ߬ߟߎ߫ ߝߊ߲߭ ߞߵߊ߬ߟߎ߬ ߣߌ ߟߊ߫ ߞߏ߫ ߞߊ߲߬ ߸ ߊ߬ߟߎ߬ ߡߊ߫ ߡߍ߲ ߛߐ߬ߘߐ߲߬ ، ߊ߬ߟߎ߫ ߘߏ߲߬ ߡߴߊ߬ߟߎ߬ ߡߊߝߐߦߌ߲ߝߐߦߌ߲߫ ߸ ߝߏ߫ ߊߟߊ߫ ߣߴߊ߬ ߟߊ߫ ߞߋߟߊ ߣߵߊ߬ߟߎ߬ ߟߊߓߣߊ߬ߦߊ߬ ߟߊ ߊ߬ ߟߊ߫ ߢߊ߬ߒߡߊ߭ ߘߏ߫ ߟߊ߫ ، ߣߴߊ߬ߟߎ߫ ߞߏ߬ߣߌ߲ ߞߵߊ߬ߟߎ߫ ߖߘߍ߬ߟߊߛߊ߬ߦߌ߬ ߸ ߏ߬ ߘߌ߫ ߞߍ߫ ߤߙߊ߫ ߘߴߊ߬ߟߎ߬ ߦߋ߫ ، ߣߴߊ߬ߟߎ߫ ߘߏ߲߬ ߞߵߊ߬ߟߎ߬ ߞߐߘߏ߲߬ ߸ ߊߟߊ߫ ߘߴߊ߬ߟߎ߫ ߖߊ߲߰ߞߕߊ߫ ߖߊ߲߰ߞߕߊ߬ ߘߌߡߌ߲ߣߍ߲ ߠߊ߫ ߘߎߢߊ߫ ߣߌ߫ ߟߊߞߌߙߊ߫ ، ߢߌ߲߬ ߘߏ߲߬ ߕߍ߫ ߞߍ߫ ߊ߬ߟߎ߬ ߟߊ߫ ߘߎ߱ ߞߊ߲߬ ߏ߬ ߘߐ߫ ߸ ߘߍ߲߬ߡߍ߲߬ߓߊ߯ ߕߍ߫ ߞߍ߫ ߊ߬ߟߎ߬ ߟߊ߫ ( ߛߊ߲ ߡߊ߬) ﴿74﴾

ߘߏ߫ ߦߴߊ߬ߟߎ߬ ߘߐ߫ ߸ ߡߍ߲ ߞߊ߬ ߟߊ߬ߤߘߌ ߕߊ߬ ߊߟߊ߫ ߦߋ߫ ߸ ߞߏ߫ ߣߌ߫ ߊߟߊ߫ ߞߊ߬ ߒ߬ߠߎ߬ ߛߐ߫ ߊ߬ ߟߊ߫ ߢߊ߬ߒߡߊ߭ ߘߐ߫ ߸ ߊ߲ ߘߌ߫ ߛߘߊߞߊ߫ ߓߐ ߞߍ߫ ߸ ߊ߲ ߘߏ߲߬ ߘߌ߫ ߞߍ߫ ߡߐ߰ ߢߌߡߊ ߟߎ߬ ߘߏ߫ ߘߌ߫ ﴿75﴾

ߊߟߊ߫ ߣߵߏ߬ ߟߎ߬ ߛߐ߫ ߟߊ ߊ߬ ߟߊ߫ ߢߊ߬ߒߡߊ߭ ߘߐ߫ ߸ ߏ߬ ߟߎ߫ ߞߵߊ߬ߟߎ߬ ߕߍ߮ ߜߟߍ߬ߦߊ߫ ߏ ߞߊ߲߬ ߸ ߞߵߊ߬ߟߎ߫ ߡߎ߬ߙߎ߲߬ߘߎ߫ ، ߊ߬ߟߎ߬ ߞߐߘߏ߲߬ߣߍ߲ ߠߴߏ߬ ߘߌ߫ ߔߏ߲߫ ﴿76﴾

ߏ߬ ߞߍ ߸ ߊߟߊ߫ ߞߵߏ߬ ߟߎ߫ ߣߐ߬ߝߍ߬ߜߍ߲߫ ߝߌ߬ߟߊ߲߬ߞߊ߬ߝߏ߬ߦߊ ߟߴߊ߬ߟߎ߫ ߛߣߐ߬ߡߍ ߟߎ߬ ߘߐ߫ ( ߝߎߚߎ߫ ) ߸ ߝߏ߫ ߞߵߊ߬ ߛߌ߰ ߊ߬ ߓߍ߲߬ߢߐ߲߰ߦߊ߬ ߟߏ߲ ߠߊ߫ ، ߞߊ߬ߡߊߛߐ߬ߘߐ߲߬ ߊ߬ߟߎ߫ ߞߵߊߟߊ߫ ߦߟߌߡߊߘߌߦߊ߫ ߞߊ߲ ߡߍ߲ ߠߊ߫ ߸ ߊ߬ߟߎ߫ ߞߵߏ ߝߏ߬ߘߏ߫ ߟߋ߬ ، ߊ߬ ߣߌ߫ ߞߊ߬ߡߊߛߐ߬ߘߐ߲߫ ߊ߬ߟߎ߬ ߟߊ߫ ߥߎߦߊ߫ ߝߐ ߝߍ߬ ﴿77﴾

ߦߊ߯ߟߊ߫ ߏ߬ ߟߎ߬ ߡߴߊ߬ ߟߐ߲߫ ߓߊ߬ ߸ ߞߏ߫ ߊߟߊ߫ ߞߵߊ߬ߟߎ߬ ( ߞߣߐߘߐ߫ ) ߜߎ߲ߘߎ ߣߴߊ߬ߟߎ߬ ߟߊ߫ ߢߐ߲߯ ߦߋ߫ ߞߊ߲ ߠߎ߬ ߟߐ߲߫ ߸ ߊ߬ ߣߌ߫ ߞߏ߫ ߊߟߊ߫ ߟߋ߬ ߞߏ߫ ߘߏ߲߰ߣߍ߲ ߠߎ߬ ߟߐ߲ߓߊ߮ ߘߌ߫؟ ﴿78﴾

ߒ߬ߓߊ߬ ߡߍ߲ ߠߎ߬ ߦߋ߫ ߘߍ߲߬ߞߣߍ߬ߦߊ߬ߓߊ߰ ߓߐߒߖߘߍߘߐߟߊ ߟߎ߬ ߡߊߕߋ߰ߙߎ߬ ߟߊ߫ ߛߘߊߞߊ( ߓߊ) ߟߎ߬ ߓߐ ߘߐ߫ ، ߊ߬ ߣߌ߫ ߝߣߊ߫ ߸ ߡߍ߲ ߠߎ߬ ߕߍ߫ ߝߏߦߌ߫ ߛߐ߬ߘߐ߲߬ ߠߊ߫ ߝߏ߫ ߊ߬ߟߎ߬ ߟߊ߫ ߡߊ߬ߞߙߐ߬ߓߐ߬ߞߙߐ߬ߓߐ߬ ߝߋ߲߬ߣߍ߲ ߸ ߊ߬ߟߎ߬ ߘߴߊ߬ ߞߍ߫ ߏ߬ ߟߎ߬ ߡߊߦߟߍ ߘߌ߫ ، ߊߟߊ߫ ߓߍߣߊ߬ ߦߟߍߓߐ߫ ߏ߬ ߟߎ߬ ߘߐ߫ ߟߋ߬ ߕߘߋ߫ ، ߊ߬ߟߎ߫ ߘߏ߲߬ ߢߍߛߌ߰ߣߍ߲߫ ߖߊ߲߰ߞߕߊ߬ ߘߌߡߌ߲ߣߍ߲ ߠߋ߬ ߟߊ߫ ﴿79﴾

ߌ ߞߊ߬ ߦߝߊ߬ ߢߌߣߌ߲߫ ߞߍ߫ ߊ߬ߟߎ߬ ߦߋ߫ ߓߊ߬ ߸ ߌ ߡߊ߫ ߦߝߊ߬ ߢߌߣߌ߲߫ ߞߍ߫ ߊ߬ߟߎ߬ ߦߋ߫ ߓߊ߬ ߸ ߤߊߟߵߌ ߞߊ߬ ߦߝߊ߬ ߢߌߣߌ߲ ߞߍ߫ ߊ߬ߟߎ߬ ߦߋ߫ ߛߋ߲߬ߧߊ߬ ߓߌߥߐߙߐ߲ߥߌ߬ߟߊ߬ ߸ ߊߟߊ߫ ߕߍ߫ ߦߊ߬ߝߴߊ߬ߟߎ߫ ߡߊ߬ ߝߋߎ߫ ، ߓߊ ߊ߬ߟߎ߫ ߞߊ߬ ߓߊ߲߬ߓߊ߰ߦߊ ߟߋ߫ ߟߐ߬ ߊߟߊ߫ ߣߴߊ߬ ߟߊ߫ ߞߋߟߊ ߡߊ߬ ، ߊߟߊ߫ ߘߏ߲߬ ߕߍ߫ ߡߌ߬ߙߌ߲߬ߘߌ߫ ߔߊߟߊ߲ߞߊߣߍ߲ ߠߎ߬ ߞߊ߲ߘߊ߫ ߟߊ߫ ﴿80﴾

ߞߘߐߕߏߟߊ ߟߎ߬ ߓߘߊ߫ ߛߍߥߴߊ߬ߟߎ߫ ߛߌ߱ ߟߊ߫ ߊߟߊ߫ ߟߊ߫ ߞߋߟߊ ߞߕߐ߫ ، ߊ߬ߟߎ߫ ߞߊ߬ ߖߘߍ߬ߘߌ ߞߐ߲߫ ߊ߬ߟߎ߬ ߟߊ߫ ߣߊ߲߬ߝߟߏ ߟߎ߬ ߣߴߊ߬ߟߎ߫ ߖߘߍ߬ߞߎ߲ ߠߎ߬ ߟߊ߫ ߟߋ߬ ߊߟߊ߫ ߛߌߟߊ ߞߊ߲߬ ، ߊ߬ ߣߴߊ߬ߟߎ߫ ߞߵߊ߬ ߝߐ߫ ߢߐ߲߮ ߢߍ߫ ߟߋ߬ ߸ ߞߏ߫ ߊߟߎ߫ ߞߊߣߊ߬ ߓߐ߫ ߕߙߊߓߊ߫ ߕߟߋ ߣߌ߲߬ ߞߊ߲߬ ߘߋ߬ ، ߊ߬ߟߎ߫ ߖߋ߬ߓߌ߬ ߸ ߞߏ߫ ߔߊߦߌߔߊߦߌ ߕߊ ߟߋ߬ ߞߟߊߦߊ ߜߍ߬ߟߍ߲߬ߡߊ߲߫ ߏ߬ ߘߌ߫ ߣߴߊ߬ߟߎ߬ ߓߴߊ߬ ߝߊ߰ߡߎ߲߬ ߠߊ߫ ﴿81﴾

ߒ߬ߓߊ߬ ߏ߬ ߟߎ߬ ߦߋ߫ ߦߟߍ߫ ߣߍ߲ߞߍ߫ ߸ ߞߊ߬ ߞߊ߬ߛߌ߬ ߓߊߞߍ߫ ߸ ߞߵߊ߬ ߓߍ߲߬ ߊ߬ߟߎ߬ ߟߊ߫ ߓߊ߯ߙߊ߫ ߞߍߣߍ߲ ߠߎ߫ ߛߊ߬ߙߊ ߡߊ߬ ﴿82﴾

ߣߌ߫ ߊߟߊ߫ ߞߵߌ ߟߊߛߊ߬ߦߌ߲߬ ߊ߬ߟߎ߫ ߝߊ߲߬ ߞߋߟߋ߲ ߡߊ߬ ߸ ߏ߬ ߟߎ߬ ߦߴߌ ߘߌ߬ߢߍ߬ߟߊ߬ߢߌߣߌ߲߫ ߓߐ ߘߐ߫ ( ߞߊ߬ ߥߴߌ ߝߍ߬ ߞߍ߬ߟߍ ߘߐ߫ ) ߸ ߌ ߦߴߊ߬ߟߎ߫ ߖߋ߬ߓߌ߬ ߞߏ߫ ߊߟߎ߫ ߕߍ߫ ߓߐ߫ ߞߊ߬ ߥߊ߫ ߒߠߋ ߝߍ߬ ߝߋߎ߫ ، ߊߟߎ߫ ߘߏ߲߬ ߕߍ߫ ߖߎ߯ ߛߌ߫ ߞߟߍ߬ ߒߠߋ ߝߍ߬ ߡߎ߬ߕߎ߲߬ ، ߓߊ ߊߟߎ߫ ߘߌ߬ߢߍ߬ ߘߊ߫ ߛߌ߱ ߟߋ߫ ߡߊ߬ ߛߋ߲߬ߧߊ߬ ߝߟߐ ߘߐ߫ ، ߏ߬ ߘߐ߫ ߸ ߊߟߎ߫ ߦߴߊߟߎ߫ ߛߌ߰ ߞߘߐߕߏߟߊ ߟߎ߫ ߝߍ߬ ߛߍߣߍ߲߬ ﴿83﴾

ߣߌ߫ ߡߐ߰ ߛߌ߫ ߛߊ߬ ߘߴߊ߬ߟߎ߬ ߘߐ߫ ߸ ߌ ߞߴߏ߬ ߡߛߊߟߌ߫ ߝߋߎ߫ ، ߌ ߘߏ߲߬ ߝߊ߲߭ ߞߴߌ ߟߐ߬ ߏ߬ ߛߊ߬ߙߌ ߡߊ߬ ߘߋ߬ ، ߓߊ ߊ߬ߟߎ߫ ߞߵߊ߬ߟߎ߫ ߓߊ߲߬ ߊߟߊ߫ ߣߴߊ߬ ߟߊ߫ ߞߋߟߊ ߘߐ߫ ߟߋ߬ ߸ ߊ߬ ߣߴߊ߬ߟߎ߫ ߛߊ߬ ߘߊ߫ ߟߋ߬ ߸ ߞߵߊ߬ ߕߘߍ߬ ߊ߬ߟߎ߬ ߔߊߟߊ߲ߞߊߣߍ߲ ߦߋ߫ ﴿84﴾

ߊ߬ߟߎ߬ ߟߊ߫ ߣߊ߲߬ߝߟߏ ߟߎ߬ ߣߴߊ߬ߟߎ߬ ߘߋ߲ ߠߎ߬ ߞߊߣߵߌ ߡߊߞߓߊ߫ ߘߋ߬ ߸ ߊߟߊ߫ ߦߴߊ߬ ߝߍ߬ ߟߋ߬ ߞߵߊ߬ߟߎ߫ ߖߊ߲߰ߞߕߊ߫ ߏ߬ ߟߎ߫ ߝߍ߬ ߘߎߢߊ߫ ߘߐ߫ ، ߊ߬ ߣߴߊ߬ߟߎ߬ ߣߌ ߦߋ߫ ߓߐ߫ ߞߵߊ߬ ߕߘߍ߬ ߊ߬ߟߎ߬ ߦߋ߫ ߓߊ߲߬ߓߊ߮ ߟߎ߬ ߘߌ߫ ﴿85﴾

ߝߐߘߊ ߘߏ߫ ߓߊ߯ ߟߊߖߌ߰ ߞߏߕߊ߲߫ ߸ ߞߏ߫ ߊߟߎ߫ ߦߋ߫ ߘߍ߲߬ߞߣߍ߬ߦߴߊߟߊ߫ ߡߊ߬ ߸ ߊ߬ ߣߴߊߟߎ߫ ߦߋ߫ ߖߘߍ߬ߘߌ ߞߍ߫ ߊ߬ ߟߊ߫ ߞߋߟߊ ߝߍ߬ ، ߊ߬ߟߎ߬ ߘߐ߫ ߝߋ߲ߕߌ߮ ߟߎ߬ ߘߴߌ ߘߌ߬ߢߍ߬ߟߊ߬ߢߌ߬ߣߌ߲߬ ߞߊ߲ ߞߍ߫ ߸ ߞߴߌ ߦߴߊ߬ ߕߏ߫ ߖߊ߰ߣߌ߲߬ ߒ߬ߠߎ߬ ߦߋ߫ ߞߍ߫ ߛߌ߰ߓߊ߮ ߟߎ߫ ߝߍ߬ ﴿86﴾

ߏ߬ ߘߐ߫ ߸ ߊ߬ߟߎ߬ ߓߘߊ߫ ߘߌ߬ߢߍ߬ ߞߏ߫ ߊ߬ߟߎ߬ ߦߋ߫ ߞߍ߫ ߞߘߐߕߏߟߊ ߟߎ߫ ߝߍ߬ ، ߊ߬ߟߎ߫ ߘߏ߲߬ ߛߣߐ߬ߡߍ ߟߎ߬ ߟߊߣߘߐߣߍ߲߫ ߠߋ߬ ߸ ߏ߬ ߟߋ ߞߏߛߐ߲߬ ߊ߬ߟߎ߬ ߕߍ߫ ߝߊ߰ߡߎ߲߬ߠߌ߲߫ ߞߍ߫ ߟߊ߫ ﴿87﴾

ߓߊ߬ߙߌ߬ ߞߋߟߊ ߣߴߊ߬ ߝߍ߬ߡߐ߯ ߘߍ߲߬ߞߣߍ߬ߦߊ߬ߣߍ߲ ߠߎ߫ ߟߋ߫ ߖߘߍ߬ߘߌ ߞߍ߫ ߟߴߊ߬ߟߎ߬ ߟߊ߫ ߣߊ߲߬ߝߟߏ ߟߎ߬ ߣߴߊ߬ߟߎ߫ ߖߘߍ߬ߞߎ߲ ߠߎ߬ ߟߊ߫ ، ߒ߬ߓߊ߬ ߏ߬ ߟߎ߬ ߢߍߛߌ߰ߣߍ߲߬ ߤߙߊ߫ ߜߊ߲߰ߛߊ߲߫ ߠߋ߬ ߟߊ߫ ߸ ߏ߬ ߟߎ߫ ߟߋ߬ ߘߏ߲߬ ߛߎߘߊ߲ߓߊ߮ ߟߎ߬ ߘߌ߫ ﴿88﴾

ߊߟߊ߫ ߣߊ߬ ߣߊߞߐ ߟߎ߫ ߟߋ߬ ߘߐߓߍ߲߬ ߠߴߏ߬ ߟߎ߬ ߦߋ߫ ߸ ߞߐ߬ߢߊ ߟߎ߬ ߦߋ߫ ߥߦߏ߬ ߟߊ߫ ߡߍ߲ ߠߎ߬ ߞߘߐ߫ ߞߎߟߊ߲ߞߎߟߊ߲߫ ، ߏ߬ ߟߎ߫ ߘߏ߲߬ ߘߎߡߊߕߐ߫ ߦߋ߲߬ ߠߋ߬ ، ߒ߬ߓߊ߬ ߏ߬ ߟߋ ߦߋ߫ ߣߌ߬ ߓߟߋߓߟߋ ߘߌ߫ ﴿89﴾

ߞߏ߲ߞߏ߫ ߞߣߐ߫ ߡߐ߯ ߟߐ߬ߦߙߌ߬ߝߐ߬ߟߊ ߟߎ߬ ߓߘߊ߫ ߣߊ߬ ߸ ߞߏ߫ ߞߊ߬ ߘߌ߬ߢߍ߫ ߊ߬ߟߎ߬ ߦߋ߫ ( ߛߊ߬ߦߌ߲ ߡߊ߬ ߞߍ߬ߟߍ ߘߐ߫ ) ، ߊ߬ ߣߌ߫ ߡߍ߲ ߠߎ߫ ߣߊ߬ ߥߎߦߊ ߝߐ߫ ߟߴߊߟߊ߫ ߣߴߊ߬ ߟߊ߫ ߞߋߟߊ ߦߋ߫ ߸ ߏ߬ ߟߎ߬ ߓߘߴߊ߬ߟߎ߫ ߛߏ߬ߘߌ߬ ( ߞߊ߬ ߓߐ߫ ߞߟߍ߬ ߘߐ߬ ߕߊ߮ ߡߊ߬ ) ، ߓߊ߬ߙߌ߬ ߖߊ߲߰ߞߕߊ߬ ߘߌߡߌ߲ߣߍ߲ ߓߍߣߵߊ߬ߟߎ߬ ߘߐ߫ ߓߊ߲߬ߓߊ߮ ߟߎ߫ ߛߐ߬ߘߐ߲߫ ߠߋ߬ ߘߍ߯ ﴿90﴾

ߕߍ߰ߡߊ߬ߛߌ߯ ߕߍ߫ ߟߊ߲߰ߝߏ߬ߓߊ߰ߕߐ ߟߎ߬ ߣߌ߫ ߛߌ߬ߘߊ߬ߓߊ߰ߕߐ ߟߎ߫ ߟߋ߬ ߡߊ߬ ( ߞߟߍ߬ ߘߐ߬ ߕߊ߰ߓߊߟߌߦߊ ) ߘߐ߫ ߸ ߊ߬ ߕߍ߫ ߡߐ߱ ߟߎ߬ ߝߣߊ߫ ߡߊ߬ ߸ ߡߍ߲ ߠߎ߬ ߕߍ߫ ߖߘߍ߬ߡߊ߬ߓߐ߬ ߝߋ߲߫ ߛߐ߬ߘߐ߲߬ ߠߊ߫ ߸ ߛߊ߲ߞߏ߫ ߊ߬ߟߎ߬ ߦߴߊ߬ߟߎ߬ ߞߣߐ ߜߍ߫ ߊߟߊ߫ ߣߴߊ߬ ߟߊ߫ ߞߋߟߊ ߦߋ߫ ، ‹ ߖߙߊ߬ߞߌ߬ › ߛߌߟߊ߫ ߡߎ߰ߡߍ߬ ߕߍ߫ ߢߊ߬ߓߊ߮ ߟߎ߫ ߡߊ߬ ، ߓߊ ߊߟߊ߫ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿91﴾

(ߕߍ߰ߡߊ߬ߛߌ߯ ) ߕߍ߫ ߡߐ߱ ߟߎ߬ ߝߣߊ߫ ߡߊ߬ ߸ ߡߍ߲ ߠߎ߬ ߓߊ߯ ߣߵߌ ߕߘߍ߬ ߸ ߞߴߌ ߦߋ߫ ߦߟߍ߬ߒ߬ߞߊ߲߬ ߝߋ߲߫ ߘߴߊ߬ߟߎ߫ ߡߊ߬ ߸ ߌ ߘߴߊ߬ ߝߐ߫ ߞߏ߫ ߒ ߕߍ߫ ߝߋ߲߫ ߛߐ߬ߘߐ߲߬ ߒ ߘߴߊߟߎ߫ ߟߊߦߟߍ߬ ߡߍ߲ ߞߊ߲߬ ، ( ߏ߬ ߓߊ߯ ߞߍ) ߊ߬ߟߎ߬ ߘߴߊ߬ߟߎ߬ ߞߐߘߏ߲߬ ߞߵߊ߬ ߕߘߍ߬ ߊ߬ߟߎ߬ ߢߊߖߌ ߦߋ߫ ߛߣߍߣߍ ߟߊ߬ ߛߎ߬ߣߎ߲ ߓߟߏ߫ ߸ ߞߏ߫ ߊ߬ߟߎ߬ ߡߊ߫ ߝߋ߲߫ ߛߐ߬ߘߐ߲߬ ߊ߬ߟߎ߬ ߘߌ߫ ߡߍ߲ ߞߍ߫ ߖߘߍ߬ߡߊ߬ߓߐ ߘߌ߫ ﴿92﴾

‹ ߖߙߊ߬ߞߌ߬ › ߛߌߟߊ ߦߋ߫ ߡߍ߲ ߠߎ߫ ߡߊ߬ ߸ ߏ߬ ߟߎ߫ ߟߋ߬ ߓߊ߬ߣߊ ߟߎ߬ ߘߌ߫ ߸ ߡߍ߲ ߠߎ߬ ߦߴߌ ߘߌ߬ߢߍ߬ߟߊ߬ߢߌߣߌ߲߫ ߠߊ߫ ߸ ߓߊ ߏ߬ ߟߎ߫ ߘߌ߬ߢߍ߬ߣߍ߲߫ ߠߋ߬ ߊ߬ߟߎ߬ ߞߍ ߡߊ߬ ߞߘߐߕߏߟߊ ߟߎ߫ ߝߍ߬ ، ߊߟߊ߫ ߝߣߊ߫ ߞߵߊ߬ߟߎ߫ ߛߣߐ߬ߡߍ ߟߎ߬ ߟߊߣߘߐ߫ ߸ ߏ߬ ߟߋ ߞߏߛߐ߲߬ ߊ߬ߟߎ߬ ߕߍ߫ ߝߏߦߌ߬ ߟߐ߲߫ ߠߊ߫ ﴿93﴾

ߊߟߎ߫ ߓߊ߯ ߊߟߎ߫ ߞߐߛߊ߬ߦߌ߲߫ ߊ߬ߟߎ߫ ߡߊ߬ ߕߎ߬ߡߊ ߡߍ߲ ߸ ߊ߬ߟߎ߬ ߘߌߣߵߊ߬ ߞߍ߫ ߟߐ߬ߦߙߌ߬ ߡߊ߬ߘߊ߲ ߘߴߊߟߎ߫ ߦߋ߫ ، ߌ ߦߴߊ߬ߟߎ߫ ߖߋ߬ߓߌ߬ ߸ ߞߏ߫ ߊߟߎ߫ ߞߊߣߊ߬ ߟߐ߬ߦߙߌ߬ ߛߌ߫ ߝߐ߫ ، ߓߊ ߊ߲ ߕߍߣߊ߬ ߟߊ߫ ߟߴߊߟߎ߫ ߟߊ߫ ، ߞߊ߬ߕߎ߲߯ ߸ ߊߟߊ߫ ߓߘߊ߫ ߓߊ߲߫ ߊߟߎ߫ ߞߌ߬ߓߊ߬ߙߏ ߟߎ߬ ߝߐ߫ ߟߴߊ߲ ߧߋ߫ ، ߊߟߊ߫ ߘߏ߲߬ ߣߴߊ߬ ߟߊ߫ ߞߋߟߊ ߓߍߣߵߊߟߎ߫ ߗߋߥߊߟߌ ߦߋ߫ ߖߐ߫ ، ߏ߬ ߟߋ ߞߐ߫ ߸ ߊߟߎ߫ ߘߌߣߊ߬ ߟߊߛߊ߬ߦߌ߬ ߞߏ߫ ߘߏ߲߰ߣߍ߲ ߣߴߊ߬ ߟߊ߲ߞߣߍߡߊߣߍ߲ ߟߐ߲ߓߊ߮ ߡߊ߬ ، ߏ߬ ߘߏ߲߬ ߘߴߊߟߎ߫ ߗߋߥߊߟߌ ߟߎ߬ ߖߐ߲ ߠߊߓߐ߫ ߊߟߎ߫ ߡߊ߬ ﴿94﴾

ߊ߬ߟߎ߬ ߘߌߣߵߊ߬ߟߎ߫ ߞߊ߬ߟߌ߬ ߊߟߊ߫ ߟߴߊߟߎ߫ ߦߋ߫ ߸ ߊߟߎ߫ ߓߊ߯ ߊߟߎ߫ ߞߐߛߊ߬ߦߌ߲߫ ߊ߬ߟߎ߫ ߡߊ߬ ߕߎ߬ߡߊ ߡߍ߲ ، ߖߐ߲߰ߛߴߊߟߎ߫ ߘߴߊߟߎ߫ ߞߐߘߏ߲߬ ߊ߬ߟߎ߬ ߟߊ߫ ، ߒ߬ߓߵߊߟߎ߫ ߦߴߊߟߎ߫ ߞߐߘߏ߲߬ ߊ߬ߟߎ߬ ߟߊ߫ ߟߋ߬ ߞߟߋ߫ ، ߓߊ ߞߛߐ ߟߴߊ߬ߟߎ߬ ߘߌ߫ ߸ ߊ߬ߟߎ߬ ߡߊߞߍ߫ ߦߌߟߊ ߟߋ߬ ( ߞߍߕߐ߫ ) ߔߊߦߌߔߊߦߌ ߘߌ߫ ߸ ߞߵߏ߬ ߞߍ߫ ߊ߬ߟߎ߬ ߟߊ߫ ߓߊ߯ߙߊ ߛߊ߬ߙߊ ߘߌ߫ ﴿95﴾

ߊ߬ߟߎ߬ ߦߴߊ߬ߟߎ߫ ߞߊ߬ߟߌ߬ ߟߴߊߟߎ߫ ߢߍ߫ ߟߋ߬ ߸ ߛߴߊߟߎ߫ ߘߌ߫ ߘߌ߬ߢߍ߫ ߊ߬ߟߎ߫ ߡߊ߬ ، ߣߴߊߟߎ߫ ߘߏ߲߬ ߘߌ߬ߢߍ߬ ߘߴߊ߬ߟߎ߫ ߡߊ߬ ߸ ߊߟߊ߫ ߞߏ߬ߣߌ߲߬ ߕߍ߫ ߘߌ߬ߢߍ߫ ߡߌ߬ߙߌ߲߬ߘߌ߬ ߔߊߟߊ߲ߞߊߣߍ߲ ߠߎ߫ ߡߊ߬ ߝߋߎ߫ ﴿96﴾

ߞߏ߲ߞߏ߫ ߞߣߐ߫ ߡߐ߮ ߟߎ߫ ߟߋ߫ ߜߍ߬ߟߍ߲߬ ( ߓߍ߯ ߘߌ߫ ) ߓߊ߲߬ߓߊ߰ߦߊ ߣߌ߫ ߝߌ߬ߟߊ߲߬ߞߊ߬ߝߏ߬ߦߊ ߘߐ߫ ، ߊ߬ ߣߴߊ߬ ߖߊߙߋߣߍ߲߫ ߊ߬ߟߎ ߟߋ߬ ߞߊߣߊ߬ ߟߍߙߊ ߞߎ߬ߙߎ߲߬ߘߎ ߟߎ߬ ߟߐ߲߫ ߸ ߊߟߊ߫ ߞߊ߬ ߡߍ߲ ߠߊߖߌ߰ ߊ߬ ߟߊ߫ ߞߋߟߊ ߡߊ߬ ، ߊߟߊ߫ ߘߏ߲߬ ߟߐ߲ߠߌ߲ߠߊ߫ ߘߌ߫ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿97﴾

ߞߏ߲ߞߏ߫ ߞߣߐ߫ ߡߐ߮ ߟߎ߬ ߘߏ߫ ߓߍ߫ ߸ ߏ߬ ߦߴߊ߬ ߟߊ߫ ߖߘߍ߬ߡߊ߬ߓߐ߬ ߘߌߣߍ߲ ߓߛߌ߬ߞߌ߬ ߟߊ߫ ߣߌߛߐ߲ߞߐ ߟߋ߬ ߘߌ߫ ، ߊ߬ ߣߴߊ߬ ߦߴߊߟߎ߫ ߘߐߞߐ߬ߣߐ߲ ߞߊ߲߬ ߜߊ߬ߟߏ߫ ߞߏ߰ߙߌ߬ߣߍ߲ ߠߎ߫ ߟߋ߬ ߟߊ߫ ، ߖߎ߯ߡߊ߲ ߘߏ߲߬ ߞߏ߰ߙߌ߬ߣߍ߲߫ ߊ߬ߟߎ ߟߋ߫ ߡߊ߬ ߔߘߋߞߎ߬ ، ߊߟߊ߫ ߘߏ߲߬ ߦߋ߫ ߡߍ߲ߠߌ߲ߠߊ߫ ߘߌ߫ ߸ ߊ߰ ߟߐ߲ߠߌ߲ߠߊ߫ ߘߌ߫ ﴿98﴾

ߞߏ߲ߞߏ߫ ߞߣߐ߫ ߡߐ߮ ߟߎ߬ ߘߏ߫ ߜߘߍ߫ ߓߍ߫ ߸ ߏ߬ ߘߍ߲߬ߞߣߍ߬ߦߊ߬ߣߍ߲߫ ߊߟߊ߫ ߣߌ߫ ߟߏ߲߫ ߠߊߓߊ߲ ߡߊ߬ ، ߊ߬ ߣߴߊ߬ ߦߴߊ߬ ߟߊ߫ ߖߘߍ߬ߡߊ߬ߓߐ ߓߛߌ߬ߞߌ߬ ߟߴߊ߬ ߡߊߛߎ߬ߘߎ߲߬ߧߊ߬ ߝߋ߲ ߠߋ߬ ߘߌ߫ ߊߟߊ߫ ߟߊ߫ ߸ ߊ߬ ߣߌ߫ ߞߋߟߊ ߟߊ߫ ߕߌ߲ߞߌ ߟߎ߫ ( ߛߐ߲߬ߞߐ ) ߘߌ߫ ، ߏ߬ ߘߏ߲߬ ߞߍߕߐ߫ ߏ߬ ߟߎ߬ ߦߋ߫ ߡߊ߬ߛߎ߬ߘߎ߲߬ߧߊ߬ ߝߋ߲ ߠߋ߬ ߘߌ߫ ߖߐ߫ ߸ ߓߊ ߊߟߊ߫ ߓߍߣߵߏ߬ ߟߎ߬ ߟߊߘߏ߲߬ ߊ߬ ߟߊ߫ ߤߌߣߊ ߘߐ߫ ، ߖߊ߯ߕߋ߬ ߸ ߊߟߊ߫ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿99﴾

ߞߐ߲߰ߓߊ߰ ߝߟߐ ߡߍ߲ ߠߎ߬ ߦߋ߫ ߝߎ߲ߘߌߓߊ߮ ߟߎ߬ ߣߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߘߐ߫ ߸ ߊ߬ ߣߌ߫ ߡߍ߲ ߠߎ߫ ߞߵߏ߬ ߟߎ߬ ߟߊߓߊ߬ߕߏ߫ ߢߌ߬ߡߊ߬ߦߊ ߘߐ߫ ، ߊߟߊ߫ ߓߘߊ߫ ߘߌ߬ߢߍ߫ ߏ߬ ߟߎ߫ ߡߊ߬ ߸ ߏ߬ ߟߎ߬ ߝߣߊ߫ ߘߌ߬ߢߍ߬ߣߍ߲߫ ߠߋ߬ ߊߟߊ߫ ߡߊ߬ ، ߊ߬ ߘߏ߲߬ ߓߘߊ߫ ߣߊߞߐ ߟߎ߬ ߘߐߓߍ߲߬ ߏ߬ ߟߎ߬ ߢߍ߫ ߸ ߖߌߢߊ ߟߎ߯ ߞߎ߬ߟߊ߲߬ߞߎ߬ߟߊ߲߬ ߠߊ߫ ߡߍ߲ ߠߎ߬ ߞߘߐߟߊ ߟߎ߬ ߘߐ߫ ߸ ߏ߬ ߟߎ߬ ߘߎߡߊߕߐ߫ ߦߋ߲߬ ߠߋ߬ ߞߘߊߎ߫ ، ߏ߬ ߘߏ߲߬ ߦߋ߫ ߣߌ߬ ߓߟߋߓߟߋ ߟߋ߬ ߘߌ߫ ﴿100﴾

ߝߌ߬ߟߊ߲߬ߞߊߝߏ ߘߏ߫ ߟߎ߫ ߦߴߊߟߎ߫ ߟߊߡߌߣߌ߲ ߞߏ߲ߞߏ߫ ߞߣߐ߫ ߡߐ߮ ߟߎ߬ ߘߐ߫ ، ߘߏ߫ ߟߎ߫ ߝߣߊ߫ ߦߋ߫ ߘߎ߰ߓߊ߬ ߞߣߐ߬ ߡߐ߮ ߟߎ߬ ߘߐ߫ ߸ ߏ߬ ߟߎ߬ ߓߘߴߊ߬ߟߎ߬ ߕߋ߲ߜߋߘߋ߲ߧߊ߫ ߝߌ߬ߟߊ߲߬ߞߊ߬ߝߏ߬ߦߊ ߞߊ߲߬ ، ߊߟߎ߫ ߡߴߏ߬ ߟߎ߬ ߟߐ߲߫ ߘߋ߬ ߸ ߒ߬ߠߎ߫ ߟߋ߬ ߞߵߏ߬ ߟߎ߬ ߟߐ߲߫ ߸ ߓߊ߬ߙߌ߬ ߊ߲ ߘߌߣߵߏ߬ ߟߎ߫ ߖߊ߲߰ߞߕߊ߫ ߛߋ߲߬ߢߊ߫ ߝߌ߬ߟߊ߬ ، ߊ߬ ߣߌ߫ ߝߣߊ߫ ߸ ߊ߬ߟߎ߬ ߘߌ߫ ߟߊߛߊ߬ߦߌ߲߫ ߖߊ߲߰ߞߕߊ߬ ߓߟߋߓߟߋ ߡߊ߬ ﴿101﴾

ߊ߬ߟߎ߬ ߘߏ߫ ߜߘߍ߫ ߟߎ߫ ߓߍ߫ ߸ ߏ߬ ߟߎ߫ ߞߵߊ߬ߟߎ߫ ߟߐ߬ ߊ߬ߟߎ߫ ߛߐ߲߭ ߠߎ߬ ߟߊ߫ ߸ ߏ߬ ߟߎ߫ ߞߊ߬ ߓߊ߯ߙߊ߫ ߢߌߡߊ ߟߋ߫ ߓߊ߬ߛߊ߲߬ ߘߏ߫ ߜߘߍ߫ ߟߊ߫ ߸ ߏ߬ ߦߋ߫ ߖߎ߯ߡߊ߲ ߘߌ߫ ، ߏ߬ ߟߎ߫ ߞߊ߬ߣߌ߲ ߸ ߊ߬ ߢߐ߲߰ߘߐ߫ ߊߟߊ߫ ߘߌߣߊ߬ ߖߘߍ߬ߟߊ߬ߛߊߦߌ ߡߌ߬ߘߊ߫ ߏ߬ ߟߎ߬ ߦߋ߫ ، ߓߊ ߊߟߊ߫ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿102﴾

ߌ ߦߋ߫ ߛߘߊߞߊ ߡߌ߬ߘߊ߫ ߏ߬ ߟߎ߬ ߟߊ߫ ߣߊ߲߬ߝߟߏ ߟߎ߬ ߘߐ߫ ߸ ߌ ߦߴߊ߬ߟߎ߬ ߛߊߣߌ߲ߧߊ߫ ߏ߬ ߟߊ߫ ߞߵߊ߬ߟߎ߬ ߜߍ߫ ߛߏߘߊ߫ ، ߊ߬ ߣߴߌ ߦߋ߫ ߕߌ߲ߞߌ߫ ߊ߬ߟߎ߬ ߦߋ߫ ߸ ߓߊ ߌ ߟߊ߫ ߕߌ߲ߞߌ ߟߋ߫ ߡߊ߬ߝߊ ߘߌ߫ ߊ߬ߟߎ߫ ߞߊ߲߬ ، ߊߟߊ߫ ߘߏ߲߬ ߦߋ߫ ߡߍ߲ߠߌ߲ߠߊ߫ ߘߌ߫ ߊ߰ ߟߐ߲ߠߌ߲ߠߊ߫ ߘߌ߫ ﴿103﴾

ߦߊ߯ߟߴߊ߬ߟߎ߬ ߡߴߊ߬ ߟߐ߲߫ ߓߊ߬ ߸ ߞߏ߫ ߊߟߊ߫ ߟߋ߫ ߖߘߍ߬ߟߊ߬ߛߊߦߌ ߡߌ߬ߘߊ߬ ߟߴߊ߬ ߟߊ߫ ߖߐ߲߭ ߠߎ߬ ߟߊ߫ ߸ ߊ߬ ߣߴߊ߬ ߦߋ߫ ߛߘߊߞߊ ߟߎ߬ ߟߊߓߌ߫ ߟߊ߫؟ ߊ߬ ߣߌ߫ ߞߏ߫ ߊߟߊ߫ ߦߋ߫ ߖߘߍ߬ߟߊ߬ߛߊߦߌ ߡߌ߬ߘߊ߬ߓߊ߰ ߤߌߣߟߊ ߟߋ߬ ߘߌ߫؟ ﴿104﴾

ߊ߬ ߝߐ߫ ߞߏ߫ ߊߟߎ߫ ߓߊ߯ߙߊ ߞߍ߫ ߕߎ߲߫ ߸ ߊߟߊ߫ ߞߏ߬ߣߌ߲߬ ߣߴߊ߬ ߟߊ߫ ߞߋߟߊ ߣߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߓߍߣߵߊߟߎ߫ ߟߊ߫ ߓߊ߯ߙߊ ߦߋ߫ ߖߐ߫ ، ߊ߬ ߣߴߊߟߎ߫ ߓߍߣߊ߬ ߟߊߛߊ߬ߦߌ߬ ߞߏ߫ ߘߏ߲߰ߣߍ߲ ߣߴߊ߬ ߟߊ߲ߞߣߍߡߊߣߍ߲ ߟߐ߲ߓߊ߮ ߡߊ߬ ، ߊ߬ ߘߏ߲߬ ߘߴߊߟߎ߫ ߗߋߥߊߟߌ߫ ߞߍ߫ ߣߐ ߓߍ߯ ߖߐ߲ ߠߊߓߐ߫ ߊߟߎ߫ ߡߊ߬ ﴿105﴾

ߘߏ߫ ߟߎ߫ ߓߍ߫ ߸ ߏ߬ ߟߎ߬ ߕߡߊߣߊߣߍ߲߫ ߠߋ߫ ߞߵߊߟߊ߫ ߟߊ߫ ߖߊ߬ߡߊߙߌ ߡߊߞߐ߬ߣߐ߲߬ ، ߞߋߟߋ߲߫ ߸ ߊ߬ ߦߴߏ߬ ߟߎ߫ ߖߊ߲߰ߞߕߊ߫ ߸ ߞߋߟߋ߲߫ ߜߘߍ߫ ߊ߬ ߦߋ߫ ߖߘߍ߬ߟߊ߬ߛߊߦߌ ߡߌ߬ߘߴߊ߬ߟߎ߬ ߦߋ߫ ، ߊߟߊ߫ ߘߏ߲߬ ߟߐ߲ߠߌ߲ߠߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿106﴾

ߡߍ߲ ߠߎ߫ ߣߊ߬ ߡߌ߬ߛߙߌ ߘߏ߫ ߟߐ߬ ߟߊ߫ ߛߌ߬ߣߊ߬ߦߊ ߟߊ߫ ߸ ߊ߬ ߣߌ߫ ߓߊ߲߬ߓߊ߰ߦߊ ߟߊ߫ ߸ ߊ߬ ߣߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߕߍߝߘߊ ߟߊ߫ ، ߊ߬ ߣߌ߫ ߓߌߘߌ߲߫ ߟߊ߫ ߦߙߐ ߘߌ߫ ߡߐ߰ ߢߍ߫ ߸ ߡߍ߲ ߞߵߊߟߊ߫ ߣߴߊ߬ ߟߊ߫ ߞߋߟߊ ߞߟߍ߬ ߞߘߐ߬ߡߊ߲߫ ، ߊ߬ߟߎ߫ ߘߏ߲߬ ߘߌߣߵߊ߬ߟߎ߫ ߞߊ߬ߟߌ߬ ߞߏ߫ ߊ߲ ߡߴߊ߬ ߟߊߥߟߌ߬ ߝߏߦߌ߫ ߡߊ߬ ߢߊ߬ߟߌ ߞߐ߫ ، ߊߟߊ߫ ߘߏ߲߬ ߛߙߋߦߊߣߍ߲߫ ߞߏ߫ ߥߎߦߊ߫ ߝߐߟߊ ߟߎ߫ ߟߋ߬ ﴿107﴾

ߌ ߞߊߣߵߌ ߟߐ߬ ߦߋ߲߬ ߝߋߎ߫ ، ߒ߬ߓߊ߬ ߡߌ߬ߛߙߌ ߡߍ߲ ߕߘߎߣߍ߲߫ ߝߊ߲ߕߊ߲ߞߊ ߞߊ߲߬ ߞߊ߬ߦߌ߯ ߊ߬ ߟߏ߲߫ ߝߟߐ ߘߐ߫ ߸ ߊ߬ ߖߊ߯ߙߋߣߍ߲߫ ߌ ߦߴߌ ߟߐ߬ ߏ߬ ߟߋ ߟߊ߫ ߸ ߓߊ ߗߍ߬ ߟߎ߫ ߟߋ߬ ߦߋ߫ ߦߋ߲߬ ߸ ߡߍ߲ ߠߎ߬ ߦߴߊ߬ ߝߍ߬ ߞߊ߬ ߛߊߣߌ߲ߧߊ߫ ، ߖߘߍ߬ߛߊ߬ߣߌ߲߬ߧߊ߬ߟߊ ߟߎ߫ ߟߋ߫ ߘߏ߲߬ ߘߌߡߊ߲߫ ߊߟߊ߫ ߦߋ߫ ﴿108﴾

ߐ߲߬ߤߐ߲߫ ߸ ߦߊ߯ߟߊ߫ ߡߐ߱ ߡߍ߲ ߣߵߊ߬ ߟߊ߫ ߟߐ߬ߟߌ߬ ߓߏ߲ ߖߎ߬ߓߌ߬ߟߊ߬ ߟߴߊ߬ ߝߊ߲ߕߊ߲߬ߞߊ߬ ߞߊ߲ߡߊ߬ ߊߟߊ߫ ߡߊ߬ ߸ ߊ߬ ߣߴߊ߬ ߟߊ߫ ߘߌ߬ߢߍ ߢߌߣߌ߲ ߡߊ߬ ߸ ߏ߬ ߟߋ ߝߌ߬ߛߊ߫ ߓߊ߰ ߥߟߊ߫ ߡߍ߲ ߞߵߊ߬ ߕߊ߫ ߟߐ߬ߟߌ߬ ߓߏ߲ ߖߎ߬ߓߌ߬ߟߊ߬ ߘߋ߲߬ߞߊ߫ ߥߎ߬ߙߎ߲߬ߓߊ߬ߕߐ ߘߊ߫ ߜߋ߲ߜߋ߲ ߞߊ߲߬ ߸ ߏ߬ ߥߎ߬ߙߎ߲߬ߓߊ߬ ߘߴߊ߬ ߘߌ߫ ߔߊߦߌߔߊߦߌ ߕߊ ߘߐ߫؟ ߒ߬ߓߊ߬ ߝߋߎ߫ ߸ ߊߟߊ߫ ߕߍ߫ ߡߌ߬ߙߌ߲߬ߘߌ߫ ߕߐ߬ߢߍ߰ߒߕߋ ߟߎ߬ ߞߊ߲ߘߊ߫ ߟߊ߫ ﴿109﴾

ߏ߬ ߟߎ߬ ߟߊ߫ ߓߏ߲߫ ߟߐ߬ߣߍ߲ ߏ߬ ߕߏߕߐ߫ ߛߌߞߊ ߟߋ߬ ߘߌ߫ ߊ߬ߟߎ߫ ߛߣߐ߬ߡߍ ߟߎ߬ ߘߐ߫ ߝߎߚߎ߫ ߸ ߝߏ߫ ߊ߬ߟߎ߫ ߛߐ߲߭ ߠߎ߬ ߘߌ߫ ߘߐߞߎߘߎ߲ߞߎߘߎ߲߫ ، ߞߊ߬ߕߎ߲߯ ߊߟߊ߫ ߦߋ߫ ߟߐ߲ߠߌ߲ߠߊ߫ ߘߌ߫ ߸ ߊ߰ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿110﴾

ߊߟߊ߫ ߓߘߊ߫ ߘߍ߲߬ߞߣߍ߬ߦߊ߬ߓߊ߮ ߟߎ߫ ߖߘߍ߬ߞߎ߲ ߣߴߊ߬ߟߎ߬ ߟߊ߫ ߣߊ߲߬ߝߟߏ ߟߎ߫ ߛߊ߲߬ ߊ߬ߟߎ߫ ߡߊ߬ ߸ ߞߵߏ߬ ߟߎ߫ ߛߐ߲߬ߞߐ ߞߍ߫ ߊ߬ߟߎ߬ ߦߋ߫ ( ߡߍ߲ߘߌߦߊ ) ߣߊߞߐ ߘߌ߫ ، ߏ߬ ߘߐ߫ ߸ ߊ߬ߟߎ߬ ߦߋ߫ ߞߍ߬ߟߍ ߞߍ߫ ߊߟߊ߫ ߛߌߟߊ ߘߐ߫ ߸ ߊ߬ߟߎ߬ ߦߋ߫ ߝߊ߰ߟߌ ߞߍ߫ ߸ ߊ߬ߟߎ߫ ߖߍ߬ߘߍ ߦߋ߫ ߝߊ߰ ، ߊߟߊ߫ ߟߊ߫ ߦߟߌߡߊߘߌߦߊ ߕߎ߬ߢߊ߬ߡߊ ߟߴߏ߬ ߘߌ߫ ߕߊ߬ߥߎ߬ߙߊߕߌ ߣߌ߫ ߟߌ߲߬ߖߌ߯ߟߌ ߣߌ߫ ߞߎ߬ߙߊ߬ߣߊ ߞߣߐ߫ ، ߖߍߣߍ߲ ߘߏ߲߬ ߘߴߊ߬ ߟߊ߫ ߟߊ߬ߤߘߌ ߝߊ߫ ߞߊ߬ ߕߊ߬ߡߌ߲߬ ߊߟߊ߫ ߟߊ߫؟ ߒ߬ߓߵߊߟߎ߫ ߢߊ߯ߟߋ߲߫ ߊߟߎ߫ ߟߊ߫ ߝߋ߬ߙߋ ߟߊ߫ ߸ ߊߟߎ߫ ߞߊ߬ ߝߙߋ߬ߢߐ߲߰ߦߊ ߡߍ߲ ߞߍ߫ ، ߏ߬ ߘߏ߲߬ ߦߋ߫ ߣߌ߬ߓߊ߫ ߟߋ߬ ߘߌ߫ ﴿111﴾

ߏ߬ ߟߎ߫ ߟߋ߫ ߖߘߍ߬ߟߛߊ߬ߦߌ߬ߟߊ ߟߎ߬ ߘߌ߫ ߸ ߓߊ߬ߕߏ߬ߟߊ ߟߎ߬ ߘߌ߫ ߸ ߊߟߊ߫ ߕߊ߲ߘߏߟߊ ߟߎ߬ ߘߌ߫ ߸ ߝߎ߲ߘߌ ߕߊ߯ߡߟߊ ߟߎ߬ ߘߌ߫ ߸ ߞߐߡߊߓߌߘߌ߲ߠߊ ߟߎ߬ ߘߌ߫ ߸ ߕߌ߲ߓߌߘߌ߲ߠߊ ߟߎ߬ ߘߌ߫ ߸ ߖߡߊ߬ߙߌ߬ߟߊ ߟߎ߬ ߘߌ߫ ߢߌ߬ߡߊ ߟߊ߫ ߸ ߝߊߕߊ߲ߕߌߟߊ ߟߎ߬ ߘߌ߫ ߖߎ߯ߡߊ߲ ߡߊ߬ ߸ ߊ߬ ߣߌ߫ ߊߟߊ߫ ߟߊ߫ ߞߎ߬ߙߎ߲߬ߘߎ ߟߎ߬ ߟߊߕߊ߲߬ߞߊ߬ߓߊ߮ ߟߎ߬ ߘߌ߫ ، ߒ߬ߓߊ߬ ߌ ߘߟߊߝߎ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߋ߫ ߟߋ߬ ߞߟߋ߫ ﴿112﴾

ߊ߬ ߕߍ߫ ߓߍ߲߬ ߟߊ߬ߝߐ߬ߓߊ߮ ߣߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߫ ߡߊ߬ ߸ ߞߏ߫ ߊ߬ߟߎ߬ ߦߋ߫ ߦߝߊ߬ ߢߌߣߌ߲ ߞߍ߫ ߛߏߡߊ ߟߎ߬ ߦߋ߫ ، ߤߊߟߵߏ߬ ߟߎ߬ ߞߍ߫ ߘߴߊ߬ߟߎ߬ ߡߊߛߎ߬ߘߎ߲߬ߧߊ߬ߓߊ߮ ߟߎ߬ ߘߌ߫ ، ߊ߬ ߓߊ߲ ߞߐ߫ ߘߐߞߣߍ߫ ߟߴߊ߬ߟߎ߫ ߡߊ߬ ߸ ߞߏ߫ ( ߛߏߡߊ ) ߏ߬ ߟߎ߬ ߦߋ߫ ߥߋ߲߯ߓߋ߫ ߘߏ߲߬ߞߏ ߟߎ߫ ߟߋ߬ ߘߌ߫ ﴿113﴾

ߌߓߎ߬ߙߊ߬ߤߌߡߊ߫ ߟߊ߫ ߦߝߊ߬ ߢߌߣߌ߲ ߡߊ߫ ߞߍ߫ ߊ߬ ߝߊ߬ ߦߋ߫ ߞߎ߲߬ ߜߘߍ߫ ߟߊ߫ ߸ ߝߏ߫ ߊ߬ ߞߵߊ߬ ߦߟߌߡߊߘߌߦߊ ߡߍ߲ ߞߍ߫ ߊ߬ ߟߊ߫ ، ߓߊ߬ߙߌ߬ ߞߵߊ߬ ߕߵߊ߬ ߘߐߜߍ߫ ߘߴߊ߬ ߡߊ߬ ߸ ߞߏ߫ ߊߟߊ߫ ߖߎ߮ ߟߋ߬ ‹ ߊ߬ ߝߊ߬ › ߘߌ߫ ߸ ߊ߬ ߞߵߊ߬ ߣߍ߰ߓߐ߫ ߊ߬ ߟߊ߫ ߞߏ ߘߐ߫ ߝߋߎ߫ ، ߓߊ ߌߓߎ߬ߙߊ߬ߤߌߡߊ߫ ߞߍ߫ ߘߊ߫ ߖߘߍ߬ߡߊ߬ߞߌ߬ߣߌ߲߬ߞߌ߬ߣߌ߲߬ߠߊ߫ ߡߎ߬ߢߎ߲߬ߓߊ߯ ߟߋ߬ ߘߌ߫ ﴿114﴾

ߊߟߊ߫ ߡߊ߲߫ ߞߊ߲߫ ߞߊ߬ ߡߌ߬ߙߌ߲߬ߘߌ߬ ߛߌ߫ ߟߊߝߟߌ߬ ߸ ߊ߬ ߓߊ߲ ߞߐ ߊ߬ߟߎ߬ ߞߊ߲ߘߊ߫ ߟߊ߫ ߸ ߝߏ߫ ߊ߬ ߦߴߊ߬ߟߎ߬ ߟߊ߫ ߖߘߍ߬ ߡߊ߬ߕߊ߲߬ߞߊ߬ ߢߊ ߦߌ߬ߘߴߊ߬ߟߎ߬ ߟߊ߫ ߟߋ߬ ߖߐ߫ ، ߖߊ߯ߕߋ߬ ߸ ߊߟߊ߫ ߟߋ߬ ߞߏ ߓߍ߯ ߟߐ߲ߓߊ߮ ߘߌ߫ ﴿115﴾

ߊߟߊ߫ ߕߊ ߟߋ߬ ߛߊ߲ ߠߎ߬ ߣߌ߫ ߘߎ߱ ߡߊ߲߬ߛߊ߬ߦߊ ߘߌ߫ ߸ ߊ߬ߟߋ ߟߋ߫ ߟߊ߬ߢߣߊ߬ߡߦߊ߬ߟߌ ߞߍ߫ ߟߊ߫ ߸ ߊ߬ߟߋ ߟߋ߫ ߛߊ߬ߦߊ ߝߣߊ߫ ߞߍ߫ ߟߊ߫ ، ߣߌ߫ ߊߟߊ߫ ߕߍ߫ ߸ ߞߏߕߌ߯ ߕߍ߫ ߊߟߎ߫ ߟߊ߫ ߘߍ߬ߡߍ߲߬ߓߊ߯ ߕߍ߫ ﴿116﴾

ߊߟߊ߫ ߓߘߊ߫ ߖߘߍ߬ߟߊ߬ߛߊߦߌ ߡߌ߬ߘߊ߫ ߟߊ߬ߝߐ߬ߓߊ߮ ߦߋ߫ ߸ ߊ߬ ߣߌ߫ ߝߎ߲ߘߌߓߊ߮ ߟߎ߬ ߣߌ߫ ߘߍ߬ߡߍ߲߬ߠߌ߲߬ߠߊ ߟߎ߬ ߦߋ߫ ߸ ߡߍ߲ ߠߎ߫ ߞߊ߬ ߞߋߟߊ ߟߊߓߊ߬ߕߏ߫ ߜߟߍ߬ߦߊ ߕߎ߬ߡߊ ߟߊ߫ ߸ ߞߵߊ߬ ߕߘߍ߬ ߖߊ߬ߡߊ ߝߊ߲߬ ߞߋߟߋ߲ ߛߣߐ߬ߡߍ ߕߎ߲߬ ߓߍ߫ ߢߌߣߌ߲߫ ߞߊ߬ ߖߍ߲߬ߞߍ߫ ߊ߬ߟߎ߬ ߘߐ߫ ߸ ߊߟߊ߫ ߣߊ߬ ߘߊ߫ ߖߘߍ߬ߟߊ߬ߛߊߦߌ ߡߌ߬ߘߊ߫ ߏ߬ ߟߎ߬ ߦߋ߫ ߏ߬ ߟߋ ߞߐ߫ ، ߓߊߏ߬ ߊ߬ߟߎ߫ ߞߌ߬ߣߌ߲߬ߞߌߣߌ߲ ߣߴߊ߬ߟߎ߬ ߤߌߣߊ ߟߋ߬ ߊߟߊ߫ ߟߊ߫ ﴿117﴾

(ߊ߬ ߣߴߊ߬ ߓߘߊ߫ ߖߘߍ߬ߟߊ߬ߛߊߦߌ ߡߌ߬ߘߊ߬ ߡߐ߰ ) ߛߓߊ߬ ߝߣߊ߫ ߦߋ߫ ߸ ߡߍ߲ ߠߎ߬ ߕߊ߫ ߓߌ߲߬ߓߊߏ ߓߐ߫ ߘߊ߫ ߕߐ߭ ߟߎ߬ ߕߊ ߡߊ߬ ، ߤߊ߲߯ ߘߎ߰ߞߟߏ ߣߴߊ߬ ߟߊ߫ ߦߙߌߥߊ ߜߍ߲߬ߘߍ߬ ߘߴߊ߬ߟߎ߫ ߡߊ߬ ، ߊ߬ ߣߴߊ߬ߟߎ߫ ߖߍ߬ߘߍ ߣߌ ߟߎ߫ ߜߍ߲߬ߘߍ߬ ߘߴߊ߬ߟߎ߫ ߡߊ߬ ، ߝߏ߫ ߊ߬ߟߎ߫ ߞߵߊ߬ ߖߌ߰ ߞߏ߫ ߘߏ߲߰ ߦߙߐ߫ ߕߍ߫ ߊ߬ߟߎ߬ ߟߴߊߟߊ߫ ߡߊ߬ ߸ ߝߏ߫ ߞߊ߬ ߕߊ߯ ߊߟߊ߫ ߖߍ߬ߘߍ ߟߋ߫ ߡߊ߬ ، ߊ߬ ߘߏ߲߬ ߞߊ߬ ߖߘߍ߬ߟߊ߬ߛߊߦߌ ߡߌ߬ߘߊ߫ ߏ߬ ߟߎ߬ ߦߋ߫ ߟߋ߬ ߸ ߛߴߊ߬ߟߎ߬ ߘߴߊ߬ߟߎ߫ ߖߘߍ߬ߟߊߛߊ߬ߦߌ߬ ، ߖߊ߯ߕߋ߬ ߸ ߊߟߊ߫ ߟߋ߫ ߖߘߍ߬ߟߊ߬ߛߊߦߌ ߡߌ߬ߘߊ߬ߓߊ߮ ߘߌ߫ ߸ ߊ߬ߟߋ ߟߋ߬ ߤߌߣߟߊ ߘߌ߫ ﴿118﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߸ ߊ߬ ߣߴߊߟߎ߫ ߦߋ߫ ߞߍ߫ ߕߎ߬ߢߊ߬ߕߌ߮ ߟߎ߫ ߝߍ߬ ﴿119﴾

ߊ߬ ߕߍ߫ ߓߍ߲߬ ߡߊ߬ߘߌ߬ߣߊ߬ ߛߏ߫ ߞߣߐ߫ ߡߐ߮ ߟߎ߬ ߣߴߊ߬ߟߎ߬ ߟߊߡߌߣߌ߲ ߞߏ߲ߞߏ߫ ߞߣߐ߫ ߡߐ߮ ߟߎ߬ ߛߌ߫ ߡߊ߬ ߸ ߞߵߊߟߊ߫ ߟߊ߫ ߞߋߟߊ ߞߐߡߊߝߐ߫ ، ߊ߬ߟߎ߫ ߘߏ߲߬ ߞߊߣߵߊ߬ߟߎ߬ ߣߌ ߟߎ߫ ߞߎ߬ߘߎߜߟߍ߬ߦߊ߫ ߞߋߟߊ ߛߟߐߡߌ߲ ߘߌ߫ ، ߓߊߏ߬ ߡߌ߲߬ߟߐ߯ ߣߌ߫ ߛߍ߰ ߣߌ߫ ߞߐ߲ߞߐ߫ ߛߌ߫ ߕߍ߫ ߊ߬ߟߎ߫ ߛߐ߬ߘߐ߲߬ ߊߟߊ߫ ߛߌߟߊ ( ߕߊ߯ߡߊ) ߘߐ߫ ، ߊ߬ߟߎ߫ ߘߏ߲߬ ߕߍ߫ ߦߙߐ߫ ߛߌ߫ ߕߊ߯ߡߊ߫ ߸ ߡߍ߲ ߘߌ߫ ߓߊ߲߬ߓߊ߮ ߟߎ߬ ߟߊߡߐߣߍ߫ ߸ ߊ߬ ߣߴߊ߬ߟߎ߬ ߕߍ߫ ߞߏ߫ ߛߐ߬ߘߐ߲߬ߕߊ߬ ߛߌ߫ ߛߐ߬ߘߐ߲߬ ߖߎ߮ ߘߏ߫ ߟߊ߫ ߸ ߝߏ߫ ߓߊ߯ߙߊ߫ ߢߌߡߊ ߦߋ߫ ߛߓߍ߫ ߊ߬ߟߎ߬ ߦߋ߫ ߏ߬ ߘߐ߫ ߟߋ߬ ߖߐ߫ ، ߓߊ ߊߟߊ߫ ߕߍ߫ ߢߊ߬ߓߊ߮ ߟߎ߫ ߛߊ߬ߙߊ ߕߌߢߍ߫ ߟߊ߫ ﴿120﴾

ߊ߬ߟߎ߫ ߘߏ߲߬ ߕߍ߫ ߖߘߍ߬ߡߊ߬ߓߐ߬ ߝߋ߲߫ ߛߌ߫ ߡߎ߬ߛߊ߬ߞߊ߫ ߘߐ߰ߡߊ߲߬ߣߍ߲߫ ߣߌ߫ ߓߏ߲߬ߓߊ߬ߓߊ߫ ߘߐ߫ ߸ ߊ߬ߟߎ߬ ߕߍ߫ ߤߊߟߌ߫ ߞߐ߬ ߞߋߟߋ߲߫ ߕߍ߰ ߸ ߝߴߏ߬ ߦߋ߫ ߛߓߍ߫ ߊ߬ߟߎ߬ ߦߋ߫ ، ߏ߬ ߓߍ߯ ߞߎ߲߭ ߠߋ߬ ߸ ߛߴߊߟߊ߫ ߘߴߊ߬ߟߎ߫ ߛߊ߬ߙߴߊ߬ߟߎ߬ ߗߋߥߊߟߌ ߘߐ߫ ߢߌ߬ߡߊ ߟߊ߫ ﴿121﴾

ߘߍ߲߬ߞߣߍ߬ߦߊ߬ߓߊ߮ ߓߍ߯ ߡߊ߲߫ ߞߊ߲߫ ߞߵߊ߬ߟߎ߫ ߥߎ߬ߛߎ߲߬ߓߊ߬ ߞߋߟߋ߲ߘߌ߫ ( ߞߊ߬ ߕߊ߯ ߞߍ߬ߟߍ ߘߐ߫) ߸ ߞߏ߬ߞߏ߫ ߖߡߊ߬ ߞߎߘߎ߲߫ ߠߋ߬ ߞߊ߫ ߞߊ߲߫ ߞߵߊ߬ߟߎ߫ ߥߎ߬ߛߎ߲߬ߓߊ߫ ߞߌ߲߬ߘߊ ߓߍ߯ ߘߐ߫ ߞߊ߬ ߥߊ߫ ߝߊ߰ߡߎ߲߬ߦߊ ߢߌߣߌ߲߫ ߘߌ߯ߣߊ ߘߐ߫ ، ߏ߬ ߟߎ߬ ߞߐߛߊߦߌ߲ ߦߋ߫ ߣߵߊ߬ߟߎ߫ ߡߌ߬ߙߌ߲߬ߘߌ ߟߎ߫ ߞߊ߬ߥߊ߲߬ߘߌ߫ ߸ ߖߐ߲߰ߛߴߊ߬ߟߎ߬ ߘߴߊ߬ߟߎ߬ ߝߊ߲ߕߊ߲߬ߞߊ߫ ﴿122﴾

ߤߍ߲߬ ߊߟߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߸ ߊߟߎ߫ ߦߋ߫ ߓߊ߲߬ߓߊ߮ ߟߎ߫ ߞߟߍ߬ ߸ ߡߍ߲ ߠߎ߫ ߕߎ߲߰ߣߍ߲߬ ߊߟߎ߫ ߟߊ߫ ߸ ߝߏ߫ ߊ߬ߟߎ߬ ߦߋ߫ ߞߘߊ߬ߜߟߍ߬ߦߊ ߦߴߊߟߎ߫ ߘߐ߫ ، ߊߟߎ߫ ߘߏ߲߬ ߦߴߊ߬ ߟߐ߲߫ ߸ ߞߏ߫ ߊߟߊ߫ ߦߋ߫ ߝߊ߲ߕߊ߲ߞߟߊ ߟߎ߫ ߟߋ߫ ߝߍ߬ ﴿123﴾

ߝߐߘߊ ߘߏ߫ ߓߊ߯ ߟߊߖߌ߰ ߞߏߕߊ߲߫ ߸ ߊ߬ߟߎ߬ ߘߏ߫ ߘߴߊ߬ ߝߐ߫ ߞߏ߫ ߣߌ߲߬ ߞߵߊߟߎ߫ ߖߐ߲߫ ߠߊ߫ ߘߍ߲߬ߞߣߍ߬ߦߊ ߖߘߌ߫؟ ߞߵߊ߬ ߕߘߍ߬ ߘߏ߲߬ ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲ ߦߋ߫ ߸ ߊ߬ ߞߵߏ߬ ߟߎ߫ ߟߋ߬ ߟߊ߫ ߘߍ߲߬ߞߣߍ߬ߦߊ ߖߘߌ߫ ، ߏ߬ ߟߎ߫ ߟߋ߫ ߘߏ߲߬ ߦߋ߫ ߛߍߥߊ߫ ߟߴߊ߬ ߟߊ߫ ﴿124﴾

ߒ߬ߓߊ߬ ߖߌ߰ߙߌ߬ߖߐ߯ߙߐ ߦߋ߫ ߡߍ߲ ߠߎ߫ ߛߣߐ߬ߡߍ ߘߐ߫ ߛߊ߫ ߸ ߊ߬ ߞߵߏ߬ ߟߎ߫ ߟߋ߬ ߟߊ߫ ߞߛߐ ߖߘߌ߫ ߞߛߐ߫ ߜߘߍ߫ ߟߊ߫ ، ߝߏ߫ ߊ߬ߟߎ߫ ߛߊ߬ ߘߊ߫ ߞߵߊ߬ ߕߘߍ߬ ߊ߬ߟߎ߬ ߦߋ߫ ߓߊ߲߬ߓߊ߮ ߟߎ߬ ߘߌ߫ ﴿125﴾

ߦߊ߯ߟߴߊ߬ߟߎ߬ ߕߴߊ߬ ߦߋ߫ ߟߊ߫ ߛߐ߲߬ ߓߊ߬ ߸ ߊ߬ߟߎ߬ ߦߋ߫ ߞߘߐߓߐ߫ ߟߊ߫ ߛߊ߲߭ ߓߍ߯ ߟߊ߫ ߛߋ߲߬ߢߊ߬ ߞߋߟߋ߲߫ ߥߟߊ߫ ߛߋ߲߬ߢߊ߫ ߝߌ߬ߟߊ߬؟ ߊ߬ߟߎ߬ ߕߴߊ߬ߟߎ߫ ߖߘߍ߬ߟߊߛߊ߬ߦߌ߬ ߟߴߏ߬ ߛߌ߫ ߘߐ߫ ߸ ߊ߬ߟߎ߫ ߘߏ߲߬ ߕߴߊ߬ߟߎ߫ ߕߊ߰ߛߌ߬ ߟߊ߫ ﴿126﴾

ߝߐߘߊ ߘߏ߫ ߓߊ߯ ߟߊߖߌ߰ ߞߏߕߊ߲߫ ߸ ߊ߬ߟߎ߬ ߘߏ߫ ߘߴߊ߬ ߞߍ߫ ߘߏ߫ ߡߊߝߟߍ ߘߌ߫ ߸ ߞߵߊ߬ ߝߐ߫ ߞߏ߫ ߡߐ߰ ߢߊ߯ ߊߟߎ߫ ߟߊ߫ ߓߊ߬؟ ߊ߬ߟߎ߬ ߘߌ߫ ߓߊ߲߫ ߞߵߊ߬ߟߎ߬ ߞߐߛߊ߬ߦߌ߲߬ ، ߊߟߊ߫ ߝߣߴߊ߬ߟߎ߫ ߛߣߐ߬ߡߍ ߟߊߛߊ߬ߦߌ߬ ߟߊ߫ ߏ߬ ߟߋ ߘߐ߫ ߸ ߓߊ ߡߌ߬ߙߌ߲߬ߘߌ߫ ߟߴߊ߬ߟߎ߬ ߘߌ߫ ߸ ߡߍ߲ ߠߎ߬ ߕߍ߫ ߝߏߦߌ߬ ߞߘߐߟߐ߲߫ ߠߊ߫ ﴿127﴾

ߖߊ߯ߕߋ߬ ߸ ߞߋߟߊ ߘߏ߫ ߓߘߊ߫ ߣߵߊߟߎ߫ ߡߊ߬ ߸ ߞߊ߬ ߓߐ߫ ߊߟߎ߫ ߖߍ߬ߘߍ ߘߐ߫ ، ߊߟߎ߫ ߕߙߐ߫ ߞߏ ߜߍ߬ߟߍ߲߬ߡߊ߲߫ ߊ߬ ߡߊ߬ ߸ ߊߟߎ߫ ߘߌߡߊ߲ߓߊ ߦߴߊ߬ ߦߋ߫ ، ߘߍ߲߬ߞߣߍ߬ߦߊ߬ߓߊ߮ ߟߎ߫ ߞߌ߬ߣߌ߲߬ߞߌߣߌ߲ ߣߴߊ߬ߟߎ߬ ߤߌߣߊ ߦߴߊ߬ ߟߊ߫ ﴿128﴾

ߣߴߊ߬ߟߎ߫ ߞߵߊ߬ߟߎ߬ ߞߐߘߏ߲߬ ߸ ߌ ߦߴߊ߬ ߝߐ߫ ߞߏ߫ ߒߠߋ ߥߊ߬ߛߊ ߟߋ߬ ߊߟߊ߫ ߘߌ߫ ߸ ߡߊ߰ߙߌ߬ ߜߘߍ߫ ߘߏ߲߬ ߕߍ߫ ߏ߬ ߞߐ߫ ، ߒ ߓߘߊ߫ ߒ ߛߍ߲߬ߓߍ߫ ߏ߬ ߟߊ߫ ߸ ߓߊ ߊ߬ߟߋ ߟߋ߫ ߛߡߍ߬ ߓߟߋߓߟߋ ߕߌ߱ ߘߌ߫ ﴿129﴾

ߊ. ߟ. ߙ. ( ߊߟߌߝ. ߟߊ߯ߡ. ߙߊ߯ ) ߢߌ߲߬ ߠߎ߬ ߦߋ߫ ߥߘߋ߬ߥߘߋ߬ߟߌ߬ ߟߍߙߊ ߟߝߊߙߌ ߟߎ߫ ߟߋ߬ ߘߌ߫ ﴿1﴾

ߦߊ߯ߟߊ߫ ߞߓߊߞߏߦߊ߫ ߟߋ߬ ߡߐ߱ ߟߎ߬ ߟߊ߫ ߓߊ߬ ߸ ߞߏ߫ ߊ߲ ߓߘߊ߫ ߗߍ߬ ߞߋߟߋ߲߫ ߦߟߌߘߏ߲߬ ߊ߬ߟߎ߬ ߘߐ߫ ߸ ( ߞߵߊ߬ ߝߐ߫ ߏ߬ ߦߋ߫ ) ߞߏ߫ ߖߊ߬ߛߙߋ߬ߡߊ߬ߟߊ ߞߍ߫ ߡߐ߱ ߟߎ߬ ߦߋ߫ ، ߊ߬ ߣߌ߫ ߞߏ߫ ߘߟߊߝߎߟߌ ߞߍ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߋ߫ ߸ ߞߏ߫ ߕߎ߬ߢߊ ߛߋ߲߬ ߓߊ߲ߓߊ߲ߣߍ߲߫ ߠߴߊ߬ߟߎ߬ ߞߘߐ߫ ߊ߬ߟߎ߫ ߡߊ߰ߙߌ ߕߍ߰ߟߊ ߘߐ߫ ، ߓߊ߲߬ߓߊ߮ ߟߎ߬ ߞߊ߲߫ ߏ߬ ߟߋ ߡߊ߬ ߸ ߞߏ߫ ߣߌ߲߬ ߦߋ߫ ߛߎߓߊ߯ ߘߐߜߍ ߖߊ߯ߕߋ ߟߋ߬ ߘߌ߫ ﴿2﴾

ߊߟߎ߫ ߡߊ߰ߙߌ ߟߋ߬ ߊߟߊ߫ ߘߌ߫ ߸ ߡߍ߲ ߞߊ߬ ߛߊ߲ ߠߎ߬ ߣߌ߫ ߘߎ߱ ߘߊ߲߫ ߕߟߋ߬ ߥߐ߯ߙߐ߫ ߞߘߐ߫ ߸ ߞߊ߬ ߓߊ߲߫ ߞߵߊ߬ ߟߊߞߢߊ߫ ߛߍ߬ߡߍ ߞߊ߲߬ ، ߊ߬ߟߋ ߟߋ߬ ߞߏ ( ߡߊ߬ߡߙߊ߬ߟߌ ) ߛߌ߲߬ߝߏ߲߬ߧߊ߬ ߟߊ߫ ، ߛߟߏ߬ߣߊ߬ߟߌ߬ߓߊ߯ ߕߍ߫ ߸ ߝߏ߫ ߊ߬ߟߋ߬ ߓߊ߯ ߘߌ߬ߢߍ߬ ( ߡߍ߲ ߦߋ߫ ) ، ߊߟߊ߫ ߏ߬ ߟߋ ߊߟߎ߫ ߡߊ߰ߙߌ ߘߌ߫ ، ߒ߬ߓߵߊߟߎ߯ ߏ߬ ߟߋ ߓߊ߬ߕߏ߫ ߘߋ߬ ، ߦߊ߯ߟߴߊߟߎ߫ ߕߍ߫ ߊߟߎ߫ ߕߊ߰ߛߌ߬ ߟߊ߫ ߟߋ߫ ߓߊ߬؟ ﴿3﴾

ߊߟߎ߫ ߓߍ߯ ߛߊ߬ߦߌ߬ߕߐ߫ ߊ߬ߟߋ ߟߋ߫ ߡߊ߬ ߞߐߘߍ߫ ، ߊߟߊ߫ ߟߊ߫ ߕߎ߬ߢߊ߬ ߦߟߌߡߊߘߌߦߊ ߟߴߏ߬ ߘߌ߫ ߸ ߊ߬ߟߋ ߟߋ߬ ߘߊ߲ߠߌ߲ ߠߊߝߟߐ߫ ߟߊ߫ ߸ ߞߊ߬ ߓߊ߲߫ ߞߵߊ߬ ߟߊߛߊ߬ߦߌ߲߬ ߞߎߘߊ߫ ߘߌ߫ ، ߏ ߞߎ߲߭ ߠߋ߬ ߸ ߛߴߊ߬ ߘߌ߫ ߘߍ߲߬ߞߣߍ߬ߦߊ߬ߓߊ߯ ߢߌ߬ߡߊ߬ ߞߍ߬ߟߊ ߟߎ߫ ߛߙߊ߬ ߕߋߟߋ߲ ߠߊ߫ ، ߒ߬ߓߊ߬ ߡߍ߲ ߠߎ߫ ߓߊ߲߬ߣߍ߲߬ ߛߊ߫ ߸ ߏ߬ ߟߎ߬ ߢߍߛߌ߰ߣߍ߲߫ ߡߌ߲߬ߕߊ߬ ߝߎߦߊߝߎߦߊ ߣߌ߫ ߖߊ߲߰ߞߕߊ߬ ߘߌߡߌ߲ߣߍ߲ ߠߋ߬ ߟߊ߫ ߸ ߞߊ߬ߡߊߛߐ߬ߘߐ߲߫ ߊ߬ߟߎ߬ ߟߊ߫ ߓߊ߲߬ߓߊ߰ߦߊ ߝߍ߬ ﴿4﴾

ߊ߬ߟߋ ߟߋ߫ ߞߊ߬ ߕߋ߬ߟߋ ߞߍ߫ ߞߣߍߦߊ ߘߌ߫ ߞߊ߬ ߞߊߙߏ ߞߍ߫ ߦߋߟߋ߲ ߘߌ߫ ߸ ߞߵߏ ߘߡߊ߬ߦߌ߬ߙߊ߬ߦߊ߫ ߛߌ߬ߛߊ߮ ߟߎ߬ ߘߌ߫ ، ߖߐ߲߰ߛߴߊߟߎ߫ ߘߌ߫ ߛߊ߲߭ ߠߎ߬ ߦߙߌߞߊ ߣߌ߫ ߖߊ߬ߕߋ߬ߟߌ ߟߐ߲߫ ، ߊߟߊ߫ ߡߴߏ߬ ( ߟߎ߬ ) ߘߊ߲߫ ߝߏߦߌ߬ ߟߊ߫ ߝߏ߫ ߕߎ߬ߢߊ ، ߊ߬ ߘߏ߲߬ ߦߋ߫ ߟߝߊߙߌ ߟߎ߬ ߝߊߙߊ߲ߝߊߛߌ߫ ߟߊ߫ ߡߌ߬ߙߌ߲߬ߘߌ߬ ߟߐ߲ߠߌ߲ߠߊ ߟߎ߫ ߟߋ߬ ߦߋ߫ ﴿5﴾

ߛߎ ߣߌ߫ ߕߟߋ߬ߘߐ߬ߟߊ ߟߊ߫ ߝߐ߫ ߢߐ߲߯ ߞߐ ߣߌ߫ ߊߟߊ߫ ߟߊ߫ ߝߋ߲߫ ߘߊ߲ߣߍ߲ ߡߍ߲ ߠߎ߬ ߦߋ߫ ߛߊ߲ ߠߎ߬ ߣߌ߫ ߘߎ߱ ߘߐ߫ ߸ ߏ߬ ߓߍ߯ ߦߋ߫ ߕߊ߰ߛߌ߬ ߞߏ߫ ߜߊ߲߬ߛߊ߲߫ ߠߋ߬ ߘߌ߫ ߡߌ߬ߙߌ߲߬ߘߌ߬ ߝߊ߲ߕߊ߲ߞߟߊ ߟߎ߬ ߦߋ߫ ﴿6﴾

ߒ߬ߓߊ߬ ߡߍ߲ ߠߎ߬ ߦߟߌߛߌ߰ߣߍ߲߬ ߕߍ߫ ߒ߬ ߓߍ߲߬ߢߐ߲߰ߦߊ ߟߊ߫ ߸ ߊ߬ ߣߴߊ߬ߟߎ߫ ߘߌ߬ߢߍ߬ߣߍ߲߬ ߘߎߢߊ߫ ߢߣߊߡߦߊ ߡߊ߬ ߞߵߊ߬ߟߎ߬ ߡߝߊ߫ ߏ ߞߊ߲߬ ߸ ߊ߬ ߣߌ߫ ߡߍ߲ ߠߎ߫ ߖߊ߲߬ߓߐߣߍ߲߫ ߒ߬ ߠߊ߫ ߘߊ߬ߟߎ ߟߎ߬ ߘߐ߫ ߸ ﴿7﴾

ߒ߬ߓߊ߬ ߏ߬ ߟߎ߫ ߟߋ߬ ߡߊߞߍ߫ ߦߌߟߊ ߞߍߕߐ߫ ߕߊ ߘߌ߫ ߸ ߞߊ߬ߡߊߛߐ߬ߘߐ߲߫ ߊ߬ߟߎ߬ ߗߋߥߊߟߌ ߝߍ߬ ﴿8﴾

ߡߍ߲ ߠߎ߫ ߞߏ߬ߣߌ߲ ߘߍ߲߬ߞߣߍ߬ߦߊ߬ߣߍ߲߫ ߞߊ߬ ߢߌ߬ߡߊ ߟߎ߬ ߞߍ߫ ߸ ߏ߬ ߟߎ߫ ߡߊ߰ߙߌ ߘߴߊ߬ߟߎ߬ ߞߊ߲ߘߴߊ߬ߟߎ߬ ߟߊ߫ ߘߍ߲߬ߞߣߍ߬ߦߊ ( ߛߓߊߓߎ߫ ) ߟߊ߫ ، ߞߐ߬ߢߊ ߟߎ߬ ߘߌ߫ ߕߏ߫ ߥߦߏ߬ ߟߴߏ߬ ߟߎ߬ ߞߘߐߟߊ ߟߎ߬ ߘߐ߫ ߣߍߡߊ ߣߊߞߐ ߟߎ߬ ߘߐ߫ ߞߎߟߊ߲ߞߎߟߊ߲߫ ﴿9﴾

ߊ߬ߟߎ߬ ߟߊ߫ ߝߋ߲߫ ߡߊߞߟߌ߫ ߞߊ߲ ߠߋ߫ ߦߋ߲߬ ߸ ߞߏ߫ ߊ߲ ߡߊ߰ߙߌ ߌ ߛߊߣߌ߲ߡߊ߲߫ ، ߊ߬ߟߎ߬ ߟߊ߫ ߝߏ߬ߟߌ ߟߋ߬ ߸ ߞߏ߫ ߖߐ ، ߊ߬ߟߎ߬ ߟߊ߫ ߝߋ߲߫ ߡߊߞߟߌ ߞߎ߲߬ߘߏ߲ ߠߋ߬ ߸ ߞߏ߫ ߕߊ߲߬ߘߏ ߊߟߊ߫ ߦߋ߫ ߸ ߖߊ߯ߓߊ ߟߎ߫ ߡߊ߰ߙߌ ߟߋ߬ ﴿10﴾

ߊߟߊ߫ ߕߎ߲߬ ߓߊ߯ ߞߌߢߍ߫ ߖߎ߯ߡߊ߲ ߟߊ ߟߊ߫ ߡߐ߱ ߟߎ߫ ߞߊ߲߬ ߸ ߦߏ߫ ߊ߬ߟߎ߬ ߦߋ߫ ߞߌߢߍ߫ ߟߊ߫ ߤߙߊ ߟߊ߫ ߢߊ ߡߍ߲ ߸ ߊ߬ߟߎ߬ ߛߕߊ ߕߎ߲߬ ߘߌ߫ ߟߊߕߍ߰ ߖߏߣߊ߫ ، ߞߏ߬ߣߌ߲߬ ߡߍ߲ ߠߎ߬ ߦߟߌ߫ ߕߍ߫ ߒ߬ ߓߍ߲߬ߢߐ߲߰ߦߊ ߟߊ߫ ߸ ߊ߲ ߧߴߏ߬ ߟߎ߬ ߞߣߐߘߐߝߟߌ߬ߣߍ߲ ߠߋ߬ ߕߏ߫ ߟߴߊ߬ߟߎ߬ ߟߊ߫ ߘߊ߲߬ߠߊ߬ߕߊߡߌ߲ ߘߐ߫ ߔߍߘߍ߲ߞߍ߲ߛߍ߲߫ ﴿11﴾

ߣߌ߫ ߡߊ߲߬ߕߙߐ߫ ߡߊ߰ ߘߊ߫ ߡߐ߱ ߟߊ߫ ߕߋ߲߬ ߸ ߊ߬ ߘߴߊ߬ ߞߍ߫ ߒ߬ ߞߟߌ ߘߌ߫ ߞߵߊ߬ ߟߊߣߍ߲ ߕߏ߫ ߊ߬ ߝߎ߬ߘߎ ߝߊ߲߬ ߞߋߟߋ߲ ߞߊ߲߬ ߸ ߥߟߴߊ߬ ߛߌ߰ߣߍ߲ ߸ ߤߊߡߊ߲ߕߍ߫ ߊ߬ ߟߐ߬ߣߍ߲ ، ߒ߬ߞߊ߬ ߣߴߊ߲ ߞߵߊ߬ ߟߊ߫ ߕߙߐߦߊ ߏ߬ ߓߐ߫ ߊ߬ ߞߊ߲߬ ߸ ߊ߬ ߘߌ߫ ߕߊ߬ߡߌ߲߬ ߗߊߥߎ߲߫ ߞߵߊ߬ ߞߍ߫ ߦߏ߫ ߊ߬ ߡߴߊ߲ ߞߟߌ߫ ߕߙߐߦߊ߫ ߡߊ߬ ߡߍ߲ ߡߊ߰ ߘߴߊ߬ ߟߊ߫ ، ߒ߬ߓߊ߬ ߖߊߛߟߌߟߊ ߟߎ߬ ߗߋߥߊߟߌ ߟߎ߬ ߡߊߢߍ߯ߙߍߣߍ߲߫ ߊ߬ߟߎ߬ ߢߊߞߘߐ߫ ߕߋ߲߬ ߠߋ߬ ﴿12﴾

ߊ߲ ߘߏ߲߬ ߞߵߊߟߎ߫ ߢߍ߫ ߝߊ߯ߘߐߞߍ ߟߎ߬ ߛߌߟߊߛߊ߬ ߟߋ߬ ߸ ߊ߬ߟߎ߫ ߞߊ߬ ߕߐ߬ߢߍ߮ ߞߍ ߡߍ߲ߞߍ߫ ، ߏ߬ ߟߎ߬ ߟߊ߫ ߞߋߟߊ ߟߎ߫ ߕߎ߲߬ ߣߊ߬ ߘߴߊ߬ߟߎ߫ ߡߊ߬ ߔߊߞߌ ߟߎ߬ ߘߌ߫ ، ߞߏ߬ߣߵߊ߬ߟߎ߬ ߡߊ߫ ߛߐ߲߬ ߘߍ߲߬ߞߣߍ߬ߦߊ߬ ߞߏ ߡߊ߬ ، ߒ߬ߓߵߊ߲ ߧߋ߫ ߡߌ߬ߙߌ߲߬ߘߌ߫ ߛߐ߲߬ߡߊ ߟߎ߫ ߛߙߊ߬ ߟߊ߫ ߕߋ߲߬ ߠߋ߬ ﴿13﴾

ߊ߲ ߣߵߊߟߎ߫ ߞߍ߫ ߟߊ߫ ߣߘߐ߬ߛߌ߰ߟߊ ߟߎ߬ ߘߌ߫ ߘߎ߱ ߞߊ߲߬ ߏ߬ ߟߎ߫ ߟߋ߬ ߞߐ߫ ߸ ߛߴߊ߲ ߘߴߊ߬ ߦߋ߫ ߊߟߎ߫ ߝߣߊ߫ ߦߴߊ߬ ߞߍ߫ ߟߊ߫ ߢߊ ߡߍ߲ ﴿14﴾

ߣߴߊ߲ ߠߊ߫ ߟߍߙߊ߫ ߘߐߞߣߍߣߍ߲ ߠߎ߫ ߞߊ߬ߙߊ߲߬ ߘߴߊ߬ߟߎ߬ ߦߋ߫ ߸ ߡߍ߲ ߠߎ߬ ߦߟߌ߫ ߕߴߊ߲ ߓߍ߲߬ߢߐ߲߰ߦߊ ߟߊ߫ ߸ ߏ߬ ߟߎ߬ ߘߴߊ߬ ߝߐ߫ ߞߴߌ ߦߋ߫ ߣߊ߬ ߞߎ߬ߙߣߊ߬ ߜߘߍ߫ ߘߌ߫ ߡߍ߲ ߕߍ߫ ߢߌ߲߬ ߘߌ߫ ، ߥߟߊ߫ ߌ ߦߴߊ߬ ߡߊߝߊ߬ߟߋ߲߬ ، ߊ߬ߟߎ߫ ߖߋ߬ߓߌ߬ ߞߏ߫ ߊ߬ ߕߍ߫ ߞߎ߲߫ ߒߠߋ ߘߐ߫ ߞߵߊ߬ ߡߊߝߊ߬ߟߋ߲߬ ߒ ߖߘߍ߬ ߕߊ߫ ߜߋ߲߬ ߘߐ߫ ߘߋ߬ ، ߓߊ ߒߠߋ ߕߍ߫ ߝߏߦߌ߬ ߟߊߓߊ߬ߕߏ ߞߊ߲߬ ߝߏ߫ ߒ ߧߋ߫ ߦߟߌߘߏ߲߬ ߠߊ߫ ߡߍ߲ ߠߊ߫ ، ߒߠߋ ߘߏ߲߬ ߛߌߟߊ߲߫ ߠߊ߫ ߒ ߡߊ߰ߙߌ ߛߐ߬ߛߐ ߘߐ߫ ߟߏ߲ߓߊ ߘߏ߫ ߖߊ߲߰ߞߕߊ ߟߋ߬ ߟߊ߫ ﴿15﴾

ߊ߬ ߝߐ߫ ߞߏ߫ ߣߴߊ߬ ߕߎ߲߬ ߞߵߊߟߊ߫ ߘߌߦߊ߫ ߸ ߒߠߋ ߕߎ߲߬ ߕߍ߫ ‹ ߟߍߙߊ ߣߌ߲߬ › ߞߊ߬ߙߊ߲߬ ߊߟߎ߫ ߦߋ߫ ߝߋߎ߫ ، ߊ߬ ߝߊ߲߭ ߕߎ߲߬ ߕߍ߫ ߊߟߎ߫ ߟߊߟߐ߲ߠߌ߲߫ ߊ߬ ߟߊ߫ ߟߋ߬ ، ߓߊߏ߬ ߒ ߓߘߊ߫ ߡߍ߲߫ ߊߟߎ߫ ߕߍߡߊ߬ ߛߌ߭ ߞߎ߲߬ߕߊ߰ ߖߊ߲߫ ߞߘߐ߫ ߣߌ߲߬ ߢߍ߫ ߞߘߐ߬ߡߊ߲߫ ، ߦߊ߯ߟߴߊߟߎ߫ ߕߴߏ߬ ߤߊ߲ߞߟߌߡߦߊ߫ ߟߊ߫ ߓߊ߬؟ ﴿16﴾

ߖߍߣߍ߲ ߠߊ߫ ߕߐ߬ߢߍ߮ ߘߌ߫ ߕߊ߬ߡߌ߲߬ ߡߐ߱ ߕߊ ߟߊ߫ ߸ ߡߍ߲ ߞߊ߬ ߥߎߦߊ ߞߎ߲߬ߘߐߕߍ߰ ߞߵߊ߬ ߟߴߊߟߊ߫ ߟߊ߫ ߸ ߥߟߴߊ߬ ߞߵߊ߬ ߟߊ߫ ߟߝߊߙߌ ߟߎ߬ ߡߊߛߐ߬ߛߐ߬؟ ߓߊ߬ߙߌ߬ ߝߋߎ߫ ߸ ߛߐ߲߬ߡߊ ߟߎ߬ ߕߍߣߊ߬ ߛߎߘߊ߲߫ ߠߊ߫ ﴿17﴾

ߊ߬ߟߎ߬ ߦߋ߫ ߝߋ߲߫ ߠߋ߬ ߓߊ߬ߕߏ߬ ߟߊ߫ ߞߵߊߟߊ߫ ߕߏ߫ ߸ ߡߍ߲ ( ߓߊ߬ߕߏ߬ߓߊߟߌߦߊ ) ߕߍ߫ ߊ߬ߟߎ߬ ߕߙߐ߫ ߸ ߊ߬ ( ߓߊ߬ߕߏ ) ߘߏ߲߬ ߕߍ߫ ߊ߬ߟߎ߬ ߣߝߊ߫ ، ߊ߬ߟߎ߬ ߞߊ߲߫ ߏ߬ ߟߎ߫ ߟߋ߫ ߡߊ߬ ߸ ߞߏ߫ ߢߌ߲߬ ߠߎ߫ ߟߵߊ߲ ߛߟߏ߬ߣߊ߬ߓߊ߮ ߟߎ߬ ߘߌ߫ ߊߟߊ߫ ߓߘߊ ، ߊ߬ ߝߐ߫ ߞߏ߫ ߌ߬ߦߏ߯ ߊߟߎ߫ ߘߌ߫ ߊߟߊ߫ ߞߌ߬ߓߊ߬ߙߏ߬ ߞߏ߫ ߟߊ߫ ߸ ߊ߬ ߡߊ߫ ߡߍ߲ ߟߐ߲߫ ߛߊ߲ ߠߎ߬ ߣߌ߫ ߘߎ߱ ߞߣߐ߫؟ ߊ߬ ߘߏ߲߬ ߛߊߣߌ߲ߡߊ߲߫ ߞߵߊ߬ ߞߘߐߕߵߊ߬ߟߎ߬ ߟߊ߫ ߜߙߊ߬ߢߐ߲߰ߦߊ߬ ߝߋ߲ ߠߎ߫ ߡߊ߬ ߞߟߋ߫ ﴿18﴾

ߡߐ߱ ߟߎ߫ ߕߎ߲߬ ߕߍ߫ ߝߏߦߌ߬ ߘߌ߫ ߝߏ߫ ߡߊ߲߬ߕߏ߲߬ ߞߋߟߋ߲߫ ߔߋ߫ ߸ ߞߏ߬ߣߵߊ߬ߟߎ߬ ߝߐ߫ ߘߊ߫ ߢߐ߲߮ ߞߐ߫ ߟߋ߬ ، ߣߌ߫ ߞߎߡߊ߫ ߞߋߟߋ߲߫ ߞߐ߲߰ߣߍ߲ ߕߍ߫ ߞߊ߬ ߝߘߊ߫ ߌ ߡߊ߰ߙߌ ߟߊ߫ ߸ ߛߴߊ߬ߟߎ߬ ߟߊ߫ ߢߐ߲߯ ߛߐߛߐ߫ ߞߏ ߞߕߌ ߓߘߊ߫ ߕߍ߰ ߊ߬ߟߎ߬ ߕߍ߫ ﴿19﴾

ߊ߬ߟߎ߬ ߞߊ߲߫ ߠߋ߬ ߞߏ߫ ߥߟߊߞߏ߫ ߡߊ߲߬ߕߊߣߌ߲߫ ߕߘߍ߬ ߟߊߖߌ߰ ‹ ߞߋߟߊ › ߡߵߊ߬ ߡߊ߰ߙߌ ߓߟߏ߫ ، ߊ߬ߟߎ߫ ߖߋ߬ߓߌ߬ ߞߏ߫ ߸ ߞߏ߫ ߘߏ߲߰ߣߍ߲ ߦߋ߫ ߊߟߊ߫ ߟߋ߬ ߕߊ߫ ߘߌ߫ ߸ ߒ߬ߞߵߊߟߎ߫ ߦߋ߫ ߡߊ߬ߞߐ߬ߣߐ߲߬ߠߌ߲ ߞߍ߫ ߖߐ߫ ߸ ߒߠߋ ߖߍ߬ߘߍ ߦߴߊߟߎ߫ ߝߍ߬ ߡߊ߬ߞߐ߬ߣߐ߲߬ߠߌ߲߬ߠߊ ߟߎ߬ ߘߏ߫ ߟߋ߬ ߘߌ߫ ﴿20﴾

ߣߴߊ߲ ߞߊ߬ ߡߐ߱ ߟߎ߫ ߛߎ߲߬ߛߎ߲߬ ߤߌߣߊ ߟߊ߫ ߡߊ߲߬ߕߙߐ ߡߊ߰ߣߍ߲ ߞߐ ߊ߬ߟߎ߬ ߟߊ߫ ߸ ߌ ߘߴߊ߬ߟߎ߬ ߦߋ߫ ߣߊߡߙߊ ߘߐߓߍ߲߬ ߠߊ߫ ߒ߬ ߠߊ߫ ߟߝߊߙߌ ߟߎ߬ ߞߊ߲ߡߊ߬ ، ߊ߬ ߟߊߛߋ߫ ߞߏ߫ ߊߟߊ߫ ߟߋ߬ ߞߊߟߌߡߊ߲߫ ߣߊߡߙߊ ߟߊ߫ ( ߓߍ߯ ߘߌ߫ ) ، ߓߊ ߒ߬ ߠߊ߫ ߞߋߘߋ߲ ߠߎ߬ ߦߴߊߟߎ߫ ߟߊ߫ ߣߊߡߙߊ߫ ߞߍߕߊ ߓߍ߯ ߛߓߍ߫ ߟߊ߫ ߟߋ߬ ﴿21﴾

‹ ߊߟߊ߫ › ߟߋ߬ ߊߟߎ߫ ߟߊߕߊ߯ߡߊ߫ ߟߊ߫ ߜߙߋ ߣߌ߫ ߖߌ ߞߊ߲߬ ، ߣߴߊߟߎ߫ ߞߍ߫ ߘߊ߫ ߞߎߟߎ߲ ߠߎ߬ ߞߣߐ߫ ߏ߬ ߘߐ߫ ߸ ߏ߬ ߟߎ߬ ߘߌ߫ ߞߎߟߎ߲ߞߎߟߎ߲߫ ߊ߬ߟߎ߬ ߘߌ߫ ߝߢߐ߫ ߘߌߡߊ߲ ߓߟߏ߫ ، ߏ߬ ߓߊ߯ ߞߍ߫ ߊ߬ߟߎ߬ ߓߍ߯ ߘߌ߫ ߛߍߥߊ߫ ߏ߬ ߟߊ߫ ، ߘߊ߬ߡߊ߲߬ߛߊ߫ ߝߢߐ߫ ߜߍߟߍ߲ ߘߌ߫ ߣߊ߬ ‹ ߞߎߟߎ߲ › ߠߎ߫ ߡߊ߬ ߸ ߞߊ߬ ߟߊ߲߬ߓߏ߲ ߠߎ߫ ߣߵߊ߬ߟߎ߫ ߡߊ߬ ߞߊ߬ ߓߐ߫ ( ߟߊ߬ߡߌߣߌ߲ ) ߝߊ߲߭ ߓߍ߯ ߘߐ߫ ߸ ߝߏ߫ ߊ߬ߟߎ߬ ߘߴߊ߬ ߖߌ߰ ߸ ߞߏ߫ ߊ߬ߟߎ߬ ߓߘߊ߫ ߟߊߡߌߣߌ߲߫ ߔߋߕߎ߫ ، ߊ߬ߟߎ߬ ߘߴߊ߬ ߞߟߌ߫ ߏ߬ ߘߐ߫ ߞߊ߬ ߘߌ߯ߣߊ ߓߎ߰ߓߎ߯ ߊ߬ ߦߋ߫ ߛߏߘߊ߫ ، ߞߏ߫ ߣߴߌ ߞߵߊ߲ ߠߊߞߛߌ߫ ߢߌ߲߬ ߘߐ߫ ߸ ߊ߲ ߘߌ߫ ߞߍ߫ ߞߏߢߌߡߊߟߐ߲ߠߊ ߟߎ߬ ߘߏ߫ ߘߌ߫ ߟߋ߬ ߘߍ߯ ﴿22﴾

ߒ߬ߓߵߊߟߊ߫ ߓߊ߯ ߊ߬ߟߎ߬ ߟߊߞߛߌ߫ ߏ߬ ߘߐ߫ ߖߐ߫ ߸ ߊ߬ߟߎ߬ ߘߴߊ߬ ߞߍ߫ ߕߐ߬ߢߍ߮ ߘߌ߫ ߘߎ߱ ߞߊ߲߬ ߕߎ߬ߢߊ ߕߣߊ߬ ߟߊ߫ ߕߋ߲߬ ߝߎ߯ ، ߤߍ߲߬ ߊߟߎ߬ ߡߐ߱ ߟߎ߬ ߸ ߊߟߎ߫ ߟߊ߫ ߕߐ߬ߢߍ߮ ߦߴߊߟߎ߫ ߖߍ߬ߘߍ ߟߋ߫ ߡߊ߬ ߸ ߘߎߢߊ߫ ߢߣߊߡߦߊ ߘߊ߰ߡߎ߲߬ߣߍ߲ ߢߌߣߌ߲ ߠߊ߬ ، ߏ߬ ߟߋ ߞߐ߫ ߸ ߊߟߎ߫ ߘߌߣߊ߫ ߛߊ߬ߦߌ߫ ߒ߬ߠߎ߫ ߡߊ߬ ߸ ߏ߬ ߓߊ߯ ߞߍ߫ ߊ߲ ߘߴߊߟߎ߫ ߗߋߥߊߟߌ ߓߍ߯ ߖߐ߲ ߠߊߓߐ߫ ߊߟߎ߫ ߡߊ߬ ﴿23﴾

ߘߎߢߊ߫ ߢߣߊߡߦߊ ߟߊߒߡߊ ߟߋ߬ ߸ ߦߏ߫ ߊ߲ ߣߊ߬ ߖߌ ߡߍ߲ ߠߊߖߌ߰ ߟߊ߫ ߞߊ߬ ߓߐ߫ ߡߐ߲ߕߐ߲ ߘߐ߫ ، ߘߎ߱ ߝߍߘߍ߲߫ ߝߋ߲ ߠߎ߬ ߢߊ߯ߡߌ߲߫ ߘߴߏ߬ ߟߊ߫ ߸ ߡߐ߱ ߟߎ߬ ߣߌ߫ ߓߌߦߊ߲ ߠߎ߬ ߘߊߥߎ߲ߕߊ ߟߎ߬ ߘߐ߫ ߸ ߝߏ߫ ‹ ߘߎ߱ › ߘߴߊ߬ ߡߊ߬ߖߐ߯ߙߊ߲ ߠߎ߫ ߕߊ߬ ߸ ߞߵߊ߬ ߖߘߍ߬ ߡߊߢߍ߯ߙߍ߫ ߸ ߊ߬ ߘߏ߲߬ߞߏ ߟߎ߬ ߞߵߊ߬ ߓߛߌ߬ߞߌ߬ ߛߊ߫ ߸ ߞߏ߫ ߊ߬ߟߎ ߟߋ߬ ߛߋߣߍ߲߫ ߘߎ߱ ߟߊߗߋ߲߬ߧߊ߬ ߟߊ߫ ߕߋ߲߬ ، ߘߊ߬ߡߊ߲߬ߛߊ߫ ߊ߲ ߠߊ߫ ߖߊ߬ߡߊߙߌ ߘߌ߫ ߣߊ߬ ߏ ߡߊ߬ ߛߎ ߘߐ߫ ߥߟߊ߫ ߕߋ߬ߟߋ ߘߐ߫ ، ߊ߲ ߘߴߏ߬ ߞߍ߫ ߝߋ߲߫ ߞߊ߬ߣߍ߲ ߘߌ߫ ߜߟߋߞߎ߬ ߸ ߦߏ߫ ߊ߬ ߕߎ߲߬ ߕߴߦߋ߲߬ ߞߎߣߎ߲߬ ، ߒ߬ߓߵߊ߲ ߧߋ߫ ߟߝߊߙߌ ߟߎ߬ ߝߊߙߊ߲ߝߊߛߌ߫ ߟߊ߫ ߡߌ߬ߙߌ߲߬ߘߌ߬ ߛߌߡߊߟߌߟߊ ߟߎ߬ ߦߋ߫ ߕߋ߲߬ ߠߋ߬ ﴿24﴾

ߊߟߊ߫ ߦߋ߫ ߞߟߌߟߌ ߞߍ߫ ߟߊ߫ ߞߊߕߙߍ߬ ߖߐ ߛߏ ߟߋ߫ ߡߊ߬ ߸ ߡߍ߲ ߘߏ߲߬ ߓߊ߯ ߊ߬ ߘߌߦߊ߫ ߸ ߊ߰ ߏ߬ ߟߋ ߞߊ߲ߘߊ߫ ߟߊ߫ ߛߌߟߊ߫ ߕߋߟߋ߲ߣߍ߲߫ ߓߐߚߐ ߞߊ߲߬ ﴿25﴾

ߡߍ߲ ߠߎ߫ ߢߊ߬ߣߍ߲߫ ߸ ߢߌ߬ߡߊ ߟߴߏ߬ ߟߎ߬ ߢߍ߫ ߸ ߊ߬ ߣߌ߫ ߡߊ߬ߞߊߝߏ ، ߜߊ߲߬ߜߊ߲߬ ߣߌ߫ ߟߊ߬ߝߍ߬ߦߊ߬ ߛߌ߫ ߕߴߏ߬ ߟߎ߬ ߞߏߟߘߊ ߟߎ߬ ߡߊߣߐ߯ ߟߊ߫ ، ߓߊ ߏ߬ ߟߎ߫ ߟߋ߬ ( ߡߍ߲ߘߌߦߊ ) ߣߊߞߐ ߕߌ߱ ߟߎ߬ ߘߌ߫ ، ߊ߬ߟߎ߫ ߘߏ߲߬ ߘߎߡߊߕߐ߫ ߦߋ߲߬ ߠߋ߬ ﴿26﴾

ߒ߬ߓߊ߬ ߡߍ߲ ߠߎ߫ ߣߊ߬ ߖߎ߯ߡߊ߲ ߠߎ߬ ߞߍ߫ ߟߊ߫ ߛߊ߫ ߸ ߖߎ߯ߡߊ߲ ߛߊ߬ߙߊ ߟߴߊ߬ ߢߐ߲߱ ߘߌ߫ ߘߋ߬ ، ߟߊ߬ߝߍߦߊ ߞߍߕߐ߫ ߏ߬ ߟߎ߫ ߟߋ߬ ߢߡߊߣߐ߯ ߟߊ߫ ߸ ߕߊ߲߬ߞߊ߬ߓߊ߰ ߛߌ߫ ߘߏ߲߬ ߕߴߏ߬ ߟߎ߬ ߟߊ߫ ߊߟߊ߫ ߡߊ߬ ، ߊ߬ ߘߌ߫ ߞߍ߫ ߦߴߏ߬ ߟߎ߬ ߢߘߊ ߟߎ߫ ߞߎ߲߬ߠߊ߬ߓߌߘߌ߲ߣߍ߲߫ ߛߎ ߘߓߌ߬ߣߍ߲߬ߓߊ ߞߎߘߎ߲߫ ߓߟߋߓߟߋ ߟߎ߫ ߟߋ߬ ߟߊ߫ ، ߒ߬ߓߊ߬ ߏ߬ ߟߎ߫ ߟߋ߬ ߕߊ ߘߏ߲߬ߞߏ ߟߎ߬ ߘߌ߫ ߸ ߊ߬ߟߎ߬ ߘߎߡߊߕߐ߫ ߏ߬ ߟߋ ߘߐ߫ ﴿27﴾

ߊ߲ ߓߊ߯ ߊ߬ߟߎ߬ ߓߍ߯ ߟߊߘߍ߬ ߟߏ߲ ߡߍ߲ ߸ ߊ߲ ߘߴߊ߬ ߝߐ߫ ߛߏߡߊ ߟߎ߬ ߦߋ߫ ߸ ߞߏ߫ ߊߟߎ߫ ߕߏ߫ ߊߟߎ߫ ߣߐ߭ ߘߐ߫ ߸ ߊߟߎ߫ ߣߴߊߟߎ߫ ߜߙߊ߬ߢߐ߲߮ ߠߎ߫ ߞߊ߬ߣߌ߲߫ ، ߊ߲ ߘߌ߫ ߓߊ߲߫ ߞߵߊ߬ߟߎ߬ ߕߍߝߘߊ߫ ߞߵߊ߬ߟߎ߬ ߓߍ߯ ߕߏ߫ ߊ߬ߟߎ߬ ߞߏߟߊ߫ ، ߊ߬ߟߎ߫ ߜߙߊ߬ߢߐ߲߮ ߠߎ߬ ߘߴߊ߬ ߝߐ߫ ߊ߬ߟߎ߫ ߡߊ߬ ߸ ߞߏ߫ ߊߟߎ߫ ߕߎ߲߬ ߕߍ߫ ߒ߬ߠߎ߫ ߓߊ߬ߕߏ߬ ߟߊ߫ ߘߋ߬ ﴿28﴾

ߊߟߊ߫ ߘߏ߲߬ ߥߛߊ߬ ߘߊ߫ ߛߙߋ߫ ߘߌ߫ ߒ߬ߠߎ߬ ߣߴߊߟߎ߫ ߕߍ߫ ߸ ߒ ߞߏ߫ ߒ߬ߠߎ߫ ߖߊ߲߬ߓߐߣߍ߲߫ ߠߋ߬ ߊߟߎ߫ ߟߊ߫ ߓߊ߬ߕߏ ߘߐ߫ ߡߍߣߍ߲ߎ߲߫ ﴿29﴾

ߏ߬ ߦߌߟߊ ߟߋ߬ ߘߐ߫ ߸ ߣߌߡߊ ߓߍ߯ ߘߴߊ߬ ߖߊ߲߬ߓߌ߬ߟߴߊ߬ ߟߊ߫ ߓߊ߯ߙߊ߫ ߕߊ߬ߡߌ߲߬ߣߍ߲ ߠߎ߬ ߘߐ߫ ، ߊ߬ ߣߴߊ߬ߟߎ߬ ߘߌ߫ ߟߊߛߊ߬ߦߌ߫ ߊ߬ߟߎ߫ ߡߊ߰ߙߌ߬ ߓߘߍ ߊߟߊ߫ ߡߊ߬ ߸ ߞߵߊ߬ߟߎ߬ ߟߊ߫ ߡߊ߰ߙߌ߫ ߞߎ߲߬ߘߐߕߍ߰ߣߍ߲ ߓߍ߯ ߕߎߣߎ߲߫ ߊ߬ߟߎ߫ ߡߊ߬ ߖߋߎ߲߫ ﴿30﴾

ߊ߬ߟߎ߫ ߢߌ߬ߣߌ߲߬ߞߊ߬ ߸ ߞߏ߫ ߖߍߣߍ߲ ߓߊߟߏ ߘߌ߫ ߟߴߊߟߎ߫ ߡߊ߬ ߞߊ߬ ߓߐ߫ ߡߐ߲ߕߐ߲ ߘߐ߫ ߸ ߊ߬ ߣߌ߫ ߞߊ߬ ߓߐ߫ ߘߎ߱ ߘߐ߫؟ ߥߟߊ߫ ߖߍߣߍ߲ ߦߋ߫ ߕߟߏߘߋ߲ ߠߎ߬ ߣߌ߫ ߢߊߞߌߛߍ ߟߎ߫ ߡߙߊ߬ ߟߊ߫؟ ߊ߬ ߣߌ߫ ߖߍߣߍ߲ ߦߋ߫ ߣߌߡߊ ߟߊߓߐ߫ ߟߊ߫ ߛߎ߭ ߘߐ߫ ߸ ߞߊ߬ ߛߎ߭ ߟߊߓߐ߫ ߣߌߡߊ ߘߐ߫؟ ߊ߬ ߣߌ߫ ߖߍߣߍ߲ ߥߊߟߌߢߊ ߟߎ߫ ߖߊ߬ߕߋߛߌ߰ ߟߊ߫؟ ߊ߬ߟߎ߬ ߘߌߣߵߊ߬ ߝߐ߫ ߛߍ߲ ߞߏ߫ ߊߟߊ߫ ߞߍ߰ ، ߊ߬ ߝߐ߫ ߞߏ߫ ߒ߬ߓߵߊߟߎ߫ ߕߍ߫ ߊߟߎ߫ ߝߊ߲ߕߊ߲߬ߞߊ߬ ߟߊ߫ ߓߊ߬؟ ﴿31﴾

ߒ߬ߓߵߊߟߊ߫ ߏ߬ ߟߋ ߊߟߎ߫ ߡߊ߰ߙߌ߬ ߓߘߍ ߘߌ߫ ߸ ߡߋ߬ߘߋ ߜߘߍ߫ ߘߏ߲߬ ߦߋ߫ ߕߎ߬ߢߊ ߞߐ߫ ߣߌ߫ ߝߌ߬ߟߌ ߕߍ߫؟ ߊߟߎ߫ ߦߴߊߟߎ߫ ߡߎ߬ߙߎ߲߬ߘߎ߬ ߟߴߏ߬ ߘߐ߫ ߘߌ߬ ߛߊ߫؟ ﴿32﴾

ߒ߬ߓߊ߬ ߌ ߡߊ߰ߙߌ ߟߊ߫ ( ߞߐ߲߬ߞߐ߲߬ߒ߬ߡߊ߬ ) ߞߊ߲ ߜߋ߲ߜߋ߲ߦߊߣߍ߲߫ ߔߊߟߊ߲ߞߊߓߊ߯ߕߐ ߟߎ߫ ߡߊ߬ ߕߋ߲߬ ߠߋ߬ ߸ ߞߵߊ߬ߟߎ߫ ߘߍ߲߬ߞߣߍ߬ߦߊ߬ߓߊߟߌ ߕߏ߫ ﴿33﴾

ߊ߬ߟߎ߫ ߢߌ߬ߣߌ߲߬ߞߊ߬ ߸ ߞߏ߫ ߦߊ߯ߟߊ߫ ߘߏ߫ ߟߋ߬ ߊߟߎ߫ ߜߙߊ߬ߢߐ߲߮ ߠߎ߬ ߘߐ߫ ߓߊ߬ ߸ ߡߍ߲ ߦߋ߫ ߘߊ߲ߠߌ߲ ߠߊߝߟߐ߫ ߟߊ߫ ߞߊ߬ ߓߊ߲߫ ߞߵߊ߬ ߡߊߛߊ߬ߦߌ߲߬ ߞߎߘߊ߫ ߘߌ߫؟ ߊ߬ ߝߐ߫ ߞߏ߫ ߊߟߊ߫ ߟߋ߬ ߘߊ߲ߠߌ߲ ߠߊߝߟߐ߫ ߟߊ߫ ߸ ߞߊ߬ ߓߊ߲߫ ߞߵߊ߬ ߡߊߛߊ߬ߦߌ߲߬ ߞߎߘߊ߫ ߘߌ߫ ، ߒ߬ߓߊ߬ ߡߋ߬ߘߋ ߊߟߎ߫ ߞߎ߲߭ ߓߐ߫ ߟߴߏ߬ ߞߊ߲߬ ߓߏ߲߰؟ ﴿34﴾

ߊ߬ߟߎ߫ ߢߌ߬ߣߌ߲߬ߞߊ߬ ߕߎ߲߯ ߸ ߞߏ߫ ߦߊ߯ߟߊ߫ ߘߏ߫ ߟߵߊߟߎ߫ ߜߙߊ߬ߢߐ߲߮ ߠߎ߬ ߘߐ߫ ߓߊ߬ ߸ ߡߍ߲ ߦߋ߫ ߞߊ߲ߘߊߟߌ ߞߍ߫ ߟߊ߫ ߕߎ߬ߢߊ ߡߊ߬؟ ߊ߬ ߝߐ߫ ߞߏ߫ ߊߟߊ߫ ߟߋ߬ ߞߊ߲ߘߊߟߌ ߞߍ߫ ߟߊ߫ ߕߎ߬ߢߊ ߡߊ߬. ߐ߲߬ߤߐ߲߫ ߸ ߡߍ߲ ߦߋ߫ ߞߊ߲ߘߊߟߌ ߞߍ߫ ߟߊ߫ ߕߎ߬ߢߊ ߡߊ߬ ߸ ߊ߬ ߖߊߙߋߣߍ߲߫ ߞߵߏ߬ ߟߋ ߟߊߓߊ߬ߕߏ߫ ߓߊ߬ ߸ ߥߟߊ߫ ߡߍ߲ ߕߍ߫ ߞߊ߲ߘߊߟߌ߫ ߞߍ߫ ߟߊ߫ ߸ ߝߏ߫ ߞߵߊ߬ߟߋ߬ ߞߊ߲ߘߊ߫؟ ߒ߬ߓߊ߬ ߡߋ߬ߘߋ ߊߟߎ߫ ߟߊ߫ ߸ ߊߟߎ߫ ߦߋ߫ ߞߕߌ ߟߊ߫ ߟߊ߫ ߘߌ߫ ߓߏ߲߰؟ ﴿35﴾

ߊ߬ߟߎ߫ ߝߊ߲߬ߓߊ ߘߏ߲߬ ߕߍ߫ ߝߏߦߌ߬ ߟߊߓߊ߬ߕߏ߬ ߟߊ߫ ߖߌ߰ߟߌ ߞߐ߫ ، ߖߌ߰ߟߌ ߘߏ߲߬ ߕߍ߫ ߟߊ߬ߞߊ߰ߙߌ߬ߟߌ ߞߍ߫ ߟߊ߫ ߕߎ߬ߢߊ ߡߊ߬ ߝߏߦߌ߬ ߟߊ߫ ، ߖߊ߯ߕߋ߬ ߸ ߊߟߊ߫ ߞߵߊ߬ ߟߐ߲߫ ߊ߬ߟߎ߬ ߦߋ߫ ߡߍ߲ ߞߍ߫ ߟߊ߫ ﴿36﴾

ߞߎ߬ߙߊ߬ߣߊ ߣߌ߲߬ ߕߴߛߋ߫ ߞߎ߲߬ߘߐߕߍ߰ ߟߊ߫ ߝߋߎ߫ ߣߌ߫ ߊߟߊ߫ ߕߍ߫ ، ߓߊ߬ߙߌ߬ ߊ߬ ߢߍ߫ ߟߍߙߊ ߟߊߛߙߋߦߊߟߊ߲ ߠߋ߬ ، ߊ߬ ߣߌ߫ ߟߍߙߊ ߏ߬ ߕߐ߬ߝߍ߬ߦߊ߬ ߞߊ߲ ߠߋ߬ ، ߛߌߞߊ߫ ߛߌ߫ ߕߴߊ߬ ߘߐ߫ ، ߊ߬ ߝߘߊߣߍ߲߫ ߖߊ߯ߓߊ ߟߎ߫ ߡߊ߰ߙߌ ߟߋ߬ ߟߊ߫ ﴿37﴾

ߊ߬ߟߎ߬ ߞߊ߲߫ ߠߋ߫ ߓߊ߬ ߞߏ߫ ߊ߬ ߣߊ߬ ‹ ߞߎ߬ߙߊ߬ߣߊ › ߓߐ߫ ߟߴߊ߬ ߞߎ߲߬ߘߐ߫ ߟߋ߬؟ ߊ߬ ߝߐ߫ ߞߏ߫ ߒ߬ߓߵߊߟߎ߫ ߣߵߊ߬ ߢߐ߲߰ ߝߐߘߊ߫ ߞߋߟߋ߲߫ ߘߌ߫ ߥߍ߫ ، ߊ߬ ߣߴߊߟߎ߫ ߘߌ߫ ߡߍ߲-ߍ-ߡߍ߲߫ ߠߊߣߐ߬ ߊߟߎ߯ ߏ߬ ߓߍ߯ ߞߟߌ߫ ߏ߬ ߘߐ߫ ߡߍ߲ ߕߍ߫ ߊߟߊ߫ ߘߌ߫ ߸ ߣߴߊߟߎ߫ ߞߍ߫ ߘߊ߫ ߕߎ߬ߢߊ߬ ߕߌ߯ ߟߎ߫ ߘߌ߫ ﴿38﴾

ߋ߬ߋ߬ߋ߯ ߡߍ߲ ߦߋ߫ ߸ ߊ߬ߟߎ߫ ߣߊ߬ ߞߏ߫ ߟߋ߬ ߡߊߛߐ߬ߛߐ߬ ߟߊ߫ ߣߌ߲߬ ߸ ߊ߬ߟߎ߬ ߡߊ߫ ߡߍ߲ ߟߐ߲ߠߌ߲߫ ߠߊߝߏ߬ ، ߊ߬ ߘߏ߲߬ ߞߘߐߡߊߖߊ߲ ߡߊ߫ ߣߵߊ߬ߟߎ߫ ߡߊ߬ ߡߎߣߎ߲߬ ، ߊ߬ߟߎ߬ ߢߍߓߊ߮ ߟߎ߫ ߘߏ߲߬ ߞߊ߬ ߡߊ߬ߛߐ߬ߛߐ߬ߟߌ ߞߍ߫ ߕߋ߲߬ ߠߋ߬ ߞߘߐ߬ߡߊ߲߫ ، ߊ߬ ߝߟߍ߫ ߓߊ߫ ߕߐ߬ߢߍ߰ߒߕߋ ߟߎ߬ ߟߊߓߊ߲ ߞߍ߫ ߘߊ߫ ߢߊ ߡߍ߲ ﴿39﴾

ߘߏ߫ ߦߴߊ߬ߟߎ߬ ߘߐ߫ ߸ ߏ߬ ߘߍ߲߬ߞߣߍ߬ߦߊ߬ߣߍ߲߫ ‹ ߞߎ߬ߙߊ߬ߣߊ › ߡߊ߬ ، ߘߏ߫ ߜߘߍ߫ ߦߴߊ߬ߟߎ߬ ߘߐ߫ ߸ ߏ߬ ߘߍ߲߬ߞߣߍ߬ߦߊ߬ߣߍ߲߬ ߕߍ߫ ߊ߬ ߡߊ߬ ، ߌ ߡߊ߰ߙߌ ߟߋ߫ ߘߏ߲߬ ߞߊ߬ ߕߌߢߍߟߌߟߊ ߟߎ߬ ߟߐ߲߫ ﴿40﴾

ߣߴߊ߬ߟߎ߫ ߞߵߌ ߛߐ߬ߛߐ߬ ߸ ߌ ߦߴߊ߬ ߝߐ߫ ߞߏ߫ ߒߠߋ ߟߊ߫ ߓߊ߯ߙߊ ߒ ߖߍ߬ߘߍ߫ ߟߋ߬ ߦߋ߫ ߸ ߊߟߎ߫ ߝߣߊ߫ ߟߊ߫ ߓߊ߯ߙߊ ߦߴߊߟߎ߫ ߖߍ߬ߘߍ߫ ߟߋ߬ ߦߋ߫ ، ߊߟߎ ߣߍ߰ߓߐߣߍ߲߫ ߠߋ߬ ߒߠߋ ߟߊ߫ ߓߊ߯ߙߊ ߘߐ߫ ߸ ߒߠߋ ߝߣߊ߫ ߣߍ߰ߓߐߣߍ߲߫ ߠߋ߬ ߊߟߎ߫ ߟߊ߫ ߓߊ߯ߙߊ ߘߐ߫ ﴿41﴾

ߊ߬ߟߎ߬ ߘߏ߫ ߟߎ߫ ߓߍ߫ ߸ ߏ߬ ߟߎ߬ ߦߴߊ߬ߟߎ߬ ߕߟߏߡߊߟߐ߬ ߟߴߌ ߟߊ߫ ، ߓߊ߬ߙߌ߬ ߌߟߋ ߘߌ߫ ߛߋ߫ ߕߟߏߜߋߘߋ߲ ߠߎ߫ ߟߐ߬ ߟߊ߫ ߡߍ߲ߠߌ߲ ߠߊ߫ ߸ ߤߊߟߌ߬ ߤߊ߲ߞߟߌ߫ ߕߍ߫ ߊ߬ߟߎ߬ ߟߊ߫؟ ﴿42﴾

ߊ߬ߟߎ߬ ߘߏ߫ ߟߎ߫ ߝߣߊ߫ ߓߍ߫ ߸ ߏ߬ ߟߎ߬ ߦߴߌ ߡߊߝߟߍ߫ ߟߊ߫ ، ߞߏ߬ߣߌ߲߬ ߌߟߋ ߘߌ߫ ߛߋ߫ ߝߎߦߋ߲ ߠߎ߬ ߞߊ߲ߘߊ߫ ߟߊ߫ ߸ ߤߟߴߊ߬ߟߎ߬ ߕߍ߫ ߦߋߟߌ߫ ߞߍ߫ ߟߊ߫؟ ﴿43﴾

ߒ߬ߓߵߊߟߊ߫ ߕߍ߫ ߡߐ߱ ߟߎ߫ ߕߐ߬ߢߍ߰ ߟߊ߫ ߝߏߦߌ߬ ߟߊ߫ ߘߋ߬ ߸ ߞߏ߬ߣߌ߲߬ ߡߐ߱ ߟߎ߫ ߟߴߊ߬ߟߎ߫ ߖߍ߬ߘߍ߫ ߕߐ߬ߢߍ߰ ߟߊ߫ ﴿44﴾

‹ ߊߟߊ߫ › ߞߍߕߐ߫ ߊ߬ߟߎ߬ ߟߊߘߍ߬ ߟߊ߫ ߟߏ߲ ߡߍ߲ ߸ ߊ߬ ߘߌ߫ ߞߍ߫ ߦߏ߫ ߊ߬ߟߎ߬ ߡߊ߫ ߥߛߎ߬ ߛߌ߫ ߞߍ߫ ( ߘߎ߱ ߞߊ߲߬ ) ߝߏ߫ ߕߟߋ߬ߘߐ߬ߟߊ ߕߎ߬ߡߊ߬ߙߋ߲߬ ߞߋߟߋ߲߫ ߸ ߊ߬ߟߎ߬ ߘߌ߫ ߢߐ߲߮ ߟߐ߲߫ ߡߍ߲ ߞߘߐ߫ ، ߡߍ߲ ߠߎ߬ ߦߋ߫ ߊߟߊ߫ ߓߍ߲߬ߢߐ߲߰ߦߊ ߡߊߛߐ߬ߛߐ߬ ߟߊ߫ ߸ ߏ߬ ߟߎ߬ ߓߘߊ߫ ߓߣߐ߬ ، ߓߊ ߊ߬ߟߎ߬ ߡߊ߫ ߞߍ߫ ߞߊ߲ߘߊߓߊ߯ ߟߎ߫ ߘߌ߫ ﴿45﴾

ߊ߲ ߣߊ߬ ߒ߬ ߞߐ߲߬ߞߐ߲߬ ߠߴߊ߬ߟߎ߫ ߡߊ߬ ߞߏ ߡߍ߲ ߘߐ߫ ߸ ߊ߲ ߞߵߏ ߦߘߵߌ ߟߊ߫ ߓߊ߬ ߸ ߥߟߴߊ߲ ߞߵߌ ߛߏߡߊߦߟߍߡߊ߲߫ ߓߊ߬ ߸ ߊ߬ߟߎ߫ ߛߊ߬ߦߌ߬ߕߐ߫ ߒ߬ߠߎ߫ ߟߋ߫ ߡߊ߬ ، ߊߟߊ߫ ߘߏ߲߬ ߦߴߊ߬ߟߎ߬ ߗߋߥߊߟߌ ߟߎ߬ ߛߙߋ ߟߋ߬ ߘߌ߫ ﴿46﴾

ߡߊ߲߬ߕߏ߲ ߓߍ߯ ߣߴߊ߬ ߕߊ߫ ߞߋߟߊ߫ ߟߋ߬ ( ߟߐ߬ߓߊ ߓߏ߲ ) ، ߡߍ߲ ߠߎ߬ ߟߊ߫ ߞߋߟߊ ߓߊ߯ ߣߊ߬ ߸ ߞߕߌ ߘߌ߫ ߕߍ߰ ߏ߬ ߟߎ߬ ߕߍ߫ ߕߋߟߋ߲ ߠߊ߫ ߸ ߊ߬ߟߎ߫ ߘߏ߲߬ ߛߌ߫ ߕߍ߫ ߕߐ߬ߢߍ߰ ߟߊ߫ ﴿47﴾

ߊ߬ߟߎ߬ ߦߴߊ߬ ߝߐ߫ ߟߊ߫ ߛߐ߲߬ ߸ ߞߏ߫ ߊ߬ߟߋ߬ ߛߘߊߒߡߊߕߎߡߊ ߣߌ߲߬ ߦߋ߫ ߥߊ߯ߕߌ ߖߐ߲߫ ߘߌ߫ ߓߏ߲߰ ߸ ߣߴߊߟߎ߫ ߦߋ߫ ߕߎ߬ߢߊ߬ ߕߌ߯ ߟߎ߫ ߘߌ߫؟ ﴿48﴾

ߊ߬ߟߎ߫ ߖߋ߬ߓߌ߬ ߸ ߞߏ߫ ߒߠߋ ߕߍ߫ ߝߏߦߌ߫ ߡߙߊ߬ ߟߊ߫ ߒ ߖߘߍ߬ ߦߋ߫ ߕߙߐ߫ ߘߐ߫ ߊ߬ ߣߌ߫ ߣߝߊ߫ ߘߐ߫ ߸ ߝߏ߫ ߡߍ߲ ߓߊ߯ ߊߟߊ߫ ߘߌߦߊ߫ ، ߛߕߊ߫ ߟߋ߬ ߘߏ߲߬ ߦߋ߫ ߡߊ߲߬ߕߏ߲ ߓߍ߯ ߟߊ߫ ، ߡߍ߲ ߠߎ߬ ߛߕߊ ߓߊ߯ ߛߋ߫ ߸ ߏ߬ ߟߎ߬ ߕߍ߫ ߘߏ߲߰ߘߌ߫ ߕߎ߬ߡߊ߬ߙߋ߲߬ ߞߋߟߋ߲߫ ߠߊ߫ ߸ ߊ߬ߟߎ߫ ߘߏ߲߬ ߕߍ߫ ߞߐ߲߰ ( ߕߎ߬ߡߊ߬ߙߋ߲߬ ߞߋߟߋ߲߫ ߠߊ߫) ﴿49﴾

ߊ߬ߟߎ߫ ߢߌ߬ߣߌ߲߬ߞߊ߬ ߞߏ߫ ߊߟߎ߯ ߊ߬ ߝߟߍ߫ ߓߊ߫ ߸ ߣߌ߫ ߊߟߊ߫ ߟߊ߫ ߖߊ߲߰ߞߕߊ ߣߊ߬ ߘߴߊߟߎ߫ ߡߊ߬ ߛߎ ߘߐ߫ ߥߟߊ߫ ߕߋ߬ߟߋ ߘߐ߫ ( ߊ߬ߟߎ߬ ߦߴߏ߬ ߞߍ߫ ߟߊ߫ ߘߌ߬؟) ، ߡߋ߬ߘߋ ߘߏ߲߬ ߦߋ߫ ߛߐ߲߬ߡߊ ߟߎ߫ ߜߍ߬ߘߍ߲߬ ߠߴߊ߬ߟߋ߬ ߣߌ߲߬ ߠߊ߫ ߓߏ߲߰؟ ﴿50﴾

ߐ߲߬ߤߐ߲߫ ߸ ߊ߬ ߓߊ߯ ߞߍ߫ ߕߎ߬ߡߊ ߡߍ߲ ߊߟߎ߫ ߟߊߕߐ߫ ߊ߬ ߟߊ߫ ߏ߬ ߟߋ ߘߐ߫ ߓߊ߬؟ ߋ߫ ߞߋߟߋ߲߬؟ ߸ ߞߵߊ߬ ߕߘߍ߬ ߜߎ ߊߟߎ߫ ߕߘߍ߬ ߞߌߢߍ߫ ߟߴߊ߬ ߟߊ߫ ߞߘߐ߬ߡߊ߲߫ ﴿51﴾

ߏ߬ ߟߋ ߞߐ߫ ߸ ߊ߬ ߘߌ߫ ߝߐ߫ ߕߐ߬ߢߍ߰ߒߕߋ ߟߎ߬ ߦߋ߫ ߸ ߞߏ߫ ߊߟߎ߫ ߦߋ߫ ߘߎߡߊ ߖߊ߲߰ߞߕߊ ߡߊߜߏ߬ߙߏ߫ ߟߋ߬ ߕߘߋ߫ ، ߊߟߎ߫ ߘߏ߲߬ ߕߍ߫ ߛߙߊ߬ ߟߊ߫ ߝߏߦߌ߬ ߟߊ߫ ߝߏ߫ ߊߟߎ߫ ߕߘߍ߬ ߡߍ߲ ߞߍ߫ ߟߊ߫ ﴿52﴾

ߊ߬ߟߎ߬ ߦߴߌ ߘߐߢߌ߬ߣߌ߲߬ߞߊ߬ ߟߊ߫ ߸ ߞߏ߫ ߦߊ߯ߟߊ߫ ߕߎ߬ߢߊ߫ ߟߋ߬ ( ߛߙߊ߬ߟߌ ߘߌ߫ ) ߓߊ߬؟ ߊ߬ߟߎ߫ ߖߋ߬ߓߌ߬ ߞߏ߫ ߤߊ߯ߟߌ߫ ߸ ߊ߰ ߒ ߣߌ߫ ߒ ߡߊ߰ߙߌ ߕߍ߫ ߸ ߕߎ߬ߢߊ ߖߊ߯ߕߋ ߟߋ߬ ߛߎߋ߯ ، ߊߟߎ ߘߏ߲߬ ߕߴߛߋ߫ ߓߟߏߡߓߊߟߌ߫ ߞߍ߫ ߟߊ߫ ﴿53﴾

ߣߌߡߊ ߞߋ߬ߟߋ߲߬ߞߋ߬ߟߋ߲߬ߣߊ ߡߍ߲ ߞߊ߬ ߕߐ߬ߢߍ߮ ߞߍ߫ ߸ ߤߊߟߌ߫ ߘߎ߰ߞߟߏ ߞߣߐ߫ ߝߋ߲ ߠߎ߬ ߞߍ߫ ߘߴߏ߬ ߕߊ ߘߌ߫ ߸ ߊ߬ ߘߴߏ߬ ߞߴߊ߬ ߞߎ߲߬ߡߊ߬ߞߊ ߘߌ߫ ߞߐߚߐ߫ ، ߊ߬ߟߎ߫ ߘߏ߲߬ ߢߊ ߓߊ߯ ߟߊ߫ ߖߊ߲߰ߞߕߊ ߞߊ߲߬ ߸ ߊ߬ߟߎ߬ ߘߴߊ߬ߟߎ߬ ߟߊ߫ ߣߡߌߛߊ ߘߏ߲߰ ߗߙߎ߫ ، ߘߊ߬ߡߊ߲߬ߛߊ߫ ߞߕߌ ߘߌ߫ ߕߍ߰ ߊ߬ߟߎ߬ ߕߍ߫ ߕߋߟߋ߲ ߠߊ߫ ߸ ߊ߬ߟߎ߫ ߘߏ߲߬ ߕߍ߫ ߕߐ߬ߢߍ߰ ߟߊ߫ ﴿54﴾

ߐ߲߬ߤߐ߲߫ ߸ ߞߏ߬ߞߏ߫ ߊߟߊ߫ ߕߊ ߟߋ߬ ߛߊ߲ ߠߎ߬ ߣߌ߫ ߘߎ߱ ߞߣߐ߫ ߝߋ߲ ߘߌ߫ ߞߍ߬؟ ߐ߲߬ߤߐ߲߫ ߸ ߞߏ߬ߞߏ߫ ߊߟߊ߫ ߟߊ߫ ߦߟߌߡߊߘߌߦߊ߫ ( ߟߐ߯ߟߊߣߍ߲) ߦߋ߫ ߕߎ߬ߢߊ߫ ߟߋ߬ ߘߌ߫ ߞߍ߬؟ ߒ߬ߞߵߊ߬ߟߎ߫ ߝߊ߲߬ߓߊ ߟߋ߬ ߡߊ߫ ߝߏߦߌ߬ ߟߐ߲߫ ﴿55﴾

‹ ߊߟߊ߫ › ߟߋ߫ ߟߊ߬ߢߣߊ߬ߡߦߊ߬ߟߌ ߞߍ߫ ߟߊ߫ ߸ ߊ߬ߟߋ ߟߋ߫ ߛߊ߬ߦߊ ߝߣߊ߫ ߞߍ߫ ߟߊ߫ ، ߊߟߎ߫ ߘߏ߲߬ ߠߊߛߊ߬ߦߌ߬ߕߐ߫ ߊ߬ߟߋ ߟߋ߫ ߡߊ߬ ﴿56﴾

ߤߍ߲߬ ߊߟߎ߬ ߡߐ߱ ߟߎ߬ ߸ ߞߊ߬ߥߊ߲߬ߘߌ ߓߘߊ߫ ߣߵߊߟߎ߫ ߡߊ߬ ߞߊ߬ ߝߘߴߊߟߎ߫ ߡߊ߰ߙߌ ߟߊ߫ ߸ ߊ߬ ߣߌ߫ ߛߌߛߌ ߟߎ߬ ߘߐ߫ ߞߏ ߓߊߛߌ ߣߌ߫ ߞߊ߲ߘߦߊ ߣߌ߫ ߤߌߣߊ ߸ ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߋ߫ ﴿57﴾

ߊ߬ ߟߊߛߋ߫ ߞߴߏ߬ ߟߎ߬ ߦߋ߫ ߊߟߊ߫ ߟߊ߫ ߢߊ߬ߒߡߊ߭ ߣߴߊ߬ ߟߊ߫ ߤߌߣߊ ߟߋ߬ ߘߌ߫ ، ߒ߬ߓߵߊ߬ߟߎ߬ ߦߋ߫ ߛߍߥߊ߫ ߏ߬ ߟߎ߬ ߟߊ߫ ߘߋ߬ ߸ ߓߊ ߏ߬ ߟߎ߬ ߞߊ߫ ߝߌ߬ߛߴߊ߬ߟߎ߬ ߟߊ߫ ߝߋ߲߫ ߠߊߘߍ߬ߕߊ ߓߍ߯ ߘߌ߫ ﴿58﴾

ߊ߬ ߝߐ߫ ߞߏ߫ ߐ߲߬ߤߐ߲߫ ߸ ߊߟߊ߫ ߞߊ߬ ߝߋ߲ ߡߍ߲ ߠߎ߬ ߟߊߖߌ߰ ߊߟߎ߫ ߡߊ߬ ߤߊ߬ߙߌ߬ߖߍ߮ ߘߌ߫ ߸ ߊߟߎ ߘߏ߲߬ ߞߵߏ߬ ߘߏ߫ ߞߍ߫ ߕߊ߬ߣߊ ߘߌ߫ ߞߊ߬ ߘߏ߫ ߞߍ߫ ߘߤߊ߬ߣߍ߲ ߘߌ߫؟ ߊ߬ߟߎ߫ ߢߌ߬ߣߌ߲߬ߞߊ߬ ߞߏ߫ ߦߊ߯ߟߊ߫ ߊߟߊ߫ ߟߋ߬ ߘߌ߬ߢߍ߬ߣߴߏ߬ ߡߵߊߟߎ߫ ߦߋ߫ ߓߊ߬ ߸ ߥߟߴߊߟߎ߫ ߦߋ߫ ߥߎߦߊ ߟߋ߬ ߟߊ ߞߊ߲߬ ߊߟߊ߫ ߟߊ߫؟ ﴿59﴾

ߡߍ߲ ߠߎ߬ ߦߋ߫ ߥߎߦߊ ߟߊ߫ ߟߴߊߟߊ߫ ߟߊ߫ ߸ ߏ߬ ߟߎ߬ ߟߊ߫ ߖߌ߰ߟߌ ߣߊ߬ߕߐ߫ ߞߍ߫ ߟߊ߫ ߘߌ߬ ߟߐ߬ߓߊ ߟߏ߲؟ ߖߊ߯ߕߋ߬ ߸ ߊߟߊ߫ ߦߋ߫ ߢߊ߬ߒߡߊ߭ ߕߌ߱ ߟߋ߬ ߘߌ߫ ߡߐ߱ ߟߎ߬ ߦߋ߫ ، ߓߊ߬ߙߌ߬ ߊ߬ߟߎ߫ ߝߊ߲߬ߓߊ ߟߋ߬ ߕߍ߫ ߞߏߢߌߡߊߟߐ߲߫ ߞߍ߫ ߟߊ߫ ﴿60﴾

ߌߟߋ ߕߍ߫ ߞߍ߫ ߥߊߟߌߢߊ߫ ߛߌ߫ ߘߐ߫ ߸ ߌ ߕߍ߫ ߞߊ߬ߙߊ߲߬ ߛߌ߫ ߞߍ߫ ߞߎ߬ߙߊ߬ߣߊ ߞߣߐ߫ ߸ ߊߟߎ߫ ߘߏ߲߬ ߕߍ߫ ߓߊ߯ߙߊ߫ ߛߌ߫ ߞߍ߫ ߸ ߝߏ߫ ߒ߬ߠߎ߬ ߦߋ߫ ߞߍ߫ ߛߙߋ ߟߎ߬ ߘߌ߫ ߊߟߎ߫ ߡߵߊߟߎ߫ ߝߘߌ߫ ߕߎߡߊ ߟߊ߫ ߏ߬ ߘߐ߫ ، ߝߕߌ߫ ߖߌߘߊ߲߫ ߢߐ߲߰ߣߍ߲߫ ߠߋ߬ ߜߎ ߕߍ߫ ߘߏ߲߰ ߠߴߌ ߡߊ߰ߙߌ ߡߊ߬ ߘߎ߱ ߣߌ߫ ߛߊ߲ ߛߌ߫ ߞߣߐ߫ ، ߝߋ߲߫ ߕߍ߫ ߡߍ߲ ߞߊ߫ ߘߐ߯ ߏ߬ ߘߌ߫ ، ߝߋ߲߫ ߝߣߊ߫ ߕߍ߫ ߡߍ߲ ߞߊ߫ ߓߏ߲߬ ߏ߬ ߘߌ߫ ߸ ߝߴߏ߬ ߓߍ߯ ߦߋ߫ ߞߍ߫ ߟߍߙߊ߫ ߘߐߜߍ ߘߐ߫ ﴿61﴾

ߞߏ߬ߞߏ߫ ߊߟߊ߫ ߢߌ߲߭ ߠߎ߬ ߸ ߛߌߟߊ߲߫ ߣߌ߫ ߖߘߐ߬ ߛߌ߫ ߕߍߣߊ߬ ߞߍ߫ ߟߴߏ߬ ߟߎ߫ ߟߋ߬ ߟߊ߫ ߞߍ߬؟ ﴿62﴾

ߏ߬ ߟߎ߫ ߟߋ߫ ߘߍ߲߬ߞߣߍ߬ߦߊ߬ߣߍ߲߫ ߸ ߊ߬ߟߎ߫ ߘߏ߲߬ ߦߴߊ߬ߟߎ߬ ߝߊ߲ߕߊ߲߬ߞߊ߬ ߟߊ߫ ﴿63﴾

ߘߟߊߝߎߟߌ ߟߴߏ߬ ߟߎ߬ ߦߋ߫ ߘߎߢߊ߫ ߢߣߊߡߦߊ ߘߐ߫ ߸ ߊ߬ ߣߌ߫ ߟߊߞߌߙߊ߫ ߝߣߊ߫ ߘߐ߫ ، ߝߊ߬ߟߋ߲߬ ߢߊ߫ ߘߏ߲߬ ߕߍ߫ ߊߟߊ߫ ߟߊ߫ ߞߎߡߊ ߟߎ߬ ߟߊ߫ ߸ ߒ߬ߓߊ߬ ߏ߬ ߟߋ ߦߋ߫ ߣߌ߭ ߘߐ߫ ߓߟߋ߬ߓߟߋ ߘߌ߫ ߛߊ߫ ﴿64﴾

ߊ߬ߟߎ߬ ߟߊ߫ ߞߎߡߊ ߞߊߣߵߌ ߟߊߛߎ߬ߣߎ߲߫ ߘߋ߬ ، ߖߊ߯ߕߋ߬ ߸ ߜߟߌߦߊ ߓߍ߯ ߟߊߘߍ߬ߣߍ߲ ߦߋ߫ ߊߟߊ߫ ߟߋ߬ ߦߋ߫ ، ߏ߬ ߟߋ ߘߏ߲߬ ߦߋ߫ ߡߍ߲ߠߌ߲ߠߊ ߘߌ߫ ߸ ߊ߬ߟߋ ߟߋ߬ ߟߐ߲ߠߌ߲ߠߊ ߘߌ߫ ﴿65﴾

ߞߏ߬ߞߏ߫ ߊߟߊ߫ ߕߊ ߟߋ߬ ߛߊ߲ ߠߎ߬ ߣߌ߫ ߘߎ߱ ߣߌߡߊ ( ߓߍ߯ ) ߘߌ߫ ߞߍ߬؟ ߡߍ߲ ߠߎ߬ ߦߋ߫ ߜߙߊ߬ߢߐ߲߮ ߘߏ߫ ߟߎ߫ ߞߟߌ߫ ߟߊ߫ ߞߵߊߟߊ߫ ߕߏ߫ ߸ ߏ߬ ߟߎ߬ ߦߋ߫ ߡߋ߬ߘߋ ߟߊߓߊ߬ߕߏ߬ ߟߊ߫؟ ߏ߬ ߟߎ߬ ߕߍ߫ ߝߏߦߌ߬ ߟߊߓߊ߬ߕߏ߬ ߟߊ߫ ߖߌ߰ߟߌ ߞߐ߫ ، ߊ߬ߟߎ߫ ߘߏ߲߬ ߕߍ߫ ߝߏߦߌ߫ ߞߊ߲߬ ߞߎ߲߬ߘߐ߬ߕߍ߮ ߞߐ߫ ﴿66﴾

‹ ߊߟߊ߫ › ߟߋ߫ ߞߊ߬ ߛߎ ߞߍ߫ ߊߟߎ߫ ߦߋ߫ ߸ ߛߴߊߟߎ߫ ߘߴߊߟߎ߫ ߡߝߊ߫ ߏ߬ ߘߐ߫ ߸ ߞߊ߬ ߕߟߋ߬ߘߐ߬ߟߊ ߞߍ߫ ߦߋߟߌ߫ ߕߎߡߊ ߘߌ߫ ، ߖߊ߯ߕߋ߬ ߸ ߕߊ߰ߛߌ߬ ߞߏ߫ ߟߎ߫ ߟߴߏ߬ ߘߐ߫ ߡߌ߬ߙߌ߲߬ߘߌ߬ ߕߟߏߡߊߣߐ߲߮ ߠߎ߬ ߦߋ߫ ߘߋ߬ ﴿67﴾

ߊ߬ߟߎ߬ ߞߊ߲߫ ߠߋ߬ ߞߏ߫ ߊߟߊ߫ ߓߘߴߊ߬ ߓߟߏߞߍ߫ ߘߋ߲߫ ߠߊ߫ ߸ ߊ߬ ߘߏ߲߬ ߛߊߣߌ߲ߡߊ߲߫ ߏ ߡߊ߬ ، ߊ߬ߟߋ ߟߋ߫ ߓߊ߬ߣߊ ߘߌ߫ ߸ ߓߊ ߊ߬ ߕߊ ߟߋ߬ ߝߋ߲ ߘߌ߫ ߡߍ߲ ߦߋ߫ ߛߊ߲ ߠߎ߬ ߞߣߐ߫ ߊ߬ ߣߌ߫ ߡߍ߲ ߦߋ߫ ߘߎ߱ ߞߊ߲߬ ߸ ߘߊ߬ߟߎ߬ ߛߌ߫ ߕߍ߫ ߊߟߎ߫ ߓߟߏ߫ ( ߊߟߊ߫ ߘߋ߲߫ ߞߏ) ߢߌ߲߬ ߠߊ߫ ، ߌ߬ߦߏ߯ ߊߟߎ߫ ߘߌ߫ ߝߋ߲߫ ߝߐ߫ ߊߟߊ߫ ߡߵߊߟߎ߫ ߡߊ߫ ߡߍ߲ ߟߐ߲߫؟ ﴿68﴾

ߊ߬ ߟߊߛߋ߫ ߞߏ߫ ߡߍ߲ ߠߎ߬ ߦߋ߫ ߥߎߦߊ ߞߎ߲߬ߘߐߕߍ߰ ߟߊ߫ ߞߵߊ߬ ߟߴߊߟߊ߫ ߟߊ߫ ߸ ߏ߬ ߟߎ߬ ߕߍߣߊ߬ ߛߎߘߊ߲߫ ߠߊ߫ ߡߎ߰ߡߍ߫ ﴿69﴾

ߏ߬ ߟߎ߬ ߟߊ߫ ߘߊ߰ߡߎ߲ ߦߋ߫ ߘߎߢߊ߫ ߟߋ߬ ߘߐ߫ ، ߏ߬ ߟߋ ߞߐ߫ ߛߊ߫ ߸ ߊ߬ߟߎ߬ ߘߌ߫ ߛߊ߬ߦߌ߫ ߒ߬ߠߎ߫ ߡߊ߬ ، ߊ߲ ߘߏ߲߬ ߘߌ߫ ߓߊ߲߫ ߞߵߊ߬ߟߎ߬ ߡߊߜߏ߬ߙߏ߫ ߖߊ߲߰ߞߕߊ߬ ߜߍߟߍ߲ ߠߊ߫ ߸ ߞߊ߬ߡߊߛߐ߬ߘߐ߲߫ ߊ߬ߟߎ߬ ߟߊ߫ ߓߊ߲߬ߓߊ߰ߦߊ ߝߍ߬ ﴿70﴾

ߌ ߦߋ߫ ߣߎߤߎ߲߫ ߖߊ߲߬ߖߏ߲ ߘߐߞߊ߬ߙߊ߲߫ ߊ߬ߟߎ߬ ߦߋ߫ ߸ ߕߎ߬ߡߊ ߡߍ߲ ߊ߬ ߞߵߊ߬ ߝߐ߫ ߊ߬ ߡߌ߬ߙߌ߲߬ߘߌ ߡߊ߬ ߸ ߞߏ߫ ߒ ߓߊߘߋ߲ ߠߎ߬ ߸ ߒߠߋ ߡߍ߲ ߡߍ߲ ߞߍߣߴߊߟߎ߫ ߕߍߡߊ߬ ߸ ߊ߬ ߣߌ߫ ߒ ߧߋ߫ ߞߊ߬ߥߊ߲߬ߘߌ߬ߟߌ ߡߍ߲ ߞߍ߫ ߟߴߊߟߊ߫ ߟߊ߫ ߟߝߊߙߌ ߟߎ߬ ߟߊ߫ ߸ ߣߴߏ߬ ߟߎ߫ ߜߟߍ߬ߦߊ߬ ߘߴߊߟߎ߫ ߡߊ߬ ߸ ߒ߬ߓߊ߬ ߒߠߋ ߓߘߊ߫ ߒ ߛߍ߲߬ߓߍ߬ ߊߟߊ߫ ߟߊ߫ ߥߍ߫ ، ߏ߬ ߘߐ߫ ߸ ߊߟߎ߫ ߦߴߊߟߎ߫ ߟߊ߫ ߥߊߟߌߢߊ ߣߴߊߟߎ߫ ߜߙߊ߬ߢߐ߲߮ ߠߎ߬ ߟߊߘߍ߬ ( ߒ ߞߊ߲ߡߊ߬ ) ، ߊߟߎ߫ ߟߊ߫ ߥߊߟߌߢߊ ߏ߬ ߘߏ߲߬ ߞߊߣߊ߬ ߞߍ߫ ߊߟߎ߫ ߡߊ߬ ߞߣߐߜߊ߫ ߞߏ߫ ߘߌ߫ ߘߋ߬ ، ߊߟߎ߫ ߓߊ߲߫ ߞߊ߬ ߒ ߠߊ߫ ߞߏ ߓߐ߫ ߊ߬ ߟߊ߫ ߝߋߎ߫ ، ߊߟߎ߫ ߝߊ߲߭ ߞߊߣߊ߬ ߒ ߡߊߕߡߊߣߊ߫ ߘߋ߬ ﴿71﴾

ߣߴߊߟߎ߫ ߘߏ߲߬ ߞߵߊߟߎ߫ ߞߐߘߏ߲߬ ( ߘߌ߯ߣߊ ߟߊ߫ ) ߸ ߒߠߋ ߞߏ߬ߣߌ߲ ߕߍ߫ ߊߟߎ߫ ߕߙߊ߫ ߟߴߊ߬ ߛߙߊ߬ ߟߊ߫ ، ߒߠߋ ߛߊ߬ߙߊ ߕߍ߫ ߜߘߍ߫ ߡߊ߬ ߝߏ߫ ߊߟߊ߫ ، ߒߠߋ ߘߏ߲߬ ߖߡߊ߬ߙߌ߬ߣߍ߲߫ ߠߋ߬ ߞߏ߫ ߒ ߧߋ߫ ߞߍ߫ ߖߘߍ߬ߞߟߏ߬ߟߊ ߟߎ߬ ߘߏ߫ ߘߌ߫ ﴿72﴾

ߓߊ߬ߙߌ߬ ߊ߬ߟߎ߫ ߞߵߏ߬ ߛߐ߬ߛߐ߬ ، ߊ߲ ߘߏ߲߬ ߞߵߏ߬ ߣߴߊ߬ ߝߍ߬ ߡߐ߮ ߟߎ߬ ߟߊߞߛߌ߫ ߞߎߟߎ߲ ߞߣߐ߫ ߸ ߞߵߏ߬ ߟߎ߬ ߞߍ߫ ߣߘߐ߬ߛߌ߰ߟߊ ߟߎ߬ ߘߌ߫ ، ߊ߲ ߞߊ߬ ߒ߬ ߠߊ߫ ߟߝߊߙߌ ߟߎ߬ ߡߊߛߐ߬ߛߐ߬ߓߊ߮ ߟߎ߬ ߟߊߕߏ߫ ߖߌ ߘߐ߫ ߟߋߎ߫ ، ߊ߬ ߝߟߍ߫ ߓߊ߫ ߖߊ߬ߛߙߋ߬ߡߟߊ߬ߓߊ߰ߕߐ ߟߎ߬ ߟߊߓߊ߲ ߞߍ߫ ߘߊ߫ ߢߊ ߡߍ߲ ﴿73﴾

ߣߎߤߎ߲߫ ߕߊ߬ߡߌ߲ ߞߐ߫ ߸ ߊ߲ ߞߊ߬ ߞߋߟߊ߫ ߛߌߦߊߡߊ߲߫ ߗߋ߫ ߊ߬ߟߎ߫ ߡߌ߬ߙߌ߲߬ߘߌ ߟߎ߫ ߡߊ߬ ߸ ߏ߬ ߟߎ߫ ߣߊ߬ ߘߴߏ߬ ߟߎ߫ ߡߊ߬ ߔߊߞߌ ߟߎ߬ ߘߌ߫ ، ߓߊ߬ߙߌ߬ ߏ߬ ߟߎ߫ ߣߐ߬ ߕߘߍ߬ ߡߍ߲ ߡߊߛߐ߬ߛߐ߬ ߟߊ߫ ߞߘߐ߬ߡߊ߲߫ ߸ ߊ߬ߟߎ߬ ߡߊ߫ ߛߐ߲߬ ߘߍ߲߬ߞߣߍ߬ߦߊ߬ ߟߴߏ߬ ߡߊ߬ ߡߎ߬ߕߎ߲߬. ߒ߬ߓߵߊ߲ ߦߋ߫ ߖߊ߲߰ߘߊ߬ߓߊ߮ ߟߎ߫ ߛߣߐ߬ߡߍ ߟߊߣߘߐ߫ ߟߊ߫ ߕߋ߲߬ ߠߋ߬ ﴿74﴾

ߏ߬ ߟߎ߬ ߓߍ߯ ߕߊ߬ߡߌ߲ ߞߐ߫ ߸ ߊ߲ ߞߊ߬ ߡߎߛߊ߫ ߣߌ߫ ߤߊߙߎߣߊ߫ ߗߋ߫ ߝߋߙߊߥߎ߲߫ ߣߴߊ߬ ߟߊ߫ ߖߊ߬ߡߊ ߢߓߊ ߟߎ߫ ߡߊ߬ ߒ߬ ߠߊ߫ ߡߊ߲߬ߕߊߣߌ߲ ߠߎ߬ ߘߌ߫ ߸ ߓߊ߬ߙߌ߬ ߏ߬ ߟߎ߫ ߞߵߊ߬ߟߎ߫ ߖߘߍ߬ߘߐߓߏ߲߬ߧߊ߫ ߞߊ߬ ߞߍ߫ ߡߌ߬ߙߌ߲߬ߘߌ߫ ߞߎ߲߬ߞߏ߬ߕߐ ߟߎ߬ ߘߌ߫ ﴿75﴾

ߓߊߏ߬ ߕߎ߬ߢߊ ߣߊ߬ߣߍ߲ ߏ߬ ߟߎ߫ ߡߊ߬ ߞߊ߬ ߝߘߊ߫ ߒ߬ߠߎ߫ ߖߍ߬ߘߍ ߟߊ߫ ߸ ߊ߬ߟߎ߬ ߞߊ߲߫ ߞߏ߫ ߣߌ߲߬ ߦߋ߫ ߛߎߓߊ߯ߦߊ ߜߍߘߐߕߊ ߟߋ߬ ߘߌ߫ ﴿76﴾

ߡߎߛߊ߫ ߞߊ߲߫ ߸ ߞߏ߫ ߌ߬ߦߏ߯ ߕߎ߬ߢߊ ߣߊ߬ߣߍ߲ ߊߟߎ߫ ߡߊ߬ ߸ ߊߟߎ߫ ߘߴߏ߬ ߝߴߏ߬ ߡߊ߬؟ ߊ߬ ߝߐ߫ ߣߌ߲߬ ߦߋ߫ ߛߎߓߊ߯ߦߊ ߟߋ߬ ߘߌ߫ ߘߍ߫؟ ߛߎߓߊ߮ ߟߎ߫ ߘߏ߲߬ ߕߍ߫ ߛߎߘߊ߲߫ ߠߊ߫ ߥߍ߫ ﴿77﴾

ߊ߬ߟߎ߬ ߞߊ߲߫ ߞߴߌ ߣߊ߬ߣߴߊ߲ ߕߘߍ߬ ߟߊ߫ ߟߋ߫ ߓߊ߬ ߛߴߌ ߘߌ߫ ߒ߬ ߓߐ߫ ߞߏ ߟߎ߫ ߞߊ߲߬ ߊ߲ ߞߊ߬ ߒ߬ ߝߊ߬ ߟߎ߫ ߕߘߍ߬ ߡߍ߲ ߠߎ߫ ߞߊ߲߬؟ ߊ߬ ߣߌ߫ ߛߊ߫ ߓߏ߲߬ߧߊ ߦߋ߫ ߞߍ߫ ߊߟߎ߫ ߝߌ߬ߟߊ ߘߐߙߐ߲߫ ߕߊ ߘߌ߫ ߖߡߊ߬ߣߊ ߞߣߐ߫؟ ߒ߬ߓߊ߬ ߒ߬ߠߎ߬ ߕߍߣߊ߫ ߘߍ߲߬ߞߣߍ߬ߦߊ߬ ߟߴߊߟߎ߫ ߝߌ߬ߟߊ ߡߊ߬ ߘߋ߬ ﴿78﴾

ߝߋߙߊߥߎ߲߫ ߞߊ߲߫ ߞߏ߫ ߊߟߎ߫ ߦߋ߫ ߣߊ߬ ߛߎߓߊ߯ ߞߎߛߊ߲ ߓߍ߯ ߡߊߟߐ߬ ߒ ߠߊ߫ ﴿79﴾

ߛߎߓߊ߮ ߟߎ߫ ߣߊ߬ߣߍ߲ ߸ ߡߎߛߊ߫ ߞߊ߲߫ ߊ߬ߟߎ߫ ߡߊ߬ ߞߏ߫ ߊߟߎ߫ ߓߊ߯ ߞߍ߫ ߡߍ߲ ߠߎ߫ ߝߟߌ߬ ߞߏ ߘߐ߫ ߸ ߊߟߎ߯ ߏ߬ ߟߎ߫ ߝߌ߬ߟߌ߫ ߟߋ߬ ߞߟߋ߫ ﴿80﴾

ߏ߬ ߟߎ߫ ߣߊ߬ ߟߊ߬ߝߟߌ߬ߟߌ ߞߍ߫ ߟߊ ߸ ߡߎߛߊ߫ ߞߊ߲߫ ߞߏ߫ ߊߟߎ߫ ߣߊ߬ߣߍ߲߬ ߡߍ߲ ߘߌ߫ ߣߌ߲߬ ߸ ߏ߬ ߦߋ߫ ߛߎߓߊ߯ߦߊ ߟߋ߬ ߘߌ߫ ، ߊߟߊ߫ ߘߏ߲߬ ߞߍߕߐ߫ ߏ߬ ߕߌߢߍ߫ ߟߊ߫ ߟߋ߬ ߔߛߐߞߐ߬ ߸ ߓߊߏ߬ ߊߟߊ߫ ߕߍ߫ ߕߌߢߍߟߌߟߊ ߟߎ߬ ߟߊ߫ ߓߊ߯ߙߊ ߟߊߢߊ߬ ߟߊ߫ ﴿81﴾

ߊߟߊ߫ ߘߏ߲߬ ߘߌ߫ ߕߎ߬ߢߊ ߜߋ߲ߜߋ߲ߦߴߊ߬ ߞߎߡߊ߫ ߞߊ߲ ߠߎ߬ ߟߊ߫ ߸ ߤߟߴߊ߬ ߜߏߦߊ߫ ߘߊ߫ ߛߐ߲߬ߡߊ ߟߎ߬ ߦߋ߫ ﴿82﴾

ߡߐ߰ ߛߌ߫ ߡߊ߫ ߘߍ߲߬ߞߣߍ߬ߦߊ߬ ߡߎߛߊ߫ ߡߊ߬ ߝߏ߫ ߊ߬ ߖߍ߬ߘߍ ߡߌ߬ߙߌ߲߬ߘߌ ߟߎ߬ ߓߐ߲ߛߐ߲ ߘߏ߫ ߟߎ߫ ، ߏ߬ ߘߏ߲߬ ߝߊ߲߭ ߞߍ߫ ߘߊ߫ ߝߋߙߊߥߎ߲߫ ߣߴߊ߬ߟߎ߫ ߖߍ߬ߘߍ ߡߌ߬ߙߌ߲߬ߘߌ ߢߓߊ ߟߎ߬ ߢߍߛߌߟߊ߲ߢߍ ߟߋ߫ ߡߊ߬ ߸ ߞߴߏ߬ ߟߎ߬ ߞߊߣߊ߬ ߥߊ߬ߥߎߟߋ ߟߴߊ߬ߟߎ߫ ߞߊ߲߬ ، ߝߋߙߊߥߎ߲߫ ߘߏ߲߬ ߞߍ߫ ߘߊ߫ ߖߘߍ߬ߞߘߐ߬ߕߊ߬ߟߊ ߟߋ߬ ߘߌ߫ ߘߎ߰ߞߟߏ ߞߊ߲߬ ߸ ߞߊ߬ ߞߍ߫ ߕߌߢߍߟߌߟߊ ߟߎ߬ ߘߏ߫ ߘߌ߫ ﴿83﴾

ߡߎߛߊ߫ ߞߵߊ߬ ߟߊߛߋ߫ ߸ ߞߏ߫ ߒ ߓߊߘߋ߲ ߠߎ߬ ߸ ߣߴߊߟߎ߫ ߟߊߣߍ߲߫ ߞߍ߫ ߘߴߊߟߊ߫ ߟߊ߫ ߸ ߒ߬ߓߊ߬ ߊߟߎ߫ ߦߴߊߟߎ߫ ߛߍ߲߬ߓߍ߫ ߊ߬ ߟߊ߫ ߟߋ߬ ߞߟߋ߫ ߸ ߣߴߊ߬ ߕߘߍ߬ ߘߴߊߟߎ߫ ߦߋ߫ ߖߘߍ߬ߞߟߏ߬ߦߊ߬ߓߊ߯ ( ߛߌ߬ߟߊ߬ߡߊ߫) ߟߎ߫ ߘߌ߫ ﴿84﴾

ߊ߬ߟߎ߬ ߞߊ߲߫ ߏ߬ ߟߋ ߘߐ߫ ߸ ߞߏ߫ ߊ߲ ߓߘߊ߫ ߒ߬ ߛߍ߲߬ߓߍ߬ ߊߟߊ߫ ߟߊ߫ ߝߛߊߦߌ߫ ، ߞߏ߫ ߊ߲ ߡߊ߰ߙߌ ߸ ߖߊ߰ߣߌ߲߬ ߌ ߞߊߣߊ߬ ߞߘߐߓߐߟߌ ߟߴߊ߲ ߞߊ߲߬ ߡߌ߬ߙߌ߲߬ߘߌ߫ ߕߐ߬ߢߍ߰ߒߕߋ ߟߎ߬ ߦߋ߫ ﴿85﴾

ߊ߬ ߣߴߌ ߦߴߊ߲ ߠߊߞߛߌ߫ ߌ ߟߊ߫ ߤߌߣߊ ߟߊ߫ ߡߌ߬ߙߌ߲߬ߘߌ߫ ߓߊ߲߬ߣߍ߲ ߠߎ߫ ߡߊ߬ ﴿86﴾

ߊ߲ ߣߊ߬ ߘߊ߫ ߦߟߌߘߏ߲ ߞߍ߫ ߡߎߛߊ߫ ߣߌ߫ ߤߊߙߎߣߊ߫ ߟߊ߫ ߸ ߒ ߞߏ߫ ߊߟߎ߫ ߦߴߊߟߎ߫ ߡߊߞߍ߫ ߊߟߎ߫ ߡߌ߬ߙߌ߲߬ߘߌ ߘߌ߫ ߡߌߛߌ߬ߙߊ߲߬ ، ߊߟߎ߫ ߦߴߊߟߎ߫ ߟߊ߫ ߓߏ߲ ߠߎ߬ ߞߍ߫ ߞߐߘߐ߲ߞߎ߲ ߠߎ߬ ߘߌ߫ ߞߊ߬ ߕߏ߫ ߛߊߟߌ ߟߐ߬ ߟߊ߫ ߞߍ߬ߣߍ߲ ، ߊ߬ ߣߴߌߟߋ ߦߴߌ ߘߟߊߝߎ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߋ߫ ﴿87﴾

ߡߎߛߊ߫ ߞߵߊ߬ ߝߐ߫ ߞߏ߫ ߊ߲ ߡߊ߰ߙߌ ߸ ߌߟߋ ߟߋ߫ ߞߊ߬ ߝߋߙߊߥߎ߲߫ ߣߴߊ߬ ߟߊ߫ ߖߊ߬ߡߊ ߢߓߊ ߟߎ߬ ߛߐ߫ ߡߊ߬ߛߘߌ ߣߌ߫ ߣߊ߲߬ߝߟߏ ߟߎ߬ ߟߊ߫ ߘߎߢߊ߫ ߢߣߊߡߦߊ ߘߐ߫ ، ߊ߲ ߡߊ߰ߙߌ ߌ ߞߵߏ߬ ߞߍ߫ ߟߋ߬ ߛߴߊ߬ߟߎ߬ ߘߌ߫ ߟߊ߬ߝߟߌ߬ߟߌ ߞߴߌ ߟߊ߫ ߛߌߟߊ ߡߊ߬ ، ߊ߲ ߡߊ߰ߙߌ ߸ ߊ߬ߟߎ߬ ߟߊ߫ ߣߊ߲߬ߝߟߏ ߟߎ߬ ߓߎߙߎ߲ߞߐ߫ ߸ ߌ ߦߴߊ߬ߟߎ߫ ߖߎ߬ߛߎ ߟߎ߫ ߖߊ߬ ߊ߬ߟߎ߬ ߞߊߣߊ߬ ߘߍ߲߬ߞߣߍ߬ߦߊ߫ ߝߋߎ߫ ߸ ߝߏ߫ ߊ߬ߟߎ߬ ߓߊ߯ ߖߊ߲߰ߞߕߊ߬ ߘߌߡߌ߲ߣߍ߲ ߦߋ߫ ߟߋ߬ ߕߘߋ߫ ﴿88﴾

‹ ߊߟߊ߫› ߞߊ߲߫ ߞߏ߫ ߊߟߎ߫ ߝߌ߬ߟߊ ߟߊ߫ ߘߎߓߊ ߓߘߊ߫ ߖߋ߬ߓߌ߬ ، ߏ߬ ߘߐ߫ ߸ ߊߟߴߊߟߎ߫ ߟߊߕߋߟߋ߲߫ ߠߋ߬ ߸ ߊߟߎ߫ ߞߊߣߊ߬ ߞߏߟߐ߲ߓߊߟߌ ߟߎ߬ ߟߊ߫ ߛߌߟߊ ߟߊߓߊ߬ߕߏ߫ ߘߋ߬ ﴿89﴾

ߊ߲ ߣߊ߬ ߘߊ߫ ߌߛߌߙߊߌߟߞߊ ߟߎ߬ ߟߊߕߊ߬ߡߌ߲߬ ߓߊ ߟߊ߫ ، ߏ߬ ߞߍ ߝߋߙߊߥߎ߲߫ ߣߴߊ߬ ߟߊ߫ ߞߟߍ߬ߓߏߟߏ߲ ߠߎ߫ ߞߵߊ߬ߟߎ߬ ߛߊ߯ߘߊ߫ ߕߐ߬ߢߍ߮ ߣߌ߫ ߖߎ߯ߦߊ ߜߍߞߟߐ ߟߊ߫ ، ߝߏ߫ ߖߌߘߐߕߏ ߥߊ߫ ߘߴߊ߬ ߛߐ߬ߘߐ߲߬ ، ߊ߬ ߞߊ߲߫ ߏ߬ ߘߐ߫ ߞߏ߫ ߒ ߓߘߊ߫ ߟߴߊ߬ ߟߊ߫ ߒ ߞߏ߫ ߡߊ߰ߙߌ߬ ߜߘߍ߫ ߕߍ߫ ߸ ߝߏ߫ ߌߛߌߙߊߌߟߞߊ ߟߎ߫ ߘߍ߲߬ߞߣߍ߬ߦߊ߬ߣߍ߲߫ ߡߍ߲ ߡߊ߬ ، ߏ߬ ߘߐ߫ ߒ ߓߘߊ߫ ߞߍ߫ ߖߘߍ߬ߞߟߏ߬ߟߊ ߟߎ߬ ߘߏ߫ ߘߌ߫ ﴿90﴾

(ߊ߬ ߖߋ߬ߓߌ߬ ߘߊ߫ ߞߏ߫ ) ߋ߫ ߞߋߟߋ߲߬؟ ߌ ߘߏ߲߬ ߓߘߊ߫ ߞߎ߬ߕߊ ߞߍ߫ ߞߘߐ߬ߡߊ߲߫ ߞߊ߬ ߞߍ߫ ߕߌߢߍߟߌߟߊ ߟߎ߬ ߘߏ߫ ߘߌ߫؟ ﴿91﴾

ߒ߬ߓߊ߬ ߓߌ߬ ߸ ߊ߲ ߘߴߌ ߝߊ߬ߘߌ ߘߐߙߐ߲߫ ߠߊߞߛߌ߫ ߸ ߛߴߌ ߘߌ߫ ߞߍ߫ ߕߊ߰ߛߌ߬ ߞߏ߫ ߘߴߌ ߞߐ߫ ߡߐ߮ ߟߎ߬ ߦߋ߫ ، ߓߊ߬ߙߌ߬ ߌ߬ߦߏ߯ ߞߟߋ߫ ، ߡߐ߰ ߛߘߍߡߊ߲߫ ߠߋ߫ ߖߊ߲߬ߓߐߣߍ߲߫ ߒ߬ ߠߊ߫ ߘߊ߬ߟߎ ߟߎ߬ ߘߐ߫ ﴿92﴾

ߊ߲ ߞߊ߬ ߌߛߌߙߊߌߟߞߊ ߟߎ߬ ߡߊߞߍ߫ ߛߍ߬ߓߍ ߡߊ߬ߞߍ߬ߟߌ߬ ߢߊ ߟߋ߫ ߡߊ߬ ߸ ߞߵߊ߬ߟߎ߫ ߤߊ߬ߙߌ߬ߖߍ߰ ߝߋ߲߫ ߢߌߡߊ ߟߎ߬ ߘߏ߫ ߟߊ߫ ، ߞߏ߬ߣߵߊ߬ߟߎ߬ ߡߊ߫ ߢߐ߲߮ ߛߐ߬ߛߐ߬ ߝߋߎ߫ ߸ ߝߏ߫ ߟߐ߲ߠߌ߲ ߣߊ߬ߣߍ߲ ߊ߬ߟߎ߫ ߡߊ߬ ، ߌ ߡߊ߰ߙߌ ߘߏ߲߬ ߘߌߣߊ߬ ߞߕߌ߫ ߊ߬ߟߎ߬ ߕߍ߫ ߟߐ߬ߓߊ ߟߏ߲ ߊ߬ߟߎ߬ ߟߊ߫ ߢߐ߲߯ ߛߐߛߐ߫ ߞߏ ߓߍ߯ ߟߊ߫ ߘߐ߫ ﴿93﴾

ߣߴߌ ߞߍ߫ ߘߊ߫ ߛߌߞߊ߫ ߘߐ߫ ߒ߬ ߠߊ߫ ߟߍߙߊ߫ ߟߊߖߌ߰ߣߍ߲ ߘߐ߫ ߌ ߡߊ߬ ߸ ߌ ߦߋ߫ ߡߐ߱ ߟߎ߫ ߢߌ߬ߣߌ߲߬ߞߊ߬ ߡߍ߲ ߠߎ߬ ߦߋ߫ ( ߖߌ߰ ) ߟߍߙߊ ߞߊ߬ߙߊ߲߬ ߠߴߌ ߢߍ߫ ߞߘߐ߬ߡߊ߲߫ ، ߒ߬ߓߊ߬ ߕߎ߬ߢߊ ߖߊ߯ߕߋ ߟߋ߫ ߣߊ߬ߣߴߌ ߡߊ߬ ߣߌ߲߬ ߞߊ߬ ߝߊߘߊ߫ ߌ ߡߊ߰ߙߌ ߟߊ߫ ، ߏ߬ ߘߐ߫ ߸ ߌ ߞߊߣߊ߬ ߞߍ߫ ߛߌߞߊߓߊ߮ ߟߎ߬ ߝߋ߲߫ ߘߌ߫ ߘߋ߬ ﴿94﴾

ߌ ߘߏ߲߬ ߞߊߣߊ߬ ߞߍ߫ ߡߐ߱ ߟߎ߬ ߝߋ߲߫ ߘߌ߫ ߸ ߡߍ߲ ߠߎ߬ ߦߋ߫ ߊߟߊ߫ ߟߊ߫ ߟߝߊߙߌ ߟߎ߬ ߡߊߛߐ߬ߛߐ߬ ߟߊ߫ ، ߌ ߘߌ߫ ߞߍ߫ ߓߣߐ߬ߓߊ߮ ߟߎ߬ ߘߏ߫ ߘߌ߫ ߏ߬ ߘߐ߫ ﴿95﴾

ߌ ߡߊ߰ߙߌ ߟߊ߫ ( ߞߐ߲߬ߞߐ߲߬ߒ߬ߡߊ ) ߞߎߡߊ ߜߋ߲ߜߋ߲ߦߊߣߍ߲߫ ߡߍ߲ ߠߎ߫ ߡߊ߬ ߸ ߏ߬ ߟߎ߬ ߕߍߣߊ߫ ߘߍ߲߬ߞߣߍ߬ߦߊ߬ ߟߊ߫ ߡߎ߰ߡߍ߫ ﴿96﴾

ߤߊߟߌ߫ ߘߊ߬ߟߎ ߓߍ߯ ߘߏ߫ ߟߋ߫ ߣߊ߬ ߘߴߊ߬ߟߎ߫ ߡߊ߬ ، ߝߏ߫ ߊ߬ߟߎ߬ ߦߋ߫ ߖߊ߲߰ߞߕߊ߬ ߘߌߡߌ߲ߣߍ߲ ߦߋ߫ ߟߋ߬ ߕߘߋ߫ ﴿97﴾

ߦߊ߯ߟߊ߫ ߘߎ߰ ( ߘߏ߲߬ߞߏ ) ߘߏ߫ ߘߍ߲߬ߞߣߍ߬ߦߊ߬ ߘߊ߫ ߓߊ߬ ߡߍ߲ ߠߊ߫ ߘߍ߲߬ߞߣߍ߬ߦߊ ߞߵߊ߬ ߡߎߣߊ߲ߝߊ߲߫؟ ( ߏ߬ ߝߋ߲߫ ߡߊ߫ ߞߍ߫ ߝߋߎ߫ ) ߸ ߝߏ߫ ߦߣߎߛߊ߫ ߡߌ߬ߙߌ߲߬ߘߌ ߘߐߙߐ߲߫ ߸ ߓߊ ߏ߬ ߟߎ߫ ߘߍ߲߬ߞߣߍ߬ߦߊ ߡߍ߲ ߞߍ߫ ߘߊ߫ ߸ ߊ߲ ߞߊ߬ ߘߐ߯ߦߊ ߖߊ߲߰ߞߕߊ ߟߊߥߌ߬ߟߴߊ߬ߟߎ߫ ߞߊ߲߬ ߘߎߢߊ߫ ߢߣߊߡߦߊ ߘߐ߫ ، ߊ߬ ߣߴߊ߲ ߞߵߊ߬ߟߎ߫ ߘߊ߰ߡߎ߲߬ ߝߎߚߎ߫ ߝߏ߫ ߕߎ߬ߡߊ ߘߏ߫ ﴿98﴾

ߣߴߊ߬ ߕߎ߲߬ ߞߵߌ ߡߊ߰ߙߌ ߘߌߦߊ߫ ߸ ߘߎ߰ߞߟߏ ߞߊ߲߬ ߡߐ߮ ߓߍ߯ ߕߘߍ߬ ߘߌ߫ ߘߍ߲߬ߞߣߍ߬ߦߊ߫ ߞߐߘߍ߫ ، ߊ߬ ߝߐ߫ ߌߟߋ ߘߌ߫ ߡߐ߱ ߟߎ߬ ߞߘߊߡߊ߫ ߏ߬ ߘߐ߫ ߞߏ߫ ߝߏ߫ ߊ߬ߟߎ߬ ߓߊ߯ ߞߍ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߘߌ߫؟ ﴿99﴾

ߒ߬ߓߵߊ߬ ߕߍ߫ ߞߎ߲߫ ߣߌߡߊ߫ ߛߌ߫ ߘߐ߫ ߞߊ߬ ߘߍ߲߬ߞߣߍ߬ߦߊ߫ ، ߝߏ߫ ߊߟߊ߫ ߓߊ߯ ߘߌ߬ߢߍ߫ ߟߋ߬ ߖߐ߫ ߸ ߊ߬ ߘߏ߲߬ ߦߋ߫ ߞߛߐ ߟߋ߬ ߞߍ߫ ߟߊ߫ ߤߊ߲ߞߟߌߒߕߊ߲ ߠߎ߫ ( ߛߣߐ߬ߡߍ ) ߟߊ߫ ﴿100﴾

ߊ߬ ߟߊߛߋ߫ ߞߏ߫ ߊߟߎ߫ ߦߋ߫ ߛߊ߲ ߠߎ߬ ߣߌ߫ ߘߎ߱ ߞߣߐ߫ ߝߋ߲ ߠߎ߬ ߡߊߝߟߍ߫ ߓߊ߫ ، ߓߊ߬ߙߌ߬ ߘߊ߬ߟߎ ߟߎ߬ ߣߌ߫ ߖߊ߬ߛߙߋ߬ߡߟߊ߬ ߞߊ߲ ߠߎ߬ ߕߍߣߊ߬ ߝߏߦߌ߫ ߢߊ߬ ߟߊ߫ ߡߌ߬ߙߌ߲߬ߘߌ߫ ߘߍ߲߬ߞߣߍ߬ߦߊ߬ߓߊߟߌ ߟߎ߫ ߡߊ߬ ﴿101﴾

ߊ߬ߟߎ߯ ߡߋ߬ߘߋ ߡߊߞߐ߬ߣߐ߲߬ ߠߊ߫ ߣߴߊ߬ߟߎ߬ ߢߍߓߊ߯ ߕߊ߬ߡߌ߲߬ߣߍ߲ ߠߎ߬ ߟߊ߫ ߖߊ߲߬ߖߏ߲ ߠߎ߫ ߢߐ߲߱ ߕߍ߫؟ ߒ߬ߓߵߊ߬ ߟߊߛߋ߫ ߞߏ߫ ߊߟߎ߫ ߡߊ߬ߞߐ߬ߣߐ߲߬ߠߌ߲ ߞߍ߫ ، ߒߠߋ ߖߍ߬ߘߍ ߦߴߊߟߎ߫ ߝߍ߬ ߡߊ߬ߞߐ߬ߣߐ߲߬ߠߌ߲߬ߠߊ ߟߎ߬ ߘߏ߫ ߟߋ߬ ߘߌ߫ ﴿102﴾

ߊ߲ ߘߏ߲߬ ߘߌߣߊ߫ ߒ߬ ߠߊ߫ ߞߋߟߊ ߟߎ߬ ߣߴߊ߬ߟߎ߫ ߝߍ߬ ߡߐ߯ ߘߍ߲߬ߞߣߍ߬ߦߊ߬ߣߍ߲ ߠߎ߬ ߟߊߞߛߌ߫ ، ߒ߬ߓߊ߬ ߘߍ߲߬ߞߣߍ߬ߦߊ߬ߓߊ߮ ߟߎ߬ ߟߊߞߛߌ ߦߋ߫ ߛߋ߲ߛߋߘߋ߲ ߘߌ߫ ߒ߬ߠߎ߫ ߡߊ߬ ߕߋ߲߬ ߠߋ߬ ﴿103﴾

ߊ߬ ߟߊߛߋ߫ ߞߏ߫ ߤߍ߲߬ ߊߟߎ߬ ߡߐ߱ ߟߎ߬ ߸ ߣߴߊߟߎ߫ ߞߍ߫ ߘߊ߫ ߛߌߞߊ߫ ߘߐ߫ ߒߠߋ ߟߊ߫ ߘߌ߯ߣߊ߫ ߞߏ ( ߢߌ߲߬ ) ߘߐ߫ ߸ ߒ߬ߓߊ߬ ߒߠߋ ߕߍߣߵߊߟߎ߫ ߕߊ߫ ߓߊ߬ߕߏ߬ ߝߋ߲ ߠߎ߫ ߓߊ߬ߕߏ߬ ߟߊ߫ ߘߋ߬ ߞߵߊߟߊ߫ ߕߏ߫ ، ߒ߬ߞߊ߬ ߒ ߧߴߊߟߊ߫ ߟߋ߫ ߓߊ߬ߕߏ߬ ߟߊ߫ ߸ ߏ߬ ߡߍ߲ ߦߴߊߟߎ߫ ߛߏߡߊߦߟߍߡߊ߲߫ ߠߊ߫ ، ߓߊ ߒ ߖߡߊ߬ߙߌ߬ߣߍ߲߫ ߠߋ߬ ߞߏ߫ ߒ ߧߋ߫ ߞߍ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߘߏ߫ ߘߌ߫ ﴿104﴾

(ߊ߬ ߣߴߊ߬ ߝߐߣߍ߲߫ ߠߋ߬ ߒ ߧߋ߫ ߸ ) ߞߏ߫ ߌ ߢߊߘߐߟߊ ߟߊߟߐ߬ ( ߞߵߊ߬ ߓߍ߲߬ ) ߘߌ߯ߣߊ ߡߊ߬ ߖߐ߲ߖߐ߲߫ ، ߌ ߘߏ߲߬ ߞߊߣߊ߬ ߞߍ߫ ߛߏߡߊ ߟߎ߬ ߝߋ߲߫ ߘߌ߫ ߘߋ߬ ﴿105﴾

ߊ߬ ߣߌ߫ ߞߴߌ ߞߊߣߊ߬ ߝߋ߲߫ ߞߟߌ߫ ߞߵߊߟߊ߫ ߕߏ߫ ߸ ߡߍ߲ ߕߴߌ ߡߎߣߊ߲ߝߊ߲߫ ߊ߬ ߘߏ߲߬ ߕߴߌ ߕߙߐ߫ ، ߣߴߌ ߞߵߏ߬ ߞߍ߫ ߸ ߏ ߕߎ߬ߡߊ ߝߍ߬ ߌ ߓߘߊ߫ ߞߍ߫ ߕߐ߬ߢߍ߰ߒߕߋ ߟߎ߬ ߘߏ߫ ߘߌ߫ ﴿106﴾

ߣߌ߫ ߊߟߊ߫ ߞߊ߬ ߡߊ߲߬ߕߙߐ߫ ߡߊ߰ ߌ ߟߊ߫ ߸ ߟߊ߬ߥߟߌ߬ߓߊ߯ ߕߴߏ߬ ߟߊ߫ ، ߣߴߊ߬ ߘߏ߲߬ ߞߊ߬ ߤߙߊ߫ ߟߊߢߌߣߌ߲߫ ߌ ߦߋ߫ ߸ ߟߛߊ߬ߦߌ߬ߓߊ߯ ߕߍ߫ ߊ߬ ߟߊ߫ ߢߊ߬ߒߡߊ߭ ߟߊ߫ ، ߊ߬ ߘߏ߲߬ ߦߴߏ߬ ߞߍ߫ ߟߊ߫ ߞߊ߬ ߡߐ߰ ߟߋ߬ ߟߊߛߐ߬ߘߐ߲߬ ߡߍ߲ ߓߊ߯ ߊ߬ ߘߌߦߴߊ߬ ߟߊ߫ ߖߐ߲߭ ߠߎ߬ ߘߐ߫ ، ߊ߬ߟߋ ߟߋ߫ ߘߏ߲߬ ߦߝߊ߬ߟߊ߫ ߤߌߣߟߊ ߘߌ߫ ﴿107﴾

ߊ߬ ߟߊߛߋ߫ ߞߏ߫ ߤߍ߲߬ ߊߟߎ߬ ߡߐ߱ ߟߎ߬ ߸ ߕߎ߬ߢߊ ߓߘߊ߫ ߣߵߊߟߎ߫ ߡߊ߬ ߞߊ߬ ߝߘߴߊߟߎ߫ ߡߊ߰ߙߌ ߟߊ߫ ، ߒ߬ߓߊ߬ ߡߍ߲ ߓߊ߯ ߞߊ߲ߘߊ߫ ߏ ߡߊ߬ ߸ ߏ߬ ߦߋ߫ ߞߊ߲ߘߊ߫ ߟߴߊ߬ ߖߍ߬ߘߍ߫ ߟߋ߬ ߦߋ߫ ، ߣߌ߫ ߡߍ߲ ߘߏ߲߬ ߝߟߌ߬ ߘߊ߫ ߸ ߏ߬ ߦߋ߫ ߝߌ߬ߟߌ ߞߍ߫ ߟߴߊ߬ ߖߍ߬ߘߍ߫ ߟߋ߬ ߟߊ߫ ، ߒߠߋ ߞߏ߬ߣߌ߲߬ ߕߍ߫ ߊߟߎ߫ ߜߋ߬ߟߎ߲߬ߓߊ߯ ߘߌ߫ ﴿108﴾

ߦߟߌߘߏ߲ ߡߍ߲ ߦߋ߫ ߞߍ߫ ߟߴߌ ߟߊ߫ ߸ ߌ ߦߴߏ߬ ߟߋ ߟߊߓߊ߬ߕߏ߬ ، ߊ߬ ߣߴߌ ߦߴߌ ߡߎ߬ߢߎ߲߬ ߝߎߚߎ߫ ߸ ߝߏ߫ ߊߟߊ߫ ߦߋ߫ ߞߕߌ ߕߍ߰ ߸ ߓߊ ߏ߬ ߟߋ ߦߋ߫ ߞߕߌ߫ ߕߍ߯ߟߊ ߟߎ߬ ߘߐ߫ ߢߌ߬ߡߊ ߘߌ߫ ﴿109﴾

ߊ. ߟ. ߙ. ( ߊߟߌߝ. ߟߊ߯ߡ. ߙߊ߯ ) ߟߍߙߊ߫ ߟߋ߫ ߣߌ߲߬ ߸ ߡߍ߲ ߟߝߊߙߌ ߟߎ߫ ߥߘߋ߬ߥߘߋ߬ߦߊ߬ߣߍ߲߫ ߞߊ߬ ߓߊ߲߫ ߞߵߊ߬ߟߎ߬ ߝߊߙߊ߲ߝߊߛߌ߫ ߸ ߞߊ߬ ߝߘߊ߫ ( ߡߊ߰ߙߌ߫ ) ߥߘߋ߬ߥߘߋ߬ߟߌ߬ߟߊ߫ ߞߟߊ߬ߡߊ߬ߓߊ߮ ߟߊ߫ ﴿1﴾

ߞߏ߫ ߊߟߎ߫ ߞߊߣߊ߬ ߝߏߦߌ߫ ߓߊ߬ߕߏ߬ ߝߏ߫ ߊߟߊ߫ ، ߒߠߋ ߦߴߊߟߎ߫ ߦߋ߫ ߖߊ߬ߛߙߋ߬ߡߟߊ߬ߟߊ ߣߌ߫ ߘߟߊߝߎߟߊ ߟߋ߬ ߘߌ߫ ߸ ߞߊ߬ ߝߘߊ߫ ߊߟߊ߫ ߟߊ߫ ﴿2﴾

ߞߏ߫ ߊߟߎ߫ ߦߋ߫ ߦߝߊ߬ ߢߌߣߌ߲ ߞߍ߫ ߊߟߎ߫ ߡߊ߰ߙߌ ߟߊ߫ ߸ ߊ߬ ߣߴߊߟߎ߫ ߦߴߊߟߎ߫ ߖߘߍ߬ߟߊߛߊ߬ߦߌ߫ ߊ߬ ߡߊ߬ ߸ ߊ߬ ߘߴߊߟߎ߫ ߘߊ߰ߡߎ߲߫ ߏ߬ ߘߐ߫ ߘߊ߰ߡߎ߲߬ ߢߌߡߊ߫ ߟߊ߫ ߸ ߝߏ߫ ߞߊ߬ ߛߋ߫ ߛߕߊ߫ ߟߐ߯ߟߊߣߍ߲߫ ߡߊ߬ ، ߊ߬ ߘߏ߲߬ ߘߌ߫ ߢߊ߬ߒ߬ߡߊ߬ ߕߌ߮ ߓߍ߯ ߛߐ߫ ߊ߬ ߟߊ߫ ߢߊ߬ߒߡߊ߭ ߟߊ߫ ، ߓߊ߬ߙߌ߬ ߣߴߊߟߎ߫ ߞߵߊߟߎ߫ ߞߐߘߏ߲߬ ߸ ߒ ߧߋ߫ ߛߌߟߊ߲߫ ߠߴߊߟߎ߫ ߘߌ߫ ߏ߬ ߘߐ߫ ߟߏ߲ߓߊ ߘߏ߫ ߖߊ߲߰ߞߕߊ ߟߋ߬ ߟߊ߫ ﴿3﴾

ߊߟߎ߫ ߛߊ߬ߦߌ߬ߕߐ߫ ߊߟߊ߫ ߟߋ߫ ߡߊ߬ ، ߏ߬ ߟߋ ߘߏ߲߬ ߛߋ߫ ߟߊ߫ ߞߏ ߓߍ߯ ߟߊ߫ ﴿4﴾

ߞߏ߬ߞߏ߫ ߊ߬ߟߎ ߟߴߊ߬ߟߎ߬ ߛߌߛߌ ߟߎ߬ ߘߐߞߙߎ߬ ߟߊ߫ ߞߍ߬ ߛߴߊ߬ߟߎ߬ ߘߴߊ߬ߟߎ߫ ߘߏ߲߰ ߊߟߊ߫ ߡߊ߬؟ ߞߏ߬ߞߏ߫ ߊ߬ߟߎ߬ ߦߴߊ߬ߟߎ߫ ߞߎ߲߬ߠߊ߬ߓߌߘߌ߲߫ ߠߴߊ߬ߟߎ߬ ߟߊ߫ ߝߊ߰ߣߌ߲ ߠߎ߬ ߟߊ߫ ߕߎ߬ߡߊ ߡߍ߲ ߸ ߊߟߊ߫ ߞߵߊ߬ߟߎ߬ ߟߊ߫ ߞߏ߫ ߘߏ߲߰ߣߍ߲ ߣߴߊ߬ ߟߊ߲ߞߣߍߡߊߣߍ߲ ߓߍ߯ ߟߐ߲߫ ߞߍ߬؟ ߓߊߏ߬ ߛߌߛߌ ߟߎ߬ ߘߐ߫ ߞߏ ߟߎ߬ ߟߐ߲ߓߊ߮ ߟߋ߬ ﴿5﴾

ߡߊ߬ߛߍ߲߬ߛߍ߲߬ߓߊ߰ ߛߌ߫ ߕߍ߫ ߘߎ߱ ߞߊ߲߬ ߸ ߡߍ߲ ߖߐ߲߰ߣߍ߲ ߕߍ߫ ߊߟߊ߫ ߞߎ߲߬ ߸ ߊ߬ ߣߴߊ߬ ߞߵߊ߬ ߡߊߞߍ߫ ߦߙߐ ߣߴߊ߬ ߛߎ߭ ߓߙߌ߬ ߦߙߐ ߟߐ߲߫ ، ߓߊ ߏ߬ ߓߍ߯ ߛߓߍߣߍ߲߫ ߠߋ߬ ߟߍߙߊ߫ ߘߐߜߍ ߘߐ߫ ﴿6﴾

ߊ߬ߟߋ ߟߋ߫ ߞߊ߬ ߛߊ߲ ߠߎ߬ ߣߌ߫ ߘߎ߱ ߘߊ߲߫ ߕߟߋ߬ ߥߐ߯ߙߐ߫ ߞߘߐ߫ ߸ ߊ߬ ߟߊ߫ ߛߍ߬ߡߍ ߕߘߍ߬ ߖߌ ߟߋ߫ ߞߊ߲߬ ߸ ( ߏ ߞߎ߲߭ ߠߋ߬ ) ߛߴߊ߬ ߘߴߊߟߎ߫ ߘߐߜߍ߫ ߊߟߎ߫ ߡߍ߲ ߗߋߥߊߟߌ ߢߌ߬ߡߊ߬ ߓߊ߯ ߞߍ߫ ، ߌ ߘߏ߲߬ ߓߊ߯ ߊ߬ ߝߐ߫ ( ߊ߬ߟߎ߫ ߡߊ߬ ) ߞߏ߫ ߊߟߎ߫ ߟߊߞߎߣߎ߲ߕߐ߫ ߟߋ߬ ߛߊ߬ߦߊ ߞߐ߫ ߸ ߓߊ߲߬ߓߊ߮ ߟߎ߬ ߘߴߊ߬ ߝߐ߫ ߸ ߞߏ߫ ( ߘߌ߯ߣߊ߫ ߞߏ ) ߣߌ߲߬ ߕߍ߫ ߝߏߦߌ߬ ߘߌ߫ ߝߏ߫ ߛߎߓߊ߯ߦߊ ߜߍߘߐߕߊ ﴿7﴾

ߣߴߊ߲ ߘߏ߲߬ ߞߊ߬ ߖߊ߲߰ߞߕߊ ߘߏ߲߰ߘߌ߫ ߊ߬ߟߎ߫ ߡߊ߬ ߞߵߊ߬ ߛߌ߰ ߥߊ߯ߕߌ߫ ߦߙߌߞߕߊ߫ ߟߊ߫ ߸ ߊ߬ߟߎ߬ ߘߴߊ߬ ߝߐ߫ ߞߏ߫ ߡߋ߬ߘߋ ߦߴߊ߬ ߘߐߡߌ߬ߘߊ߬ ߟߊ߫ ߣߊ߬ߟߌ ߡߊ߬ ߓߏ߲߰؟ ߞߵߊ߬ ߕߘߍ߬ ߊ߬ ߣߊ߬ߕߐ߫ ߊ߬ߟߎ߫ ߡߊ߬ ߟߏ߲ ߡߍ߲ ߸ ߊ߬ ߕߴߛߋ߫ ߟߊߛߊ߬ߦߌ߬ ߟߴߊ߬ߟߎ߫ ߡߊ߬ ߝߋߎ߫ ، ߊ߬ߟߎ߫ ߘߏ߲߬ ߠߊ߫ ߞߏ߫ ߡߊߦߟߍߣߍ߲ ߘߌ߫ ߓߋ߬ ߊ߬ߟߎ߫ ߞߊ߲߬ ߓߙߌ߫ ﴿8﴾

ߊ߲ ߓߊ߯ ߡߐ߱ ߛߎ߲߬ߛߎ߬ߡߎ߲߫ ߒ߬ ߠߊ߫ ߤߌߣߊ ߘߏ߫ ߟߊ߫ ߞߏߕߊ߲߫ ߸ ߞߊ߬ ߓߊ߲߫ ߞߵߏ ߓߏ߬ߛߌ߫ ߊ߬ ߟߊ߫ ߸ ߊ߬ ߘߌ߫ ߖߋ߰ߕߍ߰ ߡߍߣߍ߲ߎ߲߫ ߞߊ߬ ߞߍ߫ ߝߌߛߙߌߥߊߟߋ ߘߌ߫ ﴿9﴾

ߣߴߊ߲ ߘߏ߲߬ ߞߵߊ߬ ߛߎ߲߬ߛߎ߬ߡߎ߲߬ ߣߍߡߊ߫ ߟߊ߫ ߡߊ߲߬ߕߙߐ ߡߊ߰ߣߍ߲ ߞߐ ߊ߬ ߟߊ߫ ߸ ߊ߬ ߘߴߊ߬ ߝߐ߫ ߞߏ߫ ߖߎ߯ߡߊ߲ ߓߍ߯ ߓߘߊ߫ ߥߊ߫ ߞߊ߬ ߡߊߓߐ߫ ߒ ߠߊ߫ ، ߘߊ߬ߡߊ߲߬ߛߊ߫ ߊ߬ ߘߌ߫ ߞߍ߫ ߖߍ߰ߙߍ߬ߕߐ߬ ߥߊߛߏߟߊ ߘߌ߫ ﴿10﴾

ߝߏ߫ ߡߍ߲ ߠߎ߫ ߣߵߊ߬ߟߎ߫ ߡߎ߬ߢߎ߲߬ ߠߊ߫ ߞߊ߬ ߢߌ߬ߡߊ ߟߎ߬ ߞߍ߫ ߸ ߏ߬ ߟߎ߫ ߟߋ߫ ߘߏ߲߬ ߢߍߛߌ߰ߣߍ߲߫ ߦߝߊ߬ߟߌ ߣߌ߫ ߛߙߊ߬ ߓߟߋߓߟߋ ߟߊ߫ ﴿11﴾

ߊ߬ ߢߐ߲߰ߘߐ߫ ߸ ߌ ߦߴߌ ߦߟߌߘߏ߲߬ ߞߊ߲ ߘߏ߫ ߕߏ߫ ߟߊ߫ ߦߋ߲߬ ߸ ߊ߬ ߣߴߌ ߛߌߛߌ ߦߋ߫ ߜߍ߲߬ߘߍ߬ ߟߴߊ߬ ߟߊߛߋ ߘߐ߫ ߸ ߞߏ߫ ߊ߬ߟߎ߬ ߞߊߣߵߊ߬ ߝߐ߫ ߞߏ߫ ߥߟߊߞߏ߫ ߛߊߣߌ߲߫ ߢߊߘߊ߲߫ ߕߘߍ߬ ߟߊߖߌ߰ ߊ߬ ߡߊ߬ ߸ ߥߟߊ߫ ߞߋ߲ߛߐ߲ ߘߏ߫ ߕߘߍ߬ ߦߋ߫ ߣߵߊ߬ ߝߍ߬ ، ߌߟߋ ߘߏ߲߬ ߦߋ߫ ߖߊ߬ߛߙߋ߬ߡߊ߬ߟߌ߬ߟߊ ߘߐߙߐ߲߫ ߠߋ߬ ߘߌ߫ ߸ ߓߊ߬ߙߌ߬ ߊߟߊ߫ ߟߋ߬ ߞߏ ߓߍ߯ ߜߋ߬ߟߎ߲߬ߓߊ߮ ߘߌ߫ ﴿12﴾

ߊ߬ߟߎ߬ ߞߊ߲߫ ߠߋ߫ ߓߊ߬ ߞߏ߫ ߊ߬ ߣߊ߬ ߞߎ߬ߙߊ߬ߣߊ ߞߎ߲߬ߘߐߕߍ߰ ߟߊ߫ ߟߋ߬؟ ߊ߬ߟߎ߫ ߖߋ߬ߓߌ߬ ߞߏ߫ ߒ߬ߓߵߊߟߎ߫ ߣߵߊ߬ ߢߐ߲߰ ߝߐߘߊ߫ ߕߊ߲߫ ߘߌ߫ ߓߊ߫ ߞߵߏ߬ ߟߎ߫ ߞߎ߲߬ߘߐߕߍ߰ ، ߊ߬ ߣߴߊߟߎ߫ ߦߋ߫ ߡߐ߰ ߟߎ߬ ߞߟߌ߫ ߏ߬ ߘߐ߫ ߸ ߊߟߎ߫ ߘߌ߫ ߡߍ߲ ߠߎ߬ ߟߊߣߐ߬ ߞߵߊߟߊ߫ ߕߏ߫ ߸ ߣߴߊ߬ ߕߘߍ߬ ߘߊ߫ ߊߟߎ߫ ߦߋ߫ ߕߎ߬ߢߊ߬ ߕߌ߯ ߟߎ߫ ߘߌ߫ ﴿13﴾

ߣߴߊ߬ߟߎ߬ ߡߴߊߟߎ߫ ߖߋ߬ߓߌ߫ ߏ߬ ߘߐ߫ ߸ ߒ߬ߓߵߊߟߎ߫ ߦߴߊ߬ ߟߐ߲߫ ߛߊ߫ ߸ ߞߏ߫ ‹ ߞߎ߬ߙߊ߬ߣߊ › ߟߊߖߌ߰ߣߍ߲߫ ߊߟߊ߫ ߟߊ߫ ߟߐ߲ߠߌ߲ ߠߋ߬ ߟߊ߫ ، ߊ߬ ߣߌ߫ ߞߏ߫ ߡߊ߰ߙߌ߬ ߜߘߍ߫ ߕߴߏ߬ ߞߐ߫ ، ߦߊ߯ߟߴߊߟߎ߫ ߘߌ߫ ߞߍ߫ ߛߌ߬ߟߊ߬ߡߊ ߟߎ߬ ߘߌ߫ ߏ߬ ߘߐ߫ ߓߊ߬؟ ﴿14﴾

ߡߍ߲ ߓߊ߯ ߞߍ߫ ߘߎߢߊ߫ ߢߣߊߡߦߊ ߣߴߊ߬ ߡߊ߬ߢߍ߯ߙߍ ߝߍ߬ ߸ ߊ߲ ߘߴߏ߬ ߟߎ߬ ߗߋߥߊߟߌ ߟߎ߬ ߘߝߴߊ߬ߟߎ߬ ߦߋ߫ ߘߎߢߊ߫ ߘߐ߫ ، ߊ߬ߟߎ߬ ߟߊ߫ ߝߏߦߌ߬ ߕߍ߫ ߣߊ߰ߛߌ߬ ﴿15﴾

ߓߊ߬ߙߌ߬ ߝߏߦߌ߬ ߕߍߣߊ߬ ߞߍ߫ ߟߴߏ߬ ߟߎ߫ ߟߋ߬ ߢߍ߫ ߟߊߞߌߙߊ߫ ߝߏ߫ ߕߊ ، ߊ߬ߟߎ߬ ߟߊ߫ ߞߏ߫ ߟߊߘߊ߲ߣߍ߲ ߠߎ߬ ߕߌߢߍߕߐ߫ ߟߋ߬ ߸ ߞߵߊ߬ߟߎ߬ ߟߊ߫ ߓߊ߯ߙߊ ߟߎ߬ ߞߍ߫ ߜߊ߲ߛߊ߲ ߘߌ߫ ߝߎ߯ ﴿16﴾

ߦߊ߯ߟߊ߫ ߡߐ߱ ߡߍ߲ ߦߋ߫ ߔߊߞߌ ߞߊ߲߬ ߞߊ߬ ߝߘߴߊ߬ ߡߊ߰ߙߌ ߟߊ߫ ߸ ߛߙߋ ߘߏ߫ ߘߏ߲߬ ߦߴߊ߬ ߟߊߓߊ߬ߕߏ߬ ߟߊ߫ ߞߊ߬ ߝߘߴߊߟߊ߫ ߟߊ߫ ، ߊ߬ ߣߌ߫ ߡߎߛߊ߫ ߟߊ߫ ߟߍߙߊ ߞߐ߲߰ ߘߴߊ߬ ߢߍ߫ ߢߍߦߊ ߣߌ߫ ߤߌߣߊ ߘߐ߫ ߸ ߒ߬ߓߊ߬ ߏ߬ ߡߐ߱ ߟߎ߫ ߟߋ߫ ߘߍ߲߬ߞߣߍ߬ߦߊ߬ߣߴߊ߬ ߡߊ߬ ، ߒ߬ߞߊ߬ ߡߍ߲ ߓߊ߯ ߊ߬ ߓߊ߲߬ ߊ߬ ߡߊ߬ ߞߙߎߞߊ ߢߌ߲߬ ߠߎ߬ ߘߐ߫ ߛߊ߫ ߸ ߕߊ ߟߴߏ߬ ߦߟߌߡߊ߬ ، ߒ߬ߓߊ߬ ߌ ߞߊߣߊ߬ ߞߍ߫ ߛߌߞߊ߫ ߘߐ߫ ߣߌ߲߬ ߞߏߢߊ ߘߐ߫ ߝߋߎ߫ ، ߓߊߏ߬ ߕߎ߬ߢߊ ߖߊ߯ߕߋ ߟߋ߫ ߞߊ߬ ߝߊߘߴߌ ߡߊ߰ߙߌ ߟߊ߫ ، ߓߊ߬ߙߌ߬ ߡߐ߱ ߝߊ߲߬ߓߊ ߟߋ߬ ߕߍ߫ ߘߍ߲߬ߞߣߍ߬ߦߊ߬ ߟߊ߫ ﴿17﴾

ߖߍߣߍ߲ ߠߊ߫ ߕߐ߬ߢߍ߮ ߘߌ߫ ߕߊ߬ߡߌ߲߬ ߥߎߦߊ ߟߊߓߊ߮ ߞߊ߲߬ ߊߟߊ߫ ߟߊ߫؟ ߒ߬ߓߊ߬ ߡߐ߰ ߛߎ߮ ߏ߬ ߟߎ߫ ߟߋ߬ ߟߊߟߐ߬ߕߐ߫ ߊ߬ߟߎ߫ ߡߊ߰ߙߌ ߢߊߞߘߐ߫ ߸ ߛߙߋ ߟߎ߬ ߘߴߊ߬ ߝߐ߫ ߛߊ߫ ߞߏ߫ ߢߌ߲߬ ߠߎ߫ ߟߋ߫ ߞߊ߬ ߥߎߦߊ ߟߴߊ߬ߟߎ߫ ߡߊ߰ߙߌ ߟߊ߫ ، ߞߏ߬ߞߏ߫ ߊߟߊ߫ ߟߊ߫ ߘߊ߲ߞߊ ߟߋ߫ ߕߐ߬ߢߍ߰ߒߕߋ ߟߎ߫ ߡߊ߬ ߞߍ߬؟ ﴿18﴾

ߓߊ ߏ߬ ߟߎ߫ ߟߋ߫ ߞߎ߬ߡߊ߲߬ߘߌ߬ߟߌ ߞߍ߫ ߟߴߊߟߊ߫ ߛߌߟߊ ߡߊ߬ ، ߊ߬ ߣߴߊ߬ߟߎ߬ ߦߴߊ߬ ߢߌߣߌ߲߫ ߠߊ߫ ߞߏ߫ ߊ߬ߟߎ߬ ߦߴߏ߬ ߞߍ߫ ߟߊ߫ ߞߐ߲߬ߕߌ߲ ߘߌ߫ ، ߏ߬ ߟߎ߫ ߟߋ߫ ߘߏ߲߬ ߓߊ߲߬ߣߍ߲߫ ߛߎ߬ߟߊ߬ ߞߏ ߡߊ߬ ﴿19﴾

ߒ߬ߓߊ߬ ߏ߬ ߟߎ߬ ߕߍߣߊ߬ ߓߟߏߡߓߊߟߌ߫ ߞߍ߫ ߟߊ߫ ߘߎ߰ߞߟߏ ߞߊ߲߬ ߸ ߢߌ߲߬ ߜߘߍ߫ ߟߎ߫ ߘߏ߲߬ ߕߍߣߊ߬ ߞߍ߫ ߟߴߊ߬ߟߎ߬ ߟߊ߫ ߞߵߊߟߊ߫ ߕߏ߫ ، ߖߊ߲߰ߞߕߊ ߓߍߣߊ߬ ߓߊߟߌ߫ ߏ߬ ߟߎ߫ ߟߋ߫ ߞߊ߲߬ ߸ ߓߊ ߊ߬ߟߎ߫ ߕߎ߲߬ ߕߍ߫ ߡߍ߲ߠߌ߲߫ ߠߊߣߐ߬ ߟߊ߫ ߸ ߊ߬ߟߎ߫ ߕߎ߲߬ ߕߍ߫ ߦߋߟߌ߫ ߞߍ߫ ߟߊ߫ ﴿20﴾

ߒ߬ߓߊ߬ ߏ߬ ߟߎ߫ ߟߋ߫ ߓߣߐ߬ߣߴߊ߬ߟߎ߫ ߖߘߍ߬ ߘߐ߫ ، ߓߊ ߊ߬ߟߎ߬ ߟߊ߫ ߝߋ߲߫ ߞߎ߲߬ߘߐߕߍ߰ߣߍ߲ ߓߍ߯ ߓߘߊ߫ ߕߎߣߎ߲߫ ߊ߬ߟߎ߫ ߡߊ߬ ߖߋߥߎ߲߫ ﴿21﴾

ߛߌߞߊ߫ ߞߏ߬ߣߌ߲߬ ߕߍ߫ ߡߍ߲ ߘߐ߫ ߸ ߏ߬ ߟߎ߫ ߟߋ߬ ߞߍߕߐ߫ ߓߣߐ߬ߓߊ߮ ߢߍߕߊ ߟߎ߬ ߘߌ߫ ߛߎ߬ߟߊ߫ ﴿22﴾

ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߞߊ߬ ߢߌ߬ߡߊ ߟߎ߬ ߞߍ߫ ߸ ߊ߬ ߣߌ߫ ߞߵߊ߬ߟߎ߫ ߖߘߍ߬ߡߊߖߌ߰ ߊ߬ߟߎ߫ ߡߊ߰ߙߌ ߦߋ߫ ߸ ߏ߬ ߟߎ߫ ߟߋ߬ ߞߍߕߐ߫ ( ߡߍ߲ߘߌߦߊ ) ߣߊߞߐ ߡߊ߲߬ߕߎ߬ߙߋ ߟߎ߬ ߘߌ߫ ߸ ߊ߬ߟߎ߫ ߘߏ߲߬ ߘߎߡߊߕߐ߫ ߦߋ߲߬ ߠߋ߬ ﴿23﴾

ߖߊ߬ߡߊ߫ ߝߌ߬ߟߊ ߟߊߢߐ߲߯ߡߊ ߘߐ߫ ߸ ߦߏ߫ ߝߎߦߋ߲ ߣߌ߫ ߛߌ߲ߛߌ߲ߓߊ ، ߊ߬ ߣߌ߫ ߢߡߊ ߣߌ߫ ߡߍ߲ߠߌ߲ߠߊ ߸ ߦߊ߯ߟߊ߫ ߏ߬ ߟߎ߬ ߘߌ߫ ߞߢߊ߫ ߟߊߢߐ߲߯ߡߊ߫ ߘߐ߫؟ ߊ߬ ߝߐ߫ ߊߟߎ߫ ߕߴߊߟߎ߫ ߕߊ߰ߛߌ߬ ߟߊ߫ ߟߋ߫ ߓߊ߬؟ ﴿24﴾

ߖߊ߯ߕߋ߬ ߸ ߒ߬ߠߎ߫ ߟߋ߫ ߞߊ߬ ߣߎߤߎ߲߫ ߗߋ߫ ߊ߬ ߡߌ߬ߙߌ߲߬ߘߌ ߡߊ߬ ߸ ( ߊ߬ ߞߵߊ߬ ߝߐ߫ ߊ߬ߟߎ߬ ߦߋ߫ ) ߞߏ߫ ߒߠߋ ߦߋ߫ ߖߊ߬ߛߙߋ߬ߡߟߊ߬ߓߊ߰ ߘߐ߬ߜߍ߫ ߟߋ߬ ߘߌ߫ ߊߟߎ߫ ߦߋ߫ ߘߋ߬ ﴿25﴾

ߞߏ߫ ߊߟߎ߫ ߞߊߣߊ߬ ߝߏߦߌ߫ ߓߊ߬ߕߏ߬ ߊߟߊ߫ ߞߐ߫ ߸ ߒߠߋ ߞߏ߬ߣߌ߲ ߛߌߟߊ߲ߣߴߊߟߎ߫ ߘߌ߫ ߟߏ߲ ߘߏ߫ ߖߊ߲߰ߞߕߊ߬ ߘߌߡߌ߲ߣߍ߲ ߠߋ߬ ߟߊ߫ ﴿26﴾

ߏ߬ ߟߊ߫ ߡߌ߬ߙߌ߲߬ߘߌ ߢߓߊ ߘߐ߫ ߓߊ߲߬ߓߊ߮ ߟߎ߬ ߞߊ߲߫ ߸ ߞߏ߫ ߊ߲ߠߎ߬ ߡߴߌ ߦߋ߫ ߝߏߦߌ߬ ߘߌ߫ ߸ ߝߏ߫ ߊ߲ ߢߐ߲߰ ߡߐ߰ ߛߊ߬ߕߊ ، ߊ߲ ߘߏ߲߬ ߡߊ߫ ߡߐ߰ ߛߌ߫ ߦߴߌ ߟߊߓߊ߬ߕߏ߬ ߟߊ߫ ߦߋߟߌ ߞߎ߲߬ߝߟߐ ߘߐ߫ ߸ ߝߏ߫ ߊ߲ ߘߐ߫ ߢߊ߰ߙߊ߬ߒߞߋ ߟߎ߬ ، ߊ߲ ߘߏ߲߬ ߢߊ߫ ߕߍ߫ ߝߌ߬ߛߡߊ߬ߒߕߋ߬ߦߊ߬ ߛߌ߫ ߟߴߊߟߎ߫ ߓߟߏ߫ ߒ߬ߠߎ߫ ߡߊ߬ ، ߊ߲ ߝߊ߲߭ ߦߴߊߟߎ߫ ߓߛߌ߬ߞߌ߬ ߟߊ߫ ߥߎߦߊ߫ ߝߐߟߊ ߟߎ߫ ߟߋ߬ ߘߌ߫ ﴿27﴾

ߊ߬ ߞߵߊ߬ߟߎ߫ ߖߋ߬ߓߌ߬ ߞߏ߫ ߒ ߓߊߘߋ߲ ߠߎ߬ ، ߐ߲߬ߤߐ߲߫ ߸ ߣߴߊ߬ ߕߘߍ߬ ߘߊ߫ ߒߠߋ ߦߋ߫ ߔߊߞߌ ߟߋ߫ ߞߊ߲߬ ߞߊ߬ ߝߘߊ߫ ߒ ߡߊ߰ߙߌ ߟߊ߫ ߸ ߏ߬ ߘߏ߲߬ ߓߘߊ߫ ߒߠߋ ߛߐ߫ ߤߌߣߊ ߘߏ߫ ߟߊ߫ ߸ ߞߊ߬ ߓߐ߫ ߊ߬ ߖߍ߬ߘߍ ߕߍ߰ߟߊ ߘߐ߫ ߸ ߏ߬ ߞߏߢߊ ߘߏ߲߬ ߓߘߊ߫ ߘߐߝߌ߲߬ ߊߟߎ߫ ߡߊ߬ ، ߦߊ߯ߟߊ߫ ߒ߬ߠߎ߬ ߘߴߊߟߎ߫ ߞߘߊߡߊ߫ ߏ߬ ߟߊ߫ ߞߵߊ߬ ߕߘߍ߬ ߊ߬ ߜߏߡߊ߲ߓߊ ߦߴߊߟߎ߫ ߦߋ߫؟ ﴿28﴾

ߊ߬ ߞߏ߫ ߒ ߓߊߘߋ߲ ߠߎ߬ ߸ ߒߠߋ ߕߍ߫ ߣߊ߲߬ߝߟߏ߬ ߢߌߣߌ߲߫ ߠߴߊߟߎ߫ ߟߴߊߟߋ߬ ߢߌ߲߬ ߘߐ߫ ، ߓߊ ߒߠߋ ߛߊ߬ߙߊ ߕߍ߫ ߝߏߦߌ߫ ߡߊ߬ ߝߏ߫ ߊߟߊ߫ ، ߒߠߋ ߘߏ߲߬ ߕߍ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߜߍ߲߫ ߝߋߎ߫ ، ߓߊ ߏ߬ ߟߎ߫ ߞߵߊ߬ ߟߐ߲߫ ߞߏ߫ ߊ߬ߟߎ߬ ߦߴߊ߬ߟߎ߫ ߡߊ߰ߙߌ ߓߍ߲߬ߢߐ߲߰ߦߊ߬ ߟߊ߫ ߟߋ߬ ߸ ߒߠߋ ߘߏ߲߬ ߢߊ߯ ߊߟߎ߫ ߟߊ߫ ߡߌ߬ߙߌ߲߬ߘߌ߫ ߞߎ߲߬ߒߕߊ߲ ߠߋ߬ ߘߌ߫ ﴿29﴾

ߊ߬ ߞߏ߫ ߒ ߓߊߘߋ߲ ߠߎ߬ ߸ ߖߍߣߍ߲ ߞߍߕߐ߫ ߒߠߋ ߘߍ߬ߡߍ߲߬ ߠߊ߫ ߞߊ߬ ߒ ߕߟߴߊߟߊ߫ ߟߊ߫ ߣߌ߫ ߒ ߞߵߏ߬ ߟߎ߬ ߜߍ߲߫؟ ߦߊ߯ߟߊ߫ ߊߟߎ߫ ߕߍ߫ ߊߟߎ߫ ߕߊ߰ߛߌ߬ ߟߊ߫ ߟߋ߫ ߓߊ߬؟ ﴿30﴾

ߒߠߋ ߘߏ߲߬ ߕߴߊ߬ ߝߐ߫ ߊߟߎ߫ ߦߋ߫ ߝߋߎ߫ ߸ ߒ ߞߏ߫ ߊߟߊ߫ ߟߊ߫ ߡߣߐ߬ߓߏ߲ ߠߎ߬ ߦߋ߫ ߒ ߓߟߏ߫ ، ߒ ߘߏ߲߬ ߡߊ߫ ߞߏ߫ ߘߏ߲߰ߣߍ߲߬ ߟߐ߲߫ ، ߒ ߘߏ߲߬ ߕߴߊ߬ ߝߐ߫ ߒ ߞߏ߫ ߒ ߧߋ߫ ߞߋ߲ߛߐ߲߫ ( ߡߟߍ߬ߞߊ߫ ) ߘߌ߫ ، ߒ ߘߏ߲߬ ߕߴߊ߬ ߝߐ߫ ߊߟߎ߫ ߢߊ ߟߊ߫ ߡߐ߰ ߓߐ߬ߘߍ߬ߓߐ߬ߣߍ߲ ߠߎ߫ ߡߊ߬ ߒ ߞߏ߫ ߊߟߊ߫ ߕߍߣߊ߬ ߤߙߊ߫ ߘߌ߫ ߟߴߏ߬ ߟߎ߫ ߡߊ߬ ، ߓߊ ߊߟߊ߫ ߟߋ߫ ߞߵߏ߬ ߟߎ߬ ߣߌ߫ ߘߐ߫ ߞߏ ߟߐ߲߫ ، ( ߒ ߓߊ߯ ߏ߬ ߟߎ߬ ߜߍ߲߫ ߸ ) ߏ ߕߎ߬ߡߊ ߒ ߓߘߊ߫ ߞߍ߫ ߕߐ߬ߢߍ߰ߒߕߋ ߟߎ߬ ߘߏ߫ ߘߌ߫ ﴿31﴾

ߊ߬ߟߎ߬ ߞߊ߲߫ ߞߏ߫ ߤߍ߲߬ ߌߟߋ߬ ߣߎ߯ߤߎ߲߫ ߸ ߌ ߓߘߴߊ߲ ߘߊߘߐߖߊ߬ ߞߵߊ߲ ߘߊߘߐߖߊ ߟߊߛߌߦߊߦߊ߫ ߞߏߖߎ߯ߦߊ߫ ، ߒ߬ߓߊ߬ ߌ ߦߴߌ ߞߐ߲߬ߞߐ߲߬ ߠߴߊ߲ ߡߊ߬ ߡߍ߲ ߘߐ߫ ߸ ߣߵߏ߬ ߘߴߊ߲ ߞߊ߲ߡߊ߬ ߛߍߣߍ߲߬ ߸ ߣߴߌ ߞߍ߫ ߘߊ߫ ߕߎ߬ߢߊ߬ ߕߌ߮ ߟߎ߬ ߘߏ߫ ߘߌ߫ ﴿32﴾

ߊ߬ ߞߵߊ߬ߟߎ߫ ߖߋ߬ߓߌ߬ ߞߏ߫ ߊߟߊ߫ ߟߋ߫ ߣߊ߬ ߟߴߏ߬ ߘߴߊߟߎ߫ ߞߊ߲ߡߊ߬ ߸ ߣߴߏ߬ ߞߵߊ߬ ߘߌߦߊ߫ ߞߊ߬ߣߌ߲߫ ، ߊߟߎ߫ ߘߏ߲߬ ߕߍ߫ ߓߟߏߡߓߊߟߌ߫ ߞߍ߫ ߏ߬ ߘߐ߫ ߝߋߎ߫ ﴿33﴾

ߒߠߋ ߟߊ߫ ߟߊ߬ߟߌ߬ߟߌ ߕߴߊߟߎ߫ ߣߝߊ߫ ߸ ߣߌ߫ ߒ ߧߴߊ߬ ߝߍ߬ ߞߊ߬ ߟߊ߬ߟߌ߬ߟߌ ߞߍ߫ ߊߟߎ߫ ߦߋ߫ ߸ ߞߵߊ߬ ߕߘߍ߬ ߊߟߊ߫ ߦߴߊ߬ ߝߍ߬ ߟߋ߬ ߞߵߊߟߎ߫ ߟߊߝߟߌ߬ ، ߏ߬ ߟߋ ߊߟߎ߫ ߡߊ߰ߙߌ ߘߌ߫ ߸ ߊߟߎ߫ ߘߏ߲߬ ߠߊߛߊ߬ߦߌ߲߬ߕߐ߫ ߏ߬ ߟߋ ߡߊ߬ ﴿34﴾

ߊ߬ߟߎ߬ ߞߊ߲߫ ߠߋ߫ ߓߊ߬ ߸ ߞߏ߫ ߊ߬ ߣߵߊ߬ ߞߎ߲߬ߘߐߕߍ߰ ߟߊ߫ ߟߋ߬؟ ߊ߬ߟߎ߫ ߖߋ߬ߓߌ߬ ߞߏ߫ ߣߌ߫ ߒ ߣߐ߬ ߞߍ߫ ߘߴߊ߬ ߞߎ߲߬ߘߐߕߍ߰ ߟߊ߫ ߸ ߒ ߞߎ߲߬ߞߏ ߦߋ߫ ߒ ߖߍ߬ߘߍ ߟߋ߫ ߡߊ߬ ߸ ߞߏ߬ߣߌ߲߬ ߒ ߣߍ߰ߓߐߣߍ߲߫ ߠߋ߬ ߊߟߎ߫ ߞߎ߲߬ߞߏ߬ ߕߍ߰ ߣߐ ߘߐ߫ ߘߋ߬ ﴿35﴾

ߦߟߌߘߏ߲ ߣߊ߬ ߘߊ߫ ߞߍ߫ ߣߎߤߎ߲߫ ߠߊ߫ ߸ ߞߏ߫ ߡߐ߰ ߜߘߍ߫ ߕߍߣߊ߫ ߘߍ߲߬ߞߣߍ߬ߦߊ߬ ߟߴߌ ߡߌ߬ߙߌ߲߬ߘߌ ߘߐ߫ ߡߎ߬ߕߎ߲߬ ߸ ߝߏ߫ ߡߍ߲ ߘߍ߲߬ߞߣߍ߬ߦߊ߬ߣߍ߲߬ ߞߘߐ ߦߋ߫ ، ߒ߬ߞߊ߬ ߌ ߞߊߣߵߌ ߖߘߍ߬ ߟߊߛߎ߬ߣߎ߲߫ ߊ߬ߟߎ߬ ߗߋߥߊߟߌ ߘߐ߫ ߡߎ߬ߕߎ߲߫ ߘߋ߬ ﴿36﴾

ߌ ߦߋ߫ ߞߎߟߎ߲ ߠߊߘߊ߲߫ ߊ߲ ߢߊߞߘߐ߫ ߸ ߊ߬ ߣߴߊ߲ ߠߊ߫ ߦߟߌߘߏ߲ ߠߊ߫ ߸ ߌ ߘߏ߲߬ ߞߊߣߊ߬ ߞߎߡߊ߫ ߛߌ߫ ߟߐ߬ ߒ ߡߊ߬ ߕߐ߬ߢߍ߰ߒߕߋ ߟߎ߬ ߟߊ߫ ߞߏ ߘߐ߫ ، ߓߊߏ߬ ߊ߬ߟߎ߬ ߕߏߕߐ߫ ߟߋ߬ ߖߌ ߘߐ߫ ߕߋߜߊ߫ ﴿37﴾

ߊ߬ ߞߍߣߍ߲ ߞߎߟߎ߲ ߠߊߘߊ߲ ߞߊ߲߬ ߸ ߊ߬ ߡߌ߬ߙߌ߲߬ߘߌ ߢߓߊ ߘߏ߫ ߟߎ߫ ߓߊ߯ ߕߊ߬ߡߴߊ߬ ߟߊ߫ ߞߏߕߊ߲߫ ߸ ߊ߬ߟߎ߬ ߘߴߊ߬ ߡߊߦߟߍ߫ ، ߊ߬ ߘߴߊ߬ߟߎ߫ ߖߋ߬ߓߌ߬ ߞߏ߫ ߣߴߊߟߎ߫ ߞߊ߬ ߒ߬ߠߎ߬ ߡߊߦߟߍ߫ ߸ ߊ߲ ߝߣߊ߫ ߘߌߣߵߊߟߎ߫ ߡߊߦߟߍ߫ ߦߏ߫ ߊߟߎ߫ ߦߴߊ߲ ߡߊߦߟߍ߫ ߟߊ߫ ߢߊ ߡߍ߲ ߣߌ߲߬ ﴿38﴾

ߊߟߎ߫ ߘߏ߲߬ ߓߍߣߵߊ߬ ߟߐ߲߫ ߛߋߚߋ߫ ߖߊ߲߰ߞߕߊ ߣߊ߬ߕߐ߫ ߡߍ߲ ߡߊ߬ ߸ ߞߵߊ߬ ߟߊߛߌ߰ ߘߐ߯ߦߊ ߡߎ߬ߙߎ߲߬ߕߌ߬ߣߍ߲߬ ߜߟߏ ߞߊ߲߬ ߸ ߊ߬ ߣߌ߫ ߞߊ߬ ߖߊ߲߰ߞߕߊ߬ ߓߟߏߕߍ߰ߓߊߟߌ ߖߎߙߊ߲߫ ߊ߬ ߞߊ߲߬ ﴿39﴾

(ߏ߬ ߟߋ ߕߏ߫ ߘߴߌߘߐ߫ ) ߝߏ߫ ߊ߲ ߠߊ߫ ߖߊ߬ߡߊߙߌ ߣߊ߬ ߘߊ߫ ، ߏ߬ ߞߍ ߕߊߞߎ߲ߘߌߦߊ ߝߙߎߝߙߎ߫ ߘߊ߫ ( ߖߌ ߟߊ߫ ) ، ߊ߲ ߞߊ߲߫ ߊ߬ ߡߊ߬ ߸ ߒ ߞߏ߫ ߝߋ߲ ߞߋ߬ߟߋ߲߬ߞߋ߬ߟߋ߲߬ߣߊ ߓߍ߯ ߝߌ߬ߟߊ߬ߓߊ ߕߊ߬ ߞߎߟߎ߲ ߘߐ߫ ߸ ߊ߬ ߣߴߌ ߟߊ߫ ߘߋ߲ߓߦߊ ، ߝߏ߫ ߞߐ߲߬ߞߐ߲߬ߒ߬ߡߊ߬ ߞߊ߲ ߞߐ߲߰ߣߍ߲߬ ߡߍ߲ ߡߊ߬ ، ߊ߬ ߣߌ߫ ߝߣߊ߫ ߸ ߌ ߦߋ߫ ߘߍ߲߬ߞߣߍ߬ߦߊ߬ߓߊ߮ ( ߟߎ߫ ) ߕߊ߬ ، ߓߊ߬ߙߌ߬ ߡߐ߰ ߛߌ߫ ߡߊ߫ ߘߍ߲߬ߞߣߍ߬ߦߴߊ߬ ߝߍ߬ ߝߏ߫ ߕߜߋߣߍ߲߫ ﴿40﴾

‹ ߣߎߤߎ߲߫ › ߞߊ߲߫ ߞߏ߫ ߊߟߎ߫ ߦߟߍ߬ ‹ ߞߎߟߎ߲› ߞߣߐ߫ ߸ ߊ߬ ߓߏ߬ߙߌ ߣߴߊ߬ ߓߍߟߍ߲ ߓߍ߯ ߦߋ߫ ߞߍ߫ ߟߴߊߟߊ߫ ߕߐ߮ ߟߋ߬ ߟߊ߫ ، ߖߊ߯ߕߋ߬ ߸ ߒ ߡߊ߰ߙߌ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿41﴾

ߊ߬ ߦߋ߫ ߓߏ߬ߙߌ߬ ߟߴߊ߬ߟߎ߬ ߘߌ߫ ߟߊ߲߬ߓߏ߲ ߠߎ߬ ߢߊߝߍ߬ ߸ ߏ߬ ߟߎ߫ ߟߋ߬ ߦߏ߫ ߞߐ߲߬ߞߍ ߟߎ߬ ، ߣߎߤߎ߲߫ ߞߵߊ߬ ߘߋ߲ߞߍ߫ ߞߟߌ߫ ߸ ߏ߬ ߕߘߍ߬ ߝߏ߬ߣߊ߲ ߠߊ߫ ߸ ߞߏ߫ ߒ ߘߋ߲ߞߍ߫ ߟߋ߱ ߸ ߣߊ߬ ߦߍ߬ߟߵߊ߲ ߝߍ߬ ߏ߱ ߸ ߌ ߞߊߣߊ߬ ߞߍ߫ ߓߊ߲߬ߓߊ߮ ߟߎ߫ ߝߍ߬ ߘߋ߬ ﴿42﴾

ߏ߬ ߞߊ߲߫ ߞߏ߫ ߒߠߋ ߘߌ߫ ߦߍ߬ߟߍ߫ ߞߎ߬ߙߎ ߟߊ߫ ߸ ߏ߬ ߘߌ߫ ߒ ߕߊ߲߬ߞߊ߬ ߖߌ ߡߊ߬ ߸ ߣߎߤߊ߲߫ ߞߊ߲߫ ߞߏ߫ ߕߊ߲߬ߞߊ߬ߓߊ߰ ߛߌ߫ ߕߍ߫ ߓߌ߬ ߞߊ߬ ߓߐ߫ ߊߟߊ߫ ߟߊ߫ ߥߊߟߌߢߊ ߡߊ߬ ߸ ߝߏ߫ ߊߟߊ߫ ߓߊ߯ ߤߌߣߊ߫ ߡߍ߲ ߠߊ߫ ، ߘߊ߬ߡߊ߲߬ߛߊ߫ ߸ ߟߊ߲߬ߓߏ߲ ߠߎ߫ ߘߏ߲߬ ߘߴߊ߬ߟߎ߫ ߝߌ߬ߟߊ ߕߍ߫ ߸ ߞߵߊ߬ ߘߋ߲ߞߍ߫ ߞߍ߫ ߖߌ߫ ߘߐ߫ ߕߏߟߊ ߟߎ߬ ߘߏ߫ ߘߌ߫ ﴿43﴾

ߏ߬ ߞߍ ߸ ߊ߬ ߝߐ߫ ߘߊ߫ ߞߏ߫ ߌߟߋ߬ ߘߎ߱ ߸ ߌ ߟߊ߫ ߖߌ ߟߊߞߎ߬ߣߎ߲߬ ، ߞߏ߫ ߌߟߋ߬ ߛߊ߲ ߸ ߌ ߘߐߡߌ߬ߘߊ߫ ߕߋ߲߬ ، ߏ߬ ߞߍ ߖߌ ߖߊ߬ ߘߊ߫ ߞߵߊ߬ ߕߘߍ߬ ߥߊߟߌߢߊ ߓߘߊ߫ ߓߊ߲߫ ߟߊߕߍ߰ ߟߊ߫ ، ߞߎߟߎ߲ ߓߍߟߍ߲߫ ߘߊ߫ ߖߎߘߌ߫ ( ߞߐ߲߬ߞߍ ) ߞߊ߲߬ ، ߛߊߣߌߛߊߕߍ߫ ߸ ߊ߬ ߟߊߛߋ߫ ߘߊ߫ ߞߏ߫ ߡߌ߬ߙߌ߲߬ߘߌ߫ ߕߐ߬ߢߍ߰ߒߕߋ ߟߎ߬ ߓߘߊ߫ ߦߌߟߡߊߖߊ߲߰ߧߊ߫ ߔߏ߲߫ ﴿44﴾

ߣߎ߯ߤߎ߲߫ ߣߊ߬ ߘߴߊ߬ ߡߊ߰ߙߌ ߞߟߌ߫ ߸ ߞߏ߫ ߒ ߡߊ߰ߙߌ ߸ ߒ ߘߋ߲ߞߍ߫ ߦߋ߫ ߒ ߞߐߙߍ ߘߏ߫ ߟߋ߬ ߘߌ߫ ߘߋ߬ ߸ ߌ ߟߊ߫ ߦߟߌߡߊߘߌߦߊ ߘߏ߲߬ ߦߋ߫ ߕߎ߬ߢߊ߫ ߟߋ߬ ߘߌ߫ ߸ ߌߟߋ ߟߋ߫ ߘߏ߲߬ ߦߋ߫ ߞߕߌߟߊ ߟߎ߬ ߟߊ߫ ߞߕߌߟߊ ߘߌ߫ ﴿45﴾

‹ ߊߟߊ߫ › ߞߊ߲߫ ߞߏ߫ ߣߎ߯ߤߎ߲߫ ߸ ߏ߬ ߕߴߌ ߟߊ߫ ߘߋ߲ߓߦߊ ߝߋ߲߫ ߘߌ߫ ߘߋ߬ ߸ ߓߊ ߏ߬ ߦߋ߫ ߓߊ߯ߙߊ߫ ߟߋ߬ ߘߌ߫ ߡߍ߲ ߕߍ߫ ߢߊ߬ߕߊ߫ ߘߌ߫ ، ߏ߬ ߘߐ߫ ߸ ߌ ߞߊߣߊ߬ ߒ ߕߙߊ߫ ߞߏ߫ ߟߊ߫ ߌ ߡߊ߫ ߡߍ߲ ߢߊߟߐ߲߫ ، ߒߠߋ ߦߴߌ ߟߊߟߌ߫ ߟߊ߫ ߟߋ߬ ߸ ߌ ߞߊߣߊ߬ ߞߍ߫ ߡߐ߰ ߞߎ߲߬ߒߕߊ߲ ߠߎ߬ ߘߏ߫ ߘߌ߫ ﴿46﴾

ߊ߬ ߞߊ߲߫ ߞߏ߫ ߒ ߡߊ߰ߙߌ ߸ ߒ ߧߋ߫ ߕߊ߲߬ߞߊ߬ ߕߙߊ ߞߍ߫ ߟߴߌ ߟߊ߫ ߸ ߌ ߦߋ߫ ߒ ߕߊ߲߬ߞߊ߬ ߌ ߕߙߊ ߡߊ߬ ߞߏ߫ ߟߊ߫ ߡߎ߬ߕߎ߲߬ ߒ ߡߊ߫ ߡߍ߲ ߢߊߟߐ߲߫ ، ߣߴߌ ߝߊ߲߭ ߡߊ߫ ߦߝߊ߬ ߒ ߡߊ߬ ߞߊ߬ ߤߌߣߊ߫ ߒ ߠߊ߫ ߸ ߒ ߘߌ߫ ߞߍ߫ ߓߣߐ߬ߓߊ߮ ߟߎ߬ ߘߏ߫ ߘߌ߫ ﴿47﴾

ߊ߬ ߝߐ߫ ߘߊ߫ ߞߏ߫ ߣߎ߯ߤߎ߲߫ ߸ ߖߌ߰ ߞߊ߬ ߓߐ߫ ߞߎߟߎ߲ ߘߐ߫ ߖߐ ߘߌ߫ ߞߊ߬ ߝߘߊ߫ ߒ߬ߠߎ߬ ߟߊ߫ ߸ ߊ߬ ߣߌ߫ ߓߙߊߞߊ ߟߎ߬ ߘߴߌ ߞߊ߲߬ ߸ ߊ߬ ߣߌ߫ ߡߊ߲߬ߕߏ߲ ߘߏ߫ ߟߎ߫ ߞߊ߲߬ ߌ ߝߍ߬ ߡߐ߮ ߟߎ߬ ߘߐ߫ ، ߒ߬ߞߊ߬ ߡߊ߲߬ߕߏ߲߬ ߜߘߍ߫ ߟߎ߫ ߓߍ߫ ߸ ߊ߲ ߘߴߏ߬ ߟߎ߬ ߛߐ߫ ( ߘߎߢߊ߫ ) ߘߊ߰ߡߎ߲ ߠߊ߫ ߖߐ߫ ، ߞߊ߬ ߓߊ߲߫ ߸ ߖߊ߲߰ߞߕߊ߬ ߘߌߡߌ߲ߣߍ߲ ߘߌߣߊ߬ ߡߊ߰ ߏ߬ ߟߎ߬ ߟߴߊ߲ ߓߟߏ߫ ߟߋ߬ ߘߍ߯ ﴿48﴾

ߒ߬ߓߊ߬ ߞߏ߫ ߘߏ߲߰ߣߍ߲ ߠߎ߫ ߖߊ߲߬ߖߏ߲ ߠߎ߬ ߘߏ߫ ߟߋ߬ ߦߟߌߘߏ߲ ߞߍߣߴߌ ߟߊ߫ ߒ߬ ߓߟߏ߫ ߣߌ߲߬ ، ߣߴߏ߬ ߕߍ߫ ߸ ߌߟߋ ߣߴߌ ߟߊ߫ ߡߌ߬ߙߌ߲߬ߘߌ ߕߘߍ߬ ߡߴߏ߬ ߟߐ߲߫ ߣߌ߲߬ ߢߍ߫ ߞߘߐ߬ߡߊ߲߫ ، ߒ߬ߓߊ߬ ߌߟߋ ߌ ߡߎ߬ߢߎ߲߫ ߠߋ߬ ߸ ( ߞߵߌ ߟߊ߫ ߌ ߓߏ߲߫ ߓߌߢߍ ߘߌ߫ ߖߐ߫) ، ߓߊߏ߬ ߞߏ߫ ߟߊߓߊ߲ ߦߋ߫ ߝߊ߲ߕߊ߲ߞߟߊ ߟߎ߫ ߟߋ߬ ߕߊ ߘߌ߫ ﴿49﴾

ߊ߲ ߞߊ߬ ߊ߯ߘߌ ߟߎ߬ ߓߊߘߋ߲߫ ߤߎ߯ߘߎ߫ ߗߋ߫ ߊ߬ߟߎ߫ ߡߊ߬ ، ߏ߬ ߞߊ߲߫ ߞߏ߫ ߒ ߓߊߘߋ߲ ߠߎ߬ ߸ ߊߟߎ߯ ߊߟߊ߫ ߓߊ߬ߕߏ߬ ، ߡߊ߰ߙߌ߬ ߜߘߍ߫ ߕߴߊߟߎ߫ ߟߴߏ߬ ߡߍ߲ ߞߐ߫ ، ߊߟߎ߫ ߘߏ߲߬ ߕߍ߫ ߝߏߦߌ߬ ߘߌ߫ ߞߎ߲߬ߘߐ߬ߕߍ߰ߟߊ ߟߎ߬ ߞߐ߫ ﴿50﴾

ߞߏ߫ ߒ ߓߊߘߋ߲ ߠߎ߬ ߸ ߒߠߋ ߕߍ߫ ߊ߬ߟߋ߬ ߢߌ߲߬ ߛߙߊ߬ ߡߞߊߣߌ߲߫ ߠߴߊߟߎ߫ ߟߊ߫ ߸ ߓߊ ߒߠߋ ߛߊ߬ߙߊ ߕߍ߫ ߘߏ߫ ߜߘߍ߫ ߡߊ߬ ߝߏ߫ ߡߍ߲ ߞߊ߬ ߒ ߘߊ߲߫ ، ߦߊ߯ߟߊ߫ ߤߊ߲ߞߟߌ߫ ߟߋ߬ ߕߍ߫ ߊߟߎ߫ ߟߊ߫ ߓߊ߬؟ ﴿51﴾

ߞߏ߫ ߒ ߓߊߘߋ߲ ߠߎ߬ ߸ ߊߟߎ߫ ߦߝߊ߬ ߢߌߣߌ߲ ߞߍ߫ ߊߟߎ߫ ߡߊ߰ߙߌ ߟߊ߫ ߸ ߞߊ߬ ߓߊ߲߫ ߞߵߊߟߎ߫ ߖߘߍ߬ߟߊߛߊ߬ߦߌ߫ ߊ߬ ߡߊ߬ ، ߏ߬ ߓߊ߯ ߞߍ߫ ߊ߬ ߘߌ߫ ߡߐ߲ߕߐ߲ ߗߋ߫ ߊߟߎ߫ ߡߊ߬ ( ߖߌ ߘߌ߫ ) ߓߙߐߕߐߕߐ߫ ، ߊ߬ ߣߴߊ߬ ߘߴߊߟߎ߫ ߖߘߌ߫ ߝߊ߲߬ߞߊ߬ ߜߘߍ߫ ߟߊ߫ ߞߵߏ߬ ߟߴߊߟߎ߫ ߝߊ߲߬ߞߊ߬ ߞߘߐ ߞߊ߲߬ ، ߒ߬ߞߵߊߟߎ߫ ߞߊߣߵߊߟߎ߫ ߞߐߘߏ߲߬ ߞߊ߬ ߞߍ߫ ߛߐ߲߬ߡߊ ߟߎ߬ ߘߌ߫ ߘߋ߬ ﴿52﴾

ߊ߬ߟߎ߬ ߞߊ߲߫ ߞߏ߫ ߤߍ߲߬ ߌߟߋ߬ ߤߎ߯ߘߎ߫ ߸ ߌ ߡߊ߫ ߣߵߊ߲ ߡߊ߬ ߔߊߞߌ߫ ߘߌ߫ ߢߌ߲߬ ߘߌ߫ ߡߎߣߎ߲߬ ߘߋ߬ ، ߊ߲ߠߎ߫ ߘߏ߲߬ ߕߍߣߊ߫ ߒ߬ ߡߊ߰ߙߌ ߟߎ߬ ߕߏ߫ ߟߊ߫ ߦߋ߲߬ ߌߟߋ ߟߊ߫ ߞߎߡߊ ߞߏߛߐ߲߬ ، ߊ߲ ߜߎ ߕߍߣߊ߫ ߘߍ߲߬ߞߣߍ߬ߦߊ߬ ߟߴߌ ߡߊ߬ ߟߋ߬ ߘߍ߯ ﴿53﴾

ߊ߲ ߘߏ߲߬ ߕߍ߫ ߘߏ߫ ߜߘߍ߫ ߝߐ߫ ߟߊ߫ ߸ ߒ ߞߏ߫ ߝߏ߫ ߣߴߊ߲ ߡߊ߰ߙߌ ߘߏ߫ ߟߎ߫ ߣߐ߬ ߞߍ߫ ߘߊ߫ ߖߎ߯ߡߊ߲߫ ߞߍ߫ ߟߴߌ ߟߊ߫ ߞߍ߬ ߸ ( ߞߵߌ ߟߐ߬ ߝߊ߬ߕߐ߬ ߞߊ߲߬ ߝߐ ߟߊ߫) ، ߤߎ߯ߘߎ߫ ߞߊ߲߫ ߞߏ߫ ߒ ߧߋ߫ ߊߟߊ߫ ߞߍ߫ ߟߊ߫ ߒ ߛߙߋ ߘߌ߫ ߸ ߊߟߎ߫ ߖߍ߬ߘߍ ߝߣߊ߫ ߦߋ߫ ߛߙߋߦߊ߫ ߸ ߞߏ߫ ߒߠߋ ߣߍ߰ߓߐߣߍ߲߫ ߠߋ߬ ߊߟߎ߫ ߟߊ߫ ߛߏߡߦߊ߫ ߞߏ ߟߎ߬ ߘߐ߫ ߝߋߎ߫ ﴿54﴾

(ߊߟߎ߫ ߣߊ߬ ߡߍ߲ ߠߎ߫ ߕߊ߬ ߟߊ߫ ) ߞߵߊߟߊ߫ ߕߏ߫ ߦߋ߲߬ ߞߊ߬ߣߌ߲߫ ߸ ߊߟߎ߫ ( ߓߍ߯ ) ߟߊߘߍ߬ߣߍ߲ ߦߋ߫ ߒ ߘߓߊ߬ߙߌ߬ ߝߛߊߦߌ߫ ، ߊߟߎ߫ ߝߊ߲߭ ߞߊ߫ ߒ ߘߏ߲߰ߘߌ߫ ߟߋ߬ ﴿55﴾

ߒߠߋ ߛߍ߲߬ߓߍ߬ߣߍ߲߬ ߊߟߊ߫ ߟߋ߬ ߟߊ߫ ߸ ߒߠߋ ߡߊ߰ߙߌ ߣߴߊߟߎ߫ ߡߊ߰ߙߌ ߞߊ߬ߣߌ߲߫. ߡߊ߬ߛߍ߲߬ߛߍ߲߬ߓߊ߰ ߛߌ߫ ߕߍ߫ ߸ ߣߌ߫ ߡߍ߲ ߕߋ߲ߛߌ ߕߴߊ߬ ߓߟߏ߫ ، ߖߊ߯ߕߋ߬ ߸ ߒ ߡߊ߰ߙߌ ߦߋ߫ ߛߌߟߊ߫ ߕߋߟߋ߲ߣߍ߲ ߠߋ߫ ߞߊ߲߬ ﴿56﴾

ߣߴߊߟߎ߫ ߞߵߊߟߎ߫ ߞߐߘߏ߲߬ ߘߏ߲߬ ߸ ߒߠߋ ߗߋߣߍ߲߫ ߞߊ߲ ߡߍ߲ ߘߌ߫ ߸ ߒ ߞߏ߬ߣߌ߲ ߓߘߊ߫ ߓߊ߲߫ ߏ߬ ߟߊߛߋ߫ ߟߴߊߟߎ߫ ߡߊ߬ ، ߒ ߡߊ߰ߙߌ ߘߌ߫ ߡߌ߬ߙߌ߲߬ߘߌ߬ ߜߘߍ߫ ߞߍ߫ (ߊߟߎ߫) ߣߘߐ߬ߓߌߟߊ ߘߌ߫ ߸ ߡߍ߲ ߕߍ߫ ߊߟߎ߫ ߘߌ߫ ، ߊߟߎ߫ ߘߏ߲߬ ߕߴߊ߬ ߕߙߐ߫ ߝߏߦߌ߬ ߟߊ߫ ، ߓߊߏ߬ ߒ ߡߊ߰ߙߌ ߦߋ߫ ߞߏ ߓߍ߯ ߕߊ߲߬ߞߊ߬ߓߊ߮ ߟߋ߬ ߘߌ߫ ﴿57﴾

ߊ߲ ߠߊ߫ ߖߊ߬ߡߊߙߌ ߣߊ߬ߣߍ߲ ߸ ߊ߲ ߞߊ߬ ߤߎ߯ߘߎ߫ ߣߴߊ߬ ߝߍ߬ ߡߐ߯ ߘߍ߲߬ߞߣߍ߬ߦߊ߬ߣߍ߲ ߠߎ߬ ߟߊߞߛߌ߫ ߒ߬ ߠߊ߫ ߤߌߣߊ ߟߊ߫ ، ߊ߲ ߞߵߊ߬ߟߎ߫ ߔߏ߬ߘߏ߲߬ߞߌ߫ ߖߊ߲߰ߞߕߊ߬ ߖߎ߮ ߘߐ߫ ﴿58﴾

ߊ߯ߘߌ ߏ߬ ߟߎ߫ ߟߋ߫ ߞߵߊ߬ߟߎ߫ ߡߊ߰ߙߌ ߟߊ߫ ߘߊ߬ߟߎ ߟߎ߬ ߡߊߛߐ߬ߛߐ߬ ߸ ߞߵߏ߬ ߟߊ߫ ߞߋߟߊ ߟߎ߫ ߛߐ߬ߛߐ߫ ، ߊ߬ ߣߌ߫ ߞߊ߬ ߖߘߍ߬ߛߊ߰ߣߦߊ߬ߟߊ߫ ߞߊߝߋߜߍߟߍ߲ ߘߊ߬ߡߊ ߟߊ߫ ߖߊ߬ߡߊߙߌ ߟߊߓߊ߬ߕߏ߬ ﴿59﴾

ߏ߬ ߟߎ߫ ߣߐ߬ߝߍ߬ߜߍ߲߫ ߘߊ߫ ߘߊ߲ߞߊ ߟߋ߬ ߟߊ߫ ߘߎߢߊ߫ ߢߌ߲߬ ߘߐ߫ ߸ ߊ߬ ߣߌ߫ ߟߐ߬ߓߊ ߟߏ߲ ߝߣߊ߫ ߘߐ߫. ߞߏ߬ߞߏ߫ ߊ߯ߘߌ ߟߎ߫ ߟߋ߫ ߓߊ߲߬ ߘߴߊ߬ߟߎ߫ ߡߊ߰ߙߌ ߘߐ߫ ߞߍ߬؟ ߞߏ߬ߞߏ߫ ߤߎ߯ߘߎ߫ ߡߌ߬ߙߌ߲߬ߘߌ߫ ߊ߯ߘߌ ߟߎ߫ ߟߋ߬ ߦߙߐߡߊߖߊ߲߬ߧߊ߬ ߘߊ߫ ߞߍ߬ ߞߵߊ߬ߟߎ߬ ߞߍ߫ ߞߎ߲߫؟ ﴿60﴾

ߊ߲ ߞߊ߬ ߛߊ߬ߡߎ߯ߘߊ ߟߎ߬ ߓߊߘߋ߲߫ ߛ߫ߊ߯ߟߌߤߎ߫ ߗߋ߫ ߊ߬ߟߎ߫ ߡߊ߬ ، ߏ߬ ߞߊ߲߫ ߞߏ߫ ߒ ߓߊߘߋ߲ ߠߎ߬ ߸ ߊߟߎ߯ ߊߟߊ߫ ߓߊ߬ߕߏ߬ ߸ ߡߊ߰ߙߌ߬ ߜߘߍ߫ ߕߴߊߟߎ߫ ߟߴߏ߬ ߡߍ߲ ߞߐ߫ ، ߏ߬ ߟߋ ߞߵߊߟߎ߫ ߘߊ߲߫ ߘߎ߱ ( ߝߊ߬ߘߌ ) ߘߐ߫ ߸ ߞߵߊߟߎ߫ ߡߊߞߍ߫ ߊ߬ ߘߐ߫ ، ߒ߬ߓߵߊߟߎ߯ ߦߝߊ߬ ߢߌߣߌ߲ ߞߍ߫ ߏ߬ ߟߋ ߟߊ߫ ߸ ߞߵߊߟߎ߫ ߖߘߍ߬ߟߊߛߊ߬ߦߌ߫ ߊ߬ ߡߊ߬ ، ߖߊ߯ߕߋ߬ ߸ ߒߠߋ ߡߊ߰ߙߌ ߦߋ߫ ߡߊ߬ߛߎ߬ߘߎ߲߬ߧߊ߬ߓߊ߯ ߘߌ߫ ߸ ߊ߬ ߦߋ߫ ߖߋ߬ߓߟߌ߬ߟߊ߫ ߘߌ߫ ﴿61﴾

ߊ߬ߟߎ߬ ߞߊ߲߫ ߞߏ߫ ߤߍ߲߬ ߌߟߋ߬ ߛ߫ߊ߯ߟߌߤߎ߫ ߸ ߌ ߕߘߍ߬ ߒ߬ߠߎ߬ ߘߐ߫ ߖߋ߰ߦߊ߬ߕߌ߯ ߟߋ߬ ߘߌ߫ ߣߌ߲߬ ߢߍ߫ ، ߦߊ߯ߟߊ߫ ߌ ߦߴߊ߬ ߝߍ߬ ߟߋ߬ ( ߛߌߛߍ߲߬ ) ߓߊ߬ ߞߵߊ߲ ߝߊߕߊ߲ߕߌ߫ ߞߏ߫ ߊ߲ ߞߊߣߊ߬ ߒ߬ ߝߊ߬ ߟߎ߬ ߟߊ߫ ߝߋ߲߫ ߓߊ߬ߕߏ߬ߕߊ ߟߎ߫ ߓߊ߬ߕߏ߬؟ ߌ ߘߏ߲߬ ߦߋ߫ ߒ߬ ߞߟߌ߫ ߟߊ߫ ߝߋ߲ ߡߍ߲ ߡߊ߬ ߣߌ߲߬ ߸ ߏ߬ ߛߌߞߓߊ ߟߵߊ߲ ߘߐ߫ ߕߋ߲߬ ߛߌߞߊ߫ ﴿62﴾

ߊ߬ ߞߵߊ߬ߟߎ߫ ߖߋ߬ߓߌ߬ ߞߏ߫ ߒ ߓߊߘߋ߲ ߠߎ߬ ߸ ߊߟߎ߫ ߢߊ߯ ߊ߬ ߟߊ߫ ߓߊ߬ ߸ ߣߴߊ߬ ߕߘߍ߬ ߘߊ߫ ߒߠߋ ߦߋ߫ ߔߊߞߌ ߟߋ߫ ߞߊ߲߬ ߞߊ߬ ߝߘߊ߫ ߒ ߡߊ߰ߙߌ ߟߊ߫ ߸ ߏ߬ ߘߏ߲߬ ߓߘߴߊ߬ ߖߍ߬ߘߍ ߟߊ߫ ߤߌߣߊ ߘߏ߫ ߘߌ߫ ߒߠߋ ߡߊ߬ ߸ ߖߍߣߍ߲ ߞߍߕߐ߫ ߒߠߋ ߘߍ߬ߡߍ߲߬ ߠߊ߫ ߞߊ߬ ߓߐ߫ ߊߟߊ߫ ߓߟߏ߫ ߣߌ߫ ߒ ߞߵߊ߬ ߞߎ߬ߕߊ߬؟ ߊߟߎ ߘߏ߲߬ ߕߍߣߊ߬ ߒߠߋ ߖߘߌ߫ ߟߊ߫ ߝߏߦߌ߬ ߟߊ߫ ߝߏ߫ ߟߊ߬ߓߣߐ߬ߟߌ ﴿63﴾

ߞߏ߫ ߒ ߓߊߘߋ߲ ߠߎ߬ ߸ ߊߟߊ߫ ߟߊ߫ ߢߐ߯ߡߍ߫ ߡߛߏ ߟߋ߫ ߣߌ߲߬ ߸ ߞߵߏ߬ ߞߍ߫ ߊߟߎ߫ ߦߋ߫ ߡߊ߲߬ߕߊߣߌ߲߫ ߘߌ߫. ߒ߬ߞߵߊߟߎ߫ ߦߴߏ߬ ߕߏ߫ ߊ߬ ߦߴߊ߬ ߘߡߊߢߌߣߌ߲߫ ߊߟߊ߫ ߟߊ߫ ߘߎ߱ ߞߊ߲߬ ߸ ߊߟߎ߫ ߞߊߣߊ߬ ߡߊ߰ ߊ߬ ߟߊ߫ ߖߎ߯ߡߊ߲߫ ߘߌ߫ ߘߋ߬ ، ߓߊ ߖߊ߲߰ߞߕߊ߫ ߞߎ߲߬ߘߐ߬ߛߎߘߎ߲ ߘߴߊߟߎ߫ ߡߌ߬ߘߊ߫ ߏ߬ ߘߐ߫ ߟߋ߬ ߘߍ߯ ﴿64﴾

ߞߏ߬ߣߵߊ߬ߟߎ߫ ߞߵߊ߬ ߥߙߐ߬ߛߐ ߟߎ߫ ߕߍ߰ ߞߵߊ߬ ߝߊ߰ ، ߛ߫ߊߟߌߤߎ߫ ߞߊ߲߫ ߞߏ߫ ߒ߬ߓߊ߬ ߊߟߴߊߟߎ߫ ߘߊ߰ߡߎ߲߬ ߊߟߎ߫ ߟߊ߫ ߟߎ ( ߟߎ߬ ) ߞߣߐ߫ ߕߟߋ߬ ߛߓߊ߬ ( ߘߐߙߐ߲߫ ) ߞߘߐ߫ ، ߏ߬ ߘߏ߲߬ ߦߋ߫ ߛߙߊߕߌ߫ ߟߋ߬ ߘߌ߫ ߡߍ߲ ߕߍߣߊ߬ ߝߘߏ߬ ߟߊ߫ ﴿65﴾

ߊ߲ ߠߊ߫ ߖߊ߬ߡߊߙߌ ߣߊ߬ߣߍ߲ ߸ ߊ߲ ߞߊ߬ ߛ߫ߊߟߌߤߎ߫ ߣߴߊ߬ ߝߍ߬ ߡߐ߯ ߘߍ߲߬ߞߣߍ߬ߦߊ߬ߣߍ߲ ߠߎ߬ ߟߊߞߛߌ߫ ߒ߬ ߠߊ߫ ߤߌߣߊ ߟߊ߫ ߞߊ߬ ߓߐ߫ ߏ߬ ߟߏ߲ ߘߐ߯ߦߡߊ ߡߊ߬ ، ߖߊ߯ߕߋ߬ ߸ ߌ ߡߊ߰ߙߌ ߟߋ߫ ߝߊ߲߬ߞߊ߬ߡߊ߫ ߣߌ߬ߣߌ߬ߟߊ ߘߌ߫ ﴿66﴾

ߘߊ߬ߡߊ߲߬ߛߊ߫ ߛߊ߬ߝߍ߬ ߞߊ߲߬ ߞߋߟߋ߲߫ ߞߊ߬ ߕߐ߬ߢߍ߰ߒߕߋ ߟߎ߫ ߡߌ߬ߘߊ߬ ، ߏ߬ ߞߍ ߸ ߊ߬ߟߎ߬ ߓߌߘߌ߲ߣߍ߲ ߞߊ߬ ߘߎ߬ߛߊ ߟߊߜߍ߫ ߊ߬ߟߎ߬ ߟߊ߫ ߟߎ ߟߎ߬ ߞߣߐ߫ ߛߊ߲ߞߌߘߊ߲߫ ﴿67﴾

ߞߵߊ߬ ߞߍ߫ ߦߏ߫ ߊ߬ߟߎ߫ ߕߎ߲߬ ߕߴߦߋ߲߬ ߞߘߐ߬ߡߊ߲߫ ، ߞߏ߬ߞߏ߫ ߛߊ߬ߡߎߘߊ ߟߎ߫ ߟߋ߫ ߞߵߊ߬ߟߎ߫ ߓߊ߲߬ ߊ߬ߟߎ߫ ߡߊ߰ߙߌ ߘߐ߫ ߞߍ߬؟ ߞߏ߬ߞߏ߫ ߛߊ߬ߡߎߘߊ ߟߎ߫ ߟߋ߬ ߦߌߟߡߊߖߊ߲߰ߧߊ߬ ߘߊ߫ ߞߍ߬ ߞߵߊ߬ߟߎ߬ ߞߍ߫ ߞߎ߲߫؟ ﴿68﴾

ߊ߲ ߠߊ߫ ( ߞߋ߲ߛߐ߲߫ ) ߞߋߟߊ ߟߎ߫ ߣߊ߬ ߘߊ߫ ߌߓߎ߬ߙߊ߬ߤߌߡߊ߫ ߡߊ߬ ߘߟߊߝߎߟߌ ߘߌ߫ ، ߊ߬ߟߎ߫ ߞߵߊ߬ ߞߐ߲߬ߘߐ߲߬ ߞߏ߫ ߖߐ ߦߴߌ ߡߊ߬ ، ߊ߬ ߝߣߊ߫ ߞߵߊ߬ߟߎ߫ ߝߏ߬ ߞߏ߫ ߖߐ ߦߴߊߟߎ߫ ߡߊ߬ ، ߏ߬ ߡߊ߫ ߡߍ߲߫ ߸ ߊ߬ ߣߊ߬ ߘߊ߫ ( ߊ߬ߟߎ߫ ߝߊ߲߬ߘߊ ߞߍ߫ ) ߕߎߙߊߣߍ߲߫ ( ߛߓߏ ) ߦߌߟߊ߲ߣߍ߲ ߘߌ߫ ﴿69﴾

ߊ߬ ߣߵߊ߬ ߦߋ߫ ߟߊ ߊ߬ߟߎ߬ ߓߟߏ ߕߍ߫ ߡߊ߰ ߟߊ߫ ‹ ߛߏ߬ߓߏ› ߟߊ߫ ߸ ߊ߬ߟߎ߬ ߟߊ߫ ߞߏ ߘߐߝߌ߲߬ ߘߴߊ߬ ߡߊ߬ ߸ ߊ߬ ߣߴߊ߬ ߡߛߌ߬ߡߛߌ߬ ߘߴߊ߬ߟߎ߬ ߢߍߛߌߟߊ߲ߢߍ ߘߌ߫ ߡߢߍߡߢߍ߫ ، ߏ߬ ߟߎ߬ ߞߊ߲߫ ߊ߬ ߡߊ߬ ߞߴߌ ߞߊߣߊ߬ ߛߌߟߊ߲߫ ߠߋ߬ ߞߟߋ߫ ، ߒ߬ߠߎ߬ ߗߋߣߍ߲߫ ߟߎߕߌ߫ ߟߊ߫ ߡߌ߬ߙߌ߲߬ߘߌ ߟߋ߬ ߞߊ߲ߡߊ߬ ﴿70﴾

ߌߓߎ߬ߙߊ߬ߤߌߡߊ߫ ߡߏ߬ߛߏ ߟߐ߬ߣߍ߲ ߦߟߍ߫ ߘߊ߫ ، ߏ߬ ߞߍ ߊ߲ ߞߊ߬ ߒ߬ ߘߟߊߝߎ߬ ߏ߬ ߦߋ߫ ߌߛߌ߬ߤߊ߯ߞߊ߫ ( ߡߏߦߌ߫ ߞߏ ) ߟߊ߫ ، ߊ߬ ߣߌ߫ ߦߊ߬ߞߎߓߊ߫ ߝߣߊ߫ ( ߡߏߦߌ߫ ߞߏ ) ߟߊ߫ ߸ ߌߛߌ߬ߤߊ߯ߞߊ߫ ߞߐ߫ ﴿71﴾

ߡߏ߬ߛߏ ߞߊ߲߫ ߞߏ߫ ߛߓߊߞߎߘߊ߫ ߸ ߌ߬ߦߏ߯ ߒߠߋ ߡߏߦߌ߫ ߸ ߒߠߋ ߡߛߏ߬ߞߘߐ߬ߕߐ؟ ߒ ߗߍ߬ ߣߌ߲߬ ߝߣߊ߫ ߦߋ߫ ߗߍ߬ߡߐ߰ ߞߓߐߞߓߐ ߘߌ߫؟ ߏ߬ ߘߏ߲߬ ߦߋ߫ ߞߏ߫ ߡߊߞߓߊߣߍ߲߫ ߘߌ߫ ߘߋ߬߹ ﴿72﴾

‹ ߡߟߍ߬ߞߊ › ߟߎ߬ ߞߊ߲߫ ߞߏ߫ ߌ ߦߋ߫ ߞߓߊ߫ ߟߴߊߟߊ߫ ߟߊ߫ ߥߊߟߌߢߊ ߟߋ߬ ߘߐ߫؟ ߊߟߊ߫ ߟߊ߫ ߤߌߣߊ ߣߴߊ߬ ߟߊ߫ ߓߙߊߞߊ ߟߎ߫ ߟߋ߬ ߘߏ߲߬ ߦߴߊߟߎ߫ ߓߏ߲߫ ߘߏ߲ߞߏ ߟߎ߫ ߡߊ߬ ، ߊߟߊ߫ ߘߏ߲߬ ߦߋ߫ ߕߊ߲߬ߘߏ߬ߕߊ߫ ߘߌ߫ ߊ߰ ߡߌ߬ߙߌ߲߬ߡߊ߫ ߘߌ߫ ﴿73﴾

ߕߎ߬ߡߊ ߡߍ߲ ߛߌߟߊ߲ ߓߐ߫ ߘߊ߫ ߌߓߎ߬ߙߊ߬ߤߌߡߊ߫ ߟߊ߫ ߞߊ߬ ߘߟߊߝߎߟߌ ߛߍߥߊ ߣߵߊ߬ ߡߊ߬ ߸ ߊ߬ ߞߊ߬ ߒ߬ ߘߊߘߐߝߙߊߢߐ߲߯ߦߊ ߘߊߡߌ߬ߣߊ߬ ߟߎ߯ߕߌ߫ ߟߊ߫ ߡߌ߬ߙߌ߲߬ߘߌ ߛߟߏ߬ߣߊ߬ ߞߏ ߘߐ߫ ﴿74﴾

ߖߊ߯ߕߋ߬ ߸ ߌߓߎ߬ߙߊ߬ߤߌߡߊ߫ ߞߍ߫ ߘߊ߫ ߡߎ߬ߢߎ߲߬ߓߊ߯ ߖߘߍ߬ߡߊ߬ߞߌ߬ߣߌ߲߬ߞߌ߬ߣߌ߲߬ߠߊ ߖߘߍ߬ߟߛߊ߬ߦߌ߬ߟߊ߫ ߟߋ߬ ߘߌ߫ ﴿75﴾

(ߏ߬ ߟߎ߬ ߞߊ߲߫ ߞߏ߫ ) ߌߟߋ߬ ߌߓߎ߬ߙߊ߬ߤߌߡߊ߫ ߸ ߌ ߞߐߘߏ߲߬ ( ߛߟߏ߬ߣߊ߬ߟߌ߬ ߞߏ ) ߢߌ߲߬ ߠߊ߫ ߝߋߎ߫ ߸ ߓߊ ߌ ߡߊ߰ߙߌ ߟߊ߫ ߖߊ߬ߡߊߙߌ ߓߘߊ߫ ߓߊ߲߫ ߣߊ߬ ߟߊ߫ ، ߏ߬ ߘߐ߫ ߸ ߖߊ߲߰ߞߕߊ ߣߊ߬ߕߐ߫ ߟߴߊ߬ߟߎ߫ ߡߊ߬ ߛߍߣߍ߲߬ ߡߍ߲ ߕߍ߫ ߟߊߛߊ߬ߦߌ߬ ߟߊ߫ ﴿76﴾

ߕߎ߬ߡߊ ߡߍ߲ ߊ߲ ߠߊ߫ ߞߋߟߊ ߟߎ߫ ߣߊ߬ ߘߊ߫ ߟߎߕߌ߫ ߡߊ߬ ߸ ߊ߬ ߛߎ߬ߣߎ߲߬ ߘߴߊ߬ߟߎ߬ ߟߊ߫ ߞߏ߫ ߟߊ߫ ߸ ߞߵߊ߬ ߛߣߐ߬ߡߍ ߛߌ߬ߕߌ߫ ߊ߬ߟߎ߫ ߝߍ߬ ߞߏߛߓߍ߫ ، ߊ߬ ߞߊ߲߫ ߞߏ߫ ߓߌ߬ ߦߋ߫ ߟߏ߲߫ ߜߍߟߍ߲߫ ߠߋ߬ ߘߌ߫ ߘߋ߬ ﴿77﴾

ߘߊ߬ߡߊ߲߬ߛߊ߫ ߸ ߊ߬ ߡߌ߬ߙߌ߲߬ߘߌ ߟߎ߬ ߞߊߟߌߦߊߡߍߣߍ߲ߕߐ ߣߊ߬ ߘߴߊ߬ ߡߊ߬ ، ߞߘߐ߬ߡߊ߲߫ ߘߏ߲߬ ߸ ߊ߬ߟߎ߫ ߕߘߍ߬ ߖߎ߯ߡߊ߲ ߠߎ߫ ߟߋ߬ ߞߍ߫ ߟߊ߫ ، ߟߎ߯ߕߌ߫ ߞߊ߲߫ ߊ߬ߟߎ߫ ߡߊ߬ ߞߏ߫ ߒ ߓߊߘߋ߲ ߠߎ߬ ߸ ߒ ߘߋ߲ߡߛߏ ߟߎ߫ ߟߋ߬ ߣߌ߲߬ ، ߏ߬ ߟߎ߬ ߛߊߣߌ߲ߡߊ߲߫ ߊߟߎ߫ ߦߋ߫ ، ߒ߬ߓߵߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߘߋ߬ ߸ ߊߟߎ߫ ߘߏ߲߬ ߞߊߣߊ߬ ߒ ߠߊߡߊ߬ߟߏ߬ߦߊ߫ ߒ ߠߊ߫ ߟߏ߲ߟߊ߲ ߠߎ߬ ߦߋ߫ ߘߋ߬ ، ߦߊ߯ߟߊ߫ ߗߍ߬ ߤߊ߲ߞߟߌߡߊ߫ ߕߴߊߟߎ߫ ߘߐ߫ ߓߊ߬؟ ﴿78﴾

ߊ߬ߟߎ߬ ߞߊ߲߫ ߞߴߌ ߜߎ ߞߵߊ߬ ߟߐ߲߫ ߞߏ߫ ߡߊ߬ߞߏ߬ ߛߌ߫ ߕߍ߫ ߒ߬ߠߎ߬ ߟߊ߫ ߞߵߊ߬ ߟߐ߬ ߌ ߘߋ߲ߡߛߏ ߟߎ߫ ߡߊ߬ ، ߌ ߞߵߊ߬ ߟߐ߲߫ ߛߋߚߋ߫ ߊ߲ ߧߋ߫ ߡߍ߲ ߝߍ߬ ﴿79﴾

ߟߎ߯ߕߌ߫ ߞߊ߲߫ ߞߏ߫ ߥߟߊߞߏ߫ ߝߊ߲߬ߞߊ߫ ߕߘߍ߬ ߦߋ߫ ߞߍ߫ ߒ ߠߴߊߟߎ߫ ߡߊ߬ ، ߥߟߊ߫ ߒ ߕߘߍ߬ ߦߋ߫ ߒ ߝߙߊ߬ ߡߌ߬ߙߌ߲߬ߘߌ߬ ߜߍߟߍ߲ ߘߏ߫ ߟߊ߫ ﴿80﴾

ߞߋ߲ߛߐ߲ ߠߎ߬ ߞߊ߲߫ ߞߏ߫ ߟߎ߯ߕߌ߫ ߸ ߒ߬ߠߎ߬ ߦߴߌ ߡߊ߰ߙߌ ߟߊ߫ ߞߋߟߊ ߟߎ߫ ߟߋ߬ ߘߌ߫ ، ߏ߬ ߘߐ߫ ߊ߬ߟߎ߬ ߕߍߣߊ߬ ߛߋ߫ ߟߴߌ ߡߊ߬ ߝߋߎ߫ ، ߌ ߦߋ߫ ߓߐ߫ ߌ ߘߏ߲߬ߞߏ ߟߎ߬ ߘߌ߫ ߛߎ ߕߐ߬ ߞߎߘߎ߲ ߘߐ߫ ، ߡߐ߰ ߛߌ߫ ߞߊߣߵߊ߬ ߞߐߝߍߣߍ߲߫ ߊߟߎ߫ ߘߐ߫ ߘߋ߬ ߸ ߝߏ߫ ߌ ߡߏ߬ߛߏ ، ߓߊߏ߬ ߊ߬ߟߎ߬ ߟߊ߫ ߞߏ߫ ߛߐ߬ߘߐ߲߬ߕߊ ߢߐ߲߰ ߠߋ߬ ߞߍߕߐ߫ ߏ ߛߐ߬ߘߐ߲߬ ߠߊ߫ ، ߊ߬ߟߎ߬ ߟߊ߫ ߛߘߊߒߡߊߕߎߡߣߊ ߟߋ߬ ߦߟߍߦߟߍ ߘߌ߫ ( ߖߍߡߎߙߍ߲ ߠߊ߫ ، ߘߓߌ߬ ) ߦߟߍߦߟߍ ߘߏ߲߬ ߡߊߣߊ߫ ߛߎ߬ߘߎ߲߬ߧߊ߫ ߓߊ߬؟ ﴿81﴾

ߊ߲ ߠߊ߫ ߖߊ߬ߡߊߙߌ ߣߊ߬ߣߍ߲ ߸ ߊ߲ ߞߵߊ߬ߟߎ߬ ߟߊ߫ ߛߏ ߞߎ߲߬ߡߊ߬ߟߊ ߞߍ߫ ߊ߬ ߞߘߐߟߊ ߘߌ߫ ߸ ߊ߬ ߣߴߊ߲ ߞߊ߬ ߓߍ߬ߙߍ ߟߊߓߐߙߐ߲ߘߐ߫ ߊ߬ߟߎ߫ ߞߊ߲߬ ߸ ߣߊߟߌ߬ߡߎ߲߫ ߣߊ߰ߘߌ߬ߝߘߊ ߕߎ߲߰ߣߍ߲߫ ߢߐ߲߰ߠߊ ߘߌ߫ ﴿82﴾

ߏ߬ ߓߍ߯ ߕߐ߰ߡߊ߬ߛߙߋ߬ߣߍ߲߬ ߞߘߐ ߟߵߌ ߡߊ߰ߙߌ ߓߘߊ ߸ ߏ߬ ߘߏ߲߬ ߦߙߐ߫ ߡߊ߲߫ ߖߊ߲߬ ߕߐ߬ߢߍ߰ߒߕߋ ߟߎ߬ ߟߊ߫ ﴿83﴾

ߊ߲ ߞߊ߬ ߡߊߘߌߦߊ߲ߞߊ ߟߎ߬ ߓߊߘߋ߲߫ ߛߊ߬ߦߌ߬ߓߎ߫ ߗߋ߫ ߊ߬ߟߎ߫ ߡߊ߬ ، ߏ߬ ߞߊ߲߫ ߊ߬ߟߎ߫ ߡߊ߬ ߞߏ߫ ߒ ߓߊߘߋ߲ ߠߎ߬ ߊߟߎ߯ ߊߟߊ߫ ߓߊ߬ߕߏ߫ ߘߋ߬ ߸ ߡߊ߰ߙߌ߬ ߜߘߍ߫ ߕߍ߫ ߊߟߎ߫ ߟߊ߫ ߏ߬ ߟߋ ߞߐ߫ ، ߊߟߎ߫ ߞߊߣߊ߬ ߛߎߡߊ߲ߟߊ߲ ߣߌ߫ ߖߊ߭ ߟߊߘߛߏ߫ ߘߋ߬ ߸ ߒߠߋ ߘߏ߲߬ ߢߊ߯ ߊߟߎ߫ ߟߊ߫ ߤߙߊ߫ ߘߐ߫ ߛߊ߫ ߸ ߓߊ߬ߙߌ߬ ߒ ߛߌߟߊ߲ߣߍ߲߫ ߊߟߎ߫ ߘߌ߫ ߖߊ߲߰ߞߕߊ ߟߊ߫ ߟߏ߲߫ ߠߋ߬ ߘߐ߫ ߸ ߡߍ߲ ߞߍߕߐ߫ ߊߟߎ߫ ߟߊߝߏ߬ ߟߊ߫ ߔߘߋߞߎ߬ ﴿84﴾

ߞߏ߫ ߒ ߓߊߘߋ߲ ߠߎ߬ ߸ ߊߟߎ߫ ߛߎߡߊ߲ߟߊ߲ ߣߌ߫ ߖߊ߭ ߟߝߊ߫ ߕߋߟߋ߲ ߠߋ߬ ߟߊ߫ ، ߊߟߎ߫ ߞߊߣߊ߬ ߡߐ߱ ߟߎ߬ ߟߊߓߐ߬ߣߐ߫ ߊ߬ߟߎ߬ ߓߟߏߝߋ߲ ߠߎ߬ ߘߐ߫ ߸ ߊߟߎ߫ ߘߏ߲߬ ߞߊߣߊ߬ ߖߊߛߟߌ ߞߍ߫ ߘߎ߱ ߞߊ߲߬ ߞߊ߬ ߞߍ߫ ߕߌߢߍߟߌߟߊ ߟߎ߬ ߘߌ߫ ﴿85﴾

ߊߟߊ߫ ߟߊ߫ ߤߊ߬ߙߌ߬ߖߍ߰ ߕߏߕߊ ߟߋ߬ ߘߌߡߊ߲߫ ߊߟߎ߫ ߟߊ߫ ߸ ߣߴߊ߬ ߕߘߍ߬ ߘߴߊߟߎ߫ ߦߋ߫ ߘߍ߲߬ߞߣߍ߬ߦߊ߬ߓߊ߯ ߟߎ߫ ߘߌ߫ ، ߒߠߋ ߘߏ߲߬ ߕߴߊߟߎ߫ ߕߊ߲߬ߞߊ߬ߓߊ߯ ߘߌ߫ ߘߋ߬ ﴿86﴾

ߊ߬ߟߎ߬ ߞߊ߲߫ ߞߏ߫ ߌߟߋ߬ ߛߊ߬ߦߌ߬ߓߎ߫ ߸ ߦߊ߯ߟߊ߫ ߌ ߟߊ߫ ߛߊߟߌ ߟߵߌ ߖߡߊ߬ߙߌ߬ ߟߊ߫ ߓߊ߬ ߞߏ߫ ߒ߬ߠߎ߬ ߦߋ߫ ߒ߬ ߝߊ߬ ߟߎ߬ ߟߊ߫ ߝߋ߲߫ ߓߊ߬ߕߏ߬ߕߊ ߟߎ߬ ߕߏ߫ ߦߋ߲߬ ߸ ߥߟߊ߫ ߞߏ߫ ߊ߲ ߞߊߣߊ߬ ߒ߬ ߛߊ߬ߥߏ ߞߍ߫ ߒ߬ ߠߊ߫ ߣߊ߲߬ߝߟߏ ߟߎ߬ ߘߐ߫؟ ( ߒ߬ߓߊ߬ ߌߟߋ ߌ ߘߌߦߊ߫ ߸ ߌ ߢߊ߲߭ ߦߋ߫ ߓߊ߲߬ߘߊ߲ ߠߊ߫)߹ ߌ ߦߋ߫ ߡߎ߬ߢߎ߲߬ߓߊ߯ ߤߊ߲ߞߟߌߡߊ߫ ߘߌ߫ ߞߊ߬ߣߌ߲߫߹ ﴿87﴾

ߊ߬ ߞߊ߲߫߫ ߞߏ߫ ߒ ߓߊߘߋ߲ ߠߎ߬ ߸ ߐ߲߬ߤߐ߲߫ ߣߴߊ߬ ߕߘߍ߬ ߘߊ߫ ߞߏ߫ ߒߠߋ ߦߋ߫ ߔߊߞߌ ߟߋ߫ ߞߊ߲߬ ߞߊ߬ ߝߘߊ߫ ߒ ߡߊ߰ߙߌ ߟߊ߫ ߸ ߊ߬ ߘߏ߲߬ ߓߘߊ߫ ߒߠߋ ߛߐ߫ ߊ߬ ߟߊ߫ ߤߊ߬ߙߌ߬ߖߍ߰ ߢߌߡߊ ߘߏ߫ ߟߊ߫ ߸ ߒߠߋ ߘߏ߲߬ ߕߴߊ߬ ߝߍ߬ ߝߋߎ߫ ߞߵߊߟߎ߫ ߞߐߟߊߝߏ߫ ߞߏ ߘߏ߫ ߞߍ ߘߐ߫ ߸ ߒ ߣߐ߬ ߊߟߎ߫ ߝߊߕߊ߲ߕߌ߫ ߟߊ߫ ߡߍ߲ ߡߊ߬ ، ߒߠߋ ߞߏ߬ߣߌ߲߬ ߕߍ߫ ߝߏߦߌ߫ ߝߍ߬ ߝߏ߫ ߟߢߊ߬ߟߌ߫ ߸ ߝߊ߬ߣߌ߫ ߒ ߘߴߏ߬ ߟߊߣߐ߬ ، ߒ ߓߍ߲߬ߒ߬ߛߋ߲߬ߡߊ ߘߏ߲߬ ߕߍ߫ ߝߘߊ߫ ߟߊ߫ ߝߏߦߌ߬ ߟߊ߫ ߝߏ߫ ߊߟߊ߫ ، ߒ ߛߍ߲߬ߓߍ߬ߣߴߏ߬ ߟߋ ߟߊ߫ ߸ ߒ ߘߏ߲߬ ߦߋ߫ ߒ ߖߘߍ߬ ߟߊߛߊ߬ߦߌ߬ ߟߴߏ߬ ߟߋ ߡߊ߬ ﴿88﴾

ߞߏ߫ ߒ ߓߊߘߋ߲ ߠߎ߬ ߸ ߊߟߎ߫ ߣߌ߫ ߒߠߋ ߟߊ߫ ߝߐߢߐ߲߯ߞߐ ߞߊߣߵߊߟߎ߫ ߟߐ߬ ߞߎ߲߬ߞߏ߬ ߘߐߕߍ߰ ߟߊ߫ ߘߋ߬ ߸ ߡߍ߲ ߘߴߊ߬ ߞߍ߫ ߞߏ߫ ߦߴߊߟߎ߫ ߛߐ߬ߘߐ߲߬ ߸ ߡߍ߲ ߢߐ߲߰ ߞߊ߬ ߣߎ߯ߤߎ߲߫ ߡߌ߬ߙߌ߲߬ߘߌ ߛߐ߬ߘߐ߲߬ ߸ ߥߟߊ߫ ߤߎ߯ߘߎ߫ ߡߌ߬ߙߌ߲߬ߘߌ ߸ ߤߊߡߊ߲ߕߍ߫ ߛ߫ߊ߯ߟߌߤߎ߫ ߡߌ߬ߙߌ߲߬ߘߌ ، ߟߎ߯ߕߌ߫ ߡߌ߬ߙߌ߲߬ߘߌ ߝߊ߲߭ ߡߊ߲߫ ߖߊ߲߬ ߊߟߎ߫ ߟߊ߫ ﴿89﴾

ߊߟߎ߫ ߦߋ߫ ߦߝߊ߬ ߢߌߣߌ߲ ߞߍ߫ ߊߟߎ߫ ߡߊ߰ߙߌ ߟߊ߫ ߸ ߊ߬ ߣߴߊߟߎ߫ ߦߴߊߟߎ߫ ߖߘߍ߬ߟߊߛߊ߬ߦߌ߫ ߊ߬ ߡߊ߬ ، ߖߊ߯ߕߋ߬ ߸ ߒߠߋ ߡߊ߰ߙߌ ߦߋ߫ ߤߌߣߟߊ߫ ߘߌ߫ ߸ ߊ߬ ߦߋ߫ ߞߊ߬ߣߌ߲ ߘߐߘߌߦߊߓߊ߯ ߘߌ߫ ﴿90﴾

ߊ߬ߟߎ߬ ߞߊ߲߫ ߞߏ߫ ߌߟߋ߬ ߛߊ߬ߦߌ߬ߓߎ߫ ߸ ߊ߲ ߕߍ߫ ߛߌߦߊߡߊ߲߫ ߝߊ߰ߡߎ߲߬ ߠߴߌ ߟߊ߫ ߞߎߡߊ ߘߐ߫ ߸ ߊ߲ ߝߊ߲߭ ߦߴߌ ߦߋ߫ ߟߊ߫ ߖߐ߲ߝߐ߲ߓߊ߯ߕߐ ߟߋ߬ ߘߴߊ߲ ߕߍߡߊ߬ ، ߣߴߌ ߡߊ߬ߡߐ߮ ߟߎ߬ ߕߍ߫ ߸ ߊ߲ ߕߎ߲߬ ߘߴߌ ߞߙߎ߬ߟߊ߬ߓߏ߲߫ ، ߌߟߋ ߖߍ߬ߘߍ ߘߏ߲߬ ߕߍߣߊ߫ ߒ߬ߠߎ߫ ߓߊ߬ߟߌ߬ ߟߊ߫ ﴿91﴾

ߊ߬ ߞߵߊ߬ߟߎ߫ ߖߋ߬ߓߌ߬ ߸ ߞߏ߫ ߒ ߓߊߘߋ߲ ߠߎ߬ ߸ ߌ߬ߦߏ߯ ߒߠߋ ߡߊ߬ߡߐ߮ ߟߎ߫ ߟߋ߬ ߜߟߌߡߊ߲߫ ߊߟߎ߫ ߡߊ߬ ߞߊ߬ ߕߊ߬ߡߌ߲߬ ߊߟߊ߫ ߟߊ߫ ߸ ߝߏ߫ ߊߟߎ߫ ߓߘߴߏ߬ ߟߊ߫ ߞߏ ߟߊߝߟߌ߬ ߊߟߎ߫ ߞߕߐ߫ ߔߊߣߊ߲ߎ߲߫؟ ߒ ߡߊ߰ߙߌ ߘߏ߲߬ ߣߵߊߟߎ߫ ߗߋߥߊߟߌ ߟߎ߬ ߟߊߝߏ߬ ߟߊ߫ ߟߋ߬ ߔߘߋߞߎ߬ ﴿92﴾

ߊ߬ ߞߏ߫ ߒ ߓߊߘߋ߲ ߠߎ߬ ߸ ߊߟߎ߫ ߓߊ߯ߙߊ ߞߍ߫ ߊߟߎ߫ ߕߊ߫ ߞߍߢߊ ߡߊ߬ ، ߒߠߋ ߝߣߊ߫ ߦߋ߫ ߓߊ߯ߙߟߊ߫ ߟߋ߬ ߘߌ߫ ( ߒ ߕߊ߫ ߞߍߢߊ ߡߊ߬) ، ߓߊ߬ߙߌ߬ ߛߋߚߋ߫ ߊߟߎ߫ ߓߍߣߵߊ߬ ߟߐ߲߫ ߸ ߖߊ߲߰ߞߕߊ ߣߊ߬ߕߐ߫ ߡߍ߲ ߡߊ߬ ߞߵߊ߬ ߟߊߝߍߦߊ߫ ߸ ߊ߬ ߣߌ߫ ߡߍ߲ ߦߋ߫ ߥߎߦߊ߫ ߝߐߟߊ ߘߌ߫ ، ߊߟߎ߫ ߘߏ߲߬ ߦߋ߫ ߡߊ߬ߞߐ߬ߣߐ߲߬ߠߌ߲ ߞߍ߫ ߖߐ߫ ، ߒߠߋ ߝߣߊ߫ ߡߊ߬ߞߐ߬ߣߐ߲߬ߠߌ߲߬ߠߊ ߘߏ߫ ߟߋ߬ ߘߌ߫ ߊߟߎ߫ ߝߍ߬ ﴿93﴾

ߊ߲ ߠߊ߫ ߖߊ߬ߡߊߙߌ ߣߊ߬ߣߍ߲ ߸ ߊ߲ ߞߊ߬ ߛߊ߬ߦߌ߬ߓߎ߫ ߣߴߊ߬ ߝߍ߬ ߡߐ߯ ߘߍ߲߬ߞߣߍ߬ߦߊ߬ߣߍ߲ ߠߎ߬ ߟߊߞߛߌ߫ ߒ߬ ߠߊ߫ ߤߌߣߊ ߟߊ߫ ߸ ߛߊ߬ߝߍ߬ ߞߊ߲߬ ߞߋߟߋ߲߫ ߞߊ߬ ߕߐ߬ߢߍ߰ߒߕߋ ߟߎ߫ ߡߌ߬ߘߊ߫ ، ߏ߬ ߞߍ ߸ ߊ߬ߟߎ߬ ߓߌߘߌ߲ߣߍ߲ ߞߊ߬ ߘߎ߬ߛߊ ߟߊߜߍ߫ ߊ߬ߟߎ߬ ߟߊ߫ ߟߎ ( ߟߎ߬ ) ߞߣߐ߫ ߛߊ߲ߞߌߘߊ߲߫ ﴿94﴾

ߞߵߊ߬ߟߎ߬ ߞߍ߫ ߞߎ߲߫ ߸ ߦߏ߫ ߊ߬ߟߎ߫ ߕߎ߲߬ ߕߴߦߋ߲߬ ߞߘߐ߬ߡߊ߲߫ ، ߞߏ߬ߞߏ߫ ߡߊߘߌߦߣߊߞߊ ߟߎ߫ ߟߋ߬ ߦߙߐߡߊߖߊ߲߬ߧߊ߬ ߘߊ߫ ߞߍ߬ ߸ ߦߏ߫ ߛߊ߬ߡߎߘߊ ߟߎ߬ ߦߌߟߡߊߖߊ߲߬ߧߊ߬ ߘߊ߫ ߢߊ ߡߍ߲؟ ﴿95﴾

ߖߊ߯ߕߋ߬ ߸ ߒ߬ߠߎ߫ ߟߋ߫ ߞߊ߬ ߡߎߛߊ߫ ߗߋ߫ ߒ߬ ߠߊ߫ ߡߊ߲߬ߕߊߣߌ߲ ߠߎ߬ ߣߌ߫ ߘߊ߬ߟߎ߬ ߘߐ߬ߜߍ ߘߌ߫ ﴿96﴾

ߞߵߊ߬ ߗߋ߫ ߝߋߙߊߥߎ߲߫ ߣߴߊ߬ ߟߊ߫ ߖߊ߬ߡߊ ߢߓߊ ߟߎ߫ ߡߊ߬ ، ߏ߬ ߟߎ߫ ߞߊ߬ ߝߋߙߊߥߎ߲߫ ߠߊ߫ ߖߊ߬ߡߊߙߌ ߟߊߓߊ߬ߕߏ߬ ، ߝߋߙߊߥߎ߲߫ ߠߊ߫ ߖߊ߬ߡߊߙߌ ߘߏ߲߬ ߕߎ߲߬ ߕߍ߫ ߞߊ߲ߘߊ߫ ߛߌߟߊ߫ ߞߊ߲߬ ﴿97﴾

‹ ߝߋߙߊߥߎ߲߫ › ߘߌߣߵߊ߬ ߡߌ߬ߙߌ߲߬ߘߌ ߢߍߡߌ߬ߘߊ߫ ߟߐ߬ߓߊ ߟߏ߲ ߸ ߞߊ߬ ߥߴߊ߬ߟߎ߬ ߘߌ߫ ߕߊ ߘߐ߫ ߸ ߦߏ߫ ߓߌߦߊ߲ ߠߎ߫ ߜߍ߲߬ߜߍ߲߬ ߠߊ߫ ߢߊ ߡߍ߲ ߞߊ߬ ߥߊ߫ ߟߊ߬ߡߌ߲߬ ߦߙߐ ، ߟߊ߬ߡߌ߲߬ ߦߙߐ߬ ߖߎ߯ ߘߏ߲߬ ߏ߬ ߘߌ߫ ߥߍ߫ ﴿98﴾

ߏ߬ ߟߎ߫ ߣߐ߬ߝߍ߬ߜߍ߲߫ ߘߊ߫ ߘߊ߲ߞߊ ߟߋ߬ ߟߊ߫ ( ߘߎߢߊ߫ ) ߢߌ߲߬ ߘߐ߫ ߸ ߊ߬ ߣߌ߫ ߟߐ߬ߓߊ ߟߏ߲ ߝߣߊ߫ ߘߐ߫ ߸ ߛߐߟߌߝߋ߲ ߏ߬ ߘߏ߲߬ ߖߎ߯ߡߊ߲߫ ߛߐߓߊ߯ߕߐ ߡߊ߬ ߞߟߋ߫ ﴿99﴾

ߢߌ߲߬ ߠߎ߬ ߦߋ߫ ߛߏ ߟߎ߫ ߖߊ߲߬ߖߏ߲ ߠߎ߬ ߘߏ߫ ߟߋ߬ ߘߌ߫ ، ߊ߲ ߧߴߏ߬ ߟߎ߫ ߟߋ߬ ߘߊ߲߬ߕߍ߰ ߟߴߌ ߦߋ߫ ߣߌ߲߬ ، ߏ߬ ߘߏ߫ ߟߎ߫ ߟߐ߬ߣߴߊ߬ ߢߊ ߡߊ߬ ߡߎߣߎ߲߬ ، ߘߏ߫ ߟߎ߫ ߞߊ߬ߣߍ߲߫ ߠߋ߬ ߞߵߊ߬ߟߎ߫ ߣߐ߭ ߘߐߝߌߘߊ߲߫ ߝߋߎ߫ ﴿100﴾

ߊ߲ ߘߏ߲߬ ߡߊ߫ ߓߊ߰ ߏ߬ ߟߎ߫ ߡߊ߬ ߘߋ߬ ߸ ߓߊ߬ߙߌ߬ ߏ߬ ߟߎ߫ ߟߋ߫ ߓߊ߰ ߘߴߊ߬ߟߎ߫ ߖߘߍ߬ ߡߊ߬ ، ߊ߬ߟߎ߫ ߕߘߍ߬ ߊ߬ߟߎ߫ ߡߊ߰ߙߌ ߡߍ߲ ߠߎ߫ ߓߊ߬ߕߏ߬ ߟߊ߫ ߞߵߊߟߊ߫ ߕߏ߫ ߸ ߏ߬ ߟߎ߬ ߡߊ߫ ߝߏߦߌ߫ ߢߵߊ߬ߟߎ߫ ߡߊ߬ ߌ ߡߊ߰ߙߌ ߟߊ߫ ߖߊ߬ߡߊߙߌ ߣߊ߬ ߕߎߡߊ ߟߊ߫ ، ߏ߬ ߟߎ߫ ߝߊ߲߭ ߡߴߊ߬ߟߎ߬ ߖߘߌ߫ ߝߏߦߌ߬ ߟߊ߫ ߝߏ߫ ߡߊ߬ߞߏ߬ߛߊ ﴿101﴾

ߒ߬ߓߊ߬ ߌ ߡߊ߰ߙߌ ߟߊ߫ ߡߌ߬ߘߊ߬ߟߌ ߦߋ߫ ߕߋ߲߬ ߠߋ߬ ߸ ߣߴߊ߬ ߞߊ߬ ߛߏ߫ ߕߐ߬ߢߍ߰ߟߊ ߟߎ߫ ߡߌ߬ߘߊ߫ ߞߊ߬ߣߌ߲߫ ، ߊ߬ ߟߊ߫ ߡߌ߬ߘߊ߬ߟߌ ߘߏ߲߬ ߘߌߡߌ߲ߣߍ߲߫ ߊ߬ ߜߍ߬ߟߍ߲߬ߡߊ߲߫ ﴿102﴾

ߖߊ߯ߕߋ߬ ߸ ߕߊ߰ߛߌ߬ ߞߏ߫ ߟߋ߬ ߢߌ߲߬ ߘߐ߫ ߟߊߞߌߙߊ߫ ߖߊ߲߰ߞߕߊ ߢߍߛߌߟߊ߲ߢߍߓߊ߮ ߦߋ߫ ߞߏߛߓߍ߫ ، ߏ߬ ߟߋ ߘߏ߲߬ ߦߋ߫ ߡߐ߱ ߟߎ߬ ߟߊߘߍ߬ ߟߏ߲ ߘߌ߫ ߸ ߏ߬ ߟߋ ߦߋ߫ ߛߙߋߦߊ ߟߏ߲ ߝߣߊ߫ ߘߌ߫ ﴿103﴾

ߊ߲ ߘߏ߲߬ ߕߍ߫ ( ߟߏ߲ ) ߏ߬ ߘߏ߲߰ߘߌ߬ ߟߊ߫ ߞߏ߫ ߜߘߍ߫ ߦߋ߫ ߝߏ߫ ߛߕߊ߫ ߦߙߌߞߊߣߍ߲ ﴿104﴾

ߟߏ߲ ߏ߬ ߓߊ߯ ߣߊ߬ ߸ ߣߌߡߊ߫ ߛߌ߫ ߕߍ߫ ߞߎߡߊ߫ ߸ ߣߌ߫ ߊߟߊ߫ ߡߊ߫ ߘߌ߬ߢߍ߬ ، ߞߎ߲߬ߠߊ߲߬ߜߏ߫ ߦߋ߫ ߡߐ߱ ߟߎ߬ ߘߐ߫ ߸ ߞߎ߲߬ߠߊ߲߬ߘߌ߫ ߝߣߊ߫ ߦߴߊ߬ߟߎ߬ ߘߐ߫ ﴿105﴾

ߒ߬ߓߊ߬ ߡߍ߲ ߠߎ߫ ߞߎ߲߬ߠߊ߲߬ߜߏ߬ߦߊ߬ߣߍ߲߫ ߸ ߏ߬ ߟߎ߬ ߥߊߕߐ߫ ߕߊ ߟߋ߬ ߘߐ߫ ߸ ߥߏߙߏ߲ߥߏߙߏ߲߫ ߞߊ߲ ߣߌ߫ ߛߌ߯ߛߌ߯ ߞߊ߲ ߦߴߊ߬ߟߎ߬ ߟߊ߫ ߦߋ߲߬ ߞߘߊߎ߫ ﴿106﴾

ߊ߬ߟߎ߫ ߘߏ߲߬ ߘߎߡߊߕߐ߫ ߦߋ߲߬ ߠߋ߬ ߸ ߝߊ߬ߣߌ߫ ߛߊ߲ ߠߎ߬ ߣߌ߫ ߘߎ߱ ߓߍ߫ ، ߝߏ߫ ߡߍ߲ ߓߴߌ ߡߊ߰ߙߌ ߘߌߦߊ߫ ߘߋ߬ ، ߌ ߡߊ߰ߙߌ ߘߏ߲߬ ߦߋ߫ ߖߘߍ߬ ߛߊ߬ߥߏ߬ ߞߍ߬ߟߊ ߟߋ߬ ߘߌ߫ ﴿107﴾

ߡߍ߲ ߠߎ߫ ߞߏ߬ߣߌ߲ ߞߎ߲߬ߠߊ߬ߘߌߦߊߣߍ߲߫ ߸ ߏ߬ ߟߎ߬ ߥߊߕߐ߫ ( ߡߍ߲ߘߌߦߊ ) ߣߊߞߐ ߟߋ߬ ߘߐ߫ ، ߊ߬ߟߎ߫ ߘߏ߲߬ ߘߎߡߊߕߐ߫ ߦߋ߲߬ ߠߋ߬ ߝߊ߬ߣߌ߫ ߛߊ߲ ߠߎ߬ ߣߌ߫ ߘߎ߱ ߓߍ߫ ، ߝߏ߫ ߡߍ߲ ߓߴߌ ߡߊ߰ߙߌ ߘߌߦߊ߫ ߘߋ߬ ، ߏ߬ ߦߋ߫ ߛߐߟߌ߫ ߟߋ߬ ߘߌ߫ ߡߍ߲ ߕߍ߫ ߓߟߏߕߍ߰ ߟߊ߫ ﴿108﴾

ߒ߬ߓߊ߬ ߌ ߞߊߣߊ߬ ߞߍ߫ ߛߌߞߊ߫ ߛߌ߫ ߘߐ߫ ߢߌ߲߬ ߠߎ߬ ߟߊ߫ ߓߊ߬ߕߏ߬ߕߊ ߟߎ߬ ߟߊ߫ ߞߏߢߊ ߘߐ߫ ߸ ߊ߬ߟߎ߬ ߕߍ߫ ߓߊ߬ߕߏ ߞߍ߫ ߟߊ߫ ߢߊ߫ ߜߘߍ߫ ߡߊ߬ ߝߏ߫ ߊ߬ߟߎ߫ ߝߊ߬ ߟߎ߫ ߕߍ߬ߘߍ߫ ߓߊ߬ߕߏ ߞߍ߫ ߟߊ߫ ߢߊ ߡߍ߲ ߞߘߐ߬ߡߊ߲߫ ، ߒ߬ߠߎ߫ ߘߏ߲߬ ߓߍߣߵߊ߬ߟߎ߫ ߣߌ߭ ߘߝߴߊ߬ߟߎ߬ ߦߋ߫ ߖߐ߫ ߸ ߝߏߦߌ߬ ߕߴߊ߬ ߖߊ߲߬ ﴿109﴾

ߖߊ߯ߕߋ߬ ߸ ߊ߲ ߞߊ߬ ߡߎߛߊ߫ ߛߐ߫ ߟߍߙߊ ߟߊ߫ ، ߊ߬ߟߎ߫ ߞߊ߬ ߢߐ߲߮ ߛߐ߬ߛߐ߫ ߏ߬ ߞߏߢߊ ߘߐ߫ ، ߓߊ߬ߙߌ߬ ߣߌ߫ ߞߎߡߊ߫ ߞߋߟߋ߲߫ ߞߐ߲߰ߣߍ߲ ߕߍ߫ ߞߊ߬ ߝߘߊ߫ ߌ ߡߊ߰ߙߌ ߟߊ߫ ߸ ߛߊ߫ ߞߕߌ ߓߘߊ߫ ߕߍ߰ ߊ߬ߟߎ߬ ߕߍ߫ ، ߊ߬ߟߎ߫ ߘߏ߲߬ ߦߋ߫ ߛߌߞߊ ߖߊ߯ߕߋ ߟߋ߬ ߘߐ߫ ߊ߬ ߞߏߢߊ ߘߐ߫ ߕߋ߲߬ ߛߌߞߊ߫ ﴿110﴾

ߊ߬ߟߎ߬ ߞߋߟߋ߲ߞߋߟߋ߲ߣߊ ߝߋ߲-ߋ-ߝߋ߲߫ ߸ ߌ ߡߊ߰ߙߌ ߘߴߏ߬ ߟߎ߬ ߗߋߥߊߟߌ ߟߎ߬ ( ߛߊ߬ߙߊ ) ߘߝߴߊ߬ߟߎ߬ ߦߋ߫ ߟߋ߬ ߘߍ߯ ، ߓߊߏ߬ ߊ߬ߟߎ߬ ߗߋߥߊߟߌ ߟߎ߫ ߞߟߊ߬ߡߊ߬ߓߊ߮ ߟߋ߬ ﴿111﴾

ߒ߬ߓߊ߬ ߌߟߋ ߌ ߕߋߟߋ߲߫ ߠߋ߬ ߸ ߦߏ߫ ߌ ߖߡߊ߬ߙߌ߬ ߘߊ߫ ߢߊ ߡߍ߲ ߸ ߌ ߣߌ߫ ߡߍ߲ ߓߍ߯ ߕߎ߬ߓߌ߬ ߘߴߌ ߝߍ߬ ، ߞߏ߬ߣߵߊߟߎ߫ ߞߊߣߵߊߟߎ߫ ߘߊ߲߬ߠߊߕߊ߬ߡߌ߲߫ ߘߋ߬ ߸ ߓߊ ߊߟߊ߫ ߢߊ߯ ߊߟߎ߫ ߗߋߥߊߟߌ ߟߎ߬ ߟߊ߫ ﴿112﴾

ߊߟߎ߫ ߞߊߣߊ߬ ߝߊ߲ߞߊ߲߫ ߕߐ߬ߢߍ߰ߒߕߋ ߟߎ߫ ߞߊ߲߬ ߘߋ߬ ߸ ߓߊ ߕߊ ߘߌ߫ ߡߊ߰ ߊߟߎ߫ ߟߴߏ߬ ߘߐ߫ ߟߋ߬ ߘߍ߯ ، ߣߌ߫ ߊߟߊ߫ ߘߏ߲߬ ߕߍ߫ ߸ ߢߌ߲߬ ߜߘߍ߫ ߟߎ߫ ߕߍ߫ ߊߟߎ߫ ߟߊ߫ ߸ ߊߟߎ߫ ߘߏ߲߬ ߕߍߣߊ߫ ߘߍ߬ߡߍ߲߬ ߠߴߏ߬ ߞߐ߫ ﴿113﴾

ߌ ߦߋ߫ ߛߊߟߌ ߟߐ߬ ߕߋ߬ߟߋ ߣߎ߲߫ ߝߌ߬ߟߊ ߣߌ߫ ߛߎ ߡߊ߬ߛߎߘߎ߲ߧߊ ߘߐ߫ ، ߓߊߏ߬ ߢߌ߬ߡߊ ߟߎ߫ ߟߋ߬ ߖߎ߯ߡߊ߲ ߠߎ߬ ߟߊߕߊ߯ ߟߊ߫ ߞߘߎߞߘߎ߫ ، ߒ߬ߓߊ߬ ߏ߬ ߦߋ߫ ߦߟߌߓߌߟߊ߫ ߟߋ߬ ߘߌ߫ ߕߊ߰ߛߟߌ߬ߟߊ ߟߎ߬ ߦߋ߫ ﴿114﴾

ߌߟߋ ߌ ߡߎ߬ߢߎ߲߬ ߖߐ߫ ، ߓߊߏ߬ ߝߋߎ߫ ߊߟߊ߫ ߕߍ߫ ߢߊ߬ߓߊ߮ ߟߎ߫ ߛߊ߬ߙߊ ߕߌߢߍ߫ ߟߊ߫ ﴿115﴾

ߥߟߊߞߏ߫ ߊߟߎ߫ ߢߍ߫ ߝߊ߯ߘߐߞߍ ߟߎ߬ ߘߐ߫ ߡߐ߰ߘߐ߬ߜߍ߬ ߕߌ߮ ߟߎ߫ ߕߘߍ߬ ߝߊߕߊ߲ߕߟߌ ߞߍ߫ ߕߌߢߍߟߌ ߡߊ߬ ߖߡߊ߬ߣߊ ߞߣߐ߫. ( ߞߏ߬ߣߌ߲߬ ߏ߬ ߡߊ߫ ߞߍ߫ ) ߝߏ߫ ߞߋ߬ߟߋ߲߬ߞߋߟߋ߲߫ ، ߊ߲ ߘߏ߲߬ ߞߵߏ߬ ߟߎ߬ ߟߊߞߛߌ߫ ߟߋ߬ ߊ߬ߟߎ߬ ߢߊߝߍ߬ ، ߒ߬ߞߊ߬ ߕߐ߬ߢߍ߰ߒߕߋ ߟߎ߫ ߞߵߊ߬ߟߎ߫ ߕߵߊ߬ߟߎ߬ ߟߊ߫ ߡߍ߲ߘߌߦߊ߫ ߛߐ߬ߘߐ߲߬ߣߍ߲ ߠߎ߫ ߟߋ߬ ߝߍ߬ ، ߞߊ߬ ߞߍ߫ ߞߎ߲߬ߞߏ߬ߕߐ ߟߎ߬ ߘߌ߫ ﴿116﴾

ߌ ߡߊ߰ߙߌ ߘߏ߲߬ ߕߍ߫ ߖߡߊ߬ߣߊ߬ ߛߌ߫ ߛߌߟߊߛߊ߬ ߟߊ߫ ߕߐ߬ߢߍ߮ ߟߊ߫ ߸ ߞߵߊ߬ ߘߏ߲߬ߞߏ ߟߎ߬ ߕߏ߫ ߢߊ߬ߟߌ ߟߊ߫ ﴿117﴾

ߊ߬ ߕߎ߲߬ ߓߴߌ ߡߊ߰ߙߌ ߘߌߦߊ߫ ߸ ߊ߬ ߕߎ߲߬ ߘߌ߫ ߡߐ߱ ߟߎ߬ ߞߍ߫ ߡߊ߲߬ߕߏ߲߬ ߞߋߟߋ߲߫ ߔߋ߫ ߘߌ߫ ، ߓߊ߬ߙߌ߬ ߊ߬ߟߎ߬ ߕߍߣߊ߬ ߝߘߊ߫ ߟߊ߫ ߢߐ߲߯ ߛߐߛߐ ߟߊ߫ ߘߋ߬ ، ﴿118﴾

ߝߏ߫ ߣߴߌ ߡߊ߰ߙߌ ߤߌߣߊ߫ ߘߊ߫ ߡߍ߲ ߠߊ߫ ، ߊ߬ ߘߏ߲߬ ߞߵߊ߬ߟߎ߬ ߘߊ߲߫ ߛߐ߬ߛߐ߬ߟߌ ߏ߬ ߟߋ ߘߐ߫ ߸ ߌ ߡߊ߰ߙߌ ߟߊ߫ ߞߎߡߊ ߓߘߊ߫ ߓߊ߲߫ ߘߝߊ߫ ߟߊ߫ ߸ ߞߏ߫ ߒ ߘߌ߫ ߔߊߦߌߔߊߦߌ ߟߝߊ߫ ߥߐ߬ߞߎߟߐ ߣߌ߫ ߡߐ߱ ߟߎ߬ ߟߊߘߍ߬ߣߍ߲ ߠߊ߫ ߟߋ߬ ߕߘߋ߫ ﴿119﴾

ߊ߲ ߧߋ߫ ߣߌ߲߬ ߞߋߟߋ߲ߞߋߟߋ߲ߣߊ ߟߋ߬ ߘߊ߲߬ߕߍ߰ ߟߴߌ ߦߋ߫ ߞߋߟߊ ߟߎ߫ ߖߊ߲߬ߖߏ߲ ߠߎ߬ ߘߐ߫ ߸ ߊ߲ ߘߴߌ ߛߣߐ߬ߡߍ ߓߊ߲ߓߊ߲߫ ߡߍ߲ ߠߊ߫ ، ߕߎ߬ߢߊ ߟߋ߫ ߘߏ߲߬ ߣߊ߬ߣߴߌ ߡߊ߬ ߟߍߙߊ ߣߌ߲߬ ߞߣߐ߫ ߸ ߊ߬ ߣߌ߫ ߞߊ߬ߥߊ߲߬ߘߌ߬ߟߌ ߣߌ߫ ߖߊ߲߬ߓߌ߬ߟߊ߬ߟߌ ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߋ߫ ﴿120﴾

ߊ߬ ߟߊߛߋ߫ ߘߍ߲߬ߞߣߍ߬ߦߊ߬ߓߊߟߌ ߟߎ߫ ߡߊ߬ ߸ ߞߏ߫ ߊߟߎ߫ ߦߋ߫ ߓߊ߯ߙߊ ߞߍ߫ ߊߟߎ߫ ߕߊ߫ ߞߍߢߊ ߡߊ߬ ߸ ߒ߬ߠߎ߬ ߝߣߊ߫ ߦߋ߫ ߓߊ߯ߙߟߊ ߟߎ߫ ߟߋ߬ ߘߌ߫ ( ߒ߬ ߕߊ߫ ߞߍߢߊ ߡߊ߬) ﴿121﴾

ߊ߬ ߣߌ߫ ߞߏ߫ ߊߟߎ߫ ߦߋ߫ ߡߊ߬ߞߐ߬ߣߐ߲߬ߠߌ߲ ߞߍ߫ ߸ ߒ߬ߠߎ߬ ߝߣߊ߫ ߦߋ߫ ߡߊ߬ߞߐ߬ߣߐ߲߬ߠߌ߲߬ߠߊ ߟߎ߫ ߟߋ߬ ߘߌ߫ ﴿122﴾

ߊߟߊ߫ ߕߊ ߟߋ߬ ߛߊ߲ ߠߎ߬ ߣߌ߫ ߘߎ߱ ߞߏ߫ ߘߏ߲߰ߣߍ߲ ( ߠߎ߬ ) ߘߌ߫ ߸ ߞߏ ߓߍ߯ ߘߏ߲߬ ߠߊߛߊ߬ߦߌ߬ߕߐ߫ ߊ߬ߟߋ ߟߋ߫ ߡߊ߬ ߞߐߘߍ߫ ، ߒ߬ߓߊ߬ ߌ ߦߴߏ߬ ߟߋ ߓߊ߬ߕߏ߬ ߸ ߊ߬ ߣߴߌ ߦߴߌ ߛߍ߲߬ߓߍ߫ ߊ߬ ߟߊ߫ ، ߌ ߡߊ߰ߙߌ ߘߏ߲߬ ߖߊ߲߬ߓߐ߬ߣߍ߲߫ ߕߍ߫ ߊߟߎ߫ ߗߋߥߊߟߌ ( ߟߎ߬ ) ߘߐ߫ ﴿123﴾

ߊ. ߟ. ߙ. ( ߊߟߌߝ. ߟߊ߯ߡ. ߙߊ߯. ) ߢߌ߲߬ ߠߎ߬ ߦߋ߫ ߟߍߙߊ߫ ߘߐߜߍ ߟߝߊߙߌ ߟߎ߫ ߟߋ߬ ߘߌ߫ ﴿1﴾

ߒ߬ߠߎ߫ ߟߋ߫ ߞߊ߬ ߞߎ߬ߙߊ߬ߣߊ ߟߊߖߌ߰ ߘߐ߬ߛߊߙߌ ߘߌ߫ ߊߙߊߓߎ߫ ( ߞߊ߲) ߘߐ߫ ߸ ߛߴߊߟߎ߫ ߘߴߊ߬ ߝߊ߰ߡߎ߲߬ ﴿2﴾

ߊ߲ ߧߋ߫ ߘߐ߬ߝߐ ߟߎ߬ ߘߐ߫ ߢߌ߬ߡߊ ߟߋ߫ ߘߊ߲߬ߕߍ߰ ߟߴߌ ߦߋ߫ ߞߎ߬ߙߊ߬ߣߊ ߣߌ߲߬ ߘߐ߫ ߸ ߊ߲ ߣߵߌ ߦߟߌߘߏ߲߬ ߠߴߏ߬ ߡߍ߲ ߠߊ߫ ߸ ߤߟߴߊ߬ ߓߊ߯ ߕߘߍ߬ ߌ ߖߊ߲߬ ߕߍ߫ ߏ߬ ߘߐ߫ ߞߘߐ߬ߡߊ߲߫ ﴿3﴾

ߕߎ߬ߡߊ ߡߍ߲ ߦߛߎߝߎ߫ ߞߵߊ߬ ߝߐ߫ ߊ߬ ߝߊ߬ ߦߋ߫ ߞߏ߫ ߒ ߝߊ߬ ߸ ߒ ߛߌ߬ߓߏ߬ߣߍ߲߫ ߟߏ߬ߟߏ߬ ߕߊ߲߫ ߣߌ߫ ߞߋߟߋ߲߫ ߣߌ߫ ߕߋ߬ߟߋ ߣߌ߫ ߞߊߙߏ ߟߋ߬ ߟߊ߫ ، ߒ ߞߵߊ߬ߟߎ߬ ߦߋ߫ ߊ߬ߟߎ߬ ߕߌ߲ߓߌߘߌ߲ߣߍ߲߫ ߒ ߧߋ߫ ﴿4﴾

ߏ߬ ߞߊ߲߫ ߞߏ߫ ߒ ߘߋ߲߫ ߸ ߌ ߞߊߣߵߌ ߟߊ߫ ߛߌ߬ߓߏ ( ߣߌ߲߬ ) ߘߐߛߊߙߌ߫ ߌ ߓߊߘߋ߲ ߠߎ߬ ߦߋ߫ ߘߋ߬ ، ߊ߬ߟߎ߬ ߘߌ߫ ߘߊ߬ߓߊߙߌ ߞߴߌ ߟߊ߫ ߏ߬ ߘߐ߫ ، ߓߊߏ߬ ߜߍ߬ߘߍ ߦߋ߫ ߡߐ߱ ߖߎ߯ ߘߐߜߍ ߟߋ߬ ߘߌ߫ ﴿5﴾

ߒ߬ߓߊ߬ ߊ߰ ߕߋ߲߬ ߠߋ߬ ߸ ߌ ߡߊ߰ߙߌ ߓߍߣߵߌ ߛߎߥߊ߲ߘߌ߫ ، ߊ߬ ߣߴߊ߬ ߘߴߌ ߟߊߟߐ߲ߠߌ߲߫ ( ߞߏ߫ ߣߊ߬ߕߐ ) ߞߎߡߊ ߟߎ߬ ߞߘߐߡߊߖߊ߲ ߘߏ߫ ߟߎ߫ ( ߢߊߝߐ ) ߟߊ߫ ، ߊ߬ ߣߴߊ߬ ߘߴߊ߬ ߟߊ߫ ߣߍߡߊ ߘߝߊ߫ ߌ ߡߊ߬ ߸ ߊ߬ ߣߌ߫ ߦߊ߰ߞߎߓߊ߫ ߘߏ߲߬ߞߏ ߟߎ߫ ߡߊ߬ ، ߦߏ߫ ߊ߬ ߞߵߊ߬ ߘߝߊ߫ ߢߊ ߡߍ߲ ߞߘߐ߬ߡߊ߲߫ ߌ ߝߊ߬ ߝߌ߬ߟߊ ߡߊ߬ ߸ ߣߊߟߌ߬ߡߎ߲߫ ߌߓߎ߬ߙߊ߬ߤߌߡߊ߫ ߣߌ߫ ߌߛߌ߬ߤߊ߯ߞߊ߫ ߘߌ߫ ، ߖߊ߯ߕߋ߬ ߸ ߌ ߡߊ߰ߙߌ ߦߋ߫ ߟߐ߲ߠߌ߲ߠߊ߫ ߘߌ߫ ߸ ߊ߬ ߦߋ߫ ߥߘߋ߬ߥߘߋ߬ߟߌ߬ߟߊ߫ ߘߌ߫ ﴿6﴾

ߕߊ߰ߛߌ߬ ߞߏ߬ ߛߌߦߊߡߊ߲߫ ߠߋ߬ ߦߛߎߝߎ߫ ߣߴߊ߬ ߓߊߘߋ߲ ߠߎ߬ ߕߍ ߘߐ߫ ߢߌ߬ߣߌ߲߬ߞߊ߬ߟߌ߬ߟߊ ߟߎ߬ ߦߋ߫ ﴿7﴾

ߊ߬ ߞߐ߬ߘߐ ߟߎ߫ ߟߋ߬ ߞߵߊ߬ ߝߐ߫ ߸ ߞߏ߫ ߦߛߎߝߎ߫ ߣߴߊ߬ ߓߊߘߋ߲ߡߊ߫ ( ߘߐ߮ ) ߟߋ߬ ߘߌߡߴߊ߲ ߝߊ߬ ߦߋ߫ ߞߊ߬ ߕߊ߬ߡߌ߲߫ ߒ߬ߠߎ߫ ߞߊ߲߬ ، ߒ߬ߠߎ߫ ߟߋ߬ ߘߏ߲߬ ߞߊ߫ ߛߌߦߊ߫ ، ߊ߲ ߝߊ߬ ߦߋ߫ ߝߟߌ߬ߓߊ߫ ߟߋ߬ ߘߐ߫ ߏ߬ ߘߌ߫ ߘߋ߬ ﴿8﴾

ߏ߬ ߘߐ߫ ߸ ߊߟߎ߫ ߦߋ߫ ߦߛߎߝߎ߫ ߝߊ߰ ߸ ߥߟߴߊߟߎ߫ ߦߴߊ߬ ߟߊߝߌ߬ߟߌ߫ ߖߡߊ߬ߣߊ ߘߏ߫ ߘߐ߫ ، ߊߟߎ߫ ߝߊ߬ ߢߊ ߘߌ߫ ߓߟߏߡߊߞߵߊߟߎ߫ ߡߊ߬ ߏ߬ ߘߐ߫ ، ߏ߬ ߓߊ߯ ߞߍ߫ ߊߟߎ߫ ߘߌ߫ ߞߍ߫ ߦߛߎߝߎ߫ ߞߐ߫ ߡߌ߬ߙߌ߲߬ߘߌ߬ ߢߌߡߊ߫ ߟߎ߫ ߘߌ߫ ﴿9﴾

ߊ߬ߟߎ߬ ߘߐ߫ ߞߎߡߟߊ ߘߏ߫ ߞߊ߲߫ ߸ ߞߏ߫ ߊߟߎ߫ ߞߊߣߊ߬ ߦߛߎߝߎ߫ ߝߊ߰ ߘߋ߬ ، ߣߴߊߟߎ߫ ߞߍ߫ ߘߊ߫ ߡߍ߲ ߞߍ߫ ߟߊ߫ ߸ ߊߟߎ߫ ߦߴߏ߬ ߞߍ߫ ߊ߬ ߟߊߝߟߌ߬ߣߍ߲ ߘߌ߫ ߞߐ߬ߟߐ߲ ߥߎߟߎ߲ ߠߎ߫ ߟߋ߬ ߘߐ߫ ߛߌߘߌ߲ߎ߲߬ ، ߖߐ߲߰ߛߊ߫ ߕߊ߯ߡߊ߫ ߛߘߍ ߘߏ߫ ߘߴߊ߬ ߛߌߘߌ߲߫ ﴿10﴾

ߊ߬ߟߎ߬ ߥߊ߫ ߘߴߊ߬ ߝߐ߫ ߞߏ߫ ߊ߲ ߝߊ߬ ߸ ߡߋ߬ߘߋ ߌ ߟߊ߫ ߓߏ߲߰ ߌ ߕߍ߫ ߟߊ߫ ߟߊ߫ ߒ߬ߠߎ߬ ߟߊ߫ ߦߛߎߝߎ߫ ߟߊ߫ ߞߏ ߘߐ߫ ߸ ߒ߬ߠߎ߫ ߘߏ߲߬ ߜߎ ߦߴߊ߬ ߟߊߟߌߓߊ߮ ߟߎ߫ ߟߋ߬ ߘߌ߫؟ ﴿11﴾

ߊ߬ ߓߌ߬ߟߵߊ߲ ߝߍ߬ ߛߌߣߌ߲߫ ߸ ߊ߬ ߦߴߊ߬ ߡߊߕߊ߯ߡߊ߫ ߜߍ߲߬ߜߍ߲ ߘߐ߫ ߸ ߊ߬ ߣߴߊ߬ ߦߴߊ߬ ߢߣߊߜߍ߫ ߸ ߊ߲ߠߎ߬ ߦߋ߫ ߞߍ߫ ߊ߬ ߞߣߐ߬ߜߍ߲߬ߓߊ߮ ߟߎ߬ ߘߌ߫ ﴿12﴾

‹ ߊ߬ߟߎ߫ ߝߊ߬ › ߞߊ߲߫ ߸ ߞߏ߫ ߊ߬ ߡߊ߲߫ ߘߌ߫ ߒ ߧߋ߫ ߟߋ߫ ߓߏ߬ ߊߟߎ߫ ߦߋ߫ ߥߴߊ߬ ߘߌ߫ ، ߓߊ ߒ ߧߋ߫ ߛߌߟߊ߲߫ ߠߊ߫ ߟߋ߬ ߥߘߊ ߞߊߣߵߊ߬ ߘߊߥߎ߲߫ ߞߵߊߟߎ߫ ߖߊ߲߬ߓߐߣߍ߲ ߕߏ߫ ߊ߬ ߘߐ߫ ﴿13﴾

ߊ߬ߟߎ߬ ߞߊ߲߫ ߸ ߞߏ߫ ߣߌ߫ ߥߘߊ ߞߵߊ߬ ߘߊߥߎ߲߫ ߒ߬ߠߎ߫ ߖߡߊ߬ߓߊ ߢߣߊ߫ ߸ ߏ ߕߎ߬ߡߊ ߒ߬ߠߎ߫ ߟߋ߫ ߓߣߐ߬ߓߊ߰ߕߐ ߟߎ߬ ߘߌ߫ ߛߊ߫ ߞߍ߬؟ ﴿14﴾

ߊ߬ߟߎ߬ ߥߊߣߍ߲ ߊ߬ ߘߌ߫ ߸ ߊ߬ߟߎ߫ ߞߵߊ߬ߟߎ߬ ߟߊߘߍ߬ ߞߏ߫ ߊ߬ߟߎ߬ ߦߴߊ߬ ߓߌ߬ߟߊ߬ ߟߊ߫ ߞߐ߬ߟߐ߲ ߥߎߟߎ߲ ߠߎ߬ ߘߐ߫ ، ߊ߲ ߞߊ߬ ߦߟߌߘߏ߲ ߞߍ߫ ߊ߬ ߟߊ߫ ߏ߬ ߕߎ߬ߡߊ ߟߋ߬ ߸ ߒ ߞߏ߫ ߌ ߘߌߣߵߊ߬ߟߎ߬ ߟߊ߫ ߞߏߢߊ ߣߌ߲߬ ߖߐ߲ ߠߊߓߐ߫ ߊ߬ߟߎ߫ ߡߊ߬ ߟߏ߲ ߘߏ߫ ߸ ߞߵߊ߬ ߕߘߍ߬ ߊ߬ߟߎ߬ ߦߟߌ߫ ߕߍ߫ ߊ߬ ߟߊ߫ ﴿15﴾

ߊ߬ߟߎ߫ ߣߊ߬ ߘߴߊ߬ߟߎ߫ ߝߊ߬ ߕߘߍ߬ ߥߎ߬ߙߊ ߟߊ߫ ߞߊ߬ߛߌ ߘߌ߫ ﴿16﴾

ߊ߬ߟߎ߬ ߞߊ߲߫ ߞߏ߫ ߊ߲ ߝߊ߬ ߸ ߊ߲ ߕߊ߯ ߘߊ߫ ߓߏ߬ߙߌ߬ ߘߐ߬ߞߢߊ ߟߋ߬ ߟߊ߫ ߸ ߞߊ߬ ߦߛߎߝߎ߫ ߕߏ߫ ߊ߲ ߓߟߏߝߋ߲ ߠߎ߫ ߞߎ߲߬ߠߊ߫ ، ߏ߬ ߞߍ ߥߘߊ ߞߵߊ߬ ߘߊߥߎ߲߫ ، ߌߟߋ ߘߏ߲߬ ߕߍߣߊ߬ ߟߊ߫ ߟߊ߫ ߒ߬ߠߎ߬ ߟߊ߫ ߸ ߤߟߴߊ߲ ߞߍ߫ ߘߊ߫ ߕߎ߬ߢߊ߬ ߟߊ߫ ﴿17﴾

ߊ߬ߟߎ߫ ߣߊ߬ ߘߊ߫ ߥߎߦߊ߫ ߖߋߟߌ ߘߴߊ߬ ߟߊ߫ ߘߙߌ߬ߞߌ ߟߊ߫ ، ߊ߬ߟߎ߫ ߝߊ߬ ߞߊ߲߫ ߞߏ߫ ߒ߬ߒ߬ߒ߯ ߸ ߊߟߎ߫ ߣߌ ߟߎ߫ ߟߋ߬ ߓߘߊ߫ ߣߌ߲߬ ߞߏߢߊ ߘߐߓߍ߲߬ ߕߎ߲߫ ، ߡߎ߬ߢߎ߲ ߠߋ߫ ߞߏ߬ߣߌ߲߬ ߞߊ߫ ߢߌ߲߬ ߸ ߘߍ߲߬ߡߍ߲߬ߠߌ߲ ߘߏ߲߬ ߦߋ߫ ߢߌߣߌ߲ߕߊ ߘߌ߫ ߊߟߊ߫ ߟߋ߬ ߟߊ߫ ߊߟߎ߫ ߟߊ߫ ߡߊ߲߬ߞߕߎ߬ߒ߬ߞߊ߲߬ߠߊ ( ߟߎ߫ ) ߡߊ߬ ﴿18﴾

ߘߊ߬ߡߊ߲߬ߛߊ߫ ߸ ߕߊ߯ߡߊ߫ ߛߘߍ ߘߏ߫ ߣߊ߬ ߘߊ߫ ، ߏ߬ ߟߎ߫ ߞߵߊ߬ߟߎ߬ ߟߊ߫ ߖߌ߫ ߕߟߊ ߞߋߟߦߊ߫ ، ߏ ߣߵߊ߬ ߟߊ߫ ߖߟߎ߬ߝߍ ߟߊߖߌ߰ ߟߊ ߕߋ߲߬ ، ߊ߬ ߞߊ߲߫ ߞߏ߫ ߊ߬ߛߐߍ ߒ ߕߊ߫ ߗߍ߬ߓߊ߬ߟߋ߲߬ߣߍ߲߫߹ ߓߊ߬ߙߌ߬ ߊ߬ߟߎ߫ ߞߵߊ߬ ߟߊ߫ ߞߏ ߜߎ߲߬ߘߎ߫ ߞߵߊ߬ ߞߍ߫ ߞߙߊ߬ߖߊߥߏ ߘߌ߫ ، ߊߟߊ߫ ߘߏ߲߬ ߞߵߊ߬ߟߎ߬ ߗߋߥߊߟߌ ߟߎ߬ ߟߐ߲߫ ﴿19﴾

ߊ߬ߟߎ߫ ߞߵߊ߬ ߝߋ߬ߙߋ߫ ߏ߬ ߟߎ߫ ߡߊ߬ ߛߐ߲߬ߞߐ߬ߣߍ߲߫ ߠߊ߫ ، ߘߙߐߡߍ߫ ߦߙߌߞߕߊ߫ ߘߊ߲ߘߐߣߍ߲߫ ، ߓߊ ߊ߬ߟߎ߫ ߓߊ߲߬ߣߍ߲߫ ߠߋ߫ ߕߍ߬ߘߍ߫ ߊ߬ ߘߐ߫ ߛߍߣߍ߲߬ ߝߋߎ߫ ﴿20﴾

ߡߍ߲ ߞߵߊ߬ ߛߊ߲߬ ߡߌߛߌ߬ߙߊ߲߬ ߸ ߏ߬ ߞߵߊ߬ ߝߐ߫ ߊ߬ ߡߏ߬ߛߏ ߦߋ߫ ߞߏ߫ ߣߌ߲߬ ߠߊߘߌߦߊ߫ ߸ ߛߴߊ߬ ߘߴߊ߲ ߡߎߣߊ߲ߝߊ߲߫ ߸ ߥߟߴߊ߲ ߧߴߊ߬ ߞߍ߫ ߒ߬ ߘߋ߲߫ ߘߌ߫ ، ߒ߬ߓߵߊ߲ ߞߊ߬ ߦߛߎߝߎ߫ ߡߝߊ߫ ߖߡߊ߬ߣߊ ߞߣߐ߫ ߕߋ߲߬ ߠߋ߬ ߸ ߛߴߊ߲ ߘߌߣߵߊ߬ ߟߊߟߐ߲ߠߌ߲߫ ( ߞߏ߫ ߣߊ߬ߕߐ ) ߞߎߡߊ ߟߎ߬ ߞߘߐߡߊߖߊ߲ ߘߏ߫ ߟߎ߫ ( ߢߊߝߐ ) ߟߊ߫ ، ߊߟߊ߫ ߘߏ߲߬ ߛߋ߫ ߟߴߊ߬ ߟߊ߫ ߞߏ߫ ߞߍߕߊ ߟߊ߫ ߟߋ߬ ߛߎߋ߯ ߸ ߓߊ߬ߙߌ߬ ߡߐ߱ ߝߊ߲߬ߓߊ ߟߋ߬ ߕߴߏ߬ ߟߐ߲߫ ߠߊ߫ ﴿21﴾

ߕߎ߬ߡߊ ߡߍ߲ ߊ߬ ߛߋ߫ ߘߴߊ߬ ߟߊ߫ ߞߐ߮ ߥߊ߯ߕߌ ߡߊ߬ ߸ ߊ߲ ߞߵߊ߬ ߛߐ߫ ߞߕߌߦߊ ( ߥߘߋ߬ߥߘߋ߬ߟߌ ) ߣߌ߫ ߟߐ߲ߠߌ߲ ߠߊ߫ ، ߒ߬ߓߊ߬ ߊ߲ ߧߋ߫ ߢߊ߬ߓߊ߮ ߟߎ߫ ߛߙߊ߬ ߟߊ߫ ߕߋ߲߬ ߠߋ߬ ﴿22﴾

ߊ߬ ߦߋ߫ ߡߏ߬ߛߏ ߡߍ߲ ߠߊ߫ ߓߏ߲ ߠߊ߫ ߸ ߏ ߣߊ߬ ߘߴߊ߬ ߟߊߢߌߣߌ߲߫ ߊ߬ ߖߍ߬ߘߍ ߡߊ߬ ߸ ߞߊ߬ ߘߊ ߟߎ߬ ߕߎ߲߯ ، ߞߵߊ߬ ߝߐ߫ ߊ߬ ߦߋ߫ ߞߏ߫ ߤߍ߲߬ ، ߒ ߓߘߊ߫ ߒ ߖߘߍ߬ ߘߴߌ ߡߊ߬ ، ߊ߬ ߞߵߊ߬ ߖߋ߬ߓߌ߬ ߞߏ߫ ߊߟߊ߫ ߒ ߕߊ߲߬ߞߊ߲߫߹ ߓߊ ߒ ߡߊߕߌ߮ ߓߘߊ߫ ߒ ߠߊߘߌߦߊ߫ ߘߋ߬ ، ߊ߬ ߘߏ߲߬ ߸ ߕߐ߬ߢߍ߰ߒߕߋ ߟߎ߬ ߕߍߣߊ߬ ߛߎߘߊ߲߫ ߠߊ߫ ﴿23﴾

ߡߏ߬ߛߏ ߞߵߊ߬ ߣߌ ߟߴߊ߬ ߞߊ߲߬ ، ߊ߬ ߝߣߊ߫ ߞߵߊ߬ ߣߌ ߟߊ߫ ߡߏ߬ߛߏ ߞߊ߲߬ ߸ ߝߏ߫ ߊ߬ ߣߵߊ߬ ߡߊ߰ߙߌ ߟߊ߫ ߘߊ߬ߟߎ ߦߋ ߡߍ߲ ߞߍ߫ ߟߊ߫ ، ߊ߲ ߘߏ߲߬ ߞߵߏ߬ ߟߊߥߟߌ߬ ߡߍ߲ ߡߊ߬ ߸ ߒ ߞߏ߫ ߛߴߊ߲ ߘߴߊ߬ ߡߊߓߐ߫ ߖߎ߯ߡߊ߲ ߣߌ߫ ߖߊߕߐߦߊ ߟߊ߫ ، ߓߊߏ߬ ߊ߲ ߠߊ߫ ߖߐ߲߬ ߓߎ߰ߓߎ߰ߣߍ߲ ߠߎ߬ ߘߏ߫ ߟߋ߬ ﴿24﴾

ߊ߬ߟߎ߫ ߝߌ߬ߟߊ ߥߊ߫ ߘߊ߫ ߞߐ߲߰ ߘߊ ߡߊ߬ ߡߍ߲ߞߍ߭ ߸ ߡߏ߬ߛߏ ߞߵߊ߬ ߟߊ߫ ߘߙߌ߬ߞߌ ߝߙߴߊ߬ ߞߕߐ߫ ، ߊ߬ߟߎ߫ ߞߵߊ߬ ߛߏߕߌ߮ ߕߘߍ߬ ߘߊ ߟߊ߫ ، ߡߏ߬ߛߏ ߞߊ߲߫ ߞߏ߫ ߡߍ߲ ߓߊ߯ ߛߐ߲߬ ߖߎ߮ ߟߐ߬ ߌ ߟߊ߫ ߘߋ߲ߓߦߊ ߡߊ߬ ߸ ߏ߬ ߛߊ߬ߙߊ ߦߋ߫ ߡߎ߲߬ ߘߌ߫؟ ߸ ߝߏ߫ ߞߵߊ߬ ߓߌ߬ߟߊ߬ ߥߛߎ ߟߊ߫ ߞߍ߬ ߸ ߥߟߊ߫ ߞߊ߬ ߖߊ߲߰ߞߕߊ߬ ߘߌߡߌ߲ߣߍ߲߫ ߟߴߊ߬ ߞߊ߲߬߹ ﴿25﴾

ߦߛߎߝߎ߫ ߞߊ߲߫ ߸ ߞߏ߫ ߊ߬ߟߋ ߟߋ߫ ߞߊ߬ ߒ ߠߊߢߌߣߌ߲߫ ߒ ߖߍ߬ߘߍ ߡߊ߬ ߞߟߋ߫ ، ߛߙߋߦߊ ߟߊߟߐ߬ ߘߊ߫ ߡߏ߬ߛߏ ߖߍ߬ߘߍ ߓߘߊߡߐ߮ ߘߏ߫ ߓߟߏ߫ ߸ ߞߏ߫ ߣߴߊ߬ ߟߊ߫ ߘߙߌ߬ߞߌ ߝߙߊߣߍ߲߫ ߞߍ߫ ߘߴߊ߬ ߢߍߕߐ߫ ߸ ߕߎ߬ߢߊ ߡߏ߬ߛߏ ߟߋ߫ ߝߍ߬ ߏ߬ ߘߐ߫ ߸ ߊ߬ߟߋ ߟߋ߬ ߥߎߦߊ߫ ߕߌ߮ ߘߌ߫ ﴿26﴾

ߣߴߊ߬ ߟߊ߫ ߘߙߌ߬ߞߌ ߘߏ߲߬ ߝߙߊߣߍ߲߫ ߞߍ߫ ߘߴߊ߬ ߞߕߐ߫ ߸ ߥߎߦߊ ߡߏ߬ߛߏ ߟߋ߫ ߝߍ߬ ߏ߬ ߘߐ߫ ߸ ߊ߬ߟߋ ߟߋ߫ ߕߎ߬ߢߊ߬ ߕߌ߮ ߘߌ߫ ﴿27﴾

ߊ߬ ߣߵߊ߬ ߟߊ߫ ߘߙߌ߬ߞߌ ߝߙߊߣߍ߲ ߦߋ߫ ߟߴߊ߬ ߞߕߐ߫ ߸ ߊ߬ ߞߊ߲߫ ߞߏ߫ ߣߌ߲߬ ߦߴߊߟߎ ߡߏ߬ߛߏ ߟߎ߫ ߘߊ߬ߓߊߙߌ ߘߏ߫ ߟߋ߬ ߘߌ߫ ߓߏ߬ ߸ ߓߊ ߊߟߎ߫ ߘߊ߬ߓߊߙߌ ߓߏ߲߬ߓߊ߬ߓߊ ߟߋ߬ ﴿28﴾

ߞߏ߫ ߤߍ߲߬ ߌߟߋ߬ ߦߛߎߝߎ߫ ߸ ߌߟߋ ߌ ߞߐߘߏ߲߬ ߞߏ ߢߌ߲߬ ߠߊ߫ ، ߌߟߋ ߡߏ߬ߛߏ ߦߋ߫ ߦߝߊ߬ ߢߌߣߌ߲ ߞߴߌ ߖߟߎ߬ߡߎ߲ ߠߊ߫ ، ߓߊ ߌߟߋ ߟߋ߫ ߝߎ߬ߕߎ߲߬ߕߌ߬ߟߊ ߟߎ߬ ߘߏ߫ ߘߌ߫ ﴿29﴾

ߡߏ߬ߛߏ ߟߎ߫ ߞߵߊ߬ ߝߐ߫ ߘߎ߱ ߞߣߐ߫ ߸ ߞߏ߫ ߛߌ߬ߘߌ߲߬ߞߊ߲ ߡߏ߬ߛߏ ߟߋ߫ ߣߵߊ߬ ߟߊ߫ ߓߏ߲ߠߊߘߋ߲ ߟߊߢߌߣߌ߲߫ ߠߴߊ߬ ߖߍ߬ߘߍ ߡߊ߬ ߸ ߞߊ߬ ߤߌߟߍ߫ ߏ߬ ߝߍ߬ ߡߍߣߍ߲ߎ߲߫ ، ߊ߲ߠߎ߬ ߢߊ߯ ߊ߬ ߟߊ߫ ߝߟߌ߬ ߘߐ߬ߜߍ߫ ߟߋ߬ ߘߐ߫ ߣߌ߲߬ ߘߋ߬ ﴿30﴾

ߊ߬ ߣߵߏ߬ ߟߎ߬ ߟߊ߫ ߡߊ߬ߓߙߎ߬ߕߟߌ߬ ߞߊ߲ ߡߍ߲߫ ߠߊ ߸ ߊ߬ ߞߊ߬ ߞߋߟߊ ߟߐ߬ ߊ߬ߟߎ߫ ߡߊ߬ ߸ ߞߊ߬ ߛߍ߲߬ߓߍ߬ߟߊ߲߬ ߘߐߓߍ߲߬ ߊ߬ߟߎ߬ ߦߋ߫ ، ߞߊ߬ ߡߎ߬ߙߎ ߘߏ߲߬ ߊ߬ ߞߋ߬ߟߋ߲߬ߞߋ߬ߟߋ߲߬ߣߊ ߓߟߏ߫ ߸ ߞߵߊ߬ ߝߐ߫ ( ߦߛߎߝߎ߫ ߡߊ߬ ) ߸ ߞߏ߫ ߓߐ߫ ߌ ߦߋ߫ ߥߴߊ߬ߟߎ߬ ߢߊߞߘߐ߫ ߛߊ߫ ، ߊ߬ߟߎ߬ ߢߊ ߟߴߊ߬ ߞߊ߲߬ ߸ ߊ߬ߟߎ߬ ߞߓߊ߫ ߘߴߊ߬ ߟߊ߫ ߓߊߞߍ߫ ، ߊ߬ߟߎ߫ ߞߵߊ߬ߟߎ߬ ߕߍ߮ ߟߎ߬ ߘߐߢߋߙߋ߲ߞߎ߫ ߸ ߞߵߊ߬ ߝߐ߫ ߞߏ߫ ߤߋ߯ߦߌ߬ ߸ ߊߟߊ߫ ߛߋߣߍ߲߫߹ ߣߌ߲߬ ߕߍ߫ ߊߘߡߊ߫ ߘߌ߫ ߸ ߣߌ߲߬ ߕߍ߫ ߝߏߦߌ߬ ߘߌ߫ ߝߏ߫ ߞߋ߲ߛߐ߲߫ ( ߗߋ߲߰ ) ߞߊ߬ߡߙߊ߬ߒߞߋ ﴿31﴾

ߊ߬ߟߋ߬ ߡߏ߬ߛߏ ߞߊ߲߫ ߞߏ߫ ߒ߬ߓߵߊߟߎ߫ ߣߊ߬ ߒ ߖߙߊ߬ߞߌ߬ ߟߊ߫ ߡߍ߲ ߠߊ߫ ߞߏ ߘߐ߫ ߖߐ߫ ߸ ߏ߬ ߟߋ ߣߌ߲߬ ، ߒߠߋ ߟߋ߬ ߜߎ ߞߵߊ߬ ߟߊߢߌߣߌ߲߫ ߊ߬ ߖߍ߬ߘߍ ߡߊ߬ ߸ ߊ߬ ߘߏ߲߬ ߞߵߊ߬ ߖߘߍ߬ ߟߊߕߊ߲߬ߞߊ߫ ، ߓߊ߬ߙߌ߬ ߒ ߧߴߊ߬ ߞߐ߫ ߡߍ߲ ߘߐ߫ ߣߴߊ߬ ߡߴߏ߬ ߞߍ߫ ߸ ߊ߬ ߘߌ߫ ߘߏ߲߬ ߥߛߎ ߟߊ߫ ߸ ߊ߬ ߣߴߊ߬ ߘߌ߫ ߞߍ߫ ߘߐ߯ߦߊߓߊ߯ߕߐ ߟߎ߬ ߘߏ߫ ߘߌ߫ ﴿32﴾

(ߦߛߎߝߎ߫ ߘߎߓߊ߫ ߘߊ߫ ߞߏ߫ ) ߒ ߡߊ߰ߙߌ ߸ ߊ߬ߟߎ߬ ߦߋ߫ ߒ ߞߟߌ߫ ߟߊ߫ ߡߍ߲ ߡߊ߬ ߣߌ߲߬ ߸ ߥߛߎ߫ ( ߟߊ߫ ߘߏ߲ ) ߠߋ߬ ߘߌߡߊ߲߫ ߒߠߋ ߦߋ߫ ߏ߬ ߘߌ߫ ߸ ߣߴߌ ߘߏ߲߬ ߡߴߊ߬ߟߎ߬ ߟߊ߫ ߘߊ߬ߓߊߙߌ ߞߎ߲߬ߓߐ߫ ߒ ߞߊ߲߬ ߸ ߒ ߘߌ߫ ߤߌߟߍ߫ ߊ߬ߟߎ߫ ߝߍ߬ ߸ ߞߊ߬ ߒ ߞߍ߫ ߞߏߙߏ߲ߧߊ߫ ߞߍߟߊ ߟߎ߬ ߘߏ߫ ߘߌ߫ ﴿33﴾

ߊ߬ ߡߊ߰ߙߌ ߞߵߊ߬ ߟߊ߫ ߘߎߓߊ ߏ߬ ߟߋ ߟߊߓߌ߫ ߸ ߞߊ߬ ߡߏ߬ߛߏ ߟߎ߫ ߘߊ߬ߓߊߙߌ ߞߎ߲߬ ߓߐ߫ ߊ߬ ߞߊ߲߬ ߝߋߎ߫ ߸ ߓߊߏ߬ ߊߟߊ߫ ߟߋ߬ ߡߍ߲ߠߌ߲ߠߊ߫ ߟߐ߲ߠߌ߲ߠߊ ߘߌ߫ ﴿34﴾

ߊ߬ߟߎ߫ ߣߊ߬ ߘߴߊ߬ ߝߊ߰ߡߎ߲߬ ( ߊ߬ ߟߊߜߍ ) ߘߊ߬ߟߎ ߟߎ߬ ߦߋߣߍ߲ ߞߐ߫ ߸ ߞߏ߫ ߞߵߊ߬ ߘߏ߲߬ ߥߛߎ ߟߊ߫ ߡߎߣߎ߲߬ ߛߊߣߌ߬ ߥߊ߯ߕߌ߫ ߕߍ߫ ﴿35﴾

ߝߎߣߎ߲ߞߋ߫ ߝߌ߬ߟߊ߫ ߘߏ߲߬ ߘߴߊ߬ ߝߍ߬ ߥߛߎ ߟߊ߫ ߸ ߏ߬ ߞߋߟߋ߲ ߞߊ߲߫ ߊ߬ ߡߊ߬ ߸ ߞߏ߫ ߒ ߛߌ߬ߓߏ߬ߣߍ߲߬ ߒ ߧߋ߫ ߘߐ߬ߟߐ ߘߐߓߌߘߌ߲ ߞߊ߲߬ ، ߊ߬ ߕߐ߬ ߞߋߟߋ߲ ߞߊ߲߫ ߸ ߞߏ߫ ߒߠߋ ߛߌ߬ߓߏ߬ߣߍ߲߫ ߠߋ߬ ߓߙߎߘߍ߯ ߘߏߣߌ߲ ߦߋ߫ ߒ ߞߎ߲߬ ߸ ߞߐ߬ߣߐ ߟߎ߬ ߦߋ߫ ߘߏ߫ ߘߊߥߎ߲߫ ߠߴߏ߬ ߘߐ߫ ߛߐ߲߬ ، ߛߌ߬ߓߏ ߏ߬ ߟߎ߫ ߝߊ߬ߛߊߙߌ ߝߐ߫ ߒ߬ ߧߋ߫ ߖߊ߰ߣߌ߫ ، ߓߊ ߊ߲ߠߎ߬ ߢߊ߯ ߌ ߟߊ߫ ߡߐ߰ ߢߌߡߊ ߟߎ߬ ߘߏ߫ ߟߋ߬ ߘߌ߫ ﴿36﴾

‹ ߦߛߎߝߎ߫ › ߞߊ߲߫ ߸ ߞߏ߫ ߛߎ߬ߡߊ߲߬ ߛߌ߫ ߕߍߣߵߊߟߎ߫ ߡߵߊߟߎ߫ ߝߌ߬ߟߊ ߓߊߟߏ ߘߌ߫ ߸ ߝߏ߫ ߒ ߧߴߏ߬ ߛߎ߮ ߝߐ߫ ߊߟߎ߫ ߦߋ߫ ߡߎߣߎ߲߬ ߸ ߞߊ߬ ߞߐ߲߰ ߊ߬ ߣߊ߭ ߢߍ߫ ߊߟߎ߫ ߡߊ߬ ، ߒ߬ߓߊ߬ ߒߠߋ ߡߊ߰ߙߌ ߣߊ߬ ߒ ߠߊߟߐ߲ߠߌ߲߫ ߠߊ߫ ߞߏ ߡߍ߲ ߠߎ߬ ߟߊ߫ ߸ ߏ߬ ߟߎ߬ ߘߏ߫ ߟߴߏ߬ ߘߌ߫ ߸ ߓߊߏ߬ ߒߠߋ ߣߊ߬ ߡߌ߬ߙߌ߲߬ߘߌ߬ ߟߎ߫ ߟߋ߬ ߟߊ߫ ߣߊߡߎ߲ ߕߏ߫ ߟߊ߫ ߦߋ߲߬ ߸ ߡߍ߲ ߠߎ߬ ߕߍ߫ ߘߍ߲߬ߞߣߍ߬ߦߊ߬ ߟߴߊߟߊ߫ ߡߊ߬ ߸ ߊ߬ ߣߴߊ߬ߟߎ߫ ߓߊ߲߬ߣߍ߲߬ ߟߊߞߌߙߊ߫ ߞߏ ߡߊ߬ ﴿37﴾

ߒ ߞߊ߬ ߒ ߝߊ߬ ߟߎ߫ ߟߋ߬ ߟߊ߫ ߣߊߡߎ߲ ߠߊߓߊ߬ߕߏ߬ ߸ ߣߊߟߌ߬ߡߎ߲߫ ߌߓߎ߬ߙߊ߬ߤߌߡߊ߫ ߣߌ߫ ߌߛߌ߬ߤߊ߯ߞߊ߫ ߣߌ߫ ߦߊ߰ߞߎߓߊ߫ ߘߌ߫ ، ߊ߬ ߕߍ߫ ߓߍ߲߬ ߒ߬ߠߎ߫ ߡߊ߬ ߊ߲ ߧߋ߫ ߝߏߦߌ߫ ߝߙߊ߬ ߊߟߊ߫ ߡߊ߬ ، ߏ߬ ߘߏ߲߬ ߦߴߊߟߊ߫ ߟߊ߫ ߢߊ߬ߒߡߊ߭ ߘߏ߫ ߟߋ߬ ߘߌ߫ ߒ߬ߠߎ߫ ߞߊ߲߬ ߸ ߊ߬ ߣߌ߫ ߡߐ߱ ߓߍ߯ ߞߊ߲߬ ، ߓߊ߬ߙߌ߬ ߡߐ߱ ߝߊ߲߬ߓߊ ߟߋ߬ ߕߍ߫ ߞߏߢߌߡߊߟߐ߲߫ ߠߊ߫ ﴿38﴾

ߞߏ߫ ߒ ߥߛߎߟߊߢߐ߲߯ ߝߌ߬ߟߊ ߸ ߦߊ߯ߟߊ߫ ߡߊ߰ߙߌ߬ ߛߌߦߊߡߊ߲߫ ߓߐߣߍ߲߫ ߢߐ߲߰ߡߊ ߟߎ߬ ߸ ߏ߬ ߟߎ߫ ߟߋ߫ ߝߌ߬ߛߊ߫ ߓߊ߬ ߥߟߴߊߟߊ߫ ߞߎ߲߬ߞߋߟߋ߲߫ ߞߘߊߡߊߟߌߟߊ؟ ﴿39﴾

ߒ߬ߓߵߊߟߎ߫ ߕߍ߫ ߝߏߦߌ߫ ߓߊ߬ߕߏ߬ ߟߊ߫ ߞߵߊߟߊ߫ ߕߏ߫ ߝߏ߫ ߕߐ߮ ߟߎ߬ ߸ ߊߟߎ߫ ߣߴߊߟߎ߫ ߝߊ߬ ߟߎ߫ ߣߊ߬ ߡߍ߲ ߠߎ߬ ߕߐ߯ߟߊ߫ ߟߊ߫ ، ߞߵߊ߬ ߕߘߍ߬ ߊߟߊ߫ ߡߴߊ߬ߟߎ߫ ߘߊ߬ߟߎ߬ ߛߌ߫ ߟߊߖߌ߰ ، ߞߕߌ ߘߏ߲߬ ߕߍ߫ ߝߏߦߌ߬ ߕߊ߫ ߘߌ߫ ߝߏ߫ ߊߟߊ߫ ، ߏ ߣߊ߬ ߖߡߊ߬ߙߌ߬ߟߌ ߞߍ߫ ߟߊ߫ ߞߏ߫ ߊߟߎ߫ ߞߊߣߊ߬ ߝߏߦߌ߫ ߓߊ߬ߕߏ߬ ߝߏ߫ ߊ߬ߟߋ߬ ، ߓߊ ߏ߬ ߟߋ ߘߌ߯ߣߊ߫ ߕߋߟߋ߲ߣߍ߲ ߘߌ߫ ، ߓߊ߬ߙߌ߬ ߡߐ߱ ߝߊ߲߬ߓߊ ߟߋ߬ ߕߴߏ߬ ߟߐ߲߫ ߠߊ߫ ﴿40﴾

ߞߏ߫ ߒ ߥߛߎߟߊߢߐ߲߯ ߝߌ߬ߟߊ ߸ ߊߟߎ߫ ߝߌ߬ߟߊ ߞߋߟߋ߲ ߸ ( ߏ߬ ߟߊ߫ ߛߌ߬ߓߏ ߞߘߐ ߟߋ߬ ߞߏ߫ ) ߏ߬ ߘߌߣߵߊ߬ ߡߊߕߌ߮ ߟߊߡߌ߲߬ ߘߐ߬ߟߐ ߟߊ߫ ( ߞߏߞߎߘߊ߫ ) ، ߊ߬ ߕߐ߬ ߞߋߟߋ߲ ߛߊ߫ ߸ ( ߏ߬ ߕߊ ߞߘߐ ߟߋ߬ ߞߏ߫ ) ߏ߬ ߘߌߣߊ߬ ߓߊߙߊ߲ߕߏ߫ ߸ ߞߐ߬ߣߐ ߟߎ߬ ߘߌ߫ ߘߏ߫ ߘߊߥߎ߲߫ ߊ߬ ߞߎ߲߭ ߘߐ߫. ߞߏߢߊ ߓߘߊ߫ ߓߊ߲߫ ߟߊߕߍ߰ ߟߊ߫ ߸ ߊߟߎ߫ ߣߊ߬ ߢߌ߬ߣߌ߲߬ߞߊ߬ߟߌ ߞߍ߫ ߟߊ߫ ߡߍ߲ ߘߐ߫ ﴿41﴾

ߦߛߎߝߎ߫ ߞߵߊ߬ ߖߌ߰ ߞߏ߫ ߡߍ߲ ߞߛߌߕߐ߫ ߏ߬ ߝߌ߬ߟߊ ߘߐ߫ ߸ ߊ߬ ߞߵߊ߬ ߝߐ߫ ߏ߬ ߦߋ߫ ߸ ߞߏ߫ ߌ ߦߋ߫ ߒ ߞߏߝߐ߫ ߌ ߡߊߕߌ߮ ߦߋ߫ ، ߓߊ߬ߙߌ߬ ߜߍ߬ߘߍ ߞߵߊ߬ ߟߊߢߌ߬ߣߴߊ߬ ߖߍ߬ߘߍ ߡߊ߰ߙߌ ߞߏߝߐ ߞߐ߫ ، ߏ߬ ߞߍ ߦߛߎߝߎ߫ ߡߍ߲߫ ߘߊ߫ ߥߛߎ ߟߊ߫ ߛߊ߲߬ ߘߊ߲ߘߐ߫ ߞߘߐ߫ ﴿42﴾

ߡߊ߲߬ߛߊ ߣߊ߬ ߘߴߊ߬ ߝߐ߫ ߸ ߞߏ߫ ߒ ߛߌ߬ߓߏ߬ߣߍ߲߫ ߣߛߌ߬ߡߛߏ߫ ߕߟߐ߬ߣߍ߲߬ ߥߐߙߐ߲ߥߌ߬ߟߊ߬ ߟߊ߫ ߸ ߓߙߊߣߍ߲߫ ߥߐߙߐ߲ߥߌ߬ߟߊ߬ ߦߴߏ߬ ߟߎ߬ ߘߊߥߎ߲ ߞߊ߲߬ ، ߊ߬ ߣߌ߫ ߕߌ߲ߛߐ߲߫ ߘߏ߲ߓߏ߫ ߥߐߙߐ߲ߥߌ߬ߟߊ߬ ( ߝߣߊ߫ ) ߟߊ߫ ، ߊ߬ ߣߌ߫ ߘߏ߫ ߜߘߍ߫ ߟߎ߫ ߟߊ߫ ߸ ߏ߬ ߟߎ߫ ߖߊ߬ߣߍ߲ ߦߋ߫ ، ߤߍ߲߬ ߊߟߎ߬ ߞߏߟߊߕߍ߮ ߟߎ߬ ߸ ߊߟߎ߫ ߦߋ߫ ߒ ߖߋ߬ߓߌ߬ ߒ ߠߊ߫ ߛߌ߬ߓߏ ߣߌ߲߬ ߞߘߐ ߟߊ߫ ߞߟߋ߫ ߸ ߣߴߊߟߎ߫ ߞߍ߫ ߘߊ߫ ߛߌ߬ߓߏ߬ ߝߛߊ߬ߙߌ߬ߟߊ߫ ߟߎ߫ ߘߌ߫؟ ﴿43﴾

ߏ߬ ߟߎ߬ ߞߊ߲߫ ߞߏ߫ ߛߌ߬ߓߏ߬ ߞߙߌߞߙߊ ߟߎ߫ ߟߋ߬ ߣߌ߲߬ ، ߒ߬ߠߎ߫ ߘߏ߲߬ ߡߊ߫ ߛߌ߬ߓߏ߬ ߞߙߌߞߙߊ ߟߎ߫ ߝߊ߬ߛߊߙߌ߫ ߟߐ߲߫ ﴿44﴾

ߡߍ߲ ߞߛߌ߫ ߘߊ߫ ߥߛߎ߫ ߟߊ߫ ߡߐ߯ ߝߌ߬ߟߊ ߘߐ߫ ߸ ߏ ߞߵߊ߬ ߛߌߡߊ߫ ߥߊ߯ߕߌ߫ ߞߎߘߎ߲߫ ߞߐ߫ ߸ ߞߵߊ߬ ߝߐ߫ ߞߏ߫ ߒߠߋ ߘߴߊߟߎ߫ ߞߌ߬ߓߊ߬ߙߏ߫ ߊ߬ ߝߊ߬ߛߊߙߌ ߟߊ߫ ߸ ߊߟߎ߫ ߦߋ߫ ߒߠߋ ߞߋߟߦߊ߫ ﴿45﴾

(ߏ߬ ߕߊ߯ ߘߴߊ߬ ߝߐ߫ ߞߏ߫ ) ߦߛߎߝߎ߫ ߸ ߌߟߋ߬ ߕߎ߬ߢߊ߬ ߕߌ߮ ߸ ߊ߲ ߖߋ߬ߓߌ߬ ߣߛߌ߬ߡߛߏ߫ ߕߟߐ߬ߣߍ߲߬ ߥߐߙߐ߲ߥߌ߬ߟߊ߬ ( ߟߊ߫ ߛߌ߬ߓߏ ) ߘߐ߫ ߸ ߓߙߊߣߍ߲߫ ߥߐߙߐ߲ߥߌ߬ߟߊ߬ ߦߴߏ߬ ߟߎ߬ ߘߊߥߎ߲ ߞߊ߲߬ ، ߊ߬ ߣߌ߫ ߕߌ߲ߛߐ߲߫ ߘߏ߲ߓߏ߫ ߥߐߙߐ߲ߥߌ߬ߟߊ߬ ߟߊ߫ ، ߊ߬ ߣߌ߫ ߘߏ߫ ߜߘߍ߫ ߟߎ߫ ߟߊ߫ ߸ ߏ߬ ߟߎ߫ ߖߊ߬ߣߍ߲ ߦߋ߫ ، ( ߊ߲ ߖߋ߬ߓߌ߫ ߏ߬ ߟߎ߬ ߘߐ߫ ) ߸ ߛߊ߫ ߒ ߘߌ߫ ߛߊ߬ߦߌ߫ ߡߐ߱ ߟߎ߫ ߡߊ߬ ߸ ߛߴߊ߬ߟߎ߬ ߘߴߏ߬ ߟߐ߲߫ ﴿46﴾

‹ ߦߛߎߝߎ߫› ߞߊ߲߫ ߸ ߞߏ߫ ߊߟߎ߫ ߦߋ߫ ߛߍ߬ߣߍ ߞߍ߫ ߟߊ߫ ߛߊ߲߬ ߥߐߙߐ߲ߥߌ߬ߟߊ߫ ߕߎ߲߰ߣߍ߲߫ ߢߐ߲߰ߠߊ߫ ߟߋ߬ ߞߘߐ߫ ، ߊߟߎ߫ ߓߊ߯ ߡߍ߲ ߞߊ߬ ߏ߬ ߘߐ߫ ߸ ߊߟߎ߫ ߦߴߏ߬ ߕߏ߫ ߊ߬ ߕߌ߲ߛߐ߲ ߠߊ߫ ، ߝߏ߫ ߊߟߎ߫ ߓߊ߯ ߞߍ߫ ߕߜߋߣߍ߲ ߡߍ߲ ߘߊߥߎ߲߫ ߠߊ߫ ﴿47﴾

ߏ߬ ߟߋ ߞߐ߫ ߸ ߛߊ߲߬ ߞߐ߯ߟߐߡߊ߫ ߥߐߙߐ߲ߥߌ߬ߟߊ߬ ߘߌ߫ ߣߊ߬ ߸ ߏ߬ ߟߎ߬ ߘߴߊߟߎ߫ ߟߊ߫ ߢߍߛߌ߯ ߘߐߓߍ߲߬ߣߍ߲ ߓߍ߯ ߡߍ߬ߡߍ߬ ߸ ߝߏ߫ ߊߟߎ߫ ߦߋ߫ ߕߜߋߣߍ߲ ߡߍ߲ ߠߊߡߙߊ߬ ߟߊ߫ ﴿48﴾

ߒ߬ߓߊ߬ ߛߊ߲߬ ߜߘߍ߫ ߘߌ߫ ߣߊ߬ ߏ߬ ߞߐ߫ ߛߊ߫ ߸ ߡߐ߱ ߟߎ߬ ߘߌ߫ ߛߊ߲ߖߌߦߊ߫ ߡߍ߲ ߘߐ߫ ߸ ߊ߬ ߣߴߊ߬ߟߎ߬ ߘߌ߫ ߘߐ߬ߓߌ߬ߘߌ߲߬ߠߌ߲ ߞߍ߫ ߡߍ߲ ߘߐ߫ ﴿49﴾

ߡߊ߲߬ߛߊ ߞߊ߲߫ ߏ߬ ߘߐ߫ ߸ ߞߏ߫ ߊߟߎ߯ ߣߊ߬ ‹ ߊ߬ߟߋ߬ ߛߌ߬ߓߏ߬ ߝߛߊ߬ߙߌ߬ߟߊ › ߘߌ߫ ߒ ߡߊ߬ ߓߊ߫ ߸ ߗߋߘߋ߲ ߣߊ߬ߣߍ߲ ( ߦߛߎߝߎ߫ ߡߊ߬ ) ߸ ߊ߬ ߞߊ߲߫ ߏ ߡߊ߬ ߞߏ߫ ߛߊ߬ߦߌ߬ ߌ ߡߊߕߌ߮ ߡߊ߬ ߡߎߣߎ߲߬ ߸ ߌ ߦߴߊ߬ ߢߌ߬ߣߌ߲߬ߞߊ߬ ߞߏ߫ ߡߋ߬ߘߋ ߡߏ߬ߛߏ ߟߎ߫ ߟߌ߬ߤߟߊ ߘߌ߫ ߸ ߡߍ߲ ߠߎ߫ ߞߵߊ߬ߟߎ߬ ߕߍ߮ ߟߎ߬ ߘߐߢߋߙߋ߲ߞߎ߫؟ ߒߠߋ ߡߊߕߌ߮ ߞߏ߬ߣߌ߲ ߞߵߊ߬ߟߎ߫ ߘߊ߬ߓߊߙߌ ߟߐ߲߫ ߠߋ߫ ߘߋ߬ ﴿50﴾

‹ ߡߊ߲߬ߛߊ › ߞߊ߲߫ ߡߏ߬ߛߏ ߟߎ߫ ߡߊ߬ ߸ ߞߏ߫ ߊߟߎ߫ ߟߊ߫ ߞߏߢߊ ߞߍ߫ ߘߊ߫ ߘߌ߬ ߓߏ߲߰ ߸ ߊߟߎ߫ ߞߊ߬ ߦߛߎߝߎ߫ ߟߊߢߌߣߌ߲ ߡߍ߲ ߞߍ߫ ߊ߬ ߖߍ߬ߘߍ ߡߊ߬؟ ‹ ߡߏ߬ߛߏ › ߟߎ߬ ߞߊ߲߫ ߞߏ߫ ߤߋ߯ߦߌ߬ ߛߋ ߊߟߊ߫ ߦߋ߫߹ ߊ߲ ߡߊ߫ ( ߛߐ߲߬ ) ߖߎ߰ ߛߌ߫ ߟߐ߲߫ ‹ ߦߛߎߝߎ߫ › ߟߊ߫ ، ߛߌ߬ߘߌ߲߬ߞߊ߲ ߡߏ߬ߛߏ ߞߊ߲߫ ߞߏ߫ ߛߌߛߍ߲߬ ߸ ߕߎ߬ߢߊ ߓߘߊ߫ ߟߊ߲ߞߣߍߡߊ߫ ߸ ߒߠߋ ߟߋ߫ ߞߵߊ߬ ߟߊߢߌߣߌ߲߫ ߊ߬ ߖߍ߬ߘߍ ߡߊ߬ ، ߖߊ߯ߕߋ߬ ߸ ߊ߬ߟߋ ߟߋ߬ ߖߏ߫ ߕߌ߮ ߘߌ߫ ﴿51﴾

(ߦߛߎߝߎ߫ ߞߊ߲߫ ߞߏ߫ ߢߌ߬ߣߌ߲߬ߞߊ߬ߟߌ ) ߣߌ߲߬ ߞߎ߲߭ ߠߋ߬ ߸ ߛߴߊ߬ ߘߴߊ߬ ߟߐ߲߫ ߞߏ߫ ߒߠߋ ߡߴߊ߬ ߖߊ߲߬ߝߊ߫ ߘߏ߲߰ ߘߐ߫ ߸ ߊ߬ ߣߌ߫ ߞߏ߫ ߊߟߊ߫ ߕߍ߫ ߖߊ߲߬ߝߊ߬ߒߕߋ ߟߎ߫ ߘߊ߬ߓߊߙߌ ߞߊ߲ߘߊ߫ ߟߊ߫ ߡߎ߰ߡߍ߫ ﴿52﴾

ߒߠߋ ߡߊ߫ ߒ ߖߘߍ߬ ߣߌ ߟߊߜߍ߫ ( ߞߊ߲߫ ߝߐ߫ ߣߌ߲߬ ) ߘߋ߬ ، ߓߊ ߣߌ ߦߋ߫ ߖߡߊ߬ߙߌ߬ߟߊ߬ߓߊ߫ ߟߋ߬ ߘߌ߫ ߖߎ߯ߡߊ߲ ߠߊ߫ ، ߝߏ߫ ߒ ߡߊ߰ߙߌ ߓߊ߯ ߤߌߣߊ߫ ߡߍ߲ ߠߊ߫ ، ߓߊ ߒ ߡߊ߰ߙߌ ߦߋ߫ ߦߝߊ߬ߟߊ߫ ߘߌ߫ ߊ߰ ߤߌߣߟߊ߫ ߘߌ߫ ﴿53﴾

ߡߊ߲߬ߛߊ ߣߊ߬ ߘߴߊ߬ ߝߐ߫ ߞߏ߫ ߊߟߎ߫ ߣߵߊ߬ ߘߌ߫ ߒ ߡߊ߬ ߸ ߒ ߧߴߊ߬ ߞߍ߫ ߒ ߖߍ߬ߘߍ ߘߎ߲߬ߘߎ߬ߡߊ ߘߌ߫ ، ߊ߬ ߣߵߏ߬ ߞߎߡߊߢߐ߲߯ߦߊ߫ ߟߊ ߸ ߏ߬ ߞߊ߲߫ ߊ߬ ߡߊ߬ ߞߏ߫ ߌ ߡߝߊߣߍ߲߫ ߠߋ߬ ߒ߬ߠߎ߬ ߓߘߊ ߦߊ߲߬ ߓߌ߬ ߸ ߌ ߦߋ߫ ߟߊߒߠߊߒߕߋ߫ ߘߌ߫ ﴿54﴾

‹ ߦߛߎߝߎ߫ › ߞߊ߲߫ ߸ ߞߏ߫ ߒ߬ߓߊ߬ ߌ ߦߋ߫ ߒߠߋ ߓߌ߬ߟߊ߬ ߖߡߊ߬ߣߊ ߡߣߐ߬ߓߏ߲ ߠߎ߫ ߞߎ߲߬ߠߊ߫ ، ߓߊ ߒߠߋ ߦߋ߫ ߝߋ߲߫ ߠߊߕߊ߲ߞߟߊ߫ ߞߎߛߊ߲ ߠߋ߬ ߘߌ߫ ﴿55﴾

ߒ߬ߓߊ߬ ߊ߲ ߞߊ߬ ߦߛߎߝߎ߫ ߡߝߊ߫ ߖߡߊ߬ߣߊ ߞߣߐ߫ ߕߋ߲߬ ߠߋ߬ ߸ ߊ߬ ߦߴߊ߬ ߡߊߞߍ߫ ߦߋ߲߬ ߝߊ߲߭ ߓߍ߯ ߘߐ߫ ߸ ߡߍ߲ ߓߊ߯ ߊ߬ ߘߌߦߊ߫ ، ߊ߲ ߘߏ߲߬ ߦߋ߫ ߒ߬ ߠߊ߫ ߤߌߣߊ ߟߊߛߋ߫ ߟߊ߫ ߡߐ߰ ߟߋ߫ ߡߊ߬ ߸ ߡߍ߲ ߓߊ߯ ߒ߬ ߘߌߦߊ߫ ، ߞߏ߬ߣߵߊ߲ ߕߍ߫ ߢߊ߬ߓߊ߮ ߟߎ߫ ߛߊ߬ߙߊ ߕߌߢߍ߫ ߟߊ߫ ߝߋߎ߫ ﴿56﴾

ߟߊߞߌߙߊ߫ ߛߊ߬ߙߊ ߘߏ߲߬ ߦߋ߫ ߝߌ߬ߛߊ߫ ߏ߬ ߘߌ߫ ، ߓߊ߬ߙߌ߬ ߏ߬ ߦߋ߫ ߡߐ߰ ߟߋ߬ ߦߋ߫ ߡߍ߲ ߠߎ߫ ߘߍ߲߬ߞߣߍ߬ߦߊ߬ ߘߊ߫ ߸ ߊ߬ ߣߴߊ߬ߟߎ߬ ߞߍ߫ ߘߊ߫ ߝߊ߲ߕߊ߲ߞߟߊ ߟߎ߬ ߘߌ߫ ﴿57﴾

ߘߊ߬ߡߊ߲߬ߛߊ߫ ߸ ߦߛߎߝߎ߫ ߓߊߘߋ߲ ߠߎ߫ ߣߊ߬ ߘߊ߫ ، ߊ߬ߟߎ߫ ߘߏ߲߭ ߊ߬ ߞߊ߲߬ ߸ ߊ߬ ߞߵߊ߬ߟߎ߬ ߟߐ߲߫ ߞߵߊ߬ ߕߘߍ߬ ߊ߬ߟߎ߬ ߓߘߊ߫ ߝߟߌ߬ ߊ߬ ߡߊ߬ ߡߍߣߍ߲ߎ߲߫ ﴿58﴾

ߊ߬ ߣߵߊ߬ߟߎ߫ ߞߎ߲߬ߕߊ߰ߝߋ߲ ߠߎ߬ ߛߏ߯ߙߏ߫ ߟߊ ߸ ߊ߬ ߞߊ߲߫ ߞߏ߫ ߊߟߎ߫ ߦߋ߫ ߣߵߊߟߎ߫ ߝߊ߬ߘߋ߲߬ ߘߐ߯ߣߍ߲ ߘߌ߫ ߒ ߡߊ߬ ߘߋ߬ ، ߊߟߎ߫ ߡߴߊ߬ ߦߋ߫ ߒ ߧߋ߫ ߛߎߡߊ߲ߟߊ߲ ߠߝߊ߫ ߟߊ߫ ߸ ߊ߬ ߣߌ߫ ߒ ߧߋ߫ ߟߊ߬ߖߌ߬ߦߊ߬ߟߌ߬ߟߊ ߟߎ߬ ߘߐ߫ ߢߌ߬ߡߊ ߟߋ߬ ߘߌ߫؟ ﴿59﴾

ߣߴߊߟߎ߫ ߡߊ߫ ߣߊ߬ ( ߊߟߎ߫ ߘߐ߯ߣߍ߲ ) ߏ߬ ߘߌ߫ ߒ ߡߊ߬ ߸ ߛߎߡߊ߲ߠߌ߲߫ ߕߍ߫ ߊߟߎ߫ ߦߋ߫ ߒ ߓߘߊ ߏ߬ ߘߐ߫ ، ߊߟߎ߫ ߝߊ߲߭ ߞߊߣߵߊߟߎ߫ ߡߊߘߏ߲߬ ߒ ߠߊ߫ ߟߋ߬ ﴿60﴾

ߊ߬ߟߎ߬ ߞߊ߲߫ ߞߏ߫ ߊ߲ ߘߌߣߵߊ߬ ߢߌߣߴߊ߬ ߝߊ߬ ߟߊ߫ ߸ ߊ߲ ߘߏ߲߬ ߘߴߏ߬ ߞߍ߫ ߟߋ߬ ߘߍ߯ ﴿61﴾

‹ ߦߛߎߝߎ߫ › ߞߊ߲߫ ߊ߬ ߟߊ߫ ߝߎߣߎ߲ߞߋ ߟߎ߬ ߦߋ߫ ߸ ߞߏ߫ ߊߟߎ߫ ߦߴߊ߬ߟߎ߬ ߟߊ߫ ߞߙߊ߬ߖߊߥߏ ( ߛߐ߲߬ߞߐ ) ߟߎ߫ ߓߌ߬ߟߴߊ߬ߟߎ߬ ߟߊ߫ ߘߏ߬ߣߌ߲ ߠߎ߬ ߘߐ߫ ߸ ߛߴߊ߬ߟߎ߬ ߘߴߏ߬ ߟߐ߲߫ ߊ߬ߟߎ߬ ߓߊ߯ ߛߊ߬ߦߌ߫ ߊ߬ߟߎ߬ ߓߘߊߡߐ߮ ߟߎ߫ ߡߊ߬ ߕߎ߬ߡߊ ߡߍ߲ ، ߖߐ߲߬ߛߴߊ߬ߟߎ߬ ߘߴߊ߬ߟߎ߬ ߞߐߛߊ߬ߦߌ߲߬ ﴿62﴾

ߊ߬ߟߎ߫ ߛߊ߬ߦߌ߬ߣߍ߲ ߊ߬ߟߎ߫ ߝߊ߬ ߡߊ߬ ߸ ߊ߬ߟߎ߬ ߞߊ߲߫ ߞߏ߫ ߊ߲ ߝߊ߬ ߸ ߛߎߡߊ߲ߠߌ߲ ߓߘߊ߫ ߞߎ߬ߡߊ߲߬ߘߌ߫ ߒ߬ ߡߊ߬ ، ߏ߬ ߘߐ߫ ߸ ߌ ߦߴߊ߲ ߘߐ߯ߣߍ߲ ߓߌ߬ߟߴߊ߲ ߝߍ߬ ، ߏ߬ ߓߊ߯ ߞߍ߫ ߊ߲ ߘߌ߫ ߛߎߡߊ߲ߠߌ߲ ߛߐ߬ߘߐ߲߬ ، ߊ߲ ߘߏ߲߬ ߘߌ߫ ߞߍ߫ ( ߒ߬ ߘߐ߯ߣߍ߲ ) ߟߊߕߊ߲߬ߞߊ߬ߓߊ߮ ߟߎ߬ ߘߌ߫ ﴿63﴾

‹ ߊ߬ߟߎ߫ ߝߊ߬ › ߞߊ߲߫ ߸ ߞߏ߫ ߦߊ߯ߟߊ߫ ߒ ߘߴߊ߬ ߞߊ߬ߙߌ߬ߝߵߊߟߎ߫ ߟߊ߫ ߓߊ߬ ߦߏ߫ ߒ ߞߵߊ߬ ߓߊߞߋߟߋ߲ߡߊ ߞߊ߬ߙߌ߬ߝߵߊߟߎ߫ ߟߊ߫ ߢߊ ߡߍ߲ ߞߘߐ߬ߡߊ߲߫؟ ߒ߬ߞߊ߬ ߸ ߊߟߊ߫ ߟߋ߫ ߟߊ߬ߕߊ߲߬ߞߊ߬ߟߌ߬ߟߊ߬ ߢߌߡߊ ߘߌ߫ ߸ ߊ߬ߟߋ ߟߋ߫ ߘߏ߲߬ ߦߋ߫ ߤߌߣߟߊ ߟߎ߬ ߘߐ߫ ߤߌߣߟߊ ߘߌ߫ ﴿64﴾

ߊ߬ߟߎ߫ ߣߵߊ߬ߟߎ߬ ߓߟߏߝߋ߲ ߠߎ߬ ߟߊߞߊ߬ ߟߊ ߸ ߊ߬ߟߎ߫ ߞߵߊ߬ߟߎ߬ ߟߊ߫ ߞߙߊ߬ߖߊߥߏ ( ߛߐ߲߬ߞߐ ) ߟߎ߬ ߟߊߛߊ߬ߦߌ߬ߣߍ߲ ߦߴߊ߬ߟߎ߫ ߡߊ߬ ، ߊ߬ߟߎ߬ ߞߊ߲߫ ߞߏ߫ ߊ߲ ߝߊ߬ ߸ ߊ߲ ߧߋ߫ ߡߋ߬ߘߋ ߢߌߣߌ߲߫ ߠߊ߫ ߡߎ߬ߕߎ߲߬؟ ߊ߲ ߠߊ߫ ߞߙߊ߬ߖߊߥߏ ( ߛߐ߲߬ߞߐ ) ߟߎ߫ ߟߋ߬ ߟߊߛߊ߬ߦߌ߬ߣߍ߲߫ ߒ߬ ߡߊ߬ ߣߌ߲߬ ، ( ߊ߬ ߕߏ߫ ) ߒ߬ ߧߋ߫ ߥߊ߫ ߒ߬ ߘߏ߲߬ߞߏ ߟߎ߬ ߘߡߊߢߌߣߌ߲߫ ߸ ߒ߬ ߧߋ߫ ߒ߬ ߘߐ߯ߣߍ߲ ߞߣߐ߬ߜߍ߲߫ ، ߊ߬ ߣߌ߫ ߒ߬ ( ߠߊ߫ ߛߎߡߊ߲ߠߌ߲ ) ߦߋ߫ ߖߘߌ߫ ߢߐ߯ߡߍ߫ ߞߋߟߋ߲߫ ߘߏ߬ߣߌ߲߬ ߠߊ߫ ، ߏ߬ ߝߊ߲߭ ߛߎߡߊ߲ߠߌ߲ ߣߐ߰ߡߊ߲߬ ߓߍ߫ ﴿65﴾

‹ ߊ߬ߟߎ߫ ߝߊ߬ › ߞߊ߲߫ ߸ ߞߏ߫ ߒ ߕߴߊ߬ ߗߋ߫ ߊߟߎ߫ ߝߍ߬ ߝߋߎ߫ ߸ ߝߏ߫ ߣߴߊߟߎ߫ ߣߊ߬ ߘߴߊߟߊ߫ ߟߊ߫ ߟߊ߬ߤߘߌ ߘߌ߫ ߒ ߡߊ߬ ߸ ߞߏ߫ ߊߟߎ߫ ߘߌ߫ ߣߵߊ߬ ߘߌ߫ ߒ ߡߊ߬ ߟߋ߬ ߘߍ߯ ߸ ߝߏ߫ ߣߌ߫ ߞߏ ߡߍ߲ ( ߞߵߊߟߎ߫ ߛߐ߬ߘߐ߲߬ ) ߞߵߊߟߎ߫ ( ߓߍ߯ ) ߟߊߝߏ߬ ߞߘߍߜߍ߬. ߊ߬ߟߎ߫ ߣߊ߬ߣߍ߲ ߊ߬ߟߎ߬ ߟߊ߫ ߟߊ߬ߤߘߌ ߘߌ߫ ߟߴߊ߬ ߡߊ߬ ߸ ߊ߬ ߞߊ߲߫ ߞߏ߫ ߊߟߊ߫ ߟߵߊ߲ ߝߐ߫ ߞߊ߲ ߣߌ߲߬ ߓߟߏߡߊ ߘߌ߫ ﴿66﴾

ߊ߬ ߓߊ߲߫ ߘߊ߫ ߞߵߊ߬ ߝߐ߫ ߞߏ߫ ߒ ߘߋ߲ ߠߎ߬ ߸ ߊߟߎ߫ ߞߊߣߊ߬ ( ߥߊ߫ ) ߘߏ߲߬ ߘߊ߫ ߞߋߟߋ߲߫ ߝߍ߬ ߘߋ߬ ߸ ߊߟߎ߫ ߓߍ߯ ߦߋ߫ ߘߏ߲߬ ߊ߬ ߕߊ߫ ߘߊ߫ ߟߋ߬ ߝߍ߬ ، ߒߠߋ ߕߍ߫ ߊߟߎ߫ ߟߊߞߊ߯ߙߌ߫ ߊߟߊ߫ ߡߊ߬ ߝߏߦߌ߬ ߟߊ߫ ، ߓߊ ߞߕߌ ߕߍ߫ ߝߏߦߌ߬ ߓߟߏ߫ ߝߏ߫ ߊߟߊ߫ ߸ ߒ ߛߍ߲߬ߓߍ߬ߣߴߏ߬ ߟߋ ߟߊ߫ ߸ ߛߍ߲߬ߓߍ߬ߟߊ ߟߎ߫ ߘߏ߲߬ ߦߴߊ߬ߟߎ߫ ߛߍ߲߬ߓߍ߫ ߏ߬ ߟߋ ߟߊ߫ ߘߋ߬ ﴿67﴾

ߊ߬ߟߎ߫ ߘߏ߲߬ߣߍ߲ ߊ߬ߟߎ߫ ߝߊ߬ ߟߊ߫ ߖߡߊ߬ߙߟߌ߬ ߢߊ ߡߊ߬ ߸ ߏ߬ ߡߴߊ߬ߟߎ߬ ߟߊߞߊ߯ߙߌ߫ ߊߟߊ߫ ߡߊ߬ ߝߏߦߌ߬ ߟߊ߫ ߸ ߝߏ߫ ߊ߬ ߣߊ߬ ߡߊ߬ߞߏ ߡߍ߲ ߢߊ߬ ߟߊ߫ ߦߊ߰ߞߎߓߊ߫ ߣߌ ߘߐ߫ ، ߓߊߏ߬ ߟߐ߲ߠߌ߲ߠߊ ߟߴߊ߬ ߘߌ߫ ߸ ߊ߲ ߞߵߊ߬ ߟߊߟߐ߲ߠߌ߲߫ ߡߍ߲ ߠߊ߫ ߞߊ߬ߣߌ߲߫ ، ߓߊ߬ߙߌ߫ ߡߐ߱ ߝߊ߲߬ߓߊ ߟߋ߬ ߕߴߏ߬ ߟߐ߲߫ ߠߊ߫ ﴿68﴾

ߊ߬ߟߎ߫ ߘߏ߲߬ߣߍ߲ ߦߛߎߝߎ߫ ߞߊ߲߬ ߸ ߊ߬ ߞߵߊ߬ ߣߊߞߋߟߋ߲߫ ߘߐ߮ ߡߊߘߏ߲߬ ߊ߬ ߟߊ߫ ߸ ߞߵߊ߬ ߝߐ߫ ߊ߬ ߦߋ߫ ߞߏ߫ ߒߠߋ ߡߍ߲ ߣߌ߲߬ ߸ ߒߠߋ ߟߵߌ ߣߊߘߋ߲ߡߊ߫ ߞߘߐߞߍ ߘߌ߫ ، ߏ߬ ߘߐ߫ ߸ ߊ߬ߟߎ߫ ߕߘߍ߬ ( ߢߊ߲ߜߏߦߊ ) ߡߍ߲ ߞߍ߫ ߟߊ߫ ߸ ߌ ߞߊߣߊ߬ ߖߘߐ߬ ߏ߬ ( ߛߌ߫ ) ߟߊ߫ ߡߎ߬ߕߎ߲߬ ﴿69﴾

ߊ߬ ߣߵߊ߬ߟߎ߫ ߞߎ߲߬ߕߊ߰ߝߋ߲ ߠߎ߬ ߛߏ߯ߙߏ߫ ߟߊ ߸ ߊ߬ ߞߊ߬ ߖߌߟߊߝߍ ߓߌ߬ߟߴߊ߬ ߣߊߞߋߟߋ߲߫ ߘߐ߯ߞߍ ߘߏ߬ߣߌ߲ ߘߐ߫ ، ߞߊ߬ ߓߊ߲߫ ߞߊ߬ ߞߟߋߞߟߋߡߊߦߟߍߟߊ ߟߐ߬ ߞߟߋߞߟߋߡߊߦߟߍ ߟߊ߫ ߸ ߞߏ߫ ߤߋ߯ ߊߟߎ߬ ߢߐ߯ߡߍ߫ ( ߘߏߣߌ߲߫ ) ߕߌ߮ ߟߎ߬ ߸ ߖߊ߰ ߊߟߎ߫ ߦߋ߫ ߛߏ߲߭ ߠߎ߫ ߟߋ߬ ߘߌ߫ ﴿70﴾

ߊ߬ߟߎ߫ ߞߵߊ߬ ߝߐ߫ ߞߵߊ߬ ߕߘߍ߬ ߊ߬ߟߎ߬ ߓߘߴߊ߬ߟߎ߬ ߢߊߛߌ߲߫ ߊ߬ߟߎ߬ ߟߊ߫ ߸ ߞߏ߫ ߊߟߎ߫ ߡߎ߲߬ ߢߌߣߌ߲߫ ߠߊ߫؟ ﴿71﴾

ߊ߬ߟߎ߬ ߞߊ߲߫ ߞߏ߫ ߊ߲ ߧߋ߫ ߡߊ߲߬ߛߊ߬ߞߍ ߟߊ߫ ߖߌߟߊߝߍ ߟߋ߬ ߢߌߣߌ߲ ߠߊ߬ ߸ ߡߍ߲ ߘߏ߲߬ ߓߊ߯ ߣߵߊ߬ ߘߌ߫ ߢߐ߯ߡߍ߫ ߞߋߟߋ߲߫ ߘߏ߬ߣߌ߲߬ ߘߌ߫ ߘߴߏ߬ ߡߊ߬ ߸ ߒߠߋ ߖߍ߬ߘߍ ߟߴߏ߬ ߓߟߏߡߊ ߘߌ߫ ﴿72﴾

‹ ߦߛߎߝߎ߫ ߓߊߘߋ߲ › ߠߎ߬ ߞߊ߲߫ ߸ ߞߏ߫ ߊߟߎ߫ ߜߎ ߞߵߊ߬ ߟߐ߲߫ ߛߎߋ߯ ߞߏ߫ ߒ߬ߠߎ߬ ߡߊ߫ ߣߊ߬ ߕߌߢߍߟߌ߫ ߟߊ߫ ߖߡߊ߬ߣߊ ߞߣߐ߫ ߸ ߊ߲ ߘߏ߲߬ ߕߍ߫ ߓߟߏߟߊߥߛߎߣߍ߲߫ ߠߎ߫ ߘߌ߫ ﴿73﴾

‹ ߞߟߋߞߟߋߡߊߦߟߍߟߊ › ߟߎ߬ ߞߊ߲߫ ߸ ߞߏ߫ ߡߋ߬ߘߋ ߞߍߕߐ߫ ߊ߬ ߛߊ߬ߙߊ ߘߌ߫ ߣߌ߫ ߥߎߦߊ߫ ߞߍ߫ ߘߴߊߟߎ߫ ߝߍ߬؟ ﴿74﴾

ߊ߬ߟߎ߬ ߞߊ߲߫ ߞߏ߫ ߊ߬ ߛߊ߬ߙߊ ߓߊ߬؟ ߸ ߊ߬ ߓߊ߯ ߕߘߍ߬ ߡߍ߲ ߘߏ߬ߣߌ߲ ߘߐ߫ ߏ߬ ߟߋ ߊ߬ ߛߊ߬ߙߊ ߘߌ߫ ߸ ߓߊ ߒ߬ߠߎ߬ ߦߋ߫ ߕߐ߬ߢߍ߰ߒߕߋ ߟߎ߫ ߛߙߊ߬ ߟߊ߫ ߕߋ߲߬ ߠߋ߬ ﴿75﴾

ߏ߬ ߞߍ ߸ ߊ߬ ߛߐ߰ ߘߊ߫ ߘߏ ߟߎ߬ ߟߊ߫ ߡߎ߬ߙߊ߲ ߘߐߥߟߏߡߊ ߡߵߊ߬ ߘߐ߯ߞߍ߫ ߟߊ߫ ߡߎ߬ߙߊ߲ ߢߍ߫ ، ߞߊ߬ ߓߊ߲߫ ߞߵߊ߬ ߟߊߓߐ߫ ߊ߬ ߘߐ߯ߞߍ߫ ߟߊ߫ ߡߎ߬ߙߊ߲ ߘߐ߫ ، ߒ߬ߓߊ߬ ߊ߲ ߞߊ߬ ߝߍ߬ߙߍ ߘߌ߫ ߦߛߎߝߎ߫ ߡߊ߬ ߕߋ߲߬ ߠߋ߬ ߸ ߓߊ ߊ߬ ߡߊ߲߫ ߞߊ߲߫ ߞߵߊ߬ ߘߐ߯ߞߍ߫ ߡߌ߬ߘߊ߫ ߡߊ߲߬ߛߊ ߟߊ߫ ߘߌ߯ߣߊ ( ߛߊ߬ߙߌ߬ߦߊ ) ߘߐ߫ ߸ ߝߏ߫ ߣߴߊ߬ ߞߵߊߟߊ߫ ߘߌߦߊ߫ ߸ ߡߍ߲ ߘߏ߲߬ ߓߊ߯ ߒ߬ ߘߌߦߊ߫ ߸ ߊ߲ ߧߴߏ߬ ߟߋ ߡߐ߬ߟߐ߲ ߠߎ߬ ߡߊߦߟߍ߬ ߟߊ߫ ، ߟߐ߲ߠߌ߲߫ ߕߌ߮ ߝߋ߲-ߋ-ߝߋ߲߫ ߸ ߟߐ߲ߠߌ߲ߠߊ ߘߏ߫ ߟߴߏ߬ ߛߊ߲ߘߐ߫ ﴿76﴾

ߊ߬ߟߎ߬ ߞߊ߲߫ ߞߏ߫ ߣߌ߲߬ ߓߊ߯ ߛߏ߲߬ߧߊ߬ߟߌ ߞߍ߫ ߸ ߊ߬ ߓߊߘߋ߲ ߘߏ߫ ߓߘߊ߫ ߛߏ߲߬ߧߊ߬ߟߌ ߞߍ߫ ߞߘߐ߬ߡߊ߲߫ ، ߓߊ߬ߙߌ߬ ߦߛߎߝߎ߫ ߞߵߏ߬ ( ߜߊ߬ߒߠߊ ) ߘߏ߲߰ ߊ߬ ߣߌߘߐ߫ ، ߊ߬ ߡߴߏ߬ ߟߊ߲ߞߣߍߡߴߊ߬ߟߎ߬ ߦߋ߫ ، ߊ߬ ߞߵߊ߬ ߝߐ߫ ߟߋ߬ ߕߋ߲߬ ߸ ߞߏ߫ ߊߟߎ ߟߋ߫ ߘߏ߲߬ ߜߎ ߟߌ߬ߤߟߊ ߞߊ߫ ߖߎ߯ߓߊ ߦߋ߫. ߓߊ߬ߙߌ߬ ߊߟߊ߫ ߞߵߊߟߎ߫ ߟߊ߫ ߡߊ߲߬ߞߕߎ߬ߒ߬ߞߊ߲߬ߠߊ ߟߐ߲߫ ߖߐ߫ ﴿77﴾

‹ ߦߛߎߝߎ߫ ߓߊߘߋ߲ › ߠߎ߬ ߞߊ߲߫ ߞߏ߫ ߤߍ߲߬ ߌߟߋ߬ ߛߌ߬ߘߌ߲߬ߞߊ߲ ߸ ߝߊ߬ ߗߍ߬ߡߐ߰ߓߊ߫ ߟߋ߬ ( ߘߋ߲ߣߍ߲ ) ߢߌ߲߬ ߠߊ߫ ، ߏ߬ ߘߐ߫ ߸ ߊ߲ ߞߋߟߋ߲߫ ߡߌ߬ߘߴߊ߬ ߣߐ߭ ߘߐ߫ ߖߊ߰ߣߌ߲߫ ، ߓߊߏ߬ ߊ߲ ߢߊ߯ ߌ ߟߊ߫ ߢߊ߬ߓߊ߮ ߟߎ߬ ߘߏ߫ ߟߋ߬ ߘߌ߫ ﴿78﴾

ߊ߬ ߞߊ߲߫ ߞߏ߫ ߞߊ߯ߙߌ߫ ، ߊߟߊ߫ ߒ ߞߛߌ߫߹ ߸ ߒ߬ ߕߍ߫ ߡߐ߰ ߛߌ߫ ߡߌ߬ߘߊ߬ ߝߏ߫ ߒ߬ ߞߊ߬ ߒ߬ ߓߟߏߝߋ߲ ߦߋ߫ ߡߍ߲ ߞߎ߲߬ ، ߊ߲ ߘߌ߫ ߞߍ߫ ߕߐ߬ߢߍ߰ߒߕߋ ߟߎ߬ ߘߏ߫ ߘߌ߫ ߏ߬ ߘߐ߫ ﴿79﴾

ߊ߬ߟߎ߫ ߖߌ߰ߕߍ߰ ߘߴߊ߬ ߛߐ߬ߘߐ߲߬ ߞߏ ߟߊ߫ ߡߍ߲ߞߍ߭ ߸ ߊ߬ߟߎ߫ ߞߵߊ߬ߟߎ߬ ߡߊߓߐ߫ ߞߵߊ߬ ߞߍ߫ ߢߐ߲߯ߦߋ ߘߌ߫ ، ߊ߬ߟߎ߬ ߘߐ߫ ߞߌ߬ߣߊ ߞߊ߲߫ ߸ ߞߏ߫ ߊߟߎ߫ ߡߴߊ߬ ߟߐ߲߫ ߓߊ߬ ߞߏ߫ ߊߟߎ߫ ߝߊ߬ ߞߵߊߟߊ߫ ߟߊ߫ ߟߊ߬ߤߘߌ ߟߋ߫ ߡߌ߬ߘߵߊߟߎ߫ ߟߊ߫؟ ، ߊ߬ ߣߌ߫ ߞߘߐ߬ߡߊ߲߫ ߸ ߡߍ߲ ߕߏ߫ ߘߴߊߟߎ߫ ߟߊ߫ ߦߛߎߝߎ߫ ߞߏ ߘߐ߫ ߘߏ߲߬؟ ، ߏ߬ ߘߐ߫ ߸ ߒߠߋ ߕߍߣߊ߬ ߓߐ߫ ߟߊ߫ ߘߎ߱ ߣߌ߲߬ ߞߣߐ߫ ߝߋߎ߫ ߝߏ߫ ߣߌ߫ ߒ ߝߊ߬ ߘߌ߬ߢߍ߬ ߘߊ߫ ߒ ߧߋ߫ ߸ ߥߟߴߊߟߊ߫ ߦߋ߫ ߞߕߌ ߘߌߦߊ߫ ߒ ߠߊ߫ ، ߏ߬ ߟߋ ߘߏ߲߬ ߦߋ߫ ߞߕߌ߫ ߕߍ߯ߟߊ ߟߎ߬ ߘߐ߫ ߢߌ߬ߡߊ ߘߌ߫ ﴿80﴾

ߊߟߎ߫ ߦߋ߫ ߛߊ߬ߦߌ߬ ߞߊ߬ ߥߴߊߟߎ߫ ߝߊ߬ ߕߘߍ߬ ، ߊߟߎ߫ ߦߴߊ߬ ߝߐ߫ ߞߏ߫ ߊ߲ ߝߊ߬ ߸ ߌ ߘߋ߲ߞߍ߫ ߣߊ߬ ߛߏ߲߬ߧߊ߬ߟߌ ߟߋ߬ ߞߍ߫ ߟߊ߫ ، ߊ߲ߠߎ߫ ߘߏ߲߬ ߡߊ߫ ߞߏߟߐ߲߫ ߊ߬ ߘߐ߫ ߝߏ߫ ߊ߲ ߣߵߊ߬ ߟߐ߲߫ ߠߊ ߸ ߓߊ ߊ߲ ߕߍ߫ ߞߏߘߏ߲߰ߣߍ߲߫ ߞߣߐ߬ߜߍ߲߬ߓߊ߯ ߟߎ߫ ߘߌ߫ ﴿81﴾

ߊ߲ ߕߘߍ߬ ߛߏ ߡߍ߲ ߠߊ߫ ߸ ߌ ߦߴߏ߬ ߟߎ߫ ߢߌ߬ߣߌ߲߬ߞߊ߬ ߕߎ߲߫ ߸ ߊ߬ ߣߌ߫ ߒ߬ߣߊ߬ߣߍ߲߬ ߢߐ߯ߡߍ߫ ߕߌ߮ ߡߍ߲ ߠߎ߬ ߘߐ߫ ، ߊ߲ ߧߋ߫ ߕߎ߬ߢߊ ߟߋ߬ ߟߊ߫ ߛߎߋ߯ ﴿82﴾

‹ ߊ߬ߟߎ߫ ߝߊ߬ › ߞߊ߲߫ ߞߏ߫ ߍ߲߬ߍ߲߫ ، ߊߟߎ߫ ߣߌ ߟߋ߬ ߓߘߊ߫ ߞߏ ߘߏ߫ ߘߐߓߍ߲߬ ߊߟߎ߫ ߢߣߊ߫ ߕߎ߲߫ ، ߒ߬ߞߊ߬ ߡߎ߬ߢߎ߲ ߠߋ߬ ߞߊ߫ ߢߌ߲߬ ߸ ߓߊ ߊ߬ ߢߐ߲߰ߘߐ߫ ߊߟߊ߫ ߘߌߣߊ߬ ‹ ߒ ߘߋ߲ › ߓߍ߯ ߘߌ߫ ߒ ߡߊ߬ ߞߐߘߍ߫ ، ߖߊ߯ߕߋ߬ ߸ ߊ߬ߟߋ ߟߋ߬ ߟߐ߲ߠߌ߲ߠߊ߫ ߥߘߋ߬ߥߘߋ߬ߟߌ߬ߟߊ ߘߌ߫ ﴿83﴾

ߊ߬ ߓߊ߲߫ ߘߊ߫ ߞߵߊ߬ ߞߐߘߏ߲߬ ߊ߬ߟߎ߬ ߟߊ߫ ߞߵߊ߬ ߝߐ߫ ߞߏ߫ ߊ߯ߟߊ߲߫ ߸ ߒ ߘߏ߲߬ ߛߎ߬ߣߎ߲߬ߣߍ߲߬ ߦߛߎߝߎ߫ ߞߏ ߟߊ߫ ߥߍ߫߹ ، ߜߍ ߣߊ߬ ߘߊ߫ ߟߴߊ߬ ߢߊ߫ ߝߌ߬ߟߊ ߞߊ߲߬ ߛߎ߬ߣߎ߲ ߓߟߏ߫ ߸ ߞߵߊ߬ ߕߘߍ߬ ߊ߬ ߡߐߣߍߣߍ߲߫ ߞߊߘߌߞߊߘߌ߫ ﴿84﴾

ߊ߬ߟߎ߬ ߞߊ߲߫ ߞߏ߫ ߊ߰ ߒ߬ ߣߌ߫ ߊߟߊ߫ ߕߍ߫ ߸ ߌ ߘߌ߫ ߕߏ߫ ߦߛߎߝߎ߫ ߞߏߝߐ ߞߊ߲߬ ߝߎߚߎ߫ ߸ ߝߏ߫ ߞߵߌ ߞߍ߫ ߜߊ߲߬ߘߌ ߘߌ߫ ߸ ߥߟߊ߫ ߞߵߌ ߞߍ߫ ߕߏߒߘߐߓߊ߯ߕߐ ߟߎ߬ ߘߏ߫ ߘߌ߫ ﴿85﴾

‹ ߊ߬ߟߎ߫ ߝߊ߬ › ߞߊ߲߫ ߸ ߞߏ߫ ߒߠߋ ߦߋ߫ ߒ ߠߊ߫ ߣߌ߬ߟߊ߬ߝߌ߲ ߣߌ߫ ߒ ߠߊ߫ ߛߎ߬ߣߎ߲ ߡߞߊ߬ߛߌ߬ߟߌ ߞߍ߫ ߟߴߊߟߊ߫ ߟߋ߬ ߦߋ߫ ، ߒߠߋ ߘߏ߲߬ ߞߊ߬ ߡߍ߲ ߟߐ߲߫ ߊߟߊ߫ ߝߍ߬ ߸ ߊߟߎ ߡߴߏ߬ ߟߐ߲߫ ﴿86﴾

ߊ߬ ߞߏ߫ ߒ ߘߋ߲ ߠߎ߬ ߸ ߊߟߎ߫ ߥߊ߫ ߝߛߍ߬ߝߛߍ߬ߟߌ ߞߍ߫ ߦߛߎߝߎ߫ ߣߴߊ߬ ߘߐ߯ߞߍ߫ ߟߊ߫ ߞߏ ߟߊ߫ ، ߊߟߎ߫ ߞߊߣߵߊߟߎ߫ ߖߌ߰ߕߍ߰ ߊߟߊ߫ ߟߊ߫ ߤߌߣߊ ߟߊ߫ ، ߓߊ ߡߐ߰ ߛߌ߫ ߕߍ߫ ߊ߬ ߖߌ߰ߕߍ߰ ߊߟߊ߫ ߟߊ߫ ߤߌߣߊ ߟߊ߫ ߝߏ߫ ߡߌ߬ߙߌ߲߬ߘߌ߫ ߓߊ߲߬ߣߍ߲ ߠߎ߬ ﴿87﴾

ߊ߬ߟߎ߫ ߘߏ߲߬ߣߍ߲ ( ߦߛߎߝߎ߫ ) ߞߊ߲߬ ߸ ߊ߬ߟߎ߬ ߞߊ߲߫ ߞߏ߫ ߤߍ߲߬ ߌߟߋ߬ ߛߌ߬ߘߌ߲߬ߞߊ߲ ߸ ߕߙߐ ߟߋ߬ ߓߘߊ߫ ߡߊ߰ ߊ߲ ߣߌ߫ ߒ߬ ߘߏ߲߬ߞߏ ߟߎ߬ ߟߊ߫ ، ߊ߲ ߘߏ߲߬ ߣߊ߬ߣߍ߲߫ ߞߙߊ߬ߖߊߥߏ߫ ߡߊ߲߬ߜߏ ߟߋ߬ ߘߌ߫ ، ߌ ߦߋ߫ ߛߎߡߊ߲ߠߌ߲ ߓߎߟߋߓߎߟߋ ߞߍ߫ ߊ߲ ߧߋ߫ ߸ ߞߊ߬ ߝߊ߲߬ߞߊ߬ߘߋߦߌ ߓߐ߫ ߒ߬ ߠߊ߫ ، ߓߊߏ߬ ߊߟߊ߫ ߟߋ߬ ߝߊ߲߬ߞߊ߬ߘߋ߬ߦߌ߬ ߓߐ߬ߟߊ ߟߎ߫ ߓߙߊ߬ߖߌ߬ ߟߊ߫ ﴿88﴾

ߊ߬ ߞߊ߲߫ ߞߏ߫ ߊߟߎ߫ ߞߵߊ߬ ߟߐ߲߫ ߓߊ߬ ߊߟߎ߫ ߞߊ߬ ߡߍ߲ ߞߍ߫ ߦߛߎߝߎ߫ ߣߴߊ߬ ߘߐ߯ߞߍ߫ ߟߊ߫ ߞߵߊ߬ ߕߘߍ߬ ߊߟߎ߫ ߞߏߟߐ߲ߓߊߟߌߡߊ ߦߋ߫؟ ﴿89﴾

ߊ߬ߟߎ߬ ߞߊ߲߫ ߞߏ߫ ߦߊ߯ߟߊ߫ ߌߟߋ ߟߋ߬ ߦߛߎߝߎ߫ ߘߌ߫ ߓߊ߬؟ ߸ ߊ߬ ߞߊ߲߫ ߞߏ߫ ߒߠߋ ߟߋ߬ ߦߛߎߝߎ߫ ߘߌ߫ ߞߍ߬ ، ߣߌ߲߬ ߦߋ߫ ߒ ߣߊߞߋߟߋ߲߫ ߘߐ߯ߣߍ߲ ߠߋ߬ ߘߌ߫ ، ߊߟߊ߫ ߟߋ߬ ߝߎߣߎ߲ߛߙߋߦߊߣߍ߲߫ ߒ߬ߠߎ߫ ߡߊ߬ ، ߓߊ ߡߍ߲ ߓߊ߯ ߊ߬ ߝߊ߲ߕߊ߲߬ߞߊ߫ ߞߵߊ߬ ߡߎ߬ߢߎ߲߬ ߸ ߊߟߊ߫ ߞߏ߬ߣߌ߲߬ ߕߍ߫ ߢߊ߬ߓߊ߮ ߟߎ߫ ߛߊ߬ߙߊ ߕߌߢߍ߫ ߟߊ߫ ߘߋ߬ ﴿90﴾

ߊ߬ߟߎ߬ ߞߊ߲߫ ߞߏ߫ ߊ߰ ߒ߬ ߣߴߊߟߊ߫ ߕߍ߫ ߸ ߊߟߊ߫ ߟߋ߫ ߞߵߌ ߛߎߥߊ߲ߘߌ߫ ߒ߬ߠߎ߫ ߡߊ߬ ، ߒ߬ߠߎ߫ ߟߋ߬ ߘߏ߲߬ ߞߍ߫ ߘߊ߫ ߝߎ߬ߕߎ߲߬ߕߌ߬ߟߊ ߟߎ߬ ߘߌ߫ ﴿91﴾

‹ ߦߛߎߝߎ߫ › ߞߊ߲߫ ߞߏ߫ ߖߙߊ߬ߞߌ߬ ߕߍ߫ ߊߟߎ߫ ߡߊ߬ ߓߌ߬ ، ߊߟߊ߫ ߘߌߣߊ߬ ߦߝߵߊߟߎ߫ ߡߊ߬ ߸ ߓߊ ߏ߬ ߟߋ ߤߌߣߟߊ ߟߎ߬ ߘߐ߫ ߤߌߣߟߊ ߘߌ߫ ﴿92﴾

ߊߟߎ߫ ߥߊ߫ ߒ ߠߊ߫ ߘߙߌ߬ߞߌ ߣߌ߲߬ ߘߌ߫ ߸ ߊߟߎ߫ ߥߴߊ߬ ߟߊߝߟߌ߬ ߒ ߝߊ߬ ߢߊߘߐߟߊ ߘߐ߫ ، ߏ߬ ߓߊ߯ ߞߍ߫ ߊ߬ ߘߌ߫ ߞߍ߫ ߦߋߟߌߟߊ ߘߌ߫ ߥߟߍߟߍ߫ ، ߊ߬ ߣߴߊߟߎ߯ ߣߵߊߟߎ߫ ߘߏ߲߬ߞߏ ߓߍ߯ ߘߌ߫ ߒ ߝߍ߬ ߦߊ߲߬ ߞߐߘߍ߫ ﴿93﴾

ߕߊ߯ߡߊ߫ ߛߘߍ ߥߟߌ߬ߣߍ߲ ߸ ߊ߬ߟߎ߫ ߝߊ߬ ߞߊ߲߫ ߞߏ߫ ߒ ߓߘߊ߫ ߦߛߎߝߎ߫ ߛߎߡߊ ߛߐ߬ߘߐ߲߬ ߛߎߋ߯ ߣߴߊߟߎ߫ ߕߍ߫ ߒ ߛߐ߬ߛߐ߬ ߟߊ߫ ߞߍ߬ߣߍ߲ ﴿94﴾

ߊ߬ߟߎ߬ ߞߊ߲߫ ߸ ߞߏ߫ ߊ߰ ߒ߬ ߣߴߊߟߊ߫ ߕߍ߫ ߌ ߦߴߌ ߟߊ߫ ߝߟߌ߬ ߞߘߐ ߘߐ߫ ߡߎߣߎ߲߬ ߖߐ߫ ﴿95﴾

ߘߟߊߝߎߟߊ ߣߊ߬ߣߍ߲ ߘߙߌ߬ߞߌ ߟߊߝߟߌ߬ ߟߴߊ߬ ߢߊߘߐߟߊ ߘߐ߫ ߸ ߊ߬ ߛߊ߬ߦߌ߲߬ ߘߊ߫ ߢߡߊߦߊ ߘߐ߫ ߘߏߦߌ߲߫ ، ߊ߬ ߞߊ߲߫ ߏ߬ ߘߐ߫ ߞߏ߫ ߒߠߋ ߡߴߊ߬ ߝߐ߫ ߊߟߎ߫ ߦߋ߫ ߒ ߞߏ߫ ߒߠߋ ߞߊ߬ ߡߍ߲ ߟߐ߲߫ ߊߟߊ߫ ߝߍ߬ ߊߟߎ߫ ߡߴߏ߬ ߟߐ߲߫؟ ﴿96﴾

ߊ߬ߟߎ߬ ߞߊ߲߫ ߞߏ߫ ߊ߲ ߝߊ߬ ߸ ߦߝߊ߬ ߢߌߣߌ߲ ߞߍ߫ ߊ߲ ߧߋ߫ ߒ߬ ߖߟߎ߬ߡߎ߲ ߠߎ߬ ߟߊ߫ ߖߊ߰ߣߌ߲߫ ، ߓߊߏ߬ ߒ߬ߠߎ߫ ߟߋ߬ ߞߍ߫ ߘߊ߫ ߝߎ߬ߕߎ߲߬ߕߌ߬ߟߊ ߟߎ߬ ߘߌ߫ ﴿97﴾

‹ ߊ߬ߟߎ߫ ߝߊ߬ › ߞߊ߲߫ ߞߏ߫ ߒ ߘߌߣߊ߬ ߦߝߊ߬ ߢߌߣߌ߲ ߞߍ߫ ߊߟߎ߫ ߦߋ߫ ߒ ߡߊ߰ߙߌ ߟߊ߫ ߸ ߓߊ ߏ߬ ߦߋ߫ ߦߝߊ߬ߟߊ߫ ߤߌߣߟߊ ߟߋ߬ ߘߌ߫ ﴿98﴾

ߊ߬ߟߎ߫ ߘߏ߲߬ߣߍ߲ ߦߛߎߝߎ߫ ߞߊ߲߬ ߸ ߊ߬ ߞߵߊ߬ ߡߏߦߌߓߊ߯ ߝߌ߬ߟߊ ߟߊߞߢߐ߬ߡߴߊ߬ ߝߍ߬ ߸ ߞߵߊ߬ ߝߐ߫ ߞߏ߫ ߊߟߎ߫ ߘߏ߲߬ ߡߌߛߌ߬ߙߊ߲߬ ߸ ߣߌ߫ ߊߟߊ߫ ߛߐ߲߬ ߘߊ߫ ߸ ߊߟߎ߫ ߞߎ߲߬ߠߊ߬ߝߎߟߋ߲ߣߍ߲ ߦߋ߫ ߝߊ߲ߛߊ߲߫ ﴿99﴾

ߊ߬ ߞߵߊ߬ ߡߏߦߌߓߊ߯ ߝߌ߬ߟߊ ߟߊߦߍ߬ߟߍ߫ ߛߍ߬ߡߍ ߞߊ߲߬ ، ߊ߬ߟߎ߫ ߞߵߊ߬ߟߎ߫ ߓߋ߬ ߊ߬ ߦߋ߫ ߕߌ߲ߓߌߘߌ߲ ߘߌ߫ ، ߊ߬ ߞߊ߲߫ ߏ߬ ߘߐ߫ ߞߏ߫ ߒ ߝߊ߬ ߸ ߣߌ߲߬ ߦߋ߫ ߒ ߠߊ߫ ߛߌ߬ߓߏ ߝߊ߬ߛߊߙߌ ߟߋ߬ ߘߌ߫ ߣߌ߲߬ ߢߍ߫ ߞߘߐ߬ߡߊ߲߫ ߸ ߒ ߡߊ߰ߙߌ ߓߘߴߊ߬ ߞߍ߫ ߕߎ߬ߢߊ ߘߌ߫ ߝߛߊߦߌ߫ ، ߊ߬ ߘߏ߲߬ ߢߊ߬ ߘߊ߫ ߒ ߡߊ߬ ߸ ߊ߬ ߞߊ߬ ߒ ߠߊߓߐ ߡߍ߲ ߞߍ߫ ߥߛߎ ߟߊ߫ ، ߊ߬ ߣߴߊ߬ ߣߊ߬ ߘߴߊߟߎ߫ ߝߣߊ߫ ߘߌ߫ ߞߊ߬ ߓߐ߫ ߞߏ߲ߞߛߏ ߟߊ߫ ߸ ߜߍ߬ߘߍ ߓߊ߲ ߞߐ ߘߏ߲߬ ߠߊ߫ ߒ ߣߌ߫ ߒ ߓߊߘߋ߲ ߠߎ߬ ߕߍ߫ ، ߖߊ߯ߕߋ߬ ߸ ߒ ߡߊ߰ߙߌ ߦߋ߫ ߡߐߡߐߒߕߋ߫ ߟߋ߬ ߘߴߊ߬ ߛߊ߬ߥߏ߬ߣߊ߲߬ ߞߏ ߘߐ߫ ، ߓߊ ߊ߬ߟߋ ߟߋ߬ ߟߐ߲ߠߌ߲ߠߊ ߘߌ߫ ߸ ߊ߬ߟߋ ߟߋ߬ ߥߘߋ߬ߥߘߋ߬ߟߌ߬ߟߊ ߘߌ߫ ﴿100﴾

ߒ ߡߊ߰ߙߌ ߸ ߌ ߓߘߊ߫ ߒ ߛߐ߫ ߡߊ߲߬ߛߊ߬ߦߊ ߘߏ߫ ߟߊ߫ ، ߊ߬ ߣߴߌ ߞߊ߬ ߒ ߠߊߟߐ߲ߠߌ߲߫ ( ߞߏ߫ ߣߊ߬ߕߐ ) ߞߎߡߊ ߟߎ߬ ߞߘߐߡߊߖߊ߲ ߘߏ߫ ߟߎ߫ ( ߢߊߝߐ ) ߟߊ߫ ، ߌߟߋ߬ ߛߊ߲ ߠߎ߬ ߣߌ߫ ߘߎ߱ ߛߌ߲ߘߌߓߊ߮ ߸ ߌߟߋ ߟߋ߬ ߒ ߠߊ߫ ߞߏߕߌ߮ ߘߌ߫ ߘߎߢߊ߫ ߣߌ߫ ߟߊߞߌߙߊ߫ ، ߌ ߦߋ߫ ߒ ߛߏߡߊߦߟߍߡߊ߲߫ ߛߌ߬ߟߊ߬ߡߊ ߘߌ߫ ߸ ߊ߬ ߣߴߌ ߦߋ߫ ߒ ߝߊ߬ߙߊ߫ ߡߐ߰ ߢߌߡߊ ߟߎ߫ ߞߊ߲߬ ﴿101﴾

ߒ߬ߓߊ߬ ߣߌ߲߬ ߦߋ߫ ߞߏ߫ ߘߏ߲߰ߣߍ߲ ߖߊ߲߬ߖߏ߲ ߠߎ߬ ߘߏ߫ ߟߋ߬ ߘߌ߫ ߸ ߊ߲ ߧߴߌ ߦߟߌߘߏ߲߬ ߠߴߏ߬ ߟߋ ߟߊ߫ ߸ ߣߴߏ߬ ߕߍ߫ ߌߟߋ ߕߎ߲߬ ߕߍ߫ ߏ߬ ߟߎ߫ ߝߍ߬ ߦߋ߲߬ ߊ߬ߟߎ߬ ߝߊ߲ߞߊ߲߫ ߕߎߡߊ ߊ߬ߟߎ߬ ߟߊ߫ ߞߏ ߞߊ߲߬ ߸ ߞߵߊ߬ ߕߘߍ߬ ߊ߬ߟߎ߬ ߦߋ߫ ߣߊߡߙߊ ߘߐߛߘߊ ߞߊ߲߬ ﴿102﴾

ߓߊ߬ߙߌ߬ ߌ ߞߵߊ߬ ߞߊ߬ߣߌ߲߬ ߢߊ-ߊ-ߢߊ߫ ߸ ߡߐ߱ ߝߊ߲߬ߓߊ ߕߍߣߊ߬ ߞߍ߫ ߟߊ߫ ߘߍ߲߬ߞߣߍ߬ߦߊ߬ߓߊ߯ ߟߎ߫ ߘߌ߫ ﴿103﴾

ߌ ߘߏ߲߬ ߕߍ߫ ߊ߬ߟߎ߬ ߕߙߊ߫ ߟߊ߫ ߛߙߊ߬ ߟߴߊ߬ ߘߐ߫ ߥߍ߫ ߸ ߓߊ ߘߏ߫ ߜߘߍ߫ ߕߍ߫ ߝߏ߫ ߖߊ߲߬ߓߌߟߊ ߟߊߛߋ ߖߊ߯ߓߊ ߟߎ߫ ߡߊ߬ ﴿104﴾

ߕߐ߰ߡߊ߬ߛߙߋ߫ ߖߋ߬ߟߌߖߋ߬ߟߌ߫ ߟߋ߬ ߛߊ߲ ߠߎ߬ ߣߌ߫ ߘߎ߱ ߞߊ߲߬ ߸ ߊ߬ߟߎ߬ ߦߋ߫ ߕߊ߬ߡߌ߲߬ ߠߴߏ߬ ߟߎ߬ ߟߊ߫ ߸ ߞߵߊ߬ ߕߘߍ߬ ߊ߬ߟߎ߬ ߞߐߘߏ߲߬ߣߍ߲ ߦߴߏ߬ ߟߎ߬ ߟߊ߫ ߔߏ߲߫؟ ﴿105﴾

ߊ߬ߟߎ߫ ߝߊ߲߬ߓߊ ߖߍ߬ߘߍ ߕߍ߫ ߘߍ߲߬ߞߣߍ߬ߦߊ߬ ߟߴߊߟߊ߫ ߡߊ߬ ߸ ߝߏ߫ ߞߊ߬ ߞߍ߫ ߛߏߡߊ ߟߎ߬ ߘߌ߫ ﴿106﴾

ߦߊ߯ߟߴߊ߬ߟߎ߬ ߘߌ߫ ߟߴߊ߬ ߟߊ߫ ߓߊ߬ ߸ ߞߏ߫ ߜߎ߬ߕߙߎ ߕߍ߫ ߣߵߊ߬ߟߎ߫ ߡߵߊߟߊ߫ ߟߊ߫ ߖߊ߲߰ߞߕߊ ߘߌ߫؟ ߥߟߊ߫ ߟߐ߬ߓߊ ߦߋ߫ ߣߊ߬ ߓߊ߬ߙߴߊ߬ߟߎ߬ ߘߐ߫ ߸ ߞߵߊ߬ ߕߘߍ߬ ߊ߬ߟߎ߬ ߦߟߌ߫ ߕߴߊ߬ ߟߊ߫ ﴿107﴾

ߊ߬ ߟߊߛߋ߫ ߞߏ߫ ߒߠߋ ߟߊ߫ ߛߌߟߊ ߟߋ߫ ߣߌ߲߬ ߸ ߒ ߧߋ߫ ߞߟߌߟߌ ߟߋ߬ ߞߍ߫ ߟߴߊߟߊ߫ ߡߊ߬ ߸ ߞߵߊ߬ ߟߊ߫ ߢߟߊߞߊ߫ ߞߏ߫ ߞߊ߲߬ ߒߠߋ ߣߌ߫ ߒ ߠߊߓߊ߬ߕߏ߬ߓߊ߮ ߓߍ߯ ߦߋ߫ ، ߊߟߊ߫ ߟߊ߫ ߛߊߣߌ߲ߧߊ ߛߘߊ߫ ߘߐ߫ ߸ ߒߠߋ ߕߍ߫ ߛߏߡߊ ߟߎ߬ ߝߋ߲߫ ߘߌ߫ ﴿108﴾

ߊ߲ ߡߊ߫ ߡߐ߰ ߛߌ߫ ߞߋߟߦߊ߫ ߌߟߋ ߢߍ߫ ߞߘߐ߬ߡߊ߲߫ ߸ ߝߏ߫ ߗߍ߭ ߟߎ߬ ، ߊ߲ ߧߴߏ߬ ߟߎ߫ ߟߋ߬ ߦߟߌߘߏ߲߬ ߠߊ߫ ߛߏ ߟߎ߬ ߞߣߐ߫ ߡߐ߮ ߟߎ߬ ߘߐ߫ ، ߦߊ߯ߟߴߊ߬ߟߎ߬ ߕߍ߫ ߊ߬ߟߎ߬ ߘߐߕߊ߯ߡߊ߫ ߟߊ߫ ߖߡߊ߬ߣߊ ߟߎ߬ ߞߣߐ߫ ߓߊ߬ ߸ ߞߊ߬ ߥߴߊ߬ ߝߟߍ߫ ߊ߬ߟߎ߬ ߢߍߓߊ߮ ߟߎ߬ ߟߊߓߊ߲ ߞߍ߫ ߘߊ߫ ߢߊ ߡߍ߲ ، ߟߊߞߌߙߊ߫ ߛߏ ߟߋ߫ ߘߏ߲߬ ߦߋ߫ ߤߙߊ ߘߌ߫ ߝߊ߲ߕߊ߲ߞߟߊ ߟߎ߬ ߦߋ߫ ߸ ߦߊ߯ߟߴߊߟߎ߫ ߕߴߏ߬ ߤߊ߲ߞߟߌߡߦߊ߫ ߟߊ߫ ߓߊ߬؟ ﴿109﴾

(ߕߏ߫ ߞߍߣߴߏ߬ ߟߋ ߘߐ߫ ߝߎߚߎ߫ ) ߸ ߝߏ߫ ߞߋߟߊ ߟߎ߫ ߖߌ߰ߕߍ߰ ߘߊ߫ ߸ ߊ߬ ߣߴߊ߬ߟߎ߫ ߞߵߊ߬ ߓߛߌ߬ߞߌ߫ ߞߏ߫ ߊ߬ߟߎ߬ ߓߘߊ߫ ߡߊߛߐ߬ߛߐ߬ ، ߊ߲ ߠߊ߫ ߘߍ߬ߡߍ߲߬ߠߌ߲ ߣߊ߬ ߘߴߊ߬ߟߎ߫ ߡߊ߬ ߏ߬ ߟߋ ߘߐ߫ ߛߊ߫ ، ߏ߬ ߞߍ ߸ ߊ߲ ߘߌߦߊߣߍ߲߫ ߡߐ߮ ߟߎ߬ ߟߊߞߛߌ߫ ߘߊ߫ ، ߝߏߦߌ߫ ߘߏ߲߬ ߕߍ߫ ߒ߬ ߠߊ߫ ߞߘߊ߬ߜߟߍ߬ߦߊ ߟߊߛߊ߬ߦߌ߲߫ ߞߊ߬ ߓߐ߫ ߡߌ߬ߙߌ߲߬ߘߌ߫ ߛߐ߲߬ߡߊ ߟߎ߫ ߞߊ߲߬ ﴿110﴾

ߕߊ߰ߛߌ߬ ߞߏ߫ ߟߋ߫ ߢߌ߲߬ ߠߎ߬ ߟߊ߫ ߘߐ߬ߝߐ ߟߊߞߊ߬ߟߌ ߘߐ߫ ߤߊ߲ߞߟߌ߫ ߕߌ߮ ߟߎ߬ ߦߋ߫ ، ߞߎ߬ߙߊ߬ߣߊ ߢߌ߲߬ ߘߏ߲߬ ߕߍ߫ ߓߊ߬ߘߏ߫ ߞߎ߲߬ߘߐߕߍ߰ߣߍ߲߫ ߘߌ߫ ، ߓߊ߬ߙߌ߬ ߊ߬ ߢߍ߫ ߟߍߙߊ ߟߊߛߙߋߦߊߟߊ߲ ߠߋ߬ ، ߊ߬ ߣߌ߫ ߞߏ ߓߍ߯ ߝߊߙߊ߲ߝߊߛߌ ߟߋ߬ ، ߊ߬ ߣߌ߫ ߞߊ߲ߘߊ ߣߌ߫ ߤߌߣߊ ߟߴߊ߬ ߘߌ߫ ߡߌ߬ߙߌ߲߬ߘߌ߫ ߘߍ߲߬ߞߣߍ߬ߦߊ߬ߣߍ߲ ߠߎ߬ ߦߋ߫ ﴿111﴾

ߊ. ߟ. ߡ. ߙ. ( ߊߟߌߝ. ߟߊ߯ߡ. ߡߌ߯ߡ. ߙߊ߯. ) ߢߌ߲߬ ߠߎ߬ ߦߋ߫ ߟߍߙߊ ߟߝߊߙߌ ߟߎ߫ ߟߋ߬ ߘߌ߫ ، ߡߍ߲ ߠߊߖߌ߰ߣߴߌ ߡߊ߬ ߞߊ߬ ߝߊߘߴߌ ߡߊ߰ߙߌ ߟߊ߫ ߸ ߏ߬ ߦߋ߫ ߕߎ߬ߢߊ߫ ߟߋ߬ ߘߌ߫ ، ߓߊ߬ߙߌ߬ ߡߐ߱ ߝߊ߲߬ߓߊ ߟߋ߬ ߕߍ߫ ߘߍ߲߬ߞߣߍ߬ߦߊ߬ ߟߊ߫ ﴿1﴾

ߊߟߊ߫ ߟߋ߫ ߞߊ߬ ߛߊ߲ ߠߎ߬ ߞߘߐߕߊ߬ ߸ ߊߟߎ߫ ߢߊ߫ ߕߍ߫ ߛߡߊ߬ߛߋ߲߫ ߠߎ߫ ߟߴߊ߬ߟߎ߬ ߞߘߐ߫ ، ߊ߬ ߞߊ߬ ߓߊ߲߫ ߞߵߊ߬ ߟߊߞߢߊ߫ ߛߍ߬ߡߍ ߞߊ߲߬ ، ߊ߬ ߞߊ߬ ߕߋ߬ߟߋ ߣߌ߫ ߞߊߙߏ ߞߟߏ߫ ߸ ߏ߬ ߞߋߟߋ߲ߞߋߟߋ߲ߣߊ ߦߋ߫ ߓߏ߬ߙߌ߬ ߟߊ߫ ߞߊߕߙߍ߬ ߛߕߊ߫ ߟߐ߯ߟߊߣߍ߲߫ ߠߋ߫ ߡߊ߬ ߸ ߊ߬ߟߋ ߟߋ߬ ߥߊߟߌߢߊ ߟߎ߫ ( ߡߊ߬ߡߙߊ߬ߟߌ ) ߛߌ߲߬ߝߏ߲߬ߧߊ߫ ߟߊ߫ ߸ ߞߊ߬ ߟߝߊߙߌ ߟߎ߬ ߝߊߙߊ߲ߝߊߛߌ߫ ߸ ߛߴߊߟߎ߫ ߘߌ߫ ߘߍ߲߬ߞߣߍ߬ߦߴߊߟߎ߫ ߡߊ߰ߙߌ ߓߍ߲߬ߢߐ߲߰ߦߊ ߡߊ߬ ﴿2﴾

ߊ߬ߟߋ ߟߋ߫ ߞߊ߬ ߘߎ߱ ߘߐߝߎߟߋ߲߫ ߸ ߞߊ߬ ߞߐ߲߬ߞߍ ߟߎ߬ ߣߌ߫ ߞߐ߬ߢߊ ߟߎ߬ ߞߍ߫ ߊ߬ ߢߊߝߍ߬ ، ߊ߬ ߣߴߊ߬ ߞߊ߬ ߖߊ߲߬ߕߌ߯ ߝߌ߬ߟߊ-ߝߌ߬ߟߊ߬ ߞߍ߫ ߦߙߌߘߋ߲ ߠߎ߫ ߞߋ߬ߟߋ߲߬ߞߋ߬ߟߋ߲߬ߣߊ ߘߐ߫ ، ߊ߬ߟߋ ߟߋ߬ ߛߎ ߞߍ߫ ߟߊ߫ ߞߊ߬ ߕߟߋ߬ߘߐ߬ߟߊ ߞߎ߲߬ߠߊ߬ߓߌߘߌ߲߫ ، ߕߊ߰ߛߌ߬ ߞߏ߫ ߟߎ߫ ߟߴߏ߬ ߘߐ߫ ߡߌ߬ߙߌ߲߬ߘߌ߬ ߛߌߡߊߟߌߟߊ ߟߎ߬ ߦߋ߫ ߘߋ߬ ﴿3﴾

ߓߊ߲߬ߞߎ߬ ߞߎ߬ߘߎ߲߬ߓߊ߫ ߛߌ߰ߢߐ߲߰ߡߊ ߟߎ߫ ߟߋ߫ ߘߎ߱ ߘߐ߫ ، ߊ߬ ߣߌ߫ ߖߊ߬ߓߌ߬ߙߋ߲߬ ߣߊߞߐ ߟߎ߬ ߣߌ߫ ߝߏ߬ߘߏ ߟߎ߬ ߣߌ߫ ߕߡߊߙߏߝߍ ߟߎ߬ ، ߏ߬ ߘߏ߫ ߟߎ߫ ߕߛߐ߬ߞߘߐ߬ߡߊ߬ߣߍ߲߫ ߸ ߘߏ߫ ߟߎ߫ ߕߛߐ߬ߞߘߐ߬ߡߊ߬ߣߍ߲߫ ߕߍ߫ ، ߊ߬ ߓߍ߯ ߦߋ߫ ߟߊߡߌ߲߬ ߠߊ߫ ߖߌ߫ ߞߋߟߋ߲߫ ߠߋ߬ ߟߊ߫ ߸ ߊ߲ ߘߏ߲߬ ߦߴߊ߬ ߘߏ߫ ߟߊߝߌ߬ߛߦߊ߬ ߟߊ߫ ߘߏ߫ ߘߌ߫ ߣߍߦߊ ߘߐ߫ ، ߕߊ߰ߛߌ߬ ߞߏ߫ ߟߎ߫ ߟߴߏ߬ ߟߎ߬ ߘߐ߫ ߡߌ߬ߙߌ߲߬ߘߌ߬ ߤߊ߲ߞߟߌߡߊ ߟߎ߬ ߦߋ߫ ﴿4﴾

ߣߴߌ ߓߍ߫ ߞߓߊ߫ ߟߊ߫ ߸ ߞߓߊߞߏ߫ ߟߵߊ߬ߟߎ߬ ߞߎߡߊ߫ ߞߊ߲ ߢߌ߲߬ ߘߌ߫ ߘߋ߬ ߸ ߞߏ߫ ߣߴߊ߲ ߞߍ߫ ߘߊ߫ ߓߎ߰ߘߌ ߘߌ߫ ߸ ߌ߬ߦߏ߯ ߊ߲ ߘߌ߫ ߞߍ߫ ߘߊ߲ߠߌ߲߫ ߞߎߘߊ߫ ߘߐ߫؟ ߒ߬ߓߊ߬ ߏ߬ ߟߎ߫ ߟߋ߫ ߓߊ߲߬ߣߴߊ߬ߟߎ߫ ߡߊ߰ߙߌ ߘߐ߫ ߸ ߞߏߟߏ߲ߜߊ߲ ߠߎ߬ ߞߍߕߐ߫ ߏ߬ ߟߎ߫ ߟߋ߬ ߞߊ߲ߠߊ߫ ، ߏ߬ ߟߎ߫ ߟߋ߬ ߞߍߕߐ߫ ߕߊ ߘߏ߲߬ߞߏ ߟߎ߬ ߘߌ߫ ߸ ߊ߬ߟߎ߫ ߘߏ߲߬ ߘߎߡߊߕߐ߫ ߏ߬ ߟߋ ߘߐ߫ ﴿5﴾

ߊ߬ߟߎ߬ ߦߋ߫ ߞߌߢߍ ߢߌߣߌ߲߫ ߠߴߌ ߝߍ߬ ߖߎ߯ߡߊ߲ ߠߊ߫ ߢߌ߬ߡߊ ߢߍ߫ ، ߏ ߢߐ߲߰ߘߐ߬ ߛߌߦߊߡߊ߲߫ ߘߏ߲߬ ߓߘߊ߫ ߕߊ߬ߡߌ߲߫ ߊ߬ߟߎ߬ ߢߍ߫ ߞߘߐ߬ߡߊ߲߫ ߥߍ߫ ، ߓߊ߬ߙߌ߬ ߌ ߡߊ߰ߙߌ ߟߋ߫ ߘߐ߬ߞߏ߬ߦߊ߬ߕߏ߬ߟߌ ߕߌ߱ ߘߌ߫ ߡߐ߱ ߟߎ߬ ߦߋ߫ ߞߵߊ߬ ߟߴߊ߬ߟߎ߬ ߟߊ߫ ߕߐ߬ߢߍ߮ ߞߊ߲߬ ، ߊ߬ ߣߌ߫ ߝߣߊ߫ ߸ ߌ ߡߊ߰ߙߌ ߟߋ߫ ߓߌ߲߬ߓߊ߬ߏ߬ ߜߍߟߍ߲ ߕߌ߱ ߘߌ߫ ﴿6﴾

ߓߊ߲߬ߓߊ߮ ߟߎ߬ ߞߊ߲߫ ߠߋ߬ ߸ ߞߏ߫ ߥߟߊߞߏ߫ ߡߊ߲߬ߕߊߣߌ߲߫ ߕߘߍ߬ ߟߊߖߌ߰ ߊ߬ ߡߵߊ߬ ߡߊ߰ߙߌ ߓߟߏ߫ ، ߌߟߋ ߘߏ߲߬ ߦߋ߫ ߖߊ߬ߛߙߋ߬ߡߊ߬ߟߌ߬ߟߊ ߟߋ߬ ( ߘߐߙߐ߲߫ ) ߘߌ߫ ، ߞߊ߲ߘߊߓߊ߯ ߟߋ߫ ߘߏ߲߬ ߦߋ߫ ߡߌ߬ߙߌ߲߬ߘߌ ߓߍ߯ ߟߊ߫ ﴿7﴾

ߊߟߊ߫ ߞߵߊ߬ ߟߐ߲߫ ߝߋ߲ ߓߍ߯ ߡߛߏ߬ߡߊ߲ ߦߋ߫ ߞߣߐ ߡߍ߲ ߕߊ߬ ߟߊ߫ ، ߊ߬ ߣߌ߫ ߘߋ߲ߛߏ ߟߎ߬ ߦߋ߫ ߘߐߘߛߏ߫ ߟߊ߫ ߊ߬ ߣߴߊ߬ߟߎ߬ ߦߋ߫ ߖߘߌ߫ ߟߊ߫ ߤߊߞߍ ߡߍ߲ ߠߊ߫ ، ߓߊ ߞߏ ߓߍ߯ ߦߴߊ߬ ߓߟߏ߫ ߘߡߊ߬ߦߌߙߊ߫ ߟߋ߬ ߡߊ߬ ﴿8﴾

ߞߏ߫ ߘߏ߲߰ߣߍ߲ ߣߴߊ߬ ߟߊ߲ߞߣߍߡߊߣߍ߲ ߟߐ߲ߓߊ߮ ߟߋ߬ ، ߘߊ߲߬ߞߙߐ߬ߓߊ ߟߋ߬ ، ߞߘߐߕߊ߬ߣߍ߲ ߠߋ߬ ﴿9﴾

ߊߟߎ߫ ߡߍ߲ ߓߊ߯ ߞߎߡߊ ߜߎ߲߬ߘߎ߫ ߏ߱ ߸ ߡߍ߲ ߓߊ߯ ߊ߬ ߟߊ߲ߞߣߍߡߊ߫ ߏ߱ ߸ ߡߍ߲ ߓߊ߯ ߊ߬ ߢߡߊߘߏ߲߰ ߛߎ ߘߐ߫ ߏ߱ ߸ ߊ߬ ߣߌ߫ ߡߍ߲ ߓߊ߯ ߊ߬ ߖߘߍ߬ ߟߊߓߐ߫ ߕߋ߬ߟߋ ߘߐ߫ ߏ߱ ߸ ߏ߬ ߓߍ߯ ߞߢߊߡߊ߲߫ ߠߋ߬ ߖߐ߲ ﴿10﴾

(ߞߣߐ߬ߜߍ߲߬ ߡߟߍߞߊ ) ߞߋ߬ߟߋ߲߬ߞߋ߬ߟߋ߲߬ߓߐ߬ߟߊ ߟߎ߫ ߟߋ߬ ߡߐ߱ ߓߍ߯ ߟߴߊ߬ ߢߍߕߐ߫ ߸ ߊ߬ ߣߴߊ߬ ߞߕߐ߫ ، ߏ߬ ߟߎ߬ ߦߴߊ߬ ߟߊߕߊ߲߬ߞߊ߬ ߟߴߊߟߊ߫ ߟߊ߫ ߖߊ߬ߡߊߙߌ ߟߊ߫ ، ߊߟߊ߫ ߘߏ߲߬ ߕߍ߫ ߡߌ߬ߙߌ߲߬ߘߌ߬ ߛߌ߫ ߟߌ߬ߤߟߊ ߡߊߦߟߍ߬ߡߊ߲߬ ߠߊ߫ ߸ ߝߏ߫ ߊ߬ߟߎ߬ ߓߊ߯ ߊ߬ߟߎ߫ ߖߍ߬ߘߍ߫ ߟߌ߬ߤߟߊ ߡߊߦߟߍ߬ߡߊ߲߫ ، ߣߌ߫ ߊߟߊ߫ ߞߊ߬ ߖߎ߯ߡߊ߲߫ ߟߊߢߌߣߌ߲߫ ߡߌ߬ߙߌ߲߬ߘߌ ߡߍ߲ ߦߋ߫ ߸ ߟߛߊ߬ߦߌ߬ߓߊ߯ ߕߴߏ߬ ߟߊ߫ ߸ ߓߛߌ߬ߓߊ߰ ߜߘߍ߫ ߘߏ߲߬ ߕߴߊ߬ߟߎ߬ ߟߊ߫ ߣߌ߫ ߊߟߊ߫ ߕߍ߫ ﴿11﴾

ߊ߬ߟߋ ߟߋ߬ ߡߍ߯ߡߍ߮ ߦߌ߬ߘߊ߬ ߟߴߊߟߎ߫ ߟߊ߫ ߛߌߟߊ߲ ߣߌ߫ ߕߡߊ߬ߦߌ ߘߌ߫ ، ߊ߬ ߘߌ߫ ߛߊ߲ߝߌ߲߫ ߢߐ߰ߞߐ߬ߞߐ ߟߎ߬ ߟߊߘߊ߲߫ ߛߐ߲߬ ﴿12﴾

ߛߊ߲ߜߊߟߌߡߊ ߣߌ߫ ߞߋ߲ߛߐ߲ ߠߎ߬ ߦߴߊ߬ ߕߊ߲߬ߘߏ ߛߊߣߌ߲ߧߊ߫ ߟߴߊ߬ ߢߍߛߌߟߊ߲ߢߍ ߡߊ߬ ߸ ߊ߬ ߦߋ߫ ߜߊ߬ߙߊ߲߬ߞߕߊ ߟߎ߬ ߗߋ߫ ߟߊ߫ ߛߐ߲߬ ، ߊ߬ ߘߴߏ߬ ߟߊߛߋ߫ ߡߐ߰ ߡߊ߬ ߡߍ߲ ߓߊ߯ ߊ߬ ߘߌߦߊ߫ ، ߞߏ߬ߣߵߊ߬ߟߎ߬ ߦߋ߫ ߊߟߊ߫ ߞߏ ߛߐ߬ߛߐ߬ߟߌ ߟߴߏ߬ ߓߍ߯ ߞߐ߫ ߡߎߣߎ߲߬ ، ߊ߬ ߘߏ߲߬ ߦߋ߫ ߓߌ߲߬ߓߊ߬ߏ߬ ߜߍߟߍ߲ ߕߌ߰ ߘߌ߫ ߞߟߋ߫߹ ﴿13﴾

ߕߎ߬ߢߊ ߞߟߌߟߌ ߦߋ߫ ߟߐ߬ ߟߴߊ߬ߟߋ ߟߋ߫ ߡߊ߬ ، ߊ߬ߟߎ߬ ߦߋ߫ ߡߍ߲ ߠߎ߬ ߞߟߌ߫ ߟߊ߫ ߞߵߊ߬ߟߋ߬ ߕߏ߫ ߦߋ߲߬ ߸ ߏ߬ ߟߎ߬ ߕߍ߫ ߊ߬ߟߎ߫ ߖߋ߬ߓߌ߬ ߟߊ߫ ߝߏߦߌ߬ ߟߊ߫ ، ߊ߰ ߟߋ߬ ߦߏ߫ ߡߍ߲ ߦߴߊ߬ ߕߍ߯ ߝߌ߬ߟߊ ߘߐߝߎߟߋ߲߫ ߠߊ߫ ߖߌ ߦߋ߫ ߸ ߛߴߏ߬ ߘߌ߫ ߛߴߊ߬ ߘߊ ߞߣߐ߫ ߸ ߏ߬ ߘߏ߲߬ ߛߋ߫ ߢߊ߫ ߕߍ߫ ߊ߬ ߘߊ ߞߣߐ߫ ، ߒ߬ߓߊ߬ ߓߊ߲߬ߓߊ߮ ߟߎ߬ ߟߊ߫ ߞߟߌߟߌ ߕߍ߫ ߝߏߦߌ߬ ߘߌ߫ ߝߎ߮ ߞߐ߫ ﴿14﴾

ߛߊ߲ ߠߎ߬ ߣߌ߫ ߘߎ߱ ߞߣߐ߫ ߝߋ߲ ߠߎ߬ ߣߴߊ߬ߟߎ߬ ߘߎߟߋ߲ ߠߎ߬ ߦߋ߫ ߕߌ߲ߓߌߘߌ߲ ߞߍ߫ ߟߴߊߟߊ߫ ߦߋ߫ ߘߌߦߊߘߌߦߊ ߟߊ߫ ߸ ߊ߬ ߣߌ߫ ߜߏߦߊߜߏߦߊ ߟߊ߫ ߸ ߛߐ߱ ߡߊ߬ ߣߌ߫ ߥߎ߬ߙߊ ߟߊ߫ ﴿15﴾

ߊ߬ ߝߐ߫ ߞߏ߫ ߖߍߣߍ߲ ߦߋ߫ ߛߊ߲ ߠߎ߬ ߣߌ߫ ߘߎ߱ ߡߊ߰ߙߌ ߘߌ߫؟ ߊ߬ ߖߋ߬ߓߌ߬ ߞߏ߫ ߊߟߊ߫ ߞߍ߬ ، ߊ߬ ߝߐ߫ ߞߏ߫ ߌ߬ߦߏ߯ ߊߟߎ߫ ߞߵߊߟߊ߫ ߕߏ߫ ߞߵߊߟߎ߫ ߓߟߏߞߍ߫ ߞߏߕߌ߯ ߜߘߍ߫ ߟߎ߫ ߟߊ߫ ߸ ߡߍ߲ ߠߎ߬ ߕߍ߫ ߣߝߊ߬ ߣߌ߫ ߕߙߐߦߊ߫ ߛߌ߫ ߡߙߊ߬ ߟߴߊ߬ߟߎ߫ ߖߘߍ߬ ߦߋ߫؟ ߊ߬ ߝߐ߫ ߞߏ߫ ߦߊ߯ߟߊ߫ ߝߎߦߋ߲ ߣߌ߫ ߢߡߊ ߘߌ߫ ߞߢߊ߫ ߓߊ߬؟ ߥߟߊ߫ ߦߊ߯ߟߊ߫ ߘߌ߬ߓߌ ߟߎ߬ ߣߌ߫ ߦߋߟߋ߲ ߘߌ߫ ߞߢߊ߫؟ ߤߊߡߊ߲ߕߍ߫ ߊ߬ߟߎ߫ ߣߊ߬ ߜߙߊ߬ߢߐ߲߮ ߡߍ߲ ߠߎ߬ ߞߍ߫ ߟߴߊߟߊ߫ ߟߊ߫ ߸ ߏ߬ ߟߎ߫ ߞߵߊ߬ ߟߊ߫ ߘߊ߲ߠߌ߲ ߢߐ߲߰ ߠߋ߬ ߘߊ߲߫ ߸ ߝߏ߫ ߞߊ߬ ߘߊ߲ߠߌ߲ ߠߎ߬ ߡߎߣߎ߲ߧߴߊ߬ߟߎ߬ ߢߣߊ߫ ߓߊ߬؟ ߊ߬ ߟߊߛߋ߫ ߞߏ߫ ߊߟߊ߫ ߟߋ߬ ߝߋ߲ ߓߍ߯ ߘߊ߲ߓߊ߮ ߘߌ߫ ߸ ߊ߬ ߣߴߊ߬ߟߋ ߟߋ߫ ߞߎ߲߬ߞߋߟߋ߲߫ ߞߘߊߡߊߟߌߟߊ ߘߌ߫ ﴿16﴾

ߊ߬ ߞߊ߬ ߖߌ ߟߊߖߌ߰ ߞߊ߬ ߓߐ߫ ߡߐ߲ߕߐ߲ ߘߐ߫ ߸ ߞߐ߭ ߟߎ߫ ߥߦߏ߬ ߘߴߊ߬ߟߎ߫ ߝߐ߬ߝߐ ߟߎ߫ ߘߡߊ߬ߦߌߙߊ ߟߊ߫ ، ߥߏ߬ߦߏ ߞߊ߬ ߞߊ߲߬ߞߊ ߝߎ߲ߣߍ߲ ߕߊ߬ ، ߞߊ߲߬ߞߊ ߏ߬ ߢߐ߲߰ ߠߋ߬ ߣߍ߱ ߛߎ߮ ߟߎ߬ ߝߣߊ߫ ߟߊ߫ ߸ ߡߍ߲ ߠߎ߬ ߦߋ߫ ߦߋ߬ߟߋ߲߬ ߠߊ߫ ߕߊ ߘߐ߫ ߡߊ߬ߖߐ߯ߙߊ߲ ߢߌߣߌ߲ ߠߊ߫ ߸ ߥߟߊ߫ ߡߎ߬ߙߊ߲ ، ߊߟߊ߫ ߦߋ߫ ߕߎ߬ߢߊ ߣߌ߫ ߥߎߦߊ ߟߊ߫ ߟߊ߫ ߛߊ߲߬ߘߊ ߘߌ߫ ߕߋ߲߬ ߠߋ߬ ، ߒ߬ߓߊ߬ ߞߊ߲߬ߞߊ ߛߊ߫ ߸ ߏ߬ ߘߌ߫ ߥߊ߫ ߝߊ߲ߞߎߟߊ߲߫ ، ߡߐ߱ ߟߎ߬ ߡߎߣߊ߲ߝߊ߲߫ ߝߋ߲ ߘߌ߫ ߕߏ߫ ߘߎ߱ ߘߐ߫ ߸ ߊߟߊ߫ ߘߏ߲߬ ߦߋ߫ ߛߊ߲߬ߘߊ ߟߎ߬ ߟߊ߫ ߟߊ߫ ߕߋ߲߬ ߠߋ߬ ﴿17﴾

ߡߍ߲ ߠߎ߫ ߞߵߊ߬ߟߎ߫ ߡߊ߰ߙߌ ߖߋ߬ߓߌ߬ ߸ ߢߌ߬ߡߊ ߟߴߏ߬ ߟߎ߬ ߦߋ߫ ، ߡߍ߲ ߠߎ߬ ߡߴߊ߬ ߖߋ߬ߓߌ߬ ߛߊ߫ ߸ ߤߊߟߌ߫ ߘߎ߱ ߞߣߐ߫ ߝߋ߲ ߓߍ߯ ߞߍ߫ ߘߴߏ߬ ߟߎ߬ ߓߟߏ߫ ߸ ߞߵߏ߬ ߢߐ߲߰ ߜߘߍ߫ ߟߴߊ߬ ߞߊ߲߬ ߸ ߊ߬ߟߎ߬ ߘߴߊ߬ߟߎ߫ ߞߎ߲߬ߞߊ߬ ߏ߬ ߟߊ߫ ، ߒ߬ߓߊ߬ ߖߊ߬ߕߋ߬ߓߐ߬ ߖߎ߮ ߦߴߏ߬ ߟߎ߫ ߟߋ߬ ߦߋ߫ ، ߊ߬ ߣߴߊ߬ߟߎ߬ ߡߊߞߍ߫ ߦߙߐ ߟߋ߬ ( ߞߍߕߐ߫ ) ߔߊߦߌߔߊߦߌ ߘߌ߫ ߸ ߏ߬ ߘߏ߲߬ ߦߋ߫ ߟߊ߫ ߦߙߐ߫ ߖߎ߯ ߘߌ߫ ߞߟߋ߫ ﴿18﴾

ߐ߲߬ߤߐ߲߫ ߸ ߦߊ߯ߟߊ߫ ( ߡߐ߱ ) ߡߍ߲ ߞߵߊ߬ ߟߐ߲߫ ߞߏ߫ ( ߝߋ߲ ) ߡߍ߲ ߟߊߖߌ߰ߣߴߌ ߡߊ߬ ߞߊ߬ ߝߊߘߴߌ ߡߊ߰ߙߌ ߟߊ߫ ߞߴߏ߬ ߟߋ ߕߎ߬ߢߊ ߘߌ߫ ߸ ߏ߬ ߘߌ߫ ߞߍ߫ ߓߊ߬ ߦߏ߫ ߡߍ߲ ߦߋ߫ ߝߎߦߋ߲ ߘߌ߫؟ ߒ߬ߓߊ߬ ߤߊ߲ߞߟߌߕߌ߮ ߟߎ߫ ߟߴߊ߬ߟߎ߫ ߕߊ߰ߛߌ߬ ߟߊ߫ ﴿19﴾

ߏ߬ ߟߎ߫ ߟߋ߬ ߊߟߊ߫ ߟߊ߫ ߟߊ߬ߤߘߌ ߝߊ߫ ߟߊ߫ ߸ ߊ߬ߟߎ߬ ߕߍ߫ ߛߘߊߒߡߊߞߊ߲ߠߊ ߕߌߢߍ߫ ߟߊ߫ ߝߋߎ߫ ﴿20﴾

ߏ߬ ߟߎ߫ ߟߋ߬ ߝߋ߲߫ ߕߎ߲߰ ߠߊ߫ ߸ ߊߟߊ߫ ߞߊ߬ ߖߡߊ߬ߙߌ߬ߟߌ ߞߍ߫ ߞߏ߫ ߞߊ߬ ߡߍ߲ ߕߎ߲߰ ߸ ߊ߬ߟߎ߬ ߦߋ߫ ߛߌߟߊ߲߫ ߠߴߊ߬ߟߎ߫ ߡߊ߰ߙߌ ߢߍ߫ ߸ ߞߊ߬ ߖߌߕߐߦߊ߫ ߖߊ߬ߕߋ߬ߓߐ߬ ߖߎ߮ ߢߍ߫ ﴿21﴾

ߏ߬ ߟߎ߫ ߟߋ߫ ߞߵߊ߬ߟߎ߫ ߡߎ߬ߢߎ߲߫ ߊ߬ߟߎ߫ ߡߊ߰ߙߌ ߞߏߟߘߊ ߢߌߣߌ߲ ߡߊ߬ ߸ ߊ߬ ߣߌ߫ ߞߊ߬ ߛߊߟߌ ߟߐ߬ ߸ ߊ߬ ߣߴߊ߲ ߞߵߊ߬ߟߎ߫ ߤߊ߬ߙߌ߬ߖߍ߰ ߝߋ߲ ߡߍ߲ ߠߊ߫ ߸ ߊ߬ߟߎ߬ ߦߋ߫ ߖߘߍ߬ߡߊ߬ߓߐ ߞߍ߫ ߟߴߏ߬ ߘߐ߫ ߜߎ߲߬ߘߎ ߣߌ߫ ߟߊ߲ߞߣߍߡߊ ߘߐ߫ ߸ ߊ߬ ߣߴߊ߬ߟߎ߬ ߦߋ߫ ߢߌ߬ߡߊ ߞߍ߫ ߟߊ߫ ߞߊ߬ ߖߎ߯ߡߊ߲ ߠߊߕߊ߲߬ߞߌ߲߫ ، ߒ߬ߓߊ߬ ߏ߬ ߟߎ߫ ߟߋ߬ ߕߊ ߦߋ߫ ߛߏ ߞߏߟߊߓߊ߲ ߘߌ߫ ﴿22﴾

ߣߊߟߌ߬ߡߎ߲߬ ߝߙߍ ߣߊߞߐ ߟߎ߬ ߘߌ߫ ߸ ߊ߬ߟߎ߫ ߘߏ߲߬ߕߐ߫ ߦߋ߲߬ ߠߋ߬ ߸ ߊ߬ ߣߌ߫ ߡߍ߲ ߠߎ߬ ߓߊ߯ ߢߵߊ߬ߟߎ߫ ߝߊ߭ ߟߎ߬ ߣߴߊ߬ߟߎ߬ ߝߘߎߡߊ ߟߎ߬ ߣߴߊ߬ߟߎ߬ ߓߐ߲ߛߐ߲ ߠߎ߬ ߘߐ߫ ߸ ߞߋ߲ߛߐ߲ ߠߎ߬ ߦߋ߫ ߘߏ߲߬ ߠߴߊ߬ߟߎ߫ ߞߊ߲߬ ߘߊ ߓߍ߯ ߟߊ߫ ﴿23﴾

ߞߏ߫ ߖߐ ߦߴߊߟߎ߫ ߡߊ߬ ߞߊ߬ߡߊߛߐ߬ߘߐ߲߬ ߊߟߎ߫ ߞߊ߬ ߡߎ߬ߢߎ߲ ߡߍ߲ ߞߍ߫ ߸ ߛߏ ߞߏߟߊߓߊ߲ ߘߏ߲߬ ߢߊ߬ ߘߊ߫ ߞߟߋ߫ ﴿24﴾

ߞߏ߬ߣߌ߲߬ ߡߍ߲ ߠߎ߬ ߦߴߊߟߊ߫ ߟߊ߫ ߟߊ߬ߤߘߌ ߕߌߢߍ߫ ߟߴߊ߬ ߘߐߖߊ߭ ߞߐ߫ ߸ ߊ߬ ߣߴߊ߬ߟߎ߬ ߦߋ߫ ߝߋ߲߫ ߕߍ߰ ߟߴߊߟߊ߫ ߞߊ߬ ߖߊ߬ߡߊߙߌ ߞߍ߫ ߞߏ߫ ߞߊ߬ ߡߍ߲ ߕߎ߲߰ ، ߊ߬ ߣߌ߫ ߞߵߊ߬ ߞߍ߫ ߕߌߢߍߟߌ ߘߌ߫ ߖߡߊ߬ߣߊ ߞߣߐ߫ ، ߘߊ߲ߞߊ ߏ߬ ߟߎ߫ ߟߋ߬ ߢߍ߫ ߸ ߊ߬ ߣߌ߫ ߛߏ߫ ߖߎ߮ ߦߴߊ߬ߟߎ߬ ߢߍ߫ ﴿25﴾

ߊߟߊ߫ ߦߋ߫ ߤߊ߬ߙߌ߬ߖߍ߮ ߘߐߝߎߟߋ߲߫ ߠߊ߫ ߡߐ߰ ߟߋ߬ ߦߋ߫ ߡߍ߲ ߓߊ߯ ߊ߬ ߘߌߦߊ߫ ، ߊ߬ ߣߴߊ߬ ߘߴߊ߬ ߛߕߌ߬ ߝߣߊ߫ ، ߊ߬ߟߎ߬ ߓߘߊ߫ ߛߍߥߊ߫ ߘߎߢߊ߫ ߢߣߊߡߦߊ ߟߊ߫ ، ߘߎߢߊ߫ ߢߣߊߡߦߊ ߘߏ߲߬ ߕߍ߫ ߝߏߦߌ߬ ߘߌ߫ ߟߊߞߌߙߊ߫ ( ߕߊ ߘߊߝߍ߬ ) ߝߏ߫ ߘߊ߰ߡߎ߲ ( ߘߐ߫ ߛߐ߰ߡߘߊ߬ߝߙߋ) ﴿26﴾

ߓߊ߲߬ߓߊ߮ ߟߎ߬ ߦߴߊ߬ ߝߐ߫ ߟߊ߫ ߞߏ߫ ߥߟߊߞߏ߫ ߡߊ߲߬ߕߊߣߌ߲߫ ߕߘߍ߬ ߟߊߖߌ߰ ‹ ߞߋߟߊ› ߡߵߊ߬ ߡߊ߰ߙߌ ߓߟߏ߫ ، ߊ߬ߟߎ߫ ߖߋ߬ߓߌ߬ ߞߏ߫ ߊߟߊ߫ ߦߋ߫ ߡߐ߰ ߟߋ߬ ߟߊߝߟߌ߬ ߟߊ߫ ߡߍ߲ ߓߊ߯ ߊ߬ ߘߌߦߊ߫ ߸ ߊ߬ ߘߌ߫ ߡߐ߰ ߞߊ߲ߘߴߊ߬ ߖߍ߬ߘߍ ߡߊ߬ ߡߍ߲ ߓߊ߯ ߊ߬ ߖߘߍ߬ߟߊߛߊ߬ߦߌ߬ ﴿27﴾

ߏ߬ ߟߎ߫ ߟߋ߫ ߘߍ߲߬ߞߣߍ߬ߦߊ߬ߣߍ߲߫ ߸ ߊ߬ ߣߴߊ߬ߟߎ߫ ߛߣߐ߬ߡߍ ߟߎ߬ ߦߋ߫ ߡߝߊ߫ ߟߴߊߟߊ߫ ߞߏߝߐ ߟߊ߫ ، ߞߏ߬ߞߏ߫ ߛߣߐ߬ߡߍ ߟߎ߬ ߦߋ߫ ߡߝߊ߫ ߟߴߊߟߊ߫ ߞߏߝߐ ߟߋ߬ ߟߊ߫ ߞߍ߬؟ ﴿28﴾

ߡߍ߲ ߠߎ߫ ߞߏ߬ߣߌ߲ ߘߍ߲߬ߞߣߍ߬ߦߊ߬ߣߍ߲߫ ߞߊ߬ ߢߌ߬ߡߊ ߟߎ߬ ߞߍ߫ ߸ ߓߘߏ߬ߞߏ߬ߓߘߊߞߊ ߦߴߏ߬ ߟߎ߫ ߟߋ߬ ߢߍ߫ ߸ ߊ߬ ߣߌ߫ ߛߊ߬ߦߌ߬ ߦߌ߬ߟߊ߬ ߢߌߡߊ ﴿29﴾

ߒ߬ߓߊ߬ ߊ߲ ߣߵߌ ߗߋ߫ ߟߊ߫ ߡߌ߬ߙߌ߲߬ߘߌ߫ ߡߊ߬ ߕߋ߲߬ ߠߋ߬ ߸ ߡߌ߬ߙߌ߲߬ߘߌ߬ ߛߘߍߡߊ߲߫ ߓߘߊ߫ ߕߊ߬ߡߌ߲߬ ߡߍ߲ ߢߍ߫ ߞߘߐ߬ߡߊ߲߫ ߸ ߒ ߞߏ߫ ߛߴߌ ߘߌ߫ ߟߍߙߊ߫ ߞߊ߬ߙߊ߲߬ ߊ߬ߟߎ߬ ߦߋ߫ ߒ ߞߵߌ ߦߟߌߘߏ߲߬ ߡߍ߲ ߠߊ߫ ، ߊ߬ߟߎ߫ ߘߏ߲߬ ߦߋ߫ ߓߊ߲߬ߓߊ߰ߦߊ ߟߐ߭ ߞߊ߲߬ ߡߊ߬ߤߌ߬ߣߊ߬ߟߊ ߡߊ߬ ߏ߬ ߓߍ߯ ߞߐ߫ ، ߊ߬ ߝߐ߫ ߞߴߏ߬ ߟߋ ߒߠߋ ߡߊ߰ߙߌ ߘߌ߫ ߸ ߡߊ߰ߙߌ߬ ߜߘߍ߫ ߘߏ߲߬ ߕߴߏ߬ ߞߐ߫ ، ߒߠߋ ߛߍ߲߬ߓߍ߬ߣߴߏ߬ ߟߋ ߟߊ߫ ߸ ߒ ߘߏ߲߬ ߒ ߖߘߍ߬ߟߊߛߊ߬ߦߌ߲߬ ߠߴߊ߬ߟߋ ߟߋ߫ ߡߊ߬ ﴿30﴾

ߤߊߟߌ߬ ߞߎ߬ߙߣߊ߬ ߜߘߍ߫ ߕߎ߲߬ ߓߍ߫ ߸ ߞߎ߬ߙߎ ߟߎ߬ ߘߌ߫ ߟߊߕߊ߯ ߡߍ߲ ߠߊ߫ ߸ ߥߟߊ߫ ߞߊ߬ ߘߎ߱ ߘߐߞߎߘߎ߲ߞߎߘߎ߲߫ ߊ߬ ߟߊ߫ ߸ ߤߊߡߊ߲ߕߍ߫ ߞߊ߬ ߛߎ߭ ߟߎ߬ ߟߊߞߎߡߴߊ߬ ߟߊ߫ ،.. ߞߏ߬ߣߌ߲߬ ߌ߬ߦߏ߯ ߞߟߋ߫߹ ߊߟߊ߫ ߕߊ ߟߋ߬ ߞߏߢߊ ߓߍ߯ ߘߌ߫. ߦߊ߯ߟߊ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߡߴߊ߬ ߟߐ߲߫ ߓߊ߬ ߞߏ߫ ߊ߬ ߕߎ߲߬ ߓߊ߯ ߘߌߦߴߊߟߊ߫ ߦߋ߫ ߸ ߊ߬ ߕߘߍ߬ ߘߌ߫ ߡߐ߱ ߓߍ߯ ߞߊ߲ߘߊ߫ ߞߐߘߍ߫؟ ߒ߬ߓߊ߬ ߖߛߎ߬ ߞߟߎ߬ ߞߏ ߕߍߣߊ߬ ߝߘߊ߫ ߟߊ߫ ߓߊ߲߬ߓߊ߮ ߟߎ߫ ߛߐ߬ߘߐ߲߬ ߠߴߊ߬ߟߎ߬ ߗߋߥߊߟߌ ߟߎ߬ ߞߏߛߐ߲߬ ، ߥߟߊ߫ ߖߛߎ߬ ߞߟߎ߬ ߞߏ ߦߋ߫ ߖߎߙߊ߲߫ ߊ߬ߟߎ߬ ߟߊ߫ ߟߎ ߘߊߝߍ߬ ߸ ߝߏ߫ ߊߟߊ߫ ߟߊ߫ ߦߟߌߡߊߘߌߦߊ ߦߋ߫ ߣߊ߬ ، ߊߟߊ߫ ߘߏ߲߬ ߕߍ߫ ߦߟߌߡߊߘߌߦߊ߫ ߞߊ߲ ߝߘߏ߬ ߟߊ߫ ﴿31﴾

ߞߋߟߊߡߐ߯ ߛߘߍߡߊ߲߫ ߓߘߊ߫ ߘߐߓߊ߬ߙߊ߲߬ߕߌ߬ ߌߟߋ ߢߍ߫ ߞߘߐ߬ߡߊ߲߫ ߸ ߓߊ߬ߙߌ߬ ߒ ߞߊ߬ ߓߊ߲߬ߓߊ߮ ߟߎ߫ ߘߏ߲߰ߘߌ߬ ߡߎߣߎ߲߬ ߖߐ߫ ، ߒ ߞߊ߬ ߓߊ߲߫ ߞߵߊ߬ߟߎ߬ ߕߍ߯ߕߊ߭ ߡߍ߲ ߞߍ߫ ߸ ߒ߬ ߠߊ߫ ߓߌ߲߬ߓߊߏ ߞߍ߫ ߘߊ߫ ߘߌ߬؟ ﴿32﴾

ߐ߲߬ߤߐ߲߫ ߸ ߖߍߣߍ߲ ߟߐ߬ߣߍ߲߫ ߣߌߡߊ ߓߍ߯ ߞߎ߲߬ߘߐ߫ ߊ߬ ߗߋߥߊߟߌ ߝߍ߬؟ ߌ߬ߦߏ߯ ߊ߬ߟߎ߫ ߞߊ߬ ߜߙߊ߬ߢߐ߲߮ ߠߎ߬ ߞߍ߫ ߊߟߊ߫ ߏ߬ ߟߊ߫؟ ߊ߬ ߝߐ߫ ߞߏ߫ ߊߟߎ߫ ߦߋ߫ ( ߜߙߊ߬ߢߐ߲߮ ) ߏ߬ ߟߎ߬ ߕߐ߮ ߡߊߘߊ߲߫ ߓߊ߫ ، ߥߟߴߊߟߎ߫ ߦߋ߫ ߊߟߊ߫ ߞߌ߬ߓߊ߬ߙߏ߬ ߟߊ߫ ߞߏ߫ ߟߋ߬ ߟߊ߫ ߓߊ߬ ߊ߬ ߡߊ߫ ߡߍ߲ ߟߐ߲߫ ߘߎ߱ ߞߊ߲߬ ߸ ߥߟߊ߫ ߞߎߡߊ߫ ߟߊ߲ߞߣߍߡߊߣߍ߲߫ ߠߋ߬ ߟߊ߫؟ ߋ߬ߋ߬ߋ߯ ߡߍ߲ ߦߋ߫ ߸ ߓߊ߲߬ߓߊ߮ ߟߎ߬ ߟߊ߫ ߣߊߡߙߊ ߟߋ߬ ߓߘߊ߫ ߡߊߢߍ߯ߙߍ߫ ߊ߬ߟߎ߬ ߢߊߞߘߐ߫ ߸ ߞߵߊ߬ߟߎ߫ ߞߎ߬ߡߊ߲߬ߘߌ߬ ߛߌߟߊ ߡߊ߬ ، ߊߟߊ߫ ߘߏ߲߬ ߓߊ߯ ߡߍ߲ ߠߊߝߟߌ߬ ߞߊ߲ߘߊߓߊ߯ ߕߴߏ߬ ߟߊ߫ ﴿33﴾

ߊ߬ߟߎ߫ ߛߐ߰ߕߐ߫ ߘߎߢߊ߫ ߢߣߡߦߊ ߖߊ߲߰ߞߕߊ ߟߋ߫ ߡߊ߬ ߸ ߟߊߞߌߙߊ߫ ߖߊ߲߰ߞߕߊ ߘߏ߲߬ ߜߍ߬ߟߍ߲߬ߡߊ߲߫ ߏ߬ ߘߌ߫ ، ߟߊ߬ߕߊ߲߬ߞߊ߬ߓߊ߯ ߘߏ߲߬ ߕߍ߫ ߊ߬ߟߎ߬ ߟߴߊߟߊ߫ ߡߊ߬ ﴿34﴾

(ߡߍ߲ߘߌߦߊ ) ߣߊߞߐ ߡߊ߲߬ߞߕߎ ߟߋ߫ ߣߌ߲߬ ߸ ߝߊ߲ߕߊ߲ߞߟߊ ߟߎ߬ ߦߟߌߡߊߘߌߦߊߣߍ߲߫ ߡߍ߲ ߠߊ߫: ߞߐ߭ ߟߎ߬ ߦߋ߫ ߥߦߏ߬ ߟߴߊ߬ ߞߘߐߟߊ ߟߎ߬ ߘߐ߫ ߸ ߊ߬ ߦߙߌ ߟߎ߬ ߥߟߏߒߘߐ ߟߎ߬ ߣߴߊ߬ߟߎ߬ ߘߎߟߋ߲ ߦߴߊ߬ߟߎ߬ ߟߊ߫ ߟߋ߬ ߞߘߊߎ߫ ، ߒ߬ߓߊ߬ ߝߊ߲ߕߊ߲ߞߟߊ ߟߎ߬ ߟߊߓߊ߲߫ ( ߦߌߟߊ ) ߟߴߏ߬ ߘߌ߫ ، ߓߊ߲߬ߓߊ߮ ߟߎ߫ ߟߋ߬ ߟߊߓߊ߲߫ ( ߦߌߟߊ ) ߦߋ߫ ߕߊ ߘߌ߫ ﴿35﴾

ߊ߲ ߣߊ߬ ߡߍ߲ ߠߎ߬ ߛߐ߫ ߟߊ߫ ߟߍߙߊ ߟߊ߫ ( ߞߘߐ߬ߡߊ߲߫ ) ߸ ߏ߬ ߟߎ߫ ߟߋ߬ ߛߍߥߊ߫ ߟߊ߫ ߝߋ߲߫ ߠߊ߫ ߡߍ߲ ߠߊߖߌ߰ߣߴߌ ߡߊ߬ ߣߌ߲߬ ، ߓߊ߬ߙߌ߬ ߡߐ߰ ߦߋ߫ ߞߙߎߞߊ ߟߎ߬ ߘߐ߫ ߸ ߡߍ߲ ߦߴߊ߬ ߦߌߟߊ ߘߏ߫ ߡߊߛߐ߬ߛߐ߬ ߟߊ߫ ، ߊ߬ ߟߊߛߋ߫ ߞߏ߫ ߒߠߋ ߖߡߊ߬ߙߌ߬ߣߍ߲߫ ߠߋ߬ ߸ ߞߏ߫ ߒ ߧߴߊߟߊ߫ ߓߊ߬ߕߏ߬ ߸ ߊ߬ ߣߌ߫ ߞߏ߫ ߒ ߞߊߣߊ߬ ߝߋ߲߫ ߝߊ߬ߙߴߊ߬ ߡߊ߬ ، ߒ ߧߋ߫ ߞߟߌߟߌ ߞߍ߫ ߟߴߊ߬ߟߋ ߟߋ߫ ߡߊ߬ ߸ ߒ ߘߏ߲߬ ߦߋ߫ ߒ ߖߘߍ߬ ߟߊߛߊ߬ߦߌ߬ ߟߴߊ߬ߟߋ ߟߋ߫ ߡߊ߬ ﴿36﴾

ߒ߬ߓߵߊ߲ ߣߵߊ߬ ߟߊߖߌ߰ ߟߊ߫ ߥߘߋ߬ߥߘߋ߬ߟߌ ߟߎ߬ ߘߌ߫ ߊߙߊߓߎ߫ ( ߞߊ߲ ) ߘߐ߫ ߕߋ߲߬ ߠߋ߬. ߞߏ߬ߣߌ߲߬ ߣߴߌ ߞߵߊ߬ߟߎ߬ ( ߣߌ ) ߛߊ߬ߥߏ ߟߎ߬ ߟߊߓߊ߬ߕߏ߫ ߡߎ߬ߕߎ߲߬ ߟߐ߲ߠߌ߲ ߣߊ߬ߣߍ߲ ߞߐ߫ ߌ ߡߊ߬ ߸ ߢߌ߲߬ ߕߴߌ ߟߴߊߟߊ߫ ߡߊ߬ ߏ߬ ߘߐ߫ ߸ ߕߊ߲߬ߞߊ߬ߓߊ߰ ߕߴߌ ߟߊ߫ ﴿37﴾

ߊ߲ ߞߊ߬ ߞߋߟߊߡߐ߯ ߛߌߦߊߡߊ߲߫ ߠߋ߬ ߗߋ߫ ߌ ߢߍ߫ ߞߘߐ߬ߡߊ߲߫ ، ߊ߲ ߞߵߏ߬ ߟߎ߬ ߛߐ߫ ߝߘߎߡߊ ߟߎ߬ ߣߌ߫ ߓߐ߲ߛߐ߲ ߠߎ߬ ߟߊ߫ ، ߞߏ߬ߣߵߊ߬ ߛߋ߫ ߕߍ߫ ߞߋߟߊߡߐ߯ ߛߌ߫ ߦߋ߫ ߞߊ߬ ߣߊ߬ ߡߊ߲߬ߕߊߣߌ߲ ߘߌ߫ ߝߏ߫ ߊߟߊ߫ ߓߊ߯ ߘߌ߬ߢߍ߬ ، ߛߕߊ ߓߍ߯ ߣߴߊ߬ ߕߊ߫ ߟߍߙߊ߫ ߟߋ߬ ﴿38﴾

ߊߟߊ߫ ߦߋ߫ ߝߋ߲߫ ߠߋ߬ ߖߏ߲߫ ߠߊ߫ ߡߍ߲ ߓߊ߯ ߊ߬ ߘߌߦߊ߫ ߸ ߊ߬ ߦߋ߫ ߘߏ߫ ߝߣߊ߫ ߕߏ߫ ߟߴߊ߬ ߡߊ߬ ، ߟߍߙߊ ߓߊ߫ ߞߘߐ ߦߴߊ߬ߟߋ ߟߋ߬ ߓߟߏ߫ ﴿39﴾

ߊ߲ ߞߵߊ߬ߟߎ߬ ߦߟߌߡߊߘߌߦߊ߫ ߞߏ߫ ( ߟߐ߯ߟߊߣߍ߲ ) ߘߏ߫ ߦߘߵߌ ߟߊ߫ ߓߊ߬ ߸ ߥߟߊ߫ ߊ߲ ߞߵߌ ߛߏߡߊߦߟߍߡߊ߲߫ ߓߊ߬ ߸ ߡߍ߲ ߌ ߡߊ߬ ߏ߬ ߟߋ ߟߊ߬ߛߋ߬ߟߌ ߘߌ߫ ، ߖߊ߬ߕߋ߬ߓߐ ߛߊ߫ ߸ ߏ߬ ߦߋ߫ ߒ߬ߠߎ߫ ߟߋ߫ ߡߊ߬ ﴿40﴾

ߊ߬ߟߎ߬ ߕߴߊ߬ ߦߋ߫ ߟߊ߫ ߓߊ߬ ߒ ߧߋ߫ ߣߊ߭ ߞߊ߲߬ ߖߡߊ߬ߣߊ ߡߊ߬ ߞߊ߬ ߕߊ߬ߡߌ߲߫ ߊ߬ ߡߊߘߐ߯ߦߊ߫ ߟߴߊ߬ ߞߎ߲߭ ߓߍ߯ ߟߊ߫؟ ߊߟߊ߫ ߟߋ߬ ߞߕߌ ߟߊ߫ ߟߊ߫ ߸ ߣߐ߬ߡߛߊ߬ߦߌ߬ߓߊ߯ ߘߏ߲߬ ߕߍ߫ ߊ߬ ߟߊ߫ ߞߕߌ ߟߊ߫ ، ߊ߬ߟߋ ߟߋ߫ ߖߊ߬ߕߋ߬ߓߐ߬ ߞߊߟߌ߲ ߕߌ߱ ߘߌ߫ ﴿41﴾

ߊ߬ߟߎ߬ ߢߍߓߊ߮ ߟߎ߫ ߞߊ߬ ߣߊߡߙߊ ߞߍ߫ ، ߊߟߊ߫ ߟߋ߬ ߘߏ߲߬ ߕߊ߫ ߦߋ߫ ߣߊߡߙߊ ߓߍ߯ ߘߌ߫ ߸ ߓߊ ߊ߬ ߞߵߊ߬ ߟߐ߲߫ ߣߌߡߊ ߓߍ߯ ߦߋ߫ ߡߍ߲ ߓߊ߯ߙߊ߫ ߟߊ߫ ߸ ߞߏ߬ߣߌ߲߬ ߓߊ߲߬ߓߊ߮ ߟߎ߬ ߘߌߣߵߊ߬ ߟߐ߲߫ ߛߏ ߞߏߟߊߓߊ߲ ߦߋ߫ ߡߍ߲ ߕߊ߫ ߘߌ߫ ﴿42﴾

ߓߊ߲߬ߓߊ߮ ߟߎ߬ ߞߊ߲߫ ߠߋ߬ ߸ ߞߴߌߟߋ ߕߍ߫ ߞߋߟߊߡߐ߯ ߘߌ߫ ، ߊ߬ߟߎ߫ ߖߋ߬ߓߌ߬ ߞߏ߫ ߊߟߊ߫ ߥߛߊ߬ ߘߊ߫ ߛߙߋ߫ ߘߌ߫ ߒߠߋ ߣߴߊߟߎ ߕߍ߫ ، ߊ߬ ߣߌ߫ ߟߍߙߊ ߟߐ߲ߓߊ߮ ߥߛߊ߬ ߘߴߊ߲ ߕߍ߫ ߛߙߋ߫ ߘߌ߫ ﴿43﴾

ߊ. ߟ. ߙ. ( ߊߟߌߝ. ߟߊ߯ߡ. ߙߊ߯. ) ߒ߬ߠߎ߫ ߟߋ߫ ߣߊ߬ ߟߍߙߊ ߣߌ߲߬ ߠߊߖߌ߰ ߟߴߌ ߡߊ߬ ߸ ߛߴߌ ߘߌ߫ ߡߐ߱ ߟߎ߬ ߓߐ߫ ߘߌ߬ߓߌ ߟߎ߬ ߘߐ߫ ߞߊߕߙߍ߬ ߦߋߟߋ߲ ߡߊ߬ ߸ ߊ߬ߟߎ߫ ߡߊ߰ߙߌ ߟߊ߫ ߘߌ߬ߢߍ ߟߊ߫ ߸ ߞߊ߬ ߕߊ߯ ߣߌ߬ߣߌ߬ߟߊ߫ ߕߊ߲߬ߘߏ߬ߕߊ ߟߊ߫ ߛߌߟߊ ߞߊ߲߬ ﴿1﴾

ߊߟߊ߫ ߏ߬ ߟߋ ߕߊ߫ ߦߋ߫ ߛߊ߲ ߠߎ߬ ߞߣߐ߫ ߝߋ߲ ߣߌ߫ ߘߎ߱ ߞߊ߲߬ ߝߋ߲ ߘߌ߫ ، ߒ߬ߞߊ߬ ߜߊ߬ߟߏ ߟߋ߫ ߓߊ߲߬ߓߊ߮ ߟߎ߬ ߦߋ߫ ߸ ߣߊߟߌ߬ߡߎ߲߫ ߖߊ߲߰ߞߕߊ߬ ߜߍߟߍ߲ ߘߌ߫ ﴿2﴾

ߏ߬ ߟߎ߫ ߟߋ߬ ߘߎߢߊ߫ ߢߣߊߡߦߊ ߞߊ߬ߣߌ߲߬ ߠߊ߫ ߟߊߞߌߙߊ߫ ߕߊ ߘߌ߫ ، ߊ߬ ߣߴߊ߬ߟߎ߬ ߦߋ߫ ߞߎ߬ߡߊ߲߬ߘߌ߬ߟߌ ߞߍ߫ ߟߴߊߟߊ߫ ߛߌߟߊ ߡߊ߬ ، ߊ߬ ߣߌ߫ ߞߊ߬ ߢߌߣߌ߲߫ ߞߏ߫ ߊ߬ߟߎ߬ ߦߴߏ߬ ߞߍ߫ ߟߊ߫ ߞߐ߲߬ߕߌ߲ ߘߌ߫ ، ߒ߬ߓߊ߬ ߏ߬ ߟߎ߫ ߟߋ߫ ߝߟߌ߬ ߔߘߋߞߟߋ ߘߐ߫ ﴿3﴾

ߊ߲ ߡߊ߫ ߞߋߟߊ߫ ߛߌ߫ ߗߋ߫ ( ߞߊ߲߫ ߜߘߍ߫ ߘߐ߫ ) ߝߏ߫ ߊ߬ ߡߌ߬ߙߌ߲߬ߘߌ ߖߍ߬ߘߍ ߟߊ߫ ߞߊ߲ ߸ ߛߴߏ߬ ߘߌ߫ ߝߊߙߊ߲ߝߊߛߌ ߞߍ߫ ߊ߬ߟߎ߬ ߦߋ߫ ، ߏ߬ ߓߍ߯ ߣߴߊ߬ ߕߊ߫ ߊߟߊ߫ ߦߋ߫ ߡߐ߰ ߟߋ߬ ߟߊߝߟߌ߬ ߟߊ߫ ߸ ߡߍ߲ ߓߊ߯ ߊ߬ ߘߌߦߊ߫ ، ߓߊ ߊ߬ߟߋ ߟߋ߫ ߣߌ߬ߣߌ߬ߟߊ߫ ߥߘߋ߬ߥߘߋ߬ߟߌ߬ߟߊ ߘߌ߫ ﴿4﴾

ߊ߲ ߞߊ߬ ߡߎߛߊ߫ ߗߋ߫ ( ߞߊ߲ ߞߍ߫ ) ߒ߬ ߠߊ߫ ߡߊ߲߬ߕߊߣߌ߲ ߠߎ߬ ߘߌ߫ ߟߋ߬ ߸ ߒ ߞߏ߫ ߌ ߡߌ߬ߙߌ߲߬ߘߌ ߟߊߓߐ߫ ߘߌ߬ߓߌ ߟߎ߬ ߘߐ߫ ߞߊߕߙߍ߬ ߦߋߟߋ߲ ߡߊ߬ ، ߊ߬ ߣߴߌ ߦߴߊ߬ߟߎ߫ ߖߊ߲߬ߓߌ߬ߟߵߊߟߊ߫ ߟߊ߫ ( ߞߏ߫ ߞߍߣߍ߲߫ ߞߘߐ ) ߟߎ߬ ߟߏ߲ ߠߎ߬ ߘߐ߫ ، ߓߊ ߕߊ߰ߛߌ߬ߟߌ߫ ߟߎ߫ ߟߴߏ߬ ߟߎ߬ ߘߐ߫ ߡߎ߬ߢߎ߲߬ߓߊ߰ ߞߏߢߌߡߊߟߐ߲ߠߊ ߘߊ߬ߡߊ ߦߋ߫ ﴿5﴾

ߕߎ߬ߡߊ ߡߍ߲ ߡߎߛߊ߫ ߞߵߊ߬ ߝߐ߫ ߊ߬ ߡߌ߬ߙߌ߲߬ߘߌ ߦߋ߫ ߸ ߞߏ߫ ߊߟߎ߫ ߦߴߊߟߎ߫ ߖߊ߲߬ߓߌ߬ߟߊ߬ ߊߟߊ߫ ߟߊ߫ ߣߍߡߊ ߘߐ߫ ߊߟߎ߫ ߞߊ߲߬ ߸ ߊ߬ ߞߵߊߟߎ߫ ߓߏ߬ߛߌ ߡߍ߲ ߞߍ߫ ߝߋߙߊߥߎ߲߫ ߘߏ߲߬ߞߏ ߟߎ߬ ߓߟߏ߫ ߸ ߏ߬ ߟߎ߬ ߡߍ߲ ߠߎ߫ ߕߘߍ߬ ߊߟߎ߫ ߜߊ߰ߢߊ߬ߜߊ߯ߢߊ߫ ߟߊ߫ ߖߊ߲߰ߞߕߊ߬ ߖߎ߮ ߟߎ߬ ߟߊ߫ ߸ ߊ߬ ߣߴߊ߬ߟߎ߫ ߕߘߍ߬ ߊߟߎ߫ ߘߋ߲ߞߍ ߟߎ߬ ߞߊ߲ߠߊߕߍ߰ ߟߊ߫ ߸ ߞߵߊߟߎ߫ ߡߏ߬ߛߏ ߟߎ߬ ߘߐߙߐ߲߫ ߢߣߊߡߊ ߕߏ߫ ، ߤߊ߲߫ ߸ ߏ߬ ߞߍ߫ ߘߴߊߟߎ߫ ߞߊ߲߬ ߞߘߐߓߐߟߌߓߊ߫ ߟߋ߬ ߘߌ߫ ߊߟߎ߫ ߡߊ߰ߙߌ ߓߟߏ߫ ߘߋ߬ ﴿6﴾

ߕߎ߬ߡߊ ߡߍ߲ ߊߟߎ߫ ߡߊ߰ߙߌ ߞߵߊ߬ ߟߊߛߋ߫ ߸ ߞߏ߫ ߣߴߊߟߎ߫ ߞߊ߬ ߞߏߢߌߡߊߟߐ߲ ߞߍ߫ ߒ ߘߌ߫ ߊߟߎ߫ ߖߘߌ߫ ، ߣߴߊߟߎ߫ ߘߏ߲߬ ߞߊ߬ ߞߏߢߌߡߊߟߐ߲ߓߊߟߌߦߊ ߞߍ߫ ߸ ߒ ߠߊ߫ ߖߊ߲߰ߞߕߊ ߜߍ߬ߟߍ߲߬ߡߊ߲߫ ߠߋ߫ ߘߋ߬ ﴿7﴾

ߡߎߛߊ߫ ߞߵߊ߬ ߟߊߛߋ߫ ߸ ߞߏ߫ ߣߴߊߟߎ߫ ߞߊ߬ ߞߏߢߌߡߊߟߐ߲ߓߊߟߌߦߊ ߞߍ߫ ߸ ߊߟߎ߫ ߣߌ߫ ߘߎ߰ߞߟߏ ߞߊ߲߬ ߡߐ߮ ߓߍ߯ ߞߊ߬ߣߌ߲߫ ߸ ߊߟߊ߫ ߦߋ߫ ߞߊ߯ߙߌߓߊ߯ ߘߌ߫ ߊ߬ ߦߋ߫ ߕߊ߲߬ߘߏ߬ߕߊ߫ ߘߌ߫ ﴿8﴾

ߦߊ߯ߟߴߊߟߎ߫ ߢߍߓߊ߮ ߟߎ߫ ߞߌ߬ߓߊ߬ߙߏ ߡߊ߫ ߣߵߊߟߎ߫ ߡߊ߬ ߓߊ߬؟ ߣߊߟߌ߬ߡߎ߲߬ ߣߎߤߎ߲߫ ߡߌ߬ߙߌ߲߬ߘߌ ߣߌ߫ ߊ߯ߘߌ ߟߎ߬ ߣߌ߫ ߛߊ߬ߡߎ߯ߘߊ ߟߎ߬ ߘߌ߫ ߸ ߊ߬ ߣߌ߫ ߡߍ߲ ߠߎ߬ ߦߴߏ߬ ߟߎ߬ ߞߐ߫؟ ߡߐ߰-ߐ-ߡߐ߰ ߕߴߏ߬ ߟߎ߬ ߟߐ߲߫ ߝߏ߫ ߊߟߊ߫ ، ߏ߬ ߟߎ߬ ߟߊ߫ ߞߋߟߊ ߟߎ߫ ߣߊ߬ ߘߴߊ߬ߟߎ߫ ߡߊ߬ ߔߊߞߌ ߟߎ߬ ߘߌ߫ ، ߒ߬ߞߵߊ߬ߟߎ߫ ߞߵߊ߬ߟߎ߬ ߕߍ߮ ߟߎ߬ ߟߊߛߊ߬ߦߌ߫ ߊ߬ߟߎ߬ ߘߊ ߟߎ߬ ߞߣߐ߫ ߸ ߞߵߊ߬ ߝߐ߫ ߞߏ߫ ߊ߲ ߕߍ߫ ߊߟߎ߫ ߞߋߟߦߊ߫ ߞߏ ߝߍ߬ ߜߊߘߌߜߊߘߌ߫ ، ߓߊ ߊߟߎ߫ ߦߴߊ߲ ߞߟߌ߫ ߟߊ߫ ߡߍ߲ ߡߊ߬ ߸ ߏ߬ ߛߌߞߓߊ ߟߵߊ߲ ߘߐ߫ ߕߋ߲߬ ߛߌߞߊ߫ ﴿9﴾

ߊ߬ߟߎ߬ ߟߊ߫ ߞߋߟߊ ߟߎ߬ ߞߊ߲߫ ߞߏ߫ ߊ߬ ߝߐ߫ ߛߌߞߊ߫ ߟߋ߬ ߊߟߊ߫ ߞߏ ߘߐ߫ ߓߊ߬؟ ߏ߬ ߡߍ߲ ߦߋ߫ ߛߊ߲ ߠߎ߬ ߣߌ߫ ߘߎ߱ ߛߌ߲ߘߌߓߊ߮ ߘߌ߫؟ ߸ ߊ߬ ߘߏ߲߬ ߦߴߊߟߎ߫ ߞߟߌ߫ ߟߊ߫ ߟߋ߬ ߛߴߊ߬ ߘߴߊߟߎ߫ ߖߟߎ߬ߡߎ߲ ߘߏ߫ ߟߎ߫ ߦߝߊ߬ ߊߟߎ߫ ߦߋ߫ ߸ ߊ߬ ߣߴߊ߬ ߦߴߊߟߎ߫ ߘߏ߲߰ߘߌ߬ ߞߊߕߙߍ߬ ߛߕߊ߫ ߟߐ߯ߟߊߣߍ߲ ߡߊ߬ ، ߏ߬ ߟߎ߬ ߞߊ߲߫ ߞߏ߫ ߊߟߎ ߕߍ߫ ߝߏߦߌ߬ ߘߌ߫ ߝߏ߫ ߒ߬ߠߎ߫ ߢߐ߲߰ ߡߐ߰ ߛߊ߬ߕߊ ، ߊߟߎ߫ ߦߴߊ߬ ߝߍ߬ ߟߋ߬ ߞߵߊ߲ ߞߎ߬ߡߊ߲߬ߘߌ߬ ߝߋ߲߫ ߠߎ߫ ߡߊ߬ ߸ ߊ߲ ߝߊ߬ ߟߎ߫ ߕߘߍ߬ ߡߍ߲ ߠߎ߫ ߓߊ߬ߕߏ߬ ߟߊ߫ ، ߒ߬ߓߵߊߟߎ߫ ߣߵߊ߲ ߡߊ߬ ߘߊ߬ߟߎ߬ ߘߐ߬ߜߍ߫ ߘߌ߫ ߥߍ߫ ﴿10﴾

ߊ߬ߟߎ߬ ߟߊ߫ ߞߋߟߊ ߟߎ߫ ߞߵߊ߬ߟߎ߫ ߖߋ߬ߓߌ߬ ߸ ߞߏ߫ ߒ߬ߠߎ߬ ߕߍ߫ ߝߏߦߌ߬ ߘߌ߫ ߓߏ߬ ߝߏ߫ ߊߟߎ߫ ߢߐ߲߰ ߡߐ߰ ߛߊ߬ߕߊ ، ߓߊ߬ߙߌ߬ ߊߟߊ߫ ߦߋ߫ ߝߎߣߎ߲ߛߙߋߦߊ߫ ߟߊ߫ ߡߐ߰ ߟߋ߬ ߡߊ߬ ߸ ߡߍ߲ ߓߊ߯ ߊ߬ ߘߌߦߴߊ߬ ߟߊ߫ ߖߐ߲߭ ߠߎ߬ ߘߐ߫ ، ߛߋ߫ ߕߍ߫ ߒ߬ߠߎ߬ ߢߍ߫ ߞߊ߬ ߣߵߊߟߎ߫ ߡߊ߬ ߛߋߓߊ߯ߦߊ߫ ߘߌ߫ ߸ ߝߏ߫ ߣߌ߫ ߊߟߊ߫ ߘߌ߬ߢߍ߬ ߘߊ߫ ، ߘߍ߲߬ߞߣߍ߬ߦߊ߬ߓߊ߮ ߟߎ߫ ߘߏ߲߬ ߦߴߊ߬ߟߎ߫ ߛߍ߲߬ߓߍ߬ ߊߟߊ߫ ߟߋ߬ ߟߊ߫ ﴿11﴾

ߡߋ߬ߘߋ ߒ߬ߠߎ߬ ߟߊ߫ ߣߴߊ߲ ߕߍ߫ ߒ߬ ߛߍ߲߬ߓߍ߬ ߊߟߊ߫ ߟߊ߫ ߸ ߊ߬ ߓߊ߲ ߞߐ ߒ߬ ߞߊ߲ߘߊ߫ ߟߊ߫ ߒ߬ ߠߊ߫ ߛߌߟߊ ߟߎ߫ ߡߊ߬؟ ߊ߲ߠߎ߫ ߘߏ߲߬ ߘߴߊ߲ ߡߎ߬ߢߎ߲߬ ߊߟߎ߫ ߟߊ߫ ߡߊ߲߬ߕߙߐ߬ ߟߊߣߍ߲ ߓߍ߯ ߡߊ߬ ߊ߲ ߞߊ߲߬ ، ߓߊ ߛߍ߲߬ߓߍ߬ߟߊ ߟߎ߬ ߦߴߊ߬ߟߎ߫ ߛߍ߲߬ߓߍ߬ ߊߟߊ߫ ߟߋ߬ ߟߊ߫ ﴿12﴾

ߓߊ߲߬ߓߊ߮ ߟߎ߬ ߞߊ߲߫ ߊ߬ߟߎ߬ ߟߊ߫ ߞߋߟߊ ߟߎ߫ ߡߊ߬ ߸ ߞߏ߫ ߞߋߟߋ߲߫ ߊ߲ ߧߴߊߟߎ߫ ߟߊߓߐ߫ ߒ߬ ߠߊ߫ ߘߎ߱ ߟߊ߫ ߸ ߥߟߴߊߟߎ߫ ߦߋ߫ ߛߊ߬ߦߌ߲߫ ߒ߬ ߠߊ߫ ߣߊߡߎ߲ ߘߐ߫ ، ( ߞߋߟߊ ߟߎ߫ ) ߡߊ߰ߙߌ ߞߵߊ߬ߟߎ߬ ߦߟߌߘߏ߲߬ ߸ ߞߏ߫ ߛߋߚߋ߫ ߊ߲ ߣߊ߬ߕߐ߫ ߟߋ߬ ߕߐ߬ߢߍ߰ߒߕߋ ߟߎ߬ ߛߌߟߊߛߊ߬ ߟߊ߫ ﴿13﴾

ߊ߬ ߣߴߊ߲ ߣߊ߬ߕߐ߫ ߟߵߊߟߎ߫ ߟߊߛߌ߰ ߟߊ߫ ߖߡߊ߬ߣߊ ߞߣߐ߫ ߏ߬ ߟߎ߬ ߞߐ߫ ، ߖߊ߯ߕߋ߬ ߸ ߏ߬ ߞߍߕߐ߫ ߡߐ߰ ߟߋ߬ ߦߋ߫ ߡߍ߲ ߞߊ߬ ߛߌߟߊ߲߫ ߊ߬ ߟߐ߭ ߢߍ߫ ߒ ߣߊ߰ߟߊ߫ ߸ ߊ߬ ߣߌ߫ ߞߊ߬ ߛߌߟߊ߲߫ ߒ ߠߊ߫ ߞߐ߲߬ߞߐ߲߬ߒ߬ߡߊ ߢߍ߫ ﴿14﴾

ߊ߬ߟߎ߫ ߞߊ߬ ߟߊ߬ߥߛߊ߬ ߢߌߣߌ߲ ߞߍ߫ ߸ ߏ߬ ߞߍ ߖߘߍ߬ߛߊ߰ߣߦߊ߬ߟߊ߬ ߞߊ߲ߘߐߜߍߟߍ߲ ߓߍ߯ ߖߋ߰ߘߐ߬ߞߏߟߏ߲ߧߊ߫ ߘߊ߫ ߝߏߦߊ߲߫ ﴿15﴾

ߔߊߦߌߔߊߦߌ ߘߏ߲߬ ߦߴߊ߬ ߞߕߐ߫ ߸ ߊ߬ ߣߴߊ߬ ߘߌߣߊ߬ ߟߊߡߌ߲߬ ߖߋ߬ߟߌ߬ ߞߐߟߐ߲ߞߐߟߐ߲ ߖߌ ߟߊ߫ ﴿16﴾

ߊ߬ ߦߴߏ߬ ߟߋ ߓߌ߬ߙߌ߲߬ߘߌ߬-ߓߌߙߌ߲ߘߌ߫ ߟߊ߫ ߸ ߊ߬ ߘߏ߲߬ ߕߍ߫ ߛߎ߬ߘߎ߲߬ߧߊ߬ ߛߋ߫ ߟߴߊ߬ ߟߊߞߎ߬ߣߎ߲߬ ߠߊ߫ ߸ ߛߊ߬ߦߊ ߘߌߣߵߊ߬ ߡߊ߬ ߞߊ߬ ߓߐ߫ ߝߊ߲߭ ߓߍ߯ ߘߐ߫ ߸ ߊ߬ ߘߏ߲߬ ߕߍ߫ ߛߊ߬ ߝߋߎ߫ ، ߖߊ߲߰ߞߕߊ߬ ߘߐ߬ߜߌߟߌ߲ ߖߍ߬ߘߍ ߟߴߊ߬ ߞߕߐ߫ ﴿17﴾

ߡߍ߲ ߠߎ߫ ߓߊ߲߬ߣߍ߲߫ ߊ߬ߟߎ߫ ߡߊ߰ߙߌ ߘߐ߫ ߸ ߏ߬ ߟߎ߬ ߗߋߥߊߟߌ ߟߎ߬ ߟߊߒߡߊ ߟߋ߬ ߦߏ߫ ߓߎ߰ߘߌ߬ߜߍ ߸ ߝߢߐ ߓߘߊ߫ ߜߟߍ߬ߦߊ߫ ߏ߬ ߡߊ߬ ߝߢߐߓߊ߫ ߟߏ߲ ߘߐ߫ ، ߊ߬ ߕߌ߱ ߟߎ߬ ߕߍ߫ ߝߏߦߌ߬ ߟߊߣߐ߬ ߟߴߊ߬ߟߎ߬ ߟߊ߫ ߓߎ߰ߘߌ߬ߜߍ߬ ߟߊߘߍ߬ߣߍ߲ ߘߐ߫ ، ߒ߬ߓߊ߬ ߏ߬ ߟߋ ߝߟߌ߬ ߔߘߋߞߟߋ ߘߌ߫ ߛߊ߫ ﴿18﴾

ߌ ߡߴߊ߬ ߦߋ߫ ߓߊ߬ ߞߏ߫ ߊߟߊ߫ ߞߊ߬ ߛߊ߲ ߠߎ߬ ߣߌ߫ ߘߎ߱ ߘߊ߲߫ ߕߎ߬ߢߊ߫ ߟߋ߬ ߟߊ߫؟ ߒ߬ߓߊ߬ ߣߴߊ߬ ߞߵߊ߬ ߘߌߦߊ߫ ߸ ߊ߬ ߘߴߊߟߎ߫ ߟߊߕߊ߯ ߛߐߍ߫ ߞߊ߬ ߣߊ߬ ߘߊ߲ߠߌ߲߫ ߞߎߘߊ߫ ߘߌ߫ ﴿19﴾

ߏ߬ ߝߊ߲߭ ߡߊ߲߫ ߜߍ߬ߟߍ߲߬ ߊߟߊ߫ ߡߊ߬ ߟߋ߬ ﴿20﴾

ߊ߬ߟߎ߬ ߓߍ߯ ߘߌߣߵߊ߬ߟߎ߫ ߟߐ߬ ߊߟߊ߫ ߢߊߞߘߐ߫ ߸ ߏ߬ ߓߊ߯ ߞߍ߫ ߖߐ߲ߝߐ߲ߓߊ߯ߕߐ ߟߎ߬ ߘߴߊ߬ ߝߐ߫ ߖߘߍ߬ߘߐ߬ߓߊ ߟߎ߬ ߦߋ߫ ߸ ߞߏ߫ ߒ߬ߠߎ߫ ߕߘߍ߬ ߊߟߎ߫ ߞߐߓߌߟߊ ߟߎ߫ ߟߋ߬ ߘߌ߫ ، ߦߊ߯ߟߴߊߟߎ߫ ߘߌ߫ ߞߏ߫ ߢߊ߬ ߒ߬ ߡߵߊߟߊ߫ ߟߊ߫ ߖߊ߲߰ߞߕߊ ߘߐ߫ ߓߊ߬؟ ߊ߬ߟߎ߬ ߘߴߊ߬ߟߎ߫ ߖߋ߬ߓߌ߬ ߸ ߞߏ߫ ߣߴߊߟߊ߫ ߕߎ߲߬ ߞߵߊ߲ ߞߊ߲ߘߊ߫ ߸ ߒ߬ ߕߘߍ߬ ߘߴߊߟߎ߫ ߞߊ߲ߘߊ߫ ߟߋ߬ ߘߍ߯ ، ߊ߲ ߞߊ߬ ߒ߬ ߡߊߞߊ߬ߛߌ߫ ߓߊ߬ ߸ ߥߟߊ߫ ߒ߬ ߞߊ߬ ߒ߬ ߡߎ߬ߢߎ߲߫ ߓߊ߬ ߸ ߏ߬ ߓߍ߯ ߞߊ߫ ߞߊ߲߫ ߒ߬ ߡߊ߬ ، ߓߊ ߕߟߊ߫ ߦߙߐ߫ ߛߌ߫ ߕߍ߫ ߒ߬ ߠߊ߫ ﴿21﴾

ߞߕߌ߫ ߕߍ߮ ߓߊ߯ ߓߊ߲߫ ߸ ߜߍ߬ߘߍ ߘߴߊ߬ ߝߐ߫ ߞߏ߫ ߊߟߊ߫ ߞߵߊߟߎ߫ ߦߟߌߡߊߘߌߦߊ߫ ߕߎ߬ߢߊ ߦߟߌߡߊߘߌߦߊ ߟߊ߫ ߸ ߒߠߋ ߝߣߊ߫ ߞߵߊߟߎ߫ ߦߟߌߡߊߘߌߦߊ߫ ߸ ߒ ߘߏ߲߬ ߞߵߊߟߎ߫ ߞߐߡߊߝߐ߫ ߒ ߕߊ ߏ߬ ߘߐ߫ ߟߋ߬ ، ߘߊ߬ߟߎ߫ ߘߏ߲߬ ߕߎ߲߬ ߕߍ߫ ߒ ߓߟߏ߫ ߊߟߎ߫ ߡߊ߬ ، ߝߏ߫ ߒ ߞߵߊߟߎ߫ ߞߟߌ߫ ߟߋ߬ ߕߋ߲߬ ߸ ߊߟߎ߫ ߘߏ߲߬ ߞߊ߬ ߒ ߠߊߡߌ߬ߘߊ߬ ، ߏ߬ ߘߐ߫ ߸ ߊߟߎ߫ ߞߊߣߊ߬ ߒߠߋ ߖߙߊ߬ߞߌ߫ ߘߋ߬ ߸ ߊߟߴߊߟߎ߫ ߖߍ߬ߘߍ ߟߋ߫ ߖߙߊ߬ߞߌ߫ ، ߒߠߋ ߕߍ߫ ߊߟߎ߫ ߘߍ߬ߡߍ߲߬ߓߊ߯ ߘߌ߫ ߸ ߊߟߎ߫ ߕߍ߫ ߒߠߋ ߘߍ߬ߡߍ߲߬ߓߊ߯ ߘߌ߫ ، ߊߟߎ߫ ߞߊ߬ ߒ ߜߙߊ߬ߢߐ߲߰ߦߊ ߡߍ߲ ߞߍ߫ ߞߘߐ߬ߡߊ߲߫ ߸ ߒ ߓߘߴߊߟߎ߫ ߥߊߟߢߌߡߊߟߐ߲ߓߊߟߌߦߊ߫ ߏ߬ ߘߐ߫ ، ߤߊ߲߫ ߸ ߕߐ߬ߢߍ߰ߒߕߋ ߟߎ߬ ߢߍߛߌ߰ߣߍ߲߫ ߖߊ߲߰ߞߕߊ߬ ߘߌߡߌ߲ߣߍ߲߫ ߠߊ߫ ߞߟߋ߫ ﴿22﴾

ߘߍ߲߬ߞߣߍ߬ߦߊ߬ߓߊ߯ ߢߌ߬ߡߊ߬ ߞߍ߬ߟߊ ߟߎ߬ ߘߌߣߊ߬ ߟߊߘߏ߲߬ ߣߊߞߐ ߟߎ߬ ߘߐ߫ ߸ ߞߐ߬ߢߊ ߟߎ߬ ߦߋ߫ ߥߦߏ߬ ߟߴߏ߬ ߟߎ߬ ߞߘߐߟߊ ߟߎ߬ ߘߐ߫ ߞߎߟߊ߲ߞߎߟߊ߲߫ ، ߊ߬ߟߎ߫ ߘߏ߲߬ ߘߎߡߊߕߐ߫ ߦߋ߲߬ ߠߋ߬ ߊ߬ߟߎ߫ ߡߊ߰ߙߌ ߟߊ߫ ߘߌ߬ߢߍ ߟߊ߫ ، ߊ߬ߟߎ߬ ߟߊ߫ ߝߏ߬ߟߌ߬ ߞߊ߲ ߠߋ߬ ߦߋ߲߬ ߸ ߞߏ߫ ߖߐ ( ߊߟߎ߫ ߡߊ߬) ﴿23﴾

ߌ ߡߴߊ߬ ߦߋ߫ ߓߊ߬ ߊߟߊ߫ ߦߋ߫ ߞߎߡߊ߫ ߢߌߡߊ ߛߊ߲߬ߘߊ ߟߊ߫ ߟߊ߫ ߢߊ ߡߍ߲؟ ߊ߬ ߦߴߊ߬ ߟߊ߫ ߟߊ߫ ߦߙߌ߫ ߢߌߡߊ ߟߋ߫ ߡߊ߬ ߸ ߡߍ߲ ߖߎ߭ ߓߊ߲ߓߊ߲ߣߍ߲߫ ߸ ߊ߬ ߓߏߟߏ߲ ߦߋ߫ ߛߊ߲ ߡߊ߬ ﴿24﴾

ߊ߬ ߦߴߊ߬ ߥߟߏߒߘߐ ߘߌ߫ ߟߊ߫ ߕߎ߬ߡߊ ߓߍ߯ ߟߊ߫ ߸ ߊ߬ ߡߊ߰ߙߌ ߟߊ߫ ߘߌ߬ߢߍ ߟߊ߫ ، ߊߟߊ߫ ߦߋ߫ ߛߊ߲߬ߘߊ ߟߊ߫ ߟߊ߫ ߡߐ߱ ߟߎ߬ ߦߋ߫ ߟߋ߬ ߸ ߛߴߊ߬ߟߎ߬ ߘߴߊ߬ߟߎ߫ ߕߊ߰ߛߌ߬ ﴿25﴾

ߞߎߡߊ߫ ߖߎ߮ ߝߣߊ߫ ߟߊߒߡߊ ߟߋ߬ ߸ ߦߏ߫ ߦߙߌ߫ ߖߎ߮ ߡߍ߲ ߓߐ߬ߣߍ߲߫ ߘߎ߱ ߞߐߞߊ߲߬ ߣߐ߯ߘߌ߫ ߸ ߓߊ߲ߓߊ߲߫ ߦߙߐ߫ ߛߌ߫ ߕߍ߫ ߊ߬ ߟߊ߫ ﴿26﴾

ߊߟߊ߫ ߦߋ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߞߐߡߊߓߌ߲ߓߌ߲߫ ߠߊ߫ ߞߎߡߊ߫ ߓߊ߲ߓߊ߲ߣߍ߲ ߠߋ߬ ߟߊ߫ ߘߎߢߊ߫ ߢߣߊߡߦߊ ߘߐ߫ ߸ ߊ߬ ߣߌ߫ ߟߊߞߌߙߊ߫ ߝߣߊ߫ ߘߐ߫ ، ߊߟߊ߫ ߦߋ߫ ߕߐ߬ߢߍ߰ߒߕߋ ߟߎ߫ ߟߋ߬ ߟߊߝߟߌ߬ ߟߊ߫ ، ߊߟߊ߫ ߘߏ߲߬ ߦߋ߫ ߞߏ߫ ߟߋ߬ ߞߍ߫ ߟߊ߫ ߸ ߡߍ߲ ߓߊ߯ ߊ߬ ߘߌߦߊ߫ ﴿27﴾

ߌ ߡߴߊ߬ ߦߋ߫ ߓߊ߬ ߡߍ߲ ߠߎ߫ ߞߵߊߟߊ߫ ߟߊ߫ ߣߍߡߊ ߝߊ߬ߟߋ߲߬ ߞߏߢߌߡߊߟߐ߲ߓߊߟߌߦߊ ߟߊ߫ ߸ ߊ߬ ߣߴߊ߬ߟߎ߫ ߞߵߊ߬ߟߎ߬ ߟߊ߫ ߡߌ߬ߙߌ߲߬ߘߌ ߡߊߞߍ߫ ߕߏߒߘߐ ߛߏ ߟߊ߫؟ ﴿28﴾

ߣߊߟߌ߬ߡߎ߲߬ ߔߊߦߌߔߊߦߌ ߘߌ߫ ߸ ߊ߬ߟߎ߫ ߘߏ߲߬ ߘߏ߲߬ߕߐ߫ ߦߋ߲߬ ߠߋ߬ ، ߏ߬ ߘߏ߲߬ ߦߋ߫ ߘߊ߯ ߦߙߐ߫ ߖߎ߯ ߘߌ߫ ߞߟߋ߫߹ ﴿29﴾

ߏ߬ ߟߎ߫ ߟߋ߫ ߞߊ߬ ߢߐ߲߰ߘߐ ߟߎ߬ ߞߍ߫ ߊߟߊ߫ ߟߊ߫ ߸ ߛߴߊ߬ߟߎ߬ ߘߌ߫ ߟߊ߬ߝߟߌ߬ߟߌ ߞߍ߫ ߊ߬ ߟߊ߫ ߛߌߟߊ ߡߊ߬ ، ߊ߬ ߝߐ߫ ߏ߬ ߟߎ߬ ߦߋ߫ ߸ ߞߏ߫ ߊߟߎ߫ ߦߴߊߟߎ߫ ߘߌߦߊߓߐ߫ ߟߋ߬ ߞߟߋ߫ ، ߞߏ߬ߣߌ߲߬ ߊߟߎ߫ ߟߊߓߊ߲߫ ߦߌߟߊ ߟߋ߬ ( ߞߍߕߐ߫ ) ߕߊ ߘߌ߫ ﴿30﴾

ߊ߬ ߟߊߛߋ߫ ߒ ߠߊ߫ ߖߐ߲߭ ߠߎ߫ ߡߊ߬ ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߸ ߞߏ߫ ߊ߬ߟߎ߬ ߦߋ߫ ߛߊߟߌ ߟߐ߬ ، ߊ߬ ߣߴߊ߲ ߞߵߊ߬ߟߎ߫ ߤߊ߬ߙߌ߬ߖߍ߯ ߣߊ߲߬ߝߟߏ ߡߍ߲ ߠߊ߫ ߸ ߊ߬ߟߎ߬ ߦߋ߫ ߖߘߍ߬ߡߊ߬ߓߐ ߞߍ߫ ߏ߬ ߘߐ߫ ߜߎ߲߬ߘߎ ߣߌ߫ ߟߊ߲ߞߣߍߡߊ ߘߐ߫ ߸ ߞߊ߬ ߞߐ߲߰ ߟߏ߲߫ ߣߊ߲߭ ߢߍ߫ ߞߎ߲߬ߞߊ߬ ߕߍ߫ ߡߍ߲ ߘߐ߫ ߸ ߕߋߙߌߢߐ߲߯ߦߊ߫ ߕߍ߫ ߊ߬ ߘߐ߫ ﴿31﴾

ߊߟߊ߫ ߟߋ߫ ߞߊ߬ ߛߊ߲ ߠߎ߬ ߣߌ߫ ߘߎ߱ ߘߊ߲߫ ، ߊ߬ ߣߴߊ߬ ߞߊ߬ ߖߌ ߟߊߖߌ߰ ߞߊ߬ ߓߐ߫ ߡߐ߲ߕߐ߲ ߘߐ߫ ، ߞߊ߬ ߦߙߌߘߋ߲ ߠߎ߬ ߟߊߝߍߘߍ߲߫ ߏ߬ ߟߊ߫ ߓߊߟߏ ߘߌ߫ ߊߟߎ߫ ߦߋ߫ ، ߊ߬ ߣߴߊ߬ ߞߊ߬ ߞߎߟߎ߲ ߞߟߏ߫ ߊߟߎ߫ ߦߋ߫ ߸ ߛߴߏ߬ ߘߌ߫ ߞߎߟߎ߲ߞߎߟߎ߲߫ ߟߌ߲ߓߊ߲ ߞߊ߲߬ ߊ߬ ߟߊ߫ ߖߊ߬ߡߊߙߌ ߟߊ߫ ߸ ߊ߬ ߞߊ߬ ߓߊ ߟߎ߬ ߝߣߊ߫ ߞߟߏ߫ ߊߟߎ߫ ߦߋ߫ ﴿32﴾

ߊ߬ ߞߊ߬ ߕߋ߬ߟߋ ߣߌ߫ ߞߊߙߏ ߞߟߏ߫ ߊߟߎ߫ ߦߋ߫ ߞߘߊߎ߫ ߸ ߊ߬ ߣߴߊ߬ ߞߊ߬ ߛߎ ߣߌ߫ ߕߟߋ߬ߘߐ߬ߟߊ ߝߣߊ߫ ߞߟߏ߫ ߊߟߎ߫ ߦߋ߫ ﴿33﴾

ߊ߬ ߣߴߊߟߎ߫ ߞߵߊ߬ ߕߙߊ߫ ߝߋ߲-ߋ-ߝߋ߲߫ ߠߊ߫ ߸ ߊ߬ ߞߵߏ߬ ߓߍ߯ ߘߴߊߟߎ߫ ߡߊ߬ ، ߒ߬ߓߊ߬ ߣߴߊߟߎ߫ ߞߵߊߟߊ߫ ߟߊ߫ ߣߍߡߊ ߦߙߌߞߊ߫ ߸ ߊߟߎ߫ ߕߍ߫ ߓߊ߲߫ ߊ߬ ߡߊߘߊ߲߫ ߠߊ߫ ، ߓߊ߬ߙߌ߬ ߖߊ߯ߕߋ߬ ߸ ߡߐ߱ ߦߋ߫ ߕߐ߬ߢߍ߰ߒߕߋ߫ ߘߌ߫ ߸ ߊ߬ ߦߋ߫ ߞߏߢߌߡߊߟߐ߲ߓߊߟߌ߫ ߘߌ߫ ﴿34﴾

ߕߎ߬ߡߊ ߡߍ߲ ߌߓߎ߬ߙߊ߬ߤߌߡߊ߫ ߞߵߊ߬ ߝߐ߫ ߞߏ߫ ߒ ߡߊ߰ߙߌ ߸ ߛߏ ߣߌ߲߬ ߞߍ߫ ߦߙߐ߫ ߟߊߞߊ߲ߘߊߣߍ߲߫ ߘߌ߫ ، ߌ ߦߋ߫ ߒ ߣߌ߫ ߒ ߘߋ߲ ߠߎ߬ ߦߙߐߡߊߖߊ߲߬ߧߊ߫ ߸ ߊ߲ ߞߊߣߊ߬ ߖߏ߭ ߟߎ߫ ߓߊ߬ߕߏ߬ ﴿35﴾

ߒ ߡߊ߰ߙߌ ߸ ߖߏ߭ ߟߎ߬ ߓߘߊ߫ ߛߌߦߊߡߊ߲߫ ߠߊߝߟߌ߬ ߡߐ߱ ߟߎ߬ ߘߐ߫ ߘߋ߬߹ ߡߍ߲ ߓߊ߯ ߒߠߋ ߟߊߓߊ߬ߕߏ߬ ߸ ߏ߬ ߟߋ ߦߋ߫ ߒ ߘߏ߫ ߘߌ߫ ، ߡߍ߲ ߓߊ߯ ߒ ߛߐ߬ߛߐ߫ ߘߏ߲߬ ߸ ߌߟߋ ߟߋ߫ ߞߏ߬ߣߌ߲ ߦߋ߫ ߦߝߊ߬ߟߊ߫ ߤߌߣߟߊ ߘߌ߫ ߘߋ߬ ﴿36﴾

ߊ߲ ߡߊ߰ߙߌ ߸ ߒ ߓߘߊ߫ ߒ ߓߐ߲ߛߐ߲ ߘߏ߫ ߟߊߛߌ߰ ߝߏ߲ߝߊ߲߫ ߠߋ߬ ߘߐ߫ ߣߌ߲߬ ߸ ߡߍ߲ ߕߍ߫ ߛߣߍ߬ߡߊ߬ ߦߙߐ߫ ߘߌ߫ ߸ ߌ ߟߊ߫ ߓߏ߲߫ ߠߊߕߏߣߍ߲ ߘߌ߲߬ߞߌߙߊ ߘߐ߫ ، ߒ ߡߊ߰ߙߌ ߸ ߒ ߞߏ߫ ߛߴߊ߬ߟߎ߬ ߘߌ߫ ߛߊߟߌ ߟߐ߬ ، ߒ߬ߓߊ߬ ߌ ߦߋ߫ ߡߐ߱ ߘߏ߫ ߟߎ߫ ߛߣߐ߬ߡߍ ߞߎ߲߬ߟߐ߬ ߊ߬ߟߎ߬ ߟߊ߫ ߸ ߊ߬ ߣߴߌ ߦߴߊ߬ߟߎ߫ ߤߊ߬ߙߌ߬ߖߍ߰ ߦߙߌߘߋ߲ ߠߎ߬ ߟߊ߫ ߛߴߊ߬ߟߎ߬ ߘߌ߫ ߞߴߌ ߞߏߢߌߡߊߟߐ߲ߓߊ߯ ߟߎ߫ ߘߌ߫ ﴿37﴾

ߊ߲ ߡߊ߰ߙߌ ߸ ߌߟߋ ߞߵߊ߬ ߟߐ߲߫ ߊ߲ߠߎ߬ ߦߋ߫ ߡߍ߲ ߘߏ߲߰ ߠߊ߫ ߸ ߊ߬ ߣߴߊ߲ ߧߋ߫ ߡߍ߲ ߟߊ߲ߞߣߍߡߊ߫ ߟߊ߫ ߸ ߝߏߦߌ߫ ߘߏ߲߬ ߕߍ߫ ߘߏ߲߰ ߠߴߊߟߊ߫ ߡߊ߬ ߘߎ߱ ߣߌ߫ ߛߊ߲ ߛߌ߫ ߞߣߐ߫ ﴿38﴾

ߕߊ߲߬ߘߏ ߊߟߊ߫ ߦߋ߫ ߸ ߡߍ߲ ߞߊ߬ ߒ ߞߘߐ߬ߣߍ߲߬ߓߊ ߣߌ߲߬ ߛߐ߫ ߌߛߌ߬ߡߊ߬ߌߟߊ߫ ߣߴߌߛߌ߬ߤߊ߯ߞߊ߫ ߟߊ߫ ، ߖߊ߯ߕߋ߬ ߸ ߒ ߡߊ߰ߙߌ ߦߋ߫ ߕߌ߲ߞߌ߫ ߡߍ߲ߠߊ ߟߋ߬ ߘߌ߫ ﴿39﴾

ߒ ߡߊ߰ߙߌ ߸ ߒ ߞߍ߫ ߛߊߟߌ ߟߐ߬ߓߊ߯ ߘߌ߫ ߸ ߊ߬ ߣߌ߫ ߒ ߓߐ߲ߛߐ߲ ߘߏ߫ ߟߎ߫ ߝߣߊ߫ ، ߊ߲ ߡߊ߰ߙߌ ߸ ߌ ߦߋ߫ ߒ ߠߊ߫ ߕߌ߲ߞߌ ߟߊߓߌ߫ ﴿40﴾

ߊ߲ ߡߊ߰ߙߌ ߸ ߦߝߊ߬ ߒ ߡߊ߬ ، ߊ߬ ߣߌ߫ ߒ ߡߏߦߌߓߊ߯ ߝߌ߬ߟߊ ߡߊ߬ ߸ ߊ߬ ߣߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߫ ߡߊ߬ ߸ ߖߊ߬ߕߋ߬ߓߐ ߟߐ߬ ߟߏ߲ ߘߐ߫ ﴿41﴾

ߒ߬ߓߵߊߟߎ߫ ߞߴߊߟߊ߫ ߖߌ߰ ߖߊ߲߬ߓߐ߬ߓߊ߯ ߘߌ߫ ߕߐ߬ߢߍ߰ߒߕߋ ߟߎ߬ ߞߋߥߊߟߌ ߘߐ߫ ߘߋ߬ ߸ ߊ߬ ߦߴߊ߬ߟߎ߫ ߘߏ߲߰ߘߌ߬ ߟߊ߫ ߟߏ߲߫ ߠߋ߬ ߦߋ߫ ߸ ߢߊ ߟߎ߬ ߛߎߘߊ߲ߕߐ߫ ߡߍ߲ ߘߐ߫ ﴿42﴾

ߏ ߕߎ߬ߡߊ ߊ߬ߟߎ߬ ߞߊߟߌߦߊߡߍߣߍ߲ߕߐ ߟߎ߫ ߞߎ߲߭ ߛߊ߲ߘߌߣߍ߲ ߦߋ߫ ߸ ߊ߬ߟߎ߬ ߢߊ ߕߍ߫ ߛߋ߫ ߟߊ߫ ߛߊ߬ߦߌ߬ ߟߴߊ߬ߟߎ߫ ߡߊ߬ ، ߊ߬ߟߎ߫ ߛߣߐ߬ߡߍ ߟߎ߬ ߘߐߞߏߟߏ߲ ߦߋ߫ ߝߏߦߊ߲߫ ﴿43﴾

ߌ ߦߋ߫ ߖߊ߬ߛߙߋ߬ߡߊ߬ߟߊ ߞߍ߫ ߡߐ߱ ߟߎ߬ ߦߋ߫ ߖߊ߲߰ߞߕߊ ߣߊ߬ ߟߏ߲ ߠߊ߫ ، ߒ߬ߓߊ߬ ߕߐ߬ߢߍ߰ߒߕߋ ߟߎ߬ ߦߴߊ߬ ߝߐ߫ ߟߴߏ߬ ߟߋ ߘߐ߫ ߸ ߞߏ߫ ߊ߲ ߡߊ߰ߙߌ ߸ ߊ߲ ߘߏ߲߰ߘߌ߫ ߛߕߊ߫ ߞߎ߲߬ߘߐ߬ߛߎߘߎ߲߫ ߠߊ߫ ߡߎߣߎ߲߬ ߞߟߋ߫ ߸ ߊ߲ ߘߴߌ ߟߊ߫ ߞߟߌߟߌ ߖߋ߬ߓߌ߫ ߏ߬ ߘߐ߫ ߸ ߞߊ߬ ߞߋߟߊ ߟߎ߬ ߟߊߓߊ߬ߕߏ߬. ( ߊ߬ߟߎ߬ ߘߌ߫ ߖߋ߬ߓߌ߬ ) ߸ ߞߏ߫ ߊߟߎ ߟߋ߫ ߕߎ߲߬ ߡߴߊߟߎ߫ ߞߊ߬ߟߌ߫ ߞߘߐ߬ߡߊ߲߫ ߓߊ߬ ߞߏ߫ ߞߎ߲߬ߘߏ߲߬ ߕߍ߫ ߊߟߎ߫ ߡߊ߬؟ ﴿44﴾

ߊߟߎ߫ ߘߏ߲߬ ߞߵߊߟߎ߫ ߛߌ߰ ߖߘߍ߬ߕߐ߬ߢߍ߰ߟߊ ߟߎ߫ ߛߌ߰ ߦߌߟߊ ߟߎ߬ ߘߐ߫ ߸ ߊ߬ ߣߌ߫ ߞߍߢߊ ߟߎ߬ ߟߊ߲ߞߣߍߡߊ߫ ߘߴߊߟߎ߫ ߦߋ߫ ߸ ߊ߲ ߞߊ߬ ߡߍ߲ ߠߎ߬ ߞߍ߫ ߏ߬ ߟߎ߬ ߟߊ߫ ، ߊ߬ ߣߌ߫ ߝߣߊ߫ ߸ ߊ߲ ߞߊ߬ ߛߊ߲߬ߘߊ ߟߎ߬ ߟߴߊߟߎ߫ ߦߋ߫ ﴿45﴾

ߏ߬ ߟߎ߫ ߘߏ߲߬ ߞߵߊ߬ߟߎ߬ ߟߊ߫ ߣߡߊߙߊ ߞߍ߫ ߟߋ߬ ߖߐ߫ ، ߞߵߊ߬ ߕߘߍ߬ ߊ߬ߟߎ߬ ߟߊ߫ ߣߊߡߙߊ ߦߋ߫ ߊߟߊ߫ ߟߋ߬ ߓߟߏ߫ ߸ ߤߟߴߊ߬ ߓߊ߯ ߊ߬ ߕߍ߬ߘߍ߫ ߟߋ߬ ߞߍ߫ ߊ߬ߟߎ߬ ߟߊ߫ ߣߊߡߙߊ ߘߌ߫ ߞߎ߬ߙߎ ߟߎ߬ ߓߐ߫ ߊ߬ߟߎ߫ ߣߐ߭ ߟߎ߬ ߘߐ߫ ﴿46﴾

ߒ߬ߓߵߊߟߎ߫ ߞߴߊߟߊ߫ ߖߌ߰ ߊ߬ ߟߊ߫ ߦߟߌߡߊߘߌߦߊ ߝߘߏ߬ߓߊ߯ ߘߌ߫ ߊ߬ ߟߊ߫ ߞߋߟߊ ߟߎ߬ ߦߋ߫ ߘߋ߬ ، ߖߊ߯ߕߋ߬ ߸ ߊߟߊ߫ ߦߋ߫ ߣߌ߬ߣߌ߬ߟߊ߫ ߘߌ߫ ߸ ߕߊߢߐ߲߯ߓߐ ߕߌ߱ ߟߋ߬ ߝߣߊ߫ ߦߋ߫ ﴿47﴾

ߟߏ߲ ߘߏ߫ ߸ ߘߎ߱ ߓߍߣߊ߫ ߝߊ߬ߟߋ߲߬ ߘߎ߰ ߜߘߍ߫ ߟߊ߫ ، ߊ߬ ߣߌ߫ ߛߊ߲ ߠߎ߬ ߝߣߊ߫ ، ߏ ߕߎ߬ߡߊ ߓߍ߯ ߓߘߊ߫ ߟߊ߲ߞߣߍߡߊ߫ ߊߟߊ߫ ߞߎ߲߬ߞߋߟߋ߲߫ ߞߘߊߡߊߟߌߟߊ ߦߋ߫ ﴿48﴾

ߌ ߘߌ߫ ߛߐ߲߬ߡߊ ߟߎ߬ ߦߋ߫ ߏ߬ ߟߏ߲ ߸ ߊ߬ߟߎ߬ ߞߙߎߝߊߣߍ߲߫ ߖߟߐ߬ߞߐ ߟߎ߬ ߟߊ߫ ﴿49﴾

ߊ߬ߟߎ߬ ߟߊ߫ ߘߙߌ߬ߞߌ ߟߎ߬ ߦߋ߫ ߡߣߊ߫ ߡߍߣߍ߲ߕߊ ߟߎ߬ ߘߌ߫ ߸ ߏ߬ ߟߎ߬ ߕߊ߫ ߡߍߣߍ߲ ߦߴߊ߬ߟߎ߬ ߢߘߊ ߟߎ߫ ߞߎ߲߬ߠߊ߬ߓߌߘߌ߲߫ ߠߊ߫ ߡߐ߲ߕߐ߲߫ ﴿50﴾

ߏ ߞߎ߲߭ ߠߋ߬ ߸ ߛߴߊߟߊ߫ ߘߌ߫ ߣߌߡߊ ߓߍ߯ ߛߊ߬ߙߴߊ߬ ߗߋߥߊߟߌ߫ ߟߊ߫ ، ߖߊ߯ߕߋ߬ ߸ ߊߟߊ߫ ߟߋ߫ ߖߊ߬ߕߋ߬ߓߐ߬ ߞߊߟߌ߲ ߞߍߓߊ߮ ߘߌ߫ ﴿51﴾

ߣߌ߲߬ ( ߓߍ߯ ) ߦߋ߫ ߟߊ߬ߛߋ߬ߟߌ߫ ߟߋ߬ ߘߌ߫ ߡߐ߱ ߟߎ߫ ߡߊ߬ ߖߊ߬ߛߙߋ߬ߡߊ߬ߟߊ ߘߌ߫ ، ߊ߬ ߣߌ߫ ߛߴߊ߬ߟߎ߬ ߘߴߊ߬ ߟߐ߲߫ ߸ ߞߏ߫ ߊߟߊ߫ ߟߋ߬ ߡߊ߰ߙߌ߬ ߞߋߟߋ߲ ߘߌ߫ ߸ ߊ߬ ߣߌ߫ ߖߐ߲߰ߛߊ߫ ߤߊ߲ߞߟߌߡߊ ߟߎ߬ ߘߴߊ߬ߟߎ߫ ߕߊ߰ߛߌ߫ ﴿52﴾

ߊ. ߟ. ߙ. ( ߊߟߌߝ. ߟߊ߯ߡ. ߙߊ߯. ) ߢߌ߲߬ ߠߎ߬ ߦߋ߫ ߟߍߙߊ ߟߝߊߙߌ ߟߎ߫ ߟߋ߬ ߘߌ߫ ߸ ߊ߬ ߣߌ߫ ߘߐ߬ߛߊ߬ߙߌ߬ ߘߐߞߣߍߣߍ߲ ߠߋ߬ ﴿1﴾

ߓߊ߲߬ߓߊ߮ ߟߎ߬ ߘߌߣߵߊ߬ ߣߊ߬ߕߊ߫ ߕߎ߬ߡߊ ߘߏ߫ ߟߊ߫ ߸ ߞߏ߫ ߥߟߊߞߏ߫ ߊ߬ߟߎ߫ ߕߎ߲߬ ߦߋ߫ ߞߍ߫ ߖߘߍ߬ߞߟߏ߬ߟߊ߫ ߟߎ߫ ߘߌ߫ ﴿2﴾

ߌߟߋ ߊ߬ߟߎ߬ ߕߏ߫ ߦߋ߲߬ ߖߐ߫ ߊ߬ߟߎ߬ ߦߋ߫ ߘߊߥߎ߲ߠߌ߲ ߞߍ߫ ߞߵߊ߬ߟߎ߬ ߘߌߦߊߓߐ߫ ߸ ߊ߬ ߣߌ߫ ߣߕߊ߬ ( ߘߐ߬ߛߌ߮ ) ߦߴߊ߬ߟߎ߬ ߢߣߊߜߍ߫ ، ߞߏ߬ߣߵߊ߬ߟߎ߬ ߓߍߣߵߊ߬ ߟߐ߲߫ ﴿3﴾

ߊ߲ ߡߊ߫ ߘߎ߰ ߛߌ߫ ߛߌߟߊߛߊ߬ ߣߌ߫ ߛߕߊ߫ ߟߍߙߊ߫ ߡߊߟߐ߲ߣߍ߲߫ ߕߍ߫ ߡߍ߲ ߠߊ߫ ﴿4﴾

ߡߊ߲߬ߕߏ߲߬ ߛߌ߫ ߘߏ߲߬ ߕߍ߫ ߞߐ߲߰ ߊ߬ ߛߕߊ ߢߍ߫ ߸ ߊ߬ ߕߍ߫ ߘߏ߲߰ߘߌ߫ ( ߊ߬ ߞߐ߫) ﴿5﴾

‹ ߓߊ߲߬ߓߊ߮ › ߟߎ߬ ߞߊ߲߫ ߠߋ߬ ߞߏ߫ ߤߍ߲߬ ߸ ߞߊ߬ߥߊ߲߬ߘߌ ߟߊߖߌ߰ߣߍ߲߫ ߌߟߋ ߡߍ߲ ߡߊ߬ ߸ ߖߊ߯ߕߋ߬ ߸ ߝߊ߬ߕߐ ߖߍ߬ߘߍ ߟߵߌ ߘߌ߫ ﴿6﴾

ߥߟߊߞߏ߫ ߌ ߕߍ߬ߘߍ߫ ߣߵߊ߲ ߡߊ߬ ߞߋ߲ߛߐ߲ ߠߎ߬ ߘߌ߫ ߸ ߣߴߌ ߦߋ߫ ߕߎ߬ߢߊ߬ ߕߌ߮ ߟߎ߬ ߘߏ߫ ߘߌ߫ ﴿7﴾

ߞߋ߲ߛߐ߲ ߠߎ߬ ߕߍ߫ ߖߌ߰ ߟߊ߫ ߜߊ߲ߛߊ߲߫ ߘߋ߬ ߝߏ߫ ߛߓߍ߬ ߓߟߏ ߡߊ߬ ߸ ߣߴߏ߬ ߘߏ߲߬ ߞߍ߫ ߘߊ߫ ߸ ߊ߬ߟߎ߫ ( ߖߊ߲߰ߞߕߊ ) ߕߍ߫ ߘߏ߲߰ߘߌ߫ ߡߎ߬ߕߎ߲߬ ﴿8﴾

ߒ߬ߠߎ߬ ߡߍ߲ ߣߊ߬ ߞߊ߬ߥߊ߲߬ߘߌ ߟߊߖߌ߰ ߟߊ߫ ߸ ߒ߬ߠߎ߫ ߟߴߊ߬ ߞߣߐ߬ߜߍ߲߬ߓߊ߮ ߟߎ߬ ߘߌ߫ ﴿9﴾

ߊ߲ ߘߏ߲߬ ߜߎ ߞߊ߬ ߞߋߟߊ ߟߐ߬ ߌߟߋ ߢߍ߫ ߝߟߐ߫ ߡߐ߱ ߟߎ߬ ߟߊ߫ ߞߙߎߞߊ ߟߎ߬ ߘߐ߫ ߟߋ߬߹ ﴿10﴾

ߒ߬ߞߊ߬ ߞߋߟߊ߫ ߛߌ߫ ߡߊ߫ ߣߵߊ߬ߟߎ߫ ߡߊ߬ ߸ ߣߴߊ߬ߟߎ߬ ߡߴߏ߬ ߡߊߦߟߍ߫ ﴿11﴾

ߒ߬ߓߵߊ߲ ߧߴߊ߬ ߟߊߘߏ߲߬ ߠߊ߫ ߛߐ߲߬ߡߊ ߟߎ߫ ߛߣߐ߬ߡߍ ߘߐ߫ ߕߋ߲߬ ߠߋ߬ ، ﴿12﴾

ߡߍ߲ ߠߎ߬ ߕߍ߫ ߘߍ߲߬ߞߣߍ߬ߦߊ߬ ߟߴߊ߬ ߡߊ߬ ، ߝߟߐ߫ ߡߐ߱ ߟߎ߫ ߟߌ߬ߤߟߊ ߟߎ߫ ߘߏ߲߬ ߓߘߊ߫ ߕߊ߬ߡߌ߲߬ ߞߟߋ߫ ﴿13﴾

ߤߟߴߊ߲ ߕߎ߲߬ ߞߊ߬ ߘߊ ߘߏ߫ ߟߊߞߵߊ߬ߟߎ߬ ߦߋ߫ ߛߊ߲ ߠߊ߫ ߸ ߊ߬ߟߎ߬ ߦߋ߫ ߕߋ߬ߟߋ߲߫ ߦߟߍ߬ ߟߊ߫ ߦߋ߲߬ ߛߐ߲߬ ﴿14﴾

ߊ߬ߟߎ߫ ߕߎ߲߬ ߘߴߊ߬ ߝߐ߫ ߸ ߞߏ߫ ߊ߲ ߢߊ ߟߎ߫ ߟߋ߬ ߟߊߡߌߟߏߣߍ߲߫ ، ߞߏ߫ ߋ߬ߋ߬ߋ߯ ߊߜߊ߫ ߸ ߛߎߓߊ߯ߦߊ ߟߋ߬ ߞߍߣߍ߲߫ ߒ߬ ߠߊ߫ ﴿15﴾

ߖߊ߯ߕߋ߬ ߸ ߒ߬ߠߎ߫ ߟߋ߫ ߞߊ߬ ߛߘߍߟߏߟߏ ߟߎ߬ ߞߍ߫ ߛߊ߲ ߘߐ߫ ߸ ߞߵߊ߬ ߡߊߢߍ߯ߙߍ߫ ߏ߬ ߟߎ߬ ߟߊ߫ ߝߟߍߟߌߟߊ ߟߎ߬ ߢߊߞߘߐ߫ ﴿16﴾

ߊ߬ ߣߌ߫ ( ߞߵߏ߬ ߟߎ߬ ߞߍ߫ ) ߞߵߊ߬ ߕߊ߲߬ߞߊ߫ ߜߍ߬ߘߍ߫ ߞߙߎ߬ߟߊ߬ߓߏ߲߬ߕߊ ߘߊ߬ߡߊ ߡߊ߬ ﴿17﴾

ߝߏ߫ ߡߍ߲ ߓߊ߯ ߕߟߏߡߊߟߐ ߛߏ߲߬ߧߊ߫ ، ( ߟߏ߬ߟߏ߬ ) ߕߟߊߡߊߟߐ߯ ߕߡߊ߫ ߘߐߜߍ߫ ߘߏ߲߬ ߘߴߏ߬ ߛߊ߯ߘߊ߫ ߝߢߊߢߊߢߊ߫ ﴿18﴾

ߘߎ߰ߞߟߏ ߘߏ߲߬ ߸ ߊ߲ ߞߵߏ߬ ߘߐߝߎߟߋ߲߫ ߠߋ߬ ߝߋ߲ߜߋ߲߫ ، ߊ߬ ߣߴߊ߲ ߞߊ߬ ߞߎ߬ߙߎ ߟߎ߫ ߝߌ߬ߟߌ-ߝߟߌ߬ ߊ߬ ߢߊߝߍ߬ ، ߊ߬ ߣߌ߫ ߝߣߊ߫ ߸ ߊ߲ ߞߊ߬ ߝߋ߲ ߓߍ߯ ߘߏ߫ ߟߊߝߍߘߍ߲߫ ߊ߬ ߞߊ߲߬ ߖߊ߬ ߟߊ߬ ߛߎ߬ߡߊ߲߬ߠߌ߲߬ ߓߟߏ ߡߊ߬ ߖߋߞߎ߫ ﴿19﴾

ߊ߲ ߞߊ߬ ߓߊߟߏ ߟߎ߬ ߞߍ߫ ߊ߬ߟߎ߬ ߘߐ߫ ߊߟߎ߫ ߦߋ߫ ߸ ߊ߬ ߣߌ߫ ߝߋ߲߫ ߜߘߍ߫ ߟߎ߫ ߦߋ߫ ߸ ߊߟߎ߫ ߕߍ߫ ߡߍ߲ ߠߎ߬ ߓߊߟߏߓߊ߯ ߟߎ߫ ߘߌ߫ ﴿20﴾

ߝߋ߲߫ ߛߌ߫ ߕߍ߫ ߸ ߡߍ߲ ߡߣߐ߬ߓߏ߲ ߠߎ߬ ߕߍ߫ ߒ߬ߠߎ߬ ߓߟߏ߫ ، ߞߏ߬ߣߵߊ߲ ߕߴߊ߬ ߟߊߖߌ߰ ߟߊ߫ ߝߏ߫ ߘߡߊ߬ߦߌ߬ߙߊ߬ ߡߊߟߐ߲ߣߍ߲߫ ߡߊ߬ ﴿21﴾

ߊ߲ ߞߊ߬ ߝߢߐ ߟߎ߬ ߗߋ߫ ߟߊ߬ߞߍ߬ߟߌ߬ߟߊ ߟߎ߬ ߘߖߌ߫ ( ߛߊ߲ߝߌ߲ ߠߎ߬ ߟߊ߫ ) ߸ ߊ߲ ߞߊ߬ ߖߌ ߟߊߖߌ߰ ߏ߬ ߘߐ߫ ߞߊ߬ ߓߐ߫ ߡߐ߲ߕߐ߲ ߘߐ߫ ߸ ߞߵߊߟߎ߫ ߟߊߡߌ߲߬ ߏ߬ ߟߊ߫ ، ߞߏ߬ߣߵߊߟߎ߫ ߕߴߏ ߡߣߐ߬ߓߏ߲߬ߧߊ߬ߓߊ߯ ߟߎ߫ ߘߌ߫ ߘߋ߬ ﴿22﴾

ߊ߲ߠߎ߫ ߘߏ߲߬ ߸ ߖߊ߯ߕߋ߬ ߒ߬ߠߎ߫ ߟߋ߫ ߟߊ߬ߢߣߊ߬ߡߦߊ߬ߟߌ ߞߍ߫ ߟߊ߫ ߸ ߒ߬ߠߎ߫ ߟߋ߫ ߟߊ߬ߛߦߊ߬ߟߌ ߞߍ߫ ߟߊ߫ ، ߒ߬ߠߎ߫ ߟߋ߬ ߗߍߕߊߓߊ߮ ߟߎ߬ ߘߌ߫ ﴿23﴾

ߛߋߚߋ߫ ߒ߬ߠߎ߫ ߞߊ߬ ߢߍߓߌߟߊߓߊ߮ ߟߎ߬ ߟߐ߲߫ ߊߟߎ߫ ߘߐ߫ ߸ ߊ߲ ߞߊ߬ ߘߏ߲߰ߘߌ߬ߓߊ߮ ߟߎ߬ ߝߣߊ߫ ߟߐ߲߫ ﴿24﴾

ߖߊ߯ߕߋ߬ ߸ ߌ ߡߊ߰ߙߌ ߟߋ߬ ߞߍߕߐ߫ ߓߍ߯ ߟߊߘߍ߬ ߟߊ߫ ، ߓߊ ߊ߬ ߦߋ߫ ߥߘߋ߬ߥߘߋ߬ߟߌ߬ߟߊ߫ ߘߌ߫ ߸ ߊ߬ ߦߋ߫ ߟߐ߲ߠߌ߲ߠߊ߫ ߘߌ߫ ﴿25﴾

ߖߊ߯ߕߋ߬ ߸ ߊ߲ ߞߊ߬ ߡߐ߱ ߘߊ߲߫ ߣߊ߰ߘߌ߬ ߓߊ߲ߞߎ߫ ߞߊ߲߫ ߓߐߟߊ ߟߋ߬ ߘߐ߫ ߸ ߞߊ߬ ߓߐ߫ ߓߐ߰ ߘߐߕߐ߬ߞߎ߬ߟߐ߬ߕߊ ߘߐ߫ ﴿26﴾

ߒ߬ߓߊ߬ ߜߍ߬ߘߍ ߛߊ߫ ߸ ߊ߲ ߞߵߏ߬ ߟߋ ߝߟߐ߫ ߘߊ߲߫ ߢߍ ߘߐ߫ ߕߊ߫ ߞߟߊߡߊ߲ ߘߐ߫ ﴿27﴾

ߕߎ߬ߡߊ ߡߍ߲ ߌ ߡߊ߰ߙߌ ߞߵߊ߬ ߝߐ߫ ߞߋ߲ߛߐ߲ ߠߎ߬ ߦߋ߫ ߸ ߞߏ߫ ߒ ߓߍߣߊ߬ ߡߐ߱ ߘߊ߲߫ ߣߊ߰ߘߌ߬ ߓߊ߲ߞߎ߫ ߞߊ߲߫ ߓߐߟߊ ߘߐ߫ ߸ ߞߊ߬ ߓߐ߫ ߓߐ߰ ߘߐߕߐ߬ߞߎ߬ߟߐ߬ߕߊ ߘߐ߫ ﴿28﴾

ߒ ߓߊ߯ ߓߊ߲߫ ߏ߬ ߟߊߞߢߊ߫ ߟߊ߫ ߞߊ߬ ߒ ߠߊ߫ ߛߟߐߡߌ߲ ߘߏ߫ ߝߍ߫ ߊ߬ ߘߐ߫ ߸ ߊߟߎ߫ ߦߴߊߟߎ߫ ߓߋ߬ ߏ߬ ߦߋ߫ ߕߌ߲ߓߌߘߌ߲ ߘߌ߫ ߓߙߌ߫ ﴿29﴾

ߞߋ߲ߛߐ߲ ߓߍ߯ ߞߊ߬ ߕߌ߲ߓߌߘߌ߲ ( ߏ߬ ) ߞߍ߫ ߞߐߘߍ߫ ﴿30﴾

ߝߏ߫ ߓߙߌ߬ߛߌ߫ ، ߏ߬ ߟߋ ߞߵߊ߬ ߓߊ߲߬ ߞߏ߫ ߊ߬ ߕߍ߫ ߞߍ߫ ߕߌ߲ߓߌߘߌ߲ߠߊ ߟߎ߫ ߝߍ߬ ߝߋߎ߫ ﴿31﴾

‹ ߊߟߊ߫› ߞߊ߲߫ ߞߏ߫ ߓߙߌ߬ߛߌ߫ ߸ ߡߋ߬ߘߋ ߌ ߟߊ߫ ߣߴߌ ߕߍ߫ ߞߍ߫ ߟߊ߫ ߕߌ߲ߓߌߘߌ߲ߠߊ ߟߎ߫ ߝߍ߬؟ ﴿32﴾

ߊ߬ ߞߊ߲߫ ߞߏ߫ ߒߠߋ ߕߍ߫ ߒ ߕߌ߲ ߓߌߘߌ߲߫ ߡߐ߰ ߦߋ߫ ߸ ߌ ߞߊ߬ ߡߍ߲ ߘߊ߲߫ ߣߊ߰ߘߌ߬ ߓߊ߲ߞߎ߫ ߞߊ߲߫ ߓߐߟߊ ߘߐ߫ ߸ ߞߊ߬ ߓߐ߫ ߓߐ߰ ߘߐߕߐ߬ߞߎ߬ߟߐ߬ߕߊ ߘߐ߫ ﴿33﴾

‹ ߊߟߊ߫ › ߞߊ߲߫ ߞߏ߫ ߒ߬ߓߊ߬ ߓߐ߫ ߦߊ߲߬ ߝߋߎ߫ ، ߌ ߓߘߊ߫ ߞߍ߫ ߞߙߎ߬ߟߊ߬ߓߏ߲߬ߕߊ ߘߌ߫ ﴿34﴾

ߘߊ߲ߞߊ ߟߵߌ ߡߊ߬ ߛߍߣߍ߲߬ ߝߏ߫ ߞߵߊ߬ ߛߌ߰ ߛߙߊ߬ߟߌ ߟߏ߲ ߠߊ߫ ﴿35﴾

‹ ߓߙߌ߬ߛߌ߬ › ߞߊ߲߫ ߞߏ߫ ߒ߬ߓߊ߬ ߒ ߡߊ߰ߙߌ ߸ ߒ ߘߏ߲߰ߘߌ߫ ( ߛߊ߬ߦߊ ߟߊ߫ ) ߝߏ߫ ߞߵߊ߬ ߛߌ߰ ߥߟߌ ߟߏ߲ ߠߊ߫ ﴿36﴾

‹ ߊߟߊ߫ › ߞߊ߲߫ ߸ ߞߏ߫ ߒ ߓߘߴߌ ߡߊߞߐ߬ߣߐ߲߬ ߏ߬ ߟߊ߫ ߝߛߊߦߌ߫ ﴿37﴾

ߝߏ߫ ߞߵߊ߬ ߛߌ߰ ߟߏ߲߫ ߡߊߟߐ߲ߣߍ߲ ߥߊ߯ߕߌ ߟߊ߫ ﴿38﴾

‹ ߓߙߌ߬ߛߌ߬ › ߞߊ߲߫ ߞߏ߫ ߒ ߡߊ߰ߙߌ ߸ ߌ ߣߊ߬ ߒߠߋ ߟߊߝߟߌ߬ ߟߊ߫ ߡߍ߲ ߠߊ߫ ߖߐ߫ ߸ ߒ ߝߣߊ߫ ߘߌ߫ ߡߊ߬ߢߍ߰ߙߍ߬ߟߌ ߞߍ߫ ߊ߬ߟߎ߬ ߢߊߞߘߐ߫ ߘߎ߱ ߞߊ߲߬ ߸ ߊ߬ ߣߌ߫ ߒ ߘߴߊ߬ߟߎ߬ ߓߍ߯ ߟߊߝߟߌ߬ ߞߐߘߍ߫ ﴿39﴾

ߝߏ߫ ߌ ߟߊ߫ ߖߐ߲߬ ߓߎ߰ߓߎ߰ߣߍ߲ ߡߍ߲ ߠߎ߬ ߦߴߊ߬ߟߎ߬ ߘߐ߫ ﴿40﴾

‹ ߊߟߊ߫ › ߞߊ߲߫ ߸ ߞߏ߫ ߣߌ߲߬ ߦߋ߫ ߛߌߟߊ߫ ߕߋߟߋ߲ߣߍ߲ ߠߋ߬ ߘߌ߫ ߒߠߋ ߡߊ߬ ﴿41﴾

ߒ ߠߊ߫ ߖߐ߲߬ ( ߓߘߍ ) ߟߎ߫ ߞߏ߬ߣߌ߲ ߸ ߛߋߓߊ߯ߦߊ߫ ߛߌ߫ ߕߴߌ ߦߋ߫ ߏ߬ ߟߎ߫ ߡߊ߬ ߸ ߝߏ߫ ߝߟߌ߬ߓߊ߰ߒߕߋ ߡߍ߲ ߠߎ߬ ߓߴߌ ߟߊߓߊ߬ߕߏ߬ ﴿42﴾

ߔߊߦߌߔߊߦߌ ߟߋ߫ ߘߏ߲߬ ߦߴߏ߬ ߓߍ߯ ߢߍߛߌ߮ ߘߌ߫ ߕߊߦߌ߫ ﴿43﴾

ߘߊ߫ ߥߐߙߐ߲ߥߌ߬ߟߊ߫ ߟߋ߬ ‹ ߔߊߦߌߔߊߦߌ › ߟߊ߫ ، ߦߋ߲߬ ߘߏ߲߬ߓߊ߮ ߟߎ߬ ߘߐߕߟߊߣߍ߲߫ ߠߋ߬ ߸ ߘߊ ߞߋ߬ߟߋ߲߬ߞߋ߬ߟߋ߲߬ߣߊ ߓߍ߯ ߕߊ ߞߎߘߎ߲߫ ߞߋߟߋ-ߞߋߟߋ߲߫ ﴿44﴾

ߝߊ߲ߕߊ߲ߞߟߊ ߟߎ߫ ߟߋ߬ ߘߏ߲߬ߕߐ߫ ߣߊߞߐ ߟߎ߬ ߣߌ߫ ߞߐ߬ߢߊ ߟߎ߬ ߘߐ߫ ﴿45﴾

(ߊ߬ ߘߌ߫ ߝߐ߫ ߏ߬ ߟߎ߫ ߡߊ߬) ߸ ߞߏ߫ ߊߟߎ߫ ߘߏ߲߬ ߦߋ߲߬ ߖߐ ߘߌ߫ ߸ ߊߟߎ߫ ߞߎ߲߬ߠߊ߬ߝߎߟߋ߲ߣߍ߲߫ ߝߊ߲ߛߊ߲߫ ﴿46﴾

ߊ߲ ߘߌ߫ ߞߐߣߌ߲ߧߊ ߓߍ߯ ߓߐ߫ ߊ߬ߟߎ߫ ߛߣߐ߬ߡߍ ߟߎ߬ ߘߐ߫ ߸ ߞߵߊ߬ߟߎ߬ ߞߍ߫ ߓߊߘߋ߲ߡߊ ߟߎ߬ ߘߌ߫ ߸ ߞߵߊ߬ߟߎ߬ ߟߊߛߌ߰ ߜߍ߬ߡߍ ߟߎ߫ ߞߊ߲߬ ߸ ߞߵߊ߬ߟߎ߬ ߢߊߕߋߟߋ߲߫ ߢߐ߲߮ ߠߊ߫ ﴿47﴾

ߛߍ߰ ߕߍ߫ ߡߊ߰ ߟߴߊ߬ߟߎ߬ ߟߊ߫ ߦߋ߲߬ ߸ ߊ߬ߟߎ߫ ߘߏ߲߬ ߕߍ߫ ߟߊߓߐ߫ ߟߊ߫ ߦߋ߲߬ ߡߎ߬ߕߎ߲߬ ﴿48﴾

ߒ ߠߊ߫ ߖߐ߲߭ ߠߎ߫ ߞߌ߬ߓߊ߬ߙߏ߬ ߞߏ߫ ߒߠߋ ߸ ߒߠߋ ߟߋ߫ ߦߝߊ߬ߟߊ߫ ߤߌߣߟߊ ߘߌ߫ ﴿49﴾

ߊ߬ ߣߌ߫ ߝߣߊ߫ ߸ ߞߏ߫ ߒ ߠߊ߫ ߖߊ߲߰ߞߕߊ ߟߋ߫ ߖߊ߲߰ߞߕߊ߬ ߘߌߡߌ߲ߣߍ߲ ߘߌ߫ ﴿50﴾

ߊ߬ ߣߴߌ ߦߴߊ߬ߟߎ߫ ߞߌ߬ߓߊ߬ߙߏ߬ ߌߓߎ߬ߙߊ߬ߤߌߡߊ߫ ߟߊ߫ ߟߏ߲ߟߊ߲߫ ߞߏ ߟߊ߫ ﴿51﴾

ߕߎ߬ߡߊ ߡߍ߲ ߏ߬ ߟߎ߫ ߘߏ߲߬ ߘߴߊ߬ ߞߊ߲߬ ߝߏ߬ߟߌ ߘߌ߫ ߸ ߞߏ߫ ߖߐ ( ߊߟߎ߫ ߡߊ߬ ) ߸ ߊ߬ ߞߊ߲߫ ߞߏ߫ ߒ߬ߠߎ߫ ߘߏ߲߬ ߓߘߊ߫ ߛߌߟߊ߲߫ ߊߟߎ߫ ߢߍ߫ ߥߍ߫߹ ﴿52﴾

ߊ߬ߟߎ߬ ߞߊ߲߫ ߞߴߌ ߞߊ߫ ߛߌߟߊ߲߫ ߠߋ߬ ߞߟߋ߫ ߸ ߓߊ ߊ߲ ߣߊ߬ߣߍ߲߫ ߒ߬ ߘߟߊߝߎ߬ ߟߴߌ ߦߋ߫ ߘߋ߲ߞߍ߫ ߟߐ߲ߠߌ߲ߠߊ߫ ߟߋ߬ ( ߛߐ߬ߘߐ߲) ߠߊ߫ ﴿53﴾

ߊ߬ ߞߊ߲߫ ߸ ߞߏ߫ ߊߟߎ߫ ߞߍߕߐ߫ ߊߟߎ߫ ߘߟߊߝߎ߬ ߟߊ߫ ߒ ߞߘߐ߬ߣߍ߲߬ߓߊ ߢߌ߲߬ ߠߋ߬ ߦߋ߫ ߸ ߊߟߎ߫ ߦߋ߫ ߡߎ߲߬ ߘߟߊߝߎߟߌ߫ ߞߍ߫ ߟߊ߫ ߣߌ߲߬ ߕߋ߲߬؟ ﴿54﴾

ߊ߬ߟߎ߬ ߞߊ߲߫ ߸ ߞߏ߫ ߒ߬ ߧߋ߫ ߒ߬ ߘߟߊߝߎ߬ ߟߴߌ ߦߋ߫ ߕߎ߬ߢߊ߫ ߟߋ߬ ߟߊ߫ ߝߊ߯ߛߌ߫ ، ߏ߬ ߘߐ߫ ߸ ߌ ߞߊߣߵߌ ߖߘߍ߬ ߞߍ߫ ߖߌ߰ߕߍ߰ߓߊ߰ߕߐ ߟߎ߬ ߝߋ߲߫ ߘߌ߫ ߘߋ߬ ﴿55﴾

ߊ߬ ߞߊ߲߫ ߞߏ߫ ߖߍߣߍ߲ ߘߴߊ߬ ߖߌ߰ߕߍ߰ ߊ߬ ߡߊ߰ߙߌ ߟߊ߫ ߤߌߣߊ ߟߊ߫ ߣߌ߫ ߝߟߌ߬ߓߊ߰ߒߕߋ ߟߎ߬ ߕߍ߫؟ ﴿56﴾

ߊ߬ ( ߓߊ߲߫ ߘߊ߫ ) ߞߵߊ߬ ߝߐ߫ ߞߏ߫ ߤߍ߲߬ ߊߟߎ߬ ߞߋߘߋ߲ ߠߎ߬ ߸ ߡߋ߬ߘߋ ߊߟߎ߫ ߟߌ߬ߤߟߊ ߘߌ߫؟ ﴿57﴾

ߏ߬ ߟߎ߬ ߞߊ߲߫ ߞߏ߫ ߒ߬ߠߎ߬ ߗߋߣߍ߲߫ ߡߌ߬ߙߌ߲߬ߘߌ߫ ߛߐ߲߬ߡߊ ߟߎ߫ ߟߋ߬ ߞߊ߲ߡߊ߬ ߣߌ߲߬ ﴿58﴾

ߝߏ߫ ߟߎ߯ߕߌ߫ ߘߏ߲߬ߞߏ ߟߎ߬ ߸ ߊ߲ ߞߏ߬ߣߌ߲ ߘߴߏ߬ ߟߎ߬ ߓߍ߯ ߟߊߞߛߌ߫ ߞߐߘߍ߫ ﴿59﴾

ߝߏ߫ ߊ߬ ߡߏ߬ߛߏ ، ߊ߲ ߓߘߴߊ߬ ߟߊߕߍ߰ ߒ ߞߴߏ߬ ߘߌ߫ ߕߘߍ߬ ߞߐ߫ ߘߐ߫ ߕߏߟߊ ߟߎ߫ ߝߍ߬ ﴿60﴾

ߗߋߘߋ߲ ߠߎ߫ ߣߊ߬ߣߍ߲ ߟߎ߯ߕߌ߫ ( ߣߴߊ߬ ) ߞߐߙߍ ߡߊ߬ ﴿61﴾

ߊ߬ ߞߊ߲߫ ߞߏ߫ ߊߟߎ߫ ߘߏ߲߬ ߦߋ߫ ߝߟߌ߬ߒ߬ߡߊ߬ ߡߐ߯ ߟߎ߫ ߟߋ߬ ߘߌ߫ ߘߋ߬ ﴿62﴾

ߊ߬ߟߎ߬ ߞߊ߲߫ ߞߏ߫ ߍ߲߬ߍ߲߫ ، ߒ߬ߠߎ߫ ߣߊ߬ߣߴߌ ߡߊ߬ ߝߋ߲߫ ߠߋ߬ ߘߌ߫ ߣߌ߲߬ ߸ ߊ߬ߟߎ߫ ߕߘߍ߬ ߛߌߞߊ߫ ߟߊ߫ ߡߍ߲ ߘߐ߫ ﴿63﴾

ߊ߲ ߘߏ߲߬ ߣߊ߬ߣߴߌ ߡߊ߬ ߛߍ߬ߓߍ ߟߋ߬ ߘߌ߫ ߸ ߊ߲ ߧߋ߫ ߕߎ߬ߢߊ߫ ߟߋ߬ ߟߊ߫ ߛߎߋ߯ ﴿64﴾

ߏ߬ ߘߐ߫ ߸ ߌ ߦߋ߫ ߕߊ߯ ߌ ߞߐߙߍ ߘߌ߫ ߛߎ ߕߐ߬ ߞߎߘߎ߲ ߘߐ߫ ߸ ߌ ߦߴߌ ߓߌ߬ߟߴߊ߬ߟߎ߬ ߞߐ߫ ، ߊߟߎ߫ ߝߋ߲߫ ߞߊߣߵߊ߬ ߞߐߝߍߣߍ߲߫ ߘߋ߬ ، ߊߟߎ߫ ߘߏ߲߬ ߦߋ߫ ߥߊ߫ ߦߙߐ߫ ߟߋ߬ ߘߐ߫ ߊߟߎ߫ ߓߊ߯ ߖߊ߬ߡߊߙߌ߫ ߡߍ߲ ߠߊ߫ ﴿65﴾

ߊ߲ ߞߊ߬ ߒ߬ ߠߊ߫ ߟߊ߬ߕߍ߮ ߟߐ߬ ߊ߬ ߡߊ߬ ߥߊߟߌߢߊ ߏ߬ ߟߋ ߞߊ߲߬ ߸ ߒ ߞߏ߫ ( ߓߊ߲߬ߓߊ߮ ) ߢߌ߲߬ ߠߎ߬ ߞߏߕߍ߰ߕߐ߫ ߟߋ߬ ߦߟߍߦߟߍ ߕߎ߬ߡߊ ߟߊ߫ ﴿66﴾

(ߘߊ߬ߡߊ߲߬ߛߊ߫ ) ߸ ߘߎ߰ ߘߏ߲ߞߏ ߟߎ߬ ߛߍߥߊߡߍߣߍ߲ߕߐ ߣߊ߬ ߘߊ߫ ﴿67﴾

‹ ߟߎ߯ߕߌ߫ › ߞߊ߲߫ ߸ ߞߏ߫ ߢߌ߲߬ ߠߎ߬ ߦߋ߫ ߒ ߠߊ߫ ߟߏ߲ߟߊ߲ ߠߎ߫ ߟߋ߬ ߘߌ߫ ߸ ߊߟߎ߫ ߞߊߣߊ߬ ߒ ߞߎ߲߬ߘߐߕߋ߬ ߏ߬ ߟߎ߬ ߢߣߊ߫ ߘߋ߬ ﴿68﴾

ߊߟߎ߫ ߦߴߊߟߎ߫ ߝߊ߲ߕߊ߲߬ߞߵߊߟߊ߫ ߡߊ߬ ߸ ߊߟߎ߫ ߞߊߣߊ߬ ߒ ߠߊߡߊ߬ߟߏ߬ߦߊ߫ ߘߋ߬ ﴿69﴾

ߊ߬ߟߎ߬ ߞߊ߲߫ ߸ ߞߏ߫ ߒ߬ߠߎ߬ ߡߊߣߵߌ ߝߊߕߊ߲ߕߌ߫ ߞߘߐ߬ߡߊ߲߫ ߘߎߢߊ߫ ߡߐ߱ ߟߎ߫ ߡߊ߬؟ ﴿70﴾

‹ ߟߎ߯ߕߌ߫ › ߞߊ߲߫ ߸ ߞߏ߫ ߒ ߘߋ߲ߡߛߏ ߟߎ߫ ߟߋ߬ ߣߌ߲߬ ߣߴߊߟߎ߫ ߦߴߊ߬ ߝߍ߬ ߞߊ߬ ߡߍ߲ ߞߍ߫ ﴿71﴾

ߞߏ߬ߣߌ߲߬ ߊ߰ ߒ ߣߴߌ ߛߌ߭ ߕߍ߫ ߸ ߊ߬ߟߎ߬ ߝߎߦߋ߲ߕߐߟߡߊ ߟߴߊ߬ߟߎ߬ ߟߊ߫ ߡߌߟߏߕߐߦߊ ߘߐ߫ ﴿72﴾

ߘߊ߬ߡߊ߲߬ߛߊ߫ ߸ ߞߎߟߋ߫ ߞߊ߲߫ ߞߋߟߋ߲߫ ߞߵߊ߬ߟߎ߫ ߡߌ߬ߘߊ߫ ߕߟߋ߬ ߖߎߞߘߎ ߡߊ߬ ﴿73﴾

ߊ߲ ߞߵߊ߬ ( ߟߎ߬ ߟߊ߫ ߛߏ ) ߞߎ߲߬ߡߊ߬ߟߊ ߞߍ߫ ߊ߬ ߞߘߐߟߊ ߘߌ߫ ، ߊ߬ ߣߴߊ߲ ߞߊ߬ ߣߊ߰ߘߌ߬ߝߘߊ ߓߙߍ߬ߞߌߛߍ ߟߎ߬ ߓߐߙߐ߲ߘߐ߫ ߊ߬ߟߎ߫ ߞߊ߲߬ ﴿74﴾

ߖߊ߯ߕߋ߬ ߸ ߕߊ߰ߛߌ߬ ߞߏ߬ ߟߎ߫ ߟߴߏ߬ ߟߎ߬ ߘߐ߫ ߖߎ߯ߓߍߟߌߟߊ ߟߎ߬ ߦߋ߫ ﴿75﴾

(ߛߏ ) ߏ߬ ߦߋ߫ ߛߌߟߊ߫ ߓߎ߬ߣߍ߲߬ߓߊ߫ ߟߋ߬ ߟߊ߫ ﴿76﴾

ߖߊ߯ߕߋ߬ ߸ ߕߊ߰ߛߌ߬ ߞߏ߫ ߟߴߏ߬ ߘߐ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߋ߫ ﴿77﴾

ߣߌ߫ ߛߓߋ߬ߕߎ ߘߏ߲߬ߞߏ ߟߎ߫ ߕߌ߲߬ ߞߍ߫ ߘߊ߫ ߕߐ߬ߢߍ߰ߒߕߋ ߟߎ߬ ߘߌ߫ ߸ ﴿78﴾

ߊ߲ ߘߏ߲߬ ߞߊ߬ ߒ߬ ߕߊߢߐ߲߯ߓߐ߫ ߊ߬ߟߎ߬ ߘߐ߫ ߞߟߋ߫ ، ߛߏ߫ ߝߌ߬ߟߊ ߏ߬ ߜߎ ߦߋ߫ ߝߏ߲߬ߘߏ߬ ߜߍ ߟߋ߬ ߟߊ߫ ﴿79﴾

ߖߊ߯ߕߋ߬ ߸ ߤߌߖߙߌߞߊ ߟߎ߫ ߞߊ߬ ߞߋߟߊ ߟߎ߬ ߡߊߛߐ߬ߛߐ߫ ߟߋ߬ ﴿80﴾

ߊ߲ ߘߏ߲߬ ߜߎ ߣߊ߬ ߘߴߊ߬ߟߎ߫ ߡߊ߬ ߒ߬ ߠߊ߫ ߡߊ߲߬ߕߊߣߌ߲ ߠߎ߬ ߘߌ߫ ، ߓߊ߬ߙߌ߬ ߊ߬ߟߎ߫ ߞߵߊ߬ߟߎ߬ ߞߐߘߏ߲߬ ߏ߬ ߟߎ߬ ߟߊ߫ ߟߋ߬ ߔߏ߲߫ ﴿81﴾

ߊ߬ߟߎ߫ ߕߘߍ߬ ߞߎ߬ߙߎ ߟߎ߬ ߟߛߍ߫ ߟߊ߫ ߓߏ߲ ߠߎ߬ ߘߌ߫ ، ߊ߬ߟߎ߫ ߞߎ߲߬ߠߊ߬ߝߎߟߋ߲ߣߍ߲߫ ( ߏ߬ ߟߎ߬ ߞߣߐ߫ ߝߊ߲ߛߊ߲߫) ﴿82﴾

ߓߊ߬ߙߌ߬ ߛߊ߬ߝߍ߬ ߞߊ߲߬ ߞߋߟߋ߲߫ ߞߵߏ߬ ߟߎ߫ ߡߌ߬ߘߊ߬ ߦߟߍߦߟߍ ߕߎ߬ߡߊ ߟߊ߫ ﴿83﴾

ߊ߬ߟߎ߫ ߘߏ߲߬ ߓߊ߯ߙߊ߫ ߣߐ ߡߊ߫ ߝߏߦߌ߫ ߢߵߊ߬ߟߎ߫ ߡߊ߬ ﴿84﴾

ߊ߲ߠߎ߫ ߞߏ߬ߣߌ߲ ߡߊ߫ ߛߊ߲ ߠߎ߬ ߣߌ߫ ߘߎ߱ ߣߴߏ ߝߌ߬ߟߊ ߕߍߟߊ ߘߊ߲߫ ߝߏߦߌ߬ ߟߊ߫ ߕߎ߬ߢߊ ߞߐ߫ ، ߟߐ߬ߓߊ ߥߊ߯ߕߌ ߘߏ߲߬ ߣߊ߬ߕߐ߫ ߟߋ߬ ߛߋߚߋ߫ ، ߏ߬ ߘߐ߫ ߸ ߌߟߋ ߦߋ߫ ߞߏߘߐߞߏߦߊߕߏ ߞߍ߫ ߘߐ߬ߞߏ߬ߦߊ߬ߕߏ߬ߟߌ߬ ߢߌߡߊ ߟߊ߫ ﴿85﴾

ߖߊ߯ߕߋ߬ ߸ ߌ ߡߊ߰ߙߌ ߟߋ߬ ߘߊ߲ߠߌ߲ߠߊ߫ ߞߎߛߊ߲߫ ߞߟߊ߬ߡߊ߬ߓߊ߮ ߘߌ߫ ﴿86﴾

ߖߊ߯ߕߋ߬ ߸ ߊ߲ ߓߘߴߌ ߛߐ߫ ߘߐ߬ߛߊ߬ߦߌ߲߬ߛߊ߬ߦߌ߲߬ߕߊ߬ ߥߐߙߐ߲ߥߌ߬ߟߊ߬ ߟߊ߫ ߸ ߊ߬ ߣߌ߫ ߘߐ߬ߛߊߙߌ߫ ߓߟߋ߬ߓߟߋ ߟߊ߫ ﴿87﴾

ߌ ߞߊߣߊ߬ ߢߊߓߐ߫ ߝߋ߲߫ ߝߍ߬ ߊ߲ ߣߊ߬ ߝߌ߬ߟߊ߬ߓߊ ߘߏ߫ ߟߎ߫ ߘߊ߰ߡߎ߲߬ ߠߊ߫ ߡߍ߲ ߠߴߊ߬ߺ(ߺߟߋ߬ ߡߐ߱) ߟߎ߬ ߘߐ߫ ، ߌ ߘߏ߲߬ ߞߊߣߊ߫ ߛߎ߬ߣߎ߲߫ ߊ߬ߟߎ߫ ߝߍ߬ ، ߊ߬ ߣߌ߫ ߌ ߦߴߌ ߞߊ߬ߡߊ߲ ߡߊߖߌ߰ ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߋ߫ ﴿88﴾

ߌ ߦߴߊ߬ ߝߐ߫ ߞߏ߫ ߒߠߋ ߸ ߒߠߋ ߟߋ߫ ߖߊ߬ߛߙߋ߬ߡߊ߬ߟߌ߬ߟߊ߬ ߘߐ߬ߜߍ ߘߌ߫ ﴿89﴾

ߦߏ߫ ߊ߲ ߞߊ߬ ( ߖߊ߬ߛߙߋ߬ߡߊ߬ߟߌ ) ߡߍ߲ ߢߐ߲߰ ߠߊߖߌ߰ ߢߐ߲߯ ߠߊߛߍ߲ߠߊ ߟߎ߫ ߡߊ߬ ﴿90﴾

ߏ߬ ߟߎ߬ ߡߍ߲ ߠߎ߫ ߣߊ߬ ߞߎ߬ߙߊ߬ߣߊ ߞߍ߫ ߟߊ߫ ߞߎߘߎ߲ߞߎߘߎ߲ ߠߎ߬ ߘߌ߫ ﴿91﴾

ߊ߬ ߘߏ߲߬ ߦߋ߫ ߒ ߣߴߌ ߡߊ߰ߙߌ ߕߍ߫ ߸ ߊ߲ ߘߌߣߵߏ߬ ߓߍ߯ ߟߊߘߍ߬ߣߍ߲ ߢߌ߬ߣߌ߲߬ߞߊ߫ ߟߋ߬ ߕߘߋ߫ ﴿92﴾

(ߞߵߊ߬ߟߎ߫ ߢߌ߬ߣߌ߲߬ߞߊ߬ ) ߝߋ߲߫ ߡߊ߬ ߸ ߊ߬ߟߎ߫ ߕߘߍ߬ ߡߍ߲ ߞߍ߫ ߟߊ߫ ﴿93﴾

ߌ ߖߡߊ߬ߙߌ߬ߒ߬ߞߊ߲߬ߠߊ ߟߊߥߊ߲߬ߞߊ߬ ߛߍߣߍ߲߬ ߝߛߊߦߌ߫ ߸ ߊ߬ ߣߌ߫ ߌ ߦߴߌ ߞߐߘߏ߲߬ ߛߏߡߊ ߟߎ߬ ߟߊ߫ ߔߏ߲߫ ﴿94﴾

ߖߊ߯ߕߋ߬ ߸ ߊ߲ ߓߘߴߌ ߥߛߊ߬ ߦߟߍߓߐߒߘߐߟߊ ߟߎ߫ ߡߊ߬ ﴿95﴾

ߏ߬ ߟߎ߬ ߡߍ߲ ߠߎ߬ ߦߋ߫ ߡߊ߰ߙߌ߬ ߜߘߍ߫ ߞߍ߫ ߟߴߊߟߊ߫ ߝߍ߬ ، ߞߏ߬ߣߌ߲߬ ߛߋߚߋ߫ ߊ߬ߟߎ߬ ߓߍߣߵߊ߬ ߟߐ߲߫ ﴿96﴾

ߊ߲ ߘߏ߲߬ ߞߵߊ߬ ߟߐ߲߫ ߒ ߞߏ߫ ߊ߬ߟߎ߬ ߟߊ߫ ߞߎߡߊ ߦߴߌ ߛߌߛߌ ߜߍ߲߬ߘߍ߬ ߟߊ߫ ﴿97﴾

ߒ߬ߓߊ߬ ߌ ߦߋ߫ ߛߊߣߌ߲ߧߊߞߴߌ ߡߊ߰ߙߌ ߕߊ߲߬ߘߏ ߟߊ߫ ߸ ߊ߬ ߣߴߌ ߦߋ߫ ߞߍ߫ ߕߌ߲ߓߌߘߌ߲ߠߊ ߟߎ߬ ߘߏ߫ ߘߌ߫ ﴿98﴾

ߊ߬ ߣߌ߫ ߌ ߦߴߌ ߡߊ߰ߙߌ ߓߊ߬ߕߏ߫ ߟߋ߬ ߝߎߚߎ߫ ߝߏ߫ ߘߍ߲߬ߞߣߍ߬ߦߊ ߦߋ߫ ߣߵߌ ߡߊ߬ ﴿99﴾

ߊߟߊ߫ ߟߊ߫ ߖߊ߬ߡߊߙߌ ߣߊ߬ߕߐ߫ ߖߐ߫ ߸ ߊߟߎ߫ ߞߊߣߊ߬ ߜߍ߬ߘߍ߲߫ ߊ߬ ߟߊ߫ ߟߋ߬ ߞߟߋ߫ ߸ ߊ߬ ߛߊߣߌ߲ߡߊ߲߫ ߞߊ߬ ߞߘߐߕߵߊ߬ߟߎ߬ ߟߊ߫ ߜߙߊ߬ߢߐ߲߮ ߠߎ߫ ߡߊ߬ ﴿1﴾

ߊ߬ ߦߋ߫ ߞߋ߲ߛߐ߲ ߠߎ߬ ߟߊߖߌ߰ ߟߊ߫ ߛߟߐߡߌ߲ ߘߌ߫ ߊ߬ ߟߊ߫ ߖߊ߬ߡߊߙߌ ߟߊ߫ ߡߐ߰ ߟߋ߬ ߡߊ߬ ߸ ߡߍ߲ ߓߊ߯ ߊ߬ ߘߌߦߴߊ߬ ߟߊ߫ ߖߐ߲߭ ߠߎ߬ ߘߐ߫ ، ߞߏ߫ ߊߟߎ߫ ߖߊ߬ߛߙߋ߬ߡߊ߬ߟߊ ߞߍ߫ ߟߋ߬ ߞߏ߫ ߡߊ߰ߙߌ߬ ߜߘߍ߫ ߕߍ߫ ߒߠߋ ߞߐ߫ ߸ ߊߟߎ߫ ߦߴߊߟߎ߫ ߝߊ߲ߕߊ߲߬ߞߊ߬ ߒߠߋ ߡߊ߬ ߘߋ߬ ﴿2﴾

ߊߟߊ߫ ߞߊ߬ ߛߊ߲ ߠߎ߬ ߣߌ߫ ߘߎ߱ ߘߊ߲߫ ߕߎ߬ߢߊ߫ ߟߋ߬ ߟߊ߫ ، ߊ߬ ߘߏ߲߬ ߞߘߐߕߊ߬ߣߍ߲߫ ߊ߬ߟߎ߬ ߟߊ߫ ߜߙߊ߬ߢߐ߲߮ ߠߎ߫ ߡߊ߬ ﴿3﴾

ߊ߬ ߞߊ߬ ߡߐ߱ ߘߊ߲߫ ߛߖߌߣߍ߲߫ ( ߣߙߐߘߐߖߎ߮ ) ߟߋ߬ ߘߐ߫ ، ߏ߬ ߟߋ ߦߴߊ߬ ߞߟߍ߬ߢߐ߲߰ ߘߐ߬ߜߍ ߘߌ߫ ߣߌ߲߬ ﴿4﴾

ߊ߬ ߞߊ߬ ߞߟߏߝߋ߲ ߠߎ߬ ߘߊ߲߫ ߊߟߎ߫ ߟߊ߫ ߞߏߟߊ߫ ، ߣߍߣߍ߫ ߜߍ߲߫ ߝߋ߲߫ ߦߴߏ߬ ߟߎ߬ ߟߴߊߟߎ߫ ߦߋ߫ ߸ ߊ߬ ߣߌ߫ ߡߎߣߊ߲ߝߊ߲ ߠߎ߬ ، ߊߟߎ߫ ߘߊߥߎ߲ߕߊ ߟߎ߬ ߝߣߊ߫ ߦߴߊ߬ߟߎ߬ ߘߐ߫ ﴿5﴾

ߗߋ߲߰ߧߊ ߦߴߊ߬ߟߎ߬ ߘߐ߫ ߊߟߎ߫ ߦߋ߫ ߸ ߊ߬ߟߎ߬ ߟߊߘߏ߲߬ ߕߎߡߊ ߣߴߊ߬ߟߎ߬ ߟߊߓߐ߫ ߕߎߡߊ ߟߊ߫ ﴿6﴾

ߊ߬ߟߎ߬ ߦߴߊߟߎ߫ ߘߏ߬ߣߌ߲ ߠߎ߫ ߕߊ߬ ߟߊ߫ ߞߊ߬ ߕߊ߯ ߘߎ߰ ߟߊ߫ ߸ ߊߟߎ߫ ߖߍ߬ߘߍ ߕߍ߫ ߛߴߊ߬ߟߎ߬ ߟߊߛߋ߫ ߟߊ߫ ߦߋ߲߬ ߣߌ߫ ߕߙߐ ߞߐ߫ ، ߖߊ߯ߕߋ߬ ߸ ߊߟߎ߫ ߡߊ߰ߙߌ ߦߋ߫ ߞߌ߬ߣߌ߲߬ߞߌ߬ߣߌ߲߬ߠߊ߫ ߘߌ߫ ߸ ߊ߬ ߦߋ߫ ߤߌߣߟߊ߫ ߘߌ߫ ﴿7﴾

ߊ߬ ߞߊ߬ ߛߏ߭ ߟߎ߬ ߣߌ߫ ߝߊ߬ߟߌ߬ߓߊ ߟߎ߬ ߣߌ߫ ߝߊ߬ߟߌ ߟߎ߬ ߘߊ߲߫ ߠߋ߬ ߸ ߛߴߊߟߎ߫ ߘߌ߫ ߦߟߍ߬ ߊ߬ߟߎ߫ ߞߊ߲߬ ߸ ߊ߬ ߣߌ߫ ߡߊ߬ߛߘߌ ߝߣߊ߫ ߘߌ߫ ، ߊ߬ ߘߏ߲߬ ߦߋ߫ ߝߋ߲߫ ߠߋ߬ ߘߊ߲߫ ߠߴߊߟߎ߫ ߡߊ߫ ߡߍ߲ ߟߐ߲߫ ( ߡߎߣߎ߲߬) ﴿8﴾

ߛߌߟߊ߫ ߕߋߟߋ߲ߣߍ߲ ߦߌ߬ߘߊ ߟߋ߬ ߊߟߊ߫ ߡߊ߬ ، ߓߊ ߘߏ߫ ( ߟߎ߫ ) ߘߎ߬ߣߍ߲߫ ߠߋ߬ ߞߐ߲ߕߌ߲߫ ، ߊ߬ ߘߏ߲߬ ߕߎ߲߬ ߓߊ߯ ߊߟߊ߫ ߘߌߦߊ߫ ߸ ߊ߬ ߕߎ߲߬ ߘߴߊߟߎ߫ ߓߍ߯ ߞߊ߲ߘߊ߫ ߞߐߘߍ߫ ﴿9﴾

ߊ߬ߟߋ ߟߋ߬ ߖߌ ߟߊߖߌ߰ ߟߊ߫ ߞߊ߬ ߓߐ߫ ߡߐ߲ߕߐ߲ ߘߐ߫ ، ߊߟߎ߫ ߡߌ߲߬ߖߌ ߏ߬ ߟߋ ߘߐ߫ ߸ ߦߙߌ ߟߎ߬ ߝߍߘߍ߲߫ ߠߴߏ߬ ߟߋ ߘߐ߫ ߸ ߊߟߎ߫ ߦߋ߫ ߓߌߦߊ߲ ߠߎ߬ ߘߡߊߢߌߣߌ߲߫ ߠߊ߫ ߡߍ߲ ߠߎ߬ ߘߐ߫ ﴿10﴾

ߊ߬ߟߋ ߟߋ߬ ߛߍ߬ߣߍ ( ߢߐ߭ ) ߟߎ߬ ߟߊߝߍߘߍ߲߫ ߠߴߏ߬ ߟߊ߫ ߸ ߊ߬ ߣߌ߫ ߛߏߞߏ߬ߘߏ ߣߌ߫ ߕߡߊߙߏ ߣߌ߫ ߖߊ߬ߓߌ߬ߙߋ߲ ߠߎ߬ ، ߊ߬ ߣߌ߫ ߦߙߌߘߋ߲ ߕߐ߬ߡߊ ، ߕߐ߰ߡߊ߬ߛߙߋ߫ ߦߴߏ߬ ߘߐ߫ ߡߌ߬ߙߌ߲߬ߘߌ߬ ߛߌߡߟߊ ߟߎ߬ ߦߋ߫ ߘߋ߬ ﴿11﴾

ߊ߬ ߞߊ߬ ߛߎ ߣߌ߫ ߕߟߋ߬ߘߐ߬ߟߊ ߣߌ߫ ߕߋ߬ߟߋ ߣߌ߫ ߞߊߙߏ ߞߟߏ߫ ߊߟߎ߫ ߦߋ߫ ، ߟߏ߬ߟߏ ߟߎ߬ ߓߍ߯ ߞߟߏߣߍ߲߫ ߊ߬ ߟߊ߫ ߖߊ߬ߡߊߙߌ ߟߋ߬ ߟߊ߫ ، ߖߊ߯ߕߋ߬ ߸ ߕߊ߰ߛߌ߬ ߞߏ߫ ߟߎ߫ ߟߴߏ߬ ߘߐ߫ ߡߌ߬ߙߌ߲߬ߘߌ߬ ߤߊ߲ߞߟߌߡߊ ߟߎ߬ ߦߋ߫ ﴿12﴾

ߊ߬ ߣߴߊ߬ ߞߊ߬ ߝߋ߲ ߡߍ߲ ߠߎ߬ ߟߊߓߎ߯ ߘߎ߱ ߞߊ߲߬ ߊߟߎ߫ ߦߋ߫ ߸ ߞߵߊ߬ߟߎ߫ ߞߐ߬ߟߐ ߟߎ߬ ߓߐ߫ ߢߐ߲߮ ߡߊ߬ ، ߖߊ߯ߕߋ߬ ߸ ߕߊ߰ߛߌ߬ ߞߏ߫ ߟߴߏ߬ ߘߐ߫ ߡߌ߬ߙߌ߲߬ߘߌ߬ ߦߟߌߕߏߟߊ ߟߎ߬ ߦߋ߫ ﴿13﴾

ߊ߬ߟߋ ߟߋ߫ ߞߊ߬ ߟߌ߲ߓߊ߲ ߞߟߏ߫ ߊߟߎ߫ ߦߋ߫ ߸ ߛߴߊߟߎ߫ ߘߌ߫ ߛߓߏ߬ ߞߍ߲ߘߍߞߍ߲ߘߍ ߘߊߥߎ߲߫ ߏ߬ ߘߐ߫ ، ߊ߬ ߣߴߊߟߎ߫ ߦߋ߫ ߡߊ߬ߖߐ߯ߙߊ߲ ߘߏ߫ ߟߊߓߐ߫ ߊ߬ ߘߐ߫ ߸ ߞߵߏ߬ ߓߌ߬ߟߊ߬ ߊߟߎ߫ ߝߊ߬ߘߌ ߡߊ߬. ߌ ߘߏ߲߬ ߦߋ߫ ߞߎߟߎ߲ ߠߎ߬ ߦߋ߫ ߟߊ߫ ߞߎߟߎ߲ߞߎߟߎ߲߫ ߠߴߊ߬ ߞߊ߲߬ ߸ ߛߴߊߟߎ߫ ߘߌ߫ ߥߴߊߟߊ߫ ߟߊ߫ ߢߊ߬ߒߡߊ߭ ߢߌߣߌ߲߫ ، ߊ߬ ߣߌ߫ ߛߴߊߟߎ߫ ߘߴߊ߬ ߞߏߢߌߡߊߟߐ߲߫ ﴿14﴾

ߊ߬ ߞߊ߬ ߞߎ߬ߙߎ ߟߎ߬ ߟߊߝߌ߬ߟߌߝߟߌ߬ ߘߎ߱ ߢߊߝߍ߬ ߸ ߊ߬ ߞߊߣߊ߬ ߟߊߡߊ߰ ߊߟߎ߫ ߘߌ߫ ، ߊ߬ ߣߴߊ߬ ߞߊ߬ ߞߐ߭ ߟߎ߬ ߣߌ߫ ߛߌߟߊ ߟߎ߬ ߞߍ߫ ߊ߬ ߢߊߝߍ߬ ߸ ߛߴߊߟߎ߫ ߘߌ߫ ߞߊ߲ߘߊ߫ ( ߊߟߎ߫ ߥߊ߫ ߦߙߐ ߟߎ߫ ߡߊ߬) ﴿15﴾

ߊ߬ ߣߌ߫ ( ߞߊ߬ ߞߐ߭ ߟߎ߬ ߣߌ߫ ߞߎ߬ߙߎ ߏ߬ ߟߎ߬ ߞߍ߫ ) ߕߐ߰ߡߊ߬ߛߙߋ ߟߎ߬ ߘߌ߫ ، ߊ߬ߟߎ߬ ߦߋ߫ ߞߊ߲ߘߊ߫ ߟߊ߫ ߟߏ߬ߟߏ ߝߣߊ߫ ߡߊ߬ ﴿16﴾

ߊ߬ ߝߐ߫ ߡߍ߲ ߘߊ߲ߠߌ߲ ߞߍ߫ ߟߊ߫ ߸ ߏ߬ ߘߌ߫ ߞߍ߫ ߓߊ߬ ߦߏ߫ ߡߍ߲ ߕߍ߫ ߘߊ߲ߠߌ߲߫ ߞߍ߫ ߟߊ߫؟ ߦߊ߯ߟߴߊߟߎ߫ ߕߍ߫ ߊߟߎ߫ ߕߊ߰ߛߌ߬ ߟߊ߫ ߟߋ߫ ߓߊ߬؟ ﴿17﴾

ߣߴߊߟߎ߫ ߞߵߊߟߊ߫ ߟߊ߫ ߣߍߡߊ ߡߊߘߊ߲߫ ߢߊ-ߊ-ߢߊ߫߸ ߊߟߎ߫ ߕߍ߫ ߊ߬ ߖߊ߬ߕߋ߬ ߟߐ߲߫ ، ߖߊ߯ߕߋ߬ ߸ ߊߟߊ߫ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿18﴾

ߊߟߊ߫ ߘߏ߲߬ ߞߵߊ߬ ߟߐ߲߫ ߸ ߊߟߎ߯ ߡߍ߲ ߜߎ߲߬ߘߎ߬ ߟߊ߫߸ ߊ߬ ߣߴߊߟߎ߯ ߡߍ߲ ߟߊ߲ߞߣߍߡߊ߫ ߟߊ߫ ﴿19﴾

ߊߟߎ߫ ߦߋ߫ ߖߏ߭ ߡߍ߲ ߠߎ߬ ߞߟߌ߫ ߟߊ߫ ߞߵߊߟߊ߫ ߕߏ߫ ߸ ߏ߬ ߟߎ߬ ߕߍ߫ ߝߏߦߌ߬ ߘߊ߲߫ ߠߊ߫ ߸ ߏ߬ ߟߎ߫ ߝߊ߲߭ ߘߊ߲ߣߍ߲߫ ߠߋ߬ ﴿20﴾

ߊ߬ߟߎ߬ ߦߋ߫ ߣߌߒߕߊ߲ ߠߎ߫ ߟߋ߬ ߘߌ߫ ߊ߬ߟߎ߬ ߕߍ߫ ߣߌߡߊ߫ ߟߎ߫ ߘߌ߫ ، ߊ߬ߟߎ߫ ߝߊ߲߭ ߡߴߊ߬ ߟߐ߲߫ ߠߋ߬ ߊ߬ߟߎ߬ ߟߊߥߟߌ߬ߕߐ߫ ߕߎ߬ߡߊ ߡߍ߲ ﴿21﴾

ߊߟߎ߫ ߡߊ߰ߙߌ ߦߋ߫ ߡߊ߰ߙߌ߬ ߞߋߟߋ߲߫ ߔߋ߫ ߟߋ߬ ߘߌ߫ ، ߒ߬ߓߊ߬ ߡߍ߲ ߠߎ߬ ߕߍ߫ ߘߍ߲߬ߞߣߍ߬ߦߊ߬ ߟߊ߫ ߟߊߞߌߙߊ߫ ߡߊ߬ ߛߊ߫ ߸ ߏ߬ ߟߎ߫ ߟߋ߫ ߛߣߐ߬ߡߍ ߟߎ߬ ߦߋ߫ ߡߊ߬ߛߐ߬ߛߐ߬ߟߌ ߟߊ߬ ߸ ߊ߬ߟߎ߫ ߖߍ߬ߘߍ ߦߋ߫ ߖߘߍ߬ߘߐ߬ߓߊ ߟߎ߬ ߘߌ߫ ﴿22﴾

ߛߌߞߊ߫ ߕߍ߫ ߡߍ߲ ߘߐ߫ ߸ ߊߟߊ߫ ߞߵߊ߬ ߟߐ߲߫ ߊ߬ߟߎ߬ ߦߋ߫ ߡߍ߲ ߜߎ߲߬ߘߎ߬ ߟߊ߫ ߸ ߊ߬ ߣߴߊ߬ߟߎ߬ ߦߋ߫ ߡߍ߲ ߟߊ߲ߞߣߍߡߊ߫ ߟߊ߫ ߸ ߞߏ߬ߣߌ߲߬ ߝߋߎ߫ ߊ߬ ߕߍ߫ ߖߘߍ߬ߘߐ߬ߓߊ ߟߎ߬ ߟߊ߫ ߞߏ߫ ߘߐ߫ ﴿23﴾

ߣߴߊ߬ ߘߏ߲߬ ߝߐ߫ ߘߴߊ߬ߟߎ߬ ߦߋ߫ ߸ ߞߏ߫ ߊߟߎ߫ ߡߊ߰ߙߌ ߞߊ߬ ߡߋ߬ߘߋ ߟߊߖߌ߰؟ ߊ߬ߟߎ߬ ߘߴߊ߬ ߝߐ߫ ߞߏ߫ ߝߟߐߡߐ߮ ߟߎ߬ ߟߊ߫ ߛߌߙߌ߲߫ ( ߞߘߐ ) ߟߎ߫ ߞߍ߬ ﴿24﴾

(ߏ߬ ߞߎ߲߭ ߠߋ߬ ߸ ) ߛߴߊ߬ߟߎ߬ ߘߴߊ߬ߟߎ߫ ߘߏ߬ߣߌ߲ ߠߎ߬ ߘߝߊߣߍ߲ ߕߊ߬ ߟߐ߬ߓߊ ߟߏ߲ ، ߊ߬ ߣߌ߫ ߞߊ߬ ߘߏ߫ ߕߊ߬ ߡߐ߱ ߟߎ߫ ߘߏ߬ߣߌ߲ ߠߎ߬ ߘߐ߫ ߸ ߊ߬ߟߎ߬ ߦߋ߫ ߡߍ߲ ߠߎ߬ ߟߊߝߟߌ߬ ߟߊ߫ ߟߐ߲ߠߌ߲ߓߊߟߌߦߊ ߡߊ߬ ، ߤߊ߲߫ ߸ ߊ߬ߟߎ߫ ߘߏ߲߬ ߘߌ߫ ߘߏ߬ߣߌ߲߬ ߖߎ߯ ߕߊ߬ ߞߟߋ߫ ﴿25﴾

ߊ߬ߟߎ߬ ߢߍߓߊ߮ ߟߎ߫ ߞߊ߬ ߣߊߡߙߊ ߞߍ߫ ߸ ߊߟߊ߫ ߘߏ߲߬ ߣߊ߬ ߘߴߊ߬ߟߎ߬ ߟߊ߫ ߟߐ߬ߟߌ߬ ߓߏ߲ ߖߎ߬ߓߌߟߊ ߟߎ߬ ߞߊ߲ߡߊ߬ ߸ ߏ߬ ߞߍ ߓߟߌ ߥߎ߬ߦߊ߬ ߘߴߊ߬ߟߎ߫ ߞߊ߲߬ ߞߊ߬ ߓߐ߫ ߊ߬ߟߎ߫ ߞߎ߲߬ߘߐ߫ ߸ ߊ߬ ߣߌ߫ ߖߊ߲߰ߞߕߊ ߣߊ߬ ߘߴߊ߬ߟߎ߫ ߡߊ߬ ߞߊ߬ ߓߐ߫ ߦߙߐ߫ ߘߐ߫ ߸ ߊ߬ߟߎ߬ ߦߟߌ߫ ߕߍ߫ ߡߍ߲ ߠߊ߫ ﴿26﴾

ߏ߬ ߟߋ ߞߐ߫ ߸ ߊߟߊ߫ ߘߴߊ߬ߟߎ߫ ߞߎ߲߬ߘߐߦߌ߬ߘߊ߬ ( ߞߊ߲ ߞߍ߫ ) ߟߐ߬ߓߊ ߟߏ߲ ߸ ߞߏ߫ ߒ ߜߙߊ߬ߢߐ߮ ߟߎ߬ ߦߋ߫ ߡߌ߲߫ ߸ ߊߟߎ߫ ߕߘߍ߬ ߕߍߜߟߍߦߊ ߞߍ߫ ߟߊ߫ ߡߍ߲ ߠߎ߬ ߟߊ߫ ߞߏߘߐ߫؟ ߒ߬ߓߊ߬ ߡߍ߲ ߠߎ߬ ߛߐߣߍ߲߫ ߟߐ߲ߠߌ߲ ߠߊ߫ ߸ ߏ߬ ߟߎ߬ ߦߴߊ߬ ߝߐ߫ ߟߴߏ߬ ߟߋ ߘߐ߫ ߸ ߞߏ߫ ߘߐ߯ߦߡߊ ߣߌ߫ ߖߎ߯ߡߊ߲ ߠߋ߫ ߓߊ߲߬ߓߊ߮ ߟߎ߫ ߞߊ߲߬ ߓߌ߬ ( ߘߋ߬) ﴿27﴾

ߞߋ߲ߛߐ߲ ߠߎ߬ ߓߊ߯ ߞߍ߫ ߖߘߍ߬ߕߐ߬ߢߍ߰ߟߊ ߟߎ߬ ߛߏߡߊߦߟߍߡߊ߲߫ ߠߊ߫ ߸ ߏ߬ ߟߎ߬ ߘߌ߫ ߖߐߡߌ߲߫ ߞߊ߲ ߝߐ߫ ߸ ߞߏ߫ ߒ߬ߠߎ߫ ߕߎ߲߬ ߕߍ߫ ߖߎ߯ߡߊ߲߫ ߛߌ߫ ߞߍ߫ ߟߊ߫ ، ߞߊ߯ߙߌ߫ ߸ ߓߊ ߊߟߊ߫ ߞߵߊ߬ ߟߐ߲߫ ߊߟߎ߫ ߕߘߍ߬ ߡߍ߲ ߞߍ߫ ߟߊ߫ ﴿28﴾

ߒ߬ߓߵߊߟߎ߫ ߘߏ߲߬ ߔߊߦߌߔߊߦߌ ߘߊ ߟߎ߬ ߟߊ߫ ߸ ߞߊ߬ ߘߎߡߊ߫ ߦߋ߲߬ ، ߖߘߍ߬ߘߐ߬ߓߊ ߟߎ߬ ߡߊߞߍ߫ ߦߌߟߊ ( ߏ߬ ) ߖߎ߯ߡߊ߲߫ ߞߟߋ߫ ﴿29﴾

ߊ߬ ߘߌ߫ ߝߐ߫ ߝߊ߲ߕߊ߲ߞߟߊ ߟߎ߫ ߡߊ߬ ߞߏ߫ ߊߟߎ߫ ߡߊ߰ߙߌ ߞߊ߬ ߡߋ߬ߘߋ ߟߊߖߌ߰؟ ߊ߬ߟߎ߬ ߘߴߊ߬ ߝߐ߫ ߞߏ߫ ߤߙߊ ߞߍ߰ ، ߒ߬ߓߊ߬ ߡߍ߲ ߠߎ߫ ߢߊ߬ߣߍ߲߫ ߸ ߢߌ߬ߡߊ ߟߴߏ߬ ߟߎ߬ ߦߋ߫ ߘߎߢߊ߫ ߢߌ߲߬ ߘߐ߫ ، ߟߊߞߌߙߊ߫ ߛߏ ߟߋ߫ ߘߏ߲߬ ߞߊ߫ ߝߌ߬ߛߊ߬ ، ߝߊ߲ߕߊ߲ߞߟߊ ߟߎ߬ ߟߊ߫ ߛߏ ߢߊ߬ߣߍ߲߫ ߠߋ߬ ߘߋ߬ ﴿30﴾

ߏ߬ ߟߋ ߝߙߍ ߣߊߞߐ ߟߎ߬ ߘߌ߫ ߸ ߊ߬ߟߎ߫ ߘߏ߲߬ ߘߏ߲߬ߕߐ߫ ߏ߬ ߟߋ ߘߐ߫ ߸ ߖߌߢߊ ߟߎ߯ ߥߦߏ߬ ߟߴߏ߬ ߟߎ߬ ߞߘߐߟߊ ߟߎ߬ ߘߐ߫ ߞߎߟߊ߲ߞߎߟߊ߲߫ ، ߊ߬ߟߎ߫ ߛߊ߬ߥߏ߬ߣߊ߲߬ ߝߋ߲ ߓߍ߯ ߟߴߊ߬ߟߎ߬ ߦߋ߫ ߦߋ߲߬ ، ߊߟߊ߫ ߘߏ߲߬ ߦߋ߫ ߝߊ߲ߕߊ߲ߞߟߊ ߟߎ߫ ߛߙߊ߬ ߟߊ߫ ߕߋ߲߬ ߠߋ߬ ﴿31﴾

ߞߋ߲ߛߐ߲ ߠߎ߬ ߦߋ߫ ߡߍ߲ ߠߎ߬ ߛߏߡߊߦߟߍߡߊ߲߫ ߠߊ߫ ߞߵߊ߬ ߛߐ߬ߘߐ߲߫ ߊ߬ߟߎ߬ ߛߊߣߌ߲ߡߊ߲߫ ߸ ߊ߬ߟߎ߬ ߘߴߊ߬ ߝߐ߫ ( ߏ߬ ߟߎ߫ ߡߊ߬ ) ߞߏ߫ ߖߐ ߦߴߊߟߎ߫ ߡߊ߬ ߸ ߊߟߎ߫ ߦߋ߫ ߘߏ߲߬ ( ߡߍ߲ߘߌߦߊ ) ߣߊߞߐ ߘߐ߫ ߞߊ߬ߡߊߛߐ߬ߘߐ߲߬ ߊߟߎ߫ ߗߋߥߊߟߌ ߝߍ߬ ﴿32﴾

ߘߐ ߢߌ߲߬ ߠߎ߬ ߦߋ߫ ߡߋ߬ߘߋ ߜߘߍ߫ ߡߊߞߐ߬ߣߐ߲߬ ߠߊ߫ ߣߌ߫ ߞߋ߲ߛߐ߲ ( ߡߟߍ߬ߞߊ ) ߟߎ߫ ߣߊ߭ ߕߍ߫ ߊ߬ߟߎ߬ ߞߊ߲ߡߊ߬؟ ߥߟߊ߫ ߌ ߡߊ߰ߙߌ ߟߊ߫ ߖߊ߬ߡߊߙߌ ߦߋ߫ ߣߊ߬ ، ߊ߬ߟߎ߬ ߢߍߓߊ߮ ߟߎ߫ ߘߏ߲߬ ߞߵߊ߬ ߞߍ߫ ߕߋ߲߬ ߠߋ߬ ، ߊߟߊ߫ ߡߊ߫ ߓߊ߰ ߏ߬ ߟߎ߫ ߡߊ߬ ߘߋ߬ ߸ ߞߏ߬ߣߌ߲߬ ߏ߬ ߟߎ߫ ߟߋ߫ ߓߊ߰ ߘߴߊ߬ߟߎ߫ ߖߍ߬ߘߍ߫ ߡߊ߬ ﴿33﴾

ߊ߬ߟߎ߫ ߞߊ߬ ߗߋߥߊߟߌ ߡߍ߲ ߞߍ߫ ߏ߬ ߖߎ߯ߡߊ߲ ߠߎ߫ ߞߵߊ߬ߟߎ߫ ߛߐ߬ߘߐ߲߬ ߸ ߊ߬ ߣߴߊ߬ߟߎ߫ ߕߘߍ߬ ߦߟߍߓߐߒߘߐ ߡߍ߲ ߞߍ߫ ߟߊ߫ ߸ ߏ߬ ( ߜߊ߬ߟߏ ) ߓߋ߬ ߘߴߊ߬ߟߎ߫ ߞߊ߲߬ ﴿34﴾

ߛߏߡߊ ߟߎ߬ ߞߊ߲߫ ߠߋ߬ ߞߏ߫ ߊ߬ ߕߎ߲߬ ߓߊ߯ ߊߟߊ߫ ߘߌߦߊ߫ ߸ ߒ߬ߠߎ߬ ߣߌ߫ ߒ߬ ߝߊ߬ ߟߎ߫ ߕߎ߲߬ ߕߍ߫ ߝߏߦߌ߫ ߓߊ߬ߕߏ߫ ߞߵߊߟߊ߫ ߕߏ߫ ، ߊ߲ ߘߏ߲߬ ߕߎ߲߬ ߕߍ߫ ߕߣߊ߬ ߛߌ߫ ߟߊߘߊ߲߫ ߊߟߊ߫ ߕߊ ߞߐ߫ ، ߒ߬ߓߵߊ߬ߟߎ߬ ߢߍߓߊ߮ ߟߎ߬ ߝߣߊ߫ ߞߵߊ߬ ߞߍ߫ ߕߋ߲߬ ߠߋ߬ ߖߐ߫ ، ߡߋ߬ߘߋ ߘߏ߲߬ ߦߋ߫ ߞߋߟߊ ߟߎ߫ ߡߊ߬ ߣߌ߫ ߟߊ߬ߛߋ߬ߟߌ߬ ߘߐߞߣߍߣߍ߲ ߕߍ߫؟ ﴿35﴾

ߒ߬ߠߎ߫ ߞߊ߬ ߞߋߟߊ ߘߏ߫ ߟߊߥߌ߬ߟߌ߫ ߡߊ߲߬ߕߏ߲ ߓߍ߯ ߘߐ߫ ߟߋ߬ ߸ ߒ ߞߏ߫ ߊߟߎ߯ ߊߟߊ߫ ߓߊ߬ߕߏ߬ ߸ ߞߵߊߟߎ߫ ߡߊߓߐ߫ ߞߏ߲ߞߏߓߊ ߟߊ߫ ، ߘߏ߫ ߦߴߊ߬ߟߎ߬ ߘߐ߫ ߊߟߊ߫ ߞߵߏ߬ ߟߎ߬ ߞߊ߲ߘߊ߫ ߸ ߘߏ߫ ߜߘߍ߫ ߦߴߊ߬ߟߎ߬ ߘߐ߫ ߝߌ߬ߟߌ ߜߋ߲ߜߋ߲ߦߊ߫ ߘߴߏ߬ ߡߊ߬ ، ߒ߬ߓߊ߬ ߊߟߴߊߟߎ߫ ߕߊ߯ߡߊ߫ ߘߎ߱ ߢߊߝߍ߬ ߸ ߞߵߊ߬ ߡߊߝߟߍ߫ ߡߊ߬ߛߐ߬ߛߐ߬ߟߌ߬ߟߊ ߟߎ߬ ߟߊߓߊ߲ ߞߍ߫ ߘߊ߫ ߢߊ ߡߍ߲ ﴿36﴾

ߌ ߓߊ߯ ߢߌ߲߬ ߠߎ߬ ߞߊ߲ߘߊ ߞߊ߬ߣߌ߲߬ ߢߊ-ߊ-ߢߊ߫ ߸ ߊߟߊ߫ ߕߍ߫ ߡߐ߰ ߞߊ߲ߘߊ߫ ߝߋߎ߫ ߡߍ߲ ߦߋ߫ ߟߊ߬ߝߟߌ߬ߟߌ ߞߍ߫ ߟߊ߫ ، ߘߍ߬ߡߍ߲߬ߓߊ߯ ߘߏ߲߬ ߕߴߏ ( ߡߐ߰ ߛߎ߮ ) ߟߎ߬ ߟߊ߫ ﴿37﴾

ߊ߬ߟߎ߬ ߓߘߴߊ߬ߟߎ߫ ߞߊ߬ߟߌ߬ ߊߟߊ߫ ߟߊ߫ ߸ ߊ߬ߟߎ߬ ߟߊ߫ ߞߊ߬ߟߌ߬ߟߌ ߛߓߍ߬ߣߊ߲߬ߕߊ ߟߊ߫ ߸ ߞߏ߫ ߊߟߊ߫ ߕߍߣߊ߫ ߛߊ߬ߓߊ߮ ߟߊߞߎߣߎ߲߫ ߠߊ߫. ߞߏ߬ߣߌ߲߬ ߤߊ߯ߟߌ߫ ߸ ߏ߬ ߦߋ߫ ߛߘߊߒߡߊߞߊ߲ߠߊ߫ ߟߋ߬ ߘߌ߫ ߡߍ߲ ߞߍ ߦߴߊ߬ ߡߊ߬ ߛߋ߲ߛߋߘߋ߲ ߘߌ߫ ، ߓߊ߬ߙߌ߬ ߡߐ߱ ߝߊ߲߬ߓߊ ߟߋ߬ ߕߴߏ߬ ߟߐ߲߫ ߠߊ߫ ﴿38﴾

(ߛߎ߭ ߟߎ߬ ߟߊߥߟߌ߬ ߞߎ߲ ߠߋ߬ ) ߸ ߛߴߊ߬ ߘߴߊ߬ߟߎ߬ ߟߊ߫ ߢߐ߲߯ ߛߐߛߐ߫ ߞߏ ߘߐߞߣߍ߫ ߊ߬ߟߎ߬ ߦߋ߫ ، ߊ߬ ߣߌ߫ ߛߊ߫ ߓߊ߲߬ߓߊ߮ ߟߎ߬ ߘߴߊ߬ ߟߐ߲߫ ߸ ߞߏ߫ ߊ߬ߟߎ߫ ߕߘߍ߬ ߥߎߦߊ ߟߋ߫ ߞߊ߲߬ ﴿39﴾

ߊ߲ ߓߊ߯ ߞߍ߫ ߞߏ ߘߏ߫ ߟߊߢߌߣߌ߲߫ ߠߊ߫ ߸ ߊ߲ ߠߊ߫ ߞߎߡߊ ߟߴߊ߬ ߝߐ ߘߴߏ߬ ߡߊ߬ ߞߏ߫ ߞߍ߫ ߸ ߏ߬ ߞߏ ߘߏ߲߬ ߘߌ߫ ߞߍ߫ ﴿40﴾

ߡߍ߲ ߠߎ߬ ߝߎ߲ߘߌ߫ ߘߴߊߟߊ߫ ߞߏ ߘߐ߫ ߊ߬ߟߎ߫ ߕߐ߬ߢߍ߰ߣߍ߲ ߞߐ߫ ߸ ߊ߲ ߘߌߣߵߏ߬ ߟߎ߬ ߡߊߞߍ߫ ߞߏ߫ ߢߌߡߊ ߞߍ߫ ߘߎߢߊ߫ ߘߐ߫ ߟߋ߬ ߖߐ߫ ، ߟߊߞߌߙߊ߫ ߛߊ߬ߙߊ ߟߋ߫ ߘߏ߲߬ ߞߊ߫ ߓߏ߲߬ ߣߴߊ߬ߟߎ߬ ߓߴߏ߬ ߟߐ߲߫ ߠߊ߫ ﴿41﴾

ߏ߬ ߟߎ߫ ߟߋ߫ ߞߵߊ߬ߟߎ߫ ߡߎ߬ߢߎ߲߬ ߸ ߊ߬ ߣߌ߫ ߞߵߊ߬ߟߎ߫ ߛߍ߲߬ߓߍ߫ ߊ߬ߟߎ߫ ߡߊ߰ߙߌ ߟߊ߫ ﴿42﴾

ߊ߲ ߡߊ߫ ߡߐ߰ ߛߌ߫ ߞߋߟߦߊ߫ ߌߟߋ ߢߍ߫ ߞߘߐ߬ߡߊ߲߫ ߝߏ߫ ߗߍ߭ ߟߎ߬ ߸ ߊ߲ ߧߴߏ߬ ߟߎ߫ ߟߋ߬ ߦߟߌߘߏ߲߬ ߠߊ߫ ߸ ߒ߬ߓߵߊߟߎ߫ ߦߋ߫ ߟߍߙߊ߫ ( ߞߘߐ) ߘߏ߲߬ߞߏ ߟߎ߫ ߢߌ߬ߣߌ߲߬ߞߊ߬ ߓߊ߫ ߣߴߊߟߎ߫ ߣߐ߬ ߡߊ߫ ߞߴߊ߬ ߢߊߟߐ߲߫ ߠߊ߫ ﴿43﴾

(ߊ߲ ߞߵߏ߬ ߟߎ߬ ߗߋ߫ ) ߔߊߞߌ ߟߎ߬ ߣߌ߫ ߟߍߙߊ߫ ߞߘߐ ߟߎ߫ ߟߋ߬ ߘߌ߫ ߸ ߊ߲ ߘߏ߲߬ ߓߘߊ߫ ߞߊ߬ߥߊ߲߬ߘߌ ߟߊߖߌ߰ ߌ ߝߣߊ߫ ߡߊ߬ ߸ ߖߐ߲߰ߛߊ߫ ߝߋ߲ ߡߍ߲ ߠߊߖߌ߰ߣߍ߲߫ ߡߐ߱ ߟߎ߫ ߡߊ߬ ߌ ߘߴߏ߬ ߘߐߞߣߍ߫ ߊ߬ߟߎ߬ ߦߋ߫ ߛߴߊ߬ߟߎ߬ ߘߴߊ߬ߟߎ߫ ߕߊ߰ߛߌ߫ ﴿44﴾

ߊ߬ ߝߐ߫ ߡߍ߲ ߠߎ߫ ߣߊ߬ ߖߎ߯ߡߊ߲ ߠߎ߬ ߣߊߡߙߊ ߘߐߛߘߊ߫ ߟߊ߫ ߸ ߏ߬ ߟߎ߬ ߘߌ߫ ߦߟߌߟߊߕߍ߰ ߓߊ߬ ߞߏ߫ ߊߟߊ߫ ߕߍ߫ ߘߎ߱ ߟߐ߬ ߊ߬ߟߎ߬ ߟߊߞߎ߬ߣߎ߲߬ ߠߊ߫ ߞߌߚߌ߫؟ ߸ ߥߟߊ߫ ߖߊ߲߰ߞߕߊ ߦߋ߫ ߣߵߊ߬ߟߎ߫ ߡߊ߬ ߞߊ߬ ߓߐ߫ ߦߌߟߊ߫ ߘߐ߫ ߸ ߊ߬ߟߎ߬ ߡߊ߫ ߡߍ߲ ߟߐ߲߫؟ ﴿45﴾

ߤߊߡߊ߲߫ ߊ߬ ߦߴߊ߬ߟߎ߬ ߕߍ߯ߕߊ߬ ߞߵߊ߬ߟߎ߬ ߕߏ߫ ߊ߬ߟߎ߬ ߟߊ߫ ߖߌ߰ߣߌ߬ߦߟߍ ߟߎ߬ ߟߊ߫ ، ߓߊߏ߬ ߊ߬ߟߎ߬ ߕߍ߫ ߓߟߏߡߓߊߟߌ߫ ߞߍߓߊ߯ ߟߎ߫ ߘߌ߫ ﴿46﴾

ߤߊߡߊ߲ߕߍ߫ ߊ߬ ߦߴߊ߬ߟߎ߫ ߡߌ߬ߘߊ߫ ߘߐ߬ߛߌ߬ߟߊ߲߬ߠߌ߲߬ ߓߟߏ ߡߊ߬ ، ߞߏ߬ߣߌ߲߬ ߖߊ߯ߕߋ߬ ߸ ߊߟߎ߫ ߡߊ߰ߙߌ ߦߋ߫ ߞߌ߬ߣߌ߲߬ߞߌ߬ߣߌ߲߬ߠߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿47﴾

ߊ߬ ߝߐ߫ ߊ߬ߟߎ߬ ߕߴߊ߬ ߦߋ߫ ߟߊ߫ ߓߊ߬ ߊߟߊ߫ ߞߊ߬ ߝߋ߲-ߋ-ߝߋ߲߫ ߘߊ߲߫ ߸ ߏ߬ ߟߎ߬ ߘߎߟߋ߲ ߠߎ߬ ߦߴߊ߬ߟߎ߬ ߕߊ߯ߣߌߛߊ߬ߦߌ߬ ߟߊ߫ ߞߌߣߌ߲ ߣߌ߫ ߣߎߡߊ߲ ߠߎ߫ ߝߍ߬ ߕߌ߲ߓߌߘߌ߲ ߠߴߊߟߊ߫ ߦߋ߫ ߸ ߊ߬ ߣߌ߫ ߖߘߍ߬ߘߐ߯ߦߊ ߟߊ߫؟ ﴿48﴾

ߝߋ߲ ( ߓߍ߯ ) ߦߋ߫ ߕߌ߲ߓߌߘߌ߲ ߞߍ߫ ߟߴߊߟߊ߫ ߦߋ߫ ߡߊ߬ߛߍ߲߬ߛߍ߲߬ߓߊ߯ ߘߐ߫ ߸ ߡߍ߲ ( ߠߎ߬ ) ߦߋ߫ ߛߊ߲ ߠߎ߬ ߞߣߐ߫ ߸ ߊ߬ ߣߌ߫ ߡߍ߲ ( ߠߎ߬ ) ߦߋ߫ ߘߎ߱ ߞߊ߲߬ ߸ ߞߵߊ߬ ߟߊ߫ ߡߟߍ߬ߞߊ ߟߎ߫ ߞߊ߲߬ ، ߊ߬ߟߎ߫ ߘߏ߲߬ ߕߍ߫ ߊ߬ߟߎ߫ ߖߘߍ߬ߘߐߓߏ߲߬ߧߊ߬ ߟߊ߫ ﴿49﴾

ߏ߬ ߟߎ߫ ߟߋ߬ ߛߌߟߊ߲߫ ߠߴߊ߬ߟߎ߫ ߡߊ߰ߙߌ ߢߍ߫ ߸ ߏ߬ ߡߍ߲ ߦߴߊ߬ߟߎ߫ ߞߎ߲߬ߘߐ߫ ߸ ߊ߬ ߣߴߊ߬ߟߎ߬ ߦߴߊ߬ߟߎ߫ ߖߡߊ߬ߙߌ߬ߒ߬ߞߊ߲߬ߠߊ ߟߎ߬ ߞߍ߫ ߟߊ߫ ( ߊ߬ ߢߊ ߡߊ߬) ﴿50﴾

ߊߟߊ߫ ߞߊ߲߫ ߠߋ߬ ߸ ߞߏ߫ ߊߟߎ߫ ߞߊߣߊ߬ ߡߊ߰ߙߌ߫ ߝߌ߬ߟߊ߫ ߡߌ߬ߘߊ߫ ߘߋ߬ ، ߓߊ ߊ߬ߟߋ߬ ߦߋ߫ ߡߊ߰ߙߌ߬ ߞߋߟߋ߲߫ ߔߋ߫ ߟߋ߬ ߘߌ߫ ، ߒ߬ߓߵߊߟߎ߫ ߛߌߟߊ߲߫ ߒߠߋ ߢߍ߫ ߟߋ߬ ߘߋ߬ ﴿51﴾

ߊ߬ߟߋ ߟߋ߬ ߕߊ߫ ߦߋ߫ ߝߋ߲ ߓߍ߯ ߘߌ߫ ߛߊ߲ ߠߎ߬ ߣߌ߫ ߘߎ߱ ߘߐ߫ ، ߊ߬ߟߋ߬ ߕߊ ߟߋ߬ ߘߌ߯ߣߊ ߘߌ߫ ߞߘߊߎ߫ ، ߌ߬ߦߏ߯ ߊ߬ߟߎ ߘߌ߫ ߛߌߟߊ߲߫ ߜߘߍ߫ ߢߍ߫ ߡߍ߲ ߕߍ߫ ߊߟߊ߫ ߘߌ߫؟ ﴿52﴾

ߣߍߡߊ ߡߍ߲ ߦߴߊߟߎ߫ ߞߊ߲߬ ߸ ߏ߬ ߝߘߊߣߍ߲߫ ߊߟߊ߫ ߟߋ߬ ߟߊ߫ ، ߏ߬ ߟߋ ߞߐ߫ ߛߊ߫ ߸ ߣߌ߫ ߡߊ߲߬ߕߙߐ߫ ߡߊ߰ ߘߴߊߟߎ߫ ߟߊ߫ ߸ ߊߟߴߊߟߎ߫ ߡߊߞߊ߬ߛߌ߬ ߟߴߊ߬ߟߋ ߟߋ߬ ߦߋ߫ ﴿53﴾

ߒ߬ߓߊ߬ ߏ߬ ߟߋ ߞߐ߫ ߸ ߣߴߊ߬ ߞߊ߬ ߡߊ߲߬ߕߙߐ ߓߐ߫ ߊߟߎ߫ ߞߊ߲߬ ߸ ߊߟߎ߫ ߝߊ߲߬ ߞߋߟߋ߲ ߘߌ߫ ߜߙߊ߬ߢߐ߲߯ ߞߍ߫ ߊ߬ߟߎ߫ ߡߊ߰ߙߌ ߟߊ߫ ( ߏ߬ ߞߏߢߊ ߘߐ߫) ﴿54﴾

ߞߵߊ߬ ߟߊߥߟߌ߬ ߸ ߊ߲ ߞߵߊ߬ߟߎ߬ ߛߐ߫ ߝߋ߲ ߡߍ߲ ߠߊ߫ ߸ ߛߴߊ߬ߟߎ߬ ߘߴߏ߬ ߝߌߛߙߌߥߊߟߋߦߊ߫ ، ߒ߬ߓߊ߬ ߊߟߴߊߟߎ߫ ߘߊ߰ߡߎ߲߬ ߝߛߊߦߌ߫ ، ߞߏ߬ߣߌ߲߬ ߛߋߚߋ߫ ߸ ߊߟߎ߫ ߓߍߣߵߊ߬ ߟߐ߲߫ ﴿55﴾

ߊ߲ ߣߵߊ߬ߟߎ߫ ߤߊ߬ߙߌ߬ߖߍ߰ ߟߊ߫ ߝߋ߲ ߡߍ߲ ߠߊ߫ ߸ ߊ߬ߟߎ ߟߋ߬ ߝߋ߲ ߘߏ߫ ߟߎ߫ ߣߌ߭ ߓߐ߫ ߟߴߏ߬ ߘߐ߫ ߊ߬ߟߎ߬ ߡߊ߫ ߡߍ߲ ߠߎ߬ ߟߐ߲߫ ، ߞߏ߬ߣߌ߲߬ ߒ ߓߘߊ߫ ߒ ߞߊ߬ߟߌ߬ ߛߋߚߋ߫ ߸ ߊߟߎ߫ ߓߍߣߊ߬ ߘߐߢߌ߬ߣߌ߲߬ߞߵߊߟߎ߫ ߟߊ߫ ߞߎ߲߬ߘߐ߬ߕߍ߰ ߞߏ ߟߎ߫ ߡߊ߬ ﴿56﴾

ߊ߬ߟߎ ߟߋ߬ ߘߋ߲ߡߛߏ ߟߎ߬ ߞߍ߫ ߟߴߊߟߊ߫ ߕߊ ߘߌ߫ ߸ ߏ߬ ߘߏ߲߬ ߛߊߣߌ߲ߡߊ߲߫ ߏ ߡߊ߬ ߸ ߊ߬ߟߎ߬ ߘߴߊ߬ߟߎ߬ ߘߌߦߊߣߊ߲ߕߊ ߟߎ߬ ߞߍ߫ ߊ߬ߟߎ߫ ߖߍ߬ߘߍ ߕߊ ߘߌ߫ ( ߣߊߟߌ߬ߡߎ߲߬ ߘߋ߲ߞߍ ߟߎ߬ ߘߌ߫) ﴿57﴾

ߘߟߊߝߎ߫ ߓߊ߯ ߞߍ߫ ߊ߬ ߘߏ߫ ߦߋ߫ ߘߋ߲ߡߛߏ߫ ( ߡߏߦߌ߫ ߞߏ ) ߟߊ߫ ߸ ߏ߬ ߢߊߞߘߐߛߌ߬ߛߌ߬ߣߍ߲ ߘߌ߫ ߕߋ߬ߟߋ߲߬ ߘߌߡߌ߲ ߓߟߏ߫ ߡߐߚߐ߫ ﴿58﴾

ߘߟߊߝߎ߫ ߞߍߣߴߊ߬ ߦߋ߫ ߝߋ߲ ߡߍ߲ ߠߊ߫ ߏ߬ ߟߊߜߏߦߊߢߍ ߡߊ߬߸ ߊ߬ ߘߴߊ߬ ߢߡߊߘߏ߲߰ ( ߊ߬ ) ߡߌ߬ߙߌ߲߬ߘߌ ߡߊ߬ ߗߙߎ߫ ، ߦߊ߯ߟߴߊ߬ ߦߴߊ߬ ߟߊߡߙߊ߬ ߘߐ߯ߦߡߊ ߞߊ߲߬ ߸ ߥߟߴߊ߬ ߦߴߊ߬ ߓߙߌ߬ ߓߎ߰ߘߌ ߘߐ߫؟ ߤߊ߲߫ ߸ ߊ߬ߟߎ߬ ߞߕߌ߫ ߟߊ߫ ߢߊ ߖߎ߯ߡߊ߲߫ ߠߋ߫ ߘߋ߬؟ ﴿59﴾

ߟߊߒߡߊ߫ ߝߋ߲߫ ߖߎ߮ ߟߋ߫ ߓߍ߲߬ߣߍ߲߬ ߟߊߞߌߙߊ߫ ߞߏ ߘߍ߲߬ߞߣߍ߬ߦߊ߬ߓߊߟߌ ߟߎ߫ ߡߊ߬ ߸ ߞߊ߬ ߟߊߒߡߊ߫ ߝߋ߲߫ ߥߙߎߞߌߣߍ߲ ߓߍ߲߬ ߊߟߊ߫ ߡߊ߬ ، ߏ߬ ߟߋ ߘߏ߲߬ ߦߋ߫ ߣߌ߬ߣߌ߬ߟߊ߫ ߥߘߋ߬ߥߘߋ߬ߟߌ߬ߟߊ ߘߌ߫ ﴿60﴾

ߣߌ߫ ߊߟߊ߫ ߕߎ߲߬ ߞߊ߬ ߡߐ߱ ߟߎ߫ ߡߌ߬ߘߴߊ߬ߟߎ߬ ߟߊ߫ ߕߐ߬ߢߍ߮ ߟߊ߫ ߸ ߊ߬ ߕߎ߲߬ ߕߍ߫ ߡߊ߬ߛߍ߲߬ߛߍ߲߬ߓߊ߰ ߞߋߟߋ߲߫ ߕߏ߫ ߘߎ߱ ߞߊ߲߬ ، ߞߏ߬ߣߌ߲߬ ߊ߬ ߦߴߊ߬ߟߎ߫ ߘߏ߲߰ߘߌ߬ ߟߊ߫ ߞߊߕߙߍ߬ ߛߕߊ߫ ߟߐ߯ߟߊߣߍ߲߫ ߠߋ߫ ߡߊ߬ ، ߒ߬ߓߊ߬ ߣߴߊ߬ߟߎ߬ ߛߕߊ ( ߏ߬ ߟߋ ) ߣߊ߬ ߘߊ߫ ߛߊ߫ ߸ ߊ߬ߟߎ߬ ߕߍ߫ ߘߏ߲߰ߘߌ߫ ߕߎ߬ߡߊ߬ߙߋ߲߬ ߞߋߟߋ߲߫ ߠߊ߫ ߸ ߊ߬ߟߎ߬ ߕߍ߫ ߢߍߓߌ߬ߟߊ߫ ( ߕߎ߬ߡߊ߬ߙߋ߲߬ ߞߋߟߋ߲߫ ߠߊ߫) ﴿61﴾

ߊ߬ߟߎ ߟߴߊ߬ߟߎ߬ ߜߏߦߊߣߍ߲ߕߊ ߟߎ߬ ߞߍ߫ ߟߴߊߟߊ߫ ߕߊ ߘߌ߫ ، ߊ߬ߟߎ߫ ߣߍ߲߭ ߠߎ߬ ߘߌ߫ ߥߎߦߊ ߡߊ߲߬ߞߕߎ߬ ߛߊ߫ ߸ ߞߏ߫ ߢߌ߬ߡߊ ߟߋ߬ ߛߌ߰ߣߴߊ߬ߟߎ߬ ߢߍ߫ ، ߛߌߞߊ߫ ߘߏ߲߬ ߕߍ߫ ߡߍ߲ ߘߐ߫ ߸ ߕߊ ߟߋ߫ ߛߌ߰ߣߴߊ߬ߟߎ߬ ߢߍ߫ ، ߊ߬ߟߎ߬ ߟߊߞߐ߲߰ߕߐ߫ ߟߋ߬ ߦߋ߲߬ ߡߊ߬ ﴿62﴾

ߊ߰ ߒ ߣߴߊߟߊ߫ ߕߍ߫ ، ߖߊ߯ߕߋ߬ ߸ ߊ߲ ߞߊ߬ ߞߋߟߊ ߗߋ߫ ߡߊ߲߬ߕߏ߲ ߠߎ߫ ߡߊ߬ ߌߟߋ ߢߍ߫ ߞߘߐ߬ߡߊ߲߫ ، ߓߊ߬ߙߌ߬ ߜߍ߬ߘߍ ߞߵߏ߬ ߟߎ߬ ߟߊ߫ ߓߊ߯ߙߊ ߟߎ߬ ߡߊߢߍ߯ߙߍ߫ ߊ߬ߟߎ߬ ߢߊߞߘߐ߫ ، ߏ߬ ߟߋ ߞߍߕߐ߫ ߊ߬ߟߎ߬ ߟߊ߫ ߞߏߕߌ߮ ߘߌ߫ ߓߌ߬ ߛߊ߫ ، ߊ߬ߟߎ߫ ߘߏ߲߬ ߢߍߛߌ߰ߣߍ߲߫ ߖߊ߲߰ߞߕߊ߬ ߘߌߡߌ߲ߣߍ߲ ߠߋ߬ ߟߊ߫ ﴿63﴾

ߒ߬ߠߎ߬ ߡߊ߫ ߟߍߙߊ ߗߋ߫ ߌߟߋ ߡߊ߬ ߞߎ߲߬ ߜߘߍ߫ ߟߊ߫ ߸ ߝߏ߫ ߌ ߦߴߊ߬ߟߎ߬ ߟߊ߫ ߢߐ߲߯ ߛߐߛߐ߫ ߞߏ ߟߎ߫ ߟߋ߬ ߘߐߞߣߍ߫ ߊ߬ߟߎ߬ ߦߋ߫ ߸ ߊ߬ ߣߌ߫ ߞߵߊ߬ ߞߍ߫ ߞߊ߲ߘߦߊ ߣߌ߫ ߤߌߣߊ ߘߌ߫ ߡߌ߬ߙߌ߲߬ߘߌ߫ ߘߍ߲߬ߞߣߍ߬ߦߊ߬ߣߍ߲ ߠߎ߬ ߦߋ߫ ﴿64﴾

ߊߟߊ߫ ߟߋ߫ ߞߊ߬ ߖߌ ߟߊߖߌ߰ ߞߊ߬ ߓߐ߫ ߡߐ߲ߕߐ߲ ߘߐ߫ ߸ ߊ߬ ߞߊ߬ ߘߎ߱ ߛߊ߬ߣߍ߲߬ ߞߘߐ ߟߊߢߣߊߡߦߊ߫ ߏ߬ ߟߊ߫ ، ߕߊ߰ߛߌ߬ ߞߏ߫ ߟߴߏ߬ ߘߐ߫ ߡߌ߬ߙߌ߲߬ߘߌ߫ ߕߟߏߡߊߣߐ߲߮ ߠߎ߬ ߦߋ߫ ﴿65﴾

ߕߊ߰ߛߌ߬ߟߌ߫ ߟߵߊߟߎ߫ ߦߋ߫ ߞߟߏߝߋ߲ ߠߎ߬ ( ߟߊ߫ ߞߏ ) ߘߐ߫ ، ߊ߲ ߧߴߊߟߎ߫ ߟߊߡߌ߲߬ ߠߴߏ߬ ߟߎ߬ ߞߣߐ߫ ߝߋ߲ ߘߐ߫ ߸ ߓߏ߬ ߢߊ߮ ߣߌ߫ ߖߋ߬ߟߌ ߕߍ߫ ߸ ߣߊߟߌ߬ߡߎ߲߬ ߣߐߣߐ߫ ߓߎ߰ߓߎ߰ߣߍ߲ ߘߌ߫ ، ߏ߬ ߟߊߞߎ߬ߣߎ߲ ߣߐ߲߰ߡߊ߲߫ ߊ߬ ߡߌ߲߬ߓߊ߮ ߟߎ߫ ߡߊ߬ ﴿66﴾

ߊ߬ ߣߴߊߟߎ߫ ߦߋ߫ ߟߊ߬ߡߌ߬ߟߏ߬ߟߌ߬ ߝߋ߲ ߠߎ߬ ߣߌ߫ ߘߊߥߎ߲ߕߊ߫ ߢߌߡߊ ߟߎ߬ ߟߊߘߊ߲߫ ߠߊ߫ ߦߙߌߘߋ߲ ߠߎ߬ ߘߐ߫ ߸ ߣߊߟߌ߬ߡߎ߲߬ ߕߡߊߙߏ ߟߎ߬ ߣߌ߫ ߖߊ߬ߓߌ߬ߙߋ߲ ߠߎ߬ ߘߌ߫ ، ߏ߬ ߟߎ߬ ߦߋ߫ ߛߌߡߊߟߌ߫ ߞߏ߫ ߟߋ߬ ߘߌ߫ ߡߌ߬ߙߌ߲߬ߘߌ߬ ߤߊ߲ߞߟߌߡߊ ߟߎ߬ ߦߋ߫ ﴿67﴾

ߌ ߡߊ߰ߙߌ ߟߋ߫ ߞߊ߬ ߦߟߌߘߏ߲ ߞߍ߫ ߟߞߌߛߍ ߟߎ߬ ߟߊ߫ ߸ ߞߏ߫ ߊߟߎ߫ ߦߋ߫ ߓߏ߲ ߠߎ߫ ߡߌ߬ߘߊ߫ ߞߎ߬ߙߎ ߟߎ߬ ߣߌ߫ ߦߙߌ ߟߎ߬ ߘߐ߫ ߸ ߊ߬ ߣߴߊ߬ߟߎ߬ ߦߋ߫ ( ߜߏ߲߬ߞߊ߲ ) ߡߍ߲ ߠߎ߬ ߟߊߦߟߍ߬ ߟߊ߫ ﴿68﴾

ߏ߬ ߞߐ߫ ߸ ߊߟߎ߫ ߦߋ߫ ߦߙߌߘߋ߲ ߓߍ߯ ߘߏ߫ ߘߊߥߎ߲߫ ߸ ߊ߬ ߣߴߊߟߎ߫ ߦߋ߫ ߘߏ߲߬ ߊߟߎ߫ ߡߊ߰ߙߌ ߟߊ߫ ߛߌߟߊ ߟߎ߫ ߝߍ߬ ߊ߬ ߞߊ߬ ߡߍ߲ ߠߎ߬ ߞߟߏ߫ ߊߟߎ߫ ߦߋ߫ ، ߡߌ߲߬ߕߊ߬ ( ߕߌ߲ߡߊ߲߫ ) ߠߋ߬ ߓߐ߫ ߟߴߏ߬ ߟߎ߬ ߞߣߐ߫ ߸ ߡߍ߲ ߠߎ߫ ߞߐ߬ߟߐ ߟߎ߬ ߓߐߣߍ߲߫ ߢߐ߲߮ ߡߊ߬ ، ߟߊ߬ߞߍ߲߬ߘߍ߬ߦߊ߬ߟߌ߬ ( ߓߊߛߌ߫ ) ߟߴߏ߬ ߘߐ߫ ߡߐ߱ ߟߎ߬ ߦߋ߫ ، ߖߊ߯ߕߋ߬ ߸ ߕߊ߰ߛߌ߬ ߞߏ߫ ߟߴߏ߬ ߘߐ߫ ߡߌ߬ߙߌ߲߬ߘߌ߬ ߡߙߌߓߊ߮ ߟߎ߬ ߦߋ߫ ﴿69﴾

ߊߟߊ߫ ߟߋ߫ ߞߵߊߟߎ߫ ߘߊ߲߫ ߸ ߏ߬ ߞߐ߫ ߊ߬ߟߋ ߟߋ߬ ߊߟߎ߫ ߛߏߡߊߦߟߍߡߊ߲߫ ߠߊ߫ ، ߊߟߎ߫ ߘߏ߫ ߓߍ߫ ߸ ߏ߬ ߘߌ߫ ߟߊߛߊ߬ߦߌ߫ ( ߞߐ߬ߘߐ ߓߟߏ߫ ) ߛߌ߭ ߓߍ߯ ߘߐ߫ ߢߊ߰ߙߊ߲߬ߞߋ ߡߊ߬ ߸ ߤߊߞߍߕߏ߫ ߊ߬ ߞߊߣߊ߬ ߝߏߦߌ߬ ߟߐ߲߫ ߟߐ߲ߠߌ߲߫ ߞߘߐ߬ߡߊ߲ ߞߐ߫ ، ߖߊ߯ߕߋ߬ ߸ ߊߟߊ߫ ߦߋ߫ ߟߐ߲ߠߌ߲ߠߊ߫ ߘߌ߫ ߊ߰ ߛߋߓߊ߯ ߘߌ߫ ﴿70﴾

ߊߟߊ߫ ߟߋ߬ ߞߵߊߟߎ߫ ߘߏ߫ ߟߊߝߌ߬ߛߦߊ߬ ߘߏ߫ ߘߌ߫ ߤߊ߬ߙߌ߬ߖߍ߮ ߘߐ߫ ، ߡߍ߲ ߠߎ߬ ߟߊߝߌ߬ߛߦߊ߬ߣߍ߲߫ ߸ ߏ߬ ߟߎ߬ ߕߍ߫ ߊ߬ߟߎ߫ ߤߊ߬ߙߌ߬ߖߍ߮ ߟߊߛߊ߬ߦߌ߬ ߟߴߊ߬ߟߎ߬ ߓߟߏߡߐ߮ ߟߎ߫ ߡߊ߬ ߞߵߊ߬ߟߎ߬ ߓߍ߯ ߟߊߞߢߴߊ߬ ߘߐ߫ ، ߌ߬ߦߏ߯ ߊ߬ߟߎ߬ ߘߌ߫ ߕߏ߫ ߊߟߊ߫ ߟߊ߫ ߣߍߡߊ ߡߊߛߐ߬ߛߐ߬ ߟߊ߫؟ ﴿71﴾

ߊߟߊ߫ ߞߊ߬ ߝߘߎߡߊ ߟߎ߬ ߞߍ߫ ߊߟߎ߫ ߟߊ߫ ߞߊ߬ ߓߐ߫ ߊߟߎ߫ ߖߍ߬ߘߍ ߟߎ߬ ߘߐ߫ ߸ ߞߊ߬ ߘߋ߲ ߠߎ߬ ߣߌ߫ ߡߊ߬ߡߊ߬ߙߋ߲ ߠߎ߬ ߞߍ߫ ߊߟߎ߫ ߟߴߊߟߎ߫ ߝߘߎߡߊ ߟߎ߫ ߝߍ߬ ، ߊ߬ ߣߴߊ߬ ߞߵߊߟߎ߫ ߤߊ߬ߙߌ߬ߖߍ߰ ߝߋ߲߫ ߓߘߍߓߘߍ ߟߎ߬ ߟߊ߫ ، ߊ߬ ߝߐ߫ ߡߐ߱ ߟߎ߬ ߘߌ߫ ߘߍ߲߬ߞߣߍ߬ߦߊ߫ ߡߣߊ߬ߡߣߊ ߡߊ߬ ߸ ߊ߬ ߣߌ߫ ߞߵߊ߬ ߞߍ߫ ߝߌߛߙߌߥߊߟߋߦߊ ߟߐ߭ ߘߌ߫ ߊߟߊ߫ ߟߊ߫ ߣߍߡߊ ߡߊ߬؟ ﴿72﴾

ߊ߬ߟߎ߬ ߦߋ߫ ߝߋ߲߫ ߠߋ߫ ߓߊ߬ߕߏ߬ ߟߊ߫ ߞߵߊߟߊ߫ ߕߏ߫ ߸ ߡߍ߲ ߕߍ߫ ߤߊ߬ߙߌ߬ߖߍ߰ ߛߌ߫ ߡߙߊ߬ ߟߴߊ߬ߟߎ߬ ߦߋ߫ ߛߊ߲ ߠߎ߬ ߣߌ߫ ߘߎ߱ ߛߌ߫ ߞߣߐ߫ ، ߊ߬ߟߎ߫ ߝߊ߲߭ ߕߴߏ߬ ߟߊߣߐ߬ ߟߋ߬ ﴿73﴾

ߒ߬ߓߵߊߟߎ߫ ߞߣߊ߫ ߢߐ߲߰ߘߐ ߟߎ߬ ߞߍ߫ ߊߟߊ߫ ߟߊ߫ ߘߋ߬ ߸ ߓߊߏ߬ ߊߟߊ߫ ߟߋ߫ ߞߊ߬ ߟߐ߲ߠߌ߲ ߞߍ߫ ߸ ߊߟߎ ߘߏ߲߬ ߡߊ߫ ߟߐ߲ߠߌ߲߫ ߞߍ߫ ﴿74﴾

ߊߟߊ߫ ߦߋ߫ ߛߊ߲߬ߘߊ ߟߊ߫ ߟߊ߫ ߖߐ߲߬ߞߍ߫ ߡߙߊ߬ߣߍ߲ ߠߋ߫ ߡߊ߬ ߸ ߡߍ߲ ߕߍ߫ ߝߏߦߌ߫ ߣߐ߬ ߟߊ߫ ߸ ߊ߬ ߣߌ߫ ( ߤߙߐ߫ ) ߞߍ߫ ߞߋߟߋ߲߫ ߡߊ߬ ߸ ߊ߲ ߣߊ߬ ߡߍ߲ ߤߊ߬ߙߌ߬ߖߍ߰ ߟߊ߫ ߊ߲ ߖߍ߬ߘߍ ߓߟߏ߫ ߤߊ߬ߙߌ߬ߖߍ߰ ߢߌߡߊ ߟߊ߫ ، ߏ߬ ߦߋ߫ ߖߘߍ߬ߡߊ߬ߓߐ ߞߍ߫ ߟߴߏ߬ ߘߐ߫ ߜߎ߲߬ߘߎ ߣߌ߫ ߟߊ߲ߞߣߍߡߊ ߘߐ߫ ، ߦߊ߯ߟߊ߫ ߏ߬ ߟߎ߬ ߘߌ߫ ߞߢߊ߫ ߓߊ߬؟. ߕߊ߲߬ߘߏ ߊߟߊ߫ ߦߋ߫ ߸ ߏ߬ ߟߎ߬ ߕߍ߫ ߞߢߊ߫ ߞߟߋ߫ ، ߓߊ߬ߙߌ߬ ߊ߬ߟߎ߫ ߝߊ߲߬ߓߊ ߟߋ߬ ߕߴߏ߬ ߟߐ߲߫ ߠߊ߫ ﴿75﴾

ߊߟߊ߫ ߦߋ߫ ߛߊ߲߬ߘߊ߬ ߜߘߍ߫ ߟߊ߫ ߟߊ߫ ߗߍ߬ ߝߌ߬ߟߊ߫ ߡߊ߬: ߞߋߟߋ߲ ߦߋ߫ ߓߏߓߏ ߘߌ߫ ߸ ߏ߬ ߕߍ߫ ߝߏߦߌ߫ ߣߐ߬ ߟߊ߫ ߸ ߊ߬ ߖߐ߲߰ߣߍ߲ ߓߍ߯ ߦߴߊ߬ ߡߊߕߌ߮ ߟߋ߫ ߞߎ߲߬ ، ߏ߬ ߘߏ߲߬ ߓߊ߯ ߊ߬ ߟߊߕߊ߯ ߝߊ߲߬-ߊ-ߝߊ߲߬ ߊ߬ ߕߍ߫ ߣߊ߬ ߤߙߊ߫ ߘߌ߫ ߞߊ߬ ߓߐ߫ ߦߋ߲߬ ، ߦߊ߯ߟߊ߫ ߏ߬ ߣߌ߫ ߗߍ߬ ߘߐ ߘߌ߫ ߞߢߊ߫ ߓߊ߬ ߸ ߡߍ߲ ߦߋ߫ ߖߡߊ߬ߙߌ߬ߟߌ ߞߍ߫ ߟߊ߫ ߕߋߟߋ߲ ߠߊ߫ ߸ ߊ߬ ߘߏ߲߬ ߦߋ߫ ߛߌߟߊ߫ ߕߋߟߋ߲ߣߍ߲߫ ߞߊ߲߬؟ ﴿76﴾

ߊߟߊ߫ ߕߊ ߟߋ߬ ߛߊ߲ ߠߎ߬ ߣߌ߫ ߘߎ߱ ߞߏ߫ ߘߏ߲߰ߣߍ߲ ߘߌ߫ ، ߟߐ߬ߓߊ ߞߏߢߊ ߕߍ߫ ߝߏߦߌ߬ ߘߌ߫ ߝߏ߫ ߊ߰ ߟߋ߬ ߦߏ߫ ߢߊ߫ ߞߐߡߌ߲߫ ߞߏ߫ ߞߋߟߋ߲߫ ߸ ߥߟߴߊ߬ ߛߎ߬ߘߎ߲߬ߡߊ߲߫ ߏ߬ ߘߌ߫ ، ߖߊ߯ߕߋ߬ ߸ ߊߟߊ߫ ߟߋ߬ ߛߋ߫ ߟߊ߫ ߞߏ ߓߍ߯ ߟߊ߫ ﴿77﴾

ߊߟߊ߫ ߟߋ߫ ߞߵߊߟߎ߫ ߟߊߓߐ߫ ߊߟߎ߫ ߣߊ߫ ߟߎ߫ ߘߓߍ ߟߎ߬ ߘߐ߫ ߸ ߞߵߊ߬ ߕߘߍ߬ ߊߟߎ߫ ߡߊ߫ ߝߏߦߌ߬ ߟߐ߲߫ ߸ ߊ߬ ߞߊ߬ ߕߟߏߘߋ߲ ߣߌ߫ ߢߊ ߟߎ߬ ߣߌ߫ ߛߣߐ߬ߡߍ ߟߎ߬ ߞߍ߫ ߊߟߎ߫ ߟߊ߫ ߸ ߛߴߊߟߎ߫ ߘߴߊ߬ ߞߏߢߌߡߊߟߐ߲߫ ﴿78﴾

ߦߊ߯ߟߴߊ߬ߟߎ߬ ߕߍ߫ ߞߐ߬ߣߐ ߟߎ߬ ߞߟߏߣߍ߲ ߦߋ߫ ߟߊ߫ ߛߊ߲ ߝߏ߬ߟߏ߲߬ߝߊ߬ߟߊ߲߬ߕߍ ߘߐ߫ ߓߊ߬؟ ߒ߬ߓߊ߬ ߝߏߦߌ߫ ߘߏ߲߬ ߕߴߏ߬ ߟߎ߬ ߘߐߡߌ߬ߘߊ߬ ߟߊ߫ ߦߋ߲߬ ߝߏ߫ ߊߟߊ߫ ، ߕߊ߰ߛߌ߬ ߞߏ߫ ߟߎ߫ ߟߴߏ߬ ߘߐ߫ ߡߌ߬ߙߌ߲߬ߘߌ߫ ߘߍ߲߬ߞߣߍ߬ߦߊ߬ߣߍ߲ ߠߎ߬ ߦߋ߫ ߘߋ߬ ﴿79﴾

ߊߟߊ߫ ߞߊ߬ ߡߊ߬ߞߍ߬ ߦߌߟߊ ߟߎ߬ ߞߍ߫ ߊߟߎ߫ ߦߋ߫ ߊߟߎ߫ ߟߊ߫ ߓߏ߲ ߠߎ߬ ߞߣߐ߫ ، ߊ߬ ߞߊ߬ ߓߏ߲ ߠߎ߬ ߞߍ߫ ߊߟߎ߫ ߦߋ߫ ߓߌߦߊ߲߫ ߜߟߏ ߟߎ߬ ߘߐ߫ ، ߏ߬ ߟߎ߬ ߝߍ߲ߡߊ߲߫ ߊߟߎ߫ ߓߟߏ߫ ߊߟߎ߫ ߥߟߌ߬ ߟߏ߲ ߣߴߊߟߎ߫ ߘߊ߯ߡߊߞߍ߫ ߟߏ߲ ߘߐ߫ ، ߊ߬ ߣߌ߫ ߞߵߊ߬ߟߎ߫ ߛߊ߬ߝߏ ߟߎ߬ ߣߴߊ߬ߟߎ߫ ߖߋ߬ߦߌ ߟߎ߬ ߣߴߊ߬ߟߎ߬ ߛߌ ߟߎ߬ ߞߍ߫ ߕߊ߬ߕߊ ߟߎ߬ ߣߌ߫ ߘߊ߰ߡߎ߲߬ ( ߝߋ߲ ߠߎ߬ ) ߘߌ߫ ߛߊߣߌ߬ ߥߊ߯ߕߌ߫ ߕߍ߫ ﴿80﴾

ߊߟߊ߫ ߞߊ߬ ߘߎߟߋ߲ ߠߎ߬ ߞߍ߫ ߊ߬ ߟߊ߫ ߝߋ߲߫ ߘߊ߲ߣߍ߲ ߠߎ߬ ߟߴߊߟߎ߫ ߦߋ߫ ، ߊ߬ ߣߴߊ߬ ߞߊ߬ ߝߊߟߊ߲ߓߏ߲ ߠߎ߬ ߞߍ߫ ߞߎ߬ߙߎ ߟߎ߬ ߟߴߊߟߎ߫ ߦߋ߫ ، ߊ߬ ߣߴߊ߬ ߞߊ߬ ߞߏ߬ߛߊ ߘߏ߫ ߟߎ߫ ߞߍ߫ ߊߟߎ߫ ߦߋ߫ ߸ ߏ߬ ߟߎ߬ ߦߴߊߟߎ߫ ߕߊ߲߬ߞߊ߬ ߟߊ߫ ߝߎ߲߬ߕߊߣߌ߲ ߡߊ߬ ، ߊ߬ ߣߌ߫ ߞߏ߬ߛߊ߬ ߜߘߍ߫ ߟߎ߫ ߸ ߏ߬ ߟߎ߬ ߦߴߊߟߎ߫ ߕߊ߲߬ߞߵߊߟߎ߫ ߜߊ߲߬ߛߊ߲ ߠߊ߫ ߡߙߊ߬ߒ߬ߡߊ߬ߝߋ߲ ߡߊ߬ ، ߒ߬ߓߊ߬ ( ߊߟߊ߫ ) ߦߴߊ߬ ߟߊ߫ ߣߍߡߊ ߘߝߊ߫ ߟߴߊߟߎ߫ ߡߊ߬ ߕߋ߲߬ ߠߋ߬ ߸ ߖߐ߲߬ߛߴߊߟߎ߫ ߘߴߊߟߎ߫ ߖߘߍ߬ ߞߟߏ߫ ﴿81﴾

ߒ߬ߓߊ߬ ߣߴߊ߬ߟߎ߫ ߞߵߊ߬ߟߎ߬ ߞߐߘߏ߲߬ ߸ ߡߍ߲ ߦߴߌߟߋ ߡߊ߬ ߘߐߙߐ߲߫ ߏ߬ ߟߋ ߟߊ߬ߛߋ߬ߟߌ߬ ߘߐߞߣߍߣߍ߲ ߘߌ߫ ﴿82﴾

ߊ߬ߟߎ߬ ߦߋ߫ ߊߟߊ߫ ߟߊ߫ ߣߍߡߊ ߟߐ߲߫ ߠߊ߫ ߟߋ߬ ߖߐ߫ ߸ ߞߊ߬ ߓߊ߲߫ ߞߵߊ߬ ߡߊߛߐ߬ߛߐ߬ ، ߓߊߏ߬ ߊ߬ߟߎ߫ ߝߊ߲߬ߓߊ ߦߋ߫ ߝߌߛߙߌߥߊߟߋ ߟߎ߫ ߟߋ߬ ߘߌ߫ ﴿83﴾

ߊ߲ ߞߍߕߐ߫ ߛߙߋ߫ ߞߋߟߋ߲߫ ߠߊߥߟߌ߬ ߟߊ߫ ߡߊ߲߬ߕߏ߲ ߓߍ߯ ߘߐ߫ ߟߏ߲ ߡߍ߲ ، ߘߌ߬ߢߍ߬ ߕߍ߫ ߞߍ߫ ߓߊ߲߬ߓߊ߮ ߟߎ߬ ߦߋ߫ ( ߊ߬ߟߎ߬ ߦߋ߫ ߞߎߡߊ߫ ) ߸ ߖߘߍ߬ߟߊ߬ߛߊߦߌ߲߫ ߘߏ߲߬ ߕߍ߫ ߢߌߣߌ߲߫ ߊ߬ߟߎ߫ ߝߍ߬ ﴿84﴾

ߏ ߕߎ߬ߡߊ ߟߋ߬ ߸ ߕߐ߬ߢߍ߰ߒߕߋ ߟߎ߬ ߘߌ߫ ߖߊ߲߰ߞߕߊ ߦߋ߫ ߸ ߞߵߊ߬ ߕߘߍ߬ ߊ߬ ߕߍ߫ ߡߊߛߍ߬ߟߍ߲߬ߓߍ߫ ߊ߬ߟߎ߫ ߞߊ߲߬ ߸ ߊ߬ߟߎ߫ ߘߏ߲߬ ߕߍ߫ ߡߊߞߐ߬ߣߐ߲߬ ( ߥߊ߯ߕߌ߫ ߜߘߍ߫ ߟߊ߫) ﴿85﴾

ߡߍ߲ ߠߎ߫ ߞߊ߬ ߜߙߊ߬ߢߐ߲߰ߦߊ ߞߍ߫ ߸ ߏ߬ ߟߎ߬ ߓߊ߯ ߊ߬ߟߎ߫ ߜߙߊ߬ߢߐ߲߮ ߠߎ߬ ߦߋ߫ ߸ ߊ߬ߟߎ߬ ߘߴߊ߬ ߝߐ߫ ߞߏ߫ ߊ߲ ߡߊ߰ߙߌ ߸ ߢߌ߲߬ ߠߎ߫ ߟߵߊ߲ ߜߙߊ߬ߢߐ߲߮ ߠߎ߬ ߘߌ߫ ߸ ߊ߲ ߕߘߍ߬ ߡߍ߲ ߠߎ߬ ߞߟߌ߫ ߟߊ߫ ߞߵߌߟߋ ߕߏ߫ ، ߏ߬ ߓߊ߯ ߞߍ߫ ߏ߬ ߟߎ߬ ߘߌ߫ ߖߋ߬ߓߌ߬ߟߌ ߟߊߝߌ߬ߟߌ߫ ߊ߬ߟߎ߫ ߡߊ߬ ߸ ߞߏ߫ ߊߟߎ߫ ߝߣߊ߬ ߝߎ߯ߝߊߕߌ߫ ﴿86﴾

‹ ߓߊ߲߬ߓߊ߮ › ߟߎ߬ ߘߌ߫ ߖߘߍ߬ߞߟߏ ߟߐ߬ ߊߟߊ߫ ߡߊ߬ ߏ߬ ߟߏ߲ ߸ ߞߵߊ߬ ߕߘߍ߬ ߊ߬ߟߎ߬ ߟߊ߫ ߝߋ߲߫ ߞߎ߲߬ߘߐߕߍ߰ߣߍ߲ ߠߎ߬ ߓߘߊ߫ ߕߎߣߎ߲߫ ߊ߬ߟߎ߫ ߡߊ߬ ߖߋߎ߲߫ ﴿87﴾

ߡߍ߲ ߠߎ߫ ߞߊ߬ ߓߊ߲߬ߓߊ߰ߦߊ ߞߍ߫ ، ߊ߬ ߣߴߊ߬ߟߎ߫ ߞߊ߬ ߞߎ߬ߡߊ߲߬ߘߌ߬ߟߌ ߞߍ߫ ߊߟߊ߫ ߛߌߟߊ ߡߊ߬ ߸ ߊ߲ ߘߴߏ߬ ߟߎ߬ ߖߘߌ߫ ߖߊ߲߰ߞߕߊ߬ ߞߎߘߊ߫ ߟߊ߫ ߖߊ߲߰ߞߕߊ߫ ߞߘߐ߬ߡߊ߲ ߞߊ߲߬ ߞߊ߬ߡߊߛߐ߬ߘߐ߲߫ ߊ߬ߟߎ߬ ߟߊ߫ ߕߌߢߍߟߌ ߝߍ߬ ﴿88﴾

ߏ߬ ߟߏ߲ ߠߋ߬ ߸ ߊ߲ ߘߌ߫ ߛߙߋ߫ ߞߋߟߋ߲߫ ߠߊߥߌ߬ߟߌ߫ ߡߊ߲߬ߕߏ߲ ߓߍ߯ ߘߐ߫ ߊ߬ߟߎ߫ ߖߍ߬ߘߍ ߞߊ߲ߡߊ߬ ، ߞߵߏ߬ ߓߐ߫ ߊ߬ߟߎ߫ ߖߍ߬ߘߍ ߘߐ߫ ، ߊ߲ ߘߌߣߵߌߟߋ ߝߣߊ߫ ߘߌ߫ ߛߙߋ ߘߌ߫ ߢߌ߲߬ ߠߎ߬ ߞߊ߲ߡߊ߬ ߸ ߊ߲ ߘߏ߲߬ ߞߊ߬ ߟߍߙߊ ߟߊߖߌ߰ ߌߟߋ ߡߊ߬ ߞߏ ߓߍ߯ ߘߐߞߣߍߟߊ߲ ߠߋ߬ ߘߌ߫ ߸ ߊ߬ ߣߌ߫ ߞߊ߲ߘߦߊ ߣߌ߫ ߤߌߣߊ ߣߌ߫ ߘߟߊߝߎߟߌ ߘߌ߫ ߖߘߍ߬ߞߟߏ߬ߟߊ ߟߎ߬ ߦߋ߫ ﴿89﴾

ߊߟߊ߫ ߦߋ߫ ߖߡߊ߬ߙߌ߬ߟߌ ߞߍ߫ ߟߊ߫ ߕߋߟߋ߲ ߣߌ߫ ߢߊ߬ߟߌ ߣߌ߫ ߡߊ߬ߛߎ߬ߘߎ߲߬ߧߊ߬ߓߊ߮ ߟߎ߬ ߛߐ ߟߋ߬ ߟߊ߫ ߸ ߊ߬ ߦߋ߫ ߝߊߕߊ߲ߕߟߌ ߞߍ߫ ߟߊ߫ ߖߊߡߙߎߦߊ ߣߌ߫ ߞߐ߲ߞߏ ߣߌ߫ ߕߐ߬ߢߍ߮ ߡߊ߬ ، ߊ߬ ߘߏ߲߬ ߦߴߊߟߎ߫ ߞߊ߬ߥߊ߲߬ߘߌ߬ ߟߊ߫ ߟߋ߬ ߛߴߊߟߎ߫ ߘߴߊߟߎ߫ ߕߊ߰ߛߌ߫ ﴿90﴾

ߣߴߊߟߎ߫ ߞߊ߬ ߟߊ߬ߤߘߌ ߕߊ߬ ߸ ߊߟߎ߫ ߦߋ߫ ߊߟߊ߫ ߟߊ߫ ߟߊ߬ߤߘߌ ߝߊ߫ ߟߋ߬ ، ߝߋߎ߫ ߸ ߊߟߎ߫ ߞߊߣߊ߬ ߞߊ߬ߟߌ߬ߒ߬ߞߊ߲߬ߠߊ ߟߎ߬ ߓߙߐߕߐ߫ ߊ߬ߟߎ߬ ߘߐߖߊ߭ ߞߐ߫ ߜߘߋߜߘߋ߫ ߸ ߞߵߊ߬ ߕߘߍ߬ ߊߟߎ߫ ߓߘߊ߫ ߓߊ߲߫ ߊߟߊ߫ ߞߍ߫ ߟߊ߫ ߓߟߏߡߊ ߘߌ߫ ߊߟߎ߫ ߖߘߍ߬ ߞߊ߲ߡߊ߬ ، ߊߟߊ߫ ߘߏ߲߬ ߞߵߊ߬ ߟߐ߲߫ ߖߐ߫ ߊߟߎ߫ ߦߋ߫ ߡߍ߲ ߞߍ߫ ߟߊ߫ ﴿91﴾

ߊߟߎ߫ ߞߊߣߊ߬ ߞߍ߫ ߘߋ߬ ߦߏ߫ ߡߏ߬ߛߏ ߡߍ߲ ߞߵߊ߬ ߖߘߍ߬ ߟߊ߫ ߥߌ߬ߙߌ߲߬ߘߌ߬ ߞߊߙߌ ߓߙߐߕߐ߫ ߸ ߞߵߊ߬ ߞߍ߫ ߝߎߟߋ߲ߝߎߟߋ߲ ߠߎ߬ ߘߌ߫ ߊ߬ ߔߙߊߕߊߣߍ߲ ߞߐ߫ ߝߊ߲߬ߞߊ ߟߊ߫ ، ߏ߬ ߟߋ ߊߟߎ߫ ߞߊ߬ߟߌ߬ߒ߬ߞߊ߲߬ߠߊ ߟߎ߬ ߞߍ ߘߌ߫ ߣߊߡߙߊ ߘߌ߫ ߊߟߎ߫ ߣߌ߫ ߢߐ߲߮ ߕߍ߫ ߸ ߛߊ߫ ߡߊ߲߬ߕߏ߲ ߘߏ߫ ߘߌ߫ ߡߊ߬ߡߊ߬ ߘߏ߫ ߘߌ߫ ، ߊߟߊ߫ ߘߏ߲߬ ߏ߬ ߟߊߥߟߌ߬ ߟߴߊߟߎ߫ ߘߐߜߍ ߟߋ߫ ߡߊ߬ ، ߞߏ߬ߣߌ߲߬ ߛߋߚߋ߫ ߊ߬ ߘߌߣߵߊߟߎ߫ ߟߊ߫ ߢߐ߲߯ ߛߐߛߐ߫ ߞߏ ߟߎ߬ ߘߐߞߣߍ߫ ߊߟߎ߫ ߦߋ߫ ߟߐ߬ߓߊ ߟߏ߲ ﴿92﴾

ߣߴߊ߬ ߕߎ߲߬ ߞߵߊߟߊ߫ ߘߌߦߊ߫ ߸ ߊ߬ ߕߘߍ߬ ߘߴߊߟߎ߫ ߞߍ߫ ߡߊ߲߬ߕߏ߲߬ ߞߋߟߋ߲߫ ߔߋ߫ ߘߌ߫ ߸ ߓߊ߬ߙߌ߬ ߊ߬ ߦߋ߫ ߡߐ߰ ߟߋ߬ ߟߊߝߟߌ߬ ߟߊ߫ ߡߍ߲ ߓߊ߯ ߊ߬ ߘߌߦߊ߫ ، ߊ߬ ߘߌ߫ ߡߐ߰ ߞߊ߲ߘߊ߫ ߡߍ߲ ߓߊ߯ ߊ߬ ߘߌߦߊ߫ ، ߞߏ߬ߣߌ߲߬ ߛߋߚߋ߫ ߊߟߎ߫ ߓߍߣߊ߬ ߘߐߢߌ߬ߣߌ߲߬ߞߵߊߟߎ߫ ߟߊ߫ ߓߊ߯ߙߊ ߡߊ߬ ﴿93﴾

ߊߟߎ߫ ߞߊߣߵߊߟߎ߫ ߟߊ߫ ߞߊ߬ߟߌ߬ߟߌ ߟߎ߬ ߞߍ߫ ߣߊߡߙߊ ߘߌ߫ ߊߟߎ߫ ߣߌ߫ ߢߐ߲߮ ߕߍ߫ ߘߋ߬ ، ( ߊߟߎ߫ ) ߛߋ߲߬ߝߘߍ ߘߌ߫ ߕߣߍ߬ߣߍ߫ ߏ߬ ߘߐ߫ ߊ߬ ߓߊ߲ߓߊ߲ߣߍ߲ ߞߐ ، ߊ߬ ߣߴߊߟߎ߫ ߘߌ߫ ߖߎ߯ߡߊ߲ ߡߊߜߙߏ߬ ߊߟߎ߫ ߟߊ߫ ߞߎ߬ߡߊ߲߬ߘߌ߬ߟߌ ߞߏߛߐ߲߬ ߊߟߊ߫ ߛߌߟߊ ߡߊ߬ ، ߖߊ߲߰ߞߕߊ߬ ߓߟߋߓߟߋ߫ ߟߋ߫ ߘߏ߲߬ ( ߛߌ߰ߣߍ߲߬ ) ߊߟߎ߫ ߢߍ߫ ﴿94﴾

ߊߟߎ߫ ߞߊߣߵߊߟߊ߫ ߟߊ߫ ߟߊ߬ߤߘߌ ߝߊ߬ߟߋ߲߫ ߛߐ߲߬ߞߐ߬ߣߍ߲߬ ߕߜߋ ߟߊ߫ ߘߋ߬ ، ߓߊ ߝߋ߲ ߡߍ߲ ߊߟߊ߫ ߓߘߊ ߸ ߏ߬ ߟߋ ߘߌߡߊ߲߫ ߊߟߎ߫ ߟߊ߫ ߣߴߊߟߎ߫ ߓߴߊ߬ ߟߐ߲߫ ߠߊ߫ ﴿95﴾

ߝߋ߲ ߡߍ߲ ߦߴߊߟߎ߫ ߓߟߏ߫ ߏ߬ ߦߋ߫ ߓߊ߲߫ ߠߊ߫ ߟߋ߬ ߸ ߓߊ߬ߙߌ߬ ߡߍ߲ ߦߋ߫ ߊߟߊ߫ ߓߟߏ߫ ߏ߬ ߟߋ ߘߎߡߊ߫ ߟߊ߫ ، ߒ߬ߓߊ߬ ߛߋߚߋ߫ ߊ߲ ߣߊ߬ߕߐ߫ ߟߋ߫ ߡߎ߬ߢߎ߲߬ߓߊ߮ ߟߎ߬ ߛߐ߫ ߟߴߊ߬ߟߎ߫ ߛߊ߬ߙߊ ߟߊ߫ ߸ ߞߵߊ߬ ߓߍ߲߬ ߊ߬ߟߎ߬ ߗߋߥߊߟߌ ߘߐ߫ ߢߌ߬ߡߊ ߡߊ߬ ﴿96﴾

ߡߍ߲ ߓߊ߯ ߢߌ߬ߡߊ߬ ߞߍ߫ ߗߍ߬ߡߊ߲߬ ߘߐ߫ ߥߟߊ߫ ߡߛߏ߬ߡߊ߲߫ ߘߐ߫ ߸ ߊ߬ ߘߏ߲߬ ߦߋ߫ ߘߍ߲߬ߞߣߍ߬ߦߊ߬ߓߊ߯ ߘߌ߫ ، ߊ߲ ߘߌߣߵߏ߬ ߟߊߢߣߊߡߦߊ߫ ߢߣߊߡߦߊ߫ ߢߌߡߊ߫ ߟߊ߫ ، ߊ߬ ߣߴߊ߲ ߘߴߏ߬ ߟߎ߬ ߛߐ߫ ߊ߬ߟߎ߫ ߛߊ߬ߙߊ ߟߊ߫ ߸ ߞߵߊ߬ ߓߍ߲߬ ߊ߬ߟߎ߬ ߗߋߥߊߟߌ ߘߐ߫ ߢߌ߬ߡߊ ߡߊ߬ ﴿97﴾

ߒ߬ߓߊ߬ ߌ ߓߊ߯ ߞߍ߫ ߞߎ߬ߙߊ߬ߣߊ ߞߊ߬ߙߊ߲߬ ߠߊ߫ ߞߏߕߊ߲߫ ߸ ߌ ߦߋ߫ ߕߊ߲߬ߞߊ߬ ߟߊ߬ߢߌߣߌ߲ ߞߍ߫ ߊߟߊ߫ ߟߊ߫ ߞߊ߬ ߓߐ߫ ߜߍ߬ߘߍ߫ ߞߙߎ߬ߟߊ߬ߓߏ߲߬ߕߊ ߡߊ߬ ﴿98﴾

ߘߊ߬ߟߎ߬ ߛߌ߫ ߕߍ߫ ߜߍ߬ߘߍ ߓߟߏ߫ ߡߐ߰ ߟߎ߫ ߡߊ߬ ߸ ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߸ ߊ߬ ߣߴߊ߬ߟߎ߫ ߛߍ߲߬ߓߍ߬ߣߍ߲߫ ߊ߬ߟߎ߫ ߡߊ߰ߙߌ ߟߊ߫ ﴿99﴾

ߊ߬ ߟߊ߫ ߘߊ߬ߟߎ ߦߋ߫ ߡߐ߰ ߟߎ߫ ߟߋ߫ ߞߊ߲߬ ߸ ߡߍ߲ ߠߎ߬ ߦߴߊ߬ߟߎ߫ ߓߛߌ߬ ߟߴߊ߬ ߟߊ߫ ߸ ߊ߬ ߣߌ߫ ߡߍ߲ ߠߎ߬ ߦߋ߫ ߜߙߊ߬ߟߌ ߞߍ߫ ߟߴߊ߬ ߡߊ߬ ﴿100﴾

ߊ߲ ߓߊ߯ ߟߝߊߙߌ ߘߏ߫ ߡߊߝߊ߬ߟߋ߲߬ ߟߝߊߙߌ߫ ߜߘߍ߫ ߟߊ߫ ߞߏߕߊ߲߫ ، ߊߟߊ߫ ߟߋ߫ ߘߏ߲߬ ߞߵߊ߬ ߟߐ߲߫ ߊ߬ ߦߋ߫ ߡߍ߲ ߠߊߖߌ߰ ߟߊ߫ ߸ ߌ ߘߴߊ߬ߟߎ߬ ߞߊ߲ ߡߍ߲߫ ߞߴߌ ߦߋ߫ ߞߎ߲߬ߘߐ߬ߕߍ߰ߟߊ ߟߋ߬ ߘߌ߫ ، ߞߵߊ߬ ߕߘߍ߬ ߝߋߎ߫ ߸ ߊ߬ߟߎ߫ ߝߊ߲߬ߓߊ ߟߋ߬ ߡߊ߫ ߟߐ߲ߠߌ߲߫ ߞߍ߫ ﴿101﴾

ߊ߬ ߟߊߛߋ߫ ߞߏ߫ ߛߊߣߌ߲ߧߊ ߛߟߐߡߌ߲ ߠߋ߫ ߖߌ߰ߣߴߊ߬ ߘߌ߫ ߞߊ߬ ߝߊߘߴߌ ߡߊ߰ߙߌ ߟߊ߫ ߕߎ߬ߢߊ ߘߌ߫ ، ߛߴߊ߬ ߘߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߓߊ߲ߓߊ߲߫ ( ߊ߬ ߟߊ߫ ) ، ߊ߬ ߣߌ߫ ߞߵߊ߬ ߞߍ߫ ߞߊ߲ߘߦߊ ߣߌ߫ ߘߟߊߝߎߟߌ ߘߌ߫ ߖߘߍ߬ߞߟߏ߬ߟߊ ߟߎ߬ ߦߋ߫ ﴿102﴾

ߒ߬ߠߎ߫ ߞߵߊ߬ ߟߐ߲߫ ߖߐ߫ ߒ ߞߏ߫ ߊ߬ߟߎ߬ ߞߊ߲߫ ߠߋ߬ ߞߏ߫ ߡߐ߰ ߟߵߊ߬ ߞߊ߬ߙߊ߲߬ ߠߴߊ߬ ߟߊ߫ ، ߊ߬ߟߎ߫ ߘߏ߲߬ ߦߋ߫ ߝߊ߲ߞߊ߲߫ ߠߊ߫ ߞߊ߲ ߡߍ߲ ߞߊ߲߬ ߏ߬ ߘߌ߫ ߸ ߏ߬ ߦߋ߫ ߘߐ߬ߞߎߙߊ߲ ߠߋ߬ ߘߌ߫ ، ( ߞߎ߬ߙߊ߬ߣߊ ) ߢߌ߲߬ ߘߏ߲߬ ߦߋ߫ ߊߙߊߓߎ߫ ߞߊ߲ ߔߌߦߐߔߌߦߐ ߟߋ߬ ߘߌ߫ ﴿103﴾

ߡߍ߲ ߠߎ߬ ߕߍ߫ ߘߍ߲߬ߞߣߍ߬ߦߊ߬ ߟߴߊߟߊ߫ ߟߊ߫ ߟߝߊߙߌ ߟߎ߫ ߡߊ߬ ߸ ߊߟߊ߫ ߕߍߣߵߏ߬ ߟߎ߬ ߞߊ߲ߘߊ߫ ߟߊ߫ ߝߋߎ߫ ߸ ߓߊ ߊ߬ߟߎ߬ ߢߍߛߌ߰ߣߍ߲߫ ߖߊ߲߰ߞߕߊ߬ ߘߌߡߌ߲ߣߍ߲ ߠߋ߬ ߟߊ߫ ﴿104﴾

ߡߍ߲ ߠߎ߬ ߦߋ߫ ߝߊ߬ߣߌ߲߬ߧߊ ߞߎ߲߬ߘߐߕߍ߰ ߟߊ߫ ߸ ߏ߬ ߟߎ߫ ߟߋ߬ ߕߍ߫ ߘߍ߲߬ߞߣߍ߬ߦߊ߬ ߟߴߊߟߊ߫ ߟߊ߫ ߟߝߊߙߌ ߟߎ߫ ߡߊ߬ ، ߏ߬ ߟߎ߫ ߟߋ߬ ߘߏ߲߬ ߦߋ߫ ߥߎߦߊ߫ ߝߐߟߊ ߟߎ߬ ߘߌ߫ ﴿105﴾

ߡߍ߲ ߓߊ߯ ߓߊ߲߬ߓߊ߰ߦߊ ߟߐ߬ ߊߟߊ߫ ߡߵߊ߬ ߘߍ߲߬ߞߣߍ߬ߦߊ߬ߣߍ߲ ߞߐ߫ ، .. ߝߏ߫ ߡߍ߲ ߞߘߊߡߊߣߍ߲߫ ߘߋ߬ ߞߵߊ߬ ߛߣߐ߬ߡߍ ߡߝߊߣߍ߲ ߕߏ߫ ߘߍ߲߬ߞߣߍ߬ߦߊ ߞߊ߲߬ ، ߓߊ߬ߙߌ߬ ߡߍ߲ ߓߊ߯ ߊ߬ ߛߣߐ߬ߡߍ ߟߊߞߊ߬ ߓߊ߲߬ߓߊ߰ߦߊ ߦߋ߫ ߸ ߊߟߊ߫ ߟߊ߫ ߛߊ߬ߙߌ ߏ߬ ߟߎ߫ ߟߋ߫ ߡߊ߬ ߸ ߊ߬ ߣߴߊ߬ߟߎ߬ ߢߍߛߌ߰ߣߍ߲߫ ߖߊ߲߰ߞߕߊ߬ ߓߟߋߓߟߋ߫ ߟߋ߬ ߟߊ߫ ﴿106﴾

ߏ ߘߏ߲߬ ߞߎ߲߭ ߠߋ߬ ߸ ߓߊ ߊ߬ߟߎ߫ ߣߊ߬ ߘߎߢߊ߫ ߢߣߊߡߦߊ ߟߋ߫ ߞߊ߬ߣߌ߲߬ ߠߊ߫ ߟߊߞߌߙߊ߫ ߕߊ ߘߌ߫ ߸ ߊ߬ ߣߌ߫ ߝߣߊ߫ ߸ ߊߟߊ߫ ߕߍ߫ ߡߌ߬ߙߌ߲߬ߘߌ߫ ߓߊ߲߬ߣߍ߲ ߠߎ߬ ߞߊ߲ߘߊ߫ ߟߊ߫ ﴿107﴾

ߒ߬ߓߵߊߟߊ߫ ߣߵߏ߬ ߟߎ߫ ߟߋ߫ ߛߣߐ߬ߡߍ ߟߎ߬ ߣߴߊ߬ߟߎ߬ ߕߟߏߘߋ߲ ߠߎ߬ ߣߴߊ߬ߟߎ߬ ߢߊ ߟߎ߬ ߟߊߣߘߐ߫ ߟߊ߫ ߸ ߊ߬ ߣߌ߫ ߝߣߊ߫ ߏ߬ ߟߎ߫ ߟߋ߫ ߢߌ߬ߣߊ߬ߓߊ߮ ߟߎ߬ ߘߌ߫ ﴿108﴾

ߛߌߞߊ߫ ߕߍ߫ ߡߍ߲ ߘߐ߫ ߸ ߊ߬ߟߎ ߟߋ߫ ߛߎ߬ߟߊ߫ ߓߣߐ߬ߓߊ߮ ߟߎ߬ ߘߌ߫ ﴿109﴾

ߏ߬ ߞߐ߫ ߸ ߌ ߡߊ߰ߙߌ ߦߋ߫ ߡߐ߰ ߟߎ߫ ߟߋ߬ ߦߋ߫ ߸ ߡߍ߲ ߠߎ߬ ߝߎ߲ߘߌ߫ ߘߴߊ߬ߟߎ߬ ߞߘߐߓߐߣߍ߲ ߞߐ߫ ߸ ߏ߬ ߞߐ߫ ߊ߬ߟߎ߫ ߞߊ߬ ߖߘߍ߬ߘߌ ߞߍ߫ ، ߊ߬ ߣߴߊ߬ߟߎ߫ ߞߵߊ߬ߟߎ߫ ߡߎ߬ߢߎ߲߬ ، ߏ߬ ߟߋ ߞߐ߫ ߸ ߌ ߡߊ߰ߙߌ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿110﴾

ߟߏ߲ ߘߏ߫ ߓߍ߫ ߸ ߣߌߡߊ ߓߍ߯ ߣߊ߬ߕߐ ߦߴߊ߬ ߖߍ߬ߘߍ ߟߊ߫ ߞߏ ߡߞߊ߬ߛߌ߬ߟߌ ߟߋ߬ ߞߍ߫ ߟߊ߫ ߸ ߣߌߡߊ ߘߏ߲߬ ߓߍ߯ ߗߋߥߊߟߌ ߘߌ߫ ߘߝߴߊ߬ ߦߋ߫ ߖߐ߫ ߸ ߊ߬ߟߎ߬ ߕߍ߫ ߕߐ߬ߢߍ߰ ߝߋߎ߫ ﴿111﴾

ߊߟߊ߫ ߦߋ߫ ߛߊ߲߬ߘߊ ߟߊ߫ ߟߊ߫ ߛߏ ߘߏ߫ ߟߋ߫ ߡߊ߬ ߸ ߏ߬ ߟߋ ߞߎ߲߬ߠߊ߬ߝߎߟߋ߲ߣߍ߲ ߡߝߊߣߍ߲߫ ߕߘߍ߬ ߸ ߊ߬ ߤߊ߬ߙߌ߬ߖߍ߮ ߦߙߌߥߊߣߍ߲ ߦߋ߫ ߣߊ߬ ߟߴߊ߬ ߡߊ߬ ߞߊ߬ ߓߐ߫ ߝߊ߲߭ ߓߍ߯ ߘߐ߫ ، ߏ߬ ߟߋ ߞߵߊߟߊ߫ ߟߊ߫ ߣߍߡߊ ߟߎ߬ ߝߌߛߙߌߥߊߟߋߦߊ߫ ، ߏ߬ ߞߍ ߊߟߊ߫ ߞߵߊ߬ ߡߊߜߙߏ߬ ߞߐ߲ߞߐ ߣߌ߫ ߛߌߟߊ߲ ߓߊ߬ߛߊ߲߬ߣߍ߲ ߠߊ߫ ߸ ߞߊ߬ߡߊߛߐ߬ߘߐ߲߫ ߊ߬ߟߎ߬ ߟߊ߫ ߓߊ߯ߙߊ ߝߍ߬ ﴿112﴾

ߞߋߟߊ ߘߏ߲߬ ߜߎ ߣߊ߬ ߘߴߊ߬ߟߎ߫ ߡߊ߬ ߞߊ߬ ߓߐ߫ ߊ߬ߟߎ߫ ߖߍ߬ߘߍ ߘߐ߫ ، ߓߊ߬ߙߌ߬ ߊ߬ߟߎ߫ ߞߵߏ ߛߐ߬ߛߐ߫ ، ߏ߬ ߞߍ ߖߊ߲߰ߞߕߊ ߞߵߊ߬ߟߎ߬ ߕߍ߯ߕߊ߬ ߗߐߞߎ߬ߡߐ߬ ߸ ߞߵߊ߬ ߕߘߍ߬ ߊ߬ߟߎ߬ ߦߋ߫ ߕߐ߬ߢߍ߮ ߟߊ߬ ﴿113﴾

ߊߟߊ߫ ߞߵߊߟߎ߫ ߤߊ߬ߙߌ߬ߖߍ߰ ߝߋ߲߫ ߘߤߊ߬ߣߍ߲߬ ߓߘߍߓߘߍ ߡߍ߲ ߠߎ߬ ߟߊ߫ ߸ ߊߟߎ߫ ߦߴߏ߬ ߘߏ߫ ߘߊߥߎ߲߫ ߸ ߞߵߊߟߊ߫ ߟߊ߫ ߣߍߡߊ ߞߏߢߌߡߊߟߐ߲߫ ߣߴߊߟߎ߫ ߦߴߊ߬ߟߋ ߟߋ߫ ߓߊ߬ߕߏ߬ ߟߊ߫ ﴿114﴾

ߊ߬ ߣߊ߬ ߛߊ߲ߞߌߘߊ߲ ߣߌ߫ ߖߋ߬ߟߌ ߣߌ߫ ߟߍ߬ ߛߓߏ ߟߋ߬ ߟߊߕߐ߲߫ ߠߴߊߟߎ߫ ߡߊ߬ ، ߊ߬ ߣߌ߫ ߞߎߟߋ߫ ߞߍߣߍ߲߫ ߡߍ߲ ߠߴߊߟߊ߫ ߛߌ߬ߣߊ ߟߎ߬ ߦߋ߫ ، ߒ߬ߓߊ߬ ߣߌ߫ ߡߍ߲ ߘߋ߬ߥߎ߬ ߘߊ߫ ߞߵߊ߬ ߕߘߍ߬ ߡߙߎߕߌߓߊ߯ ߕߍ߫ ߖߊ߲߰ߘߊ߬ߓߊ߯ ߕߍ߫ ߸ ߏ߬ ߘߐ߫ ߸ ߊߟߊ߫ ߦߋ߫ ߦߝߊ߬ߟߊ߫ ߘߌ߫ ߊ߰ ߤߌߣߟߊ߫ ߘߌ߫ ﴿115﴾

ߊߟߎ߫ ߞߊߣߊ߬ ߥߎߦߊ ߝߐ߫ ߊߟߎ߫ ߣߍ߲߭ ߠߎ߬ ߟߊ߫ ߡߊ߲߬ߞߕߎ߬ߟߌ ߘߐ߫ ߘߋ߬ ߸ ߞߏ߫ ( ߝߋ߲ ) ߣߌ߲߬ ߘߤߊ߬ߣߍ߲߫ ߸ ߘߐ ߢߌ߲߬ ߠߋ߬ ߟߊߕߐ߲ߣߍ߲߫ ، ߞߵߊ߬ ߟߊߥߟߌ߬ ߛߴߊߟߎ߫ ߘߌ߫ ߥߎߦߊ ߞߎ߲߬ߘߐߕߍ߰ ߞߵߊ߬ ߟߴߊߟߊ߫ ߟߊ߫ ، ߡߍ߲ ߠߎ߫ ߘߏ߲߬ ߦߋ߫ ߥߎߦߊ ߞߎ߲߬ߘߐߕߍ߰ ߟߊ߫ ߞߵߊ߬ ߟߴߊߟߊ߫ ߟߊ߫ ߸ ߏ߬ ߟߎ߬ ߕߍߣߊ߬ ߛߎߘߊ߲߫ ߠߊ߫ ﴿116﴾

(ߘߎߢߊ߫ ) ߘߊ߰ߡߎ߲߬ߣߍ߲߬ ߕߜߋ ( ߓߐ߲߯ߕߍ߫ ) ߸ ߊ߬ߟߎ߬ ߢߍߛߌ߰ߣߍ߲߫ ߖߊ߲߰ߞߕߊ߬ ߘߌߡߌ߲ߣߍ߲ ߠߋ߬ ߟߊ߫ ﴿117﴾

ߊ߲ ߞߊ߬ ( ߝߋ߲ ) ߡߍ߲ ߠߎ߬ ߟߊߕߐ߲߫ ߦߊ߬ߤߎ߯ߘߎ ߟߎ߫ ߡߊ߬ ߸ ߊ߲ ߓߘߴߏ߬ ߟߎ߫ ߘߊ߲߬ߕߍ߰ ߌ ߦߋ߫ ߞߘߐ߬ߡߊ߲߫ ، ߊ߲ ߘߏ߲߬ ߡߊ߫ ߓߊ߰ ߏ߬ ߟߎ߫ ߡߊ߬ ߘߋ߬ ߸ ߓߊ߬ߙߌ߬ ߊ߬ߟߎ ߟߋ߫ ߓߊ߰ ߘߴߊ߬ߟߎ߫ ߖߍ߬ߘߍ ߡߊ߬ ﴿118﴾

ߒ߬ߓߊ߬ ߌ ߡߊ߰ߙߌ ߦߋ߫ ߡߐ߰ ߟߎ߫ ߟߋ߬ ߦߋ߫ ߸ ߡߍ߲ ߠߎ߫ ߞߊ߬ ߖߎ߯ߡߊ߲ ߞߍ߫ ߞߏߟߐ߲ߓߊߟߌߦߊ ߡߊ߬ ߸ ߞߊ߬ ߓߊ߲߫ ߞߵߊ߬ߟߎ߫ ߖߘߍ߬ ߟߊߛߊ߬ߦߌ߲߬ ، ߊ߬ ߣߌ߫ ߞߊ߬ ߟߢߊ߬ߟߌ ߞߍ߫ ، ߏ߬ ߟߋ ߞߐ߫ ߌ ߡߊ߰ߙߌ ߦߋ߫ ߦߝߊ߬ߟߊ߫ ߘߌ߫ ߸ ߊ߰ ߤߌߣߟߊ߫ ߘߌ߫ ﴿119﴾

ߖߊ߯ߕߋ߬ ߸ ߌߓߎ߬ߙߊ߬ߤߌߡߊ߫ ߞߍ߫ ߘߊ߫ ߡߊ߲߬ߕߏ߲߬ ߕߋߟߋ߲ߣߍ߲ ߠߋ߬ ߘߌ߫ ߊߟߊ߫ ߦߋ߫ ߖߐ߲ߖߐ߲߫ ، ߝߋߎ߫ ߸ ߊ߬ ߡߊ߫ ߞߍ߫ ߛߏߡߊ ߟߎ߬ ߝߋ߲߫ ߘߌ߫ ﴿120﴾

ߊ߬ ߞߍ߫ ߘߴߊ߬ ߟߊ߫ ߣߍߡߊ ߟߎ߬ ߞߏߢߌߡߊߟߐ߲ߓߊ߯ ߝߣߊ߫ ߘߌ߫ ߸ ߊ߬ ߞߵߊ߬ ߛߎߥߊ߲ߘߌ߫ ߏ߬ ߟߋ ߘߐ߫ ߞߵߊ߬ ߞߊ߲ߘߊ߫ ߛߌߟߊ߫ ߕߋߟߋ߲ߣߍ߲ ߞߊ߲߬ ﴿121﴾

ߊ߲ ߞߵߊ߬ ߛߐ߫ ( ߞߏ߫ ) ߢߌߡߊ߫ ߟߋ߬ ߟߊ߫ ߘߎߢߊ߫ ߘߐ߫ ، ߊ߬ ߘߏ߲߬ ߦߋ߫ ߟߊߞߌߙߊ߫ ߡߐ߰ ߢߌߡߊ ߟߎ߬ ߘߏ߫ ߟߋ߬ ߘߌ߫ ﴿122﴾

ߏ߬ ߟߋ ߞߐ߫ ߊ߲ ߞߵߌߟߋ ߦߟߌߘߏ߲߬ ߸ ߒ ߞߴߌ ߦߋ߫ ߕߎ߲߰ ߌߓߎ߬ߙߊ߬ߤߌߡߊ߫ ߟߊ߫ ߣߊߡߎ߲ ߠߋ߬ ߟߊ߫ ߖߐ߲ߖߐ߲߫ ߸ ߓߊ ߏ߬ ߡߊ߫ ߞߍ߫ ߛߏߡߊ ߟߎ߬ ߝߋ߲߫ ߘߌ߫ ﴿123﴾

ߞߍ߲ߘߍߟߏ߲߫ ( ߛߓߌߕߌ߫ ) ߞߏ ߟߊߣߍ߲߫ ߡߐ߰ ߟߎ߫ ߟߋ߫ ߞߎ߲߬ ߸ ߡߍ߲ ߠߎ߫ ߞߊ߬ ߢߐ߲߮ ߛߐ߬ߛߐ߫ ߊ߬ ߞߏߢߊ ߘߐ߫ ، ߌ ߡߊ߰ߙߌ ߘߏ߲߬ ߘߌߣߵߊ߬ߟߎ߬ ߟߊ߫ ߢߐ߲߯ ߛߐߛߐ߫ ߞߏ ߟߎ߬ ߞߕߌ ߟߴߊ߬ߟߎ߬ ߕߍ߫ ߟߐ߬ߓߊ ߟߏ߲ ߠߋ߬ ߕߘߋ߫ ﴿124﴾

ߌߟߋ ߦߋ߫ ߞߟߌߟߌ ߞߴߌ ߡߊ߰ߙߌ ߟߊ߫ ߛߌߟߊ ߡߊ߬ ߥߘߋ߬ߥߘߋ߬ߟߌ ߣߌ߫ ߞߊ߬ߥߊ߲߬ߘߟߌ߬ ߢߌߡߊ ߟߋ߬ ߟߊ߫ ߸ ߊ߬ ߣߴߌ ߦߴߊ߬ߟߎ߬ ߞߎߡߊߢߐ߲߯ߦߊ߫ ߞߊ߲߫ ߓߘߍ߫ ߟߊ߫ ߸ ߓߊߏ߬ ߌ ߡߊ߰ߙߌ ߟߋ߫ ߞߵߊ߬ ߟߐ߲߫ ߡߍ߲ ߝߟߌ߬ߣߍ߲߫ ߊ߬ ߟߊ߫ ߛߌߟߊ ߡߊ߬ ߸ ߊ߬ ߞߊ߬ ߞߊ߲ߘߊߓߊ߯ߕߐ ߟߎ߬ ߝߣߊ߫ ߟߐ߲߫ ﴿125﴾

ߣߴߊߟߎ߫ ߞߊ߬ ߞߍ߫ ( ߕߊߢߐ߲߯ߓߐ ) ߓߌ߲߬ߓߊߏ ߓߐ߫ ߟߊ߫ ߸ ߊߟߎ߫ ߦߋ߫ ߓߌ߲߬ߓߊߏ߫ ߟߋ߬ ߓߐ߫ ߡߍ߲ ߢߐ߲߰ ߟߊ߫ ߘߴߊߟߎ߫ ߞߊ߲߬ ، ߣߴߊߟߎ߫ ߝߊ߲߭ ߞߵߊߟߎ߫ ߡߎ߬ߢߎ߲߬ ߸ ߏ߬ ߟߋ ߤߙߊ ߘߌ߫ ߡߎ߬ߢߎ߲߬ߓߊ߮ ߟߎ߬ ߦߋ߫ ﴿126﴾

ߌ ߦߴߌ ߡߎ߬ߢߎ߲߫ ߠߋ߫ ߘߋ߬ ߸ ߌ ߟߊ߫ ߡߎ߬ߢߎ߲ ߘߏ߲߬ ߞߊߣߊ߬ ߞߍ߫ ߝߏߦߌ߬ ߦߋ߫ ߝߏ߫ ߊߟߊ߫ ، ߌ ߞߣߊ߫ ߛߎ߬ߣߎ߲߬ ߊ߬ߟߎ߫ ߝߍ߬ ، ߌ ߘߏ߲߬ ߞߊߣߊ߬ ߞߍ߫ ߜߍ߲߬ߘߍ߫ ߘߐ߫ ߊ߬ߟߎ߬ ߟߊ߫ ߣߊߡߙߊ ߟߎ߬ ߞߏߛߐ߲߬ ﴿127﴾

ߖߊ߯ߕߋ߬ ߸ ߊߟߊ߫ ߦߋ߫ ߝߊ߲ߕߊ߲ߞߟߊ ߟߎ߫ ߟߋ߫ ߝߍ߬ ߸ ߊ߬ ߣߌ߫ ߡߍ߲ ߠߎ߬ ߦߋ߫ ߢߊ߬ߓߊ߮ ߟߎ߬ ߘߌ߫ ﴿128﴾

(ߡߊ߰ߙߌ ) ߛߊߣߌ߲ߡߊ߲߫ ߸ ߡߍ߲ ߞߊ߬ ߛߎߘߐߛߣߍߡߊ ߞߍ߫ ߊ߬ ߟߊ߫ ߖߐ߲߭ ߘߌ߫ ߛߎ ߘߐ߫ ߸ ߞߊ߬ ߓߐ߫ ߡߌ߬ߛߙߌ߬ ߟߊߕߏߣߍ߲ ߠߊ߫ ߞߊߕߙߍ߬ ߡߌ߬ߛߙߌ߬ ߦߌߟߡߊߖߊ߲ ߡߊ߬ ، ߊ߲ ߣߊ߬ ߓߙߊߞߊ ߞߍ߫ ߟߴߏ߬ ߡߍ߲ ߟߊߡߌߣߌ߲ ߘߐ߫ ، ߖߐ߲߰ߛߊ߫ ߒ߬ ߘߌ߫ ߒ߬ ߠߊ߫ ߡߊ߲߬ߕߊߣߌ߲ ߠߎ߬ ߘߏ߫ ߦߌ߬ߘߴߊ߬ ߟߊ߫ ، ߖߊ߯ߕߋ߬ ߸ ߊ߬ߟߋ ߟߋ߬ ߡߍ߲ߠߌ߲ߠߊ߫ ߦߋߟߌߟߊ ߘߌ߫ ﴿1﴾

ߊ߲ ߞߊ߬ ߟߍߙߊ ߘߌ߫ ߡߎߛߊ߫ ߡߊ߬ ߞߵߏ߬ ߞߍ߫ ߞߊ߲ߘߦߊ ߘߌ߫ ߌߛߌߙߊߌߟߞߊ ߟߎ߬ ߦߋ߫ ، ߒ ߞߏ߫ ߤߍ߲߬ ߊߟߎ߫ ߞߊߣߊ߬ ߛߍ߲߬ߓߍ߬ߟߊ߲߬ ߜߘߍ߫ ߡߌ߬ߘߊ߬ ߒߠߋ ߞߐ߫ ߘߋ߬ ﴿2﴾

ߒ ߞߏ߫ ߤߍ߲߬ ߊߟߎ߬ ߡߐ߱ ߓߐ߲ߛߐ߲ ߠߎ߬ ߸ ߒ ߞߊ߬ ߡߍ߲ ߕߊ߬ ߣߎߤߎ߲߫ ߝߍ߬ ( ߞߎߟߎ߲ ߘߐ߫) ߸ ( ߣߎߤߎ߲߫ ) ߏ߬ ߘߏ߲߬ ߞߍ߫ ߘߊ߫ ߖߐ߲߬ ߞߏߢߌߡߊߟߐ߲ߠߊ߫ ߟߋ߬ ߘߌ߫ ﴿3﴾

ߊ߲ ߞߵߊ߬ ߟߊߕߍ߰ ߌߛߌߙߊߌߟߞߊ ߟߎ߫ ߡߊ߬ ߟߍߙߊ ߞߣߐ߫ ߸ ߒ ߞߏ߫ ߊߟߎ߫ ߘߌߣߊ߬ ߕߌߢߍߟߌ ߞߍ߫ ߘߎ߱ ߞߊ߲߬ ߛߋ߲߬ߧߊ߫ ߝߌ߬ߟߊ߬ ، ߊߟߎ߫ ߘߌߣߵߊߟߎ߫ ߖߘߍ߬ ߥߙߎߞߌ߫ ߥߙߎߞߌߓߊ߫ ߟߊ߫ ﴿4﴾

ߕߎ߬ߡߊ ߡߍ߲ ߏ߬ ߦߟߌߡߊߘߌߦߊ߫ ߝߌ߬ߟߊ ߝߟߐߡߊ ߣߊ߬ ߘߊ߫ ߸ ߊ߲ ߞߊ߬ ߒ߬ ߠߊ߫ ߖߐ߲߭ ߘߏ߫ ߟߊߥߟߌ߬ ߊߟߎ߫ ߞߊ߲ߡߊ߬ ߸ ߏ߬ ߟߎ߬ ߦߋ߫ ߞߊ߬ߘߏ߬ߜߟߍ߬ߦߊ߫ ߕߌ߰ ߟߎ߫ ߘߌ߫ ߞߏߛߓߍ߫ ، ߏ߬ ߟߎ߫ ߘߏ߲߬ ߘߊ߫ ߟߎ ߟߎ߬ ߞߣߐ߫ ߔߙߊߎ߫ ، ߦߟߌߡߊߘߌߦߊ ߏ߬ ߘߏ߲߬ ߞߍ߫ ߘߊ߫ ߝߊ߯ߛߌ߫ ﴿5﴾

ߏ߬ ߟߋ ߞߐ߫ ߸ ߊ߲ ߞߊ߬ ߝߊ߲߬ߞߊ ߟߊߛߊ߬ߦߌ߲߬ ߊߟߎ߫ ߡߊ߬ ߖߎ߮ ߟߎ߫ ߞߊ߲߬ ߸ ߊ߬ ߣߴߊ߲ ߞߵߊߟߎ߫ ߖߘߌ߫ ߣߊ߲߬ߝߟߏ ߟߎ߬ ߣߌ߫ ߘߋ߲ߞߍ ߟߎ߬ ߟߊ߫ ߸ ߊ߬ ߣߴߊ߲ ߞߵߊߟߎ߫ ߞߍ߫ ߖߡߊ߬ ߛߌߦߊߡߊ߲߫ ߘߌ߫ ﴿6﴾

ߣߴߊߟߎ߫ ߢߊ߬ ߘߊ߫ ߸ ߊߟߎ߫ ߢߊ߬ ߘߴߊߟߎ߫ ߖߍ߬ߘߍ߫ ߟߋ߬ ߦߋ߫ ، ߣߴߊߟߎ߫ ߘߏ߲߬ ߖߎ߯ߦߊ߫ ߘߊ߫ ߸ ߊߟߎ߫ ߦߴߏ߬ ߞߍ߫ ߟߴߊߟߎ߫ ߖߍ߬ߘߍ߫ ߟߋ߬ ߟߊ߫. ߒ߬ߓߊ߬ ߕߎ߬ߡߊ ߡߍ߲ ߦߟߌߡߊߘߌߦߊ ߞߐߟߕߊ ߣߊ߬ ߘߊ߫ ߸ ߏ߬ ߞߍ߫ ߘߊ߫ ߟߋ߬ ߛߴߊ߬ߟߎ߬ ߘߴߊߟߎ߫ ߢߊߘߐߟߊ ߟߎ߬ ߟߊߛߎ߬ߣߎ߲߬ ߸ ߊ߬ ߣߌ߫ ߞߊ߬ ߘߏ߲߬ ߡߌ߬ߛߙߌ ߟߊ߫ ߦߏ߫ ߊ߬ߟߎ߫ ߘߏ߲߬ ߘߴߊ߬ ߟߊ߫ ߢߊ ߡߍ߲ ߛߋ߲߬ߧߊ߬ ߝߟߐ ߘߐ߫ ، ߊ߬ ߣߴߊ߬ߟߎ߬ ߦߴߊ߬ߟߎ߬ ߟߊ߫ ߦߙߐ߫ ߡߊߜߐ߬ߙߐ߲߬ߞߕߐ߬ߣߍ߲ ߓߍ߯ ߖߊߡߎߙߊ߲߫ ߖߊߡߎߙߊ߲߫ ߞߏߖߎ߮ ߟߊ߫ ﴿7﴾

ߊ߬ ߢߐ߲߰ߘߐ߫ ߊߟߎ߫ ߡߊ߰ߙߌ ߘߌ߫ ߤߌߣߴߊߟߎ߫ ߟߊ߫ ߸ ߒ߬ߞߊ߬ ߣߴߊߟߎ߫ ߞߵߊߟߎ߫ ߣߐ߬ߡߊߛߊ߬ߦߌ߲߬ ߒ߬ ߝߣߊ߫ ߘߌ߫ ߒ߬ ߣߐ߬ߡߊߛߊ߬ߦߌ߲߬ ، ߊ߲ ߘߏ߲߬ ߣߊ߬ ߔߊߦߌߔߊߦߌ ߞߍ߫ ߟߊ߫ ߓߊ߲߬ߓߊ߮ ߟߎ߬ ߟߊߞߘߎ߬ ߦߙߐ ߟߋ߬ ߘߌ߫ ߜߍߕߙߍ߬ ﴿8﴾

ߞߎ߬ߙߊ߬ߣߊ ߣߌ߲߬ ߦߋ߫ ߞߊ߲ߘߊߟߌ ߞߍ߫ ߟߊ߫ ‹ ߛߌߟߊ߫ › ߟߋ߫ ߡߊ߬ ߡߍ߲ ߕߋߟߋ߲ߣߍ߲߫ ، ߊ߬ ߣߴߊ߬ ߦߋ߫ ߘߟߊߝߎߟߌ ߞߍ߫ ߟߊ߫ ߘߍ߲߬ߞߣߍ߬ߦߊ߬ߓߊ߮ ߟߎ߫ ߟߋ߬ ߦߋ߫ ߸ ߡߍ߲ ߠߎ߬ ߦߋ߫ ߢߌ߬ߡߊ ߟߎ߬ ߞߍ߫ ߟߊ߫ ߸ ߞߏ߫ ߊ߬ߟߎ߬ ߢߍߛߌ߰ߣߍ߲߫ ߛߙߊ߬ ߓߟߋߓߟߋ߫ ߟߋ߬ ߟߊ߫ ﴿9﴾

ߊ߬ ߣߌ߫ ߞߏ߫ ߡߍ߲ ߠߎ߫ ߘߍ߲߬ߞߣߍ߬ߦߊ߬ߣߍ߲߫ ߕߍ߫ ߛߎ߬ߟߊ߫ ߡߊ߬ ߸ ߊ߲ ߣߊ߬ ߖߊ߲߰ߞߕߊ߬ ߘߌߡߌ߲ߣߍ߲ ߠߋ߬ ߘߐߓߍ߲߬ ߠߴߏ߬ ߟߎ߬ ߦߋ߫ ﴿10﴾

ߡߐ߱ ߟߋ߬ ߕߊ߬ߣߊ ߡߊߞߟߌ߫ ߟߊ߫ ߸ ߦߏ߫ ߊ߬ ߦߋ߫ ߤߙߊ ߡߊߞߟߌ߫ ߟߊ߫ ߢߊ ߡߍ߲ ، ߓߊߏ߬ ߡߐ߱ ߦߋ߫ ߞߌߢߍߓߊ߯ߒߕߋ ߟߋ߬ ߘߌ߫ ﴿11﴾

ߊ߲ ߞߊ߬ ߛߎ ߣߌ߫ ߕߟߋ߬ߘߐ߬ߟߊ ߞߍ߫ ߕߐ߰ߡߊ߬ߛߙߋ߫ ߝߌ߬ߟߊ߫ ߟߋ߬ ߘߌ߫ ߸ ߊ߲ ߞߊ߬ ߛߎ ߕߐ߰ߡߊ߬ߛߙߋ ߕߍ߬ ߸ ߞߊ߬ ߕߟߋ߬ߘߐ߬ߟߊ ߕߐ߰ߡߊ߬ߛߙߋ ߞߍ߫ ߦߋߟߌߟߊ߲߫ ߘߌ߫ ، ߛߴߊߟߎ߫ ߘߌ߫ ߢߊ߬ߒߡߊ߭ ߢߌߣߌ߲߫ ߊߟߎ߫ ߡߊ߰ߙߌ ߝߍ߬ ( ߏ ߕߎ߬ߡߊ ߟߊ߫ ) ، ߊ߬ ߣߌ߫ ߛߴߊߟߎ߫ ߘߌ߫ ߛߊ߲߭ ߠߎ߬ ߦߙߌߞߊ ߖߊ߬ߕߋ߬ߟߌ ߟߐ߲߫ ، ߊ߲ ߘߏ߲߬ ߞߊ߬ ߞߏ ߓߍ߯ ߝߊߙߊ߲ߝߊߛߌ߫ ߟߋ߬ ߥߟߋߟߋ߫ ﴿12﴾

ߊ߲ ߞߊ߬ ߡߐ߱ ߞߋ߬ߟߋ߲߬ߞߋ߬ߟߋ߲߬ߣߊ ߟߊ߫ ߞߐ߬ߣߐ ߛߘߌ߬ ߊ߬ ߞߊ߲ ߠߊ߫ ߟߋ߬ ߸ ߊ߲ ߧߋ߫ ߓߍ߯ ߕߊ ߏ߬ ߟߋ ߟߊߓߐ߫ ߟߴߊ߬ ߦߋ߫ ߟߐ߬ߓߊ ߟߏ߲ ߟߍߙߊ ߘߌ߫ ، ߊ߬ ߦߴߏ߬ ߟߊߞߊ߬ߣߍ߲ ߓߍ߲߬ߢߐ߲߰ߦߊ߬ ߟߊ߫ ﴿13﴾

ߞߏ߫ ߌ ߟߊ߫ ߟߍߙߊ ߞߊ߬ߙߊ߲߬ ߓߊ߫ ߸ ߌ ߖߍ߬ߘߍ ߘߌ߫ ߥߛߊ߬ ߞߍ߫ ߖߊ߬ߕߋ߬ߓߐ߬ߟߊ߫ ߘߌ߫ ߓߌ߬ ߌ ߖߍ߬ߘߍ߫ ߞߎ߲߬ ﴿14﴾

ߡߍ߲ ߓߊ߯ ߞߊ߲ߘߊ߫ ߏ߬ ߦߋ߫ ߞߊ߲ߘߊ߫ ߟߴߊ߬ ߖߍ߬ߘߍ߫ ߟߋ߬ ߦߋ߫ ، ߡߍ߲ ߓߊ߯ ߝߟߌ߬ ߏ߬ ߦߋ߫ ߝߌ߬ߟߌ ߞߍ߫ ߟߴߊ߬ ߖߍ߬ߘߍ߫ ߟߋ߬ ߟߊ߫ ، ߘߏ߬ߣߌ߲߬ ߕߌ߮ ߘߏ߫ ߞߏ߬ߣߌ߲߬ ߕߴߛߋ߫ ߘߏ߬ߣߌ߲߬ ߕߌ߰ ߜߘߍ߫ ߘߏ߬ߣߌ߲ ߕߊ߬ ߟߊ߫ ، ߊ߲ ߘߏ߲߬ ߕߍ߫ ߖߊ߲߰ߞߕߊ߬ߟߌ߫ ߞߍ߫ ߟߊ߫ ߸ ߝߏ߫ ߊ߲ ߓߊ߯ ߞߋߟߊ ߘߏ߫ ߟߊߥߌ߬ߟߌ߫ ߟߋ߬ ߡߎߣߎ߲߬ ߖߐ߫ ﴿15﴾

ߣߴߊ߲ ߧߴߊ߬ ߝߍ߬ ߞߊ߬ ߛߏ ߡߍ߲ ߛߌߟߊߛߊ߬ ߸ ߊ߲ ߧߋ߫ ߦߋ߲߬ ߡߐ߰ ߡߊߣߍߡߊߣߍ߲ ߠߎ߫ ߟߋ߬ ߞߣߐߘߐߖߡߊߙߌ߫ ߟߊ߫ ߸ ߏ߬ ߟߎ߬ ߘߌ߫ ߔߊߟߊ߲ߞߊ ߟߊߘߏ߲߬ ߦߋ߲߬ ، ߞߐ߲߬ߞߐ߲߬ߒ߬ߡߊ߬ ߞߊ߲ ߘߌ߫ ߓߋ߬ ߊ߬ߟߎ߫ ߞߊ߲߬ ߏ߬ ߘߐ߫ ߜߏߓߌ߫ ، ߏ߬ ߓߊ߯ ߞߍ߫ ߸ ߊ߲ ߘߌ߫ ߦߋ߲߬ ߓߍߘߍ߲ߛߍ߫ ߟߋߎ߫ ﴿16﴾

ߊ߲ ߓߘߊ߫ ߝߊ߯ߘߐߞߍ߫ ߖߋ߬ߟߌߖߋ߬ߟߌ߫ ߟߋ߬ ߛߌߟߊߛߊ߬ ߣߎߤߎ߲߫ ( ߕߊ߬ߡߌ߲) ߞߐ߫؟ ߌ ߡߊ߰ߙߌ ߘߏ߲߬ ߥߛߊ߬ ߘߊ߫ ߞߟߊ߬ߡߊ߬ߓߊ߯ ߘߌ߫ ߸ ߊ߬ ߣߌ߫ ߦߋߟߌߓߊ߯ ߘߌ߫ ߊ߬ ߟߊ߫ ߖߐ߲߭ ߠߎ߫ ߖߟߎ߬ߡߎ߲ ߠߎ߬ ߟߊ߫ ﴿17﴾

ߡߍ߲ ߓߊ߯ ߞߍ߫ ߞߌߢߍ߲߫ ߝߍ߬ ߸ ߊ߲ ߘߌ߫ ߝߋ߲߫ ߠߊߞߌߢߍ߫ ߏ߬ ߦߋ߫ ߡߍ߲ ߓߊ߯ ߒ߬ ߘߌߦߊ߫ ، ߊ߲ ߘߏ߲߬ ߏ߬ ߞߍ߫ ߟߊ߫ ߡߐ߰ ߟߋ߬ ߦߋ߫ ߸ ߒ߬ ߓߊ߯ ߊ߬ ߟߊߢߌߣߌ߲߫ ߡߍ߲ ߦߋ߫ ، ߊ߲ ߘߌ߫ ߓߊ߲߫ ߞߊ߬ ߔߊߦߌߔߊߦߌ ߞߴߏ߬ ߢߍߛߌ߮ ߘߌ߫ ߸ ߊ߬ ߘߌ߫ ߘߏ߲߬ ߏ߬ ߘߐ߫ ߸ ߞߵߊ߬ ߕߘߍ߬ ߊ߬ ߦߋ߫ ߣߊ߬ߣߌ߲߬ߕߊ߫ ߘߌ߫ ߸ ߊ߬ ߦߋ߫ ߜߍ߲ߕߊ߫ ߘߌ߫ ﴿18﴾

ߣߌ߫ ߡߍ߲ ߘߏ߲߬ ߞߍ߫ ߘߊ߫ ߛߎ߬ߟߊ߫ ߝߍ߬ ߸ ߊ߬ ߘߏ߲߬ ߞߊ߬ ߦߋ߲߬ ߓߊ߯ߙߊ ߞߍ߫ ߞߵߊ߬ ߕߘߍ߬ ߊ߬ ߦߋ߫ ߘߍ߲߬ߞߣߍ߬ߦߊ߬ߓߊ߯ ߘߌ߫ ߸ ߒ߬ߓߊ߬ ߏ߬ ߟߎ߫ ߟߋ߬ ߟߊ߫ ߓߊ߯ߙߊ ߦߋ߫ ߞߏߢߌߡߊߟߐ߲ߕߊ ߘߌ߫ ﴿19﴾

ߘߐ ߢߌ߲߬ ߠߎ߫ ߏ߱ ߸ ߘߐ ߢߌ߲߬ ߠߎ߬ ߝߣߊ߫ ߏ߱ ߸ ߊ߲ ߘߴߊ߬ߟߎ߫ ߞߋ߬ߟߋ߲߬ߞߋ߬ߟߋ߲߬ߣߊ ߓߍ߯ ߖߘߌ߫ ߌ ߡߊ߰ߙߌ ߟߊ߫ ߛߐߟߌ ߘߐ߫ ߸ ߌ ߡߊ߰ߙߌ ߟߊ߫ ߛߐߟߌ ߘߏ߲߬ ߕߍ߫ ߞߎ߬ߡߊ߲߬ߘߌ߬ߕߊ߫ ߘߌ߫ ( ߡߐ߰ ߛߌ߫ ߡߊ߬) ﴿20﴾

ߊ߬ ߝߟߍ߫ ߓߊ߫ ߸ ߊ߲ ߣߵߊ߬ߟߎ߬ ߘߏ߫ ߟߊߝߌ߬ߛߦߊ߬ ߟߊ߫ ߘߏ߫ ߘߌ߫ ߢߊ ߡߍ߲ ، ߛߎ߬ߟߊ߫ ߟߋ߬ ߘߏ߲߬ ߟߐ߬ߦߌ߬ߟߊ߬ ߞߏ ߟߎ߫ ߓߏ߲߬ߓߊ߫ ߸ ߊ߬ ߝߌ߬ߛߡߊ߬ߒ߬ߕߋ߬ߦߊ߬ ߞߏ ߝߣߊ߫ ߓߏ߲߬ߓߊ߫ ﴿21﴾

ߌ ߞߊߣߊ߬ ߡߊ߰ߙߌ߬ ߜߘߍ߫ ߞߍ߫ ߊߟߊ߫ ߝߍ߬ ߘߋ߬ ، ߏ߬ ߓߊ߯ ߞߍ߫ ߌ ߘߴߌ ߛߌ߰ ߌ ߣߊ߬ߣߌ߲߬ߣߍ߲߫ ߸ ߌ ߟߊߓߌ߬ߟߊ߬ߣߍ߲߫ ﴿22﴾

ߌ ߡߊ߰ߙߌ ߞߊ߬ ߖߡߊ߬ߙߌ߬ߒ߬ߞߊ߲߬ߠߊ ߟߊߕߍ߰ ߟߋ߬ ߸ ߞߏ߫ ߊߟߎ߫ ߞߊߣߊ߬ ߝߏߦߌ߫ ߓߊ߬ߕߏ߬ ߊ߬ߟߋ߬ ߞߐ߫ ߸ ߊ߬ ߣߌ߫ ߞߊ߬ ߢߊ߬ ߡߏߦߌߓߊ߯ ߝߌ߬ߟߊ ߟߊ߫ ߸ ߣߴߊ߬ߟߎ߬ ߞߋߟߋ߲߫ ߥߟߴߊ߬ߟߎ߫ ߝߌ߬ߟߊ ߛߋ߫ ߘߊ߫ ߞߐ߬ߘߐ ߡߊ߬ ߌ ߓߟߏ߫ ߸ ߌ ߞߊߣߵߊ߬ ߝߐ߫ ߊ߬ߟߎ߫ ߡߊ߬ ߘߋ߬ ߞߏ߫ ߡߐߚߐ߫ ߸ ߌ ߘߏ߲߬ ߞߴߊ߬ߟߎ߬ ߟߊߜߎ߬ߝߎ߲߬ ، ߌ ߦߋ߫ ߞߎߡߊ߫ ߣߐ߲߯ ߠߋ߬ ߝߐ߫ ߊ߬ߟߎ߬ ߦߋ߫ ﴿23﴾

ߌ ߦߋ߫ ߖߘߍ߬ߘߐ߯ߦߊ ߞߊ߬ߡߊ߲ ߠߋ߬ ߡߊߖߌ߰ ߊ߬ߟߎ߬ ߦߋ߫ ߤߌߣߊ ߞߐ߬ߣߐߡߊ߬ ، ߊ߬ ߣߴߌ ߦߴߊ߬ ߝߐ߫ ߛߐ߲߬ ߸ ߞߏ߫ ߒ ߡߊ߰ߙߌ ߤߌߣߴߊ߬ߟߎ߫ ߝߌ߬ߟߊ ߟߊ߫ ߸ ߦߏ߫ ߊ߬ߟߎ߫ ߞߊ߬ ߒ ߘߐ߰ߡߊ߲߬ߣߍ߲ ߟߊߡߐ߬ ߢߊ ߡߍ߲ ﴿24﴾

ߊߟߎ߫ ߡߊ߰ߙߌ ߟߋ߫ ߞߵߊ߬ ߟߐ߲߫ ߡߍ߲ ߦߴߊߟߎ߫ ߣߌ ߘߐ߫ ، ߣߴߊߟߎ߫ ߞߍ߫ ߘߊ߫ ߟߢߊ߬ߟߌ߬ߟߊ߫ ߟߎ߫ ߘߌ߫ ߸ ߊ߬ߟߋ߬ ߝߣߊ߫ ߦߋ߫ ߦߝߊ߬ߓߊ߯ ߟߋ߬ ߘߌ߫ ߖߘߍ߬ߟߛߊ߬ߦߌ߬ߟߊ ߟߎ߬ ߦߋ߫ ﴿25﴾

ߌ ߦߋ߫ ߡߊ߬ߛߎ߬ߘߎ߲߬ߧߊ߬ߓߊ߮ ߛߐ߫ ߊ߬ ߤߊߞߍ ߟߊ߫ ߸ ߊ߬ ߣߌ߫ ߘߐ߰ߕߐ ߣߌ߫ ߛߌߟߊߘߋ߲ ، ߞߏ߬ߣߌ߲߬ ߌ ߞߊߣߊ߬ ߝߏ߬ߦߌ߬ߟߌ ߞߍ߫ ߝߏ߬ߦߌ߬ߝߏ߬ߦߌ߬ߟߌ ߘߌ߫ ߘߋ߬ ﴿26﴾

ߓߊߏ߬ ߖߊ߯ߕߋ߬ ߸ ߝߏ߬ߦߟߌ߬ߟߊ ߟߎ߬ ߦߋ߫ ߜߍ߬ߘߍ ߟߎ߬ ߓߊߘߋ߲ ߠߎ߫ ߟߋ߬ ߘߌ߫ ߸ ߜߍ߬ߘߍ ߘߏ߲߬ ߓߊ߲߬ߣߍ߲߫ ߠߴߊ߬ ߡߊ߰ߙߌ ߘߐ߫ ﴿27﴾

ߣߴߌ ߞߊ߬ ߞߴߌ ߞߐߘߏ߲߬ ߠߊ߫ ( ߌ ߟߊ߫ ߡߐ߰ ߛߐߕߊ ) ߟߎ߬ ߓߟߏ߫ ߸ ߞߵߊ߬ ߕߘߍ߬ ߌ ߦߟߌ߫ ߦߋ߫ ߡߊ߬ߞߏ ߘߏ߫ ߟߊ߫ ߌ ߡߊ߰ߙߌ ߝߍ߬ ߌ ߦߴߏ߬ ߢߌߣߌ߲ ߞߊ߲߬ ߸ ߏ߬ ߘߐ߫ ߌ ߦߋ߫ ߞߎߡߊ߫ ߣߐ߲߯ ߠߋ߬ ߝߐ߫ ߊ߬ߟߎ߬ ߦߋ߫ ﴿28﴾

ߌ ߞߴߌ ߓߟߏ ߞߏߟߏ߲ߜߊ߲ߦߊ߫ ߘߋ߬ ߞߵߊ߬ ߟߴߌ ߞߊ߲ ߝߍ߬ ، ߌ ߘߴߌ ߛߌ߰ ߡߊ߲߬ߜߏߦߊ ߘߐ߫ ߏ߬ ߘߐ߫ ، ߌ ߘߏ߲߬ ߞߴߊ߬ ߘߐߝߎߟߋ߲߫ ߘߐ߬ߝߎ߬ߟߋ߲߬ߠߌ߲ ߡߎ߰ߡߍ ߟߊ߫ ߸ ߌ ߘߴߌ ߛߌ߰ ߞߏ߬ߙߌ ߕߍߡߊ߬ ߏ߬ ߘߐ߫ ﴿29﴾

ߌ ߡߊ߰ߙߌ ߦߋ߫ ߤߊ߬ߙߌ߬ߖߍ߮ ߘߐߝߎߟߋ߲߫ ߠߊ߫ ߡߐ߰ ߟߋ߬ ߦߋ߫ ߡߍ߲ ߓߊ߯ ߊ߬ ߘߌߦߊ߫ ، ߊ߬ ߣߴߊ߬ ߦߴߊ߬ ߜߟߍ߬ߦߊ߬ ߟߊ߫ ߝߣߊ߫ ، ߊ߬ ߘߏ߲߬ ߦߋ߫ ߞߟߊ߬ߡߊ߬ߓߊ߯ ߦߋߟߌߓߊ߯ ߟߋ߬ ߘߌ߫ ߊ߬ ߟߊ߫ ߖߐ߲߭ ߠߎ߫ ( ߟߌ߬ߤߟߊ ) ߟߊ߫ ﴿30﴾

ߊߟߎ߫ ߞߊߣߵߊߟߎ߫ ߘߋ߲ ߠߎ߫ ߝߊ߰ ߘߐ߰ ߢߍߛߌߟߊ߲ߢߍ ߡߊ߬ ، ߒ߬ߠߎ߫ ߟߴߏ߬ ߟߎ߬ ߣߴߊߟߎ ߓߊߟߏ߫ ߟߊ߫ ، ߤߊ߲߫ ߸ ߏ߬ ߟߎ߫ ߝߊ߱ ߦߋ߫ ߝߎ߬ߕߎ߲߬ߕߌ߬ߓߊ߫ ߟߋ߬ ߘߌ߫ ߘߋ߬ ﴿31﴾

ߊߟߎ߫ ߞߊߣߵߊߟߎ߫ ߡߊߘߏ߲߬ ߢߊ߬ߡߐ߰ߦߊ ߟߊ߫ ߝߋߎ߫ ، ߓߊ ߏ߬ ߦߋ߫ ߞߏߙߏ߲ߧߊ ߟߋ߬ ߘߌ߫ ߸ ߊ߬ ߣߴߊ߬ ߦߋ߫ ߛߌߟߊ߫ ߖߎ߯ߓߊ߫ ߟߋ߬ ߘߌ߫ ﴿32﴾

ߊߟߎ߫ ߞߊߣߊ߬ ߣߌ ߝߊ߰ ߊߟߊ߫ ߣߊ߬ ߡߍ߲ ߠߊߕߐ߲߫ ߠߊ߫ ߸ ߝߏ߫ ߊ߰ ߞߍ߫ ߕߎ߬ߢߊ ߞߎ߲߬ߠߊ߫ ، ߡߍ߲ ߓߊ߯ ߝߊ߰ ߕߐ߬ߢߍ߮ ߟߊ߫ ߸ ߊ߲ ߓߘߊ߫ ߘߊ߬ߟߎ߬ ߘߴߏ߬ ߓߘߊߡߐ߮ ߡߊ߬ ( ߕߊ߫ ߛߙߊ ߘߐ߫ ) ߸ ߞߏ߬ߣߵߊ߬ ߞߊߣߊ߬ ߘߊ߲߬ߠߊ߬ߕߊߡߌ߲ ߞߍ߫ ߝߊ߰ߟߌ ( ߕߊߢߐ߲߯ߓߐ ) ߘߐ߫ ߘߋ߬ ߸ ߓߊߏ߬ ߊ߬ߟߋ ߟߋ߫ ߘߍ߬ߡߍ߲߬ߕߊ ߘߌ߫ ( ߛߊ߬ߙߌ߬ߦߊ ߓߟߏ߫) ﴿33﴾

ߊߟߎ߫ ߘߏ߲߬ ߞߊߣߵߊߟߎ߫ ߡߊߘߏ߲߬ ߝߊߙߌߕߊ ߟߊ߫ ߣߊ߲߬ߝߟߏ ߟߊ߫ ߝߋߎ߫ ߣߴߊ߬ ߟߊߢߊ߬ߕߐ ߕߍ߫ ، ߝߏ߫ ߊ߬ ߦߋ߫ ߛߴߊ߬ ߞߎ߲߬ߡߊ߬ߞߘߎ ߥߊ߯ߕߌ ߡߊ߬ ، ߊߟߎ߫ ߦߋ߫ ߟߊ߬ߤߘߌ ߝߊ߫ ߘߋ߬ ߸ ߓߊ ߟߊ߬ߤߘߌ ߦߋ߫ ߡߊߢߌ߬ߣߌ߲߬ߞߊ߬ߕߊ߫ ߟߋ߬ ߘߌ߫ ﴿34﴾

ߊߟߎ߫ ߓߊ߯ ߞߍ߫ ߛߎߡߊ߲ߠߌ߲ ߞߍ߫ ߟߊ߫ ߸ ߊߟߎ߫ ߦߋ߫ ߛߎߡߊ߲ߠߌ߲ ߓߎߟߋߓߎߟߋ ߞߍ߫ ، ߊ߬ ߣߴߊߟߎ߫ ߦߋ߫ ߖߌߘߊ߲߫ ߕߊ ߞߍ߫ ߡߊ߲߬ߕߊ߰ ߕߋߟߋ߲ߣߍ߲ ߠߋ߬ ߟߊ߫ ، ߓߊ ߏ߬ ߟߋ ߞߊ߫ ߢߌ߲߬ ߸ ߞߐߝߟߌ߫ ߢߌߡߊ߫ ߘߏ߲߬ ߏ߬ ߟߋ ߟߊ߫ ﴿35﴾

ߌ ߞߊߣߊ߬ ߞߏ߫ ߟߊߓߊ߬ߕߏ߬ ߌ ߡߊ߫ ߡߍ߲ ߢߊߟߐ߲߫ ߸ ߓߊ ߕߟߏߘߋ߲ ߣߌ߫ ߢߊ ߣߌ߫ ߛߣߐ߬ߡߍ ߓߍ߯ ߣߊ߬ߕߐ߫ ߡߊߢߌ߬ߣߌ߲߬ߞߊ߬ ߟߊ߫ ߟߋ߬ ( ߊ߬ ߕߌ߱ ߟߊ߫) ﴿36﴾

ߌ ߞߣߊ߫ ߢߊ߲߬ߞߊ߲߬ ߕߊ߯ߡߊ ߞߍ߫ ߘߎ߱ ߞߊ߲߬ ߸ ߓߊ ߌ ߕߍߣߊ߬ ߘߎ߱ ߝߙߊ߫ ߟߊ߫ ߸ ߌ ߘߏ߲߬ ߕߍߣߊ߬ ߛߋ߫ ߟߊ߫ ߞߎ߬ߙߎ ߟߎ߬ ߘߐ߫ ߖߊ߲߬ߧߊ ߘߐ߫ ﴿37﴾

ߏ߬ ߓߍ߯ ߦߋ߫ ߞߏߖߎ߯ ߟߋ߬ ߘߌ߫ ߸ ߡߍ߲ ߠߎ߬ ߜߏߡߊ߲ߓߊ ߦߴߌ ߡߊ߰ߙߌ ߦߋ߫ ߔߐ߫ ﴿38﴾

ߢߌ߲߬ ߠߎ߬ ߓߐߣߍ߲߫ ߥߘߋ߬ߥߘߋ߬ߟߌ߬ ߞߊ߲߫ ߠߋ߬ ߘߐ߫ ߸ ߌ ߡߊ߰ߙߌ ߞߵߌ ߦߟߌߘߏ߲߬ ߡߍ߲ ߠߊ߫ ، ߌ ߘߏ߲߬ ߞߊߣߊ߬ ߡߊ߰ߙߌ߬ ߜߘߍ߫ ߞߍ߫ ߊߟߊ߫ ߝߍ߬ ߘߋ߬ ، ߓߊ ߌ ߘߌ߫ ߟߊߝߟߌ߬ ߔߊߦߌߔߊߦߌ ߘߐ߫ ߏ߬ ߘߐ߫ ߸ ߞߵߊ߬ ߕߘߍ߬ ߌ ߦߋ߫ ߖߙߊ߬ߞߌ߬ߕߊ߫ ߘߌ߫ ߸ ߌ ߦߋ߫ ߜߍ߲ߕߊ߫ ߘߌ߫ ﴿39﴾

ߦߊ߯ߟߊ߫ ߊߟߎ߫ ߡߊ߰ߙߌ ߟߋ߫ ߞߵߊߟߎ߫ ߞߙߍߞߙߍ߫ ߘߋ߲ߞߍ ߟߎ߬ ߟߊ߫ ߓߊ߬ ߸ ߞߊ߬ ߡߟߍ߬ߞߊ ߟߎ߬ ߕߏ߫ ߊ߬ ߖߍ߬ߘߍ ߓߟߏ߫ ߡߛߏ߬ߡߊ߲ ߠߎ߬ ߘߌ߫؟ ، ߒ߬ߓߵߊߟߎ߫ ߦߋ߫ ߞߎߡߓߊ߫ ߝߐ߫ ߟߊ߫ ( ߏ߬ ߘߌ߫ ) ߞߟߋ߫ ﴿40﴾

ߊ߲ ߘߏ߲߬ ߣߊ߬ ߘߐ߬ߛߊ߬ߦߌ߬ߛߊ߬ߦߌ߬ߟߌ ߞߍ߫ ߟߊ߫ ߞߎ߬ߙߊ߬ߣߊ ߢߌ߲߬ ߘߐ߫ ߟߋ߬ ߸ ߛߴߊ߬ߟߎ߬ ߘߴߊ߬ߟߎ߫ ߕߊ߰ߛߌ߫ ، ߏ߬ ߘߏ߲߬ ߝߊ߲߭ ߕߍ߫ ߕߊ߬ߡߌ߲߬ ߠߴߊ߬ߟߎ߬ ߖߘߌ߫ ߟߊ߫ ߝߏߦߌ߬ ߟߊ߫ ߝߏ߫ ߣߎ߲ߞߘߐߕߊ ﴿41﴾

ߊ߬ ߟߊߛߋ߫ ߞߏ߫ ߣߌ߫ ߡߊ߰ߙߌ߬ ߜߘߍ߫ ߟߎ߫ ( ߕߎ߲߬ ) ߞߍ߫ ߘߴߊߟߊ߫ ߝߍ߬ ߦߏ߫ ߊ߬ߟߎ߬ ߞߊ߲߫ ߊ߬ ߝߐ߫ ߟߊ߫ ߢߊ ߡߍ߲ ߸ ߏ߬ ߟߎ߫ ߕߘߍ߬ ߘߌ߫ ߛߌߟߊ߫ ߢߌߣߌ߲߫ ( ߞߵߊ߬ ߟߐ߬ ) ߛߍ߬ߡߍ ߕߌ߱ ߡߊ߬ ߟߋ߬ ߘߍ߯ ﴿42﴾

(ߞߏ߬ߣߌ߲߬ ) ߊߟߊ߫ ߛߊߣߌ߲ߡߊ߲߫ ߸ ߊ߬ ߣߴߊ߬ ߞߘߐߕߊ߬ߣߍ߲߫ ߊ߬ߟߎ߬ ߘߊߘߐߞߊ߲ ߏ߬ ߡߊ߬ ߸ ߞߘߐߕߊߟߌ߫ ߓߟߋ߬ߓߟߋ ߟߊ߫ ﴿43﴾

ߛߊ߲߫ ߥߐߙߐ߲ߥߌ߬ߟߊ ߣߌ߫ ߘߎ߱ ߦߋ߫ ߛߊߣߌ߲ߧߊ ߝߐ߫ ߟߴߊ߬ ߦߋ߫ ߸ ߊ߬ ߣߴߏ߬ ߟߎ߬ ߞߣߐ߫ ߝߋ߲ ߠߎ߬ ، ߝߋ߲߫ ߛߌ߫ ߘߏ߲߬ ߕߍ߫ ߸ ߡߍ߲ ߕߴߊ߬ ߛߊߣߌ߲ߧߊ ߝߐ߫ ߟߊ߫ ߸ ߞߵߏ߬ ߟߴߊ߬ ߕߊ߲߬ߘߏ ߞߊ߲߬ ، ߓߊ߬ߙߌ߬ ߊߟߎ ߟߋ߬ ߕߴߏ߬ ߟߎ߬ ߟߊ߫ ߛߊߣߌ߲ߧߊ߫ ߝߐ߫ ߢߊ ߝߊ߰ߡߎ߲߬ ߠߊ߫ ، ߓߊߏ߬ ߖߊ߯ߕߋ߬ ߸ ߊߟߊ߫ ߦߋ߫ ߡߎ߬ߢߎ߲߬ߓߊ߯ ߦߝߊ߬ߓߊ߮ ߟߋ߬ ߘߌ߫ ﴿44﴾

ߌ ߓߊ߯ ߞߍ߫ ߞߎ߬ߙߊ߬ߣߊ ߞߊ߬ߙߊ߲߬ ߠߊ߫ ߸ ߊ߲ ߘߌ߫ ߥߊ߬ߣߊߙߌ߫ ߛߎ߬ߕߙߊ߬ߣߍ߲ ߘߏ߲߬ ߌ ߣߌ߫ ߟߊߞߌߙߊ߫ ߞߏ ߘߍ߲߬ߞߣߍ߬ߦߊ߬ߓߊߟߌ ߟߎ߬ ߕߍ߫ ﴿45﴾

ߊ߲ ߘߏ߲߬ ߣߊ߬ ߘߊߕߎ߲߯ ߠߎ߫ ߟߋ߬ ߞߍ߫ ߟߴߊ߬ߟߎ߫ ߛߣߐ߬ߡߍ ߟߎ߬ ߟߊ߫ ߊ߬ߟߎ߬ ߞߊߣߊ߬ ‹ ߞߎ߬ߙߊ߬ߣߊ› ߝߊ߰ߡߎ߲߬ ، ߊ߬ ߣߌ߫ ߞߊ߬ ߜߋߘߋ߲ߟߊ߲߫ ߞߍ߫ ߊ߬ߟߎ߬ ߕߟߏ ߟߎ߬ ߟߊ߫ ߔߋ߲߫ ، ߌ ߓߴߌ ߡߊ߰ߙߌ ߞߏߝߐ߫ ߞߎ߬ߙߊ߬ߣߊ ߞߣߐ߫ ߏ߬ ߘߐ߫ ߸ ߞߏ߫ ߊ߬ ߞߋߟߋ߲߫ ߔߋ߫ ߟߋ߬ ߸ ߊ߬ߟߎ߬ ߘߴߊ߬ߟߎ߬ ߞߐߘߏ߲߬ ߣߎ߲ߞߘߐߕߊ ߘߌ߫ ߔߏ߲߫ ﴿46﴾

ߊ߲ߠߎ߫ ߞߵߊ߬ ߟߐ߲߫ ߖߐ߫ ߊ߬ߟߎ߬ ߦߴߊ߬ߟߎ߬ ߕߟߏߡߊߟߐ߬ ߟߊ߫ ߞߎ߲߭ ߡߍ߲ ߠߊ߫ ، ߊ߬ߟߎ߬ ߦߴߊ߬ߟߎ߬ ߕߟߏߡߊߟߐ߬ ߟߴߌ ߟߊ߫ ߟߋ߬ ߸ ߞߊ߬ ߓߊ߲߫ ߞߊ߬ ߥߴߊ߬ ߞߍ߫ ߢߐ߲߯ߦߋ ߘߌ߫ ، ߏ߬ ߕߎ߬ߡߊ ߟߊ߫ ߸ ߕߐ߬ߢߍ߰ߒߕߋ ߟߎ߬ ߦߴߊ߬ ߝߐ߫ ߟߊ߫ ( ߢߐ߲߯ߦߋ ߘߐ߫ ߟߋ߬ ) ߸ ߞߏ߫ ߊߟߎ߫ ߕߍ߫ ߝߏߦߌ߬ ߟߊߓߊ߬ߕߏ ߞߊ߲߬ ߣߌ߲߬ ߝߏ߫ ߗߍ߬ ߘߓߊ߬ߙߌ߬ߣߍ߲ ﴿47﴾

ߊ߬ ߝߟߍ߫ ߓߊ߫߸ ߊ߬ߟߎ߬ ߦߋ߫ ߛߊ߲߬ߘߊ ߟߎ߬ ߟߊ߫ ߟߴߌߟߋ ߡߊ߬ ߢߊ ߡߍ߲ ߝߎߚߎ߫ ߸ ߝߏ߫ ߞߵߊ߬ߟߎ߬ ߞߣߐߘߐߝߟߌ߬ ߸ ߊ߬ߟߎ߬ ߕߍ߫ ߛߌߟߊ߫ ߛߌ߫ ߟߊߣߐ߬ ߟߊ߫ ߡߎ߬ߕߎ߲߬ ﴿48﴾

ߊ߬ߟߎ߫ ߝߊ߲߭ ߞߊ߲߫ ߠߋ߬ ߸ ߞߏ߫ ߊ߬ ߝߐ߫ ߣߴߊ߲ ߞߍ߫ ߘߊ߫ ߞߟߏ߫ ߜߛߊߞߙߊ ߟߎ߬ ߣߴߊ߬ ߡߎ߰ߡߎ߰ߣߍ߲ ߠߎ߬ ߘߌ߫ ߕߎ߬ߡߊ ߡߍ߲ ߸ ߦߊ߯ߟߊ߫ ߒ߬ ߘߌ߫ ߟߊߥߟߌ߬ ߘߊ߲ߠߌ߲߫ ߞߎߘߊ߫ ߘߐ߫ ߓߊ߬؟ ﴿49﴾

ߊ߬ߟߎ߫ ߖߋ߬ߓߌ߬ ߸ ߞߏ߫ ߊߟߎ߯ ߞߍ߫ ߝߘߊ ߘߌ߫ ߥߟߊ߫ ߣߍ߱ ߘߌ߫ ﴿50﴾

ߤߊߡߊ߲ߕߍ߫ ߘߊ߲ߝߋ߲߫ ߜߘߍ߫ ߘߌ߫ ߡߍ߲ ߘߌ߫ ߓߏ߲߬ߧߵߊߟߎ߫ ߛߣߐ߬ߡߍ ߟߎ߬ ߘߐ߫ ، ߊ߬ߟߎ߬ ߘߌߣߵߊ߬ ߝߐ߫ ߏ߬ ߘߐ߫ ߸ ߞߏ߫ ߖߍߣߍ߲ ߞߍߕߐ߫ ߒ߬ ߠߊߛߊ߬ߦߌ߬ ߟߊ߫ ( ߢߣߊߡߦߊ ߘߐ߫ )؟ ߌ ߦߴߊ߬ߟߎ߫ ߖߋ߬ߓߌ߬ ߸ ߞߏ߫ ߡߍ߲ ߞߵߊߟߎ߫ ߛߌ߲ߘߌ߫ ߛߋ߲߬ߧߊ߬ ߝߟߐ ߘߐ߫ ߞߍ߬ ، ߊ߬ߟߎ߬ ߘߴߊ߬ߟߎ߫ ߞߎ߲߭ ߠߎ߬ ߘߐߘߐ߲߬ ߌ ߡߊ߬ ߏ߬ ߘߐ߫ ߸ ߞߵߊ߬ ߝߐ߫ ߞߴߏ߬ ߞߍߕߐ߫ ߕߎ߬ߡߊ ߢߌ߬ߡߊ߲߬؟ ߌ ߦߴߊ߬ߟߎ߫ ߖߋ߬ߓߌ߬ ߸ ߞߏ߫ ߊ߬ ߢߐ߲߰ߘߐ߫ ߊ߬ ߛߎ߬ߘߎ߲߬ߧߊ߬ߣߍ߲߫ ߣߊ߬ ߞߍ߫ ﴿51﴾

ߟߏ߲ ߏ߬ ߓߊ߯ ߛߋ߫ ߸ ‹ ߊߟߊ߫ › ߘߴߊߟߎ߫ ߞߟߌ߫ ، ߊߟߎ߫ ߘߏ߲߬ ߘߌ߫ ߖߋ߬ߓߌ߬ߟߌ ߞߍ߫ ߊ߬ ߕߊ߲߬ߘߏ ߘߌ߫ ، ߊ߬ ߣߴߊߟߎ߫ ߘߴߊ߬ ߖߌ߰ ߞߏ߫ ߊߟߎ߫ ߡߊ߫ ߥߛߎ߬ ߛߌ߫ ߞߍ߫ ߝߏ߫ ߕߜߋߣߍ߲߫ ﴿52﴾

ߊ߬ ߟߊߛߋ߫ ߒ߬ ߠߊ߫ ߖߐ߲߭ ߠߎ߫ ߡߊ߬ ߸ ߞߏ߫ ߊ߬ߟߎ߬ ߦߋ߫ ߝߋ߲߫ ߠߋ߬ ߝߐ߫ ߸ ߡߍ߲ ߞߊ߫ ߢߌ߲߬ ، ߓߊߏ߬ ߜߍ߬ߘߍ ߟߴߊ߬ߟߎ߬ ߕߍ ߕߌߢߍ߫ ߟߊ߫ ، ߖߊ߯ߕߋ߬ ߸ ߜߍ߬ߘߍ ߦߋ߫ ߡߐ߱ ߖߎ߯ ߘߐߜߍ ߟߋ߬ ߘߌ߫ ﴿53﴾

ߊߟߎ߫ ߡߊ߰ߙߌ ߟߋ߫ ߞߵߊߟߎ߫ ߟߐ߲߫ ߸ ߣߴߊ߬ ߞߵߊ߬ ߘߌߦߊ߫ ߊ߬ ߘߌ߫ ߤߌߣߴߊߟߎ߫ ߟߊ߫ ߸ ߥߟߊ߫ ߣߴߊ߬ ߞߵߊ߬ ߘߌߦߊ߫ ߊ߬ ߘߴߊߟߎ߫ ߖߊ߲߰ߞߕߊ߫ ، ߊ߲ ߞߏ߬ߣߌ߲ ߡߴߌ ߗߋ߫ ߊ߬ߟߎ߬ ߞߊ߲ߡߊ߬ ߜߋ߬ߟߎ߲߬ߠߌ߲߬ߓߊ߯ ߘߌ߫ ﴿54﴾

ߌ ߡߊ߰ߙߌ ߟߋ߫ ߞߵߊ߬ ߟߐ߲߫ ( ߣߌߡߊ ) ߡߍ߲ ߠߎ߬ ߦߋ߫ ߛߊ߲ ߠߎ߬ ߣߌ߫ ߘߎ߱ ߞߣߐ߫ ߸ ߊ߲ ߘߏ߲߬ ߞߊ߬ ߟߊ߬ߝߐ߬ߓߊ߮ ߘߏ߫ ߟߊߝߌ߬ߛߦߊ߬ ߘߏ߫ ߘߌ߫ ߟߋ߬ ، ߊ߲ ߞߊ߬ ߘߊߎߘߊ߫ ߟߋ߬ ߛߐ߫ ߞߏ߬ߣߌ߲߬ߛߋ߲ ߠߊ߫ ( ߖߊ߬ߓߎ߯ߙߌ ߞߊ߬ߣߌ߲߫) ﴿55﴾

ߊ߬ ߟߊߛߋ߫ ߞߏ߫ ߊߟߎ߫ ߡߍ߲ ߠߎ߬ ߜߊߟߏ߲߫ ߠߴߊߟߎ߫ ߟߊ߫ ( ߡߊ߰ߙߌ ߟߎ߬ ߘߌ߫ ) ߞߵߊߟߊ߫ ߕߏ߫ ߸ ߊߟߎ߯ ߏ߬ ߟߎ߬ ߞߟߌ߫ ߟߋ߬ ߞߟߋ߫ ، ߓߊ߬ߙߌ߬ ߏ߬ ߟߎ߬ ߕߍ߫ ߕߙߐߦߊ ߟߊߥߌ߬ߟߌ ߣߴߊ߬ ߦߟߍ߬ߡߊ߲ ߛߌ߫ ߣߐ߬ ߟߊ߫ ߞߊ߬ ߓߐ߫ ߊߟߎ߫ ߞߊ߲߬ ﴿56﴾

ߊߟߎ߫ ߘߏ߲߬ ߦߋ߫ ߡߍ߲ ߠߎ߬ ߞߟߌ߫ ߟߊ߫ ߸ ߏ߬ ߟߎ߫ ߖߍ߬ߘߍ ߟߋ߫ ߛߊ߲߬ߞߊ߬ߟߊ߲߬ߦߊ ߓߍ߯ ߘߐ߫ ߛߎ߬ߘߎ߲߬ߡߊ߲ ߢߌߣߌ߲߫ ߠߴߊ߬ߟߎ߫ ߡߊ߰ߙߌ ߝߍ߬ ، ߊ߬ ߣߴߊ߬ߟߎ߬ ߦߴߊ߬ߟߎ߬ ߦߟߌߛߌ߰ ߟߴߊ߬ ߟߊ߫ ߤߌߣߊ ߟߊ߫ ߸ ߞߊ߬ ߛߌߟߊ߲߫ ߊ߬ ߟߊ߫ ߖߊ߲߰ߞߕߊ ߢߍ߫ ، ߓߊߏ߬ ߌ ߡߊ߰ߙߌ ߟߊ߫ ߖߊ߲߰ߞߕߊ ߦߋ߫ ߡߊ߬ߕߊ߲߬ߞߊ߬ ߝߋ߲߫ ߠߋ߬ ߘߌ߫ ﴿57﴾

ߛߏ߫ ߛߌ߫ ߕߍ߫ ߸ ߝߏ߫ ߒ߬ߠߎ߬ ߦߴߏ߬ ߛߌߟߊߛߊ߬ ߟߐ߬ߓߊ ߟߏ߲ ߢߍ߫ ، ߥߟߴߊ߲ ߧߴߊ߬ ߖߊ߲߰ߞߕߊ߫ ߖߊ߲߰ߞߕߊ߬ ߜߍߟߍ߲ ߠߊ߫ ، ߏ ߘߏ߲߬ ߛߓߍߣߍ߲߫ ߠߋ߬ ߟߍߙߊ ߞߣߐ߫ ﴿58﴾

ߝߏߦߌ߬ ߡߴߊ߲ ߞߎ߬ߡߊ߲߬ߘߌ߫ ߡߊ߲߬ߕߊߣߌ߲ ߠߎ߬ ߗߋ ߡߊ߬ ߸ ߝߏ߫ ߝߟߐ߫ ߡߐ߮ ߟߎ߫ ߞߵߊ߬ߟߎ߬ ߡߊߛߐ߬ߛߐ ߡߍ߲ ߞߍ߫ ، ߊ߲ ߞߊ߬ ߢߐ߯ߡߍ߫ ߡߛߏ ߘߌ߫ ߛߊ߬ߡߎߘߊ ߟߎ߫ ߡߊ߬ ( ߞߵߊ߬ ߞߍ߫ ) ߜߍߘߐߦߋߕߊ ߘߌ߫ ߸ ߏ߬ ߟߎ߫ ߞߵߊ߬ߟߎ߫ ߓߊ߲߬ ߏ߬ ߘߐ߫ ، ߊ߲ ߘߏ߲߬ ߕߍ߫ ߞߋߟߊ ߟߎ߬ ߗߋ߫ ߟߊ߫ ߡߊ߲߬ߕߊߣߌ߲ ߠߎ߬ ߘߌ߫ ߞߎ߲߬ ߛߌ߫ ߟߊ߫ ߸ ߝߏ߫ ߘߐ߬ߛߌ߬ߟߊ߲߬ߠߌ߲ ﴿59﴾

ߕߎ߬ߡߊ ߘߏ߫ ߟߊ߫ ߸ ߊ߲ ߞߵߊ߬ ߝߐ߫ ߌ ߦߋ߫ ߒ ߞߴߌ ߡߊ߰ߙߌ ߣߊ߬ ߡߐ߱ ߟߎ߬ ߟߊߝߏ߬ ߟߊ߫ ߟߋ߬ ߔߘߋߞߎ߬ ، ߊ߲ ߘߏ߲߬ ߞߊ߬ ߛߌ߬ߓߏ ߡߍ߲ ߦߘߵߌ ߟߊ߫ ߸ ߊ߬ ߣߌ߫ ߦߙߌ ߡߍ߲ ߘߊ߲ߞߊߣߍ߲߫ ߞߎ߬ߙߊ߬ߣߊ ߘߐ߫ ߸ ߊ߲ ߡߴߏ߬ ߟߎ߬ ߞߍ߫ ߞߎ߲߬ ߛߌ߫ ߟߊ߫ ߝߏ߫ ߡߐ߱ ߟߎ߬ ߞߘߐߓߐ. ߊ߲ ߧߋ߫ ߕߏ߫ ߟߴߊ߬ߟߎ߬ ߘߐߛߌߟߊ߲߫ ߠߊ߫ ߟߋ߫ ߛߐ߲߬ ߸ ߓߊ߬ߙߌ߬ ߏ߬ ߕߍ߫ ߊ߬ߟߎ߬ ߖߘߌ߫ ߟߊ߫ ߝߏߦߌ߬ ߟߊ߫ ߝߏ߫ ߘߊ߲߬ߠߊ߬ߕߊߡߌ߲߫ ߓߟߋ߬ߓߟߋ ﴿60﴾

ߕߎ߬ߡߊ ߡߍ߲ ߊ߲ ߞߵߊ߬ ߝߐ߫ ߡߟߍ߬ߞߊ ߟߎ߬ ߦߋ߫ ߸ ߒ ߞߏ߫ ߊߟߎ߫ ߕߌ߲ߓߌߘߌ߲ ߞߍ߫ ߊߘߡߊ߫ ߦߋ߫ ، ߊ߬ߟߎ߬ ( ߓߍ߯ ) ߞߊ߬ ߕߌ߲ߓߌߘߌ߲ ߞߍ߫ ߝߏ߫ ߓߙߌ߬ߛߌ߫ ، ߏ߬ ߞߊ߲߫ ߞߏ߫ ߌ߬ߦߏ߯ ߌ ߣߊ߬ ߡߍ߲ ߘߊ߲߫ ߠߊ߫ ߓߐ߱ ߘߐ߫ ߸ ߒߠߋ ߦߋ߫ ߕߌ߲ߓߌߘߌ߲ ߞߍ߫ ߏ߬ ߦߋ߫؟ ﴿61﴾

ߞߏ߫ ߊ߬ ߝߟߍ߫ ߓߊ߫ ߸ ߌ ߣߵߢߌ߲߬ ߡߍ߲ ߠߊߝߌ߬ߛߦߊ߬ ߟߊ߫ ߒߠߋ ߘߌ߫ ߣߌ߲߬ ߸ ߣߴߌ ߞߊ߬ ߒ ( ߛߌ߭ ) ߘߏ߲߰ߘߌ߫ ߞߊ߬ ߛߋ߫ ߟߐ߬ߓߊ ߟߏ߲ ߡߊ߬ ߸ ߒ ߘߴߊ߬ ߓߐ߲ߛߐ߲ ߓߍ߯ ߡߊߛߐ߬ߘߐ߲߫ ( ߞߵߊ߬ߟߎ߫ ߓߌ߬ߟߊ߬ ߒ ߣߐ߭ ߞߊ߲߬ ) ߝߏ߫ ߞߋ߬ߟߋ߲߬ߞߋߟߋ߲߫ ﴿62﴾

‹ ߊߟߊ߫ › ߞߊ߲߫ ߞߏ߫ ߕߊ߯ ߟߋ߬ ߞߟߋ߫ ، ߝߋ߲-ߋ-ߝߋ߲߫ ߞߵߊ߬ ߓߟߵߌ ߞߐ߫ ߊ߬ ( ߓߐ߲ߛߐ߲ ) ߠߎ߬ ߘߐ߫ ߸ ߔߊߦߌߔߊߦߌ ߟߋ߬ ( ߞߍߕߐ߫ ) ߊߟߎ߫ ߛߊ߬ߙߊ ߘߌ߫ ߸ ߛߙߊ߬ ߘߐߥߛߊ߬ߣߍ߲ ߠߊ߫ ﴿63﴾

ߌ ߓߊ߯ ߝߋ߲-ߋ-ߝߋ߲߫ ߡߊߣߐ߬ ߊ߬ߟߎ߬ ߘߐ߫ ߸ ߌ ߦߴߏ߬ ߡߊߞߟߴߌ ߟߊ߫ ߞߊ߲ߠߊߓߐߟߌ ߟߊ߫ ߸ ߊ߬ ߣߴߌ ߦߴߌ ߟߊ߫ ߛߏ߬ߟߊ ߟߎ߬ ߣߴߌ ߟߊ߫ ߛߋ߲߬ߠߊ߬ߡߊ ߟߎ߬ ߟߊߜߘߏ߫ ߊ߬ߟߎ߬ ߞߊ߲ߡߊ߬ ߸ ߌ ߘߏ߲߬ ߦߴߊ߬ߟߎ߫ ߜߙߊ߬ߢߐ߲߰ߦߊ߫ ߣߊ߲߬ߝߟߏ ߣߌ߫ ߘߋ߲ ߠߎ߬ ߘߐ߫ ߸ ߊ߬ ߣߴߌ ߦߴߊ߬ߟߎ߬ ߕߟߏߡߊߕߍ߰ ، ߜߍ߬ߘߍ ߘߏ߲߬ ߕߴߊ߬ߟߎ߬ ߕߟߏߡߊߕߍ߰ ߟߊ߫ ߝߏߦߌ߬ ߟߊ߫ ߡߊߙߊ߲ߛߊ ߞߐ߫ ﴿64﴾

ߒ ߠߊ߫ ߖߐ߲߬ ( ߓߘߍ ) ߟߎ߫ ߞߏ߬ߣߌ߲ ߸ ߛߋߓߊ߯ߦߊ߫ ߛߌ߫ ߕߴߌ ߓߟߏ߫ ߏ߬ ߟߎ߫ ߡߊ߬ ، ߌ ߡߊ߰ߙߌ ߘߏ߲߬ ߥߛߊ߬ ߘߊ߫ ߛߍ߲߬ߓߍ߬ߟߊ߲߫ ߘߌ߫ ﴿65﴾

ߊߟߎ߫ ߡߊ߰ߙߌ ߟߋ߬ ߞߎߟߎ߲ ߛߊ߬ߡߊ߲߬ ߠߴߊߟߎ߫ ߦߋ߫ ߟߌ߲ߓߊ߲ ߞߊ߲߬ ߸ ߛߴߊߟߎ߫ ߘߴߊ߬ ߟߊ߫ ߢߊ߬ߒߡߊ߭ ߘߏ߫ ߢߌߣߌ߲߫ ، ߓߊߏ߬ ߖߊ߯ߕߋ߬ ߸ ߊߟߎ߫ ߤߌߣߊ ߟߴߊ߬ ߟߊ߫ ﴿66﴾

ߣߌ߫ ߕߙߐ߫ ߡߊ߰ ߘߴߊߟߎ߫ ߟߊ߫ ߖߌ ߞߊ߲߬ ߸ ߊߟߎ߫ ߦߋ߫ ( ߝߋ߲ ) ߡߍ߲ ߠߎ߬ ߞߟߌ߫ ߟߊ߫ ߸ ߏ߬ ߓߍ߯ ߘߌ߫ ߕߎߣߎ߲߫ ( ߊߟߎ߫ ߡߊ߬ ) ߝߏ߫ ߊ߬ߟߋ ߞߋߟߋ߲߫ ، ߊ߬ ߓߊ߯ ߊߟߎ߫ ߟߊߞߛߌ߫ ( ߏ߬ ߘߐ߫ ) ߞߊ߬ ߛߋ߫ ߜߙߋ ߟߊ߫ ߸ ߊߟߎ߫ ߘߴߊߟߎ߫ ߞߐߘߏ߲߬ ߥߟߊߞߌ߫ ، ߤߊ߲߫ ߸ ߡߐ߱ ߞߍߣߍ߲߫ ߝߌߛߙߌߥߊߟߋߓߊ߫ ߟߋ߬ ߘߌ߫ ߘߋ߬ ﴿67﴾

ߊ߬ ߝߐ߫ ߊߟߎ߫ ߘߌ߫ ߦߟߌߟߊߕߍ߰ ߸ ߞߏ߫ ߊ߬ ߕߍ߫ ߜߙߋߡߟߊ ߝߊ߲߬ ߞߋߟߋ߲߫ ߟߐ߬ ߊߟߎ߫ ߟߊߞߎ߬ߣߎ߲߬ ߠߊ߫؟ ߥߟߴߊ߬ ߦߋ߫ ( ߕߐ߲ߞߐߟߐ߲߫ ) ߓߙߍ߬ ߛߊ߬ߙߌ߬ߟߊ ߗߋ߫ ߊߟߎ߫ ߞߊ߲ߡߊ߬؟ ߊߟߎ߫ ߘߏ߲߬ ߕߍ߫ ߡߞߊ߬ߘߊ߲߬ߓߊ߯ ߛߐ߬ߘߐ߲߬ ߊߟߎ߫ ߟߊ߫ ߏ߬ ߘߐ߫ ﴿68﴾

ߥߟߴߊߟߎ߫ ߘߌ߫ ߦߟߌߟߊߕߍ߰ ߓߊ߬ ߸ ߞߏ߫ ߊ߬ ߕߍ߫ ߊߟߎ߫ ߟߊߛߊ߬ߦߌ߲߬ ߊ߬ߺ(ߺߟߋ߬ ߓߊ) ߞߊ߲߬ ߛߋ߲߬ߧߊ߬ ߜߘߍ߫ ߘߐ߫؟ ߊ߬ ߦߋ߫ ߝߢߐ߫ ߜߍߟߍ߲ ߗߋ߫ ߊߟߎ߫ ߞߊ߲ߡߊ߬ ߏ߬ ߘߐ߫ ߞߵߊߟߎ߫ ߟߊߕߏ߫ ߖߌ ߘߐ߫ ߕߋߜߊ߫ ߞߵߏ߬ ߡߊߛߐ߬ߘߐ߲߬ ߊߟߎ߫ ߟߊ߫ ߝߌߛߙߌߥߊߟߋߦߊ ߝߍ߬؟ ߊߟߎ߫ ߘߏ߲߬ ߕߍ߫ ߣߐ߬ߝߍ߬ߜߍ߲߬ߓߊ߯ ߛߐ߬ߘߐ߲߬ ߊߟߎ߫ ߖߘߍ߬ ߦߋ߫ ߒ߬ߠߎ߬ ߞߊ߲ߡߊ߬ ߏ߬ ߘߐ߫ ﴿69﴾

ߖߊ߯ߕߋ߬ ߸ ߒ߬ߠߎ߫ ߞߵߊߘߡߊߘߋ߲ ߠߎ߬ ߟߊߘߌߦߓߊ ߟߋ߬ ߞߍ߫ ߸ ߊ߲ ߞߵߊ߬ߟߎ߫ ߕߊ߬ ߓߏ߬ߙߌ߬ߝߋ߲ ߠߎ߫ ߞߊ߲߬ ߜߙߋߡߟߊ ߣߌ߫ ߖߌߞߊ߲ߠߊ ߟߎ߬ ߘߐ߫ ߸ ߊ߬ ߣߴߊ߲ ߞߵߊ߬ߟߎ߫ ߤߊ߬ߙߌ߬ߖߍ߰ ߝߋ߲߫ ߓߘߍߓߘߍ ߟߎ߬ ߟߊ߫ ، ߊ߲ ߘߏ߲߬ ߞߵߊߟߎ߫ ߟߊߝߌ߬ߛߊ߬ߦߊ߫ ߝߌ߬ߛߡߊ߬ߒ߬ߕߋ߬ߦߊ ߖߊ߯ߕߋ ߟߋ߬ ߟߊ߫ ߒ߬ ߠߊ߫ ߘߊ߲ߝߋ߲ ߛߌߦߊߡߊ߲߫ ߘߌ߫ ﴿70﴾

ߊ߲ ߞߍߕߐ߫ ߡߌ߬ߙߌ߲߬ߘߌ ߓߍ߯ ߞߟߌ߫ ߟߴߊ߬ ߢߍߓߊ߮ ߕߐ߮ ߟߊ߫ ߟߏ߲ ߡߍ߲ ߸ ߣߌ߫ ߡߍ߲ ߠߊ߫ ߟߍߙߊ ߘߌ߫ ߘߴߊ߬ ߡߵߊ߬ ߞߌߣߌ߲߫ ߓߟߏ ߟߊ߫ ߏ߬ ߘߐ߫ ߸ ߏ߬ ߟߎ߫ ߟߵߊ߬ߟߎ߫ ߖߍ߬ߘߍ ߟߊ߫ ߟߍߙߊ ߞߊ߬ߙߊ߲߬ ߠߊ߫ ، ߊ߬ߟߎ߫ ߘߏ߲߬ ߕߍ߫ ߕߐ߬ߢߍ߰ ߟߊ߫ ߡߙߐ߫ ߞߋߟߋ߲߫ ߢߐ߲߰ ߠߊ߫ ﴿71﴾

ߡߍ߲ ߓߊ߯ ( ߊ߬ ߖߘߍ߬ ) ߞߍ߫ ߝߎߦߋ߲ ߘߌ߫ ‹ ߘߎߢߊ߫ › ߢߌ߲߬ ߘߐ߫ ߸ ߏ߬ ߟߋ ( ߞߍߕߐ߫ ) ߝߎߦߋ߲ ߘߌ߫ ߟߊߞߌߙߊ߫ ، ߊ߬ ߘߏ߲߬ ߝߊ߲߭ ߝߟߌ߬ߣߍ߲߬ ߛߌߟߊ ߡߊ߬ ߏ߬ ߘߌ߫ ﴿72﴾

ߣߴߊ߬ߟߎ߬ ߓߍߢߌߣߌ߲߫ ߞߵߌ ߟߊߝߘߏ߬ ߝߋ߲߫ ߡߊ߬ ߊ߲ ߞߵߌ ߦߟߌߘߏ߲߬ ߡߍ߲ ߠߊ߫ ߸ ߛߴߌ ߘߴߊ߬ ߛߌ߬ߣߊ߬ ߜߘߍ߫ ߟߊߖߌ߰ ߞߏ ߥߎߦߊ ߟߊ߫ ߒ߬ߠߎ߬ ߟߊ߫ ، ߏ ߕߎ߬ߡߊ ߝߍ߬ ߛߊ߫ ߸ ߊ߬ߟߎ߬ ߘߴߌ ߞߍ߫ ߊ߬ߟߎ߬ ߕߋߙߌ߫ ߘߌ߫ ﴿73﴾

ߣߌ߫ ߒ߬ߠߎ߫ ߕߌ߲߬ ߡߴߌ ߓߊ߲ߓߊ߲߫ ߓߘߍߞߍ߭ ߸ ߌ ߕߎ߲߬ ߓߍߢߌߣߌ߲߫ ߠߋ߫ ߞߊ߬ ߝߊ߲ߞߊ߲߫ ߊ߬ߟߎ߫ ߞߊ߲߬ ߣߍ߲ߞߍ߫ ﴿74﴾

ߊ߲ ߘߏ߲߬ ߕߌ߲߬ ߘߴߌ ߡߊߜߏ߬ߙߴߏ߬ ߘߐ߫ ߢߣߊߡߦߊ ߖߊ߲߰ߞߕߊ ߣߌ߫ ߛߊ߬ߦߊ ߖߊ߲߰ߞߕߊ ߟߊ߫ ، ߌ ߘߏ߲߬ ߕߎ߲߬ ߕߍ߫ ߘߍ߬ߡߍ߲߬ߓߊ߰ ߛߌ߫ ߛߐ߬ߘߐ߲߬ ߌ ߖߘߍ߬ ߟߊ߫ ߒ߬ߠߎ߫ ߡߊ߬ ﴿75﴾

ߣߴߊ߬ߟߎ߫ ߕߎ߲߬ ߓߍߢߌߣߌ߲߫ ߞߵߌ ߘߐߕߏ߰ߝߏ߬ߕߊ߯ߝߊ߫ ߖߡߊ߬ߣߊ ߞߣߐ߫ ߸ ߞߏ߫ ߊ߬ߟߎ߬ ߦߴߌ ߟߊߓߐ߫ ߟߊ߫ ߦߋ߲߬ ߸ ߊ߬ߟߎ߫ ߘߏ߲߬ ߕߎ߲߬ ߕߍ߫ ߡߍ߲߫ ߌ ߞߐ߫ ߦߋ߲߬ ߏ߬ ߘߐ߫ ߝߏ߫ ߥߊ߯ߕߌ߫ ߞߎߘߎ߲ߣߍ߲߫ ﴿76﴾

ߊ߲ ߣߐ߬ ߒ߬ ߠߊ߫ ߞߋߟߊ ߡߍ߲ ߠߎ߬ ߗߋ߫ ߟߴߌ ߢߍ߫ ߞߘߐ߬ߡߊ߲߫ ߸ ߏ߬ ߟߎ߬ ߟߊ߫ ߟߊ߲߬ߘߊ ߟߴߏ߬ ߘߌ߫ ߖߐ߫ ، ߌ ߘߏ߲߬ ߕߍߣߊ߬ ߦߟߍ߬ߡߊ߲߬ ߢߊ߫ ߛߐ߬ߘߐ߲߬ ߠߊ߫ ߒ߬ ߠߊ߫ ߟߊ߲߬ߘߊ ߟߊ߫ ﴿77﴾

ߌ ߦߋ߫ ߛߊߟߌ ߟߐ߬ ߕߋ߬ߟߋ ߖߍ߲߬ߞߍ ߟߋ߫ ߡߊ߬ ߸ ߞߵߊ߬ ߛߌ߰ ߛߎ ߞߏ߭ ߟߊ߫ ، ߌ ߦߋ߫ ߖߍߡߎߙߍ߲ ߞߊ߬ߙߊ߲ ߝߣߊ߫ ߞߍ߫ ، ߓߊ ߖߍߡߎߙߍ߲ ߞߊ߬ߙߊ߲ ߦߋ߫ ߛߙߋߦߊ߫ ߞߏ߫ ߟߋ߬ ߘߌ߫ ﴿78﴾

ߛߎ ߝߣߊ߫ ߘߐ߫ ߸ ߌ ߦߋ߫ ߛߌ߬ߒߢߣߊ ߞߍ߫ ߊ߬ ߟߊ߫ ߌ ߖߘߍ߬ ߦߋ߫ ߘߌߦߊߘߌߦߊ ߘߌ߫ ߸ ߞߎߟߊߞߏߕߍ߫ ߌ ߡߊ߰ߙߌ ߘߌߣߵߌ ߟߊߥߌ߬ߟߌ߫ ߟߐ߬ߦߌߟߊ߫ ߕߊ߲߬ߘߏ߬ߕߊ ߘߐ߫ ﴿79﴾

ߌ ߦߴߊ߬ ߝߐ߫ ߞߏ߫ ߒ ߡߊ߰ߙߌ ߸ ߒ ߠߊߘߏ߲߬ ߕߎ߬ߢߊ ߘߏ߲߬ߠߌ߲߬ ߢߊ ߡߊ߬ ߸ ߌ ߦߋ߫ ߒ ߠߊߓߐ߫ ߕߎ߬ߢߊ ߓߐߟߌ߫ ߢߊ ߡߊ߬ ، ߊ߬ ߣߴߌ ߦߴߌ ߓߘߊ ߘߊ߬ߟߎ ߘߏ߫ ߞߍ߫ ߒ ߧߋ߫ ߸ ߡߍ߲ ߦߋ߫ ߡߐ߰ ߘߍ߬ߡߍ߲߬ ߠߊ߫ ﴿80﴾

ߌ ߦߴߊ߬ ߟߊߛߋ߫ ߞߏ߫ ߛߍ߬ߓߍ ߓߘߊ߫ ߣߊ߬ ߣߊ߰ߣߊ߮ ߓߘߊ߫ ߝߏ߫ ߸ ߓߊ ߣߊ߰ߣߊ߮ ߦߋ߫ ߝߏߕߊ߫ ߟߋ߬ ߘߌ߫ ( ߦߏ߫ ߘߎ߬ߓߏ߲ߜߟߊ߬ߞߌ ߦߋ߫ ߝߏ߫ ߟߊ߫ ߢߊ ߡߍ߲) ﴿81﴾

ߊ߲ ߧߋ߫ ߝߋ߲߫ ߠߋ߬ ߟߊߖߌ߰ ߟߊ߫ ߞߎ߬ߙߊ߬ߣߊ ߘߌ߫ ߸ ߡߍ߲ ߦߋ߫ ߞߍ߲ߘߍߦߊ ߣߌ߫ ߤߌߣߊ ߘߌ߫ ߘߍ߲߬ߞߣߍ߬ߦߊ߬ߓߊ߮ ߟߎ߬ ߦߋ߫ ، ߊ߬ ߘߏ߲߬ ߕߍ߫ ߕߐ߬ߢߍ߰ߒߕߋ ߟߎ߬ ߖߘߌ߫ ߝߏߦߌ߬ ߟߊ߫ ߝߏ߫ ߓߐ߬ߣߐ ﴿82﴾

ߊ߲ ߓߊ߯ ߣߍߡߊ߫ ߡߐ߱ ߡߊ߬ ߞߏߕߊ߲߫ ߸ ߊ߬ ߘߴߊ߬ ߞߐߘߏ߲߬ ߞߵߊ߬ ߡߊߕߊ߯ ߊ߬ ߝߊ߲߬ ߞߋߟߋ߲ ߘߌ߫ ߔߏ߲߫ ، ߣߌ߫ ߖߎ߯ߡߊ߲߫ ߘߏ߲߬ ߡߊ߰ ߘߴߊ߬ ߟߊ߫ ߸ ߊ߬ ߘߌ߫ ߞߍ߫ ߖߌ߰ߕߍ߰ߓߊ߰ߕߐ ߘߌ߫ ߥߘߊߎ߫ ﴿83﴾

ߊ߬ ߝߐ߫ ߞߏ߫ ߓߍ߯ ߦߋ߫ ߓߊ߯ߙߊ߫ ߟߴߊ߬ ߞߎ߲߬ߕߋߟߋ߲߫ ߠߋ߫ ߝߍ߬ ߸ ߊߟߎ߫ ߡߊ߰ߙߌ ߘߏ߲߬ ߞߵߊ߬ ߟߐ߲߫ ߖߐ߫ ߸ ߡߍ߲ ߦߋ߫ ߞߊ߲ߘߊ߫ ߛߌߟߊ ߞߊ߲߬ ﴿84﴾

ߊ߬ߟߎ߬ ߦߴߌ ߢߌ߬ߣߌ߲߬ߞߊ߬ ߟߊ߫ ߛߟߐߡߌ߲ ߡߊ߬ ، ߊ߬ߟߎ߫ ߖߋ߬ߓߌ߬ ߞߏ߫ ߛߟߐߡߌ߲ ߦߋ߫ ߒ ߡߊ߰ߙߌ ߟߊ߫ ߞߏ ߘߏ߫ ߟߋ߬ ߘߌ߫ ، ߊߟߎ߫ ߘߏ߲߬ ߡߊ߫ ߛߐ߫ ߝߏߦߌ߬ ߟߊ߫ ߟߐ߲ߠߌ߲ ߘߐ߫ ߝߏ߫ ߕߜߋߣߍ߲߫ ﴿85﴾

ߣߴߊ߬ ߕߎ߲߬ ߞߊ߬ ߒ߬ ߘߌߦߊ߫ ߸ ߊ߲ ߣߵߌ ߦߟߌߘߏ߲߬ ߠߊ߫ ( ߞߎ߬ߙߊ߬ߣߊ ) ߡߍ߲ ߠߊ߫ ߸ ߊ߲ ߕߘߍ߬ ߘߴߏ߬ ߟߊߕߊ߯ ߞߐߍ߫ ، ߌ ߘߏ߲߬ ߕߎ߲߬ ߕߍ߫ ߛߍ߲߬ߓߍ߬ߟߊ߲߫ ߛߐ߬ߘߐ߲߬ ߌ ߖߘߍ߬ ߟߴߏ߬ ߞߏ ߘߐ߫ ߒ߬ߠߎ߬ ߞߊ߲ߡߊ߬ ߡߎ߬ߕߎ߲߬ ﴿86﴾

(ߏ ߘߏ߲߬ ߟߊߕߊ߯ߓߊߟߌ ߡߊ߫ ߕߏ߫ ߞߎ߲߬ ߛߌ߫ ߟߊ߫ ) ߸ ߝߏ߫ ߌ ߡߊ߰ߙߌ ߟߊ߫ ߤߌߣߊ ، ߓߊߏ߬ ߊ߬ ߟߊ߫ ߢߊ߬ߒߡߊ߭ ߓߏ߲߬ߓߊ߫ ߟߵߌ ߞߊ߲߬ ߘߋ߬ ﴿87﴾

ߊ߬ ߟߊߛߋ߫ ߞߏ߫ ߤߊߟߌ߫ ߡߐ߱ ߟߎ߬ ߣߌ߫ ߥߐ߬ߞߎߟߐ ߟߎ߫ ߞߵߊ߬ߟߎ߬ ߟߊߘߍ߬ ߸ ߞߏ߫ ߊ߬ߟߎ߬ ߦߋ߫ ߣߊ߬ ߟߊ߫ ߞߎ߬ߙߊ߬ߣߊ ߣߌ߲߬ ߢߐ߲߰ ߘߌ߫ ߸ ߊ߬ߟߎ߬ ߕߍ߫ ߣߵߊ߬ ߢߐ߲߰ ߘߌ߫ ߝߋߎ߫ ، ߤߟߴߊ߬ߟߎ߬ ߘߏ߫ ߞߍ߫ ߘߊ߫ ߘߏ߫ ߘߍ߬ߡߍ߲߬ߓߊ߮ ߘߌ߫ ﴿88﴾

ߊ߲ ߓߘߊ߫ ߞߏߟߊߒߞߏߡߊ ߛߎ߮ ߓߍ߯ ߡߊߛߊ߬ߦߌߛߊ߬ߦߌ߫ ߡߐ߱ ߟߎ߬ ߦߋ߫ ߞߎ߬ߙߊ߬ߣߊ ߣߌ߲߬ ߞߣߐ߫ ، ߞߏ߬ߣߌ߲߬ ߡߐ߱ ߝߊ߲߬ߓߊ ߓߊ߲߬ߣߍ߲߬ ߗߏ߫ ߝߏ߫ ߞߊߝߋߜߟߍߦߊ ﴿89﴾

ߊ߬ߟߎ߫ ߝߊ߲߭ ߞߊ߲߫ ߠߋ߬ ߞߏ߫ ߊ߲ ߕߍ߫ ߘߍ߲߬ߞߣߍ߬ߦߊ߬ ߌ ߡߊ߬ ߝߋߎ߫ ߸ ߝߏ߫ ߌ ߓߊ߯ ߓߎ߬ߦߌ ߘߏ߫ ߟߊߝߎ߲ߘߌ߫ ߒ߬ ߧߋ߫ ( ߒ߬ ߠߊ߫ ) ߖߡߊ߬ߣߊ ߘߐ߫ ﴿90﴾

ߥߟߊ߫ ߣߊߞߐ߫ ߦߋ߫ ߞߴߌ ߓߟߏ߫ ߕߡߊߙߏ߫ ( ߝߍ ) ߣߌ߫ ߖߊ߬ߓߌ߬ߙߋ߲߬ ( ߝߍ ) ߘߌ߫ ، ߌ ߘߏ߲߬ ߦߋ߫ ߞߐ߬ߢߊ ߟߎ߬ ߟߊߥߏ߬ߦߴߏ߬ ߢߊߝߍ߬ ߞߎߟߊ߲ߞߎߟߊ߲߫ ﴿91﴾

ߤߊߡߊ߲ߕߍ߫ ߌ ߦߋ߫ ߛߊ߲ ߠߊߓߋ߬ ߊ߲ ߞߊ߲߬ ߞߎߘߎ߲ߞߎߘߎ߲ ߠߎ߬ ߘߌ߫ ߸ ߦߏ߫ ߌ ߞߵߊ߬ ߜߊߟߏ߲߫ ߌ ߟߊ߫ ߢߊ ߡߍ߲. ߥߟߊ߫ ߌ ߦߋ߫ ߣߵߊߟߊ߫ ߣߌ߫ ߞߋ߲ߛߐ߲ ߠߎ߬ ߘߴߌ ߓߏ߬ߟߏ߲߬ߘߊ ߘߌ߫ ﴿92﴾

ߥߟߊ߫ ߓߏ߲߫ ߦߋ߫ ߞߴߌ ߓߟߏ߫ ߡߊ߬ߖߐ߯ߙߊ߲ ߘߐ߫ ، ߤߊߡߊ߲ߕߍ߫ ߌ ߦߋ߫ ߦߟߍ߬ ߛߊ߲ ߡߊ߬ ، ߊ߲ ߝߊ߲߭ ߕߍߣߊ߫ ߘߍ߲߬ߞߣߍ߬ߦߊ߬ ߟߴߌ ߟߊ߫ ߦߍ߬ߟߍ ߘߐ߫ ߸ ߝߏ߫ ߌ ߓߊ߯ ߟߍߙߊ ߘߏ߫ ߟߊߖߌ߰ ߒ߬ ߡߊ߬ ߸ ߊ߲ ߧߴߏ ߞߊ߬ߙߊ߲߬. ߊ߬ߟߎ߫ ߖߋ߬ߓߌ߬ ߞߏ߫: ߋ߫ ߡߊ߰ߙߌ߬ ߛߊߣߌ߲߹ ߒߠߋ ߡߋ߬ߘߋ ߘߌ߫ ߓߏ߲߰ ߣߌ߫ ߡߐ߱ ߞߋߟߦߊߣߍ߲ ߕߍ߫؟ ﴿93﴾

ߝߏߦߌ߬ ߡߊ߫ ߡߐ߱ ߟߎ߫ ߞߎ߬ߡߊ߲߬ߘߌ߫ ߘߍ߲߬ߞߣߍ߬ߦߊ ߡߊ߬ ߞߊ߲ߘߦߊ ߣߊ߭ ߡߍ߲ ߞߍ߫ ߘߴߊ߬ߟߎ߫ ߡߊ߬ ߸ ߝߏ߫ ߊ߬ߟߎ߫ ߞߵߊ߬ ߝߐ ߡߍ߲ߞߍ߫ ߞߏ߫ ߌ߬ߦߏ߯ ߊߟߊ߫ ߞߊ߬ ߡߐ߱ ߟߋ߬ ߟߊߥߟߌ߬ ߞߋߟߊ ߘߌ߫؟ ﴿94﴾

ߊ߬ߟߎ߫ ߖߋ߬ߓߌ߬ ߸ ߞߏ߫ ߤߊߟߌ߬ ߞߋ߲ߛߐ߲ ( ߡߟߍ߬ߞߊ) ߘߏ߫ ߟߎ߫ ߡߊߞߍߣߍ߲߫ ߓߊ߯ ߞߍ߫ ߘߎ߱ ߞߊ߲߬ ߸ ߊ߬ߟߎ߬ ߦߴߊ߬ߟߎ߬ ߕߊ߯ߡߊ߫ ߟߊ߫ ߸ ߊ߬ߟߎ߬ ߡߝߊߣߍ߲߫ ، ߊ߲ ߕߘߍ߬ ߦߋ߫ ߡߟߍ߬ߞߊ ߘߏ߫ ߟߋ߬ ߟߊߖߌ߰ ߟߴߏ߬ ߟߎ߫ ߡߊ߬ ߞߋߟߊ ߘߌ߫ ߞߊ߬ ߓߐ߫ ߛߊ߲ ߡߊ߬ ﴿95﴾

ߊ߬ ߟߊߛߋ߫ ߸ ߞߏ߫ ߊߟߊ߫ ߥߛߊ߬ ߘߊ߫ ߛߙߋ߫ ߘߌ߫ ߒߠߋ ߣߴߊߟߎ ߕߍ߫ ߸ ߊ߬ ߘߏ߲߬ ߦߴߊ߬ ߟߊ߫ ߖߐ߲߭ ߠߎ߬ ߞߟߊ߬ߡߊ߬ߓߊ߯ ߘߌ߫ ߸ ߊ߬ ߦߴߊ߬ߟߎ߬ ߦߋߓߊ߯ ߘߌ߫ ﴿96﴾

ߊߟߊ߫ ߞߏ߬ߣߌ߲ ߓߊ߯ ߡߍ߲ ߞߊ߲ߘߊ߫ ߏ߬ ߟߋ ߞߊ߲ߘߕߊ ߘߌ߫ ، ߣߴߊ߬ ߘߏ߲߬ ߞߊ߬ ߡߍ߲ ߠߊߝߟߌ߬ ߸ ߌ ߕߍߣߊ߬ ߢߌ߲߬ ߜߘߍ߫ ߟߎ߫ ߛߐ߬ߘߐ߲߬ ߠߴߏ߬ ߟߎ߬ ߟߊ߫ ߣߴߊ߬ߟߋ߬ ߕߍ߫ ، ߊ߲ ߘߌߣߵߏ߬ ߟߎ߬ ߟߊߥߌ߬ߟߌ߫ ߟߐ߬ߓߊ ߟߏ߲ ( ߊ߬ߟߎ߬ ߓߌߘߌ߲ߣߍ߲߫ ) ߊ߬ߟߎ߬ ߢߘߊ ߟߎ߫ ߞߊ߲߬ ߸ ߏ ߕߎ߬ߡߴߊ߬ߟߎ߬ ߝߎߦߋ߲ߠߡߊ ߓߏߓߏߟߡߊ ߕߟߏߜߋߘߋ߲ߠߡߊ ( ߟߎ߬ ) ߦߋ߫ ، ߊ߬ߟߎ߬ ߡߊߞߍ߫ ߦߌߟߊ ߟߋ߬ ( ߞߍߕߐ߫ ) ߔߊߦߌߔߊߦߌ ߘߌ߫ ߸ ߏ߬ ߓߊ߯ ߡߊߛߍ߬ߟߍ߲߬ߓߍ߬ ߞߏߕߊ߲߫ ߸ ߒ߬ ߘߴߊ߬ߟߎ߬ ߖߘߌ߫ ߡߍߣߍ߲߫ ߞߎߘߊ߫ ߟߊ߫ ߖߌߖߌ߫ ﴿97﴾

ߏ߬ ߟߋ ( ߞߍߕߐ߫) ߊ߬ߟߎ߫ ߛߊ߬ߙߊߘߌ߫ ، ߓߊ ߊ߬ߟߎ߫ ߞߵߊ߬ߟߎ߫ ߓߊ߲߬ ߒ߬ ߠߊ߫ ߟߝߊߙߌ ߟߎ߬ ߘߐ߫ ߟߋ߬ ، ߊ߬ ߣߴߊ߬ߟߎ߫ ߞߵߊ߬ ߝߐ߫ ߞߏ߫ ߣߴߊ߲ ߞߍ߫ ߘߊ߫ ߞߟߏ߫ ߜߛߊߞߙߊ ߟߎ߬ ߣߴߊ߬ ߡߎ߰ߡߎ߰ߣߍ߲ ߠߎ߬ ߘߌ߫ ߕߎ߬ߡߊ ߡߍ߲ ߸ ߦߊ߯ߟߴߊ߲ ߘߌ߫ ߟߊߥߟߌ߬ ߘߊ߲ߠߌ߲߫ ߞߎߘߊ߫ ߘߐ߫ ߓߊ߬؟ ﴿98﴾

ߦߊ߯ߟߴߊ߬ߟߎ߬ ߕߍ߫ ߊ߬ ߦߋ߫ ߟߊ߫ ߓߊ߬ ߞߏ߫ ߊߟߊ߫ ߡߍ߲ ߞߊ߬ ߛߊ߲ ߠߎ߬ ߣߌ߫ ߘߎ߱ ߘߊ߲߫ ߸ ߞߴߏ߬ ߘߌ߫ ߛߴߊ߬ߟߎ߫ ߢߐ߲߰ ߜߘߍ߫ ( ߟߎ߫ ) ߘߊ߲߫ ߠߊ߫؟ ߏ߬ ߟߋ ߘߏ߲߬ ߞߊ߬ ߛߕߊ߫ ߞߍ߫ ߊ߬ߟߎ߬ ߟߊ߫ ߛߌߞߊ߫ ߛߌ߫ ߕߍ߫ ߡߍ߲ ߘߐ߫ ، ߕߐ߬ߢߍ߰ߒߕߋ ߟߎ߫ ߘߏ߲߬ ߓߊ߲߬ߣߍ߲߬ ߗߏ߫ ߝߏ߫ ߕߋ߲ߜߋߘߋ߲ߧߊ ﴿99﴾

ߊ߬ ߟߊߛߋ߫ ߞߏ߫ ߣߴߊߟߎ ߟߋ߫ ߕߘߍ߬ ߒ ߡߊ߰ߙߌ ߟߊ߫ ߤߌߣߊ ߡߣߐ߬ߓߏ߲ ߠߎ߫ ߡߙߊ߬ ߟߊ߫ ߸ ߊߟߎ߫ ߕߘߍ߬ ߘߴߊߟߎ߫ ߓߟߏߘߐߡߌ߬ߘߴߊ߬ ߞߊ߲߬ ߖߘߍ߬ߡߊ߬ߓߐ ߢߍߛߌߟߊ߲ߢߍ ߡߊ߬ ߸ ߓߊ ߡߐ߱ ߦߋ߫ ߕߍ߯ߜߍߟߍ߲ ߠߋ߬ ߘߌ߫ ﴿100﴾

ߖߊ߯ߕߋ߬ ߸ ߊ߲ ߞߊ߬ ߡߎߛߊ߫ ߛߐ߫ ߡߊ߲߬ߕߊ߬ߣߌ߲߬ ߘߐ߬ߜߍ߫ ߞߐ߬ߣߐ߲߬ߘߐ߫ ߟߋ߬ ߟߊ߫ ߸ ߌߛߌߙߊߌߟߞߊ ߟߎ߫ ߢߌ߬ߣߌ߲߬ߞߊ߬ ߕߎ߲߫ ، ߏ ߣߊ߬ߣߍ߲ ߊ߬ߟߎ߫ ߡߊ߬ ߸ ߝߋߙߊߥߎ߲߫ ߞߊ߲߫ ߊ߬ ߡߊ߬ ߞߏ߫ ߒߠߋ ߌߟߋ ߡߎߛߊ߫ ߖߌ߰ ߟߊ߫ ( ߡߐ߰ ) ߘߓߊ߬ߙߌ߬ߣߍ߲ ߠߋ߬ ߘߌ߫ ﴿101﴾

‹ ߡߎߛߊ߫ › ߞߊ߲߫ ߞߏ߫ ߌߟߋ ߞߵߊ߬ ߟߐ߲߫ ߛߎߋ߯ ߞߏ߫ ߝߏߦߌ߬ ߡߊ߫ ߢߌ߲߬ ߠߎ߬ ߟߊߖߌ߰ ߞߵߊ߬ߟߎ߬ ߞߍ߫ ߢߟߊߞߊ߫ ߞߏ ߟߎ߬ ߘߌ߫ ߸ ߝߏ߫ ߛߊ߲ ߠߎ߬ ߣߌ߫ ߘߎ߱ ߡߊ߰ߙߌ ، ߒߠߋ ߘߏ߲߬ ߸ ߛߋߚߋ߫ ߒ ߧߴߌߟߋ ߝߋߙߊߥߎ߲߫ ߖߌ߰ ߟߊ߫ ߕߏߒߘߐߓߊ߯ߕߐ ߟߋ߬ ߘߌ߫ ﴿102﴾

‹ ߝߋߙߊߥߎ߲߫ › ߕߎ߲߬ ߓߊ߯ ߊ߬ ߝߍ߬ ߞߊ߬ ‹ ߌߛߌߙߊߌߟߞߊ› ߟߎ߬ ߟߊߝߋߝߋ߫ ߟߋ߫ ߖߡߊ߬ߣߊ ߞߣߐ߫ ، ߏ߬ ߞߍ ߊ߲ ߞߵߊ߬ ߟߊߕߏ߫ ߖߌ ߘߐ߫ ߟߋߎ߫ ߸ ߊ߬ ߣߴߊ߬ ߝߍ߬ߡߐ߮ ߓߍ߯ ߞߐߘߍ߫߹ ﴿103﴾

ߊ߬ߟߋ ߕߊ߬ߡߌ߲ ߞߐ߫ ߸ ߊ߲ ߞߵߊ߬ ߝߐ߫ ߌߛߌߙߊߌߟߞߊ ߟߎ߬ ߦߋ߫ ߸ ߒ ߞߏ߫ ߊߟߎ߫ ߦߴߊߟߎ߫ ߡߊߞߍ߫ ߖߡߊ߬ߣߊ ߞߣߐ߫ ߔߌߢߊ߲߫ ، ߒ߬ߓߊ߬ ߣߌ߫ ߦߟߌߡߊߘߌߦߊ ߟߊߓߊ߲ ߣߊ߬ ߘߊ߫ ߸ ߒ߬ ߘߴߊߟߎ߫ ߟߊߣߊ߬ ( ߖߊ߬ߡߊ߫ ) ߞߐ߬ߡߐ߲ߞߐ߬ߡߐ߲ ߘߌ߫ ﴿104﴾

ߊ߲ ߞߊ߬ ‹ ߞߎ߬ߙߊ߬ߣߊ› ߟߊߖߌ߰ ߕߎ߬ߢߊ ߟߋ߬ ߟߊ߫ ߸ ߊ߬ ߘߏ߲߬ ߖߌ߰ ߘߊ߫ ߕߎ߬ߢߊ߫ ߟߋ߬ ߟߊ߫ ، ߊ߲ ߞߏ߬ߣߌ߲߬ ߒ߬ ߡߴߌ ߗߋ߫ ߝߋ߲߫ ߜߘߍ߫ ߘߌ߫ ߸ ߝߏ߫ ߘߟߊߝߎߟߌߟߊ ߣߌ߫ ߖߊ߬ߛߙߋ߬ߡߊ߬ߟߌ߬ߟߊ ﴿105﴾

ߊ߲ ߞߊ߬ ߞߎ߬ߙߊ߬ߣߊ ߘߐߞߎߘߎ߲ߞߎߘߎ߲߫ ߠߋ߬ ߸ ߛߴߌ ߘߴߊ߬ ߞߊ߬ߙߊ߲߬ ߡߐ߱ ߟߎ߬ ߦߋ߫ ߕߎߜߍ߫ ، ߊ߲ ߞߵߊ߬ ߘߐ߲߬ߘߐ߰ߣߍ߲߬ ߠߊ߬ߖߌ߯ ߏ߬ ߟߋ ߘߐ߫ ﴿106﴾

ߊ߬ ߟߊߛߋ߫ ߞߏ߫ ߊߟߎ߫ ߘߍ߲߬ߞߣߍ߬ߦߴߊ߬ ߡߊ߬ ߥߟߴߊߟߎ߫ ߞߣߊ߫ ߘߍ߲߬ߞߣߍ߬ߦߊ߫ ، ߡߍ߲ ߠߎ߫ ߞߏ߬ߣߌ߲ ߛߐߣߍ߲߫ ߟߐ߲ߠߌ߲ ߠߴߊ߬ ߢߍ߫ ߸ ߊ߬ ߓߊ߯ ߞߊ߬ߙߊ߲߫ ߏ߬ ߟߎ߬ ߦߋ߫ ߕߋ߲߬ ߸ ߊ߬ߟߎ߬ ߘߴߊ߬ߟߎ߫ ߓߋ߬ ( ߊ߬ߟߎ߫ ) ߓߏ߲߬ߓߏ߲ ߠߎ߫ ߞߊ߲߬ ߕߌ߲ߓߌߘߌ߲ ߘߌ߫ ߓߙߌ߫ ﴿107﴾

ߊ߬ߟߎ߬ ߘߴߊ߬ ߝߐ߫ ߞߏ߫ ߊ߲ ߡߊ߰ߙߌ ߓߘߊ߫ ߛߊߣߌ߲ߧߊ߫ ، ߖߊ߰ ߊ߲ ߡߊ߰ߙߌ ߟߊ߫ ߦߟߌߡߊߘߌߦߊ ߦߋ߫ ߞߍ߫ ߟߊ߫ ߟߋ߬ ﴿108﴾

ߊ߬ߟߎ߬ ߘߴߊ߬ߟߎ߫ ߓߋ߬ ( ߊ߬ߟߎ߫ ) ߓߏ߲߬ߓߏ߲ ߠߎ߫ ߞߊ߲߬ ߞߊ߬ߛߌ ߘߌ߫ ߸ ߊ߬ ߘߏ߲߬ ߘߴߊ߬ߟߎ߬ ߟߊ߫ ߢߍ߬ߣߍ߲ ߡߊߞߊ߬ߝߏ߬ ( ߓߘߍߞߍ߭) ﴿109﴾

ߊ߬ ߟߊߛߋ߫ ߞߏ߫ ߊߟߎ߫ ߦߴߊ߬ ߞߟߌ߫ ߞߏ߫ ߊߟߊ߫ ، ߥߟߴߊߟߎ߫ ߦߴߊ߬ ߞߟߌ߫ ߞߏ߫ ߡߊ߬ߤߌ߬ߣߊ߬ߟߊ ، ߊߟߎ߫ ߞߵߊ߬ ߞߟߌ߫ ߊ߬ ߝߋ߲-ߋ-ߝߋ߲߫ ߠߊ߫ ( ߏ߬ ߘߌ߫ ߓߍ߲߬ ) ، ߓߊߏ߬ ߕߐ߯ ߢߌߡߊ߫ ߜߊ߲߬ߛߊ߲߫ ߠߴߊ߬ ߟߊ߫ ، ߌ ߞߊߣߵߌ ߟߊ߫ ߛߊߟߌ ߟߊ߲ߞߣߍߡߊ߫ ߌ ߘߏ߲߬ ߞߊߣߵߊ߬ ߜߎ߲߬ߘߎ߫ ߸ ߌ ߦߋ߫ ߛߌߟߊ߫ ߟߋ߬ ߢߌߣߌ߲߫ ߏ ( ߝߌ߬ߟߊ ) ߕߍ߫ ﴿110﴾

ߌ ߦߴߊ߬ ߝߐ߫ ߛߐ߲߬ ߞߏ߫ ߕߊ߲߬ߘߏ ߊߟߊ߫ ߦߋ߫ ߸ ߏ߬ ߡߍ߲ ߡߴߊ߬ ߓߟߏߞߍ߫ ߘߋ߲߫ ߠߊ߫ ، ߜߙߊ߬ߢߐ߲߯ ߘߏ߲߬ ߕߍ߫ ߊ߬ ߟߊ߫ ߡߊ߲߬ߛߊ߬ߦߊ ߘߐ߫ ߸ ߢߌ߲߬ ߝߣߊ߫ ߕߍ߫ ߊ߬ ߟߊ߫ ߞߵߊ߬ ߓߐ߫ ߘߐ߯ߦߡߊ ߘߐ߫. ߌ ߦߴߏ߬ ߟߋ ߓߏ߲߬ߧߊ߬ ߓߎߦߌ߯ ﴿111﴾

ߕߊ߲߬ߘߏ ߊߟߊ߫ ߦߋ߫ ߡߍ߲ ߞߊ߬ ߟߍߙߊ ߟߊߖߌ߰ ߊ߬ ߟߊ߫ ߖߐ߲߭ ߡߊ߬ ߸ ߊ߬ ߘߏ߲߬ ߡߊ߫ ߘߎ߬ ߞߍ߫ ߊ߬ ߘߐ߫ ﴿1﴾

ߞߵߊ߬ ߕߋߟߋ߲߫ ߖߐ߲ ߸ ߛߴߊ߬ ߘߌ߫ ߖߊ߬ߛߙߋ߬ߡߊ߬ߟߊ ߞߍ߫ ߖߊ߲߰ߞߕߊ߬ ߜߍߟߍ߲ ߠߊ߫ ߞߊ߬ ߓߐ߫ ߊ߬ ߓߘߊ ߸ ߊ߬ ߣߴߊ߬ ߦߋ߫ ߘߟߊߝߎߟߌ ߞߍ߫ ߘߍ߲߬ߞߣߍ߬ߦߊ߬ߓߊ߯ ߢߌ߬ߡߊ߬ ߞߍ߬ߟߊ ߟߎ߬ ߦߋ߫ ߸ ߞߏ߫ ߊ߬ߟߎ߬ ߢߍߛߌ߰ߣߍ߲߫ ߛߙߊ߬ ߢߌߡߊ߫ ߟߋ߬ ߟߊ߫ ﴿2﴾

ߊ߬ߟߎ߬ ߡߍ߲ߕߐ߫ ߏ߬ ߘߐ߫ ߟߋ߬ ߞߘߊߎ߫ ﴿3﴾

ߊ߬ ߣߴߊ߬ ߦߋ߫ ߖߊ߬ߛߙߋ߬ߡߊ߬ߟߊ ߞߍ߫ ߡߐ߰ ߟߎ߬ ߦߋ߫ ߸ ߡߍ߲ ߠߎ߬ ߞߊ߲߫ ߞߏ߫ ߘߋ߲߫ ߦߋ߫ ߊߟߊ߫ ߓߟߏ߫ ﴿4﴾

ߏ ߘߏ߲߬ ߜߎ ߟߐ߲ߠߌ߲߫ ߕߍ߫ ߊ߬ߟߎ߬ ߣߴߊ߬ߟߎ߫ ߝߊ߭ ߟߎ߬ ߛߌ߫ ߟߊ߫ ، ߞߎߡߓߊ߫ ߟߋ߬ ߓߐ߫ ߟߴߊ߬ߟߎ߬ ߘߊ ߟߎ߬ ߟߊ߫ ߏ߬ ߘߌ߫ ߕߋ߲߬ ߔߘߊߞߟߊ߫ ، ߊ߬ߟߎ߫ ߘߏ߲߬ ߕߍ߫ ߝߏߦߌ߬ ߝߐ߫ ߟߊ߫ ߥߎߦߊ ߞߐ߫ ﴿5﴾

ߊ߬ ߢߐ߲߰ߘߐ߫ ߌ ߦߴߌ ߖߍ߬ߘߍ߫ ߝߎ߰ߛߌ߬ ߟߊ߫ ߟߋ߬ ߛߎ߬ߣߎ߲ ߠߊ߫ ߢߌ߲߬ ߠߎ߫ ߣߐ߬ߝߍ߬ ߓߊ߬ ߞߏ߫ ߊ߬ߟߎ߬ ߡߊ߫ ߘߍ߲߬ߞߣߍ߬ߦߊ߫ ߢߊߝߐߟߌ ߣߌ߲߬ ߡߊ߬؟ ﴿6﴾

ߒ߬ߠߎ߫ ߣߊ߬ ߘߎ߱ ߞߊ߲߬ ߝߋ߲ ߠߎ߬ ߞߍ߫ ߟߴߊ߬ ߡߊ߬ߢߍ߯ߙߍ ߘߌ߫ ߟߋ߬ ߸ ߞߵߊ߬ ߟߊߥߌ߬ߟߌ߫ ߊ߬ߟߎ߬ ߘߐߜߍ ߡߊ߬ ߣߴߊ߬ߟߎ߬ ߡߍ߲ ߗߋߥߊߟߌ ߢߌ߬ߡߊ߬ ߞߍ߫ ߘߊ߫ ﴿7﴾

ߊ߲ ߘߏ߲߬ ߘߌߣߵߊ߬ߟߋ߬ ( ߘߎ߱ ) ߞߐߞߊ߲ߠߊ ߞߍ߫ ߜߙߋߞߙߋ ߘߌ߫ ߜߟߋߞߎ߫ ﴿8﴾

ߌ ߦߴߊ߬ ߖߊ߬ߕߋ߬ ߟߊ߫ ߟߋ߫ ߓߊ߬ ߞߏ߫ ߝߊߟߊ߲ ߣߌ߫ ߞߙߎ߬ߥߏ ߘߏ߲߬ߞߏ ߟߎ߫ ߕߘߍ߬ ߊ߲ ߠߊ߫ ߡߊ߲߬ߕߊߣߌ߲ ߠߎ߬ ߘߐ߫ ߞߓߊߞߏ ߘߏ߫ ߟߋ߬ ߘߌ߫؟ ﴿9﴾

ߕߎ߬ߡߊ ߡߍ߲ ߝߎߣߎ߲ߞߋ ߟߎ߫ ߞߵߊ߬ߟߎ߫ ߞߎ߲߬ߞߊ߬ߙߌ߬ߝߊ߬ ߝߊߟߊ߲ ߠߊ߫ ߸ ߊ߬ߟߎ߬ ߞߊ߲߫ ߞߏ߫ ߊ߲ ߡߊ߰ߙߌ ߸ ߊ߲ ߛߐ߫ ߤߌߣߊ ߟߊ߫ ߞߊ߬ ߓߐ߫ ߌ ߕߍ߰ߟߊ ߘߐ߫ ، ߊ߬ ߣߴߌ ߦߴߊ߲ ߠߊ߫ ߞߏ ߘߐߓߍ߲߬ ߊ߲ ߧߋ߫ ߞߵߊ߬ ߞߍ߫ ߞߊ߲ߘߦߊ ߘߌ߫ ﴿10﴾

ߏ߬ ߞߍ ߊ߲ ߞߵߊ߬ߟߎ߬ ߕߟߏ ߟߎ߬ ߟߴߊ߬ ߡߊ߬ ( ߞߵߊ߬ߟߎ߬ ߟߊߛߎ߬ߣߐ߰) ߝߊߟߊ߲ ߞߣߐ߫ ߛߊ߲߬ ߦߙߌߞߊ߫ ߞߘߐ߫ ﴿11﴾

ߊ߲ ߓߊ߲߫ ߘߊ߫ ߞߵߊ߬ߟߎ߬ ߟߊߥߟߌ߬ ߸ ߛߴߊ߲ ߘߴߊ߬ ߟߐ߲߫ ߞߙߎߞߊ߫ ߝߌ߬ߟߊ ߘߐ߫ ߸ ߡߍ߲ ߣߐ߬ ߓߊ߯ ߞߍ߫ ߊ߬ ߟߐ߲߫ ߠߊ߫ ߊ߬ߟߎ߫ ߞߊ߬ ߥߎ߬ߛߎ ߡߍ߲ ߞߍ߫ ﴿12﴾

ߊ߲ߠߎ߬ ߦߴߏ߬ ߟߎ߫ ߟߋ߫ ߖߊ߲߬ߖߏ߲ ߘߊ߲߬ߕߍ߰ ߟߴߌ ߦߋ߫ ߕߎ߬ߢߊ ߟߊ߫ ߣߌ߲߬ ، ߝߎߣߎ߲ߞߋ ߏ߬ ߟߎ߫ ߟߋ߫ ߘߍ߲߬ߞߣߍ߬ߦߊ߬ ߘߴߊ߬ߟߎ߫ ߡߊ߰ߙߌ ߡߊ߬ ߸ ߊ߲ ߝߣߊ߫ ߞߵߊ߬ߟߎ߬ ߟߊ߫ ߞߊ߲ߘߦߊ ߡߊߞߊ߬ߝߏ߬ ( ߓߘߍߞߍ߭) ﴿13﴾

ߊ߲ ߘߏ߲߬ ߞߵߊ߬ߟߎ߫ ߖߛߎ߬ߟߊߜߟߍ߬ߦߊ߫ ߸ ߕߎ߬ߡߊ ߡߍ߲ ߊ߬ߟߎ߫ ߞߵߊ߬ߟߎ߫ ߟߐ߬ ߞߵߊ߬ ߟߊߛߋ߫ ߞߏ߫ ߒ߬ߠߎ߫ ߡߊ߰ߙߌ ߟߋ߬ ߛߊ߲ ߠߎ߬ ߣߌ߫ ߘߎ߱ ߡߊ߰ߙߌ ߘߌ߫ ، ߊ߲ ߕߍߣߊ߫ ߡߊ߰ߙߌ߬ ߜߘߍ߫ ߞߟߌ߫ ߟߴߏ߬ ߞߐ߫ ߸ ߓߊ ߊ߲ ߓߘߊ߫ ߞߎߡߊ߫ ߘߊ߲߬ߠߊ߬ߕߊߡߌ߲ ߠߊ߫ ߏ߬ ߘߐ߫ ﴿14﴾

ߊ߲ ߡߌ߬ߙߌ߲߬ߘߌ ߟߎ߫ ߟߋ߬ ߣߌ߲߬ ، ߏ߬ ߟߎ߫ ߟߋ߬ ߓߘߊ߫ ߡߊ߰ߙߌ߬ ߜߘߍ߫ ߟߎ߫ ߡߌ߬ߘߊ߫ ߞߵߊߟߊ߫ ߕߏ߫ ، ߥߟߊߞߏ߫ ߊ߬ߟߎ߫ ߕߍ߬ߘߍ߫ ߣߊ߬ ߘߊ߬ߟߎ߬ ߘߐ߬ߞߣߍߣߍ߲߫ ߘߌ߫ ( ߡߊ߰ߙߌ ) ߏ߬ ߟߎ߬ ߟߊ߫ ߞߏ ߡߊ߬ ، ߖߍߣߍ߲ ߘߏ߲߬ ߘߌ߫ ߕߐ߬ߢߍ߮ ߞߍ߫ ߞߊ߬ ߕߊ߬ߡߌ߲߬ ߥߎߦߊ ߟߊߓߊ߮ ߞߊ߲߬ ߊߟߊ߫ ߟߊ߫؟ ﴿15﴾

(ߊ߬ߟߎ߬ ߞߊ߲߫ ߢߐ߲߮ ߦߋ߫ ߸ ߞߏ߫ ) ߣߴߊߟߎ߫ ߓߘߴߊߟߎ߫ ߡߊߓߐ߫ ߢߌ߲߬ ߠߎ߬ ߣߴߊ߬ߟߎ߬ ߟߊ߫ ߓߊ߬ߕߏ߬ ߝߋ߲ ߠߎ߬ ߟߊ߫ ߸ ߡߍ߲ ߠߎ߬ ߕߍ߫ ߊߟߊ߫ ߘߌ߫ ߸ ߒ߬ߓߵߊߟߎ߫ ߥߴߊߟߎ߫ ߞߎ߲߬ߞߊ߬ߙߌ߬ߝߊ߬ ߝߊߟߊ߲ ߠߊ߫ ، ߊߟߎ߫ ߡߊ߰ߙߌ ߘߴߊ߬ ߟߊ߫ ߤߌߣߊ ߘߏ߫ ߥߊ߲߬ߥߊ߲߬ ߊߟߎ߫ ߞߎ߲߬ߠߊ߫ ߦߋ߲߬ ߸ ߊ߬ ߘߏ߲߬ ߘߌ߫ ߣߐ߰ߦߊ߬ ߦߙߐ߫ ߘߐߓߍ߲߬ ߊߟߎ߫ ߦߋ߫ ߊߟߎ߫ ߟߊ߫ ߞߏߢߊ ߟߊ߫ ﴿16﴾

ߌ ߦߋ߫ ߕߋ߬ߟߋ ߖߌ߲ߞߌ߲ߕߐ ߦߋ߫ ߟߊ߫ ߖߍ߲߬ߞߍ߬ ߟߴߊ߬ߟߎ߬ ߟߊ߫ ߝߊߟߊ߲ ߡߊ߬ ߞߌߣߌ߲ ߝߊ߲߭ ߝߍ߬ ، ߊ߬ ߓߋ߬ߕߐ ߘߌ߫ ߕߊ߬ߡߌ߲߬ ߊ߬ߟߎ߬ ߕߏ߫ ߟߊ߫ ߣߎߡߊ߲ ߝߊ߲߭ ߝߍ߬ ، ߊ߬ߟߎ߫ ߖߍ߬ߘߍ ߡߊߞߍߣߍ߲߫ ߊ߬ ߝߏ߯ ߦߙߌߥߊߣߍ߲ߓߊ ߟߋ߬ ߘߐ߫ ، ߒ߬ߓߊ߬ ߏ߬ ߦߋ߫ ߊߟߊ߫ ߟߊ߫ ߕߐ߰ߡߊ߬ߛߙߋ ߟߎ߬ ߘߏ߫ ߟߋ߬ ߘߌ߫ ، ߊߟߊ߫ ߓߊ߯ ߡߍ߲ ߞߊ߲ߘߊ߫ ߏ߬ ߟߋ ߞߊ߲ߘߕߊ ߘߌ߫ ߸ ߣߴߊ߬ ߘߏ߲߬ ߞߊ߬ ߡߍ߲ ߠߊߝߟߌ߬ ߸ ߌ ߕߍ߫ ߢߌ߲߬ ߞߊ߲ߘߊߟߌߟߊ߫ ߛߐ߬ߘߐ߲߫ ߏ߬ ߟߊ߫ ߡߎ߬ߕߎ߲߬ ﴿17﴾

ߌ ߦߴߊ߬ߟߎ߫ ߖߌ߰ ߟߊ߫ ߞߏ߫ ߊ߬ߟߎ߬ ߦߴߊ߬ߟߎ߬ ߢߣߊ߫ ߟߋ߬ ߸ ߊ߬ߟߎ߫ ߘߏ߲߬ ߛߎ߬ߣߐ߰ߣߍ߲߫ ߠߋ߬ ، ߊ߲ ߧߋ߫ ߕߏ߫ ߟߴߊ߬ߟߎ߫ ߦߟߍ߬ߡߊ߲߬ߦߟߍߡߊ߲߫ ߠߊ߫ ߞߌߣߌ߲߫ ߝߊ߲ ߣߌ߫ ߣߎߡߊ߲߫ ߝߊ߲ ߞߊ߲߬ ߠߋ߬ ߞߍ߬ߣߍ߲ ، ߊ߬ߟߎ߬ ߟߊ߫ ߥߎ߬ߟߎ ߣߐ߲߬ߞߐ߲߫ ߝߌ߬ߟߊ ߘߐߝߎߟߋ߲ߣߍ߲߫ ߘߊߕߍ߯ߣߍ߲ ߘߐ߫ ، ߣߴߌ ߕߎ߲߬ ߓߍ߫ ߖߌ߲ߞߌ߲߫ ߠߴߊ߬ߟߎ߫ ߡߊ߬ ߸ ߌ ߕߎ߲߬ ߘߴߌ ߞߐߟߐ߬ ߊ߬ߟߎ߬ ߟߊ߫ ߓߏ߬ߙߌ ߘߌ߫ ߟߋ߬ ߘߍ߯ ، ߌ ߘߏ߲߬ ( ߖߎ߬ߛߎ ) ߕߎ߲߬ ߘߌ߫ ߝߴߊ߬ߟߎ߬ ߢߍߛߌߟߊ߲ߢߍ ߟߊ߫ ﴿18﴾

ߊ߬ ߘߏ߲߬ ߕߋ߲߬ ߠߋ߬ ، ߊ߲ ߣߊ߬ߣߴߏ߬ ߟߎ߫ ߟߋ߬ ߟߊߥߟߌ߬ ߟߊ߫ ߸ ߛߴߊ߬ߟߎ߬ ߘߌ߫ ߢߐ߲߮ ߘߐߢߌ߬ߣߌ߲߬ߞߊ߫ ، ߘߏ߫ ߞߊ߲߫ ߊ߬ߟߎ߬ ߘߐ߫ ߸ ߞߏ߫ ߊߟߎ߫ ߓߘߊ߫ ߥߊ߯ߕߌ߫ ߖߋ߬ߟߌ߫ ߟߋ߬ ߞߍ߫ ߦߊ߲߬؟ ߊ߬ߟߎ߬ ߞߊ߲߫ ߞߏ߫ ߒ߬ ߓߘߊ߫ ߕߟߋ߬ ߞߋߟߋ߲߫ ߥߟߊ߫ ߕߋ߬ߟߋ ߝߊ߲߬ ߞߋߟߋ߲߫ ߠߋ߬ ߞߍ߫ ، ߊ߬ߟߎ߫ ߣߊ߬ ߘߴߊ߬ ߝߐ߫ ߞߏ߫ ߊߟߎ߫ ߡߊ߰ߙߌ ߟߋ߫ ߞߵߊ߬ ߟߐ߲߫ ߊߟߎ߫ ߓߘߊ߫ ߥߎ߬ߛߎ ߡߍ߲ ߞߍ߫. ߞߏ߫ ߒ߬ߓߵߊߟߎ߫ ߦߴߊߟߎ߫ ߞߋߟߋ߲߫ ߞߋߟߦߴߊߟߎ߫ ߟߊ߫ ߥߊߘߌ ߢߌ߲߬ ߘߌ߫ ߸ ߞߊ߬ ߕߊ߯ ߘߎ߱ ߞߣߐ߫ ߸ ߏ߬ ߦߋ߫ ߛߎ߬ߡߊ߲߬ ߢߌߡߊ߫ ߡߊߝߟߍ߫ ߸ ߊ߰ ߣߊ߬ ߓߊߟߏ ߘߴߊ߬ߟߎ߫ ߡߊ߬ ߏ߬ ߘߐ߫ ، ߞߏ߬ߣߌ߲߬ ߊ߬ ߦߴߊ߬ ߡߐ߯ߡߐ߯ ߘߋ߬ ، ߊ߬ ߞߣߊ߫ ߡߐ߰ ߛߌ߫ ߟߊߞߍ߫ ߊߟߎ߫ ߞߊ߬ߟߊߡߊ߬ ﴿19﴾

ߓߊ ߣߴߊ߬ߟߎ߫ ߞߵߊߟߎ߫ ߡߊߛߐ߬ߘߐ߲߬ ߊ߬ߟߎ߬ ߘߴߊߟߎ߫ ߞߙߎ߬ߟߊ߬ߓߏ߲߫ ߥߟߴߊ߬ߟߎ߬ ߦߴߊߟߎ߫ ߟߊߛߊ߬ߦߌ߲߫ ߊ߬ߟߎ߬ ߟߊ߫ ߣߊߡߎ߲ ߘߐ߫ ، ߊߟߎ߫ ߘߏ߲߬ ߕߍ߫ ߛߎߘߊ߲߫ ߏ߬ ߘߐ߫ ߡߎ߬ߕߎ߲߬ ߝߛߍߞߘߎ߫ ﴿20﴾

ߏ߬ ߟߋ ߕߏ߫ ߘߴߌ ߘߐ߫ ߸ ߊ߲ ߣߊ߬ ߘߊ߫ ( ߡߐ߱ ߟߎ߬ ) ߟߊߖߌ߲ߞߌ߲߫ ߊ߬ߟߎ߫ ߡߊ߬ ߸ ߛߴߊ߬ߟߎ߬ ߘߴߊ߬ ߟߐ߲߫ ߞߏ߫ ߊߟߊ߫ ߟߊ߫ ߛߘߊߒߡߊߞߊ߲ߠߊ ߦߋ߫ ߕߎ߬ߢߊ߫ ߟߋ߬ ߘߌ߫ ߸ ߊ߬ ߣߌ߫ ߞߏ߫ ߟߐ߬ߓߊ ( ߞߍߕߐ߫ ߟߋ߬ ) ߛߌߞߊ߫ ߛߌ߫ ߕߍ߫ ߊ߬ ߘߐ߫. ߊ߬ߟߎ߫ ߣߊ߬ ߘߊ߫ ߢߐ߲߮ ߛߐ߬ߛߐ߫ ߢߌ߲߬ ߠߎ߬ ߟߊ߫ ߞߏߢߊ ߘߐ߫ ߊ߬ ߕߎ߬ߡߊ ߟߊ߫: ߘߏ߫ ߟߎ߫ ߞߊ߲߫ ߞߏ߫ ߞߊ߬ ߓߏ߲ ߟߐ߬ ߊ߬ߟߎ߫ ߡߊ߬ ، ߊ߬ߟߎ߫ ߡߊ߰ߙߌ ߟߋ߫ ߘߏ߲߬ ߞߵߊ߬ߟߎ߬ ߟߐ߲߫ ، ߒ߬ߞߊ߬ ߡߍ߲ ߠߎ߬ ߜߟߌߦߊ߫ ߘߴߊ߬ߟߎ߬ ߟߊ߫ ߞߏ ߞߊ߲߬ ߸ ߏ߬ ߟߎ߫ ߞߵߊ߬ ߝߐ߫ ߸ ߞߏ߫ ߊ߲ ߘߌߣߊ߫ ߡߌ߬ߛߙߌ ߘߏ߫ ߟߐ߬ ߊ߬ߟߎ߫ ߡߊ߬ ߟߋ߬ ߘߍ߯ ﴿21﴾

ߘߏ߫ ߟߎ߫ ߘߌߣߵߊ߬ ߝߐ߫ ߞߏ߫ ߊ߬ߟߎ߫ ( ߡߐ߰ ) ߛߊ߬ߓߊ߫ ߟߋ߬ ߸ ߊ߬ߟߎ߬ ߣߊ߯ߣߌ߲ߣߊ߲ ߦߴߊ߬ߟߎ߬ ߟߊ߫ ߥߎ߬ߟߎ ߘߌ߫ ، ߘߏ߫ ߟߎ߫ ߘߴߊ߬ ߝߐ߫ ߞߏ߫ ߊ߬ߟߎ߫ ( ߡߐ߰ ) ߟߏ߯ߟߎ߫ ߟߋ߬ ߸ ߊ߬ߟߎ߬ ߥߐ߯ߙߐߣߊ߲ ߦߴߊ߬ߟߎ߬ ߟߊ߫ ߥߎ߬ߟߎ ߘߌ߫ ، ߞߏ߫ ߘߏ߲߰ߣߍ߲ ߡߊߝߊ߲߬ߝߊ߲ ߘߐ߫ ߞߊ߬ߣߌ߲߫ ، ߘߏ߫ ߟߎ߫ ߝߣߊ߫ ߘߌߣߵߊ߬ ߝߐ߫ ߞߏ߫ ߊ߬ߟߎ߫ ( ߡߐ߰ ) ߥߐߙߐ߲ߥߌ߬ߟߊ߫ ߟߋ߬ ߸ ߊ߬ߟߎ߬ ߛߋߦߌ߲ߣߊ߲ ߦߴߊ߬ߟߎ߬ ߟߊ߫ ߥߎ߬ߟߎ ߘߌ߫. ߌߟߋ ߊ߬ ߝߐ߫ ߛߊ߫ ߞߏ߫ ߒ ߡߊ߰ߙߌ ߟߋ߫ ߞߵߊ߬ߟߎ߬ ߦߙߌߞߊ ߟߐ߲߫ ߸ ߡߐ߰ ߛߌ߫ ߡߴߊ߬ߟߎ߬ ߟߐ߲߫ ߝߏ߫ ߞߋ߬ߟߋ߲߬ߞߋߟߋ߲߫ ، ߒ߬ߓߊ߬ ߌ ߞߊߣߊ߬ ߛߐ߬ߛߐ߬ߟߌ߬ ߛߌ߫ ߞߍ߫ ߊ߬ߟߎ߬ ߟߊ߫ ߞߏ ߘߐ߫ ߡߎ߬ߕߎ߲߬ ߸ ߝߏ߫ ߜߍ߫ ߘߐ߫ ߛߐߛߐߟߌ ߘߐߙߐ߲߫ ، ߌ ߘߏ߲߬ ߞߊߣߊ߬ ߡߐ߰ ߛߌ߫ ߢߌ߬ߣߌ߲߬ߞߊ߫ ߢߌ߲߬ ߠߎ߬ ߘߐ߫ ߊ߬ߟߎ߬ ߟߊ߫ ߞߏ ߡߊ߬ ﴿22﴾

ߊ߬ ߣߴߌ ߞߴߊ߬ ߝߐ߫ ߞߏ߫ ߛߌ߫ ߡߊ߬ ߞߏ߫ ߒ ߘߴߢߌ߲߬ ߞߍ߫ ߛߌߣߌ߲߫ ﴿23﴾

ߝߏ߫ ߞߵߊ߬ ߛߙߵߊߟߊ߫ ߟߊ߫ ߟߋ߬ ߖߐ߫ ، ߣߴߌ ߢߌ߬ߣߊ߬ ߘߴߏ߬ ߘߐ߫ ߌ ߦߴߌ ߖߊ߲߬ߓߌ߬ߟߊ߬ ߌ ߡߊ߰ߙߌ ߘߐ߫ ߸ ߊ߬ ߣߴߌ ߦߴߊ߬ ߝߐ߫ ߞߏ߫ ߊ߬ ߢߐ߲߰ߘߐ߫ ߒ ߡߊ߰ߙߌ ߘߌ߫ ߒ ߞߊ߲ߘߊ߫ ߛߥߊ߬ߓߊ߬ ߜߘߍ߫ ߡߊ߬ ߸ ߡߍ߲ ߛߎ߬ߘߎ߲߬ߡߊ߲߫ ߢߌ߲߬ ߘߌ߫ ﴿24﴾

ߊ߬ߟߎ߬ ߡߍ߲߫ ߘߴߊ߬ߟߎ߬ ߟߊ߫ ߝߊߟߊ߲ ߠߊ߫ ߸ ߛߊ߲߬ ߗߍ߬ߡߍ߫ ߛߓߊ߬ ߸ ߊ߬ߟߎ߫ ߝߊ߲߭ ߖߘߌ߫ ߘߊ߫ ( ߛߊ߲߬ ) ߞߐ߬ߣߐ߲߬ߘߐ߬ ߟߊ߫ ﴿25﴾

ߌߟߋ ߊ߬ ߝߐ߫ ߞߏ߫ ߊߟߊ߫ ߟߋ߫ ߞߵߊ߬ ߟߐ߲߫ ߊ߬ߟߎ߫ ߞߊ߬ ߥߎ߬ߛߎ ߡߍ߲ ߞߍ߫ ، ߓߊ ߏ߬ ߟߋ ߕߊ߫ ߦߋ߫ ߛߊ߲ ߠߎ߬ ߣߌ߫ ߘߎ߱ ߞߏ߫ ߘߏ߲߰ߣߍ߲ ߘߌ߫ ، ߌߟߋ ߘߏ߲߬ ߌ ߢߊ ߓߍ߲߬ ߊ߬ߟߋ ߟߋ߫ ߡߊ߬ ، ߌ ߦߴߌ ߕߟߏߡߊߟߐ߬ ߊ߬ ߟߊ߫ ، ߢߌ߲߬ ߜߘߍ߫ ߕߍ߫ ߊ߬ߟߎ߬ ߟߴߊ߬ߟߋ߬ ߞߐ߫ ߸ ߊ߬ߟߋ ߘߏ߲߬ ߕߍ߫ ߡߐ߰ ߛߌ߫ ߟߊߕߘߍ߬ ߟߴߊ߬ ߟߊ߫ ߞߕߌ ߘߐ߫ ﴿26﴾

ߌ ߦߟߌߘߏ߲߬ߣߴߌ ߡߊ߰ߙߌ ߟߊ߫ ߟߍߙߊ ߡߍ߲ ߠߊ߫ ߸ ߌ ߦߋ߫ ߕߴߏ߬ ߟߋ ߞߊ߬ߙߊ߲߬ ߠߊ߫ ، ߝߊ߬ߟߋ߲߬ߓߊ߯ ߕߍ߫ ߏ߬ ߟߋ ߟߊ߫ ߞߎߡߊ ߟߎ߬ ߟߊ߫ ߸ ߌ ߘߏ߲߬ ߕߍߣߊ߫ ߛߍ߲߬ߓߍ߬ߟߊ߲߫ ߛߐ߬ߘߐ߲߬ ߠߊ߫ ߣߴߏ߬ ߕߍ߫ ﴿27﴾

ߌ ߦߴߌ ߣߌ ߡߎ߬ߢߎ߲߫ ߡߐ߰ ߟߎ߫ ߟߋ߫ ߝߍ߬ ߸ ߡߍ߲ ߠߎ߬ ߦߴߊ߬ߟߎ߫ ߡߊ߰ߙߌ ߞߟߌ߫ ߟߊ߫ ߛߐ߰ߡߊ߬ߘߊ ߣߌ߫ ߥߎ߬ߙߊ߬ߘߊ ߟߊ߫ ߸ ߊ߬ ߞߏߟߘߊ ߢߌߣߌ߲ ߡߊ߬ ، ߌ ߢߊ߫ ߝߌ߬ߟߊ ߞߣߊ߫ ߕߊ߬ߡߌ߲߫ ߏ߬ ߟߎ߬ ߟߊ߫ ߘߋ߬ ߞߴߌ ߦߋ߫ ߘߎߢߊ߫ ߢߣߊߡߦߊ ߡߊ߬ߢߍ߯ߙߍ ߢߌߣߌ߲߫ ߠߊ߫ ߸ ߌ ߘߏ߲߬ ߞߊߣߊ߬ ߡߐ߰ ߞߊ߲߫ ߡߌ߬ߘߊ߫ ߘߋ߬ ߊ߲ ߣߐ߬ ߡߍ߲ ߛߣߐ߬ߡߍ ߟߊߢߌ߬ߣߊ߬ ߟߴߊ߲ ߞߏߝߐ ߟߊ߫ ߸ ߊ߬ ߘߏ߲߬ ߞߵߊ߬ ߣߌ ߛߊ߬ߥߏ ߟߊߓߊ߬ߕߏ߬ ، ߏ߬ ߞߍ ߸ ߊ߬ ߟߊ߫ ߞߏ ߞߍ߫ ߘߊ߫ ( ߞߏ߫ ) ߡߊߓߌ߬ߟߊ߬ߣߍ߲ ߘߌ߫ ﴿28﴾

ߌ ߦߴߊ߬ ߝߐ߫ ߞߏ߫ ߕߎ߬ߢߊ ߝߘߊߣߍ߲߫ ߊߟߎ߫ ߡߊ߰ߙߌ ߟߋ߬ ߟߊ߫ ، ߏ߬ ߘߐ߫ ߊ߬ ߓߊ߯ ߡߍ߲ ߘߌߦߊ߫ ߏ߬ ߦߋ߫ ߘߍ߲߬ߞߣߍ߬ߦߊ߫ ، ߊ߬ ߓߊ߯ ߡߍ߲ ߝߣߊ߫ ߘߌߦߊ߫ ߏ߬ ߦߋ߫ ߓߊ߲߬ߓߊ߰ߦߊ߫ ، ߒ߬ߠߎ߫ ߞߏ߬ߣߌ߲ ߣߐ߬ ߕߊ ߟߋ߬ ߘߐߓߍ߲߬ ߠߊ߫ ߕߐ߬ߢߍ߰ߒߕߋ ߟߎ߬ ߦߋ߫ ، ߏ ߘߊ߬ߣߊ߲ ߠߎ߫ ߟߋ߬ ߞߍߣߍ߲߫ ߞߵߊ߬ߟߎ߬ ߟߊߝߏ߬ ߔߘߋߞߎ߫ ، ߣߴߊ߬ߟߎ߫ ߞߊ߬ ߛߊ߲ߖߌ߫ ߢߌߣߌ߲ ߞߍ߫ ߸ ߊ߬ߟߎ߬ ߘߌ߫ ߛߊ߲ߖߌߦߊ߫ ، ߏ߬ ߦߋ߫ ߦߏ߫ ߕߟߎ߫ ߥߙߌ߬ߣߍ߲߫ ، ߏ߬ ߦߋ߫ ߢߊߘߐߟߊ ߟߎ߫ ߛߏ߬ߘߌ߲߬ ߠߊ߫ ߟߋ߬ ߞߙߐߕߐߕߐ߫ ، ߡߌ߲߬ߕߊ߬ ߖߎ߯ ߟߋ߬ ߸ ߊ߬ ߘߏ߲߬ ߖߎ߯ߡߊ߲߫ ߡߊ߬ߞߍ߬ߦߌ߬ߟߊ߬ߦߊ ߘߐ߫ ﴿29﴾

ߡߍ߲ ߠߎ߫ ߞߏ߬ߣߌ߲ ߘߍ߲߬ߞߣߍ߬ߦߊ߬ߣߍ߲߫ ߞߊ߬ ߢߌ߬ߡߊ ߟߎ߬ ߞߍ߫ ، .. ߊ߲ߠߎ߬ ߸ ߒ߬ߠߎ߫ ߞߏ߬ߣߌ߲ ߕߍ߫ ߡߐ߱ ߛߊ߬ߙߊ ߕߌߢߍ߫ ߟߊ߫ ߸ ߡߍ߲ ߞߊ߬ ߗߋߥߊߟߌ ߟߊߢߊ߬ ﴿30﴾

(ߒ߬ߓߊ߬ ) ߏ߬ ߟߎ߫ ߟߋ߬ ߢߍߛߌ߰ߣߍ߲߫ ߝߙߍ ߣߊߞߐ ߟߎ߬ ߟߊ߫ ߸ ߖߌߢߊ ߟߎ߬ ߦߋ߫ ߥߦߏ߬ ߟߴߏ߬ ߟߎ߬ ߞߘߐߟߊ ߟߎ߬ ߘߐ߫ ߞߎߟߊ߲ߞߎߟߊ߲߫ ، ߊ߬ߟߎ߬ ߘߌ߫ ߡߊߖߐ߯ߙߊ߲߫ ߦߋ߲߬ ߛߊߣߌ߲߫ ߜߊߙߊ߲ߜߊߙߊ߲ ߠߎ߬ ߟߊ߫ ߸ ߊ߬ ߣߴߊ߬ߟߎ߬ ߘߴߊ߬ߟߎ߬ ߡߊߛߌ߬ߘߌ߫ ߝߊ߰ߣߌ߲߬ ߝߙߌߛߌߡߊ ߟߎ߬ ߟߊ߫ ߸ ߣߊߟߌ߬ߡߎ߲߬ ߕߣߐߣߐ ߣߌ߫ ߖߎ߯ߝߊ߮ ߟߎ߬ ߘߌ߫ ߸ ߊ߬ߟߎ߫ ߛߍ߲߬ߓߍ߬ߣߍ߲߫ ߜߍ߬ߡߍ ߟߎ߬ ߘߐ߫ ، ߛߙߊ߬ ߢߌߡߊ߫ ߟߴߏ߬ ߘߌ߫ ߸ ߊ߬ ߘߏ߲߬ ߢߊ߬ߣߍ߲߫ ߡߊ߬ߞߍ߬ߦߌ߬ߟߊ߬ߦߊ ߘߐ߫ ﴿31﴾

ߛߊ߲߬ߘߊ ߟߴߊ߬ߟߎ߬ ߦߋ߫ ߗߍ߬ ߝߌ߬ߟߊ߫ ߡߊ߬ ، ߊ߲ ߞߊ߬ ߖߊ߬ߓߌ߬ߙߋ߲߬ ߣߊߞߐ߫ ߝߌ߬ߟߊ߬ ߞߍ߫ ߏ߬ ߟߋ ߞߋߟߋ߲ ߦߋ߫ ، ߞߵߏ ߝߌ߬ߟߊ ߟߊߡߌߣߌ߲߫ ߕߡߊߙߏߛߎ߲ ߠߎ߬ ߟߊ߫ ߸ ߞߵߏ ߝߌ߬ߟߊ ߕߍߟߊ ߞߍ߫ ߝߏ߬ߘߏ ߘߌ߫ ߛߊ߫ ﴿32﴾

ߣߊߞߐ߫ ߝߌ߬ߟߊ ߏ߬ ߟߋ ߓߍ߯ ߣߊ߬ ߘߴߊ߬ߟߎ߬ ߥߟߏߒߘߐ ߘߌ߫ ߸ ߝߏߦߌ߬ ߡߊ߫ ߘߛߏ߫ ߊ߬ ߘߐ߫ ߸ ߊ߲ ߘߏ߲߬ ߞߊ߬ ߞߐ߬ߢߊ ߟߊߝߎ߲ߘߌ߫ ߊ߬ ߝߌ߬ߟߊ ߢߊߝߍ߬ ߟߋ߬ ߞߎߟߊ߲ߞߎߟߊ߲߫ ﴿33﴾

ߦߙߌߘߋ߲߫ ߛߌߦߊߡߊ߲߫ ߣߊ߬ ߘߊ߫ ߛߋ߫ ߊ߬ ߓߟߏ߫ ، ߊ߬ ߞߵߊ߬ ߝߐ߫ ߊ߬ ߘߍ߬ߢߐ߲߮ ߦߋ߫ ߏ߬ ߟߋ ߘߐ߫ ߸ ߞߵߊ߬ ߕߘߍ߬ ߊ߬ ߦߴߊ߬ ߓߊ߬ߘߏ߬ߢߐ߲߰ߦߊ ߞߊ߲߬ ߸ ߞߏ߫ ߒߠߋ ߌ ߢߍ߫ ߣߊ߲߬ߝߟߏ߫ ߟߊ߫ ߸ ߒ ߧߴߌ ߢߍ߫ ߖߡߊ߬ ߟߊ߫ ﴿34﴾

ߊ߬ ߘߏ߲߬ ߘߴߊ߬ ߟߊ߫ ߣߊߞߐ ߘߐ߫ ߸ ߞߵߊ߬ ߛߐ߬ߘߐ߲߬ ߊ߬ ߦߴߊ߬ ߖߍ߬ߘߍ߫ ߕߐ߬ߢߍ߰ ߟߴߊ߬ ߝߐ ߘߐ߫ ߸ ߞߏ߫ ߒߠߋ ߦߟߌ߫ ߕߍ߫ ߣߌ߲߬ ߜߊ߬ߣߊ߲߬ ߞߏ߫ ߟߊ߫ ߡߎ߬ߕߎ߲߬ ߝߋߎ߫ ﴿35﴾

ߒ ߦߟߌ߫ ߕߍ߫ ߟߐ߬ߓߊ ߟߐ߬ ߞߏ ߝߣߊ߫ ߟߊ߫ ߸ ߤߊߟߌ߬ ߒ ߘߏ߲߬ ߟߊߛߊ߬ߦߌ߬ ߘߊ߫ ߒ ߡߊ߰ߙߌ ߡߊ߬ ߸ ߒ ߞߍߕߐ߫ ߊ߬ ߞߎ߲߬ߝߊߟߋ߲ ߠߋ߫ ߛߐ߬ߘߐ߲߬ ߠߊ߫ ( ߦߋ߲߬ ) ߡߍ߲ ߝߌ߬ߛߴߊ߬ ߘߌ߫ ﴿36﴾

ߊ߬ ߘߍ߬ߢߐ߲߮ ߞߊ߲߫ ߊ߬ ߡߵߊ߬ ߖߋ߬ߓߌ ߘߐ߫ ߸ ߞߏ߫ ߌ߬ߦߏ߯ ߌ ߘߌ߫ ߓߊ߲߬ߓߊ߰ߦߊ ߟߐ߬ ‹ߡߊ߰ߙߌ› ߡߊ߬ ߡߍ߲ ߞߵߌ ߘߊ߲߫ ߓߎ߰ߘߌ ߘߐ߫؟ ߏ߬ ߞߐ߫ ߖߌߣߍ߲߫ ߣߙߐߘߐߖߎ߮ ߘߐ߫؟ ߞߊ߬ ߓߊ߲߫ ߞߵߌ ߟߊߞߢߊ߫ ߗߍ߭ ߘߌ߫؟ ﴿37﴾

ߒ߬ߞߊ߬ ߒߠߋ ߸ ߊߟߊ߫ ߟߋ߬ ߒߠߋ ߡߊ߰ߙߌ ߘߌ߫ ، ߒ ߘߏ߲߬ ߕߍ߫ ߝߋ߲߫ ߞߋߟߋ߲߫ ߛߌ߫ ߝߙߊ߬ ߒ ߡߊ߰ߙߌ ߡߊ߬ ﴿38﴾

ߥߟߊߞߏ߫ ߌ ߘߏ߲߬ ߕߎߡߊ ߌ ߟߊ߫ ߣߊߞߐ ߘߐ߫ ߸ ߌ ߕߘߍ߬ ߊ߬ ߝߐ߫ ߞߏ߫: ߡߍ߲ ߓߊ߯ ߊߟߊ߫ ߘߌߦߊ߫ ߸ ߝߊ߲߬ߞߊ߬ ߛߌ߫ ߕߍ߫ ߝߏ߫ ( ߡߍ߲ ߦߋ߫ ) ߊߟߊ߫ ߟߊ߫. ߣߴߌ ߞߊ߬ ߒ ߦߋ߫ ߸ ߒߠߋ ߞߊ߫ ߘߐ߯ ߌ ߘߌ߫ ߣߊ߲߬ߝߟߏ߫ ߟߊ߫ ߸ ߊ߬ ߣߌ߫ ߘߋ߲߫ ߠߊ߫ ﴿39﴾

ߊ߬ ߢߐ߲߰ߘߐ߫ ߒ ߡߊ߰ߙߌ ߘߌ߫ ߒ ߛߐ߫ ߤߙߊ߫ ߟߊ߫ ߞߊ߬ ߕߊ߬ߡߵߌ ߟߊ߫ ߣߊߞߐ ߟߊ߫ ، ߊ߬ ߣߴߊ߬ ߘߌ߫ ߜߊ߬ߙߊ߲߬ߞߕߊ ߟߎ߬ ߗߋ߫ ߊ߬ ߞߊ߲ߡߊ߬ ߞߊ߬ ߓߐ߫ ߛߊ߲ ߡߊ߬ ، ߊ߬ ߘߌ߫ ߟߊߓߊ߲߫ ߜߙߋߞߙߋ ߘߌ߫ ߏ߬ ߘߐ߫ ߜߟߋߞߎ߬ ﴿40﴾

ߥߟߴߊ߬ ߖߌ ߦߋ߫ ߟߊߓߊ߲߫ ߖߊ߬ߟߌ ߡߊ߬ ߜߍ߯ߙߍ߫ ߸ ߌ ߘߏ߲߬ ߕߍ߫ ߊ߬ ߖߌ߫ ߢߌߣߌ߲ ߟߊߣߐ߬ ߡߎ߬ߕߎ߲߬ ﴿41﴾

ߊ߬ ߟߊ߫ ߦߙߌߘߋ߲ ߠߎ߫ ߣߊ߬ ߘߊ߫ ߟߊߝߏ߬ ߔߘߋߞߎ߬ ، ߊ߬ ߟߊߓߊ߲ ߣߊ߬ ߘߴߊ߬ ߞߍ߫ ߊ߬ ߕߍ߯ ߝߌ߬ߟߊ ߦߟߍ߬ߡߊ߲߬ߦߟߍߡߊ߲ ߘߌ߫ ߣߡߌߛߊ ߡߊ߬ ߸ ߊ߬ ߣߊ߬ ߖߘߍ߬ߡߊ߬ߓߐ ߡߍ߲ ߞߍ߫ ߟߴߊ߬ ( ߟߊ߫ ߡߎ߬ߛߊ߬ߞߊ߫ ߘߏ߲߬ߣߍ߲ ߡߵߊ߬) ߘߐ߫ ߸ ߞߵߊ߬ ߕߘߍ߬ ߊ߬ ߥߎ߬ߦߊ߬ߣߍ߲ ߦߴߊ߬ ߟߐ߲ ߠߎ߫ ߞߊ߲߬ ، ߊ߬ ߦߴߊ߬ ߝߐ ߞߊ߲߬ ߛߊ߫ ߞߏ߫ ߊ߯ߟߊ߲߫ ߸ ߥߟߊߞߏ߫ ߒ ߕߎ߲߬ ߞߊ߫ ߝߋ߲߫ ߞߋߟߋ߲߫ ߛߌ߫ ߝߙߊ߬ ߒ ߡߊ߰ߙߌ ߞߊ߲߬ ﴿42﴾

ߞߙߎߞߊ߫ ߡߊ߫ ߞߍ߫ ߦߋ߲߬ ߡߍ߲ ߠߎ߬ ߘߴߊ߬ ߘߍ߬ߡߍ߲߬ ߣߌ߫ ߊߟߊ߫ ߕߍ߫ ߸ ߊ߬ ߘߏ߲߬ ߡߊ߫ ߞߍ߫ ߊ߬ ߖߍ߬ߘߍ߫ ߘߍ߬ߡߍ߲߬ߓߊ߯ ߘߌ߫ ﴿43﴾

ߏ߬ ߦߌߟߊ߫ ߛߎ߮ ߘߐ߫ ߸ ߘߍ߬ߡߍ߲߬ߓߊ߰ߦߊ ߦߋ߫ ߊߟߊ߫ ߕߎ߬ߢߊ߬ߡߊ ߟߋ߬ ߓߟߏ߫ ، ߓߊ ߏ߬ ߟߋ ߢߌ߬ߡߊ߫ ߛߙߊ߬ߟߌ ߘߐ߫ ߸ ߏ߬ ߟߋ ߢߌ߬ߡߊ߬ ߞߏ߫ ߟߊߓߊ߲ ߘߐ߫ ﴿44﴾

ߌ ߦߋ߫ ߘߎߢߊ߫ ߢߣߊߡߦߊ ߛߊ߲߬ߘߊ ߟߴߊ߬ߟߎ߬ ߦߋ߫ ، ߏ߬ ߟߊߒߡߊ ߟߋ߬ ߦߏ߫ ߊ߬ ߣߊ߬ ߖߌ ߡߍ߲ ߠߊߖߌ߰ ߟߊ߫ ߞߊ߬ ߓߐ߫ ߡߐ߲ߕߐ߲ ߘߐ߫ ، ߘߎ߱ ߝߍߘߍ߲ߝߋ߲ ߠߎ߬ ߢߊ߯ߡߌ߲߫ ߘߴߏ߬ ߟߊ߫ ، ߏ߬ ߟߎ߫ ߣߊ߬ ߘߊ߫ ߖߊ߬ ߞߊ߬ ߡߎ߯ߡߎ߯ ߞߊ߬ ߖߎߙߎ߲ߖߎߙߎ߲߫ ߝߢߐ ߓߟߏ߫ ߛߎߋ߫ ، ߖߊ߯ߕߋ߬ ߸ ߊߟߊ߫ ߟߋ߬ ߛߋߣߍ߲߫ ߞߏ ߓߍ߯ ߟߊ߫ ﴿45﴾

ߣߊ߲߬ߝߟߏ ߣߌ߫ ߘߋ߲ߞߍ ߟߎ߬ ߦߋ߫ ߘߎߢߊ߫ ߢߣߊߡߦߊ ߡߊ߬ߢߍ߯ߙߍ ߟߋ߬ ߘߌ߫ ، ߒ߬ߓߊ߬ ߕߏߕߊ߫ ߢߌߡߊ ߟߎ߬ ߛߊ߫ ߸ ߏ߬ ߟߎ߫ ߟߋ߫ ߢߌ߬ߡߊ߬ ߌ ߡߊ߰ߙߌ ߓߘߊ ߛߊ߬ߙߊ ߘߐ߫ ߸ ߏ߬ ߟߎ߫ ߟߋ߫ ߢߌ߬ߡߊ߫ ߣߊ߬ߕߊ ߘߐ߫ ﴿46﴾

ߊ߲ ߞߍߕߐ߫ ߞߎ߬ߙߎ ߟߎ߬ ߟߊߕߊ߯ ߟߊ߫ ߟߏ߲ ߡߍ߲ ߸ ߌ ߘߌ߫ ߘߎ߱ ߟߊߞߢߊߣߍ߲ ߦߋ߫ ߞߊ߬ ߞߍ߫ ߕߛߊߞߙߊ ߘߌ߫ ، ߊ߲ ߘߴߊ߬ߟߎ߬ ( ߓߍ߯ ) ߟߊߘߍ߬ ߏ߬ ߘߐ߫ ߞߐߘߍ߫ ߸ ߊ߲ ߕߍ߫ ߡߐ߰ ߞߋߟߋ߲߫ ߕߏ߫ ߞߐ߫ ߊ߬ߟߎ߬ ߘߐ߫ ﴿47﴾

ߊ߬ߟߎ߬ ߘߌ߫ ߟߊߟߐ߬ ߌ ߡߊ߰ߙߌ ߣߊ߰ߟߊ߫ ߛߝߊ ߘߐ߫ ߸ ( ߞߵߊ߬ ߝߐ߫ ߊ߬ߟߎ߬ ߦߋ߫ ߸ ߞߏ߫ ) ߊߟߎ߫ ߣߊ߬ߣߍ߲ ߝߟߍ߫ ߒ ߕߘߍ߬ ߟߊ߫ ߣߌ߲߬ ߸ ߦߏ߫ ߊ߲ ߞߵߊߟߎ߫ ߘߊ߲߫ ߢߊ ߡߍ߲ ߛߋ߲߬ߧߊ߬ ߝߟߐ ߘߐ߫ ߸ ߞߵߊ߬ ߕߘߍ߬ ߊߟߎ߫ ߞߵߊ߬ ߜߊߟߏ߲߫ ߊߟߎ߫ ߟߊ߫ ߟߋ߬ ߸ ߞߏ߫ ߊ߲ ߕߍߣߊ߬ ߛߘߊߒߡߊߕߎߡߣߊ߫ ߞߍ߫ ߟߴߊߟߎ߫ ߟߊ߫ ﴿48﴾

(ߓߍ߯ ߗߋߥߊߟߌ ߟߎ߬ ) ߟߍߙߊ ߘߌ߫ ߟߊ߫ ߜߍ ߘߐ߫ ، ߏ߬ ߓߊ߯ ߞߍ߫ ߌ ߘߌ߫ ߛߐ߲߬ߡߊ ߟߎ߬ ߛߌߟߊ߲ߣߍ߲ ߦߋ߫ ߏ߬ ߞߣߐ߫ ߞߏ ߢߍ߫ ߸ ߞߵߊ߬ ߝߐ߫ ߞߏ߫ ߊ߯ߟߊ߲߫߹ ߡߋ߬ߘߋ ߟߍߙߊ ߢߌ߲߬ ߠߊ߫ ߓߏ߲߬ ߸ ߊ߬ ߕߍ߫ ( ߞߏ ) ߘߐ߰ߡߊ߲߬ߣߍ߲߬ ߣߴߊ߬ ߓߏ߲߬ߓߊ߬ ߛߌ߫ ߕߏ߫ ߸ ߝߏ߫ ߊ߬ ߦߴߏ߬ ߓߍ߯ ߡߊߘߊ߲߫ ߠߋ߬ ߖߐ߫. ߊ߬ߟߎ߫ ߘߏ߲߬ ߘߴߊ߬ߟߎ߬ ߟߊ߫ ߓߊ߯ߙߊ ߓߍ߯ ߛߐ߬ߘߐ߲߬ ߜߍ ߘߐ߫ ߔߊߞߌߛߊ߫ ، ߓߊߏ߬ ߌ ߡߊ߰ߙߌ ߕߍ߫ ߡߐ߰ ߛߌ߫ ߕߐ߬ߢߍ߰ ߟߊ߫ ﴿49﴾

ߕߎ߬ߡߊ ߡߍ߲ ߊ߲ ߞߵߊ߬ ߝߐ߫ ߡߟߍ߬ߞߊ ߟߎ߬ ߦߋ߫ ߸ ߒ ߞߏ߫ ߊߟߎ߫ ߕߌ߲ߓߌߘߌ߲ ߞߍ߫ ߊߘߡߊ߫ ߦߋ߫ ، ߊ߬ ߓߍ߯ ߞߊ߬ ߕߌ߲ߓߌߘߌ߲ ߞߍ߫ ߝߏ߫ ߓߙߌ߬ߛߌ߫ ߸ ߏ߬ ߟߋ ߕߘߍ߬ ߥߐ߬ߞߎߟߐ ߟߎ߬ ߘߐ߫ ، ߒ߬ߞߵߊ߬ ߔߊߟߊ߲ߞߊ߫ ߘߴߊ߬ ߡߊ߰ߙߌ ߟߊ߫ ߖߊ߬ߡߊߙߌ ߞߣߐ߫ ߟߋ߬ ، ߌ߬ߦߏ߯ ߊߟߎ߫ ߘߴߏ߬ ߣߴߊ߬ ߓߐ߲ߛߐ߲ ߠߎ߫ ߡߌ߬ߘߵߊߟߎ߫ ߟߊ߫ ߞߏߕߌ߮ ߟߎ߬ ߘߌ߫ ߞߊ߬ ߒߠߋ ߕߏ߫ ߸ ߞߵߊ߬ ߕߘߍ߬ ߊ߬ߟߎ߬ ߦߴߊߟߎ߫ ߖߎ߮ ߟߋ߬ ߘߌ߫؟ ߏ ߘߏ߲߬ ߦߋ߫ ߝߊ߬ߟߋ߲߬ߠߌ߲߬ ߖߎ߯ ߘߌ߫ ߕߐ߬ߢߍ߰ߒߕߋ ߟߎ߬ ߓߟߏ߫ ߞߟߋ߫ ﴿50﴾

ߒߠߋ ߘߏ߲߬ ߜߎ ߡߴߊ߬ߟߎ߬ ߟߊߛߙߋߦߊ߫ ߛߊ߲ ߠߎ߬ ߣߌ߫ ߘߎ߱ ߘߊ߲ ߣߴߊ߬ߟߎ߫ ߖߘߍ߬ߞߎ߲ ߛߌ߫ ߘߊ߲ ߡߊ߬ ، ߓߊ ߒߠߋ ߕߍ߫ ߟߊ߬ߝߟߌ߬ߟߌ߬ߟߊ ߟߎ߬ ߞߍ߫ ߟߊ߫ ߒ ߕߎ߰ ߘߐ߬ߜߟߍ߬ߦߊ߬ߓߊ߯ ߟߎ߫ ߘߌ߫ ﴿51﴾

‹ ߊߟߊ߫ › ߞߍߕߐ߫ ߊ߬ ߝߐ߫ ߟߴߊ߬ߟߎ߫ ߡߊ߬ ߟߏ߲ ߡߍ߲ ߸ ߞߏ߫ ߊߟߎ߫ ߦߋ߫ ߒ ߜߙߊ߬ߢߐ߲߮ ߠߎ߬ ߞߟߌ߫ ߓߊ߫ ߸ ߊߟߎ߫ ߕߘߍ߬ ߡߍ߲ ߠߎ߬ ߜߊߟߏ߲߫ ߠߴߊߟߎ߫ ߟߊ߫ ، ߊ߬ߟߎ߬ ߘߴߊ߬ߟߎ߬ ߞߟߌ߫ ߓߊ߬ߙߌ߬ ߊ߬ߟߎ߬ ߕߍ߫ ߛߍ߯ ߝߌ߬ߟߌ߫ ߊ߬ߟߎ߬ ߘߐ߫ ، ߘߊ߬ߡߊ߲߬ߛߊ߫ ߊ߲ ߘߌ߫ ߟߊ߬ߕߏ߬ߒ߬ߘߐ߬ߟߌ ߝߏߟߏ߲ߞߎߘߎ߲ ߘߏ߫ ߘߏ߲߬ ߊ߬ߟߎ߬ ߕߍ߫ ߔߙߊߎ߫ ﴿52﴾

ߛߐ߲߬ߡߊ ߟߎ߬ ߘߌ߫ ߕߊ ߦߋ߫ ߸ ߊ߬ߟߎ߬ ߘߴߊ߬ ߖߌ߰ ߞߏ߫ ߊ߬ߟߎ߫ ߓߋ߬ߕߐ߫ ߏ߬ ߟߋ ߘߐ߫ ، ߞߏ߬ߣߌ߲߬ ߊ߬ߟߎ߬ ߕߍ ߊ߬ ߡߟߊ߫ ߦߙߐ߫ ߛߌ߫ ߛߐ߬ߘߐ߲߬ ﴿53﴾

ߊ߲ ߓߘߊ߫ ߞߏߟߊߒߞߏߡߊ ߛߎ߮ ߓߍ߯ ߘߏ߫ ߘߐߛߊ߬ߦߌߛߊ߬ߦߌ߫ ߞߎ߬ߙߊ߬ߣߊ ߣߌ߲߬ ߞߣߐ߫ ߡߐ߱ ߟߎ߬ ߦߋ߫ ߸ ߓߊ߬ߙߌ߬ ߡߐ߱ ߟߋ߬ ߟߊ߫ ߛߐ߬ߛߐ߬ߟߌ ߛߘߍߡߊ߲߫ ߝߋ߲ ߓߍ߯ ߘߌ߫ ﴿54﴾

ߕߎ߬ߡߊ ߡߍ߲ ߞߊ߲ߘߦߊ ߣߊ߬ ߘߊ߫ ߡߐ߱ ߟߎ߫ ߡߊ߬ ߸ ߝߏߦߌ߬ ߡߴߊ߬ߟߎ߫ ߞߎ߬ߡߊ߲߬ߘߌ߫ ߘߍ߲߬ߞߣߍ߬ߦߊ ߡߊ߬ ߸ ߊ߬ ߣߌ߫ ߦߝߊ߬ ߢߌߣߌ߲ ߡߵߊ߬ߟߎ߫ ߡߊ߰ߙߌ ߟߊ߫ ߸ ߞߏ߫ ߝߏ߫ ߝߟߐ߫ ߡߐ߱ ߟߎ߬ ߟߊ߫ ߟߊ߲߬ߘߊ ߟߋ߬ ߓߊ߯ ߣߵߊ߬ߟߎ߫ ߡߊ߬ ߕߘߋ߫ ، ߥߟߊ߫ ߖߊ߲߰ߞߕߊ ߦߋ߫ ߣߵߊ߬ߟߎ߫ ߡߵߊ߬ ߛߎ߯ߦߊ ߓߍ߯ ߘߏ߫ ߘߌ߫ ﴿55﴾

ߊ߲ ߡߊ߫ ߞߋߟߊߡߐ߮ ߟߎ߬ ߗߋ߫ ( ߝߋ߲߫ ߜߘߍ߫ ߟߎ߫ ߘߌ߫ ) ߝߏ߫ ߘߟߊߝߎߟߊ ߟߎ߬ ߣߌ߫ ߖߊ߬ߛߙߋ߬ߡߊ߬ߟߌ߬ߟߊ ߟߎ߬ ، ߓߊ߲߬ߓߊ߮ ߟߎ߫ ߟߋ߬ ߘߊߘߐߜߟߍߦߊ ߞߍ߫ ߟߊ߫ ߡߣߊ߬ߡߣߊ߬ ( ߘߊߟߎ ߟߎ߫ ) ߞߎ߲߬ߠߊ߫ ߸ ߛߴߊ߬ߟߎ߬ ߘߌ߫ ߕߎ߬ߢߊ ߓߎߙߎ߲ߞߐ߫ ߏ߬ ߟߊ߫ ، ߊ߬ ߣߌ߫ ߞߊ߬ ߒ߬ ߠߊ߫ ߟߝߊߙߌ ߟߎ߬ ߣߌ߫ ߖߊ߬ߛߙߋ߬ߡߟߊ߬ ߞߊ߲ ߠߎ߬ ߞߍ߫ ߦߟߍߒߡߊ߫ ߝߋ߲ ߘߌ߫ ﴿56﴾

ߖߍߣߍ߲ ߠߊ߫ ߕߐ߬ߢߍ߮ ߕߊ߬ߡߌ߲߬ߣߍ߲߫ ߡߐ߱ ߟߊ߫ ߸ ߡߍ߲ ߞߊ߬ߥߊ߲߬ߘߌ߬ ߘߴߊ߬ ߡߊ߰ߙߌ ߟߊ߫ ߟߝߊߙߌ ߟߎ߬ ߟߊ߫ ߸ ߊ߬ ߞߵߊ߬ ߞߐߘߏ߲߬ ߏ߬ ߟߎ߬ ߟߊ߫ ߸ ߊ߬ ߣߌ߫ ߞߊ߬ ߢߌ߬ߣߴߊ߬ ߖߍ߬ߘߍ ߓߟߏ߫ ߟߊ߫ ߗߋߥߊߟߌ ߞߐ߫؟ ߊ߲ ߣߐ߬ ߕߎ߲߯ߟߊ߲߫ ߞߍ߫ ߟߴߏ߬ ߟߎ߫ ߟߋ߫ ߛߣߐ߬ߡߍ ߟߎ߬ ߟߊ߫ ߸ ߊ߬ߟߎ߬ ߞߊߣߊ߬ ߝߊ߰ߡߎ߲߬ߠߌ߲߫ ߞߍ߫ ߊ߬ߟߎ߬ ߟߊ߫ ، ߊ߬ ߣߌ߫ ߞߊ߬ ߜߋߘߋ߲ߟߊ߲߫ ߞߍ߫ ߊ߬ߟߎ߬ ߕߟߏ ߟߎ߬ ߟߊ߫ ߸ ߤߊߟߵߌ ߓߊ߯ ߊ߬ߟߎ߬ ߞߟߌ߫ ߞߊ߲ߘߦߊ ߡߊ߬ ߢߊ-ߊ-ߢߊ߫ ߸ ߊ߬ߟߎ߬ ߕߍ߫ ߞߊ߲ߘߊ߫ ߏ߬ ߘߐ߫ ߡߎ߬ߕߎ߲߬ ߝߛߍߞߘߎ߫ ﴿57﴾

ߌ ߡߊ߰ߙߌ߫ ߦߝߊ߬ߟߊ ߟߋ߬ ߤߌߣߊ ߕߌ߱ ߘߌ߫ ߞߟߋ߫. ߣߴߏ߬ ߕߍ߫ ߊ߬ ߕߎ߲߬ ߘߴߊ߬ߟߎ߫ ߡߌ߬ߘߴߊ߬ߟߎ߬ ߕߊ߫ ߞߍߕߊ ߟߊ߫ ߸ ߊ߬ ߕߘߍ߬ ߘߌ߫ ߖߊ߲߰ߞߕߊ ߟߊߞߌߢߍ߫ ߊ߬ߟߎ߫ ߡߊ߬ ، ߓߊ߬ߙߌ߬ ߛߘߊߒߡߊߕߎߡߣߊ߫ ߟߋ߬ ( ߟߐ߯ߟߊߣߍ߲߫ ) ߊ߬ߟߎ߬ ߦߋ߫ ، ߊ߬ߟߎ߫ ߘߏ߲߬ ߕߍߣߊ߫ ߘߏ߲߰ ߦߌߟߊ߫ ߛߐ߬ߘߐ߲߬ ߠߴߏ ߞߘߐ߫ ﴿58﴾

ߛߏ ߡߍ߲ ߠߎ߬ ߦߋ߫ ߣߌ߲߬ ߸ ߊ߲ ߣߵߏ߬ ߟߎ߬ ߛߌߟߊߛߊ߬ ߟߊ߫ ߟߋ߬ ߸ ߊ߬ߟߎ߫ ߞߊ߬ ߕߐ߬ߢߍ߮ ߞߍ ߡߍ߲ߞߍ߫ ، ߊ߲ ߘߏ߲߬ ߞߊ߬ ߛߘߊߒߡߊߕߎߡߣߊ߫ ߟߋ߬ ߞߍ߫ ߏ߬ ߟߎ߬ ߛߌߟߛߊ ߟߊ߫ ﴿59﴾

ߕߎ߬ߡߊ ߡߍ߲ ߡߎߛߊ߫ ߞߵߊ߬ ߝߐ߫ ߊ߬ ߟߊ߫ ߝߎߣߎ߲ߞߋ ߦߋ߫ ߸ ߞߏ߫ ߒ ߕߍ߫ ߘߊ߲߬ ( ߕߊ߯ߡߊ ߟߊ߫ ) ߝߋߎ߫ ߸ ߝߏ߫ ߒ ߓߊ߯ ߛߋ߫ ߓߊ߫ ߝߌ߬ߟߊ ߞߊ߬ߝߏ߬ ߦߌߟߊ ߸ ߥߟߊ߫ ߒ ߧߋ߫ ߕߊ߬ߡߌ߲߫ ( ߦߋ߲߬ ߠߊ߫ ) ߞߛߐߞߛߐ߫ ﴿60﴾

ߊ߬ߟߎ߬ ߛߋ ߓߊ߫ ߝߌ߬ߟߊ ߞߊ߬ߝߏ߬ ߦߌߟߊ ߸ ߊ߬ߟߎ߫ ߢߌ߬ߣߊ߬ ߘߴߊ߬ߟߎ߬ ߝߊ߲ߘߊ߫ ߖߍ߮ ߞߐ߫ ߦߋ߲߬ ، ߏ ߞߵߊ߬ ߟߊ߫ ߛߌߟߊ ߡߌ߬ߘߊ߫ ߞߵߊ߬ ߞߍ߫ ߓߊ ߘߐ߫ ߛߍߓߍ߲ߎ߲߬ ﴿61﴾

ߊ߬ߟߎ߫ ߕߊ߬ߡߌ߲ ߸ ߡߎߛߊ߫ ߞߊ߲߫ ߊ߬ ߟߊ߫ ߝߎߣߎ߲ߞߋ ߡߊ߬ ߸ ߞߏ߫ ߣߵߊ߲ ߘߊߓߐ ߘߴߊ߲ ߡߊ߬ ߕߋ߲߬ ߸ ߊ߲ ߓߘߊ߫ ߛߍ߰ ߛߐ߬ߘߐ߲߫ ߒ߬ ߠߊ߫ ߕߊ߯ߡߊ ߣߌ߲߬ ߘߐ߫ ߟߋ߫ ߘߋ߬ ﴿62﴾

ߏ߬ ߞߵߊ߬ ߖߋ߬ߓߌ߬ ߸ ߞߏ߫: ߏ߯ ߐ߲߬ߤߐ߲߯ ߸ ߊ߲ ߞߵߊ߲ ߡߊߞߍ ߡߍ߲ ߞߍ߫ ߝߘߊߞߟߏ ߞߊ߲߬ ߸ ߒߠߋ ߢߌ߬ߣߊ߬ ߘߊ߫ ߖߍ߮ ߞߐ߫ ߦߋ߲߬ ، ߝߏߦߌ߫ ߘߏ߲߬ ߡߊ߫ ߒ ߠߊߢߌ߬ߣߴߊ߬ ߞߐ߫ ߝߏ߫ ߜߍ߬ߘߍ ߞߏ߫ ߒ ߞߊߣߵߊ߬ ߞߏߝߐ߫ ߟߋ߬ ߘߍ߯ ، ߖߍ߮ ߘߏ߲߬ ߞߵߊ߬ ߟߊ߫ ߛߌߟߊ ߡߌ߬ߘߊ߬ ߓߊ ߘߐ߫ ߘߟߊ߬ߖߊ߬ ߞߏ ߘߝߊߣߍ߲ ߘߌ߫ ﴿63﴾

‹ ߡߎߛߊ߫ › ߞߊ߲߫ ߸ ߞߏ߫ ߊ߲ ߘߏ߲߬ ߜߎ ߕߘߍ߬ ߦߋ߲߬ ߠߋ߬ ߢߌߣߌ߲ ߠߊ߬ ، ߏ߬ ߞߍ ߊ߬ߟߎ߫ ߝߌ߬ߟߊ ߛߊ߬ߦߌ߬ ߘߴߊ߬ߟߎ߫ ߜߋ߬ߙߋ ߞߊ߲߬ ߸ ߞߵߏ߬ ߟߊߓߊ߬ߕߏ߫ ߟߓߊ߬ߕߏ߬ߟߌ ߟߊ߫ ﴿64﴾

ߊ߬ߟߎ߬ ߥߊ߫ ߘߊ߫ ߖߐ߲߭ ߘߏ߫ ߛߐ߬ߘߐ߲߫ ߒ߬ ߠߊ߫ ߖߐ߲߭ ߠߎ߬ ߘߐ߫ ߸ ߊ߲ ߓߘߴߏ߬ ߛߐ߫ ߒ߬ ߠߊ߫ ߤߌߣߊ ߘߏ߫ ߟߊ߫ ߸ ߊ߬ ߣߴߊ߲ ߓߘߴߊ߬ ߟߊߟߐ߲ߠߌ߲߫ ߒ߬ ߠߊ߫ ߟߐ߲ߞߏ ߘߏ߫ ߟߊ߫ ﴿65﴾

ߡߎߛߊ߫ ߞߊ߲߫ ߏ ߡߊ߬ ߞߏ߫ ߦߊ߯ߟߊ߫ ߒ ߧߴߌ ߟߊߓߊ߬ߕߏ߫ ߓߊ߬ ߸ ߣߌ߲߬ ߡߊ߬ ߌ ߦߋ߫ ߒ ߠߊߟߐ߲ߠߌ߲߫ ߛߥߊ߬ߓߊ ߘߏ߫ ߟߊ߫ ߸ ߌ ߟߊߟߐ߲ߠߌ߲ߣߍ߲߫ ߡߍ߲ ߠߊ߫؟ ﴿66﴾

ߏ߬ ߞߊ߲߫ ߞߴߌߟߋ ߕߍߣߊ߫ ߡߎ߬ߢߎ߲ ߣߐ߬ ߟߊ߫ ߒߠߋ ߝߍ߬ ߘߋ߬ ﴿67﴾

ߌ ߦߴߌ ߡߎ߬ߢߎ߲߬ ߠߊ߫ ߞߏ߫ ߡߊ߬ ߘߌ߬ ߸ ߌ ߟߊ߫ ߟߐ߲ߠߌ߲ ߡߊ߫ ߡߍ߲ ߠߊߝߏ߬ ߔߘߋߞߎ߬؟ ﴿68﴾

‹ ߡߎߛߊ߫ › ߞߊ߲߫ ߸ ߞߏ߫ ߣߌ߫ ߊߟߊ߫ ߛߐ߲߬ ߘߊ߫ ߸ ߌ ߘߌ߫ ߒ ߕߍ߬ߘߍ߫ ߡߎ߬ߢߎ߲߬ߓߊ߯ ߘߌ߫ ، ߒ ߘߏ߲߬ ߕߴߌ ߟߊ߫ ߖߡߊ߬ߙߌ߬ ߛߌ߫ ߡߊߛߐ߬ߛߐ߬ ﴿69﴾

‹ ߟߐ߲ߞߏߕߌ߮ › ߞߊ߲߫ ߸ ߞߏ߫ ߒ߬ߓߊ߬ ߣߴߌ ߞߊ߬ ߒ ߠߊߓߊ߬ߕߏ߬ ߸ ߌ ߞߊߣߊ߬ ߒ ߢߌ߬ߣߌ߲߬ߞߊ߬ ߝߏߦߌ߫ ߡߊ߬ ߸ ߝߏ߫ ߒ ߓߊ߯ ߞߎߡߴߌ ߦߋ߫ ߡߍ߲ ߞߏߝߐ ߞߊ߲߬ ﴿70﴾

ߊ߬ߟߎ߫ ߝߌ߬ߟߊ ߕߊ߯ ߘߊ߫ ߝߎߚߎ߫ ߸ ߝߏ߫ ߊ߬ߟߎ߬ ߥߊ߫ ߘߊ߫ ߘߏ߲߬ ߞߎߟߎ߲ ߞߣߐ߫ ، ߘߊ߬ߡߊ߲߬ߛߊ߫ ‹ ߟߐ߲ߞߏߕߌ߮ › ߞߵߏ߬ ߛߐ߰ ߔߙߎ߫ ، ‹ ߡߎߛߊ߫ › ߞߊ߲߫ ߞߏ߫ ߌ ߞߵߢߌ߲߬ ߛߐ߰ ߟߋ߬ ߞߍ߬ ߛߴߌ ߘߴߊ߬ ߕߌ߱ ߟߎ߬ ߟߊߕߏ߫ ߖߌ ߘߐ߫؟ ߌ ߘߏ߲߬ ߓߘߊ߫ ߞߏ߫ ߜߍߟߍ߲߫ ߞߍ߫ ߣߌ߲߬ ﴿71﴾

‹ ߟߐ߲ߞߏߕߌ߮ › ߞߊ߲߫ ߸ ߞߏ߫ ߒߠߋ ߡߴߊ߬ ߝߐ߫ ߒ ߞߏ߫ ߌߟߋ ߕߍߣߊ߫ ߡߎ߬ߢߎ߲ ߣߐ߬ ߟߊ߫ ߒߠߋ ߝߍ߬؟ ﴿72﴾

‹ ߡߎߛߊ߫ › ߞߊ߲߫ ߞߏ߫ ߌ ߞߊߣߊ߬ ߒ ߡߌ߬ߘߊ߬ ߞߏ߫ ߟߊ߫ ߒ ߢߌ߬ߣߊ߬ߣߍ߲߬ ߡߍ߲ ߘߐ߫ ، ߌ ߘߏ߲߬ ߞߊ߫ ߒ ߞߘߊߡߊ߫ ߒ ߠߊ߫ ߞߏ ߢߌ߲߬ ߘߐ߫ ߜߍ߬ߟߍ߲߬ߡߊ߲߫ ߠߊ߫ ﴿73﴾

ߊ߬ߟߎ߬ ߕߊ߯ ߘߊ߫ ߕߎ߲߯ ، ߝߏ߫ ߊ߬ߟߎ߬ ߥߊ߫ ߘߊ߫ ߓߍ߲߬ ߘߋ߲ߞߍߣߍ߲ ߘߏ߫ ߘߌ߫ ، ߟߐ߲ߞߏߕߌ߮ ߞߵߏ ߝߊ߰ ߔߌߘߏ߫ ، ‹ ߡߎߛߊ߫ › ߞߊ߲߫ ߞߏ߫ ߌ߬ߦߏ߯ ߌ ߞߊ߬ ߣߌ߫ ߛߊߣߌ߲ߡߊ߲ ߝߊ߰ ߕߋ߲߬ ߊ߬ ߡߊ߫ ߞߍ߫ ߣߌ߫ ߢߐ߲߯ ߘߌ߫؟ ߌ ߘߏ߲߬ ߓߘߊ߫ ߣߊ߬ ߞߏ߫ ߡߊߝߟߌ߬ߣߍ߲߫ ߘߌ߫ ߘߋ߬ ﴿74﴾

‹ ߟߐ߲ߞߏߕߌ߮ › ߞߊ߲߫ ߞߏ߫ ߒߠߋ ߡߴߊ߬ ߝߐ߫ ߒ ߞߏ߫ ߌߟߋ ߕߍߣߊ߬ ߡߎ߬ߢߎ߲ ߣߐ߬ ߟߊ߫ ߒߠߋ ߝߍ߬؟ ﴿75﴾

‹ ߡߎߛߊ߫ › ߞߊ߲߫ ߞߏ߫ ߒ ߓߴߌ ߢߌ߬ߣߌ߲߬ߞߊ߬ ߞߏ߫ ߜߘߍ߫ ߡߊ߬ ߡߎ߬ߕߎ߲߬ ߸ ߌ ߞߊߣߊ߬ ߒ ߘߍ߬ߢߐ߲߰ߦߊ߫ ߏ߬ ߞߐ߫ ߸ ߓߊ ߌ ߓߘߊ߫ ߟߐ߬ߦߙߌ߫ ߛߐ߬ߘߐ߲߬ ߒ ߡߊ߬ ߝߋߎ߫ ﴿76﴾

ߊ߬ߟߎ߬ ߕߊ߯ ߘߊ߫ ߕߎ߲߯ ، ߝߏ߫ ߊ߬ߟߎ߬ ߛߋ߫ ߘߊ߫ ߘߎ߰ ߘߏ߲߬ߞߏ ߘߏ߫ ߟߎ߫ ߡߊ߬ ߸ ߊ߬ߟߎ߫ ߞߊ߬ ߘߊߥߎ߲ߠߌ߲߫ ߢߌߣߌ߲ ߞߍ߫ ߦߋ߲߬ߞߊ ߟߎ߬ ߟߊ߫ ߸ ߏ߬ ߟߎ߫ ߞߵߊ߬ߟߎ߫ ߓߊ߲߬ ߞߏ߫ ߊ߬ߟߎ߬ ߕߍ߫ ߊ߬ߟߎ߫ ߝߊ߲߬ߘߊ߬ ߟߊ߫. ߘߊ߬ߡߊ߲߬ߛߊ߫ ߊ߬ߟߎ߫ ߞߊ߬ ߘߊ߲߬ߘߊ߲ ߘߏ߫ ߦߋ߫ ߦߋ߲߬ ߸ ߏ߬ ߓߍߢߌߣߌ߲߫ ߞߊ߬ ߥߎ߬ߦߊ߬ ، ߟߐ߲ߞߏߕߌ߮ ߞߵߏ ߟߐ߬ ، ߡߎߛߊ߫ ߞߊ߲߫ ߞߏ߫ ߊ߬ ߕߌ߲߬ ߓߴߌ ߘߌߦߊ߫ ߌ ߕߘߍ߬ ߘߌ߫ ߛߊ߬ߙߊ߫ ߡߌ߬ߘߊ߫ ߢߌ߲߬ ߘߐ߫ ﴿77﴾

‹ ߟߐ߲ߞߏߕߌ߮ › ߞߊ߲߫ ߞߏ߫ ߣߌ߲߬ ߦߋ߫ ߝߘߊߟߌ ߟߋ߬ ߘߌ߫ ߒߠߋ ߣߴߌߟߋ ߕߍ߫ ߛߍߣߍ߲߬ ، ߒ ߞߏ߬ߣߌ߲ ߓߍߣߵߌ ߞߌ߬ߓߊ߬ߙߏ߬ ߞߏ ߟߎ߬ ߞߘߐߡߊߖߊ߲ ߠߊ߫ ߸ ߌ ߡߊ߫ ߡߍ߲ ߠߎ߫ ߡߎ߬ߢߎ߲ ߠߊߣߐ߬ ﴿78﴾

ߡߍ߲ ߦߋ߫ ߞߎߟߎ߲ ߠߊ߫ ߞߏ ߘߌ߫ ߸ ߏ߬ ߦߋ߫ ߘߐ߰ߕߐ ߘߏ߫ ߟߋ߬ ߕߊ߫ ߘߌ߫ ، ߡߍ߲ ߠߎ߬ ߦߋ߫ ߓߊ߯ߙߊ߫ ߟߊ߫ ߓߊ ߞߊ߲߬ ، ߒ ߣߵߊ߬ ߢߌߣߌ߲߫ ߠߊ߫ ߒ ߞߏ߫ ߒ ߧߋ߫ ߝߍ߭ ߟߊ߫ ߏ߬ ߟߋ ߟߊ߫ ، ߓߊ ߡߊ߲߬ߛߊ ߘߏ߫ ߟߴߏ߬ ߟߎ߬ ߞߕߐ߫ ߡߍ߲ ߞߍߕߐ߫ ߞߎߟߎ߲߫ ( ߢߌߡߊ ) ߓߍ߯ ߡߌ߬ߘߊ߬ ߟߊ߫ ߓߋ߬ߒ߬ߞߊ߲߬ߠߌ߲ ߠߊ߫ ﴿79﴾

ߡߍ߲ ߦߋ߫ ߘߋ߲ߞߍߣߍ߲ ߕߊ߫ ߝߊ߲߭ ߘߌ߫ ߸ ߏ߬ ߡߏߦߌߓߊ߯ ߝߌ߬ߟߊ ߟߋ߫ ߘߍ߲߬ߞߣߍ߬ߦߊ߬ߓߊ߯ ߝߌ߬ߟߊ߬ ߘߌ߫ ، ߒ߬ ߛߌߟߊ߲ߣߍ߲߫ ߏ߬ ߟߋ ߘߐ߫ ߒ ߞߏ߫ ߊ߬ ߞߊߣߵߏ߬ ߟߎ߬ ߞߘߊߡߊ߫ ߘߊ߲߬ߠߊ߬ߕߊߡߌ߲ ߣߌ߫ ߓߊ߲߬ߓߊ߰ߦߊ ߟߊ߫ ﴿80﴾

ߊ߲ ߧߴߊ߬ ߢߌߣߌ߲߫ ߠߴߏ߬ ߟߋ ߘߐ߫ ߸ ߒ ߞߴߏ߬ ߟߎ߫ ߡߊ߰ߙߌ ߦߴߊ߬ ߝߊ߬ߟߋ߲߬ ߜߘߍ߫ ߘߴߊ߬ߟߎ߫ ߡߊ߬ ߸ ߡߍ߲ ߝߌ߬ߛߴߊ߬ ߘߌ߫ ߛߊߣߌ߲ߧߊ ߘߐ߫ ߸ ߊ߬ ߛߎ߬ߘߎ߲߬ߡߊ߲߫ ߊ߬ ߘߌ߫ ߕߌ߲߭ ߘߐ߫ ﴿81﴾

ߒ߬ߓߊ߬ ߘߊ߲߬ߘߊ߲ ߛߊ߫ ߸ ߏ߬ ߦߋ߫ ߘߋ߲ߞߍߣߍ߲߫ ߝߊߙߌߕߊ߫ ߝߌ߬ߟߊ߫ ߟߋ߬ ߕߊ ߘߌ߫ ߘߎ߱ ߞߣߐ߫ ، ߏ߬ ߟߎ߬ ߟߊ߫ ߣߊ߲߬ߝߟߏ߫ ߓߙߌ߬ߣߍ߲ ߠߋ߫ ( ߘߊ߲߬ߘߊ߲ ) ߏ߬ ߞߘߐ߫ ߸ ߊ߬ߟߎ߫ ߝߊ߬ ߘߏ߲߬ ߕߘߍ߬ ߡߐ߰ ߢߌߡߊ߫ ߟߋ߬ ߘߌ߫ ، ߌ ߡߊ߰ߙߌ ߦߴߊ߬ ߝߍ߬ ߟߋ߬ ߸ ߏ߬ ߟߎ߬ ߦߋ߫ ߛߴߊ߬ߟߎ߬ ߟߊ߫ ߞߎ߲߬ߡߊ߬ߞߘߎ ߖߊ߬ߕߋ ߘߐ߫ ߡߎߣߎ߲߬ ߸ ߊ߬ߟߎ߬ ߦߋ߫ ߣߊ߬ ߕߏ߫ ߊ߬ߟߎ߬ ߟߊ߫ ߣߊ߲߬ߝߟߏ ߟߊߓߐ߫ ߟߊ߫ ߸ ߞߵߏ߬ ߤߌߣߊ ߝߘߊ߫ ߌ ߡߊ߰ߙߌ ߟߊ߫. ߒߠߋ ߡߊ߫ ߞߏ ߢߌ߲߬ ߠߎ߬ ߞߍ߫ ߒ ( ߖߘߍ߬ ) ߕߊ߫ ߞߏ߫ ߡߊ߬ ߘߋ߬ ، ߒ߬ߓߊ߬ ߞߏ ߟߎ߬ ߞߘߐߡߊߖߊ߲ ߠߋ߫ ߣߌ߲߬ ߸ ߌ ߡߊ߫ ߡߍ߲ ߠߎ߫ ߡߎ߬ߢߎ߲ ߠߊߣߐ߬ ﴿82﴾

ߊ߬ߟߎ߬ ߦߴߌ ߢߌ߬ߣߌ߲߬ߞߊ߬ ߟߊ߫ ߞߙߋߝߌߟߊߕߌ߮ ߟߊ߫ ߞߏ ߡߊ߬ ߸ ߊ߬ߟߎ߫ ߖߋ߬ߓߌ߬ ߞߏ߫ ߒ ߘߌߣߵߏ߬ ߞߏߝߐ ߘߏ߫ ߘߐߞߊ߬ߙߊ߲߬ ߊߟߎ߫ ߦߋ߫ ߛߍ߲ ﴿83﴾

ߒ߬ߠߎ߫ ߟߋ߫ ߞߊ߬ ߡߊ߬ߝߊ ߞߴߏ߬ ߦߋ߫ ߘߎ߰ߞߟߏ ߞߊ߲߬ ߞߵߊ߬ ߛߐ߫ ߞߏ ߓߍ߯ ߝߍ߬ߙߍ ߟߊ߫ ﴿84﴾

ߊ߬ ߞߊ߬ ߝߍ߬ߙߍ ߟߊߓߊ߬ߕߏ߬ ߝߎߚߎ߫ ﴿85﴾

ߝߏ߫ ߊ߬ ߥߊ߫ ߘߊ߫ ߛߋ߫ ߕߋ߬ߟߋ ߓߋ߬ ߦߌߟߊ ، ߊ߬ ߞߵߊ߬ ߕߘߍ߬ ߏ߬ ߦߋ߫ ߓߋ߬ ߟߊ߫ ߓߐ߰ ߝߌ߲ ߞߐ߬ߢߊ ߟߋ߬ ߘߐ߫ ، ߊ߬ ߞߊ߬ ߡߌ߬ߙߌ߲߬ߘߌ ߘߏ߫ ߕߍ߬ߘߍ߫ ߦߋ߲߬ ، ߒ߬ߠߎ߬ ߞߊ߲߫ ߊ߬ ߡߊ߬ ߒ ߞߏ߫ ߌߟߋ߬ ߞߙߋߝߌߟߊߕߌ߮ ߸ ߞߋߟߋ߲߫ ߌ ߦߋ߫ ߢߌ߲߬ ߠߎ߫ ߖߊ߲߰ߞߕߊ߫ ߥߟߊ߫ ߌ ߦߋ߫ ߢߵߊ߬ߟߎ߬ ߟߊ߫ ﴿86﴾

ߊ߬ ߞߊ߲߫ ߞߏ߫ ߡߍ߲ ߓߊ߯ ߕߐ߬ߢߍ߮ ߞߍ߫ ߸ ߛߋߚߋ߫ ߊ߲ ߘߴߏ ߖߊ߲߰ߞߕߊ߫ ߸ ߏ߬ ߘߌ߫ ߓߊ߲߫ ߞߊ߬ ߟߊߛߊ߬ߦߌ߲߫ ߊ߬ ߡߊ߰ߙߌ ߡߊ߬ ، ߏ߬ ߘߏ߲߬ ߘߴߊ߬ ߖߊ߲߰ߞߕߊ߫ ߖߊ߲߰ߞߕߊ߬ ߖߎ߮ ߟߊ߫ ﴿87﴾

ߣߌ߫ ߡߍ߲ ߘߏ߲߬ ߘߍ߲߬ߞߣߍ߬ߦߊ߬ ߘߊ߫ ߞߊ߬ ߢߌ߬ߡߊ ߞߍ߫ ߸ ߢߌ߬ߡߊ ߟߴߏ߬ ߦߋ߫ ߊ߬ ߛߊ߬ߙߊ ߘߌ߫ ، ߊ߲ ߧߋ߫ ߣߐ߰ߦߊ߫ ߟߋ߬ ߝߐ߫ ߟߴߏ߬ ߦߋ߫ ߒ߬ ߠߊ߫ ( ߥߊߟߌߢߊ ) ߡߊ߬ߡߙߊ߬ߟߌ ߘߐ߫ ﴿88﴾

ߏ߬ ߟߋ ߞߐ߫ ߸ ߊ߬ ߞߊ߬ ߝߍ߬ߙߍ ߟߊߓߊ߬ߕߏ߬ ߝߎߚߎ߫ ﴿89﴾

ߝߏ߫ ߊ߬ ߥߊ߫ ߘߊ߫ ߛߋ߫ ߕߋ߬ߟߋ ߖߌ߲ߞߌ߲߫ ߦߌߟߊ ، ߊ߬ ߥߊ߫ ߘߴߊ߬ ߕߘߍ߬ ߏ߬ ߦߋ߫ ߖߌ߲ߞߌ߲߫ ߠߊ߫ ߡߌ߬ߙߌ߲߬ߘߌ߫ ߡߊ߬ ߸ ߊ߲ ߡߊ߫ ߥߣߊ߬ߙߌ߬ ߛߌ߫ ߞߍ߫ ߏ߬ ߟߎ߬ ߣߌ߫ ߕߋ߬ߟߋ ߕߍ߫ ﴿90﴾

ߊ߬ ߞߍ߫ ߘߊ߫ ߕߋ߲߬ ߠߋ߬ ߖߐ߫ ߸ ߊ߲ ߞߵߊ߬ ߟߊ߫ ߞߏ ߟߊߝߏ߬ ߟߋ߬ ߞߊ߬ ߞߍ߫ ߊ߬ ߞߊ߬ߟߊߡߊ߬ ߔߘߋߞߎ߬ ﴿91﴾

ߏ߬ ߟߋ ߞߐ߫ ߸ ߊ߬ ߞߊ߬ ߝߍ߬ߙߍ ߟߊߓߊ߬ߕߏ߬ ߝߎߚߎ߫ ﴿92﴾

ߝߏ߫ ߊ߬ ߛߋ߫ ߘߊ߫ ߓߊ߬ߟߊ߲߫ ߝߌ߬ߟߊ ߕߍ߫ ، ߊ߬ ߞߊ߬ ߡߌ߬ߙߌ߲߬ߘߌ߫ ߕߘߍ߬ ߏ ߝߌ߬ߟߊ ߢߍߕߐ߫ ߸ ߡߍ߲ ߠߎ߬ ߞߍ߫ ߡߊ߲߫ ߘߌ߫ ߞߊ߬ ߞߎߡߊ߫ ߛߌ߫ ߝߊ߰ߡߎ߲߬ ﴿93﴾

ߏ߬ ߟߎ߬ ߞߊ߲߫ ߊ߬ ߡߊ߬ ߸ ߞߏ߫ ߤߍ߲߬ ߌߟߋ߬ ߞߙߋߝߌߟߊߕߌ߮ ߸ ߦߊߖߎ߯ߖߎ ߟߎ߬ ߣߌ߫ ߡߊߖߎ߯ߖߎ ߟߎ߫ ߟߋ߬ ߕߌߢߍߟߌ ߟߊ߫ ߒ߬ ߠߊ߫ ߖߡߊ߬ߣߊ ߢߌ߲߬ ߘߐ߫ ، ߦߊ߯ߟߊ߫ ߒ߬ ߧߋ߫ ߛߙߊ߬ ߞߴߌ ߦߋ߫ ߓߊ߬ ߸ ( ߣߌ߲߬ ߡߊ߬ ) ߌ ߦߋ߫ ߓߊ߬ߟߊ߲߫ ߘߏ߲߬ ߊ߲ ߣߴߏ߬ ߟߎ߬ ߕߍ߫؟ ﴿94﴾

ߊ߬ ߞߊ߲߫ ߞߏ߫ ߒ ߡߊ߰ߙߌ ߓߘߊ߫ ߝߍ߬ߙߍ ߡߍ߲ ߞߍ߫ ߒߠߋ ߦߋ߫ ߸ ߏ߬ ߟߋ ߝߌ߬ߛߊ߬ ( ߛߊ߬ߙߊ ߘߌ߫ ) ߸ ߞߏ߬ߣߌ߲߬ ߊߟߎ߫ ߒ ߘߍ߬ߡߍ߲߬ ( ߕߏ߬ ) ߝߊ߲ߞߊ ߟߊ߫ ߸ ߒ ߧߋ߫ ߓߊ߬ߟߊ߲ ߘߏ߲߬ ߊߟߎ߫ ߣߴߏ߬ ߟߎ߬ ߕߍ߫ ﴿95﴾

ߊߟߎ߫ ߦߋ߫ ߣߊ߬ ߣߍ߰ߛߏ߲߬ߞߓߊ ߟߎ߬ ߡߊߟߐ߬ ߒ ߠߊ߫ ߝߎߚߎ߫ ߸ ߝߏ߫ ߞߊ߬ ߞߊߙߊ߲ߞߊߙߊ߲߫ ߝߌ߬ߟߊ ߕߍ ߟߊߞߢߊ߫ ، ߊ߬ ߞߊ߲߫ ߞߏ߫ ߒ߬ߓߵߊߟߎ߫ ߦߋ߫ ߝߊ߲ ߝߍ߫ ߊ߬ ߟߊ߫ ߛߍߣߍ߲߬ ߸ ߝߏ߫ ߊ߬ ߦߋ߫ ߞߍ߫ ߕߊ ߘߌ߫ ، ߊ߬ ߞߊ߲߫ ߏ߬ ߘߐ߫ ߞߏ߫ ߊߟߎ߫ ߣߊ߬ ߘߊ߬ߢߊ߲߫ ߦߋ߬ߟߋ߲߬ߣߍ߲ ߘߌ߫ ߒ ߡߊ߬ ߛߊ߫ ߸ ߒ ߧߴߏ߬ ߟߊߓߐ߲߬ ߊ߬ ߞߊ߲߬ ߜߟߋߞߎ߬ ﴿96﴾

ߊ߬ߟߎ߬ ߡߴߏ߬ ߟߊߣߐ߬ ߟߊ߬ߦߟߍ߬ߟߌ ߘߐ߫ ߸ ߊ߬ߟߎ߫ ߘߏ߲߬ ߡߴߊ߬ ߟߊߣߐ߬ ߛߋ߲߬ߠߌ߲߬ ߘߐ߫ ﴿97﴾

ߊ߬ ߞߊ߲߫ ߞߏ߫ ߣߌ߲߬ ߦߋ߫ ߤߌߣߊ߫ ߟߋ߬ ߘߌ߫ ߞߊ߬ ߝߘߊ߫ ߒ ߡߊ߰ߙߌ ߟߊ߫ ، ߒ߬ߞߊ߬ ߣߌ߫ ߒ ߡߊ߰ߙߌ ߟߊ߫ ߛߘߊߒߡߊߕߎߡߣߊ ߛߋ߫ ߘߊ߫ ߸ ߊ߬ ߘߴߢߌ߲߬ ߠߊߞߢߊ߫ ߞߵߊ߬ ߞߍ߫ ߕߛߊߞߙߊ ߘߌ߫ ، ߒ ߡߊ߰ߙߌ ߟߊ߫ ߛߘߊߒߡߊߕߎߡߣߊ ߘߏ߲߬ ߦߋ߫ ߕߎ߬ߢߊ߫ ߟߋ߬ ߘߌ߫ ﴿98﴾

ߏ߬ ߟߏ߲ ߸ ߊ߲ ߘߌ߫ ( ߡߐ߱ ) ߟߎ߬ ߕߏ߫ ߊ߬ ߘߏ߫ ߟߎ߫ ߦߋ߫ ߝߘߌ߫ ߟߊ߫ ߘߏ߫ ߟߎ߫ ߞߊ߲߬ ߸ ߦߏ߫ ߟߊ߲߬ߓߏ߲ ߠߎ߫ ߟߋ߬ ، ߘߊ߬ߡߊ߲߬ߛߊ߫ ߓߘߎ ߘߌ߫ ߝߍ߫ ، ߏ߬ ߓߊ߯ ߞߍ߫ ߊ߲ ߘߴߊ߬ߟߎ߬ ߟߊߘߍ߬ ߖߡߊ߬ ߞߋߟߋ߲߫ ߘߌ߫ ﴿99﴾

ߊ߲ ߘߌ߫ ߔߊߦߌߔߊߦߌ ߞߊ߲߬ߞߊ߲߫ ߓߊ߲߬ߓߊ߮ ߟߎ߬ ߢߊߞߘߐ߫ ߏ߬ ߟߏ߲ ߥߛߊߞߙߊ߫ ﴿100﴾

ߏ߬ ߟߎ߬ ߡߍ߲ ߠߎ߬ ߢߊ ߟߎ߫ ߕߘߍ߬ ߞߎ߲߬ߠߊ߬ߓߘߌ߬ߟߊ߲ ߘߐ߫ ߞߊ߬ ߓߐ߫ ߒ ߞߏߝߐ ( ߦߋ ) ߡߊ߬ ߸ ߊ߬ߟߎ߫ ߘߏ߲߬ ߕߎ߲߬ ߕߍ߫ ߡߍ߲ߠߌ߲ ߟߊߣߐ߬ ߟߊ߫ ﴿101﴾

ߊ߰ ߓߊ߲߬ߓߊ߮ ߟߎ߬ ߢߣߊ߫ ߟߋ߫ ߓߊ߬ ߸ ߞߏ߫ ߊ߬ߟߎ߬ ߦߋ߫ ߒߠߋ ߟߊ߫ ߖߐ߲߭ ߠߎ߫ ߡߌ߬ߘߴߊ߬ߟߎ߬ ߟߊ߫ ߞߏߕߌ߮ ߟߎ߬ ߘߌ߫ ߞߊ߬ ߒߠߋ ߕߏ߫؟ ߒ߬ߠߎ߫ ߘߏ߲߬ ߣߊ߬ ߔߊߦߌߔߊߦߌ ߘߐߓߍ߲߬ ߠߊ߫ ߞߵߊ߬ ߞߍ߫ ߓߊ߲߬ߓߊ߮ ߟߎ߫ ߟߋ߫ ߖߌ߬ߦߊ߬ߘߊ ߘߌ߫ ﴿102﴾

ߊ߬ ߝߐ߫ ߦߊ߯ߟߊ߫ ߒ ߧߴߊߟߎ߫ ߞߌ߬ߓߊ߬ߙߏ߫ ߓߣߐ߬ߓߊ߮ ߟߎ߬ ߟߴߊ߬ߟߎ߬ ߗߋߥߊߟߌ ߟߎ߬ ߘߐ߫ ߓߊ߬؟ ﴿103﴾

ߏ߬ ߟߎ߫ ߟߋ߬ ߟߊ߫ ߓߊ߯ߙߊ ߓߎ߬ߘߎ߲߬ߣߍ߲߫ ߊ߬ߟߎ߬ ߞߐ߫ ߘߎߢߊ߫ ߢߣߊߡߦߊ ߘߐ߫ ߸ ߊ߬ߟߎ߫ ߘߏ߲߬ ߦߴߊ߬ ߖߊ߬ߕߋ߬ ߟߊ߫ ߞߏ߫ ߊ߬ߟߎ߬ ߦߋ߫ ߓߊ߯ߙߊ߫ ߟߢߊ ߟߋ߫ ߞߊ߲߬ ( ߏ߬ ߘߌ߫) ﴿104﴾

ߒ߬ߓߊ߬ ߏ߬ ߟߎ߫ ߟߋ߫ ߓߊ߲߬ߣߍ߲߫ ߊ߬ߟߎ߫ ߡߊ߰ߙߌ ߟߊ߫ ߟߝߊߙߌ ߟߎ߬ ߣߴߊ߬ ߓߍ߲߬ߢߐ߲߰ߦߊ ߡߊ߬ ߗߏ߫ ، ߊ߬ߟߎ߬ ߟߊ߫ ߓߊ߯ߙߊ ߟߎ߬ ߕߌߢߍߣߍ߲߫ ߏ߬ ߟߋ ߘߐ߫ ߔߛߐߞߐ߫ ، ߊ߲ ߘߏ߲߬ ߕߍߣߊ߫ ߖߊ߭ ߟߊߕߋߟߋ߲߫ ߠߴߏ߬ ߟߎ߬ ߦߋ߫ ߟߐ߬ߓߊ ߟߏ߲ ߝߛߍߞߘߎ߫ ﴿105﴾

ߏ߬ ߘߐ߫ ߸ ߊ߬ߟߎ߫ ߛߊ߬ߙߊ ߞߍߕߐ߫ ߔߊߦߌߔߊߦߌ ߟߋ߬ ߘߌ߫ ߸ ߞߊ߬ߡߊߛߐ߬ߘߐ߲߫ ߊ߬ߟߎ߬ ߟߊ߫ ߓߊ߲߬ߓߊ߰ߦߊ ߝߍ߬ ߊ߬ ߣߴߊ߬ߟߎ߫ ߞߊ߬ ߒ߬ ߠߊ߫ ߟߝߊߙߌ ߟߎ߬ ߣߌ߫ ߒ߬ ߠߊ߫ ߞߋߟߊ ߟߎ߬ ߞߍ ߡߍ߲ ߞߍ߫ ߦߟߍߒߡߊ߫ ߝߋ߲ ߘߌ߫ ﴿106﴾

ߡߍ߲ ߠߎ߫ ߞߏ߬ߣߌ߲ ߘߍ߲߬ߞߣߍ߬ߦߊ߬ߣߍ߲߫ ߞߊ߬ ߢߌ߬ߡߊ ߟߎ߬ ߞߍ߫ ߸ ߘߊ߰ߡߎ߲ ߣߊߞߐ ߟߎ߫ ߟߋ߬ ߞߍߕߐ߫ ߏ߬ ߟߎ߫ ߖߌ߬ߦߊ߬ߘߊ ߘߌ߫ ﴿107﴾

ߏ߬ ߟߎ߬ ߘߎߡߊߕߐ߫ ߦߋ߲߬ ߠߋ߬ ߸ ߊ߬ߟߎ߫ ߘߏ߲߬ ߕߍ߫ ߦߟߍ߬ߡߊ߲߬ ߦߙߐ߫ ߢߌߣߌ߲߫ ߞߊ߬ ߓߐ߫ ߦߋ߲߬ ﴿108﴾

ߊ߬ ߝߐ߫ ߞߏ߫ ߤߊ߯ߟߌ߫ ߸ ߣߌ߫ ߟߌ߲ߓߊ߲ ߞߍ߫ ߘߊ߫ ߘߎߓߊ ߘߌ߫ ߒ ߡߊ߰ߙߌ ߟߊ߫ ߞߎߡߊ ߟߎ߬ ߛߓߍ߫ ߞߊ߲ ߡߊ߬ ߸ ߟߌ߲ߓߊ߲ ߘߌ߫ ߘߛߍ߫ ߞߊ߬ ߞߐ߲߰ ߒ ߡߊ߰ߙߌ ߟߊ߫ ߞߎߡߊ ߟߎ߬ ߓߊ߲ ߢߍ߫ ، ߤߊߟߵߊ߲ ߣߊ߬ ߘߴߏ߬ ߜߘߍ߫ ߞߍ߫ ߡߊ߬ߜߍ߲ ߘߌ߫ ﴿109﴾

ߊ߬ ߟߊߛߋ߫ ߞߏ߫ ߒߠߋ ߦߴߊߟߎ߫ ߢߐ߲߰ ߡߐ߰ ߟߋ߬ ߘߌ߫ ، ߞߏ߬ߣߌ߲߬ ߒߠߋ ߟߋ߬ ߦߟߌߘߏ߲߬ߣߍ߲߫ ߞߏ߫ ߊߟߎ߫ ߡߊ߰ߙߌ ߦߋ߫ ߡߊ߰ߙߌ߬ ߞߋߟߋ߲߫ ߔߋ߫ ߟߋ߬ ߘߌ߫ ، ߒ߬ߓߊ߬ ߣߌ߫ ߡߍ߲ ߦߟߌ߫ ߞߍ߫ ߘߴߊ߬ ߡߊ߰ߙߌ ߓߍ߲߬ߢߐ߲߰ߦߊ ߟߊ߫ ߸ ߏ߬ ߦߋ߫ ߓߊ߯ߙߊ߫ ߓߊ߯ߙߊ߫ ߢߌߡߊ߫ ߟߊ߫ ߸ ߊ߬ ߘߏ߲߬ ߞߊߣߊ߬ ߡߐ߰ ߛߌ߫ ߝߊ߬ߙߴߊ߬ ߡߊ߰ߙߌ ߟߊ߫ ߓߊ߬ߕߏ ߘߐ߫ ﴿110﴾

ߞ. ߤ. ߦ. ߊ߳. ߛ߫. ( ߞߊ߯ߝ. ߤߊ߯ߎ. ߦߊ߯ߎ. ߊ߳ߌߣ. ߛ߫ߊ߯ߘ) ﴿1﴾

ߌ ߡߊ߰ߙߌ ߟߊ߫ ߤߌߣߊ ߞߏߝߐ ߟߋ߫ ߣߌ߲߬ ߸ ߊ߬ ߟߊ߫ ߖߐ߲߬ߞߍ߫ ߖ߭ߊߞߊ߬ߙߌ߬ߦߊ߫ ߦߋ߫ ﴿2﴾

ߕߎ߬ߡߊ ߡߍ߲ ߏ ߞߵߊ߬ ߡߊ߰ߙߌ ߞߟߌ߫ ߸ ߞߟߌߟߌ߫ ߘߏ߲߰ߣߍ߲߫ ߠߊ߫ ﴿3﴾

ߞߏ߫ ߒ ߡߊ߰ߙߌ ߸ ߒߠߋ ߞߟߏ ߓߘߊ߫ ߞߐ߯ ߸ ߒ ߞߎ߲߭ ߓߘߊ߫ ߞߍ߫ ߛߌ߫ ߜߍ ߟߊ߫ ߓߎߥߊ߲߫ ، ߒ ߘߏ߲߬ ߕߴߌ ߡߊߕߙߊ ߘߐ߫ ߞߎ߲߬ߠߊ߲߬ߜߏ߫ ߘߌ߫ ߘߋ߬ ߸ ߌߟߋ߬ ߒ ߡߊ߰ߙߌ ﴿4﴾

ߒߠߋ ߘߏ߲߬ ߓߘߊ߫ ߛߌߟߊ߲߫ ߓߛߌ߬ߓߊ߮ ߟߎ߬ ߟߊ߫ ߸ ߡߍ߲ ߠߎ߬ ߕߏߕߐ߫ ߒ ߞߐ߫ ߸ ߒ ߡߏ߬ߛߏ ߘߏ߲߬ ߦߋ߫ ߦߟߌߕߍ߯ߕߐ߫ ߘߌ߫ ، ߏ߬ ߘߐ߫ ߸ ߖߊ߰ߣߌ߲߬ ߒ ߛߐ߫ ߘߋ߲߫ ߠߊ߫ ߞߊ߬ ߝߘߊ߫ ߌ ߝߊ߲ߝߊ߲߫ ߠߊ߫ ﴿5﴾

ߏ߬ ߦߋ߫ ߒ ߗߍߕߊ߬ ߸ ߊ߬ ߣߴߊ߬ ߦߋ߫ ߘߏ߫ ߕߊ߬ ߦߊ߬ߞߎ߯ߓߊ߫ ߘߏ߲߬ߞߏ ߟߎ߬ ߗߍ ߘߐ߫ ، ߒ ߡߊ߰ߙߌ ߌ ߘߏ߲߬ ߦߴߊ߬ ߞߍ߫ ߘߌ߬ߢߍ߬ߡߊ߬ߕߊ߫ ߘߌ߫ ﴿6﴾

(ߊߟߊ߫ ߞߊ߲߫ ߊ߬ ߡߊ߬ ߸ ߞߏ߫ ) ߖ߭ߊߞߊ߬ߙߌ߬ߦߊ߫ ߸ ߊ߲ ߧߋ߫ ߒ߬ ߘߟߊߝߎ߬ ߟߴߌ ߦߋ߫ ߘߋ߲ߞߍ߫ ߟߊ߫ ߸ ߊ߬ ߕߐ߯ ߞߏ߫ ߦߊߤߊ߬ߦߊ߫ ، ߊ߲ ߘߏ߲߬ ߡߊ߫ ߕߐ߯ߡߊ߲߫ ߞߍ߫ ߊ߬ ߟߊ߫ ߞߘߐ߬ߡߊ߲߫ ﴿7﴾

ߊ߬ ߞߊ߲߫ ߞߏ߫ ߒ ߡߊ߰ߙߌ ߸ ߘߋ߲ߞߍ߫ ߞߍߕߐ߫ ߒߠߋ ߓߟߏ߫ ߘߌ߬ ߸ ߒ ߡߏ߬ߛߏ ߞߍߣߍ߲ ߞߐ߫ ߦߟߌߕߍ߯ߕߐ ߘߌ߫ ߸ ߞߊ߬ ߒ ߖߍ߬ߘߍ ߛߋ߫ ߡߐ߰ߓߊ߬ߦߊ ߘߐ߫ ߞߐ߮ ߘߊ߲߭ ߠߊ߫؟ ﴿8﴾

ߊ߬ ߞߊ߲߫ ߞߏ߫ ߌ ߡߊ߰ߙߌ ߞߊ߲߫ ߕߋ߲߬ ߠߋ߬ ߸ ߞߴߏ ߣߐ߲߰ߡߊ߲߬ߓߊ ߟߋ߬ ߒߠߋ ߡߊ߬ ߸ ߓߊߏ߬ ߒ ߞߵߌ ߖߍ߬ߘߍ ߘߊ߲߫ ߞߘߐ߬ߡߊ߲߫ ߞߵߊ߬ ߕߘߍ߬ ߌ ߕߍ߫ ߝߏߦߌ߬ ߘߌ߫ ﴿9﴾

‹ ߖ߭ߞߊ߬ߙߌ߬ߦߊ߫› ߞߊ߲߫ ߞߏ߫ ߒ ߡߊ߰ߙߌ ߸ ߊ߬ ߕߐ߰ߡߊ߬ߛߙߋ ߦߌ߬ߘߊ߬ ߒ ߠߊ߫ ߥߍ߫ ، ‹ ߊߟߊ߫ › ߞߊ߲߫ ߞߏ߫ ߌ ߟߊ߫ ߕߐ߰ߡߊ߬ߛߙߋ ߡߍ߲ ߘߌ߫ ߸ ߌ ߞߊߣߊ߬ ߞߎߡߊ߫ ߡߐ߱ ߟߎ߫ ߝߍ߬ ߛߎ߫ ߛߓߊ߬ ߟߊߞߢߊߣߍ߲߫ ߞߘߐ߫ ﴿10﴾

ߏ߬ ߞߍ ߸ ߊ߬ ߓߐ߫ ߘߊ߫ ߞߐߘߐ߲ߞߎ߲ ߘߐ߫ ߞߊ߬ ߥߴߊ߬ ߡߌ߬ߙߌ߲߬ߘߌ ߕߘߍ߬ ، ߊ߬ ߞߊ߬ ߞߐߡߌ߲߫ ߏ߬ ߟߎ߫ ߡߊ߬ ߸ ߞߏ߫ ߊߟߎ߫ ߛߊߣߌ߲ߧߊ ߝߐ߫ ߊߟߊ߫ ߦߋ߫ ߛߐ߰ߡߊ߬ ߣߌ߫ ߥߎ߬ߙߊ ߟߊ߫ ﴿11﴾

ߊ߲ ߞߊ߲߫ ߘߋ߲ ߏ ߡߊ߬ ߒ ߞߏ߫ ߦߊߤߊ߬ߦߊ߫ ߸ ߟߍߙߊ ߡߌ߬ߘߊ߬ ߛߍ߲ߓߍ߫ ߟߊ߫ ، ߊ߲ ߘߏ߲߬ ߞߵߊ߬ ߛߐ߫ ߞߕߌߦߊ ߟߊ߫ ߘߋ߲ߣߍ߲ߧߊ ߘߐ߫ ﴿12﴾

ߊ߬ ߣߴߊ߲ ߞߵߊ߬ ߛߐ߫ ߒ߬ ߖߍ߬ߘߍ ߟߊ߫ ߤߌߣߊ ߘߏ߫ ߟߊ߫ ߸ ߊ߬ ߣߌ߫ ߟߊ߬ߜߍ ߝߣߊ߫ ߟߊ߫ ، ߊ߬ ߘߏ߲߬ ߞߍ߫ ߘߊ߫ ߝߊ߲ߕߊ߲ߞߟߊ߫ ߘߌ߫ ﴿13﴾

ߊ߬ ߣߴߊ߬ ߞߍ߫ ߘߊ߫ ߢߊ߬ߓߊ߯ ߘߴߊ߬ ߡߏߦߌߓߊ߯ ߝߌ߬ߟߊ ߟߊ߫ ، ߝߋߎ߫ ߊ߬ ߡߊ߫ ߞߍ߫ ߖߘߍ߬ߛߊ߰ߣߦߊ߬ߟߊ߫ ߕߟߏߜߍߟߍ߲߫ ߘߌ߫ ﴿14﴾

ߖߐ ߦߴߊ߬ ߡߵߊ߬ ߡߏߦߌ߫ ߟߏ߲ ߸ ߊ߬ ߣߴߊ߬ ߛߊ߬ ߟߏ߲ ، ߊ߬ ߣߴߊ߬ ߢߣߊߡߊ ߟߊߥߟߌ߬ ߟߏ߲ ﴿15﴾

ߡߊߙߌߦߡߊ߫ ߞߏߝߐ߫ ߟߍߙߊ ߞߣߐ߫ ߸ ߕߎ߬ߡߊ ߡߍ߲ ߊ߬ ߞߵߊ߬ ߡߊߓߐ߫ ߊ߬ ߘߏ߲߬ߞߏ ߟߎ߬ ߟߊ߫ ߸ ߞߊ߬ ߥߴߊ߬ ߡߊߞߍ߫ ߦߙߐ ߘߏ߫ ߘߐ߫ ( ߛߏ ) ߕߟߋ߬ߓߐ ߘߐ߫ ﴿16﴾

ߊ߬ ߞߊ߬ ߥߊ߬ߣߊߙߌ ߘߏ߲߬ ߊ߬ ߣߴߏ߬ ߟߎ߬ ߕߍ߫ ، ߏ߬ ߞߍ ߊ߲ ߞߊ߬ ߒ߬ ߠߊ߫ ߛߟߐߡߌ߲ ߗߋ߫ ߊ߬ ߡߊ߬ ، ߏ ߞߵߊ߬ ߖߘߍ߬ ߛߊߥߎߙߴߊ߬ ߢߊߞߘߐ߫ ߡߐ߰ ߟߊߞߢߊߣߍ߲ ߘߌ߫ ߖߐ߯ߟߌ߫ ﴿17﴾

ߊ߬ ߞߊ߲߫ ߏ ߡߊ߬ ߞߏ߫ ߒߠߋ ߦߋ߫ ߡߊ߰ߙߌ߬ ߤߌߣߊߒߕߋ ߟߊ߫ ߞߊ߬ߙߌ߬ߝߊ ߟߋ߬ ߘߐ߫ ߌ ߡߊ߬ ߸ ߣߴߌ ߞߍ߫ ߘߊ߫ ߝߊ߲ߕߊ߲ߞߟߊ߫ ߘߌ߫ ﴿18﴾

ߏ߬ ߞߊ߲߫ ߞߏ߫ ߒߠߋ ߦߴߌ ߡߊ߰ߙߌ ߟߊ߫ ߗߋߘߋ߲ ߠߋ߬ ߘߌ߫ ߸ ߞߏ߫ ߒ ߧߋ߫ ߣߵߌ ߛߐ߫ ߘߋ߲ߞߍ߫ ߛߊߣߌ߲ߡߊ߲߫ ߠߊ߫ ﴿19﴾

ߊ߬ ߞߊ߲߫ ߞߏ߫ ߘߋ߲ߞߍ߫ ߞߍߕߐ߫ ߒߠߋ ߓߟߏ߫ ߘߌ߬ ߗߍ߬ ߡߊ߫ ߡߊ߰ ߒ ߠߊ߫ ߸ ߒ ߘߏ߲߬ ߕߍ߫ ߖߊߕߐ߫ ߘߌ߫؟ ﴿20﴾

‹ ߛߟߐߡߌ߲ › ߞߊ߲߫ ߞߏ߫ ߊ߰ ߕߋ߲߬ ߠߋ߬ ߘߋ߬ ، ߌ ߡߊ߰ߙߌ ߞߊ߲߫ ߞߴߏ ߣߐ߰ߡߊ߲߬ߓߊ ߟߋ߬ ߒߠߋ ߡߊ߬ ߸ ߒ߬ ߘߏ߲߬ ߦߴߊ߬ ߞߍ߫ ߟߊ߫ ߡߐ߱ ߟߎ߬ ߦߋ߫ ߘߟߊߖߊ߫ ߞߏ߫ ߣߌ߫ ߤߌߣߊ߫ ߟߋ߬ ߘߌ߫ ߸ ߞߊ߬ ߝߘߊ߫ ߒ߬ ߖߍ߬ߘߍ ߟߊ߫ ، ߊ߬ ߘߏ߲߬ ߓߘߊ߫ ߓߊ߲߫ ߞߍ߫ ߟߊ߫ ߞߏ߫ ߟߊߕߍ߰ߣߍ߲߫ ߘߌ߫ ﴿21﴾

ߘߊ߬ߡߊ߲߬ߛߊ߫ ߊ߬ ߞߊ߬ ߘߋ߲ ߞߣߐߕߊ߬ ، ߊ߬ ߞߵߊ߬ ߡߊߓߐ߫ ( ߞߣߐ ) ߏ߬ ߟߋ ߘߌ߫ ߔߏ߲߫ ﴿22﴾

ߕߌ߲߭ ߣߊ߬ ߘߴߊ߬ ߘߌ߫ ߕߡߊߙߏ߫ ߜߎ߲ ߘߏ߫ ߡߊ߬ ، ߊ߬ ߞߊ߲߫ ߞߏ߫ ߊ߯ߟߊ߲߫߹ ߥߟߊߞߏ߫ ߒ ߕߍ߬ߘߍ߫ ߛߊ߬ ߣߌ߲߬ ߢߍ߫ ، ߊ߬ ߣߌ߫ ߒ ߕߘߍ߬ ߞߍ߫ ߢߌ߬ߣߊ߬ߒ߬ߞߐ߬ ߝߋ߲߫ ߞߐߢߌ߬ߣߊ߬ߣߍ߲ ߘߌ߫ ߡߍߣߍ߲ߎ߲߫ ﴿23﴾

ߘߊ߬ߡߊ߲߬ߛߊ߫ ‹ ߊ߬ › ߞߵߊ߬ ߞߟߌ߫ ߊ߬ ߣߊ߰ߟߊ߫ ߸ ߞߏ߫ ߌ ߞߣߊ߫ ߛߎ߬ߣߎ߲߫ ߠߋ߬ ߞߟߋ߫ ߸ ( ߓߊ ) ߌ ߡߊ߰ߙߌ ߓߘߊ߫ ߞߐ߬ߢߊ ߟߊߓߎ߬ߦߌ߬ ߌ ( ߛߋ߲߬ ) ߞߘߐ߫ ﴿24﴾

ߕߡߊߙߏ߫ ߜߎ߲ ߖߌ߯ߖߌ߯ ߌ ߖߍ߬ߘߍ߫ ߞߊ߲߬ ߓߊ߫ ، ߊ߬ ߘߴߊ߬ ߘߏ߲ߓߏ߫ ߞߊߘߌߕߊ ߟߎ߬ ߟߊߓߎ߬ߘߎ߲߬ ߌ ߡߊ߬ ߛߍ߲ ߓߘߍߓߘߍ߫ ﴿25﴾

ߌ ߦߋ߫ ߘߊߥߎ߲ߠߌ߲ ߞߍ߫ ߞߵߌ ߡߌ߲߬ ߸ ߊ߬ ߣߴߌ ߦߴߌ ߢߊߛߎߡߊ߫ ، ߞߎߟߊߞߏߕߍ߫ ߣߴߌ ߞߊ߬ ߡߐ߰-ߐ-ߡߐ߰ ߦߋ߫ ( ߦߊ߲߬ ) ߸ ߌ ߦߴߊ߬ ߝߐ߫ ߞߏ߫ ߒߠߋ ߣߊ߬ ߘߊߞߊ߲ ߕߊ߬ ߟߊ߫ ߡߊ߰ߙߌ߬ ߤߌߣߊߒߕߋ ߦߋ߫ ߞߙߊߟߊߕߎ߲߮ ߠߋ߬ ߟߊ߫ ߸ ߏ߬ ߘߐ߫ ߒ ߕߍ߫ ߞߎߡߊ߫ ߟߊ߫ ߡߐ߰ ߛߌ߫ ߝߍ߬ ߏ߬ ߟߋ ߘߐ߫ ߓߌ߬ ﴿26﴾

ߏ߬ ߟߋ ߞߐ߫ ߸ ߊ߬ ߞߊ߬ ߘߋ߲ ߕߊ߬ ߞߊ߬ ߥߴߊ߬ ߘߌ߫ ߊ߬ ߡߌ߬ߙߌ߲߬ߘߌ ߡߊ߬ ، ߏ߬ ߟߎ߬ ߞߊ߲߫ ߞߏ߫ ߋ߫ ߡߊߙߌߦߡߊ߫߹ ߸ ߌ ߘߏ߲߬ ߓߘߊ߫ ߣߊ߬ ߞߏ߫ ߡߊߞߓߊߣߍ߲߫ ߘߌ߫ ߣߌ߲߬ ߞߟߋ߫ ﴿27﴾

ߌߟߋ߬ ߤߊߙߎߣߊ߫ ߡߊ߬ߡߛߏ ߸ ߌ ߝߊ߬ ߡߊ߫ ߞߍ߫ ߞߏߙߏ߲ߧߊ ߡߐ߰ ߘߌ߫ ߸ ߌ ߣߊ߫ ߡߊ߫ ߞߍ߫ ߖߊߕߐ߫ ߘߌ߫ ﴿28﴾

ߊ߬ ߞߵߊ߬ߟߎ߫ ߖߋ߬ߓߌ߬ ߞߐߡߌ߲ ߘߐ߫ ߸ ߞߏ߫ ߊߟߎ߫ ߦߴߊ߬ߟߋ߬ ߘߋ߲ ߖߍ߬ߘߍ ߢߌ߬ߣߌ߲߬ߞߊ߬ ، ߊ߬ߟߎ߬ ߞߊ߲߫ ߞߏ߫ ߒ߬ ߧߋ߫ ߞߎߡߊ߫ ߟߊ߫ ߘߋ߲ ߢߋߙߌ߲ ߝߍ߬ ߖߍ߰ߖߍ߮ ߘߐ߫ ߘߌ߬؟ ﴿29﴾

‹ ߘߋ߲ › ߞߊ߲߫ ߞߏ߫ ߒߠߋ ߦߋ߫ ߊߟߊ߫ ߟߊ߫ ߖߐ߲߭ ߠߋ߬ ߘߌ߫ ، ߊ߬ ߘߏ߲߬ ߓߘߊ߫ ߒ ߛߐ߫ ߟߍߙߊ ߟߊ߫ ߸ ߊ߬ ߣߴߊ߬ ߓߘߊ߫ ߒ ߞߍ߫ ߟߊ߬ߝߐ߬ߓߊ߮ ߘߏ߫ ߘߌ߫ ﴿30﴾

ߊ߬ ߣߴߊ߬ ߞߊ߬ ߒ ߞߍ߫ ߓߙߊߞߊߕߌ߯ ߘߌ߫ ߒ ߓߊ߯ ߞߍ߫ ߝߊ߲߬-ߊ-ߝߊ߲߬ ، ߊ߬ ߘߏ߲߬ ߞߊ߬ ߒ ߡߊߛߙߊ߬ ߛߊߟߌ ߣߌ߫ ߖߞߊ߫ ߓߐ ߟߊ߫ ߝߊ߬ߣߌ߫ ߒ ߓߊߟߏߣߍ߲߫ ﴿31﴾

ߊ߬ ߣߌ߫ ߞߏ߫ ߒ ߧߋ߫ ߢߊ߬ ߒ ߡߏߦߌ߫ ߣߊ ߟߊ߫ ߸ ߊ߬ ߘߏ߲߬ ߡߊ߫ ߒ ߞߍ߫ ߖߘߍ߬ߛߊ߰ߣߦߊ߬ߟߊ߫ ߞߎ߲߬ߠߊ߲߬ߜߏ߫ ߘߌ߫ ﴿32﴾

ߖߐ ߦߋ߫ ߒ ߡߊ߬ ߒ ߡߏߦߌ߫ ߟߏ߲ ߣߌ߫ ߒ ߛߊ߬ ߟߏ߲ ߸ ߊ߬ ߣߌ߫ ߒ ߢߣߊߡߊ ߟߊߥߟߌ߬ ߟߏ߲ ﴿33﴾

(ߘߋ߲ ) ߏ߬ ߟߋ ߡߊߙߌߦߡߊ߫ ߘߋ߲ߞߍ߫ ߌߛߊ߫ ߘߌ߫ ߕߎ߬ߢߊ߬ ߝߐߟߌ ߘߐ߫ ߸ ߊ߬ߟߎ߬ ߦߋ߫ ߛߌߞߊ ߞߊ߲߬ ߡߍ߲ ߞߏߢߊ ߘߐ߫ ﴿34﴾

ߊ߬ ߕߍ߫ ߓߍ߲߬ ߊߟߊ߫ ߡߊ߬ ߸ ߊ߬ ߦߴߊ߬ ߓߟߏߞߍ߫ ߘߋ߲߫ ߠߊ߫ ߸ ߤߋߦߌ߬ ߊ߬ ߛߊߣߌ߲ߡߊ߲߫ ، ߊ߬ ߘߏ߲߬ ߓߊ߯ ߞߏ ߡߍ߲ ߠߊߕߍ߰ ߸ ߊ߬ ߦߴߊ߬ ߝߐ߫ ߟߴߏ߬ ߡߊ߬ ߟߋ߬ ߞߏ߫ ߞߍ߫ ߸ ߏ߬ ߘߏ߲߬ ߘߌ߫ ߞߍ߫ ﴿35﴾

ߞߏ߫ ߊߟߊ߫ ߟߋ߬ ߒߠߋ ߡߊ߰ߙߌ ߣߴߊߟߎ߫ ߡߊ߰ߙߌ ߘߌ߫ ، ߊߟߎ߯ ߏ߬ ߟߋ ߓߊ߬ߕߏ߫ ߘߋ߬ ، ߓߊ ߏ߬ ߟߋ ߛߌߟߊ߫ ߕߋߟߋ߲ߣߍ߲ ߘߌ߫ ﴿36﴾

ߒ߬ߞߊ߬ ߞߙߎߞߊ ߓߍ߯ ߞߵߊ߬ ߞߍ߫ ߛߐ߬ߛߐ߬ߟߌ ߟߋ߬ ߘߌ߫ ߢߐ߲߮ ߕߍ߫ ، ߒ߬ߓߊ߬ ߜߊ߬ߟߏ߬ ߦߋ߫ ߓߊ߲߬ߓߊ߮ ߟߎ߫ ߟߋ߬ ߢߍ߫ ߟߏ߲ߓߊ ߟߊ߬ߘߍ߬ߘߊ ߘߐ߫ ﴿37﴾

ߌ ߦߋ߫ ߡߍ߲ߠߌ߲ ߣߌ߫ ߦߋߟߌ ߞߍ߫ ߊ߬ߟߎ߬ ߟߊ߫ ، ߊ߬ߟߎ߫ ߣߊ߬ ߟߏ߲ ߘߐ߫ ߒ߬ߠߎ߫ ߡߊ߬ ، ߞߏ߬ߣߌ߲߬ ߓߌ߬ ߛߊ߫ ߸ ߕߐ߬ߢߍ߰ߒߕߋ ߟߎ߬ ߦߋ߫ ߝߟߌ߬ ߔߘߋߞߟߋ ߟߋ߬ ߘߐ߫ ﴿38﴾

ߌ ߦߋ߫ ߖߊ߬ߛߙߋ߬ߡߊ߬ߟߊ ߞߍ߫ ߊ߬ߟߎ߬ ߦߋ߫ ߕߌ߲߬ߞߊ߬ߟߐ߲ ߟߏ߲ ߠߊ߫ ߸ ߏ ߕߎ߬ߡߊ ߞߏߢߊ ߓߘߊ߫ ߓߊ߲߫ ߟߊߕߍ߰ ߟߊ߫ ، ߊ߬ߟߎ߫ ߘߏ߲߬ ߖߊ߲߬ߓߐ߬ߣߍ߲ ߕߍ߫ ߘߍ߲߬ߞߣߍ߬ߦߊ߬ ߟߊ߫ ﴿39﴾

ߒ߬ߠߎ߫ ߟߋ߫ ߘߎ߱ ߗߍߕߊ߬ ߟߊ߫ ߊ߬ ߣߴߊ߬ ߞߊ߲߬ ߡߐ߮ ߓߍ߯ ، ߊ߬ߟߎ߫ ߖߍ߬ߘߍ ߘߏ߲߬ ߠߊߛߊ߬ߦߌ߬ߕߐ߫ ߒ߬ߠߎ߫ ߟߋ߫ ߡߊ߬ ﴿40﴾

ߌߓߎ߬ߙߊ߬ߤߌߡߊ߫ ߞߏߝߐ߫ ߟߍߙߊ ߘߐ߫ ߸ ߏ߬ ߞߍ߫ ߘߊ߫ ߕߎ߬ߢߊ߬ߕߌ߯ ߟߊ߬ߝߐ߬ߓߊ߯ ߟߋ߬ ߘߌ߫ ﴿41﴾

ߕߎ߬ߡߊ ߡߍ߲ ߊ߬ ߞߵߊ߬ ߝߐ߫ ߊ߬ ߝߊ߬ ߦߋ߫ ߸ ߞߏ߫ ߒ ߝߊ߬ ߸ ߡߎ߲߬ߠߊ߫ ߌ ߦߋ߫ ߝߋ߲߫ ߓߊ߬ߕߏ߬ ߟߊ߫ ߡߍ߲ ߕߍ߫ ߡߍ߲ߠߌ߲߫ ߞߍ߫ ߟߊ߫ ߸ ߊ߬ ߕߍ߫ ߦߋߟߌ߫ ߞߍ߫ ߟߊ߫ ߸ ߊ߬ ߘߏ߲߬ ߕߍ߫ ߝߏߦߌ߫ ߢߊ߬ ߟߴߌ ߡߊ߬؟ ﴿42﴾

ߊ߬ ߞߏ߫ ߒ ߝߊ߬ ߸ ߝߋ߲߫ ߠߋ߬ ߣߊ߬ߣߍ߲߬ ߒߠߋ ߡߊ߬ ߟߐ߲ߠߌ߲ ߘߌ߫ ߸ ߡߍ߲ ߡߊ߫ ߣߵߌ ߡߊ߬ ، ߏ߬ ߘߐ߫ ߸ ߒߠߋ ߟߊߓߊ߬ߕߏ߬ ߒ ߧߴߌ ߞߊ߲ߘߊ߫ ߛߌߟߊ߫ ߕߋߟߋ߲ߣߍ߲ ߞߊ߲߬ ﴿43﴾

ߊ߬ ߞߏ߫ ߒ ߝߊ߬ ߸ ߌ ߞߊߣߊ߬ ߜߍ߬ߘߍ ߓߊ߬ߕߏ߫ ߘߋ߬ ߸ ߓߊ ߜߍ߬ߘߍ ߞߍߣߍ߲߫ ߡߊ߰ߙߌ߬ ߤߌߣߊߒߕߋ ߛߐ߬ߛߐ߬ߓߊ߮ ߟߋ߬ ߘߌ߫ ﴿44﴾

ߊ߬ ߞߏ߫ ߒ ߝߊ߬ ߸ ߒߠߋ ߛߌߟߊ߲ߣߍ߲߫ ߠߋ߬ ߸ ߒ ߞߏ߫ ߖߊ߲߰ߞߕߊ ߞߣߊ߫ ߡߊ߰ ߌ ߟߊ߫ ߞߊ߬ ߝߘߊ߫ ߡߊ߰ߙߌ߬ ߤߌߣߊߒߕߋ ߟߊ߫ ، ߏ߬ ߘߐ߫ ߌ ߘߌ߫ ߞߍ߫ ߜߍ߬ߘߍ ߢߌ߲߭ ߘߌ߫ ﴿45﴾

ߊ߬ ( ߝߊ߬ ) ߞߊ߲߫ ߸ ߞߏ߫ ߌ ߦߴߌ ߖߍ߲߬ߞߍ߬ ߞߏ ߟߋ߬ ߘߐ߫ ߒ߬ ߡߊ߰ߙߌ ߟߎ߫ ߡߊ߬ ߓߊ߬ ߌߓߎ߬ߙߊ߬ߤߌߡߊ߫؟ ߒ߬ߓߊ߬ ߣߴߌ ߡߊ߫ ߝߘߊ߫ ߸ ߒ ߘߴߌ ߞߙߎ߬ߟߊ߬ߓߏ߲߫ ߠߋ߬ ߘߍ߯ ، ߏ߬ ߘߐ߫ ߌ ߡߊߓߐ߫ ߒ ߠߊ߫ ߟߋ߬ ߔߏ߲߫ ﴿46﴾

ߊ߬ ߞߊ߲߫ ( ߊ߬ ߝߊ߬ ߡߊ߬ ) ߸ ߞߏ߫ ߖߐ ߦߴߌ ߡߊ߬ ߥߍ߫ ، ߒ ߞߏ߬ߣߌ߲߬ ߘߌߣߊ߫ ߦߊ߬ߝߊ ߢߌߣߌ߲߫ ߌ ߦߋ߫ ߒ ߡߊ߰ߙߌ ߟߊ߫ ، ߓߊ ߏ߬ ߢߊ߬ߣߍ߲߬ߓߊ ߟߋ߬ ߒߠߋ ߟߊ߫ ﴿47﴾

ߒ ߘߏ߲߬ ߘߌ߫ ߒ ߡߊߓߐ߫ ߊߟߎ߫ ߟߊ߫ ߸ ߊ߬ ߣߴߊߟߎ߫ ߦߋ߫ ߡߍ߲ ( ߓߍ߯ ) ߞߟߌ߫ ߟߊ߫ ߞߵߊߟߊ߫ ߕߏ߫ ߸ ߒ ߘߌ߫ ( ߥߊ߫) ߒ ߡߊ߰ߙߌ ߞߟߌ߫ ، ߊ߬ ߘߏ߲߬ ߢߐ߲߰ߘߐ߫ ߸ ߒ ߕߍ߫ ߞߍ߫ ߒ ߡߊ߰ߙߌ ߞߟߌ ߘߐ߫ ߖߌ߰ߘߐ߬ߞߏߟߏ߲߫ ߘߌ߫ ﴿48﴾

ߊ߬ ߣߵߊ߬ ߡߊߓߐ߫ ߟߴߊ߬ߟߎ߬ ߟߊ߫ ߸ ߊ߬ ߣߴߊ߬ߟߎ߬ ߦߋ߫ ߝߋ߲ ߡߍ߲ ߠߎ߫ ߓߊ߬ߕߏ߬ ߟߊ߫ ߞߵߊߟߊ߫ ߕߏ߫ ߸ ߊ߲ ߕߊ߯ ߘߴߊ߬ ߛߐ߫ ߌߛߌ߬ߤߊ߯ߞߊ߫ ߟߊ߫ ߸ ߊ߬ ߣߌ߫ ߦߊ߬ߞߎ߯ߓߊ߫ ߝߣߊ߫ ߟߊ߫ ߸ ߊ߲ ߘߏ߲߬ ߞߵߏ߬ ߓߍ߯ ߞߍ߫ ߟߊ߬ߝߐ߬ߓߊ߯ ߟߋ߬ ߘߌ߫ ﴿49﴾

ߊ߬ ߣߴߊ߲ ߞߵߊ߬ߟߎ߬ ߛߐ߫ ߒ߬ ߠߊ߫ ߤߌߣߊ ߘߏ߫ ߟߊ߫ ߸ ߞߊ߬ ߕߎ߬ߢߊ ߛߋߟߎ߫ ߞߘߐߕߊ߬ߣߍ߲߬ ߝߣߊ߫ ߞߍ߫ ߊ߬ߟߎ߬ ߟߊ߫ ﴿50﴾

ߡߎߛߊ߫ ߞߏߝߐ߫ ߟߍߙߊ ߘߐ߫ ߸ ߏ߬ ߞߍ߫ ߘߊ߫ ߡߐ߰ ߓߎ߰ߓߎ߰ߣߍ߲߫ ߘߌ߫ ߸ ߊ߬ ߞߍ߫ ߘߊ߫ ߞߋߟߊ߫ ߟߊ߬ߝߐ߬ߓߊ߯ ߘߌ߫ ﴿51﴾

ߊ߲ ߘߏ߲߬ ߞߵߊ߬ ߞߟߌ߫ ߞߎ߬ߙߎ ߞߌߣߌ߲ߓߟߏ߫ ߝߘߎ ߝߍ߬ ߸ ߞߵߊ߬ ߡߊߘߏ߲߬ ߒ߬ ߠߊ߫ ߢߐ߲߯ߦߋ߫ ߞߊ߲ߡߊ߬ ﴿52﴾

ߊ߲ ߞߵߊ߬ ߞߘߐ߬ߞߍ߬ ߤߊߙߎߣߊ߫ ߘߴߊ߬ ߡߊ߬ ߒ߬ ߠߊ߫ ߤߌߣߊ ߟߊ߫ ߸ ߞߵߏ߬ ߞߍ߫ ߟߊ߬ߝߐ߬ߓߊ߮ ߘߏ߫ ߘߌ߫ ﴿53﴾

ߌߛߌ߬ߡߊ߬ߌߟߊ߫ ߞߏߝߐ߫ ߟߍߙߊ ߘߐ߫ ، ߏ߬ ߞߍ߫ ߘߊ߫ ߛߘߊߒߡߊߞߊ߲ߠߊ ߟߊߕߋߟߋ߲ߓߊ߯ ߘߌ߫ ߸ ߊ߬ ߞߍ߫ ߘߊ߫ ߞߋߟߊ߫ ߟߊ߬ߝߐ߬ߓߊ߯ ߘߌ߫ ﴿54﴾

ߊ߬ ߕߘߍ߬ ߊ߬ ߞߐߙߍ ߟߐ߬ ߟߊ߫ ߛߊߟߌ ߣߌ߫ ߖߞߊ߫ ߓߐ ߟߊ߫ ߸ ߊ߬ ߘߏ߲߬ ߞߍ߫ ߘߴߊ߬ ߡߊ߰ߙߌ ߕߍ߰ߟߊ ߘߐ߫ ߘߌ߬ߢߍ߬ߡߊ߬ ߡߐ߯ ߘߌ߫ ﴿55﴾

ߌߘߙߌ߬ߛߊ߬ ߞߏߝߐ߫ ߟߍߙߊ ߘߐ߫ ، ߏ߬ ߞߍ߫ ߘߊ߫ ߕߎ߬ߢߊ߬ ߕߌ߯ ߘߌ߫ ߸ ߊ߬ ߞߍ߫ ߘߊ߫ ߟߊ߬ߝߐ߬ߓߊ߯ ߘߌ߫ ﴿56﴾

ߊ߲ ߘߏ߲߬ ߞߵߊ߬ ߞߘߐߕߊ߬ ߟߐ߬ߦߌ߬ߟߊ߬ ߡߊߦߟߍ߬ߣߍ߲߫ ߘߐ߫ ﴿57﴾

(ߡߍ߲ ߠߎ߬ ߡߊߘߊ߲ߣߍ߲߫ ߣߌ߲߬ ) ߸ ߊߟߊ߫ ߣߍߡߊߣߴߏ߬ ߟߎ߫ ߟߋ߫ ߡߵߊߘߡߊ߫ ߓߐ߲ߛߐ߲߫ ߟߊ߬ߝߐ߬ߓߊ߮ ߟߎ߬ ߘߐ߫ ، ߊ߬ ߣߌ߫ ߡߐ߱ ߟߎ߬ ( ߓߐ߲ߛߐ߲ ߠߎ߬ ߘߐ߫) ߸ ߊ߲ ߞߊ߬ ߡߍ߲ ߠߎ߫ ߕߊ߬ ߣߎߤߎ߲߫ ߝߍ߬ ( ߞߎߟߎ߲ ߞߣߐ߫ ). ߊ߬ ߣߌ߫ ߌߓߎ߬ߙߊ߬ߤߌߡߊ߫ ߣߴߌߛߌ߬ߙߊ߬ߌߟߊ߫ ߓߐ߲ߛߐ߲ ߠߎ߬ ߘߐ߫ ، ߊ߬ ߣߌ߫ ߒ߬ ߠߊ߫ ߡߐ߰ ߞߊ߲ߘߊߣߍ߲ ߣߌ߫ ߒ߬ ߠߊ߫ ߡߐ߰ ߛߎߥߊ߲ߘߌߣߍ߲ ߠߎ߬ ߘߐ߫ ، ߡߊ߰ߙߌ߬ ߤߌߣߊߒߕߋ ߟߊ߫ ߟߝߊߙߌ ߟߎ߬ ߓߊ߯ ߞߊ߬ߙߊ߲߫ ߏ߬ ߟߎ߬ ߡߍ߲ ߠߎ߬ ߦߋ߫ ߸ ߊ߬ߟߎ߬ ߘߴߊ߬ߟߎ߫ ߓߋ߬ ߕߌ߲ߓߌߘߌ߲ ߘߌ߫ ߸ ߊ߬ ߣߌ߫ ߞߊ߬ߛߌ ߘߌ߫ ﴿58﴾

ߣߘߐ߬ߓߌ߬ߟߊ߬ ߖߎ߮ ߟߎ߫ ߟߋ߫ ߣߊ߬ ߘߊ߫ ߝߐ߫ ߏ߬ ߟߎ߬ ߞߐ߫ ، ߏ߬ ߟߎ߫ ߟߋ߫ ߞߊ߬ ߛߊߟߌ ߡߊߓߌ߬ߟߊ߬ ߸ ߞߊ߬ ߣߌ ߛߊ߬ߥߏ ߟߎ߬ ߟߊߓߊ߬ߕߏ߬ ߸ ߒ߬ߓߊ߬ ߏ߬ ߟߎ߫ ߟߋ߬ ߟߊߝߟߌ߬ߕߐ߫ ߕߏߒߘߐ ߘߌ߲߬ߞߌߙߊ ߘߐ߫ ﴿59﴾

ߝߏ߫ ߣߌ߫ ߡߍ߲ ߞߵߊ߬ ߖߘߍ߬ߟߊߛߊ߬ߦߌ߲߬ ߞߊ߬ ߘߍ߲߬ߞߣߍ߬ߦߊ߫ ߞߊ߬ ߓߊ߯ߙߊ߫ ߢߌߡߊ ߞߍ߫ ، ߒ߬ߓߊ߬ ߏ߬ ߟߎ߫ ߟߋ߫ ߘߏ߲߬ߕߐ߫ ( ߡߍ߲ߘߌߦߊ ) ߣߊߞߐ ߘߐ߫ ، ߊ߬ߟߎ߫ ߘߏ߲߬ ߕߍ߫ ߕߐ߬ߢߍ߰ ߟߊ߫ ߝߏߦߌ߬ ߟߊ߫ ﴿60﴾

ߝߙߍ ߣߊߞߐ ߟߎ߫ ߟߋ߬ ߞߴߏ߬ ߘߌ߫ ߸ ߡߊ߰ߙߌ߬ ߤߌߣߊߒߕߋ ߣߵߊ߬ ߟߊ߫ ߖߐ߲߭ ߠߎ߬ ߦߟߌߡߊߘߌߦߊ߫ ߟߊ߫ ߡߍ߲ ߠߎ߬ ߟߊ߫ ߘߏ߲߰ ߘߐ߫ ، ߊ߬ ߘߏ߲߬ ߠߊ߫ ߦߟߌߡߊߘߌߦߊ߫ ( ߞߏ ) ߦߋ߫ ߣߊ߬ ߟߊ߫ ߟߋ߫ ߘߋ߬ ﴿61﴾

ߊ߬ߟߎ߬ ߕߍ߫ ߞߎ߬ߟߊ߲߬ߞߎ߬ߟߊ߲߬ ߞߊ߲߬ ߛߌ߫ ߡߍ߲߫ ߠߊ߫ ߦߋ߲߬ ߸ ߝߏ߫ ߖߐ ߝߏ߬ߟߌ߬ ߞߊ߲ ߘߊ߬ߡߊ ߸ ߊ߬ߟߎ߬ ߓߊߟߏ ߘߏ߲߬ ߦߴߊ߬ߟߎ߬ ߢߍ߫ ߦߋ߲߬ ߛߐ߰ߡߊ߬ ߣߌ߫ ߥߎ߬ߙߊ ߟߊ߫ ﴿62﴾

ߣߊߞߐ ߏ ߘߏ߲߬ ߸ ߊ߲ ߧߴߏ߬ ߞߍ߫ ߟߊ߫ ߗߍ ߘߌ߫ ߡߐ߰ ߟߋ߬ ߦߋ߫ ߒ߬ ߠߊ߫ ߖߐ߲߭ ߠߎ߬ ߘߐ߫ ߸ ߡߍ߲ ߞߍ߫ ߘߊ߫ ߝߊ߲ߕߊ߲ߞߟߊ ߘߌ߫ ﴿63﴾

ߒ߬ߠߎ߬ ( ߞߋ߲ߛߐ߲ ߠߎ߬ ) ߕߍ߫ ߖߌ߰ ߟߊ߫ ߸ ߝߏ߫ ߌ ߡߊ߰ߙߌ ߟߊ߫ ߖߊ߬ߡߊߙߌ ، ߏ߬ ߟߋ ߕߊ߫ ߦߋ߫ ߒ߬ߠߎ߬ ߢߍ߫ ߞߏ ߣߌ߫ ߒ߬ ߞߐ߫ ߞߏ ߘߌ߫ ، ߊ߬ ߣߌ߫ ߡߍ߲ ߦߴߏ߬ ߟߎ߬ ߕߍ߫ ، ߌ ߡߊ߰ߙߌ ߘߏ߲߬ ߕߍ߫ ߢߌ߬ߣߊ߬ߓߊ߯ ߘߌ߫ ﴿64﴾

ߊ߬ߟߋ ߟߋ߬ ߦߋ߫ ߛߊ߲ ߠߎ߬ ߣߌ߫ ߘߎ߱ ߣߴߏ߬ ߝߌ߬ߟߊ ߕߍߟߊ ߡߊ߰ߙߌ ߘߌ߫ ، ߒ߬ߓߊ߬ ߌ ߦߴߏ߬ ߟߋ ߓߊ߬ߕߏ߬ ߸ ߊ߬ ߣߴߌ ߦߴߌ ߡߎ߬ߢߎ߲߫ ߊ߬ ߓߊ߬ߕߏ ߞߊ߲߬ ، ߦߊ߯ߟߊ߫ ߌ ߞߊ߬ ߕߐ߯ߡߊ߲߫ ߟߐ߲߫ ߊ߬ ߟߊ߫ ߓߊ߬؟ ﴿65﴾

ߡߐ߱ ߟߴߊ߬ ߝߐ߫ ߟߊ߫ ߕߋ߲߬ ߞߏ߫ ߦߊ߯ߟߊ߫ ߣߌ߫ ߒ ߛߊ߬ ߘߊ߫ ߸ ߒ ߢߣߊߡߊ ߘߌ߫ ߟߊߓߐ߫ ߕߎ߲߯ߣߌ߲߫ ߓߊ߬؟ ﴿66﴾

ߦߊ߯ߟߊ߫ ߡߐ߱ ( ߏ߬ ) ߕߴߊ߬ ߦߟߌߓߌ߬ߟߊ߬ ߟߊ߫ ߓߊ߬ ߞߏ߫ ߒ߬ߠߎ߫ ߞߵߊ߬ ߘߊ߲߫ ߞߘߐ߬ߡߊ߲߫ ߞߵߊ߬ ߛߐ߬ߘߐ߲߬ ߊ߬ ߕߎ߲߬ ߕߍ߫ ߝߏߦߌ߬ ߘߌ߫؟ ﴿67﴾

ߊ߰ ߒ ߣߴߌ ߡߊ߰ߙߌ ߕߍ߫ ߸ ߛߋߚߋ߫ ߊ߲ ߘߌߣߵߊ߬ߟߎ߬ ߣߌ߫ ߜߍ߬ߘߍ ߟߎ߬ ߟߊߘߍ߬ ߸ ߊ߲ ߘߌ߫ ߓߊ߲߫ ߞߵߊ߬ߟߎ߬ ߟߊߣߊ߬ ߸ ߞߵߊ߬ߟߎ߬ ߟߊߢߐ߲߬ߞߌ߲߬ ߔߊߦߌߔߊߦߌ ߟߊߡߌߣߌ߲ ߘߐ߫ ߞߎߙߍ߫ ﴿68﴾

ߊ߲ ߘߌ߫ ߓߊ߲߫ ߞߊ߬ ߡߐ߰ ߓߏ߬ߛߌ߫ ߡߌ߬ߙߌ߲߬ߘߌ ߞߋ߬ߟߋ߲߬ߞߋ߬ߟߋ߲߬ߣߊ ߘߐ߫ ߸ ߡߍ߲ ߠߊ߫ ߞߊߝߋߜߟߍߦߊ ߓߏ߲߬ߓߊ߬ߓߊ ߦߋ߫ ߡߊ߰ߙߌ߬ ߤߌߣߊߒߕߋ ߡߊ߬ ﴿69﴾

ߒ߬ߠߎ߫ ߟߋ߬ ߘߏ߲߬ ߞߵߊ߬ ߟߐ߲߫ ߡߍ߲ ߠߎ߬ ߖߊ߯ߙߋߣߍ߲߫ ߔߊߦߌߔߊߦߌ߫ ߘߐ߫ ߘߏ߲ ߠߊ߫ ﴿70﴾

ߡߐ߰ ߛߌ߫ ߞߏ߬ߣߌ߲ ߕߍ߫ ߊߟߎ߫ ߘߐ߫ ߸ ߡߍ߲ ߕߍ߫ ߞߐ߬ ߕߊ߮ ߞߍ߫ ߦߋ߲߬ ، ߏ߬ ߞߍߣߴߌ ߡߊ߰ߙߌ ߡߊ߬ ߛߋ߲ߛߋߘߋ߲߫ ߠߊߕߍ߰ߣߍ߲ ߠߋ߬ ߘߌ߫ ﴿71﴾

ߏ߬ ߟߋ ߞߐ߫ ߛߊ߫ ߸ ߊ߲ ߘߌ߫ ߝߊ߲ߕߊ߲ߞߟߊ ߟߎ߬ ߟߊߞߛߌ߫ ߸ ߞߊ߬ ߕߐ߬ߢߍ߰ߒߕߋ ߟߎ߫ ߢߐ߲߬ߞߌ߲߬ߣߍ߲ ߕߏ߫ ߊ߬ ߘߐ߫ ߦߋ߲߬ ߞߎߙߍ߫ ﴿72﴾

ߓߊߏ߬ ߊ߲ ߠߊ߫ ߟߝߊߙߌ߫ ߘߐߞߣߍߣߍ߲ ߠߎ߫ ( ߕߎ߲߬ ) ߓߊ߯ ߞߊ߬ߙߊ߲߫ ߏ߬ ߟߎ߬ ߦߋ߫ ߞߏߕߊ߲߫ ߸ ߓߊ߲߬ߓߊ߮ ߟߎ߬ ߘߴߊ߬ ߝߐ߫ ߘߍ߲߬ߞߣߍ߬ߦߊ߬ߓߊ߮ ߟߎ߫ ߡߊ߬ ߸ ߞߏ߫ ( ߊ߲ ) ߖߊ߬ߡߊ߫ ߝߌ߬ߟߊ ߘߐ߫ ߸ ߖߍߣߍ߲ ߟߐ߬ߘߌߦߊ ߞߊ߫ ߝߌ߬ߛߊ߬ ߸ ߊ߬ ߣߌ߫ ߖߐ߲߫ ߠߊ߫ ߞߍߙߍ߲ ߢߌ߬ߡߊ߬ ߦߋ߫؟ ﴿73﴾

ߊ߲ ߓߘߊ߫ ߓߐ߲ߛߐ߲ߘߊ߫ ߖߋ߬ߟߌߖߋ߬ߟߌ߫ ߟߋ߬ ߛߌߟߊߛߵߊ߬ߟߎ߬ ߢߍ߫ ߞߘߐ߬ߡߊ߲߫؟ ߏ߬ ߟߎ߯ ߊ߬ߟߎ߬ ߢߍ߫ ߡߎ߬ߙߊ߲߬ ߞߏ ߘߐ߫ ߸ ߊ߬ ߣߌ߫ ߦߋߞߏߢߌߡߊ ߘߐ߫ ﴿74﴾

ߊ߬ ߟߊߛߋ߫ ߞߏ߫ ߡߍ߲ ߓߊ߯ ߞߍ߫ ߝߌ߬ߟߌ ߘߐ߫ ߸ ( ߊߟߡߊ߫ ) ߡߊ߰ߙߌ߬ ߤߌߣߊߒߕߋ ߦߋ߫ ߘߐ߬ߝߎ߬ߟߋ߲߬ߠߌ߲߬ ߞߍ߫ ߏ߬ ߦߋ߫ ߝߋ߲ߜߋ߲߫ ( ߛߌ߭ ߣߌ߫ ߤߊ߬ߙߌ߬ߖߍ߮ ߟߊ߫ ) ߸ ߝߏ߫ ߊ߬ߟߎ߬ ߢߊ ߦߋ߫ ߟߊ߫ ߞߏ ߞߊ߲߬ ߸ ߞߐ߲߬ߞߐ߲߬ ߞߍߣߴߊ߬ߟߎ߬ ߞߊ߲ߡߊ߬ ߡߍ߲ ߘߐ߫ ، ߞߋߟߋ߲߫ ߏ߬ ߦߋ߫ ߞߍ߫ ߖߊ߲߰ߞߕߊ ߘߌ߫ ߸ ߥߟߴߊ߬ ߦߋ߫ ߞߍ߫ ߟߐ߬ߓߊ ߘߌ߫ ، ߊ߬ߟߎ߫ ߞߏ߬ߣߌ߲߬ ߘߌߣߵߊ߬ ߟߐ߲߫ ߸ ߡߍ߲ ߟߌ߬ߤߟߊ ߞߊ߫ ߖߎ߯ ߸ ߊ߬ ߣߌ߫ ߡߍ߲ ߠߊ߫ ߞߟߍ߬ ߖߡߊ ߟߊ߲߰ߝߏ߬ߣߍ߲߫ ﴿75﴾

ߊߟߊ߫ ߦߋ߫ ߞߊ߲ߘߊߓߊ߮ ߟߎ߫ ߟߋ߬ ߖߘߌ߫ ߟߊ߫ ߞߊ߲ߘߦߊ ߟߊ߫ ، ߕߏߕߊ߫ ߢߌߡߊ ߟߎ߫ ߟߋ߬ ߝߌ߬ߛߊ߬ ߌ ߡߊ߰ߙߌ ߓߘߊ ߓߙߊ߬ߖߌ߬ ߞߏ ߘߐ߫ ߸ ߊ߬ ߣߴߏ߬ ߟߋ ߞߊ߫ ߝߌ߬ߛߊ߫ ߘߐ߬ߛߊ߬ߦߌ߬ߟߌ ߘߐ߫ ﴿76﴾

ߌ ߡߴߊ߬ ߦߋ߫ ߓߊ߬ ߡߍ߲ ߣߵߊ߬ ߓߊ߲߬ ߠߊ߫ ߒ߬ ߠߊ߫ ߟߝߊߙߌ ߟߎ߬ ߘߐ߫ ߸ ߊ߬ ߣߴߊ߬ ߞߵߊ߬ ߝߐ߫ ߞߏ߫ ߒ ߓߍߣߊ߬ ߛߐ߫ ߣߊ߲߬ߝߟߏ߫ ߟߊ߫ ߊ߬ ߣߌ߫ ߘߋ߲߫ ߠߊ߫ ﴿77﴾

ߦߊ߯ߟߊ߫ ߊ߬ ߓߘߊ߫ ߖߌ߲ߞߌ߲߫ ߞߏ߫ ߘߏ߲߰ߣߍ߲ ߡߊ߬ ߟߋ߬ ߓߊ߬؟ ߥߟߴߊ߬ ߓߘߊ߫ ߟߊ߬ߤߘߌ ߟߋ߫ ߡߌ߬ߘߊ߫ ߡߊ߰ߙߌ߬ ߤߌߣߊߒߕߋ ߕߍ߰ߟߊ ߘߐ߫؟ ﴿78﴾

ߞߊ߯ߙߌ߫ ߸ ߊ߲ ߘߏ߲߬ ߘߌߣߵߊ߬ ߞߎߡߊ߫ ߞߊ߲ ߛߓߍ߫ ߸ ߊ߬ ߣߴߊ߲ ߘߌߣߊ߬ ߖߊ߲߰ߞߕߊ ߘߐߝߎߟߋ߲߫ ߊ߬ ߦߋ߫ ߝߋ߲ߜߋ߲߫ ﴿79﴾

ߊ߬ ߞߊ߲߫ ( ߊ߬ ߟߊ߫ ߣߊ߲߬ߝߟߏ ) ߡߍ߲ ߡߊ߬ ߸ ߊ߲ ߘߴߏ߬ ߟߎ߫ ߕߵߊ߬ ߗߍ ߘߐ߫ ߸ ߊ߬ ( ߕߍ߯ߜߍ ) ߘߌߣߵߊ߲ ߕߘߍ߬ ߛߏߘߊ߫ ﴿80﴾

ߊ߬ߟߎ߫ ߞߵߊߟߊ߫ ߕߏ߫ ߦߋ߲߬ ߞߵߊ߬ߟߎ߬ ߓߟߏߞߍ߫ ߡߊ߰ߙߌ߬ ߜߘߍ ߟߎ߬ ߟߊ߫ ߟߋ߬ ߸ ߛߴߏ߬ ߘߌ߫ ߞߍ߫ ߊ߬ߟߎ߬ ߦߋ߫ ߞߐߡߊߓߌ߲ߓߌ߲ߠߌ߲ ߘߌ߫ ﴿81﴾

ߞߏ߬ߣߌ߲߬ ߌ߬ߦߏ߯ ߞߟߋ߫ ߸ ߖߏ߭ ߏ߬ ߟߎ߫ ߣߊ߬ߕߐ߫ ߟߋ߫ ߊ߬ߟߎ߬ ߟߊ߫ ߓߊ߬ߕߏ ߝߌߛߙߌߥߊߟߋߦߊ߫ ߟߊ߫ ߸ ߞߊ߬ ߞߍ߫ ߊ߬ߟߎ߫ ߞߟߍ߬ߢߐ߲߮ ߠߎ߬ ߘߌ߫ ﴿82﴾

ߌ ߡߴߊ߬ ߦߋ߫ ߓߊ߬ ( ߞߵߊ߬ ߟߐ߲߫ ) ߞߏ߫ ߒ߬ߠߎ߫ ߟߋ߫ ߜߍ߬ߘߍ ߟߎ߬ ߗߋ߫ ߟߊ߫ ߓߊ߲߬ߓߊ߮ ߟߎ߫ ߡߊ߬ ߸ ߊ߬ߟߎ߬ ߦߴߊ߬ߟߎ߬ ߘߐߖߏ߯ߙߏ߫ ( ߞߎ߬ߕߊ ߟߊ߫ ) ߖߏ߯ߙߏߞߙߏ߫؟ ﴿83﴾

ߒ߬ߓߊ߬ ߌߟߋ ߞߊߣߊ߬ ߞߌߢߍ߫ ߊ߬ߟߎ߫ ߡߊ߬ ߟߋ߬ ߞߟߋ߫ ، ߓߊߏ߬ ߒ ߧߴߊ߬ߟߎ߬ ߟߊ߫ ߥߊ߯ߕߌ ߟߎ߫ ߖߊ߬ߕߋ ߟߋ߫ ߞߊ߲߬ ߦߙߌߞߊߟߌ ߟߊ߫ ߖߐ߫ ﴿84﴾

ߊ߲ ߞߍߕߐ߫ ߝߊ߲ߕߊ߲ߞߟߊ ߟߎ߬ ߟߊߘߍ߬ ߟߊ߫ ߡߊ߰ߙߌ߬ ߤߌߣߊߒߕߋ ߕߍ߰ߟߊ ߘߐ߫ ߟߏ߲ ߡߍ߲ ߸ ߛߋߒߓߘߊߟߌ ߦߟߍ߬ߒ߬ߞߊ߲߬ߓߊ߰ ߖߡߊ ߘߌ߫ ﴿85﴾

ߊ߬ ߣߴߊ߲ ߘߌ߫ ߛߐ߲߬ߡߊ ߟߎ߫ ߞߏ߬ߙߏ߲߬ߞߏߙߏ߲߫ ߞߊ߬ ߕߊ߯ ߔߊߦߌߔߊߦߌ ߡߊ߬ ߓߌߦߊ߲߫ ߠߊߡߌ߲߬ߕߊ ߟߎ߬ ߟߊ߫ ߞߐ߬ߕߊ߰ ߢߊ ߡߊ߬ ﴿86﴾

ߞߵߊ߬ ߕߘߍ߬ ߛߟߏ߬ߣߊ߬ߟߌ߫ ߕߍ߫ ߊ߬ ߛߌ߫ ߓߟߏ߫ ߸ ߝߏ߫ ߡߍ߲ ߣߐ߬ ߓߊ߯ ߞߍ߫ ߟߊ߬ߤߘߌ߬ ( ߖߐ߲ߖߐ߲߫ ) ߡߌ߬ߘߊ߬ ߟߊ߫ ߡߊ߰ߙߌ߬ ߤߌߣߊߒߕߋ ߝߍ߬ ﴿87﴾

ߊ߬ߟߎ߬ ߞߊ߲߫ ߠߋ߬ ߸ ߞߏ߫ ߡߊ߰ߙߌ߬ ߤߌߣߊߒߕߋ ߓߘߴߊ߬ ߓߟߏߞߍ߫ ߘߋ߲߫ ߠߊ߫ ﴿88﴾

ߊߟߎ߫ ߘߏ߲߬ ߓߘߊ߫ ߣߊ߬ ߞߏ߫ ߡߊߞߓߊߣߍ߲߫ ߘߌ߫ ߏ߬ ߘߌ߫ ߞߟߋ߫ ﴿89﴾

ߛߊ߲ ߠߎ߬ ߓߍߢߌߣߌ߲߫ ߞߊ߬ ߝߙߊ߫ ߏ߬ ߘߐ߫ ߸ ߞߊ߬ ߘߎ߱ ߛߍ߲ߞߍ߫ ߸ ߞߊ߬ ߞߎ߬ߙߎ ߟߎ߫ ߓߋ߬ ߞߊ߬ ߖߍ߲ߛߍ߲߫ ߛߎߋ߫ ﴿90﴾

ߞߏ߫ ߊ߬ߟߎ߬ ߓߘߊ߫ ߘߋ߲߫ ߘߍ߬ߡߍ߲߬ߘߌ߫ ߡߊ߰ߙߌ߬ ߤߌߣߊߒߕߋ ߟߊ߫ ﴿91﴾

ߊ߬ ߘߏ߲߬ ߕߍ߫ ߓߍ߲߬ ߡߊ߰ߙߌ߬ ߤߌߣߊߒߕߋ ߡߊ߬ ߸ ߊ߬ ߦߴߊ߬ ߓߟߏߞߍ߫ ߘߋ߲߫ ߠߊ߫ ﴿92﴾

ߣߌߡߊ߫ ߛߌ߫ ߕߍ߫ ߛߊ߲ ߠߎ߬ ߣߌ߫ ߘߎ߱ ߞߊ߲߬ ߣߌ߫ ߡߍ߲ ߖߐ߲߬ߠߊ߬ߡߊ ߕߍ߫ ߣߊ߬ ߟߊ߫ ߡߊ߰ߙߌ߬ ߤߌߣߊߒߕߋ ߡߊ߬ ﴿93﴾

ߊ߬ ߞߵߊ߬ߟߎ߫ ߖߊ߬ߕߋ߫ ߟߋ߬ ߸ ߞߵߊ߬ߟߎ߬ ߦߙߌߞߊ߫ ߦߙߌߞߊߟߌ ߟߊ߫ ߖߐ߫ ﴿94﴾

ߊ߬ߟߎ߫ ߞߋ߬ߟߋ߲߬ߞߋ߬ߟߋ߲߬ߣߊ ߘߏ߲߬ ߘߌ߫ ߣߊ߬ ( ߊߟߊ߫ ) ߡߊ߬ ߟߐ߬ߓߊ ߟߏ߲ ߠߋ߬ ߛߏߘߊ߫ ﴿95﴾

ߡߍ߲ ߠߎ߫ ߞߏ߬ߣߌ߲ ߘߍ߲߬ߞߣߍ߬ߦߊ߬ߣߍ߲߫ ߞߊ߬ ߢߌ߬ߡߊ ߟߎ߬ ߞߍ߫ ߸ ߡߊ߰ߙߌ߬ ߤߌߣߊߒߕߋ ߘߌߣߊ߬ ߞߊ߬ߣߌ߲߬ߢߐ߲߰ߦߊ ߞߍ߫ ߏ߬ ߟߎ߬ ߕߍ߫ ﴿96﴾

ߊ߲ ߣߊ߬ ‹ ߞߎ߬ߙߊ߬ߣߊ › ߣߐ߰ߦߊ߬ ߟߴߌ ߣߍ߲߭ ߞߊ߲߬ ߠߋ߬ ߸ ߛߴߌ ߘߌ߫ ߘߟߊߝߎߟߌ ߞߍ߫ ߊ߬ ߟߊ߫ ߝߊ߲ߕߊ߲ߞߟߊ ߟߎ߬ ߦߋ߫ ، ߊ߬ ߣߴߌ ߦߋ߫ ߖߊ߬ߛߙߋ߬ߡߊ߬ߟߊ ߞߍ߫ ߊ߬ ߟߊ߫ ߡߌ߬ߙߌ߲߬ߘߌ߫ ߣߌߘߐߜߍߟߍ߲ ߦߋ߫ ﴿97﴾

ߊ߲ ߓߘߊ߫ ߓߐ߲ߛߐ߲ߘߊ߫ ߖߋ߬ߟߌߖߋ߬ߟߌ߫ ߟߋ߬ ߛߌߟߊߛߊ߬ ߢߌ߲߬ ߠߎ߬ ߢߍ߫ ߞߘߐ߬ߡߊ߲߫؟ ߦߊ߯ߟߊ߫ ߌ ߦߴߏ߬ ߟߎ߬ ߘߏ߫ ߞߋߟߋ߲߫ ߟߊߞߏߟߐ߲߫ ߠߊ߫ ߓߊ߬؟ ߥߟߊ߫ ߌ ߦߋ߫ ߡߊ߲߬ߞߊ߲߬ ߡߍ߲߫ ߠߴߊ߬ߟߎ߬ ߟߊ߫؟ ﴿98﴾

ߕ߭ߤߊ߫ ߟߋ߬ ﴿1﴾

ߊ߲ ߡߊ߫ ߞߎ߬ߙߊ߬ߣߊ ߢߌ߲߬ ߠߊߖߌ߰ ߌ ߡߊ߬ ( ߞߵߊ߬ ߟߊߥߟߌ߬ ) ߛߴߌ ߘߌ߫ ߢߊߣߌ߲߫ ﴿2﴾

(ߊ߬ ߡߊ߫ ߟߊߥߟߌ߬ ߝߏߦߌ߫ ߡߊ߬ ߸ ) ߝߏ߫ ߞߊ߬ ߞߊ߬ߥߊ߲߬ߘߌ ߞߍ߫ ߛߌߟߊ߲ߓߊ߮ ߢߍ߫ ﴿3﴾

ߊ߬ ߖߌ߰ߣߍ߲߫ ߞߊ߬ ߝߘߊ߫ ߡߍ߲ ߠߊ߫ ߸ ߏ߬ ߟߋ ߞߊ߬ ߘߎ߱ ߣߌ߫ ߛߊ߲߫ ߞߘߐߕߊ߬ߣߍ߲ ߠߎ߬ ߘߊ߲߫ ﴿4﴾

ߡߊ߰ߙߌ߬ ߤߌߣߊߒߕߋ ߟߊߞߢߊߣߍ߲߫ ߛߍ߬ߡߍ ߟߋ߫ ߞߊ߲߬ ﴿5﴾

ߊ߬ ߕߊ ߟߋ߬ ߝߋ߲ ߘߌ߫ ߡߍ߲ ߦߋ߫ ߛߊ߲ ߠߎ߬ ߞߣߐ߫ ߸ ߡߍ߲ ߦߋ߫ ߘߎ߱ ߞߣߐ߫ ߸ ߡߍ߲ ߦߴߏ ߝߌ߬ߟߊ ߕߍ߫ ߸ ߊ߬ ߣߌ߫ ߡߍ߲ ߦߋ߫ ߓߎ߰ߘߌ߬ ߦߌߟߌ߲ߣߍ߲ ߞߘߐ߫ ﴿6﴾

ߤߊߟߵߌ ߓߊ߯ ߞߎߡߊ ߟߊ߲ߞߣߍߡߊ߫ ߸ ߓߊ ‹ߊߟߊ߫› ߞߊ߬ ߜߎ߲߬ߘߎ ߣߌ߫ ߘߏ߲߰ߣߍ߲߬ߓߊ ( ߓߍ߯) ߟߐ߲߫ ﴿7﴾

ߊߟߊ߫ ߞߏ߬ߣߌ߲ ߸ ߡߊ߰ߙߌ߬ ߛߌ߫ ߕߍ߫ ߊ߬ߟߋ߬ ߞߐ߫ ، ߕߐ߯ ߢߌߡߊ߫ ߜߊ߲߬ߛߊ߲߫ ߠߋ߫ ߘߏ߲߬ ߦߴߊ߬ ߟߊ߫ ﴿8﴾

ߦߊ߯ߟߊ߫ ߡߎߛߊ߫ ߞߏ ߓߊ߬ߘߏ ߣߊ߬ ߘߴߌ ߡߊ߬ ߓߊ߬؟ ﴿9﴾

ߕߎ߬ߡߊ ߡߍ߲ ߊ߬ ߞߊ߬ ߕߊ ( ߟߊߕߌ߲ ) ߦߋ߫ ߸ ߞߵߊ߬ ߝߐ߫ ߊ߬ ߞߐߙߍ ߡߊ߬ ߞߏ߫ ߊߟߎ߫ ߦߋ߫ ߒ ߡߊߞߐ߬ߣߐ߲߬ ߘߍ߫ ߸ ߒ ߓߘߊ߫ ߕߊ ߘߏ߫ ߟߊߞߏߟߐ߲߫ ( ߒ ߧߋ߫ ߥߊ߫ ߛߋ߫ ߦߋ߲߬ ) ߸ ߛߊ߫ ߒ ߘߌ߫ ߣߊ߬ ߕߟߊߡߊߟߐ߮ ߘߏ߫ ߘߴߊߟߎ߫ ߡߊ߬ ߞߊ߬ ߓߐ߫ ߦߋ߲߬ ߸ ߥߟߊ߫ ߒ ߧߋ߫ ߞߊ߲ߘߦߊ߫ ߛߐ߬ߘߐ߲߬ ߕߊ߫ ߘߊ ߟߊ߫ ﴿10﴾

ߊ߬ ߛߋ ߦߋ߲߬ ߸ ߊ߬ ߞߟߌ߫ ߘߊ߫ ߞߏ߫ ߡߎߛߊ߫ ߟߋ߬ ﴿11﴾

ߒߠߋ ߟߋ߫ ߓߏ߬ ߸ ߒߠߋ ߡߍ߲ ߌ ߡߊ߰ߙߌ ߘߌ߫ ، ߌ ߟߊ߫ ߔߋߕߎ߫ ߝߌ߬ߟߊ ߓߐ߫ ߘߍ߫ ، ߓߊ ߌ ߦߋ߫ ߕߎߥߊ߫ ߞߐ߬ ߛߊߣߌ߲ ߠߋ߬ ߟߊ߫ ߣߌ߲߬ ﴿12﴾

ߒߠߋ ߓߘߴߌ ߛߎߥߊ߲ߘߌ߫ ߸ ߌ ߕߟߏߡߊߟߐ߬ ߌ ߦߟߌߘߏ߲߫ ߞߊ߲ ߠߊ߫ ﴿13﴾

ߒߠߋ ߞߏ߬ߣߌ߲ ߸ ߒߠߋ ߟߋ߬ ߊߟߊ߫ ߘߌ߫ ߸ ߡߊ߰ߙߌ߬ ߛߌ߫ ߕߍ߫ ߒߠߋ ߞߐ߫ ߸ ߒ߬ߓߊ߬ ߒߠߋ ߟߋ߫ ߓߊ߬ߕߏ߬ ߸ ߌ ߦߋ߫ ߛߊߟߌ ߟߐ߬ ߒ ߞߏߝߐ߫ ߞߊ߲ ߡߊ߬ ﴿14﴾

ߛߋߚߋ߫ ߸ ߟߐ߬ߓߊ ߣߊ߬ߕߐ߫ ߟߋ߬ ، ߒ ߘߏ߲߬ ߊ߬ ߕߏ߫ ߟߊ߫ ߘߏ߲߱ ߠߋ߬ ߘߐ߫ ߸ ( ߊ߬ ߣߊ߬ ߞߎ߲ ߠߋ߬) ߸ ߛߊ߫ ߣߌߡߊ ߓߍ߯ ߘߌ߫ ߛߊ߬ߙߴߊ߬ ߗߋߥߊߟߌ ߟߊ߫ ﴿15﴾

ߒ߬ߓߊ߬ ߡߍ߲ ߘߍ߲߬ߞߣߍ߬ߦߊ߬ߣߍ߲߬ ߕߍ߫ ߊ߬ ߡߊ߬ ߸ ߊ߬ ߘߏ߲߬ ߦߴߊ߬ ߣߌ ߛߊ߬ߥߏ ߟߊߓߊ߬ߕߏ߬ ߟߊ߫ ߸ ߏ߬ ߞߊߣߵߌ ߞߎ߬ߡߊ߲߬ߘߌ߫ ߊ߬ ߞߏߢߊ ߡߊ߬ ߘߋ߬ ߸ ߌ ߘߌ߫ ߕߏ߫ ߊ߬ ߘߐ߫ ߏ߬ ߘߐ߫ ﴿16﴾

ߡߋ߬ߘߋ ߌ ߞߌߣߌ߲ ߘߐ߫ ߣߌ߲߬ ߡߎߛߊ߫؟ ﴿17﴾

ߊ߬ ߞߊ߲߫ ߞߏ߫ ߒ ߠߊ߫ ߘߐ߬ߞߐ ߟߋ߬ ߸ ߒ ߧߋ߫ ߒ ߛߍ߲߬ߓߍ߬ ߟߴߏ߬ ߟߋ ߟߊ߫ ߸ ߊ߬ ߣߌ߫ ߒ ߧߋ߫ ߝߌߘߊ ߟߊߖߌ߰ ߟߴߊ߬ ߟߊ߫ ߒ ߠߊ߫ ߕߊ߬ߡߛߌ ߟߎ߫ ߡߊ߬ ، ߊ߬ ߡߊ߬ߞߏ߬ ߜߘߍ߫ ߟߎ߫ ߝߣߊ߫ ߦߋ߫ ߒ ߠߊ߫ ﴿18﴾

‹ ߊߟߊ߫ › ߞߊ߲߫ ߞߏ߫ ߊ߬ ߟߊߝߟߌ߬ ߓߊ߫ ߡߎߛߊ߫ ﴿19﴾

ߊ߬ ߣߵߊ߬ ߟߊߝߟߌ߬ ߟߊ ߸ ߘߊ߬ߡߊ߲߬ߛߊ߫ ߊ߬ ߞߍ߫ ߘߊ߫ ߛߊ߭ ߘߌ߫ ߡߟߏߞߏߡߟߊߞߊ߫ ﴿20﴾

‹ ߊߟߊ߫ › ߞߊ߲߫ ߞߏ߫ ߊ߬ ߡߌ߬ߘߊ߬ ߸ ߌ ߞߊߣߊ߬ ߛߌߟߊ߲߫ ߘߋ߬ ، ߒ ߘߴߊ߬ ߟߊߛߊ߬ߦߌ߲߬ ߊ߬ ߢߊ߫ ߞߘߐ ߡߊ߬ ߛߍ߲ ﴿21﴾

ߌ ߦߴߌ ߓߟߏ ߘߙߍ߬ ߌ ߞߓߊ߬ߞߘߐ߬ߟߊ ߡߊ߬ ، ߊ߬ ߜߍߣߍ߲߫ ߥߟߊߥߟߊ ߘߌ߫ ߓߐ߫ ߛߍ߲ ߸ ߞߵߊ߬ ߕߘߍ߬ ߖߎ߯ߡߊ߲߫ ߕߍ߫ ، ߏ߬ ߦߋ߫ ߡߊ߲߬ߕߊ߬ߣߌ߲߬ ߜߘߍ߫ ߟߋ߬ ߘߌ߫ ﴿22﴾

ߓߊ ߒ ߧߴߊ߬ ߝߍ߬ ߟߋ߬ ߞߊ߬ ߒ ߠߊ߫ ߡߊ߲߬ߕߊ߬ߣߌ߲߬ ߓߟߋߓߟߋ ߘߏ߫ ߟߎ߫ ߦߘߵߌ ߟߊ߫ ﴿23﴾

ߌ ߦߋ߫ ߕߊ߯ ߝߋߙߊߥߎ߲߫ ߡߊ߬ ߸ ߓߊ ߏ߬ ߓߘߊ߫ ߕߊ߬ߡߌ߲߫ ߘߊ߲߭ ߠߊ߫ ﴿24﴾

‹ ߡߎߛߊ߫ › ߞߊ߲߫ ߞߏ߫ ߒ ߡߊ߰ߙߌ ߸ ߒ ߛߌߛߌ ߦߙߌߥߊ߫ ߒ ߧߋ߫ ﴿25﴾

ߌ ߦߋ߫ ߒ ߠߊ߫ ߞߏߢߊ ߣߐ߰ߦߊ߬ ߒ ߧߋ߫ ﴿26﴾

ߊ߬ ߣߴߌ ߦߋ߫ ߛߘߌ߬ߟߌ ߝߎߟߋ߲߫ ߞߵߊ߬ ߓߐ߫ ߒ ߣߍ߲߭ ߘߐ߫ ﴿27﴾

ߛߴߊ߬ߟߎ߬ ߘߌ߫ ߒ ߠߊ߫ ߞߎߡߊ ߝߊ߰ߡߎ߲߫ ﴿28﴾

ߌ ߦߋ߫ ߞߊ߲ߞߘߐߛߌ߯ ߞߍ߫ ߒ ߠߊ߫ ߒ ߓߘߊߡߐ߮ ߟߎ߬ ߘߐ߫ ﴿29﴾

ߒ ߞߘߐ߬ߞߍ߬ ߤߊߙߎߣߊ߫ ߞߊ߬ߣߌ߲߫ ﴿30﴾

ߌ ߦߋ߫ ߒ ߛߍ߲ߓߍ ߜߟߍ߬ߦߊ߫ ߏ߬ ߟߊ߫ ﴿31﴾

ߊ߬ ߣߴߌ ߦߴߏ ߕߘߍ߬ ( ߒ ߝߍ߬ ) ߒ ߠߊ߫ ߞߏ ߟߎ߬ ߘߐ߫ ﴿32﴾

ߛߴߊ߲ ߘߴߌ ߛߊߣߌ߲ߧߊ ߟߊߥߊ߲߬ߞߊ߲߬ ߛߌߦߊߡߊ߲ ߞߍ߫ ﴿33﴾

ߊ߬ ߣߴߊ߲ ߧߴߌ ߞߏߝߐ߫ ߛߌߦߊߡߊ߲ ߞߍ߫ ﴿34﴾

ߌߟߋ ߖߍ߬ߘߍ ߘߏ߲߬ ߢߊ߯ ߊ߲ ߠߊ߫ ߖߐ߫ ﴿35﴾

‹ ߊߟߊ߫ › ߞߊ߲߫ ߸ ߞߏ߫ ߌ ߟߊ߫ ߕߙߊߟߌ߫ ߝߋ߲ ߓߘߊ߫ ߘߴߌ ߡߊ߬ ߡߎߛߊ߫ ﴿36﴾

ߊ߲ ߘߏ߲߬ ߓߘߊ߫ ߢߊ߬ ߌ ߡߊ߬ ߛߋ߲߬ߧߊ߬ ߜߘߍ߫ ߘߐ߫ ߞߘߐ߬ߡߊ߲߫ ﴿37﴾

ߕߎ߬ߡߊ ߡߍ߲ ߊ߲ ߞߵߌ ߣߊ߫ ߦߟߌߘߏ߲߬ ߦߟߌߘߏ߲߫ ߞߊ߲ ߘߏ߫ ߟߊ߫ ﴿38﴾

ߒ ߞߏ߫ ‹ ߘߋ߲ › ߠߊߝߟߌ߬ ߞߊ߲߬ߞߌߙߊ ߘߐ߫ ߸ ߌ ߦߴߏ߬ ߝߣߊ߫ ߟߊߝߟߌ߬ ߓߊ߫ ߞߎߣߊ߲ ߘߐ߫ ، ߓߊ߫ ߞߎߣߊ߲ ߦߴߊ߬ ߟߊߝߟߌ߬ ߞߊ߲ߞߎ߲ ߠߊ߫ ߸ ߏ߬ ߓߊ߯ ߞߍ߫ ߒߠߋ ߖߎ߮ ߣߴߊ߬ ߖߍ߬ߘߍ ߖߎ߮ ߘߴߊ߬ ߕߊ߬ ، ߒ ߘߏ߲߬ ߞߊ߬ ߒ ߠߊ߫ ߡߊ߲߬ߘߌߦߊ ߟߊߝߌ߬ߟߴߌ ߞߊ߲߬ ، ߖߐ߲߬ߛߊ߫ ߸ ߌ ߘߌ߫ ߟߊߡߐ߬ ߒߠߋ ߖߍ߬ߘߍ ߢߊߞߘߐ߫ ﴿39﴾

ߕߎ߬ߡߊ ߡߍ߲ ߌ ߞߘߐ߬ߡߛߏ߬ ߕߏ߫ ߘߴߊ߬ ߛߋ߲߬ߘߐ߫ ߝߎߚߎ߫ ߸ ߞߣߵߊ߬ ߝߐ߫ ߞߏ߫ ߦߊ߯ߟߊ߫ ߒ ߧߴߊߟߎ߫ ߞߊ߲ߘߊ߫ ߡߐ߰ ߡߊ߬ ߓߊ߬ ߡߍ߲ ߘߴߊ߬ ߟߊߞߟߏߞߟߏ߫ ( ߊߟߎ߫ ߦߋ߫ )؟ ߒ߬ߓߊ߬ ߊ߲ ߞߵߌ ߟߊߛߊ߬ߦߵߌ ߣߊ߫ ߡߊ߬ ( ߕߋ߲߬ ߠߋ߬ ) ߸ ߛߴߊ߬ ߢߊ ߘߌ߫ ߛߎߡߊ߫ ߸ ߊ߬ ߣߴߊ߬ ߞߣߊ߫ ߛߎ߬ߣߎ߲߬ ، ߌ ߣߊ߬ ߘߊ߫ ߣߌߡߊ ߘߏ߫ ߝߊ߰ ، ߊ߲ ߞߵߌ ߟߊߞߛߌ߫ ߏ߬ ߞߣߐߜߊ ߡߊ߬ ߸ ߊ߲ ߞߊ߬ ߓߊ߲߫ ߞߵߌ ߞߘߐߓߐ߫ ߞߘߐߓߐߟߌ߫ ߛߌߦߊߡߊ߲߫ ߠߊ߫ ، ߌ ߥߊ߫ ߘߊ߫ ߛߊ߲߬ ߛߌߦߊߡߊ߲߫ ߥߛߎ߬ ߞߍ߫ ߡߊߘߌߦߣߊߞߊ ߟߎ߬ ߕߍߡߊ߬ ߸ ߌߟߋ ߡߎߛߊ߫ ߓߘߊ߫ ߓߊ߲߫ ߣߌ߲߬ ߞߊ߬ ߣߊ߬ (ߒ ߠߊ߫) ߟߊ߬ߕߍ߮ ߡߊ߬ ﴿40﴾

ߒ ߘߏ߲߬ ߞߵߌ ߛߎߥߊ߲ߘߌ߫ ߒ ߖߍ߬ߘߍ ߟߋ߬ ߦߋ߫ ﴿41﴾

ߌ ߣߴߌ ߞߘߐ߬ߞߍ߬ ߦߋ߫ ߕߊ߯ ߒ ߠߊ߫ ߡߊ߲߬ߕߊߣߌ߲ ߠߎ߬ ߘߌ߫ ߸ ߊߟߎ߫ ߘߏ߲߬ ߞߣߊ߫ ߝߊ߬ߘߌ߬ߘߐߝߊ߰ ߒ ߞߏߝߐ ߘߐ߫ ߘߋ߬ ﴿42﴾

ߊߟߎ߫ ߝߌ߬ߟߊ ߥߊ߫ ߝߋߙߊߥߎ߲߫ ߕߘߍ߬ ߸ ߓߊ ߊ߬ ߓߘߊ߫ ߕߊ߬ߡߌ߲߫ ߘߊ߲߭ ߠߊ߫ ﴿43﴾

ߊߟߎ߫ ߦߋ߫ ߞߎߡߊ߫ ߣߐ߲߯ ߠߋ߬ ߝߐ߫ ߊ߬ ߦߋ߫ ߘߋ߬ ߸ ߛߴߊ߬ ߘߴߊ߬ ߕߊ߰ߛߌ߫ ߥߟߴߊ߬ ߦߋ߫ ߛߌߟߊ߲߫ ﴿44﴾

ߊ߬ߟߎ߬ ߞߊ߲߫ ߞߏ߫ ߊ߲ ߡߊ߰ߙߌ ߸ ߊ߲ ߧߋ߫ ߛߌߟߊ߲߫ ߠߊ߫ ߟߋ߬ ߸ ߒ ߞߏ߫ ߊ߬ ߞߣߊ߫ ߞߐ߲߰ ( ߡߙߊ߬ ߟߊ߫ ) ߊ߲ ߡߊ߬ ߸ ߥߟߴߊ߬ ߞߣߊ߫ ߘߊ߲߬ߠߊ߬ߕߊߡߌ߲ ߞߍ߫ ﴿45﴾

‹ ߊߟߊ߫ › ߞߊ߲߫ ߸ ߞߏ߫ ߊߟߎ߫ ߞߊ߫ ߛߌߟߊ߲߫ ߠߋ߬ ߞߟߋ߫ ، ߓߊߏ߬ ߒߠߋ ߦߴߊߟߎ߫ ߝߍ߬ ߟߋ߬ ( ߞߘߊߎ߫ ) ߒ ߕߟߏ ߣߌ߫ ߒ ߢߊ ߘߌ߫ ﴿46﴾

ߊߟߎ߫ ߣߵߊ߬ ߕߘߍ߬ ߸ ߊߟߎ߫ ߦߴߊ߬ ߝߐ߫ ߞߏ߫ ߒ߬ߠߎ߬ ߦߴߌ ߡߊ߰ߙߌ ߟߊ߫ ߞߋߘߋ߲߫ ߝߌ߬ߟߊ߫ ߟߋ߬ ߘߌ߫ ߸ ߞߴߌ ߦߋ߫ ߌߛߌߙߊߌߟߞߊ ߟߎ߫ ߓߌ߬ߟߵߊ߲ ߝߍ߬ ߸ ߌ ߞߣߴߊ߬ߟߎ߫ ߖߊ߲߰ߞߕߊ߫ ߡߎ߬ߕߎ߲߬ ، ߊ߲ ߘߏ߲߬ ߣߊ߬ߣߴߌ ߡߊ߬ ߌ ߡߊ߰ߙߌ ߟߊ߫ ߕߐ߰ߡߊ߬ߛߙߋ ߘߏ߫ ߟߋ߬ ߘߌ߫ ߸ ߖߐ ߞߏ߬ߣߌ߲߬ ߦߋ߫ ߡߐ߰ ߟߋ߬ ߦߋ߫ ߸ ߡߍ߲ ߓߊ߯ ߞߊ߲ߘߦߊ ߟߊߓߊ߬ߕߏ߬ ﴿47﴾

ߊ߲ߠߎ߫ ߘߏ߲߬ ߸ ߒ߬ߠߎ߬ ߦߟߌߘߏ߲߬ߣߍ߲߫ ߠߋ߬ ߞߏ߫ ߖߊ߲߰ߞߕߊ ߦߋ߫ ߡߐ߰ ߟߋ߫ ߡߊ߬ ߸ ߡߍ߲ ߓߊ߯ ߡߊ߬ߛߐ߬ߛߐ߬ߟߌ ߞߍ߫ ߊ߬ ߣߌ߫ ߞߵߊ߬ ߞߐߘߏ߲߬ ﴿48﴾

ߝߋߙߊߥߎ߲߫ ߞߊ߲߫ ߞߏ߫ ߡߎߛߊ߫ ߸ ߖߍߣߍ߲ ߊߟߎ߫ ߝߌ߬ߟߊ ߡߊ߰ߙߌ ߘߌ߫؟ ﴿49﴾

ߏ߬ ߞߊ߲߫ ߞߏ߫ ߒ߬ߠߎ߫ ߡߊ߰ߙߌ ߟߋ߫ ߞߊ߬ ߝߋ߲ ߓߍ߯ ߖߙߎߡߎ߲ ߘߴߊ߬ ߡߊ߬ ߸ ߞߊ߬ ߓߊ߲߫ ߞߵߊ߬ ߓߍ߯ ߞߊ߲ߘߊ߫ ( ߊ߬ ߢߊ߬ ߞߏ߫ ߡߊ߬) ﴿50﴾

‹ ߝߋߙߊߥߎ߲߫ › ߞߊ߲߫ ߞߏ߫ ߓߐ߲ߛߐ߲ߘߊ߫ ߝߟߐߝߟߐ ߟߎ߫ ߟߌ߬ߤߟߊ ߦߋ߫ ߘߌ߬؟ ﴿51﴾

‹ ߡߎߛߊ߫ › ߞߊ߲߫ ߞߴߏ߬ ߟߐ߲ߠߌ߲ ߒ ߡߊ߰ߙߌ ߟߋ߬ ߦߋ߫ ߟߍߙߊ ߘߏ߫ ߘߐ߫ ߸ ߒ ߡߊ߰ߙߌ ߘߏ߲߬ ߕߍ߫ ߝߌ߬ߟߌ߫ ߸ ߊ߬ ߕߍ߫ ߢߌ߬ߣߊ߬ ﴿52﴾

ߏ߬ ߟߋ ߞߊ߬ ߘߎ߱ ߞߍ߫ ߊߟߎ߫ ߦߋ߫ ߖߍ߰ߖߍ߮ ߘߌ߫ ، ߞߊ߬ ߛߌߟߊ ߟߎ߬ ߞߍ߫ ߊ߬ ߢߊߝߍ߬ ߊߟߎ߫ ߦߋ߫ ߸ ߊ߬ ߣߌ߫ ߞߊ߬ ߖߌ ߟߊߖߌ߰ ߞߊ߬ ߓߐ߫ ߡߐ߲ߕߐ߲ ߘߐ߫ ، ߊ߲ ߞߊ߬ ߝߌ߬ߟߊ߬ߓߊ ߟߎ߬ ߟߊߓߐ߫ ߏ߬ ߟߊ߫ ߝߍߘߍ߲ߝߋ߲߫ ߓߐߣߍ߲߫ ߢߐ߲߰ ߡߊ ߟߎ߬ ߘߐ߫ ﴿53﴾

(ߞߏ߫ ) ߊߟߎ߫ ߘߊߥߎ߲ߠߌ߲ ߞߍ߫ ߞߵߊߟߎ߫ ߟߊ߫ ߓߌߦߊ߲ ߠߎ߬ ߘߡߊߢߌߣߌ߲߫ ، ߤߊ߲߫ ߕߊ߰ߛߌ߬ ߞߏ߬ ߛߌߦߊߡߊ߲߫ ߠߴߏ߬ ߟߎ߬ ߘߐ߫ ߤߊ߲ߞߟߌ߫ ߕߌ߮ ߟߎ߬ ߦߋ߫ ߘߋ߬ ﴿54﴾

ߊ߲ ߞߵߊߟߎ߫ ߘߊ߲߫ ߘߎ߱ ߝߊ߬ߘߌ ߟߋ߬ ߘߐ߫ ، ߊ߲ ߞߍߕߐ߫ ߊߟߎ߫ ߟߊߛߊ߬ߦߌ߬ ߟߴߊ߬ߟߋ ߟߋ߬ ߘߐ߫ ، ߊ߲ ߘߏ߲߬ ߣߊ߬ߕߐ߫ ߟߵߊߟߎ߫ ߟߊߓߐ߫ ߟߴߊ߬ ߘߐ߫ ߕߎ߬ߡߊ߬ ߜߘߍ߫ ߟߊ߫ ﴿55﴾

ߊ߲ ߞߊ߬ ߒ߬ ߠߊ߫ ߡߊ߲߬ߕߊߣߌ߲ ߓߍ߯ ߦߌ߬ߘߊ߬ ‹ ߝߋߙߊߥߎ߲߫ › ߠߊ߫ ߟߋ߬ ߛߋߚߋ߫ ، ߞߏ߬ߣߵߊ߬ ߞߊ߬ ߡߊ߬ߛߐ߬ߛߐ߬ߟߌ ߞߍ߫ ߞߵߊ߬ ߓߊ߲߬ ߝߊߦߌ߲߫ ﴿56﴾

ߊ߬ ߞߊ߲߫ ߞߏ߫ ߌߟߋ߬ ߡߎߛߊ߫ ߸ ߌ ߣߊ߬ߣߍ߲߫ ߒ߬ ߕߘߍ߬ ߟߊ߫ ߟߋ߫ ߓߊ߬ ߞߴߌ ߦߋ߫ ߒ߬ ߠߊߓߐ߫ ߟߊ߫ ߒ߬ ߠߊ߫ ߖߡߊ߬ߣߊ ߘߐ߫ ߌ ߟߊ߫ ߛߎߓߊ߯ߦߊ ( ߘߊ߬ߓߊߙߌ ) ߟߊ߫؟ ﴿57﴾

ߒ߬ߓߊ߬ ߊ߲ ߝߣߊ߫ ߘߌߣߵߌ ߞߊ߲ߡߊ߬ ߏ߬ ߢߐ߲߰ ߛߎߓߊ߯ߦߊ߫ ߘߌ߫ ߛߍ߲ ، ߌߟߋ ߦߋ߫ ߛߘߊߒߡߊߕߎߡߣߊ ߘߏ߫ ߟߊߘߊ߲߫ ߊ߲ ߣߴߌߟߋ ߕߍ߫ ߸ ߒ߬ߠߎ߬ ߣߴߌߟߋ ߛߌ߫ ߞߊߣߵߏ ߝߘߏ߬ ، ( ߒ߬ ߧߋ߫ ߢߐ߲߮ ߓߍ߲߬ ߏ߬ ߟߏ߲ ߡߊ߬ ) ߦߌߟߊ߫ ߞߋߟߋ߲߫ ߘߐ߫ ﴿58﴾

‹ ߡߎߛߊ߫ › ߞߊ߲߫ ߞߏ߫ ߊߟߎ߫ ߟߊ߫ ߛߘߊߒߡߊߕߎߡߣߊ ߏ߬ ߦߋ߫ ߞߍ߫ ߡߊ߬ߛߘߌ ߟߏ߲ ߘߌ߫ ، ߡߐ߱ ߓߍ߯ ߦߋ߫ ߟߊߘߍ߬ ߏ ߡߊ߬ ߛߎ߲߰ߕߟߋ ߟߊ߫ ﴿59﴾

ߏ߬ ߝߐ ߸ ߝߋߙߊߥߎ߲߫ ߞߵߊ߬ ߞߐߘߏ߲߬ ߞߊ߬ ߥߴߊ߬ ߟߊ߫ ߘߊ߬ߓߊߙߌ ߟߎ߬ ߟߊߘߍ߬ ߞߊ߬ ߣߊ߬ ﴿60﴾

ߡߎߛߊ߫ ߞߊ߲߫ ߊ߬ߟߎ߫ ߡߊ߬ ߞߏ߫ ߜߊ߬ߟߏ ߓߍ߫ ߊߟߎ߫ ߦߋ߫߹ ߊߟߎ߫ ߞߊߣߊ߬ ߥߎߦߊ ߞߎ߲߬ߘߐߕߍ߰ ߞߵߊ߬ ߟߴߊߟߊ߫ ߟߊ߫ ߘߋ߬ ߸ ߏ߬ ߓߊ߯ ߞߍ߫ ߊ߬ ߘߴߊߟߎ߫ ߛߌߟߊߛߊ߬ ߖߊ߲߰ߞߕߊ ߟߊ߫ ، ߓߊߏ߬ ߡߍ߲ ߓߊ߯ ߞߎ߲߬ߘߐ߬ߕߍ߮ ߞߍ߫ ߕߋ߲߬ ߸ ߏ߬ ߓߘߊ߫ ߖߌ߰ߘߐ߬ߞߏߟߏ߲ߧߊ߫ ߝߏߦߊ߲߫ ﴿61﴾

ߊ߬ߟߎ߫ ߜߊ߲߬ߛߊ߲ ߞߊ߬ ߛߐ߬ߛߐ߬ߟߌ ߞߍ߫ ߢߐ߲߮ ߕߍ߫ ߊ߬ߟߎ߬ ߟߊ߫ ߞߏߢߊ ߘߐ߫ ، ߘߊ߬ߡߊ߲߬ߛߊ߫ ߊ߬ߟߎ߫ ߞߊ߬ ߢߐ߲߯ߦߋ ߞߍ߫ ߜߎ߲߬ߘߎ ߘߐ߫ ﴿62﴾

ߊ߬ߟߎ߬ ߞߊ߲߫ ( ߢߐ߲߯ߦߋ ߘߐ߫ ) ߸ ߞߏ߫ ߢߌ߲߬ ߠߎ߬ ߦߋ߫ ߛߎߓߊ߯ ߝߌ߬ߟߊ߫ ߟߋ߬ ߘߌ߫ ߸ ߊ߬ߟߎ߬ ߦߴߊ߬ ߝߍ߬ ߟߋ߫ ߞߵߊߟߎ߫ ߟߊߓߐ߫ ߊߟߎ߫ ߟߊ߫ ߖߡߊ߬ߣߊ ߞߣߐ߫ ߊ߬ߟߎ߬ ߟߊ߫ ߛߎߓߊ߯ߦߊ ߟߊ߫ ، ߊ߬ ߣߌ߫ ߞߵߊߟߎ߫ ߟߊ߫ ߣߊߡߎ߲߫ ߕߋߟߋ߲ߣߍ߲ ߠߊߕߊ߯ ߔߏ߲߫ ﴿63﴾

ߏ߬ ߘߐ߫ ߸ ߊߟߎ߫ ߦߴߊߟߎ߫ ߟߊ߫ ߘߊ߬ߓߊߙߌ ߟߎ߬ ߟߊߘߍ߬ ߞߊ߬ ߣߵߊߟߎ߫ ߟߐ߬ߖߟߎ߬ߡߊ߫ ߸ ߡߍ߲ ߘߏ߲߬ ߓߊ߯ ߥߙߎߞߌ߫ ߓߌ߬ ߸ ߏ߬ ߟߋ ߛߎߘߊ߲ߕߐ߫ ﴿64﴾

ߊ߬ߟߎ߬ ߞߊ߲߫ ߞߏ߫ ߤߍ߲߬ ߌߟߋ߬ ߡߎߛߊ߫ ߸ ߌߟߋ ߘߌ߫ ߟߊ߬ߝߟߌ߬ߟߌ ߞߍ߫ ߓߊ߬ ߸ ߥߟߊ߫ ߒ߬ߠߎ߬ ߝߟߐ߫ ߦߋ߫ ߟߊ߬ߝߟߌ߬ߟߌ ߞߍ؟ ﴿65﴾

‹ ߡߎߛߊ߫ › ߞߊ߲߫ ߞߏ߫ ߍ߲߬ߍ߲߫ ߸ ߊߟߎ߫ ߦߋ߫ ߟߊ߬ߝߟߌ߬ߟߌ ߞߍ߫ ߟߋ߬ ߞߟߋ߫ ، ߘߊ߬ߡߊ߲߬ߛߊ߫ ߊ߬ߟߎ߬ ߟߊ߫ ߖߎ߬ߟߎ ߟߎ߬ ߣߴߊ߬ߟߎ߬ ߟߊ߫ ߞߟߏ߬ߡߊ߲ ߠߎ߬ ߞߍ߫ ߘߊ߫ ‹ ߡߎߛߊ߫ › ߢߊߞߘߐ߫ ߊ߬ߟߎ߬ ߟߊ߫ ߛߎߓߊ߯ߦߊ ߥߙߊ߬ ߞߏ߬ߖߎ߮ ߡߊ߬ ߸ ߦߏ߫ ߊ߬ߟߎ߬ ߦߴߊ߬ߟߎ߬ ߕߊ߯ߡߊ߫ ߟߊ߫ ߟߋ߬ ﴿66﴾

ߏ߬ ߞߍ ߸ ߡߎߛߊ߫ ߡߛߌ߬ߡߛߌ߬ ߘߴߊ߬ ߣߌߘߐ߫ ߛߌߟߊ߲ ߘߌ߫ ﴿67﴾

ߊ߲ ߞߊ߲߫ ߊ߬ ߡߊ߬ ߸ ߒ ߞߏ߫ ߌ ߞߊ߫ ߛߌߟߊ߲߫ ߘߋ߬ ، ߓߊ ߌߟߋ ߟߋ߬ ߞߍߕߐ߫ ߛߋߓߊ߮ ߘߌ߫ ﴿68﴾

ߝߋ߲ ߡߍ߲ ߦߴߌ ߓߟߏ߫ ߏ߬ ߟߊߝߟߌ߬ ߓߊ߫ ، ߊ߬ ߘߴߊ߬ߟߎ߬ ߟߊ߫ ߝߋ߲߫ ߠߊߘߊ߲ߣߍ߲ ߠߎ߬ ߟߊߞߎ߬ߣߎ߲ߞߎ߬ߣߎ߲߬ ߛߍ߲ ، ߓߊ ߊ߬ߟߎ߫ ߣߊ߬ ߡߍ߲ ߠߊߘߊ߲߫ ߠߊ߫ ߸ ߏ߬ ߦߋ߫ ߛߎߓߊ߯ ߘߓߊߙߌ ߟߋ߬ ߘߌ߫ ، ߛߎߓߊ߮ ߘߏ߲߬ ߓߊ߯ ߣߊ߬ ߝߊ߲߬-ߊ-ߝߊ߲߬ ߊ߬ ߕߍ߫ ߛߎߘߊ߲߫ ߝߋߎ߫ ﴿69﴾

ߘߊ߬ߡߊ߲߬ߛߊ߫ ߸ ߛߎߓߊ߮ ߟߎ߫ ߞߵߊ߬ߟߎ߫ ߓߋ߬ ߕߌ߲ߓߌߘߌ߲ ߘߌ߫ ߸ ߞߵߊ߬ ߝߐ߫ ߞߏ߫ ߊ߲ ߓߘߊ߫ ߘߍ߲߬ߞߣߍ߬ߦߊ߫ ߤߊߙߎߣߊ߫ ߣߌ߫ ߡߎߛߊ߫ ߡߊ߰ߙߌ ߡߊ߬ ﴿70﴾

‹ ߝߋߙߊߥߎ߲߫ › ߞߊ߲߫ ߞߏ߫ ߌ߬ߦߏ߯ ߊߟߎ߫ ߓߘߊ߫ ߘߍ߲߬ߞߣߍ߬ߦߊ߫ ‹ߡߎߛߊ߫› ߡߊ߬ ߞߵߊ߬ ߛߐ߬ߘߐ߲߬ ߒߠߋ ߡߊ߫ ߘߌ߬ߢߍ߬ ߊߟߎ߫ ߦߋ߫؟ ߖߊ߰ ߏ߬ ߟߋ ߦߴߊߟߎ߫ ߟߊ߫ ߡߐ߰ߓߊ ߘߌ߫ ߡߍ߲ ߞߵߊߟߎ߫ ߞߊ߬ߙߊ߲߬ ߛߎߓߊ߯ߦߊ ߟߊ߫؟ ߒ߬ߓߊ߬ ߒ ߘߴߊߟߎ߫ ߓߟߏ ߟߎ߬ ߣߴߊߟߎ߫ ߛߋ߲߭ ߠߎ߫ ߕߍ߰ ߞߵߊ߬ߟߎ߫ ߝߐ߬ߛߐ߲߬ ߢߐ߲߮ ߘߐ߫ ، ߊ߬ ߣߌ߫ ߒ ߘߴߊߟߎ߫ ߓߊߙߊ߲ߕߏ߫ ߕߡߊߙߏ߫ ߜߊ߲ߞߊ ߟߎ߬ ߟߊ߫ ، ߊߟߎ߫ ߘߌߣߵߊ߬ ߟߐ߲߫ ߸ ߊ߲ ߝߌ߬ߟߊ ߝߍ߬ ߡߍ߲ ߠߊ߫ ߖߊ߲߰ߞߕߊ ߜߍ߬ߟߍ߲߬ߡߊ߲߫ ߸ ߊ߬ ߣߴߊ߬ ߘߎߡߊߣߍ߲߫ ﴿71﴾

‹ ߛߎߓߊ߮ › ߟߎ߬ ߞߊ߲߫ ߸ ߞߏ߫ ߔߊߞߌ ߡߍ߲ ߠߎ߫ ߣߊ߬ߣߍ߲߫ ߒ߬ ߡߊ߬ ߣߌ߲߬ ߸ ߊ߬ ߣߌ߫ ( ߡߊ߰ߙߌ ) ߡߍ߲ ߞߵߊ߲ ߘߊ߲߫ ߸ ߊ߲ ߕߴߌߟߋ ߛߎߥߊ߲ߘߌ߫ ߏ߬ ߟߎ߫ ߡߊ߬ ߝߋߎ߫ ، ߌ ߓߊ߯ ߞߍ߫ ߡߍ߲ ߞߍ߫ ߟߊ߫ ߸ ߏ߬ ߞߍ߫ ߝߛߊߦߌ߫ ، ߓߊ߬ߙߌ߬ ߌ ߕߊ߫ ߞߍߟߌ ߦߋ߫ ߘߎߢߊ߫ ߢߣߊߡߦߊ ߢߌ߲߬ ߠߋ߬ ߘߐߙߐ߲߫ ߘߌ߫ ﴿72﴾

ߊ߲ߠߎ߫ ߞߏ߬ߣߌ߲ ߸ ߒ߬ߠߎ߬ ߓߘߊ߫ ߘߍ߲߬ߞߣߍ߬ߦߊ߫ ߒ߬ ߡߊ߰ߙߌ ߡߊ߬ ߸ ߛߴߊ߬ ߘߌ߫ ߒ߬ ߕߊ߲߬ߓߏ߲߬ ߣߐ ߟߎ߫ ߦߊ߰ߝߊ߫ ߒ߬ ߧߋ߫ ߸ ߊ߬ ߣߴߌ ߞߵߊ߲ ߞߘߊߡߊ߫ ߛߎߓߊ߯ߦߊ ߡߍ߲ ߠߊ߫ ، ߊߟߊ߫ ߟߋ߫ ߘߏ߲߬ ߝߌ߬ߛߊ߬ ߸ ߏ߬ ߟߋ ߘߎߡߊߕߐ߫ ﴿73﴾

ߡߍ߲ ߞߎ߲߬ߞߏ߬ߕߐ ߓߊ߯ ߣߵߊ߬ ߡߊ߰ߙߌ ߡߊ߬ ߸ ߔߊߦߌߔߊߦߌ߫ ߟߴߏ߬ ߢߍ߫ ߸ ߊ߬ ߕߍ߫ ߛߊ߬ ߦߋ߲߬ ߊ߬ ߘߏ߲߬ ߕߍ߫ ߢߣߊߡߦߊ߫ ﴿74﴾

ߡߍ߲ ߘߏ߲߬ ߘߍ߲߬ߞߣߍ߬ߦߊ߬ߣߍ߲ ߓߊ߯ ߣߵߊ߬ ‹ ߡߊ߰ߙߌ › ߡߊ߬ ߸ ߞߵߊ߬ ߕߘߍ߬ ߊ߬ ߓߘߊ߫ ߢߌ߬ߡߊ ߟߎ߬ ߞߍ߫ ߸ ߒ߬ߓߊ߬ ߡߐ߬ߟߐ߲߬ ߡߊߦߟߍ߬ߣߍ߲ ߠߎ߬ ߦߴߏ߬ ߟߎ߫ ߟߋ߬ ߢߍ߫ ﴿75﴾

ߣߊߟߌ߬ߡߎ߲߫ ߝߙߍ ߣߊߞߐ ߟߎ߬ ߘߌ߫ ߸ ߞߐ߬ߢߊ ߟߎ߬ ߦߋ߫ ߥߦߏ߬ ߟߊ߫ ߡߍ߲ ߠߎ߬ ߞߘߐߟߊ ߟߎ߬ ߘߐ߫ ، ߊ߬ߟߎ߬ ߘߎߡߊߕߐ߫ ߏ߬ ߟߋ ߘߐ߫ ، ߏ߬ ߟߋ ߘߏ߲߬ ߦߋ߫ ߡߐ߰ ߟߊߜߍߣߍ߲ ߞߐ߲ߘߐ߲ ߘߌ߫ ﴿76﴾

ߊ߲ ߣߊ߬ ߘߊ߫ ߡߎߛߊ߫ ߦߟߌߘߏ߲߬ ߞߊ߲ ߞߍ߫ ߸ ߒ ߞߏ߫ ߓߐ߫ ߛߎ ߘߐ߫ ߒ ߠߊ߫ ߖߐ߲߭ ߠߎ߬ ߘߌ߫ ߸ ߌ ߦߋ߫ ߥߊ߫ ߛߌߟߊ߫ ߖߊߙߊ߲ ߕߋ߬ ߊ߬ߟߎ߬ ߦߋ߫ ߓߊ ߞߣߐ߫ ، ߌ ߕߍ߫ ߛߌߟߊ߲߫ ߠߊ߫ ߞߏ߫ ߗߍ߫ ߞߍߕߐ߫ ߓߴߌ ߘߐ߫ ߸ ߌ ߘߏ߲߬ ߕߍ߫ ߖߘߐ߬ ߟߊ߫ ﴿77﴾

ߝߋߙߊߥߎ߲߫ ߞߵߊ߬ߟߎ߬ ߛߊ߯ߘߴߊ߬ ߟߊ߫ ߞߟߍ߬ߓߏߟߏ߲ ߠߎ߬ ߘߌ߫ ߡߍ߲ߞߍ߭ ߸ ߓߊ߫ ߞߎߣߊ߲ ߦߌߟߊ ߡߍ߲ ߞߵߊ߬ߟߎ߫ ߞߎ߲߬ߠߊ߬ߓߌߘߌ߲߫ ߸ ߏ߬ ߞߵߊ߬ߟߎ߫ ߞߎ߲߬ߠߊ߬ߓߌߘߌ߲߫ ߔߎ߫ ﴿78﴾

ߝߋߙߊߥߎ߲߫ ߘߏ߲߬ ߞߵߊ߬ ߡߌ߬ߙߌ߲߬ߘߌ ߟߊߝߌ߬ߟߌ߫ ߟߋ߬ ߸ ߊ߬ ߡߴߊ߬ߟߎ߬ ߞߊ߲ߘߊ߫ ﴿79﴾

ߤߍ߲߬ ߊߟߎ߬ ߌߛߌߙߊߌߟߞߊ ߟߎ߬ ߸ ߊ߲ ߞߵߊߟߎ߫ ߟߊߞߛߌ߫ ߊߟߎ߫ ߖߎ߮ ߡߊ߬ ߸ ߊ߬ ߣߴߊ߲ ߞߊ߬ ߢߐ߲߯ߦߋ ߛߘߊߒߡߊߞߊ߲ߠߊ ߘߴߊߟߎ߫ ߡߊ߬ ߞߎ߬ߙߎ ߞߌߣߌ߲ߓߟߏ߫ ߞߊߙߊ߲ߞߊߙߊ߲ ߠߊ߫ ، ߊ߬ ߣߴߊ߲ ߞߊ߬ ߓߊ߯ߘߊߟߌ ߣߌ߫ ߥߋ߲߬ߕߙߋ߬ߟߋ߲߬ ( ߛߓߏ ) ߟߊߖߌ߰ ߊߟߎ߫ ߡߊ߬ ﴿80﴾

(ߒ ߞߏ߫ ) ߊߟߎ߫ ߦߋ߫ ߝߋ߲߫ ߓߘߍߓߘߍ ߟߎ߬ ߘߏ߫ ߘߊߥߎ߲߫ ߸ ߊ߲ ߞߵߊߟߎ߫ ߤߊ߬ߙߌ߬ߖߍ߰ ߡߍ߲ ߠߎ߬ ߟߊ߫ ، ߓߊ߬ߙߌ߬ ߊߟߎ߫ ߞߣߊ߫ ߘߊ߲߬ߠߊ߬ߕߊߡߌ߲ ߞߍ߫ ߊ߬ ߘߐ߫ ߘߋ߬ ، ߒ ߠߊ߫ ߛߊ߬ߙߌ ߘߌ߫ ߓߋ߬ ߊߟߎ߫ ߞߊ߲߬ ߏ߬ ߘߐ߫ ، ߒ ߠߊ߫ ߛߊ߬ߙߌ ߘߏ߲߬ ߓߊ߯ ߓߋ߬ ߡߍ߲ ߞߊ߲߬ ߸ ߏ߬ ߓߘߊ߫ ߗߌߙߏ߲߫ ﴿81﴾

ߒߠߋ ߘߏ߲߬ ߦߝߊ߬ߟߊ߬ߓߊ߫ ߘߌ߫ ߡߐ߰ ߟߋ߬ ߦߋ߫ ߸ ߡߍ߲ ߓߊ߯ ߊ߬ ߖߘߍ߬ ߟߊߛߊ߬ߦߌ߲߬ ߸ ߞߊ߬ ߘߍ߲߬ߞߣߍ߬ߦߊ߫ ߞߊ߬ ߢߌ߬ߡߊ߬ ߞߍ߫ ߸ ߞߊ߬ ߓߊ߲߫ ߞߊ߬ ߞߊ߲ߘߊ߫ ﴿82﴾

ߡߋ߬ߘߋ ߞߵߌ ߞߌߢߍ߫ ߣߊ߬ ߟߴߌ ߡߌ߬ߙߌ߲߬ߘߌ ߢߍ߫ ߕߋ߲߬ ߡߎߛߊ߫؟ ﴿83﴾

ߊ߬ ߞߊ߲߫ ߞߏ߫ ߊ߬ߟߎ߬ ߦߋ߫ ߒ ߣߐ߭ ߞߊ߲߬ ߞߊ߬ ߣߊ߬ ، ߒߠߋ ߞߌߢߍߣߍ߲ ߣߊ߬ߣߴߌ ߕߘߍ߬ ߟߊ߫ ߟߋ߬ ߒ ߡߊ߰ߙߌ ߸ ߛߴߌ ߘߌ߫ ߘߌ߬ߢߍ߬ ( ߒ ߡߊ߬) ﴿84﴾

‹ ߊߟߊ߫ › ߞߊ߲߫ ߞߏ߫ ߒ߬ߠߎ߬ ߓߘߴߌ ߡߌ߬ߙߌ߲߬ߘߌ ߞߘߐߓߐ߫ ߌ ߞߐ߫ ߦߋ߲߬ ߘߋ߬߹ ߏ߬ ߞߍ ߛߊ߬ߡߙߌ߬ߞߊ ߞߵߊ߬ߟߎ߬ ߟߊߝߟߌ߬ ﴿85﴾

ߡߎߛߊ߫ ߡߐߣߍߡߍߣߍ߲ߕߐ ߛߎ߬ߣߎ߲߬ߣߍ߲߬ߓߊ ߛߊ߬ߦߌ߲߬ ߘߴߊ߬ ߡߌ߬ߙߌ߲߬ߘߌ ߡߊ߬ ߸ ߊ߬ ߞߊ߲߫ ߞߏ߫ ߋ߫ ߒ ߡߌ߬ߙߌ߲߬ߘߌ߹ ߦߊ߯ߟߊ߫ ߊߟߎ߫ ߡߊ߰ߙߌ ߡߴߊߟߎ߫ ߦߟߌߡߊߘߌߦߊ߫ ߦߟߌߡߊߘߌߦߊ߫ ߢߌߡߊ߫ ߟߊ߫ ߓߊ߬؟ ߸ ߟߊ߬ߤߘߌ ߟߋ߫ ߞߎ߲߬ߘߐߖߊ߲߬ߧߊ߬ߣߍ߲߬ ߊߟߎ߫ ߡߊ߬ ߓߊ߬ ߸ ߥߟߴߊߟߎ߫ ߦߴߊ߬ ߝߍ߬ ߟߋ߬ ߛߊ߬ߙߌ ߦߋ߫ ߓߋ߬ ߊߟߎ߫ ߞߊ߲߬ ߞߊ߬ ߝߘߴߊߟߎ߫ ߡߊ߰ߙߌ ߟߊ߫؟ ߏ߬ ߞߍ ߊߟߎ߫ ߞߊ߬ ߒ ߠߊ߫ ߛߘߊߒߡߊߞߊ߲ߠߊ ߝߘߏ߬؟ ﴿86﴾

ߊ߬ߟߎ߬ ߞߊ߲߫ ߞߏ߫ ߊ߲ ߡߴߌ ߟߊ߫ ߛߘߊߒߡߊߞߊ߲ߠߊ ߝߏ߬ߘߏ߫ ߒ߬ ߖߘߍ߬ ߕߊ߫ ߓߟߏ߫ ߡߊ߬ ߓߏ߬ ، ߓߊ߬ߙߌ߬ ߊ߲ ߠߊ߬ ߘߏ߬ߣߌ߲߬ ߛߌߦߊߡߊ߲߫ ߠߋ߫ ߕߊ߬ ߟߊ߫ ߡߌ߬ߙߌ߲߬ߘߌ ߟߊ߫ ߡߊ߬ߛߘߌ߬ ( ߛߊߣߌ߲ ) ߘߐ߫ ، ߊ߲ ߣߵߏ߬ ߟߎ߫ ߟߋ߬ ߟߊߝߟߌ߬ ߟߊ߫ ( ߕߊ ߘߐ߫ ) ߸ ߛߊ߬ߡߙߌ߬ߞߊ ߝߣߊ߫ ߞߊ߬ ߘߏ߫ ߟߊߝߟߌ߬ ( ߕߊ ߘߐ߫ ) ߢߊ߫ ߞߋߟߋ߲ ߏ߬ ߟߋ ߡߊ߬ ﴿87﴾

ߏ߬ ߟߋ ߞߊ߬ ߕߎߙߊߣߍ߲߫ ߝߊ߬ߘߌ߬ߡߊ ߟߊߓߐ߫ ߊ߬ߟߎ߬ ߦߋ߫ ߸ ߞߏ߲߬ߓߏ߬ ߞߊ߲ ߦߋ߫ ߡߍ߲ ߠߊ߫ ، ߊ߬ߟߎ߬ ߞߊ߲߫ ߢߐ߲߮ ߢߍ߫ ߸ ߞߏ߫ ߊߟߎ߫ ߡߊ߰ߙߌ ߣߌ߫ ߡߎߛߊ߫ ߡߊ߰ߙߌ ߟߋ߫ ߣߌ߲߬ ߸ ߊ߬ ߢߌ߬ߣߊ߬ ߘߴߊ߬ ߞߐ߫ ߟߋ߬ ﴿88﴾

ߞߏ߬ߣߵߊ߬ߟߎ߬ ߡߴߊ߬ ߦߋ߫ ߓߊ߬ ߕߎߙߊߣߍ߲ ߕߍ߫ ߖߋ߬ߓߟߌ߬ ߟߊߛߊ߬ߦߌ߬ ߟߴߊ߬ߟߎ߫ ߡߊ߬ ߸ ߊ߬ ߘߏ߲߬ ߕߍ߫ ߕߙߐߦߊ߫ ߣߌ߫ ߡߎߣߊ߲ߝߊ߲߫ ߛߌ߫ ߡߙߊ߬ ߟߴߊ߬ߟߎ߬ ߦߋ߫؟ ﴿89﴾

ߤߊߙߎߣߊ߫ ߘߏ߲߬ ߜߎ ߕߎ߲߬ ߞߵߊ߬ ߝߐ߫ ߊ߬ߟߎ߬ ߦߋ߫ ߞߘߐ߬ߡߊ߲߫ ߸ ߞߏ߫ ߒ ߓߊߘߋ߲ ߠߎ߬ ߸ ߊߟߎ߫ ߞߘߐߓߐߣߍ߲߫ ( ߕߎߙߊߣߍ߲ ) ߠߊ߫ ߟߋ߬ ، ߣߴߏ߬ ߕߍ߫ ߊߟߎ߫ ߡߊ߰ߙߌ ߦߋ߫ ߡߊ߬ߤߌ߬ߣߊ߬ߟߊ߫ ߟߋ߬ ߘߌ߫ ، ߊߟߎ߫ ߦߋ߫ ߒߠߋ ߟߊߓߊ߬ߕߏ߬ ߸ ߊ߬ ߣߴߊߟߎ߫ ߦߋ߫ ߒ ߠߊ߫ ߖߊ߬ߡߊߙߌ ߡߌ߬ߘߊ߬ ﴿90﴾

ߊ߬ߟߎ߬ ߞߊ߲߫ ߞߏ߫ ߊ߲ ߕߍ߫ ߝߘߊ߫ ߣߌ߲߬ ߠߊߡߍ߲߬ߛߍ߲߬ߧߊ߬ ߟߊ߫ ( ߓߊ߬ߕߏ ߟߊ߫ ) ߝߋߎ߫ ߝߏ߫ ߡߎߛߊ߫ ߓߊ߯ ߛߊ߬ߦߌ߲߬ ߊ߲ ߡߊ߬ ﴿91﴾

‹ ߡߎߛߊ߫ › ߞߊ߲߫ ߞߏ߫ ߤߍ߲߬ ߌߟߋ߬ ߤߊߙߎߣߊ߫ ߸ ߌ ߣߵߊ߬ߟߎ߫ ߝߟߌ߬ߣߍ߲ ߦߋ߫ ߟߊ ߸ ߡߎ߲߬ ߞߵߌ ߞߎ߬ߡߊ߲߬ߘߌ߫ ߸ ﴿92﴾

ߌ ߡߊ߫ ߒ ߛߊ߯ߘߊ߫؟ ߦߊ߯ߟߊ߫ ߌ ߓߘߊ߫ ߒ ߠߊ߫ ߖߊ߬ߡߊߙߌ ߛߐ߬ߛߐ߫ ߟߋ߬ ߓߊ߬؟ ﴿93﴾

‹ ߤߊߙߎߣߊ߫ › ߞߊ߲߫ ߞߏ߫ ߒ ߣߊ߫ ߘߋ߲ ߸ ߌ ߞߊ߫ ߒ ߡߌ߬ߘߊ߬ ߒ ߓߏ߲߬ߓߏ߲߬ߛߌ ߣߌ߫ ߒ ߞߎ߲߬ߛߌ ߝߋ߲-ߋ-ߝߋ߲߫ ߡߊ߬ ، ߒߠߋ ߛߌߟߊ߲ߣߍ߲߫ ߠߋ߬ ߒ ߞߏ߫ ߌ ߞߣߴߊ߬ ߝߐ߫ ( ߒ ߡߊ߬ ) ߞߴߌ ߓߘߊ߫ ߝߘߊߟߌ ߟߊߘߏ߲߬ ߌߛߌߙߊߌߟߞߊ ߟߎ߬ ߕߍ߫ ߸ ߌ ߘߏ߲߬ ߡߊ߫ ߒ ߠߊ߫ ߞߎߡߊ ߡߊߞߐ߬ߣߐ߲߬ ﴿94﴾

‹ ߡߎߛߊ߫ › ߞߊ߲߫ ߞߏ߫ ߊ߬ ߘߏ߲߬ ߞߵߌ ߛߐ߬ߘߐ߲߬ ߘߵߌߟߋ߬ ߛߊ߬ߡߙߌ߬ߞߊ؟ ﴿95﴾

ߊ߬ ߞߊ߲߫ ߞߏ߫ ߒߠߋ ߞߊ߬ ߝߋ߲߫ ߠߋ߬ ߦߋ߫ ߸ ߕߐ߭ ߟߎ߬ ߡߊ߫ ߡߍ߲ ߦߋ߫ ، ߒ ߣߊ߬ ߞߋߟߊ ( ߛߋ߲߬ ) ߣߐ ߕߙߐ߬ߡߢߐ߬ ߞߋߟߋ߲߫ ߕߊ߬ ߟߊ ߞߵߏ߬ ߟߊߝߌ߬ߟߴߊ߬ ߞߊ߲߬ ߸ ߒߠߋ ߣߌ ߣߵߏ߬ ߟߋ ߟߊߗߋ߲߬ߧߊ߬ ߟߊ߫ ߒ ߢߊߞߘߐ߫ ߕߊ߲߬ ﴿96﴾

‹ ߡߎߛߊ߫ › ߞߊ߲߫ ߊ߬ ߡߊ߬ ߞߏ߫ ߒ߬ߓߊ߬ ߌ ߞߏߕߊ߬ ߌ ߦߋ߫ ߕߊ߯ ߔߏ߲߫ ، ߡߍ߲ ߦߴߌߟߋ ߡߊ߬ ߢߣߊߡߦߊ ߘߐ߫ ߛߍߣߍ߲߬ ߸ ߌ ߦߋ߫ ߕߏ߫ ߊ߬ ߝߐ߫ ߟߊ߫ ߟߋ߬ ߛߐ߲߬ ߞߏ߫ ߡߊ߰ ߞߊ߫ ߞߍ߫ ߒ ߠߊ߫ ߘߋ߬ ، ߛߘߊߒߡߊߕߎߡߣߊ߫ ߟߋ߫ ߘߏ߲߬ ߦߴߌ ߢߍ߫ ߸ ߌ ߕߍߣߵߏ ߝߘߏ߬ ߟߊ߫ ، ߌ ߦߴߌ ߢߊ ߟߐ߬ ߌ ߡߊ߰ߙߌ ߘߐ߫ ߓߊ߫ ߸ ߌ ߕߋ߬ߟߋ߲߬ ߘߊ߫ ߡߍ߲ ߠߊߡߍ߲߬ߛߍ߲߬ߧߊ߬ ߟߊ߫ ߸ ߊ߲ ߘߴߊ߬ ߖߋ߬ߣߌ߲߬ ߛߍ߲ ߞߵߊ߬ ߖߎ߲ߖߎ߲߫ ߓߊ߫ ߖߌ ߟߊ߫ ߛߎߋ߫ ﴿97﴾

ߖߊ߯ߕߋ߬ ߸ ߊߟߎ߫ ߡߊ߰ߙߌ ߦߋ߫ ߊߟߊ߫ ߟߋ߬ ߘߌ߫ ߸ ߡߊ߰ߙߌ߬ ߜߘߍ߫ ߕߴߏ߬ ߟߋ ߞߐ߫ ، ߏ߬ ߟߋ ߦߙߌߥߊߣߍ߲߫ ߝߋ߲ ߓߍ߯ ߡߊ߬ ߟߐ߲ߠߌ߲ ߠߊ߫ ﴿98﴾

ߊ߲ ߧߋ߫ ߞߏ߫ ߕߊ߬ߡߌ߲߬ߣߍ߲ ߘߏ߫ ߟߎ߫ ߖߊ߲߬ߖߏ߲ ߘߊ߲߬ߕߍ߰ ߟߴߌ ߦߋ߫ ߕߊ߲߬ ߠߋ߬ ߸ ߊ߲ ߘߏ߲߬ ߣߵߌ ߛߐ߫ ߟߊ߫ ߞߊ߬ߥߊ߲߬ߘߌ ߟߋ߬ ߟߊ߫ ߣߌ߲߬ ߞߊ߬ ߓߐ߫ ߊ߲ ߕߍ߰ߟߊ ߘߐ߫ ﴿99﴾

ߡߍ߲ ߓߊ߯ ߊ߬ ߞߐߘߏ߲߬ ߏ߬ ߟߊ߫ ߸ ߏ߬ ߘߌ߫ ߘߏ߬ߣߌ߲߬ ߜߌߟߌ߲ ߕߊ߬ ߟߐ߬ߓߊ ߟߏ߲ ﴿100﴾

ߊ߬ߟߎ߬ ߘߎߡߊߕߐ߫ ߏ߬ ߟߋ ߘߐ߫ ، ߏ߬ ߘߏ߲߬ ߦߋ߫ ߘߏ߬ߣߌ߲߬ ߖߎ߯ ߘߴߊ߬ߟߎ߫ ߞߎ߲߬ ߟߐ߬ߓߊ ߟߏ߲ ߞߟߋ߫ ﴿101﴾

ߓߘߎ ߝߍߕߐ߫ ߏ߬ ߟߏ߲ ߠߋ߬ ߸ ߊ߬ ߣߴߊ߲ ߘߌ߫ ߛߐ߲߬ߡߊ ߟߎ߬ ߟߊߘߍ߬ ߏ߬ ߟߏ߲ ߞߵߊ߬ ߕߘߍ߬ ߊ߬ߟߎ߬ ( ߢߊ ߟߎ߬ ) ߓߊ߯ߦߊߣߍ߲߫ ߡߏߟߊߟߊ߫ ﴿102﴾

ߊ߬ߟߎ߬ ߘߌ߫ ߞߏߟߊߒߞߘߐߢߐ߲߯ߦߊ ߞߍ߫ ߢߐ߲߮ ߝߍ߬ ( ߞߵߊ߬ ߝߐ߫ ) ߞߏ߫ ߊߟߎ߫ ߡߊ߫ ߥߛߎ߬ ߛߌ߫ ߞߍ߫ ߝߏ߫ ( ߛߎ߫ ) ߕߊ߲߫ ﴿103﴾

ߒ߬ߠߎ߫ ߘߏ߲߬ ߞߵߊ߬ ߟߐ߲߫ ߖߐ߫ ߊ߬ߟߎ߬ ߦߋ߫ ߡߍ߲ ߝߐ߫ ߟߊ߫ ، ߕߎ߬ߡߊ ߡߍ߲ ߊ߬ߟߎ߬ ߘߐ߫ ߛߌߟߊ߫ ߕߋߟߋ߲ߣߍ߲߫ ߕߌ߮ ߟߎ߬ ߞߍߕߐ߫ ߊ߬ ߝߐ߫ ߟߊ߫ ߸ ߞߏ߫ ߊߟߎ߫ ߡߊ߫ ߥߛߎ߬ ߛߌ߫ ߞߍ߫ ߝߏ߫ ߟߏ߲߫ ߞߋߟߋ߲߫ ﴿104﴾

ߊ߬ߟߎ߬ ߦߴߌ ߢߌ߬ߣߌ߲߬ߞߊ߬ ߟߊ߫ ߞߎ߬ߙߎ ߟߎ߫ ߡߊ߬ ، ߊ߬ߟߎ߫ ߖߋ߬ߓߌ߬ ߞߏ߫ ߒ ߡߊ߰ߙߌ ߦߴߏ߬ ߟߎ߬ ߖߎ߲ߖߎ߲߫ ߠߊ߫ ߟߋ߬ ߛߎߋ߫ ﴿105﴾

ߊ߬ ߘߴߊ߬ߟߎ߬ ߕߛߊߞߙߊߟߡߊ ߟߊߞߢߊߣߍ߲ ߕߏ߫ ߝߟߊߞߘߊ߫ ﴿106﴾

ߌ ߕߍ߫ ߘߋ߲߬ߞߊ߬ ߞߎ߬ߘߎ߲߬ ߣߌ߫ ߜߎߛߎ߲ߞߎ߲߫ ߛߌ߫ ߦߴߊ߬ߟߎ߬ ߘߐ߫ ﴿107﴾

ߊ߬ߟߎ߬ ( ߓߍ߯ ) ߘߌ߫ ߞߟߌߟߌߟߊ ߟߊߓߊ߬ߕߴߏ߬ ߟߏ߲ ߸ ߖߍ߲߬ߞߍ߬ ߕߍ߫ ߞߍ߫ ߏ ߡߊ߬ ߝߋߎ߫ ، ߞߊ߲ ߠߎ߬ ߘߌ߫ ߡߊߖߌ߰ ߡߊ߰ߙߌ߬ ߤߌߣߊߒߕߋ ߦߋ߫ ߸ ߌ ߕߍ߫ ߝߏߦߌ߬ ߡߍ߲߫ ߏ߬ ߘߐ߫ ߝߏ߫ ߗߐ߰ߓߍ߬ߗߐ߰ߓߍ߬ ߞߊ߲ ߘߊ߬ߡߊ ﴿108﴾

ߏ߬ ߟߏ߲ ߠߋ߬ ߸ ߛߟߏ߬ߣߊ߬ߟߌ ߕߍ߫ ( ߡߐ߰ ߛߌ߫ ) ߣߝߊ߬ ߝߏ߫ ߡߊ߬ߤߌ߬ߣߊ߬ߟߊ ߓߊ߯ ߘߌ߬ߢߍ߬ ߡߍ߲ ߦߋ߫ ߸ ߊ߬ ߣߴߊ߬ ߓߊ߯ ߛߐ߲߬ ߞߎߡߊ ߡߊ߬ ߡߍ߲ ߦߋ߫ ﴿109﴾

ߓߊ ߊ߬ ߞߊ߬ ‹ ߡߐ߱ › ߟߎ߬ ߢߍ߫ ߞߏ ߣߴߊ߬ߟߎ߬ ߞߐ߫ ߞߏ ( ߓߍ߯ ) ߟߐ߲߫ ، ߊ߬ߟߎ߬ ߟߊ߫ ߟߐ߲ߠߌ߲ ߘߏ߲߬ ߣߐ߬ ߕߍ߫ ߊ߬ߟߋ߬ ߟߊߝߏ߬ ߟߊ߫ ﴿110﴾

ߢߊߘߐߟߊ ߟߎ߬ ߘߌߣߊ߬ ߞߟߏ߫ ( ߡߊ߰ߙߌ߬ ߣߌߡߊ߫ ߟߐ߬ߣߍ߲߫ ߖߘߍ߬ߟߊ ߦߋ߫ ߞߎߙߍ߫ ، ߞߵߊ߬ ߕߘߍ߬ ߕߐ߬ߢߍ߮ ߕߊ߬ߓߊ߮ ߓߘߊ߫ ߖߋ߰ߘߐ߬ߞߏߟߏ߲ߧߊ߫) ﴿111﴾

ߡߍ߲ ߞߏ߬ߣߌ߲ ߣߐ߬ ߓߊ߯ ߞߍ߫ ߢߌ߬ߡߊ ߟߎ߬ ߞߍ߫ ߟߊ߫ ߞߵߊ߬ ߛߐ߬ߘߐ߲߬ ߊ߬ ߦߋ߫ ߘߍ߲߬ߞߣߍ߬ߦߊ߬ߓߊ߯ ߘߌ߫ ߸ ߏ߬ ߕߍ߫ ߛߌߟߊ߲߫ ߢߌ߬ߡߊ߬ ߟߊ߬ߘߛߏ߫ ߣߌ߫ ߞߎ߲߬ߞߏ߬ ߘߐ߬ߥߙߊ߬ ߛߌ߫ ߟߊ߫ ﴿112﴾

ߒ߬ߓߵߊ߲ ߣߵߊ߬ ߟߊߖߌ߰ ߟߊ߫ ߘߐ߬ߛߊߙߌ ߘߌ߫ ߊߙߊߓߎ ( ߞߊ߲ ) ߘߐ߫ ߕߋ߲߬ ߠߋ߬ ߸ ߊ߬ ߣߴߊ߲ ߞߊ߬ ߞߐ߲߬ߞߐ߲߬ߒߡߊ ߘߐߛߊ߬ߦߌ߲߫ ߊ߬ ߘߐ߫ ߸ ߛߴߊ߬ߟߎ߬ ߘߴߊ߬ߟߎ߬ ߝߊ߲ߕߊ߲߬ߞߊ߬ ߸ ߥߟߴߊ߬ ߦߋ߫ ߞߊ߬ߥߊ߲߬ߘߌ ߟߊߞߎߘߦߴߊ߬ߟߎ߬ ߦߋ߫ ﴿113﴾

ߒ߬ߓߵߊߟߊ߫ ߞߘߐߕߊ߬ߣߍ߲߫ ߞߟߋ߫߹ ߡߊ߲߬ߛߊ ߟߋ߬ ߸ ߕߎ߬ߢߊ߬ ߞߌߛߍ ߟߋ߬ ، ߌߟߋ ߞߊߣߊ߬ ߞߌߢߍ߫ ߞߎ߬ߙߊ߬ߣߊ ߟߊ߫ ߞߊ߬ ߞߐ߲߰ ߊ߬ ߦߟߌߘߏ߲ ߓߊ߲ ߟߊߛߋ ߢߍ߫ ߌ ߡߊ߬ ، ߌ ߦߋ߫ ߕߏ߫ ߊ߬ ߝߐ߫ ߟߊ߫ ߟߋ߬ ߸ ߞߏ߫ ߒ ߡߊ߰ߙߌ ߒ ߖߘߌ߫ ߟߐ߲ߠߌ߲ ߠߊ߫ ﴿114﴾

ߊ߲ ߞߊ߬ ߟߊ߬ߤߘߌ ߘߌ߫ ߊߘߡߊ߫ ߡߊ߬ ߞߘߐ߬ߡߊ߲߫ ߸ ߏ߬ ߢߌ߬ߣߊ߬ ߘߴߏ߬ ߘߐ߫ ߸ ߊ߲ ߘߏ߲߬ ߡߊ߫ ߝߊ߲ߞߊ߲߫ ߛߌ߫ ߕߘߍ߬ ߊ߬ ߓߟߏ߫ ﴿115﴾

ߕߎ߬ߡߊ ߡߍ߲ ߊ߲ ߞߵߊ߬ ߝߐ߫ ߞߋ߲ߛߐ߲ ߠߎ߫ ߡߊ߬ ߸ ߒ ߞߏ߫ ߊߟߎ߯ ߕߌ߲ߓߌߘߌ߲ ߞߍ߫ ߊߘߡߊ߫ ߦߋ߫ ، ߏ߬ ( ߓߍ߯ ) ߞߊ߬ ߕߌ߲ߓߌߘߌ߲ ߞߍ߫ ߝߏ߫ ߓߙߌ߬ߛߌ߬ ߡߍ߲ ߞߵߊ߬ ߓߊ߲߬ ﴿116﴾

ߊ߲ ߞߵߊ߬ ߝߐ߫ ߒ ߞߏ߫ ߊߘߡߊ߫ ߸ ߣߌ߲߬ ߦߴߌ ߣߴߌ ߝߘߎߡߊ ߖߎ߮ ߟߋ߬ ߘߌ߫ ߸ ߏ߬ ߘߐ߫ ߊ߬ ߞߊߣߵߊߟߎ߫ ߝߌ߬ߟߊ ߟߊߓߐ߫ ( ߡߍ߲ߘߌߦߊ ) ߣߊߞߐ߫ ߘߐ߫ ߘߋ߬ ߞߵߌ ߢߊߜߊ߬߹ ﴿117﴾

ߡߍ߲ ߘߏ߲߬ ߦߴߌ ߦߋ߫ ( ߣߊߞߐ ߘߐ߫ ) ߸ ߌ ߕߍ߫ ߞߐ߲ߞߐ߫ ߦߋ߲߬ ߸ ߌ ߕߍ߫ ߝߊߘߌߦߊ߫ ﴿118﴾

ߌ ߘߏ߲߬ ߕߍ߫ ߡߌ߲߬ߟߐ߯ ߦߋ߲߬ ߸ ߌ ߕߍ߫ ߓߐ߫ ߕߟߋ߬ ߟߊ߫ ﴿119﴾

ߓߊ߬ߙߌ߬ ߜߍ߬ߘߍ ߞߵߊ߬ ߘߊ ߟߴߊ߬ ߞߘߐ߫ ߞߏ߫ ߊߘߡߊ߫ ߸ ߒ ߧߋ߫ ߘߎߡߊ ߣߌ߫ ߡߊ߲߬ߛߊ߬ߦߊ ߞߘߐ߬ߓߊߟߌ ߦߙߌ ߦߌ߬ߘߊ߬ ߌ ߟߊ߫ ߓߊ߬؟ ﴿120﴾

ߊ߬ߟߎ߫ ߝߌ߬ߟߊ ߞߊ߬ ߘߏ߫ ߘߊߥߎ߲߫ ߏ߬ ߘߐ߫ ߡߍ߲ߞߍ߭ ߸ ߊ߬ߟߎ߫ ߖߊ߲߬ߓߘߍ ߟߊ߲ߞߣߍߡߊ߫ ߘߴߊ߬ߟߎ߬ ߦߋ߫ ، ߏ߬ ߞߍ ߊ߬ߟߎ߫ ߞߊ߬ ߣߊߞߐ ߝߌߘߊ ߘߏ߫ ߟߎ߫ ߡߙߐߡߙߐ ߘߊߡߌ߬ߣߴߊ߬ߟߎ߫ ߖߍ߬ߘߍ߫ ߡߊ߬ ، ߊߘߡߊ߫ ߓߘߴߊ߬ ߡߊ߰ߙߌ ߛߐ߬ߛߐ߫ ߟߴߏ߬ ߘߌ߫ ߞߊ߬ ߘߏ߲߬ ߝߟߌ߬ ߥߊ ߟߊ߫ ﴿121﴾

ߏ߬ ߟߋ ߞߐ߫ ߸ ߊ߬ ߡߊ߰ߙߌ ߞߵߊ߬ ߛߎߥߊ߲ߘߌ߫ ߸ ߞߊ߬ ߖߘߍ߬ߟߊ߬ߛߊߦߌ ߡߌ߬ߘߴߊ߬ ߦߋ߫ ߞߵߊ߬ ߞߊ߲ߘߊ߫ ﴿122﴾

ߊߟߊ߫ ߞߊ߲߫ ߞߏ߫ ߒ߬ߓߵߊߟߎ߫ ߝߌ߬ߟߊ ߓߍ߯ ߦߋ߫ ߖߌ߰ ߞߊ߬ ߓߐ߫ ( ߣߊߞߐ ) ߘߐ߫ ߸ ߊߟߎ߬ ߖߎ߯ߢߐ߲߯ߡߊ ߟߎ߬ ، ߣߌ߫ ߒ ߠߊ߫ ߞߊ߲ߘߦߊ ߘߏ߫ ߞߍ߫ ߘߊ߫ ߣߊ߬ ߝߋ߲߫ ߘߌ߫ ߊߟߎ߫ ߡߊ߬ ߸ ߡߍ߲ ߓߊ߯ ߒ ߠߊ߫ ߞߊ߲ߘߦߊ ߏ߬ ߟߊߓߊ߬ߕߏ߬ ߸ ߏ߬ ߕߍ߫ ߝߌ߬ߟߌ߫ ߡߎ߬ߕߎ߲߬ ߊ߬ ߕߍ߫ ߞߎ߲߬ߠߊ߲߬ߜߏߦߊ߫ ﴿123﴾

ߣߌ߫ ߡߍ߲ ߘߏ߲߬ ߞߵߊ߬ ߞߐߘߏ߲߬ ߒߠߋ ߟߊ߫ ߞߊ߬ߥߊ߲߬ߘߌ ߟߊ߫ ߸ ߢߣߊߡߦߊ߫ ߛߕߌ߬ߣߍ߲ ߠߋ߫ ߛߌ߰ߣߴߏ߬ ߢߍ߫ ، ߊ߬ ߣߴߊ߲ ߘߴߊ߬ ߝߎߦߋ߲ ߜߍ߲߬ߜߍ߲߫ ߟߐ߬ߓߊ ߟߏ߲ ﴿124﴾

ߊ߬ ߘߴߊ߬ ߝߐ߫ ߞߏ߫ ߒ ߡߊ߰ߙߌ ߸ ߡߎ߲߬ ߠߊ߫ ߌ ߦߋ߫ ߒ ߝߎߦߋ߲ߠߡߊ ߜߍ߲߬ߜߍ߲߬ ߠߊ߫ ߸ ߒ ߘߏ߲߬ ߜߎ ߕߘߍ߬ ߢߡߊ ߘߌ߫ ߞߘߐ߬ߡߊ߲߫؟ ﴿125﴾

‹ ߊߟߊ߫ › ߘߴߊ߬ ߖߋ߬ߓߌ߬ ߞߏ߫ ߒ ߠߊ߫ ߟߝߊߙߌ ߟߎ߫ ߣߊ߬ ߘߴߌ ߡߊ߬ ߕߋ߲߬ ߠߋ߬ ߸ ߌ ߢߌ߬ߣߊ߬ ߘߴߏ߬ ߟߎ߬ ߞߐ߫ ߸ ߢߌ߬ߣߊ߬ ߞߍߣߴߌ ߝߣߊ߫ ߞߐ߫ ߕߋ߲߬ ߠߋ߬ ߓߌ߬ ﴿126﴾

ߒ߬ߓߊ߬ ߊ߲ ߧߋ߫ ߡߐ߰ ߛߙߊ߬ ߟߊ߫ ߕߋ߲߬ ߠߋ߬ ߸ ߡߍ߲ ߞߊ߬ ߖߊߛߟߌ ߞߍ߫ ߸ ߊ߬ ߘߏ߲߬ ߡߊ߫ ߘߍ߲߬ߞߣߍ߬ߦߴߊ߬ ߡߊ߰ߙߌ ߟߊ߫ ߟߝߊߙߌ ߟߎ߫ ߡߊ߬ ، ߟߊߞߌߙߊ߫ ߖߊ߲߰ߞߕߊ ߟߋ߫ ߘߏ߲߬ ߜߍ߬ߟߍ߲߬ߡߊ߲߫ ߸ ߊ߬ ߘߎߡߊߣߍ߲߫ ߝߣߊ߫ ﴿127﴾

ߊ߬ ߡߊ߫ ߘߐߞߣߍ߫ ߊ߬ߟߎ߫ ߡߊ߬ ߓߊ߬ ߸ ߞߏ߫ ߊ߲ ߓߘߊ߫ ߓߐ߲ߛߐ߲ߘߊ߫ ߖߋ߬ߟߌߖߋ߬ߟߌ߫ ߟߋ߬ ߛߌߟߊߛߵߊ߬ߟߎ߬ ߢߍ߫ ߞߘߐ߬ߡߊ߲߫؟ ߸ ߊ߬ߟߎ߬ ߦߴߊ߬ߟߎ߬ ߘߐߕߊ߯ߡߊ߫ ߟߴߏ߬ ߟߎ߫ ߛߌ߰ ߦߌ߬ߟߊ߬ ߞߘߐ ߟߎ߬ ߘߐ߫ ، ߕߊ߰ߛߌ߬ ߛߌߦߊߡߊ߲߫ ߠߴߏ߬ ߘߐ߫ ߤߊ߲ߞߟߌ߫ ߕߌ߮ ߟߎ߬ ߦߋ߫ ߘߋ߬ ﴿128﴾

ߣߌ߫ ߞߎߡߊ ߘߏ߫ ߝߐߟߌ ߞߐ߲߰ߣߍ߲߫ ߕߴߌ ߡߊ߰ߙߌ ߓߟߏ߫ ߸ ߣߌ߫ ߛߕߊ ߘߏ߫ ߟߐ߯ߟߊߣߍ߲ ߕߍ߫ ߸ ߊ߬ ߕߎ߲߬ ߘߌ߫ ߞߍ߫ ߝߍ߲ߝߍߘߍ߲ ߘߌ߫ ߟߋ߬ ߘߍ߯ ﴿129﴾

ߒ߬ߓߊ߬ ߌߟߋ ߊ߬ߟߎ߬ ߟߊ߫ ߞߎߡߊ ߟߎ߫ ߡߎ߬ߢߎ߲߬ ߖߐ߫ ، ߊ߬ ߣߴߌ ߦߴߌ ߡߊ߰ߙߌ ߛߊߣߌ߲ߧߊ ߟߴߊ߬ ߕߊ߲߬ߘߏ ߞߊ߲߬ ߕߋ߬ߟߋ ߖߌ߲ߞߌ߲ ߢߍ߫ ߸ ߊ߬ ߣߴߊ߬ ߓߋ߭ ߢߍ߫ ، ߊ߬ ߣߴߌ ߦߴߊ߬ ߛߊߣߌ߲ߧߊ ߝߐ߫ ߛߎ ߞߎ߲߬ߕߊ߮ ߟߎ߬ ߘߐ߫ ߸ ߊ߬ ߣߌ߫ ߕߟߋ߬ߘߐ߬ߟߊ ߕߐ߲ߕߐ߲ ߠߎ߬ ߟߊ߫ ߸ ߖߐ߲߬ߛߊ߫ ߌ ߘߌ߫ ߘߌ߬ߢߍ ߛߐ߬ߘߐ߲߬ ﴿130﴾

ߌ ߞߊߣߊ߬ ߌ ߢߊߓߐ߫ ߝߋ߲߫ ߝߍ߬ ߊ߲ ߣߵߊ߬ߟߎ߬ ߘߐ߫ ߝߌ߬ߟߊ߬ߓߊ ߘߏ߫ ߟߎ߫ ߘߊ߰ߡߎ߲߬ ߠߊ߫ ߡߍ߲ ߠߊ߫ ߘߎߢߊ߫ ߢߣߊߡߦߊ ߛߐ߰ߡߊ߬ ߘߊ߬ ߝߙߋ ߟߎ߬ ߘߐ߫ ߸ ߊ߲ ߘߏ߲߬ ߞߵߏ߬ ߟߊߥߌ߬ߟߴߊ߬ߟߎ߬ ߞߘߐߓߐ ߟߋ߫ ߡߊ߬ ߏ߬ ߟߊ߫ ، ߒ߬ߓߊ߬ ߌ ߡߊ߰ߙߌ ߟߊ߫ ߤߊ߬ߙߌ߬ߖߍ߮ ( ߡߍ߲ ߦߴߊ߬ ߓߘߊ ) ߛߊ߫ ߸ ߏ߬ ߟߋ ߝߌ߬ߛߊ߬ ߸ ߏ߬ ߟߋ ߘߏ߲߬ ߘߎߡߊߕߐ߫ ﴿131﴾

ߌ ߞߐߙߍ ( ߟߎ߫ ) ߖߡߊ߬ߙߌ߬ ߛߊߟߌ ߟߊ߫ ߸ ߌ ߖߍ߬ߘߍ ߘߏ߲߬ ߦߴߌ ߡߎ߬ߢߎ߲߬ ߊ߬ ߞߊ߲߬ ߠߋ߬ ߕߎߜߍ߫ ، ߒ߬ߠߎ߬ ߕߴߌ ߕߙߊ߫ ߟߊ߫ ( ߒ߬ ) ߖߐ߲߰ߣߍ߲߫ ߠߊ߫ ߸ ߒ߬ߠߎ߫ ߟߋ߬ ߝߊ߲߭ ߦߴߌ ߖߐ߲߰ߣߍ߲ ߕߊ߬ ߟߊ߫ ، ߟߊ߬ߓߊ߲ ߘߏ߲߬ ߦߋ߫ ߡߍ߲ ߠߊ߫ ߸ ߏ߬ ߟߋ ߝߊ߲ߕߊ߲ߞߊ ߘߌ߫ ﴿132﴾

ߊ߬ߟߎ߬ ߞߊ߲߫ ߠߋ߬ ߓߏ߬ ߞߏ߫ ߥߟߊߞߏ߫ ‹ ߞߋߟߊ › ߕߍ߬ߘߍ߫ ߣߵߊ߲ ߡߊ߬ ߡߊ߲߬ߕߊߣߌ߲ ߘߏ߫ ߘߌ߫ ߞߊ߬ ߝߘߴߊ߬ ߡߊ߰ߙߌ ߟߊ߫ ، ߋ߫ ߸ ߔߊߞߌ ߡߊ߫ ߣߵߊ߬ߟߎ߫ ߡߊ߬ ߟߍߙߊ߫ ߝߟߐ ߟߎ߬ ߘߐ߫ ߓߊ߬؟ ﴿133﴾

ߒ߬ߓߊ߬ ߣߌ߫ ߒ߬ߠߎ߫ ߕߌ߲߬ ߞߵߊ߬ߟߎ߬ ߛߌߟߊߛߊ߬ ߖߊ߲߰ߞߕߊ ߟߊ߫ ߞߋߟߊ ߟߊߣߊ߭ ߢߍ߫ ߸ ߊ߬ߟߎ߫ ߕߎ߲߬ ߘߴߊ߬ ߝߐ߫ ߞߏ߫ ߊ߲ ߡߊ߰ߙߌ ߸ ߥߟߊߞߏ߫ ߌ ߕߘߍ߬ ߞߋߟߊ ߘߏ߫ ߟߐ߬ ߒ߬ ߡߊ߬ ߡߎߣߎ߲߬ ، ߊ߲ ߕߘߍ߬ ߘߴߌ ߟߊ߫ ߟߝߊߙߌ ߟߎ߬ ߟߊߓߊ߬ߕߏ߬ ߸ ߊ߲ ߣߊ߬ߡߊߣߊ߬ ߘߐ߯ߦߊ߫ ߞߵߊ߲ ߞߎ߲߬ߘߐߦߌ߬ߘߊ߬ ߜߊ߲ߛߊ߲߫ ﴿134﴾

ߊ߬ ߟߊߛߋ߫ ߞߏ߫ ߓߍ߯ ߦߋ߫ ߡߊ߬ߞߐ߬ߣߐ߲߬ߠߌ߲ ߠߋ߬ ߟߊ߫ ، ߒ߬ߓߵߊߟߎ߫ ߝߣߊ߫ ߡߊ߬ߞߐ߬ߣߐ߲߬ߠߌ߲ ߞߍ߫ ، ߒ߬ߞߵߊߟߎ߫ ߘߌߣߵߊ߬ ߟߐ߲߫ ߡߍ߲ ߠߎ߬ ߦߋ߫ ߛߌߟߊ߫ ߕߋߟߋ߲ߣߍ߲ ߕߌ߱ ߟߎ߬ ߘߌ߫ ߸ ߊ߬ ߣߌ߫ ߡߍ߲ ߞߊ߲ߘߊߣߍ߲߫ ﴿135﴾

ߡߐ߱ ߟߎ߫ ߖߊ߬ߕߋ߬ߓߐ ߓߘߊ߫ ߛߎ߬ߘߎ߲߬ߧߴߊ߬ߟߎ߬ ߟߊ߫ ߸ ߊ߬ߟߎ߫ ߘߏ߲߬ ߖߊ߲߬ߓߐߣߍ߲ ߞߐߘߏ߲߬ߣߍ߲߫ ߠߋ߬ ߔߏ߲߫ ﴿1﴾

ߞߊ߬ߥߊ߲߬ߘߌ߬ ߞߎߘߊ߫ ߛߌ߫ ߕߍ߫ ߣߵߊ߬ߟߎ߫ ߡߊ߬ ߞߊ߬ ߝߘߴߊ߬ߟߎ߫ ߡߊ߰ߙߌ ߟߊ߫ ߸ ߣߴߊ߬ߟߎ߬ ߡߴߏ߬ ߟߊߡߍ߲߫ ߞߵߊ߬ߟߎ߬ ߕߏ߫ ߡߣߊ߬ߡߣߊ ߟߊ߫ ﴿2﴾

ߞߵߊ߬ߟߎ߫ ߛߣߐ߬ߡߍ ߟߎ߬ ߢߣߊߜߍ߫ ߞߍ߬ߣߍ߲ ، ߊ߬ߟߋ߬ ߕߐ߬ߢߍ߰ߒߕߋ ߟߎ߫ ߞߊ߬ ߢߐ߲߯ߦߋ ߜߎ߲߬ߘߎ߫ ߟߋ߬ ߸ ( ߞߵߊ߬ ߝߐ߫ ߏ߬ ߘߐ߫ ) ߸ ߞߏ߫ ( ߞߋߟߊ ) ߣߌ߲߬ ߦߋ߫ ߡߋ߬ߘߋ ߜߘߍ߫ ߘߌ߫ ߣߴߊߟߎ߫ ߢߐ߲߰ ߡߐ߰ ߛߊ߬ߕߊ ߕߍ߫؟ ߸ ( ߞߏ߫ ) ߌ߬ߦߏ߯ ߊߟߎ߫ ߘߌ߫ ߣߊ߬ ߛߎߓߊ߯ߦߊ ߡߊ߬ ߞߵߊ߬ ߕߘߍ߬ ߊߟߎ߫ ߢߊ߯ ߊ߬ ߟߊ߫؟ ﴿3﴾

ߏ߬ ߞߊ߲߫ ߞߏ߫ ߒߠߋ ߡߊ߰ߙߌ ߟߋ߫ ߞߊ߬ ߛߊ߲ ߣߌ߫ ߘߎ߱ ߞߎߡߊ ߟߐ߲߫ ، ߓߊ ߊ߬ߟߋ ߟߋ߬ ߡߍ߲ߠߌ߲ߠߊ߫ ߟߐ߲ߠߌ߲ߠߊ ߘߌ߫ ﴿4﴾

ߍ߲߬ߍ߲߫ ߸ ߊ߬ߟߎ߬ ߞߊ߲߫ ߠߋ߬ ߞߏ߫ ߛߌ߬ߓߏ߬ ߞߙߌߞߙߊ ߟߋ߬ ، ߞߏ߫ ߍ߲߬ߍ߲߫ ߊ߬ ߣߵߊ߬ ߓߐ߫ ߟߴߊ߬ ߞߎ߲߬ߘߐ߫ ߟߋ߬ ، ߞߏ߫ ߍ߲߬ߍ߲߫ ߛߎ߬ߞߎ߬ߦߊ߬ߟߊ ߟߋ߬ ، ߒ߬ߓߵߊ߬ ( ߝߣߊ߫ ) ߦߋ߫ ߣߊ߬ ߡߊ߲߬ߕߊߣߌ߲ ߘߏ߫ ߘߌ߫ ߓߊ߫ ߦߏ߫ ߝߟߐ߫ ߡߐ߱ ߟߎ߬ ߗߋ߫ ߘߊ߫ ߡߍ߲ ߢߐ߲߱ ߘߌ߫ ﴿5﴾

ߘߎ߰ ߘߏ߲߬ߞߏ߬ ߛߌ߫ ߡߊ߫ ߘߍ߲߬ߞߣߍ߬ߦߊ߫ ߢߌ߲߬ ߠߎ߬ ߢߍ߫ ߞߘߐ߬ߡߊ߲߫ ߣߴߊ߲ ߞߵߏ߬ ߟߎ߬ ߛߌߟߊߛߊ߬ ، ߊ߬ߟߎ ߘߌ߫ ߘߍ߲߬ߞߣߍ߬ߦߊ߫ ߏ߬ ߘߐ߫؟ ﴿6﴾

ߒ߬ߠߎ߬ ߡߊ߫ ߜߘߍ߫ ߛߌ߫ ߞߋߟߦߊ߫ ߌߟߋ ߢߍ߫ ߞߘߐ߬ߡߊ߲߫ ߝߏ߫ ߗߍ߭ ߟߎ߬ ، ߊ߲ ߞߵߏ ߜߊ߲߬ߛߊ߲ ߠߋ߬ ߦߟߌߘߏ߲߬ ، ߒ߬ߓߊ߬ߣߴߊߟߎ߫ ߡߊ߫ ߡߍ߲ ߢߊߟߐ߲߫ ߊߟߎ߫ ߦߋ߫ ߟߍߙߊ ߘߏ߲߬ߞߏ ߟߎ߫ ߢߌ߬ߣߌ߲߬ߞߊ߫ ߏ ߡߊ߬ ﴿7﴾

ߊ߲ ߡߴߊ߬ߟߎ߬ ߞߍ߫ ߝߊ߬ߘߌ߬ ߟߎ߫ ߘߌ߫ ߡߍ߲ ߠߎ߬ ߘߌ߫ ߢߊ߬ ߛߎ߬ߡߊ߲ ߞߐ߫ ߸ ߊ߬ߟߎ߫ ߘߏ߲߬ ߡߊ߫ ߞߍ߫ ߘߎߡߊߓߊ߯ ߟߎ߫ ߘߌ߫ ﴿8﴾

ߞߏ߬ߣߌ߲߬ ߊ߲ ߞߊ߬ ߦߟߌߡߊߘߌߦߊ߫ ߞߊ߲ ߠߎ߫ ߕߎ߬ߢߊ߬ߕߌ߰ߦߴߊ߬ߟߎ߬ ߦߋ߫ ߸ ߞߵߊ߬ߟߎ߬ ߣߌ߫ ߒ߬ ߘߌߦߊߣߊ߲߫ ߡߐ߮ ߟߎ߬ ߟߊߞߛߌ߫ ߸ ߊ߬ ߣߴߊ߲ ߞߊ߬ ߖߊߛߟߌߟߊ ߟߎ߬ ߛߌߟߊߛߊ߬ ߟߋߎ߫ ﴿9﴾

ߊ߲ ߓߘߊ߫ ߟߍߙߊ߫ ߟߋ߬ ߟߊߖߌ߰ ߊߟߎ߫ ߡߊ߬ ߣߌ߲߬ ߸ ߊߟߎ߫ ߞߎ߲߬ߠߊ߬ߦߋߙߋ߲ ߦߋ߫ ߡߍ߲ ߘߐ߫ ، ߦߊ߯ߟߴߊߟߎ߫ ߕߴߏ߬ ߤߊ߲ߞߟߌߡߦߊ߫ ߟߊ߫ ߟߋ߫ ߓߊ߬؟ ﴿10﴾

ߊ߲ ߓߘߊ߫ ߘߎ߱ ߖߋ߬ߟߌߖߋ߬ߟߌ߫ ߟߋ߬ ߛߌߟߊߛߊ߬ ߡߍ߲ ߕߍ߬ߘߍ߫ ߕߐ߬ߢߍ߮ ߟߊ߬؟ ߊ߬ ߣߴߊ߲ ߞߊ߬ ߡߌ߬ߙߌ߲߬ߘߌ߬ ߜߘߍ߫ ߟߎ߫ ߛߌ߲ߘߌ߫ ߏ߬ ߟߎ߬ ߞߐ߫؟ ﴿11﴾

ߕߎ߬ߡߊ ߡߍ߲ ߏ߬ ߟߎ߫ ߛߏ߬ߓߌ߬ ߘߊ߫ ߖߊ߲߰ߞߕߊ ( ߣߊ߬ ߞߏ ) ߡߊ߬ ߸ ߘߊ߬ߡߊ߲߬ߛߊ߫ ߊ߬ߟߎ߫ ߞߵߊ߬ߟߎ߫ ߓߏ߬ߙߌ߫ ߊ߬ ߞߘߐ߫ ﴿12﴾

ߞߏ߫ ߊߟߎ߫ ߞߊߣߵߊߟߎ߫ ߓߏ߬ߙߌ߫ ߞߍ߬ ، ߊߟߎ߫ ߛߊ߬ߦߌ߲߬ ߊߟߎ߫ ߟߊ߫ ߡߍ߲ߘߌߦߊ߫ ߝߋ߲ ߠߎ߬ ߣߴߊߟߎ߫ ߡߊߞߍ߫ ߦߙߐ ߟߎ߫ ߡߊ߬ ߸ ߖߐ߲߰ߛߴߊߟߎ߫ ߘߌ߫ ߘߐߢߌ߬ߣߌ߲߬ߞߊ߫ ﴿13﴾

ߊ߬ߟߎ߬ ߞߊ߲߫ ߞߏ߫ ߊ߯ߟߊ߲߫߹ ߒ߬ߠߎ߫ ߟߋ߬ ߞߍ߫ ߘߊ߫ ߕߐ߬ߢߍ߰ߒߕߋ ߟߎ߬ ߘߌ߫ ߘߍ߯ ﴿14﴾

(ߞߎߡߊ) ߏ߬ ߟߋ ߡߊ߫ ߓߐ߫ ߊ߬ߟߎ߬ ߘߊ߫ ߸ ߝߏ߫ ߊ߲ ߞߵߊ߬ߟߎ߬ ߞߍ߫ ߞߊ߬ߟߌ߬ ߝߋ߲ ߠߎ߬ ߘߌ߫ ߞߵߊ߬ߟߎ߬ ߘߎߝߊ߫ ߟߋߎ߫ ﴿15﴾

ߒ߬ߠߎ߬ ߡߊ߫ ߛߊ߲ ߠߎ߬ ߣߌ߫ ߘߎ߱ ߣߴߊ߬ߟߎ߫ ߝߌ߬ߟߊ ߕߍߟߊ ߘߊ߲߫ ߕߏߟߏ߲߫ ߠߊ߫ ߘߋ߬ ﴿16﴾

ߣߌ߫ ߒ߬ ߕߎ߲߬ ߦߋ߫ ߕߏߟߏ߲ ߠߊߘߊ߲߫ ߠߊ߫ ߸ ߒ߬ ߕߍ߬ߘߍ߫ ߏ߬ ߟߊߘߊ߲߫ ߠߊ߫ ߒ߬ ߖߍ߬ߘߍ ߓߘߊ ߟߋ߬ ، ߣߴߊ߲ ߕߎ߲߬ ߦߴߏ߬ ߞߍߓߊ߯ ߘߌ߫ ߞߊ߬ߣߌ߲߫ ﴿17﴾

ߞߏ߬ߣߌ߲߬ ߍ߲߬ߍ߲ߍ߲߬ ߘߋ߬ ، ߊ߲ ߧߋ߫ ߕߎ߬ߢߊ ߟߋ߫ ߓߎ߰ߓߎ߰ߡߊ߬ ߟߊ߫ ߥߎߦߊ ߡߊ߬ ߸ ߊ߬ ߦߴߊ߬ ( ߘߖߐ߫ ߞߵߊ߬ ) ߞߎ߲߬ߣߍ ߛߊߙߌ߫ ، ߘߊ߬ߡߊ߲߬ߛߊ߫ ߊ߬ ߓߘߊ߫ ߝߏ߫ ، ߜߊ߬ߟߏ ߟߋ߫ ߘߏ߲߬ ߊߟߎ߫ ߦߋ߫ ߸ ߞߊ߬ߡߊߛߐ߬ߘߐ߲߬ ߊߟߎ߫ ߟߊ߫ ߡߊ߲߬ߞߕߎ߬ߒ߬ߞߊ߲߬ߠߊ ߝߍ߬ ﴿18﴾