[1] အလိဖ် လာမ် မီမ်။
[2] ဤကျမ်းသည် (ယခင်ထုတ်ပြန်ခဲ့သောကျမ်းများထဲ၌ ကြိုတင်အမိန့်ရှိထားသည့် ကျမ်းဂန်ဖြစ်လေရာ (ဝါ) အသင်တို့က ငါအရှင်မြတ်ထံတွင် ”ကျွန်ုပ်တို့အား ဖြောင့်မတ်မှန်ကန်သောလမ်းကို ညွှန်ကြားပြသတော်မူပါ” ဟု တောင်းခံခြင်းကို ငါအရှင်လက်ခံတော်မူ၍ ချပေးတော်မူလိုက်သည့် လမ်းမှန်ညွှန်ကြားပြသချက်ကျမ်းဂန်ဖြစ်လေရာ) ၎င်းကျမ်းဂန်နှင့်ပတ်သက်၍ သံသယဖြစ်စရာမရှိပေ။ ဤကျမ်းဂန်သည် မုသ်သကီန် ကြောက်ရွံ့ အပြစ်ရှောင် ကောင်းကျိုးဆောင်သူများအတွက် လမ်းမှန်ညွှန်ကြားပြသချက်ဖြစ်သည်။
[3] ထိုမုသ်သကီန်များသည် (ကုရ်အာန်က ပြဆိုထားသည့်) အကွယ်မှအရာများ* ကို(အမှန်ဖြစ်သည်၊ တည်ရှိသည်ဟု) ယုံကြည်* ကြပြီး ၎င်းတို့သည် စွလာသ်* ဝတ်ပြုဆောက်တည်ကြသည့်အပြင် ၎င်းတို့သည် ငါအရှင် ၎င်းတို့အား ပေးသနားထားတော်မူသော ပစ္စည်းဥစ္စာများထဲမှ (အချို့ကိုလည်း) လှူဒါန်းကြသည်။
[4] ထို့ပြင် ၎င်းမုသ်သကီန်များသည် အသင်(တမန်တော်)ထံသို့ ထုတ်ပြန်ပို့ချခြင်းခံခဲ့ရသည့် (ကုရ်အာန်)ကျမ်းတော်ကို သာမက၊ အသင်(တမန်တော်)မတိုင်မီ (နဗီတမန်တော်များထံသို့) ထုတ်ပြန်ပို့ချခြင်းခံခဲ့ရသည့် ကျမ်းဂန်များ* ကိုလည်း ယုံကြည်ကြသည်။ ထို့ပြင် ၎င်းမုသ်သကီန်ကြောက်ရွံ့အပြစ်ရှောင် ကောင်းကျိုးဆောင်သူများသည် အာခိရသ် တမလွန်ဘဝကိုလည်း (အမှန်ဟု) ယုံကြည်ကြသည်။
[5] ၎င်းတို့သည် ၎င်းတို့အား ဖန်ဆင်းမွေးမြူတော်မူသောအရှင်မြတ်ထံမှ လမ်းမှန်ညွှန်ကြားပြသချက်အပေါ်တွင် ရှိနေကြပြီး ၎င်းတို့သာလျှင် အောင်မြင်ကြမည့်သူများ ဖြစ်ကြသည်။
[6] အမှန်စင်စစ် ကာဖိရ်ငြင်းပယ်သူများမှာမူ အသင်(တမန်တော်)သည် သူတို့အား သတိပေးနှိုးဆော်မှု ပြုသည်ဖြစ်စေ၊ သတိပေးနှိုးဆော်မှု မပြုသည်ဖြစ်စေ သူတို့အပေါ်တွင် အတူတူသာဖြစ်သည်။ ၎င်းတို့သည် ယုံကြည်ကြမည် မဟုတ်ပေ။
[7] အလ္လာဟ်အရှင်မြတ်သည် ၎င်းတို့၏ စိတ်နှလုံးများအပေါ်နှင့် ၎င်းတို့၏အကြားအာရုံများအပေါ်တွင် တံဆိပ်ခပ်နှိပ်လိုက်သည့်အပြင် ၎င်းတို့၏အမြင်အာရုံများအပေါ်တွင်လည်း အကာအကွယ်ရှိနေပြီဖြစ်သည်။ ထို့ပြင် ၎င်းတို့အတွက် ကြီးလေးသောအပြစ်ဒဏ်လည်းရှိသည်။
[8] ထို့ပြင် လူသားများမှ အချို့သူတို့သည် ယုံကြည်ကြသူများ မဟုတ်ကြဘဲလျက်* “ကျွန်ုပ်တို့သည် အလ္လာဟ်အရှင်နှင့် နောက်ဆုံးနေ့ကို ယုံကြည်ကြပါပြီ“ဟု ၎င်းတို့က ပြောဆိုကြသည်။
[9] ၎င်းတို့သည် အလ္လာဟ်အရှင်မြတ်နှင့် အီမာန် ယုံကြည်သူများကို လှည့်စားကြသည်။ ထို့ပြင်(အမှန်စင်စစ်) သူတို့သည် သူတို့ကိုယ်ကို သူတို့ကလွဲ၍ မည်သူ့ကိုမျှလည်း လှည့်စားနေကြသည်မဟုတ်ပေ။ ဤသည်ကိုလည်း သူတို့ အသိမရှိကြပေ။
[10] ၎င်းတို့၏ စိတ်နှလုံးများထဲတွင် ရောဂါရှိနေသည်၊ သို့ဖြစ်ရာ အလ္လာဟ်အရှင်မြတ်သည် ၎င်းတို့အား ရောဂါပိုတိုးစေတော်မူလိုက်သည်။* ထို့ပြင် ၎င်းတို့သည် လိမ်လည်(ပြောဆို)ခဲ့ကြသည့်အတွက်ကြောင့် ၎င်းတို့အတွက် ပြင်းပြနာကျင်စေသော အပြစ်ဒဏ်ရှိသည်။
[11] ထို့ပြင် ၎င်း(ယောင်ဆောင်)သူများအား အသင်တို့သည် ကမာ္ဘမြေပေါ်တွင် ဖျက်လိုဖျက်ဆီးမပြုလုပ်ကြနှင့်ဟု ပြောဆိုလိုက်သောအခါ သူတို့က ကျွန်ုပ်တို့သည် ကောင်းမွန်အောင်ပြုပြင်သူများသာ ဖြစ်ကြပါသည်ဟု ပြောဆိုကြသည်။
[12] သတိပြုကြပါ၊ ဤသူများသာလျှင် အမှန်စင်စစ် ဖျက်ဆီးရေးလုပ်သူများဖြစ်ကြသည်။* သို့ရာတွင် သူတို့သည် အသိမရှိကြပေ။
[13] ထို့ပြင် အသင်တို့သည် လူ(စွဟာဗဟ်)များ အီမာန်ယုံကြည်ကြသကဲ့သို့ အီမာန်ယုံကြည်ကြပါ*ဟု သူတို့သည် ပြောဆိုခြင်းခံရသောအခါ သူတို့က ကျွန်ုပ်တို့သည် အသိဉာဏ်နည်းသူများ အီမာန်ယုံကြည်ကြသကဲ့သို့ အီမာန်ယုံကြည်ရပါမည်လောဟု ပြန်ပြောကြသည်။ သတိပြုကြပါ၊ ထိုသူများသာလျှင် အမှန်မုချ အသိပညာနည်းပြီး အသိတရားမရှိသည့်သူများပင် ဖြစ်ကြသည်။ သို့ရာတွင် သူတို့သည် အသိမရှိကြပေ။
[14] ထို့ပြင် ၎င်း(ယောင်ဆောင်)သူများသည် အီမာန်ယုံကြည်ကြသူများနှင့် တွေ့ဆုံကြသောအခါ ကျွန်ုပ်တို့သည်လည်း အီမာန်ယုံကြည်ကြပါသည်ဟု ပြောဆိုကြသည်။ ၎င်းနောက် သူတို့၏ ခေါင်းဆောင်သူယုတ်မာများနှင့် သီးသန့် တွေ့ဆုံကြသောအခါ ကျွန်ုပ်တို့သည် အမှန်စင်စစ် အသင်တို့နှင့် အတူတကွသာလျှင်ဖြစ်ကြပါသည်၊ အမှန်စင်စစ် ကျွန်ုပ်တို့သည် (သူတို့အား) ပြက်ရယ်ပြောင်လှောင်သူများသာ ဖြစ်ကြပါသည်ဟု ပြောဆိုကြသည်။
[15] အလ္လာဟ်အရှင်မြတ်သည်လည်း သူတို့အား ပြန်လည်ပြက်ရယ်ပြု(တုံ့ပြန် အစားပေး)လိုက်တော်မူသည်၊* ထို့အပြင် သူတို့အား သူတို့၏ကုဖ်ရ် ငြင်းပယ်မှုလမ်းလွဲမှုထဲ၌ တဝဲလည်လည်ဖြစ်လျက် (ရှိနေစေရန်) အရှည်ဆွဲထားလိုက်တော်မူသည်။
[16] ထိုသူတို့သည် လမ်းမှားကို လမ်းမှန်နှင့် အလဲလှယ်လုပ်ပြီး ဝယ်ယူလိုက်ကြသူများသာ ဖြစ်ကြသည်။ ထို့ကြောင့် သူတို့၏အရောင်းအဝယ်*သည် (သူတို့အား) အကျိုးအမြတ်မပေးသည့်အပြင် သူတို့သည် လမ်းမှန်ရရှိသူများလည်း မဟုတ်ခဲ့ကြတော့ပေ။
[17] သူတို့၏ပမာသည် အကြင်သူနှင့်တူသည်၊ ထိုသူသည် မီးကိုမွှေးခဲ့၏။ ထို့ကြောင့် ၎င်း၏အနီးအနားမှအရာများသည် အလင်းရောင်ရရှိသွားခဲ့ကြသောအခါ* အလ္လာဟ်အရှင်မြတ်သည် ထိုအလင်းရောင်ကို ယူသွားလိုက်တော်မူသည်။ ထို့နောက် သူတို့အား အမှောင်ထဲ၌ စွန့်လွှတ်ထားခဲ့လိုက်သည့်အပေါ် သူတို့သည် (မည်သည့်အရာကိုမျှ) မမြင်ကြရတော့ပေ။
[18] ထို(အယောင်ဆောင်)သူများသည် နားပင်းသူများ၊ ဆွံ့အသူများနှင့် မျက်စိကန်းသူများဖြစ်ကြသည့်အတွက် သူတို့သည် (အမှန်တရားဘက်သို့) ပြန်လှည့်ကြတော့မည်မဟုတ်ပေ။
[19] သို့မဟုတ်၊ ထို(အယောင်ဆောင်)သူများသည် အမှောင်များ(အထပ်ထပ်)နှင့် မိုးချုန်းသံအပြင် လျှပ်စီးလက်ခြင်းလည်းပါဝင်သော ကောင်းကင်မှ သည်းထန်စွာရွာသွန်းသည့်မိုး(ထဲ၌ရှိနေသူများ)နှင့် ပမာတူကြသည်။ ထိုသူများသည် မိုးချုန်းသံများ ကြားရသောအခါ သေရမည်ကိုကြောက်ပြီး၊ သူတို့၏လက်ချောင်းများကို သူတို့၏နားများတွင် (ထိုးပြီး ပိတ်ဆို့)ပြုလုပ်ထားလိုက်ကြသည်။ ထို့ပြင် အလ္လာဟ်အရှင်မြတ်သည် မယုံကြည်သော ကာဖိရ်ငြင်းပယ်သူများအား (မည်သည့်နေရာမျှ ထွက်ပြေး၍မရရန် တန်ခိုးတော်နှင့်) ဝန်းရံထားတော်မူသော အရှင်ဖြစ်တော်မူသည်။
[20] လျှပ်စီးလက်ခြင်းသည် သူတို့၏အမြင်အာရုံများကို ဆတ်ခနဲယူသွားမည့်ဆဲဆဲဖြစ်သည်။ လျှပ်စီးလက်ခြင်းသည် သူတို့အတွက် လင်းဝင်းမှုပြုလုပ်ပေးသည့်အခါတိုင်း သူတို့သည် ထိုအလင်းရောင်ထဲတွင် သွားလာမှုပြုကြသည်။ ၎င်းနောက် သူတို့အပေါ်တွင် အမှောင်ကျရောက်လာပြန်သောအခါ သူတို့သည် ရပ်တန့်နေလိုက်ကြသည်။* ထို့ပြင် အကယ်၍သာ အလ္လာဟ်အရှင် အလိုတော်ရှိတော်မူခဲ့ပါလျှင် အမှန်မုချ အရှင်မြတ်သည် သူတို့၏ အကြားများနှင့်အမြင်များကို ရုပ်သိမ်းပစ်တော်မူခဲ့လိမ့်မည်။ အမှန်စင်စစ် အလ္လာဟ်အရှင်မြတ်သည် အရာရာတိုင်းအပေါ်တွင် အလွန်စွမ်းဆောင်နိုင်တော်မူသော အရှင်ဖြစ်တော်မူသည်။
[21] အို-လူသားအပေါင်းတို့၊ အသင်တို့သည် အသင်တို့အား မွေးမြူဖန်ဆင်းတော်မူသောအရှင်ကို ကြောက် ရွံ့အပြစ်ရှောင် ကောင်းကျိုးဆောင်သူများဖြစ်ကြရန်အတွက် ခဝပ်ကိုးကွယ်ကြပါ။ ထိုအရှင်သည် အသင်တို့ကိုသာမက အသင်တို့မတိုင်မီရှိသူများကိုလည်း ဖန်ဆင်းတော်မူခဲ့သည့်အရှင် ဖြစ်တော်မူသည်။
[22] ထိုအရှင်မြတ်သည် အသင်တို့အတွက် ကမာ္ဘမြေကြီးကိုအခင်းအဖြစ်နှင့် ကောင်းကင်ကိုအမိုးအဖြစ် ပြုလုပ်ပေးတော်မူခဲ့သည်။ ထို့ပြင် အရှင်မြတ်သည် ကောင်းကင်မှ မိုးရေကို ရွာသွန်းစေတော်မူခဲ့ပြီး အသင်တို့အတွက် ထိုမိုးရေဖြင့် စားနပ်ရိက္ခာအဖြစ် အသီးအနှံများကို ထွက်ပေါ်စေတော်မူခဲ့သည်။ သို့ဖြစ်ရာ အသင်တို့သည် သိနေကြလျက် အလ္လာဟ် အရှင်မြတ်နှင့် ယှဉ်တွဲကိုးကွယ်မှုများ မပြုလုပ်ကြနှင့်။
[23] ထို့ပြင် အကယ်၍ အသင်တို့သည် ငါအရှင်မြတ်က ငါအရှင်မြတ်၏ကျွန်(ဖြစ်သူ တမန်တော်မုဟမ္မဒ်(ဆွ) အပေါ်ချပေးတော်မူခဲ့သည့်အရာ (ကုရ်အာန်ကျမ်းတော်မြတ်)ကို (ငါအရှင်၏ထံမှမဟုတ်၊ မုဟမ္မဒ်(ဆွ)သည် မိမိသဘောနှင့်ပြောခဲ့သည်ဟု အသင်တို့) သံသယဖြစ်ခဲ့ကြသည်ဆိုလျှင် အသင်တို့အနေဖြင့် (စကားကြွယ်ဝသည့် အာရဗ်များပီသစွာ) ငါအရှင်ချပေးတော်မူခဲ့သော ထို(ကုရ်အာန်)နှင့်တူသည့် စူရဟ်ဏ္ဍတစ်ပုဒ် (မျှရေးသားပြုစုပြီး) ယူဆောင်လာခဲ့ကြပါ။ ထို့နောက် (တမန်တော်မုဟမ္မဒ်(ဆွ)၏စကားဟု အသင်တို့ပြောသည်မှာ မှန်မည်ဆိုလျှင်) အသင်တို့သည် စကားမှန်ပြောသူများဖြစ်ကြမည်ဆိုလျှင် အလ္လာဟ် အရှင်မြတ်မှလွဲ၍ အသင်တို့ကို သက်သေခံပေးမည့်သူ(ကူညီမည့်)သူများကိုလည်း ခေါ်ဆောင်လာခဲ့ကြပါ။
[24] ထို့နောက် (အာရဗ်များသည် လူရေးသည့်ကုရ်အာန်ဟုပြောပြီး လက်တွေ့မရေးနိုင်ကြသောအခါ အလ္လာဟ်အရှင်မြတ်က သူတို့အားမိန့်ကြားတော်မူသည်) အကယ်၍ အသင်တို့သည် (အတိတ်၌ ကုရ်အာန်ကျမ်းတော်မြတ်နှင့်ပတ်သက်၍ ယှဉ်ပြိုင်မှုများ) မပြုလုပ်နိုင်ခဲ့ကြဘူးဆိုလျှင်၊ ထို့ပြင် (အနာဂတ်၌လည်း) မည်သည့်အခါမှ အသင်တို့ ပြုလုပ်နိုင်ကြမည် မဟုတ်ပေ။* သို့ဖြစ်ပေရာ အသင်တို့သည် ငရဲမီးမှ ကြောက်ရွံ့ရှောင်ကြဉ်ကြပါ။ ထိုငရဲမီး၏မီးစာသည် (ငြင်းပယ်သော ကာဖိရ်) လူသားများနှင့် (ကာဖိရ်များ၏ကိုးကွယ်ရာ) ကျောက်တုံးများဖြစ်သည်။* ထိုငရဲမီးသည် ကာဖိရ်ငြင်းပယ်သူများအတွက် အသင့်ပြုလုပ်ထားပြီးဖြစ်သည်။
[25] ၎င်းနောက် အသင်(တမန်တော်)သည် အီမာန်ယုံကြည်ကြပြီး ကောင်းမြတ်သောလုပ်ရပ်များပြုလုပ်သည့်သူများကို သတင်းကောင်းပေးလိုက်ပါ။ အမှန်စင်စစ် ၎င်းတို့အတွက် ဂျန္နသ်သုခဘုံများရှိသည်။ ထိုသုခဘုံများ၏အောက်တွင် စမ်းရေချောင်းများစီးဆင်းနေသည်။* သုခဘုံသားများသည် ထိုသုခဘုံထဲမှ သစ်သီးဝလံ ကျွေးမွေးခြင်းခံရသည့်အခါတိုင်းတွင် ”ဤသစ်သီးဝလံသည် ယခင်(လောကမှာရှိစဉ်)က ကျွန်ုပ်တို့ကို ကျွေးမွေးခြင်းခံခဲ့ရပြီးဖြစ်သည်”ဟု ပြောဆိုကြလိမ့်မည်။ ၎င်းနောက် သူတို့သည် (အရသာကွဲပြီး) ပုံသဏ္ဍာန်တူသော သစ်သီးဝလံကိုလည်း ကျွေးမွေးခြင်းခံကြရပေဦးမည်။ ထို့ပြင် သူတို့အတွက် သုခဘုံထဲတွင် စင်ကြယ်သန့်ပြန့်သည့် ဇနီးကြင်ရာများလည်း ရှိကြပေဦးမည်။* ထို့ပြင် သူတို့သည် သုခဘုံထဲတွင် အမြဲထာဝရ စံမြန်းနေထိုင်လျက်ရှိကြမည်။
[26] အမှန်စင်စစ် အလ္လာဟ်အရှင်မြတ်သည် ခြင်ကောင်နှင့်ပင်ဖြစ်စေ၊ ခြင်ကောင်ထက်သေးငယ်သောအရာ သို့မဟုတ် ကြီးမားသောအရာနှင့်ပင်ဖြစ်စေ ပုံပမာခိုင်းနှိုင်းပြခြင်းကို ရှက်တော်မမူပေ။ မုအ်မင်န်ယုံကြည်သူများသည် ထိုပုံဆောင်ချက်ကို သူတို့အား ဖန်ဆင်းမွေးမြူတော်မူသော အရှင်သခင့်ထံတော်မှ အမှန်ဖြစ်သည်ဟူ၍သာ သိနားလည်ကြသည်။ ကာဖိရ်ငြင်းပယ်သူများကမူ (ကဲ့ရဲ့ပြစ်တင်သည့်အနေဖြင့်) အလ္လာဟ်အရှင်မြတ်သည် ဤပုံပမာအားဖြင့် မည်သည့်အရာကိုရည်ရွယ်တော်မူခဲ့ပါသနည်းဟု ပြောဆိုကြသည်။ အလ္လာဟ်အရှင်မြတ်သည် ထိုပုံပမာဖြင့် အမြောက်အမြားကို လမ်းမှားပို့ဆောင်တော်မူပြီး အမြောက်အမြားကို လမ်းမှန်ညွှန်ကြားပြသ ပို့ဆောင်တော်မူသည်။ ထို့ပြင် (စင်စစ်) အလ္လာဟ်အရှင်မြတ်သည် ထိုပုံပမာဖြင့် အရှင်မြတ်၏အမိန့်တော်ကို ဖီဆန်သူများကလွဲ၍ မည်သူ့ကိုမျှ လမ်းလွဲစေတော်မမူပေ။
[27] ထိုသူများသည် အလ္လာဟ်အရှင်မြတ်နှင့် သစ္စာကတိ ခိုင်မာစွာ ပြုပြီးနောက်မှ ထိုကတိကဝတ်ကို ဖောက်ဖျက်ကြသည်။ ထို့ပြင် အလ္လာဟ်အရှင်မြတ်သည် (ဆွေမျိုးသားချင်းများနှင့် ရင်းနှီးစွာ) ပေါင်းသင်းဆက်ဆံရန် အမိန့်ချထားတော်မူသည်ကိုလည်း အဆက်ဖြတ်ကြသည်။ ထို့ပြင် သူတို့သည် ကမာ္ဘမြေပေါ်၌လည်း ဖျက်လိုဖျက်ဆီးပြုလုပ်ကြသည်။ (စင်စစ်)သူတို့သာ ပျက်စီးဆုံးရှုံးမည့်သူများဖြစ်ကြသည်။
[28] အသင်တို့သည် အလ္လာဟ်အရှင်မြတ်အား မည်သည့်နည်းဖြင့် ငြင်းဆိုကြမည်နည်း။ (အမှန်မှာ) အသင်တို့သည် သေသူသက်မဲ့များသာဖြစ်ခဲ့ကြပါလျက် ၎င်းနောက်တွင် အရှင်မြတ်သည် အသင်တို့အား အသက်ရှင်သန်စေတော်မူခဲ့သည်။ ၎င်းနောက် တစ်ဖန် အရှင်မြတ်သည် အသင်တို့အား သေစေတော်မူဦးမည်။ ထို့နောက် တစ်ဖန် အရှင်မြတ်သည် အသင်တို့အား ရှင်စေတော်မူဦးမည်။ ၎င်းနောက်တွင် အသင်တို့သည် ထိုအရှင်မြတ်ထံသို့ ပြန်လည်ရောက်ရှိစေခြင်းခံကြရမည်။
[29] ထိုအရှင်မြတ်သည် အသင်တို့အတွက် မြေပထဝီ၌ အလုံးစုံသောအရာကို ဖန်ဆင်းတော်မူခဲ့သည်။ ၎င်းနောက် အရှင်မြတ်သည် ကောင်းကင်ဘက်သို့ လှည့်တော်မူခဲ့ပြီး မိုးခုနှစ်ထပ်ကို နေသားတကျဖြစ်ရန် ပြုလုပ်တော်မူခဲ့သည်။ ထို့ပြင် အရှင်မြတ်သည် အရာရာတိုင်းအား အကြွင်းမဲ့သိရှိသောမူသော အရှင်ဖြစ်တော်မူသည်။
[30] ထို့ပြင် တစ်ခါက အသင်(တမန်တော်)အား ဖန်ဆင်းမွေးမြူသောအရှင်သည် ကောင်းကင်တမန်များအား အမှန်စင်စစ် ငါအရှင်သည် ကမာ္ဘမြေပေါ်၌(လူသားများ၏ဖခင် အာဒမ်(အလိုင်ဟိ)ကို) ကိုယ်စားလှယ်တစ်ဦး(အဖြစ်) ခန့်အပ်တော်မူမည်ဟု အမိန့်ရှိတော်မူသောအခါ ကောင်းကင်တမန်များသည် (ယခုကဲ့သို့)လျှောက်ထားကြသည်။ (အို-အရှင်) အရှင်မြတ်သည် ချို့တဲ့ခြင်းဟူသမျှမှ သန့်ပြန့်စင်ကြယ်တော်မူကြောင်း ချီးမွမ်းမှုနှင့်တကွ မြင့်မြတ်မှုသည် အရှင်မြတ်အတွက်ဖြစ်တော်မူကြောင်း ကျွန်ုပ်တို့ပြောဆိုတသနေကြပါလျက် ကမာ္ဘမြေတွင် ပျက်စီးရာပျက်စီးကြောင်းပြုလုပ်၍ (အချင်းသတ်ဖြတ်ပြီး) သွေးထွက်သံယိုပြုလုပ်ကြမည့်သူများကို ကိုယ်စားလှယ်ခန့်တော်မူပါမည်လော။ (ထိုအခါ) အရှင်မြတ်သည် အသင်တို့မသိသည့်အရာများကို အမှန်မုချ ငါအရှင်မြတ် သိရှိတော်မူသည်ဟု ပြောဆိုမိန့်ကြားတော်မူခဲ့သည်။
[31] ထို့ပြင် အရှင်မြတ်သည် (လူသားအားလုံး၏ဖခင်)အာဒမ်*အား (အရာဝတ္ထုများ၏) အမည်များအားလုံးကို သင်ပေးတော်မူခဲ့သည်။ ၎င်းနောက် အရှင်မြတ်သည် ထိုအမည်များပေးထားသည့်အရာအားလုံးတို့ကို ကောင်းကင်တမန်များရှေ့တွင် ပြသတော်မူခဲ့ပြီး မိန့်ကြားတော်မူခဲ့သည်။ အသင်တို့သည် အမှန်စကားပြောဆိုသူများဖြစ်ကြပါလျှင် ဤအရာဝတ္ထုများ၏အမည်များကို ငါ့အား ပြောပြကြပါ။
[32] ကောင်းကင်တမန်များက ပြောဆိုခဲ့ကြသည်၊ အို-အရှင် အရှင်မြတ်သည် ချို့တဲ့မှုဟူသမျှမှ သန့်ရှင်းစင်ကြယ်တော်မူပါသည်။ အရှင်မြတ် ကျွန်ုပ်တို့အား သင်ပေးထားသည်မှလွဲ၍ ကျွန်ုပ်တို့တွင် မည်သည့်အသိမျှမရှိပါ။ အရှင်မြတ်သာလျှင် အကြွင်းမဲ့သိတော်မူသောအရှင်၊ ပညာဉာဏ်အမြော်အမြင်နှင့် အလွန်ပြည့်စုံတော်မူသောအရှင် ဖြစ်တော်မူပါသည်။
[33] အရှင်မြတ် အမိန့်ရှိတော်မူခဲ့သည်။ အို-အာဒမ်၊ အသင်သည် ကောင်းကင်တမန်များအား အရာဝတ္ထုများ၏အမည်များကို ပြောပြလိုက်ပါ။ ထို့နောက် (လူသားအားလုံး၏ဖခင်)အာဒမ်က ကောင်းကင်တမန်များအား အရာဝတ္ထုများ၏အမည်များကို ပြောပြခဲ့သောအခါ အရှင်မြတ်သည် (ကောင်းကင်တမန်များအား) မိန့်ကြားတော်မူခဲ့သည်။ ငါအရှင်မြတ်သည် ကောင်းကင်များနှင့် မြေပထဝီ၏လျှို့ဝှက်ချက်များကို သိရှိတော်မူသည်ဟု အသင်တို့အား မိန့်ကြားတော်မမူခဲ့သလော။ ထို့ပြင် ငါအရှင်မြတ်သည် အသင်တို့ ထုတ်ဖော်ပြောဆိုသည်များကိုသာမက အသင်တို့လျှို့ဝှက်ထားသည်များကိုလည်း သိရှိတော်မူသည်။
[34] ထို့ပြင် ငါအရှင်မြတ်သည် ကောင်းကင်တမန်များအား အသင်တို့သည် အာဒမ်ကိုဦးချကြ* ဟု အမိန့်ပေးတော်မူသည့်အခါ အိဗ်လီစ်မှလွဲ၍ ကောင်းကင်တမန်အားလုံးသည် (အာဒမ်(အလိုင်ဟိ)ကို) ဦးချခဲ့ကြသည်။ အိဗ်လီစ်မှာမူ ငြင်းပယ်ပြီး မာနထောင်လွှားခဲ့သည်။* ထို့နောက် သူသည် ကာဖိရ်များထဲ၌ပါဝင်သွားခဲ့တော့သည်။
[35] ၎င်းပြင် ငါအရှင်မြတ်က မိန့်ကြားတော်မူခဲ့သည်၊ အို-အာဒမ်၊ အသင်နှင့်အသင်၏ဇနီးကြင်ရာတို့သည် ဂျန္နသ်သုခဘုံတွင် နေထိုင်ပြီး အသင်တို့နှစ်ဦးသည် ထိုသုခဘုံတွင် အသင်နှစ်ဦးအလိုရှိသည့်နေရာမှ စိတ်ဆန္ဒရှိသမျှ ဖောသီစွာ စာသုံးကြပါ။ ထို့ပြင် အသင်တို့နှစ်ဦးသည် ဤအပင်၏အနီးကို မကပ်ကြနှင့်။* ထိုသို့မဟုတ်ဘဲ(ကပ်ခဲ့လျှင်) အသင်တို့နှစ်ဦးသည် အပြစ်ကျူးလွန်သူများထဲ၌ ပါဝင်သွားလိမ့်မည်။
[36] ထို့နောက် ရှိုင်သွာန်သည် သူတို့နှစ်ဦးအား ထိုသစ်ပင်နှင့်ပတ်သက်၍ (သွေးဆောင်ဖြားယောင်းကာ) တိမ်းပါးချွတ်ချော်စေခဲ့သည်။ ထို့ပြင် သူတို့နှစ်ဦးရှိသောနေရာ ဂျန္နသ်မှ သူတို့နှစ်ဦးအား ထွက်စေခဲ့သည်။ ထို့နောက် ငါအရှင်မြတ်က မိန့်ကြားတော်မူခဲ့သည်။ အသင်တို့ (ဤနေရာမှ) ဆင်းသွားကြ၊ အသင်တို့ထဲမှအချို့သည် အချို့အတွက် ရန်သူများပင်ဖြစ်ကြမည်။ အသင်တို့အတွက် ကမာ္ဘမြေပြင်တွင် အချိန်တစ်ခုအထိ နေရာထိုင်ခင်းနှင့် အကျိုးခံစားမှုရရှိလိမ့်မည်။
[37] ထို့နောက် (လူသားအားလုံး၏ဖခင်)အာဒမ်သည် ၎င်းအား ဖန်ဆင်းမွေးမြူတော်မူသောအရှင်မြတ်ထံမှ အချို့(ခွင့်လွှတ်အသနားခံနည်း) စကားရပ်များကို သင်ယူခဲ့(ပြီး ဝန်ချတောင်းပန် အသနားခံ)လိုက်သည်။ ထို့အတွက် အရှင်မြတ်သည် (၎င်းဘက်သို့ သနားကရုဏာတော်နှင့်လှည့်ပြီး ၎င်း၏ဝန်ချတောင်းပန်မှုကို) လက်ခံခွင့်လွှတ်လိုက်တော်မူခဲ့သည်။ အမှန်စင်စစ် အရှင်မြတ်သာလျှင် အမှားဝန်ခံမှုကို အကြိမ်ကြိမ်လက်ခံ ခွင့်လွှတ်တော်မူသောအရှင်၊ အလွန်သနားကြင်နာတော်မူသောအရှင် ဖြစ်တော်မူသည်။
[38] ငါအရှင်မြတ် မိန့်ကြားတော်မူခဲ့သည်။ အသင်တို့အားလုံး ဤဂျန္နသ်သုခဘုံမှ ဆင်းသွားလိုက်ကြပါ။ ထို့နောက် အကယ်၍ အသင်တို့ထံသို့ ငါအရှင်မြတ်ထံမှ တရားလမ်းညွှန်မှု အမှန်မုချ ကျရောက်လာလျှင် မည်သူမဆို ငါအရှင်မြတ်၏လမ်းညွှန်မှုကို လိုက်နာပါမူ ထိုသူများအပေါ်၌ စိုးရိမ်ကြောက်ရွံ့စရာလည်း ရှိမည်မဟုတ်သည့်အပြင် သူတို့သည် ပူဆွေးကြရမည်လည်း မဟုတ်ပေ။
[39] ထို့ပြင် အကြင်သူတို့သည် ငြင်းပယ်ခဲ့ကြပြီး ငါအရှင်မြတ်၏တရားတော်များကို မဟုတ်မမှန်ဟု လိမ်လည်ပြောဆိုခဲ့ကြသည်၊ ထိုသူများသည် ငရဲသားများပင်ဖြစ်ကြသည်။ သူတို့သည် ထိုငရဲထဲတွင် အမြဲထာဝစဉ်နေကြရမည့်သူများဖြစ်ကြသည်။
[40] အို-အစ္စရာအီလ်*မျိုးနွယ်ဝင်အပေါင်းတို့၊ အသင်တို့အား ငါအရှင်ကျေးဇူးပြုတော်မူထားခဲ့သည့် ဂုဏ်ကျေးဇူးတော်များကို သတိရကြပါ။ ထို့နောက် အသင်တို့သည် ငါအရှင်မြတ်နှင့်ချုပ်ဆိုထားသော ကတိသစ္စာကို ပြည့်ဝစွာဆောင်ရွက်ကြပါ။ (သို့ဖြစ်လျှင်) ငါအရှင်မြတ်သည်လည်း အသင်တို့နှင့်ချုပ်ဆိုထားသော ကတိသစ္စာကို ပြည့်ဝစွာဆောင်ရွက်တော်မူမည်။ သို့ဖြစ်ရာ အသင်တို့သည် ငါအရှင်မြတ်ကိုသာ ကြောက်ရွံ့ကြပါ။
[41] ထို့ပြင် အသင်တို့သည် ငါအရှင်မြတ် ချပေးတော်မူခဲ့သောအရာ(ကုရ်အာန်ကျမ်းတော်)ကို အီမာန်ယုံကြည်ကြပါ။ ထို(ကုရ်အာန်)ကျမ်းသည် အသင်တို့ထံတွင်ရှိသောကျမ်းဂန်များကို ထောက်ခံသောကျမ်းဖြစ်သည်။* ထို့ပြင် အသင်တို့သည် ထို(ကုရ်အာန်)ကျမ်းတော်မြတ်အား ပထမဆုံး ငြင်းဆိုသူများမဖြစ်ကြနှင့်။ ထို့ပြင် အသင်တို့သည် ငါအရှင်မြတ်၏တရားများကို တန်ဖိုးအနည်းငယ်နှင့်လဲလှယ်ရောင်းချခြင်း မပြုကြနှင့်။ ထို့ပြင် အသင်တို့သည် ငါအရှင်မြတ်ကိုသာ ကြောက်ရွံ့ကြပါ။
[42] ထို့ပြင် အသင်တို့သည် အမှန်(တရား)ကို အမှား(မတရား)နှင့် မရောနှောကြနှင့်။ ထို့ပြင် အသင်တို့သည် အမှန်တရားများကို သိပါလျက်နှင့် ဖုံးကွယ်ထိမ်ချန်၍ မထားကြနှင့်။
[43] ထို့ပြင် အသင်တို့သည် စွလာသ်* ဝတ်ပြုကြပါ။ ထို့ပြင် ဇကာသ်* ပေးဆောင်ကြပါ။ ထို့ပြင် အသင်တို့သည် ကိုင်းညွှတ်ရိုကျိုးသူများနှင့် အတူတကွ ကိုင်းညွှတ်ရိုကျိုးကြပါ။
[44] အသင်တို့သည် လူများအား ကောင်းမှုပြုလုပ်ရန် အမိန့်ပေးနေကြပြီး အသင်တို့ကိုယ် အသင်တို့ကိုမူ မေ့လျော့နေကြသလော။ (စင်စစ်)အသင်တို့သည် ကျမ်းဂန်ကို ဖတ်ရွတ်နေကြပါလျက် အသင်တို့သည် ထို့နောက်တွင်လည်း အသိမရှိကြလေသလော။
[45] ထို့ပြင် အသင်တို့သည် သည်းခံခြင်း၊ စွလာသ်ဝတ်ပြုခြင်းတို့ဖြင့် (အရှင်မြတ်ထံတွင်) အကူအညီတောင်းခံကြပါ။ ထို့ပြင် အမှန်စင်စစ် ထိုစွလာသ်ဝတ်ပြုမှုသည် ကြောက်ရွံ့ရိုးကျိုးသူများမှလွဲ၍ (အခြားသူများအတွက်) အလွန်(ခက်ခဲ)ကြီး(လေး)သည့် တာဝန်ကြီးဖြစ်သည်။
[46] ထို(ကြောက်ရွံ့ရိုးကျိုး)သူများသည် အမှန်မုချ သူတို့အား ဖန်ဆင်းမွေးမြူတော်မူသော အရှင်မြတ်ကို ဖူးတွေ့ကြရမည့်သူများဖြစ်သည်ဟု ယုံကြည်ကြသည့်အပြင် ထိုအရှင်မြတ်ထံသို့ ပြန်လှည့်ကြရမည့်သူများဖြစ်သည်ဟူ၍လည်း ယုံကြည်ကြသည်။
[47] အို-အစ္စရာအီလ်မျိုးနွယ်အပေါင်းတို့၊ အသင်တို့အပေါ်တွင် ငါအရှင်ပြုထားခဲ့သော ကျေးဇူးတော်များကိုသာမက ငါအရှင် အသင်တို့အား (အသင်တို့၏ခေတ်ရှိ) စကြဝဠာအပေါင်းထက် မြင့်မြတ်မှုချီးမြှင့်တော်မူခဲ့သည်ကိုလည်း သတိရကြပါ။
[48] ထို့ပြင် အသင်တို့သည် အကြင်နေ့အား ကြောက်ရွံ့၍ မိမိကိုယ်ကိုကာကွယ်ကြပါ။ ထိုနေ့တွင် မည်သူကမျှ မည်သူ့အား မည်သည့်အကျိုးကိုမျှ ပြုနိုင်မည်မဟုတ်ပေ။ ထို့ပြင် မည်သူ့ထံကမှ အသနားခံလိုက်လံပြောဆိုပေးခြင်း* ကိုလည်း လက်ခံခြင်းခံရမည်မဟုတ်ပေ။ ၎င်းပြင် မည်သူ့ထံကမှ(အအ်မာလ်လုပ်ရပ်များကို) အစားထိုးလဲလှယ်ယူခြင်းခံရမည်လည်းမဟုတ်ပေ။ ထို့ပြင် သူတို့သည် ကူညီခြင်းခံရမည်လည်းမဟုတ်ပေ။
[49] ထို့ပြင် တစ်ခါက ငါအရှင်သည် အသင်တို့အား ဖိရ်အောင်န်*၏ အခြွေအရံများ၏အန္တရာယ်မှ ကယ်တင်တော်မူခဲ့သည်။ သူတို့သည် အသင်တို့အား အလွန်ဆိုးရွားသည့် ဘေးဒုက္ခပေးကြသည်။ သူတို့သည် အသင်တို့၏ သားယောက်ျားလေးများကို သတ်ဖြတ်ကြပြီး အသင်တို့၏(သမီး)မိန်းမများကို (သေးသိမ်မှုထဲမှာနစ်မြုပ်နေစေရန်) မသတ်ဘဲအရှင်ထားကြသည်။ ထို့ပြင် ၎င်းထဲတွင် အသင်တို့အား ဖန်ဆင်းမွေးမြူတော်မူသော အရှင်မြတ်ထံမှ ကြီးကျယ်သည့် စမ်းသပ်ချက်ရှိသည်။
[50] ထို့ပြင် တစ်ခါက ငါအရှင်သည် အသင်တို့အတွက် ပင်လယ်ကိုခွဲပြီး အသင်တို့အား (ဖိရ်အောင်န်၏ အခြွေအရံများ၏အန္တရာယ်မှ) ကယ်တင်တော်မူခဲ့သည်။ ထို့နောက် အသင်တို့ကြည့်မြင်လျက်ရှိစဉ်၌ပင် ငါအရှင်သည် ဖိရ်အောင်န်၏ အခြွေအရံများအား နစ်မြုပ်စေတော်မူခဲ့သည်။
[51] ထို့ပြင် တစ်ခါက ငါအရှင်သည် (တမန်တော်)မူစာအား ညပေါင်းလေးဆယ်၏ ကတိကဝတ်ကိုပြုတော်မူခဲ့သည်။ ထို့နောက် ၎င်း(တမန်တော်)၏နောက်ကွယ်တွင် အသင်တို့သည် ကျူးလွန်သူများဖြစ်လျက် နွားငယ်ကို ကိုးကွယ်ရာအဖြစ်ပြုလုပ်ခဲ့ကြသည်။
[52] ၎င်းပြင် အသင်တို့သည် ထိုကဲ့သို့နွားငယ်အား ကိုးကွယ်ကြပြီးနောက်၌ပင် အသင်တို့သည် ငါအရှင်မြတ်အား ကျေးဇူးသိကြရန်အတွက် ငါအရှင်သည် အသင်တို့အား ခွင့်လွှတ်တော်မူခဲ့သည်။
[53] ထို့ပြင် တစ်ခါက ငါအရှင်မြတ်သည် အသင်တို့ တရားရကြရန်အတွက် (တမန်တော်)မူစာအား (သောင်ရာသ်)ကျမ်းဂန်နှင့် အမှားအမှန်ခွဲခြားပေးသောအရာကို ပေးသနားတော်မူခဲ့သည်။
[54] ထို့ပြင် တစ်ခါက (တမန်တော်)မူစာသည် ၎င်း၏အမျိုးသားများကိုပြောကြားခဲ့သည် -အို- ကျွန်ုပ်၏အမျိုးသားအပေါင်းတို့၊ အမှန်စင်စစ် အသင်တို့သည် နွားငယ်အားကိုးကွယ်၍ အသင်တို့ကိုယ်ကို အသင်တို့နှိပ်စက်ခဲ့ကြပြီ၊ သို့ဖြစ်ရာ အသင်တို့သည် အသင်တို့အား ဖန်ဆင်းမွေးမြူတော်မူသောအရှင်မြတ်ထံတွင် ဝန်ချတောင်းပန် အသနားခံကြပါ။ ၎င်းပြင် အသင်တို့သည် အသင်တို့အချင်းချင်း သတ်ဖြတ်ကြပါ။* ထို(ဝန်ချတောင်းပန်သည့်အနေနှင့် အချင်းချင်းသတ်ဖြတ်ခြင်းသည်) အသင်တို့အတွက် အသင်တို့အား ဖန်ဆင်းမွေးမြူတော်မူသော အရှင်မြတ်ထံတော်တွင် ကောင်းမြတ်သည့်အရာဖြစ်သည်။ ထို့နောက် အလ္လာဟ်အရှင်မြတ်သည် အသင်တို့၏ဝန်ချတောင်းပန်ခြင်းကို သနားကရုဏာနှင့်လှည့်ပြီး လက်ခံခွင့်လွှတ်တော်မူခဲ့သည်။ အမှန်စင်စစ် အရှင်မြတ်သည် အမှားဝန်ခံမှုကို အကြိမ်ကြိမ် လက်ခံခွင့်လွှတ်တော်မူသောအရှင်၊ အလွန်သနားကြင်နာတော်မူသောအရှင် ဖြစ်တော်မူသည်။
[55] ထို့ပြင် တစ်ခါက အသင်တို့က ပြောဆိုကြသည် -“အို- (တမန်တော်)မူစာ၊ ကျွန်ုပ်တို့သည် အလ္လာဟ်အရှင်မြတ်အား မျက်ဝါးထင်ထင် မဖူးမြင်ရမချင်း* ကျွန်ုပ်တို့သည် အသင်(တမန်တော်)ကို လုံးဝယုံကြည်ကြမည်မဟုတ်ပေ။“ ထို(သို့ပြောဆိုကြသည့်အတွက်)ကြောင့် အသင်တို့အား မိုးကြိုးလောင်မီးက ဖမ်းဆီးခဲ့သည်။ အသင်တို့လည်း (ထိုအရာကို)တွေ့မြင်လျက်ရှိခဲ့ကြသည်။
[56] ထို့နောက် ငါအရှင်မြတ်သည် အသင်တို့သေပြီးနောက်မှပင် အသင်တို့ ကျေးဇူးသိတတ်ကြရန် အသင်တို့အား တစ်ဖန်ရှင်ပြန်ထစေတော်မူခဲ့သည်။
[57] ထို့ပြင် ငါအရှင်သည် အသင်တို့ပေါ်၌ မိုးတိမ်များကို အရိပ်အာဝါသပြုလုပ်ပေးတော်မူခဲ့သည်သာမက ငါအရှင်သည် မန်းဟုခေါ်သည့် နှင်းမုန့်နှင့် ငုံးသတ္တဝါတစ်မျိုးကို ချပေးတော်မူခဲ့သည်။ အသင်တို့သည် ငါအရှင် ပေးသနားတော်မူသော ကောင်းမြတ်သည့် စားနပ်ရိက္ခာများကို စားသုံးကြပါ။ ထို့နောက် သူတို့သည် ငါအရှင်မြတ်အား နှိပ်စက်ညှဉ်းပန်းခဲ့ကြသည် မဟုတ်ပေ။ သို့ရာတွင် သူတို့ကိုယ်သူတို့သာလျှင် နှိပ်စက်ညှဉ်းပန်းခဲ့ကြခြင်းဖြစ်သည်။
[58] ထို့ပြင် တစ်ခါက ငါအရှင်မြတ်သည် မိန့်ကြားတော်မူခဲ့သည်- “အသင်တို့သည် ဤမြို့*သို့ဝင်ရောက်ပြီး မြို့ထဲတွင် မည်သည့်နေရာမှမဆို အသင်တို့ကြိုက်နှစ်သက်ရာကို ဖောသီစွာ စားသုံးကြပါ။ မြ့ိုတံခါးပေါက်ကို ရိုးကျိုးဝပ်တွားလျက်*ဝင်ကြပါ။ ၎င်းပြင် ဟိသွ်သွသွန် “ကျွန်တော်တို့၏အပြစ်များကို ခွင့်လွှတ်တော်မူပါ“ ဟုဆိုကြပါ။ (ထိုအတိုင်းလိုက်နာကြလျှင်) ငါအရှင်သည် အသင်တို့၏မှားယွင်းချက်များကို ခွင့်လွှတ်တော်မူမည်။ ထို့ပြင် ငါအရှင်သည် ကောင်းကျိုးဆောင်ရွက်သူများအား ကုသိုလ်အကျိုးတိုးပြီးပေးသနားတော်မူမည်။
[59] ထို့နောက် ကျူးလွန်ကြသူများသည် သူတို့ကို ပြောကြားထားသည့်စကားနှင့် ဆန့်ကျင်သည့်အခြားစကား*ကို ပြောင်းလဲသုံးစွဲခဲ့ကြသည်။ ထို့ကြောင့် ငါအရှင်သည် ကျူးလွန်ခဲ့ကြသူများအပေါ်တွင် ၎င်းတို့ ဒုစရိုက်ကျူးလွန်ခဲ့ကြခြင်းကြောင့် မိုးကောင်းကင်မှ အပြစ်ဒဏ်(ရောဂါကပ်ဘေး) ချပေးတော်မူခဲ့သည်။
[60] ထို့ပြင် တစ်ခါက (တမန်တော်)မူစာသည် ၎င်း၏အမျိုးသားများအတွက် သောက်ရေကို (ငါအရှင့်ထံ)တောင်းခံခဲ့သည်။ (ထိုအခါ) ငါအရှင်က မိန့်ကြားတော်မူခဲ့သည်- အသင်(တမန်တော်)သည် အသင်၏တောင်ဝှေးဖြင့် ကျောက်တုံးကို ရိုက်လိုက်ပါ။ ထိုအခါ ထိုကျောက်တုံးမှ စမ်းရေချောင်း၁၂ခု ပန်းထွက်*လာခဲ့သည်။ ထိုအုပ်စုများသည် သူတို့၏သောက်သုံးရာနေရာကို သိရှိခဲ့ကြသည်။ (ထိုအခါ အရှင်မြတ်က မိန့်ကြားတော်မူသည်) အသင်တို့သည် အလ္လာဟ်အရှင်မြတ်၏ စားနပ်ရိက္ခာများကို စားကြသောက်ကြပါ။ ထို့နောက် ကမာ္ဘပေါ်တွင် ဖျက်ဆီးသူများအဖြစ်နှင့် ဆူပူသောင်းကျန်းခြင်းမပြုကြနှင့်။
[61] ထို့ပြင် တစ်ခါက အသင်တို့ကပြောဆိုခဲ့ကြသည်- “အို- (တမန်တော်)မူစာ၊ ကျွန်တော်တို့သည် အစားအစာတစ်မျိုးတည်းအပေါ်တွင် သည်းခံမနေနိုင်တော့ပါ။ ထို့အတွက် အသင်(တမန်တော်)အား ဖန်ဆင်းမွေးမြူတော်မူသောအရှင်၏ထံတော်တွင် ဆုတောင်းပေးပါ၊ အရှင်မြတ်သည် ကျွန်ုပ်တို့အတွက် မြေမှပေါက်ရောက်သည့် ဟင်းသီးဟင်းရွက်များ၊ သခွားသီးများ၊ ဂျုံများ၊ ပဲနီလေးများနှင့် ကြက်သွန်နီများကိုပါ ပေါက်ရောက်စေရန်(ဆုတောင်းပေးပါ)။“ ၎င်း(တမန်တော်မူစာ)ကပြောခဲ့သည်- “အသင်တို့သည် အလွန်ကောင်းသော စားနပ်ရိက္ခာများကို အလွန်ညံ့သော စားနပ်ရိက္ခာများနှင့် လဲလှယ်လိုကြသလော။ (သို့ဖြစ်လျှင်) မြ့ိုတစ်မြ့ိုသို့ ဝင်ရောက်နေထိုင်လိုက်ကြပါ၊ ထိုထဲတွင် အမှန်ပင် အသင်တို့တောင်းသည်များကို ရလိမ့်မည်။“* ထို့ပြင် သူတု့ိအပေါ်၌ သေးသိမ်မှုနှင့် ဆင်းရဲမှုသည် (အမြဲ)အတည်ဖြစ်သွားခဲ့သည်။ ထို့ပြင် သူတို့သည် အလ္လာဟ်အရှင်မြတ်၏အမျက်တော်စူးရှမှုကို ခံစားခဲ့ရ(လျက်လှည့်လည်နေကြရ)တော့သည်။ ထိုသို့ဖြစ်ရသည်မှာ သူတို့သည် အလ္လာဟ်အရှင်မြတ်၏ တရားဒေသနာတော်များကို ငြင်းပယ်နေခဲ့ကြပြီး တမန်တော်များကို မတရား သတ်ဖြတ်နေခဲ့ကြခြင်းကြောင့်*ဖြစ်သည်။ ၎င်းသည် သူတို့၏သွေဖည်မှုနှင့် စည်းဖောက်မှုများကြောင့်ဖြစ်သည်။
[62] အမှန်မုချ အီမာန်ယုံကြည်ကြသော မုအ်မင်န်များ*၊ ယဟူဒီများ*၊ နတ်စွ်ရာနီများ* နှင့် စွာဗိအိများ*၊ (၎င်းတို့ထဲမှ) မည်သူမဆို အလ္လာဟ်အရှင်မြတ်နှင့် နောက်ဆုံးနေ့ကို ယုံကြည်ကြပြီး ကောင်းမြတ်သည့်လုပ်ရပ်များကို လုပ်ဆောင်ခဲ့လျှင် သူတို့အတွက် သူတို့အား ဖန်ဆင်းမွေးမြူသောမူသောအရှင်မြတ်ထံတော်တွင် ကုသိုလ်အကျိုး အဆင်သင့်ရှိသည်။ ၎င်းပြင် သူတို့အပေါ်တွင် မည်သည့်စိုးရိမ်စရာမျှလည်းမရှိသည့်အပြင် သူတို့သည် ဝမ်းနည်းပူဆွေးကြရမည်လည်း မဟုတ်ပေ။
[63] ထို့ပြင် တစ်ခါက ငါအရှင်မြတ်သည် အသင်တို့အပေါ်“သွူရ်“တောင်*ကိုပင့်မလျက် အသင်တို့ထံမှ ကတိခန်ဝန်ချက်ကို ရယူတော်မူခဲ့သည်။ (၎င်းနောက် ငါအရှင်မြတ်က မိန့်ကြားတော်မူခဲ့သည်-) “အသင်တို့သည် ကြောက်ရွံ့အပြစ်ရှောင် ကောင်းကျိုးဆောင်သူများဖြစ်ရန်အတွက် ငါအရှင် အသင်တို့အား ပေးသနားတော်မူခဲ့သောအရာ (သောင်ရာသ်ကျမ်းတော်)ကို စွဲမြဲစွာကိုင်ထားကြပါ။ ၎င်းပြင် ထိုကျမ်းထဲ၌ရှိသောတရားတော်များကိုလည်း သတိရကြပါ။“
[64] ၎င်းနောက် အသင်တို့သည် ကတိဝန်ခံချက်ပေးပြီးနောက်မှ (ကုဖ်ရ် ဘက်သို့)နောက်ကြောင်းပြန်လှည့်သွားကြသည်။ ထို့ပြင် အကယ်၍သာ အလ္လာဟ်အရှင်မြတ်၏ကျေးဇူးတော်နှင့် သနားကရုဏာတော်သည် အသင်တို့အပေါ်၌ မရှိခဲ့လျှင် အမှန်မုချ အသင်တို့သည် ဆုံးရှုံးသူများဖြစ်ကြမည်။
[65] ထို့ပြင် အသင်တို့ထဲမှ စနေ(ဥပုသ်)နေ့*နှင့်ပတ်သက်၍ ဖောက်ဖျက်ကျူးလွန်ခဲ့ကြသူများအား ငါအရှင်မြတ်က “အသင်တို့သည် ယုတ်ညံ့သော မျောက်တိရိစာ္ဆန်များဖြစ်ကြလော့“ ဟူ၍ မိန့်ကြားတော်မူခဲ့သည်ကို အသင်တို့ အမှန်စင်စစ် အသိပင်ဖြစ်ခဲ့ကြသည်။
[66] ထို့ပြင် ငါအရှင်မြတ်သည် ၎င်းတို့ခေတ်တွင် ရှိခဲ့ကြသူများနှင့် ၎င်းတို့၏နောင်လာနောက်သားများအတွက် ထိုအဖြစ်အပျက်ကို သတိတရားရယူစရာအဖြစ်နှင့် ကြောက်ရွံ့အပြစ်ရှောင် ကောင်းကျိုးဆောင်သူများအတွက် ဆုံးမဩဝါဒအဖြစ် ပြုတော်မူခဲ့သည်။
[67] ထို့ပြင် တစ်ခါက (တမန်တော်)မူစာသည် ၎င်း၏အမျိုးသားများအား ပြောဆိုခဲ့သည်- အမှန်ပင် အလ္လာဟ်အရှင်မြတ်သည် အသင်တို့အား နွားမတစ်ကောင် လှီးဖြတ်ရန်* အမိန့်ပေးတော်မူသည်။ ထိုအခါ သူတို့က ပြောဆိုဖြေကြားခဲ့ကြသည်- “အသင်(တမန်တော်)သည် ကျွန်ုပ်တို့အား ပြက်ရယ်ပြောင်လှောင်မှု ပြုလုပ်သည်လော။“ ၎င်း(တမန်တော်မူစာ)က ပြောဆိုဖြေကြားခဲ့သည်- ငါသည် အသိအလိမ္မာကင်းမဲ့သူများထဲတွင် အပါအဝင်မဖြစ်စေရန် အလ္လာဟ်အရှင်မြတ်ထံ၌ခိုလှုံ၏။
[68] ထိုအမျိုးသားများက ပြောဆိုခဲ့ကြသည်၊ (အို-တမန်တော်မူစာ)အသင်သည် အသင့်အား ဖန်ဆင်းမွေးမြူတော်မူသော အရှင်မြတ်ထံတော်တွင် ထိုနွားမသည် မည်သို့နွားမဖြစ်သည်ကို ရှင်းလင်းဖော်ပြရန် တောင်းခံပေးပါ။ ၎င်း(တမန်တော်မူစာ)ကပြောခဲ့သည်- အမှန်ပင် အရှင်မြတ်က အမိန့်ရှိတော်မူသည်- အမှန်မုချ ထိုနွားမသည် အိုသည့်နွားမလည်းမဟုတ်၊ ပျိုသည့်နွားမလည်းမဟုတ်ဘဲ အလယ်အလတ်စားဖြစ်သည်။ သို့ဖြစ်ရာ အသင်တို့သည် အမိန့်ပေးခံရသည့်အတိုင်း ပြုလုပ်ဆောင်ရွက်ကြပါ။
[69] ထိုအမျိုးသားများက ပြောဆိုခဲ့ကြသည်၊ (အို-တမန်တော်မူစာ)အသင်သည် အသင့်အား ဖန်ဆင်းမွေးမြူတော်မူသော အရှင်မြတ်ထံတော်တွင် ထိုနွားမသည် မည်သည့်အရာင်အသွေးရှိသော နွားမဖြစ်သည်ကို ရှင်းလင်းဖော်ပြရန် တောင်းခံပေးပါ။ ၎င်း(တမန်တော်မူစာ)ကပြောခဲ့သည်- အမှန်ပင် အရှင်မြတ်က အမိန့်ရှိတော်မူသည်- အမှန်မုချ ထိုနွားမသည် ကြည့်ရှုသူများအား စိတ်ကြည်နူးစေသည့် အဝါရင့်ရောင်ဖြစ်သည်။
[70] သူတို့က(ထပ်မံ) ပြောဆိုခဲ့ကြသည်၊ (အို-တမန်တော်မူစာ)အသင်သည် အသင့်အား ဖန်ဆင်းမွေးမြူတော်မူသော အရှင်မြတ်ထံတော်တွင် ထိုနွားမသည် မည်သို့နွားမမျိုးဖြစ်သည်ကို ရှင်းလင်းဖော်ပြရန် တောင်းခံပေးပါ။ အမှန်ပင် နွားများသည် ကျွန်ုပ်တို့အမြင်တွင် ရုပ်ဆင်းသဏ္ဍာန် ဆင်တူယိုးမှားဖြစ်နေသည့်အတွက်ကြောင့်ဖြစ်ပါသည်။ ထို့ပြင် အလ္လာဟ်အရှင်မြတ် အလိုရှိတော်မူခဲ့ပါလျှင် ကျွန်ုပ်တို့သည် လမ်းမှန်ကို အမှန်ပင် တွေ့သူများဖြစ်ကြပါလိမ့်မည်။
[71] ၎င်း(တမန်တော်မူစာ)ကပြောခဲ့သည်- အမှန်ပင် အရှင်မြတ်က အမိန့်ရှိတော်မူသည်- အမှန်မုချ ထိုနွားမသည် လယ်မြေ၌ထွန်ယက်သည့်ခိုင်းနွားမျိုးလည်းမဟုတ်ပေ၊ (ရေတွင်းမှ ရေသယ်၍) လယ်ယာမြေထဲသို့ ရေသွင်းသည့်နွားမျိုးလည်းမဟုတ်ပေ။ အပြစ်ကင်းစင်ပြီး ၎င်းထဲ၌ မှည့်အစွန်းအထင်း အရောင်ရောခြင်းလည်းမရှိသည့် နွားမမျိုးဖြစ်သည်။ (ထိုအခါ)သူတို့က ပြောခဲ့ကြသည်- ယခုမှပင် အသင်(တမန်တော်)သည် မှန်ကန်ရှင်းလင်းစွာ ဖော်ပြလိုက်သည်။ ၎င်းနောက် သူတို့သည် (ထိုအမိန့်ကို)လိုက်နာရန် နီးစပ်မှုမရှိခဲ့ကြပါဘဲလျက် (မတတ်သာသည့်အဆုံး)* နွားမကို ဇဗဟ်လုပ် လှီးဖြတ်ခဲ့လိုက်ကြသည်။
[72] ထို့ပြင် တစ်ခါက အသင်တို့သည် လူတစ်ဦးအား သတ်ခဲ့ပြီးနောက် ထိုလူသတ်မှုနှင့်ပတ်သက်၍ အသင်တို့အချင်းချင်း တစ်ဦးကိုတစ်ဦး စွပ်စွဲခဲ့ကြသည်။ ထို့နောက် အလ္လာဟ်အရှင်မြတ်သည် အသင်တို့ထိမ်ချန်လျှို့ဝှက်ထားသည့်ကိစ္စကို ဖွင့်ထုတ်ဖော်ပြသည့်အရှင် ဖြစ်တော်မူသည်။
[73] ထို့နောက် ငါအရှင်မြတ်သည် မိန့်ကြားတော်မူခဲ့သည်- အသင်တို့သည် ထိုသူ(သေ)ကို ထို(နွားမ)၏အစိတ်အပိုင်းနှင့် ရိုက်ခတ်လိုက်ကြပါ။ အလ္လာဟ်အရှင်မြတ်သည် ထိုကဲ့သို့ပင် သေသူများကို ရှင်စေတော်မူမည်။ ထို့ပြင် အရှင်မြတ်သည် အသင်တို့နားလည်ကြရန်အတွက် အရှင်မြတ်၏လက္ခဏာများကို ပြသတော်မူသည်။
[74] ထို့နောက် အသင်တို့၏စိတ်နှလုံးများသည် ထို(ကဲ့သို့ အရှင်မြတ်၏နက်ရှိုင်းဆန်းကြယ်သော တန်ခိုးတော်များကို တွေ့မြင်ခဲ့ရပြီး)နောက်လည်း ခက်ထန်မာကျောလာခဲ့သည်။* ၎င်းပြင် ထိုစိတ်နှလုံးများသည် ကျောက်ဆောင်များကဲ့သို့ဖြစ်ခဲ့သည်သာမက ထိုကျောက်ဆောင်များထက်ပင် ပိုမိုပြင်းထန်မာကျောပေသည်။ အဘယ့်ကြောင့်ဆိုသော် ကျောက်ဆောင်များထဲတွင် စမ်ရေချောင်းများစီးထွက်လာသည့် ကျောက်ဆောင်များလည်း အမှန်မုချ ရှိသည်။ ထို့ပြင် ထိုကျောက်ဆောင်များထဲတွင် အက်ကွဲပြီး ရေပန်းထွက်လာသည့် ကျောက်ဆောင်များလည်း အမှန်ပင်ရှိသည်။ ထို့ပြင် ထိုကျောက်ဆောင်များထဲတွင် အလ္လာဟ်အရှင်မြတ်အား ကြောက်ပြီး နိမ့်ဆင်းလာသည့်ကျောက်ဆောင်များလည်း အမှန်ပင်ရှိသည်။ ထို့ပြင် အလ္လာဟ်အရှင်မြတ်သည် အသင်တို့ ပြုလုပ်ကြသည့်ကိစ္စများကို မေ့လျော့နေတော်မူသောအရှင် မဟုတ်ပေ။
[75] ၎င်းပြင် ထိုသူ(ယဟူဒီ)များသည် အသင်တို့၏ပြောဆိုမှုအပေါ် အီမာန်ယုံကြည်ကြလိမ့်မည်ဟု အသင်(မုအ်မင်န်)များ မျှော်လင့်တောင့်တနေကြသလော။ ထို့ပြင် အမှန်စင်စစ် သူတို့အထဲတွင် အလ္လာဟ်အရှင်မြတ်၏စကားတော်များကို ကြားနာကြသည့်အုပ်စုတစ်စုရှိခဲ့သည်။ ထို့နောက် သူတို့သည် အရှင်မြတ်၏စကားတော်များကို သိကျွမ်းနားလည်ပြီးနောက်မှ သိလျက်နှင့် (မိမိတို့အလိုကျ)ပြုပြင်ပြောင်းလဲကြသည်။
[76] ထို့ပြင် ယဟူဒီများသည် မုအ်မင်န်ယုံကြည်သူများနှင့် တွေ့သည့်အခါ(အယောင်ဆောင်ပြီး) ကျွန်ုပ်တို့လည်း (တရားတော်များကို)ယုံကြည်ကြပါသည်ဟု ပြောဆိုကြသည်။ ၎င်းပြင် သူတို့ထဲမှအချို့သည် အချို့နှင့်သီးသန့်တွေ့ဆုံသောအခါ (ယခုကဲ့သို့)ပြောဆိုကြသည်- အသင်တို့သည် အလ္လာဟ်အရှင်မြတ်က အသင်တို့ကို ဖွင့်ပြတော်မူခဲ့သောအကြင်အကြောင်းအရာများ*နှင့်ပတ်သက်၍ ထိုမုအ်မင်န်များကို ပြောပြကြသလော။ သူတို့သည် ထိုအကြောင်းအရာများကို အသင်တို့အား ဖန်ဆင်းမွေးမြူတော်မူသော အရှင်မြတ်၏ထံတော်ပါးတွင် အသင်တို့နှင့်ဆန့်ကျင်ပြီး အထောက်အထားအဖြစ် တင်ပြကာ ငြင်းခုံကြလိမ့်မည်။ သို့ဖြစ်ရာ အသင်တို့ ဤမျှပင် အသိမရှိကြသလော။
[77] ထို့ပြင် အလ္လာဟ်အရှင်မြတ်သည် ၎င်းတို့ တိတ်ဆိတ်စွာ လျှို့ဝှက်ထားသောအရာများနှင့် ပွင့်လင်းစွာဖော်ထုတ်သည့်အရာများကို အမှန်ပင်သိရှိတော်မူသည်ကို ၎င်းတို့မသိကြလေသလော။
[78] ထို့ပြင် ထို(ယဟူဒီများ)ထဲတွင် စာပေကျမ်းဂန် မတတ်ကျွမ်းသူများလည်းရှိကြသည်။ ထိုသူများသည် လုပ်ကြံပြောဆိုထားသော သတင်းစကားများမှလွဲ၍* ကျမ်းဂန်ကို မသိနားမလည်ကြပေ။ ထို့ပြင် သူတို့သည် ထင်မြင်ယူဆနေကြသည်မှလွဲ၍ အခြားမည်သည့်အရာမျှ မဟုတ်ပေ။
[79] ထို့နောက် ကျမ်းဂန်များကို သူတို့၏လက်ဖြင့်ရေးသားပြီး အဖိုးအခ အနည်းငယ်ဖြင့် ရောင်းချရန် ဤကျမ်းသည် အလ္လာဟ်အရှင်မြတ်ထံမှကျမ်းဟု (လိမ်လည်)ပြောဆိုသူများအတွက် ပျက်စီးခြင်းရှိသည်။ ၎င်းပြင် သူတို့သည် သူတို့၏လက်များဖြင့် သူတို့ရေးသားကြသည့်အတွက် ပျက်စီးကြရမည်ဖြစ်ပြီး (ထိုနည်းဖြင့်)ရှာဖွေသောကြောင့်လည်း ပျက်စီးကြရမည်ဖြစ်ပေသည်။
[80] ထို့ပြင် သူတို့က ပြောဆိုကြသည်- ငရဲမီးသည် ကျွန်ုပ်တို့အား ရေတွက်ထားသောရက်အချို့မှလွဲ၍ လုံးဝထိရောက်မည်မဟုတ်ပေ။ (အို-တမန်တော်)အသင်ပြောလိုက်ပါ- အသင်တို့သည် (ဤသည်နှင့်ပတ်သက်၍) အလ္လာဟ်အရှင်မြတ်ထံမှ ကတိကဝတ် တစ်စုံတစ်ခု ရယူထားကြပါသလော။ ထိုကဲ့သို့ ရယူထားခဲ့ကြလျှင် အလ္လာဟ်အရှင်မြတ်သည် အရှင်မြတ်ပြုထားသည့်ကတိကို မည်သည့်အခါမှ ဖျက်တော်မူမည်မဟုတ်ပေ။ သို့မဟုတ် အသင်တို့သည် အလ္လာဟ်အရှင်မြတ်အပေါ်တွင် အသင်တို့ မသိနားမလည်သည့်အရာကို (ရမ်းဆ)ပြောဆိုနေကြသည်လော။
[81] အမှန်မှာ မည်သူမဆို မကောင်းမှုအကုသိုလ်များကို ရှာဖွေရယူမည်၊ ၎င်းနောက် သူ၏ပြစ်မှုများသည် သူ့အား ဝန်းရံထားပြီးဆိုလျှင် ထိုသူများသည် ငရဲသားများပင်ဖြစ်ကြသည်။ သူတို့သည် ထိုငရဲဘုံထဲတွင် အမြဲထာဝရ နေကြရပေမည်။
[82] ထို့ပြင် အကြင်သူတို့သည် အီမာန်ယုံကြည်၍ ကောင်းမြတ်သည့်လုပ်ရပ်များကို ပြုလုပ်ကြသည်။ ထိုသူများသည် ဂျန္နသ်သုခဘုံသားများဖြစ်ကြသည်။ ထိုသူတို့သည် ထိုဂျန္နသ်သုခဘုံထဲတွင် အမြဲနေကြရမည့်သူများဖြစ်ကြသည်။
[83] ထို့ပြင် တစ်ခါက ငါအရှင်မြတ်သည် အစ္စရာအီလ်မျိုးနွယ်များထံမှ (ယခုကဲ့သို့)ခိုင်မာသော ကတိကဝတ် ရယူခဲ့သည်။* အသင်တို့သည် အလ္လာဟ်အရှင်မြတ်မှလွဲ၍ မည်သည့်အရာကိုမှ မကိုးကွယ်ကြရ၊ ထို့ပြင် မိဘနှစ်ပါးနှင့် ကောင်းမွန်စွာ ဆက်ဆံကြရမည်၊ ထို့ပြင် ဆွေမျိုးရင်းချာများနှင့်၊ အဘမဲ့ကလေးများအပြင်၊ ဆင်းရဲသားများနှင့်လည် (ကောင်းမွန်စွာဆက်ဆံကြရမည်)၊ ထို့ပြင် လူများကို ကောင်းမွန်စွာ ပြောဆိုကြရမည်၊ စွလာသ်ဝတ်ပြုကြရမည်၊ ဇကာသ်(ဆင်းရဲသားနှင့် လိုအပ်သူများ၏ဝေစု)ကို ပေးဆောင်ကြရမည်။ ထို(ကဲ့သိုကတိပြုဝန်ခံပြီး)နောက် အသင်တို့ထဲမှ အနည်းငယ်မှလွဲ၍ ကျန်အားလုံးသည် မျက်နှာလွှဲကာ ပြန်လှည့်သွားကြသည်။ ထို့ပြင် အသင်တို့သည် မျက်နှာလွှဲသွေဖည်သူများသာ ဖြစ်ကြသည်။
[84] ထို့ပြင် တစ်ခါက ငါအရှင်မြတ်သည် အသင်တို့ထံမှ “အသင်တို့သည် အသင်တို့အချင်းချင်း သွေးထွက်သံယို မပြုကြရန်၊ ထို့ပြင် တစ်ဦးကိုတစ်ဦး အသင်တို့နေထိုင်ရာ အိုးအိမ်မြ့ိုရွာအရပ်ဒေသများမှ နှင်မထုတ်ကြရန်“ ကတိကဝတ်ယူတော်မူခဲ့သည်။ ထို့နောက် အသင်တို့သည် ထိုကတိဝန်ခံချက်ကို အတည်ပြုပြီး အသင်တို့ကိုယ်တိုင် သက်သေထူလျက်ရှိကြသည်။
[85] ထို့နောက်လည်း အသင်တို့ပင် အသင်တို့အချင်းချင်း တစ်ဦးကိုတစ်ဦး သတ်ဖြတ်ကြသည်။ ၎င်းနောက် အသင်တို့ထဲမှ လူတစ်စုအား သူတို့၏အိုးအိမ်မြ့ိုရွာများမှ နှင်ထုတ်ကြသည်။ ထို့ပြင် အသင်တို့သည် အပြစ်ဒုစရိုက်နှင့် မတရားကျူးကျော်မှုကိစ္စများတွင် သူတို့နှင့်ဆန့်ကျင်ပြီး (သူတို့၏ရန်သူများကို) ရိုင်းပင်းကူညီကြသည်။ ထို့ပြင် တစ်ခါ လူများသည် အသင်တို့ထံသို့ သုံ့ပန်းအဖြစ်နှင့်ရောက်လာ(ပြန်)သောအခါ အသင်တို့သည် သူတို့ကို ရွေးယူကြပြန်သည်။ သူတို့ကို နှင်ထုတ်ခြင်းသည် အသင်တို့အပေါ်၌ တားမြစ်ထားသောအရာတစ်ခုဖြစ်ပါလျက်၊ အသင်တို့သည် ကျမ်းတော်၏တစ်စိတ်တစ်ဒေသကိုသာ လက်ခံယုံကြည်ကြ၍ တစ်စိတ်တစ်ဒေသကိုမူ ငြင်းပယ်ကြသလော။* ထို့နောက် အသင်တို့ထဲမှ ထိုကဲ့သို့ပြုလုပ်သူ၏ အကျိုးရလာဒ်သည် ဤလောကီဘဝတွင် သိက္ခာကျအရှက်ရခြင်းမှလွဲ၍ မည်သည့်အရာရှိဦးမည်နည်း။ ထို့ပြင် ကိယာမသ်တရားစီရင်မည့်နေ့တွင် ထိုသူများသည် အပြင်းထန်ဆုံးအပြစ်ဒဏ်ဘက်သို့ ပို့ခြင်းခံကြရမည်။ ထို့ပြင် အလ္လာဟ်အရှင်မြတ်သည် အသင်တို့ပြုလုပ်ကြသောအရာများကို မေ့လျော့တော်မူမည့်အရှင် မဟုတ်ပေ။
[86] ထိုသူမျာသည် ဤလောကီဘဝကို တမလွန်ဘဝနှင့် လဲလှယ်ဝယ်ယူသူများပင်ဖြစ်ကြသည်။ ထို့အတွက် သူတို့သည် အပြစ်ဒဏ်လျော့ပေ့ါခံကြရမည်လည်း မဟုတ်ပေ၊ ကူညီစောင်မခြင်းခံကြရမည်လည်း မဟုတ်ပေ။
[87] ထို့ပြင် အမှန်တကယ် ငါအရှင်မြတ်သည် (တမန်တော်)မူစာကို (သောင်ရာသ်)ကျမ်းပေးသနားတော်မူခဲ့သည်။ ထို့ပြင် (တမန်တော်)မူစာ၏နောက်တွင် နဗီတမန်တော်များကို ဆက်တိုက်စေလွှတ်တော်မူခဲ့သည်။ ထို့နောက် မရ်ယမ်*၏သားတော် (တမန်တော်)အီစာ*ကို ထင်ရှားသည့်တန်ခိုးတော်များ*ပေးတော်မူခဲ့သည်။ ထို့ပြင် ငါအရှင်သည် (တမန်တော်)အီစာကို မြင့်မြတ်သည့်ဝိညာဉ်(ကောင်းကင်တမန်ဂျိဗ်ရီလ်)နှင့် အားဖြည့်ပေးတော်မူခဲ့သည်။ ထို့နောက် မည်သည့်အခါမဆို တမန်တော်တစ်ပါးပါးသည် အသင်တို့မနှစ်သက်သောအမိန့်တော်များကို အသင်တို့ထံ ယူဆောင်လာခဲ့လျှင် အသင်တို့သည် မာနတက်ပြီး အချို့(နဗီများ)အား လိမ်လည်ပြောဆိုသူများဟု စွပ်စွဲခဲ့ကြပြီး အချို့(နဗီများ)အား သတ်ဖြတ်ကြသည် မဟုတ်ပါလော။
[88] ထို့ပြင် သူတို့ကပြောခဲ့ကြပြန်သည်- ကျွန်ုပ်တို့၏စိတ်နှလုံးများသည် (အဖုံးအအုပ်ထဲတွင်)ဖုံးအုပ်လျက်ရှိနေကြသည်။ ထိုသို့မဟုတ်ပေ၊ အမှန်စင်စစ် သူတို့၏သွေဖည်ငြင်းပယ်မှုကြောင့် အလ္လာဟ်အရှင်မြတ်သည် သူတို့အား အရှင်မြတ်၏ကရုဏာတော်မှ ဝေးစေတော်မူခဲ့ခြင်းသာဖြစ်သည်။ ထို့ကြောင့် ၎င်းတို့သည် (၎င်းတို့စိတ်ထဲမှ)အနည်းငယ်သာ အီမာန်ယုံကြည်ကြသည်။
[89] ထို့ပြင် တစ်ခါတွင် အလ္လာဟ်အရှင်မြတ်ထံမှ သူတို့(ယဟူဒီများ)ထံသို့ ၎င်းတို့ထံတွင် ရှိနှင့်ပြီးဖြစ်သော (သောင်ရာသ်)ကျမ်းကို ထောက်ခံပေးသည့်ကျမ်းတစ်စောင် (ကုရ်အာန်)ရောက်လာခဲ့သည်။ ၎င်းပြင် ယခင်က သူတို့သည် ကာဖိရ်များနှင့် ဆန့်ကျင်၍(ထိုကျရောက်လာမည့် ကုရ်အာန်ကျမ်း သို့မဟုတ် တမန်တော်မြတ်(ဆွ)ကို အကြောင်းပြုကာ အရှင်မြတ်ထံမှ)အောင်မြင်မှုများ တောင်းခံနေခဲ့ကြသည်။* ထို့နောက် သူတို့သိပြီးဖြစ်သော ထို(ကုရ်အာန်)ကျမ်းတော်သည် သူတို့ထံသို့ အမှန်ရောက်လာသည့်အခါတွင် သူတို့သည် ထိုကျမ်းကိုပင် သွေဖည်ခဲ့ကြပြန်သည်။ ထို့ကြောင့် ငြင်းပယ်သူများအတွက် အလ္လာဟ်အရှင်မြတ်၏ကရုဏာတော်မှ ကင်းဝေးမှုသာရှိပေသည်။
[90] သူတို့သည် သူတို့၏အသက်များနှင့် လဲလှယ်ဝယ်ယူလိုက်ကြသောအရာသည် မည်မျှဆိုးရွားလိုက်လေသနည်း။ ထိုအရာသည် အလ္လာဟ်အရှင်မြတ် ချပေးတော်မူသော တရားဒေသနာတော်ကို ငြင်းပယ်ခြင်းပင်ဖြစ်သည်။ (ထိုသို့ ငြင်းပယ်ရသည့်အကြောင်းမှာလည်း သူတို့သည်) အလ္လာဟ်အရှင်မြတ်က အရှင်မြတ်၏ကျွန်များအနက်မှ အရှင်မြတ်နှစ်သက်တော်မူသောသူအပေါ် အရှင်မြတ်၏ကျေးဇူးပြုတော်မူခြင်းကို မနာလို*ကြသည့်အတွက်ကြောင့်သာ ဖြစ်ပေသည်။ ထို့ကြောင့်ပင် သူတို့သည် ဒေါသအပေါ်တွင် ဒေါသသာထပ်၍ သက်ရောက်ခံခဲ့ကြရသည်။ ထို့ပြင် သွေဖည်ငြင်းပယ်သူများအတွက် သေးသိမ်စေသည့် အပြစ်ဒဏ်လည်းရှိပေသည်။
[91] ထို့ပြင် ယဟူဒီများကို “အသင်တို့သည် အလ္လာဟ်အရှင်မြတ်ချပေးတော်မူခဲ့သော ကျမ်းဂန်များအား ယုံကြည်လိုက်နာကြပါ“ ဟုပြောဆိုသည့်အခါ သူတို့က “ကျွန်ုပ်တို့သည် ကျွန်ုပ်တို့အပေါ်တွင် ချပေးခြင်းခံရသော(သောင်ရာသ်)ကျမ်းကိုသာ ယုံကြည်ပါသည်“ဟု ပြန်လည်ပြောဆိုကြသည်။ ၎င်းပြင် သူတို့သည် ထို(သောင်ရာသ်)ကျမ်းနောက်မှကျမ်း(ကုရ်အာန်)ကို ဤကျမ်းသည် မှန်ကန်သောကျမ်းဖြစ်ပါလျက်နှင့်၊ ၎င်းပြင် သူတို့ထံရှိနေသည့်(သောင်ရာသ်)ကျမ်းကို ထောက်ခံအတည်ပြုနေပါလျက်နှင့် (ထိုကျမ်းကို)ငြင်းပယ်ကြသည်။ (အို-တမန်တော်)အသင် (သူတို့ကို)ပြောလိုက်ပါ “အကယ်၍ အသင်တို့သည် ယုံကြည်သူများဖြစ်ခဲ့ကြသည်ဆိုလျှင် ယခင်က အလ္လာဟ်အရှင်မြတ်၏ နဗီတမန်တော်များကို အဘယ့်ကြောင့်သတ်ဖြတ်သနည်း“။
[92] ထို့ပြင် အမှန်စင်စစ် အသင်တို့ထံ (တမန်တော်)မူစာသည် ထင်ရှားသည့် သက်သေလက္ခဏာ တန်ခိုးတော်များ*နှင့်တကွ ရောက်လာခဲ့သည်။ ထို့နောက် ၎င်း(တမန်တော်မူစာ)၏နောက်ကွယ်တွင် အသင်တို့သည် နွားငယ်ကို ကိုးကွယ်ရာပြုလုပ်ခဲ့ကြသည်။ ထို့ပြင် အသင်တို့သည် (အသင်တို့ကိုယ်ကို အသင်တို့)ညှင်းပန်းနှိပ်စက်နေသည့်သူများပင်ဖြစ်ကြသည်။
[93] ထို့ပြင် တစ်ခါက ငါအရှင်မြတ်သည် အသင်တို့အပေါ်၌ သွူရ်တောင်ကို ပင့်မ၍ (ယခုကဲ့သို့)အသင်တို့၏ ကတိသစ္စာကို ရယူခဲ့သည်- “အသင်တို့သည် ငါအရှင်မြတ်ချပေးတော်မူသည့်အရာ(သောင်ရာသ်)ကျမ်းကို ခိုင်မြဲစွာဆုပ်ကိုင်၍ နာထောင်(လိုက်နာ)ကြပါ။“ ထိုအခါ သူတို့ကပြောဆိုကြသည်- “ကျွန်ုပ်တို့ ကြားကြပါ၏(ဟု အပေါ်ယံပြောဆိုကြသည်)၊ ထို့နောက်(စိတ်တွင်းက) မနာခံကြပါ(ဟုရေရွတ်ကြသည်)။“* ၎င်းပြင် သူတို့၏ငြင်းပယ်မှုကြောင့် သူတို့၏စိတ်နှလုံးများထဲ၌ နွားငယ်(၏ကြီးကျယ်မြင့်မြတ်မှု) တိုက်ကျွေးခံခဲ့လိုက်ရပြီဖြစ်သည်။ (အို-တမန်တော်)အသင် (သူတို့အား)ပြောလိုက်ပါ- “အကယ်၍ အသင်တို့သည် ယုံကြည်ကြသူများ ဖြစ်ခဲ့ကြသည်ဆိုလျှင် အသင်တို့၏အီမာန်ယုံကြည်မှုက အသင်တို့အား အမိန့်ပေးညွှန်ကြားသောအရာများသည် အဘယ်မျှ ဆိုးယုတ်လိုက်လေသနည်း။“
[94] (အို-တမန်တော်)အသင် (ယဟူဒီများကို)ပြောလိုက်ပါ- “အကယ်၍ အလ္လာဟ်အရှင်မြတ်ထံ၌ရှိသော တမလွန်ဘဝ၏အိမ်ယာ(ဂျန္နသ်သုခဘုံ)သည် အခြားလူများနှင့် မသက်ဆိုင်ဘဲ အသင်တို့အတွက်ချည်းသာ ဖြစ်ခဲ့သည်ဆိုလျှင် အသင်တို့(ပြောဆိုယုံကြည်သည့် ထိုစကား)သည် မှန်ကန်သည်ဆိုပါက ထို့အတွက် အသင်တို့သည် တောင့်တလိုက်ကြပါ။“
[95] သို့ရာတွင် သူတို့သည် သူတို့လက်များက ကြိုတင်ပို့ထားသောအရာ(အကုသိုလ်များ)ကြောင့် မည်သည့်အခါမှ သေခြင်းကို တောင့်တကြမည်မဟုတ်ပေ။* ထို့ပြင် အလ္လာဟ်အရှင်မြတ်သည် အပြစ်ကျူးလွန်သူများကို အကြွင်းမဲ့သိတော်မူသောအရှင် ဖြစ်တော်မူသည်။
[96] ထို့ပြင် အသင်(တမန်တော်)သည် သူတို့(ယဟူဒီများ)အား လူများအားလုံးထက် (ဤဘဝ၏)အသက်ရှင်နေထိုင်ခြင်းကို အမက်မောဆုံးသူများအဖြစ် အမှန်မုချ တွေ့ရလိမ့်မည်သာမက သူတို့သည် မုရှ်ရိက်များထက်ပင် (ဤဘဝကို)ပိုမက်မောကြသေးသည်။ သူတို့(ယဟူဒီများ)ထဲမှ လူတိုင်းသည် နှစ်တစ်ထောင် အသက်ရှည်နေချင်ကြသည်။ ထို့ပြင် ထိုသို့အသက်ရှည်ခြင်းသည် (လည်း တစ်နေ့တွင် သေဆုံးရမည်ဖြစ်သည့်အတွက်) သူတို့အား အပြစ်ဒဏ်မှ ကယ်တင်မည့်အရာမဟုတ်ပေ။ ထို့ပြင် အလ္လာဟ်အရှင်မြတ်သည် သူတို့ပြုမူကြသည့်အရာများကို အကြွင်းမဲ့မြင်တော်မူသောအရှင် ဖြစ်တော်မူသည်။
[97] (အို- တမန်တော်)အသင် (ယဟူဒီများကို)ပြောလိုက်ပါ၊ မည်သူမဆို(ကောင်းကင်တမန်)ဂျိဗ်ရီလ်ကို ရန်မူခဲ့လျှင်* (ငါအရှင်မြတ်သည်) ထိုသူ၏ရန်သူပင်။ အဘယ့်ကြောင့်ဆိုသော် အမှန်မှာ ဂျိဗ်ရီလ်ကောင်းကင်တမန်သည် ထိုအရာ(ကုရ်အာန်ကျမ်း)ကို အလ္လာဟ်အရှင်မြတ်၏အမိန့်တော်နှင့်ပင် အသင်(တမန်တော်)၏ စိတ်နှလုံးတွင်းသို့ ချပေးခဲ့ခြင်းသာဖြစ်သည်။ ထိုကျမ်းသည် ယခင်က ချပေးထားသည့် ကျမ်းများကိုလည်းထောက်ခံသည်။ တရားလမ်းညွှန်လည်းဖြစ်သည်။ မုအ်မင်န်ယုံကြည်သူများအတွက် သတင်းကောင်းလည်းဖြစ်သည်။
[98] မည်သူမဆို အလ္လာဟ်အရှင်မြတ်နှင့် အရှင်မြတ်၏ကောင်းကင်တမန်များ၊ အရှင်မြတ်၏ရစူလ်တမန်တော်များ၊ ဂျိဗ်ရီလ်၊ မီကာအီလ် တို့ကို ရန်မူခဲ့လျှင် အမှန်ပင် အလ္လာဟ်အရှင်မြတ်သည်လည်း ကာဖိရ်ငြင်းပယ်သူများ၏ ရန်သူဖြစ်တော်မူသည်။
[99] ထို့ပြင် အမှန်တကယ် ငါအရှင်မြတ်သည် အသင်(တမန်တော်)၏ထံသို့ ထင်ရှားသည့် သက်သေလက္ခဏာများကို ချပေးခဲ့ပြီးဖြစ်သည်။ ထိုသက်သေလက္ခဏာတော်များကို အမိန့်နာမခံသူများမှလွဲ၍ မည်သူမျှ မငြင်းပယ်ကြပေ။
[100] ထိုယဟူဒီများသည် အရှင်မြတ်နှင့် ကတိသစ္စာ တစ်စုံတစ်ခုပြုလုပ်လိုက်တိုင်း သူတို့ထဲမှ လူတစ်စုသည် ထိုကတိသစ္စာကို ပစ်ပယ်ထားခဲ့ကြသည်မဟုတ်လော။ အမှန်စင်စစ် သူတို့ထဲမှ အမြောက်အမြားသည် အီမာန်မယုံကြည်ကြပေ။
[101] ထို့ပြင် ၎င်းတို့ထံသို့ အလ္လာဟ်အရှင့်ထံမှ သူတို့ထံ၌ရှိပြီးဖြစ်သည့် (သောင်ရာသ်)ကျမ်းကို ထောက်ခံသည့် နဗီတမန်တော်(မုဟမ္မဒ်-ဆွ)ရောက်လာသည့်အခါ ထိုကျမ်းရသူများထဲမှပင် လူတစ်စုသည် (ထိုကျမ်းများကိုပင်)မသိကြသကဲ့သို့* အရှင်မြတ်၏ကျမ်းကို သူတို့၏နောက်ကျောဘက်၌ ပစ်ပယ်ထားခဲ့ကြသည်။
[102] ထို့ပြင် ထိုသူ(ယဟူဒီ)များသည် (တမန်တော်)စုလိုင်မာန်ဘုရင်အုပ်ချုပ်သည့် (ခေတ်ကာလ)တွင် ရှိုင်သွာန်များရွတ်ဖတ်ကြသည့် စုန်းပယောဂအတတ်ပညာနောက်သို့ လိုက်စားခဲ့ကြသည်။* အမှန်စင်စစ် (တမန်တော်)စုလိုင်မာန်သည် မည်သည့်ကုဖ်ရ်ငြင်းပယ်မှုကိုမျှ မပြုခဲ့ပေ။ သို့ရာတွင် ထိုရှိုင်သွာန်များသည်ပင် လူများအား စုန်းပယောဂသင်ပေးပြီး ကုဖ်ရ်ငြင်းပယ်မှုကို ပြုခဲ့ကြသည်။ ထို့ပြင် (ထိုယဟူဒီများသည်) ဗာဗိလုံမြ့ိုမှ ကောင်းကင်တမန်နှစ်ပါး ဟာရူသ်နှင့် မာရူသ်တို့အပေါ်တွင် ကျရောက်ခဲ့သည့် စုန်းပယောဂနောက်သို့လည်း လိုက်စားခဲ့ကြသည်။ ထိုကောင်းကင်တမန်နှစ်ပါးက “ကျွန်ုပ်တို့သည် စမ်းသပ်မှုအတွက်(ရောက်လာခြင်း)ဖြစ်သည်။ ထို့ကြောင့် အသင်တို့သည် စုန်းပယောဂ(မှော်အတတ်ပညာ)နောက်လိုက်ပြီး ကုဖ်ရ်ငြင်းပယ်မှု မပြုကြနှင့်“ ဟု မပြောသမျှ မည်သူ့ကိုမှ ထို(စုန်းပယောဂအတတ်များကို) သင်မပေးကြပေ။ ထို့နောက်လည်း သူတို့သည် ထိုကောင်းကင်တမန်နှစ်ပါးထံမှ ဇနီးခင်ပွန်းနှစ်ဦးကို ပြတ်စဲစေသည့်အတတ်ပညာကို သင်ယူကြသည်။ အမှန်စင်စစ် သူတို့သည် အလ္လာဟ်အရှင်မြတ်၏အလိုတော်မရှိဘဲ ထိုစုန်းပယောဂအတတ်နှင့် မည်သူ့ကိုမျှ ဘေးအန္တရာယ်မပြုနိုင်ပေ။ ၎င်းပြင် သူတို့သည် သူတို့အား အကျိုးမပြုဘဲ ဆုံးရှုံးမှုဖြစ်စေသည့်အရာကို သင်ယူလိုက်ကြသည်။ ထို့ပြင် အမှန်မုချ ထိုအရာများကို ရယူသည့်သူများသည် တမလွန်ဘဝ အာခိရသ်တွင် မည်သည့်(ကောင်းသော)ဝေစုမျှမရှိသည်ကို သူတို့ သိရှိခဲ့ပြီးဖြစ်ကြသည်။ ထို့ပြင် သူတို့အသက်များနှင့် သူတို့လဲလှယ် လိုက်စားထားသည့်အရာ(မှော်အတတ်)သည် အမှန်ပင် အဘယ်မျှ ဆိုးယုတ်လိုက်သနည်း။ ဤသည်ကို သူတို့ သိကြလျှင် ကောင်းလေစွ။
[103] ထို့ပြင် အမှန်စင်စစ် သူတို့သည် အီမာန်ယုံကြည်ကြပြီး ကြောက်ရွံ့အပြစ်ရှောင် ကောင်းကျိုးဆောင်ကြလျှင် အလ္လာဟ်အရှင်မြတ်ထံမှ သူတို့ အမှန်ပင်ရရှိမည့် အကျိုးကုသိုလ်သည် ပိုကောင်းသည်။ ဤသည်ကို သူတို့သိလျှင် ကောင်းလေစွ။
[104] အို- မုအ်မင်န် ယုံကြည်သူအပေါင်းတို့၊ အသင်တို့သည် (တမန်တော်မြတ်(ဆွ)၏ရှေ့မှောက်၌) “ရာအိနာ“ဟု မပြောဆိုကြနှင့်၊* “အွန်ဇွရ်နာ“ဟု ပြောဆိုကြပါ။ ထို့ပြင် အသင်တို့သည် နာခံကြပါ။ ထို့နောက် မနာခံကြသည့် ကာဖိရ်ငြင်းပယ်သူများအတွက်မှာမူ ပြင်းပြနာကျင်စေသည့် အပြစ်ဒဏ်ရှိသည်။
[105] ယခင်က ကျမ်းရထားသူများထဲမှ ကာဖိရ်ငြင်းပယ်သူများအပြင် အရှင်မြတ်နှင့်တုဖက်ကိုးကွယ်သည့် မုရှ်ရိက်များထဲမှလူများလည်း အသင်တို့အပေါ် အသင်တို့အား ဖန်ဆင်းမွေးမြူတော်မူသောအရှင်မြတ်ထံမှ မည်သည့်ကောင်းခြင်းကိုမျှ ပို့ချပေးသနားတော်မူသည်ကို မနှစ်သက်ကြပေ။ (သူတို့မနှစ်သက်ကြလျှင်လည်း) အလ္လာဟ်အရှင်မြတ်သည် အရှင်မြတ်နှစ်သက်တော်မူသောသူများကို အရှင်မြတ်၏အသနားတော်နှင့် သီးသန့်ရွေးချယ်တော်မူသည်။ ထို့ပြင် အလ္လာဟ်အရှင်မြတ်သည် ကြီးကျယ်မြင့်မြတ်သည့် ကျေးဇူးတော်ရှင်ဖြစ်တော်မူသည်။
[106] ငါအရှင်မြတ်သည် အာယသ်တော်တစ်ခုကို ရုပ်သိမ်းတော်မူသည်ဖြစ်စေ၊ သို့မဟုတ် ထိုအာယသ်တော်ကိုမေ့ပျောက်စေတော်မူသည်ဖြစ်စေ၊ ငါအရှင်မြတ်သည် ထိုအာယသ်ထက် ပိုကောင်းသည့်အာယသ် သို့မဟုတ် ထိုကဲ့သို့ အာယသ်မျိုးကို ယူဆောင်လာ(ပြီးထုတ်ပြန်ပို့ချ)တော်မူသည်။* အမှန်စင်စစ် အလ္လာဟ်အရှင်မြတ်သည် အရာအားလုံးအပေါ်တွင် အလွန်စွမ်းဆောင်နိုင်တော်မူသောအရှင် ဖြစ်တော်မူသည်ဆိုခြင်းကို အသင်(တမန်တော်)မသိပါသလော။
[107] ကောင်းကင်များနှင့် မြေပထဝီကို အလ္လာဟ်အရှင်မြတ်သာ စိုးပိုင်တော်မူကြောင်းနှင့် အသင်တို့အတွက် အလ္လာဟ်အရှင်မြတ်မှလွဲ၍ ကာကွယ်စောင့်ရှောက်မည့်သူ၊ ကူညီစောင်မမည့်သူ မည်သူမျှမရှိကြောင်းကို အသင်(တမန်တော်)မသိပါသလော။
[108] ယခင်က(တမန်တော်)မူစာ တောင်းဆိုမေးမြန်းခြင်းခံခဲ့ရသကဲ့သို့ အသင်တို့လည်း အသင်တို့၏တမန်တော်(မုဟမ္မဒ်-ဆွ)ကို ထိုကဲ့သို့ပင် တောင်းဆိုမေးမြန်းလိုကြပါသလော။ မည်သူမဆို အီမာန်ယုံကြည်မှုအစား ကုဖ်ရ်ငြင်းပယ်မှုကို လဲလှယ်ယူမည်ဆိုလျှင် ထိုသူသည် အမှန်ပင် ဖြောင့်မတ်မှန်ကန်သည့်လမ်းမှ တိမ်းချော်သွားပြီဖြစ်သည်။
[109] ကျမ်းရသည့်သူများအနက်မှ အမြောက်အမြားသည် သူတို့အတွက် အမှန်တရားသည် ထင်ရှားပြီးသည့်နောက်၌ပင် သူတို့၏စိတ်များထဲမှ မနာလိုမှုကြောင့် အသင်တို့ အီမာန်ယုံကြည်ပြီး နောက်တစ်ဖန် အသင်တို့အား ကာဖိရ်ဘဝသို့ ပြန်လည်ရောက်စေချင်ကြသည်။ ထို့အတွက် အသင်တို့သည် အလ္လာဟ်အရှင်မြတ်ထံမှ အမိန့်တော်ကျရောက်လာသည်အထိ သူတို့အား ခွင့်လွှတ်ပြီး လျစ်လျူရှုနေကြပါ။ အမှန်မုချ အလ္လာဟ်အရှင်မြတ်သည် အရာအားလုံးအပေါ်တွင် အလွန်စွမ်းဆောင်နိုင်တော်မူသော အရှင်ဖြစ်တော်မူသည်။
[110] ထို့ပြင် အသင်တို့သည် စွလာသ်ဝတ်ပြုမှုကို ဆောက်တည်ကြပြီး ဇကာသ်(ဆင်းရဲသားနှင့် လိုအပ်သူများ၏ဝေစု)ကို ပေးဆောင်ကြပါ။ ထို့ပြင် အသင်တို့အတွက် ရှေ့ကိုကြိုတင်ပို့ဆောင်ထားသည့် မည်သည့်ကောင်းမှုကိုမဆို အလ္လာဟ်အရှင်မြတ်ထံ၌ အသင်တို့ ရရှိကြလိမ့်မည်။ အမှန်စင်စစ် အလ္လာဟ်အရှင်မြတ်သည် အသင်တို့ပြုမူကြသည့် အရာအားလုံးကို အကြွင်းမဲ့မြင်တော်မူသောအရှင်ဖြစ်တော်မူသည်။
[111] ထို့ပြင် သူတို့က ပြောဆိုကြသည်- ဂျန္နသ်သုခဘုံကို ယဟူဒီ သို့မဟုတ် နတ်စွ်ရာနီဖြစ်သည့်သူမှလွဲ၍ မည်သူမျှ လုံးဝ ဝင်ရမည်မဟုတ်။ ထိုအရာသည် သူတို့၏ လိုချင်တပ်မက်မှုများသာဖြစ်သည်။ (အို- တမန်တော်)အသင် (သူတို့ကို)ပြောကြားလိုက်ပါ။ အသင်တို့(ပြောသမျှ)သည် မှန်သည်ဆိုလျှင် အသင်တို့၏ ခိုင်လုံသည့်အထောက်အထား တစ်ခုခုကို ယူဆောင်ခဲ့ကြပါ။
[112] (သူတို့ပြောသကဲ့သို့ အခြားသူသည် ဂျန္နသ်ထဲသို့) အဘယ့်ကြောင့်မဝင်နိုင်ရမည်နည်း၊ အမှန်မုချ မည်သူမဆို ကောင်းကျိုးဆောင်ရွက်သူဖြစ်လျက် သူ၏ကိုယ်ကို အလ္လာဟ်အရှင်မြတ်အတွက် အမိန့်နာခံပေးအပ်ခဲ့လျှင် ထိုသူအတွက် သူ၏အကျိုးရလာဒ်သည် သူ့အားဖန်ဆင်းမွေးမြူတော်မူသော အရှင်မြတ်ထံ၌ ရရှိလိမ့်မည်။ ၎င်းပြင် သူတို့အပေါ်၌ စိုးရိမ်စရာလည်း ရှိမည်မဟုတ်သည့်အပြင် သူတို့သည် ပူဆွေးရမည်လည်းမဟုတ်ပေ။
[113] ထို့ပြင် ယဟူဒီများက ပြောခဲ့ကြသည်၊ နတ်စွ်ရာနီများသည် မည်သည့်အရာ(အခြေခံအမှန်တရား)ပေါ်၌မျှ မရှိခဲ့ပေ။ ၎င်းပြင် နတ်စွ်ရာနီများကလည်း ပြန်ပြောခဲ့ကြသည်၊ ယဟူဒီများသည် မည်သည့်အရာ(အခြေခံအမှန်တရား)ပေါ်၌မျှ မရှိခဲ့ပေ။* သူတို့ အုပ်စုနှစ်ခုလုံးသည်(အရှင်မြတ် တစ်ပါးတည်းက ချပေးခဲ့သည့်) ကျမ်းကိုသာ ရွတ်ဖတ်နေကြပါလျက် (တစ်ဖက်နှင့်တစ်ဖက် မဟုတ်မမှန်ပြောနေကြသည်)။ ထိုနှစ်အုပ်စုပြောနေကြသကဲ့သို့ပင် (ကျမ်းမရသည့်သူ)ပညာမဲ့များကလည်း သူတို့စကားမျိုးကဲ့သို့ပင် (ကျမ်းရသူ မွတ်စ်လင်မ်များသည် မည်သည့်အခြေခံအမှန်တရားပေါ်၌မျှ မရှိခဲ့ပေဟု) ပြောဆိုခဲ့ကြသည်။ ထို့အတွက် အလ္လာဟ်အရှင်မြတ်သည် ကိယာမသ်ရှင်ပြန်ထမည့်နေ့တွင် သူတို့ကွဲလွဲနေခဲ့ကြသည့်ပြဿနာများကို သူတို့ကြားတွင် စီရင်ဆုံးဖြတ် အမိန့်ချတော်မူမည်။
[114] ထို့ပြင် အလ္လာဟ်အရှင်မြတ်၏ဗလီကျောင်းတော်များတွင် အရှင်မြတ်၏နာမတော်ကို တသမှုမှ တားဆီးပိတ်ပင်ခဲ့ပြီး ထိုဗလီကျောင်းတော်ကို ဖျက်ဆီးရန်ကြိုးပမ်းခဲ့ကြသည့်သူများထက် ပိုမိုတရားသူသည် မည်သူရှိဦးမည်နည်း။ (အမှန်စင်စစ်)သူတို့ကိုယ်တိုင် ထို(ဗလီ)ထဲသို့ ကြောက်ရွံ့စွာဝင်ရောက်ရမည်မှလွဲ၍ အခြားမရှိပေ။ ထိုကဲ့သို့ ဖျက်ဆီးရန်ကြိုးပမ်းသူများအတွက် ဤဘဝတွင် သေးသိမ်မှုနှင့် တမလွန်ဘဝတွင် ကြီးလေးသည့်အပြစ်ဒဏ်ရှိသည်။
[115] ထို့ပြင် အရှေ့နှင့်အနောက်(အပြင်ရှိသမျှအရာအားလုံး)သည် အရှင်မြတ်အတွက်သာဖြစ်သည်။ သို့ဖြစ်ရာ အသင်တို့သည် မည်သည့်ဘက်သို့ပင် မျက်နှာမူသည်ဖြစ်စေ ထိုဘက်တွင် အရှင်မြတ်၏မျက်နှာတော် ရှိနေတော်မူသည်။ အမှန်စင်စစ် အလ္လာဟ်အရှင်မြတ်သည် (အသိဉာဏ်ပညာနှင့် ကရုဏာကျယ်ဝန်းလျက် အရာအားလုံးကို) ဝန်းခြုံထားတော်မူသောအရှင်၊ အကြွင်းမဲ့သိတော်မူသောအရှင် ဖြစ်တော်မူသည်။
[116] သူတို့(ယဟူဒီ၊ နတ်စွ်ရာနီများ)က အလ္လာဟ်အရှင်မြတ်၌ သားရှိသည်ဟု ပြောဆိုခဲ့ကြသည်။ အရှင်မြတ်သည် ကင်းစင်သန့်ပြန့်တော်မူသည်။ အမှန်စင်စစ် မိုးကောင်းကင်များနှင့် မြေပထဝီတွင်ရှိသမျှကို အရှင်မြတ်သာ ပိုင်ဆိုင်တော်မူသည်။ ထိုအရာအားလုံးသည် အရှင်မြတ်၏အမိန့်ကို နာခံသောသူများဖြစ်ကြသည်။
[117] အရှင်မြတ်သည် မိုးကောင်းကင်များနှင့် မြေပထဝီကို စတင်ဖန်ဆင်းတော်မူသောအရှင် ဖြစ်တော်မူသည်။ ထိုအရှင်မြတ်သည် ကိစ္စရပ်တစ်ခုကို ပြဋ္ဌာန်းတော်မူသည့်အခါ ထိုကိစ္စရပ်ကို “ဖြစ်စေ“ဟု ပြောလိုက်သည်နှင့် ထိုကိစ္စသည်ဖြစ်ပေါ်လာသည်။
[118] ပညာမဲ့များက ပြောဆိုခဲ့ကြသည်၊ အလ္လာဟ်အရှင်မြတ်သည် ကျွန်ုပ်တို့အား အဘယ့်ကြောင့်(တိုက်ရိုက်)စကားပြောတော်မမူပါသနည်း၊ သို့မဟုတ် ကျွန်ုပ်တို့ထံ (အံ့ဩဖွယ်ရာ) တန်ခိုးတော်တစ်ခုခု အဘယ့်ကြောင့်ရောက်ရှိမလာပါသနည်း။ ထိုသို့ပင် သူတို့မတိုင်မီလူများကလည်း သူတို့၏စကားကဲ့သို့ ပြောဆိုခဲ့ကြသည်။ သူတို့၏စိတ်နှလုံးများသည် ဆင်တူယိုးမှားပင်ဖြစ်ခဲ့ကြသည်။ အမှန်မုချ ငါအရှင်မြတ်သည် ယုံကြည်မိသူများအတွက် အာယသ်တော်များကို ရှင်းလင်းဖွင့်ဆိုပြသတော်မူပြီးဖြစ်သည်။
[119] အမှန်မုချ ငါအရှင်မြတ်သည် အသင်(တမန်တော်)ကို အမှန်တရားနှင့်တကွ သတင်းကောင်းပေးသူအဖြစ်နှင့် သတိပေးနှိုးဆော်သူအဖြစ် စေလွှတ်တော်မူခဲ့သည်။ ထို့နောက် အသင်(တမန်တော်)သည် ဂျဟန္နမ်ငရဲသားများနှင့်ပတ်သက်၍ အမေးအမြန်းခံရမည်မဟုတ်ပေ။
[120] ထို့ပြင် ယဟူဒီများနှင့်နတ်စွ်ရာနီများသည် သူတို့၏ဘာသာအယူဝါဒကို အသင်(တမန်တော်)မလိုက်နာသမျှ အသင်(တမန်တော်)ကို မည်သည့်အခါမှ ကျေနပ်ကြမည်မဟုတ်ပေ။ (အို-တမန်တော်)အသင်ပြောလိုက်ပါ၊ အမှန်စင်စစ် အလ္လာဟ်အရှင်မြတ်၏လမ်းမှန်ညွှန်ကြားပြသမှုသာ လမ်းမှန်ညွှန်ကြားပြသမှုအစစ်ဖြစ်သည်။ ၎င်းပြင် အကယ်၍ အသင်(တမန်တော်)သည် အသင်၏ထံ အသိပညာရောက်ရှိပြီးနောက်မှ သူတို့၏အလိုဆန္ဒများနောက်ကိုလိုက်ခဲ့မည်ဆိုလျှင် အသင်(တမန်တော်)အတွက် အလ္လာဟ်အရှင်မြတ်(၏အရေးယူမှု)မှ (လွတ်မြောက်စေရန်)ကာကွယ်စောင့်ရှောက်မည့်သူနှင့် ကူညီရိုင်းပင်းမည့်သူ မည်သူမျှရှိမည်မဟုတ်ပေ။
[121] အကြင်သူများအား ငါအရှင်မြတ်သည် ကျမ်းတော်ကိုပေးသနားတော်မူခဲ့သည်၊ ထိုသူများသည် ကျမ်းတော်ကိုရွတ်ဖတ်လိုက်နာထိုက်သည့်နည်းဖြင့် ဖတ်ရွတ်လိုက်နာကြသည်။* ထိုသူများပင် ကျမ်းတော်ကို အမှန်စင်စစ် ယုံကြည်သည့်သူများဖြစ်ကြသည်။ ၎င်းပြင် မည်သူမဆို ထိုကျမ်းတော်ကို ငြင်းပယ်လျှင် ထိုသူများသည်သာ ပျက်စီးဆုံးရှုံးမည့်သူများဖြစ်ကြသည်။
[122] အို- အစ္စရာအီလ်မျိုးနွယ်ဝင်အပေါင်းတို့၊ ငါအရှင်မြတ်က အသင်တို့အပေါ် ကျေးဇူးပြုထားသည့် ကျေးဇူးတော်များကို သတိရကြပါ။ ထို့ပြင် အမှန်ပင် ငါအရှင်မြတ်သည် အသင်တို့ကို(အသင်တို့ခေတ်ရှိ) စကြဝဠာအားလုံးထက် ထူးကဲမြင့်မြတ်စေတော်မူခဲ့သည်ကိုလည်း သတိရကြပါ။
[123] ထို့ပြင် အသင်တို့သည် အကြင်နေ့ကိုကြောက်ရွံ့ပြီး (အသင်တို့ကိုယ်ကို ကာကွယ်ကြပါ၊) ထိုနေ့တွင် မည်သူကမျှ မည်သူ့ကို မည်သည့်အရာတစ်ခုမျှ အကျိုးပြုနိုင်မည်မဟုတ်ပေ။ မည်သူ၏ထံကမှ အစားထိုးလဲလှယ်ယူခြင်းကိုလည်း လက်ခံခြင်းခံရမည် မဟုတ်ပေ။ မည်သူ၏အသနားခံ လိုက်လံပြောပေးခြင်းမှလည်း အကျိုးရှိမည် မဟုတ်ပေ။ ထို့ပြင် သူတို့သည် ကူညီခြင်းလည်း ခံကြရမည်မဟုတ်ပေ။
[124] ထို့ပြင် တစ်ခါက(တမန်တော်)အိဗ်ရာဟီမ်ကို ၎င်းအား ဖန်ဆင်းမွေးမြူတော်မူသောအရှင်မြတ်က အချို့ကိစ္စရပ်များနှင့်ပတ်သက်၍ စမ်းသပ်တော်မူသည့်အခါ ၎င်း(တမန်တော်)သည် ထိုကိစ္စရပ်များကို ပြည့်ဝစွာဆောင်ရွက်ခဲ့သည်။ အရှင်မြတ်က အမိန့်ရှိတော်မူသည်။ အမှန်မုချ ငါအရှင်မြတ်သည် အသင်(တမန်တော်)ကိုလည်း ူအများ၏ အိမာမ်ရှေ့ဆောင်အဖြစ် ခန့်အပ်တော်မူမည်။ ၎င်း(တမန်တော်)က ပြောဆို(မေးမြန်း)ခဲ့သည်၊ ကျွန်ုပ်၏သားမြေးများထဲမှလည်း (အီမာမ်ရှေ့ဆောင် ခန့်အပ်တော်မူပါမည်လော)။ အရှင်မြတ်က မိန့်တော်မူခဲ့သည်၊ ငါအရှင်မြတ်၏ကတိတော်သည် မတရားပြုလုပ်သည့်သူများနှင့် မသက်ဆိုင်ပေ။
[125] ထို့ပြင် တစ်ခါက ငါအရှင်မြတ်သည် ကအ်ဗဟ်ကျောင်းတော်* ကို လူများအားလုံးအတွက် အကြိမ်ကြိမ်ပြန်လှည့်လာရသည့်နေရာအဖြစ်နှင့် ငြိမ်းချမ်းမှုခိုလှုံရာဌာနအဖြစ် ပြုလုပ်သတ်မှတ်တော်မူခဲ့သည်။ ၎င်းပြင် အသင်တို့သည် (တမန်တော်)အိဗ်ရာဟီမ်ရပ်တည်သည့်နေရာကို စွလာသ်ဝတ်ပြုရာနေရာအဖြစ် ပြုလုပ်ကြပါ။ ထို့ပြင် ငါအရှင်မြတ်သည် (တမန်တော်)အိဗ်ရာဟီမ်နှင့် (တမန်တော်)အစ္စမာအီလ်တို့အား (ယခုကဲ့သို့)အမိန့်ချမှတ်တော်မူခဲ့သည်၊ အသင်တို့(တမန်တော်)နှစ်ဦးသည် (ငါအရှင်မြတ်၏အိမ်တော်ကို) သွဝါဖ် လှည့်ပတ်ဖူးမြော်ကြသူများ၊ အိအ်သိကာဖ် ဗလီထဲတွင် စွဲမြဲစွာနေထိုင်လျက် အရှင်မြတ်၏နှစ်သက်မှုကို ရအောင်ရှာဖွေသူများ၊ ရုကူအ် ကိုင်းညွတ်ရိုကျိုးသူများနှင့် စဂျ်ဒဟ် ဦးချသူများအတွက် ငါ၏အိမ်တော်ကို သန့်ပြန့်အောင် ရှင်းလင်းထားကြရမည်။
[126] ထို့ပြင် တစ်ခါက (တမန်တော်)အိဗ်ရာဟီမ်ကပြောဆိုခဲ့သည်၊ အို-ကျွန်ုပ်အား ဖန်ဆင်းမွေးမြူတော်မူသောအရှင်၊ ဤဒေသကို ငြိမ်းချမ်းသာယာသည့်မြ့ိုတော်အဖြစ် ပြုလုပ်ပေးတော်မူပါ။ ၎င်းပြင် ဤမြ့ိုသူမြ့ိုသားများထဲမှ အလ္လာဟ်အရှင်မြတ်နှင့် နောက်ဆုံးနေ့ကို ယုံကြည်သူများအား သစ်သီးဝလံများထဲမှ စားနပ်ရိက္ခာများကို ပေးသနားတော်မူပါ။ အရှင်မြတ်က အမိန့်တော်ရှိတော်မူခဲ့သည်၊ ထို့ပြင် ငါအရှင်မြတ်သည် ငြင်းပယ်ခဲ့သူများအားလည်း အချိန်အနည်းငယ် အကျိုးခံစားစေတော်မူမည်။ တမလွန်ဘဝ၌ ငါအရှင်မြတ်သည် သူတို့အား ငရဲမီး၏အပြစ်ဒဏ်ထဲသို့ အတင်းအကျပ် မောင်းနှင်တော်မူမည်။ ထို့ပြင် (သူတို့၏)ခရီးလမ်းဆုံးနေရာသည် အဘယ်မျှ ဆိုးဝါးလိုက်သနည်း။
[127] ထို့ပြင် တစ်ခါက (တမန်တော်)အိဗ်ရာဟီမ်နှင့် (၎င်း၏သားတော် တမန်တော်)အစ္စမာအီလ်တို့သည် (ကအ်ဗဟ်)ကျောင်းတော်၏နံရံကို မြှင့်တင်(ဆောက်လုပ်)နေစဉ် (အရှင်မြတ်ထံ၌ ပြောဆိုလျှောက်ထားကြသည်) အို-ကျွန်ုပ်တို့အား ဖန်ဆင်းမွေးမြူတော်မူသောအရှင်၊ ကျွန်ုပ်တို့ထံမှ(ကျောင်းဆောက်လုပ်သည့်ကောင်းမှုကို) လက်ခံတော်မူပါ။ အမှန်စင်စစ် အရှင်မြတ်သည် အကြွင်းမဲ့ကြားတော်မူသောအရှင်၊ အကြွင်းမဲ့သိတော်မူသောအရှင် ဖြစ်တော်မူပါသည်။
[128] ထို့ပြင် အို-ကျွန်ုပ်တို့အား ဖန်ဆင်းမွေးမြူတော်မူသောအရှင်၊ အရှင်မြတ်သည် ကျွန်ုပ်တို့အား အရှင်မြတ်၏အမိန့်ကို(ပြည့်ပြည့်ဝဝ)နာခံသူ မွတ်စ်လင်မ်နှစ်ဦးအဖြစ် ပြုလုပ်တော်မူပါ။ ၎င်းပြင် ကျွန်ုပ်တို့၏ သားစဉ်မြေးဆက်ထဲမှလည်း အရှင်မြတ်၏အမိန့်ကို(ပြည့်ပြည့်ဝဝ)နာခံသူ မွတ်စ်လင်မ်အုပ်စုအဖြစ် ပြုလုပ်တော်မူပါ။ ထို့ပြင် အရှင်မြတ်သည် ကျွန်ုပ်တို့အား အိဗာဒသ်ကိုးကွယ်နည်းဥပဒေများကို ပြသပေးတော်မူပါ။ ၎င်းပြင် အရှင်မြတ်သည် ကျွန်ုပ်တို့(ဘက်သို့ ကရုဏာနှင့်လှည့်ပြီး ကျွန်ုပ်တို့)၏ ဝန်ချတောင်းပန်မှုကို လက်ခံခွင့်လွှတ်တော်မူပါ။ အမှန်စင်စစ် အရှင်မြတ်သည် အမှားဝန်ခံမှုကို အကြိမ်ကြိမ် လက်ခံခွင့်လွှတ်တော်မူသောအရှင်၊ အလွန်သနားကြင်နာတော်မူသောအရှင် ဖြစ်တော်မူပါသည်။
[129] ထို့ပြင် အို-ကျွန်ုပ်တို့အား ဖန်ဆင်းမွေးမြူတော်မူသောအရှင်၊ သူတို့ထဲတွင် သူတို့ထဲမှပင် ရစူလ်တမန်တော်တစ်ပါးကို ပွင့်ပေါ်စေတော်မူပါ၊ ထိုတမန်တော်သည် သူတို့၏ရှေ့မှောက်၌ အရှင်မြတ်၏အာယသ်တော်များကို ဖတ်ရွတ်မည်၊ သူတို့အား ကျမ်းဂန်နှင့်တကွ ပညာဉာဏ်အမြော်အမြင်ကိုလည်း သင်ကြားပေးမည်၊ ထို့နောက် သူတို့အား စင်ကြယ်သောသူများဖြစ်အောင်လည်း ပြုလုပ်ပေးမည်။* စင်စစ်အရှင်မြတ်သည်သာ တန်ခိုးတော်နှင့် အလွန်လွှမ်းမိုးတော်မူသောအရှင်၊ ပညာဉာဏ်အမြော်အမြင်နှင့် အလွန်ပြည့်စုံတော်မူသောအရှင်ဖြစ်တော်မူပါသည်။
[130] မိမိကိုယ်မိမိအသိဉာဏ်မရှိ မိုက်မဲသူဖြစ်အောင်လုပ်သူမှလွဲ၍ မည်သူသည် (တမန်တော်)အိဗ်ရာဟီမ်၏သာသနာ*မှ လွှဲရှောင်သွားမည်နည်း။ ထို့ပြင် အမှန်စင်စစ် ငါအရှင်မြတ်သည် ထိုအိဗ်ရာဟီမ်ကို ဤလောကတွင် (တမန်တော်အဖြစ်)ရွေးချယ်တော်မူခဲ့သည့်အပြင် တမလွန်ဘဝတွင်လည်း အမှန်စင်စစ် ၎င်းသည် ကောင်းမြတ်သူများထဲမှဖြစ်လိမ့်မည်။
[131] တစ်ခါက (တမန်တော်)အိဗ်ရာဟီမ်ကို ၎င်းအား ဖန်ဆင်းမွေးမြူတော်မူသောအရှင်က အမိန့်ရှိတော်မူခဲ့သည်၊ အသင်သည် အမိန့်နာခံသူ(မွတ်စ်လင်မ်)ဖြစ်လိုက်ပါ။ (တမန်တော်)အိဗ်ရာဟီမ်က ပြောခဲ့သည်၊ ကျွန်ုပ်သည် စကြဝဠာအားလုံးအား ဖန်ဆင်းမွေးမြူတော်မူသော အရှင်မြတ်၏အမိန့်တော်ကို နာခံပြီးဖြစ်ပါသည်။
[132] ထို့ပြင် (တမန်တော်)အိဗ်ရာဟီမ်နှင့် (တမန်တော်)ယအ်ကူဗ်တို့သည် ထိုအကြောင်းနှင့်ပတ်သက်၍ ၎င်းတို့၏သားများကို မှာကြားခဲ့သည်၊ အို-ငါ့သားအပေါင်းတို့၊ အမှန်စင်စစ် အလ္လာဟ်အရှင်မြတ်သည် အသင်တို့အတွက် အစ္စလာမ်သာသနာကို ရွေးချယ်တော်မူပြီးဖြစ်သည့်အတွက် အသင်တို့သည် အမိန့်နာခံသည့် မွတ်စ်လင်မ်များဖြစ်လျက်နှင့်သာ သေဆုံးကြပါ။
[133] အသင်တို့သည် (တမန်တော်)ယအ်ကူဗ်ကွယ်လွန်ခါနီး၌ အသင့်ရောက်ရှိနေခဲ့ကြပါသလော၊ တစ်ခါက ၎င်း(တမန်တော်ယအ်ကူဗ်)သည် ၎င်း၏သားများကို ပြောခဲ့သည်၊ ငါ၏နောက်တွင် အသင်တို့သည် မည်သည့်အရာကို ကိုးကွယ်ကြမည်နည်း။ သူတို့က ပြောဆိုခဲ့ကြသည်၊ ကျွန်ုပ်တို့သည် ဖခင်နှင့်တကွ ဖခင်၏ဘိုး၊ဘေးများဖြစ်သည့် (တမန်တော်)အိဗ်ရာဟီမ်၊ (တမန်တော်)အစ္စမာအီလ်နှင့် (တမန်တော်)အစ္စဟာက်တို့၏ ကိုးကွယ်ရာအရှင် တစ်ပါးတည်းကိုသာ ကိုးကွယ်ကြပါမည်။ ၎င်းပြင် ကျွန်ုပ်တို့သည် ထိုအရှင်၏ အမိန့်နာခံသူ(မွတ်စ်လင်မ်)များဖြစ်ကြပါသည်။
[134] ၎င်းသည် ကုန်လွန်သွားခဲ့သည့် အုပ်စုတစ်စုဖြစ်သည်၊ သူတို့ ဆည်းပူးရှာဖွေခဲ့သောအရာများသည် သူတို့အတွက်ဖြစ်ပြီး အသင်တို့ ဆည်းပူးရှာဖွေခဲ့သောအရာများသည် အသင်တို့အတွက်သာဖြစ်သည်။ ထို့နောက် သူတို့ပြုကျင့်ခဲ့သည့်အရာများနှင့် စပ်လျဉ်း၍ အသင်တို့သည် မေးမြန်းခြင်းခံကြရမည်မဟုတ်ပေ။
[135] ထို့ပြင် သူတို့ကပြောခဲ့ကြသည်၊ အသင်တို့သည် ယဟူဒီဘာသာဝင် သို့မဟုတ် နတ်စ်ွရာနီဘာသာဝင်တွေဖြစ်ကြပါ။ သို့မှသာ အသင်တို့သည် တရားလမ်းမှန်ကို ရကြမည်။ (အို-တမန်တော်)အသင်ပြောလိုက်ပါ၊ (အသင်တို့ပြောသကဲ့သို့ မည်သည့်အခါမှ ဖြစ်ကြမည်)မဟုတ်ပေ၊ အမှန်စင်စစ် (ငါတို့သည် ကွေ့ကောက်ခြင်းမရှိသော) ဖြောင့်မတ်မှန်ကန်သည့် (တမန်တော်)အိဗ်ရာဟီမ်၏သာသနာ(အစ္စလာမ်)ကို (ယုံကြည်လိုက်နာကြသောသူများဖြစ်ကြမည်။) ထို့ပြင် ၎င်း(တမန်တော်အိဗ်ရာဟီမ်)သည် အလ္လာဟ်အရှင်မြတ်နှင့် တွဲဖက်ကိုးကွယ်သူများထဲတွင် မပါဝင်ခဲ့ပေ။
[136] အသင်တို့သည် (ဤသို့)ပြောဆိုကြပါ၊ ကျွန်ုပ်တို့သည် အလ္လာဟ်အရှင်မြတ်ကို အီမာန်ယုံကြည်ခဲ့ကြပါသည်၊ ၎င်းပြင် ကျွန်ုပ်တို့ထံ ချပေးခြင်းခံရသည့်အရာ(ကုရ်အာန်ကျမ်းတော်မြတ်)အပြင် (တမန်တော်)အိဗ်ရာဟီမ်၊ (တမန်တော်)အစ္စမာအီလ်၊ (တမန်တော်)အစ္စဟာက်၊ (တမန်တော်)ယအ်ကူဗ်နှင့် ၎င်း၏အမျိုးအနွယ် သားမြေးများထံသို့ ချပေးခြင်းခံရသည့်အရာ(ကျမ်းများ၊ တရားဒေသနာများ)ကိုလည်း ယုံကြည်ခဲ့ကြပါသည်။ ၎င်းပြင် (တမန်တော်)မူစာနှင့် (တမန်တော်)အီစာတို့ကို ချပေးခြင်းခံရသည့်အရာ(ကျမ်းများ)ကိုလည်း ယုံကြည်ခဲ့ကြပါသည်။ ထို့ပြင် ကျွန်ုပ်တို့သည် တမန်တော်များအားလုံးထံသို့ ၎င်းတို့အား ဖန်ဆင်းမွေးမြူတော်မူသောအရှင်ထံမှ ချပေးခြင်းခံရသည့်အရာ(တရားဒေသနာများ)ကိုလည်း ယုံကြည်ခဲ့ကြပါသည်။ ကျွန်ုပ်တို့သည် တမန်တော်များ၏ကြားထဲတွင် မည်သူ့ကိုမှ ခွဲခြားခြင်းမပြုကြပါ။ ထို့ပြင် ကျွန်ုပ်တို့သည် ထိုအရှင်မြတ်၏အမိန့်တော်ကို နာခံသောသူများသာ ဖြစ်ကြပါသည်။
[137] ထို့နောက် အကယ်၍ သူ(ယဟူဒီနှင့် နတ်စ်ွရာနီ)တို့သည် အသင်တို့(စွဟာဗဟ်များ) အီမာန်ယုံကြည်ကြသကဲ့သို့ ယုံကြည်ခဲ့ကြလျှင် သူတို့သည်လည်း တရားလမ်းမှန်ကို အမှန်စင်စစ် ရရှိကြလိမ့်မည်။ ထို့နောက် အကယ်၍ သူတို့သည် ကျောခိုင်းမျက်နှာလွှဲသွားကြလျှင် အမှန်စင်စစ် သူတို့သည် ကွဲပြားဆန့်ကျင်မှုထဲ၌ပင် ရှိနေကြပေမည်။ သို့ဖြစ်ရာ အသင်(တမန်တော်)အား သူတို့(၏ရန်ပြုမှု)မှ အလ္လာဟ်အရှင်မြတ်(၏ကူညီစောင့်ရှောက်မှု)သည် လုံလောက်စေတော်မူလိမ့်မည်။ ထို့ပြင် အရှင်မြတ်သည် အကြွင်းမဲ့ကြားတော်မူသောအရှင်၊ အကြွင်းမဲ့သိတော်မူသောအရှင် ဖြစ်တော်မူသည်။
[138] (အလ္လာဟ်အရှင်မြတ် တစ်ပါးတည်းကိုသာ ယုံကြည်ကိုးကွယ်မှုဖြစ်သည့် သောင်ဟီဒ်ဟူသော) အလ္လာဟ်အရှင်မြတ်၏ဆေးရောင်ကို (အရှင်မြတ်က ကျွန်ုပ်တို့အား ခြယ်သတော်မူခဲ့သည်)။* ထို့ပြင် အရှင်မြတ်ထက်သာပို၍ ဆေးရောင်ခြယ်သနိုင်သူ မည်သူရှိဦးမည်နည်း။ ၎င်းပြင် ကျွန်ုပ်တို့သည် အရှင်မြတ်ကိုသာ ကိုးကွယ်သူများဖြစ်ကြသည်။
[139] (အို-တမန်တော်)အသင်သည် (ယဟူဒီများကို)ပြောလိုက်ပါ၊ အသင်တို့သည် အလ္လာဟ်အရှင်မြတ်နှင့်ပတ်သက်၍ ထိုအရှင်မြတ်သည် ကျွန်ုပ်တို့နှင့်အသင်တို့အား ဖန်ဆင်းမွေးမြူတော်မူသောအရှင်ဖြစ်တော်မူပါလျက်နှင့် ကျွန်ုပ်တို့အား အငြင်းအခုံ ပြုလုပ်နေကြပါသလော။ ထို့ပြင် ကျွန်ုပ်တို့၏လုပ်ရပ်များသည် ကျွန်ုပ်တို့အတွက်ဖြစ်၍ အသင်တို့၏လုပ်ရပ်များသည် အသင်တို့အတွက်ဖြစ်သည်။ ထို့ပြင် ကျွန်ုပ်တို့သည် ထိုအရှင်မြတ်ကိုသာ စိတ်စေတနာဖြူစင်မှုဖြင့် တစ်စိတ်တစ်လက်တည်း ကိုးကွယ်သူများဖြစ်ကြသည်။
[140] အမှန်စင်စစ် (တမန်တော်များဖြစ်ကြသည့်)အိဗ်ရာဟီမ်၊အစ္စမာအီလ်၊အစ္စဟာက်၊ယအ်ကူဗ်နှင့် သားစဉ်မြေးဆက်များသည် ယဟူဒီ သို့မဟုတ် နတ်စ်ွရာနီဘာသာဝင်များ ဖြစ်ကြသည်ဟူ၍ အသင်တို့ပြောဆိုကြသလော။ (အို-တမန်တော်)အသင်ပြောလိုက်ပါ၊ အသင်တို့သည် ပိုမိုသိကြသလော၊ သို့မဟုတ် အလ္လာဟ်အရှင်မြတ်သည်ပင် ပိုသိတော်မူပါသလော။ ထို့ပြင် အလ္လာဟ်အရှင်မြတ်ထံမှ (ရရှိထားပြီး)သူ၏ထံတွင်ရှိနေသည့် သက်သေအထောက်အထားကို ထိမ်ချန်လျှို့ဝှက်သောသူထက် သာပိုမတရားသူသည် မည်သူရှိဦးမည်နည်း။ ထို့ပြင် အလ္လာဟ်အရှင်မြတ်သည် အသင်တို့ပြုမူကြသည့် ကိစ္စများကို မေ့လျော့တော်မူမည့်အရှင်လည်း မဟုတ်ပေ။
[141] ၎င်းသည် အမှန်ပင် ကုန်လွန်သွားခဲ့သည့် အုပ်စုတစ်စုဖြစ်သည်၊ သူတို့ ဆည်းပူးရှာဖွေခဲ့သောအရာများသည် သူတို့အတွက်ဖြစ်ပြီး အသင်တို့ ဆည်းပူးရှာဖွေခဲ့သောအရာများသည် အသင်တို့အတွက်ပင်ဖြစ်သည်။ ထို့နောက် သူတို့ပြုလုပ်ခဲ့သည့်လုပ်ရပ်များနှင့် စပ်လျဉ်း၍ အသင်တို့သည် မေးမြန်းခြင်းခံကြရမည်မဟုတ်ပေ။ (လူတိုင်းသည် မိမိတို့ပြုမူခဲ့သည်များ၏အစားကိုသာ ခံကြရမည်ဖြစ်သည်။)
[142] မကြာမီ လူများအနက်မှ မသိမိုက်မဲသူများသည် (ယခုကဲ့သို့)ပြောကြလိမ့်မည်၊ မည်သည့်အရာက ထိုမွတ်စ်လင်မ်များအား သူတို့၏မူလ မျက်နှာမူရာအရပ်မှ ပြောင်းလဲအောင်လုပ်လိုက်သနည်း။ (အို-တမန်တော်)အသင် ပြောလိုက်ပါ၊ အရှေ့နေထွက်ရာအရပ်နှင့် အနောက်နေဝင်ရာအရပ်ကို အလ္လာဟ်အရှင်မြတ်သာ စိုးပိုင်တော်မူသည်။ အရှင်မြတ်သည် အရှင်မြတ်အလိုရှိသောသူကိုသာ ဖြောင့်မတ်မှန်ကန်သည့်လမ်းကို ညွှန်ကြားပြသတော်မူသည်။
[143] ထို့ပြင် ထိုကဲ့သို့ပင် ငါအရှင်သည် အသင်တို့အား လူများအတွက်(စံပြ) အသိသက်သေများဖြစ်စေရန်နှင့် ရစူလ်တမန်တော်(မုဟမ္မဒ်-ဆွ)သည်လည်း အသင်တို့အတွက် (စံပြ) အသိသက်သေများဖြစ်စေရန် အလယ်အလတ်*ကျသည့်အုပ်စုအဖြစ် ပြုလုပ်တော်မူခဲ့သည်။ အမှန်စင်စစ် ငါအရှင်မြတ်သည် အသင်မျက်နှာမူခဲ့သည့် ကိဗ်လဟ်ကို (ကိဗ်လဟ်အဖြစ်) ပြုလုပ်တော်မူခဲ့သည့်အကြောင်းမှာ အခြားအတွက်မဟုတ်၊ တမန်တော်၏အမိန့်ကို လိုက်နာသူနှင့် (တမန်တော်၏အမိန့်ကို မလိုက်နာဘဲ) မိမိ၏ခြေဖနောင့်ဘက်(ကျောခိုင်း) ပြန်လှည့်သွားသူကို ငါအရှင်မြတ်(ခွဲခြား)သိတော်မူရန်အတွက်သာဖြစ်သည်။ ထို့ပြင် အမှန်စင်စစ် ဤ(ကိဗ်လဟ်ပြောင်းလဲသည့်)ကိစ္စသည် အရှင်မြတ်က တရားလမ်းမှန်ညွှန်ကြားပြသထားသော သူများမှလွဲ၍ (အခြားသူများအတွက်) အလွန်ကြီးလေးသည့်ကိစ္စဖြစ်သည်။ ၎င်းပြင် အလ္လာဟ်အရှင်မြတ်သည် အသင်တို့၏ယုံကြည်မှုကို အကျိုးမဲ့ဖြစ်စေရန် (ဤကဲ့သို့ ကိဗ်လဟ်ပြောင်းလဲခြင်း အမိန့်ထုတ်ပြန်ခြင်း) မဟုတ်ပေ။ အမှန်စင်စစ် အလ္လာဟ်အရှင်မြတ်သည် လူများအပေါ်တွင် အလွန်ကြင်နာတော်မူသောအရှင်၊ အလွန်သနားကြင်နာတော်မူသောအရှင် ဖြစ်တော်မူသည်။
[144] အသင်(တမန်တော်)သည် မိုးကောင်းကင်ဘက်သို့ အကြိမ်ကြိမ် မျက်နှာမော်ကြည့်နေသည်ကို ငါအရှင် အမှန်စင်စစ်မြင်နေတော်မူသည်။ ထို့အတွက် ငါအရှင်သည် အသင်(တမန်တော်)နှစ်သက်သည့် ကိဗ်လဟ်ဘက်သို့ အသင်(တမန်တော်)အား အမှန်စင်စစ် လှည့်ပေးတော်မူမည်။ ထို့အတွက်ကြောင့် အသင်(တမန်တော်)သည် (ယခုအချိန်က စပြီး) အသင်၏မျက်နှာကို မတ်စ်ဂျိဒိဟရာမ်(ကအ်ဗဟ်ကျောင်းတော်)ဘက်သို့ လှည့်လိုက်ပါ။ ထို့ပြင် အသင်တို့သည် မည်သည့်အရပ်ဒေသ၌ပင်ရှိသည်ဖြစ်စေ (စွလာသ်ဝတ်ပြုသည့်အခါ) ထို မတ်စ်ဂျိဒိဟရာမ်ဘက်သို့သာ အသင်တို့၏မျက်နှာများကို လှည့်ကြပါ။ ထို့ပြင် အမှန်စင်စစ် ကျမ်းရသူများက ထိုအမိန့်တော်သည် သူတို့အား ဖန်ဆင်းမွေးမြူတော်မူသော အရှင်မြတ်ထံမှ အမှန်ပင်ဖြစ်ကြောင်း မုချသိကြသည်။ ထို့ပြင် အလ္လာဟ်အရှင်မြတ်သည် သူတို့ပြုမူကြသည့် ကိစ္စရပ်များကို မေ့လျော့တော်မူသောအရှင် မဟုတ်ပေ။
[145] ထို့ပြင် အမှန်စင်စစ် အကယ်၍ အသင်(တမန်တော်)သည် သက်သေလက္ခဏာဟူသမျှကို ကျမ်းရထားသူများရှေ့၌ ယူဆောင်လာလျှင်လည်း သူတို့သည် အသင်၏မျက်နှာမူရာ ကိဗ်လဟ်ကို လိုက်နာကြမည် မဟုတ်ပေ။ အသင်သည်လည်း သူတို့၏မျက်နှာမူရာ ကိဗ်လဟ်ကို လိုက်နာမည့်သူ မဟုတ်ပေ။ သူတို့အချင်းချင်းသည်လည်း အချို့သည် အချို့၏မျက်နှာမူရာ ကိဗ်လဟ်ကို လိုက်နာကြသောသူများ မဟုတ်ကြပေ။ သို့ဖြစ်ရာ (အရှင်မြတ်ထံမှ မှန်ကန်သည့်)အသိပညာများသည် အသင်(တမန်တော်)ထံသို့ ရောက်ပြီးနောက်မှ အသင်သည် သူတို့၏အလိုဆန္ဒများကို လိုက်လျောခဲ့လျှင် အမှန်စင်စစ် အသင်သည် အပြစ်ကျူးလွန်သူများထဲတွင် အပါအဝင်ဖြစ်သွားလိမ့်မည်။
[146] ငါအရှင်မြတ်က ကျမ်းဂန်ချီးမြှင့်ပေးသနားထားသည့်သူများသည် သူတို့၏သားမြေးများကို သိရှိ(မှတ်မိ)ကြသကဲ့သို့ ထိုတမန်တော်(မုဟမ္မဒ်-ဆွ)ကိုလည်း သိရှိ(မှတ်မိ)ကြသည်။* ထို့နောက် အမှန်စင်စစ် သူတို့ထဲမှ လူတစ်စုသည် အမှန်ကိုသိပါလျက် ထိမ်ချန်လျှို့ဝှက်ထားကြသည်။
[147] (မျက်နှာမူရာအရပ်နှင့်ပတ်သက်သည့် အမိန့်တော်)အမှန်သည် အသင်(တမန်တော်)ကို ဖန်ဆင်းမွေးမြူတော်မူသောအရှင်ထံမှ (လာသည့်)အမိန့်ပင်ဖြစ်သည်။ ထို့ကြောင့် အသင်(တမန်တော်)သည် သံသယဖြစ်သူများထဲတွင် မပါဝင်ပါနှင့်။
[148] ထို့ပြင် လူမျိုးတိုင်းတွင်(မျက်နှာမူရာ)အရပ်တစ်ခုစီရှိ၏။ သူတို့သည်(ဝတ်ပြုသည့်အခါ) ထိုမျက်နှာမူရာဘက်သို့ မျက်နှာမူလေ့ရှိကြသည်။ သို့ဖြစ်ရာ အသင်တို့သည် ကောင်းမှုကုသိုလ်ကို သူ့ထက်ငါသာအောင် အပြိုင်အဆိုင်ပြုလုပ်ကြပါ။ အသင်တို့သည် မည်သည့်အရပ်၌ပင်ရှိသည်ဖြစ်စေ အလ္လာဟ်အရှင်မြတ်သည် အသင်တို့အားလုံးကို စုရုံးစေတော်မူမည်။ အမှန်စင်စစ် အလ္လာဟ်အရှင်မြတ်သည် အရာအားလုံးအပေါ်တွင် အလွန်စွမ်းဆောင်နိုင်တော်မူသောအရှင် ဖြစ်တော်မူသည်။
[149] ထို့ပြင် အသင်(တမန်တော်)သည် မည်သည့်နေရာသို့ထွက်သည်ဖြစ်စေ (မည်သည့်နေရာ၌ပင်ရှိသည်ဖြစ်စေ) အသင်၏မျက်နှာကို (စွလာသ်ဝတ်ပြုသည့်အခါ) မတ်စ်ဂျိဒိဟရာမ်ကျောင်းတော်ဘက်သို့လှည့်ပါ။ အမှန်စင်စစ် ထိုအမိန့်သည် အသင့်အား ဖန်ဆင်းမွေးမြူတော်မူသောအရှင်ထံမှ (လာသည့်အမိန့်) အမှန်ပင်ဖြစ်သည်။ ထို့ပြင် အလ္လာဟ်အရှင်မြတ်သည် အသင်တို့ပြုမူကြသည့် အရာများမှ မေ့လျော့တော်မူသောအရှင် မဟုတ်ပေ။
[150] ထို့ပြင် အသင်(တမန်တော်)သည် မည်သည့်နေရာသို့ထွက်သည်ဖြစ်စေ အသင်၏မျက်နှာကို (စွလာသ်ဝတ်ပြုသည့်အခါ) မတ်စ်ဂျိဒိဟရာမ်ကျောင်းတော်ဘက်သို့လှည့်ပါ။ အသင်တို့သည်လည်း မည်သည့်နေရာ၌ပင်ရှိသည်ဖြစ်စေ အသင်တို့၏မျက်နှာများကို (စွလာသ်ဝတ်ပြုသည့်အခါ) မတ်စ်ဂျိဒိဟရာမ်ကျောင်းတော်ဘက်သို့လှည့်ကြပါ။ (ဤကဲ့သို့ အမိန့်ချတော်မူခြင်းသည်) အသင်တို့အပေါ်တွင် လူများ၏စောဒကတက်ခြင်း မရှိရန်အတွက်ဖြစ်သည်။* သို့ရာတွင် သူတို့ထဲမှ မတရားပြုလုပ်သောသူများကမူ*၊ (စောဒကတက်နေကြဦးမည်ဖြစ်သည်)။ သို့ဖြစ်ရာ အသင်တို့သည် သူတို့အား လုံးဝမကြောက်ကြဘဲ ငါအရှင်မြတ်ကိုသာ ကြောက်ရွံ့ကြပါ။ ထို့နောက် ငါအရှင်မြတ်သည် အသင်တို့အပေါ် ငါအရှင်မြတ်၏ကျေးဇူးတော်ကို ပြည့်စုံစေတော်မူရန်နှင့် အသင်တို့သည် လမ်းမှန်ကိုရရှိကြရန်အတွက် (ဤကဲ့သို့ အမိန့်ချတော်မူခြင်းဖြစ်သည်)။
[151] (ထိုသို့ အသင်တို့၏ ကိဗ်လဟ်ကို ကအ်ဗဟ်ကျောင်းတော်ဘက်သို့လှည့်ပေးထား၍ အရှင်မြတ်၏ကျေးဇူးတော်များကို ပြည့်စုံအောင်လုပ်ပေးကာ အသင်တို့ လမ်းမှန်ရရှိသွားစေရန် ကျေးဇူးပြုတော်မူခြင်းသည် ဤကျေးဇူးမတိုင်မီ၌) ငါအရှင်မြတ်သည် အသင်တို့ထံသို့ အသင်တို့ထဲမှ တမန်တော်တစ်ပါးစေလွှတ်(ပြီးကျေးဇူးပြု)တော်မူသကဲ့သို့ပင်ဖြစ်သည်။ ထိုတမန်တော်သည် ငါအရှင်မြတ်၏ အာယသ်တော်များကို အသင်တို့ရှေ့၌ ဖတ်ရွတ်သည်။ ၎င်းပြင် အသင်တို့အား(မကောင်းမှုများမှ)သန့်စင်အောင်ပြုပေးသည်။ ထို့ပြင် အသင်တို့အား ကျမ်းဂန်နှင့် ပညာဉာဏ်မြော်အမြင်ကို သင်ပေးသည်။* ထို့ပြင် အသင်တို့မသိခဲ့သောအရာများကိုလည်း သင်ပေးသည်။
[152] သို့ဖြစ်ရာ အသင်တို့သည် ငါအရှင်မြတ်အား သတိရကြပါ။ ငါအရှင်မြတ်သည်လည်း အသင်တို့အား သတိရတော်မူမည်။ ထို့ပြင် အသင်တို့သည် ငါအရှင်မြတ်၏ကျေးဇူးတော်ကို သိကြပါ။ ထို့ပြင် အသင်တို့သည် ငါအရှင်မြတ်အား ကျေးဇူးမကန်းကြနှင့်။
[153] အို- အီမာန်ယုံကြည်သူအပေါင်းတို့၊ အသင်တို့သည် သည်းခံခြင်း၊ စွလာသ်ဝတ်ပြုခြင်းတို့ဖြင့် (အရှင်မြတ်ထံတွင်) အကူအညီတောင်းကြပါ။ အမှန်စင်စစ် အလ္လာဟ်အရှင်မြတ်သည် သည်းခံသူများနှင့်အတူတကွ ရှိတော်မူသည်။
[154] ထို့ပြင် အသင်တို့သည် အလ္လာဟ်အရှင်မြတ်၏လမ်းတော်တွင် အသတ်ခံရသူများကို သေသူများဟုမပြောကြနှင့်။ အမှန်စင်စစ် သူတို့သည် (အရှင်မြတ်ထံတွင်)ရှင်နေသူများသာ ဖြစ်ကြသည်။ သို့ရာတွင် အသင်တို့ မသိနိုင်ကြပေ။
[155] ထို့ပြင် အမှန်စင်စစ် ငါအရှင်မြတ်သည် အသင်တို့အား တစ်စုံတစ်ခုသောအရာဖြင့် စမ်းသပ်တော်မူမည်။ ကြောက်ရွံ့စိုးရိမ်မှုဖြင့်လည်းကောင်း၊ ငတ်မွတ်မှုဖြင့်လည်းကောင်း၊ ပစ္စည်းဥစ္စာလျော့နည်းဆုံးရှုံးမှုဖြင့်လည်းကောင်း၊ အသက်ဆုံးရှုံးဖြင့်လည်းကောင်း၊ ကောက်ပဲသီးနှံများ ပျက်စီးမှုဖြင့်လည်းကောင်း စမ်းသပ်တော်မူမည်။ ၎င်းနောက် အသင်(တမန်တော်)သည် သည်းခံသူများအား သတင်းကောင်းပေးလိုက်ပါ။
[156] ထိုသူများသည် သူတို့အပေါ် ဒုက္ခတစ်စုံတစ်ခုကျရောက်လာသည့်အခါ (ဤသို့)ပြောဆိုကြသည်၊ အမှန်စင်စစ် ကျွန်ုပ်တို့သည် အလ္လာဟ်အရှင်မြတ်အတွက်သာ ဖြစ်ကြပြီး အမှန်စင်စစ် ကျွန်ုပ်တို့သည် အရှင်မြတ်ထံသို့ ပြန်သွားကြရမည့်သူများသာ ဖြစ်ကြသည်။
[157] ထိုသူများအပေါ်၌ပင် သူတို့ကို ဖန်ဆင်းမွေးမြူတော်မူသောအရှင်ထံမှ ကောင်းချီးမဂင်္လာများနှင့် သနားကရုဏာရှိသည်။ ထို့ပြင် သူတို့ပင် တရားလမ်းမှန်ကို ရရှိသူများဖြစ်ကြသည်။
[158] အမှန်စင်စစ် စဖွာနှင့် မရ်ဝဟ်တောင်*သည် အလ္လာဟ်အရှင်မြတ်၏ ထင်ရှားသောအထိမ်းအမှတ်များ*အနက်မှဖြစ်သည်။ သို့ဖြစ်ရာ မည်သူမဆို အလ္လာဟ်အရှင်မြတ်၏အိမ်တော်(ကအ်ဗဟ်ကျောင်းတော်)သို့ ဟဂျ်ပြုလုပ်*ရန် သို့မဟုတ် အွမ္မရဟ်ပြုလုပ်*ရန်သွားလျှင် ထိုသူတို့အပေါ်တွင် ထိုတောင်နှစ်ခုကြား(စအီပြုလုပ်)သွားလာခြင်း*သည် မည်သည့်အပြစ်မျှ မရှိပေ။ ထို့ပြင် မည်သူမဆို စေတနာအလျောက် ကောင်းမှုတစ်ခုခုပြုလုပ်လျှင် အမှန်ပင် အလ္လာဟ်အရှင်မြတ်သည် အမိန့်နာခံသူကို အလွန်ကျေးဇူးပြု အစားပေးတော်မူသောအရှင်၊ အကြွင်းမဲ့သိတော်မူသောအရှင် ဖြစ်တော်မူသည်။
[159] အမှန်စင်စစ် အကြင်သူများသည် ငါအရှင်မြတ်ချပေးတော်မူသော ထင်ရှားသည့်အထောက်အထားများနှင့် လမ်းမှန်ညွှန်ကြားပြသချက်များကို ငါအရှင်မြတ်သည် လူများအတွက် ကျမ်းဂန်ထဲတွင် ရှင်းလင်းစွာ ဖော်ပြထားပြီးနောက်မှပင် ထိမ်ချန်လျှို့ဝှက်ထားကြသည်။ ထိုသူများအား အလ္လာဟ်အရှင်မြတ်သည် ကရုဏာတော်မှ ကင်းဝေးစေတော်မူသည်။ ထို့ပြင် ကျိန်ဆဲသူများကလည်း သူတို့အား ကျိန်ဆဲကြသည်။
[160] သို့ရာတွင် အကြင်သူများသည် ဝန်ချတောင်းပန်ကြမည်၊ ထို့နောက် ပြုပြင်ပြီးနေကြမည်၊ ၎င်းပြင် (အမိန့်တော်များကို) ရှင်းလင်းထုတ်ဖော်ပြောကြမည်ဆိုလျှင် ငါအရှင်မြတ်သည် ထိုသို့သောသူများ၏ သောင်ဗဟ်အမှားဝန်ချတောင်းပန်မှုကို လက်ခံတော်မူသည်။ အမှန်စင်စစ် ငါအရှင်မြတ်သည် အမှားဝန်ခံမှုကို အကြိမ်ကြိမ်လက်ခံတော်မူသောအရှင်၊ အလွန်သနားကြင်နာတော်မူသောအရှင် ဖြစ်တော်မူသည်။
[161] အမှန်စင်စစ် အကြင်သူများသည် သွေဖည်ငြင်းပယ်ပြီး ကာဖိရ်အဖြစ်နှင့် သေဆုံးခဲ့ကြသည်။ (သို့ဖြစ်လျှင်) အလ္လာဟ်အရှင်မြတ်အပြင် ကောင်းကင်တမန်များနှင့် လူများအားလုံးတို့၏ ကျိန်ဆဲခြင်းတို့သည် ထိုသူများအပေါ်တွင်ရှိသည်။
[162] သူတို့သည် ထိုအထဲ၌ပင် အမြဲနေရမည့်သူများဖြစ်ကြသည်။ သူတို့ထံမှ အပြစ်ဒဏ်သည် ပေါ့ပါးသွားမည်လည်းမဟုတ်သည့်အပြင် အချိန်ဆိုင်းငံ့ခြင်းလည်းခံရမည် မဟုတ်ပေ။
[163] ထို့ပြင် တစ်ပါးတည်းတည်ရှိတော်မူသည့် ကိုးကွယ်ထိုက်သောအရှင်သာ အသင်တို့၏အရှင်ဖြစ်တော်မူသည်။ ထိုအရှင်မှလွဲ၍ ကိုးကွယ်ထိုက်သောအရှင် မရှိပေ။ ထိုအရှင်မြတ်သည် အနန္တကရုဏာတော်ရှင်၊ အလွန်သနားကြင်နာတော်မူသောအရှင် ဖြစ်တော်မူသည်။
[164] အမှန်စင်စစ် မိုးကောင်းကင်များနှင့် ပထဝီမြေကို ဖန်ဆင်းတော်မူခြင်းတွင်၊ နေ့နှင့်ညပြောင်းလဲနေခြင်းတွင်၊ လူသားများအား အကျိုးဖြစ်ထွန်းစေသောအရာများတင်ဆောင်ပြီး ပင်လယ်ထဲ၌ သွားလာနေသည့်သဘေင်္ာများတွင်၊ (ခြောက်ကပ်)သေပြီးဖြစ်သည့် မြေကြီးကို ရှင်သန်(စိမ်းလန်း)စေရန် မိုးကောင်းကင်မှ အလ္လာဟ်အရှင်မြတ် ရွာသွန်းစေသည့်မိုးရေတွင်၊ ထို(အမှန်ပင် စိမ်းလန်းရှင်သန်သွားသည့်)မြေကြီးပေါ် တိရစာ္ဆန်အမျိုးမျိုးကို ပေါက်ဖွားပြန့်နှံ့စေတော်မူခဲ့ရာတွင်၊ ထို့ပြင် လေများကို ပြောင်းရွှေ့ရွေ့လျားစေခြင်းတွင်၊ မိုးနှင့်မြေကြား၌(သွားလာရန်)အမိန့်နာခံနေသည့်မိုးတိမ်များတွင် နာလည်တတ်သည့်၊ အသိဉာဏ်ရှိသောသူများအတွက် (အရှင်မြတ်၏)သက်သေလက္ခဏာများ*ရှိသည်။
[165] ထို့ပြင် လူများတွင် အချို့သည် အလ္လာဟ်အရှင်မြတ်နှင့်ယှဉ်ပြီး အခြားအရာ(ရုပ်တု၊ အကြီးအကဲ)များကို တွဲဖက်ကိုးကွယ်ကြသည်။ ထိုသူများသည် အလ္လာဟ်အရှင်မြတ်ကို ချစ်ခင်မြတ်နိုးသကဲ့သို့ ထိုအရာများကို ချစ်ခင်မြတ်နိုးကြသည်။ ၎င်းပြင် အီမာန်ယုံကြည်ကြသူများမှာမူ အလ္လာဟ်အရှင်မြတ်ကိုသာ အလွန်ချစ်ခင်မြတ်နိုးကြသည်။ ထို့ပြင် (အရှင်မြတ်နှင့်တွဲဖက်ပြီး) မတရားကျူးလွန်သည့်သူများသည် အရှင်မြတ်၏အာဇာဗ် အပြစ်ဒဏ်ကိုမြင်သည့်အခါ အင်အားဟူသမျှသည် အလ္လာဟ်အရှင်မြတ်သာ စိုးပိုင်တော်မူကြောင်းနှင့် အလ္လာဟ်အရှင်မြတ်သည် ပြင်းထန်သည့်အပြစ်ဒဏ်ခတ်တော်မူသောအရှင် ဖြစ်ကြောင်းကို သူတို့(သိရှိလိုက်ရသကဲ့သို့ ဤဘဝ၌ကတည်းက) အကယ်၍(ကြိုတင်)သိမြင်ကြလျှင် ကောင်းလေစွ။
[166] တစ်ချိန်(ကိယာမသ်နေ့)တွင် ခေါင်းဆောင်များသည် သူတို့၏နောက်လိုက်များကို စွန့်ပစ်ကြလိမ့်မည်။ ထို့ပြင် သူတို့(အားလုံး)သည် အပြစ်ဒဏ်များကို မြင်ကြလိမ့်မည်။ ထို့နောက် သူတို့သည် တစ်ဦးနှင့်တစ်ဦး ဆက်သွယ်မှုများလည်း ပြတ်တောက်သွားလိမ့်မည်။
[167] ထို့ပြင် နောက်လိုက်တပည့်များက ပြောဆိုကြမည်၊ အကယ်၍ ငါတို့သည် (လောကသို့) တစ်ကြိမ် ပြန်လှည့်ခွင့်ရလျှင် ကောင်းလေစွ။ သို့ဖြစ်လျှင် ထိုခေါင်းဆောင်များသည် ငါတို့အား စွန့်ပစ်သွားကြသကဲ့သို့ ငါတို့သည်လည်း သူတို့အား စွန့်ပစ်လိုက်ကြမည်။ အလ္လာဟ်အရှင်မြတ်သည် ထိုသို့ပင် သူတို့၏အပြုအမူများကို သူတို့အပေါ်တွင် ကြေကွဲဖွယ်ရာအဖြစ် ပြသတော်မူမည်။ ၎င်းနောက် သူတို့သည် ငရဲမီးထဲမှ ထွက်ကြရမည့်သူများမဟုတ်ကြပေ။
[168] အို- လူသားအပေါင်းတို့၊ အသင်တို့သည် ကမာ္ဘမြေပေါ်တွင်ရှိသည့် အရာများထဲမှ စားပိုင်ခွင့်ပြုထားသည့်*သန့်ပြန့်သောအရာများကို စားသုံးကြပါ။ ထို့နောက် အသင်တို့သည် ရှိုင်သွာန်၏လျှောက်လှမ်းမှုများအတိုင်း (ဖဝါးခြေထပ်)မလိုက်ကြနှင့်။* အမှန်စင်စစ် ရှိုင်သွာန်သည် အသင်တို့၏ ထင်ရှားသောရန်သူပင်ဖြစ်သည်။
[169] (အဘယ့်ကြောင့်ဆိုသော်)သူ(ရှိုင်သွာန်)သည် အသင်တို့အား မကောင်းမှုများနှင့် စက်ဆုပ်ဖွယ်ရာကိစ္စများဖြင့်လည်းကောင်း၊ အသင်တို့သည် အသင်တို့မသိသည့်ကိစ္စရပ်များကို အလ္လာဟ်အရှင်မြတ်အပေါ်တွင် လိမ်လည်ပြစ်တင်ပြောဆိုရန်အတွက်လည်းကောင်း* အမိန့်ပေး လှုံ့ဆော်နေသူသာဖြစ်သည်။
[170] ထို့ပြင် အသင်တို့သည် အလ္လာဟ်အရှင်မြတ်ချပေးတော်မူသောအရာ(တရားတော်)များကို လိုက်နာကြပါဟု သူတို့ကို ပြောဆိုခံကြရသည့်အခါ သူတို့ကပြောဆိုကြသည်၊ ထိုသို့ လိုက်နာမည်မဟုတ်ပါ၊ အမှန်မှာ ကျွန်ုပ်တို့သည် ကျွန်ုပ်တို့၏ဘိုး၊ဘေးများလိုက်နာနေသည်ကို ကျွန်ုပ်တို့တွေ့ခဲ့ရသည့်အရာကိုသာ လိုက်နာကြမည်။* အကယ်၍ သူတို့၏ဘိုး၊ဘေးများသည် မည်သည့်အရာမှမသိကြသည့်အပြင် လမ်းမှန်ရသည့်သူများ မဟုတ်ကြလျှင်လည်း(သူတို့နောက်ကိုသာလိုက်ကြမည်လော)။
[171] ကာဖိရ်ငြင်းပယ်သူများ၏ပမာသည် ခေါ်သံနှင့်အော်ဟစ်သံမှလွဲ၍ မည်သည့်အရာကိုမျှ မကြားသည့်(တိရစာ္ဆန်ကျောင်းသည့်သူ၏)တိရစာ္ဆန်များကို ဟစ်အော်သံနှင့်တူသည် (မည်သည့်အရာကိုမျှ နားလည်ခြင်းမရှိပေ)*။ သူတို့သည် နားပင်းသူများ၊ ဆွံ့အသူများ၊ မျက်ကန်းများသာဖြစ်ကြသည်။ သို့ဖြစ်ပေရာ သူတို့သည်(မည်သည့်အရာကိုမျှ) မသိနားမလည်ကြပေ။
[172] အို- အီမာန်ယုံကြည်သူအပေါင်းတို့၊ အသင်တို့အား ငါအရှင်မြတ်ပေးသနားတော်မူထားသည့် သန့်ပြန့်သောအရာများထဲမှ စားသုံးကြပါ။ ထို့ပြင် အသင်တို့သည် အလ္လာဟ်အရှင်မြတ်တစ်ပါးတည်းကိုသာ ကိုးကွယ်ခဲ့ကြသည်ဆိုလျှင် ထိုအရှင်မြတ်အား ကျေးဇူးတင်ကြပါ။
[173] အလ္လာဟ်အရှင်မြတ်သည် အသင်တို့အပေါ်တွင် အသေကောင်၊*(ယိုစီးပြီးသည့်)သွေး၊*ဝက်သား*နှင့် အလ္လာဟ်အရှင်မြတ်မှလွဲ၍ အခြားအရာများအတွက် ရည်စူး(သတ်ဖြတ်ထား)သည့် သားကောင်များ*ကိုသာ အမှန်စင်စစ် တားမြစ်ထားတော်မူသည်။ သို့ရာတွင် (အစားအစာမရရှိ၍ အသက်စိုးရိမ်ရသည်အထိ) အကျပ်အတည်းနှင့် ရင်ဆိုင်ခဲ့ရသူသည် (အရသာခံချင်သည့်)မက်မောခုံမင်သူလည်းမဟုတ်ဘဲ၊ (လိုသည်ထက် ပိုစားသည့်)အစားကျူးသည်လည်းမဟုတ်ဘဲ (မသေရုံစားခဲ့လျှင်)* ထိုသူ၏အပေါ်တွင် မည်သည့်အပြစ်မျှ မရှိပေ။ အမှန်စင်စစ် အလ္လာဟ်အရှင်မြတ်သည် အလွန်လွတ်ငြိမ်းချမ်းသာခွင့်ပေးတော်မူသောအရှင်၊ အလွန်သနားကြင်နာတော်မူသောအရှင် ဖြစ်တော်မူသည်။
[174] အမှန်စင်စစ် အလ္လာဟ်အရှင်မြတ် ချပေးတော်မူသည့်ကျမ်းဂန်ကို ထိမ်ချန်ပြီး ထိုကျမ်းဂန်ကို အဖိုးအခအနည်းငယ်နှင့် လဲလှယ်ရောင်းချသူများသည် သူတို့၏ဗိုက်များထဲတွင် မီးကလွဲ၍ အခြားမည်သည့်အရာကိုမျှ စားသောက်ဖြည့်တင်းနေကြခြင်းမဟုတ်ပေ။ ထို့ပြင် ကိယာမသ်ရှင်ပြန်ထရမည့်နေ့တွင် အလ္လာဟ်အရှင်မြတ်သည် သူတို့အား(အရေးလုပ်၍)စကားပြောမည် မဟုတ်ပေ။ ထို့ပြင် သူတို့အား စင်ကြယ်အောင်လုပ်ပေးမည်လည်း မဟုတ်ပေ။ ထို့ပြင် သူတို့အတွက် ပြင်းပြနာကျင်စေသည့် အပြစ်ဒဏ်လည်းရှိသည်။
[175] ထိုသူများသည် လမ်းမှားကို လမ်းမှန်နှင့် အဇာဗ်အပြစ်ဒဏ်ကို မဂ်ဖိရသ် လွတ်ငြိမ်းချမ်းသာမှုနှင့် လဲလှယ်ဝယ်ယူသူများဖြစ်ကြသည်။ ထို့ပြင် သူတို့သည် ငရဲမီး၏ဒဏ်ကို မည်မျှခံနိုင်သူများဖြစ်ကြသနည်း။
[176] ထို(အပြစ်ဒဏ်များခံရမည့်)အကြောင်းရင်းမှာ အမှန်စင်စစ် အလ္လာဟ်အရှင်မြတ်သည် မှန်ကန်သောကျမ်းတော်ကို ချပေးတော်မူခဲ့သော်ငြားလည်း ထိုကျမ်းတော်နှင့်ပတ်သက်၍ ကွဲလွဲကြသည့်သူများသည် ဝေးကွာလှသည့် ကွဲပြားမှု၌ အမှန်ရောက်ရှိနေသောကြောင့်ဖြစ်သည်။
[177] (မိမိတို့နေရာဒေသနှင့်အညီ ကိဗ်လဟ်ရှိရာ)အရှေ့အရပ်နှင့် အနောက်အရပ်ဘက်သို့ မျက်နှာမူခြင်းသည်သာ အသင်တို့အတွက် မြင့်မြတ်သောကောင်းမှု*မဟုတ်သေးပေ။ သို့ရာတွင် မြင့်မြတ်သည့်ကောင်းမှုရှင်များဟူသည် အလ္လာဟ်အရှင်မြတ်၊ နောက်ဆုံးနေ့၊ ကောင်းကင်တမန်များ၊ ကျမ်းဂန်များနှင့် နဗီတမန်တော်များကို ယုံကြည်ကြသောသူများဖြစ်သည်။ ထို့ပြင် ထိုသူများသည် အရှင်မြတ်အား ချစ်မြတ်နိုးသည့်အတွက် သူတို့၏ပစ္စည်းဥစ္စာများကို ဆွေမျိုးများ၊ အဘမဲ့ကလေးများ၊ ဆင်းရဲသားများ၊ ခရီးသည်များ၊ တောင်းစားသူများနှင့် ကျေးကျွန်များအား (ကျွန်ဘဝမှ လွတ်မြောက်စေရန်) ပေးကမ်းလှူဒါန်းကြသည်။ သူတို့သည် စွလာသ် ဝတ်ပြုကြသည်။ ဇကာသ်ပေးဆောင်ကြသည်။ သူတို့သည် ကတိပြုသည့်အခါ ကတိတည်ကြသည်။ ဆင်းရဲဒုက္ခရောက်သည့်အခါ၊ ရောဂါဝေဒနာခံစားရသည့်အခါနှင့် စစ်တိုက်သည့်အခါတွင်လည်း သည်းခံကြသောသူများဖြစ်ကြသည်။ သူတို့သာ မှန်ကန်သည့်သူများဖြစ်ကြသည်။ ထို့ပြင် သူတို့သာ ကြောက်ရွံ့အပြစ်ရှောင် ကောင်းကျိုးဆောင်သူများ ဖြစ်ကြသည်။
[178] အို- အီမာန်ယုံကြည်သူအပေါင်းတို့၊ အသင်တို့အပေါ်တွင် (မတရား)အသတ်ခံရသူများနှင့် ပတ်သက်၍ လက်စားချေရန်(ဥပဒေ)ပြဋ္ဌာန်းထားလိုက်ပေပြီ။ (ပြဋ္ဌာန်းချက်မှာ) လွတ်လပ်သူသည် လွတ်လပ်သူ၏အစား၊ ကျေးကျွန်သည် ကျေးကျွန်၏အစား၊ မိန်းမသည် မိန်းမ၏အစား (သေဒဏ်ခံရမည်)*။ ထို့နောင် အကြင်(သတ်)သူသည် သူ၏ညီနောင်(ဖြစ်သည့် သေသူ၏အမွေဆိုင်များ)ဘက်မှ တစ်စုံတစ်ရာ ခွင့်လွှတ်မှုပြုခံခဲ့ရလျှင် (သေသူ၏အမွေစားအမွေခံများသည်) ကောင်းမွန်သည့်နည်းဖြင့် လျော်ကြေးတောင်းဆိုမှုပြုရမည်။ (သတ်သူကလည်း သူတို့တောင်းဆိုသကဲ့သို့) ကောင်းမွန်သည့်နည်းနှင့် လျော်ကြေးပေးဆပ်ဖို့(ဖရဿွ်တာဝန်)ဖြစ်သည်။* ဤသည် အသင်တို့ကို ဖန်ဆင်းမွေးမြူတော်မူသော အရှင်မြတ်ထံမှ (သေစားသေစေခြင်းဒဏ်မှ) လျှော့ပေါ့ပေးခြင်းနှင့်* သနားကရုဏာချီးမြှင့်ခြင်း*ပင်ဖြစ်သည်။ ထို(ဥအဒေပြဋ္ဌာန်းပြီး)နောက် မည်သူမဆို (ဤဥပဒေကို)ကျူးလွန်လျှင် ထိုသူအတွက် ပြင်းပြနာကျင်စေသည့် အပြစ်ဒဏ်ရှိလိမ့်မည်။
[179] အို- အသိဉာဏ်ရှိသူအပေါင်းတို့၊ အသင်တို့သည် (မတရားသတ်ဖြတ်ခံရခြင်းမှ) ရှောင်ကြဉ်နိုင်ကြရန်အတွက်*ထိုသို့ သေစားသေစေခြင်းထဲ၌ အသင်တို့အတွက် အသက်ရှင်ခြင်းရှိသည်။
[180] အသင်တို့ထဲမှ တစ်ဦးဦးထံသို့ သေခြင်းတရား ဆိုက်ရောက်လာသည့်အခါ အကယ်၍ သူသည် ပစ္စည်းဥစ္စာတစ်စုံတစ်ရာ ချန်ထားခဲ့လျှင် (သူ၏)မိဘနှစ်ပါးနှင့် ဆွေမျိုးရင်းချာများအတွက် ကောင်းမွန်သည့်နည်းဖြင့် မှာကြားခဲ့ရန်* အသင်တို့ပေါ်တွင် ပြဋ္ဌာန်းခြင်းခံရသည်။ (ဤသည်) ကြောက်ရွံ့အပြစ်ရှောင် ကောင်းကျိုးဆောင်သူများအပေါ်တွင် တာဝန်ဖြစ်သည်။
[181] ထို့နောက် အကြင်သူတို့သည် (ထိုမှာကြားချက်ကို) ကြားနာပြီးနောက်မှ ပြောင်းလဲခဲ့လျှင် ထိုပြောင်းလဲခြင်း၏အပြစ်သည် ပြောင်းလဲသောသူများအပေါ်၌သာ ကျရောက်သည်။ (ထိုပြောင်းလဲထားသောအမိန့်များကို လိုက်နာပါက လိုက်နာသူများသည် စီစစ်ခြင်းမပြုသည့် အပြစ်ဖြစ်ပေမည်။) အမှန်စင်စစ် အလ္လာဟ်အရှင်မြတ်သည် (သူတို့မှာကြားခဲ့သည်များကို) အကြွင်းမဲ့ကြားတော်မူသောအရှင်၊ အကြွင်းမဲ့သိတော်မူသောအရှင် ဖြစ်တော်မူသည်။
[182] ထို့နောက် အကြင်သူသည် မှာကြားခဲ့သူထံမှ ဘက်လိုက်မတရားမှု တစ်စုံတစ်ခု သို့မဟုတ် ပြစ်မှုတစ်စုံတစ်ခုကို စိုးရိမ်ရ၍ ထို(အမွေဆိုင်)သူများ၏ကြားတွင် သင့်မြတ်အောင်လုပ်ခဲ့လျှင် ထိုသို့(သင့်မြတ်အောင်)လုပ်သူအပေါ် မည်သည့်အပြစ်မျှ မရှိပေ။ အမှန်စင်စစ် အလ္လာဟ်အရှင်မြတ်သည် အလွန်လွတ်ငြိမ်းချမ်းသာခွင့်ပေးတော်မူသောအရှင်၊ အလွန်သနားကြင်နာတော်မူသောအရှင် ဖြစ်တော်မူသည်။
[183] အို- အီမာန်ယုံကြည်သူအပေါင်းတို့၊ အသင်တို့သည် ကြောက်ရွံ့အပြစ်ရှောင် ကောင်းကျိုးဆောင်သူများဖြစ်ကြရန်အတွက် အသင်တို့ မတိုင်မီသူများအပေါ်တွင် စွောင်မ် ဥပုသ်စောင့်ထိန်းမှု (အမိန့်တော်)ပြဋ္ဌာန်းခံခဲ့ရသကဲ့သို့ အသင်တို့အပေါ်တွင်လည်း စွောင်မ် ဥပုသ်စောင့်ထိန်းရန် (အမိန့်တော်)ပြဋ္ဌာန်းခံလိုက်ရပြီ ဖြစ်သည်။
[184] (စွောင်မ် ဥပုသ်စောင့်ထိန်းရမည့်ရက်များသည်) ရေတွက်ထားသော နေ့ရက်များသာဖြစ်သည်။* သို့ရာတွင် အသင်တို့ထဲမှ တစ်ဦးတစ်ယောက်သည် ရောဂါဝေဒနာကြောင့် သို့မဟုတ် ခရီးထွက်နေသောကြောင့် (စွောင်မ် ဥပုသ် မစောင့်ထိန်းဘဲနေခဲ့လျှင်) ထိုသူ၏အပေါ်တွင် အခြားရက်များ၌ (သူပျက်ခဲ့သည့်)အရေအတွက်အတိုင်း စောင့်ထိန်းရမည်ဖြစ်သည်။ ထို့ပြင် အကြင်သူများသည် ခဲယဉ်းစွာ စွောင်မ် ဥပုသ်စောင့်ထိန်းကြရလျှင်* ထိုသူမျာသည် (မစောင့်နိုင်သော စွောင်မ် ဥပုသ်တစ်ရက်၏အစား) ဆင်းရဲသားတစ်ဦးကို(တစ်ရက်)ကျွေးမွေးကြရမည်။ ထို့ပြင် အကြင်သူသည် (မိမိ၏အသိတရားဖြင့် ဖြူစင်သောစိတ်)စေတနာအလျောက် ကောင်းမှုတစ်ခုခုပြုလုပ်လျှင် ထိုအရာသည် သူ၏အတွက် ပို၍ကောင်းသည်။ ၎င်းပြင် (မတတ်စွမ်းနိုင်သူအတွက် အခွင့်ရှိသော်ငြားလည်း စောင့်ထိန်းခြင်း၏အကျိုးအာနိသင်ကို) အသင်တို့ သိနားလည်ခဲ့ကြလျှင် စွောင်မ် ဥပုသ်စောင့်ထိန်းခြင်းသည် အသင်တို့အတွက် ပို၍ကောင်းသည်။
[185] ရမဿွန်လ*သည် ကုရ်အာန်ကျမ်းတော်မြတ် ကျရောက်ခဲ့သည့်လ ဖြစ်သည်။ ထိုကျမ်းတော်သည် လူသားများအားလုံးအတွက် လမ်းမှန်ညွှန်ကြားပြသချက်၊ ၎င်းပြင် တရားလမ်းမှန်နှင့် အမှားအမှန် ခွဲခြားသိစေမှု၏ ထင်ရှားသည့်သက်သေလက္ခဏာများပင်ဖြစ်သည်။ ိသို့ဖြစ်ရာ အသင်ထဲမှ မည်သူမဆို ထိုလနှင့် ကြုံကြိုက်ခဲ့လျှင် ထိုသူသည် ထိုလတွင်(တစ်လလုံး)စွောင်မ် ဥပုသ်စောင့်ထိန်းရမည်။ ထို့ပြင် အသင်တို့ထဲမှ တစ်ဦးတစ်ယောက်သည် ရောဂါသည်ဖြစ်နေခြင်း သို့မဟုတ် ခရီးထွက်နေခြင်းကြောင့် (စွောင်မ် ဥပုသ် မစောင့်ထိန်းဘဲနေခဲ့လျှင်) ထိုသူ၏အပေါ်တွင် အခြားရက်များ၌ (သူပျက်ကွက်ခဲ့သည့်)အရေအတွက်နှင့်အမျှ စောင့်ထိန်းရမည်ဖြစ်သည်။ အရှင်မြတ်သည် အသင်တို့အတွက် လွယ်ကူမှုကိုသာ လိုလားတော်မူသည်။ အသင်တို့အတွက် ခက်ခဲမှုကို လိုလားတော်မမူပေ။ ထို့ပြင် အသင်တို့(ပျက်ကွက်ခဲ့သည့်နေ့ရက်) အရေအတွက်ကို ဖြည့်စေရန်နှင့် အရှင်မြတ်က အသင်တို့အား ညွှန်ကြားပြသထားသည့် နည်းလမ်းအတိုင်း အသင်တို့သည် ကြီးကျယ်မြင့်မြတ်တော်မူကြောင်း ရွတ်ဆိုကြရန်အတွက်ဖြစ်သည်။ ၎င်းပြင် အသင်တို့ ကျေးဇူးတင်ကြရန်အတွက်လည်း ဖြစ်သည်။
[186] ထို့ပြင် ငါအရှင်မြတ်၏ကျွန်များသည် ငါအရှင်မြတ်နှင့်ပတ်သက်၍ အသင်(တမန်တော်)ကို မေးမြန်းသည့်အခါ (အသင်ပြောလိုက်ပါ) အမှန်စင်စစ် ငါအရှင်မြတ်သည် (သူတို့နှင့်)နီးကပ်စွာပင် ရှိတော်မူသည်။* ငါအရှင်မြတ်သည် ဆုတောင်းဒုအာပြုသူ၏ ဆုတောင်းဒုအာကို ထိုသူ ငါအရှင်မြတ်ထံတွင် ဆုတောင်းသည့်အခါ လက်ခံတော်မူသည်။ သူတို့သည် ဖြောင့်မတ်မှန်ကန်သည့် တရားလမ်းမှန်ကို ရရှိလိုက်နာကြရန်အတွက် သူတို့သည် ငါအရှင်မြတ်၏ အမိန့်တော်များကို လက်ခံပြီး ငါအရှင်မြတ်ကိုသာ ယုံကြည်ကြရမည်။
[187] အသင်တို့အတွက် စွောင်မ်ဥပုသ်စောင့်သောည၌ အသင်တို့၏ဇနီးများနှင့် ပေါင်းသင်းဆက်ဆံခြင်းကို ခွင့်ပြုပေးတော်မူလိုက်သည်။* သူမတို့သည် အသင်တို့အတွက် အဝတ်အစားဖြစ်ပြီး အသင်တို့သည်လည်း သူမတို့အတွက် အဝတ်အစားဖြစ်သည်။* အမှန်စင်စစ် အသင်တို့သည် အသင်တို့ကိုယ်ကို အသင်တို့သာ လှည့်စားနေခဲ့ကြသည်*ကို အလ္လာဟ်အရှင်မြတ်သည် သိရှိပြီးဖြစ်တော်မူသည်။ ထို့နောက် အရှင်မြတ်သည် အသင်တို့(ဘက်သို့ သနားကရုဏာနှင့်လှည့်ပြီး အသင်တို့၏ဝန်ချတောင်းပန်မှု)ကို လက်ခံခွင့်လွှတ်လိုက်တော်မူသည်။ ထို့ပြင် အသင်တို့၏မှားယွင်းချွတ်ချော်မှုများကိုလည်း ပလပ်လိုက်တော်မူသည်။ သို့ဖြစ်ရာ ယခုမူ အသင်တို့သည် အသင်တို့၏ ဇနီးကြင်ရာများနှင့် ပေါင်းသင်းဆက်ဆံကြ၍ အသင်တို့အတွက် အလ္လာဟ်အရှင်မြတ် ပြဋ္ဌာန်းထားတော်မူသည့်အရာများကို ရှာဖွေကြပါ။* ထို့ပြင် အသင်တို့သည် မိုးလင်းချိန်၏အဖြူမျှင်တန်းသည် အနက်မျှင်ထုမှ ထင်ရှားလာသည့်အချိန်ထိ စားသောက်ကြပါ။* ထို့နောက် အသင်တို့သည် ညအချိန်အထိ စွောင်မ်ဥပုသ် စောင့်ထိန်းကြပါ။ ထို့ပြင် အသင်တို့သည် ဗလီကျောင်းတော်များထဲတွင် အိအ်သိကာဖ်*ထိုင်နေသည့် အခြေအနေတွင် ဇနီးများနှင့် ပေါင်းသင်းဆက်ဆံခြင်း မပြုကြနှင့်။ ဤအရာများသည် အလ္လာဟ်အရှင်မြတ် သတ်မှတ်ထားတော်မူသည့် သတ်မှတ်ချက် အမိန့်များပင်ဖြစ်သည်။ သို့ဖြစ်ရာ အသင်တို့သည် ထိုနယ်နိမိတ်သတ်မှတ်ချက်များ၏အနီးသို့ မကပ်ကြနှင့်။ ထိုသို့ပင် အလ္လာဟ်အရှင်မြတ်သည် အရှင်မြတ်၏အာယသ်တော်များကို လူများအတွက် သူတို့ ကြောက်ရွံ့အပြစ်ရှောင် ကောင်းကျိုးဆောင်ကြရန် ရှင်းပြတော်မူသည်။
[188] ထို့ပြင် အသင်တို့သည် အသင်တို့အချင်းချင်း တစ်ဦး၏ပစ္စည်းကို တစ်ဦးက မတရားသည့်နည်းဖြင့် မစားသုံးကြနှင့်။ ထို့ပြင် သူတစ်ပါးတို့၏ပစ္စည်းအချို့ကို မတရားသည့်နည်းဖြင့်စားခြင်းသည် (မတရားမှုဖြစ်ကြောင်း) အသင်တို့သိပါလျက် အာဏာပိုင်များထံသို့ (တံစိုးလက်ဆောင်ပေးပြီး) ထိုအမှုကိစ္စကို မပို့ဆောင်ကြနှင့်။
[189] သူတို့သည် ဆန်းဦးစလများနှင့် ပတ်သက်၍ အသင်(တမန်တော်)၏ထံ လာရောက်မေးမြန်းကြသည်။ (အို- တမန်တော်)အသင်ပြောလိုက်ပါ၊ ထိုဆန်းဦးစလများသည် လူများအတွက်နှင့် ဟဂျ်အတွက် အချိန်ကာလ သတ်မှတ်ချက်များဖြစ်သည်။ အသင်တို့သည် (အသင်တို့၏)အိမ်များကို အိမ်နောက်ဖေး(ပေါက်)မှဝင်ခြင်း* သည် ကောင်းမှုမဟုတ်ပေ။ သို့ရာတွင် အကြင်သူသည် ကြောက်ရွံ့ရှောင်ကြဉ်လျှင် ထိုအရာသည် ကောင်းမှုဖြစ်သည်။ ၎င်းပြင် အသင်တို့သည် (အသင်တို့၏)အိမ်များကို အိမ်ရှေ့(တံခါးပေါက်)မှဝင်ကြပါ။ ထို့ပြင် အသင်တို့ အောင်မြင်ကြရန်အတွက် အသင်တို့သည် အလ္လာဟ်အရှင်မြတ်ကို ကြောက်ရွံ့ကြပါ။
[190] ထို့ပြင် အသင်တို့သည် အလ္လာဟ်အရှင်မြတ်၏လမ်းတော်တွင် အသင်တို့အား တိုက်ခိုက်ကြသောသူများကို (ပြန်လည်)တိုက်ခိုက်ကြပါ။* ၎င်းပြင် အသင်တို့သည် မကျူးကျော်ကြနှင့်။* အမှန်စင်စစ် အလ္လာဟ်အရှင်မြတ်သည် ကျူးကျော်သူများကို နှစ်သက်တော်မမူပေ။
[191] ထို့ပြင် အသင်တို့သည် (အသင်တို့ကို တိုက်ခိုက်သတ်ဖြတ်ကြသည့်)သူ (ကာဖိရ်)များအား ဖမ်းမိသည့်နေရာတွင် သုတ်သင်လိုက်ကြပါ။ ၎င်းပြင် ထိုသူ(ကာဖိရ်)များသည် အသင်တို့အား နှင်ထုတ်ခဲ့ကြသကဲ့သို့ အသင်တို့သည်လည်း သူတို့အား နှင်ထုတ်ကြပါ။ ထို့ပြင် ညှဉ်းပန်းနှိပ်စက်နှောင့်ယှက်ခြင်း*သည် သတ်ဖြတ်ခြင်းထက်ပင် ပိုမိုဆိုးဝါးသည်။ ထို့နောက် မြင့်မြတ်သည့် ဗလီဝတ်ကျောင်းတော်ထဲတွင် သူတို့သည် အသင်တို့အား မတိုက်ခိုက်သမျှ အသင်တို့သည်လည်း သူတို့အား ထိုထဲတွင် မတိုက်ခိုက်ကြနှင့်။ ထို့နောက် အကယ်၍ သူတို့သည် အသင်တို့အား တိုက်ခိုက်လျှင်မူ အသင်တို့သည်လည်း သူတို့အား တိုက်ခိုက်ကြပါ။ ထို ကာဖိရ်များအား တုံ့ပြန်အစားပေးခြင်းသည် ဤသို့ပင်ဖြစ်သည်။
[192] ထို့နောက် အကယ်၍ သူတို့သည် ရပ်စဲခဲ့ကြလျှင် အမှန်စင်စစ် အလ္လာဟ်အရှင်မြတ် အလွန်လွတ်ငြိမ်းချမ်းသာခွင့်ပေးတော်မူသောအရှင်၊ အလွန်သနားကြင်နာတော်မူသောအရှင် ဖြစ်တော်မူသည်။
[193] ထို့ပြင် လမ်းမှားမှု(တုဖက်ကိုးကွယ်မှု) ပပျောက်ပြီး သာသနာသည် အလ္လာဟ်အတွက်ဖြစ်သွားသည်အထိ* အသင်တို့သည် သူတို့အား တိုက်ခိုက်ကြပါ။ ထို့နောက် အကယ်၍ သူတို့သည် ရပ်စဲခဲ့ကြလျှင် မတရားညှဉ်းပန်းနှိပ်စက်သူများပေါ်မှလွဲ၍ မည်သူ့အပေါ်၌မျှ ကျူးကျော်စော်ကားမှု(ရန်ငြိုး)မရှိရပေ။
[194] မြင့်မြတ်သောလ(၏အစား)သည် မြင့်မြတ်သောလသာဖြစ်သည်။* ထို့ပြင် ထူးမြတ်သည့်အရာများနှင့်(ပတ်သက်၍) တူညီသည့် တုံ့ပြန်မှုရှိသည်။ သို့ဖြစ်ရာ အကြင်သူသည် (ထူးမြတ်သောလများတွင်) အသင်တို့အား ကျူးကျော်စော်ကားခဲ့လျှင် ထိုသူသည် အသင်တို့အား ကျူးကျော်စော်ကားသကဲ့သို့ အသင်တို့သည်လည်း ထိုသူ့အား (ထူးမြတ်သောလများ၌ပင်) တုံ့ပြန်လက်စားချေလိုက်ပါ။* ထို့ပြင် အသင်တို့သည် အလ္လာဟ်အရှင်မြတ်အား ကြောက်ကြပါ။ ထို့ပြင် အလ္လာဟ်အရှင်မြတ်သည် ကြောက်ရွံ့အပြစ်ရှောင် ကောင်းကျိုးဆောင်သူ မုသ်သကီများနှင့်အတူ ရှိတော်မူသည်ဆိုသည်ကို အသင်တို့ သိထားလိုက်ကြပါ။
[195] ထို့ပြင် အသင်တို့သည် အလ္လာဟ်အရှင်မြတ်၏လမ်းတွင် သုံးစွဲကြပါ။ ထို့ပြင် အသင်တို့သည် မိမိကိုယ်မိမိ(အသင်တို့ကိုယ်အသင်တို့) ပျက်စီးမှုထဲတွင် မထည့်ကြနှင့်။* ထို့ပြင် အသင်တို့သည် ကောင်းကျိုးဆောင်ရွက်ကြပါ။ အမှန်စင်စစ် အလ္လာဟ်အရှင်မြတ်သည် ကောင်းကျိုးဆောင်ရွက်သူများကို နှစ်သက်တော်မူသည်။
[196] ထို့ပြင် အသင်တို့သည် ဟဂျ်*နှင့်အွမ္မရဟ်*ကို အလ္လာဟ်အရှင်မြတ်အတွက်သာ ပြည့်ဝစွာ ပြုလုပ်ကြပါ။ ထို့ပြင် အကယ်၍ အသင်တို့သည်(မက္ကဟ်မရောက်အောင်)အတားအဆီးခံရလျှင် ကုရ်ဗာနီသားကောင်များထဲမှ လွယ်ကူစွာရရှိသော သားကောင်ကို(ကုရ်ဗာနီပြုလုပ်ကြပါ)။ ကုရ်ဗာနီသားကောင်*သည် ရောက်ရမည့်နေရာ(ဟရမ် နယ်နမိတ်)သို့ မရောက်မချင်း အသင်တို့သည် အသင်တို့၏ဦးခေါင်းကို မရိတ်ကြနှင့်။ ထို့ပြင် အသင်တို့ထဲမှ တစ်ဦးတစ်ယောက်သည် မကျန်းမမာဖြစ်ခဲ့လျှင်၊ သို့မဟုတ် သူ၏ဦးခေါင်း၌ အနာဖြစ်ခဲ့လျှင် (ကုရ်ဗာနီသားကောင်သည် ရောက်ရမည့်နေရာသို့ မရောက်မီ ခေါင်းရိတ်ခဲ့လျှင်) ထိုသူသည် စွောင်မ်ဥပုသ်စောင့်ထိန်းခြင်း၊ သို့မဟုတ် အလှူဒါနပြုခြင်း၊ သို့မဟုတ် သားကောင် လှီးဖြတ်ခြင်းနှင့် ဖိဒ်ယဟ်*အစားပေးရမည်။ ထို့နောက် အသင်တို့သည် လုံခြုံစိတ်ချရသည့်အခါ အွမ္မရဟ်နှင့်ဟဂျ်အတူတကွ အကျိုးခံစားသောသူသည် လွယ်ကူစွာရရှိသော သားကောင်ကို(အလ္လာဟ်အတွက် သက်သင်လှီးဖြတ်ရမည်)။ ၎င်းပြင် ကုရ်ဗာနီသားကောင် မရရှိသောသူသည် ဟဂျ်ရက်ထဲ၌သုံးရက်၊ (ဟဂျ်မှ)ပြန်ရောက်သည့်အခါ ခုနှစ်ရက် စွောင်မ်ဥပုသ်စောင့်ရမည်။ ဤသည် ဆယ်ရက်တိတိဖြစ်သည်။ ဤသည် မြင့်မြတ်သည့် ဗလီဝတ်ကျောင်းတော် မတ်စ်ဂျိဒိဟရာမ် အနီးတဝိုက်တွင် အိမ်သူအိမ်သားများ မရှိသည့်သူများအတွက်သာ ဖြစ်သည်။ ထို့ပြင် အသင်တို့သည် အလ္လာဟ်အရှင်မြတ်အား ကြောက်ကြပါ၊ ထို့ပြင် အလ္လာဟ်အရှင်မြတ်သည် အမှန်စင်စစ် ပြင်းထန်စွာအရေးယူတော်မူသော အရှင်ဖြစ်တော်မူသည်ကို အသင်တို့သိထားကြပါ။
[197] ဟဂျ်(၏အချိန်)သည် သတ်မှတ်သိရှိပြီးဖြစ်သည့်လများပင်ဖြစ်သည်။* သို့ဖြစ်ရာ အကြင်သူသည် ထိုလများ၌ ဟဂျ်ပြုလုပ်ရန် သတ်မှတ်ခဲ့လျှင် ထိုသူသည် ဟဂျ်(ပြုလုပ်ရန် အိဟ်ရာမ်ရုံထားစဉ်)အတွင်း၌ ကာမ(ဆက်ဆံမှုမပြုရ သည့်အပြင် ၎င်းနှင့်ဆိုင်သည့်) ညစ်ညမ်းသောစကားကိုပင် မပြောရပေ၊ အပြစ်ကျူးလွန်မှုလည်း မပြုလုပ်ရပေ၊ ခိုက်ရန်ဖြစ်ပွားမှုကိုလည်း မပြုရပေ။ ထို့ပြင် အသင်တို့ပြုလုပ်ကြသည့် မည်သည့်ကောင်းမှုကိုမဆို အလ္လာဟ်အရှင်မြတ်သိရှိတော်မူသည်။ ထို့ပြင် အသင်တို့သည် ခရီးစရိတ် ယူဆောင်သွားကြပါ၊ ထို့ပြင် အမှန်စင်စစ် အကောင်းဆုံးခရီးစရိတ်သည် သက္ကဝါရှောင်ကြဉ်ခြင်းပင်ဖြစ်သည်။* သို့ဖြစ်ရာ အို-ဉာဏ်ရှိသူအပေါင်းတို့၊ အသင်တို့သည် ငါအရှင်မြတ်အား (မနာခံခြင်းကနေ) ကြောက်ရွံ့ကြပါ။
[198] အသင်တို့အား ဖန်ဆင်းမွေးမြူတော်မူသော အရှင်မြတ်ထံမှ ကျေးဇူးတော်ကို အသင်တို့ ရှာဖွေခြင်းသည် အသင်တို့အပေါ်တွင် မည်သည့်အပြစ်မျှမရှိပေ။* ထို့နောက် အသင်တို့သည် အရဖာသ်*မှ အစုလိုက်ပြန်လာကြသည့်အခါ မရှ်အရိဟရာမ်*အနီးတွင် အလ္လာဟ်အရှင်မြတ်အား သတိရ တသကြပါ။ ထို့ပြင် အရှင်မြတ်က အသင်တို့ကို ပြသထားသည့်(နည်းလမ်း)အတိုင်း အသင်တို့သည် သတိရ တသကြပါ။ ထို့ပြင် အမှန်စင်စစ် အသင်တို့သည် ဤသည့်မတိုင်မီက မသိလမ်းလွဲသူများပင် ဖြစ်ခဲ့ကြသည်။
[199] ထို့နောက် လူများ အစုလိုက်ပြန်လာလိုက်ကြသည့်နေရာ(အရဖာသ်)မှ အသင်တို့လည်း (သွားရောက်၍)ပြန်လာကြပါ။ ၎င်းပြင် အသင်တို့သည် လွတ်ငြိမ်းချမ်းသာခွင့်ရရန် အလ္လာဟ်အရှင့်ထံတွင် အသနားခံကြပါ။ အမှန်စင်စစ် အလ္လာဟ်အရှင်မြတ် အလွန်လွတ်ငြိမ်းချမ်းသာခွင့်ပေးတော်မူသောအရှင်၊ အလွန်သနားကြင်နာတော်မူသောအရှင် ဖြစ်တော်မူသည်။
[200] ထို့ပြင် အသင်တို့သည် အသင်တို့၏ ဟဂျ်ကျင့်စဉ်ကျင့်ရပ်များ ဆောင်ရွက်ပြီးသည့်အခါ အသင်တို့၏ဘိုး၊ဘေးများအား သတိရ တသကြသကဲ့သို့ အလ္လာဟ်အရှင်မြတ်အား သတိရ တသကြပါ။ ထို့ထက်ပိုပြီး အရှင်မြတ်အား သတိရ တသကြပါ။ ၎င်းပြင် လူများတွင် အချို့ကပြောဆိုကြသည်၊ အို-ကျွန်ုပ်တို့အား ဖန်ဆင်းမွေးမြူတော်မူသောအရှင်၊ အရှင်မြတ်သည် ကျွန်ုပ်တို့အား လောက၌သာ (ကောင်းကျိုးချမ်းသာများကို)ပေးသနားတော်မူပါ။ ၎င်းနောက် (ထိုကဲ့သို့ပြောဆို)သူအတွက် တမလွန်ဘဝတွင် မည်သည့်ဝေစုမျှ မရှိတော့ပေ။
[201] ၎င်းပြင် ထိုထဲတွင် အချို့က(ဤသို့)ပြောဆိုကြသည်၊ အို-ကျွန်ုပ်တို့အား ဖန်ဆင်းမွေးမြူတော်မူသောအရှင်၊ အရှင်မြတ်သည် ကျွန်ုပ်တို့အား ဤဘဝတွင်သာမက တမလွန်ဘဝ၌လည်း ကောင်းကျိုးချမ်းသာ ပေးသနားတော်မူပါ။ ၎င်းပြင် ငရဲမီး၏ပြစ်ဒဏ်မှလည်း ကယ်ဆယ်တော်မူပါ။
[202] ထိုသူများသည် သူတို့အတွက် သူတို့ရှာဖွေခဲ့ကြသည်များ၏ဝေစုရှိသည်။ ထို့ပြင် အလ္လာဟ်အရှင်မြတ်သည် အလွန်လျင်မြန်စွာ စာရင်းစစ်ဆေးတော်မူမည့်အရှင် ဖြစ်တော်မူသည်။
[203] ထို့ပြင် အသင်တို့သည် ရေတွက်ထားသည့်ရက်အချို့၌* အလ္လာဟ်အရှင်မြတ်အား သတိရ တသကြပါ။ ထို့နောက် အကြင်သူသည် နှစ်ရက်အတွင်း* လျင်မြန်စွာပြန်ခဲ့လျှင် ထိုသူအပေါ်တွင် မည်သည့်အပြစ်မျှ မရှိပေ။ ထို့ပြင် အကြင်သူသည် နောက်ကျနေခဲ့လျှင်လည်း* ထိုသူအပေါ်တွင် မည်သည့်အပြစ်မျှ မရှိပေ။ (ဤသည်မှာ) အပြစ်ရှောင်သောသူများအတွက်ဖြစ်သည်။ ထို့ပြင် အသင်တို့သည် အလ္လာဟ်အရှင်မြတ်အား ကြောက်ပြီး အပြစ်ရှောင် ကောင်းကျိုးဆောင်ကြပါ။ ၎င်းပြင် အသင်တို့သည် အရှင်မြတ်ထံတွင် စုရုံးကြရမည်ကိုလည်း သိရှိ(ယုံကြည်)ထားကြပါ။
[204] ထို့ပြင် လူများတွင် ဤသို့သောလူလည်းရှိသည်၊ သူ၏လောကီရေးရာစကားများသည် အသင့်အား စိတ်ဝင်စားမှုဖြစ်စေသည်။ ၎င်းပြင် သူသည် သူ၏စိတ်ထဲ၌ရှိသည်များနှင့်ပတ်သက်၍ အလ္လာဟ်အရှင်မြတ်ကိုပါ သက်သေထူလိုက်သေးသည်။ ထိုသူသည် အခက်ထန်ဆုံး ရန်လိုသူဖြစ်သည်။
[205] ထို့ပြင် ထိုသူသည် ပြန်သွားသည့်အခါ မြေပေါ်တွင် ဖျက်လိုဖျက်ဆီးပြုလုပ်ရန်၊ လယ်ယာများကို ဖျက်ဆီးရန်နှင့် တိရစာ္ဆန်များကို မျိုးဖြုတ်သတ်ဖြတ်ပစ်ရန် ကြိုးစားသည်။ ထို့ပြင် အလ္လာဟ်အရှင်မြတ်သည် ဖျက်ဆီးမှုကို နှစ်သက်တော်မမူပေ။
[206] ထို့ပြင် ထိုသူကို အသင်သည် အလ္လာဟ်အရှင်မြတ်အား ကြောက်ပါဟု ပြောခံခဲ့ရသည့်အခါ (သူ၏)ဂုဏ်သိက္ခာသည် သူ့အား မကောင်းမှုဘက်သို့ ဆွဲဆောင်သွားခဲ့သည်။ သို့ဖြစ်ရာ ထိုသူအတွက် ဂျဟန္နမ်ငရဲဘုံသည် လုံလောက်သည်။ ၎င်းပြင် အမှန်စင်စစ် ငရဲဘုံသည် အဘယ်မျှ ဆိုးဝါးလိုက်သည့်နေရာဌာန ဖြစ်လိုက်သနည်း။
[207] ထို့ပြင် လူများတွင် အချို့သည် အလ္လာဟ်အရှင်မြတ်၏ သဘောတူနှစ်သက်မှုကို ရလိုသည့်အတွက် ထိုသူ၏အသက်ကိုရောင်းချ(စွန့်လှူ)သည်။ ထို့ပြင် အလ္လာဟ်အရှင်မြတ်သည် (ထို)ကျွန်များကို အလွန်ကြင်နာတော်မူသောအရှင် ဖြစ်တော်မူသည်။
[208] အို- အီမာန်ယုံကြည်သူအပေါင်းတို့၊ အသင်တို့သည် အစ္စလာမ်ထဲသို့ လုံးလုံးလျားလျား ဝင်ရောက်ကြပါ၊ ထို့ပြင် ရှိုင်သွာန်၏လျှောက်လှမ်းမှုများနောက်ကို ဖဝါးခြေထပ် မလိုက်ကြနှင့်၊ အမှန်စင်စစ် ထိုရှိုင်သွာန်သည် အသင်တို့အတွက် ထင်ရှားသည့်ရန်သူဖြစ်သည်။
[209] ၎င်းပြင် ထင်ရှားသည့် သက်သေလက္ခဏာများသည် အသင်တို့ထံသို့ ရောက်ရှိလာပြီးနောက်တွင်မှ အသင်တို့သည် ချွတ်ချော်လွဲမှားသွားခဲ့ကြလျှင် အမှန်စင်စစ် အလ္လာဟ်အရှင်မြတ်သည် တန်ခိုးတော်နှင့် အလွန်လွှမ်းမိုးတော်မူသောအရှင်၊ ပညာဉာဏ်အမြော်အမြင်နှင့် အလွန်ပြည့်စုံတော်မူသောအရှင် ဖြစ်တော်မူသည်ကို အသင်တို့ သိထားလိုက်ကြပါ။
[210] သူတို့သည် သူတို့ထံ အလ္လာဟ်အရှင်မြတ်သည် ကောင်းကင်တမန်များနှင့်တကွ တိမ်များမိုးကာ ကြွရောက်လာပြီး (စီရင်ချက်ချကာ) ကိစ္စပြီးဆုံးသွားသည်ကိုသာ စောင့်မျှော်နေကြသည်။
[211] အစ္စရာအီလ်မျိုးနွယ်ဝင်များအား အသင်(တမန်တော်)မေးကြည့်လိုက်ပါ၊ ငါအရှင်သည် သူတို့အား ထင်ရှားသည့်သက်သေလက္ခဏာများကို မည်မျှ(များစွာ)ပေးသနားတော်မူခဲ့သနည်း။ အကြင်သူသည် သူ၏ထံသို့ အလ္လာဟ်အရှင်မြတ်၏ ကျေးဇူးတော်များရောက်ရှိပြီးနောက် ထိုကျေးဇူးတော်များကို (မသင့်တော်သည့် ပုံစံဖြင့်) အပြောင်းအလဲလုပ်ခဲ့မည်ဆိုလျှင် အမှန်ပင် အလ္လာဟ်အရှင်မြတ်သည် အပြစ်ဒဏ်ကို အလွန်ပြင်းစွာ စီရင်တော်မူသောအရှင် ဖြစ်တော်မူသည်။
[212] လောကီဘဝအသက်ရှင်ခြင်းသည် ကာဖိရ်များအတွက် လှပအောင်တန်ဆာဆင်ထားခြင်း ခံရသည်။ ထို့နောက် သူတို့သည် အီမာန်ယုံကြည်သူများကို ပြောင်လှောင်ကြသည်။* ထို့ပြင် အရှင်မြတ်အား ကြောက်ရွံ့ အပြစ်ရှောင် ကောင်းကျိုးဆောင်သူများကမူ ကိယာမသ်နေ့တွင် သူတို့ထက် မြင့်မြတ်ကြလိမ့်မည်။* ထို့ပြင် အရှင်မြတ်သည် အရှင်မြတ်အလိုရှိသူကို အကန့်အသတ်မရှိ စားနပ်ရိက္ခာ ပေးသနားတော်မူသည်။
[213] လူသားအားလုံးသည်(မူလက) အုပ်စုတစ်စုတည်းသာဖြစ်ခဲ့ကြသည်။* ထို့နောက် (ကာလကြာရှည်လာသည့်အခါ စိတ်ဓာတ်များမတူတော့ဘဲ အယူများကွဲလာသည့် အပေါ်တွင်) အလ္လာဟ်အရှင်မြတ်သည် နဗီတမန်တော်များကို (လူသားများထံသို့) သတင်းကောင်းပေးသူများအဖြစ်နှင့် သတိပေးနှိုးဆော်သူများအဖြစ် စေလွှတ်တော်မူခဲ့သည်။ အရှင်မြတ်သည် ထိုနဗီများနှင့်အတူ လူများကြားထဲတွင် အချင်းချင်းကွဲလွဲနေကြသည့်အရာ(ကုဖ်ရ်နှင့်အီမာန်)နှင့်စပ်လျဉ်း၍ ဆုံးဖြတ်ချက်ပေးတော်မူရန်အတွက် မှန်ကန်သည့်ကျမ်းကိုလည်း ချပေးတော်မူခဲ့သည်။ ထို့ပြင် ထိုကျမ်းဂန်နှင့်ပတ်သက်၍ မည်သူမျှ ကွဲလွဲမှုမရှိကြပေ၊ သို့ရာတွင် ထိုကျမ်းဂန်ကို ရရှိသည့်သူများသာ သူတို့ထံကို ထင်ရှားသည့်သက်သေလက္ခဏာများ ရောက်ရှိလာပြီးသည့်နောက်တွင် သူတို့အချင်းချင်း မလိုမုန်းတီးမှုကြောင့် ထိုကျမ်းဂန်နှင့်ပတ်သက်၍ ကွဲလွဲလာကြသည်။ ထို့နောက် အလ္လာဟ်အရှင်မြတ်သည် အရှင်မြတ်၏အမိန့်တော်နှင့် အီမာန်ယုံကြည်သူများကို သူတို့ ကွဲလွဲသည့်အရာနှင့်ပတ်သက်၍ အမှန်တရားကို ညွှန်ကြားပြသတော်မူခဲ့သည်။ ထို့ပြင် အလ္လာဟ်အရှင်မြတ်သည် မိမိအလိုရှိသူအား ဖြောင့်မတ်မှန်ကန်သောလမ်းကို ညွှန်ကြားပြသတော်မူသည်။
[214] အသင်တို့သည် ဂျန္နသ်ကို(လွယ်ကူစွာဖြင့်) ဝင်ရလိမ့်မည်ဟု ထင်မှတ်ကြသလော။ ထို့ပြင်(ယခုထိ)အသင်တို့ထံသို့ အသင်တို့မတိုင်မီက ကုန်လွန်သွားခဲ့သည့်သူများထံတွင် ရောက်ခဲ့သည့်အရာ(စမ်သပ်မှုမျိုး)များ ကျရောက်လာခြင်းမရှိသေးပေ။ ထိုသူများအပေါ်တွင် ပြင်းထန်မှုများနှင့် ဒုက္ခခက်ခဲမှုများ ကျရောက်ခဲ့သည်။ ထို့ပြင်(နောက်ဆုံး၌) တမန်တော်နှင့်တကွ ၎င်း(တမန်တော်)နှင့်အတူ အီမာန်ယုံကြည်သူများသည် အလ္လာဟ်အရှင်မြတ်၏အကူအညီ မည်သည့်အခါများရောက်လာလိမ့်မည်နည်းဟု ပြောဆိုကြရသည်အထိ သူတို့သည် တုန်လှုပ်သွားခဲ့ကြရသည်။ (ထိုအခါ အရှင်မြတ်က မိန့်ကြားတော်မူခဲ့သည်) သတိပြုကြပါ၊ အမှန်စင်စစ် အလ္လာဟ်အရှင်မြတ်၏အကူအညီသည် နီးကပ်နေပြီဖြစ်သည်။
[215] သူတို့က အသင့်အား သူတို့သည် မည်သည့်အရာကို လှူဒါန်းသုံးစွဲရမည်နည်းဟု မေးမြန်းကြသည်။ (အို-တမန်တော်)အသင်ပြောလိုက်ပါ၊ ကောင်းသည့်အရာထဲမှ အသင်တို့သည် မည်သည့်အရာများကိုပင် လှူဒါန်းသုံးစွဲကြသည်ဖြစ်စေ၊ ထိုအရာများသည် မိဘနှစ်ပါးအတွက်၊ ဆွေမျိုးသားချင်းများအတွက်၊ အဘမဲ့ကလေးများအတွက်၊ ဆင်းရဲသားများအတွက်နှင့် ခရီးသည်များအတွက် ဖြစ်ရန်လိုပေသည်။* ၎င်းပြင် အသင်တို့သည် ကောင်းသည့်အထဲမှ မည်သည့်အရာကိုပင် ပြုလုပ်ကြသည်ဖြစ်စေ၊ အလ္လာဟ်အရှင်မြတ်သည် ထိုအရာ(ကောင်းမှု)ကို အကြွင်းမဲ့သိတော်မူသောအရှင် ဖြစ်တော်မူသည်။
[216] အသင်တို့ပေါ် စစ်တိုက်ခြင်းကို ထိုစစ်တိုက်ခြင်းသည် အသင်တို့အတွက် မနှစ်မြို့ဖွယ်ရာဖြစ်ပါလျက်* ဖရဿွ်အဖြစ်ပြဋ္ဌာန်းထားခဲ့သည်။* ထို့ပြင် အသင်တို့သည် တစ်စုံတစ်ရာကို ထိုအရာသည် အသင်တို့အတွက် အကောင်းဖြစ်နေပါလျက်နှင့် စက်ဆုပ်ရွံရှာကြသည်လည်း ဖြစ်နိုင်သည်။* ထို့ပြင် အသင်တို့သည် တစ်စုံတစ်ရာကို ထိုအရာသည် အသင်တို့အတွက် အဆိုးဖြစ်နေပါလျက်နှင့် နှစ်သက်ကြသည်လည်း ဖြစ်နိုင်သည်။* အမှန်စင်စစ် အလ္လာဟ်အရှင်မြတ်သာ (သေချာစွာ)သိရှိတော်မူသည်။ အသင်တို့မှာမူ (အဖြစ်မှန်ကို) သိနားလည်ခြင်းမရှိကြပေ။
[217] မြင့်မြတ်သည့်လတွင် စစ်တိုက်ခြင်းနှင့် ပတ်သက်၍ အသင်(တမန်တော်)၏ထံသို့ သူတို့(လာရောက်)မေးမြန်းကြသည်။ (အို-တမန်တော်)အသင်ပြောလိုက်ပါ၊ ထိုလမှာ စစ်တိုက်ခြင်းသည် ကြီးလေးသည့်အပြစ်ဖြစ်သည်။* ၎င်းပြင် အလ္လာဟ်အရှင်မြတ်၏လမ်းတော်မှ တားဆီးခြင်း၊ အလ္လာဟ်အရှင်မြတ်အား သွေဖည်ငြင်းပယ်ခြင်း၊ မြင့်မြတ်သည့်ဗလီဝတ်ကျောင်းတော်(ကို ဖူးမြော်ရန်လာသည်)မှ တားဆီးခြင်း၊ ထိုဗလီဝတ်ကျောင်းတော်တွင် ခိုနားနေသူများကို နှင်ထုတ်ခြင်းများသည် အလ္လာဟ်အရှင်မြတ်ထံ၌ သတ်ဖြတ်ခြင်းထက် ပိုကြီးလေးသည့်အပြစ်ဖြစ်သည်။ ထို့ပြင် တုဖက်နှိုင်းယှဉ်ကိုးကွယ်ခြင်းသည် (ထိုစစ်ထဲ၌)သတ်ဖြတ်ခြင်းထက် ပိုကြီးသည့်အပြစ်ဖြစ်သည်။ ထို့ပြင် သူတို့သည် အကယ်၍သာ သူတို့တတ်နိုင်ကြမည်ဆိုလျှင် အသင်တို့၏သာသနာမှ အသင်တို့ ပြန်လှည့်သွားသည်အထိ အသင်တို့ကို အမြဲတိုက်ခိုက်နေလိမ့်မည်။ ၎င်းပြင် အသင်တို့ထဲတွင်မှ အကြင်သူသည် သူ၏သာသနာမှ နောက်ပြန်လှည့်ကျောခိုင်းပြီး ကာဖိရ်ဖြစ်လျက် သေဆုံးမည်ဆိုလျှင် ထိုသူ၏ကောင်းမှုဟူသမျှသည် ဤဘဝ၌သာမက တမလွန်ဘဝ၌လည်း အလဟဿဖြစ်သွားမည်။ ထိုသူများသည် ငရဲသားများဖြစ်ကြသည်။ သူတို့သည် ထိုငရဲထဲ၌ အမြဲခံစားရမည့်သူများဖြစ်ကြသည်။
[218] အမှန်မုချ အီမာန်ယုံကြည်သူများနှင့် ဟိဂျ်ရသ်*လုပ်၍ အလ္လာဟ်အရှင်မြတ်လမ်းတွင် သက်စွန့်တိုက်ခိုက်သူများသည် အလ္လာဟ်အရှင်မြတ်၏ရဟ်မသ် သနားကြင်နာမှုကို မျှော်လင့်တောင့်တကြသည်။ ထို့ပြင် အလ္လာဟ်အရှင်မြတ်သည် အလွန်လွတ်ငြိမ်းချမ်းသာခွင့် ပေးတော်မူသောအရှင်၊ အလွန်သနားကြင်နာတော်မူသောအရှင် ဖြစ်တော်မူသည်။
[219] သူတို့သည် အသင်(တမန်တော်)ထံတွင် အရက်သေစာ သောက်ခြင်း၊ လောင်းကစားခြင်းနှင့် ပတ်သက်၍(လာရောက်) မေးမြန်းကြသည်။ (အို-တမန်တော်)အသင်ပြောလိုက်ပါ၊ ထိုနှစ်ခုစလုံးထဲတွင် ကြီးလေးသည့်အပြစ်ရှိသည်။ ထို့ပြင် လူများအတွက် (အနည်းငယ်သော)အကျိုးကျေးဇူးများလည်းရှိသည်။ ထို့ပြင် ထိုနှစ်ခုစလုံး၏အပြစ်သည် ထိုနှစ်ခုစလုံး၏အကျိုးထက် ပိုကြီးသည်။* ထို့ပြင် သူတို့က အသင်(တမန်တော်)၏ထံ (လာရောက်) မေးမြန်းကြသည်၊ သူတို့သည် မည်သည့်အရာကို သုံးစွဲလှူဒါန်းကြရပါမည်နည်း။ (အို-တမန်တော်)အသင်ပြောလိုက်ပါ၊ လိုအပ်သည်ထက်ပိုသောအရာ* (ကိုလှူဒါန်းကြပါ)။ အလ္လာဟ်အရှင်မြတ်သည် အသင်တို့ စဉ်းစားဆင်ခြင်ကြရန်အတွက် အာယသ်တော်များကို အသင်တို့အတွက် ဤသို့ပင် ရှင်းပြတော်မူသည်။
[220] ဤဘဝနှင့် တမလွန်ဘဝတွင် (အသင်တို့ အကျိုးခံစားရမည့်ကိစ္စများကို စဉ်းစားဆင်ခြင်ကြရန်ဖြစ်သည်)။* ထို့ပြင် သူတို့သည် အသင်(တမန်တော်)အား အဘမဲ့ကလေးများနှင့် ပတ်သက်၍(လာရောက်) မေးမြန်းကြသည်။ (အို-တမန်တော်)အသင်ပြောလိုက်ပါ၊ ထိုအဘမဲ့ကလေးများအား ကောင်းမွန်အောင်ပြုပြင်ပေးခြင်းသည် အကောင်းဆုံးဖြစ်သည်။ ထို့ပြင် အကယ်၍ အသင်တို့သည် ထိုကလေးများနှင့် ရောနှောဆက်ဆံ(ပြီးအတူတကွ စားသုံး)ကြလျှင် ထိုကလေးများသည် အသင်တို့၏ညီနောင်များပင် ဖြစ်ကြ(သည့်အတွက် အတူတကွ ရောနှောစားသုံးပိုင်ခွင့်ရှိ)သည်။ ထို့ပြင် အလ္လာဟ်အရှင်မြတ်သည် ဖျက်ဆီးသည့်သူနှင့် ပြုပြင်သည့်သူကို ခွဲခြားသိရှိတော်မူသည်။ ထို့ပြင် အလ္လာဟ်အရှင်မြတ် အလိုရှိတော်မူခဲ့လျှင် အသင်တို့ကို ဒုက္ခရောက်အောင် လုပ်ခဲ့ပြီးဖြစ်လိမ့်မည်။* အမှန်စင်စစ် အလ္လာဟ်အရှင်မြတ်သည် တန်ခိုးတော်နှင့် အလွန်လွှမ်းမိုးတော်မူသောအရှင်၊ ပညာဉာဏ်အမြော်အမြင်နှင့် အလွန်ပြည့်စုံတော်မူသောအရှင် ဖြစ်တော်မူသည်။
[221] ထို့ပြင် အသင်တို့သည် ရှိရ်က်တုဖက်ကိုးကွယ်သည့် အမျိုးသမီးများအား သူမတို့ အီမာန်မယူသမျှ နိကာဟ်ထိမ်းမြားမှု မပြုကြနှင့်။* ထို့ပြင် အီမာန်ယုံကြည်သူ ကျွန်မတစ်ဦးသည် ရှိရ်က်တုဖက်ကိုးကွယ်သည့် အမျိုးသမီးတစ်ဦးထက် အမှန်ပင် ပိုကောင်းသည်၊ အကယ်၍ ထိုအမျိုးသမီးသည် အသင်တို့အား စိတ်ဝင်စား(စရာ ဖြစ်)စေခဲ့လျှင်လည်း (မုအ်မိနဟ် ကျွန်မသည်ပင် ပိုကောင်းသည်)။ ထို့ပြင် ရှိရ်က်တုဖက်ကိုးကွယ်သည့် အမျိုးသားများအား သူတို့ အီမာန်မယုံကြည်သမျှ (သူတို့နှင့် အသင်တို့၏သမီးများကို)လက်ထပ် မပေးကြနှင့်။ ထို့ပြင် အီမာန်ယုံကြည်သူ ကျွန်တစ်ဦးသည် ရှိရ်က်တုဖက်ကိုးကွယ်သည့် အမျိုးသားတစ်ဦးထက် အမှန်ပင် ပိုကောင်းသည်၊ အကယ်၍ ထိုအမျိုးသားသည် အသင်တို့အား စိတ်ဝင်စား(စရာ ဖြစ်)စေခဲ့လျှင်လည်း (မုအ်မင်န် ကျွန်ကပင် ပိုကောင်းသည်)။ ထိုသူများသည် ငရဲမီးဘက်သို့ ခေါ်ကြသည်။ ထို့ပြင် အလ္လာဟ်အရှင်မြတ်ကမူ ဂျန္နသ်ဘက်နှင့် မဂ်ဖိရသ် လွတ်ငြိမ်းချမ်းသာမှုဘက်သို့ အရှင်မြတ်၏အမိန့်တော်ဖြင့် ဖိတ်ခေါ်တော်မူသည်။ ထို့ပြင် အရှင်မြတ်သည် အရှင်မြတ်၏အာယသ်များကို လူအများအတွက် သူတို့ သတိတရားရကြရန် ရှင်းပြတော်မူသည်။
[222] ထို့ပြင် သူတို့က အသင်(တမန်တော်)အား ဓမ္မတာရာသီလာခြင်းနှင့် ပတ်သက်၍(လာရောက်) မေးမြန်းကြသည်။ (အို-တမန်တော်)အသင်ပြောလိုက်ပါ၊ ထိုအရာသည် (ရွံရှာဖွယ်ရာ) အညစ်အကြေးတစ်မျိုးဖြစ်သည်။ သို့ဖြစ်ရာ ဓမ္မတာရာသီလာသည့်အချိန်တွင် အသင်တို့သည် ဇနီးမိန်းမများနှင့် (ကာမ ဆက်ဆံမှုမပြုဘဲ) ခွဲခွာ၍နေကြပါ။* ထို့ပြင် အသင်တို့သည် ထိုဇနီးမိန်းမများ သန့်စင်မှုမဖြစ်သမျှ သူတို့အနီးသို့(ကာမ ဆက်ဆံရန်)မချဉ်းကပ်ကြနှင့်။ ထို့နောက် သူတို့သည် သန့်စင်လာကြသည့်အခါ အလ္လာဟ်အရှင်မြတ်သည် အသင်တို့အား အမိန့်ပေးထားသည့်နေရာမှ သူတို့ထံသို့ အသင်တို့ (ကာမ ဆက်ဆံရန်) ချဉ်းကပ်ကြပါ။ အမှန်စင်စစ် အလ္လာဟ်အရှင်မြတ်သည် ဝန်ချတောင်းပန် (ပြီး အရှင်မြတ်ဘက် အလွန်လှည့်သော)သူများအား နှစ်သက်တော်မူသည်။ ၎င်းပြင် သန့်ပြန့်စင်ကြယ်သောသူများအားလည်း နှစ်သက်တော်မူသည်။
[223] အသင်တို့၏ဇနီးမိန်းမများသည် အသင်တို့အတွက် လယ်ယာမြေဖြစ်သည်။ သို့ဖြစ်ရာ အသင်တို့သည် အသင်တို့၏လယ်ယာများကို အသင်တို့ကြိုက်သည့်နည်း*ဖြင့် (ထွန်ယက်စိုက်ပျိုး) သွားလာကြပါ။ ထို့ပြင် အသင်တို့သည် အသင်တို့အတွက် (ကောင်းမှု)ကြိုတင်ပို့ဆောင်ထားကြပါ။ ထို့ပြင် အသင်တို့သည် အလ္လာဟ်အရှင်မြတ်အား ကြောက်ကြပါ။ ထို့ပြင် အသင်တို့သည် အရှင်မြတ်နှင့် တွေ့ဆုံရမည်ဆိုသည်ကိုလည်း သိရှိ(ယုံကြည်)ထားကြပါ။ ထို့နောက် အသင်သည် အီမာန်ယုံကြည်သူများအား သတင်းကောင်းပေးလိုက်ပါ။
[224] ထို့ပြင် အသင်တို့သည် ကောင်းမှုမပြုရန်၊ အပြစ်မရှောင်ကြရန်၊ လူများကြားတွင် ခိုက်ရန်ဖြစ်မှုကို ဖြန်ဖြေမပေးကြရန် အသင်တို့၏ကျိန်ဆိုမှုများအတွက် အလ္လာဟ်အရှင်မြတ်အား (ဒိုင်းသဖွယ်)အကာအကွယ် မပြုလုပ်ကြနှင့်။ (အလ္လာဟ်နှင့်ကျိန်ဆိုထားသည့်အတွက် ထိုအလုပ်များကို မလုပ်ခြင်းဖြစ်သည်ဟု အရှင်မြတ်ကို ခုတုံးမလုပ်ကြနှင့်။)* ထို့ပြင် အလ္လာဟ်အရှင်မြတ်သည် အကြွင်းမဲ့ကြားတော်မူသောအရှင်၊ အကြွင်းမဲ့သိတော်မူသောအရှင် ဖြစ်တော်မူသည်။
[225] အလ္လာဟ်အရှင်မြတ်သည် အသင်တို့၏ အလဟဿကျိန်ဆိုမှုများ*နှင့်ပတ်သက်၍ အသင်တို့အား အရေးယူတော်မူမည်မဟုတ်ပေ။ သို့ရာတွင် အသင်တို့ စိတ်ရောကိုယ်ပါ ကျိန်ဆိုခဲ့သည်များ*နှင့်စပ်လျဉ်း၍မူ အရှင်မြတ်သည် အသင်တို့အား အရေးယူတော်မူမည်ဖြစ်သည်။ ထို့ပြင် အလ္လာဟ်အရှင်မြတ်သည် အလွန်လွတ်ငြိမ်းချမ်းသာပေးတော်မူသောအရှင်၊ အလွန်ထောက်ထားညှာတာတော်မူသောအရှင် ဖြစ်တော်မူသည်။
[226] မိမိတို့၏ဇနီးကြင်ရာများနှင့် (ကာမ ဆက်ဆံမှု ပြုမည်မဟုတ်တော့ဟု)ကျိန်ဆိုသူများ*အတွက် အချိန်လေးလ စောင့်ဆိုင်းခွင့်ရှိသည်။ ထို့နောက် အကယ်၍(လေးလအတွင်း) သူတို့၏ကျိန်ဆိုချက်ကို ပြန်လည်ရုပ်သိမ်းကြလျှင် အမှန်စင်စစ် အလ္လာဟ်အရှင်မြတ်သည် အလွန်လွတ်ငြိမ်းချမ်းသာပေးတော်မူသောအရှင်၊ အလွန်သနားကြင်နာတော်မူသောအရှင် ဖြစ်တော်မူသည်။
[227] ထို့ပြင် အကယ်၍ သူတို့သည် ကွာရှင်းပြတ်စဲရန်သာ ဆုံးဖြတ်ကြသည်ဆိုလျှင် အမှန်စင်စစ် အလ္လာဟ်အရှင်မြတ်သည် အကြွင်းမဲ့ကြားတော်မူသောအရှင်၊ အကြွင်းမဲ့သိတော်မူသောအရှင် ဖြစ်တော်မူသည်။
[228] ထို့ပြင် ကွာရှင်းပြတ်စဲခြင်းခံရသည့် ဇနီးမိန်းမများသည် အချိန်ကာလသုံးခုအထိ* အိဒ်ဒသ်စောင့်ဆိုင်းမှု ပြုကြရမည်။ ထို့ပြင် ထိုဇနီးမိန်းမများသည် အလ္လာဟ်အရှင်မြတ်နှင့် နောက်ဆုံးနေ့ကို အမှန်စင်စစ် ယုံကြည်ကြလျှင် ထိုဇနီးမိန်းမများအနေနှင့် သူမတို့၏သားအိမ်ထဲတွင် အလ္လာဟ်အရှင်မြတ် ဖန်ဆင်းထားတော်မူသောအရာ (ကိုယ်ဝန် သို့မဟုတ် ဓမ္မတာလာခြင်း)ကို ထိမ်ချန်လျှို့ဝှက်ထားပိုင်ခွင့်မရှိပေ။* ထို့ပြင် ထိုဇနီးမိန်းမများ၏ခင်ပွန်းယောက်ျားများသည် သင့်မြတ်မှုကို ရည်ရွယ်ကြသည်ဆိုလျှင် ထိုဇနီးမိန်းမများအား (ဇနီးအဖြစ်) ပြန်ယူရန် ပိုထိုက်သည်။* ၎င်းပြင် ထိုဇနီးမိန်းမများသည် ယောက်ျားများ အခွင့်အရေးရသကဲ့သို့ သူမတို့သည်လည်း ကောင်းသည့်နည်းလမ်းနှင့်အညီရကြသည်။ ထို့ပြင် ယောက်ျားများအတွက် မိန်းမများထက် အဆင့်တစ်ဆင့်ပိုသည်။* ထို့ပြင် အလ္လာဟ်အရှင်မြတ်သည် တန်ခိုးတော်နှင့် အလွန်လွှမ်းမိုးတော်မူသောအရှင်၊ ပညာဉာဏ်အမြော်အမြင်နှင့် အလွန်ပြည့်စုံတော်မူသောအရှင် ဖြစ်တော်မူသည်။
[229] ကွာရှင်းမှုသည် နှစ်ကြိမ်သာလျှင်ဖြစ်၏* ထို့နောက် (ခင်ပွန်းယောက်ျားများသည် သူတို့၏ဇနီးများကို) ကောင်းမွန်သည့်နည်းနှင့် ပြန်ပေါင်းရန်သာရှိသည်။ သို့မဟုတ်(တတိယအကြိမ်တွင်) ကောင်းမွန်စွာ (ကြည်ကြည်ဖြူဖြူ)စွန့်လွှတ်လိုက်ရန်သာရှိသည်။ ထို့ပြင် အသင်တို့အတွက် ထိုဇနီးမိန်းမများအား ပေးခဲ့သည့် (ထိမ်းမြားရန်သဘောတူထားသော မဟရ်ပစ္စည်း)ထဲမှ မည်သည့်အရာမျှ ပြန်ယူပိုင်ခွင့် မရှိပေ။ သို့ရာတွင် ထိုဇနီးမောင်နှံနှစ်ဦးသည် အလ္လာဟ်အရှင်မြတ်၏ စည်းကမ်းဥပဒေများကို စောင့်စည်းနိုင်ကြမည်မဟုတ်ဟု စိုးရိမ်ကြသည့်အခါမျိုး၌သာ (လျော်ကြေးအဖြစ်ဖြင့်ယူနိုင်သည်)။ ထို့အတွက် အကယ်၍ ထိုဇနီးမောင်နှံနှစ်ဦးသည် အလ္လာဟ်အရှင်မြတ်၏ စည်းကမ်းဥပဒေများကို မစောင့်စည်းနိုင်မည်ကို အသင်တို့ စိုးရိမ်ကြလျှင် ထိုဇနီးမိန်းမက လျော်ကြေးပေးသည့် ပစ္စည်းနှင့်ပတ်သက်၍ ထိုဇနီးမောင်နှံနှစ်ဦးအပေါ်တွင် မည်သည့်အပြစ်မျှ မထိုက်ပေ။ ထိုအရာများသည် အလ္လာဟ်အရှင်မြတ်၏စည်းကမ်းများဖြစ်သည်။ အသင်တို့သည် ထိုစည်းကမ်းများကို မကျူးကျော်ကြနှင့်။ ထို့ပြင် မည်သူမဆို အလ္လာဟ်အရှင်မြတ်၏စည်းကမ်းများကို ကျူးကျော်လျှင် ထိုသူများပင် ပြစ်မှုကျူးလွန်သည့်သူများဖြစ်ကြသည်။
[230] ထို့နောက် အကယ်၍ (ယောက်ျားက ဇနီးသည်ကို ထပ်ပြီးနောက်တစ်ကြိမ်) သွလာက်ပေးခဲ့လျှင် ထို(ကဲ့သို့ သုံးသွလာက်ပေးပြီး)နောက် ဤယောက်ျားအတွက် ထိုသူမ(ဇနီးမိန်းမ)သည် အခြားယောက်ျားတစ်ဦးဦးနှင့် နိကာဟ် ထိမ်းမြားပေါင်းသင်းမှု မပြုသမျှ ဟလာလ် တရားဝင်ဇနီးဖြစ်မည် မဟုတ်တော့ပေ။* အကယ်၍ ထို(ဒုတိယ)ယောက်ျားသည်လည်း ထိုဇနီးမိန်းမကို ကွာရှင်းပြန်လျှင် ထိုဇနီးမိန်းမနှင့် (ပထမ)ယောက်ျားတို့သည် သူတို့နှစ်ဦးအနေနှင့် အလ္လာဟ်အရှင်မြတ်၏ စည်းကမ်းဥပဒေများကို စောင့်ထိန်းနိုင်ကြမည်ဟု ထင်မြင်ယူဆပြီး နောက်တစ်ကြိမ်ပြန်လည် (နိကာဟ်ပြု လက်ထပ်၍) ပေါင်းသင်းဆက်ဆံကြလျှင် ထိုဇနီးမောင်နှံနှစ်ဦးအပေါ်တွင် မည်သည့်အပြစ်မျှမရှိပေ။ ၎င်းပြင် ထိုအရာများသည် အလ္လာဟ်အရှင်မြတ်၏ စည်းကမ်းဥပဒေများဖြစ်သည်၊ အရှင်မြတ်သည် ထိုအရာများကို အသိရှိသည့်သူများအတွက် ရှင်းပြတော်မူသည်။
[231] အသင်တို့သည် ဇနီးမိန်းများအား သွလာက်(ရဂျ်အီ)ပေးပြီးနောက် သူမတို့သည် အိဒ်ဒသ် (ကုန်ဆုံးတော့မည့်)ရက်ကို ရောက်သွားသောအခါ အသင်တို့သည် ထိုဇနီးမိန်းမများအား ကောင်းမွန်သည့်နည်းဖြင့် ပြန်ယူလိုက်ကြရမည်၊ သို့မဟုတ် ကောင်းမွန်သည့်နည်းဖြင့် စွန့်လွှတ်လိုက်ကြရမည်။ ထို့နောက် အသင်တို့သည် ထိုဇနီးမိန်းမများအား နစ်နာစေလိုသည့်အနေဖြင့် ညှဉ်းပန်းနှိပ်စက်ရန် ပြန်ယူထားခြင်းမပြုကြနှင့်။ ထို့ပြင် မည်သူမဆို ထိုကဲ့သို့ပြုလုပ်လျှင် ထိုသူသည် မိမိကိုယ်မိမိ နှိပ်စက်ခြင်းပင်ဖြစ်သည်။ ၎င်းပြင် အသင်တို့သည် အလ္လာဟ်အရှင်မြတ်၏ အာယသ်တော်များကို ပြောင်လှောင်မှု* မပြုလုပ်ကြနှင့်။ ထို့ပြင် အသင်တို့သည် အသင်တို့အပေါ်တွင်ရှိသည့် အလ္လာဟ်အရှင်မြတ်၏ကျေးဇူးတော်များကို သတိရကြပါ။ ထို့ပြင် အရှင်မြတ်က အသင်တို့အပေါ်ချပေးခဲ့သည့် ကျမ်းဂန်နှင့် ပညာဉာဏ်အမြော်အမြင် (စွန္နသ်တော်)များကိုလည်း သတိရကြပါ။ ထိုအရာများနှင့်ပင် အရှင်မြတ်သည် အသင်တို့အား ဆုံးမတော်မူသည်။ ထို့ပြင် အသင်တို့သည် အလ္လာဟ်အရှင်မြတ်အား ကြောက်ကြပါ၊ ထို့နောက် အလ္လာဟ်အရှင်မြတ်သည် အရာအားလုံးကို အကြွင်းမဲ့သိတော်မူသောအရှင် ဖြစ်တော်မူသည်ကို အသင်တို့ သိထားကြပါ။
[232] ထို့ပြင် အသင်တို့သည် ဇနီးမိန်းမများအား သွလာက်(ရဂျ်အီ)ပေးပြီးနောက် သူမတို့သည် အိဒ်ဒသ်ရက်ကိုရောက်သွားသည့်အခါ သူမတို့၏(နောက်အိမ်ထောင်ပြုမည့်)ခင်ပွန်းများနှင့် လက်ထပ်ထိမ်းမြားမှုမှ ဖိနှိပ်ချုပ်ချယ်တားမြစ်မှု* မပြုကြနှင့်(မတားမြစ်ကြနှင့်)။ ၎င်းသည် အသင်တို့ထဲမှ အလ္လာဟ်အရှင်မြတ်နှင့် နောက်ဆုံးနေ့ကို ယုံကြည်သောသူများအား (အရှင်မြတ်က) ဆုံးမသည့် ပညတ်တော်ဖြစ်သည်။ ၎င်းသည် အသင်တို့အတွက် ပိုပြီး အကျိုးဖြစ်ထွန်းစေသော ပိုပြီးစင်ကြယ်စေသောအရာဖြစ်သည်။ ထို့ပြင် အလ္လာဟ်အရှင်မြတ်သည် သိတော်မူ၍ အသင်တို့သည် မသိကြပေ။
[233] ထို့ပြင် မိခင်များသည် သူတို့၏သားသမီးများအား ၂နှစ်အပြည့် နို့တိုက်ကြရမည်။ ဤသည် ရက်ပြည့်အောင်နို့တိုက်ကျွေးလိုသူအတွက်ဖြစ်သည်။ ထို့ပြင် (ကလေး၏)ဖခင်အပေါ်တွင် နို့တိုက်ရက်ပြည့်သည်အထိ ထိုမိခင်၏စားနပ်ရိက္ခာနှင့် အဝတ်အစားကို ကောင်းမွန်သည့်နည်းဖြင့် (စီစဉ်ပေးရန်)တာဝန်ရှိသည်။ မည်သူမျှ သူတတ်စွမ်းနိုင်သည်ထက်ပိုပြီး တာဝန်ပေးခြင်း မခံရပေ။* မည်သည့်မိခင်မျှ သူ၏သားသမီးအတွက်ဖြင့် မနစ်နာစေရပေ၊ မည်သည့်ဖခင်မျှလည်း သူ၏သားသမီးအတွက်ဖြင့် မနစ်နာစေရပေ။ (ဖခင်သေဆုံးသွားလျှင်) အမွေစားအမွေခံများအပေါ်၌ ထိုကဲ့သို့ပင် (မိခင်၏စားနပ်ရိက္ခာနှင့် အဝတ်အစားကို စီစဉ်ပေးရန်)တာဝန်ရှိသည်။* ထို့နောက် မိဘနှစ်ပါးသည် သူတို့အချင်းချင်း သဘောတူတိုင်ပင်ပြီး နို့ဖြတ်လိုက်မည်ဆိုလျှင် သူတို့နှစ်ဦးအပေါ်တွင် မည်သည့်အပြစ်မျှ မရှိပေ။ ထို့ပြင် အကယ်၍ အသင်တို့သည် အသင်တို့၏သားသမီးများကို (နို့ထိန်းသည်အား) သင့်တော်သည့်ငှားရမ်းခပေးပြီး နို့တိုက်ကျွေးခိုင်းမည်ဆိုလျှင်လည်း အသင်တို့အပေါ်တွင် မည်သည့်အပြစ်မျှ မရှိပေ။ (ဝါ) အသင်တို့သည် ကလေးမိခင်ကို ပေးရန်တာဝန်ရှိသည်(များ စားစရာနှင့် အဝတ်အစား)ကို ပေးပြီးနောက် နို့ထိန်းသည် ငှားရမ်းကာ အသင်တို့၏သားသမီးများကို နို့တိုက်ကျွေးခိုင်းမည်ဆိုလျှင်လည်း အသင်တို့အပေါ်တွင် မည်သည့်အပြစ်မျှ မရှိပေ။ ထို့ပြင် အသင်တို့သည် အလ္လာဟ်အရှင်မြတ်အား ကြောက်ကြပါ၊ ထို့ပြင် အမှန်စင်စစ် အလ္လာဟ်အရှင်မြတ်သည် အသင်တို့ပြုလုပ်သည်များကို အကြွင်းမဲ့မြင်တော်မူသောအရှင် ဖြစ်တော်မူသည်ကို အသင်တို့ သိထားကြပါ။
[234] ထို့ပြင် အသင်တို့အနက်မှ တစ်ဦးဦးသည် သေဆုံးပြီး ဇနီးမိန်းမများချန်ခဲ့သည်။ ထိုဇနီးမိန်းမများသည် ၄လနှင့်၁ဝရက် အိဒ်ဒသ်စောင့်ဆိုင်းနေကြရမည်။* ထို့ပြင် ထိုဇနီးမိန်းမများသည် အိဒ်ဒသ်ရက်အဆုံးကိုရောက်သည့်အခါ သူမတို့ကိုယ်သူမတို့ ကောင်းမွန်သည့်နည်းဖြင့် ပြုလုပ်သည့်ကိစ္စ(နောက်အိမ်ထောင်ပြုခြင်း စသည်)များသည် အသင်တို့တွင် မည်သည့်အပြစ်မျှ မရှိပေ။ ထို့ပြင် အလ္လာဟ်အရှင်မြတ်သည် အသင်တို့ပြုလုပ်သည်များကို အကြွင်းမဲ့ကြားသိတော်မူသောအရှင် ဖြစ်တော်မူသည်။
[235] ထို့ပြင် အသင်တို့သည် (အိဒ်ဒသ်စောင့်ဆိုင်းနေသည့်) မုဆိုးမများကို စေ့စပ်စကားအရိပ်အခြေပြောဆိုခြင်း၊ သို့မဟုတ် (အရိပ်အခြေမပြောဘဲ) အသင်တို့ စိတ်ထဲ၌ပင် (လက်ထပ်မည့်ကိစ္စ) သိုဝှက်ထားခြင်းတွင် အသင်တို့အပေါ်၌ မည်သည့်အပြစ်မျှ မရှိပေ။ အသင်တို့သည် ထိုမုဆိုးမများအကြောင်းကို ပြောဖြစ်ကြလိမ့်မည်ဆိုသည်ကို* အလ္လာဟ်အရှင်မြတ် သိပြီးဖြစ်တော်မူသည်။ သို့ရာတွင် အသင်တို့သည် ကောင်းမွန်သည့် စကားပြောဆိုခြင်းမှလွဲ၍ အပြန်အလှန် လျှို့ဝှက်စွာ ကတိပြုမထားကြနှင့်။ ထို့ပြင် ပြဋ္ဌာန်းထားသည့် အိဒ်ဒသ်ကုန်ဆုံးရက် မရောက်မချင်း အသင်တို့သည် နိကာဟ်ပြုခြင်း အထုံးအဖွဲ့ကို မချည်နှောင်ကြနှင့်။ ထို့ပြင် အလ္လာဟ်အရှင်မြတ်သည် အသင်တို့၏စိတ်များထဲတွင် ရှိသည့်အရာများကို အမှန်စင်စစ် သိတော်မူသည့်အတွက်ကြောင့် အသင်တို့သည် အရှင်မြတ်အား ကြောက်ရွံ့ကြပါ။ ထို့ပြင် အမှန်ပင် အလ္လာဟ်အရှင်မြတ်သည် အလွန်လွတ်ငြိမ်းချမ်းသာပေးတော်မူသောအရှင်၊ အလွန်ထောက်ထားညှာတာ သည်းခံဆိုင်းငံ့တော်မူသောအရှင် ဖြစ်တော်မူသည်ဆိုသည်ကို အသင်တို့ သိထားကြပါ။
[236] အကယ်၍ အသင်တို့သည် ဇနီးမိန်းမများကို မထိတွေ့ကြသေးမီ* သို့မဟုတ် (ထိမ်းမြားရန် သဘောတူထားသော) မဟရ်ပစ္စည်း(မည်၍မည်မျှ)ဟု မသတ်မှတ်ရသေးမီပင် ကွာရှင်းခဲ့ကြလျှင် အသင်တို့တွင် မည်သည့်အပြစ်မျှ မရှိပေ။ ထို့နောက် ထိုမိန်းမများအား အသင်တို့သည် ချမ်းသာသောသူသည် ချမ်းသာသည့်အလျောက်၊ ဆင်းရဲသောသူသည် ဆင်းရဲသည့်အလျောက် သူတို့ တတ်စွမ်းနိုင်သည်ခန့် ကောင်းမွန်သည့်နည်းဖြင့် အကျိုးခံစားခွင့် (လက်ဆောင်)ပေးရန် တာဝန်ရှိသည်။* ဤသည် ကောင်းကျိုးဆောင်ရွက်သူများအပေါ်တွင် တာဝန်တစ်ခုဖြစ်သည်။
[237] ထို့နောက် အကယ်၍ အသင်တို့သည် (ထိမ်းမြားရန် သဘောတူထားသော) မဟရ်ပစ္စည်းသတ်မှတ်ပြီးနောက် သူမတို့ကို မထိတွေ့ရသေးမီတွင် ကွာရှင်းခဲ့ကြလျှင် အသင်တို့ သတ်မှတ်ခဲ့ကြသည့် မဟရ်ပစ္စည်း၏တစ်ဝက်ကို သူမတို့အား ပေးရမည်။ သို့ရာတွင် သူမတို့က ခွင့်လွှတ်ကြလျှင် (ပေးရန် မလိုတော့ပေ)။ သို့မဟုတ် နိကာဟ်ပြုလုပ်သည့်သူက သူရမည့်ကျန်တစ်ဝက်ကို ခွင့်လွှတ်လိုက်လျှင်လည်း (ထို မိန်းမသည် တစ်ဝက်ပြန်ပေးရန်မလိုတော့ပေ)။ ၎င်းပြင် အသင်တို့ ခွင့်လွှတ်လိုက်ခြင်းသည် သက္ကဝါ ကြောက်ရွံ့အပြစ်ရှောင် ကောင်းကျိုးဆောင်မှုအတွက် ပိုနီးစပ်သည်။ ထို့ပြင် အသင်တို့သည် အသင်တို့ အချင်းချင်း အပြန်အလှန် ကျေးဇူးပြုကြသည်ကို မမေ့လျော့ကြနှင့်။ အမှန်စင်စစ် အလ္လာဟ်အရှင်မြတ်သည် အသင်တို့ပြုလုပ်သည်များကို အကြွင်းမဲ့မြင်တော်မူသောအရှင် ဖြစ်တော်မူသည်။
[238] အသင်တို့သည် စွလာသ်ဝတ်ပြုမှုများကို ဂရုစိုက်(ဝတ်ပြု)ကြပါ၊ (အထူးသဖြင့်)အလယ် စွလာသ်ဝတ်ပြုမှု*ကို ဂရုစိုက်(ဝတ်ပြု)ကြပါ။ ထို့ပြင် အသင်တို့သည် အလ္လာဟ်အရှင်မြတ်၏ရှေ့တော်မှောက်တွင် ရိုကျိုးသူများအဖြစ်နှင့်ရပ်ကြပါ။
[239] ထို့နောက် အသင်တို့သည် (အန္တရာယ်များမှ)စိုးရိမ်ကြလျှင် ခြေလျင်ဖြစ်စေ၊ အစီးအနင်းစီးနေစဉ်ဖြစ်စေ (ရသည့်နည်းဖြင့် စွလာသ်ဝတ်ပြုကြပါ)။ ထို့ပြင် အသင်တို့သည် လုံခြုံစိတ်ချရသည့်အခါ အသင်တို့ မသိနားမလည်စဉ်၌ အရှင်မြတ်သင်ကြားပြသထားတော်မူသည့်အတိုင်း အသင်တို့သည် အလ္လာဟ်အရှင်မြတ်အား သတိရတသကြပါ။
[240] ထို့ပြင် အသင်တို့ထဲမှ ဇနီးမိန်းမများကို ချန်ထားခဲ့ပြီး သေဆုံးသွားကြသောသူများသည် သူတို့၏ဇနီးမိန်းမများအတွက် (နေအိမ်မှ)နှင်ထုတ်ခြင်းမပြုစေဘဲ တစ်နှစ်အကျိုးခံစားခွင့် ရရှိစေရန်(သေတမ်းစာရေးပြီး) မှာထားခဲ့ရမည်။* ထို့နောက် သူမတို့က ထွက်သွားပြီး သူမတို့ကိုယ်သူမတို့ သင့်တော်သည့်နည်းနှင့် အစီအစဉ်ပြုလုပ်ကြလျှင် အသင်တို့အပေါ်တွင် မည်သည့်အပြစ်မျှ မရှိပေ။ ထို့ပြင် အလ္လာဟ်အရှင်မြတ်သည် တန်ခိုးတော်နှင့် အလွန်လွှမ်းမိုးတော်မူသောအရှင်၊ ပညာဉာဏ်အမြော်အမြင်နှင့် အလွန်ပြည့်စုံတော်မူသောအရှင် ဖြစ်တော်မူသည်။
[241] ထို့ပြင် ကွာရှင်းပြီးဖြစ်သည့် ဇနီးမိန်းမများကိုလည်း ကောင်းမွန်သည့်နည်းဖြင့် အကျိုးခံစားခွင့် ရှိရမည်။ (ဤသည်) အလ္လာဟ်အရှင်မြတ်အား ကြောက်ရွံ့အပြစ်ရှောင် ကောင်းကျိုးဆောင်ရွက်သူများအတွက် တာဝန်တစ်ခုဖြစ်သည်။
[242] အလ္လာဟ်အရှင်မြတ်သည် အရှင်မြတ်၏အာယသ်တော်များကို အသင်တို့အတွက် သိနားလည်ကြရန် ဤသို့ပင် ရှင်းပြတော်မူသည်။
[243] အသင်(တမန်တော်)သည် ထောင်ပေါင်းများစွာရှိလျက်နှင့် သေရမည်ကိုကြောက်၍ သူတို့အိမ်များမှ ထွက်သွားခဲ့ကြသည့်သူများကို မသိမြင်ခဲ့ပါသလော။ ထို့အတွက်ကြောင့် အရှင်မြတ်သည် သူတို့အား“အသင်တို့သေကြပေတော့“ဟု မိန့်ကြားတော်မူလိုက်သည်။ (ထိုအခါ သူတို့သည် သေသွားကြသည်။) ထို့နောက် အရှင်မြတ်သည် သူတို့အား ရှင်ပြန်ထစေတော်မူခဲ့သည်။* အမှန်စင်စစ် အလ္လာဟ်အရှင်မြတ်သည် လူများပေါ်၌ ကျေးဇူးပြုတော်မူသောအရှင်ဖြစ်တော်မူသည်။ သို့ရာတွင် လူများတွင် အများစုသည် ကျေးဇူးမသိတတ်ကြပေ။
[244] ထို့နောက် အသင်တို့သည် အလ္လာဟ်အရှင်မြတ်၏လမ်းတော်တွင် စစ်တိုက်ကြပါ။* ထို့ပြင်အမှန်စင်စစ် အလ္လာဟ်အရှင်မြတ်သည် အကြွင်းမဲ့ကြားသိတော်မူသောအရှင်၊ အကြွင်းမဲ့သိတော်မူသောအရှင် ဖြစ်တော်မူသည်ဆိုသည်ကို အသင်တို့ သိထားလိုက်ကြပါ။
[245] အလ္လာဟ်အရှင်မြတ်အား ကောင်းမွန်သည့်အကြွေး*မည်သူချေးမည်နည်း။ ထို(ကဲ့သို့ချေးငှားသည့်)အတွက် အရှင်မြတ်သည် ထိုသူ့အား အဆပေါင်းများစွာ တိုးပွားစေတော်မူမည်။ ထို့ပြင် အလ္လာဟ်အရှင်မြတ်သည်ပင် ကျပ်တည်းစေတော်မူသည်။ ထို့ပြင် ချောင်လည်စေတော်မူသည်။ ထို့နောက် အသင်တို့သည် အရှင်မြတ်ထံသို့ပင် ပြန်လှည့်ကြရမည်။
[246] အသင်(တမန်တော်)သည် တမန်တော်မူစာ(၏ခေတ်ကာလ)ပြီးနောက် အစ္စရာအီလ်မျိုးနွယ်များထဲမှ အကြီးအကဲများ(၏အဖြစ်)ကို မသိမြင်ပါသလော။ တစ်ခါက သူတို့သည် သူတို့၏နဗီတမန်တော်ကို (ဤသို့)တောင်းဆိုခဲ့ကြသည်၊ “ကျွန်ုပ်တို့အတွက် ဘုရင်တစ်ပါး ခန့်ပေးပါ၊ ကျွန်ုပ်တို့သည် အရှင်မြတ်၏လမ်းတွင် တိုက်ခိုက်ကြပါမည်။“ ထို့နောက် နဗီတမန်တော်က ပြောဆိုသည်၊ အကယ်၍ အသင်တို့အပေါ်တွင် စစ်တိုက်ရန်အမိန့် ပြဋ္ဌာန်းခြင်းခံရလျှင် အသင်တို့သည် စစ်မတိုက်ဘဲ နေကောင်းနေကြလိမ့်မည် မဟုတ်လော။ သူတို့က ပြောဆိုကြသည်၊ ကျွန်ုပ်တို့အတွက် အလ္လာဟ်အရှင်မြတ်၏လမ်းတော်တွင် စစ်မတိုက်ရန် မည်သည့်အကြောင်းရှိတော့မည်နည်း၊ အမှန်ပင် ကျွန်ုပ်တို့သည် ကျွန်ုပ်တို့၏ အိုးအိမ်စည်းစိမ်နှင့် သားသမီးများမှ ခွဲခွာနှင်ထုတ်ခြင်းခံခဲ့ရပြီဖြစ်သည်။ ထို့နောက် သူတို့အပေါ်တွင် စစ်တိုက်မိန့် ပြဋ္ဌာန်းခြင်းခံရသည့်အခါ သူတို့ထဲမှ အနည်းငယ်မှလွဲ၍(ကျန်အားလုံးသည်) ကျောခိုင်းသွားကြတော့သည်။ ထို့ပြင် အရှင်မြတ်သည် မတရားကျူးလွန်သူများကို အကြွင်းမဲ့သိတော်မူသောအရှင် ဖြစ်တော်မူသည်။
[247] ထို့နောက် နဗီတမန်တော်က သူတို့အား ပြောကြားသည်၊ အမှန်စင်စစ် အလ္လာဟ်အရှင်မြတ်သည် အသင်တို့အတွက် သွာလူသ်ကို ဘုရင်အဖြစ် ခန့်အပ်စေလွှတ်တော်မူလိုက်ပြီဖြစ်သည်။ သူတို့က ပြောဆိုကြသည်၊ မည်သည့်နည်းဖြင့် ကျွန်ုပ်တို့အပေါ်တွင် သူ့အား အုပ်ချုပ်မှုအာဏာပေး၍ ဖြစ်နိုင်ပါမည်နည်း။* ၎င်းပြင် ကျွန်တော်တို့သည် သူ့ထက်ပိုပြီး အုပ်ချုပ်မှုအာဏာနှင့် ထိုက်တန်ကြသည်။ ထို့ပြင် သူသည် ပစ္စည်းဥစ္စာကြွယ်ဝချမ်းသာမှုလည်း ပေးခြင်းခံရသည် မဟုတ်ပေ။ နဗီတမန်တော်က ပြောဆိုသည်၊ အမှန်စင်စစ် အလ္လာဟ်အရှင်မြတ်သည် အသင်တို့အပေါ်တွင် သူ့အား ရွေးချယ်တော်မူသည်။ ၎င်းပြင် အရှင်မြတ်သည် သူ့အား ပညာရေးနှင့် ကိုယ်ကာယတွင် ကျယ်ဝန်းစွာ သာပိုသောအရည်အချင်းများ ပေးတော်မူသည်။ ၎င်းပြင် အလ္လာဟ်အရှင်မြတ်သည် အရှင်မြတ်အလိုရှိတော်မူသည့်သူအား အရှင်မြတ်၏ အုပ်ချုပ်မှုအာဏာကို ချီးမြှင့်တော်မူသည်။ ထို့ပြင် အလ္လာဟ်အရှင်မြတ်သည် အသိဉာဏ်ပညာနှင့် ကရုဏာကျယ်ဝန်းလျက် အရာအားလုံးကို ဝန်းခြုံထားတော်မူသောအရှင်၊ အကြွင်းမဲ့သိတော်မူသောအရှင် ဖြစ်တော်မူသည်။
[248] ထို့ပြင် သူတို့၏ နဗီတမန်တော်က သူတို့ကို ပြောကြားသည်၊ အမှန်စင်စစ် ထိုသွာလူသ်၏ ဘုရင်ဖြစ်ခြင်းလက္ခဏာသည် အသင်တို့ထံသို့ သေတ္တာတစ်လုံးရောက်လာလိမ့်မည်၊ ထိုသေတ္တာထဲတွင် အသင်တို့အား ဖန်ဆင်းမွေးမြူတော်မူသောအရှင်ထံမှ တည်ငြိမ်အေးချမ်းသာယာမှုပစ္စည်းများပါရှိလိမ့်မည်။ ထို့ပြင်(တမန်တော်)မူစာ၏အမျိုးအနွယ်နှင့် (တမန်တော်)ဟာရူန်၏အမျိုးနွယ်တို့က ချန်လှပ်ခဲ့သော ပစ္စည်းများထဲမှ (ဗရကသ်မဂင်္လာရှိသော)ပစ္စည်း အကြွင်းအကျန်အချို့ပါရှိလိမ့်မည်။ ထိုသေတ္တာကို ကောင်းကင်တမန်များက သယ်ဆောင်လာလိမ့်မည်။ အမှန်စင်စစ် အသင်တို့သည် ယုံကြည်သူများဖြစ်ကြလျှင် ထိုအထဲ၌ အသင်တို့အတွက် (ကြီးကျယ်သော) သက်သေလက္ခဏာရှိသည်။
[249] ထို့နောက် သွာလူသ်ဘုရင်သည် စစ်တပ်နှင့်ထွက်ခွာချီတက်သွားသည့်အခါ ပြောဆိုသည်၊ အမှန်စင်စစ် အလ္လာဟ်အရှင်မြတ်သည် အသင်တို့အား မြစ်တစ်ခုနှင့် စမ်းသပ်တော်မူမည်။ ထို့အတွက် အကြင်သူသည် ထိုမြစ်ထဲမှ(ရေများစွာ)သောက်ခဲ့လျှင် ထိုသူသည် ငါ၏(အုပ်စု)ထဲမှ မဟုတ်ပေ။ ၎င်းပြင် အကြင်သူသည် ရေလက်တစ်ခုပ်ခန့်မှလွဲ၍ ထိုမြစ်ထဲမှ မသောက်ခဲ့လျှင် ထိုသူသည် ငါ၏(အုပ်စု)ထဲမှဖြစ်သည်။ ထို့နောက် သူတို့ထဲမှ အနည်းငယ်မှလွဲ၍(ကျန်အားလုံးသည်) ထိုမြစ်ထဲမှ(ရေကိုများစွာ)သောက်လိုက်ကြသည်။ ထို့နောက် သွာလူသ်ဘုရင်နှင့် အီမာန်ယုံကြည်သူများသည် ထိုမြစ်ကိုကျော်လွန်သွားသည့်အခါ (ရေများစွာသောက်သူ)အချို့က ပြောဆိုကြသည်၊ ယနေ့ ဂျာလူသ်နှင့် သူ၏စစ်တပ်အား(တိုက်ရန်) ကျွန်ုပ်တို့တွင် အင်အားမရှိတော့ပေ။ အမှန်စင်စစ် အလ္လာဟ်အရှင်မြတ်နှင့် ဖူးတွေ့ရမည့်သူများဟု ယုံကြည်ထားသူများကမူ (ဤသို့)ပြောဆိုကြသည်၊ (စစ်သား)အနည်းငယ်သာရှိသည့်အုပ်စု(လေး)များသည် (စစ်သား)များစွာရှိသည့်အုပ်စု(ကြီး)များအား အရှင်မြတ်၏အမိန့်တော်ဖြင့် အကြိမ်ကြိမ်အောင်မြင်ခဲ့ကြပြီး ဖြစ်သည်။ ထို့ပြင် အလ္လာဟ်အရှင်မြတ်သည် သည်းခံသူများနှင့် အတူတကွရှိတော်မူသည်။
[250] ထို့နောက် သူတို့သည် ဂျာလူသ်ဘုရင်နှင့် သူ၏စစ်သားများအား ရင်ဆိုင်ကြသည့်အခါ (အရှင်မြတ်ထံတွင် ဤသို့ ဒိုအာတောင်းခံကြသည်) အို-ကျွန်ုပ်တို့အား ဖန်ဆင်းမွေးမြူတော်မူသောအရှင်၊ အရှင်မြတ်သည် ကျွန်ုပ်တို့အပေါ်တွင် သည်းခံနိုင်သည့်အင်အား သွန်းလောင်းပေးတော်မူပါ။ ၎င်းပြင် အရှင်မြတ်သည် ကျွန်ုပ်တို့၏ခြေများကို မြဲမြံစေတော်မူပါ။ ထို့ပြင် အရှင်မြတ်သည် ကျွန်ုပ်တို့အား ကာဖိရ်ငြင်းပယ်သူများအပေါ်၌ အောင်မြင်မှုရရန် ကူညီတော်မူပါ။
[251] ထို့နောက် သူတို့(သွာလူသ်၏စစ်သားများ)သည် အရှင်မြတ်၏အမိန့်တော်ဖြင့် သူတို့(ဂျာလူသ်၏စစ်သားများ)အား ရှုံနိမ့်အောင် ပြုလုပ်ခဲ့ကြသည်။ ဒါဝူသ်သည် ဂျာလူသ်ကို သတ်ဖြတ်ခဲ့သည်။ ထို့နောက် အလ္လာဟ်အရှင်မြတ်သည် ထိုဒါဝူသ်*ကို ဩဇာအာဏာနှင့် ဉာဏ်အမြော်အမြင်(ဝါ)နဗီဖြစ်ခြင်းကို ချီးမြှင့်ပေးသနားတော်မူခဲ့သည်။ ထို့ပြင် ၎င်း(တမန်တော်ဒါဝူသ်)အား အရှင်မြတ် အလိုရှိတော်မူသည့် ပညာရပ်များကိုလည်း သင်ကြားပေးသနားတော်မူခဲ့သည်။ ထို့ပြင် အကယ်၍ အလ္လာဟ်အရှင်မြတ်သည် လူသားများအား သူတို့အနက်မှ အချို့ကိုအချို့နှင့် တွန်းလှန်ကာကွယ်မှုမပြုခဲ့လျှင် ဤကမာ္ဘကြီးသည် အမှန်ပင် ပျက်စီးခဲ့ပြီးဖြစ်လိမ့်မည်။ သို့ရာတွင် အလ္လာဟ်အရှင်မြတ်သည် စကြဝဠာအားလုံးအပေါ်၌ ကျေးဇူးရှင် ဖြစ်တော်မူသည်။
[252] ဤသည် အလ္လာဟ်အရှင်မြတ်၏ အာယသ်တော်များပင်ဖြစ်သည်။ ငါအရှင်မြတ်သည် ထိုအာယသ်တော်များကို အသင်၏အပေါ်၌ မှန်ကန်စွာ ဖတ်ရွတ်ပြတော်မူသည်၊* ထို့ပြင် အသင်သည် စေလွှတ်တော်မူခြင်းခံရသည့် ရစူလ်တမန်တော်များထဲတွင် အမှန်ပင် တစ်ဦးအပါအဝင် ဖြစ်သည်။
[253] ငါ အရှင်မြတ်သည် အချို့တမန်တော်များကို အချို့တမန်တော်များထက် မြင့်မြတ်မှုပိုပြီး ချီးမြှင့်တော်မူခဲ့သည်။ (ဤသို့ အချို့ကို မြင့်မြတ်မှု ပိုချီးမြှင့်သည့်အတွက် ကျန်ရှိသော တမန်တော်များသည် နိမ့်ကျသွားသည် မဟုတ်ပေ။) ထိုတမန်တော်များထဲတွင် အလ္လာဟ်အရှင်မြတ်က စကားပြောတော်မူခဲ့သည့် တမန်တော်များလည်းရှိသည်။* ထို့ပြင် အရှင်မြတ်သည် ထိုတမန်တော်များထဲမှ အချို့ကို အဆင့်များ မြှင့်တင်ပေးတော်မူခဲ့သည်။* ၎င်းပြင် ငါအရှင်မြတ်သည် မရ်ယမ်၏သား(တမန်တော်)အီစာကို ထင်ရှားသည့် သက်သေလက္ခဏာများ ပေးတော်မူခဲ့သည့်အပြင် ကောင်းကင်တမန် ဂျိဗ်ရီလ်နှင့်လည်း ကူညီအားပေးတော်မူခဲ့သည်။ ထို့ပြင် အလ္လာဟ်အရှင်မြတ် အလိုရှိတော်မူခဲ့လျှင် ထိုတမန်တော်များ၏ နောက်တွင်ရှိခဲ့ကြသည်များကို သူတို့ထံ ထင်ရှားသည့်သက်သေလက္ခဏာများ ရောက်ရှိခဲ့ပြီးနောက် အချင်းချင်း သတ်ဖြတ်ကြမည်မဟုတ်ပေ။ သို့ရာတွင် သူတို့အချင်းချင်း ကွဲလွဲခဲ့ကြသည့်အတွက် သူတို့ထဲမှ အချို့သည် အီမာန်ယုံကြည်ခဲ့ကြပြီးနောက် အချို့သည် ကုဖ်ရ်ငြင်းပယ်ခဲ့ကြသည်။ ထို့ပြင် အလ္လာဟ်အရှင်မြတ် အလိုရှိတော်မူခဲ့လျှင်* သူတို့ အချင်းချင်း သတ်ဖြတ်ခဲ့ကြမည်မဟုတ်ပေ။ သို့ရာတွင် အလ္လာဟ်အရှင်မြတ်သည် အရှင်မြတ်အလိုရှိတော်မူသည်ကို ပြုလုပ်တော်မူသည်။
[254] အို- အီမာန် ယုံကြည်သူအပေါင်းတို့၊ ငါအရှင်မြတ်က အသင်တို့အား ပေးသနားတော်မူခဲ့သည့် ပစ္စည်းဥစ္စာများထဲမှ အသင်တို့သည် ထို(ကိယာမသ်)နေ့မရောက်မီ ပေးကမ်းလှူဒါန်းကြပါ။ ထိုနေ့၌ မည်သည့်အရောင်းအဝယ်မျှ ရှိမည်မဟုတ်ပေ၊ မိတ်ဆွေဖြစ်မှုလည်း ရှိမည်မဟုတ်ပေ၊ ကြားဝင်အသနားခံပြောပေးမှုလည်း ရှိမည်မဟုတ်ပေ။ ၎င်းပြင် ကုဖ်ရ်ငြင်းပယ်သူများပင် မတရားကျူးလွန်သူများဖြစ်ကြသည်။
[255] အလ္လာဟ်အရှင်မြတ်၊ ထိုအရှင်မှလွဲ၍ ကိုးကွယ်ထိုက်သောအရှင် မရှိပေ။ (ထိုအရှင်သည်) အမြဲထာဝရရှင်နေတော်မူသောအရှင်၊ အမြဲတည်ရှိလျက် ထိန်းသိမ်းစောင့်ရှောက်တော်မူသောအရှင် ဖြစ်တော်မူသည်။ အရှင်မြတ်အား ငိုက်မြည်းခြင်းနှင့် အိပ်စက်ခြင်းက မဖိစီးနိုင်ပေ။ ကောင်းကင်များနှင့် မြေပေါ်တွင်ရှိသမျှအရာများကို အရှင်မြတ်သာ ပိုင်ဆိုင်တော်မူသည်။ အရှင်မြတ်၏ခွင့်ပြုချက်မရှိဘဲ အရှင်မြတ်ထံတွင် သူတစ်ပါးအတွက် ကြားဝင်သနားခံ လိုက်ပြောပေးမည့်သူသည် မည်သူရှိသနည်း။ အရှင်မြတ်သည် သူတို့၏ရှေ့နောက် အဖြစ်အပျက် အကြောင်းစုံကို သိတော်မူသည်။ ထို့ပြင် သူတို့သည် အရှင်မြတ်၏အသိတော်ထဲမှ အရှင်မြတ်အလိုရှိသည်မှလွဲ၍ မည်သည့်အရာကိုမျှ လွှမ်းခြုံမသိနိုင်ကြပေ။ အရှင်မြတ်၏ ကုရ်စီ*သည် ကောင်းကင်များနှင့် ကမာ္ဘမြေအားလုံးကို ဝန်းခြုံထားသည်။ ထို့ပြင် ကောင်းကင်များနှင် ကမာ္ဘမြေကို စောင့်ရှောက်ရခြင်းသည် အရှင်မြတ်အား ပင်ပန်းငြီးငွေ့စေခြင်း မရှိပေ။ ၎င်းပြင် အရှင်မြတ်သည် အလွန်မြင့်မားတော်မူသောအရှင်၊ အလွန်ကြီးကျယ်မြင့်မြတ်တော်မူသောအရှင် ဖြစ်တော်မူသည်။
[256] သာသနာတွင် အတင်းအကျပ်မရှိပေ။ လမ်းမှန်သည် လမ်းမှားမှ ထင်ရှားသွားခဲ့ပြီးဖြစ်သည်။ ထို့အတွက်ကြောင့် အကြင်သူသည် (အလ္လာဟ်အရှင်မြတ်မှလွဲ၍ လူသားများကိုးကွယ်သောအရာ) သွာဂူသ်ကို ဆန့်ကျင်ငြင်းပယ်ပြီး အလ္လာဟ်အရှင်မြတ်(တစ်ပါးတည်း)ကို လက်ခံယုံကြည်ကြလျှင် မည်သည့်အခါမျှ ကျိုးပျက်ခြင်းမရှိသော ခိုင်မာသည့်ကြိုးကွင်းကို ဆုပ်ကိုင်ထားလိုက်ပြီဖြစ်သည်။ ထို့ပြင် အလ္လာဟ်အရှင်မြတ်သည် အကြွင်းမဲ့ကြားတော်မူသောအရှင်၊ အကြွင်းမဲ့သိတော်မူသောအရှင် ဖြစ်တော်မူသည်။
[257] အလ္လာဟ်အရှင်မြတ်သည် အီမာန်ယုံကြည်သူများကို ကာကွယ်စောင့်ရှောက် စောင်မတော်မူသည့် အဆွေတော်ဖြစ်တော်မူသည်။ အရှင်မြတ်သည် ထိုအီမာန်ယုံကြည်သူများကို အမိုက်အမှောင်များ(ကုဖ်ရ်)မှ အလင်းရောင်(အစ္စလာမ်)ထံသို့ ထုတ်ယူပို့ဆောင်တော်မူသည်။ ထို့ပြင် ကာဖိရ်ငြင်းပယ်သူများ၏ အဆွေခင်ပွန်းများသည် ရှိုင်သွာန်များပင်ဖြစ်ကြသည်။ ထိုရှိုင်သွာန်များသည် သူတို့အား (အစ္စလာမ်)အလင်းရောင်မှ အမိုက်အမှောင်(ကုဖ်ရ်)များထဲသို့ ပို့ဆောင်ကြသည်။ သူတို့သည်ငရဲသားများဖြစ်ကြသည်။ သူတို့သည် ထိုငရဲထဲ၌ပင် အမြဲနေထိုင်ကြရမည့်သူများဖြစ်ကြသည်။
[258] အသင်(တမန်တော်)သည် အကြင်သူ(ဘုရင်)ကို မသိမြင်ခဲ့ပါသလော။ ထိုသူ့အား အလ္လာဟ်အရှင်မြတ်က အုပ်ချုပ်မှုအာဏာ ပေးတော်မူခဲ့သည့်အပေါ်(မာနတက်ကာ) သူသည် သူ့အား ဖန်ဆင်းမွေးမြူတော်မူသောအရှင်နှင့်ပတ်သက်၍ (တမန်တော်)အိဗ်ရာဟီမ်နှင့် အငြင်းအခုံပြုခဲ့သည်။ တစ်ခါက (တမန်တော်)အိဗ်ရာဟီမ်က ပြောခဲ့သည်၊ ကျွန်ုပ်အား ဖန်ဆင်းမွေးမြူတော်မူသောအရှင်မြတ်သည် ရှင်စေတော်မူသောအရှင်၊ သေစေတော်မူသောအရှင် ဖြစ်တော်မူသည်။ သူ(ဘုရင်)ကပြောသည်၊ ငါသည်လည်း သေစေနိုင်သည်၊ ရှင်စေနိုင်သည်။* ၎င်း(တမန်တော်)အိဗ်ရာဟီမ်က ပြောသည်၊ ထို့ပြင် အမှန်မုချ အလ္လာဟ်အရှင်မြတ်သည် နေကို အရှေ့ဘက်မှ ထွက်စေတော်မူသည်။ အသင်သည် ထို(နေ)ကို အနောက်ဘက်မှထွက်အောင် ပြုလုပ်ပါ။* ထို့နောက် ကာဖိရ်ငြင်းပယ်သူ(ဘုရင်)သည် တွေဝေအံ့ဩသွားခဲ့ (ပြီး လက်မှိုင်ချလိုက်ရတော့)သည်။ ထို့ပြင် အလ္လာဟ်အရှင်မြတ်သည် မတရားကျူးလွန်သူများကို လမ်းမှန်ညွှန်ကြားပြသတော် မမူပေ။
[259] သို့မဟုတ် အသင်(တမန်တော်)သည် အကြင်သူကို မသိမြင်ခဲ့ပါသလော၊ ထိုသူသည် မြ့ိုရွာတစ်ရွာကို ဖြတ်သန်းသွားခဲ့သည်။ ထိုရွာရှိ အိမ်များသည်(ခေါင်မိုးများပြိုကျပြီး နံရံများသည်လည်း)ပြိုကျပျက်စီးလျက်ရှိသည်။ (ထိုအချင်းအရာကိုတွေ့ပြီး)၎င်းက ပြောသည်၊ အလ္လာဟ်အရှင်မြတ်သည် ဤမြို့ရွာအား ပျက်စီးပြီးနောက် မည်သည့်နည်းဖြင့် ပြန်လည်ရှင်စေ(ထူထောင်)တော်မူပါမည်နည်း။ ထို(ကဲ့သို့ ပြောသည့်အတွက်)ကြောင့် အလ္လာဟ်အရှင်မြတ်သည် ၎င်းအား နှစ်ပေါင်းတစ်ရာ သေစေတော်မူခဲ့သည်။ ထို့နောက် အရှင်မြတ်သည် ၎င်းအား ပြန်ရှင်စေတော်မူ၍ မေးမြန်းတော်မူသည်၊ “အသင်သည် မည်မျှကြာညောင်းစွာ(ဤနေရာ၌)နေခဲ့သနည်း။“ ၎င်းက ပြန်ဖြေသည်၊ “ကျွန်ုပ်သည် တစ်နေ့ သို့မဟုတ် နေ့၏တစ်စိတ်တစ်ပိုင်း နေခဲ့ပါသည်။“ အရှင်မြတ်က အမိန့်ရှိတော်မူသည်၊ ထိုသို့မဟုတ်ပေ၊ အမှန်စင်စစ် အသင်သည် နှစ်ပေါင်းတစ်ရာနေခဲ့ခြင်းဖြစ်သည်။ အသင်သည် အသင်၏စားသောက်ဖွယ်ရာများကို ကြည့်ပါ။ ထိုစားဖွယ်များသည် (ဤမျှ နှစ်ကြာသည့်တိုင်)ပုပ်သိုးနံစော်ခြင်းမရှိပေ။ ထို့နောက် (အသင်စီးနင်းလာသည့်) မြည်းတိစာ္ဆန်ကို(လည်း)ကြည့်ပါ။ ထို့နောက် ငါအရှင်မြတ်သည် အသင့်အား လူများအတွက် သက်သေလက္ခဏာတစ်ခုအဖြစ် ပြုလုပ်တော်မူရန် ဖြစ်သည်။ ထို့နောက် (အသင်စီးလာသည့် မြည်း၏)အရိုးများကို ငါအရှင်မြတ်သည် မည်ကဲ့သို့ ဆက်စပ်တော်မူပြီး အသားနှင့် ဖုံးအုပ်တော်မူသည်ဆိုသည်ကို အသင်ကြည့်ပါ။ ထို့နောက် ၎င်းအတွက် ထိုအရာများသည် ထင်ရှားလာသည့်အခါ ၎င်းက ”အမှန်စင်စစ် အလ္လာဟ်အရှင်မြတ်သည် အရာအားလုံးအပေါ် အလွန်စွမ်းဆောင်နိုင်တော်မူသောအရှင်ဖြစ်တော်မူသည်ကို ကျွန်ုပ်သိရှိ(ယုံကြည်)ပါပြီ“ ဟုပြောဆိုသည်။
[260] ထို့ပြင် တစ်ခါက (တမန်တော်)အိဗ်ရာဟီမ်သည် ပြောဆိုခဲ့သည်၊ အို- ကျွန်ုပ်အား ဖန်ဆင်းမွေးမြူတော်မူသောအရှင်၊ အရှင်မြတ်သည် သေသူများကို မည်သည့်နည်းဖြင့် ရှင်အောင်ပြုလုပ်တော်မူသည်ကို ကျွန်ုပ်အား ပြသတော်မူပါ။* အရှင်မြတ်က အမိန့်ရှိတော်မူသည်၊ အသင်(တမန်တော်)သည် (ထိုအရာကို) မယုံကြည်ပါသလော။ ၎င်း(တမန်တော်)က ပြောဆိုသည်၊ အဘယ့်ကြောင့်မယုံရပါမည်နည်း၊ အမှန်ယုံကြည်ပါသည်။ သို့ရာတွင် ကျွန်ုပ်စိတ်ကျေနပ်(တင်းတိမ်)ရန်အတွက်ပင် (မေးရခြင်း)ဖြစ်ပါသည်။ (အရှင်မြတ် ဖန်ဆင်းနိုင်ကြောင်းကို မမြင်ရဘဲနှင့် မှန်ကန်သည်ဟု သိရှိယုံကြည်လိုက်ခြင်းဖြင့်လည်း အီမာန်အတွက် လုံလောက်ပြီးဖြစ်သည်။) (ထိုအခါ)အရှင်မြတ်က မိန့်တော်မူသည်၊ သို့ဖြစ်လျှင် အသင်သည် ငှက်လေးကောင်ကို ယူပြီးနောက် အသင့်ထံတွင် သူတို့အား(ဇဗဟ် လုပ်ပြီး) အပိုင်းပိုင်းဖြတ်တောက်လိုက်ပါ။* ထို့နောက် ထိုထဲမှ တစ်ပိုင်းစီကို တောင်တစ်ခုစီ အပေါ်တင်ထားလိုက်ပါ။ ထို့နောက် အသင်သည် ထိုငှက်များကို ဟစ်ခေါ်လိုက်ပါ။ ထိုငှက်များသည် (ပြန်ရှင်ပြီး) အသင့်ထံသို့ ပြေးလာကြလိမ့်မည်။ ထို့နောက် အလ္လာဟ်အရှင်မြတ်သည် တန်ခိုးတော်နှင့် အလွန်လွှမ်းမိုးတော်မူသောအရှင်၊ ပညာဉာဏ်အမြော်အမြင်နှင့် အလွန်ပြည့်စုံတော်မူသောအရှင် ဖြစ်တော်မူသည်ကို အသင်သိလိုက်ပါ။
[261] မိမိတို့၏ ပစ္စည်းဥစ္စာများကို အလ္လာဟ်အရှင်မြတ်၏လမ်းတွင်* သုံးစွဲလှူဒါန်းသူတို့၏ပမာသည် ကောက်နှံခုနှံပေါက်စေသည့် မျိုးစေ့နှင့်တူသည်။ ထိုကောက်နှံတစ်နှံစီတွင် အစေ့ပေါင်း တစ်ရာစီပါရှိသည်။ ထို့ပြင် အလ္လာဟ်အရှင်မြတ်သည် အရှင်မြတ်အလိုရှိတော်မူသောသူအတွက် ဆထက်ထမ်းပိုး တိုးပွားစေတော်မူသည်။* ထို့ပြင် အလ္လာဟ်အရှင်မြတ်သည် အသိဉာဏ်ပညာနှင့် ကရုဏာကျယ်ဝန်းလျက် အရာအားလုံးကို ဝန်းခြုံထားတော်မူသောအရှင်၊ အကြွင်းမဲ့သိတော်မူသောအရှင် ဖြစ်တော်မူသည်။
[262] အကြင်သူများသည် သူတို့၏ ပစ္စည်းဥစ္စာများကို အလ္လာဟ်အရှင်မြတ်၏လမ်းတော်၌ သုံးစွဲလှူဒါန်းကြသည်။ ထို့နောက် သူတို့သည် သူတို့သုံးစွဲလှူဒါန်းသည့်အရာများကို ကျေးဇူးဂုဏ်ဖော်ခြင်းလည်းမပြုကြပေ၊ ထို့နောက် ဒုက္ခလည်းမပေးကြပေ။ ထိုသူများအတွက် သူတို့အား ဖန်ဆင်းမွေးမြူတော်မူသောအရှင်ထံတွင် အကျိုးကုသိုလ်များရှိသည်။ သူတို့အပေါ်တွင် မည်သည့်အရာမျှ စိုးရိမ်စရာမရှိပေ၊ ထို့ပြင် သူတို့သည် ပူဆွေးကြရမည်လည်း မဟုတ်ပေ။
[263] ကောင်းမြတ်သည့် စကားတစ်ခွန်းပြောဆိုခြင်းနှင့် ခွင့်လွှတ်ခြင်းသည် ပစ္စည်းဥစ္စာပေးကမ်းပြီး စိတ်ဒုက္ခရောက်အောင်လုပ်ခြင်းထက် ပိုကောင်းသည်။ ထို့ပြင် အလ္လာဟ်အရှင်မြတ်သည် လိုလားတောင့်တခြင်းကင်းပြီး ပြည့်စုံကြွယ်ဝတော်မူသောအရှင်၊ အလွန်ထောက်ထားညှာတာသည်းခံဆိုင်းငံ့တော်မူသောအရှင် ဖြစ်တော်မူသည်။
[264] အို- အီမာန်ယုံကြည်သူအပေါင်းတို့၊ အသင်တို့သည် အသင်တို့၏အလှူဒါနများကို ဂုဏ်ဖော်မှု၊ စိတ်ဒုက္ခပေးမှုတို့ဖြင့် အကြင်သူကဲ့သို့ အချည်းအနှီးဖြစ်အောင် မပြုလုပ်ကြနှင့်။ ထိုသူသည် အလ္လာဟ်အရှင်မြတ်နှင့် နောက်ဆုံးနေ့ကို မယုံကြည်ဘဲ လူများကို ပြစားရန်အတွက်သာ သူ၏ပစ္စည်းဥစ္စာအား လှူဒါန်းသည်။ သို့ဖြစ်ရာ သူ၏ပမာသည် ပြောင်လက်ချောမွေ့သည့် ကျောက်တုံးကဲ့သို့ပင်ဖြစ်သည်၊ ထိုကျောက်တုံးပေါ်တွင် မြေကြီး(မှုန့်) အနည်းငယ်တင်နေသည်၊ ၎င်းနောက် ထိုကျောက်တုံးပေါ်တွင် သည်းထန်သည့်မိုးရွာချလိုက်သောကြောင့် ကျောက်တုံးသည် မူလအတိုင်း ပြောင်ချောပြီးကျန်ခဲ့သည်။ ထို(ပြစား)သူများသည် သူတို့ရှာဖွေ ဆည်းပူးခဲ့သည့်အရာများထဲမှ မည်သည့်အရာ တစ်ခုမျှ(အကျိုးဆဝါဗ်)ရရှိမည် မဟုတ်ပေ။* အလ္လာဟ်အရှင်မြတ်သည် ထိုကာဖိရ်များအား လမ်းမှန်ညွှန်ကြားပြသတော်မူမည် မဟုတ်ပေ။
[265] ထို့ပြင် အကြင်သူများသည် သူတို့၏ ပစ္စည်းဥစ္စာများကို အလ္လာဟ်အရှင်မြတ်၏ ကျေနပ်နှစ်သက်မှုရှာဖွေရန်အတွက် သူတို့၏စိတ်နှလုံးထဲမှ (ယုံကြည်မှု)တည်တံ့စွာထားပြီး* သုံးစွဲကြသူများ၏ပမာသည် တောင်ကုန်းပေါ်၌ရှိသည့် ဥယျာဉ်နှင့် အလားတူသည်။ ထိုဥယျာဉ်ပေါ်တွင် သည်းထန်သည့်မိုး ရွာဖြိုးသည့်အတွက် ဥယျာဉ်သည် ၎င်း၏အသီးအနှံများကို နှစ်ဆတိုးထွက်စေသည်။ အကယ်၍ ထို(ဥယျာဉ်)အပေါ် သည်းထန်သည့်မိုး မရွာလျှင်လည်း မိုးဖွဲနှင့်ပင် (သီးနှံထွက်ရန်လုံလောက်သည်)။ ထို့ပြင် အလ္လာဟ်အရှင်မြတ်သည် အသင်တို့ပြုလုပ်သည်များကို အကြွင်းမဲ့မြင်တော်မူသောအရှင် ဖြစ်တော်မူသည်။
[266] အသင်တို့ထဲမှ တစ်ဦးတစ်ယောက်သည် (ဤကဲ့သို့ဖြစ်ခြင်းကို) နှစ်သက်ပါသလော၊ ထိုသူ့တွင် စွန်ပလွန်နှင့် စပျစ်ဥယျာဉ်တစ်ခုရှိသည်၊ ထိုဥယျာဉ်အောက်မှ စမ်းရေချောင်းများ စီးဆင်းနေသည်။ ထိုဥယျာဉ်ထဲတွင် ထိုသူ့အတွက် သစ်သီးဝလံမျိုးစုံရှိသည်။ ၎င်းနောက် ထိုသူသည် အသက်အရွယ်ကြီးရင့်မှု ဆိုက်ရောက်လာ၍ အင်အားချည့်နဲ့သည့် သားသမီးများကလည်းရှိသည်။ ထို့နောက် လောင်မီးပါသည့်မုန်တိုင်းသည် ထိုဥယျာဉ်ပေါ်တွင်ကျရောက်ပြီး ထိုဥယျာဉ်သည် လောင်ကျွမ်းသွားတော့သည်။ (ဤသည်မှာ အလှူဒါနကို ဂုဏ်ဖော်ခြင်း၊ ပြစားခြင်း၊ စိတ်ဒုက္ခပေးများဖြင့် ဖျက်ဆီးသူ၏ပမာပင်ဖြစ်သည်။) ဤကဲ့သို့ပင် အလ္လာဟ်အရှင်မြတ်သည် အသင်တို့စဉ်းစားကြရန် အသင်တို့အတွက် အာယသ်တော်များကို ရှင်းပြတော်မူသည်။
[267] အို- အီမာန်ယုံကြည်သူအပေါင်းတို့၊ အသင်တို့သည် အသင်တို့ရှာဖွေရရှိသည့် သန့်ပြန့်(ကောင်းမွန်)သည့် ပစ္စည်းဥစ္စာများထဲမှ သုံးစွဲလှူဒါန်းကြပါ၊ ၎င်းပြင် အသင်တို့အတွက် ငါအရှင်မြတ်က မြေမှထွက်စေသည့် (သတ္ထု၊ သစ်သီးဝလံ စသည့်)အရာများထဲမှလည်း (သုံးစွဲလှူဒါန်းကြပါ)။ ထို့ပြင် အသင်တို့သည် မသန့်ပြန့်(ညံ့ဖျင်း)သည့် ပစ္စည်းဥစ္စာများထဲမှ သုံးစွဲလှူဒါန်း စိတ်ပင်မကူးကြနှင့်။ အသင်တို့ကိုယ်တိုင်လည်း ထို(ညံ့ဖျင်းသည့်)အရာများကို ယူကြမည့်သူများ မဟုတ်ကြပေ၊ သို့ရာတွင် (မလွှဲမရှောင်သာ) မျက်စိမှိတ်ပြီးမှသာ ယူကြမည်။ ထို့ပြင် အမှန်စင်စစ် အလ္လာဟ်အရှင်မြတ်သည် လိုလားတောင့်တခြင်းကင်းပြီး ပြည့်စုံကြွယ်ဝတော်မူသောအရှင်၊ အလွန်ချီးမွမ်းခြင်းခံထိုက်တော်မူသောအရှင် ဖြစ်တော်မူသည်ကို အသင်တို့ သိထားကြပါ။
[268] ရှိုင်သွာန်သည် အသင်တို့အား ဆင်းရဲမှုနှင့် ခြိမ်းခြောက်သည်၊* ၎င်းပြင် အရှက်မရှိသည့်အရာများ (စေးနှဲမှု)ကိုပြုလုပ်ရန် အသင်တို့အားညွှန်ကြားသည်။ ထို့ပြင် အလ္လာဟ်အရှင်မြတ်ကမူ အသင်တို့အား မဂ်ဖိရသ် လွတ်ငြိမ်းချမ်းသာခွင့်အပြင် အကျိုးကျေးဇူးများကိုပါ အသင်တို့အား(ပေးသနားရန်) ကတိပြုတော်မူသည်။ ထို့ပြင် အလ္လာဟ်အရှင်မြတ်သည် အသိဉာဏ်ပညာနှင့် ကရုဏာကျယ်ဝန်းလျက် အရာအားလုံးကို ဝန်းခြုံထားတော်မူသောအရှင်၊ အကြွင်းမဲ့သိတော်မူသောအရှင် ဖြစ်တော်မူသည်။
[269] အရှင်မြတ်သည် အရှင်မြတ်အလိုရှိသောသူကို ပညာဉာဏ်အမြော်အမြင်* ပေးသနားတော်မူသည်။ ထို့ပြင် မည်သူမဆို ပညာဉာဏ်အမြော်အမြင် ပေးသနားတော်မူခြင်းခံရလျှင် ထိုသူသည် ကောင်းခြင်းများစွာကို ပေးသနားတော်မူခြင်းခံလိုက်ရပြီ ဖြစ်သည်။ ထို့ပြင် ဉာဏ်ရှင်များမှလွဲ၍ မည်သူမျှ သတိတရားမရကြပေ။
[270] ထို့ပြင် အသင်တို့သည် မည်သည့်အလှူကို လှူသည်ဖြစ်စေ၊ သို့မဟုတ် မည်သည့်အဓိဋ္ဌာန်ကိုပြုသည်ဖြစ်စေ* အမှန်စင်စစ် အလ္လာဟ်အရှင်မြတ်သည် ထိုအရာကို သိတော်မူသည်။ ထို့ပြင် မတရားကျူးလွန်သူများအတွက် ကူညီမည့်သူ တစ်ဦးတစ်ယောက်မျှရှိမည် မဟုတ်ပေ။
[271] အကယ်၍ အသင်တို့သည် အလှူဒါနများကို ထင်ရှားစွာလှူမည်ဆိုလျှင်လည်း ကောင်းမြတ်သည်။* ထို့ပြင် အကယ်၍ အသင်တို့သည် ဆင်းရဲသားများအား လျှို့ဝှက်ပြီး ပေးကမ်းကြမည်ဆိုလျှင် အသင်တို့အတွက် ပိုကောင်းသည်။ ထို့ပြင် အသင်တို့၏ ပြစ်မှုဒုစရိုက်များထဲမှ အချို့ကို အရှင်မြတ်သည် ဖယ်ရှားပေးတော်မူမည်။ ထို့ပြင် အလ္လာဟ်အရှင်မြတ်သည် အသင်တို့ပြုလုပ်သည်များကို အကြွင်းမဲ့ကြားသိတော်မူသောအရှင် ဖြစ်တော်မူသည်။
[272] ထိုသူ(ကာဖိရ်)များ လမ်းမှန်ရရန် အသင်(တမန်တော်)၏အပေါ်တွင် တာဝန်မရှိပေ။* ထို့ပြင် အလ္လာဟ်အရှင်မြတ်သည် အရှင်မြတ် အလိုရှိတော်မူသူများကို လမ်းမှန်ရစေတော်မူသည်။* ထို့ပြင် အသင်တို့သည် ကောင်းသည့်အရာထဲမှ မည်သည့်အရာပင် လှူသည်ဖြစ်စေ၊ ၎င်းသည် အသင်တို့အတွက်သာ ဖြစ်သည်။ ထို့ပြင် အသင်တို့သည် အလ္လာဟ်အရှင်မြတ်၏ နှစ်သက်မှုရရှိရန်အတွက်သာ သုံးစွဲလှူဒါန်းကြသည်။ ထို့ပြင် အသင်တို့သည် ကောင်းသည့်အရာထဲမှ မည်သည့်အရာကို လှူသည်ဖြစ်စေ အသင်တို့သည် မတရားပြုလုပ်ခြင်း မခံရဘဲလျှက် အသင်တို့သည် (၎င်း၏အကျိုးကို) ပြည့်ဝစွာ ပေးဆပ်ခြင်းခံရမည်။
[273] (အလှူဒါနများသည်) အလ္လာဟ်အရှင်မြတ်၏လမ်းတော်တွင် ဝိုင်းဝန်းပိတ်ဆို့ခြင်းခံနေကြရသည့်* ဆင်းရဲသားများအတွက်ဖြစ်သည်။ သူတို့သည် (သူတို့ဝမ်းစာရှာရန်) ကမာ္ဘမြေတွင် သွားလာနိုင်ခြင်းမရှိကြပေ။ သိက္ခာစောင့်စည်း (ပြီး သူတို့လိုအပ်ချက်ကို ထုတ်ဖော်ပြောဆိုခြင်းမရှိသော)ကြောင့် မသိနားမလည်သူများက သူတို့ကို ချမ်းသာကြွယ်ဝသူများဟု ထင်မှတ်ကြသည်။ အသင်(တမန်တော်)သည် သူတို့အား သူတို့၏ အသွင်အပြင် လက္ခာနှင့်ပင် (ဆင်းရဲသည်ကို) သိနိုင်သည်။သူတို့သည် လူများထံတွင် ဇွတ်အတင်း တွယ်ကပ်လျှက် မတောင်းကြပေ။ ထို့ပြင် အသင်တို့သည် ကောင်းသည့်အရာထဲမှ မည်သည့်အရာကို လှူသည်ဖြစ်စေ၊ အမှန်စင်စစ် အလ္လာဟ်အရှင်မြတ်သည် ထိုအရာကို အကြွင်းမဲ့သိတော်မူသောအရှင် ဖြစ်တော်မူသည်။
[274] အကြင်သူများသည် သူတို့၏ ပစ္စည်းဥစ္စာများကို နေ့၌ဖြစ်စေ၊ ည၌ဖြစ်စေ သိုသိပ်စွာနှင့် ထင်ရှားစွာ သုံးစွဲလှူဒါန်းကြသည်။ ထိုအတွက်ကြောင့် သူတို့၏အကျိုးရလဒ်သည် သူတို့အတွက် သူတို့အား ဖန်ဆင်းမွေးမြူတော်မူသောအရှင်ထံတွင် ရှိသည်။ ထို့ပြင် သူတို့အပေါ်တွင် မည်သည့်အရာမျှ စိုးရိမ်စရာမျှလည်းမရှိပေ၊ ထို့ပြင် သူတို့သည် ပူဆွေးကြရမည်လည်း မဟုတ်ပေ။
[275] အတိုးစားသူများသည်* (ကိယာမသ်နေ့ပြန်ထသည့်အခါ) ကောင်းကောင်း မရပ်နိုင်ကြဘဲ ရှိုင်သွာန်ပူးကပ်၍ ရူးနေသူများကဲ့သို့ ရပ်ကြလိမ့်မည်။ ထိုကဲ့သို့ ဖြစ်ရသည်မှာ သူတို့က “ကူးသန်းရောင်းဝယ်ခြင်းသည်လည်း အတိုးစားခြင်းနှင့်အတူတူပင်ဖြစ်သည်“ ဟု ပြောဆိုခြင်းကြောင့်ဖြစ်သည်။ အမှန်စင်စစ် အလ္လာဟ်အရှင်မြတ်သည် ကူးသန်းရောင်ဝယ်ခြင်းကို ခွင့်ပြုထားတော်မူပြီး အတိုးစားခြင်းကို တားမြစ်တော်မူခဲ့သည်။ ထို့ကြောင့် အကြင်သူသည် သူ့အား ဖန်ဆင်းမွေးမြူတော်မူသောအရှင်ထံမှ ဆုံးမဩဝါဒ ရောက်ရှိလာခဲ့ပြီးနောက် (အတိုးစားခြင်းကို ဟလာလ်ဟု မပြောဆိုတော့ဘဲ အတိုးစားခြင်းကို ဟရာမ်ဟု ယုံကြည်ကာ) ရပ်ဆိုင်းလိုက်လျှင် (ဤအမိန့်)မတိုင်မီက ယူပြီးဖြစ်သည့်အရာ (အတိုး)များသည် ၎င်း၏ပစ္စည်းများပင်ဖြစ်သည်။ (ဤအမိန့်သည် ကုရ်အာန်ကျရောက်ခဲ့စဉ်ကာလအတွက်သာ ဖြစ်ခဲ့၏။ ယခုခေတ်အတွက် မဟုတ်ပေ။ ယခုခေတ်မှာမူ ယူထားပြီးသောအတိုးဟူသမျှသည် အတိုးသာလျှင်ဖြစ်ပြီး အတိုးမယူတော့ဘူးဟု သောင်ဗဟ်လုပ်လိုက်သောကြောင့် ယူထားပြီးဖြစ်သော အတိုးများသည် ဟလာလ်ဖြစ်မသွားပေ။ ဟရာမ်သာလျှင်ဖြစ်သည်။) ထို့ပြင် ၎င်း၏ကိစ္စများသည် အလ္လာဟ်အရှင်မြတ်ဘက်သို့ (အပ်နှံလိုက်ပြီး)ဖြစ်သည်။ (၎င်းသည် စိတ်ထဲမှ အမှန် သောင်ဗဟ်လုပ်၍ ရပ်ဆိုင်းခြင်းဖြစ်၏၊ မဖြစ်၏ဆိုသည်ကို အသင်တို့အနေနှင့် မကောင်းထင်မြင်ရန် မခွင့်မရှိပေ။) ထို့ပြင် အကြင်သူများသည် ထပ်မံပြီး(အတိုးစားခြင်းကို) ပြုလုပ်ကြလျှင် သူတို့သည် ငရဲသားများပင်ဖြစ်ကြသည်။ သူတို့သည် ငရဲမီးထဲတွင် အမြဲနေကြရမည့်သူများဖြစ်သည်။
[276] အလ္လာဟ်အရှင်မြတ်သည် အတိုးကို ဆုတ်ယုတ်လျော့နည်း ပျက်စီးစေတော်မူပြီး အလှူဒါနကို တိုးပွားစေတော်မူသည်။* ထို့ပြင် အလ္လာဟ်အရှင်မြတ်သည် အလွန်ကျေးဇူးကန်း ငြင်းပယ်သည့် ပြစ်မှု ကျူးလွန်သူတိုင်းကို နှစ်သက်တော်မမူပေ။
[277] အမှန်စင်စစ် အကြင်သူတို့သည် အီမာန်ယုံကြည်ခဲ့ကြပြီး ကောင်းမြတ်သည့်လုပ်ရပ်များကို ပြုလုပ်ခဲ့ကြသည်၊ ထို့ပြင် စွလာသ်ဝတ်ပြုမှုုကို တည်ဆောက်ခဲ့ကြသည်၊ ထို့ပြင် ဇကာသ်(ဆင်းရဲသားနှင့် လိုအပ်သူများ၏ဝေစု)ကို ပေးဆောင်ခဲ့ကြသည်၊ ထိုသူများအတွက် သူတို့၏အကျိုးရလဒ်သည် သူတို့အား ဖန်ဆင်းမွေးမြူတော်မူသောအရှင်ထံတွင် ရှိသည်။ ထို့ပြင် သူတို့အပေါ်တွင် မည်သည့်အရာမျှ စိုးရိမ်စရာမျှလည်း မရှိပေ၊ ထို့ပြင် သူတို့သည် ပူဆွေးကြရမည်လည်း မဟုတ်ပေ။
[278] အို- အီမာန် ယုံကြည်သူအပေါင်းတို့၊ အကယ်၍ အသင်တို့သည် ယုံကြည်သူများဖြစ်ခဲ့ကြသည်ဆိုလျှင် အလ္လာဟ်အရှင်မြတ်အား ကြောက်ရွံ့ကြပါ၊ ထို့ပြင် ရယူရန်ကျန်နေသည့် အတိုးများကိုလည်း စွန့်လွှတ်လိုက်ကြပါ။
[279] ထို့နောက် အကယ်၍ အသင်တို့သည် (ထို အမိန့်တော်အတိုင်း)မပြုလုပ်ခဲ့ကြလျှင် အလ္လာဟ်အရှင်မြတ်၊ အရှင်မြတ်၏ ရစူလ်တမန်တော်နှင့် စစ်တိုက်ရန် အဆင်သင့် ပြင်ဆင်လိုက်ပါ။* ထို့ပြင် အကယ်၍ အသင်တို့သည် (အတိုးစားခြင်းကိုရပ်ကာ) အရှင်မြတ်ဘက်သို့ လှည့်ပြီး အမှားဝန်ခံခဲ့ကြလျှင် အသင်တို့၏ အရင်းငွေများသည် အသင်တို့အတွက်ဖြစ်သည်။ အသင်တို့သည် (ငွေရင်းထက်ပိုပြီး အတိုးယူကာ သူတစ်ပါးအား) မတရားပြုလုပ် နစ်နာစေကြမည်လည်း မဟုတ်ပေ၊ ၎င်းပြင် အသင်တို့သည် (ငွေရင်း ပြန်ရသည့်အတွက် သူတစ်ပါး၏) မတရား နစ်နာမှုပြုခြင်းကိုလည်း ခံကြရမည် မဟုတ်ပေ။
[280] အကယ်၍ (အသင်တို့ထံမှ ချေးငှားထားသည့်)သူသည် ဆင်းရဲကျပ်တည်းသူဖြစ်လျှင် ချောင်လည်သည်အထိ (အကြွေးဆပ်ရမည့်) အချိန်ကို စောင့်ဆိုင်းပေးရမည်။ ထို့နောက် (မဆပ်နိုင်သူထံမှ အကြွေးကို မယူတော့ဘဲ) အလှူဒါနအဖြစ် စွန့်လှူလိုက်ခြင်းသည် အကယ်၍ (၎င်းစွန့်လှူခြင်း၏ အကျိုးဆဝါဗ်ကို) အသင်တို့ သိကြမည်ဆိုလျှင် ၎င်းသည် အသင်တို့အတွက် ပိုကောင်းသည်။
[281] ထို့ပြင် အသင်တို့သည် အကြင်နေ့ကို ကြောက်ကြပါ၊ ထိုနေ့၌ အသင်တို့သည် အလ္လာဟ်အရှင်မြတ်ထံသို့ ပြန်ပို့ခံကြရမည်။ ထို့နောက် လူတိုင်းသည် သူတို့ ရှာဖွေပြုကျင့်ခဲ့ကြသည့်အရာများကို သူတို့သည် မတရားပြုခြင်း မခံကြရဘဲလျက်နှင့် အပြည့်အဝ ပေးဆပ်ခြင်းခံကြရမည်။
[282] အို- အီမာန် ယုံကြည်သူအပေါင်းတို့၊ အသင်တို့သည် အသင်တို့အချင်းချင်း အချိန်ကာလတစ်ခုအထိ သတ်မှတ်ပြီး* အကြွေးနှင့်ရောင်းဝယ်ကြသည့်အခါ ိုကိစ္စကို(စာရွက်စာတမ်းနှင့်) ရေးမှတ်ထားကြပါ။ ထို့နောက် စာရေးတစ်ဦးသည် အသင်တို့ကြား၌ မျှတစွာ ရေးသားပေးရမည်။ ထို့ပြင် စာရေးတစ်ဦးသည် သူ့အား အရှင်မြတ် သင်ပေးထားသည့်အတိုင်း ရေးသားပေးခြင်းကို မငြင်းပယ်ရပေ။ ထို့ကြောင့် စာရေးသည် ရေးသားပေးရမည်။ ထို့ပြင် (ကြွေးဆပ်ရန်)တာဝန်ရှိသူကလည်း ပြောပြ ရေးသားစေရမည်။ ထို့နောက် (ရေးသားခိုင်းသည့်အခါတွင်) သူ့အား ဖန်ဆင်းမွေးမြူတော်မူသည့် အလ္လာဟ်အရှင်မြတ်အား ကြောက်ပြီး တာဝန်ရှိသည့် (အကြွေးပမာဏ)ထဲမှ မည်သည့်အရာမျှ လျှော့ပေါ့(ရေးခိုင်းခြင်း) မပြုရပေ။ ထို့ပြင် အကယ်၍ (ကြွေးဆပ်ရန်)တာဝန်ရှိသူသည် အသိဉာဏ်နည်းသူဖြစ်လျှင် သို့မဟုတ် ရေးခိုင်းရန် မစွမ်းဆောင်နိုင်လျှင် သူ၏အုပ်ထိန်းသူက မျှတစွာ ရေးခိုင်းစေရမည်။ ထို့ပြင် အသင်တို့သည် အသင်တို့ ယောက်ျားများထဲမှ သက်သေနှစ်ဦးကို ထားကြပါ။ ထို့ပြင် အကယ်၍ ထိုသက်သေနှစ်ဦးသည် ယောက်ျားနှစ်ဦးမဖြစ်ကြလျှင် အသင်တို့ နှစ်သက်သည့်သက်သေများထဲမှ ယောက်ျားတစ်ဦးနှင့် မိန်းမနှစ်ဦးဖြစ်ရမည်။* အကြောင်းမှာမူ ထိုမိန်းမနှစ်ဦးထဲမှ တစ်ယောက်မေ့လျော့လျှင် ကျန်တစ်ယောက်က ထိုတစ်ယောက်ကို သတိပေးနိုင်ရန်အတွက်ဖြစ်သည်။ ၎င်းပြင် သက်သေများသည်လည်း သူတို့အား ဖိတ်ခေါ်ခြင်းခံရသည့်အခါ မငြင်းပယ်ရပေ။* ထို့ပြင် အသင်တို့သည် အကြွေးကိစ္စကို သေးသည်ဖြစ်စေ၊ ကြီးသည်ဖြစ်စေ သတ်မှတ်ကာလအထိ အသင်တို့ရေးရန် မပျင်းရိကြနှင့်။ ဤသည် အလ္လာဟ်အရှင်မြတ်ထံမှ အသင်တို့အတွက် ပိုမိုမျှတသည့်နည်းလမ်းဖြစ်ပြီး သက်သေခံရန် ပိုမိုခိုင်လုံသည့်နည်းဖြစ်သည်။ ထို့ပြင် အသင်တို့အတွက် သံသယကင်းရန် အနီးစပ်ဆုံးနည်းလမ်းလည်းဖြစ်သည်။ သို့ရာတွင် အရောင်းအဝယ်သည် အသင်တို့၏ကြားတွင် လက်ငင်း အလဲအလှယ်ပြုလုပ်ကြသည့် အရောင်းအဝယ်ဖြစ်လျှင် ရေးသားခြင်းမပြုလျှင်လည်း အသင်တို့ပေါ်တွင် မည်သည့်အပြစ်မျှ မရှိပေ။* ထို့ပြင် လက်ငင်းအရောင်းအဝယ်လုပ်သည့်အခါတွင်လည်း သက်သေများထားကြပါ။ ထို့ပြင် မည်သည့်စာရေးနှင့် မည်သည့်သက်သေကိုမျှ နစ်နာအောင် မလုပ်ရပေ။* ထို့ပြင် အကယ်၍ အသင်တို့သည် ထို(နစ်နာစေခြင်း)အရာကို ပြုလုပ်ကြလျှင် ထိုအရာသည် အသင်တို့အတွက် အပြစ်တစ်ခုဖြစ်သည်။ ထို့ပြင် အသင်တို့သည် အလ္လာဟ်အရှင်မြတ်အား ကြောက်ကြပါ။ ၎င်းပြင် အရှင်မြတ်သည် အသင်တို့ကို သင်ကြားပြသပေးတော်မူသည်။ ထို့ပြင် အလ္လာဟ်အရှင်မြတ်သည် အရာအားလုံးကို အကြွင်းမဲ့သိတော်မူသောအရှင် ဖြစ်တော်မူသည်။
[283] ထို့ပြင် အကယ်၍ အသင်တို့သည် ခရီးသွားနေစဉ် (အကြွေးရောင်းဝယ်မှုအတွက်) စာရေးတစ်ဦးမျှ မရှိလျှင် (စိတ်ချရရန်) အာမခံပစ္စည်း တစ်စုံတစ်ခုထားခဲ့ရမည်။ သို့ရာတွင် အကယ်၍ အသင်တို့သည် တစ်ဦးနှင့်တစ်ဦး စိတ်ချခဲ့ကြလျှင် ယုံကြည်စိတ်ချခြင်းခံရသည့် (အကြွေးယူ)သူသည် သူ့အား ဖန်ဆင်းမွေးမြူတော်မူသည့် အလ္လာဟ်အရှင်မြတ်အား ကြောက်ပြီး (အကြွေးပေး)သူ၏အကြွေးကို ပေးဆပ်ရမည်။ ၎င်းပြင် အသင်တို့သည် သိမြင်သမျှကို မထိမ်ချန်ကြနှင့်။ ထို့ပြင် အကြင်သူသည် တွေ့မြင်သမျှကို ထိမ်ချန်မည်ဆိုလျှင် ထိုသူ၏စိတ်နှလုံးသည်* ပြစ်မှုကျူးလွန်သူ၏ စိတ်နှလုံးဖြစ်မည်။ ထို့ပြင် အလ္လာဟ်အရှင်မြတ်သည် အသင်တို့ ပြုလုပ်သည်များကို အကြွင်းမဲ့သိတော်မူသောအရှင် ဖြစ်တော်မူသည်။
[284] မိုးကောင်းကင်များနှင့် မြေပေါ်တွင်ရှိသမျှအရာများအားလုံးသည် အလ္လာဟ်အရှင်မြတ်သာ ပိုင်ဆိုင်သည့်အရာများဖြစ်သည်။ အသင်တို့သည် အသင်တို့စိတ်များထဲတွင် ရှိသည်များကို ထုတ်ဖော်၍ပြောသည်ဖြစ်စေ၊ လျှို့ဝှက်၍ထားသည်ဖြစ်စေ၊ အလ္လာဟ်အရှင်မြတ်သည် ထိုအရာများနှင့်ပတ်သက်၍ အသင်တို့အား စစ်ဆေးမေးမြန်းတော်မူမည်။*ထို့နောက် အလ္လာဟ်အရှင်မြတ်သည် မိမိအလိုရှိသည်မူသောသူကို လွတ်ငြိမ်းချမ်းသာခွင့် ပေးသနားတော်မူပြီး မိမိအလိုရှိတော်မူသောသူကို အပြစ်ဒဏ်ပေးတော်မူမည်။ ထို့ပြင် အလ္လာဟ်အရှင်မြတ်သည် အရာအားလုံးအပေါ် အလွန်စွမ်းဆောင်နိုင်တော်မူသောအရှင် ဖြစ်တော်မူသည်။
[285] တမန်တော်(မုဟမ္မဒ်-ဆွ)သည် ၎င်းအား ဖန်ဆင်းမွေးမြူတော်မူသောအရှင်ထံမှ ၎င်းထံသို့ချပေးသည့်အရာ (ကုရ်အာန်ကျမ်းတော်)ကို ယုံကြည်ခဲ့ပေပြီ။*ထို့ပြင် အီမာန်ယုံကြည်သူများအားလုံးသည်လည်း ယုံကြည်ခဲ့ကြပေပြီ။ သူတို့အားလုံးသည် အလ္လာဟ်အရှင်မြတ်၊ အရှင်မြတ်၏ကောင်းကင်တမန်တော်များ၊ အရှင်မြတ်၏ကျမ်းဂန်များနှင့် အရှင်မြတ်၏ ရစူလ်တမန်တော်များအားလုံးကို ယုံကြည်ခဲ့ကြသည်။ (သူတို့က ပြောဆိုကြသည်) ကျွန်ုပ်တို့သည် အရှင်မြတ်၏ရစူလ်တမန်တော်များထဲမှ မည်သည့်ရစူလ်တမန်တော်တစ်ပါးကိုမျှ ခွဲခြားခြင်းမပြုကြပေ။ (အားလုံးကို ယုံကြည်ကြပါသည်။) ထို့ပြင် သူတို့သည် (အရှင်မြတ်ထံ) ပြောဆိုလျှောက်ထားကြသည်၊ “ကျွန်ုပ်တို့သည် (အမိန့်တော်များကို) ကြားကြပြီး လိုက်နာခဲ့ကြပါသည်။ အို- ကျွန်ုတို့အား ဖန်ဆင်းမွေးမြူတော်မူသောအရှင်၊ အရှင်မြတ်၏လွတ်ငြိမ်းချမ်းသာခွင့်ပေးသနားတော်မူခြင်းကို (ကျွန်ုပ်တို့ လိုလားတောင့်တကြပါသည်)။ ၎င်းပြင် နောက်ဆုံးပြန်လှည့်ရာစခန်းသည်လည်း အရှင်မြတ်ထံ၌သာ ဖြစ်ပါသည်။“
[286] အလ္လာဟ်အရှင်မြတ်သည် မည်သူ့ကိုမျှ သူတတ်နိုင်သည်ထက်ပိုပြီး တာဝန်ပေးတော်မမူပေ။ သူကိုယ်တိုင် ရှာဖွေဆည်းပူးခဲ့သည့် (ကောင်းသည့်)အရာများသည် သူ့အတွက်ပင်ဖြစ်ပြီး သူကိုယ်တိုင် ရှာဖွေဆည်းပူးခဲ့သည့် (မကောင်းသည့်)အရာများသည်လည်း သူ၏အပေါ်၌ပင်တင်ရှိမည်ဖြစ်သည်။ (အသင်တို့သည် အရှင်မြတ်ထံတွင် ဤကဲ့သို့ ဆုတောင်းကြပါ။) “အို- ကျွန်ုပ်တို့အား ဖန်ဆင်းမွေးမြူတော်မူသောအရှင်၊ ကျွန်ုပ်တို့သည် မေ့လျော့ပြီး သို့မဟုတ် မှားယွင်းချွတ်ချော်ပြီး (ပြုမိခဲ့သည့် မကောင်းမှုများနှင့် ပတ်သက်၍) အရှင်မြတ်သည် ကျွန်ုပ်တို့အား ဖမ်းဆီးအရေးယူတော်မမူပါနှင့်။ ထို့ပြင် အို- ကျွန်ုပ်တို့အား ဖန်ဆင်းမွေးမြူတော်မူသောအရှင်၊ ကျွန်ုပ်တို့မတိုင်မီ ယခင်က သူများအပေါ်တွင် လေးလံသည့်ဝန်ကို တင်ထားသကဲ့သို့ ကျွန်ုပ်တို့အပေါ်တွင် တင်တော်မမူပါနှင့်။ ထို့ပြင် အို- ကျွန်ုပ်တို့အား ဖန်ဆင်းမွေးမြူတော်မူသောအရှင်၊ အရှင်မြတ်သည် ကျွန်ုပ်တို့ မတတ်စွမ်းနိုင်သည့်တာဝန်များကိုလည်း ကျွန်ုပ်တို့အား ထမ်းဆောင်စေတော်မမူပါနှင့်။ ထို့ပြင် အရှင်မြတ်သည် ကျွန်ုပ်တို့အား ခွင့်လွှတ်တော်မူပါ။ ထို့နောက် အရှင်မြတ်သည် ကျွန်ုပ်တို့အား သနားတော်မူပါ။ အရှင်မြတ်သာ ကျွန်တော်တို့၏ အရေးကိစ္စများကို စီမံခန့်ခွဲပေးသည့်အရှင်သခင် ဖြစ်တော်မူပါသည်။ အရှင်မြတ်သည် ကျွန်ုပ်တို့အား ကာဖိရ်ငြင်းပယ်သူများအပေါ်တွင် (အောင်နိုင်ရန်) ကူညီတော်မူပါ။