Afar - Chapter 55 - Ar-Rahman

Yallay fulte Racmatta le

isi naqoosak isih faxe mara Qhuraan barse

Usuk seehadaytu gine

isih faxam baxxaqqa hayuh yab kaa barse

Ayróo kee alsá sittal ciggiilak yimixxige cisaabay diggi iyyal gexxa

Kaadu cutuk kee coox isi Rabbi taaxigeeh, kaah kummatta. (sujuud kaah abta)

Kaadu qaran baaxóh amol fayya heeh baaxól qadliy isi naqoosa kah amrisa hee

Miidaanat caddok tatre waytaanaah, tu kah miidaanissen mara gane waytaanâ gideh

Kaadu miidaan qadlil (massal) soolisaay, miidaan madaggoysina (madaacisina) sinaamak

Kaadu Yalli baaxó ginóh tet fidise

Teetil caxâ mixuu kee curra addak kak tawqe faan le tamiira (nakili) tan

Kaadu amboy qagura lee kee suruy meqe coox teetil yan

Yalli seehadaytu (aadam) gineh kafnaanah kanniy itta kallay alayseenih inna lek

Kaadu jinni girah uray hadiidigak (bliis) gine

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Yalli usuk ayró kak tawqe namma kabih Rabbiiy, ayró kak korta namma kabih Rabbi cagay kee gilalah

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Yalli namma baday tii kak coboy lee kee, tii kak qasbo le yesgelleeh sittat yangoorowen

Ken nammayih fanat reebuy sittat kak tatre waana yan

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Ken nammayak luul kee marjaan yawqe Yallih duddal

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Kaadu Yalli qaleelah inna le kaxxa dawaanikiy badal gexa le sinam tu xiqih

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Ginók baaxô bagul ennittam inkih baytaah

Ku Rabbiy nabna leeh massakaxxa le raaqa

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Qaranwaa kee baaxól tanim faxxa haytam kaa esserta, kulli ayro usuk abaamat yan. (fayyaheek, rammaheek, yuynuwweek, qidek)

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Sin cisaabâ fanah afkunenno abba hayteenimil sin galatnuh a qilsi namma buxay. (seehadaa kee jinni kinnuk)

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Jinnii kee seehada buttay, Yallih amrik tawqeenim duddeenik, qaranwâ deraafee kee baaxô deraafek eweqa. Tawqeenim ma duddan kaxxa maqaraay, (kuwwataay) Yallih fayxi edde tanih akke waytek

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Toysa seehadaa kee ginnow girak uraa kee diyaayisen nacaas Siinil rubsumele (siinil Qulelon), tokkel wohuk sitta ma cattaana

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Qaran qanxixaah qisih admisen qasa faleh (adintá) inna le qoborta yakke waqdi, (qhħiyaamah ayró kinnuk)

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Too ayró aben dambik seehadah umeynit messerimaay, jinni umeynit messerima

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Woo ayró umeynit sinni astootil tamixxigimeeh, malayka amok gonboobaa kee ibak dadoobal (xibiiqal) xabba ken haytaah, girat ken qambissa

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Tah jahannam giray umeynit addunyal dirabboysak sugte kinni Keenik iyyaanah

Tet fan kee niqna kak caddok taturte leeh fanat meekitan digaalah

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Sinni Rabbih foocih soolok meesite mari, namma jannat le

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Caxâ mixuu kee mexexu le luud le namma jannata

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Ama namma jannatih addal gexxa namma dara tan

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Ken nammayih addal ummaan caxâ mixuk namma qaynat yan

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Yallih foocih soolok meesite mari ama namma jannatal ruffu iyyan, fidooday adda kak gibdi cariirik kibuk tanil cusuulah anuk namma jannatih mexexih mafaala keenil xayih

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Woo fidoodal wagitto isi baqoltit yayseede agabi yan, ken baqoltik duma seehada keenil morbinnaay, jinni keenil morbinna fidoh

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Ta agabi qaxah wirya yaaqhuut kee marjaan innah

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Addunyal maqaané abe marih galto akeeral jannatak sa macaay

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Edde yabne namma jannatâ kalah namma jannat yan

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Ama namma jannat inxixih cuuginih

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Ken nammayih addal namma daray nabam darittay aggiriqqe wayta tan

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Ama namma jannatih addal caxâ mixuu kee tamiiraay (nakilaay), rummaan yan

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Woo jannootah addal cal meqe agabuy kaxxam qaxmeqe yan

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Woo jannootah addal curral qayniy wagitto isi baqoltit tayseedey, luuluk tan qarwah addal tani elle tan

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Ken baqoltik duma seehada keenil morbinnaay, jinni keenil morbinna fidoh

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Anxax makaddid (barkumaamii) kee qaxmeqe fiddiimil cusuulah anuk

Toysa seehadaa kee jinnik sin Rabbi siinih yecee niqmatittek dirabbossaanam ma niqmataay

Ku Rabbih migaq saytuniih, kay kayri maggoh, usuk dudda le nabna leeh, kaal yeemene marah mattaccoo leeh, konnaba le