Afar - Chapter 70 - Al-Maarij

Korosuk num raq sinni digaaláy keenil obtu wayta essereeh kallace

Usuk korosuh tet essereeh keenik tet waasa num mayan, yalli tet oobisam faxek

Yallay fayya leeh nabna leh kabuk taniih keenik cattam matan

Malaykaa kee jibriil Yallâ fanah tawqe ixxi kak kontom alfih sanat yakke ayróh addat

Toysa isbir Nabiyow qaxmeqe sabrih

Diggah, usun (koros kinnuk) digaalá xer iimiy akke waytah yablen

Kaadu nanu xayiimiy takku waytah tet nable

Amah takkem Qaran diyaayisen lakqoo kee nacaasih innah gaca ayró

Kaadu qaleelá bisu le suufuy fikiikiseeniy caacayat gexah inna takke ayró

Elle xayi elle xayi essere waah, kacnoyti kacnoyta essere waa ayro

Yalli woo ayro sitta ken yaybulleeh, sitta yaaxigeeniih sittah xiqaanam malon. tokkel umeyni (korosta kinnuk) isi nafsik isi xaylo fidah yaceem faxaah sangeela Qhiyaamah ayroh digaalak

Kaadu isi barraa kee isi toobokoyta fidah yaceem faxa

Baaxô bagul inkih enni ittaamat waddiimaamih sangel le, tohuk lakal Yallih digaalák naggoowam faxa woo fidat

Caagid usuk elle faxa inna hinna, diggah is ladá deqsitta giráy hadiidigtaah habuubugta kinni

Is arab siibtá gira niqnâ gibdah

Isî fanah secta iimaanat derre cabeeh, Yallaa kee Yallih farmoytih amri cine mara

Kaadu sectah maalu kobxiseeh, Yallih cakki kak aceewee mara

Diggah seehadayti baakerliiy, qaraarakolih (qambaxxaglih) anuk ginniime

usuk umaane kaa xagte tet tekkek qaraarako li kinni (qaxbaxxaagite)

Kaadu maqaané kaa xagteeh gaddalitek kaxxa gabâ gibda li kinni

Salat abá koh raqtuh immay

Woh umman sinni salaatih baguk kate waa mara kinni

Kaadu usun yimixxige cakki (maglab kinnuk) maalut kak yan mara kinni

Kallaca tu malii kee kallace waa tu malih

Kaadu usun cisab kee galtoh ayró (Qhiyaamah ayró kinnuk) nummaysa mara

Kaadu usun sinni Rabbih digaalák meesita mara

Tama meesih kah meesitaanam, diggaluk ken Rabbih digaalá yaamineenim mali (baggibda mali)

Kaadu usun sinni sammooma (sambooba) dalwak dacrisa mara

Sinni gennaaqoh agabuu kee sinni say naqoosay ken gabá timlike akke waytek, toysa diggah usun qeemu maloonuuy, yassacakken mara hinnon

Tokkel tamahak kalihim faxeeh, gurrise mari, woo mari usun caddok taturleela kinni

Kaadu usun sinni amaanootaa kee sinni xagna dacrisa mara kinni

Kaadu usun sinni sumaaqittel soolaah, wohul diggi iyya mara kinni

Kaadu usun sinni salat le waktil dacrisa mara kinni

Woo mari jannootah addal massakaxxa leeh, ruffu iyya

Nabiyow koroosite mari fillitte kadeedisak koo fanah edde yardem maca lee

Kok migdaa kee gura le kabul horta hortah gaca mara akkuk

Kulli seehadayti keenik, Yalli waara niqmat le jannat ise culsaamah sangeelaa

Aleey caagid usun elle yakkalen inna hinna, diggah nanu usun yaaxigeenimik ken ginne. (woh daacoyta kinnuk)

Ayrô mawqooqii kee ayrô kormaami Rabbil (Yalli isi nafsi edde faxak) xiibita diggah nanu dudda linoomul

Keenik yayse mara ciggiilisnaamal, kaadu hebeltô seehadayti keenik nek mayassaqqa, ken bayisnam fannek abe nee kaltam matan

Toysa usun Sinni baatilit giirisoonay ken ixxic, kaadu sinni addunyal digritoonay ken ixxic ken ayróy (woh Qhiyaamah ayró kinnuk) kah xagnisimeenit ongoorowwu iyyaanam fanah

Magooqak sissikuk yawqen ayró, addunyal sinni yallittey xeet kee cooxuk tanî fanah tet yaqbudoonuh asassakuk kah gexak sugen innah

Intiita keenik meesih rammitak buraa kee qunxaané ken buulta, woh addunyal kah xagnisimak sugen ayró (Qhiyaamah ayró kinnuk) kinni