Dagbani - Chapter 59 - Al-Hashr

Binshɛɣu din be sagbana ni, ni binshɛɣu din be tiŋgbani ni niŋdila Naawuni kasi. Yaha! Ŋuna n-nyɛ Nyεŋda, Yεmgoliŋgalana

Ŋuna (Naawuni) n-nyɛ Ŋun yihi ninvuɣu shɛba ban niŋ chɛfuritali bɛ ni ti shɛba litaafi la puuni bɛ yiŋsi tuuli karibu la ni. 1 Yi (Muslinnim’) daa bi tεhi ni bɛ ni saɣi yi (ka chɛ bɛ yiŋsi), ka bɛ (Yahuudunim’) gba tεhi ni bɛ yiliwaɣila maa ni tooi taɣi ba ka chɛ Naawuni (daazaaba). Ka Naawuni kaba na luɣushεli polo bɛ ni bi tεhi, ka zaŋ dabεm niŋ bɛ suhiri ni, ka bɛ mali bɛ mammaŋ’ nuhi, n-ti pahi ban ti Naawuni yεlimaŋli nuhi wurindi bɛ yiŋsi, dinzuɣu kpahimmi ya, yaa yinim’ ninvuɣu shɛba ban suhiri ne. Yim yim buyi ka bɛ kari Yahudanima n-yihi Madina, di tuuli yihibu n-daa nyɛ Annabi ʒɛmana, ka bɛ ti lahi kari ba yihi Saidinaa Umoro zaamani ni

Yaha! Di yi di pala Naawuni daa niŋla bɛ karibu maa talahi zuɣu, tɔ! O naan niŋ ba azaaba Dunia puuni. Yaha! Buɣum daazaaba be bɛ zuɣu Zaadali

Di daliri nyɛla bɛ (Yahuudunim’) maa yiɣisila Naawuni mini O tumo zaligu, Ŋun mi ti yiɣisi Naawuni zaligu, tɔ! Achiika! Naawuni nyɛla Azaabakpeeni lana

Binshɛɣu yi (Muslinnim’) ni ŋmaai (chεfurinim’) dobino tia zuɣu, bee yi chɛ li mi ka di ʒe di nyεbli zuɣu, tɔ! Di nyɛla Naawuni ni saɣi ti shεli, domin O filiŋ ninvuɣu shɛba ban kpee yi maa

Yaha! Tobbuna shɛŋa Naawuni ni labsi ti O tumo (Annabi Muhammadu), ka di pala yi (Muslinnim’) yila (tobu ni) ni yuri mini laakuminima. Amaa! Naawuni tirila O tuumba nasara O ni bɔri so zuɣu. Yaha! Naawuni nyɛla Toora binshɛɣu kam zuɣu

Tobbun’ shɛŋa Naawuni ni labsi ti O tumo (Annabi Muhammadu) ka di yi Larbu tiŋkpannim’ sani na, tɔ! Di nyɛla Naawuni mini O tumo dini, ni dɔɣiriba, n-ti pahi kpibsi, mini nandana, ni sochanda, domin di ti di leei din gindi yi bundannim’ sunsuuni (ka chɛ faranima). Dinzuɣu, Naawuni tumo ni kan ya na ni shɛli, tɔ! Gbibi ya li, O mi ni mɔŋ ya ni shεli, tɔ! Yin mɔŋmi ya yi maŋa. Yaha! Zom ya Naawuni. Achiika! Naawuni nyɛla Azaaba kpeeni lana

Di nyɛla faranim’ ban zo hiʒira ka bɛ yihi ba bɛ yiŋsi ka fa bɛ daarzichi la dini, ka bɛ bɔri tibginsim Naawuni sani ni O yεda, ka sɔŋdi Naawuni ni O tumo. Tɔ! Bannim’ maa n-nyɛ yεlimaŋli nima

Ni ninvuɣu shεba ban ʒi bɛ yiŋsi (Madinanima) ka ti Naawuni yεlimaŋli pɔi ka ban zo hiʒira maa naan ti kana, ka bɛ bɔri ŋun zo hiʒira labi na bɛ sani, bɛ mi bɛ zabri nyuli bɛ suhiri ni n-zaŋ chaŋ bɛ ni ti ban zo hiʒira maa (tobbun’ shɛŋa), ka bɛ naan lahi tibgi (ban zo hiʒira maa) n-gari bɛ maŋa, ka di nyɛla bɛ gba malila bukaata shɛli, dinzuɣu bɛ ni gu so ka chɛ o suhu ni bɛm, tɔ! Bana n-nyɛ ban nyɛ tarli

Ni ninvuɣu shεba ban kana bɛ nyaaŋa n-ti yεra: “Yaa ti Duuma Naawuni! Chεli ti taya paŋ ti, n-ti pahi ti mabihi (Muslinnim’) ban daŋ ti tooni ni yɛlimaŋtibo. Yaha! Di zaŋ pukparim niŋ ti suhiri ni n-zaŋ chaŋ ninvuɣu shεba ban ti yεlimaŋli sani. Yaa ti Duuma Naawuni! Achiika! A nyɛla Nambɔzɔrikpeeni, Zaadali Nambɔzobonaa

(Yaa nyini Annabi)! Di ni bɔŋɔ, a bi nya munaafichinim’ maa ni yεri bɛ mabihi ban niŋ chεfuritali (Yahuudunim’ puuni maa)! Achiika! Bɛ yi yihi ya (Madina ŋɔ), tɔ! Ti gba ni yi m-pahi yi zuɣu, ti mi ku doli ŋun kam tuhiri ya kuli mali wɔra. Yaha! Bɛ yi tuhi ya, achiika! Ti ni sɔŋ ya. Tɔ! Naawuni di shɛhira kadama bɛ nyɛla ʒirinima

Achiika! Bɛ yi yihi ba (Madina), bɛ ku yi m-pahi bɛ zuɣu, bɛ mi yi yɛn tuhi ba, bɛ ku sɔŋ ba. Yaha! Hali bɛ yi sɔŋ ba, bɛ ni lebi biri, din nyaaŋa bɛ ku nya nasara

Achiika! Yi (Muslinnim’) dabiɛm m-kpɛm bɛ suhiri ni n-gari Naawuni, di daliri n-nyɛ bɛ nyɛla ninvuɣu shεba ban bi baŋda

Bɛ ku tooi laɣim namgbaniyini tuhi ya (yi Muslinnima), naɣila tiŋ’ shɛŋa bɛ ni gu li, bee goma nyaansi (domin dabiɛm zuɣu), jɛlinsi din be bɛ sunsuuni kpεma, ka a tεhiri ba ninvuɣu yinsi, amaa! Ka bɛ suhiri woli woli, domin bɛ nyɛla ninvuɣu shεba ban bi niŋdi haŋkali

Kamani ninvuɣu shεba ban daa kuli kana pɔi ni bana maa kotomsi, bɛ daa lam bɛ tuumbɛri sanyoo (Badari tobu dali). Ka azaaba kpeeni be bɛ zuɣu (Zaadali)

Kamani shintaŋ, saha shɛli o ni yɛli ninsala: “Leemi chɛfura,” saha shεli o ni leei chɛfura, ka o yεli: “Mani nuu ka a ni, achiika! Mani zɔri Naawuni, bin- namda Duuma.”

Ka bɛ (ninsala mini shintaŋ) bahigu yɛn ti nyɛ buɣum ni, ka bɛ nyɛla ban yɛn ti kpalim di puuni. Yaha! Dina n-nyɛ zualindiriba sanyoo

Yaa yinim’ ninvuɣu shɛba ban ti Naawuni yεlimaŋli! Zom ya Naawuni. Yaha! Nyɛvuli lihimi di ni daŋsi tuun’ shɛli n-zali di maŋ’ biεɣuni. Yaha! Zom ya Naawuni. Achiika! Naawuni mi din sɔɣi yi tuuntumsa puuni

Yaha! Di leei ya kamani ninvuɣu shεba ban tam Nawuni yεla, ka O (Naawuni) chɛ ka bɛ tam bɛ maŋ’ yεla. Bannim’ maa n-nyɛ ninvuɣu shɛba ban kpee yi

Buɣum bihi mini Alizanda bihi ku niŋ yim, Alizanda bihi n-nyɛ ninvuɣu shεba ban nyɛ tarli

Ti (Tinim Naawuni) yi di siɣisi la Alkur’aani ŋɔ maa zoli zuɣu na, a naan nya li ka di nyɛla din balgi di maŋa, ka nyɛla din tahibɔɣi domin Naawuni zobo zuɣu. Yaha! Ti tiri la ninsalinim kotomsi ŋɔ maa, domin achiika! Bɛ nyɛla ban yɛn niŋ tɛha

Ŋuna n-nyɛ Naawuni So duuma jεmdigu ni kani ni yεlimaŋli naɣila Ŋuna, Ŋuna n-nyɛ Ŋun mi din sɔɣi, ni din be polo ni, Ŋuna n-nyɛ Dunia Nambɔnaa, Zaadali Nambɔzobonaa

Ŋuna n-nyɛ Naawuni So Ŋun namda, Ŋun piindi nambu, Ŋun tiri ŋmahiŋgbana, O malila yulisuma, binshɛɣu din be sagbana ni, ni din be tiŋgbani ni simsiri O mi. Ŋuna lahi nyɛ Nyɛŋda, Yεmgoliŋga lana