Dagbani - Chapter 69 - Al-Haqqah

Din ku tooi mɔŋ (din yɛn niŋ ka di kala amii, dina n-nyɛ Chiyaama)

Bo n-leei nyɛ din ku tooi mɔŋ (din yɛn niŋ ka di kala amii maa)

Yaha! (Yaa nyini Annabi)! Bo n-leei baŋsi a din ku tooi mɔŋ

Samuudu mini Aadunim’ daa labsi suhi ni tobu (Chiyaama dali) ʒiri

Amaa! Samuudunim’ bana, bɛ daa niŋ bala hallaka ni tahigu din nyɛ zaɣikpeeni

Yaha! Amaa! Aadunima, ka bɛ niŋ ba hallaka ni pɔhim shεli din mali wɔri, ka di kumsi lahi be, ka mali yaa. Samuudunima n-daa nyɛ Annabi Sālihu niriba, ka Aadunim’ mi daa nyɛ Annabi Hudu niriba

O (Naawuni) daa tim li mi na bɛ zuɣu yuŋ diba ayɔpoin ni dabsa anii, ka di kuli pa taba zuɣu, dinzuɣu ka a nya ninsalinim’ di puuni, ka bɛ nyɛla ban dondoya kamani dobino tigbir’ shɛŋa din lu n-doya

(Yaa nyini ŋun gbilsiri tibli)! Di ni- bɔŋɔ, a lahi nyari bɛ puuni so ŋun kpalim

Ka Fir’auna mi gba kana, ni ninvuɣu shεba ban daa kana pɔi ni bana, n-ti pahi ninvuɣu shεba bɛ ni daa lebi bɛ tiŋgbani pili (Annabi Lutu niriba), domin bɛ tuumbεri zuɣu

Ka bɛ kpe bɛ Duuma (Naawuni) tumo taali ni, dinzuɣu ka O gbaai ba gbaari shεli din biɛrim pahira

Achiika! Saha shεli kom ni daa kpe m-pali tiŋgbani ni, ka Ti kpiɣi ya niŋ ŋarim maa puuni

Domin Ti (Tinim’ Naawuni) zaŋ li leei wa’azu tin ya, ka tibli din yɛn wum li ka tilgi gu di maŋa

Dinzuɣu bɛ (Malaaika) yi ti piɛbsi kikaa ni yim zuɣu

Ka bɛ kpiɣi tiŋgbani mini zoya, ka nyɛm li nyɛmbu yim

Tɔ! Dindali maa ka din yɛn niŋ maa shiri yɛn niŋ

Yaha! Dindali maa ka sagbana yɛn tahibɔɣi, ka leei zaɣigbariŋ

Ka Malaaikanim’ ʒe di yεɣali kam. Ka Maalaaikanim’ anii yɛn ti ʒi a Duuma Daali’arshi (nam garo) bɛ zuɣu ni

Dindali maa ka bɛ yɛn ti zaŋ ya n- zali Naawuni tooni, ka nyɛvulilana so ku tooi sɔɣi yi puuni

Amaa! Bɛ yi ti ti so o litaafi o nudirigu zuɣu, o ni yεli: “Deemi ya n litaafi ŋɔ maa karim.”

Achiika! Mani daa dihitabli (Dunia puuni) kadama n-nyɛla ŋun yɛn ti laɣim ni n saliya karibu

Dinzuɣu, ka o nyɛla ŋun be bεri shɛli puuni bɛ ni niŋ yɛdda

Alizanda shɛli din duhi zuɣusaa la puuni

Ka di (Alizanda maa) binwola kuli be yoma (n-ti ŋun bɔri li)

(Ka bɛ yεli ba): “Dim ya ka nyu yolsigu puuni, domin yi ni daa daŋsi tum tuun’ shεŋa dabsa din garila puuni (Dunia).”

Amaa! Ninvuɣu so bɛ ni ti o litaafi ni o nuzaa, tɔ! O ni ti yεli: “M-baye, bε yi di kuli bi ti ma n litaafi ŋɔ gba.”

Yaha! M-bi mi bɛ ni yɛn kari ma saliya shɛli

Mbaye, di (kpibu maa) yi di kuli nyɛla yim zuɣu (Dunia puuni)

M buni (arzichi) bi tooi niŋ ma anfaani shɛli

N yiko (daliri) naai ya ka chε ma

Din nyaaŋa, zaŋmi ya o n-ti labi ʒehiimi (buɣum) ni

Din nyaaŋa, lom ya o ni zoligu din waɣilim nyɛ nuu ŋmεbu pihiyɔpoin, ka zaŋ ya o niŋ di puuni

Achiika! O daa nyɛla ninvuɣu so ŋun bi ti Naawuni so Ŋun galsi maa yεlimaŋli

O mi bi kpaŋsiri ninsalinima nandana dihibu

Dinzuɣu, zuŋɔ o ka zosim kpe

O mi ka bindir’ shεli m-pahila yum kom (ʒim ni mari)

So bi diri li naɣila tuumbiεri nima

Dinzuɣu M (Mani Naawuni) po yi (ninsalinim’) ni nyari shɛli

Ni yi ni bi nyari shɛli

Achiika! Di (Alkur’aani) nyɛla tuun’ so (Annabi Muhammadu) ŋun mali jilma la yεltɔɣa

Yaha! Di pala yiliyindi so yεltɔɣa, bɛla ka yi tiri Naawuni yεlimaŋli

Di mi pala baɣa so yεltɔɣa, biɛla ka yi teeri Naawuni yεla

Di (Alkur’aani) nyɛla bɛ ni siɣisi shɛli ka di yi binnamda Duuma sani na

Yaha! O (Annabi Muhammadu) yi di ŋma ʒi’ shεŋa m-pa Ti (Tinim’ Naawuni)

Achiika! Ti naan gbaai o ni nudirigu

Din nyaaŋa, Ti naan ŋmaagi o kukojilgu (ka o kpi)

Yi mi puuni so naan ku tooi taɣi o (Annabi Muhammadu) ka chɛ Ti (Tinim’ Naawuni) daazaaba

Yaha! Achiika! Di (Alkur’aani) nyɛla teebu n-zaŋ ti wuntizɔriba

Yaha! Achiika! Ti mi ni ʒirinim’ be yi (ninsalinim’) puuni

Yaha! Achiika! Di yɛn ti nyɛla ashaara n-zaŋ ti chεfurinima (Zaadali)

Yaha! Achiika! Di (Alkur’aani) nyɛla yεlimaŋli ka nyɛ din dihitabli

Dinzuɣu, simsim a Duuma So Ŋun nam galsi maa yuli