Dagbani - Chapter 70 - Al-Maarij

Bɔhigulana so bɔhiya n-zaŋ chaŋ azaaba shεli din yɛn ti niŋ

N-zaŋ ti chεfurinima, so mi ku tooi taɣi li

Ka di yɛn ti yila Naawuni So Ŋun su so’ shɛŋa din duri zuɣusaa sani

Ka Malaaikanim’ yɛn ti duri O sani, n-ti pahi Ruhi (Malaaika Ziblila), dabsi’ shεli din saɣisi yuuntuhu pihinu (Dunia ŋɔ laasabu puuni)

Dinzuɣu (yaa nyini Anaabi)! Niŋmi suɣulo, suɣulo din viεla

Achiika! Bɛ (chεfurinim’ maa) nyari li mi (Chiyaama yiɣisibu) katiŋa

Ka Ti (Tinim’ Naawuni) nyari li ka di be yoma

Dabsi’ shεli sagbana ni yɛn ti leei kamani tahiʒiεɣu (bee anʒilfa) din nyεlgi

Ka zoya leei kamani pekobri di yεɣili

Zosim’ mi bi bɔhiri o zo yεla

Ka bɛ chɛ ka bɛ (ninsalinim’) yuundi taba, ka bibee ti yɛn bɔri ni o zaŋ o bihi n-yo o maŋ’ zuɣu, ka tilgi dindali maa daazaaba

Ni o paɣa mini o mabihi

Ni o dɔɣiriba ban daa laɣim ʒiya ni ŋuna (Dunia puuni)

Ni ban kam be tiŋgbani ni namgban- yini, ka di naan tooi tilgi o (ka chɛ Naawuni daazaaba)

Haifa! Achiika! Di nyɛla Lazza (buɣum kobilnini)

Ka di nyɛ din fuɣiri zuɣugbana

Ka di boondi ŋun lebi biri Adiini, ka yi di yɛla ni

Ka laɣim arzichi, ka lo li niŋ adaka ni (ka zaɣisi adiini sɔŋsim)

Achiika! Bɛ nam ninsala ka o nyɛla diribarlim lana

Din be yi shihi o, ka o kɔŋ suɣulo

Naɣila jiŋ’ puhiriba

Bana n-nyɛ ninvuɣu shεba ban kuli bi milgi ka be jiŋli puhibu ni

Ni ninvuɣu shεba ban daarzichi puuni mali tarli ka di nyɛ zaɣimirili

N-zaŋ ti ŋun suhira, ni ŋun bi suhira dini

Ni ninvuɣu shεba ban tiri sanyoo dali (Zaadali) yɛlimaŋli

Ni ninvuɣu shεba ban zɔri bɛ Duuma (Naawuni) daazaaba dabiɛm

Achiika! Bɛ Duuma (Naawuni) daazaaba ka yεmbahiga

Ni ninvuɣu shεba ban gu bɛ tooni

Naɣila bɛ daamiliya paɣaba, ni bɛ dabpaɣaba. Achiika! Bannim’ maa pala bɛ ni galindi shɛba

Amaa! Ninvuɣu so ŋun ti bo (paɣa shεba) din nyaaŋa, tɔ! Bannim’ maa n- nyɛ ban kpahi yεɣi tariga

Ni ninvuɣu shεba ban guri bɛ da- amaananima, n-ti pahi bɛ daalikauli

Ni ninvuɣu shεba ban zani n-tuhi bɛ shɛhiranima

Ni ninvuɣu shεba ban guri bɛ jiŋli

Bannim’ maa yɛn ti bela Alizanda yiya puuni, ka bɛ nyɛla bɛ ni tibgiri shɛba

(Yaa nyini Annabi)! Ka bozuɣu ka ninvuɣu shεba ban niŋ chεfuritali maa kuli zɔri yomyom’ n-kani a sani na (ni bε ti wum din be a sani)

Ka bɛ nyɛla laɣinsi n-ʒi a nudirgu mini a nuzaa zuɣu

Di ni bɔŋɔ, bɛ zaɣiyino kam niŋdila kore ni bɛ ti zaŋ o n-kpεhi yolisigu Daalizanda la puuni

Haifa! Achiika! Ti (Tinim’ Naawuni) nam ba mi bɛ ni ʒi shɛli puuni na

Dinzuɣu, M-po wulinpuhili mini wulinluhili Duuma? Achiika! Ti (Tinim’ Naawuni) nyɛla ban mali yiko

Ka Ti ni tooi nyɛhi ba ka tahi ninvuɣu shɛba ban gari ba na, Ti mi pala bɛ ni yɛn tooi nyɛŋ shɛba

Dinzuɣu (yaa nyini Annabi)! Chεli ba ka bɛ lim (bɛ ʒiri puuni), ka kpɛrita hali ti laɣim ni bɛ dabsi’ shεli bɛ ni niŋdi ba di daalikauli maa

Dabsi’ shεli bɛ ni yɛn ti yiri na bɛ gbala ni yomyoma, ka di ŋmanila bɛ niŋdila yomyoma n-chani buɣa jεma shee la

Ka bɛ nina ba tiŋgbani ni, ka filiŋ pili ba, dina n-nyɛ dabsi’ shεli bɛ ni daa gbaai ba di daalikauli la