Dagbani - Chapter 75 - Al-Qiyamah

M (Mani Naawuni) po Zaadali

Yaha! M-po nyɛvuli shɛli din zooi di maŋ’ galime

Di ni bɔŋɔ, ninsala (chɛfura) tεhirimi ni Ti (Tinim’ Naawuni) ku tooi laɣim o koba (Zaadali)

Wumma! Ti (Tinim’ Naawuni) nyɛla ban yɛn tooi laɣim o nubihi mini o naponbihi luɣuyini

Chɛli gba! Ninsala (chɛfura) bɔrimi ni o daŋsi tuumbεri o tooni

Ka o naan bɔhira: “Bondali n-nyɛ Zaadali?”

Di yi ti niŋ ka nimbihi nyεɣisi

Ka goli neesim chaŋ ka chɛ li

Dindali maa ka ninsala yɛn ti yεli: “Yapolo ka guubu shee be?”

Haifa! Sɔɣibu shee ti kani

Dindali maa, a Duuma (Naawuni) sani n-nyɛ tablibu shee

Dindali maa, ka bɛ yɛn ti ninsala o ni daŋsi tuun’ shɛli (o nyɛvuli puuni), ni o ni naɣisi shɛli lahibali

Chɛli gba! Ninsala gba nya o tuma ni nyɛ shɛli

Hali o yi ti tahi o fabla na (bɛ ku deei li)

(Yaa nyini Annabi)! Di damdi a zinli (ni Alkur’aani karimbu), domin a gbaai li ni yomyoma

Achiika! Ti (Tinim’ Naawuni) n-su di laɣimbu (a zuɣu ni), ni di karimbu

Dinzuɣu, Ti yi karindi li, tɔ! Nyin doli di karimbu maa (ni baalim)

Din nyaaŋa, Tinima n-su di neebu

Haifa! Chɛli gba! Yi (ninsalinim’) bɔri la yomyom’ yili ŋɔ maa (Dunia)

Ka chεri Chiyaama

Dindali maa, (ninvuɣu shεba) nina yɛn ti malila neesim

Ka di nyɛla din lihiri di Duuma (Naawuni)

Yaha! Dindali maa ka (ninvuɣu shεba) nina yɛn ti zaɣizaɣi

Ka di dihitabli kadama yɛlbiɛɣu ni shee di zuɣu na

Haifa! Nyɛvuli yi ti paai kukojila ni (ninsala yi ti yɛn bahi)

Ka bɛ yεli: “Ŋuni n-leei nyɛ tibra (ŋun yɛn taɣi o nyɛvuli n-ti ti)

Ka o dihitabli ni o nyɛla ŋun yɛn wolgi ni Dunia

Ka (ninsala) bee gabgi ni o bee

A Duuma (Naawuni) sani n-nyɛ karilabi shee dindali maa

O (chɛfura) bi tila (Alkur’aani) yεlimaŋli, o mi bi puhi jiŋli

Amaa! O labsi li mi (Alkur’aani) ʒiri, ka lebi biri

Din nyaaŋa, ka o chaŋ o iyaali sani ka gamda

(Yaa nyini chɛfura)! Ashaara be a zuɣu, dina n-nyɛ din simsi a

Di nyaaŋa, ashaara be a zuɣu, dina n-nyɛ din simsi a

Di ni bɔŋɔ, ninsala tεhirimi ni bɛ kuli yɛn chɛ o mi lala

Di ni bɔŋɔ, o daa pala dablim kom din tɔɣi, ka bɛ dulindi li n-niŋdi (paɣa tooni na)

Din nyaaŋa, ka o leei ʒitalli, ka O (Naawuni) nam o, ka chɛ ka o nama saɣisi

Ka zaŋ o niŋ balibu buyi puuni, doo ni paɣa

Di ni bɔŋɔ, (Duuma So) Ŋun niŋ ŋɔ maa ka yiko din yɛn tooi neei kpiimba