Dagbani - Chapter 77 - Al-Mursalat

M (Mani Naawuni) po pɔhim shɛli din ʒɛri parinda

Yaha! M-po pɔhim shɛŋa din ʒɛri ni pam, ka saɣindi binyɛra

N-lahi po Malaaika shɛba ban toori Naawuni nambɔzɔhigu (sakom) n- yεɣinda

Ka lahi po Alkur’aani aayanim’ din wolgiri yɛlimaŋli mini ʒiri, ka di nyɛ wolgibu ni yɛlimaŋli

Yaha! M-po Malaaika shɛba ban siɣisiri wahayi (Naawuni tuuntali) na

Domin di ti ŋmaai daliri kam, bee ka di leei valsigu

Achiika! Bɛ ni niŋdi ya alikauli shɛli maa (Chiyaama) nyɛla din yɛn niŋ

Dinzuɣu di yi ti niŋ ka bɛ nyɛhi saŋmarsi neesim

Yaha! Bɛ yi ti bɔɣi sagbana

Yaha! Di yi ti niŋ ka bɛ wurim zoya

Yaha! Bɛ yi zali saha shɛli tuumba ni yɛn laɣim

Dabsi’ dini zuɣu ka bɛ naɣisi li

Yɛlimaŋli mini ʒiri wolginsim dali zuɣu (ka bɛ naɣisi li)

(Yaa nyini Annabi)! Bo n-leei yɛn chɛ a baŋ din nyɛ wloginsim dabsili

Dindali maa, azaaba kpeeni daa be ninvuɣu shɛba ban labsiri Chiyaama ʒiri maa zuɣu

Di ni bɔŋɔ, Ti (Tinim’ Naawuni) daa bi niŋ ban daŋ tooni hallaka

Din nyaaŋa ka Ti yɛn zaŋ ban kpalim nyaaŋa n-dolsi ba

Lala ka Ti niŋdi bibiɛhi

Dindali maa, azaaba kpeeni daa be ninvuɣu shɛba ban labsi Chiyaama ʒiri maa zuɣu

Di ni bɔŋɔ, Ti (Tinim’ Naawuni) bi nam ya mi ni kochɔɣiŋgu (Maniyyi bee dablim kom)

Ka Ti zaŋ li niŋ luɣushɛli polo din nyɛ suhudoo ni yɛmbahiga shee

Hali ni saha shɛli Ti ni zali li

Ka Ti (Tinim’ Naawuni) zali Ti nam zaligu, m-bo ni ban zaandi fukumsi

Dindali maa, azaaba kpeeni daa be ninvuɣu shɛba ban labsi Chiyaama ʒiri maa zuɣu

Di ni bɔŋɔ, Ti (Tinim’ Naawuni) bi zaŋ tiŋgbani leei koligu

(Ka di laɣindi) ninvuɣu shɛba ban be bɛ nyɛvuya ni mini ban kpi (di puuni)

Ka Ti zaŋ zolikara niŋ di puuni, ka nyuhi ya ko’ nyɛɣisili

Dindali maa, azaaba kpeeni daa be ninvuɣu shɛba ban labsi Chiyaama ʒiri maa zuɣu

“Cham ya mahim shɛli din mali wula ata la shee (dina n-nyɛ ʒahannama buɣum nyɔhi).”

Dina m-pa mahim, di mi ku tooi taɣi ninsala ka chɛ ʒahannama buɣum zilli

Achiika! Di nyɛla din labri buɣum kpila din ŋmani nam yilikara

Ka di naan ŋmani laakumi sabila

Dindali maa, azaaba kpeeni daa be ninvuɣu shɛba ban labsi Chiyaama ʒiri maa zuɣu

Ŋɔ maa nyɛla dabsi’ shɛli bɛ (niriba) ni ku tooi yɛli yɛltɔɣa

Bɛ mi ku saɣi ti ba, ka bɛ fabli

Dindali maa, azaaba kpeeni daa be ninvuɣu shɛba ban labsi Chiyaama ʒiri maa zuɣu

Ŋɔ maa nyɛla wolginsim dabsili, ka Ti (Tinim’ Naawuni) laɣim yi mini ban daŋ tooni maa

Dinzuɣu, di yi niŋ ka yi mali nabiɛri shɛli, tɔ! Yin nam ya Ma

Dindali maa, azaaba kpeeni daa be ninvuɣu shɛba ban labsi Chiyaama ʒiri maa zuɣu

Achiika! Wuntizɔriba yɛn ti bela mahim mini kobilnina puuni

Ni binwoli shɛŋa bɛ suhi ni kuli gbaai

(Ka bɛ yɛli ba)! “Dim ya ka nyu ka di nyɛ yolsigu n-tin ya domin yi ni daa tumdi tuun’ shɛŋa zuɣu.”

Achiika! Lala ka Ti (Tinim’ Naawuni) yɔri ninvuɣu suma sanyoo

Dindali maa, azaaba kpeeni daa be ninvuɣu shɛba ban labsi Chiyaama ʒiri maa zuɣu

Dim ya ka wum ya nyεɣisim biɛla, achiika! Yi nyɛla bibiɛhi

Dindali maa, azaaba kpeeni daa be ninvuɣu shɛba ban labsi Chiyaama ʒiri zuɣu

Yaha! Bɛ yi yɛli ba: “Kurummi ya n-ti Naawuni, bɛ bi kurinda.”

Dindali maa, azaaba kpeeni daa be ninvuɣu shɛba ban labsi Chiyaama ʒiri maa zuɣu

Ka yɛltɔɣa dini ka bɛ (chɛfurinim’) leei yɛn ti yɛlimaŋli di (Alkur’aani) nyaaŋa