Fulah - Chapter 38 - Sad

Saad. Mi woondirii Alqur'aana, jom waaju

Si ko woni, yedduɓe ɓen wonii e townitaare e lurral

Ɗuuɗii e gire ɗen Men halki, ado maɓɓe, ɓen noddi faabo, kono tawi ko bonatno bonii

Ɓe ŋalɗi, nde jertinoowo jeyaaɗo e maɓɓe, arata ɓe. Yedduɓe ɓen wi'i: "Oo, ko mbileejo heewuɗo fenaande

Kere o waɗay reweteeɗi ɗin, reweteeɗo gooto? Pellet, ɗum ko huunde haawniinde non

Mbatu maɓɓe ngun huccitiri wiide: "Yehee, tabiton e reweteeɗi mon ɗin. Ɗum ɗoo, ko huunde eɓɓanaande

Men nanaali fii ɗum, e diina sakkitiika kan. Ɗum wonaali, si wanaa ko fefindaa

Kere ko e makko Jantoore nden jippotoo hakkunde amen?" Si ko woni, ɓe wonii e sikkitagol Jantoore Am nden. Wurin, ko fii ɓe meeɗaali taho, lepte Am ɗen

Kaa ɓe jogiti ngaluuji yurmeende Joomi maa, Fooluɗo, Dokko On

Kaa ko kamɓe woodani laamagol kammuli ɗin e leydi ndin e kon ko woni hakkunde majji? Haray yo ɓe ƴeenŋu ɓe ƴawa

Ko ɓe konu hoyngu non, fooleteengu e feddeeji ɗin

Ado maɓɓe, yimɓe Nuuhu ɓen fennuno, e Aadi'en e Fir'awna jom-peme

e Samuuda'en, e yimɓe Luutu ɓen, e yimɓe pitaaji ɓen; ko ɓen woni feddeeji (fennuɓe) ɓen

Kala ɓee wonaali, si wanaa o fennii Nulaaɓe ɓen. Lepte Am ɗen jojji e maɓɓe

Ɓee habbaaki, si wanaa haacaango gooto, ngo alaa ruttorde

Ɓe wi': "Joomi amen, yaccinan men geɓal lepte amen, ado Ñalaande hasboore nden

Muñño e kon ko ɓe wi'ata; annditaa jeyaaɗo Amen on, Daawuuda, jom doole. Ko o ɗuuɗunooɗo tuubugol

Men eltii pelle ɗen, hiɗe subbunhinoda e makko, ka kiikiiɗe e ka weetugol

e colli ɗin, hiɗi mooɓindiraa, kala e majji no tuubana Mo

Men semmbini laamu makko ngun, Men yeɗi mo Annabaaku e fasinteegal

Hara kumpital wenjunooɓe ɓen arii maa, nde ɓe ƴawunoo ka ganngunal

Nde ɓe naatuoo ka Daawuuda, o ɗenƴii ɓe. Ɓe wi'i: "Wata a hulu ! Ko wennjuɓe ɗiɗo; goɗɗo e amen tooñii oya. Ñaawir goonga hakkunde amen, wata a tooñu, tinndinaa men e laawol focciingol ngol

Oo ko musiɗɗo am: himo jogii baali cappanɗe jeenay e jeenay, min miɗo jogii baalii gootii. O wi'i: "Henndinam ngii"; o foolimi e yewtere

O maaki: "Pellet, o tooñirii ma lamndagol baalii maa ngii, waɗtugol e baali makko ɗin". Ɗuuɗii ko hawtuɓe tooñindirta hakkunde maɓɓe, si wanaa ɓen gomɗimɓe, ɓe golli moƴƴuɗi - ɓen non no fanɗi. - Daawuuda felliti, wonnde Men jarribike mo. O insinanii Joomi makko, o suuyiri sujjugol, o tuubi

Men yaafanii mo ɗum. Pellet non, hino woodani mo ko Amen, ɓadal e moƴƴude ruttorde

Ko an yo Daawuuda, Men waɗii ma lomto ka leydi. Ñaawir goonga hakkunde yimɓe ɓen, wata a jokku mbeleeɗe, sakko ɗe majjine e laawol Allah ngol". Pellet, ɓen majjooɓe e laawol Allah ngol, hino woodani ɓe lepte tiiɗuɗe, sabu ko ɓe yejjitiri kon, Ñalaande hasboore nden

Men tagiraali kammu ngun e leydi ndin e ko woni hakkunde majji kon, meere. Ɗum ko sikke yedduɓe ɓen. Bone woodanii ɓen yedduɓe, e Yiite ngen

Ka Men waɗay ɓen gomɗimɓe ɓe golli moƴƴi, wano bonnooɓe ɓen ka hoore leydi? Kaa Men waɗay gomɗuɓe ɓen, wano faajireeɓe ɓen

Ko Deftere barkinaande, woni ko Men jippini e maaɗa, fii no ɓe taskora Aayeeje mayre, e ko joomiraaɓe haqqille ɓen waajitora

Men yeɗi Daawuuda Sulaymaana, - jeyaaɗo moƴƴo - Ko o ɗuuɗuɗo tuubugol-ruttoo

Janto nde o hollanoo kiikiiɗe, pucci yooɗuɗi yaawuɗi

o maaki: "Min ɓurnorii yiɗugol jawdi, dii ko mi jantotoo Joomi am kon, haa [naange] ngen mutoyii

Gomɗii Men jarribike Sulaymaana, Men werlii e jullere makko nden ɓanndu. Refti o tuubi

O maaki: "Joomi am, haforanam, yeɗaa lam laamu, ngu heertantaako goɗɗo goo, ɓaawo am. Pellet, ko An woni yeɗoowo On

Men eltani mo henndu ndun, tawi hindu wifira e sago makko, neweende, nokku kala ko o yiɗi

E seytanuuji ɗin, mahaynooɗi e mutaynooɗi

Goɗɗi ɗin, ko dummbaaɗi e penɗe

Ɗum ko dokkal Amen. Okkitir, maa jogitoraa ko aldaa e lamnditoreede

Ko pellet, hino woodani mo ka Amen, ɓadal e moƴƴude ruttorde

Janto kadi jeyaaɗo Amen on Ayyuuba, nde o noddunoo Joomi makko, wonnde : "Seytaane memirii lam tampere e muuseendi

[Allah wi'ani mo]: "Latir tunndawal maa ngal [ka leydi]: Ɗam ɗoo, ko lootorɗam, ɓuuɓuɗal e njaram

Men yeɗi mo ɓeynguure makko nden, e yeru maɓɓe tawti ɓe, yurmeende immorde e Amen, e waaju wonannde marɓe haqqille ɓen

Nanngir sookewo maa ngon, tamere huɗo, piyiraa ɗum [suddiiɗo maa on], fii wata a firtu (woondoore nden)". Men tawu mo, muññiiɗo. O moƴƴii jeyaaɗo. Pellet, ko o ɗuuɗuɗo tuubugol-ruttoo

Janto kadi, jeyaaɓe Amen ɓen, Ibraahiima e Ishaaqa e Yaaquuba, joomiraaɓe cemmbe e yi'anɗe

Men heertinanii ɓe heertinannde, annditugol galle (laakara) ɗen

E kadi ɓee ka Amen, ko jeyaaɓe e suɓaaɓe moƴƴuɓe suɓaaɓe

Janto kadi Ismaa'iila, e Yuusa'u, e Zal-Kifli, kala maɓɓe, ko jeyaaɓe e suɓaaɓe

Ɗum ko waaju. Ko pellet, hino woodani gomɗuɓe ɓen, ruttorde moƴƴunde

Ɗum ko Aljannaaji ñiiɓal, ɗi ɓe udditanaa dame mun

hara ko ɓe soɓɓindii ɓe ton, hiɓe nodda ton muuyanteeɗi ɗuuɗuɗi e njaram

Hino woodani ɓe (ton): raɓɓiduɓe ndaarɗe, goreeɓe

Ko ɗum woni ko fodaɗon, fii Ñalaande hasboore nden

Pellet, ɗum ko arsike Amen, gasugol alanaa mo

Ɗum, [ko njoɓdi maɓɓe]. Pellet, hino woodani kadi bewɓe ɓen, ko ɓuri bonnde e ruttorde

woni Jahannama, nge ɓe naatoyta. Nge bonii ndaɗɗudi

Ɗum, ko yo ɓe meeɗu: ko fatata, e ƴeƴƴiri

goɗɗe ɗen, nannduɗe e majje, ko nooneeji

E hino dental naatiroyay ngal doole e mon, toolii alanaa ɓe; tawde ko ɓe naatooɓe Yiite

Ɓen wi'a: bismilla alanaa mon, ko onon defi men ɗum". Nge bonii ñiiɓirde

Ɓe wi'a: "Joomi amen, defuɗo men ɗum on, ɓeydan mo leptte cowalle ka Yiite

Ɓeya wi'i: "Ko haɗi men yi'ugol worɓe, ɓe men limtaynoo e bomɓe ɓen

Hara men jogitorno ɓe ton jalnori, kaa ko gite (amen) yawti ɓe

Pellet, ka goonga, ko ɗum woni yeddondiral yimɓe Yiite ɓen

Maaku: "Anndee ko mi jertinoowo. Reweteeɗo woo alaa, si wanaa Allah Gooto, Fooluɗo On

Jeyɗo kammuuli ɗin e leydi ndin, e kon ko woni hakkunde ɗin ɗiɗi, Fooluɗo, Haforoowo On

Maaku: "(Ndee Alqur'aanaare), ko nde kabaaru mawɗo

kono hiɗon ɗuurnii ɗum

Ganndal alanaano lam, e fii mbatu ngun dowrowu, tuma nde ɓe wennjaynoo

Wahayinaaka e am, si wanaa wonnde min on, ko mi jertinoowo ɓanngina

Janto nde Joomi maa daalannoo Malaa'ika'en: "Min ko Mi tagiroowo ɓanndinke, immorde loopal

si Mi fotindirii mo, Mi wuttii e makko ruuhu Am on, haray suuyanee mo sujjon

Malaa'ika'en fow sujji ɓe denndaangal

si wanaa Ibuliisa, o mawnintinii, o woni jeyaaɗo e yedduɓe ɓen

(Allah) daali: "Ko an yo Ibuliisa, ko haɗu maa sujjangol ko Mi tagiri juuɗe Am? A mawnintini kaa a jeya e townitiiɓe ɓen?" @Corrected

O wi'i: "Ko min ɓuri mo moƴƴude. A tagirii lam e yiite, A tagirii mo kanko e loopal

O daali: "Yaltu ton, an on, ko a riiwaaɗo

pellet, kuddi Am ndin fawike ma haa Ñalnde njoɓdi diina

(Ibuliisa) wi'i : "Joomi am, nennitanam, haa ñalnde nde ɓe immintintee

O daali: "A jeyaama e nennitanteeɓe ɓen

haa e ñalaande happu anndaaɗo

O wi'i: "Mi woondirii mawngu Maa ngun ! Ma mi bewnuɓe fow maɓɓe

si wanaa jeyaaɓe Maa, laɓɓinaaɓe ɓen e maɓɓe

(Allah) daali: "Mi woondirii goonga, ko goonga mi wowlata

ma Mi hebbinire Jahannama, e ɓen jokkuɓe ma fow e maɓɓe

Maaku: "Mi lamndaaki on njoɓdi e fii ɗum; mi wonaali jeyaaɗo e sincooɓe(deftatoobe)

Ndee [Alqur’aanaare] wonaali, si wanaa waaju tageefo ngon

Ma on anndu (fii) kabaaru mayre, ko neeɓaa