Kinyarwanda - Chapter 38 - Sad

Swad111! Ndahiriye kuri Qur’an yuje urwibutso

Nyamara abahakanye bari mu bwibone n’ubwigomeke

Ese ni ibisekuru bingahe tworetse mbere yabo, bigatakamba by’impitagihe

(Abarabu b’ababangikanya-mana) batangajwe no kugerwaho n’umuburizi (Muhamadi) ubakomokamo. Nuko abahakanyi baravuga bati "Uyu ni umurozi w’umubeshyi

Ese arashaka ko imana (zacu) zose ziba Imana imwe? Mu by’ ukuri, iki ni ikintu gitangaje

Maze ibikomerezwa muri bo bigenda bivuga biti "Nimugende munambe ku mana zanyu. Mu by’ukuri, uyu ni umugambi wateguwe

Ibi ntitwigeze tubyumva mu myizerere yo hambere. Ibi nta kindi biri cyo usibye kuba ari ibihimbano

Ese ni we wenyine muri twe waba warahishuriwe urwibutso? Ahubwo barashidikanya ku rwibutso rwanjye (Qur’an), kuko batarasogongera ku bihano byanjye

Ese baba bafite ibigega by’impuhwe za Nyagasani wawe, Umunyembaraga zihebuje, Ugaba bihebuje

Cyangwa baba bafite ubwami bw’ibirere n’isi ndetse n’ibiri hagati yabyo? Niba ari uko bimeze, ngaho nibazamuke mu kirere bakoresheje uburyo ubwo ari bwo bwose (maze bakumire ubutumwa)

Izo ni ingabo zizatsindwa (nk’uko) iz’udutsiko zatsinzwe (mbere)

Mbere yabo (hari benshi) bahinyuye (intumwa); nk’abantu ba Nuhu, aba Adi ndetse na Farawo wari ufite inyubako zitangaje

N’aba Thamudu, abantu ba Lutwi ndetse n’aba Ayikat (b’i Mediyani), bose bari udutsiko

Nta na kamwe muri two katahinyuye intumwa, nuko ibihano byanjye biba impamo

Aba nta kindi bategereje kitari urusaku rumwe rudasubira

Kandi baravuga bati "Nyagasani wacu! Twihutishirize ibyo watugeneye (ibihano) mbere y’uko umunsi w’ibarura ugera

Ihanganire ibyo bavuga (yewe Muhamadi), kandi wibuke umugaragu wacu Dawudi wari umunyembaraga (mu kutugaragira). Mu by’ukuri, yicuzaga kuri Allah cyane

Mu by’ukuri, twashoboje imisozi gufatanya nawe (Dawudi) kudusingiza buri uko bucyeye n’uko bwije

Ndetse n’inyoni zikusanyirijwe hamwe, zaramwumviye (zifatanya nawe mu kudusingiza)

Maze dukomeza ubwami bwe, tunamuha ubushishozi no guca imanza neza

Ese (yewe Muhamadi) inkuru y’abari bashyamiranye yaba yarakugezeho, ubwo buriraga bagasanga (Dawudi) aho yasengeraga (Mih’rab)

Ubwo binjiraga kwa Dawudi maze akabikanga, bakavuga bati "Wigira ubwoba! Twembi twashyamiranye; umwe muri twe yahuguje undi. Bityo, dukiranure mu kuri kandi ntubogame, ndetse unatuyobore inzira igororotse

Mu by’ukuri, uyu muvandimwe wanjye afite intama mirongo cyenda n’icyenda, mu gihe njye mfite intama imwe (gusa), ariko yavuze ati "Nayo yindagize!" (Nyamara njye simbishaka), none yandushije ijwi

(Dawudi atabanje kumva undi) aravuga ati "Rwose yaguhuguje kuba yagusabye intama yawe ngo ayongere mu ze. Kandi mu by’ukuri, abenshi mu bafatanyije imitungo barahuguzanya, uretse babandi bemeye bakanakora ibikorwa byiza; kandi ni bo bake". Nuko Dawudi amenya ko twamugerageje asaba imbabazi Nyagasani we, yitura hasi yubamye, anicuza (kuri Allah)

Nuko ibyo turabimubabarira. Kandi mu by’ukuri, ari hafi yacu ndetse azagira igarukiro ryiza (Ijuru)

Yewe Dawudi! Mu by’ukuri, twakugize umusigire ku isi, bityo jya ukiranura abantu mu kuri kandi ntuzagendere ku marangamutima, kugira ngo atazavaho akuyobya inzira ya Allah. Mu by’ukuri, abazayoba inzira ya Allah bazahanishwa ibihano bikaze, kubera kwibagirwa umunsi w’ibarura

Ntitwanaremye ikirere n’isi ndetse n’ibiri hagati ya byo nta mpamvu. Uko ni ko abahakanye bibwira. Bityo, ibihano bikaze by’umuriro bizaba ku bahakanyi

Ese abemeye bakanakora ibikorwa byiza twabafata kimwe n’abangizi ku isi? Cyangwa se ngo dufate kimwe abatinya Imana n’inkozi z’ibibi

Iki ni igitabo cyuje imigisha twaguhishuriye (yewe Muhamadi), kugira ngo (abantu) batekereze ku mirongo yacyo ndetse no kugira ngo abanyabwenge bibuke

Kandi Dawudi twamuhaye Sulayimani nk’impano. Yari umugaragu mwiza. Mu by’ukuri, yicuzaga kuri Allah cyane

(Ibuka) ubwo nimugoroba yamurikirwaga amafarasi y’ubwoko bwiza kandi yiruka cyane

Nuko akavuga ati "Nakunze iby’isi kugeza ubwo nibagirwa Nyagasani wanjye, izuba ririnda rirenga

Ngaho nimuzingarurire!" Maze atangira kuzagaza ku maguru no ku majosi

Kandi rwose twagerageje Sulayimani tujugunya ikibiri112 ku ntebe ye y’ubwami, (bimutera gusa nk’utakaje ubwami bwe, abona ko yageragejwe) nyuma yicuza ku Mana

Aravuga ati "Nyagasani wanjye! Mbabarira, unangabire ubwami butazigera buhabwa undi nyuma yanjye. Mu by’ukuri, ni wowe ugaba bihebuje

Nuko dutegeka umuyaga guca bugufi ku itegeko rye, akawerekeza aho ashaka (kujya hose)

Ndetse n’amashitani y’amoko yose; yaba ayubaka n’ayibira mu mazi (twayategetse kumwumvira)

Naho andi (yamwigomekagaho) yayafungaga ku minyururu

(Allah abwira Sulayimani ati) "Ibi ni impano yacu; bityo ha (uwo ushatse) cyangwa wime (uwo ushatse), nta cyo uzabazwa

Kandi mu by’ukuri, yari hafi yacu ndetse azagira igarukiro ryiza (Ijuru)

Unibuke ubwo umugaragu wacu Ayubu yatakambiraga Nyagasani we agira ati "Mu by’ukuri, Shitani yanteje ibyago n’ububabare

(Allah aramubwira ati) "Kubita ikirenge cyawe hasi; ayo mazi akonje (avuyemo) ni ayo kwiyuhagira no kunywa

Nuko k’ubwimpuhwe ziduturutseho, tumugarurira umuryango we uri kumwe n’abandi nkawo, kugira ngo bibe urwibutso ku banyabwenge

Unafate umuba w’udushari mu kuboko kwawe maze uwukubitishe (umugore wawe113), kugira ngo udatatira indahiro. Mu by’ukuri, twasanze (Ayubu) ari umuntu wihangana akaba n’umugaragu mwiza, kandi rwose yicuzaga cyane (kuri Allah)

Kandi wibuke (yewe Muhamadi) abagaragu bacu; Ibrahimu, Isihaka na Yakubu; bari abanyamurava (mu kudusenga) bakanagira ubushishozi (mu idini)

Mu by’ukuri, twarabatoranyije tubaha umwihariko wo kwibuka imperuka

Kandi rwose imbere yacu bari intoranywa bakaba n’abantu beza

Unibuke Isimayili, Aliyasa na Dhul’kifli; bose bari abantu beza

Iyi (Qur’an) ni urwibutso. Kandi mu by’ukuri, abatinya (Allah) bazagira igarukiro ryiza

Ijuru rihoraho, bazafungurirwa imiryango yaryo

Aho bazaba begamye, batumiza imbuto nyinshi n’ibinyobwa

Bazaba bari kumwe n’abagore barangamiye abagabo babo (gusa) kandi b’urungano

Ibyo ni byo (bihembo) by’umunsi w’ibarura mwasezeranyijwe

Mu by’ukuri, ibyo ni amafunguro yacu adateze kuzashira

Ibyo (ni byo bizagororerwa abemera). Naho abanyabyaha bazagira igarukiro ribi

Umuriro wa Jahanamu bazinjiramo, ukazaba ari bwo buturo bubi

Ibyo (ni byo bihano bazahanishwa). Bityo, nibabisogongere; ni amazi yatuye n’amashyira

N’ibindi (bihano) bimeze nkabyo by’ingeri nyinshi

(Abayobeje abandi bazabwirwa bati) "Aka ni agatsiko kaje kubana namwe (mu muriro)", (bavuge bati) "Nta heza bashyikiye kuko mu by’ukuri, binjiye mu muriro

(Abayobejwe) bazavuga bati "Ahubwo ni mwe mutashyikiye aheza kuko ari mwe mwawudukururiye (umuriro); kandi ni cyo cyicaro kibi

Bazavuga bati "Nyagasani wacu! Uwadukururiye ibi mwongerere ibihano byo mu muriro byikubye kabiri

Bazanavuga bati "Byatugendekeye bite ko tutabona bamwe mu bantu twabaraga mu nkozi z’ibibi

Ese twabibeshyagaho (ku isi) tubannyega (naho ari abantu b’intungane, cyangwa bari kumwe natwe mu muriro) amaso yacu akaba atababona

Mu by’ukuri, uko gusubiranamo kw’abantu bo mu muriro ni impamo

Vuga (yewe Muhamadi) uti "Njye nta kindi ndi cyo usibye kuba ndi umuburizi, kandi nta yindi mana ikwiye gusengwa by’ukuri itari Allah; Umwe rukumbi, Umunyembaraga w’ikirenga

Nyagasani w’ibirere n’isi ndetse n’ibiri hagati yabyo, Umunyembaraga zihebuje,Umunyembabazi uhebuje

Vuga (yewe Muhamadi) uti "Iyi (Qur’an) ni inkuru ihambaye

Ariko mwayiteye umugongo

Nta bumenyi nari mfite ku mpaka zagibwaga n’abamalayika bo mu ijuru (ku iremwa rya Adamu)

Usibye ko nabihishuriwe kuko ndi umuburizi ugaragara

(Ibuka) ubwo Nyagasani wawe yabwiraga abamalayika ati "Mu by’ukuri, ngiye kurema umuntu mu ibumba

Nimara kumutunganya nkanamuhuhamo roho, mumwikubite imbere mwubamye

Nuko abamalayika bose barubama

Usibye Ibilisi (Shitani) wagize ubwibone maze akaba mu bahakanye

(Nuko Allah akavuga ati) "Yewe Ibilisi! Ni iki cyakubujije kubamira uwo naremye n’amaboko yanjye yombi? Ese wagize ubwibone cyangwa wabaye mu bishyize hejuru

(Ibilisi) iravuga iti "Njye ndi mwiza kumurusha kuko wandemye mu muriro, we ukamurema mu ibumba

Allah aravuga ati "Ngaho sohoka aha ( mu ijuru), kuko ubaye ikivume

Kandi rwose umuvumo wanjye uzagukurikirana kuzageza ku munsi w’ibihembo

(Allah) aravuga ati "Mu by’ukuri, ubaye mu bazaramba

Kugeza ku munsi w’igihe kizwi

(Ibilisi) iravuga iti "Ndahiye ku bw’icyubahiro cyawe, ko rwose nzabayobya bose

Uretse abagaragu bawe b’indobanure muri bo

(Allah) avuga arahira ati "Ni ukuri, kandi ibyo mvuga ni ukuri

Ko wowe na bamwe mu bazagukurikira nzabuzurisha umuriro wa Jahanamu

Vuga (yewe Muhamadi) uti "Ntabwo (kubagezaho ubutumwa) mbibasabira igihembo na kimwe, ndetse nta n’ubwo ndi mu bishushanya (bakora ibyo batategetswe)

Iyi (Qur’an) nta kindi iri cyo usibye kuba ari urwibutso ku biremwa byose

Kandi rwose muzamenya inkuru yayo bidatinze" Yahishuriwe i Maka, ig