Kinyarwanda - Chapter 54 - Al-Qamar

Igihe cy’imperuka kiregereje ndetse n’ukwezi kwarasadutse

N’iyo (abahakanyi) babonye igitangaza, batera umugongo bakavuga bati "Ubu ni uburozi bukomeje

Barahakanye banakurikira irari ryabo, kandi buri kintu kizagira iherezo

Kandi rwose bagezweho n’inkuru zibabuza (gukora ibibi)

(Izo nkuru ziri muri Quran) zuje ubushishozi buhebuje, ariko uko kubaburira ntacyo kwabamariye

Bityo (yewe Muhamadi), birengagize kandi (unabibutse) umunsi umuhamagazi azahamagarira kugana ku kintu giteye ubwoba (gucirwa urubanza ku munsi w’imperuka)

Bazaba bubitse amaso (kubera ikimwaro), basohoka mu mva bameze nk’inzige zinyanyagiye

Bihuta bagana uhamagara, abahakanyi bazavuga bati "Uyu ni umunsi ugoye

Na mbere yabo, abantu ba Nuhu bahinyuye umugaragu wacu, maze baravuga bati "Ni umusazi", ndetse aranamaganwa

Nuko asaba Nyagasani we (agira ati) "Rwose njye naneshejwe, bityo ntabara

Nuko dufungura amarembo y’ikirere, hamanuka amazi yisuka ari menshi

Nuko isi tuyikuramo amasoko, maze amazi (yo mu nsi no hejuru) arahura ku bw’itegeko ryagenwe

Maze (Nuhu) tumutwara mu (kintu) gikozwe mu mbaho n’imisumari (inkuge)

Cyagendaga (hejuru y’amazi) tugihanze ijisho; (ibyo) biba igihembo cy’uwahakanyijwe

Rwose (iyi nkuru ya Nuhu) twarayiretse ngo ibe ikimenyetso (n’isomo ku bazaza nyuma ye). Ese hari uwibuka (ngo bimugirire akamaro)

Mbega uko ibihano byanjye no kuburira kwanjye byari bimeze

Kandi rwose tworoheje Qur’an kugira ngo ibe urwibutso. Ese hari uwibuka (ngo bimugirire akamaro)

Aba Adi bahinyuye (Intumwa yabo Hudi); mbega uko ibihano byanjye no kuburira kwanjye byari bimeze

Mu by’ukuri, twaboherereje inkubi y’umuyaga uvuza ubuhuha ku munsi w’amakuba akomeye

Uterura abantu bakamera nk’ingiga z’ibiti by’imitende byaranduwe

Kandi rwose tworoheje Qur’an kugira ngo ibe urwibutso. Ese hari uwibuka (ngo bimugirire akamaro)

Aba Thamudi bahinyuye kuburira (kwacu)

Nuko baravuga bati "Ese ni gute twafata umuntu umwe unadukomokamo ngo tube ari we dukurikira? Rwose ubwo twaba turi mu buyobe n’ubusazi

Ese ubu koko urwibutso ni we wenyine muri twe rwahawe? Ahubwo we ni umubeshyi akaba n’umwibone

Bidatinze bazamenya umubeshyi w’umwibone uwo ari we

Twaboherereje ingamiya kugira ngo tubagerageze; bityo bagenzure unabihanganire

Unababwire ko amazi bagomba kuyasangira nayo (ingamiya); buri wese azajya agira umunsi we wo kuyanywaho

Ariko bahamagaye mugenzi wabo (afata icyuma) arayica

Mbega uko ibihano byanjye no kuburira kwanjye byari bimeze

Mu by’ukuri, twaboherereje urusaku rumwe gusa, maze bamera nk’ibyatsi byumye byaribaswe

Kandi rwose tworoheje Qur’an kugira ngo ibe urwibutso. Ese hari uwibuka (ngo bimugirire akamaro)

Abantu ba Lutwi bahinyuye kuburira (kwacu)

Twaboherereje inkubi y’umuyaga uvanze n’amabuye (ubarimbura bose), usibye gusa umuryango wa Lutwi twarokoye mu rukerera

(Ibyo twabikoze) ku bw’ingabire ziduturutseho. Uko ni ko duhemba ushimira

Nyamara (Lutwi) yari yarababuriye ko bazahura n’ibihano byacu, nuko bashidikanya ku kubaburira (kwacu)

Baranamwinginze (ngo abahe) abashyitsi be (kugira ngo babakorere ubutinganyi). Nuko tubahuma amaso (tuvuga tuti) "Ngaho nimusogongere ibihano byanjye no kuburira (kwanjye)

Kandi rwose twabazindukirije mu bihano bikomeza (kuzageza ku munsi w’imperuka)

Ngaho nimusogongere ibihano byanjye no kuburira (kwanjye)

Kandi rwose tworoheje Qur’an kugira ngo ibe urwibutso. Ese hari uwibuka (ngo bimugirire akamaro)

Kandi rwose kuburira (kwanjye) kwageze ku bantu ba Farawo

Bahinyuye ibitangaza byacu byose, nuko turabafata tubahanisha ibihano by’Umunyembaraga uhebuje, Ushobora byose

Ese abahakanyi banyu (b’i Maka) ni bo beza kurusha abo (abantu ba Adi, aba Thamudi, aba Nuhu n’aba Farawo, boretswe)? Cyangwa mufite ubudahangarwa bwanditse mu bitabo (bwo kutazahanwa)

Cyangwa (abo bahakanyi) baravuga bati "Twe turi benshi bashyize hamwe, bashoboye kwitabara

Nyamara abo bishyize hamwe bazatsindwa banayabangire ingata

Ahubwo umunsi w’imperuka ni cyo gihe basezeranyijwe (cyo kuzahanirwaho), ndetse imperuka izaba iteye ubwoba cyane kandi irura

Mu by’ ukuri, inkozi z’ibibi ziri mu buyobe (hano ku isi) kandi zizahanishwa umuriro utwika

Umunsi uburanga bwabo buzakururirwa mu muriro (bazabwirwa bati) "Ngaho nimusogongere igihano cy’umuriro

Mu by’ukuri, buri kintu twakiremeye igeno ryacyo

Kandi itegeko ryacu ni ijambo rimwe; (ryihuta) nko guhumbya no guhumbura

Kandi rwose tworetse abantu bameze nkamwe (mu buhakanyi). Ese hari uwibuka (ngo bimugirire akamaro)

Kandi buri kintu cyose bakoze cyanditswe mu bitabo (by’ibikorwa byabo)

Na buri kintu, cyaba gito cyangwa kinini, kiranditse

Mu by’ukuri, abatinya Allah bazaba bari mu busitani n’imigezi (Ijuru)

Mu byicaro by’ukuri, hafi y’Umwami ushobora byose