Kinyarwanda - Chapter 79 - An-Naziat

Ndahiriye ku (bamalayika) bashikanuza (roho z’abahakanyi) n’ubukana buhambaye

No ku (bamalayika) bakuramo (roho z’abemeramana) bitonze

No ku (bamalayika) bogoga ikirere bihuta (batwaye izo roho)

No ku (bamalayika) bihutana (ubutumwa babuzaniye intumwa za Allah ku isi)

No ku (bamalayika) bashyira mu bikorwa ibyo bategetswe

Umunsi (impanda ya mbere izavuzwa), maze isi n’imisozi bigatigita bikabije (buri kiremwa kigapfa)

(Umutingito wa mbere) uzakurikirwa n’undi mutingito (maze buri kiremwa kizuke)

Uwo munsi imitima (ya bamwe) izaba ifite ubwoba n’agahinda

Ndetse n’indoro yabo izaba yaciye bugufi (isuzuguritse)

Bazavuga bati "Ese mu by’ukuri, tuzasubizwa mu buzima (bwacu bwo ku isi) twahozemo

Na nyuma y’uko tubaye amagufa ashangutse

Baravuga bati "Uko kugaruka kwacu (ku isi twifuza) kwaba ari igihombo

(Ubwo impanda izavuzwa bwa kabiri) bizaba ari urusaku rumwe

Icyo gihe bazisanga imusozi (bongeye kuba bazima nyuma yo gupfa)

Ese inkuru ya Musa yakugezeho

Ubwo Nyagasani we yamuhamagaraga mu kibaya gitagatifu cya Tuwa (agira ati)

Jya kwa Farawo kuko rwose yigometse

Umubwire uti "Ese ushobora kwiyeza (ukareka icyaha cy’ubuhakanyi, ukaba umwemeramana)

Nkakuyobora kwa Nyagasani wawe kugira ngo umutinye

Nuko (Musa) amwereka igitangaza gihambaye

Ariko (Farawo) yarahinyuye aranigomeka

Maze atera umugongo akataza (ashishikariza abantu be kudakurikira Musa)

Nuko akoranya (abantu be), avuga mu ijwi riranguruye

Agira ati "Ni njye nyagasani wanyu w’ikirenga

Bityo, Allah amuhanira icyaha cya nyuma (cyo kuvuga ko ari we nyagasani w’ikirenga) n’icya mbere (cyo kuba yarabwiye ibyegera bye ko atazi ko bafite indi mana itari we)

Mu by’ukuri, muri ibyo harimo isomo kuri buri wese utinya Allah

Ese (yemwe bantu) iremwa ryanyu ni ryo rikomeye, cyangwa ikirere (Allah) yubatse (ni cyo gikomeye)

Yazamuye igisenge cyacyo, maze aragitunganya

Ijoro ryacyo arigira umwijima, amanywa yacyo arayakesha

Nyuma y’ibyo arambura isi

Ayisohoramo amazi yayo n’inzuri zayo

Anashimangira imisozi

Kugira ngo bibagirire akamaro, mwe n’amatungo yanyu

Ariko igihe icyago gihambaye (umunsi w’imperuka) kizaza

Umunsi umuntu azibuka ibyo yakoze

Umuriro wa Jahanamu uzagaragarizwa (buri wese) ureba

Ubwo kuri wa wundi wigometse

Agahitamo ubuzima bwo kuri iyi si (agakurikira ibibi aterwa n’irari rye)

Mu by’ukuri, umuriro wa Jahanamu uzaba ubuturo (bwe)

Ariko wa wundi watinye kuzahagarara imbere ya Nyagasani we, akanabuza umutima we kurarikira ibibi

Mu by’ukuri, Ubusitani (Ijuru) buzaba ubuturo (bwe)

(Abahakanyi) barakubaza (yewe Muhamadi) ku bijyanye n’igihe imperuka izabera

Nta bumenyi ufite bwo kugira icyo uyivugaho

Ahubwo wowe (Muhamadi) nta kindi uri cyo uretse kuba uri umuburizi w’abatinya (umunsi w’imperuka)

Umunsi bazawubona, bazamera nk’aho babaye ku isi ikigoroba kimwe cyangwa igitondo kimwe