Kinyarwanda - Chapter 81 - At-Takwir

Igihe izuba rizazingazingwa (urumuri rwaryo rukazimira)

N’igihe imisozi izakurwa mu myanya yayo

N’igihe ingamiya z’imbyeyi zizarekwa (ntizitabweho)

N’igihe inyamaswa z’inkanzi zizakoranyirizwa hamwe

N’igihe inyanja zizaka umuriro

N’igihe roho zizasubizwa mu mibiri yazo (abeza bakajya ukwabo n’ababi bakajya ukwabo)

N’igihe umwana w’umukobwa wahambwe ari muzima azabazwa

Icyaha yakoze cyatumye yicwa

N’igihe ibitabo (bikubiyemo ibikorwa byiza n’ibibi bya buri muntu) bizaramburwa

N’igihe ikirere kizakurwaho

N’igihe umuriro wa Jahanamu uzenyegezwa

N’igihe Ijuru rizegerezwa hafi

Icyo gihe buri muntu azamenya ibyo yakoze

Bityo, ndahiriye ku nyenyeri zitagaragara ku manywa zikongera kugaragara nijoro

Zigenda zihuta kandi zikanihisha

Nanarahiriye ku ijoro igihe riguye

No ku gitondo igihe gitangaje

Mu by’ukuri, (Qur’an) ni ijambo ryazanywe n’Intumwa yubahitse [(Malayika Jibrilu), (riturutse kwa Allah)

(Iyo ntumwa) ifite imbaraga (yahawe na Allah), Nyagasani w’intebe y’icyubahiro

Yumvirwa (n’abamalayika mu birere) kandi ikaba yizewe (kwa Allah)

Kandi (yemwe bahakanyi) mugenzi wanyu (Intumwa Muhamadi ibakomokamo) si umusazi

Kandi rwose yabonye (Malayika Jibrilu) ari mu kirere gikeye

Kandi (Intumwa Muhamadi) ntigundira ibyo yahishuriwe (ngo ireke kubyigisha abantu)

Kandi (Qur’an) si ijambo rya Shitani wavumwe

Nonese muragana he

Mu by’ukuri, iyi (Qur’an) nta kindi iri cyo usibye kuba ari urwibutso ku biremwa (byose)

Kuri wawundi muri mwe ushaka gukurikira inzira igororotse

Kandi nta cyo mwashaka (ngo kibe) keretse Allah, Nyagasani w’ibiremwa (byose) aramutse agishatse