Kendayan - Chapter 52 - At-Tur

Demi gunung (sinnai)

Man demi kitab nang ditulis

Ka’ lamaratn nang tabuka

Demi bai’tul ma’mur (ka’bah)

Demi atap nang di tinggian (langit)

Demi lautan nang bagalombang

Sungguh siksa Tuhan nyu pasti tajadi

Nana’ sasuatu pun nang bisa manolaknya

Ka’ ari (katika) langit bagoncang sakaras- karasnya

Man gunung bajalatn (bapindah-pindah)

Maka calakalah ka’ ari koa bagi urakng- urakng nang buat alok

Urakng-urakng nang bamain-main dalapm kabatilatn (pabuatan dosa)

Ka’ ari (waktu) koa iaka’koa dinyorong ka’ naraka jahanam mang sakuat-kuatnya

(Di kataatn ka’ iaka’koa), “Nian lah naraka nang de’e kita’ nustaatnnya

Maka ahe ke’ nian seher? Ato’ ke’ kita’ nana’ nele’

Tama’lah ka’ dalapmnya (rasaatnlah angat apinya) mao’ kita’ basabar ato’ nana’ sama ma’an ka’ kita’. Sasungguhnya kita’ ngge’ dimare’ balasatn atas ahe nang udah kita’ karajaatn

Sasungguhnya urakng-urakng nang batakwa ada ka’ dalapm saruga man kanyamanan

Iaka’koa barepo-repo mang ahe nang dibare’atn Tuhan ka’ iaka’koa. Man Tuhan maliharanya ka’koa dari ajab naraka

(Di kutaatn ka’ iaka’koa), “Makatn man nyocoklah mang rasa nyaman sabage balasatn dari ahe nang udah kita’ karajaatn

Iaka’koa basanar ka’ atas pane-pane nang tasusun man kami bare’atn ka’ iaka’koa pasangan Bidaddari nang bamata gagas

Man urakng—urakng nang baiman, mang anak ucu’nya ka’koa nang ngikutinya dalapm kaimanan, kami patamuan iaka’koa mang anak ucu’nya (ka’ dalapm saruga), man kami nana’ ngurangi’ saebetpun pahala amal (kabajikatn)nya ka’koa, satiap urakng taikat mang ahe nang ia karajaatn

Man kami barentatn ka’ iaka’koa tambahati barupa buah-buahatn man degeng dari sagala janis nang iaka’koa mao’

(Ka’ dalapm saruga koa) iaka’koa saling nguluatn galas nang isi’nya nana (nimbulatn) ucapatn nang nana’ bapa’edah ato pun pabuatatn dosa

Man ka’ sakitar nya ka’koa ada kamuda’- kamuda’ nang bakulilikng nto’ (ngalayani) nyaka’koa, sa’akan-akan iaka’koa mutiara nang tasimpan

Man sabagiatn nya ka’koa ba adap-adapatn seko’ man nang lain salaing batagur

Iaka’koa bakata, “sasungguhnya kami de’e, waktu ada ka’ tangah –tangah kaluarga kami marasa gali’ (ka’ ajaib)”

Maka Allah marentatn ka’ kami karunia man malihara kami dari ajab naraka

Sasungguhnya kami nyambah-Nya dari de’e, ialah nang maha ngalimpahatn kabaikatn, Maha Panyayang.”

Maka paringatatnlah, karana mang nikmat Tuhannyu kao (Muhammad) buke’lah saurakng panyantet man buke’ uga’ urakng gila

Sampe iaka’koa bakata, “ia adalah saurakng panya’ir nang kami tunggu-tunggu cilaka nimpa’nya”

Kataatnlah (Muhammad), “tungguhlah! Sasungguhnya akupun tamasok urakng nang gi’ tagah nunggu barage kita’”

Ahe ke’ iaka’koa diparentah dipikiran- pikirannya nto’ ngucapatn (tuduhatn- tuduhatn) nian ato ke’ iaka’koa kaum nang ngalampoi’ batas

Ato ke’ iaka’koa bakata, “ia (Muhammad) babuat alok,” nana’! iaka’koa nang nana’ baiman

Maka cobalah iaka’koa muat nang sama nang Al-Quran kade’ iaka’koa urakng – urakng nang banar

Ato ahe ke’ iaka’koa dinyiptaatn tanpa asal- usul ato’ ke’ iaka’koa nang nyiptaatn (diri’nya babaro)

Ato ke’ iaka’koa udah nyiptaatn langit man bumi? Sabanarnya iaka’koa nana’ ngayakini’ (ahe nang iaka’koa kataatn)

Ato’ ke’ ka’ isinya ka’koa ada bendahara Tuhannyu ato ke’ iaka’koa nang bakuasa

Ato ahe ke’ iaka’koa ada tanga’ (ka’ langit) nto’ nangaratn (hal-hal nang gaib)? Maka cobalah urakng nang nangaratn ka’ antaranya ka’koa atakng ngincakng katarangan nang nyata

Ato ke’ kao (Muhammad) minta’ imbalatn ka’ iaka’koa sampe iaka’koa banitakng

Ato ke’ ka’ isinya ka’koa bapangatahuatn tantang nang gaib lalu iaka’koa nulisnya

Ato ke’ iaka’koa akan babuat tipu daya? Tapi, urakng-urakng nang kapir koa, justru nang kana tipu daya

Ato ke’ iaka’koa batuhan salian Allah? Maha suci Allah dari ahe nang iaka’koa sakutuatn

Man kade’ iaka’koa nele’ gumpalatn- gumpalatn rahu’ bajantu’atn dari langit, iaka’koa bakata, “koa ialah rahu’ nang batumpuk-tumpuk”

Maka biartnlah iaka’koa sampe iaka’koa namui’ ari (nang dijanjiatn ka’) iaka’koa, ka’ ari koa iaka’koa diminasaatn

(Iakoa) ka’ ari (waktu) tipu dayanya nana’ banguna saebetn pun nto’nya ka’koa man iaka’koa nana’ akan di bare’ patolongatn

Man sasungguhnya nto’ urakng-urakng nang jalim masih ada ajab salain koa. Tapi, kabanyakatn iaka’koa nana’ nau’an

Man basabarlah (Muhammad) nunggu katatapatn Tuhannyu, karana sasungguhnya kao ada ka’ dalapm pangawasatn kami, man batasbihlah mang muji Tuhannyu waktu kao lumpat tudur

Man ka’ sabagiatn malam batasbihlah ka’-Ia man (uga’) ka’ waktu tingalapmnya bintakng-bintakng (waktu pajar)