Kendayan - Chapter 69 - Al-Haqqah

Ari Kiamat

Ahe ke’ ari kiamat koa

Nu’an ke’ kao ahe ari kiamat koa

Kaom Samud, man ‘ad udah nustakan (madah alok) ari kiamat

Maka adapon kaum samud, ia iaka’koa udah diminasakan mang soara nang miah karas

Sadangkan kaom Ad, ia iaka’koa udah diminasakan mang angin topan nang miah dingin

Allah nimpakan angin koa ka’ ia iaka’koa salama tujuh malam lapan ari tarus manarus; maka kita’ nae’ kaom ‘Ad pada waktu koa mati bagalimpangan ampahe batakng- batakng kurma nang udah kosong (lapok)

Maka ada ke’ kita’ nele’ saurakngpun nang masih tasisa ka’ antaranya iaka’koa

Kamodiatn atakng Fir’aun man urakng- urakng sanape’nya mang (panduduk) nagari-nagari nang di nyungkir balikatn karana kasalahatn nang aya’

Maka ia iaka’koa nurhakai’ utusan Tuhannya, Allah nyiksa ia iaka’koa man siksakan nang miah karas

Sasungguhnya katika ai’ naik (sampe’ ka’ gunung), Kami (Allah) ngincakng (ne’ moyang) kita’857 ka’ dalapm kapal

Supaya Kami jadiatn (paristiwa koa) sabage paringatatn ka’ kita’ man supaya diparatiatn di tarenyekng nang mao nangar

Maka kade’ sangkakala (taromnpet) koa disiup sakali nyiup

Diangkatlah dunia mang gunung-gunung lalu dibanturatn kaduanya sakali banturatn

Maka pada ari koa tajadilah kiamat

Man tabalahlah langit, karana pada ari koa langit manjadi rapuh

Man da’ sagana Mala’ekat barada ka’ sagala panjuru langit. Pada ari koa lapan Mala’ekat nyujukng ‘Arsy (singgasana) Tuhannyu ka’ atas (kapalanya) iaka’koa

Pada ari koa kita’ di adapatn (ka’ Tuhan kita’), nana’ ada sasoatu jukutpun dari kita’ nang tasambunyi (bagi Allah)

Adaputn urakng nang kitabnya859 di bare’atn ka’ kokot kanannya, maka ia bakata, “Tataplah, bacalah kitabku (nian)”

Sasungguhnya aku yakin, bahoa’ (satu saat) aku akan narema’ paretongan taradap diri’ku babaro

Maka urakng koa barada ka’ dalapm kaidupatn nang di ridoi’ (sukai’)

Ka’ dalapm saruga nang tingi

Buah-buahnya babalah

(ka’ ia iaka’koa di katakan), “makatn man nyocoklah mang nikmat karana amal nang udah kita’ karajaatn pada ari-ari nang udah lalu de’e”

Nang adaputn urakng-urakng nang kitabnya di bare’atn ka’ kokot keba’nya, maka ia bakata, “Alangkah baiknya kade’ kitabku (nian) nana’ di bare’atn ka’ aku

Sahingga aku nana’ nau’an ampahe paretonganku

(Wahe), kiranya (kamatiatn) koalah nang nyudahi’ sagala sasuatu

Hartaku sama sakali nana’ baguna ka’ aku

Kakoasa’an ku udah ilang dariku”

(Allah bapirman), “Ta’aplah ia lalu ikatlah kokotnya ka’ tege’nya”

Lalu masokkatnlah (tama’anlah) ia ka’ dalapm api naraka nang manyala-nyala

Kamodiatn ikatlah ia mang rante nang panyakngnya tujuh puluh hasta (roas kokot)

Sasungguhnya ia-lah urakng nang nana’ baiman ka’ Allah nang Maha Aya’

Man uga’ ia nan’ ngajuratn (urakng lain) nto’ mare’ makatn urakng masikitn

Maka pada ari nian nana’ ada saurakngpun ayukng baginya

Man nana’ ada makanantn (nto’nya) kacoali dari darah man nananh

Nana’ ada nang makatn nya kacoali urakng- urakng nang badosa

Maka Aku (Allah) basumpah demi ahepun nang kita’ tele’

Man demi ahepun nang nana’ kita’ tele’

Sasungguhnya ia (Al-Quran koa) banar- banar wahyu (nang di turubkatn ka’) Rasul nang mulia

Man ia (Al-Quran) buke’ pakatakan saurakng panya’ir saebet sakali kita’ baiman ka’ ia

Ia (Al-Quran) koa ialah wahyu nang dituruntatn dari Tuhan saluruh alam

Kade’ sakiranya ia (Muhammad) nang ngada-ngadakan sabagiatn pakatakan atas (dama) Kami

Pasti Kami singi’i’ ia ka’ kokot kanannya

Kamudiatn Kami (Allah) potong pambuluh jantung nya

Maka nana’ saurakng pun dari kita nang bisa ngalangi’ (Kami nto ngukumnya)

Sungguh, Al-Quran koa palajaratn bagi urakng-urakng nang batakwa

Man sungguh, Kami (Allah) nau’an bahoa’ ka’ antara kita’ ada urakng nang madah alok

Man sungguh, Al-Quran koa akan nimbulatn panyasalatn bagi urakng-urakng kapir (ka’ naherat nae)

Man sungguh, Al-Quran koa kabanaratn nang mayakinkatn

Maka batasbihlah man (nyabut) dama Tuhannyu nang Maha Agung. a (Baraka tnyabut) dama Allah nang Maha Pangasih, Maha Panyayang