Luyia - Chapter 27 - An-Naml

Twa Syn, Tsino ni tsinyaali tsieyi Ikurani, nende eshibatu eshinoosi

Obulunjifu nende amakhuwa amalayi khubasuubili

Balia balumiililanga okhulaama (salah) nende okhurusia ishihanwa (izaaka) ,nabo bali nobusuubili muno bwo mwikulu

Toto balia balasuubilanga mwikulu tawe, khwabaronela ebikhole biabu, manabo bawofulilamwo

Abo nibo baliba nende eshinyasio eshibii, nabo mwikulu nibo balinyoola okhusikha muno

Ne toto ewe wechesibungwa Ikurani okhurula khuwamachesi, Omumanyi muno

(Itsulila) olwa Musa yaboolela Abandu beyinzu yiyie mbu; “Toto esie endutsi omulilo, bulano buri nditsa okhubarerera amacheni kali khumulilo oko, nohomba ndista okhubarerera eshichenga shiakhanga mwakhaba murio mwanyoola okhwora (omulilo)

Kho olwa yakulakhwo, yawulila omulango mbu; “Alinetsikhabi owuli mumulilo kuno nende ulia uli mundulo mwakwo, ne Nyasaye niwoluyali, Omulesi webiloonje bioosi.”

Ewe Musa- Toto esie nesie Nyasaye owa Amaani Owamachesi muno

“Ne sukuna indabushi yiyio” olwayayilola nimoolanga shinga inzokha, yakalukhana inyuma niyelukha, neshiyalinda tawe. Nyasaye namuboolela,“Ewe Musa olaria tawe, toto esie, Abarumwa shibabetsanga noburi imbeli wanje tawe.”

“Halali ulia wakhola obubii, mana nakalukhania obulayi habundu wobubii, Toto esie endi Omunji wobulesheli Omunji wetsimbabaasi

Ne Injisia omukhono mumufuko kukwo, kulakalukhana okhuba omulafu tswe bulali bwobubii tawe. Ni ndala khubimanyisio tisa bia Firauni nende Abandu bebe, toto abo bali Abandu abarula khunjila yanje

Mana olwa ebimanyisio biefu bilolekha biaboolela baboola mbu; “Buno ni obulosi obwahabulafu”

Mana nibabiyingasia khububii nende khubufuru ne emioyo chiabu nichimanyile muno mbu nitoto, kho henga indukho yabandu bakholanga obubii shinga yali

Netoto khwahelesia Daudi nende Suleiman obumanyi, Nibaboola mbu; “Oluyali nilwa Nyasaye owakhukholela efwe obulayi muno okhushila abanji mubasumba bebe abasuubili.”

Ne Suleiman nabukula habundu wa Dawud, ne naboola mbu; “enywe Abandu, khwechesibwa okhuboola khwa mayoni, ne khwahelesibwa buli eshindu, toto buno ni obulayi buli habulafu.”

Ne Suleiman nakhung’asilibwa omukanda kukwe kwabalwani okhurula mumajini, nende Abandu nende amayoni, nakwo nikureebwa mumikanda emikanda

Okhula shingala boola mwitwoma lietsindukusi, indukusi yaboola(okhuboolela atsiashie) mbu; “Enywe tsindukusi injile mutsinzu tsienyu, Suleiman nende omukanda kukwe kwe liyie baletsa babasena tawe, nabo nibakorerwe.”

Mana namwenya natsekha okhurulana nende likhuwa elo naboola mbu; “Ewe Nyasaye wanje mbelesie amaani ekhupe orio khutsimbabaasi tsiawambelesia, esie nende abebusi banje, ne enyoole okhukhola ebikhole ebilayi ebiawachama, ne unyinjisie khutsimbabaasi tsistio, mubasumba bobo abalayi.”

Mana nachenda nahenga amayoni, naboola mbu; kabelekarie endalalolanga Hud hud? Nohomba shililiho tawe

Toto nditsa okhuliwa eshinyasio eshilulu, nohomba nditsa okhulisinza nohomba limbelesie eshifune shilolekha

Shiyashinda muno tawe(Hud Hud niliula) niliboola mbu; “Enyoolele kamulamanyile tawe, ne ikhwitsile endi okhurula sabaa nende amakhuwa katoto.”

“Toto esie enyoolele Omukhasi niyabaruka naye yahelesibwa buli eshindu, ne ali nende eshisaala eshikhongo (shobwami).”

“Emunyoolele nende Abandu bebe nibeenamilanga eliuba mushilenje shia Nyasaye, ne Shetani yabaronela ebikhole biabu mana nabeekalila injila(ya abweene) khomana shibalunjikhanga tawe.”

Mbu khobaleshe okhwinamila Nyasaye owurusinjia akefisile mwikulu nende mushialo ne yamanya akamufisanga nende akamuretsanga habulafu

Nyasaye, abulaho ulaamungwa khubwatoto ulali ye tawe Nyasaye we shisaala shiobwami eshikhongo

(Suleiman) naboola mbu; “khulahenga khulole mbu nobwatoto nohomba oli mubabeeyanga.”

Tsia nende Ibarua yanje ino, mana obahelesie, mana awuleele, mana olole shabalakhukalusia

Naboola mbu; “Enywe abakhongo toto endererwe ibarua yoluyali.”

Irula khu Suleiman, nayo ni; “Mulira lia Nyasaye Owetsimbabaasi Owobukoosia.”

Mulaakholela obufuru tawe, ne muule ewanje mweesi nimumalile okhuba abaisilamu

Naboola mbu; “Enywe abakhongo, munjelele khwikhuwa lino, shindakhakhalaka liosi liosi tawe okhuula mumboolele.”

Nibaboola mbu; “efwe khuli abaamani, nende abobulwani abakhongo, ne okhubusia khuli khwiwe kholola liokhalaka.”

(Malkia) Naboola mbu; “Toto Abaami nibenjila mwitokho balinyasinjia, ne bakholanga Abandu boluyali mwo okhuba hasi, ne endio nilwabakholanga.”

“Ne toto esie nditsa okhubayilila eshisangasia mana eninde shiabarumwa baletsa ninasho.”

Kho olwa Omurumwa wuwe yoola khu Suleiman, Suleiman naboola mbu; “koo enywe mwenya okhukhonya nende omwandu? Ne kwayambelesia Nyasaye ni omulayi po okhushila okwayahelesia enywe. Halali enywe musangalilanga ebisangasia biabu.”

“Kalukhayo nende ishisangasia esho khubo, toto efwe khwitsa okhubatsiila nende omukanda kwabalwani okwabalanya okhwema nakwo tawe, netoto khulabarusiamwo, nibatonyele abateshele nibatutuye .”

(Suleiman) Naboola; “Enywe abakhongo ni wina witsa okhunderera eshisala shishie shioluyali nabashili okhunzitsila nibasilime.”

Ifrit okhurula Mumajini naboola mbu; “Esie nditsa okhurera noshili okhubukha oli hoa , esie toto endi nende amani kokhukhola endio ne endi omwisikwa.”

Ulia uli nende obumanyi bweshitabu naboola mbu; “Esie nditsa okhukhurerera noshili okhumetiametia (Okhutimba) tsimoni tsitsio, “kho olwa yalola nishirererwe imbeli wuwe naboola mbu; “kano nikhutsimbabaasi tsia Nyasaye wanje khoyandeme mbu ekhupa orio nohomba ekhaya, ne ulia okhupa orio toto ye akhupa khululwe omwene, ne ulia ukhaya toto Nyasaye wanje ni Omuyinda Omuhani muno

(Suleiman) Naboola mbu; “Mumukalukhasilie eshisala shishie shobwami shino khulolekhwo mbu alashimanya nohomba yetsa okhuba mubalia abalakhashimanya tawe

Kho olwayoola naboolelwa mbu; “koo eshisaala shiobwami shino shili shinga eshishio? Naboola mbu shili ngashio butswa, nafu khwechesibwa obumanyi nikhushili okhulola kano, na khumalile okhuba abasalamu”

Ne (Suleiman) namukania kalia akayalaamanga akalali ka- Nyasaye tawe, toto ye yali mubandu Abakhayi

Naboolelwa mbu; “injila munzu, olwayalola amunjila yapara mbu amatsi kaliwo, mana naninia ingubo yiyie nafimbula tsindenywe tsitsie, (Suleiman) naboola mbu; “Toto obo ni obwelu 27. bwakasibwa nende biwo”(Bilqis) naboola mbu: “ Nyasaye wanje esie ekholeele obubii omwoyo kwanje, ne esilimile halala nende Suleiman khu Nyasaye Omulesi webilonje bioosi.”

Ne toto khwayilila babu Thamudi owashiabwe Swalih, nababoolela mbu: “Mulaame Nyasaye” mana nibakalukhana emikanda chibili chisolananga

Naboola mbu: “ enywe Abandu banje shichila shina nimuyuyushilanga obubii inyuma wamalayi? Shichila shina nimulasaba eshileshelo Nyasaye mwakhaba murio mwanyoola okhubeelwa tsimbabaasi?”

Nibaboola mbu: “khunyoolele lisubilo shichila ewe nende balia bali halala ninawe.” Naboola mbu “ (ikhabi imbii yenyu) lisubilo lienyu lili khu Nyasaye , halali enywe muli Abandu bateemungwa.”

Ne bali mwitokho Abandu tisa abakholanga amahaka muno khushialo, neshibakasinjia liosi liosi tawe

Nibaboola mbu “ mwitsubanile khu Nyasaye mbu khwitsa okhumutsunushila eshilo khumusere ye nende Abandu baye, ne toto khwitsa okhuboolela Omundu waye (omuchelami wuwe) mbu: “shikhulutsikhwo okhusikha khwabandu baye tawe, ne toto efwe khuboolanga habwene.”

Mana nibakasia ebifwanga biabu nafu nikhukasia amakhuwa kefu, nabo nibalamanyile tawe

Kho henga shingala indukho yebifwanga biabu yali, toto efwe khwabasishia nende Abandu babu boosi

Kho etso nitso tsinzu tsiabu tsiatong’a tsikhaya shichila obubii bwabu, toto mukano khulimwo nende ameeko khubandu bamanya

Mana nikhuhabina balia basuubila nende balia bamuritsanga

Ne Lut olwayaboolela Abandu bebe mbu: “ mukholanga eshifwolo nimulola?”

Toto enywe mwinjililanga Abasatsa mubwikombi balali abakhasi tawe, toto enywe muli Abandu bakholanga obusilu.”

Ne likalusio lia Abandu bebe shiliali halali okhuboola mbu: “tafie abaloondi ba Luti mulitokho lienyu, abo ni Abandu betswenulanga.”

Mana nikhumuhabina nende Abandu bebe, halali omukhasi wuwe, nikhumuhandichila khubalia abatong’a inyuma

Mana nikhubakwisilia ifula, ne yali ifula ifwana irie ino ya Abandu bekanyilisibwa

Boola: “oluyali nilwa Nyasaye ne omulembe kube khubasumba bebe abayalobola. Kho Koo Nyasaye niye Omulayi nohomba balia abamumusanjinjia ninaye?”

Nohomba ulia waloonga likulu nende eshialo mana nabeshilia amatsi okhurula mwikulu, ne khu ako nikhumesilia emikunda chilolekha obulayi, enywe mubula obunyali bwokhumesia emisala chakwo. Nyasaye wundi halala nende Nyasaye? Halali abo ni Abandu bokhutsia bushiama

Nohomba ulia wabakholela liloba okhuba habundu weshimenyo , mana naramwo emialo nende tsingulu ne naraho eshikalilo hakari wetsinyanza tsibili. Koo aliho Nyasaye wundi halala nende Nyasaye? Halali abanji mubo shibamanyile tawe

Nohomba ulia uwulilanga amalilo ka ulia ukhayilwe, olwa amusabanga, mana namurusiliakhwo obutinyu obo, ne nabakhola okhuba abalindi beshialo, Nyasaye wundi halala nende Nyasaye? Okhwitsulila khwenyu ni okhutiti

Nohomba ulia ubarunjisinjia khushilima shokhushialo nende shiomunyanza, ne ulia uyilanga omuyeka okhurera amakhuwa amalayi tsimbabaasi tsitsie nitsishili okhuula (ifula), koo Nyasaye wundi halala nende Nyasaye ? Nyasaye ali hekulu muno nende kabamutsokasinjia ninako

Nohomba ulia wachachia ebiloonje , mana alibikalusia, nende ulia ubakabilanga okhurula mwikulu nende khushialo.. koo Nyasaye wundi halala nende Nyasaye? Boola mbu : “rere ebifune bienyu nikali mbu toto muboolanga obulaamba.”

Boola mbu: “abulaho uli mwikulu nende khushialo umanyile akefisile halali Nyasaye, nabo shibamanyile mbu ni liina wabakhalamusibwe tawe

Bubetsele burie obumanyi (bwokhumanya) komwikulu? halali bo bali mubukanakani bwabu, halali bo ni abawofu khubwo

Ne balia bakhaya nibaboola mbu: “olwakhuliba liloba nende bapapa befu mbu khulilamusibwa?”

Toto khwalakwa kano efwe nende bapapa befu bakhale. Kano shinishiosi shiosi tawe halali tsingano tsiakhale

Boola mbu: “ chende khushialo mana mulole shinga indukho yabandu ababii yali.”

Ne olabeelela tawe ne olabamubutinyu tawe khulwa ebifwanga biabu biabakholanga

Ne baboolanga mbu; “ ne indache ino iliula liina? Toto nimuli mbu muboolanga obulaamba.”

Boola mbu: “ nikaboolele ahambi hano ebuleka khumakhuwa kamuyungubalilanga.”

Netoto Nyasaye wuwo amanyile muno akebilifu biabu bifisanga nende akabaretsanga habulafu

Ne libulaho liefisa mwikulu nende khushialo halali lili mushitabu eshiokhwinoosia

Toto Ikurani ino ikananga khu baana ba Isarail amanji kalia akabawukhanangamwo

Ne toto Ikurani ino ni obulunjifu nende tsimbabaasi khubalia abasuubila

Toto Nyasaye alibusia hakari wabu khukhubusia khukhwe, naye niye Owamani Omumanyi muno

Kho wisiche Nyasaye toto ewe oli khubwatoto bulolekha

Toto ewe shonyala okhukhola abafu bawulile omulango tawe nohomba okhole abekala amarwi bawulila tawe olwabakalukhanaga nibabwao

Nohomba shonyala okhulunjisia abawofu mubukori bwabu, ne shiwakhakhola bawulila halali balia abasuubila tsinyaali tsiefu, nabo nibo abawulili

Ne olwelikhuwa lilibarulila, khulibarusilia isolo okhurula mwiloba, ibalomalomie, toto Abandu bakhaya okhusuubila tsinyaali tsiefu

Ne inyanga yakhulikhung’asia buli Abandu emikanda chiabalia abayingasinjia ebimanyisio biefu, ne baliemibwa ebituche ebituche

Okhula shingala baliula mana (Nyasaye) aboole mbu: “koo enywe mwayingana ebimanyisio bianje nimulabimanyile obulayi tawe, nohomba nishina shiamwakholanga?.”

Mana likhuwa nilibakwila khumabii kabakhola, ne baliwulela tsi

Koo, shibalolangakhwo mbu efwe khwakhola eshilo okhuba shiokhwihotselesiamwo, nende eshitere okhubakhonya okhulola. Toto mu ako khulimwo nende ameeko khubandu basuubilanga

Ne inyanga yolwika lulikhupwa, mana bibeyebeye bioosi ebili mwikulu nende khushialo halali ulia wa Nyasaye alichama, ne boosi bakhamwitsile nibali abateshele

Ne olilola tsingulu nopara mbu tsiemele natsio tsichendanga shinga amaleesi. Nibo obwiranyi bwa Nyasaye, obwayakasilia obulayi buli eshindu, toto ye amanyile muno akamukholanga

Abaliitsa namalayi balinyoola amalayi muno okhushilakhwo ako, nabo khushibeyibeyi shieyinyanga eyo baliba nomulembe

Ne abalitsa nende amabii, obweni bwabu bulisindikhwa mumulilo (mana boboolelwe mbu) “shimurungungwa tawe halali kalia akamwakholanga.”

Toto elomesibwe okhulaama Nyasaye omulesi welitokho lino eliahebwa oluyali, ne buli eshindu ni eshishie ne elomesibwe okhuba mubasalamu

Ne osoome Ikurani , kho ulia ulunjikha alunjikhanga khulwa ye omwene, ne ulia ukora boola mbu: “ toto esie endisa mubekanyilisi.”

Ne boola Mbu: “oluyali lwosi ni lwa Nyasaye yetsa okhubechesia ebimanyisio bibie mwitsa okhubimanya, ne Nyasaye shang’ang’alinga kamukholanga tawe.”