Luyia - Chapter 28 - Al-Qasas

Taa sin Mym

Etso ni tsinyaali tsieshitabu shinoosinjia

Khukhusomelanga amakhuwa ka Musa nende Firauni khubwatoto khubandu basuubilanga

Toto Firauni yelola khushialo nokhola Abandu bokhushialo emikanda emikanda. Niyelesia obuteshele omukanda mulala mwicho, yasinzanga Abana babu abasiani ne nalekha abeshikhasi, toto ye yali muboononi

Ne khwenya okhukholela amalayi balia bakholelwa obubii khushialo, ne khubakhole okhuba abemilisi, ne khubakhole babe nibo abeeneshio

Ne khulabahelesia amaani khushialo kho khwechesie Firauni nende Hamana nende omukanda kwabu kweliyie kalia akabaritsanga

Ne khwafimbulila Nyinamwana Musa mbu “ munuunie ne noba nomuririra omusukune mumwalo, ne olaria tawe nohomba alabeelela tawe, toto efwe khwitsa okhumukalusia khwiwe, ne khwitsa okhumukhola okhuba mubarumwa.’’

Mana Abandu ba Firaun nibamutoola, kho abe omusuku khubo nende eshibeela, toto Firauni nende Hamana nende omukanda kukwe kwa balwaani bali abetsimbii

Ne omukhasi wa Firaun naboola mbu: “ eshisangasia tsimoni tsianje nende etsitsio, olamwiira tawe, anyala okhuba wobukhoonyi khwifwe nohomba khwamukhola okhuba omwana wefu nabo nibakorerwe.”

Ne omwayo kwa Nyina Musa nikuba omukhaya, yali ahambi okhura amakhuwa habulafu, khukhayanga okhura mumwoyo kukwe amaani, kho anyoole okhuba mubalia basuubilanga

Ne naboolela omukhana wabu (Musa) mbu : “muloondelele” mana nahenga mubwifisi abalamulola tawe

Mana nikhumwikalila abanunia okhurula mukhuchaka, ne (omukhana wabu) naboola mbu: “abechesiekhwo Abandu beyinzu abanyala okhumulela, ne betsa okhuba abalayi khuye

Mana nikhumukalusia khunyinamwana khotsimoni tsitsie tsinyoole okhusangala ne akhaye okhubeelela, ne amanye mbu indache ya Nyasaye niyatoto halali Abandu abaanji shibamanyile tawe

Ne olwa yakubuya mana naba omukhongo, khwamuhelesia amachesi nende obumanyi, ne endio nilwakhurunganga abakholi abamalayi

Niyenjila mwitokho olwa abeenelio nibali mukhung’ang’aala, nanyoolamwo Abandu babili nibakhupananga, mulala okhurula mubandu bebe ne owundi okhurula mubasuku bebe. Kho ulia okhurula mubandu bebe namusaba mbu amukhonye khumusuku wuwe ulia. Musa namukhupa eshifusi shiokhushilifu mana namumala. Naboola mbu: “ chino ni milala khumilimo chia shetani, toto ye ni omusuku ukosinjia owahabulafu.”

Naboola mbu: “ Nyasaye wanje , toto esie ekholeele obubii omwoyo kwanje, kho undeshele” mana nikhumuleshela , toto ye niye Omulesheli muno Owetsimbabaasi muno

Naboola mbu:“Nyasaye wanje shingala umbeelele tsimbabaasi shinditsa okhukhoonya Abandu ababii tawe

Nibumushiela mwitokho naye nali nende oburi, nalindanga. Mana khandi Omundu wamwenyelekhwo obukhoonyi mungolobe amulanganga. Musa namuboolela mbu: “ toto ewe oli omushiamu owahabulafu.”

Kho olwa yenya okhura mumukhono ulia uli omusuku wabu, ulia naboola mbu: “ ewe Musa wenya okhunzira shingala werere Omundu mungolobe? Ewe shiwenya halali okhuba omufuru khushialo ne shiwenya okhuba mubandu abalayi tawe?’’

Mana Omundu niyetsa okhurula mumbeka etsia ehale welitookho nasesemanga, naboola mbu : “ ewe Musa! Toto abakhongo basanjilananga okhwira, kho rula, esie endi mubakhwenyelanga amalayi.”

Mana narula naririre, nahengahenga naboola mbu: “ Nyasaye wanje habine okhurulana nende Abandu ababii.”

Ne olwa yatsiila ebuleka wa Madyana naboola mbu: “ Nyasaye wanje yetsa okhununjisia injila ya habwene.”

Ne olwayoola khumaatsi ka Madyana, yanyoola omukanda kwa Abandu nikunywesinjia, na nanyoola mumbeka wabu abakhasi babili bekalilanga (emiruko chiabu okhunywa) Musa naboola mbu: “mukhabeele murie?” boosi babili nibaboola mbu: “shikhwakhanywesia tawe okhula shingala abandi abo banywesia, mana bakalusieyo emiruko chiabu ne papa wefu ni omukofu muno.”

Mana (Musa) nabanywesila, nenakalukha okhwikhala mushinikha, naboola mbu: “Nyasaye wanje esie toto endi omutakha muno wobulayi bwawitsa okhunzishilia.”

Mulala khubeshikhana babili balia namwitsila nachenda nalola tsisoni, naboola mbu; “ papa akhulanganga mbu akhurunge omurungo kwokhunywesiliye.” Mana shingala 28. yamuulila mana namukanila omakhuwa kaye, yaboola mbu: “olaria tawe omalile okhuhonokokha okhurulana nende Abandu ababii.”

Mulala khubakhaana babili balia naboola mbu; “ ewe papa wanje muhandiche emilimo, toto omulayi wokhoyeshele okhuhandika ni ulia Owaamaani Omwisikwa.”

Naboola mbu: “esie ndenya ekhubashile mulala khubakhana banje babili bano, khulwa okhukholela emilimo emika munane, ne niwusia ekhumi ni okhwenya khukhwo, ne esie shindenya okhunichilisia tawe, witsa okhunyoola nendi omundu omulayi.”

Naboola mbu: “ kano kali hakari wanje ninawe, ebise biosi biosi biemala ndalakholelwa obubii tawe, ne Nyasaye nomuliindi wakakhuboolanga kano.’’

Olwa Musa yamala ebise ebo, yarula nende Abandu bebe yalola omulilo elubeka wetsingulu naboolela Abandu bebe mbu: ‘‘muninde hano toto esie endutsi omulilo, awundi ndalabarerera amacheni kakwo nohomba eshichenga munyoole okhwoora.”

Olwa yakuulakhwo nalaangwa ebuleka womukhono musatsa mushikuri shietsimbabaasi okhurula khumusaala “ ewe Musa ! toto esie nesie Nyasaye webiloonje bioosi.”

“Ne sukuna indabushi yiyio,” mana shingala yayilola niyikotiombola shinga inzokha yakalukhana niyelukha ne shiyahenga inyuma tawe. Nikhumuboolela mbu: “ ewe Musa! Sita imbeli ne olaria tawe, toto ewe oli mubalia bahonokoshe.”

Injisia omukhono kukwo mushifuko, kwitsa okhurula nikuli omulafu tswe kulali khububii tawe, ne wifumbarire omukhono kukwo nowulila oburi. Kho bino bitsa okhuba ebimanyisio bibili birula khu Nyasaye wuwo khulwa Firauni nende abakhongo bebe, toto bo ni Abandu ababii

Musa naboola mbu: “ Nyasaye wanje , toto esie ndera mubo omundu, kho eritsanga mbu betsa okhunzira.”

Ne Omusiani wefu Haruni ni Omulomalomi omulayi muno okhushila esie, kho murume halala ninasi abe omukhonyelesi wanje, toto esie eritsanga mbu betsa okhuyingasia.”

(Nyasaye) naboola mbu: “khwitsa okhura amaani mumukhono kukwo okhuburira khumusiani wenyu, ne khwitsa okhubahelesia obushili neshibalanyala okhuboolakhwo tawe, khulwe ebimanyisio biefu nende abaloondi benyu nenywe mulishila

Kho olwa Musa yabeetsela nende ebimanyisio bibie ebili habulafu baboola mbu: “ kano shinishiosi shiosi tawe halali obulosi obuchikhwa, shikhwawulilakhwo kano khubapapa befu bakhale tawe.”

Ne Musa naboola mbu: “Nyasaye wanje amanyile muno ulia witsa nende obulunjifu okhurula khuye, nende ulia uliba nende akhumalilikha okhulayi khweshimenyo, toto abamabii shibalibura tawe

Firauni naboola mbu: “enywe abakhongo! shebamanyilekhwo Nyasaye wundi owulali esie tawe. Kho ewe Hamana nzashilie omulilo khwiloba unyumbashile munara enyoole okhulenjelela Nyasaye wa Musa, ne esie embara mbu aboolanga obubeyi butswa.’’

Mana niyelola ye nende omukanda kukwe kwabalwani khushialo khunjila ilali yatoto tawe, ne nibapara mbu toto shibalikalusibwa khwifwe tawe

Mana nikhumutila halala nende omukanda kukwe kwokhulwana nikhubasukuna munyanza, kho henga shingala indukho yababii yalii

Nikhubakhola abemilisi balanganga mumulilo, ne inyanga yeyindukho shibali honokokha tawe

Ne nikhubaloondiakhwo eshilaamo khushialo khuno, ne inyanga yeyindukho bo balikhupa khushibii

Ne toto khwahelesia Musa eshitabu nikhumalile okhusishia emikanda chiaranjilila , mbu shibe eshilafusia tsimoni tsiabu, neshibe obulunjifu nende tsimbabaasi kho banyoole okhwitsulila

Ne ewe shiwali ebuleka wemumbo olwa khwayilila Musa amalomesio ne shiwali mubalia baliho tawe

Halali efwe khwaloonga emikanda eminji ne emika nichibabeela eminji, ne shiwali omumenyanwa nende Abandu ba Madyana tawe, osomanga khubo tsinyaali tsiefu halali nefwe khwatsishinjia

Nohomba ewe shiwali ebuleka we shikulu owakhwamulanjila tawe, halali nitsimbabaasi tsia Nyasaye wuwo kho wikanyilisilie abandu bashili okhulilwa nende Omwikanyilisi, ewe noshili okhwitsa, bakhaba bario betsulila

Ne kaletsa okhubanyoola amasila khukalia kemikhono chiabu chiaranjilisia, mana baboole mbu: “ Nyasaye wefu! Shichila shina nalakhurumila efwe omurumwa khwaloonda tsinyaali tsitsio mana khwaba mubalia basuubila.?”

Halali olwa obwatoto bwabetsela okhurula khwifwe, baboola mbu: “shichila shina nalahebwa shingala kalia aka Musa yahebwa?” koo shibakakhaya tawe kalia aka Musa yahebwa khale, mana nibaboola mbu:” abalosi babili baloleshe,” ne nibaboola mbu: “toto efwe mukabu koosi khubakhayile.”

Boola mbu: “ mana nekhamurere eshitabo okhurula khu Nyasaye eshili nende obulunjifu obulayi muno okhushila bibili bino eshiloonde, toto nimuli ababoolanga obwatoto.”

Ne nibalakhukalusia tawe , kho manya mbu bo baloondanga butswa obwikombi bwe emioyo chiabu. Ne niwina wakora muno okhushila ulia uloondanga obwikombi bwomwoyo kukwe, obubula obulunjifu oburulanga khu Nyasaye. Toto Nyasaye shalunjisinjia Abandu ababii tawe

Ne toto khwabalondokhanilia amakhuwa , kho banyoole okhwitsulila

Balia bakhweshila eshitabu imbeli washio bo bashisuubilanga mwo

Ne nibasoomelwa baboolanga mbu : “khushisuubile toto sho ni obwatoto okhurula khu Nyasaye wefu, toto khwali nikhumalile okhusilima embeli wakano

Abo balihebwa omurungo kwabu okhuula khabili khulwa okhwifwila khwabu ne barusinjia obubii khubulayi, ne barusinjia (eshihanwa) khubiakhubakabiile

Ne nibawulila amakhuwa kabulamwo oluchendo beretsanga ehale ninako nebaboola mbu: “ khuli nende ebikhole biefu nanyu muli nende ebienyu, omulembe kube ninanyu shikhwenyanga okhuyingana nabasilu tawe.”

Ewe shiwakhalunjisia owawachama tawe halali Nyasaye nulunjisinjia owayenya , naye niye umanyile muno abalunjikhanga

Ne abakhayi nibaboola mbu: “nikhuloonda obulunjifu halala ninawe khwitsa okhukamulwa okhurula hasi wefu” koo shikhwabekhasia habundu woluyali nende omulembe, abiamanga ebiamo bietsimbia tsiosi, okhuba omukabo okhurula khwifwe, halali abaanji mubo shibamanyile tawe

Ne tsingongo tsinga tsiakhwasishia etsielolanga khubulamu bwatsio. Ne kalia niko amatala kabu akalekhalwamwo tawe bo nibakharula halali hatiti, nafu nefwe abakabukula

Ne Nyasaye shiyali usishia tsingongo tawe okhula arume Omurumwa mwitokho liatsio likhongo, abasoomele tsinyaali tsiefu, ne shikhwali abasishia tsingongo tawe halali Abandu batsio nibali ababii

Ne shiosi shiosi eshiamwahelesibwa nishiobwikhoonyi bwobulamu bwokhushialo, nende oburone bwashio. Ne eshili ewa Nyasaye nishio eshilayi muno nenishio shilitong’a, shibaparangakhwo tawe

Koo ulia wakhulaka indache indayi eyalinyoola, alishinga ulia wakhwahelesia obwokholo bwomushialo, mana inyanga yeyindukho aliba mubalia abalirebwa mumulilo

Ne inyanga yalibalanga mana abareebe mbu : ‘bali hena abamwanzokasinjia ninabo abamwaboolanga?”

Belikhuwa liakwila baliboola mbu: “Nyasaye wefu , bano nibo bakhukosia, khwabakosia shingala khwakora, khubeekana imbeli wuwo, shibalaamanga efwe tawe.”

Ne liliboolwa mbu: “ mulaanje Abanyasaye benyu abo abamwanzokasinjia” mana balibalanga ne shibalifuchilila tawe, ne balilola eshinyasio. Abayie babetsanga balunjikha

Ne Inyanga yalibalanga mana abarebe mbu: “ni shina shamwakalusia Abarumwa?”

Amakhuwa kalibakora inyanga eyo koosi. Nabo shibalirebana tawe

Ne ulia wasaba eshileshelo mana nasuubila nenakhola amalayi, oyo aliba mubalia babura

Ne Nyasaye wuwo omulesi oloonganga shia yenya ne alobolanga, ebilonje bibula okhwiyawulila, oluyali ni lwa Nyasaye owehekulu muno khukabamutsokasinjia ninako

Ne Nyasaye wuwo omulesi amanyile kebilifu biabu bifisanga nende akabaretsanga habulafu

Naye niye Nyasaye, abulaho Nyasaye wundu owulali ye tawe, ali nende oluyali mukhuchaka nende mukhumalilikha, ne okhubusia khwoosi ni okhukhwe,ne ni ewuwe niyo amulikalusibwa

Boola mulolala murie Nyasaye nabakholela eshilo okhutsililila ukhula inyanga yeyindukho, kho ni Nyasaye shina owulali ye ulabarerera obulafu, koo shimuwulilanga tawe

Ne okhurulana nende tsimbabaasi tsitsie yabakasilia eshilo neshitere, mwihotselesiemwo nemukhabemwo emikabo chichie, ne muba murio khomwanyoola okhumupila orio

Ne inyanga yalibalaanga mana abareebe mbu: “bali hena abamwanzokasinjia ninabo abamwaboolanga?”

Ne khulirusia buli mumukanda omuloli ne khuliboola mbu: “rere eshifune shienyu “ Ne balimanya mbu abwatoto ni bwa Nyasaye ne kalibakora koosi pe akabachikhanga

Toto Karuni yali mulala khubandu ba Musa, mana nabakholela amabii, ne khwamuhelesia amabishilo ketsifunguo tsiako tsisitoyela Abandu ba amaani. Olwa Abandu bebe bamuboolela mbu : “olelola tawe toto Nyasaye shiyachama abelolanga tawe.”

“Ne okoonye khu kalia aka Nyasaye yakhuhelesia eshimenyo shiomwikulu, ne olebilila omukabo kukwo kwokhushialo tawe, ne khola amalayi shinga Nyasaye yakhukholela amalayi, ne olakhaaba okhukhola obwonooni khushialo tawe, toto Nyasaye shiyachama aboononi tawe.”

Yaboola mbu:“esie kano ndahebwa okhurulana nende obumanyi bwanje’’ shamanyilekhwo mbu toto Nyasaye yamala okhusishia imbeli wuwe emikanda eminji balia abali nende omwandu omunji okhumushila. Ne aboononi shibalirebwa tsimbi tsiabu tawe

Mana niyetsela Abandu bebe nafwalile obulayi. Balia abachama obulamu bwokhushialo nibaboola mbu: ‘‘abayie khubakho mbu nefwe abahelesibwa omwandu shingala kwa Karuni yahelesibwa, toto bwene ye niweyikhabi ikhongo,”

Ne abahelesibwa obumanyi nibaboola mbu: “abaane enywe, omurungo kwa Nyasaye 28. ni omulayi muno khu ulia wasuubila mana nakhola amalayi , ne shibanyoola ako tawe halali ebesumulisi

Mana nikhumukhola ye namilwa neliloba halala nende inzu yiyie, mana nalabakhwo nende omukanda kumuhabina khu Nyasaye tawe, ne shiyali mubahabinwa tawe

Mana balia abekoombanga okhuba shinga ye olwabeele nibachaaka okhuwuka mbu: “eeh koo khane Nyasaye ametanga omukabo ulia owayenya mubasumba bebe, ne atutuyilinjia owayenya, Nyasaye akhayanga okhukholela amalayi liloba liakhakhumilile ninaye, oh toto khane Nyasaye shabusinjia Abakhayi tawe

Esho nisho eshimenyo shomwikulu, khwakholela balia abalenyanga obukhongo khushialo khuno nohomba obwoononi, ne indukho indayi niyabalia abaria Nyasaye

Ulia ulakhola amalayi alinyoola omurungo omulayi okhushila amalayi ako akayakhola, ne ulia ukhola amabii shibalirungwa balia bakholanga amabii halali kalia akabakholanga

Toto ulia wakhulomesia okhuloonda Ikurani alikhukalusia habundu wokhukalukha. Boola mbu: “Nyasaye wanje omulesi amanyile muno ulia witsa khubulunjifu nende ulia uli mubukori bulolekha.”

Ne ewe shiwali niwamanya mbu olirererwa eshitabu tawe halali nitsimbabaasi tsia Nyasaye wuwo Omulesi, kho olaba omukhonyi khubakhayi tawe

Ne balakhwikalila okhuloonda tsinyaali tsia Nyasaye nomalile okhufimbulilwa, ne olanje khunjila ya Nyasaye wuwo, ne olabakhwo mubatsokaasi tawe

Ne olalaama halala nende Nyasaye nyasaye wundi tawe. Abulaho Nyasaye wundi owulali Ye. Buli eshindu shilisikha halali ye. Okhubusia khwosi khuli khuye, ne ewuwe namulikalusibwa