Luyia - Chapter 31 - Luqman

Alif Lam Mim

Tsino nitsinyaali tsieshitabu eshiakasibwa obulayi

Balia balumililanga okhulaama nende bahininjia eshihanwa (zakaa), abali nende obusuubili khuyinyanga yeyindukho

Abo nibo bali khubulunjifu, okhurula khu Nyasaye wabu, ne abo nibo abalibura

Ne mubandu balimwo balia abawulanga amakhuwa kabula oluchendo, mbu kho banyoole okhukosia khunjila ya Nyasaye nibalamanyile liosi liosi tawe, nebakholelanga injila eyo omubayo, Abo baliba nende eshinyasio shietsisoni

Ne nibasoomelwa tsinyaali tsiefu, batshihelesinjia emikongo mukhwilola , shinga balatsiwulilekhwo tawe, shinga mumarwi kabu kalimwo iwula, kho basuubisie amakhuwa keshinyasio eshilulu

Toto balia abasuubila mana nibakhola amalayi baliba nende emikunda chobwokholo

Balimenyamwo tsinyanga tsiasi, ne indache ya Nyasaye ni yatoto, naye niye Owamani, Owamachesi muno

Yalonga likulu libula tsisilo, tsiamulola ,ne nara khwililoba tsingulu lilabatengeyatengeya tawe, naye yasalasiamwo tsisolo tsiabuli imbia, ne khukwisinjia amatsi okhurula hekulu, mana nikhumesiamwo emimela emilayi echia buli imbia

Khuno nokhuloonga khwa Nyasaye, kho munzechesiekhwo nishina shiabaloonga balia abalali Ye (Nyasaye) Halali abonooni bali mubukori bulolekha

Netoto khwahelesia Luqman amachesi, nikhumuboolela mbu:“khupila Nyasaye orio muno, ni ulia witsa ukhupa orio, oyo aba akhupilanga khululwe omwene, ne ulia ukhaya ne Nayasaye ni Omuyinda Owitsomibwa muno ”

Olwa Luqman yaboolela Omusiani wuwe, namuhelesinjia amachelo, mbu: “Ewe mwanawanje, olatsokaasia Nyasaye tawe, shichila toto okhutsokasia ni obwonooni obukhongo.”

Ne khwachelela Omundu khubebusi bebe, Nyina mwana yamuchinga khubusandi nobunyakhani, ne okhumuleshesia okhununa ni emika chibili, mbu khupila orio esie nende abebusi bo, ne amakalishilo kenyu ni khwisie

Ne nibakhunichilisia okhunzokasia nende kalia kobula ninako obumanyi, alabawulila tawe, halali menya ninabo khubulayi ne oloonde injila yabalia abanzitsangakhwo, mana ewanje ni amulikalusibwa ne ndilibaboolela akamwakholanga

Ewe mwanawanje, toto likhuwa liosi liosi kata nilili shinga obusiro bwo yinyuma yolule, kata nilili mulukulu nohomba mwikulu nohomba khushialo, Nyasaye alilirera, toto Nyasaye ni omuchesi muno wamakhuwa kefisile uli nende obumanyi bwakoosi

Ewe mwanawanje: “lumilila okhulaama(Iswalah) ne olomesie amalayi ne okanie amabii, ne wifwile khukalia akalakhunyoola, toto ako ni amakhuwa kakhoyeshele okhuloondwa.”

Ne olahenga Abandu neshileka tawe, ne olachenda khushialo nende isunga tawe, toto Nyasaye shiyachama buli ulia weshileka owilolanga tawe

Ne otiile okhuchenda khwahakari, ne wishie hasi omwoyo kukwo, toto omwoyo kweyisishili nikwo omubii muno okhushila emioyo chiosi

Koo, shimulolakhwo mbu Nyasaye yabahotselesiya ebili mwikulu nende khushialo, mana nabetsusilia tsimbabaasi tsitsie- etsia habulafu nende atsifisile? Ni mubandu balimwo abayingananga khu Nyasaye nibabula obumanyi, nohomba obulunjifu nohomba eshitabu shiobulafu

Ne nibaboolelwa mbu: “Loonde aka Nyasaye yeshia,” nibaboola mbu; “halali efwe khuloonda akakhwanyoola nako bapapa befu” koo kata shetani nali mbu abalanganga mushinyasio shio mulilo

Ne ulia wiyaana obweni bubwe khu Nyasaye, nenali mbu nomukholi wamalayi, toto aba amalile okhutila omukoye kwalakhalikha, ne indukho yamakhuwa koosi nikhu Nyasaye

Ne ulia okhaya, obukhayi bwaye bulakhuwa eshibeela tawe, amakalushilo kenyu ni khwifwe, awo khulibaboolela kalia kabakholanga, toto Nyasaye ni Omumanyi muno owakali mubilifu

Khubasangasinjia hatiti, mana khulibaluuma mushinyasio eshisiro

Nenobareeba mbu:“niwina waloonga likulu nende eshialo” Ne balaboolasa mbu: “ni Nyasaye” boola mbu: “oluyali lwosi ni lwa Nyasaye halali abaanji mubo shibamanyile tawe”

Buli eshili mwikulu nende mushialo nishia Nyasaye toto Nyasaye niye Omuyinda owulayungwa muno

Ne chibetsanga mbu emisala chiosi chili khushialo nitsikalamu, nende tsinyanza(tsibe obwino) tsikhonywa nende tsinyanza saba, (ukhuhandika) amakhuwa ka Nyasaye shikakhaweele tawe, Toto Nyasaye ni Owamani Owamachesi muno

Toto okhulongwa khwenyu nende okhulamusibwa khwenyu khuli shinga khwo mwoyo mulala, toto Nyasaye ne Omuwulili Omuloli muno

Shololakhwo mbu Nyasaye yenjisinjia eshilo mushitere, ne yenjisia eshitere mushilo, ne yakhola eliuba nende omwesi okhumuwulila biosi bichendanga butswa okhula inyanga yarebwaho, netoto Nyasaye ali nende obumanyi bwa koosi pe akamukholanga

Endio nilwokhuba mbu, toto Nyasaye niye owa habweene , Ne ebiabalaamanga ebilali ye tawe nobukori, netoto Nyasaye niye owahekulu omukhongo muno

Shololakhwo mbu ebinimwa bichendanga munyanza khutsimbabaasi tsia Nyasaye, kho anyoole okhubamanyia ebimanyisio bibie, toto mwako khulimwo nende abimanyisio khubuli omwisumilisi owokhupa orio muno

Ne olwa amarunda kabafunikhanga shinga amaleesi, balamaanga Nyasaye mubwihotselefu muno, ne olwa abahonokosia mana abare khulukongo, abandi mubo baba hakari hakari, ne abulaho uyingasinjia ebimanyisio biefu bino halali buli ulia omukhayi omukhongo

Enywe Abandu murie Nyasaye wenyu ne murie inyanga yomwibusi alalikhoonya Omwana wuwe, nohomba Omwana okhukhoonya omwibusi wuwe shiosi-shiosi. Toto indache ya Nyasaye niyatoto, kho obulamu bwokhushialo bulabakatia tawe, nohomba omukati ulia alabakatia khu Nyasaye tawe

Toto Nyasaye ali nende obumanyi bweyinyanga yeyindukho ne, yeshinjia ifula, ne amanyile eshili mulubeleshelo, ne omwoyo kukorerwe shiakulanyola mutsuli, ne omwoyo kukorerwe akulifwila, toto Nyasaye niye omumanyi owamakhuwa koosi