Luyia - Chapter 33 - Al-Ahzab

Ewe Omurumwa, tsililila okhuria Nyasaye ne olawulila abakhayi nende abeshikhabili tawe, toto Nyasaye ni Omumanyi muno, Owamachesi po

Ne loonda kalia kofimbulilungwa okhurula khu Nyasaye wuwo, toto Nyasaye ali nende obumanyi khu koosi akamukholanga

Ne wisiche Nyasaye, Ne Nyasaye ayela muno okhuba omuliindi

Nyasaye shiyakholakhwo Omundu okhuba nende emioyo chibili mushilifu shishie tawe, Ne shiyakhola abakhasi benyu abamuchelaasinjia emikongo chiabu nende emikongo chabanyinenywe- okhuba banyinenywe tawe. Ne shiyakhola Abana bamukhususiye okhuba Abana benyu barulile khumikongo chienyu tawe, ako namakhuwa kenyu okhurula muminwa chienyu butswa, ne Nyasaye niye uboolanga obwatoto, naye niye ulunjisinjia khunjila

Mubalaanje ameera kabu khubasamwana, obo nibo obuleng’aafu khu Nyasaye, ne nimulamanyile Basamwana tawe ni Abana benyu nende abetsa benyu mudini. Ne shinobutulanikhwinywe khukamwitsukhanile tawe, halali ni obutulani khukalia akemioyo chienyu chikholele katong’ane. Ne Nyasaye ni Omulesheli muno Owetsimbabaasi po

Omurumwa akhoyesheele muno okhuranjilisibwa khubasalamu (bamusuubila) okhushila bo beene, (okhula bamukomelele Omurumwa kata nibili okhurusia obulamu bwabu nende omwandu) ne Abakhaye bebe ni banyinabwe, Ne abeekho bakhoyeleshele abeene khubeene. (okhuteshania, okhuchelama nende akandi shinga yako) mushitabo shia Nyasaye, ukhushila Abasuubili bandi nende (Muhanjirina)- halali shinobubii tawe nimukhola obulayi khubesta benyu, kano kamala okhuhandikwa mushitabu

Ne (itsulila) olwa khwabukula indache khubarumwa nende khwiwe ewe, nende khu Nuhu nende khu Ibrahim nende khu Isah Omwana wa Mariam, ne nikhubukula khubo indache isiro

Kho areebe abatoto okhulondokhana nende obwatoto bwabu, ne yarecheshela obakhayi eshinyasio eshilulu

Enywe abasuubila, itsulile tsimbabasi tsia Nyasaye khwinywe, olwa omukanda kwabalwani kwabeetsela, mana nikhukurumila omuyeka nende omukanda kwabalwani okwamulaalola, Ne toto Nyasaye alololanga muno akamukholanga

Olwa babetsela okhurula hekulu wenyu nende hasi wenyu, olwa tsimoni tsiang’ang’ala ne emioyo nichiula khumworokoro, nanyu nimuchaka okhuparira Nyasaye amaparo kakabukhane

Awo Abasuubili batemwa mana nibaseswa okhuseswa okhukhongo

Ne olwa obeshikhabili nende balia abali nende obulwale mumioyo chiabu, boboola mbu: “Nyasaye nende Omurumwa wuwe shibakhulaka halali obubeyi butswa.”

Ne omukanda mulala mubo alwakwaboola mbu: “Enywe abamenyanwa ba Yathribu- mubula amemelo, kho kalushe. Ne omukanda kundi mubo nikusaba Omurumwa obwiyangu nikuboola mbu: “Tsinzu tsiefu nitsikhaya” Ne shitsiali tsikhaya tawe, shibenyanga eshindi tawe halali okhwilukha

Ne babenjililanga (omukanda kwabalwani abakhayi) hekulu wabu mutsimbeka tsiosi (tsia madina) mana basabwe okhulwana, bakhakholele, neshibakhamenyele omo halali ebise bititi butswa

Boola mbu: “okhwilukha shikhulabakhoonya tawe nikali mbu mwilukhanga lifwa nohomba okhwirwa, kho shimulawulila obulayi tawe halali hatiti butswa”

Boola: “Ni wina unyala okhubalinda nende Nyasaye nabenyela obubii nohomba nabenyela tsimbabaasi. “ Ne shibalanyoola omulindi nohomba omukhoonyi owulali Nyasaye tawe

Toto Nyasaye abamanyile balia abeyikalilanga mwinywe (balatsia muliye tawe) nende balia baboolelanga abashiabwe mbu: ‘‘itse khifwe (mulatsia nende Muhammad tawe) Ne shibatsitsanga muliyie tawe halali hatitibutswa.’’

Balabakholela obwimani, halali olwa oburi bwitsa, alabalola bakhuhenganga, tsimoni tsiabu nitsibotokhana shinga ulia unyiranga nali okhufwa, halali olwa oburi buwa, babasinyisinjia nende tsinimi tsiabu tsindulu, bakholelanga obwimani amakhuwa amalayi, Abo shibasuubila tawe khulwako Nyasaye yarusiaho omurungo kwebikhole biabu, ne ako ni amangu khu Nyasaye

(Ukhula isayino muburi bwabu) paparanga mbuemikanda(chiabasuku) chishili okhurula. Ne emikanda echo chitsanga ( khandi), bakhekombele mbu bakhabeele mushitsimi halala nende abamenyanwa bamwo (baduwi), barebasa amakhuwa kenyu, Ne babetsanga halala ninenyu shibakhakhupane tawe halali hatiti butswa

Toto muli nende eshimanyisio eshilayi khumurumwa wa Nyasaye, khu balia basubilanga Nyasaye nende inyanga yeyindukho, mana barumbula Nyasaye muno

Ne olwa Abasuubili balola omukanda kweliyie (okwabakhayi) baboola mbu: “ kano niko ka Nyasaye nende Omurumwa wuwe yakhulaka, ne Nyasaye nende Omurumwa wuwe baboola obwatoto. Ne (likhuwa lino) shiliabameta halali obusubili nende obuwulili

Mubasuubili balimwo Abasatsa abakhola akabalakana nende Nyasaye, abandi bamala okhumala limenya liabu, ne abandi bashilindanga, ne shibakalukhaniakhwo kata hatiti tawe

Kho Nyasaye arunje abatoto khulwa obwatoto bwabu, ne abasandie abeshikhabili, niyenya, nohomba abaleshele, toto Nyasaye ni Omulesheli muno, Owetsimbabaasi po

Ne balia abakhaya Nyasaye yabakalusia nende liruma liabu, shibanyoolakhwo shiosi shiosi khubulayi tawe, ne Nyasaye nayela abasuubili mubulwani. Ne Nyasaye ni wa Amani Owoluyali muno

Ne niyeshia balia abakhukhoonya (abasuku) mubandu bahebwa eshitabu, okhurula mutsingoba tsiabu, mana nara oburi mumioyo chiabu, abaandi babu nimubeera, ne abaandi nimubatila

Ne nabakhola nimubukula liloba liabu nende tsinzu tsiabu nende omwandu kwabu, nende habundu wamwali nimushile okhusenakhwo tawe, ne Nyasaye nomunyali wabuli eshindu

Ewe Omurumwa boolela abakhaye bobo mbu: “ nikali mbu mwenyanga obulamu bwokhushialo nende oburone bwabwo, itse abasubule khulekhane omulekhano omulayi.”

“Ne ni mwenya Nyasaye nende Omurumwa wuwe nende inzu yomwikulu, Awo toto Nyasaye yarecheshela abakholi bamalayi mwinywe omurungo omukhongo

Enywe Abakhaye abo Murumwa , ulia witsa okhukhola mwinywe abwonooni bwahabulafu, alametelwa eshinyasio okhula khabili, ni kano ni amangu khu Nyasaye

Ni mwinywe ulia witsa okhuwulila Nyasaye nende Omurumwa wuwe, mana nakhola amalayi, khwitsa okhumuhelesia omurungo kukwe okhula khabili, ne khwamurecheshela omukabo omulayi

Enywe Abakhasi abo Murumwa, Enywe shimuli shinga yesi yesi mubakhasi tawe, ni mwenya okhuria Nyasaye, kho mula toratosia emioyo chienyu tawe, kho ulia uli nende obulwale mumwoyo kukwe aletsa yekomba tawe. Ne muboole amakhuwa amalayi

Ne mwikhale mutsinzu tsienyu, ne mulechesia oburone bwenyu shingala bechesinja abakhasi betsinyanga tsiobusilu tawe, ne mulumilile okhulaama ne murusie eshihanwa, ne muwulile Nyasaye nende Omurumwa wuwe, Nyasaye yenya okhuba yiniakhwo eshifwolo enywe Abandu beyinzu, nende okhubatswenula muno

Ne mwitsulisie (Abandu) akasomungwa mutsinzu tsienyu mutsinyali tsia Nyasaye nende amachesi (amakhuwa komurumwa) toto Nyasaye ni Omumanyi wa makhuwa kefisile ne ni omumanyi wamakhuwa koosi

Toto abaisilamu Abasatsa nende Abaisilamu Abakhasi, nende Abasuubili Abasatsa nende Abasuubili Abakhasi, nende Abasatsa bawulilanga, nende Abakhasi bawulilanga nende Abasatsa baboolanga obwatoto, nende Abakhasi baboolanga abwatoto, nende Abasatsa besumilisinjia, nende Abakhasi besumilisinjia, nende abehotselesinjia Abasatsa nende Abakhasi behotselesinjia nende Abasatsa barusinjia eshihanwa nende Abakhasi barusinjia eshihanwa, nende Abasatsa bafunganga nende Abakhasi bafunganga, nende Abasatsa abalindanga ebiekenyi biabu, nende Abakhasi balindanga ebiekenyi biabu, nende Abasatsa barumbulanga Nyasaye muno, nende Abakhasi barumbulanga Nyasaye muno, Nyasaye yabarecheshela eshileshelo nende omurungo omukhongo

Shikakhoyeshele khumusuubili Omusatsa nohomba khumuusibili Omukhasi, olwa Nyasaye nende Omurumwa wuwe nibakhamala okhubusia likhuwa,(bo)babe nende likhuwa lindi mukhubusia okho, ne ulia ulawulila Nyasaye nende Omurumwa wuwe, toto aba akorere, obukori buli habulafu

Ne (betsulisie ) olwa waboolela ulia wa Nyasaye yakholela obulayi nawe wesi nomukholela obulayi, mbu: “ Tilana nende Omukhasi wuwo ne orie Nyasaye (olamulekha tawe)” Ne nofisa mushilifu shishio aka Nyasaye yenya okhurusia, ne noria amakhuwa kabandu, ne Nyasaye niye ukhoyeshele muno okhuriibwa. Kho Zaid olwa yamalana nomukhasi oyo, khwa khubashila ewe kho bulaba obutinyu khubasuubili okhuteshia abakhasi ba Abana babu bokhulela olwabalaba nibalabenya tawe, Ne lilako lia Nyasaye niliokhukholwa

Obutulani bubulaho khu Murumwa okhukhola amakhuwa ka Nyasaye yamusubula, ne edio niliba lia Nyasaye khubalia boosi baranjilila khale, ne lilako lia Nyasaye ni likhuwa liamala okhubusibwa mbu liliba lirio

Balia boosinjia oburume bwa Nyasaye, nebamuritsanga, ne shibaritsanga yesiyesi tawe halali Nyasaye, ne Nyasaye niye uyela muno okhubala

Mohammad shi nisamwana yesiyesi mubasatsa benyu tawe, halali ni Omurumwa wa Nyasaye ne niwokhumalilikha mubarumwa, ne Nyasaye nomumanyi wa buli eshindu

Enywe abasuubila murumbule Nyasaye okhurumbula okhunji

Ne mumwitsoomie eshilo neshitere

Ye niye ubarereranga tsimbabaasi, nende Abamalaika bebe (babalamilanga) kho abayinie mushilima okhutsia mubulafu, na niwetsimbabaasi muno khubasubili

Amashesanio kabu inyanga yakhubukanana ninaye kaliba mbu “mulembe” neyabarecheshela omurungo omulayi

Ewe Omurumwa , toto efwe khwakhuruma obe Omuloli nende Omusuubisia nende Omwikanyilisi

Ne obe omulanji khunjila ya Nyasaye, khubuchami bubwe, nende itaa iyininjia obulafu

Ne subusia Abasubili mbu bali nende tsimbabaasi tsikhongo tsirulanga khu Nyasaye

Ne olawulila abakhayi nende abeshikhabili tawe, ne olateba amasinyisio kabu tawe, ne wisiche Nyasaye, ne Nyasaye ayela okhuba omulindi

Enywe balia basuubila, nimuteshia abakhasi abasuubili mana mubaleshe nimushili okhubatilakhwo, eda ibula khubo yamulababalila, mubahelesie shokhubasangasia ne mubaleshe okhulekhana okhulayi

Ewe Omurumwa, khukhusubulila Abakhasi bao obawahelesia omurungo kwabu, nende balia abomukhono kukwo omulunji kwatila mubalia ba Nyasaye yakhuhelesia, nende Abakhana bomusiani wabu papa wuwo, nende Abakhana ba senje wuwo, nende Abakhana bakhotsa wuwo, nende Abakhana bo mukhana wabu mama wuwo, balia abawuuya ninawe, nende omukhasi omusuubili, niyerusia omwene eshikhaya khumurumwa, Omurumwa mwene niyenya okhumuteshia. Ochamilwa ewe butswa, shini khubasuubili bandi tawe. Toto khwamala okhubenoosilia okakhwabalachila khubakhasi babu, nende abemikhono chiabu emisatsia chiatila, kho bulaba obusiro khwiwe tawe. Ne Nyasaye ni Omulesheli muno Owetsimbabaasi po

Ositie ebuleka owawenya mubo, ne obukule owawenya. Ne niwenya ulia owawara elubeka, shinobubii khubo tawe. Okhukhola endio khwitsa okhuchila tsimoni tsiabu tsisangale, nebalabeelela tawe, ne babe nobuchami khushilia shiobahelesia, abo boosi. Ne Nyasaye amanyile kali mumioyo chienyu, ne Nyasaye ni Omumanyi(omuholo) Omwihotselefu

Nomalile okhuba nende (abakhaye bolinabo bano) shochamilwa (okhuteshia) abakhasi nohomba, okhubakalukhania nende abakhasi bandi kata obulayi bwabu nibukhuchamisia, halali ulia ulimumukhono kukwo omulunji. Ne Nyasaye ni Omuloli wabuli eshindu

Enywe Abasuubili mulenjile mutsinzu tsio murumwa tawe halali okhuula shinga mufuchililwa okhutsia okhulia, eshilibwa shilalindwa okhuya tawe, halali nimulangwa injile nenimumala okhulia musalaane(mubweo) ne mulekhala okhupa tsimbakha tawe, shichila likuwa lino lisinyisinjia Omurumwa, naye abalolelanga tsisoni, ne Nyasaye shalolanga tsisoni okhuboola bwatoto tawe. Ne nimureeba (abakhaye baye) mubareebele inyuma weshikalilo (weyipasia) , okhukhola kano khwitsa okhwosia emioyo chienyu nende emioyo chiabu, ne shimukhoyeshela okhumusinyisia Omurumwa wa Nyasaye tawe. Nohomba okhuteshia Abakhasi baye ye niyakhafwa. Toto likhuwa lino ni tsimbi tsikhongo imbeli wa Nyasaye

Nimura habulafu shiosi shilia nohomba nimufisa toto bwene Nyasaye yamanya buli eshindu

Shini tsimbi khubo okhulolana nende basabwe nohomba Abana babu beshisiani, nohomba Abasiani babu, nohomba Abana babasiani babu, nohomba Abana babakhana babu nohomba Abakhasi babu, nohomba balia abemikhono chiabu emilunji chiatila, ne murie Nyasaye, toto Nyasaye ni omuloli wabuli eshindu

Toto Nyasaye nende Abamalaika bebe basabilanga Omurumwa (tsimbabaasi). Enywe balia abasuubila mumusabile (Omurumwa) ne mumushesie omulembe muno

Toto balia basinyisinjia Nyasaye nende Omurumwa wuwe, Nyasaye abatsuba khushialo nende mwikulu ne yabarecheshela eshinyasio (shietsisoni) shokhututuya

Nebalia basinyisinjia Abasuubili Abasatsa nende Abasuubili Abakhasi, khukabalakholele tawe, toto bamala okhuchinga obuchishi obukhongo nende tsimbii tsilolekha

Ewe Omurumwa boolela Abakhasi bao nende, Abakhana bao, nende Abakhasi babasuubili, beeshie obulayi tsingubo tsiabu, okhukhola endio khulachila bamanyishe, kho balasinyisibwa tawe, ne Nyasaye ni Omulesheli muno Owetsimbabaasi

Ne Abeshikhabili nende balia bali nende obulwale mumioyo chiabu nende balia abasalasinjia obubii mulukongo, nibalalekha tawe, toto khwitsa okhubasasiakhwo ewe, ne shibetsa okhwikhala omo ahambi ninawe halali khubise bititi butswa

Batsubwa, wosiwosi abalolekhana batilwe mana berwe okhwirwa

Liba lia Nyasaye alialiwo khubalia babura, ne sholinyoola muliba lia Nyasaye obukalukhani tawe

Abandu bakhurebanga okhulondokhana nende indukho, boola mbu: “ obumanyi bwayo bulikhu Nyasaye butswa, ne nishina shitsa okhumanyisia mbu indukho ili ahambi.”

Toto Nyasaye yatsuba Abakhayi ne nabarecheshela omulilo

Balimenyamwo tsinyanga tsiosi, neshibalinyoolamwo Omuhelwa nohomba omukhonyi tawe

Inyanga yobweni bwabu bulikalukhanibwa mumulilo baliboola mbu: “Abaane manyanga khuwulila Nyasaye, mana khuwulila Omurumwa.”

Ne baliboola mbu: “Nyasaye wefu toto efwe khwaulila Abaami befu, nende Abakhongo befu, mana abo nibakhukosia injila.”

Nyasaye wefu bahelesie bano eshinyasio shimetekhe, ne obatsube eshitsubo eshikhongo

Enywe Abasuubila mulaba shinga balia abasinyisia Musa, mana Nyasaye namutswenula khukababoola, naye yali weshiribwa imbeli wa Nyasaye

Enywe balia basuubila murie Nyasaye ne muboole amakhuwa katoto

Alabakasilia obulayi ebikhole bienyu ne alabaleshela ebionoono bienyu, ne ulia uwulila Nyasaye nende Omurumwa wuwe, toto alaba naburire okhubura okhukhonga

Toto efwe khwalolesia omalako kefu likulu nende eshialo nende tsingulu, mana nibikhaya okhukachinga nibiria, ne nikhubilolela tsimbabaasi mana Omundu nachinga. Toto ye ni omwonooni omukhongo omusilu muno

Kho Nyasaye anyoole okhuhelesia eshinyasio abeshikhabili, Abasatsa nende abeshikhabili Abakhasi, Nende abatsokaasi beshisatsa nende Abatsokaasi beshikhasi, Ne aleshele abasubili abasatsa nende abasubili abakhasi, ne toto Nyasaye ni omulesheli muno owetsimbabaasi po