Luyia - Chapter 34 - Saba

Oluyali lwosi ni lwa Nyasaye, ulia owebili mwikulu nende mushialo nebibie, ne mwikulu oluyali nolulwe, naye ni Owamachesi Omumanyi muno

Amanyile kenjilanga mwiloba nende karulangamwo, nende kekhanga mwikulu nende kaninagamwo, naye ni Omulesheli muno, Owetsimbabaasi po

Ne abakhayi baboola mbu: “indukho eyo shilikhwitsila tawe,” Boola mbu: “khushina? Nditsuba khu Nyasaye wanje, toto ilibetsela, Omumanyi wakefisile, sishifisanga khuye tawe kata eshili nende obusiru shinga bweyindukusi, mwikulu nohomba khushialo, nohomba eshititi okhushila esho, nohomba eshikhongo muno, halali biosi ebo bili mushitabu shinoosinjia.”

Abarunje balia abasuubila mana nibakhola ebikhole ebilayi, abo balinyoola obulesheli nende omukabo kwoluyali

Ne balia bakhalabana okhuyingasia ebimanyisio biefu, nibalola mbu besta okhukhushila, abo balinyoola eshinyasio eshibii shiobululu

Ne balia bahebwa obumanyi, bamanya mbu kalia keshibwa khwiwe okhurula khu Nyasaye wuwo nikatoto, nako kalunjisinjia khunjila ya Owamaani witsomibungwa muno

Ne balia abakhaya baboola mbu: “ koo khubechesiekhwo Omusatsa ubaboolelanga mbu olwamuliba nimurandulwe (nimubolele) ebitonye ebitonye mbu mulikalusibwa mwaba ebiloonje obiyiakha?”

“Koo yakhaba nachiishile Nyasaye obubeyi nohomba ali nende lilalu?” Halali balia abalasubila mwikulu tawe bali mushinyasio nende obukori bwa ehale muno

Koo, shibalolangakhwo akali imbeli wabu nende akali inyuma wabu akelikulu nende eshialo? Khwenyanga khwakhalomesiye liloba liabamila, nohomba khwakhabakwisiyiekhwo ebitonye bielikulu, toto mu ako khulimwo nende abimanyisio khubuli Omusumba, Owekanila. (yasaba eshileshelo)

Ne toto khwahelesia Dawud tsimbabaasi okhurula khwifwe, “Enywe tsingulu, kalusie omwoyo halala ninaye, nende enywe amayoni, mwesi. Ne nikhumutoratosilia eshichuma

Nikhumuboolela mbu “kasia (tsingubo tsiebichuma) tsibambalifu, ne olunjisie obulayi khukhuliimasia. Ne mukhole ebikhole ebilayi, toto esie endolanga kamukholanga

Ne ewa Suleiman (khwakhola) omuyeka (kwatsitsanga) oluchendo lwakwo alweyitsuli (luyela oluchendo) lwo omwesi mulala, nende oluchendo lwokwo lweyingolobe luyela oluchendo lwo mwesi mulala, mana nikhumusalulila isebeli ya ishaba. Ne mumajini (khwalimwo) nende kalia kakholanga emilimo imbeli wuwe khubuchami bwa Nyasaye wuwe, ne buli wira ebuleka khumalomesio kefu mubo, khumutisia eshinyasio shiomulilo kwakhanga

Kamukholelanga eliayenya, shinga olukoba lweliye, nende abifwanani, nende masinia amakhongokhongo , nende emifuria emikhongo, achilarusibwa habundu wachio (nikhubaboolela mbu) “enywe Abandu ba Daudi khole ebikhole ebilayi khulwa okhupa orio (khutsimbabaasi tsiamwahebwa). Ne ni batiti mubasumba banje bakhupanga orio

Ne olwa khwamubusilia okhufwa (olwayafwa) abulaho wabechesia lifwa lilie halali isolo yomwiloba, eyalia indabushi yiyie, kho shingala yakwa Amajini nikamanya nikaboola mbu kabetsanga nikamanya amakhuwa kefisile, shikakhamenyele mushinyasio shiokhututuyibwa esho tawe

Toto mushimenyo shia (Abandu beshialo sha) sabaa khwalimwo nende eshimanyisio. Emikunda chibili, omukhono omulunji nende omukaata. “Lie khumukabo kwa Nyasaye wenyu, ne mukhupe orio, Eshialo eshilayi, ne Nyasaye ni Omulesheli muno.”

Halali bo ni baloba, mana nikhubarerera amatsi amanji (nikabiyia tsindalo tsiabu) Ne nikhubakalukhanilia mumikunda chiabu echo, emikunda chindi chibilisa echia ebiamo ebilulu biobukhwakhwa, nende emisala mititi chie mikunasi

Khwabarunga kano shichila obuyingani bwabu, nafu shikhuhelesinjia eshinyasio tawe halali khu ulia ukhaya

Ne hakari wabu nende tsingongo tsilia etsiakhwahelesia tsimbabaasi, khwaraho tsingongo tsilolekhana, mana nikhuramwo ebihulushilo bio luchendo ‘‘chendemwo eshilo neshitere nomulembe.”

Halali nibaboola mbu: “Nyasaye wefu oreho oluchendo olurambi hakari wetsinjendo tsiefu, mana nibakholela emioyo chiabu obubii. Khonikhubakhola tsingano, nikhubasalaasia emikanda chikabukhane, Toto mukano khulimwo nende ameeko khubalia abefwilanga abakhupanga orio muno

Ne toto Ibilisi nakhola amaparo keke khubo okhuba katoto, kho nibamuloonda , halali omukanda kwabasuubili

Naye shiyali nende obunyali bwosi bwosi khubo tawe, halali khokhumanye mbu ni wina usuubila mwikulu, ne ni wina uba nende eshibeyibeyi, ne Nyasaye wuwo niye wokhulinda buli eshindu

Boola: “lanje balia abamuboolanga mbu ni Abanyasaye balali Nyasaye tawe, babula shiosi shiosi kata shiobusiro shinga indukusi, mwikulu nohomba khushialo, ne babulamwo obusaanji (mwikulu nende mushialo) Naye abula omukhoonyi mubo

Ne okhusabila khwosi khwosi shikhulikhoonya tawe imbeli wuwe halali khu ulia ulichamilwa, okhula shinga lwoburi bulirusibwa mumioyo chiabu baliboola mbu: “Nyasaye wenyu Omulesi aboolele mbushina?” nabo baliboola mbu: “obwatoto, naye niye Owehekulu Omukhongo.”

Boola: “Niwina abahetsanga emikabo okhurula mwikulu nende khushialo?” boola mbu: “ Nyasaye,“ ne (baboolele) ; ‘‘Toto efwe nohomba enywe khuli khubulunjifu nohomba khubukori,obuli habulafu

Boola mbu: “shimulirebwa obionoono bia efwe khwakhola tawe, nohomba efwe shikhulirebwa aka enywe mukholanga tawe.”

Boola mbu: ‘‘Nyasaye wefu alikhukhung’asia, mana alikhubusilia hakari wefu khubwatoto, naye niye Omubusia Omumanyi muno. ”

Boola mbu: “mumanyiekhwo balia bamutsokasinjia naye okhuba abasaanji (bebe).’’ Shikanyalikhana tawe, halali ye niye Nyasaye yenyene, owa Amaani Owamachesi muno

Ne sikhwakhuruma halali khubandu boosi, obe Omusuubisia, Omwikanjilisi, halali Abandu abanji shibamanyile tawe

Ne boboolanga mbu: “Iliba lina indache yino, nimuli ababoolanga obulaamba.”

Boola mbu: “Muli nende ebise bialakwa, inyanga eyamulalisitilibwakhwo kata isaa ndala nohomba shimuyiliranjilila tawe.”

Ne balia abakhaya nibaboola mbu: “Shikhulasuubila Ikurani ino tawe, nohomba ebitabu bilia beshibwa imbeli wayio,” Ne nolilolakhwo shinga aboononi olwa baliemibwa imbeli wa Nyasaye wabu, olwabalikalusania amakhuwa abeene khubeene, abateshele balia baliboolela balia belola abakhonga mbu: “Mukhayanga okhuba enywe toto efwe khwakhabeela Abasuubili.”

Abelola akhuba abakhongo baliboolela abateshele balia mbu: “ mbu efwe khwabekalila obulunjifu nibumalile okhuboolela? Tawe enywe abeene nenywe mwali aboononi.”

Abateshele balia nibaboolela balia abelola abakhongo, mbu: “Halali mwakholanga ebifwanga eshitere nende eshilo, olwa mwakhulomesinjia okhukhaya Nyasaye nende okhumukholela Abasanji.” Nabo balichisa okhwiyitsulisia olwabalilola eshinyasio, ni khulira ominyororo mumakosi kabalia bakhaya. Shibarungungwa akandi tawe halali kabo bakholanga

Ne shikhwarumakho Omwikanyilisi mulukongo lwosilwosi, halali abeene lwo abalikho nashio baboola mbu: “Toto efwe khukhaya akamwarumwa ninako ako.”

Ne nibaboola mbu: “efwe khuli nende Omwandu omunji, nende Abana , ne efwe shikhulihebwa eshinyasio tawe.’’

Boola: “toto Nyasaye wanje yekulilanga omukabo owayenya ne atutuyilinjia (owa yenya) halali Abandu abanji shibamanyile tawe

Ne shini omwandu kwenyu nohomba Abana benyu, abetsa okhubara ahambi ninafu khuyingasi halali ulia wasuubila mana nakhola amalayi, Kho abo balinyoola omurungo kumeeteshe khukalia akabakholanga, ne baliba nomulembe mubikoro biomwikulu

Ne balia bakhalabananga okhuyingasia tsinyaali tsiefu, nibalola mbu balakhushila, abo balirerwa mushinyasio

Boola mbu: “toto Nyasaye wanje abambulilanga omukabo owayenya mubasumba bebe, ne amututuyilinjia (owanyenya) Ne shiosi shiosi shia murusia, ye alakalusiaho, naye niye Omukabi Omulayi muno

Ne (betsulile) Inyanga yalibakhung’asia boosi, mana aboolele Abamalaika mbu: “ koo bano babalaamanga?”

Baliboola mbu: “ oli ehale nende obulemefu bwosibwosi, newe omuhelwa wefu, shini abo tawe, halali bo balaamanga Amajini, ne abaanji mubo bakasuubilanga.’’

Kho Nyanga yino abulaho ulinyala okhukhoonya owashie khubulayi nohomba khububii. Ne khuliboolela balia bakhola obubii mbu: “pile eshinyasio shiomulilo, shilia eshiamwayingananga.”

Ne nikhubasomela tsinyaali tsiefu etsiahabulafu, nibaboola mbu: ‘‘uno shini shiosi shiosi tawe halali omusatsa wenya okhubasitia ehale nende aka bapapa benyu balaamanga,” nenibaboola mbu: “kano shini shiosi shiosi tawe halali obubeyi obwachikhwa” Ne baboola balia bakhaya olwa obwatoto bwabetsela mbu: “buno shineshindu tawe halali obulosi obwabulafu.”

Ne shikhwabahelesia ebitabu biabasomanga tawe nohomba shikhwabarerekhwo omwikanyilisi imbeli wuwo

Nebalia bali embeli wabu nibayingasia, Ne bashili okhula ebuleka wa ekhumi, ewa khwahelesia abo, bayingasia Abarumwa banje, kho eshinyasio shianje shiali shirie

Boola mbu: “Toto esie ebachelelanga likhuwa elala butswa, mbu mweme shichila Nyasaye, babili babili, nende shiamulala shiamulala, mana mupare mbu; owashienywe uno abula lilabu, ye ni Omwikanyilisisa wenyu eshinyasio eshilulu nishishiili okhuula

Boola: “Omurungo kwebasaba oko ni okwenyu enywe, omurungo kwanje kulisa khu Nyasaye butswa, naye ni omuloli wabuli eshindu

Boola: “Toto Nyasaye wanje arusinjia obukori khubwatoto, naye ni Omumanyi muno wa akefisile

Boola mbu: “obwatoto bwitsile, ne obubeyi shibularera amacheni tawe nohomba shibulakalusia (amani kabwo tawe)

Boola “Nikali mbu engorere mana engorasa khulwanje omwene, na nelunjikha nishichila nikayafimbulilanga Nyasaye wanje, toto ye ni Omuwulili muno owuli ahambi

Ne nolalangakhwo shingala baliba nibabeyabeya, halali balibula amelushilo, ne balitilwa abundu ahambi

Ne baliboola mbu : “khubusuubile,” halali bakhanyala barie okhubunyoola (obuusilamu eyo) habundu ehale eyo

Ne nibalikalilwa hakari wabu nende kalia akabekomba, shingala abashiabwe bekalilwa khale , toto abo bali nende ingalukhani yokhurera eshibeyibeyi