Luyia - Chapter 40 - Ghafir

Ha mim

Okhwishibwa khweshitabu shino khurula khu Nyasaye Owamani Omumanyi muno

Uleshelanga tsimbi ufuchililanga eshileshelo, Oweshinyasio eshilulu , umuhaani abulaho Nyasaye halali Ye, ne ewuwe niwo amakalushilo

Shibayingananga khubimanyisio bia Nyasaye tawe halali bialia bakhaya , kho okhuyelayela khwabu khushialo khulakhung’ang’asia tawe

Imbeli wabu Abandu ba Nuh nende emikanda chindi chiakhaya okhuloonda ka Nyasaye, ne buli omukanda kwali nendeamahababakokhutila Omurumwa wabu, mana nibayingana khubukori khobanyoole okhukalukhania obwatoto , mana nebatiila, kho eshinyasio shianje shiali shirie

Ne endi nilwaliatinyisibwa likhuwa lia Nyasaye wuwo Omulesi khubakhayi, mbu toto bo ni Abandu bomumulilo

Ne balia bachinganga indebe(arsh) nende balia bamubotokhana bamwitsoominjia nibahelesia Nyasaye wabu oluyali , nebamusuubilanga ne basabilanga eshileshelo balia basuubila: “ Nyasaye wefu Omulesi waswania buli eshindu tsimbabaasi nende obumanyi kho baleshele balia abasaba eshileshelo mana nibaloonda injila yiyio, ne obekalile eshinyasio shio mulilo

Nyasaye wefu Omulesi obenjisie mwikulu mumukunda kulaliwa tawe, kwa wabalaka nende balia bakhola amalayi mubebusi babu, nende abakhasi babu nende olwibulo lwabu , toto ewe newe Owamaani Owamachesi muno

Ne obekalile amabii, ne owawikalila amabii inyanga eyo toto oliba omukoosiyie, ne okho nikho okhubura okhukhongo

Toto balia bakhaya balilangwa mana baboolelwe mbu: “ toto okhusinya khwenyu Nyasaye ni okhukhongo okhushila shinga mwesinya abeene, olwa mwalangungwa khubusuubili nanyu nimukhaya”

Baliboola mbu: “ Nyasaye wefu Omulesi okhufwisiyie khabili, ne okhulamusiyie khabili, mana khufuchilile tsimbi tsiefu, kho injila yokhurula iliho

Ako ni endio , okhubeela Nyasaye niyalaamungwa yenyene mwakhayanga , ne natsokaasibwa mwachamanga, mana obunyali ni bwa Nyasaye omukhongo wehekulu

Ye niye ubalolosilinjia ebimanyisio bibie, ne abeshilinjia okhurula hekulu emikabo. Ne abulaho witsulila kano halali ulia umukalushila

Kho mulaame Nyasaye nomwitswenula khu dini yiyie , kata abakhayi nibasinyikha

Niye unininjia ebichelo, mwene ishisala , arumanga Malaika(jibril ) Ruh khubunyali bubwe khuwayenya mubasumba bebe, khulwa okhubekanyilisia inyanga yomukhung’ano

Nyanga yino buli Omundu alarungwa kayakholanga, luno okhukholanila obubii khubulaho , toto Nyasaye ni Omwangu wokhubala

Ne bekanyilisie inyanga ili ahambi , olwe emioyo chiliula khwiporokotio, nabo nibayinjilwe neshibeela, abamabii shibaliba nende Omwitsa nohomba ubasabila yawulilwa tawe

Yamanya okhukatia khwetsimoni, nende ke emioyo chifisanga

Ne Nyasaye abusinjia khubwatoto , ne balia balaamanga owulali Nyasaye shibabusinjia shiosi shiosi tawe, toto Nyasaye ni Omuwulili Omuloli muno

Shibachendangakhwo khushialo mana balola indukho yabalia bali imbeli wabu, bali nende amani amanji okhubashila, nende ebikhole ebikhongo khushialo, mana Nyasaye nabatila obutinyu khutsimbi tsiabu, mana nibakhaywa ubakhoonya okhurula khushinyasio shia Nyasaye

Endio nilwokhuba mbu Abarumwa babetselanga nende ebifune biyela mana nibakhaya ne Nyasaye nabatila, toto ye niwa amaani weshinyasio eshilulu

Ne toto khwaruma Musa halala nende ebimanyisio biefu nende ebifune bia habulafu

Khu Firaun nende Hamana nende Qarun, mana nibaboola mbu : “uno ni Omulosi Omubeeyi muno.”

Olwa yabeetsela nende obwatoto okhurula khwifwe , baboola mbu: “yire Abana abasiani babalia basuubila ninaye , mana muleshe Abana abakhana, ne ebifwanga bia bakhayi shibli hosi hosi tawe halali mubukori.”

Ne Firaun naboola mbu : “mundeshe ndire Musa mana alanje Nyasaye wuwe Omulesi, esie eritsanga ye okhukalukhania idini yenyu nohomba akhole amabii khushialo.”

Ne Musa naboola mbu: “esie ndilinda khu Nyasaye wanje Omulesi khu enywe, okhurulana nende buli Omufuuru ulasuubilanga inyanga yokhubalilwa”

Mana Omusatsa omusuubili mubandu ba Firaun owafisa obusuubili bubwe naboola mbu: “koo mwira butswa Omundu shichila okhuboolasa mbu Nyasaye nomulesi wanje ne abetseele nende abwatoto okhurula khu Nyasaye wenyu, ne nali mbu nomubeyi mumuleshe nobubeyi bubwe , ne nali owatoto kamulakanga kalamunyoola, toto Nyasaye shalunjisinjia ulia wabura eshichelo Omubeyi tawe.”

Enywe Abandu banje obwami nobwenyu nyagayino mushilile khushialo, ne wina ulikhuhabina khushinyasio shia Nyasaye nishilikhwitsila? Firaun naboola mbu: “esie shebaboolela liosi liosi tawe halali lilia liendola , ne esie shebalunjisinjia tawe halali khunjila yobulunjifu.’’

Ne wasuubila ulia naboola mbu: “ enywe Abandu banje esie abariranga shinga tsinyanga tsie mikanda

Shinga Abandu ba Nuh nende ba Ad nende Thamud nende balia ababaloondakhwo, ne Nyasaye shakholelanga Abandu bebe akabalakhoyeshele tawe

Enywe Abandu banje esie abaririranga inyanga yetsimbungu

Inyanga yamulilukha nimukalukha inyuma, shimuliba nende wokhubalinda khu Nyasaye tawe, ne ulia wa Nyasaye yahandichila obukori shali nende umulunjisia tawe

Ne toto Yusuf yamala okhubetsela nende obulafu bwatoto, halali enywe nimutsilila okhuba nende tsinganakani khukalia kayamurerera okhuula shinga yafwa, mwaboola mbu Nyasaye shalirera Omurumwa wundi tawe, endio nilwa Nyasaye alekhanga akora ulia owabura eshichelo wikanakaninjia

Balia bayingananga khubimanyisio bia Nyasaye nibabula amatililo , neshisinyisio eshikhongo imbeli wa Nyasaye nende imbeli wabasuubili, endio nilwa Nyasaye aretsanga eshimanyisio khubuli omwoyo omufururu kwisunganga

Mana Firaun naboola mbu: “ Hamana nyumbashile ingasi (munara) kho enyoole okhuulila khutsinjila

Tsinjila tsielikulu enyoole okhulola Nyasaye wa Musa, netoto esie amuparirasa mbu ni omubeyi.” Ne endio ni lwa Firaun yakholelwa alole ebikhole bibie ebibii okhuba ebilayi mana niyekalilwa tsinjila. Ne ebikhole bia Firaun shibiamukhoonya tawe halali okhumusishia

Na owasuubila ulia naboola mbu: “enywe Abandu banje munondekhwo ebalunjisie injila yabalunjifu”

Enywe Abandu banje toto obulamu bwokhushialo khuno ni omwikhoyo omutiti ne toto mwikulu nisho eshimenyo shietsinyanga tsiosi

Ulia ukhola amabii shalirungwa halali amabii, ne ulia ukhola amalayi mubasatsa nohomba mubakhasi nali omusuubili , abo nibo balinjila mwikulu, balihebwa emikabo chibula eshichelo

Enywe Abandu banje muli murie ebalanganga khubuhonia nanyu munaanganga okhutsia mumulilo

Munaanganga mbu ekhaye Nyasaye mana emutsokasie khukengorerwe , nasi emulanganga khu owa Amaani Owobulesheli muno

Toto owamunanjilanga okhumulaama shakhoyesheele okhukholelwa omulango khushialo khuno nohomba mwikulu tawe, ne efwe fwesi khulikalusibwa ewa Nyasaye , ne toto balia babura eshichelo nibo Abandu bomumulilo

Ne mulitsulila kebaboolelanga kano ne endeshela likhuwa lianje Nyasaye, toto Nyasaye alolanga muno Abasumba bebe

Mana Nyasaye nabaliinda khubusuku bwabakhola, mana eshinyasio eshibii shilibotokhana Abandu ba Firaun

Balinjila mumulilo itsuli nende ingoloobe ne olwa indukho iliula baliboolelwa mbu: “injisie Abandu ba Firauni mushinyasio eshilulu”

Olwa balireebana mumulilo, Abateshele balireeba Abafuru mbu: “ toto efwe khwabaloondangakhwo mana munyala okhukhututuyiliakhwo omulilo kuno.”

Abafuru baliboola mbu: “ toto efwe fwesi khulimwo , toto Nyasaye amalile okhubusia khubandu bebe”

Balia bali mumulilo baliboolela abalindi bomulilo mbu: “ mukhusabilekhwo Nyasaye wenyu Omulesi , akhututuyiliekhwo eshinyasio kata inyanga ndala.”

Baliboola mbu: “Abarumwa shibabeetselanga nende ebifune biahabulafu? Baliboola mbu: “kali kario” mana baliboolelwa mbu: “ musabe Nyasaye wenyu, ne amalaamo kabakhayi ni amakhaya imbeli wa Nyasaye

Toto efwe khulihabina Abarumwa befu nende balia basuubila khushialo, nende inyanga yabaloli balieema

Inyanga yebichila biabakhayi shibiliwulilwa tawe, ne balinyoola eshitsubo, ne balinyoola eshimenyo eshibi muno

Netoto khwahelesia Musa obulunjifu ne nikhuhelesia Abana ba Israil eshitabu

Shilimwo obulunjifu nende emetsulisio khu bandu bamachesi

Kho wisumilisie toto aka Nyasaye yalaka kalirulila, ne saba eshileshelo khumabii ko, ne witsomie Nyasaye wuwo Omulesi ingoloobe nende itsuli

Toto balia bayingananga khubimanyisio bia Nyasaye nibabula amatililo , ebilifu biabu nebikhaya halali benyanga obukhongo ne shibanyala okhubuulila tawe, kho wilinde khu Nyasaye , toto ye ni Omuwulili Omuloli muno

Toto okhulongwa khwelikulu nende eshialo nokhukhongo okhushila okhulongwa khwa Abandu, halali Abandu abanji shibamanyile tawe

Ne shibahelaana omuwofu nende owulolanga tawe, nohomba balia abasuubila nibakhola amalayi bakhayelana nende abetsimbi? Muparanga hatiti muno

Toto indukho iliula ibula obukanakani tawe, halali Abandu abanji shibasuubilanga tawe

Ne Nyasaye wenyu Omulesi yaboola mbu: “musabee ndalabahelesia, toto balia belolanga okhulaama esie balinjila mumulilo nibatutuye.”

Nyasaye niye wabakholela eshilo muhulushilemwo, ne eshitere mulolele, toto Nyasaye niwetsimbabaasi khubandu halali Abandu abanji shibakhupanga orio tawe

Oyo niye Nyasaye wenyu omulesi owaloonga buli eshindu , abulaho Nyasaye wundi owulali ye tawe, kho ni hena amuhenjibungwa

Ne endio nilwa baliinjibwa balia abakhayanga ebimanyisio biefu

Nyasaye niye wabakholela eshialo okhuba eshimenyo , ne likulu okhuba eshiumbashe , mana nabahelesia ifwani indayi muno, ne nabahelesia emikabo emilayi muno , oyo niye Nyasaye Omulesi wenyu , ne niwoluyali Nyasaye Omulesi webilonje biosi

Naye Nomulamu abulaho Nyasaye wundi owulali Ye , khomumulaame mubutwenufu, oluyali nilwa Nyasaye Omulesi webilonje bioosi

Boola mbu: “ toto esie ndakanibwa okhulaama biamulamaanga ebilali Nyasaye , olwa obulafu bwanzitsila okhurula khu Nyasaye wanje Omulesi ne elomesibwe okhwilekhula khu Nyasaye Omulesi webiloonje bioosi

Niye wabaloonga okhurula khwiloba, okhutsia khu amaatsi kolwibulo , okhutsia okhuba lilika lia matsayi, okhula shingala murulamwo abatoro, okhula shingala muula abakali, okhula shingala muba abakofu, ne mwinywe baliho abafwitsanga nibashili abatiti ne boosi boole khubise biabalachilwa, kho munyoole okhupara

Niye ulamusinjia ne niye ufwisiinjia , ne niyenya okhukhola likhuwa aboolanga butswa mbu: “ ba” niliba

Shololanga balia bayingananga khubimanyisio bia Nyasaye balinjibungwa hena

Nebalia bakhaya eshitabu nende kalia kakhwaruma Abarumwa befu, balitsa okhumanya

Olwa baliboywa mwikosi mwabu emikoye nende eminyororo, nibakhwesulululwa

Mumaatsi kayia pa (hamiim) mana basambwe mumulilo

Mana baliboolelwa mbu: “bali hena abamwasaanjinjia ninabo

Abalali Nyasaye.” Baliboola mbu: “bakhukorerekhwo halali shikhwalaamanga shiosi shiosi inyuma wefu tawe” Endio nilwa Nyasaye akosinjia Abakhayi

Ako nilwokhuba mbu mwasangalanga khushialo khunjila ilali ya habwene nende shingala mwelolanga

Injile mumiliango chia Jahannamu, mumenyemwo tsinyanga tsioosi, ni eshimenyo eshibi shili shirie khubafuru

Kho wisumilisie toto aka Nyasaye yalaka kaliba, ne nikhukhwechesia khu kalia kakhwabalaka nohomba nikhukhufwisia , ne nikhwifwe butswa niwo abalikalukha

Ne toto khwaruma Abarumwa imbeli wuwo, abandi khwakhuboolela ne abandi bakhulakhuboolela, ne Omurumwa shiyakharerere eshimanyisio shiosi shiosi halali khubunyali bwa Nyasaye, mana lilako lia Nyasaye lwaliliitsa lilibusibwa khubwatoto ne awo Abakori balisikha

Nyasaye niye wabalonjela ebiruche ebindi bibachingenge ne ebindi mulitsenje

Ne munyoola obukhoonyi khubio, ne bibamalilanga obusiro buli mumioyo chienyu, ne muchingungwa khubio nende biomumatsi muchingungwakhwo

Ne abechesinjia ebimanyisio bibie , kho nibimanyisio shina biamukhayanga

Shibachendangakhwo khushialo mana balola indukho yabalia abali imbeli wabu, bali abaanji , nende amaani amanji nende ebikhole ebikhongo khushialo okhubashila. Ne koosi kabakholanga shikabakhoonya shiosi shiosi tawe

Olwa Abarumwa babu babetsela nende ebilolelo bia habulafu, basaangalila okhurulana nende obumanyi bwa baali ninabwo, mana nikababotokhana kalia akabakholelanga omubayo

Olwa balola eshinyasio shiefu, baboola mbu : “ khusuubiile Nyasaye mulala yenyene, ne khwikanile biakhwatsokasinjia ninabio. (Nyasaye)

Obusuubili bwabu shibwabakhoonya eshindu tawe olwabalola eshinyasio shiefu. Eyo niyo injila ya Nyasaye yabura khubasumba bebe, mana eyo Abakhayi nibasikha