Luyia - Chapter 41 - Fussilat

Ha Mim

Ameshio kano karula khu Omunji, Wetsimbabaasi Wobukoosia muno

Eshitabu shie tsinyali tsiashio tsienoosibwa, shisomungwa mulwarabu khubandu baminyile

Shisuubisia nende okhwikanyilisia, halali abanji bakhaya okhubukulamwo oluchendo, mana shibasuulilanga tawe

Ne baboola mbu: “ emieyo chiefu chiafunikhwa khukokhulanjilanga ako, ne amarwi kefu kekala, ne hakari wefu ninawe khuli nende eshikalilo, ne khola toto fwesi khukholanga.”

Boola esie endisa Omundu shinga enywe, enyolanga obufimbuli mbu toto Nyasaye wenyu ni Nyasaye mulala, kho mulunjishe khuye ne mumusabe eshileshelo, ne eshinyasio eshikhongo shilinyoola abatsokaasinjia Nyasaye

Balia balarusinjia eshihanwa tawe ne bakhaya ukhusuubila inyanga yeyindukho

Toto balia basuubila mana nibakhola amalayi bali nomurungo kulaliwa

Bola mbu: “toto enywe mukhayanga ulia waloonga eshialo khutsinyanga tsibili, ne mumusasia nende abanyasaye bandi, oyo niye Nyasaye webiloonje biosi.”

Ne yaramwo tsingulu hekulu washio, ne naramwo ikhabi, nenabalililamwo emikabo chabio khutsinyanga tsine, kano kali habwene muno khubarebanga

Mana naleng’ana khwikulu nalo nilili omwosi, naliboolela nende eshialo “ itse nimuchamile noho nimukhayile,” biaboola mbu : “ khwitsile nikhuli abarechelefu.”

Mana naloonga “ amakulu saba” khutsinyanga tsibili, mana nahana buli likulu akalio, mana nikhurona likulu lieshialo khu tsitaa tsiobulindi, esho nishio eshichelo shia Nyasaye Owamani Omumanyi muno

Ne nibalakabukulamwo oluchendo tawe, boola mbu: “ Ebekanyisilia eshinyasio sholuyoka shinga shiali sha A’ad nende Thamud

Olwa betselwa nende Abarumwa okhurula imbeli wabu nende inyuma wabu, nibaboolelwa mbu: “ mulalaame shiosi shiosi tawe halali Nyasaye.” nibaboola mbu: “ Nyasaye wefu alenya yakharumile Abamalaika, kho toto efwe khukamwarumwa ninako ako khukhayile.”

Mana Abandu ba A’ad, Bali abafuru khushialo munjila ilali yatoto tawe, mana nibaboola mbu: “ wina ushila efwe amani ? “ shibalolanga mbu Nyasaye wabaloonga ali namaani okhubashila, Ne bakhayanga ebimanyisio biefu

Mana nikhubarumila omuyeka kweyimbumbuyeka, khutsinyanga tsiamasila, kho banyoole okhupila eshinyasio shiokhubafulafusia, mubulamu bwokhushialo, ni eshinyasio shie indukho ni shokhufulafusia okhukhongo okhushila, Nabo shibalihabinwa tawe

Ne Abandu ba Thamud khwabalunjisia halali nibachama obuwofu okhushila obulunjifu, mana omulilo kweshinyasio shieshifulafusio, nikubabukula khu kalia kabakholanga

Mana nikhuhabina abasuubila abali nibaria Nyasaye mubo

Ne inyanga yabasuku ba Nyasaye balikhung’asibwa mumulilo, nibakabulwa mumikanda chaukhane

Olwa balikulakhwo (omulilo oko), amarwi kabu nende tsimoni tsiabu nende amaseelo kabu bilirusia obuloli khu koosi pe kabakholanga

Ne balireeba amaseelo kemibili chiabu mbu,: “ shina shichila noyinia obuloli khwifwe ?” kaliboola mbu: “ Nyasaye okhulomalomiyie owulomalominjia buli eshindu Naye niye awamulonga olwokhuranga na iwuwe namulikalukha.”

Shimwali nimunyala okhwifisa tawe, kho amarwi kenyu nende tsimoni tsienyu nende amaseelo kenyu akhubarusilia obuloli, halali mwaparanga mbu toto Nyasaye shiyamanya amaanji kamukholanga tawe

Ako niko amaparo kenyu, kamuparire Nyasaye wenyu Omulesi, kamusishiye, mana nimuba mubalia abatiba

Ne nibefwila, omulilo nisho eshimenyo shiabu, ne nibasaba eshileshelo shibaleshelwa tawe

Mana nikhubelesia abetsa, mana nibabaronela ke imbeli nende inyuma wabu, mana likhuwa nilibusibwa khubo , babe halala nende amahanga kabura imbeli wabu, okhurulana nende Amajini nende Abandu, toto abo nibaba bokhusikha

Ne Abakhayi baboola mbu: “ mularechelesia Ikurani ino tawe, ne khupe oluyoka mwakhaba murio mwashila.”

Mana toto khulabakhofia eshinyasio eshilulu balia bakhaya, ne toto khulabarunga omurungo omubii khukabakholanga

Oko niko omurungo kwa basuku ba Nyasaye, Omulilo, Omo shiliba eshimenyo shiabu tsinyanga tsiosi, omurungo kwabu khukalia kabakhayanga ebilolelo biefu

Ne abakhayi baliboola mbu: “Nyasaye wefwe Omulesi khwechesie balia bakhukosinjia mu Majini nende Mubandu, khubakhole babe hasi webilenje bwefu khobabe khu bandu bahasi muno.”

Efwe khuli abahelwa benyu khubulamu bwokhushialo nende mwikulu, ne bilimwo biosi pe bie mioyo chenyu chikombanga, ne omo mulinyoolamwo bioosi biamwenya

Obucheni okhurula khu Nyasaye Amulesheli muno, wobukoosia po

Ne wina oyo wamakhuwa amalayi muno, okhushila ulia ulanganga khu injila ya Nyasaye , mana akhole amalayi, mana aboole mbu endi halala nabasalamu

Obulayi shibuyelana nende obubii tawe, runga obubii nende lilia lilayi, kata bibe shinga ulia woli naye obusuku ni omwitsawo wa mbusia ngonie

Ne shibakhanyoola obulayi buno tawe halali balia bokhwifwila, ne shiyakhanyoola tawe halali ulia weyikhabi ikhongo

Ne shetani nakhubeyia beyia neshibeyibeyi wishinje khu Nyasaye, toto ye niye Omuwulili, Omumanyi muno

Ne mubimanyisio bibie ni eshilo nende eshitere nende eliuba nende omwesi, mulenamila eliuba nohomba omwesi tawe, ne inamile Nyasaye wabiloonga toto nimumulaamanga yenyene

Ne nibafura, manya mbu bioosi ebili ewa Nyasaye bimwitsoominjia eshilo neshitere, nabio shibichong’anga tawe

Ne mubimanyisio bibie , toto ewe ololanga liloba ( liniongofu) liabuyukha ne nikhulirakhwo amatsi olola nilirenga imirombo nichirulamwo, toto ulia uwalilamusia niye ulilamusia abafu, toto ye ni Omunyali wa buli eshindu

Toto balia bakoyasinjia obwatoto buli mubimanyisio biefu shibakhakhwifisila tawe, kho ulia ufubwa mumililo ali obulayi okhushila ulwa witsa nomulembe inyanga yeyindukho? khole shamwenya toto ye alolanga muno kamukholanga

Toto balia bakhaya ametsulisio olwa kabetsela, ( balisishibwa) ne toto neshitabu shiamani shioluyali

Obukori shibwakhashitsila okhurula inyuma washio noho imbeli tawe, sheshibwa nende Omuchesi witsomibungwa muno

Koboolelungwa kano ni kalia kaboolelwa Abarumwa betsa imbeli wuwo. Ne toto Nyasaye wuwo Omulesi ni umelesheli ne ni mwene eshinyasio eshilulu

Ne khukholanga Ikurani ino mulusungo olucheni bakhaboolele mbu : “shichila shina tsinyali tsiayo nitsilaba tsinzaukhania ? lwakhaba lurie olusungo olucheni naye Omurumwa nomwarabu ?” Boola: Ikurani ino ni obulunjifu nende eshinyisio khu usuubila. Ne balia balasuubila mumarwi kabu baramwo tsimbale, nabo khuyo nabawofu, abo balangungwa nabo bali ehale

Netoto khwarumila Musa eshitabu, mana nibaukhanamwo, ne lilabetsanga likhuwa liaranjilila okhurula khu Nyasaye wo Omulesi, bakhabusilibwe, ne toto abo bali mushibeyibeyi shiobuyendi

Owukhola amalayi akholela omwoyo kukwe, ne ukhola amabii kali khumwoyo kukwe ne Nyasaye wuwo shakholelanga Omundu amabii tawe

Obumanyi bwokhumanya inyanga yeyindukho bukalusibwa butswa khuye (Nyasaye) ne ebiamo shibirulanga mubimuli biabio, nahomba omukhasi shiyakhabelekha inda nohomba yebule halali Nyasaye yamanya. Ne inyanga yabalilanga mana abareebe mbu: “ bali hena abamwasanjinjia ninabo?” baliboola mbu: “ khufuchilila mbu abulaho yesiyesi mwifwe uyinia obuloli khukano”

Mana nibabakorakhwo balia ababalamanga ne nibaba nende obwatoto mbu babula abelushila

Omundu shachonga’nga okhusaba amasayo amalayi tawe, ne amabii nikamunyoola afwa omwoyo

Ne nikhumukhofwa tsimbabaasi tsiefu niyakhamala okhunyakhanakhwo, toto alaboola mbu: “ kano niko kekhoyeshele, ne shembara indukho nilibaho tawe, ne nengalusibwa khu Nyasaye wanje Omulesi, toto esie endi nende obulayi ewuwe,” khuliboolela abakhayi kabakholanga, ne toto khuli bahelesia eshinyasio eshisiro

Ne nikhuhelesia Omundu obwokholo, akalukhana nakhupila Abandu likosi, ne amabii nikamunyoola asaba amasayo amarambi

Boola mbu: “ mulola murie nikali kano mbu karula khu Nyasaye, mana mukakhaye, ni wina omukori muno okhushila ulia wamainji kali ehale.?”

Khulabechesia ebimanyisio biefu hekulu , nende mumioyo chiabu, okhula kamanyikhane khubo mbu kano nikatoto” , koo shikakhuyela tawe mbu Nyasaye wuwo nomuloli wabuli eshindu

Manye mbu toto abo bali mutsinganakani khukhubukanana nende Nyasaye wabu, Manye mbu toto Nyasaye yatererera buli eshindu