Luyia - Chapter 42 - Ash-Shura

Ha mim

Ayn Sin Qaf

Endi nilwa akhufimbulila obufimbuli ewe nende abaliho imbeli wuwo, Nyasaye Owamaani Owamachesi muno

Nebibie bili mwikulu nende mushialo, naye niye Owoluyali Omukhongo

Likulu likhaaba okhwatikhana mwo hekulu eyo, ne Abamalaika betsoominjia Nyasaye wabu Omulesi nibamuwa oluyali, ne basabilanga bali khushialo eshileshelo, Manya mbu Nyasaye niye Omulesheli Owobukoosa muno

Ne balia abakhola abalindi bandi abalali Ye tawe, Nyasaye niye Omulindi wabu, ne ewe sholi omuhabini wabu tawe

Ne endio nilwakhwakhufimbulila Ikurani mulusungo lwo lwarabu, kho wikanyilisie Abandu ba nyina tsingongo (Makka,) nende abali mutsimbeka tsiayio, ne okanyilisie inyanga yokhukhung’asibwa Abandu boosi ibula obukanakani tawe, Omukanda kundi kuliba mwikulu ne ukundi kuliba mumulilo

Ne Nyasaye yenyanga yakhabakholele boosi omukanda mulala, halali yenjisinjia owayenya mutsimbabaasi tsitsie, ne ababii shibaliba nende omuliindi nohomba omukhonyi tawe

Nohomba babukula abaalindi bandi abalali Nyasaye, Ne Nyasaye niye omulindi naye niye ulamusinjia abafuu, naye niye Omunyali wabuli eshindu

Ne shiosi shosi shiamwawukhanamwo, obukhalachi bashio buli khu Nyasaye, oyo niye Nyasaye Omulesi wanje, niye wandisikanga ne ni ewuwe ni andilikalukha

Omulonji welikulku nende eshialo, niye owabaloonga omukhasi no musatsa, nende tsisolo tsiosi tsirio, abametelelangakhwo ario, shibulaho shoisi shiosi shifwanana naye, naye ni Omuwulili Omuloli muno

Niye mwene tsifunguo tsielikulu nende eshialo, ahelesinjia owayenyele omukabo omunji ne alonga owayenya, toto ye ni Omumanyi wabuli eshindu

Nyasaye yabalachila mudini ka yalachila Nuh nende kakhwakhufimbulila ewe, nende kakhwalachila Ibrahim nende Musa nende Yesu, mbu mutile idini ne mulakabukhana khuyo tawe, ni amasiro khubatsokaasi kobalanjilanga ako, Nyasaye alobolaanga ewuwe wayenya, na alunjisinjia ulunjikha khuye

Ne khwako, balanje, ne lunjikha shinga walomesibwa, ne alaloonda okhwenya khwabu tawe, ne boola mbu : “esuubile ka Nyasaye yeshia mubitabo, ne elomesibwe okhukhola abuleng’afu hakari wenyu, ne Nyasaye niye Omulesi wefu nende Omulesi wenyu, khuli nende ebikhole biefu, nanyu muli nende ebikhole bienyu, liakhuyinganilakhwo libulaho hakari wefu, ne Nyasaye alikhukhung’asia fwesi halala, ne ewuwe nakhulikalukha.”

Ne balia bayingananga khu Nyasaye nibamalile okhufuchililwa, okhuyingana khwabu nokhukhaya imbeli wa Nyasaye wabu Omulesi, ne basinyishilwa ne bali nende eshinyasio eshilulu

Nyasaye niye weshia eshitabu khubwatoto nende eshichelo, ne ni shina shiokhumanyia mbu indukho ili ahambi

Abalasuubila bayungubasinjia benya mbu yitse lwangu, ne abasuubili bayiria ne bamanya mbu toto niyahabwene, koo manya mbu, balia bayingana inyanga ye indukho eyo, bali mubukori abwa ehale muno

Nyasaye nomwihotselefu khubasumba bebe, akabanga omukabo owayenya, naye niye Owamani Owoluyali muno

Yesi yesi wenya lichesa lwomwikulu khulamumetela khwo, ne ulia wenya lichesa liokhushialo khulamuhelesia, ne abula shiosi shiosi mwikulu

Nohomba bo bali nende abanyasaye babatsokaasinjia, babakaasilia amalako keyidini ya Nyasaye alabafuchilila tawe, ne likhayanga okhuba likhuwa liokhwaukhasia bakhakhalachilwe, ne toto ababii bali nende eshinyasio eshilulu

Olilola aboononi nibali abari khukabakhola, nako kaliboolela butswa, nebalia basuubila mana nibakhola amalayi baliba mumikunda chio mwikulu, baliba nende shiabenya shiosi shiosi imbeli wa Nyasaye wabu Omulesi, okho nikhwo okhubura okhukhongo

Ako niko ka Nyasaye asuubisia Abasumba bebe basuubila mana nibakhola amalayi, Boola mbu: “esie shebarebanga omurungo kwosikwosi tawe halali obuheli khubeekho, ne ukhola lilayi khumumetela lilayi,” toto Nyasaye nomulesheli wokhukalusia orio ikhongo muno

Nohomba baboolanga mbu: “ akatilinjia Nyasaye kabulaho,” Ne Nyasaye niyenya nara eshimanyisio khumwoyo kwo, na Nyasaye yosia obukori ne atinyisia abwatoto khumakhuwa keke, toto ye ni Omumanyi muno khukali mubilifu

Naye niye (uchamilanga/ufuchililanga) weshilesholoshia Abasumbabe, nealeshelanga tsimbi ne yamanya muno akamukholanga

Ne niye afuchililanga balia basuubila mana nibakhola amalayi, ne abametalanga tsimbabaasi tsitsie, ne abakhayi bali neshinyasio eshilulu

Ne Nyasaye ahelesinjia Abasumba bebe omukabo omunji bakhafurire khushialo, halali yeshinjia khushichelo shiayenya, Toto ye yamanya obulayi Abasumba bebe ne abalolanga

Naye niye (ureranga/ owishinjia) ifula, Abandu nibawesiyekhwo omwoyo, ne aswaninjia tsimbabaasi tsitsie naye niye omulindi witsomibungwa muno

Ne mubimanyisio bibie okhulongwa khwelikulu nende eshialo, nende bayaswaniamwo bilala khubio tsisolo, naye alinobunyali bwokhukhung’asia niyenya

Ne amasila kosikosi kamunyoola karulana nende kemikhono chienyu chikholele, ne aleshelanga amanji

Ne enywe shimwakhashila khushialo tawe, ne mubula umulindi nohomba ubakhonya ulali Nyasaye tawe

Ne mubimanyisio bibie ni ebiilukhanga khumatsi nibitsia nibikalukha shinga tsingulu

Niyenya ayenzesia omuyeka, ni bitong’a halala nibiemele khunyanza, toto muako khulimwo nende ebimanyisio khubuli wisumilisia omukhupi muno wa orio

Nohomba abitibie mumatsi, khukabakhola ne aleshelanga amanji

Nekho bamanye balia bayingana khubimanyisio biefu mbu babula habundu abelushila

Ne biosi biamwahebwa ni omwikhoyo kwobulamu bwokhushialo, ne bili ewa Nyasaye nebilayi bilaliwa tawe, khubalia basuubila mana nibesika Nyasaye wabu Omulesi yenyene

Ne balia beyikalilanga abionono ebikhongo, nende eshifwolo, nenibasinyisibwa baleshelanga

Nebalia bafuchililanga Nyasaye wabu Omulesi mana balaamanga khatsotso, ne amakhuwa kabu basanjilananga, ne khubia khubakabalile barusinjia

Nende balia olwabakholelwa obusuku, behabinanga

Ne omurungo kwa amabii, ni amabii shinga ako. Kho ulia uleshela, mana yakasia omulembe omurungo kukwe kuli khu Nyasaye, toto ye shiyayanza abetsimbi tawe

Ne balia behabinanga nibakholelwe amabii, babula injila yokhufunaanibwa

Bafunaanibungwa nibalia bakholelanga Abandu amabii, ne bafuranga khushialo munjila ilali yatoto tawe, abo balinyoola eshinyasio eshilulu

Ne ulia wifwila mana yaleshela, toto ako niko amakhuwa kenyekha

Ne wa Nyasaye alekha yakora, abula omulindi ulali ye, ne olilola abamabii olwa balilola eshinyasio, baliboola mbu: “ilikhowo injila yosiyosi yakhunyala okhukalusibwakhwo?”

Olibalola nibayilwa mumulilo, nibewotselesiye mubuteshele, bahenganga mefisi, ne Abasuubila baliboola mbu: “ Toto balia abasikha nibasishia emioyo chiabu nende Abandu babu inyanga yeyindukho” koo manya mbu toto balia betsimbi baliba khushinyasio shilaliwa tawe

Ne shibaliba nende abalindi babahabina tawe halali Nyasaye, ne owa Nyasaye alekha akore, oyo abula injila yosiyosi

Fuchilile Nyasaye wenyu omulesi, Inyanga ileyikalila nishili okhuboolela irulanga khu Nyasaye, shimuliba nende amwilushila tawe, ne shimuliba nende ashibekalila tawe

Ne nibakhaya efwe shikhwakhuruma obe omulindi wabu tawe. Shi Kali khu iwe halali okhusia butswa oburume, ne toto efwe nikhukhofwa omundu tsimbabaasi okhurula khwifwe atsisangalila. ne obubii nibumunyoola khu kakholele omwene, toto Omundu oyo akhayanga muno

Obwami bwemwikulu nende khushialo ni bwa Nyasaye, olonganga shinga yenya, ne ahelesinjia owayenya Abana abakhana, ne ahelesia owayenya abasiani

Nohomba amusaasilie abasiani nabakhana, na akhola owayenya okhuba omukumba toto ye Nomumanyi Omunyali muno

Ne Omundu shiyakhalomaloma nende Nyasaye tawe halali khubufimbuli, nohomba inyuma weshiikalilo, nohomba arume Omurumwa ne amufimbulila khubunyali bwe shiayenya, toto ye niwa hekulu Owamachesi muno

Ne endio nilwakhwakhufimbulila ikurani, khubunyali bwefu, shiwali niwamanya ni shina eshitabu nohomba obusuubili, halali nikhushikhola obulafu, khulunjisia khusio (owakhwenya/ owakhuchamile) mubasumba befu, ne toto ewe ulunjisinjia khunjila ingololofu

Injila ya Nyasaye wabiosi bio mwikulu nende biokhushialo nebibie, koo manye mbu amakhuwa koosi kalikalukha khuNyasaye