Luyia - Chapter 48 - Al-Fath

Toto efwe khwakhwikulila obushili bwa habulafu

Kho Nyasaye akhuleshele ebionoono bibio biawaranjilila nende biawamalilikha, ne akhwitsusilie tsimbabaasi tsitsie, ne akhulunjisie khu injila ingolofu

Ne akhuhabine obuhabini bwa amani

Niye weshia obuyeenzefu mumioyo chia basuubili kho anyoole okhubameeta obusuubili hekulu wobusuubili bwabu, ne omukaanda kwabalwani bo mwikulu nende bo khushialo ni kwa Nyasaye, ne Nyasaye niye Omumanyi po Owamachesi muno

Khoyenjisie Abasuubili Abasatsa Nabakhasi mwikulu mumikunda chiburangamwo emialo, balimenyamwo thsinyanga tsiosi, mana abaleshele tsimbi tsiabu, ne okho imbeli waNyasaye nikho okhubura okhukhongo

Ne abahelesie eshinyasio abeshikhabili, abasatsa nabakhasi, nende abatsokasinjia Nyasaye abasatsa nabakhasi abapariranga Nyasaye amaparo amabii, kuliboolela omukalukhano omubii, Ne Nyasaye yabasinyishila, mana nabatsuba, nenabarecheshela omulilo kwa Jahannam, ne ni amakalushilo amabii muno

Abalwani beliyie bo mwikulu nende bomushialo ni baNyasaye ne Nyasaye Niwamani Owamachesi muno

Toto efwe khwakhuruma obe Omuloli, Omusuubisia, Omwikanyilisi

Kho musuubile Nyasaye nende Omurumwa wuwe, ne mumukhoonye, ne mumwe eshiribwa, ne mwitsomie Nyasaye itsuli nende ingolobe

Toto balia bakhunganga omukhono toto bonganga Nyasaye omukhono. Omukhono kwa Nyasaye kuli hekulu wemikhono chiabu, ne ulia ufunakanga indakano, afunaka khulwo okhumisia omwoyo kukwe, ne ulia okhola kayalaka Nyasaye, alamuha umurungo omukhongo

Ababeduwi (abamenyi bomumasokholio) batong’a inyuma balakhuboolela mbu :“Omwandu kwefu nende Abandu befu bakhutiyisiye, kho khusabile eshileshelo,” baboolanga netsinimi tsiabu akalali mumioyo chiabu, boola mbu: “ ni wina unyala okhumukhoonya imbeli wa Nyasaye ni yenya okhubaha eshinyasio nohomba niyenya okhubaha amalayi, ne Nyasaye amanyile muno kamukholanga

halali mwapara mbu Omurumwa nende Abasuubili shibalakalushila Abandu babu tawe, mana nikabasangasia emioyo chienyu, mana ni mupara amaparo amabii, mana ninuba Abandu baasikha

Ne ulasuubila Nyasaye nende Omurumwa wuwe, toto efwe khwarecheshela abakhayi omulilo omululu

Obwami bwo mwikulu nende mushialo nibwa Nyasaye, aleshelanga wayenya ne asandia wa yenya, ne Nyasaye ni omunji wobulesheli omukoosia muno

Ne abatonga inyuma baliboola mbu “ Nimutsia okhubukula omwandu kweliyie (ghanima) mukhuleshe khutsie ninanyu, benyanga okhukalukhania amakhuwa ka Nyasaye, boola shimulakhulondokhwo tawe, endio nilwa Nyasaye yamala okhuboola imbeli, kho balaboola mbu : “enywe mulineshikhalikhali ninafu,” halali shibali bamanya tawe halali hatiti

Boolela batong’anga inyuma mubamenyi bomumasokholio “baduwi” mwitsa okhulangwa mulwane nende Abandu ba amani po, mulwane ninabo nohomba balonde amalako, ne nimuwulila mwaloonda Nyasaye alabarunga omurongo omulayi, ne nimukhaya shinga mwaranjilila okhukhaya, Nyasaye alabaha eshinyasio eshilulu

Omuwofu shafunanibwa tawe, nohomba omulema, nohamba omulwale, ne uloonda ka Nyasaye nende Omurumwa wuwe Nyasaye alamwinjisia mwikulu mumikunda chibura hasi wachio emialo, ne ukhaya alamuhelesia eshinyasio eshilulu

Toto Nyasaye yafuchilila Abasuubili olwa bakhuunga omukhono hasi womusaala, Nyasaye namanya kali mumioyo chiabu, mana nabeshilia obuyeenzefu, ne na barunga obushili bwahambi

Nende omwandu kweliyie omunji kwabalabukula, na Nyasaye niwaamani owamachesi

Ne okundi (yetsa okhubahelesia) kwamushili okhunyoola tawe, Nyasaye yamala okhukabotokhana, Ne Nyasaye ni Omunyali wabuli eshindu

Ne abakhayi balwananga ninanyu bakhelushe nibakalukha inyuma, mana shibakhanyoolele owubalinda nohomba ubahabina tawe

Omulukha kwa Nyasaye kwabura khale, ne sholinyoola mumulukha kwa Nyasaye obukalukhani tawe

Ye niye wekalila emikhono chiabu okhuboolakhwo, ne emikhono chienyu okhuboolakhwo, mulitokha lia Makka, niyakhamala akhubaha enywe obushili khubo, ne Nyasaye alolanga po kamukholanga

Abo nibo bakhaya, mana nibabekalila okhwinjila mumusikiti kwoluyali, ne nibekalila ebisashilo (ebiayo biokhusinzwa) okhuula habundu wabio. Ne babulanga okhuba abasatsa abasuubili nende abakhasi abasuubili, abamulamanyile tawe, mwakhalwanile ninabo, mana mwenjila mububii okhurulana ninabo nimulamanyile tawe. Nyasaye (akholele kano ) khoyenjisie owayenya mutsimbabaasi tsitsie, ne bakabukhananga khwakhahele abakhayi eshinyasio eshilulu

Olwa abakhayi bara mumioyo chiabu oburuma, oburuma bwobusilu, mana Nyasaye niyeeshia obuyeenzefu khu Murumwa wuwe nende khubasuubili, ne nabalomesia likhuwa lwokhumuria, ne toto nibo bali bakhoyeshele abeenelio, ne Nyasaye yamanya muno buli eshindu

Ne toto Nyasaye yakhola amaloro komurumwa wuwe okhuba katoto. Toto mulenjila mumusikiti kwoluyali Nyasaye nachama – mumulembe, nimubechele imirwe chienyu nohomba nimututuyie liswi. shimularia tawe, mana yamanya kamulamanya tawe, mana nabaha imbeli wakano obushili bwahambi

Niye waruma omurumwa wuwe khubulunjifu nende idini yatoto, kho iyihe uluyali khutsidini tsiosi ne Nyasaye niye Omuloli uyela

Mohammad ni Omurumwa wa Nyasaye, ne balia bali halala ninaye bali nende amani khubakhayi, nebabeelanilanga tsimbabaasi abeene khubeene. olabalola nibeenama (nibasujuda) nibarahasi obweni – okhulaama ne nibakoonya tsimbabaasi nende obuchami bwa Nyasaye. Ibimanyisio biabu bili khubweni bwabu, okhurulana nende okhurahasi emirwe chiabu nibasujuda. Endio nilweyifwani yabu mutawurati nende ifwani yabu mu Injili. Ne ifwani yabu mu injili bali shinga omumela kwarusia imbandu yakwo, mana nikuyelesia amaani, nikunera, nikwema obulayi namasafu kakwo, mana nikusangasia abalima, kho kusinyisie khukwo abakhayi, Nyasaye yalaka balia abasuubila mana nibakhola amalayi mubo, obulesheli nende omurungo omukhongo