Luyia - Chapter 59 - Al-Hashr

Bitsoominjia Nyasaye biosi bili Mwikulu nende bili Mushialo, Naye Niwamani Owamachesi muno

Niye warusia Abakhayi okhurula mu balia bahebwa eshitabu Mutsinzu tsiabu, ebise biokhuwuya khwa ambeli, shimwaparakhwo mbu banyala okhurula tawe, nibapara mbu tsingoba tsiabu tsilabaliinda khu Nyasaye, halali Nyasaye yaboolela munjila yabalamanyile tawe, nara amayendo mumioyo chiabu, basambulanga tsinzu tsiabu nemikhono chiabu, nende emikhono chiabasuubili, khoparemwo enywe abetsimoni

Ne naba mbu Nyasaye shiyabahandichila okhurula tawe yakhabahelesiye eshinyasio khusialo ne inyanga imalilishi bakhabe nende eshinyasio shio mumulilo

Ako nilwokhubeela mbu booma omirwe khu makhuwa ka Nyasaye nende Omurumwa wuwe, ne ulia wumila Nyasaye omurwe , toto Nyasaye niweshinyasio eshilulu

Omusala kwosikwosi kwamuremele, nohomba kwamuleshele nikwemele khushisina shiakwo, nikhubunyali bwa Nyasaye ne abonooni bafimbwe omurwe

Ne omwandu kwa Nyasaye yahelesia omurumwa wuwe okhurula khubo, shimwakulwanila okhwikhonyela tsifarasi nohomba tsingamia tawe, halali Nyasaye ahelesinjia Abarumwa bebe obunyali khu yesi yesi wayenya ne Nyasaye nomunyali wabuli eshindu

Ne omwandu kwa Nyasaye yahelesia Omurumwa wuwe okhurula khubandu betsingongo, nikwa Nyasaye nende Omurumwa, nende Abeekho, nende Abafwilwa, nende Abamanani nende bananjila, kho kukhaye okhubotokhana khubayinda mwinywe, ne shia Omurumwa abahelesia mubukule ne shiabakaya mushileshe, ne murie Nyasaye , toto Nyasaye niweshinyasio eshilulu

Nikwa Abamanani abawuyi abaloondwa mutsinzu tsiabu nibanulwa omwandu kwabu, bakhabanga amalayi, okhurula khu Nyasaye wabu, nende obuchami, ne bahabinanga Nyasaye nende Omurumwa wuwe, abo nibo abatoto

Ne balia bali namatala nende obusuubili imbeli wabu, bayanza balia babawuyilamwo ne shibali nobwimani mumioyo chiabu tawe khushabahelesibwa ne beyimanga kata nibali mbu bo nibakhoyeshele, ne ulia wikalila obwimani bwo mwoyo kukwe, abo nibo ababura

Nebalia betsa inyuma wabu baboolanga mbu Nyasaye khuleshele efwe nende Abana befu abakhuranjilila mubusuubili, ne olara mumioyo chiefu ishinda khubalia basuubila tawe, Nyasaye wefu toto oli Omwihotselefu Owetsimbabaasi muno

Shololangakhwo balia abefisa mubasuubila baboolelanga abashiabwe abakhayi mubandu bahebwa eshitabu mbu: “Nimurusibwa khularula halala ninanyu, ne shikhularia mwinywe yesiyesi tawe, ne nimukhuywa khulabahabina.” Ne Nyasaye ali nende obwatoto mbu bakatinjia

Nibarusibwa, shibalarula halala ninabo tawe ne nibakhuywa shibalabahabina tawe, nenibaba bahabina balabelukha mana shibalabahabina tawe

Toto enywe muli eshirisio eshikhongo mumioyo chiabu okhushila Nyasaye, ako ni khulwa okhuba mbu bo ni Abandu balamanyile shiosi shiosi tawe

Bali shinga balia bali imbeli wabu hatiti, Batemwa amakhuwa kabu nikabiya, mana balinyoola eshinyasio eshilulu

Shinga shetani olwayaboolela Omundu mbu khaya, olwa yakhaya yaboola mbu : “esie endi ehalee ninawe esie ndaria Nyasaye Omulesi webilonje biosi.”

Ne niiba indukho yabu mbu totobo balimumulilo tsinyanga tsiosi , ne oko niko omurungo kwa Abonooni

Enywe balia basuubila, rie Nyasaye Ne buli shia mundu ahenge nishina shiayekasiliyie mutsuli, ne murie Nyasaye, Toto Nyasaye nomumanyi po khukamukholanga

Ne mulaba shinga balia bebilila Nyasaye mana nabakhola nibeyibilila, Abo nibo abashiamu

Shibayelana tawe Abandu bomulilo nende Abandu bo mwikulu, Abandu bomwikulu nibo abalibura

Khwishinjia Ikurani ino khulukulu wakhalulutsi niluriire nilwatikhana khulwokhuria Nyasaye, ne endio nilwakhuchelasilinjia Abandu bakhaba bario banyoola okhupara

Ye niye Nyasaye, Neabulaho Nyasayewundi tawe halali ye, Omumanyi wakefisa nende kalolekha, naye ni Omunji wetsimbabaasi Omukoosia muno

Naye Niye Nyasaye abulaho owundi halali ye, Omwaami, Woluyali , Womulembe, Omureri Womulembe, uyilanga amakhuke Omwene, Owaamani , ukholonga liayenya, omukhongo, Ni Omutswenufu khubamumuretsanga khwo

Naye niye Nyasaye Omuloonji, Omukaasi, uretsangakhwo obukoondo, ali nende ameera amalayi, bimwitsominjia biosi bili Mwikulu nende mushialo naye niye Omushili, Owamachesi muno