Luyia - Chapter 61 - As-Saf

Bitsoominjia Nyasaye biosi bili mwikulu nende mushialo, naye niye Omwami, Owamachesi muno

Enywe Abasuubili, shichila shina ni muboolanga akamulakhola tawe

Ni eshisinyo eshikhongo imbeli wa Nyasaye okhuboola kamulakhola

Toto bwene Nyasaye yayanza balia abalwananga khu injila yiyie khulunyaali shinga lisisi liatilana

Ne Olwa Musa yaboolela Abandu bebe mbu: “Enywe Abandu banje shichila shina musinyisinjia, ne toto mwamanya mbu esie endi Omurumwa wa Nyasaye khwinywe?” ne olwabatsililila nobubii bwabu, Nyasaye yalekha emioyo chikore, ne Nyasaye shalunjisinjia Abandu abakori tawe

Yitsulila Olwa Yesu Omwana wa Mariam yaboola mbu : “Enywe Abana ba Israel esie endi Omurumwa wa Nyasaye khwinywe, efuchilila obwatoto bwendi nabo okhurula mutaurati, nende okhubalachilisia Omurumwa unondakhwo ulangwa mbu Ahmed, olwa yabeetsela baboola mbu buno nobulosi bulolekha

Benyanga okhusumia obulafu bwa Nyasaye ne minwa chiabu, ne Nyasaye alatinyia abulafu bubwe kata abakhayi nibafimba

Niye owaruma Omurumwa wuwe nende obulunjifu nende idini ya toto ilolekhane habulafu okhushila tsi dini thindi, kata Abatsokaasi nibafimba

Enywe Abasuubili, abamanyiekhwo inganga yitsa okhubahonia nende eshinyasio eshilulu

Musubilenje Nyasaye nende Omurumwa wuwe, ne mukhalabanenje khunjila ya Nyasaye khu miandu chienyu nende emioyo chienyu ako ni amalayi khwinywe nikaba mbu mwakhamanya

Alabaleshela ebionoono bienyu, ne alabenjisia mwikulu mumikunda chiburanga hasi wachio emialo nende eshimenyo eshilayi mumukunda kwa Eden, okho nikhwo okhubura okhukhongo

Ne eshindi shibachamisia, obukhoonyi okhurula khu Nyasaye nende obushili buli hambi, ne suubisia Abasuubili

Enywe Abasubili mube abahabini ba Nyasaye, Shinga Yesu yareeba abechi bebe, mbu niwina umuhabini wanje khu Nyasaye ? abechi be nibaboola mbu Efwe khuli abahabini ba Nyasaye” Mana nikusuubila omukanda okhurula mubana ba Israil, ne okundi nikukhaya, kho nikhukhoonya kulia okwasuubila khubasuku bakwo, nikushila