Burmese - Chapter 25 - Al-Furqan

၁။ အရှင်မြတ်၏ ကျေးကျွန်တမန်တော်အား အမှားနှင့်အမှန်ကို ခွဲခြားဆုံးဖြတ်ဖို့ရာ စံနှုန်းကျမ်းတော်ကို ထုတ်ပြန် ပို့ချပေးသနားတော်မူသောအရှင်မြတ်သည် မင်္ဂလာအဖြာဖြာနှင့်ပြည့်စုံတော်မူပါ၏၊ ယင်းသို့ထုတ်ပြန်ပေးသနား တော်မူခြင်းမှာ တမန်တော်သည် လူသားအပေါင်းတို့သို့ သတိပေးသူဖြစ်ရန်အလို့ငှာဖြစ်၏။

၂။ အရှင်မြတ်သည် မိုးမြေနိုင်ငံတော်ကြီးကို စိုးပိုင်တော်မူ၏၊ အရှင်မြတ်၌ သားသမီးမရှိချေ၊ အချုပ်အချာအာဏာ ၌ အရှင်မြတ်မှာ ဘက်စပ်ပူးပေါင်းသူအလျဉ်းမရှိချေ၊ အရှင်မြတ်သည် အရာဝထ္ထုတိုင်းကို ဖန်ဆင်းတော်မူ၏၊ ၎င်းကို တိကျအောင်စီမံထားတော်မူ၏။

၃။ သို့ပါလျက်သူတို့သည် အလ္လာဟ်အရှင်မြတ်မှတပါး တစ်စုံတစ်ရာမဖန်ဆင်းနိုင်ပဲ မိမိပင်လျှင် ဖန်ဆင်းခြင်းခံ ရသောဘုရားတုများကို ဆည်းကပ်ပူဇော်ကြ၏၊ ထိုဘုရားပျက်တို့သည် သူတို့အတွက်ပင်လျှင် အကျိုးအပြစ် မပြုစွမ်းနိုင်ချေ၊ သေခြင်း၊ ရှင်ခြင်း၊ သေသူကို ပြန်ရှင်စေသောအာဏာစသည်တို့ကို မပိုင်ဆိုင်ကြချေ။

၄။ မိစ္ဆာမိုက်တို့က ဤကျမ်းသည် ဖန်တီးသောမုသားကျမ်းမှတပါး အခြားတစ်စုံတစ်ခုမှမဟုတ်ချေ၊ အခြားသူ တို့သည် ထိုကိစ္စ၌ ကူညီကြ၏၊ ထို့ကြောင့်သူတို့သည် အတင်းစကား၊ မုသားစကားကို ဖန်တီးကြ၏ဟု ပြောဆိုကြ၏။

၅။ တဖန်သူတို့က ပြောသည်မှာ ရှင်မိုဟမ္မဒ်သည် ရှေးလူဟောင်းတို့စီရင်သောဒဏ္ဍာရီပုံဝထ္ထုများကို ရေးသားထား၍ ထိုပုံဝထ္ထုများကို နေ့ညဉ့်မပြတ်သူ့အား ရွတ်ဖတ်ပြကြ၏ဟု ဆိုကြ၏။

၆။ အို--မိုဟမ္မဒ်၊ သင်သည် ထိုသူမိုက်တို့အား ဟောကြားလော့၊ မိုးကောင်းကင်နှင့် ကမ္ဘာမြေပေါ်ဝယ် လျှို့ဝှက် နက်နဲသောအရာဟူသမျှကို သိတော်မူသောအရှင်မြတ်သည် ဤကျမ်းတော်ကို ထုတ်ပြန်ပို့ချပေးသနားတော်မူ၏၊ မှတ်သားကြလော့၊ အလ္လာဟ်အရှင်မြတ်သည် အမြဲအပြစ်လွှတ်တော်မူသောအရှင်၊ ကောင်းကြီးမင်္ဂလာပေးသနား တော်မူသောသခင်ဖြစ်တော်မူ၏။

၇။ ထို့အပြင်သူတို့ပြောကြသည်၊ ဤအလ္လာဟ်အရှင်မြတ်၏ တမန်တော်သည် အစားအစာမှီဝဲသုံးဆောင်၏၊ စျေးဆိုင် ကမ်းနားများကိုလည်း လှည့်ပတ်သွားလာလေ့ရှိ၏၊ ဤသူသည် ဘာရောဂါဖြစ်နေသနည်းဟု ဆိုကြကုန်၏၊ သူနှင့်အတူတကွ သတိပေးသူဖြစ်ဖို့ရာ အထက်ကောင်းကင်ဘုံမှ ကောင်းကင်တမန်တော်တစ်ပါးကို ဤသူထံသို့ အဘယ်ကြောင့်ချပေးတော်မမူပါသနည်း။

၈။ သို့မဟုတ်သူ့အား ရွှေငွေရတနာကို သူ့အပေါ်သို့ အဘယ်ကြောင့်ပစ်ချတော်မမူသနည်း၊ သူစားသောက်ဖို့ရာ အစာအာဟာရပေးသော နိဗ္ဗာန်ဥယျာဉ်အဘယ်ကြောင့် သူ၌မရှိသနည်း၊ ထို့အပြင်မကောင်းမှုပြုကျင့်သူတို့က ဟယ်-အချင်းတို့၊ သင်တို့သည် စုန်းဖမ်းစားသူတစ်ဦး၏ နောက်သို့ လိုက်နေသည်သာတည်းဟု ပြောဆိုကြ၏။

၉။ အို--တမန်တော်၊ ၎င်းတို့သည် သင့်အား မည်သို့မည်ပုံနှိုင်းယှဉ်ကြသည်ကို သင်ဆင်ခြင်ကြည့်ရှုလော့၊ ထို့ကြောင့်သူတို့သည် လမ်းမှားကြ၏၊ လမ်းမှန်ကို မရနိုင်ကြချေ။

၁ဝ။ အို--တမန်တော်၊ ကောင်းကြီးမင်္ဂလာအဖြာဖြာနှင့်ပြည့်စုံတော်မူထသောအလ္လာဟ်အရှင်မြတ်သည် အကယ်၍ အလိုတော်ရှိပါလျှင် သင်၏အဖို့ ၎င်းတို့ပြောဆိုသည့်ဥယျာဉ်ပန်းမာလ်ထက် သာလွန်ကောင်းမြတ်သည့်ဥယျာဉ်ကို ပေးသနားတော်မူလတ့ံ၊ ထိုဥယျာဉ်အောက်၌ စိမ့်စမ်းရေမြောင်းများလည်း အယဉ်ထွေထွေစီးဆင်းလျက်ရှိ၏၊ သင့်အား များစွာသောဘုံနန်းပြဿဒ်တို့ကိုလည်း ပေးတော်မူလတ့ံ။

၁၁။ အို--တမန်တော်၊ သူသည် သင့်ကိုသာ ငြင်းဆန်သည်မဟုတ်၊ အချိန်တော်ကြီး ကျရောက်မည်ကိုလည်း ငြင်းပယ်ကြ၏၊ ဤအချိန်တော်ကြီးကို ပစ်ပယ်သောသူတို့အဖို့အရာ ငါသည် ငရဲမီးတောက်မီးလျှံကို စီရင်ထား တော်မူ၏။

၁၂။ ငရဲသည် သူတို့ကို အဝေးမှ မြင်သောအခါ သူတို့သည် ထိုမီးတောက်မီးလျှံ၏ ဖြောက်ဖြောက်မည်သံနှင့် ဟိန်းသံကြီးကို ကြားကြရလတ့ံ။

၁၃။ ထိုသူတို့အား မီးသံကြိုးဖြင့် ချည်နှောင်၍ ငရဲ၏ကျဉ်းကျပ်ပြည့်နှက်သောအပိုင်းတွင်းသို့ ဆွဲငင်ပစ်ချလိုက်သော အခါ သူတို့သည် နေရာတွင် ပျက်စီးခြင်းဆုကို တောင်းကြ၏။

၁၄။ ထိုအခါငရဲထိန်းတို့က ဤနေ့တော်ကြီး၌ ပျက်စီးခြင်းတစ်ခုတည်းသာမတောင်းကြလင့်၊ များစွာသောပျက်စီး ခြင်းကို တောင်းကြလော့။

၁၅။ အို--တမန်တော်၊ ဟောကြားလော့၊ ငရဲမီးသည် သာလွန်ကောင်းမြတ်သလော၊ သို့မဟုတ်ဒုစရိုက်မကောင်းမှုကို တွန်းလှန်ပစ်သူတို့အား ပေးသနားတော်မူမည်ဟု ကတိထားတော်မူသော၊ အိုခြင်း၊နာခြင်း၊သေခြင်းကင်းမဲ့သော နိဗ္ဗာန်ဥယျာဉ်တော်က သာလွန်ကောင်းမြတ်သလော၊ထိုဥယျာဉ်တော်သည် သူတော်ကောင်းတို့၏ ဆုနှင့်ဘဝခရီး ဆုံးရာဖြစ်၏။

၁၇။ ထိုမိစ္ဆာယုတ်နှင့်တကွ အလ္လာဟ်အရှင်မြတ်အစား သူတို့ကိုးကွယ်သောဘုရားများကို စုတော်မူမည့်နေ့တော်ကြီး၌ အရှင်မြတ်က ဟယ်-ဘုရားပျက်တို့၊ သင်တို့သည် ဤငါ့ကျေးကျွန်တို့အား လမ်းလွဲလမ်းမှားကို ပြသကြလေ သလော၊ သို့မဟုတ်သူတို့သည် မိမိတို့အလိုအလျောက်လမ်းမှန်မှ လွဲဖယ်၍ သွားကြလေသလောဟု မိန့်တော် မူလတ့ံ။

၁၈။ သူတို့က အို--အလ္လာဟ်အရှင်၊ အရှင်သည် ချို့တဲ့ခြင်းကင်းသောအနန္တဂုဏ်တော်ရှင်ဖြစ်တော်မူပါ၏၊ အရှင် မှတပါး အခြားကာကွယ်စောင့်ရှောက်မည့်အဆွေခင်ပွန်းကို ရှာဖွေခြင်းမှာ အကျွနု်ပ်တို့အဖို့အရာမဟုတ်ပါ၊ သို့သော်အရှင်သည် ထိုမိစ္ဆာနှင့် သူတို့၏မိဘဘိုးဘွားတို့အား ချမ်းသာသုခကို ပေးသနားတော်မူသဖြင့် သူတို့ သည် အရှင်မြတ်၏သတိပေးပညတ်တော်ကို မေ့လျော့၍ ပျက်စီးဆုံးရှုံးရသူများဖြစ်ကြပါ၏ဟု တင်လျှောက် ကြ၏။

၁၉။ အလ္လာဟ်အရှင်မြတ်က ဟယ်-မိစ္ဆာမိုက်တို့၊ နင်တို့ဆည်းကပ်ကိုးကွယ်သောဘုရားများပင် နင်တို့သည် မုသား တင်လျှောက်သည်ဟု လျှောက်ကြပေပြီ၊ နင်တို့သည် အပြစ်ဒဏ်တော်ကို လွှဲရှောင်နိုင်မည်မဟုတ်ချေ၊ အကူ အညီလည်း ရနိုင်မည်မဟုတ်ချေဟု မိန့်တော်မူလတ့ံ၊ နင်တို့အနက် အကြင်သူသည် ဒုစရိုက်မကောင်းမှုကို ကျူးလွန်အ့ံ၊ ထိုသူအား ငါသည် အလွန်ပြင်းပြသောအပြစ်ဒဏ်တော်ကို မြည်းစေတော်မူလတ့ံ။

၂ဝ။ အို--တမန်တော်၊ ငါသည် သင်၏အထက်အဆက်ဆက်သောတမန်တော်များကို စေလွှတ်တော်မူ၏၊ ထိုတမန် တော်တို့သည် မုချဧကန်အစားအစာသုံးဆောင်ကြ၏၊ စျေးဆိုင်ကမ်းနားများသို့လည်း လှည့်ပတ်သွားလာကြ၏၊ အို--လူသားအပေါင်းတို့၊ သင်တို့အနက် အချို့သောသူများကို အချို့သောသူများအတွက် စုံစမ်းဖို့ရာ စီရင်ထား တော်မူ၏၊ သင်တို့၌ သည်းခံခြင်းတရားရှိကြမည်လော၊ အကြောင်းမူကား အလ္လာဟ်အရှင်မြတ်သည် အမြဲ မြင်တော်မူသောအရှင်ဖြစ်တော်မူ၏။

၂၁။ ငါ့အား ဖူးမြော်ရမည်ကို မမျှော်လင့်သူတို့က အကျွန်ုပ်ထံ ကောင်းကင်တမန်များကို အဘယ်ကြောင့်မစေလွှတ် ပါသနည်း၊ အကျွနု်ပ်တို့သည် မိမိတို့၏အရှင်သခင်ကို အဘယ်ကြောင့်မျက်ဝါးထင်ထင်မဖူးမြင်ရပါသနည်းဟု ပြောဆိုကြ၏၊ အမှန်မှာသူတို့သည် မိမိတို့ကိုယ်ကို မိမိတို့အဖို့အလွန်အထင်ကြီး၍ မာနထောင်လွှားလျက် တရားတော်ကို မထီမဲ့မြင်ပြုကြ၏။

၂၂။ သူတို့သည် ကောင်းကင်တမန်များကို မြင်ရသောနေ့၊ ထိုနေ့တော်ကြီး၌ အပြစ်ရှိသူများအတွက် သတင်းကောင်း ရှိမည်မဟုတ်ချေ၊ ထိုအခါသူတို့က အကာအဆီးကြီးရှိလျှင် ကောင်းလေစွဟု ငိုကြွေးကြလိမ့်မည်။

၂၃။ ထို့အပြင်ငါသည် သူတို့ပြုခဲ့သောအမှုဘက်သို့ လှည့်တော်မူမည်၊ ငါသည် ၎င်းကို လွင့်ပါးသောသဲမှုန့်ကလေးများ ဖြစ်စေတော်မူလတ့ံ။

၂၄။ အကြင်သူတို့သည် ထိုနေ့တော်ကြီး၌ နိဗ္ဗာန်ဥယျာဉ်တော်ကို ရကြအ့ံ၊ ထိုသူတို့သည် သူတို့၏ဘုံဗိမာန်တွင် သာလွန်သာယာ၍ မွန်းလွဲအပန်းဖြေရိပ်သာ၌ ပိုမိုပျော်ပါးကြလတံ့။

၂၅။ ထိုနေ့တော်ကြီး၌ မိုးကောင်းကင်သည် တိမ်မြူနှင့်တကွပြိုကွဲပျက်စီး၍ ကောင်းကင်တမန်တော်များကို သက်ဆင်း စေတော်မူလတံ့။

၂၆။ ထိုနေ့တော်ကြီး၌ နိုင်ငံတော်ကြီး၊ နိုင်ငံတော်ကြီးအစစ်အမှန်သည် မဟာကရုဏာတော်အရှင်၊ အလ္လာဟ်၏ နိုင်ငံတော်ဖြစ်၏၊ ထိုနေ့သည် မယုံကြည်သူတို့အဖို့ ဒုက္ခများသာဖြစ်မည်။

၂၇။ ထိုနေ့တော်ကြီး၌ လက်နှစ်ဘက်ကိုအားဖြင့် လျှိုကိုက်လျက် ဒုစရိုက်ကောင်က အလ္လာဟ်အရှင်မြတ်၏ တမန် တော်သခင်နှင့်အတူတကွ လမ်းမှန်ကို အကျွနု်ပ်ရွေးချယ်ခဲ့လျှင် တော်လေစွဟု ဆိုလတ့ံ။

၂၈။ အကျွနု်ပ်အတွက် ဒုက္ခပဲ၊ အကျွန်ုပ်သည် ဤကဲ့သို့သောသူကို အဆွေခင်ပွန်းမဖွဲ့ခဲ့လျှင် ကောင်းလေစွဟုလည်း ဆိုလတ့ံ။

၂၉။ အကျွနု်ပ်ထံသို့ တရားတော်ကျရောက်လာပြီးမှ သူသည် အကျွနု်ပ်ကို တရားတော်မှ တိမ်းသွားစေလေ၏၊ ရှိုင်တန်မာရ်နတ်သည် အကူအညီလိုသောအချိန်၌ လူသားကို စွန့်ပစ်သွားသူဖြစ်၏။

၃ဝ။ ထိုအခါတမန်တော်က အို--အကျွန်ုပ်၏အသက်သခင်ကျေးဇူးရှင်၊ အကျွနု်ပ်၏လူများသည် ကုရ်အာန်ကျမ်းတော် ကို မထီလေးစားစွန့်လွှတ်ထားပါသည်ဟု တင်လျှောက်လတ့ံ။

၃၁။ ဤကဲ့သို့ငါသည် ဒုစရိုက်ကောင်တို့မှ ရန်သူတစ်ယောက်ကို တမန်တော်တိုင်းအတွက် ပေါ်ပေါက်စေတော်မူ၏၊ သို့သော်အလ္လာဟ်သည် လမ်းပြသူ၊ မှိုင်းမသူအဖြစ်ဖြင့် လုံလောက်တော်မူ၏။

၃၂။ ထို့အပြင်မယုံကြည်သူတို့က ထိုသူအား ကျမ်းမြတ်ကုရ်အာန်ကို တစ်ကြိမ်တစ်ခါတည်းအပြီးအဘယ်ကြောင့် ချပေးတော်မမူသနည်းဟု ဆိုကြ၏၊ အို--တမန်တော်၊ သင့်အား ကျမ်းတော်ကို ဤကဲ့သို့အကြိမ်ကြိမ်ထုတ်ပြန် တော်မူခြင်းကား သင်၏နှလုံးကို ကျမ်းတော်အားဖြင့် ငါအရှင်မြတ်အားတင်းပေးတော်မူဖို့ရာဖြစ်၏၊ ထို့အပြင် ငါသည် ကျမ်းတော်ကို စနစ်တကျစီစဉ်ထားတော်မူ၏။

၃၃။ အို--တမန်တော်၊ သူတို့သည် တစ်စုံတစ်ခုသောဥပမာကို သင့်ထံသို့ယူဆောင်ခဲ့လျှင် ငါသည် ထိုအကြောင်းနှင့် စပ်လျဉ်း၍ မှန်ကန်သောအဖြေကို သင့်အား ပေးသနားတော်မူ၏၊ သူတို့၏ဥပမာထက်သာလွန်သောချေပချက်ကို ပေးသနားတော်မူ၏။

၃၄။ အကြင်သူတို့အား ငရဲမီးထဲသို့ မျက်နှာမှောက်၍ ယူခဲ့လတဲ့၊ ထိုသူတို့သည် အလွန်ဆိုးဝါးသောအဖြစ်သို့ ဆိုက်ရောက်ကြ၍ ဓမ္မလမ်းကြောင်းမှ ဝေးကွာကြ၏။

၃၅။ ငါသည် တမန်တော်မူစာအား ကျမ်းတော်တစ်စောင်ချပေးသနားတော်မူ၏၊ သူ၏ အစ်ကိုတမန်တော်ဟာရွန် ကိုလည်း သူ၏အခိုင်းအစေဖြစ်စေတော်မူ၏။

၃၆။ ထို့နောက်သူတို့အား သင်တို့သည် ငါ၏နှုတ်ကပတ်တော်များမယုံကြည်သူတို့ထံ သွားကြလော့ဟု ဗျာဒိတ်ပေး တော်မူ၏၊ ထို့နောက်ငါသည် ထိုမိစ္ဆာမိုက်တို့အားလုံးကို လုံးလုံးဖျက်ဆီးတော်မူ၏။

၃၇။ ထို့အပြင်တမန်တော်နူဟို၏လူများ၊ သူတို့သည် ငါ၏တမန်တော်များကို မယုံကြည်ပယ်ရှားသောအခါ ငါသည် သူတို့အားလုံးကို ရေတွင် နှစ်မြုပ်သတ်တော်မူ၏၊ သူတို့ပုံစံကို လူသားတို့အဖို့အရာ မဟာသင်ခန်းစာတော်ကြီး အဖြစ်ဖြင့် ပြုထားတော်မူ၏၊ ငါသည် ဒုစရိုက်မှုကျူးလွန်သူတို့အဖို့ အလွန်ပြင်းပြနာကျယ်ဖွယ်ရှိသောအပြစ် ဒဏ်တော်ကို ပြင်ဆင်ထားတော်မူ၏။

၃၈။ ထို့အပြင်အားဒ်နှင့် ဆမူးဒ်လူမျိုးများ၊ ရတ်(စ်)မြို့သူမြို့သားတို့နှင့်တကွ ထိုလူမျိုးတို့အကြားတွင်ရှိသည့်များစွာ သောအသင်းသားများ။

၃၉။ ငါအရှင်မြတ်သည် သူတို့တစ်မျိုးစီကို ဥပမာအမျိုးမျိုးဆောင်၍ သတိပေးတော်မူ၏၊ ထို့နောက်ငါသည် သူတို့ တစ်မျိုးစီကို အပျက်ကြီးပျက်စေတော်မူ၏။

၄ဝ။ ထို့အပြင်သူတို့သည် ကျောက်စရစ်မိုး၊ ကျောက်ခဲမိုးများအလွန်ကြောက်မက်ဖွယ်ရွာသွန်းသော ရှေးမယုံကြည် သူတို့ နေရာအရပ်ရပ်သို့ အထပ်ထပ်အဖန်ဖန်ဖြတ်သန်းသွားလာကြဖူး၏၊ သူတို့သည် ထိုပျက်စီးယိုယွင်းသော နေရာတို့ကို မမြင်ပဲ ရှိနိုင်မည်လား၊ ယင်းသို့မဖြစ်နိုင်ချေ၊ သို့သော်သူတို့သည် ရှင်ပြန်ထမြောက်ရမည်ကို မမျှော်လင့်ကြချေ။

၄၁။ ထိုသူတို့သည် သင်တမန်တော်ကို တွေ့မြင်သောအခါ သူတို့သည် သင့်အား ပျက်ရယ်စရာအဖြစ်ဖြင့်သာ ဆက်ဆံ၏၊ ဤသူကား အလ္လာဟ်အရှင်မြတ်က တမန်တော်အဖြစ်ဖြင့် စေလွှတ်တော်မူသောလူလားဟု ဆိုကြ၏။

၄၂။ ငါတို့သည် မိမိတို့ဘုရားများကို သဒ္ဒါစိတ်အားကြီးစွာနှင့် မဆည်းကပ်မကိုးကွယ်ကြခဲ့ပါလျှင် ဤသူသည် ငါတို့အား မိမိတို့ဘုရားများမှ ဝေးစွာဖျားယောင်းယူဆောင်သွားလတ့ံဟု ဆက်လက်၍ ပြောဆိုကြ၏၊ သူတို့သည် အပြစ်ဒဏ်တော်ကို မျက်ဝါးထင်ထင်မြင်ရကြသောအခါ အဘယ်သူသည် တရားလမ်းမှ သာလွန်လွဲချော်သွား သည်ကို သိကြရလတ့ံ။

၄၃။ မိမိ၏ တပ်မက်ခြင်းအညစ်အကြေးကို သူ၏ဘုရားဟုဆိုသောသူကို သင်မြင်ရပြီလော၊ သင်သည် ထိုသူကို အုပ်ထိန်းသူလုပ်မည်လော။

၄၄။ သို့မဟုတ်ထိုသူတို့အနက် အများအပြားတို့သည် ကြားနိုင်၊ သို့မဟုတ်နားလည်နိုင်သည်ဟု သင်ထင်မှတ်သလော၊ ယင်းသို့မဟုတ်ချေ၊ သူတို့သည် အခြေလေးချောင်းတိရိစ္ဆာန်များကဲ့သို့ပင်ဖြစ်၏၊ သူတို့သည် တရားလမ်းတော်ကို ဝေးစွာလွှဲသွားကြ၏။

၄၅။ အို--တမန်တော်၊ သင်၏အရှင်သခင်သည် အရိပ်ကို မည်သို့စီရင်တော်မူသည်ကို သင်စဉ်းစားဆင်ခြင်မမြင် သလော၊ အရှင်မြတ်အလိုတော်ရှိပါလျှင် ထိုအရိပ်ကို မလှုပ်မရှားရပ်တန့်နေစေရန် ပြုစွမ်းနိုင်တော်မူ၏၊ ငါသည် နေကို အရိပ်၏လမ်းပြဖြစ်စေတော်မူ၏။

၄၆။ ထို့နောက်ငါသည် ၎င်းအရိပ်ကို ငါ့အထံတော်သို့ တဖြည်းဖြည်းဆွဲယူတော်မူ၏။

၄၇။ အလ္လာဟ်အရှင်မြတ်သည် ညဉ့်ကို သင်တို့အဖို့ ဖုံးအုပ်သောအရာဖြစ်စေတော်မူ၏၊ အိပ်စက်ခြင်းကို သင်တို့ အမောအပန်းဖြေဖို့ရာ စီရင်ထားတော်မူ၏၊ နေ့ကို ရှင်ပြန်ထမြောက်သွားလာဖို့ရာ ပြုထားတော်မူ၏။

၄၈။ တဖန်အလ္လာဟ်အရှင်မြတ်သည် လေများကို စေလွှတ်တော်မူ၏၊ ထိုလေများသည် အရှင်မြတ်၏ မဟာကရုဏာ တော်ကျရောက်မည့်သတင်းကောင်းကို ယူဆောင်လာသောရှေ့ပြေးများဖြစ်ကြသည်၊ ထို့နောက်အာကာသမှ သန့်ရှင်းစင်ကြယ်သောမိုးကို ရွာသွန်းစေတော်မူ၏။

၄၉။ ထိုမိုးရေအားဖြင့် ငါသည် သေနေသောမြေအား အသက်ပေးတော်မူ၏၊ ငါသည် ငါဖန်ဆင်းတော်မူသည့်များလှ စွာသောတိရိစ္ဆာန်သတ္တဝါ၊ လူသတ္တဝါတို့သောက်ဖို့ရာ မိုးရေကို ပေးသနားတော်မူ၏။

၅ဝ။ သူတို့သတိရဖို့ရာ ငါသည် သူတို့အထဲတွင် မိုးကို အဖန်တလဲလဲရွာသွန်းစေတော်မူ၏၊ သို့သော်လူသားတို့အနက် အများအပြားသည် မယုံကြည်မှုမှတပါး အားလုံးကို ငြင်းပယ်ကြ၏။

၅၁။ ငါသည် အလိုတော်ရှိလျှင် ရွာတိုင်းရွာတိုင်းတွင် သတိပေးစေလွှတ်နိုင်တော်မူ၏။

၅၂။ ထို့ကြောင့်မိစ္ဆာဒိဋ္ဌိတို့ကို နားမထောင်လင့်၊ သို့သော်သူတို့ကို နိုင်နင်းအောင် ကျမ်းတော်အားဖြင့် ကြီးစွာကြိုးစား လော့။

၅၃။ တဖန်အလ္လာဟ်အရှင်မြတ်သည် သမုဒ္ဒရာနှစ်စင်းကို ပေါင်းစပ်လျက်ရှိစေသော်လည်း သီးသန့်ထားတော်မူ၏၊ ၎င်းနှစ်စင်းအနက် တစ်စင်းမှာ အရသာရှိ၏၊ ချို၏၊ တစ်စင်းမှာ ခါး၏၊ အရှင်မြတ်သည် ထိုရေနှစ်စင်းကြားတွင် အဆီးအကာတံတိုင်းကြီးတစ်ခုကို ကာဆီးတော်မူ၏။

၅၄။ တဖန်အရှင်မြတ်သည် လူသားကို ရေမှ ဖန်ဆင်းတော်မူ၏၊ ထို့အပြင်လူသားအား သွေးသားကြောင့် တော်စပ်သူ ဆွေမျိုးများ လက်ထပ်ထိမ်းမြားခြင်းကြောင့် တော်စပ်သူဆွေမျိုးများကို ပေးသနားတော်မူ၏၊ အကြောင်းမူကား သင်၏အသက်သခင်ကျေးဇူးရှင်သည် အနန္တတန်ခိုးတော်အရှင်ဖြစ်တော်မူ၏။

၅၅။ သို့ပါလျက်သူတို့သည် အလ္လာဟ်အရှင်မြတ်အစား သူတို့ကို အကျိုးအပြစ်မပေးနိုင်သောဘုရားယောင်များကို ခဝပ်ဦးညွတ်ကြ၏၊ မယုံကြည်သူတို့၏ အရှင်သခင်ကို အမြဲဆန့်ကျင်သောသူများဖြစ်ကြ၏။

၅၆။ အို--တမန်တော်မိုဟမ္မဒ်၊ ငါသည် သင့်အား သတင်းကောင်းဆောင်သူနှင့် သတိပေးသူအဖြစ်ဖြင့်သာ စေလွှတ် တော်မူ၏။

၅၇။ အို--တမန်တော်၊ သင်ဟောပြောလော့၊ မိမိ၏အရှင်သခင်ထံသို့ သွားရာလမ်းကို ရှာလိုသူသည် ထိုလမ်းရှာခြင်း မှတပါး မည်သည့်တရားဟောကြေးမျှ ငါသည် သင်တို့ထံမှ မတောင်းချေ။

၅၈။ အို--တမန်တော်၊ သင်သည် သေခြင်းတရားကင်းမဲ့သောအသက်ရှင်နေသောအရှင်မြတ်အား ယုံကြည်ကိုးစား၍ အရှင်မြတ်၏ ကျေးဇူးတော်ကို ရင့်ကျူးလော့၊ အရှင်မြတ်သည် မိမိ၏ကျေးကျွန်တို့၏ အပြစ်အနာများကို သိသူအဖြစ်ဖြင့် လုံလောက်တော်မူ၏။

၅၉။ အရှင်မြတ်သည် ကမ္ဘာမြေပြင်မိုးကောင်းကင်နှင့် မိုးမြေစပ်ကြားရှိရှိသမျှအပေါင်းကို ခြောက်ရက်မျှနှင့် အပြီးအစီး ဖန်ဆင်းတော်မူ၏၊ ထို့နောက်ရာဇပလ္လင်တော်ကြီးပေါ်သို့ တက်တော်မူ၏၊ မဟာကရုဏာတော်ရှင်ဖြစ်တော်မူ၏၊ သင်တို့သည် အရှင်မြတ်၏အကြောင်းကို သိသူတို့ထံ မေးမြန်းကြလော့။

၆ဝ။ ထို့အပြင်သူတို့အား မဟာကရုဏာတော်အရှင်အား ခဝပ်ကိုးကွယ်ကြလော့ဟု ဆိုသောအခါ သူတို့က မဟာကရု ဏာတော်အရှင်သည် အဘယ်ဟာနည်း၊ရှင်မိုဟမ္မဒ်၊ သင်က ဝတ်ပြုဦးညွတ်လော့ဟုဆိုသောမည်သည့်အရာမဆို ငါတို့ပျပ်ဝပ်ကြမည်လောဟု တုံ့ပြန်ပြောဆိုကြ၏၊ ယင်းတိုက်တွန်းနှိုးဆော်ခြင်းသည် ထိုသူတို့၌ မုန်းတီးခြင်းကို တိုးပွားစေ၏။

၆၁။ အထက်ကောင်းကင်ဘုံ၌ ကြယ်နက္ခတ်တာရာစုအရှိန် ထွန်းလင်းတောက်ပသောနေနှင့်လတို့ကို ဖန်ဆင်းထား တော်မူသောအရှင်မြတ်သည် ကောင်းကြီးမင်္ဂလာအဖြာဖြာနှင့်ပြည့်စုံတော်မူပါ၏။

၆၂။ ၎င်းအပြင် အကြင်သူသည် သတိရလိုပါ၏၊ သို့မဟုတ်ကျေးဇူးတင်လို၏၊ ထိုသူအတွက် နေ့နှင့်ညကို အလှည့်ကျ အဆက်မပြတ်ဖြစ်ပေါ်လာအောင် ဖန်ဆင်းသောသူသည် အရှင်မြတ်ဖြစ်တော်မူ၏။

၆၃။ မဟာကရုဏာတော်အရှင်၏ သစ္စာရှိသောကျေးတော်မျိုးကျွန်တော်မျိုးတို့သည် ကမ္ဘာမြေပေါ်တွင် မာန်မာန မရှိပဲ မိမိကိုယ်ကို နှိမ့်ချ၍ အိန္ဒြေရှိရှိသွားလာကြ၏၊ ၎င်းအပြင်ထိုသူတော်ကောင်းတို့သည် ပညာမရှိသူများ နှုတ်ဆက်သောအခါ သင်တို့အပေါ်သို့ အေးချမ်းသာယာခြင်းကျရောက်ပါသော်ဝ်ဟု မေတ္တာစကားကို ဆိုကြ၏။

၆၄။ ၎င်းအပြင်ထိုသူတို့သည် သူတို့၏ အရှင်သခင်အား ဦးညွတ်ချ၍သော်လည်းကောင်း၊ မတ်တပ်ရပ်၍သော် လည်းကောင်း၊ ဝတ်ပြုလျက် ညဉ့်အချိန်ကို ကုန်လွန်စေကြ၏။

၆၅။ ၎င်းအပြင်ထိုသူတို့သည် ဤသို့ဆုတောင်းကြ၏၊ အို--အကျွနု်ပ်၏ အသက်သခင်ကျေးဇူးရှင်၊ အဝီစီငရဲ၏ အပြစ်ဒဏ်ကို အကျွနု်ပ်တို့နှင့်ဝေးကွာအောင် ဖယ်ရှားတော်မူပါ၊ အမှန်မှာ ထိုဒဏ်တော်သည် အလွန်ကြောက် မက်ဖွယ်ပြင်းပြနာကျင်ဖွယ်ကောင်းလှပါ၏။

၆၆။ အမှန်မှာ ငရဲသည် ဆင်းရဲဒုက္ခကြီးလှသောနေရာဌာနဖြစ်ပါ၏။

၆၇။ တဖန်ထိုသူတို့သည် သုံးစွဲရာ၌ လက်ဖွာသည်မဟုတ်၊ စေးနဲသည်လည်းမဟုတ်၊ မလွန်မယုတ်၊ အလယ်အလတ် လမ်းကို လိုက်သူများဖြစ်ကြ၏။

၆၈။ ၎င်းအပြင်ထိုသူတို့သည် အလ္လာဟ်အရှင်မြတ်နှင့်တွဲဖက်၍ မည်သည့်အရာဝထ္ထုကိုမှ ဆည်းကပ်ကိုးကွယ်ကြသည် မဟုတ်၊ သူတို့သည် အရှင်မြတ်ပညတ်တော်မူသည့်အတိုင်း သူ့အသက်ကို တရားသောနည်းနှင့်မှတပါး အခြား နည်းနှင့်မသတ်ကြချေ၊ မတရားကာမမှုကို မပြုကျင့်ကြချေ၊ မည်သူမဆိုအထက်ဖော်ပြပါပြစ်မှုများကို ကျူးလွန် လျှင် ကြီးလေးသောအပြစ်ဒဏ်သင့်၏။

၆၉။ ယင်းပြစ်မှုကို ကျူးလွန်သူသည် ရှင်ပြန်ထမြောက်ရသောနေ့တော်ကြီး၌ နှစ်ဆတပိုးကြီးလေးသောအပြစ်ဒဏ် ခံရလတ့ံ၊ ထို့အပြင်သူသည် ငရဲမီးထဲ၌ မိုက်မဲယုတ်ည့ံသောအဖြစ်နှင့် အစဉ်အမြဲခံနေရလတ့ံ။

၇ဝ။ သို့ရာတွင်သူတို့အနက် မည်သူမဆိုမိမိမှားယွင်းမိသောအပြစ်စုကို နောင်တရ၍ ဝန်ချတောင်းပန်၏၊ ယုံကြည် လျက် ကောင်းမှုကို ပြုကျင့်၏၊ အလ္လာဟ်အရှင်မြတ်သည် ထိုသူ၏မကောင်းမှုမျာကို ကောင်းမှုများအဖြစ်သို့ ပြောင်းလဲစေတော်မူမည်။ အလ္လာဟ်အရှင်မြတ်သည် အမြဲအပြစ်လွှတ်တော်မူ၏၊ ကောင်းကြီးမင်္ဂလာပေးတော် မူ၏။

၇၁။ အကြင်သူသည် မိမိကျူးလွန်မိသောအပြစ်များကို နောင်တရ၍ ဝန်ချတောင်းပန်ပြီးလျှင် ကုသိုလ်ကောင်းမှုကို ပွားများအ့ံ၊ ထိုသူသည် အလ္လာဟ်အရှင်မြတ်ဘက်တော်သို့ မှန်ကန်သောသတိနောင်တရခြင်း၊ မှန်ကန်သော ယုံကြည်မှုတို့နှင့် လှည့်သူဖြစ်၏။

၇၂။ ၎င်းအပြင်ထိုသူတို့သည် မုသားသက်သေခံသူများမဟုတ်၊ သို့သော်သူတို့တစ်ရံတစ်ခါအလဇ္ဇီလုပ်၍နေသော အလုပ်ဌာနသို့ ရောက်သွားကြလျှင် သူတော်ကောင်းပီပီစက္ခုန္ဒြေမပျက်၊ အခြားဘက်သို့ လှည့်လျှောက်သွား ကြ၏။

၇၃။ ၎င်းအပြင် မိမိတို့၏အသက်သခင်ကျေးဇူးရှင် ထုတ်ပြန်ပို့ချပေးသနားတော်မူသောပညတ်တရားတော်များကို သတိရစေသောအခါ သူတို့သည် တရားတော်ကို မကြားသောနားပင်းသူများ၊ မမြင်သောမျက်စိကန်းများ မဟုတ်ချေ။

၇၄။ ၎င်းအပြင်ထိုသူတို့သည် အို--အကျွနု်ပ်တို့၏ အရှင်သခင်၊ အကျွနု်ပ်တို့အား မိမိတို့မျက်ရှုဖြစ်ကြသောသားမယား တို့ကြောင့် ပျော်ရွှင်ချမ်းမြေ့ခြင်းကို ချပေးသနားတော်မူပါ၊ ဒုစရိုက်မကောင်းမှုများကို တွန်းဖယ်သူတို့၏ စံနမူနာဖြစ်တော်မူပါဟု ငါအရှင်မြတ်ထံဆုတောင်းကြ၏။

၇၅။ ထိုသူတို့သည် ၎င်းတို့၏ခန္တီပါရမီ၊ သမာဓိဂုဏ်သိက္ခာကြောင့် မြင့်မြတ်သောနိဗ္ဗာန်ဗိမာန်ကို အသနားတော်မြတ် ခံကြရလတ့ံ၊ သူတို့သည် နိဗ္ဗာန်တော်၌ ရွှင်လန်းစွာခရီးဦးကြိုဆိုခြင်းနှင့် အေးချမ်းသာယာခြင်းမင်္ဂလာမေတ္တာပို့သ ခြင်းတို့ကို တွေ့ကြံုကြရလတ့ံ။

၇၆။ သူတို့သည် နိဗ္ဗာန်ဘုံတော်တွင် ထာဝရအစဉ်အမြဲခံစားကြရလတ့ံ၊ နိဗ္ဗာန်တော်သည် အလွန်ပျော်ရွှင်မွေ့လျော် ဖွယ်ရာနေရာထိုင်ခင်းကြီးဖြစ်၏။

၇၇။ အို--တမန်တော်မိုဟမ္မဒ်၊ သင်သည် မိစ္ဆာမိုက်တို့အား ဟောကြားလော့၊ ဟယ်-အချင်းတို့၊ ငါ၏အသက်သခင် ကျေးဇူးရှင်သည် သင်တို့၏ဆွလားသ်ဝတ်ပြုခြင်းကြောင့်သာမဟုတ်လျှင် သင်တို့ကို အရေးစိုက်တော်မူမည် မဟုတ်ချေ၊ သို့သော်ယခုသင်တို့သည် သစ္စာတရားတော်ကို ငြင်းဆန်၏၊ ထို့ကြောင့်စစ်ကြောစီရင်အပြစ်ဒဏ် တော်မူခြင်းရှိလတ့ံ။