Burmese - Chapter 38 - Sad

၁။ ဆွားဒ်။ အလွန်ထင်ရှားကျော်ဇော်သော ကျမ်းမြတ်ကုရ်အာန်ရှိသကဲ့သို့။

၂။ မိစ္ဆာဒိဋ္ဌိတို့သည် အနှစ်သာရမရှိသော ပလွှားဝင့်မော်ခြင်း၌ မွေ့လျော်နေကြ၏၊ ဂိုဏ်းဂဏကွဲပြားတည်ထောင် နေကြ၏။

၃။ ငါအရှင်မြတ်သည် ဤလူများထက် ရှေးကျသောလူအဆက်ဆက်ပေါင်းများစွာကို ဖျက်ဆီးရုပ်သိမ်းတော်မူခဲ့ပြီ၊ အပြစ်ဒဏ်မှ လွတ်မြောက်ရမည့်အချိန်ကုန်လွန်သောအခါမှသာ ထိုလူဟောင်းတို့သည် ကယ်ဆယ်စောင်မတော် မူရန် မြည်တမ်းတောင်းပန်ကြ၏။

၄။ ထို့အပြင်မိစ္ဆာမိုက်တို့သည် မိမိတို့အမျိုးသားတစ်ဦး တမန်တော်ဖြစ်လာသည်ကို အ့ံသြကြ၏၊ ဤသူကား မှော်စုံးမျက်လှည့်အတတ်တတ်မြောက်သည့်မုသားကောင်စင်စစ်ဖြစ်သည်ဟု ပြောဆိုကြ၏။

၅။ အချင်းတို့၊ ရှင်မိုဟမ္မဒ်သည် ငါတို့မိရိုးဖလာဘုရားများကို တစ်ပါးတည်းသောဘုရားပြုလုပ်သလား၊ ကြည့်ကြ လော့၊ သူ၏ဟောပြောချက်သည် အလွန်အ့ံသြဖွယ်ကောင်းပေစွဟု ဆိုကြ၏။

၆။ မိစ္ဆာဒိဋ္ဌိတို့အထဲမှ အကြီးအကဲတို့သည် ဟိုဟိုဒီဒီသွားလာ၍ သြဝါဒပေးကြသည်မှာ အချင်းတို့၊ သင်တို့သည် မိမိတို့မိရိုးဖလာကိုးကွယ်သောဘုရားများအပေါ်၌ မြဲမြံသောသစ္စာရှိကြလော့၊ မှတ်သားကြလော့၊ ရှင်မိုဟမ္မဒ်၏ စကားသည် တရားမဟုတ်၊ လုပ်ကြံပြောဆိုသောမုသားစကားသာတည်း။

၇။ အချင်းတို့၊ ငါတို့သည် ဤကဲ့သို့တရားမျိုးကို နောက်ပေါ်သောဘာသာများတွင် တစ်ရံတစ်ခါမျှမကြားဘူးချေ၊ ဤတရားသည် မဟုတ်မမှန် သူ၏ စိတ်ကစားခြင်းသာဖြစ်၏။

၈။ ငါတို့အနက် သူ့ကိုသာလျှင် ရွေးကောက်၍ ကျမ်းတော်ချပေးသလောဟု ပြောဆိုကြ၏၊ အမှန်မှာ သူတို့သည် ငါအရှင်မြတ်ချပေးသနားတော်မူသောကျမ်းတော်ကို ယုံမှားသံသယရှိနေကြ၏၊ သူတို့သည် ငါ၏အပြစ်ဒဏ်တော် ကို မမြည်းရသေးချေ။

၉။ သို့မဟုတ် အနန္တတန်ခိုးတော်ရှင်၊ ရက်ရောပေးကမ်းစွန့်ကြဲတောမူထသောအရှင်၊ သင်၏ အသက်သခင်ကျေးဇူး တော်ရှင်၏ အနန္တကောင်းကြီးမင်္ဂလာတော်သည် သူတို့ပိုင်ဆိုင်သောဥစ္စာရတနာဖြစ်သလော။

၁၀။ သို့မဟုတ် သူတို့သည် ကမ္ဘာမြေပြင်မိုးကောင်းကင်တည်းဟူသောနိုင်ငံတော်ကြီးနှင့် မိုးမြေစပ်ကြားရှိ ဝထ္ထု အစုစုတို့ကို စိုးပိုင်ကြသလော၊ အကယ်၍ စိုးပိုင်လျှင် သူတို့သည် ကောင်းကင်နိုင်ငံတော်ကို ကြိုးလှေကား အားဖြင့် တက်ကြစေလော့။

၁၁။ ရှိရှိသမျှသောမိစ္ဆာအသင်းတို့သည် အရေးနိမ့်ဆုံးရှုံးသောစစ်တပ်သာဖြစ်ကြ၏။

၁၂၊၁၃။ သူတို့ထက်ရှေးကျသောတမန်တော်နူဟို၏ လူများ၊ အားဒ်အမျိုးသားများ၊ လွဒ်၏ လူများ၊ တောင်သူတောင်သား ခေါ်လူများ၊ ဤအသင်းသားတို့သည် မိမိတို့ထံရောက်လာသောတမန်တော်များကို မယုံကြည်ငြင်းဆန်ကြ၏။

၁၂၊၁၃။ သူတို့ထက် ရှေးကျသောတမန်တော်နူဟို၏ လူများ၊ အားဒ်အမျိုးသားများ၊ လွဒ်၏ လူများ၊ တောင်သူတောင်သား ခေါ်လူများ၊ဤအသင်းသားတို့သည် မိမိတို့ထံရောက်လာသောတမန်တော်များကို မယုံကြည်ငြင်းဆန်ကြ၏။

၁၄။ ဤအသင်းသားတို့တစ်ယောက်မျှမကျန် အားလုံးသည် မိမိတို့ထံလာသောတမန်တော်များကို မယုံကြည် မထီ မဲ့မြင်ပြုကြသောကြောင့် ငါအရှင်မြတ်၏ ပြင်းပြသောအပြစ်ဒဏ်တော်နှင့်သာ ထိုက်တန်၏။

၁၅။ ဤသူတို့သည် အလွန်ထိတ်လန့်ကြောက်မက်ဖွယ်သောအသံကြီးကိုသာ စောင့်ဆိုင်းနေကြ၏၊ ထိုအသံကြီး တစ်ခါတစ်ကြိမ်တည်းသာ မည်ဟီး၏။

၁၆။ သူတို့သည် အို-အကျွနု်ပ်တို့၏အရှင်သခင်၊ အကျွနု်ပ်တို့အား ကံကြမ္မာအလျောက် တရားစီရင်တော်မူသော နေ့တော်ကြီးမတိုင်မီ အမြန်စီရင်တော်မူပါဟု ဆုတောင်းဝ့ံကြ၏။

၁၇။ အို-တမန်တော်၊ ဤသူမိုက်တို့၏ စကားကို သည်းခံ၍ ဘုန်အာနုဘော်နှင့် ပြည့်စုံသောငါ၏ ကျေးကျွန်တမန် တော်ဒါဝတ်(ဒ်)၏ ထုံးကို စဉ်းစားဆင်ခြင်လော့၊ မှတ်သားလော့၊ ထိုတမန်တော်သည် တရားသံဝေဂရ၍ ငါ့ အား ဝတ်အထူးပြု၏။

၁၈။ မှတ်သားကြလော့၊ ငါသည် တောင်များကို ထိုတမန်တော်နှင့်အတူ ညဉ့်တိုင်းနံနက်တိုင်း ငါ့အား ဝတ်ပြု၍ ငါ၏ ဂုဏ်ကျေးဇေူးတော်ကို ချီးကျုးတသစေတော်မူ၏။

၁၉။ ထို့အပြင်ငှက်အပေါင်းတို့လည်း စုရုံးစည်းဝေး၍ အလ္လာဟ်အရှင်မြတ်အား နားစွင့်နေကြ၏။

၂၀။ ငါသည် ထိုတမန်တော် စိုးမိုးအုပ်ချုပ်သောနိုင်ငံတော်ကို အင်အားတောင့်တင်းပြည့်ဝစေတော်မူ၏၊ သူ့အားလည်း ဉာာဏ်ပညာနှင့် ထက်မြက်မှန်ကန်စွာဆုံးဖြတ်နိုင်သည့်စွမ်းရည်သတ္တိတို့ကို ပေးသနားတော်မူ၏။

၂၁။ ထို့အပြင်အို-တမန်တော်၊ တမန်တော်ဒါဝတ်(ဒ်)ထံ ထရားစွဲဆိုရန် လာကြသူတို့၏ အကြောင်းအရာများကို သင်ကြားရပြီလော၊ ထိုအမှုသည်တို့သည် တံတိုင်းပြဿဒ်ကို ချိပ်တက်ကျော်နင်းပြီးလျှင် ဘုရင်မင်းမြတ်၏ အခမး်တော်ထဲသို့ ဝင်လာကြ၏။

၂၂။ သူတို့သည် ရုတ်တရက်ဝင်ရောက်လာကြသဖြင့် တမန်တော်ဒါဝတ်(ဒ်)သည် ထိတ်လန့်သွား၏၊ သူတို့က တမန်တော်ကြီးမကြောက်ရွံ့ပါနှင့်၊ အကျွနု်ပ်တို့သည် အမှုသည်နှစ်ယောက်ဖြစ်ပါသည်။ အကျွနု်ပ်တို့အနက် တစ်ယောက်သည် အခြားတစ်ယောက်ကို ပြစ်မှားမိပါ၏။ ထို့ကြောင့်အကျွနု်ပ်တို့စပ်ကြားတွင် မှန်ကန်စွာဆုံးဖြတ် ပေးတော်မူပါ၊ မတရားဆုံးဖြတ်တော်မမူပါနှင့်၊ သမာသမတ်လမ်းကို ပြသတော်မူပါ။

၂၃။ နားဆင်တော်မူပါ၊ ဤအကျွနု်ပ်ညီရင်းအစ်ကိုဖြစ်သူတွင် သိုးမကောင်ရေကိုးဆယ်ကိုးရှိပါ၏၊ အကျွနု်ပ်မှာမူကား သိုးမတစ်ကောင်သာရှိပါ၏၊ သို့ပါလျက် သူက ထိုသိုးမကို သူ့အား အပ်နှံရန်ပြောပါ၏၊ ထို့အပြင် သူသည် စကားဖြင့် အနိုင်ကျင့်ပါ၏။

၂၄။ ထိုအခါဒါဝတ်(ဒ်)က အို-လျှောက်သူ၊ ထိုသူသည် မိမိသိုးများအပြင် သင်၏ သိုးကို တောင်းရာ၌ သင့်ကို ပြစ်မှားမိ၏၊ မှတ်သားကြလော့၊ များလှစွာသောအလုပ်ဖက်စပ်သူတို့သည် အချင်းချင်းတစ်ဦးကို တစ်ဦးက အနိုင်အထက်နှိပ်စက်ညှင်းပန်းတတ်၏၊ သို့ရာတွင် သမ္မာတရားတော်ကို ယုံကြည်လျက် ကောင်းမှုပြုကျင့်သူ များသည် ယင်းသို့မကျင့်ကြံချေ၊ သို့သော်သူတို့၏ အရေအတွက်မူကား နည်းလှချေ၏၊ ထို့နောက်တမန်တော်ဒါဝတ်(ဒ်)သည် မိမိအား ငါအရှင်မြတ်စုံစမ်းတော်မူပြီဟု ရိပ်မိသဖြင့် သူသည် မိမိအသက်ကျေးဇူးရှင်အထံတော် ၌ အပြစ်လွှတ်တော်မူရန် ဦးခေါင်းညွှတ်ချပျပ်ဝပ်လျက် အပြစ်ကို ဝန်ချတောင်းပန်၏။

၂၅။ ငါသည် ကျူးလွန်မိသောအပြစ်များကို ခွင့်လွှတ်တော်မူ၏၊ မှတ်သားကြလော့၊ သူသည် ငါ၏ မျက်မှောက် တော်သို့ ဝင်ခွင့်ရှိ၏၊ သူ၏ခရီးပန်းတိုင်သည် သုမင်္ဂလာဖြစ်၏။

၂၆။ သူ့အား မိန့်တော်မူသည်မှာ အို-ဒါဝတ်(ဒ်)မှတ်သားလော့၊ ငါသည် သင့်အား ဤကမ္ဘာမြေပေါ်တွင် ငါ၏ ကိုယ်စားလှယ်တော်ရာထူူးဖြင့် ချီးမြှင့်ထားတော်မူပြီ၊ လူသားတို့အလယ်ကြား၌ တရားကို မှန်ကန်စွာဆုံးဖြတ် လော့၊ အလ္လာဟ်အရှင်မြတ်၏ သမ္မာတရားလမ်းတော်မှ သွေဖယ်သွားအောင် လှည့်ဖြားသောသင်၏ ရာဂ၊ ဒေါသစသောမကောင်းစိတ်ဆွဲငင်ရာ လိုက်ပါကျင့်မူခြင်းကို မပြုလင့်၊ မှတ်သားကြလော့၊ အလ္လာဟ်အရှင်မြတ်၏ လမ်းတော်မှ လွဲချော်သွားသောသူတို့သည် တရားစစ်ကြောစီရင်တော်မူသောနေ့တော်ကြီးကို သတိမမူမေ့လျော့ နေကြသောကြောင့် အလွန်ပြင်းပြကြောက်မက်ဖွယ်အပြစ်ဒဏ်ကို ခံစားကြရလတ့ံ။

၂၇။ တဖန်ငါသည် ကမ္ဘာမြေပြင်မိုးကောင်းကင်နှင့်တကွ ေျကာင်းကင်မိုးမြေအကြားခပ်သိမ်းကုန်သောဝထ္ထုများကို အချည်းနှီးအကျိုးမဲ့ဖန်ဆင်းတော်မူသည်မဟုတ်ချေ၊ မယုံကြည်သူမိစ္ဆာမိုက်တို့က ယင်းသို့ဖန်ဆင်းတော်မူသည် ဟု ထင်မှတ်ကြ၏၊ သို့ဖြစ်၍ မိစ္ဆာယုတ်တို့သည် ငရဲမီးတွင် ပျက်စီးဆုံးရှုံးရမည်သာတည်း။

၂၉။ အို-တမန်တော်၊ ဤကျမ်းမြတ်ကုရ်အာန်ကို သင့်အား ငါထုတ်ပြန်ချပေးသနားတော်မူ၏၊ ဤကျမ်းတော်မြတ် သည် ကောင်းကြီးမင်္ဂလာအဖြာဖြာနှင့် ပြည့်စုံ၏၊ သို့ထုတ်ပြန်ပို့ချပေးသနားတော်မူသည်မှာ လူသားအပေါင်း တို့သည် ကျမ်းတော်မြတ်၏ ဂါထာတော်များကို စဉ်းစားဆင်ခြင်ဖို့ရာသော်လည်းကောင်း၊ အသိဉာာဏ်ရှိသူတို့ တွေးတော်သုံးသပ်ဖို့ရာသော်လည်းကောင်း ဖြစ်၏။

၃၀။ ငါသည် တမန်တော်ဒါဝတ်(ဒ်)အား စိုလိုင်မံခေါ် သားကောင်းရတနာကို ပေးသနားတော်မူ၏၊ မှတ်သားကြလော့၊ သူသည် အလ္လာဟ်အရှင်မြတ်ကို အမြဲဝတ်ပြု၍ မိမိအပြစ်များကို ဝန်ချတောင်းပန်၏။

၃၁။ တနေ့သ၌ နေမဝင်မီညနေချမ်းအချိန်တွင် အလွန်လျင်မြန်သောစစ်မြင်းများကို သူ့အား ပြသောအခါ။

၃၂။ သူပြောဆိုသည်မှာ ထိုမြင်းများကို ကန့်လန့်ကာနောက်ကွယ်သို့ ယူသွားသည့်တိုင်အောင် ငါသည် အလ္လာဟ် အရှင်မြတ်အား အာရုံပြုသည်ထက် လောကီစည်းစိမ်ဥစ္စာများကို သာလွန်နှစ်သက်မိချေပြီ။

၃၃။ ထို့နောက်ထိုမြင်းများကို ငါ၏ရှေ့သို့ သွင်းခဲ့ကြလော့ဟု အမိန့်ပေး၍ ရောက်သောအခါ ၎င်းမြင်းများ၏ ခြေ များနှင့် လည်တိုင်များကို သန်လျက်ဖြင့် ခုတ်ပိုင်းလေ၏။

၃၄။ ငါသည် တမန်တော်စိုလိုင်မာန်အား မုချဧကန်စုံစမ်းတော်မူ၏၊ သူ၏ ပလ္လင်ပေါ်၌ ရုပ်ကလာပ်တစ်ခုချထားူတော် မူ၏၊ ထိုအခါသူသည် သတိနောင်တရ၏။

၃၅။ တမန်တော်စိုလိုင်မာန်သည် ငါ့အထံတော်၌ ပန်ထွာဆုတောင်းသည်မှာ အို-အကျွနု်ပ်၏ အရှင်သခင်၊ အကျွနု်ပ်၏ အပြစ်များကို ခွင့်လွှတ်တော်မူပါ၊ အကျွနု်ပ်မရှိသည့်နောက် မည်သူတစ်စုံတစ်ယောက်နှင့်မျှ မထိုက်တန်သော အချုပ်အခြာအာဏာကို အကျွနု်ပ်အား ပေးသနားတော်မူပါ၊ အရှင်သည် ပေးကမ်းစွန့်ကြဲတော်မူထသောအရှင် အမှန်အကန်ဖြစ်တော်မူ၏။

၃၆။ ထိုအခါ ငါသည် လေကို တမန်တော်စိုလိုင်မာန်၏ အမိန့်ကို နာခံစေတော်မူ၏၊ လေသည် တမန်တော်၏ အမိန့်အတိုင်းရောက်လိုသောအရပ်သို့ ဖြည်းညှင်းသာယာစွာယူဆောင်၍ သွားလေ၏။

၃၇။ ထို့အပြင်အဆောင်အအုံတည်ဆောက်လျက်ရှိသောနတ်ဘီလူး၊ ပုလဲရတနာများကို ငုပ်ယူသောနတ်ဘီလူးများ အပါအဝင်ဖြစ်သောရှိုင်တန်မာရ်နတ်များကိုလည်း တမန်တော်စိုလိုင်မာန်၏ အမိန့်ကို နာခံစေတော်မူ၏။

၃၈။ ထို့အပြင်သံကြိုးနှင့်အတူတကွ ဖွဲ့နှောင်ထားသောရှိုင်တန်နတ်ဘီလူးများကိုလည်း တမန်တော်၏ အခိုင်းအစေ ဖြစ်စေတော်မူ၏။

၃၉။ ထို့နောက် တမန်တော်ကို ငါမိန့်တော်မူသည်မှာ အို-စိုလိုင်မာန်၊ ဤသည်ဤဟာများသည် ငါက သင့်အား ချပေးသနားတော်မူသောစည်းစိမ်ဥစ္စာများတည်း၊ ထို့ကြောင့်ပေးကမ်းူစွန့်ကြဲလိုလျှင် စွန့်ကြဲလော့၊ သိုမှီးသိမ်း ဆည်းထားလိုလျှင် သိမ်းဆည်းထားလော့၊ သင့်အား ဤပစ္စည်းများအတွက် တစ်စုံတစ်ရာစစ်ကြောမေးမြန်းမည် မဟုတ်ချေဟု ဖြစ်၏။

၄၀။ ထို့အပြင်မှတ်သားကြလော့၊ တမန်တော်စိုလိုင်မာန်သည် ငါ့အထံတော်၌ မျက်နှာရသူဖြစ်၏၊ သူ၏ ပန်းတိုင်သည် သုမင်္ဂလာဖြစ်၏။

၄၁။ ထို့အပြင်အို-မိုဟမ္မဒ်၊ ငါ၏ ကျေးကျွန်အိုင်ယူး(ဘ်)၏ အကြောင်းကိုလည်း သင်ဟောပြောလော့၊ သူသည် မိမိ၏ အသက်သခင်ကျေးဇူူးတော်ရှင်ကို တင်လျှောက်သည်မှာ အို-အရှင်မြတ်၊ ရှိုင်တန်မာရ်နတ်သည် အကျွနု်ပ် အား ဆင်းရဲဒုက္ခအမျိုးမျိုးနှင့် နှိပ်စက်နေပါသည်။

၄၂။ ထိုအခါသူ့အား အို-အိုင်ယူး(ဘ်)၊ သင်သည် မိမိခြေဖနောင့်ဖြင့် မြေကို ဆောင့်ေျလာ့ဟု ဗျာဒိတ်ပေးတော်မူ၏၊ သို့ဆောင့်သောအခါ စမ်းရေထွက်လာ၏၊ ဤရေသည် ရေချိုးဖို့ရာ ရေအေးလည်း ဖြစ်၏၊ သောက်ဖို့ရာရေ၊ အမောဖြေအားဖြည့်ဖို့ ရေလည်းဖြစ်၏။

၄၃။ ထို့အပြင်ငါသည် မိမိ၏ မဟာဂရုဏာတော်ဖြင့် တမန်တော်အိုင်ယူး(ဘ်)အား ၎င်း၏ အိမ်သူအိမ်သားကိုသော် လည်းကောင်း၊ သူတို့နှင့်တူသူများကိုသော်လည်းကောင်း၊ ပေးသနားတော်မူ၏၊ ယင်းသို့ပေးသနားတော်မူခြင်း ကား ငါ့ထံမှ ကောင်းကြီးမင်္ဂလာတော်ဖြစ်၏၊ အသိဉာာဏ်ရှိသူတို့အဖို့ အမှတ်သညာလည်းဖြစ်၏။

၄၄။ ထို့အပြင်သူ့အား အို-အိုင်ယူး(ဗ်)၊ သင်သည် သစ်ကိုင်းတစ်ကိုင်းကို ကိုင်၍ ရိုက်လော့၊ သင်သည် မိမိပြုသော သစ္စာကို မဖျက်လင့်၊ မှတ်သားကြလော့၊ ငါသည် သူ့အား တည်ကြည်သမာဓိရှိသူအဖြစ်နှင့်ပင် တွေ့မြင်တော် မူ၏၊ အလွန်မွန်မြတ်သောကျေးတော်မျိုး ကျွန်တော်မျိုးတစ်ဦးဖြစ်ပေစွ၊ စင်စစ်မှာ သူသည် မိမိကျေးဇူးတော် သခင် အလ္လာဟ်အရှင်မြတ်ဘက်တော်သို့ သတိနောင်တရခြင်းဖြင့် အမြဲမျက်နှာမူ၏။

၄၅။ အို-တမန်တော်မိုဟမ္မဒ်၊ ငါ၏ ကျေးကျွန်တမန်တော်အေဗရာဟမ်၊ အစ်စ်ဟတ်(က်)၊ ယအ်ကွတ်(ဘ်)တို့၏ အကြောင်းူအရာကို ဟောပြောလော့၊ ထိုတမန်တော်တို့သည် အရည်အချင်းကောင်းမြတ်၏၊ အမြော်အမြင်ကြီး သူတို့ဖြစ်ကြ၏။

၄၆။ မှတ်သားကြလော့၊ ငါသည် ထိုတမန်တော်တို့အား နောင်တမလွန်ဘဝ၌ရှိသောဘုံဗိမာန်ကို အမြဲသတိရတတ် သောဖြူစင်သောစိတ်သဘောအားဖြင့် သန့်ရှင်းစင်ကြယ်တော်မူ၏။

၄၇။ မှတ်သားကြလော့၊ ငါ၏ရှေ့တော်၌ ထိုတမန်တော်တို့သည် ငါအမြတ်တနိုးရွေးကောက်တော်မူသောသူတော် သူမြတ်တို့ဘောင်တွင် ပါဝင်သူများမုချဖြစ်ကြ၏။

၄၈။ အို-တမန်တော်မိုဟမ္မဒ်၊ အစ္စမာအီလ်၊ အီလီရှားဇွလ်ကစ်(ဖ်)လေ့တို့သည် တမန်တော်များဖြစ်ကြ၏၊ သူတို့ အကြောင်းကိုလည်း ဟောကြားလော့၊ စင်စစ်အားဖြင့် သူတို့သည် ငါရွေးကောက်တင်မြှောက်တော်မူသော သူတော်သူမြတ်တို့ဘောင်တွင် အပါအဝင်ဖြစ်ကြ၏။

၄၉။ ဤကျမ်းတော်မြတ်သည် အဆုံးအမသတိပေးတရားတော်ဖြစ်၏၊ မှတ်သားကြလော့၊ ဒုစရိုက်မကောင်းမှုကို ရှောင်ကြဉ်သူတို့အတွက်မူကား သူတို့၏ ခရီးပန်းတိုင်သည် သုမင်္ဂလာဖြစ်၏။

၅၀။ ထိုပန်းတိုင်သည် သုခဥယျာဉ်တော်များဖြစ်၏၊ ထိုဥယျာဉ်တော်များ၏ တံခါးများကို သူတို့အတွက် ဖွင့်ထား တော်မူ၏။

၅၁။ သူတို့သည် ထိုဥယျာဉ်တော်များတွင် လဲလျောင်းလျက် ဥယျာဉ်ရှိ မွန်မြတ်များပြားသော သစ်သီးသစ်ဥနှင့် အေးမြသောသောက်စရာတို့ကို တောင်းသောက်စားကြ၏။

၅၂။ ထို့အပြင်သူတို့အပါးတွင် စက္ခုအိန္ဒြေရှိသောနတ်ကညာများူလည်းရှိကြ၏။

၅၃။ ဤကျေးဇူးတော်များသည် တရားစီရင််တော်မူသောနေ့တွင် ပေူးသနားတော်မူမည်ဟု သင်တို့အား ဂတိသစ္စာ ထားတော်မူသောအောင်ဆုမင်္ဂလာတော်တည်း။

၅၄။ မှတ်သားကြလော့၊ ဤကျေးဇူးတော်များသည် ငါပေးသနားတော်မူသောဘောဇဉ်ရိက္ခာများအမှန်ဖြစ်၏၊ ၎င်းတို့ သည် ဘယ်သောအခါမျှ မပုပ်သိုးမပျက်စီးချေ။

၅၅။ ဤအောင်ဆုမင်္ဂလာတော်ကြီးသည် သမ္မာတရားတော်အတိုင်း ကျင့်ကြံသောသူမွန်သူမြတ်တို့အဖို့အရာဖြစ်၏၊ မှတ်သားကြလော့၊ တရားလွန်သူအပြစ်ကောင်တို့မှာမူကား သူတို့၏ခရီးပန်းတိုင်သည် အမင်္ဂလာဖြစ်ရလတ့ံ။

၅၆။ သူတို့သည် အဝီစိငရဲမီးတွင် လောင်ကျွမ်းကြရလတ့ံ၊ အလွန်ဆိုးဝါသောနေရာထိုင်ခင်ဖြစ်၏။

၅၇။ ငရဲအတွင်း၌ သူတို့သောက်ဖို့ရာ ကျိုက်ကျိုက်ဆူသောရေပူရှိ၏၊ အလွန်အေးသောရေခဲရေလည်း ရှိ၏၊ သူတို့ သည် ၎င်းရေကိုသာ သောက်ရမည်သာတည်း။

၅၈။ ထို့အပြင်အပူအအေးစုံတွဲရှိသကဲ့သို့့ အခြားအပြစ်ဒဏ်များလည်း စုံတွဲစုံတွဲစီ အမျိုးမျိုးအဖုံဖုံရှိသေး၏။

၅၉။ အို-ငရဲသားတို့၊ သည်မှာ သင်တို့ထံသို့ မစဉ်းစားမဆင်ခြင်ပဲ အရေးတကြီးတိုးဝင်လာသောစစ်တပ်ကြီးတစ်ခု ရှိသေး၏၊ ငရဲသားတို့က သင်တို့အဖို့သာယာသောခရီးဦးကြိုဆိုသောစကားမရှိချေ၊ အကယ်စင်စစ်သူတို့သည် ငရဲမီး၌ ဖုတ်ကင်ခြင်းကို ခံကြရလတ့ံဟု ဆို၏။

၆၀။ သူတို့က ဟယ်-လမ်းမှားသို့ သွေးဆောင်သောသူယုတ်မာကြီးတို့၊ သင်တို့ကို ခရီးဦးကြိုဆိုဖို့ရာ နှစ်သိမ့်စေ သောစကားမရှိချေ၊ သင်တို့သည် မိမိတို့ဖျားယောင်းသွေးဆောင်ခြင်းအားဖြင့် ငါတို့ကို ဤဘေးဒဏ်သို့ ယူဆောင် လာကြ၏၊ ယခုမူကား ကံဆိုးမိုးမှောင်ဘဝသို့ ရောက်ရချေပြီဟု ဆိုကြ၏။

၆၁။ တဖန်သူတို့က အို-အကျွနု်ပ်တို့၏ ကျေးဇူးတော်သခင်၊ အကျွနု်ပ်တို့အား ဤဘေးဒုက္ခသို့ ပို့ဆောင်သောသူ တို့အား အပြစ်ဒဏ်နှစ်ဆထမ်းပိုးတိုးပေးတော်မူပါဟု တင်လျှောက်ကြ၏။

၆၂။ ငရဲသားတို့အချင်းချင်း ဤသို့မေးမြန်းကြ၏၊ ငါတို့မလိမ္မာဆိုးသွမ်းသူဟု ယူဆလေ့ရှိသောသူများကို ငါတို့ ယခုမမြင်ရချေ၊ ငါတို့အဘယ်အဖြစ်သို့ ဆိုက်ရောက်နေကြသနည်း။

၆၃။ ငါတို့သည် သူတို့အား ရယ်စရာဟု ထင်မှတ်ခဲ့ခြင်းသည် မှားပြီလော သို့မဟုတ် ငါတို့သည် သူတို့ကို မမြင် ပဲ မျက်စိမှောက်နေသလော။

၆၄။ မှတ်သားကြလော့၊ ငရဲသားတို့သည် အချင်းချင်းတစ်ဦးနှင့်တစ်ဦး ယင်းကဲ့သို့မုချဧကန်အငြင်းအခုန်ပြုကြ၏၊ အချင်းဖြစ်ပွားကြ၏။

၆၅။ အို-တမန်တော်မိုဟမ္မဒ်၊ သင်သည် သူတို့အား ဟောကြားလော့၊ ငါသည် အဆုံးအမသတိပေးသူသာတည်း၊ အလ္လာဟ်အရှင်မြတ်မှတပါး အခြားအရှင်သခင်မရှိချေ၊ အရှင်မြတ်သည် တစ်ဆူတည်းအထီးထီးတည်တော် မူ၏၊ ဇာတိပကတိအားဖြင့် ကုံလုံပြည့်စုံတော်မူ၏။

၆၆။ အရှင်မြတ်သည် ကမ္ဘာမြေပြင်မိုးကောင်းကင်နှင့် မိုးမြေအကြားရှိရှိသမျှတို့ကို သိမ်းရုံးစိုးပိုင်တော်မူ၏၊ အနန္တ တန်ခိုးတော်သခင်၊ အပြစ်လွှတ်တော်မူသောအရှင်ဖြစ်တော်မူ၏။

၆၇။ အို-တမန်တော် ဟောပြောလော့၊ ဟယ်-အချင်းတို့၊ ဤကျမ်းမြတ်ကုရ်အာန်သည် အတိုင်းမသိသိမ်မွေ့နက်နဲ မြင့်မြတ်လှ၏။

၆၈။ သို့ပါလျက် သင်တို့သည် ဤကျမ်းတော်မြတ်ကို မလိုက်နာ ကျောပေးကြ၏။

၆၉။ ဟယ်-အချင်းတို့၊ ကောင်းကင်းတမန်တော်ကြီးများအချင်းချင်း ငြင်းခုံကြသောအခါ သူတို့အကြောင်းကို ငါ မသိရချေ။

၇၀။ ငါသည် အလ္လာဟ်အရှင်မြတ်စေလွှတ်တော်မူသော တမန်တော်ရိုးရိုးသာတည်းဟု ငါ့ထံ ဗျာဒိတ်တော်လာ၏။

၇၁။ အို-တမန်တော်၊ သင်၏ အသက်သခင်ကျေးဇူးရှင်သည် ကောင်းကင်တမန်တော်မျာအား မိန့်တော်မူသည်မှာ အို-ကောင်းကင်တမန်အပေါင်းတို့၊ ကြည့်ကြလော့၊ ငါသည် လူသားကို ရွှံ့မြေမှ ဖန်ဆင်းတော်မူမည်ဖြစ်၏။

၇၂။ ယင်းသို့ဗျာဒိတ်ပေးတော်မူပြီးနောက် လူသားကို ကိုယ်ကာယခြေလက်အင်္ဂါအစုံအလင်ဖန်ဆင်းတော်မူ၏၊ ၎င်း ကိုယ်ကာယအတွင်း ငါ၏ အသက်ဝိညာဉ်ကို မှုတ်သွင်းတော်မူ၏၊ ယင်းသို့အသက်သွင်းတော်မူပြီးသည်နောက် ကောင်းကင်တမန်တို့အား လူသားကို ဦးညွှတ်ချ၍ အရိုအသေပြုရန် ခိုင်းတော်မူ၏။

၇၃။ ကောင်းကင်တမန်တော်များအနက် တဦးသောတမန်တော်မှတပါး အခြားတမန်တော်များသည် ဦးညွှတ်ချ၍ အရိုအသေပြုကြ၏။

၇၄။ အရိုအသေမပြုသောကောင်းကင်တမန်မှာ အီဗလစ်(စ်)ဖြစ်၏၊ သူသည် လူသားအား စက်ဆုတ်ရွံရှာ၏၊ မထီ လေးစားပြု၏၊ မယုံကြည်သူမိစ္ဆာမိုက်တို့ဘောင်တွင် အပါအဝင်ဖြစ်သွား၏။

၇၅။ အလ္လာဟ်အရှင်မြတ် ဗျာဒိတ်ပေးသည်မှာ အို-အီဗလစ်(စ်)၊ နင်သည် ငါ၏လက်တော်နှစ်ဘက်ဖြင့် ဖန်ဆင်းသော လူသားကို ဦးညွှတ်ချခြင်းမပြုအောင် နင့်အား အဘယ်အရာတစ်စုံတစ်ခုက တားဆီးကန့်ကွက်သနည်း၊ နင်သည် အလွန်မာနကြီးသလော၊ သို့မဟုတ် နင်သည် မြင့်မြတ်၍ တန်ခိုးကြီးသူတို့ဘောင်တွင် အပါအဝင်ဖြစ်သလော။

၇၆။ အီဗလစ်(စ်)က တုံ့ပြန်လျှောက်သည်မှာ အို-အလ္လာဟ်အရှင်၊ အကျွနု်ပ်သည် လူသားထက်သာလွန်မြင့်မြတ်ပါ၏၊ အရှင်မြတ်သည် အကျွနု်ပ်ကို မီးမှ ဖန်ဆင်းတော်မူပါ၏၊ လူသားကို မြေစေးမှ ဖန်ဆင်းတော်မူပါ၏။

၇၇။ ထိုအခါအလ္လာဟ်အရှင်မြတ်ဗျာဒိတ်ပေးတော်မူသည်မှာ အို-အီဗလစ်(စ်)၊ နင်သည် ဤသုခဘုံနန်းမှ အမြန် ထွက်သွားလော့၊ မှတ်သားလော့၊ အမှန်မှာ နင်သည် ငါ့အထံတော်မှ နှင်ထုတ်ခံရသောရာဇဝတ်ကောင်ဖြစ်၏။

၇၈။ ထို့အပြင် မှတ်သားလော့၊ စစ်ကြောစီရင်တော်မူသောနေ့တော်ကြီးတိုင်အောင် ငါ၏ ကျိန်ဆဲခြင်းသည် နင့်ကို နှိပ်စက်လတ့ံ။

၇၉။ ထိုအခါသူက အို-အကျွနု်ပ်၏အရှင်သခင်၊ သူတို့ကို ရှင်ပြန်ထမြောက်စေတော်မူသောနေ့တော်ကြီးတိုင်အောင် အကျွနု်ပ်၏ အပြစ်ဒဏ်ကို ဆိုင်းင့ံထားတော်မူပါဟု ပြန်လျှောက်၏။

၈၀၊၈၁။ နင်သည် ချိန်းချက်သတ်မှတ်ထားသောအချိန်တိုင်အောင် အပြစ်ဒဏ်တော်ကို ရွှေ့ဆိုင်းထားခြင်းခံရသော သူတို့ဘောင်တွင် အပါအဝင်ဖြစ်၏ဟု အရှင်မြတ်ဗျာဒိတ်ပေးတော်မူ၏။

၈၀၊၈၁။ နင်သည် ချိန်းချက်သတ်မှတ်ထားသောအချိန်တိုင်အောင် အပြစ်ဒဏ်တော်ကို ရွှေ့ဆိုင်းထားခြင်းခံရသော သူတို့ဘောင်တွင် အပါအဝင်ဖြစ်၏ဟု အရှင်မြတ်ဗျာဒိတ်ပေးတော်မူ၏။

၈၂။ ထိုအခါအီဗလစ်(စ်)က အို-အရှင်မြတ်၊ အရှင်၏ အနန္တတန်ခိုးတော်ကို တိုင်တည်၍ ဆိုပါ၏၊ အကျွန်ုပ်သည် လူသားအားလုံးတို့ကို မုချအမှန်ဖျားယောင်းသွေးဆောင်ပါမည်။

၈၃။ သို့သော် အရှင်မြတ်ကို အမြတ်တနိုးဝတ်ပြုသောစိတ်တခုတည်းသောရှိသော ကျေးတော်မျိုးကျွန်တော်မျိုးတို့ကို မူကား အကျွနု်ပ်မလှည့်စားနိုင်ပါဟု လျှောက်ထားပြန်၏။

၈၄၊၈၅။ အလ္လာဟ်အရှင် ဗျာဒိတ်ပေးတော်မူသည်မှာ အို-အီဗလစ်(စ်)၊ ငါသည် အမှန်ကိုသာ မိန့်တော်မူ၏၊ အမှန်စကား ကား ငါသည် ငရဲကို နင်နှင့်တကွ နင့်နောက်ကို လိုက်သူများနှင့် ပြည့်နှက်အောင် ဖြည့်တော်မူမည်။

၈၄၊၈၅။ အလ္လာဟ်အရှင် ဗျာဒိတ်ပေးတော်မူသည်မှာ အို-အီဗလစ်(စ်)၊ ငါသည် အမှန်ကိုသာ မိန့်တော်မူ၏၊ အမှန်စကား ကား ငါသည် ငရဲကို နင်နှင့်တကွ နင့်နောက်ကို လိုက်သူများနှင့် ပြည့်နှက်အောင် ဖြည့်တော်မူမည်။

၈၆။ အို-တမန်တော်မိုဟမ္မဒ်၊ သင်သည် လူသားအပေါင်းတို့အား ဟောကြားလော့၊ ဟယ်-အချင်းတို့၊ ငါသည် သမ္မာတရားတော်ကို ဟောကြားသွန်သင်ဆုံးမရခြင်းကြောင့် သင်တို့ထံမှ အဖိုးအခတောင်းလည်း မတောင်းချေ၊ တမန်တော်ဟန်ဆောင်သောလိမ်လည်သူလည်း မဟုတ်ချေ။

၈၇။ မှတ်သားကြလော့၊ ကျမ်းမြတ်ကုရ်အာန်သည် ဝေနေယျသတ္တဝါအပေါင်းတို့အတွက် အဆုံးအမတရားတော်မှတပါး အခြားတစ်စုံတစ်ရာမဟုတ်ချေ။

၈၈။ သင်တို့သည် ထိုကျမ်းတော်မြတ်အကြောင်းအရာအမှန်ကို ကာလမကြာမီ သိကြရလိမ့်မည်။