Burmese - Chapter 44 - Ad-Dukhan

၁။ ဟာ မီး(မ်)။

၂။ အရာခပ်သိမ်းကုန်တို့ကို ရှင်းလင်းစေသောကျမ်းမြတ်ကုရ်အာန်အားဖြင့် ငါအရှင်မြတ်၏ ဘုန်းတော်ဂုဏ်တော်ကို အာရုံပြုကြလော့။

၃။ မှတ်သားကြလော့၊ ငါသည် ထိုကျမ်းမြတ်ကို မင်္ဂလာရှိသောညဉ့်တစ်ညဉ့်၌ ထုတ်ပြန်ချပေးသနားတော်မူ၏၊ မှတ်သားကြလော့၊ ငါသည် အမြဲတစေသတိပေးနေတော်မူ၏။

၄။ ထိုညဉ့်မြတ်၌ နက်နဲသိမ်မွေ့သောပညတ်တော်တိုင်းကို ထင်ရှားရှင်းလင်းစေတော်မူ၏။

၅။ ငါ၏အထံတော်မှ ပညတ်တော်ဖြစ်၏။

၆။ ကျမ်းတော်သည် သင်၏ အရှင်သခင်အထံတော်မှ ကောင်းကြီးမင်္ဂလာတော်ဖြစ်၏၊ မှတ်သားလော့၊ အရှင်မြတ် သည် အကြွင်းမဲ့ကြားတော်မူသောအရှင်၊ အကြွင်းမဲ့သိတော်မူသောအရှင်ဖြစ်တော်မူ၏။

၇။ အရှင်မြတ်သည် မိုးကောင်းကင်၊ ကမ္ဘာမြေကြီးနှင့် မိုးမြေအကြားရှိသမျှအရာဝထ္ထုခပ်သိမ်းကုန်တို့၏ အရှင် သခင်ဖြစ်တော်မူ၏၊ အို-လူသားတို့၊ သင်တို့၌ ယုံကြည်မှုတရားအမှန်အကန်ရှိလျှင် ကောင်းလေစွ။

၈။ အရှင်မြတ်မှတပါး အခြားအရှင်သခင်မရှိချေ၊ အလ္လာဟ်အရှင်မြတ်သာလျှင် အသက်ရှင်စေတော်မူ၏၊ အသက် သေစေတော်မူ၏၊ အရှင်မြတ်သည် သင်နှင့် သင်၏ မိဘဘိုးဘွားရှေးလူဟောင်းတို့၏ အသက်သခင်ကျေးဇူး ရှင်ကြီးဖြစ်တော်မူ၏။

၉။ သို့ပါလျက် သူတို့သည် ဒွိဟသံသယမှု၌ နစ်မွန်းနေကြ၏။

၁ဝ။ အို-တမန်တော်၊ သင်သည် မိုးကောင်းကင်မှ တစ်ခဲနက်သောအခိုးအလျှံတို့ထင်ရှားစွာထွက်ပေါ်လာမည့်နေ့ကို စောင့်ဆိုင်းနေလော့။

၁၁။ ထိုအခိုးအလျှံတို့သည် လူသားတို့ကို ဝိုင်းဝန်းဖုံးအုပ်ထားလိမ့်မည်၊ ဤသည်ကား အလွန်ပြင်းပြနာကျယ်ဖွယ်သော အပြစ်ဒဏ်တော်ကြီးဖြစ်၏။

၁၂။ ထိုအခါမယုံကြည်သူတို့က ဟစ်အော်လျှောက်တင်ကြမည်မှာ အို-အကျွနု်ပ်တို့၏ အသက်သခင်ကျေးဇူးရှင်၊ အကျွန်ုပ်တို့ကို အပြစ်ဒဏ်တော်မှ ကယ်နှုတ်တော်မူပါ၊ အကျွနု်ပ်တို့သည် ယုံကြည်သူအမှန်ပင်ဖြစ်ကြပါ၏။

၁၃။ စင်စစ်မှာ သူတို့သည် အဘယ်မှာလျှင် တရားတော်ကို သတိရကြမည်နည်း၊ အမှန်ကိုဆိုသော် တရားတော်ကို ရှင်းလင်းဟောပြောသောတမန်တော်သည် သူတို့ထံ၌ ပွင့်လာခဲ့ပြီ။

၁၄။ သို့ပါလျက် ထိုသူတို့သည် ထိုတမန်တော်ကို မျက်နှာလွှဲကျောခိုင်းကြပြီးလျှင် သူတပါးသင်ကြားခြင်းခံရသော အရူးသာတည်းဟူ၍ ဆိုကြ၏။

၁၅။ မှတ်သားကြလော့၊ ငါသည် အပြစ်ဒဏ်ကို ခေတ္တခဏဖယ်ရှားထားတော်မူ၏၊ မှတ်သားကြလော့၊ သင်တို့သည် မိစ္ဆာဒိဋ္ဌိအယူဝါဒသို့ ပြန်ကြ၏။

၁၆။ ငါသည် မိစ္ဆာဒိဋ္ဌိတို့အား အလွန်ကြီးမားသောဖမ်းဆီးခြင်းဖြင့် ဖမ်းဆီးတော်မူသောနေ့တော်ကြီး၌ ငါသည် သူတို့ကို မုချဧကန်အပြစ်ဒဏ်ခတ်တော်မူမည်။

၁၇။ ငါသည် သူတို့ထက်ရှေးကျသောဖွာရော၏ အသင်းသားများကို စုံစမ်းတော်မူ၏၊ သူတို့ထံသို့ အလွန်မြင့်မြတ်သော တမန်တော်တစ်ပါးရောက်လာ၏။

၁၈။ ထိုတမန်တော်က သူတို့အား ဟယ်-အချင်းတို့၊ အလ္လာဟ်အရှင်မြတ်၏ ကျေးကျွန်များကို ငါ့အား ပြန်အပ် ကြလော့၊ ငါသည် သင့်တို့အဖို့အရာ သစ္စာရှိသောတမန်တော်သာတည်း။

၁၉။ သင်တို့သည် အလ္လာဟ်အရှင်မြတ်အား ငါတကောမလုပ်ကြလင့်၊ မှတ်သားကြလော့၊ ငါသည် သင်တို့ထံသို့ ထင်ရှားသောသက်သေခံချက်တော်ကို ယူဆောင်လာ၏။

၂ဝ။ မှတ်သားကြလော့၊ သင်တို့သည် ငါ့ကို ခဲပေါက်၍ သတ်ခြင်းကို မပြုစေခြင်းငှာ ငါသည် ငါ၏အရှင်သခင်၊ သင်တို့၏အရှင်သခင်၌ ခိုလှုံ၏။

၂၁။ အကယ်၍သင်တို့သည် ငါ့ကို မယုံကြည်လျှင် ငါသွားပါရစေ။

၂၂။ သူသည် မိမိ၏ အသက်သခင်ကျေးဇူးရှင်ကြီးအား ဤသူ ဤသူတို့သည် အပြစ်ရှိသူများဖြစ်ကြပါ၏ဟု ငိုကြွေး တိုင်တန်း၏။

၂၃။ ထိုအခါသူ၏ အရှင်သခင်က အို-တမန်တော်မူစာ၊ ငါ၏ ကျေးကျွန်များကို ညတွင်ခေါ်ငင်ထွက်ပြေးလော့၊ မှတ်သားလော့၊ သင်တို့ကို လိုက်ဖမ်းလိမ့်မည်ဟု ဗျာဒိတ်ပေးတော်မူ၏။

၂၄။ ထို့အပြင်ပင်လယ်ကို သင်တို့နောက်တွင် စွန့်ထားခဲ့ကြလော့၊ သင်၏ ရန်သူတို့သည် ရေနစ်မြုပ်သေရသော စစ်သည်တော်များဖြစ်ကြ၏။

၂၅။ ထိုသူတို့သည် မြောက်မြားစွာသောဥယျာဉ်ပန်းမာလ်နှင့် စိမ့်စမ်းရေတွင်းများကို စွန့်ပစ်ထားခဲ့ကြရ၏။

၂၆။ ထို့အပြင် ကိုင်းကျွန်းလယ်ယာ၊ ဥစ္စာခမ်းနား၊ အလွန်ကြီးကျယ်သောအဆောက်အဦးများကိုလည်း စွန့်ပစ်ထားခဲ့ ကြရ၏။

၂၈။ ၎င်းတို့သည် ဤကဲ့သို့ပင် ဘဝပြောင်းသွားကြရ၏၊ နောက်သူတို့ပိုင်ပစ္စည်းဥစ္စာများကို အခြားအသင်းသား တို့အား အမွေပစ္စည်းဖြစ်စေတော်မူ၏။

၂၉။ ၎င်းတို့သေကြေပျက်စီးသောကြောင့် မိုးကောင်းကင်နှင့် ကမ္ဘာမြေပြင်က ဝမ်းနည်းကြေကွဲခြင်းမပြုချေ၊ သူတို့၏ အပြစ်ဒဏ်ကို ရွှေ့ဆိုင်းထားတော်မမူချေ။

၃ဝ။ ငါသည် အစ္စရာအီလ်အမျိုးသားတို့အား ရှက်ဖွယ်သောအပြစ်ဒဏ်မှ ကယ်နှုတ်တော်မူ၏။

၃၁။ ငါသည် သူတို့ကို ဖွာရောမင်းလက်မှ ကယ်နှုတ်တော်မူ၏၊ သူသည် မသူတော်တို့၏ အာဏာရှင်ဖြစ်၏။

၃၂။ ငါသည် အစ္စရာအီလ်အမျိုးသားတို့ကို လူမျိုးတကာတို့အထဲမှ ရွေးကောက်ချီးမြှောက်တော်မူ၏။

၃၃။ ငါသည် သူတို့အား ငါ၏ သက်သေသာဓကတော်များကို ချပေးသနားတော်မူ၏၊ ထိုသာဓကတော်များသည် ထင်ရှားကြီးမားသောစုံစမ်းခြင်းလည်းဖြစ်၏။

၃၄။ မှတ်သားကြလော့၊ ဤကိုရိုက်ရ်ှအမျိုးသားတို့သည် အမှန်ပင် ဤသို့ဆိုကြ၏။

၃၅။ ငါတို့သည် ပထမသေလွန်ကွယ်ပျောက်ပြီးသည့်နောက် ဘာမျှမဖြစ်နိုင်ချေ၊ ငါတို့သည် ပြန်ရှင်ရမည်မဟုတ်ချေ။

၃၆။ သင်တို့အမှန်ကိုဆိုလျှင် ငါတို့မိဘဘိုးဘွားတို့ကို ပြန်ယူခဲ့ပါ။

၃၇။ သူတို့သည် တူဘာလူမျိုးနှင့် ၎င်းတို့ထက်ရှေးကျသောလူဟောင်းများထက် သာလွန်ကောင်းမြတ်ကြသလော၊ ငါသည် ထိုသူတို့အားလုံးကို သူတို့၏အပြစ်များကြောင့် ကွပ်မျက်စီရင်တော်မူ၏။

၃၈။ ငါသည် ကမ္ဘာမြေပြင်မိုးကောင်းကင်နှင့်တကွ မိုးမြေအကြားရှိရှိသမျှအရာများကို အချည်းနှီးအကျိုးမဲ့ဖန်ဆင်း တော်မူသည်မဟုတ်ချေ။

၃၉။ ငါသည် ၎င်းတို့ကို တရားတော်အတွက်သာ ဖန်ဆင်းတော်မူ၏၊ သို့သော်အရေအတွက်များစွာသောသူတို့သည် မသိကြချေ။

၄ဝ။ မုချဧကန်တရားစီရင်ဆုံးဖြတ်တော်မူသောနေ့တော်ကြီးကို သူတို့အားလုံးအတွက် သတ်မှတ်ချိန်းချက်ထားတော် မူ၏။

၄၁။ ထိုနေ့တော်ကြီး၌ မိတ်ဆွေတစ်ဦးက အခြားမိတ်ဆွေတစ်ဦးကို ကျေးဇူးမပြုနိုင်ချေ၊ သူတို့ကို ကူညီရိုင်းပင်း မည်မဟုတ်ချေ။

၄၂။ သို့ရာတွင် အလ္လာဟ်အရှင်မြတ် ကောင်းကြီးမင်္ဂလာပေးသနားတော်မူသောသူများကား ယင်းသို့မဟုတ်ချေ၊ မှတ်သားကြလော့၊ အရှင်မြတ်သည် အနန္တတန်ခိုးတော်အရှင်၊ အနန္တကောင်းကြီးမင်္ဂလာတော်သခင်ဖြစ်တော်မူ၏။

၄၃။ မှတ်သားကြလော့၊ ရှားစောင်းပင်သည်သာလျှင်။

၄၄။ အပြစ်ထိုက်သင့်သူတို့စားမျိုရန် အစာအာဟာရဖြစ်၏။

၄၅။ ထိုရှားစောင်းပင်သည် ငရဲသားတို့ဝမ်းတွင်း၌ အရည်ကျိုထားသောကြေးနီရည်ကဲ့သို့ ပွက်ပွက်ဆူနေ၏။

၄၆။ ရေနွေးပွက်ပွက်ဆူနေသကဲ့သို့လည်း ဖြစ်၏။

၄၇။ ထိုနေ့တော်ကြီး၌ မိန့်တော်မူမည်မှာ ဤသူကို ဖမ်းဆီး၍ ငရဲမီးအတွင်းသို့ ဆွဲသွင်းလော့။

၄၈။ ထို့နောက်သူ၏ ဦးခေါင်းထိပ်ထက် ပွက်ပွက်ဆူသောရေပူကို လောင်းချလော့။

၄၉။ ထို့အပြင်၎င်းအား ဤသို့ပြောလော့၊ နင်သည် ဤအပြစ်ဒဏ်၏ အရသာကို မြိန်ရှက်စွာမြည်းလော့၊ စင်စစ်မှာ နင်သည် လောကတွင် တန်ခိုးဂုဏ်သိမ်မြင့်မြတ်၏။

၅ဝ။ မှတ်သားလော့၊ ယနေ့သည် နင်ယုံမှားသံသယရှိသောနေ့တော်ကြီးအမှန်ပင်ဖြစ်၏။

၅၁။ မှတ်သားကြလော့၊ ဆွလားသ်ဝတ်ကို စောင့်ထိန်းသောသူတို့သည် လုံခြံုသာယာသောနေရာ၌ စံစားရလိမ့်မည်။

၅၂။ ပန်းမလ်ဥယျာဉ်စိမ့်စမ်းချောင်းမြောင်းတို့အလယ်တွင် စံစားရလိမ့်မည်။

၅၃။ နူးည့ံပြေပြစ်သောပိုးထည်အဝတ် ပန်းအမျိုးမျိုးထိုးထား၍ ချောမောထူထပ်သောပိုးထည်အဝတ်များကို ဝတ်ဆင် လျက် တစ်ဦးနှင့်တစ်ဦး မျက်နှာချင်းဆိုင်၍ နေထိုင်စံစားရလိမ့်မည်။

၅၄။ ယင်းကဲ့သို့ မွေ့လျော်စံစားစေတော်မူမည်၊ ၎င်းအပြင်ငါသည် ၎င်းတို့အား မျက်လုံးမျက်ဆံပြည့်ဝသောနတ် ကညာတို့နှင့် ထိမ်းမြားပေးတော်မူလိမ့်မည်။

၅၅။ သူတို့သည် နိဗ္ဗာန်ဥယျာဉ်တော်၌ ဘေးမရှိ လုံခြံုစွာနှင့် အလိုရှိရာအထူးထူးအထွေထွေသောသီးမျိုးဥမျိုးများကို တောင်းယူနိုင်ကြ၏။

၅၆။ သူတို့သည် ပထမသေခြင်းမှတပါး နိဗ္ဗာန်တွင် သေခြင်းကို မတွေ့ကြံုရတော့ချေ၊ ထို့အပြင်အရှင်မြတ်သည် သူတို့ကို ငရဲဘေးဒဏ်မှ ကယ်နှုတ်တော်မူပြီ။

၅၇။ ယင်းကယ်နှုတ်ခြင်းသည် သင်၏အသက်သခင်ကျေးဇူးရှင်ကြီး၏ ကောင်းကြီးမင်္ဂလာတော်ဖြစ်၏၊ အထွဋ်မြတ်ဆုံး သောအောင်မြင်ခြင်းတည်း။

၅၈။ အို-တမန်တော်၊ သူတို့တရားရစေဖို့ရာ ငါသည် ဤကျမ်းမြတ်ကုရ်အာန်ကို လွယ်ကူစွာသိနိုင်ရန် သင်၏ ဘာသာစကားဖြင့် ထုတ်ပြန်ပို့ချပေးသနားတော်မူ၏။

၅၉။ သို့ဖြစ်၍ သင်သည် စောင့်ဆိုင်းနေလော့၊ သူတို့လည်း စောင့်ဆိုင်းနေကြ၏။