Burmese - Chapter 45 - Al-Jathiyah

၁။ ဟာ မီး(မ်)။

၂။ ဤကုရ်အာန်ကျမ်းတော်သည် အနန္တတန်ခိုးတော်သခင်၊ သဗ္ဗညုတဉာာဏ်တော်ရှင်အလ္လာဟ်အရှင်မြတ်၏ အထံ တော်မှ ဖြစ်၏။

၃။ မှတ်သားကြလော့၊ မိုးကောင်းကင်နှင့် ကမ္ဘာမြေကြီး၌ ယုံကြည်သူတို့အဖို့အရာ သက်သေသာဓကတော်များ ပါရှိ၏။

၄။ အို-လူသားအပေါင်းတို့၊ သင်တို့ကို ဖန်ဆင်းတော်မူခြင်းနှင့် တိရိစ္ဆာန်သတ္တဝါများကို ကမ္ဘာမြေပေါ်ဝယ် အနှံ့အပြား ကြဲဖြန့်ထားတော်မူခြင်းတို့၌လည်း အမှန်အကန်ယုံကြည်သူတို့အဖို့အရာ သက်သေသာဓကတော်များပါရှိ၏။

၅။ နေ့နှင့်ညဉ့်ကို အလှည့်ကျလဲလှယ်တော်မူခြင်း၊ မိုးကောင်းကင်မှ ရိက္ခာချပေးသနားတော်မူခြင်း၊ မြေသေ မြေဟောင်းတို့ကို ထိုမိုးရေဖြင့် တဖန်ပြန်ရှင်တော်မူခြင်း၊ လေများကို တိုက်ခတ်စေတော်မူခြင်းများသည် အမျှော်အမြင်စဉ်းစားဉာာဏ်ရှိသူတို့အဖို့အရာ သက်သေသာဓကတော်များဖြစ်ကြ၏။

၆။ အို-တမန်တော်၊ ဤသာဓကများသည် ငါက သင့်အား မှန်ကန်စွာရေရွတ်ပြတော်မူသောသက်သေသာဓကတော် တည်း၊ အလ္လာဟ်နှင့် အရှင်မြတ်၏ သက်သေသာဓကတော်များကို မယုံကြည်ငြင်းသောသူတို့သည် အဘယ် အရာကို ယုံမည်နည်း။

၇။ ဒုစရိုက်မုသားကောင်တိုင်းပင် ပျက်စီးဆုံးရှုံးရမည်သာတည်း။

၈။ ထိုသူသည် မိမိအား ရွတ်ဖတ်ပြသော အလ္လာဟ်အရှင်မြတ်၏ နှုတ်ကပတ်တော်များကို ကြားသော်လည်း မကြားသကဲ့သို့ အလေးမပြု မော်ကြွားနေ၏၊ ထို့ကြောင့်အေ-တမန်တော်၊ သင်သည် ထိုသူအား အလွန်ပြင်းပြ နာကျင်ဖွယ်သောအပြစ်ဒဏ်အကြောင်း သတင်းကို ပေးလော့။

၉။ ထိုသူသည် ငါ၏နှုတ်ကပတ်တော်များမှ တစ်စုံတစ်ခုသောဂါထတော်ကို သိရသောအခါ သူသည် ထိုဂါထာတော် ကို ပျက်ရယ်၏၊ ဤလူအမျိုးအစားအဖို့အရာ အလွန်ရှက်ဖွယ်သောအပြစ်ဒဏ်တော်ရှိ၏။

၁ဝ။ ထိုသူတို့ရှေ့၌ ငရဲရှိ၏၊ သူတို့၏ လောကီစည်းစိမ်ဥစ္စာတို့သည်ကား ထိုသူတို့ကို ကျေးဇူးမပြုစွမ်းနိုင်ချေ၊ သူတို့ကို ကာကွယ်စောင့်ရှောက်ရန်၊ အလ္လာဟ်အရှင်မြတ်မှတပါး ၎င်းတို့ကိုးကွယ်သောဘုရားတုဘုရားယောင် တို့သည် ဘာမျှမတတ်စွမ်းနိုင်ချေ၊ သူတို့ခံစားဖို့ရာ အလွန်ကြီးမားသောအပြစ်ဒဏ်တော်ရှိ၏။

၁၁။ ဤကျမ်းတော်သည် လမ်းညွှန်ကျမ်းတော်ဖြစ်၏၊ အကြင်သူတို့သည် မိမိတို့၏ အသက်သခင်ကျေးဇူးရှင်ကြီး၏ နှုတ်ကပတ်တော်ကို မယုံကြည်အ့ံ၊ ထိုသူတို့အဖို့အရာ အလွန်ပြင်းပြနာကျင်ဖွယ်သောအပြစ်ဒဏ်တော်ရှိ၏။

၁၂။ အရှင်မြတ်၏ အမိန့်တော်အားဖြင့် လှေသင်္ဘောစသည်တို့သည် ပင်လယ်သမုဒ္ဒရာများတွင် သွားလာရန်သော် လည်းကောင်း၊ သင်တို့သည် အရှင်မြတ်၏ ကျေးဇူးတော်ကို ရှာဖွေကြရန်သော်လည်းကောင်း၊ သင်တို့သည် အရှင်မြတ်ကျေးဇူးတော်ကို သိကောင်းသိရန်သော်လည်းကောင်း၊ အလ္လာဟ်အရှင်မြတ်သည် ပင်လယ်သမုဒ္ဒရာ ကို သင်တို့အကျိုးရှိဖို့ရာ ဖန်ဆင်းတော်မူ၏။

၁၃။ အရှင်မြတ်သည် မိုးကောင်းကင်နှင့် ကမ္ဘာမြေပြင်ဝယ် ရှိသမျှအရာခပ်သိမ်းတို့ကို သင်တို့အကျိုးရှိဖို့ရာ စီမံ ပြုပြင်ထားတော်မူ၏၊ ဤအရာများသည် အရှင်မြတ်အထံတော်မှ ဖြစ်၏၊ မှတ်သားကြလော့၊ ယင်းအချက်များ တွင် စဉ်းစားဆင်ခြင်တတ်သူတို့အဖို့အရာ သက်သေသာဓကတော်များပါရှိ၏။

၁၄။ ယုံကြည်သူတို့အား အလ္လာဟ်အရှင်မြတ်၏ နေ့ထူးနေ့မြတ်ကို မမျှော်လင့်၊ မကိုးစားသူတို့ကို အပြစ်လွှတ်ရန် ဟောပြောလော့၊ အကြောင်းမူကား အရှင်မြတ်သာလျှင် လူသားတို့ကို မိမိတို့ပြုကျင့်ခဲ့သည့်အလျောက် ကောင်းမှု ဆိုးကျိုးပေးသနားစီရင်တော်မူရန်ဖြစ်၏။

၁၅။ အကြင်သူသည် ကုသိုလ်ကောင်းမှုကို ပြုကျင့်အ့ံ၊ ထိုကောင်းမှုသည် သူ၏ ဝိညာဉ်ကောင်းစားဖို့ရာသာဖြစ်၏၊ အကြင်သူသည် အကုသိုလ်မကောင်းမှုကို ပြုကျင့်အ့ံ၊ ထိုမကောင်းမှုသည် သူ၏ ဝိညာဉ်နစ်နာဖို့ရာဖြစ်၏၊ နောက်ဆုံးစွန်၌ သင်တို့အားလုံးကို မိမိတို့အသက်သခင်ကျေးဇူးရှင်ကြီး၏ အထံတော်သို့ ပြန်ယူဆောင်ခဲ့လိမ့်မည်။

၁၆။ လွန်လေပြီးသောအခါဝယ် ငါသည် အစ္စရာအီလ်လူမျိုးအား ကျမ်းတော်ဘုန်းတန်ခိုးအာဏာတော်တမန်တော် အဖြစ်ဖြင့် ချီးမြှောက်တော်မူ၏၊ သူတို့စားသောက်ဖို့ရာ ကောင်းမွန်သန့်ရှင်းသောအစာအဟာရကိုလည်း ချပေး သနားတော်မူ၏၊ သူတို့အား အခြားအမျိုးသားတို့ထက် သာလွန်၍ ကောင်းကြီးမင်္ဂလာချပေးသနားတော်မူ၏။

၁၇။ ငါသည် သူတို့အား ရှင်းလင်းထင်ရှားသောပညတ်တော်များကို ပေးသနားတော်မူ၏၊ သို့သော်တရားအလင်း ရောင်ကို ချပေးသနားတော်မမူမီ သူတို့၌ အချင်းချင်းကွဲလွဲမှုမရှိချေ၊ တရားတော်ကို ပေးသနားတော်မူပြီး မှသာလျှင် မနာလိုဝန်တိုစိတ်ကြောင့် အချင်းချင်းတကွဲတပြားဖြစ်ကြ၏၊ မုချဧကန်သင်၏ အသက်သခင်ကျေးဇူး ရှင်ကြီးသည် ရှင်ပြန်ထမြောက်ရသောနေ့တော်ကြီး၌ သူတို့စပ်ကြားတွင် သူတို့၏ ကွဲပြားမှုများကို စစ်ကြောစီရင် တော်မူလိမ့်မည်။

၁၈။ အို-တမန်တော်၊ ငါသည် သင့်ကို ငါ၏ပညတ်တရားလမ်းပေါ်၌ ထားတော်မူပြီ၊ ထို့ကြောင့်သင်သည် ထိုလမ်း တော်ကြီးကို လိုက်လော့၊ မိစ္ဆာဒိဋ္ဌိတို့၏ အလိုဆန္ဒသို့ မလိုက်လင့်။

၁၉။ မှတ်သားကြလော့၊ သူတို့သည် အလ္လာဟ်အရှင်မြတ်အား အန်မတုနိုင်ချေ၊ မှတ်သားလော့၊ တရားကျူးလွန်သူ တို့သည် အချင်းချင်းတစ်ဦးနှင့်တစ်ဦး အဆွေခင်ပွန်းဖြစ်ကြ၏၊ သို့သော်အလ္လာဟ်အရှင်မြတ်သည် မကောင်းမှုကို ရှောင်ကြဉ်သူတို့၏ အဆွေခင်ပွန်းကြီးဖြစ်တော်မူ၏။

၂ဝ။ ဤကုရ်အာန်ကျမ်းတော်သည် လူသားတို့အဖို့အရာ ဝိဇ္ဇာအလင်းရောင်ကြီးဖြစ်၏၊ ယုံကြည်သူအစစ်အမှန်တို့ အဖို့အရာ လမ်းပြကျမ်းတော်ကြီးဖြစ်၏၊ ကောင်းကြီးမင်္ဂလာတော်လည်း ဖြစ်၏။

၂၁။ အကုသိုလ်မကောင်းမှုပြုကျင့်သူတို့က သူတို့နှင့်ယုံကြည်၍ ကုသိုလ်ကောင်းမှုပွားများသူတို့ကို ဤဘဝနောင်ဘဝ၌ ထပ်တူထပ်မျှအရှင်မြတ်ထားတော်မူမည်ဟု ထင်မှတ်ကြသလော၊ သူတို့၏ အယူအဆမှားလေစွ။

၂၂။ အလ္လာဟ်အရှင်မြတ်သည် ကမ္ဘာမြေပြင်မိုးကောင်းကင်ကို ကောင်းကျိုးအတွက်သာ ဖန်ဆင်းတော်မူ၏၊ သို့ ဖန်ဆင်းတော်မူခြင်းမှာ လူခပ်သိမ်းတို့သည် မိမိတို့ကြိုးစားမှု၏ အကျိုးအပြစ်ကို ခံစားစိမ့်သောငှာဖြစ်၏၊ သူတို့သည် မတရားပြုခြင်းကို ခံရမည်မဟုတ်ချေ။

၂၃။ အို-တမန်တော်၊ မိမိအလိုဆန္ဒကို အရှင်သခင်အမှတ် ဆည်းကပ်ကိုးကွယ်သူကို သင်မြင်၏လော၊ အလ္လာဟ် အရှင်မြတ်သည် သိလျက်နှင့် သူ့ကို လမ်းမှားတွင် ပစ်ထားတော်မူ၏၊ သူ၏ နားနှင့်နှလုံးကို တံဆိပ်ခတ်နှိပ်ထား တော်မူ၏၊ မျက်စိကိုလည်း အဆီးအကာနှင့်ဖုံးအုပ်ထားတော်မူ၏၊ အလ္လာဟ်အရှင်မြတ်စွန့်ပစ်တော်မူပြီးမှ သူ့ကို အဘယ်သူသည် လမ်းပြမည်နည်း၊ သင်တို့သည် တရားတော်ကို အရေးစိုက်ကြမည်မဟုတ်လော။

၂၄။ သူတို့သည် ဤသို့ပြောကြ၏၊ ဤဘဝမှတပါး အခြားဘဝမရှိချေ၊ ကျွနု်ပ်တို့သည် ဓမ္မတာအတိုင်း သေကြရှင်ကြ ၏၊ အချိန်ကာလမှတပါး အခြားမည်သည့်အရာမျှ ငါတို့ကို မဖျက်ဆီးနိုင်ချေ၊ သူတို့သည် ဤအကြောင်းအရာ ကို မသိပဲ ရမ်းဆ၍သာ ပြောဆိုကြ၏။

၂၅။ ငါချပေးသနားတော်မူသောနှုတ်ကပတ်တော်များကို သူတို့အား ရွတ်ဖတ်ပြသောအခါ သူတို့သည် ဘာမျှအချေ အတင်မပြောနိုင်ပဲ ဤသို့ဆိုကြ၏၊ သင်တို့အမှန်ကို ဆိုသော် ငါတို့၏ သွားလေသူမိဘဘိုးဘွားတို့ကို ပြန်ယူခဲ့ ကြပါ။

၂၆။ အေ-တမန်တော်၊ ဟောပြောလော့၊ ဟယ်-အချင်းတို့၊ အလ္လာဟ်အရှင်မြတ်သာလျှင် သင်တို့ကို အသက်ရှင် စေတော်မူ၏၊ သေလည်းသေစေတော်မူ၏၊ ထို့နောက်ရှင်ပြန်ထမြောက်ရသောနေ့တော်ကြီး၌ သင်တို့ကို ပြန်ရှင် စေတော်မူမည်၊ စုဆောင်းတော်မူမည်၊ ဤအကြောင်းကို ယုံမှားသံသယလုံးဝမရှိနိုင်ချေ၊ သို့သော် များစွာသော လူသားတို့သည် မသိကြချေ။

၂၇။ အလ္လာဟ်အရှင်မြတ်သည် မိုးကောင်းကင်နှင့် ကမ္ဘာမြေပြင်ကို စိုးပိုင်တော်မူ၏၊ အကြင်နေ့၌ အချိန်တော် ကျရောက်လာ၏၊ ထိုနေ့၌ မိစ္ဆာအယူဝါဒကို လိုက်သောသူတို့သည် ဆုံးရှုံးပျက်စီးရလိမ့်မည်။

၂၈။ ထိုနေ့တော်ကြီး၌ သင်သည် လူမျိုးတိုင်းအား ပဆစ်ဒူးတုပ်လျက် ထိုင်နေကြသည်ကို မြင်ရလိမ့်မည်၊ လူမျိုး အသီးသီးတို့အား သူတို့ပြုကျင့်မှုစာရင်းရှိရာသို့ ဆင့်ခေါ်ပြီးလျှင် ဤသို့မိန့်တော်မူမည်၊ ယနေ့သင်တို့ပြုခဲ့သော အမှုအခင်းများ၏ ကောင်းကျိုးဆိုးကျိုးများကို ပြန်ဆပ်တော်မူလတ့ံ။

၂၉။ ငါ၏ စာရင်းစာအုပ်သည် သင်တို့၏ ပြုကျင့်မှုများကို မှန်ကန်စွာထုတ်ဖော်ပြထား၏၊ မှတ်သားကြလော့၊ ငါ သည် သင်တို့ပြုကျင့်သမျှတို့ကို အကုန်အစင်မှတ်ပုံတင်ထားစေတော်မူ၏။

၃ဝ။ ထိုအခါ အကြင်သူတို့သည် ယုံကြည်ခြင်းတရားရှိလျက် ကုသိုလ်ကောင်းမှုကို ပွားများခဲ့အ့ံ၊ ထိုသူတို့အား သူတို့၏ အသက်သခင်ကျေးဇူးရှင်ကြီးသည် မိမိ၏ ကောင်းကြီးမင်္ဂလာတော်အတွင်းသို့ သွတ်သွင်းတော်မူ လိမ့်မည်၊ ထိုသွတ်သွင်းတော်မူခြင်းသည် ထင်လင်းသောအောင်ဆုမင်္ဂလာတော်ကြီးဖြစ်၏။

၃၁။ သို့သော်အကြင်သူတို့သည် မယုံကြည်ငြင်းပယ်ခဲ့ကြအ့ံ၊ ထိုသူတို့အား ဤသူမိန့်တော်မူလိမ့်မည်၊ ငါ၏ ပညတ် တော်များကို သင်တို့အား ရွတ်ဖတ်ပြခဲ့သည်မဟုတ်လော၊ သို့သော် သင်တို့သည် တရားတော်ကို ရွံရှာ၍ အပြစ်ရှိသူများဖြစ်ကြ၏။

၃၂။ အရှင်မြတ်၏ ကတိသစ္စာတော်သည် မှန်ကန်၏၊ အချိန်ကာလတော်ကြီးကျရောက်လာမည်ကို ယုံမှားသံသယ မရှိနိုင်ချေဟု နင်တို့အား ပြောသောအခါ နင်တို့က ငါတို့သည် ထိုအချိန်မည်သည်ဖြစ်စေကို မသိချေ၊ ထို အရာသည် ထင်မိထင်ရာပြောခြင်းမှတပါး အခြားတရားမဟုတ်ဟု ငါတို့ကြံစည်ယူဆ၏၊ ထိုအကြောင်းကို ငါတို့ယုံမှားသံသယရှိ၏ဟု ပြောကြ၏။

၃၄။ ထို့အပြင် သူတို့အား ဤသို့မိန့်တော်မူလတ့ံ၊ နင်တို့သည် ဤနေ့တော်ကြီး၏ စည်းဝေးပွဲသဘင်ကို မေ့လျော့ သကဲ့သို့ ငါသည်လည်း ငါသည်လည်း သင်တို့ကို ဤနေ့တော်ကြီး၌ မေ့လျော့တော်မူမည်၊ နင်တို့၏ နေထိုင်ရာ ဌာနမှာကား ငရဲမီးဖြစ်၏၊ နင်တို့ကို ကူညီစောင်မမည့်သူဆို၍ တစ်စုံတစ်ယောက်မျှမရှိချေ။

၃၅။ နင်တို့သည် ယင်းကဲ့သို့မရှုမလှခံစားရခြင်းကား အလ္လာဟ်အရှင်မြတ်၏ နှုတ်ကပတ်တော်များကို ပျက်ချော် ပြောင်လှောင်ကြသောကြောင့်ဖြစ်၏၊ နင်တို့ကို လောကကြီးက လှည့်စားနေသောကြောင့်လည်းဖြစ်၏၊ ထို့ကြောင့် သူတို့သည် ထိုနေ့မှစ၍ ငရဲမီးထဲမှ ထွက်လာရမည်မဟုတ်ချေ၊ သူတို့သည် မိမိကိုယ်ကို မိမိမပြုပြင်နိုင်ကြချေ။

၃၆။ ထို့ကြောင့်ကောင်းကင်ဘုံများ၏ အရှင်သခင်၊ မဟာပထဝီမြေကြီး၏ အရှင်သခင်၊ အနန္တစကြာဝဠာတို့၏ အရှင်သခင်၊ အလ္လာဟ်အရှင်မြတ်သည် ချီးမွမ်းခြင်းတည်ရာဖြစ်တော်မူပါ၏။

၃၇။ မိုးမြေနှစ်ပါး၌ ကြီးကဲမြင့်မြတ်တင့်တယ်ခန့်ငြားခြင်းသည် အရှင်မြတ်အဖို့သာလျှင် ဖြစ်၏၊ အရှင်မြတ်သည် အနန္တတန်ခိုးတော်သခင်၊ သဗ္ဗညုတဉာာဏ်တော်ရှင်ဖြစ်တော်မူ၏။