Burmese - Chapter 51 - Adh-Dhariyat

၁။ မြူမှုန့်သစ်ရွက်စသောအရာဝထ္ထုများကို ကစင့်ကလျားဖြစ်အောင် တိုက်ခတ်သောလေများ။

၂။ ထို့အပြင်လေးလံလှသောမိုးတိမ်ကို ထမ်းရွက်သောလေများ။

၃။ ထို့အပြင်သမုဒ္ဒရာပင်လယ်များတွင် ဖြည်းညှင်းသာယာစွာသွားလာသောလှေကြီးလှေငယ်သင်္ဘောများ။

၄။ ထို့အပြင်ငါ၏ အမိန့်တော်အရ ကောင်းကြီးမင်္ဂလာများကို ဝေချမ်းပေးသောကောင်းကင်တမန်များ၊ ဤအရာ အပေါင်းတို့ကို သုံးသပ်ဆင်ခြင်၍ ငါ၏ တန်ခိုးတော်ဂုဏ်တော်များကို တသအောက်မေ့ကြလော့။

၅။ မှတ်သားကြလော့၊ သင်တို့အား ခြိမ်းခြောက်ထားတော်မူသောအရာသည် မုချဧကန်မှန်ကန်၏။

၆။ စစ်ကြောစီရင်တော်မူခြင်းသည် မုချဧကန်ဖြစ်လိမ့်မည်။

၇။ သွားလာဖို့ရာ လမ်းအသွယ်သွယ်ရှိသောမိုးကောင်းကင်ကို ဆင်ခြင်၍ ငါ၏ တန်ခိုးတော်ဂုဏ်တော်တို့ကို အာရုံပြုကြလော့။

၈။ မှတ်သားကြလော့၊ သင်တို့သည် သမ္မာတရားတော်ကို အမျိုးမျိုးအဖုံဖုံဝိဝါဒများဖြစ်ကြ၏။

၉။ တရားတော်ကို မနှစ်သက်သူအား တရားတော်ကို ကျောပေးသွားစေတော်မူ၏။

၁၁။ ၎င်းတို့သည် အမှောင်အမိုက်တွင် မိုက်မဲတွေဝေသတိမေ့လျော့နေကြ၏။

၁၂။ ထိုသူမိုက်တို့က တရားစီရင်တော်မူသောနေ့တော်ကြီးသည် အဘယ်အခါကျရောက်လိမ့်မည်နည်းဟု မေးကြ၏။

၁၃။ ထိုနေ့တော်ကြီးကား ထိုသူယုတ်မာတို့အား ငရဲမီးဖြင့် ညှင်းဆဲမည့်နေ့ဖြစ်၏။

၁၄။ ထိုသူမိုက်တို့အား သင်တို့သည် မိမိကိုယ်ကို မိမိနှိပ်စက်ညှင်းပန်းခြင်း၏ အရသာကို မြည်းကြလော့၊ ဤပြစ်ဒဏ် တော်သည် သင်တို့အလျင်စလိုတောင်းကြသောဒဏ်တော်ဖြစ်၏ဟု မိန့်တော်မူလတ့ံ။

၁၅။ သို့သော်ဒုစရိုက်မကောင်းမှုကို ရှောင်သူတို့မူကား ဥယျာဉ်တော်နှင့် စိမ့်စမ်းချောင်းမြောင်းအလယ်တွင် စံစား နေထိုင်ရကြလိမ့်မည်။

၁၆။ ထိုနိဗ္ဗန်သားတို့သည် မိမိတို့၏ အသက်သခင်ကျေးဇူးရှင်ကြီးပေးသနားတော်မူသောအောင်ဆုမင်္ဂလာတော်ကို ခံယူနေကြရလိမ့်မည်၊ အကြောင်းမူကား သူတို့သည် အထက်ကျော်ကာလက ကောင်းမှုပြုသူများဖြစ်ကြ၏။

၁၇။ ထိုသူတို့သည် ညဉ့်အချိန်၌ အနည်းငယ်သာအိပ်လေ့ရှိကြ၏။

၁၈။ ထို့အပြင်နေ့တိုင်းအာရုံမတက်မီ အပြစ်လွှတ်တော်မူခြင်းကို ရှာမှီးကြ၏။

၁၉။ ထို့အပြင်သူတို့၏ စည်းစိမ်ဥစ္စာမှ သူတောင်းစား၊ ဆင်းရဲသားနှင့် အခြားအောက်ကျနောက်ကျသူဆင်းရဲတို့ အတွက် သူတို့ရအပ်သောဝေစုရှိ၏။

၂ဝ။ ထို့အပြင်ဤကမ္ဘာမြေပေါ်တွင်ကား ယုံကြည်သူအစစ်အမှန်တို့အဖို့ သက်သေသာဓကတော်များရှိကြ၏။

၂၁။ ထို့အပြင် သင်တို့၏ ကိုယ်တွင်း၌လည်း သာဓကတော်များရှိကြ၏၊ သို့ပါလျက် သင်တို့သည် မမြင်နိုင်ကြသလော။

၂၂။ ထို့အပြင် အထက်ကောင်းကင်ဘုံတွင် သင်တို့အဖို့အရာ စားနပ်ရိက္ခာများရှိ၏၊ ထို့အပြင် သင်တို့အား ကတိထား တော်မူသောအရာများလည်းရှိ၏။

၂၃။ မိုးကောင်းကင်နှင့် ကမ္ဘာမြေကြီး၏ အရှင်သခင်၏တန်ခိုးတော်ကြောင့် အထက်အဆိုပါတရားစကားအရပ်ရပ်သည် သင်တို့စကားပြောဆိုသကဲ့သို့ မှန်ကန်ချေ၏၊ ယုံမှားသံသယလုံးဝမရှိနိုင်ချေ။

၂၄။ အို-တမန်တော်မိုဟမ္မဒ်၊ တမန်တော်အေဗရာဟမ်၏ မြင့်မြတ်သည့်ဧည့်သည်တော်အကြောင်းအရာများကို သင် ကြားနာရပြီမဟုတ်လား။

၂၅။ သူတို့သည် သူ့အပါးသို့ရောက်သောအခါ အေးချမ်းသာယာပါစေသော်ဝ်ဟု နှုတ်ဆက်မေတ္တာဆိုကြ၏၊ သူ ကလည်း အေးချမ်းသာယာပါစေသော်ဝ်ဟု ပြန်၍ မေတ္တာပို့ပြီးလျှင် ငါမသိသောသူစိမ်းများဖြစ်ကြ၏ဟု စိတ်တွင် တွေးမိ၏။

၂၆။ ထို့နောက်သူသည် အိမ်သူအိမ်သားများထံ ထွက်သွား၍ အဆီတစ်ထပ်အသားတစ်ထပ်နူးနပ်မွှေးကြိုင်သော အမဲကင်များကို ယူဆောင်လာစေ၏။

၂၇။ ထိုအမဲကင်ကို သူတို့ရှေ့တွင် ကောင်းမွန်စွာပြင်ဆင်၍ အဆွေတို့သုံးဆောင်တော်မူမည်မဟုတ်လောဟု ဆို၍ တည်ကျွေး၏။

၂၈။ ထို့နောက်သူသည် သူတို့ကို ကြောက်လန့်လာ၏။ သူတို့ကလည်း မကြောက်လင့်ဟု ဆို၍ လိမ်မာရေးခြား ရှိသောသားကောင်းရတနာတစ်ယောက်ရမည့် သတင်းကောင်းကို ပေးလေ၏။

၂၉။ ထိုအခါသူ၏ ကြင်ဘက်တော်ထွက်လာ၍ မိမိ၏ ပါးပြင်နှစ်ဘက်ကို လက်ဖြင့် သုံးသပ်၍ ကြီးသောအသံဖြင့် ငိုကြွေးပြောဆိုသည်မှာ ငါသည် သက်ရွယ်ကြီးသောအမြံုမဖြစ်၏။

၃ဝ။ သူတို့က ပြန်ပြောသည်မှာ အမြံုဖြစ်စေကာမူ ရှင်မ၏ အရှင်သခင်က ယင်းသို့ဗျာဒိတ်တော်ခတ်နှိပ်တော်မူ၏၊ မုချဧကန်အရှင်မြတ်သည် လိမ်မာတော်မူသောအရှင်၊ သိတော်မူသောအရှင် ဖြစ်တော်မူ၏။

၃၁။ ထိုအခါတမန်တော်အေဗရာဟမ်က အို-အလ္လာဟ်အရှင်မြတ်၊ စေလွှတ်တော်မူသောတမန်တို့၊ ထို့နောက် သင် တို့မှာ မည်သည့်အမိန့်တော်ပါလာပါသနည်းဟု ဆို၏။

၃၂။ ကောင်းကင်တမန်တို့က အကျွနု်ပ်တို့ကို အပြစ်ရှိသောသူတို့ထံ စေလွှတ်တော်မူ၏ဟု ပြန်ပြော၏။

၃၃၊၃၄။ သို့စေလွှတ်တော်မူခြင်းမှာ ၎င်းသူဆိုးသူညစ်တို့ကို ဖျက်ဆီးဖို့ရာ သင်၏ အသက်သခင်ကျေးဇူးရှင်ကြီး တံဆိပ် ခတ်နှိပ်ပြီးဖြစ်သောရွှံ့လုံးများကို သူတို့အပေါ်သို့ ပစ်ချဖို့အလို့ငှာဖြစ်၏ဟု ဆက်လက်၍ ပြော၏။

၃၃၊၃၄။ သို့စေလွှတ်တော်မူခြင်းမှာ ၎င်းသူဆိုးသူညစ်တို့ကို ဖျက်ဆီးဖို့ရာ သင်၏ အသက်သခင်ကျေးဇူးရှင်ကြီး တံဆိပ် ခတ်နှိပ်ပြီးဖြစ်သောရွှံ့လုံးများကို သူတို့အပေါ်သို့ ပစ်ချဖို့အလို့ငှာဖြစ်၏ဟု ဆက်လက်၍ ပြော၏။

၃၅။ ထို့နောက် ငါသည် ထိုနေရာတွင်ရှိသောယုံကြည်သူ သူတော်ကောင်းတို့ကို အပြင်သို့ ထုတ်ဆောင်တော်မူ၏။

၃၆။ သို့သော် ထိုအရပ်တွင် ယုံကြည်ကျိုးနွံနာခံသူတို့၏ အိမ်တစ်ဆောင်သာ ငါတွေ့တော်မူ၏။

၃၇။ ထိုအရပ်ဒေသတွင် အလွန်ပြင်းပြနာကျင်ဖွယ်သောအပြစ်ဒဏ်တော်ကို ကြောက်ရွံ့သောသူတို့အဖို့အရာ သင်ခန်းစာတော်တစ်ပါးကို ငါအထင်အရှားထားခဲ့တော်မူ၏။

၃၈။ ထို့အပြင် ငါသည် ဖွာရောမင်းထံ ထင်ရှားသောအမိန့်တော်နှင့်တကွ စေလွှတ်တော်မူသည့်တမန်တော်မူစာ ၌လည်း သာဓကတော်တစ်ပါးပါရှိ၏။

၃၉။ သို့သော် ဖွာရောဘုရင်သည် မာန်စောင်ပလွှား မိမိစွမ်းအားကို ယုံကြည်ကိုးစား၍ တမန်တော်ကို ငြင်းဆန်ပြီးလျှင် ပယောဂဆရာ(သို့မဟုတ်) ရူးသွပ်သောသူဟု ပုတ်ခတ်စွပ်စွဲ၏။

၄ဝ။ ထို့ကြောင့် ငါသည် ထိုမင်းနှင့်တကွ ၎င်း၏ စစ်သည်ဗိုလ်ခြေတို့ကို ဖမ်းဆီးပြီးလျှင် ပင်လယ်ထဲသို့ ပစ်ချ တော်မူလိုက်၏၊ အကြောင်းမူကား သူသည် အပြစ်သင့်သူဖြစ်၏။

၄၁။ ထို့အပြင်အားဒ်လူမျိုးထံသို့ သေကြေပျက်စီးသောလေဆိုးကို ငါစေလွှတ်တော်မူသောအခါ ထိုလူမျိုး၌ သက်သေ သာဓကတော်တစ်ပါးရှိ၏။

၄၂။ ထိုလေပြင်းမုန်တိုင်းသည် မိမိလမ်းတွင် ရှိသမျှအရာဝထ္ထုတို့ကို ချမ်းသာမပေး၊ အားလုံးကို မြေမှုန့်အတိဖြစ်စေ၏။

၄၃။ ထို့အပြင် စမူးဒ်လူမျိုးအား သင်တို့သည် ရှေ့ကို အနည်းငယ်မျှသာလောကီစည်းစိမ်ကို ခံစားလော့ဟု မိန့် တော်မူသောအခါ၌လည်း ထိုလူမျိုးတို့၌ သက်သေသာဓကတော်တစ်ပါးရှိ၏။

၄၄။ သို့သော် ထိုသူတို့သည် မိမိတို့၏အသက်သခင် ကျေးဇူးရှင်ကြီး၏ ပညတ်တော်ကို တော်လှန်ကြသောကြောင့် သူတို့ငေးကြည့်နေစဉ်ပင် သူတို့ကို မိုးကြိုးပစ်၏။

၄၅။ ထိုအခါ သူတို့သည် ထိုင်ရာမှမထနိုင်ချေ၊ မိမိကိုယ်ကို မကူညီမစောင့်ရှောက်နိုင်ချေ။

၄၆။ ထို့အပြင်အထက်ကျော်ကာလက တမန်တော်နူဟို၏ လူတို့ရှိကြ၏၊ မှတ်သားကြလော့၊ သူတို့သည် တရား လက်လွှတ်ဆိုးသွမ်းသောသူတို့ဖြစ်ကြ၏။

၄၇။ ငါသည် တန်ခိုးတော်အနန္တအားဖြင့် မိုးကောင်းကင်ကို ဖန်ဆင်းတော်မူ၏၊ ငါပင်လျှင် ထိုကောင်းကင်ကို အလွန်ကျယ်ပြန့်စေတော်မူ၏။

၄၈။ ထို့အပြင် ငါသည် မဟာပထဝီမြေကြီးကို ကျယ်ဝန်းပြန့်ပြူးစွာခင်းကျင်းထားတော်မူ၏၊ ဤသို့ခင်းကျင်းတော်မူ ထသောအရှင်သည် မဟာကရုဏာတော်သခင်ဖြစ်တော်မူ၏။

၄၉။ ငါသည် ခပ်သိမ်းသောဝထ္ထုများကို အစုံလိုက်၊ အစုံလိုက်ဖန်ဆင်းတော်မူ၏၊ သို့ဖန်ဆင်းတော်မူခြင်းကား သင်တို့သုံးသပ်ဆင်ခြင်ကောင်း ဆင်ခြင်ဖို့ရာဖြစ်၏။

၅ဝ။ ထို့ကြောင့် အရှင်မြတ်အထံတော်သို့ ပြေးကြလော့၊ ငါ့မှာမူကား သင်တို့အတွက် အရှင်မြတ်အထံတော်မှ သတိပေးသူရိုးရိုးသာဖြစ်၏။

၅၁။ ထို့အပြင်အလ္လာဟ်အရှင်မြတ်နှင့် အခြားဘုရားကို တွဲ၍ မကိုးကွယ်ကြလင့်၊ ငါ့မှာမူကား အရှင်မြတ်အထံတော် မှ သင်တို့အတွက် သတိပေးသူရိုးရိုးသာဖြစ်၏။

၅၂။ ဤလူများအလျင် လူဟောင်းများထံသို့ တမန်တော်များမလာလေမှ လာလေလျှင် သူတို့က တမန်တော်တို့ကို စုန်းမှော်ပယောဂဆရာ(သို့မဟုတ်) အရူးအပေါဟု ပုန်ခတ်စွပ်စွဲကြ၏။

၅၃။ ယင်းကဲ့သို့ မိုက်ရိုင်းစော်ကားခြင်းကို တစ်ဦးမှ တစ်ဦးသို့ အမွေပေးခဲ့သလော၊ မဟုတ်ချေ၊ သူတို့သည် တရားတော်ကို ကျူးလွန်သူများဖြစ်ကြ၏။

၅၄။ ထို့ကြောင့် သူတို့ထံမှ ထွက်ခွာသွားလော့၊ သတိပေးနှိုးဆော်ခြင်းသည် ယုံကြည်သူတို့ကို အကျိုးပေး၏။

၅၅။ အို-တမန်တော်၊ သတိပေးလော့၊ သတိပေးနှိုးဆော်ခြင်းသည် ယုံကြည်သူတို့ကို အကျိုးပေး၏။

၅၆။ ငါသည် ဂျင်နတ်သားများနှင့် လူသားတို့ကို ငါ့အား ကိုးကွယ်ဝတ်ပြုဖို့အတွက်သာ ဖန်ဆင်းတော်မူ၏။

၅၇။ ငါသည် သူတို့ထံမှ စားနပ်ရိက္ခာကို အလိုတော်ရှိတော်မူသည်မဟုတ်၊ သူတို့ကို ငါ့အား အစာအဟာရကျွေးမွေး ရန် ဗျာဒိတ်ပေးတော်မူသည်လည်းမဟုတ်။

၅၈။ မှတ်သားကြလော့၊ အလ္လာဟ်အရှင်မြတ်သည်၊ အရှင်မြတ်သည် စားနပ်ရိက္ခာပေးသနားတော်မူသောအရှင်၊ အနန္တတန်ခိုးတော်ရှင်ဖြစ်တော်မူ၏။

၅၉။ ထို့အပြင်မှတ်သားကြလော့၊ ရှေးခေတ်မတရားကောင်တို့အတွက် ကြောက်မက်ဖွယ်သောနေ့ကျရောက်သကဲ့သို့ ယခုခေတ်ဒုစရိုက်ကောင်တို့အဖို့လည်း ကြောက်မက်ဖွယ်သောနေ့တော်အသင့်ရှိ၏၊ ထို့ကြောင့်သူတို့သည် ထိုနေ့တော်ကြီးကို အလျင်စလိုတောင်းဆိုခြင်းကို အလျင်းမပြုသင့်ချေ။

၆ဝ။ သို့ဖြစ်၍ မိစ္ဆာဒိဋ္ဌိတို့သည် မိမိတို့ထံ ဆိုက်ရောက်လာစေတော်မူမည်ဟု ကတိထားတော်မူသောနေ့တော်ကြီး ကြောင့် ပျက်စီးရတော့မည်သာတည်း။