Burmese - Chapter 52 - At-Tur

၁။ အို-တမန်တော်၊ တူစီနာတောင်ကို စဉ်းစားဆင်ခြင်၍ ငါ၏တန်ခိုးတော်ဂုဏ်တော်ကို သတိရလော့။

၂။ ထို့အပြင်ကမ္ဗည်းထိုးထားသောကျမ်းတော်ကိုလည်း အာရုံပြု၍ ငါ၏တန်ခိုးတော်ဂုဏ်တော်ကို သတိရလော့။

၃။ ထိုကျမ်းတော်ကား ကျယ်ဝန်းပြန့်ပြူချောမွတ်သောစက္ကူပေါ်တွင် ရေးတင်မှတ်သားလျက်ရှိ၏။

၄။ ထို့အပြင် လူအများခဏခဏဝတ်တက်ရန်လာသောကအ်ဘာကျောင်းတော်ကြီးကိုလည်း အာရုံပြု၍ ငါ၏ တန်ခိုး တော် ဂုဏ်တော်ကို သတိရလော့။

၅။ ထိုမြင့်မြတ်လှစွာသောအမိုးကိုလည်း အာရုံပြု၍ ငါ၏ တန်ခိုးတော်ဂုဏ်တော်ကို သတိရလော့။

၆။ ထို့အပြင် ရေတင်းကြမ်းပြည့်လျှံနေသောသမုဒ္ဒရာကိုလည်း အာရုံပြု၍ ငါ၏တန်ခိုးတော်ဂုဏ်တော်ကို သတိ ရလော့။

၇။ အို-တမန်တော်၊ သင်၏အရှင်သခင်၏ အပြစ်ဒဏ်တော်သည် မုချဧကန်ကျရောက်လာမည်သာတည်း။

၈။ ထိုအပြစ်ဒဏ်တော်သည် ကာဆီးထားနိုင်သူဆို၍ တစ်စုံတစ်ယောက်မျှမရှိချေ။

၉။ မိုးကောင်းကင်သည် မငြိမ်မသက်သွက်သွက်ခါလှုပ်သောနေ့တော်ကြီး။

၁ဝ။ ထိုနေ့တော်ကြီး၌ တောင်ကမ်းဟူသမျှလည်း လေတွင် လွင့်ပါလတ့ံ။

၁၁။ တရားတော်ကို ငြင်းပယ်သောသူအပေါင်းသည် ထိုနေ့တော်ကြီး၌ ကြီးစွာပျက်စီးရတော့သည်သာတည်း။

၁၂။ ထိုသူတို့သည် သိမ်မွေ့နက်နဲသောကိစ္စများတွင် အဖျင်းစကားပြောကြ၏။

၁၃။ ထိုသူတို့ကို ငရဲမီးအတွင်းသို့ ထိုးသွင်းသောနေ့တော်ကြီး၌။

၁၄။ ယင်းသို့ ထိုးသွင်းပြီးနောက် သူတို့အား မိန့်တော်မူသည်မှာ ဟယ်-မိစ္ဆာဒိဋ္ဌိတို့၊ ဤမီးသည် နင်တို့ငြင်းခုံသော ငရဲမီးဖြစ်၏။

၁၅။ ဤငရဲသည် မှော်အတတ်လော၊ သို့မဟုတ် သင်တို့သည် မမြင်ကြသလော။

၁၆။ ငရဲမီးအပူရှိန်ကို ခံကြလော့၊ ထိုအပူရှိန်ကို နင်တို့သည်းခံစွာခံသည်ဖြစ်စေ၊ မခံသည်ဖြစ်စေ၊ နင်တို့အတွက် မထူးချေ၊ အတူတူသာဖြစ်၏၊ နင်တို့ပြုကျင့်လေ့ရှိသောအကျင့်အကြံများအတွက် နင်တို့အား ပေးအပ်ခြင်းသာ ဖြစ်၏။

၁၇။ မှတ်သားကြလော့၊ မိမိတို့ကျင့်အပ်သောကျင့်ဝတ်များကို ကျေပွန်သူတို့မှာမူကား နိဗ္ဗာန်ဥယျာဉ်တော်များ၌ စံစားကြရ၏၊ ပျော်ရွှင်ကြရ၏။

၁၈။ သူတို့၏ အရှင်သခင်သည် သူတို့အား အောင်ဆုမင်္ဂလာတော်ပေးသနားတော်မူ၏၊ ငရဲမီးညှင်းပန်းခြင်းဘေးမှ ကာဆီးထားတော်မူ၏၊ ထိုအကြောင်းများကြောင့် သူတို့သည် အားရဝမ်းသာရှိကြရ၏။

၁၉။ သူတို့အား မိန့်တော်မူသည်မှာ အို-နိဗ္ဗာန်သားအပေါင်းတို့၊ သင်တို့ပြုကျင့်ခဲ့သောကုသိုလ်ကောင်းမှု၏ အကျိုး ကြောင့် ပျော်ရွှင်သာယာစွာစားကြလော့၊ သောက်ကြလော့။

၂ဝ။ ထိုသူတို့သည် တင့်တယ်သိုက်မြိုက်စွာစီတန်းခင်းကျင်းထားသောပလ္လင်ထက်ဝယ် လှဲလျောင်းမွေ့လျော်စံပျော် နေထိုင်ကြရ၏၊ ငါသည် သူတို့အား မျက်စိမျက်လုံးပြူးထူးလှပသောနတ်ကညာများနှင့် စုလျားရစ်ပတ်လက်ထပ် ပေးသနားတော်မူ၏။

၂၁။ ထို့အပြင် ယုံကြည်သူတို့၏ သားသမီးများသည် ယုံကြည်မှု၌ မိမိတို့မိဘ၏ ခြေရာကို လိုက်လျှင် ငါသည် ထိုသားသမီးများကို မိမိတို့မိဘနှင့် နိဗ္ဗာန်တွင် တွေ့ဆုံ၍ အတူတကွစံစားနေထိုင်စေတော်မူမည်၊ ထိုသူတို့ ဆည်းပူးခဲ့သောကုသိုလ်ကောင်းမှု၏ အကျိုးကိုလည်း အနည်းငယ်မျှလျှော့ပေါ့ပေးတော်မူမည်မဟုတ်၊ လူတိုင်း ပင်လျှင် မိမိပြုကျင့်ခဲ့သောအမှုအခင်းများ၏ အကျိုးအပြစ်အတွက် တာဝန်ခံ၊ အပေါင်ခံပစ္စည်းဖြစ်၏။

၂၂။ ထို့အပြင် ငါသည် နိဗ္ဗာန်သူနိဗ္ဗာန်သားတို့အား သူတို့အလိုရှိသည့်အတိုင်း သစ်သီးသစ်ဥအမျိုးမျိုး၊ သားငါး အဖုံဖုံတို့ကို ပေးသနားတော်မူ၏။

၂၃။ ထို့အပြင် သူတို့သည် တစ်ဦးလက်မှ တစ်ဦးလက်သို့ ရေခွက်တစ်ခုကို ကမ်းလှမ်းယူငင်ပေးကြ၏၊ ထိုခွက်ရှိ သောက်စရာကြောင့် သောက်သူတို့သည် ယစ်မူးမေ့လျော့ခြင်းလည်းမရှိ၊ စကားအသိမ်အဖျင်းကို ပြောဆိုခြင်း လည်းမရှိ၊ အပြစ်ကျုးကျော်ခြင်းလည်းမရှိဖြစ်၏။

၂၅။ ထို့အပြင်သူတို့သည် တစ်ဦးအနား တစ်ဦးကပ်၍ တစ်ယောက်အကြောင်းကို တစ်ယောက်မေးမြန်းလျက်ရှိကြ၏။

၂၆။ ထိုနေ့တော်ကြီး၌ တစ်ဦးနှင့်တစ်ဦးပြောကြသည်မှာ အကျွနု်ပ်တို့သည် အထက်ကျော်ကာရီက အိမ်သူအိမ်သား များနှင့်အတူနေထိုင်စဉ် ကျွနု်ပ်တို့သည် အမြဲပင်စိုးရိမ်ကြောင့်ကျခဲ့ကြရ၏။

၂၇။ သို့သော် အလ္လာဟ်အရှင်မြတ်သည် အကျွနု်ပ်တို့အား ကောင်းကြီးမင်္ဂလာတော်ပေးသနားတော်မူပြီ၊ ငရဲမီးလေပူ အခိုးအငွေ့ဘေးမှ ကာကွယ်တော်မူခဲ့ပြီ။

၂၈။ အကျွနု်ပ်တို့ကား ရှေးအခါလောကတွင် အရှင်မြတ်အား အစဉ်မပြတ်ဝတ်ပြုခဲ့ကြ၏၊ အရှင်မြတ်သည် မဟာ ကရုဏာတော်အရှင်၊ အနန္တကောင်းကြီးမင်္ဂလာတော်သခင် အမှန်အကန်ဖြစ်တော်မူ၏။

၂၉။ ထို့ကြောင့် အို-တမန်တော်၊ လူသားတို့အား သတိပေးလော့၊ အလ္လာဟ်အရှင်မြတ်၏ ဂုဏ်ကျေးဇူးတော်ကြောင့် သင်သည် ဗေဒင်ဆရာလည်းမဟုတ်၊ စိတ်နှလုံးပေ့ါသွပ်သူအရူးလည်းမဟုတ်။

၃ဝ။ သို့မဟုတ် သူတို့က သူသည် လင်္ကာဆရာဖြစ်၏၊ သူ့ကို အချိန်ကာလက ဆုံးမမည်ဟု အကျွနု်ပ်တို့မျှော်လင့် ၏ဟု ပြောဆိုကြသလော။

၃၁။ အို-တမန်တော်၊ သူတို့အား သင်တို့လည်း မိမိတို့လိုရာကို မျှော်လင့်ကြလော့၊ ငါလည်း သင်တို့နည်းတူ မျှော်လင့်၏ဟု ဟောကြားလော့။

၃၂။ အို-တမန်တော်၊ ထိုသူတို့၏ စိတ်က သူတို့အား ဤကဲ့သို့ပြုကျင့်ပြောဆိုရန် အကြံပေးသလော၊ သို့မဟုတ် သူတို့သည် တရားကျူးလွန်သောသူယုတ်များဖြစ်ကြသလော။

၃၃။ သို့မဟုတ် သူတို့က ဤကျမ်းတော်ကို သူဖန်တီး၏ဟု စွပ်စွဲသလော၊ ယင်းစွပ်စွဲချက်မမှန်ချေ၊ သို့သော် သူ တို့သည် ယုံကြည်မည်မဟုတ်ချေ။

၃၄။ သူတို့သည် အကယ်၍ အမှန်စကားကို ဆိုသော် သူတို့အား ဤကျမ်းမြတ်ကုရ်အာန်နှင့်တူမျှသောတရားဒေသနာ တစ်ပါးကို ပြုကြစေလော့။

၃၅။ သို့မဟုတ် သူတို့သည် နတ္တိမှ ဖန်ဆင်းတော်မူခြင်းခံကြရသလော၊ သို့မဟုတ် သူတို့သည် ဖန်ဆင်းသူများဖြစ် ကြသလော။

၃၆။ သို့မဟုတ် သူတို့သည် မိုးကောင်းကင်နှင့် ကမ္ဘာမြေကြီးကို ဖန်ဆင်းကြသလော၊ မဖန်ဆင်းချေ၊ သူတို့သည် မည်သည့်အရာမှ တပ်အပ်သေချာစွာမသိကြချေ။

၃၇။ အို-တမန်တော်၊ သူတို့သည် သင်၏ အရှင်သခင်၏ ဘဏ္ဍာပစ္စည်းတော်များကို ပိုင်ဆိုင်ကြသလော၊ သို့မဟုတ် သူတို့သည် အရှင်မြတ်၏ ဘဏ္ဍာစိုးများဖြစ်ကြသလော။

၃၈။ သို့မဟုတ် သူတို့၌ ကောင်းကင်သို့ တက်၍ အမိန့်တော်များကို နားထောင်ဖို့ရာ လှေကားရှိသလော၊ သို့ပါလျှင် သူတို့၏ နားထောင်သူအား လုံလောက်ထင်ရှားသောသက်သေပြစေကုန်။

၃၉။ အို-မိစ္ဆာဒိဋ္ဌိတို့၊ အလ္လာဟ်အရှင်မြတ်မှာ သမီးမိန်းမတော်များသာရှိ၍ သင်တို့မှာ သားယောက်ျားများရှိကြသလော။

၄ဝ။ သို့မဟုတ် သင်တမန်တော်သည် ၎င်းတို့အား တရားဓမ္မဟောပြောခတောင်းဖူးသလော၊ ယင်းသို့တောင်းခြင်း ကြောင့် သူတို့ကြွေးတွင် နစ်မြုနေပြီလော။

၄၁။ သို့မဟုတ် သူတို့သည် မမြင်စွမ်းနိုင်သောအရာများကို ပိုင်ဆိုင်၍ ထိုအရာများကို ရေးသားထားနိုင်ကြသလော။

၄၂။ သို့မဟုတ် သူတို့သည် တမန်တော်ကို ဥပါယ်တမည်ဖြင့် လှည့်စားဖို့ရာ ကြံစည်ကြသလော၊ သို့သော်မယုံကြည် သူတို့သာလျှင် လှည့်ဖြားခြင်းခံကြရ၏။

၄၃။ သို့မဟုတ် သူတို့မှာ အလ္လာဟ်အရှင်မြတ်မှတပါး အခြားအရှင်သခင်ရှိသလော၊ အလ္လာဟ်အရှင်မြတ်သည် သူတို့တွဲဖက်သောဘုရားတုဘုရားယောင်များထက် မြင့်မြတ်တော်မူထသောအနန္တဂုဏ်တော်ရှင်ဖြစ်တော်မူ၏။

၄၄။ အကယ်၍ ထိုမိစ္ဆာဒိဋ္ဌိတို့သည် မိမိတို့အပေါ်သို့ အထက်ကောင်းကင်ဘုံပဲ့ကျသည်ကို မြင်ကြရလျှင် သူတို့က ကျလာသောအရာသည် တိမ်ဆိုင်တိမ်ခဲဖြစ်သည်ဟု ပြောဆိုကြလတ့ံ။

၄၅။ အို-တမန်တော်မိုဟမ္မဒ်၊ ထိုသူတို့သည် ၎င်းတို့၏ နေ့တော်ကြီးကို တွေ့မြင်ရသည့်တိုင်အောင် သူတို့ကို လျစ်လျူရှုလော့၊ ထိုနေ့တော်ကြီး၌ သူတို့သည် မိုးကြိုးအပစ်ခံကြရလတ့ံ။

၄၆။ ထိုနေ့တော်ကြီး၌ ထိုသူတို့၏ ပရိယာယ်သည် သူတို့အတွက် တစ်စုံတစ်ခုမျှစွမ်းဆောင်နိုင်မည်မဟုတ်၊ ထို့အပြင် သူတို့သည် ကူညီစောင်မခြင်းကို ခံကြရလိမ့်မည်မဟုတ်။

၄၇။ စင်စစ်အားဖြင့် ထိုဒုစရိုက်ကောင်များအဖို့အရာ ဤဒဏ်တော်ထက် ကြီးလေးသောဒဏ်တော်လည်းရှိသေး၏၊ သို့သော်သူတို့အနက် အရေအတွက်များစွာသောသူတို့သည် မသိကြချေ။

၄၈။ ထို့ကြောင့် အို-မိုဟမ္မဒ်၊ သင်၏ အရှင်သခင်၏ စီရင်ချက်ဗျာဒိတ်တော်ကိုသာ စိတ်ရှည်လက်ရှည်မျှော်လင့် စောင့်ဆိုင်းလော့၊ အကြောင်းမူကား သင်သည် မုချဧကန် ငါ၏မျက်မှောက်တော်တွင် ရှိ၏၊ သင်သည် နံနက်အိပ်ရာမှ ထသောအခါ သင်၏အရှင်သခင်၏ ကျေးဇူးတော်ကို ချီးကျုးလော့။

၄၉။ ထို့အပြင် သင်သည် ညဉ့်အခါ၌လည်းကောင်း၊ နံနက်မိုးသောက်ကြယ်နက္ခတ်များဝင်သောအခါ၌လည်းကောင်း၊ အရှင်မြတ်အား ချီးကျူးတသလော့။