Burmese - Chapter 88 - Al-Ghashiyah

၂။ ထိုနေ့တော်ကြီး၌ မျက်နှာအများအပြားသည် ညှိုးငယ်ကြလတံ့။

၃။ ပြင်းထန်စွာကြိုးစားအားထုတ်၍ မောပန်းကြလတံ့။

၄။ တောက်လောင်နေသောမီးလောင်မြိုက်ခြင်းခံကြရလတံ့။

၅။ ထိုသူတို့သည် ကျိုက်ကျိုက်ဆူသောရေပူစမ်းမှ ရေကို သောက်ကြရလတံ့။

၆။ ထိုသူတို့စားဖို့ရာ ခါးသည့်ဆူးပင်သီးမှတပါး အခြားအစားအစာအလျဉ်းမရှိချေ။

၇။ ထိုဆူးပင်သီးသည် စားသူတို့အား အာဟာရမဖြစ်စေ၊ မွတ်သိပ်ဆာလောင်ခြင်းကိုလည်း မဖြစ်ချေ။

၈။ ထိုနေ့တော်ကြီး၌ အခြားသူတို့မှာမူကား ပျော်ပါးရွှင်လန်းကြရလတံ့။

၉။ ထိုသူတို့သည် မိမိတို့ကြိုးစားခဲ့သောအမှု၏ အကျိုးကို ကျေနပ်နှစ်သက်စွာခံစားကြလတံ့။

၁၀။ ထိုသူတို့သည် အလွန်မြင့်မြတ်သောဥယျာဉ်တော်တွင် စံစားကြလတံ့။

၁၁။ ထိုဥယျာဉ်တော်၌ သူတို့သည် အကျိုးမရှိ၊ သိမ်ဖျင်းသောစကားကို လုံးဝမကြားချေ။

၁၂။ ထိုဥယျာဉ်တော်၌ ရေပန်းထွက်စီးဆင်းနေသောစမ်းချောင်းရှိ၏။

၁၃။ ထိုဥယျာဉ်တော်၌ ကျက်သရေမင်္ဂလာရှိသောပလ္လင်မြင့်များလည်းရှိကြ၏။

၁၄။ ထို့အပြင်တကောင်း၊ ရေခွက်၊ ဖလား၊ ဖန်ခွက်များကို အသင့်ပြင်ဆင်ထား၏။

၁၅။ ထိုမှတပါး မှီအုံး၊ ထိုင်အုံးများကို သိုက်မြိုက်တင့်တယ်စွာစီတန်းခင်းကျင်းထား၏။

၁၆။ ကမ္ဗလာ၊ မွေ့ယာ၊ ကော်ဇောများကိုလည်း ခင်းကျင်းထား၏။

၁၇။ အို-တမန်တော်၊ သူတို့သည် ကုလားအုတ်များကို ကြည့်ရှုပြီးလျှင် ထိုတိရိစ္ဆာန်များကို မည်ကဲ့သို့ဖန်ဆင်းထား တော်မူသည်ကို မစဉ်းစားကြလော။

၁၈။ ထို့အပြင်မိုးကောင်းကင်ကို ကြည့်ရှုပြီးလျှင် မည်ကဲ့သို့မြှင့်ထားတော်မူသည်ကိုလည်း မဆင်ခြင်ကြသလော။

၁၉။ တဖန် တောတောင်များကို ကြည့်ရှုပြီးလျှင် မည်ကဲ့သို့ခိုင်ခန့်မြဲမြံစွာဖန်ဆင်းထားတော်မူသည်ကိုလည်း မစဉ်းစားကြလော့။

၂၀။ ထိုမှတပါး ဤကမ္ဘာမြေကြီးကို ကြည့်ရှုပြီးလျှင် မည်ကဲ့သို့ဖြန့်ခင်းထားတော်မူသည်ကိုလည်း မစဉ်းစားမဆင်ခြင်ကြလော။

၂၁။ ထို့ကြောင့် သင်တမန်တော်သည် ထိုသူတို့အား ဩဝါဒပေးလော့၊ သင်သည် ဩဝါဒပေးရသူသာဖြစ်၏။

၂၂။ သင်သည် လူသားတို့ကို စောင့်ရှောက်ထိန်းသိမ်းရသူမဟုတ်ချေ။

၂၃။ သို့သော်အကြင်သူသည် မနှစ်မြို့၊ မယုံကြည်အံ့။

၂၄။ အလ္လာဟ်အရှင်မြတ်သည် ထိုသူအား အလွန်ကြီးလေးသောအပြစ်ဒဏ်ခတ်တော်မူလိမ့်မည်။

၂၅။ ဧကန်အမှန် သူတို့အားလုံးသည် ငါ့ထံတော်သို့ ပြန်လာကြရမည်။

၂၆။ ထိုအခါ ငါသည် သူတို့၏ ပြုကျင့်မှု စာရင်းကို ရှင်းတော်မူမည်။