Albanian - Chapter 74 - Al-Muddaththir

O ti i mbuluar

Ngrihu dhe tërhiqu vërejtjen (duke i thirrur)

Dhe madhëroje Zotin tënd

Dhe rrobat tua pastroi

Dhe të keqes së ndyrë largohu

Dhe mos u mburr me atë që jep e të duket shumë

Dhe për hir të Zotit tënd duro

E, kur të fryhet në Sur

atëherë ajo është ditë e vështirë

Për jobesimtarët është jo e lehtë

Ti më le Mua dhe atë që e krijova të vetmuar

Dhe bëra të ketë pasuri të madhe

E bëra edhe me djem që i ka me vete

Dhe Unë i lash në disponim të gjitha mundësitë

E ai lakmon që t´i shtoj edhe më tepër

E jo, se ai vërtet ishte mohues i fakteve tona

Atë do ta ndrydhi me një dënim të rëndë e të padurueshëm

Pse ai shumë mendonte, radhitte e përgatiste (për Kur´anin)

Qoftë i shkatërruar, po si përceptonte

Prapë qoftë i shkatërruar, po si përceptonte

Ai sërish thellohej në mendime

Pastaj mrrolej dhe bëhej edhe i vrazhdë

Pastaj ktheu shpinën me mendjemadhësi

E tha: "Ky (Kur´ani) nuk është tjetër, vetëm se magji që përcillet prej të tjerëve

Ky nuk është tjetër, përveç fjalë njerëzish

E Unë atë do ta hedh në Sekar

E, ku e di ti se çka është Sekar

Ai nuk lë send të mbetet pa e djegur

Ai është që ua prish dhe ua nxin lëkurat

Mbikëqyrës mbi të janë nëntëmbëdhjetë

E mbikëqyrës të zjarrit Ne nuk bëjmë tjetër, përveç engjëjve dhe numrin e tyre (të përmendur në Kur´an) nuk e bëmë për tjetër, por vetëm si sprovë për ata që nuk besuan, e që të binden ata që u është dhënë libri, e atyre që besuan t´u shtohet edhe më besi

Jo, nuk është ashtu, pasha hënën

Edhe natën kur tërhiqet

Edhe agimin kur agon

S´ka dyshim se ai (Sekari) është një nga belatë më të mëdha

Është vërejtje për njerëz

Për atë nga mesi juaj që dëshiron të përparojë (në të mira) apo të ngecë

Secili njeri është peng i veprës së vet

Përveç atyre të djathtëve

Që janë në xhennete e i bëjnë pyetje njëri-tjetrit

Çka u solli juve në Sekar

Ata thonë: "Nuk kemi qenë prej atyre që faleshin (që bënin namaz)

Nuk kemi qenë që ushqyenim të varfërit

Dhe kemi qenë që përziheshim me të tjerët në punë të kota

Dhe kemi qenë që nuk e besonim ditën e gjykimit

Derisa na erdhi e vërteta (vdekja)

E tanimë, atyre nuk u bën dobi ndërmjetësimi i ndërmjetësuesve

Po çka kishin ata që largoheshin prej këshillës (Kur´anit)

Ata ishin si gomarë të trembur (të egër)

Që ikin prej luanit (ose prej gjahtarit)

Veç kësaj, secili prej tyre dëshironte t´i jepej libër i posaçëm (i hapët, i qartë)

E jo! Por ata janë që nuk i frikësohen botës tjetër

Dhe jo! Se ai (Kur´ani) është këshillë e lartë

E kush do, këshillohet me të

Po ata nuk mund të marrin mësim prej tij, vetëm nëse All-llahu do, Ai është i denjë për t´ju ruajtur dhe i denjë për falje mëkatesh