Back to Languages

Urdu - Chapter 71 - Nuh

Translation by Abul A Ala Maududi — Permalink

Verse 1 — Surah Nuh 71:1

ہم نے نوحؑ کو اس کی قوم کی طرف بھیجا (اس ہدایت کے ساتھ) کہ اپنی قوم کے لوگوں کو خبردار کر دے قبل اس کے کہ ان پر ایک دردناک عذاب آئے

Verse 2 — Surah Nuh 71:2

ا س نے کہا "اے میری قوم کے لوگو، میں تمہارے لیے ایک صاف صاف خبردار کردینے والا (پیغمبر) ہوں

Verse 3 — Surah Nuh 71:3

(تم کو آگاہ کرتا ہوں) کہ اللہ کی بندگی کرو اور اس سے ڈرو اور میری اطاعت کرو

Verse 4 — Surah Nuh 71:4

اللہ تمہارے گناہوں سے درگزر فرمائے گا اور تمہیں ایک وقت مقرر تک باقی رکھے گا حقیقت یہ ہے کہ اللہ کا مقرر کیا ہوا وقت جب آ جاتا ہے تو پھر ٹالا نہیں جاتا کاش تمہیں اِس کا علم ہو

Verse 5 — Surah Nuh 71:5

اُس نے عرض کیا "اے میرے رب، میں نے اپنی قوم کے لوگوں کو شب و روز پکارا

Verse 6 — Surah Nuh 71:6

مگر میری پکار نے اُن کے فرار ہی میں اضافہ کیا

Verse 7 — Surah Nuh 71:7

اور جب بھی میں نے اُن کو بلایا تاکہ تو اُنہیں معاف کر دے، انہوں نے کانوں میں انگلیاں ٹھونس لیں اور اپنے کپڑوں سے منہ ڈھانک لیے اور اپنی روش پر اڑ گئے اور بڑا تکبر کیا

Verse 8 — Surah Nuh 71:8

پھر میں نے ان کو ہانکے پکارے دعوت دی

Verse 9 — Surah Nuh 71:9

پھر میں نے علانیہ بھی ان کو تبلیغ کی اور چپکے چپکے بھی سمجھایا

Verse 10 — Surah Nuh 71:10

میں نے کہا اپنے رب سے معافی مانگو، بے شک وہ بڑا معاف کرنے والا ہے

Verse 11 — Surah Nuh 71:11

وہ تم پر آسمان سے خوب بارشیں برسائے گا

Verse 12 — Surah Nuh 71:12

تمہیں مال اور اولاد سے نوازے گا، تمہارے لیے باغ پیدا کرے گا اور تمہارے لیے نہریں جاری کر دے گا

Verse 13 — Surah Nuh 71:13

تمہیں کیا ہو گیا ہے کہ اللہ کے لیے تم کسی وقار کی توقع نہیں رکھتے؟

Verse 14 — Surah Nuh 71:14

حالانکہ اُس نے طرح طرح سے تمہیں بنایا ہے

Verse 15 — Surah Nuh 71:15

کیا دیکھتے نہیں ہو کہ اللہ نے کس طرح سات آسمان تہ بر تہ بنائے

Verse 16 — Surah Nuh 71:16

اور اُن میں چاند کو نور اور سورج کو چراغ بنایا؟

Verse 17 — Surah Nuh 71:17

اور اللہ نے تم کو زمین سے عجیب طرح اگایا

Verse 18 — Surah Nuh 71:18

پھر وہ تمہیں اِسی زمین میں واپس لے جائے گا اور اِس سے یکایک تم کو نکال کھڑا کرے گا

Verse 19 — Surah Nuh 71:19

اور اللہ نے زمین کو تمہارے لیے فرش کی طرح بچھا دیا

Verse 20 — Surah Nuh 71:20

تاکہ تم اس کے اندر کھلے راستوں میں چلو

Verse 21 — Surah Nuh 71:21

نوحؑ نے کہا، "میرے رب، اُنہوں نے میری بات رد کر دی اور اُن (رئیسوں) کی پیروی کی جو مال اور اولاد پا کر اور زیادہ نامراد ہو گئے ہیں

Verse 22 — Surah Nuh 71:22

اِن لوگوں نے بڑا بھاری مکر کا جال پھیلا رکھا ہے

Verse 23 — Surah Nuh 71:23

اِنہوں نے کہا ہرگز نہ چھوڑو اپنے معبودوں کو، اور نہ چھوڑو وَدّ اور سُواع کو، اور نہ یَغُوث اور یَعُوق اور نَسر کو

Verse 24 — Surah Nuh 71:24

انہوں نے بہت لوگوں کو گمراہ کیا ہے، اور تو بھی اِن ظالموں کو گمراہی کے سوا کسی چیز میں ترقی نہ دے

Verse 25 — Surah Nuh 71:25

اپنی خطاؤں کی بنا پر ہی وہ غرق کیے گئے اور آگ میں جھونک دیے گئے، پھر انہوں نے اپنے لیے اللہ سے بچانے والا کوئی مددگار نہ پایا

Verse 26 — Surah Nuh 71:26

اور نوحؑ نے کہا، "میرے رب، اِن کافروں میں سے کوئی زمین پر بسنے والا نہ چھوڑ

Verse 27 — Surah Nuh 71:27

اگر تو نے اِن کو چھوڑ دیا تو یہ تیرے بندوں کو گمراہ کریں گے اور اِن کی نسل سے جو بھی پیدا ہوگا بدکار اور سخت کافر ہی ہوگا

Verse 28 — Surah Nuh 71:28

میرے رب، مجھے اور میرے والدین کو اور ہر اس شخص کو جو میرے گھر میں مومن کی حیثیت سے داخل ہوا ہے، اور سب مومن مردوں اور عورتوں کو معاف فرما دے، اور ظالموں کے لیے ہلاکت کے سوا کسی چیز میں اضافہ نہ کر