Urdu - Chapter 104 - Al-Humazah

تباہی ہے ہر اس شخص کیلئے جو (رُوبرُو) طعن و تشنیع کرنے والا (اور پسِ پشت) عیب جوئی کرنے والا ہے۔

جو مال جمع کرتا ہے اور اسے گن گن کر رکھتا ہے۔

کیا وہ خیال کرتا ہے کہ اس کا مال اسے ہمیشہ زندہ رکھے گا۔

ہرگز نہیں وہ تو چکناچور کر دینے والی جگہ میں پھینک دیا جائے گا۔

اور تمہیں کیا معلوم ہے کہ وہ چکناچور کردینے والی جگہ کیا ہے؟

وہ اللہ کی خوب بھڑکائی ہوئی آگ ہے۔

جو دلوں تک جا پہنچے گی۔

جو چَو طرفہ طور پر ان پر بند کر دی جائے گی۔

وہ لمبے لمبے ستونوں (جیسے شعلوں) میں (گِھرے ہوئے ہوں گے)۔