Urdu - Chapter 23 - Al-Muminun

yaqinan imaan waalo ne falaah haasil karli

jo apni namaaz mein khushu karte hai

jo laghwiyaath se mu mod lete hai

jo zakaath adaa karne waale hai

jo apni sharamgaaho ki hifaazath karne waale hai

bajuz apni biwiyo aur milkiyath ki laundiyo ke, yaqinan ye malaamato mein se nahi hai

jo us ke siva kuch aur chaahe, wahi hadh se tajaawuz kar jaane waale hai

jo apni amaanto aur waade ki hifaazath karne waale hai

jo apni namaazo ki nigehbaani karte hai

yahi waaris hai

jo firdaus ke waaris honge, jahaa wo hamesha rahenge

yaqinan hum ne insaan ko mitthi ke jauhar se paida kiya

phir ose nutfa bana kar, mehfooz jageh mein qaraar de diya

phir nutfe ko hum ne jama hoa qoon bana diya, phir us qoon ke luthde ko gosh ka tukda kar diya, phir gosh ke tukde ko haddiyaa bana di, phir haddiyo ko hum ne gosh pehna diya, phir dosri banaawat mein us ko paida kar diya, barkato waala hai wo Allah, jo sab se behetreen paida karne waala hai

us ke baadh phir tum sab yaqinan mar jaane waale ho

phir qayaamath ke din bila shuba tum sab uthaaye jaoge

hum ne tumhaare upar saath asmaan banaaye hai aur hum maqluqaath se ghaafil nahi hai

hum ek sahih andaaz se asmaan se paani barsaate hai, phir ose zameen mein tehra dete hai aur hum us ke le jaane par yaqinan qaadir hai

osi paani ke zariye se hum tumhaare liye khajuro aur anguro ke baghaath paida kar dete hai, ke tumhaare liye un mein bahuth se mewe hote hai, unhee mein se tum khaate bhi ho

aur wo daraqth jo toor seena pahaad se nikalta hai, jo tel nikaalta hai aur khaane waale ke liye saalan hai

tumhaare liye chau paayo mein bhi badi bhaari ibrath hai, un ke peto mein se hum tumhe doodh pilaate hai, aur bhi bahuth se nafe tumhaare liye un mein hai, un mein se baaz baaz ko tum khaate bhi ho

aur un par aur kashtiyo par tum sawaar karaaye jaate ho

yaqinan hum ne Nuh(alaihissalaam) ko us ki khaum ki taraf rasool bana kar bheja, us ne kaha ke aye meri khaum ke logo, Allah ki ibaadath karo aur us ke siva tumhaara koyi maboodh nahi, kya tum (us se) nahi darte

us ki khaum ke kaafir sardaaro ne saaf keh diya ke ye to tum jaisa hee insaan hai, ye tum par fazilath aur badaayi haasil karna chaahta hai, agar Allah hee ko manzoor hota, to kisi farishte ko utaar ta, hum ne to ise apne agle baap dadaao ke zamaane mein suna hee nahi

yaqinan us shaqs ko junoon hai, pas tum ose ek waqte muqarrar tak dheel do

Nuh (alaihissalaam) ne dua ki, aye mere rab! un ke jhutlaane par tu meri madad kar

to hum ne un ki taraf wahi bheji, ke tu hamaari aankho ke saamne hamaari wahi ke mutaabiq ek kashti bana, jab hamara hukm aa jaaye aur tanvvor ubal pade, to , tu har qism ka ek ek joda us mein rakh le aur apne ahal ko bhi, magar un mein se jin ki baabath hamaari baath pehle guzar chuki hai, qabardaar jin logo ne zulm kiya hai, un ke baare mein, mujh se kuch kalaam na karna, wo to sab duboye jayenge

jab tu aur tere saathi kashti par ba itmenaan baith jaao, to kehna ke sab tareef Allah ke liye hee hai, jis ne hamein zaalim logo se najaath ataa farmaayi

aur kaha ke aye mere rab! mujhe ba barkath jageh utaar aur tu hee behetreen utaarne waala hai

yaqinan us mein badi badi nishaaniya hai aur hum beshak azmaayesh karne waale hai

un ke baadh hum ne aur bhi ummath paida ki

phir un mein, khud un mein se (hee) rasool bhi bheja ke tum sab Allah ki ibaadath karo, us ke siva tumhaara koyi maboodh nahi, tum kyo nahi darte

aur sardaraane khaum ne jawaab diya, jo kufr karte thein aur aaqirath ki mualaqaath ko jhutlaate thein, aur hum ne unhe dunyawi zindagi mein khush haal kar rakha tha, ke ye to tum jaisa hee insaan hai, tumhaari hee quraak ye bhi khaata hai aur tumhaare peene ka paani hee ye bhi peeta hai

agar tum ne apne jaise hee insaan ki taabedaari karli, to beshak tum saqt qasaare waale ho

kya ye tumhe is baath ka waada karta hai, ke jab tum mar kar sirf qaak aur haddi reh jaoge, to tum phir zinda kiye jaoge

nahi nahi, door aur bahuth door hai wo jis ka tum waada diye jaate ho

(zindagi) to sirf dunya ki zindagi hai, hum marte jeete rehte hai aur ye nahi ke hum phir uthaaye jayenge

ye to bas aisa shaqs hai jis ne Allah par jhoot (buhtaan) baandh liya hai, hum to us par imaan laane waale nahi hai

nabi ne dua ki ke parvardigaar, un ke jhutlaane par tu meri madad kar

jawaab mila ke ye to bahuth hee jald apne kiye par pachtaane lagenge

bil aaqir adl ke taqaaze ke mutaabiq, cheeq ne pakad liya aur hum ne inhe kudaa kar-kat kar daala, pas zaalimo ke liye doori ho

un ke baadh hum ne aur bhi bahuth si ummate paida ki

na to koyi ummath apne waqte muqarrara se aage badi aur na piche rahi

phir hum ne lagataar rasool bheje, jab jab jis ummath ke paas us ka rasool ayaa, us ne jhutlaaya, pas hum ne ek ko dosre ke piche laga diya aur unhe afsaana bana diya, un ke logo ko doori hai jo imaan qubool nahi karte

phir hum ne Mosa(alaihissalaam) ko aur us ke bhai Haroon(alaihissalaam) ko apni aayato aur khuli daleel ke saath bheja

feraun aur us ke lashkaro ki taraf, pas unhone takabbur kiya aur thein hee wo sarkash log

kehne lage ke kya hum apne jaise do shaqso par imaan laaye? halaan ke khud un ki khaum (bhi) hamaare ma taheth hai

pas unhone un duno ko jhutlaaya, aaqir wo bhi halaak shuda logo mein mil gaye

hum ne to mMsa(alaihissalaam) ko kitaab (bhi) di, ke log raahe raasth par aa jaaye

hum ne ibn Maryam aur us ke waaleda ko, ek nishaani banaya aur un duno ko bulandh saaf qaraar waali aur jaari paani waali jageh mein panaah di

aye paighambaro! halaal chize khao aur nek amal karo, tum jo kuch kar rahe ho us se main ba-qoobi waaqif hoon

yaqinan tumhara ye deen ek hee deen hai aur mein hee tum sab ka rab hoon, pas tum mujh se darte raho

phir unhone khud (hee) apne amr (deen) ke aapas mein tukde tukde kar liye, har gruh jo kuch us ke paas hai, osi par itra raha hai

pas aap (bhi) inhe un ki ghaflath mein hee kuch muddath pada rehne de

kya ye (yo) samajh baithe hai? ke hum jo bhi un ke maal wa aulaad bada rahe hai

wo un ke liye bhalaiyyo mein jaldi kar rahe hai (nahi nahi) balke ye samajhte hee nahi

yaqinan jo log apne rab ki haybath se darte hai

aur jo apne rab ki aayato par imaan rakhte hai

aur jo apne rab ke saath kisi ko shareek nahi karte

aur jo log dete hai, jo kuch dete hai aur un ke dil kap kapaate hai ke wo apne rab ki taraf lautne waale hai

yahi hai jo jaldi jaldi bhalaiyya haasil kar rahe hai aur yahi hai, jo un ki taraf daud jaane waale hai

hum kisi nafs ko us ki taaqath se zyaada takleef nahi dete aur hamaare paas aisi kitaab hai jo haq ke saath bolti hai, un ke upar kuch bhi zulm na kiya jayega

balke un ke dil us taraf se ghaflath mein hai, aur un ke liye us ke siva bhi bahuth se amaal hai jinhe wo karne waale hai

yahaan tak ke jab hum ne un ke aasuda haal logo ko azaab mein pakad liya, to wo bil-bilaane lage

aaj math bil-bilaao, yaqinan tum hamaare muqaable par madad na kiye jaoge

meri aayate to tumhaare saamne padi jaati thi, phir bhi tum apni ediyo ke bal ulte bhaagte thein

akadte aint’te, afsaana goyi karte ose chohd dete thein

kya unhone is baath mein ghaur wa fikr hee nahi kiya? balke un ke paas wo ayaath jo unke agle baap dadaao ke paas nahi aya tha

ya unhone apne paighambar ko pehchana nahi, ke us ke munkir ho rahe hai

ya, ye kehte hai ke, ose junoon hai? balke wo to un ke paas haq laaya hai, haan un mein aksar haq se chidne waale hai

agar haq hee un ki qaahisho ka pairao ho jaaye to, zameen wa asamaan aur un ke darmiyaan ki har cheez darham barham ho jaaye, haq to ye hai ke hum ne inhe un ki nasihath pahonchadi hai, lekin wo apni nasihath se mu modne waale hai

kya aap un se koyi ujrath chahte hai? yaad rakhiye ke aap ke rab ki ujrath bahuth hee behtar hai aur wo sab se behtar rozi rasa hai

yaqinan aap to unhe raahe raasth ki taraf bula rahe hai

beshak jo log aaqirath par yaqeen nahi rakhte, wo sidhe raaste se mud jaane waale hai

aur agar hum un par rahem farmaaye aur un ki taklife door karde, to ye to apni apni sarkashi mein jam kar aur behekne lage

aur hum ne unhe azaab mein bhi pakda, ta-hum ye log na to apne parvardigaar ke saamne jhuke aur na hee aajizi eqtiyaar ki

yahaan tak ke jab hum ne, un par saqt azaab ka, darwaaza qol diya, to osi waqt fauran mayoos ho gaye

wo Allah hai jis ne tumhaare liye, kaan aur aankhe aur dil paida kiye, magar tum bahuth hee kam shukr karte ho

aur wahi hai jis ne tumhe paida kar ke zameen mein phaila diya aur osi ki taraf tum jama kiye jaoge

aur ye wahi hai jo jilaata aur maarta hai aur raath din ke raddo badal ka muqtaar bhi wahi hai, kya tum ko samajh boojh nahi

balke un logo ne bhi waisi hee baath kahi, jo agle kehte chale aaye

ke kya jab hum mar kar mitthi aur haddi ho jayenge, kya phir bhi hum zaroor uthaaye jayenge

hum se aur hamaare baap dadaao se, pehle hee se ye waada hota chala ayaa hai, kuch nahi, ye to sirf agle logo ke afsaane hai

pochiye to sahih, ke zameen aur us ki kul cheeze kis ki hai? batlaao agar jaante ho

fauran jawaab denge ke Allah ki, keh dijiye ke phir tum nasihath kyo nahi haasil karte

daryaaft ki jiye ke saatho asmaano ka aur bahuth ba azmath arsh ka rab kaun hai

wo log jawaab denge ke Allah hee hai, keh dijiye ke phir tum kyo nahi darte

pochiye ke tamaam cheezo ka eqtiyaar kis ke haath mein hai? ao panaah deta hai aur jis ke muqaable mein koyi panaah nahi diya jaata, agar tum jaante ho, to batla do

yahi jawaab denge ke Allah hee hai, keh dijiye, phir tum kidhar se jaadu kar diye jaate ho

haq ye hai ke hum ne unhe haq pahoncha diya hai aur ye beshak jhute hai

na to Allah ne kisi ko bete banaya aur na us ke saath aur koyi maboodh hai, warna har maboodh apni maqlooq ko liye liye phirta aur har ek dosre par chad daudta, jo ausaaf ye batlaate hai, un se Allah paak(aur be niyaaz) hai

wo ghaayeb haazir jaanne waala hai aur jo shirk ye karte hai, us se baalaatar hai

aap dua kare ke aye mere parvardigaar! agar tu mujhe wo dikhaaye jis ka waada unhe diya ja raha hai

to aye rab! tu mujhe un zaalimo ke gruh mein na karna

hum jo kch waade unhe de rahe hai, sab aap ko dikha dene par yaqinan qaadir hai

buraayi ko us tariqe se door kare, jo saraasar bhalaayi waala ho, jo kuch ye bayaan karte hai, hum ba-qoobi waaqif hai

aur dua kare ke aye mere parvardigaar! main shaitaano ke was-waso se teri panaah chaahta hoon

aur aye rab main teri panaah chahta hoon ke wo mere paas aa jaaye

yahaan tak ke jab un mein se kisi ko mauth aane lagti hai, to kehta hai, aye mere parvardigaar! mujhe waapas lauta de

ke apni chohdi hoyi dunya mein ja kar nek amaal karlo, har giz aisa nahi hoga, ye to sirf ek qaul hai, jis ka ye qaayal hai, un ke pusht to ek hijaab hai, un ke dubaara ji uthne ke din tak

pas jab ke soor phoonk diya jayega, us din na to aapas ke rishtedaar hee rahenge aur na aapas ki poch gaj

jin ki taraazu ka palla bhaari ho gaya, wo to najaath waale ho gaye

aur jin ke taraazu ka palla halka ho gaya, ye hai wo jinhone apna nuqsaan aap kar liya, jo hamesha ke liye jahannam waasil hoye

un ke chehro ko aag jhulasti rahegi aur wo wahaan badh shakal bane hoye honge

kya meri aayate tumhaare saamne tilaawath nahi ki jaati thi? phir bhi tum unhe jhutlaate thein

kahenge ke aye parvardigaar! hamaari badh-baqti hum par ghaalib aa gayi (waaqeyi) hum thein hee gumraah

aye hamaare parvardigaar hamein yahaan se najaath de, agar ab bhi hum aisa hee kare, to beshak hum zaalim hai

Allah ta’ala farmaayega, phit kaare hoye yaheen pade raho aur mujh se kalaam na karo

mere bandho ki ek jamaath thi jo baraabar yahi kehti rahi ke aye hamaare parvardigaar! hum imaan la chuke hai, tu hamein baqsh aur hum par rahem farma, tu sab meherbaano se zyaada meherbaan hai

(lekin) tum unhe mazaaq mein hee udaate rahe yahaan tak ke (is mashghale ne) tum ko meri yaad (bhi) bhula di aur tum un se mazaaq hee karte rahe

Allah ta’ala daryaafth farmayega ke tum zameen mein ba-etebaar barso ki ginti ke, kis qadar rahe

wo kahenge ek din ya ek din se bhi kam, ginti ginne waalo se bhi poch li jiye

Allah ta’ala farmayega fi l waaqe tum wahaa bahuth hee kam rahe ho, aye kaash ke tum ose pehle hee se jaan lete

kya tum ye gumaan kiye hoye ho ke hum ne tumhe yo hee bekaar paida kiya hai aur ye ke tum hamaari taraf lautaaye hee na jaoge

Allah ta’ala saccha baadshah hai, wo badi bulandi waala hai, us ke siva koyi maboodh nahi, wahi buzrug arsh ka maalik hai

jo shaqs Allah ke saath kisi dosre maboodh ko pukaare jis ki koyi daleel us ke paas nahi, pas us ka hisaab to us ke rab ke upar hee hai, beshak kaafir log najaath se mehroom hai

aur kaho ke aye mere rab! tu baqsh aur rahem kar aur tu sab meherbaano se behtar meherbaani karne waala hai