Urdu - Chapter 37 - As-Saffat

qasam hai saff baandhne waale (farishto) ki

phir puri tarah daantne waalo ki

phir zikrullah ki tilaawath karne waalo ki

yaqinan tum sab ka maaboodh ek hee hai

asmaano aur zameen aur un ke darmiyaan ki tamaam chizo aur mashriqo ka rab wahi hai

hum ne asmaane dunya ko sitaaro ki zeenath se araasta kiya

aur hifaazath ki, sarkash shaytaan se

aalam baala ke farishto (ki baatho) ko sunne ke liye wo kaan bhi nahi laga sakte, balke har taraf se wo maare jaate hai

bhagaane ke liye aur un ke liye daayimi azaab hai

magar jo koyi ek aadh baath uchak le bhaage to (fauran hee) us ke piche dahekta hoa shula lag jaata hai

un kaafiro se pucho to ke aya un ka paida karna zyaada dushwaar hai ya (un ka) jinhe hum ne (un ke alaawa) paida kiya hai? hum ne (insaano) ko lais daar mitthi se payda kiya hai

balke tu ta’ajjub kar raha hai, aur ye masqara pan kar rahe hai

aur jab unhe nasihath ki jaati hai, ye nahi maante

aur jab kisi maujeze ko dekhte hai, to mazaaq udaate hai

aur kehte hai ke ye to bilkul khullam khulla jaadu hee hai

kya jab hum mar jayenge aur qaak aur haddi ho jayenge, phir kya (sach moch) hum uthaaye jayenge

kya hum se pehle ke hamaare baap dada bhi

Aap jawaab di jiye ke haan haan aur tum zaleel (bhi) honge

wo to sirf ek zoor ki jhidki hai, ke yeka yek ye dekhne lagenge

aur kahenge ke haay hamaari qaraabi, yahi jaza (saza) ka din hai

yahi faisle ka din hai jise tum jhutlaate rahe

(un sab ko) jama kar ke unhe dozakh ki raah dikha do

aur unhe tehra lo (is liye) ke un se (zaruri) sawaal kiye jaane waale hai

tumhe kya ho gaya hai ke (us waqt) tum ek dosre ki madad nahi karte

balke wo (sab ke sab) aaj farma bardaar ban gaye

wo ek dosre ki taraf mutawajje ho kar sawaal wa jawaab karne lagenge

kahenge ke tum to hamaare paas hamaari daayi taraf se aate thein

wo jawaab denge ke nahi, balke tum hee imaan daar na thein

aur kuch hamaara zoor to tum par tha (hee) nahi balke tum khud hee sarkash log thein

ab to hum (sab) par hamaare rab ki ye baath saabith ho chuki, ke hum (azaab) chakne waale hai

pas hum ne tumhe gumraah kiya, hum to khud bhi gumraah hee thein

so ab aaj ke din to (sab ke sab) azaab mein shareek hai

hum gunehgaaro ke saath isi tarah kiya karte hai

ye wo (log) hai ke jab un se kaha jaata hai ke Allah ke siva koyi maaboodh nahi, to ye sarkashi karte thein

aur kehte thein ke kya hum apne mabudho ko ek diwaane shaayar ki baath par chohd de

(nahi nahi) balke (nabi(sallallahu alaihi wasallam) to haq (saccha deen) laaye hai aur sab rasulo ko saccha jaante hai

yaqinan tum dardnaak azaab ka maza chakne waale ho

tumhe osi ka badhla diya jayega jo tum karte thein

magar Allah ta’ala ke qaalis bar guzida bandhe

unhee ke liye muqarrara rozi hai

(har tarah ke) mewe aur wo ba-izzath wa ekraam honge

nemato waali jannato mein

taqto par ek dosre ke saamne (baithe) honge

jaari sharaab ke jaam ka un par daur chal raha hoga

jo saaf shaffaaf aur pine mein lazeez hogi

na us se darde sar ho aur na us ke pine se behke

aur un ke paas nichi nazro, badi badi aankho waali (hure) hongi

aisi jaise chupaaye hoye ande

(jannati) ek dosre ki taraf rukh kar ke puchenge

un mein se ek kehne waala kahega ke mera ek saathi tha

jo (mujh se) kaha karta tha ke kya tu (qayaamath ke aane ka) yaqeen karne waalo mein se hai

kya jab ke hum mar kar mitthi aur haddi ho jayenge, kya us waqt hum jaza diye jaane waale hai

kahega tum chaahte ho ke jhaank kar dekh lo

jhaank te hee ose bicho beech jahanna mein (jalta hoa) dehega

kahega wallah!qareeb tha ke tu mujhe (bhi) barbaadh karde

agar mere rab ka ehsaan na hota to main bhi dozakh mein haazir kiye jaane waalo mein hota

kya (ye sahih hai) ke hum marne waale hee nahi

bajuz pehli ek mauth ke aur na hum azaab kiye jaane waale hai

phir to (zaaher baath hai ke) ye badi kamyaabi hai

aisi (kamyaabi) ke liye amal karne waalo ko amal karna chahiye

kya ye mahmaani acchi hai ya sendh(zaqoom) ka daraqt

jise hum ne zaalimo ke liye saqt azmaayesh bana rakha hai

beshak wo daraqt jahannam ki jad mein se nikalta hai

jis ke khoshe shaytaano ke saro jaise hote hai

(jahannami) osi daraqt mein se khayenge aur osi se pet bharenge

phir us par garam jalte jalte paani ki malooni hogi

phir un sab ka lautna jahannam ki (aag ke dher ki) taraf hoga

yaqeen maano! ke unhone apne baap dada ko, behka hoa paya

aur ye unhee ke nishaan khadam par daudte rahe

un se pehle bhi bahuth se agle behek chuke hai

jin mein hum ne daraane waale (rasool) bheje thein

ab tu dekh le ke jinhe dhamkaaya gaya tha, un ka anjaam kaisa kuch hoa

sivaaye Allah ke barguzida bandho ke

aur hamein Nuh(alaihissalaam) ne pukaara, to (dekh lo) hum kaise acche dua qubool karne waale hai

hum ne ose aur us ke ghar waalo ko us zabardasth musibath se bacha liya

aur us ki aulaad ko hum ne baaqi rehne waali bana di

aur hum ne us ka (zikre khair) pichlo mein baaqi rakha

Nuh(alaihissalaam) par tamaam jahaano mein salaam ho

hum neki karne waalo ko isi tarah badhla dete hai

wo hamaare imaandaar bandho mein se tha

phir hum ne dosro ko dubo diya

aur us (Nuh(alaihissalaam) ki taabedaari karne waalo mein se (hee) Ibraheem(alaihissalaam) (bhi) thein

jab ke apne rab ke paas be-ayb dil laaye

unhone apne baap aur apni khaum se kaha ke tum kya pooj rahe ho

kya tum Allah ke siva ghade hoye maboodh chaahte ho

to ye (batlaao ke) tum ne rabbul aalameen ko kya samajh rakha hai

ab Ibraheem(alaihissalaam) ne ek nigaah sitaaro ki taraf uthaayi

aur kaha main to bimaar hoon

us par wo sab us se mu mude hoye waapas chale gaye

aap (chup chupa te) un ke maboodho ke paas gaye aur farmaane lage, tum khaate kyo nahi

tumhe kya ho gaya hai ke baath tak nahi karte ho

phir to (puri khuwwath ke saath) daaye haath se unhe maarne par pil pade

wo (budh parasth) daude bhaage aap ki taraf mutawajjeh hoye

to aap ne farmaya tum unhe pujhte ho, jinhe khud tum taraashte ho

halaan ke tumhe aur tumhaari banaayi hoyi chizo ko Allah hee ne paida kiya hai

wo kehne lage is ke liye ek makaan banaao aur us dehekti hoyi aag mein ose daal do

unhone to us (Ibraheem(alaihissalaam) ke saath makar karna chaaha, lekin hum ne unhee ko nicha kar diya

aur us Ibraheem(alaihissalaam) ne kaha main to hijrath kar ke apne parvardigaar ki taraf jaane waala hoon, wo zaroor meri rehnumaayi karega

aye mere rub! mujhe nek baqth aulaad ataa farma

to hum ne ose ek burdubaar bacche ki bashaarath di

phir jab wo (baccha) itni umar ko pahoncha ke us ke saath chale phire, to us (Ibraheem(alaihissalaam) ne kaha, mere pyaare bacche, main qaab mein tujhe zubaah karte hoye dekh raha hoon, ab tu bata ke teri kya raay hai? bete ne jawaab diya ke abba jo hukm hoa hai ose baja laiye, InshaAllah aap mujhe sabr karne waalo mein se payenge

gharz jab duno muti ho gaye aur us ne (baap ne) us ko (bete ko) peshaani ke bal gira diya

to hum ne awaaz di, ke aye Ibraheem(alaihissalaam)

yaqinan tu ne apne qaab ko saccha kar dikhaya, beshak hum neki karne waalo ko isi tarah jaza dete hai

dar haqiqath ye khula imtehaan tha

aur hum ne ek bada zabiha us ke fidye mein de diya

aur hum ne un ka zikr khair pichlo mein baaqi rakha

Ibraheem(alaihissalaam) par salaam ho

hum neko kaaro ko isi tarah badhla dete hai

beshak wo hamaare imaan daar bandho mein se tha

aur hum ne us ko Is’haaq(alaihissalaam) nabi ki bashaarath di, jo saaleh logo mein se hoga

aur hum ne Ibraheem wa Ishaaq(alaihima assalaam) par bartake naazil farmaayi aur un duno ki aulaad mein baaze to nek baqth hai aur baaz apne nafs par sarih zulm karne waale hai

yaqinan hum ne Mosa aur Haroon(alaihima assalaam) par bada ehsaan kiya

aur unhe aur un ki khaum ko bahuth bade dukh dard se najaath de di

aur un ki madad ki to wahi ghaalib rahe

aur hum ne unhe (waazeh aur) roushan kitaab di

aur unhe sidhe raaste par qaayam rakha

aur hum ne un duno ke liye piche aane waalo mein ye baath baaqi rakhi

ke Mosa aur Haroon(alaihima assalaam) par salaam ho

beshak hum nek logo ko isi tarah badhla diya karte hai

yaqinan ye duno hamaare momin bandho mein se thein

beshak Ilyas(alaihissalaam) bhi paighabaro mein se thein

jab ke unhone apni khaum se farmaya ke tum Allah se darte nahi ho

kya tum baal (naami buth) ko pukaarte ho? aur sab se behtar khaaliq ko chohd dete ho

Allah jo tumhaara aur tumhaare agle tamaam baap dadaao ka rab hai

lekin khaum ne unhe jhutlaaya, pas wo zaroor (azaab mein) haazir rakhe jayenge

sivaaye Allah ta’ala ke muqlis bandho ke

hum ne (Ilyas(alaihissalaam) ka zikre khaire pichlo mein bhi baaqi rakha

ke Ilyas(alaihissalaam) par salaam ho

hum neki karne waalo ko isi tarah badhla dete hai

beshak wo hamaare imaandaar bandho mein se thein

beshak Looth(alaihissalaam) bhi paighambaro mein se thein

hum ne unhe aur unke ghar waalo ko sab ko najaath di

bajuz us budhiya ke jo piche reh jaane waalo mein reh gayi

phir hum ne auro ko halaak kar diya

aur tum subaah hone par un ki bastiyo ke paas se guzarte ho

aur raath ko bhi, kya phir bhi nahi samajhte

aur bila shuba Younus(alaihissalaam) nabiyo mein se thein

jab bhaag kar pahonche, bhari kashti par

phir qura andaazi hoyi, to ye maghloob ho gaye

to phir unhe machli ne nigal liya aur wo khud apne aap ko malaamath karne lage

pas agar ye paaki bayaan karne waalo mein se na hote

to logo ke uthaaye jaane ke din tak us ke pet mein hee rehte

pas unhe hum ne chatyal maydaan mein daal diya aur wo us waqt bimaar thein

aur un par saaya karne waala ek bel daar daraqth hum ne uga diya

aur hum ne unhe ek laakh balke aur zyaada aadmiyo ki taraf bheja

pas wo imaan laaye aur hum ne unhe ek zamaane tak aysh wa ishrath di

un se daryaaft ki jiye! ke kya aap ke rab ki to betiyaa hai aur un ke bete hai

ya, ye us waqt maujoodh thein, jab ke hum ne farishto ko mu’annas1 payda kiya

agaah raho! ke ye log sirf apni iftera pardaazi se keh rahe hai

ke Allah ta’ala ki aulaad hai, yaqinan ye mehez jhute hai

kya Allah ta’ala ne apne liye betiyo ko beto par tarji di

tumhe kya ho gaya hai, kaise hukm lagaate phirte ho

kya tum is qadar bhi nahi samajhte

ya tumhaare paas is ki koyi saaf daleel hai

to jaao agar sacche ho, to apni hee kitaab le aao

aur un logo ne to Allah ke aur jinnaath ke darmiyaan bhi qaraabat-daari teh raayi hai, aur halaan ke khud jinaath ko maloom hai ke wo (is aqeede ke log, azaab ke saamne) pesh kiye jayenge

jo kuch ye (Allah ke baare mein) bayaan kar rahe hai, is se Allah ta’ala bilkul paak hai

sivaaye! Allah ke muqlis bandho ke

yaqeen maano ke tum sab aur tumhaare mabudaan (baatil)

kisi ek ko bhi behka nahi sakte

bajuz us ke jo jahannami hee hai

(farishto ka khaul hai ke) hum mein se to har ek ki jageh muqarrar hai

aur hum to (bandagiye ilaahi mein) saf basta khade hai

aur us ki tasbih bayaan kar rahe hai

kuffaar to kaha karte thein

ke agar hamaare saamne agle logo ka zikr hota

to hum bhi Allah ke cheeda bandhe ban jaate

lekin phir is Qur’aan ke saath kufr kar gaye, pas ab an-qareeb jaan lenge

aur albatta hamaara waada pehle hee apne rasulo ke liye saadir ho chuka hai

ke yaqinan wahi madad kiye jayenge

aur hamaara hee lashkar ghaalib (aur bartar) rahega

ab aap kuch dino tak un se mu pher li jiye

aur unhe dekhte rahiye aur ye bhi aage chal kar dekh lenge

kya ye hamaare azaab ki jaldi macha rahe hai

suno! jab hamara azaab un ke maidaan mein utar aayega, us waqt un ki jin ko mutanabbe kar diya gaya tha, badi buri subaah hogi

aap kuch waqt tak un ka qayaal chohd di jiye

aur dekhte rahiye, ye bhi abhi abhi dekh lenge

paak hai aap ka rab jo bahuth badi izzath waala hai, har us cheez se (jo mushrik) bayaan karte hai

paighambaro par salaam hai

aur sab tarah ki tareef Allah ke liye hai, jo saare jahaan ka rab hai