Urdu - Chapter 68 - Al-Qalam

noon, qasam hai qalam ki aur us ki, jo kuch ke wo (farishte) likhte hai

tu apne rab ke fazl se deewana nahi hai

aur beshak tere liye be intehaa ajr hai

aur beshak tu bahuth bade (umdah) aqlaaq par hai

pas ab tu bhi dekh lega aur ye bhi dekh lenge

beshak tera rab apni raah se behekne waalo ko qoob jaanta hai aur wo raah yaafta logo ko bhi ba-qoobi jaanta hai

pas tu jhutlaane waalo ki na maan

wo to chaahte hai ke tu zara dheela ho, to ye bhi dheele pad jaaye

aur tu kisi aise shaqs ka bhi kaha na maanna jo zyaada qasme khaane waala

be-vaqaar, kamina, ayb go, choghal qoor

bhalaayi se rokne waala, hadh se bad jaane waala gunehgaar

gardan kash, phir saath hee be nasab ho

us ki sarkashi sirf is liye hai ke wo maal waala aur beto waala hai

jab us ke saamne hamaari aayate padi jaati hai to keh deta hai ke ye to aglo ke qisse hai

hum bhi is ki soong (naak) par daagh denge

beshak hum ne unhe isi tarah azmaa liya, jis tarah hum ne baagh waalo ko azmaaya tha, jab ke unhone qasme khaayi ke subaah hote hee, us baagh ke phal utaar lenge

aur InshaAllah na kaha

pas us par tere rab ki jaanib se ek bala, chaaro taraf ghoom gayi aur ye so hee rahe thein

pas wo baagh aisa ho gaya jaise kati hoyi kheti

ab subah hote hee unhone ek dosre ko awaaze di

ke agar tumhe phal utaarne hai, to apni kheti par sawere hee sawere chal pado

phir ye sab chupke chupke ye batein karte hoye chale

ke aaj ke din koyi miskeen tumhaare paas na aane paaye

aur lapke hoye subah subah gaye (samajh rahe thein) ke hum qaabo pa gaye

jab unhone baagh dekha to kehne lage yaqinan hum raasta bhol gaye

nahi nahi balke hamaari qismath phot gayi

un sab mein jo behtar tha, us ne kaha ke main tum se na kehta tha ke tum Allah ki paakizgi kyo nahi bayaan karte

to sab kehne lage hamaara rab paak hai, beshak hum hee zaalim thein

phir wo ek dosre ki taraf rukh kar ke aapas mein malaamath karne lage

kehne lage haay afsoos! yaqinan hum sarkash thein

kya ajab hai ke hamaara rab hamein is se behtar badhla de de, hum to ab apne rab se hee aarzo rakhte hai

yo hee aafath aati hai aur aaqirath ki aafath bahuth badi hai, kaash unhe samajh hoti

parhezgaaro ke liye un ke rab ke paas nemato waali jannate hai

kya hum musalmaano ko misl gunehgaaro ke kar denge

tumhe kya ho gaya, kaise faisle kar rahe ho

kya tumhaare paas koyi kitaab hai jis mein tum padte ho

ke us mein tumhaari man maani batein ho

ya tum ne hum se kuch qasme li hai? jo qayaamath tak baaqi rahe, ke tumhaare liye wo sab hai jo tum apni taraf se muqarrar karlo

un se pucho to ke un mein se kaun is baath ka zimmedaar (aur daawedaar) hai

kya un ke koyi shraeek hai? to chahiye ke apne apne shariko ko le aaye, agar ye sacche hai

jis din pindli khol di jayegi aur sajde ke liye bulaaye jayenge to (sajda) na kar sakenge

nigaahe nichi hongi aur un par zillath wa qaari cha rahi hogi, halaan ke ye sajde ke liye (us waqt bhi) bulaaye jaate thein jab ke sahih saalim thein

pas mujhe aur us kalaam ko jhutlaane waale ko chohd de, hum unhe is tarah aahista aahista khinchenge ke unhe maaloom bhi na hoga

aur main unhe dheel donga, beshak meri tadbeer badi mazbooth hai

kya tu un se koyi ujrath chahta hai jis ke taawaan1se ye dabe jaate ho

ya kya un ke paas ilme ghayb hai jise wo likhte ho

pas tu apne rab ke hukm ka sabr se (intezaar kar) aur machli waale ki tarah na hoja, jab ke us ne gham ki haalath mein dua ki

agar ose us ke rab ki nemath na paa leti to yaqinan wo bure haalo mein, chatyal maydaan mein daal diya jaata

ose us ke rab ne phir nawaaza aur ose nek-kaaro mein kar diya

aur qareeb hai ke kaafir apni tez nigaaho se aap ko phusla de, jab kabhi Qur’aan sunte hai aur keh dete hai ye to zaroor deewana hai

dar haqiqath ye (Qur’aan) to tamaam jahaan waalo ke liye saraasar nasihath hee hai