Urdu - Chapter 37 - As-Saffat

Qasam hai saf bandhney walay (farishton ki)

Phir poori tarah dantney walon ki

Phir zikar-e-Allah ki tilawat kerney walon ki

Yaqeenan tum sab ka mabood aik hi hai

Aasmano aur zamin aur inn kay darmiyan ki tamam cheezon aur mashriqon ka rab wohi hai

Hum ney aasman-e-duniya ko sitaron ki zeenat say aaraasta kiya

Aur hifazat ki sirkash shetan say

Aalam-e-bala kay farishton (ki baaton) ko sunnay kay liye woh kaan bhi nahi laga saktay bulkay her taraf say woh maaray jatay hain

Bhaganey kay liye aur unn kay liye daeemi azab hai

Magar jo koi aik aadh baat uchak lay bhagay to (foran hi) uss kay peechay dehakta hua shola lag jata hai

Inn kafiron say poocho to kay aaya inn ka peda kerna ziyadah dushwaar hai ya (unn ka) jinhen hum ney (inn kay ilawa) peda kiya? Hum ney (insano) ko less daar mitti say peda kiya hai

Bulkay tu tajjub ker raha hai aur yeh maskhara pan ker rahey hain

Aur jab enhen naseehat ki jati hai yeh nahi mantay

Aur jab kissi moajzzay ko dekhtay hain to mazaq uratay hain

Aur kehtay hain kay yeh to bilkul khullam khulla jadoo hi hai

Kiya jab hum mar jayen gay aur khak aur haddi hojayen gay phir kiya (sach much) hum uthaye jayen gay

Kiya hum say pehlay kay humaray baap dada bhi

Aap jawab dijiye! Kay haan haan aur tum zaleel (bhi) howo gay

Woh to sirf aik zor ki jhirki hai kay yakayak yeh dekhney lagay gay

Aur kahen gay kay haye humari kharabi yehi jaza (saza) ka din hai

Yehi faislay ka din hai jissay tum jhutlatay rahey

Zalimon ko aur unn kay humrahiyon ko aur (jin) jin ki woh Allah kay ilawa parastish kertay thay

(inn sab ko) jama kerkay enhen dozakh ki raah dikha do

Aur enhen theraklo (iss liye) kay inn say (zaroori) sawal kiyey janay walay hain

Tumhen kiya hogaya hai kay (iss waqt) tum aik doosray ki madad nahi kertay

Bulkay woh (sab kay sab) aaj farmanbardaar bann gaye

Woh aik doosray ki taraf mutawajja hoker sawal-o-jawab kerney lagen gay

Kahen gay kay tum to humaray pass humari dayen taraf say aatay thay

Woh jawab den gay kay nahi bulkay tum hi eman daar na thay

Aur kuch humara zor to tum per tha (hi) nahi. Bulkay tum (khud) sirkash log thay

Abb to hum (sab) per humaray rab ki yeh baat sabit ho chuki kay hum (azab) chakhney walay hain

Pus hum ney tumhen gumrah kiya hum to khud bhi gumrah hi thay

So abb aaj kay din to (sab kay sab) azab mein shareek hain

Hum gunehgaaro kay sath issi tarah kiya kertay hain

Yeh woh (log) hain kay jab inn say kaha jata hai kay Allah kay siwa koi mabood nahi to yeh sirkashi kertay thay

Aur kehtay thay kay kiya hum apnay maboodon ko aik deewaney shaeer ki baat per chor den

(nahi nahi) bulkay (nabi) to haq (sacha deen) laye hain aur sab rasoolon ko sach jantay hain

Yaqeenan tum dard-naak azab (ka maza) chakhney walay ho

Tumhen ussi ka badla diya jayega jo tum kertay thay

Magar Allah Taalaa kay khalis bargazeedah banday

Unhin kay liye muqarrara rozi hai

(her tarah kay) meway aur ba-izzat-o-ikraam hongay

Nematon wali jannaton mein

Takhton per aik doosray kay samney (bethay) hongay

Jaari sharab kay jaam ka unn per dor chal raha hoga

Jo saaf shaffaf peenay mein lazeez hogi

Na uss say dard-e-sir ho aur na uss kay peenay say behken

Aur unn kay pass neechi nazron bari bari aankhon wali (hooren) hongi

Aisi jesay chupaye huyey anday

(jannati) aik doosray ki taraf rukh kerkay poochen gay

Unn mein say aik kehney wala kahe ga mera aik sathi tha

Jo (mujh say) kaha kerta tha kay kiya tu (qayamat kay aaney ka) yaqeen kerney walon mein say hai

Kiya jab kay hum mar ker mitti aur haddi hojayen gay kiya uss waqt hum jaza diyey janey walay hain

Kahey ga tum chahtay ho kay jhaank ker dekh lo

Jhaanktay hi ussay beechon beech jahannum mein (jalta hua) dekhay ga

Kahey ga Wallah! Qareeb tha kay tu mujhay (bhi) barbaad ker day

Agar meray rab ka ehsan na hota to mein bhi dizakh mein hazir kiyey janey walon mein hota

Kiya (yeh sahih hai) kay hum marney walay hi nahi

Ba-juz pehli aik mot kay aur na hum azab kiyey janey walay hain

Phir to (zahir baat hai kay) yeh bari kaamyabi hai

Aisi (kaamyabi) kay liye amal kernay walon ko amal kerna chahayey

Kiya yeh mehmaani achi hai ya seendh (zaqoom) ka darakht

Jissay hum ney zalimon kay liye sakht aazmaeesh bana rakha hai

Be-shak woh darakht jahannum ki jarr mein say nikalta hai

Jiss kay khoshay shetan kay siron jesay hotay hain

(jahannumi) issi darakht mein say khayen gay aur issi say pet bharen gay

Phir iss per garum jaltay jaltay paani ki malooni hogi

Phir inn sab ka lotna jahannum ki (aag kay dher ki) taraf hoga

Yaqeen mano! Kay enhon ney apnay baap dadon ko behka hua paya

Aur yeh unhi kay naqsh-e-qadam per dortay rahey

Inn say pehlay bhi boht say aglay behak chukay hain

Jinn mein hum ney daraney walay (rasool) bhejay thay

Abb tu dekh ley jinhen dhamkaya gaya tha unn ka anjam kaisa kuch hua

Siwaye Allah kay bargazeedah bandon kay

Aur humen nooh (alh-e-salam) ney pukara to (dekhlo) hum kaisay achay dua qabool kerney walay hain

Hum ney ussay aur uss kay ghar walon ko uss zabardast museebat say bacha liya

Aur uss ki aulad ko hum ney baqi rehney wali bana di

Aur hum ney uss ka (zikar-e-khair) pichlon mein baqi rakha

Nooh (alh-e-salam) per tamam jahano mein salam ho

Hum neki kerney walon ko issi tarah badlay detay hain

Woh humaray eman daar bandon mein say tha

Phir hum ney doosron ko dobo diya

Aur uss (nooh alh-e-salam ki) tabeydaari kerney walon mein say (hi) ibrahim (alh-e-salam bhi) thay

Jabkay apany rab kay pass bey-aib dil laye

Unhon ney apnay baap aur apni qom say kaha kay tum kiya pooj rahey ho

Kiya tum Allah kay siwa gharay huyey maboob chahtay ho

To yeh (batlao kay) tum ney rab-ul-aalameen ko kiya samjh rakha hai

Abb ibrahim (alh-e-salam) ney aik nigah sitaron ki taraf uthaee

Aur kaha mein to beemar hun

Iss per woh sab uss say mun moray huyey wapis chalay gaye

Aap (chup chupatay) unn kay maboodon kay pass gaye aur farmaney lagay tum khatay kiyon nahi

Tumhen kiya hogaya kay baat tak nahi kertay

Phir to (poori qooat kay sath) dayen hath say unhen maarney per pal paray

Woh (butt parast) doray bhagay aap ki taraf mutawajja huyey

To aap ney farmaya tum enhen poojtay ho jinhen (khud) tum tarashtay ho

Halankay tumhen aur tumhari banaee hui cheezon ko Allah hi ney peda kiya hai

Woh kehney lagay iss kay liye aik makan banao aur iss (dekakti hui) aag mein issay daal do

Unhon ney to iss (ibrahim alh-e-salam) kay sath makar kerna chaha lekin hum ney unhi ko neecha ker diya

Aur uss (ibrahim alh-e-salam) ney kaha mein to hijrat kerkay apnay perwerdigar ki taraf janey wala hun. Woh zaroor meri rehnumaee keray ga

Aey meray rab! Mujhay nek bakht aulad ata farma

To hum ney ussay aik burd-baar bachay ki bisharat di

Phir jab woh (bacha) itni umar ko phoncha kay uss kay sath chalay phiray to uss (ibrahim alh-e-salam) ney kaha meray piyaray bachay! Mein khuwab mein apnay aap ko tujhay zibah kertay huyey dekh raha hun. Abb tu bata kay teri kiya raye hai? Betay ney jawab diya kay abba! Jo hukum hua hai ussay baja layiye inshaAllah aap mujhay sabar kerney walon mein say payen gay

Gharz jab dono mutee hogaye aur uss ney (baap ney) uss ko (betay ko) paishaani kay bal gira diya

To hum ney aawaz di kay aey ibrahim

Yaqeenan tu ney apna khuwab sacha ker dikhaya be-shak hum neki kerney walon ko issi tarah jaza detay hain

Dar-haqeeqat yeh khulla imtehan tha

Aur hum ney aik bara zabeeha iss kay fidyey mein dey diya

Aur hum ney unn ka zikar-e-khair pichlon mein baqi rakha

Ibrahim (alh-e-salam) per salam ho

Hum neko karon ko issi tarah badla detay hain

Be-shak woh humaray eman daar bandon mein say tha

Aur hum ney uss ko ishaq (alh-e-salam) nabi ki bisharat di jo saleh logon mein say hoga

Aur hum ney ibrahim-o-ishaq (al-e-heem-us-salam) per barkaten nazil farmaeen aur inn dono ki aulad mein baazay to nek bakht hain aur baaz apnay nafs per sareeh zulm kerney walay hain

Yaqeenan hum ney musa aur haroon (al-e-heem-us-salam) per bara ehsan kiya

Aur unhen aur unn ki qom ko baray dukh dard say nijat dey di

Aur unn ki madad ki to wohi ghalib rahey

Aur hum ney unhen (wazeh aur) roshan kitab di

Aur unhen seedhay rastay per qaeem rakha

Aur hum ney unn dono kay liye peechay aanay walon mein yeh baat baqi rakhi

Kay musa aur haroon (al-e-heem-us-salam) per salam ho

Be-shak hum nek logon ko issi tarah badlay diya kertay hain

Yaqeenan yeh dono humaray momin bandon mein say thay

Be-shak ilyas (alh-e-salam) bhi payghumbaron mein say thay

Jabkay unhon ney apni qom say farmaya kay tum Allah say dartay nahi ho

Kiya tum ba’al (naami butt) ko pukartay ho? Aur sabb say behtar khaliq ko chor detay ho

Lekin qom ney unhen jhutlaya pus woh zaroor (azab mein) hazir rakhay jayen gay

Siwaye Allah Taalaa kay mukhlis bandon kay

Hum ney (ilyas alh-e-salam) ka zikar-e-khair pichlon mein bhi baqi rakha

Kay ilyas per salam ho

Hum neki kerney walon ko issi tarah badla detay hain

Be-shak woh humaray eman daar bandon mein say tha

Be-shak loot (alh-e-salam bhi) payghumbaron mein say thay

Hum ney unhen aur unn kay ghar walon sab ko nijat di

Ba-juz uss burhiya kay jo peechay reh janey walon mein reh gaee

Phir hum ney auron ko halak ker diya

Aur tum to subha honey per unn ki bastiyon kay pass say guzartay ho

Aur raat ko bhi kiya phir bhi nahi samajhtay

Aur bila-shuba younus (alh-e-salam) nabiyon mein say thay

Jab bhag ker phonchay bhari kashti per

Phir qura-andazi hui to maghloob hogaye

To phir unhen machli ney nigal liya aur woh khud apnay aap ko malamat kerney lag gaye

Pus agar yeh paki biyan kerney walon mein say na hotay

To logon kay uthaye janey kay din tak uss kay pet mein hi rehtay

Pus unhen hum ney chatyal medan mein daal diya aur woh uss waqt beemar thay

Aur unn per saya kerney wala aik bel daar darakht hum ney uga diya

Aur hum ney unhen aik lakh bulkay aur ziyadah aadmiyon ki taraf bheja

Pus woh eman laye aur hum ney unhen aik zamaney tak aish-o-ishrat di

Inn say daryaft kijiye! Kay kiya aap kay rab ki to betiyan hain aur inn kay betay hain

Ya yeh uss waqt mojood thay jabkay hum ney farishton ko moanniss peda kiya

Aagah raho! Kay yeh log sirf apni iftra per-dazi say keh rahey hain

Kay Allah Taalaa ki aulad hai. Yeqeenan yeh mehaz jhootay hain

Kiya Allah Taalaa ney apnay liye betiyon ko beton per tarjeeh di

Tumhen kiya hogaya hai kaisay hukum lagatay phirtay ho

Kiya tum iss qadar bhi nahi samajhtay

Ya tumharay pass iss ki koi saaf daleel hai

To jao agar sachay ho to apni hi kitab ley aao

Aur inn logon ney to Allah kay aur jinnaat kay darmiyan bhi qarabat daari theraee hai aur halankay khud jinnaat ko maloom hai kay woh (iss aqeeday kay log azab kay samney) paish kiyey jayen gay

Jo kuch yeh (Allah kay baray mein) biyan ker rahey hain uss say Allah Taalaa bilkul pak hai

Siwaye Allah kay mukhlis bandon kay

Yaqeen mano kay tum sab aur tumharay maboodaan (baatil)

Kissi aik ko bhi behka nahi saktay

Ba-juz uss kay jo jahannumi hi hai

(farishton ka qol hai kay) hum mein say to her aik ki jagah muqarrar hai

Aur hum to (bandag-e-elahee mein) saff basta kharay hain

Aur uss ki tasbeeh biyan ker rahey hain

Kuffaar to kaha kertay thay

Kay agar humaray samney aglay logon ka zikar hota

To hum bhi Allah kay cheedah banday bann jatay

Lekin phir iss quran kay sath kufur ker gaye pus abb un-qareeb jaan len gay

Aur albata humara wada pehlay hi apnay rasoolon kay liye sadir ho chuka hai

Kay yaqeenan woh hi madad kiyey jayen gay

Aur humara hi lashkar ghalib (aur bartar) rahey ga

Abb aap kuch dino tak inn say mun pher lijiyey

Aur enhen dekhtay rahiyey aur yeh bhi aagay chal ker dekh len gay

Kiya yeh humaray azab ki jaldi macha rahey hain

Suno! Jab humara azab inn kay medan mein utar aaye ga uss waqt unn ki jin ko muta-nabbay ker diya gaya tha bari buri subha hogi

Aap kuch waqt tak inn ka khayal chor dijiyey

Aur dekhtay rahiyey yeh bhi abhi abhi dekh len gay

Pak hai aap ka rab jo bot bari izzat wala hai her uss cheez say (jo mushrik) biyan kertay hain

Payghumbaron per salam hai

Aur sab tarah ki tareef Allah kay liye hai jo saray jahan ka rab hai