Urdu - Chapter 44 - Ad-Dukhan

Qasam hai iss wazahat wali kitab ki

Yaqeenan hum ney issay ba-barkat raat mein utara hai be-shak hum daraney walay hain

Issi raat mein her aik mazboot kaam ka faisla kiya jata hai

Humaray pass say hukum hoker hum hi hain rasool bana ker bhejney walay

Aap kay rab ki meharbani say. Wohi hai sunnay wala jannay wala

Jo rab hai aasmano ka aur zamin ka aur jo kuch inn kay darmiyan hai agar tum yaqeen kerney walay ho

Koi mabood nahi iss kay siwa wohi jilata hai aur maarta hai wohi tumhara rab hai aur tumharay aglay baap dadon ka

Bulkay woh shak mein paray khel rahen hain

Aap uss din kay muntazir rahen jabkay aasman zahir dhuwan laye ga

Jo logon ko gher ley ga yeh dard-naak azab hai

Kahen gay kay aey humaray rab! Yeh aafat hum say door ker dey hum eman qabool kertay hain

Inn kay liye naseehat kahan hai? Khol khol ker biyan kerney walay payghumber unn kay pass aa chukay

Phir bhi inhon ney unn say mun phera aur keh diya kay sikhaya parhaya hua baaoola hai

Hum azab ko thora door ker den gay to phir tum apni ussi halat per aajao gay

Jiss din hum bari sakht pakar pakaren gay bilyaqeen hum badla lenay walay hain

Yaqeenan inn say pehlay hum qom-e-firaon ko (bhi) aazma chukay hain jinn kay pass (Allah ka) ba-izzat rasool aaya

Kay Allah Taalaa kay bando ko meray hawalay kerdo yaqeen mano kay mein tumharay liye amanat daar rasool hun

Aur tum Allah Taalaa kay samney sirkashi na kero mein tumharay pass khulli daleel laney wala hun

Aur mein apnay aur tumharay rab ki panah mein aata hun iss say kay tum mujhay sangsaar kerdo

Aur agar tum mujh per eman nahi latey to mujh say alag hi raho

Phir unhon ney apnay rab say dua ki kay yeh sabb gunehgar log hain

(hum ney keh diya) kay raton raat tu meray bando ko ley ker nikal yaqeenan tumhara peecha kiya jayega

Tu darya ko saakin chor ker chala jaa bilashuba yeh lashkar gharq kerdiya jayega

Woh boht say baghaat aur chashmey chor gaye

Aur khetiyan aur rahat buksh thikaney

Aur woh aaram ki cheezen jinn mein aish ker rahey thay

Uss i tarah hogaya aur hum ney inn sabb ka waris doosri qom ko bana diya

So unn per na na to aasman-o-zamin roye aur na unhen mohlat mili

Aur be-shak hum ney (hi) bani isareel ko (sakht) ruswakun saza say nijat di

(Jo) firaon ki taraf say (horahi) thi.fil-waqey woh sirkash aur hadd say guzarney walon mein say tha

Aur hum ney danista tor per bani israeel ko duniya jahan walon per fokiyat di

Aur hum ney unhen aisi nishaniyan din jinn mein sareeh aazmaeesh thi

Yeh log to yehi kehtay hain

Kay (aakhri cheez) yehi humara pehli baar (duniya say) mar jana hai aur hum doobara uthaye nahi jayen gay

Agar tum sachay ho to humaray baap dadon ko ley aao

Kiya yeh log behtar hain ya tubba’a ki qom kay log aur jo unn say bhi pehlay thay. Hum ney unn sabb ko halak ker diya yaqeenan woh gunehgar thay

Hum ney zamin aur aasmano aur inn kay darmiyan ki cheezon ko khel kay tor per peda nahi kiya

Bulkay hum ney unhen durust tadbeer kay sath peda kiya hai lekin inn mein aksar log nahi jantay

Yaqeenan faislay ka din inn sabb ka tey shuda waqt hai

Uss din koi dost kissi dost kay kuch bhi kaam na aayega aur na unki imdad ki jayegi

Magar jiss per Allah ki meharbani hojaye woh zabardast aur reham kerney wala hai

Be-shak zaqoom (thoher) ka darakht

Gunehgar ka khana hai

Jo misil talchat kay hai aur pet mein kholta rehta hai

Misil tez garum pani kay

Issay pakar lo phir ghaseettay huyey beech jahannum tak phonchao

Phir iss kay sir per sakht garum pani ka azab bahao

(iss say kaha jayega) chakhta jaa tu to bara zee-izzat aur baray ikraam wala tha

Yehi woh cheez hai jiss mein tum shak kiya kertay thay

Be-shak (Allah say) darney walay aman chain ki jagah mein hongay

Baghon aur chashmon mein

Bareek aur dabeez resham kay libas pehney huyey aamney samney behtay hongay

Yeh uss tarah hai aur hum bari bari aankhon wali hooron say unka nikah kerden gay

Dil jamaee kay sath wahan her tarah kay mewon ki farmaeeshen kertay hongay

Wahan woh mot chakhney kay nahi haan pehli mot (jo woh marr chukay) enhen Allah Taalaa ney dozakh ki saza say bacha diya

Yeh sirf teray rab ka fazal hai yehi hai bari kamyabi

Hum ney iss (quran) ko teri zaban mein aasan kerdiya takay woh naseehat hasil keren

Abb tu muntazir reh yeh bhi muntazir hain