Urdu - Chapter 50 - Qaf

Qaaf bohat bari shan walay iss quran ki qasam

bulkay enhen tajjub maloom hua kay inn kay pass inhi mein say aik aagah kerney wala aaya to kafiron ney kaha kay yeh aik ajeeb cheez hai

kiya jabb hum mar ker mitti hojayen gay phir yeh wapsi door (az aqal) hai

Zamin jo kuch inn mein say ghatati hai who humen maloom hai aur humaray pass sabb yaad rakhnay waali kitab hai

Buklay inhon nay sachi baat ko jhoot kaha hai jabkay who inn kay pass phonch chuki pus who aik uljhao mein par gaye hain

Kiya inhon nay aasman ko apnay uper nahi dekha? Kay hum ney ussay kiss tarah banaya aur zeenat di hai iss mein koi shigaf nahi

Aur zamin ko hum ney bicha diya hai aur iss mein hum ney pahaar daal diye hain aur iss mein hum ney qisam qisam ki khushnuma cheezen uga di hain

Takay her rujoo kernay walay bandey kay liye beenaee aur daanaaee ka zariya ho

Aur hum ney aasman say babarkat pani barsaya aur iss say baghaat aur katney walay khet k ghallay peda kiye

Aur khujuron kay buland-o-bala darakht jinkay khoshay teh ba teh hain

Bandon ki rozi kay liye aur hum ney pani say murda shehar ko zinda ker diya. Issi tarah (qabron say) nikalna hai

Inn say pehlay Nooh ki qom ney aur rass walon ney aur samood ney

Aur aad ney aur firaon ney aur biradran-e-loot ney

Aur aeeka walon ney aur tubba ki qom ney bhi takzeeb ki thi.sab ney payghambron ko jhutlaya pus mera wada-e-azab inn per sadiq aagaya

Kiya hum pehli baar kay peda kerney say thak gaye? Bulkay yeh log naee pedaeesh ki taraf say shak mein hain

Hum ney insan ko peda kiya hai aur iss kay dil mein jo khayalat uthtay hain unn say hum waqif hain aur hum uss ki rag-e-jaan say bhi ziyadah uss say qareeb hain

Jiss din do lenay walay ja letay hain aik dayen taraf aur aik bayen taraf betha hua hai

(Insan) mun say koi lafz nikal nahi pata magar kay usskay pass nigheban tayyar hai

Aur mot ki beyhoshi haq ley ker aa phonchi yehi hai jiss say tu bidakta phirta tha

Aur soor phonk diya jayega.Wada-e-azab ka din yehi hai

Aur her shaks iss tarah aayega kay uss kay sath aik lanay wala hoga aur aik gawahee denay wala

Yaqeenan tu iss say ghaflat mein tha lekin hum ney teray samney say pardah hata diya pus aaj teri nigah bohat tez hai

Uss ka humnasheen (farishta) kahega yeh hazir hai jo kay meray pass tha

Daal do jahannum mein her kafir sirkash ko

Jo nek kaam say rikney wala aur hadd say guzar janay wala aur shak kerney wala tha

Jiss ney Allah k sath doosra mabood bana liye tha pus iss say sakht azab mein daal do

Iss ka humnasheen (shetan) kahega aey humaray rab! Mein ney issay gumrah nahi kiya tha bulkay yeh khud hi door daraz ki gumrahi mein tha

Haq taalaa farmaye ga bus meray samney jhagray ki baat mat kero mein to pehlay hi tumhari taraf waeed (wada-e-azab) bhej chuka tha

Meray haan baat badalti nahi aur na hi mein apnay bandon per zara bhi zulm kerney wala hun

Jiss din hum dozakh say poochen gay kiya tu bhar chuki? Woh jawab dey di kiya kuch aur ziyadah bhi hai

Aur jannat perhezgaron kay liye bilkul qareeb kerdi jayegi zara bhi door na hogi

Yeh hai jiss ka tum say wada kiya jata tha her uss shaks kay liye jo rujoo kerney wala aur pabandi kerney wala ho

Jo rehman ka ghaeebana khof rakhta ho aur tawajja wala dil laya ho

Tum iss jannat mein salamti kay sath dakhil hojao. Yeh hamesha rehney ka din hai

Yeh wahan jo chahyen unhen milay ga (bulkay) humaray pass aur bhi ziyadah hai

Aur inn say pehlay bhi hum boht si ummaton ko halak ker chukay hain jo inn say taqat mein bohat ziyadah thi woh shehron mein dhondtay hi reh gaye, kay koi bhagney ka thikana hai

Iss mein her sahib-e-dil kay liye ibrat hai aur uss kay liye jo dil say mutawajja hoker kaan lagaye aur woh hazir ho

Yaqeenan hum ney aasmanon aur zamin aur jo kuch iss kay darmiyan hai sab ko (sirf) cheh (6) din mein peda kerdiya aur humen thakaan ney chua tak nahi

Pus yeh jo kuch kehtay hain aap iss per sabar keren aur apnay rab ki tasbeeh tareef kay sath biyan keren sooraj nikalney say pehlay bhi aur sooraj ghuroob honey say pehlay bhi

Aur raat kay kissi waqt bhi tasbeeh keren aur namaz kay baad bhi

Jiss roz uss tund-o-tez cheekh ko yaqeen kay sath sunn len gay, yeh din hoga nikalney ka

Hum hi jilatay hain aur hum hi martay hain aur humari hi taraf lot phir ker aana hai

Jiss din zamin phat jayegi aur yeh dortay huye (nikal paren gay) yeh jama kerlena hum per boht hi aasan hai

Yeh jo kuch keh rahey hain hum bakhoobi jaantay hain aur aap inn per jabar kerney walay nahi to aap quran kay zariyey enhen samjhatay rahen jo meray waeed (daraway kay wadon) say dartay hain