Urdu - Chapter 23 - Al-Muminun

بیشک دونوں جہان میں با مراد ہو گئے ایمان والے

وہ ایمان والے جو اپنی نماز میں عجزو نیاز کرتے ہیں

اور وہ جو ہر بیہودہ امر سے منہ پھیرے ہوئے ہیں

اور وہ جو زکوٰۃ ادا کرتے ہیں

اور وہ جو اپنی شرمگاہوں کی حفاظت کرنے والے ہیں

بجز اپنی بیویوں کے اور ان کنیزوں کے جو ان کے ہاتھوں کی ملکیت ہیں تو بیشک انہیں ملامت نہ کی جائیگی

اور جس نے خواہش کی ان دو کے ما سوا تو یہی لوگ حد سے بہت زیادہ تجاوز کرنے والے ہیں نیز وہ (مومن با مراد ہیں)

جو اپنی امانتوں اور اپنے وعدوں کی پاسداری کرنے والے ہیں

اور وہ جو اپنی نمازوں کی پوری حفاظت کرتے ہیں

یہی لوگ وارث ہیں

جو وارث بنیں گے فردوس (بریں) کے وہ اس میں ہمیشہ رہیں گے

اور بیشک ہم نے پیدا کیا انسان کو مٹی کے جوہر سے

پھر ہم نے رکھا اسے پانی کی بوند بنا کر ایک محفوظ مقام میں

پھر ہم نے بنا دیا نطفہ کو خون کا لوتھڑا پھر ہم نے بنا دیا اس لوتھڑے کو گوشت کی بوٹی پھر ہم نے پیدا کر دیں اس بوٹی سے ہڈیاں ، پھر ہم نے پہنا دیا ان ہڈیوں کو گوشت ۔ پھر (روح پھونک کر) ہم نے اسے دوسری مخلوق بنا دیا پس بڑا با برکت ہے اللہ جو سب سے بہتر بنانے والا ہے

پھر یقیناً تم ان مرحلوں سے گزرنے کے بعد مرنے والے ہو

پھر بلا شبہ تمھیں روز قیامت (قبروں سے ) اٹھایا جائیگا

اور بےشک ہم نے تمھارے اوپر سات راستے بنا دیے اور ہم اپنی مخلوق (کی مصلحتوں) سے بےخبر نہ تھے

اور ہم نے اتارا آسمان سے پانی اندازہ کے مطابق پھر ہم نے ٹھیرا لیا اسے زمین میں اور یقیناً ہم اسے بالکل نا پید کرنے پر پوری طرح قادر ہیں

پھر ہم نے اگائے تمھارے لیے اس پانی سے باغات کھجوروں اور انگوروں کے تمھارے لیے ان میں بہت سے پھل ہیں اور ان میں سے تم کھاتے بھی ہو

نیز پیدا کیا ایک درخت جو اگتا ہے طور سینا میں وہ اگتا ہے تیل لیے ہوئے اور سالن لیے ہوئے کھانیوالوں کے لیے

اور بےشک تمھارے لیے جانوروں میں بھی غورو فکر کا مقام ہے ہم پلاتے ہیں تمھیں اس (دودھ) سے جو ان کے شکموں میں ہے اور تمھارے لیے ان میں طرح طرح کے بہت فائدے ہیں اور انھیں (کے گوشت) سے تم کھاتے ہو

اور ان پر اور کشتیوں پر تمھیں سوار کیا جاتا ہے

اور ہم نے بھیجا نوح (علیہ السلام) کو ان کی قوم کی طرف تو آپ نے فرمایا اے میری قوم! اللہ تعالیٰ کی عبادت کرو، نہیں ہے تمھارا کوئی خدا اس کے بغیر ۔ کیا تم (بت پرستی کے انجام سے ) نہیں ڈرتے

تو کہنے لگے وہ سردار جنھوں نے کفر اختیار کیا تھا ان کی قوم سے کہ نہیں ہے یہ مگر بشر تمھارے جیسا یہ چاہتا ہے کہ اپنی بزرگی جتلائے تم پر اور اگر اللہ تعالیٰ (رسول بھیجنا) چاہتا تو وہ اتارتا فرشتوں کو ، ہم نے نہیں سنی یہ بات (جو نوح علیہ السلام کہتے ہیں ) اپنے پہلے آباؤاجداد میں

نہیں ہے یہ مگر ایسا شخص جسے جنون کا مرض ہو گیا ہے سو انتظار کرو اس کے انجام کا کچھ عرصہ

آپ نے عرض کی اے رب!(اب) تو ہی میری مدد فرما کیونکہ انھوں نے مجھے جھٹلا دیا ہے

تو ہم نے وحی بھیجی ان کی طرف کہ بناؤ ایک کشتی ہماری نگاہوں کے سامنے اور ہمارے حکم کے مطابق۔ پھر جب آجائے ہمارا عذاب اور (پانی) اُبل پڑے تنور سے تو داخل کر لو اس میں ہر جوڑے میں سے دو دو اور اپنے گھر والوں کو بجز ان کے جن کے بارے میں پہلے فیصلہ ہو چکا ہے ان میں سے ، اور گفتگو نہ کرنا میرے ساتھ ان کے متعلق جنھوں نے ظلم کیا وہ تو ضرور غرق کیے جائیں گے

پھر جب اچھی طرح بیٹھ جائیں آپ اور آپ کے ساتھی کشتی کے عرشہ پر تو کہنا سب تعریفیں اللہ تعالیٰ کے لیے ہیں جس نے ہمیں نجات دی ظالم قوم (کے جوروستم) سے

اور یہ بھی عرض کرنا کہ اے میرے رب! اتار مجھے با برکت منزل پر اور تو ہی سب سے بہتر اتارنے والا ہے

بیشک اس قصہ میں ہماری قدرت کی نشانیاں ہیں اور ہم ضرور (اپنے بندوں کو ) آزمانے والے ہیں

پھر ہم نے پیدا فرما دی ان کے (غرق ہونے کے ) بعد ایک دوسری جماعت

پھر ہم نے بھیجا ان میں ایک رسول ان میں سے (اس نے انہیں کہا) کہ عبادت کرو اللہ کی ، نہیں ہے تمھارا کوئی خدا اس کے سوا، کیا تم (شرک کے انجام سے) نہیں ڈرتے ہو

تو بولے ان کی قوم کے سردار جنھوں نے کفرکیا تھا اور جنھوں نے جھٹلایا تھا قیامت کی حاضری کو اور ہم نے خوشحال بنا دیا تھا انھیں دنیوی زندگی میں ۔ (اے لوگو!) نہیں ہے یہ مگر ایک بشر تمھاری مانند، یہ کھاتا ہے وہی خوراک جو تم کھاتے ہو اور پیتا ہے اس سے جس تم پیتے ہو

اور اگر تم پیروی کرنے لگے اپنے جیسے بشر کی تو تم تب نقصان اٹھانے والے ہو جاؤ گے

کیا وہ تم سے یہ وعدہ کرتا ہے کہ تم جب مر جاؤ گے اور مٹی اور ہڈیاں ہو جاؤ گے تو تمھیں (پھر قبروں سے) نکالا جائیگا

یہ بات عقل سے بعید ہے بالکل بعیدجس کا تم سے وعدہ کیا جا رہا ہے

نہیں ہے کوئی اور زندگی سوائے ہماری اس دنیوی زندگی کے یہی ہمارا مرنا ہے اور یہی ہمارا جینا ہے اور ہمیں دوبارہ نہیں اٹھایا جائیگا

وہ نہیں مگر ایسا شخص جس نے بہتان لگایا ہے اللہ تعالیٰ پر جھوٹا اور ہم تو قطعاً اس پر ایمان نہیں لائیں گے۔

اس پیغمبر نے کہامیرے رب! اب تو میری مدد فرما کیونکہ انھوں نے تو مجھے جھٹلا دیا ہے

اللہ تعالیٰ نے فرمایا عنقریب ہی یہ لوگ اپنے کیے پر نادم ہو جائیں گے

تو آ پکڑا انہیں حقیقی چنگھاڑ نے تو ہم نے انھیں خس و خاشاک بنا دیا تو برباد ہو جائے وہ قوم جو ستم شعار ہے

پھر ہم نے پیدا فرمائی ان (کی بربادی) کے بعد کئی قومیں

آگے نہیں بڑھ سکتی کوئی قوم اپنی مقررہ میعاد سے اور نہ وہ لوگ پیچھے رہ سکتے ہیں

پھر ہم بھیجتے رہے اپنے رسول یکے بعد دیگرے جب کبھی کسی امت کے پاس اس کا رسول آیا تو انھوں نے اسے جھٹلایا ۔ پس ہم بھی ایک کے بعد دوسرے کو ہلاک کرتے گئے اور ہم نے (ان جابر) قوموں کو افسانے بنا دیا پس خدا کی پھٹکار ہو ایسی قوم پر جو ایمان نہیں لاتی

پھر ہم نے بھیجا موسیٰ اور ان کے بھائی ہارون علیہ السلام کو اپنی نشانیاں اور واضح دلیل دے کر

فرعون اور اس کے درباریوں کی طرف تو انہوں نے بھی غرور و تکبر کیا اور وہ لوگ برے سر کش تھے

تو انہوں نے کہا کیا ہم ایمان لے آئیں ان دو آدمیوں پر جو ہماری مانند ہیں ، حالانکہ ان کی قوم ہماری غلام ہے

پس انھوں نے ان دونوں کو جھٹلایا نتیجہ یہ نکلا کہ وہ بھی برباد ہونے والوں میں شامل ہو گئے

اور بیشک ہم نے عطا فرمائی موسیٰ علیہ السلام کو کتاب تاکہ ( ان کی قوم) ہدایت یافتہ ہو جائے

اور ہم نے بنا دیا مریم کے فرزند اور ان کی (مریم) ماں کو (اپنی قدرت کی) نشانی اور انھیں بسایا ایک بلند مقام پر جو رہائش کے قابل تھا اور جہاں چشمے جاری تھے

اے (میرے) پیغمبرو! پاکیزہ چیزیں کھاؤ اور اچھے کام کرو۔ بیشک میں جو اعمال تم کر رہے ہو ان سے خوب واقف ہوں

اور یہی تمھارا دین ہے (اور) وہ ایک ہی ہے اور میں تم سب کا پروردگار ہوں سو تم ڈرا کرو مجھ سے

لیکن کاٹ کر بنا دیا انھوں نے اپنی دینی وحدت کو باہمی اختلاف سے پارہ پارہ۔ ہر گروہ اپنے نظریات پر مسرور ہے

پس (اے محبوب!) رہنے دو انھیں اپنی مد ہوشی میں کچھ وقت تک

کیا یہ تفرقہ باز خیال کرتے ہیں کہ ہم جو ان کی مدد کر رہے ہیں مال و اولاد (کی کثرت سے)

تو ہم جلدی کر رہے ہیں انھیں بھلائیاں پہچانے میں (یوں نہیں) بلکہ وہ (حقیقت حال سے ) بےخبر ہیں

بیشک وہ لو گ جو اپنے رب کے خوف سے ڈر رہے ہیں

اور وہ جو اپنے رب کی آیتوں پر ایمان رکھتے ہیں

اور وہ جو اپنے رب کے ساتھ (کسی کو) شریک نہیں بناتے

اور وہ جو دیتے ہیں جو کچھ دیتے ہیں اس حال میں کہ ان کے دل ڈر رہے ہیں (اس خیال سے) کہ وہ (ایک دن) اپنے رب کی طرف لوٹنے والے ہیں

یہی لوگ جلدی کرتے ہیں بھلائیاں کرنے میں وہ بھلائیوں کی طرف سبقت لے جانے والے ہیں

اور ہم تکلیف نہیں دیتے کسی شخص کو مگر جتنی اس کی طاقت ہے اور ہمارے پاس ایک کتاب ہے جو سچ بولتی ہے اور ان پر کوئی ظلم نہیں کیا جائیگا

بلکہ ان کے دل مد ہوش ہیں اس (خوفناک حقیقت) سے اور ان کے اعمال مومنوں کے اعمال سے مختلف ہیں یہ (نابکار) ان برے کاموں کو ہی کرنے والے ہیں

یہاں تک کہ ہم پکڑیں گے ان کے خوشحال لوگوں کو عذاب سے ، اس وقت وہ چلائیں گے

(ظالمو!) آج نہ چلّاؤ تمھاری ہماری طرف سے اب کوئی مدد نہ کی جائیگی

(وہ وقت یاد کرو) جب ہماری آیتیں تمھارے سامنے پڑھی جاتی تھیں اور تم اپنی ایڑیوں کے بل لوٹ جایا کرتے تھے

غرور و تکبّر کرتے ہوئے (پھر صحن حرم میں) تم داستان سرائی کیا کرتے تھے

اور قرآن کی شان میں بکواس کیا کرتے تھے کیا انھوں نے کبھی تدبر نہ کیا قرآن میں ؟یا آئی تھی ان کے پاس ایسی چیز جو نہ آئی تھی ان کے پہلے آباؤاجداد کے پاس۔

یا انھوں نے اپنے رسول (مکرم) کو نہ پہچانا تھا اس لیے وہ اس کے منکر بنے رہے

یا کہتے ہیں کہ اسے سودا کا مرض ہے (یوں نہیں ) بلکہ وہ تشریف لایا ان کے پاس حق کے ساتھ اور بہت سے لوگ ان میں سے حق کو نا پسند کرتے ہیں

اور اگر پیروی کرتا حق ان کی خواہشات (نفسانی) کی تو درہم برہم ہو جاتے آسمان اور زمین اور جو کچھ ان میں ہے بلکہ ہم ان کے پاس لے آئے ان کی نصیحت تو وہ اپنی نصیحت سے ہی روگردانی کرنے والے ہیں

کیا آپ طلب کرتے ہیں ان سے کچھ معاوضہ ؟ (آپ کے لیے) تو آپ کے رب کی عطا بہتر ہے اور وہ سب سے بہتر رزق دینے والا ہے

اور بےشک آپ انھیں بلاتے ہیں سیدھی راہ کی طرف

بلاشبہ وہ لوگ جو ایمان نہیں لاتے آخرت پر وہ راہ راست سے منحرف ہونے والے ہیں

اور اگر ہم ان پر مہربانی بھی فرمائیں اور دور بھی کر دیں اس مصیبت کو جس میں مبتلا ہیں پھر بھی وہ بڑھتے جائیں گے اپنی سر کشی میں اندھے بنے ہوئے

اور ہم نے پکڑ لیا انھیں عذاب سے ، پھر بھی وہ نہ جھکے اپنے رب کی بارگاہ میں اور نہ وہ اب گڑ گڑا کر (توبہ کرتے) ہیں

یہاں تک کہ جب ہم کھول دیں گے ان پر دروازہ سخت عذاب والا وہ اس وقت بالکل مایوس ہو جائیں گے

اور وہ وہی ہے جس نے بنائے تمھارے لیے کان اور آنکھیں اور دل، لیکن (ان عظیم نعمتوں پر بھی) تم بہت کم شکر ادا کرتے ہو

اور وہ وہی ہے جس نے پھیلا دیا تمھیں زمین (کے اطراف ) میں اور (انجام کار) اسی کی جناب میں اکٹھے کیے جاؤ گے

اور وہ وہی ہے جو زندہ کرتا ہے اور مارتا ہے اور اسی کے اختیار میں ہے گردش لیل و نہار۔ کیا (اتنا بھی) تم نہیں سمجھتے

بلکہ انھوں نے بھی وہی بات کہی جو پہلے (کفار) کہا کرتے تھے

انھوں نے کہا، کیا جب ہم مر جائیں گے اور بن جائیں گے خاک اور ہڈیاں تو کیا ہمیں پھر اٹھایا جائیگا؟

بلاشبہ یہ وعدہ کیا گیا ہم سے اور ہمارے باپ دادا کے ساتھ بھی آج سے پہلے (لیکن آج تک پورا نہ ہوا) نہیں ہیں یہ باتیں مگر من گھڑت افسانے پہلے لوگوں کے

(اے حبیب!) آپ پوچھیے کس کی ملکیت ہے یہ زمین اور جو کچھ اس میں ہے (بتاؤ) اگر تم جانتے ہو

وہ کہیں گے (یہ سب) اللہ تعالیٰ کی ملکیت ہیں۔ آپ فرمائیے پھر کیا تم غور نہیں کرتے

پوچھیے کون ہے مالک سات آسمانوں کا ، اور (کون ہے ) مالک عرش عظیم کا ؟

وہ کہیں گے (یہ سب) اللہ تعالیٰ کی ملکیت ہے۔ آپ فرمائیے تم اس سے کیوں نہیں ڈرتے

آپ پوچھیے وہ کون ہے جس کے دست قدرت ہیں ہر چیز کی کامل ملکیت ہے اور وہ پناہ دیتا ہے (جسے چاہے) اور پناہ نہیں دی جا سکتی اس کی مرضی کے خلاف (بتاؤ) اگر تم کچھ علم رکھتے ہو

وہ کہیں گے یہ اللہ تعالیٰ ہی کی شان ہے۔ فرمائیے پھر کیسے تم دھوکہ میں مبتلا ہو جاتے ہو

حقیقت یہ ہے کہ ہم نے پہنچا دیا انھیں حق اور وہ یقیناً جھوٹے ہیں

نہیں بنایا اللہ نے کسی کو (اپنا) بیٹا اور نہ ہی اس کے ساتھ کوئی اور خدا ہے ورنہ لے جاتا ہر خدا ہر اس چیز کو جو اس نے پیدا کی ہوتی اور غلبہ حاصل کرنے کی کوشش کرتے وہ خدا ایک دوسرے پر ۔ پاک ہے اللہ تعالیٰ ان تمام (نا زیبا) باتوں سے جو وہ بیان کرتے ہیں

وہ جاننے والا ہے ہر پوشیدہ اور ظاہر کو ، پس وہ بلند ہے اس شرک سے جو وہ کرتے ہیں

آپ یہ دعا مانگیے اے میرے پروردگار! اگر تو ضرور مجھے دکھانا چاہتا ہے وہ (عذاب) جس کا ان سے وعدہ کیا گیا ہے

تو میرے رب!(ازراہ عنایت) مجھے ان ظالموں کے ساتھ نہ کرنا

اور ہم اس بات پر کہ دکھا دیں تجھے وہ عذاب جس کا ہم نے ان سے وعدہ کیا ہے قادر ہیں

دُور کرو اس چیز سے جو بہت بہتر ہے برائی کو ہم خوب جانتے ہیں جو باتیں وہ بیان کرتے ہیں

اور کہیے میرے رب! میں پناہ طلب کرتا ہوں تیری شیطانوں کے وسوسوں سے

یہاں تک کہ جب آئے گی ان میں سے کسی کو موت تو وہ (بصد حسرت) کہے گا میرے مالک ! مجھے (دنیا میں ) واپس بھیجدے

شاید میں اچھے کام کروں اس دنیا میں دوبارہ جا کر جسے میں ایک بار چھوڑ آیا ہوں ۔ ایسا نہیں ہو سکتا ۔ یہ ایک (لغو) بات ہے جو وہ کہہ رہا ہے اور ان کے آگے ایک آڑ ہے اس دن تک جب وہ دوبارہ زندہ کیے جائینگے

تو جب صور پھونکا جائیگا تو کوئی رشتہ داریاں نہ رہیں گے ان کے درمیان اس روز اور نہ وہ ایک دوسرے کے متعلق پوچھ سکیں گے

البتہ جن کے پلڑے بھاری ہونگے تو وہی لوگ کامیاب و کامران ہونگے

اور جن کے پلڑے ہلکے ہونگے تو وہی لوگ ہیں جنھوں نے نقصان پہنچایا اپنے آپ کو وہ جہنم میں ہمیشہ (جلتے) رہیں گے

بُری طرح جھُلس دے گی ان کے چہروں کو آگ اور وہ اس میں دانت نکالے ہونگے

کیا ہماری آیتیں نہیں پڑھی جاتی تھیں تمہارے سامنے اور تم انھیں جھٹلایا کرتے تھے

(معذرت کرتے ہوئے) کہیں گے اے ہمارے رب ! غالب آگئی تھی ہم پر ہماری بد بختی اور ہم گم کردہ راہ لوگ تھے

اے ہمارے مالک !(ایک بار) ہمیں نکال اس سے پھر اگر ہم نا فرمانی کی طرف رجوع کریں تو یقیناً پھر ہم ظالم ہوں گے

جواب ملے گا پھٹکارے ہوئے پڑے رہو اس میں اور مت بولو میرے ساتھ

(تمھیں یاد ہے) ایک گروہ میرے بندوں میں سے ایسا تھا جو عرض کیا کرتا تھا اے ہمارے رب ! ہم ایمان لے آئے ہی ، سو تو بخش دے ہمیں اور رحم فرما ہم پر اور تو سب سے بہتر رحم فرمانیوالاہے

تم نے ان کا مذاق اڑانا شروع کر دیا ، حتی کہ اس مشغلے نے غافل کر دیا تمھیں میری یاد سے اور تم ان پر قہق ہے لگایا کرتے تھے

میں نے بدلہ دے دیا انھیں آج ان کے صبر کا (ذرا دیکھو) وہی ہیں مراد کو پانے والے

اللہ تعالیٰ فرمائے گا (ذرا بتاؤ) کتنے سال تم زمین میں ٹھیرے رہے ؟

کہیں گے ہم ٹھیرے تھے بس ایک دن یا دن کا کچھ حصہ ۔ آپ پوچھ لیں سال گننے والوں سے

ارشاد ہوگا تم نہیں ٹھیرے مگر تھوڑا عرصہ ۔ کاش! تم اس (حقیقت) کو (پہلے ہی) جان لیتے

کیا تم نے یہ گمان کر رکھا تھا کہ ہم نے تمھیں بےمقصد پیدا کیا ہے اور تم ہماری طرف نہیں لوٹائے جاؤ گے

پس بہت بلند ہے اللہ جو بادشاہ حقیقی ہے (بے مقصد تخلیق سے) نہیں کوئی معبود بجز اس کے ۔ وہ مالک ہے عزت والے عرش کا

اور جو پوجتا ہے اللہ تعالیٰ کے ساتھ کسی دوسرے معبودکو جس کی اس کے پاس کوئی دلیل نہیں تو اس کا حساب اس کے رب کے پاس ہے۔ بلاشبہ نہیں کامیاب ہونگے حق کا انکار کرنے والے

اور (اے محبوب!) آپ (یوں ) عرض کرو میرے رب! بخش دے (میری گنہگار اُمّت کو) اور رحم فرما (ہم سب پر ) اور تو سب سے بہتر رحم فرمانے والاہے