Urdu - Chapter 44 - Ad-Dukhan

حا ۔ میم

حق کو واضح کرنے والی کتاب کی قسم

بیشک ہم نے اتارا ہے اسے ایک بابرکت رات میں ہماری یہ شان ہے کہ ہم بروقت خبردار کر دیا کرتے ہیں

اسی رات میں فیصلہ کیا جاتا ہے ہر اہم کام کا

ہر حکم ہماری جانب سے صادر ہوتا ہے ہم ہی (کتاب و رسول) بھیجنے والے ہیں

سراپا رحمت آپ کے رب کی طرف سے ۔ بیشک وہی سب کچھ سننے والا جاننے والا ہے

وہ جو رب ہے آسمانوں اور زمین کا اور جو کچھ ان کے درمیان ہے اگر تم ایماندار ہو

نہیں کوئی معبود بجز اس کے وہ زندہ کرتا ہے اور مارتا ہے تمہارا بھی رب اور تمہارے پہلے باپ دادا کا بھی رب ہے

بلکہ وہ شک میں پڑے کھیل رہے ہیں

پس آپ انتظار کریں اس دن کا جب ظاہر ہوگا آسمان پر صاف نظر آنے والا دھواں

جو چھا جائے گا لوگوں پر ۔ یہ دردناک عذاب ہو گا

(اس وقت کہیں گے) اے ہمارے رب! دُور کر دے ہم سے یہ عذاب ۔ ہم (ابھی ) ایمان لاتے ہیں

ان کے نصیحت قبول کرنے کی امید کہاں حالانکہ ان کے پاس تشریف لے آیا روشن رسول

پھر انہوں نے منہ پھیر لیا تھا اس سے اور کہا سکھایا ہوا ہے ، دیوانہ ہے

ہم دور کرنے والے ہیں عذاب کو قلیل عرصہ کے لیے تم پھر کفر کی طرف لوٹ جاؤ گے

جس روز ہم انہیں پوری شدت سے پکڑیں گے (اس روز) ہم (ان سے) بدلہ لے لیں گے

اور ہم نے آزمایا تھا ان سے پہلے قوم فرعون کو اور آیا تھا ان کے پاس معزز رسول

(اس نے فرمایا تھا) کہ میرے حوالے کر دو اللہ کے بندوں کو ۔ میں تمہارے لیے معتبر رسول ہوں

اور نہ سر کشی کرو اللہ کے مقابلہ میں میں لے آیا ہوں تمہارے پاس (اپنی رسالت کی ) روشن دلیل

اور میں نے پناہ لے لی ہے اپنے رب کی اور تمہارے رب کی کہ تم مجھ پر پتھراؤ کر سکو

اور اگر تم ایمان لانے کے لیے تیار نہیں تو پھر مجھ سے کنارہ کش ہو جاؤ

پس پکارا موسیٰ نے اپنے رب کو (الہٰی) بلاشبہ یہ مجرم لوگ ہیں

(حکم ملا) لے چلو میرے بندوں کو راتوں رات ۔ تمہارا تعاقب کیا جائے گا

اور رہنے دو سمندر کو تھما ہوا ۔ بےشک وہ ایسا لشکر ہے جو غرق ہو کر رہے گا

وہ چھوڑ گئے بہت سے باغات اور چشمے

(سر سبز) کھیتیاں اور شاندار مقامات

اور بہت سارا سازو سامان جس میں وہ عیش کیا کرتے تھے

یونہی ہوا۔ اور ہم نے وارث بنا دیا ان تمام چیزوں کا دوسرے لوگوں کو

پس نہ رویا ان (کی بربادی ) پر آسمان اور نہ زمین اور نہ انہیں مزید مہلت دی گئی

اور بےشک ہم نے نجات دی بنی اسرائیل کو رسوا کن عذاب سے

(یعنی) فرعون (کی غلامی) سے ۔ بلاشبہ وہ بڑا متکبّر (اور) حد سے بڑھنے والوں میں سے تھا

اور ہم نے چنا تھا بنی اسرائیل کو جان بوجھ کر ، جہان والوں پر

اور ہم نے عطا فرمائیں انہیں ایسی نشانیاں جن میں صریح آزمائش تھی

بے شک یہ (کفار مکہ) بھی کہتے ہیں

نہیں ہے (ہمارے لیے) مگر ہماری (یہی) پہلی موت اور نہ ہمیں دوبارہ اٹھایا جائے گا

بھلا ہمارے باپ دادوں کو تو زندہ کر کے لے آؤ اگر تم سچے ہو

(اے لوگو!) ذرا سوچو) کیا یہ لوگ بہتر ہیں یا تبع کی قوم اور جو لوگ ان سے پہلے گزرے ہیں ہم نے انہیں (بہمہ شوکت و حشمت) ہلاک کر دیا۔ بیشک وہ مجرم تھے

اور نہیں پیدا فرمایا ہم نے آسمانوں اور زمین کو اور جو کچھ ان کے درمیان ہے کھیل کے طور پر

نہیں پیدا فرمایا ہم نے آسمان و زمین کو مگر حق کے ساتھ لیکن ان میں سے اکثر (اس حقیقت کو ) نہیں جانتے

یقیناً فیصلہ کا دن ان سب کو (دوبارہ زندہ کرنے کے لیے) مقرروقت ہے

جس روز کوئی دوست کسی دوست کے ذرا کام نہ آئے گا اور نہ ان کی مدد کی جائے گی

سوائے ان کے جن پر اللہ نے رحم فرمایا ہے بیشک وہ سب پر غالب ، ہمیشہ رحم کرنے والا ہے

بلاشبہ زقوم کا درخت

گنہگار کی خوراک ہوگا

پگھلے تانبے کی مانند، پیٹوں میں جوش مارے گا

جیسے کھولتا پانی جوش مارتا ہے

(حکم ہو گا) اس (نا بکار) کو پکڑ لو اسے گھسیٹ کر لے جاؤ جہنم کے وسط میں

پھر انڈیلو اس کے سر کے اوپر کھولتا پانی (اسے) عذاب دینے کے لیے

بے شک یہ وہ ہے جس میں تم شک کیا کرتے تھے

یقیناً پرہیزگار امن کی جگہ میں ہوں گے

باغات میں اور (بہتے ہوئے) چشموں میں

پہنے ہوئے ہوں گے لباس باریک اور دبیز ریشم کا ۔ آمنے سامنے بیٹھے ہوں گے

ہاں یونہی ہوگا اور ہم بیاہ دینگے انہیں گوری گوری آہو چشم عورتوں سے

وہ منگوا لیا کریں گے وہیں ہر قسم کا پھل اطمینا ن سے

نہ چکھیں گے وہاں موت کا ذائقہ بجز اس پہلی موت کے اور اللہ نے بچا لیا انہیں عذاب جہنم سے

محض آپ کے رب کی مہربانی سے یہی وہ بڑی کامیابی ہے (جس کی انہیں آرزو تھی)

پس ہم نے آسان کر دیا قرآن کو آپ کی زبان میں تاکہ وہ نصیحت قبول کریں

سو آپ بھی انتظار کیجیے وہ بھی انتظار کرنے والے ہیں