Urdu - Chapter 70 - Al-Maarij

مطالبہ کیا ہے ایک سائل نے ایسے عذاب کا جو ہو کر کر رہے

(وہ سن لے) یہ تیار ہے کفار کے لیے اسے کوئی ٹالنے والا نہیں

یہ اللہ کی طرف سے ہے جو عروج کے زینوں کا مالک ہے

عروج کرتے ہیں فرشتے اور جبریل اللہ کی بارگاہ میں یہ عذاب اس روز ہوگا جس کی مقدار پچاس ہزار برس ہے

(ایسا) صبر کیجیے جو بہت خوبصورت ہو

کفار کو تو یہ بہت دور نظر آتا ہے

(لیکن) ہم اسے قریب دیکھ رہے ہیں

اس روز آسمان پگھلی ہوئی دھات کی مانند ہوگا

اور پہاڑ رنگ برنگی اون کی طرح ہوجائیں گے

اور کوئی جگری دوست کسی جگری دوست کا حال نہ پوچھے گا

دکھائی دیں گے ایک دوسرے کو ہر مجرم تمنا کرے گا کہ کاش! بطور فدیہ دے سکتا آج کے عذاب سے بچنے کے لیے اپنے بیٹوں کو،

اپنی بیوی کو، اپنے بھائی کے ،

اپنے خاندان کو جو (ہر مشکل میں) اسے پناہ دیتا تھا

اور (بس چلے تو) جتنے لوگ زمین میں ہیں سب کو پھر یہ (فدیہ) اس کو بچالے

(لیکن) ایسا ہر گز نہ ہوگا بیشک آگ بھڑک رہی ہوگی

نوچ لے گی گوشت پوست کو

وہ بلائے گی جس نے (حق سے) پیٹھ پھیری اور منہ موڑا تھا

اور مال جمع کرتا رہا پھر اسے سنبھال سنبھال کر رکھتا رہا

بے شک انسان بہت لالچی پیدا ہوا ہے

جب اسے تکلیف پہنچے تو سخت گھبرا جانے والا

اور جب اسے دولت ملے تو حد درجہ بخیل

بجز ان نمازیوں کے

جو اپنی نماز پر پابندی کرتے ہیں

اور وہ جن کے مالوں میں مقرر حق ہے

اور جو تصدیق کرتے ہیں روزِجزاء کی

اور جو اپنے رب کے عذاب سے ہمیشہ ڈرنے والے ہیں

بے شک ان کے رب کا عذاب نڈر ہونے کی چیز نہیں

اور وہ لوگ جو اپنی شرمگاہوں کی حفاظت کرنے والے ہیں

بجز اپنی بیویوں کے یا اپنی کنیزوں کے تو ان پر کوئی ملامت نہیں

البتہ جو خواہش کریں گے ان کے علاوہ تو وہی لوگ حد سے بڑھنے والے ہیں

اور جو اپنی امانتوں اور عہد وپیمان کی پاسداری کرتے ہیں

اور جو لوگ اپنی گواہیوں پر قائم رہنے والے ہیں

اور جو لوگ اپنی نمازوں کی حفاظت کرتے ہیں

یہی لوگ مکرم (ومحترم) ہوں گے جنتوں میں

پس ان کافروں کو کیا ہو گیا ہے کہ آپ کی طرف ٹکٹکی باندھے بھاگے چلے آرہے ہیں

ایک گروہ دائیں طرف سے اور دوسرا گروہ بائیں طرف سے

(کیا طمع کرتا ہے ان میں سے ہر شخص کہ ایمان وعمل کے بغیر) نعمتوں بھری جنت میں اسے داخل کیا جائے

ہر گز نہیں ہم نے ان کو پیدا کیا ہے اس (مادہ) سے جس کو وہ بھی جانتے ہیں

پس میں قسم کھاتا ہوں مشرقوں اور مغربوں کے رب کی کہ ہم پوری قدرت رکھتے ہیں

کہ ان کے بدلے میں ان سے بہتر لوگ لے آئیں اور ہم ایسا کرنے سے عاجز نہیں

سو آپ رہنے دیجیے انہیں کہ (خرافات میں) مگن رہیں اور کھیلتے کودتے رہیں حتی کہ وہ ملاقات کریں اپنے اس دن سے جس کا ان سے وعدہ کیا گیا ہے

اس روز نکلیں گے (اپنی) قبروں سے جلدی جلدی گویا وہ (اپنے بتوں کے استھانوں کی طرف دوڑے جار ہے ہیں)

جھکی ہوں گی ان کی آنکھیں چھا رہی ہوگی ان پر ذلت یہی وہ دن ہے جس کا ان سے وعدہ کیا گیا تھا