Urdu - Chapter 79 - An-Naziat

قسم ہے ان (فرشتوں) کی جو (کافروں کی روح) سختی سے کھینچتے ہیں۔

اور جو (مومنوں کی روح کی) گرہ نرمی سے کھول دیتے ہیں۔

پھر (فضا میں) تیرے ہوئے جاتے ہیں۔

پھر تیزی سے لپکتے ہیں۔

پھر جو حکم ملتا ہے اس (کو پورا کرنے) کا انتظام کرتے ہیں۔

کہ جس دن بھونچال (ہر چیز کو) ہلا ڈالے گا۔

پھر اس کے بعد ایک اور جھٹکا آئے گا۔

اس دن بہت سے دل لرز رہے ہوں گے۔

ان کی آنکھیں جھکی ہوئی ہوں گی۔

یہ (کافر لوگ) کہتے ہیں کہ : کیا ہم پہلی والی حالت پر لوٹا دیئے جائیں گے ؟

کیا اس وقت جب ہم بوسیدہ ہڈیوں میں تبدیل ہوچکے ہوں گے ؟

کہتے ہیں کہ : اگر ایسا ہوا تو یہ بڑے گھاٹے کی واپسی ہوگی۔

حقیقت تو یہ ہے کہ وہ بس ایک زور کی آواز ہوگی۔

جس کے بعد وہ اچانک ایک کھلے میدان میں ہوں گے۔

(اے پیغمبر) کیا تمہیں موسیٰ کا واقعہ پہنچا ہے ؟

جب ان کے پروردگار نے انہیں طوی کی مقدس وادی میں آواز دی تھی۔

کہ : فرعون کے پاس چلے جاؤ، اس نے بہت سرکشی اختیار کر رکھی ہے۔

اور اس سے کہو کہ کیا تمہیں یہ خواہش ہے کہ تم سنور جاؤ ؟

اور یہ کہ میں تمہیں تمہارے پروردگار کا راستہ دکھاؤں تو تمہارے دل میں خوف پیدا ہوجائے ؟

چنانچہ موسیٰ نے اس کو بڑی زبردست نشانی دکھائی

پھر بھی اس نے (انہیں) جھٹلایا، اور کہنا نہیں مانا۔

پھر دوڑ دھوپ کرنے کے لیے پلٹا۔

پھر سب کو اکٹھا کیا اور آواز لگائی۔

اور کہا کہ : میں تمہارا اعلی درجے کا پروردگار ہوں۔

نتیجہ یہ ہوا کہ اللہ نے اسے آخرت اور دنیا کے عذاب میں پکڑ لیا۔

حقیقت یہ ہے کہ اس واقعے میں اس شخص کے لیے بڑی عبرت ہے جو اللہ کا خوف دل میں رکھتا ہو۔

(انسانو) کیا تمہیں پیدا کرنا زیادہ مشکل ہے یا آسمان کو ؟ اس کو اللہ نے بنایا ہے۔

اس کی بلندی اٹھائی ہوئی ہے، پھر اسے ٹھیک کیا ہے۔

اور اس کی رات کو اندھیری بنایا ہے، اور اس کے دن کی دھوپ باہر نکال دی ہے۔

اور زمین کو اس کے بعد بچھا دیا ہے۔

اس میں سے اس کا پانی اور اس کا چارہ نکالا ہے۔

اور پہاڑوں کو گاڑھ دیا ہے۔

تاکہ تمہیں اور تمہارے مویشیوں کو فائدہ پہنچائے۔

پھر جب وہ سب سے بڑا ہنگامہ برپا ہوگا۔

جس دن انسان اپنا سارا کیا دھرا یاد کرے گا۔

اور دوزخ ہر دیکھنے والے کے سامنے ظاہر کردی جائے گی۔

تو وہ جس نے سرکشی کی تھی۔

اور دنیا کی زندگی کو ترجیح دی تھی۔

لیکن وہ جو اپنے پروردگار کے سامنے کھڑا ہونے کا خوف رکھتا تھا اور اپنے نفس کو بری خواہشات سے روکتا تھا۔

تو جنت ہی اس کا ٹھکانا ہوگی۔

یہ لوگ تم سے قیامت کی گھڑی کے بارے میں پوچھتے ہیں کہ وہ کب قائم ہوگی ؟

تمہارا یہ بات بیان کرنے میں کیا کام ؟

اس کا علم تو تمہارے پروردگار پر ختم ہے۔

جو شخص اس سے ڈرتا ہو، تم تو صرف اس کو خبردار کرنے والے ہو۔

جس دن یہ اس کو دیکھ لیں گے، اس دن انہیں ایسا معلوم ہوگا جیسے وہ (دنیا میں یا قبر میں) ایک شام یا ایک صبح سے زیادہ نہیں رہے۔