Urdu - Chapter 81 - At-Takwir

جب سورج لپیٹ دیا جائے گا۔

اور جب ستارے ٹوٹ ٹوٹ کر گریں گے۔

اور جب پہاڑوں کو چلایا جائے گا۔

اور جب دس مہینے کی گابھن اونٹنیوں کو بھی بیکار چھوڑ دیا جائے گا۔

اور جب وحشی جانور اکٹھے کردیے جائیں گے۔

اور جب سمندروں کو بھڑکایا جائے گا۔

اور جب لوگوں کے جوڑے جو ٹے بنا دئے جائیں گے۔

کہ اسے کس جرم میں قتل کیا گیا ؟

اور جب اعمال نامے کھول دئے جائیں گے۔

اور جب آسمان کا چھلکا اتار دیا جائے گا۔

اور جب دوزخ بھڑکائی جائے گی۔

اور جب جنت قریب کردی جائے گی۔

تو اس وقت ہر شخص کو اپنا سارا کیا دھرا معلوم ہوجائے گا۔

اب میں قسم کھاتا ہوں ان ستاروں کی جو پیچھے کی طرف چلنے لگتے ہیں۔

جو چلتے چلتے دبک جاتے ہیں۔

اور قسم کھاتا ہوں رات کی جب وہ رخصت ہو۔

اور صبح کی جب وہ سانس لے۔

کہ یہ (قرآن) یقینی طور پر ایک معزز فرشتے کا لایا ہوا کلام ہے۔

جو قوت والا ہے، جس کا عرش والے کے پاس بڑا رتبہ ہے۔

وہاں اس کی بات مانی جاتی ہے۔ وہ امانت دار ہے۔

اور (اے مکہ والو) تمہارے ساتھ رہنے والے یہ صاحب (یعنی حضرت محمد (صلی اللہ علیہ وآلہ وسلم) کوئی دیوانے نہیں ہیں۔

اور یہ بالکل سچی بات ہے کہ انہوں نے اس فرشتے کو کھلے ہوئے افق پر دیکھا ہے۔

اور وہ غیب کی باتوں کے بارے میں بخیل بھی نہیں ہیں۔

اور نہ یہ (قرآن) کسی مردود شیطان کی (بنائی ہوئی) کوئی بات ہے۔

پھر بھی تم لوگ کدھر چلے جارہے ہو ؟

یہ تو دنیا جہان کے لوگوں کے لیے ایک نصیحت ہے۔

تم میں سے ہر اس شخص کے لیے جو سیدھا سیدھا رہنا چاہے۔

اور تم چاہو گے نہیں، الا یہ کہ خود اللہ چاہے جو سارے جہانوں کا پروردگار ہے۔