Back to Languages
Yau - Chapter 53 - An-Najm
Translation by Muhammad Bin Abdul Hamid Silika — Permalink
Verse 1 — Surah An-Najm 53:1
Ngujilumbila ndondwa ndema ja jikutiŵila
Verse 2 — Surah An-Najm 53:2
Nganapotela n’jenuju (Muhammadi ﷺ), soni nganapombotala
Verse 3 — Surah An-Najm 53:3
Soni ngajukuŵecheta ya chisako (chakwe)
Verse 4 — Surah An-Najm 53:4
Nganigaŵa galakwego ikaŵeje maloŵe gakuuwula gagakuuwulidwa
Verse 5 — Surah An-Najm 53:5
An’jiganyisye (Qur’anijo Jibulilu) jwamachili gamajinji
Verse 6 — Surah An-Najm 53:6
Jwajukwete kaoneche kambone. Basi ni jwatamilichiche (pakaoneche kakwe kasyesyene kaŵan’guumbiile Allah)
Verse 7 — Surah An-Najm 53:7
Jwalakwe (Jibulilu) juli pachipelela cha meso chamwinani nnope
Verse 8 — Surah An-Najm 53:8
Kaneka ni jwaŵandichile (Jibulilu), basi ni konjechesya soni nnope kuŵandichila
Verse 9 — Surah An-Najm 53:9
Ni waliji (uŵandikane wao) mpela sikati ja songa siŵili sya ukunje, kapena kuŵandichila nnope (kupunda pele)
Verse 10 — Surah An-Najm 53:10
Basi (Allah) ni jwaajuuwiile kwa kapolo Jwakwe (Muhammadi ﷺ) ya jwaajuuwiile (kupitila mwa Jibulilu)
Verse 11 — Surah An-Najm 53:11
Ntima (wa Muhammadi ﷺ) nganiulambusya pa yajwaiweni (ni meso gakwe)
Verse 12 — Surah An-Najm 53:12
Ana ni nkukangana najo pa yajukuiona
Verse 13 — Surah An-Najm 53:13
Soni chisimu (Muhammadi ﷺ) ŵam’bweni (Jibulilu) ndema jine (chilo cha Al-Mi‘râj)
Verse 14 — Surah An-Najm 53:14
Pa chitela chansaawu chakupelelapo (indu yakwela kwinani kapena kutuluka pasi, chachili kusyeto kwa mawunde nsano nagaŵili)
Verse 15 — Surah An-Najm 53:15
Palakwepo ni pajili Mbepo Jakutamilichikamo
Verse 16 — Surah An-Najm 53:16
Ndema jayachiunichilaga chitela chansaawucho yayachiunichilaga
Verse 17 — Surah An-Najm 53:17
Liso (lya Muhammadi ﷺ) nganilisembenduka, soni nganilisumba mpika
Verse 18 — Surah An-Najm 53:18
Chisimu chene jwalakwe (Muhammadi ﷺ) jwaiweni ilosyo yekulungwa-kulungwa ya Ambuje ŵakwe (Allah)
Verse 19 — Surah An-Najm 53:19
Ana mwaweni Al-Lâta ni Al-‘Uzzâ
Verse 20 — Surah An-Najm 53:20
Kwisa soni Manâta jwatatu jwinejo (kuŵa milungu jenu mmalo mwa Allah)
Verse 21 — Surah An-Najm 53:21
Ana jenumanja ni nkwete ŵanache ŵachilume, sano Jwalakwe (Allah) ni jukwete ŵanache ŵachikongwe
Verse 22 — Surah An-Najm 53:22
Kwele ni gaŵanya kwalupuso (kwakuntenda lupuso Allah)
Verse 23 — Surah An-Najm 53:23
Nganigaŵatu galakwego ikaŵeje menape (ga isanamu) gan’gakolasile jenumanja ni achatati ŵenu, Allah nganatulusya pa yalakweyo umboni uliose (wakundisya kuigalagatila), ngakukuya ŵanganyao ikaŵeje liganichisya, ni yayikusaka mitima, kutendaga pamasile pachaichilile kuumila kwa M’mbuje gwao (Allah) chongoko
Verse 24 — Surah An-Najm 53:24
Kapena mundu mpaka akombole kupata chilichose chaakuchiluumba? (Ngwamba)
Verse 25 — Surah An-Najm 53:25
Basi Allah ni Nsyene Akhera ni Duniya
Verse 26 — Surah An-Najm 53:26
Ana soni Achimalaika ŵalingwa kumawunde ŵangaŵa nkukamuchisya chondechonde jao chilichose, ikaŵeje panyuma pakupeleka lusa Allah kwa jwaankunsaka (mwa ŵanganyao kuti awombe duwa ja chondechonde), ni kunonyelwa najo (nkuwombeledwajo)
Verse 27 — Surah An-Najm 53:27
Chisimu aŵala ŵangakukulupilila ya Akhera akwakolanga Achimalaika ni mena gachikongwe (pakuŵecheta kuti ŵanganyao ŵanache ŵachikongwe ŵa Allah)
Verse 28 — Surah An-Najm 53:28
Ni nganakola ŵanganyao pa yalakweyo umanyilisi uliose, ngakukuya ikaŵeje liganichisya, sano liganichisya lyangakamuchisya chilichose pa yakuona
Verse 29 — Surah An-Najm 53:29
Basi munnekaani ajula jwaachitundumalile chikumbusyo Chetu (Qur’an), ni ngajukusaka ikaŵeje umi wa duniya
Verse 30 — Surah An-Najm 53:30
Chele ni chipelela chao cha umanyilisi. Chisimu Ambuje ŵenu (Allah) ni ŵaakummanyilila jwaapoteele kuleka litala Lyakwe, nambo soni ni ŵaakummanyilila jwajongweche
Verse 31 — Surah An-Najm 53:31
Soni Allah ni Nsyene yosope yaili ku mawunde ni yaili petaka, kuti akaalipile aŵala ŵasakesye pa yaŵapanganyisye, ni kwalipila yambone aŵala ŵaakolosisye (masengo)
Verse 32 — Surah An-Najm 53:32
Aŵala ŵaakuliŵambasya ilemwa yekulungwa-kulungwa, ni yakunyalaya, ikaŵeje yamwanamwana. Chisimu Ambuje ŵenu (Allah) ni Ŵachikululuko chakusapanguka. Ŵalakwe ni ŵaakummanya chenene jenumanja, kutandila paŵan’gumbaga kuumila mwitaka, ni pandema jankuŵaaga misigo mu itumbo ya achimama ŵenu. Basi ngasilliswejesyaga mwachimisyene, Jwalakwe ni Jwaakummanya chenene jwaali ni woga (wakun’jogopa Allah)
Verse 33 — Surah An-Najm 53:33
Ana mum’bweni (mmwe Muhammadi ﷺ) ajula jwaagalawiche (kuleka kuunda malamusi ga Allah)
Verse 34 — Surah An-Najm 53:34
Ni jutosile panandi (mu chipanje chakwe) kaneka ni kuleka (kutolako)
Verse 35 — Surah An-Najm 53:35
Ana kukwakwe kwana umanyilisi wakusisika, basi jwalakwe ni jukuiona (yanti chipanje chakwecho chichimale ligongo lyakutola)
Verse 36 — Surah An-Najm 53:36
Ana nganijusalilidwa yaili mu ikalakala ya Musa
Verse 37 — Surah An-Najm 53:37
Ni Ibrahima ajula juŵakwanilisye (chilanga cha Allah)
Verse 38 — Surah An-Najm 53:38
Yanti jwantwiichile nsigo (wasambi) ngasaja kutwichila nsigo (wasambi) wajwine
Verse 39 — Surah An-Najm 53:39
Niyanti mundu nganijukola ikaŵeje yajupanganyisye
Verse 40 — Surah An-Najm 53:40
Nambo soni kuti masengo gakwe gaachionedwa
Verse 41 — Surah An-Najm 53:41
Kaneko ni tachilipidwa malipilo gakwana
Verse 42 — Surah An-Najm 53:42
Ni yanti kwa Ambuje ŵenu (Allah) ni kuchipelela (kwakuwujila indu yosope)
Verse 43 — Surah An-Najm 53:43
Ni yanti Jwalakwe (Allah) ni Jwaakutendekaasyaga kuseka ni Jwaakutendekasyaga soni kulila
Verse 44 — Surah An-Najm 53:44
Ni yanti Jwalakwe (Allah) ni Jwaakupeleka chiwa ni Jwaakupeleka soni umi
Verse 45 — Surah An-Najm 53:45
Ni yanti Jwalakwe (Allah) ni jwaagumbile mitundu jiŵili; chachilume ni chachikongwe
Verse 46 — Surah An-Najm 53:46
Kuumila mu lindondwa (lya ulume) pati litajidwe (m’chiŵelechelo)
Verse 47 — Surah An-Najm 53:47
Ni yanti kwa Jwalakwe (Allah) kwana guumba kwine (kwakwimusya ŵawe m’malembe)
Verse 48 — Surah An-Najm 53:48
Ni yanti Jwalakwe (Allah) ni Jwaakupeleka yakwanila (kuikamulichisya masengo), ni Jwaakupeleka soni yakusalasya
Verse 49 — Surah An-Najm 53:49
Ni yanti Jwalakwe (Allah) ni M’mbuje jwa ndondwa ja chilimila (jaŵajigalagatilaga ŵarabu ŵane)
Verse 50 — Surah An-Najm 53:50
Ni yanti Jwalakwe (Allah) ni juŵajonasile achina Adi ŵandanda
Verse 51 — Surah An-Najm 53:51
Ni achina Samuda, ni nganansigasya (ata jumo)
Verse 52 — Surah An-Najm 53:52
Kwisa soni ŵandu ŵa Nuhu kalakala, chisimu ŵanganyao ŵaliji ŵalupuso nnope, ni ŵakusumba mpika nnope (pa sambi)
Verse 53 — Surah An-Najm 53:53
Ni misi jakupitikusyidwa (ja ŵandu ŵa Lutwi) ŵajigwisyisye
Verse 54 — Surah An-Najm 53:54
Ni yam’bunichiile (misijo) yayam’bunichiile (yaili ilagasyo ya sakalawe syelongo lyejoche ni moto wa Jahannama)
Verse 55 — Surah An-Najm 53:55
Ana ni chapi mu chindimba cha Ambuje ŵenu (Allah mmwe amundu) cha nkuchikaichila (kuti mwine nganichiŵa Chakwe)
Verse 56 — Surah An-Najm 53:56
Aju (Muhammadi ﷺ) ni nkutetela jumpepe mwa akutetela ŵandanda
Verse 57 — Surah An-Najm 53:57
Chikusejelela chakusejelela (Kiyama jikuŵandichila)
Verse 58 — Surah An-Najm 53:58
Pangali jwampaka achiunukule (kuti chimanyiche ndema jakwe jakwichila) jwangaŵaga Allah
Verse 59 — Surah An-Najm 53:59
Ana jenumanja nkujisimonga aji abaliji (Qur’an)
Verse 60 — Surah An-Najm 53:60
Ni nkuseka (mwachipongwe) ni ngalilaga (pati nchipikanaga yogoyo ya Allah)
Verse 61 — Surah An-Najm 53:61
Ni n’gamba kwanjila pe
Verse 62 — Surah An-Najm 53:62
Basi munsujudilaani Allah ni mun’galagatileje (Jwele Jikape)