Yau - Chapter 13 - Ar-Rad

Alif-Lam-Mim-Ra. Aga ni ma Aya ga m’Chitabu (cha Qur’an). Sano ayila yaitulusyidwe kukwenu (mmwe Muhammadi ﷺ) kuumila kwa Ambuje wenu niyakuonaonape; nambo kuti wandu wajinji ngaakukulupilila

Allah ni Ajula juwanyakwile mawunde mwangali misati jankujiona; kaneka ni jwatenjele pa Arishi (Chindanda Chaulungu). Ni alijepepesye lyuwa ni mwesi, chilichose (mwa yalakweyi) chikwenda (mwakwendelechela) mpaka pandema jekolanjidwe. Jwalakwe jukulondesyaga ichindu (ya iwumbe Yakwe). Jugopolanya ma Aya kuti jenumanja nkulupilile kusyesyene yakusimangana ni M’mbuje gwenu

Soni Jwalakwe ni Ajula jwaalijasesye litaka, ni kuwika palakwepo yakunyichisya (matumbi) kwisa soni sulo. Soni mu isogosi iliyose juwisile mwalakwemo mitundu jiwili jiwili. Akuchitendaga chilo kuwa chakuwuunichila muusi. Chisimu mu yalakweyi mwana ilosyo kwa wandu waakuchetelela

Sano petaka pana ipande yagundana (nambo yajila yakwe yakulekangana), ni (mwana soni) migunda ja zabibu ni mimela (jine), kwisa soni mitende jana mapanda ni jangali mapanda; (nambo yoseyo) ikwitilidwa ni mesi gampepe (gakulandana), ni tukuitenda ine kuwa yambone nnope kuipunda ine mu kanonye. Chisimu mu yalakweyi mwana ilosyo kwa wandu waakwete lunda

Sano naga n’di wakusimonga (mmwe Muhammadi ﷺ ya kakanile ka makafili), basi chakusimosya nnope nikuwecheta kwao (kwanti): “Ana tuli tusyuchile litaka, nambo yakuona uwwejo tuchiwa soni mu kagumbidwe kasambano?” Wanganyao ni awala wanganankulupilila M’mbuje gwao, soni wanganyao makongwa tigakawe mu ngosi mwao, soni wanganyao niwandu wa ku Moto, wanyao kwalakweko takawe wandamo

Ni akunkulumisya kuti m’biche nayo yakusakala (yaili ilagasyo yao) nkaniyiwe yambone; kutendaga pamasile paipite paujo pao ilagasyo yakulandana (ni yaakuikulumisyayo kumikutula jine, yayawajilwe kuti aliunde nayo). Soni chisimu Ambuje wenu ni waakwete chikululuko kwa wandu pa lupuso lwao. Soni chisimu Ambuje wenu ni Waukali nnope pakupeleka ipotesi

Sano awala wakanile ni akutiji: “Nambi uli ngantuluchila jwalakwe chisimosimo kuumila kwa M’mbujegwe (mpela simbo ja Musa ni ngamiya ja Swaleh)?” Chisimutu mmwe n’gambile kuwa nkutetela (ngawa jwakwika nayo isimosimo mwankusachila). Sano wandu waliose akwete nkwajongola (jwao ni isimosimo yawampele Allah)

Allah akumanyilila chaakujigala wakongwe waliose (m’chitumbo mwao), ni yaikupungusya iwelechelo ni yaikonjechesya yakwe, soni chindu chilichose Kukwakwe chili ni chipiimo (chakwe)

(Jwalakwe ni) Nkumanyilila yakusisika ni yakuonechela, Jwankulungwa nnope, Jwapenani kusyene

Yalumope (kwa Allah) jwaakusisa malowe mwa jenumanja ni jwaakuganyanyisya, ni mundu jwaakulisisa chilo ni jwaakwenda kalolekape muusi

(Mundu jwalijose) jukwete akupisyangana (wachilaika) m’bujo mwakwe ni munyuma mwakwe waakunchengeta mu lilamusi lya Allah. Chisimu Allah nganawa augalawisye ntendele wauli kwa wandu mpaka ali agalawisye (wanduo) umbone wauli m’mitima mwao. Sano naga Allah ali asachile kwapa wandu ilagasyo, basi pangali kuiusya, soni nganakola wanganyao kaligoselo kalikose kangawaga Jwalakwe

Jwalakwe ni Ajula jwaakunnosyaga jenumanja kumesya mwa (kuntaga) woga (wakusalidwa ni njasi) ni tama (jakupata wula), ni akugapatikanisyaga mawunde gakusitopa (ni mesi gawula)

Soni kulindima kukunswejesyaga Jwalakwe mwakuntogolela, nombenao Achimalaika (akasanswejesyaga) pakun’jogopa, ni akasatumisyaga njasi nikunsala najo jwansachile. Sano wanganyao (achimakafili) akusisyana ya Allah (kuti apali kapena pangali kutendaga ali apali), soni Jwalakwe ni Jwaukali nnope pakupeleka ipotesi

Jiwele Jakwe duwa jakuonaonape (ni Jwakuwajilwa kum’bomba ligongo ni jwaakwangaga duwajo), sano awala waakuilumbanjila inepe yangawaga Jwalakwe nganiyiwa yajanjile wanganyao pa chilichose, pangawaga nti chisawu ajula jwaakusapangula magasa gakwe ganagawili kulochesya kumesi kuti gaiche (mesigo) m’kamwa mwakwe, kutendaga nganigawa gayiche, ni nganijiwa duwa jamakafili ikaweje mu kusokonechela

Soni akunsujudilaga Allah waali kumawunde ni petaka mwakusaka ni mwakanganisyidwa, nambo soni iwulili yao (ikunsujudilaga) kundawi ni kwigulo

Jilani: “Ana ninduni m’mbuje jwa kumawunde ni petaka?” Jilani: “Allah.” Jilani: “Ana mwatesile (wanepe) wangawaga Jwalakwe kuwa akun’gosa, wali wangali ukombosi wakulikamuchisya achimisyene namuno kulipa isausyo?” Jilani: “Ana mpaka alandane jwangalola ni jwakulolaga? Ana kapena mpaka chilandane chipi ni lilanguka? Kapena am’biichiile Allah wakamusyangana nao, wagumbile yawatite pagumba Jwalakwe, mwanti iwumbe (yambali siwilisi) ikulandana kukwao?” Jilani: “Allah ni Nkugumba chilichose. Soni Jwalakwe ni Jumpepe, Jwamachili gangalimbana nago.”

(Jwalakwe) akasatulusyaga mesi (gawula) kuumila kwinani, basi iwata niikujilimaga mwachipiimo chakwe, nigakasajigala mesi gachikuumba chiulo chachikasatutumila mpaka pachanya, nambo soni muyaakasaiwukutaga (wachipala) pamoto (mpela mtapo wagolodi ni silifa) pakusaka (koposya) ipeto kapena iteleko, mukasatutuma chiulo chakulandana nichalakwecho. Iyyoyopeyo niyaakuti Allah pakupeleka chilandanyo cha yakuona ni yaunami. Sano chiulo nichigambaga kututumila nikwasichila, nambo yakwakamuchisya wandu niikasatamilichikaga mwitaka, mwele nimwaakasapelechelaga Allah ilandanyo

Akwete kupata awala wan’jitiche M’mbuje gwao Ukoto (Mbepo), nambo awala wanganan’jitika Jwalakwe, namuno angaje kola (pa Kiyama) yosope yaili pachilambo ni yanti mpela yeleyo soni yalumo, angajile kusaka kuliombolela nayo (nambo nga nganiyija kwakamuchisya), wanganyao takakole chiwalanjilo chakusakala nnope, soni mauto gao ni ku Jahannama, kaje kusakala malo gagusama (galitandichile)

Ana jwaakumanyilila yanti yaitulusyidwe kukwenu kuumila kwa Ambuje wenu niyakuona, mpaka alandane ni jwangalola? Chisimu waakwete lundape ni waakukumbuchilaga

Awala waakukwanilisya chilanga cha Allah, ni wangawesesya soni chilanga (chakutawana ni wandu achimijao)

Ni awala waakulumbikanya ichindu yalamwile Allah kuti ilumbikanyisyidwe, ni akuwa ali nkun’jogopa M’mbuje gwao, ni kuchijogopaga soni chiwalanjilo chakusakala nnope (cha pa Kiyama)

Ni awala waapilile pakusachilila Ngope ja M’mbuje gwao, ni kwimikaga Swala mwakolosya, ni kutolaga mu ichindu yatwapele mwakusisa ni mwakuonechela, ni kutyosyaga niyambone yakusakala, wanganyao niwaakwete mbesi (jambone) ja Nyumba (ja Akhera)

Matimbe Gandamo, gatakagajinjile wanganyao kwisa soni wawatesile yaukoto mwa achinangolo wao, achiwammakwao ni wanache wao, nambo soni Achimalaika taakaajinjilileje wanganyao pannango uliose

(Achasalilaga kuti): “Ntendele uwe kukwenu, ligongo lya kupilila kwenu.” Kaje kusalala yakuichisya ya Nyumba (ja Akhera)

Sano awala waakugopola chilanga cha Allah panyuma pakuchitawa, ni kataga yalamwile Allah kuti ilumbikanyisyidwe, ni kuwatanganyaga pa chilambo, wanganyao niwakwete kupata malweso, soni akwete kupata wanganyao Nyumba jakusakala nnope (Jahannama)

Allah akasansapangulila lisiki jwansachile, ni kunandiya (lisikilyo kwa jwansachile), ni akusengwa nao (achimakafili) umi wa duniya, ni nganiuwa umi wa duniya pakulandanya ni Akhera ikaweje kusengwa kwannonope

Achimakafili niakutiji: “Nambi uli ngantuluchila jwalakweju chisimosimo kuumila kwa Ambujegwe?” Jilani: “Chisimu Allah akunnechelelaga kusokonechela jwansachile, ni kun’jongolela Kukwakwe jwaujile (kwa Allah pa kutenda toba).”

Awala waakulupilile, soni mitima jao ni jikutulalilaga pakunkolanga Allah. Manyililani yanti; pakunkolanga Allah mitima jikasatulalila

Awala waakulupilile ni kutendaga yambone, kusengwa ni kwao, kwisa soni malo gakuujila gambone nnope (ku Mbepo)

Iyyoyopeyo tuntumisye mmwejo (Muhammadi ﷺ) ku nkutula wajapite paujo pakwe mikutula jine, kuti mwaasoomele yatun’juwulile, nambo wanganyao akunkana Ar-Rahman (Jwaukoto wejinji). Jilani: “Jwalakwe ni M’mbuje gwangu, pangali nnungu jwine (jwakuwajilwa kun’galagatila) ikaweje Jwelepejo. Kukwakwe njegamiile, soni Kukwakwe ni kwakuujila kwangu pakutenda toba.”

Soni ingawe kuti kwaliji kwana Qur’an janti ni jalakwejo matumbi nikwendesyedwa (pandema jakusoomwa), kapena ni jalakwejo litaka niganjidwa, kapena ni jalakwejo wawe nikwawechetekasya (jikaliji aji Qur’aniji, nambo masengo ga Qur’an ngawa gele). Nambo ulamusi wa chilichose uwele wa Allah. Ana nganamanyililepe awala waakulupilile yanti Allah angasache angajongwele wandu wosope? Sano chitapani ngachileka kwapata awala waakanile ligongo lya ayila (yakusakala) yatesile, kapena chituule (chitapanicho) dusi ni musi wao mpaka chiyiche chilanga cha Allah, chisimu Allah jwangakasa chilanga

Soni chisimu pamasile pawatendedwe chipongwe Achimitenga paujo penu (mmwe Muhammadi ﷺ nkanim’biche), basi ni napeleche lipesa kwa awala wawakufuulu, kaneko ni nakwembekenye (ni ilagasyo), ana ilagasyo Yangu yaliji uli (kapoteche kakwe)

Ana kwali Ajula (Allah) jwaakuujiimila ntima uliose pa yaupanganyisye (kuti taachiulipila, ngawa nijwali jwakuwajilwa kun’galagatila)? Ni am’biichiile Allah wakamusyangana nao. Jilani: “Mwakolangani (wakamusyangana naowo).” Kapena nkuntagulila Jwalakwe yangakuimanyilila pa chilambo, kapena (n’gamba kuwecheta) malowe gapachanyape (ngawa gakuumila pasi pa ntima)? Nambo kuti gasalalisyidwe kwa awala wakanile malindi gao, ni asiwilidwe kwitala (lyagoloka). Sano jwannechelele Allah kupotela, basi nganakola nkun’jongola

Akwete kupata wanganyao ilagasyo mu umi wa duniya, sano chisimu ipotesi ya Akhera niyakupoteka nnope, soni ngasakola nkwagosa jwalijose kwa Allah

Chilandanyo cha Mbepo jaapedwile chilanga wawoga (wakun’jogopa Allah, chili nyyi): Sulo sikujilima cha pasi pakwe, isogosi yakwe yandamo kwisa soni miulili jakwe. Jele nimbesi ja awala wan’jogwepe (Allah). Sano mbesi ja achimakafili ni Moto

Sano awala watwapele chitabu (mpela Abdullah bin Salam ni Ayuda wane waasingwiche) akuisengwela ayila yaitulusyidwe kukwenu (jajili Qur’an), nambo m’mikutula jine (jamakafili) mwana waakuikana ine mwa yalakweyo. Jilani (mmwe Muhammadi ﷺ): “Chisimu une namulidwe kuti nan’galagatileje Allah ni ngawwanganyaga Jwalakwe (ni chilichose). Kukwakwe nguwilanjila, soni Kukwakwe nikwakuujila kwangu.”

Soni iyyoyopeyo tujitulwisye jalakwe (Qur’aniji) kuwa chilamusi cha m’Charabu, nambo naga nkuye isako yao panyuma pa umanyilisi waum’bichilile, ngasinkola kwa Allah nsyowe jwalijose namuno akun’gosa

Soni chisimu pamasile patwatumisye Achimitenga paujo penu (mmwe Muhammadi ﷺ), ni twawichile achiwammakwao kwisa soni wanache, ni nganiyiwa kwa ntenga julijose yanti nikwikanacho chisimosimo ikaweje mu lisosa lya Allah, ndema jilijose jana lilamusi lyakwe lyalilembedwe, (nkwika ndemajo lilamusi likasaika)

Allah akasaifutaga yaisachile (kuti ayifute), ni kuilimbikasya (kuti ikatyoka yaisachile), soni Kukwakwe kwana Mama jwa Chitabu (Al-Lauh Al-Mahfuz)

Soni kanga chitunnosye (mmwe Muhammadi ﷺ pa duniya pepano) ine mwa ayila (ipotesi) yatukwatetela kapena kumpa chiwa (nkanitunnosye tiyapatepe), chisimu masengo genu nikulungusya (utenga) basi, sano Kukwetu ni kwachili chiwalanjilo (cha kwawalanjila itendo yao)

Ana ngaakuiwona yanti Uwwe tukuchiichilila chilambo (chamakafili) nikuchipungulaga (panandi panandi) kuumila m’malile mwakwe (pakuchipeleka kwa Asilamu pakupunda pangondo)? Sano Allah akasalamulaga, pangali jwakuwusyanukula ulamusi Wakwe, soni Jwalakwe ni Jwachitema pakuwalanjila

Ni akuwechetaga awala wakanile kuti: “Mmwe (Muhammadi ﷺ) nganim’ba ntenga.” Jilani: “Allah akukwanila kuwa Mboni chilikati changune ni jenumanja (yakuti une ntenga), kwisa soni awala wauli kukwao umanyilisi wa m’chitabu (mpela Abdullah bin Salam ni Ayuda wane kwisa soni Akilisito waujitiche Usilamu).”